འོན་ཟེར་ཅན་གྱི་མདུན་བསྐྱེད།
འོན་ཟེར་ཅན་གྱི་མདུན་བསྐྱེད་ཡོད།
མདུན་དུ་ཞིང་ཁམས་རྣམ་པར་དག་པའི་དབུས། །མྱ་ངན་མེད་པའི་ལྗོན་ཤིང་བསིལ་གྲིབ་ལ། །པདྨ་ཟླ་བ་ཕག་པ་སེར་པོའི་སྟེང་། །ཏཱཾ་ལས་མྱ་ངན་མེད་པའི་འོད་ཟེར་ཅན། །སེར་ལྗང་ཞལ་གཅིག་ཕྱག་གཉིས་ཞི་ཞིང་འཛུམ། །སྟོད་གཡོགས་ཨོཾ་རག་སྔོན་པོ་ཤམ་ཐབས་དཀར། །སྣ་ཚོགས་རིན་ཆེན་རྒྱན་གྱིས་རྣམ་པར་བརྒྱན། །ཕྱག་གཡས་ཁབ་དང་སྐྱབས་སྦྱིན་གཡོན་པ་ན། །མྱ་ངན་མེད་པའི་ཡལ་ག་སྐུད་པ་བསྣམས། །གནས་གསུམ་འབྲུ་གསུམ་ཐུགས་ཀའི་ཚྭ་འོད་ཀྱིས། །རང་བཞིན་གནས་ནས་འཁོར་བཅས་སྤྱན་དྲངས་གྱུར། །ཧཱུཾ།
འོག་མིན་གནས་དང་བྱང་ཤར་ཡོངས་འདུའི་ཤིང་། །པོ་ཊ་ལ་དང་ཨོ་རྒྱན་རྡོ་རྗེ་གདན། །མྱ་ངན་མེད་པའི་ལྗོན་པ་ལ་སོགས་ནས། །ལྷ་མོ་འོད་ཟེར་ཅན་མ་འཁོར་དང་བཅས། །རྩེ་གཅིག་དད་པའི་ཡིད་ཀྱིས་སྤྱན་འདྲེན་ན། །ཐུགས་རྗེ་ཐུགས་དམ་དབང་གིས་གཤེགས་སུ་གསོལ། །པད་ཟླ་ཕག་པའི་གདན་ལ་དགྱེས་པར་བཞུགས། །དབང་ལྷས་དབང་བསྐུར་མཆོད་རྟེན་དབུ་བརྒྱན་གྱུར། །ཨོཾ་མཱ་རཱི་ཙེ་ས་པ་རི་ཝཱ་ར་བཛྲ་ས་མ་ཡ་ཛཿཧཱུྃ་བཾ་ཧོ༔ ཏིཥྛ་ལྷན། ཨ་བྷི་ཥིཉྩནྟཾ། ཨོཾ་བཛྲ་སྤ་ར་ཎ་ཁཾ། མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་
གཟུགས་སྒྲ་དྲི་རོ་རེག །དངོས་འབྱོར་ཡིད་སྤྲུལ་མཆོད་པ་རྒྱ་མཚོའི་ཚོགས། །འོད་ཟེར་ཅན་མ་འཁོར་དང་བཅས་ལ་འབུལ། །ལྷ་ཡི་དབང་པོ་ལྷ་མིན་གཡུལ་རྒྱལ་ནས། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བའི་ཡུམ་མཆོག་འོད་ཟེར་ཅན་མ་ལ། །བཀྲ་ཤིས་རྫས་བརྒྱུད་དག་ནི་དབུལ་བར་བགྱི། །རིན་ཆེན་གདུགས་དང་གསེར་ཉ་པདྨ་དུང་། །བུམ་པ་རྒྱལ་མཚན