ལྷ་དམག་སྤྱི་བསྐུལ་ཐན་ལྟས་ཁྲ་འགྱེད་དགྲ་ཆོས་བསྡུས་པ་དགྲ་བགེགས་ཚར་གཅོད་འགྲིགས་ཆགས་སུ་བཀོད་པ།
ལྷ་དམག་སྤྱི་བསྐུལ་ཐན་ལྟས་ཁྲ་འགྱེད་དགྲ་ཆོས་བསྡུས་པ་དགྲ་བགེགས་ཚར་གཅོད་འགྲིགས་ཆགས་སུ་བཀོད་པ་བཞུགས་སོ།
ཤྲཱི་མ་ཧཱ་ཀ་ལ་ན་མ། དགྲ་ཆོས་ལྷ་དམག་སྤྱི་བསྐུལ་དགྲ་བགེགས་ཚར་གཅོད་ལ། དམར་གཏོར་གཅིག་ལ་དམར་གཏོར་བཅུས་བསྐོར། དཀར་གཏོར་གཅིག་ལ་གཡག་ལུག་བྱ་རིགས་གཟུགས་ཀྱིས་བསྐོར། སྤྲོ་ན་གཡག་རུ་གཡོན་པའམ། རྟ་རྨིག་གཡོན་པའི་ནང་དུ། དགྲ་བོའི་བླ་བྱང་རྡོ་ནག་རྡེའུ་དགུ་བཅུག །ལིངྒ་མགོ་ཐུར་བསྟན་ལ་བཏགས་སོ། །གླང་མའི་ལིང་དགུ་ཧཱུྃ་དང་བྷྱོ་ཁྲམ་བྲི། ཚྭ་གཡེར་རམ་རུག་གོ་གསུམ་ཐལ་བ་དང་། ཤ་རུ་དགོ་རུ་གཙོད་རུ་མདའ་ཆག་རྣམས། གྲི་ཡས་ལ་ཙག་བྱུག་པ་དང་། ཤིང་ནག་ལ་རྔ་མོང་དྲེལ་ཕག་དང་། ཐན་ལྟས་ཁྲ་འགྱེད་ཀྱི་ཡིག་ཆུང་གནད་ཡིག་དཔེའུ་རིས་ལྟར་བྱས་ལ། ཤིང་ཚེར་མ་ཅན་ནམ་དྲག་པོའི་ཤིང་གི་མཚོན་ཆ་སྣ་ཚོགས་བྱེད་ལ་རྩེ་མོ་ལ་དུག་ཁྲག་གི་ཁྲག་རོ་སོལ་དང་
བསྲེས་པ་བྱུག དེའི་སྟེང་ལ། མཱརཡདགྲབོའིསྲོགལརྦདདགྲབོའིསྲོགལརྒྱུགལུསལཧབཤམཱརཡསོད༔ བཟློག་པ་ཁ་རྐྱང་ཡིན་ན། བྷྱོ་ཟློག་སྒྱུར༔ སོགས་ཁ་སྒྱུར་བྱེད། མཚོན་ཆའི་རྩེ་མོ་དགྲ་ཕྱོགས་སུ་བསྟན་ལ་རྔ་མོང་ལུས་ལ་བཙུགས་ནས་བོར་ན་དགྲ་བྲུབ་འགྲོ་བ་ཡིན། ཡི་དམ་ཆོས་སྐྱོང་བཀའ་སྲུང་ཡོངས་རྫོགས་བསྐུལ། དེ་ནས་ཨ་ཁཾ་དམིགས་བྱ་བསྐྱེད་པ་ནི། ཨོཾ་སྭ་བྷ་ཝས་སྦྱངས། གཏོ་ནག་མི་དམིགས་པ་སྟོང་པའི་ངང་ལས་བདུད་ཤིང་ནག་པོའི་གླང་གཟུགས་དང་ཤིང་མི་ནག་པོ་ཁ་སྨྲས་གླེང་གཞིའི་ཁྲག་གྲོད་མགུལ་དུ་བཏགས་པ། ཐན་རིགས་ལྟས་ངན་མི་སྡུག་སྣ་ཚོགས་ཀྱིས་བསྐོར་བ། དེའི་མདུན་དུ་ལྕགས་ཁང་
ནག་པོའི་ནང་དུ། དགྲ་བོ་འགུགས་པའི་གཡག་རུ་ནག་པོ་ཚ་ལ་རྩུབ་པ་ནག་ལ་འཇིག་པ། དེའི་ནང་དུ་ཐད་དུ་ལང་བའི་དགྲ་བོ་ཐམས་ཅད་ཀྱི་བླ་དང་སྲོག་གི་ལིང་གཟུགས་དང་སྐྱེ་མཆེད་ཚང་བ་སྔོ་ལ་སྐྱ་བ། ཧཾ་ལ་རིད་པ། མིག་ནས་ཁྲག་གི་མཆི་མ་ཤོར་བ། རྐང་ལག་ལྕགས་སྒྲོག་གིས་བསྡམ་པ། མགོན་སྐྱབས་ཀྱི་ལྷ་དང་བྲལ་ནས་འདར་ལྡི་ལི་ལི་སྔང་ཧད་ཧད་བྱེད་པ་ཉམ་ཐག་ཉོན་མོངས་པ་ཁ་ནས་ང་སྡུག་དང་ང་བསྔལ་གྱི་ཆོ་ངེ་འདེབས་པ་ཞིག་ཏུ་གྱུར། གཞན་ཡང་སྔགས་འཆང་བདག་དང་ཡོན་བདག་འཁོར་དང་བཅས་པ་ཐམས་ཅད་ལ། ཉི་མ་ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅས་པ་ཐམས་ཅད་ནས་སྡང་བར་བྱེད་པའི་དགྲ། གནོད་པར་བྱེད་པའི་བགེགས། བར་དུ་གཅོད་པའི་རྐྱེན། །ལེན་པ་མེད་པའི་ནོར་འཕྲོག་པ། བཟློས་པ་མེད་པའི་སྲོག་ལ་རྒོལ་བ། ཟོས་པ་མེད་པའི་བུ་ལོན་སྙག་པ། དོ་བསྡོ་ཤིང་ཕོད་བཙུགས་པའི་དགྲ་ཡ་གྱོད་ཡ་འཛིང་ཡ་འཁོན་ཡ་བྱེད་པའི་དགྲ་བོ། ལ་ཁ་ནས་ཇག་པ་རྟ་སྒ་བཏོད་མི། ལུང་ཁུང་ནས་རྐུན་མ་ཤེད་སྤུ་ཁུར་མི། རྐུན་ཁ་ཤོམ་བྱེད་མི། འཇབ་ལག་ཤོམ་བྱེད་མི། ཁ་མཆུ་དང་བཙོད་ཡ་བྱེད་
པའི་དགྲ་བོ། གདོན་བགེགས་འབྱུང་པོ་དམ་སྲི་ཐམས་ཅད་ཀྱི་བླ་རྡོ་ནག་པོ། བླ་ཤིང་ལིང་དགུ་གྲུབ་པའི་ཚྭ་སྒོག་རམ་པ། གོ་གསུམ་ཐལ་བ། ཡས་སྟགས་དེ་དག་ཐམས་ཅད་ལ་དགྲ་བགེགས་ཐམས་ཅད་ཀྱི་བླ་སྲོག་རྣམ་པར་ཤེས་པ་དབྱེར་མེད་དུ་ཐིམ་པར་གྱུར། ཛཿ རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། ཡི་དམ་རྒྱུད་སྡེ་བཞི་ཡི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། དཔའ་བོ་མཁའ་འགྲོ་རྣམས་ཀྱི་བཀའ་བདེན་པ་དང་། ཆོས་སྐྱོང་ཕོ་རྒྱུད་མོ་རྒྱུད་རྣམས་ཀྱི་བཀའ་བདེན་པ་དང་། བཀའ་སྲུང་དམ་ཅན་རྒྱ་མཚོ་འཁོར་དང་བཅས་པ་རྣམས་ཀྱི་བཀའ་བདེན་པ་དང་། ཕོ་ལྷ་དགྲ་བླ་ཝེར་མ་ཡུལ་ལྷ་ཟོ་དོར་རྣམས་ཀྱི་བཀའ་བདེན་པ་དང་། སྔགས་འཆང་རྣལ་འབྱོར་པ་བདག་གི་སྔགས་དང་ཕྱག་རྒྱ་ཏིང་ངེ་འཛིན་རྣམས་ཀྱི་བཀའ་བདེན་པའི་མཐུས། སྔགས་འཆང་རྣལ་འབྱོར་པ་བདག་ཅག་ཡོན་མཆོད་མི་ནོར་འཁོར་དང་བཅས་པ་ཐམས་ཅད་ལ། ཉི་མ་ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅས་པ་ཐམས་
