དགྲ་ཆོས་ལྷ་དམག་སྤྱི་བསྐུལ་ལྟས་ངན་དགྲ་འགྱེད་དགྲ་ཆོས་བསྡུས་པ་དགྲ་བགེགས་ཚར་གཅོད་ཀྱི་ལས་འགྲིགས།
དགྲ་ཆོས་ལྷ་དམག་སྤྱི་བསྐུལ་ལྟས་ངན་དགྲ་འགྱེད་དགྲ་ཆོས་བསྡུས་པ་དགྲ་བགེགས་ཚར་གཅོད་ཀྱི་ལས་འགྲིགས་སམ།
ན་མོ་མཉྫ་ཤྲཱི་ཡེ། རིགས་གསུམ་མགོན་ལ་ཕྱག་འཚལ་ལོ། །འགྲོ་བ་ཀུན་ལ་ཕན་ཕྱིར་བྲིས། །སངས་རྒྱས་བྱང་ཆུབ་སེམས་དཔའ་དང་། །བླ་མ་ཡི་དམ་མཁའ་འགྲོའི་ཚོགས། །ཆོས་སྐྱོང་སྲུང་མས་བཀའ་གནང་སྩོལ། །དགྲ་ཆོས་ཐོག་པ་སྡེ་དགུ་ཡི། །དང་པོ་བཅས་ཀྱི་རིམ་པ་ནི། །དགྲ་ཆོས་བསྡུས་པའི་གཏོར་མ་ལ། །དམར་གཏོར་གཅིག་ལ་བཅུ་ཡིས་བསྐོར། །དེ་ལ་མཚེ་ཡུངས་རྩང་ཤས་བརྒྱན། །ལིངྒ་མགོ་མཇུག་ལྡོག་པ་བཙུགས། །དེ་ལ་དྲག་རྒྱན་རྔམ་བརྗིད་བྱ། །དཀར་གཏོར་གཅིག་ལ་དཀར་གསུམ་མཆོད། །རྩེ་ལ་ཁྱུང་འབྲུག་སེང་གསུམ་དང་། །
གྱི་ལིང་ཤང་ཤང་རྨ་བྱ་བཙུགས། །གཡག་ལུག་བྱ་རིགས་གཟུགས་ཀྱིས་བསྐོར། །ཤིང་ནག་རྔ་མོང་དྲེལ་ཕག་གཟུགས། །ཐན་རིགས་གཟུགས་རྣམས་ཐམས་ཅད་བཤམས། །སོ་སོའི་ཤ་སྤུ་ཅི་སྙེད་སྦྱར། །ཁོག་པར་གནས་ཡིག་སོ་སོར་བཅུག །ཁམ་སས་གཡོགས་ལ་གྲི་ཡས་བཙུགས། །བོར་ན་དགྲ་བྲུབ་འགྲོ་བ་ཡིན། །ཤ་རུ་དགོ་རུ་གཙོད་རུ་དང་། །མདའ་ཆག་གཞུ་ཆག་རྣམས་ཀྱང་བསྐོར། །ཧོམ་ཁུང་ནང་དུ་གཡག་རུ་བཞག །ལིངྒ་མན་ངག་ལྟར་དུ་བཙུགས། །ཚྭ་གཡེར་རམ་རུག་བྲ་བོ་དང་། །སྒོག་པ་གོ་གསུམ་ཐལ་བ་དང་། །མི་དང་དུད་འགྲོས་མ་འགོང་
པའི། །རྡེལ་བུ་ནག་པོ་དགུ་དང་ནི། །གླང་མའི་ལིང་ཚེ་དགུ་དང་བཅས། །དེ་འདྲའི་དགུ་ཚོ་དགུ་བཤམས་ལ། །ཁམ་སའི་ས་ལ་གླང་ཆེན་བྱ། །རེ་བའི་གལ་ཏ་བྲེ་ཤོང་ནང་། རམ་རུག་ཚྭ་གཡེར་སྒོག་པ་དང་། །བཙོད་སྐག་ཐལ་སོལ་མི་ཁའི་རྫས། །ཐམས་ཅད་མ་ཚང་མེད