ལོ་ཡག་ལ་ཕན་པའི་གདམས་ངག་བྱང་ཆུབ་སེམས་དཔའ་སའི་སྙིང་པོའི་ཆོ་གའི་མཐའ་བརྒྱན་སྦྱིན་སྲེག་ནོར་བུའི་ཕྲེང་བ།
ལོ་ཡག་ལ་ཕན་པའི་གདམས་ངག་བྱང་ཆུབ་སེམས་དཔའ་སའི་སྙིང་པོའི་ཆོ་གའི་མཐའ་བརྒྱན་སྦྱིན་སྲེག་ནོར་བུའི་ཕྲེང་བ་བཞུགས་སོ། །
ན་མོ་རཏྣ་ཏྲ་ཡཱ་ཡ། དཀོན་མཆོག་རིན་ཆེན་གསུམ་ལ་ཕྱག་འཚལ་ནས། །དུས་ངན་མུ་གེའི་བསྐལ་པ་ཞི་བའི་ཕྱིར། །ས་སྙིང་གཙོ་འཁོར་མེ་མཆོད་བྲི་བ་ལ། །བླ་མ་དཀོན་མཆོག་ཐུགས་རྗེས་གནང་བ་སྩོལ། །ལོ་ཏོག་ཉེས་སམ་ལོ་ནད་མང་བ་དང་། །ས་བཅུད་ཉམས་པའི་ལྟས་ངན་བྱུང་བ་ན། །ཆོ་ག་གཞུང་བཞིན་ཚད་ལྡན་འགྲུབ་པའི་རྗེས། །མེ་མཆོད་འདི་ནི་ཡོན་ཏན་ཤིན་ཏུ་ཆེ། །དེ་ཕྱིར་དཀྱིལ་འཁོར་བསྲེག་རྫས་ལ་སོགས་པ། །རྒྱས་བསྡུས་འབྲིང་སོགས་གང་ལྕོགས་བྱ་བ་ནི། །ཁྱིམ་མམ་ཞིང་དཀྱིལ་གང་བདེར་བྱི་དོར་བྱ། །སྐྱབས་སེམས་ནས་བཟུང་བདག་བསྐྱེད་བསྙེན་པའི་རྗེས། །དཀར་གཏོར་གནས་དེར་བཤམས་ལ་འདོན་བསྒོམ་བྱ། ཨོཾ་ཨ་མྲྀ་ཏེ་ཧཱུྃ་ཕཊ། ཧཱུྃ། རང་ཉིད་ས་སྙིང་ཕྱག་
གཡས་སར་བསྣུན་པས། །ས་རྡོལ་དེ་ནས་ས་ཡི་ལྷ་མོ་ནི། །གསེར་མདོག་བུམ་འཛིན་སྐུ་སྟོད་ས་གནོན་མངོན། །འཁོར་དུ་ཐེ་སེ་ཙང་ཀུན་ས་འཛིན་དང་། །འདིར་གནས་ས་བདག་ཚོགས་ཀུན་སྤྱན་དྲངས་གྱུར། །རིན་ཆེན་སྣོད་དུ་ཨོཾ་ལས་གཏོར་མ་ནི། །དཀར་གསུམ་འདོད་ཡོན་བདུད་རྩིའི་རྒྱ་མཚོ་ལ། །ཨོཾ་ཨཱཿཧཱུྃ་གིས་འཛད་མེད་གཏེར་གྱུར་ཅིག །ས་ལྷ་བརྟན་མ་ས་བདག་ཚོགས་རྣམས་དང་། །ཡུལ་ཕྱོགས་ས་མིག་འདིར་གནས་ཀུན་ལ་འབུལ། །བདག་གི་མཐུན་རྐྱེན་སྒྲུབས་ལ་ས་འདི་སྩོལ། །ཨོཾ་པྲ་བྷེ་དེ་ཝཱི་ལོ་ཀ་བྷུ་མི་པ་ཏི་ས་པ་རི་ཝཱ་ར་ཨི་དམ་བྷ་
ལཾ་ཏ་ཁ་ཁ་ཁཱ་ཧི་ཁཱ་ཧི། ཨརྒྷཾ་སོགས། རྒྱལ་ཀུན་ས་ལམ་སྒྲུབ་པའི་གྲོགས་མཛད་མ། །གསེར་མདོག་མཛེས་སྡུག་རིན་ཆེན་གཏེར་བུམ་འཛིན། །འཛམ་གླིང་ས་ལ་དབང་བའི་ལྷ་མོ་ཆེ། །བདག་གིས་གུས་པས་བརྟན་མ་ཁྱོད་ལ་བསྟོད། །འཁོར་གྱི་ས་བདག་ཚོགས་རྣམས་ཐམས་ཅད་ལ། །མཆོད་ཅིང་བསྟོད་དེ་བདག་གིས་ཕྲིན་ལས་སྒྲུབས། །ལོ་ཏོག་ལ་གནོད་ལོ་ནད་ཞི་བ་དང་། །འབྲས་དྲུག་ཕུན་སུམ་ཚོགས་པའི་དངོས་གྲུབ་སྩོལ། །བདག་གི་བསམ་པའི་སྟོབས་དག་དང་༴ །དེ་ནས་ས་བདག་ཚོགས་རྣམས་ཀྱིས། ཕྲིན་ལས་རྒྱབ་ཅིང་ས་གནང་ནས། །སླར་ཡང་ས་ལ་ཐིམ་པར་བསམ། །ས་སྟེགས་དྲི་བཟང་ཆག་ཆག་བཏབ། །ཞི་རྒྱས་གཉིས་ཀ་གང་རུང་ལ། །རྒྱས་པར་ཐིག་ཆེན་བརྒྱད་ལ་སོགས། །མཐོང་བརྒྱུད་ཕྱག་ལེན་ལྟར་བྱས་པའི། །དབུས་སུ་པདྨ་འདབ་བཞི་ཡི། །སྟེང་དུ་ལྷ་གྲངས་རང་མདོག་གི །ཚོན་སྤུངས་བྱས་ལ་ཞི་བའི་ཤིང་། །མཁན་དཀར་ཤུག་པ་སུར་དཀར་གྱི། །ཤིང་ཚད་སོར་དྲུག་ཙམ་གྱིས་ནི། །ཟླུམ་པོ་དྲུག་སྐོར་བརྩེག་པར་བྱ། །ཞི་བའི་དཀྱིལ་འཁོར་ཟླུམ་པོ་རྡོ་རྗེའི་མཚན། །རྒྱས་པར་སྟག་པ་ཉ་སྦྲིད་དང་། །འོམ་བུ་ཤིང་ཚད་གྲུ་རེ་ཡིས། །གྲུ་བཞི་བཅའ་བ་མེ་ཚང་ཡང་། །རྒྱས་པའི་དཀྱིལ་འཁོར་གྲུ་བཞི་ནོར་བུའི་མཚན། །ཡམ་ཤིང་ལ་སོགས་སོ་སོར་བྱ། །འབྲིང་
པོ་པད་འདབ་ཚོན་སྤུང་དང་། །ཤིང་སྣ་རེ་རེ་ཙམ་གྱིས་ཆོག །བསྡུས་པ་ནས་ཚོམ་ལྔ་བཀོད་ཅིང་། །དུག་ཤིང་མིན་པའི་ཤིང་གིས་ཆོག །ཀུ་ཤ་བཀྲམ་པ་ལ་སོགས་པ། །ལེགས་པར་ཕྱག་བཞེས་ལྟར་དུ་བྱ། །བསྲེག་རྫས་རྒྱས་པ་ཡོངས་རྫོགས་དང་། །འབྲིང་པོ་ཞི་བ་ཡུངས་ཀར་དང་། ཏིལ་དང་གྲོ་ལ་བསྟེན་ཀྱང་རུང་། །བསྡུས་པ་གྲོ་ནི་ཁོ་ནས་ཆོག །རྒྱས་པར་དྭརླ་སྲན་མ་དང་། །སོ་བ་འབྲས་ནི་འབྲིང་པོ་སྟེ། །བསྡུས་པ་སོ་བ་ཁོ་ནས་ཆོག །ཡམ་ཤིང་མར་ཁུ་མེད་མི་རུང་། །རྣམ་ལྔ་ཆ་གསུམ་མེ་ལྷ་ལ། །དཀར་གཏོར་གཉིས་དང་མེ་རྐང་གཅིག །ཟླུམ་གཏོར་ལྔ་ཚོམ་དཀར་གསུམ་རིགས། །བརྫིས་པའི་རིལ་བུ་གྲངས་མེད་བྱ། །འོ་ཞོ་དྲི་བཟང་སྦྱར་བའི་ཆུ། །མཁོ་བའི་ཡོ་བྱད་སྟ་གོན་བྱ། །རང་ཉིད་མདའ་དར་བུད་ཤིང་ཐོགས། །གྱེར་སྒོམ་སྦྲགས་ལ་འདི་སྐད་དོ།འདི་ནས་ལོ་གླུད་བཏང་བར་མཆན། །ཧཱུྃ། རང་ཉིད་ཐུགས་ལས་མེ་ཡི་ལྷ་མོ་ནི། །ཞི་བའི་ལས་མཛད་དཀར་མོ་མེ་དར་དཀར། །ཕྱག་གཡོན་ནད་གདོན་བསྲེགས་པའི་ཡེ་ཤེས་ཀྱི། །མེ་ཡི་བུད་ཤིང་འཛིན་པས་ཤར་ནས་སྦར། །ནད་གདོན་བགེགས་ཚོགས་ཞི་བའི་ལས་མཛོད་ཅིག །ཨོཾ་ཨགྣེ་ཡེ་དེ་བ་ཏ་ཡེ་ཛྭ་ལ་རཾ་ཤཱནྟིཾ་ཀུ་རུ་ཡེ་སྭཱ་ཧཱ། ཤར་ནས་མེ་སྦར་བྱ། རྒྱས་པའི་དུས། ཧཱུྃ། རང་ཉིད་ཐུགས་ནས་མེ་ཡི་ལྷ་མོ་ནི། །རྒྱས་པའི་ལས་མཛད་སེར་མོ་མེ་