ཅད་ནས། སྡང་བར་བྱེད་པའི་དགྲ། གནོད་པར་བྱེད་པའི་བགེགས། བར་དུ་གཅོད་པའི་རྐྱེན། སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་བསམ་པ། ད་དགྲ་དངོས་སུ་བྱེད་པའི་གནོད་བྱེད་དགྲ་བོ། ལེན་པ་མེད་པའི་སྲོག་ལ་རྒོལ་བ། བསྡོས་པ་མེད་པའི་ནོར་འཕྲོག་པ། ཟོས་པ་མེད་པའི་བུ་ལོན་བསྙག་པ། དོ་བསྔོ་ཞིང་ཕོད་བཙུགས་པའི་དགྲ་ཡ་གྱོད་ཡ་འཛིང་ཡ་འཁོན་ཡ་བྱེད་པའི་དགྲ་བོ། ལ་ཁ་ནས་ཇག་པ་རྟ་སྒ་བཏོད་མི། ལུང་ཁུང་ནས་རྐུན་མ་ཤེད་སྤྱི་ཁུར་མི། རྐུན་ཁ་ཤོམ་བྱེད་མི། འཇབ་ལག་ཤོམ་བྱེད་མི། ཁ་མཆུ་དང་རྩོད་ཡ་བྱེད་མི། མི་མེད་དང་ལྷ་མེད་ཟེར་བའི་དགྲ་བོ་ཐམས་ཅད་ཀྱི་བླ་སྲོག་རྣམ་པ་ཤེས་པ་མཐོ་རི་བོའི་རྩེ། དམའ་རྒྱ་མཚོའི་འགྲམ། བར་ཉི་ཟླའི་ཁྱིམ། །སྔགས་པ་ནུས་པ་ཅན་གྱི་གུར་ཁང་། སྲིད་པ་གསུམ་གར་གནས་ཀྱང་སྐད་ཅིག་རང་དབང་མེད་པར་གཟུགས་ལིངྒ། བླ་རྡོ་ནག་པོ་མིང་བྱང་གླང་གཟུགས་ཐལ་རམ་འདི་ལ་ཁུག་ཅིག་ཕོབ་ཅིག །བཛྲ་ཨཾ་ཀུ་ཤ་ཛཿརཏྣ་པཱ་ཤ་ཧཱུྃ། པདྨ་སྤོ་ཊ་བི། ཀརྨ་གྷནེ་ཧོ༔ ཅེས་རོལ་ཆེན་དང་བཅས་ལན་དགུ་བཀུག་པར་བྱའོ། །དང་པོ་གཟུ་དཔང་དང་མི་འགལ་བ་རྣམས་ཚུལ་བཞིན་ཉམས་སུ་
བླངས་ལ། དཀོན་མཆོག་གསུམ་པོ་གཟུ་དང་དཔང་། །བླ་མ་ཡི་དམ་གཟུ་དང་དཔང་། །མཁའ་འགྲོ་ཆོས་སྐྱོང་གཟུ་དང་དཔང་། །བཀའ་སྲུང་དམ་ཅན་གཟུ་དང་དཔང་། །ནོར་ལྷ་གཏེར་བདག་གཟུ་དང་དཔང་། །ཕོ་ལྷ་དགྲ་ལྷ་གཟུ་དང་དཔང་། །ཡུལ་ལྷ་གཞི་བདག་གཟུ་དང་དཔང་། །གནས་པོ་དགེ་བསྙེན་གཟུ་དང་དཔང་། །ཁྱེད་རྣམས་གཟུ་དང་དཔང་མཛོད་ཅིག །གཏོར་མ་འབྲུ་སྣ་འདོད་ཡོན་ལྔས། །མཁའ་འགྲོ་ཆོས་སྐྱོང་ཐུགས་དམ་བསྐང་། །ཇ་ཕུད་ཆང་ཕུད་བདུད་རྩི་ལྔས། །གཟུ་དཔང་ལྷ་ལ་མཆོད་པ་འབུལ། །དགྲ་བགེགས་ཤ་ཁྲག་ལིངྒ་ཡིས། །བཀའ་སྲུང་དམ་ཅན་མཉེས་གྱུར་ཅིག །བདུད་རྩི་གསེར་སྐྱེམས་མཆོད་པ་ཡིས། །ཕོ་ཉ་ལས་ལ་རྒྱུག་པ་བརྔན། །དཀར་གསུམ་མངར་གསུམ་གཏོར་མ་ཡིས། །ཡུལ་ལྷ་གཞི་བདག་གཉན་པོ་མཆོད། །ཕྱི་ནང་གསང་བའི་བསྐང་རྟེན་གྱིས། །ཁྱད་པར་ཅན་གྱི་སྲུང་མ་བརྔན། །ཚྭ་གཡེར་རམ་པ་ཐལ་འཇིམ་འདིས། །དགྲ་བོ་བྱད་མ་ཐམས་ཅད་བྲུབ། །ཤིང་ནག་གླང་མའི་ལིང་དགུ་དང་། །གྲི་ཤ་འཕང་དམར་རུ་ཅོ་ལ། །དགྲ་བོའི་མི་ནོར་ཁྲམ་ལ་ཐོབ། །གླང་
གཟུགས་ངར་མི་ནག་པོ་ལ། །མོ་ངན་རྨིས་ངན་ལྟས་ངན་སྒྱུར། །ཕུང་ལྟས་ཁྲག་གི་གྲོད་པ་ལ། །དགྲ་བོ་གྲི་ངོ་རྨེ་ངོ་སྒྱུར། །གཡག་རུ་ནང་གི་ལིངྒ་ལ། །དགྲ་རྐུན་ཇག་པའི་བླ་སྲོག་ཁུག །དོ་ནུབ་ཉི་མའི་དགོང་འཚམ་ལ། །ཡི་དམ་ཆོས་སྐྱོང་བསྙེན་གྲངས་ཐེམས། །སྔགས་འཆང་བཟླས་བརྗོད་གྲངས་ཡང་ཚང་། །བཀའ་སྲུང་དམ་ཅན་རྒྱུག་པའི་སྲང་། །ཕོ་ཉ་ལས་མཁན་དམག་ལ་ཆོས། །དགྲ་བླ་ཝེར་མ་དགྲ་ལ་རྒྱུག །ཡུལ་ལྷ་གཞི་བདག་དགྲ་ལ་ཆོས། །ཁྱད་པར་སྲུང་མས་ཕྲིན་ལས་མཛོད། །ཀུ་དང་བསྲོ་ལ་དགའ་བ་དང་། །དར་ལ་འདུ་བ་དགྲ་བླའི་ལུགས། །སེར་ཆགས་ཡོངས་ཀྱི་དགྲ་བླ་རྣམས། །དར་ནག་ཕྱོར་ལ་ད་འདུས་ཤིག །རྔ་སྒྲ་ལྡིར་ལྡིར་ཆས་རེ་རན། །གོ་ཁྲབ་གྱོན་ལ་རྣོ་མཚོན་ཐོགས། །མགྱོགས་པ་ཞོན་ལ་རིངས་པར་རྒྱུག །ཞེ་སྡང་ཕྱུངས་ལ་ང་རྒྱལ་བསྐྱེད། །དགྲ་གཟུགས་ལིངྒ་འདི་གཉིས་ལ། །གང་ལ་དམིགས་པའི་དགྲ་བོ་གསུམ། །མཉམ་པོར་བཞེས་ལ་མེད་པར་མཛོད། །དགྲ་ངོ་བབ་ན་དགྲ་བོ་བྲུབ། །ཇག་ངོ་བབ་ན་ཇག་པ་བྲུབ། །རྐུན་ངོ་བབ་ན་རྐུན་མ་བྲུབ། །གྱོད་ངོ་བབ་ན་གྱོད་ཡ་
