ཐན་པ་འབེབས་པ་རལ་གྲི་གོམ་གཅོད།
ཐན་པ་འབེབས་པ་རལ་གྲི་གོམ་གཅོད་ཅེས་བྱ་བ་བཞུགས་སོ།
དཔལ་ཧེ་རུ་ཀ་ལ་ཕྱག་འཚལ་ལོ། །རྣལ་འབྱོར་པས་དམ་སྲི་མནན་པའི་ཐབས། ཨོཾ་སྭ་བྷ་ཝ་སོགས། སྟོང་པའི་ངང་ལས། ཨོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་གཏོར་མ་ཁ་དོག་དྲི་རོ་ཕུན་སུམ་ཚོགས་པར་གྱུར། ཨོཾ་ཨ་ཀཱ་རོ་སོགས། ལན་གསུམ། ཧཱུྃ། ང་ནི་གསང་བདག་རྡོ་རྗེ་འཛིན། །ཚངས་པ་རྒྱལ་ཆེན་ཕྱོགས་སྐྱོང་བཅུ། །མགུལ་ལྷ་དགེ་བསྙེན་བརྟན་མའི་ཚོགས། །ཡུལ་ཕྱོགས་འདི་ཡི་ས་བདག་ཀླུ་གཉན་ཚོགས། །དམ་རྫས་གཏོར་མ་གསེར་སྐྱེམས་འདི་བཞེས་ལ། །བདག་གི་མཐུན་པའི་གྲོགས་མཛོད་ལ། །ས་འདི་བདག་ལ་བསྩལ་དུ་གསོལ། །ས་རྐོ་བ་ལ་
ཕྲག་དོག་མ་མཛད་ཅིག །དམ་ཉམས་དགྲ་བོ་ལས་ངན་ལ། །བཀའ་ཡི་ཆད་པ་མྱུར་དུ་ཆོད། །དམ་སྲི་མནན་པའི་ལས་མཛོད་ཅིག །ཨོཾ་སརྦ་ལོ་ཀ་པཱ་ལ་ས་པཱ་རི་ཝཱ་ར་ཨི་དཾ་བྷ་ལི་ཁཱ་ཧི། ཞེས་དཀར་གཏོར་འབུལ། དེ་ནས་ལྕོག་རྡོག་ཆངས་བུ་ཏིང་ལོ་བྲན་ལ། ཨོཾ་སྭ་བྷཱ་ཝ་སོགས། སྟོང་པའི་ངང་ལས་པདྨའི་སྣོད་ཡངས་པའི་ནང་དུ་གཏོར་མ་ཁ་དོག་དྲི་རོ་ཕུན་སུམ་ཚོགས་པར་གྱུར། ན་མཿསརྦ་ཏ་ཐཱ་ག་ཏ་ཨ་ཝ་སོགས། །ལན་བདུན་དང་དེ་བཞིན་གཤེགས་པ་བཞིའི་མཚན་བརྗོད་ལ། ལན་ཆགས་གླུད་ཀྱི་གཏོར་མ་འདི། །བསྔོ་ཞིང་འབུལ་བའི་གནས་སུ་གྱུར་པ་ལས། །ས་སྲིན་
བྲག་སྲིན་ཀླུ་སྲིན་གདུག་པའི་ཚོགས། །ལན་ཆགས་འབྱུང་པོ་དྲི་ཟ་གྲུལ་བུམ་དང་། །གཟའ་བདུད་ཕོ་ཉ་སྤྲུལ་པའི་ཐན་ལྟས་བདག །གཏོར་མ་འདི་བཞེས་མགུ་ཞིང་ལ། ཚིམ་པར་གྱིས་ལ་རང་རང་གནས་སུ་གཤེགས། །བཀའ་དང་དམ་ལ་འདས་ན་མགོ་བོ་འགས། །ལུས་ངག་དུམ་བུ་ཚལ་པར་འགྲོ་བར་གྱིས། །དེ་བས་ཐམས་ཅད་རང་རང་གནས་སུ་གཤེགས། །ཨོཾ་ཨུཙྪཏ་ཡ་ཕཊ། སུམྦྷ་ནི་སོགས། བཛྲ་རཀྵ་རཀྟ་ཧཱུྃ་ཕཊ། དེ་ནས་ས་འབེབས