རིགས་རྒྱུད་སྤྲུལ་སྐུ་བཞག་པའི་གདམས་ངག
རིགས་རྒྱུད་སྤྲུལ་སྐུ་བཞག་པའི་གདམས་ངག །ཨྠྀི༔
ན་མོ་གུ་རུ་དྷེ་ཝ་ཌཱཀྐི་ནཱི་ཡེ། རྩ་བ་གསུམ་ལ་གུས་པས་ཕྱག་འཚལ་ནས། །རིགས་རྒྱུད་སྤྲུལ་སྐུ་བཞག་པའི་གདམས་ངག་བྲི། ཆོས་བདག་སྲུང་མས་བཀའ་ཡི་གནང་བ་སྩོལ། །བུད་མེད་བཅུ་གཉིས་ལོན་ནས་ལྔ་བཅུའི་བར། །ཟླ་མཚན་འཛག་ཕྱིར་སྲིད་ནི་འབྱུང་བར་བཤད། །ཟླ་བ་རེ་ལ་ཟླ་མཚན་ལན་རེ་འཛག །དེ་རྟགས་ཉམ་ཆུང་བཞིན་ངག་ནུ་མ་འཁྲོང་། །སྐད་གཡོ་མིག་འགུལ་སྐྱེས་པ་འདོད་པའི་རྟགས། །ཁྲག་མདོག་ནག་རྩིག་ཅན་ནི་མཚེར་པའི་ཁྲག །དེ་དུས་མི་སྤྱོད་སྤྱད་ཀྱང་སྲིད་མི་ཆགས། །སྔོ་སྐྱ་རྒྱུ་མའི་ཁྲག་སྟེ་སྤྱོད་མི་བྱ། །སྨུག་ནག་མཆིན་པའི་ཁྲག་
ཡིན་སྤྱོད་མི་བྱ། །སྐྱ་སོབ་སྦུ་བ་ཅན་ནི་གློ་བའི་ཁྲག །དེ་རྣམས་སྙིགས་མའི་ཁྲག་ཡིན་སྲིད་མི་ཆགས། །གལ་ཏེ་ཆགས་ཀྱང་ལྐུགས་པའམ་བུ་མོ་འོང་། །དེ་ཕྱིར་ཁྲག་ངན་མ་ཟད་བར་མི་སྤྱོད། །དེ་རྗེས་དྭངས་མ་ཙིཏྟ་སྙིང་གི་ཁྲག །གསལ་ལམ་མེ་ཡི་མདོག་འདྲ་དམར་ལ་དྭངས། །དེ་དུས་སྤྱོད་ན་སྲིད་ཆགས་གྲུང་པོ་སྐྱེ། །ཚེས་གྲངས་གཅིག་གསུམ་ལྔ་བདུན་དགུ་དང་ནི། །བཅུ་གཅིག་བཅུ་གསུམ་བཅོ་ལྔ་བཅུ་བདུན་དང་། །བཅུ་དྲུག་ཉེར་གཅིག་ཉེར་གསུམ་ཉེར་ལྔ་དང་། །ཉེར་བདུན་ཉེར་དགུ་རྣམས་ལ་བུ་འབྱུང་སྟེ། །གཉིས་བཞི་བརྒྱད་བཅུ་བཅུ་གཉིས་བཅུ་
བཞི་དང་། །བཅུ་དྲུག་བཅོ་བརྒྱད་ཉི་ཤུ་ཉེར་གཉིས་དང་། །གཉིས་དྲུག་ཉེར་བརྒྱད་གནམ་གང་བུ་མོ་འབྱུང་། །སྐྱེས་པའི་ཕོ་རྩ་གཡས་ན་ཡོད་པ་དང་། །བུད་མེད་ཕོ་རྩ་གཡོན་ན་ཡོད་པའི་ཕྱིར། །སྐྱེས་པའི་གཡས་དང་བུད་མེད་གཡོན་གཉིས་པོ། །སྟེང་དུ་བསྟན་ནས་སྤྱད་ན་བུ་མོ་འབྱུང་། །གན་རྐྱལ་ལ་སོགས་ལ་ནི་ངེས་པ་མེད། །ཕ་ཡི་ཁུ་བ་མང་ན་བུ་སྐྱེ་སྟེ། །མ་ཡི་ཟླ་མཚན་མང་ན་བུ་མོ་འོང་། །དེ་ཕྱིར་ཕ་ཡིས་བུད་མེད་གཞན་མི་སྤྱོད། །ཕ་ཡི་ཁུ་བ་མང་བར་བྱ་བའི་ཕྱིར། །གངས་སྦལ་ཤ་དང་ཅོང་ཞི་མཆིལ་པའི་ཤ། །སྦྱར་བའི་རིལ་བུ་རྒྱུན་དུ་བསྟེན་པའམ། །ཤ་ཆང་ཟས་བཅུད་བཟང་པོའི་ལུས་ཟུངས་བསྐྱེད། །ཟླ་མཚན་དང་པོ་འཛག་ནས་ཞག་བཞིའི་དུས། །ཆུ་འཇམ་དག་གིས་བུད་མེད་ལུས་བཀྲུས་ལ། །སྔགས་བཞི་བརྒྱ་རེའི་ཆུ་ནི་འཁྱོར་གང་སྔགས། །དེ་ནས་བུད་མེད་དེ་ལ་བླུད་པར་བྱ། །ནུབ་མོ་ཉལ་ཁ་བུད་མེད་ལྟོ་བ་ལ། །སྔགས་འདི་རྣམས་ནི་བརྒྱ་འམ་ཉེར་བརྒྱད་བཏབ། །ཨོཾ་ད་ཙ་ཨ་སོ་ན་ཡེ་སྭཱ་ཧཱ། ལྟོ་བའི་ཤར་ནས་བཏབ་པས་བུ་ཕོར་འགྱུར། ཨོཾ་ཏྲན་པ་ཨ་པ་ན་ཡེ་སྭཱ་ཧཱ། ལྟོ་བའི་ལྷོ་ནས་བཏབ་པས་བུ་དེ་བརྟན། །ཨོཾ་ར་ཛ་བྷེ་ཨ་པ་ན་ཡེ་སྭཱ་ཧ༔ ལྟོ་
བའི་ནུབ་བཏབ་སྲིད་བས་སྲིད་བརྟན་འགྱུར། ཨོཾ་གྷ་གྷ་ལ་སྤྱི་རུ་ཨ་པ་ན་ཡེ་སྭཱ་ཧཱ། ལྟོ་བའི་བྱང་ནས་བཏབ་པས་བར་ཆད་ཞི། །དེ་ལྟར་སྔགས་བཞིས་ཆུ་ཁྱོར་གང་སྔགས་ནས། །བུད་མེད་ལ་བླུད་སྔས་ནི་ཤར་དུ་བསྟན། །སེམས་ཅན་དོན་དུ་སྤྲུལ་སྐུ་འཇོག་བསམ་པའི། །སེམས་བསྐྱེད་ལྡན་པས་ཡབ་ནི་རྟ་མགྲིན་དང་། །ཡུམ་ནི་རྡོ་རྗེ་ཕག་མོ་གསལ་བར་བསྒོམ། །བསོད་ནམས་བསགས་པའི་བར་དོའི་རྣམ་ཤེས་གཅིག །ཨོ་རྒྱན་པདྨའི་སྐུ་རུ་གྱུར་ནས་ཀྱང་། །ཡབ་ཀྱི་སྤྱི་བོ་ནས་ཞུགས་དབུ་མ་བརྒྱུད། །རྡོ་རྗེའི་སྦུབ་ནས་པདྨའི་ནང་དུ་བྱོན། །ཡུམ་གྱི་མངལ་ནི་གཞལ་ཡས་ཁང་གི་དབུས། །བྱང་སེམས་དཀར་དམར་ཉི་ཟླའི་གདན་བཞུགས་བསྒོམ། །ཆགས་པ་སྤྱོད་ཚེ་ཕ་མ་གཉིས་པོ་ཡི། །ཡིད་ལ་གང་དྲན་རྟགས་ནི་བུ་ལ་བྱུང་། །ཆོས་པ་དྲན་ན་བུ་ལ་ཆོས་པ་འབྱུང་། །སྡིག་པ་དྲན་ན་བུ་ལ་སྡིག་ཅན་འོང་། །ཕྱུག་པོ་དྲན་ན་བུ་ལ་ཕྱུག་པོ་འོང་། །དབུལ་པོ་དྲན་ན་བུ་དེ་དབུལ་པོ་འོང་། །དེ་ཕྱིར་ཤེས་རབ་ཆེ་འདོད་འཇམ་དབྱངས་བསྒོམ། །མཐུ་སྟོབས་ཆེ་འདོད་ཕྱག་ན་རྡོ་རྗེ་བསྒོམ། །འགྲོ་དོན་ཆེ་འདོད་སྤྱན་རས་གཟིགས་སུ་བསྒོམ། །བརྟུལ་ཞུགས་རྫུ་
