གནམ་ཆོས་ཐུགས་གཏེར་ཟབ་མོ་ལས་སྤོ་རེ་ཎའི་སྐོར་ལས་ཆབ་གཏོར་རིམ་པ།
གནམ་ཆོས་ཐུགས་གཏེར་ཟབ་མོ་ལས་སྤོ་རེ་ཎའི་སྐོར་ལས་ཆབ་གཏོར་རིམ་པ་བཞུགས་སོ། །
ན་མོ་མ་ཧཱ་ཀ་རུ་ཎ་ཡེ༔ གནམ་ཆོས་ཐུགས་གཏེར་ཟབ་མོ་ལས༔ སྤོ་རེ་ཎའི་སྐོར་ལས་བྱུང་བའི་ཆབ་གཏོར་བཏང་བའི་རིམ་པ་ནི། ཐེབ་ཙེ་ལྔ་ཚར་བཤམས་དེ་བཤལ་ཚེ་སྐྱབས་འགྲོ་ནི༔ ན་མོ༔ དཀོན་མཆོག་གསུམ་དང་རྩ་བ་གསུམ༔ སྐྱབས་གནས་རྣམས་ལ་སྐྱབས་སུ་མཆི༔ འགྲོ་ཀུན་སངས་རྒྱས་ལ་འགོད་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ ལན་གསུམ་འདོན་ཚེ་སྣོད་བཤམ་པ་དང་༔ སྤྱན་འདྲེན་བཞུགས་གསོལ༔ སེམས་བསྐྱེད་དང་བཅས་པ་རྣམས་གཞུང་ཚིག་ལྔ་པ་ནི༔ ཐེབ་ཙེ་ལྔ་ནང་དུ་གཏོར་རིལ་ལམ་ནས་འབྲུ་དང་ཆུ་བླུགས་ལ༔ རང་ཉིད་ཁ་སར་པཱ་ཎིར་བསྐྱེད༔ ཨོཾ་ཨ་མྲྀ་ཏེ་ཧཱུྃ་ཕཊ༔ སྭ་བྷ་ཝས་སྦྱངས། སྟོང་
པའི་ངང་ལས་རིན་ཆེན་སྣོད་ནང་དུ༔ གཏོར་མ་དམ་ཚིག་བདུད་རྩིར་གྱུར༔ གཟུགས་མཛེས་འབྱམས་ཀླས་འཇིགས་ཀུན་བྲལ༔ རིན་ཆེན་མང་ལ་ཕྱག་འཚལ་ལོ༔ ཧཱུྃ༔ རྩ་བ་གསུམ་གྱི་ལྷ་ཚོགས་རྣམས༔ གནས་འདིར་སྤྱན་འདྲེན་གཤེགས་སུ་གསོལ༔ པདྨ་ཉི་ཟླའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ འགྲོ་བ་སེམས་ཅན་མ་ལུས་ཀུན༔ ཀུན་ཏུ་བཟང་པོའི་ས་ཐོབ་ཤོག༔ བླ་མ་བརྒྱུད་པར་བཅས་རྣམས་དང་༔ ཡི་དམ་ལྷ་ཚོགས་མ་ལུས་ལ༔ བདུད་རྩི་གཏོར་མ་འདི་འབུལ་ལོ༔ ཨོཾ་གུ་རུ་སརྦ་ཏ་ཐཱ་གཱ་ཏ་ཨབྷཾ་སོགས། པྲ་
