རྒྱུན་ཁྱེར་ཆུ་གཏོར་བསྡུས་ཆ་ཚང་ཤིན་ཏུ་བསྡུས་པ།
རྒྱུན་ཁྱེར་ཆུ་གཏོར་བསྡུས་ཆ་ཚང་ཤིན་ཏུ་བསྡུས་པ་བཞུགས།
གཏོར་མ་ཛ་གཏོར་ཆུ་སྦྱིན་ཆག་མེད་འདི། །རྒྱས་པ་མ་ལྕོགས་རྒྱུན་ཁྱེར་ཉམས་ལེན་ནི། །མདུན་དུ་ཀ་ཊོ་རའམ་ཟངས་སྡེར་བཤམས། །དེ་ནང་ནས་འབྲུ་ཅུང་ཟད་བཏབ་ནས་བཤམས། །གཏོར་འགུ་ལ་སོགས་ཆུ་སྣོད་མདུན་དུ་བཞག ༈ རང་ཉིད་ཐུགས་རྗེ་ཆེན་པོ་ནི། །ཞལ་གཅིག་ཕྱག་གཉིས་རྣམ་པར་གྱུར། །རང་གི་ཕྱག་ནས་བདུད་རྩིའི་རྒྱུན། །བབ་པས་ཡི་དྭགས་ཀུན་ཚིམ་གྱུར། །ཨོཾ་མ་ཎི་པདྨེ་ཧཱུྃ། ཨོྃ་ཨཱ༔ཧཱིཧཱུྃ། ༀ་ཛྭ་ལ་མི་དཾ་སརྦ་པྲ་ཏེ་བྱཱ་སྭཱ་ཧཱ། མཆན། རང་ཉིད་སྐད་ཅིག་དྲན་རྫོགས་སྤྱན་རས་གཟིགས། །ཁ་སར་པཱ་ཎིའི་སྐུ་རུ་ལམ་མེར་གསལ། །ཟངས་གཞོང་ཡངས་ཤིང་རྒྱ་ཆེ་ཡུལ་གྲུ་ཙམ། །དེ་ནང་ཕྱོགས་བཞི་དབུས་ལྔ་
པདྨ་དང་། །ཟླ་བའི་གདན་ནི་ལྔ་ཚོམ་སྒོམ་པ་ཡི། །དབུས་སུ་འཁོར་ལོ་བདེ་མཆོག་སྐུ་མདོག་དམར། །གྲི་ཐོད་འཛིན་ཅིང་ཕག་མོ་ཡུམ་དང་འཁྲིལ། །ཕྱོགས་བཞིར་མཁའ་འགྲོ་སྡེ་བཞི་མོས་པ་ཙམ། །ཤར་དུ་ཛཾ་ལས་ཛཾ་དཀར་ཁྲོ་བོའི་སྐུ། །གཡས་པས་བེ་ཅོན་གཡོན་པས་ནེའུ་འཛིན། །ཁ་ཊཾ་མཆན་བཅུག་འབྲུག་ལ་ཆིབས་པའོ། །ཕྱོགས་བཞིར་མཁའ་འགྲོ་སྡེ་བཞི་ཡོད་པར་བསྒོམ། །ལྷོ་རུ་ཛཾ་ལས་ཛ་སེར་ནོར་རྒྱུན་མ། །བི་ཛ་ནེའུ་ལེ་འབྲས་སྙེ་མཆོད་སྦྱིན་འཛིན། །ཕྱོགས་མཚམས་བརྒྱད་དུ་ནོར་ལྷ་ཕོ་བརྒྱད་དེ། །དེ་དག་ཀུན་གྱི་གཡོན་དུ་སོ་
སོའི་ཡུམ། །ཆ་ལུགས་ནོར་རྒྱུན་མ་དང་འདྲ་བར་བསྐྱེད་། །ནུབ་ཏུ་ཛཾ་ལས་ཛ་དམར་ཕྱག་དྲུག་པ། །དམར་དཀར་སྔོ་བའི་ཞལ་གསུམ་ཞི་མ་ཁྲོ། །དང་པོས་ནོར་བུའི་ཐོད་པ་ནོར་བུས་བཀང་། །བར་པས་ལྕགས་ཀྱུ་ཞགས་པ་ཐ་མ་གཉིས། །ནེའུ་ལེ་བཙིར་བས་རིན་ཆེན་ཆར་པ་འབེབས། །ཞབས་བཞིའི་ནོར་སྐྱུགས་ཕོ་མོ་མནན་པར་བསམ། །བྱང་དུ་ཧཱུྃ་ལས་ཛཾ་ནག་ཁྲོ་བོའི་སྐུ། །གཅེར་བུ་སྦྲུལ་རྒྱན་ཐོད་ཁྲག་ནེའི་ལེ་འཛིན། །ཞབས་གཉིས་གནོད་སྦྱིན་ནོར་བདག་སེར་པོ་མནན། །རང་འདྲའི་སྡེ་བརྒྱད་ཛ་ནག་བརྒྱད་ཀྱིས་བསྐོར། །དེ་དག་འདོན་ནི་མི་དགོས་ཡིད་ཀྱིས་བསྒོམ། །ངག་ཏུ་སྔགས་འདི་བརྗོད་པས་སྤྱན་དྲངས་བསྟིམ། །གནས་གསུམ་ཨོཾ་ཨཱཿཧཱུྃ་གསུམ་ལས། །འོད་འཕྲོས་ཡེ་ཤེས་པ་ཡི་ཚོགས། །སྤྱན་དྲངས་གཉིས་སུ་མེད་པར་གྱུར། །ཤྲཱི་ཧེ་རུ་ཀ་ཝཱ་ར་ཧི་སརྦ་ཛམྦྷ་ལ་ས་པ་རི་ཝཱ་ར་བཛྲ་སཱ་མ་ཡ་ཛཿ ཛཿཧཱུྃ་བཾ་ཧོ༔ ཨརྒྷཾ་སོགས། ཤབྡ་པྲ་ཏཱིཙྪ་སྭཱ་ཧཱ། ཅེས་བརྗོད། རང་གི་ཕྱག་གཡས་རིན་ཆེན་བུམ་པ་ནས། །བདུད་རྩིའི་ཆུ་རྒྱུན་བདེ་མཆོག་ཡབ་ཡུམ་ལ། །ཕུལ་བས་ཁམས་གསུམ་དབང་སྡུད་དངོས་གྲུབ་ཐོབ། །བདུད་རྩི་གསོལ་དང་སྐུ་ལ་ཁྲུས་གསོལ་གྱུར། །
ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ༔ ཨོཾ་ཛ་བྷིར་མོ་ཧར་ལ་སྭཱ་ཧཱ། དེ་ནི་ཆུ་སྦྱིན་གཏེར་གྱི་འདོད་འཇོ་ཡིན། །བུམ་པའི་ཆུ་ནི་མུ་ཏིག་ཆར་པའི་རྒྱུན། །ཛཾ་དཀར་ལྷ་ལྔའི་དབུ་ལ་བབ་པར་བསམ། །ཨོཾ་པདྨ་ཀྲོ་དྷ་ཨརྱ་ཛཾ་བྷ་ལ་ཧྲི་ད་ཡ་ཧཱུྃ་ཕཊ། ཇོ་བོ་རྗེ་ཡི་ཛ་དཀར་ཕྱི་སྒྲུབ་ཡིན། །བུམ་པའི་བདུད་རྩི་ཛ་སེར་ནོར་རྒྱུན་མ། །ནོར་ལྷ་ཕོ་བརྒྱད་མོ་བརྒྱད་བསྐོར་བ་ཡི། །སྐུ་ལ་ཁྲུས་དང་ཞལ་དུ་བདུད་རྩི་དྲངས། །མཉེས་ནས་དངོས་གྲུབ་ཐམས་ཅད་སྩོལ་བར་བསམ། །ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། དེ་ཡིས་ནོར་ལྷ་བཅོ་བརྒྱད་ཆུ་སྦྱིན་ཚང་། །ཇི་དམར་ཐུགས་ཀའི་རཾ་ལས་མེ་འབར་བས། །ཞལ་ནས་མེ་ལྕེ་བྱུང་ཞིང་སྐོམ་པ་ལ། །ཆུ་ཕུལ་སྐོམ་མཆོད་རབ་ཏུ་ཐུགས་མཉེས་ནས། །ཇི་ལའི་ཞལ་གསུམ་ནོར་སྐྱུགས་གཉིས་ཀྱི་སྐུབ། །ནེའུ་གཉིས་དང་ནོར་སྐྱུགས་གཉིས་ཀྱི་ཁ། །ནོར་བུ་སྐྱུགས་པས་རང་གནས་ཁྲ་ལྟེམ་གང་། །ཨོཾ་ཛམྦྷ་ལ་ཛ་ལེནྡྲ་ཡེ་དྷ་ན་མེ་དྷི་གྷིསྭཱ་ཧཱ། དེ་ནི་གྲྭ་པ་མངོན་ཤེས་ཅན་གྱི་གཏེར་མའི་ལུགས། བུམ་པའི་བདུད་རྩི་བྱང་སེམས་དཀར་པོ་ཡིས། །རང་བཞིན་ཛ་ནག་སྡེ་བརྒྱད་ཛ་ནག་བཅས། །སྐུ་ལ་ཁྲུས་དང་ཞལ་དུ་བདུད་རྩི་ཕུལ། །སྐུ་ལུས་བདེ་བ་རྒྱས་པས་
