དགྲ་འདྲེའི་ལིངྒ་བྲི་གྱེར་སྔོན་འགྲོ།
དགྲ་འདྲེའི་ལིངྒ་བྲི་གྱེར་སྔོན་འགྲོ་བཞུགས་སོ། །དཔལ་ནག་པོ་ཆེན་པོ་ལ་ཕྱག་འཚལ་ལོ། །དགྲ་འདྲེའི་ལིདྨ་བྲི་བའི་སྔོན་འགྲོ་དངོས་གཞི་ནི། གཞན་ཡང་ལིང་ཁྲུས་མན་ངག་ལྟར་བྱའོ། །རང་གི་མདུན་དུ་དུག་ཤོག་མཐོ་གང་སོར་བཞི་ལ། གྲི་ཁྲག །ཁྱི་ནག །ཤ་ཕོ་གྲིར་ཤིའི་ཁྲག །ཡུགས་སའི་མངལ་ཁྲག །ཕོ་སྤྱང་ཁྲག། །ཁྲག་སྣ། དུག་སྣ་ཚོགས་སྣག་ཚ་ལ་སྦྱར་ལ་ལིངྒ་བྲིའོ། །སྨྱུ་གུ་ནི་གྲི་ལྕགས་སམ། གྲི་སྡུག་གམ། སྐྱེར་ནག་དུག་ཤིང་ལ་དུག་སྣ་ཁྲག་སྣའི་ངར་གླུད་ལ་བྲིའོ། །ཕུང་རེ་ལ་ལག་གདན་བྱས། ཚོན་སྐུད་བྱད་ཐག་སྔོ་དམར་དེ་རྣམས་བསགས་ལ། དང་པོ་དཀར་ཕྱོགས་རྣམས་ལིངྒར་མི་འཇུག་པའི་གསེར་སྐྱེམས་བཤམས་ལ་འབུལ་ལོ། །དམ་ཉམས་དགྲ་བགེགས་སྲི་ལིང་བྲི་བ་ནི། དུར་ཁྲོད་གནས་ཁང་གང་རུང་དུ། འཛབ་དང་གཤེད་ཆས་འཚོགས་པར་བསགས། གཞི་མ་ནག་པོའི་སྟེང་དུ་ལིངྒ་བྲི་བའི་རྫས་རྣམས་བཀོད། རང་ཉིད་ལྷའི་ང་རྒྱལ་བསྒོམ་ལ། ཧཱུྃ། ང་ནི་འཇམ་དཔལ་གཤིན་རྗེའི་གཤེད། །སྐུ་ཡི་ཆ་ལུགས་ཟ་བྱེད་རྔམས་ལ་འཇིགས། །གསུང་གི་ང་རོས་ཧཱུྃ་དང་ཕཊསྒྲ་སྒྲོག །ཐུགས་ནི་ཆོས་ཉིད་ཞི་བའི་ངང་ལས་མ་གཡོས་ཀྱང་། །དགྲ་བགེགས་འདུལ་ཕྱིར་དམ་ཉམས་ལིངྒ་བྲི། །དེ་ནས་བགེགས་ལ་བཀའ་བསྒོ་བ་ནི། ཧཱུྃ། དམ་ཉམས་གཤེད་པོ་ལས་ངན་ཁྱོད། །སྔོན་གྱི་ལས་ངན་དྲན་
གྱིས་ལ། །སྔོན་གྱི་སངས་རྒྱས་བཀའ་མ་བཅག །ད་ལྟ་བདག་གི་དམ་མ་བཀྲལ། །ཕྱི་རབས་རྣལ་འབྱོར་སུན་མ་ཕྱུང་། །དེ་ནས་ལིངྒ་བྲི་བའི་རྫས་སོགས་བསགས་པ་ནི། དམ་ཉམས་གཤེད་པོ་ལས་ངན་ཁྱོད། །བདེ་ཆེན་ལམ་ལ་འགོད་བསམ་ན། །ལིངྒ་བྲི་བའི་གདན་ས་མེད། །ལས་ངན་སྒྲིབ་པ་སྦྱངས་བསམ་ན། །ལིངྒ་བྲི་བའི་ཤོག་བུ་མེད། །ཐུགས་རྗེས་ལྕགས་ཀྱུས་འཛིན་བསམ་ན། །ལིངྒ་བྲི་བའི་སྨྱུ་གུ་མེད། །ཐར་པའི་ལམ་ལ་ཁྲིད་བསམ་ན། །ལིངྒ་བྲི་བའི་སྣག་ཚ་མེད། །གཞལ་ཡས་ཁང་དུ་བཀོད་བསམ་ཚུན། །ལིངྒ་བཞུགས་པའི་ཕོ་བྲང་མེད། །ཁྱི་ཐོད་ར་ཐོད་ཕག་ཐོད་གསུམ། །ལིངྒ་འདུག་པའི་གནས་ས་བཟང་། །དར་ཚོན་སྣ་ལྔ་གདུགས་ལྟར་ཕུབ། །དར་ནག་གཡབ་མོ་སྤྲིན་ལྟར་གཏིབས། །སྔོན་བཀའ་བརྒྱུད་གོང་མའི་བཀའ་མ་བཅག །ད་ཨ་ཙི་མ་ན་ཡ་རེ་ཆ། །ཁྱོད་སྔོན་གྱི་ལས་ངན་དྲན་པར་གྱིས། །དེ་ནས་རྫས་ལག་ཏུ་ཐོགས་ལ་བྲི་བ་ནི། ད་ལིངྒ་བྲི་བའི་གདན་ས་ཡོད། །མོན་རས་སྨུག་པོ་ཁ་གང་ལ། །ལིངྒ་བྲི་བའི་གདན་ས་བྱས། །དམ་ཉམས་གཤེད་པོ་ལས་ངན་ཁྱོད། །ཁྱོད་བདེ་ཆེན་ལམ་ལ་འགོད་པའི་རྟགས། །
ལིངྒ་བྲི་བའི་ཤོག་བུ་ཡོད། །དུག་ཤོག་དུག་ལང་མཐོ་གང་ལ། །ལིངྒ་བྲི་བའི་ཤོག་བུ་བྱས། །དམ་ཉམས་གཤེད་པོ་ལས་ངན་ཁྱོད། །ཁྱོད་ལས་ངན་སྒྲིབ་པ་སྦྱངས་བའི་རྟགས། །ད་ལིངྒ་བྲི་བའི་སྨྱུ་གུ་ཡོད། །སྐྱེས་པ་དར་མའི་གྲི་རུས་ལ། །ལིངྒ་བྲི་བའི་སྨྱུ་གུ་བྱས། །དམ་ཉམས་གཤེད་པོ་ལས་ངན་ཁྱོད། །ཁྱོད་ཐུགས་རྗེས་ལྕགས་ཀྱུས་འཛིན་པའི་རྟགས། །ད་ལིངྒ་བྲི་བའི་སྣག་ཚ་ཡོད། །ཁྱི་ཁྲག་ར་ཁྲག་ཕག་ཁྲག་དང་། །ལིངྒ་བྲི་བའི་སྣག་ཚ་བྱས། །དམ་ཉམས་གཤེད་པོ་ལས་ངན་ཁྱོད། །ཁྱོད་ཐར་པའི་ལམ་ལ་ཁྲིད་པའི་རྟགས། །ད་ལིངྒ་བྲི་བའི་ཕོ་བྲང་ཡོད། །གྲུ་གསུམ་མཐིང་ནག་ཧོམ་ཁུང་དུ། །ལིངྒ་འདུག་པའི་ཕོ་བྲང་བྱས། །དམ་ཉམས་གཤེད་པོ་ལས་ངན་ཁྱོད། །ཁྱོད་གཞལ་ཡས་ཁང་དུ་བཀོད་པའི་རྟགས། །ཕྱི་ནས་ལྕགས་རི་མུ་ཁྱུད་བསྐོར། །གཤེད་པོ་ལས་ངན་དུག་ལ་དགའ། །དུག་ཤིང་སྣ་དགུའི་རྩང་གིས་བསྐོར། །གཤེད་པོ་ལས་ངན་མུ་ནག་དགའ། །ཟངས་ནག་མགོ་ལ་བཀབ་པ་དེ། །གཤེད་མ་མུན་ཁང་གཏིབ་པའི་རྟགས། །གཤེད་པོ་ལས་ངན་མཚོན་ལ་དགའ། །གདུག་པའི་མདའ་
