བྱང་ཆུབ་ལམ་གྱི་གེགས་སེལ་མདོར་བསྡུས་པ།
བྱང་ཆུབ་ལམ་གྱི་གེགས་སེལ་མདོར་བསྡུས་པ་བཞུགས་སོ།
ན་མོ་ལོ་ཀི་ཤྭ་ར་ཡེ། བླ་མ་ཡི་དམ་དབྱེར་མེད་པའི། །སྤྱན་རས་གཟིགས་ལ་གསོལ་བ་འདེབས། །ཉམས་རྟོགས་སྐྱེ་བར་བྱིན་གྱིས་རློབས། །རེ་ས་གཞན་མེད་ཐུགས་རྗེས་གཟིགས། །གནས་པོ་ཚེ་དབང་འབུམ་ཞེས་པས། །གེགས་སེལ་བསྐྱལ་ཞེས་གསུངས་པའི་ལན། །གསར་རྙིང་མདོ་རྒྱུད་བསྟན་བཅོས་ཀུན། །གེགས་སེལ་ཁོ་ན་མ་ལགས་སམ། །དལ་འབྱོར་མི་ལུས་ཐོབ་ན་ཡང་། །དམ་པའི་ཆོས་ལ་བློ་མི་འགྲོ། །དུག་གསུམ་མི་དགེ་ཅི་ནུས་འབད། །སྨྱོན་པ་ཆུ་ལ་མཆོང་བ་འདྲ། །ངན་སོང་གཏན་ཡུལ་བྱེད་པའི་གེགས། །གེགས་འདིས་
བསླུས་པ་ཤིན་ཏུ་མང་། །དེ་ལ་གེགས་སེལ་གདམས་ངག་ནི། །ཡིད་བཞིན་ནོར་བུ་རིན་ཆེན་ལས། །མི་ལུས་རྙེད་པར་དཀའ་ཚུལ་བསམ། །ད་རེས་ཆོས་ཤིག་མ་ནུས་ན། །རིན་ཆེན་གླིང་ནས་སྟོང་ལོག་ངེས། །སྙིང་མེད་མདོ་མེད་ཡིན་པར་སོམས། །ཚེ་འདིའི་དགྲ་གཉེན་སྐྱིད་སྡུག་སོགས། །གལ་ཆེ་བསྲན་ཚུགས་མི་གདའ་ཡང་། །རྨི་ལམ་ཙམ་ཞིག་ཡིན་པར་སོམས། །དགེ་སྡིག་གཉིས་པོ་མ་གཏོགས་པ། །དགྲ་དང་གཉེན་དང་ལོངས་སྤྱོད་ནོར། །དར་གུད་གཏམ་གྱི་བཟང་ངན་སོགས། །གཅིག་ཀྱང་རྗེས་སུ་མི་འབྲང་བར། །རང་ཉིད་
གཅིག་པུར་འགྲོ་བ་སོམས། །སྔོན་ཚེ་བསྐལ་པ་དུ་མ་ནས། །སངས་རྒྱས་གྲངས་མེད་བྱོན་གྱུར་ཀྱང་། །བྱང་བལྟས་ཕུག་པར་ཉི་མ་བཞིན། །རང་ལ་ཕན་པར་མ་གྱུར་ན། འཁོར་བར་འཁྱམས་ལ་སྐྱོ་བ་སྐྱེ། །ད་རེས་བསྟན་དང་བླ་མ་མཇལ། །དབང་ཁྲིད་གདམས་པ་ཐོབ་དུས་འདིར། །ལམ་སྣ་ཟིན་ཙམ་མ་བྱས་ན། །འཁོར་བ་དོན་མེད་ཡིན་པར་སོམས། །དེ་ལྟར་ཡང་ཡང་བསམ་བྱས་པས། །བློ་སེམས་ཆོས་ལ་ཤུགས་ཀྱིས་ཚུད། །ལམ་སྣ་ཟིན་པའི་བོགས་སྐྱེད་འོང་། །དེ་ལྟར་ཆོས་ལ་བློ་སོང་ཡང་། །དམན་རྣམས་ཟས་གོས་ཚོལ་ཕྱིར་གཡེང་། །འབྲིང་རྣམས་སོ་ནམ་འཚོ་སྐྱོང་གཡེང་། །མི་ཆེན་དགྲ་འདུལ་གཉེན་སྐྱོང་གཡེང་། །ད་རེས་གལ་ཆེན་འདི་བསྒྲུབ་ནས། །རྗེས་སོར་ཁོམ་དུས་ཆོས་བྱེད་བསམ། །བྱ་བཞག་ཆུ་ཡི་གཉེར་མ་བཞིན། །གཅིག་རྒྱབ་གཅིག་འབྱུང་དལ་དུས་མེད། །བྱེད་བསམ་ངང་ལ་མི་ཚེ་ཟད། །ཆོས་འདོད་ཉམས་ལེན་ཤེས་ན་ཡང་། །འགྲུབ་དུས་མེད་པའི་གེགས་ཆེན་ཡིན། །དེ་ལ་མི་རྟག་འཆི་བ་སྒོམས། །ཤི་བའི་མི་ཚོ་རྩིས་བགྲང་ཐོངས། །རང་བས་གཞོན་པ་དེ་ཙམ་ཤི །རྒས་གཞོན་ངེས་པ་མི་གདའ་
ན། །རྒྱལ་པོ་བློན་པོ་མི་ཆེན་རྣམས། །སྨན་དང་རིམ་གྲོས་མ་ཕན་འདས། །འཆི་བ་བཟློག་ཐབས་མི་གདའ་ན། །སྙིགས་མ་ལྔ་ཡི་དུས་ཚོད་འདིར། །ཚེ་ཐུང་ནད་མང་བར་ཆད་རྒོད། །གློ་བུར་ཧུར་ཐུམ་ཤི་བ་མང་། །སང་ཕོད་ཕྱི་མ་གང་སྔ་ཨང་། །ཟླ་བ་རྒྱབ་མ་ཚེ་ཕྱི་མ། །གང་སྔ་ཐག་ཆོད་ང་ལ་མེད། །དེ་ཕྱིར་བྱ་བ་གཞན་རྣམས་ལས། །དམ་ཆོས་ཉམས་ལེན་གལ་ཆེར་བྱ། །ཚེ་འདི་བློས་བཏང་མ་ནུས་ཀྱང་། །དམ་ཆོས་ཉམས་ལེན་གཙོ་བོ་ལ། །ཚེ་འདི་ཞོར་ལ་བསྒྲུབ་ཙམ་མཛོད། །དེ་བྱས་འཕྲལ་དུ་ཤི་ན་ཡང་། །འགྱོད་མེད་བློ་བདེའི་བོགས་སྐྱེད་འོང་། །རྒྱུ་འབྲས་དམ་ཆོས་མ་ཐོས་པས། །ཕན་ཡོན་ཉེས་དམིགས་མ་ཤེས་གྱུར་ན། །སྡིག་སྤང་དགེ་སྒྲུབ་མི་བྱེད་པ། །བསམ་མེད་བྱིས་པ་མེར་མཆོང་འདྲ། །ཕན་ཡོན་ཉེས་དམིགས་ཤེས་བཞིན་དུ། །སྡིག་ལ་མི་འཛེམ་འཆོལ་ཉོག་སྤྱོད། །ཤེས་བཞིན་བཙན་དུག་ཟ་བ་འདྲ། །དེ་འདྲ་བཤགས་ཀྱང་དག་པར་དཀའ། །མནར་མེད་དམྱལ་བར་སྲེག་པའི་གེགས། །དེ་ལ་མདོ་སྡེ་མཛངས་བླུན་སོགས། །རྒྱུ་འབྲས་ཆོས་ལ་ཡིད་ཆེས་བསྐྱེད། །ཕ་མ་མཉམ་པའི་བུ་