ནེའུ་ལེ་བཙིར། །དགོས་འདོད་སྣ་ཚོགས་ཆར་བཞིན་འབེབས་པར་བསམ། །ན་མོ་རཏྣ་ཏྲ་ཡཱ་ཡ། ན་མོ་མ་ཎི་བྷ་དྲ་ཡ། མ་ཧཱ་ཡཀྵ་སེ་ན་པ་ཏ་ཡེ། ཏདྱ་ཐཱ༔ ཨོཾ་ཛཾ་བྷ་ལ་ཛ་ལེན་ཡེ་སྭཱ་ཧཱ། གཅིག་དང་། ཨོཾ་ཛིལླི་སྭཱ་ཧཱ། ཞེས་སྔགས་ཐུང་བརྗོད་པར་བྱའོ།། དཔལ་ལྡན་རྡོ་རྗེ་རྣལ་འབྱོར་མ་ལ་ཕྱག་འཚལ་བསྟོད། །ཁྱོད་ནི་འདོད་པའི་གཙོ་མོ་སྟེ། །སྲིད་གསུམ་ཐམས་ཅད་དབང་དུ་སྡུས། །བདག་ལ་འདོད་པའི་དངོས་གྲུབ་སྩོལ། །འགྲོ་བ་དབུལ་བའི་སྡུག་བསྔལ་གཟིགས་གྱུར་ནས། །འཇིག་རྟེན་མགོན་པོའི་སྤྱན་ཆབ་ལས་འཁྲུངས་པའི། །གངས་རི་ལྟར་དཀར་ནོར་འཆང་ཀུན་གྱི་རྗེ། །མཁའ་འགྲོ་བཞི་ཡིས་བསྐོར་ལ་ཕྱག་འཚལ་བསྟོད། །ནོར་གྱི་དབང་ཕྱུག་རིན་ཆེན་གཏེར་མངའ་ཞིང་། །གནོད་སྦྱིན་ནོར་འཆང་མང་པོ་ཀུན་གྱི་རྗེ། །བྱང་ཕྱོགས་སྐྱོང་བའི་མགོན་པོ་ཛཾ་བྷ་ལ། །དངོས་གྲུབ་མཆོག་སྩོལ་མཛད་ལ་ཕྱག་འཚལ་བསྟོད། །བདེ་གཤེགས་ཀུན་གྱི་གསུང་ལས་ལེགས་སྤྲུལ་ཞིང་། །ཐུགས་རྗེའི་ཆགས་པས་སྐུ་མདོག་དམར་པོར་བཞུགས། །དབང་གི་ཕྲིན་ལས་རྫོགས་མཛད་ཛ་བྷ་ལ། །མ་ལུས་འགྲོ་བའི་རེ་སྐོང་ཕྱག་འཚལ་བསྟོད། །
མགོན་པོ་ནམ་མཁའི་མདོག་ཅན་རིན་ཆེན་ཆར་འབེབས་པ། །མ་སྐྱེས་རང་བཞིན་དག་པས་སྐུ་མདོག་སྔོན་པོར་བཞུགས། །ཁྱོད་ནི་རྡོ་རྗེ་སེམས་དཔའ་ཉིད་དེ་བདག་དྲན་ན། །རྟག་ཏུ་ཡིད་ལ་རེ་བའི་འབྲས་བུ་མཆིས་པར་མཛོད། །ཅེས་བརྗོད་ཀུན་གྱི་དངོས་གྲུབ་ཐོབ་པར་བསམ། ཨོཾ་ཨཱཿཧཱུྃ། ཞེས་ཆུ་ཐིགས་ལྕེ་ལ་བཞག །སོར་མོས་ཆུ་དེ་ཕྱོགས་བཞིར་གཏོར་ཚུལ་བྱ། ཨོཾ་བཛྲ་སཏྭ་ཧཱུྃའམ་ཡིག་བརྒྱ་བཟླ། །ལྷ་ཚོགས་ཐམས་ཅད་རང་ལ་ཐིམ་པ་དང་། །ལོངས་སྤྱོད་ཐམས་ཅད་སྤྲིན་ལྟར་འདུ་བར་བསམ། འབད་དང་རྩོལ་བ་སོགས་ཀྱི་འདོད་གསོལ་བྱ། །མཆན། ཆུ་ལྷག་དེ་ཁ་གསོས་ལ། ཨོཾ་ཨཱཿཧཱུྃ། རིན་ཆེན་སྣོད་དུ་བདུད་རྩི་རྒྱ་མཚོར་གྱུར། །བདེ་གཤེགས་རིན་ཆེན་མང་དང་གཟུགས་མཛེས་དང་། །འབྱམས་ཀླས་འཇིགས་ཀུན་བྲལ་ལ་ཕྱག་འཚལ་ལོ། །བླ་མ་ཡི་དམ་དཀོན་མཆོག་སྲི་ཞུའི་མགྲོན། །ཆོས་སྐྱོང་སྲུང་མ་ཕྲིན་ལས་སྒྲུབ་པའི་མགྲོན། །གནོད་བྱེད་གདོན་བགེགས་ལན་ཆགས་ཤ་འཁོན་མགྲོན། །འགྲོ་བ་རིགས་དྲུག་བྱམས་དང་སྙིང་རྗེའི་མགྲོན། །དེ་དག་སོ་སོར་མཆོད་པས་མཉེས་གྱུར་ཅིག །སྦྱིན་པས་ཚིམ་ཞིང་སྡུག་བསྔལ་ཞི་གྱུར་ཅིག །དཀོར་སྒྲིབ་ལན་
ཆགས་ཐམས་ཅད་བྱང་གྱུར་ཅིག །ཀུན་ཀྱང་རྣམ་མཁྱེན་སངས་རྒྱས་ཐོབ་པར་ཤོག །ན་མསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། ཁྱད་པར་ཡི་དྭགས་རྣམས་དང་བར་སྲིད་རྣམས། །ཆུ་སྦྱིན་འདིས་ཚིམ་བླ་མེད་སངས་རྒྱས་ཤོག །ཨོཾ་ཛྭ་ལ་མི་དཾ་སརྦ་པྲ་ཏེ་སྭཱ་ཧཱ། དེ་ཡིས་གཏོར་མ་བརྒྱ་རྩའི་ཆུ་སྦྱིན་ཚང་། །ཞྭ་དམར་པ་ཡིས་མཛད་པ་ཅུང་ཟད་བཅོས། །དེ་ནས་གཤེགས་གསོལ་མི་དགོས་མི་དམིགས་དང་། །སྤྱན་འདྲེན་ལ་སོགས་ཡང་ནི་མི་དགོས་སོ། །བསྔོས་པ་ཙམ་གྱིས་སོ་སོའི་གནས་རྣམས་སུ། །བདུད་རྩི་ལོངས་སྤྱོད་ལ་སོགས་ཐོབ་པར་དམིགས། །གོང་གི་ཛཾ་བྷ་ལ་ཡི་སྔགས་དེ་རྣམས། །རབ་ལ་བརྒྱ་རྩ་འབྲིང་ལ་ལོ་གྲངས་དང་། །ཐ་མ་བདུན་ནམ་ཉེར་གཅིག་རེ་ཡིས་ཆོག །ཉུང་ལ་འདུས་ཆེ་ཆག་མེད་འདོན་སླ་བ། །གཉེར་པ་ཆོས་འཕེལ་ཞེས་བྱས་བསྐུལ་བའི་ངོར། །དགེ་སློང་རཱ་ག་ཨ་སྱ་ཞེས་བྱ་བས། །ཤིང་སྤྲུལ་བདུད་རྩི་འཁྱིལ་པ་ཞེས་བྱའི་ལོར། །སྟོབས་ཆེན་གླང་གི་ཟླ་བའི་ཡར་ཚེས་ལྔར། །དཔལ་རི་རྩེ་ཡི་མཚམས་ཀྱི་ཁོང་ནས་བྲིས། །ཚེ་དཔལ་བསོད་ནམས་ཡར་ངོས་ཟླ་བཞིན་འཕེལ། །དཔལ་དང་འབྱོར་པ་འདོད་ཁམས་ལྷ་ལས་ཕྱུག །ཆོས་སྲིད་དབང་ཐང་དབྱར་གྱི་ཆུ་བཞིན་རྒྱས། །བསྟན་དང་འགྲོ་ལ་ཕན་ཐོགས་རྒྱ་ཆེན་ཤོག །མངྒ་ལཾ།། །།