ལྷ་མོ་འོད་ཟེར་ཅན་སེར་མོ་ཕྱག་གཉིས་མའི་སྒྲུབ་ཐབས་འདོན་སྒོམ་སྦྲག་པ་བསྙེན་སྒྲུབ་ལས་སྦྱོར་གཅིག་ཏུ་དྲིལ་བ།
ལྷ་མོ་འོད་ཟེར་ཅན་སེར་མོ་ཕྱག་གཉིས་མའི་སྒྲུབ་ཐབས་འདོན་སྒོམ་སྦྲག་པ་བསྙེན་སྒྲུབ་ལས་སྦྱོར་གཅིག་ཏུ་དྲིལ་བ་བཞུགས་སོ། །
ན་མོ་དྷེ་ཝི་མཱ་རི་ཙི། འཇིགས་པ་ཀུན་སྐྱོབ་མ་ལ་ཕྱག་འཚལ་ལོ། །ལྷ་མོ་འདི་ཉིད་དང་པོ་ཡུན་རིང་བསྙེན། །བར་དུ་བསྒྲུབ་ཅིང་ཐ་མ་ལས་ལ་སྦྱོར། །གསུངས་ཀྱང་སྙིགས་དུས་དེ་འདྲའི་ལོང་མ་མཆིས། །ཚེ་ཐུང་ནད་མང་དགྲ་རྐུན་རླུང་ལྟར་འཚུབ། །དེས་ན་མྱུར་དུ་བྱིན་རླབས་འཇུག་པའི་ཐབས། །བསྙེན་སྒྲུབ་ལས་སྦྱོར་ཆིག་དྲིལ་སྒྲུབ་པ་བཤད། །དཀར་གསུམ་གཏོར་མ་ཟླུམ་པོ་བཤམས་པའི་རྩེར། །ལྷ་མོའི་ཙཀླི་བཙུགས་པ་དམིགས་པའི་རྟེན། །ཡང་ན་ཤིང་ལེབ་སོགས་ལ་ལྷ་མོ་ནི། །ལྗང་གུ་གཡོན་གཟིགས་མཆོད་རྟེན་དབུ་བརྒྱན་པ། །ཨོཾ་རག་སྟོད་གཡོགས་སྔོན་པོ་ཅན་བྲིས་སོ། །ཤིང་ལ་རྒྱབ་རྟེན་པདྨའི་གདན་ཅན་ནོ། །དེ་ཡི་མདུན་ངོས་མཆོད་པ་ཅི་འབྱོར་བཤམས། །ས་ཡི་གྲྭའུ་གྲུ་བཞི་ཁ་སྦྱར་
ནང་། །ཡ་གབ་མ་གབ་ཚུ་ཡིག་སེར་པོ་བྲི། །ཏཱཾ་ཡིག་མིག་ཏུ་སྔགས་རིང་བྲིས་པ་ཡི། །ཙཀླུའི་གོང་དུ་དགྲ་ཇག་ཆོམ་རྐུན་མིང་། །བྲིས་པའི་བར་དུ་གོ་གསུམ་ཐལ་བས་བཀང་། །ཁ་སྦྱོར་སྟེང་དུ་སྣ་ཚོགས་རྡོ་རྗེ་བྲི། །སྐུད་པ་སེར་པོས་རྒྱ་གྲམ་དཀྲིས་བྱས་ལ། །གཏོར་མའི་འོག་གམ་རང་མདུན་དམན་སར་བཞག །ཤིང་གི་དབྱུག་པ་རྡོ་རྗེ་རྩེ་གསུམ་མགོ ། ཡུ་བ་རྡོ་རྗེ་རྩེ་གཅིག་བྱས་པ་གཅིག །ཡོད་ན་མདུན་བསྐྱེད་རྟེན་དུ་བཙུགས་པར་བྱ། །མེད་ན་ཙཀ་ལི་གིས་ནི་ཆོག་པའོ། །རང་ཉིད་ཁྲུས་དང་གཙང་སྦྲ་བྱ་བ་དང་། །སྒྲུབ་ཚེ་ཚོགས་འཁོར་མ་གཏོགས་ཤ་ཆང་སྤང་། །ལ་ཕུད་སྒོག་པ་མི་གཙང་ཟས་ལ་འཛེམ། །ལྷ་མོ་དེ་ཉིད་རྩེ་གཅིག་དད་པས་བསྒྲུབ། །འདོན་སྒོམ་སྦྲག་མ་འདི་ཉིད་ཐུན་གསུམ་སྟེ། །ཐུན་གསུམ་བསྙེན་སྒྲུབ་ལས་