་པར་བཀལ། །མི་ནག་གཅིག་ཞོན་གཅིག་གིས་ཁྲིད། །ཤིང་ནག་གླང་མའི་མི་གཟུགས་ནི། །ཁྲུ་གང་ཙམ་གྱི་མགུལ་པ་ལ། །ཁྲག་དྲོད་ཤ་རུར་རོ་སོལ་གྱིས། །བྷྱོ་རེ་ཛ་རེ་བྲིས་ལ་བཏགས། །དགྲ་དཔུང་བཅག་པའི་ཆ་ལག་ནི། །ལུས་པོའི་ལག་པ་གཡས་པ་ཡི། །དཔུང་པ་ཡུགས་ས་སྟག་ལོ་མའི། །སྐྲ་ཤད་རྔ་ཤད་རྔོག་མ་དང་། །དཀར་ནག་དག་གིས་སྐུད་པས་དཀྲིས། །དུར་རྡོར་རལ་གྲི་བཅག་རྫས་བཤམས། །འཇག་མའི་སྐྱ་མི་ཆེ་བ་ལ། །རེ་བའི་གལ་ཏའི་ནང་དུ་ནི། །མི་ཁའི་རྫས་སྣ་སྣ་ཚོགས་དང་། །རུས་པ་བཙའ་ཅན་རྡེལ་ནག་དགུ། དུག་རྫས་རྣམས་ཀྱིས་བཀང་ལ་བཞག །སྲབ་མདའ་དཀར་ནག་གཉིས་ཀྱང་འཐེན། །དེ་ནས་དགྲ་ཤ་སྟོན་འགྱེད་ལ། །བསྒྲལ་ཉ་མཐོ་གང་ཙམ་ཞིག་དགོས། །དེ་ནས་མནངས་བགོས་ཆ་ལག་ནི། །ཁྲབ་རྨོག་ཉ་མོ་སྟོང་རྫོང་གཅིག །བསེ་ཕུབ་
འཁོར་ལོ་གླིང་ཆེན་གཉིས། །སྟག་རས་གཟིག་རས་འཁོར་ལོ་གསུམ། །འོག་རྟའི་སྒ་སྲབ་བལ་སྟན་བཞི། །དམག་རྔ་སྟོང་གསུམ་སྒྲ་སྒྲོག་ལྔ། །དམག་དར་ཁྲ་བོ་གུ་ལིང་དྲུག །དམག་དུང་དཀར་མོ་རྒྱང་གྲགས་བདུན། །དམག་གླིང་སྙན་པའི་རྒྱ་གླིང་བརྒྱད། །འགྲོས་མཁན་བཅུ་གསུམ་འོག་རྟ་དགུ། །གསེར་ཉི་མ་བཅུ་གསུམ་ཙམ་དང་བཅུ། །དངུལ་ཟླ་བ་བཅུ་གསུམ་ཙམ་དང་བཅུ་གཅིག །གཡུ་ཕུག་རོན་ཙམ་དང་བཅུ་གཉིས། །བུ་ཕོ་རྒྱུད་རྟ་ནོར་ལུག་དང་བཅུ་གསུམ། །མོ་རྒྱུད་ཁང་ཞིང་མཛོ་དང་བཅུ་བཞི། །རྟ་ཆེ་ཆུང་ཉི་ཤུ་ལྔ་དང་བཅོ་ལྔ། །དྲེལ་ཆེ་ཆུང་ཉི་ཤུ་ལྔ་དང་བཅུ་དྲུག །མཛོ་ཆེ་ཆུང་དྲུག་གསུམ་བཅོ་བརྒྱད་དང་བཅུ་བདུན། །ནོར་ཆེ་ཆུང་སོ་ལྔ་དང་བཅོ་བརྒྱད། །ལུག་བཞི་བཅུ་ཞེ་ལྔ་དང་བཅུ་དགུ། །ར་བཞི་བརྒྱ་རྩ་བཞི་དང་ཉི་ཤུ། །ཕག་གཉིས་བརྒྱ་ལྔ་བཅུ་དང་རྩ་གཅིག །རྔ་མོང་མ་ཧེ་སུམ་བརྒྱ་དང་ཉེར་གཉིས། །ལྷ་རྟ་ལྷ་གཡག་ལུག་དང་ཉེར་གསུམ། །དེ་རྣམས་པར་བཏབ་བཟང་པོ་བྱ། །གནངས་བགོས་དུས་སུ་ཕྱོགས་མཚམས་མཆོད། །ཁྱད་པར་གཏོ་ནག་དགྲ་ཟོར་འདི། །གོང་གི་རྫས་རྣམས་བཤད་པ་ལྟར། །མ་ཚང་མེད་པར་བསགས་
