གནས་བརྟན་ཆོ་ག་ཤིན་ཏུ་བསྡུས་པ་འཕགས་ཚོགས་རྒྱ་མཚོ་ཚུལ་ཁྲིམས་དྲི་ལྡན།
གནས་བརྟན་ཆོ་ག་ཤིན་ཏུ་བསྡུས་པ་འཕགས་ཚོགས་རྒྱ་མཚོ་ཚུལ་ཁྲིམས་དྲི་ལྡན་བཞུགས་སོ། ༈ གནས་བརྟན་ཆོ་ག་བསྡུས་པ་ནི། མདུན་དུ་རིན་ཆེན་ཁང་བཟང་རྒྱ་ཆེ་བར། །དབུས་སུ་སེངྒེས་བཏེག་པའི་རཏྣའི་ཁྲི། །ལྷ་རྫས་གོས་ཀྱིས་བཀླུབ་ཅིང་ཆུ་སྐྱེས་དང་། །ཟླ་བའི་སྟེང་ན་སྟོན་པ་ཤཱཀྱ་ཐུབ། །མཚན་དང་དཔེ་འབར་ཆོས་གོས་རྣམ་གསུམ་གསོལ། །ས་གནོན་མཉམ་གཞག་རྡོ་རྗེ་སྐྱིལ་ཀྲུང་བཞུགས། །གཡས་གཡོན་ཤཱ་རིའི་བུ་དང་མོའུ་འགལ། །ཡན་ལག་འབྱུང་སོགས་གནས་བརྟན་བཅུ་དྲུག་རྣམས། །གསེར་མདོག་ཆོས་གོས་རྣམ་གསུམ་སྐུ་ལ་གསོལ། །ཕྱག་མཚན་སྣ་ཚོགས་འཛིན་ཅིང་ལྷམ་མེར་བཞུགས། །མདུན་དུ་འཕགས་པའི་དགེ་བསྙེན་དྷརྨ་ཏཱ། །སངས་རྒྱས་མཆོད་པའི་བྱེད་པོ་ཧྭ་ཤང་ནི། །མཆོད་རྫས་སྣ་ཚོགས་ཐོགས་ཤིང་དགྱེས་པའི་ཉམས། །ཕྱོགས་བཞིར་རྒྱལ་པོ་ཆེན་པོ་སྡེ་བཞིར་བཅས། །སྣང་ཞིང་སྟོང་ལ་འཇའ་ཚོན་ལྟ་བུར་གསལ། །ཐུགས་རྗེས་རྩོད་པའི་དུས་ཀྱི་གདུལ་བྱ་རྣམས། །རྣམ་གྲོལ་ལམ་ལ་འགོད་མཛད་འགྲོ་བའི་མགོན། །ཐུབ་པ་མཆོག་དང་གནས་བརྟན་ཆེན་པོ་རྣམས། །འཁོར་དང་བཅས་པ་གནས་འདིར་གཤེགས་སུ་
གསོལ། །གནས་བརྟན་བཅུ་དྲུག་འདིར་བྱོན་གདན་ལ་བཞུགས། །དགེ་བསྙེན་སྐྱབས་གསོལ་དཀོན་མཆོག་བསྟན་པ་སྲུངས། །དྷརྨ་ཏཱ་དང་ཧྭ་ཤང་རྒྱལ་ཆེན་བཞི། །འདིར་གཤེགས་དགྱེས་པའི་གདན་ལ་བཞུགས་སུ་གསོལ། །བདག་སོགས་གྲངས་མེད་ལུས་སྤྲུལ་གུས་པ་ཡི། །དྭངས་བ་ཆེན་པོའི་ཕྱག་འཚལ་སྐྱབས་སུ་མཆི། །རྐང་གཉིས་གཙོ་བོ་སྟོན་པ་ཤཱཀྱའི་རྒྱལ། །མཆོག་ཟུང་གཉིས་དང་བཅས་ལ་ཕྱག་འཚལ་ལོ། །དཔལ་ལྡན་བླ་མའི་སྐུ་ཚེ་བརྟན་པ་དང་། །སངས་རྒྱས་བསྟན་པ་རྒྱས་པར་བྱིན་གྱིས་རློབས། །ཡན་ལག་འབྱུང་དང་མ་ཕམ་ནགས་ན་གནས། །དུས་ལྡན་རྡོ་རྗེ་མོ་བུ་བཟང་པོ་དང་། །གསེར་བེའུའི་བྷ་ར་དྷཱ་ཛཱར་ཕྱག་འཚལ་ལོ། །དཔལ་ལྡན་བླ་མའི་སྐུ་ཚེ་བརྟན་པ་དང་། །སངས་རྒྱས་བསྟན་པ་རྒྱས་པར་བྱིན་གྱིས་རློབས། །འཕགས་པ་བ་ཀུ་ལ་དང་སྒྲ་གཅན་འཛིན། །ལམ་ཕྲན་བྷ་ར་དྷཱ་ཛཱ་བསོད་སྙོམས་ལེན། །ལམ་ཕྲན་ཀླུ་སྡེ་སྦེད་བྱེད་མི་ཕྱེད་པ། །དྷརྨ་ཏཱ་དང་ཧྭ་ཤང་ལ་ཕྱག་འཚལ། །དཔལ་ལྡན་བླ་མའི་སྐུ་ཚེ་བརྟན་པ་དང་། །སངས་རྒྱས་བསྟན་པ་རྒྱས་པར་བྱིན་གྱིས་རློབས། །བརྩོན་པས་གོ་བསྒོས་སངས་རྒྱས་བསྟན་པ་
སྲུངས། །ཕྱོགས་བཞིའི་རྒྱལ་ཆེན་བཞི་ལ་ཕྱག་འཚལ་ལོ། །དཔལ་ལྡན་བླ་མའི་སྐུ་ཚེ་བརྟན་པ་དང་། །སངས་རྒྱས་བསྟན་པ་རྒྱས་པར་བྱིན་གྱིས་རློབས། །ཐུབ་དབང་གནས་བརྟན་འཁོར་དང་བཅས་རྣམས་ལ། །དངོས་འབྱོར་ཡིད་སྤྲུལ་ཀུན་བཟང་མཆོད་པའི་སྤྲིན། །ལུས་དང་ལོངས་སྤྱོད་དགེ་ཚོགས་མཆོད་པ་འབུལ། །བསོད་ནམས་ཡེ་ཤེས་ཚོགས་གཉིས་རབ་རྫོགས་ནས། །ཏིང་འཛིན་ཟས་ཀྱིས་རྟག་ཏུ་འཚོ་བ་དང་། །སྦྱིན་པའི་ཕར་ཕྱིན་རྫོགས་པར་བྱིན་གྱིས་རློབས། །བདག་དང་མཁའ་མཉམ་སེམས་ཅན་མ་ཐམས་ཅད་ཀུན། །ཚུལ་ཁྲིམས་ཕ་རོལ་ཕྱིན་པ་ཐོབ་པར་ཤོག །སྡིག་ལྟུང་ཉེས་པའི་དྲི་ཡི་མ་གོས་པ། །འཕགས་པ་ཉེ་བ་འཁོར་ལྟར་མཉམ་པར་ཤོག །རྨད་བྱུང་སྦྱངས་པའི་ཡོན་ཏན་ཕུལ་བྱུང་བ། །འཕགས་པ་འོད་སྲུང་ལྟ་བུར་འབྱུང་གྱུར་ཅིག །བཤད་སྒྲུབ་ཐོས་བསམ་སྒོམ་གསུམ་རབ་སྦྱངས་ནས། །དགེ་འདུན་འཕགས་པའི་ཚོགས་རྣམས་རྒྱས་གྱུར་ཅིག །སངས་རྒྱས་སྤྲུལ་པ་དགྲ་བཅོམ་འཕགས་པའི་ཚོགས། །འགྲོ་བའི་དོན་དུ་བསྟན་པ་སྐྱོང་མཛད་པ། །དཀོན་མཆོག་གསུམ་དངོས་གནས་བརྟན་བཅུ་དྲུག་གི །བསྟན་
པ་ཡུང་རིང་གནས་པར་བྱིན་གྱིས་རློབས། །དེ་ལྟར་བདག་གི་གསོལ་བ་བཏབ་པའི་མཐུས། །ཐུབ་དབང་གནས་བརྟན་རྣམས་ལས་འོད་ཟེར་འཕྲོས། །བདག་གཞན་ལ་ཕོག་སྒོ་གསུམ་དྲི་མ་སྦྱངས། །ཡེང་མེད་ཏིང་འཛིན་ཤེས་རབ་ཚུལ་ཁྲིམས་གྱི། །བསླབ་གསུམ་དངོས་གྲུབ་བྱིན་རླབས་ཐོབ་པར་གྱུར། །ཐུབ་དབང་གནས་བརྟན་ཡེ་ཤེས་པ་རྣམས་ཀུན་། །འོད་ཞུ་རང་ཐིམ་དབྱེར་མེད་གཅིག་ཏུ་འདྲེས། །རྒྱལ་ཆེན་སྡེ་བཞིའི་རང་རང་དངོས་གྲུབ་ཚོགས། །སྩོལ་ཞིང་སོ་སོའི་གནས་སུ་གཤེགས་པར་གྱུར། །དུས་གསུམ་རྒྱལ་ཟློབ་སྲས་བཅས་ཐུགས་རྗེ་ཡི། །ཉན་ཐོས་ཚུལ་བཟུང་སྲིད་པའི་ཇི་སྲིད་བར། །བསྟན་པ་སྐྱོང་ཞིང་འགྲོ་བའི་དོན་མཛད་པ། །གནས་བརྟན་ཆེན་པོ་རྣམས་ཀྱི་བཀྲ་ཤིས་ཤོག །བསྟན་པའི་དཔལ་གྱུར་བླ་མའི་ཞབས་པད་བརྟན། །བསྟན་འཛིན་སྐྱེས་བུ་ས་སྟེང་ཡོངས་ལ་ཁྱབ། །བསྟན་པའི་སྦྱིན་བདག་མངའ་ཐང་འབྱོར་པ་རྒྱས། །བསྟན་པ་ཡུན་རིང་གནས་པའི་བཀྲ་ཤིས་ཤོག །བཀྲ་ཤིས་བརྗོད། དེ་ལྟར་གནས་བརྟན་བཅུ་དྲུག་གི་ཕྱག་མཆོད་འདི་ཉིད་རྟག་པར་བརྩོན་ན་ནད་གདོན་བར་ཆད་ཞི་ཞིང་ཚུལ་ཁྲིམས་ཕུན་སུམ་ཚོགས་པར་འགྱུར་བ་དང་། བསྟན་པ་ལ་ཕན་ཐོགས་པའི་ནུས་པ་
དང་ལྡན་པར་འགྱུར་རོ། །གང་ཞིག་དགེ་འདུན་རྣམས་ཀྱིས་འཚོགས་སུ་འདོན་པར་བྱས་ན་དེར་གནས་བརྟན་བཅུ་དྲུག་མངོན་སུམ་དུ་འབྱོན་ཞིང་བྱིན་གྱིས་རླབས་པ་དང་། དགེ་འདུན་གྱི་སྡེ་ཆེན་པོ་འདུ་བར་འགྱུར་རོ། །རྒྱལ་པོ་ཆེན་པོ་སྡེ་བཞིའི་བསྲུང་ཞིང་སྐྱོང་བར་འགྱུར་རོ། །ཞེས་པ་འདི་ཡང་དད་པའི་དཔལ་ལྡན་པ་ཤཱཀྱའི་རྗེས་འཇུག་ཀརྨ་བཀྲ་ཤིས་དཔལ་འབྱོར་ནས་བསྐུལ་ངོར། ༧ ཆགས་སྤྲུལ་ལྔ་པ་ཀརྨ་ཐུབ་བསྟན་རྣམ་རྒྱལ་ངེས་དོན་བསྟན་པ་འཛིན་པའི་སྡེས་གནས་མདོ་ཐུབ་བསྟན་བཤད་སྒྲུབ་གླིང་གི་ཆོས་འཁོར་ཆེན་པོའི་ཡང་དབེན་གཟིམ་ཆུང་པདྨ་བཀོད་དུ་མཚམས་ཀྱི་ཐུན་བར་གཅིག་ཏུ་རྫོགས་པར་བྲིས་པའི་དགེ་བས་རང་གཞན་གྱི་སྒྲིབ་གསུམ་ལྷག་མེད་དུ་བྱང་ཞིང་ཚུལ་ཁྲིམས་ཕུན་སུམ་ཚོགས་པ་ཐོབ་པ་དང་། རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་པར་གྱུར་ཅིག །དགེའོ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།