གཏོར་མ་བརྒྱ་རྩའི་དམིགས་རིམ་མདོར་བསྡུས་པའི་ཟིན་བྲིས།
གཏོར་མ་བརྒྱ་རྩའི་དམིགས་རིམ་མདོར་བསྡུས་པའི་ཟིན་བྲིས་བཞུགས་སོ། །
ན་མོ་ལོ་ཀི་ཤྭ་ར་ཡེ། གཏོར་མ་བརྒྱ་རྩ་འདི་ཉིད་ལ། །མདུན་བསྐྱེད་མགྲོན་བཞིའི་བསྐྱེད་ཆོག་རྒྱས་པ་དང་། །སྤྱན་དྲངས་བཞུགས་གསོལ་ཡན་ལག་བདུན་པ་སོགས། །རྒྱས་པར་ཡོད་ཀྱང་དཀོན་མཆོག་འབངས་ཀྱིས་ནི། །བསྡུས་པ་ཡིན་པས་དེ་རྣམས་མི་དགོས་གསུངས། །འདོན་ཆ་ཐམས་ཅད་བྷེ་རྒྱུ་ཡིན་པའི་ཕྱིར། །ལོགས་ནས་དམིགས་རིམ་སྒོམ་ཡང་མི་དགོས་ཏེ། །བློ་ཆུང་གཞུང་ཚིག་ཅུང་ཞིག་གོ་དཀའ་བས། །ཕྱག་ལེན་དམིགས་རིམ་ཟུར་ཙམ་འདིར་འགོད་བྱ།། ༈ སངས་རྒྱས་ཆོས་ཚོགས་སྐྱབས་སེམས་རྗེས་དེ་ནས། །རང་ཉིད་ཁ་སར་པཱ་ཎི་
དྲན་རྫོགས་བྷཻཾ། །ཕྱག་གཡས་མཆོག་སྦྱིན་གཡོན་པས་པད་དཀར་འཛིན། །འདི་སྐབས་ཞབས་གཉིས་བཞེངས་ནས་བཞུགས་པ་ཡིན། །ཕྱག་སོར་བཅུ་དང་ཞབས་ཀྱི་སོར་མོ་བཅུར། །ཆུ་མགོ་རྡོལ་བ་ལྟ་བུའི་བདུད་རྩི་བབས། །བདུད་རྩི་དེ་དག་རྟ་ཡི་རྔ་མ་བཞིན། །རྩ་བ་གཅིག་ལ་ཕྲན་བུ་མང་པོའི་རྒྱུན། །ཡི་དྭགས་ཡུལ་དུ་ན་ར་ར་བབས་པས། །ཡི་དྭགས་ཁ་ནི་ཁབ་ཀྱི་མིག་ཙམ་དུ། །བདུད་རྩིའི་ཟེར་ནི་རྟ་རྔའི་ཉག་མ་ཙམ། །ཡི་དྭགས་ཀུན་གྱི་ཁ་རུ་སོ་སོར་ཞུགས། །བཀྲེས་སྐོམ་ཞི་ཞིང་ལུས་རྣམས་བཟང་པོར་གྱུར། །ཆུ་རྒྱུན་དེ་ཉིད་རྒྱུན་ཆད་མེད་བབས་
པས། །ལྟོ་བ་གང་ཞིང་བདེ་སྐྱིད་ལྡན་པར་བྷོ། །མ་ཎི་ཧཱིཧཱུྃ་བརྒྱ་རྩའི་བར་དུ་བསྒྲུང་། །ཛ་ལ་མི་དཾ་གསུམ་མམ་བདུན་གྱིས་ཆོག །སེ་གོལ་གཅིག་མ་བརྡབ་ན་མི་ཐོབ་ཅིང་། །གཅིག་ལས་མང་ན་ཁོ་ལ་སྐྲག་སྣང་འབྱུང་། །ཡི་དྭགས་ཁོ་ཡི་གྲལ་ནི་དམའ་ན་ཡང་། །ལྟོགས་སྐོམ་ཆེ་དྲགས་རྗེས་ནས་སྒུག་ལོང་མེད། །གནས་ཀྱི་ཡི་དྭགས་འདི་རུ་མི་ཕྱིན་ཀྱང་། ཁ་ཐོར་ཡི་དྭགས་ཁ་བ་བུ་ཡུག་ཙམ། །གཏོར་ཐེབ་བཤམས་པ་ཙམ་ནས་འོང་བར་གསུངས། །དེ་ལ་སྔོན་དུ་ཆུ་གཏོར་མ་བསྔོས་ན། །གཉོམ་ཆུང་ལ་ལ་ལྟོགས་སྐོམ་བརྒྱལ་ནས་འགྲོ་།འདྲེ་ཡི་རིགས་ཀུན་ཡི་དྭགས་རིགས་སུ་གཏོགས། །སྟོབས་ཆེན་རྣམས་ཀྱིས་མགྲོན་གྱི་སྡེ་འཇོམས་བྱེད། །དེ་ཕྱིར་ཡི་དྭགས་སྔོན་དུ་བསྔོས་པ་ཡིན། །ལུས་མ་ཐོབ་པའི་བར་དོའི་སེམས་ཅན་ནི། །ཉི་ཟེར་རྡུལ་ལྟར་རྒྱུན་དུ་མང་པོ་འོང་། །དེ་ཀུན་སྐྱབས་མེད་མགོན་མེད་བཀྲེས་ཤིང་སྐོམ། །དེ་ཡང་ལས་ཀྱི་སྒྲིབ་པ་ཡིན་པའི་ཕྱིར། །ལས་སྒྲིབ་སྦྱོང་བྱེད་ཀཾ་ཀའི་གཟུངས་རིང་རིགས། །བྱིན་གྱིས་བརླབས་པའི་རང་གི་ཕྱག་སོར་གྱིས། །ཆུ་སྦྱིན་བཀྲེས་སྐོམ་འཇིགས་སྐྲག་ཞི་བར་བྷེ། །བར་དོར་མ་བསྔོས་ཟས་ནི་མི་ཐོབ་ཕྱིར། །བར་དོའི་
སེམས་ཅན་ཀུན་ཚིམ་ལ་སོགས་བརྗོད། །ཡི་དྭགས་དང་ནི་བར་དོ་འདྲ་བ་སྟེ། །གཟུགས་ནི་མ་ངེས་རྣམ་པ་སྣ་ཚོགས་ཡོད། གཟུགས་བྷེ་མི་དགོས་ཐོབ་པར་བྷེ་པས་ཆོག། ༈ དེ་ནས་ཇོ་གཏོར་བཏང་བའི་ཐེབ་ཙེ་དེ། །ཡངས་ཤིང་རྒྱ་ཆེ་འཛམ་གླིང་ཙམ་རེ་བྷོ། །དེ་ནས་ཛ་སེར་ཛཾ་ནག་མངོན་རྟོགས་ལྟར། །བསྐྱེད་དང་སྤྱན་དྲངས་དབང་བསྐུར་རྒྱས་གདབ་བྱ། །རང་གི་ཐུགས་ཀར་སྤྲུལ་པའི་མཆོད་པའི་སྤྲིན། །མེ་ཏོག་བདུག་སྤོས་མར་མེ་དྲི་ཆབ་དང་། །ཞལ་ཟས་རོལ་མོ་དཔག་མེད་མཆོད་པར་བྷེ། །ཨརྒྱུ་ལ་སོགས་སྔགས་དེ་བརྗོད་པར་བྱ། །ཤརྡ་ནམ་ཟེར་ཏིང་ཤག་རྡེབ་རྒྱུ་ཡིན། །རང་ཉིད་ཁ་སར་པཱ་ཎིའི་ཕྱག་རྒྱའི་མཐིལ། །བུམ་སོགས་ཡིག་འབྲུ་ལྔ་ལ་སྐད་ཅིག་གིས། །རྒྱལ་བ་རིགས་ལྔའི་སྐུ་རུ་ལམ་མེ་བྱུང་། །དེ་རྣམས་འོད་ཞུ་འོད་ཀྱི་ཁ་དོག་ལྔ། །དེ་ལྟར་ཆབ་ཕྲོམ་ལྔ་ཆུ་བབས་པ་ལྟར། །འོད་ཕུང་ཞུ་བའི་བདུད་རྩིའི་ཆུ་རྒྱུན་ནི། །ཇི་སེར་གྱི་ནི་དབུ་ལ་ཁྲུས་གསོལ་ཏེ། །དེ་དོན་སྔོན་ཚེ་བདུད་རྒྱལ་ལྷ་སྦྱིན་གྱིས། །སྐྱོགས་ཆེན་བཅས་ནས་ཐུབ་པའི་སྟེང་དུ་འཕངས། །ཕྱག་ན་རྡོ་རྗེས་རྡོ་རྗེ་འཕང་བའི་དུས། །སྐྱོགས་ཆེན་ལ་ཕོག་དུམ་བུ་གསུམ་དུ་
བཅག །ཛཾ་བྷ་སེར་པོས་ཐུབ་པར་གནོད་དོགས་པས། །སྐུ་ལུས་བཀབ་པས་ཛ་བྷའི་དབུ་ལ་ཕོག །བདུད་ཀྱིས་བྱས་པའི་རྨ་དེ་སོས་རྒྱུ་མེད། །རྨ་དེ་བཀྲུ་བའི་ཚུལ་ནི་ཡིན་མོད་སྐད་། །ཆུ་ནི་འཆོར་བ་བརྒྱ་རྩ་ཕུལ་དགོས་ཀྱང་། །དེང་སང་སྔགས་ནི་བརྒྱ་རྩ་མ་ཚར་བར། །ཆུ་ནི་ཕྱུར་བས་ཆོག་པ་ཕྱག་ལེན་ཡིན། །དེ་ལྟར་བྱས་ན་དངོས་གྲུབ་སྩོལ་བ་ནི། །ཛོ་སེར་བསྟོད་པ་འདོད་གསོལ་མཛད་པའི་རྗེས། །ཇི་སེར་འོད་ཞུ་ཛཾ་ཡིག་གསེར་གྱི་མདོག །རང་གི་སྤྱི་བོའི་གཙུག་ཏུ་ཐིམ་པར་བྷོ། །དེ་ཡིས་བསོད་ནམས་ཡར་ངོའི་ཟླ་ལྟར་འཕེལ།། ༈ ཇོ་ནག་བཏང་ལུགས་གོང་དང་འདྲ་ན་ཡང་། །མི་འདྲའི་ཁྱད་པར་ཟབ་ཁྱད་མན་ངག་ནི། །རང་ཉིད་ཕྱག་གི་བདུད་རྩིའི་ཆུ་རྒྱུན་དེ། །དང་པོ་རང་གི་ཞལ་དུ་སོང་བར་བསྒོམ། །རང་གི་ལུས་བརྒྱུད་བྱང་སེམས་ངོ་བོར་གྱུར། །རྡོ་རྗེ་རྩེ་ནས་མར་བྱུང་ལག་སྟེང་བྱུང་། །དེ་ཉིད་ཛཾ་ནག་ཞལ་དུ་སོང་བ་ཡིས། །སྐུ་ལུས་བདེ་བ་ཚད་མེད་སྐྱེས་པར་བྷོ། །དམིགས་པ་འདི་ནི་རྡོ་རྗེ་གདན་པའི་ལུགས། །གལ་ཏེ་ཆུ་སྦྱིན་ཡུན་རིང་བྱས་གྱུར་ན། །དངོས་གྲུབ་ཅི་ཡང་འབྱུང་བར་མ་གྱུར་ན། །ཛ་ནག་གནད་ལ་དབབ་པའི་མན་ངག་
ནི། །ཛཾ་ནག་ལྟེ་བར་ཡི་གེ་རཾ་དམར་པོ། །དེ་ལས་མེ་འབར་མེ་ལྕེ་ཞལ་དུ་བྱུང་། །ཤིན་ཏུ་སྐོམ་ཞིང་སྐུ་ལུས་སྐམ་ལ་ཁད། །དེ་ལ་ཆུ་དབུལ་སྐོམ་ཞི་བཀྲག་མདངས་རྒྱས། །ཛཾ་ལྷ་མཉེས་ནས་ནེའུ་ལེ་བཙིར་ནས། །རིན་ཆེན་སྣ་ཚོགས་ཆར་བབ་རང་གི་གནས། །ནོར་བུ་སྣ་ཚོགས་ཁྲ་ལྟེམ་གང་བར་བྷོ། །དེ་ནས་མཆོད་བསྟོད་འདོད་གསོལ་བྱ། །དེ་ནས་དངོས་གྲུབ་བླངས་བའི་བསམ་པ་ཡིས། །སྲིན་ལག་གཡས་པས་ཆུ་ལ་རེག་བྱ་སྟེ། །བཟའ་བཏུང་འདོད་ན་ལྕེ་ལ་རེག་པར་བྱ། །ནོར་སོགས་འདོད་ན་ལག་མཐིལ་གཡོན་རེག་བཅང་། །དབང་སྡུད་འདོད་ན་སྲིན་ལག་ཕྱོགས་བཞིར་གཏོར། །དེ་ནས་ཛཾ་ནག་འོད་ཞུ་ཧཱུྃ་དུ་གྱུར། །གཞི་ན་འདུག་ན་རྒྱབ་ཡོལ་ལ་བསྟིམ་མམ། །འཁོར་སློབ་མངའ་ཐང་འཕེལ་བར་གསུངས་པ་ཡིན། །ས་གཅིག་མི་འདུག་རང་གི་སྙིང་གར་བསྟིམ། །འདི་ཡི་ཡབ་ནི་རྒྱལ་པོ་རྣམ་ཐོས་སྲས། །དེ་ཕྱིར་འབྲུ་དང་རིན་ཆེན་འཕེལ་བར་གསུངས། །ཡུམ་ནི་ཀླུ་མོ་ཡིན་པས་ནོར་ཕྱུགས་འཕེལ། །ཀླུ་བརྒྱད་ལུས་ལ་བརྒྱན་པས་ཀླུ་ནད་ཞི། །རིམས་ནད་ཞི་བའི་ནོར་བུ་རིན་ཆེན་དེ། །གསང་རྡོར་གྱེན་དུ་བསླང་བའི་ནང་དུ་ཡོད། །དེ་ལ་
