ལེགས་ལྡན་མགོན་པོའི་གཡག་རུ་དགྲ་ཆོས་ཀྱི་སྲིད་པའི་དགྲ་བྲུབ་ཆེན་མོའི་ཟིན་བྲིས།
ལེགས་ལྡན་མགོན་པོའི་གཡག་རུ་དགྲ་ཆོས་ཀྱི་སྲིད་པའི་དགྲ་བྲུབ་ཆེན་མོའི་ཟིན་བྲིས་བཞུགས་སོ།
དཔལ་ལེགས་ལྡན་ནག་པོ་ལ་ཕྱག་འཚལ་ལོ། །དེ་ཡི་དགྲ་བྲུབ་ཆེན་མོ་ནི། །སྲིད་པའི་དགྲ་ཆོས་ཞེས་ཀྱང་བྱ། །སྔོན་གྱི་བསྐལ་པ་དང་པོ་ལ། །ལྷ་དང་ལྷ་མིན་འཐབ་པའི་ཚེ། །སུམ་ཅུ་རྩ་གསུམ་ལྷ་གནས་ཡང་། །ལྷ་མ་ཡིན་ལ་འཆོར་ལ་ཐུག །དེ་ཚེ་ལྷ་དབང་བརྒྱ་བྱིན་གྱིས། །ཕྱག་ན་རྡོ་རྗེ་ལ་ཞུས་པས། །གསང་བདག་ཕྱག་ན་རྡོ་རྗེ་ཡིས། །དམ་པ་ཆོས་ཀྱིས་མཚན་གསོལ་བ། །མགོན་པོ་ལེགས་ལྡན་ནག་པོ་ཟེར། །ཡེ་སྲིད་ལྷ་ཡིས་མཚན་གསོལ་བ། །དགྲ་བླ་ཀུན་ཐུབ་འཇིགས་མེད་ཟེར། །སྐྱེ་བོ་ཡོངས་ཀྱིས་མཚན་གསོལ་བ། །དཔལ་མཐུ་ཆེན་
ཝེར་མ་ཉི་མ་ཟེར། །ངོ་བོ་གཅིག་ལ་མཚན་མང་བ། །ཁྱད་པར་དགྲ་འདྲེ་འདུལ་བའི་མཆོག །དགྲ་བྲུབ་འདི་ཉིད་གནང་བའི་ཕྱིར། །ལྷ་མིན་དམག་ཚོགས་ཆམ་ལ་ཕབ། །ལྷ་རྣམས་བདེ་སྐྱིད་ཕུན་སུམ་ཚོགས། །བསྐལ་པ་དེ་ཡི་བར་མ་ལ། །སྲིད་པ་ཡེ་སྨོན་རྒྱལ་པོ་ལ། །ངམ་རྗེ་བཙན་པོ་དགྲ་རུ་ལང་། །ཡེ་ཁམས་མི་ཡི་སྤྱི་ཆོས་ཏེ། །ངམ་རྗེ་དེ་ལ་འཆོར་ལ་ཐུག །ལྷ་ཆེན་སྣང་བ་དོན་ལྡན་གྱིས། །དགྲ་ཆོས་དགྲ་བྲུབ་འདི་བྱས་པས། །ངམ་རྗེ་བཙན་པོ་ཆམ་ལ་ཕབ། །ངམ་གྱིས་དཀོར་ནོར་སྣ་དགུ་དེ། །ཡེ་སྨོན་རྒྱལ་པོའི་གནང་དུ་ཐོབ། །བསྐལ་པ་དེ་ཡིས་
ཐ་མ་ལ། །ཐུགས་ཀར་བུ་དགུ་བྱ་བ་ལ། །ཐུགས་དམར་བུ་དགུ་དགྲ་རུ་ལང་། །ཐུགས་ཀར་མཁར་ལྷ་རྩེ་མོ་ནས། །བཙན་བྱ་འུག་པ་གཤོག་རིང་བབས། །ཐུགས་དམར་བཙན་གྱི་དམག་ཚོགས་ཀྱིས། །ཐུགས་ཀར་ལྷ་འཁོར་བཤིག་ལ་ཐུག །དེ་ཚེ་ཡེ་ཤེས་དམག་ཚོགས་ཀྱིས། །དགྲ་བྲུབ་དགྲ་ཆོས་འདི་བྱས་པས། །ཐུགས་དམར་བཙན་གྱིས་གོང་ཡུལ་རྒྱལ། །ཐུགས་དམར་ནག་ཟོག་བཅོ་བརྒྱད་དེ། །ཐུགས་ཀར་བུ་དགུའི་གནང་དུ་བཅད། །བསྐལ་པ་དེ་ཡི་འོག་མ་ལ། །ལྷ་ཚ་བུ་དགུ་བྱ་བ་ལ། །སྲིན་ཚ་བུ་དགུ་དགྲ་རུ་ལང་། །སྲིན་པོའི་དམག་ཚོགས་ཁྲི་ཕྲག་གིས། །ལྷ་ཡུལ་དཀར་པོ་གླིང་དགུ་དེ། །སྲིན་ཚའི་དམག་ལ་འཆོར་ལ་ཐུག །དེ་ཚེ་ཐུགས་ཀར་སློབ་དཔོན་གྱིས། །དགྲ་ཆོས་དགྲ་བྲུབ་འདི་བྱས་པས། །སྲིན་ཚ་བུ་དགུའི་གཡུལ་ངོ་ཟློག །སྲིན་ཚའི་དཀོར་ནོར་ཁྱུ་ཆེན་དགུ། །བང་མཛོད་མཁར་ཆེན་བཅོ་བརྒྱད་བཅས། །ལྷ་ཚེ་བུ་དགུའི་གནང་དུ་ཐོབ། །བསྐལ་པ་དེ་ཡི་འོག་མ་ལ། །མིའུ་རུས་དྲུག་ཡབ་དང་བདུན། །མཛོ་མོ་དཀར་མོ་བདུན་ཡོད་དེ། །བདུད་ཀྱི་ཇག་པས་དེད་པ་ལ། །ཡབ་རྒན་དེ་ལ་ར་མདའ་བྱས། །ཨ་མྱེ་བདུད་ཀྱིས་
བསད་དོགས་ནས། །གཉན་གྱི་བུ་མོས་བར་བྱས་ནས། །ཨ་མྱེ་ཁྲོས་ནས་གྲི་བརྒྱབས་པས། །གཉན་རྒོད་དྷེ་ཝས་དེ་གཟིགས་ནས། །གཉན་གྱི་གཟིར་མདས་ཨ་མེ་བསད། །དེ་ཚེ་མིའུ་རུས་དྲུག་གིས། །དགྲ་བྲུབ་དགྲ་ཆོས་འདི་བྱས་པས། །གཉན་ལ་ཕ་སྟོང་བདུད་ལ་ཕ་ཤ་ལོན། །དེ་རྗེས་རྒྱ་བོད་ཧོར་གསུམ་གྱི། །ཕ་རྒན་ཤི་ནས་རོ་བགོས་པས། །ཕ་མཚུན་ནག་པོ་རྒྱ་ལ་ཤོར། །རྒྱ་མི་རབས་གསུམ་ལ་དར་བའི་དུས། །བོད་མི་རབས་གསུམ་ལ་དབུལ་ཕོངས་བྱུང་། །སྟོང་གསུམ་མགོན་ལྷ་དཀར་པོ་ཡི། །དགྲ་བྲུབ་དགྲ་ཆོས་འདི་བྱས་པས། །ཕ་མཚུན་སྐུ་རྒྱལ་བོད་ལ་ལོན། །བོད་ཁམས་བདེ་སྐྱིད་ཕུན་སུམ་ཚོགས། །དེ་རྗེས་སྐུ་རྒྱལ་བོད་ཀྱི་ཡུལ། །རྒྱལ་པོ་གཉའ་ཁྲི་བཙན་པོ་དེས། །དམ་པ་ཆོས་ཀྱི་དབུ་བརྙེས་ནས། །བསྟན་པ་དར་ཞིང་རྒྱས་པ་ལ། །དུས་དང་བསྐལ་པ་དེ་ཙམ་ན། །གནམ་མཐའ་ལྕགས་ཀྱི་རྒད་པོ་དང་། །ས་མཐའ་ཟངས་ཀྱི་རྒན་མོ་དང་། །དེ་གཉིས་ཐབས་ཀྱི་བཤོས་པ་ལས། །སྒོ་ང་བཞི་སྲིད་དུང་སྒོང་ཤར། །ཤར་ཕྱོགས་རྒྱ་ཡི་དགྲ་སྲི་བྱུང་། །གཡུ་སྒོང་ལྷོ་རུ་རྡོལ་བ་ལས། །ལྷོ་ཕྱོགས་འཇང་གི་དགྲ་སྲི་བྱུང་། །ཟངས་
