ལེགས་ལྡན་མགོན་པོ་གཡག་རུ་དགྲ་ཆོས་གཏོ་གཞུང་མན་ངག་མུ་ཏིག་ཕྲེང་བ་ལས་ཡས་སྟགས་སྒྱུར་ཆོས་ཡས་སྟགས་དགུ་རྫོང་།
ལེགས་ལྡན་མགོན་པོ་གཡག་རུ་དགྲ་ཆོས་གཏོ་གཞུང་མན་ངག་མུ་ཏིག་ཕྲེང་བ་ལས་ཡས་སྟགས་སྒྱུར་ཆོས་ཡས་སྟགས་དགུ་རྫོང་ཞེས་བྱ་བ་བཞུགས་སོ། །
ཐམས་ཅད་མཁྱེན་པ་འཇམ་དཔལ་དབྱངས་ལ་ཕྱག་འཚལ་ལོ། །ཡས་སྟགས་ཀྱི་བསྒྱུར་ཆོས་ཆེན་མོ་གཏོ་སྒྱུར་འབུམ་སྡེའི་ཏིག་ཀ །གཏོ་སྒྱུར་ཐམས་ཅད་ཀྱི་གཞུང་དང་། དོན་ཐམས་ཅད་ཀྱི་བྱུང་ཁུངས་འབྲས་བུ། མུན་པ་ནང་གི་སྒྲོན་མེ། གཏོ་ཐམས་ཅད་ཀྱི་ལྡེའུ་མིག །མུ་ཏིག་ཕྲེང་བ་ཞེས་བྱ་བ་འདི། གཏོ་ཀུན་ལ་འགྲོ་སྟེ། ཆེ་ཡས། ཆུང་ཡས། དགྲ་བྲུབ། འདྲེ་དགུ་སྐྱས་འདེབས། སྟོང་སྒྲུབ་ཐམས་ཅད་ལ་འདི་འགྲོའོ། །བཅའ་ཚོགས་ཐལ་འཇིམ་མགོ་དགུ། ཕུང་སྲི་རྔ་མོང་། སྤྲེལ་དམར་ཅན། བཙན་ཤ་དམར་པོ། གླ་བ་རོག་པོ། ཕག་ནག་པོ། མགར་བ་སྲི་དམར། ཁྱི་ནག་པོ། ངར་མི་ནག་པོ། དྲེལ་ནག །བྲ་བ། ས་རྫ་ལུང་མང་། བརྡུང་དགུའི་རྭ། ཕྲ་དགུ། རྨིག་ཟ་དགུ།
གཅན་གཟན་གྱི་མཆེ་བ། འཕུར་དགུ་བྱ་དགུའི་གསོབ། སེམས་ཅན་གྱི་མགོ་རུས། ཤིང་ནག་མགལ་དུམ་དགུ། ཐག་པ་གླུད་བསག་ལ། རང་ཉིད་ལྷ་ཡི་ང་རྒྱལ་དང་ལྡན་པས། དྲག་ཏུ་བཀུག་གཞུག་བྱས་ལ་བསྔོས་ཏེ་འདི་སྐད་དོ།། ཀྱཻ། དེ་རིང་སྲིད་པའི་གནམ་གང་ལ། །ད་ལྟ་གདུག་པའི་ཕྱི་འཕྲད་ལ། །ཡས་སྟགས་བྱུང་ཁུངས་མ་བཤད་ན། །འདྲེ་དང་ཡས་གཉིས་ག་ལ་འཕྲོད། །དེ་བས་ཡས་སྟགས་མ་བཤད་ན། །སྐུ་གླུད་ཨེ་ཐེངས་མི་ཤེས་སོ། །སྣང་སྲིད་ཡས་ལེན་གླུད་བདག་རྣམས། །ཡས་སྟགས་ཆོ་འབྲང་བཤད་ཀྱིས་ཉོན། །གཏོ་མཁན་བདེན་པའི་བཀའ་ལ་ཉོན། །གཙང་བཙོག་མི་
འདྲེ་ཤགས་ཀྱིས་ཕྱེས། །ཉིན་སྲིབ་མི་ནོར་ཆབ་ཀྱིས་ཕྱེས། །ཡས་སྟགས་མི་ནོར་གཏོ་མཁན་ང་ཡིས་ཕྱེས། །ང་གཏོ་མཁན་འདུག་ས་ལྷ་ཡི་གནས། །དྲང་མཁན་ལྷ་ཡི་འདུག་ས་ནས། །འདྲེ་གདུག་པ་མ་གནས་རྐུ་མར་ཕུད། །མཚོན་དང་དགྲ་བླ་མ་འབྲལ་ཞིག །ལྟས་ངན་ཡས་སྟགས་ཕན་འདྲེའི་རྫས། །སྲིད་པའི་འདྲེ་དགུ་ཡས་ལོངས་ཤིག །འདྲེ་གདོན་བགེགས་གསུམ་ཡས་ལ་ལྟོས། །འདྲེ་བདུད་ཡས་ལ་མི་བལྟ་ན། །ཡས་འདི་འཕངས་པ་འཕྲོ་བརླག་ཡིན། །དེ་བས་འདྲེ་བདུད་ཡས་ལ་ལྟོས། །ང་ཡིས་བརྗོད་ན་འཕྲག་རེ་ཡང་། །དེ་བས་གཏོ་མཁན་བདག་ཅག་གི །ཕ་གནམ་གཉེན་ཡིན་པས་གྲོགས་ཕུག་མཐོ། །མ་ས་གཉེན་ཡིན་པས་མུ་རྨིང་བཟང་། །བདག་ནི་རྫུ་འཕྲུལ་སྟོབས་དང་ལྡན། །དེ་བས་བདག་གི་བཀའ་ལ་ཉོན། །ད་ཡས་ལ་སྔ་བ་རྔ་མོང་ཡིན། །ཕ་གནམ་གྱི་སྔ་ཐན་མཆུ་རིང་ཡིན། །མ་ས་ཡི་ཐན་ལྔ་སྣ་དྲུག་ཡིན། །བུ་ལྟས་ངན་ཕུང་སྲི་རྔ་མོང་ཡིན། །སྲིད་ནི་འབྱུང་བ་ལྔ་ལས་སྲིད། །འོང་ནི་ངོམ་གྱི་ཡུལ་ནས་འོང་། །ཆགས་ནི་ལྷ་མི་གནས་སུ་ཆགས། །གཟུགས་ནི་སེམས་ཅན་ཀུན་གྱི་གཟུགས། །འདྲེ་ནི་ལྟས་ངན་ཐན་ཅིག་