ཁྲུས་གསོལ་རིམས་ནད་ཞི་བར་བཤད། །ཆགས་ལོ་ནས་བརྒྱུད་ཛ་ནག་སྒྲུབ་ཐབས་ཀྱི། །དམིགས་འདི་ཟབ་ཁྱད་དེ་དག་རྣམས་ཀྱིས་འཐུས། །སྤྱིར་ནི་ཇོ་སེར་ཛ་ནག་ཛཾ་ལྷའི་རིགས། འདི་དག་མཆོད་པས་སངས་རྒྱས་ཐམས་ཅད་ནི། །མཆོད་པར་འགྱུར་ཞིང་ཐུབ་པས་རྗེས་སུ་བཟུང་། །གནོད་གནས་དབང་པོའི་རྟོགས་བརྗོད་ནས་བཤད་ཅིང་། །ཛཾ་བྷ་ལྷ་ལ་ཆུ་སྦྱིན་མ་བྱས་ན། །ཐུབ་པའི་ཉན་ཐོས་གྲལ་དུ་མི་གཏོགས་གསུངས། །ཛ་ལྷའི་གཏོར་མ་སྔོན་དུ་བཏང་བའི་དོན། །ཛཾ་བྷའི་ཆུ་སྦྱིན་བྱས་པའི་ཆུ་དེ་ནི། །ཅུང་ཟད་གཏོར་ཆུ་ནང་དུ་ཚུར་བསྲེས་ནས།། ༈ དེ་ནས་ཆ་བཅུ་ལ་སོགས་གཞན་བཏང་ན། །ཛཾ་བྷ་ལྷ་ནི་སྦྱིན་པའི་ལྷ་ཡིན་ཕྱིར། །མགྲོན་རྣམས་མཉེས་ཤིང་ཡི་དྭགས་རྣམས་ཀྱང་ཚིམ། །ཕན་ཡོན་ཤིན་ཏུ་ཆེ་བའི་ཟབ་གནད་ཡོད། །དེ་མིན་ཛཾ་བྷ་ལྷ་ཡི་ཆུ་དེ་ནི། །འཐུང་ཆུ་བྱས་ན་དངོས་གྲུབ་མྱུར་བ་དང་། །རྟ་ལུག་ནོར་ལ་བཏབ་ན་འཕེལ་བར་བཤད། །ཆུ་རྣམས་དོར་དུས་སྣོད་ཁ་ཕྱིར་མི་བསྟན། །ཕྱིར་བསྟན་གཡང་ཉམས་ནང་བསྟན་དངོས་གྲུབ་འབྱུང་། །ཛཾ་ལཾ་བྱ་ཁྱིར་བྱིན་ན་གཡང་ཉམས་ཏེ། །རང་གིས་བཟའ་འམ་རྟ་ནོར་རྣམས་ལ་བྱིན། །བ་ལང་གླང་དང་བོང་
བུར་བྱིན་མི་རུང་། །དེ་བས་ཁྱིམ་གྱི་ཕུག་ཏུ་སྦས་ན་ལེགས། །དེ་ཡིས་ཆུ་སྦྱིན་ཇི་གཏོར་ཞལ་གདམས་ཚང་།། ༈ དེ་ནས་གཏོར་མ་བརྒྱ་རྩའི་རིམ་པ་ལ། །རང་ཉིད་ཐུགས་རྗེ་ཆེན་པོར་ཡང་ཡང་བྷཻཾ། །པད་ཟླའི་སྟེང་དུ་རྡོ་རྗེ་སྐྱིལ་ཀྲུང་བཞུགས། །དམ་ཡེ་དབྱེར་མེད་སྐད་ཅིག་དྲན་རྫོགས་བྷཻཾ། །ཨ་མྲྀ་ཏ་ཡི་སྔགས་ནི་བརྗོད་ཙམ་གྱིས། །གཏོར་ནས་གཏོར་རིལ་གཏོར་ཆུ་ལ་ཕོག་པས། །མི་གཙང་འབག་བཙོག་དྲི་མ་དག་པར་བྷཻཾ། །བྱ་རྒྱུད་ཡིན་ཕྱིར་གཙང་སྦྲ་གལ་ཆེ་བར། །སྭ་བྷཱ་ཝ་ཡི་སྔགས་ནི་བརྗོད་ཙམ་གྱིས། །ཐེབ་ཙེ་ཆུ་དང་གཏོར་རིལ་ནས་འབྲུ་ཉུང་། །དངོས་པོར་འཛིན་པ་ཐམས་ཅད་སྟོང་པར་བསྒོམ། །ཐེབ་ཙེ་དེ་དག་རིན་ཆེན་སྣ་ཚོགས་སྣོད། །རེ་རེ་སྟོང་གསུམ་ཙམ་དུ་ཆེ་བའི་ནང་། །དམ་ཚིག་བདུད་རྩི་འོ་མ་ལྟ་བུས་གང་། །རང་ཉིད་ཐུགས་རྗེ་ཆེན་པོ་རི་རབ་ཙམ། །ཕྱག་གཡས་མཆོག་སྦྱིན་སྟེང་དུ་ཟླ་བའི་ཐོད། །ཨོཾ་དཀར་ཨཱཿདམར་ཧཱུྃ་མཐིང་བརྩེགས་མར་གནས། །དེ་གསུམ་ཞུ་བ་བདུད་རྩི་དཀར་དམར་མཐིང་། །གཏོར་མའི་ནང་བབ་ཡེ་ཤེས་བདུད་རྩིར་བསྒོམ། །ཟླ་བ་དང་བཅས་ཞུ་ནས་ཐིམ་པར་བསམ། །དེ་ནས་གཏོར་མ་བྱིན་