བྲུབ། །སྨྲས་ངོ་བབ་ན་སྨྲས་ཡ་བྲུབ། །བྷྱོ་བྷྱོ་སྡང་བའི་དགྲ་ལ་བློ། །བྷྱོ་བྷྱོ་གནོད་པའི་བགེགས་ལ་བྷྱོ། །དུས་ལ་བབ་བོ་ས་མཱ་ཡ། །དགྲ་ལ་རྦད་དོ་མཐུ་མ་ཆུང་། །ཞེས་ཡི་དམ་ཆོས་སྐྱོང་བཀའ་སྲུང་རྣམས་ཀྱི་ཆད་སྔགས་དྲག་ཏུ་བཟླའོ། །བདག་ཉིད་ཡི་དམ་རྗེ་བསྒོམ་པའི་མདུན་དུ་ཆོས་སྐྱོང་སྲུང་མ་འཇིག་རྟེན་ལས་འདས་པ་དང་མ་འདས་པ་ཐམས་ཅད་ཀྱིས་རང་རང་གི་བཀའ་ཉན་འབུམ་དང་བཅས་ནས་མགྱོགས་པ་ཆིབས་ཤིང་ཕྱག་ཏུ་ཐན་དང་ལྟས་ངན་སྣ་ཚོགས་ཐོགས་ནས་རང་གི་མདུན་དུ་ཡོད་པར་བསམ་ལ། བདག་ཉིད་ཡི་དམ་གྱི་བཀའ་ཉན་གསུང་སྡོད་དུ། དཔེར་ན་རྗེའི་བཀའ་ལ་བྲན་གྱིས་མི་འདའ་བ་བཞིན་དུ་དགྲ་ལ་ཐན་ལྟས་སྣ་ཚོགས་བཏང་བའི་ལས་བྱེད་པར་བསམ། ༈ ཧཱུྃ། མ་གཡེལ་མ་གཡེལ་སྲུང་མའི་ཚོགས། །མ་གཡེལ་དྲག་པོ་དགྲ་ལ་རྒྱུག །བསྟན་པ་གཉན་ལ་དགྲ་བྱུང་ན། །ལྷ་དང་སྲུང་མའི་དམག་ཚོགས་འདུས། །སངས་རྒྱས་ཆོས་ཀྱི་སྐུ་དགྲ་ལ། །དྲག་ཤུལ་ཅན་གྱི་དམག་ཚོགས་ཆོས། །ཞལ་ཤེས། །ལས་གཤིན་ཀིང་ཀང་དམར་ནག་ཆོས། །དུག་གདོང་ལས་གཤིན་འཁོར་བཅས་ཆོས། །རྡོ་རྗེ་འཇིགས་བྱེད་འཁོར་བཅས་
ཆོས། །ལས་གཤིན་ཆོས་རྒྱལ་ཡབ་ཡུམ་ཆོས། །ཚེ་བདག་ནག་པོ་འཁོར་བཅས་ཆོས། །མ་མགོན་ཕྱོགས་བཅུའི་མགོན་པོ་ཆོས། །མགོན་པོ་བྱ་རོག་འཁོར་བཅས་ཆོས། །བྱིན་བརླབས་མྱུར་མཛད་མགོན་པོ་ཆོས། །དཔལ་ལྡན་ལྷ་མོ་དཔོན་གཡོག་ཆོས། །བདུད་མགོན་སྲོག་བདུད་ནག་པོ་ཆོས། །སྲིན་མགོན་གཉན་མགོན་ཡབ་ཡུམ་ཆོས། །སྔགས་སྲུང་ཚེ་རིང་མཆེད་ལྔ་ཆོས། །ཞིང་སྐྱོང་སེང་གདོང་ཡབ་ཡུམ་ཆོས། །དུར་ཁྲོད་བདག་པོ་བདག་མོ་ཆོས། །གདུག་པ་བསེ་ཡི་སྐྱེས་བུ་ཆོས། །གཙང་བཙན་མཆེད་འཁོར་བཅས་པ་ཆོས། །གཡུ་སྒྲོན་སྨན་མོ་འབུམ་ཚོགས་ཆོས། །སྔགས་བདག་ཀླུ་ཆེན་བརྒྱད་པོ་ཆོས། །མཁར་ནག་ཀླུ་བདུད་ཀླུ་བཙན་ཆོས། །དྲེགས་པའི་སྡེ་དཔོན་སུམ་ཅུ་ཆོས། །སྔགས་བདག་དྲེགས་ཆེན་བཅོ་བརྒྱད་ཆོས། །དྲག་ཤུལ་ཅན་གྱི་དམག་ཚོགས་ཆོས། །འདོད་ཁམས་ལྷ་དང་སྲུང་མ་ཆོས། །མཐུ་ཆེན་དབང་པོ་བརྒྱ་བྱིན་ཆོས། །རྩལ་མཁན་ཚོགས་བདག་གླང་སྣ་ཆོས། །མདའ་མཁན་གྱི་ནུ་རཱ་ཙ་ཆོས། །འཐབ་སྐྱེན་མ་ཧཱ་ཀཱ་ལ་ཆོས། །སྟོབས་ཆེན་ལེགས་ལྡན་ནག་པོ་ཆོས། །མཐུ་ཆེན་སྔགས་ཀྱི་བདག་
པོ་ཆོས། །འཛིན་མཁན་བྲག་ལྷ་མགོན་པོ་ཆོས། །ལམ་མཁན་ཨཱརྱ་རེ་མན་ཆོས། །སོ་མཁན་དཔལ་རབ་འཆང་བའི་མགོན་པོ་ཆོས། །ཡང་ཟོར་ཧཱ་ལུ་མ་དྷ་ཆོས། །སྒྲོགས་མཁན་ཁྱབ་འཇུག་ནག་པོ་ཆོས། །རྐྱལ་མཁན་བ་ལི་སྨུག་པོ་ཆོས། །མདའ་ར་ཉེ་དབང་སོ་གཉིས་ཆོས། །གཅོད་མཁན་ལྷ་སྲིན་སྡེ་བརྒྱད་ཆོས། །བརྟུལ་ཟླཞུགས་གླང་ཆེན་སྨྱོན་པ་ཆོས། །འཕྲང་སྲུང་སྟག་གཡག་རྔམ་པ་ཆོས། །རེ་འབྱམས་བྱ་རྒྱལ་ཁྱུང་ཆེན་ཆོས། །ཁྲོ་གཏུམ་གཡུ་འབྲུག་སྔོན་པོ་ཆོས། །ནམ་མཁའ་ལྡིང་དང་སེང་གེ་ཆོས། །ཉིན་གྱི་དྲོད་གསལ་ཉི་མ་ཆོས། །ནུབ་ཀྱི་སྒྲོན་གསལ་ཟླ་བ་ཆོས། །ཕྱི་དཔུང་ལྷ་ཀླུ་གཉན་དམག་ཆོས། །སྣ་ཁྲིད་རྡོ་རྗེ་ལེགས་པ་ཆོས། །དཔའ་བོ་བེ་གར་རྒྱལ་པོ་ཆོས། །ཞལ་ཤེས། །ནད་བདག་ཨེ་ཀ་ཙ་ཏི་ཆོས། །གནོད་སྦྱིན་ཤན་པ་དམར་ནག་ཆོས། །གསོད་མཁན་སྲོག་བདག་སྐྱེས་བུ་ཆོས། །བཤའ་མཁན་ཁྲ་ཆུང་ཤེ་ནེ་ཆོས། །ཤ་ཟ་ཕྲ་མེན་ཁྲ་སྐྱ་ཆོས། །ཁྲག་འཐུང་འབར་བ་དྲེད་མགོ་ཆོས། །མགྱོགས་བྱེད་སྐྱ་ངོམས་སྤུན་གསུམ་ཆོས། །ཟ་བྱེད་མགོན་པོ་སྡེ་ལྔ་ཆོས། །རྒྱུག་བྱེད་མོན་པ་ནག་པོ་ཆོས། །
