གསོལ་འདེབས་ལེའུ་བདུན་པའི་དམིགས་རིམ་ལོ་རྒྱུས་ཕན་ཡོན་དང་བཅས་པ།
གསོལ་འདེབས་ལེའུ་བདུན་པའི་དམིགས་རིམ་ལོ་རྒྱུས་ཕན་ཡོན་དང་བཅས་པ་བཞུགས་སོ།
ན་མོ་གུ་རུ་པྲ་ཝཱ་ཀ་རཱ་ཡེ། དུས་གསུམ་རྒྱལ་བ་མ་ལུས་འདུས་པའི་སྐུ། །ཨོ་རྒྱན་རིན་པོ་ཆེ་ལ་ཕྱག་འཚལ་ནས། །ལེའུ་བདུན་མའི་དམིགས་རིམ་ཞལ་ཤེས་བྲི། །ཆོས་བདག་ཌཱཀིས་བཀའ་ཡི་གནང་བ་སྩོལ། །དེ་ལ་དང་པོ་ལོ་རྒྱུས་ཟུར་ཙམ་བཤད་པ་ནི། ཨ་ཏི་བཀོད་པའི་རྒྱུད་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཞེས་གསུངས་པའི་ཕྱིར་རོ། །དེ་ལ་གནས་ཕུན་སུམ་ཚོགས་པ་བདེ་བ་ཅན་གྱི་ཞིང་ཁམས་ན། སྟོན་པ་ཕུན་སུམ་ཚོགས་པ་སངས་རྒྱས་འོད་དཔག་མེད་ལ། འཁོར་ཕུན་
སུམ་ཚོགས་པ་པདྨ་རིགས་ཀྱི་སེམས་དཔའ་དང་སེམས་མ་གྲངས་མེད་པས་བསྐོར་ནས་བཞུགས་པའི་ཚེ། འཇིག་རྟེན་གྱི་དཔའ་བོ་དང་ཌཱཀི་རྣམས་ཀྱི་ཕྱོགས་བཅུའི་སངས་རྒྱས་ཐམས་ཅད་འགྲོ་བའི་དོན་དུ་སྤྲུལ་པའི་སྐུ་འབྱོན་པར་གསོལ་བ་བཏབ་པས། སངས་རྒྱས་ཐམས་ཅད་ཀྱི་ཐུགས་ཀའི་འོད་ཟེར་སངས་རྒྱས་འོད་དཔག་ཏུ་མེད་པའི་ཐུགས་ཀར་ཐིམ་སྟེ། སྣང་བ་མཐའ་ཡས་ཀྱི་ཐུགས་ཀ་ནས་གསེར་གྱི་རྡོ་རྗེ་ལ་ཡི་གེ་ཧཱུྃཡིས་མཚན་པ་ཞིག་འཕྲོས་ནས། བདེ་བ་ཅན་གྱི་ཞིང་ཁམས་ཀྱི་ལྷོ་ནུབ་འོ་མ་ཅན་གྱི་མཚོ་ལ་ཐིམ་པས། པད་སྡོང་གི་རྩེ་ནས་གུ་རུ་སྐུ་ལྔ་ཐོད་ཕྲེང་རྩལ་སྡེ་
ལྔའི་ཚུལ་དུ་འཁྲུངས་སོ། །དེར་འཕགས་པ་སྤྱན་རས་གཟིགས་ཀྱིས་སངས་རྒྱས་སྣང་བ་མཐའ་ཡས་ལ་སྤྲུལ་པ་དེའི་ལོ་རྒྱུས་གསུངས་བར་ཞུས་པས། གུ་རུ་ཆོས་སྐུར་སྒྲུབ་པའི་རྒྱུད་བརྒྱ་རྩ་བརྒྱད། ལོངས་སྐུར་སྒྲུབ་པའི་རྒྱུད་བརྒྱ་རྩ་བརྒྱད། སྤྲུལ་སྐུར་སྒྲུབ་པའི་རྒྱུད་བརྒྱ་རྩ་བརྒྱུད་རྣམས་བསྡུས་པའི་རྒྱུད། སྤྱི་རྒྱུད་པད་སྡོང་བརྩེགས་པ། སྐུ་རྒྱུད་ཤེལ་གྱི་རི་བོ། གསུང་རྒྱུད་རིན་ཆེན་འབྲུག་སྒྲ། ཐུགས་རྒྱུད་ནམ་མཁའ་ཀློང་ཡངས། ཡོན་ཏན་རྒྱུད་བསྟན་པའི་སྲོག་ཤིང་། ཕྲིན་ལས་རྒྱུད་སྤུ་གྲི་རེག་གཅོད། གུ་རུ་དྲག་པོར་སྒྲུབ་པའི་རྒྱུད་དྲེགས་པའི་སྙིང་འབྱིན་དང་བདུན་བཀའ་སྩལ་པ་རྣམས། སྤྱན་རས་གཟིགས་ཀྱིས་བཀའ་ཡི་བསྡུ་བ་བྱས་ནས། མཁའ་འགྲོ་གསང་བ་ཡེ་ཤེས་ལ་གཏད་དེ། གསང་བ་ཡེ་ཤེས་མཁའ་འགྲོས་འཛམ་བུ་གླིང་དུ་གདན་དྲངས་ནས། རི་བོ་པོ་ཊ་ལ་ཡི་ལྷོ་ནུབ་བྲག་ཕུག་མཱ་ར་ཏི་ཀར་གཏེར་དུ་སྦས་སོ། །དེ་ནས་ཐོད་ཕྲེང་སྡེ་ལྔའི་སྤྲུལ་པ་དབུས་ཕྱོགས་རྣམ་སྣང་གངས་ཆེན་མཚོའི་ཕྱོགས་སུ་བཞུགས་པའི་འཛམ་གླིང་བྱེ་བ་ཕྲག་བརྒྱ་ན་པད་འབྱུང་བྱེ་བ་ཕྲག་བརྒྱ། ཤར་ཕྱོགས་རྡོ་རྗེ་གངས་ཆེན་མཚོ་ལ་སོགས་པ། ཕྱོགས་བཞི་ན་རིགས་བཞིའི་གངས་ཆེན་མཚོ་བཞིའི་
ཕྱོགས་ན་གནས་པའི་འཛམ་གླིང་བྱེ་བ་ཕྲག་བརྒྱ་ཚན་བཞིན་ཡང་པད་འབྱུང་བྱེ་བ་ཕྲག་བརྒྱ་ཚན་བཞིར་སྤྲུལ་ནས་འགྲོ་དོན་མཛད་དོ། །དེ་བཞིན་དུ་འགྲོ་བ་རིགས་དྲུག་དེ་སྙེད་དུའང་པད་འབྱུང་རེ་རེ་སྤྲུལ་ནས་འགྲོ་དོན་མཛད་དེ། དེ་ཐམས་ཅད་ཐུགས་རྒྱུད་ངོ་བོ་ནི་གཅིག་ཡིན་ནོ། །དེ་ལ་འཛམ་བུ་གླིང་འདིར་འགྲོ་དོན་མཛད་ཚུལ་ལའང་ཕྱི་ནང་གསང་བ་ཡང་གསང་བཞིར་ཡོད་དེ། ཕྱི་ལྟར་ལྷོ་ནུབ་རྔ་ཡབ་གླིང་གི་ཚུར་མཐའ། ནུབ་ཕྱོགས་ཨོ་རྒྱན་ཡུལ་གྱི་ཕར་མཐའི་བར་དེར་རྒྱ་མཚོས་ཆོད་ནས་ཡོད་པའི་གཙང་ལག་གཅིག །ཨོ་རྒྱན་ཡུལ་དྷ་ན་ཀོ་ཤའི་གླིང་དུ་བརྐྱངས་ནས་ཡོད་པ་དེར་པད་སྡོང་ལ་སྐུ་འཁྲུངས་ནས། ཨོ་རྒྱན་ཡུལ་གྱི་རྒྱལ་པོ་ཞིག་གི་བུ་ཚབ་མཛད་པ་ལ། བློན་པོའི་བུ་བཀུམས་པས་རྒྱལ་པོས་སྤྲུགས། །རབ་ཏུ་བྱུང་ནས་རིག་གནས་མཐའ་དག་ལ་མཁས་པའི་པཎྜི་ཏ་ཆེན་པོར་གྱུར་ཏེ། བསྟན་བཅོས་མང་དུ་བརྩམས་ནས། ནཱ་ལེནྡྲའི་པཎྜི་ཏ་བདུན་བརྒྱ་ལ་གཟིགས་སུ་ཕུལ་བས། ཐམས་ཅད་ཀྱིས་ཕྱག་འཚལ་ཞབས་སྤྱི་བོར་བླངས་ནས་ཁྱོད་ཀྱི་གསུངས་རྣམས་སྟོན་པའི་བཀའ་དང་ཁྱད་པར་མི་འདུག་པས། མདོ་རྒྱུད་ཀྱི་ལུང་འདྲེན་སོགས་བཤད་པའི་ཡན་ལག་གཞན་མི་
དགོས་པར་འདུག །ཅེས་ཞུས་པས་མཚན་པཎྜི་ཏ་ཡན་ལག་མེད་པའི་རྡོ་རྗེ་ཞེས་གྲགས། དེ་ནས་རྒྱ་གར་ནུབ་ཕྱོགས་ཀྱི་དུར་ཁྲོད་དུ་སྒྲུབ་པ་མཛད་པས་མཆོག་གི་དངོས་གྲུབ་ཐོབ་ནས་མཚན་པདྨ་བཛྲ་ཞེས་གྲགས་ཏེ། བདེ་མཆོག་ཕྲེང་བའི་རྒྱུད་ནས་ལུང་བསྟན་པའི་གྲུབ་ཆེན་བརྒྱད་ཀྱི་ཡ་གྱལ། ད་ལྟ་བླ་མེད་དཀྱིལ་འཁོར་ནུབ་ཕྱོགས་ཀྱི་དུར་ཁྲོད་དུ་བཞུགས་པའི་གྲུབ་ཆེན་དེ་ཡིན་ལ། རྒྱ་གར་དུ་དབྱར་ལོ་དགུན་ལོ་ཞེས་པ། དབྱར་དགུན་རེ་ལ་ལོ་རེར་བརྩི་སྲོལ་ཡོད་པའི་ལུགས་ཀྱིས་ལོ་སུམ་སྟོང་བཞེས་རྒྱབ་བོད་དུ་བྱོན་ནས། བསམ་ཡས་བཞེངས་ལྷ་འདྲེ་ཐམས་ཅད་དམ་ལ་བཏགས། དེ་ནས་བོད་ཀྱི་རྒྱལ་པོའི་དབང་ཞུས་ནས་དབང་ཡོན་དུ་རྒྱལ་པོའི་བཙུན་མོ་མཁར་ཆེན་བཟའ་མཚོ་རྒྱལ་འབུལ་དགོས་གསུངས་པས། བློན་པོ་རྣམས་མ་དད་ནས། པཎྜི་ཏ་འདི་རྒྱ་བལ་གྱི་མི་འདོད་པ་ཅན་ཞིག་འདུག །ཧ་ཅང་མཐུ་དང་རྫུ་འཕྲུལ་ཆེ་དྲག་རྒྱལ་སྲིད་འཕྲོག་དོགས་ཡོད་ཟེར་ནས། གསེར་མང་པོ་བསྡུས་ནས་ཕུལ་ཏེ་རྒྱ་གར་དུ་འབྱོན་པར་ཞུས་པས། བློན་པོ་རྣམས་ཀྱི་སྣང་ངོར་བོད་དུ་ལོ་བཅུ་གཉིས་ལས་མ་བཞུགས་པར་རྒྱ་གར་དུ་བྱོན་ཏེ། ཕྱིའི་རྣམ་ཐར་ལས་མ་དག་པ་རྣམས་ཀྱི་སྣང་ངོར་ཡིན་
ནོ། །ནང་ལྟར་ན་པད་སྡོང་ལ་སྐུ་འཁྲུངས། རྒྱ་དཀར་ནག་ལི་ཡུལ་སོགས་སུ་བསྟན་པ་དང་སེམས་ཅན་རྣམས་ཀྱི་དོན་རྒྱ་ཆེན་པོ་མཛད་དེ། མཆོག་གི་མཚན་བརྒྱད་དང་། སྤྲུལ་པའི་མཚན་བཞི་བཅུ་སོགས་སུ་གྲགས་ནས། ལོ་ཧྲིལ་པོ་སུམ་སྟོང་དྲུག་བརྒྱ་བཞེས་ནས་བོད་དུ་བྱོན། ལྷ་འདྲེ་ཐམས་ཅད་དམ་ལ་བཏགས་ནས་བསམ་ཡས་བཞེངས་པ་དང་། གཏེར་ཁ་བྱེ་བ་སྦས་ནས་བོད་དུ་ལོ་བརྒྱ་དང་བཅུ་གཅིག་བཞུགས་ཏེ་སྲིན་པོའི་ཁ་གནོན་དུ་བྱོན། དེ་ནི་ལས་ཅུང་ཟད་དག་པའི་སྣང་ངོར་ཡིན་ནོ། །གསང་བ་ལྟར་ན་པདྨ་འབྱུང་གནས་ཟེར་བ་དེ། གཞན་རང་རྒྱུད་པ་ཞིག་མ་ཡིན་ཏེ་སངས་རྒྱས་སྣང་བ་མཐའ་ཡས་ཞེས་ཀྱང་བྱ། འོད་དཔག་ཏུ་མེད་པ་ཞེས་ཀྱང་བྱ། ཚེ་དཔག་མེད་ཅེས་ཀྱང་བྱ་བ་དེ་ཉིད་དངོས་ཡིན་ལ་བདེ་བ་ཅན་གྱི་ཞིང་ཁམས་ནས་སྤྲུལ་པ་དེ་བྱ་བབ་པ་ལྟར། ཨོ་རྒྱན་ཡུལ་གྱི་པད་སྡོང་རྩེར་བྱོན་ནས། དེ་ཉིད་དུ་མཁའ་འགྲོ་མ་རྣམས་ལ་རྒྱུད་སྡེ་མཐའ་ཡས་པ་ཞིག་གསུངས་ནས། སླར་གནས་ཉི་ཤུ་རྩ་བཞི་སོགས་གནས་ཆེན་རྣམས་སུ། རང་བཞིན་གྱི་དཀྱིལ་འཁོར་དངོས་སུ་སྤྲུལ་ནས། བྱང་ཆུབ་སེམས་དཔའ་དང་དཔའ་བོ་ཌཱཀི་རྣམས་ལ་རྒྱུད་སྡེ་དཔག་ཏུ་མེད་པར་
གསུངས་ཤིང་གཏེར་དུ་སྦས་སོ། །རྒྱ་བོད་ཀྱི་ལྷ་འདྲེ་དྲེགས་པ་ཅན་ཐམས་ཅད་འདུལ་བའི་ཕྱིར་རྟ་མགྲིན་དམར་ནག་དང་། གུ་རུ་དྲག་པོ་རིགས་ལྔ་དང་། ཆེ་མཆོག་ཧེ་རུ་ཀ་དང་། རྡོ་རྗེ་གཞོན་ནུ་སོགས་ཁྲོ་བོའི་སྐུར་བཞེངས་ནས་ལྷ་འདྲེ་ཐམས་ཅད་དམ་ལ་བཏགས་ཤིང་སྲོག་སྙིང་ཕུལ། དེ་ནས་སྐུ་དངོས་སྲིན་པོའི་ཁ་གནོན་མཛད་ཀྱང་སྤྲུལ་པ་ནི་ཡར་མར་གྱི་ཚེས་བཅུ་དང་ནང་ནུབ་རྒྱུན་དུ་བོད་ལ་བྱོན་ཅིང་། དད་པ་ཅན་ལ་བྱིན་གྱིས་བརླབ་ཅིང་དངོས་གྲུབ་སྩོལ་བ་དང་། དུས་ཕྱིས་གསར་དུ་ལྷ་འདྲེ་སྐྱེས་པ་རྣམས་ཀྱང་དམ་ལ་འདོགས་པར་མཛད་དེ། གསང་བའི་རྣམ་ཐར་འདི་ལས་དག་པ་རྣམས་ཀྱི་སྣང་ངོར་ལགས་སོ། །ཡང་གསང་དེ་ཁོ་ན་ཉིད་ལྟར་ན། སྣང་སྲིད་འཁོར་འདས་ཐམས་ཅད་པདྨ་འབྱུང་གནས་ཀྱི་སྐུ་གསང་ཐུགས་ཀྱི་ཡེ་ནས་ཁྱབ་པར་བཞུགས་པས་སྐྱེ་འཆི་དང་། འདས་གྲོང་དང་། གཤེགས་བཞུད་མི་མངའ་སྟེ། དག་པ་ས་གསུམ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་སྣང་ངོར་ལགས་སོ། །ངེས་པ་ཁོ་ནར་མདོ་ཡི་སྟོན་པ་སྤྲུལ་སྐུ་ཤཱཀྱ་ཐུབ་པ་ཡིན་ཅིང་། སྔགས་ཀྱི་སྟོན་པ་སྤྲུལ་སྐུ་པདྨ་འབྱུང་གནས་ཡིན་པའི་ཕྱིར། ཉིད་ཀྱི་གསུང་རྣམས་རྒྱུད་ཚིག་རྡོ་རྗེའི་གསུང་ཡིན་
པས། རྒྱུད་གཞན་ལ་བརྟེན་ནས་མཛད་མི་དགོས་ནའང་། གདུལ་བྱ་ཐེ་ཚོམ་ཅན་རྣམས་དྲང་བའི་ཕྱིར་དུ། བྲག་ཕུག་མཱ་ར་ཏི་ཀར་འཆི་མེད་ཚེའི་རིག་འཛིན་སྒྲུབ་དུས། མཁའ་འགྲོ་མ་གསང་བ་ཡེ་ཤེས་ཀྱིས་གཏེར་སྒོ་ཕྱེས་ནས། སྔར་སངས་རྒྱས་སྣང་བ་མཐའ་ཡས་ཀྱིས་གསུངས་པའི་རྒྱུད་དེ་རྣམས་ཆོས་བདག་པོ་ལ་སྤྲད་པའི་ཚུལ་གྱིས་ཨོ་རྒྱན་ལ་གཏད་དེ། སངས་རྒྱས་ཚེ་དཔག་མེད་དངོས་སུ་བྱོན་ནས་དབང་བསྐུར་རོ། །དེ་ནས་རྒྱུད་དེ་དག་ལ་བརྟེན་ནས་གུ་རུ་ཉིད་ཀྱིས་སྒྲུབ་ཐབས་དཔག་ཏུ་མེད་པར་མཛད་དེ། རྒྱ་གར་དང་བལ་ཡུལ་བོད་ཁ་བ་ཅན་དུ་གཏེར་ཁ་བྱེ་བ་ས་ཡ་སྦས་ནས། མ་འོངས་ལས་ཅན་རྣམས་ཀྱིས་རིམ་པར་བཏོན་ནས་སེམས་ཅན་གྱི་དོན་རྒྱ་ཆེན་པོ་འབྱུང་བའི་སྨོན་ལམ་ལུང་བསྟན་དང་བཅས་པ་སོ་སོར་མཛད་དོ། །དེ་ལྟར་གུ་རུ་ཉིད་ཀྱི་སྒྲུབ་ཐབས་གྲངས་མེད་པ་དེ་ཐམས་ཅད་ཚུར་བསྡུ་ན་བཞིར་འདུས་ཏེ། ཕྱི་གསོལ་འདེབས་ལ་བརྟེན་ནས་བླ་མ་ལྟར་སྒྲུབ་པ་དང་། ནང་བསྐྱེད་རིམ་སྔགས་བཟླས་པ་ལ་བརྟེན་ནས་མ་ཧཱ་ཡོ་ག་ལྟར་སྒྲུབ་པ་དང་། གསང་བ་རྩ་རླུང་ཐིག་ལེ་ལ་བརྟེན་ནས་ཨ་ནུ་ཡོ་ག་ལྟར་སྒྲུབ་པ་དང་། ཡང་གསང་རྫོགས་པ་ཆེན་པོ་ལ་བརྟེན་
ནས་ཨ་ཏི་ཡོ་ག་ལྟར་སྒྲུབ་པ་དང་བཞིའོ། །དེ་ཡི་ནང་ནས་ཕྱི་གསོལ་བ་འདེབས་པ་ལ་བརྟེན་ནས་སྒྲུབ་པའི་ཐབས་ལེའུ་བདུན་པ་འདི་ཡང་གཏེར་ཁ་མང་ཞིག་ཏུ་སྦས་པ་ལས། པདྨ་གླིང་པས་གཅིག་བཏོན་པ་ལྷོ་མོན་ངོས་སུ་ཅུང་ཟད་དར་ཏེ་འགྲོ་དོན་ཆུང་། འདི་ནི་སྣ་ནམ་རྡོ་རྗེ་བདུད་འཇོམས་ཀྱི་སྐྱེ་བ་རིག་འཛིན་རྒོད་ཀྱི་ལྡེམ་འཕྲུ་ཅན་གྱི་ཆོས་སྐལ་ཡིན་ཏེ། ཟང་ཟང་ལྷ་བྲག་དང་། བྲག་རི་དུག་སྦྲུལ་སྤུངས་འདྲ་སོགས་ནས། བསེ་སྒྲོམ་སྨུག་པོ་དང་། དུང་སྒྲོམ་དཀར་པོ་དང་། གསེར་སྒྲོམ་སེར་པོ་དང་། མཆོང་སྒྲོམ་དམར་པོ་དང་། གཡུ་སྒྲོམ་ལྗང་གུ་སྟེ་གཏེར་གྱི་སྒྲོམ་ཆེན་པོ་ལྔ་བྱུང་བ་བཏོན་པའི་ནང་ནས། རྫོགས་ཆེན་དགོངས་པ་ཟང་ཐལ། བླ་མ་བཀའ་བརྒྱད། གུ་རུ་དྲག་མཐིང་། རྒྱལ་བརྔན་ཆེན་མོ་ལ་སོགས་པ་ཆོས་སྐོར་དཔག་ཏུ་མེད་པ། བྲམ་ཟེ་སྐྱེ་བདུན་གྱི་ཤ །འབྲས་མོ་ལྗོངས་སོགས་གནས་ཆེན་མང་པོའི་གནས་ཡིག །ཨོ་རྒྱན་ཡབ་ཡུམ་དབུ་ལོ་ན་བཟའ་སྐུ་འདྲ་སོགས་དཔག་ཏུ་མེད་པ་གཏེར་ནས་བཏོན། དེ་དུས་རི་ཁྲོད་བ་བཟང་པོ་གྲགས་པས་ལེའུ་བདུན་མ་གཏེར་ནས་ཐོན་པ་ཆོས་བདག་རིག་འཛིན་རྒོད་ལྡེམ་ཅན་ཡིན་པས་གཏེར་ཤོག་ཁོང་ལ་ཕུལ། རྒྱལ་པོ་ཁྲི་སྲོང་ལྡེའུ་
བཙན་གྱི་གདུང་རྒྱུད་གཙང་ལ་སྟོད་བྱང་པ་ཆོས་རྒྱལ་ཚང་གིས་སྦྱིན་བདག་བྱས་པས་འགྲོ་དོན་རྒྱས་ཏེ། དབུས་གཙང་ཁམས་ཐམས་ཅད་དུ་ཁོང་གི་གཏེར་ཆོས་རྒྱས་པར་གྱུར་ཏེ། མཐར་དཔོན་སློབ་དགུ་རྫུ་འཕྲུལ་གྱི་སྟོབས་ཀྱིས་འབྲས་མོ་ལྗོངས་སུ་བྱོན་ནས། གནས་ཀྱི་གདའ་ལུགས་ཀྱི་ཡི་གེ་བྱ་རྒོད་གྱི་སྐེ་ལ་བཏགས་ནས་ལན་གཉིས་བསྐུར། དཔོན་སློབ་རྣམས་གནས་དེ་ནས་མཁའ་སྤྱོད་དུ་གཤེགས་སོ། །དུས་ཚོད་ནི་རྗེ་རིན་པོ་ཆེའི་སྐུ་ཚེའི་སྟོད་ཙམ་ལ་ཡིན་ནོ། །དེ་ལྟར་ཁུངས་བཙུན་པའི་གསོལ་འདེབས་འདི་ལའང་། ཕྱི་བླ་མ་སྐུ་གསུམ་ཐོ་བརྩེགས་སུ་གསོལ་བ་འདེབས་པ། ནང་བླ་མ་ཞི་ཁྲོ་རབ་འབྱམས་སུ་གསོལ་བ་འདེབས་པ་དང་། གསང་བ་རིག་འཛིན་བརྒྱུད་པའི་བླ་མ་ལ་གསོལ་བ་འདེབས་པ། ཟངས་མདོག་དཔལ་གྱི་རི་ཡི་ཞིང་བཀོད་ལ་བརྟེན་ནས་གསོལ་བ་འདེབས་པ། རྣམ་ཐར་རྗེས་སུ་དྲན་པའི་སྒོ་ནས་གསོལ་བ་འདེབས་པ། ངོ་བོ་དྲན་པའི་སྒོ་ནས་གསོལ་བ་འདེབས་པ། ཐུགས་རྗེ་བྱིན་རླབས་དྲན་པའི་སྒོ་ནས་གསོལ་བ་འདེབས་པ་དང་བདུན་ནོ། །དང་པོ་སྐྱབས་འགྲོ་སེམས་བསྐྱེད་སྤྱི་ལྟར་བྱས་ཀྱང་ལེགས། བསྡུ་ན་སྐྱབས་འགྲོ་ནི་གསོལ་འདེབས་རང་གི་
འཐུས། སེམས་ཅན་ཐམས་ཅད་ཚེ་རབས་མང་པོའི་ཕ་མ་ཤ་སྟག་ཡིན་པས། དུས་རྟག་ཏུ་རིགས་དྲུག་གི་སྡུག་བསྔལ་ལས་ཐར་དུས་མེད་པའི་སྙིང་རེ་རྗེ། སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་ས་ལ་འགོད་པའི་ཕྱིར་དུ། བདག་གིས་དཀོན་མཆོག་ཀུན་འདུས་གུ་རུ་རིན་པོ་ཆེ་ལ་གསོལ་བ་འདེབས་པར་བྱའོ་སྙམ་པའི་སེམས་བསྐྱེད་ལ། ༈ རང་གི་སྤྱི་གཙུག་ཁྲུ་གང་ཙམ་གྱི་སྟེང་དུ་པདྨ་འདབ་དྲུག་དང་ཟླ་བའི་གདན་ལ། ཨོ་རྒྱན་སྤྲུལ་སྐུའི་ཆ་ལུགས་པད་ཞྭ་ཆོས་གོས་ཟབ་བེར་ཅན་གཞུང་ལྟར་བསྒོམ། འདབ་མ་དྲུག་ལ་གཡས་སུ་ཁྲི་སྲོང་ལྡེའུ་བཙན་དང་མུ་ཁྲི་བཙན་པོ་གཉིས་རྒྱལ་པོའི་ཆ་ལུགས་དར་དམར་གྱི་ལ་ཐོད་ཅན། གཡོན་དུ་ཡེ་ཤེས་མཚོ་རྒྱལ་མཁའ་འགྲོའི་ཆ་ལུགས་ཅན་དང་རྡོ་རྗེ་བདུད་འཇོམས། རྒྱབ་ཏུ་ནམ་མཁའི་སྙིང་པོ་པཎ་ཞྭ་ཆོས་གོས་ཅན། མདུན་དུ་རིག་འཛིན་རྒོད་ལྡེམ་ཅན་སྨུག་ནག་རྣལ་འབྱོར་པའི་ཆ་ལུགས་ཅན་སྤྱི་བོར་རྒོད་སྒྲོ་སྐྱེས་པ། ཨོ་རྒྱན་གྱི་སྤྱི་གཙུག་ཏུ་བླ་མ་ལོངས་སྐུ་ཚེ་དཔག་མེད་དམར་པོ། ཡུམ་ཚེ་ཡི་ལྷ་མོ་ཙཎྜ་ལཱི་དམར་མོ་ཚེ་མདའ་དང་ཚེ་བུམ་བསྣམས་ནས་ཡབ་ལ་འཁྱུད་པ། ཡབ་ཀྱི་དཔྲལ་བར་རྣམ་སྣང་ཚེ་དཔག་མེད་ཡབ་ཡུམ་དཀར་པོ།
