འཁོར་ལོ་བཀྲམ་པའི་འདོན་བྱ།
འཁོར་ལོ་བཀྲམ་པའི་འདོན་བྱ་བཞུགས་སོ།། ན་མོ་བླ་མ་བདེ་གཤེགས་འདུས་པའི་སྐུ༔ དཀོན་མཆོག་གསུམ་གྱི་རང་བཞིན་ལ༔ བདག་དང་འགྲོ་དྲུག་སེམས་ཅན་རྣམས༔ བྱང་ཆུབ་བར་དུ་སྐྱབས་སུ་མཆི༔ སེམས་བསྐྱེད་འགྲོ་བ་ཀུན་དོན་དུ༔ བླ་མ་སངས་རྒྱས་བསྒྲུབས་ནས་ནི༔ གང་ལ་གང་འདུལ་ཕྲིན་ལས་ཀྱིས༔ འགྲོ་དྲུག་བསྒྲལ་བར་དམ་བཅའ་འོ༔ ༔ རང་ཉིད་སོགས། འཁོར་ལོ་ཁྲོ་རྒྱལ་དྲག་པོ་ཐོད་ཕྲེང་རྩལ༔ ཕྱག་ཆ་ཟོར་དང་ཐུན་དང་གཏོར་མ་བསྣམས༔ ཡཀྵ་མེ་དབལ་སྐུ་ལུས་མེ་ལས་གྲུབ༔ དམག་དཔུང་བཞིན་དུ་བར་སྣང་གང་བར་འཕྲོས༔ སེར་བ་སེར་བདག་གཞོབ་ཐུལ་བུན་ནེ་བསྲེགས༔ གཡས་སུ་གཟུར་ཅིག༔ གཡོན་དུ་བྱོལ་ཅིག༔ འབྲུག་མོའི་སྒྲ་ཆོག་ཅིག༔ གློག་མོའི་ལྕེ་ཆོད་ཅིག༔ སེར་བ་དཀར་པོའི་རྐང་པ་ཆོག་ཅིག༔ ཨོཾ་ཨཱཿཧཱུྃ་ཨཱརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཨཱ་ཧཱུྃ་ཧཱུྃ་ཕཊ༔ ཨོཾ་བཛྲ་ཧཱུྃ༔ རཀྵ་ཧཱུྃ༔ ཡཀཱ་ཧཱུྃ༔ ཨཿཡཿམཿདུཿརུཿཙཿཤཿནཿསཿམཿཡཿཧཱུྃ་ཕཊསེར་བ་སེར་བྱེད་སྣ་འདྲེན་དང་བཅས་པ་སྟམ་བྷ་ཡ༔ ན་ཤ་ཡ་མཱ་ར་ཡ༔ ཧཱུྃ་རཾ་ཕཊ་རཾ་བྷོ་རོ་དྲག་ཏུ་རཾ་ཛྭ་ལ་རཾ་ཧཱུྃ་ཕཊ༔ སྟེང་
གསེར་གྱི་འཁོར་ལོ༔ བར་སྣང་མེ་ཡི་འཁོར་ལོ༔ ས་གཞི་ལྕགས་སྲེག་གི་འཁོར་ལོ་རྣམས་སུ་གྲུབ་པར་གྱུར༔ སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་དཔའ་བོ་མཁའ་འགྲོ་དམ་པ་ཆོས་སྐྱོང་བའི་སྲུང་མ་རྣམས་དང་༔ བླ་མ་ཡི་དམ་དབང་དྲག་པདྨའི་སྐུ་འཁོར་དང་བཅས་པ་རྣམས་ཀྱིས༔ སྲུང་རིས་ཀྱི་ལོ་ཐོག་སྲུང་བ་དང་༔ སྐྱབས་པར་མཛད་དུ་གསོལ༔ ཨོཾ་ཡེ་དྷརྨཱ་སོགས། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ ལྔ་བདུན་བརྗོད༔ མེ་ཏོག་འཐོར་བར་བྱའོ༔ ཧཱི༔ སྔོན་གྱི་བསྐལ་པའི་དང་པོ་ལ༔ སློབ་དཔོན་པདྨ་སྤྱན་དྲངས་ཚེ༔ བལ་ཡུལ་ལ་ནས་མང་ཡུལ་བྱོན༔ མང་ཡུལ་ལ་ནས་མར་བྱོན་ཚེ༔ ལྷ་སྲིན་དམ་ལ་བཏགས་ཤིང་བྱོན༔ བདག་ནི་དེ་ཡི་བཀའ་བརྒྱུད་ཡིན༔ ཁྱེད་རྣམས་ལྷ་འདྲེ་དེ་ཡི་རིགས་རྒྱུད་ཡིན༔ སྔོན་གྱི་སློབ་དཔོན་བཀའ་མ་བཅག༔ ད་ལྟ་སྔགས་འཆང་དམ་མ་བཀྲལ༔ ཡུལ་འདིར་ཐོག་སེར་མ་བཏང་ཞིག༔ ༈ སངས་རྒྱས་ཀྱི་བཀའ་དང་དམ་ལ་མ་འདའ་ཞིག༔ ཆོས་ཀྱི་བཀའ་དང་དམ་ལ་མ་འདའ་ཞིག༔ དགེ་འདུན་གྱི་བཀའ་དང་དམ་ལ་མ་འདའ་ཞིག༔ བླ་མ་ཡི་དམ་དཔའ་བོ་མཁའ་འགྲོ་དམ་པ་ཆོས་སྐྱོང་སྲུང་
མས་གནས་འདིར་ཐོ་བརྩེགས༔ དུང་བུས་འཁོར་ལོ་བཀྲམ་པ་འདི༔ བླ་མ་དབང་དྲག་པདྨའི་བཞུགས་གནས་ཡིན་པ་ཤེས་པར་གྱིས་ལ༔ སུ་ཡང་མི་ཚེ༔ སུ་ཡང་མི་བཙན་པར༔ ལུས་རྡུལ་ཕྲན་བཞིན་དུ་བརླག་པར་ཤེས་པར་གྱིས་ལ༔ ཡུལ་པདྨ་ཁ་ཕྱེས་པ་ལྟ་བུའི་ཁམས་ཡང་པ་ཅན་དུ་དེངས་ཤིག༔ ལན་གསུམ་དུང་འབུད་དོ༔ ལོ་དག་སེར་བ་མི་འབྱུང་ཞིང་༔ སྡེ་བརྒྱད་གནོད་པ་མེད་པར་མཛོད༔ འཇིག་རྟེན་བདེ་ཞིང་ལོ་ལེགས་ཤིང་༔ འབྲུ་རྣམས་འཕེལ་ཞིང་ཆོས་འཕེལ་བ༔ བདེ་ལེགས་ཕུན་སུམ་ཚོགས་པ་ཡིས༔ ཡིད་ལ་འདོད་པ་ཀུན་འགྲུབ་མཛོད༔ ༧ རཱ་ག་ཨ་སྱས་སྦྱར། །ཨྠྀི༔ཿ།