ལྷ་སྲིན་སྡེ་བརྒྱད་འཁོར་བཅས་ཆོས། །མཐུ་ཆེན་འཇིག་རྟེན་སྲུང་མ་རྣམས། །གོ་ཁྲབ་གྱོན་ལ་རྣོ་མཚོན་རྡོར། །མགྱོགས་པ་ཞོན་ལ་རིངས་པར་རྒྱུགས། །ཞེ་སྡང་ཕྱུངས་ལ་ང་ལྟརྒྱལ་སྐྱེད། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །རྒྱ་གར་ཡུལ་གྱི་མཁའ་འགྲོ་མ། །བོད་ཀྱི་ཡུལ་གྱི་བརྟན་སྐྱོང་མ། །སྟོང་གསུམ་དམག་དཔོན་བྱེད་མཁན་མོ། །བརྟན་མ་དམག་གི་རྒྱལ་མོ་ནི། །བརྟན་སྐྱོང་ཡ་མའི་ཚོགས་དང་བཅས། །གོ་ཁྲབ་གྱོན་ལ་རྣོ་མཚོན་རྡོར། །མགྱོགས་པ་ཞོན་ལ་རིངས་པར་རྒྱུགས། །ཞེ་སྡང་ཕྱུངས་ལ་ང་རྒྱལ་སྐྱེད། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །སངས་རྒྱས་ཆོས་ལ་ཕྱོགས་པའི་ལྷ། །མཆོད་ན་མགོན་སྐྱབས་བྱེད་པའི་ལྷ། །བརྔན་ན་དགྲ་ལ་རྒྱུག་པའི་ལྷ། །བོད་ཀྱི་མགུར་ལྷ་བཅུ་གསུམ་དང་། །དགེ་བསྙེན་ཉི་ཤུ་རྩ་གཅིག་དང་། །བོད་ཀྱི་ཐང་ལྷ་ཡར་ཞུར་དང་། །གཉན་ཆེན་རྨ་གཉན་སྤོམ་ར་ནི། །འཁོར་དུ་གཉན་དམག་བསམ་མི་ཁྱབ། །ཀུན་ཀྱང་མི་དཀར་རྟ་དཀར་ཅན། །གོ་ཆ་སྲ་ལ་མཚོན་ཆ་རྣོ། །བ་དན་དཀར་པོ་གནམ་ལ་
གཡུགས། །ཀི་བསྭོ་ཆ་སྒྲ་དི་རི་རི། །ཀུན་ཀྱང་མཐུ་ཆེན་རྩལ་དྲག་ཅན། །དྲག་པོའི་བློསྒྲ་དི་རི་རི། །རྣལ་འབྱོར་དམ་ཚིག་ཅན་གྱི་གཉེན། །སྐྱེ་བོ་དགྲ་ལྷ་ཅན་གྱི་གཉེན། །རྨངས་པོ་རྩ་དཀར་བཀྲོལ་བའི་གཉེན། །འཐབ་མོ་གཡུལ་ལས་རྒྱལ་བའི་གཉེན། །སངས་རྒྱས་ཆོས་ལ་ཕྱོགས་པའི་གཉེན། །ཆ་ལ་དགའ་ཞིང་དར་ལ་འདུ། །ཀི་ལ་དགའ་ཞིང་བསོ་ལ་དགྱེས། །གོ་ཁྲབ་གྱོན་ལ་རྣོ་མཚོན་བརྡར། །མགྱོགས་པ་ཞོན་ལ་རིངས་པར་རྒྱུགས། །ཞེ་སྡང་ཕྱུངས་ལ་ང་རྒྱལ་སྐྱེད། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །མ་གཡེལ་ཡུལ་ལྷའི་དམག་ཚོགས་རྣམས། །མྱུར་བར་སྡང་བའི་དགྲ་ལ་རྒྱུགས། །སྐུ་རྒྱལ་བཙན་གྱི་དམག་ཚོགས་ཆོས། །སྨོན་སྐྱེས་གང་བཞུར་མཆེད་གསུམ་ཆོས། །དམག་དཔོན་དབྱི་རྒྱལ་རིན་ཆེན་ཆོས། །ཀླུ་རྒྱལ་པོ་ཏོ་འཁོར་བཅས་ཆོས། །ཙོ་རྒྱལ་གོ་རྒྱལ་ཡབ་ཡུམ་ཆོས། །སྐྱེས་བུ་ངོམ་རྒྱལ་འཁོར་བཅས་ཆོས། །གཏམ་རྒྱལ་དབྱི་དོ་དགེ་བསྙེན་ཆོས། །མཐུ་ཆེན་འཇིག་རྟེན་སྲུང་མ་རྣམས། །གོ་ཁྲབ་གྱོན་ལ་རྣོ་མཚོན་རྡོར། །མགྱོགས་པ་ཞོན་ལ་
རིངས་པར་རྒྱུགས། །ཞེ་སྡང་ཕྱུངས་ལ་ང་རྒྱལ་སྐྱེད། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །འཇིག་རྟེན་སྲུང་མའི་དམག་ཚོགས་ལ། །དཀར་གསུམ་བརྒྱན་པའི་གཏོར་མ་དང་། །ཁྱུང་དང་སེང་གེ་གཡུ་འབྲུག་དང་། །གྱི་ལིང་ཤང་ཤང་རྨ་བྱ་དང་། །སྟག་གཟིག་གུང་གཡི་དཀར་པོ་དང་། །གཡག་ལུག་བྱ་རིགས་སྣ་ཚོགས་འདི། །སྔགས་དང་ཕྱག་རྒྱས་བྱིན་གྱིས་བརླབས། །བསམ་གཏན་ལྷ་ཡི་དཀོར་བས་ལྷག །ལྷ་སྲུང་གཉན་པོའི་སྐུ་ལ་འབུལ། །གཞན་ཡང་དངོས་དང་ཡིད་ལས་སྤྲུལ། །བཀྲ་ཤིས་རྟགས་བརྒྱད་རིན་ཆེན་བདུན། །སྲ་བའི་གོ་ཆ་རྣོ་བའི་མཚོན། །མདའ་དར་ཕུད་རྒོད་གཙང་མ་འབུལ། །ལྷ་དང་སྲུང་མའི་དམག་ཚོགས་རྣམས། །རེམ་ཞིག་སྡང་བའི་དགྲ་ལ་རྒྱུགས། །སྡང་བའི་དགྲ་ལ་ཞེ་སྡང་སྐྱེད། །ཧོར་སོགས་དགྲ་རྐུན་ལས་ངན་གྱིས། །སྲུང་མ་གཉན་པོ་མ་བརྩིས་ན། །ཁྱོད་ཀྱིས་ཀོ་ལོང་དམ་པོ་མཛོད། །བསྐལ་པ་དུས་ཀྱི་སྙིགས་མ་ལ། །ཡེ་ཤེས་ལྷ་ནི་འགྲུབ་ཐག་རིང་། །ཁྱེད་རྣམས་འཇིག་རྟེན་མྱུར་མགྱོགས་ལྷ། །སྣང་སྲིད་ལྷ་འདྲེ་དམག་ལ་འདུས། །རྒྱལ་ཆེན་སྡེ་བཞིས་
