ཨོ་རྒྱན་རིན་པོ་ཆེའི་གསོལ་འདེབས་བླ་མ་རྒྱང་འབོད་བྱིན་རླབས་ཆར་འབེབས།
ཨོ་རྒྱན་རིན་པོ་ཆེའི་གསོལ་འདེབས་བླ་མ་རྒྱང་འབོད་བྱིན་རླབས་ཆར་འབེབས་བཞུགས་སོ། །
ན་མོ་གུ་རུ་དྷེ་ཝ་ཌཱཀི་ནཱི་ཡེ། མི་བདག་གི་སྤྱི་བོའི་གཙུག་རོལ་ན། །གདན་པདྨ་ཉི་ཟླ་སུམ་བརྩེགས་སྟེང་། །ཕ་དྲིན་ཆེན་རྩ་བའི་བླ་མ་དང་། །དོན་དབྱེར་མེད་གུ་རུ་པདྨ་འབྱུང་། །སྐུ་དཀར་དམར་མདངས་ལྡན་མཚན་དཔེ་རྫོགས། །ཞལ་ཞི་འཛུམ་སྤྱན་གསུམ་ཞི་མ་ཁྲོ། །དབུ་པད་ཞྭ་རྒོད་ལྡེམ་ཉི་ཟླས་སྤྲས། །ཕྱག་རྡོ་རྗེ་བྷནྡྷ་ཚེ་བུམ་འཛིན། །སྐུ་ཟབ་བེར་ཆོས་གོས་རྣམ་གསུམ་གསོལ། །ཡུམ་ཌཱཀི་སྦས་ཚུལ་ཁ་ཊཾ་འཆང་། །ཞབས་རྡོ་རྗེ་སྐྱིལ་མོ་ཀྲུང་གིས་བཞུགས། །རྗེ་རྒྱལ་བའི་ཞིང་ཁམས་མ་ལུས་པ། །དེ་ཐམས་ཅད་པད་འབྱུང་སྐུ་ཡིས་ཁྱབ། །
ལྷ་རྒྱུད་སྡེའི་དཀྱིལ་འཁོར་མ་ལུས་པ། །དེ་ཐམས་ཅད་པད་འབྱུང་སྐུ་ལ་རྫོགས། །རྗེ་དེ་ཡི་དཔྲལ་མགྲིན་ཐུགས་ཀ་རུ། །རྗེ་རྒྱལ་བ་ཀུན་གྱི་སྐུ་གསུང་ཐུགས། །དོན་ཨོཾ་དཀར་ཨཱཿཿདམར་ཧཱུྃ་མཐིང་གསལ། །ཐུགས་ཧཱུྃ་ཡིག་སྣ་ཚོགས་ཕྱོགས་བཅུར་འཕྲོས། །གནས་ཆོས་དབྱིངས་རབ་འབྱམས་ཞིང་ཁམས་ནས། །རྗེ་བླ་མ་རིག་འཛིན་གྲུབ་ཐོབ་ཚོགས། །སྐྱབས་སངས་རྒྱས་བྱང་སེམས་ཡི་དམ་ལྷ། །ལྷ་མཁའ་འགྲོ་ཆོས་སྐྱོང་སྲུང་མའི་ཚོགས། །དཔེ་ཁ་བ་བུ་ཡུག་འཚུབ་བཞིན་བྱོན། །དེ་ཐམས་ཅད་པད་འབྱུང་འཁོར་གྱི་ཚུལ། །ཞིང་ནམ་མཁའ་བར་སྣང་
ཁྱབ་པར་བཞུགས། །གནས་འོག་མིན་ཆོས་དབྱིངས་ཞིང་ཁམས་ནས། །དཔལ་ཀུན་ཏུ་བཟང་པོ་རྡོ་རྗེ་འཆང་། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུ་རྟོགས་པར་བྱིན་གྱིས་རློབས། །སྐྱབས་ཤཱཀ་ཐུབ་བྱང་སེམས་ཉེ་སྲས་བརྒྱད། །དཔལ་གནས་བརྟན་བཅུ་དྲུག་དགྲ་བཅོམ་ཚོགས། །བདག་གསོལ་བ་འདེབས་སོ་ཐུགས་རྗེས་ཟུངས། །ལུས་ཚུལ་ཁྲིམས་ལྡན་པར་བྱིན་གྱིས་རློབས། །རྗེ་རྒྱ་གར་གྲུབ་ཆེན་བརྒྱད་ཅུ་བཞི། །དཔལ་པད་འབྱུང་རྗེ་འབངས་ཉི་ཤུ་ལྔ། །བདག་གསོལ་བ་འདེབས་སོ་ཐུགས་རྗེས་ཟུངས། །བདག་ཕྱག་ཆེན་རྟོགས་པར་བྱིན་གྱིས་རློབས། །དཔལ་ཆོས་རྒྱལ་མེས་དབོན་ལོ་པཎ་ཚོགས། །རྗེ་ས་སྐྱའི་འཇམ་དབྱངས་བདུན་བརྒྱུད་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །དོན་བསྐྱེད་རྫོགས་འབྱོངས་བར་བྱིན་གྱིས་རློབས། །རྗེ་ཇོ་འབྲོམ་ཁུ་རྔོག་རྒྱལ་སྲས་གསུམ། །ཆོས་བཀའ་གདམས་བརྒྱུད་པའི་བླ་མ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །བྱམས་སྙིང་རྗེ་འབྱོངས་བར་བྱིན་གྱིས་རློབས། །རྗེ་མར་མི་དྭགས་པོ་དུས་གསུམ་མཁྱེན། །དཔལ་འབྲི་སྟག་ཚལ་
འབྲུག་བརྒྱུད་པ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །དོན་རང་ངོ་ཤེས་པར་བྱིན་གྱིས་རློབས། །ཉང་ཆོས་དབང་གཏེར་སྟོན་བརྒྱ་རྩ་བརྒྱད། །ཆོས་རྫོགས་ཆེན་བརྒྱུད་པའི་བླ་མ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །དོན་གནས་ལུགས་རྟོགས་པར་བྱིན་གྱིས་རློབས། །རྗེ་དམ་པ་མ་གཅིག་ལབ་ཀྱི་སྒྲོན། །གཅོད་བཀའ་བབ་བུ་ཆེན་བཅུ་དྲུག་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །བདུད་བཞི་རང་སར་ཞི་བར་བྱིན་གྱིས་རློབས། །ལྷ་བདེ་གསང་འཇིགས་གསུམ་དུས་འཁོར་ལོ། །སྔགས་གསར་མའི་དཀྱིལ་འཁོར་ལྷ་ཚོགས་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །ཚེ་གཅིག་སངས་རྒྱས་འགྲུབ་པར་བྱིན་གྱིས་རློབས། །ལྷ་བཀའ་དགོངས་ཕུར་གསུམ་ཞི་ཁྲོ་སོགས། །སྔགས་རྙིང་མའི་ལྷ་ཚོགས་ཐམས་ཅད་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །བསྐྱེད་རྫོགས་བརྟན་པ་ཐོབ་པར་བྱིན་གྱིས་རློབས། །ཡུམ་ཕག་ཁྲོས་སེང་གསུམ་སྒྲོལ་མ་གཉིས། །གནས་གསུམ་གྱི་དཔའ་བོ་མཁའ་འགྲོ་ལ། །བདག་གསོལ་བ་འདེབས་སོ་ཐུགས་རྗེས་
ཟུངས། །འཇའ་ལུས་མཁའ་སྤྱོད་འགྲུབ་པར་བྱིན་གྱིས་རློབས། །ཕྱག་བཞི་དྲུག་གུར་མགོན་བེར་ནག་ཅན། །ཡུམ་དུད་སོལ་རང་བྱུང་རེ་མ་ཏི། །དཔལ་ཡེ་ཤེས་ཆོས་སྐྱོང་སྲུང་མ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །རྐྱེན་ངན་བར་ཆད་མེད་པར་བྱིན་གྱིས་རློབས། །དཔལ་འཛམ་ལྷ་རིགས་ལྔ་ནོར་རྒྱུན་མ། །མགོན་ཡེ་ཤེས་ནོར་ལྷ་གཏེར་བདག་