ཕུགས་ལྷ་དང་ཀ་ལྷ་བསྟོད་པ།
ཕུགས་ལྷ་དང་ཀ་ལྷ་བསྟོད་པའི་དབུ་ཕྱོགས་བཞུགས་སོ།
དཀོན་མཆོག་གསུམ་ལ་ཕྱག་འཚལ་ལོ། །ཕྲུ་གཡང་ཕུགས་ལྷ་བསྟོད་པའི་ཐབས་ལ། རི་རབ་བང་རིམ་གསུམ་གྱི་སྟེང་དུ། ཕུགས་རི་དིལ་དཀར་གྱི་མདུན་དུ་ཞལ་དཀར་སྟེང་དུ། དབུས་སུ་རིན་པོ་ཆེ་སྣ་ཚོགས་བཞག །ཁྱུང་དང་བྱ་རྒོད་ཁྲ་གླག་བཙུགས། གཡས་གཡོན་སྦལ་སྦྲུལ། མདུན་རྒྱབ་གསེར་གྱི་མི་ཕོ། ལྕགས་ཀྱི་ར་སྐྱེས། དུང་གི་སེང་གེ་རྣམས་ཀྱིས་བསྐོར། དཀར་གསུམ་མངར་གསུམ་གྱིས་བརྒྱན་པ་བཤམས། ཕུག་རྟེན་ལ་ཤིང་རྩི་སྣ་ཚོགས་རིན་པོ་ཆེ་སྣ་ལྔ་འབུལ། དར་སྣ་ལྔ་། དཀར་རིགས། མངར་རིགས། ཕྱུག་པོ་འཕེན་པོ། བཀྲ་ཤིས་པའི་ལག་ནས་བླངས་པའི་ཞིང་ས་འབྲུ་སྣ། རྟ་ནོར་གྱི་སྤུ། བསོད་ནམས་ཁས་དྲག་ཅན་གྱི་གཡུ་ཁྲབ་ཤིང་ཐོག་རྒྱ་སྤོས། ཤ་མར་ཐུད་གསུམ།
མདའ་དར་དར་གོས། དུད་འགྲོའི་རིགས། གཅན་གཟན་རྣམས་ཀྱི་སྤུ་སྣ་ཚོགས། ཤིང་རྩི་ལ་བརྒྱན། ཕུགས་ལ་རྟེན་བཙུགས། ཡི་དམ་གང་རུང་གི་བསྐང་ཚོགས་སྐབས་སུ་བྱ། དེ་ནས་བདེ་བའི་སྟན་ལ་འདུག །བསྐང་ཚོགས་ཚར་ནས་བསྟོད་པ་ནི། གཞི་སྟེང་ནས་ཀྱི་ཚོམ་བུ་བཀོད། ཕྱྭ་གཡང་ཕུག་ལྷ་ནི། །ཀྱཻ། ལྷ་ཀོང་ཙེ་འཕྲུལ་གྱི་རྒྱལ་པོ་ལ་ཕྱག་འཚལ་ལོ། །ཨོཾ་སྭ་བྷ་ཝས་སྦྱངས། སྟོང་པའི་ངང་ལས་ཕུགསལྷ་དཔལ་ལྡན་ལྷ་མོ་ས་མདོག་སེར་མོ་ཞལ་གཅིག་ཕྱག་བཞི་སྤྱན་གསུམ་མཆེ་བ་བཞི་གཙིགས་པ། དབུ་སྐྲ་ཁམ་སེར་གྱེན་དུ་བཅིངས་ཤིང་ལྷག་མ་ཐུལ་དུ་གྲོལ་བ་ལ། ཐོད་སྐམ་རིན་པོ་ཆེའི་ཕྲེང་བས་བཅིངས་
པ། སྤྱི་གཙུག་ཏུ་ཟླ་བ་ཕྱེད་པ་དང་རྨ་བྱའི་མདོངས་ཀྱིས་མཛེས་པ། སྐུ་ལ་དར་སེར་གྱི་འཇོལ་བེར་གསོལ་ཞིང་རིན་པོ་ཆེའི་ཕྲེང་བའི་དོ་ཤལ་ཅན། ཞབས་གཉིས་རྒྱལ་མོ་རོལ་སྟབས་འཁྱིལ་བའི་ཚུལ་གྱིས་བཞུགས་པ། ཕྱག་བཞི་གཡས་ཀྱི་དང་པོ་ན་རིན་པོ་ཆེ་ཁ་ཊཾ་རྩེ་གསུམ་བསྣམས་པ། གཡོན་གྱི་དང་པོ་ན་གསེར་གྱི་མེ་ལོང་ཕྱི་ཞིང་བལྟ་བ། གཡས་ཀྱི་འོག་མ་ན་རིན་པོ་ཆེའི་ཕུར་པ་འདྲིལ་ཞིང་འདེབས་པ། གཡོན་གྱི་འོག་མ་ན། རིན་པོ་ཆེའི་རྐྱལ་པ་ནེའུ་ལེ་འཛིན་པ། དཔལ་ལྡན་ལྷ་མོའི་གཡས་སུ་ཛཾ་བྷ་ལ་སེར་པོ་གཡས་རྒྱལ་མཚན་དང་། གཡོན་ནེའུ་ལེ་འཛིན་པ། གཡོན་དུ་ལྷ་མོ་ནོར་རྒྱུན་མ་སེར་མོ་གཡས་མཆོག་སྦྱིན་དང་གཡོན་འབྲས་ཀྱི་སྙེ་མ་འཛིན་པ། ཞབས་སྐྱིལ་ཀྲུང་དུ་བཞུགས་པ། །དེའི་སྟེང་གི་ནམ་མཁའ་ལ་སྣང་སྲིད་ཟིལ་གནོན་པདྨ་འབྱུང་གནས་ལ་འཁོར་དཔའ་བོ་མཁའ་འགྲོ་འཇའ་སྤྲིན་འཐིབས་ནས་བཞུགས་པ། གཞལ་ཡས་ཁང་གི་བླ་མ་ཡི་དམ་ལྷ་ཚོགས་ཆོས་སྐྱོང་སྲུང་མ་ཡུལ་ལྷ་གཞི་བདག་དང་བཅས་ཏེ། སྣང་ལ་རང་བཞིན་མ་གྲུབ་པར་བཞུགས་པའི་གནས་གསུམ་ནས་འོད་ཟེར་འཕྲོས། རང་བཞིན་གྱི་གནས་ནས་ཡེ་ཤེས་པ་
རྣམས་གཞལ་ཡས་ཁང་འདི་ཉིད་ལ་སྤྱན་དྲངས། དམ་ཚིག་པ་དང་ཡེ་ཤེས་པ་གཉིས་སུ་མེད་པར་གྱུར། བསང་དང་རོལ་མོ་དབྱངས་རིང་པོས་སྤྱན་འདྲེན་ནོ། །སྤོས་རིང་བལྟམས་། ཀྱཻ། དེ་རིང་གནམ་ལ་སྐར་མ་བཟང་། །ས་ལ་དེ་ནི་དུས་ཚོད་བཟང་། །བར་ལ་དེ་ནི་བཀྲ་ཤིས་བཟང་། །ལོ་ལ་དེ་ནི་བཀྲ་ཤིས་བཟང་། །ཟླ་བ་ལ་ནི་བཀྲ་ཤིས་བཟང་། །ཞག་དང་དེ་ནི་ཟ་མ་དགེ །དུས་ཚོད་དང་ནི་ཚེས་གྲངས་བཟང་། །བཀྲ་ཤིས་ཕུན་སུམ་ཚོགས་པའི་གཞི་ཐོག་འདིར། །གནས་ཁང་འདི་ཡི་ཕུག་ལྷ་ནི། །དེ་རིང་ཕུག་ལྷ་འཁྱམས་པ་གར་གནས་ཀྱང་། །གནས་ཁང་འདི་ལ་སྤྱན་འདྲེན་ནས། །ཕུག་རྟེན་འདི་ལ་བཞུགས་སུ་གསོལ། །བང་མཛོད་འདི་ལ་གཡང་ཅིག་ཕོབ། །དར་ཚོན་ཡ་འདི་ལ་རྟེན་བྱིན་བཞུགས། །རྒྱུ་སྦྱོར་ཡོན་བདག་གནས་ཁང་འདིས། །ཕུག་ལྷ་འཁྱམས་པ་ཡོད་ན་གནས་འདིར་བཞུགས། །ཕུག་ལྷ་ཆག་པ་ཡོད་ན་གནས་འདིར་བྱོན། །ཕུག་ལྷ་འཁྲུག་པ་ཡོད་ན་གནས་འདིར་ཟླུམ། །ཕུག་ལྷ་རལ་བ་ཡོད་ན་གནས་འདིར་དྲུབ། །ཕུག་ལྷ་བྱེར་བ་ཡོད་ན་གནས་འདིར་སྡུས། །ཕུག་ལྷ་སྟོར་བ་ཡོད་ན་གནས་འདིར་བྱོན། །
