ཀུ་རུ་ཀུལླེའི་གཏོར་མ།
ཨོཾ་ལས་རིན་ཆེན་པདྨ་འོད་ལྔའི་ནང་། །དེ་དབུས་ཧྲིལས་ཀུ་རུ་ཀུལླེ་དམར། །ཞི་མ་ཁྲོ་འཛུམ་སྣ་ཚོགས་རྒྱན་ལྡན་ཞིང་། །ཕྱག་བཞི་ལྕགས་ཀྱུ་ཞགས་པ་མདའ་གཞུ་འཛིན། །ཞབས་གཉིས་འདོར་སྟབས་ཉི་ཟླ་པད་གདན་བཞུགས། །སྔགས་ཕྲེང་གཡོན་འཁོར་སྤྱན་དྲངས་བདག་ལ་ཐིམ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཨུ་ཀ་ཡེ། ཨ་པཱ་ཡེ། ཀ་པ་ཡེ་བཛྲ་སིདྡྷི་སིདྡྷི་ཧཱུྃ་ཛ་ཛཿ མདུན་དུ་རིན་ཆེན་ཟངས་གཞོང་ནང་དུ། ཟན་དང་ཆང་དང་ཤ་དང་མར་དང་བུ་རམ་དང་ཟས་རྣམ་པ་སྣ་ཚོགས་པ་ལ་སོགས་པ་འབྲུ་སྣ་ཚོགས་གཏོར་མ་དཀར་གསུམ་མངར་གསུམ་རྒྱ་མཚོ་ཁ་དོག་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ། ཨོཾ་ཀུ་རུ་ཀུལླེ་ས་པ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི༔ རྒྱལ་བློན་འབངས་འཁོར་ཡུལ་ཁམས་སྐྱེ་འགྲོ་ཕོ་མོའི་སྙིང་དཀར་ནག་མཚམས་སུ་ལྕགས་ཀྱུས་ཁུག་ལ་མྱུར་དུ་ཨཾ་ཀུ་ཤ་ཛཿ ཧཱི༔ རིན་ཆེན་འོད་ལྔ་མདངས་ལྡན་གཞལ་ཡས་ཁང་། །རྗེ་བཙུན་ཀུ་རུ་ཀུལླེ་དམར་མོ་ནི། །ཁྲོ་འཛུམ་སྒེག་ཅིང་དར་དང་རཏྣའི་བརྒྱན། །རིན་ཆེན་ལྕགས་ཀྱུ་ཞགས་པ་མདའ་གཞུ་བསྣམས། །ཉི་ཟླ་པད་གདན་སྟེང་ན་གར་
ཐབས་བཞུགས། །སྲིད་གསུམ་བདག་པོ་སྟོང་གསུམ་ཁ་ལོ་སྒྱུར། །འདོད་དགུ་ལོངས་སྤྱོད་དབང་བསྒྱུར་མ་ལ་བསྟོད། །ཨ་རཱ་གས་སྦྱར་བའོ།