གསང་སྔགས་དགྲ་ཆོས་ཐོག་པ་སྡེ་དགུ་དགྲ་བྲུབ་ནག་པོའི་གཡབ་མོ་གཏོ་ནག་དགྲ་ཟོར།
གསང་སྔགས་དགྲ་ཆོས་ཐོག་པ་སྡེ་དགུ་དགྲ་བྲུབ་ནག་པོའི་གཡབ་མོ་གཏོ་ནག་དགྲ་ཟོར་བཞུགས་སོ། །
ན་མོ་མཉྫ་ཤྲཱི་ཡེ། འཇམ་དཔལ་རིགས་གསུམ་ཞབས་ལ་ཕྱག་འཚལ་ནས། །འགྲོ་ལ་ཕན་ཕྱིར་དགྲ་ཆོས་མདོ་ཙམ་བྲི། །ཡི་དམ་ཆོས་སྐྱོང་ཝེར་མས་བཀའ་གནང་སྩོལ། །སྔོན་ཚེ་ཡེ་སྨོན་རྒྱལ་པོའི་སྐུ་རིང་ལ། །བདུད་པོ་ངམ་རྗེ་རྩོལ་པོ་དགྲ་རུ་ལངས། །འཛམ་གླིང་མི་ལ་དམག་སྣ་ལྡང་བའི་དུས། །སྲིད་པ་ཡེ་སྨོན་རྒྱལ་པོ་ཁོ་རང་གིས། །གཤིན་པོ་རང་གཏོ་རང་གིས་བྱས་པ་ལ། །ས་ལས་རྡོ་བླངས་དགྲ་བོའི་བླ་རྡོ་བྱས། །ལུང་ལས་ཤིང་བཅད་དགྲ་བོའི་བླ་ཤིང་བྱས། །དགྲ་བོའི་རྐང་ལག་གཟུགས་བཞི་མགོ་དང་ལྔ། །ལིངྒ་བྲིས་ནས་འགུགས་གཞུག་ཟིལ་གྱིས་མནན། །གཡག་རུའི་ནང་བཅུག་རྡོ་ནག་ཤིང་ནག་དང་། །མི་ཁའི་ཡས་བསགས་ཤིང་ནག་མི་གཟུགས་གཅིག །དྲོད་པར་ཁྲག་བླུགས་དགྲ་ལིང་མཚོན་ཆས་གཏུབ།
དེ་ཡིས་ངམ་རྗེ་རྩོལ་པོ་རླུ་གབ་ནོན། །དམག་རྣམས་ཕར་ལ་བཟློག་སྟེ་དགྲ་བྲུབ་སོང་། །དེ་ཕྱིར་མིའུ་རུས་དྲུག་བཀྲ་ཤིས་སོ། །དེང་སང་གཏོ་མཁན་འགའ་ཡི་བྱེད་ཚུལ་ལ། །སྔོན་གྱི་དེ་ཡིན་ཟེར་བའི་དགྲ་ཆོས་བྱེད། །བཅའ་ཚོགས་འདོན་རྒྱུ་གཉིས་པོ་ཡ་བྲལ་ཏེ། །རྡོ་ནག་ཡོན་བདག་ཚང་གི་ཁྱིམ་ནས་ལེན། །ཤིང་ནག་ཡིན་ཟེར་གླང་མ་དུམ་བུ་དགུ། །ལིངྒ་མེད་པ་གཡག་རུ་སྟོང་པ་ཞིག །འདོན་ཆ་མེད་པའི་གླང་གཟུགས་ཁྲག་དྲོད་བཏགས། །གོང་ནོན་མི་དགོས་དེ་ནུབ་མཚོན་ཆས་གཏུབ། །དཔེ་མེད་ལུང་མེད་རྟ་ཡི་ཡིག་དྲུག་འདྲ། །དེ་འདྲས་ཕན་གནོད་ཅི་འགྱུར་ཆ་མ་མཆིས། །དེ་ལ་ཕན་ཕྱིར་དགྲ་ཆོས་འདི་བྲིས་པ། །གྲུབ་ལྟར་ལག་ཏུ་ལན་བདེ་བཀོད་པར་བྱ། །དང་པོ་ཡི་དམ་ཆོས་སྐྱོང་བཀའ་སྲུང་དང་། །གཞུང་ལྟར་
མཆོད་ཕྲེང་ཚོགས་མཆོད་བསྐང་བསྡུས་དང་། །བཟློག་གཞུང་འདོན་ལ་བསྙེན་པ་ཅི་མང་བྱེད། །དཔེར་ན་རྒྱལ་པོར་ཞུས་ནས་བཀའ་ཁྲིམས་བླང་། །དེ་ནས་གཞན་ལ་བཙོད་པ་ལྟ་བུའོ། །མར་གཞི་དགྲ་བོའི་བཅའ་ཚོགས་འདི་ལྟ་སྟེ། །ཧོམ་ཁུང་ནང་དུ་གཡག་རུ་གཡོན་པ་བཞག །གཡག་རུའི་ནང་དུ་དགྲ་ལིང་མན་ངག་ལྟར། །བྲིས་པ་བཅུག་ལ་གླང་མར་བྱོ་ཁྲམ་བྲིས། །ཚྭ་གཡེར་རམ་རུག་གོ་གསུམ་ཐལ་བ་དང་། །མི་དང་དུད་འགྲོས་མ་འགོང་རྡེལ་བུ་རྣམས། །དེ་འདྲའི་དགུ་ཚོམ་བཤམས་ལ་དགྲ་བྲུབ་བྱ། །གླང་གཟུགས་མགུལ་དུ་ཁྲག་དྲོད་གཡག་རུ་བཏགས། །མདའ་ཟོར་རྒྱོབ་ལ་དགྲ་ཕྱོགས་ཟོར་ཡང་འཕོངས། །གཞུང་ལྟར་བྱེད་ན་བསྲུང་བ་བསྐང་ཟློག་སོགས། །ཞག་མང་བཅའ་ན་ནུབ་རེ་བཟློག་པའི་མཇུག །ཚར་རེ་བཏོན་ནས་དགྲ་བྲུབ་བྱ་བ་དང་། །མནན་པ་བྱ་བ་དགྲ་མནན་མཆོག་ཡིནཏེ། །བྱད་དང་དགྲ་ངོ་མང་དང་ཇག་རྐུན་བཅིང་། །ཁ་མཆུ་མི་ཁ་ལྡང་བ་ལ་སོགས་པ། །ཕན་ཆེན་ལག་ཏུ་བླངས་བའི་གཏོ་ནག་ཡིན། །གོང་དུ་དགྲ་ཟློག་དགྲ་བགེགས་ཚར་གཅོད་འདོན། །འདི་ནི་གཏིང་ཕུལ་ཡིན་པ་ཤེས་པར་གྱིས། །ཞིབ་པར་སྔགས་པ་ཁྱོད་ལ་ཞལ་ཁྲིད་བྱེད། །འདོན་ཆ་བཅས་དང་མཐུན་པ་འདི་ལྟར་རོ། །ཨོཾ་སྭ་བྷ་ཝས་སྦྱངས། གཏོ་ནག་མི་དམིགས་པ་སྟོང་པའི་ངང་ལས། བདུད་ཤིང་ནག་པོ་གླང་གཟུགས་དང་། ཤིང་མི་ནག་པོ་ཁ་སྨྲས་གླེང་གཞིའི་ཁྲག་གྲོད་མགུལ་དུ་བཏགས་པ། དེ་ཡི་མདུན་དུ་
ལྕགས་ཁང་ནག་པོའི་ནང་དུ། དགྲ་བོ་འགུགས་པའི་གཡག་རུ་ནག་པོ་ཚ་ལ་རྩུབ་པ། ནག་ལ་འཇིགས་པ། དེའི་ནང་དུ་ཐད་དུ་ལང་བའི་དགྲ་བོ་ཐམས་ཅད་ཀྱི་བླ་དང་སྲོག་གི་ལིངྒ་གཟུགས་དང་སྐྱེ་མཆེད་ཚང་བ་སྔོ་བ་སྐྱ་བ་ཧམ་པ་རིད་པ། མིག་ནས་ཁྲག་གི་མཆི་མ་ཤོར་བ། རྐང་ལག་ལྕགས་སྒྲོག་གིས་བསྡམས་པ། མགོན་སྐྱབས་ཀྱི་ལྷ་དང་བྲལ་བ། འདར་ཕྲི་ལི་ལི་བསྔངས་ཧ་ཧ་བྱེད་པ། ཉམས་ཐག་ཉོན་མོངས་པ། ཁ་ནས་སྡུག་བསྔལ་གྱི་ཆོ་ངེས་འདེབས་པ་ཞིག་ཏུ་གྱུར། གཞན་ཡང་སྔགས་འཆང་རྣལ་འབྱོར་པ་བདག་དང་ཡོན་བདག་འཁོར་དང་བཅས་པ་ཐམས་ཅད་ལ། ཉི་མ་ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅས་པ་ཐམས་ཅད་ནས། སྡང་བར་བྱེད་པའི་དགྲ། གནོད་པར་བྱེད་པའི་བགེགས། བར་དུ་གཅོད་པའི་རྐྱེན། ལེན་པ་མེད་པའི་ནོར་འཕྲོག་པ། བཟློས་པ་མེད་པའི་སྲོག་ལ་རྒོལ་བ། ཟོས་པ་མེད་པའི་བུ་ལོན་སྙག་ལྷོ་པ། དོ་བསྡོ་ཤིང་ཕོད་བཙུགས་པའི་དགྲ་ཡ་གྱོད་ཡ་འཛིང་ཡ་འཁོན་ཡ་བྱེད་པའི་དགྲ་བོ། ལ་ཁ་ནས་ཇག་པ་རྟ་སྒ་བཏོད་མི། ལུང་ཁུང་ནས་རྐུན་མ་ཤེད་སྤུ་ཁུར་མི། རྐུན་ཁ་
ཤོར་བྱེད་མི། འཇབ་ལག་ཤོམ་བྱེད་མི། ཁ་མཆུ་དང་བཙོད་ཡ་བྱེད་པའི་དགྲ་བོ། གདོན་བགེགས་འབྱུང་པོ་དམ་སྲི་ཐམས་ཅད་ཀྱི་བླ་རྡོ་ནག་པོ། བླ་ཤིང་ལིང་དགུ་གྲུབ་པའི་ཚྭ་སྒོག་རམ་པ། གོ་གསུམ་ཐལ་བ། ཡས་སྟགས་དེ་དག་ཐམས་ཅད་ལ་དགྲ་བགེགས་ཐམས་ཅད་ཀྱི་བླ་སྲོག་རྣམ་པར་ཤེས་པ་དབྱེར་མེད་དུ་ཐིམ་པར་གྱུར། ཛཿ ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། ཡི་དམ་རྒྱུད་སྡེ་བཞི་ཡི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། དཔའ་བོ་མཁའ་འགྲོ་རྣམས་ཀྱི་བཀའ་བདེན་པ་དང་། ཆོས་སྐྱོང་ཕོ་རྒྱུད་མོ་རྒྱུད་རྣམས་ཀྱི་བཀའ་བདེན་པ་དང་། བཀའ་སྲུང་དམ་ཅན་རྒྱ་མཚོ་འཁོར་དང་བཅས་པ་རྣམས་ཀྱི་བཀའ་བདེན་པ་དང་། ཕོ་ལྷ་དགྲ་བླ་ཝེར་མ་ཡུལ་ལྷ་ཟོ་དོར་རྣམས་ཀྱི་བཀའ་བདེན་པ་དང་། སྔགས་འཆང་རྣལ་འབྱོར་པ་བདག་གི་སྔགས་དང་ཕྱག་རྒྱ་ཏིང་ངེ་འཛིན་རྣམས་ཀྱི་བཀའ་བདེན་པའི་མཐུས། སྔགས་འཆང་རྣལ་འབྱོར་པ་བདག་ཅག་ཡོན་མཆོད་མི་ནོར་འཁོར་དང་བཅས་པ་ཐམས་ཅད་ལ། ཉི་
