རྔ་ཐུག་ཁམས་གསུམ་ཟིལ་གནོན་ཞེས་བྱ་བའི་འདོན་བྱ།
རྔ་ཐུག་ཁམས་གསུམ་ཟིལ་གནོན་ཞེས་བྱ་བའི་འདོན་བྱ་བཞུགས་སོ། །དབུ་ཡི་གཟིགས་ཕྱོགས་དགེ་ལེགས་འཕེལ།
ན་མོ་མ་ཧཱ་ཀཱ་ལ་ཡེ། ཐུག་ལྕགས་ཁ་ཊོ་དབྱིབས་ཅན་ནི། །སྡེ་པ་བླ་ཆེན་ཐོབ་ཡིན་ཅིང་། །མདུང་ལྕགས་སྔགས་པ་སྤྱི་ཡི་ཡིན། །སྟོད་སྨད་བར་གསུམ་འབོད་ཅད་བསད། །སྔགས་ཀྱི་ཤོག་དྲིལ་བཅུག་པར་གསུངས། །ཡང་ན་ཕྱོགས་གསུམ་བྱ་བར་གསུངས། །རྒྱས་པར་སྲོག་འཁོར་བླ་རྡོ་བཏགས། །རང་དང་ཆོས་སྐྱོང་གང་རྩེན་པའི། །སྤྱི་དང་བྱེ་བྲག་གང་འདོད་རུང་། །བྱེས་སུ་ཁྱེར་རམ་གཞི་ལ་འཛུགས། །དུས་བཟང་ལས་བྱང་གསོལ་ཁ་སྐབས། །གྱེར་སྒོམ་སྦྲགས་ལ་འདི་སྐད་དོ། །ཧཱུྃ། སྔོན་གྱི་བསྐལ་པའི་དང་པོ་ལ། །རི་རབ་རི་ཡི་སྲོག་ཤིང་ལ། །ཡོངས་འདུས་དཔག་བསམ་ལྗོན་ཤིང་སྐྱེས། །རྩ་བ་ཀླུ་ཡི་ཡུལ་དུ་ཟུག །སྐེད་པ་ལྷ་མིན་ཡུལ་དུ་
རྒྱས། །རྩེ་མོ་ལྷ་ཡི་ཡུལ་དུ་སླེབས། །ལོ་མར་གནམ་ལོའི་གཟུགས་བརྙན་འཆར། །ཟིལ་པ་གླིང་བཞི་ཆར་རྒྱུན་འབབ། །འབྲས་བུ་བདུད་རྩི་ལྷ་ཡི་ཟས། །དེ་ལ་ལྷ་དང་ལྷ་མིན་རྩོད། །འཁྲུག་པ་དེ་ཉིད་ཞི་བའི་ཕྱིར། །དཔག་བསམ་ཤིང་གི་བདག་མོ་ལ། །མ་གཅིག་དཔལ་ལྡན་ལྷ་མོ་བསྐོས། །དེ་ཚེ་ཤིང་གི་ལྷ་མོ་ལ། །འོད་ཟེར་སྤྱན་མ་ཞེས་སུ་གྲགས། །ལྷ་དང་ལྷ་མིན་མགོན་སྐྱབས་མཛད། །ལྷ་མིན་བདུད་ཀྱི་དམག་དཔུང་ཟློག །སྔོན་དུས་སྲིད་པ་དེ་བཞིན་དུ། །དཔག་བསམ་ཙནྡན་གོར་ཤི་ཤ། །ལྷ་ཤིང་ཤུག་པའི་སྡོང་པོ་འདི། །རྩ་
བ་ཀླུ་ཡི་ཡུལ་དུ་ཟུགས། །ནད་སེལ་ཀླུ་སྨན་ཆུ་རྒྱུན་འབེབས། །བརྟེན་ནི་འབྱུང་བ་ས་ལ་བརྟེན། །ས་ཡི་ལྷ་མོ་སངས་རྒྱས་སྤྱན། །གཡོ་འགུལ་མེད་པར་བརྟན་པར་ཟུངས། །སྐེད་པ་བར་སྣང་ཁམས་སུ་ཁྱབ། །བར་སྣང་གཉན་གྱི་སྤྱན་ལམ་དུ། །ལོ་འབྲས་མེ་ཏོག་བར་སྣང་ཁྱབ། །ལོ་མ་དར་ཟབ་སྲབ་ལས་