དར་སེར། །ཕྱག་གཡོན་ནོར་འབྲུ་རྒྱས་པའི་ཡེ་ཤེས་ཀྱི། །མེ་ཡི་བུད་ཤིང་འཛིན་པས་ལྷོ་ནས་སྦར། །ལོ་ལེགས་འབྲུ་ཚོགས་རྒྱས་པའི་ལས་མཛོད་ཅིག །བྷྲཱུཾ་ཨགྣེ་དེ་ཝི་ཏ་ཡེ་ཛྭ་ལ་རཾ་པུཏྟཾ་ཀུ་རུ་སྭཱ་ཧཱ། ཨོཾ། མ་རིག་དུག་ལྔའི་རྣམ་རྟོག་ལས་བྱུང་བའི། །འཕྲལ་གྱི་རྐྱེན་དང་ཡུན་གྱི་སྒྲིབ་པ་རྣམས། །སྲེག་མཛད་ཡེ་ཤེས་ལྔ་ཡི་མེ་ཆེན་འདིས། །ཕྲིན་ལས་གང་བརྩམས་ལྷུན་གྱིས་གྲུབ་པར་མཛོད། །ཅེས་མདའ་དར་གཡུགས། མེ་ཐབ་ལ་བསང་ཆུས་བྲན། ཨོཾབཛྲ་ཨ་མྲྀ་ཏ་ཀུཎྜ་ལཱི་སོགས། ཨོཾ་སྭ་བྷ་ཝས་སྦྱངས་ལ། སྟོང་པའི་ངང་ལས་འབྱུང་བློབ་རིམ་བརྩེགས་སྟེང་། །པད་ཟླའི་སྟེང་དུ་བགྲང་ཕྲེང་རཾ་མཚན་པས། །འོད་འཕྲོས་འཕགས་མཆོད་འགྲོ་བའི་སྡིག་སྒྲིབ་དང་། །ལོ་ཏོག་ལ་གནོད་ལོ་ནད་ཐམས་ཅད་བསལ། །ཚུར་འདུས་ཡོངས་གྱུར་མེ་ལྷ་སྐུ་མདོག་དཀར། །གཡས་པས་མེ་ཧོམ་གཡོན་པས་རིལ་བ་འཛིན། །རིན་ཆེན་རྒྱན་སྤྲས་དབུ་ལ་པྲོག་ཞུ་གསོལ། །ཚངས་སྐུད་དོ་ཤལ་ར་སྐྱེས་གདན་ལ་བཞུགས། །གནས་གསུམ་འབྲུ་ལས་འོད་འཕྲོས་ཤར་ལྷོ་ནས། །རང་འདྲའི་མེ་ལྷ་སྤྱན་དྲངས་གཉིས་མེད་གྱུར། །ཧཱུྃ། དད་པ་དང་ནི་དམ་ཚིག་གིས། །
ཚུར་གཤེགས་མེ་ལྷ་དྲང་སྲོང་མཆོག །བསྲེག་བླུགས་ཞལ་ཟས་བཞེས་སླད་དུ། །འབར་བའི་གདན་ལ་གཤེགས་སུ་གསོལ། །ཨག་ཡེ་ས་མ་ཡ་ཛཿཧཱུྃ་བཾ་ཧོ༔ ཡང་དག་ཉིད་དུ་དད་མོས་ཀྱང་། །འཇིག་རྟེན་སྲིད་ཞུ་ཚུལ་གྱིས་ནི། །ཕྱག་དང་ཞབས་ནི་བསིལ་ནས་ཀྱང་། །འབར་བའི་གདན་ལ་བཞུགས་སུ་གསོལ། །ཨོཾ་ཨགྣེ་ཡེ་ཨཧཱུྃ་པྲ་ཏིཙྪ་ཧོ། ཧཱུྃ། མྱ་ངན་མི་འདའ་ཐུགས་རྗེའི་ངང་། །ཉོན་མོངས་མ་སྤངས་གོས་པ་མེད། །མ་ཆགས་རང་བཞིན་དག་པ་ལ། །པདྨའི་གདན་ལ་བཞུགས་སུ་གསོལ། །པདྨ་ཀ་མ་ལྱཱ་སིཾ། ཧཱུྃ། ཡེ་ཤེས་འོད་ཀྱི་ཉོན་མོངས་བག་ཆགས་བསྲེགས། །ཕྲིན་ལས་བཞི་ཡིས་ལས་རྣམས་མྱུར་དུ་སྒྲུབས། །མེ་ལྷའི་རྒྱལ་པོ་ཤར་ལྷོ་གདོན་གྱི་གཙོ། །ཕྱག་འཚལ་དམ་ཚིག་བཞིན་དུ་ཕྲིན་ལས་མཛོད། །ཨ་ཏི་པཱུ་ཧོ༔ པྲ་ཏི་ཛ་ཧོ། ས་མ་ཡ་སྟེ། གཙང་སྦྱར་ཁ་དོག་དབྱིབས་ལེགས་ཡིད་འོང་བའི། །ཆུ་དང་ཐང་སྐྱེས་མེ་ཏོག་སྣ་ཚོགས་འདི། །མེ་ལྷའི་རྒྱལ་པོ་འཁོར་དང་བཅས་ལ་འབུལ། །བཞེས་ནས་ལོ་ཏོག་ནད་ཀུན་ཞི་བར་མཛོད། །ཨོཾ་ཨགྣེ་ཡེ་པུལླེ་པྲ་ཏིཙྪ་ཡེ་ལོ་ནད་ཐམས་ཅད་ཤཱནྟཾ་ཀུ་རུ་ཡེ་སྭཱ་ཧཱ།
