ལྷ་བདུན་མ།
ཨཱཿཿ ཆོས་རྣམས་དམིགས་མེད་ཡེ་ནས་རྫོགས་པ་ཆེ། །དེ་ཡི་རང་མདངས་མཁའ་ལ་འཇའ་ཤར་ལྟར། །རང་ཉིད་རྡོ་རྗེ་སེམས་དཔའ་ཤེལ་གྱི་མདོག །དར་དང་རིན་ཆེན་རྒྱན་སྤྲས་འཛུམ་པའི་ཞལ། །ཕྱག་གཉིས་རྡོ་རྗེ་དྲིལ་འཛིན་ཕྱེད་དཀྱིལ་བཞུགས། །དེ་ཡི་ཐུགས་ཀར་ཞི་བ་བཞི་བཅུ་གཉིས། །མགྲིན་པར་རིག་འཛིན་སྡེ་ལྔ་ཡབ་ཡུམ་འཁྲིལ། །སྤྱི་བོར་ཁྲག་འཐུང་འབར་བ་ལྔ་བཅུ་བརྒྱད། །མེ་ལོང་གཟུགས་བརྙན་ལྟ་བུར་བཀྲ་ལམ་མེ། །དམ་ཚིག་ཡེ་ཤེས་དབྱེར་མེད་གདོད་ནས་གསལ། ཨོཾ་ཨཱཿཿཧཱུྃ༔ བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷརྟུ་ཨཱཿ ཨོཾ་རུ་ལུ་རུ་ལུ་ཧཱུྃ་བྷོ་ཧཱུཾ། ཞེས་དང་། འ་ཨ་ཤ་ས་མ་ཧ༔ འདི་ནི་བཏགས་གྲོལ་སྙིང་པོ་སྟེ། ཞི་ཁྲོའི་ཉམས་ལེན་ཚང་བའོ། ། ༈ རང་ཉིད་དྲན་རྫོགས་དམ་ཡེ་དབྱེར་མེད་ངང་། །ཐུགས་རྗེ་ཆེན་པོ་གསང་འདུས་སྐུ་མདོག་དམར། །མཚན་དཔེ་དར་དང་རིན་ཆེན་རྒྱན་རྣམས་རྫོགས། །ཞལ་གཅིག་དབུ་གཙུག་སྣང་བ་མཐའ་ཡས་བཞུགས། །ཕྱག་གཡས་ཐུགས་ཀར་པད་ཕྲེང་གཡོན་པ་ཡི། །ཚེ་བུམ་ལྟེ་བར་འཛིན་ཅིང་ཕྱེད་སྐྱིལ་བཞུགས། །མཁའ་འགྲོ་གསང་ཡེ་དམར་མོ་སྐུ་ལ་འཁྲིལ། །ཕྱག་གཡས་
ཨུཏྤལ་གཡོན་པས་ཚེ་བུམ་བསྣམས། །ཐུགས་དཀར་འཁོར་ལོ་དཀར་པོ་རྩིབས་དྲུག་པའི། །ལྟེ་བར་ཧཱིདང་རྩིབས་དྲུག་ཡི་གེ་དྲུག །དེ་ལས་འོད་འཕྲོས་རྒྱལ་བ་ཐམས་ཅད་མཆོད། །སྐུ་གསུང་ཐུགས་ཀྱི་བྱིན་རླབས་བདག་ལ་བསྡུས། །འགྲོ་བའི་སྒོ་གསུམ་སྡིག་སྒྲིབ་སྦྱང་བར་གྱུར། ཨོཾ་མ་ཎི་པདྨེ་ཧཱུཾ་ཧཱི༔ ཨ་ར་པ་ཙ་མི་ཏ་ཧྲིད་ཡ་སྭཱ་ཧཱ། མ་བསྒོམ་སངས་རྒྱས་ཐོབ་པའི་ཐབས། །དེ་ཡི་བུམ་སྒྲུབ་ཉམས་ལེན་ཚང་། ༈ སེམས་ཅན་ཐམས་ཅད་ཀྱི་དོན་དུ་དམིགས་ནས། ཨོཾ་པདྨོ་ཨུཏྟི་ཥ་བི་མ་ལེ་ཧཱུཾ་ཕཊ། ཉིན་རེ་ཚར་བདུན་མ་ཆག་ན་བདེ་བ་ཅན་དུ་སྐྱེ། སྤྱན་རས་གཟིགས་པདྨ་གཙུག་ཏོར་གྱི་སྙིང་པོའོ། །འདི་ཤུག་པ་དམར་པོ་རབ། མ་རྙེད་ན་བཟང་ཤིང་གང་རུང་བ་རྣམས་ལ་མང་དུ་བསྔགས་ནས་ཡང་ཡང་བདུག་པས་མི་ནད་ནོར་ནད་རྟ་ནད་ལུག་ནད་ཡམས་ནད་ཀྱི་རིགས་ཐམས་ཅད་ཆད་པར་གསུངས་པ་གསར་རྙིང་གཉིས་ཀ་མཐུན་ནོ། ༈ །སྤྱན་རས་གཟིགས་ཡིད་བཞིན་འཁོར་ལོའི་སྙིང་པོ་འདི་ཅི་མང་བཟླས་པས་ནད་ཐམས་ཅད་དང་འཁྲུག་རྩོད་ཁ་སྨྲས་དང་བཀྲ་མི་ཤིས་པ་ཐམས་ཅད་ཞི། བཀྲ་ཤིས་བདེ་ལེགས་འབྱུང་བ་རྒྱུད་དང་མན་ངག་གཉིས་ཀ་མཐུན། ཨོཾ་པདྨ་ཚིནྡྷ་མ་ཎི་ཛཱ་ལ་ཧཱུྃ། སངས་རྒྱས་སྨན་གྱི་བླ་བཻཌཱུརྱ་འོད་ཀྱི་རྒྱལ་པོ་ལ་ཕྱག་འཚལ་ལོ། འདི་ལ་རབ་བརྒྱ། འབྲིང་ཉེར་གཅིག །ཐ་མ་བདུན་རེ་མ་
ཆག་ན། ཚེ་འདིར་ནད་ཞི་ཞིང་ཕྱི་མ་ངན་སོང་ལ་མི་འགྲོ་བ་ཐུབ་པའི་བཀའོ། ༈ ཧཱུཾ། བདག་དང་མདུན་དུ་ལོ་མ་ཅན། །སེར་མོ་ཞལ་གཅིག་ཕྱག་གཉིས་མ། །གཡས་པ་རྡོ་རྗེ་གཡོན་སྡིགས་མཛུབ། །རྨ་བྱ་ལོ་མའི་ཤམ་ཐབས་ཅན། །པདྨ་ཉི་མའི་གདན་ལ་བཞུགས། །སངས་རྒྱས་ཀུན་གྱི་བྱིན་རླབས་ནི། །བདག་མདུན་ཐིམ་ཞིང་དབང་བསྐུར་གྱུར། །ཨོཾ་པི་ཤ་ཙི་པཎ་ཤ་ཝ་རི་སརྦ་ཛཱ་ར་པྲ་ཤ་མ་ནི་སྭཱ་ཧཱ། ཞེས་བསམ། ཨོཾ་པི་ཤ་ཙི་སྭཱ་ཧཱ། ནངས་སྔ་ཕྲེང་བསྐོར་རེ་མ་ཆག་པར་རྩ་སྟོང་ལ་བཟླས། སྣ་བུག་ཏུ་ཕུ་གདབ། གལ་ཆེ་དུས་མང་བར་རྒྱུ་བགྲང་ན་ནད་ཉུང་ཞིང་རིམས་ནད་ཐམས་ཅད་ཞི། བཀྲ་ཤིས་བདེ་ལེགས་འབྱུང་བ་གནམ་ཆོས་གསར་རྙིང་ཐམས་ཅད་ནས་གསུངས་སོ། ༈ །རང་ཉིད་སྨེ་བརྩེགས་ལྗང་ནག་ཁྲོས། །གཡས་སྔོ་གཡོན་དཀར་དབུས་ལྗང་ཞལ། །དང་པོས་སྡིགས་མཛུབ་ཐུགས་ཀར་བསྣོལ། །བར་པས་ལྕགས་ཀྱུ་ཞགས་པ་སྟེ། །ཐ་མས་རྡོ་རྗེ་དྲིལ་བུ་བསྣམས། །ཁྲོ་བོའི་ཆས་རྫོགས་པད་ཉིར་བཞུགས། །ཐུགས་ཀར་ཧཱུྃ་ལྗང་སྔགས་ཀྱིས་བསྐོར། །རང་འདྲ་སྤྱན་དྲངས་རང་ལ་བསྟིམ། །མེ་འབར་གྲིབ་དང་མི་གཙང་བསྲེགས། །ཨོཾ་བྷུར་ཁུང་མ་ཧཱ་པྲ་མ་ཎ་ཡེ་བྷུར་རྩི་