འཇམ། །འབྲས་བུ་ཡིད་བཞིན་ནོར་བུའི་ཚོགས། །དགོས་འདོད་སྣ་ཚོགས་ཆར་དུ་འབེབས། །རྩེ་མོ་དགུང་སྔོན་ནམ་མཁའི་དབྱིངས། །མ་གཅིག་ལྷ་མོའི་སྤྱན་ལམ་ན། །བྱང་ཤར་ཡོངས་འདུའི་ལྗོན་པའི་ཤིང་། །དཔལ་ལྡན་མགོན་པོའི་སྤྱན་ལམ་ན། །རྡོ་རྗེ་གདན་གྱི་བྱང་ཆུབ་ཤིང་། །སེང་གདོང་ཡབ་ཡུམ་སྤྱན་ལམ་ན། །རྔམ་པ་སྒྲ་སྒྲོགས་ཤིང་ཆེན་ངོས། །ཞིང་སྐྱོང་ཕྱོགས་སྐྱོང་སྤྱན་ལམ་ན། །དུར་ཁྲོད་བརྒྱད་ཀྱི་རང་བྱུང་ཤིང་། །བྱ་རོག་གདོང་ཅན་སྤྱན་ལམ་ན། །བསིལ་བ་ཚལ་གྱི་ཉ་གྲོའི་ཤིང་། །མྱུར་མཛད་མགོན་པོའི་སྤྱན་ལམ་ན། །ལྷོ་ཕྱོགས་ཙནྡན་རྐང་གཅིག་ཤིང་། །ཀླུ་རྒྱལ་རྣམས་ཀྱི་སྤྱན་ལམ་ན། །ལྷོ་ཕྱོགས་ཛམ་བུའི་པྲིཀྵའི་ཤིང་། །ཙནྡན་སྡོང་པོའི་ཤིང་ཆེན་འདི། །ཕྱི་ལྟར་འདོད་འབྱུང་དཔག་བསམ་ཤིང་། །
དགོས་འདོད་ཆར་པ་སི་ལི་ལི། །ནང་ལྟར་ཙནྡན་བེང་ཆེན་ཤིང་། །ལྷ་དམག་བྱེ་བ་དགུ་ཁྲི་གནས། །གསང་བ་ཆོས་དབྱིངས་ཕོ་བྲང་ཆེ། །ཆོས་སྐྱོང་དམ་ཅན་ཐམས་ཅད་ཀུན། །སྤྲིན་ལྟར་འདུ་ཞིང་རླུང་ལྟར་འཚུབ། །མ་མགོན་ཞིང་སྐྱོང་ཕྱོགས་སྐྱོང་ཀུན། །སྲིད་པ་ཆགས་ནས་ཤིང་ལ་བརྟེན། །སྲིད་པའི་རྒྱུད་ལུང་དེ་བཞིན་ཉིད། །ཤིང་ཆེན་འདི་ལ་བརྟེན་ཆོས་ཤིག །ཧཱུྃ། སྔོན་གྱི་བསྐལ་པའི་དང་པོ་ལ། །ལྷ་དང་ལྷ་མིན་འཁྲུག་པའི་ཚེ། །བརྒྱ་བྱིན་མངོན་ཤེས་ལྡན་པ་དེས། །གཞན་འཕྲུལ་དབང་བྱེད་ལྷ་གནས་ནས། །ཡེ་ཤེས་མགོན་པོ་སྤྱན་དྲངས་པས། །མགོན་པོ་བྱ་རོག་ཆེན་པོར་སྤྲུལ། །དཔག་བསམ་ཤིང་གི་རྩེ་ལ་བབ། །བྱ་རོག་སྤྲུག་སེལ་ལན་གསུམ་བྱས། །ཇེ་ཆེར་རི་རབ་ཙམ་དུ་གྱུར། །སྤྲུལ་པའི་ལྷ་དམག་ནམ་མཁའ་གང་། །རི་རབ་གཡོ་ཞིང་རྒྱ་མཚོ་ཁོལ། །ལྷ་མིན་དམག་ཚོགས་ཁྲག་ཏུ་བཅུག །མགོན་པོ་བྱ་རོག་ཆེན་པོ་དང་། །དཔག་བསམ་ཤིང་གི་བདག་པོར་གྱུར། །སྔོན་བྱུང་སྲིད་པ་དེ་བཞིན་དུ། །དཔག་བསམ་ཙནྡན་སྡོང་པོར་རྩེར། །རྔ་ཐུག་ནག་པོ་སྐྱོན་པ་འདི། །མགོན་པོ་བྱ་
རོག་ཆེན་པོ་དངོས། །སིག་སིག་ཡམ་ཡམ་འགུལ་ཙམ་ན། །མགོན་པོའི་སྤྲུལ་པ་ནམ་མཁའ་གང་། །དགྲ་བགེགས་ལོག་འདྲེན་དཔུང་ཚོགས་རྣམས། །ཁྲག་ཏུ་བསྐྱུར་ཤིང་བརྒྱལ་བར་བྱེད། །རྔ་ཐུག་ཤར་དུ་བསྐྱོད་ཙ་ན། །སྐུ་མགོན་དཀར་པོའི་ནམ་མཁའ་གང་། །ནད་གདོན་བར་ཆད་ཞི་བར་མཛོད། །རྔ་ཐུག་ལྷོ་རུ་བསྐྱོད་ཙ་ན། །ཡོན་ཏན་མགོན་སེར་ནམ་མཁའ་གང་། །ཚེ་བསོད་དཔལ་འབྱོར་རྒྱས་པར་མཛོད། །རྔ་ཐུག་ནུབ་ཏུ་བསྐྱོད་ཙ་ན། །གསུངམགོན་དམར་པོའི་ནམ་མཁའ་གང་། །ཁམས་གསུམ་སྲིད་གསུམ་དབང་དུ་བསྡུས། །རྔ་ཐུག་བྱང་དུ་བསྐྱོད་ཙ་ན། །ཕྲིན་ལས་མགོན་ལྗང་ནམ་མཁའ་གང་། །གནོད་བྱེད་དགྲ་བགེགས་རྡུལ་དུ་རློགས། །རྔ་ཐུག་རང་སར་གནས་ཙམ་ན། །ཐུགས་མགོན་མཐིང་གས་ནམ་མཁའ་གང་། །མཆོག་གི་དངོས་གྲུབ་བསྩལ་དུ་གསོལ། །བ་དན་འདི་ནི་མཆོད་པའི་རྫས། །རྒྱལ་བས་མདོ་རྒྱུད་ཀུན་ནས་གསུངས། ། ཧཱུྃ༔ སྔོན་གྱི་བསྐལ་པའི་དང་པོ་ལ། །ཡུམ་ཆེན་ཨུ་མ་དེ་ཝ་ཡི། །སྲས་མོ་ལྷ་མོ་དུང་སྐྱོང་མ། །ཁོལ་མོ་ལྷ་མོ་རེ་མ་ཏི། །འབོད་ཕྱིར་དྲེད་མོང་རལ་པས་གཡབ། །རང་
དབང་མེད་པར་མདུན་དུ་བཀུག །བཀའ་བསྒོས་དམ་བཞག་སྨོན་ལམ་བཏབ། །སྔོན་དུས་སྲིད་པ་དེ་བཞིན་དུ། །རྔ་ཐུག་རལ་པ་ནག་པོ་འདིའི། །ཡུམ་ཆེན་དམ་ཚིག་སྒྲོལ་མ་ཡིས། །གཡབ་ཅིང་སྤྲུལ་པའི་དུས་རྣམས་ལ། །ལྷ་མོ་དཔོན་གཡོག་མྱུར་དུ་བྱོན། །རྟེན་རྫས་རྔ་ཐུག་འདི་ལ་བཞུགས། །རྔ་ཐུག་ཤར་དུ་གཡབ་པའི་ཚེ། །ཤར་ཕྱོགས་མ་མོ་དཀར་མོ་འབུམ། །འདིར་བྱོན་ཞི་བའི་ཕྲིན་ལས་སྒྲུབས། །རྔ་ཐུག་ལྷོ་རུ་གཡབ་པའི་ཚེ། །ལྷོ་ཕྱོགས་མ་མོ་སེར་མོ་འབུམ། །འདིར་བྱོན་རྒྱས་པའི་ཕྲིན་ལས་མཛོད། །རྔ་ཐུབ་ནུབ་ཏུ་གཡབ་པའི་ཚེ། །ནུབ་ཕྱོགས་མ་མོ་དམར་མོ་འབུམ། །འདིར་བྱོན་དབང་གི་ཕྲིན་ལས་མཛོད། །རྔ་ཐུག་བྱང་དུ་གཡབ་པའི་ཚེ། །བྱང་ཕྱོགས་མ་མོ་ལྗང་མོ་འབུམ། །འདིར་བྱོན་དྲག་པོའི་ཕྲིན་ལས་མཛོད། །རྔ་ཐུག་རང་སར་གནས་པའི་ཚེ། །ཡེ་ཤེས་ལས་ཀྱི་མ་མོ་རྣམས། །འདིར་བྱོན་མཆོག་ཐུན་དངོས་གྲུབ་སྩོལ། ། ཧཱུྃ། སྔོན་གྱི་བསྐལ་པའི་དང་པོ་ལ། །སུམ་ཅུ་རྩ་གསུམ་ལྷ་ཡུལ་ན། །ལྷ་མིན་བདུད་ཀྱི་དམག་ཚོགས་གཡོས། །མངོན་ཤེས་ལྡན་པའི་ལྷ་རྣམས་ཀྱིས། །རི་རབ་རི་ཡི་རྩེ་
མོ་ནས། །དར་ནག་གཡབ་མོའི་གཡབ་པའི་ཚེ། །འཛམ་གླིང་ལྷོ་ཕྱོགས་དུར་ཁྲོད་ནས། །ཆོས་སྐྱོང་མ་མགོན་འཁོར་དང་བཅས། །སྤྲིན་ནག་རླུང་གིས་བསྐྱོད་པ་བཞིན། སུམ་རྩེན་ལྷ་ཡི་ཡུལ་དུ་བྱོན། །ལྷ་མིན་དམག་ཚོགས་གཡུལ་ངོ་ཟློག །དཀར་ཕྱོགས་ལྷ་རྣམས་རྒྱལ་བར་མཛད། །སྔོན་བྱུང་སྲིད་པ་དེ་བཞིན་དུ། །ཐུག་ལྕགས་མགུལ་རྒྱན་དར་ནག་འདི། །མཐོ་བ་དགུང་ལ་དཔེ་བླངས་ནས། །གོང་རས་ཁ་དོག་སྔོན་པོ་བྱས། །ལྷ་ངོ་དགུང་བས་མཐོ་གྱུར་ཅིག །དམའ་བ་ས་ལ་དཔེ་བླངས་ནས། །འོག་ཤམས་ཁ་ཚོདོག་སེར་པོ་བྱས། །ཆོས་སྲིད་ས་ལྟར་བརྟན་གྱུར་ཅིག །མ་མགོན་སྐུ་ལ་དཔེ་བླངས་ནས། །དར་གྱི་ཁ་དོག་ནག་པོ་བྱས། །མཐུ་སྟོབས་ནུས་པ་རྒྱས་གྱུར་ཅིག །ཡེ་ཤེས་མེ་ལ་དཔེ་བླངས་ནས། །རྒྱབ་ཀྱི་གདོང་རས་དམར་པོ་བྱས། །དགྲ་བགེགས་བདུད་དཔུང་བསྲེགས་གྱུར་ཅིག །ཕྲིན་ལས་རྣམ་བཞི་འགྲུབ་པའི་ཕྱིར། །དར་ལྕེ་ཁ་དོག་སྣ་ཚོགས་བྱས། །བསམ་པ་ཡིད་བཞིན་འགྲུབ་གྱུར་ཅིག །མ་མགོན་དམ་ཅན་བརྟེན་པའི་ཕྱིར། །དར་ལ་བསྙེན་སྒྲུབ་གསང་སྔགས་བྲིས། །ཆོས་སྐྱོང་སྤྲིན་ལྟར་འདུ་གྱུར་ཅིག །