བཞེས་ནས་ལོ་ལེགས་འབྲུ་ཚོགས་རྒྱས་པར་མཛོད། །ཨོཾ་ཨགྣེ་ཡེ་ལོ་ལེགས་འབྲུ་ཚོགས་ཐམས་ཅད་པུཊྚི་ཀུ་རུ་ཡེ་སྭཱ་ཧཱ། གཙང་སྦྱར་དྲི་བསུང་ངད་དང་ལྡན་པ་ཡི། །ཙན་དན་ལ་སོགས་དྲི་བཟང་སྤོས་སྤྲིན་འདི། །མེ་ལྷའི་རྒྱལ་པོ་འཁོར་དང་བཅས་ལ་འབུལ། །བཞེས་ནས་ལོ་ཏོག་ནད་ཀུན་ཞི་བར་མཛོད། །ཨོཾ་ཨགྣེ་ཡེ་དྷ་པེ་པྲ་ཏཱིཙྪ་ཡེ་ལོ་ནད་ཐམས་ཅད་ཤཱནྟི་ཀུ་རུ་སྭཱ་ཧཱ། གཙང་སྦྱར་འབྲུ་དང་ཞུན་མར་གཏམ་པ་དང་། །སྣང་སྲིད་གསལ་བའི་སྒྲོན་མེའི་རིགས་གྱུར་རྣམས། །མེ་ལྷའི་རྒྱལ་པོ་འཁོར་དང་བཅས་ལ་འབུལ། །བཞེས་ནས་ལོ་ཏོག་ནད་ཀུན་ཞི་བར་མཛོད། །ཨོཾ་ཨགྣེ་ཡེ་ཨཱ་ལོ་ཀེ་པྲ་ཏིཙྪ་ཡེ་ལོ་ནད་ཐམས་ཅད་ཤཱནྟཾ་ཀུ་རུ་ཡེ་སྭཱ་ཧཱ། གཙང་སྦྱར་ཕྱོགས་ཀུན་དྲི་བཟང་ལྡང་ནུས་པའི། །ག་པུར་གུར་གུམ་ལ་སོགས་དྲི་མཆོག་འདི། །མེ་ལྷའི་རྒྱལ་པོ་འཁོར་དང་བཅས་ལ་འབུལ། །བཞེས་ནས་ལོ་ཏོག་ནད་ཀུན་ཞི་བར་མཛོད། །ཨོཾ་ཨགྣེ་ཡེ་གནྡྷེ་པྲ་ཏིཙྪ་ཡེ་ལོ་ནད་ཐམས་ཅད་ཤཱནཾ་ཀུ་རུ་སྭཱ་ཧཱ། གཙང་སྦྱར་རོ་བཅུད་སྟོང་དང་ལྡན་པ་ཡི། །དཀར་མངར་རྣམ་མང་རོ་བརྒྱའི་ཞལ་ཟས་འདི། །མེ་ལྷའི་རྒྱལ་པོ་འཁོར་དང་བཅས་ལ་འབུལ། །བཞེས་ནས་ལོ་
ཏོག་ནད་ཀུན་ཞི་བར་མཛོད། །ཨོཾ་ཨགྣེ་ཡེ་ནེ་ཝི་ཏྱ་པྲ་ཏཱིཙྪ་ཡེ་ལོ་ནད་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། རྔ་དུང་ཌཱ་རུ་དྲིལ་བུ་པི་ཝང་དང་། །རབ་སྙན་རོལ་མོའི་སྒྲ་སྐད་ཅི་མཆིས་པ། །མེ་ལྷའི་རྒྱལ་པོ་འཁོར་དང་བཅས་ལ་འབུལ། །བཞེས་ནས་ལོ་ཏོག་ནད་ཀུན་ཞི་བར་མཛོད། །ཨོཾ་ཨགྣེ་ཡེ་ཤབྡ་པྲ་ཏཱིཙྪ་ཡེ་ལོ་ནད་ཐམས་ཅད་ཤཱནྟཾ་ཀུ་རུ་ཡེ་སྭཱ་ཧཱ། དེ་ནས་བསྲེག་རྫས་འབུལ་བ་ནི། །རྒྱས་བསྡུས་འབྲིང་གསུམ་གང་འདོད་བྱ། །ཧཱུྃ། ཡེ་ཤེས་ཀློང་ཡང་འཁྱིལ་བའི་གཞལ་ཡས་སུ། །དམ་རྫས་བདུད་