སེར་བསང་།
སེར་བསང་བཞུགས་པའི་དབུ་ཡི་གཟིགས་ཕྱོགས་སྤྲོ་བར་བཞུགས། ༈ འདི་ཡི་གེ་སུ་ཤེས་ཀྱི་འདོན་རུང་བཀའ་གཉེན་མིན་ལག །དཔེ་གཅོད་མི་གདའ་ན་གཅོད་ཆུགས། གཞན་ཕན་གང་ཆེ་བསམ་པས་བྲིས་པ་དགེ་ལེགས་འཕེལ། ཀརྨ་མརྟིས།
གུ་རུ་རིན་པོ་ཆེ་ལ་ཕྱག་འཚལ་ལོ། །རིག་འཛིན་བདུད་འདུལ་རྡོ་རྗེའི་གཏེར་ཡིག་ལས། །ངོམ་གྱི་ཕྱོགས་སུ་སད་སེར་མུ་གེ་འབྱུང་། །ཞེས་ཨོ་རྒྱན་རིན་པོ་ཆེའི་ལུང་བསྟན་པའི་དུས་ལ་བསླེབས་པས། དུས་ཕྱིས་སེར་བ་རྒོད་ཅིང་སྔགས་པ་རྣམས་ཀྱིས་ཐུབ་དཀའ་བར་བྱུང་བས། དེ་ལ་ཕན་པའི་དོན་དུ་ལོ་གླུད་སེར་བསང་བྲི་བར་བྱ་སྟེ། བསང་མཆོད་སྤྱི་ལྟར་ལས། ཁྱོད་པར་བསང་ཁང་ནང་དུ་སྙེ་མའི་ཕུད་རྣམས་མཆོད་ཅིང་བསང་རྒྱས་པར་བྱེད་ན། འདི་ཁུ་ཡེའི་གོང་དུ་འདོན་ལ། འདི་རྐྱང་པ་དུས་བཏོན་ན་ཡང་ཆོག་པས། ཚར་གསུམ་བཞི་བདུན་སོགས་འདོན་ན། གཤེགས་གསོལ་མན་ཚར་གཅིག་བྱ། བསང་རྒྱས་པ་བྱེད་ན་གཤེགས་གསོལ་ཉུང་བ་ནི་སྐྱུར་ཀྱང་རུང་ངོ་། དམིགས་པ་འདོན་སྒོམ་སྦྲགས་པས་བྱའོ། །
ན་མོ། དཀོན་མཆོག་གསུམ་དང་རྩ་བ་གསུམ། །གུ་རུ་དྲག་པོ་ཡེ་ཤེས་ཁྲོ་བཅུ་ལ། །བདག་དང་ལོ་ཐོག་འབུ་སྲིན་སྐྱབས་སུ་མཆི། །འགྲོ་བ་མུ་གེའི་འཇིགས་པ་ཞི་བ་དང་། འབུ་སྲིན་རྣམས་ལ་མི་འཇིགས་སྦྱིན་པའི་ཕྱིར། །ལོ་གླུད་སེར་བསང་བདག་གིས་བརྩམ་པར་བྱ། །ཆོས་རྣམས་སྤྲོས་བྲལ་ཡེ་ནས་རྫོགས་པ་ཆེ། །དེ་ཡི་རང་མདངས་རང་ཉིད་སྐད་ཅིག་གིས། །རྡོ་རྗེ་གྲོ་ལོད་སྐུ་མདོག་དམར་སྨུག་ནག་སྤྱན་གསུམ་ཨམ་གཙིགས་དབུ་སྐྲ་དམར་སེར་འཁྱིལ། །རྡོ་རྗེ་ཕྱར་ཞིང་ལྕགས་ཕུར་ཕྱོགས་བཅུར་གཟིར། །ཕོད་ཁ་ཆོས་གོས་མི་མགོའི་དོ་ཤལ་