མགྲིན་པར་སྣང་བ་མཐའ་ཡས་ཚེ་དཔག་མེད་ཡབ་ཡུམ་དམར་པོ། ཐུགས་ཀར་མི་བསྐྱོད་པ་ཚེ་དཔག་མེད་ཡབ་ཡུམ་མཐིང་ག །ལྟེ་བར་རིན་འབྱུང་ཚེ་དཔག་མེད་ཡབ་ཡུམ་སེར་པོ། གསང་གནས་སུ་དོན་གྲུབ་ཚེ་དཔག་མེད་ཡབ་ཡུམ་ལྗང་གུ། ཐམས་ཅད་མཉམ་བཞག་གི་སྟེང་དུ་ཚེ་བུམ་འཛིན་པ། སྐྱིལ་ཀྲུང་གིས་བཞུགས་ཤིང་དར་དང་རིན་པོ་ཆེ་ཡིས་བརྒྱན་པ། ལོངས་སྐུའི་སྤྱི་གཙུག་ཏུ་བླ་མ་ཆོས་སྐུ་རྡོ་རྗེ་འཆང་མཐིང་ནག་རྡོ་རྗེ་དང་དྲིལ་བུ་འཛིན་པ་ཡུམ་མཚོ་རྒྱལ་དཀར་མོ་གཅེར་བུ་གྲི་ཐོད་ཅན་ཡབ་ལ་འཁྱུད་པ། དེ་གསུམ་ཀའི་དཔྲལ་བར་ཨོཾ་དཀར་པོ། མགྲིན་པར་ཨཱཿཿདམར་པོ། ཐུགས་ཀར་ཧཱུྃ་མཐིང་ག་དེ་ལས་འོད་ཟེར་འཕྲོས་པས་སངས་རྒྱས་ཀྱི་ཞིང་ཁམས་ཐམས་ཅད་ནས། ཆོས་སྐུ་ལོངས་སྐུ་སྤྲུལ་སྐུའི་སངས་རྒྱས་བྱང་སེམས་ཐམས་ཅད་སྤྱན་དྲངས་ནས་དབྱེར་མེད་དུ་ཐིམ་པས་དཀོན་མཆོག་ཀུན་འདུས་ཀྱི་ངོ་བོར་བསྒོམས་ལ། ཨེ་མ་ཧོ༔ སྤྲོས་བྲལ་ཆོས་ཀྱི་དབྱིངས་ཀྱི་ཞིང་ཁམས་སུ༔ ཞེས་པ་ནས། པདྨ་སིདྡྷི་ཧཱུྃ༔ གི་བར་དུ་གསོལ་བ་བཏབ་པས། བླ་མ་སྐུ་གསུམ་གྱི་དཔྲལ་བའི་ཨོཾ་ལས་འོད་ཟེར་དཀར་པོ་འཕྲོས་ནས། རང་གི་དཔྲལ་བར་ཐིམ་པས་ལུས་
ཀྱི་སྒྲིབ་པ་དག་ནས། སྐུའི་བྱིན་རླབས་དང་དངོས་གྲུབ་ཐོབ། མགྲིན་པའི་ཨཱཿཋལས་འོད་ཟེར་དམར་པོ་འཕྲོས་ནས་རང་གི་མགྲིན་པར་ཐིམ་པས་ངག་གི་སྒྲིབ་པ་དག་ནས་གསུང་གི་བྱིན་རླབས་དང་དངོས་གྲུབ་ཐོབ། ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས་ནས་རང་གི་སྙིང་གར་ཐིམ་པས་ཡིད་ཀྱི་སྒྲིབ་པ་དག་ནས་ཐུགས་ཀྱི་བྱིན་རླབས་དང་དངོས་གྲུབ་ཐོབ་པར་བསྒོམ་མོ། །དེ་ནས་ཆོས་སྐུ་ལོངས་སྐུ་ལ་ཐིམ་ལོངས་སྐུ་སྤྲུལ་སྐུ་ལ་ཐིམ། འཁོར་རྣམས་གཙོ་བོ་ལ་ཐིམ། གཙོ་བོ་འོད་དུ་ལྟེམ་གྱིས་ཞུ་ནས་རང་ལ་ཐིམ་པས། ཨོ་རྒྱན་རིན་པོ་ཆེའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དམ་ཆུ་ལ་ཆུ་ཐིམ་པ་ལྟར་གྱུར་པས་རང་གི་ལུས་ངག་ཡིད་གསུམ་གྱི་སྒྲིབ་པ་དག་ནས་སྐུ་གསུམ་ཡོངས་རྫོགས་ཀྱི་བྱིན་རླབས་དང་དངོས་གྲུབ་ཐོབ་པར་བསྒོམ་མོ། །དམིགས་པ་དེ་རྣམས་སྒོམ་ཚེ་བཛྲ་གུ་རུ་འདོན་པར་བྱའོ། །དེ་ནི་སྐུ་གསུམ་ཐོ་བརྩེགས་སུ་བསྒོམས་ནས་བྱིན་རླབས་ཞུ་བ་སྟེ། ལེའུ་དང་པོའི་བསྒོམ་བྱ་ཟབ་བོ། །ཨྠྀི།། །།དེ་ནས་རང་གི་སྤྱི་བོར་པདྨ་དང་ཟླ་བའི་གདན་རྒྱ་ཁྱོན་བསམ་ལས་འདས་པ། དེའི་སྟེང་དུ་ཨོ་རྒྱན་རིན་པོ་ཆེ་པད་ཞྭ་ཆོས་གོས་ཅན་གཞུང་ལྟར་ལ། སྐུ་
ཤིན་ཏུ་ཆེ་བ་དབུ་སྲིད་པའི་རྩེ་ན་སླེབ་པ། སྐུ་སྟོད་ཀྱིས་གཟུགས་ཁམས་ཁྱབ་པ། སྐུ་སྨད་ཀྱིས་འདོད་ཁམས་ཁྱབ་པ། སྐུའི་ནང་སྟོང་ཞིང་གསལ་བ། སྐུ་ཡི་འོད་ཀྱིས་སངས་རྒྱས་ཀྱི་ཞིང་ཐམས་ཅད་ཁྱབ་པ། སངས་རྒྱས་ཀྱི་ཞིང་ཁམས་ཐམས་ཅད་སྐུ་ལུས་ཀྱི་བཀོད་པ་ལ་རྫོགས་པ། སྐུའི་ནང་སྟོང་སང་ངེ་བ་གསལ་བ་ལ་ལུས་དཀྱིལ་བཀོད་པའི་ཚུལ་དུ། དབུ་ཀླད་པ་དུང་ཁང་གི་ནང་དུ་ཆེ་མཆོག་ཧེ་རུ་ཀ་ལ་ཁྲག་འཐུང་འབར་བ་ལྔ་བཅུ་རྩ་བརྒྱད་ཀྱི་ལྷ་ཚོགས་ཀྱིས་བསྐོར་བ། དཔྲལ་བ་མཛོད་སྤུའི་ནང་དུ་འཇམ་དཔལ་གཤིན་རྗེའི་གཤེད་ལ་འཇམ་དཔལ་སྐུ་ཡི་ལྷ་ཚོགས་ཀྱིས་བསྐོར་བ། མགྲིན་པ་ལོངས་སྤྱོད་འཁོར་ལོར་རིག་འཛིན་དཔའ་བོ་ཐོད་པ་རྩལ་ལ་དག་པ་རིག་འཛིན་གྱི་ལྷ་ཚོགས་ཀྱིས་བསྐོར་བ། ལྗགས་པདྨ་ལེ་བརྒན་གྱི་ནང་དུ་རྟ་མགྲིན་པདྨ་དབང་ཆེན་ལ་པདྨ་གསུང་གི་ལྷ་ཚོགས་ཀྱིས་བསྐོར་བ། ཐུགས་ཀའི་སྟོད་ཙིཏྟ་རིན་པོ་ཆེ་མེ་ཤེལ་གྱི་གུར་ཕུབ་པ་ལྟ་བུའི་ནང་དུ། ཆོས་སྐུ་ཀུན་བློ་བཟང་ཡབ་ཡུམ། ལོངས་སྐུ་རིགས་ལྔ་ཡབ་ཡུམ། སེམས་དཔའ་སེམས་མ་བཅུ་དྲུག་ཤཱཀྱ་ཐུབ་པ་ལ་སོགས་སྤྲུལ་སྐུ་ཐུབ་དྲུག །སྒོ་བ་ཁྲོ་ཆེན་ཡབ་ཡུམ་བཞི་སྟེ་ཞི་བ་བཞི་བཅུ་རྩ་གཉིས་
སྐུ་ཚོམ་བུ་ཧྲུག་གེ་བཞུགས་པ། ཐུགས་ཀའི་ཆ་སྨད་དུ་ཐུགས་མཆོག་བཛྲ་ཧེ་རུ་ཀ་ལ་ཡང་དག་ཐུགས་ཀྱི་ལྷ་ཚོགས་ཀྱིས་བསྐོར་ནས་བཞུགས་པ། ལྟེ་བར་བླ་མེད་ཧེ་རུ་ཀ་ལ་མ་མོ་རྒོད་གཏོང་གི་ལྷ་ཚོགས་ཀྱིས་བསྐོར་ནས་བཞུགས་པ། ལྟེ་འོག་ཆོས་འབྱུང་དམར་པོ་ཡངས་ཤིང་རྒྱ་ཆེ་བའི་དབུས་སུ་ཡུམ་མཆོག་རྡོ་རྗེ་ཕག་མོ་ལ་མཁའ་འགྲོ་བྱེ་བ་འབུམ་གྱིས་བསྐོར་ནས་བཞུགས་པ། གསང་གནས་བདེ་བསྐྱོད་འཁོར་ལོ་ན་བཅོམ་ལྡན་རྡོ་རྗེ་གཞོན་ནུ་ལ་ཕྲིན་ལས་ཕུར་པའི་ལྷ་ཚོགས་ཀྱིས་བསྐོར་ནས་བཞུགས་པ་སྟེ། ཁྲོ་བོ་དེ་དག་ཕལ་ཆེར་ཞལ་གསུམ་ཕྱག་དྲུག་ཡིན་ཀྱང་ཞལ་གཅིག་ཕྱག་གཉིས་པ་ཡང་བསྒོམ་རུང་གསུངས། འཁོར་རྣམས་མོས་པ་ཙམ་གྱིས་ཆོག །གཞན་ཡང་མཛོད་སྤུའི་རྩེར་འཇམ་དབྱངས། ལྗགས་རྩེར་སྤྱན་རས་གཟིགས༔ ཐུགས་ཀའི་ཐད་ཀྱི་བྲང་ལ་ཕྱག་ན་རྡོ་རྗེ། སྐུ་ཡི་རྩ་གནས་ཉི་ཤུ་རྩ་བཞི་ན་ཡུལ་ཉི་ཤུ་རྩ་བཞིའི་དཔའ་བོ་དང་ཊཱ་ཀི། བ་སྤུ་བྱེ་བ་ས་ཡ་ཐམས་ཅད་དུ་དཔའ་བོ་མཁའ་འགྲོ་ཏིལ་གྱི་གོང་བུ་ཁ་ཕྱེས་པ་ལྟ་བུ། ཕྱག་གཡོན་བྷནྡྷའི་སྟེང་དུ་ཚེ་བུམ་ནང་དུ་སངས་རྒྱས་ཚེ་དཔག་མེད་ལ་འཆི་མེད་ཚེའི་ལྷ་ཚོགས་ཀྱིས་བསྐོར་བར་བསྒོམ། ཡེ་ཤེས་པ་སྤྱན་འདྲེན་མི་
དགོས་ཏེ། སྐུ་ཡི་བཀོད་པ་དེ་དང་སངས་རྒྱས་ཀྱི་ཞིང་ཁམས་ཐམས་ཅད་ན་བཞུགས་པའི་ཡེ་ཤེས་པ་དབྱེར་མེད་དུ་བསྒོམས་ལ། ཨེ་མ་ཧོ༔ སངས་རྒྱས་བསྟན་པ་རྨད་བྱུང་བསམ་ཡས་ལ༔ ཞེས་པ་ནས། ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ ཞེས་པའི་བར་ཚང་བར་འདོན། དེ་ལྟར་གསོལ་བ་བཏབ་པས་སྐུའི་དཀྱིལ་འཁོར་གྱི་ལྷ་ཚོགས་ཐམས་ཅད་ཀྱི་སྐུ་ལས་ཟག་མེད་ཡེ་ཤེས་ཀྱི་བདུད་རྩི་ངང་ཁྲ་ལ་ལ་བབས་པས་སྐུ་ལུས་ལྟེམ་གྱིས་གང་། མ་ཤོང་བའི་ཚུལ་དུ་གསང་བ་རྡོ་རྗེའི་སྦུབས་ནས་ངང་རྒྱང་རྒྱང་བབ་སྟེ། །རང་གི་སྤྱི་གཙུག་ཚངས་པའི་བུ་ག་ནས་ཞུགས། སྤྱི་བོ་བདེ་ཆེན་གྱི་འཁོར་ལོ་གང་། ལུས་ཀྱི་སྒྲིབ་པ་དག་སྐུ་བུམ་པའི་དབང་ཐོབ། ལམ་བསྐྱེད་རིམ་བསྒོམ་པ་ལ་དབང་། ལུས་སྤྲུལ་སྐུ་འགྲུབ་པའི་སྐལ་པ་དང་ལྡན་པར་བྱས། བདུད་རྩི་མར་བབ་མགྲིན་པ་ལོངས་སྤྱོད་ཀྱི་འཁོར་ལོ་གང་། ངག་གི་སྒྲིབ་པ་དག །གསུང་གསང་བའི་དབང་ཐོབ། ལམ་རྩ་རླུང་བསྒོམ་པར་དབང་། ངག་ལོངས་སྐུ་གསུང་དབྱངས་ཡན་ལག་དྲུག་ཅུ་དང་ལྡན་པར་འགྲུབ་པའི་སྐལ་ལྡན་དུ་གྱུར། བདུད་རྩི་མར་བབ་སྙིང་ག་ཆོས་ཀྱི་འཁོར་ལོ་གང་། སེམས་ཀྱི་སྒྲིབ་པ་དག་
ཐུགས་ཤེས་རབ་ཡེ་ཤེས་ཀྱི་དབང་ཐོབ། ལམ་རྩ་རླུང་ཐིག་ལེ་རྫོགས་པའི་རིམ་པ་བསྒོམ་པར་དབང་། སེམས་ཆོས་སྐུ་འགྲུབ་པའི་སྐལ་བ་དང་ལྡན་པར་བྱས། བདུད་རྩི་མར་བབས། ལྟེ་བ་སྤྲུལ་པའི་འཁོར་ལོ་གང་། ལུས་ངག་ཡིད་གསུམ་ཆ་སྙོམས་ཀྱི་སྒྲིབ་པ་དག །དབང་བཞི་པ་དོན་དམ་པ་ཚིག་དབང་རིན་པོ་ཆེ་ཐོབ། ལམ་འོད་གསལ་ཕྱག་རྒྱ་ཆེན་པོ་བསྒོམ་པར་དབང་། ངོ་བོ་ཉིད་ཀྱི་སྐུ་འགྲུབ་པའི་སྐལ་བ་དང་ལྡན་པར་བྱས། བདུད་རྩི་མར་བབས། གསང་གནས་བདེ་སྐྱོང་གི་འཁོར་ལོ་གང་། བག་ཆགས་དང་ཤེས་བྱའི་སྒྲིབ་པ་ཕྲ་མོ་ཡན་ཆད་དག །རིག་པ་རྩལ་གྱི་དབང་ཐོབ། ལམ་རྫོགས་པ་ཆེན་པོ་བསྒོམ་པར་དབང་། ཀུན་བཟང་བདེ་བ་ཆེན་པོའི་སྐུ་འགྲུབ་པའི་སྐལ་བ་དང་ལྡན་པར་བྱས། བདུད་རྩི་རྐང་མཐིལ་ནས་སྤྱི་གཙུག་མན་ཆད་ལྟེམ་གྱིས་གང་ནས། ནད་གདོན་སྡིག་སྒྲིབ་ཐམས་ཅད་བ་སྤུའི་སྒོ་དང་འོག་སྒོ་རྐང་མཐིལ་གཉིས་ནས་ནག་ཉིལ་གྱིས་ཕྱིར་ཐོན། བདག་གི་ལུས་དྲི་མེད་ཤེལ་སྒོང་ལྟར་གྱུར། དེ་ནས་སྤྱི་བོའི་ཨོ་རྒྱན་རིན་པོ་ཆེ་སྐུ་ལུས་ལ་བཀོད་པའི་ལྷ་ཚོགས་དང་བཅས་པ་ཐམས་ཅད་འོད་དུ་ལྟེམ་མེ་ཞུ་ནས། བདག་ལ་སིབས་ཀྱིས་ཐིམ་པས་བདག་གི་ལུས་གདོས་
བཅས་ཤ་ཁྲག་གི་ཕུང་པོ་འདི་སྐད་ཅིག་ལ་བདེ་ཆེན་གྱི་ལུས་སུ་གནས་གྱུར་ནས། རང་ཉིད་རྡོ་རྗེ་སེམས་དཔའ་དཀར་པོ་རྡོ་རྗེ་ཐུགས་ཀར་འཛིན་ཅིང་དྲིལ་བུ་དཀུ་ལ་བརྟེན་པ། དར་དང་རིན་པོ་ཆེས་བརྒྱན་ཅིང་པད་ཟླའི་གདན་ལ་ཕྱེད་སྐྱིལ་དུ་བཞུགས་པར་གྱུར་པའི་ཐུགས་ཀར་ཞི་བ་བཞི་བཅུ་རྩ་གཉིས། མགྲིན་པར་དག་པ་རིག་འཛིན་གྱི་ལྷ་ཚོགས། ཀླད་པ་དུང་ཁང་གི་ནང་དུ་འབར་བ་ཁྲག་འཐུང་ལྔ་བཅུ་རྩ་བརྒྱད་ཐམས་ཅད་མེ་ལོང་ནང་གི་གཟུགས་བརྙན་ལྟར་བཀྲ་ལམ་མེར་གསལ་བར་བསྒོམ། དེ་རྣམས་སྐུ་མདོག་ཕྱག་མཚན་སོ་སོར་མ་ཤེས་ནའང་ཡོད་སྙམ་པའི་མོས་པ་ཙམ་གྱིས་ཆོག །དེ་ནི་ནང་ལྟར་བླ་མ་ཞི་ཁྲོ་རབ་འབྱམས་ལུས་དཀྱིལ་ལ་གསོལ་བ་བཏབ་ནས་དབང་བཞི་ལེན་པའི་གདམས་ངག་སྟེ་ལེའུ་གཉིས་པའི་དམིགས་རིམས་ཟབ། །ཨྠྀི། །།དེ་ནས་རང་ཉིད་ཁ་ལྷོ་ནུབ་ཏུ་རྒྱུས་ལ་འཛམ་བུ་གླིང་འདི་ཐམས་ཅད་པདྨ་དང་ཟླ་བའི་གདན་ཆེན་པོ་གཅིག་ཏུ་གྱུར་པའི་སྟེང་དུ་རང་ཉིད་བཅོམ་ལྡན་གསང་ཆེན་རིགས་གཅིག་རྡོ་རྗེ་སེམས་དཔའི་སྐུ་རི་རབ་ཙམ་པ། སྐྱིལ་ཀྲུང་གིས་འཛམ་གླིང་ཁེབས་པ། སྐུ་མདོག་དཀར་པོ་ཕྱག་གཡས་རྡོ་རྗེ་ཐུགས་ཀར་འཛིན་ཅིང་
གཡོན་དྲིལ་བུ་དཀུར་བརྟེན་པ། དར་དང་རིན་པོ་ཆེ་སྣ་ཚོགས་ཀྱིས་བརྒྱན་ཅིང་ཐུགས་ཀར་ཟླ་བའི་གདན་ལ་རང་སེམས་ཡེ་ཤེས་སེམས་དཔའ་ཧཱུྃ་དཀར་པོས་མཚན་པ། ཡེ་ཤེས་དམ་ཚིག་དབྱེར་མེད་པའི་ངོ་བོར་བསྒོམས་ལ། མདུན་ཕ་ཀི་ན་ལྷོ་ནུབ་རྔ་ཡབ་གླིང་དེའི་ཕྱི་རིམ་མེ་རིའི་ཕྲེང་བ་དང་རྡོ་རྗེའི་ར་བ། ནང་དུ་ཕྱོགས་མཚམས་བརྒྱད་ལ་སྲིན་པོའི་གྲོང་ཁྱེར་ཆེན་པོ་བརྒྱད་ཡོད་པ་ནི་དུར་ཁྲོད་ཆེན་པོ་བརྒྱད། དེའི་དབུས་མར་མཚོ་དབུས་སུ་རི་དམར་པོ་ཟུར་གསུམ་གདན་ཐབས་ཀྱི་སྟེང་དུ་ཕོ་བྲང་པདྨ་འོད་ཀྱི་གཞལ་ཡས་ཁང་། གྲུ་བཞི་སྒོ་བཞི་རྒྱན་རྟ་བབས་ལ་སོགས་པ་དཀྱིལ་འཁོར་གྱི་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་རིན་པོ་ཆེའི་ཁྲི་གདན་ཐབས་ཟུར་བརྒྱད་པའི་སྟེང་པདྨ་དང་ཉི་མའི་གདན་ལ། ཨོ་རྒྱན་རིན་པོ་ཆེ་སྤྲུལ་སྐུའི་ཆ་ལུགས་ཆོས་གོས་པད་ཞྭ་ཅན་ངོ་བོ་ནི་ཆེ་མཆོག་ཧེ་རུ་ཀ་དང་དབྱེར་མེད་པ། སྐུ་གཟི་བརྗིད་ཉི་མ་སྟོང་བས་ལྷག་པ། དེའི་མདུན་དེ་ཤར་ཡིན་པ་ཐུགས་མཆོག་བཛྲ་ཧེ་རུ་ཀ་ལ་ཡང་དག་ཐུགས་ཀྱི་ལྷ་ཚོགས་ཀྱིས་བསྐོར་བ། སྐུའི་གཡས་དེ་ལྷོ་ཡིན་པས་འཇམ་དཔལ་གཤིན་རྗེའི་གཤེད་ལ་འཇམ་དཔལ་སྐུའི་ལྷ་ཚོགས་ཀྱིས་བསྐོར་བ། སྐུ་རྒྱབ་ནུབ་ངོས་དེར་རྟ་
མགྲིན་པདྨ་དབང་ཆེན་ལ་པདྨ་གསུང་གི་ལྷ་ཚོགས་ཀྱིས་བསྐོར་བ། སྐུ་གཡོན་བྱང་དེར་དཔལ་ཆེན་རྡོ་རྗེ་གཞོན་ནུ་ལ་ཕྲིན་ལས་ཕུར་པའི་ལྷ་ཚོགས་ཀྱིས་བསྐོར་བ། མདུན་གཡས་ཟུར་ཤར་ལྷོ་དེར་བླ་མེད་ཧེ་རུ་ཀ་ལ་མ་མོ་རྦོད་གཏོང་གི་ལྷ་ཚོགས་ཀྱིས་བསྐོར་བ། རྒྱབ་གཡས་ཟུར་ལྷོ་ནུབ་དེར་དཔའ་བོ་རིག་འཛིན་ཐོད་པ་རྩལ་ལ་བླ་མ་རིག་འཛིན་གྱི་ལྷ་ཚོགས་ཀྱིས་བསྐོར་བ། རྒྱབ་གཡོན་ཟུར་ནུབ་བྱང་དེར་དྲེགས་པ་ཀུན་འདུལ་ལ་འཇིག་རྟེན་མཆོད་བསྟོད་ཀྱི་ལྷ་ཚོགས་ཀྱིས་བསྐོར་བ། མདུན་གཡོན་བྱང་ཤར་དུ་སྟོབས་ལྡན་ནག་པོ་ལ་དམོད་པ་དྲགས་སྔགས་ཀྱི་ལྷ་ཚོགས་ཀྱིས་བསྐོར་བ། དེའི་རྒྱབ་གིང་ཆེན་བརྒྱད་མཁའ་འགྲོ་ཤུགས་འགྲོ་བརྒྱད་དང་བཅུ་དྲུག་ཐམས་ཅད་གྲི་གུག་ཐོད་ཁྲག་ཅན། གཞན་ཡང་དཀྱིལ་འཁོར་ཕྱི་ནང་ཐམས་ཅད་དུ་མཁའ་འགྲོ་ཆོས་སྐྱོང་ཐམས་ཅད་སྤྲིན་ལྟར་འཁྲིགས་པར་བསྒོམ་སྟེ། འཁོར་ལྷ་དེ་དག་སྐུ་མདོག་ཕྱག་མཚན་མ་གསལ་ཀྱང་བཟོད། བཞུགས་ཡོད་སྙམ་པའི་མོས་པ་ཙམ་གྱིས་ཆོག་གོ །དེ་ལྟར་བདག་རྡོ་རྗེ་སེམས་དཔའ་འཛམ་གླིང་ཁྱབ་པ་དེ་བདག་བསྐྱེད། མདུན་དུ་གུ་རུ་རིན་པོ་ཆེ་ལ་བཀའ་བརྒྱད་ཀྱི་ལྷ་ཚོགས་བདུན་བརྒྱ་ཉི་ཤུའི་བསྐོར་བ་
དེ་ལ་མདུན་བསྐྱེད་དུ་བྱས་ལ་གསོལ་བ་འདེབས་ཏེ། ཨེ་མ་ཧོ༔ འདི་ནས་ཉི་མ་ལྷོ་ནུབ་མཚམས་ཤེད་ན༔ ཞེས་པ་ནས། འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་དུ་གསོལ༔ ཞེས་པའི་བར་དུ་གསོལ་བ་བཏབ་པས། འཁོར་ཐམས་ཅད་ཀྱི་བྱིན་རླབས་ཐུགས་རྗེ་དངོས་གྲུབ་མཐུ་ནུས་ཐམས་ཅད་འོད་ཁ་དོག་ལྔའི་རྣམ་པར་གཙོ་བོ་ལ་ཐིམ། གཙོ་བོའི་དཔྲལ་བ་ནས་ཐིག་ལེ་དཀར་པོ་ཨོཾ་གྱིས་མཚན་པ་ཞིག་སྐར་མདའ་འཕང་བ་ལྟར་དཀར་ཤར་གྱིས་བྱུང་ནས་རང་གི་དཔྲལ་བར་ཐིམ་པས། འགྱུར་བ་མེད་པའི་སྐུའི་དངོས་གྲུབ་ཐོབ་ནས་འཆི་བ་མེད་པ་རྡོ་རྗེའི་སྐུར་གྱུར། གུ་རུའི་མགྲིན་པ་ནས་ཐིག་ལེ་དམར་པོ་ཨཱཿཡིག་གིས་མཚན་པ་ཞིག་དམར་ཤར་གྱིས་བྱུང་ནས་རང་གི་མགྲིན་པར་ཐིམ་པས། འགག་མེད་གསུང་གི་དངོས་གྲུབ་ཐོབ་ནས་ཆོས་ཐམས་ཅད་བསླབ་མ་དགོས་པར་རང་རྡོལ་དུ་ཤེས་ཏེ་འཆད་རྩོད་རྩོམ་གསུམ་ལ་ཐོགས་པ་མེད་པར་གྱུར། གུ་རུའི་ཐུགས་ཀ་ནས་ཐིག་ལེ་སྔོན་པོ་ཧཱུྃ་ཡིག་གིས་མཚན་པ་ཞིག་སྔོ་ཤར་གྱིས་འཕྲོས་ནས་རང་གི་སྙིང་གར་ཐིམ་པས་འཁྲུལ་མེད་ཐུགས་ཀྱི་དངོས་གྲུབ་ཐོབ་ནས། སྒོམ་སྒྲུབ་ལ་མ་ལྟོས་པར་སྟོང་ཉིད་འོད་གསལ་གྱི་དོན་མངོན་སུམ་རྗེན་པར་རྟོགས། གུ་