་པ་ནི། ན་མོ་མཉྫ་ཤྲཱི་ཡེ། དཀོན་མཆོག་གསུམ་དང་འཕགས་འཇམ་དཔལ་ལ་ཕྱག་འཚལ་ལོ། །དེ་རིང་ལྷ་ཀླུ་ཡུལ་ལྷ་ས་བདག་རྣམས། །ཐམས་ཅད་འདུས་ལ་གུས་པས་བདག་ལ་ཉོན། །ས་འདིར་ཡོད་པ་ནི་ངས་མི་ཤེས་པ་མ་ཡིན་ནོ། །ང་རྣལ་འབྱོར་པ་བདག་གིས་ཁྱེད་རྣམས་ལ་ཕོད་མི་བཙུགས། །དོ་མི་བསྡོ། ཡ་བོ་མི་བཟུང་། འགྲས་མི་བཙལ། ས་འདི་འཕགས་པ་དཀོན་མཆོག་གསུམ་གྱི་ལུང་བསྟན་པ་ཡིན། དཔལ་ཕྱག་ན་རྡོ་རྗེ་དང་ཁྱུང་རྒོད་མཁའ་ལྡིང་དམར་པོའི་ལུང་བསྟན་པ་ཡིན། ང་ས་མཁན་གྱི་ཤེས་པ་མ་ཡིན། སྔོན་དྲང་སྲོང་སྔོ་ནག་གི་དང་། སྲིད་པའི་མིའུ་ཐུང་གི་འདིར་ཡོད་ཟེར་བ་
ཡིན། ས་འདིས་འབྱུང་ཚུལ་ལུང་བསྟན་པ་ནི། བྱ་ཁྱུང་འདྲ་བའི་སྦྱར་འོག་ན། །དམ་ཉམས་དགྲ་བོའི་དུར་ས་ཡོད། གླང་ཆེན་འདྲ་བའི་སྣ་ལྗགས་ན། །དམ་ཉམས་དགྲ་བོའི་དུར་ས་ཡོད། །རུ་སྦལ་འདྲ་བའི་སྦོ་ཞབས་ན། །དམ་ཉམས་དགྲ་བོའི་དུར་ས་ཡོད། །དུག་སྦྲུལ་འདྲ་བའི་ལྕེ་མདུད་ན། །དམ་ཉམས་དགྲ་བོའི་དུར་ས་ཡོད། །རལ་གྲི་འདྲ་བའི་ས་འོག་ན། །དམ་ཉམས་དགྲ་བོའི་དུར་ས་ཡོད། །ཆུ་གཉིས་མདུད་པའི་མདོ་སྣ་ན། །དམ་ཉམས་དགྲ་བོའི་དུར་ས་ཡོད། །གྲུ་གསུམ་འདྲ་བའི་མར་ཞབས་ན། །དམ་ཉམས་དགྲ་བོའི་དུར་ས་ཡོད། །བཙན་འཇིགས་ཁྲོས་འདྲའི་བྲག་སྣ་ན། །དམ་ཉམས་དགྲ་བོའི་དུར་ས་ཡོད། །རི་སོག་པོ་ཁྲོས་འདྲའི་གཉའ་ཞབས་ན། །དམ་ཉམས་དགྲ་བོའི་དུར་ས་ཡོད། །བཙན་ས་གསུམ་གྱི་གཉན་ནོན་དགོས། །མགྱོགས་པ་གསུམ་གྱི་སྒབ་དེད་དགོས། །དེ་ལྟར་གསུངས་ནས་བདག་ལ་ལུང་བསྟན་པ་ཡིན། ད་ནི་ས་འདི་འབེབས་པ་ཡིན། ཧཱུྃ། བདག་ཉིད་གསང་བདག་གསལ་བའི་མདུན། །དབང་ཆེན་ཤི་བྷ་ཏྲ་དང་། །བཙུན་མོ་ས་འཛིན་ལག་པ་དང་། །ལྔ་སེར་ལོ་ཟླ་
ཞག་ལ་འཁོར། །དུས་ཚོད་ཚེས་གྲངས་བདག་པོ་དང་། །ཞལ་ཟས་དཀར་མངར་འབྲུ་སྣ་དང་། །ཤེལ་ཚིགས་ཁྲི་དཀར་སྟོང་ནག་འབུལ། །ས་ལ་ང་ས་མ་ཟེར་ཅིག །རྡོ་ལ་ང་རྡོ་མ་ཟེར་ཅིག །ཆུ་ལ་ང་ཆུ་མ་ཟེར་ཅིག །མ་བརྐུས་པ་ཡི་འཇལ་དུ་འབུལ། །མ་ཕྲོག་པ་ཡི་སྦྱིན་དུ་འབུལ། །མ་བསད་པ་ཡི་སྟོང་དུ་འབུལ། ཚེ་གླུད་སྲོག་གི་སྐྱོན་དུ་འབུལ། །ནོར་ཕྱུགས་རྟ་ཡི་གླུད་དུ་འབུལ། །ཞི་བ་བྱང་ཆུབ་སེམས་དང་ལྡན་པར་ཤོག །ཨོཾ་ཨ་ཀ་ནི་ནི་ཀ་སོགས། མ་ཡེ་སྭཱ་ཧཱ། ས་བདག་ཀླུ་གཉན་རྣམས་ཞལ་ངོ་མ་ནག་ཐུགས་མ་ལོག །གདུག་པའི་དབལ་ཟེར་མ་བཏང་། ཀོ་ལོང་རུ་ང་ཕྲག་དོག་མ་མཛད་ཅིག །མདའ་དར་ལག་ཏུ་ཐོགས་ལ་འདི་སྐད་དོ། །ཧཱུྃ། མདའ་འདི་ཚིགས་གསུམ་འཛོམ་པ་ནི། །ཕུན་སུམ་ཚོགས་པའི་བླ་རྟགས་ཡིན། །ཚིགས་གཅིག་སྟོང་ལ་ཕུད་པ་ནི། །མི་ནོར་སྐག་ལས་ཐར་བ་ཡིན། །སྒྲོ་ལ་ཞིག་རལ་མེད་པ་ནི། །ནོར་ལ་གོད་ཁ་མེད་པའི་རྟགས་ཡིན་བཟང་དགོས། །མདའ་མགུལ་དུ་དར་ཚོན་སྣ་ལྔ་བཏགས་པ་ནི། །མི་ནོར་འཕེལ་རྒྱས་འཛོམས་པའི་རྟགས་ཡིན། །བལ་དང་རིན་ཆེན་སྣ་ལྔས་བརྒྱན་པ་
ནི། །བསམ་པའི་དོན་རྣམས་འགྲུབ་པའི་རྟགས་ཡིན། །མདེའུ་རྣོ་ངར་ལྡན་པ་ནི། །ཤེས་རབ་རྣོ་ངར་ལྡན་པའི་རྟགས་ཡིན། །སྨྱུག་མ་ཆག་གས་མེད་པ་ནི། །སྲོག་ལ་ཞིག་རལ་མེད་པའི་རྟགས། །མདའ་མགུལ་གཟི་ཆུ་མིག་དགུ་ཡོད་པ་ནི། །ས་འདྲེ་ཆུ་འདྲེའི་གནོད་པ་བཟློག་པ་ཡིན། ཀྱཻ། དེ་རིང་ཉི་མ་ཐམས་ཅད་དགེ། །གཟའ་སྐར་ཚེས་གྲངས་ཐམས་ཅད་བཟང་། །ཡི་དམ་ལྷ་ཚོགས་བྱིན་རླབས་ཆེ། །ཆོས་སྐྱོང་སྲུང་མ་མཐུ་རྩལ་ཆེ། །ཡུལ་ལྷ་གཞི་བདག་དཀར་ཕྱོགས་ཆེ། །རྡོ་རྗེ་སློབ་དཔོན་དམ་ཚིག་ལྡན། །བཀྲ་ཤིས་ས་ཡི་ས་འདི་འབེབས་པ་ནི། །བྱ་ཁྱུང་ལྟ་བུ་ལ་འབེབས་ན། །གྲེ་བ་ལྟ་བུ་ལ་ཕོབ་ཅིག །གཡུ་འབྲུག་ལྟ་བུ་འབེབས་ན། །ཟེ་བ་ལྟ་བུ་ལ་ཕོབ་ཅིག །སེང་གེ་ལྟ་བུ་ལ་འདེབས་ན། །གཡུ་རལ་ལྟ་བུ་ལ་ཕོབ་ཅིག །རུ་སྦལ་ལྟ་བུ་ལ་འདེབས་ན། །ཁོག་པ་ལྟ་བུ་ལ་ཕོབ་ཅིག །དོམ་བུ་ལྟ་བུ་ལ་འདེབས་ན། །།དང་ཁ་ལྟ་བུ་ལ་ཕོབ་ཅིག །རྒྱ་སྟག་ལྟ་བུ་ལ་འདེབས་ན། །འཛུམ་དྲུག་ལྟ་བུ་ལ་ཕོབ་ཅིག །དུག་སྦྲུལ་ལྟ་བུ་ལ་འདེབས་ན། །སྤྱི་གཙུག་ལྟ་བུ་ལ་ཕོབ་ཅིག །དམ་ཉམས་དགྲ་