དར་ལྕེ་རླུང་རྟའི་མདོག་དང་སྔགས། །དབང་ཐང་རླུང་རྟ་དར་གྱུར་ཅིག །ཕྱར་དར་གཡབ་དར་བསྒྲུབ་པའི་རྫས། །གསང་སྔགས་རྒྱུད་དེ་ཀུན་ནས་གསུངས། །དོན་དང་ལྡན་པའི་དར་ནག་འདི། །ཕྱར་བས་ཆོས་སྐྱོང་ཐམས་ཅད་འདུ། །ཆ་དང་བསོ་ལ་དགའ་བ་དང་། །དར་ལ་འདུ་བ་དགྲ་བླའི་ལུགས། །སེར་ཆགས་ཡོངས་ཀྱི་དགྲ་བླ་རྣམས། །དར་ནག་ཕྱར་བས་དེར་འདུས་ཤིག །སྔོན་ཚེ་ལྷ་མོ་དཔོན་གཡོག་གཉིས། །རླུང་ལྷ་བསྒྲུབ་པའི་རླུང་ནག་འགྲུབ། །རླུང་ནག་གཡོས་ནས་ལྷ་མོ་སྤྲུལ། །སྲིད་པའི་མ་མོ་རླུང་ཕྱིར་མ། །ཁྱོད་ཀྱིས་དར་ནག་ཕྱོགས་བཅུར་གཡོབ། །དར་ནག་ཤར་དུ་གཡབ་པའི་ཚེ། །ཤར་ཕྱོགས་ཆོས་སྐྱོང་སྲུང་མ་རྣམས། །ཉི་ཟླ་བཞིན་དུ་ཤར་བཞིན་བྱོན། །རུ་མཚོན་འདི་ལ་བརྟན་པར་བཞུགས། །དར་ནག་ལྷོ་རུ་གཡབ་པའི་ཚེ། །ལྷོ་ཕྱོགས་ཆོས་སྐྱོང་སྲུང་མ་རྣམས། །ལྷོ་སྤྲིན་བཞིན་དུ་གཏིབ་ཅིང་བྱོན། །རུ་མཚོན་འདི་ལ་བརྟན་པར་བཞུགས། །དར་ནག་ནུབ་ཏུ་གཡབ་པའི་ཚེ། །ནུབ་ཕྱོགས་ཆོས་སྐྱོང་སྲུང་མ་རྣམས། །ཆུ་བོ་བཞིན་དུ་འབབ་ཅིང་བྱོན། །རུ་མཚོན་འདི་ལ་བརྟན་
པར་བཞུགས། །དར་ནག་བྱང་དུ་གཡབ་པའི་ཚེ། །བྱང་ཕྱོགས་ཆོས་སྐྱོང་སྲུང་མ་རྣམས། །སྐྱི་སེར་བཞིན་དུ་འདྲིལ་ཅིང་བྱོན། །རུ་མཚོན་འདི་ལ་བརྟན་པར་བཞུགས། །དར་ནག་སྟེང་དུ་བསྐྱོད་པའི་ཚེ། །སྟེང་ཕྱོགས་ཆོས་སྐྱོང་སྲུང་མ་རྣམས། །སྦྲང་ཆར་བཞིན་དུ་འབབ་ཅིང་བྱོན། །རུ་མཚོན་འདི་ལ་བརྟན་པར་བཞུགས། །དར་ནག་འོག་ཏུ་ནོར་བའི་ཚེ། །འོག་ཕྱོགས་ཆོས་སྐྱོང་སྲུང་མ་རྣམས། །ན་བུན་བཞིན་དུ་འཐུལ་ཞིང་བྱོན། །རུ་མཚེན་འདི་ལ་བརྟན་པར་བཞུགས། །དར་ནག་བྱང་ཤར་གཡབ་པའི་ཚེ། །བྱང་ཤར་ནག་འདབ་དུར་ཁྲོད་ནས། །མགོན་པོ་བྱ་རོག་འདིར་བྱོན་བཞུགས། །དར་ནག་ཤར་ལྷོར་གཡབ་པའི་ཚེ། །ཤར་ལྷོར་ནག་འདབ་དུར་ཁྲོད་ནས། །མྱུར་མཛད་མགོན་པོ་འདིར་བྱོན་བཞུགས། །དར་ནག་ལྷོ་ནུབ་གཡབ་པའི་ཚེ། །ལྷོ་ནུབ་ལང་ཀ་པུ་རུ་ནས། །སྲིན་མགོན་ཡབ་ཡུམ་འདིར་བྱོན་བཞུགས། །དར་ནག་ནུབ་བྱང་གཡབ་པའི་ཚེ། །ནུབ་བྱང་ཨོ་རྒྱན་བྲག་རི་ནས། །བྲག་ལྷ་མགོན་པོ་འདིར་བྱོན་བཞུགས། །དར་ནག་ཉིན་མོ་གཡབ་པའི་ཚེ། །ཉི་མའི་སྲས་པོ་རེ་མནྟ། །འདིར་བྱོན་རུ་མཚོན་འདི་ལ་