རུའི་ལྟེ་བ་ནས་ཐིག་ལེ་སེར་པོ་གསེར་བཙོ་མའི་མདོག་ལ་སྭཡིག་གིས་མཚན་པ་ཞིག་སེར་ཤར་གྱིས་འཕྲོས། རང་གི་ལྟེ་བར་ཐིམ་པས་ཡོན་ཏན་རེ་སྐོང་གི་དངོས་གྲུབ་།ཐོབ་ནས་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་ཐམས་ཅད་རང་བྱུང་ལྷུན་གྲུབ་ཏུ་ཐོབ། གུ་རུའི་གསང་གནས་ནས་ཐིག་ལེ་ལྗང་གུ་ཧཡིག་གིས་མཚན་པ་གཅིག་ལྗང་ཤར་གྱིས་འཕྲོས་ནས། རང་གི་གསང་གནས་སུ་ཐིམ་པས་ཕྲིན་ལས་འགྲོ་འདུལ་གྱི་དངོས་གྲུབ་ཐོབ་ནས། ལས་དང་བྱ་བ་གང་བསམ་ཐམས་ཅད་ཐོགས་པ་མེད་པར་འགྲུབ་པ་དངོས་གྲུབ་ཐོབ་པར་བསྒོམ་མོ། །དེ་ནས་བདག་རྡོ་རྗེ་སེམས་དཔའ་འོད་དུ་ཞུ་ནས་ཐུགས་ཀའི་ཧཱུྃ་ལ་ཐིམ། ཧཱུྃ་ཡང་གྱེན་རྫོགས་སུ་ཡལ་ནས་སྟོང་པ་ཉིད་དུ་གྱུར་པར་བསྒོམས་ལ། སེམས་བཅོས་སླད་མེད་པར་ལྷུག་པར་བཞག་ལ་དེའི་ངོ་བོ་ལ་མ་ཡེངས་ཙམ་དུ་བལྟའོ། །དེ་ནི་རྔ་ཡབ་གླིང་གི་བཀོད་པ་ལ་བརྟེན་ནས་བླ་མ་སྒྲུབ་ཆེན་བཀའ་བརྒྱད་ཀྱི་ལྷ་ཚོགས་ལ་གསོལ་བ་བཏབ་ནས། དངོས་གྲུབ་ལེན་པ་སྟེ། ལེའུ་གསུམ་པའི་དམིགས་རིམ་ཟབ། །ཨྠྀི།། །།དེ་ནས་རང་གི་སྤྱི་བོའི་གཙུག་ཏུ་མེ་ཏོག་པདྨའི་སྡོང་པོ་གཅིག་ལ་མེ་ཏོག་དཀར་དམར་མཐིང་
གསུམ་བརྩེགས་མར་ཡོད་པ་རེ་རེ་ལ་འདབ་མ་སྟོང་ཕྲག་དུ་མ་ཡོད་པའི་འོག་མ་ལ་པདྨ་དཀར་པོའི་ལྟེ་བར་ཨོ་རྒྱན་རིན་པོ་ཆེ་སྤྲུལ་སྐུའི་ཆ་ལུགས་ཆོས་གོས་པད་ཞྭ་ཅན། འདབ་མ་རྣམས་ལ་རྗེ་འབངས་ཉི་ཤུ་རྩ་ལྔ་ལ་སོགས་བོད་ཀྱི་རིག་འཛིན་གང་ཟག་སྙན་བརྒྱུད་བླ་མ་ཐམས་ཅད་ཀྱིས་བསྐོར་ནས་བཞུགས་པ། ཨོ་རྒྱན་གྱི་དབུ་གཙུག་ཏུ་པདྨ་དམར་པོའི་ལྟེ་བར་རིག་འཛིན་དགའ་རབ་རྡོ་རྗེ་དཀར་པོ་ཆོས་གོས་གསོལ་ཞིང་སྐྱིལ་ཀྲུང་ས་གནོན་མཉམ་བཞག་ཅན། དབུ་གཙུག་ཏོར་ཞབས་འཁོར་ལོས་བརྒྱན་པའི་པད་འདབ་རྣམས་ལ། རིག་འཛིན་བརྒྱད་ལ་སོགས་རྒྱ་གར་གྱི་གྲུབ་ཐོབ་རིག་འཛིན་བརྡའ་བརྒྱུད་བླ་མ་རྣམས་ཀྱིས་བསྐོར་ནས་བཞུགས་པ། དེའི་དབུ་གཙུག་པདྨ་སྔོན་པོའི་ལྟེ་བར་ཆོས་སྐུ་ཀུན་ཏུ་བཟང་པོ་མཐིང་ཀ་མཉམ་བཞག་གི་ཕྱག་རྒྱས་ཡུམ་ཀུན་ཏུ་བཟང་མོ་དཀར་མོ་ལ་འཁྱུད་པ། འདབ་མ་རྣམས་ལ་རིགས་ལྔའི་སངས་རྒྱས་ཤཱཀྱ་ཐུབ་པ་ལ་སོགས་པ་སངས་རྒྱས་བྱང་སེམས་རྒྱལ་བ་དགོངས་བརྒྱུད་ཐམས་ཅད་ཀྱིས་བསྐོར་ནས་བཞུགས་པར་བསྒོམ། དེ་ལྟར་གཙོ་བོ་གསུམ་གྱི་གནས་གསུམ་གྱི་ཡི་གེ་གསུམ་ལས་འོད་ཟེར་དཔག་ཏུ་མེད་པ་འཕྲོས་པས་མཁའ་སྤྱོད་དག་པའི་གནས་ནས་རིག་འཛིན་གྱི་
ལྷ་ཚོགས་ཐམས་ཅད་ཁ་བ་བུ་ཡུག་འཚུབ་པ་ལྟར་བྱོན་ནས་དབྱེར་མེད་དུ་ཐིམ་པར་བསྒོམ། ཨེ་མ་ཧོ༔ སྤྲོས་བྲལ་བདེ་ཆེན་རྒྱལ་བ་ཀུན་ཏུ་བཟང་༔ ཞེས་པ་ནས། གང་ཟག་སྙན་བརྒྱུད་བླ་མར་གསོལ་བ་འདེབས༔ ཞེས་པའི་བར་གསོལ་བ་བཏབ་པས་རིག་འཛིན་གྱི་ལྷ་ཚོགས་རྣམས་ལས་འོད་ཟེར་དཔག་ཏུ་མེད་པ་འཕྲོས་པས། སྣོད་བཅུད་འཁོར་འདས་ཐམས་ཅད་འོད་དུ་ཞུ་ནས། རིག་འཛིན་རྣམས་ལ་ཐིམ། རིག་འཛིན་གྱི་འཁོར་ཐམས་ཅད་གཙོ་བོ་གསུམ་ལ་ཐིམ། གཙོ་བོ་གསུམ་ཡང་ཀུན་ཏུ་བཟང་པོ་དགའ་རབ་རྡོ་རྗེ་ལ་ཐིམ། དགའ་རབ་རྡོ་རྗེ་ཨོ་རྒྱན་ལ་ཐིམ། ཨོ་རྒྱན་རིན་པོ་ཆེ་ཡང་འོད་དུ་ཞུ་ནས་བདག་ལ་ཐིམ་པས་བདག་གི་ལུས་འདི་ཡང་འོད་དུ་ཞུ་ནས་ནམ་མཁའ་ལ་འཇའ་ཡལ་བ་ལྟར་དངོས་མེད་དུ་ཡལ་བར་བསྒོམས་ལ། མ་ཡེངས་ཙམ་དུ་རང་གི་སེམས་ལ་བལྟས་ཏེ་ཡུད་ཙམ་འདུག་གོ །དེའི་ཚེ་སྔར་བྱས་པའི་བྱ་བ་ཐམས་ཅད་ལ་བསམ་བློ་མི་བཀྲམ། ད་འདི་བྱེད་ཀྱི་བསམ་གཞིག་མི་བཏང་། ད་ལྟ་ཡིད་ལ་ཅི་དྲན་ཞིང་གདའ་བ་དེ་ལ་ཅེ་རེ་བལྟས་པས། སེམས་ཀྱི་ངོ་བོ་དེ་ལ་གཟུགས་ཁ་དོག་དངོས་པོ་ཅི་ཡང་མ་མཐོང་བ་དེ་སྟོང་པ་ཉིད་ཡིན་
ནོ། །ཅི་ཡང་མེད་པ་མ་ཡིན་པར་ཅི་ཡང་དྲན་ཞིང་གསལ་བའི་འོད་གསལ་ཞེས་བྱའོ། །རེས་འགའ་ཅི་ཡང་མི་དྲན་པར་ཀྱི་ལེ་འདུག་པ་གནས་པ་ཟེར་རོ། །རེས་འགའ་གར་ཡང་འཕྲོ་ལྷཞིང་རྒྱུག་པས་འགྱུ་བ་ཟེར་རོ། །གནས་སམ་འགྱུའམ་ཅི་བྱེད་ཅི་གདའ་རིག་པས་རིག་པ་ཟེར་རོ། །གནས་འགྱུ་གཉིས་ལ་བཟང་ངན་མེད་དེ་གཉིས་ཀ་སེམས་ཡིན་ལ་ཁྱད་པར་མེད་པའོ། །ཧ་ཀྱང་རྩུབ་དྲག་ནས་མ་བདེ་ན་ལུས་སེམས་ལྷོད་དེ་ཀློད། ཁོ་རང་གར་འགྲོ་བཏང་ལ་རྒྱངས་སྲུངས་བྱས་པས་ཁོ་རང་ཚུར་ལ་འཁོར་ནས་བདེ་ལྷན་ནེ་གནས་སོ། །ཧ་ཅང་གནས་ཉམས་ཆེ་ནས་མ་གསལ་བ་རྨུགས་སེ་འདུག་ན། ལུས་སེམས་བསྒྲིམས་ལ་ཧྲིག་གེར་བལྟས་པས་གསལ་ལོ། །ལྟ་ཡུན་རིང་ན་མི་གསལ་བས། ལྟ་ཡུན་ཐུང་ལ་ལྟ་གྲངས་མང་བར་བྱའོ། །རེས་འགའ་གསལ་ཞིང་ངེས་ཤེས་སྐྱེ། རེས་འགའ་མི་གསལ་ཞིང་འདི་མིན་པ་འདྲ་བསམ་པའི་ཐེ་ཚོམ་སྐྱེ། དགྱེ་དགུ་མང་དུ་བྱུང་ཡང་མ་བསྐྱུར་བར་བསྐྱངས་པས་རིམ་གྱིས་བྱིས་པས་བསམ་བློ་ཟིན་པ་ལྟ་བུ་ཞིག་འོང་ངོ་། །གསོལ་འདེབས་ཀྱི་ལེའུ་ཁ་རེ་རེ་དབྱངས་དང་བཅས་ནས་བཏོན་རྗེས། སེམས་ལ་བལྟས་པས་ངེས་ཤེས་ཡོད་པའི་ཉམས་བཟང་པོ་
རེ་འཕྲལ་དུ་སྐྱེའོ། །འདི་གསོལ་འདེབས་དུས་ཁོ་ན་མ་ཡིན་པར། ཟ་དུས་འཐུང་དུས་འགྲོ་འཆག་ཉལ་འདུག་ཀུན་ཏུ་ཡུད་ཙམ་རྒྱུན་དུ་མ་བརྗེད་པར་བལྟ་བར་བྱ་སྟེ། མིག་གིས་རི་བྲག་དང་གྲོང་ཁྱེར་དང་མི་དང་དུད་འགྲོ་སོགས་གཟུགས་སྣ་ཚོགས་གང་མཐོང་ན་ཡང་། འདི་ནི་འདི་རེད། འདི་ནི་བཟང་། འདི་ནི་ངན་བསམ་པའི་རྣམ་པར་རྟོག་པ་སྐྱེས་པའི་དུས་སུ། འདི་བཟང་འདི་ངན་བསམ་པའི་སེམས་དེ་ལ་ཧྲིག་གེར་བལྟས་པས། ངོ་བོ་སྟོང་པ་ཉིད་དུ་ལྷང་ངེར་འཆར་བ་ནི་གཟུགས་སྣང་སྟོང་གི་ཏིང་ངེ་འཛིན་ཡིན་ནོ། །གཟུགས་མཛེས་མི་མཛེས་དང་བཟང་ངན་གཉིས་ཀའི་ངོ་བོ་སྟོང་པ་ཉིད་དུ་རོ་སྙོམས་ཐུབ་ན་གཟུགས་སྣང་སྟོང་དུ་གྲོལ་བའོ། །རྣ་བའི་ཡུལ་དུ་སྙན་པའི་གླུ་དང་པི་ཝཾ་དང་རང་ལ་བྱམས་ཤིང་བསྟོད་པའི་ཚིག་ཐོས་ན་སེམས་དགའ་བའི་རྟོགས་པ་སྐྱེ། དེའི་ངོ་བོ་ལ་བལྟས་པས་སྟོང་པ་ཉིད་ཡིན་ནོ། །མི་སྙན་པའི་སྒྲ་ཝ་དང་ཁྭ་ཏའི་སྐད་དང་རང་ལ་གནོད་པའམ་སྨད་པའི་ཚིག་ཐོས་ན་མི་དགའ་བའི་རྟོག་པ་སྐྱེ། དེའི་ངོ་བོ་ལ་བལྟས་ན་སྟོང་པ་ཉིད་ཡིན། སྙན་དང་མི་སྙན་པའི་སྒྲ་གཉིས་པོ་ཁྱད་མེད་སྟོང་པ་ཉིད་དུ་རྟོགས་ན་སྒྲ་གྲག་སྟོང་དུ་གྲོལ་བ་ཡིན་ནོ། །དེ་
བཞིན་དུ་ཡིད་ལ་དད་པ་དང་དག་སྣང་དང་བྱམས་སྙིང་རྗེ་སོགས་དགེ་བའི་བསམ་པ་སྐྱེས་ནའང་། དེའི་ངོ་བོ་སྟོང་པ་ཉིད་དུ་མ་རྟོགས་ན། འཇིག་རྟེན་པའི་བདེ་སྐྱིད་འབྱུང་བའི་རྒྱུ་ཙམ་ལས་བྱང་ཆུབ་འཐོབ་པའི་རྒྱུར་མི་འགྲོ་བས། བསམ་པ་བཟང་པོ་དེའི་ངོ་བོ་ལ་བལྟས་པས་སྟོང་ཉིད་སྙིང་རྗེ་ཟུང་དུ་འཇུག །དགེ་བའི་བསམ་པ་བཟང་པོ་ནི་ཐབས་དེའི་ངོ་བོ་སྟོང་ཉིད་དུ་རྟོགས་པས་ཤེས་རབ་ཡིན་པས་ཐབས་ཤེས་རབ་ཟུང་འཇུག་དེ་བྱང་ཆུབ་ཐོབ་པའི་རྒྱུ་ཡིན་ནོ། །སེམས་ལ་རྣམ་རྟོག་མི་འཕྲོ་དགུ་འཕྲོ་མི་དྲན་དགུ་དྲན་འདི་རང་གིས་རང་མ་རིག་པས་ལྷན་ཅིག་སྐྱེས་པའི་མ་རིག་པ་ཞེས་བྱ་བ། འཁོར་བ་མཐའ་མེད་དུ་འཁྱམས་པའི་རྩ་བ་ཡིན་ཏེ། རྣམ་སྣང་མངོན་བྱང་གི་རྒྱུད་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་འཁྱམས་བྱེད་ཡིན། །ཅེས་གསུངས་པ་འདི་རང་གིས་རང་རིག་ན་ལྷན་ཅིག་སྐྱེས་པའི་ཡེ་ཤེས་ཕྱག་རྒྱ་ཆེན་པོ་ཡིན་ཏེ། མི་རྟོགས་ཏིང་འཛིན་ལ་གནས་ན། །ནམ་མཁའ་བཞིན་དུ་རྟོགས་མེད་གནས། །ཞེས་གསུངས་ཏེ། མ་རིག་ན་རྣམ་རྟོག་རིག་ན་ཡེ་ཤེས་དེ་གཉིས་རིག་མ་རིག་གི་ཁྱད་མ་གཏོགས་སེམས་ཡིན་པ་ལ་ཁྱད་མེད་དོ། །སེམས་ལ་ཞེ་སྡང་སྐྱེས་ན་
དམྱལ་བའི་ས་བོན། ཞེ་སྡང་དེའི་ངོ་བོར་བལྟས་པས་གཟུགས་ཁ་དོག་དངོས་པོ་མེད་པར་སྟོང་པ་ཉིད་དུ་ཡལ་བ་དེ་མེ་ལོང་ལྟ་བུའི་ཡེ་ཤེས་སོ། །སེམས་ལ་གཏི་མུག་ནག་ཐིབས་སེ་བ་དེ་དུད་འགྲོའི་ས་བོན། དེའི་ངོ་བོར་བལྟས་པས་སྟོང་པ་ཉིད་དུ་རྟོགས་པ་ཆོས་དབྱིངས་ཡེ་ཤེས་སོ། །སེམས་ལ་ང་རྒྱལ་སྐྱེས་པ་དེ་ལྷ་ཕམ་ལྟུང་གི་རྒྱུ་ཡིན། དེའི་ངོ་བོར་བལྟས་པས་སྟོང་པ་ཉིད་དུ་གྲོལ་བ་མཉམ་པ་ཉིད་ཀྱི་ཡེ་ཤེས་སོ། །སེམས་ལ་འདོད་ཆགས་སྐྱེས་པ་དེ་ཡི་དྭགས་ཀྱི་ས་བོན། དེའི་ངོ་བོར་བལྟས་པས་སྟོང་པ་ཉིད་དུ་གྱུར་པ་སོ་སོར་རྟོག་པའི་ཡེ་ཤེས་སོ། །སེམས་ལ་ཕྲག་དོག་སྐྱེས་པ་དེ་ལྷ་མ་ཡིན་གྱི་ས་བོན། དེའི་ངོ་བོར་བལྟས་པས་སྟོང་པ་ཉིད་དུ་རྟོགས་པའི་བྱ་བ་གྲུབ་པའི་ཡེ་ཤེས་སོ། །མ་རིག་ན་དུག་ལྔ། །རིག་ན་ཡེ་ཤེས་ལྔ་ཡིན་པས། དུག་ལྔ་སྤང་མི་དགོས་པར་ཡེ་ཤེས་ལྔར་འཆར་བ་གསང་སྔགས་ཀྱི་ཁྱད་ཆོས་ལགས་སོ། །དེ་ལྟ་བུའི་ཉམས་ལེན་དེ་རྒྱུན་དུ་སྐྱོང་ཐུབ་ན་ཕྱག་རྒྱ་ཆེན་པོ་དང་། རྫོགས་ཆེན་དང་། ཟབ་མོ་དབུ་མ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཞི་བྱེད་ལ་སོགས་པ་ཟབ་ཆོས་ཐམས་ཅད་ཀྱི་དོན་ཡང་ཚང་བ་ཡིན་ནོ། །གལ་ཏེ་དེ་འདྲ་
ཉམས་ལེན་དེ་མ་གོ་བའམ་གོ་ཡང་ཉམས་སུ་མ་ལོན་ན། བསྐྱེད་རིམ་ཁྱེར་སོ་གསུམ་གྱི་དག་སྣང་སྦྱང་བར་བྱ་སྟེ། གཟུགས་མཐོང་ཚད་ཐམས་ཅད་ཨོ་རྒྱན་རིན་པོ་ཆེའི་སྐུ་སྣང་སྟོང་འཇའ་ཚོན་ལྟ་བུར་བསྒོམ། སྒྲ་གྲག་ཚད་ཐམས་ཅད་བཛྲ་གུ་རུའི་སྒྲ་གྲག་སྟོང་བྲག་ཆ་ལྟར་བསྒོམ། ཡིད་ལ་དྲན་ཚད་ཐམས་ཅད་དྲན་སྟོང་སྨིག་རྒྱུ་ལྟ་བུ་ཡིན་སྙམ་དུ་བྱ། མདོར་ན་འཁོར་འདས་སྣོད་བཅུད་ཐམས་ཅད་དངོས་པོ་བདེན་པར་གྲུབ་པ་གཅིག་ཀྱང་མེད་དེ་རང་གི་སེམས་འཁྲུལ་ནས་དངོས་པོར་མཐོང་བ་ཡིན་ཏེ། དཔེར་ན་རྨི་ལམ་དུ་བྲག་རི་དང་གྲོང་ཁྱེར་སྐྱེས་པ་བུད་མེད་ལ་སོགས་རྨིས་པ་ན་སེམས་འཁྲུལ་པ་མ་གཏོགས་གཅིག་ཀྱང་མེད་པ་དང་འདྲ་བས་སྣང་སྲིད་འཁོར་འདས་ཐམས་ཅད་སྟོང་ཞིང་བདག་མེད་པའི་སྟོང་པ་ཉིད་ཡིན་ནོ་སྙམ་དུ་སྟོང་ཉིད་རྒྱས་འདེབས་ཙམ་དུ་བསྒོམ་པར་བྱའོ། །དེ་ལྟ་བུའི་ཉམས་ལེན་དེ་དག་གསལ་འདེབས་པའི་ཕྱིར་ངག་ཏུ་ཡང་། འདི་ལྟར་མིག་གི་ཡུལ་དུ་སྣང་བ་ཡི༔ ཞེས་སོགས་ནས། བདག་འདྲའི་རང་རྒྱུད་གྲོལ་བར་བྱིན་གྱིས་རློབས༔ ཞེས་པའི་བར་ཚིག་འབྲུ་ཉི་ཤུ་རྩ་གཅིག་དེ་འདོན་ཅིང་གསོལ་བ་བཏབ་པ་དང་། ཚིག་གི་དོན་ལ་བསམ་གཞིག་རྒྱུན་ཏུ་བཏང་བར་བྱའོ། །
ལེའུ་བཞི་པ་རིག་འཛིན་གྲུབ་ཐོབ་རྣམས་ལ་གསོལ་བ་བཏབ་ནས་བྱིན་ཕབ་སྟེ་ཉམས་ལེན་སྐྱོང་བའི་གདམས་པ་ཟབ། །ཨྠྀི།། །།དེ་ནས་རྣམ་ཐར་གསོལ་འདེབས་འདི་ལ་མཚན་མང་དུ་ཡོད་ཀྱང་། མཆོག་གི་མཚན་བརྒྱད་གཙོ་ཆེ། འདི་ལ་ཉི་མ་འོད་ཟེར་མཚན་མེད་པ་ནི། གསང་སྔགས་ཐམས་ཅད་ལ་གབ་སྐུང་རེ་འོང་སྲོལ་ཡོད་པས་ཉི་མ་འོད་ཟེར་མཚན་སྦས་པ་ཡིན་ནོ། །རང་གི་རྒྱབ་ཕྱོགས་འདི་ནས་པདྨའི་སྡོང་པོ་ཆེན་པོ་གཅིག་སྐྱེས་པའི་སྡོང་པོ་ལ་རང་རྒྱབ་གཏད་པའི་སྟེང་གི་བར་སྣང་ལ། མེ་ཏོག་པད་མ་འདབ་མ་བརྒྱད་པ་རྒྱ་ཆེ་བའི་ལྟེ་བར་ཟེའུ་འབྲུའི་སྟེང་དུ། ཨོ་རྒྱན་རིན་པོ་ཆེ་སྤྲུལ་སྐུའི་ཆ་ལུགས་ཆོས་གོས་པད་ཞྭ་ཅན་གཞུང་ལྟར་བསྒོམ་མོ། །འདབ་མ་བརྒྱད་ལ་མདུན་དེ་ཤར་ཡིན་པའི་འདབ་ཡམ་ལ། པདྨ་འབྱུང་གནས་མཐིང་ནག་སྐུ་གཅེར་བུ་ཕྱག་གཡས་རྡོ་རྗེ་རྩེ་ལྔ། གཡོན་པས་སྡིགས་མཛུབ་ཅན་ཡུམ་དཀར་མོ་ལ་འཁྱུད་པ། གཡས་ཀྱི་འདབ་མ་ལ་མཁས་པ་བློ་ལྡན་མཆོག་སྲེད་སྔགས་པའི་ཆ་ལུགས་ཌ་མ་རུ་དང་བྷན་བསྣམས་པ། རྒྱབ་ཀྱི་འདབ་མ་ལ་ཉི་མ་འོད་ཟེར་སེར་པོ་གྲུབ་ཐོབ་ཆ་ལུགས་ཕྱག་གཡས་ཁ་ཊཱ་གཡོན་ཉི་ཟེར། གཡོན་གྱི་འདབ་མར་
འཕགས་པ་སེང་གེ་སྒྲ་སྒྲོག་མཐིང་ནག་ཁྲོ་བོའི་སྐུ། རྡོ་རྗེ་སྡིགས་མཛུབ་ཅན་སྐུ་སྟོད་ལ་སེང་གེའི་གཡང་གཞི་མནབས་པ། མདུན་གཡས་ཤར་ལྷོར་པདྨ་སཾ་བྷ་པཎྜི་ཏ་གཞོན་ནུ་ཕྱག་གཡས་པས་ལི་ཡི་བཟེད་ཞལ་པདྨའི་རི་མོ་ཅན། གཡོན་སྐྱབས་སྦྱིན། རྒྱབ་གཡས་ཟུར་འདབ་མ་ལ་པདྨ་རྒྱལ་པོ་ལ་ཐོད་དམར་པོ་ཅན། ཕྱག་གཡས་སེང་ལྡེང་གི་ཌཱ་མ་རུ་གཡོན་མེ་ལོང་རྒྱབ་གཡོན་ཟུར་དུ་ཤཱཀྱ་སེང་གེ་ཤཱཀྱ་ཐུབ་པ་འདྲ་བ་ལ་ས་གནོན་མཉམ་བཞག་རྡོ་རྗེ་འཛིན་པ། མདུན་གཡོན་རྡོ་རྗེ་གྲོ་ལོད་སྨུག་ནག་དབུ་སྐྲ་སྨུག་འབོལ་གྱེན་དུ་བརྗེ་ས་པ། སྐུ་ལ་ཕོད་ཁ་ལྗང་གུའི་སྟེང་དུ་ཆོས་གོས་ངུར་སྨྲིག་དང་མི་མགོའི་དོ་ཤལ་ཅན། རྡོ་རྗེ་ཕྱར་ཞིང་ཕུར་པ་འདྲིལ་བ། སྟག་མོའི་སྟེང་དུ་བརྐྱང་བསྐུམ་དུ་འགྱིང་བའོ། །གཙོ་འཁོར་དགུ་ཁའི་དཔྲལ་བར་ཨོཾ། མགྲིན་པར་ཨཱཿཐུགས་ཀར་ཧཱུཾ། དེ་ལས་འོད་ཟེར་འཕྲོས་པས་རྔ་ཡབ་གླིང་ནས་ཨོ་རྒྱན་རིན་པོ་ཆེ་གུ་རུ་མཚན་བརྒྱད་དང་བཅས་པ་སྤྱན་དྲངས་ནས་དབྱེར་མེད་དུ་ཐིམ་པར་བསྒོམ། ཨེ་མ་ཧོ༔ ལྷོ་ནུབ་རྔ་ཡབ་གླིང་ཕྲན་སྲིན་པོའི་ཡུལ༔ ཞེས་པ་ནས། ཐུགས་རྗེས་གཟིགས་ལ་བྱིན་གྱིས་བརླབ་ཏུ་གསོལ༔ ཞེས་པའི་བར་དུ་གསོལ་བ་བཏབ་