སྦྱོར་གསུམ་པོ་ཡིན། །ཐུན་མཚམས་མདུན་བསྐྱེད་མཆོད་བསྟོད་གསུམ་ཁ་འདོན། །དཀོན་མཆོག་གསུམ་དང་འོད་ཟེར་ཅན་མ་ལ། །བདག་དང་བསྲུང་བྱ་འཁོར་བཅས་སྐྱབས་སུ་མཆི། །འགྲོ་བ་ཀུན་གྱི་འཇིགས་སྐྲག་བསལ་བའི་ཕྱིར། །འཕགས་མ་འོད་ཟེར་ཅན་མ་བསྒྲུབ་པར་བྱ། །རང་ཉིད་སྐད་ཅིག་ལྷ་མོའི་སྐུར་གསལ་བའི། །ཐུགས་ཀའི་ཏཱཾ་ཡིག་འོད་ཀྱིས་འོད་ཟེར་ཅན། །སངས་རྒྱས་བྱང་སེམས་འཁོར་ཚོགས་དང་བཅས་པ། །སྤྱན་དྲངས་མདུན་གྱི་ནམ་མཁར་བཞུགས་པ་ལ། །རང་གི་ཐུགས་ཀའི་འོད་ལས་མཆོད་པའི་སྤྲིན། །དཔག་མེད་སྤྲུལ་ནས་ལྷ་མོའི་སྐུ་ལ་མཆོད། །ན་མོ་མཱ་རི་ཙྩཾ་སརྦ་པྲ་ཏཱིཙྪ་སྭཱ་ཧཱ། དཀོན་མཆོག་གསུམ་དངོས་འཇིགས་པ་ཀུན་སེལ་མ། །འོད་ཟེར་ཅན་ལ་བདག་ཅག་སྐྱབས་སུ་མཆི། །ཐོག་མེད་དུས་ནས་བདག་ཅག་འཁོར་བཅས་ཀྱིས། །འཇིགས་དང་སྡུག་བསྔལ་རྒྱུ་བསགས་མི་དགེའི་ལས། །གང་བྱས་དེ་དག་འགྱོད་པས་སོ་སོར་བཤགས། །རྒྱལ་དང་རྒྱལ་སྲས་འཕགས་དང་སོ་སྐྱེ་ཡིས། །མི་འཇིགས་སྦྱིན་དང་བཟོད་པའི་གོ་ཆ་སོགས། །དགེ་བ་གང་བསགས་ཀུན་ལ་རྗེས་ཡི་རང་། །འགྲོ་ཀུན་འཁོར་བའི་འཇིགས་ལས་སྐྱོབ་པའི་
ཕྱིར། །བླ་མེད་བྱང་ཆུབ་སེམས་ནི་བདག་གིས་བསྐྱེད། །ནམ་མཁའི་མཁའ་མཉམ་སེམས་ཅན་མ་ལུས་པའི། །འཇིགས་སྐྲག་སྡུག་བསྔལ་ཚོགས་ནི་ཅི་མཆིས་པ། །ཐམས་ཅད་མ་ལུས་བདག་གིས་སེལ་བར་ཤོག །ནམ་མཁའི་ལྷ་མོ་འོད་ཞུ་བདག་ལ་ཐིམ། །འགྲོ་ཀུན་བདེ་ལྡན་སྡུག་བསྔལ་ཀུན་བྲལ་ཞིང་། །བདེ་ལས་ཉམས་མེད་བཏང་སྙོམས་ལ་གནས་ཤོག །ཨོཾ་སྭ་བྷཱ་ཝ་ཤུདྡྷཱ་སརྦ་དྷསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་རྡོ་རྗེའི་ས་གཞི་དང་། །རྭ་གུར་མེ་རི་འབར་བའི་དབུས་ཉིད་དུ། །སྣ་ཚོགས་པདྨ་ཟླ་སྟེང་རང་གི་སེམས། །ཏཱཾ་ཡིག་སེར་པོའི་འོད་ཀྱིས་རྒྱལ་བ་མཆོད། །སེམས་ཅན་ཀུན་གྱི་འཇིགས་པ་ཐམས་ཅད་བསལ། །རྒྱལ་བའི་སྟོབས་བཅུ་འགྲོ་བའི་བསོད་ནམས་སྟོབས། །ཐམས་ཅད་ཚུར་འདུས་མྱ་ངན་མེད་པའི་ཤིང་། །ཡལ་ག་ནཱཾ་གྱིས་མཚན་པ་ཡོངས་གྱུར་ལས། །རང་ཉིད་ལྷ་མོ་གསེར་མདོག་ཤིན་ཏུ་མཛེས། །ཞལ་གཅིག་ཞི་འཛུམ་ཕྱག་གཉིས་ཁབ་སྐུད་འཛིན། །ཞབས་གཉིས་ཕྱེད་སྐྱིལ་གཡོན་པ་ཅུང་ཟད་བརྐྱངས། །སྟོད་གཡོགས་ཨོཾ་རང་སྔོན་པོ་ཤམ་ཐབས་དཀར། །སྣ་ཚོགས་དར་དང་རིན་ཆེན་རྒྱན་གྱིས་