བྷར་ཀི་བི་མ་ལེ་ཨུ་ཙུཥཱ་ཀྲོ་དྷ་ཧཱུྃ་ཕཊ། ཡང་ན། ཨོཾ་བྷར་ཁུང་དྷིས་སྭཱ་ཧཱ། བཟླས་པས་ཟས་གྲིབ་གོས་གྲིབ་དང་རོ་གྲིབ་བཙོག་གྲིབ་དམ་ཉམས་གྲིབ་ཐམས་ཅད་ཞི་ཞིང་གཞན་ལའང་། སྔགས་ཆུ་བྱས་ནས་ཁྲུས་བྱེད་བཅུག སྣ་ནོར་དང་ཁྱིམ་ལ་གཏོར་བའམ། །གུ་ཁུལ་ལམ་ནི་ཤུག་པ་སོགས། །བསྔགས་ནས་བདུག་ན་གྲིབ་ཀུན་སེལ། ༈ རྒྱལ་བ་རྒྱ་མཚོའི་ལས་ཚོགས་ནི། རང་ངམ་ནད་པ་གང་ཡིན་དེ། །གང་དུ་ན་བའི་ས་དེ་རུ། །རྒྱལ་བ་རྒྱ་མཚོའི་སྐུ་ཞིག་བསྒོམ། །དེ་ལས་ཡུན་རིང་རྩེ་གཅིག་བསྒོམ། །དེ་ནས་སྐབས་སུ་དྲག་དམིགས་ནི། །གང་ནའི་ས་དེར་ཁྱུང་གཅིག་བསྒོམ། །ཁྱུང་དེས་ནད་གདོན་ཟ་ཞིང་ནི། །ནང་ནས་ཚུར་ཞུགས་དེས་ནང་ནས། །ནད་ཀྱི་རྫོརླངས་པ་ནག་ཕྱུར་རེ། །བྱུང་བས་ནད་བདག་ལ་ཕོག་བསྒྲལ། །དེས་ནི་ནད་རྣམས་ཀུན་ལ་ཕན། །རང་ཉིད་རྒྱལ་བ་རྒྱ་མཚོར་བསྒོམ། །རང་ངམ་གཞན་ལ་གནོད་བྱེད་ཡི། །གདོན་ལ་སྙིང་རྗེ་དྲག་པོ་བསྒོམ། །དེ་ལ་ཡུན་ནི་ཅི་རིང་བྱ། །དེ་ནས་དྲག་པོའི་དམིགས་པ་ནི། །རང་ཉིད་རྒྱལ་བ་རྒྱ་མཚོ་ཡི། །སྐུ་ལས་ཁྲོ་ཆུང་རྟ་མགྲིན་ནི། །དམར་པོ་དབྱུག་ཐོ་ཞགས་པ་ཅན། །གྲངས་མེད་སེར་རྒོད་བབ་ལྟར་འཕྲོས། །མེ་དཔུང་རླུང་འཚུབ་དང་བཅས་ཏེ། །གདོན་བགེགས་རྒྱ་མཚོའི་ཕ་རོལ་བསྐྲད། །རྟ་མགྲིན་ཐམས་ཅད་ཚུར་འདུས་ནས། །ཁྲོ་བོའི་གུར་དུ་གྱུར་པ་བསྒོམ། །དེ་ཡི་གདོན་རྣམས་
ཐམས་ཅད་ཞི། །སྔགས་ནི་ཡིག་དྲུག་ཤམ་བུ་རུ། །རྐེའི་ནད་གདོན་ཤཱནཾ་ཀུ་རུ་སྭཱ་ཧཱ། བརྒྱ་སོགས་མང་ཉུང་གལ་དང་བསྟུན། ༈ གསར་རྙིང་སྤྱི་ཡི་ལས་ཚོགས་ནི། །རང་གཞན་བློ་སེམས་མི་བདེ་ན། །སྙིང་དཀྱིལ་ཡིག་གེ་བཻ་དཀར་པོ། །དེ་ལས་བདུད་རྩི་དཀར་པོ་བབ། །སྙིང་ནི་བདུད་རྩིས་གང་བར་སེམས། །དམིགས་པ་ཟིན་ནས་འཕྲལ་དུ་ཕན། །ཡུན་རིང་བསྒོམས་ན་རྩད་ནས་ཕན། ༈ རང་གཞན་ཚད་སར་ན་བ་དང་། །སྙིང་དཀྱིལ་བ་ཡིག་དཀར་པོ་ལས། །ག་པུར་གྱི་ནི་རང་བཞིན་གྱི། །ཆུ་འཆག་བབ་ནས་དོན་སྣོད་བཤེལ། །ནད་ཀུན་འོག་སྒོ་ནས་ཐོན་དམིགས། །རང་ཉིད་ན་ན་སོ་བསྒྲིབ་པ། །སེལ་སྒྲ་དང་བཅས་རླུང་ཡང་རྔུབ། །མྱུར་དུ་ཕན་པ་མྱོང་བས་གྲུབ། ༈ །རང་གཞན་གྲང་བའི་ནད་བྱུང་ན། །ལྟེ་འོག་ཐད་ཀྱི་དབུ་མའི་ནང་། །རཾ་ཡིག་དམར་པོ་མེ་འབར་བས། །ལུས་ཀུན་མེ་ཡིས་རབ་ཏུ་གང་། །ནད་དང་གདོན་བཅས་བསྲེགས་པར་གྱུར། །ནན་ཆེན་བསྒོམས་ན་ཕན་པར་ངེས། ༈ རང་གཞན་རླུང་གི་ནད་བྱུང་ན། མདུན་དུ་བྷནྡྷ་ཆེན་པོའི་ནང་། །འབྲི་མར་མར་ཁུས་གང་བ་ལ། །རྐང་པའི་མཐེ་བོང་གཡས་པ་ནི། །སྐུ་གུར་གྱུར་པའི་ནང་དུ་རྔུབས། །ལུས་ཀུན་མར་ཁུས་སེར་ལྟེམ་གང་། །བ་སྤུ་བུ་ག་ཐམས་ཅད་ནས། །ཡུངས་ཀར་ཙམ་པ་ཁྲོམ་མེ་བསྒོམ། །ནན་གྱིས་བསྒོམས་ན་ཕན་པར་ངེས། །སྔགས་ནི་མེད་དེ་དམིགས་པའོ། ༈ །སྒྲོལ་མ་དཀར་མོའི་ལས་ཚོགས་ནི། །རང་དམ་ནད་པ་
གཞན་རང་རུང་། །ནམ་མཁར་སྒྲོལ་མ་དཀར་མོ་བསྒོམ། །པོ་ཊ་ལ་ནས་སྤྱན་དྲངས་བསྟིམ། །ནད་དེ་ཞི་བར་གསོལ་བ་བཏབ། ཨོཾ་ཏཱ་རེ་ཏུཏྟཱ་རེ་ཏུ་རེ་སྒྲོམོའི་ནད་ཤཱནྟིཾ་ཀུ་རུ་སྭཱ་ཧཱ། ཅེས་ཅི་ཙམ་ནུས་པ་བཟླས། སྒྲོལ་མའི་སྐུ་ལས་བདུད་རྩི་ནི། །དཀར་པོ་འོ་མའི་རྒྱུན་ལྟར་བབས། །དེ་ཡིས་ནད་དེ་སང་སང་དག །དེ་ནས་ན་སར་སྒྲོལ་མ་བསྟིམ། །དེ་ནས་དམིགས་མེད་ངང་ལ་བཞག་དད་པ་ངེས་ཤེས་མ་ཆུང་ན། །འདི་ལས་ཟབ་པ་ཡོད་མི་སྲིད། །ལག་བླང་མང་བས་ཡིད་ཆེས་ཡོད། །དེ་ལྟར་ཐུགས་དམ་ཉེར་མཁོའི་སྐོར། །བྱ་བཏང་ཀརྨ་ཤེས་རབ་ལ། །ཕན་ཕྱིར་རཱ་ག་ཨ་སྱས་བྲིས།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།