བཞུགས། །དར་ནག་མཚན་མོ་གཡབ་པའི་ཚེ། །མཚན་མོ་རྒྱུག་པའི་དུད་སོལ་མ། །འདིར་བྱོན་རུ་མཚོན་འདི་ལ་བཞུགས། །དར་ནག་རྒྱུན་དུ་གཡབ་པའི་ཚེ། །བཀའ་སྲུང་དམ་ཅན་རྒྱ་མཚོའི་ཚོགས། །འདིར་བྱོན་རུ་མཚོན་འདི་ལ་བཞུགས། །ཧཱུྃ། སྔོན་གྱི་བསྐལ་པའི་དང་པོ་ལ། །རི་བོ་གནམ་ལྕགས་འབར་བའི་རྩེར། །བདུད་པོ་རི་ཊའི་ཕོ་བྲང་བཅས། །དཔལ་ཆེན་རྟ་མགྲིན་ཡབ་ཡུམ་གྱིས། །བདུད་རྒྱལ་རུ་ཊ་ཕོ་མོ་བཏུལ། །རི་ཡི་རྒྱལ་པོ་མ་ལ་ཡ། །གནམ་ལྕགས་འབར་བའི་རྩེ་མོ་ན། །རང་སྣང་ཐོད་པའི་གཞལ་ཡས་ཁང་། །མེ་རླུང་འཚུབ་མའི་ཀློང་དཀྱིལ་ནས། །ཆོས་སྐྱོང་མ་མགོན་ཐམས་ཅད་ཀྱི། །གཏན་གྱི་བཞུགས་གནས་ཕོ་བྲང་བཅས། །སྔོན་བྱུང་སྲིད་པ་དེ་བཞིན་དུ། །ཐུག་ལྕགས་གནམ་ལྕགས་འབར་བ་ལ། །ཆོས་སྐྱོང་ཀུན་གྱི་བཞུགས་གནས་མཛོད། །སྔོན་ཚེ་བསྐལ་པའི་དང་པོ་ལ། །དྲང་སྲོང་ཆེན་པོ་དཀོན་པ་སྐྱེས། །ལོ་གྲངས་འབུམ་ཕྲག་བཅུ་གཉིས་བར། །ཏིང་འཛིན་གཅིག་ལ་མཉམ་པར་བཞག །དྲང་སྲོང་དེ་ཡི་རུས་པ་ལ། །གནམ་ལྕགས་རྡོ་རྗེ་ཕ་ལམ་བྱུང་། །ལྷ་ཆེན་རྣམས་ཀྱི་ཕྱག་ཆ་
མཛད། །དྲག་པོ་འཇིགས་བྱེད་ནག་པོ་དེས། །གནམ་ལྕགས་འབར་བའི་མདུང་གཅིག་བྱས། །བཏབ་ན་མི་ཕོག་མི་སྲིད་ཅིག །ཕོག་ནས་མི་སྨྲས་མི་སྲིད་ཅིག །སྨྲས་ན་མི་ཤི་མི་སྲིད་གསུམ། །ཤི་ནས་ངན་སོང་མི་འགྲོ་མེད། །དམ་བཅའ་བཞི་ལྡན་ཏྲི་ཤུ་ལ། །ཆོས་སྐྱོང་ཀུན་གྱི་ཐུགས་ཀྱི་རྟེན། །དྲེགས་བྱེད་ཀུན་གྱི་ཕྱག་ཆར་བྱུང་། །དེ་བཞིན་ཐུག་ལྕགས་ཏྲི་ཤུ་ལ། །ཆོས་སྐྱོང་ཀུན་གྱི་ཐུགས་རྟེན་མཛོད། །ཏྲི་ཤུ་ལ་ནི་ཕྱག་བྱས་ཀྱང་། །ལྷ་མོའི་ཐུགས་དམ་བསྐང་ལགས་ན། །དངོས་སུ་བཤམས་ནས་སྨོས་ཅི་དགོས། །ལྷ་མོ་དཔོན་གཡོག་ཐུགས་དམ་བསྐང་། །སྔོན་ཚེ་ལྷ་མིན་དམག་དཔུང་གིས། །བརྒྱ་བྱིན་ལྷ་ཡི་མངའ་ཐང་འཕྲོག །ལྷ་མིན་གྲོང་ཁྱེར་སུམ་བརྩེགས་བརྩིགས། །དབང་ཕྱུག་ཆེན་པོའི་ལུང་བསྟན་ནས། །རྒྱ་མཚོ་ཆེན་པོའི་ཕ་རོལ་ནས། །མགོན་པོ་ནག་པོ་ལེགས་ལྡན་དེས། །གནམ་ལྕགས་རྡོ་རྗེ་ཕ་ལམ་དེས། །ཏྲི་ཤུ་ལ་ནི་མཚོན་ཆར་བརྡུང་། །ལྷ་མིན་གྲོང་ཁྱེར་སུམ་བརྩེགས་བཤིགས། །སྔོན་བྱུང་སྲིད་པ་དེ་བཞིན་དུ། །ཐུག་ལྕགས་འབར་བ་འདི་བཙུགས་པས། །དགྲ་བགེགས་བདུད་ཚོགས་ཞིག་གྱུར་
ཅིག །དཔལ་ལྡན་མགོན་པོའི་ཕྱག་ཆ་འདིས། །མགོན་པོ་ཀུན་གྱི་ཐུགས་དམ་བསྐང་། །རྔ་ཐུག་རྔམ་བརྗིད་འབར་བ་འདིས། །ཕྱི་ནི་ཐུག་ལྕགས་མེ་རི་འབར། །ནང་ལྟར་ཐོད་མཁར་གཞལ་ཡས་ཁང་། །གསང་བ་འོག་མིན་ཆོས་ཀྱི་དབྱིངས། །རྣམ་པར་སྣང་མཛད་དུར་ཁྲོད་ཆེ། །སྟོང་གསུམ་ཡུངས་འབྲུ་ཚུད་པ་དང་། །ནམ་མཁའ་ལག་མཐིལ་མཉམ་པའི་འཕྲུལ། །འོག་མིན་དུར་ཁྲོད་རྩུབ་འགྱུར་ཚལ། །ཡོང་འདུས་ཤིང་དང་མུ་ལེ་མཚོ། །ལྕང་ལོ་ཅན་དང་དུར་ཁྲོད་བརྒྱད། །རྡོ་རྗེ་གདན་དང་ན་ལན་ཊ། །ཨོ་རྒྱན་རི་དང་དཔལ་གྱི་རི། །ཆོས་སྐྱོང་བཞུགས་གནས་ཐམས་ཅད་དང་། །དབྱེར་མེད་ཐུག་ལྕགས་ལྷུན་གྱིས་གྲུབ། །ཕྱི་ལྟར་གཡག་རྒོད་རྔ་མ་སྟེ། །ཉག་མ་རེ་རེ་སྲོག་ལྟར་སྲུང་། །ནང་ལྟར་དགོས་འདོད་འབྱུང་བའི་སྤྲིན། །དགོས་འདོད་ཆར་པ་སི་ལི་ལི། །ནག་པོ་སེར་སྤྲིན་འཁྲིགས་པ་འདྲ། །དྲག་པོའི་ཐོག་སེར་དགྲ་ལ་འབེབས། །གསང་བ་མཆོད་པའི་སྤྲིན་ཆེན་ཏེ། །འཐུག་པོ་བཀོད་དང་བདེ་བ་ཅན། །མངོན་དགའི་ཞིང་དང་དགའ་ལྡན་ཞིང་། །འདོད་ཁམས་ལྷ་གནས་ཐམས་ཅད་ཀྱིས། །