བཀླུབས། །གནས་གསུམ་འབྲུ་གསུམ་ཐུགས་ཀའི་མཾ་ཡིག་ལས། །འོད་འཕྲོས་ཡེ་ཤེས་པ་དང་དབང་གི་ལྷ། །ནམ་མཁར་སྤྱན་དྲངས་ཡིད་སྤྲུལ་མཆོད་ཚོགས་འབུལ། །ཛཧཱུྃ་བོ་ཧོས་དམ་ཡེ་དབྱེར་མེད་འདྲེས། །དབང་ལྷས་དབང་བསྐུར་རྣམ་སྣང་དབུ་བརྒྱན་གྱུར། །ཐུགས་ཀར་ཟླ་སྟེང་རཾ་ཡིག་མཐའ་མ་ལ། །སྔགས་ཕྲེང་གཡོན་དུ་འཁོར་བའི་འོད་ཟེར་གྱིས། །རྒྱལ་བ་ཀུན་མཆོད་འགྲོ་བའི་འཇིགས་ཀུན་བསལ། །རྒྱལ་བ་སྲས་བཅས་ཀུན་གྱི་མཐུ་དང་སྟོབས། །འཇིག་རྟེན་སྐྱེ་འགྲོའི་བསོད་ནམས་སྟོབས་ནུས་རྣམས། །བསྡུས་ནས་བདག་དང་བསྲུང་བྱ་རྣམས་ལ་ཐིམ། །ཁྱད་པར་འོག་མིན་གནས་དང་རི་རབ་རྩེར། །མྱ་ངན་མེད་པ་རྒྱ་གར་ཤིང་དྲུང་ནས། །འོད་ཟེར་ཅན་མའི་སྐུ་ནི་ཆེ་ཕྲའི་ཚོགས། །ཁ་བ་བུ་ཡུག་འཚུབ་པ་ལྟ་བུར་བྱོན། །བདག་དང་བསྲུང་བྱ་ཀུན་ལ་སིབ་སིབ་ཐིམ། །འཇིགས་སྐྲག་སྡུག་བསྔལ་ཀུན་ལས་སྐྱོབ་པར་གྱུར། །ཨོཾ་མཱ་རི་ཙེ་སྭཱ་ཧཱ། ཡི་གེ་དྲུག་པ་བསྙེན་པ་འདི་ཉིད་ནི། །ནམ་ལངས་ནས་བཟུང་དྲོས་ཆེན་བར་དུ་བཟླས། །དེ་ནས་ཐུན་མཚམས་མདུན་བསྐྱེད་མཆོད་བསྟོད་ནི། །ཨོཾ་སྭ་བྷ་ཝ༔ སྟོང་པའི་ངང་ལས་མདུན་དུ་པད་ཟླའི་སྟེང་། །མྱ་ངན་
མེད་པའི་ཤིང་གི་ཡལ་ག་ནི། །ཏཱཾ་ཡིག་སེར་པོས་མཚན་པ་ཡོངས་གྱུར་ལས། །ལྷ་མོ་འོད་ཟེར་ཅན་མ་གསེར་གྱི་མདོག །ཞལ་གཅིག་ཞི་འཛུམ་ཐོར་ཚུགས་དབུ་རྒྱན་ཅན། །ཕྱག་གཉིས་ཁབ་སྐུད་གནོད་བྱེད་ཁ་མིག་ཚེམས། །དར་དཀར་སྨད་གཡོགས་རག་སྟོད་གཡོགས་སྔོ། །རིན་ཆེན་རྒྱན་ལྡན་སྐྱིལ་ཀྲུང་རོལ་སྟབས་བཞུགས། །ཕོ་ཉ་མོ་བཞི་ལ་སོགས་འཁོར་གྱིས་བསྐོར། །དེ་ཡི་གནས་གསུམ་ཨོཾ་ཨཱཿཿཧཱུྃ་གསུམ་དང་། །ཐུགས་ཀར་ཟླ་སྟེང་ཏཱཾ་ཡིག་སྔགས་ཕྲེང་ལས། །འོད་འཕྲོས་ཡེ་ཤེས་པ་དང་དབང་ལྷ་རྣམས། །ནམ་མཁར་སྤྱན་དྲངས་བཛྲ་ས་མཱ་ཛཿ ཧཱུྃ། ཆོས་དབྱིངས་རྣམ་པར་དག་པའི་ཞིང་ཁམས་ནས། །རྒྱལ་བའི་བསྐྱེད་ཡུམ་ལྷ་མོ་འོད་ཟེར་ཅན། །གཤེགས་དང་བཞུགས་པའི་མཚན་མ་མི་མངའ་ཡང་། །ཆུ་ཟླ་བཞིན་དུ་གནས་འདིར་སྣང་བར་མཛོད། །འཐུག་པོ་བཀོད་དང་བདེ་ཅན་ཞིང་ཁམས་ནས། །རྒྱལ་བའི་བསྐྱེད་ཡུམ་ལྷ་མོ་འོད་ཟེར་ཅན། །སྙིགས་མ་ལྔ་དུས་འབྱོན་པར་མི་འོས་ཀྱང་། །སྨོན་ལམ་ཐུགས་བསྐྱེད་དབང་གིས་འདིར་གཤེགས་ཤིག །ཡོངས་འདུས་ཤིང་དང་མྱ་ངན་མེད་ཤིང་ནས། །རིག་
སྔགས་ལྷ་མོ་མཐུ་ཆེན་འོད་ཟེར་ཅན། །དེང་འདིར་ཁྱེད་ཀྱི་ཕྲིན་ལས་དུས་ལ་བབ། །གློག་བཞིན་མྱུར་བའི་སྟོབས་ཀྱིས་འདིར་བྱོན་ཞིག །གསེར་མདོག་ཕག་དང་པདྨ་ཟླ་བའི་སྟེང་། །མི་གཡོ་དགྱེས་ཤིང་བརྟན་པར་བཞུགས་སུ་གསོལ། །ཨོཾ་མཱ་རི་ཙེ་ཛཿཧཱུྃ་བཾ་ཧོ༔ ཏིཥྛ་ལྷན༔ དབང་ལྷས་དབང་བསྐུར་རྣམ་སྣང་དབུ་བརྒྱན་གྱུར། །ཧཱུཾ་ལས་རིན་ཆེན་སྣོད་དུ་ཁཾ་ཡིག་ལས། །མཆོད་པའི་སྤྲིན་དང་དཀར་གསུམ་བདུད་རྩིའི་མཚོ། །ཨོཾ་ཨཱཿཿཧཱུྃ་གིས་ཡེ་ཤེས་བདུད་རྩིར་གྱུར། །མཆོད་ཡོན་མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་ཉེར་སྤྱོད་རྣམ་པ་བདུན། །དངོས་འབྱོར་ཡིད་ཀྱིས་སྤྲུལ་ཏེ་འབུལ་ལགས་ན། །བདག་ཅག་རྣམས་ཀྱི་ཉེར་མཁོ་ལོངས་སྤྱོད་ལ། །དགྲ་ཇག་ཆོམ་རྐུན་འཇིགས་ལས་སྐྱོབས་པར་མཛོད། །གཟུགས་སྒྲ་དྲི་རོ་རེག་བྱའི་འདོད་ཡོན་ལྔ་། །དངོས་འབྱོར་ཡིད་ཀྱིས་སྤྲུལ་ཏེ་འབུལ་ལགས་ན། །བདག་གི་འདོད་ཡོན་མཁོ་རྒུ་ལོངས་སྤྱོད་ལ། །དགྲ་ཇག་ཆོམ་རྐུན་འཇིགས་ལས་སྐྱོབ་པར་མཛོད། །གདུགས་དང་གསེར་ཉ་དུང་དཀར་པདྨ་དང་། །རིན་ཆེན་བུམ་པ་དཔལ་བེའུ་འཁོར་ལོ་སྟེ། །བཀྲ་ཤིས་རྟགས་བརྒྱད་ལྷ་མོའི་སྐུ་
ལ་འབུལ། །བདག་ཅག་བཀྲ་ཤིས་བདེ་སྐྱིད་ལྡན་པར་མཛོད། །འཁོར་ལོ་ལ་སོགས་རྒྱལ་སྲིད་རིན་ཆེན་བདུན། །བློ་ཡིས་སྤྲུལ་ཏེ་ལྷ་མོ་ཁྱེད་ལ་འབུལ། བདག་དང་བདག་གི་བསྲུང་བྱ་ཐམས་ཅད་ཀུན། །རྒྱལ་པོའི་འཇིགས་པ་ཀུན་ལས་སྐྱབས་པར་མཛོད། །རིན་ཆེན་སྨན་འབྲུ་དྲི་དང་སྙིང་པོ་ལྔ། །སྣ་ཚོགས་མཆོད་པ་དངོས་སམ་ཡིད་ཀྱིས་འབུལ། །ཚེ་རབས་ཀུན་ཏུ་མེ་ཆུ་རྒྱལ་པོའི་དགྲ། །འཇིགས་དང་སྡུག་བསྔལ་ཀུན་ལས་སྐྱབས་པར་མཛོད། །གླིང་བཞི་ཉི་ཟླ་རི་རབ་གཞལ་མེད་ཁང་། །བློ་ཡིས་སྤྲུལ་ནས་ཡིད་ཀྱིས་ལེགས་བླངས་ནས། །དཔག་ཏུ་མེད་པའི་མཆོད་པས་མཆོད་ལགས་ན། །བདག་ཅག་ཡུལ་ཁམས་བཅས་པ་བསྐྱབ་ཏུ་གསོལ། །ཨོཾ་ཨ་ཀཱ་རོ༔ ཨོཾ་མཱ་རི་ཙེ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨནྡྷཾ་སོགས། ཧཱུྃ་བྷོ༔ རྒྱལ་བའི་ཡུམ་མཆོག་ལྷ་མོ་འོད་ཟེར་ཅན། །སྐུ་མདོག་ཕྱག་མཚན་མ་ངེས་ཅིར་ཡང་སྟོན། །རེས་འགའ་སེར་མོ་ཞལ་ལྔ་ཕྱག་བཅུ་མ། །རེས་འགའ་སེར་མོ་ཞལ་གསུམ་ཕྱག་བརྒྱད་མ། །རེས་འགའ་དམར་མོ་ཞལ་དྲུག་བཅུ་གཉིས་ཕྱག །རེས་འགའ་དམར་མོ་ཞལ་གསུམ་ཕྱག་
དྲུག་མ། །རེས་འགའ་སེར་མོ་ལྗང་མོ་ཕྱག་གཉིས་མ། །སྣ་ཚོགས་སྤྲུལ་པའི་སྐུ་ལ་ཕྱག་འཚལ་བསྟོད། །སྣ་ཚོགས་རྒྱན་དང་སྣ་ཚོགས་ཕྱག་མཚན་དང་། །སྣ་ཚོགས་ཞི་དང་ཁྲོ་དང་ཞི་མ་ཁྲོ། །སྣ་ཚོགས་འཇིག་རྟེན་སྐྱོང་དང་ཤིང་རྟ་དང་། །ཕག་དང་པད་ཟླ་ལ་སོགས་སྣ་ཚོགས་གདན། །ཡི་གེ་དྲུག་དང་བདུན་སོགས་སྣ་ཚོགས་སྔགས། །ཞི་རྒྱས་དབང་སོགས་སྣ་ཚོགས་ལས་གྲུབ་མ། །ལྷ་མོ་འཕྲུལ་མོ་ཆེ་ལ་བདག་བསྟོད་དོ། །བཀའ་ཡི་ཕོ་ཉ་ལྷ་མོ་ཕག་གདོང་བཞི། །ཁབ་སྐུད་ལ་སོགས་སྣ་ཚོགས་ཕྱག་མཚན་འཛིན། །གཙོ་མོའི་བཀའ་བཞིན་གང་བཅོལ་ལས་བསྒྲུབས་མ། །མྱུར་མགྱོགས་ཕྲིན་ལས་ཅན་ལ་བདག་གིས་བསྟོད། །གང་ཞིག་ལྷ་མོ་ཆེན་མོ་འོད་ཟེར་ཅན། །ཁྱོད་མིང་ཙམ་ཞིག་སུ་ཡིས་ཤེས་པ་དེ། །དགྲ་ཡི་དབང་དུ་འགྲོ་བར་མི་འགྱུར་ཞིང་། །ཆད་པས་བཅད་མེད་མགོ་བོ་བྲེག་ཏུ་མེད། །རྨོངས་པར་བྱར་མེད་མེ་ཡིས་བསྲེག་ཏུ་མེད། །བརྒག་ཏུ་མེད་ཅིང་བརྒལ་མེད་བཟུང་དུ་མེད། །དགྲ་དང་ཆོམ་རྐུན་ཕལ་པས་མཐོང་མི་འགྱུར། །ཞགས་པ་ལྕགས་སྒྲོག་དག་གིས་བཅིངས་མི་ནུས། །དེ་ལྟར་ནུས་ལྡན་ལྷ་མོ་མཆོག་ཁྱོད་ལ། །