ཅན། །བརྐྱང་བསྐུམ་འདོར་ཐབས་སྟག་མོའི་གདན་ལ་འགྱིངས། །ཡེ་ནས་དམ་ཡེ་དབྱེར་མེད་ཐུགས་སྲོག་ཧཱུྃ། །དེ་ལས་འོད་འཕྲོས་བསང་མགྲོན་སྤྱན་དྲངས་གྱུར། །ཧཱུྃ། གདོད་ནས་རྣམ་དག་ཆོས་དབྱིངས་ཞིང་ཁམས་ནས། །འཇིག་རྟེན་དྲེགས་པ་ཀུན་འདུལ་པདྨ་འབྱུང་། །ཡེ་ཤེས་ཁྲོ་བཅུ་འཁོར་བཅས་གཤེགས་སུ་གསོལ། །ལོ་ཐོག་རྣམས་ལ་བསྲུང་ཕྱིར་བརྟན་པར་བཞུགས། །སྟོང་གསུམ་མི་མཇེད་འཇིག་རྟེན་ཞིང་ཁམས་ནས། །སྲིད་པའི་སེར་བདག་གཟའ་གདོན་དྲེགས་པའི་ཚོགས། །ལོ་གླུད་བསང་མཆོད་འབུལ་ཚུཕྱིར་འདིར་བྱོན་ལ། །ཞི་ཞིང་བྱམས་པའི་སེམས་ཀྱིས་བསང་མཆོད་བཞེས། །རཾ་ཡཾ་ཁཾ་གིས་མི་གཙང་དྲི་མ་སྦྱངས། །དྷིལས་བསང་ཁང་དུ་བའི་ལྷ་མོ་ནི། །སྔོན་མོ་རྒྱན་དང་ལང་ཚོ་ཕུན་སུམ་ཚོགས། །ཕྱག་གཡས་ཁྲུས་བུམ་ཕོག་ཐུག་འགྲམ་འཁྲུག་བཀྲུ། །གཡོན་པས་སྨན་གཞོང་སྤོས་སྤྲིན་སྟོང་གསུམ་ཁྱབ། །དུད་པའི་ཆ་ཤས་ཟེར་མ་རེ་རེ་ལ། །འདོད་ཡོན་ལྔ་དང་རྒྱལ་སྲིད་བཀྲ་ཤིས་རྫས། །བཟའ་བཏུང་ལོངས་སྤྱོད་སྣ་ཚོགས་ཆར་བཞིན་འབེབས། བཛྲ་དྷུ་པེ་ཧཱུྃ་གིས་བྱིན་གྱིས་བརླབས། །ཕྱེ་མར་ཟས་ཕུད་དཀར་གསུམ་
མཆོད་པའི་འདིས། །ཧཱུྃ། སངས་རྒྱས་ཀུན་འདུས་གུ་རུ་རིན་པོ་ཆེ། །སྐྱེ་འཆི་མེད་པ་རྡོ་རྗེའི་སྐུ། །ལྷ་སྲིན་ཐམས་ཅད་འདུལ་མཛད་པ། །གུ་རུ་པདྨ་འབྱུང་གནས་ལ། །ཕྱག་འཚལ་བསང་དང་མཆོད་པ་འབུལ། །ལོ་ཏོག་རྣམས་ལ་སྐྱབས་པར་ཞུ། །བྱིན་གྱིས་རློབས་ཤིག་གུ་རུ་རྗེ། །སྣང་སྲིད་དྲེགས་པ་འདུལ་མཛད་པ། །གུ་རུ་དྲག་པོའི་ལྷ་ཚོགས་ལ། །ཕྱག་འཚལ་བསང་དང་མཆོད་པ་འབུལ། །སད་དང་སེར་བའི་གནོད་པ་ཟློག །ལོ་ཏོག་རྣམས་ལ་བསྲུང་དུ་གསོལ། །ལོ་ལེགས་འབྲུ་བཅུད་འཕེལ་བའི་ལྷ། །སེམས་དཔའ་ས་ཡི་སྙིང་པོ་ལ། །ཕྱག་འཚལ་བསང་དང་མཆོད་པ་འབུལ། །ལོ་ལེགས་འབྲུ་འཕེལ་དངོས་གྲུབ་སྩོལ། །སད་དང་སེར་བ་ཟློག་པའི་ལྷ། །ཁྲོ་བོ་རྡོ་རྗེའི་མཆུ་ལ་ཡང་། །ཕྱག་འཚལ་བསང་དང་མཆོད་པ་འབུལ། །ཐོག་དང་སེར་བའི་གནོད་པ་ཟློག །ལོ་ཐོག་རྣམས་ལ་བསྲུང་དུ་གསོལ། །ཁྲོ་བོ་ཧཱུྃ་ཆེན་ཀཱ་ར་ལ། །ཕྱག་འཚལ་བསང་དང་མཆོད་པ་འབུལ། །སྟེང་གི་ཕྱོགས་ཀྱི་ཐོག་སེར་ཟློག །ལོ་ཐོག་རྣམས་ལ་བསྲུང་དུ་གསོལ། །ཁྲོ་བོ་རྣམ་པར་རྒྱལ་བ་ལ། །ཕྱག་འཚལ་བསང་དང་མཆོད་པ་
འབུལ། །ཤར་ཕྱོགས་དྲི་ཟའི་ཐོག་སེར་ཟློག །ལོ་ཐོག་རྣམས་ལ་བསྲུང་དུ་གསོལ། །ཁྲོ་བོ་དབྱུག་པ་སྔོན་པོ་ལ། །ཕྱག་འཚལ་བསང་དང་མཆོད་པ་འབུལ། །ཤར་ལྷོ་མེ་ལྷའི་ཐོག་སེར་ཟློག །ལོ་ཏོག་སྲུང་སྐྱོབ་མཛད་དུ་གསོལ། །ཁྲོ་བོ་གཤིན་རྗེའི་གཤེད་པོ་ལ། །ཕྱག་འཚལ་བསང་དང་མཆོད་པ་འབུལ། །ལྷོ་ཕྱོགས་གཤིན་རྗེའི་ཐོག་སེར་ཟློག །ལོ་ཐོག་རྣམས་ལ་སྲུང་སྐྱོབ་མཛོད། །ཁྲོ་བོ་མི་གཡོ་མགོན་པོ་ལ། །ཕྱག་འཚལ་བསང་དང་མཆོད་པ་འབུལ། །ལྷོ་ནུབ་སྲིན་པོའི་ཐོག་སེར་ཟློག །ལོ་ཏོག་རྣམས་ལ་ཐུགས་རྗེས་སྐྱོབ། །ཁྲོ་བོ་རྟ་མགྲིན་རྒྱལ་པོ་ལ། །ཕྱག་འཚལ་བསང་དང་མཆོད་པ་འབུལ། །ནུབ་ཕྱོགས་ཀླུ་ཡི་ཐོག་སེར་ཟློག །ལོ་ཐོག་རྣམས་ལ་སྐྱོབ་པར་ཞུ། །ཁྲོ་བོ་འདོད་པའི་རྒྱལ་པོ་ལ། །ཕྱག་འཚལ་བསང་དང་མཆོད་པ་འབུལ། །ནུབ་བྱང་རླུང་ལྷའི་ཐོག་སེར་ཟློག །ལོ་ཐོག་སྲུང་སྐྱོབ་མ་གཡེལ་ཞིག །ཁྲོ་བོ་བདུད་རྩི་འཁྱིལ་པ་ལ། །ཕྱག་འཚལ་བསང་དང་མཆོད་པ་འབུལ། །བྱང་ཕྱོགས་གནོད་སྦྱིན་ཐོག་སེར་ཟློག །ལོ་ཐོག་སྲུང་སྐྱོབ་མེལ་ཚེ་མཛོད། །ཁྲོ་བོ་ཁམས་གསུམ་རྣམ་རྒྱལ་ལ། །ཕྱག་འཚལ་བསང་