མ་ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅས་པ་ཐམས་ཅད་ནས། སྡང་བར་བྱེད་པའི་དགྲ། གནོད་པར་བྱེད་པའི་བགེགས། བར་དུ་གཅོད་པའི་རྐྱེན། སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་བསམ་པ། ད་དགྲ་དངོས་སུ་བྱེད་པའི་གནོད་བྱེད་དགྲ་བོ། ལེན་པ་མེད་པའི་སྲོག་ལ་རྒོལ་བ། བསྡོས་པ་མེད་པའི་ནོར་འཕྲོག་པ། ཟོས་པ་མེད་པའི་བུ་ལོན་བསྙག་པ། དོ་བསྔོ་ཞིང་ཕོད་བཙུགས་པའི་དགྲ་ཡ་གྱོད་ཡ་འཛིང་ཡ་འཁོན་ཡ་བྱེད་པའི་དགྲ་བོ། ལ་ཁ་ནས་ཇག་པ་རྟ་སྒ་བཏོད་མི། ལུང་ཁུང་ནས་རྐུན་མ་ཤེད་སྤུ་ཁུར་མི། རྐུན་ཁ་ཤོར་བྱེད་མི། འཇབ་ལག་ཤོམ་བྱེད་མི། ཁ་མཆུ་དང་རྩོད་ཡ་བྱེད་མི། མི་མེད་དང་ལྷ་མེད་ཟེར་བའི་དགྲ་བོ་ཐམས་ཅད་ཀྱི་བླ་སྲོག་རྣམ་པ་ཤེས་པ་མཐོ་རི་བོའི་རྩེ། དམའ་རྒྱ་མཚོའི་འགྲམ། བར་ཉི་ཟླའི་སྐྱབས། སྔགས་པ་ནུས་པ་ཅན་གྱི་གུར་ཁང་། སྲིད་པ་གསུམ་གར་གནས་ཀྱང་སྐད་ཅིག་རང་དབང་མེད་པར་གཟུགས་ལིངྒ། བླ་རྡོ་ནག་པོ་མིང་བྱང་གླང་གཟུགས་ཐལ་རམ་འདི་ལ་ཁུག་ཅིག་ཕོབ་ཅིག །བཛྲ་ཨཾ་ཀུ་ཤ་ཛཿ རཏྣ་པཱ་ཤ་ཧཱུྃ༔ པདྨ་སྥོ་ཊ་བཾ། ཀརྨ་གྷནྡྷེ་
ཧོ། །ཅེས་རོལ་ཆེན་དང་བཅས་པས་ལན་གསུམ་བཀུག་པར་བྱས་ལ་དང་པོ་གཟུ་དཔང་མི་འགལ་བ་རྣམས་ཚུལ་བཞིན་ཉམས་སུ་བླངས་ནས། ཧཱུྃ། དཀོན་མཆོག་གསུམ་པོ་གཟུ་དང་དཔང་། །བླ་མ་ཡི་དམ་གཟུ་དང་དཔང་། །མཁའ་འགྲོ་ཆོས་སྐྱོང་གཟུ་དང་དཔང་། །བཀའ་སྲུང་དམ་ཅན་གཟུ་དང་དཔང་། །ནོར་ལྷ་གཏེར་བདག་གཟུ་དང་དཔང་། །ཕོ་ལྷ་དགྲ་ལྷ་གཟུ་དང་དཔང་། །ལྷ་བཙན་ཤན་པ་གཟུ་དང་དཔང་། །དགྲ་ལྷ་ཡེ་བརྫུ་གཟུ་དང་དཔང་། །སྣང་སྲིད་ལྷ་འདྲེ་གཟུ་དང་དཔང་། །ཡུལ་ལྷ་གཞི་བདག་གཟུ་དང་དཔང་། །གནས་བདག་དགེ་བསྙེན་གཟུ་དང་དཔང་། །ཁྱེད་རྣམས་གཟུ་དང་དཔང་མཛོད་ཅིག །གཏོར་མ་འབྲུ་སྣ་འདོད་ཡོན་ལྔས། །མཁའ་འགྲོ་ཆོས་སྐྱོང་ཐུགས་དམ་བསྐང་། །ཇ་ཕུད་ཆང་ཕུད་བདུད་རྩི་ལྔས། །གཟུ་དཔང་ལྷ་ལ་མཆོད་པར་འབུལ། །དགྲ་བགེགས་ཤ་ཁྲག་ལིངྒ་ཡིས། །བཀའ་སྲུང་དམ་ཅན་མཉེས་གྱུར་ཅིག །བདུད་རྩི་གསེར་སྐྱེམས་མཆོད་པ་ཡིས། །ཕོ་ཉ་ལས་ལ་རྒྱུག་པ་བརྔན། །དཀར་གསུམ་མངར་གསུམ་མཆོད་པ་ཡིས། །ཡུལ་ལྷ་གཞི་བདག་གཉན་པོ་མཆོད། །ཕྱི་ནང་གསང་བའི་བསྐང་རྟེན་གྱིས། །ཁྱད་པར་
ཅན་གྱི་སྲུང་མ་བརྔན། །ཚ་གཡེར་རམ་པ་ཐལ་འཇིམ་འདིས། །དགྲ་བོ་བྱད་མ་ཐམས་ཅད་བྲུབ། །ཤིང་ནག་གླང་མའི་ལིང་དགུ་དང་། །གྲི་ཤ་འཕང་དམར་རུ་ཅོ་ལ། །དགྲ་བོ་མི་ནོར་ཁྲམ་ལ་ཐོབ། །གླང་གཟུགས་ངར་མི་ནག་པོ་ལ། །མོ་ངན་རྨི་ངན་ལྟས་ངན་སྒྱུར། །ཕུང་ལྟས་ཁྲག་གི་གྲོད་པ་ལ། །དགྲ་ངོ་གྲི་ངོ་རྨེ་ངོ་སྒྱུར། །གཡའ་རུ་ནང་གི་ལིངྒ་ལ། །དགྲ་རྐུན་ཇག་པའི་བླ་སྲོག་ཁུག །དོ་ནུབ་ཉི་མའི་དགོང་འཚམས་ལ། །ཡི་དམ་ཆོས་སྐྱོང་བསྙེན་གྲངས་ཐེམ། །སྔགས་འཆང་བཟླས་བརྗོད་གྲངས་ཀྱང་ཚང་། །བཀའ་སྲུང་དམ་ཅན་རྒྱུག་པའི་སྲང་། །ཕོ་ཉ་ལས་མཁན་དམག་ལ་ཆོས། །དགྲ་བླ་ཝེར་མ་དགྲ་ལ་རྒྱུག །ཡུལ་ལྷ་གཞི་བདག་དགྲ་ལ་ཆོས། །ཁྱད་པར་སྲུང་མས་ཕྲིན་ལས་མཛོད། །ཀུ་དང་བསོ་ལ་དགའ་བ་དང་། །དར་ལ་འདུ་བ་དགྲ་བླའི་ལུགས། །སེར་ཆགས་ཡོངས་ཀྱི་དགྲ་བླ་རྣམས། །དར་ནག་ཕྱར་ནས་ད་འདུས་ཤིག །རྔ་སྒྲ་ལྡིར་ལྡིར་ཆས་རེ་རན། །གོ་ཁྲབ་གྱོན་ལ་རྣོ་མཚོན་ཐོགས། །མགྱོགས་པ་ཞོན་ལ་རིང་པར་རྒྱུག །ཞེ་སྡང་ཕྱུང་ལ་ང་རྒྱལ་བསྐྱེད། །དགྲ་གཟུགས་ལིངྒ་
འདི་གཉིས་དང་། །གང་ལ་དམིགས་པའི་དགྲ་བོ་གསུམ། །མཉམ་པོར་བཞེས་ལ་མེད་པར་མཛོད། །དགྲ་ངོ་བབ་ན་དགྲ་བོ་བྲུབ། །ཇག་ངོ་བབ་ན་ཇག་པ་བྲུབ། །རྐུན་ངོ་བབ་ན་རྐུན་མ་བྲུབ། །གྱོད་ངོ་བབ་ན་གྱོད་ཡ་བྲུབ། །སྨྲས་ངོ་བབ་ན་སྨྲས་ཡ་བྲུབ། །བྷྱོ་བྷྱོ་སྡང་བའི་དགྲ་ལ་བྷྱོ། །བྷྱོ་བྷྱོ་གནོད་པའི་བགེགས་ལ་བྷྱོ། །དུས་ལ་བབ་བོ་ས་མ་ཡ། །དགྲ་ལ་རྦད་དོ་མཐུ་མ་ཆུང་། །ཞེས་ཡི་དམ་ཆོས་སྐྱོང་དང་བཀའ་སྲུང་རྣམས་ཀྱི་ཆད་སྔགས་དྲག་ཏུ་བཟླའོ། །དེ་ནས་བྱུང་ཁུངས་ཀྱི་སྒྲུང་ནི་འདི་སྐད་དོ།། ཀྱཻ། དགྲ་བྲུབ་བྱེད་པ་གར་སྲིད་ན། །སྔོན་གྱི་བསྐལ་པའི་དང་པོ་ལ། །ཕ་གནམ་མཐའ་ལྕགས་ཀྱི་རྒན་པོ་དང་། །མ་ས་མཐའ་ཟངས་ཀྱི་རྒན་མོ་གཉིས། །དེ་གཉིས་རྫུ་འཕྲུལ་བསྡེབས་པ་ལས། །དེ་ལ་སྒོ་ང་བཞི་རུ་སྲིད། །དུང་སྒོང་ཤར་དུ་བརྡོལ་བ་ལས། །ཤར་ཕྱོགས་རྒྱ་ཡི་དགྲ་སྲི་སྲིད། །གཡུ་སྒོང་ལྷོ་རུ་བརྡོལ་བ་ལས། །ལྷོ་ཕྱོགས་འཇང་གི་དགྲ་སྲི་སྲིད། །ཟངས་སྒོང་ནུབ་ཏུ་བརྡོལ་བ་ལས། །ནུབ་ཕྱོགས་མོན་གྱི་དགྲ་སྲི་སྲིད། །ལྕགས་སྒོང་བྱང་དུ་བརྡོལ་བ་ལས། །བྱང་ཕྱོགས་ཧོར་གྱི་དགྲ་སྲི་སྲིད། །ཕྱོགས་བཞིའི་དགྲ་སྲི་རྣམ་བཞི་དེ། །གོ་གྱོན་