ལ་ཡང་། །ཚེ་ཡི་རིང་ཐུང་སྐྱིད་དང་སྡུག །མི་མཉམ་ལས་འབྲས་སོ་སོའི་རྟགས། །མི་ལུས་ཐོབ་པ་འདྲ་འདྲ་ལ། །དབང་སྟོབས་མངའ་ཐང་ཆེ་དང་ཆུང་། །མི་མཉམ་ལས་འབྲས་བལྟས་པས་གསལ། །སྐྱེ་བ་འདི་དང་ཚེ་རབས་ཀུན། །ཕན་ངེས་གཉེན་ནི་དགེ་བ་ཆོས། །གནོད་ངེས་དགྲ་ནི་མི་དགེའི་སྡིག །དེ་ཕྱིར་སྡིག་སྤངས་དགེ་ལ་འབད། །ངན་སོང་སྤོང་བའི་བོགས་སྐྱེད་འབྱུང་། །དེ་ལྟར་སྡིག་སྤང་དགེ་བསྒྲུབས་ཀྱང་། །ཕྱི་མ་ལྷ་དང་མི་རྣམས་ཀྱི། །བདེ་སྐྱིད་འདོད་ཕྱིར་ཡིན་ན་ནི། །སྐྱེ་བ་བརྒྱ་སྟོང་ཁྲི་འབུམ་དུ། །འདོད་བཞིན་བདེ་སྐྱིད་འབྱུང་ན་ཡང་། །དེ་ནས་དགེ་རྩ་དེ་ཟད་ནས། །སླར་ཡང་ངན་སོང་མཐའ་མེད་འཁྱམས། །ཐར་པ་མི་ཐོབ་གེགས་ཆེན་ཡིན། །སྔར་ཡང་གེགས་འདིས་བསླུས་པས་ལན། །འཇིག་རྟེན་འདི་ཡི་བདེ་སྐྱིད་མཆོག །ཚངས་པ་བརྒྱ་བྱིན་འཁོར་ལོས་སྒྱུར། །དེ་ཡང་ནམ་ཞིག་ལྟུང་དགོས་ན། །འཁོར་བར་སྙིང་པོ་ག་ལ་ཡོད། །འཕྲལ་དུ་གནས་སྐབས་བདེ་སྐྱིད་ཀྱང་། །དུག་དང་འདྲེས་པའི་ཟས་ཞིམ་ལྟར། །ཕུགས་སུ་ཕན་ལས་གནོད་པ་ཆེ། །དེ་ཕྱིར་སྡིག་སྤངས་དགེ་བ་བསྒྲུབ། །འཁོར་
བའི་བདེ་སྐྱིད་འདོད་པ་སྤང་། །བཙོན་དོང་ནང་གི་བཙོན་བཞིན་དུ། །སྐྱེ་རྒས་ན་འཆི་བྱེ་བ་དུང་། །འདི་ལ་སྐྱག་པས་འཁོར་བ་ནས། །ནམ་ཐར་བསམ་པ་ཡིད་ལ་འཆང་། །ཐར་པ་ཐོབ་པའི་བོགས་སྐྱེད་འབྱུང་། །དེ་ལྟར་ཐར་པ་སྒྲུབ་པོ་ཡང་། །སྙིང་རྗེ་སེམས་བསྐྱེད་མི་ལྡན་པར། །རང་དོན་ཁོ་ན་ལ་དམིགས་ན། །ཉན་རང་དགྲ་བཅོམ་ཐོབ་ནས་ཀྱང་། །འཁོར་བའི་སྡུག་བསྔལ་སྤངས་ལགས་ཀྱང་། །རྫོགས་པའི་སངས་རྒྱས་མི་ཐོབ་པས། །ཐེག་དམན་ལམ་གོལ་གེགས་ཆེན་ཡིན། །དེ་ལ་བྱམས་དང་སྙིང་རྗེ་བསྐྱེད། །རང་གི་ཕ་མ་མ་བྱས་པའི། །སེམས་ཅན་གཅིག་ཀྱང་ཡོད་པ་མིན། །དེ་དག་ཐམས་ཅད་འཁོར་བ་ཡི། །སྡུག་བསྔལ་རྒྱ་མཚོར་བྱིང་བཞིན་དུ། །རང་ཉིད་ཐར་ཡང་དགོས་པ་ཆུང་། །དེ་ཡང་གནས་སྐབས་ལྷ་མི་ཡི། །བདེ་བར་བཀོད་ཀྱང་སླར་ཡང་ལྟུང་། །དེ་བས་སེམས་ཅན་ཐམས་ཅད་ཀུན། །བླ་མེད་རྫོགས་པའི་སངས་རྒྱས་སར། །བདག་ཉིད་ཁོ་ནས་བཀོད་པའི་ཕྱིར། །ཉམས་ལེན་དགེ་སྦྱོར་འབད་སྙམ་པའི། །བློ་སྟོབས་བསྐྱེད་ལ་སེམས་བསྐྱེད་སྒོམས། །ཐུབ་པས་གཞན་དོན་མཛད་པ་
དང་། །བྱིས་པས་རང་དོན་བྱས་པ་གཉིས། །གང་དེ་ལེགས་གདའ་གནད་དེ་སོམས། །དགེ་སྦྱོར་དགེ་རྩ་ཆེ་ཕྲ་ཀུན། །འགྲོ་ཀུན་སངས་རྒྱས་ཐོབ་ཕྱིར་བསྔོས། །ཅི་བྱས་བྱང་ཆུབ་ལམ་དུ་འགྲོ། །མཐར་འཚང་རྒྱ་བའི་བོགས་ཆེན་འབྱུང་། །དེ་ལྟར་སེམས་བསྐྱེད་ཆོས་བྱས་ཀྱང་། །བླ་མ་བཀའ་བརྒྱུད་རྣམ་ཐར་དང་། །ཕན་ཡོན་ཞིང་ཁམས་བཀོད་པ་དང་། །ངན་སོང་སྡུག་བསྔལ་ཡོད་ལུགས་དང་། །ཕན་ཡོན་ཉེས་དམིགས་ཅི་ཐོས་ཀྱང་། །བཤད་ཚོད་ཡིན་སྙམ་ངེས་ཤེས་མེད། དཀོན་མཆོག