ལོ་ཡག་པ་ལ་ཕན་པའི་གདམས་ངག་བྱང་ཆུབ་སེམས་དཔའ་སའི་སྙིང་པོ་དང་ལྷ་མོ་ཆེན་མོ་དཔལ་མཆོད་ཅིང་སྒྲུབ་ཐབས།
ལོ་ཡག་པ་ལ་ཕན་པའི་གདམས་ངག་བྱང་ཆུབ་སེམས་དཔའ་སའི་སྙིང་པོ་དང་། ལྷ་མོ་ཆེན་མོ་དཔལ་མཆོད་ཅིང་སྒྲུབ་ཐབས་བཞུགས་སོ།།
ན་མོ་ལོ་ཀེ་ཤྭ་ར་ཡེ། བཅོམ་ལྡན་ཐུགས་རྗེ་ཅན་ལ་ཕྱག་འཚལ་ནས། །འགྲོ་ལ་ཕན་ཕྱིར་ལོ་རིམ་བྱ་བའི་ཐབས། །རྒྱུད་དང་མན་ངག་མང་པོའི་དོན་བསྡུས་བཤད། །ཚེ་ལོ་སུམ་ཅུ་པ་ལ་མུ་གེ་འབྱུང་། །ལོ་ཐོག་མི་སྐྱེ་ཆར་དཀོན་སྐྱེ་འཁྲུངས་ཞན། །བཙའ་རིགས་འདི་དང་གྲ་སྐྱ་འབུ་སྲིན་དང་། །བཙའ་སད་སེར་བས་འབྲུ་རྣམས་མེད་པར་བྱེད། །དེ་སྐད་ཨོ་རྒྱན་རྗེ་ཡི་ལུང་བསྟན་ནས། །དེ་དུས་འགྲོ་ལ་གདམས་པ་འདིས་ཕན་ཤོག །ཡོད་ན་ས་སྙིང་གཙོ་འཁོར་ཐང་སྐུ་བཤམས། །མེད་ན་གཙང་མའི་དབུས་སུ་རྡུལ་ཚོན་གྱིས། །པདྨ་འདབ་བཞི་བྲིས་ན་ལེགས་པ་སྟེ། །ཡང་ན་འབྲུ་ཡི་ཚོམ་བུ་ལྔ་ཙམ་བཀོད། །དེ་མཐར་མཆོད་པ་རྣམ་ལྔ་ལྷ་བཤོས་བཅས། །སྣོད་གཙང་ནང་དུ་ཤ་ཆང་མ་འདྲེས་པའི། །དཀར་གསུམ་བརྒྱན་
པའི་གཏོར་མ་ཟླུམ་པོ་ནི། །ཆེ་བ་གཅིག་ལ་ཆུང་བ་བཞིས་བསྐོར་བཤམས། །མཆོད་པ་འབུལ་རྒྱུའི་ནས་ནི་མང་པོ་དང་། །མཎྜལ་ཡོད་བྱད་དེ་རུ་ཚགས་བྱས་ཤིང་། །སྔོན་འགྲོ་ལྕོག་རྡོག་བཤམས་ལ་གྱེར་བསྒོམ་བྱ། །བླ་མ་དཀོན་མཆོག་གསུམ་ལ་སྐྱབས་སུ་མཆི། །འགྲོ་བ་མུ་གེའི་འཇིགས་པ་བསལ་བའི་ཕྱིར། །བདག་གི་བྱང་སེམས་ས་སྙིང་བསྒྲུབ་པར་བྱ། །སྟོང་པའི་ངང་ལས་པདྨ་ཟླ་བའི་སྟེང་། །ཀིཾ་ཡིག་དཀར་པོའི་འོད་ཀྱིས་འཕགས་པ་མཆོད། །སེམས་ཅན་དོན་བྱས་ཚུར་འདུས་ཡོངས་གྱུར་ལས། །རང་ཉིད་བྱང་སེམས་ས་ཡི་སྙིང་པོ་དཀར། །ཞལ་གཅིག་ཞི་འཛུམ་ཐོར་ཚུགས་དབུ་རྒྱན་མཛེས། །
ཕྱག་གཡས་འབྲས་ཀྱི་མྱུ་གུ་ཐུགས་ཀར་འཛིན། །གཡོན་པས་དྲིལ་བུ་དཀུར་བརྟེན་ཕྱེད་སྐྱིལ་བཞུགས། །དར་དང་རིན་ཆེན་དུ་མས་སྐུ་ལ་བརྒྱན། །གནས་གསུམ་འབྲུ་གསུམ་ཐུགས་ཀའི་ཀྵ་ཡིག་ལས། །འོད་འཕྲོས་ཡེ་ཤེས་སྤྱན་དྲངས་གཉིས་མེད་ཐིམ། །དབང་ལྷས་དབང་བསྐུར་རིགས་བདག་དབུར་བརྒྱན་པའི། །ཐུགས་ཀར་ཟླ་སྟེང་ཀྵ་ཡིག་ཐ་མ་ལ། །སྔགས་ཀྱིས་གཡས་སུ་བསྐོར་བས་འོད་ཟེར་འཕྲོས། །སངས་རྒྱས་ཀུན་མཆོད་འགྲོ་བའི་སྒྲིབ་པ་བསལ། །ཁྱད་པར་ལོ་ཐོག་ལ་གནོད་ལོ་ནད་ཀུན། །བ་མོར་ཉི་ཟེར་ཕོག་ལྟར་སང་སང་དག །བདག་གི་ལོ་ཐོག་ཕུན་སུམ་ཚོགས་པར་གྱུར། །ཨོཾ་ཀྵི་ཧི་ར་ཙ་ཡ་སྭཱ་ཧཱ། ཞེས་བརྒྱ་རྩ་བརྒྱད་བཟླས། དེ་ནས་མདུན་བསྐྱེད་ཀྱི་ཐོག་མར་ཆངས་བུ་ལྕོག་རྡོག་བྲན་ལ། །གྷོལས་རིན་ཆེན་སྣོད་དུ་ལོ་ཡི་གླུད། །འདོད་ཡོན་སྣ་ཚོགས་ཕུན་སུམ་ཚོགས་པ་ནི། །ཨོཾཨཱཿཧཱུྃ་གིས་ཟད་མེད་བདུད་རྩིར་གྱུར། །ཚེ་སྔོན་ལས་དང་འཕྲལ་རྐྱེན་ལས་བྱུང་བའི། །ལོ་ཐོག་རྣམས་ལ་གནོད་པའི་བགེགས་རིགས་རྣམས། །དཀོན་མཆོག་བདེན་པས་ཊཀྐི་ཧཱུྃ་ཛཉཁུག །མཐུན་རྫས་འདོད་ཡོན་གཏོར་མ་འདི་བཞེས་ལ། །ཕྱིན་ཆད་ལོ་ཐོག་རྣམས་