ཕུག་ལྷ་འཁོན་པ་ཡོད་ན་གནས་འདིར་ཟླུམ། །ཀྱཻ། ཤར་ཕྱོགས་ཕུག་ལྷ་ཆེན་པོ་ནི། །སྐུ་མདོག་དཀར་ལ་འོད་ཟེར་འབར། །ཕྱག་ན་ཕུག་ལྷའི་དམུ་དག་འཛིན། །རྒྱུ་སྦྱོར་ཡོན་བདག་གནས་ཁང་ལ། །ཤར་གྱི་ཕྱོགས་ནས་སྤྱན་འདྲེན་གཤེགས་སུ་གསོལ། །ཕུག་རྟེན་འདི་ལ་བསྟིམ་དུ་གསོལ། །བང་མཛོད་འདི་ལ་བརྟན་པར་མཛོད། །ཀྱཻ། ལྷོ་ཕྱོགས་ཕུག་ལྷ་ཆེན་པོ་ནི། །སྐུ་མདོག་སྔོ་ལ་འོད་ཟེར་འབར། །ཕྱག་ན་ཕུག་ལྷའི་དམུ་དག་འཛིན། །རྒྱུ་སྦྱོར་ཡོན་བདག་གནས་ཁང་ལ། །ལྷོ་ཡི་ཕྱོགས་ནས་སྤྱན་འདྲེན་གཤེགས་སུ་གསོལ། །ཕུག་རྟེན་འདི་ལ་བསྟིམ་དུ་གསོལ། །བང་མཛོད་འདི་ལ་བརྟན་པར་མཛོད། །ཀྱཻ། ནུབ་ཕྱོགས་ཕུག་ལྷ་ཆེན་པོ་ནི། །སྐུ་མདོག་དམར་ལ་འོད་ཟེར་འབར་། །ཕྱག་ན་ཕུག་ལྷའི་དམུ་དག་འཛིན། །རྒྱུ་སྦྱོར་ཡོན་བདག་གནས་ཁང་ལ། །ནུབ་ཀྱི་ཕྱོགས་ནས་སྤྱན་འདྲེན་གཤེགས་སུ་གསོལ། །ཕུག་རྟེན་འདི་ལ་བསྟིམ་དུ་གསོལ། །བང་མཛོད་འདི་ལ་བརྟན་པར་མཛོད། །ཀྱཻ། བྱང་ཕྱོགས་ཕུག་ལྷ་ཆེན་པོ་ནི། །སྐུ་མདོག་ལྗང་ལ་འོད་ཟེར་འབར། །ཕྱག་ན་ཕུག་ལྷའི་དམུ་དག་འཛིན། །རྒྱུ་
སྦྱོར་ཡོན་བདག་གནས་ཁང་ལ། །བྱང་གི་ཕྱོགས་ནས་སྤྱན་འདྲེན་གཤེགས་སུ་གསོལ། །ཕུག་རྟེན་འདི་ལ་བསྟིམ་དུ་གསོལ། །བང་མཛོད་འདི་ལ་བརྟན་པར་མཛོད། །ཀྱཻ། དབུས་ཕྱོགས་ཕུག་ལྷ་ཆེན་པོ་ནི། །སྐུ་མདོག་གསེར་གྱི་སྙིང་པོ་འདྲ། །ཕྱག་ན་ཕུག་ལྷའི་དམུ་དག་འཛིན། །རྒྱུ་སྦྱོར་ཡོན་བདག་གནས་ཁང་ལ། །དབུས་ཀྱི་ཕྱོགས་ནས་སྤྱན་འདྲེན་གཤེགས་སུ་གསོལ། །ཕུག་རྟེན་འདི་ལ་བསྟིམ་དུ་གསོལ། །བང་མཛོད་འདི་ལ་བརྟན་པར་མཛོད། །བདུད་རྩི་ཆར་པ་སི་ལི་ལི། །གསེར་གྱི་ཐང་མ་བརྡལ་རེ་ཡག །བདུད་རྩི་ཆར་པ་བཅུད་རེ་ཆེ། །ཕུག་ལྷ་མནོལ་བ་ཡོད་གྱུར་ན། །བདུད་རྩི་གཙང་མའི་སྐུ་ཁྲུས་གསོལ། །ཕུག་ལྷ་འཁྱམས་པ་ཡོད་ན་ཡང་། །ཕུག་རྟེན་འདི་ལ་བསྟིམ་དུ་གསོལ། །ཕུག་ལྷ་འཆལ་བ་ཡོད་ན་ཚུར་ལ་ཁུག །ཕུག་ལྷ་མནོལ་བ་ཡོད་ན་ཡར་ལ་བསངས། །ཕུག་ལྷ་ཡོ་བ་ཡོད་ན་ཡར་ལ་སྲོངས། །ཕུག་ལྷ་ཆད་པ་ཡོད་ན་ཡར་ལ་འཐུད། །ཕུག་ལྷ་དམའ་བ་ཡོད་ན་ཡར་ལ་བསྟོད། །ཕུག་ལྷ་འཁྱམས་པ་ཡོད་ན་ཡང་། །ཕུག་རྟེན་འདི་ལ་བསྟིམ་དུ་གསོལ། །བང་མཛོད་འདི་ལ་བརྟན་པར་
