ཁྱིམ་ལྷ་བསྟོད་པ་རིན་པོ་ཆེའི་ལེགས་ཚོགས།
ཁྱིམ་ལྷ་བསྟོད་པ་རིན་པོ་ཆེའི་ལེགས་ཚོགས་བཞུགས་སོ།
འཕགས་པ་འཇམ་དཔལ་དབྱངས་ལ་ཕྱག་འཚལ་ལོ། །དུས་བཟང་གི་ཡར་ཚེས་གཟའ་སྐར་བཟང་ཞིང་རྒྱལ་ཕུར་ལྟ་བུ་ལ། རིན་ཆེན་དར་སྣ་འབྲུ་སྣ་སྨན་སྣ་ཤིང་སྣ་ལ་བལ་ཚོན་གྱིས་ཅི་མཛེས་བསགས་ལ། ནམ་མཁའ་དང་ཤིང་རིས་ལྔ་ལ་རིགས་ལྔའི་ཕྱག་མཚན་ས་བོན་དང་། བཀྲ་ཤིས་རྟགས་བརྒྱད་ཉེ་བའི་རིན་ཆེན་སྣ་བདུན་སོགས། །ཚོན་རྩི་སོགས་ཀྱིས་ཅི་མཛེས་པ་བསགས་ལ། ཁང་པའི་ཕུགས་སམ། ཀ་བའི་ངོས་ལྟ་བུ་ལ་འཛུགས་ཤིང་འདི་གྱེར་རོ། །ཨོཾ་སྭ་བྷ་ཝ་སོགས་སྦྱངས། སྟོང་པའི་ངང་ལས་ཧཱུྃ་ལས་རིན་པོ་ཆེའི་གཞལ་ཡས་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པདྨ་དང་ཉི་ཟླའི་གདན་ལ་ཁྱིམ་ལྷ་གེའུ་ཐུང་སྐུ་མདོག་གསེར་རི་
ལྷུན་པོ་ལ་ཉི་མ་འབུམ་གྱི་མདངས་དང་ལྡན་པ་ཞལ་གཅིག་ཕྱག་གཉིས་གཡས་བཱི་ཛ་པུ་ར་དང་། གཡོན་ནེའུ་ལེ་འཛིན་པ། དར་དང་རིན་པོ་ཆེས་རྒྱན་གྱིས་བརྒྱན་པ། རྒྱལ་པོ་རོལ་པའི་སྟབས་ཀྱིས་བཞུགས་པ། འཁོར་དུ་ནོར་བདག་འབུམ་གྱིས་བསྐོར་བ། དེའི་སྟེང་གི་ཆ་ལ་རྩ་བརྒྱུད་ཀྱི་བླ་མ། བར་གྱི་ཆ་ལ་ཡི་དམ་གྱི་ལྷ་ཚོགས། འོག་གི་ཆ་ལ་ཆོས་སྐྱོང་བའི་སྲུང་མའི་ཚོགས་དཔག་ཏུ་མེད་པ། ལྷ་ཚོགས་དེ་དག་གི་གནས་གསུམ་རྡོ་རྗེ་གསུམ་གྱི་མཚན་པ་ལས་འོད་ཟེར་འཕྲོས། རང་བཞིན་དག་པའི་ཕོ་བྲང་ནས་མཆོག་གསུམ་རྒྱལ་བ་སྲས་བཅས་སྤྱན་
དྲངས། བཛྲ་ས་མཱ་ཡ་ཛཿ ཧཱུྃ། དད་པ་དང་ནི་དམ་ཚིག་གིས། །རྩ་གསུམ་ནོར་ལྷ་ཆོས་སྲུང་སོགས། །མ་ལུས་འཁོར་དང་བཅས་པ་རྣམས། །ཚུར་བྱོན་ཚུར་བྱོན་གཤེགས་སུ་གསོལ། །གཤེགས་ནས་གནས་འདིར་བཞུགས་སུ་གསོལ། །བཞུགས་ནས་རྣལ་འབྱོར་བདག་ཅག་ལ། །དྲན་པ་ཙམ་གྱིས་དངོས་གྲུབ་ཀྱི། །འདོད་དགུའི་ཆར་ཆེན་འབེབ་ཏུ་གསོལ། །ཛཿཧཱུྃ་བཾ་ཧོས་དམ་ཡེ་འདྲེས། པདྨ་ཀ་མ་ལཱ་ཡ་ཧཱུྃ། དབང་ལྷ་སྤྱན་དྲངས་དབང་བསྐུར་ནས། །རིན་ཆེན་འབྱུང་ལྡན་རྒྱས་གདབ་གྱུར། །ཞིང་ཁམས་རྒྱ་མཚོ་དཔག་མེད་ན། །མཆོད་རྫས་རྒྱ་མཚོ་དཔག་མེད་དང་། །གུས་པས་དངོས་བཤམས་ཡིད་སྤྲུལ་བཅས། །བདག་ལ་བརྩེ་བས་བཞེས་ནས་ཀྱང་། །བདག་དང་སེམས་ཅན་ཐམས་ཅད་ལ། །དངོས་གྲུབ་ཀུན་གྱི་བཀའ་དྲིན་སྩོལ། །གཞན་ཡང་བཀྲ་ཤིས་རྫས་རྟགས་བརྒྱད། །རྒྱལ་སྲིད་ཉེ་བའི་རིན་ཆེན་བདུན། །ལྷ་མིའི་འབྱོར་པ་ལས་བྱུང་བའི། །འདོད་ཡོན་མ་ཚང་མེད་པ་རྣམས། །སྔགས་དང་ཕྱག་རྒྱས་བྱིན་བརླབས་ནས། །དགྱེས་པ་སྐྱེད་བྱེད་རྟེན་དུ་འབུལ། །ནམ་ཞེས་བྱ་བ་སྟོང་པ་དང་། །མཁའ་ཞེས་བྱ་
བ་ཅི་ཡང་སྟོང་། །དུག་ལྔ་རང་དག་སྐུ་ལྔ་ཡི། །འོད་ཟེར་ཁ་དོག་ལྔ་ལྡན་འདི། །སྐུ་ལྔའི་བདག་ཉིད་ཁྱེད་ལ་འབུལ། །བཞེས་ནས་སྣང་སྲིད་གསལ་བར་སྟོན་། །དགོས་འདོད་འབྱུང་བའི་དཔག་བསམ་ཤིང་། །ཕྱག་མཚན་ལྔ་ཡི་མཆོད་པའི་ཚོགས། །ཤིང་རིས་འཇའ་ཚོན་འོད་དུ་འབར། །ཡུལ་མཁར་ཞིང་གི་རྟེན་དུ་འབུལ། །བདག་དང་རྒྱུ་སྦྱོར་ཡོན་བདག་ལ། །ཁ་འཛིན་རྒྱབ་རྟེན་སྡོང་གྲོགས་མཛོད། །འདོད་པའི་ཡོན་ཏན་ལྔ་ལྡན་པའི། །ཤིང་རྩི་རྒྱན་ལྡན་འདི་འབུལ་བས། །ཕོ་བྲང་འདི་ལ་བཞུགས་སུ་གསོལ། །མོན་ཡུལ་ལྷོ་སྨྱུག་ལྡེམ་པ་ལ། །བྱ་རྒྱལ་རྒོད་ཀྱི་དང་རུས་བརྒྱན། །ཁ་དོག་དམར་བ་མཚལ་གྱིས་བྱུག །རྣོ་དབལ་ལྡན་པའི་མདེའུ་སྤྱད། །སྐྱེས་པ་ཕོ་ཡེ་ཡི་རྟེན་ཤིང་འབུལ། །མཆོག་གི་རྒྱལ་བ་སྲས་བཅས་དང་། །ས་བདག་ཡུལ་ལྷ་གཞི་བདག་དང་། །གྲོགས་ལྷ་ཕོ་ལྷ་དགྲ་བླ་དང་། །མ་ལྷ་ཞང་ལྷ་གཉན་པོ་དང་། །མཆོད་ཡུལ་དམ་པ་ཁྱེད་རྣམས་ཀྱིས། །རྣལ་འབྱོར་བདག་ལ་བརྩེར་དགོངས་ཏེ། །ཚེ་དཔལ་ནོར་སྤེལ་དགྲ་བགེགས་སྒྲོལ། །ཉིན་གྱི་བྱ་ར་མཚན་གྱི་མེལ་ཚེ་མཛོད། །ཕར་འགྲོ་སྐྱེལ་
