སེར་སྲུང་གདམས་པ་ཉེར་མཁོ་བཞུགས་སོ།
ན་མོ་གུ་རུ་ཨརྩིག་ཡེ། བླ་མ་དྲག་པོའི་སྐུ་ལ་ཕྱག་འཚལ་ལོ། །འགྲོ་ལ་ཕན་ཕྱིར་སེར་སྲུང་གདམས་པ་བྲི། །ཆོས་བདག་སྲུང་མས་བཀའ་ཡི་གནང་བ་སྩོལ། །དང་པོ་དམ་ཚིག་བསྲུང་བྱ་ནི། །སེར་སྲུང་སྔགས་པའི་བསྲུང་བྱ་དང་། །སྡེ་ཡི་དམ་ཚིག་གཉིས་སུ་ཡོད། །སྡེ་ཡི་དམ་ཚིག་ཟས་སུ་ཡོད། །སེར་སྲུང་སྔགས་པའི་བསྲུང་བྱ་ནི། །གཙང་མའི་ཕུད་ཀྱི་ལྷ་སྲུང་དང་། །ཡུལ་ལྷ་དུས་སུ་མཆོད་པ་བྱ། །རྫུན་དང་མནའ་ལ་རྟག་ཏུ་འཛེམ། །མནའ་ནི་དཔང་པོ་མི་བྱའོ། །ཕྱི་བ་མི་གསོད་ཤ་མི་ཟ། །མགོ་ལ་མར་ནི་མི་བཀུ་ཞིང་། །སེར་བསང་དུས་སུ་སྲུང་མི་བཀུ། །སླང་ངར་བརྫིས་པའི་ཟས་ནི་ཟ་མི་རུང་། །སླ་ང་མགོ་ལ་གྱོན་མི་རུང་། །ཕྲེང་བ་གཞན་གྱི་ལག་མི་
འགྲིམ། །ཆུ་དང་ནེའུ་སེང་རློག་མི་བྱ། །སེར་གཏའ་སྔགས་པ་གཞན་གྱིས་ཚོར་མི་བྱ། །འཐབ་འཁོན་འཛིང་མོ་མི་བྱའོ། །ཁ་འཕྲོ་སྦག་པ་སྲུང་བར་བྱ། །ཁྱད་པར་རྨེ་ཅན་དམ་ཉམས་ཀྱི། །ཁ་འཕྲོ་འཛེམ་པ་གལ་ཆེའོ། །སེར་བ་བསྲུངས་ནས་མ་བསྡུས་བར། །མན་ངག་གཞན་ལ་མི་སྤེལ་ལོ། །ཀླུ་ཤིང་བྲ་མའི་མེ་མི་འབུད། །གོས་སྨེ་གོན་པར་མི་བྱའོ་། །གླང་དང་རྔ་བྲན་ཤ་མི་ཟ། །སེར་བ་སྔགས་བསྡོ་གཏམ་མི་བྱ། །གཟའ་དང་སྡོང་མོ་ལྷ་འདྲེ་མཆོད། །སེར་གཏའ་སྔགས་དུས་སྨྲ་བཅད་བྱ། །སེར་གཏའ་མི་ལག་མི་འགྲིམ་སྟེ། །ཡང་ན་རབ་གནས་བསྐྱལ་བར་བྱ། །སྡེ་ཡིས་བསྲུང་བྱ་འདི་ལྟར་སྲུངས། །གཉེན་སར་སྐྱེས་པའི་ཤིང་མི་གཅོད། །ཆུ་མིག་ན་བ་མི་རློག་གོ །ཉ་དང་སྦལ་པ་སྦྲུལ་མི་གསོད། །གཉན་སའི་
ཤིང་དང་ཀླུ་ཤིང་གིས། །མེ་ནི་འབུད་པར་མི་བྱའོ། །ཕྱི་བ་གྲུམ་པ་སྲམ་མི་གསོད། །རི་གཉན་ཀུས་འདེབསརྦབ་བཏང་སྤང་། །སེར་བ་སྔགས་དུས་སྔགས་པའི་དྲུང་། །ཁྱི་དང་བུད་མེད་མི་བཏང་ངོ་། །སེར་བ་སྔགས་པའི་སྟང་མི་བྱ། །སེར་བ་སྔགས་པའི་མདུན་དུ་ནི། །ར་ལུག་འདེད་པར་མི་རུང་ངོ་། །སེར་བ་སྔགས་དུས་སྔགས་པ་ཡི། །ངོ་ལ་གཞན་གྱི་ལྟ་མི་རུང་། །དམ་ཚིག་དེ་རྣམས་མ་ཐུབ་ན། །ཞུད་ཀྱི་ཕོག་པ་ཞེས་བྱ་སྟེ། །སེར་བ་ཐུབ་པར་དཀའ་ཞེས་བཤད། ༈ །དེ་ནས་སེར་བའི་དུས་བདུན་ལ། །རྟག་བདུན་བྱུང་ན་སེར་བ་འོང་། །ཚེས་པ་བཞི་ཡི་སྔ་དྲོ་ཞོགས། །སྤྲིན་ནི་སེར་ནག་བྱུང་བ་ན། །སེར་བ་འོང་ནས་སྤྲིན་མགོ་གནོན། །ཚེས་བརྒྱད་ཕུག་རོན་སྐེ་འདྲའི་སྤྲིན། །བཅུ་གཅིག་ར་རྒྱའི་སྒོ་འདྲའི་སྤྲིན། །བཅོ་ལྔ་ཁམ་ནག་ཐལ་བ་གནམ་གཏོར་འདྲ། །བཅོ་བརྒྱད་རྟ་སྐྱའི་རྔ་མ་གྱེན་བཤད་འདྲ། །ཉེར་གཉིས་སྤྲིན་དམར་སེམས་ཅན་གཟུགས་འདྲ་བ། །ཉེར་དགུ་སྤྲིན་ནི་དུད་ཁ་མགོ་ཆེ་བ། །དེ་དག་བྱུང་ན་དུས་ཀྱི་སེར་བ་འོང་། །དུས་དེར་འོང་བར་ཤེས་ནས་བསྒྲིམ་པར་བྱ། །གཞན་ཡང་དུས་མིན་སྤྲིན་ལ་བརྟག་པ་ནི། །རྨ་བྱའི་མགྲིན་འདྲ་དུང་ནི་བརྩེགས་འདྲ་ཡི། །སྤྲིན་ནི་བྱུང་ན་སེར་བ་འོང་འདོད་ཡིན། །སྔོན་པོ་གཡུ་འབྲུག་འདྲ་ན་ཕྱི་འཕྲད་འོང་། །སྤྲིན་དཀར་སྲིན་མ་དྲན་པ་འདྲ་བྱུང་ན། །དེ་ཡི་ཉིན་ཕྱེད་སེར་བ་འོང་བའི་ལྟས། །སྤྲིན་དཀར་དུང་འདྲའི་དཀྱིལ་དུ་གཟུགས་བརྙན་འདྲ། །བྱུང་ན་ཕྱིར་ཉིན་སེར་བ་འོང་བ་ཡིན། །ཡང་ན་དེ་ནུབ་ཕྱིར་ནུབ་
སྲོད་ལ་སེར་བ་འོང་། །ར་མ་རྒྱ་མོའི་སྤོ་དང་འདྲ་བའི་སྤྲིན། །དམའ་ཞིང་འཁྲུག་ལ་རླུང་ཆེན་བྱུང་བ་ན། །ད་ལྟ་ཉིད་དུ་སེར་བ་འོང་བར་ངེས། །སྤྲིན་ནི་ཁང་རྨིང་ས་རུལ་མདོག་འདྲ་དང་། །ཕུབ་རུལ་གཏོར་འདྲ་བྱུང་ན་འཕྲལ་དུ་འོང་། །སྤྲིན་ནི་དུད་ཁ་བང་རིམ་ཡོད་པ་དང་། །སྤྲིན་རྣམས་དམའ་ཞིང་འཁྲུག་ན་མྱུར་དུ་འོང་། །སྤྲིན་ནི་དུད་ཁ་ཐལ་བའི་མདོག་འདྲ་བ། །དམའ་ཞིང་ཁྱུག་ཁྱུག་བྱེད་ན་མྱུར་དུ་འོང་། །ནམ་མཁའ་སྐྱ་དང་འོད་དེ་འདུག་ན་འོང་། །ནམ་མཁའ་གསལ་དང་སྐྱ་འོད་རླུང་ཆེ་དང་། །སྤྲིན་ནི་མཐིང་ནག་འབྲུག་ཆེན་གློག་མྱུར་དང་། །སྤྲིན་དལ་རླུང་འཚུབ་ཀ་བ་བཙུགས་འདྲ་བ། །དེ་དག་ཕྱི་དྲོ་མུན་འཚུབ་ཚུན་ལ་འོང་། །སྤྲིན་ནི་དཀར་ཞིང་འཕང་མཐོ་རླུང་དྲག་ནས། །རླུང་ཤད་ཅན་དེ་སྨན་གྱི་སེར་བ་ཡིན། །དེ་ནི་ཉི་མ་ཕྱེད་ཡོལ་ཙམ་ནས་འོང་། །སྤྲིན་ནག་དུད་ཁ་སེམས་ཅན་གཟུགས་འདྲ་བ། །བྱུང་ན་ཀླུ་ཡི་སེར་བ་འོང་བའི་རྟགས། །སྤྲིན་ནི་ཁམ་ནག་རླུང་འཚུབ་ཆེན་པོ་དང་། །འབྲུག་གློག་ཆེ་ན་བདུད་ཀྱི་སེར་བ་གཡོས། །མུན་འཚུབ་བམ་ནི་ནམ་ཕྱེད་འོང་བ་ཡིན། །སྤྲིན་ནི་སེར་པོ་རླུང་གི་གོ་རོ་རོ། །བྱེད་ན་བཙན་གྱི་སེར་བ་འོང་བ་ཡིན། །སྤྲིན་ནི་ནག་ལ་ནམ་མཁའ་དབལ་སྐྱ་ཤིང་། །རླུང་སུབ་བྱེད་ན་སྡེ་བརྒྱད་སེར་བ་ཡིན། །ནམ་མཁའ་གཞན་ནི་དང་ཞིང་ཐད་ཀ་དེར། །སྤྲིན་ནག་འཁྱིལ་ན་གཟའ་ཡི་སེར་བ་ཡིན། །ནམ་མཁར་སྤྲིན་གྱི་འདུ་ཚོགས་མང་། །ད་ལྟ་གནགས་ཤིང་ད་ལྟ་དྭངས། །ནམ་མཁའ་མི་རྟག་ཤིན་ཏུ་བྲེལ། །བུ་ཡུག་ཁུ་འཕང་
ཕུམ་ཕྲུམ་མང་། །དེ་ཡང་གནམ་ངོ་རྒོད་པའི་ལྟས། །ཉམས་ལ་མེ་འབར་སྦྲུལ་འཁྱུག་སྙམ། །རྨི་ལམ་ལུག་ཁྱུ་མ་ཐུབ་ཤོར། །དམག་ཇག་ཚུར་ལ་བཅའ་བ་རྨིས། །འབྲུག་སྐད་གྲམ་རྡོ་ཆད་འདྲ་དང་། །འབྲུག་སྐད་གྲག་བརྡ་ཡང་ཡང་ཆད། །འབྲུག་ནི་རྐང་འོག་ནས་གྲགས་འདྲ། །གློག་ནི་དམའ་ཞིང་ས་ལ་འཁྱིལ། །སེར་བ་འོང་བའི་ལྟས་ཡིན་ནོ། །ནམ་མཁའ་བྱིན་རླབས་སྤྲིན་མགོ་མནན། །ལྷོ་ནུབ་ཐད་ཀྱི་ནམ་མཁའ་ལ། །སྤྲིན་ནག་ཆུང་ཞིང་ལོག་དགུ་ལ། །ཡང་ཡང་མཐོར་ཞིང་ཡང་ཡང་འདུ། །འབྲུག་སྐད་ཀླད་པ་འགས་སྙམ་པ། །ཡང་ན་གཟེར་ལྷང་སྙིང་ལ་གཟེར། །རྨི་ལམ་མགར་བྱེད་ལྕགས་བརྡུང་བ། །སོལ་ཁང་མགར་ཚང་བཅའ་བ་མཐོང་། །ཉམས་ལ་ལྕགས་བརྡུང་ཐོ་སྐད་ཐོས། །སར་སྒྲ་སིར་སྒྲ་ཙིར་སྒྲ་གྲག །དེ་ནི་སྟེང་ཐོག་འོང་བའི་ལྟས། །ས་འགུལ་ས་ཁོལ་རྐང་པ་སྦྲིད། །ས་འོག་རྔ་སྒྲ་འབིར་སྒྲ་གྲག །ས་ཡི་འོག་ནས་དུད་པ་འཐུལ། །དེ་ནི་འོག་འཁྱུག་འོང་བའི་ལྟས། །ཐོག་སྲུང་སྔགས་དང་དམིགས་པ་བྱ། །ནངས་སྔ་ནམ་མཁའ་བྱིན་རླབས་ནི། །ན་མོ་བདག་དང་ལོ་ཐོག་འབུ་སྲིན་བཅས། །དཀོན་མཆོག་གསུམ་ལ་སྐྱབས་སུ་མཆི། །འགྲོ་བ་གསོ་ཕྱིར་ལོ་ཐོག་འདི་རྣམས་ནི། །འགྲོ་ལ་ཕན་ཕྱིར་བདག་གིས་བསྲུང་བར་བྱ། །སྟོང་པའི་ངང་ལས་རང་སེམས་ཧཱིཡིག་ལས། །རང་ཉིད་ཐུགས་རྗེ་ཆེན་པོ་སྤྱན་རས་གཟིགས། །ཞལ་གཅིག་ཞི་འཛུམ་
དར་དང་རིན་ཆེན་བརྒྱན། །ཕྱག་གཡས་ཤེལ་ཕྲེང་གཡོན་པས་པད་མ་འཛིན། །ཐུགས་ཀའི་ཧྲིལ་ཡི་གེ་དྲུག་པས་བསྐོར། །ཞབས་གཉིས་རྡོ་རྗེ་སྐྱིལ་ཀྲུང་པད་ཟླར་བཞུགས། །དབུ་གཙུག་ནམ་མཁའི་དབྱིངས་སུ་པད་ཟླའི་སྟེང་། །སངས་རྒྱས་འོད་དཔག་མེད་པ་སྐུ་མདོག་དམར། །ཕྱག་གཉིས་མཉམ་བཞག་ལྷུང་བཟེད་བདུད་རྩིས་བཀང་། །ཞབས་གཉིས་རྡོ་རྗེ་སྐྱིལ་མོ་ཀྲུང་གིས་བཞུགས། །ཐུགས་ཀའི་ཧྲཱི༔ལས་འོད་འཕྲོས་བདེ་ཆེན་ནས། །ཐུགས་རྗེ་ཆེན་པོ་དང་ནི་འོད་དཔག་མེད། །གྲངས་མེད་སྤྱན་དྲངས་གཉིས་སུ་མེད་པར་བསྟིམ། །ལྷ་སྲིན་སྡེ་བརྒྱད་སེར་བདག་སྣ་འདྲེན་བཅས། །ཚེ་རབས་མང་པོའི་ཕ་མ་ཡིན་པའི་ཕྱིར། །ད་ལྟ་ལུས་ངན་བདུད་རིགས་འདྲེ་རུ་སྐྱེས། །འདི་དག་ཐམས་ཅད་སྙིང་རེ་རྗེ་ན་ཨང་། །སྡེ་བརྒྱད་སེར་བདག་སྣ་འདྲེན་དང་བཅས་པ། །སྡུག་བསྔལ་ཀུན་བྲལ་བདེ་བ་ཀུན་དང་ལྡན། །མྱུར་དུ་སངས་རྒྱས་ཐོབ་ན་དགའ་བ་ལ། །ཨོཾ་མ་ཎི་པདྨེ་ཧཱུྃ༔ བརྒྱ་རྩ་འདོན། བདག་གི་ཞལ་ནས་ཡིག་དྲུག་སྒྲ་གྲག་པའི། །ཐུགས་ཀའི་ཧཱུྃལས་འོད་ཟེར་དཀར་པོ་འཕྲོས། །སྡེ་བརྒྱད་སེར་བདག་སྣ་འདྲེན་རྣམས་