འདྲེའི་དུར་ས་འདིར་འདེབས་ལ། །ཁྱོད་ས་བདག་ཀླུ་གཉན་རྣམས་ལ། །ས་མིའི་མཐུ་བ་རན་ཙམ་གཅིག་བདག་ལ་གཡོར་དང་། །ང་ས་མཁན་ལ་མཛའ་རོག་དང་ཤག་རོག་ལྟ་བུ་མཛོད་ཅིག །དེ་ནས་ས་མདའ་ས་ལ་བཙུགས་ལ། ཧཱུྃ། ད་ནི་ས་མདའ་སིལ་མ་འདི། །ས་མདའ་ཡིན་པས་ས་ལ་བཙུགས། །ས་འདྲེ་ས་སྲིའི་སྙིང་ལ་བཙུགས། །ཁྱད་པར་དུར་ས་མིག་ལ་གནོད་པའི་ས་འདྲེ་ས་སྲི་ནག་པོ་དགུ་པོའི་སྙིང་ལ་བཙུགས། །ཡ་བདུད་རྒྱལ་པོ་ཡར་ལ་སྒྱུར། །མ་བདུད་རྒྱལ་མོ་མར་ལ་སྒྱུར། །བཙན་བདུད་དྲི་ཟ་ཐད་དུ་སྒྱུར། །ཐན་དང་ཐན་བདག་བཅས་པ་ད་ཆོད་ཅིག །ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ། ཕུར་པའམ་འཇོར་ཐོགས་ལ། གནམ་ལྕགས་ཀྱི་སྐག་ལེ་ངར་མ་འདོམ་པ་དགུ་པ་འདི། སྟེང་གི་ལྷ་ལ་མི་འདེབས། འོག་གི་ཀླུ་ལ་མི་འདེབས། བར་གྱི་བཙན་ལ་མི་འདེབས། འགོ་བའི་ལྷ་རྣམས་ལ་མི་འདེབས། སྲུང་མའི་ལྷ་རྣམས་ལ་མི་འདེབས། ནོར་ལྷ་གནོད་སྦྱིན་རྣམས་ལ་མི་འདེབས། ལེ་གུ་རྣམས་ལ་མི་འདེབས། དེ་རྣམས་གཡས་སུ་བཟུར། གཡོན་དུ་བཟུར། བར་དུ་བཟུར། མཐོ་བ་རྣམས་གནམ་ལ་བཞུགས་པ་ཡར་ལ་བཞུགས། །
དམའ་བ་རྣམས་ས་ལ་བཞུགས་པ་རང་ཡུལ་བཞུགས། དེ་དག་ཐམས་ཅད་བྱང་ཆུབ་མཆོག་ཏུ་སེམས་བསྐྱེད་པར་མཛོད་ཅིག །ངས་ས་འདི་འདེབས་པ་ནི་ཐན་དང་ཆོ་འཕྲུལ་བཏང་བའི་བདག་པོ་དང་བདག་མོ་རྣམས་ཀྱི་སྙིང་ལ་འདེབས། སྟེང་གི་ཐན་བཅུ་གསུམ་གྱི་གནོད་པ་དགྲ་ལ་སྒྱུར། བར་གྱི་ཐན་བཅུ་གསུམ་གྱི་གནོད་པ་དགྲ་ལ་སྒྱུར། འོག་གི་ཐན་བཅུ་གསུམ་གྱི་གནོད་པ་དགྲ་ལ་སྒྱུར། བྷྱོ་བྷྱོ་ཟློག་ཟློག །དེ་ནས་ས་བརྐོ་བ་ནི། ས་བདག་ལྟོ་འཕྱེ་རྩི་བ་ནི། དཔྱིད་གསུམ་བྱང་། དབྱར་གསུམ་ཤར། སྟོན་གསུམ་ལྷོ། དགུན་གསུམ་ནུབ་ཏུ་ཁ་གྲུ་བཀོ། ༈ རང་ཉིད་ཁྱུང་ནག་བསྒོམ་ལ་འཇོར་མགོ་ལན་གསུམ་ས་ལ་འདེབ། དེ་ནས་ཤ་ལག་པ་ཐོགས་ལ། ཧཱུྃ། ལག་པ་གནམ་ལ་བསྟན་པ་ནི། །སྐྱིད་ཀྱི་གཡང་སྒོ་ཕྱེ་བར་མཛོད། །ལག་པ་ས་ལ་བསྟན་པ་ནི། །འོག་གི་ས་སྒོ་བྱེ་བ་ཆོད། །ས་འོག་དུར་ཕག་ནག་པོས་ཆོད། །ཞག་དུས་ཉི་མའི་ཆོ་འཕྲུལ་ཟློག །དེ་ནས་གཡང་གཞི་ཐོགས་ལ། གཡང་མོ་ལུག་གི་གཡང་གཞི་འདི། །ཤ་ནི་མ་ཉམས་པ་ཡིན་པས། །ནོར་ལ་གོད་ཁ་མེད་པའི་རྟགས། །སྤུ་འདི་མ་ཉམས་པ་འདི་ནི། །ནོར་ཕྱུགས་འཕེལ་བའི་རྟགས་ཤིག་ཡིན།
ད་ནི་གཡང་གཞི་རྩ་བཞི་ཚང་བ་འདི་ནི། །ཕྱོགས་བཞིའི་དགྲ་འདྲེ་འདུལ་བའི་རྟགས་ཡིན་པས། གཡང་གཞི་རྩལ་ཆེན་གནམ་ལ་ལན་གསུམ་གཡུག །ཡར་གྱི་བདུད་བཞི་དང་ས་སྒོ་བྱེ་བ་ཆོད་ཅིག །གཡང་གཞི་ས་ལ་ལན་གསུམ་བརྡེབ། ས་ལ་བརྡབས་པས་ས་སྲིའི་བརྟན་ཕུར་ཕུད། མར་གྱི་ས་སྒོ་བྱེ་བ་ཆོད་ཅིག །བར་དུ་གཡུག་པས་བར་གྱི་ས་འདྲེ་གབ་རྐུང་ཕུད་པ་འདིས་གནོད་བྱེད་ཐམས་ཅད་གཡང་གཞི་འདིས་མནན་པས་མ་ལྡང་ཞིག །མ་འགུལ་ཅིག །བདག་ཅག་ཡོན་མཆོད་ཐམས་ཅད་བསྐལ་པ་དང་ལྡན་པར་གྱུར་ཅིག །ཅེས་མེ་ཏོག་འཐོར། ལག་ལ་ནས་ཐོགས་ལ་དེ་མཁའ་ལ་གཏོར། དེ་ནས་ཐན་ཐག་བྲེག་པའི་ཟོར་བ་དགོས། །ཐན་ཕུར་ཕུད་པའི་ཐོ་བ་དགོས། །ཐན་སྒབ་གཅོད་པའི་སྣ་རེ་དགོས། གཞི་མ་དཀར་པོ་ཕྱིང་པའི་ལྭ་བ་དཀར་པོ་ཁ་གང་གི་ཐོག་ཏུ་དཀར་གཏོར་འབྲུ་སྣ་གསེར་སྐྱེམས་བཞག །རེ་བ་ནག་པོའམ་ཕྱིང་མ་ནག་པོ་ཁ་གང་གི་ཐོག་ཏུ་འབྲུ་ནག་གི་དཔལ་གཏོར་དུག་ཁྲག་གིས་བརྒྱན་པ་གཅིག་འོག་ཏུ་བཞག །དེ་ལ་ཐན་ཐག་ནག་པོ་འདོམ་པ་དགུ་པས་བཅའ་ཏི་འོག་ཏུ་བཞག །རང་ཉིད་སྔགས་འཆང་དྲག་པོ་བསྐྱེད། ཨོཾ་ཨཱཿཧཱུྃ་གསུམ་གྱིས་གཏོར་མ་དྲི་རོ་ཕུན་སུམ་ཚོགས་པར་གྱུར། ཧ་ཧོ་ཧྲཱིཿཕེཾ། ལྷ་ཡི་སྡེ་ཚོགས་ཚངས་པ་ཆེན་པོ་དང་། །ཀླུ་ཡི་སྡེ་ཚོགས་
