སྤྲུལ་པའི་ཆོས་རྒྱལ་སྲོང་བཙན་སྒམ་པོའི་གསོལ་འདེབས།
སྤྲུལ་པའི་ཆོས་རྒྱལ་སྲོང་བཙན་སྒམ་པོའི་གསོལ་འདེབས་ནི།
ན་མོ་ལོ་ཀི་ཤྭ་ར་ཡེ། བཅོམ་ལྡན་ཤཱཀ་ཐུབ་མྱ་ངན་འདས་པའི་ཚེ། །སྤྱན་རས་གཟིགས་ཀྱིས་བཞུགས་པར་གསོལ་བཏབ་པས། །གདུལ་བྱ་རྫོགས་ཕྱིར་མྱ་ངན་འདས་གསུངས་ཚེ། །ད་དུང་བོད་ཡུལ་ཞབས་ཀྱིས་མ་བཅགས་པས། །དེ་ཕྱིར་མྱ་ངན་མི་འདའ་བཞུགས་གསོལ་པས། །དེ་ནི་ཁྱོད་ཀྱི་གདུལ་བྱ་ཡིན་ནོ་གསུངས། །བོད་ཀྱི་འདུལ་སྐལ་དེ་ལ་གསོལ་བ་འདེབས། །དེ་དོན་འོད་དཔག་མེད་ལ་ཞུས་པ་ཡིས། །བོད་ཀྱི་སེམས་ཅན་ཁྱོད་ཀྱི་སྨིན་གྱིས་ལ། །ང་ཡི་དྲུང་དུ་ཁྲིད་ལ་ཤོག་ཅིག་གསུངས། །བོད་ཁམས་འདྲེན་མཛད་དེ་ལ་གསོལ་བ་
འདེབས། །འཇམ་དཔལ་རྩ་བའི་རྒྱུད་ལས་བཅོམ་ལྡན་གྱི། །བྱང་ཕྱོགས་ལྷ་ལྡན་ཞེས་བྱའི་ཡུལ་དུ་ནི། །རྒྱལ་པོ་མི་ཡི་ལྷ་ཞེས་བྱ་བ་འབྱུང་། །ལོ་ནི་བརྒྱད་ཅུར་རྒྱལ་སྲིད་བྱེད་འགྱུར་གསུངས། །རྒྱལ་བས་ལུང་བསྟན་དེ་ལ་གསོལ་བ་འདེབས། །ཐུགས་རྗེ་ཆེན་པོ་བོད་ཀྱི་རྒྱལ་པོར་སྤྲུལ། །ལྷམ་ཞུགས་བལྟམས་ཚེ་འཇའ་འོད་མེ་ཏོག་ཆར། །དབུ་ལ་ཨ་མི་དྷེ་ཝའི་ཞལ་མངའ་བས། །ལྭ་བ་དམར་པོས་དཀྲིས་པས་ལ་ཐོད་བྱུང་། །དབུ་གཉིས་མངའ་བ་དེ་ལ་གསོལ་བ་འདེབས། །བློན་པོ་ཐོན་མི་རྒྱ་གར་ཡུལ་དུ་བཏང་། །རྒྱ་ཡིག་ལྔ་བཅུ་བོད་
ཡིག་སུམ་ཅུར་བསྒྱུར། །བཟོ་རྩིས་སྨན་དང་གཏམ་རྒྱུད་མང་པོ་ཡི། །བོད་ཡུལ་རྨོང་པ་སེལ་ལ་གསོལ་བ་འདེབས། །སྒྲོལ་མ་དཀར་སྔོན་སྤྲུལ་པའི་བཙུན་མོ་གཉིས། །ཇོ་བོ་རྣམ་གཉིས་བོད་དུ་གདན་དྲངས་ནས། །བསྟན་པའི་སྲོལ་བསྟོད་མཛད་ལ་གསོལ་བ་འདེབས། །ར་ས་འཕྲུལ་སྣང་རྒྱལ་སྟག་ར་མོ་ཆེ། །ཡེར་པ་ལ་སོག་གཙུག་ལག་བརྒྱ་རྩ་བཞེངས། །འགྲོ་བའི་སྒྲིབ་སྦྱོང་མཛད་ལ་གསོལ་བ་འདེབས། །བལ་པོ་ཤྲཱི་ལ་མཉྫ་སྤྱན་དྲངས་ནས། །ཐུགས་རྗེ་ཆེན་པོའི་མདོ་རྒྱུད་ཉེར་གཅིག་བསྒྱུར། །སྤྱན་རས་གཟིགས་རྒྱུདབང་དངོས་ལ་ཆོས་གསན་ནས། །བློན་འབངས་ཐམས་ཅད་སྨིན་གྲོལ་ལམ་ལ་བཀོད། །མུན་སེལ་སྒྲོན་མེ་དེ་ལ་གསོལ་བ་འདེབས། །སྤྲུལ་པའི་དགེ་སློང་རྒྱ་གར་ཡུལ་དུ་བཏང་། །ཙནྡན་ཇོ་བོ་སྒྲོལ་མ་རང་བྱོན་སོགས། །སྟོན་མཆོག་གདན་འདྲེན་མཛད་དེ་གསོལ་བ་འདེབས། །ལི་ཡི་ཡུལ་དུ་བཙུན་པ་གཉིས་ལ་ནི། །འཕགས་པ་འཇམ་དཔལ་དབྱངས་ཀྱིས་ལུང་བསྟན་ནས། །མཇལ་ཚེ་དབུ་ཡི་ཨ་མི་དྷེ་ཝ་བསྟན། །བྱེ་མ་གསེར་དུ་བསྒྱུར་ནས་དངོས་གྲུབ་གནང་། །སྐད་ཅིག་རང་ཡུལ་སླེབ་པའི་རྫུ་འཕྲུལ་བསྟན། །རྫུ་
འཕྲུལ་སྟོབས་ལྡན་དེ་ལ་གསོལ་བ་འདེབས། །པདྨ་དྲྭ་བའི་རྒྱུད་ལས་ལུང་བསྟན་ལྟར། །ཐུགས་དམ་བཅུ་གཅིག་ཞལ་ནི་རང་བྱོན་གྱུར། །འབྱོན་བཞུགས་དངོས་སུ་མཛད་ཅིང་འོད་ཟེར་འཕྲོ། །ངོ་མཚར་བསམ་ལས་འདས་ལ་གསོལ་བ་འདེབས། །པད་འབྱུང་ལ་སོགས་རྒྱ་གར་གྲུབ་ཆེན་རྣམས། །རྫུ་འཕྲུལ་སྟོབས་ཀྱིས་བྱོན་ནས་དམ་ཆོས་ཞུས། །སྤྱན་རས་གཟིགས་དངོས་བོད་ཀྱི་རྒྱལ་པོ་ཞེས། །འཛམ་གླིང་ཀུན་ཏུ་གྲགས་ལ་གསོལ་བ་འདེབས། །འཛམ་གླིང་བྱེ་བ་ཕྲག་བརྒྱའི་ཞིང་ཁམས་ན། །གངས་ཆེན་བོད་ཡུལ་བྱེ་བ་ཕྲག་བརྒྱ་སྟེ། །སྲོང་བཙན་སྒམ་པོ་རྒྱ་བཟའ་བལ་བཟའ་དང་། །བཅུ་གཅིག་ཞལ་སྐུ་བྱེ་བ་ཕྲག་བརྒྱ་རུ། །སྤྲུལ་ནས་མཁའ་མཉམ་འགྲོ་བ་འདྲེན་ནོ་ཞེས། །མདོ་ལས་ལུང་བསྟན་དེ་ལ་གསོལ་བ་འདེབས། །མ་འོངས་ལུང་བསྟན་བཀའ་ཆེམས་གཏེར་དུ་སྦས། །རྒྱལ་པོ་བཙུན་མོ་གཉིས་བཅས་འོད་ཞུ་ནས། །བཅུ་གཅིག་ཞལ་ལ་དངོས་སུ་ཐིམ་གྱུར་པས། །ཐེ་ཚོམ་བསལ་ཕྱིར་ལྷ་ཡི་ཐུགས་ཀ་ནས། །ཡབ་ཡུམ་གསུམ་གྱི་ཞལ་ནི་དངོས་སུ་བསྟན། །མ་འོངས་ཞལ་ཆེམས་བཞག་ལ་གསོལ་བ་འདེབས། །འོད་
ཟེར་བཀྱེ་བས་གཙུག་ལག་བྱིན་གྱིས་བརླབས། །འོད་ཟེར་ལྷ་བརྒྱད་ལ་ཐིམ་བྱིན་རླབས་ལྡན། །འཇའ་ལུས་རྡོ་རྗེའི་སྐུ་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་གིས་བཞེངས་པའི་སྐུ་འདྲ་འདི་དག་རྣམས། །རང་བྱོན་བཅུ་གཅིག་ཞལ་བཞིན་བྱིན་རླབས་ལྡན། །འབྲེལ་ཚད་བདེ་ཆེན་ཞིང་དུ་སྐྱེ་བ་དང་། །ཁྱེད་ཀྱིས་གསུངས་པའི་ཐུགས་རྗེའི་སྒྲུབ་ཐབས་རྣམས། །བདག་གིས་ཉམས་བླངས་དངོས་གྲུབ་གཉིས་ཐོབ་ནས། །བདག་དང་བདག་གི་རྒྱུད་འཛིན་འཁོར་སློབ་བཅས། །སྤྲུལ་པའི་རྒྱལ་པོ་སྲོང་བཙན་སྒམ་པོ་དང་། །སྐུ་གསུང་ཐུགས་ཡོན་ཕྲིན་ལས་མཉམ་གྱུར་ཅིག །ཅེས་པ་མེ་ཕོ་རྟའི་ལོ་ནག་པ་ཟླ་བའི་ཉེར་གསུམ་འགྲུབ་སྦྱོར་དང་ལྡན་པ་ལ། གདུང་རྟེན་སྐུ་འདྲ་རྣམས་ཐུགས་རྗེ་ཆེན་པོ་རྒྱལ་བ་རྒྱ་མཚོ་དང་། ཐུགས་སྒྲུབ་གསང་འདུས་དང་། གནམ་ཆོས་ལུགས་དང་དཀྱིལ་འཁོར་བཞིའི་སྒོ་ནས་རབ་གནས་བྱས་དུས། འབྱུང་བ་ཁོད་སྙོམས་པ་དང་། ནམ་མཁའ་ལ་འཇའ་ཚོན་དང་། སློབ་བུ་རྫོགས་ཆེན་པ་ཞིག་གིས། ལྷ་སོ་སོ་ལ་སྐུ་ཕྲ་མོ་མང་པོ་ནས་གཏོར་བ་ལྟར་ཐིམ་པ་མཐོང་འདུག་ཅིང་། ཆོས་དང་ཟང་ཟིང་གི་རྟེན་འབྲེལ་ལེགས་བྱུང་། དེ་ནས་ཞག་བདུན་ལྷའི་མདུན་དུ་གྲྭ་པ་རྣམས་ལ་ཆོ་ག་དང་མཆོད་པ་བྱེད་བཅུག་ཅིང་། རང་གི་ཡང་བྱིན་འབེབས་
ཀྱི་དམིགས་རིམ་ལ་འབད་པས་ཉེར་ལྔའི་ཐོ་རངས། ཉམས་ཀྱི་སྣང་བ་དང་རྨི་ལམ་འདྲེས་པའི་སྣང་བ་ལ། མདུན་གྱི་ནམ་མཁར་ཆོས་རྒྱལ་སྲོང་བཙན་སྒམ་པོ་དེ། སྐུ་ཁང་རྩག་གསུམ་ཙམ་ཨེ་ཡོད་སྙམ་པ། དབུ་ལ་དར་དམར་པོའི་ལྭ་ཐོད་ཅན་སྐུ་ལ་གོས་ཆེན་ལྗང་ཁུའི་རལ་གུ་གསོལ་བའི་རྒྱབ་ན། བེར་ཕྱམ་དམར་པོ་གསོལ་བ་ཞབས་སྐྱིལ་ཀྲུང་གིས་བཞུགས་པ། ཤིན་ཏུ་གསལ་བ་གཅིག་ལམ་མེ་བཞུགས་པ་མཇལ་བ་ལ་བརྟེན་ནས་ཀརྨ་རཱ་ག་ཨ་སྱས་བྲིས་སོ།། ༈ །།གྲུབ་ཆེན་སངས་རྒྱས་དབོན་གྱི་གསོལ་འདེབས་ནི། ༈ ན་མོ་གུ་རུ་གིར་ཏི་ཤྲཱི་ཡེ། ཨུ་རྒྱན་ཆེན་པོའི་ལུང་དུ་བསྟན་པ་ལྟར། །རྒྱ་གར་གྲུབ་ཆེན་ནཱ་རོ་པཎྜི་ཏ། །བསམ་བཞིན་བོད་ཀྱི་ཡུལ་དུ་སྐུ་འཁྲུངས་པ། །སངས་རྒྱས་དབོན་དུ་གྲགས་ལ་གསོལ་བ་འདེབས། །སྐུ་འཁྲུངས་ལྟེ་བ་བཅད་པའི་སྒྲ་ལ་ཡང་། །སྙན་པའི་དབྱངས་ཀྱིས་ཚིགས་བཅད་མང་པོ་སོགས། །ངོ་མཚར་རྟགས་དང་མཚན་མ་དུ་མ་ཡི། །སྤྲུལ་པའི་སྐུ་རུ་གྲགས་ལ་གསོལ་བ་འདེབས། །བྱིས་སྦའི་ཚེ་ན་གཞོན་ནུའི་རོལ་རྩེད་ཀྱིས། །རི་བྲག་ཐོགས་མེད་ལ་སོགས་རྫུ་འཕྲུལ་གྱིས། །གྲུབ་མཆོག་སངས་རྒྱས་དབོན་ཞེས་ཡོངས་སུ་གྲགས། །རྗེ་བཙུན་གྲགས་པའི་དཔལ་ལ་གསོལ་བ་འདེབས། །ཇོ་བོ་བྲག་ནག་ལ་
སོགས་ལྷ་སྲིན་བཏུལ། །སྤྲུག་གི་བཙན་རྒོད་བདུད་རྩི་འདྲེན་པ་སོགས། །སློབ་དཔོན་ཆེན་པོ་པདྨའི་སྤྲུལ་པ་ཞེས། །ལྷ་འདྲེས་གུས་ཤིང་བསྟོད་ལ་གསོལ་བ་འདེབས། །བདག་མེད་མ་ཡི་བཀའ་སྲུང་དུར་ཁྲོད་ཀྱིས། །མཁའ་འགྲོ་ལྔ་ཡི་གདུང་བའི་གླུ་བླངས་ཤིང་། །སྲོག་སྙིང་ཕུལ་ནས་བསྟན་པ་བསྲུངས་བར་ཆད། །དགྱེས་རྡོར་གྲུབ་པའི་རིག་འཛིན་གྷིརྟི་ཤི། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །བདེན་ཚིག་བརྗོད་པས་སངས་རྒྱས་ཚེམས་ཐོབ་ཅིང་། །དབྱར་ཁའི་ཆུ་ལ་མཁའ་འགྲོའི་དར་ལམ་འཐེན། །རི་བོ་ཆེ་སོགས་གདན་ས་ཆགས་བཅགས་མཛད། །བསྟན་པའི་རྒྱལ་མཚན་བཙུགས་ལ་གསོལ་བ་འདེབས། །ཟབ་ཆོས་རྒྱ་མཚོ་ཁམས་ཕྱོགས་དཀར་པོར་བཏང་། །དགེ་འདུན་སྟོང་ཕྲག་མང་པོ་འདུས་མཛད་དེ། །གཙུག་ལག་དམ་ཆོས་ཡུན་རིང་དར་རྒྱས་པའི། །ལུང་བསྟན་བྱིན་རླབས་མཛད་དེར་གསོལ་བ་འདེབས། །བཀའ་ཤོག་ཙམ་གྱིས་གྲོལ་བ་བརྒྱ་ཕྲག་སྟེ། །མཐོང་ཐོས་དྲན་རིག་འགྲོ་བ་སྨིན་གྲོལ་མཛད། །རིགས་རྒྱུད་ཆོས་བརྒྱུད་དབྱར་གྱི་ཆུ་བཞིན་རྒྱས། །བསྟན་པའི་བདག་པོ་དེ་ལ་གསོལ་བ་འདེབས། །ཞེ་
བདུན་བཞེས་ཚེ་མཁའ་འགྲོའི་སུན་མ་བྱུང་། །རྡོ་རྗེ་འཆང་གི་ཆ་ལུགས་མཛད་ནས་གཤེགས། །བརྒྱུད་འཛིན་ཨུ་རྒྱན་མགོན་པོས་ལུང་བསྟན་མཛད། །སྐལ་ལྡན་རྣམས་ལ་ཞལ་སྟོན་གདམས་པ་གནང་། །འདས་ཚུལ་བསྟན་ཡང་འཆི་མེད་རྡོ་རྗེའི་སྐུ། །གྲུབ་པའི་རིག་འཛིན་དེ་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །ཐུགས་རྗེ་ཆེན་པོ་དམར་པོ་ལུགས་དང་ནི། །སྤྲུལ་སྐུ་ལྷ་གཅིག་བུམ་གཅིག་ལ་སོགས་པ། །ཁྱད་ལས་བརྒྱུད་པའི་ཟབ་ཆོས་འདི་དག་གིས། །བདག་བརྒྱུད་སྨིན་ཅིང་གྲོལ་བར་བྱིན་གྱིས་རློབས། །ཁྱེད་ཀྱི་བྱིན་རླབས་བཀའ་བབས་ཉེ་བརྒྱུད་ནི། །བདག་ལ་དངོས་སུ་འབྱུང་བར་བྱིན་གྱིས་རློབས། །དེ་ལ་བསྟན་ནས་ཐུགས་རྗེ་ཆེན་པོ་འགྲུབ། །འབྲེལ་ཚད་དོན་ལྡན་ཁྱེད་དང་མཉམ་པར་ཤོག །ཅེས་པ་ཚེ་དཔག་ལྷ་གཅིག་བུམ་གཅིག་དང་། ཐུགས་རྗེ་ཆེན་པོ་དམར་པོ་ལུགས་ལ་ཡང་ཅུང་ཟད་རེ་བསྙེན་པའི་སྐབས། མེ་ཕོ་རྟའི་ལོ་ནག་པ་ཟླ་བའི་གནམ་གང་གི་ནམ་ལང་ཙམ་ལ། ཅུང་ཟད་འཐུམ་ཙམ་ལ་རྗེ་སངས་རྒྱས་དབོན་རིན་པོ་ཆེ་དགེ་སློང་གི་ཆ་ལུགས་ཞབས་སྐྱིལ་ཀྲུང་གིས་བཞུགས་པ། དབུ་ལ་དྭགས་ཞུ་འདྲ་བ་དམར་པོ་གསོལ་བ་ཞིག་མཇལ། དེས་རྩ་རླུང་གིས་གདམས་པ་
སོགས་ཟབ་ཆོས་མང་པོ་གནང་སྟེ་ཡིད་ལ་ནི་མ་ཟིན་པ་ཅིག་བྱུང་བས་གསོལ་བ་བཏབ་པའོ། །ཨ་རཱ་གས་སོ།། ༈ །ཆོས་སྐྱོང་བཀའ་སྲུང་ཚོགས་ལ་དོན་གྱི་བསྟོད་པ་དང་ནོངས་བཤགས་སུ་མཛད་པ་བཞུགས་སོ། ༈ །ན་མོ་དྷརྨ་པཱ་ལ་ཡེ། འཁོར་བའི་སྐྱབས་གནས་དཀོན་མཆོག་གསུམ། །དེ་ལ་ཕྱི་ནང་གསང་བ་གསུམ། །ནང་གི་དཀོན་མཆོག་རྣམ་གསུམ་ནི། །རྩ་བ་གསུམ་དུ་གྲགས་པ་ཡི། །ཕྲིན་ལས་རྩ་བ་མཁའ་འགྲོ་དང་། །ཆོས་སྐྱོང་དམ་ཅན་རྒྱ་མཚོ་ལ། །གུས་པའི་ཡིད་ཀྱིས་ཕྱག་འཚལ་ལོ། །མ་གུས་སྐྱབས་འགྲོ་གཏོང་ཉེན་གདའ། །སངས་རྒྱས་བྱེ་བ་ཕྲག་བདུན་གྱི། །ཐུགས་སྤྲུལ་མགོན་པོ་ཕྱག་བཞི་པ། །རྡོ་རྗེ་འཆང་དངོས་ཡིན་པར་གསུངས། །རང་ཉིད་བར་དོར་འཁྱམས་ཚེ་ཡང་། །དག་་པའི་ཞིང་དུ་ཁྲིད་འགྱུར་ཞེས། །གྲི་གུག་བརྩེགས་པའི་རྒྱུད་ལས་གསུངས། །ཕྱི་ལྟར་ལྷ་མོ་དབྱངས་ཅན་མ། །ནང་ལྟར་རྡོ་རྗེ་ཕག་མོ་སྟེ། །གསང་བ་དུད་སོལ་ལྷ་མོ་ཉིད། །དེ་སྐད་གྲུབ་ཆེན་མཚོ་སྐྱེས་གསུངས། །དེ་ལ་མཆོད་ཅིང་བསྟོད་བྱས་ནས། །སངས་རྒྱས་ཀུན་ལ་མཆོད་པར་འགྱུར། །དེ་སྐད་ཕྱག་ན་རྡོ་རྗེས་གསུངས། །དེ་ཕྱིར་མ་མགོན་འདི་
གཉིས་ནི། །ཡི་དམ་ཆོས་སྐྱོང་གཉིས་ཀ་ལགས། །དེ་ལ་ཕྱག་འཚལ་བསྟོད་པར་བགྱི། །ཡེ་ཤེས་མགོན་པོ་བེར་ནག་ཅན། །སྤྱན་རས་གཟིགས་དབང་སྤྲུལ་པ་རུ། །རིན་ཆེན་དཔུང་རྒྱན་རྒྱུད་ནས་གསུངས། །གྲུབ་ཆེན་པཀཱི་ཡེ་ཤེས་མགོན་པོ་ཉིད། །དབྱེར་མེད་པཀྵི་ཉིད་ཀྱིས་གསུངས། །ཨུ་རྒྱན་ཆེན་པོས་ལུང་ཡང་བསྟན། །འཇམ་དཔལ་སྦྱོར་ཡུམ་བཱ་ཏ་ལི། །རང་བྱུང་རྒྱལ་མོ་དབྱེར་མེད་དེ། །དོན་ལ་ས་བཅུའི་སེམས་མ་ཉིད། །དེ་ཕྱིར་མ་མགོན་ལྕམ་དྲལ་འདི། །བླ་མ་ཡི་དམ་ཆོས་སྐྱོང་གསུམ། །གཅིག་ཏུ་འདུས་པའི་ངོ་བོ་ཉིད། །དེ་ཕྱིར་ཕྱག་འཚལ་བསྟོད་པར་བགྱི། །ཕྱག་དྲུག་རིགས་དྲུག་སྐྱེ་སྒོ་གཅོད། །ལན་གཅིག་འབྲེལ་པ་ཐོབ་པས་ཀྱང་། །བར་དོའི་འཇིགས་པ་སྐྱོབ་པའི་ཕྱིར། །བར་དོའི་མགོན་པོ་ཞེས་སུ་གྲགས། །ཐུགས་རྗེ་ཆེན་པོ་དག་པོ་སྟེ། །བྱིན་རླབས་མྱུར་མཛད་སྤྱན་རས་གཟིགས། །ཁྱེད་ལ་ཕྱག་འཚལ་བསྟོད་པར་བགྱི། །ཀུན་བཟང་ཆེ་མཆོག་ཧེ་རུ་ཀ །འཁོར་བའི་རྩ་བ་བདག་འཛིན་ཏེ། །དུག་གསུམ་རུ་ཏྲ་སྡེ་གསུམ་བསྒྲལ། །ངོ་བོ་ཀུན་ཏུ་བཟང་པོ་ཉིད། །སྟོབས་པོ་ཆེ་དང་སྨེ་བརྩེགས་
སོགས། །རེས་འགའ་ཡི་དམ་སྐུ་རུ་སྟོན། །ཡི་དམ་ཆོས་སྐྱོང་དབྱེར་མེད་ཉིད། །དེ་ཕྱིར་ཁྱེད་ལ་ཕྱག་འཚལ་བསྟོད། །སྲིན་མགོན་གཉེན་མགོན་དུར་ཁྲོད་བདག །འཁོར་ལོ་སྡོམ་པའི་སྤྲུལ་པར་གསུངས། །ད་ལྟ་ས་གནས་སེམས་དཔའ་སྟེ། །ས་ལམ་བར་ཆད་སེལ་བར་བཤད། །དེ་ཕྱིར་ཁྱེད་ལ་ཕྱག་འཚལ་བསྟོད། །བདེ་མཆོག་ཐུགས་སྤྲུལ་མགོན་པོ་སེང་གདོང་དང་། །ཁྱེད་གཉིས་མཆོད་ཅིང་བསྒྲུབ་པའི་མི། །མངོན་པར་དགའ་དང་དཔལ་ལྡན་ཞིང་། །བདེ་བ་ཅན་དང་ལས་རབ་རྫོགས། །འཐུག་པོ་བཀོད་ཚིསོགས་ཞིང་ཁམས་བརྗོད། །ཀུན་བཟང་ཐུགས་ཀར་ཐིམ་གྱུར་ཞེས། །ཞིང་སྐྱོང་སྲིན་མགོན་རྒྱུད་ལས་བཤད། །དེ་ཕྱིར་ཁྱེད་ལ་ཕྱག་འཚལ་བསྟོད། །འདས་པའི་སངས་རྒྱས་རིན་ཆེན་མང་། །མ་འོངས་སངས་རྒྱས་རིན་ཆེན་གདུགས། །ད་ལྟ་རྣམ་སྣང་ཐུགས་སྤྲུལ་ཏེ། །རྫོགས་པའི་སངས་རྒྱས་ཉིད་ཡིན་ཞེས། །གར་མཁན་མཆོག་གི་རྒྱུད་ལས་གསུངས། །དེ་ཕྱིར་རྣམ་སྲས་སེར་ཆེན་བསྟོད། །ཁྱད་པར་སྣང་བ་མཐའ་ཡས་ཀྱི། །གསུང་གི་སྤྲུལ་པའི་ནོར་ལྷ་སྟེ། །གཞན་ལས་ཁྱད་པར་འཕགས་སོ་ཞེས། །བཀའ་
གཏེར་གཉིས་ཀའི་གཞུང་ལས་གསུངས། །དེ་ཕྱིར་རྣམ་སྲས་དམར་པོར་བསྟོད། །སྤྱན་རས་གཟིགས་དབང་སྤྱན་ཆབ་སྤྲུལ། །འདི་ཉིད་བསྒྲུབ་ཅིང་མཆོད་པ་ན། །བདེ་བ་ཅན་གྱི་ཞིང་ཁམས་སྐྱེ། །སྤྱན་རས་གཟིགས་ཀྱི་གོ་འཕང་ཐོབ། །དེ་སྐད་ཇོ་བོ་རྗེ་ཡིས་གསུངས། །དེ་ཕྱིར་འབྲུག་ཞོན་ལྷ་ལྔར་བསྟོད། །བདེ་གཤེགས་ཀུན་གྱི་གསུང་སྤྲུལ་སྟེ། །སྣང་བ་མཐའ་ཡས་ནོར་ལྷའི་སྐུ། །ཡུམ་ནི་སྒྲོལ་མ་དམར་མོ་སྟེ། །འདི་ཉིད་མཆོད་བསྟོད་བསྒྲུབས་པ་ན། །བདེ་བ་ཅན་དུ་སྐྱེ་འགྱུར་ཞེས། །འཕགས་པ་སྤྱན་རས་གཟིགས་ཀྱིས་གསུངས། །རྒྱ་གར་གྲུབ་ཆེན་འགས་ཀྱང་གསུངས། །དེ་ཕྱིར་འཛམ་དམར་ཡབ་ཡུམ་བསྟོད། །ས་བཅུའི་སེམས་དཔའ་རྡོ་རྗེ་ལེགས། །རྡོར་དབྱིངས་སྦྱོང་རྒྱུད་གཉིས་ཀའི་ལྷ། །ཕྱག་རྡོར་འཁོར་གྱི་སེམས་དཔའ་ཆེ། །པདྨ་དྲྭ་བའི་དཀྱིལ་འཁོར་ལྷ། །འགྲོ་ཀུན་བདེ་ལ་འགོད་པར་ནུས། །དེ་ཕྱིར་མགར་བ་ནག་པོར་བསྟོད། །སྒྲོལ་མ་སྔོན་མོའི་སྤྲུལ་པ་སྟེ། །སྤྱན་རས་གཟིགས་ཀྱི་ལྕམ་སྲིང་ཉིད། །འཁོར་ལོ་བདེ་མཆོག་དཀྱིལ་འཁོར་གྱི། །འཚམས་མ་གཤིན་རྗེའི་མཆེ་བ་ལ། །རྡོ་རྗེ་གཡུ་ཡི་སྒྲོལ་
མར་བསྟོད། །རྡོར་དབྱིངས་སྦྱོང་རྒྱུད་སེམས་དཔའི་གྲངས། །སེམས་དཔའ་རྡོ་རྗེ་ཁུ་ཚུར་ཏེ། །བདེ་གཤེགས་ཀླུ་དབང་རྒྱལ་པོའི་སྤྲུལ། །ས་དྲུག་ལ་གནས་སེམས་དཔའ་ཆེ། །ཇོ་བོ་སྔགས་ཀྱི་བདག་པོར་བསྟོད། །སྒྲོལ་མ་དཀར་མོའི་སྤྲུལ་པ་སྟེ། །ཚེ་ཡི་ལྷ་མོ་གོས་དཀར་མོ། །མ་མོ་རྦོད་གཏོང་དཀྱིལ་འཁོར་ལྷ། །དཀར་མོ་ཉི་ཟླ་ཐོད་ཕྲེང་ཅན། །བཀྲ་ཤིས་ཚེ་རིང་མ་ལ་བསྟོད། །སེམས་དཔའ་ཉེ་བའི་སྲས་བརྒྱད་གྲགས། །ད་ལྟ་ས་བརྒྱད་སེམས་དཔའི་ཚུལ། །ཐང་ལྷ་མཁར་ནག་སྨྱོ་ཁ་སོགས། །མཚན་བརྒྱད་གནས་བརྒྱད་ལྡན་ལ་བསྟོད། །ཀུན་ཏུ་བཟང་མོའི་སྤྲུལ་པ་སྟེ། །གསང་སྔགས་སྲུང་མ་རལ་གཅིག་མ། །ཕྱག་ན་རྡོ་རྗེའི་ཕྲིན་ལས་སྤྲུལ། །ཡེ་ཤེས་གཟའ་མཆོག་རཱ་ཧུ་ལ། །དེ་སོགས་བཀའ་སྲུང་ཕལ་ཆེར་རྣམས། །སངས་རྒྱས་བསྟན་པ་བསྲུང་བའི་ཕྱིར། །འཇིག་རྟེན་དྲེགས་པའི་ཚུལ་སྟོན་ཡང་། །ངོ་བོ་འཕགས་མའི་སྤྲུལ་པ་སྟེ། །དོན་ལ་ས་གནས་སེམས་དཔའ་ཆེ། །དགེ་འདུན་དཀོན་མཆོག་གྲར་གཏོགས་པས། །བདག་གིས་མཆོད་ཅིང་བསྟོད་པར་བགྱི། །དེ་དོན་རྒྱུད་ཀྱི་འགྲེལ་ཆེན་ལས། །རྒྱུད་ཀྱི་སྟོན་པ་རྡོ་
རྗེ་འཆང་། །ཞུ་བ་པོ་དང་ཉན་པའི་འཁོར། །དེ་ཉིད་འཛིན་པའི་རིག་འཛིན་མཆོག །རྒྱུད་དེ་སྲུང་བའི་ཆོས་སྐྱོང་རྣམས། །སྟོན་པ་ཉིད་ཀྱི་སྤྲུལ་པར་གསུངས། །དེ་ཕྱིར་རྩ་བ་གསུམ་པོ་ཉིད། །རྣམ་པ་མཆོག་དམན་ཚུལ་སྟོན་ཡང་། །ངོ་བོ་དབྱེར་མེད་དོན་ཤེས་པས། །བདག་གིས་འབྲལ་མེད་བརྟེན་པར་བགྱི། །ཉམས་ཆག་འཁྲུལ་པ་གང་མཆིས་བཤགས། །ཕྱིན་ཆད་མི་བགྱིད་དམ་བཅའ་བས། །མས་གདུང་བུ་ལ་བརྩེ་བ་བཞིན། །རྟག་ཏུ་འབྲལ་མེད་སྡོང་གྲོགས་མཛོད། །ཅེས་པ་འདི་བླ་མ་ཆོས་ལ་དབང་ཀུན་བཟང་འདས་ནས། ཡིད་ཆད་པ་ལྟར་གྱུར་ཏེ་ཆོས་སྐྱོང་གི་བསྐང་གསོལ་དང་བཀའ་སྲུང་གི་གསོལ་མཆོད་ལོ་དུ་མར་གཟབ་ཀྱང་། རྐྱེན་ཁ་དང་བར་ཆད་ནི་དཔུང་པ་ལྟར་བྱུང་། མཐུན་རྐྱེན་བསྒྲུབ་ཅིང་འགའ་རྐྱེན་མི་སེལ་ན། །དེ་རྣམས་ཀྱིས་རྩ་བ་ལ་སྨན་མཆོག་གམ་གནམ་ཆོས་ལྟ་བུ་ཞིག་ཐུགས་དམ་བྱས་ན་དགའ་བ་འདྲ། ཆོས་སྐྱོང་བཀའ་སྲུང་འདི་ཚོ་ལ་མཆོད་བསྟོད་བྱས་ཀྱང་སྐྱག་དད་མེད་པ་འདྲ་བསམ་ཉལ་བའི་ནུབ། ཉམས་རྨི་ལམ་འདྲེས་པའི་མཚམས་ན། །རང་གི་བསོད་ནམས་ཀྱིས་མ་ཕེར་བ་ཡིན། བཀའ་སྲུང་གི་མ་ཕེར་བ་སྤུ་ཙམ་ཡང་མེད་ཟེར་བའི་སྒྲ་ཞིག་ནམ་མཁའ་ནས་གསལ་བར་གྲགས། དེ་ཡི་དོན་ཕྱིས་ཀྱང་ཡང་ཡང་བསམ་བློ་བཏང་བས། མ་མགོན་སོགས་མཐོ་རིམ་རྣམས་ནི་ཡི་
དམ་དང་དབྱེར་མེད་དུ་འདུག །བཀའ་སྲུང་དམའ་རིགས་རྣམས་ཀྱང་ས་གནས་ཀྱི་སེམས་དཔའ་ཁོ་ན་རེད། ཐ་ན་ཚེ་རིང་མ་དང་ལྷ་སྨན་སོགས་ཀྱིའང་བར་དོའི་གནས་སྐབས་སུ་ཕན་འདོགས་པ་དང་ལམ་སྟོན་ནུས་པའི་ལོ་རྒྱུས། རང་བྱུང་རྡོ་རྗེའི་བར་དོའི་རྣམ་ཐར་ན་གསར་བར་གདའ་ན། གཞན་ཆོས་སྐྱོང་མཐོ་བ་ཚོ་ལ་སྨོས་ཅི་དགོས། རང་གི་ཕ་མྱེས་སྔགས་འཆང་མགོན་པོ་རྒྱལ་ཞེས་བྱ་བ་ལོ་བརྒྱད་ཅུ་གྱ་གཉིས་རེད་དུས། མི་སྔོན་པོ་རས་དཀར་པོའི་ཨ་གྷ་རོག་ཅན། །གཟུགས་ཐུང་ཞིང་འཇིགས་པ་ཞིག་གིས། ཁོང་ཁང་པ་རྙིང་པ་འགྱེལ་ལ་ཁད་གཅིག་གི་སྟེང་ན་འདུག་པ་དེ་སྟེང་ནས་ཁང་པ་གསར་པ་བཟོས་མ་ཐག་གཅིག་གི་སྟེང་དུ་བཞག་པ་རྨིས། ད་ལོ་འཆི་ཞིང་གཞན་ཞིག་ཏུ་སྐྱེ་བ་ལེན་པ་འདྲ། །གསུངས་པས་དེ་ལོ་འདས་ཤིང་རྟེན་རིང་སྲེལ་མང་དུ་བྱོན་སྐད་དོ། །མི་དེ་མགོན་པོ་ཡིན་པར་འདུག་གསུངས་སྐད། དེས་ན་ཆོས་སྐྱོང་རྣམས་ལ་གསོལ་མཆོད་ཐེངས་ན་ཕྱི་མ་ཡང་རང་དག་པའི་ཞིང་དུ་སྐྱེལ་བར་བཤད་གདའ། ཐ་ན་ཡང་ངན་སོང་དུ་ལྟུང་མི་འཇུག་པར། ལྷ་མིའི་ལུས་བརྟེན་བཟང་པོ་རེ་ན་སྐྱེལ་བ་ཡིན་པར་འདུག །དེ་ཡི་གནད་ཀྱིས་ང་ཡི་བླ་མ་འོལ་བ་འདས་ཁ། ད་ང་འགྲོ་རན་འདུག་པས་ལམ་གཏོར་གཏོང་དགོས་གསུངས་ནས་ཆོས་སྐྱོང་ལྷ་གྲངས་ཀྱི་དམར་གཏོར་མང་པོ་བཅས་ཏེ། གཏོར་འབུལ་རྒྱས་པར་མཛད་ནས་དེ་མ་ཐག་འདས་སྐད། དེ་ཚོ་ལ་བསམ་བཀའ་སྲུང་ཚོ་སྐྱུར་དགོས་བསམ་པ་དེ། དམ་ཚིག་གི་སེལ་རེད་པས་བསྟོད་པ་དང་བཤགས་པ་འདི་བྱས་པའོ། ༧ ཀརྨ་ཨ་རཱ་གས་
སོ།། ༈ རྒྱལ་བའི་དབང་པོ་ལ་དོན་དམ་ངེས་པའི་སྒོ་དང་སྤྲུལ་པ་ཐབས་ཀྱིས་འགྲོ་བའི་དོན་མཛད་པའི་ཆ་ཙམ་ལ་གསོལ་བ་འདེབས་པ་ནི། ན་མོ་གུ་རུ་ལོ་ཀི་ཤྭ་ར་ཡེ། །བདེ་བ་ཅན་གྱི་ཞིང་ཁམས་ན། །འོད་དཔག་མེད་པའི་ཉེ་གནས་ཚུལ། །འཇིག་རྟེན་དབང་ཕྱུག་སྤྱན་རས་གཟིགས། །སྤྲུལ་པ་བྱེ་བ་བསམ་མི་ཁྱབ། །ཀུན་གྱི་སྤྲུལ་གཞི་རྩ་བའི་ལྷ། །གསོལ་བ་འདེབས་སོ་ཐུགས་རྗེས་ཟུངས། །འོག་མིན་འཐུག་པོ་བཀོད་པ་ན། །རྣམ་པར་སྣང་མཛད་གངས་ཅན་མཚོ། །སྐུ་ལ་ཞིང་ཁམས་དཔག་མེད་རྫོགས། །ངེས་པ་ལྔ་ལྡན་ལོངས་སྤྱོད་རྫོགས། །ཀུན་རིག་རྣམ་པར་སྣང་མཛད་ལ། །གསོལ་བ་འདེབས་སོ་ཐུགས་རྗེས་ཟུངས། །གྲངས་མེད་བསྐལ་པའི་སྔོན་རོལ་ན། །གཞན་ཕན་རྣམ་རོལ་བཅོམ་ལྡན་འདས། །དེ་སོགས་འདས་པའི་སངས་རྒྱས་བཞུགས། །གྲངས་མེད་སྟོན་ལ་ཕྱག་འཚལ་ལོ། །འཛམ་གླིང་བྱེ་བ་ཕྲག་བརྒྱ་ན། །སྐལ་བཟང་སངས་རྒྱས་བྱེ་བ་བརྒྱ། །ལྷོ་ནུབ་རྔ་ཡབ་གླིང་ཕྲན་ན། །པདྨ་འབྱུང་གནས་བྱེ་བ་བརྒྱ། །རི་བོ་ཏ་ལར་བྱེ་བ་བརྒྱ། །སྤྱན་རས་གཟིགས་དབང་བྱེ་བ་བརྒྱ། །རྣམ་པ་ཐ་དད་ངོ་བོ་གཅིག །
གསོལ་བ་འདེབས་སོ་ཐུགས་རྗེས་ཟུངས། །སྟེང་ཕྱོགས་དགའ་ལྡན་ལྷ་ཡུལ་ན། །བློ་གྲོས་རིན་ཆེན་ཞེས་སུ་གྲགས། །རྒྱལ་བ་བྱམས་པའི་ཉེ་གནས་ཚུལ། །ལྷོ་ཕྱོགས་དཔལ་གྱི་རི་བོ་ན། །ས་ར་ཧ་པ་ཞེས་སུ་གྲགས། །གྲུབ་ཆེན་བརྒྱད་ཅུའི་ཚོགས་དཔོན་ཚུལ། །གནས་མཆོག་ཉི་ཤུ་རྩ་བཞི་ན། །འཆི་མེད་འཇའ་ལུས་གྲུབ་ཆེན་ཚུལ། །ཀླུ་ཡི་འབྱུང་གནས་ཞེས་སུ་གྲགས། །གསོལ་བ་འདེབས་སོ་བྱིན་གྱིས་རློབས། །དུར་ཁྲོད་མེ་རི་འབར་བ་ན། །དབང་ཆེན་རྟ་མགྲིན་ཁྲོ་བོའི་ཚུལ། །བྱང་ཕྱོགས་དུར་ཁྲོད་ཆེན་པོ་ན། །རྡོ་རྗེ་བེར་ཆེན་མགོན་པོའི་ཚུལ། །གསོལ་བ་འདེབས་སོ་དངོས་གྲུབ་སྩོལ། །མ་འོངས་ཚེ་ལོ་བརྒྱད་ཁྲིའི་དུས། །འཁོར་ལོས་སྒྱུར་བའི་རྒྱལ་པོ་དང་། །རྒྱལ་བ་བྱམས་པའི་སྦྱིན་བདག་ཚུལ། །དེ་འོག་བཅོམ་ལྡན་སེང་གེ་སྒྲ། །སྐལ་བཟང་སངས་རྒྱས་དྲུག་པའི་ཚུལ། །སངས་རྒྱས་དགུ་བརྒྱ་གོ་དགུའི་མཐར། །དེ་བཞིན་གཤེགས་པ་སྣང་མཛད་ཞེས། །སྐལ་བཟང་སངས་རྒྱས་ཐ་མའི་ཚུལ། །མ་འོངས་དུས་མཐའི་བསྐལ་པ་ལ། །བདེ་བ་ཅན་གྱི་ཞིང་ཁམས་སུ། །འོད་ཟེར་དཔལ་བརྩེགས་རྒྱལ་པོ་ཞེས། །མཛད་པ་
