གཡས་རུ་དགྲ་ཆོས་ཀྱི་ཁ་ཚར། མི་ཁ་བྲ་མཆུ་བཀར་བའི་བསྒྱུར་ཆོས་ཟབ་མོ།
གཡས་རུ་དགྲ་ཆོས་ཀྱི་ཁ་ཚར། མི་ཁ་བྲ་མཆུ་བཀར་བའི་བསྒྱུར་ཆོས་ཟབ་མོ་བཞུགས་སོ། །
ན་མོ་མཉྫ་ཤྲཱི་ཡེ། འདི་དགྲ་ཆོས་བྱ་བའི་དུས་སུ་རྣལ་འབྱོར་པ་བདག་ཅག་ཡོན་མཆོད་ལ་རྒྱལ་པོ་ཡུལ་མི་བན་བོན་བུད་མེད་སོགས་ཀྱིས་མི་ཁ་ཆེ་ན་དེ་དག་བཀར་བའི་ཐབས་ལ། ས་སྤྱིན་ལ་བྲ་བའི་གཟུགས་བཅོས་ལ་ཚོན་གྱིས་བསྒྱུར། ཚྭ། ཡོས། རམ་རུག །ཤ་ཁྲག །ལྟེ་ཕྱེ། ཆངས་བུ་སོགས་ཡས་རྫས་མང་དུ་བསྐོར། བྱིན་གྱིས་བརླབས་ལ། རྒྱ་ཆེན་ཤུགས་ལྡན་གྱི་སྔགས་ཉེར་གཅིག་བཟླ། མི་ཁ་བྲ་མཆུ་ཐམས་ཅད་གཏོང་བྱེད་དང་བཅས་འགུགས་གཞུག་དྲག་ཏུ་བྱས་ལ། དང་པོ་དགྲ་བླ་བསྐུལ་བ་ནི། ཀྱཻ། དེ་རིང་སྲིད་པའི་གནམ་གང་ལ། །དམ་ཉམས་དགྲ་ལ་དམག་འདྲེན་ནོ། །ཆོས་སྐྱོང་སྲུང་མ་དགྲ་ལ་ཆོས། །ནམ་མཁའི་ལྷ་དམག་དགྲ་ལ་ཆོས། །
བར་སྣང་གཉན་དམག་དགྲ་ལ་ཆོས། །ས་གཞིའི་ཀླུ་དམག་དགྲ་ལ་ཆོས། །ཡུལ་ལྷ་གཞི་བདག་དགྲ་ལ་ཆོས། །དགྲ་བླ་ཝེར་མ་དགྲ་ལ་ཆོས། །ཁྱེད་རྣམས་དམག་ལ་ཆས་ཙམ་ན། །དམག་དཔོན་རྟ་ལ་ཞོན་པ་དེ། །གནམ་ས་ཀ་གདུང་འཕྲད་པ་འདྲ། །རྨོག་ནི་གངས་ལ་ཉི་ཤར་འདྲ། །ཁྲབ་ནི་རྫ་རྒོད་ཉིལ་བ་འདྲ། །ཕུབ་ནི་འབྲོང་ཆེན་འགྱིང་བ་འདྲ། །དར་འཕྲུ་ལྷོ་སྤྲིན་འཁྲིགས་པ་འདྲ། །སྟག་དོང་མེ་ལྕེ་མཆེད་པ་འདྲ། །གཟིག་ཤུབས་ཐིག་ལེ་བཀྲ་ཡག་འདྲ། །མདའ་ནི་ཐོག་རྒོད་སེར་ཆེན་འདྲ། །གཞུ་མོ་བྲག་ཆེན་བཀང་བ་འདྲ། །རལ་