སྒོང་ནུབ་ཏུ་རྡོལ་བ་ལས། །ནུབ་ཕྱོགས་མོན་གྱི་དགྲ་སྲི་བྱུང་། །ལྕགས་སྒོང་བྱང་དུ་རྡོལ་བ་ལས། །བྱང་ཕྱོགས་ཧོར་གྱི་དགྲ་སྲི་བྱུང་། །དགྲ་སྲི་དེ་བཞིས་རྐྱེན་བྱས་ནས། །ཕྱོགས་བཞིའི་དགྲ་བཞི་དེ་ནས་ལང་། །གནམ་མཐའ་ལྕགས་ཀྱི་རྒད་པོ་དེ། །གཤིན་རྗེ་ཁྲམ་ཐོགས་དབྱུག་འཛིན་སྤྲུལ། །རྡུལ་ནག་འཚུབ་མའི་རྟ་ལ་ཞོན། །མི་དགེ་སྡུག་པ་སྣ་ཚོགས་བསྟན། །མདས་མཐའ་ལངས་ཀྱི་རྒན་མོ་དེས། །མི་ཁའི་བུ་མོ་བ་རུ་སྤྲུལ། །ནད་མུག་མཚོན་གྱི་ཆར་པ་ཕབ། །བོད་ཀྱི་ཆོས་རྒྱལ་འཁོར་འབངས་བཅས། །མི་ནོར་རྟིང་ནས་བརླག་ལ་ཐུག །དེ་ཚེ་རྒྱལ་བློན་འཁོར་བཅས་ཀྱི། །བཀའ་བགྲོས་བྱས་ནས་བློ་བྱུང་ནས། །མཐུ་ཆེན་ནོར་ལྷ་ཐོད་དཀར་གྱིས། །དགྲ་བྲུབ་དགྲ་ཆོས་འདི་བྱས་པས། །ཕྱོགས་བཞིའི་དགྲ་བཞི་ཆམ་ལ་ཕབ། །ཕྱོགས་བཞིའི་ཇ་དར་རིན་པོ་ཆེ། །གོ་མཚོན་ནོར་སོགས་གནང་དུ་ཆོད། །དེ་རྗེས་བསྐལ་པའི་ཐ་མ་ལ། །ཆོས་རྒྱལ་མུ་ཁྲི་བཙན་པོ་ལ། །ཞང་བློན་མགུལ་རིང་དགྲ་ལང་དུས། །དགྲ་བྲུབ་དགྲ་ཆོས་འདི་བྱས་པས། །ཞང་དབུ་རིང་ཕ་ཚན་བཅས་པ་བརླག །དེ་རྗེས་རྒྱ་བོད་འཁྲུག་པའི་དུས། །སྔགས་པ་རྡོ་རྗེ་བདུད་འཇོམས་
དང་། །ཡོན་མཆོད་གཉིས་ཀྱི་ཟླ་གཅིག་བར། །དགྲ་བྲུབ་དགྲ་ཆོས་འདི་བྱས་པས། །བོད་རྒྱལ་རྒྱ་རྣམས་བོད་འོག་ཚུད། །དེ་ཕྱིར་བོད་ལ་འཕྲག་གཡང་ཆེ། །དེ་བས་ཕྱི་རབས་རྣལ་འབྱོར་ལ། །དགྲ་ཇག་ཆོམ་རྐུན་ནད་མུག་མཚོན། །བྱད་ཁ་ལ་སོགས་རྐྱེན་ངན་ལ། །འདི་ལས་ལྷག་པའི་རྐྱེན་ཟློག་ནི། །ས་སྟེང་འདི་ན་མེད་དོ་སྐད། །དེ་ཕྱིར་ལེགས་ལྡན་བྱ་ཐབས་ནི། །ཆོས་ལུགས་བོན་ལུགས་སྲིད་པའི་ལུགས། །ལུགས་ཁ་གསུམ་ལ་བཅའ་ལུགས་གསུམ། །དགྲ་ཟློག་དགྲ་བྲུབ་མདོས་ཐབས་གསུམ། །བཅའ་ཐབས་མི་གཅིག་དྲུག་ཙམ་ཡོད། །དྲུག་གི་ནང་ནས་འདི་ཉིད་ནི། །སྲིད་པའི་ལུགས་དང་ཆོས་ལུགས་ཀྱི། །ཟུང་འབྲེལ་དབྱེར་མེད་བྱ་བ་ཡིན། །འདི་ཡི་ལག་ལེན་བསྟན་པ་ནི། །༈ །ལྕགས་སྣོད་ཀྱི་ནང་དུ་རི་རབ་བང་རིམ་བཞི་པ་བྱས། ཤར་དཀར་ལྷོ་སེར་ནུབ་དམར་བྱང་ལྗང་། དབུས་སུ་བྲུབ་ཁུང་གཅིག་གི་ཕྱོགས་གསུམ་དུ་བྲུབ་ཁུང་གསུམ་བྱ། ནང་དུ་ཤོག་ལིང་དང་ཟན་ལིང་གསུམ་བཞག །དེ་སྟེང་དམར་གཏོར་ཆེ་བ་གཅིག་བཞག །དེ་ནི་ལེགས་ལྡན་མགོན་པོའི་གཏོར་མ་ཡིན། ཟུར་གསུམ་ལ་དམར་གཏོར་དེ་བས་ཆུང་བ་གསུམ་