ལ་གནོད་མ་བྱེད། །ས་བོན་ཁ་མངར་འབྲས་བུ་སོ་སོར་སྨིན། །དེ་བཞིན་དགེ་སྡིག་འབྲས་བུ་མི་བསླུ་བས། །གླུད་གཏོར་འདི་ཁྱེར་མ་གནོད་གཞན་དུ་དེངས། །༈ ཨོཾ་སརྦ་བིགྷཾ་བ་ལིཾ་ཏ་ཁཱ་ཧི་ཁཱ་ཧི། ཨརྒྷཾ་སོགས་ནས། སརྦ་བིགྷཾ་གཙྪགཙྪ། ཞེས་ཕྱི་རོལ་དུ་དོར་རོ། །ཨོཾ་ཨ་མྲྀ་ཏེ་ཧཱུྃ་ཕཊ། ཨོཾ་སྭ་བྷ་ཝ་སོགས། སྟོང་པའི་ངང་ལས་མདུན་འདིར་རང་གི་ཞིང་། །ཐམས་ཅད་ཕྱོགས་གཅིག་གསལ་བའི་དབུས་ཉིད་དུ། །པཾ་ལས་པདྨའི་སྡོང་པོ་ཡལ་ག་དང་། །ལོ་འབྲས་མེ་ཏོག་ཕུན་སུམ་ཚོགས་པའི་དབུས། །སྣ་ཚོགས་པདྨ་འདབ་མ་འབུམ་ལྡན་དབུས། །ཟེའུ་འབྲུར་ཟླ་བའི་དཀྱིལ་འཁོར་རྒྱས་པའི་སྟེང་། །འབྲས་ཀྱི་མྱུ་གུ་ཀྵཡིག་མཚན་པ་ལ། །འོད་འཕྲོས་འཕགས་མཆོད་སེམས་ཅན་དོན་ཀུན་བྱས་། །ཚུར་འདུས་འོད་ཞུ་ཡོངས་སུ་གྱུར་པ་ལས། །སེམས་དཔའ་ཆེན་པོ་ས་ཡི་སྙིང་པོ་ནི། །སྟོན་ཟླའི་མདོག་ཅན་ཞལ་གཅིག་ཕྱག་གཉིས་པ། །ཞལ་གཅིག་ཞི་འཛུམ་སྤྱན་གཉིས་ཞིང་ལ་གཟིགས། །ཕྱག་གཉིས་གཡས་པས་མྱུ་གུ་ཐུགས་ཀར་འཛིན། །གཡོན་པས་དྲིལ་བུ་དཀུར་བརྟེན་ཕྱེད་སྐྱིལ་བཞུགས། །ཐོར་ཚུགས་དབུ་རྒྱན་ཕྱག་གདུབ་ཞབས་
གདུབ་དང་། །མགུལ་རྒྱན་དཔུང་རྒྱན་སྟོད་གཡོགས་སྨད་དཀྲིས་སོགས། །སྣ་ཚོགས་དར་དང་རིན་ཆེན་དུ་མས་བརྒྱན། །དེ་ཡི་གཡས་སུ་ལྷ་མོ་ནོར་རྒྱུན་མ། །གསེར་མདོག་ཕྱག་གཡས་མཆོག་སྦྱིན་ཕྱག་རྒྱུ་དང་། །གཡོན་པས་འབྲས་ཀྱི་སྙེ་མ་ཐུགས་ཀར་འཛིན། །གཡོན་དུ་ལྷ་མོ་དཔལ་ནི་སྐུ་མདོག་ལྗང་། །ཕྱག་གཡས་རིན་ཆེན་མཚན་པའི་པདྨ་དང་། །གཡོན་པས་སྐྱབས་སྦྱིན་ཕྱག་རྒྱ་གདན་ལ་བརྟེན། །མདུན་དུ་ས་ཡི་ལྷ་མོ་བརྟན་མ་ནི། །གསེར་མདོག་ཕྱག་གཉིས་ཐལ་སྦྱར་བུམ་པ་འཛིན། །དེ་གསུམ་ཕྱེད་སྐྱིལ་དར་དང་རིན་ཆེན་བརྒྱན། །གཙོ་བོའི་རྒྱབ་ཕྱོགས་དབུས་སྟེང་པད་ཟླའི་སྟེང་། །སངས་རྒྱས་རིན་ཆེན་མེ་ཏོག་ཡོན་ཏན་གྱི། །རྒྱ་མཚོ་བཻཌཱུརྱ་དང་གསེར་གྱི་རི། །ཁ་དོག་བཟང་པོ་གསེར་དུ་སྣང་བའི་དཔལ། །གསེར་མདོག་ཆོས་གོས་རྣམ་གསུམ་སྐུ་ལ་གསོལ། །མཆོག་སྦྱིན་མཉམ་བཞག་རྡོ་རྗེའི་སྐྱིལ་ཀྲུང་བཞུགས། །མཐའ་བསྐོར་དཔལ་གྱི་ལྷ་མོ་གྲོགས་མོ་བརྒྱད། །གསེར་གྱི་མདོག་ཅན་སྙེ་མ་བུམ་པ་འཛིན། །ཀུན་ཀྱང་གནས་གསུམ་ཡིག་འབྲུ་གསུམ་པོ་དང་། །རང་རང་ས་བོན་རྣམས་ལས་འོད་འཕྲོས་པས། །རང་