དགོས་སོ། །དང་པོ་བླ་མ་ཡི་དམ་མཁའ་འགྲོ་ཆོས་སྐྱོང་རྣམས། །གཞུང་ལྟར་མཆོད་ཕྲེང་ཚོགས་མཆོད་བསྐང་བསྡུས་དང་། །སྤྱི་བསྐུལ་སྒོས་བསྐུལ་བསྒྲལ་ལས་ཞལ་སྟབས་བྱ། བཟློག་གཞུང་བཟློག་ཕྲན་ལ་སོགས་ཅི་འགྲུབ་བྱ། །དེ་ནི་མཐོང་བ་བརྒྱུད་པ་ལྟར་དུའོ། །དེ་ནས་གཡག་རུ་གླང་གཟུགས་ཤིང་མི་རྣམས། །ཆུ་གཙང་ཆང་རྒོད་ཁྲག་རྒོད་བྲན་བྱས་ནས། །ཨོཾ་སྭ་བྷ་ཝས་སྦྱངས། གཏོ་ནག་མི་དམིགས་པ་སྟོང་པའི་ངང་ལས། སོགས། དབྱེར་མེད་དུ་ཐིམ་པར་གྱུར། རྗེ་བཙུན་རྩ་བ་དང་། སོགས་ནས་འགུགས་གཞུག་ལན་དགུ་བྱ། །གཟུ་དཔང་གྱེར་ནས་ཡི་དམ་ཆོས་སྐྱོང་དང་། །བཀའ་སྲུང་རྣམས་ཀྱི་ཆད་སྔགས་དྲག་ཏུ་བཟླས། །དེ་ནས་དམིགས་པ་ཐན་ལྟས་ཁྲ་འགྱེད་ལྟར། །བདག་ཉིད་ཡི་དམ་རྗེ་བསྒོམ་པ་ལ། །དགྲ་ཆོས་བསྡུས་པ་དགྲ་བགེགས་ཚར་གཅོད་ནི། །ཧཱུྃ། མ་གཡེལ་སོགས། མཚམས་སུ་སྤྲད་ཤེས་བྱ། བཅོལ་བའི་ཕྲིན་ལས་འགྲུབ་པར་མཛོད། །ཅེས་གཏོར་མ་མདོས་ནང་དུ་མཆོད། སྲུང་མ་རྣམས་ཀྱི་སྤྲུལ་པ་གྲངས་མེད་སོགས་ནས་བསམ་ཞིང་། ཧཱུྃ། མ་གཡེལ་ཆོས་སྐྱོང་སྲུང་མའི་ཚོགས། །སོགས་ནས། ཐལ་བ་རྡུལ་དུ་བརླག་པར་མཛོད། །སྲུང་མ་རྣམས་ཀྱིས་དགྲ་ཤ་ཟོ། །སོགས་ནས། སྒྲུབ་པར་