བཞག །དེ་ནི་ལྷ་མོ་ལེགས་ལྡན་མཆེད་གསུམ་གཏོར་མ་ཡིན། དེ་མཐར་བང་རིམ་དང་པོ་ལ། དམར་གཏོར་བརྒྱད་ཀྱིས་བསྐོར་བ་ནི། དེ་ནི་ལེགས་ལྡན་གྱི་གཏོར་མ་ཡིན། དེ་མཐར་བང་རིམ་གཉིས་པ་ལ་དམར་གཏོར་ཉེར་གཅིག་གིས་བསྐོར། དེ་ནི་ནག་པོ་སྟོང་དང་ཤ་ཟ་འབུམ། མ་མོ་བྱེ་བ་གནོད་སྦྱིན་ཁྲི་དང་བཅས་པའི་གཏོར་མ་ཡིན། བང་རིམ་གསུམ་པར་དམར་གཏོར་ཉི་ཤུ་རྩ་གཅིག་གིས་བསྐོར། བང་རིམ་ཐ་མ་ལ་འབྲང་རྒྱས་བཅུ་གསུམ་གྱིས་བསྐོར། དེ་ནི་དགྲ་བླ་ཝེར་མ་རྣམས་ཀྱི་གཏོར་མ་ཡིན། དེ་རྒྱབ་ལྕོག་རྡོག་དང་ཆངས་བུ་གཙང་མ་སྦྲགས་ལ་བསྐོར། དེ་ནི་ལས་བྱེད་བདུད་ཁུར་རྣམས་ཀྱི་གཏོར་མ་ཡིན། དེ་མཐར་ས་སྦྱིན་ལ་རྟ་དྲེལ་བོང་གསུམ། མཛོ་ཁལ་གླང་གསུམ། ཁྱི་ར་ཕག་གསུམ་དགུ་པོ་ལ་མི་གཟུགས་སྐྱོན། སྔོན་མ་གསུམ་གྱིས་མདའ་གཞུ་བཟུང་བ། བར་མ་གསུམ་གྱིས་མདུང་བཟུང་བ། རྒྱབ་མ་གསུམ་གྱིས་གྲི་བཟུང་བ། ཝེར་མའི་ལས་མཁན་བཞི་ནི། ཤར་དུ་ར་དམར་ཟོར་ཐོགས། ར་མགོ་ཅན་ལག་ན་ཟོར་བ་ཐོགས་པ། ལྷོར་སྤྲེལ་དམར་རྟ་ཐོགས་སྤྲེལ་མགོ་ཅན་ལག་ན་སྟ་རེ་ཐོགས་པ། ནུབ་ཏུ་བོང་བུ་སྟེ། བོང་བུའི་མགོ་ཅན་སྟེས་ཁེ་
འཛིན་པ། བྱང་དུ་འཁྱིལ་པ་མེ་འཁྱིལ་བྱ་མགོ་ཅན་མེ་དཔུང་འཛིན་པ། གཏོར་མ་རྣམས་ལ་ཤ་དུམ་ཁྲག་ཆུས་བྲན་ལ་བཞག །ལྕགས་རི་ལ་རྩང་དམར་ནག་བཅུ་གཅིག་བཙུགས། མདོས་ལྟར་བྱེད་ན་ནམ་མཁའ་ཁྲམ་ཤིང་བྱང་བུ་རྣམས་བཙུགས། མདའ་ཟོར་རྡོ་ཟོར་གཏོར་ཟོར་རྣམས་ཀྱིས་བསྐོར། སྣོད་གཙང་མའི་ནང་དུ་དཀར་གཏོར་གཅིག་ལ་བྱ་དཀར་བཙུགས། འབྲང་རྒྱས་དང་གཡག་ལུག་ར་གསུམ་གྱིས་བསྐོར། དེ་ནི་རྒྱུག་རོག་ཡུལ་ལྷ་ཟོ་དོར་གྱི་གཏོར་མ་ཡིན། དེ་ཡི་མདུན་དུ་ཕུང་རེ་ཡི་སྟེང་དུ་ཤོག་ལིང་དང་རྡོ་ནག་རྡེལ་བུ་དགུ་ལ་ནི་བྲིས་པ། གླང་མའི་ལིང་ཚེ་དགུ་ལ་ཚྭ་དང་ཛ་ཁྲི་བྲིས་པ། གཡེར་མ་དགུ་བོང་བ་དུམ་བུ་དགུ། ཚྭ་སྒོག་རམ་པ་དང་བཅས་པ་བཀོད། གལ་ཆེན་ཞག་མང་བྱེད་ན་གྲུ་གསུམ་ནངདུ་བཀོད་ལ་རྩང་བཙུགས། གཡག་རུ་གཡོན་མ་ལ་གླང་གི་མགོ་དང་ཛ་ཁྲི་བྲིས་ལ་བཞག །ཐག་པ་ཁྲ་བོ་འདོམ་པ་གང་། ཤ་རུ་ཤིང་ལྕགས་ས་ཆུ་རེ་ནག་རྣམས་བཀོད། །བྲ་བ་ཐལ་འཇིམ་མགོ་དགུ་ཡང་བཞག །ཡས་སྟགས་རྫོངས་ན་གཞུང་ལྟར་བྱུང་བཞིན་བཅས། དགྲ་དཔུང་གཅོག་ན་རང་ཟོག་མ་ཡིན་པའི་དཔུང་པ་གཡོན་པ་བཞག །གྱོད་ཀྱི་ཤྭ་བཞི་
སྤགས་ན་རང་གཞུང་ལྟར། རྐུན་མ་ཚང་ཕུད་བྱེད་ན་མི་གཟུགས་བཞི་ཡི་ལག་ན་ཞགས་པ་ཐོགས་པ་བྱ། དམག་ཇག་ལ་འགྲོ་བ་ཡིན་ན་གནང་བགོས་བྱེད་རྒྱུ་གཞུང་ནས་འབྱུང་བཞིན་བྱ། ངེས་པར་དགྲ་ལ་རྟགས་ཐོན་བྱེད་ན་འདྲེ་དགུ་སྐྱས་འདེབས་བྱ། མི་ཁ་དགྲ་ལ་རྦད་ཐབས། བསེ་རག་དགྲ་ལ་ཆད་ཐབས་གཞུང་བཞིན་བྱ། དེ་གསུམ་གནད་ཀྱི་མན་ངག་སུས་ཀྱང་བཟློག་མེད་བདེན་རྫུན་མེད་པ་ཡིན། ཞལ་ཤེས་གསུམ་ཡོད་ཐུགས་ལ་གབ། དེ་མིན་གབ་ཅིང་སྦས་པ་མེད། འབུལ་རྒྱུའི་གཏོར་ཆུང་ཤ་དུམ་ཟུར་དུ་བཤམས། ཁྲེལ་ཐག་གཅོད་ན་ཐག་པ་ཁྲ་བོ་འདོམ་པ་གང་བྱ། དེ་ནི་བཅའ་ཚོགས་རྒྱས་པ་ཡིན། ༈ འབྲིང་ལ་གཏོར་མ་གོང་ལྟར་ལས། ཡས་སྟགས་རྣམས་མི་དགོས། བསྡུས་པ་ནི་དམར་གཏོར་ཆེ་བ་གཅིག་ལ་ཆུང་བ་བཅུ་ཡིས་བསྐོར། དཀར་གཏོར་གོང་ལྟར་རྡོ་ནག་གླང་མ་ལིང་དགུ་བྲ་བ་ཤ་དུམ་རྣམས་བཤམས། ༈ གཞན་རྣམས་མི་དགོས་སོ། །ཤིན་ཏུ་བསྡུ་ན། རྡེལ་ནག་གླང་གཟུགས་རེ་ནག་བྱ་ཐག་རྣམས་མ་གཏོགས་གཞན་མི་དགོས། འདོན་ལུགས་རྒྱས་པ་གོང་ནོན་ཡི་དམ་གང་ཡིན་གྱི་ལས་བྱང་དང་ཆོས་སྐྱོང་རྣམས་སོང་བའི་མཚམས་སུ། གཏོར་མ་
དགྲ་ཆོས་རྣམས་ཆུ་གཙང་གིས་བྲན་ལ། དགྲ་ཆོས་གཞུང་གི་སྡང་བར་བྱེད་པའི་དགྲ་བོའི་བླ་རྡོ་ཡིན་ཟེར་བའི་བར་འདོན། ལིངྒ་གླང་མ་རྡེལ་ནག་རྣམས་ལ་འགུག་གཞུག་ལན་གསུམ་བྱ། གཏོར་མ་རྣམས་གླིང་བཞི་གླིང་ཕྲན་བརྒྱད་འདོད་པའི་ཡོན་ཏན་ལྔ་ཡོ་བྱད་ཕུན་སུམ་ཚོགས་པ། གོ་མཚོན་ཕོ་བྲང་ཞིང་ཁམས་ཕུན་སུམ་ཚོགས་པ། བཟའ་བཅའ་རྟེན