མི་མགོན་དཀར་པོ་དང་། །ས་བདག་ས་ཡི་ལྷ་མོ་བརྟན་མའི་ཚོགས། །ཡུལ་ཕྱོགས་འདི་ཡི་གནས་བདག་གཞི་བདག་རྣམས། །གཏོར་མ་བཞེས་ལ་གཟུ་དང་དཔང་པོ་མཛོད། །མགུར་ལྷ་དགེ་བསྙེན་བརྟན་མ་ཡུལ་འདིས་བདག །དཀར་ཕྱོགས་མཆོད་པར་འོས་དང་བསྟོད་པར་འོས། །མ་ལུས་འཁོར་དང་བཅས་པ་ཐམས་ཅད་ལ། །དངོས་འབྱོར་ཡིད་སྤྲུལ་རྒྱས་པའི་གསེར་སྐྱེམས་དང་། །དཀར་དམར་ལོངས་སྤྱོད་འབྲུ་སྨན་གཏོར་མས་མཆོད། །གསེར་སྐྱེམས་མཆོད་པའི་དམ་རྫས་འདི་བཞེས་ལ། །ལྟས་ངན་རྨི་ལམ་ངན་པ་ཐམས་ཅད་ཟློག །ལོ་ཟླ་སྤར་སྨེ་ས་བདག་ཐམས་ཅད་རྣམས། །གསེར་སྐྱེམས་མཆོད་པའི་དམ་རྫས་འདིབཞེས་ལ། །ལོ་ཟླ་ཞག་གི་སྐག་རྣམས་ཐམས་ཅད་ཟློག །གཟུ་དང་དཔང་པོ་དམ་པ་མཛད་དུ་གསོལ། །བཅོལ་བའི་ཕྲིན་ལས་མྱུར་དུ་འགྲུབ་པར་མཛོད། །ཅེས་དཀར་གཏོར་གསེར་སྐྱེམས་མཆོད། དེ་ནས་གཞི་ནག་པོའི་ཐོག་འབྲུ་ནག་དམར་གཏོར་དང་བཅས་པ་བྲན། ཞེས་སོགས་བཀའ་བརྒྱད་གཞུང་དུ་ཡོད་ལྟར་གཟུ་དཔང་གསེར་སྐྱེམས་བཅོལ་གཏད་བྱའོ། །དེ་ནས་གཏོར་མ་ནག་པོ་དེ་བྲན་ལ། ཧཱུྃ། བདག་ཅག་རྣམས་ལ་གནོད་པ་ཡི། །ཆགས་ཆེ་ཉམ་ང་ཐམས་
ཅད་བཟློག་ཏུ་གསོལ། །ཡས་ཀྱི་བདུད་གཡོས་མས་ཀྱི་སྲི་ལངས་ཟློག །བདུད་བཙན་གཤིན་རྗེ་དྲི་ཟའི་ཕོ་ཉས་ཟློག །མ་བདུད་ཐེའུ་རང་དམུ་ཡི་ཕོ་ཉ་ཟློག །ལྷག་པ་ཐམས་ཅད་ཡ་བདུད་ཕོ་ཉས་ཟློག །མ་ཚང་བ་རྣམས་མ་བདུད་ཕོ་ཉས་ཟློག །མོན་དང་རྒྱུ་ལུག་ཐམས་ཅད་བཟློག་གྱུར་ཅིག །ཧོ་དགོངས་སུ་གསོལ་ལོ། །ས་རིམ་པ་དགུའི་འོག་རོལ་ནས། མཐའ་མེད་རྒྱ་མཚོའི་ནང་ཤེད་ནས། གཤིན་རྗེ་ཡ་མ་རཱ་ཙ། ལས་གཤིན་སུམ་བརྒྱ་དྲུག་ཅུ། ལས་ཀྱི་གཤིན་རྗེ་བྷ་ཝ་སྭ་ཏ། སྤྲུལ་པ་ཉི་ཁྲི་གཅིག་སྟོང་། ཡང་སྤྲུལ་ལས་མཁན་ཕོ་ཉ་ཁྱེད་རྣམས་ཀྱིས་གནམ་ས་ཙམ་གྱི་ཞལ་ཕྱེས། གངས་རི་ཙམ་གྱི་མཆེ་བ་གཙིགས། བར་སྣང་ཙམ་གྱི་ལྗགས་རྐྱངས་ལ། སྟོང་གསུམ་ཙམ་མིད་པ་རུ༔ བསྟན་པ་བཤིགས་པའི་དགྲ་བགེགས་འབྱུང་པོ་རྣམས། ཐན་ལྟས་རྨི་ལམ་མོ་ངན་པ་བཞེས་ཤིག །དགྲ་གྱོད་ཇག་རྐུན་གནོད་པ་བཞེས་ཤིག །ནད་བདག་ཡམས་བདག་རིམས་ཀྱི་བདག་པོ་བདག་མོ་བཞེས་ཤིག །ཟ་འདྲེ་འགོང་པོ་དབུལ་སྲི་བཞེས་ཤིག །སྟེང་འོག་བར་གསུམ་གྱི་ལྷ་ཀླུ་གཉན་རྣམས་ཀྱིས་དྲང་ཤན་ཕྱེས་ཤིག །ཐན་ཐག་འདི་
ཟོར་བས་བྲེག་ཅིག །ཐན་ཕུར་འདི་ཐོ་བས་ཕུད་ཅིག །ཐན་སྒབ་འདི་སྟ་རེས་ཆོད་ཅིག །ཐན་ལྟས་འདི་དགྲ་ལ་སྒྱུར་ཅིག །ལྟས་ངན་འདི་བགེགས་ལ་སྒྱུར་ཅིག །ཆོ་འཕྲུལ་འདི་དགྲ་བོ་དམ་ཉམས་བསྟན་དགྲ་རྣམས་ལ་སྒྱུར་ཅིག །བཟློག་ཅིག །ཨོཾ་ལཾ་ཧཱུྃ་ལཾ་སུཾ་བྷ་ཡ་ནན། བཟློག་ཅིག་སྒྱུར་ཅིག །ཅེས་དམོད་བཅོལ་གང་དྲན་དང་བཅས་ལ་ཐན་ཐག་ཟོར་བས་དུམ་བུ་དགུ་བཅད་ལ་དོང་ནང་དུ་ཐན་དང་མཉམ་དུ་མནན་ལ། འགུགས་གཞུག་ལན་གསུམ་བྱ། དེ་ནས་བཅའ་ཐི་མ་ཧཱ་བ་ལ་སོགས་གང་འོས་འདོན་ལ་མནན་ནོ། །དེ་སྟེང་བཅའ་ཐི་ནག་པོ་གྲུ་གསུམ་ལྟ་བུ་བརྩེགས། །དམ་ཉམས་ཐན་ཐན་བདག་དང་བཅས་པ་ལས་གཤིན་ཞལ་དུ་འཕང་བར་བསམ། ཞེས་རྟ་བྲོ་དང་བྱ་ཁྱུང་གིས་རྗེས་བཅད་པར་བསམས་ལ་མི་དམིགས་པའི་ངང་ལ་ཡུན་རིང་དུ་བཞག་གོ། །ཞེས་པ་འདི་ཡང་སློབ་དཔོན་པདྨས་མཛད་པའི་བཅའ་ཐི་དང་། ཕྱག་རྡོར་གྱི་ལས་མཐའ་བཅའ་ཐི་དང་། རྒྱ་ནག་དུ་ཧར་ནག་པོས་མཛད་པའི་ས་འབེབས་ནང་མནན་པ་ལ་གཞི་བྱས་ནས་སྔགས་ཆུང་གསར་བུ་འགའ་ལ་ཕན་ཕྱིར་༧ རཱ་ག་ཨ་སྱས་སྨྲས་པ་ལྟར། པདྨ་ཐབས་མཁས་ཞེས་པའི་ཡི་གེར་བཀོད། །ཉེས་འགལ་མཆིས་ན་ལྷ་དང་སྲུང་མར་བཤགས། །དགེ་བས་སེམས་ཅན་རྣམས་ལ་ཕན་ཐོགས་དང་། །སངས་རྒྱས་བསྟན་པ་དར་ཞིང་རྒྱས་པར་ཤོག །སརྦ་མངྒ་ལམ།། །།