བཞིན་གནས་དང་ལྕང་ལོ་ཅན་སོགས་ནས། །ལོ་ལ་ཕན་བྱེད་ལྷ་ཚོགས་སྤྱན་དྲངས་གྱུར། །ཧཱུྃ། འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །སངས་རྒྱས་རིན་ཆེན་ཡོན་ཏན་རྒྱ་མཚོ་ཡི། །བཻཌཱུརྱ་དང་གསེར་རི་ཁ་དོག་བཟང་། །གསེར་དུ་སྣང་བའི་དཔལ་ཞེས་བཅོམ་ལྡན་འདས། །ལྷ་མོ་དཔལ་ཆེན་མོ་ཡི་བཤེས་གཉེན་ཁྱོད། །གཤེགས་དང་བཞུགས་པའི་མཚན་མ་མི་མངའ་ཡང་། །ཆུ་ཟླ་བཞིན་དུ་གནས་འདིར་སྣང་བར་མཛོད། །མངོན་དགའ་ལ་སོགས་དག་པའི་ཞིང་ཁམས་ནས། །བྱང་ཆུབ་སེམས་དཔའ་ཆེན་པོ་ས་ཡི་སྙིང་། །བདག་སོགས་འགྲོ་ལ་ཐུགས་རྗེས་བརྩེར་དགོངས་ལ། །ཁྱེད་བཞེད་འགྲོ་དོན་མཛད་ཕྱིར་འདིར་གཤེགས་ཤིག །རི་རབ་ཆེན་པོའི་བྱང་ཕྱོགས་ལྟུང་ལོ་ཅན། །བསོད་ནམས་མེ་ཏོག་འོད་ཀྱི་སྐྱེད་མོས་ཚལ། །རིན་ཆེན་ཁང་བཟང་གསེར་གྱི་རྒྱལ་མཚན་ནས། །ལྷ་མོ་ཆེན་མོ་དཔལ་མོ་གཤེགས་སུ་གསོལ། །ལྕང་ལོ་ཅན་་གནས་རྒྱལ་པོའི་ཕོ་བྲང་ནས། །ནོར་རྒྱུན་ལྷ་མོ་འཁོར་བཅས་གཤེགས་སུ་གསོལ། །འོག་གཞི་དབང་ཆེན་གསེར་གྱི་དཀྱིལ་འཁོར་ནས། །ས་ཡི་ལྷ་མོ་བརྟན་མ་གཤེགས་སུ་
གསོལ། །གསེར་འོད་ལ་སོགས་མདོ་སྡེའི་གླེང་གཞི་ནས། །ཁྱེད་བཞེད་འགྲོ་དོན་མཛད་པ་འདིར་ལགས་པས། །གློག་ལྟར་སྐད་ཅིག་ཡུད་ཀྱིས་འདིར་བྱོན་ཅིག །ཨོཾ་སརྦ་ཏ་ཐཱ་ག་ཏ་ཀཱི་ཧི་ར་ཙ་དེ་ཝཱི་ཤྲཱི་བཱ་སུ་དྷ་རི་པྲི་ཐི་དེ་ཝཱི་ས་པཱ་རི་ཝཱ་ར་བཛྲ་ས་མཱ་ཛཿ བཅོམ་ལྡན་འདས་དང་བྱང་སེམས་ས་ཡི་སྙིང་། །ལྷ་མོ་ཆེན་མོ་དཔལ་དང་ནོར་རྒྱུན་མ། །བརྟན་མ་གནོད་སྦྱིན་མོ་བརྒྱད་བཅས་པ་རྣམས། །འགྲོ་བའི་དོན་དུ་འདིར་ནི་བྱོན་པ་ལེགས། །བདག་དང་ཡོན་བདག་དམིགས་ཡུལ་ཞིང་རྣམས་ཀྱི། །དབུས་སུ་ཡིད་སྤྲུལ་པད་ཟླའི་གདན་ལ་བཞུགས། །གྲངས་མེད་བསྐལ་པའི་སྔོན་ནས་ཐུགས་བསྐྱེད་ཅིང་། །སྨོན་ལམ་རྒྱ་ཆེན་ཇི་ལྟར་བཏབ་པ་དང་། །ཁྱད་པར་ས་སྙིང་འཁོར་ལོ་བཅུ་པའི་མདོ། །གསེར་འོད་དམ་པ་ལྷ་མོ་དཔལ་གྱི་མདོ། །གར་མཁན་མཆོག་གི་རྟོགས་པ་ལ་སོགས་ནས། །ཇི་ལྟར་ཞལ་བཞེས་ཐུགས་དམ་རྗེས་དགོངས་ལ། །བདག་དང་བདག་གིས་བསྲུང་བྱ་འདི་དག་གི །གྲོ་ནས་བྲ་སྲན་ཡུངས་སོགས་ལོ་ཐོག་རྣམས། །ཤིན་ཏུ་ལེགས་ཤིང་ཕུན་སུམ་ཚོགས་པར་མཛོད། །ཨོཾ་བཛྲ་ས་མ་ཡ་ཧཱུྃ། ཏིཥྛ་ལྷན། ཧཱི༔ དབང་ལྷ་སྤྱན་དྲངས་
