དགྲ་སྣ་བསྒྱུར་བའི་གླང་ཆེན་སྣ་བསྒྱུར།
དགྲ་སྣ་བསྒྱུར་བའི་གླང་ཆེན་སྣ་བསྒྱུར་བཞུགས་སོ། །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །གླང་ཆེན་སྣ་བསྒྱུར་གྱི་བཅས་ལ། ཕུང་ཤུལ་ས་དང་། ས་སྣ་དང་། ཁྲམ་འདུ་ས་དང་། དྲག་པོའི་ས་ལ་གཞི་བྱས་ནས། ས་བྲེ་གང་ལས་གླང་ཆེན་བཅས་ལ། རེ་བའི་སྟན་དང་ས་སྤྱིན་གྱི་སྒ་བྱ། རེ་བའི་སྣོད་དུ་ཚྭ་གཡེར་རམ་རུག །མི་ཁའི་ཡས་དང་། མི་ནོར་གྱི་གླུད་སྣ་ཚོགས་བཀལ་ལོ། །ཡང་དགྲ་སྣ་བསྒྱུར་བ་ཡིན་ན། དམག་དཔོན་གོ་མཚོན་ཐོགས་པ་བསྐྱོན། མཚོན་ཆ་སྣ་ཚོགས་བཟོས་ལ་བཙུགས། གོ་གྱོན་མཚོན་ཐོགས་པའི་དམག་མི་མང་པོས་བསྐོར་བར་བྱའོ། །རང་ཉིད་ཕྱག་ན་རྡོ་རྗེའམ། ཡི་དམ་གང་ཡིན་བསྒོམ་ལ་འདི་སྐད་དོ།། ཀྱཻ། བསྐལ་པ་གྲངས་མེད་སྔོན་རོལ་དུ། །ས་བླའི་རྒྱལ་པོ་སྨན་ཏེ་བྱ་བ་དང་། །ཚངས་པ་ཆེན་པོ་བྱ་བ་ལ། །རྨོང་འདྲེ་ཆེན་པོ་གདོན་དུ་ཆེ། །རྨོང་འདྲེ་བཟློག་པའི་དོན་ཆེད་དུ། །གསང་བདག་ཕྱག་ན་རྡོ་རྗེ་ལ། །འདི་སྐད་ཅེས་ནི་ཞུས་པ་ལ། ཀྱཻ། གསང་བདག་རྡོ་རྗེ་འཛིན་པ་ལགས། །བདག་ཚངས་པ་ཆེན་པོ་ལ། །རྨོང་འདྲེ་ཆེན་པོ་གདོན་དུ་ཆེ། །དེ་ལ་བཟློག་ཐབས་ཇི་ལྟར་ལགས། །དེ་སྐད་ཅེས་ནི་ཞུས་པ་ལ། །ཕྱག་ན་རྡོ་རྗེས་བཀའ་སྩལ་པ། །ལེགས་སོ་ལེགས་སོ་ཚངས་པའི་ལྷ། །ཁྱེད་ཀྱིས་ཞུས་པ་ཤིན་ཏུ་ལེགས། །
བདག་གིས་ཁྱེད་ལ་རབ་ཏུ་བཤད། །ལུས་བཏུད་སེམས་ཀྱིས་རབ་ཏུ་ཉོན། །དེ་ལ་བཟློག་ཐབས་འདི་ལྟར་བྱ། །དྲག་པོའི་ས་ལ་གཞི་བླངས་ཏེ། །ས་གླང་རྫུ་འཕྲུལ་སྟོབས་ཆེན་གྱིས། །དེ་ཡིས་མི་བཟློག་གཅིག་ཀྱང་མེད། །ས་གླང་སྟོབས་ཆེན་སྣ་བསྒྱུར་ན། །གདོན་རིགས་སྟོང་ཕྲག་བརྒྱད་ཅུ་ཟློག །དགྲ་སྣ་གྱོད་སྣ་ཐམས་ཅད་ཟློག །མི་ཁ་བྲ་མཚུ་ཐམས་ཅད་དང་། །རྐུན་སྣ་ཇག་སྣ་ཐམས་ཅད་ཟློག །དགྲ་སྣ་བསྒྱུར་བ་གར་སྲིད་ན། །ཁྲོ་བོ་ཆེན་པོ་སྟོབས་པོ་ཆེ། །རྫུ་འཕྲུལ་ལྷ་མོ་འབར་མ་གཉིས། །དེ་གཉིས་རྫུ་འཕྲུལ་བསྡེབས་པ་ལ། །གླང་དཀར་སྟོབས་ལྟར་བྱ་བ་ལ། །ཁྲོ་བོ་བཅུ་ཡིས་དབང་བསྐུར་བས། །སྣ་ལ་གནམ་ལྕགས་མདུང་རྩེ་བཏགས། །རྣ་བ་དེ་ནི་གཡས་གཡོན་ན། །ལྷ་དམག་བརྒྱ་བརྒྱ་མཁར་དུ་བརྩེགས། །རྩིབ་མ་དེ་ནི་གཡས་གཡོན་ན། །གོ་ཕུབ་བརྩེགས་པའི་མདུང་ཆོ་བརྩེགས། །མཇུག་མ་དེ་ཡི་རྩེ་མོ་ན། །གནམ་ལྕགས་རལ་གྲི་འབར་བ་བཏགས། །ལྷ་དམག་ཀུ་སྒྲ་དི་རི་རི། །གླང་ཆེན་སྤྱོད་སྒྲ་འུ་རུ་རུ། །རོལ་མོ་བྲོ་གར་ཁྲབས་སེ་ཁྲབ། །འདྲེ་སྲིན་གཡུལ་ངོ་ཐུར་དུ་ཟློག །འདྲེ་སྲིན་ཕོ་བརྒྱ་མནན་ཏེ་
བསད། །འདྲེ་སྲིན་མོ་བརྒྱ་བཀུག་སྟེ་བསད། །སྲིན་ཟངས་ཟ་སྐྱེ་ཕུང་པོ་ལ། །ཁྲོ་བོ་བཅུ་ཡི་བྲོ་བརྡུངས་པས། །འདྲེ་བདུད་གཡུལ་ངོ་བཟློག་པའི་གླང་། མཐུ་སྟོབས་རྫུ་འཕྲུལ་ཆེ་བའི་གླང་། །ནམ་མཁའ་ཕྱོགས་བཞི་གང་བའི་གླང་། །བཞི་བརྒྱ་རྩ་བཞི་ཚོགས་པའི་གླང་། །མཐུ་སྟོབས་རྫུ་འཕྲུལ་བསམ་མི་ཁྱབ། །ལ་ལས་ཁ་རླངས་དམར་པོ་གཏོང་། །ལ་ལས་ཁ་རླངས་སྨུག་པོ་གཏོང་། །ནད་ཀྱི་ན་བུན་སྤྲིན་ལྟར་གཏིབས། །ཆོ་འཕྲུལ་རྣམ་པ་སྣ་ཚོགས་འགྱེད། །བདུད་དང་སྲིན་པོའི་འཁོར་ཚོགས་བཅོམ། །ལུས་ལ་བསྐལ་པའི་མེ་ཆེན་འབར། །འདྲེ་སྲིན་གཡུལ་ཁ་ཐམས་ཅད་བསྲེགས། །ལྕགས་ཀྱི་རྨིག་བཞི་ས་ལ་བསྒྲད། །གནམ་ས་ཐམས་ཅད་འཁྲུག་པར་བྱེད། །སྤྱན་རྩ་དམར་པོ་གློག་ལྟར་འཁྱུག །ཡི་དྭགས་གདོན་ཚོགས་ཐམས་ཅད་བརྒྱལ། །དྲག་པོའི་ལྕགས་རལ་བསིགས་པ་ཡི། །གདུག་པའི་ཚྭ་ཚྭས་བར་སྣང་གང་། །གདུག་པའི་རྫུ་འཕྲུལ་གློག་བས་མྱུར། །བར་སྣང་ཁམས་ཀུན་གློག་གིས་གང་། །ཡོན་ཏན་རྨད་བྱུང་ཆེ་བའི་གླང་། །དགྲ་སྣ་གྱོད་སྣ་ཐམས་ཅད་དང་། །རྐུན་སྣ་ཇག་སྣ་དམག་སྣ་དང་། །ཐམས་ཅད་མ་
