གཡག་རུ་དགྲ་ཆོས་ཀྱི་ཁ་ཚར་ལས། དགྲ་བླའི་གནང་བགོས་རྟེན་འབྲེལ་ལེགས་ཚོགས་ངོ་མཚར་ཆེ་བའི་དགའ་སྟོན་གྱི་ཨུ་པ་དེ་ཤ
གཡག་རུ་དགྲ་ཆོས་ཀྱི་ཁ་ཚར་ལས། དགྲ་བླའི་གནང་བགོས་རྟེན་འབྲེལ་ལེགས་ཚོགས་ངོ་མཚར་ཆེ་བའི་དགའ་སྟོན་གྱི་ཨུ་པ་དེ་ཤ་བཞུགས་སོ།།
དེ་ནས་གཟུགས་འགྲོས་རྣམས་ཚིག་རིས་ལྟར་བགོ་བའི་ཚུལ་བྱས་ལ། ལྷ་མི་ཐམས་ཅད་ཀྱིས་གནང་བགོས་པར་བསམས་ལ། ཀྱཻ། སྔོན་གྱི་བསྐལ་པའི་དང་པོ་ལ། །གནང་བགོས་བྱེད་པ་གར་སྲིད་ན། །སྲིད་པ་ཡེ་སྨོན་རྒྱལ་པོ་དེས། །ངམ་གྱི་ཡུལ་དུ་དམག་དྲངས་པས། །ངམ་རྗེ་རྩོལ་པོའི་ཆོས་བློན་ནས། །ཝེར་མ་བུ་ཆེན་གར་མཁན་དེས། །ཡུལ་གསེར་གླིང་གོང་ནས་གནང་བགོས་བྱས། །གནང་བགོས་བྱེད་པ་དེ་ནས་སྲིད། །བསྐལ་པ་དེ་ཡི་འོག་ཤེད་ན། །གནང་བགོས་བྱ་བ་གར་སྲིད་ན། །ཐུགས་ཀར་བུ་དགུ་ཕ་བཅུ་དེས། །ཐུགས་དམར་བུ་དགུ་ཆམ་ལ་ཕབ། །དཀར་ལ་
ཁས་དྲག་དང་པོ་དེས། །ཡུལ་དཀར་མོ་གླིང་ནས་གནང་བགོས་བྱས། །གནང་བགོས་བྱེད་པ་དེ་ནས་སྲིད། །བསྐལ་པ་དེ་ཡི་འོག་མ་ལ། །གནང་བགོས་བྱེད་པ་གར་སྲིད་ན། །ལྷ་ཚ་བུ་དགུ་བྱ་བ་དེས། །སྲིན་ཚ་བུ་དགུ་ཆམ་ལ་ཕབ། །དཔའ་ཁས་དྲག་ནོར་བུ་དབང་རྒྱལ་དེས། །ཡུལ་གཡུ་འོད་གོང་ནས་གནང་བགོས་བྱས། །གནང་བགོས་བྱེད་པ་དེ་ནས་སྲིད། །བསྐལ་པ་དེ་ཡི་ཐ་མ་ལ། །གནང་བགོས་བྱེད་པ་གར་སྲིད་ན། །བོད་མིའུ་གདུང་དྲུག་བྱ་བ་དེས། །གཉེན་བདུད་གཉིས་ཀྱི་ཆོས་ལོན་ནས། །གདོང་གི་རྒྱལ་བུ་མཐིང་གེ་དེས། །བོད་
རུ་བཞིའི་ཡུལ་དུ་གནང་བགོས་བྱས། །གནང་བགོས་བྱེད་པ་དེ་ནས་སྲིད། །སྲིད་པ་དེ་ལ་དཔེ་བླང་ནས། །བདག་ལྷ་མི་འཁོར་དང་བཅས་པ་ཡི། །དེ་རིང་སྐྱིད་པའི་ཉི་མ་ཡི། །དགྲ་སོད་གནང་བགོས་གྲོ་མ་ཡག །ཆོས་ལོན་བསམ་པའི་དོན་དང་ལྡན། །དགྲ་བླའི་གནང་བགོས་བྱེད་རེ་རན། །དཔའ་ཁས་གྲགས་བསེ་རུ་ར་གཅིག་དང་། །མགྱོགས་བྱེད་རླུང་གི་གཤོག་ཆེན་གཉིས། །ད་ནི་དགྲ་བླའི་གནང་བགོས་གྱིས། །དམ་ཉམས་དགྲ་བོ་བསད་པ་ཡི། །ཁྲབ་རྨོག་ཉ་མོ་སྟོང་རྫོང་དེ། །རྒྱལ་བུ་མཐིང་གེས་གནང་སྐལ་གྱིས། །བསེ་ཕུབ་འཁོར་མོ་གླིང་ཆེན་དེ། །ཡབ་ལྷ་བརྡལ་དྲུག་གནང་སྐལ་གྱིས། །སྟག་རས་གཟིག་ཤུབས་འཁོར་གསུམ་དེ། །ཡེ་སྨོན་རྒྱལ་པོའི་གནང་སྐལ་གྱིས། །འོག་རྟ་སྒ་སྲབ་བལ་སྟན་བཅས། །ཡེ་བཤེས་དབང་རྫོགས་གནང་སྐལ་གྱིས། །དམག་རྔ་སྟོང་གསུམ་སྒྲ་སྒྲོག་དེ། །ཐུགས་ཀར་སློབ་དཔོན་གནང་སྐལ་གྱིས། །དམག་དར་ཁྲ་མོ་ལིང་དགུ་དེ། །མཐུ་ཆེན་ཝེར་མའི་གནང་སྐལ་གྱིས། །དམག་དུང་དཀར་མོ་རྒྱང་གྲགས་དེ། །ཐུགས་ཀར་བུ་དགུའི་གནང་སྐལ་གྱིས། །དམག་གླིང་སྙན་པའི་རྒྱ་གླིང་
དེ། །ལྷ་ཚ་བུ་དགུའི་གནང་སྐལ་གྱིས། །དམག་གི་རྔ་ཐུག་དར་མདུང་དེ། །མཐུ་ཆེན་ཝེར་མའི་གནང་སྐལ་གྱིས། །འགྲོས་མཁན་བཅུ་གསུམ་འོག་རྟ་དེ། །མགྲོན་ཡག་བཅུ་གསུམ་གནང་སྐལ་གྱིས། །དགྲ་སོ་ཕ་མི་དགུའི་ཀ་ཆ་དེ། །བྱོས་དེ་ཐུབ་སྤུན་དགུའི་གནང་སྐལ་གྱིས། །གནང་མ་ཐོབ་པ་ལ་གཅིག་ཀྱང་མེད། །གསེར་ཉི་མ་ཙམ་ལ་བཅུ་གསུམ་དང་། །ཤེལ་སྐར་མ་ཙམ་ལ་བཅུ་གསུམ་དང་། །དངུལ་ཟླ་བ་ཙམ་ལ་བཅུ་གསུམ་དང་། །གཡུ་ཕུག་རོན་ཙམ་ལ་བཅུ་གསུམ་དང་། །དུང་ལུ་གུ་ཙམ་ལ་བཅུ་གསུམ་དང་། །དར་ཐང་ཆེན་ཙམ་ལ་བཅུ་གསུམ་དང་། །སྡེ་གཡས་རུ་སྟོང་དང་ཉིས་བརྒྱ་དང་། །གཡོན་རུ་སྟོང་དང་ཉིས་བརྒྱ་དང་། །སྡེ་དབུས་རུ་སྟོང་དང་སུམ་བརྒྱ་དང་། །བུ་ཕོ་རྒྱུད་རྟ་ནོར་ལུག་དང་བཅས། །མོ་རྒྱུད་ཁང་ཞིང་བང་མཛོད་བཅས། །གདུང་དྲུག་ལྷ་མིའི་དགྲ་བླ་ཡིས། །མ་བགོས་སྤྱི་ཡི་གནང་སྐལ་གྱིས། །རྟ་ཁྱུ་ཆེན་ཉི་ཤུ་རྩ་ལྔ་དང་། །དྲེའུ་ཁྱུ་ཆེན་ལྔ་གསུམ་བཅོ་ལྔ་དང་། །མཛོ་ཁྱུ་ཆེན་དྲུག་གསུམ་བཅོ་བརྒྱད་དང་། །ནོར་ཁྱུ་ཆེན་སུམ་ཅུ་སོ་ལྔ་དང་། །ལུག་ཁྱུ་ཆེན་བཞི་བཅུ་ཞེ་ལྔ་