ནས་མཚན་བརྒྱད་ཀྱི་དངོས་གྲུབ་སོ་སོར་ཞུ་བ་ནི། སྡིག་སྒྲིབ་ཉེས་ལྟུང་གི་དྲི་མ་ཐམས་ཅད་དག་པར་འདོད་ན། གཙོ་འཁོར་ཐམས་ཅད་པདྨ་འབྱུང་གནས་ལ་ཐིམ། །པདྨ་འབྱུང་གནས་རང་ལ་ཐིམ་པས་རང་ཉིད་པདྨ་འབྱུང་གནས་ཀྱི་སྐུར་གྱུར་པར་བསྒོམ་མོ། །རིག་པའི་གནས་ལྔ་དང་སྡེ་སྣོད་གསུམ་ལ་མཁས་པར་འདོད་ན། གཙོ་འཁོར་ཐམས་ཅད་པདྨ་སཾ་བྷ་ལ་ཐིམ། པདྨ་སཾ་བྷ་རང་ལ་ཐིམ་པས་རང་ཉིད་པདྨ་སཾ་བྷའི་སྐུར་གྱུར་པར་བསྒོམ་པར་བྱའོ། །ལུས་རྩལ་ཆེ་བ་དང་མདའ་སྐྱེན་པ་དང་སྨྲ་མཁས་པ་ལ་སོགས་སྒྱུ་རྩལ་དྲུག་ཅུ་རྩ་བཞི་དང་། སྔགས་ཀྱི་རྒྱུད་སྡེ་ཐམས་ཅད་ལ་མཁས་པར་འདོད་ན། གཙོ་འཁོར་ཐམས་ཅད་བློ་ལྡན་མཆོག་སྲེད་ལ་ཐིམ། བློ་ལྡན་མཆོག་སྲེད་རང་ལ་ཐིམ་པས་རང་བློ་ལྡན་མཆོག་སྲེད་དུ་གྱུར་པར་བསྒོམ། མི་ཆེན་པོ་ཡིན་ན་སྡེ་སྲིད་མངའ་ཐང་འཕེལ་བ་དང་། མི་ཕལ་པ་ཡིན་ན་མི་ཐམས་ཅད་བྱམས་ཤིང་བུད་མེད་ཐམས་ཅད་ཀྱི་ཡིད་འཕྲོག་པར་འདོད་ན། གཙོ་འཁོར་ཐམས་ཅད་པདྨ་རྒྱལ་པོ་ལ་ཐིམ། པདྨ་རྒྱལ་པོ་རང་ལ་ཐིམ་པས་རང་ཉིད་པདྨ་རྒྱལ་པོའི་སྐུར་གྱུར་པར་བསྒོམ། བླ་མ་ཡིན་ན་འགྲོ་དོན་ཆེ་བ་དང་ཡོན་ཏན་མཁས་པ་ཡིན་ན་ཕན་
ཐོགས་ཆེ་བ་དང་ཕལ་པ་ཡིན་ན་ཉམས་རྟོགས་སྐྱེ་བར་འདོད་ན། གཙོ་འཁོར་ཐམས་ཅད་ཉི་མ་འོད་ཟེར་ལ་ཐིམ་ནས། ཉི་མ་འོད་ཟེར་རང་ལ་ཐིམ་པས་རང་ཉི་མ་འོད་ཟེར་གྱི་སྐུར་གྱུར་པར་བསྒོམ། སྒོམ་ཆེན་ཡིན་ན་ཚེ་འདིར་ལོངས་སྤྱོད་འདུ་ལོང་གི་སྒོམ་སྒྲུབ་ཀྱི་བར་ཆད་མི་འབྱུང་བ་དང་། རབ་བྱུང་ཡིན་ན་ཉོན་མོངས་པའི་དབང་དུ་མི་ཤོར་བས་ཚུལ་ཁྲིམས་ལ་བར་ཆད་མི་འབྱུང་བ་དང་། ཕལ་པ་ཡིན་ན་ཚེ་རབས་ཐམས་ཅད་དུ་ལུས་ལ་ན་ཚ་དང་དུས་མ་ཡིན་པའི་འཆི་བ་མི་འབྱུང་བ་དང་། དགེ་བཤེས་ཡིན་ན་སངས་རྒྱས་ཀྱི་བསྟན་པ་ལ་ཕན་པའི་བྱ་བ་རྒྱ་ཆེན་པོ་བསྒྲུབ་པར་འདོད་ན། གཙོ་འཁོར་ཐམས་ཅད་ཤཱཀྱ་སེངྒེ་ལ་ཐིམ་ནས། ཤཱཀྱ་སེང་གེ་རང་ལ་ཐིམ་པས། རང་ཤཱཀྱ་སེང་གེར་གྱུར་པར་བསྒོམ་མོ། །དགེ་བཤེས་ཡིན་ན་བགྲོ་གླེང་རྩོད་པ་ལས་རྒྱལ་བ་དང་། ཕལ་པ་ཡིན་ནའང་བན་བྱད་བོན་བྱད་དང་མུ་སྟེགས་ཀྱི་བྱད་ཁ་དང་། གཟའ་ཀླུ་ཆོས་སྐྱོང་གི་གནོད་པ་མི་འབྱུང་ཞིང་། བཀའ་སྲུང་དཀོར་བདག་གི་འཁུ་ལྡོག་མི་འབྱུང་བ་དང་ཐམས་ཅད་བཟློག་པར་འདོད་ན། གཙོ་འཁོར་ཐམས་ཅད་སེང་གེ་སྒྲ་སྒྲོག་ལ་ཐིམ་ནས། སེང་གེ་སྒྲ་སྒྲོག་རང་ལ་ཐིམ་པས་རང་སེང་གེ་སྒྲ་སྒྲོག་གི་སྐུ་གྱུར་
པར་བསྒོམ་མོ། །བླ་མ་དང་སྔགས་པ་ཡིན་ན་ལྷ་སྲིན་སྡེ་བརྒྱད་ལ་བཀའ་གང་བསྒོས་ཉན་པ་དང་། ཕལ་པ་ཡིན་ནའང་སྡེ་བརྒྱད་ཡུལ་ལྷ་ཐམས་ཅད་ཀྱི་གནོད་པས་མི་ཚུགས་ཤིང་སྡོང་གྲོགས་བྱེད་པར་འདོད་ན། གཙོ་འཁོར་ཐམས་ཅད་རྡོ་རྗེ་གྲོ་ལོད་ལ་ཐིམ་ནས། རྡོ་རྗེ་གྲོ་ལོད་རང་ལ་ཐིམ་པས་རང་རྡོ་རྗེ་གྲོ་ལོད་དུ་གྱུར་པར་བསྒོམ་མོ། །མཆོག་ཐུན་མོང་གི་དངོས་གྲུབ་ཅི་ཡང་འགྲུབ་ཅིང་ཚེ་རིང་བར་འདོད་ན། གུ་རུ་མཚན་བརྒྱད་ཁ་དེ་གཙོ་བོའི་ཕྱག་གཡོན་བྷནྡྷའི་ནང་གི་ཚེ་བུམ་ལ་ཐིམ་ནས། འཆི་མེད་ཚེ་ཡི་བདུད་རྩི་དེ་ཕྱུར་ཞིང་། །མར་བབས་པས་རང་གི་སྤྱི་བོ་ཚངས་པའི་བུ་ག་ནས་ཞུགས། རྐང་མཐིལ་ཡན་ཆད་སྤྱི་གཙུག་མན་ཆད་ཚེའི་བདུད་རྩིའི་ངང་ལྟེམ་གྱིས་གང་ནས། ནད་གདོན་ཆེའི་བར་ཆད་ཐམས་ཅད་བ་སྤུའི་བུ་ག་དང་འོག་སྒོ་དང་རྐང་མཐིལ་གཉིས་ནས་རྣག་ཁྲག་དང་འབུ་སྲིན་གྱི་གཟུགས་སུ་ནག་ཉིལ་གྱིས་ཕྱིར་ཐོན། སྤྱི་བོའི་པད་སྡོང་པདྨ་དང་བཅས་པ་གཙོ་བོ་ལ་ཐིམ། གཙོ་བོ་ཨོ་རྒྱན་སྐུ་དེ་ཇེ་ཆུང་དུསོང་ནས་སོར་གང་ཙམ་གཟི་བརྗིད་དང་ལྡན་པར་གྱུར་ནས་རང་གི་ཚངས་བུག་ནས་མར་བྱོན་སྙིང་གར་ཕེབས་པ་དང་། རང་གི་སྙིང་དེ་པདྨ་དམར་པོ་འདབ་མ་བརྒྱད་པ་ཅུང་
ཟད་ཁ་བྱེ་བའི་དབུས་སུ་ཟེའུ་འབྲུའི་སྟེང་དུ་བཞུགས་པ་ཙམ་གྱིས་ཨོ་རྒྱན་སྤྲུལ་སྐུ་དེ་གནས་འགྱུར་ནས། གུ་རུ་ཚེ་དཔག་མེད་མཚོ་སྐྱེས་རྡོ་རྗེ་སྐུ་མདོག་བྱི་རུའི་ལྟ་བུའི་ཞལ་གཅིག་སྤྱན་གསུམ་ཐོར་ཚུགས་ཅན། ཕྱག་གཉིས་མཉམ་བཞག་གི་སྟེང་ན་ཚེ་བུམ་འཛིན་པ་རྡོ་རྗེའི་སྐྱིལ་ཀྲུང་གིས་བཞུགས་པའི་པང་དུ་ཡུམ་མནྡཱ་ར་བ་དམར་མོ་གཅེར་བུ་ཚེ་མདའ་དང་ཚེ་བུམ་འཛིན་པས་འཁྱུད་པ། ཡབ་ཡུམ་གཉིས་ཀ་དར་དང་རིན་པོ་ཆེ་དང་རུས་པའི་རྒྱན་དྲུག་གིས་བརྒྱན་པ། སྐུ་སོར་གང་ཙམ་ཞིག་རྟག་ཏུ་བཞུགས་པར་བསྒོམ་མོ། །དེ་ནི་རྣམ་ཐར་དྲན་པའི་སྒོ་ནས་གསོལ་བ་བཏབ་སྟེ་དངོས་གྲུབ་སོ་སོར་ཞུ་བའི་གདམས་ངག་སྟེ། ལེའུ་ལྔ་པའི་དམིགས་རིམ་ཟབ། །ཨྠྀི།། །།དེ་ནས་རང་གི་སྤྱི་བོར་པདྨ་འདབ་མ་བཞི་པའི་དབུས་སུ། །སྐུ་མཆོག་བུདྨ་ཐོད་ཕྲེང་རྩལ་སྐུ་མདོག་དཀར་པོ་འཁོར་ལོ་དྲིལ་བུ་འཛིན་ཅིང་རྡོ་རྗེ་ཕག་མོ་དམར་མོ་ལ་འཁྱུད་པ། མདུན་ངོས་དེར་ཐུགས་མཆོག་རྡོ་རྗེ་ཐོད་ཕྲེང་རྩལ་མཐིང་ཀ་རྡོ་རྗེ་དང་དྲིལ་བུ་འཛིན་པ་རྡོ་རྗེ་མཁའ་འགྲོ་སྔོན་མོ་ལ་འཁྱུད་པ། གཡས་སུ་ཡོན་ཏན་རཏྣ་ཐོད་ཕྲེང་རྩལ་སེར་པོ་རིན་ཆེན་དྲིལ་བུ་འཛིན་ནས་རིན་ཆེན་མཁའ་འགྲོ་སེར་མོ་ལ་འཁྱུད་པ། རྒྱབ་ཏུ་
གསུང་མཆོག་པདྨ་ཐོད་ཕྲེང་རྩལ་དམར་པོ་པདྨ་དང་དྲིལ་བུ་འཛིན་པ་པདྨ་མཁའ་འགྲོ་དམར་མོ་ལ་འཁྱུད་པ། གཡོན་ཏུ་ཕྲིན་ལས་ཀརྨ་ཐོད་ཕྲེང་རྩལ་ལྗང་གུ་ཕྱག་གཡས་རྡོ་རྗེ་རྒྱ་གྲམ་དང་གཡོན་དྲིལ་བུ་འཛིན་པ་ལས་ཀྱི་མཁའ་འགྲོ་ལྗང་མོ་ལ་འཁྱུད་པ། ལྔ་ཀའང་ཞལ་ཁྲོ་འཛུམ་འགྱིང་བག་གཟི་བརྗིད་འབར་བ། འཁོར་ལོས་སྒྱུར་བའི་ཆ་བྱད་དང་རིན་པོ་ཆེ་དང་རུས་པའི་རྒྱན་ཆ་ཅན། ཟ་འོག་གི་སྨུག་བེར་ཤ་བའི་སྙན་ཞུ་རྒོད་སྒྲོ་དར་གྱི་ཅོད་པན་འཕུར་བ། གྲུ་མོ་ན་ཁ་ཊཾ་བརྟེན་ཅིང་ཞབས་ཕྱེད་སྐྱིལ་ཉི་ཟླའི་གདན་ལ་བཞུགས་པ། །ཡུམ་རྣམས་གཅེར་བུ་གྲི་གུག་ཐོད་ཁྲག་གིས་འཁྱུད་ཅིང་བཅུ་དྲུག་ལོན་པའི་ན་ཚོད་ཅན་རུས་པའི་རྒྱན་དྲུག་གིས་བརྒྱན་པའོ། །དབུས་མའི་ཡབ་ཀྱི་ཐུགས་ཀར་ཨོཾ། ཡུམ་གྱི་ཐུགས་ཀར་ཧཱུྃ༔ ཤར་གྱི་ཡབ་ཡུམ་ཐུགས་ཀར་ཧཱུྃ་དང་ཧཱ། གཡས་ཀྱི་ཡབ་ཡུམ་ཐུགས་ཀར་ཧཱུྃ་དང་རི། རྒྱབ་ཀྱི་ཡབ་ཡུམ་ཐུགས་ཀར་ཧཱུྃདང་ནི། གཡོན་གྱི་ཡབ་ཡུམ་ཐུགས་ཀར་ཨཱཿདང་ས། དེ་རྣམས་ལས་འོད་ཟེར་འཕྲོས་པས་རྔ་ཡབ་གླིང་ནས་གུ་རུ་སྐུ་ལྔ་ཡབ་ཡུམ་སྤྱན་དྲངས་དབྱེར་མེད་དུ་ཐིམ་པར་བསྒོམ། ཨེ་མ་ཧོ༔ ནུབ་ཕྱོགས་བདེ་བ་ཅན་གྱི་ཞིང་ཁམས་སུ༔ མགོན་
པོ་ཚེ་དཔག་མེད་ཀྱི། ཞེས་སོགས་ནས། འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་དུ་གསོལ༔ ཞེས་པའི་བར་གྱིས་གསོལ་བཏབ་པས། ཡབ་ཡུམ་རྣམས་སྙོམས་པར་ཞུགས་པའི་སྒྲས། ཕྱོགས་བཅུའི་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཁ་བ་བུ་ཡུག་ལྟར་སྤྱན་དྲངས་ལ། ཡབ་རྣམས་ཡབ་ལྔའི་ཞལ་དུ་ཞུགས། ཡུམ་རྣམས་ཡུམ་ལྔའི་ཞལ་དུ་ཞུགས་བདུད་རྩིར་ཞུ་སྟེ། ཡབ་ཡུམ་བཅུའི་སྦྱོར་མཚམས་ནས་བདུད་རྩི་བྱང་སེམས་དཀར་དམར་གྱི་རྒྱུན་བབ་སྟེ། རང་གི་སྤྱི་བོ་ཚངས་པའི་བུ་ག་ནས་ཞུགས། སྤྱི་བོ་བདེ་ཆེན་གྱི་འཁོར་ལོ་གང་སྐུའི་དམ་ཚིག་ཉམས་ཆག་ཐམས་ཅད་བསྐངས། གཟུགས་ཀྱི་ཕུང་པོ་དང་སེམས་ནམ་མཁའི་ཁམས་བུདྡྷ་ཐོད་ཕྲེང་རྩལ་ཡབ་ཡུམ་གྱི་ངོ་བོར་གནས་འགྱུར། བདུད་རྩི་མར་བབས་མགྲིན་པ་ལོངས་སྤྱོད་ཀྱི་འཁོར་ལོ་གང་། གསུང་གི་དམ་ཚིག་ཉམས་ཆག་བསྐངས་ནས་འདུ་ཤེས་ཀྱི་ཕུང་པོ་དང་དྲོད་ཀྱི་ཁམས་པདྨ་ཐོད་ཕྲེང་རྩལ་ཡབ་ཡུམ་གྱི་ངོ་བོར་གྱུར། བདུད་རྩི་མར་བབས། སྙིང་ཁ་ཆོས་ཀྱི་འཁོར་ལོ་གང་ཐུགས་ཀྱི་དམ་ཚིགས་ཉམས་ཆག་བསྐངས་ནས་རྣམ་ཤེས་ཀྱི་ཕུང་པོ་ཁྲག་གི་ཁམས་རྡོ་རྗེ་ཐོད་ཕྲེང་རྩལ་ཡབ་ཡུམ་གྱི་ངོ་བོར་གྱུར།
བདུད་རྩི་མར་བབས། ལྟེ་བ་སྤྲུལ་པའི་འཁོར་ལོ་གང་། རྩ་བའི་དམ་ཚིག་ཉམས་ཆག་བསྐངས་ནས་ཚོར་བའི་ཕུང་པོ་དང་ཤའི་ཁམས་རཏྣ་ཐོད་ཕྲེང་རྩལ་ཡབ་ཡུམ་གྱི་ངོ་བོར་གྱུར། བདུད་རྩི་མར་བབས་གསང་གནས་བདེ་སྐྱོང་གི་འཁོར་ལོ་གང་། ཡན་ལག་གི་དམ་ཚིག་ཉམས་ཆག་བསྐངས། འདུ་བྱེད་ཀྱི་ཕུང་པོ་དང་དབུགས་ཀྱི་ཁམས་ཀརྨ་ཐོད་ཕྲེང་རྩལ་ཡབ་ཡུམ་གྱི་ངོ་བོར་གྱུར། བདུད་རྩི་རྐང་མཐིལ་ནས་སྤྱི་གཙུག་གི་བར་ལྟེམ་གྱིས་གང་ནས་གུ་རུ་སྐུ་ལྔ་ཡབ་ཡུམ་གདན་དང་བཅས་པ་འོད་དུ་ལྟེམ་གྱིས་ཞུ་ནས་རང་ལ་དབྱེར་མེད་དུ་ཐིམ་པས་དུག་ལྔ་རྣམ་པར་དག །ཡེ་ཤེས་ལྔ་མངོན་དུ་འཆར། སྐུ་ལྔ་ལྷུན་གྱིས་གྲུབ་པར་བསྒོམ། དེ་ནས་ངོ་བོ་སངས་རྒྱས་ཐམས་ཅད་འདུས་པའི་རིགས་ལྔར་དྲན་པའི་སྒོ་ནས་གསོལ་བ་འདེབས་ཤིང་། དམ་ཚིག་ཉམས་ཆག་སྦྱོང་བ་སྟེ། ལེའུ་དྲུག་པའི་དམིགས་རིམ་ཟབ། །ཨྠྀི།། །།དེ་ནས་ལེའུ་བདུན་པའི་ཞལ་ཤེས་ནི། ལས་ཀྱི་རྣམ་པར་སྨིན་པ་ནི་སྐྱོབ་མི་ནུས་ཏེ། སྔོན་གྲོང་ཁྱེར་སེར་སྐྱ་ན་མཐའ་འཁོབ་རྒྱལ་པོ་འཕགས་སྐྱེས་པོའི་དམག་གིས་ཤཱཀྱའི་རྒྱལ་རིགས་ལྔ་བརྒྱ་ལྷག་ཙམ་བསད་པའི་ཚེ། བཅོམ་ལྡན་འདས་རྒྱལ་བ་ཤཱཀྱ་ཐུབ་
པ་དེ་ཉིད་བཞུགས་ཀྱང་སྐྱོབ་པར་མ་གྱུར་པ་དང་། རྫུ་འཕྲུལ་ཆེ་བའི་མཆོག་མོའུ་འགལ་གྱི་བུ་མུ་སྟེགས་རྣམས་ཀྱིས་སྐུ་འདམ་བུ་ལྟར་བརྡུང་བའི་ཚེ་རྫུ་འཕྲུལ་ཅུང་ཟད་ཀྱང་སྟོན་མ་ནུས་པ་ལྟ་བུའོ། །ཐེ་ཚོམ་དང་ཡིད་གཉིས་དང་དད་པ་ལྟེམ་རྐྱང་ཡོད་ན་མི་སྐྱོབ་སྟེ། ཐུགས་རྗེ་ཆེན་པོའི་གཟུངས་ཀྱི་ཕན་ཡོན་རྣམས་ལས། ཐེ་ཚོམ་གྱི་རྣམ་པ་ཅུང་ཟད་སྐྱེས་ན་དེ་ཐམས་ཅད་མི་འགྲུབ་བོ། །ཞེས་གསུངས་པ་ལྟ་བུའོ། །སྔོན་ནས་ཡུན་རིང་དུ་གསོལ་བ་བཏབ་ནས། བྱིན་རླབས་ཞུགས་པའི་རྟགས་ཅུང་ཟད་མཐོང་དགོས་ཀྱི། གྲུ་ཁའི་སྐྱབས་འགྲོ་ལྟ་བུས་སྐྱོབ་པར་དཀའོ། །དེ་ལྟ་བུ་རྣམས་མ་ཡིན་པར་དད་པ་བརྟན་པོས་སྔོན་ནས་ཡུན་རིང་གསོལ་བ་བཏབ་ནས། ཐུགས་རྗེ་བྱིན་རླབས་ཞུགས་པའི་རྟགས་དང་མཚན་མ་ཅུང་ཟད་ཐོན་པར་བྱས་ནས་འཕྲལ་དུ་འདོད་དོན་གང་དགོས་གསོལ་བ་བཏབ་ན་འགྲུབ་བོ། །དེ་འགྲུབ་ན་རང་ཉིད་ནུས་པ་ཆེ་བའི་ང་རྒྱལ་མི་རུང་བས། གུ་རུའི་ཐུགས་རྗེ་བྱིན་རླབས་ཡིན་པར་ཤེས་ནས་སླར་ཡང་དད་གུས་མེ་ལ་ཤིང་བསྣན་པ་ལྟར་བྱ་དགོས་སོ། གལ་ཏེ་ཕྲིན་ལས་དེ་མ་འགྲུབ་ན་དད་པ་ལོག་པར་མི་བྱའོ། །ལས་ཀྱི་རྣམ་པར་སྨིན་པ་ནི་མ་གཏོགས་སོ། །ཞེས་གསུངས་
པ་ལྟར་རྣམ་སྨིན་ཡིན་པ་ཤེས་པར་བྱའོ། །དཔེ་ཆ་ལ་ང་ཉིད་ཅེས་པ་གུ་རུའི་གསུང་ཚིག་བྲིས་པ་ཡིན། འདོན་དུས་ཨོ་རྒྱན་ཞེས་བསྒྱུར་བར་བྱའོ། །ཚིག་མཚམས་ཐམས་ཅད་དུ་བསམ་པ་ལྷུན་གྱིས་གྲུབ་པར་བྱིན་གྱིས་རློབས། ཞེས་དཔེ་འགའ་རེ་ལ་མེད་ཀྱང་བཙུད་པར་བྱའོ། །དང་པོ་ནི་རང་གི་སྤྱི་བོར་ཨོ་རྒྱན་རིན་པོ་ཆེ་བསྒོམས་ནས་གསོལ་བ་བཏབ་པས། གུ་རུའི་དཔྲལ་བ་ནས་འོད་ཟེར་དཀར་པོ་བྱུང་རང་གི་དཔྲལ་བར་ཐིམ་པས། གཏི་མུག་གི་སྒྲིབ་པ་དག་ནས་དུད་འགྲོའི་སྐྱེ་སྒོ་ཆོད། མགྲིན་པ་ནས་འོད་ཟེར་དམར་པོ་བྱུང་རང་གི་མགྲིན་པར་ཐིམ་པས། འདོད་ཆགས་ཀྱི་སྒྲིབ་པ་དག་ནས་ཡི་དྭགས་ཀྱི་སྐྱེ་སྒོ་ཆོད། ཐུགས་ཀ་ནས་འོད་ཟེར་མཐིང་ཀ་བྱུང་ནས་རང་གི་སྙིང་གར་ཐིམ་པས། ཞེ་སྡང་གི་སྒྲིབ་པ་དག་ནས་དམྱལ་བའི་སྐྱེ་སྒོ་ཆོད། ལྟེ་བ་ནས་འོད་ཟེར་སེར་པོ་བྱུང་ནས་རང་གི་ལྟེ་བར་ཐིམ་པས། ང་རྒྱལ་གྱི་སྒྲིབ་པ་དག་ནས་ལྷ་ཕམ་ལྟུང་དང་མི་བྲེལ་ཕོངས་ཀྱི་སྐྱེ་སྒོ་ཆོད། གསང་གནས་ནས་འོད་ཟེར་ལྗང་གུ་བྱུང་ནས་རང་གི་གསང་གནས་སུ་ཐིམ་པས། ཕྲག་དོག་གི་སྒྲིབ་པ་དག་ནས་ལྷ་མིན་གྱི་སྐྱེ་སྒོ་ཆོད། དེ་ནས་ཨོ་རྒྱན་རིན་པོ་ཆེ་རང་ལ་ཐིམ་པས་དུག་ལྔ་ཡེ་