མཐར་ཕྱིན་བཅོམ་ལྡན་འདས། །གསོལ་བ་འདེབས་སོ་བྱིན་གྱིས་རློབས། །དེང་སང་མ་དག་འཁྲུལ་པའི་ངོར། །ལྷོ་ཕྱོགས་འཇང་གི་པོ་ཊ་ལར། །ངེས་མེད་དགེ་སློང་རྣལ་འབྱོར་ཚུལ། །མཐོན་མཐིང་ཅོད་པན་འཛིན་པ་པོ། །བཛྲ་དྷརྨ་དྷརྟུ་ལ། །གསོལ་བ་འདེབས་སོ་ཐུགས་རྗེས་ཟུངས། །དུས་ངན་སྙིགས་མའི་འགྲོ་བ་ལ། །ཐུགས་རྗེས་དཔུང་ཆེན་ཆེར་བསྐྱེད་ནས། །ལོ་བརྒྱར་ཞབས་པད་བརྟན་པ་དང་། །སྒྲུབ་བརྒྱུད་བསྟན་པ་རྒྱས་པ་གཅིག །བྱིན་གྱིས་བརླབས་པར་མཛད་དུ་གསོལ། །ཅེས་པ་འདི་ཉམས་རྨི་ལམ་གྱི་མཚམས་སུ་རྟེན་འབྲེལ་གྱི་གནད་ཅིག་གིས་རྒྱལ་བའི་དབང་པོ་ཁྱོད་ལ་ཐུགས་ཤིན་ཏུ་མཉེས་པ་འདུག་ཟེར་བའི་སྒྲ་ཞིག་གྲགས། དེ་རྗེས་ནུབ་གཅིག་རྒྱལ་བའི་དབང་པོ་དངོས་ལྟར་མཇལ། བཙུན་མ་འདྲ་བ་འགའ་རེས་ང་ལ་ཞུ་སྣ་འགའ་བཅུག །དེ་རིན་པོ་ཆེ་ལ་ཞུ་དགོས་སྙམ་ནས་ཞུ་སྡེ་རྒྱལ་བའི་དབང་པོ་ཕེབས་སོང་། དེར་བྱིསྦ་འདྲ་བ་འགའ་དད་འདུན་མི་ཤེས་པར་འདུག་པས། དེར་ངས་རྒྱལ་བའི་དབང་པོ་པང་དུ་བླང་ནས་ཕྲག་ལ་སྦྱར་བ་འདྲ་བྱས་ནས་འདི་ཕ་ལ་རྒྱུན་ཏུ་འོ་བརྒྱལ་འདི་འདྲ་བ་སྨྲས་ཤིང་། དད་པའི་གདུང་ཤུགས་ཀྱིས་མཆི་མ་ཆར་ལྟར་བབ་པ་རྨིས་པས་འདི་ལ་བརྟེན་གནད་ཅིག་ཡིན་པ་འདྲ་བསམས་ནས་སྨྲས་སོ། །དེ་དུས་ཐོ་རངས་ཉམས་སྣང་ལ་ཡི་གེ་དོད་པ་ལས་རང་གི་དོན་
འབྲེལ་ཚིག་བཞི་འདུག་སྟེ། རེ་ཞིག་དུས་ལ་མ་བབ་པར་མི་བྲིའོ། །ཨ་རཱ་གས་སོ། །མངྒ་ལཾ།། ༈ །།བཀའ་རྩོམ་བསྒྲིག་ཆོག་ཟིན་བྲིས་ཀྱི་རྣམ་དབྱེ་དང་། མཛད་ཆོས་རུང་བའི་རྟེན་འབྲེལ་བྱུང་ཚུལ་སྨོན་ལམ་དང་བཅས་པ་བཞུགས་སོ།། ༈ ན་མོ་སརྦ་དྷརྨཱ་ཡེ། ལུང་རྟོགས་དམ་པའི་ཆོས་ལ་ཕྱག་འཚལ་ལོ། །ཆོས་རྣམས་ཐམས་ཅད་བཀའ་དང་བསྟན་བཅོས་གཉིས། །ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཐུབ་པའི་བསྟན་པ་ནི། །འཇིག་རྟེན་ཁམས་སུ་ཡུན་རིང་གནས་འགྱུར་གསུངས། །བཀའ་ལ་ཞལ་ནས་གསུངས་དང་བྱིན་གྱིས་བརླབས། །རྗེས་སུ་གནང་བའི་བཀའ་དང་གསུམ་ཡིན་ཏེ། །བཀའ་འགྱུར་ལ་སོགས་མདོ་རྒྱུད་རྣམས་ཡིན་ནོ། །བསྟན་བཅོས་མཛད་མཁན་ལ་ཡང་རབ་འབྲིང་གསུམ། །རབ་ནི་ཆོས་ཉིད་བདེན་པ་མཐོང་བ་སྟེ། །ས་ར་ཧ་སོགས་གྲུབ་ཆེན་རྣམས་ཡིན་ནོ། །འབྲིང་ནི་ཡི་དམ་ལྷ་ཡི་གནང་བ་ཐོབ། །ཕྱོགས་ཀློང་རྡོ་རྗེ་གདན་པ་ཆེ་ཆུང་ལྟར། །ཐ་མ་རིག་པའི་གནས་ལྔར་མཁས་པ་སྟེ། །རྒྱ་གར་པཎ་ཆེན་རྣམས་ནི་ཡིན་པར་བཤད། །རྒྱ་གར་རྒྱལ་པོ་ཆོས་ཀྱི་ཁྲིམས་དམ་པས། །པཎ་གྲུབ་མང་པོ་ཚོགས་
ནས་བརྩམས་ཆོས་ལྟར། །ལེགས་ན་ཁྲི་འདོན་བཀུར་སྟི་ངོ་སོ་བསྟོད། །མ་ལེགས་བསྟན་བཅོས་ཁྱི་ཡི་མཇུག་མར་བསྲི། །མེ་སྦར་སྣ་ཁོབ་དམྱལ་བར་ལྟུང་དགོས་ཟེར། །རྩོམ་པ་པོ་ལ་སྨ་འབེབས་ཆད་པ་གཅོད། །དེ་ཕྱིར་རྒྱ་གར་ཆོས་ཁུངས་བཙུན་ཟེར་ཡང་། །ངེས་པ་མེད་དེ་ཚད་མ་རྣམ་འགྲེལ་ཡང་། །པཎྜི་ཏ་ཀུན་ཆགས་སྡང་མ་ལེགས་ཟེར། །དང་པོ་ཁྱི་ཡི་མཇུག་མར་བསྲིས་ན་ཡང་། །ཕྱིས་ནས་ཀུན་གྱི་གཙུག་གི་ནོར་བུར་གྱུར། སློབ་དཔོན་མཁས་པ་ཙན་དྲ་གོ་མི་ཡི། །སྒྲ་ཡི་བསྟན་བཅོས་བརྩམ་པ་མ་ལེགས་པས། །གཞན་གྱི་བསྟན་བཅོས་མཐོང་བས་རང་ངོ་ཚ། །རང་གི་བརྩམ་པ་ཆུ་དོང་ནང་དུ་འཕང་། །དེ་ཚེ་སྤྱན་རས་གཟིགས་དབང་ནམ་མཁར་བྱོན། །ཁྱོད་ཀྱིས་རྩོམ་པ་ཧ་ཅང་མི་ལེགས་ཀྱང་། །བསམ་པ་བཟང་པོས་བརྩམ་ཕྱིར་འགྲོ་དོན་འབྱུང་། །ཡར་ཐོན་གསུངས་ལྟར་བཏོན་པས་རྒྱ་ཆེར་འཕེལ། །ཆུ་དེ་སུས་འཐུང་ཤེས་རབ་ཆེའོ་སྐད། །རྒྱ་གར་ནས་འགྱུར་བསྟན་བཅོས་ཕལ་ཆེར་ནི། །བསྟན་འགྱུར་ཨུ་རྒྱན་གསུངས་སོགས་མཐའ་ཡས་སོ། །བོད་ཀྱི་མཁས་གྲུབ་རྣམས་ཀྱི་རྩོམ་པ་ཡང་། །གྲུབ་མཐའ་
གཞན་གྱི་མི་དང་སྐུར་འདེབས་མང་། །འོན་ཀྱང་རང་རང་རྗེས་འཇུག་རྣམས་ལ་ཕན། །མདོར་ན་རྫོགས་པའི་སངས་རྒྱས་མ་ཐོབ་པར། །ཤེས་བྱ་རེ་རེའི་མཐའ་ཡང་ཆོད་མི་སྲིད། །དེ་ཕྱིར་བསྟན་བཅོས་རྩོམ་པ་ཕལ་ཆེར་གྱིས། །དེ་དོན་མཐའ་དག་རྟོགས་པར་དཀའ་ལགས་ཀྱང་། །རང་གི་ཤེས་ཚོད་ཙམ་ཞིག་གསུངས་པ་ལགས། །དཔེར་ན་ཁྱུང་དང་བྱེ་མ་ལྷེབ་ཡན་ཆོད། །འཕུར་བ་འདྲ་ཡང་གཤོག་རྩལ་ཆེ་ཆུང་ཁྱད། །གཉིས་ཀ་ནམ་མཁའ་མཐའ་མི་ཆོད་པ་མཉམ། །འོན་ཀྱང་གཤོག་ཐོགས་ཡིན་ཕྱིར་གཉིས་ཀ་འཕུར། །དེ་ཕྱིར་རྩོམ་པ་མཁས་པའི་བྱ་བ་སྟེ། །བློ་ཚོད་ཙམ་ཞིག་རུང་བ་ཟླ་གྲགས་གསུངས། །དེ་ཡང་དོན་ལོགས་དོན་མེད་དོན་འགལ་དང་། །བརྩེ་བ་བྲལ་བའི་བསྟན་བཅོས་སྤང་བྱ་ཡིན། །གང་ཕྱིར་རྒྱལ་བའི་བསྟན་པ་འབའ་ཞིག་གིས། །དབང་བྱས་རྣམ་གཡེང་མི་ཅན་ཡིད་ཀྱིས་བྱས། །ཐར་པ་ཐོན་པའི་ལམ་དང་རྗེས་འབྲེལ་བ། །དེ་ཡང་དྲང་སྲོང་བཀའ་བཞིན་སྤྱི་བོར་བླངས། །གསུངས་པའི་མཚན་ཉིད་དེ་ནི་ཚང་གལ་ཆེ། །ཐེག་པ་ཆེ་ཆུང་དགོངས་པ་དཀྲུགས་པ་དང་། །གཏེར་ཆོས་དཀྲུགས་ཤིང་གཏེར་རྫུན་རྩོམ་པ་སོགས། །
མནར་མེད་རྒྱུ་ཡིན་དུག་ལྟར་སྤངས་བར་བྱ། །མཁས་ཁྱད་འདོད་པའི་བསྲེ་སླད་མང་པོ་ཡང་། །གདམས་པ་འཆལ་ཤིང་བྱིན་རླབས་ཡལ་བའི་རྒྱུ། །དེ་ཕྱིར་ཨུ་རྒྱན་ཆེན་པོའི་ཡང་ཡང་བཀག །འོན་ཀྱང་དུས་ཀྱི་དབང་གིས་དེ་མང་སྟེ། །གདམས་ངག་ཚོང་དུས་འོ་མ་ལྟར་འགྱུར་གསུངས། །ཉམས་མགུར་གསོལ་འདེབས་སོགས་ལ་བཀག་པ་མེད། །དེ་ཡང་གཞན་ནས་ཐུ་དང་འདྲ་དཔེ་མིན། །འཕྲལ་དུ་ཉམས་ལ་གང་ཤར་བརྗོད་པ་ཡིན། ༈ །གཞུང་ནས་གབ་འཁྲུགས་སྤྲད་དགོས་ཡོད་པ་རྣམས། །ཤྲཱི་བསྒྲིགས་ནས་བྲི་བ་བཅོས་སླད་མ་ཡིན་ཏེ། །རྗེས་འཇུག་བློ་དམན་རྣམས་ལ་ཕན་ཕྱིར་ཡིན། །ཞལ་ཤེས་གནད་ཀྱི་མན་ངག་ཟབ་མོ་རྣམས། །སྔར་དུས་གསེར་གྱིས་བསླུ་བ་དགོས་ན་ཡང་། །སྙིགས་དུས་བྲི་མཁན་ཙམ་ཡང་དཀོན་པའི་ཕྱིར། །ཟིན་བྲིས་བྲི་བ་ཕན་འདོད་སེམས་བསྐྱེད་ཡིན། ༈ །དེ་ཕྱིར་བདག་གིས་ཟིན་བྲིས་འགྲིགས་ཆོག་སོགས། །མང་པོ་བྲིས་པ་མཁས་འདོད་ཁྱད་ཆོས་མིན། །མ་འོངས་བློ་དམན་རང་འདྲ་མང་པོ་ལ། །ཕན་པའི་སེམས་ཀྱིས་བཞག་པ་བྱས་པ་ཡིན། །དེ་ལ་འགལ་འཁྲུལ་སྦ་
འོས་གསལ་བཀོད་སོགས། །འགལ་འཁྲུལ་མཆིས་ན་ཆོས་བདག་སྲུང་མར་བཤགས། །འདི་ཕྱིར་སྒྲིབ་པར་མི་འགྱུར་དངོས་གྲུབ་སྩོལ། །དེ་དག་ཉམས་སུ་ལེན་པ་ཐམས་ཅད་ལ་།བྱིན་གྱིས་རློབས་ལ་སྲུང་སྐྱོབ་མཛད་དུ་གསོལ། །ཞེས་པ་འདི་བླ་མ་ཆོས་དབང་འདས་རྗེས། བདག་གི་སྔར་ནས་ཟིན་བྲིས་འགྲིགས་ཆོག་རྩོམ་སོགས་མང་དུ་བྱས། དེ་དག་མ་ལེགས་པ་ཡིན་ནམ་ད་ལོ་ན་ཉིང་རྐྱེན་ཁ་ཆེན་པོ་བྱུང་། རང་གི་ལག་པ་འདི་ཡང་མ་བདེ། སྔོན་དྲུང་རམ་དཀར་པོ་བས་དགོངས་འདུས་མེ་ཏོག་ཕྲེང་མཛེས་ཀྱི་བཤད་པ་བརྩམས་པས། སྨྱུག་གྲི་ཟུག་ནས་འདས་རྐྱེན་བྱས་སྐད། ཉི་མ་ཞེས་བྱ་བའི་སྔགས་པས་གུ་དྲག་དུང་ཐོན་ཐོག་བརྒྱབ་པ་སྡུག་ཁོང་ནམ་མཁའི་སྙིང་པོའི་གདུང་རྒྱུད་ཡིན་པ་འདུག་སྟེ། རཏ་གླིང་པད་གླིང་གི་གུ་དྲག་བསྲེས་ནས་བྲིས་མ་ཐག་ལྕེ་དིག །བུ་བུ་མོ་རྣམས་སྨྱོ་ནས་རབས་ཆད་སྐད། འབྲི་ཁུང་ཞབས་དྲུང་ཆོས་ཀྱི་གྲགས་པས། གཤིན་རྗེ་ཚེ་བདག་གི་ཟིན་བྲིས་འགའ་མཛད་པས། ཕྱག་མཛུབ་བསྙུངས་ནས་འདས་རྐྱེན་བྱས་སྐད། ད་ནི་བདག་གིས་ཀྱང་རྩོམ་དང་ཟིན་བྲིས་གང་ཡང་མི་བྱེད་དགོས། སྙམ་པ་ཆགས་དོ། མི་ཕོད་པ་ཨེ་ཡིན་བསམ་ནས་ཉལ་ནུབ་རྨི་ལམ་དུ། མཆོད་ཁང་འདྲ་བ་གཅིག་གི་ནང་དུ་ཕྱིན་པས། ང་རང་གི་ལག་ཏུ་ང་རང་གི་གཏེར་བཏོན་པ་ཡིན་སྙམ་པའི་དཔེ་ཆ་གསར་བ་འགའ་གདའ། སྐུ་འདྲ་དེ་ཚོའི་གསེབ་ནས་ད་རུང་ང་ཡི་གཏེར་འདོན་རྒྱུ་མང་པོ་གདའ་སྟེ། དེ་སྔ་ཡང་
བཏོན་ཏེ་ང་ལ་གཏེར་ཐོན་ཟེར་བའི་ལུང་བསྟན་མེད་པས་འདོན་མི་ཕོད་བསམས་པས། ཁྱོད་རང་གི་གཏེར་འདོན་འཕྲོ་རྣམས་ཐོན་ཟེར་བའི་སྒྲ་ཞིག་ནམ་མཁའ་ནས་གྲག །གཉིད་པ་དང་རྩོམ་རྣམས་རུང་ཟེར་བའི་བརྡའ་རུ་གོ་ནས་བྲིས་པའོ། །རཱ་ག་ཨ་སྱས་སོ།། ༈ །།པད་འབྱུང་ལ་གདུང་བའི་གསོལ་འདེབས་སྤྲུལ་སྐུ་ལ་ས་གཏེར་གྱི་སྐལ་པ་དུས་ལས་མི་འདའ་བའི་བདེན་ཚིག་ནི། ༅། གུ་རུ་པདྨ་སིདྡྷི་ཧཱུྃ༔ གནམ་ལོ་རྒྱལ་པོར་མཚན་གསོལ་བ། །ཅང་ཤེས་རྒྱལ་པོ་བ་ལ་ཧོ། །ཟླ་བ་བློན་པོས་རིས་བབ་པ། །བལ་ཆེན་གཡང་གི་ཕྱི་མོ་ལ། །ཨུ་རྒྱན་འབྱོན་པར་ཞལ་བཞེས་པའི། །དཀར་པོའི་ཕྱོགས་ཀྱི་ཚེས་བཅུ་ལ། །ཟབ་རྒྱས་ཚོགས་ཀྱི་འཁོར་ལོའི་དུས། །གསོལ་བ་གང་བཏབ་འགྲུབ་གསུངས་ན། །འདོད་དོན་གསོལ་བ་འདེབས་ལགས་ཀྱི། །སེམས་ཅན་ཀུན་གྱི་བསམ་པ་ནི། །མ་འདྲེས་སོ་སོར་མཁྱེན་ལགས་ན། །བདག་གིས་འདོད་དོན་དགོངས་པར་མཛོད། །འགྲོ་དྲུག་ཀུན་གྱིས་སྒྲ་སྐད་ནི། །མ་འདྲེས་སོ་སོར་གསན་ལགས་ན། །བདག་གི་ཚིག་འདི་གསན་དུ་གསོལ། །ཐུགས་རྗེ་གློག་བས་མྱུར་བ་ན། །མྱུར་མགྱོགས་ཕྱག་གིས་བསྐྱབ་ཏུ་གསོལ། །ལུང་བསྟན་མི་འགྱུར་རྡོ་རྗེ་ཡི། །
བར་ཆད་ཐམས་ཅད་བཟློག་ཏུ་གསོལ། །ས་རྟགས་གནམ་རྟགས་ཚང་ལགས་ཀྱི། །ཁ་བྱང་ཤོག་སེར་གནང་དུ་གསོལ། །ཚེ་དབང་རིག་འཛིན་ཁྱེད་ལགས་ཀྱིས། །ཚེ་ཡི་བར་ཆད་བཟློག་ཏུ་གསོལ། །རེ་ས་གཞན་མེད་ཁྱེད་རང་མཁྱེན། །སྤྲུལ་སྐུ་མི་འགྱུར་རྡོ་རྗེ་ནི། །ལོ་བརྒྱའི་བར་དུ་ཞབས་བརྟན་ཅིང་། །ཕྲིན་ལས་རྒྱས་པར་བྱིན་གྱིས་རློབས། །རྩེ་གཅིག་དད་པས་གསོལ་བཏབ་ན། །གསོལ་བཏབ་དོན་དང་ལྡན་པར་མཛོད། །དེ་སྐད་རཱ་ག་ཨ་སྱས་སྨྲས།། ༈ །།རྒྱལ་དབང་ཆོས་དབྱིངས་རྡོ་རྗེ་བླ་མ་ཡི་དམ་དབྱེར་མེད་དུ་གསོལ་འདེབས་སྨོན་ལམ་བཞུགས་སོ། །ན་མོ་ལོ་ཀི་ཤྭ་ར་ཡེ། འཇིག་རྟེན་དབང་ཕྱུག་སྤྱན་རས་གཟིགས། །དམར་ནག་དཀར་བའི་ཞལ་གསུམ་པ། །ཕྱག་དྲུག་དར་དང་རིན་ཆེན་བརྒྱན། །དང་པོས་པདྨ་དེའི་ཁ་འབྱེད། །བར་པས་རྡོ་རྗེ་རིན་ཆེན་ཏེ། །ཐ་མས་འཁོར་ལོ་རལ་གྲི་འཛིན། །རང་འདྲའི་ཡུམ་དང་གཉིས་སུ་མེད། །འཇིག་རྟེན་དབང་ཕྱུག་སྤྱན་རས་གཟིགས། །གུས་པའི་ཡིད་ཀྱིས་ཕྱག་འཚལ་བསྟོད། །དེ་དང་ངོ་བོ་དབྱེར་མེད་ཀྱང་། །མི་ལས་འདས་ཀྱང་མི་གཟུགས་འཛིན། །མཐོན་མཐིང་ཅོད་པན་འཆང་