་བྱིན་རླབས་རྒྱང་རིང་ཞིང་། །ཆོས་བྱས་ཕན་ཡོན་ཆུང་བའི་གེགས། །ཉི་ཟླ་ཐང་ལ་ལྟུང་ཡང་སྲིད། །རླུང་ནི་ཞགས་པས་ཟིན་ཡང་སྲིད། །སངས་རྒྱས་བཀའ་ལ་བརྫུན་མི་སྲིད། །སྙམ་པའི་ངེས་ཤེས་དྲག་པོ་བསྐྱེད། །འདི་དང་ཕྱི་མ་བར་དོ་རུ། །ཅི་མཛད་དཀོན་མཆོག་ཁྱེད་ཤེས་སེམས། །གཟུངས་སྔགས་ལ་སོགས་ཕན་ཡོན་རྣམས། །ད་ལྟ་གསུངས་ལྟར་མ་བྱུང་བ། །རང་གི་རྣམ་སྨིན་སྒྲིབ་པས་བསྒྲིབས། །ལས་ཀྱི་རྣམ་སྨིན་མ་གཏོགས་གསུངས། །དེ་དོན་གོ་བས་ལོག་ལྟ་སྤོངས། །དཀོན་མཆོག་གསུམ་གྱི་བྱིན་རླབས་འཇུག །ཕན་ཡོན་འབྱུང་བའི་
བོགས་འབྱུང་ངོ་། །དེ་ལྟར་སེམས་བསྐྱེད་ཆོས་སྤྱོད་ཀྱང་། །བསྐལ་པ་གྲངས་མེད་གསུམ་གྱི་བར། །རྫོགས་པའི་སངས་རྒྱས་མི་ཐོབ་གེགས། །རང་ལུས་ལྷ་རུ་མ་ཤེས་ནས། །ཐ་མལ་རང་རྒྱུད་བཟུང་བས་ལེན། །ཕུང་པོ་ཁམས་དང་སྐྱེ་མཆེད་རྣམས། །ཡེ་ནས་ལྷ་ཡི་དཀྱིལ་འཁོར་དུ། །གསར་རྙིང་བླ་མེད་རྒྱུད་ཀུན་མཐུན། །དེ་ཕྱིར་རང་ལུས་སྤྱན་རས་གཟིགས། །གར་འདུག་གནས་དེ་གཞལ་ཡས་ཁང་། །སུ་འགྲོགས་དཔའ་བོ་མཁའ་འགྲོའི་འཁོར། །གདན་ནི་པདྨ་ཟླ་བ་སྟེ། །གོས་རྣམས་ལྷ་ཡི་ན་བཟའ་རྒྱན། །ཟས་རྣམས་ཚོགས་འཁོར་བདུད་རྩིར་བསྒོམ། །ཚེ་འདིའམ་ནི་བར་དོར་དང་། །སྐྱེ་བ་བདུན་ལས་མི་ཐོག་པར། །སངས་རྒྱས་ཐོབ་པའི་བོགས་འབྱུང་ངོ་། །དེ་ལྟར་མོས་པ་ཙམ་བྱས་ཀྱང་། །དོན་ལ་ཡིན་རྒྱུ་མེད་བསམ་ནས། །ངེས་ཤེས་སྐྱེ་བར་མི་ནུས་པ། །བྱིན་རླབས་རྟགས་མཚན་མི་འབྱུང་གེགས། །རང་ཉིད་ཡི་དམ་གང་ཡིན་པའི། །ངེས་ཤེས་ཨུ་ཚུགས་འདྲ་བ་སྒོམས། །རྟགས་མཚན་གསལ་བའི་བོགས་འབྱུང་ངོ་། །ལྷ་རྟགས་དངོས་ཉམས་རྨི་ལམ་དུ། །ཞལ་མཐོང་ལུང་བསྟན་དག་སྣང་ལ། །
མཆོག་ཡིན་སྙམ་ནས་རློམ་སེམས་ཆེ། །རང་མཐོང་རང་རྩིས་ཆེར་སྐྱེས་ན། །མཆོག་གི་དངོས་གྲུབ་མི་ཐོབ་གེགས། །མེ་བུས་རྟགས་ལ་དུ་བའི་དཔེ། །རྟགས་མཚན་དེ་ཙམ་ལས་འོང་ཡིན། །སྙམ་དུ་རློམ་སེམས་མི་བསྐྱེད་པར། །ངེས་ཤེས་བསྐྱེད་ལ་བསྙེན་སྒྲུབ་བྱ། །ལམ་དུ་འགྲོ་བའི་བོགས་འབྱུང་ངོ་། །སྔགས་བཟླས་བསྐྱེད་རིམ་གསལ་ན་ཡང་། །གདོས་བཅས་འདོག་སྐུ་འདྲར་བསྒོམས་པས། །ལྷ་དེ་འདྲ་བའི་འབྱུང་པོའི་རིགས། །ཡང་ན་གཟུགས་ཀྱི་ཁམས་ཀྱི་ལྷར། །སྐྱེ་ཞིང་སངས་རྒྱས་མི་ཐོབ་གེགས། །ལྷ་སྐུ་གསལ་ཡང་ངོ་བོ་སྟོང་། །སྣང་སྟོང་འཇའ་ཚོན་བཞིན་དུ་བསྒོམ། །ལུས་འདི་བོར་ནས་བར་དོ་རུ། །ལོངས་སྤྱོད་རྫོགས་སྐུའི་ཞིང་ཁམས་སུ། །སྐྱེས་ནས་བྱང་ཆུབ་མཆོག་ཐོབ་བོ། །དེ་ནི་བོགས་འདོན་ཆེན་པོ་གཅིག །ཁྲིད་ཞུས་གནས་འགྱུ་སྐྱོང་ཤེས་ནས། །ཡུན་རིང་མ་སྐྱུར་བསྲུངས་ན་ཡང་། །དང་པོའི་བྲོས་དེད་དེ་ག་ལས། །ཅི་ཡང་ཡར་སྐྱེད་མེད་པའི་གེགས། །མོས་གུས་དད་པ་ཆུང་བས་ལེན། །རང་ལ་དྲིན་ཐོབ་བླ་མ་དེ། །སངས་རྒྱས་སེམས་ཅན་སུ་ཡིན་འདྲ། །རང་སེམས་ངོ་བོ་སྤྲད་པ་དེ། །སངས་རྒྱས་ཀུན་བས་