དང་། །ར་ཚེ་རེ་བཞི་བརྒྱ་རྩ་བཞི་དང་། །བ་བོང་བུ་ཉིས་བརྒྱ་ལྔ་བཅུ་དང་། །རྔ་མོང་མ་ཧེ་སུམ་བརྒྱ་ཐམ། །ལྷ་རྟ་ངང་པ་གསེར་ལྡན་དེ། །ས་མཁན་ལྷའུ་ལོད་པོའི་་གྱིས། །ས་མ་ནོར་བ་ཡི་དགའ་སྟོན་གྱིས། །ལྷ་གཡག་དཀར་པོ་ཞུར་ཅན་དེ། །སྣ་ཁྲིད་སྤྲེལ་དཀར་གསེར་མགོའི་གྱིས། །ལམ་འགགས་པ་མ་འོངས་དགའ་སྟོན་གྱིས། །ལྷ་ལུག་དཀར་པོ་བོང་མིག་དེ། །ཁས་དྲག་བསེ་རུ་རྒྱལ་པོའི་གྱིས། །གྲོས་འདུན་མ་ལེགས་པའི་དགའ་སྟོན་གྱིས། །དགྲ་གསོད་རྣམས་ལ་དཔའ་དར་སྦྱིན། །རྟ་མགྱོགས་པ་རྣམས་ལ་མགྱོགས་དར་སྦྱིན། །རྟ་ནོར་ཕྱུགས་ལུག་ཡོ་བྱད་རྣམས། །བགོས་ལ་ལེགས་ཉེས་མེད་པར་གྱིས། །གྲངས་ལ་མང་ཉུང་མེད་པར་གྱིས། །གདུང་དྲུག་ལྷ་མི་ཐམས་ཅད་ལ། །ཐོབ་ཐང་གྲངས་ཀ་མ་ནོར་ཅིག །གཞི་བྱེས་ལམ་གསུམ་ཐམས་ཅད་དུ། །བགོས་པའི་གྲངས་ཁ་མ་ནོར་ཅིག །གཡས་ཕ་སྤུན་གྱི་གནང་སྐལ་རྟ་ལ་གྱིས། གཡོན་མཉེས་སྤུན་གནང་སྐལ་ནོར་ལ་གྱིས། །འོག་སྡེ་སྲིད་གནང་སྐལ་ལུག་ལ་གྱིས། །དྲེའུ་མཛོ་རྔ་མོང་བ་ར་སོགས། །དགྲ་ནོར་ལྷག་ལུས་མེད་པར་བགོས། །དེ་ལྟར་
གནང་བགོས་བྱས་ནས་ཀྱང་། །དགྲ་བླ་ངོ་སོ་མཐོ་བ་ཡིན། །ཝེར་མ་དཔའ་རྟགས་གྲགས་པ་ཡིན། །མི་ངོ་དུང་བས་དཀར་བ་ཡིན། །ལྷ་ཞལ་ཟླ་བས་གསལ་བ་ཡིན། །དགྲ་བླས་གང་བ་ལོན་པ་ཡིན། །བཀའ་སངས་རྒྱས་བསྟན་པ་དར་བ་ཡིན། །འགྲོ་ཀུན་བདེ་ལ་བཀོད་པ་ཡིན། །བསམ་པ་ཡིད་བཞིན་འགྲུབ་པ་ཡིན། །ཀི་བསྭོ་ཆའོ་ལྷ་རྒྱལ་ལོ། །ཞེས་བརྗོད་གཡག་རུ་དགྲ་ཆོས་ཁ་ཚར་ལས། །དགྲ་བླའི་གནང་བགོས་ཆེན་མོ་འདི། །རྟེན་འབྲེལ་ལེགས་ཚོགས་དགའ་སྟོན་ཆེ། །བོད་ཁམས་ལྷ་མི་ཐམས་ཅད་ཀྱིས། །ལར་རྟེན་འབྲེལ་ལེགས་ཚོགས་ཆེ་བའི་ཕྱིར། །དམག་ཇག་ལིང་གསུམ་དགྲ་བྲུབ་སོགས། །ཤག་འདེབས་ཆོས་རྩོད་མཐུ་བྱེད་སོགས། །དྲག་པོའི་བྱ་བ་ཐམས་ཅད་ལ། །རྟེན་འབྲེལ་གལ་དུ་ཆེ་བའི་ཕྱིར། །གནང་བགོས་མེད་ན་དགྲ་བླ་སྐྱེངས། །གནང་བགོས་བྱས་ན་དགྲ་བླ་དགྱེས། །འདི་ནི་ངེས་པར་གཙོ་ཆེ་བས། །ལེགས་ལྡན་དགྲ་བྲུབ་ཐུགས་ཀར་དགྲ་ཆོས་དང་། །སྲིད་པའི་དགྲ་བྲུབ་ཆེན་མོ་རྣམས་ཀྱི་ནི། །དོན་བསྡུས་རཱ་ག་ཨ་སྱ་ཞེས་བྱས་བསྒྲིགས། །དགྲ་བླའི་དབུ་འཕང་མཐོ་བར་ཤོག །ཡོན་མཆོད་བཀྲ་ཤིས་ཕུན་ཚོགས་གྱུར། །སརྦ་མངྒ་ལཾ།། ༈ སྔགས་གནང་བཅད་ཀྱི་གོ་མཚོན་དཀོར་ནོར། ཕྱུགས་རིགས་ཐམས་ཅད་ཚིག་རིས་ལྟར་མཆོད་གཡོག་པས་སོ་སོར་བགོས་ལ་ཕུགས་གཏོར་དྲུང་དུ་ཕུལ་
བར་བྱས་པ་ཕྱག་ལེན་ཡང་དག་པའོ། །ཟབ་རྒྱ༔ ཨྠྀི། ༈ ལེགས་ལྡན་མགོན་པོའི་དགྲ་ཆོས་ལས་གཡག་རུ་དགྲ་ཆོས་ཀྱི་ཁ་ཚར། དཔའ་ཟས་དཔའ་འཆང་གབ་སྤྲོད་མངོན་གསོལ་བཞུགས་སོ། །ཨོཾ་སྭ་སྟི། དང་པོ་དཔའ་ཆང་ཐོགས་ལ། ཀྱཻ། དེ་རིང་གནམ་གང་ཉི་མ་ལ། །དུས་ཚོད་བཟང་ཞིང་གཟའ་སྐར་དགེ །སངས་རྒྱས་མཐུ་ཆེ་དགྲ་བཅོམ་རྣམས། །ཟག་པ་ཟད་ཅིང་སྨོན་ལམ་བཙན། །དེ་བཞིན་ལྷ་ཡི་སྨོན་ལམ་འགྲུབ། །རིན་ཆེན་གསེར་གྱི་ས་གཞི་ལ། །གནམ་ལྕགས་ཐོགས་ཆེན་ངར་བས་རྨོས། །སྔོན་མོ་ནས་ཀྱི་ས་བོན་བཏབ། །གཡུ་ལྗང་དགེ་བའི་འབྲས་བུ་འཁྲུངས། །འཁོར་བ་རྩད་བཅད་ཟོར་བས་བརྔས། །དགེ་བྱེད་ཆེན་པོར་བརྡུང་ལ་འཕྱར། །ཤེས་རབ་ཆེན་པོས་བྲེ་ལ་འཇལ། །འགྱུར་བ་མེད་པའི་སྒྱེད་པུ་བཙུགས། །སྙིང་རྗེ་ཆེན་པོའི་མེ་གཅིག་བུས། །ཚད་མེད་བདུད་རྩིའི་ཆུ་བླུགས་ནས། །རིན་ཆེན་ཟངས་དཀར་ནང་དུ་བཙོས། །དར་དཀར་ཕྱར་བའི་སྟེང་དུ་བརྡལ། །ཡེ་ཤེས་ལྔ་ཡི་ཕབས་རྩི་བཏབ། །ཐབས་ཤེས་གཉིས་ཀྱི་དྲོ་སར་བསྙལ། །བྱང་ཆུབ་ཐེམ་བུའི་རྒྱུད་ནས་བཙག །བཏུང་བས་དུག་གསུམ་ནད་རྣམས་སེལ། །ཡི་དམ་ལྷ་ཡི་ཚོགས་