བདག་གིས་ཕྱག་འཚལ་མཆོད་ཅིང་བསྟོད་ལགས་ན། །བདག་ཅག་དཔོན་སློབ་བསྲུང་བྱ་འཁོར་བཅས་ལ། །དགྲ་དང་ཆོམ་རྐུན་རྒྱལ་པོའི་འཇིགས་པ་ལས། །སྐྱོབ་པར་མཛོད་ཅིག་ལྷ་མོ་འོད་ཟེར་ཅན། །མེ་ཆུ་གཡངས་ས་དུག་གི་འཇིགས་པ་ལས། །སྐྱོབ་པར་མཛོད་ཅིག་ལྷ་མོ་འོད་ཟེར་ཅན། །ཕྱིར་རྒོལ་བ་དང་ཕྱི་ནང་འཁྲུག་རྩོད་ལས། །སྐྱོབ་པར་མཛོད་ཅིག་ལྷ་མོ་འོད་ཟེར་ཅན། །སྟག་གཟིག་སེང་གེ་ལ་སོགས་གཅན་གཟན་ལས། །སྐྱོབ་པར་མཛོད་ཅིག་ལྷ་མོ་འོད་ཟེར་ཅན། །ལམ་གྱི་དགྲ་དང་ཆོམ་རྐུན་ལམ་ངན་ལས། །སྐྱོབ་པར་མཛོད་ཅིག་ལྷ་མོ་འོད་ཟེར་ཅན། །བཅིངས་བ་བཏེགས་བརྩོག་མགོ་བོ་བྲེག་པ་ལས། །སྐྱོབ་པར་མཛོད་ཅིག་ལྷ་མོ་འོད་ཟེར་ཅན། །བསྲེག་དང་གཞུར་དང་ཆད་པས་བཅད་པ་ལས། །སྐྱོབ་པར་མཛོད་ཅིག་ལྷ་མོ་འོད་ཟེར་ཅན། །དགག་དང་བཟུང་དང་བརྒལ་བའི་འཇིགས་པ་ལས། །སྐྱོབ་པར་མཛོད་ཅིག་ལྷ་མོ་འོད་ཟེར་ཅན། །དགྲ་ཇག་ཆོམ་རྐུན་གནོད་འཚེ་ཤོམ་རྣམས་ཀྱི། །ཁ་མིག་ཚེམ་པར་མཛོད་ཅིག་འོད་ཟེར་ཅན། །གསེར་མདོག་ཕག་ར་ཉི་ཟླའི་བྱ་སྐྱིབས་སུ། །བདག་དང་བསྲུང་
བྱ་སྲུང་ཞིང་སྦ་བར་མཛོད། །སྔོན་གྱི་དམ་ཚིག་ཐུགས་དམ་མ་གཡེལ་བར། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །བདག་མདུན་ཡེ་ཤེས་པ་རྣམས་རྟེན་ལ་ཐིམ། །དམ་ཚིག་པ་རྣམས་མི་དམིགས་སྟོང་པར་གྱུར། །འདི་ལྟར་འོད་ཟེར་ཅན་མ་བསྒྲུབ་པ་ཡི། །དགེ་བས་འགྲོ་ཀུན་འཇིགས་པ་ཀུན་བྲལ་ནས། །མྱུར་དུ་བཅོམ་ལྡན་གོ་འཕང་ཐོབ་པར་ཤོག །འཇིགས་པ་ཀུན་སྐྱོབ་བཀྲ་ཤིས་ཀུན་སྩོལ་མ། །ལྷ་མོ་འོད་ཟེར་ཅན་གྱི་བཀྲ་ཤིས་གང་། །དེང་འདིར་བདག་ཅག་རྣམས་ལ་འབྱུང་བར་ཤོག །ཅེས་བརྗོད་དེ་ནི་བསྙེན་པ་ཐུན་དང་པོ། ༈ །དེ་ནས་སྒྲུབ་པའི་ཐུན་ནི་གཉིས་པ་ལ། །སྐྱབས་འགྲོ་ནས་བཟུང་བསྙེན་པའི་བར་དུ་འདོན། །དེ་ནས་སྒྲུབ་པའི་དམིགས་པ་འདོན་བསྒོམ་བྱ། །བདག་དང་བསྲུང་བྱ་མ་ལུས་ཐམས་ཅད་ཀྱི། །ཕྱི་རོལ་གསེར་གྱི་མདོག་ཅན་ཕག་གི་ཚོགས། །ཁ་ཕྱིར་གྱུ་ནས་ཕག་སྐད་ངུར་སྒྲ་སྒྲོག །ཕག་གི་རེ་བ་སུམ་རིམ་བར་མཚམས་མེད། །སྟེང་འོག་ཨ་ལས་ཉི་ཟླའི་དཀྱིལ་འཁོར་གཉིས། །ཁ་ལེབ་ཞབས་སྡོམ་ལྟ་བུར་གྱུར་པའི་ནང་། །བསྲུང་བྱ་མི་ནོར་ཐམས་ཅད་ཚུད་པར་གྱུར། །ཟླ་བའི་སྟེང་འོག་གཉིས་སུ་ཉི་མ་གཉིས། །དེ་ལྟར་ཉི་