བསམ་ཞིང་འདི་སྐད་དོ། །ཧཱུྃ། ཡི་དམ་ལྷ་ཚོགས་གཏོར་མ་འདི་བཞེས་ལ། །སོགས་ནས། ཁས་བླངས་དུས་ལ་བབ་བོ་ས་མ་ཡ། །སོགས་ནས། ཁཱ་ཧི་ཤྲཱི་མ་ཧཱ་ཀཱ་ལ་ནས༔ དགྲ་བགེགས་སྒྲེ་མཱ་ར་ཡ་ཕཊ༔ མགོན་པོ་སྤྱིའི་ཟད་སྔགས་བཟླས་སོ། །ཧཱུྃ། མ་གཡེལ་སྲུང་མ་མཐུ་རྩལ་ཅན། །སོགས་ནས། རང་ཉིད་ཡི་དམ་རྗེ་བསྒོམ། མདུན་གྱི་ཆོས་སྐྱོང་དང་ལྷ་ཀླུ་གཉན་གྱི་དམག་ཚོགས་ཐམས་ཅད་དགྲ་ཡུལ་དུ་སོགས་ནས་རྡུལ་དུ་བརླག་པར་བསམས་ལ། ཚར་རེ་ཐོན་པ་དང་། བྷྱོས་གདབ་ནས། བདག་དང་ཡོན་བདག་རྣམས་ཀྱིས་དར་ནག་གདབ་ལ། ཧཱུྃ། ང་ནི་སྔགས་འཆང་རྒྱལ་པོ་ཡིན། །སོགས་ནས། བ་ལིང་ཏ་ཁཱ་ཧི། གཏོར་མ་དུག་རླངས་མཚོན་ཆ་མེ་དཔུང་དུ་བསམས་ལ། ཆོས་སྐྱོང་སྲུང་མ་ལྷ་འདྲེའི་དམག་དང་བཅས་པ་རྣམས་ཅི་ལྟ་བ་བཞིན་དུ་དགྲ་བགེགས་ཀྱི་སྟེང་དུ་སོང་ནས་ཐལ་བ་རྡུལ་དུ་བརླག་པར་བསྒོམ། ཐན་དམག་བྱེ་བ་ས་ཡ་རྣམས་དགྲ་བོའི་ཁྱིམ་དུ་ཐན་དང་ལྟས་ངན་མི་སྡུག་སྣ་ཚོགས་ཀྱིས་གང་བར་རང་རང་གི་དམག་དཔུང་དཔག་ཏུ་མེད་པས་དགྲ་བོ་ལ་ལྟས་ངན་གྱིས་ཆར་ཕབ་པར་བསམས་ལ། འདི་ཡན་གལ་ཆེ་ཆུང་དང་བསྟུན་ལ་རབ་བརྒྱ། འབྲིང་དགུ། ཐ་མ་གསུམ་ལས་མི་ཉུང་བར་
བྱའོ། ༈ །གསང་སྔགས་དགྲ་ཆོས་དགྲ་བྲུབ་འདོན་ཆ་འདི་ལྟར་རོ། །ཨོཾ་སྭ་བྷ་ཝས་སྦྱངས། གཏོ་ནག་མི་དམིགས་པ་སྟོང་པའི་ངང་ལས། སོགས་ནས། འགུགས་གཞུག་ཅི་མང་དང་། གཟུ་དཔང་བྱ། མཚམས་རྣམས་ཡིག་ཆུང་ལྟར་ཤེས་པར་བྱ་དགོས་སོ། །ཤ་རུ་ཁྲམ་འདེབས་ལ། དགྲ་ལ་ཁྲམ་ཁ་ད་བསྒྱུར་ཅིག །དེ་ཡན་ཆད་ཚར་དགུའམ། བདུན་ནམ། ལྔའམ་གསུམ་མམ་གང་མང་བྱའོ།། ༈ དེ་ནས་དགྲ་དཔུང་གཅོད་པ་མཚོན་ཆའི་སྒྱོགས་ཆེན་ལ། ཁང་ཐོག་ཏུ་བསང་རྒྱས་པར་བཏང་། བསང་རབས་ལོངས་སྐབས་དང་བསྟུན། བསང་མཆོད་སོང་བའི་རྗེས་ལ་འདི་སྐད་དོ།། ད་ནི་ལྷ་ལ་བསང་མཆོད་འབུལ་བ་ནི། །སོགས་ཡིག་ཆུང་ལྟར་གྱི་ཕྱག་ལེན་མ་འཇུག་པར་བྱ། དཔུང་པ་མྱུར་དུ་ད་ཆོག་ཅིག །དེ་ནས་ཐམས་ཅད་ཀྱིས་མདའ་རུབ་གྲི་རུབ་བྱས་ལ་འཇག་རྟ་ལ་ཁ་ལོས་ལག་ལོས་བྱ། དུར་རྡོ། སྲབ་མདའ་ནག་པོ་དང་། རྡོ་ནག་དགུ་དང་། རུས་པ་བཙའ་ཅན་དེ་རྣམས་འཇག་རྟ་ལ་བཀལ་ནས་ཁ་ཕྱིར་བསྟན་ལ་བཞག་གོ དགྲ་ཤ་སྟོན་འགྱེད་ནི། བསྒྲལ་ཉ་གཏུབ་ནས་ཕྱོགས་བཞིར་མཆོད། ཀྱཻ། དགྲ་བོ་སོད་ནས་དགྲ་མགོ་ཆོད། །སོགས་ནས། །ཀི་བསྲོ་ཆའོ་ལྷ་རྒྱལ་ལོ།། ༈ དགྲ་བླའི་གནང་བསྒོས་ནི། རྟེན་འབྲེལ་ལེགས་ཚོགས་ངོ་མཚར་དགའ་སྟོན། ལྷ་མི་ཐམས་ཅད་ཀྱིས་མནངས་བགོས་པར་བསམ་ལ། པར་བཏབ་རྣམས་མ་ནོར་བར་འདོན་ཚིག་དང་བསྟུན་ལ་
ནམ་མཁའ་ལ་མཆོད། ཀྱཻ། སྔོན་གྱི་བསྐལ་པའི་དང་པོ་ལ། །སོགས་ནས། ཀི་བསྭོ་ཆའོ་ལྷ་རྒྱལ་ལོ། །རྟེན་འབྲེལ་གནད་ནི་ཆེ་བའི་ཕྱིར། །གནང་བགོས་མེད་ན་དགྲ་བླ་སྐྱེངས། །འདི་ནི་ངེས་པར་གལ་ཆེའོ། ༈ །དེ་ནས་ལྷ་གཞུང་དངོས་གྲུབ་ལེན། །དཀར་གཏོར་བསྔོས་ནས་བཀུག་གཞུག་བྱ། །སྤྲོ་ན་བསྐུལ་པ་ཡོངས་རྫོགས་འདོན། །ཆད་ཐོ་འདོན་ནས་དྲག་སྔགས་བཟླས། །ཕྱི་རོལ་ཕྱོགས་གཙང་གཏོར་བཤམས་བྱ། །སྐབས་འདིར་གསེར་སྐྱེམས་དཀར་གཏོར་དང་། །ར་དགེ་སྲིན་མོཟ་ལམ་བྱ། །དགྲ་ཆོས་གཟེ་མ་ཕུ་འདེབས་དང་། །གླང་ཆེན་སྣ་བསྒྱུར་དགྲ་དཔུང་གཅོག་པ་ལས། །ཐལ་མོ་བརྡབ་ལ་འདི་སྐད་དོ།། ཧཱུྃ། བླ་མ་ཡི་དམ་ཆོས་སྐྱོང་དང་། །སོགས་ནས། ཨུཙྪ་ཏ་ཡ་ཕཊ༔ ཆུ་བོ་ཆེན་པོའི་ནང་དུ་འཕང་། ཡོན་མཆོད་ཐམས་ཅད་ཀྱིས་བསྒྱུར་ཆོས་ཐལ་མོ་བརྡབ། སྤྲོས་བཅས་དར་ནག་ཕྱར་ནས་བཟློག་གཞུང་ལྟར་བྱའོ། །དེ་ནས། ཧཱུྃ། ད་ནི་ཆོས་ཆོས་དགྲ་ལ་ཆོས། །སོགས་ནས། བཟློག་ཅིག་བསྒྱུར་ཅིག་ས་མ་ཡ། །ཤིང་མི་ཁྲག་དྲོད་གཡག་རུ་བཤམས་ལ། མདའ་ཟོར་མཚོན་ཆ་སྣ་ཚོགས་ཕྱར་ནས། ཧཱུྃ། གཞུ་ནི་སྲིན་པོ་ཛྭ་ལ་རཾ། །སོགས་ནས། དྲག་སྔགས་བསད་སྔགས་དྲག་ཏུ་བཟླས་ནས་འཕོང་ལ་བརྡེག །དགྲ་བགེགས་སྲོག་ལ་མ་རཱ་ཡ་རྦད། ༈ དེ་ནས་དགྲ་ཆོས་གཏོར་མ་དང་། །རྔ་མོང་དྲེལ་ཕག་ཐན་གཟུགས་རྣམས། །