་དཔལ་བེའུ་འཁོར་ལོ་སྟེ། །ལྷ་ཡི་དགའ་ཚལ་མཛེས་པར་བྱེད་པ་ཡི། །བཀྲ་ཤིས་རྟགས་བརྒྱད་དག་ནི་དབུལ་བར་བགྱི། །མི་དབང་རིན་ཆེན་སྣ་བདུན་འདི་དག་ནི། །འོད་ཟེར་ཅན་མ་འཁོར་དང་བཅས་པ་ལ། །བཤམས་ཤིང་ཡིད་ཀྱིས་དམིགས་ཏེ་ཕུལ་བ་ཡིས། །འགྲོ་བ་མི་ཟད་གཏེར་ལ་སྤྱོད་པར་ཤོག །ཞིང་ཁམས་རྣམ་དག་རྡོ་རྗེའི་ས་གཞི་ལ། །གླིང་བཞི་རི་རབ་ལ་སོགས་མཆོད་པའི་སྤྲིན། །རབ་འབྱམས་བསམ་ཡས་རྡོ་རྗེའི་རྒྱན་ཕྲེང་འབར། །འོད་ཟེར་ཅན་མ་རྒྱལ་བ་ཀུན་ཡུམ་ལ། །མཆོག་ཏུ་དད་པས་ཀུན་ཏུ་བདག་འབུལ་ལོ། །བྷཾ་ལས་རིན་ཆེན་སྣོད་དུ་ཁཾ་ཡིག་ལས། །གཏོར་མ་དཀར་གསུམ་མངར་གསུམ་བདུད་རྩིའི་མཚོ། །ཁ་དོག་དྲི་རོ་ནུས་པ་
ཕུན་སུམ་ཚོགས། །འོད་ཟེར་ཅན་མ་འཁོར་དང་བཅས་ལ་འབུལ། །ཨོཾ་མཱ་རཱི་ཙི་ས་པ་རི་ཝཱ་ར་ཨབྷཾ་པཱཧུཾ་པུཊྚེ་དྷ་པེ་ཨཱཿ་ལོ་ཀེ་གནྡྷེ་ནེ་ཝི་དྱ་ཤརྡ་རུ་པ་ཤབྡ་གནྡྷེ་ར་ས་སྤརྴེ། ཨ་མཎྜ་ལ་ཌ་བྱ། ཨཊྚ་མངྒ་ལ་ཧེ་ཏུ། སབྟ་རཏྣ། རཏྣ་མཎྜལ་ལ། པྲ་ཏིཙྪ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ། ༈ ཨོཾ་མཱ་རཱི་ཙེ་ས་པ་རི་ཝཱ་ར་ཨི་དཾ་བ་ལི་ཏ་ཁ་ཁ་ཁཱ་ཧི་ཁཱ་ཧི། གང་གི་མཚན་ཙམ་འཛིན་ཅིང་དྲན་པས་ཀྱང་། །བར་དུ་གཅོད་པ་ཀུན་ལས་སྐྱོབ་མཛད་ཅིང་། །དྲི་མེད་བདེ་བ་ཆེན་པོ་སྩོལ་མཛད་མ། །ལྷ་མོ་འོད་ཟེར་ཅན་ལ་ཕྱག་འཚལ་བསྟོད། །སྐུ་མདོག་མ་ངེས་དཀར་སེར་དམར་ལྗང་སྔོ། །ཞལ་ཕྱག་མ་ངེས་སྣ་ཚོགས་ཅིར་ཡང་འགྱུར། །ཆ་ལུགས་མ་ངེས་ཞི་ཁྲོ་ཞི་མ་ཁྲོ། །འདོད་དགུ་བསྒྱུར་བའི་ལུས་འཆང་མ་ལ་བསྟོད། །མཚན་ནི་མ་ངེས་ལྷ་མོ་འོད་ཟེར་ཅན། །སྒྲོལ་མ་གཟི་བརྗིད་ཅན་མ་རལ་གཅིག་མ། །བེ་ཏཱ་ལི་དང་ནམ་གྲུ་རེ་མ་ཏི། །ཤིང་གི་ལྷ་མོ་འོད་འཆང་མ་ལ་སོགས། །མིང་བརྒྱ་མཚན་སྟོང་མ་ལ་ཕྱག་འཚལ་བསྟོད། །མཐུ་སྟོབས་རྫུ་འཕྲུལ་ནུས་པ་བསམ་མི་ཁྱབ། །ཉིན་མཚན་དུས་དྲུག་སེམས་ཅན་ཀུན་ལ་