ལ་ཚུར་འོང་དུས་བདག་གིས། །བསུ་མ་ལྟ་བུའི་མྱུར་དུ་ཕྲིན་ལས་མཛོད། །མི་ཡི་ན་ཚ་བཟློག་ཏུ་གསོལ། །ནོར་གྱི་གོད་ཡམས་བཟློག་ཏུ་གསོལ། །ཞིང་གི་བཙའ་སད་བཟློག་ཏུ་གསོལ། །སྔོན་གྱི་ལས་ངན་བཟློག་ཏུ་གསོལ། །འཕྲལ་གྱི་རྐྱེན་ངན་བཟློག་ཏུ་གསོལ། །གཞན་གྱི་བྱད་ཁ་བཟློག་ཏུ་གསོལ། །སྡེ་བརྒྱད་ཟོར་ཁ་བཟློག་ཏུ་གསོལ། །མོ་རྩིས་རྨི་ལྟས་ངན་པ་བཟློག་ཏུ་གསོལ། །སྐག་དང་སྲི་ངན་ཐམས་ཅད་བཟློག་ཏུ་གསོལ། །དངོས་གྲུབ་མ་ལུས་བསྩལ་དུ་གསོལ། །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་བརྟན་བཞུགས་ནི། །ཀྱཻ། མཆོག་གསུམ་ཡི་དམ་ཆོས་སྲུང་བཅས། །འོད་དུ་ཞུ་ནས་ཛ་ལྷར་ཐིམ། །གནས་ཁང་གཞལ་ཡས་ཁང་དུ་གྱུར། །ཡོ་བྱད་མཆོད་པའི་རྫས་སུ་གྱུར། །འཁོར་བ་ཇི་སྲིད་མ་སྟོངས་བར། །དེ་སྲིད་བཅོམ་ལྡན་བཞུགས་སུ་གསོལ། །ཉིན་རེ་བཞིན་དུ་དུས་ཀུན་ཏུ། །ཅི་ནུས་སུ་ནི་མཆོད་པར་བགྱི། །རྣལ་འབྱོར་བདག་ལ་ཅི་འདོད་པའི། །དངོས་གྲུབ་བླ་ན་མེད་པ་སྩོལ། །ཡེ་དྷརྨ་བརྗོད་ཅིང་མེ་ཏོག་འཐོར། །ཤིས་པ་བརྗོད་ལ་རོལ་མོ་དཀྲོལ། །དགའ་སྤྲོ་བྱེད་ཅིང་ཚིག་སྙན་སྨྲ། །གོས་བཟང་གཡོགས་ཤིང་རྒྱན་བཟང་
འདོགས། །དུས་ཀུན་ཟས་ནོར་ཕུད་ཀྱིས་མཆོད། །གང་བཅོལ་ལས་ལ་སོམ་ཉི་སྤང་། །ཐུན་མོང་དངོས་གྲུབ་སྟེར་བར་བྱེད། །མཐར་ཐུག་མཆོག་གི་དངོས་གྲུབ་ཀྱང་། །བདེ་བླག་ཉིད་དུ་རྙེད་པར་གྱུར། །དེ་སྐད་རཱ་ག་ཨ་སྱས་སྨྲས།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།