གྱིས་བརླབ་པ་ནི། །ཐེབ་ཙེ་ལྔའམ་ཡང་ན་དྲུག་ཀྱང་རུང་། །བཤམས་ཐེབ་རེ་ཡི་དུས་གཅིག་ཆོག་པ་ཡིན། །གཏོར་མ་བརྒྱ་རྩ་ཟེར་བའི་རྒྱུ་མཚན་ཉིད། །གཏོར་རིལ་དང་ནི་སྔགས་ཀྱི་གྲངས་མཉམ་སྟེ། །བླ་མ་ཡི་དམ་རྣམས་ལ་ཉེར་གཅིག་རེ། །ཆོས་སྐྱོང་ཡབ་ཡུམ་རྣམས་ལ་བཅུ་བཞི་ཡིན། །དེ་མིན་ཐེབ་ཙེ་བཅུ་ལ་བདུན་རེ་སྟེ། །བརྒྱ་དང་ལྔ་འགྲོ་སྔགས་གྲངས་རིལ་བུ་མཉམ། །ཞིབ་པར་བརྩིས་ན་མགྲོན་གྲངས་དེ་ཙམ་ཡོད། །དེ་ཕྱིར་བརྒྱ་རྩ་ཞེས་ནི་བྱ་བར་འདོད། །བདག་བསྐྱེད་ལྷ་བྷེ་བདག་སྒྲུབ་ཡིན་པ་སྟེ། །བཤམ་དང་གཏོར་མ་བྱིན་རླབས་རྫས་སྒྲུབ་ཡིན། །མགྲོན་རྣམས་སྤྱན་དྲངས་མགྲོན་སྒྲུབ་ཅེས་གསུངས་ཏེ། །མདུན་དུ་མེ་ཏོག་པདྨའི་སྡོང་པོ་ནི། །ཤིན་ཏུ་རྒྱ་ཆེ་ཡངས་པ་གཅིག་ཏུ་བྷཻཾ། །བསྡུ་ན་ཡིད་ཀྱིས་སྤྱན་དྲངས་ཆོག་པ་སྟེ། །རྒྱས་པར་བཞེངས་ཤིག་བཞེངས་ཤིག་ལ་སོགས་བརྗོད། །ཐུབ་དབང་ལ་སོགས་སངས་རྒྱས་བྱང་སེམས་དང་། །བླ་མ་ཡི་དམ་ལ་སོགས་དཀོན་མཆོག་མགྲོན། །ཐམས་ཅད་བྱོན་ནས་པདྨའི་སྡོང་དེ་ལ། །གཙོ་བོ་ཤཱཀ་ཐུབ་ལ་ནི་བསྐོར་བཞུགས་བྷཻཾ། །རྒྱས་པར་བཟང་སྤྱོད་སྨོན་ཐུང་འདོན་སྲོལ་ཡོད། །བསྡུ་ན་མཇུག་གི་ཡན་ལག་
བདུན་པས་ཆོག །དེ་ནས་བླ་མ་བརྒྱུད་པ་ལ་སོགས་བརྗོད། །རང་གི་ཐུགས་ལས་སྤྲུལ་པའི་མཆོད་པའི་སྤྲིན། །མེ་ཏོག་ལ་སོགས་དཔག་མེད་མཆོད་དམིགས་ཤིང་།། ཨརྒྱུ་ལ་སོགས་སྔགས་དང་ཏིང་ཤག་བྱ། །ཤེས་ན་སོ་སོའི་ཕྱག་རྒྱ་བྱས་ན་ལེགས། །བླ་མ་ཡི་དམ་སངས་རྒྱས་བྱང་སེམས་ཀྱི། །ལྗགས་ལས་འོད་ཀྱི་སྦུ་གུ་གཏོར་མར་ཟུགས། །བདུད་རྩི་དྲངས་ཤིང་གསོལ་བས་མཉེས་པར་བྷཻཾ། །སཾ་བྷ་ར་ལ་ཉི་ཤུ་རྩ་གཅིག་བཟླ། །བྱིན་གྱིས་རླབས་སོགས་འདོད་གསོལ་ཚར་མ་ཐག །པད་སྡོང་ཡར་སྐྱེས་ནམ་མཁའི་དབྱིངས་སུ་བཀྱག །དེ་སོགས་པད་སྡོང་པད་འདབ་རིམ་གསུམ་སྐྱེས། །ཆོས་སྐྱོང་ལ་སོགས་འོག་གི་གཏོར་མགྲོན་རྣམས། །མཚན་བརྗོད་ཙམ་གྱིས་རང་རང་སྐད་ཅིག་བྱོན། །མཐོ་དམན་དཀྱིལ་ཟུར་འཚམས་པའི་འདབ་མ་ལ། །སོ་སོར་བཞུགས་ནས་གཏོར་མ་གསོལ་བར་དམིགས། །འདི་ནི་བྱ་རྒྱུད་དགོངས་པ་འཁྲུལ་མེད་ཡིན། །དེ་ནས་རང་གི་ཐུགས་ལས་མཆོད་པའི་སྤྲིན། །དཔག་མེད་སྤྲུལ་ནས་ཆོས་སྐྱོང་སྲུང་མར་མཆོད། །ཨརྒྱུ་ལ་སོགས་ཕྱག་རྒྱ་ཏིང་ཤག་རྡེབ།་།སཾ་བྷ་བཅུ་བཞི་བརྗོད་ཚེ་ཆུ་ཕྱར་ཞིང་། །བསྟན་པ་བསྲུང་སོགས་འདོད་