མཚོན་ཐོགས་སྣ་ལ་ལོང་། །མཁས་པ་མི་བཞིའི་རྫུ་འཕྲུལ་གྱིས། །སྡང་བའི་དགྲ་བོ་ཐམས་ཅད་ཀུན། །འོད་ཟེར་ཤུགས་ཀྱིས་བསྡུས་ནས་ནི། །གཡག་རུ་གཡོན་མའི་ནང་དུ་བྲུབ། །ཚྭ་སྒོག་རམ་པ་དགུ་ཡིས་བྲུབ། །རྡོ་ནག་རྡེལ་བུ་དགུ་ཡིས་བྲུབ། །གླང་མའི་ལིང་ཙེ་དགུ་ཡིས་བྲུབ། །གཡེར་མ་ཁ་ཆེ་དགུ་ཡིས་ཁྲུབ། །བྲུབ་བོ་བྲུབ་བོ་མཱ་ར་ཡ། ཀྱཻ། དེ་ནས་བསྐལ་པ་བར་མ་ལ། །སྲིད་པ་ཡེ་སྨོན་རྒྱལ་པོ་ལ། །ངམ་རྗེ་རྩོལ་པོ་དགྲ་རུ་ལངས། །བོང་བུ་ནག་པོ་རྟ་རུ་ཞོན། །ཁྱི་ནག་ལྕགས་མགོ་རྗེས་སུ་ཁྲིད། །འཛམ་གླིང་མི་ལ་དམག་སྣ་དྲངས། །དེར་སྲིད་པ་ཡེ་སྨོན་རྒྱལ་པོ་དེས། །གཤིན་པོ་རང་གཏོ་རང་གིས་བྱས། །ས་ལས་རྡོ་བླང་དགྲ་བོའི་བླ་རྡོ་བྱས། །ལུང་པར་ཤིང་བཅད་དགྲ་བོའི་བླ་ཤིང་བྱས། །དགྲ་བོའི་བླ་ཤིང་བླ་རྡོ་ཚྭ་རམ་རྣམས། །གཡག་རུའི་ནང་གི་དགྲ་ལིང་ཐོག་ཏུ་བྲུབ། །སྡང་དགྲ་གནོད་བྱེད་བྲུབ་བོ་མཱ་ར་ཡ། ཀྱཻ། དེ་ལྷོ་ནས་བསྐལ་པ་ཐ་མ་ལ། །སྲིད་པ་རྒྱལ་བུ་མཐིང་གེ་ལ། །ཐེལ་མོ་སྣ་ནག་དགྲ་རུ་ལངས། །དྲིལ་ནག་རྐངགསུམ་རྟ་རུ་ཞོན། །འཛམ་གླིང་མི་ལ་དམག་སྣ་དྲངས། །དེར་
སྲིད་པ་རྒྱལ་བུ་མཐིང་གེ་དེས། །གཤིན་པོ་རང་གཏོ་རང་གིས་བྱས། །ས་ལས་རྡོ་བླངས་དགྲ་བོའི་བླ་རྡོ་བྱས། །ལུང་པར་ཤིང་བཅད་དགྲ་བོའི་བླ་ཤིང་བྱས། །དགྲ་བོ་བླ་རྡོ་བླ་ཤིང་ཚྭ་ཐལ་རམ། །གཡག་རུ་ནང་གི་དགྲ་ལིང་ཐོག་ཏུ་བྲུབ། །སྡང་དགྲ་གནོད་བྱེད་བྲུབ་བོ་མཱ་ར་ཡ། ཀྱཻ། ཐུགས་ཀར་བུ་དགུའི་སྐུ་རིང་ལ། །ཐུགས་དམར་བུ་དགུ་དགྲ་རུ་ལངས། །བཙན་རྟ་དམར་པོ་རྟ་རུ་ཞོན། །འཛམ་གླིང་མི་ལ་དམག་སྣ་དྲངས། །དེར་ཐུགས་ཀར་བུ་དགུ་བྱ་བ་དེས། །གཤིན་པོ་རང་གཏོ་རང་གིས་བྱས། །ས་ལས་རྡོ་བླངས་དགྲ་བོའི་བླ་རྡོ་བྱས། །ལུང་པར་ཤིང་བཅད་དགྲ་བོའི་བླ་ཤིང་བྱས། །དགྲ་བོའི་བླ་རྡོ་བླ་ཤིང་ཚྭ་ཐལ་རམ། །གཡག་རུའི་ནང་གི་དགྲ་ལིང་ཐོག་ཏུ་བྲུབ། །སྡང་དགྲ་གནོད་བྱེད་ཐུབ་བོ་མཱ་ར་ཡ། ཀྱཻ། ཡབ་ལྷ་གདལ་དྲུག་སྐུ་རིང་ལ། །བདུད་ཁྱུང་རུ་ནག་པོ་དགྲ་རུ་ལངས། །གླང་རུ་ནག་པོ་རྟ་རུ་ཞོན། །འཛམ་གླིང་མི་ལ་དམག་སྣ་དྲངས། །དེར་ཡབ་ལྷ་གདལ་དྲུག་བྱ་བ་དེས། །གཤིན་པོ་རང་གཏོ་རང་གིས་བྱས། །ས་ལས་རྡོ་བླངས་དགྲ་བོའི་བླ་རྡོ་བྱས། །ལུང་པར་ཤིང་བཅད་དགྲ་བོའི་བླ་ཤིང་
བྱས། །དགྲ་བོའི་བླ་རྡོ་བླ་ཤིང་ཚྭ་ཐལ་རམ། །གཡག་རུའི་ནང་གི་དགྲ་ལིང་ཐོག་ཏུ་བྲུབ། །སྡང་དགྲ་གནོད་བྱེད་བྲུབ་བོ་མཱ་ར་ཡ། །དེ་ནས་དགྲ་ཆོས་བྱ་བ་ནི། ཡོན་མཆོད་རྣམས་ཀྱིས་གོ་གྱོན་མཚོན་ཐོགས་རོལ་མོ་ཧམ་སྒྲ་དི་རི་རི་དང་བཅས་པས་འདི་སྐད་དོ། །གཡབ་བོ་དར་ནག་གཡབ་མོས་གཡབ། །ལྷ་དང་སྲུང་མའི་དམག་ཚོགས་རྣམས། །ཆོས་ཤིག་དགྲ་བགེགས་སྟེང་དུ་ཆོས། །ཆོས་སྐྱོང་མགོན་པོ་ནག་པོ་ནི། །སྐུ་མདོག་མཐིང་ནག་རྔམ་པའི་གཟུགས། །ཟ་བྱེད་རྔམ་པའི་མཆེ་བ་གཙིགས། །ནག་པོ་སྟོང་དང་ཤ་ཟ་འབུམ། །མ་མོ་བྱེ་བ་གནོད་སྦྱིན་ཁྲི། །སྤྲུལ་པ་ཡང་སྤྲུལ་འཁོར་དང་བཅས། །སྣང་སྲིད་ལྷ་འདྲེ་དམག་ལ་ཆོས། །དགྲ་བགེགས་སྟེང་དུ་དམག་ལ་ཆོས། །དམ་ཅན་རྡོ་རྗེ་ལེགས་པ་ཁྱོད། །དགྲ་བླ་ཝེར་མའི་དམག་དཔོན་ཏེ། །ཝེར་མ་སུམ་བརྒྱ་དྲུག་ཅུའི་ཚོགས། །ཆོས་ཤིག་དགྲ་བགེགས་སྟེང་དུ་ཆོས། །རྒྱུག་ཅིག་སྡང་བའི་དགྲ་ལ་རྒྱུག །ད་རེས་མཐུ་རྩལ་ཅི་འདུག་ལྟ། །ལྷ་དང་སྲུང་མའི་དམག་ཚོགས་རྣམས། །གོ་ཁྲབ་གྱོན་ལ་རྣོ་མཚོན་བརྡར། །མགྱོགས་པ་ཞོན་ལ་རིང་པར་རྒྱུག །ཞེ་སྡང་བྱུང་ལ་ང་རྒྱལ་བསྐྱེད། །ལིངྒ་
འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །ཅེས་མགོན་པོའི་དམག་འགྱེད་དམ་ཅན་གྱི་འཁོར་ཝེར་མའི་ཚོགས་དང་བཅས་པའི་དགྲ་ཆོས་ཚང་བའོ། །རྒྱས་པར་གཞུང་ལྟར་ལས། ཀྱཻ། ཤར་གྱི་ཝེར་མ་དགྲ་ལ་ཆོས། །ལྷོ་ཡི་ཝེར་མ་དགྲ་ལ་ཆོས། །ནུབ་ཀྱི་ཝེར་མ་དགྲ་ལ་ཆོས། །བྱང་གི་ཝེར་མ་དགྲ་ལ་ཆོས། །དགྲ་ཆོས་སྤྱན་དགུ་དགྲ་ལ་ཆོས། །དགྲ་ལ་ཆད་དོ་ཆོས་རེམ་རེམ། །མཐོ་ནམ་མཁའ་ཁྱུང་གི་རེ་འབྱམས་དགྲ་ལ་ཆོས། །བར་སྣང་རླུང་གི་རེ་འབྱམས་དགྲ་ལ་ཆོས། །ས་གཞི་སྦྲུལ་གྱི་རེ་འབྱམས་དགྲ་ལ་ཆོས། །དགྲ་ལ་རྦད་དོ་ཆོས་རེམ་རེམ། ཀྱཻ། དགྲ་བོ་སྤུན་དགུའི་ས་མཐའ་ཡིན། །ས་མཐའ་མ་ཡིན་དགྲ་མཐའ་ཡིན། །དགྲ་བོའི་བླ་སྲོག་ཁུག་ལ་ཤོག །བདུད་ཁུར་སྤུན་དགུའི་ས་མཐའ་ཡིན། །ས་མཐའ་མ་ཡིན་དགྲ་མཐའ་ཡིན། །དགྲ་བོའི་བླ་སྲོག་ཁུག་ལ་ཤོག །གླང་ནག་བདུད་ཁུག་ས་མཐའ་ཡིན། །ས་མཐའ་མ་ཡིན་དགྲ་མཐའ་ཡིན། །དགྲ་བོའི་བླ་སྲོག་ཁུག་ལ་ཤོག །ལྟ་བ་མིག་རྣོན་ས་མཐའ་ཡིན། །ས་མཐའ་མ་ཡིན་དགྲ་མཐའ་ཡིན། །དགྲ་བོའི་བླ་སྲོག་ཁུག་ལ་ཤོག །སྤྲེལ་དམར་རྟ་ཐོག་ས་མཐའ་ཡིན། །ས་
མཐའ་མ་ཡིན་དགྲ་མཐའ་ཡིན། །དགྲ་བོའི་བླ་སྲོག་ཁུག་ལ་ཤོག །ར་དམར་ཟོར་ཐོགས་ས་མཐའ་ཡིན། །ས་མཐའ་མ་ཡིན་དགྲ་མཐའ་ཡིན། །དགྲ་བོའི་བླ་སྲོག་ཁུག་ལ་ཤོག །མཆིལ་པ་མེ་མཆེད་ས་མཐའ་ཡིན། །ས་མཐའ་མ་ཡིན་དགྲ་མཐའ་ཡིན། །དགྲ་བོའི་བླ་སྲོག་ཁུག་ལ་ཤོག །བོང་བུ་སྟག་ཐོགས་ས་མཐའ་ཡིན། །ས་མཐའ་མ་ཡིན་དགྲ་མཐའ་ཡིན། །དགྲ་བོའི་བླ་སྲོག་ཁུག་ལ་ཤོག །རླུང་བུ་ཞགས་ཐོགས་ས་མཐའ་ཡིན། །ས་མཐའ་མ་ཡིན་དགྲ་མཐའ་ཡིན། །དགྲ་བོའི་བླ་སྲོག་ཁུག་ལ་ཤོག །སྤྱང་རི་ཁྱི་སྔོན་མོ་ས་མཐའ་ཡིན། །ས་མཐའ་མ་ཡིན་དགྲ་མཐའ་ཡིན། །དགྲ་བོའི་བླ་སྲོག་ཁུག་ལ་ཤོག །དགྲ་ལ་རྦད་དོ་ཆོས་རེམ་རེམ། །ཞེས་དང་། དེ་ནས་བླ་རྡོ་དང་བླ་ཤིང་ལ་དམིགས་ནས་འགུགས་གཞུག་ལན་གསུམ་བྱེད། སྐྱེས་པ་སྟག་ལོ་པ་གཅིག་གི་རྐང་པ་གཡོན་པས་གཡག་རུ་རྫིས་ནས་ཐམས་ཅད་ཀྱིས་དམོད་པ་བྱས་ལ་འདི་སྐད་དོ། །ཧཱུྃ། ང་ནི་ཁྲོ་རྒྱལ་ཆེན་པོ་སྟེ། །ང་ནི་གསང་བ་ཀུན་གྱི་རྗེ། །ང་ནི་དགྲ་བགེགས་ཀུན་གྱི་གཤེད། །ང་ཡི་བཀའ་ལ་མི་ཉན་མེད། །སྲིད་པའི་ཆུ་ལ་མི་འཐུང་མེད། །ཉི་མ་ཕྱོགས་བཞི་མཚམས་བརྒྱད་ཀྱི། །སྡང་
བའི་དགྲ་བོ་ཐམས་ཅད་ཀུན། །གོ་གྱོན་མཚོན་ཐོགས་སྣ་ལ་ལོངས། །འོད་ཟེར་ཤུགས་ཀྱིས་བསྡུས་ནས་སུ། །གཡག་རུ་གཡོན་པའི་ནང་དུ་བྲུབ། །ཚྭ་སྒོག་རམ་པ་དགུ་དང་རྡོ་ནག་རྡེལ་བུ་དགུ་དང་ཁུག །གླང་མའི་ལིང་ཚེ་དགུ་དང་ཁུག །གཡེར་མ་ཁ་ཆེ་དགུ་དང་ཁུག །ལིངྒ་འདི་ལ་ཐིམ་པར་གྱིས། །ཁུག་ཅིག་ཛ་ཛ་ཛན་ནན། ཀྱཻ། སྔོན་གྱི་བསྐལ་པ་དང་པོ་ལ། །དགྲ་བྲུབ་བྱེད་པ་གར་སྲིད་ན། །ལྷ་ཚ་བུ་དགུ་བྱ་བ་ལ། །སྲིན་ཚ་བུ་དགུ་དགྲ་རུ་ལང་། །ལྷ་ཚ་བུ་དགུ་བྱ་བ་དེས། །ཐུགས་ཀར་སློབ་དཔོན་གདན་དྲངས་ནས། །གཡག་རུ་གཡོན་པའི་ནང་ཤེད་ན། །རྡོ་ནག་དེ་ནི་རྡེལ་བུ་དགུ །གླང་མ་དེ་ནི་ལིང་དགུ་ཡིས། །སྲིན་ཚ་བུ་དགུའི་བླ་མར་ཁུག །དགྲ་བྲུབ་བྱེད་པ་དེ་ནས་སྲིད། །སྲིད་པ་དེ་ལ་དཔེ་བླངས་ནས། །དོ་ནུབ་ཉི་མའི་དགོང་འཚམས་ལ། །དགྲ་ངོ་བབ་ན་དགྲ་མར་བྲུབ། །རྐུན་ངོ་བབ་ན་རྐུན་མ་བྲུབ། །གྱོད་ངོ་བབ་ན་གྱོད་མར་བྲུབ། །དགྲ་སྲི་རྨི་ལམ་ངན་པ་བྲུབ། །མོ་ངན་ཐན་ལྟས་ངན་པ་བྲུབ། །བྱད་ཁ་ཕུར་ཁ་ངན་པ་བྲུབ། །མི་ཁ་བྲམ་མཆུ་ངན་པ་བྲུབ། །བྲུབ་བོ་མནན་ནོ་མ་ལྡང་ཞིག །
དགྲ་ལ་རྦད་དོ་ཆོས་རེམ་རེམ། ཀྱཻ། བསྐལ་པ་དེ་ཡི་བར་མ་ལ། །དགྲ་བྲུབ་བྱེད་པ་གར་སྲིད་ན། །ཐུགས་ཀར་བུ་དགུ་བྱ་བ་ལ། །ཐུགས་དམར་བུ་དགུ་དགྲ་རུ་ལང་། །ཐུགས་ཀར་བུ་དགུ་བྱ་བ་དེས། །ཀོང་ཚེ་འཕྲུལ་རྒྱལ་གདན་དྲངས་ནས། །གཡག་རུ་གཡོན་མའི་ནང་ཤེད་ན། །རྡོ་ནག་དེ་ནི་རྡེལ་དགུ་དང་། །གླང་མ་དེ་ནི་ལིང་དགུ་ཡིས། །ཐུགས་དམར་བུ་དགུའི་བླ་མར་བྲུབ། །དགྲ་བྲུབ་བྱེད་པ་དེ་ནས་སྲིད། །སྲིད་པ་དེ་ལ་དཔེ་བླངས་ནས། །དོ་ནུབ་ཉི་མའི་དགོང་འཚམས་ལ། །དགྲ་ངོ་བབ་ན་དགྲ་མར་བྲུབ། །རྐུན་ངོ་བབ་ན་རྐུན་མར་བྲུབ། །གྱོད་ངོ་བབ་ན་གྱོད་མར་བྲུབ། །དགྲ་སྲི་རྨི་ལམ་ངན་པ་བྲུབ། །མོ་ངན་ལྟས་ངན་ཐམས་ཅད་བྲུབ། །བྱད་ཁ་ཕུར་ཁ་ངན་པ་བྲུབ། །མི་ཁ་བྲམ་མཆུ་ངན་པ་བྲུབ། །བྲུབ་བོ་མནན་ནོ་མ་ལྡང་ཞིག །དགྲ་ལ་རྦད་དོ་ཆོས་རེ་རེམ། ཀྱཻ། བསྐལ་པ་དེ་ཡི་ཐ་མ་ལ། །དགྲ་བྲུབ་བྱེད་པ་གར་སྲིད་ན། །སྲིད་པ་ཡེ་སྨོན་རྒྱལ་པོ་ལ། །ངམ་རྗེ་རྩོལ་པོ་དགྲ་རུ་ལང་། །སྲིད་པ་ཡེ་སྨོན་རྒྱལ་པོ་དེས། །གཏོ་མཁན་རྒྱལ་པོ་སྤྱན་དྲངས་ནས། །གཡག་རུ་གཡོན་མའི་ནང་
ཤེད་ན། །རྡོ་ནག་དེ་ནི་རྡེལ་དགུ་དང་། །གླང་མ་དེ་ནི་ལིང་དགུ་ཡིས། །ངམ་རྗེ་རྩོལ་པོའི་བླ་མར་བྲུབ། །དགྲ་བྲུབ་བྱེད་པ་དེ་ནས་སྲིད། །སྲིད་པ་དེ་ལ་དཔེ་བླངས་ནས། །དོ་ནུབ་ཉི་མའི་དགོང་འཚམས་ན། །དགྲ་ངོ་བབ་ན་དགྲ་མར་བྲུབ། །རྐུན་ངོ་བབ་ན་རྐུན་མར་བྲུབ། །གྱོད་ངོ་བབ་ན་གྱོད་མར་གྲུབ། །དགྲ་སྲི་རྨི་ལམ་ངན་པ་བྲུབ། །མོ་ངན་ལྟས་ངན་ཐམས་ཅད་བྲུབ། །བྱད་ཁ་ཕུར་ཁ་ངན་པ་བྲུབ། །མི་ཁ་བྲམ་མཆུ་ངན་པ་བྲུབ། །བྲུབ་བོ་མནན་ནོ་མ་ལྡང་ཞིག །དགྲ་ལ་རྦད་དོ་ཆོས་རེམ་རེམ། །དེ་ནས་ཡོན་བདག་ཐམས་ཅད་ཀྱིས་གོ་གྱོན་མཚོན་ཐོགས་ལ་ཐམས་ཅད་གྲལ་ལ་འཁོད་ནས། ཁྲམ་བཏབ་པའི་གླང་མ་དུམ་བུ་རེ་དང་། རྗེལ་བུ་ནག་པོ་རེ། ཚྭགཡེར་རམ་གསུམ། གོ་གསུམ་ཐལ་བ་དེ་ཐམས་ཅད་གཅིག་ཏུ་རྩིས་པའི་ཆ་དགུ་བཤམས་ནས། ཚེས་གཅིག་ནས་ཉི་ཤུ་དགུའི་བར་གྱི་ཚིག་མཚམས་སུ་འོག་ནས་འབྱུང་བའི་སྔགས་དང་མི་ཐམས་ཅད་ཀྱིས་ཁ་ལོས་ལག་ལོས་བྱས་ཏེ། སྐྱིད་ཁུག་གཡོན་ནས་དྲངས་ཤིང་། གོང་གི་མི་སྟག་ལོ་པ་ལ་གཏད་ལ། དེ་གཡག་རུ་ནང་གི་ལིངྒའི་སྟེང་དུ་ཐུབ་བོ། །ཧཱུྃ། ང་ནི་ཁྲོ་རྒྱལ་འཇིགས་པའི་སྐུ། །ང་ནི་ཁམས་གསུམ་ཡོངས་ཀྱི་རྗེ། །ང་ཡི་བཀའ་ལ་མི་ཉན་མེད། །སྲིད་པའི་ཆུ་ལ་མི་འཐུང་མེད། །
ཤར་ཕྱོགས་རྒྱ་ཡི་དགྲ་སྲི་དེ། །དྲེད་མོང་རལ་ཐོད་ནང་དུ་གྲུབ། །དེ་ཕྱིར་དགྲ་བོ་མ་ལྡང་ཞིག །ལྷོ་ཕྱོགས་འཇང་གི་དགྲ་སྲི་དེ། །ཁྱི་མགོ་སྨུག་ཐོད་ནང་དུ་བྲུབ། །དེ་ཕྱིར་དགྲ་བོ་མ་ལྡང་ཞིག །ནུབ་ཕྱོགས་མོན་གྱི་དགྲ་སྲི་དེ། །རྟ་རྨིག་འཁོར་མོའི་ནང་དུ་བྲུབ། །དེ་ཕྱིར་དགྲ་བོ་མ་ལྡང་ཞིག །བྱང་ཕྱོགས་ཧོར་གྱི་དགྲ་སྲི་དེ། །གཡག་རུ་གཡོན་མའི་ནང་དུ་བྲུབ། །དེ་ཕྱིར་དགྲ་བོ་མ་ལྡང་ཞིག །དགྲ་ལ་ཆད་དོ་ཆོས་རེམ་རེམ། ཀྱཻ། ད་ནི་དགྲ་བོ་བྲུབ་བོ་དུས་ལ་བབ། །རྐུན་ངོ་བྲུབ་པའི་དུས་ལ་བབ། །ཇག་ངོ་བྲུབ་པའི་དུས་ལ་བབ། །གྱོད་ངོ་བྲུབ་པའི་དུས་ལ་བབ། །རྨེ་ངོ་བྲུབ་པའི་དུས་ལ་བབ། །མི་ཁ་བྲུབ་པའི་དུས་ལ་བབ། །དུས་ལ་བབ་བོ་ཆོས་རེམ་རེམ། །ཀྱཻ། ཚེས་གཅིག་བཅུ་གཅིག་ཉི་ཤུ་གཅིག །གཅིག་གསུམ་དག་ལ་ཆས་པའི་དགྲ་བོ་དེ། །གཡག་རུ་གཡོན་མའི་ནང་དུ་དགྲ་བོ་བྲུབ། །དྲེད་མོ་རལ་ཐོད་ནང་དུ་དགྲ་བོ་གྲུབ། །ཁྱི་མགོ་རྨུག་ཐོད་ནང་དུ་དགྲ་བོ་བྲུབ། །རྟ་རྨིག་འཁོར་མོའི་ནང་དུ་དགྲ་བོ་བྲུབ། །རྡོ་ནག་རྡེལ་བུ་དགུ་ཡིས་བྲུབ། །གླང་མའི་ལིང་རྩེ་དགུ་ཡིས་བྲུབ། །ཚྭ་སྒོག་