གྲི་བར་སྣང་གློག་དམར་འདྲ། །ཚྭ་ཚྭ་སྐར་ཕྲན་འཕྲོ་བ་འདྲ། །མཚོན་ཆ་མེ་ལྕེ་མཆེད་པ་འདྲ། །རྟ་རྒྱུག་རླུང་དམར་འཚུབ་པ་འདྲ། །རྒྱུག་རྒྱུག་སྡང་བའི་དགྲ་ལ་རྒྱུགས། །ཡི་དམ་ལྷ་དང་སྲུང་མ་རྣམས། །རང་རང་དམག་རྣམས་དཔའ་སེམས་བསྐྱེད། །མདའ་མདུང་རྣམས་ལ་ངར་ཆུ་བླུད། །བྱང་མ་རྟ་ཡི་རྒྱུག་ལམ་བསྲིངས། །དགྲ་བོའི་མི་རྟ་ཆམ་ལ་ཕོབ། །དགྲ་ཐོག་རྒྱུག་ཅིག་དགྲ་ཤ་ཟོ། །མི་ཁ་བྲ་མཆུ་བཟློག་ཏུ་གསོལ། །ཡས་གླེང་བཤད་པ་ནི། ཀྱཻ། ཡས་སྟགས་དེང་སང་གོང་རོལ་ན། །ཡས་ལ་སྔ་བ་བྲ་བ་ཡིན། །ཁྲ་བ་སྐྱ་བོ་མི་ཁའི་ཡས། །ཕ་དེ་རླུང་བོན་མཐུ་བོ་ཆེ། །མ་དེ་ཁམས་གསུམ་མི་ཁའི་བདག །བུ་ཁྱོད་ཁམས་གསུམ་བྲ་བ་ཡིན། །མིང་པོ་སྤྲེལ་ལ་སྲིང་མོ་སྟག །མིང་པོ་ལམ་གྱི་གོང་ན་གནས། །སྲིང་མོ་ལམ་གྱི་འོག་ན་གནས། །བྲ་བ་འགྲོ་བའི་མི་ཁ་ལྡང་། །དེ་ཡོད་ན་མི་དགའ་མེད་ན་དགའ། །གང་ན་མི་དགའ་སྟོང་ལ་དགའ། །བཟང་ན་མི་དགའ་ངན་ན་དགའ། །ཕྱུག་ལ་མི་དགའ་དབུལ་ལ་དགའ། །དེ་འདྲའི་མི་ཁ་སྤུན་དགུ་དེ། །རྒྱ་ཡི་མི་ཁ་ཇ་དང་བསྡོང་། །འཇང་གི་མི་ཁ་དར་དང་བསྡོང་། །ཧོར་གྱི་མི་ཁ་མདའ་
དང་བསྡོང་། །བོད་ཀྱི་མི་ཁ་འབྲུ་དང་བསྡོང་། །ལི་ཡི་མི་ཁ་གསེར་དང་བསྡོང་། །མོན་གྱི་མི་ཁ་གཟི་དང་བསྡོང་། །བལ་པོའི་མི་ཁ་རམ་དང་བསྡོང་། །ཀོང་པོའི་མི་ཁ་ཚོས་དང་བསྡོང་། །མདོ་སྨད་མི་ཁ་དངུལ་དང་བསྡོང་། །དེ་ལྟར་མི་ཁ་སྤུན་དགུ་དེ། །བྲ་བ་རྣ་དམར་རྟ་རུ་ཞོན། །སྲེ་མོ་དམར་མོ་རོལ་དུ་ཁྲིད། །ཤང་ཤང་བྲ་མཆུ་ལས་ལ་འགྱེད། །ཡུལ་མི་འཁྲུག་འདྲེ་མི་ཁས་བྱེད། །ཕུ་ནུ་འཁྲུག་འདྲེ་མི་ཁས་བྱེད། །མི་སྤུན་འཁྲུག་འདྲེ་མི་ཁས་བྱེད། །ཤག་རོགས་བྱེར་འདྲེ་མི་ཁས་བྱེད། །བཟའ་ཚང་འཁྲུག་འདྲེ་མི་ཁས་བྱེད། །མེད་ཁ་ཁ་བསྒོ་མི་ཁས་བྱེད། །མཐོ་དགའ་དམའ་དགའ་མི་ཁས་བྱེད། །དགྲ་རྐུན་ཁ་མཆུ་མི་ཁས་བྱེད། །གོད་ཁ་གྱོད་བྱུར་མི་ཁས