རྩི་གཙང་མའི་སྦྱིན་སྲེག་འདི། །མེ་ལྷའི་རྒྱལ་པོ་འཁོར་དང་བཅས་ལ་འབུལ། །བཞེས་ནས་ལོ་ཏོག་ནད་ཀུན་ཞི་བར་མཛོད། །ཨོཾ་ཨགྣེ་ཡེ་ཛྭ་ལ་རཾ་ཤཱནཾ་ཀུ་རུ་སྭཱ་ཧཱ། འདོད་གསོལ་བྱ། མང་ཉུང་སྐབས་དང་སྦྱར་ལ་ཡམ་ཤིང་འབུལ། །ཨོཾ་བོ་དྷི་བྷིཀཱ་ཡེ་སྭཱ་ཧཱ། མར་ཁུ་ཞལ་དུ་འབུལ་བར་བསམས་ལ། ཨོཾབྷ་ཝ་ཀ་ཨགྣེ་ཡེ་སྭཱ་ཧཱ། ཏིལ་ཕུལ། ཨོཾ་སརྦ་པ་པཾ་ད་ཧ་ན་བཛྲ་ཡེ་སྭཱ་ཧཱ། ཟས་མཆོག་འབུལ། ཨོཾ་སརྦ་སཾ་པ་དེ་སྭཱ་ཧཱ། སོ་བ་ཕུལ་ལ། ཨོཾ་བཛྲ་བི་ཛ་ཡེ་སྭཱ་ཧཱ། འབྲས་ཕུལ་ལ། ཨོཾ་བཛྲ་པུཥྛཡེ་སྭཱ་ཧཱ། ནས་ཕུལ་ལ། ཨོཾ་མ་ཧཱ་བེ་ག་ཡེ་སྭཱ་ཧཱ། གྲོ་ཕུལ་ལ། ཨོཾ་བཛྲ་གྷསྨ་རི་ཡེ་སྭཱ་ཧཱ། སྲན་མ་ཕུལ་
ལ༔ ཨོཾ་མ་ཧཱ་བཱ་ལ་ཡ་སྭཱ་ཧཱ། དུརྦ་ཕུལ་ལ། ཨོཾ་བཛྲ་ཨ་ཡུ་ཥེ་སྭཱ་ཧཱ། ཀུ་ཤ་ཕུལ་ལ། ཨོཾ་ཨ་པྲ་ཏི་ཧ་ཏ་བཛྲ་ཡེ་སྭཱ་ཧཱ། དཀར་གསུམ་སྦྱར་བའི་གཏོར་མ་ཕུལ་ལ། རིན་ཆེན་སྣོད་དུ་དཀར་གསུམ་གཏོར་མ་ནི། །ཨོཾ་ཨཱཿཧཱུྃ་གིས་ཟག་མེད་བདུད་རྩིར་གྱུར། །མེ་ལྷའི་རྒྱལ་པོ་འཁོར་དང་བཅས་ལ་འབུལ། །བཞེས་ནས་ལོ་ཏོག་ནད་ཀུན་ཞི་བར་མཛོད། ཨགེ་ཡེ་ས་པཱ་རི་ཝཱ་ར་ཨི་དཾ་བ་ལིང་ཏ་ཁཱ་ཧི་ཁཱ་ཧི། བསྟོད་པ་བྱ་བ་ནི། ཧཱུྃ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །རིག་པ་སྒྲུབ་པའི་ཤེས་རབ་འོད། །འཇིག་རྟེན་མེ་ལྷ་ཉིད་ལ་བསྟོད། །མ་འབྱོར་པ་དང་༴ སོགས་ཡིག་བརྒྱ་བརྗོད། དེ་ནས་རྒྱས་པར་ས་སྙིང་མདུན་བསྐྱེད་ནས། །ཕྱག་འཚལ་ཡན་ཆད་གཞུང་ལྟར་བསལ་བ་ལ། །ཚར་གྲངས་བསོག་ན་འབྲིང་པོ་སྤྱན་འདྲེན་ནས། །མགྲོན་ཐབས་ཚུལ་དུ་བསྐྱེད་ཀྱང་འཐུས་པ་ཡིན། །ཧཱུྃ། མེ་ལྷའི་ལྟོ་བར་འོད་ལྔའི་གུར་ཁང་དབུས། །པཾ་ལས་པདྨའི་སྡོང་པོ་ཡལ་ག་དང་། །སོགས་གཞུང་ལྟར་རོ། །དེ་ནས་རྣམ་ལྔ་ཕུལ་ལ། གཙང་སྦྱར་ཁ་དོག་དབྱིབས་ལེགས་ཡིད་འོང་པའི། །ཐང་དང་ཆུ་སྐྱེས་མེ་ཏོག་སྣ་ཚོགས་འདི། །ས་ཡི་སྙིང་པོ་འཁོར་དང་བཅས་ལ་འབུལ། །བཞེས་ནས་ལོ་ཏོག་ནད་