རམ་པ་དགུ་ཡིས་བྲུབ། །གཡེར་མ་ཁ་ཆེ་དགུ་ཡིས་བྲུབ། །དམ་ཉམས་དགྲ་བོའི་བླ་རྡོ་འདི། །འཕེན་པ་རྒྱ་མཚོའི་གཏིང་དུ་འཕེན། །རྒྱ་མཚོའི་ཁ་ལ་མ་འཕར་ཅིག །དགྲ་བོ་བྲུབ་བོ་མཱ་ར་ཡ། །ཏཱཾ་བྷ་ཡ་ནན། ཚེས་གཉིས་བཅུ་གཉིས་ཉི་ཤུ་གཉིས། །གཉིས་གསུམ་དག་ལ་ཆས་པའི་དགྲ་བོ་དེ། །གཡག་རུ་གཡོན་མའི་ནང་དུ་དགྲ་བོ་བྲུབ། །དྲེད་མོ་རོལ་ཐོད་ནང་དུ་དགྲ་བོ་བྲུབ། །ཁྱི་མགོ་རྨུག་ཐོད་ནང་དུ་དགྲ་བོ་བྲུབ། །རྟ་རྨིག་འཁོར་མོའི་ནང་དུ་དགྲ་བོ་བྲུབ། །རྡོ་ནག་རྡེལ་བུ་དགུ་ཡིས་བྲུབ། །གླང་མའི་ལིང་རྩེ་དགུ་ཡིས་བྲུབ། །ཚྭ་སྒོག་རམ་པ་དགུ་ཡིས་བྲུབ། །གཡེར་མ་ཁ་ཆེ་དགུ་ཡིས་བྲུབ། །དམ་ཉམས་དགྲ་བོའི་བླ་རྡོ་འདི། །འཕེན་པ་རྒྱ་མཚོའི་གཏིང་དུ་འཕེན། །རྒྱ་མཚོའི་ཁ་ལ་མ་འཕར་ཅིག །དགྲ་བོ་བྲུབ་བོ་མཱ་ར་ཡ། །སྟཾ་བྷ་ཡ་ནན། ཚེས་གསུམ་བཅུ་གསུམ་ཉི་ཤུ་གསུམ། །གསུམ་གསུམ་དག་ལ་ཆས་པའི་དགྲ་བོ་དེ། །གཡག་རུ་གཡོན་མའི་ནང་དུ་དགྲ་བོ་བྲུབ། །དྲེད་མོ་རལ་ཐོད་ནང་དུ་དགྲ་བོ་བྲུབ། །ཁྱི་མགོ་སྨུག་ཐོད་ནང་དུ་དགྲ་བོ་བྲུབ། །རྟ་རྨིག་འཁོར་མོའི་ནང་དུ་དགྲ་བོ་བྲུབ། །རྡོ་ནག་རྡེལ་བུ་དགུ་ཡིས་བྲུབ། །
གླང་མའི་ལིང་རྩེ་དགུ་ཡིས་བྲུབ། །ཚྭ་སྒོག་རམ་པ་དགུ་ཡིས་བྲུབ། །གཡེར་མ་ཁ་ཆེ་དགུ་ཡིས་བྲུབ། །དམ་ཉམས་དགྲ་བོའི་བླ་རྡོ་འདི། །འཕེན་པ་རྒྱ་མཚོའི་སྟེང་དུ་འཕེན། །རྒྱ་མཚོའི་ཁ་ལ་མ་འཕར་ཅིག །དགྲ་བོ་བྲུབ་བོ་མཱ་ར་ཡ། །ཙཱ་བྷ་ཡ་ནན། ཚེས་བཞི་བཅུ་བཞི་ཉི་ཤུ་བཞི། །བཞི་གསུམ་དག་ལ་ཆས་པའི་དགྲ་བོ་དེ། །གཡག་རུ་གཡོན་མའི་ནང་དུ་དགྲ་བོ་བྲུབ། །དྲེད་མོ་རལ་ཐོད་ནང་དུ་དགྲ་བོ་ཐུབ། །ཁྱི་མགོ་སྨུག་ཐོད་ནང་དུ་དགྲ་བོ་བྲུབ། །རྟ་རྨིག་འཁོར་མོའི་ནང་དུ་དགྲ་བོ་བྲུབ། །རྡོ་ནག་རྡེལ་བུ་དགུ་ཡིས་བྲུབ། །གླང་མའི་ལིང་རྩེ་དགུ་ཡིས་བྲུབ། །ཚྭ་སྒོག་རམ་པ་དགུ་ཡིས་བྲུབ། །གཡེར་མ་ཁ་ཆེ་དགུ་ཡིས་བྲུབ། །དམ་ཉམས་དགྲ་བོའི་བླ་རྡོ་འདི། །འཕེན་པ་རྒྱ་མཚོའི་གཏིང་དུ་འཕེན། །རྒྱ་མཚོའི་ཁ་ལ་མ་འཕར་ཅིག །དགྲ་བོ་བྲུབ་བོ་མཱ་ར་ཡ། །སྟཾ་བྷ་ཡ་ནན། ཚེས་ལྔ་བཅོ་ལྔ་ཉི་ཤུ་ལྔ། ལྔ་གསུམ་དག་ལ་༈ ཆས་པའི་དགྲ་བོ་དེ། །གཡག་རུ་གཡོན་མའི་ནང་དུ་དགྲ་བོ་བྲུབ། །དྲེད་མོ་རལ་ཐོད་ནང་དུ་དགྲ་བོ་བྲུབ། །ཁྱི་མགོ་རྨུག་ཐོད་ནང་དུ་དགྲ་བོ་བྲུབ། །རྟ་རྨིག་འཁོར་མོའི་ནང་དུ་
དགྲ་བོ་བྲུབ། །རྡོ་ནག་རྡེལ་བུ་དགུ་ཡིས་བྲུབ། །གླང་མའི་ལིང་རྩེ་དགུ་ཡིས་བྲུབ། །ཚྭ་སྒོག་རམ་པ་དགུ་ཡིས་བྲུབ། །གཡེར་མ་ཁ་ཆེ་དགུ་ཡིས་བྲུབ། །དམ་ཉམས་དགྲ་བོའི་བླ་རྡོ་འདི། །འཕེན་པ་རྒྱ་མཚོའི་གཏིང་དུ་འཕེན། །རྒྱ་མཚོའི་ཁ་ལ་མ་འཕར་ཅིག །དགྲ་བོ་བྲུབ་བོ་མཱ་ར་ཡ། །ཙཱ་བྷ་ཡ་ནན། ཚེས་དྲུག་བཅུ་དྲུག་ཉི་ཤུ་དྲུག །དྲུག་གསུམ་དག་ལ་ཆས་པའི་དགྲ་བོ་དེ། །གཡག་རུ་གཡོན་མའི་ནང་དུ་དགྲ་བོ་བྲུབ། །དྲེད་མོ་རལ་ཐོད་ནང་དུ་དགྲ་བོ་བྲུབ། །ཁྱི་མགོ་སྨུག་ཐོད་ནང་དུ་དགྲ་བོ་བྲུབ། །རྟ་རྨིག་འཁོར་མོའི་ནང་དུ་དགྲ་བོ་བྲུབ། །རྡོ་ནག་རྡེལ་བུ་དགུ་ཡིས་བྲུབ། །གླང་མའི་ལིང་རྩེ་དགུ་ཡིས་བྲུབ། །ཚྭ་སྒོག་རམ་པ་དགུ་ཡིས་བྲུབ། །གཡེར་མ་ཁ་ཆེ་དགུ་ཡིས་བྲུབ། །དམ་ཉམས་དགྲ་བོའི་བླ་རྡོ་འདི། །འཕེན་པ་རྒྱ་མཚོའི་གཏིང་དུ་འཕེན། །རྒྱ་མཚོའི་ཁ་ལ་མ་འཕར་ཅིག །དགྲ་བོ་བྲུབ་བོ་མཱ་ར་ཡ། །སྟཾ་བྷ་ཡ་ནན། ཚེས་བདུན་བཅུ་བདུན་ཉི་ཤུ་བདུན། །བདུན་གསུམ་དག་ལ་ཆས་པའི་དགྲ་བོ་དེ། །གཡག་རུ་གཡོན་མའི་ནང་དུ་དགྲ་བོ་བྲུབ། །དྲེད་མོ་རལ་ཐོད་ནང་དུ་དགྲ་བོ་བྲུབ། །ཁྱི་མགོ་རྨུག་ཐོད་ནང་དུ་དགྲ་
བོ་བྲུབ། །རྟ་རྨིག་འཁོར་མོའི་ནང་དུ་དགྲ་བོ་བྲུབ། །རྡོ་ནག་རྡེལ་བུ་དགུ་ཡིས་བྲུབ། །གླང་མའི་ལིང་རྩེ་དགུ་ཡིས་བྲུབ། །ཚྭ་སྒོག་རམ་པ་དགུ་ཡིས་བྲུབ། གཡེར་མ་ཁ་ཆེ་དགུ་ཡི་བྲུབ། །དམ་ཉམས་དགྲ་བོའི་བླ་རྡོ་འདི། །འཕེན་པ་རྒྱ་མཚོའི་གཏིང་དུ་འཕེན། །རྒྱ་མཚོའི་ཁ་ལ་མ་འཕར་ཅིག །དགྲ་བོ་བྲུབ་བོ་མཱ་ར་ཡ། །སྟཾ་བྷ་ཡ་ནན། ཚེས་བརྒྱད་བཅོ་བརྒྱད་ཉི་ཤུ་བརྒྱད། །བརྒྱད་གསུམ་དག་ལ་ཆས་པའི་དགྲ་བོ་དེ། །གཡག་རུ་གཡོན་མའི་ནང་དུ་དགྲ་བོ་བྲུབ། །དྲེད་མོ་རལ་ཐོད་ནང་དུ་དགྲ་བོ་བྲུབ། །ཁྱི་མགོ་སྨུག་ཐོད་ནང་དུ་དགྲ་བོ་བྲུབ། །རྟ་རྨིག་འཁོར་མོའི་ནང་དུ་དགྲ་བོ་བྲུབ། །རྡོ་ནག་རྡེལ་བུ་དགུ་ཡིས་བྲུབ། །གླང་མའི་ལིང་རྩེ་དགུ་ཡིས་བྲུབ། །ཚྭ་སྒོག་རམ་པ་དགུ་ཡིས་བྲུབ། །གཡེར་མ་ཁ་ཆེ་དགུ་ཡིས་བྲུབ། །དམ་ཉམས་དགྲ་བོའི་བླ་རྡོ་འདི། །འཕེན་པ་རྒྱ་མཚོའི་གཏིང་དུ་འཕེན། །རྒྱ་མཚོའི་ཁ་ལ་མ་འཕར་ཅིག །དགྲ་བོ་བྲུབ་བོ་མཱ་ར་ཡ། །ཏཱཾ་བྷ་ཡ་ནན། ཚེས་དགུ་བཅུ་དགུ་ཉི་ཤུ་དགུ། །དགུ་གསུམ་དག་ལ་ཆས་པའི་དགྲ་བོ་དེ། །གཡག་རུ་གཡོན་མའི་ནང་དུ་དགྲ་བོ་བྲུབ། །དྲེད་མོ་རལ་