་བྱེད། །དེ་རྣམས་བཀར་བར་བྱ་བའི་ཕྱིར། །རིན་ཆེན་ས་ཡི་བྲ་གཟུགས་དང་། །ཚྭ་གཡེར་རམ་རུག་བཙོད་མཚུར་དང་། །ལྕམ་པ་བྲ་བོ་ཡོས་སྙིག་དང་། །ཆངས་བུ་ཁ་འཕྲོ་འཐུང་ལྷག་དང་། །བཀལ་བར་ཡས་སྟགས་བྲ་བར་སྦྱིན། །སེན་མོ་ཟངས་ཀྱི་སྣ་དམར་མ། །བརྒྱ་འགྲོའི་མི་ལ་ཁྲམ་གཏམ་བྱེད། །དབུས་ཀྱི་མི་ལ་ཆོས་གཏམ་བྱེད། །གླ་མི་བཞིན་དུ་
མདུར་རྒྱུག་བྱེད། །སྤྱང་མོ་བཞིན་དུ་ངོ་ཉལ་བྱེད། །བུ་ཆུང་བཞིན་དུ་མིག་ཉལ་བྱེད། །རི་བོང་བཞིན་དུ་རྦ་ཉལ་བྱེད། །སྒོམ་ཆེན་མིན་ཏེ་ཀློང་ལྟས་བྱེད། །བག་མ་བཞིན་དུ་གཟུར་འདུག་བྱེད། །མི་ཁ་སུས་ཐུབ་ཟེར་ཙམ་ན། །ཁྲ་བོ་སྐྱ་བོས་ཐུབ་བོ་ཟེར། །གནམ་ལ་རི་བོ་བྱེད་མི་དེ། །བྲ་བ་མིན་ནི་གང་དེ་ཡིན། །ས་ལ་ར་བ་བྱེད་མི་དེ། །བྲ་བ་མིན་ནི་གང་དེ་ཡིན། །མཆུ་དམོད་མོ་བྱེད་པར་དགྲ་ལ་དམོད། །ཕ་མ་གཉིས་ཀྱི་མངའ་འོག་ན། །དུད་འགྲོ་བྲ་བ་སྤུན་དགུ་སྲིད། །ས་ནག་ཡུལ་བཟུང་འཕེལ་སྟོབས་ཆེ། །མི་ཐུབ་མི་འགྱུར་གཅིག་ཀྱང་མེད། །ལྟག་པ་སྐྱ་བོས་འགོང་པོ་ཐུབ། །ཙ་ཙ་ཙི་ཙིས་བསེ་རག་ཐུབ། །གཞུ་གུ་མེད་པས་མི་ཁ་ཐུབ། །སྤུ་འགོ་སེར་བས་རྒྱལ་པོ་ཐུབ། །སྤུ་སྐེད་དཀར་བས་དར་སྲི་ཐུབ། །སྤུ་རྩ་ནག་པས་འདྲེ་མོ་ཐུབ། །དཔྱིད་གསུམ་ཚོ་བས་གོད་འདྲེ་ཐུབ། །དགུན་གསུམ་རྫུད་པས་དབུལ་སྲིད་ཐུབ། །མི་ཁ་བཀར་རོ་བྲ་མཆུ་བཅད། །བརྒྱ་ཡི་མི་ཁ་བཀར་བར་བྱ། །སྟོང་གི་བྲ་མཆུ་བཀར་བར་བྱ། །བདག་ཅག་ཡོན་མཆོད་འཁོར་བཅས་ལ། །གནོད་བྱེད་མི་ཁ་བྲ་མཆུ་རྣམས། །བཀར་རོ་བྲ་བ་དེ་