དབང་བསྐུར་དྲི་མ་དག །ཐུབ་དབང་བལྟམས་ཚེ་ཀླུ་ཡིས་ཁྲུས་གསོལ་ལྟར། །རིན་ཆེན་སྤོས་ཆུ་མང་པོས་སྐུ་ཁྲུས་གསོལ། །ཆུ་ལྷག་ཡར་ལུད་རྣམ་སྣང་དབུར་བརྒྱན་གྱུར། །ལྷ་མོ་གསུམ་ལ་རིན་འབྱུང་དབུར་བརྒྱན་གྱུར། །བཅོམ་ལྡན་བལྟམས་ཚེ་ལྷ་ཡི་རས་ཕུལ་ལྟར། །རས་དཀར་འཇམ་ལ་སྣུམ་པས་སྐུ་ཕྱིའོ། །ཤཱཀ་ཐུབ་རབ་ཏུ་བྱུང་ཚེ་ས་ཡི་ལྷས། །ངུར་སྨྲིག་ན་བཟའ་སྲབ་འཇམ་ཕུལ་བ་ལྟར། །སྣ་ཚོགས་དར་དང་ཟབ་ཆེན་རབ་བཟང་ཕུལ། །བདག་ཅག་དཔོན་སློབ་བསྲུང་བྱ་འཁོར་བཅས་ཀྱིས། །རྡུལ་གཅིག་སྟེང་ན་རྡུལ་སྙེད་ལུས་སྤྲུལ་ནས། །བཅོམ་ལྡན་དེ་བཞིན་གཤེགས་པ་དགྲ་བཅོམ་པ། །ཡང་དག་རྫོགས་པའི་སངས་རྒྱས་རིན་པོ་ཆེ། །མེ་ཏོག་ཡོན་ཏན་རྒྱ་མཚོ་བཻཌཱུར། །གསེར་གྱི་ཁ་དོག་བཟང་པོ་གསེར་དུ་སྣང་། །དཔལ་ཞེས་བྱ་བ་དེ་ལ་ཕྱག་འཚལ་ལོ། །ས་བཅུའི་བྱང་ཆུབ་སེམས་དཔའ་སེམས་དཔའ་ཆེ། །ས་ཡི་སྙིང་པོའི་ཞབས་ལ་ཕྱག་འཚལ་ལོ། །ལྷ་མོ་ཆེན་མོ་དཔལ་དང་ནོར་རྒྱུན་མོ། །ས་ཡི་ལྷ་མོའི་ཞབས་ལ་ཕྱག་འཚལ་ལོ། །དཔལ་གྱི་ལྷ་མོ་གྲོགས་མོ་བརྒྱད་ལ་སོགས། །འཁོར་དང་བཅས་པ་
རྣམས་ལ་ཕྱག་འཚལ་ལོ། །ཧཱུྃ་ལས་རིན་ཆེན་སྣོད་དུ་མཆོད་རྫས་འདི། །དྭངས་ཤིང་ཐོག་མེད་ཀུན་བཟང་མཆོད་པའི་སྤྲིན། །དཀར་གསུམ་མངར་གསུམ་བདུད་རྩིའི་རྒྱ་མཚོར་གྱུར། །ཨོྃ་ཨཱ༔ཧཱུྃ་གིས་ཟག་མེད་བདུད་རྩིར་བསྒྱུར། །ཨོཾ་བཛྲ་སྤ་ར་ཎ་ཁཾ། གསེར་གྱི་ས་གཞི་གླིང་བཞི་གླིང་ཕྲན་བཅས། །གསེར་གྱི་རི་བདུན་རི་རབ་རྒྱལ་སྲིད་བདུན། །ཉེར་སྤྱོད་སྣ་བདུན་གཟུགས་སྒྲ་དྲི་རོ་རེག །ལྔ་ཕྲག་ལྔ་དང་བཀྲ་ཤིས་རྫས་རྟགས་བརྒྱད། །དངོས་སུ་འབྱོར་དང་ཡིད་ལས་སྤྲུལ་པའི་ཚོགས། །འཇིག་རྟེན་འདིའམ་འཇིག་རྟེན་གཞན་དག་ན། །མ་རྨོས་ལོ་ཐོག་ལྷ་ཡི་བདུད་རྩི་བཞིན། །དཔག་བསམ་ལྗོན་ཤིང་དར་ཟབ་ལྷ་ཡི་གོས། །རིན་ཆེན་རི་བོ་གསེར་གྱི་བྱེ་མ་དང་། །ཁྲུས་ཀྱི་རྫིང་བུ་ཡན་ལག་བརྒྱད་ལྡན་ཆུ། །བློ་ཡིས་བླངས་ཏེ་མཆོད་པའི་རྫས་སུ་དམིགས། །ཁྱད་པར་བདག་དང་བདག་གི་བསྲུང་བྱ་ཡི། །རི་ཞིང་ཐང་ཞིང་ས་བོན་ལྗང་བུར་བཅས། །སྙེ་མ་འབྲུ་དང་བཅས་པ་མཆོད་པར་འབུལ། །རིན་ཆེན་སྣོད་དུ་དཀར་གསུམ་བདུད་རྩི་མཚོ། །ཁ་དོག་དྲི་རོ་ནུས་པ་ཕུན་ཚོགས་འབུལ། །ཨོཾ་ན་མོ་བྷ་ག་ཝ་ཏེ་རཏྣ་པུངྒེ་ཀ་མ་ལ་གུ་ཎ་ས་མུ་དྲ་
ཁེཌཱུརྱ་ཨི་དམ་བ་ལིཾ་ཏ་ཁ་ཁ་ཁཱ་ཧི། ཨོཾ་ཀྵི་ཧི་ར་ཙ་ཨི་དམ་བྷ་ལིཾ་ཏ་ཁ་ཁ་ཁཱ་ཧི། ༀ་བྷ་སུ་དྷ་རི་ནི་ཨི་དམ༔ ཨོཾ་དེ་ཝི་ཤྲཱི་ཡེ་ཨི་དམ༔ ཨོཾ་པྲི་ཐི་ཝི་དེ་ཝི་ཨི་དམ༴ ཨརྒྷཾ་སོགས་ནས། ཤབྲ་སརྦ་པཱུ་ཛ་པྲ་ཏཱིཙྪ་སྭཱ་ཧཱ། ཨོཾ་ཨཱཿཧཱུྃ། འདས་པའི་སངས་རྒྱས་བཅོམ་ལྡན་དེ་བཞིན་གཤེགས། །རིན་ཆེན་མེ་ཏོག་ཡོན་ཏན་རྒྱ་མཚོ་ཡི། །བེཟླུརྒྱ་དང་གསེར་གྱི་ཁ་དོག་བཟང་། །གསེར་དུ་སྣང་བའི་དཔལ་ལ་ཕྱག་འཚལ་ལོ། །གང་ཞིག་ཞིང་ནི་བཟང་ངམ་ངན་ཡང་རུང་། །ས་བོན་བཏབ་ནས་སོ་ནམ་མ་བྱས་ཀྱང་། །ཁྱེད་ལ་མཆོད་ཅིང་རྩེ་གཅིག་གསོལ་བཏབ་ན། །ལོ་ལེགས་འབྲུ་རྣམས་འཕེལ་མཛད་ཐུགས་རྗེ་ཅན། །ས་ཡི་སྙིང་པོའི་ཞབས་ལ་ཕྱག་འཚལ་བསྟོད། །གཞན་ཡང་ཁྱེད་ལ་མཆོད་ཅིང་གསོལ་བཏབ་ན། །སྡུག་བསྔལ་ཀུན་བྲལ་བཟའ་བཏུང་གང་འདོད་རྙེད། །ནོར་དང་ཡོ་བྱད་ཡིད་ལ་གང་འདོད་འབྱུང་། །མངོན་ཤེས་ལྔ་པོ་ནོར་དང་ལོངས་སྤྱོད་འཕེལ། །བྱང་སེམས་ས་སྙིང་ཁྱོད་ལ་ཕྱག་འཚལ་བསྟོད། །ཁྱོད་ཀྱི་མཚན་བརྗོད་ཕྱག་འཚལ་མཆོད་པ་ཡི། །དགྲ་དང་ནད་དང་འཐབ་རྩོད་ཀུན་དང་བྲལ། །གསོད་པར་ཤོམ་ཡང་བཙོན་
དང་གདོན་ལས་ཐར། །སྨྱོ་འབོག་དུག་སྦྲུལ་གཅན་གཟན་ཀུན་ལས་ཐར། །མེ་ཆུ་གཡང་ས་གཡུལ་ངོ་འཇིགས་ལས་ཐར། །འཇིགས་པ་ཀུན་སྐྱོབས་ས་བཅུའི་བྱང་ཆུབ་སེམས། །ས་ཡི་སྙིང་པོའི་ཞབས་ལ་ཕྱག་འཚལ་བསྟོད། །ཁྱེད་ལ་རྩེ་གཅིག་ཐེ་ཚོམ་མེད་པ་རུ། །གསོལ་བ་བཏབ་ན་ལོང་བས་གཟུགས་ཀྱང་མཐོང་། །འོན་པས་སྒྲ་ཐོས་ལྐུགས་པས་སྨྲ་བ་ཤེས། །སྨྱོན་པས་དྲན་པ་རྙེད་ཅིང་ཉོན་མོངས་ཞི། །ས་ཡི་སྙིང་པོའི་ཞབས་ལ་ཕྱག་འཚལ་བསྟོད། །བདག་དང་བདག་གི་བསྲུང་བྱ་སྦྱིན་བདག་བཅས། །ཁྱེད་ལ་མཆོད་ཅིང་ཕྱག་འཚལ་བསྟོད་ལགས་ཀྱི། །གྲོ་ནས་བྲ་སྲན་ཡུངས་སོགས་ལོ་ཏོག་རྣམས། །ལོ་ལེགས་འབྲུ་ཚོགས་འཕེལ་བའི་དངོས་གྲུབ་སྩོལ། །བཙའ་སད་སེར་གསུམ་གྲ་སྐྱ་འབུ་སྲིན་དང་། །ཞིང་དང་ལོ་ཐོག་ལ་གནོད་བགེགས་ཀྱི་ཚོགས། །ཐམས་ཅད་ཞི་ཞིང་མེད་པར་མཛད་དུ་གསོལ། །གཞན་ཡང་འཇིགས་པ་ཀུན་ལས་ཐར་བ་དང་། །ཕུན་སུམ་ཚོགས་པའི་དངོས་གྲུབ་བདག་ལ་སྩོལ། །སེམས་ཅན་དབུལ་ཕོངས་ནད་དང་དགྲས་བཙེར་ལ། །ཕན་ཕྱིར་སངས་རྒྱས་ཀུན་གྱིས་གསུངས་པ་ཡི། །རིག་སྔགས་ལྷ་མོ་ཆེན་མོ་ནོར་རྒྱུན་
མ། །ས་བཅུའི་སེམས་མ་ཁྱོད་ལ་ཕྱག་འཚལ་བསྟོད། །མཚན་རྣམས་ཐོས་པས་བདེ་སྐྱིད་ལོ་ལེགས་ནུས། །གནོད་སྦྱིན་སྲིན་མོ་ཤ་ཟས་གནོད་མི་ནུས། །ནད་དང་མུ་གེའི་འཆིང་བ་ཞི་མཛད་མ། །ལྷ་མོ་ནོར་རྒྱུན་མ་ལ་ཕྱག་འཚལ་བསྟོད། །གང་ཞིག་གང་དུ་གཟིགས་དང་གང་དུ་བྱོན། །དེ་རུ་སེམས་ཅན་བྱེ་བ་ཁྲག་ཁྲིག་ལ། །བདེ་སྐྱིད་ལོངས་སྤྱོད་ཟད་མེད་འཕེལ་ནུས་མ། །ལྷ་མོ་ཆེན་མོ་དཔལ་ལ་ཕྱག་འཚལ་བསྟོད། །གང་ཞིག་ལྷ་མོ་ཆེན་མོ་ཁྱོད་ལ་མཆོད་བྱས་ན། །བསྐལ་པ་བྱེ་བ་ཁྲག་ཁྲིག་འབུམ་ཕྲག་ལ། །མུ་གེ་མེད་ཅིང་ལོ་ལེགས་བདེ་སྐྱིད་འཕེལ། །ཡིད་བཞིན་ནོར་བུ་ལྷ་མོ་དཔལ་ལ་བསྟོད། །སྐྱེ་བ་ཀུན་ཏུ་ངན་སོང་སྐྱེ་སྒོ་འགགས། །ཚེ་རབས་ཀུན་ཏུ་ལྷ་མིའི་བདེ་སྐྱིད་སྤྱོད། །ཚེ་འདིར་ཟས་ནོར་ཡོ་བྱད་ཀུན་སྩོལ་མ། །ལྷ་མོ་ཆེན་མོ་དཔལ་ལ་ཕྱག་འཚལ་བསྟོད། །ཁྱོད་མཚན་ལན་གསུམ་བརྗོད་ཅིང་མཆོད་བྱས་ན། །ས་ཡི་བཅུད་དང་འབྲུ་ཡི་ཨཱཿཕུང་པོ་འཕེལ། །ལོ་ཐོག་འབྲས་བུ་ཐམས་ཅད་སྐྱེད་བྱེད་མ། །ལྷ་མོ་ཆེན་མོ་དཔལ་ལ་ཕྱགའ་ཚལ་བསྟོད། །ལྷ་མོ་ཁྱེད་ཀྱི་ཐུགས་ཀྱིས་གར་དགོངས་ལ། །སྤྱན་གྱིས་གར་
