སད་བསྲུང་བསང་མཆོད་བདུད་རྩིའི་སྤྲིན་སྤུངས་དགོས་འདོད་ཀུན་འབྱུང་།
སད་བསྲུང་བསང་མཆོད་བདུད་རྩིའི་སྤྲིན་སྤུངས་དགོས་འདོད་ཀུན་འབྱུང་བཞུགས་སོ།
ཧྲཱི༔ སྐྱབས་གནས་ཀུན་འདུས་དཀོན་མཆོག་གསུམ་པོ་ལ། །བདག་དང་ལོ་ཐོག་འབུ་སྲིན་སྐྱབས་སུ་མཆི། །སེམས་ཅན་མུ་གེའི་འཇིགས་པ་བསལ་བའི་ཕྱིར། །བདག་གི་ལོ་ཐོག་འདི་རྣམས་བསྲུང་བར་བྱ། །རང་ཉིད་ཐུགས་རྗེ་ཆེན་པོ་ཞི་ཞིང་འཛུམ། །ཕྱག་གཡས་སྤྲིན་གྱི་རྒྱལ་མཚན་ནམ་མཁར་ཕྱར། །གཡོན་པས་པད་དཀར་བདུད་རྩིའི་ན་བུན་འཐུལ། །དབུ་ལ་སྤྲིན་གྱི་འཇའ་ཚོན་སྣ་དགུ་འཁྲིགས། །ཐུགས་ཀའི་ཧཱུྃལས་བྱམས་པའི་འོད་ཟེར་འཕྲོས། །སྐུ་གསུམ་དག་པའི་ཞིང་ཁམས་གཞལ་ཡས་ནས། །བླ་མ་ཡི་དམ་སངས་རྒྱས་བྱང་སེམས་
དང་། །དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས། །འཇིག་རྟེན་འདས་དང་མ་འདས་ལྷ་སྲིན་དང་། །སྟོང་གསུམ་གཞི་བདག་ས་བདག་མ་ལུས་ཀུན། །ནམ་མཁའ་ས་གཞི་གང་བར་སྤྱོད་གྱུར་ཅིག །ཨོཾ་ཨ་ཀཱ་རོས་བྱིན་གྱིས་བརླབས་ནས། ཨོཾ་ཨཱཿཧཱུྃ། ཧཱུྃ་ལས་རིན་ཆེན་སྣོད་ཀྱི་ནང་དུ་ནི། །བསང་རྫས་མཆོད་སྤྲིན་སྟོང་གསུམ་ཁྱབ་པ་ལས། །སྤོས་སྤྲིན་དྲྭ་བའི་སངས་རྒྱས་ཞིང་ཀུན་ཁྱབ། །དེ་ལཾ་བཀྲ་ཤིས་རྫས་རྟགས་རིན་ཆེན་བདུན། །འདོད་ཡོན་ལྔ་ལྡན་ཆར་རྒྱུན་ལྟ་བུ་འབེབས། །བཟའ་བཏུང་བདུད་རྩི་གཟུགས་སྒྲ་དྲི་རོ་རེག །ཟད་མེད་
ལོངས་སྤྱོད་ནམ་མཁའ་གང་བར་གྱུར། །བདག་གིས་བསྲུང་བའི་ལོ་ཐོག་ཡུལ་ཁམས་འདི། །ལྷ་ཚོགས་རྣམས་ལ་སྐྱབས་ཞུ་ཐུགས་རྗེས་གཟིགས། །ཆོས་སྐུ་དྲུག་པ་རྡོ་རྗེ་འཆང་ཆེན་ལ། །དྲིན་ཆེན་རྩ་བརྒྱུད་བླ་མའི་ཚོགས་ཀྱིས་བསྐོར། །མཆོད་རྫས་བདུད་རྩི་སྤྲིན་ཕུང་མཆོད་པ་འབུལ། །སད་ཀྱི་གནོད་པ་སྲུང་ཞིང་བསྐྱབ་ཏུ་གསོལ། །ཡུལ་ཕྱོགས་འདི་རུ་བྱིན་རླབས་སྤྲིན་དཔུང་གཏིབས། །གྲུབ་ཆེན་བརྒྱད་ཅུའི་ས་ལ་དྲོད་ཆེན་ཕོབ། །གསོལ་འདེབས་བྱིན་རླབས་ན་བུན་འཐིབས་པར་མཛོད། །བཅོམ་ལྡན་རྣམ་སྣང་ཆེན་པོ་སྤྲིན་ཆེན་དང་། །སངས་རྒྱས་སྤྲིན་མཛེས་སྤྲིན་འཐིབ་ཆེན་པོ་དང་། །སྤྲིན་གདུགས་སྤྲིན་ལྟར་མཛེས་དང་སྤྲིན་ཆེན་ཁེབས། །སངས་རྒྱས་སྤྲིན་ཆེན་དམ་པ་སྤྲིན་སྡུད་ལ། །བདུད་རྩི་ཀླུ་ཤིང་དྲི་བཟང་དུད་པས་བསང་། །སད་ཀྱི་གནོད་པ་མེད་པར་བྱིན་གྱིས་རློབས། །ཕྱོགས་བཅུའི་ཞིང་ནས་ན་བུན་སྤྲིན་ལྟར་གཏིབས། །ཐུགས་རྗེས་བྱིན་རླབས་ས་ལ་དྲོད་ཆེན་ཕོབ། །བསྟན་པའི་བདག་པོ་ཤཱཀྱ་ཐུབ་པ་ནི། །སྐུ་མདོག་སེར་པོ་ནམ་མཁའ་ཁྱབ་པར་བཞུགས། །ནམ་མཁའ་གསེར་གྱི་གའུ་ཕྱག་ན་བསྣམས། །ལོ་ཐོག་གསེར་གྱི་
གའུ་ནང་དུ་ཚུད། །འཕགས་པའི་གནས་བརྟན་ཆེན་པོ་བཅུ་དྲུག་དང་། །ཉན་ཐོས་དགྲ་བཅོམ་དཔག་མེད་འཁོར་གྱིས་བསྐོར། །དྲི་ཞིམ་སྤོས་སྤྲིན་ནམ་མཁའ་གང་བར་འབུལ། །དམ་པའི་ཆོས་ཀྱིས་སད་འདྲེ་གྲོལ་བ་དང་། །བྱིན་རླབས་སྤྲིན་གྱིས་ནམ་མཁའ་ཁེབས་པར་མཛོད། །ཐུགས་རྗེ་ནུས་པས་ས་ལ་དྲོད་ཆེན་ཕོབ། །སྙིང་རྗེས་མཐར་ཕྱིན་སྤྱན་རས་གཟིགས་དབང་ནི། །སྐུ་མདོག་དཀར་གསལ་བར་སྣང་ཁྱབ་པར་བཞུགས། །ལོངས་སྐུ་རྒྱལ་བ་རིགས་ལྔའི་ཚོགས་ཀྱིས་བསྐོར། །སྤྲིན་གྱི་བུམ་འཛིན་ཁ་ནས་ན་བུན་ཐུལ། །བསང་རྫས་མཆོད་པའི་སྤྲིན་ཕུང་དུ་མ་འབུལ། །ཡིག་དྲུག་ཆར་གྱིས་སད་འདྲེ་ཚིམ་གྱུར་ཅིག །ཁམས་གསུམ་སྲིད་པ་གསུམ་གྱི་སྤྲིན་བསྡུས་མཛོད། །ཆོས་ཀྱི་ཀློང་ནས་བྱིན་རླབས་ན་བུན་གཏིབས། །ཐུགས་རྗེས་བྱིན་རླབས་ས་ལ་དྲོད་ཆེན་ཕོབ། །ཤེས་རབ་མཐར་ཕྱིར་འཇམ་དཔལ་གཞོན་ནུ་ནི། །སྐུ་མདོག་དམར་སེར་ས་གཞི་ཁྱབ་པར་བཞུགས། །ཕྱག་ན་རལ་གྲི་མེ་དྲོད་འབར་བ་བསྣམས། །ས་ཡི་སྙིང་པོ་ཉེ་བའི་སྲས་བརྒྱད་བསྐོར། །ཕྱེ་མར་འབྲུ་སྣ་དྲི་བཟང་དུད་པས་བསང་། །སད་ཀྱི་གནོད་པ་དྲོད་ཀྱི་
ཟིལ་པར་གྱུར། །བྱིན་རླབས་དྲོད་ཀྱི་ས་ལ་མེ་ཆེན་སྦྱོར། །མཐུ་སྟོབས་མཐར་ཕྱིན་གསང་བའི་བདག་པོ་ནི། །མཐིང་ནག་རྡོ་རྗེ་སྡིགས་མཛུབ་མེ་དཔུང་གིས། །བགེགས་ཀྱི་རྒྱལ་པོ་གདོང་ལྔ་འགོང་པོ་བསྲེགས། །སད་འདྲེ་འདུལ་བྱེད་ཁྲོ་བཅུའི་འཁོར་གྱིས་བསྐོར། །མཆོད་སྤྲིན་སྣ་ལྔ་གསུར་གྱི་དུད་སྤྲིན་འབུལ། །བྱིན་རླབས་སྤྲིན་ཕུང་ས་ལ་དྲོད་ཆེན་ཕོབ་། །གུ་རུ་པདྨ་ཡེ་ཤེས་མཚོ་རྒྱལ་ལ། །རིག་འཛིན་རྒྱལ་བ་ཞི་ཁྲོའི་འཁོར་གྱིས་བསྐོར། །གུས་པས་ཕྱག་འཚལ་བསང་གི་དུད་སྤྲིན་འབུལ། །སྣང་སྲིད་ཟིལ་གནོན་འབྲུ་ཟློསད་ཞི་བར་མཛོད། །སྐུ་ལ་བྱིན་རླབས་སྤྲིན་དཔུང་ཐིབས་སེ་ཐིབ། །ཐུགས་རྗེའི་ན་བུན་ས་ལ་དྲོད་ཆེན་ཕོབ། །བཅོམ་ལྡན་འཁོར་ལོ་སྡོམ་པ་ཀྱེ་རྡོར་ལ། །ཡི་དམ་རྒྱུད་སྡེ་བཞི་ཡི་ཚོགས་ཀྱིས་བསྐོར། །དྲི་ཞིམ་སྤོས་སྣ་ཕྱེ་མར་གསུར་གྱི་བསང་། །ཆུ་སད་རླུང་སད་རོ་སད་ཞི་བར་མཛོད། །ཐུགས་རྗེའི་སྤྲིན་དང་ན་བུན་ཆེན་པོས་གཡོགས། །བྱིན་རླབས་ནུས་པས་ས་ལ་དྲོད་ཆེན་ཕོབ། །ས་གནས་བྱང་ཆུབ་སེམས་དཔའ་ཐམས་ཅད་ལ། །གྲུབ་ཐོབ་སྐྱེས་ཆེན་དམ་པ་མཆོག་གིས་བསྐོར། །དམ་རྫས་མཆོད་སྤྲིན་ཞིང་ཁམས་
ཀུན་ཁྱབ་འབུལ། །ཡུལ་ཕྱོགས་འདི་ཡི་སད་འདྲེ་ཞི་བར་མཛོད། །བྱིན་རླབས་སྤྲིན་གྱི་འཇིག་རྟེན་ཁྱབ་པར་མཛོད། །ཐུགས་རྗེའི་བྱིན་རླབས་ས་ལ་དྲོད་ཆེན་ཕོབ། །དཔའ་བོ་དཔའ་མོ་འབུམ་གྱི་ཚོགས་དཔོན་ལ། །མཁའ་འགྲོ་ཤུགས་འགྲོ་བྱེ་བ་དུང་གིས་བསྐོར། །དཀར་གསུམ་བདུད་རྩི་དྲི་ལྡན་བསང་མཆོད་འབུལ། །སད་ཀྱི་zགནོད་པ་བསྲུང་ཞིང་བསྐྱབ་ཏུ་གསོལ། །ས་ཕྱོགས་འདི་རུ་འཇའ་སྤྲིན་སྣ་ལྔས་ཁེངས། །ཐུགས་རྗེས་བྱིན་རླབས་ས་ལ་དྲོད་ཆེན་ཕོབ། །རྗེ་བཙུན་འཕགས་མ་སྒྲོལ་མ་སྐུ་མདོག་མཐིང་། །ས་གཞི་གཡུ་ཡི་གའུ་ཕྱག་ན་བསྣམས། །གཡུ་ཡི་གའུ་ནང