དང་མཆོད་པ་འབུལ། །བྱང་ཤར་བགེགས་ཀྱི་ཐོག་སེར་ཟློག །ལོ་ཐོག་ཁྲོ་བོ་ཁྱོད་ཀྱིས་སྲུངས། །ཁྲོ་བོ་སྟོབས་པོ་ཆེ་ལ་ཡང་། །ཕྱག་འཚལ་བསང་དང་མཆོད་པ་འབུལ། །ས་བདག་ཡུལ་ལྷའི་ཐོག་སེར་ཟློག །ལོ་ཐོག་འདི་རྣམས་ཐུབ་པར་སྲུངས། །དཔལ་མགོན་བདུན་ཅུ་རྩ་ལྔ་ལ། །ཕྱག་འཚལ་བསང་དང་མཆོད་པ་འབུལ། །ཡུལ་འདིར་སད་སེར་མ་བཏང་ཞིག །རྒྱལ་བའི་བཀའ་བཞིན་འཇིག་རྟེན་སྐྱོངས། །བཀྲ་ཤིས་བདེ་ལེགས་མཛད་དུ་གསོལ། །དྲེགས་པའི་སྡེ་དཔོན་སུམ་ཅུ་ལ། །ལོ་གླུད་བསང་དང་མཆོད་པ་འབུལ། །ཡུལ་འདིར་སད་སེར་མ་བཏང་བར། །ལོ་ཕྱུགས་ལེགས་པའི་ཁ་འཛིན་མཛོད། །སྔགས་བདག་དྲེགས་པ་བཅོ་བརྒྱད་ལ། །ལོ་གླུད་བསང་དང་མཆོད་པ་འབུལ། ཡུལ་འདིར་སད་སེར་མ་བཏང་བར། །སེར་བ་སྲུང་རོགས་ཁྱོད་ལ་བཅོལ། སྔོན་ཚེ་དཔལ་ཆེན་ཧེ་རུ་ཀའི། །བཀའ་དང་དམ་ལ་མ་འདའ་བར། །བཅོལ་བའི་ཕྲིན་ལས་འགྲུབ་པར་མཛོད། །ནམ་མཁའ་ཡངས་པའི་དཀྱིལ་འཁོར་ནས། །སྲིད་པའི་སེར་བདག་རཱ་ཧུ་ལ། །ཡབ་ཡུམ་སྲས་དང་འཁོར་བཅས་ལ། །
ལོ་གླུད་བསང་དང་མཆོད་པ་འབུལ། །ཡུལ་འདིར་སེར་བ་མ་བཏང་ཞིག །ཟས་ཀྱི་ངོ་ཅིག་ཁྱོད་ཀྱི་གྱིས། །ཤར་ནས་ནུབ་ཏུ་བྱོན་ཙམ་ན། །དམུ་བདུད་དྲག་པོ་འཁོར་བཅས་ལ། །བྱི་ནུ་ར་ཙ་ཆེན་པོ་ལ། །ལོ་གླུད་བསང་དང་མཆོད་པ་འབུལ། །དམུ་བདུད་སེར་བ་མ་བཏང་ཞིག །ཟས་ཀྱི་ངོ་ཅིག་ཁྱོད་ཀྱི་གྱིས། །ཤར་ལྷོ་མཚམས་ནས་བྱོན་ཙམ་ན། །དགྲ་བླའི་རྒྱལ་མོ་འཁོར་དང་བཅས། །དྲང་སྲོང་ཆེན་པོ་ར་ཧུ་ལ། །ཁྱེད་ལ་ལོ་གླུད་བསང་མཆོད་འབུལ། །དགྲ་བླའི་སེར་བ་མ་བཏང་ཞིག །ཟས་ཀྱི་ངོ་ཅིག་ཁྱོད་ཀྱི་གྱིས། །ལྷོ་ནས་བྱང་དུ་བྱོན་པའི་ཚེ། །ཀླུ་བཙན་ཡོངས་ཀྱི་འཁོར་གྱིས་བསྐོར། །ལྷ་ཆེན་ཁྱབ་འཇུག་ཆེན་པོ་ལ། །ལོ་གླུད་བསང་དང་མཆོད་པ་འབུལ། །ཀླུ་བཙན་སེར་བ་མ་བཏང་ཞིག །ཟས་ངོ་ཁྱབ་འཇུག་ཁྱོད་ཀྱི་གྱིས། །ལྷོ་ནུབ་མཚམས་ནས་བྱོན་པའི་ཚེ། །སྲིན་པོ་ཤ་ཟ་འཁོར་དང་བཅས། །སྲིན་པོ་བྱི་ཏྲི་པ་ཏྲ་ལ། །ལོ་གླུད་བསང་དང་མཆོད་པ་འབུལ། །ཀླུ་བཙན་སེར་བ་མ་བཏང་ཞིག །ཟས་ངོ་བྱི་ཏྲི་ཁྱོད་ཀྱི་གྱིས། །ནུབ་ནས་ཤར་དུ་བྱོན་པའི་ཚེ། །སྲིད་པ་མ་མོའི་ཚོགས་དང་བཅས། །དགྲ་ཕུང་ལྗང་སྔོན་
ཆེན་པོ་ལ། །ལོ་གླུད་བསང་དང་མཆོད་པ་འབུལ། །མ་མོའི་སེར་བ་མ་བཏང་ཞིག །ཟས་ངོ་ལྗང་སྔོན་ཁྱོད་ཀྱི་གྱིས། །ནུབ་བྱང་མཚམས་ནས་བྱོན་པའི་ཚེ། །ལས་ཀྱི་གཤིན་རྗེའི་འཁོར་གྱི་བསྐོར། །དུ་བ་འཇུག་རིང་ཆེན་པོ་ལ། །ལོ་གླུད་བསང་དང་མཆོད་པ་འབུལ། །གཤིན་རྗེའི་སེར་བ་མ་བཏང་ཞིག །ཟས་ངོ་འཇུག་རིང་ཁྱོད་ཀྱི་གྱིས། །བྱང་ནས་ལྷོ་རུ་བྱོན་པའི་ཚེ། །བདུད་རིགས་ཀུན་གྱི་འཁོར་གྱིས་བསྐོར། །བདུད་པོ་རོག་ཏི་འབར་བ་ལ། །ལོ་གླུད་བསང་དང་མཆོད་པ་འབུལ། །བདུད་ཀྱི་སེར་བ་མ་བཏང་ཞིག །ཟས་ངོ་རོག་ཏི་ཁྱོད་ཀྱི་གྱིས། །བྱང་ཤར་མཚམས་ནས་བྱོན་པའི་ཚེ། །བགེགས་རིགས་སྟོང་ཕྲག་བརྒྱད་ཅུས་བསྐོར། །བགེགས་དཔོན་བྱི་ནུ་ཡ་ཀ་ལ། །ལོ་གླུད་བསང་དང་མཆོད་པ་འབུལ། །བགེགས་ཀྱི་སེར་བ་མ་བཏང་ཞིག །ཟས་ངོ་ལོག་འདྲེན་ཁྱོད་ཀྱི་གྱིས། །ཤར་ཕྱོགས་ནམ་མཁའི་ལོ་བདག་མོ། །སྟག་སྲིན་ཟོར་བའི་གདོང་ཅན་མ། །ལོ་གླུད་བསང་དང་མཆོད་པ་འབུལ། །སེར་སྤྲིན་ནག་པོ་མ་གཡོ་ཞིག །ཟས་ངོ་སྲིན་མོ་ཁྱོད་ཀྱི་གྱིས། །ལྷོ་ཕྱོགས་ནམ་མཁའི་མངའ་བདག་མོ། །
བམ་སྲིན་དྲེད་མོང་གདོང་ཅན་མ། །ལོ་གླུད་བསང་དང་མཆོད་པ་འབུལ། །སེར་འབྲུག་འུར་སྒྲ་མ་འབྱིན་ཅིག །ཟས་ངོ་སྲིན་མོ་ཁྱོད་ཀྱི་གྱིས། །ནུབ་ཕྱོགས་ནམ་མཁའི་མངའ་བདག་མོ། །རྐང་སྲིན་བ་གླང་གདོང་ཅན་ལ། །ལོ་གླུད་བསང་དང་མཆོད་པ་འབུལ། །སེར་སྒྲ་གློག་དམར་མ་འཁྱུག་ཅིག །ཟས་ངོ་སྲིང་མོ་ཁྱོད་ཀྱི་གྱིས། །བྱང་ཕྱོགས་ནམ་མཁའི་མངའ་བདག་མོ། །འབྲོག་སྲིན་ཆུ་སྲིན་གདོང་ཅན་ལ། །ལོ་གླུད་བསང་དང་མཆོད་པ་འབུལ། །སེར་བ་དཀར་པོའི་གདོང་མ་སྟོན། །ཟས་ངོ་སྲིན་མོ་ཁྱོད་ཀྱི་གྱིས། །རི་རབ་རི་ཡི་རྩེ་མོ་ནས། །ཡབ་གཅིག་སྲིན་པོ་ཡཀྵ་འབར། །ཁྱོད་ལ་ལོ་གླུད་མཆོད་པ་འབུལ། །གནམ་ལྕགས་ཐོག་མདའ་མ་འཕེན་ཅིག །ཟས་ངོ་ཡབ་རྒན་ཁྱོད་ཀྱི་གྱིས། །འོག་ཕྱོགས་རྒྱ་མཚོའི་གཏིང་རུམ་ནས། །ཡུམ་གཅིག་སྦལ་མགོ་ཁྲག་མིག་མ། །ལོ་གླུད་མཆོད་པ་འདི་བཞེས་ལ། །འོག་ཐོག་ས་འཁྲུག་མ་བཏང་ཞིག །ཟས་ངོ་ཡུམ་རྒན་ཁྱོད་ཀྱི་གྱིས། །གཟའ་བདུད་ཡབ་ཡུམ་སྲས་འཁོར་ལ། །སེར་བ་སྲུང་བའི་ཕྲིན་ལས་བཅོལ། །ཁྱེད་ལ་བསྲུང་དུ་བཅོལ་བ་འདི། །རང་ཤ་རང་གིས་མ་ཟ་ཞིག །རང་ཁྲག་རང་
གིས་མ་འཐུང་ཞིག །བཅོམ་ལྡན་ཕྱག་ན་རྡོ་རྗེ་དང་། །པདྨ་འབྱུང་གནས་བཀའ་མ་བཅག །བཅོལ་བའི་ཕྲིན་ལས་འགྲུབ་པར་མཛོད། །བོད་ཁམས་བརྟན་མ་བཅུ་གཉིས་དང་། །རྗེ་ཡི་མགུར་ལྷ་བཅུ་གསུམ་དང་། །དགེ་བསྙེན་ཉི་ཤུ་རྩ་གཅིག་ལ། །ལོ་གླུད་བསང་དང་མཆོད་པ་འབུལ། །ཡུལ་འདིར་སེར་བ་མ་བཏང་ཞིག །ལོ་ཕྱུགས་ལེགས་པའི་ཁ་འཛིན་མཛོད། །སློབ་དཔོན་པདྨའི་བཀའ་བཞིན་དུ། །ཡུལ་འདིར་བཀྲ་ཤིས་བདེ་ལེགས་མཛོད། །ཁྱད་པར་མདོ་ཁམ་ཟལ་མོ་སྒང་། །ཆུ་གཉིས་བར་གྱི་སྤྱི་རྗེ་ནི། །བོད་ཀྱི་སྐུ་རྒྱལ་ཤེ་ནེ་ནི། །འཁོར་དང་བཅས་པ་ཐམས་ཅད་ལ། །བསང་དང་མཆོད་པ་འདི་འབུལ་ལོ། །ཡུལ་འདིར་སེར་བ་མ་བཏང་ཞིག །ལོ་ཕྱུགས་ལེགས་པའི་ཁ་འཛིན་མཛོད། །ངོམ་ཡུལ་ཀུན་ལ་མངའ་མཛད་པའི། །སྐྱེས་བུ་ངོམ་རྒྱ་མཚོ་བཀྲ་ནི། །འཁོར་དང་ཡང་འཁོར་བཅས་པ་ལ། །བསང་དང་མཆོད་པ་འདི་འབུལ་ལོ། །ཡུལ་འདིར་སེར་བ་མ་བཏང་ཞིག །རང་གི་ཡུལ་འདི་ཁྱོད་ཀྱིས་སྲུངས། །སྤོ་རྒྱལ་སྟག་རྩེ་མཆེད་དགུ་དང་། །དགེ་བསྙེན་སྤྱི་འབྱམས་རྫ་དམར་དང་། །ཁྲ་ཚང་མ་ལ་
སོགས་པ་ཡི། །ཡུལ་ཕྱོགས་འདི་ཡི་བཙན་རིགས་ནི། །མ་ལུས་འཁོར་དང་བཅས་པ་ལ། །བསང་དང་མཆོད་པ་འདི་འབུལ་ལོ། །ཡུལ་འདིར་སེར་བ་མ་བཏང་ཞིག །རང་གི་ཡུལ་འདི་ཁྱོད་ཀྱིས་སྲུངས། །དགེ་བསྙེན་དབྱི་དོ་མཚོ་ནག་དང་། །མཁར་ནག་རིན་ཆེན་ལྷུན་གྲུབ་སོགས། །ཡུལ་ཕྱོགས་འདི་གནས་ཀླུ་བདུད་ལ། །བསང་དང་མཆོད་པ་འདི་འབུལ་ལོ། །ཡུལ་འདིར་སེར་བ་མ་བཏང་ཞིག །སེར་བ་སྲུང་བའི་ཕྲིན་ལས་མཛོད། །མཛོད་འཛིན་སོ་རྒྱལ་དོན་འགྲུབ་དང་། །བསེན་མཁར་གསུམ་པོ་ཕས་ཕས་སོགས། །ཡུལ་ཕྱོགས་འདིར་གནས་གཞི་བདག་ལ། །བསང་དང་མཆོད་པ་འདི་འབུལ་ལོ། །ཡུལ་འདིར་སེར་བ་མ་བཏང་ཞིག །སེར་བ་ཁྱེད་ཅག་རྣམས་ཀྱིས་སྲུངས། །རྫ་ཡི་ལྷ་བྲག་དཀར་པོ་སོགས། །ཡུལ་ཕྱོགས་འདི་ལ་གནས་པ་ཡི། །སྣང་ཞིང་སྲིད་པའི་ལྷ་འདྲེ་ལ། །བསང་དང་མཆོད་པ་འདི་འབུལ་ལོ། །ཡུལ་འདིར་སེར་བ་མ་བཏང་ཞིག །སེར་བའི་སྣ་འདྲེན་མ་བྱེད་པར། །རང་གི་ཡུལ་འདིར་རང་གིས་སྲུངས། །འཛམ་རྒྱལ་ར་དཀར་ག་ཡས་དང་། །མཁར་ནག་བཙོས་རུ་ལ་སོགས་པ། །ཡུལ་འདིའི་