བཀའ་དྲིན་ཆེ། །རྡོ་རྗེ་འཆང་དང་ཀུན་ཏུ་བཟང་། །སངས་རྒྱས་ཀུན་གྱི་ཆོས་སྐུ་དང་། །བླ་མ་དབྱེར་མེད་མོས་གུས་བསྐྱེད། །བླ་མ་སངས་རྒྱས་ཆོས་སྐུ་དེ། །རྡོ་རྗེ་འཆང་དང་སྣང་མཐའ་ཡས། །ཆོས་སྐུའི་སངས་རྒྱས་གཅིག་ཏུ་བསྒོམ། །དཀོན་མཆོག་བླ་མ་ཡི་དམ་ལྷ། །ཀུན་འདུས་བསྒོམ་ལ་གསོལ་བ་བཏབ། །གདུང་ཤུགས་མཆི་མ་ཕྱུང་བར་བྱ། །བླ་མ་འོད་ཞུ་རང་ལ་བསྟིམ། །དེ་འདྲ་ཐུན་གསུམ་ཐུན་བཞི་སོགས། །འབད་ནི་དབྱར་ཁའི་སོས་བཞིན་དུ། །ཉམས་རྟོགས་རང་རྡོལ་ཁོག་ནས་འཆར། །ཅི་ཡང་འཆར་བའི་བོགས་འབྱུང་ངོ་། །དེ་ལྟར་ཉམས་ལེན་བསྐྱངས་ཙམ་ན། །རིག་པ་འཕྲོ་རྒོད་འཚུབ་ཅིང་རྒྱུག །སྐྱོང་རྒྱུ་མི་རྙེད་ཡི་མུག་སྐྱེ། །ནན་གྱིས་བསྐྱངས་ན་བློ་མི་བདེ། །རྒན་མོས་ཕྱུགས་ལུག་འཚོས་པ་འདྲ། །དེ་ལ་རྒོད་པའི་གེགས་ཞེས་བྱ། །གནས་འགྱུ་གདམ་ག་བྱས་པས་ལེན། །འཁྱིལ་པའི་ཆུ་དང་རྦ་རླབས་ཆུ། །ཆུ་ཡིན་པ་ལ་ཁྱད་པར་མེད། །གནས་པའི་སེམས་དང་འགྱུ་བའི་སེམས། །སེམས་ཉིད་ཡིན་ལ་ཁྱད་པར་མེད། །སེམས་ཉིད་ཡེ་ནས་ཆོས་ཀྱི་སྐུ། །དེ་ལ་བཅོས་སླད་བྱས་ན་ཞེན། །
གནས་འདོད་མ་ཆེ་འགྱུ་དོགས་སྤོང་། །མ་ཡེངས་ཙམ་ལ་ལྷོད་ནས་སྐྱོངས། །གསལ་ཚེ་སྐྱུར་ལ་ཡང་ཡང་སྒོམས། །བློ་བདེ་སྐྱོང་སླའི་བོགས་ཤིག་འབྱུང་། །དེ་ལྟར་བསྐྱངས་བས་རེས་འགའ་ཞིག །བལྟས་ཀྱང་གསལ་དང་ངེས་ཤེས་མེད། །གནམ་ངོ་རྨུགས་ལྟར་ཐིབ་བེ་བ། །ཧྲིག་གེ་བྱས་ནས་བལྟས་ན་ཡང་། །རྣམ་རྟོག་འདི་ཡིན་ངོས་བཟུང་རྒྱུ། །མེད་པའི་བན་བུན་ཕྲ་ཞིབ་ལྡང་། །ཡུན་རིང་སྐྱོང་ཡང་མི་འདོད་པ། །བྱིང་བའི་སྐྱོན་ཏེ་གེགས་ཤིག་ཡིན། །དེ་ལ་ལྟ་སྟངས་ནམ་མཁར་གཏད། །སེམས་དང་ནམ་མཁའ་སྔོ་བསང་བསྲེ། །ལུས་སེམས་སྒྲིམས་ལ་ལུས་གནད་བསྲང་། །གསལ་དྭངས་རྗེན་པའི་བོགས་ཤིག་འབྱུང་། །ཏིང་འཛིན་གེགས་ལ་རྣམ་མང་ཡང་། །བྱིང་རྒོད་གཉིས་ལ་ཕལ་ཆེར་འདུས། །དེ་ལ་གེགས་སེལ་མང་ན་ཡང་། །དོན་ལ་བསྒྲིམ་ལྷོད་གཉིས་ཡིན་ཏེ། །རྒོད་ན་ལྷོད་ལ་བྱིང་ན་བསྒྲིམ། །ལ་ཆེན་གང་ཤར་ངོ་བོ་ལ། །གང་བྱུང་དེས་ཆོག་སྐྱོང་བ་མཆོག །བཟང་བཟང་པོ་གཅིག་མ་འདོད་ལ། །ངན་ངན་འདྲེ་ཡང་མི་སྐྱུར་བར། །ཡུགས་སས་དྭ་ཕྲུག་སྐྱོང་བ་ལྟར། །རྒྱུན་བསྲིང་བ་ནི་གནད་ཡིན་ནོ། །ལམ་ལུས་ཕོག་
པའི་གེགས་སེལ་ཡིན། །དེ་ལྟར་རྒྱུན་གཅིག་བསྲིངས་ནུས་ན། །བདེ་གསལ་མི་རྟོག་ཉམས་བཟང་འཆར། །ལུས་བདེ་སེམས་བདེ་སེམས་རྩ་སྐྱིད། །ང་ལས་སྐྱིད་པ་མེད་དོ་སྙམ། །འགྱུ་བ་ཉུང་ཞིང་མེར་རེ་གནས། །སྤྱོད་ལམ་ཕལ་ཆེར་འབྲལ་བ་མེད། །འོད་གསལ་འཁོར་ཡུག་ཡིན་ནམ་སྙམ། །ཉོན་མོངས་དུག་ལྔའི་མགོ་ཡང་ནོན། །འཇིག་རྟེན་བྱ་བས་དགོས་པ་མེད། །གཅིག་པུར་བྲག་ཕུག་འགྲིམ་ན་བསམ། །མཚན་མོ་རྨི་ལམ་ཕལ་ཆེར་ཟིན། །ཉམས་ལེན་འདི་དང་མ་བྲལ་ན། །འདི་ཕྱིའི་དོན་ཆེན་འགྲུབ་བོ་སྙམ། །དེ་ལ་ངེས་ཤེས་མཆོག་འཛིན་གྱི། །ངང་ནས་ཚེ་ཡི་དུས་བྱས་ན། །ཉམས་ལེན་ཆེ་ཆུང་རིམ་པ་ཡིས། །རྒྱལ་ཆེན་རིགས་བཞིའི་ལྷ་རྣམས་དང་། །སུམ་ཅུ་རྩ་གསུམ་མཐའ་བྲལ་དང་། །དགའ་ལྡན་འཕྲུལ་དགའ་གཞན་འཕྲུལ་གྱི། །ལྷ་ཡི་གནས་སུ་སྐྱེ་བ་ལེན། །བདེ་སྐྱིད་ལོངས་སྤྱོད་དཔག་མེད་ཀྱང་། །བྱང་ཆུབ་མི་ཐོབ་གེགས་ཡིན་ནོ། །དེ་ལ་བདེ་ཉམས་ཅི་སྐྱེས་ཀྱང་། །དེ་ལ་ཆགས་ཞེན་མཆོག་འཛིན་སྤང་། །བདེ་བ་དེ་ཡི་ངོ་བོ་ལ། །ཧྲིག་གེ་བལྟས་པས་བདེ་བ་དང་། །སྟོང་པ་དབྱེར་མེད་
ཟུང་དུ་འཇུག །བདེ་སྟོང་ཕྱག་རྒྱ་ཆེན་པོར་འཆར། །གོལ་ས་གཅོད་པའི་བོགས་འདོན་ཡིན། །དེ་ཉིད་བསྐྱངས་བས་དེ་མི་རྟག །རང་སེམས་གསལ་སྟོང་རྗེན་པར་འཆར། སྤྲིན་ཐག་ཆད་པའི་ནམ་མཁའ་ལྟར། །ལྷང་ངེ་རྗེན་ནེ་ས་ལེ་བ། །དྲན་པས་ནམ་ཟིན་དེ་ཡི་ངང་། །ཐེ་ཚོམ་མེད་པའི་ངེས་ཤེས་སྐྱེ། །འདི་བས་ལྷག་པའི་ཉམས་རྟོགས་ནི། །གྲུབ་ཐོབ་རྣམས་ལའང་མེད་དམ་སྙམ། །གཉིད་དང་རྨི་ལམ་མཚམས་ཤེད་ན། །ཉི་ཟེར་ཟླ་ཐིག་མེ་རུ་ནི། །འདྲ་བའི་འོད་ཅིག་རྐྱེན་བྱས་ནས། །ཉམས་ལེན་ཉིན་པར་བཞིན་དུ་ཟིན། །གཉིད་བཞིན་ཁང་པའི་ནང་དང་ནི། །ས་ཐག་རིང་དང་ལ་གྲིབ་ཀྱིས། །ཅི་གདའ་ཅི་བྱེད་རེས་འགའ་མཐོང་། །སུ་ཡིན་ཟེར་ཡང་ང་ཡི་འདི། །རྟོགས་པ་མཆོག་གྱུར་ཡིན་ནོ་སེམས། །དེ་ལ་ཆགས་ཞེན་ཆེན་པོ་དང་། །ངེས་ཤེས་བརྟན་པོས་ཚེ་འཕོས་ན། །ཚངས་རིས་ཚངས་པ་མདུན་ན་འདོན། །དགེ་ཆུང་ཚད་མེད་དགེ་ལ་སོགས། །ཉམས་ལེན་དེ་ཡི་ཆེ་ཆུང་གིས། །གཟུགས་ཁམས་གནས་རིགས་བཅུ་བདུན་གྱི། །ལྷ་ཡི་གནས་སུ་སྐྱེས་ནས་ཀྱང་། །རིན་པོ་ཆེ་ཡི་གཞལ་ཡས་སུ། །མཚན་དཔེས་ལྡན་པའི་
ལུས་ཐོབ་ནས། །རེ་ཞིག་ལོ་གྲངས་དཔག་མེད་དུ། །བདེ་སྐྱིད་སངས་རྒྱས་ཞིང་འདྲ་ཡང་། །སླར་ཡང་ངན་སོང་ལྟུང་བའི་གེགས། །དེ་ལྟར་གསལ་ཉམས་ཆེ་དྲག་པས། །ཟག་བཅས་མངོན་ཤེས་ཤར་འདྲ་ཡང་། །དེ་ལ་མཆོག་འཛིན་ང་རྒྱལ་སྤང་། །གསལ་བ་དེ་ཡི་ངོ་བོ་ལ། །བལྟས་པས་ངོ་བོ་སྟོང་པར་རྟོགས། །གསལ་སྟོང་དབྱེར་མེད་གཅིག་ཏུ་འདྲེས། །གསལ་སྟོང་ཕྱག་རྒྱ་ཆེན་པོར་འཆར། །བླ་མེད་མཆོག་ཐོབ་བོགས་ཤིག་འདོན། །དེ་ཉིད་བསྐྱངས་བས་ནམ་ཞིག་ན། །བདེ་ཉམས་གསལ་ཉམས་གཉིས་ཀ་མེད། །ཐམས་ཅད་སྟོང་པ་ཉིད་དུ་མཐོང་། །ལུས་ཀྱང་དངོས་སུ་མེད་དམ་སྙམ། །ཕྱི་ནང་སྣོད་བཅུད་འཁོར་འདས་རྣམས། །ཐམས་ཅད་སྟོང་པ་ནམ་མཁའ་འདྲ། །སྙམ་པའི་རྟོག་པ་སྐྱེས་ཙམ་ན། །ཐམས་ཅད་སྟོང་པ་ཉིད་དུ་གདའ། །དགེ་སྡིག་ཕན་གནོད་ག་ལ་ཡོད། །སྙམ་ནས་སྡིག་ལ་མི་འཛེམས་ཤིང་། །དགེ་བ་སྒྲུབ་པར་མི་བྱེད་ན། །སྟོང་ལྟ་ཧད་པོ་བདུད་ཀྱི་ལས། །སྟོང་པ་ཉིད་ལ་ལྟ་ཉེས་པས། །ཤེས་རབ་དམན་རྣམས་ཕུང་གསུངས་ལྟར། །མནར་མེད་གནས་སུ་ལྟུང་བའི་གེགས། །རྟོགས་པ་
ཅི་ཙམ་མཐོ་ན་ཡང་། །རྒྱུ་འབྲས་ལགས་ལེན་ཞིབ་ཏུ་བརྩི། །དཔེར་ན་ནམ་མཁའ་སྟོང་པ་ལས། །རླན་དང་ཚ་གྲང་རྟེན་འབྲེལ་གྱིས། །འཇའ་དང་སྤྲིན་དང་ཆར་པ་དང་། ཐོག་དང་སེར་བ་འོང་བ་ལྟར། །ཆོས་ཀུན་སྟོང་པ་ཉིད་ཡིན་ཀྱང་། །རྒྱུ་འབྲས་རྟེན་འབྲེལ་མི་བསླུ་བས། །རིགས་དྲུག་སྐྱིད་སྡུག་སྣ་ཚོགས་འབྱུང་། །ཤེས་རབ་སྟོང་ཉིད་བསྒོམ་པ་ཡི། །འཁོར་བ་སྤངས་ནས་ཆོས་སྐུ་ཐོབ། །ཚོགས་བསགས་སྙིང་རྗེ་བསྒོམས་པ་ཡིས། །ལོངས་སྐུ་སྤྲུལ་སྐུ་ཐོབ་པ་སྟེ། །ཤེས་རབ་སྟོང་ཉིད་ཐབས་ནི་ཚོགས། །ཚོགས་གཉིས་ཟུང་འཇུག་ཉམས་སུ་བླང་། །སྐུ་གཉིས་ཐོབ་པའི་བོགས་འདོན་ཆེ། །དེ་ལྟར་ཚོགས་གཉིས་འབད་པའི་ཚེ། །ཐམས་ཅད་སེམས་རེད་བསམ་པ་དང་། །སེམས་ནི་ནམ་མཁའ་དང་འདྲ་བསམ། །སེམས་ནི་ཡོད་མེད་གཉིས་ཀ་མིན། །ཡོད་མིན་མེད་མིན་རེད་བསམ་དང་། །སེམས་ནི་ཅི་ཡང་མི་གདའ་བསམ། །དེ་འདྲ་རེས་འགའ་སྐྱེས་ཀྱང་བཟོད། །དེ་འདྲ་ཡིན་ལ་ཁ་ཡོད་ཀྱང་། །དེ་འདྲ་ཡིན་ནོ་བསམ་པ་ཡི། །ངེས་ཤེས་འཛིན་པ་དམ་པོའི་ངང་། །གལ་ཏེ་ཚེ་འདིར་འཕོས་ན་ནི། །གཟུགས་མེད་སྐྱེ་མཆེད་མུ་