གསུམ་བཙུགས་པ་དེ། །གཤེད་ཀྱི་འབྲོས་ལམ་གཅོད་པའི་རྟགས། །ཞེས་གསེར་སྐྱེམས་དང་གཏོར་མ་བཤམས་ལ་འདི་སྐད་དོ། །ཧཱུྃ། ང་ནི་དཔལ་ཆེན་ཧེ་རུ་ཀ །ལྷ་ཀླུ་གཞི་བདག་དཀར་ཕྱོགས་དང་། །ལྷ་དང་མེ་བདག་གཤིན་རྗེ་དང་། །སྲིན་པོ་ཀླུ་དང་རླུང་ལྷ་དང་། །གནོད་སྦྱིན་འབྱུང་པོ་གཟའ་སྐར་དང་། །ལྟོ་འཕྱེ་གྲུལ་བུམ་མིའམ་ཅི། །མཁའ་རྒྱུ་ས་བདག་ལ་སོགས་རྣམས། །ཐམས་ཅད་མ་ལུས་ང་ལ་ཉོན། །ངས་ཉེས་བྱེད་ལིངྒ་བྲི་བ་ལ། །ཉེས་མེད་ཀྱི་ཕྱོགས་སྐྱོང་ས་བདག་རྣམས། །མིང་མེད་མི་ལ་མ་ཞེན་ཅིག །རུས་མེད་རུས་ལ་མ་ཞེན་ཅིག །ཡིད་མེད་ཡིད་ལ་མ་འཇུག་ཅིག །བླ་མེད་བླ་ལ་མ་འཁོར་ཅིག །གཟུགས་མེད་གཟུགས་ལ་མ་ཆགས་ཤིག །ཁྱེད་རྣམས་ལིངྒ་འདི་ལ་ཞེན་པ་ན། །སྔགས་ཀྱིས་བསྐོར་ཞིང་ཕྱག་རྒྱས་བཅད། །ཁྲག་དང་དུག་གིས་མྱོས་སུ་འཇུག །ཐུན་གྱིས་བྲབ་ཅིང་ཕུར་པས་མནན། །འཆོར་མེད་ཧོམ་ཁུང་ནང་དུ་འཛུད། །མེ་ཡིས་བསྲེག་ཅིང་མཚོན་གྱིས་གཏུབ། །གསེར་སྐྱེམས་དམ་པ་འདི་བཞེས་ལ། །གཟུགས་དང་ལིངྒ་འདི་ལ་མ་འཇུག་ཅིག །ཅེས་གསེར་སྐྱེམས་དང་གཏོར་མ་མཆོད། ད་ལིངྒ་བྲི་བ་ནི། ཧཱུྃ། ང་ནི་
འཇམ་དཔལ་གཤིན་རྗེའི་གཤེད། །ལྷ་སྲིན་སྡེ་བརྒྱད་ལས་ལ་བསྐུལ། །དམ་ཉམས་དགྲ་བགེགས་གང་ཡིན་འདི། །གཟུགས་ནི་ལིངྒ་འདི་ལ་བྲི། །བླ་ནི་འཁོར་ལོ་འདི་ལ་བསྐོར། །མིང་ནི་བྱང་བུ་འདི་ལ་འདེབས། །ཉོན་ཅིག་ལས་ངན་གཤེད་པོ་ཁྱོད། །དེ་ཕྱིར་སྤྱི་ལིང་སྤྱི་བོའི་གཙུག་ནས་བྲི། །ད་ཕོ་ལིང་ཕྲག་པ་གཡས་ནས་བསྐོར། །མོ་ལིང་ཕྲག་པ་གཡོན་ནས་བསྐོད། །ཆུང་ལིང་རྐང་པ་གཡོན་ནས་བསྐོར། །དགྲ་ལིང་རྐང་པ་གཡས་ནས་བསྐོར། །འདྲེ་ལིང་འདོམས་ཀྱི་ཞབས་ནས་བྲི། །དབང་པོ་རྣམ་ལྔ་འདི་ལ་ཚང་། །སྤྱི་བོར་ཡི་གེ་ནན་གྱིས་མནན། །རྣམ་ཤེས་གནས་པ་སྙིང་ཡིན་ཏེ། །སྙིང་གར་ཡི་གེ་ཏྲི་ནཱཾ་བྲི། །ཡན་ལག་བཞི་ལ་ཛཿཧཱུྃ་དང་། །ཁཾ་ཧོ་ཡི་གེ་བྲི་བར་བྱས། །བརླ་དཔུང་བཞི་ལ་ཆག་བཞི་བྲི། །རྐང་མཐིལ་གཉིས་ལ་ཡཾ་གཉིས་བྲི། །རྐང་བཞི་ལྕགས་སྒྲོག་བསྡམས་པ་བྲི། །དེནས་གཟུ་དཔང་བྱ་བ་ནི། ཀྱཻ། གསོན་དང་ཡི་དམ་ལྷ་ཡི་ཚོགས། །ཉོན་ཅིག་འཇིག་རྟེན་དྲེགས་པའི་ཚོགས། །ང་ནི་མ་ལེན་མ་ཉེས་སོ། །དང་པོ་མ་ཉེས་ཁ་མ་ཉེས། །དེ་ནས་མ་ཉེས་སེམས་མ་ཉེས། །དེ་ནས་མ་ཉེས་
ལག་མ་ཉེས། །ང་མ་ཉེས་དཔང་པོ་དཀོན་མཆོག་བཞུགས། །དཀོན་མཆོག་དཔང་པོར་མི་བཞུགས་རྒྱུས། །ཕུགས་སོ་གཏད་ས་ལོགས་ན་མེད། །ཡི་དམ་ལྷ་ཚོགས་དཔང་པོར་བཞུགས། །ཡི་དམ་ལྷ་ཚོགས་དཔང་པོར་མི་བཞུགས་རྒྱུས། །གཟུ་བོ་བྱེད་མའི་ལོགས་ན་མེད། །མཁའ་འགྲོ་ཆོས་སྐྱོང་དཔང་པོར་མི་བཞུགས་རྒྱུས། །ཞལ་ལྕེ་གཅོད་མཁན་ལོགས་ན་མེད། །ལྷ་སྲིན་སྡེ་བརྒྱད་དཔང་པོར་མི་བཞུགས་རྒྱུས། །དྲང་ཤན་འབྱེད་མི་ལོགས་ན་མེད། །དམ་ཉམས་གཤེད་པོ་ལས་ངན་ཁྱོད། །སངས་རྒྱས་བསྟན་པ་གཉན་པོ་བཤིགས། །དཀོན་མཆོག་གསུམ་གྱི་དབུ་འཕང་སྨོད། །བླ་མ་དམ་པའི་སྐུ་ལ་བསྡོས། །གསང་སྔགས་ཟབ་མོའི་ཆོས་ལ་སྨད། །དམ་ཚིག་གཉན་པོ་ཁྱད་དུ་བསད། །དགེ་བ་བཅུ་པོ་རྒྱབ་ཏུ་བོར། །མི་དགེ་བཅུ་པོ་དང་དུ་བླངས། །ཕུག་གི་མི་ཡི་ཚེ་ལ་བརྐུས། །སྒོ་ཡི་ནོར་གྱི་སྲོག་ཀྱང་བཅད། །ཞིམ་མངར་ཟས་ཀྱི་བཅུད་ཀྱང་ཕྲོག །བདག་ལ་བྱིང་རྨུག་འཐིབ་གསུམ་བཏང་། །ཁྱོད་ལ་བྱས་པ་གཅིག་ཀྱང་མེད། །མ་ཐོག་མྱུར་དུ་གནས་འདིར་ཁུག །དེ་ནས་དཀོན་མཆོག་གསུམ་དང་བདེན་སྟོབས་རྒྱས་པར་བརྗོད་པའི་རྗེས་སུ། ན་
མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་ཀྱི་བཀའ་བདེན་པ་དང་། གསང་སྔགས་དང་། རིག་སྔགས་དང་། གཟུངས་སྔགས་དང་། སྙིང་པོ་དང་། ཏིང་ངེ་འཛིན་གྱི་བཀའ་བདེན་པ་དང་། བདེན་པ་ཆེན་པོའི་མཐུས་རྒེའི་རྐྱེན་ངན་དང་བར་གཅོད་ནད་འདྲེ་གཅོང་སྲི་སྲོག་གཅོད་དབུག་ལེན་ཟ་འདྲེ་ཤི་གཤེད་གཤེད་མར་གྱུར་པ་གསོན་བདུད་གཤིན་ལྕགས་རྣམས་གཟུགས་ལིངྒ་འདི་ལ་མྱུར་དུ་ཁུག་ཅིག །བཛྲ་ཨཾ་ཀུ་ཤ་ཛཿ རཏྣ་པ་ཤ་ཧཱུྃ༔ པདྨ་སྤོ་ཊ་ཐཾ༔ ཀརྨ་གྷནྡྷེ་ཧོ༔ ཛཿཧཱུྃ་བཾ་ཧོ༔ གཟུགས་ལིངྒ་དང་གཉིས་སུ་མེད་པར་གྱུར། །ཅེས་བརྗོད། ཡི་དམ་གྱི་ཐུགས་ཀ་ནས་འོད་ཟེར་འཕྲོས་པས། ཕོ་ཉ་ལས་མཁན་རྣམས་ལ་ཕོག་པས། ཐམས་ཅད་ཁྲོས་འཁྲུགས་ནས་དགྲ་བགེགས་གང་ཡིན་བཀུག་ནས་ལིངྒ་ལ་བསྟིམ། ༈ དེ་ནས་ལིངྒ་ཆས་ཞུགས་བྱས་ནས། ཚོན་སྐུད་སྣ་ལྔས་རྒྱ་གྲམ་དུ་བཅིང་། འཛབ་ཀྱི་ནང་དུ་བཞག་ལ་འདི་སྐད་དོ། །ཧཱུྃ། དམ་ཉམས་སྡིག་ཅན་ལས་ངན་ཁྱོད། །ཁྱོད་རུས་པ་ཞེ་སྡང་ཕ་ལས་བྱུང་། །ཤ་ཁྲག་འདོད་ཆགས་
མ་ལས་བྱུང་། །རིག་པ་གཏི་མུག་ལས་ལ་བྱུང་། །འཁོར་བ་མ་ཡི་མངལ་དུ་ཞུགས། །ཉོན་མོངས་ལྔ་ཕུང་གཟུགས་སུ་གྲུབ། །དུག་ལྔ་རྩད་ནས་བཅད་པའི་ཕྱིར། །གཟུགས་དང་ལིངྒ་བཅས་པ་བྱས། །རྣམ་ཤེས་བཀུག་ནས་གཟུགས་ལ་བསྟིམ། །ལྷ་དང་ཕྱེས་ནས་བྱད་དུ་བཅུག །དམ་ཉམས་སྡིག་ཅན་ལས་ངན་ཁྱོད། །ང་ཡི་མདུན་དུ་འདུག་པ་དེ། །ལས་ཀྱི་རླུང་གིས་དེད་པ་ཡིན། །བསྐལ་པའི་མུན་པས་བསུས་པ་ཡིན། །ལས་ཀྱི་རྣམ་སྨིན་དུ་བ་ཡིན། །ཕོ་ཉ་ལས་མཁན་བཀུག་པ་ཡིན། །ཐར་མེད་བཙོན་རར་ཚུད་པ་ཡིན། །དེ་ཕྱིར་ཉོན་ཅིག་ང་ལ་ཉོན། ༈ །ངས་ལིངྒའི་དཀྱིལ་འཁོར་མི་བཅའ་རྒྱུས། །ཁྱོད་ངན་སོང་གསུམ་དུ་སྐྱེ་བའི་དོགས། །ངས་ཕྱག་རྒྱའི་དྲྭ་བས་མི་བཅིང་རྒྱུས། །ཁྱོད་བཀའ་དང་དམ་ལ་འདའ་བའི་དོགས། །ངས་དུག་གསུམ་ཆུ་དང་མི་སྦྱར་རྒྱུས། །ཁྱོད་ལུས་ངག་ཡིད་གསུམ་མི་གུས་དོགས། །ངས་ཡེ་ཤེས་ཆད་པས་མི་བཅད་རྒྱུས། །ཁྱོད་དུག་ལྔའི་དབང་དུ་འགྲོ་བའི་དོགས། །ངས་དྲག་པོའི་ལས་ལ་མི་སྦྱར་རྒྱུས། །ཁྱོད་སྲོག་གཅོད་དབུགས་ལེན་བྱེད་པའི་དོགས། །ངས་རྣོན་པོ་རྩང་གིས་མི་བསྐོར་རྒྱུས། །ཁྱོད་
ལོག་པའི་ལམ་དུ་འཁྱམས་ཀྱིས་དོགས། ༈ །ཁྱོད་དང་གཟུགས་སུ་བྲིས་ཙམ་ན། །ཆོས་ཀྱི་སྐུ་དང་འཕྲད་པར་སོམས། །ཡིག་འབྲུ་སྔགས་ཀྱིས་བསྐོར་ཙམ་ན། །སྤྲུལ་པའི་སྐུ་དང་འཕྲད་པར་སོམས། །རྡོ་རྗེའི་ལམ་ལ་བསྐྱོན་ཙམ་ན། །ལོངས་སྤྱོད་རྫོགས་སྐུར་ལྡན་པར་སོམས། །རྣམ་ཤེས་བཀུག་ནས་བསྟིམ་ཙམ་ན། །རིག་སྟོང་མ་ལུས་འཕྲད་པར་སོམས། །སྔོ་དམར་བྱད་དུ་བཅུག་པའི་ཚེ། །འཇའ་ཚོན་སྣ་ལྔས་བསྐོར་བར་སོམས། །བྲུབ་ཁུང་ནང་དུ་བཅུག་ཙམ་ན། །གཞལ་ཡས་ཁང་དུ་བསྡད་ཟཔར་སོམས། །དྲག་པོའི་དུག་ལྔ་ཤར་ཙམ་ན། །ཡེ་ཤེས་ལྔ་དང་ལྡན་པར་སོམས། །དྲག་པོའི་ཕུར་པས་གདབ་ཙམ་ན། །ཡི་དམ་ལྷ་དང་འཕྲད་པར་སོམས། །མཚོན་ཆ་མང་པོས་སྐོར་ཙམ་ན། །སློབ་དཔོན་ལྷ་དང་འཕྲད་པར་སོམས། །དམར་ནག་རྩང་གིས་བསྐོར་ཙམ་ན། །ལྷ་དང་ལྷ་མོས་བསྐོར་བར་བསྒོམ། །དྲག་པོའི་ཐུན་གྱིས་བྲབ་ཙམ་ན། །འདོད་དགུ་ཆར་དུ་འབབ་པར་སོམས། །འདི་ལྟར་སོམས་ལ་འདི་རུ་སྡོད། ༈ །ཁྱོད་སྔོན་གྱི་ལས་ངན་ད་སྤོངས་ལ། །འཕྲལ་དུ་འགྱོད་སེམས་དྲན་པར་གྱིས། །
ལུས་ངག་ཡིད་གསུམ་ཡོན་དུ་འབུལ། །དེ་ལྟར་མ་བྱས་ཁྱོད་ཉིད་བརླག །དེ་བས་དམ་ཚིག་དྲན་པར་གྱིས། །ཅེས་བརྗོད་དོ། །སེར་བརྒྱབ་པ་རྣམས་གཞུང་མ་སྤེལ་མི་འདུག་གོ །གཤེད་རྡུང་གཞུང་ནས་འགའ་ཞིག་འདིར་ཁ་བསྐངས་ནས་བྲིས་པ་ཡིན། མི་འགལ་དོ་བསམས་ནས་བྲིས་པ་ཡིན། འགལ་ན་བཟོད་པར་གསོལ་ལོ། །མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།