ཤེས་ལྔར་གནས་འགྱུར་བར་བསྒོམས་པས་དུག་ལྔའི་སྒོ་ནས་བསགས་པའི་སྡིག་སྒྲིབ་དག་ནས་འགྲོ་བ་རིགས་དྲུག་གི་སྐྱེ་སྒོ་ཆོད། ལས་ཚོགས་དང་པོའོ།། །།ཡང་དུ་རུཥའི་དམག་ཚོགས་ཆེན་པོས་འཇིགས་པ་བྱུང་ན། རང་ཉིད་འཕགས་པ་རྡོ་རྗེ་གྲོ་ལོད་སྐུ་མདོག་སྨུག་ནག་ཁྲོ་ཞལ་ཨམ་གཙིགས་བསྡམས་ཤིང་སྤྱན་གསུམ་བསྒྲད་པ། ཕྱག་གཡས་གསེར་གྱི་རྡོ་རྗེ་ཕྱར་ཞིང་གཡོན་གནམ་ལྕགས་ཀྱི་ཕུར་པས་ཕ་རོལ་ལ་གཟིར་བའི་རྩེ་ནས་གནམ་ལྕགས་ཀྱི་ཐོག་རྒོད་གྲངས་མེད་པ་འཕྲོ་བ། ཕོད་ཁ་ལྗང་གུ་དང་ཆོས་གོས་མི་མགོའི་ཕྲེང་བ་ཅན། ཐུགས་ཀར་ཧཱུྃ་དམར་ནག་ལས་མེ་འབར་བ། ཡེ་ཤེས་པ་དང་དམ་ཚིག་པ་དབྱེར་མེད་པའི་ངོ་བོ། ཞབས་གཉིས་བརྐྱང་བསྐུམ་བྱེད་ཀྱི་འདོར་ཐབས་ཀྱིས་རྒྱ་སྟག་དམར་པོ་རི་རབ་ཙམ་སྟག་སྐད་འབྲུག་ལྟར་ངུར་བའི་སྟེང་ན་བཞུགས་པ། རང་གི་སྤྱི་བོར་ཨོ་རྒྱན་ཀརྨ་ཐོད་ཕྲེང་རྩལ་སྐུ་མདོག་ལྗང་ནག་མཆེ་བ་ཅུང་ཟད་གཙིགས་ཤིང་སྤྱན་གསུམ་བསྒྲད་པ་ཕྱག་གཡོན་དྲིལ་བུ་དང་བཅས་པའི་སྡིགས་མཛུབ་ཕ་རོལ་ལ་གཟིར་བ། ཕྱག་གཡས་གནམ་ལྕགས་ཀྱི་རྡོ་རྗེ་ཐོག་རྒོད་འཕྲོ་བ་ནམ་མཁའ་ལ་ཕྱུར་བ། བེར་དང་པད་ཞྭ་ལྗང་ནག་དང་བེར་ལྗང་ནག་གཉིས་ཀྱི་སྟེང་ན་
ཆོས་གོས་གསོལ་བ། ཞབས་དཔའ་བོ་གཡུལ་ལས་རྒྱལ་བའི་བཞུགས་སྟང་ཕྱེད་སྐྱིལ་ལ་གཡས་ཅུང་ཟད་བརྐྱངས་ནས་བཞུགས་པར་བསྒོམ། ཐུགས་ཀའི་ཧཱ་ཡིག་ལྗང་ནག་ལས་འོད་འཕྲོས་རྔ་ཡབ་ནས་དེ་བསྐྱེད་པ་ལྟ་བུ་སྤྱན་དྲངས་ལ་བསྟིམ་མོ། །གསོལ་འདེབས་བསམ་པ་ལྷུན་གྲུབ་མ་འདོན། དེ་ལྟར་གསོལ་བ་བཏབ་པས་གུ་རུའི་སྐུ་ལས་འོད་ཟེར་ལྗང་ནག་ཚྭ་ཞིང་རྩུབ་པའི་རེག་བྱ་ཅན་འཇིག་རྟེན་ཁྱབ་པར་འཕྲོས་པས། འཇིག་རྟེན་གྱི་ཁམས་ཀྱི་ལྷ་མ་སྲིན་སྡེ་བརྒྱད། སྡེ་དཔོན་སུམ་ཅུ། དཔལ་མགོན་བདུན་ཅུ། དྲེགས་ཆེན་བཅོ་བརྒྱད། མགུར་ལྷ་བཅུ་གསུམ། བརྟན་མ་བཅུ་གཉིས། དགེ་བསྙེན་ཉེར་གཅིག །ཐམས་ཅད་སྔོན་གྱི་དམ་ཚིག་རྗེས་སུ་དྲན་ནས། གོ་གྱོན་མཚོན་ཐོགས་ཏེ་དམག་དཔུང་གི་གཟུགས་སུ་སྐད་ཅིག་ཉིད་ལ་སྤྲིན་ནག་ལྟར་འཐིབས་ནས་ཕ་རོལ་གྱི་དམག་ཚོགས་ཐམས་ཅད་རང་དབང་མེད་པར་བཟློག་པར་བསྒོམ་མོ། །ལས་ཚོགས་གཉིས་པའོ།། རང་ངམ་གཞན་ལ་ནད་ཀྱིས་ཐེབས་པའི་དུས་སུ་སྤྱི་བོར་ཨོ་རྒྱན་པད་ཞྭ་ཆོས་གོས་ཅན་གཞུང་ལྟར་བསྒོམ་པའི་ཕྱག་གཡོན་ཚེ་བུམ་ནང་དུ་སངས་རྒྱས་སྨན་གྱི་བླ་བསྒོམ་པའི་ཐུགས་ཀར་ཧཱུཾ་སྔོན་
པོ་དེ་ལས་འོད་ཟེར་འཕྲོས་པས། རྔ་ཡབ་ནས་ཨོ་རྒྱན་དང་ཤར་ཕྱོགས་ཀྱི་ཞིང་ཁམས་བཻཌཱུརྱ་སྣང་བ་ནས་སྨན་བླ་སྤྱན་དྲངས་ལ་དབྱེར་མེད་དུ་བསྟིམ། གསོལ་འདེབས་ལ་བསམ་པ་ལྷུན་གྲུབ་མ་མང་དུ་བཏོན་ནས། ཕྱག་གཡོན་བུམ་པའི་ནང་སྨན་བླའི་སྐུ་ལས་བདུད་རྩིའི་རྒྱུན་བབས་ཏེ། བུམ་པའི་ཁ་ནས་ལུད་ནད་པའི་ཚངས་བུག་ནས་ཞུགས་ཏེ་ལུས་གང་དེ་ཡང་ཚད་པའི་ནད་ལ་བདུད་རྩི་དཀར་པོ་ག་པུར་གྱི་ཆུ་ལྟར་གྲང་སིལ་སིལ་བ། གྲང་བ་ལ་བདུད་རྩི་དམར་པོ་ལྕགས་སྲེག་གི་ཁུ་བ་ལྟར་ཚ་ཞིང་བསྲེགས་པ། རླུང་གི་ནད་ལ་བདུད་རྩི་སེར་པོ་འབྲུ་མར་བཞུས་པ་ལྟ་བུ། འདུས་པའི་ནད་ལ་བདུད་རྩི་ཁ་དོག་ལྔ་ལྡན་བསིལ་དྲོད་སྙོམས་པར་བབས། ཚད་པའི་ནད་ཐམས་ཅད་བཀྲུས། གྲང་བའི་ནད་ཐམས་ཅད་བསྲེགས། རླུང་གི་ནད་ལ་ཀོ་སྐམ་སྣུམ་གྱིས་བརླན་པ་ལྟ་བུ། འདུས་པའི་ནད་ལ་བ་མོ་ལ་ཉི་ཟེར་ཕོག་པ་ལྟར་བསྒོམས་ལ། མཐར་ཨོ་རྒྱན་དང་སྨན་བླ་འོད་དུ་ཞུ་ནས་གང་ན་ས་དེར་ཐིམ་པར་བསྒོམ། །ཁོལ་བུར་གཟེར་ན་གང་ན་ས་དེར་ཨོ་རྒྱན་སྨན་བླ་གོང་ལྟར་སྐུ་ཆུང་ངུ་བསྒོམས་ལ་གསོལ་བ་བཏབ་ནས་ན་ས་དེར་ཐིམ་པར་བསྒོམ་པར་བྱའོ། །ལས་ཚོགས་གསུམ་པའོ།།
དབུལ་ཕོངས་དང་བཀྲེས་སྐོམ་དང་མུ་གེ་སེལ་བ་ནི། རང་གི་སྤྱི་བོར་པདྨ་འདབ་མ་སེར་པོ་འདབ་མ་སྟོང་ལྡན་གྱི་ལྟེ་བར་གུ་རུ་རཏྣ་ཐོད་ཕྲེང་རྩལ་སྐུ་མདོག་གསེར་བཙོ་མ་ལྟ་བུ། བེར་དང་པད་ཞྭ་ཆོས་གོས་ཐམས་ཅད་ཟ་འོག་སེར་པོ་རིན་ཆེན་ཆ་བདུན་རི་མོ་ཅན། སྐུ་ཤ་རྒྱས་ཤིང་གཟི་བརྗིད་དང་ལྡན་པའི་ཐུགས་ཀར་ཧཱུྃ་ཡིག་སེར་པོ་ལས་འོད་ཟེར་འཕྲོས་པས་རྔ་ཡབ་ནས་ཡེ་ཤེས་པ་སྤྱན་དྲངས་ལ་བསྟིམ། བསམ་པ་ལྷུན་གྲུབ་མའི་གསོལ་བ་བཏབ་པའི་སྐུ་ལས་འོད་ཟེར་སེར་པོ་འཇིག་རྟེན་ཁྱབ་པར་འཕྲོས་ནས། རྣམ་སྲས་རིགས་ལྔ་ཛཾ་ལྷ་རིགས་ལྔ་ལ་སོགས། གནོད་སྦྱིན་བྱེ་བ་བདུན་འབུམ་ནོར་རྒྱུན་མ་མཆེད་ལྔ་ལ་སོགས་ནོར་ལྷ་མོ་རིགས། མཁའ་འགྲོ་བྱེ་བ་འབུམ་སྡེ། ཚོགས་བདག །ཨ་པ་ར་ཙི་ཛི་ཏ། ས་ཡི་ལྷ་མོ་སོགས་དངོས་གྲུབ་ལ་དབང་བ་རྣམས་སྔོན་གྱི་དམ་ཚིག་རྗེས་སུ་དྲན་ནས་ན་བུན་འཐིབས་པ་ལྟར་སྐད་ཅིག་ལ་འདུས་ནས། ལ་ལས་རིན་པོ་ཆེའི་ཆར། ལ་ལས་འབྲུའི་ཆར། ལ་ལས་ཟས་དང་གོས་ཀྱི་ཆར་འབེབས་པར་བསམས་ལ། མཐར་ཨོ་རྒྱན་རང་ལ་ཐིམ་པར་བསྒོམས་པས་དབུལ་ཕོངས་འབྱུང་བའི་ལས་ཀྱི་སྒྲིབ་པ་དག་ནས་རང་ཉིད་རཏྣ་ཐོད་ཕྲེང་རྩལ་དུ་
གྱུར་པར་བསྒོམ། ལས་ཚོགས་བཞི་པའོ།། །།སྔོན་གཏེར་སྟོན་རཏྣ་གླིང་པས། ཁྱུང་ཚང་བྲག་ནས་གཏེར་དང་པོ་བཏོན་དུས་བྲག་བརྐོས་པས། སེར་བ་བྱ་སྒོང་ཙམ་དང་རྡོ་ཡི་ཆར་པ་ལུག་མགོ་ཙམ་འུར་སྒྲ་དང་བཅས་ནས་བབས་པས། རོགས་ཐམས་ཅད་སྐྲག་ནས་ངུ་འབོད་བྱས་པས། གཏེར་སྟོན་གྱིས་ཨོ་རྒྱན་ལ་གསོལ་བ་བཏབ་པས། ང་ཁྱེད་ཀྱི་ལུང་བསྟན་པའི་གཏེར་སྟོན་ཡིན་ན་ཆོ་འཕྲུལ་འདི་ཙམ་མ་བཏང་། མིན་ན་ཅི་འདོད་གྱིས་གསུངས་པས། སེར་བ་དང་རྡོའི་ཆར་བབ་པ་ཆད་ནས་གཏེར་རྣམས་ཐོན་པ་དང་། ལྷོ་བྲག་མཁར་ཆུ་ནས་ཁྲོམ་བསྡུས་ནས་གཏེར་འདོན་གསུངས་ནས་བྲག་བརྐོས་པས་གཏེར་མ་རྙེད་པ་ལ། ཁྲོམ་རྣམས་ཀྱིས་རྫུན་རེད་སྨྲ་དོགས་ནས། ཨོ་རྒྱན་ལ་གསོལ་བ་བཏབ་པས། གཏེར་བདག་དགེ་བསྙེན་མཁའ་རི་མི་དཀར་རྟ་དཀར་ཅན་དངོས་སུ་བྱུང་ནས། བྲག་ལ་ལྕག་ཚན་བཙུགས་ནས་གཏེར་འདི་ན་ཡོད། ངས་ཕ་ནོར་བུ་ལ་འཕྲོད་ནས་ཡོད་དོ་ཟེར་བ་ཁྲོམ་ཀུན་གྱིས་དངོས་སུ་མཐོང་ཞིང་གཏེར་ཐོན་ནས། རཏྣ་གླིང་པ་ལ་ཐམས་ཅད་ཡིད་ཆེས་པར་གྱུར་པ་ལྟ་བུ་ཡིན་ལ། སྔོན་སྤྲེའུ་བྱང་ཆུབ་སེམས་དཔའ་བྲག་སྲིན་མོའི་བུ་སྤྲེའུ་ཕྲུག་བོད་ཀྱི་མིའི་ས་བོན་
དུ་གྱུར་པ་དེ་རྣམས་མ་སོས་ནས། སྤྲེའུ་པོ་ཏ་ལར་སོང་ནས། ཐུགས་རྗེ་ཆེན་པོ་ལ་ཞུས་པས་འབྲུ་སྣ་ལྔའི་སྤར་གང་བོད་དུ་གཏོར་བ་ལས་འབྲུ་སྣ་ལྔ་འཁྲུངས། རིན་པོ་ཆེའི་ཕྱེ་མ་སྤར་གང་བོད་དུ་གཏོར་བ་ལས་གསེར་ཁ་དངུལ་ཁ་ལྕགས་ཁ་ཟངས་ཁ་སོགས་གཏེར་རྣམས་འབྱུང་བར་བཤད་པས། གསེར་དངུལ་ཟངས་ལྕགས་བརྐོ་བ་དང་བཞུ་བ་ཡང་དོན་ལ་གཏེར་ཡིན་པས། རང་གི་སྤྱི་བོར་ཨོ་རྒྱན་སེར་པོ་ཕྱག་གཡས་ནོར་བུ་དང་རིན་པོ་ཆེ་དང་གཡོན་བྷནྡྷའི་སྟེང་དུ་གཏེར་གྱི་བུམ་པ་འཛིན་པར་བསྒོམ། རྔ་ཡབ་གླིང་ནས་སྤྱན་དྲངས་ལ་བསྟིམས་ནས་བསམ་པ་ལྷུན་གྲུབ་མའི་གསོལ་བ་བཏབ་པས། སྐུ་ལས་འོད་ཟེར་འཕྲོས་ཡུལ་དེའི་གཏེར་བདག་ལྷ་འདྲེ་རྣམས་ལ་ཕོག་པས། སྔོན་གྱི་དམ་ཚིག་རྗེས་སུ་དྲན་ཏེ་སེར་སྣའི་མདུད་པ་ལས་གྲོལ་ནས། གཏེར་ཁ་ཐམས་ཅད་ཨོ་རྒྱན་ལ་འབུལ་བའི་ཚུལ་གྱིས། ས་འོག་གི་རིན་པོ་ཆེ་ཅི་ཡོད་པ་ཐམས་ཅད་རྫ་རི་ཉིལ་བ་ལྟར་བཏོན་ཅིང་བྱིན་པར་བསམ། མཐར་ཨོ་རྒྱན་རང་ལ་ཐིམ་པས་རང་རཏྣ་ཐོད་ཕྲེང་རྩལ་དུ་གྱུར་པར་བསྒོམ། ལས་ཚོགས་ལྔ་པའོ།། །།ཡང་འབྲས་མོ་ལྗོངས་དང་། པདྨ་བཀོད་དང་། བྱང་འབྲས་མོ་གཤོངས་
དང་། གྲོ་བོ་ལུང་དང་། ལི་ཡུལ་ཆུང་བ་དང་། སྦས་པའི་ཡུལ་ཆེ་ཆུང་རྣམས་སུ་འགྲོ་དུས་སམ། ཙཱ་རི་གངས་ཀྱི་ར་བ། ཡོལ་མོ་གངས་ཀྱི་ར་བ། གནོད་སྦྱིན་གངས་ཀྱི་ར་བ་སོགས། ཨོ་རྒྱན་རིན་པོ་ཆེའི་དབེན་གནས་གངས་ཆེན་ཉི་ཤུ་རྩ་གཅིག་ལ་སོགས་གནས་ཆེན་རྣམས་སུ་འགྲོ་བའི་དུས། རང་ཉིད་སྤྱི་བོར་ཨོ་རྒྱན་རིན་པོ་ཆེ་སྤྲུལ་སྐུའི་ཆ་ལུགས་ཕྱག་གཡས་རྡོ་རྗེ་དང་བཅས་པའི་སྐྱབས་སྦྱིན་ཅན། རང་གི་མདུན་ཕ་ཀིར་ཨོ་རྒྱན་གཅེར་བུ་ཨ་ཙ་རའི་གཟུགས་ཌཱ་མ་རུ་འཁྲོལ་ཞིང་གར་བྱེད་པས་ལམ་སྣ་ཁྲིད་པར་བསྒོམས་ལ། རྔ་ཡབ་ནས་ཡེ་ཤེས་སེམས་དཔའ་སྤྱན་དྲངས་ལ་བསྟིམ་མོ། །བསམ་པ་ལྷུན་གྲུབ་མ་བཏོན་ལ་གསོལ་བ་བཏབ་པས་ཨོ་རྒྱན་གྱི་སྐུ་ལས་འོད་ཟེར་དམར་པོ་ཚ་ཞིང་སྲེག་པ་འཕྲོས། གནས་ཀྱི་གཞི་བདག་རྣམས་དང་སྒོ་སྲུང་རྣམས་ལ་ཕོག་པས། སྔོན་གྱི་དམ་ཚིག་རྗེས་སུ་དྲན་ནས་ཐམས་ཅད་ཀྱི་ལམ་སྣ་ཁྲིད་ཅིང་སྣང་སྲིད་ལྷ་འདྲེ་ཐམས་ཅད་ཀྱི་དབང་པོའི་སྒོ་ལྔ་ནས་མེ་དཔུང་འུ་རུ་རུ་འབར་བས་ཁ་ཆར་བུ་ཡུག་བཅད་པར་བསྒོམ། གནས་དེ་རྣམས་སུ་ཆོས་ཁོ་ན་བསམས་ནས་འགྲོ་ན། རབ་ཨོ་རྒྱན་དངོས་འབྲིང་སྤྲུལ་པའི་བྱ་རིགས་རི་དྭགས་ཐ་མ་ཉམས་རྨི་ལམ་དུ་
ལམ་སྟོན་པར་ཐེ་ཚོམ་མེད་གསུངས་སོ། །ལས་ཚོགས་དྲུག་པའོ།། །།ཡང་འབྲོག་ཅེས་པ་ས་སྟོང་དུ་གཅན་གཟན་དུག་སྦྲུལ་སོགས་ཀྱིས་སྐྲག་ན། སྤྱི་བོར་ཨོ་རྒྱན་ཕྱག་གཡས་རྡོ་རྗེ་དང་བཅས་པའི་སྐྱབས་སྦྱིན་ཅན་བསྒོམས་ནས་བསམ་པ་ལྷུན་གྲུབ་མའི་གསོལ་བ་བཏབ་པས། ཨོ་རྒྱན་གྱི་སྐུ་ལས་འོད་ཟེར་འཇིག་རྟེན་ཁྱབ་པར་འཕྲོས་པས། རྒྱ་གར་གྱི་དུར་ཁྲོད་བརྒྱད་ཨོ་རྒྱན་རང་བྱུང་གི་དུར་ཁྲོད་དང་དགུ་ནས། གིང་ཕོ་དགུ་གིང་མོ་དགུ་ཐམས་ཅད་གཅེར་བུ་རུས་པའི་རྒྱན་དྲུག་ཅན། ལག་ན་རྗེའི་ཆུང་ཐོགས་པ་དང་། དུར་ཁྲོད་ཀྱི་སྲུང་མ་ཀེང་རུས་ཕོ་མོ་ལག་ན་དབྱུག་ཐོ་དང་སྦྲུལ་ཞགས་ཐོགས་པ། ལྷ་མོ་ལྕགས་སྒྲོག་མ་ལྗང་མོ་ལག་ན་ལྕགས་སྒྲོག་ཐོགས་པ་མང་པོ་བྱུང་ནས་རང་གི་མཐའ་བསྐོར་ནས་ཞལ་ཕྱིར་གྱུས་ཏེ་ཀུ་སྒྲ་དང་བསྔོ་སྒྲ་དང་བཤུད་གླུ་དང་ང་རོའི་སྒྲས་གཅན་གཟན་བསྐྲད་པར་བསྒོམ་མོ། །ལས་ཚོགས་བདུན་པའོ།། །།རི་ཉིལ་བ་དང་བྲག་ཞིག་པ་དང་ས་ལོག་ས་འགུལ་སོགས་འབྱུང་དོགས་ན། རང་ཨོ་རྒྱན་སེར་པོ་ཕྱག་གཉིས་ས་གནོན་མཛད་པ་ཞབས་རྡོ་རྗེའི་སྐྱིལ་ཀྲུང་གིས་ས་ཆ་དེ་ཁྱབ་པར་བསྒོམས་ནས་གསོལ་བ་བཏབ་པས། ཨོ་རྒྱན་
རིན་པོ་ཆེ་ལས་འོད་ཟེར་སེར་པོ་འཕྲོས་པས། ས་བདག་ལྟོ་འཕྱེ་དང་ལྷ་མོ་བརྟན་མ་དང་། ས་འཛིན་ལག་པ། ས་བདག་དབང་ཆེན། བློན་པོ་ཤྲཱི་བྷ་དྲ་ཐམས་ཅད་རང་དབང་མེད་པར་འདུས་ནས་ས་གཞི་མི་གཡོ་ཞིང་བརྟན་པའི་ཕྲིན་ལས་སྒྲུབ་པར་བསྒོམས་ལ་མཐར་ཨོ་རྒྱན་ས་ཆ་དེ་ལ་ཐིམ་པར་བསྒོམ་མོ། །མཁར་ཁང་འགྱེལ་དོགས་ནའང་དེ་བཞིན་དུ་ཨོ་རྒྱན་མཁར་ཁང་ལ་བསྟིམ་མོ། །ལམ་ངན་དང་གཡང་ས་ལ་འགྲོ་དུས་མི་ཕྱུགས་རྦབ་དོགས་ན། གཡང་སའི་ཐད་ཀྱི་བར་སྣང་ལ་ཨོ་རྒྱན་སྐུ་ཤིན་ཏུ་ཆེ་བ་ཕྱག་གཡས་སྐྱབས་སྦྱིན་གྱིས་གཡང་ས་དེ་རྭ་བའི་ཚུལ་དུ་གཡོར་བར་བསྒོམ་མོ། །དེ་དག་ནི་སའི་འཇིགས་པ་སེལ་བའོ། །གྲུ་ལོག་དོགས་པའམ། རབ་མི་ཆོད་དོགས་སམ། ཟམ་པ་ལས་བྲུལ་དོགས་སམ། བྲེང་ངམ་ལྕགས་ཐག་ཆད་དོགས་ན། ཆུའི་ཐད་བར་སྣང་ལ་ཨོ་རྒྱན་གཞུང་ལྟར་ལ་ཕྱག་གཡས་སྐྱབས་སྦྱིན་མཛད་པ། ཕྱག་སྐྱབས་སྦྱིན་དེས་ཆུའི་ཕར་ཀ་ཚུར་ཀ་ཐམས་ཅད་ཁེབས་པར་བསྒོམ། ཨོ་རྒྱན་གྱི་སྐུ་ལས་འོད་ཟེར་འཕྲོས་པས་ཆུ་བདག་ཀླུ་བདུད་ཀླུ་བཙན་ཐམས་ཅད་ལ་ཕོག་པས་སྔོན་གྱི་ཁས་བླངས་དྲན་ནས་གནོད་པ་མི་བྱེད་པར་ཆུ་ལས་སྒྲོལ་བའི་སྡོང་གྲོགས་
བྱེད་པར་བསམ། ཆུ་ལས་སྒྲོལ་ཚར་ནས་ཨོ་རྒྱན་རང་ལ་བསྟིམ་མོ། །སེར་བ་བཅས་ནས་བྱུང་ན་སེར་སྤྲིན་གྱི་དཀྱིལ་དུ་རྡོ་རྗེ་གྲོ་ལོད་བསྒོམ། སྐུ་ལས་མེ་འབར་བས་སེར་སྤྲིན་དེ་མེའི་ཕུང་པོར་གྱུར་པར་བསྒོམས་ལ་གསོལ་བ་བཏབ་པས་སེར་བ་ཞུའོ། །སེར་བ་རྒྱབ་བྱུང་ན་སེར་བའི་གདོང་ལ་རྡོ་རྗེ་གྲོ་ལོད་ཞལ་ཕར་གཟིགས་ནས་སྐུ་ལས་མེ་ཕུང་ཉྩ་འཚུབ་མ་བསྐལ་པའི་འཐོར་རླུང་ལྟ་བུས་སེར་བ་ཕར་བཟློག་པར་བསྒོམ། སྡིགས་མཛུབ་ཀྱིས་ཞིང་མེད་ས་ལ་སེར་ལམ་བསྟན་པར་བྱའོ། །ཤུ་འུད་ཀྱིས་ཡུལ་དང་ཞིང་ཁྱེར་དོགས་ན། །ཤཱའི་འུད་ཀྱི་སྣར་ཐོ་ཆེན་པོ་བརྩེགས་པའི་ནང་དུ་གནས་ཆེན་ཐམས་ཅད་ཀྱི་ས་སྣ་དང་། ཨོ་རྒྱན་གྱི་སྐུའམ་བཛྲ་གུ་རུ་རྡོ་ལ་བྲིས་ནས་བཞག །ཐོ་དེ་སེང་གེ་སྒྲ་སྒྲོག་བྱ་ཁྱུང་གི་དབུ་བརྒྱན་ཡནས་ཞལ་ཕར་གཟིགས་པར་བསྒོམ། རྔ་ཡབ་ནས་ཡེ་ཤེས་པ་དེ་འདྲ་བ་དཔག་ཏུ་མེད་པ་སྤྱན་དྲངས་ལ་བསྟིམ། བསམ་པ་ལྷུན་གྲུབ་མའི་གསོལ་འདེབས་བརྒྱའམ་ཉེར་གཅིག་འདོན་ནས་ཐོ་ལ་རབ་གནས་བྱའོ། །གལ་ཆེ་ན་རབ་གནས་ལོ་དུས་སུ་བསྐྱར། ཁ་ཆར་ཆེ་ནས་གནོད་ན། རང་གི་སྤྱི་བོར་ཨོ་རྒྱན་སྐུ་ལས་མེ་དཔུང་འབར་བར་བསྒོམ། ནམ་མཁའ་ཐམས་ཅད་
སྤྲུལ་པའི་མེའི་བྱ་ཁྱུང་གིས་གང་བ། ས་གཞི་ཐམས་ཅད་ལྕགས་སྲེག་གི་རང་བཞིན། དབུས་ཀྱི་རི་བོ་མཆོག་རབ་ལ་མེ་མར་མེའི་སྡོང་བུ་ལྟར་འབར་བ། ཨོ་རྒྱན་གྱི་སྐུའི་འོད་ཟེར་ཕོག་པས་སྣང་སྲིད་སྡེ་བརྒྱད་ཀྱི་ཁ་སྣ་མིག་རྣ་བ་རྣམས་ནས་མེ་དཔུང་འུ་རུ་རུ་འབར་བ། ཀླུ་ཐམས་ཅད་རྒྱ་མཚོའི་གཏིང་དུ་བྲོས་པར་བསྒོམས་ལ་གསོལ་བ་བཏབ་བོ། །དེས་ནི་ཆུའི་འཇིགས་པ་སེལ་བའོ། །མཁར་ཁང་གྲོང་ཁྱེར་ནགས་ཚལ་སོགས་ལ་མེའི་མཆེད་དམ་མཆེད་དོགས་ན། དེའི་ནམ་མཁའ་ལ་ཨོ་རྒྱན་སྐུ་མདོག་སྔོན་པོ་ཕྱག་གཡས་སྐྱབས་སྦྱིན་དང་གཡོན་བུམ་པ་ཅན་གྱི་སྐུ་ལས་ཆུའི་རྒྱུན་ཆུ་བོ་གངྒཱ་ཙམ་བབས་པས་མེ་བསད་པར་བསྒོམ། མེ་མཆེད་དོགས་ཡིན་ན་ཆུའི་བཅུད་དེ་དག་མཁར་ཁང་གང་ཡིན་པ་དེ་ལ་ཐིམ་པར་བསྒོམ། ནགས་ཚལ་གྱི་མེ་བཤོལ་ན་ཨོ་རྒྱན་གྱི་སྐུའི་འོད་ཟེར་གྱིས་ཀླུ་དང་ཡུལ་ལྷ་ཐམས་ཅད་རང་དབང་མེད་པར་བསྐུལ་ནས་ཁ་ཆར་ཆེན་པོ་འབེབས་པར་བསྒོམ། ཐན་པ་ཆེན་པོས་ས་ཚིག་ན་ཨོ་རྒྱན་གྱི་སྐུའི་འོད་ཟེར་གྱིས་རྒྱ་མཚོ་ཆེན་པོའི་ཀླུ་རྣམས་རང་དབང་མེད་པ་བསྐུལ་ནས་ཀླུ་རེ་རེའི་ཀྱང་ཆུའི་རྐྱལ་པ་སྟོང་ཕྲག་མང་པོ་ཐོགས་ནས་བར་སྣང་ཁམས་སུ་སྤྲིན་གྱི་རྟ་ལ་ཞོན་ནས་ཆུ་བོའི་རྒྱུན་གྱིས་