བཞིར་གོལ། །བསྐལ་པ་ཁྲི་ཕྲག་བརྒྱད་ཀྱི་བར། །བཟང་ངན་ལུས་ནི་ལེན་རྒྱུ་མེད། །དྲན་མེད་བརྒྱལ་བ་འདྲ་ཞིག་འབྱུང་། །སླར་ཡང་ལུས་ལེན་འཁོར་བར་འཁྱམས། །དེ་འདྲའི་ཏིང་འཛིན་བརྟན་པོ་ནི། །སྐྱེས་པ་ཕྱི་རོལ་མུ་སྟེགས་ལུགས། །ཆོས་སྐུ་ཐོབ་པར་འདོད་པ་རེ། །དེ་འདྲའི་རྟོགས་པ་སྐྱེས་ན་ཡང་། །ཐམས་ཅད་སེམས་རེད་བསམ་མཁན་སོགས། །འཛིན་པ་དེ་ག་རང་ལ་ལྟོས། །འཛིན་པ་དེ་དག་རང་སར་དག །སྟོང་ཉིད་ཕྱག་རྒྱ་ཆེན་པོར་འཆར། །དེ་ནི་བོགས་འདོན་ཡང་དག་གོ ། དེ་ལྟར་བདེ་གསལ་མི་རྟོག་ཉམས། །བྱིང་རྒོད་ལ་སོགས་དེ་རྣམས་ལ། །གོ་རིམ་ངེས་པ་མེད་པ་སྟེ། །སྔ་འཆར་ཕྱི་འཆར་ཅི་ཡང་འབྱུང་། །འཆར་བའི་སྐོར་རྫོགས་མང་དུ་འོང་། །ཡུན་ཡང་ལོ་མང་ཟླ་གྲངས་དང་། །ཞག་འགའ་དང་ནི་ཡུད་རེ་ཙམ། །ངེས་མེད་མི་ཡི་རིགས་ཡིན་ནོ། །མི་འཆར་བ་ནི་མི་འབྱུང་སྟེ། །སྐས་ཐེམ་བཞིན་དུ་བརྒྱུད་དགོས་སོ། །རེས་འགའ་ཞེ་སྡང་འདོད་ཆགས་དང་། །ཕྲག་དོག་སེར་སྣ་སྔར་ལས་ཆེ། །ཚིག་རྩུབ་རྒྱུད་གྱོང་མི་རྣམས་ཀྱང་། །སྒོམ་ཆེན་ཟེར་ཞིང་མཚངས་ནས་འབྲུ། །རྩུབ་
ཉམས་སྡིག་སྒྲིབ་སློང་བའི་གེགས། །བླ་མ་རྗེ་ལ་གསོལ་བ་འདེབས། །ལུས་སེམས་ལྷོད་དེ་ཀློད་ལ་བསྐྱང་། །དེ་ཉིད་ཤིན་ཏུ་བོགས་ཆེའོ། །མཚང་འབྲུ་ཚིག་ངན་ལ་སོགས་པའི། །ཆེད་དུ་དེ་ལ་དམིགས་གཏད་བྱས། །ངོ་བོ་བལྟས་པས་སྟོང་པར་རྟོགས། །དེ་ལྟར་ཆུང་བ་ནས་བརྩམ་སྟེ། །གནད་ཆེན་ལ་ཡང་རིམ་པར་བསླབ། །རྣམ་རྟོག་ངན་པ་གང་སྐྱེས་ལ། །དང་པོ་རྗེས་སླེབ་བྱ་བ་ཅེས། །དེ་ནས་སྐྱེས་ཐོག་འབུར་འཇོམས་དང་། །དེ་ནས་རང་གྲོལ་ཆུ་རླབས་ལྟར། །རང་སེམས་འདུལ་བ་འདུལ་བའི་མཆོག །ཉོན་མོངས་འཇོམས་པའི་བོགས་འདོན་ཡིན། །ཉོན་མོངས་རྣམ་རྟོག་དགྲ་ཡིན་པས། །ངོ་བོ་བསྐྱངས་པས་འཇོམས་སྙམ་ན། །གཉེན་པོ་ཤོར་བའི་གེགས་ཡིན་ཏེ། །གསང་སྔགས་དོན་དང་མི་ཐུན་གེགས། །ཉོན་མོངས་དང་ནི་རྣམ་རྟོག་ཀུན། །ཡེ་ནས་ཡེ་ཤེས་ཆེན་པོ་སྟེ། །མ་རྟོགས་འཁོར་བར་འཁྱམས་པ་ཡིན། །ཉོན་མོངས་སྤང་བའི་ཕ་རོལ་ན། །ཡེ་ཤེས་བཙལ་དུ་མ་མཆིས་ཀྱང་། །དེ་རྗེས་འབྲངས་ན་འཁོར་བར་འཁྱམས།། །སྤངས་ནས་བསམ་པ་བསྒྱུར་ཐུབ་ཀྱང་། །ཐེག་དམན་ཡིན་གྱིས་ཕྱག་རྫོགས་མིན། །ཉོན་མོངས་
རྣམ་རྟོག་དགེ་མི་དགེ །གང་ཤར་ཁྱད་མེད་རང་ངོ་ལྟ། །བཟོ་བཅོས་མེད་པར་དེ་གར་ཀློད། །ཆུ་རླབས་ཆུ་རུ་གྲོལ་བ་ལྟར། །ཉོན་མོངས་ཡེ་ཤེས་ཆེན་པོར་འཆར། །གང་ཤར་སྤང་བླང་མ་དགོས་པར། །བསྒོམ་དུ་འཆར་བའི་བོགས་འདོན་ཡིན། །མངོན་རྟོགས་ལ་སོགས་བསྒོམ་པའི་དུས། །སྭ་བྷཱ་ཝ་སོགས་སྔགས་བརྗོད་ནས། །སྟོང་པ་ཉིད་དུ་གྱུར་བརྗོད་དུས། །ཅི་ཡང་མེད་པའི་སྟོང་པ་ཉིད། །ནམ་མཁའ་ལྟ་བུར་གྱུར་བསྒོམ་པ། །སྟོང་ཉིད་དངོས་སུ་མ་རྟོགས་པར། །བློས་བཟོ་རྒྱས་འདེབས་ཤོར་བའི་གེགས། །བློ་ཡིས་སྟོང་པ་མི་བཟོ་བར། །རང་སེམས་སྟོང་པའི་ངོ་བོ་ལྟ། །མངོན་སུམ་རྟོགས་པའི་བོགས་འདོན་ཡིན། །མདོ་རྒྱུད་གྲུབ་ཐོབ་གསུངས་མང་པོ། །མཐོང་བས་ཆོས་ཀུན་སྟོང་པ་ཉིད། །ནམ་མཁའ་ལྟ་བུ་ཡིན་རྒྱུ་རེད། །བསམ་པའི་གོ་བ་སྐམ་པོ་ལ། །ངེས་ཤེས་སྐྱེ་ནས་སྟོང་སྐད་འདོན། །དབུལ་པོས་ཕྱུག་པོའི་ལོ་རྒྱུས་ཚོ། །གོ་ཡང་ཕན་པ་མེད་དང་འདྲ། །དེ་ཕྱིར་གོ་བ་ཆེ་ན་ཡང་། །རྟོགས་པ་མཐོ་བར་མི་རློམ་པར། །རང་སེམས་སྟེང་དུ་རྡོ་རུས་གཏུགས། །ཉམས་སུ་མྱོང་བའི་བོགས་འདོན་ཡིན། །དེ་