མཛོད། །དེ་ནས་གནས་བདག་བརྔན་བསང་དང་རྒྱལ་པོ་མནོལ་བསང་རྨུགས་བསང་རྣམས། སྤྱད་པར་བྱའོ། །ཕུག་ལྷའི་རྫས་དང་མདའ་དར། མདུང་དར། ཤིང་རྩི་རྣམས། བང་མཛོད་དམ། ཀ་བའམ། སྟག་འགྱིང་སྤོ་ཚེ་སོགས་བྱ། རྟེན་ཤིང་བཙུགས་ཐབས་བྱ། སྦྱིན་བདག་གིས་བསྐང་ཚོགས་སྣ་ཚོགས་མཆོད། སྔགས་འཆང་རང་གིས་རོལ་མོ་དང་དབྱངས་སྙན་པོས་འདི་སྐད་གྱེར་རོ། །ཀྱཻ། དེ་རིང་ཕུག་ལྷ་གཉན་པོའི་ཁ་བརྒྱན་བསྟོད། །གངས་ལ་ཉི་མ་ཤར་བ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །ས་ལ་གཡུ་ལྗང་འཁྲུངས་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །གཡའ་རི་ལ་གཡུ་བུན་འཁྲིགས་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །བར་སྣང་འཇའ་ཚོན་ཤར་བ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །གངས་ལ་སེང་གེ་རྒྱུ་བ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །སྤང་ལ་རྩི་ཐོག་རྒྱས་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །མཚོ་ལ་ཉ་སྲམ་འཕྱོ་བ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །མཁར་ལ་མདུང་མོ་བཙུགས་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །མདུང་ལ་བ་དན་བཏགས་པ་བཞིན། །ཕུག་ལྷ་གཉན་པོའི་ཁ་
བརྒྱན་བསྟོད། །མགོ་ལ་རྨོག་མོ་གྱོན་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །རྨོག་ལ་རྒོད་འཕྲུ་བཙུགས་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །ལུས་ལ་གོ་ཁྲབ་གྱོན་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །ཁྲབ་ཐོག་བེར་གྱིས་གཡོགས་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །ལྷ་ཁང་གསེར་འཕྲུ་བཙུགས་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །གསེར་འཕྲུལ་རྒྱ་དར་འདོགས་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །ཁྱུང་ལ་དོང་རུ་སྐྱེས་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །རྭ་བར་ནོར་བུ་སྐྱེས་པ་བཞིན། །ཕུག་ལྷ་གཉན་པོའི་ཁ་བརྒྱན་བསྟོད། །རྔམ་ཆེན་བསྲོ་སྒྲ་དབང་ཐང་མཚེར་། །དགྲ་བླ་མི་དང་མ་འབྲལ་བར། །ཕུག་ལྷ་གནས་ཁང་འདི་དང་མ་བྲལ་ཞིག །བྱ་དང་འདབ་གཤོག་འགྲོགས་པ་བཞིན། །ཕུག་ལྷ་གནས་ཁང་འདི་དང་མ་བྲལ་ཞིག །ཁྱུང་དང་དཔག་བསམ་འགྲོགས་པ་བཞིན། །ཕུག་ལྷ་གནས་ཁང་འདི་དང་མ་བྲལ་ཞིག །སེང་གེ་གངས་དང་འགྲོགས་པ་བཞིན། །ཕུག་ལྷ་གནས་ཁང་འདི་དང་མ་བྲལ་ཞིག་
དུང་དང་རྒྱ་མཚོ་འགྲོགས་པ་བཞིན། །ཕུག་ལྷ་གནས་ཁང་འདི་དང་མ་བྲལ་ཞིག །སྟག་ཕྲུག་མ་བུ་བརྩེ་བ་བཞིན། །ཕུག་ལྷ་གནས་ཁང་འདི་དང་མ་བྲལ་ཞིག །མཁའ་དང་ཉི་ཟླ་འགྲོགས་པ་བཞིན། །ཕུག་ལྷ་གནས་ཁང་འདི་དང་མ་བྲལ་ཞིག །འབྲུག་དང་རི་རབ་འགྲོགས་པ་བཞིན། །ཕུག་ལྷ་གནས་ཁང་འདི་དང་མ་བྲལ་ཞིག །སྟག་གཟིག་ནགས་ཚལ་འགྲོགས་པ་བཞིན། །ཕུག་ལྷ་གནས་ཁང་འདི་དང་མ་བྲལ་ཞིག །རྟག་ཏུ་སྲུང་མས་འཚོ་རྫི་མཛོད། །ཕུག་ལྷ་བསྟོད་པའི་ཡོན་ཏན་གྱིས། །མི་ལ་ན་ཚ་མ་བཏང་ཞིག །ཕྱུགས་ལ་གོད་ཁ་མ་བཏང་ཞིག །ཞིང་ལ་བཙའ་སད་སེར་གསུམ་མ་བཏང་ཞིག །དགྲ་རྐུན་གཅན་གཟན་གནོད་པ་སྲུངས། །བདག་དང་རྒྱུ་སྦྱོར་ཡོན་བདག་ལ། །བསོད་ནམས་ནོར་གྱི་དངོས་གྲུབ་སྩོལ། །དབང་ཐང་བུ་ཡི་དངོས་གྲུབ་སྩོལ། །བསྟན་སྲུང་མཐུ་ཡི་དངོས་གྲུབ་སྩོལ། །མི་མགོ་དགུང་བས་མཐོ་བར་ཤོག །མི་འབྲུ་གསེར་བས་བཟང་བར་ཤོག །མི་མདོག་དུང་བས་དཀར་བར་ཤོག །མི་འཕེལ་ཕོ་རུ་འཕེལ་བར་ཤོག །མི་མཐའ་ཆུ་བས་རིང་བར་ཤོག །མི་སྲོག་ལྕགས་བས་སྲ་བར་ཤོག །སྐྱེ་ཚེ་ཤིང་བས་
