སེར་བ་གཅོད་ཐབས་རྡེབ་འཁོར་རྡེབ་ཆོག་དམིགས་རིམ།
སེར་བ་གཅོད་ཐབས་རྡེབ་འཁོར་རྡེབ་ཆོག་དམིགས་རིམ་བཞུགས་སོ། །རང་ཉིད་སྐད་ཅིག་གུ་རུ་དྲག་པོར་གསལ། །རྡེབ་འཁོར་དྲང་སྲོང་ཆེན་པོ་རཱ་ཧུ་ལ། །དབུ་དགུ་ཕྱག་བཞི་སྐུ་སྨད་སྦྲུལ་དུ་འཁྱིལ། །ལྟོ་བ་ཁྲག་གི་རྒྱ་མཚོ་འཁྱིལ་བའི་ནང་། །སེར་བ་སེར་བྱེད་སྣ་འདྲེན་བཅས་པ་ཁུག །སྦྲུལ་མཇུག་ནས་བཟུང་ནམ་མཁར་ཕྱར་བ་ཡི། །ནམ་མཁར་གནམ་ལྕགས་འཁོར་ལོ་འཁོར་བ་ཡིས། །དུམ་བུར་གཏུབ་ནས་གཞོབ་ཐུལ་བསྲེགས་པར་གྱུར། །ས་གཞི་ལྕགས་སྲེག་དམར་དང་ལམ་མེ་བ། །རབ་འཇིགས་མཚོན་ཆ་སྣ་ཚོགས་སྐྱེས་པ་ལ། །དྲག་ཏུ་བརྡབས་པས་སྡེ་བརྒྱད་སྨྱོས་སྐམ་སོགས། །རང་གི་ཞབས་འོག་འདར་དང་ཕྲི་ལེ་གནས། །བདག་གི་ཐུགས་ལས་འོད་ཟེར་དམར་ནག་འཕྲོས། །སྡེ་བརྒྱད་སྲོག་ཡིག་བླངས་ནས་རང་ལ་བསྟིམ། །དེས་མ་ཚད་ན། ཡང་ན་གཟའ་བདུད་དྲག་ཏུ་བརྡབས་པ་ཡིས། །དྲང་སྲོང་ལྟོ་བ་རལ་ནས་སྡེ་བརྒྱད་རྣམས། །ཁྲག་ཏུ་སྐྱུག་ཅིང་ཆུ་ཡིས་འབྱུང་བ་བཤིག །སྲུང་རིས་ཐམས་ཅད་ཁྲག་གི་རྒྱ་མཚོར་གྱུར། །རི་རབ་སྡེ་བརྒྱད་བཅས་པ་མགོ་སྟེང་ཟློག །ཉི་ཟླ་གཟའ་སྨར་འོག་ནས་འཆར་བར་གྱུར། །ཏིང་འཛིན་མ་འཆུག་པ་གལ་ཆེ། །གག་ཐུག་མ་
གཏོགས་རྡེབ་འཁོར་མི་རྡེབས་སོ། །རྡེབ་དགོས་བྱུང་ན་དྲང་སྲོང་བསྐང་གསོལ་བྱ། །བྱམས་དང་སྙིང་རྗེ་སོགས་ཀྱིས་ལྷ་འདྲེ་གསོ། །སྟོང་ཉིད་སྙིང་རྗེའི་ངང་དུ་བཞག་པར་བྱ། ཨ་སྱས་སྦྱར་བའོ།། །།