ལ་ཕོག །བདག་ལ་དད་གུས་ཅི་གསུངས་བཀའ་ཉན་གྱུར། །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་པས་གསུངས། །རྒྱུ་ལས་འགོག་པ་གང་ཡིན་པ། །དགེ་སྦྱོངས་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་བསྐྱེད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །དེ་སྟེར་འོད་ཟེར་ཕོག་ཅིང་ཆོས་བསྟན་པའི། །སེར་བ་མི་བཏང་གཏང་རེ་ན་ར་ཀན། །ཅེས་སྨྲས་དམ་བཅའ་ཕུལ་ནས་ཐམས་ཅད་ཀྱང་། །བྱམས་པའི་སེམས་སྐྱེས་ཡིག་དྲུག་འདོན་པར་གྱུར། །དེ་ནས་འོད་དཔག་མེད་པའི་ཐུགས་ཀ་ནས། །འོད་ཟེར་བྱུང་བའི་སྡེ་བརྒྱད་སེར་བདག་རྣམས། །ཐམས་ཅད་སངས་རྒྱས་སྣང་བ་མཐའ་ཡས་ཀྱི། །ཐུགས་ཀྱི་དཀྱིལ་འཁོར་ཉིད་དུ་སངས་རྒྱས་ནས། །ཐམས་ཅད་འོད་དཔག་མེད་པའི་སྐུ་རུ་གྱུར། །ནམ་མཁའ་ས་གཞི་བར་སྣང་ཐམས་ཅད་ཀུན། །འོད་དཔག་མེད་པས་ཐེམ་འགགས་ནེམ་འགགས་གང་། །ཀུན་ཀྱང་ལོ་ཐོག་སྲུང་སྐྱོབ་མཛད་པར་གྱུར། །ན་མོ་བུདྡྷ་ཡ། ན་མོ་དྷརྨཱ་ཡ། ན་མ་སཾ་གྷ་ཡ། ཨོཾ་ཨ་མི་དྷེ་ཝ་ཧྲཱིཿ པདྨ་ད་རི་ཧཱུྃ་ཡུལ་འདི་
ཞེས་བྱ་བ་ལ་སྲུངས་ཤིག་རཀྵ་རཀྟ། ཞེས་བརྒྱའམ་ཉེར་གཅིག་བཟླས། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བདེན་སྟོབས་ཀྱིས། །བསྲུང་བྱར་གྱུར་བའི་ལོ་ཐོག་ལ། །ལོ་དགྲ་སད་སེར་མི་འབྱུང་ཤོག །འགྲོ་དྲུག་སྡེ་བརྒྱད་སངས་རྒྱས་སྐུ། །ཐམས་ཅད་འོད་ཞུ་བདག་ལ་ཐིམ། །བདག་ཉིད་འོད་དཔག་མེད་ལ་ཐིམ། །སྣང་བ་མཐའ་ཡས་འོད་དུ་ཡལ། །ནམ་མཁའ་ལ་ཐིམ་སྟོང་པ་ཉིད། །ཆོས་སྐུ་སྐྱེ་མེད་ངང་དུ་གནས། །ཞེས་སྟོང་ཉེར་གཅིག་ཐུན་གཅིག་བྷེ། ཏདྱ་ཐཱ། ཨོཾ་ག་ཏེ་ག་ཏེ་པཱ་ར་ག་ཏེ་པ་ར་སཾ་ག་ཏེ་བོ་དྷི་སྭཱ་ཧཱ། ཉེར་གཅིག་གམ་བདུན་བརྗོད། རྨི་ལམ་མཁར་བརྩིགས་བྱས་དང་བཙན་སར་འདུག །ཆུ་དང་གཤའ་ཡི་རགས་བརྩིག་ར་ལུག་བཙུད། །ཞིང་གི་རིབ་བྱས་ནགས་ཚལ་ཆེན་པོར་འདུག །དེ་དག་ལོ་ཐོག་བསྲུངས་ན་འགྲུབ་རྟགས་ཡིན། །ལྷ་ཀླུ་རྣམས་ལ་གཏོར་མའི་མཆོད་པ་བྱས། ༈ །སེར་སྤྲིན་བྱུང་ན་སྤྲིན་མགོ་གནོན་པ་ནི། །རང་ཉིད་གུ་རུ་དྲག་པོ་ཡི། །ཞབས་འོག་ཀླུ་བདུད་རཱ་ཧུ་ལ། །ཅི་གཙོར་བྱས་སྡེ་བརྒྱད་མནན། །ནམ་མཁའ་གུ་རུ་པདྨས་གང་། །སེར་སྤྲིན་དཀྱིལ་དུ་གུ་དྲག་ནི། །མཁའ་འགྲོས་བསྐོར་ཞིང་མེ་དཔུང་འབར། །སེར་སྤྲིན་མེ་དཔུང་ཆེན་པོ་
