རིམས་བཟློག་གསོལ་འདེབས་ལེའུ་ཚན་བདུན།
ན་མོ་དཀོན་མཆོག་གསུམ་དང་བླ་མེད་རྩ་བ་གསུམ། །སྨན་ལྷ་མཆེད་བརྒྱད་གུ་རུ་མཚན་བརྒྱད་དང་། །དོན་ཡོད་ཞགས་པ་སྒྲོལ་མ་ཉི་ཤུ་གཅིག །ལོ་མ་གྱོན་མ་ལྷ་མོ་དཔོན་གཡོག་སོགས། །རྩ་བ་གསུམ་གྱི་ལྷ་ལ་གསོལ་འདེབས་ཀྱིས། །བསྲུང་བྱར་གྱུར་པའི་ནོར་ཕྱུགས་ཐམས་ཅད་ལ། །ཕྱུགས་ནད་ཧོན་གྱི་གནོད་པ་མེད་གྱུར་ཅིག །ཆོས་ཉིད་གདོད་ནས་རྣམ་པར་དག་པ་དང་། །རྒྱུ་འབྲས་བསླུ་མེད་རྟེན་འབྲེལ་བསླུ་མེད་དང་། །རྒྱལ་བ་སྲས་བཅས་བདེན་པའི་བདེན་སྟོབས་ཀྱིས། །བསྲུང་བྱར་གྱུར་པའི་ནོར་ཕྱུགས་ཐམས་ཅད་ལ། །གློ་གོར་ཧོན་གྱི་གནོད་པ་ཞི་གྱུར་ཅིག །སརྦ་གྲ་ཧཱ་རོ་ག་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་ཅི་མང་བཟླས། དུད་པའི་སོལ་བ་མ་དང་རེ་མ་ཏི། །སྲིད་པའི་མ་མོ་བྱེ་བ་འབུམ་ཕྲག་དང་། །དཔལ་མགོན་བདུན་ཅུ་སྡེ་དཔོན་སུམ་ཅུ་དང་། །དྲེགས་པ་བཅོ་བརྒྱད་དགེ་བསྙེན་ཉི་ཤུ་གཅིག །བརྟན་མ་བཅུ་གཉིས་མགུར་ལྷ་བཅུ་གསུམ་དང་། །ཁྱད་པར་འཛམ་གླིང་བོད་ཁམས་གནས་པ་ཡི། །ལྷ་ཀླུ་གཞི་བདག་འདྲེ་གདོན་འབྱུང་པོ་རྣམས། །སྔོན་ཚེ་སློབ་དཔོན་པདྨ་འབྱུང་གནས་ཀྱིས། །བཀའ་དང་དམ་ཚིག་
གཉེན་ལ་མ་འདའ་བར། །ཡུལ་ཕྱོགས་འདི་ཡི་མི་ནོར་ཐམས་ཅད་ལ། །མི་ནད་ཕྱུགས་ནད་གོད་ཡམས་མ་བཏང་ཞིག །འདིར་བྱོན་བཀའ་ཡི་གཏོར་མ་འདི་བཞེས་ལ། །ཕྱུགས་ནད་འདི་ཉིད་མྱུར་དུ་ཆད་པར་མཛོད། །མཐུ་རྩལ་ནུས་པ་ཅི་འདུག་དུས་འདིར་ལྟ། །བཀའ་དང་དམ་ལ་མ་འདའ་དམ་ཚིག་ཅན། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་དཀར་གཏོར་བསང་གི་གཤམ་དུ་བཏགས་པ་ལེགས། ཞེས་ཕྱུགས་ནད་གཅོད་བྱེད་འདི་རཱ་ག་ཨ་སྱས་སྤོམ་ནེ་རྡོ་རྗེའི་བྲག་ཏུ་སྦྱར་བའོ། །སརྦ་མངྒ་ལཾ།། ན་མོ་རཏྣ་ཏྲ་ཡཱ་ཡ། ཕྱོགས་བཅུའི་དུས་གསུམ་ཞིང་བཞུགས་བཅོམ་ལྡན་འདས། །ས་དང་ལམ་གནས་འཕགས་པའི་བདེན་སྟོབས་ཀྱིས། །བསྲུང་བྱར་གྱུར་པའི་ནོར་ཕྱུགས་ཐམས་ཅད་ལ། །ཕྱུགས་ནད་གོད་ཁའི་གནོད་པ་མ་བཏང་ཞིག །སྲིད་པའི་མ་མོ་མཁའ་འགྲོ་ཐམས་ཅད་དང་། །བརྟན་མ་བཅུ་གཉིས་མགུར་ལྷ་བཅུ་གསུམ་དང་། །སྡེ་དཔོན་སུམ་ཅུ་དྲེགས་པ་བཅོ་བརྒྱད་དང་། །ཁྱད་པར་ཡུལ་ཕྱོགས་འདི་ཡི་ལྷ་འདྲེ་རྣམས། །ཨོ་རྒྱན་ཆེན་པོའི་དམ་ལ་མ་འདའ་བར། །བདག་གིས་བསྲུང་བྱར་གྱུར་
པའི་ནོར་ཕྱུགས་ལ། །གློ་གོར་ཧོན་སོགས་ནོར་ནད་མ་བཏང་ཞིག །ཛམ་ལྷ་རིགས་ལྔ་ནོར་རྒྱུན་མཆེད་ལྔ་སོགས། །ནོར་ལྷ་ཀུན་གྱི་བསྲུང་བྱའི་ནོར་ཕྱུགས་ལ་།བསྲུང་ཞིང་སྐྱོབ་ལ་ཚེ་སྲོག་བརྟན་པར་མཛོད། །ཆོས་ཉིད་རྣམ་དག་རྒྱུ་འབྲས་བསླུ་མེད་དང་། །དཀོན་མཆོག་རིན་ཆེན་གསུམ་གྱི་བདེན་སྟོབས་ཀྱིས། །བསྲུང་བྱར་གྱུར་པའི་ནོར་ཕྱུགས་ཐམས་ཅད་ལ། །ཕྱུགས་ནད་ཧོན་གྱི་གནོད་པ་ཞི་གྱུར་ཅིག །ཅེས་པ་འདི་ཨ་རཱ་གས་སྤོམ་ནེ་མདོར་ལེགས་པར་སྦྱར་བའོ། དུད་པའི་སོལ་བ་མ་རེ་མ་ཏི། །སྲིད་པའི་མ་མོ་བྱེ་བ་དུང་ཕྱུར་ཕྲག །དཔལ་མགོན་བདུན་ཅུ་སྡེ་དཔོན་སུམ་ཅུ་དང་། །དྲེགས་པ་བཅོ་བརྒྱད་དགེ་བསྙེན་ཉི་ཤུ་གཅིག །བརྟན་མ་བཅུ་གཉིས་མགུར་ལྷ་བཅུ་གསུམ་དང་། །ཁྱད་པར་མདོ་ཁམས་སྒང་གི་ལྷ་འདྲེ་རྣམས། །ཨོ་རྒྱན་ཆེན་པོ་པདྨ་འབྱུང་གནས་ཀྱི། །བཀའ་དང་དམ་ཚིག་གཉེན་ལ་མ་འདའ་བར། །བདག་གི་བསྲུང་བྱའི་ནོར་ཕྱུགས་ཐམས་ཅད་ལ། །ཕྱུགས་ནད་ཧོན་གྱི་གནོད་པ་མ་བཏང་ཞིག །ཕྱུགས་ནད་འདི་ཉིད་མྱུར་དུ་ཆད་པར་མཛོད། །མཐུ་རྩལ་ནུས་པ་ཅི་འདུག་ད་ལྟའོ། །བཀའ་དང་དམ་
ཚིག་གཉེན་ལ་མ་འདའ་བར། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་དཀར་གཏོར་གྱི་མཇུག་ཏུ་སྦྱར་བ་ལེགས་མིན་ཀྱང་རུང་རཱ་ག་ཨ་སྱས་སྤོམ་ནེ་ཡོར་བྲི་གུ་རྡོ་རྗེས་བྲག་ཏུ་སྦྱར་བའོ།། ༈ ན་མོ་རཏྣ་ཏྲ་ཡཱ་ཡ། ན་མོ་བཛྲ་པཱ་ཎི་ཡེ། སྐྱབས་གནས་བསླུ་བ་མེད་པའི་དཀོན་མཆོག་གསུམ། །བདེ་གཤེགས་སྨན་ལྷ་སྒྲོལ་མ་ཉི་ཤུ་གཅིག །ཐུགས་རྗེ་ཆེན་པོ་པད་འབྱུང་ལོ་མ་ཅན། །ཆོས་ཉིད་ཆོས་ཅན་འགོགས་དང་ལམ་གྱི་བདེན། །བདེ་ལྡན་ཇི་སྙེད་མཁྱེན་པའི་བདེན་སྟོབས་ཀྱི། །ཕྱུགས་ནད་ཧོན་གྱི་གནོད་པ་མེད་པར་ཤོག །སྐྱེས་བུ་ཆེན་པོ་ལྷ་སྨན་གཡུ་སྒྲོན་མ། །དཔལ་མགོན་བདུན་ཅུ་ཡུལ་ལྷ་གཞི་བདག་ཚོགས། །སློབ་དཔོན་པདྨའི་དམ་ལ་མ་འདའ་བར། །ནོར་ནད་ཧོན་གྱི་གནོད་པ་བཟློག་པར་མཛོད། །ཁྱད་པར་རྣམ་སྲས་ནོར་ལྷ་མཆེད་བརྒྱད་ཚོགས། །སྔོན་གྱི་ཐུགས་དམ་དམ་བཅའ་མ་བསྙེལ་བར། །ནོར་ཕྱུགས་རྣམས་ལ་བསྲུང་ཞིང་སྐྱབས་མཛོད་ལ། །ནོར་ནད་ལ་སོགས་འཁོར་བའི་སྡུག་བསྔལ་ཀུན། །ཡེ་ནས་མ་གྲུབ་སྟོང་ཉིད་བདེ་བ་ཆེ། །སྐྱེ་མེད་ཆོས་སྐུའི་ཀློང་དུ་བཛྲ་མཿ ཞེས་པ་ནོར་ལུག་ཡོད་དུས་ཁག་ཁུར་ཟེར་བའི་བརྡའ་གྲགས་ནས། ཞོ་ནི་གུར་
ཙམ་ཞིག་ལ་སྤྱོད་པར་རྨིས། ཞེས་པའང་ཨ་རཱ་གས་བྲིས་པའོ།། ༄༅། །ན་མོ་རཏྣ་ཏྲ་ཡཱ་ཡ། དཀོན་མཆོག་རིན་ཆེན་གསུམ་ལ་ཕྱག་འཚལ་ལོ། །ན་མོ་བཛྲ་པཱ་ཎི་ཡེ། གསང་བདག་རྡོ་རྗེ་འཛིན་ལ་ཕྱག་འཚལ་ལོ། །སྨོན་ལམ་ཡོངས་སུ་འགྲུབ་པར་བྱིན་གྱིས་རློབས། །འཕགས་པ་སྤྱན་རས་གཟིགས་ནི་ཐུགས་རྗེའི་བདག །འཇམ་དབྱངས་མཁྱེན་རབ་མཚུངས་པ་མེད་པ་དང་། །ཕྱག་ན་རྡོ་རྗེ་མཐུ་སྟོབས་ཟླ་མེད་པས། །བདེན་པ་ཆེན་པོས་ཕྱུགས་ནད་ཞི་གྱུར་ཅིག །ཐུབ་དབང་གྲངས་མེད་གསུམ་དུ་ཚོགས་བསགས་དང་། །པདྨ་འབྱུང་གནས་རྫུ་འཕྲུལ་བསམ་ལས་འདས། །སྒྲོལ་མ་ཉེར་གཅིག་ཐུགས་རྗེ་མྱུར་བ་ཡི། །བདེན་པ་ཆེན་པོས་ཕྱུགས་ནད་ཞི་གྱུར་ཅིག །ཆོས་རྣམས་ངོ་བོ་ཡེ་ནས་སྟོང་ཉིད་དང་། །རྣམ་པ་རྟེན་འབྲེལ་བསླུ་བ་མེད་པའི་མཐུས། །ཕྱུགས་ནད་གློ་ཧོན་གནོད་པ་ཞི་གྱུར་ཅིག །བསྐལ་བཟང་འདི་ལ་བཅོམ་ལྡན་རྒྱལ་བ་སྟོང་། །འབྱོན་པར་གསུངས་པའི་ལུང་བསྟན་དེ་བདེན་ན། །བདེན་པ་དེ་ཡི་ཕྱུགས་ནད་ཞི་གྱུར་ཅིག །འཛམ་གླིང་བྱེ་བ་ཕྲག་བརྒྱའི་ཞིང་ཁམས་སུ། །ཐུབ་དབང་ཨོ་རྒྱན་བྱེ་བ་ཕྲག་བརྒྱ་ནི། །བྱོན་ཅིང་མདོ་