འདྲ། །ཐུབ་ནི་ལྟས་ངན་ཐན་ཆེན་ཐུབ། །ཐན་ལ་འདི་བས་ཆེ་བ་མེད། །ཕུང་ལ་འདི་བས་གྲགས་པ་མེད། །འདི་སྟོང་ཁམས་ཕུང་བའི་ཕུང་འདྲེ་ཡིན། །རྒྱལ་ཁམས་བརླག་པའི་བྱུར་སྲི་ཡིན། །ལྟས་ངན་བྱུར་གྱི་སྡོང་པོ་ཡིན། །མིང་ཡང་ཕུང་སྲི་རྔ་མོང་ཡིན། །མཐུ་སྟོབས་ཁྲོ་རྒྱལ་ཀུན་དང་མཉམ། །བང་ནི་ཟེར་མི་རླུང་དང་འདྲ། །ངུར་སྒྲ་ནམ་མཁའི་འབྲུག་དང་འདྲ། །ཁ་ནས་གྱོད་ཀྱི་ཁ་ཕྲུ་གཏོར། །མགུལ་དུ་སྟོང་ཡས་སྣ་ཚོགས་བཏགས། །རྒྱབ་ཏུ་མཚོན་ཆ་སྣ་ཚོགས་བཀལ། །རོལ་དུ་ཕུང་གྲང་རུ་དམར་ཁྲིད། །འདི་སྡང་དགྲ་འདུལ་བའི་གཉེན་པོ་ཡིན། །ལྟས་ངན་བརྒྱད་བཅུ་གྱ་གཅིག་འདི། །རྒྱབ་ཏུ་བཀལ་ལ་ཡས་སུ་རྫོངས། ༈ །དགྲ་བོའི་ཡུལ་དུ་ད་དམར་ཆོས། །དགྲ་ཡུལ་དུ་ཐན་གྱི་གང་བར་གྱིས། །དགྲ་བོའི་མི་ནོར་ཕུང་བར་གྱིས། །ངུར་སྐད་དྲག་པོའི་ནམ་མཁའ་གང་། །དགྲ་བོའི་ཡུལ་དུ་ད་ཆོས་ཤིག །ཕྱོགས་ཀྱི་མི་ཁ་ངན་པ་རྣམས། །ཕུང་སྲི་རྔ་མོང་ཁྱོད་ལ་བཀལ། །དགྲ་བོའི་ཡུལ་དུ་ཁུར་ལ་སོང་། །དགྲ་ལ་མི་དགེ་སྣ་ཚོགས་ཐོངས། །མོ་ངན་སོག་སྡིག་ཁྱོད་ལ་བཀལ། །ནད་ཡམས་
གོད་འདྲེ་ཁྱོད་ལ་བཀལ། །ཡོན་བདག་སྐུ་ཡི་གླུད་ཆབ་རྣམས། །ཕུང་སྲི་རྔ་མོང་ཁྱོད་ལ་བཀལ། །ཁུར་ལ་དགྲ་ཡི་ཡུལ་དུ་སོང་། །ཆོས་ཆོས་ཕུང་སྲི་རྔ་མོང་ཆོས། །རྒྱུག་རྒྱུག་དགྲ་ཡི་ཡུལ་དུ་རྒྱུགས། །དྲོངས་དྲོངས་དགྲ་ལ་ཐན་དམར་དྲོངས། །ད་གཤེགས་ད་སོང་རྔ་མོང་སོང་། ༈ །ཡས་སྟགས་དེ་སོང་འོག་རོལ་དུ། །ཡས་ལ་སྔ་བ་སྤྲེལ་དམར་ཡིན། །ངོམ་གྱི་སྤྲེལ་དམར་ཅོ་ཟད་ཁྱོད། །ཁྱོད་པ་ནི་ཧ་ནུ་གསར་ཐོག་རྒྱལ། །མ་དེ་ས་དྷ་མཚོ་མོ་ཆེ། །ཁྱོད་རང་སྤྲེལ་དམར་སྟར་ཐོག་ཡིན། །སྐྱེས་ནི་བྲག་དམར་ངོས་ལ་སྐྱེས། །གནས་ནི་རྒྱུ་ནགས་གསེབ་ན་གནས། །འདུག་ནི་ཐང་ཤིང་རྩེ་ན་འདུག །རིགས་ནི་ཧ་ནུ་མ་དྷའི་རིགས། །སྤྲུལ་ནི་ཐན་ལྟས་སྣ་ཚོགས་སྤྲུལ། །ཐང་ཤིང་རྩེ་ནས་ནུས་པ་ཆེ། །མགོ་ལ་མི་ཡི་ཐོད་བརྒྱན་ནོ། །ལུས་ལ་ཁྲག་གི་སྤུ་ཏོག་འཁྲུངས། །འགྲམ་པར་མཚལ་གྱི་ཐིག་ལེ་བྱུག །ཡིན་འདི་རྨེ་ཕོ་གྲི་རྡོ་ཡིན། །ཐུབ་ནི་རྨེ་ཕོས་དམེ་འདྲེ་ཐུབ། །བསྒྱུར་ཡང་དམེ་འདྲེའི་གནོད་པ་སྒྱུར། །མགོ་ལ་མཚོན་ཆ་སྣ་ཚོགས་བཏགས། །རྫོང་དུ་ནད་ཀྱི་རྐྱལ་པ་རྫོངས། །རོལ་དུ་བོང་བུ་རྣ་རིང་ཁྲིད། །དགྲ་བོའི་ཡུལ་