བ་སོགས། །བཛྲ་དྷརྨ་དྷརྟུ་ལ། །གསོལ་བ་འདེབས་སོ་ཐུགས་རྗེས་ཟུངས། །བླ་མ་ཡི་དམ་དབྱེར་མེད་པ། །གོ་བ་སྔར་ནས་ཡོད་མོད་ཀྱང་། །ངེས་ཤེས་ད་ལམ་གཏིང་ནས་སྐྱེས། །ད་ནི་སྙིང་ནས་གསོལ་བ་འདེབས། །གསོལ་བ་བཏབ་པའི་བྱིན་རླབས་ཀྱིས། །བདག་དང་བདག་ལ་འབྲེལ་ཐོག་རྣམས། །འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་ལམ་སྣ་དྲོངས། །འོད་དཔག་མེད་དང་ཞལ་མཇལ་ནས། །འཇིག་རྟེན་དབང་ཕྱུག་ཁྱེད་ཉིད་དང་། །རྟག་ཏུ་མི་འབྲལ་ཞིང་དེ་འཛིན། །བླ་མེད་བྱང་ཆུབ་འབྲས་ཐོབ་ཤོག །ཅེས་གསང་འདུས་འཇིག་རྟེན་དབང་ཕྱུག་གི་བསྙེན་པ་ཞག་བདུན་བྱས་པས་ཞག་དྲུག་ནུབ་ཉམས་རྨི་ལམ་གྱི་མཚམས་སུ། གསང་འདུས་དམར་པོ་ཞལ་གསུམ་ཕྱག་དྲུག་པ་མང་པོས་ནམ་མཁའ་ཐམས་ཅད་གང་བ་ཧ་ལམ་ཙམ་མཐོང་། བདུན་ནུབ་རྒྱལ་བའི་དབང་པོས་གསུངས་རིན་པོ་ཆེ་བས་ཕྱག་བྲིས་མཛད་ནས་བཀུར་བ་ཡིན་སྙམ་པའི་བཀའ་ཤོག་ཅིག་ལ། ཡི་དམ་གཅིག་ལ་ཐུགས་དམ་བྱ་ཚུལ་དང་ཡང་ན་རྒྱལ་བའི་དབང་པོ་ཉིད་ལ་བློ་བཀལ་ནས་གསོལ་བ་འདེབས་ཚུལ་གདམས་པ་ཟབ་མོ་འགའ་གདའ་བ། ཀློག་པས་དེ་ནུབ་ཡིད་ལ་གསལ་ཏེ་ཕྱིར་ནངས་བརྗེད། ཐོ་རངས་རྒྱལ་བའི་དབང་པོས་བྱིན་རླབས་རྟེན་ཤོག་ཐུམ་འགའ་བསྐུར་གདའ་བའི་ཁ་ཡིག་ལ། ཕོ་བྱས་གོ་བཅད་ད་རུང་
ལོ་གྲངས་འདི་ཙམ་ལ་འགྲོ་དོན་གྱིས་ཟེར་བའི་ཡི་གེ་གདའ་སྟེ་ལོ་གྲངས་འདི་རུ་བྲིས་པར་མི་རུང་རྨི་ལམ་དེ་ལྟར་བྱུང་བས་གསོལ་བ་བཏབ་པའོ། ༧ ཨ་རཱ་གས་སོ།། ༈ །།སྒམ་པོ་སྤྲུལ་སྐུའི་དྭགས་བརྒྱུད་ལ་གསོལ་བ་འདེབས་པ་ནི། ན་མོ་གུ་རུ། སྔོན་ཚེ་སེམས་དཔའ་མེ་ཏོག་ཟླ་མཛེས་ནི། །ཤཱཀ་ཐུབ་སྤྱན་སྔར་ཟླ་འོད་གཞོན་ནུར་གྱུར། །གངས་རིའི་ཁྲོད་དུ་དགེ་སློང་འཚོ་མཛད་ཅེས། །མདོ་སྡེ་དུ་མར་ཡང་ཡང་ལུང་བསྟན་པ། །ཐུབ་དབང་གཉིས་པ་དེ་ལ་གསོལ་བ་འདེབས། །ཡང་ཟབ་ཕྱག་རྒྱ་ཆེན་པོའི་ཆོས་ཀྱི་སྒྲ། །ཆོས་ཀྱི་རྔ་ཆེན་ཁྱེད་ཀྱིས་བརྡུང་བའི་མཐུས། །གང་ཐོས་ཐམས་ཅད་མཆོག་གི་དངོས་གྲུབ་ཐོབ། །གྲུབ་ཐོབ་ཆར་པ་འབེབས་ལ་གསོལ་བ་འདེབས། །སྤྱན་རས་གཟིགས་དབང་རྒྱལ་བ་ཀརྨ་པ། །པད་འབྱུང་ས་ར་ཧ་དང་འཚོ་མཛད་ཉིད། །མཐོང་ཐོས་དྲན་གྲོལ་ཉིད་དུ་ཞལ་བཞེས་པའི། །འབྲེལ་ཚད་དོན་ལྡན་དེ་ལ་གསོལ་བ་འདེབས། །སྤྱོད་པ་འདུལ་བ་དང་མཐུན་གཙང་བ་དང་། །བསམ་པ་བྱང་ཆུབ་སེམས་ཀྱི་བཟོ་རྒྱ་ལེགས། །ཉམས་ལེན་ཕྱག་རྒྱ་ཆེན་པོ་གནད་དུ་བསྣུན། །མགོན་པོ་ཁྱེད་ཀྱི་རྣམ་ཐར་འགྲུབ་པར་ཤོག །བདག་དང་སློབ་མ་གས་
བརྒྱུད་པར་བཅས་པ་ཡང་། །མགོན་པོ་ཁྱེད་ཀྱི་རྗེས་སུ་འཇུག་ལགས་ཀྱི། །ཁྱེད་ལྟར་ཚེ་འདིར་མཆོག་གི་དངོས་གྲུབ་ཐོབ། །ཕྱི་མ་བདེ་བ་ཅན་དུ་སྐྱེ་བར་ཤོག །ཅེས་པ་སྒམ་པོ་སྤྲུལ་སྐུས་ཆོས་བསྐུར་བྱུང་བ། སྔས་སུ་བཞག་ནས་ཉལ་ནུབ། ནམ་ཕྱེད་གྲུབ་ཐོབ་དྲུག་བདུན་ཙམ་ཞིག་གྲལ་བྱས་ནས་བཞུགས་འདུག་པའི་གྲལ་འདབས་སུ་རང་ཡང་བསྡད་པ་དང་། ཐོ་རངས་རྒྱལ་བའི་དབང་པོ་སྐུ་དངོས་འདྲ་བ་ཞིག་མཇལ། །ང་ལ་སྐུ་རྩེད་མཛད་ནས་ཡར་ལ་ཕེབས་སོང་བ། ང་རང་ཡང་དྭགས་ཞུ་དང་ཆོས་གོས་གཟན་ནས་དེའི་རྗེས་སུ་སོང་ཙ་ན། ཁང་བཟང་ལེགས་པོ་གཅིག་ཏུ་སླེབས་པ་རྨིས། གཉིད་སད་ནས་ཉམས་སྣང་ལ། ཕྱག་རྒྱ་ཆེན་པོའི་དོན་རྟོགས་ཟེར་བའི་སྒྲ་ཞིག་གྲགས་སོ། །དེ་ཕྱིར་གསོལ་འདེབས་འདི་བྱས་སོ། །རཱ་ག་ཨ་སྱས་སོ། །མངྒ་ལཾ།། ༈ །།འཕགས་མ་སྒྲོལ་མ་དཀར་མོའི་གསོལ་འདེབས་བཞུགས་སོ། །ན་མོ་ཨཱཿརྱ་ཏཱ་རེ་ཡེ། བདེ་བ་ཅན་གྱི་ཞིང་ཁམས་ན། །མགོན་པོ་ཚེ་དཔག་མེད་པའི་ཡུམ། །གོས་དཀར་མོ་ལ་གསོལ་བ་འདེབས། །པོ་ཊ་ལ་ཡི་གནས་མཆོག་ན། །འཕགས་པ་སྤྱན་རས་གཟིགས་ཀྱི་ཡུམ། །འཕགས་མ་སྒྲོལ་མར་གསོལ་བ་འདེབས། །སྤྲུལ་པས་འཛམ་གླིང་ཆུ་བཞིའི་རྒྱུད། །ཐམས་ཅད་མ་ལུས་ཁྱབ་
མཛད་ཅིང་། །འགྲོ་དོན་མཛད་ལ་གསོལ་བ་འདེབས། །བྱང་ཆུབ་སེམས་དཔའ་ཐམས་ཅད་ལ། །ལུས་དང་གྲིབ་བཞིན་རྗེས་འབྲང་ནས། །སྲུང་སྐྱོབ་མཛད་ལ་གསོལ་བ་འདེབས། །འཇིགས་པ་བཅུ་དྲུག་གང་བྱུང་སར། །གློག་བཞིན་མྱུར་བར་དེར་བྱོན་ཏེ། །སྐྱབས་ཞུས་སྐྱོབ་མཛད་མ་ལ་འདུད། །མཆོག་དང་ཐུན་མོང་དངོས་གྲུབ་ཀུན། །ཅི་འདོད་ཡིད་བཞིན་སྩོལ་མཛད་མ། །ཡིད་བཞིན་འཁོར་ལོར་གྲགས་ལ་བསྟོད། །བདག་དང་སློབ་མ་བརྒྱུད་པར་བཅས། །ལྷ་མོ་ཁྱོད་ལ་སྐྱབས་གསོལ་གྱིས། །རྟག་ཏུ་ཐུགས་རྗེས་སྐྱོབས་པར་ཞུ། །ཞེས་པ་འདི་ནི་གཉེར་པས་ཚེ་དཔག་སྟོང་སྐུའི་པར་བཏབ། ནང་གཞུག་ལ་བདག་གི་སྐུ་མཚལ་བཞག །ཚོན་རྩི་ལེགས་པར་གསོལ་འདུག་པ་ལ་རབ་གནས་ནུབ་རྨི་ལམ་དུ་ལྷ་ཁང་གཅིག་གི་ནང་དུ། སྐུ་སྐྱེ་འགའ་མཇལ་རྒྱུ་ཡོད་སྙམ་ནས་སོང་ཙ། ཁྲི་མཐོན་པོ་ལྔའི་སྟེང་ན། སྒྲོལ་མ་དཀར་མོ་ལྔ་ཤིན་ཏུ་གསལ་བ་དངོས་སུ་བཞུགས་འདུག་ཅིང་། སྤྱན་ཅུང་ཟད་བསྒྲད་འདུག །ལྔ་ཁ་ཞི་ཞིང་འཛུམ་པ་བཞད་ཅིང་འདུག་པ་མཇལ། སྐུ་འདྲ་ལ་རབ་གནས་ཞག་འགའི་བར་འཛིན་འདུག་ཟེར་བ་ལ་བརྟེན་ནས་བྲིས་པའོ། །ཨ་རཱ་གས་སོ།། ༈ །།རྒྱལ་བའི་དབང་པོ་བཅུ་པ་དང་དྲུང་པ་ལ་ངོ་བོ་དོན་གྱིས་སྣང་ཚུལ་གྱི་གསོལ་འདེབས་
ནི། ན་མོ་ལོ་ཀི་ཤྭ་ར་ཡེ། བདེ་བ་ཅན་གྱི་ཞིང་ཁམས་ན། །བཞུགས་ཚེ་རྒྱལ་བ་རྒྱ་མཚོར་གྲགས། །རི་བོ་ཏ་ལའི་རྩེ་མོ་རུ། །བཞུགས་ཚེ་འཕགས་པ་སྤྱན་རས་གཟིགས། །ཟངས་མདོག་དཔལ་རིའི་རྩེ་མོ་རུ། །བཞུགས་ཚེ་རིག་འཛིན་ཐོད་ཕྲེང་རྩལ། །རི་བོ་ཏ་ལའི་རྩེ་མོ་རུ། །བཞུགས་ཚེ་འཕགས་པ་སྤྱན་རས་གཟིགས། །ཟངས་མདོག་དཔལ་རིའི་རྩེ་མོ་རུ། །བཞུགས་ཚེ་རིག་འཛིན་ཐོད་ཕྲེང་རྩལ། །ཤར་གྱི་ཕྱོགས་ཀྱི་ཞིང་ཁམས་ན། །བཞུགས་ཚེ་འཕགས་པ་སེང་གེ་སྒྲ། །ལྷོ་ཡི་ཕྱོགས་ཀྱི་ཞིང་ཁམས་སུ། །བཞུགས་ཚེ་ཡིད་བཞིན་འཁོར་ལོ་ཞེས། །ནུབ་ཀྱི་ཕྱོགས་ཀྱི་ཞིང་ཁམས་སུ། །བཞུགས་ཚེ་འཇིག་རྟེན་དབང་ཕྱུག་ཟེར། །བྱང་གི་ཕྱོགས་ཀྱི་ཞིང་ཁམས་སུ། །བཞུགས་ཚེ་དོན་ཡོད་ཞགས་པར་གྲགས། །འོག་མིན་འཐུག་པོ་བཀོད་པ་ན། །བཞུགས་ཚེ་རྣམ་པར་གངས་ཅན་མཚོ། །སྟོང་གསུམ་བྱེ་བ་ཕྲག་བརྒྱ་ན། །བསྐལ་བཟང་སངས་རྒྱས་བྱེ་བ་བརྒྱ། །བོད་ཡུལ་བྱེ་བ་ཕྲག་བརྒྱ་ན། །སྲོང་བཙན་སྒམ་པོ་བྱེ་བ་བརྒྱ། །འཇང་ཡུལ་རི་བོ་པོ་ཊ་ལར། །བཛྲ་དྷརྨ་དྷཱ་ཏུ་ཞེས། །ཚེར་ལུང་པར་གྲགས་ལ་སོགས་
པ། །གར་འདྲ་སྟོང་གི་འཁོར་དང་བཅས། །གསོལ་བ་འདེབས་སོ་ཐུགས་རྗེས་གཟིགས། །བདག་དང་བདག་ལ་འབྲེལ་ཐོགས་རྣམས། །བདེ་བ་ཅན་དུ་ལམ་སྣ་དྲོངས། །ཞེས་པ་འདི་ནི་ལུག་ལོ་ཆོ་འཕྲུལ་ཆེན་པོའི་ཚེས་བརྒྱད་ལ་དུང་གཉིས་ཚར་བའི་དུང་སྟོན་དང་བསྔོ་བ་སྨོན་ལམ་ཚར་ནུབ། རྨི་ལམ་དུ་བཛྲ་དྷམཱ་དྷཱཏུ་སྐུ་མངོན་སུམ་ལྟ་བུ་ཞིག་མཇལ། བདག་ལ་ཐུགས་ཤིན་ཏུ་དགྱེས་པའི་ཚུལ་གྱིས། ཕྱག་གཉིས་ཀྱིས་བདག་ལ་འཁྱུད་དེ། བདག་གི་ཁ་དང་དཔུང་པ་གཡོན་འོ་བསྐྱལ་བ་ཅིག་རྨིས། དེ་རྗེས་དྲུང་སྐྱིད་སྤྲུལ་སྐུས་བདག་ལ་ཐུགས་ཤིན་ཏུ་དགྱེས་པའི་གསུང་གླེང་འགའ་རེ་དང་། མི་གཞན་མང་པོ་འགའ་ལ། བླ་མ་འདི་ལ་འབྲེལ་པ་ཐོགས་ལ་བཀུར་སྟི་གྱིས་དང་། དོན་ཆེན་པོ་དང་ལྡན་པའི་བཀའ་བཀོད་འགའ་རེ་གནང་ཐལ་བ་ཞིག་རྨིས་པ་ལ་བརྟེན་ནས་ཨ་རྭགས་བྲིས་པའོ།། ༈ །།རི་པ་ཆོས་རྗེ་བག་ཡོད་ཀྱི་སྐུ་ཚེ་ཕྲིན་ལས་རྒྱས་པའི་ཆེད་དུ། རྩེ་གསུམ་ལ་གསོལ་འདེབས་བདེན་སྟོབས་ཀྱི་སྨོན་ལམ་བཞུགས་སོ། ། ༈ ན་མོ་གུ་རུ་ལོ་ཀེ་ཤྭ་ར་ཡེ། རྡོ་རྗེ་འཆང་ཆེན་ཏཻ་ལོ་ནཱ་རོ་དང་། །མར་པ་མི་ལ་དྭགས་པོ་འབའ་བྲོམ་པ། །རས་ཆེན་པ་དང་རས་པ་དཀར་པོའི་མཚན། །ལུས་མེད་རྡོ་རྗེ་ཁུ་དབོན་རྣམ་གཉིས་དང་། །མཆོག་ཐུན་དངོས་གྲུབ་གཉིས་ལ་མངའ་བརྙེས་པའི། །གྲུབ་ཆེན་
དངུལ་རྫོངས་ཤཱཀྱ་རྡོ་རྗེ་ལ། །གསོལ་བ་འདེབས་སོ་ཐུགས་རྗེས་སྤྱན་གྱིས་གཟིགས། །རིགས་རྒྱུད་ཆོས་བརྒྱུད་རྣམས་ལ་བྱིན་གྱིས་རློབས། །ཆོས་ཀྱི་དབང་ཕྱུག་ཆོས་དབྱིངས་རྡོ་རྗེ་དང་། །ཀུན་དགའ་རྣམ་རྒྱལ་ཀརྨ་བསྟན་སྐྱོང་སོགས། །འབྲེལ་ཐོག་བླ་མ་རྣམས་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །འཇམ་དབྱངས་གྲགས་པ་བཀྲ་ཤིས་དཔལ་འབྱོར་དང་། །མགོན་དབང་བ་སོགས་ཀརྨ་ཚེ་དབང་སོགས། །བཀའ་བབས་རིག་འཛིན་བརྒྱུད་པའི་བླ་མ་རྣམས། །དེང་འདིར་ཐུགས་རྗེས་གཟིགས་ལ་བྱིན་གྱིས་རློབས། །དྲག་པོ་པདྨ་ཁྲོ་ཆུ་དུག་གདོང་དང་། །འཁོར་ལོ་སྡོམ་པ་རྡོ་རྗེ་ཕག་མོ་སོགས། །བཀའ་བབས་བརྒྱུད་པའི་ཡི་དམ་ཐམས་ཅད་ཀྱང་། །རིགས་ཀྱི་བུ་ལ་བརྒྱུད་པའི་ལྷ་འཁོར་ཕྱིར། །ལུས་ངག་ཡིད་གསུམ་སྲུང་ཞིང་བསྐྱབ་པ་དང་། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །བྱ་རོག་མཚན་ཅན་དུད་སོལ་ལྷ་མོ་སོགས། །བཀའ་བབས་རྒྱུད་པའི་ཆོས་སྐྱོང་སྲུང་མ་རྣམས། །སྔོན་གྱི་བཀའ་བསྒོས་དམ་ཚིག་དྲན་མཛོད་ལ། །རིགས་རྒྱུད་ཆོས་བརྒྱུད་དར་ཞིང་རྒྱས་
པ་དང་། །ཕྲིན་ལས་རྣམ་བཞི་འགྲུབ་པའི་སྡོང་གྲོགས་མཛོད། །དེ་ལྟར་བླ་མ་ཡི་དམ་ཆོས་སྐྱོང་ལ། །རྩེ་གཅིག་གུས་པས་གསོལ་བ་བཏབ་པའི་མཐུས། །རྡོ་རྗེ་འཛིན་པ་ཀརྨ་བག་ཡོད་སོགས། །རི་པ་རྫ་རི་བ་ཞེས་རབ་གྲགས་པའི། །རིགས་རྒྱུད་ཆོས་བརྒྱུད་བཅས་པ་འདི་རྣམས་ལ། །གལ་ཏེ་བག་མེད་བདུད་ཀྱིས་འཚེ་བ་ན། །བག་ཡོད་ཐུགས་རྗེ་ལྡན་པའི་ལྷ་སྲུང་གིས། །མི་མཐུན་གནོད་པའི་རྐྱེན་རྣམས་རབ་བསལ་ཏེ། །འཆི་མེད་རྡོ་རྗེའི་སྐུ་ལྟར་བག་ཡོད་ཤོག །བག་མེད་རྨོང་པའི་དྲི་མ་རབ་བསལ་ནས། །བག་ཡོད་ཐོས་བསམ་སྒོམ་པའི་ཤེས་རབ་ཀྱིས། །མདོ་རྒྱུད་གསར་རྙིང་གཞུང་ལུགས་རྒྱ་མཚོ་ལ། །ཐོགས་མེད་འཇམ་པའི་དབྱངས་ལྟར་བག་ཡོད་ཤོག །བག་མེད་འཆལ་བའི་དྲི་མ་རབ་སྤངས་ནས། །བག་ཡོད་ཤེས་བཞིན་ལྡན་པའི་བཙུན་ཚུགས་ཀྱིས། །ཉིས་བརྒྱ་ལྔ་བཅུ་རྩ་གསུམ་ཁྲིམས་ཀྱི་གཞི། །ཉམས་མེད་ཉེ་བ་འཁོར་ལྟར་བག་ཡོད་ཤོག །བག་མེད་ཞེ་སྡང་གནོད་སེམས་རབ་སྤངས་ནས། །བག་ཡོད་བྱམས་དང་སྙིང་རྗེའི་ཕན་སེམས་ཀྱིས། །སྨོན་དང་འཇུག་པའི་བྱང་ཆུབ་སེམས་གཉིས་པོ། །མཉམ་མེད་མི་ཕམ་མགོན་ལྟར་