་དུ་ལོ་ཐོག་ཚུད། །སྒྲོལ་མ་དཀར་སེར་དམར་ལྗང་བྱེ་བས་བསྐོར། །དྲི་ཞིམ་ཙན་དན་དཀར་དམར་དུད་པས་བསང་། །ན་བུན་སྣ་ལྔས་ཡུལ་ཁམས་ཁྱབ་པར་མཛོད། །ཐུགས་རྗེས་བྱིན་རླབས་ས་ལ་དྲོད་ཆེན་ཕོབ། །ཡེ་ཤེས་མགོན་པོ་དུད་སོལ་ལྷ་མོ་ལ། །ཆོས་སྐྱོང་ཕོ་རྒྱུད་མོ་རྒྱུད་སྲུང་མས་བསྐོར། །རྟེན་རྫས་གསུར་གྱི་དུད་སྤྲིན་ཆེན་པོ་འབུལ། །སད་འདྲེ་གདུག་པ་ཅན་རྣམས་ཁ་ཁོག་ཅིག །སྤྲིན་དང་ན་བུན་སྨུག་ཞོད་ཡུལ་ཁམས་འཐིབས། །ཐུགས་
རྗེས་བྱིན་རླབས་ས་ལ་དྲོད་ཆེན་ཕོབ། །རྣམ་སྲས་མཆེད་འཁོར་ཛཾ་ལྷ་རིགས་ལྔ་དང་། །གཏེར་བདག་གནོད་སྦྱིན་བྱེ་བ་འབུམ་སྡེ་ལ། །འབྲུ་སྣ་ཟས་སྣ་དྲི་ཞིམ་གསུར་གྱི་བསང་། །ལོ་ལེགས་འབྲུ་འཕེལ་སད་ཀྱི་གནོད་པ་སྲུངས། །སྤྲིན་གྱི་ཚོགས་གཏིབས་ས་ལ་དྲོད་ཆེན་ཕོབ། །ལྷ་ཆེན་ཚངས་པ་ལྷ་དབང་བརྒྱ་བྱིན་ལ། །ལྷ་འཁོར་སུམ་བརྒྱ་དྲུག་ཅུའི་འཁོར་གྱིས་བསྐོར། །ཕྱག་ན་རིན་པོ་ཆེ་ཡི་སྤྲིན་ཕུང་བསྣམས། །ཕྱེ་མར་འབྲུ་སྣ་གཡུ་ཤུག་གསུར་གྱི་བསང་། །ལོ་ལ་གནོད་པའི་སད་འདྲེ་ཞི་བར་མཛོད། །མཚན་མོ་ཁུ་རླངས་ན་བུན་སྤྲིན་ཚོགས་བསྡུས། །མ་དྲོས་ཀླུ་ཡི་ཕོ་བྲང་རྒྱ་མཚོའི་ཀློང་། །ཀླུ་རྒྱལ་གཙུག་ན་རིན་ཆེན་ཀླུ་ཆེན་བརྒྱད། །ས་ཡི་ལྷ་མོ་ས་བདག་བརྟན་མའི་ཚོགས། །སྟོང་གསུམ་ཀླུ་ཡི་ཚོགས་རྣམས་མ་ལུས་ལ། །ཀླུ་སྨན་དཀར་གསུམ་མངར་གསུམ་བདུད་རྩིས་བསང་། །སྐུ་ལ་ན་བུན་འཇིག་རྟེན་ཁྱབ་པར་འཁྲིགས། །བསྲུང་བའི་ཡུལ་ཞིང་མཆོད་པའི་ཡུལ་ཕྱོགས་འདིར། །སྐད་ཅིག་ད་ལྟ་སྤྲིན་ཚོགས་འདུ་བར་མཛོད། །སད་འདྲེ་ཞི་ཞིང་ས་ལ་དྲོད་ཆེན་ཕོབ། །སློབ་དཔོན་ཆེན་པོ་པདྨ་འབྱུང་གནས་ཀྱི། །བཀའ་དང་དམ་
