དགྲ་ཆོས་བསྡུས་པ་དགྲ་བགེགས་ཚར་གཅོད་ཀྱི་བསྐྱེད་ཆོག་སྤྱན་འདྲེན་དྲག་པོ།
དགྲ་ཆོས་བསྡུས་པ་དགྲ་བགེགས་ཚར་གཅོད་ཀྱི་བསྐྱེད་ཆོག་སྤྱན་འདྲེན་དྲག་པོ་བཞུགས་སོ། །དཔལ་ལྡན་མགོན་ལ་ཕྱག་འཚལ་ལོ། འདིར་དགྲ་བྱུང་ངམ། ནོར་ཤོར་རམ། གཞན་དང་འགྲས་སམ། ནམ་དགོས་པའི་དུས་སུ། བཤོས་བུ་གཞུང་བཞིན་བཤམས་ལ། གཤིན་ཁང་བསྐྱེད་པ་ནི་འདི་སྐད་དོ། །རང་གི་ཕར་མདུན། སྲུང་མ་རྣམས་ཀྱི་ཚུར་མདུན་དུ། གྲུ་གསུམ་དེ་ལྕགས་ཀྱི་ཁང་པ་ཟུར་གསུམ་པ་ནག་ལ་གཏིང་ཟབ་པ་སྒོ་མེད་པ་གཅིག་གི་ནང་དུ། དགྲ་བགེགས་ཐམས་ཅད་དངོས་སུ་བསྐྱེད་པའི་སྟེང་དུ། མགོན་པོའི་ཐུགས་ཀ་ནས་ཕཊཙགཅིག་སྤྲོས་པས་བདུད་མགོན་སྲོག་གཅོད་ནག་པོ། གཡས་སོག་ལེ་གཡོན་ཐོད་ཁྲག་ཐོགས་པ། ལུས་ལ་བདུད་སྟ་རྣོ་ཡམ་ཡམ་པས་བརྒྱན་པ། ཆིབས་སུ་བདུད་གླང་ནག་པོ་ལ་བཅིབས་པ། དེའི་འཁོར་དུ་རེ་འབྱམས་མཆེད་དགུ། ལོ་བདུད་རེ་འབྱམས་བཅུ་གཉིས། ལོའི་རེ་འབྱམས་དྲུག་ཅུ་རྩ་བཞི། ལྷ་འདྲེ་གྲི་བོའི་དམག་ཚོགས། སྲིན་ཆེན་གྱི་གདོན་ཚོགས་བདུད་པོ་ཐོད་ཁུར། མ་མོ་ནད་བདག །ཐེའུ་རང་འགོང་པོ་ཟ་བྱེད། གཤིན་རྗེ་ལ་སོགས་དཔག་ཏུ་མེད་པས་བསྐོར་བ། དགྲ་བགེགས་བསད་བཅད་བྱེད་པའི་
ཤན་པ་ལ་རྔམས་ཤིང་ཡོད་པར་བསྒོམ། ཡེ་ཤེས་པ་བསྟིམ། མཆོད་གཏོར་བསྔོ། ཕྲིན་ལས་བཅོལ་བའི་དུས་ལ། སྤྲུལ་པ་ཕོ་ཉ་མང་པོ་གདབ་ལ། སྲུང་མ་རྣམས་མྱུར་དུ་བསྐུལ་ཞིང་ཆད་པ་ནི་འདི་སྐད་དོ། །ཧཱུྃ། །སྔོན་ཚེ་དངོས་གྲུབ་སྒྲུབ་པའི་ཚེ། །བྱིན་རླབས་ཡ་མཚན་ཆེ་བའི་གནས། །བྱ་རྒོད་ཕུང་པོའི་རི་ཡི་དྲུང་། །འོད་མའི་ཚལ་གྱི་བྱང་གི་གནས། །ཀང་ཀ་ཆེན་པོའི་ལྷོ་ཕྱོགས་ན། །ནཱ་ལེནྡྲ་ཡི་ཤར་ཕྱོགས་ན། །དུར་ཁྲོད་ཆེན་པོ་བསིལ་བའི་ཚལ། །ཤི་རི་ཤ་དང་ཨ་ཤོ་ཀ །ཨུ་དུམ་ཝ་ར་ནྱ་གྲོ་ཏ། །ཤེལ་དང་མེ་ཏོག་ཚལ་གྱིས་བརྒྱན། །ཀེང་རུས་ཐོད་པའི་སྐུ་མཁར་ནས། །ནག་པོ་ཆེན་པོ་སྤྱན་འདྲེན་ནས། །ཆོས་སྐྱོང་ཕོ་བྲང་དམ་པ་འདིར། །ཐུགས་རྗེའི་དབང་གིས་གཤེགས་སུ་གསོལ། །བྱིན་གྱིས་རླབས་པའི་གནས་མཆོག་འདིར། །བསྟན་པ་བཤིག་བྱེད་སྒྲོལ་བའི་ཕྱིར། །ནག་པོ་ཆེན་པོ་གཤེགས་སུ་གསོལ། །ཤ་ཁྲག་དམར་གྱི་བདུད་རྩི་འདི། །མ་ཧཱ་ཀཱ་ལའི་ཐུགས་དམ་བསྐང་། །ཡང་གཅིག་སྐུ་བཞེངས་གཤེགས་སུ་གསོལ། །མཐིང་ནག་གྲུ་གསུམ་དཀྱིལ་འཁོར་འདིར། །ཕུང་བྱེད་ནག་པོ་སྤྱན་འདྲེན་ནོ། །ཁྲག་འཐུང་ཆེན་པོ་གཤེགས་སུ་གསོལ། །ཧཱུྃ། ཆོས་