ཆེ་བར་ཤོག །ཕྱུགས་འཕེལ་མོ་རུ་འཕེལ་བར་ཤོག །མི་དར་བཙན་ལ་རགས་པར་ཤོག །བཙན་ཕྱུག་དར་གསུམ་འཛོམ་པར་ཤོག །སྐྱིད་དར་ལོངས་སྤྱོད་འཛོམ་པར་ཤོག །བཀའ་བརྒྱུད་བླ་མ་རྣམས་ཀྱི་ངོ་སོ་བསྟོད། །ཡི་དམ་ལྷ་ཚོགས་རྣམས་ཀྱི་ངོ་སོ་བསྟོད། །ཆོས་སྐྱོང་སྲུང་མ་རྣམས་ཀྱི་ངོ་སོ་བསྟོད། །གནས་བདག་དཀོར་བདག་རྣམས་ཀྱི་ངོ་སོ་བསྟོད། །ལྷ་བཙུན་དགྲ་བླ་རྣམས་ཀྱི་ངོ་སོ་བསྟོད། །ཕོ་ཉ་སྒོ་སྲུང་རྣམས་ཀྱི་ངོ་སོ་བསྟོད། །གཡང་ར་སྒོ་བཞི་རྣམས་ཀྱི་ངོ་སོ་བསྟོད། །ཡུལ་ལྷ་༧་གཞི་བདག་རྣམས་ཀྱི་ངོ་སོ་བསྟོད། །དབེན་རི་སྲུང་མ་རྣམས་ཀྱི་ངོ་སོ་བསྟོད། །གཞི་བདག་གཞི་སྲུང་རྣམས་ཀྱི་ངོ་སོ་བསྟོད། །ཀྱཻ། བཀའ་བརྒྱུད་བླ་མ་རྣམས་ཀྱི་རྟག་བཙུགས་རྟེན་ཡར་བཀྱགས།་།ཡི་དམ་ལྷ་ཚོགས་རྣམས་ཀྱི་རྟག་བཙུགས་རྟེན་ཡར་བཀྱགས། །ཆོས་སྐྱོང་སྲུང་མ་རྣམས་ཀྱི་རྟག་བཙུགས་རྟེན་ཡར་བཀྱགས། །ཕོ་ལྷ་དགྲ་ལྷ་རྣམས་ཀྱི་རྟག་བཙུགས་རྟེན་ཡར་བཀྱགས། །ཞི་བའི་ལྷ་ཚོགས་རྣམས་ཀྱི་རྟག་བཙུགས་རྟེན་ཡར་བཀྱགས། །གཞི་བདག་ཡུལ་བདག་རྣམས་ཀྱི་རྟག་བཙུགས་རྟེན་ཡར་བཀྱགས། །
ཡུལ་ལྷ་ཟོ་དོར་རྣམས་ཀྱི་རྟག་བཙུགས་རྟེན་ཡར་བཀྱགས། །ལྷ་བཙུན་དགྲ་བླ་རྣམས་ཀྱི་རྟག་བཙུགས་རྟེན་ཡར་བཀྱགས། །གནས་བདག་གཏེར་བདག་རྣམས་ཀྱི་རྟག་བཙུགས་རྟེན་ཡར་བཀྱགས། །དཔའ་སྐྱེམས་དམ་པ་ལྷ་ཚོགས་འདིར་བྱོན་ལ། །བདག་དང་ཡོན་བདག་འཁོར་བཅས་ཁ་འཛིན་མཛོད། །བཅོལ་བའི་ཕྲིན་ལས་མྱུར་དུ་འགྲུབ་པར་མཛོད་། །ཅེས་པ་ལྷ་སྲུང་ཆོས་སྐྱོང་སྲུང་མ་མཆོད་ཅིང་བསྟོད། རྟེན་ལ་བསྟིམ། བརྟན་གཞུག་ལན་གསུམ་མམ་བདུན་ནམ་སྐབས་དང་བསྟུན། ཡེ་དྷརྨས་རབ་གནས་ལེགས་པར་བྱ། ཞེས་སོགས་དགའ་སྟོན་ཚོགས་འཁོར་རྒྱས་པ་ཡི་དམ་ལྟར་བྱ། རྗེས་སུ་འབགས་བཙོག་དང་ཉེས་པ་སོགས་ལ་ཡིག་བརྒྱས་བཤགས། ཚེ་འགུགས་དང་གསེར་འོད་འགྲུབ་ན་ལེགས། པདྨ་འབྱུང་གནས་ཀྱིས་མཛད་པའི་བཀྲ་ཤིས་སོགས་གང་སྐབས་བྱའོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།