ཐོད་ནང་དུ་དགྲ་བོ་བྲུབ། །ཁྱི་མགོ་སྨུག་ཐོད་ནང་དུ་དགྲ་བོ་བྲུབ། །རྟ་རྨིག་འཁོར་མོའི་ནང་དུ་དགྲ་བོ་བྲུབ། །རྡོ་ནག་རྡེལ་བུ་དགུ་ཡི་བྲུབ། །གླང་མའི་ལིང་རྩེ་དགུ་ཡི་བྲུབ། །ཚྭ་སྒོག་རམ་པ་དགུ་ཡི་བྲུབ། །གཡེར་མ་ཁ་ཆེ་དགུ་ཡི་བྲུབ། །དམ་ཉམས་དགྲ་བོའི་བླ་རྡོ་འདི། །འཕེན་པ་རྒྱ་མཚོའི་གཏིང་དུ་འཕེན། །རྒྱ་མཚོའི་ཁ་ལ་མ་འཕར་ཅིག །དགྲ་བོ་བྲུབ་བོ་མཱ་ར་ཡ། །སྟཾ་བྷ་ཡ་ནན། ཞེས་རིམ་བཞིན། གཡག་རུའི་ནང་དུ་རྡེལ་ནག་རྫས་སོགས་བླུགས་ནས། ཆོས་སྐྱོང་རྣམས་ཀྱི་དྲག་སྔགས་མཇུག་ཏུ། དགྲ་བོ་བྱད་མ་ཐམས་ཅད་མཱ་ཚེར་ཡ་རྦད་ནན། དགྲ་རྐུན་ཇག་གསུམ་ཐམས་ཅད་དུན་ཤིག་ཤིག་རྦད་ནན། དགྲ་ཡ་གྱོད་ཡ་ཐམས་ཅད་ཤིག་ཤིག་དུམ་དུམ་ཆད་ནན། འཛིན་ཡ་འཁོན་ཡ་ཐམས་ཅད་ཚལ་པ་ཚལ་པ་རྦད་ནན། བྱད་ཁ་ཕུར་ཁ་ཐམས་ཅད་ཁྲམ་རྦད་བྷྱོ་ཆད་ནན། མི་ཁ་བྲ་མཆུ་ཐམས་ཅད་ཏིར་ཏིར་རྦད་ནན། ཆག་ཆེན་ཉམ་ང་ཐམས་ཅད་མཱ་ར་ཡ་ཆད་ནན། མཱ་ར་ཡ་བྲུབ་ནན། མཱ་ར་ཡ་བྷྱོ་ནན། དེ་ལྟར་དྲག་ཏུ་བཟླས་སོ། །ཞེས་དགྲ་ཁ་ལ་རྒྱས་འདེབས་ཀྱི་དགྲ་བྲུབ་སྔགས་ཀྱི་རྒྱུད་ནས་བསྡུས་སོ། །དེ་ནས་གཡག་རུའི་ཁ་དེ་བཅད་པའི་ཡས་ལ། ཕུང་ཤུལ་གྱི་ས། གོ་གསུམ་ཐལ་བ།
སྐྱེད་གསུམ་དྲེག་པ་བུད་མེད་ཀྱིས་བསྡུས་པ་བསྲེས་ལ། རི་རབ་ཀྱི་གཟུགས་གཅིག་བྱ། དེ་ལ་སྐྱེར་པའི་ཕུར་ཆུང་དགུའི་གཟུགས་བྱས་ལ། གཟུགས་དེའི་རྩེ་ལ། མཛོ་ཁལ་དྲེལ་གསུམ། ཁྱི་ར་ཕག་གསུམ། བ་གླང་བོང་བུ་གསུམ་དང་དགུའི་གཟུགས་བྱ་ལ་བཙུགས། དེ་རྡོ་གཅིག་གི་སྟེང་དུ་བཤམས་ལ་འདི་སྐད་དོ། །ཧཱུྃ། ང་ནི་ཟིལ་གནོན་པདྨའི་སྐུ། །དགྲ་བགེགས་བྲུབ་ནས་ཟིལ་གྱིས་མནན། །ལྷ་དང་སྲུང་མ་གཉན་པོ་རྣམས། །མ་གཡེལ་དགྲ་བགེགས་ཟིལ་གྱིས་མནན། །ཉི་མ་ཕྱོགས་བཞི་མཚམས་བརྒྱད་ཀྱི། །དགྲ་ངོ་རྐུན་ངོ་བབ་པ་རྣམས། །གནམ་ལྕགས་ཁང་སྒྲོམ་འཁར་བའི་ནང་། །གཡག་རུ་ནག་པོའི་ནང་དུ་ཁུག །རི་རབ་ཆེན་པོས་སྟེང་ནས་མནན། །ནམ་ཡང་ཐར་བར་མ་བྱེད་ཅིག ཀྱཻ། ཡས་སྟགས་དེ་སོང་གོང་རོལ་ན། །ཡས་ལ་སྔ་བ་ཐལ་འཇིམ་ཡིན། །ཡས་ཀྱི་ཐལ་འཇིམ་མགོ་དགུ་ཡིན། །ཕ་ནི་གནམ་གྱི་ཁ་ཆར་ཡིན། །མ་ནི་ས་གཞི་ལས་སྐྱེས་བཙལ། །བུ་ནི་རྩི་ཐོགས་གཡུ་ལྗང་རྩྭ། །དུད་འགྲོ་སྒོ་ཕྱུགས་ཀྱི་ཁ་ཟས་བྱས། །ཟོས་པ་མ་ཟོས་རོ་ཅིག་བྱུང་། །འབྱུང་བ་མེ་ལ་བསྲེགས་པ་ཡི། །ཐལ་བ་གནས་པའི་དངོས་པོ་ནི། །བུད་མེད་འཕྱོར་མ་རྣམས་ཀྱིས་བསྡུས། །གོ་
གསུམ་ཐལ་བ་བསྡུས་བསམ་ནས། །འབྲས་དཀར་ཕྱེ་མ་གཤིབ་པ་འདྲ། །སྐྱེད་གསུམ་དྲེག་པ་བཞར་ཙ་ན། །ཟན་ལ་སྤོས་རྩི་བཏབ་པ་འདྲ། །རི་རབ་གཟུགས་སུ་གཏོད་ཙ་ན། །མཐུ་སྟོབས་ནམ་མཁའི་གློག་ཆེན་འདྲ། །དྲག་པོའི་ཕུར་པ་བཞིན་ཙམ་ན། །དགྲ་བགེགས་བསྒྲལ་བའི་མཚོན་ཆ་འདྲ། །མགོ་དགུ་གཟུགས་སུ་གཏོད་ཙམ་ན། །སྲིད་པའི་འདྲེ་དགུ་གཟུགས་དང་མཚུངས། །མགོ་གསུམ་མཛོ་ཁལ་དྲེལ་གསུམ་མགོ །མགོ་གསུམ་ཁྱི་ར་ཕག་གསུམ་མགོ །མགོ་གསུམ་བ་གླང་བོང་གསུམ་མགོ །མགོ་དགུ་ཁ་ལ་དགྲ་བོ་ཟོས། །སྣ་དགུ་རླུང་འཚུབ་མི་ཁ་གཏོར། །མིག་ནས་མེ་འབར་ཇག་རྐུན་བསྲེགས། །སྲིད་པའི་ཐལ་འཇིམ་མགོ་དགུ་ཁྱོད། །མི་ཐུབ་པ་ལ་གཅིག་ཀྱང་མེད། །བན་བོན་བརྒྱ་ཡི་བསྔགས་བརྗོད་མཁས། །ཁྲབ་ཆེན་བརྒྱ་ཡི་ངོ་དུག་ཚ། །མདའ་ཟུག་བརྒྱ་ཡི་རྣོ་མྱུར་ཚ། །མདུང་བཟུང་བརྒྱ་ཡི་ཁ་དུག་ཚ། །དགྲ་ལ་རྦད་དོ་ལས་ལ་རྒྱུག །ཐལ་འཇིམ་ཅི་ཐུབ་སྨྲས་ཙམ་ན། །སྲིད་པའི་འདྲེ་དགུ་ཁོས་ཐུབ་ཟེར། །ཉི་མ་ཕྱོགས་བཞི་མཚམས་བརྒྱད་ཀྱི། །དགྲ་སྲི་ལངས་བ་ཐམས་ཅད་ཐུབ། །རྨིས་ལྟས་མཚན་མ་ངན་
པ་ཐུབ། །བརྒྱ་སྟོང་ལྷག་པའི་མི་ཁ་ཐུབ། །འགོང་པོ་བསེ་རག་བསྒྲེན་འདྲེ་ཐུབ། །མི་མཐུན་ཕྱོགས་རྣམས་ཐམས་ཅད་ཐུབ། །གཡག་རུ་ཕོ་ཁར་བཅད་པའི་ཡས། །དམ་ཉམས་དགྲ་བོ་ལས་ངན་ལ། །ཐལ་བ་སྐྱ་བོའི་སྤྲིན་གྱིས་གཡོགས། །ཐལ་འཇིམ་ཆོས་ཆོས་དགྲ་ལ་ཆོས། །ཐལ་འཇིམ་རྒྱུག་རྒྱུག་དགྲ་ལ་རྒྱུག །དགྲ་ལ་རྦད་དོ་ཆོས་རེམ་རེམ། །ཞེས་རི་རབ་ཕུར་པ་མགོ་ཡི་གཟུགས་དང་བཅས་པས་གཡག་རུའི་ཁ་དེ་བཅད། དེ་ནས་རེ་བ་ནག་པོ་སྐུད་པ་ཁྲ་ཁྲིས་བསགས་ལ། ཀྱཻ། ད་ནི་དགྲ་ལ་རླུ་གབ་བཀོན། །ཡེ་སྨོན་རྒྱལ་པོའི་རྨུ་གབ་དེ། །ངམ་རྗེ་རྩོལ་པོའི་མགོ་ལ་ཁོབ། །ཡར་ལྷ་གདལ་དྲུག་རླུ་གབ་དེ། །ཁྱུང་རུ་འཛུགས་པའི་མགོ་ལ་ཁོབ། །རྒྱལ་བུ་མཐིང་གེའི་རླུ་གབ་དེ། །ཐིལ་མོ་སྣ་ནག་མགོ་ལ་ཁོབ། །ཡེ་གཤེན་དབང་རྫོགས་རླུ་གབ་དེ། །ངམ་བོན་འུ་རིའི་མགོ་ལ་ཁོབ། །དུང་ཁྱུང་དཀར་པོའི་རྨུ་གབ་དེ། །སོག་ཁྲ་རོག་པོའི་མགོ་ལ་ཁོབ། །ལྗང་ཁྲ་དཀར་སྐྱོ་པོའི་གླུ་གབ་དེ། །ངམ་རྗེ་འུག་རྒན་མགོ་ལ་ཁོབ། །ལྷ་དང་སྲུང་མའི་གླུ་གབ་དེ། །བདུད་དང་འབྱུང་པོའི་མགོ་ལ་ཁོབ། །ཕོ་ལྷ་དགྲ་བླའི་གླུ་གབ་དེ། །དགྲ་ཇག་ཆོམ་རྐུན་
མགོ་ལ་ཁོབ། །རྣལ་འབྱོར་བདག་གི་གླུ་གབ་དེ། །ཐད་ལོང་དགྲ་བོའི་མགོ་ལ་ཁོབ། །ཡོན་བདག་འདི་ཡི་གླུ་གབ་དེ། །སྡང་བའི་དགྲ་བོའི་མགོ་ལ་ཁོབ། །དགྲ་མགོ་རེ་བས་ད་ཐུམ་ཞིག། །དགྲ་མིག་ཁྲག་གི་ད་ཆོད་ཅིག །དགྲ་བོའི་སྐེ་ནས་ཐག་པས་ཆིངས། །དགྲ་སྲོག་ཆོད་ལ་དགྲ་དབུགས་བསྡུས། །བདེན་སྟོབས་བརྗོད་ལ། ཐད་དུ་ལང་བའི་དགྲ་བོ་ལས་ངན་ལ། རྟ་དཀར་པོ་ལ་སྟན་ནག་པོ་བསྟད་པ་བཞིན་དུ་སོང་ཞིག །མོ་ངན་པ་དང་། རྨི་ལམ་ངན་པ་དང་། ཐན་ལྟས་ལ་ཉེ་ངན་པ། བཀྲ་མི་ཤིས་པའི་ཕྱོགས་རིས་ངན་པ་ཐམས་ཅད་ཐད་དུ་ལང་བའི་དགྲ་བོ་ཐམས་ཅད་ཀྱི་མགོ་ལ་ཁོབ་ཅིག་བསྒྱུར་ཅིག །ཅེས་སོགས་བརྗོད་ལ་གཡག་རུ་ཐལ་འཇིམ་དང་བཅས་པའི་ཁ་དེ། རེ་བས་གཡོག་ལ་སྐུད་པ་ཁྲ་ཁྲིས་ཀྱིས་དཀྲིས་མདུད་པ་དགུ་བྱས་གླང་གཟུགས་ཀྱི་མགུལ་དུ་བཏགས་ལ་དེ་སྐད་གྱེར་བར་བྱ། །དེ་ནས་ཤ་རུ་ལ་རོ་སོལ་གྱི་ཁྲམ་རེ་བློ་རེ་ཛ་རེ་བྲིས་ཤིང་འདི་སྐད་དོ། ཀྱཻ། སྔོན་གྱི་བསྐལ་པའི་དང་པོ་ལ། །ཤ་རུ་ཁྲམ་འདེབས་འདི་ལྟར་སྲིད། །གྲི་ལ་སྔ་བ་སྟོང་གྲི་ཡིན། །ཡས་ལ་སྔ་བ་ཤ་རུ་ཡིན། །འཕུར་ལ་སྔ་བ་གྲི་བྱ་ཡིན། །ཁྱི་ལ་སྔ་བ་རི་སྤྱང་ཡིན། །ངམ་གྱི་ཤ་མཐའ་བྲག་དཀྱིལ་