དམག་དཔོན་གྱིས། །ཕྱོགས་སྐྱོང་བཅུ་ཡིས་སོ་མཚམས་སྲུངས། །རཱ་ཧུ་ལ་ཡིས་ཤན་པ་གྱིས། །རྡོ་རྗེ་ལེགས་པས་སྣ་ཁྲིད་གྱིས། །མ་མོའི་ཚོགས་ཀྱིས་དལ་ཡམས་ཕོབ། །གཤིན་རྗེའི་ཚོགས་ཀྱིས་ཁྲམ་ལ་ཐོབ། །ནམ་མཁའི་ཁམས་ནས་ལྷ་དམག་དྲོངས། །བར་སྣང་ཁམས་ནས་གཉན་དམག་དྲོངས། །ས་གཞིའི་ཁམས་ནས་ཀླུ་དམག་དྲོངས། །རྒྱལ་པོ་ཉི་མའི་ཟེར་ལ་རྒྱུགས། །བདུད་དམག་ནམ་གྱི་གུང་ལ་རྒྱུག །བཙན་དམག་སྐྱ་རེངས་ཟེར་ལ་རྒྱུགས། །གནམ་ས་རི་ལུང་བར་སྣང་གང་། །ལྷ་སྲིན་སྡེ་བརྒྱད་དམག་ལ་ཆོས། །མྱུར་བར་མྱུར་བར་རིངས་པོ་རིངས། །གོ་ཁྲབ་གྱོན་ལ་རྣོ་མཚོན་རྡོར། །མགྱོགས་པ་ཞོན་ལ་རིངས་པར་རྒྱུགས། །ཞེ་སྡང་ཕྱུངས་ལ་ང་རྒྱལ་སྐྱེད། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །དགྲ་མཁར་ཤིགས་ལ་དགྲ་གཞུ་ཆོག །དགྲ་དཔུང་ཆོག་ལ་དགྲ་སྲོག་ཆོད། །དཔའ་བོ་སོད་ལ་མགྱོགས་པ་སྐྱེལ། །གོ་ཁྲབ་ཤུས་ལ་རྣོ་མཚོན་འཕྲོག །དཔུང་པ་ཆོག་ལ་རྒྱུས་པ་ཆིངས། །སྡང་བའི་དགྲ་བོ་གནོད་བྱེད་ཀྱིས། །དམག་དང་རྐུན་ཇག་ཤོམ་པའི་ཚེ། །སྲུང་མ་
རྣམས་ཀྱིས་ཤོལ་ཐོབ་ཅིག །སྲུང་མ་རྣམས་ཀྱིས་དམག་སྣ་སྒྱུར། །ཕོ་ཉ་རྣམས་ཀྱིས་སྡང་དགྲའི་དམག་དཔུང་ཟློག །ལས་མཁན་རྣམས་ཀྱིས་དགྲ་བོ་སོད། །དྲེགས་བྱེད་རྣམས་ཀྱིས་དགྲ་སྙིང་ཕྱུངས། །ལྷ་སྲིན་ཚོགས་ཀྱིས་བླ་ཚེ་ཟོ། །དགྲ་ཤ་ཟོ་ལ་དགྲ་ཁྲག་འཐུང་། །བཙོ་བསྲེག་མི་ཁོམ་རློན་པར་ཟོ། །།དགྲ་ཇག་རྐུན་འཕྲོག་ཤོམ་པ་དང་། ཁ་མཆུ་གྱོད་ཚོལ་བྱེད་པ་དང་། །དཀོན་མཆོག་གསུམ་གྱི་སྤྱི་དགྲ་དང་། །རྣལ་འབྱོར་བདག་གི་སྒོས་དགྲ་རྣམས། །ལོ་དང་ཟླ་བར་མ་འགྱང་བར། །ཞག་དང་ཟ་མར་མ་བཞག་ལ། །ད་ལྟ་ཉིད་དུ་རྡུལ་དུ་རློགས། །དགྲ་བོ་རང་གཤེད་རང་གིས་གྱིས། །དགྲ་བོ་རང་མཚོན་རང་ལ་རྒྱོབ། །དགྲ་བོ་རང་ཤ་རང་གིས་ཟོ། །དགྲ་བོ་རང་ཁྲག་རང་གིས་འཐུངས།མ་གཡེལ་སྲུང་མ་མཐུ་རྩལ་ཅན། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། ཟས་སུ་དགྲ་བོའི་ཤ་ལ་ཟོ། །སྐོམ་དུ་དགྲ་བོའི་ཁྲག་ལ་འཐུང་། །བཅོལ་བའི་ཕྲིན་ལས་འགྲུབ་པར་མཛོད། །ཅེས་གཏོར་མ་མདོས་ནང་དུ་ཕུལ། བཀའ་སྲུང་རྣམས་ཀྱི་སྤྲུལ་པ་གྲངས་མེད་འཕྲོས་ནས་ཉི་མ་ཕྱོགས་བཞི་མཚམས་བརྒྱད་ཀྱི་དགྲ་བོ་རྣམས་རང་
དབང་མེད་པར་བཀུག་ནས་གཡག་རུ་ནང་གི་ལིངྒ་བླ་རྡེལ་ལ་ཐིམ་པར་བསམ་ཞིང་། ཧཱུྃ། མ་གཡེལ་ཆོས་སྐྱོང་སྲུང་མའི་ཚོགས། །ཉི་མ་ཕྱོགས་བཞི་མཚམས་བརྒྱད་ནས། །བདག་ལ་སྡང་བའི་དགྲ་བོ་འདི། །སྐད་ཅིག་ཉིད་ལ་ཁུག་ལ་ཤོག །ལིངྒ་དགྲ་ཡས་འདི་ལ་མྱུར་དུ་ཁུག །གཡག་རུ་གཡོན་མའི་ནང་དུ་ཁུག །ལྕགས་མཁར་སྒོ་མེད་ནང་དུ་མནན། །རྟ་རྨིག་གཡོན་པའི་ཞབས་སུ་མནན། །སྐལ་པའི་མུན་པས་སྟེང་ནས་ནོན། །རི་རབ་ཆེན་པོའི་སྟེང་ནས་ནོན། །རྒྱ་མཚོ་ཆེན་པོས་སྟེང་ནས་ནོན། །བྲུབ་བོ་མནན་ནོ་མ་ལྡང་ཞིག །བཅུག་པ་ཡིན་ནོ་མ་ལྡང་ཞིག །བཅད་པ་ཡིན་ནོ་མ་སྐྱེད་ཅིག །དམ་ཉམས་དགྲ་བོ་མ་ཤོར་ཅིག །དགྲ་སྲོག་དམར་པོ་མྱུར་དུ་ཆོད། །ཐལ་བ་རྡུལ་དུ་བརླག་པར་མཛོད། །སྲུང་མ་རྣམས་ཀྱིས་དགྲ་བོའི་ཤ་ཟོས་ཁྲག་འཐུང་ནས་རྔམ་ཞིང་གྱེས་པར་བསམ་ལ། བདག་གི་གང་བཅོལ་ཕྲིན་ལས་སྒྲུབ་པར་བསམ་ཞིང་འདི་སྐད་དོ། །ཧཱུྃ། ཡི་དམ་ལྷ་ཚོགས་གཏོར་མ་འདི་བཞེས་ལ། །བསྟན་པའི་སྤྱི་དགྲ་རྣལ་འབྱོར་སྒོས་དགྲ་ཟློག །ཕོ་རྒྱུད་མགོན་པོའི་ཚོགས་རྣམས་དགྲ་ལ་ཆོས། །བསྟན་པའི་སྤྱི་དགྲ་བདུད་རྒྱུད་རྩད་ནས་ཟློག །མོ་རྒྱུད་ལྷ་མོའི་