ཚིག་ལ་ནི་བཞག་པ་ཡི། །དཔལ་ཆེན་མགོན་པོ་བདུན་ཅུ་རྩ་གཉིས་དང་། །ཕྱི་ནང་གསང་བའི་ལྷ་སྲིན་སྡེ་བརྒྱད་སོགས། །དགེ་བསྙེན་དྲེགས་པའི་སྡེ་དཔོན་སུམ་ཅུ་དང་། །སྔགས་བདག་དྲེགས་པ་བཅོ་བརྒྱད་འཁོར་དང་བཅས། །ལོ་གླུད་གསུར་ཆེན་དྲི་ཡིས་ཚིམ་གྱུར་ཅིག །སད་ཀྱི་གནོད་པ་གདུག་རྩུབ་ཞི་གྱུར་ཅིག །མཚན་མོ་སྤྲིན་དང་ན་བུན་འཐིབས་པར་མཛོད། །བརྟན་མ་བཅུ་གཉིས་མགུར་ལྷ་བཅུ་གསུམ་དང་། །སྲིད་པ་འདི་ཉིད་ཆགས་པའི་ལྷ་དགུ་དང་། །སྐྱོབ་པར་བྱེད་པའི་ལྷ་ལྔ་བརྟན་པའི་ལྷ། །ཕྱོགས་སྐྱོང་བཅུ་དང་རྒྱལ་ཆེན་སྡེ་བཞིར་བཅས། །ལོ་གླུད་གསུར་ཆེན་དྲི་ཡིས་ཚིམ་གྱུར་ཅིག །སད་ཀྱི་གནོད་པ་མ་བཏང་བསྲུང་བར་མཛོད། །མཚན་མོ་སྤྲིན་དང་ན་བུན་འཐིབས་པར་མཛོད། །གཟའ་བརྒྱད་རྒྱུ་སྐར་ཉི་ཤུ་རྩ་བརྒྱད་དང་། །གནོད་སྦྱིན་སྡེ་དཔོན་འཕྲོག་མ་མ་བུར་བཅས། །བགེགས་ཀྱི་རྒྱལ་པོ་གདོང་ལྔ་འགོང་པོའི་ཚོགས། །མི་ལ་བསེ་རག་གྲོང་ཁྱེར་ལྔ་བརྒྱ་ལ། །ལོ་གླུད་གསུར་ཆེན་དྲི་ཡིས་ཚིམ་གྱུར་ཅིག །སད་འདྲེ་གདུག་པ་ཅན་རྣམས་ཞི་བར་མཛོད། །མཚན་མོ་སྤྲིན་དང་ན་བུན་འཐིབས་པར་
མཛོད། །ཤ་ཟ་སྲིན་པོ་དྲི་ཟ་གྲུལ་བུམ་དང་། །སྨྱོ་བྱེད་བརྗེད་བྱེད་མིའམ་ཅི་ལ་སོགས། །རིགས་དྲུག་ལན་ཆགས་ཡུལ་བདག་གྲོང་བདག་ལ། །ལོ་ལ་གནོད་པའི་བགེགས་རིགས་གདོན་ཚོགས་ལ། །ལོ་གླུད་གསུར་ཆེན་དྲི་ཡིས་ཚིམ་གྱུར་ཅིག །བྱང་རླུང་བུ་ཡུག་འདྲེ་སད་ཞི་བར་མཛོད། །མཚན་མོ་སྤྲིན་དང་ན་བུན་འཐིབས་པར་མཛོད། །མཁའ་ལ་རྒྱུ་བའི་ཡི་དྭགས་འབྱུང་པོའི་ཚོགས། །སད་ཀྱི་བདག་པོ་ཡུལ་འདྲེ་འགོང་པོའི་ཚོགས། །སྔོན་ནས་རྣམ་སྨིན་ལན་ཆགས་བདག་པོ་དང་། །ཡིད་ཀྱི་གཟུགས་ཅན་མ་ལུས་ཐམས་ཅད་ལ། །ལོ་གླུད་གསུར་ཆེན་དྲི་ཡིས་ཚིམ་གྱུར་ཅིག །ལོ་ལ་གནོད་པའི་རློམ་སེམས་ཞི་བར་མཛོད། མཚན་མོ་སྤྲིན་དང་ན་བུན་འཐིབས་པར་མཛོད། །ལུས་ནི་རྙིང་པ་གཞན་དུ་བོར་ནས་ནི། །ལུས་གཞན་གསར་པ་དུས་སུ་མ་ལོན་པའི། །གཤིན་པོ་སེམས་ཆགས་ལོ་ཐོག་རློམ་པ་སོགས། །དབང་མེད་བར་དོའི་སེམས་ཅན་ཐམས་ཅད་ལ། །ལོ་གླུད་གསུར་ཆེན་དྲི་ཡིས་ཚིམ་གྱུར་ཅིག །བརླམ་སེམས་རློམ་སེམས་སད་འདྲེ་ཞི་གྱུར་ཅིག །མཚན་མོ་སྤྲིན་དང་ན་བུན་འཐིབས་པར་མཛོད། །སེམས་ཅན་མུ་གེའི་སྡུག་བསྔལ་སྙིང་རེ་
