ལེའུ་བདུན་མའི་དམིགས་རིམ་འདོན་ཆར་ཕན་པ།
ལེའུ་བདུན་མའི་དམིགས་རིམ་འདོན་ཆར་ཕན་པ་བཞུགས་སོ།
ན་མོ་གུ་རུ་སིདྡྷི་ཧཱུྃ། ཨོ་རྒྱན་རྗེ་ལ་ཕྱག་འཚལ་ལོ། །དེ་ཡི་སྒྲུབ་ཐབས་མཐའ་ཡས་ཀྱང་། །ཕྱི་ལྟར་སྒྲུབ་ཐབས་གསོལ་འདེབས་སྐོར། །ལེའུ་བདུན་མ་ཞེས་བྱ་བའི། །དམིགས་རིམ་ངག་འདོན་གསལ་བྱེད་བརྗོད། །རང་ཉིད་རྟ་ཕག་ཡབ་ཡུམ་སྐུ། །དམར་པོ་གྲི་གུག་ཐོད་ཁྲག་འཛིན། །སྤྱི་གཙུག་རྟ་དབུ་ཕག་ཞལ་ཅན། །སྐུ་ལ་དུར་ཁྲོད་ཆས་བརྒྱད་གསོལ། །ཞབས་གཉིས་པད་ཉིར་བདུད་བཞི་མནན། །མེ་དཔུང་ཀློང་ན་འགྱིངས་བར་བསྒོམ། །ཞེས་པའི་བདག་བསྐྱེད་ལེའུ་བདུན་ཀུན་ལ་འགྲེས། །རང་གི་སྤྱི་བོར་པདྨ་དཀར་དམར་མཐིང་། །དཀར་པོའི་སྟེང་དུ་སྤྲུལ་སྐུ་པདྨ་འབྱུང་། །པད་ཞྭ་ཆོས་གོས་ཟ་
འོག་བེར་ཕྱམ་ཅན། །མཚན་དཔེའི་རབ་རྒྱས་སྤྲུལ་སྐུའི་ཆ་ལུགས་རྫོགས། །དེ་སྟེང་པདྨ་དམར་པོའི་གདན་གྱི་སྟེང་། །བླ་མ་ལོངས་སྤྱོད་རྫོགས་སྐུ་ཚེ་དཔག་མེད། །དམར་པོ་མཉམ་བཞག་ཚེ་བུམ་ཡུམ་དང་འཁྲིལ། །དར་དང་རིན་ཆེན་རྒྱན་ལྡན་ལོངས་སྐུའི་ཆས། །དེ་ཡི་དབུ་གཙུག་པདྨ་སྔོན་པོའི་སྟེང་། །བླ་མ་ཆོས་སྐུ་གསང་འདུས་རྡོ་རྗེ་འཆང་། །མཐིང་ནག་སྤྱན་གསུམ་རྡོ་རྗེ་དྲིལ་བུ་འཛིན། །རིགས་ལྔས་དབུ་བརྒྱན་རུས་པའི་རྒྱན་དྲུག་གསོལ། །མཚོ་རྒྱལ་དཀར་མོ་གྲི་ཐོད་འཛིན་པས་འཁྱུད། །སྤྲུལ་སྐུའི་ཕྱི་རིམ་པདྨ་འདབ་དྲུག་སྟེང་། །ནམ་
མཁའི་སྙིང་པོ་ཁྲི་སྲོང་ལྡེའུ་བཙན་དང་། །མཚོ་རྒྱལ་སྣ་ནམ་རྡོ་རྗེ་བདུད་འཇོམས་དང་། །མུ་ཁྲི་བཙན་པོ་རིག་འཛིན་རྒོད་ལྡེམ་ཅན། །དྲུག་པོ་རྒྱན་དང་ཆ་ལུགས་གསལ་བར་གྱུར། །གཙོ་བོ་གསུམ་པོའི་གནས་གསུམ་འབྲུ་གསུམ་ལས། །འོད་འཕྲོས་འོག་མིན་བདེ་ཆེན་རྔ་ཡབ་ནས། །བླ་མ་སྐུ་གསུམ་འཁོར་བཅས་སྤྱན་དྲངས་ཐིམ། །ཨེ་མ་ཧོ༔ སྤོས་བྲལ་ཆོས་ཀྱི་དབྱིངས་ཀྱི་ཞེས་སོགས་ནས། །བརྒྱུད་རིམ་གསོལ་འདེབས་མཐར་ཅེས་བསྙེན་པ་བསྒྲུང་། །སྤྱི་བོའི་བླ་མ་སྐུ་གསུམ་གསང་གསུམ་ལས། །བྱིན་རླབས་ཐིག་ལེ་དཀར་དམར་མཐིང་གསུམ་འཕྲོས། །བདག་གི་གནས་གསུམ་ཐིམ་པས་བྱིན་རླབས་ཞུགས། །སྐུ་གསུང་ཐུགས་ཀྱི་དངོས་གྲུབ་ཐོབ་པར་གྱུར། །སྐུ་གསུམ་འོད་ཞུ་རང་ལ་དབྱེར་མེད་ཐིམ། །དེ་ནས་མ་བཅོས་སེམས་ཀྱི་རང་ཞལ་ལྟ། །ངོ་བོ་སྟོང་པ་བླ་མ་ཆོས་ཀྱི་སྐུ། །རང་བཞིན་གསལ་བ་བླ་མ་ལོངས་སྤྱོད་རྫོགས། །སྣ་ཚོགས་འགགས་མེད་བླ་མ་སྤྲུལ་པའི་སྐུ། །སྐུ་གསུམ་རང་ལ་རྙེད་པས་བཟླས་པ་འགྲུབ། །ལེའུ་དང་པོའི་དམིགས་རིམ་སྦི་རྒྱ། ༈ །།སྤྱི་གཙུག་པདྨ་ཉི་ཟླའི་གདན་སྟེང་དུ། །ཨོ་རྒྱན་སྤྲུལ་སྐུ་པདྨ་ཐོད་ཕྲེང་རྩལ། །སྐུ་ཚད་རི་རྒྱལ་ལྟ་བུར་གཟི་བརྗིད་འབར། །ཐུགས་དབུས་ཀུན་
བཟང་རིགས་ལྔ་ཞི་བའི་ལྷ། །མགྲིན་པར་པདྨ་གར་དབང་རིག་འཛིན་ཚོགས། །དུང་ཁང་ཆེ་མཆོག་ཁྲག་འཐུང་ལྔ་བཅུ་བརྒྱད། །སྤྱི་གཙུག་ཚངས་བུག་ཚེ་དཔག་ཚེ་ཡི་ལྷ། །དཔྲལ་བར་འཇམ་དཔལ་གཤིན་རྗེ་སྐུ་ཡི་ལྷ། །མགྲིན་པར་དབང་ཆེན་རྟ་མགྲིན་གསུང་གི་ལྷ། །ཐུགས་ཀར་ཡང་དག་བཛྲ་ཐུགས་ཀྱི་ལྷ། །ལྟེ་བར་རྡོ་རྗེ་གཞོན་ནུ་ཕུར་པའི་ལྷ། །གསང་བར་བླ་མེད་མ་མོ་རྦོད་གཏོང་ལྷ། །པུས་མོ་གཡས་སུ་འཇིག་རྟེན་མཆོད་བསྟོད་ལྷ། །པུས་མོ་གཡོན་དུ་དམོད་པ་དྲག་སྔགས་ལྷ། །སྲོག་རྩར་ཤཱཀ་ཐུབ་ཉན་ཐོས་འཁོར་དང་བཅས། །དེ་སོགས་རྩ་གནས་དྲུག་ལ་ཐུབ་པ་དྲུག །ལྟེ་འོག་སོར་བཞིར་ཕག་མོའི་དཀྱིལ་འཁོར་ལྷ། །སྐུ་ཡི་རྩ་གནས་ཉི་ཤུ་རྩ་བཞི་ན། །ཡུལ་ལྟཆེན་ཉེར་བཞིའི་དཔའ་བོ་རྣལ་འབྱོར་མ། །སྐུ་ཡི་བ་སྤུ་བྱེ་བ་ས་ཡ་ལ། །དཔའ་བོ་མཁའ་འགྲོ་བྱེ་བ་ས་ཡ་སྟེ། །སྐུ་ལ་སངས་རྒྱས་ཀུན་གྱི་བཀོད་པ་རྫོགས། །ཐམས་ཅད་ཆུ་ནང་ཟླ་བ་ལྟ་བུར་གསལ། །དེ་ལྟར་བསྒོམ་སྟེ། ཨེ་མ་ཧོ༔ སངས་རྒྱས་བསྟན་པ་རྨད་བྱུང་སོགས༔ ལེའུ་གཉིས་པའི་གསོལ་འདེབས་སྙིང་པོ་བསྒྲུང་། །ལྷ་ཚོགས་ཀུན་གྱི་སྐུ་ལས་བདུད་རྩི་