གཟིགས་ལོ་ལེགས་འབྲུ་འཕེལ་ན། །བདག་དང་བདག་གི་བསྲུང་བྱ་འདི་དག་གི །བང་མཛོད་ཞིང་ཁང་བཅས་པ་འདི་དག་ལ། །ཐུགས་རྗེས་དགོངས་ལ་སྤྱན་གྱིས་གཟིགས་སུ་གསོལ། །བདག་གིས་རྩེ་གཅིག་ལྷ་མོ་ཁྱོད་འབོད་ན། །ལྕང་ལོ་ཅན་གྱི་བྱང་ཕྱོགས་གཞལ་ཡས་ཁང་། །གསེར་གྱི་རྒྱལ་མཚན་ཅན་ནས་སྐུ་བསྐྱོད་ལ། །བདག་གི་གནས་ཁང་འདི་ལ་བཞུགས་སུ་གསོལ། །ལྷ་མོ་ཕོ་བྲང་བཞུགས་པ་མི་ཕོངས་ཀྱང་། །བདག་གི་གནས་ཁང་འདི་ཉིད་རིན་ཆེན་གྱི། །གཞལ་མེད་ཁང་དུ་ཡིད་ཀྱིས་དམིགས་བྱས་ནས། །ལྷ་མོ་ཆེན་མོ་དཔལ་ལ་བཞུགས་པར་འབུལ། །ཐུགས་རྗེའི་དབང་གིས་བཞེས་ནས་རྟག་པར་བཞུགས། །འབྲུ་ཡི་ཕུང་པོ་འཕེལ་བའི་ཕྲིན་ལས་མཛོད། །གང་ཞིག་བསྐལ་བཟང་སངས་རྒྱས་ཐམས་ཅད་ཀྱི། །ས་ལམ་བསྒྲོད་དང་མངོན་པར་སངས་རྒྱས་པའི། །དབང་པོ་བདུད་དཔུང་འཇོམས་མཛད་མཐུ་མོ་ཆེ། །ས་ཡི་ལྷ་མོ་བརྟན་མ་ཁྱོད་ལ་བསྟོད། །གང་ཞིག་ཐུབ་པའི་བསྟན་ལ་ཞུགས་པ་རྣམས། །ཚུལ་ཁྲིམས་ལྡན་དང་ཚུལ་ཁྲིམས་འཆལ་བ་ཡི། །དཔང་པོར་གྱུར་པས་ཁྲིམས་འཆལ་རྒྱུན་འབྱིན་མ། །བསྟན་སྲུང་ས་ཡི་ལྷ་མོ་
ཁྱོད་ལ་བསྟོད། །ས་ཡི་བཅུད་དང་ཡོ་བྱད་ལོ་ཐོག་འཕེལ། །ནོར་དང་ལོངས་སྤྱོད་བདེ་སྐྱིད་ཀུན་ཀྱང་འཕེལ། །ས་ཡི་ནོར་ཕྱུགས་མི་དང་ཞིང་ལ་སོགས། །རྒྱས་མཛད་ལྷ་མོ་བརྟན་མ་ཁྱོད་ལ་བསྟོད། །གང་ཞིག་ཁྱོད་ནི་ཚིམ་ཞིང་དགའ་བར་འགྱུར། །དཔག་ཚད་སྟོང་ཕྲག་དྲུག་ཅུའི་ས་ཡི་བཅུད། །འཕེལ་བར་བྱེད་ཅིང་བཅུད་དང་གཟི་བརྗིད་ལྡན། །རྩི་ཤིང་ལོ་ཐོག་རྒྱས་མཛད་མ་ལ་བསྟོད། །ས་ཡི་འབྲུ་རྣམས་འཕེལ་ཞིང་སྣུམ་པ་དང་། །ཞིམ་ཞིང་དྲི་ནུས་ཕུན་སུམ་ཚོགས་པར་བྱེད། །སེམས་ཅན་རྣམས་ཀྱང་པ་གཟུགས་ཆེ་མདོག་བཟང་བར། །མཛད་མཁས་ལྷ་མོ་བརྟན་མ་ཁྱོད་ལ་བསྟོད། །འཛམ་གླིང་སྤྱི་དང་ཁྱད་པར་ཡུལ་འདི་དང་། །བདག་དང་བདག་གི་བསྲུང་བྱ་ཐམས་ཅད་ལ། །ལོ་ལེགས་སྐྱ་རྒྱལ་དངོས་གྲུབ་བསྩལ་དུ་གསོལ། །ལྷ་མོ་ཆེན་མོ་དཔལ་གྱི་གྲོགས་མོ་བརྒྱད། །ཟླ་ཤེལ་མ་དང་སྦྱིན་བྱེད་རབ་སྦྱིན་མ། །འཕགས་མ་སྦས་མ་ལྷ་མོ་རབ་བཟང་མ། །དབྱངས་ཅན་མ་སོགས་འཁོར་དང་བཅས་པ་ལ། །མཆོད་བསྟོད་འདི་བཞེས་འབྲུ་ཡི་དངོས་གྲུབ་སྩོལ། །བདག་གི་ཐུགས་ནས་འོད་འཕྲོས་མདུན་བསྐྱེད་བསྐུལ། །