སྔགས་ཆོས་འཁོར་བསྐོར་གསུངས་པ། །བདེན་པ་དེ་ཡི་བདེན་པས་ནོར་ནད་ཆོད། །རྒྱ་གར་ཡུལ་དུ་གྲུབ་ཆེན་བརྒྱད་ཅུ་དང་། །བོད་དུ་རྗེ་འབངས་ཉི་ཤུ་རྩ་ལྔ་དང་། །མར་མི་དྭགས་པོ་བཀའ་བརྒྱུད་གྲུབ་ཐོབ་སོགས། །མཆོག་ཐུན་དངོས་གྲུབ་ཐོབ་པ་དེ་བདེན་ན། །བདེན་པ་དེ་ཡི་ཧོན་ནད་ཞི་གྱུར་ཅིག །དགེ་སྡིག་རྒྱུ་འབྲས་བསླུ་བ་མེད་པ་དང་། །རྒྱལ་བའི་བཀའ་ནི་ནམ་ཡང་མི་རྫུན་ཞིང་། །མ་མགོན་ཆོས་སྐྱོང་དམ་ལ་མི་འདའ་ན། །བདེན་པ་དེ་ཡི་བསྲུང་བྱའི་ནོར་ཕྱུགས་ལ། །ཧོན་གྱི་གནོད་པ་ཐམས་ཅད་ཞི་གྱུར་ཅིག །པད་འབྱུང་གཏེར་ཁ་བྱེ་བ་སར་སྦས་ཤིང་། །གཏེར་སྟོན་བརྒྱ་དང་རྩ་བརྒྱད་ལ་སོགས་པས། །འདོན་ཅིང་རིམ་པར་འགྲོ་དོན་འབྱུང་བདེན་ན། །ཕྱུགས་ནད་ཧོན་གྱི་གནོད་པ་ཞི་གྱུར་ཅིག །ཐུགས་རྗེ་ཆེན་པོའི་ཡང་སྤྲུལ་སད་ན་ལེགས། །སྤྲུལ་པའི་ཆ་ཤེས་ཆགས་མེད་ཡིན་པ་རུ། །ལུང་བསྟན་བདེན་ན་དེ་ཡི་བདེན་སྟོབས་ཀྱིས། །བསྲུང་བྱའི་ནོར་ཕྱུགས་ཧོན་གྱིས་མི་ཚུགས་ཤོག །ལོཙྪཅོག་རོ་ཀླུ་ཡི་རྒྱལ་མཚན་གྱིས། །སྤྲུལ་པའི་ཆ་ཤེས་ཆགས་མེད་ཡིན་ནོ་ཞེས། །བསམ་ཡས་གཏེར་ཁའི་ཤོག་སེར་ལས་བྱུང་བས། །
བདེན་ན་དེ་ཡི་བདེན་པས་བསྲུང་བྱ་ཡིས། །ནོར་ཕྱུགས་ཧོན་གྱི་གནོད་པས་མི་ཚུགས་ཤོག །བོད་རྗེའི་གདུང་དང་མཁའ་སྤྱོད་པ་ཡི་གདུང་། །རིགས་རྒྱུད་ཟཆགས་མེད་ཡིན་པར་རློམ་པ་དེ། །བདེན་ན་དེ་ཡི་བདེན་པས་བསྲུང་བྱ་ཡིས། །ནོར་ཕྱུགས་རྣམས་ལ་ཧོན་གྱིས་མི་ཚུགས་ཤོག །གང་གི་སྤྲོས་བྲལ་ཕྱག་རྒྱ་ཆེན་པོའི་དོན། །མ་ནོར་མངོན་སུམ་རྟོགས་པར་རློམ་པ་དང་། །སྡོམ་གསུམ་རྩ་བ་མ་ཉམས་སྐྱོན་མེད་པར། །སུམ་ལྡན་རྡོ་རྗེ་འཛིན་པ་ཡིན་ངེས་ན། །དེ་ཡི་བདེན་པས་ཧོན་གྱི་འཇིགས་བྲལ་ཤོག །སྡེ་དཔོན་སུམ་ཅུ་ལྷ་སྲིན་སྡེ་བརྒྱད་ཚོགས། །མགུར་ལྷ་བརྟན་མ་བོད་ཀྱི་དགེ་བསྙེན་རྣམས། །སློབ་དཔོན་པདྨའི་དམ་ལ་མི་འདའ་ན། །དེ་ཡི་བདེན་པས་ཧོན་ནད་གནོད་པ་ཟློག །འཕགས་པ་བཞི་དང་འཇིག་རྟེན་སྐྱོང་བ་དང་། །བདེན་ལྡན་ཇི་སྙེད་བདེན་པའི་ནུས་མཐུ་ཡིས། །བསྲུང་བྱའི་ནོར་ཕྱུགས་ཧོན་གྱིས་མི་ཚུགས་ཤོག །ནོར་ཕྱུགས་གོད་ཁ་མེད་ཅིང་འཕེལ་གྱུར་ཅིག །ཏདྱཐཱ་པཉྩ་དྲི་ཡ་ཨ་བ་བྷོ་དྷ་ན་ཡེ་སྭཱ་ཧཱ། ཞེས་པ་འདི་ནི་ཉལ་ཁ་བདེན་སྟོབས་ཀྱི་སྨོན་ལམ་འགའ་རེ་བཏབ་ནུབ་རྨི་ལམ་དུ་ཕྱག་ན་རྡོ་རྗེས་སངས་རྒྱས་ཐམས་ཅད་ལ། ཅི་བསམ་