དུ་དམག་ལ་ཆོས། །དམག་སྣ་དགྲ་ཡི་ཡུལ་དུ་དྲོངས། །དགྲ་ཡུལ་ཐན་གྱིས་གང་བར་གྱིས། །རྒྱུ་སྦྱོར་ཡོན་གྱི་བདག་པོ་ཡི། །མོ་ངན་རྨིས་ལྟས་ངན་པ་རྣམས། །སྤྲེལ་དམར་ཁྱོད་ཀྱི་རྒྱབ་ཏུ་བཀལ། །དགྲ་ལ་རྗེས་ཤུལ་མེད་པར་གྱིས། །མི་ཁ་བྲ་མཆུ་ངན་པ་དང་། །རྨེ་ངོ་ཁྲག་ངོ་ངན་པ་དང་། །སྙིང་སྟོང་གོད་ཁ་ནད་ཡམས་དང་། །མོ་ངན་རྨིས་ལྟས་དགྲ་ལ་སྒྱུར། །ཆོས་ཆོས་སྤྲེལ་དམར་དགྲ་ལ་ཆོས། །རྒྱུག་རྒྱུག་སྤྲེལ་དམར་དགྲ་ལ་རྒྱུགས། །དྲོངས་དྲོངས་དགྲ་ཡི་ཡུལ་དུ་དྲོངས། །ད་གཤེགས་ད་སོང་སྤེལ་དམར་སོང་། ༈ །ཡས་སྟགས་དེ་སོང་འོག་རོལ་དུ། །ཡས་ལ་སྔ་བ་ཤ་བ་ཡིན། །གདུག་པའི་ངོམ་ཤ་ཟ་ས་ཁྱེད། །ཕ་དེ་ངོམ་བརྩོས་རྒྱུ་བོ་ཆེ། །མ་དེ་གདུག་ཤ་རྣ་བོ་ཆེ། །བུ་ནི་ཐན་ཤ་རུ་རིང་ཡིན། །སྐྱེས་ནི་ངོམ་གྱི་ཡུལ་དུ་སྐྱེས། །ཆགས་ནི་ཕྱི་འབྲོག་ཉིད་ལ་ཆགས། །གནས་ནི་གངས་རི་ངོས་ལ་གནས། །ཉལ་ནི་ནགས་གསེབ་བྲག་ལ་གནས། །འོང་ནི་སྨོན་པའི་ཡུལ་ལ་འོང་། །ཡས་ནི་གྲི་བོ་བཀར་བའི་ཡས། །གཟུགས་ནི་རི་བོ་ཆགས་པ་འདྲ། །མགོ་ལ་གདུག་བྱེད་ར་ཅོ་སྐྱེས། །གྲི་ཡས་སྣ་
ཚོགས་འགུལ་དུ་བཏགས། །གྲི་མཚོན་སྣ་ཚོགས་རྒྱབ་ཏུ་བཀལ། །ཁྱོད་རུ་བཅུ་ཀླད་ལ་རྒྱས་ཙམ་ན། །དམག་དཔོན་ཆས་རྩལ་ཞུགས་པ་འདྲ། །ང་ཡིས་གྱེར་ན་གླུད་ཀྱིས་རྫོངས། །གྲི་ཡི་ཡས་སུ་འཛུད་པའི་ཡས། །གྲི་ཡས་སྣ་ཚོགས་རྒྱབ་ཏུ་ཁུར། །དགྲ་ཡི་ཡུལ་དུ་ཁྱེར་ལ་སོང་། །དགྲ་ལ་དམེ་ཤི་གྲི་ལིང་ཐོངས། །དམེ་ཁ་གྲི་ངོ་སྡིག་པ་རྣམས། །གྲི་ཤ་རུ་རིང་ཁྱོད་ལ་བཀལ། །མི་ཁ་བྲ་མཆུ་སྡིག་པ་རྣམས། །ཤ་བས་ཁུར་ལ་ད་སོང་ཞིག །ཆོས་ཆོས་གྲི་ཤ་རུ་བཅུ་ཆོས། །རྒྱུག་རྒྱུག་གྲི་ཤ་རུ་བཅུ་རྒྱུགས། །དྲོངས་དྲོངས་དགྲ་ལ་ད་དམར་དྲོངས། །ད་གཤེགས་ད་ཆོས་ད་དམར་ཆོས། ༈ །ཡས་སྟགས་དེ་སོང་འོག་རོལ་ན། །ཡས་ལ་སྔ་བ་གླ་བ་ཡིན། །ཐན་ཁྱི་གླ་བ་རོག་པོ་ཁྱོད། །ཁྱོད་ཕ་དེ་གནམ་གླ་མཆེ་བ་ཅན། །མ་དེ་ས་གླ་མཆེ་བ་ཅན། །བུ་ཁྱོད་རང་གླ་ནག་སྐེ་རིང་ཡིན། །བྱུང་ནི་ནགས་ཀྱི་དཀྱིལ་ནས་བྱུང་། །གནས་ནི་རྩི་ཤིང་གསེབ་ན་གནས། །ཆགས་ནི་བདེ་བཟང་སྒང་བྲག་ཆགས། །ཡིན་པ་མ་བདུད་རྒྱལ་མོ་ཡིན། །མགོ་ལ་ཤ་མེད་རྣ་བོ་ཆེ། །ཁ་ན་སོ་ཆུང་མཆེ་བ་ཆེ། །ལུས་ལ་སྤུ་ཐུང་སྤུ་རྫོངས་
འཐུགས། །ཁ་ནས་རྩྭ་ཟ་མཆེ་བ་དཀར། །དེ་ཕྱིར་འགོང་པོ་བཀར་བའི་ཡས། །ཤ་ཡོད་ཚིལ་མེད་གསུར་བྲོ་ཙམ། །དེ་བས་བསེ་རག་ཡས་ཡིན་པས། །སྦོ་ལ་སྤོས་ཀྱིས་དུད་པ་འཐུལ། །གྲོ་མཁན་ལ་ལ་རྒྱུག་མཁན་པ། །རི་དྭགས་ལུས་ལ་གཅན་ཟན་མགོ །རི་དྭགས་ལུས་ལ་ཁྱི་སྐད་ཟུག །ཐན་གྱི་གླ་བ་རོག་པོ་ཁྱོད། །མགུལ་དུ་ཐན་གྱི་ཐག་པ་བཏགས། །རྒྱབ་ཏུ་ཐན་ཡས་སྣ་ཚོགས་བཀལ། །རོལ་དུ་ཐན་སྦྲུལ་ནག་པོ་ཁྲིད། །ང་ཡིས་གྱེར་ནས་གླུད་ཀྱིས་རྫོངས། །སྟབས་ནི་སེམས་ཅན་ཀུན་གྱིས་སྟབས། །འགྱུར་ལྡོག་ཟང་ཟིང་ནོར་བ་ཆེ། །སྦྱོར་ནི་དགྲ་ཡི་ཡུལ་དུ་སྦྱོར། །མུ་གེ་ལྟས་ངན་སྣ་ཚོགས་རྣམས། །གླ་ནག་ཁྱོད་ཀྱི་རྒྱབ་ཏུ་བཀལ། །ཁུར་ལ་དགྲ་ཡི་ཡུལ་དུ་སོང་། །རྒྱབ་ཏུ་ཐལ་འཇིམ་མགོ་དགུ་ཁུར། །དགྲ་ཡི་ཡུལ་དུ་ཁྱེར་ལ་སོང་། །དགྲ་བོ་ཐལ་འཇིམ་ཞབས་སུ་ཆུགས། །ཆོས་ཆོས་དགྲ་ཡི་ཡུལ་དུ་ཆོས། །དྲོངས་དྲོངས་དགྲ་ཡི་ཡུལ་དུ་དྲོངས། །རྒྱུག་རྒྱུག་དགྲ་ཡི་ཡུལ་དུ་རྒྱུགས། །ད་གཤེགས་དེར་སོང་གླ་ནག་སོང་། ༈ །ཡས་སྟགས་དེ་སོང་འོག་རོལ་ན། །ཡས་ལ་སྔ་བ་ཕག་ནག་ཡིན། །