ཏཱིཙྪ་སྭཱ་ཧྭ༔ ན་མསརྦ་ཏ་ཐཱ་ག་ཏ་ཨ་ཝཱ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུྃ། རབ་བརྒྱ་རྩ་འབྲིང་ཉེར་གཅིག ཐ་མ་བདུན་སོགས་བརྗོད། བདག་རྒྱུད་བྱིན་གྱིས་བརླབ་ཏུ་གསོལ༔ ཐེབ་གཉིས་པ་ལ༔ ཨ་ཀཱ་རོའི་བྱིན་གྱིས་བརླབས་ལ་ཆུ་ཕྱར་ཞིང་༔ གཏོར་མ་ཤ་ལྔ་བདུད་རྩི་ལྔ༔ ཆོས་སྐྱོང་སྲུང་མ་རྣམས་ལ་འབུལ༔ སཾ་བྷ་ར་གོང་བཞིན་བགྲང་༔ དཀོར་སྒྲིབ་བྱང་ནས་ཚོགས་རྫོགས་ཤོག༔ ཐེབ་གསུམ་པ་ལ༔ ཨ་ཀཱ་རོས་བྱིན་གྱིས་བརླབས་ལ་ཆུ་ཕྱར་ཞིང་༔ གཏོར་མ་བདུད་རྩིའི་རྒྱ་མཚོ་འདི༔ འཇིག་རྟེན་པ་རྣམས་ཀུན་ལ་འབུལ༔ གཟུགས་མཛེས་སོགས། སམྦྷ་ར་གོང་བཞིན་བསྒྲང་༔ མཉེས་ཤིང་ཚིམས་ནས་བར་ཆད་ཐེབ་བཞི་པ་ལ། ཨ་ཀཱ་རོས་བྱིན་གྱིས་བརླབས་ཆུ་ཕྱར་ཞིང༔ གཏོར་མ་འདོད་པའི་ཡོན་ཏན་ལྔ༔ གཉུག་མར་གནས་པ་རྣམས་ལ་འབུལ༔ གཟུགས་མཛེས་སོགས༔ སམྦྷ་ར་གོང་བཞིན་བསྒྲང་༔ ཁྱད་པར་ཡུལ་ཁམས་བདེ་ལེགས་མཛོད༔ ཐེབ་ལྔ་པ་ལ། ཨ་ཀཱ་རོས་བྱིན་གྱིས་བརླབས་ལ་ཆུ་ཕྱར་ཞིང་༔ ཁྱད་པར་ཚེ་རབས་ཐོག་མེད་ནས༔ ལན་ཆགས་བགེགས་རིགས་རྣམས་ལ་འབུལ༔ གཟུགས་མཛེས་སོགས༔ སམྦྷ་ར་སོགས་གོང་བཞིན༔ ཆོས་རྣམས་ཐམས་ཅད་རྒྱུ་ལས་བྱུང་༔ སོགས་ཀྱི་ཆོས་བཤད་ཤོ་ལོ་ཀ་
བྱས་ལ༔ དེ་ལྟར་ཆོས་དང་ཟང་ཟིང་གི༔ སྦྱིན་པ་རྒྱ་ཆེན་འདི་བྱས་མཐུས༔ ཐམས་ཅད་མཉེས་ཤིང་ཚིམས་གྱུར་ནས༔ མཐར་ཐུག་སངས་རྒྱས་ཐོབ་པར་ཤོག༔ གཙོ་བོ་ནུས་པ་མ་མཆིས་པས༔ མ་འབྱོར་མ་རྙེད་མ་ཚང་དང་༔ འདི་ནི་བྱས་མིན་གང་བྱས་པ༔ དེ་དག་ཐམས་ཅད་བཟོད་པར་གསོལ༔ འཇིག་རྟེན་འདས་དང་མ་འདས་པའི༔ མགྲོན་རྣམས་མ་ལུས་ཐམས་ཅད་ཀུན༔ རང་རང་བདེ་བར་གཤེགས་ནས་ཀྱང་༔ སླར་ཡང་འབྱོན་པར་མཛད་དུ་གསོལ༔ བཛྲ་མུ༔ ཕྱོགས་དུས་རྒྱལ་བ་སྲས་བཅས་དགོངས༔ ཚོགས་གཉིས་རྫོགས་ལ་རྗེས་ཡི་རང་༔ བདག་གི་དུས་གསུམ་དགེ་བསགས་པ༔ དཀོན་མཆོག་གསུམ་ལ་མཆོད་པ་འབུལ༔ རྒྱལ་བའི་བསྟན་པ་འཕེལ་གྱུར་ཅིག༔ དགེ་བ་སེམས་ཅན་ཀུན་ལ་བསྔོ༔ འགྲོ་ཀུན་སངས་རྒྱས་ཐོབ་གྱུར་ཅིག༔ དགེ་རྩ་ཐམས་ཅད་གཅིག་བསྡུས་ཏེ༔ བདག་གི་རྒྱུད་ལ་སྨིན་གྱུར་ཅིག༔ སྒྲིབ་གཉིས་དག་ནས་ཚོགས་རྫོགས་ཏེ༔ ཚེ་རིང་ནད་མེད་ཉམས་རྟོགས་འཕེལ༔ ཚེ་འདིར་ས་བཅུ་ནོན་གྱུར་ཅིག༔ ནམ་ཞིག་ཚེ་འཕོས་གྱུར་མ་ཐག༔ བདེ་བ་ཅན་དུ་སྐྱེ་བར་ཤོག༔ སྐྱེས་
ནས་པདྨོ་ཁ་བྱེ་སྟེ༔ ལུས་རྟེན་དེ་ལ་སངས་རྒྱས་ཤོག༔ བྱང་ཆུབ་ཐོབ་ནས་ཇི་སྲིད་དུ༔ སྤྲུལ་པས་འགྲོ་བ་འདྲེན་པར་ཤོག༔ དེ་ལྟར་སྤྲོས་པ་མི་ལྕོགས་སམ་ཐེབ་ཙེ་ལྔ་ཚར་མེད་ན་ཐེབ་གཅིག་གི་ནང་དུ་ཆུ་བླུག་འདོན་བྱ་གོང་བཞིན་བྱ༔ ཐེབ་ལྔ་པ་ལ་ནས་གཏོར་རིལ་གང་ཡང་མི་བླུག༔ གཞན་རྣམས་ལ་ཆབ་གཏོར་རིལ་བླུག༔ དེ་ལྟར་གཡོན་ནས་བླུགས་གཡས་ནས་གཤེགས༔ མི་འགྱུར་རྡོ་རྗེ་དགོངས་གཏེར་ལས་བྱུང་བ་ཕྱག་ལེན་རཱ་ག་ཨ་སྱས་གཏན་ལ་ཕབ་པའོ༔ འདི་ཡི་ཞལ་གདམས་ལ། རང་ཉིད་སྐད་ཅིག་ལ་ཁ་སར་པ་ཎིར་བསྐྱེད། ཐེབ་ཙེ་ལྔ་ཚར་བཤམས། མེད་ན་གཅིག །བདུད་རྩི་གཉིས་པ་ཡན་ལག་ལྔ་སོགས། བདུད་རྩི་གསུམ་པ་དཀར་གསུམ། བཞི་པ་སོ་སོའི་ཡིད་མཐུན། ལྔ་པ་ཆུ་གཙང་དུ་བསམ་མོ། །ས་མ་ཡ་རྒྱ་རྒྱ་རྒྱ༔ འདིའི་སྤྱན་འདྲེན་ལ་ཏིང་ཤག་བརྡུང་༔ བླ་མ་ལ་༠༠མཐིང་རྡུང་། ཡི་དམ་ལ་༠༠༠སུམ་བརྡུང་། དཔལ་མགོན་ལ་༠༠དྲག་བརྡུང་། །རིགས་དྲུག་ལ་བབའཐིང་ཐབས། བར་དོ་ལ་༠༠༠སུམ་བརྡུང་བྱའོ། །རྗེས་ཆོག་དུས་ཏིང་ཤག་ཁ་ཕྱིར་བསྟན། མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།