གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་སྒྲོལ་མ་དམར་མོ་ཀུ་རུ་ཀུལླེའི་སྤྲོས་མེད་ཉམས་ལེན་ཟབ་མོ།
གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས༔ སྒྲོལ་མ་དམར་མོ་ཀུ་རུ་ཀུལླེའི་སྤྲོས་མེད་ཉམས་ལེན་ཟབ་མོ་བཞུགས་སོ།།
ན་མོ། དཀོན་མཆོག་གསུམ་དང་རྩ་བ་གསུམ། །སྐྱབས་གནས་རྣམས་ལ་སྐྱབས་སུ་མཆི། །འགྲོ་ཀུན་སངས་རྒྱས་ལ་འགོད་ཕྱིར་། །བྱང་ཆུབ་མཆོག་ཏུ་སེམས་བསྐྱེད་དོ། །རང་ཉིད་སྐད་ཅིག་དྲན་རྫོགས་སུ། །ཀུ་རུ་ཀུལླེ་སྐུ་མདོག་དམར། །ཞལ་གཅིག་ཕྱག་བཞི་དང་པོ་གཉིས། །མདའ་གཞུ་འཛིན་ཅིང་འོག་མ་གཉིས། །ལྕགས་ཀྱུ་ཞགས་པ་འཛིན་པ་སྟེ། །གཡས་བསྐུམ་གཡོན་བརྐྱངས་གར་བསྟབས་འགྱིང་། །མེ་ཏོག་དམར་པོའི་ཕྲེང་བས་བརྒྱན། །དར་དང་རིན་ཆེན་རྒྱན་གྱིས་བཀླུབས། །གནས་གསུམ་ཡིག་འབྲུ་གསུམ་པོ་དང་། །
ཐུགས་ཀར་ཉི་སྟེང་ཧཱིདམར་མཐར། །སྔགས་ཕྲེང་གཡོན་དུ་འཁོར་བ་ལས། །འོད་ཟེར་དམར་པོ་ཕྱོགས་བཅུར་འཕྲོས། །ཀུ་རུ་ཀུལླེའི་རི་ཕུག་ནས། །རང་འདྲ་དཔག་མེད་སྤྱན་དྲངས་བསྟིམ། །རང་ལས་སྤྲུལ་པའི་མཆོད་པའི་ཚོགས། །དཔག་མེད་བཅོམ་ལྡན་འདས་མ་མཆོད། །ཨགྷོ་སོགས་ཀྱིས་མཆོད། བརྩེ་བས་རྗེས་ཆགས་པདྨ་རཱ་གའི་མདོག །ཞལ་གཅིག་ཕྱག་བཞི་ཞབས་གཉིས་མཛེས་པའི་སྐུ། །མདའ་གཞུ་ཨུཏྤལ་དབང་གི་ལྕགས་ཀྱུ་འཛིན་། །བཅོམ་ལྡན་རིག་བྱེད་མ་ལ་ཕྱག་འཚལ་བསྟོད། །ཐུགས་ཀའི་སྔགས་ཕྲེང་གཡོན་དུ་འཁོར་བ་ལས།
འོད་ཟེར་དམར་པོ་ཕྱོགས་བཅུར་འཕྲོས་པ་ཡིས། །འཁོར་འདས་སྣང་སྲིད་ཀུན་གྱི་དངོས་གྲུབ་བསྡུས། །རང་ལ་ཐིམ་པས་བཀྲག་མདངས་གཟི་བརྗིད་རྒྱས། །ༀ་ཀུ་རུ་ཀུ་ལླེ་ཧཱུྃ་སྭཱ་ཧཱ༔ འདི་ཉིད་རྒྱུན་ཏུ་བཟླས་པས་བསྙེན་པ་ཡིན། ཀུ་རུ་ཀུལླེའི་ཐུགས་ཀ་ནས། །འོད་ཟེར་དམར་པོ་ལྕགས་ཀྱུའི་དབྱིབས། །འཕྲོས་ཏེ་དགེ་འདུན་ཐམས་ཅད་ཀུན། །རང་གི་དབང་དུ་འདུས་པར་བསམ། །ཨོཾ་ཀུ་རུ་ཀུལླེ་ཧཱིསརྦ་སཾ་གྷ་པཱ་ཤཾ་ཀུ་རུ་སྭཱ་ཧཱ། འཁོར་སློབ་འདུ་བའི་གདམས་པ་ཟབ། རང་ཉིད་ཀུ་རུ་ཀུལླེ་ནི། །ནམ་མཁའ་ཁྱབ་པར་བསྒོམ་པ་ཡི། །ཐུགས་ཀར་རང་སེམས་ལྷ་མོའི་སྐུ། །གཟི་བརྗིད་ལྡན་པར་བསྒོམ་པ་ལས། །འོད་ཟེར་དམར་པོ་ཕྱོགས་བཅུར་འཕྲོས། །དམིགས་བྱ་གང་ཡིན་འོད་དེས་བཀུག །བྷ་གའི་ནང་ནས་སྤྱན་དྲངས་ནས། །ལྟེ་བའི་ཐད་དུ་ཐལ་མོ་སྦྱར། །རང་སེམས་ལྷ་མོ་ལ་གུས་བསྒོམ། །རང་སེམས་ལྷ་མོའི་བྷ་ག་ནས། །བྱང་སེམས་དམར་པོ་མཚལ་ཁུ་ལྟར། །བབས་པས་ཁོ་ལ་ཁྲུས་བྱས་པས། །ཁོ་ཡི་ལུས་གང་བདེ་བས་ཁྱབ། །སྙིང་ཁའི་ལྷ་མོ་ལ་གུས་ནས། །ཆགས་པས་མྱོས་ཏེ་འདུག་པར་བསམ། །ཡང་ན་འོད་ཟེར་དམར་པོ་ནི། །ལྕགས་
ཀྱུའི་དབྱིབས་ཅན་འཕྲོས་པ་ཡིས། །གང་དམིགས་དབང་དུ་འདུས་པར་བསམ། །སྤྱི་ལ་བྱེད་ན་ལོ་ཀ་དང་གཅིག་ལ་བྱེད་ན་རྒེ་སྦྱར། ཨོཾ་ཀུ་རུ་ཀུལླེ་ཧྲིསརྦ་ལོ་ཀ་པ་ཤཾ་ཀུ་རུ་ཧོ་སྭཱ་ཧཱ། དེ་དག་དམིགས་པ་གང་ཡིན་ཀྱང་། མཇུག་ཏུ་སེམས་ངོ་ཡུད་ཙམ་སྐྱོང་། དེ་ཡི་མགོ་ནོན་གནད་ཟབ་ཡིན། །གནམ་ཆོས་སྤྲོས་མེད་ཉམས་ལེན་ཚུལ། །གོ་བདེ་ཚིག་གིས་བཀྲོལ་བ་ཡིན། །རྒྱས་པར་འདོད་ན་རྩ་གསུམ་གྱི། །ལས་བྱང་ནང་དུ་མངོན་རྟོགས་བཅུག །དེ་མིན་གབ་པ་གཞན་དུ་མེད། །བླ་མ་མཐུ་སྟོབས་ལ་ཕན་ཕྱིར། །རཱ་ག་ཨ་སྱས་སྨྲས་པ་ལྟར། །དབོན་པོ་ཉིད་ཀྱིས་ཡི་གེ་བྲིས། །ཉེས་འགལ་ཆོས་བདག་ཉིད་ལ་བཤགས། །དགེ་བས་བསྟན་ལ་ཕན་ཐོག་ཤོག ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།