དུར་སྲི་ཕག་ནག་རོག་པོ་ཁྱོད། །ཁྱོད་ཕ་དེ་གནམ་ཕག་ལྟོ་བ་ཆེ། །མ་དེ་དུང་ཕག་ལག་རྡུམ་ཡིན། །ཁྱོད་རང་དུར་ཕག་ནག་པོ་ཡིན། །ཁྱོད་ཡར་ལྟ་མི་ཤེས་གནམ་གྱི་མནར། །ཟེ་བ་ཁབ་རྩེ་གཤིབས་པ་འདྲ། །ལུས་པོ་གཅན་ཟན་ཁྱི་ཡི་ལུས། །རྨིག་པ་ཚེ་རེ་ར་ཡི་རྨིག །ཟས་སུ་མི་གཙང་བུན་ལ་ཟ། །ལས་སུ་ས་ལ་དོང་དུ་བརྐོ། །སྲིད་ནི་སྲིབ་ཀྱི་ཡུལ་ལ་སྲིད། །གནས་ནི་རུང་ཁུང་མཐིལ་ན་གནས། །འོང་ནི་མི་ཡི་ཡུལ་དུ་འོང་། །ཡིན་ནི་ས་བདག་དཀོར་ནོར་ཡིན། །ཆེ་ནི་ནག་པོ་རྒྱ་ན་ཆེ། །གདུག་སེམས་ཞེ་སྡང་སྦྲུལ་ལས་ཆེ། །ཚོན་པོ་ཚིལ་ལ་གདུག་སེམས་ཆེ། །གདུག་སེམས་ཕག་ནག་རོག་པོ་ཁྱོད། །མགུལ་དུ་དུར་གྱི་ལྡེའུ་མིག་བཏགས། །རྒྱབ་ཏུ་མཚོན་ཆ་སྣ་ཚོགས་བཀལ། །རོལ་དུ་ཙ་ར་རོག་པོ་ཁྲིད། །མཐུ་སྟོབས་ས་བདག་ཉིད་བས་ཆེ། །འགོང་པོ་ཁྱིམ་དུ་ཞུགས་པ་དང་། །དགྲ་ངོ་གྲི་ངོ་ཁྲག་ངོ་དང་། །དམེ་གྲི་ཆུ་གྲི་འགགས་གྲི་དང་། །མི་ཁ་བྲ་མཆུ་གཏིབ་གྲི་རྣམས། །དགྲ་ཡི་ཡུལ་དུ་ཁྱེར་ལ་སོང་། །ཕག་གིས་ས་བརྐོ་རྡོ་ལ་གཏུག །དགྲ་ཡི་ཕག་སྣ་གྲམ་ལ་འདུག །མི་ནད་ཕྱུགས་ནད་གོད་ཡམས་རྣམས། །ཕག་
ནག་རོག་པོའི་རྒྱབ་ཏུ་བཀལ། །དགྲ་ལ་ཕོ་ནད་ཡམས་སྲི་ཐོངས། །དགྲ་ཡུལ་ཤིགས་ལ་ཤགས་མཁར་ཤིགས། །ཆོས་ཆོས་དགྲ་ཡི་ཡུལ་དུ་ཆོས། །རྒྱུག་རྒྱུག་དགྲ་ཡི་ཡུལ་དུ་རྒྱུག །སོང་སོང་ཡས་སྟགས་ད་སོང་ཞིག ༈ །ཡས་སྟགས་དེ་སོང་འོག་རོལ་དུ། །ཡས་ལ་སྔ་བ་མགར་བ་ཡིན། །ཡས་ཀྱི་མགར་བ་ཁུ་ཡུག་ཁྱོད། །ཕ་དེ་གླ་ནག་བྱུར་བུ་མཁབ། །མ་དེ་ལྟར་མོ་ངུར་མོ་མཆུ། །བུ་ཁྱོད་རང་མགར་བ་རོག་པོ་ཡིན། །ཁྱོད་རབས་ཆད་བརྒྱུད་འཛིན་མཛོ་མོའི་ཚ། །ཕ་ལ་བུ་འཁྲུངས་གླང་གི་བརྒྱུད། །གཟུགས་ནི་ཁྱུང་དཀར་མཛོ་མོའི་གཟུགས། །ཁུར་ཚན་བྲེ་སེར་འབྲོང་བས་ཆེ། །ཁྱོད་གླང་གི་བུ་ལ་རྒོད་ཀྱི་ཚ། །སྐྱེས་ནི་ནགས་རྫོངས་ནང་ན་སྐྱེས། །གནས་ནི་དབུ་ནག་མི་དང་མཐུན། །ཆས་ནི་བྱོལ་སོང་གཟུགས་དང་མཐུན། །ཐུབ་ནི་རབས་ཆད་རྐུན་ཁ་ཐུབ། །རྭ་ཡ་གནམ་དུ་སོང་བས་གནམ་སྲི་ཐུབ། །རྭ་ཡ་ས་ལ་སོང་བས་ས་སྲི་ཐུབ། །ལུས་པོ་སྟོབས་ཆེ་བརྟགས་པས་འགོང་པོ་ཐུབ། །རྔ་རྫ་ངས་རིང་བས་བསེ་རག་ཐུབ། །རྔ་སྙིང་འཐུག་པས་རབས་ཆད་ཐུབ། །ཐུབ་ཐོང་རབས་ཆད་ཡས་སུ་