དབྱིངས་མི་འགྱུར་ཀློང་དཀྱིལ་ནས། །དམ་ཅན་ནག་པོ་སྤྱན་འདྲེན་ནོ། །ལྷ་ཆེན་དཔལ་འབར་གཤེགས་སུ་གསོལ། །ཧཱུྃ། དད་པ་དང་ནི་དམ་ཚིག་གིས། །ལེགས་ལྡན་ནག་པོ་སྤྱན་འདྲེན་ནོ། །བསྟན་སྲུང་མགོན་པོ་གཤེགས་སུ་གསོལ། །ཧཱུྃ། བཅོམ་ལྡན་སངས་རྒྱས་སྤྱན་སྔ་རུ། །བསྟན་པ་སྲུང་བར་ཞལ་བཞེས་པའི། །བྱ་རོག་གདོང་ཅན་གཤེགས་སུ་གསོལ། །ནག་པོ་སྟོང་དང་ཤ་ཟ་འབུམ། །མ་མོ་བྱེ་བའི་དམག་ཚོགས་ཀུན། །བདེ་གཤེགས་སྤྲུལ་པ་གཤེགས་སུ་གསོལ། །སངས་རྒྱས་རྗེས་འཇུག་དམ་ཚིག་ཅན། །རྣལ་འབྱོར་བདག་གིས་སྤྱན་འདྲེན་ནས། །བསྟན་པ་རྒྱས་མཛད་གཤེགས་སུ་གསོལ། །དྲག་པོའི་ལས་རྣམས་བསྒྲུབ་པའི་ཕྱིར། །སྡེ་བརྒྱད་མགོན་པོ་སྤྱན་འདྲེན་ན། །སྤྱན་འདྲེན་གནས་འདིར་གཤེགས་སུ་གསོལ། །ཧཱུྃ། རྡོ་རྗེ་འཆང་གི་སྤྱན་སྔ་རུ། །ཇི་ལྟར་ཁས་བླངས་དམ་བཅས་པའི། །ཁྲག་འཐུང་ཆེན་པོ་གཤེགས་སུ་གསོལ། །ནག་པོ་ཆེན་པོ་དྲག་ཤུལ་ཅན། །བྱ་རོག་མཚན་ཅན་སྟོབས་པོ་ཆེ། །ཁྱོད་ཀྱིས་མི་འདུལ་གང་ཡང་མེད། །སྔོན་གྱི་ཐུགས་དམ་དགོངས་མཛོད་ལ། །ཧཱུྃ། དད་པ་
དང་ནི་དམ་ཚིག་གིས། །ཚུར་གཤེགས་ཚུར་བྱོན་ནག་པོ་ཆེ། །རེ་འབྱམས་བྱེ་བ་འཁོར་དང་བཅས། །དགྲ་བོ་བསྒྲལ་ཕྱིར་གཤེགས་སུ་གསོལ། །ཕུང་སྲི་ནག་པོ་འཁོར་དང་བཅས། །དགྲ་ལ་ལྟས་ངན་འགྱེད་པའི་ཕྱིར། །གྲུ་གསུམ་གནས་འདིར་གཤེགས་སུ་གསོལ། །དགྲ་ལ་ཕུང་སྲི་འགྱེད་པའི་ཕྱིར། །ཕུང་བདུད་བཅོ་བརྒྱད་གཤེགས་སུ་གསོལ། །དགྲ་ལ་ཐན་དང་ཕུང་འདྲེ་ཐོངས། །བཅོལ་བའི་ཕྲིན་ལས་མྱུར་དུ་བབས། །ཨོཾ་བཛྲ་མ་ཧཱ་ཀཱ་ལ་ཡ། ས་མ་ཡཱ། ཛཿཧཱུྃ་བཾ་ཧོ༔ མཆོད་འབུལ་བྱ། འགུགས་འདྲེན་བྱ། སྲུང་མ་རྣམས་ལ་མྱུར་དུ་དགྲ་ལ་རྦད་དོ། །དེ་ནས་གཞུང་གི། ཧཱུྃ། མ་གཡེལ་མ་གཡེལ་སྲུང་མའི་ཚོགས། སོགས། ཚར་གྲངས་ཅི་མང་བསོགས། ཞེས་པ་འདི་ཡང་རཱ་ག་ཨ་སྱས་སྦྱར་བའོ། །མངྒ་ལཾ།། །།