་རྫས་བསྒྲུབ་རྫས་ཤ་ཁྲག་ལ་སོགས་པ། ལེགས་ལྡན་མགོན་པོ་འཁོར་བཅས་དགྲ་བླ་ཝེར་མ་ཡུལ་ལྷ་ཟོ་དོར་ཐམས་ཅད་དགྱེས་པ་བསྐྱེད་ནུས་པའི་མཆོད་རྫས་ཀྱིས་ནམ་མཁའ་གང་བར་བསྒོམས་ལ། ཨོཾ་ཨཱཧཱུྃ་འབྲུ་གསུམ་གྱིས་བྱིན་གྱིས་བརླབས། ལྷ་ཚོགས་འཁོར་བཅས་ལ་ཕུལ་བས་མཉེས་ཤིང་ཚིམས་ནས་དགྲ་ཡུལ་དུ་སོང་ནས་རྡུལ་དུ་བརླག་པར་བསྒོམས་ལ་འདོན། དེ་ནི་དམག་ཇག་སོགས་ལ་འགྲོ་དུས་འགྲོ་ཁར་ཆས་ཀ་སྤྱད་ནས་བརྫ་ང་བ་ལྟ་བུ་ཡིན་པས་གལ་ཤིན་ཏུ་ཆེ། གཏོར་ཆུང་ཤ་དུམ་རྣམས་གོང་ལྟར་བྱིན་བརླབས། ཐུགས་ཀར་ཝེར་མ་ཡུལ་ལྷ་རྣམས་ཀྱི་དགྲ་ཆོས་འདོན། དེ་ནས་དགྲ་ཆོས་སྤུན་དགུ་སོགས་ནས་ཛ་ཛའི་བར་འདོན། འགུགས་གཞུག་ལན་གསུམ་བྱ། གཏོར་ཆུང་ཤ་དུམ་འབུལ། ལེགས་ལྡན་
ཡབ་ཡུམ་དང་སྲས་ཀྱི་དགྲ་ཆོས་འདོན། ལིངྒ་རྡེལ་ནག་གླང་མ་ལ་འགུགས་གཞུག་ལན་གསུམ་བྱ། ཕོ་རོག་འུག་པའི་སྒྲོས་གཡབ་ལྷ་དབྱེ་བྱ། དེ་ནས་ཤར་ཕྱོགས་རྒྱ་ཡི་དགྲ་ཞེས་པ་ནས། དགྲ་ལ་ཆད་དོ་ཞེས་པའི་བར་འདོན། གཡག་རུ་བསྐྱེད་ཆོག་འདོན། ཞག་མང་བཅའ་ན་རྨུ་གབ་འགེབས་ཐབས་འདོན་ལ་ལིངྒ་རྡོ་ནག་གླང་མ་རྣམས་ཀྱི་ཐོག་ཏུ་གཡུག །གྲི་ཁ་མཚོན་བསྒྱུར་ཆེ་ཆུང་གཉིས་དང་གྲི་བྲུབ་སྨས་བསྒྱུར་འདོན་ལ་གྲི་ཡུར་བྱེད་ལ་གྲི་རྩེས་ཁྲག་གཏོར། དེ་ནས་ལྷ་གཞུང་གང་ཡིན་རྗེས་ཀྱི་རིམ་པར་འཇུག ༈ །འབུལ་ཉིན་གོང་ལྟར་ལས་དཀར་གཏོར་གསེར་སྐྱེམས་མདའ་དར་ཧོ་ཕྱག་རྣམས་བཤམས། མི་གསུམ་མམ་ལྔ་བདུན་དགུ་སོགས་གོ་མཚོན་ཐོགས་ལ་གྲལ་བསྒྲིགས་པ་ལ། རྐང་པ་གཡོན་མའི་སྒྱེད་ཁུག་ཞབས་ནས་རྡེལ་ནག་གླང་མ་རྣམས་ལེན་མ་རག་བྱས་ལ་གྲལ་མཇུག་མས་གཡག་རུ་རྐང་ཞབས་སུ་མནན་ལ་བྲན། གཡག་རུ་བསྐྱེད། བསོ་ཚེས་གཅིག་བཅུ་གཅིག་ཟོར་དུ་རྡོ་ནག་གླང་མ་ལིངྒ་རྣམས་རིམ་པར་སྦྲགས་ལ་བྲུབ་ནས། བྲ་བ་འདོན་ལ་བྲ་མཆུ་བཅད་ལ་བྲུབ། རྐུན་མ་ཚང་ཕུད་འདོན། ཤྭ་བཞི་འདོན། དགྲ་དཔུང་གཅོག་ཁྲེལ་ཐག་གཅོད་ལ་གླང་