ཚོགས་རྣམས་དགྲ་ལ་ཆོས། །གསང་སྔགས་ཆོས་ལ་སྡང་བ་རྩད་ནས་ཟློག །སྲོག་བདུད་མ་ནིང་ནག་པོ་དགྲ་ལ་ཆོས། །དགྲ་བོའི་སྲུང་ཟློག་མཁན་གྱི་ནུས་པ་ཟློག །ལས་མགོན་ཕོ་རྒྱུད་དམག་ཚོགས་དགྲ་ལ་ཆོས། །སྡང་དགྲ་རྐྱེན་ངན་སྟོང་དང་ཉི་ཁྲི་ཟློག །མ་མོ་མོ་རྒྱུད་དམག་ཚོགས་དགྲ་ལ་ཆོས། །སྡང་དགྲ་ནད་རིགས་བཞི་བརྒྱ་རྩ་བཞི་ཟློག །རྡོར་ལེགས་ཐེའུ་རང་དམག་ཚོགས་དགྲ་ལ་ཆོས། །སྡང་དགྲ་ཕོ་ལྷོག་གླང་ཐབ་སྦྱོས་གྲིས་ཟློག །ཁྱབ་འཇུག་གཟའ་སྐར་དམག་ཚོགས་དགྲ་ལ་ཆོས། །སྡང་དགྲ་གདོང་ཐུགས་ཧུར་ཐུམ་ནག་པོས་ཟློག །སྔགས་སྲུང་མ་མོའི་དམག་ཚོགས་དགྲ་ལ་ཆོས། །སྡང་དགྲ་ཁྲག་ནད་རྒྱུ་གཟེར་དྲག་པོས་ཟློག །པེ་ཧར་རྒྱལ་འགོང་དམག་ཚོགས་དགྲ་ལ་ཆོས། །སྡང་དགྲ་བྱེ་ཞིག་སྨྱོ་འབོག་ལྕེབ་གྲིར་ཟློག །ཡམ་ཤུད་བཙན་གྱི་དམག་ཚོགས་དགྲ་ལ་ཆོས། །།སྡང་དགྲ་གློ་བུར་གྲི་ཐབས་སྣ་དགུའི་ཟློག །སྨྱོ་ཁ་ཀླུ་བདུད་དམག་ཚོགས་དགྲ་ལ་ཆོས། །སྡང་དགྲ་ཞྭ་གྲུམ་ལྷོག་རྒོད་མཛེ་ཡིས་ཟློག །མིག་དམར་ཤན་པའི་དམག་ཚོགས་དགྲ་ལ་ཆོས། །སྡང་དགྲ་གློ་བུར་ཁྲག་སྐྱུག་བམ་ལོག་ཟློག །མཆེད་གསུམ་སྤུ་གྲིའི་
དམག་ཚོགས་དགྲ་ལ་ཆོས། །སྡང་དགྲ་ཧུར་ཐུམ་ཁྲག་སྐྱུག་གྲི་རུ་ཟློག །ཀེང་རུས་དུར་བདག་དམག་ཚོགས་དགྲ་ལ་ཆོས། །སྡང་དགྲ་ཕྲ་མེན་དུར་འདྲེ་དུར་སྲི་ཟློག །གཅིག་ཆར་ལས་གཤིན་དམག་ཚོགས་དགྲ་ལ་ཆོས། །སྡང་དགྲ་འཆོར་མེད་གཤིན་རྗེའི་ཕོ་ཉས་ཟློག །སྡེ་དཔོན་སུམ་ཅུའི་དམག་ཚོགས་དགྲ་ལ་ཆོས། །སྡང་དགྲ་སྣང་སྲིད་དྲེགས་པའི་དམག་གིས་ཟློག །དྲེགས་ཆེན་བཅོ་བརྒྱད་དམག་ཚོགས་དགྲ་ལ་ཆོས། །སྡང་དགྲ་དྲག་སྔགས་གདུག་པའི་དབལ་གྱིས་ཟློག །དྲེགས་པ་ཉི་ཤུའི་དམག་ཚོགས་དགྲ་ལ་ཆོས། །སྡང་དགྲ་ལྟས་ངན་བརྒྱད་ཅུ་རྩ་བཞིས་ཟློག །ཏྲང་དཀར་བདུད་ཀྱི་དམག་ཚོགས་དགྲ་ལ་ཆོས། །སྡང་དགྲ་འཆུག་མེད་བདུད་ཀྱི་ཞགས་པས་ཟློག །སྲོག་བསྒྲུབ་མོ་གདོན་དམག་ཚོགས་དགྲ་ལ་ཆོས། །སྡང་དགྲ་རིམས་ནད་དལ་ཡམས་དྲག་པོས་ཟློག །ཤ་ཟ་ཁ་མོའི་དམག་ཚོགས་དགྲ་ལ་ཆོས། །དགྲ་ནོར་གློ་ཧོན་གོད་ཡམས་དམར་ཕྱོགས་ཟློག །བཙན་རྒོད་འབར་བའི་དམག་ཚོགས་དགྲ་ལ་ཆོས། །དགྲ་བོའི་འོག་རྟ་རྟ་ནད་འཚེར་བཅུས་ཟློག །ལྟོ་འཕྱེ་ས་བདག་དམག་ཚོགས་དགྲ་ལ་ཆོས། །སྡང་
དགྲའི་ལོ་ཐོག་བཙའ་སད་སེར་བས་ཟློག །ཕྱོགས་སྐྱོང་གདོན་གྱི་དམག་ཚོགས་དགྲ་ལ་ཆོས། །སྡང་དགྲའི་རྗེས་ཤུལ་སྟོང་ཕྲག་བརྒྱད་ཅུས་ཟློག །ཡེ་ཤེས་མགོན་པོ་ཡབ་ཡུམ་དགྲ་ལ་ཆོས། །བསྒྲལ་ཚད་རྣམ་ཤེས་དག་པའི་ཞིང་དུ་ཟློག །མ་གཡེལ་ལས་མཛོད་དམ་ཅན་རྒྱ་མཚོའི་ཚོགས། །ཁས་བླངས་དུས་ལ་བབ་བོ་སཱ་མ་ཡ། །ཨོཾ་ཤྲཱི་མ་ཧཱ་ཀཱ་ལ་ཁཱ་ཧི༔ ཏྲག་རཀྟ་ཁཱ་ཧི། ཏྲཀྵ་རཀྟ་ཐུན་བྷྱོ་ཁཱ་ཧི། ཏྲག་རཀྵ་རྦད་བློ་ཁཱ་ཧི། དམ་ཅན་མགོན་པོ་མཁའ་འགྲོའི་ཚོགས་སུ་གྱུར་པ་རྣམས་དམ་རྫས་དགྲ་བོའི་ཤ་ཁྲག་བཞེས་སུ་གསོལ། ཁཱ་ཧི། ཨོཾ་མ་ཧཱ་ཀཱ་ལ་ཡ་ཤ་ས་ན་ཨུ་པ་ཧ་རི་ཎི། ཨེ་ཥ་ཨ་པཉྩི་མ་ཀ་ལོ་ཡང་། ཨི་དཾ་རཏྣ་ཏྲ་ཡཱ་ཡ། ཨ་པ་ཀ་རི་ཎི་ཡ་ཏི་པྲ་ཏི་ཛྙཱ། སྨ་ར་སི་ཏ་དཱ། ཨི་དཾ་དུཥཱན་བ་ལིང་ཁ་ཁ་ཁཱ་ཧི་ཁཱ་ཧི། མཱ་ར་མཱ་ར། གྷིཉྩ་ཧཱུྃ། བྷནྡྷ་བྷནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དཱི་ན་མེ་ཀེ་ན་དགྲ་བགེགས་སྒྲེ་མཱ་ར་ཡ་ཧཱུྃ་ཕཊ། ཅེས་པ་འདི་གཏོར་འབུལ་གྱི་མཇུག་ཏུ་སྦྱར་ན་དགྲ་ཆོས་དང་དགྲ་བཟློག་ཏུ་འགྱུར་རོ། །༈ མ་གཡེལ་སྲུང་མ་མཐུ་རྩལ་ཅན། བདག་ཅག་དཔོན་སློབ་འཁོར་བཅས་རྣམས། །ཕྱོགས་བཞི་མཚམས་བརྒྱད་
