ཁྱིམ་ལྷ་བསྟོད་པའི་སྲུང་བ་རྩེན་པ།
ཁྱིམ་ལྷ་བསྟོད་པའི་སྲུང་བ་རྩེན་པ་བཞུགས་སོ།
མཛོད་སྲུང་རྩེན་པ་ནི། ཀྱཻ། ཕྱྭ་གཡང་དང་པོ་གང་ནས་སྲིད། །ཕྱྭ་དང་གཡང་ལས་བྱུང་བ་ཡིས། །གནམ་ལ་གཡང་གི་ཆར་འབེབས་འབབས། །ས་ལ་འབྱུང་ལྔའི་དྲོད་སྐྱེས་པ། །ཞིང་ལྷ་སྔོན་མོ་ནས་ཀྱིས་གང་། །འབྲུ་དྲུག་ནས་ཀྱི་འཕེལ་གཡང་ནི། །གཞི་མཉམ་བང་བའི་ནང་དུ་བླུགས། །གཞི་མཉམ་བང་བ་ཚུར་ལྕགས་ཅན། །བང་བ་ལྡེའུ་མིག་མ་བྱེ་ཅིག །ཕུ་ལྷ་གཡང་ལྷ་བང་ལྷ་གསུམ། །ལྡེའུ་མིག་འདི་ལ་བསྲུང་དུ་གསོལ། །རྒྱ་སྒོ་ལ། །ཀྱཻ། ཕྱོགས་བཞི་རིགས་བཞིའི་སྒོ་མོ་ལ། །གཡས་སུ་སྟག་མོ་ངར་ཆེན་གནས། གཡོན་དུ་གཡག་
པོ་རྭ་ཆེན་གནས། །སྒོ་ལྷ་སྟག་གཡག་ངར་ཞིང་འགྱིང་། །ཕྱི་ཡི་དགྲ་བགེགས་ནང་དུ་མ་ཤོར་ཅིག །ནང་གི་དངོས་གྲུབ་ཕྱི་རུ་མ་གཏོང་ཞིག །སྒོ་སྲུང་ཁྲོ་བོ་ཁྲོ་མོ་དང་། །གཏེར་བདག་ནོར་སྒོ་བསྲུང་བའི་ལྷ། །ཕྱུ་ལྷ་གཡང་ལྷ་སྒོ་ལྷ་ཡིས། །སྒོ་མོ་འདི་ལ་བསྲུང་དུ་གསོལ། །དབུས་ཀ་ལ། ཀྱཻ། སྐུ་མཁར་ཁྲ་མོའི་དབུས་ཀ་འདི། །གསེར་གྱི་ཀ་བ་ཁ་ནས་མ་གས་ཤིག །གཡུ་ཡི་གདུང་མ་སྐེད་ནས་མ་ཆག་ཅིག །དུང་གི་དར་ཁྲབ་མ་འཐོར་ཞིག །སྲིད་པ་རྒྱལ་པོའི་ཕྱུ་གཡང་དང་། །མཐའ་སྨན་རྒྱལ་མོའི་མ་གཡང་དང་། །ཕྱྭ་ལྷ་གཡང་ལྷ་
མཁར་ལྷ་རྣམས། །དབུས་ཀ་འདི་ལ་བསྲུང་དུ་གསོལ། །ཐབ་ཀ་ལ། །ཀྱཻ། ཐབ་ཀ་རིན་ཆེན་ཕྱུག་མོའི་མ་སྐྱེད་འདི། །ཕ་སྐྱེད་གཡས་སུ་མ་ཡོ་ཅིག །མ་སྐྱེད་གཡོན་དུ་མ་ཡོ་ཅིག །ཐབ་དང་འཁོན་ཐབ་མ་གཏོང་ཞིག །ཐབ་ཁ་རིན་ཆེན་ཕྱུག་མོའི་ཁར། །བཙོ་བསྲེག་གཡོ་བཀོལ་རྒྱུན་མི་འཆད། །ལོངས་སྤྱོད་མི་བཟད་ཟས་གཡང་ལྷ། །ཕྱུ་ལྷ་གཡང་ལྷ་ཐབ་ལྷ་རྣམས། །ཐབ་ཁ་མ་སྐྱེད་འདི་ལ་བསྲུང་དུ་གསོལ། །ཆུ་ར་ལ། ཀྱཻ། ཆུ་ར་རྒྱ་མཚོ་ཕྱུག་མོ་འདི། །ཞབས་རྡོལ་གློ་བུར་མ་ཟག་ཅིག །ཁ་སྦུབ་མགོ་རྟིང་མ་ལོག་ཅིག །བདུད་རྩིའི་ཆུ་རྒྱུན་མ་ཆད་ཅིག །ཀླུ་ཆེན་བརྒྱད་ཀྱི་འཕེལ་གཡང་དང་། །ཕྲུ་ལྷ་གཡང་ལྷ་ཆུ་རའི་ལྷ། །ཆུ་ར་རྒྱ་མཚོ་འདི་ལ་བསྲུང་དུ་གསོལ། །རང་འཐག་ལ། །ཀྱཻ། རང་འཐག་རུས་སྦལ་རྒྱ་བོ་འདི། །རུས་སྦལ་ཁ་འཐམ་མ་བྱུང་ཞིག །འཚོ་བ་གཡོན་སྐོར་བྱེད་དུས་སུ། །ལྟས་ངན་ཁྲག་ཏུ་མ་འབེབས་ཤིག །ལོངས་སྤྱོད་ཕྱེ་རྒྱུན་མ་ཆད་ཅིག །ས་བདག་ཀླུ་གཉན་མགོན་གཡང་དང་། །ཕྲུ་ལྷ་གཡང་ལྷ་བཟའ་བཏུང་ལྷ། །རང་འཐག་འདི་ལ་བསྲུང་དུ་གསོལ། །ཕུགས་ཁང་ཁྲ་མོ་ལ། ཀྱཻ། ཕུགས་ཁང་ཁྲ་
མོའི་མཛོད་ཕུགས་སུ། །ཕུག་གི་བཟའ་བཏུང་སྣ་ཚོགས་དང་། །སྲིད་པ་ཕྱ་མུ་གཙུག་གསུམ་གྱི། །ཕོ་རྒྱུད་ཡབ་ཀྱི་བཀྲ་གཡང་དང་། །མོ་རྒྱུད་ཡུམ་གྱི་བཟང་གཡང་དང་། །བུ་རྒྱུད་སྲས་ཀྱི་དར་གཡང་དང་། །སྨན་རྒྱུད་བུ་མོའི་མཛངས་གཡང་རྣམས། །ཕུགས་ཁང་ཁྲ་མོ་འདི་ལ་བསྲུང་དུ་གསོལ། །མདའ་དར་ལ། ཀྱཻ། བཀྲ་ཤིས་ཕུན་སུམ་ཚོགས་པའི་རྟེན། །ཕྱུ་གཡང་ནོར་གཡང་བཞུགས་པའི་རྟེན། །མི་སྲོག་འདི་ནི་མདའ་ལ་རྟེན། །མདའ་སྲོག་འདི་ནི་ལྷ་ལ་བཅོལ། །ལྷ་སྲུང་གཉན་པོས་བསྲུང་དུ་གསོལ། །ཕྱྭ་གཡང་ནོར་གཡང་བསྲུང་དུ་གསོལ། །མདའ་འདི་ལྟོང་ལ་རྟེན་དུ་གསོལ། །སྨྱུག་མའི་ཚིགས་ལ་རྟེན་དུ་གསོལ། །སྒོ་ཡི་ཟུར་ལ་རྟེན་དུ་གསོལ། །དར་གྱི་ལྕེ་ལ་རྟེན་དུ་གསོལ། །མ་ཡོ་མ་འཁྱུགས་རྟེན་དུ་གསོལ། །ཁྱིམ་ལྷ་བསྲུང་རྩེན་ཨ་རཱ་གས་སྦྱར་བ་རེ་ཞིག་དགེའོ། །ཡེ་དྷརྨ་སོགས་བརྗོད། སྤྱན་འདྲེན་པའི་ལྷ་ཐམས་ཅད་གནས་ཁང་ལ་བསྟིམ་པར་གྱུར་ཅིག །བསོད་ནམས་རི་སོགས། མངྒ་ལཾ། ཤུ་བྷཾ། དགེའོ།། །། ༧ ནང་ཆེན་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།