འབུ་སྲིན་གདུག་པ་ཁ་སྒྱུར་གྱི་བསང་།
འབུ་སྲིན་གདུག་པ་ཁ་སྒྱུར་གྱི་བསང་། བླ་མ་དཀོན་མཆོག་གསུམ་ལ་སྐྱབས་སུ་མཆི། །འགྲོ་བའི་དོན་དུ་བསང་དང་མཆོད་པ་བྱ། །ཆོས་ཀུན་དམིགས་མེད་ཡེ་ནས་རྫོགས་པ་ཆེ། །དེ་ཡིང་ངང་ལས་སྐད་ཅིག་དྲན་རྫོགས་སུ། །རང་ཉིད་རྡོ་རྗེ་གྲོ་ལོད་སྐུ་མདོག་སྨུག །ཐོར་ཚུགས་སྤྱན་བསྒྲད་མཆེ་བས་མ་མཆུ་མནན། །རྡོ་རྗེ་ཕྱར་ཞིང་ཕུར་བུ་བགེགས་ལ་གཟིར། །ཕོད་ཁ་མགོ་ཕྲེང་ཆོས་གོས་སྐུ་ལ་གསོལ། །འདོར་ཐབས་ཞབས་གཉིས་སྟག་མོའི་སྟེང་ནས་འགྱིངས། །དམ་ཡེ་དབྱེར་མེད་ཐུགས་སྲོག་ཧཱུྃ་གིས་མཚན། །ཧཱུྃ་ལས་འོད་འཕྲོས་བསང་མགྲོན་སྤྱན་དྲངས་གྱུར། །གདོད་ནས་རྣམ་དག་སྐུ་གསུམ་ཞིང་ཁམས་ནས། །འཇིག་རྟེན་འདས་དང་མ་འདས་བསང་མགྲོན་རྣམས། །ནམ་མཁར་སྤྱན་དྲངས་ཡིད་སྤྲུལ་གདན་ལ་བཞུགས། །དངོས་འབྱོར་ཡིད་སྤྲུལ་བསང་མཆོད་རྒྱ་མཚོ་འབུལ། །ཡོན་ཏན་རྒྱ་མཚོ་རྣམས་ལ་ཕྱག་འཚལ་བསྟོད། །རཾ་ཡཾ་ཁཾ་གིས་མི་གཙང་དྲི་མ་སྦྱངས། །རྩི་ཤིང་ཕྱེ་མར་འབྲུ་སྣ་ཟས་ཕུད་བཅས། །ཇ་ཆང་འོ་ཞོ་ལ་སོགས་ཕུད་ཀྱིས་བྲན། །དམར་སྐྱ་བ་ལྕིའི་མེ་ནང་དུད་སྤྲིན་གཏིབས། །བཛྲ་དྷུ་པེ་ཧཱུྃ་གིས་བྱིན་གྱིས་
རློབས། ༈ །འཕགས་པ་ཡིད་བཞིན་འཁོར་ལོ་འཁོར་བཅས་བསང་། །གདུག་པ་འདུལ་མཛད་རྡོ་རྗེ་གྲོ་ལོད་བསང་། །འབུ་སྲིན་འདུལ་མཛད་ཕྱག་སྟོང་སྤྱན་སྟོང་བསང་། །ལོ་ཐོག་འཕེལ་མཛད་ས་ཡི་སྙིང་པོ་བསང་། །འབུ་སྲིན་བཟློག་མཛད་སྨེ་བ་བརྩེགས་པ་བསང་། །འཇིག་རྟེན་སྐྱོང་མཛད་དཔའ་མགོན་བདུན་ཅུ་བསང་། །ཀླུ་ཆེན་བརྒྱད་དང་རིགས་བཞིའི་ཀླུ་རྣམས་བསང་། །ས་བདག་དབང་ཆེན་ལ་སོགས་ས་བདག་བསང་། །ས་བཅུད་འཕེལ་མཛད་ས་ཡི་ལྷ་མོ་བསང་། །བོད་ཁམས་སྐྱོང་མཛད་བརྟན་མ་བཅུ་གཉིས་བསང་། །པདྨའི་བཀའ་ཉན་སྡེ་དཔོན་སུམ་ཅུ་བསང་། །བོད་ཡུལ་སྲུང་མཛད་དགེ་བསྙེན་ཉེར་གཅིག་བསང་། །བོད་ཀྱི་ཁ་འཛིན་མགུར་ལྷ་བཅུ་གསུམ་བསང་།་།ཞིང་ལྷ་ཚངས་པ་ཆེན་པོ་འཁོར་བཅས་བསང་། །ཕྱི་ནང་གསང་བའི་ལྷ་སྲིན་སྡེ་བརྒྱད་བསང་། །ཀླུ་རྒྱལ་ལ་སོགས་རྒྱལ་ཆེན་བཅོ་བརྒྱད་བསང་། །གཙུག་ན་རིན་ཆེན་ལ་སོགས་ཀླུ་རིགས་བསང་། །ཡུམ་ནི་རག་ཤག་ཝ་ཕུ་སྨན་བདུན་བསང་། །འབོམ་ཅུ་ཀ་ན་ཝ་དམར་འཁོར་བཅས་བསང་། །མཚོ་ནག་ཀླུ་སྨན་འཁོར་དང་བཅས་པ་བསང་། །གཞན་ཡང་
མིང་དང་མཚན་ནས་མ་ཐོས་པའི། །ཡུལ་ཕྱོགས་འདིར་གནས་གཞི་བདག་ཐམས་ཅད་བསང་། །གཡུ་ཤུག་ཕྱེ་མར་གསུར་གྱིས་དུད་པས་མཆོད། །བསངས་དང་མཆོད་པ་དམ་པ་འདི་བཞེས་ལ། །ཚག་པ་ལ་སོགས་ཞིང་ལ་གནོད་པ་ཡི། །འབུ་སྲིན་ཟ་ཁ་སྤང་ལྗོངས་རྣམས་ལ་སྒྱུར། །འགྲོ་བའི་གསོས་སྦྱིན་ལོ་ཐོག་འདི་རྣམས་ལ། །སྲིན་བུ་ཚག་པའི་གནོད་པ་མ་བཏང་ཞིག །སྣང་སྲིད་ལྷ་འདྲེ་གཞི་བདག་ཁྱེད་རྣམས་ལ། །ལོ་ཐོག་འདི་རྣམས་བདག་གིས་བསྲུང་བཅོལ་གྱིས། །ཚག་པའི་གནོད་པ་མ་བཏང་ཐུབ་པར་སྲུང་། །མཐུ་རྩལ་ཅི་འདུག་བལྟའོ་དྲེགས་པ་ཅན། །ལོ་ལེགས་འབྲུ་རྣམས་འཕེལ་བའི་ཁ་འཛིན་མཛོད། །བང་མཛོད་འཛད་མེད་འབྲུ་ཡི་དངོས་གྲུབ་དེ། །ཕུ་ཁུག་གཡང་ཁུག་གཡང་དུ་ལེན། །ཐུགས་དང་འགལ་བ་གང་མཆིས་མཐོལ་ཞིང་བཤགས། །བསང་མགྲོན་ཐམས་ཅད་རང་རང་གནས་སུ་གཤེགས། །འབྲུ་དང་དམ་ཆོས་འཕེལ་བའི་བཀྲ་ཤིས་ཤོག །དགེ་བས་འགྲོ་ཀུན་བྱང་ཆུབ་ཐོབ་ཕྱིར་བསྔོ། །ཞེས་བསང་རས་བསྡུས་ལ་བ་དམར་སྐྱའི་ལྕི་བ་ལ་བཏབ་ནས་དུ་བ་ལང་ལོང་བྱ་ཞིང་ཞིང་གི་མཐའ་སྐོར། ཞེས་པ་རཱ་ག་ཨ་སྱས་སོ། །མངྒ་ལཾ།། །།