ཀུན་ཞི་བར་མཛོད། ཨོཾ་སརྦ་ཏ་ཐཱ་ག་ཏ་ཀཱི་ཧི་ར་ཙ་བཱ་སུ་དྷ་རི་དེ་ཝི་ཤི་པྲི་ཐི་དེ་ཝི་ས་པཱ་རི་ཝཱ་རུ་པཉྩེ་པྲ་ཏིཙྪ་ཡེ་ལོ་ནད་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། རྒྱས་པའི་དུས་སུ། ས་ཡི་སྙིང་པོ་འཁོར་དང་བཅས་ལ་འབུལ། །བཞེས་ནས་ལོ་ལེགས་འབྲུ་ཚོགས་རྒྱས་པར་མཛོད། །ཨོཾ་སརྦ་ཏ་ཐཱ་ག་ཏ་ཀཱི་ཧི་ར་ཙ་བཱ་སུ་དྷ་རི་དེ་ཝི་ཤི་པྲི་ཐི་དེ་ཝཱི་ས་པ་རི་ཝཱ་ར་པུཤྲཱི་པྲ་ཏིཙྪ་ཡེ་ལོ་ལེགས་འབྲུ་ཚོགས་ཐམས་ཅད་པུཊྚི་ཀུ་རུ་ཡེ་སྭཱ་ཧཱ། དེ་བཞིན་དུ། གཙང་སྦྲར་དྲི་བསུང་ངད་དང་ལྡན་པ་ཡི། །ཙནྡན་ལ་སོགས་དྲི་བཟང་སྤོས་སྤྲིན་འདི། །ས་ཡི་སྙིང་པོ་འཁོར་དང་བཅས་ལ་འབུལ། །བཞེས་ནས་ལོ་ལེགས་འབྲུ་ཚོགས་རྒྱས་པར་མཛོད། །ཨོཾ་སརྦ་ཏ་ཐཱ་ག་ཏ་ཀཱི་ཧི་ར་ཙ་བཱ་སུ་དྷ་རི་དེ་ཝི་ཤི་པྲི་ཐི་དེ་ཝཱི་ས་པ་རི་ཝཱ་ར་དྷ་པེ་པྲ་ཏིཙྪ་ཡེ་ལོ་ནད་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། གཙང་སྦྱར་འབྲུ་དང་ཞུན་མར་གཏམས་པ་དང་། །སྣང་སྲིད་གསལ་བའི་སྒྲོན་མེའི་རིགས་གྱུར་རྣམས། །ས་ཡི་སྙིང་པོ་འཁོར་དང་བཅས་ལ་འབུལ། །བཞེས་ནས་ལོ་ལེགས་འབྲུ་ཚོགས་རྒྱས་པར་མཛོད། །ཨོཾ་སརྦ་ཏ་ཐཱ་ག་ཏ་ཀཱི་ཧི་ར་ཙ་བཱ་སུ་དྷ་རི་དེ་ཝི་ཤི་པྲི་ཐི་དེ་ཝི་ས་པ་རི་ཝཱ་ར་ཨཱ་ལོ་ཀེ་པྲ་ཏིཙྪ་ཡེ་ལོ་ནད་
ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ། གཙང་སྦྱར་ཕྱོགས་ཀུན་དྲི་བཟང་ལྡང་ནུས་པའི། །ག་པུར་གུར་གུམ་ལ་སོགས་དྲི་མཆོག་འདི། །ས་ཡི་སྙིང་པོ་འཁོར་དང་བཅས་ལ་འབུལ། བཞེས་ནས་ལོ་ལེགས་འབྲུ་ཚོགས་རྒྱས་པར་མཛོད། །ཨོཾ་སརྦ་ཏ་ཐཱ་ག་ཏ་ཀཱི་ཧི་ར་ཙ་བཱ་སུ་དྷ་རི་དེ་ཝི་ཤི་པྲི་ཐི་དེ་ཝཱི་ས་པ་རི་ཝཱ་ར་གྷནྡྷེ་པྲ་ཏིཙྪཡེ་ལོ་ནད་ཐམས་ཅད་ཤཱནྟཾ་ཀུ་རུ་ཡེ་སྭཱ་ཧཱ། གཙང་སྦྱར་རོ་བཅུད་སྟོང་དང་ལྡན་པ་ཡི། །དཀར་མངར་རྣམས་མང་བཟའ་བཅའི་ཞལ་ཟས་འདི། །ས་ཡི་སྙིང་པོ་འཁོར་དང་བཅས་ལ་འབུལ། །བཞེས་ནས་ལོ་ལེགས་འབྲུ་ཚོགས་རྒྱས་པར་མཛོད། །ཨོཾ་སརྦ་ཏ་ཐཱ་ག་ཏ་ཀཱི་ཧི་ར་ཙ་བཱ་སུ་དྷ་རི་དེ་ཝི་ཤི་པྲི་ཐི་དེ་ཝཱི་ས་པ་རི་ཝཱ་ར་ནེ་ཝི་ཏྱ་པྲ་ཏཱིཙྪ་ཡེ་ལོ་ནད་ཐམས་ཅད་ཤཱནྟཾ་ཀུ་རུ་ཡེ་སྭཱ་ཧཱ། རྔ་གླིང་ཌཱ་རུ་དྲིལ་བུ་པི་ཝཾ་དང་། །རབ་སྙན་རོལ་མོའི་སྒྲ་སྐད་ཅི་མཆིས་པ། །ས་ཡི་སྙིང་པོ་འཁོར་དང་བཅས་ལ་འབུལ། །བཞེས་ནས་ལོ་ལེགས་འབྲུ་ཚོགས་རྒྱས་པར་མཛོད། །ཨོཾ་སརྦ་ཏ་ཐཱ་ག་ཏ་ཀཱི་ཧི་ར་ཙ་བཱ་སུ་དྷ་རི་དེ་ཝི་ཤི་པྲི་ཐི་དེ་ཝཱི་ས་པ་རི་ཝཱ་ར་ཤབྡ་པྲ་ཏིཙྪ་ཡེ་ལོ་ནད་ཐམས་ཅད་ཤཱནྟཾ་ཀུ་རུ་ཡེ་སྭཱ་ཧཱ། དེ་ནས་བསྲེག་རྫས་འབུལ་བ་ནི། རྒྱས་འབྲིང་བསྡུས་སོགས་གང་འདོད་སྦྱར།
ཧཱུྃ་ཡེ་ཤེས་ཀློང་ཡང་འཁྱིལ་བའི་གཞལ་ཡས་དབུས། །དམ་ཚིག་བདུད་རྩི་གཙང་མའི་སྦྱིན་སྲེག་འདི། །ས་ཡི་སྙིང་པོ་འཁོར་དང་བཅས་ལ་འབུལ། །རྒྱས་པ་ལ། །བཞེས་ནས་ལོ་ལེགས་འབྲུ་ཚོགས་རྒྱས་པར་མཛོད། །ཨོཾ་བྷོ་དྷི་བྷིཀྵ་ཡ་ཡམ་ཤིང་། མར་ཁུ་ཞལ་དུ་འབུལ་བར་བསམ་ལ། ཨོཾ་བྷ་ཝ་ཀ་ཨགྣེ་ཡེ་སྭཱ་ཧཱ། ཏིལ་ཕུལ། ཨོཾ་སརྦ་པ་པཾ་ད་ཧ་ན་བཛྲ་ཡེ་སྭཱ་ཧཱ། ཟས་མཆོག་ཕུལ། ཨོཾ་སརྦ་སཾ་པ་དེ་སྭཱ་ཧཱ། སོ་བ་ཕུལ། ཨོཾ་བཛྲ་བི་ཛ་ཡེ་སྭཱ་ཧཱ། འབྲས་ཕུལ། ཨོཾ་བཛྲ་པུཥྛ་ཡ་སྭཱ་ཧཱ། ནས་ཕུལ། ༀ་མ་ཧཱ་བེ་ག་ཡེ་སྭཱ་ཧཱ། གྲོ་ཕུལ། ཨོཾབཛྲ་གྷསྨ་རི་སྭཱ་ཧཱ། སྲན་མ་ཕུལ། ༀ་མ་ཧཱ་བྷ་ལ་ཡ་སྭཱ་ཧཱ། དུརྦ་ཕུལ། ཨོཾབཛྲ་ཨ་ཡུ་ཥེ་སྭཱ་ཧཱ། ཀུ་ཤ་ཕུལ། ཨོཾ་ཨ་པྲ་ཏི་ཧ་ཏ་སྭཱ་ཧཱ། ཅེས་བསྲེག་རྫ་ས་རྣམས་ཞི་རྒྱས། གང་རུང་གི་ལྷ་སྔགས་ལས་སྔགས་སོ་སོར་སྦྱར་ལ་རྒྱས་འབྲིང་བསྡུས་སོགས་གང་སྐབས་བྱ། འདི་ནས་གཞུང་གི་མཆོད་པ་ཕུལ་གསུངས་སོ། །དཀར་གསུམ་སྦྱར་བའི་རིལ་བུ་འོ་ཆབ་སྦྱར་ལ་འདི་སྐད་དོ། །རིན་ཆེན་སྣོད་དུ་དཀར་གསུམ་གཏོར་མ་ནི། །ཁ་དོག་དྲི་རོ་ནུས་པ་ཕུན་ཚོགས་གྱུར། །ཨོཾ་ཨཱཿཧཱུྃ་ཧ་ཧོ་ཧྲཱི༔ ལན་གསུམ། །ཟག་མེད་བདེ་སྐྱིད་བདུད་རྩིའི་གཏོར་མ་ནི། །བྱང་ཆུབ་སེམས་དཔའ་ས་ཡི་
སྙིང་པོ་དང་། །བཅོམ་ལྡན་འདས་དང་ལྷ་མོ་ནོར་རྒྱུན་མ། །ལྷ་མོ་དཔལ་དང་ས་ལྷ་བརྟན་མ་དང་། །དཔལ་གྱི་ལྷ་མོ་གྲོགས་མོ་བརྒྱད་ལ་སོགས། །འཁོར་དང་བཅས་པ་རྣམས་ཀྱི་ཞལ་དུ་འབུལ། །བཞེས་ནས་བདག་དང་བདག་གི་བསྲུང་བྱ་ཡི། །རི་ཞིང་ཐང་ཞིང་ལོ་ཏོག་ཐམས་ཅད་ལ། །གནོད་པའི་ལོ་ནད་གདུག་པ་མཐའ་དག་དང་། །བཙའ་རིགས་བཞི་དང་གྲྭ་སྐྱ་འབུ་སྲིན་དང་། །སད་སེར་ཐན་པ་ལ་སོགས་མི་མཐུན་ཕྱོགས། །ཐམས་ཅད་མྱུར་དུ་ཞི་བའི་ཕྲིན་ལས་མཛོད། །གྲོ་ནས་བྲ་སྲན་ཡུངས་སོགས་ལོ་ཏོག་རྣམས། །ཤིན་ཏུ་ལེགས་ཤིང་ཕུན་སུམ་ཚོགས་ནས་ཀྱང་། །འབྲུ་ཡི་ཕུང་པོ་འཕེལ་ཞིང་རྒྱས་པ་དང་། །ས་བཅུད་ཡོན་ཏན་ལྡན་པའི་ཕྲིན་ལས་མཛོད། །རྒྱས་པར་གཞུང་གི་གཏོར་སྔགས་བདུན་ནམ་གསུམ། །གོང་ལྟར་ལས་སྔགས་སོ་སོར་ཁ་བསྒྱུར་ཕུལ། །བསྡུ་ན་རྣམ་ལྔའི་སྔགས་མཐར་བ་ལིང་བཏགས། །རིལ་བུ་ལྔ་བདུན་གང་རུང་ལྷན་ཅིག་ཕུལ། །དེ་ནི་མང་ཉུང་སྐབས་དང་སྦྱར་བར་བྱ། །ལྔ་ཚོམ་གཏོར་མ་བྲན་ལ་བསྟོད་པ་ནས། །རྗེས་ཆོག་རྣམས་ནི་ཆོ་ག་གཞུང་བཞིན་བྱ། །རྒྱས་པར་གྲུབ་ན་མེ་ལྷ་གོང་ལྟར་མཆོད། །བསྡུ་ན་སྔགས་མཆོད་གཏོར་མ་ཕུལ་བ་དང་། །བསྟོད་པ་བཟོད་གསོལ་ཡེ་ཤེས་མེ་ལྷ་ནི། །རང་གནས་ཤར་ལྷོ་མཚམས་
སུ་གཤེགས་པར་དམིགས། །ཨགྣེ་ཡེ་ས་པཱ་རི་ཝཱ་ར་གཙྪ༔ དམ་ཚིག་པ་རྣམས་རང་གི་སྙིང་ཁར་བསྡུ། །ཤིས་བརྗོད་བསྔོ་བ་སྨོན་ལམ་རྒྱས་གདབ་བྱ། །དེ་ལྟར་ས་སྙིང་གཙོ་འཁོར་ལྔ་པོ་ཡི། །ཞི་རྒྱས་གཉིས་ཀྱི་མེ་མཆོད་འདོན་ཆ་འདི། །འཆམ་གཤིས་འཚོ་མཛད་དེ་ཡིས་བསྐུལ་བའི་ངོར། །ཨོ་རྒྱན་ཆེན་པོའི་ལུང་བསྟན་མཐའ་དག་དང་། །བཀའ་ཐང་རྣམས་ནས་སྙིགས་མའི་དུས་འདི་ལ། །མི་རྣམས་དུག་གསུམ་ཆེ་རགས་རྣམ་སྨིན་གྱི། །ནད་མུག་མཚོན་གྱི་བསྐལ་པ་འབྱུང་ཚུལ་ལ། །དཔྱད་ན་རང་གིས་ཇི་ལྟར་ཕན་སྙམ་པའི། །སྙིང་རྗེའི་དབང་གིས་ཀུན་ནས་བསླང་བ་ཡིན། །མདོ་རྒྱུད་རྣམས་ལ་དཔང་པོ་བཞག་ནས་ཀྱང་། །རྣམ་སྨིན་མཐོང་ཐོས་མྱོང་གྱུར་མ་་གཏོགས་པར། །སྐབས་སུ་ཕན་ཐོགས་ཨེ་འོང་རེ་ལྟོས་ཀྱིས། །འགྲོ་རྣམས་བཀྲེས་སྐོམ་སྡུག་བསྔལ་ཞི་བ་དང་། །ལོ་ལེགས་འབྲུ་འཕེལ་ཆོ་ག་ལས་ཚོགས་རིགས། །རང་བཟོ་མིན་པའི་བསྒྲིགས་ཆོག་མང་དུ་འབད། །དགེ་བས་འགྲོ་ཀུན་བདེ་སྐྱིད་ཕུན་ཚོགས་ཤོག །ཆོས་དང་མཐུན་པའི་དཔལ་ལ་སྤྱོད་གྱུར་ཅིག །འབྲི་བྲིས་འགལ་འཁྲུལ་ཉེས་པ་ཅི་མཆིས་པ། །སངས་རྒྱས་བྱང་སེམས་རྣམས་ཀྱི་དྲུང་དུ་བཤགས། །དེ་སྐད་སྨྲས་པ་རཱ་ག་ཨ་མྱས་སོ།། །།
༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།