གཟུགས་ཐོག་ཏུ་བཀལ། ཤ་རུ་ཁྲམ་འདེབས་གྲི་ཁ་མཚོན་བསྒྱུར་གྱི་བྲུབ་སྨྲས་བསྒྱུར་བྱའོ། །དེ་ནས་དཀར་གཏོར་གསེར་སྐྱེམས་འབུལ། འདྲེ་དགུ་སྐྱེས་འདེབས་བསེ་རག་མི་ཁ་རྣམས་འདོན། གཏོར་ཆུང་ཤ་དུམ་རྣམ་མདོས་ནང་དུ་འབུལ། དེ་རིང་སྲིད་པའི་ཟེར་བའི་དམག་བསྐུལ་འདོན། གཏོར་ཆུང་ཤ་དུམ་རྣམས་གོང་ལྟར་འབུལ། ཡི་དམ་ལྷ་ཚོགས་ཟེར་བའི་དམག་བསྐུལ་འདོན། དེ་ནས་དགྲ་ཕྱོགས་སུ་ཁྱེར་ལ། སྔོན་དུ་དཀར་གཏོར། དེ་རྒྱབ་གླང་གཟུགས། ཡས་སྟགས་རྣམས་བཞག །དགྲ་ལ་ངེས་པར་རྟགས་ཐོན་བྱེད་ན། དེ་རྒྱབ་མི་ཁ་བསེ་རག་རྣམས་བཞག །གྱོད་ཀྱི་ཤྭ་བཞི་སྤྲུག་པ་བཞག་ལ་བྲན། འགུགས་གཞུག་ལན་གསུམ་བྱེད། དེ་ནས་གྱོད་ཀྱི་ཤྭ་བཞི་དགྲ་ཕྱོགས་སུ་སྤྲུག །གཟེ་མ་ཕུ་འདེབས་འདོན། མདོས་ཟོར་རྡོ་ཟོར་རྣམས་འདོན་ལ་འཕེན། གླང་གཟུགས་ལ་མདའ་གྲི་བརྒྱབས། དགྲ་ཤ་སྟོན་འགྱེད་བཏོན་ལ་གཏོར། གཡག་རུ་གཏད་ཁྲམ་འདོན་ལ་མནན་པ་བྱ། དམག་ཇག་ལ་འགྲོ་ན་གནང་བསྒོས་དཔའ་དར་དཔའ་ཟས་འདོན་ལ་སྦྱིན། ཀི་བསྭོ་ཆའོ་ལྷ་རྒྱལ་ལོ་ལན་གསུམ་བརྗོད། དེ་ནི་དགྲ་ཆོས་རྒྱས་
པའོ། ༈ །འབྲིང་པོ་གོང་ལྟར་ལས། ཡས་སྟགས་དང་གྲི་ཁ་མཚོན་བསྒྱུར། དགྲ་དཔུང་གཅོག་པ་གྱོད་ཀྱི་ཤྭ་བཞི་འདྲེ་དགུ་སྐྱས་འདེབས་མི་ཁ་བསེ་རག་རྣམས་བསྒྱུར། ༈ བསྡུས་པ་ནི་དགྲ་ཆོས་གཞུང་ལ་ཐུགས་ཀར་དགྲ་ཆོས་ཅིག །གཟེ་མ་ཕུ་འདེབས་མ་གཏོགས་གཞན་མི་དགོས། ༈ ཤིན་ཏུ་བསྡུ་ན་སྔར་གྱི་ཐོག་པ་སྡེ་དགུའི་གཞུང་ལས་བྱུང་ལྟར་བྱ། སྤྱིར་དགོས་གལ་ཆེ་བ་ལ་དགྲ་སྲི་དར་ན་དགྲ་དཔུང་གཅོག་པ་གལ་ཆེ། ཁ་མཆུ་མང་ན་ཤྭ་བཞི་སྤྲུགས། རྨས་གྲུམ་མང་ན་གྲི་ཁ་མཚོན་བསྒྱུར་གྲི་བྲུབ་སྨྲས་སྒྱུར། ཇག་རྐུན་ལྡང་ན་རྐུན་མ་ཚང་ཕུད་རྐུན་ཐག་གཅོད་པ། ནད་སྐག་ཆེ་ན་ཡས་སྟགས་དགུ་རྫོངས་ན་སྤོ་ཤི་སྤོ། བྱད་ཁ་ཆེ་ན་ཐུར་གོང་འོག་ཝེར་མ་ཡབ་ཡུམ་སྲས་ཀྱི་དགྲ་ཆོས་ཤ་རུ་ཁྲམ་འདེབས་རྣམས་གལ་ཆེ་ཚང་མ་འདོན་པར་བྱ། དེ་ལྟར་བྱས་ན་རྐྱེན་ཟློག་མཆོག་ཡིན་ནོ། །དགྲ་མདོས་བྱས་ན་དགའ་རབ་རྡོ་རྗེས་མཛད་པའི་ནམ་མཁའ་ཁྲམ་ཤིང་བྱང་བུ་རྣམས་སབ་པར་བྱ། དགྲ་ཟློག་ལྟར་བྱས་ན་ནག་པོ་མཐུ་རྩལ་དང་མདོས་ཟོར་ཤ་ཁྲག་གཏོར་མ་ཟེར་བ་སབ། དགྲ་ཆོས་དགྲ་བྲུབ་བྱེད་ན་གཞུང་ལྟར་དེ་ཁ་བསྒྱུར་གྱི་རིམ་པའོ། །ཨེ་མ་སྲིད་པའི་དགྲ་ཟློག་