བག་ཡོད་ཤོག །བག་མེད་ཉམས་ཆག་སྒྲིབ་པ་རབ་སྤངས་ནས། །བག་ཡོད་བསྐྱེད་རྫོགས་ཟུང་དུ་འཇུག་པའི་མཐུས། །རྩ་བ་ཡན་ལག་བཅས་པའི་དམ་ཚིག་རྣམས། །ཉམས་ལེན་གསང་བའི་བདག་ལྟར་བག་ཡོད་ཤོག །བག་མེད་ཐ་མལ་སྣང་བ་རབ་སྤངས་ནས། །བག་ཡོད་བསྐྱེད་རིམ་བརྟན་པ་ཐོས་པའི་མཐུས། །གྲུབ་ཆེན་བརྒྱད་དང་ཕྲིན་ལས་རྣམ་པ་བཞི། །ཐོགས་མེད་པད་འབྱུང་ལྟ་བུར་བག་ཡོད་ཤོག །བག་མེད་ཐ་མལ་ལས་རླུང་དག་བྱས་ཏེ། །བག་ཡོད་རྩ་རླུང་གནད་དུ་བསྣུན་པའི་མཐུས། །དགའ་བཞིའི་ཡེ་ཤེས་བདེ་སྟོང་ཏིང་ངེ་འཛིན། །ཉམས་ལེན་ནཱ་རོ་པ་ལྟར་བག་ཡོད་ཤོག །བག་མེད་ཐ་མལ་འཁྲུལ་པ་རབ་སྤངས་ནས། །བག་ཡོད་ཡེངས་མེད་དྲན་པ་བརྟན་པའི་མཐུས། །སྣངསྲིད་ཕྱག་རྒྱ་ཆེན་པོའི་དཀྱིལ་འཁོར་ལས། །ཉམས་ལེན་ས་ར་ཧ་ལྟར་བག་ཡོད་ཤོག །བག་མེད་རང་དོན་ཞི་བདེའི་སེམས་སྤངས་ནས། །བག་ཡོད་སེམས་བསྐྱེད་སྨོན་ལམ་རྒྱ་མཚོའི་མཐུས། །འབྲེལ་ཚད་དོན་ལྡན་འགྲོ་དོན་རྒྱ་མཚོ་ལས། །ཉམས་མེད་སྤྱན་རས་གཟིགས་ལྟར་བག་ཡོད་ཤོག །ཀརྨ་བཀའ་བརྒྱུད་ཐར་པའི་ཁང་བཟང་
རྩེར། །བག་ཡོད་བསླབ་གསུམ་ངུར་སྨྲིག་རྒྱལ་མཚན་འཛིན། །ལུགས་གཉིས་རྣམ་སྤྱོད་རིན་ཆེན་འོད་འབར་བས། །ཐུབ་བསྟན་མི་ནུབ་རྒྱས་པའི་བཀྲ་ཤིས་ཤོག །ཅེས་པ་འདི་རིགས་རུས་རྣམ་སྤྱོད་ཕུན་སུམ་ཚོགས་པ། རི་པ་བླ་མ་ཀརྨ་བག་ཡོད་ཀྱིས་བཞེད་པ་ལྟར། རྣལ་འབྱོར་པ་ཀརྨ་ཨ་རཱ་གས་ཆོ་འཕྲུལ་ཆེན་པོའི་ཡར་ཚེས་བཅུ་གཉིས་པར། མེ་རླུང་འཕྲོད་པའི་བཀྲ་ཤིས་པའི་དུས་སྦྱོར་བཟང་པོ་ལ་སྦྱར་བའོ། །མངྒ་ལཾ།། ༈ རྟོགས་ལྡན་སངས་རྒྱས་དར་མཆེད་གྲོགས་ལ་གདམས་པའི་མགུར་ཚན་གཅིག་བཞུགས་སོ། །ན་མོ་གུ་རུ། མི་བདག་གི་སྤྱི་བོའི་གཙུག་རོལ་ན། །གདན་པདྨ་ཉི་ཟླ་བརྩེགས་པའི་སྟེང་། །ཆོས་འབྲེལ་བ་ཐོབ་ཚད་བླ་མ་དང་། །དོན་དབྱེར་མེད་གུ་རུ་པདྨ་འབྱུང་། །སྐུ་དཀར་དམར་མདངས་ལྡན་མཚན་དཔེ་རྫོགས། །དབུ་པད་ཞྭ་རྒོད་སྒྲོ་ཉི་ཟླས་བརྒྱན། །ཞལ་ཁྲོ་འཛུམ་སྤྱན་གཉིས་བདག་ལ་གཟིགས། །ཕྱག་རྡོ་རྗེ་བྷནྡྲ་ཁ་ཊཾ་འཛིན། །སྐུ་ཟབ་བེར་ཆོས་གོས་སྐུ་ལ་གསོལ། །ཞབས་རྡོ་རྗེ་སྐྱིལ་མོ་ཀྲུང་གིས་བཞུགས། །འོད་ཟེར་གཟི་བརྗིད་ཉི་མ་འབུམ་བཞིན་འབར། །ཞིང་ཕྱོགས་བཅུའི་རྒྱལ་བ་སྲས་བཅས་རྣམས། །དེ་ཐམས་ཅད་སྤྱན་དྲངས་དབྱེར་མེད་ཐིམ། །རྗེ་
སངས་རྒྱས་ཐམས་ཅད་འདུས་པའི་སྐུ། །ཐུགས་ཆོས་སྐུའི་ངོ་བོ་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་ཆོས་སྐུར་རྟོགས་པར་བྱིན་གྱིས་རློབས། །སྐྱབས་དམ་ཆོས་ཐམས་ཅད་འདུས་པའི་གསུང་། །གསུང་ལོངས་སྐུའི་ངོ་བོ་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །ངག་ལོངས་སྐུར་རྟོགས་པར་བྱིན་གྱིས་རློབས། །དཔལ་དགེ་འདུན་ཐམས་ཅད་འདུས་པའི་ཐུགས། །སྐུ་སྤྲུལ་སྐུའི་ངོ་བོ་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །ལུས་སྤྲུལ་སྐུར་རྟོགས་པར་བྱིན་གྱིས་རློབས། །ལུས་དལ་འབྱོར་མི་ལུས་རིན་ཆེན་འདི། །དཔེ་ལོ་བརྒྱ་ནང་གི་ཐོག་གཅིག་བཞིན། །དུས་ཡང་ཡང་མི་ཐོབ་ད་རེས་ཙམ། །ལུས་སྙིང་པོ་ལོན་པར་བྱིན་གྱིས་རློབས། །ཚེ་འདི་ཡི་ལོངས་སྤྱོད་སྙན་གྲགས་རྣམས། །དཔེ་ཁ་ཟས་དུག་དང་འདྲེས་པ་བཞིན། །འཕྲལ་སྐྱིད་ཀྱང་ཕུགས་སུ་གནོད་པ་ཆེ། །སྤྲང་བྱ་བ་ཐོངས་བར་བྱིན་གྱིས་རློབས། །གནས་ངན་སོང་གསུམ་གྱི་སྡུག་བསྔལ་འདི། །ཚིག་རྣ་བས་ཐོས་ཀྱང་གློ་སྙིང་འདར། །འདི་ཐོག་ཏུ་བྱུང་ན་ཇི་ལྟར་བཟོད། །ལས་སྡིག་ལ་
འཛེམ་པར་བྱིན་གྱིས་རློབས། །ཚེ་མི་རྟག་རླུང་གསེབ་མར་མེ་འདྲ། །དགྲ་འཆི་བདག་ནམ་འོང་ཚོད་ཟིན་མེད། །དེ་བྱུང་ན་ཡུད་ཙམ་བཤོལ་ཐབས་མེད། །སྤྲང་དམ་ཆོས་འགྲུབ་པར་བྱིན་གྱིས་རློབས། །ཐར་དཀའ་བ་འཁོར་བའི་རྒྱ་མཚོ་ལས། །སྐྱོབས་ངེས་པའི་བླ་མ་དཀོན་མཆོག་གསུམ། །དེ་གཅིག་བསྡུས་པདྨ་འབྱུང་གནས་ལ། །བདག་སྐྱབས་སུ་མཆིའོ་ཐུགས་རྗེས་ཟུངས། །གནས་འགྲོ་དྲུག་སེམས་ཅན་མ་ལུས་པ། །སྔོན་ཚེ་རབས་མང་པོའི་ཕ་མ་ཡིན། །དེ་ཐམས་ཅད་བདེ་ལ་འགོད་པའི་ཕྱིར། །བདག་བྱང་ཆུབ་མཆོག་ཏུ་སེམས་བསྐྱེད་དོ། །སྔོན་ཐོག་མེད་དུས་ནས་ད་ལྟའི་བར། །ལས་མི་དགེའི་སྡིག་པ་ཅི་བསགས་པ། །རྗེ་པད་འབྱུང་སྤྱན་སྔར་མཐོལ་ལོ་བཤགས། །ལུས་ལོངས་སྤྱོད་དགེ་རྩ་ཅི་མཆིས་པ། །རྗེ་ཁྱེད་ཀྱི་སྤྱན་སྔར་མཆོད་པ་འབུལ། །བདག་ཚོགས་གཉིས་ཡོངས་སུ་རྫོགས་ནས་ཀྱང་། །དོན་དབང་བཞི་རྫོགས་པར་བསྐུར་དུ་གསོལ། །སྙིང་རུས་པའི་གཏིང་ནས་གསོལ་བཏབ་པས། །ཕ་པདྨ་འབྱུང་གནས་འོད་དུ་ཞུ། །མི་བདག་དང་དབྱེར་མེད་གཅིག་ཏུ་འདྲེས། །དོན་དབང་བཞི་རྟན་ཐོག་གཅིག་ཏུ་ཐོབ། །ད་ཚུར་
ལྟོས་རང་གི་སེམས་ལ་ལྟོས། །སེམས་བལྟས་པས་མི་མཐོང་དངོས་པོ་མེད། །ཆོས་སྟོང་པ་ཉིད་ཅེས་དེ་ལ་ཟེར། །སེམས་མེད་པ་མ་ཡིན་ཅི་ཡང་འཆར།། དོན་རང་རིག་འོད་གསལ་དེ་ལ་ཟེར། །སེམས་བཞག་པས་མི་འདུག་ཕྱོགས་བཅུར་རྒྱུག །དོན་ཡེ་ཤེས་ཟང་ཐལ་དེ་ལ་ཟེར། །སེམས་བཏང་ན་མི་འགྲོ་ཚུལ་ལ་འཁོར། །སེམས་གནས་པའི་ངོ་བོ་དེ་ལ་ཟེར། །རང་སེམས་ཀྱིས་སེམས་ལ་ལྟ་བ་འདི། །ཕ་པདྨ་འབྱུང་གནས་ལྟ་བ་ཡིན། །སྤྱང་བདག་ཀྱང་ལྟ་བ་དེ་ལ་བལྟ། །ད་ལྷག་ཆད་མེད་པས་ཉམས་རེ་དགའ། །སེམས་མ་ཡེངས་དྲན་པའི་རྒྱུངས་སོ་འདི། །རྗེ་པདྨ་འབྱུང་གནས་སྒོམ་པ་ཡིན། །སྤྲང་བདག་ཀྱང་ཉམས་ལེན་དེ་ལ་བྱེད། །ད་གོལ་ས་མེད་པ་ཉམས་རེ་དགའ། །སེམས་ཡེངས་མེད་དྲན་པས་སྡིག་པ་སྤངས། །རྗེ་པདྨ་འབྱུང་གནས་སྤྱོད་པ་ཡིན། །སྤྲང་བདག་ཀྱང་སྤྱོད་པ་དེ་ལྟར་བྱེད། །ད་ཉེས་ལྟུང་མེད་པ་ཉམས་རེ་དགའ། །རང་སེམས་ཆོས་སྐུ་མངོན་གྱུར་ན། །རྗེ་པདྨ་འབྱུང་གནས་འབྲས་བུ་ཡིན། །སྤྲང་བདག་ཀྱང་འབྲས་བུ་དེ་ལ་བྱེད། །རང་སེམས་སངས་རྒྱས་རྟོགས་པས་ཉམས་རེ་དགའ། །
འཚོ་བ་སྒོ་འགྲིམ་བསོད་སྙོམས་འདི། །རྗེ་མི་ལ་རས་པའི་འཚོ་བ་ཡིན། །སྤྱང་བདག་ཀྱང་འཕྲལ་ཕྱིར་འཚོ་བ་བསྟེན། །ད་ཟད་དོགས་མི་དགོས་ཉམས་རེ་དགའ། །ཡོན་བདག་རྒྱལ་ཁམས་ཕྱོགས་མེད་འདི། །དགེ་འདུན་རྣམས་ཀྱི་རྣམ་ཐར་ཡིན། །སྤྲང་བདག་ཀྱང་ཡོན་བདག་དེ་ལ་བྱེད། །ད་ངོ་སྲུང་མི་དགོས་ཉམས་རེ་དགའ། །མི་བདག་གིས་ཉམས་ལེན་སྐྱོངས་བ་སོགས། །དུས་གསུམ་དུ་བསགས་པའི་དགེ་བ་འདི། །ཚེ་འདི་ལ་ཚེ་རིང་ནད་མེད་ཅིང་། །ཉམས་རྟོགས་པ་ཡར་ངོའི་ཟླ་བཞིན་འཕེལ། །དུས་ནམ་ཞིག་མི་གནས་འཕོ་བའི་ཚེ། །ནུབ་བདེ་བ་ཅན་གྱི་ཞིང་ཁམས་སུ། །གདན་མེ་ཏོག་པདྨའི་ཟེའུ་འབྲུ་ལ། །ལུས་བརྫུས་སྐྱེས་སྤྲུལ་སྐུ་ཐོབ་པར་ཤོག །གཞི་གདོད་ནས་སྐྱེ་བ་མེད་པ་དང་། །ལམ་རྟེན་འབྲེལ་བསླུ་བ་མེད་པ་དང་། །རྗེ་རྒྱལ་བའི་ཐུགས་རྗེ་ཚད་མེད་མཐུས། །བདག་སྨོན་ལམ་བཏབ་བཞིན་འགྲུབ་གྱུར་ཅིག །ཅེས་པ་འདི་རྟོགས་ལྡན་སངས་རྒྱས་དར་མཆེད་གྲོགས་གཉིས་ཀྱི་ཉམས་ལེན་རྒྱུར། ༧ ཨ་རཱ་གས་འཕྲལ་དུ་བྲིས་པའོ། །འདི་བློ་ལ་ཟུང་ལ་དོན་འདི་ཡིད་ལ་བསྒོམ་ཞིང་ཁ་ཐོན་མཛོད་དང་རྟོགས་པ་སྐྱེའོ། །མངྒ་ལཾ།། ༈ ། །།ཟུང་འཇུག་བརྒྱུད་པའི་བླ་
མར་གསོལ་བ་འདེབས་པའི་དུས་མིན་འཆི་བཟློག་གི་དམིགས་རིམ་ཁྱད་པར་ཅན་བཞུགས་སོ།། ༄༅། །རང་གི་སྤྱི་གཙུག་པདྨ་དང་ཟླ་བའི་གདན་ལ་རང་གི་ཆོས་འབྲེལ་ཐོབ་ཚད་ཀྱིས་དད་པ་གང་ཡོད་ཀྱི་བླ་མ་ཐམས་ཅད་གཅིག་ཏུ་འདུས་པའི་ངོ་བོ་ལ། རྣམ་པ་སངས་རྒྱས་ཚེ་དཔག་མེད་དམར་པོ་མཉམ་བཞག་གི་སྟེང་ན་ཚེའི་བུམ་པ་འཛིན་པ། དར་དང་རིན་པོ་ཆེའི་རྒྱན་དཔེ་བྱད་འོད་འབར་བ། དེའི་དབུ་གཙུག་ནས་ཡར་ལ་བཀའ་བརྒྱུད་བླ་མ་ཐམས་ཅད་ཡར་ལ་རྡོ་རྗེ་འཆང་ལ་ཐུག་གི་བར་དུ་ཐོ་ལྟར་བརྩེགས་པ། ཐམས་ཅད་ཕྱག་གཡས་སྐྱབས་སྦྱིན་གྱི་ཕྱག་རྒྱ་དང་། གཡོན་ཚེའི་བུམ་པ་བདུད་རྩིས་བཀང་བ་འཛིན་པར་བསྒོམས་ལ། རྡོ་རྗེ་འཆང་ལ་།གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །ཏེ་ལོ་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །ནཱ་རོ་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །ལྷོ་བྲག་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་
དང་། །ཡེ་ཤེས་ལྔ་ལྡན་ཐོབ་པར་ཤོག །མི་ལ་རྗེ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །སྒམ་པོ་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །དུས་གསུམ་མཁྱེན་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །རས་ཆེན་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །སྤོམ་བྲག་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །ཨོ་རྒྱན་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །རང་བྱུང་བ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་
དང་། །ཡེ་ཤེས་ལྔ་ལྡན་ཐོབ་པར་ཤོག །གཡུང་སྟོན་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །རོལ་པའི་རྡོ་རྗེ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །མཁའ་སྤྱོད་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །དེ་བཞིན་གཤེགས་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །གནས་ལུག་མཆོག་གི་དོན་རྟོགས་ཤིང་། །ཉོན་མོངས་གཡུལ་ལས་རྒྱལ་བ་ཡི། །རཏྣ་བྷ་དྲ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །མཐོང་བ་དོན་ལྡན་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་
པར་ཤོག །འཇམ་དཔལ་བཟང་པོ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །དཔལ་འབྱོར་དོན་གྲུབ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །ཆོས་གྲགས་རྒྱ་མཚོ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །བཀྲ་ཤིས་དཔལ་འབྱོར་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །མི་བསྐྱོད་རྡོ་རྗེ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །དཀོན་མཆོག་འབངས་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །དབང་ཕྱུག་རྡོ་རྗེ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །
བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །ཆོས་ཀྱི་དབང་ཕྱུག་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག ༈ །རྡོ་རྗེ་ཕག་མོ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །མ་མགོན་གཉིས་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །སེམས་དཔའ་རང་བྱུང་རྡོ་རྗེ་ནི། །ཡིད་བཞིན་ནོར་བུ་རྙེད་པ་ལྟར། །བདག་གཞན་ཡོངས་ཀྱིས་དབུལ་བ་སེལ། །དགོས་འདོད་འབྱུང་བའི་བཀྲ་ཤིས་ཤོག །བྱང་ཆུབ་སེམས་ཀྱི་ཕྲིན་ལས་ཀྱིས། །ཐུགས་རྗེས་འོད་ཟེར་ཕྱོགས་བཅུར་འཕྲོ། །བཅོ་ལྔའི་ཟླ་བ་ཉ་རྒྱས་ལྟར། །འཛམ་གླིང་བདེ་བའི་བཀྲ་ཤིས་ཤོག །འཛམ་བུ་གླིང་བདེ་བར་མཛད་དུ་གསོལ། །ཅེས་གསོལ་བ་བཏབ་པས་བརྒྱུད་པའི་བླ་མ་ཐམས་ཅད་རྩ་བའི་བླ་མ་ཚེ་དཔག་མེད་ལ་ཐིམ། དེ་ཡང་རང་ལ་ཐིམ་པར་བྷོ་པས། རང་གི་སེམས་ལ་སེམས་ཀྱིས་ལྟོས། དེ་རྣམ་རྟོག་སྐྱེ་བའི་
གེགས་སེལ་ལོ། །གསོལ་འདེབས་འདི་གྲུབ་ཐོབ་ཀརྨ་པཀི་ལ་རྒྱ་ནག་རྒྱལ་པོས་ཆད་པ་བཅད་དུས་གསུངས་པས། མེ་ཆུ་དུག་མཚོན་གང་གིས་མི་གནོད་པ་ཡིན་པས། བྱིན་རླབས་ཤིན་ཏུ་ཆེ་ཕྱིར་ཆོས་སྡེ་ཐམས་ཅད་དུ་ཐུགས་དམ་ཆག་མེད་ཡིན་ནོ། །བསྒོམ་བྱ་དམིགས་པ་དང་བཅས་བཙུན་པ་རྣམས་ཀྱི་བར་ཆད་ཞི་ཕྱིར། རཱ་ག་ཨ་སྱས་ཆོས་སྤྱོད་རབ་གསལ་ནས་བྲིས་སོ། །རྒྱུན་དུ་མ་ཆག་པར་འདོན་པར་གྱིས་ཤིག །མངྒ་ལཾ།། ༈ །ཡེ་ཤེས་རྡོ་རྗེའི་བརྟན་བཞུགས་དང་ཀརྨ་ཆགས་མེད་ཀྱི་གསུང་མགུར་བཞུགས་སོ། ༈ །མཁྱེན་བརྩེའི་རང་བཞིན་མཆོག་གི་བདག་ཉིད་ཅན། །རྒྱལ་བ་ཀུན་དང་ཕྲིན་ལས་མཉམ་པ་ལས། །ལྷག་པའི་ཐུགས་རྗེ་མངའ་བ་ཀརྨ་པ། ཞབས་པད་བསྐལ་པ་རྒྱ་མཚོར་བརྟན་གྱུར་ཅིག །ཚོགས་གཉིས་རྫོགས་པ་མཚན་དཔེའི་སྐུ་མངའ་བ། །མཐོང་བ་ཙམ་གྱིས་མངོན་མཐོ་ངེས་ལེགས་ཀྱིས། །རྣམ་པར་གྲོལ་བའི་བདེ་བ་མཆོག་གཏེར་བ། །བསྐལ་མང་རྒྱ་མཚོར་བཞུགས་པར་གསོལ་བ་འདེབས། །ཆོས་རྣམས་ཀུན་ལ་ཡེ་ཤེས་སྔོན་འགྲོ་ཞིང་། །ཡན་ལག་དྲུག་ཅུའི་ཆོས་སྒོ་མཐའ་ཡས་པ། །གཅིག་ཆར་སྟོན་ལ་འཇིགས་མེད་བསྙེངས་བྲལ་བ། །བསྐལ་མང་རྒྱ་མཚོར་བཞུགས་པར་གསོལ་བ་འདེབས། །ཟག་མེད་ཆོས་
དབྱིངས་ཟབ་ཅིང་ཡངས་པ་ལ། །བདེ་ཆེན་འགྱུར་བ་མེད་པས་སྤྲོས་དང་བྲལ། །མཁྱེན་པའི་ཡེ་ཤེས་ཆགས་ཐོགས་མི་མངའ་བ། །བསྐལ་མང་རྒྱ་མཚོར་བཞུགས་པར་གསོལ་བ་འདེབས། །བྲལ་སྨིན་ཡོན་ཏན་བྱེ་བ་རང་བཞིན་ལ། །ལེགས་བྱས་དུ་མས་འབྱུང་བ་དབང་གི་རྒྱལ། །འགྲོ་བ་ཡོངས་ཀྱི་རེ་བ་སྐོང་མཛད་པ། །བསྐལ་མང་རྒྱ་མཚོར་བཞུགས་པར་གསོལ་བ་འདེབས། །ཕན་བདེ་མ་ལུས་འབྱུང་བའི་གནས་གཅིག་པུ། །གང་འདུལ་ཐབས་ཀྱིས་རྣམ་འཕྲུལ་ཅིར་ཡང་སྟོན། །འབད་མེད་ལྷུན་གྱིས་གྲུབ་པའི་ཐུགས་རྗེ་ཅན། །བསྐལ་མང་རྒྱ་མཚོར་བཞུགས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །འགྲོ་བའི་བླ་མ་ཡེ་ཤེས་རྡོ་རྗེ་དེས། །སྐུ་ཚེ་བརྟན་ཞིང་ཕྲིན་ལས་རྒྱས་པ་དང་། །བདག་སོགས་གདུལ་བྱ་རྗེས་སུ་འཛིན་མཛད་གསོལ། །ཅེས་རྗེ་བཙུན་དཔལ་ལྡན་བླ་མ་རྒྱལ་དབང་མཆོག་གི་སྤྲུལ་པའི་སྐུའི་བརྟན་བཞུགས་གསོལ་འདེབས་སུ། །ཤཱཀྱའི་བཙུན་པ་ཡེ་ཤེས་སྙིང་པོའི་འོག་མིན་དཔལ་གྱི་མཚུར་ཕུ་ནས་གསོལ་བ་བཏབ་པའོ།། ༈ །།ལྷ་སའི་ཇོ་བོའི་གསོལ་འདེབས་བཞུགས་སོ། །ན་མོ་གུ་རུ། བསླུ་བ་མེད་པ་སྐྱབས་ཀྱི་
མཆོག ཤཱཀྱ་མུ་ནེ་འཛམ་གླིང་རྒྱན། །རྟེན་མཆོག་དེ་ལ་གསོལ་བ་འདེབས། །བར་ཆད་ཞི་བར་བྱིན་གྱིས་རློབས། །རང་བྱུང་སྤྲུལ་པའི་རྟེན་གྱི་མཆོག །ལྷ་ལྡན་ཇོ་བོ་བཅུ་གཅིག་ཞལ། །གསོལ་བ་འདེབས་སོ་ཐུགས་རྗེས་གཟིགས། །བར་ཆད་ཞི་བར་བྱིན་གྱིས་རློབས། །མི་བསྐྱོད་རྡོ་རྗེ་སྒྲོལ་མ་སོགས། །བཀྲ་ཤིས་དབུས་རིས་ལྷ་ས་ཡི། །རྟེན་དང་སྲུང་མ་ཐམས་ཅད་ལ། །གསོལ་བ་འདེབས་སོ་བར་ཆད་སོལ། །རྟེན་མཆོག་མ་ཧཱ་བོ་དྷི་དང་། །རྟ་མགྲིན་སྲིད་གསུམ་ཟིལ་གནོན་སོགས། །དཔལ་གྱི་བསམ་ཡས་གཙུག་ལག་ལ། །གསོལ་བ་འདེབས་སོ་བར་ཆད་སོལ། །ཁྲ་འབྲུག་ཀུན་བཟང་ནགས་ཁྲོད་དང་། །ཤེལ་བྲག་མཆིམས་ཕུ་ར་སྒྲེང་དང་། །མཚུར་ཕུ་ཟངས་རི་ཡེར་པ་སོགས། །གསོལ་བ་འདེབས་སོ་བར་ཆད་སོལ། །གཞན་ཡང་གནས་དང་གཙུག་ལག་ཁང་། །ཁྱད་པར་འཕགས་པ་ཐམས་ཅད་ལ། །གསོལ་བ་འདེབས་སོ་ཐུགས་རྗེས་ཟུངས། །བར་ཆད་རྐྱེན་ངན་ཐམས་ཅད་སོལ། །ཕྱི་ཡི་བར་ཆད་ཕྱི་རུ་སོལ། །ནང་གི་བར་ཆད་ནང་དུ་སོལ། །མི་མཐུན་རྐྱེན་ངན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །
ཚེ་ཡི་བར་ཆད་ཞི་བར་མཛོད། །སྲོག་གི་བར་ཆད་ཞི་བར་མཛོད། །བསམ་པ་ཡིད་བཞིན་འགྲུབ་པར་ཤོག །ཅེས་ཇོ་མཇལ་བ་ཚོ་མགོ་ཐོན་དཀའ་བ་ཐོས་དུས་རཱ་ག་ཨ་སྱས་སྦྱར་བའོ།། ༈ །།མགོན་པོ་བེར་ནག་ཞལ་གཟིགས་པའི་དུས་བསྟོད་བསྐུལ་བཞུགས། ན་མོ་གུ་རུ་མ་ཧཱ་ཀཱ་ལ་ཡེ། ཧཱུཾ། རྒྱལ་བ་ཀུན་གྱི་ཕྲིན་ལས་པ། །ཀརྨ་པ་ཉིད་ཁྲོ་སྐྱེ་བོའི་ཚུལ། །བྱིན་རླབས་ཀུན་གྱི་གཏེར་གྱུར་པ། །བླ་མ་མགོན་པོ་དབྱེར་མེད་ཁྱོད་ལ་བསྟོད། །ཡི་དམ་ཀུན་འདུས་སྤྱན་རས་གཟིགས། །གདུག་པ་འདུལ་ཕྱིར་དྲག་པོའི་གཟུགས། །དངོས་གྲུབ་མ་ལུས་སྩོལ་མཛད་པ། །ཡེ་ཤེས་མགོན་པོ་ཁྱོད་ལ་བསྟོད། །ཐུབ་པའི་བསྟན་པ་བསྲུང་བའི་ཕྱིར། །འཇིག་རྟེན་འདས་ཀྱང་འཇིག་རྟེན་ཚུལ། །ཕྱོགས་བཅུའི་མགོན་པོས་གཙོ་བོ་མཛད། །ལས་མགོན་ནག་པོ་ཁྱོད་ལ་བསྟོད། །གདུག་པའི་དགྲ་བགེགས་ཚར་གཅོད་ཕྱིར། །སྡེ་བརྒྱད་ཡོངས་ཀྱི་དམག་དཔོན་མཛད། །ཁམས་གསུམ་མ་ལུས་ཟ་བྱེད་པའི། །འཇིག་རྟེན་མགོན་པོ་ཁྱོད་ལ་བསྟོད། །རྡོ་རྗེ་འཆང་ངམ་ཤཱཀྱ་ཐུབ། །རྡོ་རྗེ་འཛིན་དང་ཌ་བྷི་པ། །རས་ཆེན་པ་དང་པཀི་སོགས། །
བརྒྱུད་པའི་སྤྱན་སྔར་ཞལ་བཞེས་དགོངས། །རྣལ་འབྱོར་བདག་ཅག་འཁོར་བཅས་ཀྱི། །བར་ཆད་སོལ་ལ་མཐུན་རྐྱེན་སྒྲུབས། །བསྟན་པ་དར་ཞིང་རྒྱས་པ་དང་། །བསམ་པ་ཡིད་བཞིན་འགྲུབ་པར་མཛོད། །ཅེས་པ་འདི་ཆོ་འཕྲུལ་ཟླ་བའི་ཚེས་བཅུའི་ནུབ་ཉམས་ཀྱི་སྣང་བ་ལ་མགོན་པོ་བེར་ནག་ཅན་ཆེ་ཆུང་མདའ་ཚད་ཙམ་སྐུ་ཞལ་རས་སོགས་ཤིན་ཏུ་གསལ་བ་གཅིག་མཇལ་སྣང་བྱུང་ནས་རཱ་ག་ཨ་སྱས་བྲིས་པའོ།། ༈ བླ་མ་རིན་པོ་ཆེ་༧ རཱ་ག་ཨ་སྱས་མཛད་པའི་པདྨ་འབྱུང་གནས་བླ་མའི་རྣལ་འབྱོར་གསོལ་འདེབས་ཀུན་ཚང་བཞད་པ་ཞིག་བཞུགས་སོ། །འཚོ་མཛད་ཤེས་རབ་ལ་གནང་བའོ།། ན་མོ་གུ་རུ། མི་བདག་གི་སྤྱི་གཙུག་ནམ་མཁའ་ལ། །འཇའ་འོད་དཔུང་འཁྲིགས་པའི་གུར་ཁང་ན། །སྐྱབས་ཀུན་འདུས་གུ་རུ་པདྨ་འབྱུང་། །སྐུ་དཀར་དམར་མདངས་ལྡན་མཚན་དཔེ་རྫོགས། །དབུ་པད་ཞྭ་རྒོད་སྒྲོ་ཉི་ཟླས་བརྒྱན། །ཞལ་ཁྲོ་འཛུམ་སྤྱན་གཉིས་བདག་ལ་གཟིགས། །སྐུ་ཟབ་བེར་ཆོས་གོས་རྣམ་གསུམ་གསོལ། །ཕྱག་རྡོ་རྗེ་བྷནྡྷ་ཚེ་བུམ་འཛིན། །ཡུམ་སྦས་ཚུལ་ཁ་ཊཾ་གྲུ་མོར་བརྟེན། །ཞབས་རྡོ་རྗེ་སྐྱིལ་ཀྲུང་པད་ཟླའི་གདན། །འོད་གཟི་བརྗིད་ཉི་མ་འབུམ་བཞིན་འབར། །
ཞིང་ཕྱོགས་བཅུའི་རྒྱལ་བ་སྲས་བཅས་རྣམས། །དཔེ་ཁ་བ་བུ་ཡུག་འཚུབ་བཞིན་བྱོན། །དེ་ཐམས་ཅད་པད་འབྱུང་སྐུ་ལ་ཐིམ། །སྐྱབས་ཀུན་འདུས་གུ་རུ་རིན་པོ་ཆེ། །བདག་གསོལ་བ་འདེབས་སོ་ཐུགས་རྗེས་ཟུངས། །དུས་དེང་སང་སྙིགས་མ་ལྔ་ཡི་དུས། །ལྷ་གཞན་གྱི་ཐུགས་རྗེ་རྡུགས་པའི་དུས། །ཆོས་གཞན་གྱི་བྱིན་རླབས་ཡལ་་བའི་དུས། །བདུད་ལྷ་སྲིན་སྡེ་བརྒྱད་ཁ་འཕྱུར་དུས། །གདོན་ནད་མུག་མཚོན་གསུམ་འཚུབ་པའི་དུས། །ཁྱེད་ཐུགས་རྗེ་ཆེ་བར་གསུངས་ལག་ན། །ད་ཆེ་བའི་དུས་ལ་བབ་ནི་གདའ། །ཚེ་འདི་དང་ཕྱི་མ་བར་དོ་གསུམ། །ད་མཐོ་བཏང་དམའ་བཏང་ཁྱེད་རང་ཤེས། །ད་ཐོབ་དཀའ་བའི་མི་ལུས་ཐོབ་ལགས་ཀྱང་། །དགྲ་འཆི་བདག་ནམ་འོང་ཏིག་ཏིག་་མེད། །བདག་དམ་ཆོས་འགྲུབ་པར་བྱིན་གྱིས་རློབས། །ལས་དགེ་སྡིག་གང་བྱས་རང་ལ་སྨིན། །ཁས་བཙན་པོ་གཤིན་རྗེའི་ཁྲིམས་ར་ན། །བདག་ངོ་གནོང་མེད་པར་བྱིན་གྱིས་རློབས། །དུས་དེང་སང་ཚེ་ཚད་བཞི་བཅུའི་མཐར། །དུས་ནམ་ཞིག་འདི་ནས་འཕོས་པའི་ཚེ། །མར་རིགས་དྲུག་གནས་སུ་མ་བཏང་བར། །ནུབ་བདེ་བ་ཅན་དུ་ལམ་སྣ་
དྲོངས། །དེ་དུས་ཀྱི་འཆི་བ་བཟློག་ཐབས་མེད། །རྐྱེན་དུས་མིན་འཆི་བ་ཁྱེད་ཀྱིས་ཟློག །ལུས་འདི་ལ་སྐུ་ཡི་བྱིན་གྱིས་རློབས། །ལུས་འཆི་མེད་ཚེ་ཡི་དངོས་གྲུབ་སྩོལ། །ངག་འདི་ལ་གསུང་གི་བྱིན་གྱིས་རློབས། །ངག་ནུས་པ་འབར་བར་མཛད་དུ་གསོལ། །སེམས་འདི་ལ་ཐུགས་ཀྱི་བྱིན་གྱིས་རློབས། །སེམས་རྟོགས་པ་འཆར་བར་བྱིན་གྱིས་རློབས། །བདག་དེ་ལྟར་རྩེ་གཅིག་གསོལ་བཏབ་པས། །རྗེ་པདྨ་འབྱུང་གནས་འོད་དུ་ཞུ། །མི་བདག་དང་དབྱེར་མེད་གཅིག་ཏུ་འདྲེས། །ད་ཚུར་ལྟོས་རང་གི་སེམས་ལ་ཟླུལྟོས། །སེམས་བལྟས་པས་མི་མཐོང་དངོས་པོ་མེད། །སེམས་མེད་པ་མ་ཡིན་ཅིར་ཡང་འཆར། །སེམས་ཡོད་མེད་མཐའ་བྲལ་དབུ་མའི་དོན། །སེམས་གར་ཤར་བཟོད་མེད་རང་ངོ་སྐྱོངས། །ཆོས་ཕྱག་རྒྱ་ཆེན་པོའི་ཉམས་ལེན་ཡིན། །སེམས་ངོ་བོ་སྟོང་པ་ཆོས་ཀྱི་སྐུ། །སེམས་མ་འགགས་རང་གསལ་ལོངས་སྤྱོད་རྫོགས། །སེམས་སྣ་ཚོགས་འགགས་མེད་སྤྲུལ་པའི་སྐུ། །དོན་སྐུ་གསུམ་རང་གི་སེམས་ལ་རྫོགས། །བཀའ་རྫོགས་པ་ཆེན་པོའི་ཁྲེགས་ཆོད་ཡིན། །ལམ་ཐོད་རྒལ་འཇའ་འོད་ཐིག་ལེ་ལྟ། །དོན་གསལ་སྟོང་ཟུང་
འཇུག་དངོས་སུ་འཆར། །ཆོས་ཐེག་པ་དགུ་ཡི་ཡང་རྩེ་ཡིན། །མི་བདག་གིས་དུས་གསུམ་དགེ་བསགས་མཐུས། །ཚེ་འདི་ལ་ཚེ་རིང་ནད་མེད་ཅིང་། །དཔལ་བསོད་ནམས་ཡར་ངོའི་ཟླ་བཞིན་འཕེལ། །དུས་ནམ་ཞིག་མི་གནས་འཕོ་བའི་ཚེ། །ནུབ་བདེ་བ་ཅན་གྱི་ཞིང་ཁམས་སུ། །ལུས་བརྫུས་སྐྱེས་སྤྲུལ་སྐུ་ཐོབ་ནས་ཀྱང་། །རྟེན་དེ་ལ་མངོན་པར་བྱང་ཆུབ་ནས། །མ་འགྲོ་དྲུག་སེམས་ཅན་འདྲེན་པ་ལ། །ལྷ་སྤྱན་རས་གཟིགས་དང་དབྱེར་མེད་ཤོག །ཅེས་པ་རྟག་བྲལ་འཚོ་མཛད་ཤེས་རབ་ཀྱིས་བསྐུལ་བ་ལ་བརྟེན་ནས། རཱ་ག་ཨ་སྱས་ངག་ནས་སྨྲས་པ་ལྟར། དགེ་སློང་སྦྱིན་པས་ཡི་གེར་བཀོད་པ་མངྒ་ལཾ།། ༈ །།མི་རྒན་བཅོས་པའི་བཅོས་གཏམ་ཡི་གེར་བྲིས་པ་འབྲས་མེད་ཤོག་བུ་ཆུད་ཟོས་སོ། ༈ །ན་མོ་གུ་རུ་དྷམཱ་ཤྭ་ར་ཡེ། དྲིན་ཅན་བླ་མ་རྗེ་བཙུན་ལ། །གསོལ་བ་འདེབས་སོ་ཐུགས་རྗེས་ཟུངས། །ཆོས་རྣམས་ཐམས་ཅད་མདོར་བསྡུས་ན། །ལྟ་སྒོམ་སྤྱོད་པ་འབྲས་བུ་བཞི། །ལྟ་བ་བཤད་ལུགས་མང་ན་ཡང་། །སེམས་ཀྱིས་སེམས་ལ་ལྟ་བ་འདི། །མི་ལ་རས་པའི་ལྟ་བ་ཡིན། །ཕྱག་རྫོགས་ལྟ་བ་དེ་ལ་འདུས། །ཁ་འབྱམས་ཚིག་གི་ལྟ་བ་དེ། །