གཟིགས། །འཇིགས་དང་གནོད་པ་ཀུན་ལས་སྐྱོབ་མཛད་མ། །ལྷ་མོ་ཐུགས་རྗེ་ཅན་ལ་ཕྱག་འཚལ་བསྟོད། །ཕག་གི་གདོང་ཅན་ཞལ་གཅིག་ཕྱག་གཉིས་མ། །ཉི་ཤུ་རྩ་བཞི་ལ་སོགས་འཁོར་གྱི་ཚོགས། །རིག་སྔགས་གྲུབ་པའི་ལྷ་མོ་བྱེ་བ་འབུམ། །འོད་ཟེར་ཅན་མ་འཁོར་དང་བཅས་ལ་བསྟོད། །གང་ཞིག་ཁྱེད་སྔགས་བརྗོད་ཅིང་གསོལ་བཏབ་ན། །བཅིངས་དང་ཆད་པས་གཅོད་དང་མགོ་བྲེག་དང་། །མེ་དང་ཆུ་དང་དུག་དང་མཚོན་ལ་སོགས། །གནོད་པ་ཀུན་སྐྱོབ་མ་ལ་ཕྱག་འཚལ་བསྟོད། །རྒྱལ་པོ་དགྲ་དང་ཆོམ་རྐུན་གཅན་གཟན་དང་། །ཕྱི་ནང་འཁྲུག་རྩོད་གྲོགས་པོས་བསླུས་པ་དང་། །ལམ་གྱི་འཇིགས་པ་སྣང་བ་ལ་སོགས་པ། །འཇིགས་པ་ཀུན་སྐྱོབ་མ་ལ་ཕྱག་འཚལ་བསྟོད། །མཐུ་དང་རྫུ་འཕྲུལ་དཔག་ཏུ་མེད་པ་ཡི། །ལྷ་མོ་འོད་ཟེར་ཅན་མ་ཁྱེད་ཉིད་ལ། །བདག་ཅག་དཔོན་སློབ་མི་ནོར་ཐམས་ཅད་དང་། །དམིགས་ཡུལ་བསྲུང་བྱ་ཐམས་ཅད་སྐྱབས་སུ་མཆི། །དགྲ་དང་རྒྱལ་པོའི་འཇིགས་ལས་བསྐྱབ་ཏུ་གསོལ། །མེ་ཆུ་དུག་མཚོན་འཇིགས་ལས་བསྐྱབ་ཏུ་གསོལ། །བཟུང་དང་བཅིངས་བའི་འཇིགས་ལས་བསྐྱབ་ཏུ་གསོལ། །
ཆད་པས་བཅིངས་བའི་འཇིགས་ལས་བསྐྱབ་ཏུ་གསོལ། །ཕྱི་ནང་འཁྲུག་རྩོད་འཇིགས་ལས་བསྐྱབ་ཏུ་གསོལ། །བསླུས་དང་མགོ་བསྐོར་འཇིགས་ལས་བསྐྱབ་ཏུ་གསོལ། །དམག་ཇག་ཆོམ་རྐུན་འཇིགས་ལས་བསྐྱབ་ཏུ་གསོལ། །བཙོན་བཟུང་རྡེག་འཚོགས་འཇིགས་ལས་བསྐྱབ་ཏུ་གསོལ། །ལམ་ལོག་ལམ་གོལ་འཇིགས་ལས་བསྐྱབ་ཏུ་གསོལ། །བགེགས་དང་ལམ་དགྲའི་འཇིགས་ལས་བསྐྱབ་ཏུ་གསོལ། །སྡང་དང་འཕྲོག་