ཡིས་བཀར། །རྒྱུག་དང་བྲེངས་སེ་ད་སོང་ཞིག །འདུར་དང་ཞུངས་སེ་ད་སོང་ཞིག །སྡང་བྱེད་དགྲ་བོའི་སྟེང་དུ་སོང་། །མྱུར་བ་ཉིད་དུ་ད་སོང་ཞིག །མི་ཁ་བྲ་མཆུ་ཁྲིད་ལ་སོང་། །བསེ་རག་ལྟོང་འགོང་ཁྲིད་ལ་སོང་། །གོད་ཁ་གོད་སྲི་ཁྲིད་ལ་སོང་། །དགྲ་སྣ་རྐུན་སྣ་ཁྲིད་ལ་སོང་། །ནད་སྣ་ཡམས་སྣ་ཁྲིད་ལ་སོང་། །མི་ནད་ཕྱུགས་ནད་ཁྲིད་ལ་སོང་། །གཞན་ལ་གནོད་ཅིང་འཚེ་བ་རྣམས། །བྲ་བ་ཁྱོད་ཀྱིས་ཁུར་ལ་སོང་། །སྡང་བྱེད་དགྲ་ལ་མི་ཁ་ཐོངས། །གཏན་གྱི་ཕ་ཡུལ་དགྲ་ལ་གྱིས། །དགྲ་བོའི་མི་ནོར་ཕུང་བར་གྱིས། །རྣལ་འབྱོར་བདག་ཅག་ཡོན་བདག་ལ། །ཕྱིན་ཆད་གནོད་པ་མ་བྱེད་ཅིག །དགྲ་ལ་རྦད་དོ་ཆོས་ཆོས་རེམ། །གནོད་བྱེད་འབྱུང་པོ་ཨུ་ཙ་ཏ་ཡ་ས་ཕཊ། ཅེས་དང་སྲུང་མ་དང་སྡེ་བརྒྱད་ཀྱི་སྔགས་མཐར། ཨོཾ་མི་ཁ་ཧུར་ཧུཾ་རྦད་རྦད་དྲིལ་དྲིལ་ཐཾ་ཐཾ་ཤིག་ཤིག་བྷྱོ་བྷྱོ་ཟློག་ཟློག་སྒྱུར་སྒྱུར། བྱུར་མི་ཁ་བྲ་མཆུ་ཐམས་ཅད་བློ་ཟློག་ཅིག །སྦྱར་བ་བཟླ་ཞིང་བསྐྲད་དམིགས་གནད་ནས་བཟུང་། གོང་གི་བྲ་མཆུ་བཅད་ཟེར་བའི་དུས་སུ་མཆུ་བཅད་ལ་ཡས་ནང་དུ་འཕང་། འདྲེ་ལྔ་གནས་ཕྱོགས་སམ། དགྲ་ཕྱོགས་སུ་ཡས་བཏང་ངོ་། །དེ་ལྟ་བུ་ཡང་ཡང་བྱས་ན་མི་ཁ་བྲ་མཆུ་ཐམས་ཅད་
བཟློག་པ་ལ་འདི་ལས་ཟབ་པ་མེད་དོ། །དགྲ་ཆོས་དུས་སུ་ཤ་རུ་ཁྲམ་འདེབས་གོང་དུ་སྦྱར། གཟུགས་ཡས་ནང་དུ་འཕོང་། རྗེས་སྲུང་འཁོར་བསྒོམ་མོ། །ཞེས་པ་འདི་ནི་མི་ཁ་བཟློག་པ་ཀུན་ལ་མཁོ་ཆེ་བ་དང་། ཁྱད་པར་དུ་ཡང་བཟང་ངན་མི་ཁ་དགྲ་རྐུན་གྱོད་བྱུར་མང་བ་མི་ཁ་ཡིན་པ་དེ་བཀར་བ་དང་། དགྲ་ཆོས་ཀྱི་སྐབས་སུ་མི་ཁ་བྲ་མཆུ་ལྡང་ཆེ་བ་དེ་དག་བཀར་བའི་ཕྱིར། གཡག་རུ་དགྲ་ཆོས་ཀྱི་ཁ་ཚར་དུ། སྔགས་འཆང་མགོན་ནག་གིས་བསྐུལ་ངོར། ཨ་རཱ་གས་བསྒྲིགས་པའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།