ཟླའི་ནང་དུ་རང་ཅག་གབ། །ཉི་ཟླའི་འོད་ཟེར་ཤིན་ཏུ་འབར་བ་ཡིས། །དགྲ་ཇག་རྐུན་པོས་ལྟ་བར་མི་བཟོད་པ། །མཐོང་བར་མི་ནུས་འོད་ཀྱིས་བསྒྲིབས་པར་གྱུར། །ཨོཾ་མཱ་རི་ཙི་འོད་ཟེར་ཅན་བདག་ཅག་དཔོན་སློབ་མི་ནོར་ཐམས་ཅད་ལ་སྐྱོབས་ཤིག་སྭཱ་ཧཱ། ཞེས་པ་དགོང་ཀ་བར་དུ་འདོན་ཞིང་བསྒོམ། །དེ་ནས་སྔར་ལྟར་མདུན་བསྐྱེད་མཆོད་གཏོར་འབུལ། །ཐུན་བསྡུ་སླར་ཡང་དགོང་ཐུན་བཟུང་བ་ནི། །སྔར་ལྟར་བདག་བསྐྱེད་བསྙེན་པའི་བར་དུ་འདོན། །བསྙེན་པའི་བར་སྐབས་སྔགས་དང་དམིགས་པ་ནི། །རང་གི་སྐུ་ལས་སྤྲུལ་པའི་ལྷ་མོ་དང་། །རང་བཞིན་གནས་ནས་བྱོན་པའི་ལྷ་མོའི་ཚོགས། །འཇིག་རྟེན་ཁམས་ཀུན་མ་ལུས་ཐམས་ཅད་ཁྱབ། །ཀུན་ཀྱང་གསེར་མདོག་དར་དང་རིན་ཆེན་བརྒྱན། །གསེར་མདོག་ཕག་ལ་ཆིབས་ནས་རླུང་ལྟར་རྒྱུགས། །ཕྱག་ན་ཁབ་དང་སྐུད་པ་བསྣམས་ནས་ཀྱང་། །གནོད་བྱེད་དགྲ་ཇག་རྐུན་པོའི་ཁ་མིག་ཚེམས། །དགྲ་སྣ་རྐུན་སྣ་བར་ཆད་བཟློག་པར་གྱུར། །ཨོཾ་མཱ་རི་ཙེ། བད་ཏཱ་ལི། བ་དཱ་ལི། བ་རཱ་ལི། བཱ་རཱ་ཧ་མུ་ཁི། སརྦ་དུཥྛན་གནོད་བྱེད་དགྲ་ཇག་ཆོམ་རྐུན་ཐམས་ཅད་ཙཀྵ་མུ་ཁཾ་བྷནྡྷ་བྷནྡྷ་སྭཱ་ཧཱ། འདི་ནི་ཉི་ནུབ་མུན་ནི་རུབ་ཁ་བར། །བསྒོམ་ཞིང་
བཟླས་ནས་གོང་ལྟར་མདུན་བསྐྱེད་དང་། །མཆོད་བསྟོད་ཐུན་ནི་བསྡུ་ཚུལ་གོང་དང་འདྲ། །མུན་ནི་རུབ་ནས་རྒྱུན་གྱི་ཐུགས་དམ་དང་། །ཆག་མེད་ཐུགས་དམ་གང་ཡོད་རྒྱུན་བཞིན་བྱ། །དེ་ནས་སླར་ཡང་བསྙེན་པ་བྱེད་འདོད་ན། །སྐད་ཅིག་དམིགས་པ་བདག་བསྐྱེད་རྐྱང་པ་བསྒོམ། །དམིགས་པ་ཁོ་ན་བྱ་ཞིང་བསྙེན་པ་བྱ། །ཉལ་ཁ་ཡེ་ཤེས་རྟེན་བསྟིམ་དམ་ཚིག་པ། །མི་དམིགས་བྱ་བ་སྟོང་ཉིད་ངང་ལ་ཉལ། །སྦྲུལ་དང་སྤྲེའུ་བྱི་བ་བོང་བུ་དང་། །རྟ་དང་གླང་ཆེན་མ་ཧེ་དྲེད་དང་ཁྱི། །ཕན་ཚུན་འཐབ་དང་རང་ཉིད་སྐྲག་པ་རྨིས། །སྔགས་ནི་ད་རུང་གཉིས་འགྱུར་ལ་སོགས་བཟླས། །རྒྱ་མཚོ་བརྒལ་དང་རི་བོ་ལ་གནས་དང་། །སངས་རྒྱས་བྱང་སེམས་ལྷ་ཚོགས་མཇལ་བ་དང་། །བུད་མེད་གཞོན་བུ་མཛེས་མ་རྒྱན་ལྡན་དང་། །འོད་ཟེར་ཅན་མ་མཇལ་དང་ལུང་སྟོན་དང་། །དྲི་བཟང་འཐུལ་དང་མར་མེ་འཛིན་པ་དང་། །འགྲུབ་པའི་རྟགས་ཏེ་མཚན་མའི་བསྙེན་པའོ། །ཟླ་བ་དྲུག་གསུམ་མམ་ཉེར་གཅིག་ལ་སོགས་དང་། །འབུམ་ཕྲག་ཉེར་བཞི་ཡང་ན་བྱེ་ཆུང་གཅིག །ཐ་མ་དྲུག་འབུམ་བྱེ་བ་བཟླས་ཀྱང་འགྲུབ་པ་སྟེ། །འབྲུ་དྲུག་ཁོ་ན་ཡིན་ཀྱང་གསུམ་ཀ་བརྩི། །ཐུན་མགོ་རྣམས་སུ་ཕྱག་རྒྱས་བཅིངས་བར་བྱ། །ལག་གཉིས་ཐལ་སྦྱར་མཐེབ་ཆེན་ཅུང་ཟད་བཀུག །གུང་མོ་རྩེ་གཏུག་མཛུབ་མོ་གུང་མོ་སྦྱར། །ཟླུམ་པོ་རྣམ་རྒྱལ་བྱས་ལ་ལྟེ་བའི་ཐད། །ཕྱག་རྒྱ་དེ་བཞག་རྐང་པ་སྐྱིལ་ཀྲུང་བཅས། །དེ་ནི་ལས་ཀུན་འགྲུབ་པའི་ཕྱག་རྒྱ་ཡིན། །འགྲུབ་ན་གྲའུ་དབེན་པའི་ས་རུ་བཞག །འཇིགས་པ་ཆེ་སར་
དབྱུག་པ་བཟུང་ནས་འགྲོ། །སྐུད་པ་དཀར་པོར་ཉེར་གཅིག་མདུད་པ་སྔགས། །རྐུན་མའི་གནོད་པ་སྲུང་བར་འགྱུར་བ་སྟེ། །སྔགས་ནི་མགོ་ཡི་སྔགས་རིང་དེ་ཡིན་ནོ། །མདུད་པ་བྱེད་ཚེ་ལྷ་མོ་ཉིད་བསྒོམས་ནས། །དང་པོ་ཕྱག་རྒྱ་བཅིངས་བྱས་དེ་ཉིད་ནས། །དལ་བུས་རླུང་བཟུང་ལྕེ་ལ་སོ་མི་བསྐྱོད། །ཁ་མིག་བཙུམས་ནས་སྔགས་ནི་ཡིད་བཟླས་དང་། །བསྲུང་སྐུད་སྔགས་རེ་མདུད་པ་ཉེར་གཅིག་བར། །དབུགས་ནི་ཕྱི་རུ་མི་བཏང་གལ་ཆེའོ། །རང་ཉིད་འཇིགས་པ་ཆེ་དུས་ནངས་རེ་བྱ། །དེ་ལྟར་སྒྲུབ་ཐབས་དང་ནི་རྟོགས་པ་རྒྱུད། །རྒྱ་གཞུང་བསྟུན་ཏེ་རཱ་ག་ཨ་སྱས་བྲིས། །ཉེས་པ་མཆིས་བཤགས་དགེ་བ་བྱང་ཆུབ་བསྔོ། །སྔགས་འདོན་ལུགས་ནི། ཨོཾ་མཱ་རི་ཙེ་སྭཱ་ཧཱ། །བསྙེན་སྔགས་སོ། །ཨོཾ་མཱ་རི་ཙེ་འོད་ཟེར་ཅན་བདག་ཅག་དཔོན་སློབ་མི་ནོར་ཐམས་ཅད་སྐྱོབས་ཤིག་སྭཱ་ཧཱ། སྒྲུབ་པའོ། །ཨོཾ་མཱ་རི་ཙུ། བད་ཏཱ་ལི། བ་དཱ་ལི། བ་རྭ་ལི། བཱ་རཱ་ཧ་མུ་ཁི། སརྦ་དུཏྟཾ་པྲ་དུཏྟཾ་གནོད་བྱེད་དགྲ་ཇག་ཆོམ་རྐུན་ཐམས་ཅད་ཙཀཱ་མུ་ཁཾ་བྷནྡྷ་བྷནྡྷ་སྭཱ་ཧཱ། ལས་སྦྱོར་རོ། །ཙེ་ཞེས་པའི་ཡེ་དེ་མགྱོགས་པར་ཀློག་དགོས། སྔགས་འདོན་ལུགས་བཀྲོལ་བྲིས་པའོ། །ཡིག་རྙིང་ལྟར་ཞལ་བཤུས་གྲུབ་བོ། །ཞུས་སོ།། ༧ ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།