བཅོམ་འཇིགས་ལས་བསྐྱབ་ཏུ་གསོལ། །ནད་དང་རིམས་ཀྱི་འཇིགས་ལས་བསྐྱབ་ཏུ་གསོལ། །ཁ་མཆུ་གླེང་གཞིའི་འཇིགས་ལས་བསྐྱབ་ཏུ་གསོལ། །ཁ་ཡོག་ཁ་སྨྲས་འཇིགས་ལས་བསྐྱབ་ཏུ་གསོལ། །སྡིགས་དང་བསྐྲད་པའི་འཇིགས་ལས་བསྐྱབ་ཏུ་གསོལ། །སྔོན་གྱི་ཐུགས་དམ་དམ་ཚིག་རྗེས་དགོངས་ལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཕྱོགས་བཅུའི་རྒྱལ་བ་སྲས་བཅས་ཐུགས་རྗེ་དང་། །བདེན་ལྡན་ཇི་སྙེད་བདེན་པའི་བདེན་སྟོབས་དང་། །ལྷ་མོ་འོད་ཟེར་ཅན་གྱི་མཐུ་སྟོབས་ཀྱིས། །བདག་སོགས་འཇིགས་པ་ཀུན་ལས་ཐར་གྱུར་ཅིག །ཨོཾ་ལྷ་མོ་འོད་ཟེར་ཅན། །བདག་ཅག་དཔོན་
སློབ་མི་ནོར་ཐམས་ཅད་ལ་སྐྱོབས་ཤིག །ཨོཾ་ལྷ་མོ་འོད་ཟེར་ཅན། །བདག་དང་བསྲུང་བྱ་ཐམས་ཅད་རྒྱལ་པོའི་འཇིགས་པ་ལས་སྲུངས་ཤིག་སྭཱ་ཧཱ། ཨོཾ་ལྷ་མོ་འོད་ཟེར་ཅན། བདག་དང་བསྲུང་བྱ་ཐམས་ཅད་ཆད་པ་གཅོད་པའི་འཇིགས་པ་ལས་སྲུངས་ཤིག་སྭཱ་ཧཱ། ཨོཾ་ལྷ་མོ་འོད་ཟེར་ཅན་བདག་དང་བསྲུང་བྱ་ཐམས་ཅད་མེ་ཆུ་དུག་མཚོན་གྱི་འཇིགས་པ་ལས་སྲུངས་ཤིག་སྭཱ་ཧཱ། ཨོཾ་ལྷ་མོ་འོད་ཟེར་ཅན་བདག་ཅག་དཔོན་སློབ་བསྲུང་བྱ་ཐམས་ཅད་ཕྱིར་རྒོལ་བ་དང་ལམ་ལོག་པའི་འཇིགས་པ་ལས་སྲུངས་ཤིག་སྭཱ་ཧཱ། ཨོཾ་ལྷ་མོ་འོད་ཟེར་ཅན་བདག་ཅག་དཔོན་སློབ་བསྲུང་བྱ་ཐམས་ཅད་གྲོགས་པོ་ངན་པས་བསླུས་པའི་འཇིགས་པ་ལས་སྲུངས་ཤིག་སྭཱ་ཧཱ། ཨོཾ་ལྷ་མོ་འོད་ཟེར་ཅན་བདག་ཅག་དཔོན་སློབ་བསྲུང་བྱ་ཐམས་ཅད་བགགས་པ་དང་བསྒྲལ་བ་དང་བསྐྱེད་པའི་འཇིགས་པ་ལས་སྲུངས་ཤིག་སྭཱ་ཧཱ། ཨོཾ་ལྷ་མོ་འོད་ཟེར་ཅན་བདག་ཅག་དཔོན་སློབ་བསྲུང་བྱ་ཐམས་ཅད་ཕྱི་ནང་འཁྲུག་རྩོད་ཐམས་ཅད་ལས་སྲུངས་ཤིག་སྭཱ་ཧཱ། ཨོཾ་ལྷ་མོ་འོད་ཟེར་ཅན་བདག་ཅག་དཔོན་སློབ་བསྲུང་བྱ་ཐམས་ཅད་ཁ་ཡོག་དང་ཕྲ་མའི་གནོད་པ་ལས་སྲུངས་ཤིག་སྭཱ་ཧཱ། ཨོཾ་ལྷ་མོ་འོད་ཟེར་ཅན་བདག་