ཆང་ཡིན། །མཁའ་འགྲོ་ཆོས་སྐྱོང་མཉེས་ཆང་ཡིན། །དགྲ་ལྷ་ཝེར་མའི་དཔའ་ཆང་ཡིན། །སྐུ་རྒྱལ་བོད་ཀྱི་དགའ་ཆང་ཡིན། །དགྲ་དཔུང་བཤིགས་པའི་རྩལ་ཆང་ཡིན། །དགྲ་བགེགས་འདུལ་བའི་མཐུ་ཆང་ཡིན། །འདྲེ་སྲིན་ཟིལ་གནོན་སྟོབས་ཆང་ཡིན། །འབྲུ་བཅུད་ལྡན་པའི་དཔའ་ཆང་འདི། །དྲི་མེད་དཀར་ཡོལ་ནང་དུ་ཀ །བླུགས་།སེང་གེ་དཀར་མོའི་འོ་མ་འདྲེས། །དཔའ་བོ་ཁྱོད་ཉིད་མ་གཏོགས་པའི། །ཕལ་པ་མི་ཡི་འཐུང་མི་སྲིད། །དཔའ་བོ་རྣམས་ཀྱིས་འདི་བཞེས་ལ། །ལྷ་མི་མཚུན་གསུམ་ངོ་སོ་བསྟོད། །ལྷ་སྲུང་དབུ་འཕང་དགུང་བས་མཐོ། །འགྲོ་དོན་བསྟན་པ་རྒྱས་པར་ཤོག །ཅེས་ཆང་དྲོང་། ཕྱེ་མར་ཐོགས་ལ། ཀྱཻ། སྔོན་གྱི་ངོ་མཚར་རྨད་བྱུང་བས། །ཕྱེ་བའི་ཕུད་གངས་རི་དཀར་པོ་ལ། །འབྲི་མར་རྩི་མར་རྒྱན་གྱིས་སྤྲས། །ཟས་མཆོག་རོ་མངར་བརྒྱ་དང་ལྡན། །དྲི་མེད་རིན་ཆེན་སྣོད་དུ་བླུགས། །ལྷ་ཡི་ཞལ་ཟས་རོ་བརྒྱ་ལྡན། །ལྷ་མི་ཀུན་གྱི་ཞལ་ཟས་ཡིན། །དགའ་སྐྱིད་འཛོམ་པའི་ཕྱེ་མར་འདི། །བཞེས་ནས་དངོས་གྲུབ་རྣམ་གཉིས་ཐོབ། །དཔའ་ཟས་ཕྱེ་མར་དཀར་གསུམ་འདིས། །དགྲ་ལྷ་མཆོད་
པས་སྡང་དགྲ་ཐུལ། །ཝེར་མས་བཞེས་ལ་གནོད་བྱེད་ཐུལ། །མི་ཡིས་བཞེས་པས་ཅི་བསམ་འགྲུབ། །རོ་མཆོག་བརྒྱ་ལྡན་ཞལ་ཟས་འདིས། །བཀྲེས་པ་འགྲངས་ཤིང་སྐོམ་པ་སེལ། །ལུས་བདེ་རིག་པ་གསལ་བྱེད་པ། །ནུས་པ་སྟོབས་ལྡན་ཟས་མཆོག་འདི། །དགྲ་འདུལ་དམག་དཔོན་ཁྱེད་རྣམས་ལ། །རྣལ་འབྱོར་བདག་གིས་འདི་འབུལ་བས། །བདག་གི་གྲགས་པས་ཁྱབ་པ་དང་། །དགྲ་རྣམས་མ་ལུས་འདུལ་བ་དང་། །ཅི་བསམ་དོན་རྣམས་འགྲུབ་པ་དང་། །བཀྲ་ཤིས་ཕུན་སུམ་ཚོགས་པར་ཤོག །ཀི་བསྲོ་ཆའོ་ལྷ་རྒྱལ་ལོ། །ཞེས་དཔའ་ཆང་དང་། ཕྱེ་མར་ལྷ་སྲུང་ལ་ཕུལ། ལྷག་མ་བདག་གཞན་གྱིས་རོལ་ལ་སྨོན་ལམ་བཏབ་བོ། །སྔགས་འཆང་རཱ་ག་སྱས་སྦྱར་བ་བཀྲ་ཤིས་པར་གྱུར་ཅིག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།