འཛམ་བུའི་གླིང་སྔོ་ལྟེམ་མེ་གང་བར་བསམ། ཨོ་རྒྱན་གྱི་བ་སྤུའི་བུ་ག་ནས་ཀྱང་ཆུ་བོའི་རྒྱུན་ཤིང་རྟའི་འཕང་ལོ་ཙམ་བབས་པས་རྩྭ་སྔོ་ཐམས་ཅད་སྔོ་ལྷུབ་ལྷུབ་སྐྱེ་བར་བསམས་ལ་གསོལ་བ་བཏབ་བོ། །མེའི་འཇིགས་པ་སེལ་བའོ། །རླུང་ཐོག་གིས་མཁར་ཁང་འགྱེལ་དོགས་པ་དང་། སྤྲིན་རླུང་གིས་གཏོར་ནས་ཆར་མི་བབ་ན། ཨོ་རྒྱན་གསེར་གྱི་མདོག་ཅན་ཞལ་ནུབ་བྱང་དུ་གཟིགས་པ། སྐུ་རི་རབ་ཙམ་ཕྱག་གཉིས་མཉམ་བཞག་ཅན་གྱི་སྐུ་ལས་འོད་ཟེར་འཕྲོས་པས། ནུབ་བྱང་མཚམས་ནས་རླུང་ལྷ་སྔོན་པོ་ཤ་བ་ཞོན་པ་ལག་ཏུ་རླུང་གི་བ་དན་བསྒྲིལ་ནས་འཛིན་པ་ཞིག་རང་དབང་མེད་པར་བཀུག་ནས་ཨོ་རྒྱན་གྱི་གདན་ཞབས་སུ་ཚུད་པས་རླུང་ལྷའི་བ་དན་ཆག །ཤ་བའི་རྐང་པ་ཆག་ནས་གདན་ཞབས་སུ་འགུལ་འཆུག་མེད་པར་མནན་པར་བསྒོམས་ལ་གསོལ་བ་འདེབས། སད་འབྱུང་དོགས་ན་ཨོ་རྒྱན་གྱི་སྐུའི་འོད་ཟེར་གྱིས་ཀླུ་ཐམས་ཅད་རང་དབང་མེད་པར་བསྐུལ་ནས། ཀླུ་དང་ཡུལ་ལྷ་ཐམས་ཅད་ཀྱི་དབང་པོའི་སྒོ་ལྔ་ནས་སྤྲིན་དང་ན་བུན་སྨུག་ཞོད་ཕྱུ་རུ་རུ་བྱུང་། ནམ་མཁའ་ཐམས་ཅད་མཁའ་འགྲོ་མའི་ཚོགས་ལག་ན་སྤྲིན་གྱི་རྔ་ཡབ་འཛིན་པས་གང་བར་བསྒོམས་ལ་གསོལ་བ་
བཏབ་བོ། །དེ་དག་ནི་རླུང་གི་འཇིགས་པ་སེལ་བའོ། །འབྱུང་བཞིའི་དམིགས་པ་སྣ་ཁ་མང་ཡང་གཅིག་ཏུ་བསྡུས་ནས། ལས་ཚོགས་བརྒྱད་པའོ།། །།ཆོམ་རྐུན་ཡོད་སར་འགྲོའམ་ཚུར་འོང་དོགས་ན། སྤྱི་བོར་ཨོ་རྒྱན་ཕྱག་གཡས་སྐྱབས་སྦྱིན་ཅན་བསྒོམ། སྐུ་ལས་འོད་ཟེར་འཕྲོས་པས་དུར་ཁྲོད་ཀྱི་གནས་ཐམས་ཅད་ནས་དུར་ཁྲོད་ཀྱི་བདག་པོ་དང་བདག་མོ་ཀེང་རུས་ཀྱི་གཟུགས་ཅན་ལག་ན་ལྕགས་ཀྱུ་དང་ཞགས་པ་ལྕགས་སྒྲོག་དྲིལ་བུ་འཛིན་པ་དཔག་ཏུ་མེད་པ་དང་། རི་རབ་ཀྱི་རྩེ་དང་རྒྱ་གར་མྱ་ངན་མེད་པའི་ཤིང་དྲུང་ནས། ལྷ་མོ་འོད་ཟེར་ཅན་མ་སེར་མོ་ཕག་ལ་ཆིབས་པ། ལག་ན་ཁབ་དང་སྐུད་པ་འཛིན་པ་དཔག་ཏུ་མེད་པ་བུ་ཡུག་འཚུབ་པ་བཞིན་བྱུང་ནས། ཇག་རྐུན་ཐམས་ཅད་ལྕགས་ཀྱུས་སྙིང་ནས་བཟུང་བ། འགུལ་དབང་མེད་པར་ཞགས་པས་བཅིངས། ལྕགས་སྒྲོག་གིས་བསྡམས། དྲིལ་བུའི་སྒྲ་ཡིས་ཡིད་མྱོས་ཏེ་དྲན་མེད་དུ་གྱུར། ཁབ་དང་སྐུད་པས་ཁ་དང་མིག་བཙེམས་པར་བསྒོམས་ལ་གསོལ་བ་བཏབ་བོ། །ལས་ཚོགས་དགུ་པའོ།། །།མཚོན་ཆའི་འཇིགས་པ་སྲུང་བ་ནི། རང་ཉིད་སེང་གེ་སྒྲ་སྒྲོག་མཐིང་ནག་ཁྲོ་བོའི་སྐུ། ཕྱག་གཡས་རྡོ་རྗེ་
གསོར་ཞིང་གཡོན་སྡིགས་མཛུབ་ཀྱི་རྩེ་ལས་མེ་འབར་བ། ཐུགས་ཉི་ཟླའི་གའུ་ཁ་སྦྱོར་གྱི་བར་དུ་མི་རྟ་བསྲུང་བྱ་རྣམས་ཚུད་པར་བསྒོམ། རང་གི་སྤྱི་བོར་ཨོ་རྒྱན་ཆོས་གོས་པད་ཞྭ། ཕྱག་གཡས་རྡོ་རྗེ་དང་བཅས་པའི་སྐྱབས་སྦྱིན་གྱིས་བདག་ལ་སྐྱོབ་པའི་ཚུལ་དུ་བསྒོམ། རྔ་ཡབ་ནས་དེ་འདྲ་བ་སྤྱན་དྲངས་ནས་རང་དང་སྤྱི་བོའི་ཨོ་རྒྱན་གཉིས་ཀ་ལ་བསྟིམས་ནས། བསམ་པ་ལྷུན་གྲུབ་མའི་གསོལ་བ་བཏབ་པས། ཕྱག་གཡས་རྡོ་རྗེ་ལས་རྡོ་རྗེ་ཕྲ་མོ་གྲངས་མེད་པ་མང་པོ་འཕྲོས་པས་བདག་གི་མགོ་ལུས་ཐམས་ཅད་རྡོ་རྗེའི་གོ་ཁྲབ་ཞུ་ལུབས་སུ་གྱུར། ཕྱག་གཡས་རྡོ་རྗེ་ལས་རྡོ་རྗེ་ཕ་ལམ་ལས་གྲུབ་པའི་རྡོ་རྗེ་ཆེན་པོའི་ཚོགས་འཕྲོས་པས་ཕྱོགས་མཚམས་ཐམས་ཅད་རྡོ་རྗེའི་ར་བ་ཟླུམ་པོའི་སྟེང་རྡོ་རྗེའི་གུར། ས་དེ་ནི་རྡོ་རྗེའི་ལྟེ་བ་ལྟ་བུར་གྱུར་པའི་ཕྱོགས་བཞིར་རྡོ་རྗེའི་ར་ཁ་གདེངས་པའི་རྡོ་རྗེའི་རྩེ་མོ་བཞི་སྐྱེས་པའི་རྡོ་རྗེ་རྒྱ་གྲམ་གྱི་ལྟེ་བའི་ནང་དུ་རང་ཉིད་ཚུད་ནས་རྡོ་རྗེའི་རྩེ་མོ་ལས་བསྐལ་པའི་མེ་ཕུང་དམྱལ་བའི་མེའི་ཚ་ངར་དང་ལྡན་པ་འུར་སྒྲ་དང་བཅས་མཆེད་ཅིང་འབར་བས་དགྲ་ཡི་མཚོན་ཐམས་ཅད་ཞ་ཉེ་མེས་བསྲེགས་པ་ལྟ་བུར་ནུས་མེད་དུ་སོང་བར་བསྒོམ་མོ། །འདི་ནི་གོང་ནས་ཡུན་རིང་
དུ་བསྒོམ་ཞིང་གསོལ་བ་བཏབ། དགོས་དུས་དམིགས་པ་གསལ་བར་བསྒོམས་ནས་གསོལ་བ་འདེབས་ལོངས་མ་བྱུང་ན་ཡང་། ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ ཞེས་པ་ཁོ་ན་སྔགས་འདོན་པ་ལྟར་བྱའོ། །དེས་རབ་མཚོན་མི་འཁོར། འབྲིང་མི་ཟུག །ཐ་མ་ཡང་ཉེས་ཞབས་མི་འགྲོ་བར་ངེས་ཏེ། ལས་ཀྱི་རྣམ་པར་སྨིན་པ་ནི་མ་གཏོགས་སོ། ལས་ཚོགས་བཅུ་པའོ།། །།དེ་ནས་དུས་ནམ་ཞིག་རང་ཉིད་འཆི་ནད་ཕོག་པར་གྱུར་པ་ན། ལན་གསུམ་དུ་རིམ་གྲོ་དང་སྨན་སོགས་ཐབས་གང་དྲག་བྱ། དེ་མ་བྱས་ན་ལུས་ལྷ་བསད་པའི་ཉེས་པ་འབྱུང་བའི་ཕྱིར་འཕོ་བ་བསྒོམ་མི་རུང་། ཅིས་ཀྱང་མ་ཕན་འཆི་བའི་རྟགས་ཚང་ན། རང་གི་སྤྱི་བོར་ཁྲུ་གང་གི་སར་པདྨ་དང་ཟླ་བའི་གདན་ལ་ཨོ་རྒྱན་སྤྲུལ་སྐུ་པད་ཞྭ་ཆོས་གོས་ཅན་གཞུང་ལྟར་བསྒོམ། དེའི་ཐུགས་ཀར་ལོངས་སྐུ་ཐུགས་རྗེ་ཆེན་པོ་སྤྱན་རས་གཟིགས་དཀར་པོ་ཕྱག་བཞི་པ་གཞུང་ལྟར་བསྒོམ། དེའི་ཐུགས་ཀར་ཆོས་སྐུ་སྣང་བ་མཐའ་ཡས་འོད་དཔག་མེད་དམར་པོ་གཞུང་ལྟར་བསྒོམ། བདེ་བ་ཅན་དང་པོ་ཏ་ལ་དང་རྔ་ཡབ་གླིང་ནས་ཡེ་ཤེས་པ་སྤྱན་དྲངས་ལ་བསྟིམ། གཞན་ཡང་བླ་མ་ཡི་དམ་སངས་རྒྱས་བྱང་སེམས་རང་གི་
རེ་ལྟོས་ཡོད་ཚད་འབྲེལ་བ་ཐོབ་ཚད་ཐམས་ཅད་ཡིད་ཀྱིས་སྤྱན་དྲངས་ལ་བླ་མ་སྐུ་གསུམ་ལ་བསྟིམས་ནས། སྐྱབས་གནས་དཀོན་མཆོག་ཀུན་འདུས་ཀྱི་ངོ་བོར་བསྒོམས་ལ་རང་གིས་ནུས་ན་གསོལ་འདེབས་བསམ་པ་ལྷུན་གྲུབ་མ་འདོན། རང་གིས་མ་ནུས་ན་དམ་ཚིག་གཙང་ཞིང་སྐད་བདེ་བ་ཞིག་ལ་དབྱངས་དང་བཅས་པས་འདོན་བཅོལ། འདོན་རོགས་མེད་ན་རང་གི་ཡིད་ཀྱིས་གསོལ་བ་བཏབ་ནས། བདག་གི་ལུས་ཤ་ཁྲག་གི་ཕུང་པོ་འདི་ནམ་ཡང་འཇིག་པའི་ཆོས་ཅན་ཡིན། བདག་ཁོ་ན་མ་ཡིན། སངས་རྒྱས་བཅོམ་ལྡན་འདས་ནས་འཇག་མའི་སྲིན་བུ་ཡན་ཆད་འཆི་བའི་ཆོས་ཉིད་འདི་ལས་མ་འདས། ད་ནི་འཁོར་བ་འདིས་སུན། ལུས་འདི་བོར་མ་ཐག་ཏུ་ཨོ་རྒྱན་ཆོས་སྐུའི་ཞིང་ཁམས་བདེ་བ་ཅན་དུ་འགྲོ་ནས་ཨོ་རྒྱན་ཆོས་སྐུའི་ངོ་བོ་སངས་རྒྱས་སྣང་བ་མཐའ་ཡས་ལ་ཆོས་ཉན་ནས་སྟན་ཐོག་དེ་ལ་ས་བཅུ་ཐོབ་པ་ཞིག་བྱས་ནས་སྤྲུལ་པ་བྱེ་བ་ཕྲག་བརྒྱས་སེམས་ཅན་གྱི་དོན་བྱའོ་སྙམ་དུ་སེམས་བསྐྱེད། རང་གི་ལུས་དང་ལོངས་སྤྱོད་ཉེ་དུ་འཁོར་ཞིང་ཁང་དང་བཅས་པ་ཨོ་རྒྱན་རིན་པོ་ཆེ་བླ་མ་སྐུ་གསུམ་དེ་ལ་མཎྜལ་གཅིག་ཏུ་བསྡུས་ཏེ་ཡིད་ཀྱིས་ཕུལ་ནས་གང་ལའང་ཆགས་ཞེན་སྤུ་ཙམ་ཡང་མེད་
པར་བྱའོ། །འདི་ཐམས་ཅད་བདག་གིས་ཨོ་རྒྱན་ལ་ཕུལ་ཚར་བ་ཡིན་པས་ད་ནས་དོན་མེད། སུས་ཅི་བྱས་ཀྱང་རུང་སྙམ་དུ་བྱའོ། །དེ་ནས་ཨོ་རྒྱན་གྱི་སྐུ་ལས་ཧྲཱི༔ཡིག་མང་དུ་འཕྲོས་ཏེ། དམྱལ་བར་སྐྱེ་བའི་ལམ་སྒོ་འོག་སྒོ། ཡི་དྭགས་ཀྱི་ལམ་ཁ། དུད་འགྲོའི་ལམ་གསང་གནས། ལྷ་མ་ཡིན་དང་གྲུལ་བུམ་གྱི་སྐྱེ་བའི་སྒོ་རྣ་བ་གཉིས། གནོད་སྦྱིན་དུ་སྐྱེ་བའི་སྒོ་སྣ་བུག་གཡས། མིར་སྐྱེ་བའི་སྒོ་སྣ་བུག་གཡོན། འདོད་ཁམས་ཀྱི་ལྷར་སྐྱེ་བའི་སྒོ་ལྟ་བ། མིའི་རྒྱལ་པོར་སྐྱེ་བའི་སྒོ་མིག་གཡོན། གཟུགས་ཁམས་ལྷར་སྐྱེ་བའི་སྒོ་མིག་གཡས་དང་མཛོད་སྤུ། གཟུགས་མེད་ཁམས་སུ་སྐྱེ་བའི་ལམ་ཚངས་སྨེ་རྣམས་ཧི༔ཡིག་དམར་པོ་མེ་འབར་བ་རེ་རེས་བཀག་པར་བསྒོམ། རང་གི་ལུས་ཀྱི་དབུས་ན་རྩ་དབུ་མ་མདའ་སྨྱུག་འབྲིང་པོ་ཙམ་མར་སྣེ་ལྟེ་འོག་ན་ཕུག་རྡུགས་སུ་ཡོད་པ། ཡར་སྣེ་སྤྱི་བོ་ཚངས་པའི་བུ་ག་རག་དུང་གི་ཁ་ལྟར་ཧད་པོར་ཡོད་པ། ལྟེ་དབུས་སུ་དབུ་མའི་ནང་དུ་མ་ལས་ཐོབ་པའི་རཀྟའི་ངོ་བོ་པདྨ་དམར་པོ་འདབ་མ་བརྒྱད་པ་སེན་མོ་ཙམ་པ། དེའི་སྟེང་དུ་རང་གི་སེམས་ཉིད་ཀྱི་ངོ་བོ་རླུང་སེམས་ཐམས་ཅད་གཅིག་ཏུ་འདུས་པའི་དྭངས་མ། ཐིག་ལེ་དཀར་པོ་སྣུམ་ལ་འདྲིལ་བ་འོད་
དང་བཅས་པ་སྲན་མ་ཙམ་པ་ཞིག་བསྒོམ། ཧིཀ་བདུན་བརྗོད་པས་ཐིག་ལེ་དེ་སྙིང་གར་འཕར། ཡང་བདུན་བརྗོད་པས་མགྲིན་པར་འཕར། ཡང་བདུན་བརྗོད་པས་སྤྱི་བོར་འཕར། ཡང་བདུན་བརྗོད་པས་སྤྱི་བོ་ནས་ཨོ་རྒྱན་བླ་མ་སྐུ་གསུམ་ཐུགས་ཀར་སིབ་སིབ་ཐིམ་པར་བསྒོམ། དམིགས་པ་དེ་དབུགས་མ་སོང་བར་དུ་རང་གིས་བསྒོམ། འཆི་ཁར་ཡིད་མི་གསལ་ན་རོགས་གཅིག་གིས་ཡང་ཡང་གསལ་འདེབས་བྱའོ། །རྟགས་ནི་སྤྱི་བོ་སྐྲངས་པ་དང་། སྤྱི་བོ་ནས་རླངས་པ་འཐུལ་བ་དང་། ཁྲག་དང་ཆུ་སེར་ཐོན་པ་དང་། དྲོད་སྤྱི་བོར་འདུས་པ་དང་། སྤྱི་བོར་ཀག་སྒྲ་གྲག་པ་དང་། སྐྲ་ཁོལ་བུར་བྱི་བ་ནང་རྟགས་ཡིན། རུས་པ་ལ་སྐུ་དང་ཡིག་འབྲུ་བྱོན་པ་གསང་བའི་རྟགས་ཡིན། མཁའ་ལ་འཇའ་ཚོན་ཤར་བ་ཕྱི་རྟགས་ཏེ་རྟགས་གསུམ་ཚང་ན་ངེས་པར་ཐེབས་རྟགས་སོ། །འདི་ནི་སྡིག་པོ་ཆེ་བཙན་ཐབས་སུ་སངས་རྒྱས་པའི་གདམས་ངག་སྟེ། འཕོ་བ་ཐེབས་ན་སྡིག་པོ་ཆེ་ཡིན་ཀྱང་སྡིག་པས་མི་གོས་པར་དག་པའི་ཞིང་དུ་སྐྱེ་བ་གསང་སྔགས་ཀྱི་ཉེ་ལམ་ཡིན་པར་གསུངས་སོ། །ཚེ་འདིར་སེམས་ངོ་ལེགས་པ་རང་ཡིད་ཆེས་པར་བསྲུང་རྒྱུ་ཡོད་ནས་ཐུགས་དམ་ལ་འདུག་འདོད་ན།
རང་ལུས་སྤྲུལ་སྐུ་ཨོ་རྒྱན་གཞུང་ལྟར་བསྒོམ། དེའི་ཐུགས་ཀར་རང་གི་སྙིང་དེ་ལོངས་སྐུ་ཚེ་དཔག་མེད་ཡབ་ཡུམ་བསྒོམ། དེའི་ཐུགས་ཀར་རང་གི་སེམས་དེ་ཆོས་སྐུ་རྡོ་རྗེ་འཆང་ཡབ་ཡུམ་བསྒོམ། རྡོ་རྗེ་འཆང་གི་ཐུགས་ཀར་ཟླ་བའི་སྟེང་དུ་ཧཱུྃ་མཐིང་ནག་འོད་ཟེར་དང་བཅས་པ་བསྒོམ། རྔ་ཡབ་དང་བདེ་བ་ཅན་དང་འོག་མིན་ནས་གུ་རུ་སྐུ་གསུམ་སྤྱན་དྲངས་རང་ལ་བསྟིམ། བསམ་པ་ལྷུན་གྲུབ་མ་རང་གིས་འདོན་ནམ་རོགས་ལ་འདོན་བཅུག །དེ་ནས་འཆི་ལ་ཁད་བྱུང་ཙ་ན། རང་ལུས་ཨོ་རྒྱན་དེ་འོད་དུ་ཞུ་ནས་ཐུགས་ཀའི་ལོངས་སྐུ་ལ་ཐིམ། ལོངས་སྐུ་འོད་དུ་ཞུ་ནས་ཆོས་སྐུ་རྡོ་རྗེ་འཆང་ལ་ཐིམ། དེའི་ཐུགས་ཀའི་ཧཱུཾ་ལ་ཐིམ་ཧཱུྃ་གྱེན་རྫོགས་སུ་ཡལ་ནས་སྟོང་པ་ཉིད་དུ་བསྒོམས་ལ། སེམས་ལ་འཁྲུལ་སྣང་དང་འཇིགས་སྐྲག་ཅི་བྱུང་ན་ཡང་། སེམས་ཁོ་རང་ཡིན་གྱི་ལོགས་ནས་ཅིའང་ཤར་རྒྱུ་མེད་པས། གང་ཤར་དེའི་ངོ་བོ་ལ་ཧྲིག་གེར་བལྟས་པས་སྟོང་ཉིད་འོད་གསལ་དུ་འཆར་རོ། །འབྱུང་བཞིའི་ཐིམ་རིམ་དཀར་ལམ་ཟླ་བ་ཤར་འདྲ། དམར་ལམ་ཉི་མ་ཤར་འདྲ། ནག་ལམ་མུན་པ་རུབ་འདྲ་ཅི་ཤར་ཡང་སོ་སོར་ངོས་བཟུང་མི་དགོས། གང་ཤར་དེ་ཉིད་ཀྱི་ངོ་བོ་ལ་བལྟས་པས་སྟོང་པ་ཉིད་དུ་འཆར་རོ། །
དེ་ནས་གཞིའི་འོད་གསལ་སྤྲིན་ཐག་ཆད་པའི་ནམ་མཁའ་ལྟ་བུ་འཆར་དུས་མི་ངོ་ཤེས་པ་འཕྲད་པ་ལྟར་ངོ་ཟིན་ནས་དེའི་ངང་དུ་གནས་པ་ལ་འོད་གསལ་ཟིན་ནས་ཐུགས་དམ་ཟིན་པ་ཟེར་རོ། །དེ་ཡང་ཕྱི་དབུགས་ཆད་མ་ཐག་ཏུ་གདུང་ཆས་ལེགས་པར་བྱས་ལ། བླ་མའམ་མཆེད་གྲོགས་ཞིག་གིས། འདི་ལྟར་མིག་གི་ཡུལ་དུ་སྣང་བ་ཡི༔ ཞེས་པ་ནས། བར་དུ་འོད་གསལ་རང་ངོ་ཤེས་པ་དང་༔ ཞེས་སོགས། ངོ་སྤྲོད་ཚིག་འབྲུ་ཉེར་གཅིག་པ་དེ་དབྱངས་དང་བཅས་སྐད་སྙན་པོས་ལན་གསུམ་མམ་བདུན་བརྗོད་པས། ཤ་བཀྲག་བཟང་ཞིང་བཞིན་འཛུམ་པ་འདྲ་བ་བག་ཆགས་པ་འོང་། དྲུང་དེར་སེམས་ངོ་སྐྱོང་ཤེས་མཁན་བསྡད་ན་ཉམས་རྟོགས་བཟང་པོ་སྐྱེ་བ་ནང་རྟགས་སོ། །ཤི་དུས་དང་བསྲེགས་དུས་ནམ་མཁར་སྤྲིན་མེད་པར་དྭངས་ཤིང་རླུང་མེད་པ་དང་། སྟོན་ཀ་སྤྲིན་མེད་ཀྱང་རྨུགས་དྲོ་བས་སད་མི་འབྱུང་བ་ཕྱིའི་རྟགས། བསྲེགས་པ་ན་ཨ་ཡིག་ཧཱུྃ་ཡིག་རིང་བསྲེལ་ཐུགས་མ་ཚིག་པ་འབྱོན་པ་གསང་རྟགས་ཏེ། རྟགས་གསུམ་ཚང་ན་ངེས་པར་འོད་གསལ་ཟིན་པའོ། །ལས་ཚོགས་བཅུ་གཅིག་པའོ།། །།དེ་ལྟར་འཕོ་བ་ཐེབ་པ་དང་འོད་གསལ་ཞག་བདུན་ཕན་
བཞུགས་ན་བར་དོ་མེད་པ་ཡར་གྱི་ཟང་ཐལ་ཡིན། མཚམས་མེད་པ་བྱས་པའི་སྡིག་པོ་ཆེ་འཕོ་བ་མ་ཐེབ་ན་བར་དོར་བགྲོད་ལོང་མེད་པ་མར་གྱི་ཟང་ཐལ་ཡིན། དེ་མིན་ཐམས་ཅད་བར་དོ་བགྲོད་དགོས་པས། ཞི་བའི་ལྷ་ཚོགས་སྐུ་གཟི་བརྗིད་ཉི་མ་སྟོང་དུས་གཅིག་ལ་ཤར་བ་ལྟར་བལྟ་བས་མི་བཟོད་པ་དང་། ཁྲོ་བོའི་སྐུ་འཇིགས་སུ་རུང་བས་སོད་སོད་རྒྱོབ་རྒྱོབ་ཟེར་བ་དང་། འབྱུང་བ་བཞིའི་རླུང་ལོག་པའི་སྒྲ་རི་བོ་སྟོང་ཉིལ་བ་ལྟ་བུ། རྒྱ་མཚོ་སྟོང་འཁྲུགས་པ་ལྟ་བུ། འཇིག་རྟེན་ཐམས་ཅད་ལ་མེ་མཆེད་པ་ལྟ་བུའི་འུར་སྒྲ། འབྲུག་སྟོང་དུས་གཅིག་ལ་གྲག་པ་ལྟ་བུའི་སྒྲ་རྣམས་ཀྱིས་ཀླད་ཁྲག་འགས་སྣང་བྱེད། རེས་འགའ་གྲོགས་མེད་པར་བྱིས་པ་ཐང་སྟོང་དུ་བསྒྱུར་བ་ལྟ་བུ་དང་། རེས་འགའ་དམག་དང་གཅན་གཟན་ཁ་ཆར་མུན་རུབ་པ་ལྟ་བུ་དང་། ལས་ཀྱི་གཤིན་རྗེས་དེད་པའི་སྣང་བ་སོགས་འཁྲུལ་སྣང་ལ་འདི་མི་འཆར་བྱ་བ་མེད་པའི་ཆེ། འདི་ལྟར་མིག་གི་ཡུལ་དུ་སྣང་བ་ཡི༔ ཞེས་སོགས་ངོ་སྤྱོད་ཚིག་འབྲུ་ཉེར་གཅིག་པ་དེ་མ་བརྗེད་པར་ཐམས་ཅད་སྟོང་ཉིད་དུ་རོ་སྙོམ་དགོས། གལ་ཏེ་སྟོང་ཉིད་ལ་གོམས་འདྲིས་ཆུང་ན། གཟུགས་ཐམས་ཅད་ཨོ་རྒྱན་གྱི་སྐུ། སྒྲ་ཐམས་ཅད་བཛྲ་གུ་རུ།