བརྒྱན་དང་བཀོད་པ་མཆོད་པའི་རྫས། །ཐམས་ཅད་རང་བྱུང་ལྷུན་གྱིས་གྲུབ། །ཕྱི་ལྟར་དར་ནག་རི་མཚོན་སྦྲེང་། །ལྷ་དང་སྲུང་མ་སྤྲིན་ལྟར་འདུ། །ནང་ལྟར་འབོད་སྒྲུབ་རྟེན་པའི་རྫས། །སྙིང་པོ་སྔགས་ཀྱི་རང་སྒྲ་སྒྲོག །གསང་བ་ལས་བཞི་བསྒྲུབ་པའི་རྫ་ས། །ཕོ་ཉ་ལས་མཁན་སྐར་ལྟར་འཁྲུགས། །འདི་ལྟར་ཐུག་ལྕགས་རུ་མཚོན་འདི། །ཆོས་སྐྱོང་སྲུང་མའི་རྟེན་དུ་བཙུགས། །རྟེན་ལ་འཁོར་ཞིང་བཞུགས་སུ་གསོལ། །རྒྱུ་ཅན་རྟེན་འབྲེལ་ཕུན་ཚོགས་པས། །ཆོས་སྐྱོང་དམ་ཅན་སྲུང་མ་ཀུན། །དབྱེར་མེད་ཆུ་ལ་ཆུ་ཞགས་ལྟར། །རྔ་ཐུག་འདི་ལ་བརྟན་པར་བཞུགས། །ལྷ་སོ་སོར་མཚན་དང་། ཚུར་བྱོན་རྔ་ཐུག་འདི་ལ་བྱོན། ཅེས་སྦྱར་ནས། དགོན་གནས་སྒར་གཞི་རྟེན་གསུམ་དང་། །མཆོད་ཆ་དཔེ་ཆ་ཀ་ཆ་དང་། །རྟ་དྲེལ་ནོར་ཕྱུགས་གྲུ་འཁོར་བཅས། །རྣལ་འབྱོར་མི་ནོར་འཁོར་བཅས་རྣམས། །བསྲུང་བའི་སྲུང་མར་ཁྱེད་རྣམས་བསྐོས། །ཐམས་ཅད་བདག་ཏུ་བཟུང་མཛོད་ལ། །ཉིན་མཚན་དབྱེར་བ་མེད་པ་སྲུངས། །དགྲ་དང་བགེགས་ལ་མ་ཤོར་ཅིག །གལ་ཏེ་དགྲ་རྐུན་ཇག་པ་ཡི། །ཁྱེར་ན་ར་མདའ་དེ་མ་ཐག །ཤིན་ཏུ་
འཇིགས་རུང་ཆོ་འཁྲུལ་གྱིས། །དངས་སྐྲག་འགྱོད་པ་སྐྱེས་མཛོད་ལ། །རྒྱ་མཚོའི་སྟེང་དུ་ཁྱེར་ཀྱང་ལོང་། །རང་འཁོར་གྲྭ་སློབ་ལོངས་སྤྱོད་བཅས། །ཡར་ངོས་ཟླ་ལྟར་འཕེལ་བར་མཛོད། །ཁྱེད་རྣམས་མངོན་ཤེས་སྤྱན་ལྡན་ཞིང་། །མཐུ་སྟོབས་རྫུ་འཕྲུལ་ཐོགས་མེད་པས། །ཅི་ལྟར་བཅོལ་བཞིན་འགྲུབ་པར་མཛོད། །མཐུ་རྩལ་ནུས་པ་ཅི་འདུག་ལྟ། །རྟགས་དང་མཚན་མ་དངོས་སུ་སྟོན། །མ་གཡེལ་ཁས་བླངས་དམ་བཅས་དགོངས། །དུས་ལ་བབ་བོ་ས་མ་ཡ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་ལྷ་སོ་སོའི་བསྙེན་སྔགས་བརྗོད་ཅིང་ལྷ་རྣམས་རྔ་ཐུག་ལ་བསྟིམ། །སྔགས་མཐར་སུ་པྲ་ཏིཥྛ་དང་། །རྟེན་འབྲེལ་སྙིང་པོ་བཏགས་ལ་རབ་གནས་བྱ། བཀྲ་ཤིས་སོགས་བྱ། དམིགས་རིམ་འདོན་བྱ་ལྟར་བསྒོམ། ཞེས་པ་རཱ་ག་ཨ་སྱས་མཐུན་མཚམས་ཤིག་ལ་བྲིས་པའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།