ཅག་དཔོན་སློབ་བསྲུང་བྱ་ཐམས་ཅད་ཁ་མཆུ་དང་གླེང་གཞི་ཁ་སྨྲས་ཀྱི་གནོད་པ་ལས་སྲུངས་ཤིག་སྭཱ་ཧཱ། ཨོཾ་ལྷ་མོ་འོད་ཟེར་ཅན་བདག་ཅག་དཔོན་སློབ་བསྲུང་བྱ་མི་ནོར་ཐམས་ཅད་མི་ནད་དང་ཕྱུགས་ནད་ཀྱི་འཇིགས་པ་ལས་སྲུངས་ཤིག་སྭཱ་ཧཱ། ཨོཾ་ལྷ་མོ་འོད་ཟེར་ཅན་བདག་ཅག་དཔོན་སློབ་བསྲུང་བྱ་མི་ནོར་ཐམས་ཅད་འཚེ་བ་དང་འཇིགས་པ་ཐམས་ཅད་ལས་སྲུངས་ཤིག་སྭཱ་ཧཱ། ཞེས་གསོལ་གདབ་སྔགས་ནི་བདག་བསྐྱེད་ནང་ལྟར་རོ། །རྟགས་ནི་སྦྲུལ་སྤྲེའུ་བྱི་ལ་བོང་བུ་རྟ་གླང་ཆེན་མ་ཧེ་དྲེད་དང་ཁྱི་ཕན་ཚུན་འཐབ་པ་དང་རང་ཉིད་སྐྲག་པར་རྨིས་ན། སྔགས་ད་རུང་གཉིས་འགྱུར་བཟླའོ། །རྒྱ་མཚོ་ལས་བསྒལ་བ་དང་རི་བོ་ལ་གནས་པ་དང་། གཞོན་ནུ་མ་དང་འཕྲད་པ་དང་། མར་མེའི་རྩེ་མོ་འཕེལ་ཞིང་དྲི་ཞིམ་པོ་སྣ་ཚོགས་བྲོ་བ་དང་། སངས་རྒྱས་བྱང་སེམས་དང་འོད་ཟེར་ཅན་མཐོང་བར་གྱུར་ཏེ་འགྲུབ་རྟགས་སོ། །ཞེས་རྟོགས་པ་ལས་གསུངས། ཞེས་འདི་རང་གཞན་ཐམས་ཅད་ལ་འཇིགས་པ་ཆེན་པོ་ཡ་ང་བར་གྱུར་པའི་ཚེ། འདི་ཡི་མངོན་རྟོགས་སོགས་དཔེ་ཡང་གཞན་དུ་ལུས་ཀྱང་། སྒྲུབ་པ་ཞིག་བྱེད་དགོས་བྱུང་དུས་སུ། གྲྭ་པ་རྣམས་ཀྱི་འདོན་པའི་ཕྱིར་དུ། རཱ་ག་ཨ་སྱས་འཕྲལ་དུ་བྲིས་ཀྱང་། གཟུངས་དང་རྟོགས་པ་དང་། རྒྱ་གཞུང་སྒྲུབ་ཐབས་དང་། རྡོར་ཕྲེང་དང་གནམ་ཆོས་དང་དགོངས་གཏེར་ཐམས་ཅད་ཀྱི་དོན་འདུས་པར་ཡོད་ཅིང་། བསླབ་བཏུས་
ནས་གསུངས་པ་དང་མཐུན་ནོ། །ཞེས་དགེ་སློང་རཱ་ག་ཨ་སྱས་སྦྱར་བ་མངྒ་ལཾ། །དགེའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།