སེམས་ཀྱི་འཁྲུལ་རྟོགས་ཐམས་ཅད་སྟོང་ཉིད་ཆོས་སྐུའི་རང་རྩལ་ཡིན་སྙམ་ཞིང་། ཨོ་རྒྱན་ལ་གསོལ་བ་འདེབས། བསམ་པ་ལྷུན་གྲུབ་མ་འདོན་པས། འཁྲུལ་སྣང་ཐམས་ཅད་ཞི་ནས་ཨོ་རྒྱན་ཉིད་དངོས་སུ་བྱོན་ཏེ་དག་པའི་ཞིང་ཁམས་སུ་ཁྲིད་པར་ངེས་སོ། །དེ་ལྟར་ཐུགས་དམ་མ་ཟིན་འཕོ་བ་མ་ཐེབ་ན་ཡང་བར་དོ་ཆོད་ནས་གྲོལ་བའི་རྟགས་ལ། ཕུང་པོ་བསྲེག་པ་ན་ལྗགས་དང་སྤྱན་མ་ཚིག་པ། སྐུ་གཟུགས་ཡིག་འབྲུ་དུང་དཀར་ཕྱག་མཚན་སོགས་འབྱོན་ནོ། །རིང་བསྲེལ་ཁ་དོག་ལྔའམ་གང་རིགས་གཅིག །ནམ་མཁར་འཇའ་ཚོན་ཁ་དོག་སྣ་ཚོགས་དང་མེ་ཏོག་གི་ཆར་སོགས་འབྱུང་བར་གསུངས། གལ་ཏེ་བར་དོ་ཆོད་ནས་དག་པའི་ཞིང་དུ་མི་སྐྱེ་བར་མིར་སྐྱེས་ནས་འགྲོ་དོན་བྱེད་པའི་རྟགས་ནི། སྤྲིན་འཇའ་དཀར་པོ་ཤིང་ལོ་འདྲ་བ་དང་། མེ་ཏོག་གི་ཆར་ཅུང་ཟད་འབབས་པ་དང་། དབུ་བུམ་ཧྲིལ་དང་རིང་བསྲེལ་ཞིབ་བུ་ཅུང་ཟད་འབྱུང་བར་བཤད་དོ། །ལས་ཚོགས་བཅུ་གཉིས་པའོ།། །།ཡང་ཚེ་སྔོན་གྱི་ལས་སྒྲིབ་དང་། འཕྲལ་སྣང་བ་འདི་འབྲིད་མཁས། རིག་པ་འདི་ཅོལ་ཆུང་། འཁྲུལ་པ་འདི་ཞིག་དཀའ་བས། ཚེ་འདིའི་སྣང་བ་འདི་ལ་བདེན་
འཛིན་ཨ་འཐས་ཆེ་ན། སྤྱི་བོར་ཨོ་རྒྱན་གཞུང་ལྟར་བསྒོམ་ལ་གསོལ་བ་བཏབ། སྐུ་ལས་འོད་ཟེར་འཕྲོས་ཕྱི་ནང་སྣོད་བཅུད་དངོས་པོ་ཐམས་ཅད་ལ་ཕོག་པས་ནམ་མཁའི་འཇའ་དང་ཆུ་ནང་གི་ཟླ་བ་དང་། མེ་ལོང་ནང་གི་གཟུགས་བརྙན་ལྟར་སྣང་ལ་རང་བཞིན་མེད་པར་གྱུར་ཏེ་ཐམས་ཅད་བདེན་པར་མ་གྲུབ་པ་སྒྱུ་མ་རྨི་ལམ་ལྟ་བུ་ཡིན་སྙམ་དུ་ཡང་ཡང་བསྒོམ་པར་བྱའོ། །སྡུག་བསྔལ་བྱུང་བའམ། རླུང་ཤས་ཆེ་བའམ། གདོན་གྱིས་གནོད་པའི་བློ་མི་བདེ་བ་དང་། རིག་པ་མི་ནོན་པ་ལ། རང་གི་སྙིང་འདི་འོད་ཁ་དོག་སྣ་ལྔ་སྣལ་མ་ལྟ་བུས་དཀྲིས་ནི་ཡོད་པར་བསྒོམ། རང་གི་སྙིང་གི་ནང་དུ་ཨོ་རྒྱན་སྤྲུལ་སྐུ་གཞུང་ལྟར་ལ། ཕྱག་གཉིས་མཉམ་བཞག་གི་སྟེང་དུ་ཀ་པཱ་ལ་བསྣམས་ནས་ཞབས་རྡོ་རྗེའི་སྐྱིལ་ཀྲུང་ཅན་བསྒོམ། །ཡེ་ཤེས་པ་བསྟིམས་ནས་གསོལ་བ་བཏབ་པས། ཕྱག་གཡོན་བྷནྡྷའི་ནང་ཡི་གེ་བོ་ཡིག་དཀར་པོ་ལས་བདུད་རྩི་བབས་ནས། རང་གི་སྙིང་གའི་ནང་ཐམས་ཅད་ངང་ལྟེམ་གྱིས་གང་བར་བསྒོམས་པས་བློ་བདེའོ། །ཉལ་དུས་གཞོགས་གཡས་ས་ལ་ཕབ་ནས་རང་གི་སྙིང་གི་དཀྱིལ་དུ་ཨོ་རྒྱན་རིན་པོ་ཆེའི་སྐུ་མཐེ་བོང་ཙམ་མེ་ཤེལ་གྱི་མདོག་འོད་ཙེ་རེ་བ་ལ་སེམས་གཏད་ནས་
ཉལ་བས་འོད་གསལ་ཟིན་ནོ། །འོད་གསལ་ནི་གཉིད་མ་སོང་རྨི་ལམ་མ་རྨིས་ཀྱི་སྐབས་དེར་སེམས་ངོ་ཟིན་ན་དེའི་ངང་ལ་གནས་པ་དེ་འོད་གསལ་ཡིན་ནོ། །ཡང་མགྲིན་པར་པདྨ་འདབ་བཞིའི་དབུས་སུ་ཨོ་རྒྱན་སྐུ་ཚོན་གང་མེ་ཤེལ་མདོག་འོད་འབར་བ་ལ་སེམས་བཟུང་ནས་ཉལ་བས་རྨི་ལམ་ཟིན་ནོ། །རྨི་ལམ་ཟིན་པ་ནི་རྨི་ལམ་ཡིན་པར་ངོ་ཤེས་ནས་བསྐྱེད་རིམ་དང་རྫོགས་རིམ་སོགས་བསྒོམས་པས་ཉིན་ལྟར་གསལ་བར་འགྱུར། ཡང་འཕུར་ནས་ཞིང་ཁམས་དང་གནས་བཟང་པོ་རྣམས་ལ་བལྟ་བར་བྱའོ། །ཡང་ཟས་ཟ་འཐུང་དུས་སྣོད་ཡེ་ཤེས་ཀྱི་ཀ་པཱ་ལ། ཟས་དེ་ཡེ་ཤེས་ཀྱི་བདུད་རྩིར་བསྒོམས་ལ་ཨོཾ་ཨཱཿ༔ཧཱུྃ་གིས་བྱིན་གྱིས་བརླབས་ཏེ། རང་ཉིད་ཨོ་རྒྱན་བསྒོམ་པའི་དཔྲལ་བར་ཨོ་རྒྱན་དཀར་པོ། མགྲིན་པར་ཨོ་རྒྱན་དམར་པོ། སྙིང་གར་ཨོ་རྒྱན་སྔོན་པོ། ལྟེ་བར་ཨོ་རྒྱན་སེར་པོ། གསང་གནས་སུ་ཨོ་རྒྱན་ལྗང་གུ་སྟེ་ཨོ་རྒྱན་རིགས་ལྔ་ལ་མཆོད་པར་བསྒོམས་ལ། ཟ་འཐུང་བྱས་པས་དཀོར་སྒྲིབ་མི་འབྱུང་ཞིང་ཚོགས་རྫོགས་པར་འགྱུར་རོ། །འགྲོ་བའི་ཚེ་གཡས་ཕྱོགས་སུ་པདྨའི་སྡོང་པོའི་རྩེར། ཨོ་རྒྱན་རིན་པོ་ཆེ་ལ་སངས་རྒྱས་བྱང་སེམས་ཐམས་ཅད་ཀྱིས་བསྐོར་བར་བསྒོམས་
ལ། དེ་ལ་བསྐོར་བ་བྱེད་པའི་མོས་པས་འགྲོ་བར་བྱ་སྟེ། འགྲོ་འདུག་བསྐོར་བའི་གདམས་པའོ། །དེ་ལྟར་འཁྲུལ་པ་གཅོད་པའི་དམིགས་པ་དེ་ཐམས་ཅད་གཅིག་ཏུ་བརྩིས་ནས། ལས་ཚོགས་བཅུ་གསུམ་པའོ།། །།དེ་རྣམས་ཕལ་ཆེར་རང་དོན་ཡིན་པས། གཞན་དོན་མ་བྱས་ན་ཐེག་པ་ཆེན་པོའི་ལམ་དུ་མི་འགྱུར་བས། སྤྱི་བོར་ཨོ་རྒྱན་སྤྲུལ་སྐུ་གཞུང་ལྟར་བསྒོམས་ལ། གསོལ་འདེབས་བསམ་པ་ལྷུན་གྲུབ་མ་བཏོན་པས། ཨོ་རྒྱན་གྱི་དཔྲལ་བ་ནས་འོད་ཟེར་དཀར་པོ་འཕྲོས། དུད་འགྲོའི་འཇིག་རྟེན་འཐུག་པོ་བཀོད་པའི་ཞིང་ཁམས་སུ་བསྒྱུར་དུད་འགྲོ་ཐམས་ཅད་བུདྡྷ་ཐོད་ཕྲེང་རྩལ་ཨོ་རྒྱན་དཀར་པོའི་སྐུར་གྱུར། ཨོ་རྒྱན་གྱི་མགྲིན་པ་ནས་འོད་ཟེར་དམར་པོ་འཕྲོས། ཡི་དྭགས་ཀྱི་འཇིག་རྟེན་བདེ་བ་ཅན་གྱི་ཞིང་ཁམས་སུ་བསྒྱུར། ཡི་དྭགས་ཐམས་ཅད་པདྨ་ཐོད་ཕྲེང་རྩལ་ཨོ་རྒྱན་དམར་པོའི་སྐུར་གྱུར། ཨོརྒྱན་གྱི་ཐུགས་ཀ་ནས་འོད་ཟེར་མཐིང་ཀ་འཕྲོས། དམྱལ་བའི་འཇིག་རྟེན་མངོན་པར་དགའ་བའི་ཞིང་ཁམས་སུ་བསྒྱུར། དམྱལ་བའི་སེམས་ཅན་ཐམས་ཅད་བཛྲ་ཐོད་ཕྲེང་རྩལ་ཨོ་རྒྱན་མཐིང་ཀའི་སྐུ་ཤ་སྟག་ཏུ་གྱུར། ཨོ་རྒྱན་གྱི་ལྟེ་བ་ནས་འོད་ཟེར་སེར་པོ་འཕྲོས། ལྷ་
དང་མིའི་འཇིག་རྟེན་དཔལ་དང་ལྡན་པའི་ཞིང་ཁམས་སུ་བསྒྱུར། ལྷ་དང་མི་ཐམས་ཅད་རཏྣ་ཐོད་ཕྲེང་རྩལ་ཨོ་རྒྱན་སེར་པོའི་སྐུར་གྱུར། ཨོ་རྒྱན་གྱི་གསང་གནས་ནས་འོད་ཟེར་ལྗང་གུ་འཕྲོས། ལྷ་མ་ཡིན་གྱི་འཇིག་རྟེན་ལས་རབ་རྫོགས་པའི་ཞིང་ཁམས་སུ་བསྒྱུར། ལྷ་མ་ཡིན་ཐམས་ཅད་ཀརྨ་ཐོད་ཕྲེང་རྩལ་ཨོ་རྒྱན་ལྗང་གུ་སྐུ་ཤ་སྟག་ཏུ་གྱུར་ནས། འགྲོ་བ་རིགས་དྲུག་གི་གནས་སྟོངས་ནས་བཛྲ་གུ་རུ་འུར་དི་རི་རི་འདོན་པར་བསྒོམས་ནས་གསོལ་བ་བཏབ་བོ། རིགས་དྲུག་གི་གནས་སྦྱོང་བའི་དམིགས་པ་དང་ལས་ཚོགས་བཅུ་བཞི་པའོ།། །།དེ་ཡན་ཆད་ནི་ལེའུ་བདུན་པའི་དམིགས་རིམ་ཤིན་ཏུ་རྒྱས་པ་གབ་བསྐུང་མེད་པར་བཀོད་པ་ཡིན་ནོ། གལ་ཏེ་གང་ཟག་བློ་རྨོངས་པས་དམིགས་པ་དེ་རྣམས་སོ་སོར་མ་ཟིན་ནའང་། སྤྱི་བོར་ཨོ་རྒྱན་སྤྲུལ་སྐུ་གཞུང་ལྟར་བསྒོམས་ནས་ལེའུ་བདུན་པ་འདོན། མཐར་ཨོ་རྒྱན་རང་ལ་བསྟིམས་ནས་རང་གི་སེམས་ལ་སེམས་ཀྱིས་རྒྱུན་དུ་བྱ་ར་བྱས་ན་ཡང་དེས་འཐུས་སོ། །འདོན་ལུགས་གསོལ་འདེབས་རེ་རེས་དམིགས་པ་དང་བཅས་ཞག་བདུན་རེ་བྱས་ནས། ཞག་ཞེ་དགུར་གསོལ་འདེབས་བདུན་རྫོགས་པར་བྱས་ན་ཟབ། ཡང་ཉིན་ཞག་
གཅིག་ལ་ནམ་ལངས་སྔ་དྲོ་དགོང་ཆེན་ཉི་ཐལ་སྲོད་ནམ་ཕྱེད་ཐོ་རངས་བདུན་ལ་ཐུན་བཟུང་བའི་ཚུལ་དུ་ལེའུ་རེ་རེ་དམིགས་པ་དང་བཅས་པས་བཏོན་ནས་ཞག་གཅིག་ལ་ལེའུ་བདུན་ཀ་རྫོགས་པར་བྱས་ནའང་རུང་། ཡང་གདན་ཐོག་གཅིག་ཏུ་ལེའུ་བདུན་ཀ་འདོན་བསྒོམ་ཡང་རུང་། རབ་ལེའུ་བདུན་ཀ་ཞག་རེ་ལ་མ་ཆག་པ། འབྲིང་གསུམ་རེ་ཙམ་འདོན་རེས་བྱ། ཐ་མ་ཡང་ལེའུ་རེ་རེ་ཙམ་མ་ཆག་པར་གལ་ཆེའོ། །དེ་ལྟར་རྒྱུན་དུ་གསོལ་བ་བཏབ་པས་བྱིན་རླབས་ཞུགས་པའི་རྟགས་ནི། ཨོ་རྒྱན་རིན་པོ་ཆེ་ཉིད་ཀྱི་གསུངས་ལས། དྲོད་ཚད་རྟགས་ཀྱི་མཚན་མ་འདི་ལྟར་འབྱུང་། །རབ་ནི་ཞལ་མཐོང་དབང་བསྐུར་བྱིན་གྱིས་བརླབ། །ཐོད་རྔ་རྐང་གླིང་སྒྲ་སྒྲོག་ལུང་བསྟན་འབྱུང་། །ཞིང་སྐྱོང་མཁའ་འགྲོས་དངོས་སུ་གཏོར་མ་ལེན། །བཀའ་སྲུང་ཆོས་སྐྱོང་ཐམས་ཅད་སྤྲིན་ལྟར་འདུ། །སྣང་སྲིད་ལྷ་འདྲེ་ཀུན་གྱིས་སྲོག་སྙིང་ཕུལ། །གང་བརྩམས་ལས་རྣམས་ཐོགས་མེད་འགྲུབ་པར་འགྱུར། །འབྲིང་ནི་ཉམས་དགའ་བག་དྲོ་བྱིན་ཆེན་འཐིབ། །སྨན་རཀ་གཏོར་མ་ཁོལ་དང་རླངས་པ་འཕྱུར། །རང་ལུས་སྦྲིད་ཅིང་འཕར་འདར་རང་དབང་མེད། །དབེན་ཁང་སྤོས་དྲིས་གང་ཞིང་འཁོར་ལ་མཁའ་འགྲོ་འབེབས། །
ལེགས་ཉེས་སྨྲ་ཞིང་སྒྲ་སྐད་སྣ་ཚོགས་འབྱིན། །ཐ་མ་རྨི་ལམ་མཚན་མ་འདི་ལྟར་འབྱུང་། །ལུས་ལས་མི་གཙང་རྣག་ཁྲག་འབབས་པ་དང་། །ཁྲུས་བྱེད་ཆས་གོས་དཀར་པོ་གྱོན་པ་དང་། །ཉི་ཟླ་ཤར་དང་མེ་ཏོག་སྣ་ཚོགས་འཐུ། །རི་བོའི་རྩེར་འདུག་གླིང་གཞན་མཐོང་བ་སོགས། །ལས་ངན་སྒྲིབ་པ་དག་པའི་མཚན་མ་ཡིན། །མེ་ཏོག་ཆར་འབབས་བདུད་རྩིའི་རྫོངས་ལ་འཐུང་། །དར་ཕྱར་དུང་འབུད་ཆོས་འཆད་ཁྲི་ལ་འདུག །བུད་མེད་ཚོགས་ཀྱིས་ཕྱག་བྱེད་ཟས་ནོར་སྟེར། །དངོས་གྲུབ་བྱིན་རླབས་ཞུགས་པའི་མཚན་མ་ཡིན། །གོ་གྱོན་མཚོན་ཐོགས་དམག་ཆེན་ཁ་ལོ་སྒྱུར། །རི་ཀླུང་མེར་སྲེག་སེམས་ཅན་སྣ་ཚོགས་བསྒྲལ། །བཙན་པོའི་རྫོང་ཞུགས་ང་རྒྱལ་ཆ་སྒྲ་འདེབས། །བར་ཆད་བགེགས་ལས་རྒྱལ་བའི་མཚན་མ་ཡིན། །རྨི་ལམ་དག་ཏུ་བླ་མ་མཁའ་འགྲོའི་ཚོགས། །ཞལ་མཐོང་ཆོས་འཆད་ལུང་སྟོན་བྱེད་པ་དང་། །རང་ཉིད་རུས་རྒྱན་ཐོགས་ནས་ནམ་མཁར་འཕུར། །ལྷ་ཡི་གནས་སམ་ཨོ་རྒྱན་ཡུལ་དུ་ཕྱིན། །ཞིང་ཁམས་བཀོད་པ་ཁྱད་འཕགས་མཐོང་བ་ནི། །ཨོ་རྒྱན་པདྨ་འགྲུབ་པའི་མཚན་མ་ཡིན། །ཅེས་པ་དང་། བཟང་པོ་དགེ་བའི་མཚན་མ་ཅི་བྱུང་
ཡང་། །དགའ་བྲོད་རློམ་སེམས་འཁྲི་བ་རྩད་ནས་བཅད། །ངན་པའི་མཚན་མ་ལྟས་ངན་ཅི་བྱུང་ཡང་། །བག་ཆགས་འཁྲུལ་སྣང་ཡིན་པས་ལམ་དུ་ཁྱེར། །ཐམས་ཅད་སེམས་ལས་བྱུང་བས་སྤྲོས་པ་ཆོད། །སེམས་ཉིད་སྤྲོས་བྲལ་ཆོས་སྐུར་ལ་བཟླའོ། །ཞེས་གསུངས་ཤིང་། ཁྱད་པར་ལས་སྒྲིབ་ཆེ་ཆུང་གིས། །ཨོ་རྒྱན་པདྨ་ང་རང་དང་། །དངོས་ཉམས་རྨི་ལམ་དུ་ཡང་མཇལ། །ལུང་བསྟན་ཆོས་བཤད་བྱེད་པ་འོང་། །མཆོག་དང་ཐུན་མོང་དངོས་གྲུབ་ཐོབ། །མཁའ་འགྲོ་ལུས་དང་གྲིབ་བཞིན་འགྲོགས། །བར་ཆད་ཐམས་ཅད་སེལ་བར་བྱེད། །ཅེས་པ་དང་། ལྔ་བརྒྱ་དུས་ཀྱི་ཐ་མ་ལ། །དུས་སྙིགས་ཁྲིམས་ཞིག་བསྟན་པ་ཉམས། །ལྷ་སྲིན་སྡེ་བརྒྱད་ཁ་རྒྱལ་བས། །དྲེགས་ཅན་དམ་ལ་བཏགས་ཕྱིར་དུ། །ཕྱི་རབས་སྐྱེ་བོ་ཐ་མལ་དང་། །བོད་ཀྱི་བནྡེ་ནུས་ཆུང་དོན། །པདྨ་བདག་གི་སྒྲུབ་ཐབས་བསྟན། །ཞེས་དང་། རིག་འཛིན་སྔགས་འཆང་པདྨ་བདག་འདྲ་ཡི། །སྐུ་ལྔ་མཚན་བརྒྱད་རྣམ་ཐར་དཔག་མེད་ལ། །མ་འོངས་དུས་སུ་སྒྲུབ་ལུགས་དཔག་མེད་བརྩམས། །ཀུན་ཀྱང་ཡང་ཟབ་མཐར་ཐུག་གཞི་བརྩམས་ཏེ། །ཞེས་པ་དང་། ཨེ་མ་ཧོ། བདག་འདྲ་པདྨ་
འབྱུང་གནས་ངས། །རང་གི་སྒྲུབ་པ་རང་གིས་བརྩམས། །སུ་འཕྲད་བདེ་ཆེན་ཞིང་དུ་སྦྱོར། །ཅེས་དང་། ཚུལ་བཞིན་སྤྱོད་པས་རང་བཞིན་བདེ་ལ་འགོད། །མི་ལུས་དོན་ལྡན་ཡིན་ནོ་རིགས་ཀྱི་བུ། །འདི་ནི་རྗེས་འཇུག་སུ་དང་སུས་བསྒྲུབ་ཀྱང་། །རྔ་ཡབ་གནས་ནས་ཨོ་རྒྱན་པདྨ་ཡིས། །རྒྱུན་ཆད་མེད་པར་ཐུགས་རྗེས་མི་འཛིན་རེ། །ཐེ་%ཚོམ་མེད་པའི་དམ་ཚིག་གཙང་བར་གཅེས། །གསོལ་བ་ཐོབ་ཅིག་རྗེས་འཇུག་རིགས་ལྡན་རྣམས། །བུ་ལ་གདུང་བའི་མ་ལྟར་བདག་གིས་སྐྱོབ། །ཉམས་དང་རྨི་ལམ་དངོས་ཀྱི་ཚུལ་དུ་ཡང་། །ཚུལ་བཞིན་སྒྲུབ་པའི་བུ་དང་ཞལ་མཇལ་ནས། །ངོ་སྤྲོད་དབང་བསྐུར་ཆོས་འཆད་ལུང་ཡང་སྟོན། །བསླུས་ན་པད་འབྱུང་ཞན་ནོ་རྗེས་འཇུག་རྣམས། །ཞེས་དང་། དུས་བཟང་ཡར་ངོའི་ཚེས་པ་བཅུ་ཡི་དུས། །མཆོད་པ་བཤམས་ཤིང་མོས་གུས་གདུང་ཤུགས་ཀྱིས། །སྙིང་ཁོང་རུས་པའི་གཏིང་ནས་ང་ཉིད་ལ། །གསོལ་བ་བཏབ་ན་པདྨ་ང་ཉིད་ཀྱིས། །ཟངས་མདོག་དཔལ་གྱི་རི་བོའི་རྩེ་མོ་ནས། །ཁྱེའུ་ངུ་ལ་ཕ་མས་མི་བཟོད་ལྟར། །བརྩེ་སེམས་ལྡན་པས་དད་ལྡན་ཚོགས་ཁང་དུ། །སྤྲུལ་པ་སྣ་ཚོགས་དུ་མའི་ཆ་ལུགས་སུ། །སྤྲུལ་
ནས་འོང་བས་དེ་དོན་གོ་བར་གྱིས། །དེ་དུས་སྨོན་ལམ་གང་བཏབ་འགྲུབ་པ་དང་། །བྱིན་རླབས་ཞུགས་པའི་རྟགས་ནི་སྣ་ཚོགས་འབྱུང་། །ཁྱད་པར་བག་དྲོ་ཉམས་དགའ་ཤེས་པ་གསལ། །གླུ་གར་ཉམས་དང་བྲོ་ཡང་འཁྲབ་སྙིང་འདོད། །དད་ལྡན་འགའ་རེས་མངོན་སུམ་མཐོང་ཡང་སྲིད། །དེ་དུས་རྟོག་པ་མི་སྐྱིལ་ཅི་བདེར་མཛོད། །གཞན་ཡང་འཇའ་དང་འོད་དང་འོད་ཀོར་དང་། །སྒྲ་དང་འཇའ་རིས་རྣམ་པ་སྣ་ཚོགས་འབྱུང་། །དེ་དུས་པདྨ་ང་རུ་ཤེས་པར་གྱིས་ལ་སྨོན་ལམ་ཐོབ། །ང་དང་རིག་འཛིན་མཁའ་འགྲོའི་ཚོགས། །ཁྱད་པར་སྤྲེའུ་ཟླའི་ཚེས་བཅུ་ལ། །བོད་ཀྱི་རྒྱལ་ཁམས་ཡོངས་ལ་འོངས། །དམ་ཚིག་ལྡན་ཞིང་བསྒྲུབ་བརྩོན་ལ། །དངོས་གྲུབ་སྦྱིན་ཅིང་བར་ཆད་སེལ། །ཉམས་པ་ཅན་རྣམས་ལྟུང་བར་འགྱུར། །ཞེས་གསུངས་སོ། །རྩ་བའི་རྒྱུད་ཆེན་པོ་པད་སྡོང་བརྩེགས་པ་ལས། དབང་པོ་གསུམ་གྱི་ཁྱད་པར་ལས། །འདི་ཉིད་དང་ནི་བར་དོ་དང་། །གཅིག་གིས་བརྒྱུད་དེ་ས་ཆོད་ནས། །ཡང་དག་བསྟན་པ་མི་གཡོ་འགྱུར། །གདོས་བཅས་ཉིད་དང་བྲལ་བའི་ཚེ། །རྡུལ་བྲལ་མཁའ་ལ་འོད་ཟེར་འཇའ། །ཡིག་འབྲུ་སྐུ་གཟུགས་རིང་བསྲེལ་སོགས། །སྐུ་