ཆེ། །བདག་ཅག་ཡོན་མཆོད་འཁོར་བཅས་ཀྱི། །མི་ཡི་ན་ཚ་ཁྱོད་ལ་བཀལ། །ཕྱུགས་ཀྱི་གོད་ཁ་ཁྱོད་ལ་བཀལ། །ཁུར་ལ་དགྲ་ཡི་ཡུལ་དུ་སོང་། །དགྲ་ཡུལ་རྐྱེན་གྱིས་གང་བར་གྱིས། །ངོམ་གྱི་ཡུལ་དུ་སྐྱེས་ཁྱོག་ཅིག །ཆོས་ཆོས་དགྲ་ཡུལ་མགར་བ་ཆོས། །རྒྱུག་རྒྱུག་དགྲ་ཡི་ཡུལ་དུ་རྒྱུགས། །དྲོངས་དྲོངས་དགྲ་ཡི་ཡུལ་དུ་དྲོངས། ༈ ཡས་སྟགས་དེ་སོང་འོག་རོལ་ན། །ཡས་ལ་སྔ་བ་ཁྱི་ནག་ཡིན། །ཕ་དེ་གནོད་པའི་སྨག་གླང་ཡིན། །མ་དེ་དུར་གླིང་ནག་མོ་ཡིན། །བུ་ཁྱོད་རང་ཁྱི་ནག་ལྕགས་མགོ་ཡིན། །ངོམ་རྗེ་རྩོལ་པོས་ཚངས་ཡ་ཡིན། །མགོ་རྣ་བ་ཧད་ལ་མཆེ་བ་ཅན། །རྔ་མ་ཨ་ལུང་འཁྱིལ་པ་འདྲ། །མཆུ་ཐོ་འགུག་པའི་ལྕགས་ཀྱུ་འདྲ། །སྤུ་ནི་ཚེར་མའི་ངར་བས་རྩུབས། །ལྕེ་ལ་དུག་གི་ཚྭ་ཚྭ་འཕྲོ། །སྐྱེས་ནི་སོལ་ཁུང་ནང་དུ་སྐྱེས། །ཉལ་ནི་ཉིན་སྲིབ་མཚམས་ན་གནས། །དགྲ་སྲོག་དེ་ནི་མཆེ་བས་གཅོད། །རྒྱབ་ཏུ་གདུག་པའི་མཚོན་ཆ་བཀལ། །དགྲ་ཡས་སྣ་ཚོགས་མཚོན་ཆ་བཀལ། །མི་ནད་ཕྱུགས་ནད་ཁལ་ཁེབ་བྲས། །མོ་ངན་སོག་སྡིག་ནན་ཐག་བྱས། །ཁུར་ལ་དགྲ་ཡི་ཡུལ་དུ་སོང་། །དགྲ་ཡི་རྐུན་
ཐག་ཡས་ཀྱི་ཆོད། །ཆོས་ཆོས་ཁྱི་ནག་དགྲ་ལ་ཆོས། །རྒྱུག་རྒྱུག་ཁྱི་ནག་དགྲ་ལ་རྒྱུག །དྲོངས་དྲོངས་ཁྱི་ནག་དགྲ་ལ་དྲོངས། ༈ །ཡས་སྟགས་དེ་སོང་། འོག་རོལ་ན། །ཡས་ལ་སྔ་བ་ངར་མའི་ཡིན། །ངར་མའི་རྒྱུ་རྩལ་གང་དུ་རྩལ། །འབྲུ་སྣ་དགུ་ཡི་རྒྱུ་འབྲས་ཡིན། །བྱུང་ཁུངས་ནག་པོ་རྒྱ་ནས་བྱུང་། །རྒྱུ་ཞིང་མུ་མེད་རྫོངས་སུ་བཏབ། །ཐབ་ཤེས་གླང་པོས་རྨོ་དོར་ལ། །གཉའ་ཤིང་ཐོང་ལྕགས་རོལ་དུ་རྨོས། །འབྲས་བུ་ཐབས་ཀྱི་སོ་ནམ་བྱས། །ཕ་དགུང་སྔོན་གནམ་གྱི་ཆར་གྱིས་བྲན། །མ་ས་གཞི་བརླན་གྱི་ངར་གྱིས་སྐྱེད། །བུ་ནི་འབྲུ་སྣ་དགུ་རུ་སྲིད། །ཟོར་གྱིས་བརྔས་ལ་ཐབ་ཀྱིས་བརྡུངས། །རིན་ཆེན་མཛེས་པའི་སྣོད་དུ་བླུག །ཡན་ལག་བརྒྱད་ལྡན་ཆབ་ཀྱིས་བྲབ། །རྣལ་འབྱོར་བདག་གི་ཕྱག་ཏུ་ཕུལ། །ཡོན་བདག་གླུད་དུ་ངར་མི་འབུལ། །འབྲུ་སྣ་དགུ་ཡི་ངར་མི་འདི། །སྤྱན་བཟང་གཟི་མདངས་ཡ་ལ་ལ། །ཤངས་བཟང་དྲི་ཞིམ་ཕ་ལ་ལ། །ཚེམས་བཟང་དུང་ལྟར་ཁྲིགས་སེ་ཁྲིག །ལྗགས་བཟང་གློག་ལྟར་ཁྱུགས་སེ་ཁྱུག །གཟུགས་བཟང་ཉི་ལྟར་ལྷགས་སེ་ལྷག །སྨྲ་མཁས་དེ་ནི་ས་ལ་ལ། །
འགྲོ་མཁས་དེ་ནི་ལྡེམས་སེ་ལྡེམ། །གོས་བཟང་དེ་ནི་ལྷུབས་སེ་ལྷུབ། །དབང་པོ་རྣམ་ལྔ་འདི་ལ་ཚང་། སྐྱེ་མཆེད་བཅུ་གཉིས་འདི་ལ་ཚང་། །མི་བས་གླུད་བཟང་ཡ་ལ་ལ། །རྗེ་བས་ཁ་དྲོ་ཐིབས་སེ་ཐིབ། །བདག་དང་ཡོན་བདག་གླུད་དུ་འབུལ། །གླུད་ཀྱི་བདག་པོས་གླུད་འདི་ལོངས། །ཡས་བདག་རྣམས་ཀྱིས་ཡས་འདི་ལོངས། །མོ་ལྟས་རྨི་ལམ་ངན་པ་རྣམས། །ལོ་ཟླ་ཞག་དང་ཟ་མའི་སྐག །ཆོ་འཕྲུལ་ལྟས་ངན་ཅི་མཆིས་རྣམས། །ངར་མིས་ཁུར་ལ་ཡས་ཁུང་འདྲིལ། །ངར་མི་རྒྱལ་པོ་སྐྱས་ཁྱོག་ཅིག །ཆོས་ཆོས་ངར་མི་ཡས་སྟགས་ཆོས། ༈ །ཡས་སྟགས་དེ་སོགས་འོག་རོལ་ན། །ཡས་ལ་སྔ་བ་དྲེལ་ནག་ཡིན། །ཁྱོད་ཀྱི་ཕ་དེ་རྒྱ་བོང་གྲྭ་བ་ཡིན། །མ་དེ་རྒོད་མ་ཡོ་ཆེན་ཡིན། །བུ་ཁྱོད་རང་བདུད་དྲེལ་ནག་པོ་ཡིན། །ཕ་མིས་ལས་སུ་ངུ་འབོད་མཁས། །མ་ཡིས་ལས་སུ་སྤྲོ་ཆེན་ཆེ། །བུ་ཁྱོད་རང་ཁུར་བའི་སྟོབས་པོ་ཆེ། །སྐྱེས་ནི་སྤང་དཀར་ལྗོངས་ལ་སྐྱེས། །གནས་ནི་གྲོག་ཕུག་བདེ་ལ་གནས། །ཡིན་ནི་རྒྱལ་པོའི་དཀོར་ནོར་ཡིན། །འགྲོ་ན་ས་སྣ་ལམ་རིང་ཡིན། །བཀལ་ན་མི་ཆགས་གཅིག་ཀྱང་མེད། །འཛེགས་ན་མཐོ་རིས་
གནས་སུ་སླེབས། །རབས་ཆད་ཡས་མཆོག་ཨ་ལ་ལ། །ཁུར་པ་སྟོབས་ཆེན་ཚན་པ་ཆེ། །བསྒྱུར་སྟོབས་ཆེ་ནས་གྱད་ཀྱི་ཤུགས། །རབས་ཆད་འགགས་འདྲེ་ཁུར་བའི་ཡས། །ཕོ་སྲི་མོ་སྲི་ས་སྲི་དང་། །མོ་ངན་སོག་སྡིག་ལྟས་ངན་དང་། །མི་ཁ་བྲ་མཆུ་འགོང་པོ་དང་། །ལོ་ཟླ་ཞག་དང་ཟ་མའི་སྐག །དེ་རྣམས་སྟོབས་ཆེན་དྲེལ་ལ་བཀལ། །ཁུར་ལ་དགྲ་ཡི་ཡུལ་དུ་སོང་། །གདུག་པ་དགྲ་ཡུལ་ནད་ཀྱི་ཁེངས། །ངོམ་གྱི་ཡུལ་དུ་སྐྱས་ཁྱོག་ཅིག །ཆོས་ཆོས་དྲེལ་ནག་དགྲ་ལ་ཆོས། །རྒྱུག་རྒྱུག་དྲེལ་ནག་དགྲ་ལ་རྒྱུགས། །དྲོངས་དྲོངས་དྲེལ་ནག་དགྲ་ལ་དྲོངས། ༈ །ཡས་སྟགས་དེ་སོང་འོག་རོལ་ན། །ཡས་ལ་སྔ་བ་བྲ་བ་ཡིན། །མི་ཁ་བྲུབ་ལ་གར་སྲིད་ན། །བྲ་བ་རྫོངས་འདེབས་མི་ཁ་ཐུབ། །ཁྱོད་ཕ་དེ་རླུང་བོན་མཐུ་བོ་ཆེ། །མ་དེ་ཁམས་གསུམ་མི་ཁའི་བདག །བུ་ཁྱོད་རང་ཁམས་ཀྱི་མི་ཁ་ཡིན། །མཆུ་དོར་དོར་བྱེད་པ་ངམ་ལ་དོར། །ཕ་མ་གཉིས་ཀྱི་མངའ་འོག་ཏུ། །བུ་དུད་འགྲོ་བྲ་བ་སྤུ་རྩ་སྔོ། །ས་ནག་ཡུལ་བཟུང་འཕེལ་སྟོབས་ཆེ། །གྲངས་མེད་མིག་བྱུང་བྲ་བ་འདི། །མི་ཐུབ་མི་འགྱུར་གཅིག་ཀྱང་མེད། །ཁ་
ནས་ཙི་ཙི་ཟེར་བ་དེ། །བསེ་རག་ཐུབ་པའི་དཔའ་སྐད་ཡིན། །ཁ་ནས་ལྡོག་ལྡོག་བྱེད་པ་དེ། །གདུག་པ་ངམ་ལ་བྱེད་པ་ཡིན། །མཇུག་མ་མེད་པས་འགོང་པོ་ཐུབ། །སྤུ་མདོག་སེར་བས་མི་ཁ་ཐུབ། །སྤུ་རྩ་ནག་པས་ཡི་དྭགས་ཐུབ། །རྣ་བ་ནག་པས་འདྲེ་མོ་ཐུབ། །ལྟག་པ་སྐྱ་བས་སྙིང་སྟོང་ཐུབ། །དཔྱིད་གསུམ་ཚེ་བས་གོད་འདྲེ་ཐུབ། །ཐུབ་ཐང་ཡས་ལ་བྲ་བ་ཆེ། །མི་ཁ་བཀར་རོ་བྲ་མཆུ་བཅད། །བརྒྱ་ཡི་མི་ཁ་ལང་བའི་ཡས། །སྟོང་གི་བྲ་མཆུ་བཀར་བའི་ཡས། །བྲ་བས་མི་ཁ་བཀར་བའི་ཡས། །ཁུར་ལ་དགྲ་ཡི་ཡུལ་ལ་སོང་། །སོང་སོང་ཡས་སྟགས་སྐྱེས་རྫོ་ངས་ཤིག །ཆོས་ཆོས་ཡས་སྟགས་ད་དམར་ཆོས། །རྒྱུག་རྒྱུག་ཡས་སྟགས་ད་དམར་རྒྱུགས། །དྲོངས་དྲོངས་ཡས་སྟགས་ད་དམར་དྲོངས། ༈ །ཡས་སྟགས་དེར་སོང་འོག་རོལ་ན། །ཡས་ལ་སྔ་བ་ཐལ་འཇིམ་ཡིན། །ཐལ་འཇིམ་ནག་པོ་མགོ་དགུ་འདི། །ཕ་དེ་གཡུ་ཆར་སྔོན་པོ་ཡིན། །མ་དེ་ས་གཞི་དྲོད་ཀྱི་རླངས་པ་ཡིན། །བུ་དེ་རྩི་ཐོག་ལས་བསྒྲུབ་རྩྭ་ཀྱང་ཡིན། །དུད་འགྲོ་ཕྱུགས་ཀྱི་ཁ་ཟས་ཡིན། །ཟག་པ་བསགས་པས་ས་བོན་བྱས། །དམར་མོ་མེ་ཡི་འོད་ཀྱིས་