འགྲུབ་པའི་གདམས་ངག་གནོང་ཞུས་པས། ཁྱེད་རང་སྨོན་ལམ་ཐོབ་དང་འགྲུབ་གསུངས་ཞེས། གནམ་རྒྱུད་འདྲ་བའི་སྒྲ་ཞིག་གྲགས་པ་ལ། བརྟེན་ནས་ཕྱིར་ནུབ་རྟེན་འབྲེལ་བྱས་ནས་བྲིས། །ཨ་རཱ་གས་སོ།། ༄༅། །ན་མོ་ཨརྱ་ཏཱ་རེ་ཡེ། པོ་ཊ་ལ་བཞུགས་སྤྱན་མྱུར་མ། །སྒྲོལ་མ་ཉི་ཤུ་རྩ་གཅིག་ལ། །གསོལ་བ་འདེབས་སོ་ཕྱག་མྱུར་བརྐྱང་། །བདག་དང་བདག་ལ་ལྟོས་པ་རྣམས། །རིམས་ནད་དྲག་པོའི་འཚེ་བ་ཟློག །ལྷོ་ཕྱོགས་སངས་རྒྱས་ཞིང་ཁམས་ནས། །ཡིད་བཞིན་འཁོར་ལོ་སྤྱན་རས་གཟིགས། །སེམས་དཔའ་བྱེ་བ་ཕྲག་དང་བཅས། །གློག་བཞིན་མྱུར་བར་འདིར་གཤེགས་ལ། །བདག་དང་བདག་ལ་ལྟོས་པ་རྣམས། །རིམས་ནད་འཚེ་བ་མྱུར་དུ་ཟློག །རྔ་ཡབ་སྤྲུལ་པའི་གནས་མཆོག་ནས། །མཐུ་སྟོབས་རྨད་བྱུང་ཨོ་རྒྱན་རྗེ། །རྗེ་འབངས་རིག་འཛིན་རྒྱ་མཚོ་ལ། །གསོལ་བ་འདེབས་སོ་ཐུགས་རྗེས་གཟིགས། །བདག་དང་བདག་ལ་ལྟོས་པ་རྣམས། །ནད་རིམས་དུས་མིན་འཆི་བའི་རྐྱེན། །ད་ལྟ་ཉིད་དུ་བཟློག་ཏུ་གསོལ། །མུ་ལེ་མཐིང་གི་མཚོ་འགྲམ་ནས། །དཔལ་ལྡན་ལྷ་མོ་དཔོན་གཡོག་ལ། །གསོལ་བ་འདེབས་སོ་ཐུགས་དམ་བསྐུལ། །ཁྱེད་མཆོད་
རིག་སྔགས་བཟླས་ལགས་ན། །དམ་ཚིག་སོམ་ལ་རིམས་ནད་དང་། །དལ་ཡམས་རྐྱེན་ཁ་བཟློག་ཏུ་གསོལ། །ཁྱད་པར་རིག་པ་ཤིང་ལོ་ཅན། །དུར་ཁྲོད་གནས་པའི་ཤ་ཟ་མ། །ཁྱོད་ཀྱི་རིག་སྔགས་བདག་འཆང་གི །དལ་ཡམས་རྐྱེན་ཁ་ད་ལྟ་ཟློག །བདག་གིས་གསོལ་བཏབ་བདེན་པའི་མཐུས། །མངོན་ཤེས་དྲུག་དང་རྡོ་རྗེ་ཡི། །སྤྱན་དང་སྙན་མངའ་ཁྱོད་ལགས་པས། །དོན་གྱི་འབྲས་བུ་མཆིས་པར་མཛོད། །ཅེས་པ་རང་གི་སློབ་བུ་བརྩོན་འགྲུས་རྒྱ་མཚོ་སོགས་ལ་རིམས་ནད་ཀྱི་འཚེ་བ་ཆེན་པོའི་སྐབས་སུ་༧ རཱ་ག་ཨ་སྱས་སྦྱར། སརྦ་མངྒ་ལཾ། །བཀྲ་ཤིས་དཔལ་འབར་འཛམ་གླིང་རྒྱན། རྒྱལ་ཁམས་ཀུན་ལ་དར་ཞིང་རྒྱས་པར་ཤོག །བཀྲ་ཤིས་ཤོག །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།