ལུས་བསྒྱུར་དུ་གསོལ། །འབྱུང་བ་ལྔ་ལས་གྲུབ་པ་ཡི། །ས་གླང་སྟོབས་ཆེན་རྫུ་འཕྲུལ་ཅན། །རྣམ་རྟོག་གློ་བུར་གདོན་རྣམས་ནི། །ཐམས་ཅད་མ་ལུས་བསྒྱུར་དུ་གསོལ། །དཔའ་རྩལ་ཆེ་བའི་གླང་པོ་ཆེ། །ས་གླང་སྟོབས་ཆེན་འདི་ཡིས་ནི། །ཐམས་ཅད་མི་བཟློག་གང་ཡང་མེད། །དེ་རིང་རྒྱུ་སྦྱོར་ཡོན་བདག་གི །མི་ནད་ཕྱུགས་ནད་ཡམས་ནད་དང་། །དགྲ་སྣ་གྱོད་སྣ་ཐན་སྣ་ཀུན། །སྟོབས་ཆེན་གླང་པོ་འདི་ལ་བཀལ། །སྟོབས་ལྡན་གླང་པོ་ཁྱོད་ཀྱིས་སྒྱུར། །བདུད་གླང་སྟོབས་དང་ལྡན་པའི་གླང་། །རིག་འཛིན་སྔགས་འཆང་བདག་ཅག་གི །སྔགས་དང་ཕྱག་རྒྱའི་བདེན་པ་ཡིས། །ཁྲོ་བོ་བཅུ་ཡི་མཐུ་སྟོབས་དང་། །ཕྱག་ན་རྡོ་རྗེས་བྱིན་རླབས་ཀྱིས། །མི་མཐུན་རྐྱེན་དང་བར་ཆད་དང་། །དགྲ་གྱོད་འཁོན་གསུམ་མི་ཁ་ཀུན། །བདུད་གླང་ནག་པོ་འདི་ལ་བཀལ། །བདུད་གླང་སྟོབས་དང་ལྡན་པའི་གླང་། །ཤར་ཕྱོགས་དྲི་ཟའི་གདུག་པ་སྒྱུར། །ལྷོ་ཕྱོགས་གཤིན་རྗེའི་གདུག་པ་སྒྱུར། །ནུབ་ཕྱོགས་ཀླུ་ཡི་གདུག་པ་སྒྱུར། །བྱང་ཕྱོགས་གནོད་སྦྱིན་གདུག་པ་སྒྱུར། །ཤར་ལྷོ་མེ་ལྷའི་གདུག་པ་སྒྱུར། །ལྷོ་ནུབ་སྲིན་པོའི་གདུག་པ་སྒྱུར། །ནུབ་བྱང་རླུང་ལྷའི་
གདུག་པ་སྒྱུར། །བྱང་ཤར་དབང་ལྡན་གདུག་པ་སྒྱུར། །སྟེང་ཕྱོགས་ལྷ་ཡི་གདུག་པ་སྒྱུར། །འོག་ཕྱོགས་ས་བདག་གདུག་པ་སྒྱུར། །འདྲེ་སྲིན་གཡུལ་ངོ་ཐུར་དུ་སྒྱུར། །དེ་རིང་རྒྱུ་སྦྱོར་ཡོན་བདག་གི །དགྲ་སྣ་ཐན་སྣ་གྱོད་སྣ་དང་། །བྱུར་དང་མི་ཁ་བྲ་མཆུ་ཀུན། །ས་གླང་སྟོབས་ཆེན་འདི་ལ་བཀལ། །དགྲ་བོའི་ཡུལ་དུ་བསྒྱུར་ཏེ་གཏོང་། །ཉི་མ་ཕྱོགས་བཞི་མཚམས་བརྒྱད་ཀྱི། །དགྲ་གྱོད་འཁོན་གསུམ་ཐམས་ཅད་སྒྱུར། །སྔ་དགྲ་ལག་གིས་བརྡལ་བ་སྒྱུར། །ཕྱི་དགྲ་ཡིད་ལ་སེམས་པ་སྒྱུར། །ད་དགྲ་ཐད་དུ་ལང་བ་སྒྱུར། །ངོ་ལ་གདོང་ཐུག་བྱེད་པ་སྒྱུར། །ལྐོག་ན་འབུག་བཞིན་འབུག་པ་སྒྱུར། །མ་ཉེས་ཁ་ཡོག་བཏང་བ་སྒྱུར། །དགྲ་སྣ་ཆུ་ལྟར་འབྲུབ་པ་སྒྱུར། །དགྲ་སྣ་རླུང་ལྟར་འཚུབ་པ་སྒྱུར། །དགྲ་སྣ་བལ་ལྟར་གཡེང་བ་སྒྱུར། །བརྒྱ་ཡི་མི་ཁ་ཟུག་པ་སྒྱུར། །སྟོང་གི་བྲ་མཆུ་སྡིག་པ་སྒྱུར། །དགྲ་སྣ་མེ་ལྟར་འབར་བ་སྒྱུར། །ཇག་པས་རྟ་ཁ་བསིག་པ་སྒྱུར། །རྐུན་བུས་ཤ་ཆིངས་ཁུར་བ་སྒྱུར། །དགྲ་ཆེན་བདུད་དུ་ལངས་བ་སྒྱུར། །དམག་སྣ་ཇག་སྣ་སྟོན་པ་སྒྱུར། །དགྲ་སྣ་རྐུན་སྣ་སྟོན་པ་སྒྱུར། །ཕྱི་ཡི་ཕྱི་དགྲ་ལངས་བ་སྒྱུར། །
ནང་ནས་ནང་འཁྲུག་ལངས་བ་སྒྱུར། །ཟུར་ནས་གཅོད་དགོས་ཟེར་བ་སྒྱུར། །གསོད་ཤོམ་རྐུ་ཤོམ་བྱེད་པ་སྒྱུར། །རྐུ་ཤོམ་འཕྲོག་ཤོམ་བྱེད་པ་སྒྱུར། །ཕྱོགས་བཞིའི་དགྲ་སྲི་ལངས་བ་སྒྱུར། །མཚམས་བཞིའི་དགྲ་སྲི་ལངས་བ་སྒྱུར། །གཟུགས་ཅན་མི་ཡི་དགྲ་ལངས་སྒྱུར། །གཟུགས་མེད་ལྷ་འདྲེའི་དགྲ་ལངས་སྒྱུར། །ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུྃ་སྤོ་ཊ་སྤྲོ་ཊ་ཧཾ་ཕཊ། བྱུར་དང་མི་ཁ་དགྲ་གྱོད་ཇག་རྐུན་ཐམས་ཅད་བྷྱོ་བྷྱོ་ཟློག་ཟློག །ཅེས་གླང་ཆེན་སྣ་བསྒྱུར་ནས་དགྲ་སྣ་ཐམས་ཅད་བསྒྱུར་བར་བསམ་མོ། །དེ་ལྟར་དགྲ་སྣའི་བསྒྱུར་ཆོས་འདི་ནི། གནམ་ཆོས་དགྲ་ཆོས་ཀྱི་སྐག་ཟློག་བསྒྱུར་ནས་ཨ་རཱ་གས་བྲིས་པའོ། །མངྒ་ལཾ། །དཔེའུ་རིས་ཀྱི་ཐོ་ཚེ། ཕུང་ཤུལ། ས་སྣ་མང་པོ། ཁྲོམ་འདུ་ས། ས་ནག་རྣམས་བསྲེས་པའི་ཁམ་ས་བྲེ་གང་ལ་གླང་ཆེན་བཟོ། རེ་བའི་སྟན། ས་སྤྱིན་གྱི་སྒྲ་གཏད། དེ་སྟེང་དམག་དཔོན་ཁྲབ་རྨོག །མདའ་གཞུ། རལ་གྲི། མདུང་། མེ་མདའ། ཕུབ་རྣམས་ཐོགས་པའི་སྐྱེས་བུ་བསྐྱོན། རེ་བའི་སྣོད་རྣམས་སུ། ཚྭ། གཡེར། རམ་རུག །ཤ་ཁྲག །ལྟེ་ཕྱེ། མིའི་སྐྲ་སེན་གོས་དུམ། ནོར་གྱི་སྡོང་ཧྲུལ། སྤུ་ཤད་རྣམས་བླུགས་ལ་སྔ་ཤད་ཕྱི་ཤད་ལ་བཀལ་ལོ། །དེ་ལ་མཚོན་ཆ་སྣ་ཚོགས་བཙུགས། དེ་ཉིད་ལ་མི་མང་པོ་གོ་གྱོན་མཚོན་ཐོགས་པས་བསྐོར་བ་བཟོའོ། །གླང་ཆེན་སྣ་བསྒྱུར་གྱི་དཔེའུ་རིས་ཀྱི་ཐོ་ཚེ་ཨྠྀི། དགེའོ།།