གྱུར། །སེར་བ་སེར་བདག་ཐམས་ཅད་བསྲེགས། །ས་གཞི་ཡཀྵ་མེ་དབལ་གང་། །ཕྱོགས་མཚམས་སྟེང་འོག་ཁྲོ་བོ་བཅས། །ཕྱོགས་སྐྱོང་བཅུ་པོ་གན་རྐྱལ་མནན། །སྡེ་བརྒྱད་གཟའ་ཀླུ་ཕྱོགས་སྐྱོང་རྣམས། །རྒྱལ་པོ་བཙོན་དུ་བཟུང་བ་ལྟར། །འོག་ཏུ་མནན་པས་ལྷ་འདྲེ་རྣམས། །གཅིག་ཀྱང་འགུལ་དབང་མེད་པར་གྱུར། །ཨརྩིག་མཇུག་ཏུ། ན་མོ་བྷ་ག་ཝ་ཏེ། ཤཱཀྱ་མུ་ན་ཡེ༔ ཏ་ཐཱ་ག་ཏཱ་ཡ། ཨར་ཧ་ཏེ་བྱུ། སཾ་མྱཀཾ་བུདྡྷ་ཡ༔ ཏདྱ་ཐཱ། ཨོཾ་འབུ་འཛེ་འབུ་འཛེ་མ་ཧཱ་འབུ་འཛེ་མ་ཧཱ་འབུ་འཛེ། ས་མ་ཡ་འབུ་འཛེ༔ ཏ་ཐ་འབུ་འཛེ། པྲ་པ་ར་འབུ་འཛེ་༔ ནཱ་ག་པ་ར་བཙོན་རྩོན། ན་ཡེ་པུ་ཧཱ་འབྱུང་པོའི་བྱད་མ་བཟློག་ཅིག །སེར་བ་ཤ་ཏྲོ་མཱ་ར་ཡ་ཧཱུྃ་ཕཊ༔ སེར་སྤྲིན་བཟློག་སྔགས་དྲག་ཙམ་རེས་ཆོག་གསུངས། རྨི་ལམ་ཐོག་རྟགས་བྱུང་ན་མགར་ཚང་གཏོར་བ་ནི། རང་ཉིད་སྐད་ཅིག་ཉིད་ལ་བརྫུས་སྐྱེས་སུ། །ཁྲོ་རྒྱལ་གུ་རུ་དྲག་པོ་གསལ་བ་ནི། །ཧཱུྃ་ཧཱུྃ་ཧཱུྃ་ཞེས་འབྲུག་སྟོང་ལྟར་བསྒྲག་ཅིང་། །ཕྱག་གཡས་སྡིགས་མཛུབ་ནམ་མཁར་གཏད་པ་ཡིས། །ཕྱག་མཚན་གསེར་གྱི་རྡོ་རྗེ་དེ་ཉིད་ལས། །གསེར་གྱི་རྡོ་རྗེ་ཆེན་པོ་རི་རབ་ཙམ། །འཕྲོས་ནས་འུར་སྒྲ་དང་
བཅས་ནམ་མཁར་སོང་། །ཐོག་དང་ཐོག་བདག་མགར་བ་མགར་ཚང་རྣམས། །ནམ་མཁའི་ཕ་མཐའ་ལྕགས་རིའི་རྒྱབ་ཏུ་དེད། །རཾ་རཾ་རཾ་བརྗོད་སྡིགས་མཛུབ་ཕྱོགས་བཅུར་གཡུག །སྟོང་གསུམ་འཇིག་རྟེན་ཐམས་ཅད་མེ་ཡི་གང་། །དེ་ནང་རྡོ་རྗེའི་རྭ་བ་གུར་ཁང་ཕུབ། །དེ་སྟེང་གནམ་ནི་གསེར་གྱི་འཁོར་ལོ་ཡི། །ལྟེ་བར་ཤཱཀ་ཐུབ་རི་རབ་ཙམ་ཞིག་བཞུགས། །རྩིབས་སྟོང་བསྐལ་བཟང་སངས་རྒྱས་སྟོང་རྩ་གཉིས། །ཐམས་ཅད་གསེར་མདོག་ས་གནོན་མཉམ་བཞག་ཅན། །ལྷ་རྣམས་མི་གཡོ་འཁོར་ལོ་གཡས་སུ་འཁོར། །རྩིབས་རྩེ་སྤུ་གྲི་ལྟ་བུ་རབ་རྣོ་བས། །གཟའ་དང་གནམ་ཐེའུ་ཐོག་སེར་མྱལ་མྱལ་གཏུབ། །ས་གཞི་ལྕགས་ཀྱི་འཁོར་ལོ་རྩིབས་སྟོང་པ། །གཡོན་དུ་འཁོར་བས་རྩིབས་རྩེ་རབ་རྣོ་བས། །ས་ཐེལ་མགར་ཚང་སེར་བའི་སྣ་འདྲེན་གཏུབས། །ན་མོ་བུདྡྷ་ཡ། ན་མོ་དྷརྨཱ་ཡ༔ ན་མཿསཾ་གྷ་ཡ༔ ཨོཾ་མ་ཧཱ་ཤྲཱི་ཀྲོ་ཏ་ཧཱུྃ་ཕཊ༔ སརྦ་ས་ཁྱམས་ཁ་རྫོལི་བྷ་དྲ་ཛ་ལ་ཛ་ལ་ཧཱུྃ་ཕཊ༔ བཅུ་གསུམ་བཟླས་པས་འབྲུག་སྐད་ཆད༔ ཉེར་གཅིག་གི་ཐོག་ར་མར་ལྟར་ཞུ་ནས་དངོས་མེད་འགྲོ་བར་གསུངས། སྔགས་འདི་གསེར་གྱིས་བྲིས་ནས་བཏགས་ན་ཐོག་མི་ཕོག །དེ་ནས་སེར་བ་
བཅས་ནི་བྱུང་ན་སྤྲིན་གཏོར་བ་ནི། ༈ བདག་ཉིད་གུ་རུ་དྲག་པོ་དང་། །འཁོར་གྱི་ཁྲོ་བོ་བཅུ་རྣམས་ཀྱི། །ཕྱག་གཡོན་རླུང་གི་འཁོར་ལོ་ལ། །བསྐལ་པའི་རླུང་ནག་འཚུབ་མ་འཕྲོས། །སེར་སྤྲིན་ཐམས་ཅད་དངོས་མེད་གཏོར། །རང་མདུན་རླུང་ལྷ་ཤ་བ་ཞོན། །ལག་ན་རླུང་གི་བ་དན་ཐོགས། །རླུང་འཚུབ་ཆེན་པོ་འཕྲོས་པ་ཡི། །སེར་སྤྲིན་ཐམས་ཅད་གཏོར་བར་གྱུར། །ཨརྩིག་མཇུག་ཏུ། ཨོཾ་ཁྲོ་ག་རུ་ཊ་ཙ་ལེ་ཙ་ལེ་ཧཱུྃ་ཧཱུྃ། ཧཱ་ཡ་ཧཱ་ཡ་ཧུ་ལུ་ཧུ་ལུ་ཧཱུྃ་ཕཊ༔ ཨོཾ་པི་ཏྲི་པ་ཏྲཿ རུ་རུ་ནཱ་ག་ར་ཙ་ཛ་ཛཿ བླ་མེད་ཛཿ ཤ་ལེ་རུ་ཙི༔ འབར་བ་ནག་པོ་བཀྲག་མེད་ཛཿ ཁྱེད་རླུང་གི་བ་དན་ཕྱོར༔ རླུང་གི་དཀྱིལ་འཁོར་སྤྲུལ༔ ཅིང་ཐང་མཱ་ར་ཡ༔ བྱེར་བྱེར་གཏོར་གཏོར་ཟློག༔ ཆུམ་ཆུམ་དྲིལ་དྲིལ༔ ཙཀྲ་ཝར་ཏེ་ཀྱིན་ཐང་རྦད་རྦད༔ སེར་བ་ཆོད་སྤྲིན་ཁྲོལ་ཁྲོལ༔ སུརླ་ཡ་ཙཀྲ་ཛ་ཡེ་བྷི་ཛ་ཡེ་སྭཱ་ཧཱ་ཕཊ། ཅེས་ཕུ་བཏབ་སྡིགས་མཛུབ་གཏད། ལག་པའི་རྡོ་རྗེ་ཁྱུང་གཤོག་གི་ཕྱག་རྒྱ་བཅས་ལ་སེར་སྤྲིན་གཤགས་པར་བསྒོམ་མོ། །གཏོར་མ་ཐུབ་ན་སེར་བ་ཆུར་བཞུ་བ་སེར་རྐང་ཚུགས་ནས་བྱུང་ན་རྐང་པ་བཅག་པ། རང་ངོས་ཁ་བྱུང་ན་གདོང་ནས་བཟློག་པ་རྣམས་དམིགས་པ་ཕྱོགས་གཅིག་ཏུ་བཤད། བདག་ཉིད་ཁྲོ་
རྒྱལ་པདྨ་དྲག་པོ་རྩལ༔ འཁོར་ཚོགས་ཁྲོ་བཅུའི་ཚོགས་དང་བཅས་པ་ཡི༔ སྐུ་ལ་བསྐལ་པའི་མེ་དཔུང་ཆེན་པོ་འབར༔ གནམ་ས་མེས་གང་སེར་བ་ཆུ་རུ་ཞུ༔ ལྷ་འདྲེ་ཐམས་ཅད་ཟིལ་གྱིས་གནོན་པར་གྱུར༔ སྔགས་བཟླས་ཤིང་རྡོ་རྗེའི་ཁྲོས་བྱེད༔ སྔགས་ཀྱི་འོད་ཟེར་མཚོན་ཆའི་འཁོར་ལོ་ཡིས༔ སེར་བའི་རྐང་པ་མྱག་མྱག་བཅད་པར་གྱུར༔ ཐུགས་ལས་སྤྲུལ་པའི་ཁྲོ་བོ་མེ་དབལ་ཚོགས༔ མེ་ཡི་འཁོར་ལོ་ཅན་འཕྲོས་སེར་རྐང་བཅད༔ ཕྱག་ཆ་ཐུན་དང་གཏོར་མ་རྣམས༔ ཡཀཱ་མེ་དབལ་སྐུ་ལུས་མེ་ལས་གྲུབ༔ སྐུ་ལས་བསྐལ་པའི་མེ་རླུང་ཆེན་པོ་འབར༔ ཕྱག་ན་མེ་ཡི་འཁོར་ལོ་འཛིན་པའི་ཚོགས༔ དམག་དཔུང་བཞིན་དུ་བར་སྣང་གང་བར་འཕྲོས༔ སེར་བ་སེར་བདག་གཞོབཐུལ་བུན་ནེ་བསྲེགས༔ སེར་བ་ཐམས་ཅད་གདོང་ནས་བཟློག་པར་གྱུར༔ གཡས་སུ་བྱོལ་གཅིག་གཡོན་དུ་གཟུར་ཅིག༔ གཡའ་རི་ལ་རྒྱོབས༔ སྤང་རི་ལ་རྒྱོབས༔ ནགས་རི་ལ་རྒྱོབས༔ གངས་རི་ལ་རྒྱོབས༔ ཞེས་སྡིགས་མཛུབ་ཀྱིས་སེར་ལམ་གཏོད་ནས། ཨརྩིག་མཇུག་ཏུ། སེར་བ་སེར་བྱེད་སྣ་འདྲེན་དང་བཅས་པ་སུཾ་བྷ་ཡ༔ ན་ཤ་ཡ༔ མཱ་ར་ཡ༔
ཧཱུྃ་རཾ་ཕཊ་རཾ་བྷོ་རཾ་ཏྲག་སེར་བ་རཾ་ཆོད༔ སྤྲིན་གཏོར་༔ དྲག་ཏུ་རཾ་རཾ་ཛྭ་ལ་རཾ་རཾ་ཧཱུྃ་ཕཊ༔ འཇིག་རྟེན་ཁམས་ཀུན་ཆུ་ཁྱག་ཀྱང་། །སྐད་ཅིག་ཙམ་གྱིས་བཅད་འགྱུར་གསུངས། །སེར་བ་བྱུང་ན་ཁར་བཙུགས་གནམ་དུ་གཏོར། །ཐུན་དང་རལ་གྲི་གཏོར་མ་སོགས། །སྔགས་དང་དམིགས་པ་གཅིག་པུས་ཆོག །བཞུ་སྔགས་ཀྱང་དེས་ཆོག །དམིགས་ངན་རྣམས་ནི་ཉེས་པ་ཆེ་བསམ་མ་བྲིས། དེ་ན་སེར་བ་བཟློག་ཐུབ་ན་རབ་ཐ་ན་བབ་ཀྱང་སེར་བའི་ཤུགས་ཉམས་ནས་ལོ་ཐོག་ལ་མི་གནོད། སེར་ལམ་བསྟན་པར་བཤར་སོང་ན་འབྲིང་པོ་ཡིན་ནོ། །སེར་བ་བཅའ་མ་ཤོར་བ་དང་། བཅས་པ་གཏོར་ཐུབ་པ་དང་། སེར་བ་བཞུ་ཐུབ་ན་མཆོག་ཡིན་ནོ། །དེ་ལྟར་བདག་རྒྱལ་ཁ་ལོན་ནས། ༈ བདག་ལས་སྤྲུལ་པའི་མཚོན་ཆ་མེ་དཔུང་རྣམས། །ཐམས་ཅད་ཚུར་འདུས་ཁྲོ་བོ་རྣམས་ལ་ཐིམ། །ཁྲོ་བོ་ཐམས་ཅད་འོད་ཞུ་བདག་ལ་ཐིམ། །བདག་ཀྱང་འོད་ཞུ་ཐུགས་ཀའི་ཧཱུྃ་ལ་ཐིམ། །ཧཱུྃ་ཡང་འོག་ནས་གྱེན་རྫོགས་སྟོང་པར་ཡལ། །འོད་གསལ་ཆོས་སྐུ་མངོན་སུམ་རྗེན་པར་བུད། །ཅེས་ཡུད་ཙམ་མཉམ་པར་བཞག །དེ་ནས་ལྷ་འདྲེ་གསོལ་བ་ནི༔ སྐད་ཅིག་ཉིད་ལ་རང་ཉིད་སྤྱན་རས་གཟིགས། །དབུ་ནི་གཟུགས་མེད་ཁམས་ཀྱི་སྲིད་རྩེར་སླེབས། །སྐུ་སྟོད་གཟུགས་ཁམས་སྐུ་སྨད་འདོད་ཁམས་ཁྱབ། །ཡེ་ནས་དམ་
ཚིག་ཡེ་ཤེས་དབྱེར་མེད་པ། །ཕྱག་གཡས་མཆོག་སྦྱིན་གཡོན་པས་པད་མ་འཛིན། །པད་ཟླའི་སྟེང་ལ་རི་རྒྱལ་ལྟ་བུར་བཞུགས། །སྐུ་ལས་འོད་ཟེར་དཀར་པོ་འཕྲོས་པ་ཡིས། །ལྷ་འདྲེ་རྣམས་ཀྱི་ཞེ་སྡང་འཁོན་སེམས་ཞི། །བདག་གིས་རླུང་གཅིག་ཚུར་ལ་རླུབ་པ་དང་། །ལྷ་འདྲེས་གཙོར་བྱས་སེམས་ཅན་ཐམས་ཅད་ཀྱི། །སྡིག་སྒྲིབ་ཉེས་ལྟུང་ཐམས་ཅད་བདག་ལ་ཐིམ། །སེམས་ཅན་ཐམས་ཅད་སྡིག་སྒྲིབ་སྡུག་བསྔལ་བྲལ། །བདག་གི་ཕན་སེམས་བཟང་པོའི་བདེན་སྟོབས་ཀྱིས། །བདག་ཉིད་གཟི་བརྗིད་ཉི་མ་འབུམ་བཞིན་འབར། །བདག་གི་རླུང་ཞིག་ཕར་ལ་བཏང་བ་དང་། །བདག་གི་བདེ་སྐྱིད་དགེ་རྩ་ཐམས་ཅད་པ། །ལྷ་འདྲེའི་གཙོར་བྱས་སེམས་ཅན་ཀུན་ལ་ཐིམ། །སེམས་ཅན་ཐམས་ཅད་བདེ་སྐྱིད་ལྡན་པར་གྱུར། །རང་གི་ཕྱག་གཡས་མཆོད་སྦྱིན་ཕྱག་མཐིལ་ནས། །འོ་མ་ལྟ་བུར་བདུད་རྩི་ཆུ་རྒྱུན་བབ། །སྡེ་བརྒྱད་སེར་བདག་སྣ་འདྲེན་བཅས་པ་ཡིས། །བདུད་རྩི་འཐུང་ཞིང་ལུས་རྣམས་ཁྲུས་བྱས་པའི། །ཐུན་དང་གཏོར་མ་རལ་གྲི་དྲག་སྔགས་དང་། །དམིགས་ངན་སྣད་ཡར་སྨྲས་འགྲམས་བྱུང་བ་སོས། །ན་ཚ་སྡུག་
བསྔལ་ཀུན་ཞི་བཀྲག་མདངས་རྒྱས། །བདག་ལ་དགའ་ཞིང་གུས་འདུད་བསྐོར་བ་བྱེད། །བྱམས་པའི་སེམས་ལྡན་ཡིག་དྲུག་འདོན་པར་གྱུར། །ཨོཾ་མ་ཎི་པདྨེ་ཧཱུྃ། དམིགས་པ་བསྒོམ་ཞིང་བརྒྱ་ཙམ་འདོན། ཨོཾ་སརྦ་བྷུ་ཏ་གཙྪ་གཙྪ༔ སྡེ་བརྒྱད་ལྷ་འདྲེ་ཐམས་ཅད་རང་གནས་གཤེགས། །རྩ་བ་གསུམ་གྱི་ལྷ་ཚོགས་དགོངས་སུ་གསོལ། །བདག་གི་སྡེ་བརྒྱད་སེར་བདག་སྣ་འདྲེན་ལ། །དྲག་སྔགས་དམིགས་པ་ཐུན་གྱིས་བསད་པ་འདི། །བཅོམ་ལྡན་དབང་དྲག་པད་མའི་ལྷ་ཚོགས་ལ། །ཁམས་གསུམ་ཡོངས་སྒྲོལ་མཆོད་པར་འགྱུར་བར་ཤོག །བྱ་དང་རི་དྭགས་འབུ་སྲིན་ཐམས་ཅད་ལ། །མི་འཇིགས་སྐྱབས་ཀྱི་སྦྱིན་པར་འགྲུབ་པར་ཤོག །དབུ་ནག་རྩམ་ཟན་འགྲོ་བ་ཐམས་ཅད་ལ། །ལོངས་སྤྱོད་ཟང་ཟིང་སྦྱིན་པར་འགྱུར་བར་ཤོག །སེར་བ་བསྲུང་ཕྱིར་ལྷ་སྒོམ་སྔགས་བཟླས་པའི། །མཆོག་གི་དངོས་གྲུབ་ཞོར་ལ་ཐོབ་པར་ཤོག །སེར་བ་བསྲུང་ཕྱིར་ལྷ་ལ་མཆོད་པ་ཡིས། །བསོད་ནམས་ཚོགས་ཆེན་ཡོངས་སུ་རྫོགས་པར་ཤོག །སྡེ་བརྒྱད་གདོན་ལ་ལོ་གླུད་བསྔོས་པ་ཡིས། །ལན་ཆགས་བུ་ལོན་ཐམས་ཅད་བྱང་བར་ཤོག །དེ་ལྟའི་དགེ་རྩ་དེ་དག་གཅིག་
བསྡུས་ཏེ། །ཆོས་སྐུ་སྣང་བ་མཐའ་ཡས་སྤྱན་སྔར་འབུལ། །མཆོད་པའི་སྤྲིན་དཔུང་ནམ་མཁའ་ཁྱབ་གྱུར་ཅིག །དེ་ཡི་དགེ་བ་འགྲོ་དྲུག་ཀུན་ལ་བསྔོ། །ཐམས་ཅད་བླ་མེད་བྱང་ཆུབ་མྱུར་ཐོབ་ཤོག །དེ་ཡི་དགེ་བ་བདག་ལ་འདིར་སྨིན་ནས། །ཚེ་རིང་ནད་མེད་ཉམས་རྟོགས་ནུས་པ་འབར། །ཚེ་གཅིག་པདྨ་འབྱུང་གནས་སྐུ་འགྲུབ་ཤོག །ས་ཕྱོགས་འདི་དང་འཇིག་རྟེན་མ་ལུས་པ། །རྟག་ཏུ་ལོ་ལེགས་བདེ་སྐྱིད་ལྡན་པ་དང་། །སྡེ་བརྒྱད་ཐམས་ཅད་བྱམས་པའི་སེམས་ལྡན་ཤོག །ཨོཾ་མངྒ་ལཾ་བྷ་ཝནྟ་སྭཱ་ཧཱ༔ ཅེས་བརྗོད་ལ་འཕྲལ་དེར་ཡང་ལྷ་ལ་གཏང་རག་གི་ཚོགས་དང་བསྐང་བ་འགྲུབ་ན་ལེགས། མ་འགྲུབ་ཀྱང་མཆོད་བསྟོད་བྱ། གཏོར་མ་འཕན་དགོས་བྱུང་ན་དེའི་ཚེ་གསར་དུ་སྔར་ལས་མི་ཞན་པ་བཅའོ། །རལ་གྲི་ཡང་རབ་གནས་སྤར་བའི་ཚུལ་དུ་ཅུང་ཟད་བསྔགས་ལ་བཞག་གོ །ཞེས་པ་གཞུང་ལུགས་མན་ངག་དུ་མའི་བཅུད་ཕྱུང་། ཞལ་ཤེས་དང་མྱོང་བ་ཡོད་པས་ཀྱང་བརྒྱན། འཕྲལ་དུ་སྔགས་ཆུང་ཞི་ཁྲོ་སྐྱབས་ཀྱིས་བསྐུལ་བ་དང་། གཞན་ཡང་སྔགས་པ་ཀུན་ལ་ཕན་ཕྱིར་ཨ་རཱ་གས་བྲིས་པ་ལ། ཉེས་པ་གང་མཆིས་ལྷ་དང་སྡེ་བརྒྱད་ར་ཧུ་ལ་ལ་བཤགས་ཤིང་། དགེ་བས་སེམས་ཅན་ཐམས་ཅད་མུ་གེའི་བསྐལ་པ་ལས་ཐར་བར་གྱུར་ཅིག །ཨེ་མ་འདི་འདྲའི་གདམས་ངག་མེད་པར་སེར་བསྲུང་བས། །
སེར་བ་ཐུབ་དཀའ་གལ་ཏེ་ཐུབ་ན་ཡང་། །སྡེ་བརྒྱད་ལྷ་འདྲེ་གཟའ་ཀླུ་ཀུན་དང་འགྲོས། །ཚེ་འདིར་མི་རུངས་མི་ཤིས་སྣ་ཚོགས་འབྱུང་། །ཕྱི་མ་ལས་སྒྲིབ་ངན་སོང་སྡུག་བསྔལ་མྱོང་། །འདི་འདྲའི་གདམས་པ་ཤེས་ནས་སེར་སྲུང་བ། །ཚེ་འདིར་གཞི་བདག་ལྷ་འདྲེས་ཕྲིན་ལས་སྒྲུབས། །བར་ཆད་སེལ་ཞིང་དངོས་གྲུབ་སྟེར་བར་འགྱུར། །ཕྱི་མ་ངན་སོང་མི་ལྟུང་མཐོ་རིས་སྐྱེ། །ཡི་དམ་ལྷ་ཡི་རྗེས་བཟུང་ཞིང་ཁམས་བརྗོད། །དེ་ཕྱིར་སྔགས་པ་ཀུན་ལ་གསེར་བས་འཕོང་། །སེམས་བསྐྱེད་ཀུན་ལ་ཕན་ཅིག་ཨང་། །དེ་སྐད་སྔགས་ནག་རཱ་ག་ཨ་སྱས་སྨྲས། །བྷ་ཝནྟུ། བཀྲ་ཤིས་པར་ཤོག །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།