ན། །ཤ་བ་བསད་པའི་ལོ་རྒྱུས་ནི། །གྲི་མཐའ་དམར་པོའི་དཀྱིལ་ཤེད་ན། །རི་བྲག་མཐའ་ལ་བཙུད་རྗེས་སྣང་། །དེ་རི་དྭགས་གང་གི་རྒྱུག་རྗེས་རེད། གྲི་མཐའ་དེ་ཡི་རྩེ་མོ་ན། །འདབ་ཆགས་གཅིག་གི་འཕུར་རྗེས་སྣང་། །དེ་འདབ་ཆགས་གང་གི་འཕུར་རྗེས་རེད། །གྲི་མཐའ་དེ་ཡི་རྩ་བ་ནས། །གཅན་གཟན་གང་གི་སོང་རྗེས་རེད། ཀྱཻ། དང་པོ་སྨན་པས་ངམ་ཤ་བཀྱེས་པ་ལ། །གྲི་མཐའ་དེ་ཡི་དཀྱིལ་ཤེད་ནས། །རི་དྭགས་རྒྱུག་རྗེས་སྣང་བ་དེ། །གྲི་ཤ་འཕང་དམར་རྒྱུག་རྗེས་རེད། །གྲི་མཐའ་དེ་ཡི་རྩེ་མོ་ན། །འདབ་ཆགས་འཕུར་རྗེས་སྣང་བ་དེ། །གྲི་བྱ་ཕོ་རོག་འཕུར་རྗེས་རེད། །གྲི་མཐའ་དེ་ཡི་རྩ་བ་ན། །གཅན་གཟན་སོང་རྗེས་སྣང་བ་དེ། །གྲི་ཁྱི་སྤྱང་ཀི་སོང་རྗེས་རེད། །དེར་གྲི་ཁྱིས་གྲི་ཤ་མཐའ་ལ་འཕོང་། །གྲི་བྱ་ཕོ་རོག་སྟེང་ན་བབ། གྲི་ཁྱི་སྤྱང་ཀིའི་རྗེས་སུ་འབྲང་། །ངམ་གྱི་ཤ་མཐའ་བྲག་དམར་ལ། །དང་པོ་ཤ་སྲིད་དེ་ལྟར་སྲིད། །བར་དུ་ཤ་གནས་དེ་ལྟར་གནས། །ཐ་མ་ཤ་བསད་དེ་ལྟར་བསད། །གྲི་ངོ་སྨྲས་ངོ་བསྒྱུར་བའི་ཕྱིར། །ཤ་རུ་ཁྲམ་འདེབས་དེ་ལྟར་སྲིད། ཀྱཻ། ཨེ་མ་ཡས་
སྟགས་ངོ་མཚར་ཆེ། །ཡས་ལ་སྔ་བ་བྱུང་ཁུངས་བཤད། །ཡས་སྟགས་བྱུང་ཁུངས་མ་བཤད་ན། །འདྲེ་དང་ཡས་གཉིས་ག་ལ་འཕྲད། །དང་པོ་ཤིས་ཆུང་རི་མོ་བཀྲག་ཙ་ན། །མོ་བཙུན་བག་ལ་ཆས་པ་འདྲ། །ཤ་རྒྱས་ལ་ཁར་བྱུང་ཙ་ན། །དམག་དཔོན་ཆས་སུ་ཞུགས་པ་འདྲ། །ཨེ་མ་ཡས་སྟགས་ངོ་མཚར་ཆེ། །རྣལ་འབྱོར་བདག་ཅག་འཁོར་བཅས་ལ། །ཉི་མ་ཕྱོགས་བཞི་མཚམས་བརྒྱད་ཀྱི། །གནོད་པར་བྱེད་པའི་དགྲ་བོ་རྣམས། །མ་ཡོ་མ་འཛུལ་ཁྲམ་ལ་ཐོབས། །ཤ་རུ་འདི་ལ་ཁྲམ་ལ་ཐོབས། །ཁྲམ་ལ་བཏབ་པའི་དགྲ་བོ་འདི། །འཆི་བདག་གཤིན་རྗེ་ཁྱོད་ལ་གཏད། ཀྱཻ། དཀོན་མཆོག་གསུམ་གྱི་བདེན་པ་ཡི། །ཤ་རུའི་ཡལ་ག་ཤར་དུ་བརྟེན། །ཤར་ཕྱོགས་རྒྱ་ཡི་དགྲ་སྲི་དེ། །མ་ཡོ་མ་འཛུར་ཁྲམ་ལ་ཐོབ། །ཤ་རུའི་ཡལ་ག་ལྷོ་ལ་བརྟེན། །ལྷོ་ཕྱོགས་འཇང་གི་དགྲ་སྲི་དེ། །མ་ཡོ་མ་འཛུལ་ཁྲམ་ཐོབ། །ཤ་རུའི་ཡལ་ག་ནུབ་ལ་བརྟེན། །ནུབ་ཕྱོགས་མོན་གྱི་དགྲ་སྲི་དེ། །མ་ཡོ་མ་འཛུར་ཁྲམ་ལ་ཐོབ། །ཤ་རུ་ཡལ་ག་བྱང་དུ་བརྟེན། །བྱང་ཕྱོགས་ཧོར་གྱི་དགྲ་སྲི་དེ། །མ་ཡོ་མ་འཛུལ་ཁྲམ་ལ་ཐོབ། །ཤ་རུའི་ཡལ་ག་རེ་རེ་
ལ། །དགྲ་བོ་མི་རྟ་རེ་རེ་ཁྲམ་ལ་ཐོབ། །ཤ་རུའི་ཡལ་ག་བཅུ་བཅུ་ལ། །དགྲ་བོ་མི་རྟ་བཅུ་བཅུ་ཁྲམ་ལ་ཐོབ། །ཤ་རུའི་ཡལ་ག་ཉི་ཤུ་ལ། །དགྲ་བོ་མི་རྟ་ཉི་ཤུ་ཁྲོམ་ལ་ཐོབ། །ཤ་རུའི་ཡལ་ག་སུམ་ཅུ་ལ། །དགྲ་བོ་མི་རྟ་སུམ་ཅུ་ཁྲམ་ལ་ཐོབ། །ཤ་རུའི་ཡལ་ག་བཞི་བཅུ་ལ། །དགྲ་བོ་མི་རྟ་བཞི་བཅུ་ཁྲམ་ལ་ཐོབ། །ཤ་རུའི་ཡལ་ག་ལྔ་བཅུ་ལ། །དགྲ་བོ་མི་རྟ་ལྔ་བཅུ་ཁྲམ་ལ་ཐོབ། །ཤ་རུའི་ཡལ་ག་དྲུག་ཅུ་ལ། །དགྲ་བོ་མི་རྟ་དྲུག་ཅུ་ཁྲམ་ལ་ཐོབ། །ཤ་རུའི་ཡལ་ག་བདུན་ཅུ་ལ། །དགྲ་བོ་མི་རྟ་བདུན་ཅུ་ཁྲམ་ལ་ཐོབ། །ཤ་རུའི་ཡལ་ག་བརྒྱད་ཅུ་ལ། །དགྲ་བོ་མི་རྟ་བརྒྱད་ཅུ་ཁྲམ་ལ་ཐོབ། །ཤ་རུའི་ཡལ་ག་དགུ་བཅུ་ལ། །དགྲ་བོ་མི་རྟ་དགུ་བཅུ་ཁྲམ་ལ་ཐོབ། །ཤ་རུའི་ཡལ་ག་བརྒྱ་བརྒྱ་ལ། །དགྲ་བོ་མི་རྟ་བརྒྱ་བརྒྱ་ཁྲམ་ལ་ཐོབ། །ཤ་རུའི་ཡལ་ག་སྟོང་སྟོང་ལ། །དགྲ་བོ་མི་རྟ་སྟོང་སྟོང་ཁྲམ་ལ་ཐོབ། །དམ་ཉམས་དགྲ་བོ་བྱ་བ་རྣམས། །ཤ་རུས་འདི་ལ་ཁྲམ་ལ་ཐོབ། །ད་ལྟ་ཉིད་དུ་ཁྲམ་ལ་ཐོབས། །མྱུར་བ་ཉིད་དུ་ཁྲམ་ལ་ཐོབ། །གནོད་བྱེད་དགྲ་བོ་མ་ཤོར་ཅིག །དགྲ་ལ་ཁྲམ་ཁ་ད་བསྒྱུར་ཅིག །ཅེས་ཁྲམ་ལ་བཏབ་པའི་
ཤ་རུ་དེ། ཡང་གླིང་གཟུགས་མགུལ་དུ་བཏགས། སྐབས་འདིར་གླང་ཆེན་སྣ་བསྒྱུར་བྱ། དེ་ནས་སྔོན་དུ་དཀར་གཏོར་གསེར་སྐྱེམས་མཆོད། གླིང་གཟུགས་ཁ་ཕྱིར་བསྟན་ནས། མདའ་ཟོར་དང་། ཟོར་གཞན་ཡང་བཤམས། ཡོན་མཆོད་ཐམས་ཅད་ཀྱི་གོ་གྱོན་མཚོན་ཐོགས་ནས་སྟང་སྟབས་བྱའོ། །སྤྲོས་བཅས་དར་ནག་བསྐྱོད་ནས་མདོས་ཟློག་གཞུང་ལྟར་བྱ་བ་ཡིན། ཧཱུྃ། ད་ནི་ཆོས་ཆོས་དགྲ་ལ་ཆོས། །ལྷ་དང་སྲུང་མའི་དམག་ཚོགས་ཆོས། །ཕོ་ལྷ་དགྲ་བླ་ཝེར་མ་ཆོས། །གཟུ་དཔང་ཡུལ་ལྷ་གཉན་པོས་མཛོད། །ནམ་མཁའི་ཁམས་ནས་ལྷ་དམག་ཆོས། །བར་སྣང་ཁམས་ནས་གཉན་དམག་ཆོས། །ས་གཞིའི་ཁམས་ནས་ཀླུ་དམག་ཆོས། །ཀུ་བསྲོ་ཆོ་སྒྲ་ཏི་རི་ཆོས། །རྔ་གཤང་རོལ་མོ་ཁྲོ་ལེ་ཆོས། །དར་ནག་བ་དན་ལྷབས་སེ་ཆོས། །ཐུན་ཟོར་དམག་ཇག་དཔུངས་སེ་ཆོས། །མདའ་མདུང་རལ་གྲི་རུབས་སེ་ཆོས། །ཀླུ་བཙན་རྟ་རྒྱུག་སྤྲིངས་སེ་ཆོས། །སྡེ་བརྒྱད་འོ་དོད་ལྷངས་སེ་ཆོས། །སྔགས་པས་བྲོ་འཁྲབ་ཁྲིགས་སེ་ཆོས། །དཔའ་བོ་གོ་ཁྲབ་སྙིགས་སེ་ཆོས། །བུད་མེད་ཐལ་རྡེབ་ཆ་ལེ་ཆོས། །བྱིས་པ་གད་རྒྱངས་ཤར་རེ་ཆོས། །དགྲ་ངན་སྨྲེ་སྔགས་འདུས་སེ་ཆོས། །འདྲེ་ངན་སྐད་ངན་ཅེ་རེ་ཆོས། །དེ་ལྟར་