འཕྲུལ་ཆེ་འདོད་ཨོ་རྒྱན་དང་། །དགེ་བཤེས་བསྟན་ལ་ཕན་འདོད་ཤཱཀ་ཐུབ་བསྒོམ། །ཡུམ་གྱི་མངལ་ཕུག་ལུགས་སུ་བླུགས་པ་ལྟར། །གདོད་ནས་ལྷ་ཡི་སྐུ་ནི་ཀྲོང་ངེར་བསྒོམ། །དེ་ལྟར་སྤྱད་པར་ཚར་རྗེས་བྷ་གའི་སྒོར། །ཁྲོ་བོ་རྟ་མགྲིན་ཚོན་གང་པ་ཞིག་གིས། །དེ་ཡི་སྒོ་སྲུང་བར་ཆད་བགགས་པར་བསྒོམ། །ཨོཾ་བཛྲ་རཀྵ་རཀྵ་སྭཱ་ཧཱ། ཞེས་བརྗོད་འགྲོ་བ་སེམས་ཅན་དོན་གྱི་ཕྱིར། །རིགས་རྒྱུད་སྤྲུལ་སྐུ་བདག་གི་བཞུགས་པ་ལ། །བར་ཆད་མེད་ཅིང་བསམ་པ་འགྲུབ་པར་ཤོག །ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་བརྗོད་ཡིད་ཀྱིས་སྨོན་ལམ་བཀྲ་ཤིས་བྱ། །སྤྱོད་ཚེ་བདེ་བ་ཁྱད་པར་ཅན་སྐྱེ་ཞིང་། །ནང་པར་མ་ཡི་དང་ཀ་མི་བདེ་ཞིང་། །ཕྱིར་ཉིན་མ་ཡི་མགོ་ན་བུ་ཆགས་རྟགས། །ཆུ་མི་འཐུང་ཞིང་གོས་ནི་དྲོ་བར་བྱ། །ཟས་ནི་བཅུད་ཆེན་བརྟེན་ལ་ལུས་ཟུངས་བསྐྱེད། །རེ་ཞིག་ཆགས་པ་མི་སྤྱོད་གཙང་སྦྲ་བྱ། །ཕ་དེས་ཀྱང་ནི་བུད་མེད་གཞན་མི་སྤྱད། །དེ་ནི་ཟླ་བ་དེ་ཡི་རྒྱབ་མ་ལ། །ཟླ་མཚན་མ་བྱུང་ངེས་པར་སྲིད་ཆགས་རྟགས། །ཟས་གྲིབ་གོས་གྲིབ་འགྲིམ་པ་འདྲེ་ཅན་འཛེམ། །ལྟོ་བའི་གཡས་ནས་འགུལ་ན་བུ་ཡིན་ཏེ། །གཡོན་ནས་འགུལ་ན་བུ་མོ་འབྱུང་བ་ཡིན། །ནུ་མ་
གཡས་པ་འབབ་ན་བུ་ཕོ་སྟེ། །ནུ་མ་གཡོན་པ་འབབ་ན་བུ་མོ་སྐྱེ། །ལུས་ལ་ཞུགས་ནས་མ་སྐྱེས་བར་དུ་ནི། །རུ་བ་མི་སྐྱ་ཉལ་ས་སྤོ་མི་རུང་། །སྐྱེས་ནས་ཟླ་ཕྱེད་བར་དུའང་དེ་དང་འདྲ། །དེ་ནས་སྐར་མ་བཟང་དུས་ས་བདག་ནི། །གྱི་ལིང་ལ་ནི་གདོང་མ་ཐུགས་པར་སྐྱ། །དེ་ནས་བུ་ཚ་དེ་ལ་འོང་ལུགས་ནི། །ཕ་སྔོན་ཆགས་པ་སྐྱེས་ན་ཕ་འདྲ་ཞིང་། །མ་སྔོན་ཆགས་པ་སྐྱེས་ན་མ་འདྲ་ཞིང་། །གཉིས་ཀ་ཆགས་པ་མཉམ་པོར་སྐྱེས་ན་གཉིས་ཀ་འདྲ། །ཕ་མ་ཁམས་ཉོབ་རིག་པ་མ་དྭངས་ན། །ཕ་མ་སྦྱང་ཡང་བུ་ཚ་གླེན་པ་འོང་། །ཕ་མའི་བྱང་སེམས་སྙིགས་མ་འདྲེས་པ་ན། །གཟུགས་མདོག་ངན་ཞིང་གཅོང་ནད་ཅན་དུ་འགྱུར། །དྭངས་མ་གཉིས་ཀ་སྟོབས་ཆུང་མ་ནིང་འབྱུང་། །དྭངས་མ་ཧ་ཅང་ཆ་མ་སྙོམ་པ་ན། །དབང་པོ་ཡན་ལག་མ་ཚང་ལྷག་ཆད་འབྱུང་། །ཕ་མ་གཉིས་ཀའི་དྭངས་མ་བྱང་སེམས་གཉིས། །ཆ་སྙོམ་ཅུང་ཟད་ཕ་ཡི་སྟོབས་ཆེ་ན། །བུ་ཕོ་གཟུགས་བཟང་སྤྱང་གྲུང་ཆེ་བ་འབྱུང་། །དྭངས་མ་ཆ་སྙོམ་མ་ཡི་སྟོབས་ཆེ་ན། །བུ་མོ་གཟུགས་མཛེས་ལྟ་ན་སྡུག་པ་འབྱུང་། །དེ་ཕྱིར་ཕ་ཡི་བྱང་སེམས་ཟད་དོགས་ཕྱིར། །བུད་མེད་གཞན་ལ་མི་སྤྱོད་ལུས་
ཟུངས་གསོ། །རིམས་སོགས་ནད་མེད་ཆང་གི་བཟི་མིན་པ། །ཁམས་བདེ་དབང་པོ་དྭངས་པའི་ཚེ་ན་སྤྱད། །དེ་ཡང་མ་ཡི་མངལ་ཁྲག་ཟླ་མཚན་བརྟག །ཁྲག་མདོག་ངན་ཚེ་མི་སྤྱད་དེ་ཟད་ནས། །དམར་གསལ་མཚལ་མདོག་བྱུང་ཚེ་སྤྱད་པ་སྟེ། །ཚེས་གྲངས་སྔགས་དང་ལུས་སྤྱོད་གོང་ལྟར་བྱ། །སེམས་བསྐྱེད་དམིགས་པ་གསལ་པོའི་སྤྲུལ་སྐུ་བལྟམས། །དེ་ལྟར་ཆོས་རྒྱལ་གདུང་རྒྱུད་སྤེལ་བ་དང་། །གྲུབ་ཐོབ་སྔགས་འཆང་གདུང་རྒྱུད་སྤེལ་བའི་ཐབས། །རྫོགས་པ་ཆེན་པོའི་རྒྱུད་གཞུང་མང་པོ་དང་། །ཨོ་རྒྱན་རྗེ་དང་དབུ་རྟ་གུབ་སོགས། །པཎ་གྲུབ་མང་པོས་མཛད་པ་མཐོང་བའི་ཕྱིར། །འོ་མའི་མཚོ་ལས་མར་གྱི་སྙིང་པོ་ལྟར། །ཚིག་ཉུང་གོ་བདེ་ལག་ཏུ་བླང་བདེ་བ། །སྤང་དཀར་གནས་པོ་ལ་སོགས་འགའ་ཞིག་ལ། །ཕན་པའི་སེམས་ཀྱིས་༧ ར་ག་ཨ་སྱས་བྲིས། །འདི་བྲིས་གསང་བ་བསྒྲགས་པའི་ཉེས་མཆིས་ན། །ཆོས་བདག་ཀིའི་ཚོགས་ལ་བཟོད་པར་གསོལ། །འདི་ནི་གསང་སྔགས་ཟབ་ལམ་སྐོར་ཡིན་པས། །གཞན་ལ་འཕྱོར་གཏམ་འཕྱར་སྟོན་བྱེད་མི་རུང་། །དེས་ན་ཆོས་བདག་མཁའ་འགྲོའི་བཀའ་ཆད་འབྱུང་། །བདག་ནི་ཆུང་ནས་རབ་བྱུང་མཐར་ཐོན་པས། །བུད་
མེད་བསྟེན་ཚུལ་བྲི་བར་མི་འོས་ཀྱང་། །རྒྱུད་གཞུང་རྣམས་ནས་གསུངས་བཞིན་བྲིས་པ་ཡིན། །ཁྲིམས་འཆལ་ལོབ་ལོང་ཅན་དུ་མི་དགོངས་འཚལ། །འདི་བྲིས་དགེ་བས་ཆོས་རྒྱལ་བྱང་སེམས་རིགས། །གྲུབ་ཐོབ་སྔགས་འཆང་རིག་འཛིན་རྒྱུད་པ་དང་། །བྲམ་ཟེ་ཁྱིམ་བདག་ཆོས་བཞིན་སྤྱོད་པ་རྣམས། །རིགས་རྒྱུད་ཆོས་བརྒྱུད་རྒྱ་ཆེར་འཕེལ་གྱུར་ནས། །བསྟན་དང་འགྲོ་ལ་ཕན་བདེ་འབྱུང་བར་ཤོག །རིགས་རྒྱུད་འཕེལ་མཛད་ཛཾ་ལྷ་ཡབ་ཡུམ་དང་། །སོ་སོར་འབྲང་མ་ཆེན་པོའི་བཀྲ་ཤིས་ཤོག། མངྒ་ལཾ།། །། ༈ པདྨ་འོད་འབར་གཞུང་ལས། །བུ་འདོད་ལ་ཡང་རིགས་རྒྱུད་ཕྲལ་དུ་འཕེལ་གསུངས་པའི་དོན། ཤུག་པའི་བྱང་བུ་ལ་སྔགས་འདི་གསེར་གྱིས་བྲིས་པ་དང་། མེ་ཏོག་དམར་པོ་ཅན་གྱི་ཤིང་ཐུར་འགའ་རེ་ཡང་དེ་དང་མཉམ་དུ་བཅིང་ལ། དེ་ཉིད་ཕུགས་གཏོར་དང་ཉེ་བའི་སར་གར་བདེར་བཙུགས་ལ་བཞག །དེ་ནས་པདྨ་འོད་འབར་གུ་རུ་ཞི་བ་གང་འདོད་ཀྱང་དེ་ཉིད་ཀྱི་རྟེན་བྱ། བདག་དང་མདུན་བསྐྱེད་ཀྱི་སྐུ་ལས་འོད་ཟེར་སེར་པོ་འཕྲོས་པས། བར་དོའི་རྣམ་ཤེས་བསོད་ནམས་དང་ལྡན་ཅིང་ཕོར་སྐྱེ་བའི་ལས་འཕྲོ་ཅན་ཐམས་ཅད་བཀུག་སྟེ་བུད་མེད་ཀྱི་
ལྟོ་བར་ཐིམ་པར་བསྒོམ་ཞིང་། བར་དོའི་སེམས་ཅན་ཕོར་སྐྱེས་པའི་ལས་འཕྲོ་ཅན་བདག་ལ་ལེན་ཆགས་ཡོད་པ་ཐམས་ཅད་བདག་གི་བུ་རུ་ཤོག་ཅིག །བདག་གི་ཡོ་བྱད་ཐམས་ཅད་བུ་ལོན་ལེན་ཆགས་སུ་འཇལ་ལོ། །ཞེས་པ་ལན་གསུམ་བརྗོད་ནས། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ་པུ་ཏྲ་པུཊྚི་ཀུ་རུ་ཡེ་སྭཱ་ཧཱ། འདི་ལ་རྒྱུན་བསྙེན་བྱ་ཞིང་། འབུམ་ཕྲག་གཅིག་ཡན་ཅི་འགྲུབ་ཐོན་ནས། བུ་ཚ་དང་རིགས་འཕེལ་བའི་ལས་ཚོགས་སོ། །བདེར་འདུས་དགོངས་འདུས་སོགས་ནས་གསུངས་པའི་དོན་ཟབ་བོ། །ཨྠྀི། དམ་ཅན་སྒྲུབ་གཞུང་ནས། བུ་ཚ་དང་རིགས་རྒྱུད་འཕེལ་གསུངས་པའི་དོན། སྐར་སྐྱོན་མེད་དུས་དམ་ཅན་གྱི་གསོལ་ཀ་མང་དུ་བྱེད་ཅིང་། མགར་ནག་བསྐང་བའི་འཇུག་ནས། གདུག་པ་འདུལ་བའི་མཐུ་རྩལ་དངོས་གྲུབ་སྩོལ། །ཟེར་བ་དེ་བསྒྱུར་ལ། རིགས་རྒྱུད་འཕེལ་ཞིང་རྒྱས་པའི་དངོས་གྲུབ་སྩོལ། །ཞེས་སྦྱར་བར་བྱའོ། །ལྷ་དང་ཆོས་སྐྱོང་འཁོར་ནས་ཡོད་ཀྱང་། འདོད་དོན་གསོལ་འདེབས་མ་ཤེས་ན། རང་གི་ཅི་འདོད་དེ་མི་འོང་བས་དེའི་དོན་གོ་བར་བྱའོ། །གདམས་ངག་འདི་གཉིས་ཕུགས་ཡོད་གནད་ཆེན་ཡིན་པས་ཉམས་སུ་ལོངས་ལ་རྟགས་ཐོན་པར་གྱིས། ཨ་
རཱ་གས་སོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།