མདུན་བསྐྱེད་སོ་སོའི་ཐུགས་ཀར་ཟླ་བའི་སྟེང་། །ས་བོན་སྔགས་ཀྱིས་བསྐོར་ལས་འོད་ཟེར་འཕྲོས། །འཇིག་རྟེན་ཀུན་གྱིས་ས་བཅུད་བསོད་ནམས་སྟོབས། །འོད་ཟེར་སེར་པོའི་རྣམ་པར་ཚུར་བསྡུས་ནས། །བདག་དང་བསྲུང་བྱའི་ཞིང་ལོ་ཐོག་ལ་ཐིམ། །བང་མཛོད་འབྲུ་ཡི་དངོས་གྲུབ་ཐོབ་པར་གྱུར། །ཅེས་བསྒོམ་ལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཏོག་རྒྱ་མཚོ་བཻཌཱུརྱ་དང་གསེར་གྱི་རི་ཁ་དོག་བཟང་པོ་གསེར་དུ་སྣང་བའི་དཔལ་ལ་ཕྱག་འཚལ་ལོ། །ཞེས་ལན་གསུམ་མམ་བདུན། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་དེ་ལ་ཕྱག་འཚལ་ལོ། །ཞེས་བརྒྱ་སྟོང་ཉེར་གཅིག་སོགས་གང་འགྲུབ་འདོན། ལྷ་མོ་ཆེན་མོ་དཔལ་ལ་ཕྱག་འཚལ་ལོ། །མཆོད་དོ། །ཞེས་ལན་གསུམ་མམ་བདུན་བརྗོད། འཕགས་མ་ལྷ་མོ་ནོར་རྒྱུན་མ་ལ་ཕྱག་འཚལ་ལོ། །ཞེས་ལན་གསུམ། བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་ལོ། །གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལ་ཕྱག་འཚལ་ལོ། །ས་ཡི་ལྷ་མོ་བརྟན་མའི་མཐུས་བདག་གི་ཞིང་ཁང་ཐམས་ཅད་དུ་སའི་བཅུད་འཕེལ་བར་གྱུར་ཅིག །གསུམ་བརྗོད། ཨོཾ་ཀིཾ་ཧི་ར་ཙ་ཡེ་སྭཱ་ཧཱ།
ཞེས་བརྒྱ་རྩ་བརྒྱད་དང་། ཨོཾ་ཨཱཀྵི་ཏི་གནྡྷ་བློ་ཧཱུྃ་སྭཱ་ཧཱ། བརྒྱ་རྩ་བརྒྱད་དང་། ཨོཾ་བཱ་སུ་དྷ་རི་ནི་སྭཱ་ཧཱ། ཨོཾ་དེ་ཝི་ཤྲཱི་ཡེ་སྭཱ་ཧཱ། ཨོཾ་པྲི་ཐི་ཝི་དེ་ཝི་སྭཱ་ཧཱ། ཞེས་པ་རྣམས་བརྒྱ་རེ་འདོན་ནོ། །བདག་དང་མདུན་བསྐྱེད་ལྷ་ཚོགས་ཐམས་ཅད་ལ། །དངོས་འབྱོར་ཡིད་སྤྲུལ་མཆོད་པས་མཆོད་ཅིང་བསྟོད། །འགལ་འཁྲུལ་ཉེས་པའི་ཚོགས་རྣམས་ཅི་མཆིས་བཤགས། །བདག་མདུན་ཡེ་ཤེས་པ་རྣམས་ཐམས་ཅད་ནི། །བདག་གི་གནས་ཁང་ཞིང་ལ་བརྟན་པར་བཞུགས། །དམ་ཚིག་པ་རྣམས་བདག་གི་སྙིང་གར་ཐིམ། །བདག་བསྐྱེད་དམ་ཚིག་མཐའ་ནས་དབུས་སུ་ཡལ། །སྟོང་ཉིད་འོད་གསལ་ཆོས་སྐུར་རྗེན་པར་བུད། །འདི་ལྟར་མཆོད་བསྟོད་བགྱིས་པའི་དགེ་བ་འདིས། །ཚེ་འདིར་ལོ་ལེགས་འབྲུ་རྣམས་འཕེལ་བ་དང་། །དེང་ནས་བཟུང་སྟེ་བྱང་ཆུབ་སྙིང་པོའི་བར། །བདག་ཉིད་མཐོང་དང་ཐོས་དང་དྲན་པས་ཀྱང་། །འགྲོ་བའི་དབུལ་ཕོངས་བཀྲེས་སྐོམ་ཞི་བ་དང་། །ལོ་ལེགས་བདེ་སྐྱིད་འཕེལ་བར་ནུས་གྱུར་ཅིག །འཛམ་བུའི་གླིང་གི་རྒྱལ་མཚན་གསེར་བཟང་པོ། །དེ་བཞིན་གཤེགས་དང་དེ་ཡི་བཀྲ་ཤིས་ཤོག །ས་བཅུའི་བྱང་ཆུབ་སེམས་དཔའ་