རྗེ། །འགྲོ་ལ་བརྩེ་བས་སྤྱན་གྱིས་གཟིགས་མཛོད་ལ། །ཤཱཀྱ་ཐུབ་པས་ནམ་མཁར་བྱིན་གྱིས་རློབས། །སྤྱན་རས་གཟིགས་ཀྱིས་བར་སྣང་སྤྲིན་སྡུད་མཛོད། །ཕྱག་ན་རྡོ་རྗེས་སད་འདྲེ་ཚར་ཆོད་ཅིག །འཇམ་དཔལ་དབྱངས་ཀྱིས་ས་ལ་དྲོད་ཆེན་ཕོབ། །པདྨ་རྒྱལ་པོས་ལྷ་སྲིན་དབང་དུ་སྡུས། །རྗེ་བཙུན་སྒྲོལ་མས་སད་ཀྱི་འཇིགས་སྐྲག་སྐྱོབ། །ཐུགས་རྗེ་ལྡན་པས་ཐུགས་རྗེའི་སྤྲིན་དཔུང་གཏིབས། །རྒྱལ་ཆེན་སྡེ་བཞིས་སྤྲིན་ཐག་ཕྱོགས་བཞིར་འཐེན། །ལྷ་ཆེན་བརྒྱད་ཀྱིས་སྤྲིན་ཐག་མི་འཆད་མཛོད། །ཀླུ་ཆེན་བརྒྱད་ཀྱིས་སྤྲིན་ཚོགས་མྱུར་དུ་བསྡུས། །ས་བདག་བརྟན་མའི་ཚོགས་ཀྱིས་ན་བུན་སློངས། །ཡུལ་གྱི་གཞི་བདག་སྤྲིན་གྱི་རྒྱལ་མཚན་ཕྱོར། །ལྷ་ཀླུ་སྡེ་བརྒྱད་སྤྲིན་གྱི་དར་ཡོལ་ཕུབ། །བཟའ་བ་རི་རབ་བཏུང་བ་རྒྱ་མཚོ་འབུལ། །ལྷ་སྲིན་གདུག་རྩུབ་སད་འདྲེ་ཞི་གྱུར་ཅིག །འབྱུང་བ་ལྔ་ཡི་སྤྲིན་གྱི་ཚོགས་བསྡུས་ལ། །ཡུལ་ཕྱོགས་འདི་ཡི་ནམ་མཁར་བརྟན་པར་མཛོད། །བྱིན་རླབས་ཞག་གིས་ནམ་མཁའ་ཁེབས་པར་མཛོད། །བསླུ་མེད་དཀོན་མཆོག་གསུམ་གྱི་ཐུགས་རྗེ་ཡིས། །ས་གནས་བྱང་ཆུབ་སེམས་དཔའི་བྱིན་རླབས་
ཀྱིས། །མཚན་མོ་ས་ལ་དྲོད་ཆེན་འབར་བ་དང་། །རྒྱ་མཚོ་ཁོལ་ཞིང་རླངས་པ་འཕྱུར་བ་དང་། །བ་མོ་ཐམས་ཅད་ཆུ་ཡི་ཟིལ་པར་གྱུར། །བར་སྣང་ན་བུན་ཆར་ཞོད་འཁྲིགས་པ་དང་། །ནུབ་མོར་ནམ་མཁར་སྤྲིན་གྱིས་གུར་ཆེན་ཕུབ། །ཡུལ་ཁམས་གཡུ་གསེར་གའུ་བར་དུ་ཚུད། །རིགས་གསུམ་མགོན་པོའི་སྐུ་གསུང་ཐུགས་སུ་གྱུར། །ལོ་ལེགས་འབྲུ་འཕེལ་ཆར་རྒྱུན་དངོས་གྲུབ་སྩོལ། །དེ་ལྟར་བསང་མཆོད་ལོ་གླུད་མཆོད་པ་འདིས། །སྣང་སྲིད་ལྷ་འདྲེ་མ་ལུས་ཐམས་ཅད་ལ། །ཀུན་ཏུ་བཟང་པོའི་མཆོད་སྤྲིན་ལྟ་བུར་གྱུར། །ཟད་མེད་ལོངས་སྤྱོད་ནམ་མཁའ་གང་བར་གྱུར། །ལོ་གླུད་གསུར་ཆེན་ཤངས་ལ་བྲོ་ཙམ་ན། །ཟས་འདོད་ཟས་དང་སྐོམ་འདོད་སྐོམ་གྱིས་སོད། །ཐམས་ཅད་མཉེས་ཤིང་དགའ་མགུ་ཡི་རང་གྱུར། །ལན་ཆགས་བུ་ལོན་ཤ་འཁོན་བྱང་གྱུར་ཅིག །སད་འདྲེ་ཞི་བ་བྱང་ཆུབ་སེམས་ལྡན་ནས། །ལོ་ལ་གནོད་པ་མེད་པར་གསུར་གྱིས་ཚིམས། །སད་འདྲེ་བླ་མེད་བྱང་ཆུབ་མྱུར་ཐོབ་ནས། །དགེ་ཚོགས་འགྲོ་ཀུན་སངས་རྒྱས་ཐོབ་ཕྱིར་བསྔོ། །ཏདྱ་ཐཱ། ཨོཾ་མུ་ནེ་མུ་ནེ་མ་ཧཱ་མུ་ནེ་ཡེ་སྭཱ་ཧཱ། ཨོཾ་ཨེ་ཡཾ་རཾ་བཾ་ལཾ་སྤྲིན་བསྡུས་བསྡུས་སྭ་ཧཱ། །
ཨོཾ་མ་ཎི་པདྨེ་ཧཱུྃ་ཧཱུྃ༔ ཨེ་ལ་ཡང་ནན་ཧུར་ཧྲིང་ལཾ་སྭཱ་ཧཱ། སྤྲིན་སྡུས་ཤིག ཨོཾ་བཛྲ་པཱ་ཎི་ཧཱུྃ། ནཱ་ག་ཕུ་རི་ཤོག །ཕུ་ནཱ་ག་ཀུ་རུ་ཤོག་ཤོག །འཁྲི་ཏ་ནཱ་ག་ལེ་ལེ་བི་བི་སྭཱ་ཧཱ། སྤྲིན་སྡུས་ཤིག །ཨོཾ་ཝ་གི་ཤྭ་རི་ཧཱུྃ། ཨོཾ་ཨེ་ལ་ཧུར་ཐུ་ཧྲིལ་སྤྲིན་བསྡུས་པྲ་རི་པྲ་རི་བྷ་རི་སྭཱ་ཧཱ། ན་མོ་རཏྣ་ཏྲ་ཡཱ་ཡ། ཨོཾ་ཀཾ་ཀ་ནི་ཀཾ་ཀ་ནི། རོ་ཙ་རོ་ཙ་ནི། ཀྲོ་ཊ་ནི་ཏྲོ་ཊ་ནི། ཏྲ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨ་པ་རཾ་པཱ་ར་ཎི་མེ་སརྦ་སཏཱ་ནཉྩ་སྭཱ་ཧཱ། ཞེས་ཤཱཀ་ཐུབ་དང་སྒྲོལ་སྔོན་གྱི་གསེར་དང་གཡུ་ཡི་གའུ་ནང་དུ་ཡུལ་ཕྱོགས་ཚུད་པར་་བསྒོམ། ནམ་མཁའ་ས་གཞི་བར་སྣང་ཐམས་ཅད་རིགས་གསུམ་མགོན་པོའི་སྐུ་ཡིས་གང་བར་བསྒོམ། ལྷ་ཀླུ་གཞི་བདག་གི་སྐུ་ལས་ན་བུན་འཕྱུར་བས་ཡུལ་ཁམས་ཁྱབ་པར་བསམ། སད་བསང་འདི་དོ་གལ་ཆེ་བའི་དུས་སུ་ལན་ལྔ་བདུན་བཅུ་སོགས་རིགས་པས་དཔགས་ན་སད་ཐུབ་པར་ཐེ་ཚོམ་མི་དགོས་སོ། །ཨ་རཱ་གས་སྦྱར་བའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།