གར་འགྲོ་ཡང་། །སྔོན་ནས་སུས་ལ་རྒྱབ་ནས་སྐྱོལ། །གཞི་བྱེས་ལམ་གསུམ་གར་འདུག་ཀྱང་། །འཇིགས་པ་བརྒྱད་ལས་སྐྱོབ་པར་མཛོད། །མཐོ་ལ་བབ་ན་ལམ་སྒྲོལ་མཛོད། །དམའ་ལ་བབ་ན་ལམ་སོལ་ཅིག །ཆུ་ལ་བབས་ན་ཆུ་སྒྲོལ་ཅིག །ཉམ་ངའི་ས་ནས་མཛོད་རྟ་རྟེན། །མཐོ་བ་དགུང་ནས་བྱ་ར་མཛོད། །དམག་བ་ཐང་ནས་འཚོ་རྫི་མཛོད། །བདག་གི་གར་འགྲོའི་ལམ་སྣ་དྲོངས། །ཚོང་པ་རྒྱབ་ཀྱི་ཤུལ་ཡར་ཆོག །ཁལ་ཁུར་མ་ཡོ་བདེ་བར་སྲོངས། །བདག་གི་མི་རྟ་ཁལ་མཛོད་རྣམས། །ཤུལ་རིང་ལམ་དུ་ཞུགས་པའི་ཚེ། །ཆད་ཅིང་ངལ་དུབ་མ་བཏང་ཞིག །ན་ཚའི་འཚེ་བ་མ་བཏང་ཞིག །བདག་ཅག་འཁོར་བཅས་གར་འགྲོ་ཡང་། །ཉིན་ལ་བབ་ན་མཚོ་རྗེ་མཛོད། །མཚན་ལ་བབས་ན་མེལ་ཚེ་མཛོད། །ཕྱི་རྐུན་ནང་དུ་མ་བཏང་ཞིག །ནང་རྐུན་བྱུང་ལ་མ་འགྱེད་ཅིག །སློབ་དཔོན་ཐུགས་ཡིད་མ་དཀྲུག་ཅིག །བྲང་མིའི་ནང་འཁོན་མ་བཏང་ཞིག །གྲོ་ལ་སྣོག་པོ་མ་བཏང་ཞིག །ནང་མི་ཐུགས་འགལ་མ་བཏང་ཞིག །ཡེ་འདྲོག་གློ་བུར་མ་བཏང་ཞིག །བདག་ཅག་འཁོར་བཅས་གར་འགྲོ་ཡང་། །
ཡག་དང་སྤྱོད་ལ་ཉེས་དང་བསྣོལ། །མི་ཕྱུགས་ནང་ནོར་གྲོགས་དང་སྤྱོད། །ཁ་ནི་ཟས་འདོད་ཟས་དང་སྤྱོད། །རྒྱབ་ནི་གོས་འདོད་གོས་དང་སྤྱོད། །ལག་ནི་ནོར་འདོད་ནོར་དང་སྤྱོད། །ཕ་རོལ་རྣམས་ཀྱི་ཆངས་པ་ཁྲོལ། །གནས་པོ་རྣམས་ཀྱི་ཡིད་སེམས་སླུས། །གནས་མོ་རྣམས་ཀྱི་སྙིང་ལག་སྤྲུལ། །ཅི་འདོད་ནོར་གྱི་དངོས་གྲུབ་སྩོལ། །ལེགས་ལྡན་མགོན་པོས་ཚོང་དཔོན་གྱིས། །དཔལ་རབ་འཆང་གི་ལམ་ལྷ་མཛོད། །ཉི་མའི་སྲས་པོས་སོ་བ་གྱིས། །པནྟ་ཤ་བ་རི་ཡི་ནོར་རྣམས་སྐྱོངས། །ཨཱརླ་རེ་མན་ཏ་ཡིས་རྟ་རྣམས་འཚོས། །བྲག་ལྷ་མགོན་པོས་མགྲོན་ལམ་ཕྱེས། །ཨཱརྱ་ཛམ་བྷ་ལྷ་ཡིས་ནོར་ལྷ་མཛོད། །རྣམ་ཐོས་སྲས་ཀྱིས་གསེར་དངུལ་སྡུས། །སྲུང་མ་རྣམས་ཀྱིས་སྡང་དགྲ་ཐུལ། །འཇིགས་པ་བརྒྱད་ལས་ཐུགས་རྗེས་སྐྱོབ། །ཡུལ་ལྷ་གཉན་གྱི་མཐུ་རོགས་མཛོད། །ལྷ་ཀླུ་གཉན་གྱིས་རྒྱབ་རྟེན་མཛོད། །རྡོ་རྗེ་ལེགས་པ་ཚོང་ལ་མཁས། །ཕ་རོལ་རྣམས་ཀྱི་འཆང་པ་ཁྲོལ། །མི་ནས་ཆོད་ལ་བདག་ལ་བྱིན། །མ་གཡེལ་སྲུང་མ་མགྲོན་གྱི་ལྷ། །རེམ་ཞིག་འདོད་པའི་དོན་རྣམས་སྒྲུབས། །ལམ་དགྲ་བྱེས་ཀྱི་འགོང་པོ་ཡི། །
རྒྱུས་པ་ཆིངས་ལ་རྡུལ་དུ་རློགས། བཅོལ་བའི་ཕྲིན་ལས་འགྲུབ་པར་མཛོད། །དམིགས་པ་ནི་རང་ཉིད་ཡི་དམ་དུ་སྒོམ་པའི་མདུན་དུ་ཆོས་སྐྱོང་དང་ལྷ་ཀླུ་གཉན་དམག་རང་རང་གི་འཁོར་གྱི་དམག་དཔུང་ལ་ལྷ་དམག་འབུམ་ལ་ཀླུ་དམག་འབུམ། ལ་ལ་བཙན་དམག་གཤིན་རྗེ་མ་མོ་ཕྱོགས་སྐྱོང་གི་དམག་འབུམ་འབུམ་དང་བཅས་ནས་དགྲ་བོའི་ཤ་ཟོས་ཁྲག་འཐུང་ནས་རྡུལ་དུ་བརླག་པར་བསམ། ཚར་དགུ་སོགས་བྱ་ཞིང་རེ་རེ་ཐོན་པ་དང་བློ་གདབ་རེ་བྱ། བློ་གདབ་ནི་རྣལ་འབྱོར་པ་བདག་དང་མཆེད་ལྕམ་རྣམས་ཀྱིས་ནས་ཐོགས་ནས་གཏོར། དར་ནག་གིས་གཡབ་ཅིང་འདི་སྐད་དོ།། བྷྱོ། ང་ནི་སྔགས་འཆང་རྒྱལ་པོ་ཡིན། །ང་ནི་ཟློག་བྱེད་ཆེན་པོ་ཡིན། །ང་ནི་སྟོང་གསུམ་བདག་པོ་ཡིན། །སྣང་སྲིད་ང་ཡི་དབང་དུ་བསྡུས། །རང་བྱུང་བསྟན་པ་རིན་ཆེན་ལ། །བདག་ཅག་བཞུགས་དང་རྐྱང་ལགས་ཏེ། །འགྲོ་དྲུག་སེམས་ཅན་གྲང་མང་བས། །ལོག་རྟོག་གདུག་པའི་སེམས་ཀྱིས་སུ། །བསྟན་པའི་རུ་ཏྲ་བྱེད་པ་དང་། །དུག་ལྔ་རྒྱས་པའི་དབང་གིས་ནི། །རྒྱུ་སྦྱོར་ཡོན་གྱི་བདག་པོ་དང་། །སྔགས་འཆང་རྒྱལ་པོ་བདག་ཅག་ལ། །ཕྱོགས་བཞི་མཚམས་བརྒྱད་སྟེང་འོག་ནས། །གདུག་རྩུབ་གཏུམ་པའི་སེམས་ཀྱིས་སུ། །ངན་སྔགས་དམོད་པ་གང་བྱེད་