གླང་ཆེན། ཤ་ཤིང་ནག་མི་གཟུགས། ཁྲག་དྲོད་ཐམས་ཅད་དགྲ་ཕྱོགས་སུ་འཕང་ནས་དམོད་བཅོལ་རྒྱས་པ་འདོན། དེ་ནས་བརྟན་མ་སྐྱོང་། འགུགས་གཞུགས་བྱ། གཡག་རུ་མནན། གཏད་ཁྲམ་འདོན། རྟ་བྲོ་ནི། །དམ་ཚིག་འདི་སྐད་བསྒྲག་གོ། ཧཱུྃ། དཀོན་མཆོག་གསུམ་གྱི་བདེན་པ་དང་། །སོགས་ནས། ཙཱ་བྷ་ཡ་ནན་ནན། དགྲ་བྱུབ་ལས། ཧཱུྃ། ང་ནི་ཁྲོ་རྒྱལ་ཆེན་པོ་སྟེ། །སོགས་ནས། མཱ་ར་ཡ་ནན། དགྲ་མནན་དགོས་པ་མེད་ན་གཏོར་གཞོང་འོག་ཏུ་དགྲ་གཟུགས་མནན་པ་ཙམ་གྱིས་ཆོག །སྤྲོ་ན་གལ་ཆེན་དགྲ་མནན་བྱེད་ན། ས་སྣ། རི་སྣ་ས་ཟུར་གཉིས་བྱང་དུ་བལྟ་བ། ས་གཉའ་ནོན་ཆེ་བའི་ས་དགྲ་དེ་རྣམས་སུ་མནན། བཅའ་ཏི་ནག་པོ་དང་། མ་ཧཱ་བ་ལ། སོགས་མནན་པ་རྒྱས་པ་གཞན་ནས་བྱུང་བ་སྟེ། སྤྱི་མཚམས་ལ་དེ་ཡིས་ཆོག་པ་ཡིན། ཤིས་བརྗོད་མཐའ་སྡུད་ལ་སོགས་འགྲུབ་བར་བྱ། ཕན་ཡོན་མི་ཁ་དགྲ་རྐུན་ཇག་པས་ལྡང་། །ཁ་མཆུ་གླེང་གཞི་རྒྱུན་ཆད་མེད་པར་འོང་། །དེ་ལ་མི་བྱེད་ཀ་མེད་འདི་དྲག་ཆེ། །ཕན་ངེས་ལག་ཏུ་བླང་བའི་མྱོང་བ་ཡོད། །སྔོན་ཚེ་གཏོ་མཁན་རྣམས་ཀྱིས་གོ་ལོག་ནས། །སྔར་གྱི་ཁ་དཔེ་ལྟ་བུར་བཅའ་ཚོགས་བྱེད། །ཕྱིས་ནས་ཡི་གེར་མཐེབ་ཁ་མ་ཚང་། །གཏོ་མཁན་རྣམས་ལ་ཁག་མེད་ལྟ་བུ་ཡིན། །དེ་ལ་མ་བཟོད་རང་ཉིད་ལག་ལེན་དང་། །ཁྱད་པར་བསྟན་འཛིན་སྔགས་འཆང་མགོན་ནག་ལ། །ཞིབ་པར་སྔགས་འཆང་ཁྱེད་ལ་ཞལ་ཁྲིད་བྱེད། །མང་དུ་མ་སྤེལ་
མཐུ་དཔེ་ལྟ་བུ་ཡིན། །དེ་སྐད་སྨྲས་སོ་རྣལ་འབྱོར་ཨ་རཱ་གས། འགྲོ་ལ་ཕན་སེམས་འགྲུབ་པའི་བཀྲ་ཤིས་ཤོག། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།