བཤད་པ་མཁས་ལ་དགོས་ལགས་ཀྱང་། །ཉམས་ལེན་བྱེད་ལ་དགོས་རྒྱུ་ཆུང་། །འབྲོག་པ་ཕྱུག་པོའི་རྟ་ལུག་གྲངས། །སྤྲང་པོས་བརྩིས་ཀྱང་རང་ལ་མེད། །དེ་ཡི་ལྟ་བ་མ་རྟོགས་ན། །ལྟ་བ་བཤད་ཀྱང་དགོས་པ་ཆུང་། །བསྒོམ་ལུགས་རྣམ་གྲངས་མང་ན་ཡང་། །མ་ཡེངས་དྲན་པའི་རྒྱངས་སོ་འདི། །མི་ལ་རས་པའི་བསྒོམ་ལུགས་ཡིན། །མ་བཅོས་བཞག་པའི་མན་ངག་ཡིན། །གང་ཤར་སྐྱོང་བ་གདམས་ངག་ཡིན། །སྤང་བླང་མེད་པ་གནད་འགགས་ཡིན། །སེམས་འཛིན་དམིགས་རིམ་མང་པོ་དེ། །ཁྲིད་སྟོན་རྣམས་ལ་མཁོ་ལགས་ཀྱང་། །ཉམས་ལེན་བྱེད་ན་དགོས་རྒྱུ་ཆུང་། །དམིགས་རིམ་མང་པོ་རྣམ་རྟོག་ཡིན། །རྣམ་རྟོག་མ་རིག་འཁྲུལ་པ་ཡིན། །དཔེར་ན་དར་གྱི་བཀྱིག་དང་འདྲ། །སྤྱོད་པའི་ས་མཚམས་མང་ལགས་ཀྱང་། །མ་ཡེངས་ངང་ནས་ཤུགས་འབྱུང་སྤྱོད། །མི་ལ་རས་པའི་སྤྱོད་པ་ཡིན། །སེམས་སྲུང་སྡོམ་པ་ཀུན་གྱི་མཆོག །རང་སེམས་འདུལ་ན་འདུལ་བ་ཡིན། །གནང་བཀག་ས་མཚམས་མང་པོ་དེ། །དགེ་སློང་རྣམས་ལ་མཁོ་ལགས་ཏེ། །ཉམས་ལེན་སྐྱོངས་ལ་དགོས་རྒྱུ་ཆུང་། །ཐབ་ཀྱི་མེ་ལ་ཆུ་བླུག་ན། །
རྩེག་སེང་དུ་བ་ཐམས་ཅད་ཆད། །དེ་བཞིན་རང་སེམས་བསྲུང་བ་ན། །ཉེས་ལྟུང་ཐམས་ཅད་རང་འགགས་ཡིན། །འབྲས་བུ་ཐོབ་ལུགས་མང་བཤད་ཀྱང་། །རང་སེམས་རང་དབང་ཐོབ་པ་ན། །འབྲས་བུ་ཡིན་པར་བཀའ་བརྒྱུད་བཞེད། །ས་ལམ་འབྲས་བུའི་བཞེད་དགོངས་རྣམས། །བགྲོ་གླེང་མཁན་ལ་མཁོ་ལགས་ཏེ། །ཉམས་ལེན་མཁན་ལ་དགོས་རྒྱུ་ཆུང་། །ཕྱག་རྒྱ་ཆེན་པོའི་གཅིག་ཆོད་ལ། །ས་ལམ་རྩི་བ་རྨོངས་པ་འཁྲུལ། །དེ་སྐད་སྐྱེ་མེད་ཞང་གིས་གསུངས། །ལྟ་སྒོམ་སྤྱོད་པ་འབྲས་བུའི་གླུ། །འཕྲལ་དུ་ཉམས་ལ་ཤར་ནས་སྨྲས། །མཁས་པ་རྣམས་ཀྱིས་ཁྲེལ་ལགས་ཀྱང་། །ཉམས་ལེན་མཁན་འགའི་སེམས་ལ་འཕྲོད། །བཤད་པའི་གཞུང་དང་མི་མཐུན་ཀྱང་། །མན་་ངག་སྙན་བརྒྱུད་དོན་དང་མཐུན། །ཞེས་སྒོམ་ཆེན་༧ རཱ་ག་ཨ་སྱས་ཉམས་མགུར་དུ་གདམས་པའོ། །མངྒ་ལཾ།། ༈ །།བན་ཆེན་པད་སྲུང་ལ་གནང་བའི་ལྟ་སྒོམ་སྤྱོད་འབྲས་ཀྱི་སྨོན་ལམ་བཞུགས་སོ། །ཨོཾ་སྭ་སྟི། མཆོག་གསུམ་བླ་མ་བྱིན་རླབས་ལྡན་པའི་སྟོབས། །ཡི་དམ་ལྷ་ལ་བསྐྱེད་རྫོགས་བསྒོམ་པའི་སྟོབས། །མཁའ་འགྲོ་ཆོས་སྲུང་ཕྲིན་ལས་བསྒྲུབ་པའི་
སྟོབས། །སྟོབས་གསུམ་རྣམ་དག་ལྡན་པའི་ཆོས་ཉིད་ཀྱིས། །སྔགས་འཆང་བན་ཆེན་པད་སྲུང་འདི་ཉིད་ཀྱི། །རྣམ་དཀར་ཡེ་ཤེས་ཐམས་ཅད་རྒྱས་གྱུར་ཅིག །ད་ལྟའི་རང་རིག་སྟོང་གསལ་རྗེན་པ་འདི། །དབྱིངས་སྣང་གཉིས་མེད་མ་བཅོས་རང་གསལ་བ། །ཀ་དག་ལྟ་བའི་ངོ་བོ་ཡིན་ཤེས་ནས། །དེ་ལ་སྤྲོ་བསྡུའི་བཟོ་བཅོས་མི་མཛད་པར། །རང་ཡན་འོད་གསལ་བསྒོམ་པ་རྟོགས་གྱུར་ཅིག །དེ་དང་སྤྱོད་ལམ་རྣམ་བཞི་ཐམས་ཅད་དུ། །འབྲལ་མེད་རང་སེམས་ཡེངས་མེད་ངང་ནས་སྤྱོད། །དེ་ཚེ་འཛིན་རྟོགས་ཐམས་ཅད་དབྱིངས་ཐིམ་ནས། །སྤྲིན་མེད་དྭངས་པའི་མཁའ་དབྱིངས་ཅི་བཞིན་དུ། །རང་རིག་དྲི་བྲལ་ཀ་དག་མངོན་གྱུར་པའི། །ཀུན་བཟང་རང་རིག་འབྲས་བུ་ཐོབ་གྱུར་ཅིག །ཅེས་ལྟ་སྒོམ་སྤྱོད་འབྲས་ཀྱི་སྨོན་ལམ་དྲུག་ཚིག་མ་ཞེས་བྱ་བ་པད་སྲུང་གིས་བཀས་བསྐུལ་ངོར་བྱ་བྲལ་ཨ་རཱ་གས་བྲིས་པའོ།། ༈ བ་ཤ་བོན་ཆུང་ལ་གནང་བའི་༧ཨོ་རྒྱན་རིན་པོ་ཆེའི་བླ་མའི་རྣལ་འབྱོར་བཞུགས་སོ།། ༈ །ན་མོ་གུ་རུ། གནས་སྤྱི་བོའི་གཙུག་གི་ནམ་མཁའ་ལ། །འཇའ་འོད་ཕུང་འཁྲིགས་པའི་གུར་ཁང་ན། །སྐྱབས་དཀོན་མཆོག་ཀུན་འདུས་པདྨ་འབྱུང་། །ཞལ་དཀར་དམར་
མདངས་ལྡན་ཁྲོ་ཞིང་འཛུམ། །དབུ་པད་ཞྭ་རྒོད་ལྡེམ་ཉི་ཟླས་བརྒྱན། །ཕྱག་རྡོ་རྗེ་བྷནྡྷ་ཚེ་བུམ་འཛིན། །སྐུ་ཟ་བེར་ཆོས་གོས་རྣམ་གསུམ་གསོལ། །ཡུམ་སྦས་ཚུལ་ཁ་ཊཾ་མཆན་དུ་བཅུག །ཞབས་རྡོ་རྗེའི་སྐྱིལ་ཀྲུང་གཟི་བརྗིད་འབར། །ཞིང་ཕྱོགས་བཅུའི་རྒྱལ་བ་སྲས་དང་བཅས། །དཔེ་ཁ་བ་བུ་ཡུག་འཚུབ་བཞིན་བྱོན། །དེ་ཐམས་ཅད་པད་འབྱུང་སྐུ་ལ་ཐིམ། །སྐྱབས་བསླུ་མེད་ཨུ་རྒྱན་རིན་པོ་ཆེ། །ཚེ་འདི་དང་ཕྱི་མ་བར་དོ་གསུམ། །ད་རེ་ས་གཞན་མེད་ཁྱེད་རང་ཤེས། །དུས་དེང་སང་དུས་ངན་སྙིགས་མའི་མཐའ། །བདུད་ལྷ་སྲིན་སྡེ་བརྒྱད་ཁ་དར་ནས། །སྔར་མེད་པའི་ནད་མཚོན་མུ་གེ་དར། །རྐྱེན་བར་ཆད་རླུང་ལྟར་འཚུབ་པའི་དུས། །ལྷ་གཞན་གྱི་ཐུགས་རྗེ་རྡུགས་པའི་དུས། །ཆོས་གཞན་གྱི་བྱིན་རླབས་ཡལ་བའི་དུས། །འདྲེ་འབྱུང་པོ་མངོན་རྒྱུག་བྱེད་པའི་དུས། །ཚེ་ལོང་མེད་དགུན་ཉི་འདྲ་བའི་དུས། །བློ་ཕ་བུ་གཉིས་ཀྱང་མི་མཐུན་དུས། །མི་སུ་ལའང་ཡིད་ཆེས་མེད་པའི་དུས། །ཁྱེད་ཐུགས་རྗེ་བྱིན་རླབས་ཆེ་གསུངས་ན། །ད་ཆེ་བའི་དུས་ལ་བབ་ནི་གདའ། །མི་བདག་གི་ལུས་ལ་བྱིན་གྱིས་རློབས། །
ལུས་ནད་མེད་བདེ་བའི་དངོས་གྲུབ་སྩོལ། །མི་བདག་གི་ངག་ལ་བྱིན་གྱིས་རློབས། །ངག་ནུས་པ་འབར་བར་བྱིན་གྱིས་རློབས། །མི་བདག་གི་སེམས་ལ་བྱིན་གྱིས་རློབས། །སེམས་ཆོས་སྐུར་རྟོགས་པར་བྱིན་གྱིས་རློབས། །ཚེ་འདི་ལ་ཚེ་རིང་ནད་མེད་ཅིང་། །དཔལ་བསོད་ནམས་མངའ་ཐང་འཕེལ་ཞིང་རྒྱས། །དུས་ནམ་ཞིག་མི་གནས་འཕོ་བའི་ཚེ། །ནུབ་བདེ་བ་ཅན་དུ་ལམ་སྣ་དྲོངས། །ཕ་ཨུ་རྒྱན་འོད་ཞུ་བདག་ཐིམ། །དོན་རང་སེམས་ཆོས་སྐུ་རྗེན་པར་རྟོགས། །མི་བདག་གི་དུས་གསུམ་དགེ་བསགས་མཐུས། །ལྷ་པདྨ་འབྱུང་གནས་འགྲུབ་གྱུར་ཅིག །དེ་བཛྲ་གུ་རུ་ཅི་འགྲུབ་བཟླས། ཞེས་བ་ཤ་བོན་ཆུང་གིས་བསྐུལ་ནས་རཱ་ག་ཨ་སྱས་འཕྲལ་དུ་སྨྲས། མངྒ་ལཾ།། ༈ རྡོ་རྗེ་འཆང་གི་བླ་མའི་རྣལ་འབྱོར་གསོལ་འདེབས་ངོ་སྤྲོད་སྨོན་ལམ་བཞུགས་སོ། །སྐྱག་ལའི་ཨ་མཆོད་ལ་གནང་བའོ། །ན་མོ་མ་ཧཱ་མུ་དྲ་ཡེ། མི་བདག་གི་སྤྱི་བོའི་གཙུག་རོལ་ན། །གདན་ཉི་ཟླ་པདྨ་བརྩེགས་པའི་སྟེང་། །རང་བཀའ་དྲིན་ཐོབ་པའི་བླ་མ་རྣམས། །དེ་གཅིག་བསྡུས་ཆོས་སྐུ་རྡོ་རྗེ་འཆང་། །སྐུ་མཐིང་གསལ་ནམ་མཁའ་དྭངས་བའི་མདོག །ཕྱག་རྡོ་རྗེ་དྲིལ་བུ་ཐུགས་ཀར་བསྣོལ། །ཞབས་རྡོ་རྗེ་
སྐྱིལ་མོ་ཀྲུང་གིས་བཞུགས། །མཚན་དཔེ་བྱད་དར་དང་རིན་ཆེན་བརྒྱན། །འོད་འོད་ཟེར་འཇའ་སྤྲིན་ཀློང་ན་བཞུགས། །རྗེ་དེ་ཡི་དབུ་གཙུག་ནམ་མཁའ་ལ། །ཆོས་ཕྱག་ཆེན་བརྒྱུད་པའི་བླ་མ་རྣམས། །དཔེ་མུ་ཏིག་སྟར་ལ་བརྒྱུན་པ་བཞིན། །ཆོས་སྒྲུབ་བརྒྱུད་བླ་མ་སྤྲིན་ལྟར་འཁྲིགས། །ལྷ་དེ་དག་གནས་གསུམ་འབྲུ་གསུམ་ལས། །འོད་འཕྲོས་པས་ཞིང་ཁམས་རབ་འབྱམས་ནས། །ལྷ་ཡེ་ཤེས་སེམས་དཔའ་སྤྱན་དྲངས་བསྟིམ། །དེ་རྒྱལ་བ་ཀུན་དང་དབྱེར་མེད་གྱུར། །གནས་འོག་མིན་ཆོས་དབྱིངས་ཕོ་བྲང་ནས། །དཔལ་རྡོ་རྗེ་འཆང་ལ་གསོལ་བ་འདེབས། །ཤར་ཟ་ཧོར་ནོར་བུའི་དགོན་པ་ན། །རྗེ་ཏེ་ལོ་སངས་རྒྱས་ལ་གསོལ་བ་འདེབས། །བྱང་པུལླ་ཧ་རའི་དགོན་པ་ན། །མཁས་པ་ནཱ་རོ་པཎ་ཆེན་ལ་གསོལ་བ་འདེབས། །ལྷོ་གྲོ་བོ་ལུང་གི་སྨན་ལྗོངས་ན། །སྒྲ་བསྒྱུར་མར་པ་ལོ་ཙྪ་ལ་གསོལ་བ་འདེབས། །ནུབ་ལ་ཕྱི་གངས་ཀྱི་ར་བ་ན། །རྗེ་རས་པ་ཆེ་ཆུང་ལ་གསོལ་བ་འདེབས། །ཤར་དྭགས་ལྷ་དཔལ་གྱི་སྒམ་པོ་ན། །རྗེ་ལྷ་རྗེ་ཁུ་དབོན་ལ་གསོལ་བ་འདེབས། །དཔལ་ཕག་མོ་གྲུ་ཡི་མཐའ་རྩ་ན། །བདེ་གཤེགས་
ཁམས་པ་རྡོར་རྒྱལ་ལ་གསོལ་བ་འདེབས། །མཚུར་མདོ་བོ་ལུང་གི་དགོན་པ་ན། །རྗེ་ཁམས་པ་དབུ་སེ་ལ་གསོལ་བ་འདེབས། །འབྲུག་ར་ལུང་གཉིས་ཀྱི་དགོན་པ་ན། །གྲུབ་ཐོབ་གླིང་རྗེ་རས་པ་ལ་གསོལ་བ་འདེབས། །གནས་སྟག་ལུང་རྡོ་རྗེའི་གདན་སྟེང་ན། །ཆོས་སྐུ་སྟག་ལུང་ཐང་པ་ལ་གསོལ་བ་འདེབས། །འབྲི་ཁུང་དཔལ་གྱི་ཡང་དགོན་ན། །སྐྱོབ་པ་འཇིགས་རྟེན་གསུམ་མགོན་ལ་གསོལ་བ་འདེབས། །གནས་མར་ཐང་དཔལ་གྱི་རི་བོ་ཆེར། །ཆོས་སྐུ་ཨུ་རྒྱན་མགོན་པོ་ལ་གསོལ་བ་འདེབས། །གནས་སྤྱི་གཙུག་པད་ཟླའི་གདན་སྟེང་དུ། །འཇམ་དབྱངས་བཀྲ་ཤིས་དཔལ་གྲུབ་ལ་གསོལ་བ་འདེབས། །དག་སྣང་ཕྱོགས་མེད་ཀྱི་གཞལ་ཡས་ན། །བསྟན་འཛིན་སྐྱེས་བུ་དམ་པ་ལ་གསོལ་བ་འདེབས། །རྗེ་བཀའ་བརྒྱུད་བླ་མ་བྱིན་རླབས་ཅན། །རྗེ་བྱིན་རླབས་ཅན་ལ་གསོལ་བ་འདེབས། །མིབདག་ལ་དབང་བསྐུར་བྱིན་གྱིས་རློབས། །ཐོབ་དཀའ་བའི་དལ་འབྱོར་མི་ལུས་འདི། །དོན་མེད་སྟོང་ལོག་མི་བྱེད་པར། །ལུས་སྙིང་པོ་ལོན་པར་བྱིན་གྱིས་རློབས། །ཚེ་མི་རྟག་ནམ་བཞུགས་སྦྲང་མ་འདྲ། །ད་ཡུན་རིང་སྡོད་རྩིས་མི་བྱེད་པ། །
བདག་འཆི་བ་དྲན་པར་བྱིན་གྱིས་རློབས། །ལས་རྒྱུ་འབྲས་མེ་ལོང་གཟུགས་བརྙན་བཞིན། །ཁས་བཙན་པོ་གཤིན་རྗེའི་ཁྲིམས་ར་ན། །བདག་ངོ་གནོང་མེད་པར་བྱིན་གྱིས་རློབས། །གནས་རིགས་དྲུག་སྡུག་བསྔལ་བཙོན་ར་ན། །སྐྱོབ་ངེས་པ་བླ་མ་དཀོན་མཆོག་གསུམ། །བདག་སྐྱབས་སུ་མཆིའོ་ཐུགས་རྗེས་ཟུངས། །མ་འགྲོ་དྲུག་བདེ་ལ་འགོད་པའི་ཕྱིར། །བདག་བྱང་ཆུབ་མཆོག་ཏུ་སེམས་བསྐྱེད་དོ། །སྔོན་ཐོག་མེད་དུས་ཀྱི་སྡིག་སྒྲིབ་རྣམས། །རྗེ་ཁྱེད་ཀྱི་སྤྱན་སྔར་མཐོལ་ཞིང་བཤགས། །ལུས་ལོངས་སྤྱོད་དགེ་རྩ་ཅི་མཆིས་པ། །རྗེ་བཀའ་བརྒྱུད་རྣམས་ཀྱི་སྤྱན་སྔར་འབུལ། །སྙིང་རུས་པའི་གཏིང་ནས་གསོལ་བ་འདེབས། །སེམས་ཆོས་སྐུ་རྟོགས་པར་བྱིན་གྱིས་རློབས། །བདག་དེ་ལྟར་རྩེ་གཅིག་གསོལ་བཏབ་པས། །ཕ་བཀའ་བརྒྱུད་བླ་མ་འོད་དུ་ཞུ། །མི་བདག་དང་དབྱེར་མེད་གཅིག་ཏུ་འདྲེས། །དོན་འོད་གསལ་ཆོས་སྐུ་རྗེན་པར་འབུད། །ཆོས་ཀུན་གྱི་རྩ་བ་རང་གི་སེམས། །བུ་མ་ཡེངས་རང་གི་སེམས་ལ་ལྟོས། །སེམས་བལྟས་པས་གཟུགས་དང་ཁ་དོག་མེད། །ཆོས་སྟོང་ཉིད་ཟེར་བ་ལོགས་ན་མེད། །སེམས་