ཀྱིས། །སྟོང་གསུམ་མ་མོ་བློ་ཡིས་གདབ། །སྟོང་གསུམ་བྷྱོ་སྒྲ་དི་རི་རི། །སྣང་སྲིད་ལྷ་འདྲེ་བློ་ཡིས་ཐོབ། །སྣང་སྲིད་ཕྱོགས་སྒྲ་ཏི་རི་རི། །ནམ་མཁའ་ལྷ་ཡི་བྱད་སྣ་ཡང་། །ཉམས་པའི་དགྲ་བགེགས་འདི་ལ་བྷྱོ། །བར་སྣང་གཉན་གྱི་བྱད་སྣ་ཡང་། །ཉམས་པའི་དགྲ་བགེགས་འདི་ལ་བྷྱོ། །ས་བདག་ཀླུ་ཡི་བྱད་སྣ་ཡང་། །ཉམས་པའི་དགྲ་བགེགས་འདི་ལ་བྷྱོ། །སྣང་སྲིད་ལྷ་འདྲེའི་བྱད་སྣ་ཡང་། །ཉམས་པའི་དགྲ་བགེགས་འདི་ལ་སྦྱོ། །གླིང་བཞི་མི་ཡི་བྱད་སྣ་ཡང་། །ཉམས་པའི་དགྲ་བགེགས་འདི་ལ་བྷྱོ། །དྲང་སྲོང་ཡོངས་ཀྱི་དམོད་ཟོར་ཡང་། །ཉམས་པའི་དགྲ་བགེགས་འདི་ལ་བྷྱོ། །དེ་རིང་འཚོགས་པའི་གདུག་རྩུབ་ཅན། །ཉམས་པའི་དགྲ་བགེགས་འདི་ལ་བྷྱོ། །སེམས་ཀྱི་བསམ་པའི་གདུག་སེམས་ཅན། །ཉམས་པའི་དགྲ་བགེགས་འདི་ལ་བྷྱོ། །དུག་ལྔ་གཡོས་པའི་གདུག་རྩུབ་ཡང་། །ཉམས་པའི་དགྲ་བགེགས་འདི་ལ་བྷྱོ། །བྷྱོ་བྷྱོ་སྡང་བའི་དགྲ་ལ་བྷྱོ། །བྱོ་བློ་གནོད་པའི་བགེགས་ལ་བྷྱོ། །བྷྱོ་ཕྱོགས་བར་ཆད་བདུད་ལ་བློ། །བྷྱོ་བྷྱོ་བྱད་མའི་སྲོག་ལ་བློ། །བྷྱོ་བྷྱོ་བྱད་མའི་ཤ་ལ་བློ། །བྷྱོ་བྷྱོ་བྱད་མའི་སྙིང་ལ་བློ། །བྷྱོ་བྷྱོ་བྱད་མའི་
ཁྲག་ལ་བྷྱོ། །བྷྱོ་བྷྱོ་བྱད་མའི་རུས་ལ་བྷྱོ། །བྷྱོ་བྷྱོ་བྱད་མའི་ལྕེ་ལ་བྷྱོ། །བྷྱོ་བྷྱོ་བྱད་མའི་ལུས་ལ་བྷྱོ། །བྷྱོ་བྷྱོ་བྱད་མའི་ངག་ལ་བྷྱོ། །བྷྱོ་བྷྱོ་བྱད་མའི་ཡིད་ལ་བློ། །བྷྱོ་བྷྱོ་བྱད་མའི་ལྷ་ལ་བྷྱོ། །བྷྱོ་བྷྱོ་བྱད་མའི་སྔགས་ལ་བྷྱོ། །བྷྱོ་བྷྱོ་བྱད་མའི་ཐོག་ཏུ་བྷྱོ། གང་དགོས་ཀྱང་འདི། དགྲ་ཆོས། དགྲ་ཟློག །དགྲ་བྲུབ། དགྲ་མནན་སྤྱི་ལྟར་བྱའོ། །ཨོཾ་སརྦ་དྷརྨཱ་ལོ་ཀ་པཱ་ལ་ས་པཱ་རི་ཝཱ་ར། དགྲ་བགེགས་ཀྱི་སྲོག་ལ་ཁཱ་ཧི། ཚྭ་ས་ལ་ཁཱ་ཧི། རཀྟ་ལ་ཁཱ་ཧི། ཙིཏྟ་ལ་ཁཱ་ཧི། གོ་རོ་ཙ་ན་ལ་ཁཱ་ཧི། བྷ་ལིཾ་ཏ་ལ་ཁཱ་ཧི། གཏོར་མ་དུག་མཚོན་མེ་དཔུང་དུ་བསམས་ལ། ཆོས་སྐྱོང་བཀའ་སྲུང་ལྷ་འདྲེའི་དམག་དང་བཅས་པ་རྣམས་ཅི་ལྟ་བ་བཞིན་དུ་དགྲ་བགེགས་ཀྱི་ཐོག་ཏུ་སོང་ནས་ཐལ་བ་རྡུལ་དུ་བརླག་པར་བསམས་ལ། ཐན་དམག་བྱེ་བ་ས་ཡ་དགྲའི་ཁྱིམ་དུ་ཐན་དང་ལྟས་ངན་མི་སྡུག་པ་སྣ་ཚོགས་ཀྱིས་གང་ནས་རང་གི་དམག་དཔུང་མེད་པར་དགྲ་ལ་ལྟས་ངན་གྱི་ཆར་ཕབ་པར་བསམས་ལ། གཟའ་དར་བ་དང་སྤྱོད་ལ་དགྲ་ཕྱོགས་སུ་བཏང་། འདི་ནི་བྱད་ཁ་བཟློག་པ་དང་། དགྲ་སྣ་བསྒྱུར་བ་དང་། ཇག་སྣ་བསྒྱུར་བ་དང་། རྐུན་མ་བཅིང་བ་དང་། མོ་ངན་ འཚེར་རྩུབ 
་བསྒྱུར་བ་ལ་དགོས་སོ། འདི་ནི་རང་ལ་དགྲ་བྱུང་ངམ་བྱུང་དོགས་སམ། ནོར་གཞན་གྱིས་ཁྱེར་རམ་ཁྱེར་དོགས། གཞན་ལ་འཁོན་འགྲས་དང་། ཁ་མཆུ་རྩོད་པ་
སོགས་ལ་འདི་བྱའོ། །ཇག་ལ་འགྲོ་བ་དང་། དགྲ་བྲུབ་བྱེད་པ་དང་། དགྲ་ལ་མཐུ་བྱེད་པ་དང་། ཚོང་ལ་འགྲོ་བ་སོགས་ལ་འདི་བྱའོ། །འདི་ནི་ལེགས་ལྡན་དགྲ་ཆོས་གོང་འོག་གཉིས་དང་། རྟ་ནག་དགྲ་ཆོས། ཕྱག་བཞི་པ་ལྷགཉིས་ཀྱིས་རྒ་ལོ་ལ་གསུངས་པའི་དགྲ་ཆོས་དང་། མ་ནིང་དགྲ་ཆོས་དང་། ཞིང་སྐྱོང་དམག་བསྐུལ། དོམ་ཅན་དགྲ་ཆོས་གསོལ་ཀ་ཆེན་པོ་དང་། ཚེ་རིང་མའི་དགྲ་ཆོས་སོགས་ཐམས་ཅད་ཀྱི་དོན་བསྡུས་ནས་རིག་སྔགས་འཆང་བ། ༧ ཀརྨ་ཨ་རཱ་གས་སྦྱར་བའོ། །འདི་ལ་ཉེས་པ་གང་མཆིས་སྲུང་མ་རྣམས་ལ་བཤགས། །དགེ་བས་དགྲ་ཇག་ཆོམ་རྐུན་གནོད་པ་ཞི། །དཀོན་མཆོག་དབུ་འཕང་དགུང་ལ་རེག་གྱུར་ཅིག །དྲིན་ཆེན་མཁས་གྲུབ་ཀརྨ་ཆགས་མེད་ཀྱི། །ཞལ་ཁྲིད་ལྟ་བུར་སྔགས་འཆང་མགོན་ནག་གི །བསྒྲིག་པས་མི་ཁ་དགྲ་རྐུན་ཁ་མཆུ་རྣམས། །མྱུར་དུ་ཞི་ཞིང་བདེ་བར་མཛད་དུ་གསོལ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།