སྒ་ལོའི་བླ་སྒྲུབ།
ན་མོ་གུ་རུ་བཛྲ་དྷ་ར་ཡེ། །བདག་གི་སྤྱི་བོར་པདྨ་ཟླ་བའི་སྟེང་། །རྩ་བའི་བླ་མ་རྒྱལ་བ་སྲས་དང་བཅས། །དབྱེར་མེད་ངོ་བོ་དཔལ་ཆེན་སྒ་ལོ་ཙཱ། །དགེ་སློང་ཆ་ལུགས་ཆོས་གོས་པཎ་ཞྭ་ཅན། །སྐུ་སྟོད་གཅེར་བུར་སྒོམ་ཐག་དམར་པོས་བརྒྱན། །ཞལ་གཅིག་ཁྲོ་འཛུམ་སྤྱན་གསུམ་ནམ་མཁར་གཟིགས། །ཕྱག་གཉིས་རྡོ་རྗེ་དྲིལ་བུ་ཐུགས་ཀར་བསྣོལ། །འཇའ་འོད་མེ་དཔུང་འཁྲུགས་པའི་ཀློང་ན་བཞུགས། །སྐུ་ཡི་ནང་དབུས་རྩ་གསུམ་འཁོར་ལོ་ལྔ། །སྤྱི་བོར་བདེ་མཆོག་ཡབ་ཡུམ་དཀར་པོ་ལ། །སྐུ་ཡི་དཔའ་བོ་ཡབ་ཡུམ་བརྒྱད་ཀྱིས་བསྐོར། །མགྲིན་པར་གསུང་གི་བདེ་མཆོག་དམར་པོ་ལ། །གསུང་གི་དཔའ་བོ་མཁའ་འགྲོ་བརྒྱད་ཀྱིས་བསྐོར། །ཐུགས་ཀར་ཐུགས་ཀྱི་བདེ་མཆོག་མཐིང་ཁ་ལ། །ཐུགས་ཀྱི་དཔའ་བོ་མཁའ་འགྲོ་བརྒྱད་ཀྱིས་བསྐོར། །ལྟེ་བར་བདེ་བ་ཆེན་པོ་འཁོར་ལོ་སྡོམ། །སྙིང་པོ་མ་བཞི་སྒོ་མཚམས་བརྒྱད་ཀྱིས་བསྐོར། །གསང་བར་ཡེ་ཤེས་མགོན་པོ་ཡབ་ཡུམ་ལ། །བྱ་སེང་ཡུམ་དང་ལེགས་ལྡན་མཁའ་འགྲོ་བརྒྱད། །དབུ་གཙུག་རྡོ་རྗེ་འཆང་ཆེན་བཀའ་བརྒྱུད་ཚོགས། །ཐམས་ཅད་གསལ་སྟོང་མེ་ལོང་
གཟུགས་ལྟར་གསལ། །འོག་མིན་གནས་དང་ཡུལ་ཆེན་ཉེར་བཞི་ནས། །རྩ་བརྒྱུད་བླ་མ་ཡི་དམ་ཆོས་སྐྱོང་ཚོགས། །ཁ་བ་བུག་ཡུག་བཞིན་དུ་བྱོན་ནས་ཐིམ། །འཻ། རྡོ་རྗེ་འཆང་ཆེན་བཀའ་བརྒྱུད་ཀྱི་བླ་མ། །གསོལ་བ་འདེབས་སོ་ཐུགས་རྗེས་ཟུངས་ཤིག །བྱིན་རླབས་མཆོག་གི་དངོས་གྲུབ་གནོང་མཛོད། །འཁོར་ལོ་སྡོམ་པ་དྲུག་ཅུ་རྩ་གཉིས། །གསོལ་བ་འདེབས་སོ་བྱིན་གྱིས་རློབས་ཤིག །མཆོག་དང་ཐུན་མོང་དངོས་གྲུབ་སྩོལ་མཛོད། །བྱ་རོག་མཚན་ཅན་ཆོས་སྐྱོང་སྲུང་མ། །གསོལ་བ་འདེབས་སོ་མཐུ་སྟོབས་དཔུང་བསྐྱེད། །ཕྲིན་ལས་རྣམ་བཞི་མྱུར་དུ་སྒྲུབ་མཛོད། །ཨོ་རྒྱན་ཐུགས་སྤྲུལ་དཔལ་ཆེན་སྒ་ལོ། །བླ་མ་ཀུན་འདུས་ཁྱེད་རང་མཁྱེན་ནོ། །བདེ་མཆོག་ངོ་བོ་དཔལ་ཆེན་སྒ་ལོ། །ཡི་དམ་ཀུན་འདུས་ཁྱེད་རང་མཁྱེན་ནོ། །ཡེ་ཤེས་མགོན་པོ་དངོས་སྤྲུལ་སྒྲ་ལོ། །ཆོས་སྐྱོང་ཀུན་འདུས་ཁྱེད་རང་མཁྱེན་ནོ། །ལུས་ལ་སྐུ་ཡི་བྱིན་གྱིས་རློབས་ཤིག །འཆི་མེད་ཚེ་ཡི་དངོས་གྲུབ་གནོང་མཛོད་ཅིག །ངག་ལ་གསུང་གི་བྱིན་གྱིས་རློབས་ཤིག །བདེན་ཚིག་ནུས་མཐུ་འགྲུབ་པར་མཛོད་ཅིག །སེམས་ལ་ཐུགས་ཀྱི་བྱིན་གྱིས་རློབས་ཤིག །ཕྱག་
རྒྱ་ཆེན་པོའི་དངོས་གྲུབ་སྩོལ་ཅིག །དེ་ལྟར་བླ་མ་རྒྱང་འབོད་བྱས་པ་ཡིས། །དཔལ་ཆེན་སྒ་ལོའི་སྐུ་ཡི་དཀྱིལ་འཁོར་ལས། །བདུད་རྩིའི་རྒྱུན་བབ་ཚངས་པའི་ལམ་ནས་ཞུགས། །སྒྲིབ་བཞི་དག་ཅིང་དབང་བཞི་རྫོགས་པར་ཐོབ། །སྐུ་བཞིའི་ས་བོན་རྒྱུད་ལ་བཞག་པར་མཛོད། །ཨོཾ་ཨཱཿཿགུ་རུ་ཀུ་མ་ར་ཤྲི་སིདྡྷི་ཧཱུྃ་སྭཱ་ཧཱ། ཞེས་བསྙེན་པ་ཅི་ནུས་བྱ། དེ་ནས་བླ་མ་སྐུ་ཡི་ལྷ་ཚོགས་བཅས། །འོད་ཞུ་རང་ལ་ཐིམ་པས་དབྱེར་མེད་འདྲེས། །རང་སེམས་སྤྲོས་བྲལ་འོད་གསལ་རྗེན་པར་བུད། །ཡེངས་བ་མ་ཡིན་འདི་བསྒོམ་གཏད་སོ་མེད། །རང་སེམས་མ་བཅོས་རང་བབ་ལྷོད་ལ་བཞག །ཐ་མལ་ཤེས་པ་རང་རིག་རྗེན་པ་འདི། །དམ་ཆོས་ཕྱག་རྒྱ་ཆེན་པོ་ཨེ་མ་ཧོ། །འདི་ལྟར་བླ་སྒྲུབ་བྱས་པའི་དགེ་བ་འདིས། །འགྲོ་ཀུན་ཚེ་གཅིག་རྡོ་རྗེ་འཆང་འགྲུབ་ཤོག །ཅེས་པ་དྲུང་འཚོ་བ་ཀུན་དགའ་བསྟན་པ་རྒྱ་མཚོ་ཞེས་པས་བསྐུལ་ནས། དཔལ་སྒ་ལོ་ཙཱའི་སྒྲུབ་གནས་གྲུབ་ཆེན་དེ་ཉིད་ཀྱི་མཆོད་རྟེན་དང་ཉེ་བ་ཚངས་གསར་གཟིམ་ཁང་དུ་འཕྲལ་དུ་བྲིས་པས་ཀུན་ལ་ཕན་པར་གྱུར་ཅིག །ཨ་རཱ་ག་རིན་པོ་ཆེའི་ཕྱག་བྲིས་ཡིག་ཆ་ལས་དག་པར་ཞལ་བཤུས་སོ།། །།