གཞི་བདག་ཐམས་ཅད་ལ། །བསང་དང་མཆོད་པ་འདི་འབུལ་ལོ། །ཡུལ་འདིར་སེར་བ་མ་བཏང་ཞིག །རང་གི་ཡུལ་འདིར་རང་གིས་སྲུངས། །ནོར་བདག་རྟ་འདྲ་འཁོར་བཅས་དང་། །འབྲོག་རྫོ་ང་སྐྱོ་ཐུ་བེནེ་སོགས། །ངོམ་ཡུལ་སྟོད་ཀྱི་གཞི་བདག་ལ། །བསང་དང་མཆོད་པ་འདི་འབུལ་ལོ། །ཡུལ་འདིར་སེར་བ་མ་བཏང་ཞིག །རང་རང་ཡུལ་རྣམས་རང་གིས་སྲུངས། །ལོ་ཕྱུགས་ལེགས་པའི་ཁ་འཛིན་མཛོད། །ས་བོན་མངར་བ་རྣམས་ལ་ནི། །འབྲས་བུ་མངར་བ་སྨིན་པར་གྱུར། །ས་བོན་ཁ་བ་རྣམས་ལ་ནི། །འབྲས་བུ་ཁ་བ་སྨིན་པར་གྱུར། །སྡིག་པའི་འབྲས་བུ་སྡུག་བསྔལ་ཏེ། །དགེ་བའི་འབྲས་བུས་བདེ་བ་ཐོབ། །དེ་ཕྱིར་གནོད་པའི་སེམས་སྤོངས་ལ། །བྱམས་པའི་སེམས་ཀྱིས་གནས་པར་མཛོད། །འཇིག་རྟེན་ལྷ་འདྲེ་ཁྱེད་རྣམས་ལ། །ལོ་གླུད་བསང་མཆོད་འདི་འབུལ་བས། །གནས་སྐབས་བདེ་སྐྱིད་ལྡན་པ་དང་། །མྱུར་དུ་སངས་རྒྱས་ཐོབ་པར་ཤོག །ལྷ་མོ་དཔལ་གྱི་འབྲུ་གཡང་དེ། །ཁུ་ཡེ་ཕྱྭ་དང་གཡང་དུ་ལེན། །ལྷ་མོ་བརྟན་མའི་ས་བཅུད་དེ། །ཁུ་ཡེ་ཕྱྭ་དང་གཡང་དུ་ལེན། །ཡེ་ཤེས་འཇིག་རྟེན་ཐམས་
ཅད་ཀྱི། །བང་མཛོད་འབྲུ་ཡི་དངོས་གྲུབ་དེ། །ཁུ་ཡེ་ཕྱྭ་དང་གཡང་དུ་ལེན། །ཕྱུ་ཧཱུྃ་གཡང་ཧཱུྃ་ལོ་ལེགས་སྐྱེ་རྒྱལ་ཧཱུྃ། །འཇིག་རྟེན་ལྷ་འདྲེ་ཐམས་ཅད་ནི། །རང་རང་སོ་སོའི་གནས་སུ་གཤེགས། །ཡེ་ཤེས་ཁྲོ་བཅུ་རྡོ་རྗེ་མཆུ། །ལོ་ཐོག་མ་བསྡུས་བར་དུ་ནི། །བརྟན་པར་བཞུགས་ལ་སྲུང་སྐྱོབ་མཛོད། །ལོ་ཏོག་བསྡུས་ནས་དབྱིངས་སུ་གཤེགས། གུ་རུ་པདྨའི་བཀྲ་ཤིས་ཤོག །ས་ཡི་སྙིང་པོའི་བཀྲ་ཤིས་ཤོག །ཁྲོ་བོ་བཅུ་ཡི་བཀྲ་ཤིས་ཤོག །ས་ཡི་ལྷ་མོའི་བཀྲ་ཤིས་ཤོག །བན་དེ་པདྨ་ཐབ་མཁས་ཀྱིས་བསྐུལ་ནས་རཱ་ག་ཨ་སྱས་འཕྲལ་དུ་ཟློབྲིས་པས་སེམས་ཅན་མང་པོ་ལ་ཕན་ཐོགས་པའི་རྒྱུ་གྱུར་ཅིག །སརྦ་མངྒ་ལཾ། ཞལ་དྲོ། དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
སེར་སྲུང་གདམས་པ་ཉེར་མཁོ།