ཆེན་མོ་འདི། །འཛམ་གླིང་འདི་ན་ཆོས་བོན་མ་དར་གོང་། །འདི་ནི་དར་རྒྱས་སྲིད་པའི་དགྲ་ཆོས་ཟེར། །དེ་ཕྱིར་འཛམ་གླིང་མི་རྣམས་ཐམས་ཅད་ཀྱི། །སྐུ་རིམ་རྐྱེན་ཟློག་གཙོ་བོ་འདི་ལ་བྱས། །འདི་ལས་ལྷག་པའི་རིམ་གྲོ་གཅིག་ཀྱང་མེད། །འདི་ཉིད་རིམ་གྲོའི་མཆོག་གྱུར་ཡིན་ན་ཡང་། །མི་ཤེས་རྨོངས་པ་འགའ་ཡི་སྨྲས་པ་ལ། །གཟུགས་ཅན་མི་ཡི་དགྲ་རྐུན་མ་གཏོགས་པའི། །དགྲ་ཆོས་བྱ་དགོས་མེད་དོ་ཟེར་སྲོལ་གདའ། །དེ་ནི་མི་ཤེས་རྨོངས་པའི་གླེན་གཏམ་ཡིན། །རྩིས་གཞུང་མདོ་རྒྱུད་ཀུན་གྱི་ལུང་བསྟན་ལ། །སྲོག་ལ་དགྲ་དར་ཤི་ཆད་འོང་། །ལུས་ལ་དགྲ་དར་ན་ཚ་འོང་། །དབང་ཐང་དགྲ་དར་གོད་ཁ་འོང་། །སྲུང་རྟ་དགྲ་དར་མི་ཁ་ལྡངས། །ལར་སྨེ་བའི་དགྲ་དང་ཞག་དུས་ལྷ། །འདྲེ་ཕྲག་དོག་བྱད་ཁ་དྲག་པོ་སོགས། །གཟུགས་ཅན་དགྲ་བས་གཟུགས་མེད་དགྲ་ཉིད་མང་། །དེ་ཕྱིར་མཆོག་དམན་སེར་སྐྱ་ཐམས་ཅད་ཀྱིས། །སྐུ་རིམ་རྐྱེན་ཟློག་བྱད་ཟློག་འདི་ལ་མཛོད། །འདི་ལས་ཟབ་པའི་རྐྱེན་ཟློག་གང་ཡང་མེད། །བན་བོན་སུ་ཡིས་བཅས་ཀྱང་འཕྲོད་པ་ཡིན། །དགྲ་ལ་རྟགས་ཐོན་འོང་བའི་མཐུ་ནག་ཡིན། །གཞན་ལ་མ་སྤེལ་སྙིང་གི་
དཀྱིལ་དུ་གབ། །དམར་ཡོན་ཨ་མྱེ་ཨོ་རྒྱན་མགོན་གྱིས་བརྒྱ་འབུལ་བྱས་ནས་སྔ་སོར་དགྲ་ཆོས་ཐོག་པ་སྡེ་དགུ་གནང་བ་ཡིན་ཀྱང་། ད་ལམ་སྲིད་པའི་དགྲ་ཆོས་ཆེན་མོ་ཟེར་བ་གཅིག་རྩིས་གཞུང་ནས་བཤད་འདུག་པས། ཤེས་མཁན་སུ་ཡང་མི་འདུག་པས། དེ་ཉིད་ལག་ལེན་དང་བཅས་གནང་དགོས་ཞེས་ནན་ཆེར་བསྐུལ་བས། ༧ རཱ་ག་ཨ་སྱས་དགྲ་ཆོས་དང་རྩིས་བསྟན་ཆོས་རྣམས་ཀྱི་དོན་བསྡུས་ནས་སྦྱར་བའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།