གསོལ་བྱས་པའི་རྗེས། །ཐེབ་ཙེ་ལྔ་བས་མེད་ན་དོར་བྱ་ཞིང་། །དོར་ཚེ་དགེ་བ་འདི་ཡི་སྐྱེ་བོ་སོགས། །བསྔོ་བ་བྱ་དང་ཆོས་བཤད་མི་རུང་ངོ་། །ཐེབ་ཙེ་དྲུག་ཡོད་ན་ནི་དོར་མི་དགོས། །དེ་ཉིད་མན་ཆད་ཆ་ནི་བཅུ་པོ་ལ། །མགོ་ན་དེ་བཞིན་གཤེགས་པའི་མཚན་བརྗོད་ཅིང་། །རིགས་དྲུག་མ་གཏོགས་མགྲོན་རྣམས་སོ་སོ་ཡི། །མིང་ནས་བརྗོད་མ་ཐག་ཏུ་སྐད་ཅིག་བྱོན། །པད་འདབ་སྟེང་བཞུགས་གཏོར་མ་གསོལ་བར་དམིགས། །རིགས་དྲུག་རྣམས་ནི་ཚུར་ལ་མི་བཀུག་སྟེ། །བསྔོས་པ་ཙམ་གྱིས་སོ་སོའི་གནས་རྣམས་སུ། །སོ་སོར་ཅི་འདོད་ལོངས་སྤྱོད་ཐོབ་པར་བྷཻཾ། །དེ་དག་ཀུན་ལ་སྔགས་གྲངས་བདུན་རེ་རེ། །མཇུག་ཏུ་སོ་སོའི་འདོད་གསོལ་བྱ་བ་ཡིན། །དེ་རྗེས་ཆོས་རྣམས་ཐམས་ཅད་རྒྱུ་ལས་སོགས། །ཆོས་བཤད་བྱ་ཞིང་རྒྱ་མཚོར་ཆུ་དོར་བ། །དགེ་བ་འདི་སོགས་བསྔོ་བ་བརྗོད་བཞིན་དུ། །ཐེབ་ཙེ་བཤམ་པ་ཕྱག་ལེན་ཡིན་པའོ། །གཏོར་མ་བཏང་བ་ཟང་ཟིང་སྦྱིན་པ་སྟེ། །སྔོན་ཆད་ཆོས་སྒྲ་མ་ཐོས་འབྱུང་པོ་དང་། །ཡི་དྭགས་རྣམས་ལ་ཆོས་ཀྱི་སྦྱིན་པའི་ཕྱིར། །ཆོས་རྣམས་ཐམས་ཅད་རྒྱུ་ལས་བྱུང་སོགས་བརྗོད། །འདི་ནི་རྒྱ་སྐད་རྟེན་འབྲེལ་སྙིང་པོ་ཡིན། །
ཆོས་ཕུང་བརྒྱད་ཁྲི་བཞི་སྟོང་རྩ་བ་ཡིན། །དེ་ཡང་བཏང་ལུགས་གོ་རིམ་མང་ན་ཡང་། །དང་པོར་ཡི་དྭགས་དེ་ནས་བར་དོ་བཏང་། །དེ་ནས་ཇོ་སེར་ཛ་ནག་ལ་སོགས་ཏེ། །ཇི་ལྷའི་རིགས་རྣམས་སྐབས་དེར་བཏང་བ་ནི། །དེ་ཡང་ཇོ་དཀར་སྐུ་དང་ཛོ་དམར་གསུང་། །ཛཾ་ནག་ཐུགས་དང་ཇི་སེར་ཡོན་ཏན་དང་། །ཛ་ཁྲ་ཕྲིན་ལས་གོ་རིམ་བྱས་ན་ལེགས། །གོ་རིམ་ཇི་སྙེད་བྱས་ཀྱང་འགལ་བ་མེད། །དེ་ནས་ཐེབ་ཙེ་དྲུག་ནི་ཡིན་དོན་ནི། །ལན་གཉིས་བཤམས་པས་རྫོགས་པ་གྲྭ་སའི་ལུགས། །ལྔ་བས་མེད་ན་མཐའ་གཉིས་དབུས་དང་གསུམ། །གཏོར་རིལ་མི་བླུག་ཡོན་ཆབ་བཤམས་ལ་བཞག །བར་གྱི་གཉིས་པོ་གཏོར་རིལ་བླུགས་བྱས་ཏེ། །གཡོན་དུ་ཉེར་གཅིག་གཡས་སུ་བཅུ་བཞི་བླུག །ཉེར་གཅིག་བླ་མ་བཅུ་བཞི་ཆོས་སྐྱོང་ཡིན། །དེ་གཉིས་དོར་ཚེ་ཆོས་བཤད་མི་རུང་ངོ་། །དེ་རྗེས་བཤམས་ཐེབ་གཉིས་ཀྱིས་ཆ་བཅུ་རྫོགས། །གལ་ཏེ་ཐེབ་ཙེ་གཅིག་ལས་མེད་ན་ནི། །ཡི་དྭགས་བར་དོར་བཏང་ལ་བཤམ་པར་བྱ། །དེ་ནས་ཛ་ལྷ་ཀུན་བཏང་དངོས་གྲུབ་བླང་། །དེ་ནས་ཆ་བཅུ་དུས་གཅིག་བཤམ་པ་སྟེ། །ཆུ་དང་ནས་འབྲུ་ཁ་གསོ་འདོན་པས་ཆོག །དེ་དོར་
བཤམས་རྗེས་ཡི་དྭགས་བར་དོར་བཏང་། །ལན་བཞི་དོར་བས་ཐམས་ཅད་རྫོགས་པ་ཡིན། །དེ་རྗེས་འབུལ་གཏོར་འབྱུང་དང་གླུད་གཏོར་སོགས། །སྤྲོ་ན་གཏོང་གི་མེད་ཀྱང་ཚང་བ་ཡིན། །དེ་རྗེས་ཡི་དྭགས་བར་དོར་ལན་གཅིག་བཏང་། །མ་འབྱོར་པ་སོགས་བཤགས་པའི་ཚིགས་བཅད་བརྗོད། །ཡིག་བརྒྱ་བརྗོད་ན་ལེགས་ལ་མ་བརྗོད་རུང་། །ཁྱེད་ཀྱིས་སེམས་ཅན་དོན་ཀུན་སོགས། །གཤེགས་སུ་གསོལ་རྗེས་བཛྲ་མུ། །ཞེས་པས་ཡེ་ཤེས་པ་རྣམས་གཤེགས། །མཆོད་སྦྱིན་གནས་འདིར་གང་ལྷགས་པ་སོགས་བརྗོད། །སརྦ་བྷུ་ཏ་གཙྪས་འཇིག་རྟེན་པ་རྣམས། །མགྲོན་བོས་ཟས་ཀྱིས་ཚིམ་པ་ཇི་བཞིན་དུ། །འགྲངས་ཤིང་དགའ་ནས་རང་གནས་སོང་བར་བྷཻཾ། །བདག་བསྐྱེད་དང་པོ་དྲན་རྫོགས་ཡིན་པའི་ཕྱིར། །བསྡུ་ཆོག་མི་དགོས་སྒོམ་མཁན་ངོ་བོར་ལྟ། །གཏོར་མ་ཆ་བཅུའི་ནང་ནས་གལ་ཆེ་ཤོས། །ཕྱི་དང་ནང་གི་སྒྲིབ་པ་ཅན་ཞེས་པ། །མཁའ་ལ་རྒྱུ་བའི་འབྱུང་པོའི་གཏོར་མ་དེ། །ཐུབ་པ་ཉིད་ཀྱིས་དངོས་སུ་གསུངས་པ་ཡིན། །སངས་རྒྱས་བྱང་སེམས་རིག་འཛིན་གྲུབ་ལ་སོགས། །མདོ་ཚིག་ཟུར་ཙམ་ལ་ལར་གསལ་བར་ཡོད། །གཞན་རྣམས་བླ་མ་རྣམས་ཀྱིས་རིམ་པར་
བསྣན། །ནད་པ་སོགས་ཀྱི་རིམ་གྲོ་ཡིན་ན་ནི། །མཁའ་ལ་རྒྱུ་བའི་འབྱུང་པོའི་གཏོར་མ་དང་། །ལན་ཆགས་བུ་ལོན་གཉིས་པོ་མང་བར་བཏང་། །ཁང་ལས་ཆར་འབོད་ལ་སོགས་ཡིན་ན་ནི། །ཀླུ་དང་ས་བདག་གཉིས་པོ་མང་བར་བྱ། །ཉིན་རེ་བཞིན་དུ་ད་ནངས་ཆུ་གཏོར་དང་། །དོ་ནུབ་མཇུག་ཏུ་ཆུ་གཏོར་གཅིག་བཏང་ཞིང་། །དེ་མིན་ཉིན་རེ་བརྒྱ་རྩ་ཁོ་ན་ཝིག །ཚར་གྲངས་ཁྲི་ཕྲག་བཅུ་ནི་འབུམ་ཡིན་ཏེ། །དེ་འདྲ་ཚོགས་པ་མང་ན་མ་གཏོགས་པ། །རེ་ཟུང་གིས་ནི་ཐོན་པའི་དུས་མ་མཆིས། །དེང་སང་རང་དོན་འབུམ་ཐེར་གསོག་མཁན་རྣམས། །སཾ་བྷ་ར་ཡི་སྔགས་གྲངས་འབུམ་ཐེར་ཏེ། །ཚར་གཅིག་ལ་ནི་སྔགས་གྲངས་བརྒྱ་རྩ་འགྲོ། །ཚར་བརྒྱ་ལ་ནི་སྔགས་གྲངས་ཁྲི་ཕྲག་ལྷག །ཚར་སྟོང་ལ་ནི་སྔགས་གྲངས་འབུམ་ལྷག་ཙམ། །དེ་ཕྱིར་དེང་སང་གཏོར་མ་ཚར་སྟོང་ལ། །གཏོར་མ་འབུམ་ཐེར་ཡིན་པ་བརྩི་སྲོལ་གདའ། །འདིར་ནི་ཚར་གྲངས་གཙོ་བོ་མི་བྱེད་ཅིང་། །སཾ་བྷ་ར་ཡི་སྔགས་གྲངས་གཙོར་འཛིན་པས། །གཏོར་མ་འབུམ་ཐེར་ཡིན་པ་ཞེས་སུ་གྲགས། །ཚར་གྲངས་ཅི་སྨོས་སྔགས་གྲངས་འབུམ་ལ་སོགས། །རིལ་བུ་ཆུ་ཐིགས་འབུམ་གྱི་གྲངས་
བསོགས་ནས། །གཏོར་མ་འབུམ་ཐེར་ཡོན་ནི་ལེན་སྲོལ་བྱུང་། །དེ་ནི་ཉེས་པ་ཆེ་ཞེས་མཁས་པས་སྨད། །ཨོཾ་ནི་ཡེ་ཤེས་ལྔ་ཡི་རང་བཞིན་ཏེ། །ཛ་ལ་འོད་ཀྱི་མེས་ནི་ཞི་བར་བྱེད། །མི་དཾ་སེར་སྣ་འཇུར་བགེགས་བྱས་པ་ཚིམ། །སརྦ་པྲ་ཏ་ཡི་དྭགས་ཐམས་ཅད་དེ། །བྱུ་ནི་ལས་དང་ཉོན་མོངས་ཞི་བར་བྱེད། །སྭཱ་ཧཱ་བཀྲེས་སྐོམ་འཇིགས་སྐྲག་ཞི་བའི་དོན། །རྒྱུད་ལ་སཾ་བྷ་ར་ནི་སྔོན་ལ་ཡོད། །དེ་བཞིན་གཤེགས་པའི་མཚན་ནི་རྗེས་ལ་གསུངས། །རྒྱུད་ལྟར་བྱ་དགོས་པཎ་ཆེན་གསུངས་ན་ཡང་། །འདི་ནི་མགྲོན་དང་གཏོར་མ་བྱིན་རླབས་ཡིན། །རིན་ཆེན་མང་ནི་གཏོར་མ་འདོད་ཡོན་གྱུར། །གཟུགས་མཛེས་དམ་པས་ཡི་དྭགས་གཟུགས་ངན་རྣམས། །གཟུགས་བཟང་ཁ་ཆེ་མགྲིན་པ་ཡངས་པར་གྱུར། །འབྱམས་ཀླས་ཀྱིས་ནི་གནོད་སེམས་གདུག་རྩུབ་ཞི། །འཇིགས་བྲལ་གྱིས་ནི་སྐྲག་འཇིགས་སྡུག་བསྔལ་སེལ། །དེ་ལྟར་མཚན་བཞིས་གཏོར་མགྲོན་བྱིན་གྱིས་བརླབས། །དེ་ནས་གཟི་བརྗིད་ཚད་མེད་གཟུངས་སྔགས་ཀྱིས། །བསྔོས་པས་མགྲོན་ཀུན་ཚིམས་ཏེ་མཉེས་པ་ཡིན། །དེ་ལྟར་གཏོར་མ་ཆ་བཅུའི་དམིགས་རིམ་འདི། །པདྨ་སྟོབས་བཅུ་ལ་སོགས་འགའ་ཞིག་ལ། །ཕན་པའི་
གདམས་པ་རཱ་ག་ཨ་སྱས་བརྩམས། །མཐར་ཕྱིན་ཞེས་བྱས་རང་གཞན་དོན་དུ་བྲིས། །འགལ་འཁྲུལ་གང་མཆིས་མཁས་པའི་དྲུང་དུ་བཤགས། །དགེ་བས་བློ་དམན་འགའ་ལ་ཕན་པར་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།