གནམ་ཆོས་ལས་ཆབ་གཏོར་གྱི་འདོན་འགྲིགས་ཁོལ་དུ་ཕྱུང་བ།
གནམ་ཆོས་ལས་ཆབ་གཏོར་གྱི་འདོན་འགྲིགས་ཁོལ་དུ་ཕྱུང་བ་བཞུགས་སོ།། ན་མོ་དཀོན་མཆོག་གསུམ་དང་རྩ་བ་གསུམ༔ དཀོན་མཆོག་གསུམ་དང་རྩ་བ་གསུམ༔ སྐྱབས་གནས་རྣམས་ལ་སྐྱབས་སུ་མཆི༔ འགྲོ་ཀུན་སངས་རྒྱས་ལ་འགོད་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ རང་ཉིད་འཇིག་རྟེན་དབང་ཕྱུག་དཀར༔ ཞལ་གཅིག་ཕྱག་གཉིས་གཡས་མཆོག་སྦྱིན༔ གཡོན་པས་པདྨ་དཀར་པོ་འཛིན༔ ཐུགས་ཀར་ཡིག་དྲུག་གཡས་བསྐོར་བསམ༔ ཨོཾ་མ་ཎི་པདྨེ་ཧཱུྃ༔ ཧཱུྃ༔ རྩ་བ་གསུམ་གྱི་ལྷ་ཚོགས་རྣམས༔ གནས་འདིར་སྤྱན་འདྲེན་གཤེགས་སུ་གསོལ༔ པདྨ་ཉི་ཟླའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ འགྲོ་བ་སེམས་ཅན་མ་ལུས་པ༔ ཀུན་ཏུ་བཟང་པོའི་ས་ཐོབ་ཤོག༔ ཨོཾ་བཛྲ་ཨ་མྲྀ་ཏ༔ ཨོཾ་སྭ་བྷ་ཝ༔ གཟུགས་མཛེས་འབྱམས་ཀླས་འཇིགས་བྲལ་དང་༔ རིན་ཆེན་མང་ལ་ཕྱག་འཚལ་བསྟོད༔ ལན་གསུམ། གཏོར་མ་བདུད་རྩིའི་རྒྱ་མཚོ་འདི༔ བླ་མ་ཡི་དམ་ལྷ་ལ་འབུལ༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུྃ༔ བདུན་ནམ་ཉེར་གཅིག་བརྗོད༔ བདག་ལ་བྱིན་གྱིས་བརླབ་ཏུ་གསོལ༔
ལན་གཉིས་དང་༔ བདག་རྒྱུད་བྱིན་གྱིས་བརླབ་ཏུ་གསོལ། ཨོཾ་ཨ་ཀཱ་རོ༴ གཏོར་མ་ཤ་ལྔ་བདུད་རྩི་འདི༔ མཁའ་འགྲོ་ཆོས་སྐྱོང་ཀུན་ལ་འབུལ༔ ན་མཿསརྦ་སོགས། དཀོར་སྦྱོང་སྡིག་སྒྲིབ་དག་གྱུར་ཅིག༔ གསུམ། ཨ་ཀཱ་རོ༴ གཏོར་མ་འཇིག་རྟེན་སྐྱོང་བ་འདི༔ དཔལ་མགོན་བདུན་ཅུ་རྣམས་ལ་འབུལ༔ ན་མསརྦ་ཏ་ཐཱ་སོགས། བར་ཆད་སོལ་ལ་དངོས་གྲུབ་སྩོལ༔ གསུམ། ཨ་ཀཱ་རོ༔ གཏོར་མ་འདོད་པའི་ཡོན་ཏན་འདི༔ འགྲོ་བ་རིགས་དྲུག་ལན་ཆགས་ཅན༔ གདུག་སེམས་ཅན་དང་གནོད་བྱེད་དང་༔ ཁྱད་པར་ཡི་དྭགས་བར་དོ་ལ༔ ཀུན་ལ་གཏོར་མ་འདི་འབུལ་ལོ༔ ན་མསརྦ་ཏ་ཐཱ་སོགས། སརྦ་པྲ་ཏ་ཀ་ཛྭ་ལ་ཁཱ་ཧི༔ སོགས། ལན་ཆགས་བུ་ལོན་བྱང་ནས་ཀྱང་༔ སྡུག་སེམས་སྡུག་བསྔལ་ཞི་གྱུར་ཅིག༔ གསུམ། ཆོས་རྣམས་ཐམས་ཅད་རྒྱུ་ལས་བྱུང་༔ དེ་རྒྱུ་དེ་བཞིན་གཤེགས་པས་གསུངས༔ རྒྱུ་ལས་འགོག་པ་གང་ཡིན་པ༔ དགེ་སྦྱོང་ཆེན་པོའི་འདི་སྐད་གསུངས༔ སྡིག་པ་ཅི་ཡང་མི་བྱ་ཞིང་༔ དགེ་བ་ཕུན་སུམ་ཚོགས་པར་སྤྱད༔ རང་གི་སེམས་ནི་ཡོངས་སུ་འདུལ༔ གཞན་གྱི་སེམས་ནི་དཀྲུག་མི་བྱ༔ འདི་ནི་སངས་རྒྱས་
བསྟན་པ་ཡིན༔ དེ་ལྟར་ཆོས་དང་ཟང་ཟིང་གི༔ སྦྱིན་པ་རྒྱ་ཆེན་འདི་བྱས་མཐུས༔ ཐམས་ཅད་མ་ལུས་ཚིམ་གྱུར་ཅིག༔ མཐར་ཐུག་སངས་རྒྱས་ཐོབ་པར་ཤོག༔ གཙོ་བོར་ནུས་པ་མ་མཆིས་པས༔ མ་འབྱོར་མ་རྙེད་མ་ཚང་བ༔ འདི་ནི་བྱ་མིན་གང་བྱས་པ༔ དེ་དག་ཐམས་ཅད་བཟོད་པར་གསོལ༔ གཤེགས་གསོལ་ནི། འཇིག་རྟེན་འདས་དང་མ་འདས་པའི༔ མགྲོན་རྣམས་མ་ལུས་ཐམས་ཅད་ཀུན༔ རང་གནས་བདེ་བར་གཤེགས་ནས་ཀྱང་༔ སླར་ཡང་འབྱོན་པར་མཛད་དུ་གསོལ༔ བཛྲ་མུ༔