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །ཚེ་བསོད་ནམས་རྒྱས་པར་བྱིན་གྱིས་རློབས། །རྗེ་བླ་མ་ཡི་དམ་མཁའ་འགྲོའི་ཚོགས། །སྐྱབས་བསླུ་མེད་ཨོ་རྒྱན་རིན་པོ་ཆེ། །མི་བདག་ལ་རེ་ས་གཞན་ན་མེད། །ལུས་ཐོབ་དཀའི་དལ་འབྱོར་རིན་ཆེན་འདི། །ཚེ་ཡང་ཡེངས་ངང་ལ་མི་ཟད་པར། །ལུས་སྙིང་པོ་ལོན་པར་བྱིན་གྱིས་རློབས། །ཚེ་མི་རྟག་རླུང་གསེབ་མར་མེ་འདྲ། །ཆོས་བྱེད་བསམ་ངང་ལ་མི་བཞག་པར། །བདག་དགེ་སྦྱོར་ནུས་པར་བྱིན་གྱིས་རློབས། །ལས་དགེ་སྡིག་ལུས་དང་གྲིབ་མ་བཞིན། །ཁོང་བཙན་པོ་གཤིན་རྗེའི་ཁྲིམས་ར་ན། །རང་ངོ་གནོང་མེད་པར་བྱིན་གྱིས་རློབས། །བདག་རིགས་དྲུག་གང་དུ་སྐྱེས་ཀྱང་སྡུག །ཐར་དཀའ་བའི་འཁོར་
བའི་རྒྱ་མཚོ་ལས། །བདག་སྐྱོ་བ་སྐྱེ་བར་བྱིན་གྱིས་རློབས། །སྐྱོབ་ངེས་པའི་བླ་མ་དཀོན་མཆོག་གསུམ། །དེ་གཅིག་བསྡུས་པདྨ་འབྱུང་གནས་ལ། །བདག་སྐྱབས་སུ་མཆིའོ་ཐུགས་རྗེས་ཟུངས། །མ་འགྲོ་དྲུག་བདེ་ལ་འགོད་པའི་ཕྱིར། །བདག་བྱང་ཆུབ་མཆོག་ཏུ་སེམས་བསྐྱེད་དོ། །ལས་མི་དགེའི་སྡིག་ལྟུང་ཅི་བགྱིས་པ། །མགོན་ཁྱེད་ཀྱི་སྤྱན་སྔར་མཐོལ་ལོ་བཤགས། །ལུས་ལོངས་སྤྱོ་དགེ་རྩ་ཅི་མཆིས་པ། །དེ་ཀུན་བཟང་མཆོད་སྤྲིན་ལྟ་བུར་གྱུར། །རྗེ་ཁྱེད་རྣམས་ཀུན་ལ་གུས་པས་འབུལ། །བདག་རྩེ་གཅིག་གུས་པས་གསོལ་བཏབ་ན། །འཁོར་ནམ་མཁའ་བར་སྣང་གང་བ་ཀུན། །དེ་ཐམས་ཅད་པད་འབྱུང་སྐུ་ལ་ཐིམ། །རྗེ་པད་འབྱུང་དཔྲལ་མགྲིན་ཐུགས་ལྟེ་ནས། །འོད་རྒྱུ། དཀར་དམར་མཐིང་དང་ལྗང་གུ་འཕྲོས། །མི་བདག་གི་དཔྲལ་མགྲིན་སྙིང་ལྟར་ཐིམ། །བདག་སྒྲིབ་བཞི་དག་ནས་དབང་བཞི་ཐོབ། །ཅེས་བསྒོམ་ཞིང་། ཨོཾ་ཨཱཿཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། རྗེ་པད་འབྱུང་འོད་ཞུ་བདག་ལ་ཐིམ། །དེ་ཐིམ་པས་བདག་ལུས་གདོས་བཅས་འདི། །འོད་འཇའ་ལུས་ཐུགས་རྗེ་ཆེན་པོའི་སྐུ། །སྐུ་དཀར་གསལ་སྟོན་ཀའི་ཟླ་རྒྱས་