སེམས་དཔའ་ཆེ། །ས་ཡི་སྙིང་པོ་དེ་ཡི་བཀྲ་ཤིས་ཤོག །ནོར་རྒྱུན་མ་དང་ས་ཡི་ལྷ་མོ་དང་། །ལྷ་མོ་ཆེན་མོ་དཔལ་གྱིས་བཀྲ་ཤིས་ཤོག །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་བ། ཞེས་སོགས་བརྗོད་དོ། ས་ཡི་སྙིང་པོ་འཁོར་ལོ་བཅུ་པའི་མདོ་ལས། གནས་གང་དག་ན་སེམས་ཅན་གང་དག་ཞིང་གཤིན་པའམ། ཞིང་མི་གཤིན་པ་ལ་ས་བོན་བཏབ། །གལ་ཏེ་ནན་ཏན་བྱས་ཀྱང་རུང་། ནན་ཏན་མ་བྱས་ཀྱང་རུང་སྟེ། སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན། རིགས་ཀྱི་བུ་དེའི་ཏིང་ངེ་འཛིན་དམ་པའི་ཡོན་ཏན་དང་། མཐུ་དང་། གཟི་བརྗིད་ཀྱི་ཤུགས་ཀྱིས་དེ་དག་གི་ལོ་ཐོག་ཐམས་ཅད་ལེགས་ཤིང་འབྲས་བུ་སྨིན་ཅིང་ལེགས་པར་འགྱུར་རོ། །ཞེས་གསུངས་པ་ལྟར་དང་། གཞན་ཡང་། ནོར་རྒྱུན་མདོ་ལས། འདི་ཐོས་པ་ཙམ་གྱིས་ལོ་ལེགས་པར་འགྱུར་རོ། །གསེར་འོད་དམ་པ་ལས། སངས་རྒྱས་དེའི་མཚན་ལན་གསུམ་བརྗོད་ཅིང་འདི་ལན་གསུམ་དང་ཚིག་བརྗོད་ནས་ལྷ་མོ་དཔལ་མཆོད་ན་འབྲུའི་ཕུང་པོ་འཕེལ་བར་གསུངས་སོ། །མདོ་སྡེ་ཆེན་པོ་དེ་རྣམས་དང་ཞི་ཁྲོ་དང་བཀའ་བརྒྱད་ཐུགས་རྗེ་ཆེན་པོ་གསང་འདུས་དང་རྟོགས་པ་ལས་ལྷ་མོ་དཔལ་གྱི་འབྲུའི་ཕུང་པོ་སྤེལ་བའི་ལེའུ་ལ་སོགས་པའི་དོན་བསྡུས་ཏེ། དུས་སྙིགས་མའི་སྐབས་འདིར་ལོ་ཉེས་པའི་སེམས་ཅན་རྣམས་
ལ་ཕན་པའི་བསམ་པ་བཟང་པོས་ཤིང་ཕོ་རྟའི་ལོ་ས་གའི་ཟླ་ཚེས་ལ་ཨ་རཱ་གས་ཉིན་གཅིག་རྫོགས་པར་བྲིས་པ་ལ། འགལ་འཁྲུལ་ཉེས་པ་ཐམས་ཅད་བཤགས་ཤིང་དགེ་བས་ལོ་ལེགས་འབྲུ་འཕེལ་ནས། སེམས་ཅན་ཐམས་ཞེཅད་བདེ་སྐྱིད་ལྡན་གྱུར་ཅིག །སྭ་སྟི། བཀྲ་ཤིས་དགེ་ལེགས་རིན་ཆེན་བྱེ་བའི་གཏེར། །རྒྱལ་སྲས་སྤྱོད་པ་རྒྱ་མཚོར་དབང་བསྒྱུར་བའི། །སེམས་དཔའ་ས་སྙིང་འཁོར་བཅས་ལ་བརྟེན་པའི། །ལོ་ལེགས་འབྲུ་དཔལ་སྤེལ་བའི་ཆོ་ག་འདི། །གངས་ལྗོངས་སྐྱེ་རྒུའི་དབུལ་ཕོངས་གདུང་བ་ཀུན། །ཡོངས་སུ་བསལ་ནས་རིང་འཚོའི་དཔལ་དང་འབྱོར། །ནུབ་མེད་སྲིད་མཐར་རྒྱས་ཕྱིར་དོན་བརྩོན་གྱིས། །ཆོས་སྦྱིན་མཛད་མེད་སྤར་གྱི་མ་མོར་བསྐྲུན། །འདི་ཡི་ལེགས་བྱས་ཤིང་རྟས་ཉེར་དྲངས་པའི། །རྨད་བྱུང་ཕྲིན་ལས་ཉིན་བྱེད་ཡོངས་ཤར་བས། །སྣོད་བཅུད་རྒུད་པའི་མུན་པ་གཞིལ་ནས་སླར། །འཕྲལ་ཡུལ་ཕན་བདེའི་པད་ཚལ་བཞད་གྱུར་ཅིག །ཅེས་དད་དམ་མཚུངས་མེད་ཡེ་ན་དགེ་སློང་མཁྱེན་བརྩེ་དགེ་ལེགས་ཀྱིས་རྣམ་དཀར་འདི་ཉིད་འབད་པས་བསྒྲུབ་སྐབས་མཁྱེན་རྩེའི་སྤྲུལ་མིང་ཆོས་ཀྱི་དབང་ཕྱུག་པས་སརྦ་ཨརྦ་སིདྡྷི་རསྟུ། འདི་ཞི་ཁྲོ་བཀའ་བརྒྱད་དམ་ཐུགས་རྗེ་ཆེན་པོ་གསང་འདུས་དབང་བསྐུར་ཐོབ་ན་འདོན་རུང་ངོ་། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།