མེད་པ་མ་ཡིན་གར་ཡང་འགྲོ། །དེ་རིག་ན་རང་རིག་ཡེ་ཤེས་ཡིན། །ལུས་ཕྱི་རུ་བཙལ་ཡང་སེམས་མ་མཆིས། །ཕྱི་སྟོང་པ་ཉིད་ཅེས་དེ་ལ་ཟེར། །ལུས་ནང་དུ་བཙལ་ཡང་སེམས་མ་མཐོང་། །ནང་སྟོང་པ་ཉིད་ཅེས་དེ་ལ་བཏགས། །འདི་ཤེས་ན་ཤེས་བྱ་ཀུན་གྱི་རབ། །བཀའ་ཤེས་རབ་ཕར་ཕྱིན་རང་གི་སེམས། །སེམས་གར་འགྲོ་ཐོངས་ལ་ཆངས་སོ་ཚུགས། །དོན་ཕྱག་རྒྱ་ཆེན་པོ་ལོགས་ན་མེད། །སེམས་གསལ་ན་གསལ་བའི་ངོ་བོ་ལྟོས། །དོན་གསལ་སྟོང་ཡེ་ཤེས་ཨེ་མ་ཧོ། །སེམས་བདེ་ན་བདེ་བའི་ངོ་བོ་ལྟོས། །དོན་བདེ་སྟོང་དབྱེར་མེད་ཨེ་མ་ཧོ། །སེམས་མི་འཕྲོ་འདུག་ལ་ངོ་བོ་ལྟོས། །དོན་མི་རྟོག་ཡེ་ཤེས་ཨེ་མ་ཧོ། །སེམས་འཕྲོ་ན་འཕྲོ་མཁན་ངོ་བོ་ལྟོས། །དོན་དྲན་སྟོང་ཡེ་ཤེས་ཨེ་མ་ཧོ། །བུ་འགྲོ་ཞིང་འགྲོ་ཞིང་སེམས་ལ་ལྟོས། །དོན་དམ་པའི་སྐོར་བ་ཨེ་མ་ཧོ། །བུ་ཟ་ཞིང་ཟ་ཞིང་སེམས་ལ་ལྟོས། །དོན་དམ་པའི་ཚོགས་འཁོར་ཨེ་མ་ཧོ། བུ་ཉལ་ཞིང་ཉལ་ཞིང་སེམས་ལ་ལྟོས། །གཉིད་འོད་གསལ་གདམས་པ་ཨེ་མ་ཧོ། །བདག་གསོལ་འདེབས་དགེ་སྦྱོར་སྐྱོང་བ་སོགས། །དུས་གསུམ་གྱི་དགེ་བ་ཅི་བསགས་
མཐུས། །ཚེ་འདི་ལ་ཚེ་རིང་ནད་མེད་ཅིང་། །དཔལ་འབྱོར་པའི་མཐུན་རྐྱེན་རབ་འཕེལ་ཞིང་། །དོན་འོད་གསལ་ཆོས་སྐུ་རྟོགས་པར་ཤོག །དུས་ནམ་ཞིག་མི་གནས་འཕོ་བའི་ཚེ། །ནུབ་བདེ་བ་ཅན་གྱི་ཞིང་ཁམས་སུ། །ལུས་བརྫུས་སྐྱེས་སྤྲུལ་སྐུ་ཐོབ་ནས་ཀྱང་། །ས་ལམ་གྱི་ཡོན་ཏན་རབ་རྫོགས་ནས། །བདག་བྱང་ཆུབ་མངོན་དུ་བྱེད་པར་ཤོག །རྗེ་རྒྱལ་བ་སྲས་བཅས་ཐུགས་རྗེ་དང་། །གཞི་གདོད་ནས་སྐྱེ་བ་མེད་པ་དང་། །ལམ་རྟེན་འབྲེལ་བསླུ་མེད་བདེན་པའི་མཐུས། །བདག་སྨོན་ལམ་བཏབ་བཞིན་འགྲུབ་གྱུར་ཅིག །ཅེས་སྐྱག་ཟླའི་ཨ་མཆོད་སེར་གཟུགས་འཛིན་པས་བསྐུལ་ཕྱིར། ཨ་རཱ་གས་འཕྲལ་དུ་བྲིས་པའོ། །འདི་ཁྲིད་མ་ཐོབ་པ་ལ་དཔེ་སྐུང་བར་བྱའོ། །མངྒ་ལཾ།། ༈ པདྨ་འབྱུང་གནས་ཀྱི་བླ་མའི་རྣལ་འབྱོར་ཞལ་གདམས་མགུར་མ་བླ་མ་སྲུང་ལ་གནང་བ་བཞུགས་སོ། ༈ །ན་མོ་པྲ་ཝ་ཀ་ར་ཡེ། མི་བདག་གི་སྤྱི་བོའི་གཙུག་རོལ་ན། །གདན་པདྨ་ཉི་ཟླ་སུམ་བརྩེགས་སྟེང་། །འཇའ་འོད་ཕུང་འཁྲིགས་པའི་གུར་ཁང་ན། །ཕ་དྲིན་ཅན་རྩ་བའི་བླ་མ་དང་། །དོན་དབྱེར་མེད་གུ་རུ་པདྨ་འབྱུང་། །སྐུ་དཀར་གསལ་མདངས་ལྡན་མཚན་
དཔེས་སྤྲས། །ཞལ་འཛུམ་མཛེས་སྤྱན་གཉིས་ཞི་མ་ཁྲོ། །དབུ་པད་ཞྭ་རྒོད་ཀྱི་ལྡེམ་འཕྲུ་ཅན། །ཕྱག་རྡོ་རྗེ་བྷནྡྷ་ཚེ་བུམ་འཛིན། །ཡུམ་ཌཱཀྐི་སྦས་ཚུལ་ཁ་ཊཾ་བརྟེན། །བེར་ཕོད་ཁ་ཆོས་གོས་ངུར་སྨྲིག་གསོལ། །ཞབས་རྡོ་རྗེ་སྐྱིལ་མོ་ཀྲུང་གིས་བཞུགས། །ཞིང་ཕྱོགས་བཅུའི་རྒྱལ་བ་སྲས་བཅས་རྣམས། །དེ་ཐམས་ཅད་སྤྱན་དྲངས་དབྱེར་མེད་ཐིམ། །རྗེ་སངས་རྒྱས་ཐམས་ཅད་འདུས་པའི་ཐུགས། །བཀའ་དམ་ཆོས་ཐམས་ཅད་འདུས་པའི་གསུང་། །ཚོགས་དགེ་འདུན་ཐམས་ཅད་འདས་པའི་སྐུ། །སྐྱབས་དཀོན་མཆོག་ཀུན་འདུས་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །དུས་དེང་སང་སྙིགས་མ་ལྔ་བརྒྱའི་མཐའ། །རྗེ་སངས་རྒྱས་ཀུན་གྱི་ཐུགས་རྗེ་རྡུགས། །བཀའ་དམ་ཆོས་ཀུན་གྱི་ངད་པ་ཡལ། །ལྷ་དཀར་ཕྱོགས་སྐྱོང་བ་ཐམས་ཅད་བྲོས། །བདུད་ནག་ཕྱོགས་གདོན་རིགས་རླུང་ལྟར་འཚུབ། །ཆར་དུས་སུ་མི་འབབ་ལོ་དགྲ་མང་། །དུས་མི་བདེ་མཐའ་དབུས་ཐམས་ཅད་འཁྲུག །སྤུན་ཉེ་དུ་མི་མཐུན་རྨེ་འཁྲུག་བྱེད། །དུས་འདི་འདྲ་ཁྱེད་ཉིད་ཐུགས་རྗེ་ཆེ། །དོན་དེ་ཕྱིར་ཁྱེད་ལ་གསོལ་བ་འདེབས། །སྟེང་གཟའ་སྐར་
འཁྲུག་པས་ཐོག་སེར་རྒོད། །མི་ཕལ་ཆེར་གཟའ་ནད་ཧུར་ཐུམ་མང་། །འོག་ཀླུ་གདོན་འཁྲུག་པས་གཅོང་ནད་མང་། །མི་ཕལ་ཆེར་ཞ་གྲུམ་མཛེ་ཡིས་འཁྱེར། །གདོན་རྒྱལ་འགོང་དར་བས་ནང་འཁྲུག་མང་། །མི་ཕལ་ཆེར་སྨྱོ་འབོག་ཆག་འདྲེས་འདེབས། །མ་མཁའ་འགྲོ་འཁྲུག་པས་རིམས་ནད་མང་། །མི་ཕལ་ཆེར་བདུན་དྲུག་ནད་ཀྱི་འཆི། །གདོན་གནོད་སྦྱིན་དར་བས་ཁ་ལྕེ་རྒོད། །མི་ཉེས་མེད་བདེ་དབྱེན་སྲོག་བྲལ། །བདུད་སྣང་སྲིད་ལྷ་འདྲེ་ཟིང་ལང་དུས། །ཕ་ཁྱེད་ཀྱི་འདུལ་སྐལ་ཡིན་ལགས་པས། །དོན་དེ་ཕྱིར་ཁྱེད་ལ་གསོལ་བ་འདེབས། །བདག་དལ་འབྱོར་མི་ལུས་ཐོབ་ལགས་ཀྱང་། །ཆོས་བྱེད་བསམ་ངང་ལ་མི་ཚེ་ཟད། །དུས་སྙེམས་མེད་གཅིག་ལ་འཆི་བས་གཏུག །དགྲ་འཆི་བདག་གཤིན་རྗེས་ཟིན་པའི་དུས། །སྨན་རིམ་གྲོས་མི་ཕན་ཕྱིར་ཕྱིར་ཐུ། །གཉེན་ཉེ་དུ་ཟས་ནོར་ཤུལ་དུ་ལུས། །སེམས་དབང་མེད་བྱ་སྒྲོ་རླུང་ཁྱེར་བཞིན། །འགག་གཟུར་མེད་བར་དོའི་འཕྲང་ལ་འགྲིམ། །ལས་དགེ་སྡིག་གཤིན་རྗེའི་ཁྲིམས་ལ་གཏུག །རྫུན་སྨྲས་ཀྱང་མི་ཕན་མེ་ལོང་གསལ། །དུས་དེ་འདྲའི་དུས་
ཤིག་བྱུང་ཙམ་ན། །སྐྱོབ་ངེས་པའི་བླ་མ་དཀོན་མཆོག་གསུམ། །དེ་གཅིག་བསྡུས་ཨུ་རྒྱན་རིན་པོ་ཆེ། །དུས་དེ་ཚེ་རེ་ས་གཞན་ན་མེད། །ཕ་ཐུགས་རྗེས་ཟུང་ཞིག་པདྨ་ལྟའབྱུང་། །ཚེ་འདི་དང་ཕྱི་མ་བར་དོ་གསུམ། །སྐྱབས་གཞན་ན་མ་མཆིས་ཁྱེད་རང་ཤེས། །བདག་གདུང་ཤུགས་དྲག་པོས་གསོལ་བཏབ་པས། །རྗེ་པདྨ་འབྱུང་གནས་འོད་དུ་ཞུ། །མི་བདག་དང་དབྱེར་མེད་གཅིག་ཏུ་འདྲེས། །དོན་དབང་བཞི་བྱིན་རླབས་ཅིག་ཆར་ཕོབ། །ད་ཚུར་ལྟོས་རང་གི་སེམས་ལ་ལྟོས། །སེམས་བལྟས་པས་གཟུགས་དང་ཁ་དོག་མེད། །སེམས་མེད་པ་མ་ཡིན་གར་ཡང་རྒྱུག །དེ་བལྟས་པས་མི་མཐོང་ངང་ལ་ཞོག །དོན་སེམས་ངོ་མཐོང་ཞེས་དེ་ལ་ཟེར། །སེམས་གནས་ན་གནས་པའི་ངང་ལ་ལྟོས། །སེམས་སྟོང་གསལ་ངང་ན་རྗེན་ནེར་ཞོག །སེམས་གར་འགྲོ་ལྷོད་ལ་རྒྱང་སྲུང་གྱིས། །དཔེ་ཆུ་ལ་ཆུ་རླབས་ཐིམ་པ་བཞིན། །སེམས་འཕྲོ་རྒོད་སྟོང་ཉིད་དབྱིངས་སུ་ཞི། །རང་སེམས་ཀྱིས་སེམས་ལ་ལྟ་བ་དེ། །རྗེ་པདྨ་འབྱུང་གནས་ལྟ་བ་ཡིན། །དེ་མ་ཡེངས་གོམ་འདྲིས་བྱེད་པ་དེ། །བསྒོམ་ཉམས་ལེན་མིང་དུ་བཏགས་པ་ཡིན། །ལས་དགེ་སྒྲུབ་སྡིག་
སྤང་བྱེད་པ་དེ། །ལྷ་པད་འབྱུང་དགྱེས་པའི་སྤྱོད་པ་ཡིན། །དོན་ཚོགས་གཉིས་མཐའ་རུ་ཕྱིན་པ་དང་། །དུས་ནམ་ཞིག་འབྲས་བུ་སངས་རྒྱས་ཐོབ། །མི་བདག་གིས་གསོལ་འདེབས་དགེ་སྦྱོར་སོགས། །དུས་གསུམ་དུ་བསགས་པའི་དགེ་བ་འདིས། །ཚེ་འདི་ལ་ཆེ་རིང་ནད་མེད་ཅིང་། །དཔལ་འབྱོར་པ་ཡར་ངོའི་ཟླ་བཞིན་འཕེལ། །དུས་ནམ་ཞིག་མི་གནས་འཕོ་བའི་ཚེ། །ནུབ་བདེ་བ་ཅན་གྱི་ཞིང་ཁམས་སུ། །ལུས་བརྫུས་སྐྱེས་སྤྲུལ་སྐུ་ཐོབ་ནས་ཀྱང་། །རྟེན་དེ་ལ་ས་བཅུ་རབ་བསྒྲོད་ནས། །དོན་བླ་མེད་བྱང་ཆུབ་ཐོབ་པར་ཤོག །གཞི་ཆོས་དབྱིངས་སྐྱེ་བ་མེད་པ་དང་། །ལམ་རྟེན་འབྲེལ་བསླུ་བ་མེད་པ་དང་། །སྐྱབས་པད་འབྱུང་ཐུགས་རྗེ་ཚད་མེད་མཐུས། །བདག་སྨོན་ལམ་བཏབ་བཞིན་འགྲུབ་པར་ཤོག །ཅེས་བླ་མ་སྲུང་གི་ཐུགས་དམ་བྱ་ཕྱིར། ཨ་རཱ་གས་འཕྲལ་དུ་བྲིས་པའོ། །མངྒ་ལཾ།། ༈ ལུང་བསྟན་གདམས་པའོ། །དུལ་མོ་བ་ཀརྨ་དར་རྒྱས་ཕུན་ཚོགས་ས་ཐག་རིང་པོ་ནས་འོ་བརྒྱལ་ཆེ་བར་ཕེབས་ཀྱང་། ང་མཚམས་ཀྱི་བཅད་རྒྱ་དམ་པས། ངོ་གཏུག་པ་དང་ངག་འདྲེས་པའི་ཐབས་ནི་མ་བྱུང་། ཆགས་ཕེབས་ཀྱི་ཚུལ་དུ་རྡུལ་བྱང་
ངོས་ནས་བྲེ་མོའི་གཏམ་འགའ་རེ་ཞུས་པས། ཆུང་ངུ་ནས་ལས་འཕྲོ་སད་པས་འཇིག་རྟེན་ཀྱི་བྱ་བ་མ་འདོད་པས། ཁྱིམ་ནས་ཁྱིམ་མེད་པ་རབ་ཏུ་བྱུང་། དེ་ཚུལ་ཁྲིམས་མིག་གི་འབྲས་བུ་ལྟར་སྲུང་ཞིང་བསྟན་པའི་མིག་རྐྱེན་ལ་ཕན་པ་ཅིག་མི་བྱེད་རེ་དབུ་བསྙུང་གིས་མཚོན་ནས་གསུངས་པས། ཁོ་བོ་ཡང་ས་ཐོབ་པ་ཙམ་དུ་དགའ། ད་ནི་ཉེ་བར་མཁོ་བའི་དབང་ལུང་། གནད་མན་ངག་རྣམས་ལ་མཁས་པར་རྩད་ཆོད་སོགས། རྫོགས་རིམ་རྩ་རླུང་ལ་ཡང་རས་རྐྱང་ཐུབ་ཅིང་ཉམས་ལེན་སྐྱོངས་བདེ་ཡོད། བླ་བརྒྱུད་བཟང་ཞིང་བཙུན་ཚུགས་བཟང་། བསྙེན་སྒྲུབ་འགའ་རེ་བྱས་པ་ལ་ཡང་རྟགས་མཚན་བཟང་པོ་ཐོན་འདུག །ད་བར་ཆད་བྱུང་ན་དབང་ལུང་ཁྲིད་སོགས་ཀྱི་བསྟན་པ་ལ་ཕན་པའི་བླ་མ་ཞིག་བྱུང་ཚར་བ་འདི་ག་ཡིན་པས། དགའ་བ་བསྒོམས། ཕར་འབྱོན་ཁ་ཐ་སྐར་ཟླ་བའི་ཚེས་བཞི་ལ་ཀརྨ་བཟང་དོ་བས། ངའི་བུ་ཆེན་དུལ་མོ་དར་རྒྱས་འདི་ལ་མཐར་ཅི་འདྲ་ཞིག་འོང་རྨི་ལམ་བརྟགས་པས་གཉིད་པ་མ་ཡིན་ཉམས་ཀྱི་སྣང་བ་ལ་སུས་ཟེར་མེད་པའི་སྐྱབས་སུ་མཆི་ཟེར་སྒྲ་ལན་གཉིས་གྲགས་པ་ཐོས་པས་བླ་མ་བཟང་པོ་ཀུན་གྱི་དད་འདུན་བྱེད་པ་ཞིག་འོང་བར་
འདུག་སྙམ། དེ་གཉིད་དུ་སོང་བའི་རྨི་ལམ་དུ། ང་ཡི་མདུན་དེར་ཕོ་རོག་གཞན་ལས་ཆེ་ཞིང་མདོག་བཟང་བ་གཅིག་ཕར་འགྲོ་ཚུར་འགྲོ་བྱེད་དོ། །ཕོ་རོག་འདི་ཙམ་ཆེ་བ་དང་མདོག་ལེགས་པ་མཐོང་མ་མྱོང་། འདི་མགོན་པོའི་བླ་རྟགས་རེད་སྙམ་ནས་སེམས་རབ་ཏུ་དགའ། དེ་ནས་འབྲོག་པའི་དཔོན་རིགས་གཅིག་ཡིན་སྙམ་པའི་མི་རྒན་ཐོར་ལྕོག་ཅན་ཨམ་ཚོམ་ཆེ་བ། ཚར་ཙག་རིས་ཤན་འདྲ་བའི་གོས་སྔོན་རྙིང་པ་གོན་པ་གཅིག་ངའི་མདུན་དུ་བྱུང་ནས་ད་ང་རྒས་ནས་ཡོད་དེ་ངའི་ནང་ཟོག་རྩིས་ཆེན་འདི་བཞག་པ་རྒྱུ་ཡིན་ཟེར་ནས་ང་ལ་ངོམས་དོ་བས། གྲི་གུག་ཤིན་ཏུ་ལེགས་པ་ཕོ་གྲི་མོ་གྲི་གཉིས་ཆེ་ཆུང་གྲུ་གང་ཙམ་པ། གཞན་གྲི་གུག་ཕོ་གྲི་མོ་གྲི་ཡིད་ལ་མེད་པ་གཅིག་དང་གསུམ་བསྟན་བྱུང་། འདི་ཚོ་ཤིན་ཏུ་རྣོ་ཞིང་སྤུ་འདེད་པ་འདུག །རྩིས་ཆེན་རེད་སྙམ་པ་ཞིག་རྨིས་པས་ཁྱེད་ཀྱི་མགོན་པོ་འགྲུབ་ཅིང་མཐུ་ནུས་ཆེན་པོ་འོང་བར་གོ །དེ་ནས་ཀཿཐོག་གི་བླ་མ་རེད་སྙམ་པའི་རལ་པ་ཅན་ཞིག་གིས་གནམ་ཆོས་ཀྱི་ལོ་མ་ཅན་དེ་ལ་རྫོགས་ཆེན་གྱི་ཚིག་གཅིག་གདའ་སྟེ་ཆ་ཚང་པོ་མི་འདུག་ཟེར་ནས་ཅུང་ཟད་མི་འགུ་མགུ་བྱེད་དོ་བ་རྨིས་པས། ཁྱེད་
རྙིང་མ་ལ་མཁས་པའི་གྲགས་པ་ཐོབ་པ་མི་འོང་བ་འདྲ་བསམ། དེ་ནས་ཀར་ལུགས་ཀྱི་བནྡེ་དྲུག་བདུན་ཙམ་ཞིག་འདུག་པ་ལ་གཅིག་ལ་ཁྱོད་བསྙེན་རྫོགས་ཞུས་པ་ཡིན་ནམ་བྱས་པས་ཡིན་ཟེར། འོ་ན་བསྙེན་རྫོགས་ཞུས་པ་ལ་རྟགས་ཆབ་རིལ་སོགས་མེད་པ་འོ་སྐོར་ཀར་ལུགས་འདི་དགེ་བསྙེན་དང་། དགེ་ཚུལ་དང་། དགེ་སློང་གསུམ་བསྲུང་བྱ་དང་ཆ་ལུགས་ཁྱད་མེད་པ་འདི་མི་ལེགས་པ་རྨིས་པས་ཁྱེད་ཀྱི་གྲྭ་སློབ་རྣམས་ཧ་ཅང་བཙུན་ཚུགས་བཟང་བ་རང་མི་འོང་ངམ་སྙམ། ཁྱེད་སློབ་མ་བརྒྱུད་པར་བཅས་པ་ཆོས་མགོ་ཐོན་ཅིང་བསྟན་པའི་རྒྱན་དུ་འགྱུར་བར་བདག་གིས་བླ་མ་ཡི་དམ་རྣམས་ལ་གསོལ་བ་འདེབས་སོ། །མཁའ་འགྲོ་ཆོས་སྐྱོང་རྣམས་ལ་ཕྲིན་ལས་བཅོལ་ལོ། །དུལ་མོ་བཀྲ་ཤིས་འོད་ཟེར་གྱི་བསྟན་པ་འཕེལ་ཞིང་རྒྱས་པར་གྱུར་ཅིག །ཅེས་པ་རཱ་ག་ཨ་སྱས་སོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།