བཞིན། །ཞལ་མཛེས་འཛུམ་སྤྱན་གཉིས་འགྲོ་ལ་གཟིགས། །ཕྱག་དང་པོས་ཐུགས་ཀར་ཐལ་མོ་སྦྱར། །ཕྱག་འོག་གཉིས་བསྒྲང་ཕྲེང་པད་དཀར་འཛིན། །དབུ་ཐོར་ཚུགས་དབུ་རྒྱན་འོད་དཔག་མེད། །སྐུ་མཚན་དཔེ་དར་དང་རིན་ཆེན་བརྒྱན། །ཞབས་སྐྱིལ་ཀྲུང་པད་ཟླའི་གདན་ལ་བཞུགས། །ཐུགས་ཟླ་སྟེང་ཧྲིལ་ཡིག་དྲུག་བསྐོར། །འོད་ཕྱོགས་བཅུའི་འཇིག་རྟེན་ཁྱབ་པར་འཕྲོས། །ཞིང་ཕྱོགས་བཅུར་བཞུགས་པའི་རྒྱལ་བ་རྣམས། །དེ་ཐམས་ཅད་ཐུགས་རྗེ་ཆེན་པོར་གྱུར། །ཆར་ན་བུན་བཞིན་བྱོན་བདག་ལ་ཐིམ། །མ་འགྲོ་དྲུག་སེམས་ཅན་མ་ལུས་པ། །དེ་ཐམས་ཅད་ཐུགས་རྗེ་ཆེན་པོར་གྱུར། །གསུང་ཡིག་དྲུག་ཆོས་སྒྲས་སྟོང་གསུམ་གང་། །དུས་སྐད་ཅིག་དུང་ཕྱུར་གྲངས་མེད་འགྲུབ། །ཨོཾ་མ་ཎི་པདྨེ་ཧཱུཾ། ཞེས་ཅི་ནུས་བཟླས་མཐར། ཕྱི་སྣོད་བཅུད་འོད་ཞུ་བདག་ལ་ཐིམ། །བདག་འོད་ཞུ་ཐུགས་ཀའི་ཧྲིལ་ཐིམ། །མི་དམིགས་སྟོང་ཉིད་དབྱིངས་སུ་ཡལ། །ད་ཚུར་ལྟོས་རང་གི་སེམས་ལ་ལྟོས། །སེམས་ཡོད་པ་མ་ཡིན་དངོས་པོ་མེད། །ཆོས་སྟོང་པ་ཉིད་ཅེས་དེ་ལ་ཟེར། །སེམས་མེད་པ་མ་ཡིན་ཅི་ཡང་འཕྲོ། །ཆོས་ཡེ་ཤེས་ཟང་ཐལ་དེ་ལ་
ཟེར། །སེམས་ཡོད་མེད་གཉིས་ཀ་མ་ཡིན་པར། །ཆོས་དབུ་མ་ཆེན་པོ་དེ་ལ་ཟེར། །ཆོས་ཐམས་ཅད་དེ་ལས་མི་འདའ་བས། །བཀའ་ཕྱག་རྒྱ་ཆེན་པོ་དེ་ལ་ཟེར། །དེ་ཤེས་ན་ཤེས་བྱ་ཀུན་གྱི་རབ། །བཀའ་ཤེས་རབ་ཕར་ཕྱིན་དེ་ལ་ཟེར། །སེམས་འདི་ལ་མ་རྫོགས་ཆོས་གཅིག་མེད། །བཀའ་རྫོགས་པ་ཆེན་པོ་དེ་ལ་ཟེར། །དེ་རྟོགས་ན་འཁོར་བའི་སྡུག་བསྔལ་ཞི། །ཆོས་སྡུག་བསྔལ་ཞི་བྱེད་དེ་ལ་ཟེར། །སེམས་རྩ་བ་ཆོད་ན་ཐམས་ཅད་གཅོད། །ཆོས་གཅོད་ཡུལ་ཕྱག་རྒྱ་ཆེན་པོ་ཟེར། །མིང་སྙན་པོས་གཅེས་མིང་ཅི་བཏགས་ཀྱང་། །དོན་རང་སེམས་ཧྲིག་ཧྲིག་འདི་ཀ་ཡིན། །འདི་བསྒོམ་དུས་འདི་སྒོམ་གཏད་སོ་མེད། །སེམས་མ་ཡེངས་ཙམ་ལ་ལྷོད་དེ་ཞོག །སེམས་འཚུབ་དུས་ལུས་སེམས་ཀློད་ལ་ལྟོས། །སེམས་འཐིབ་ན་ལུས་སེམས་བསྒྲིམ་ལ་ལྟོས། །སྐབས་སྐབས་སུ་གསོལ་འདེབས་རྒྱང་འབོད་མཛོད། །སྐབས་སྐབས་སུ་ནམ་འཆི་ནམ་འཆི་བསམ། །སྐབས་སྐབས་སུ་གར་སྐྱེ་གར་སྐྱེ་བསམ། །སྐབས་སྐབས་སུ་དགེ་སྡིག་རྩིས་གྲངས་ཐོང་། །སྐབས་སྐབས་སུ་བཟླས་བརྗོད་གཏོར་བསྔོས་མཛོད། །དུས་རྒྱུན་དུ་དྲན་
པའི་རྒྱངས་སོ་ཚུགས། །སྒོམ་ཐ་མས་རྣམ་རྟོག་རྩད་རྗེས་བཅད། །དེ་རྩད་རྗེས་བཅད་པས་སྟོང་ཉིད་འཆར། །སྒོམ་འབྲིང་གིས་ནམ་དྲན་བསྒོམ་དུ་འཆར། །དེ་དྲན་པ་ཙམ་གྱིས་ཐོག་ཏུ་གནས། །སྒོམ་རབ་ཀྱིས་རྣམ་རྟོག་བསྒོམ་དུ་འཆར། །དཔེ་ཆུ་ལ་ཆུ་རླབས་ཐིམ་པ་བཞིན། །ནུབ་གཉིད་དུས་འོད་གསལ་ཨེ་ཟིན་ལྟོས། །དེ་ལན་བདུན་ཟིན་ན་ཐུགས་དམ་ཟིན། །དེ་མ་ཟིན་རྨི་ལམ་ཨེ་ཟིན་ལྟོས། །དེ་ལན་བདུན་ཟིན་ན་བར་དོ་ཟིན། །དེ་བར་དོ་ཟིན་ན་མངོན་སངས་རྒྱས། །དེ་རྒྱུད་སྡེ་རྣམས་ཀྱི་དགོངས་པ་ཡིན། །མི་བདག་གི་དགེ་སྦྱོར་བསྐྱེད་རྫོགས་སོགས། །དུས་གསུམ་དུ་དགེ་བ་ཅི་བསགས་མཐུས། །ཚེ་འདི་ཡང་ཚེ་རིང་ནད་མེད་ཅིང་། །ཉམས་རྟོགས་པ་ཡར་ངོའི་ཟླ་ལྟར་འཕེལ། །དུས་ནམ་ཞིག་མི་གནས་འཕོ་བའི་ཚེ། །མ་གནས་གསུམ་ཌཱཀི་དཔའ་བོའི་ཚོགས། །གདུགས་རྒྱལ་མཚན་རོལ་མོའི་སྒྲ་དང་བཅས། །ནུབ་བདེ་བ་ཅན་གྱི་ཞིང་ཁམས་སུ།། གདན་མེ་ཏོག་པདྨའི་སྙིང་པོ་ལ། །ལུས་བརྫུས་སྐྱེས་སྤྲུལ་སྐུ་ཐོབ་ནས་ཀྱང་། །ས་ལམ་གྱི་ཡོན་ཏན་རབ་རྫོགས་ནས། །བདག་བླ་མེད་བྱང་ཆུབ་ཐོབ་གྱུར་ཅིག །དེ་ཐོབ་ནས་
སྤྱན་རས་གཟིགས་དབང་ལྟར། །དུས་ནམ་ཞིག་ནམ་མཁའ་གནས་ཀྱི་བར། །དོན་འབད་མེད་འགྲོ་དོན་མྱུར་འགྲུབ་ཤོག །གཞི་གདོད་ནས་སྐྱེ་བ་མེད་པ་དང་། །ལམ་རྟེན་འབྲེལ་བསླུ་བ་མེད་པ་དང་། །རྗེ་རྒྱལ་བའི་བྱིན་རླབས་ཚད་མེད་མཐུས། །བདག་སྨོན་ལམ་བཏབ་བཞིན་འགྲུབ་གྱུར་ཅིག །དཔལ་ཙཱ་རི་ཏྲ་ཡི་རྟོགས་ལྡན་གྱིས། །ཆོས་འབྲེལ་པ་གསོལ་འདེབས་དགོས་གསུངས་པས། །འཕྲལ་ཉམས་ལ་གང་ཤར་བྲིས་པ་ཡིན། །དོན་འགལ་བ་མཆིས་ན་བཟོད་པར་གསོལ། །ཐུགས་དགྱེས་པར་གྱུར་ན་རྒྱུན་དུ་ཐོན། །མི་དད་ལྡན་བྱུང་ན་སྤེལ་ཡང་རུང་། །དོན་འདོན་སྒོམ་སྦྲགས་ན་རྟོགས་པ་སྐྱེ། །ཚིག་དབྱངས་སུ་གྱེར་ན་རྣ་བ་སྙན། །འདི་རྟོགས་ལྡན་རྣམས་ཀྱི་ཆོས་སྐལ་མཛོད། །ཚིག་དེ་སྐད་རཱ་ག་ཨ་སྱས་སྨྲས། །དོན་དངོས་གྲུབ་བྱིན་རླབས་ཐོབ་པར་ཤོག །འདི་ཉམས་ཀྱི་མགུར་མའི་གསོལ་འདེབས་ཡིན། །འབྲེལ་ཚད་རྣམས་སངས་རྒྱས་སར་འགོད་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།