གསུམ་ཐོབ་རྟགས་འབྱུང་བར་འགྱུར། །འབད་པ་དོན་ཡོད་གཅིག་ཆོག་ཉིད། །ཅེས་དང་། སྐུ་རྒྱུད་ཤེལ་གྱི་རི་བོ་ལས། གཞི་སྣང་དག་པ་ཆོས་ཀྱི་དབྱིངས། ལྷག་མེད་ཉིད་དུ་མྱ་ངན་འདའ། །སྒྲ་དང་འོད་དང་བཅས་ནས་སུ། །སྐུ་གསུམ་ཞིང་དུ་མངོན་འབྱུང་བ། །གདུལ་བྱ་རྣམས་ལ་ལྷག་མར་བཅས། །སྐུ་གདུང་རིང་བསྲེལ་བཞག་ནས་ཀྱང་། །གཞན་ཕན་ཐབས་ཀྱིས་འགྲོ་བ་རྣམས། །རིམ་གྱིས་འདྲེན་པར་དེས་བྱེད་དོ། །ཡང་མཐའ་བར་དོ་ཉིད་དུ་ཡང་། །རང་སྣང་ཡེ་ཤེས་ལྷ་དང་འཕྲད། །རང་ངོ་ཤེས་ནས་རྣམ་པར་གྲོལ། །དེ་ཡང་རྒྱུ་འབྲས་དེ་ཡིས་ཡིན། །སྤྲུལ་པ་ལས་ཀྱང་སྤྲུལ་དང་སྐུ། །སྐུ་དང་མཚན་དཔེས་རབ་སྤྱས་ཤིང་། །ལས་དག་ཞིང་ལ་རབ་སྣང་བས། །བྱང་ཆུབ་མངོན་དུ་དེ་འགྱུར་ཞིང་། །དེ་སོགས་པ་དང་ཡང་དག་ལྡན། །སྤྱི་ཕུད་ཉིད་དུ་གསལ་བར་བྱེད། །ཅེས་གསུངས་སོ། །དེ་རྣམས་ནི་ཨོ་རྒྱན་རིན་པོ་ཆེ་ལ་རྩེ་གཅིག་གསོལ་བ་བཏབ་པས་འདི་དང་ཕྱི་མར་རྟགས་འབྱུང་ཚུལ་ཡིན་ལ། ཕན་ཡོན་ལ་སྤྱི་བོར་བླ་མ་སངས་རྒྱས་ཀུན་འདུས་སུ་བསྒོམས་ནས་གསོལ་བ་བཏབ་པའི་ཕན་ཡོན་ནི། ཡེ་ཤེས་གསལ་བ་སྒྲོན་མེའི་རྒྱུད་ལས། །
མཚན་དང་དཔེ་བྱད་ལྡན་པའི་ལྷ། །བསྐལ་པ་འབུམ་དུ་བསྒོམ་པ་ལས། །བླ་མ་དྲན་པ་བསོད་ནམས་ཆེ། །ཞེས་དང་། དམ་ཚིག་བཀོད་པའི་རྒྱུད་ལས། མཚན་དང་དཔེ་བྱད་ལྡན་པའི་ལྷ། །བསྐལ་པ་འབུམ་དུ་བསྒོམས་པ་ཡིས། །བླ་མ་དྲན་པའི་འབུམ་ཆར་ཡིན། །ཅེས་དང་། ཡེ་ཤེས་རྒྱ་མཚོ་དམ་ཚིག་མཆོག་གི་རྒྱུད་ལས། སྤྱི་དང་སོ་སོར་དུས་རྟག་ཏུ། །བླ་མ་སྤྱི་བོར་སྒོམ་པའི་མི། །བསྐལ་པ་འབུམ་ཕྲག་སྟོང་ཉིད་དུ། །ཡི་དམ་བསྒོམ་པའི་བསོད་ནམས་ཀྱིས། །སྟོང་ཕྲག་གྲངས་མེད་ཆར་མི་ཕོད། །དེས་ན་བསྐལ་སྟོང་སངས་རྒྱས་པས། །བླ་མ་གཉན་པ་ཤེས་པར་བྱ། །ཞེས་དང་། ཨ་ཏི་བཀོད་པའི་རྒྱུད་ལས། དྲིན་དང་ལྡན་པའི་བླ་མ་དེ། །སྤྱི་བོའི་གཙུག་གམ་སྙིང་གི་དཀྱིལ། །ཡན་ལག་མཐིལ་དུ་སུས་བསྒོམ་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། །ཅེས་དང་། དཔལ་གསང་བ་འདུས་པའི་རྒྱུད་ལས། སློབ་དཔོན་སྙིང་གར་སུས་བསྒོམས་པས། །བྱང་ཆུབ་འདི་ཡིས་ཐོབ་འགྱུར་ཞིང་། །ངོ་མཚར་ཆེན་པོའི་དངོས་གྲུབ་ཡིན། །སྐུ་གསུང་ཐུགས་ནི་འགྲུབ་པར་འགྱུར། །ཅེས་དང་། དམ་ཚིག་བཀོད་
པ་རྒྱ་མཚོའི་རྒྱུད་ལས་། རྫོགས་པའི་རིམ་པ་བསྐལ་བའི་བར་དུ་ནི། །འདུ་འཛི་རྣམ་གཡེང་སྤངས་ནས་བསྒོམས་པ་བས། །བླ་མ་རང་གི་སེམས་དཀྱིལ་དུ། དར་གཅིག་ཤར་བ་ཙམ་གྱིས་ནི། །འབུམ་ཕྲག་ཉི་ཤུའི་ཆར་མི་ཕོད། །ཅེས་དང་། ཌཱཀི་གསང་མཛོད་ཀྱི་རྒྱུད་ལས་། ངེས་པར་སངས་རྒྱས་ཁོ་ན་ཡི། །འདུ་ཤེས་བླ་མ་ལ་བསྐྱེད་ནས། །མཆོག་གི་གོ་འཕང་འདིར་ཐོབ་ཀྱི། །ཐབས་གཞན་དམན་པའི་ལམ་ཡིན་ནོ། །དཔེར་ན་ཡིད་བཞིན་ནོར་བུ་བཞིན། །ལྷག་པའི་བསམ་པ་དག་པས་ནི། །དགོས་འདོད་ཐམས་ཅད་འབྱུང་བར་བྱེད། །ཅེས་དང་། འབྲས་བུ་བླ་ན་མེད་པའི་རྒྱུད་ཆེན་པོ་དྲི་མ་མེད་པའི་སྙིང་པོ་ལས། བླ་མ་སངས་རྒྱས་གང་བསྒྲུབ་པ། །དེ་ཉིད་མོས་གུས་སྟོབས་ལས་བྱུང་། །བླ་མ་དཀྱིལ་འཁོར་ཀུན་གྱི་གཙོ། །བདག་ཉིད་ཆེན་པོ་ལྷ་ཚོགས་ཡིན། །མཆོག་དང་ཐུན་མོང་དངོས་གྲུབ་ཀུན། །ཐམས་ཅད་བླ་མ་མཆོག་ལས་འབྱུང་། །དགོས་འདོད་འབྱུང་བའི་རིན་པོ་ཆེ། །གང་གིས་འབྲེལ་པ་དོན་དང་ལྡན། །ཅེས་དང་། རྒྱུད་ཆེན་པོ་དྲི་མ་མེད་པའི་སྙིང་པོ་ལས། བླ་མ་དག་ལ་མོས་གུས་མེད་གྱུར་ན། །བསྒྲུབས་ཀྱང་འགྲུབ་
པར་མི་འགྱུར་བས། །དེ་བས་གུས་པ་ཐམས་ཅད་ཀྱིས། །བླ་མའི་སྐུ་གསུང་ཐུགས་མཉེས་བྱ། །མོས་གུས་གང་ཡོད་རྒྱལ་བའི་སྲས། །གཉུག་མ་ལྷན་སྐྱེས་ཡེ་ཤེས་འཆར། །ཅེས་དང་། ཡིད་བཞིན་མཆོག་གི་རྒྱུད་ལས། རང་གི་བླ་མ་འདུན་པའི་ལྷ། །སྤྱི་བོའི་གཙུག་ཏུ་བསྒོམ་པ་ཡིས། །སངས་རྒྱས་དཀྱིལ་འཁོར་སྟོང་ཕྲག་ཉིད། །ལག་མཐིལ་བཞག་ནས་སྟོང་གསུམ་བསྐོར། །སྙིང་གར་ལན་གསུམ་བསྟིམས་བྱས་པས། །བརྒྱ་སྟོང་དུ་ཡང་ཆར་མི་ཕོད། །དེ་བས་རྟག་ཏུ་དྲན་པ་ཡིས། །སྤྱི་གཙུག་འཁོར་ལོའི་རྒྱན་ཉིད་དུ། །དཔལ་ལྡན་བླ་མ་བསམ་པར་བྱ། །ཞེས་དང་། ཌཱ་ཀི་གསང་མཛོད་རྒྱུད་ལས། ལྷ་ལ་བརྟན་པ་ཐོབ་པ་བས། །བླ་མ་ཡུད་ཙམ་དྲན་པ་མཆོག །གསལ་ལ་མི་རྟོག་བདེ་བ་དང་། །དབྱེར་མི་ཕྱེད་པ་དེ་ཉིད་ནི། །བླ་མ་བསྒོམ་པ་ཁོ་ན་ལས། །སྐྱེས་འགྱུར་གཞན་གྱིས་འགྲུབ་པར་དཀའ། །ནོར་བུ་རིན་ཆེན་འབར་བ་བཞིན། །མི་བརྗེད་མཆོག་གི་དངོས་གྲུབ་སྟེར། །ཅེས་དང་། དྲི་མེད་གསང་བའི་རྒྱུད་ལས། དཔལ་གྱི་གཙོ་བོའི་བླ་མ་ལས། །རིགས་ལྔ་ལྷ་དང་ལྷ་མོའི་ཚོགས། །ཞི་ཁྲོ་མ་ངེས་ཟག་པ་མེད། །བདེ་བའི་ལྷ་སྐུ་བླ་མེད་
འབྱུང་། །ཆོས་དབྱིངས་ངང་ལས་གསལ་བར་སྟོན། །ཅེས་དང་། སངས་རྒྱས་འདུས་པའི་རྒྱུད་ལས། གང་འདུལ་གདུལ་བྱའི་ཞིང་བཞིན་དུ། །བླ་མ་སྒྲུབ་པའི་ཐབས་བརྩམས་ཏེ། །དེ་ཉིད་དོན་དུ་སུས་གཉེར་བ། །ཐེག་ཆེན་བླ་མའི་ས་བོན་ཏེ། །ཀུན་གྱི་བདག་ཉིད་ཆེན་པོར་འགྱུར། །ཅེས་དང་། གསང་བ་འདུས་པའི་རྒྱུད་ལས། །བླ་མ་ལ་གུས་སློབ་མ་ཡིས། །སྒྲ་རིང་བ་དང་གསལ་བ་དང་། །སྐད་གསང་མཐོན་པོས་གསོལ་འདེབས་ན། །དེ་ལ་བདག་གིས་དངོས་གྲུབ་སྟེར། །ཅེས་དང་། ཡེ་ཤེས་རྒྱ་མཚོའི་རྒྱུད་ལས། བསྙེན་དང་སྒྲུབ་པ་བྱེད་པ་བས། །བླ་མའི་གསོལ་འདེབས་ལན་གཅིག་བརྗོད། །ནུས་པ་འབུམ་ཕྲག་ཆར་མི་ཕོད། །ཅེས་དང་། དགྲ་ནག་གི་རྒྱུད་ལས། ཆོས་སྐུའི་བླ་མའི་གཟུགས་སུ་བྱོན། །དེ་ལ་ཐེ་ཚོམ་མེད་པ་ཡི། །མཁས་པས་དེ་ལ་དངོས་གྲུབ་ཉེ། །ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །རྟོག་ཅིང་སྤྱོད་པའི་རྟོག་གེ་བ། །དེ་ལ་དངོས་གྲུབ་ཤིན་ཏུ་རིང་། །ཞེས་དང་། ཡེ་ཤེས་རྒྱ་མཚོའི་རྒྱུད་ལས། བླ་མའི་སྐུ་ཡི་དཀྱིལ་འཁོར་ལ། །དབང་བཞི་ཡོངས་སུ་རྫོགས་པར་ཞུས། །ས་
ལམ་ཐམས་ཅད་དེ་ཡིས་བགྲོད། །ཅེས་དང་། བླ་མ་སྐུ་གསུམ་བདེ་བ་ཆེན་པོའི་རྒྱུད་ལས། ཐོག་མའི་སངས་རྒྱས་བླ་མ་ལ། །རང་སེམས་སྐུ་གསུམ་སྨིན་པ་ཡི། །འདི་ལས་བྱིན་རླབས་རྗེས་གནང་ཞུ། །རབ་ཟབ་བླ་མའི་དབང་ཐོབ་ནས། །མྱུར་བ་ཉིད་དུ་མངོན་སངས་རྒྱས། །ཞེས་དང་། དམ་ཚིག་བཀོད་པའི་རྒྱུད་ལས། བསྙེན་སྒྲུབ་བཟླས་པ་ས་ཡ་བས། །བླ་མའི་གསོལ་འདེབས་ལན་གཅིག་དགའ། །ཞེས་དང་། ཡེ་ཤེས་མངོན་པར་བྱང་ཆུབ་པའི་རྒྱུད་ལས། ས་དང་ལམ་གྱི་རིམ་པ་རྣམས། །བླ་མའི་མོས་གུས་ལ་བཟླས་བློབགྲོད། །བླ་མའི་སྣང་བ་མི་འབྲལ་ན། །སངས་རྒྱས་རྣམས་དང་འབྲལ་བ་མེད། །ཅེས་དང་། ཆོས་སྐུ་ཡེ་ཤེས་མཁའ་འགྲོའི་གསུང་ལས། གསང་སྔགས་བསྙེན་སྒྲུབ་བྱིན་རླབས་ཀྱི་ལམ་ཡིན། བྱིན་རླབས་མོས་གུས་ཀྱི་ལམ་ཡིན། མོས་གུས་གསོལ་འདེབས་ལ་རགས་ལས་པ་ཡིན་པས། གསོལ་བ་འབར་ཐབས་སུ་ཐོབ་དང་། བྱིན་རླབས་སྙིང་གི་དཀྱིལ་དུ་འབབ་པ་ཞིག་འོང་བ་ཡིན། ཞེས་གསུངས། དེ་རྣམས་ནི་སྤྱིར་བླ་མ་མཚན་ཉིད་དང་ལྡན་པ་སུ་ལ་གསོལ་བ་བཏབ་ཀྱང་ཕན་ཡོན་དེ་རྣམས་འབྱུང་མོད། འོན་ཀྱང་ཕན་ཡོན་དེ་ཐམས་
ཅད་འབྱུང་ཞིང་བྱིན་རླབས་དངོས་གྲུབ་མྱུར་དུ་ཐོབ་འདོད་ན། གུ་རུ་པདྨ་འབྱུང་གནས་བསྒོམ་ཞིང་གསོལ་བ་བཏབ་པར་བྱ་སྟེ། གུ་རུ་ཉིད་ཀྱི་ཞལ་ནས། ཁྱད་པར་བྱིན་རླབས་དངོས་གྲུབ་མྱུར་འདོད་ན། །རྡོ་རྗེ་དྲག་རྩལ་པདྨ་ང་ཉིད་བསྒོམ། །དུས་གསུམ་སངས་རྒྱས་ཡོན་ཏན་བདག་ལ་རྫོགས། །རྒྱལ་བ་ཞི་ཁྲོ་གསང་སྔགས་ཕྱི་ནང་དང་། །དཔའ་བོ་མཁའ་འགྲོའི་བྱིན་རླབས་དངོས་གྲུབ་རྣམས། །ནོར་བུ་རིན་ཆེན་ཡོན་ཏན་ཀུན་ལྡན་ལྟར། །དེ་དག་ཐམས་ཅད་མ་ལུས་བདག་ལ་རྫོགས། །ང་ཉིད་དྲན་དང་བསྒོམ་པ་ཙམ་གྱིས་ཀྱང་། །རྒྱལ་བ་སྲས་བཅས་ཐུགས་རྗེས་བདག་ལ་གཟིགས། །གསང་སྔགས་ཕྱི་ནང་ལྷ་ཚོགས་ཐམས་ཅད་ཀྱིས། །དབང་བསྐུར་བྱིན་རླབས་དངོས་གྲུབ་སྟེར་བར་བྱེད། །མ་མོ་མཁའ་འགྲོའི་ཚོགས་རྣམས་སྤྲིན་ལྟར་འདུ། །བཀའ་སྲུང་ཆོས་སྐྱོང་ཐམས་ཅད་བྲན་ལྟར་ཉན། །སྣང་སྲིད་ལྷ་འདྲེ་ཐམས་ཅད་བཀའ་བཞིན་སྒྲུབ། །ཡོན་ཏན་ཐམས་ཅད་ང་ཉིད་བསྒོམས་པས་འབྱུང་། དངོས་གྲུབ་ཐམས་ཅད་ང་ཉིད་བསྒོམས་པས་འཐོབ། ཕྲིན་ལས་ཐམས་ཅད་ང་ཉིད་བསྒོམས་པས་འགྲུབ། །ཅེས་གསུངས་ཏེ། གུ་རུ་ཉིད་ཀྱི་སྒྲུབ་ཐབས་
མཛད་ནས་གནང་། སྒྲུབ་ཐབས་ལའང་ཆོས་ཚན་བཞིར་ཕྱེས་ནས། ཕྱི་གསོལ་འདེབས་ཀྱི་སྐོར། ནང་བྱིན་རླབས་ཀྱི་སྐོར། གསང་བ་དངོས་གྲུབ་ཀྱི་སྐོར། དྲག་པོ་ཕྲིན་ལས་ཀྱི་སྐོར་དང་བཞི་རུ་མཛད། ཅེས་འབྱུང་བའི་ནང་ནས་ལེའུ་བདུན་པ་འདི་ནི་ཕྱི་གསོལ་འདེབས་ཀྱི་སྐོར་ཡིན་ནོ། །སྤྱིར་དེང་སང་དུས་སྙིགས་མ་ལས་ཀྱང་ཆེར་སྙིགས་མར་གྱུར་པས། གསོལ་བ་བཏབ་པས་ཀྱང་རྟགས་དང་ཕན་ཡོན་བཤད་པ་ལྟར་དངོས་སུ་འབྱུང་དཀའ་དུས་ཡིན་ནའང་། དུས་ཇི་ཙམ་སྙིགས་བཞིན་དུ་ཨོ་རྒྱན་རིན་པོ་ཆེའི་བྱིན་རླབས་ཇེ་ཆེ་ཐུགས་རྗེ་ཇེ་མྱུར་དུ་འགྲོ་བར་གསུངས་པས། སྙིང་ཐག་པ་ནས་གསོལ་བ་འདེབས་མཁན་ཡོད་ན། བྱིན་རླབས་འབྱུང་ངེས་པར་གདའ་སྟེ། དུས་སྙིགས་མའི་དུས་དེང་སང་ཡང་། ཚོང་དཔོན་ཞིག་གིས་པདྨ་བཀའ་ཐང་བཞེངས་ནས་དྲེའུར་བཀལ་ཡོད་པ། ཇག་པས་རོགས་གཞན་གྱི་དྲེལ་དང་ཚོང་དཔོན་དེའི་དྲེལ་ཐམས་ཅད་དེད་ཤོར་བས། བཀའ་ཐང་བཀལ་བའི་དྲེལ་དེ་ཚུར་ལ་རྒྱུག་བྱུང་བས་དེ་མ་ཤོར་ཟེར་བ་དང་། ཡང་རྒན་མོ་གཉིས་ལ་བ་གཉིས་ཡོད་པས། རྒན་མོ་གཅིག་དེས་ལེའུ་བདུན་མ་དང་བཛྲ་གུ་རུ་ལ་ཐུགས་དམ་རྩེ་གཅིག་བྱེད་པ་ཡིན་པས། རྐུན་
མས་མཚན་ལ་བ་གཉིས་ཁྲིད་ནས་སོང་བ། རྒན་མོ་གཅིག་གིས་གྲོང་པ་ལ་ངག་བྱས་ནས་ཐམས་ཅད་རྒྱུགས་པས་མ་ལོན། རྒན་མོ་གཅིག་དེས་ཨོ་རྒྱན་ལ་གསོལ་བ་རྩེ་གཅིག་ཏུ་བཏབ་ནས་ཉལ་བསྡད་པས། ཕྱིར་ནངས་གསོལ་བ་འདེབས་མཁན་མའི་བ་དེས་བྲེང་ཞགས་གཅིག་ཁྱེར་ནས་ཁྱིམ་དུ་སླེབ་བྱུང་ཟེར་བ་དང་། ཇོ་མོ་རྒན་མོ་གཅིག་གི་ལེའུ་བདུན་མ་དང་བཛྲ་གུ་རུ་ལ་ཐུགས་དམ་རྩེ་གཅིག་ཏུ་བྱེད་ཅིང་། གྲོང་པ་དང་ཐག་རིང་བའི་རི་ཁྲོད་བཟུང་བ་ལ་དགོང་ཀ་ཆུ་ཁུར་ནས་ཚུར་འོང་བ་དང་ལམ་དུ་དྲེད་མོང་གཅིག་དང་ཏུག་གིས་ཐུག་པས། མིག་བཙུམས་ནས་ཨོ་རྒྱན་ལ་གསོལ་བ་བཏབ་ནས་ཁ་རོག་བསྡད་ཛ། དྲེད་མོང་དེས་མོའི་ཞྭ་ཡུ་ལ་ཁ་སྣ་གཏུགས་ནས་སྣོམ་སྟེ་གནོད་པ་མ་བྱས་པར་སོང་ཟེར་བ་དང་། བླ་མ་ཆེན་པོ་ཞིག་གིས་ལེའུ་བདུན་མ་ལ་ཐུགས་དམ་གཙོ་བོར་མཛད་པས། ནམ་མཁའི་འཇའ་གུར་ནང་ནས་དངོས་སུ་ཨོ་རྒྱན་ཞལ་གཟིགས་པ་དང་། ཀུན་གྱིས་མཐོང་བར་མེ་ཏོག་གི་ཆར་ལོ། ཆེན་བབས་ཟེར་བ་དང་། ཡང་བླ་དཔོན་ཆེན་པོ་གཅིག་གིས་གཡུལ་གཏུག་ཁར་ཕམ་དོགས་ནས་ཨོ་རྒྱན་ལ་གསོལ་བ་བཏབ་པས། མདུན་དུ་འཇའ་ཟུག་པའི་སྣ་ལ་ཨོ་རྒྱན་གཙོ་འཁོར་
གསུམ་ཞལ་གཟིགས་ནས་གཡུལ་ལས་རྒྱལ་ཟེར་བ་དང་། ལེའུ་བདུན་མ་དང་བཛྲ་གུ་རུ་ལ་ཐུགས་དམ་མཛད་པས་ཚེ་རིང་བ་དང་། གཟའ་ཀླུ་རྒྱལ་པོའི་ནད་ཡོད་པ་ལ་ཕན་པ་དང་། རྨི་ལམ་དུ་ཨོ་རྒྱན་རིན་པོ་ཆེ་མཇལ་ནས་དབང་དང་བྱིན་རླབས་གདམས་ངག་བདུད་རྩི་དངོས་གྲུབ་གནང་ཟེར་མཁན་མང་དུ་མཐོང་ཞིང་ཐོས་སོ། །དེ་ན་ཡིད་ཆེས་པར་བྱའོ། །ཨེ་མ་ཧོ། ལེའུ་བདུན་པའི་དམིགས་རིམ་རྒྱས་པ་འདི། །སྔོན་ཆད་ཡི་གེར་བཀོད་པ་མ་མཆིས་ཀྱང་། །འགྲོ་བ་སེམས་ཅན་རྣམས་ལ་ཕན་པའི་ཕྱིར། །རཱ་ག་ཨ་སྱ་བདག་གིས་ཡི་གེར་བཀོད། །སྙན་བརྒྱུད་ཟབ་མོ་ཡི་གེར་བཀོད་པ་ལ། །ཆོས་བདག་ཊཱཀིས་ཀོ་ལོང་མི་མཛད་གསོལ། །འདི་ལ་འགལ་འཁྲུལ་ཉེས་པ་མཆིས་སྲིད་ན། །པད་འབྱུང་རྩ་བ་གསུམ་གྱི་ལྷ་ལ་བཤགས། །འདི་བྲིས་དགེ་བས་བདག་དང་སེམས་ཅན་ཀུན། །སྐུ་གསུམ་བླ་མའི་གོ་འཕང་ཐོབ་པར་ཤོག །སྡེ་བརྒྱད་བརྟན་མ་མགུར་ལྷ་དགེ་བསྙེན་ཚོགས། །ཨོ་རྒྱན་ཆེན་པོའི་དམ་ལས་མ་འདའ་བར། །ཆོས་འདི་འཕེལ་ཞིང་ཕྱོགས་བཅུར་རྒྱས་པ་དང་། །འདི་ཉིད་ཉམས་སུ་ལེན་པའི་སྲུང་མ་མཛོད། །བཀྲ་ཤིས་ཀུན་གྱི་འབྱུང་གནས་རིན་པོ་ཆེ། །པདྨ་
འབྱུང་གནས་བཀྲ་ཤིས་དེང་འདིར་ཤོག །སྦྱིན་བདག་ལུས་ངག་ཡིད་གསུམ་སྒྲིབ་པ་དག །ཕྱི་མ་ཨོ་རྒྱན་མཁའ་འགྲོའི་གནས་ཐོབ་ཤོག །འབྱུང་པོའི་གནོད་པ་ཞི་བར་མཛད་དུ་གསོལ། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །བཀྲ་ཤིས་དཔལ་འབར་བསྟན་པ་དར་རྒྱས་ཤོག །སརྦ་མངྒ་ལཾ། དགེའོ།། བཀྲ་ཤིས། ཞལ་དྲོ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།