བབས། །གུ་རུའི་སྐུ་གང་བདུད་རྩིའི་ཆར་རྒྱུན་བབས། །ཚངས་བུག་ནས་ཞུགས་རང་ལུས་ལྡེམས་སེ་གང་། །སྒོ་གསུམ་སྒྲིབ་དག་གསང་བའི་དབང་བཞི་ཐོབ། །ཨོ་རྒྱན་འོད་དུ་ཞུ་ནས་རང་ལ་ཐིམ། །མཆོག་ཐུན་དངོས་གྲུབ་ཡིད་བཞིན་ཐོབ་པར་གྱུར། །ལེའུ་གཉིས་པའི་དམིགས་རིམ་སྤྱི་རྒྱ། །རང་མདུན་རྔ་ཡབ་གླིང་ཕྲན་སྲིན་པོའི་ཡུལ། དཔལ་རི་པདྨ་འོད་ཀྱི་གཞལ་ཡས་ཁང་། །སྒོ་གྲུ་རྟ་བབས་མཚན་ཉིད་ཡོངས་སུ་རྫོགས། །དབུས་སུ་རིན་ཆེན་ཟུར་བརྒྱད་པད་ཟླའི་སྟེང་། །དཔལ་ཆེན་ཆེ་མཆོག་པདྨ་ཐོད་ཕྲེང་རྩལ། །སྤྲུལ་སྐུའི་ཆ་ལུགས་འོད་དང་གཟི་བརྗིད་འབར། །ཕྱོགས་མཚམས་པདྨ་ཏི་ར་ཉི་ཟླའི་སྟེང་། །སྒྲུབ་ཆེན་བཀའ་བརྒྱད་ཁྲག་འཐུང་གཙོ་བོ་བརྒྱད། །དེ་རྒྱབ་པད་འདབ་བཞི་ཡི་གདན་སྟེང་དུ། །རིག་འཛིན་གིང་དང་མཁའ་འགྲོ་སྡེ་བཞིའི་ཚོགས། །ཐམས་ཅད་མ་ལུས་དུར་ཁྲོད་རྒྱན་དང་ལྡན། །སྒོ་བཞིར་རྒྱལ་ཆེན་སྡེ་བཞི་འཁོར་བཅས་གསལ། །དེ་ལྟར་བསྒོམ་ཞིང་། ཨེ་མ་ཧོ༔ འདི་ནས་ཉི་མ་ལྷོ་ནུབ་མཚམས་ཤེད་སོགས། །ལེའུ་གསུམ་པའི་གསོལ་འདེབས་སྙིང་པོ་བསྒྲུང་། །གསོལ་བ་བཏབ་པས་ལྷ་ཚོགས་དེ་དག་གི་
དཔྲལ་མགྲིན་ཐུགས་ཀ་ལྟེ་བ་གནས་བཞི་ནས། །འོད་ཟེར་དཀར་དམར་མཐིང་དང་ལྗང་གུའི་ཚོགས། །སྐར་མདའ་ཆད་བཞིན་རང་གི་གནས་བཞིར་ཐིམ། །དབང་དང་བྱིན་རླབས་དངོས་གྲུབ་ཐོབ་པར་གྱུར། །ལེའུ་གསུམ་པའི་དམིགས་རིམ་སྦི་རྒྱ། །རང་གི་སྤྱི་བོར་པད་གདན་སུམ་བརྩེགས་སྟེང་། །སྟེང་མ་ཀུན་བཟང་ཡབ་ཡུམ་མཐིང་༡ག་སྟེ། །དེ་མཐར་རྒྱལ་བ་རིགས་ལྔ་རྡོ་རྗེ་འཆང་། །རྒྱལ་བ་དགོངས་བརྒྱུད་སངས་རྒྱས་ཀུན་གྱིས་བསྐོར། །དེ་འོག་སྟོན་པ་རྡོ་རྗེ་སེམས་དཔའ་ལ། །དགའ་རབ་ཤྲཱི་སེང་རྒྱ་གར་རིག་འཛིན་བརྒྱད། །རིག་འཛིན་བརྡའ་བརྒྱུད་བླ་མ་ཀུན་གྱིས་བསྐོར། །དེ་འོག་སྤྲུལ་སྐུ་པདྨ་འབྱུང་གནས་ལ། །རྗེ་འབངས་ཉེར་ལྔ་གཏེར་སྟོན་བརྒྱ་རྩ་བརྒྱད། །གང་ཟག་སྙན་བརྒྱུད་བླ་མ་ཀུན་གྱིས་བསྐོར། །ཀུན་ཀྱང་འཇའ་འོད་ཐིག་ལེ་ཐིག་ཕྲན་འཁྲུགས། །ནམ་མཁའི་ཁམས་རྣམས་ཡོངས་སུ་གང་བར་གྱུར། །དེ་ལྟར་བསྒོམ་ཞིང་། ཨེ་མ་ཧོ༔ སྤྲོས་བྲལ་བདེ་ཆེན་རྒྱལ་བ་སོགས། །ལེའུ་བཞི་པའི་གསོལ་འདེབས་སྙིང་པོ་བསྒྲུང་། །ལྷ་ཚོགས་ཐམས་ཅད་ཨོ་རྒྱན་ཉིད་ལ་ཐིམ། །ཨོ་རྒྱན་འོད་ཞུ་རང་ལ་ཐིམ་པ་ཡིས། །རང་གི་
སེམས་ཉིད་ཆོས་སྐུ་རྗེན་པར་གྱུར། །ཕྱག་ཆེན་མཆོག་གི་དངོས་གྲུབ་ཐོབ་པར་གྱུར། །ལེའུ་བཞི་པའི་དམིགས་རིམ་སྤྱི་རྒྱ། །རང་གི་སྤྱི་བོར་པདྨའི་སྡོང་པོ་ནི། །དབུས་དང་འདབ་བརྒྱད་སྟེང་དུ་ཟླ་གདན་རེ། །དབུས་སུ་ཨོ་རྒྱན་སྤྲུལ་སྐུའི་ཆ་ལུགས་ཅན། །འདབ་མ་བརྒྱད་ལ་གུ་རུ་མཚན་བརྒྱད་གསལ། །རྔ་ཡབ་གླིང་ནས་སྤྱན་དྲངས་གཉིས་མེད་ཐིམ། །ཨེ་མ་ཧོ༔ ལྷོ་ནུབ་རྔ་ཡབ་གླིང་ཕྲན་སོགས། ལེའུ་ལྔ་པའི་གསོལ་འདེབས་སྙིང་པོ་བསྒྲུང་། །མཚན་བརྒྱད་འོད་ཞུ་ཨོ་རྒྱན་ཉིད་ལ་ཐིམ། །ཨོ་རྒྱན་འོད་ཞུ་རང་ལ་ཐིམ་པ་ཡིས། །དབང་དང་བྱིན་རླབས་དངོས་གྲུབ་ཐོབ་པར་གྱུར། །ལེའུ་ལྔ་པའི་དམིགས་རིམ་སྤྱི་རྒྱ། །།རང་ཉིད་ཡི་དམ་རྟ་ཕག་ཡབ་ཡུམ་གྱི། །སྐུ་རྒྱབ་གཏད་པའི་པད་སྡོང་ཆེན་པོའི་རྩེར། །ཨོ་རྒྱན་ཆེན་པོ་སྤྲུལ་སྐུའི་ཆ་ལུགས་ཅན། །ཁྲོ་འཛུམ་སྤྱན་གཉིས་ནམ་མཁའི་མཐོངས་ལ་གཟིགས། །འོད་འཕྲོས་རྔ་ཡབ་གླིང་ནས་སྤྱན་དྲངས་བསྟིམ། །ཨེ་མ་ཧོ༔ ནུབ་ཕྱོགས་བདེ་བ་ཅན་གྱི་ཞིང་ཁམས་སོགས། །ལེའུ་དྲུག་པའི་གསོལ་འདེབས་སྙིང་པོ་བསྒྲུང་། །ཨོ་རྒྱན་སྐུ་ལུས་ཆུང་ངུ་ཞིག་ཏུ་གྱུར། །རང་གི་ཚངས་བུག་ནས་ཞུགས་སྙིང་གར་
བྱོན། །རང་སྙིང་པདྨ་དམར་པོ་འདབ་བརྒྱད་པ། །ཅུང་ཟད་ཁ་བྱེའི་ནང་དུ་བཞུགས་པར་གྱུར། །ལེའུ་དྲུག་པའི་དམིགས་རིམ་སྤྱི་རྒྱ། །ང་ཡི་རྗེས་འཇུག་འཁོར་བ་སྤང་འདོད་སོགས། །མདུན་གྱི་ནམ་མཁར་ཨོ་རྒྱན་སྤྲུལ་པའི་སྐུ། །ཕྱག་གཡོན་མཉམ་བཞག་བྷནྡྷ་ཚེ་བུམ་འཛིན། །ཕྱག་གཡས་རྡོ་རྗེ་དང་བཅས་སྐྱབས་སྦྱིན་མཛད། །སྐྱབས་སྦྱིན་འོག་ཏུ་བདག་དང་བསྲུང་བྱ་ཚུད། །འཇིགས་དང་གནོད་པ་ཀུན་ལས་ཐུགས་རྗེའི་སྐྱོབ། །ཨེ་མ་ཧོ༔ ནུབ་ཕྱོགས་བདེ་བ་ཅན་གྱི་ཞིང་ཁམས་སོགས། །བསམ་པ་ལྷུན་གྲུབ་མ་ཡི་གསོལ་འདེབས་བྱ། །དེ་ནི་སྤྱི་ཁྱབ་འཇིགས་པ་ཀུན་སེལ་ཡིན། །ཁྱད་པར་ནད་ཀྱི་འཇིགས་པས་ཉན་པ་ན། །རང་ངམ་ནད་པའི་སྤྱི་བོར་ཨོ་རྒྱན་གྱི། །ཆ་ལུགས་སངས་རྒྱས་སྨན་བླའི་སྐུ་རུ་བསྒོམ། །ཕྱག་གཡོན་བདུད་རྩི་སྨན་གྱི་ལྷུང་བཟེད་ནས། །ཚ་བའི་ནད་ལ་ག་པུར་བསིལ་བའི་ཆུ། །ཚངས་བུག་ནས་ཞུགས་ལུས་ཀུན་དག་པར་བསྒོམ། །གྲང་བའི་ནད་ལ་ཁྲོ་ཆུ་ཁོལ་མའི་རྒྱུན། །བབས་པས་ནད་ཀུན་བྱ་སྒྲོ་མེར་བསྲེགས་བསྒོམ། །རླུང་གི་ནད་ལ་འབྲི་མར་བཞུས་འདྲའི་རྒྱུན། །ལུས་ཀུན་ཀོ་ཀམ་
སྣུམ་གྱིས་བརླན་པ་བཞིན། །འདུས་པའི་ནད་ལ་བདུད་རྩི་ཁ་དོག་ལྔ། །བབས་པས་ལུས་གང་འབྱུང་བ་ཁོད་སྙོམ་བསྒོམ། །འཆི་བར་ཉེ་ཚེ་སྤྱི་གཙུག་པད་ཟླའི་སྟེང་། །ཨོ་རྒྱན་ཆོས་སྐུ་སྣང་བ་མཐའ་ཡས་བསྒོམ། །རང་ལུས་དབུས་སུ་ཨ་ཝ་དྷཱུ་ཏཱིའི་རྩ། །མར་སྣེ་ལྟེ་འོག་ཕུག་རྡུགས་སྙུག་ཚིགས་བཞིན། །ཡར་སྣེ་ཚངས་བུག་ཧད་པོར་སྐར་ཁུང་བཞིན། །སྙིང་ཁར་རང་གི་རླུང་སེམས་རྣམ་ཤེས་ནི། །ཐིག་ལེ་དཀར་དམར་མདངས་ལྡན་འཕར་ལ་ཁད། །སྐར་མདའ་ཆད་བཞིན་ཚངས་པའི་བུ་ག་ནས། །ཨོ་རྒྱན་སྣང་མཐའི་ཐུགས་ཀར་ཡང་ཡང་བསྟིམ། །དབུགས་ཆད་བར་དུ་དེ་ཉིད་བསྒོམས་པས་འཐུས། །ཆུ་དང་གཡང་ས་དགྲ་རྐུན་གཅན་གཟན་སོགས། །འཇིགས་པ་ཡོད་སར་འགྲོ་ཚེ་ནམ་མཁའ་ལ། །ཨོ་རྒྱན་སྐྱབས་སྦྱིན་མཛད་པ་སྒོམ་བཞིན་དུ། །བསམ་པ་ལྷུན་གྲུབ་མ་ཉིད་འདོན་པས་འཐུས། །ལེའུ་བདུན་པའི་དམིགས་རིམ་སྤྱི་རྒྱ། །དེ་ལྟར་ལེའུ་བདུན་མའི་གསོལ་འདེབས་ཀྱི་ཟིན་བྲིས་ལས་ཁོལ་དུ་ཕྱུང་བའོ། །རཱ་ག་ཨ་སྱས་ལྕགས་ཕོ་བྱི་བའི་ལོར་བདག་གི་རྒྱུན་འདོན་བྱ་ཕྱིར་བྲིས་པའོ། །སརྦ་མངྒ་ལཾ།། །།