འཕགས་པའི་གནས་བརྟན་བཅུ་དྲུག་གི་གསོལ་འདེབས།
འཕགས་པའི་གནས་བརྟན་བཅུ་དྲུག་གི་གསོལ་འདེབས་བཞུགས་སོ། །ན་མོ་ཤཱཀྱ་མུ་ནེ་ཡེ། བསྟན་པའི་བདག་པོ་གསེར་མདོག་ཅན། །ཤཱཀྱའི་ཏོག་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཤ་རིའི་བུ་སོགས་ཉན་ཐོས་ནི། །མཆོག་ཆེན་བརྒྱད་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཡན་ལག་འབྱུང་སྒྱུལ་སོགས་པ་ཡི། །འཕགས་པའི་གནས་བརྟན་བཅུ་དྲུག་ལ། །གསོལ་བ་འདེབས་སོ་ཐུགས་རྗེས་གཟིགས། །བསྟན་པ་རྒྱས་པར་བྱིན་གྱིས་རློབས། །གཉིས་ཀའི་ཆ་ལས་རྣམ་འཕྲུལ་སོགས། །དགྲ་བཅོམ་ཁྲི་དང་དྲུག་སྟོང་ལ། །གསོལ་བ་འདེབས་སོ་ཐུགས་རྗེས་གཟིགས། །བསྟན་པ་རྒྱས་པར་བྱིན་གྱིས་རློབས། །དྷརྨཱ་ཏ་དང་ཧཱ་ཤང་དང་། །རྒྱལ་ཆེན་བཞི་ལ་གསོལ་བ་འདེབས། །བསྟན་པ་རྒྱས་པར་མཛད་དུ་གསོལ། །བདག་སོགས་འགྲོ་བ་ཐམས་ཅད་ལ། །ཚུལ་ཁྲིམས་ཕ་རོལ་ཕྱིན་གྱུར་ཏེ། །འགྲོ་བ་ཐམས་ཅད་འགོད་པར་ཤོག །བདག་ལ་གནང་བའི་སྡོམ་པ་ཀུན། །ཉེས་ལྟུང་དྲི་མས་མ་གོས་པར། །ཉེ་བར་འཁོར་ལྟར་མཉམ་པར་ཤོག །སྦྱངས་བའི་ཡོན་ཏན་ཕུལ་བྱུང་ནས། །
འཕགས་པ་འོད་སྲུང་ལྟར་གྱུར་ཅིག །རཱ་ག་ཨ་སྱས་སོ།། ༈ གནས་བཅུའི་གསོལ་འདེབས་བསྡུས་པ་བཞུགས་སོ། །ཐུབ་དབང་གནས་བརྟན་བཅུ་དྲུག་དང་། །དགྲ་བཅོམ་ཁྲི་དང་དྲུག་སྟོང་དང་། །བཞི་བརྒྱའི་ཚོགས་ལ་གསོལ་བ་འདེབས། །བདག་དང་སློབ་མ་བརྒྱུད་པར་བཅས། །འཆལ་བའི་སྐྱོན་གྱིས་མ་གོས་པར། །ཚུལ་ཁྲིམས་རྣམ་པར་དག་གྱུར་ཅིག །ཐུབ་བསྟན་འཛིན་པའི་རྒྱན་གྱུར་ལ། །བྱིན་གྱིས་རླབས་པར་མཛད་དུ་གསོལ། ཅེས་པ་འདི་ཀརྨ་ཨ་རཱ་གས་མཛད་པའོ།། །།