ལྡོམ་བུ་བྱུང་དུས་ཀྱི་ཡོན་སྦྱངས།
ལྡོམ་བུ་བྱུང་དུས་ཀྱི་ཡོན་སྦྱངས་བཞུགས་སོ། །ཡང་ལྡོམ་བུ་བྱུང་དུས་ལ་སོགས་ནམ་ཡང་རུང་སྟེ། མདུན་དུ་མར། ཐུད་ཤ་ཞོ་ལ་སོགས་ཕུལ་ནས་བྱུང་དུས། ཆབ་ཀྱིས་བྲན་ལ། རང་ཉིད་སྐད་ཅིག་ལ་ཡི་དམ་རྒྱལ་བ་རྒྱ་མཚོ་ནམ་མཁས་ཁྱབ་ཚད་ཀྱི་སངས་རྒྱས་བྱང་སེམས་ཆོས་སྐྱོང་འཇིག་རྟེན་སྐྱོང་བ་འགྲོ་བ་རིགས་དྲུག་གནོད་བྱེད་ལན་ཆགས་དང་བཅས་པ་ཐམས་ཅད། །ཐུགས་རྗེ་ཆེན་པོ་རྒྱལ་བ་རྒྱ་མཚོ་དང་། ལྷ་མོ་འོད་ཟེར་ཅན་དང་། རི་ཁྲོད་ལོ་མ་ཅན་དང་། ཨཱཿརྱ་ཛམ་བྷ་ལ་དཀར་པོའི་སྐུར་གྱུར་པར་བསྒོམས་ལ། མདུན་གྱི་ཟས་དེ་ཡང་ཀྱི་རིན་པོ་ཆེའི་སྣོད་དུ་བདུད་རྩིའི་རྒྱ་མཚོ་རྒྱ་ཁྱོན་ནམ་མཁའ་དང་མཉམ་པར་གྱུར་པ་ལ། མགྲོན་ཐམས་ཅད་ཀྱི་ལྗགས་ནས་རྡོ་རྗེའི་སྦུ་གུ་བྱུང་ནས་བདུད་རྩི་གསོལ་ནས་མཉེས་པར་བསྒོམ་ཞིང་ངག་ཏུ། ཨོཾ་ཨཱཿཿཧཱུྃ་ཧ་ཧོ་ཧཱུྃསྭཱ་ཧཱ༔ ཨོཾ་མ་ཎི་པདྨེ་ཧཱུྃ༔ ཨི་དཾ་བྷ་ལིཾ་ཏ་ཁཱ་ཧི། ༀ་མ་རི་ཙེ་སྭཱ་ཧཱ། ཨི་དཾ་བྷ་ལིཾ་ཏ་ཁཱ་ཧི། ཨོཾ་པི་ཤ་ཙི་སྭཱ་ཧཱ། ཨི་དཾ་བྷ་ལིཾ་ཏ་ཁཱ་ཧི། ཨོཾ་པདྨ་ཀྲོ་དྷ་ཨཱཿརླ་ཛམ་བྷ་ལ་ཧྲིད་ཡ་སྭཱ་ཧཱ༔ ཨི་དཾ་བྷ་ལི་ཏ་ཁཱ་ཧི༔ དཀོན་མཆོག་མཆོད་པས་མཉེས་གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་
པ་ཚིམ་གྱུར་ཅིག །ལན་ཆགས་བུ་ལོན་བྱང་གྱུར་ཅིག །རྣམ་བཞིའི་མགྲོན་གྱི་ཚོགས་རྣམས་ལ། །ཚད་མེད་མཆོད་སྦྱིན་འདི་བསྔོས་པས། །བདག་དང་སེམས་ཅན་ཐམས་ཅད་ཀུན། །ལོངས་སྤྱོད་ལྡན་ཞིང་ཚོགས་རྫོགས་ནས། །མྱུར་དུ་སངས་རྒྱས་ཐོབ་པར་ཤོག །ཅེས་བརྗོད་པ་དང་། མགྲོན་རྣམས་དང་པོ་སྤྱན་འདྲེན་མི་དགོས། དྲན་རྫོགས་དམ་ཡེ་དབྱེར་མེད་སྣང་སྲིད་ལྷར་གསལ་བཏབ་པ་ཡིན། རྗེས་ནས་གཤེགས་གསོལ་དང་བསྡུ་ཆོག་མི་དགོས། ཐམས་ཅད་ཡེ་ཤེས་ཀྱི་ཆོ་འཕྲུལ་ཡིན་པས་སེམས་ཀྱི་ངོ་བོ་ལ་ལྟ་བ་རྫོགས་རིམ་མཆོག །འདི་ལྟར་བྱས་པས་ཡོན་བདག་ཚོགས་རྫོགས། རང་ལ་དཀོར་སྒྲིབ་མི་འབྱུང་ལ་རིམས་ནད་དང་ཕྱུགས་ནད་ཞི། ལོངས་སྤྱོད་ཤུགས་ཀྱིས་འཕེལ་བ་སྟེ། སྲོང་བཙན་སྒམ་པོའི་གཏོར་མ་ལམ་ཁྱེར་ཞེས་བྱ་བ་དང་། རྒྱལ་བ་རྒྱ་མཚོའི་གཏོར་མའི་དགོངས་པ་དང་མཐུན་པར། རང་གི་ཉམས་དང་བསྟུན་ཏེ་དབོན་པོ་པདྨ་ནམ་མཁའི་དོན་དུ་བྲིས་པ་ལ། ཉེས་འགལ་མཆིས་ན་བཤགས་ཤིང་དགེ་བས་འགྲོ་བ་མང་པོ་ལ་ཕན་པ་རྒྱ་ཆེན་པོར་གྱུར་ཅིག །ཅེས་པ་༧ ཨ་རཱ་གས་སྦྱར།