འདུས་པའི་དམག་ཚོགས་རྣམས། །ད་རེས་སྡང་བའི་དགྲ་ལ་ཡ། །དགྲ་བོ་བདུན་རྒྱུད་རྩད་ནས་ཆོད། །ད་རེས་གནོད་པའི་བགེགས་ལ་ཡ། །བགེགས་དཔུང་ཐལ་བ་རྡུལ་དུ་རློགས། །ཞེས་དགྲ་ཆོས་དངདམག་འགྱེད་འདི་མ་ནིང་ལས་རྒྱུད་དང་། དགྲ་བླའི་དྲག་མདོསརྣམས་ཀྱི་དོན་བསྡུས་པས་འཐུས་ཆེའོ། །དེ་ནས་ཁྱེར་བྲབ་བྱས་ཏེ། ཧཱུྃ། གཏོ་འདི་བསྡུས་བསྡུས་བསྐྱེད་བསྐྱེད་ནས། །ཡས་འདི་བསྔོས་བསྔོས་གྱེར་གྱེར་ནས། །སྒྲུང་འདི་བསྔགས་བསྔགས་བརྗོད་བརྗོད་ནས། །དགྲ་འདི་གཡབ་གཡབ་བྲུབ་བྲུབ་ནས། །སངས་རྒྱས་བསྟན་པ་བཤིག་པ་དང་། །དཀོན་མཆོག་དབུ་འཕང་སྨད་པ་དང་། །སྔགས་འཆང་དཀོར་ལ་རློམ་པ་དང་། །བསླབ་པའི་སློབ་བུ་དམ་ལོག་དང་། །བསྟན་པའི་ལེ་གུ་ལྷ་ལོག་དང་། །གཏམ་པའི་ཤག་རོགས་མནའ་ཟན་དང་། །ཉོས་པའི་ཆུང་མ་སྙིང་ངན་དང་། །རྣལ་འབྱོར་བདག་ཅག་འཁོར་བཅས་ལ། །ཐད་དུ་ལང་བའི་དགྲ་བོ་ཡི། །མི་ནོར་འཁོར་བཅས་ཕུང་བར་གྱིས། །དགྲ་བགེགས་གནོད་བྱེད་སྟེང་དུ་བྷྱོ། །བཟློག་ཅིག་བསྒྱུར་ཅིག་ས་མ་ཡ། །དེ་ནས་ཕྱི་རོལ་དུ་ཁྱེར་ནས། དམོད་བཅོལ་དྲག་ཏུ་བྱས་ཤིང་། ཟོར་ཐམས་ཅད་དགྲ་
གཟུགས་དེ་ལ་བརྒྱབ། བཟློག་བསྒྱུར་བྱའོ། །མདའ་བརྒྱད་རྩེ་ལྷོང་དུ་སྤྲད་ལ་སྡེ་བརྒྱད་དུ་བསམས་ཤིང་། ཧཱུྃ། གཞུ་འདི་སྲིན་པོ་ཛྭ་ལ་རམ། །རྒྱུད་འདི་སྦལ་མགོ་ཁྲག་མིག་ལ། །མདའ་འདི་སྲས་མཆོག་རཱ་ཧུ་ལ། །གོ་མཚོན་ལྷ་སྲིན་སྡེ་བརྒྱད་དེ། །མདའ་ཟོར་དགྲ་བོའི་སྙིང་ལ་རྒྱོབས། །དགྲ་སྲོག་ཨ་ཝ་དྷུ་ཏིས་ཆོད། །རལ་གྲིས་དགྲ་བོའི་ལྷུ་ཚིག་ཕྱེས། །ལྷ་སྲིན་སྡེ་བརྒྱད་དྲེགས་པའི་ཚོགས། །གདུག་པའི་མདུང་དམར་དབལ་སོ་ཅན། །རྒྱོབ་ཅིག་དགྲ་བོའི་སྙིང་ལ་རྒྱོབས། །ཆུམ་ཅིག་དགྲ་བོའི་དམག་དཔུང་ཆུམ། །ཆོད་ཅིག་དགྲ་བོའི་མཐའ་རྒྱུད་ཆོད། །རྡུལ་ཕྲན་བཞིན་དུ་བརླག་པར་མཛོད། །དེ་ནས་སྔོན་དུ་མདའ་རྒྱབ། དེ་ནས་མཚོན་སྣ་ཚོགས་རྒྱབ་ཚུལ་བྱ་ཞིང་། དྲག་སྔགས་དང་བསད་སྔགས་དྲག་ཏུ་བཟླས། རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་བཅས་ཐམས་ཅད་ལ། ཉི་མ་ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅས་པ་ཐམས་ཅད་ནས་ཐད་དུ་ལང་བའི་དགྲ་ཡ་གྱོད་ཡ་རྐུན་ཇག་གདོན་བགེགས་ཐམས་ཅད་ཚལ་པ་ཚལ་པ་དུམ་བུ་དུམ་བུ། རྡུལ་ཕྲན་རྡུལ་ཕྲན། ནྲྀ༔ཏྲི་ཨ་བྷྱོ་ཛ་ཛཿ དགྲ་བགེགས་སྲོག་ལ་མཱ་ར་ཡ་རྦད་རྦད། ཅེས་བཟླས་སོ། །དེ་དགྲ་གཟུགས་
གཡག་རུ་དང་བཅས་པ་རྣམས་རྒྱ་ལམ་ཆེན་པོའི་དཀྱིལ་ལམ་ཚ་ཁང་རྙིང་པའི་འོག་གམ་མ་འབྱོར་ན་ཐལ་བའི་ནང་དུ་མནན་ལ་འདི་སྐད་དོ། ཧཱུྃ། ང་ནི་ཁྲོ་རྒྱལ་ཆེན་པོ་སྟེ། །སྡང་བའི་དགྲ་བོ་ཐམས་ཅད་ཀུན། །བཏང་ངོ་རྒྱ་མཚོའི་ཕ་རོལ་བཏང་། །མནན་ནོ་རི་རབ་འོག་ཏུ་མནན། །བརྫང་ངོ་ཆུ་སྲིན་གྲེ་བར་རྫོངས། །བསྡམ་མོ་ཕྱག་རྒྱའི་འཁོར་ལོས་སྡོམས། །གཏད་དོ་འཆི་བདག་གཤིན་རྗེར་གཏད། །གཉེར་རོ་ལས་མཁན་ཁྱེད་ལ་གཉེར། །སྡང་དགྲ་གནོད་བྱེད་བྲུབ་བོ་མནན། །མཆོད་རྟེན་བྱིན་ཆེན་འོག་ཏུ་མནན། །བྲུབ་བོ་མནན་ནོ་མཱ་ར་ཡ། །རྒྱ་ལམ་ཆེན་པོའི་དཀྱིལ་དུ་བྲུབ། །བྲུབ་པོ་མནན་ནོ་མཱ་ར་ཡ། །སྔོན་མོ་ཐལ་བའི་ནང་དུ་བྲུབ། །བྲུབ་བོ་མནན་ནོ་མཱ་ར་ཡ། །ཨོཾ་ནན། ཨ་ནན། ཏྲི་ནན་ཧཱུྃ་ཕཊ༔ ཅེས་བརྗོད་ཅིང་རྐང་ཞབས་རྡོ་རྗེ་རྒྱ་གྲམ་བསམ་སཤིང་མནན། བྱང་ཆུབ་སེམས་མཆོག་མ་སྐྱེས་པ། །མནན་པ་ཡིན་གྱིས་མ་ལྡང་ཞིག །དགྲ་བགེགས་གནོད་བྱེད་ཚྭ་བྷ་ཡ་མཱ་ར་ཡ་ནན། དགྲ་མནན་དགོས་པ་མེད་ན་གཏོར་གཞོང་འོག་ཏུ་དགྲ་གཟུགས་མནན་པ་དེ་ག་ཙམ་པས་ཆོག །སྤྲོ་ན་གལ་ཆེན་དགྲ་མནན་བྱེད་པ་ན། །ས་སྣ་རི་སྣ་བྲག་སྣ་ཟུར་བྱང་བལྟ། །གཉའ་ནོན་ཆེ་བའི་དགྲ་ས་དེ་རྣམས་སུ། །བཅའ་
ཏི་ནག་པོ་མ་ཧཱ་བཱ་ལ་སོགས། །མནན་པ་རྒྱས་པ་གཞན་ནས་བྱུང་བ་སྟེ། །སྤྱི་འཚམས་ལ་ནི་འདི་ཡིས་ཆོག་པ་ཡིན། །ཕན་ཡོན་མི་ཁ་དགྲ་རྐུན་ཇག་པ་ལྡང་། །ཁ་མཆུ་གླེང་གཞི་རྒྱུན་ཆད་མེད་པར་འོང་། །བྱེད་སྣ་ཟུག་ཅིང་བཀྲ་མི་ཤིས་པར་འབྱུང་། །དེ་ལ་མི་བྱེད་ཁ་མེད་འདི་དྲག་ཆེ། །ཕན་ངེས་ལག་ཏུ་བླང་བའི་མྱོང་བ་ཡོད། །སྔོན་ཚེ་གཏོ་མཁན་རྣམས་ཀྱིས་གོ་ལོག་ནས། །སྔར་གྱི་ཁ་དཔེ་ལྟ་བུར་བཅའ་སོགས་བྱེད། །ཁྱད་པར་གཡག་རུའི་དགྲ་ཆོས་དགྲ་བྲུབ་དང་། །དགྲ་མནན་འདི་ནི་ཡེ་སྨོན་རྒྱལ་པོ་དང་། །འཛམ་གླིང་རྒྱལ་པོ་རྣམས་ལ་དར་སྲོལ་ཆེ། །ཕྱིས་ནས་ཡི་གེར་མ་ཐེབ་ཁ་མ་ཚང་། །གཏོ་མཁན་རྣམས་ལ་ཁག་མེད་ལྟ་བུ་ཡིན། །དེ་ལ་མ་བཟོད་རང་ཉིད་ལག་ལེན་དང་། །ཁྱད་པར་དམར་ཡོན་སྔགས་འཆང་མགོན་ནག་གིས། །ཡང་ཡང་བསྐུལ་བས་རྐྱེན་བྱས་ལ་བསྟན་ནས། །རྟ་ལོ་ཁྲུམས་ཀྱི་ཟླ་བའི་ཉེར་དགུ་ནུབ། །དགུ་གཏོར་ཚར་སྐབས་རཱ་ག་ཨ་སྱ་ཡིས། །སྔོན་གྱི་རྒྱུད་གཞུང་མང་པོ་མཐོང་བ་དང་། །ཡིག་ཆ་རྙིང་པ་རྣམས་ལ་གཞི་བྱས་ཏེ། །ཆོས་སྐྱོང་བཀའ་སྲུང་དགྲ་བླའི་ཚོགས་བཅས་ལ། །གསོལ་བ་བཏབ་ནས་རིམ་བཞིན་སྨྲས་པ་ལས། །སྦྱིན་པ་དད་པ་རྣམས་ཀྱིས་མྱུར་དུ་བྲིས། །དེ་ནུབ་རྨི་ལམ་རྟེན་འབྲེལ་བཟང་པོ་བྱུང་། །སྙིགས་དུས་སྐབས་འདིར་ཕན་པ་ཆེའོ་སྙམ། །ཅི་དྲན་སྨྲས་པ་མ་ཡིན་གནད་ཆེན་ཡོད། །མང་དུ་མ་སྤེལ་མཐུ་དཔེ་ལྟ་བུ་ཡིན། །ཆོས་སྐྱོང་བཀའ་སྲུང་དགྲ་བླའི་ཚོགས་བཅས་ལ། །བཀའ་འདི་གཏོད་ལ་མ་གཡེལ་སྡོང་གྲོགས་མཛོད། །
དམ་ཚིག་ཉམ་པ་རྣམས་ལ་སྲོག་གི་ཤན་པ་མཛོད། །འདི་བྲིས་དགེ་བས་དགྲ་ཇག་ཆོམ་རྐུན་ཞི། །རྣལ་འབྱོར་ཡོན་མཆོད་སྐུ་ཚེ་མཐར་ཕྱིན་ཤོག དེ་སྐད་སྨྲས་པའི་རྣལ་འབྱོར་རཱ་ག་ཨ། །འདི་ཕྱིར་སྒྲིབ་པར་མ་གྱུར་བསཏཱ་ཨ། །འགྲོ་ལ་ཕན་སེམས་འགྲུབ་པའི་བཀྲ་ཤིས་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།