བསྲེགས། །ཐལ་བ་བྱ་བའི་རོ་ཅིག་བྱུང་། །བུད་མེད་མཛེས་ལྡན་རྣམས་ཀྱིས་བསྡུས། །གོ་གསུམ་ཐལ་བ་བསྡུས་ཙམ་ན། །འབྲས་དཀར་ཕྱེ་མོ་གཞིབ་པ་འདྲ། །སྐྱེད་གསུམ་དྲེག་པ་བསྡུས་ཙམ་ན། །ཕྱེ་ལ་རྩི་རྐྱང་བཞག་པ་འདྲ། །རྡོ་ལེབ་ཐོག་ཏུ་བཞག་ཙམ་ན། །སྨན་བཟང་མོའི་ལག་ཟས་བཀོད་པ་འདྲ། །མགོ་དགུ་གཟུགས་སུ་བཏོད་ཙམ་ན། །སྲིད་པའི་འདྲེ་དགུའི་གཟུགས་དང་མཚུངས། །བནྡེ་བརྒྱ་བས་སྔགས་བཟློག་མཁས། །ཁྲབ་ཆེན་བརྒྱ་བས་ངོ་དུག་ནག །གཞུ་གཟུང་སྟོང་བས་ཁ་དུག་ཚ། །མི་ཐུབ་མི་འགྱུར་གཅིག་ཀྱང་མེད། །ཤར་ལྷོ་ནུབ་བྱང་དགྲ་སྲི་ཐུབ། །བརྒྱ་སྟོང་ལྷག་པའི་མི་ཁ་ཐུབ། །འགོང་པོའི་ཡས་སུ་ཐལ་འཇིམ་བཟང་། །གཡག་རུ་གཡོན་པ་བཅད་པའི་ཡས། །ཐལ་འཇིམ་ནང་དུ་དགྲ་སྲི་ཐུབ། །ཁུར་ལ་དགྲ་ཡི་ཡུལ་དུ་སོང་། །ཕྱོགས་བཞིའི་དགྲ་ཁ་ཐལ་བས་ཆོད། །གཡག་རུ་ནང་དུ་དགྲ་བོ་བྲུབ། །ཆོས་ཆོས་ཡས་སྟགས་ད་དམར་ཆོས། །རྒྱུག་རྒྱུག་ཡས་སྟགས་དགྲ་ལ་རྒྱུགས། །དྲོངས་དྲངས་ཡས་སྟགས་དགྲ་ལ་དྲོངས། །ད་གཤེགས་ད་སོང་ཐལ་འཇིམ་སོང་། ༈ །
ཡས་སྟགས་དེ་སོང་འོག་རོལ་ན། །ཡས་ལ་སྔ་བ་སྟོང་པ་ཡིན། །ཡས་ཀྱི་ས་རྫ་སྟོང་པ་ཁྱོད། །ཡབ་དེ་སྟོང་པ་སྟོང་མིན་ཡིན། །མ་ཡུམ་སྟོང་པའི་རང་བཞིན་ཡིན། །བུ་ཁྱོད་རང་ས་རྫ་སྟོང་པ་ཡིན། །ཕྱི་སྟོང་ནང་སྟོང་སྟོང་པའི་རྫས། །ལུང་དགུ་བཏག་པས་འདྲེ་དགུ་ཐུབ། །ཁྱིམ་ནང་མི་ཡི་སྙིང་སྟོང་ཐུབ། །སྒོ་ན་ནོར་གྱི་སྙིང་སྟོང་ཐུབ། །སྟོང་པའི་ནང་ཚང་སྟོང་ཡས་བྱས། །བྱང་ཁོག་སྟོང་པ་སྙིང་སྟོང་ཡས། །འབྲུ་ལྐོག་ཟ་ཁོག་སྙིང་སྟོང་ཡས། །འབྲུ་ལྐོག་ཟ་ལྐོག་འགོང་པོའི་ཡས། །ཚྭ་དང་སྒོག་པ་རམ་པ་གསུམ། །བ་། ཚྭ་བུལ་ཐོག་གཡེར་མ་གསུམ། །སྒམ་དྲེག་ཟོམ་དྲེག་སྤྱད་དྲེག་གསུམ། །སྙིང་སྟོང་བསྐལ་བའི་ཡས་ཡིན་པས། །ས་རྫ་སྟོང་པའི་ནགས་ཚང་བྱས། །ཁུར་ལ་འགོང་པོའི་ཡུལ་དུ་སོང་། །སྟོང་པའི་ནང་ཚང་སྟོང་པ་བྱས། །རམ་པའི་ཕ་དེ་དགུང་སྔོན་ཆར། །མ་དེ་ས་གཞི་ངད་ཀྱི་དྲོད། །བུ་ཁྱོད་རང་རམ་པ་ནག་པོ་ཞེས། །དབྱིབས་ནི་དྲག་པོ་ཚྭ་ཚྭའི་དབྱིབས། །བུད་མེད་མཚན་ལྡན་རྣམས་ཀྱིས་བྲབ། །གྲི་མོས་ཡས་སུ་མི་མོས་བསྡུས། །ས་རྫ་སྟོང་པའི་ནགས་ཚང་བྱས། །མི་ནད་ཕྱུགས་ནད་བསྒྱུར་བའི་ཕྱིར། །ཁུར་ལ་
དགྲ་བོའི་ཡུལ་དུ་སོང་། །ཁྱོག་ཅིག་ཡས་སྟགས་སྐྱས་ཁྱོག་ཅིག །ཆོས་ཆོས་ཡས་སྟགས་དགྲ་ལ་ཆོས། །རྒྱུག་རྒྱུག་ཡས་སྟགས་དགྲ་ལ་རྒྱུགས། །དྲོངས་དྲོངས་ཡས་སྟགས་དགྲ་ལ་དྲོངས། ༈ །ཡས་སྟགས་ད་སོང་འོག་རོལ་ན། །ཡས་ལ་སྔ་བ་ཐད་ཐོ་ར་རུས་ཡིན། །དེ་ལྟར་ཡས་སུ་གཏོགས་པ་ནི། །བརྡུང་དགུའི་རྭ་དང་ཕྲག་དགུའི་རྨིག །ཟ་དགུ་གཅན་གཟན་ཐོད་རུས་དང་། །འཕུར་དགུ་བྱ་ཡི་གསོབ་རས་དང་། །སེམས་ཅན་མགོ་རུས་ཁྲག་ཁྲོག་དང་། །ཐང་ཐོད་ར་རུ་སྣ་ཚོགས་དང་། །རི་དྭགས་དུད་འགྲོ་སྣ་ཚོགས་དང་། །རྭ་ཅོ་སྣ་མ་སྣ་ཚོགས་དང་། །ཤིང་ནག་མགར་བ་སོལ་བུ་དང་། །དགྲ་བགེགས་གནོད་བྱེད་ཁྲམ་ལ་ཐོབ། །ཡས་སྟགས་ལྷག་མ་སྣ་ཚོགས་ལ། །བྱ་རིགས་སྤུ་ཐོགས་སྣ་ཚོགས་དང་། །མི་ཡི་གླུད་གོས་ནོར་གྱི་སྤུ། །ཡས་སྟགས་ཆ་མ་ཆོ་དགུ་འདི། །རྒྱུ་སྦྱོར་ཡོན་བདག་གླུད་དུ་འབུལ། །སྐུ་གླུད་རིན་ཚབ་འདི་དག་འབུལ། །དགྲ་བགེགས་ཡུལ་དུ་ད་སོང་ཞིག །མི་གླེང་ཁ་མེད་ལ་ཁའི་ཤ་རུ་ཡིན། །མི་སྡོད་ཁ་མེད་མགྲོན་པོ་ཟུངས་ཟད་ཡིན། །མི་ལང་ཁ་མེད་ལ་ཁའི་རྫི་བོ་ཡིན། །མི་
འཕུར་ཁ་མེད་དེ་ཤིང་ཁའི་བྱིས་ཆུང་ཡིན། །མི་མཁོན་ཁ་མེད་དེ་རབས་ཆད་རྒན་པོ་ཡིན། །མི་ཟ་ཁ་མེད་དེ་མགྲོན་པོ་ཁལ་ཆད་ཡིན། །མི་འགྲོ་ཁ་མེད་དེ་བུ་སྲིང་གོ་མ་ཡིན། །མི་འཕེན་ཁ་མེད་དེ་གཡུལ་ངོའི་མདའ་ཁ་ཡིན། །མི་རྫོངས་ཁ་མེད་དེ་དགོང་ཁའི་ཡས་སྟགས་ཡིན།། ༈ ཀྱཻ། ཡས་སྟགས་ཆ་མ་ཆོ་དགུ་འདི། །ང་གཏོ་མཁན་བདེན་པའི་ཚིག་གིས་རྫོངས། །གསུང་སྙན་རྔ་གཤོང་སྟོབས་ཀྱིས་རྫོངས། །ཏིང་འཛིན་ནུས་པའི་སྟོབས་ཀྱིས་རྫོངས། །སོང་ཞིག་ཡས་སྟགས་ད་སོང་ཞིག ཀྱཻ། རི་དྭགས་རིགས་ཀྱི་ཡས་སྟགས་རྣམས། །རྒྱུག་དང་ཕྱ་ལེ་ད་སོང་ཞིག །གཡུང་དྭགས་རིགས་ཀྱི་ཡས་སྟགས་རྣམས། །རྒྱུག་དང་སྤྲེངས་སེ་ད་སོང་ཞིག །མཆེ་བ་ཅན་གྱི་ཡས་སྟགས་རྣམས། །རྒྱུག་དང་ཞུངས་སེ་ད་སོང་ཞིག །དགྲ་བོའི་ཡུལ་དུ་ད་སོང་ཞིག །ཐད་ཐོད་རྒྱ་རུས་ཡས་སྟགས་རྣམས། །རྫ་ལྟར་ཉི་ལེ་ད་རྒྱུག་ཅིག །ཆོས་ཆོས་ཡས་སྟགས་ད་དམར་ཆོས། །རྒྱུག་རྒྱུག་ཡས་སྟགས་ད་དམར་ཆོས། །སོང་སོང་ཡས་སྟགས་ད་དམར་ཆོས། །ལུང་ཆེན་ལུང་ཆུང་གྲལ་ལ་སོང་། །ལ་ཆེན་ལ་ཆུང་གྱིས་ལ་སོང་། །ཟེར་མི་རླུང་དང་
འགྲོགས་ལ་སོང་། །སྐྱ་རེངས་ལམ་ལ་ཞུགས་ལ་སོང་། །སྔོན་མོའི་ཆུ་ལ་འཛེགས་ལ་སོང་། །སོང་སོང་གཏོ་ཡས་ལམ་བསྟན་ནོ། །གདུག་པ་ངམ་ལ་ཉི་ཟླ་མེད། །དེ་ཡི་ཡུལ་དུ་ལམ་བསྟན་ནོ། །ས་འོག་ཆབ་རོམ་དབྱར་མི་འཇུ། །དེ་ཡི་ཡུལ་དུ་ལམ་བསྟན་ནོ། །ཀི་ཀི་བསྭོ་བསྭོ་ད་ཆོས་ཤིག །འདྲེ་དང་གདོན་གྱི་གབ་སྐུང་ཕུད། །ཡས་འདི་ཕྱིན་ལ་གདོན་ལ་འཇུག །མྱུར་དུ་དགྲ་ཡི་ཡུལ་དུ་ཆོས། །དམ་ཉམས་དགྲ་ལ་རྟགས་ཕྱུངས་ཤིག ༈ །ཡས་སྟགས་ཀྱི་བསྒྱུར་ཆོག །གཏོ་བསྐུལ་འབུམ་སྡེའི་ཏི་ཀ །གཞུང་ཐམས་ཅད་ཀྱིས་ཡས་སྟགས་མུ་ཏིག་ཤེལ་ཕྲེང་ཞེས་བྱ་བ་རྫོགས་སོ།། ༈ །།བྱད་ཐག་དཀར་པོ་རྔ་མོང་ལ་བཀལ་ལ་བརྟག་པ་སྐྱེས་པས་བཟུང་། སྒྲིལ་བུ་ནག་པོ་བུད་མེད་རྣམས་ཀྱིས་བཟུང་ཡས་ཀྱིས་འཕྱོང་རྫོགས་ནས། བྱད་ཐག་དཀར་པོ་དཀྱིལ་འཁོར་རྩར་བཞག་ལ། བྱད་ཐག་ནག་པོ་ཡང་གྲིས་དུམ་བུ་དགུ་བྱས་ལ། གཏོ་ཆས་ནང་དུ་བཞག །འདྲེ་ལྔའམ་ནི་ལོ་བདུད་ཐོག་ཏུ་བསྐྱལ། མངྒ་ལཾ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།