ལྟར་བྱིང་རྒོད་སྐྱོན་གཉིས་བསལ། །བདེ་དང་གསལ་དང་མི་རྟོག་པའི། །ཉམས་བཟང་རྣམས་ལ་མ་ཆགས་ཤིང་། །སེམས་སློང་རྩུབ་འཁྲུགས་མགོ་ནོན་ནས། །ཤོར་ས་གསུམ་དེར་མ་ཤོར་བར། །རྒྱུན་བསྲིང་ཉམས་སུ་བླང་ནུས་ན། །ནམ་ཞིག་བསོད་ནམས་དགེ་སྦྱོར་མཐུས། །བླ་མའི་བྱིན་རླབས་སེམས་ལ་འཇུག །བལྟ་རྒྱུ་ལྟ་མཁན་གཅིག་ཏུ་འདྲེས། །འདི་བསྒོམ་གཏད་སོ་གཅིག་ཀྱང་མེད། །འདི་ཡིན་འདི་མིན་འཛིན་པ་ཞིག །བདེ་གསལ་མི་རྟོག་ཉམས་བཟང་པོ། །ལེགས་ལེགས་འདྲ་ཚོ་ཤུན་པར་བུད། །ང་ཡི་སྒོམ་དེ་བོར་རམ་ཅི། །འདི་བསྒོམ་གཏད་སོ་མི་འདུག་པས། །སྒོམ་མེད་ཨམ་དེ་ཨུ་ཡིན་ཨང་། །འདི་ཆ་དེ་ཆ་མེད་པ་འདི། །གོལ་ས་གཅིག་ནི་ཨུ་ཡིན་ནམ། །སྙམ་ནས་རང་ལ་ཡིད་མི་ཆེས། །ཐ་མལ་ཤེས་པ་རྗེན་པར་བུད། །རང་སེམས་ངོ་བོ་མཐོང་བ་དེ། །ཕྱག་རྒྱ་ཆེན་པོའི་སྣེ་ཁེ་ཡིན། །སྤྲོས་བྲལ་ནམ་དྲན་དུས་ཉིད་ལ། །འཕེལ་འགྲིབ་ཆེན་པོ་མེད་ན་ཡང་། །བརྗེད་སྐབས་ཡེངས་སྐབས་འཁྲུལ་པར་འཆོར། །དྲན་རྫི་ཡང་ཡང་གསལ་འདེབས་གཅེས། །འདི་ནས་རྟོགས་ལྡན་མིང་བཏགས་རུང་། །རྣམ་གཡེང་
གནས་དང་གཅིག་པུ་གཉིས། །ཨེ་མཉམ་བོགས་སུ་ཅི་ཐོན་ལྟ། །བོགས་འདོན་བླ་མའི་གསོལ་འདེབས་དང་། །སྤྲོས་བཅས་དགེ་སྦྱོར་ཉུང་བཅུག་ལ། །ངོ་བོ་ཉིད་ལ་ཨུ་ཚུགས་བསྐྱེད། །སྤྱོད་ལམ་རྣམས་དང་ཨེ་འདྲེས་ཚད། །འདི་ནས་འདྲེས་ན་འདྲེས་ངེས་ཡིན། །བྷེ་རྒྱུ་ཅི་ཡང་མི་གདའ་བས། །བསྒྱུར་ནས་བཞག་པས་འཐུས་གདའ་བསམ། །སྤྲོས་བྲལ་མེད་པའི་སྟོང་རྗེས་ཁྱེར། །འཁྲུལ་པར་འབྱམས་པའི་གེགས་ཤིག་ཡིན། །དྲན་པས་ཡང་ཡང་གསལ་འདེབས་བྱ། །དྲན་ནས་སྒོམ་ཡིན་དྲན་པས་ཆོག །མི་དྲན་ཐ་མལ་འཁྲུལ་པ་རང་། །ཡང་ཡང་དྲན་པ་བོགས་སུ་ཆེ། །རང་སེམས་སྟེང་དུ་བཞག་པའི་ཚེ། །གཟུགས་སྒྲ་དྲི་རོ་ལ་སོགས་པ། །མཐོང་ཐོས་ཚོར་བ་མ་བཀག་ཀྱང་། །ཡིན་མིན་བླང་དོར་འཛིན་པ་མེད། །ནང་དུ་འདི་བསྒོམ་གཏད་སོ་མེད། །མ་བཅོས་རྗེན་པར་ཕྱམ་མེ་བ། །གང་ཟག་བདག་མེད་ཅེས་བྱ་སྟེ། །ཉམས་ལེན་བཟང་པོ་ཡིན་མོད་ཀྱང་། །ཆོས་ཀྱི་བདག་མེད་མ་རྟོགས་པས། །ད་རུང་སྟོང་ཉིད་ཕྱེད་པོ་ཡིན། །ཕྱི་རོལ་རི་དང་ཁང་ཁྱིམ་དང་། །སྐྱེས་པ་བུད་མེད་ལ་སོགས་ལ། །རིག་པ་
གཏད་ནས་བསྒོམ་ཙམ་ན། །འདི་ཕན་གཟུགས་དང་འདི་ཚུན་སེམས། །ཕྱེ་རྒྱུ་མེད་པར་དབྱེར་མེད་དུ། །ཉམས་ལེན་དེ་དང་ངོ་བོ་གཅིག །དེ་བཞིན་སྣང་སྲིད་འཁོར་འདས་ཀུན། །རང་གི་སེམས་དང་དབྱེར་མེད་ཅིང་། །རང་སེམས་ཡེ་ནས་སྟོང་པ་ཉིད། །སྟོང་དང་མི་སྟོང་འཛིན་པ་བྲལ། །ཕྱི་རོལ་ཡུལ་སྣང་སྣ་ཚོགས་ལ། །ཆུ་ནང་ཟླ་བའི་གཟུགས་བརྙན་ལྟར། །གསལ་ཡང་ངོ་བོ་སྟོང་པར་མཐོང་། །དེ་ཡང་བསྲེ་སོགས་མི་དགོས་པར། །རང་ཤར་རྒྱུན་དུ་བྱུང་བ་ན། །ཉམས་ཀྱི་རོ་གཅིག་ཅེས་བྱ་སྟེ། །ཆོས་ཀྱི་བདག་མེད་རྟོགས་པ་ཡིན། །དེ་ནས་སྟོང་ཉིད་ཆ་ཚང་ངོ་། །སྣང་སྲིད་འཁོར་འདས་ཆོས་ཀུན་ལ། །ཐམས་ཅད་སྟོང་ཉིད་རྩི་ཡིས་ཟིན། །གང་བྱས་ཅི་བྱས་སྒྲིབ་མི་ནུས། །སྙམ་ཞིང་སྤྱོད་པ་རྩིང་ཤོར་ནས། །མི་རྒྱུ་གྱོང་ཞིང་རྩབ་རྩུབ་མང་། །སྐབས་སུ་ཡེངས་སྐབས་བརྗེད་སྐབས་ཆེ། །འཇིག་རྟེན་བྱ་བར་རུ་ང་ཆེ། །རོ་གཅིག་འདྲེས་པའི་རྦ་ལ་གཡེང་། །ལན་གཅིག་ངན་སོང་ལྟུང་དོགས་གདའ། །དེ་ལ་སྤྱོད་པ་ཞིབ་ཏུ་བྱ། །ད་རུང་གསོལ་འདེབས་དྲག་ཏུ་གདབ། །འདི་སྐབས་གཉན་ས་འགའ་རེ་འགྲིམ། །ཆོ་
འཕྲུལ་སེམས་དང་བསྲེ་ཞིང་བསྒོམ། །སྙིང་རྗེ་སེམས་བསྐྱེད་དྲག་ཏུ་བསྒོམ། །དུས་གསུམ་རྒྱལ་བའི་ཐུགས་རྒྱུད་དང་། །འགྲོ་དྲུག་སེམས་ཅན་སེམས་རྒྱུད་གཉིས། །དབྱེར་མེད་ངོ་བོ་གཅིག་ཏུ་རྟོགས། །སེམས་དང་ནམ་མཁའ་ཆོས་ཀྱི་དབྱིངས། །དབྱེར་མེད་ཆེ་ཆུང་མེད་པར་རྟོགས། །སྣོད་བཅུད་འཁོར་འདས་ཐམས་ཅད་ཀུན། །ལན་ཚྭ་ཆུ་རུ་ཐིམ་པ་ལྟར། །རང་སེམས་ངང་དུ་དབྱེར་མེད་འདྲེས། །ད་རུང་བརྗེད་སྐབས་ཡེངས་སྐབས་ཡོད། །ཡེངས་དང་མ་ཡེངས་བརྗེད་མ་བརྗེད། །དབྱེར་མེད་བཟང་ངན་མེད་པ་རུ། །ངོ་བོ་འགྱུར་མེད་ཀློང་དུ་རྟོགས། །དེ་ག་ཙམ་ཞིག་བྱུང་བ་ན། །མི་ལུས་ཐོབ་པ་དོན་དང་ལྡན། །ནམ་ཞིག་འཆི་བའི་དུས་ན་ཡང་། །བདེ་བ་ཅན་ནམ་རྔ་ཡབ་གླིང་། །སྨོན་ལམ་རྩེ་གཅིག་གར་བཏབ་དེར། །འགྲོ་བར་ཐེ་ཚོམ་མི་དགོས་པར། །དེ་ཙམ་ཨེ་འོང་བརྩོན་འགྲུས་མཛོད། །གཞན་ཡང་བོགས་འདོན་གེགས་སེལ་ནི། །རྟོགས་པའི་གདེང་ཡང་ཐོབ་དཀའ་བས། །ནམ་འཆི་མི་ཤེས་འཆི་བའི་དུས། །བར་དོ་མི་ཆོད་པ་ཡི་གེགས། །འཇིགས་རུང་གེགས་ཆེན་དེ་སེལ་ཐབས། །རྒྱུད་སྡེ་འབུམ་ཕྲག་
དྲུག་ཅུའི་དོན། །དགའ་རབ་ཤྲཱི་སེང་པདྨ་འབྱུང་། །བི་མ་མི་ཏྲ་ལ་སོགས་པ། །རིག་འཛིན་རྗེ་འབངས་ཐུགས་ཀྱི་བཅུད། །བསྒོམ་ནི་མི་དགོས་བལྟས་པས་གྲོལ། །རྫོགས་ཆེན་ཐོད་རྒལ་ཉམས་སུ་ལོངས། །འཇའ་འོད་ཐིག་ལེ་ཐིག་ཕྲན་དང་། །རང་སེམས་ངོ་བོ་བསྲེས་ལ་ལྟོས། །གསལ་སྟོང་དབྱེར་མེད་མངོན་སུམ་མཐོང་། །གལ་ཏེ་སེམས་ངོ་མི་ཤེས་ཀྱང་། །དེ་ལ་བལྟས་པས་བར་དོ་ཆོད། །འདི་ལས་ཟབ་དང་སླ་བའི་ཆོས་མེད་དོ། །ཐེག་པ་དགུ་ཡི་ཡང་རྩེ་ཡིན། །འཇའ་འོད་ཐིག་ལེ་ཐིག་ཕྲན་རྣམས། །དངོས་སུ་གསལ་པོར་ཡིད་ཆེས་མཐོང་། །རྩེ་གཅིག་བྷོ་དང་ངོ་མཉམ་སྟེ། །ཆོས་ཉིད་མངོན་སུམ་མཐོང་བ་ཡིན། །འོད་ལྔ་ཡེ་ཤེས་ལྔ་ཡི་འོད། །འོད་སྐོར་དབྱིངས་ཀྱི་སྒྲོན་མ་སྟེ། །ཐིག་ཕྲན་རིག་པ་ལུ་གུ་རྒྱུད། །དེ་དག་ཇེ་ཆེ་ཇེར་ཆེར་འཕེལ། །ཉམས་སྣང་གོང་དུ་འཕེལ་བ་ཡིན། །སྤྲོས་བྲལ་བསྒོམ་དང་ངོ་མཉམ་ཡིན། །ཐིག་ལེའི་ནང་དུ་ལྷ་སྐུ་མཇལ། བར་དོར་ཞི་ཁྲོའི་ལྷ་འཆར་ཚེ། །ངོས་ཟིན་དག་པའི་ཞིང་དུ་སྐྱེ། །ད་ལྟར་ཞི་ཁྲོའི་ལྷ་ཡོངས་རྫོགས། །ཤར་ནས་བར་དོ་བགྲོད་མི་དགོས། །ཕྱི་དབུགས་ཆད་པ་དེ་མ་ཐག་
ནམ་མཁའི་དཀྱིལ་ནས་འོད་ཀྱི་ལམ། །མིག་གི་དཀྱིལ་དུ་ཟུག་ནས་འོང་། །དེ་ཡི་རྒྱུད་ནས་རྣམ་ཤེས་འཕོ། །རྡོ་རྗེ་སེམས་དཔའི་ཐུགས་ཀར་ཐིམ། །རྫོགས་ཆེན་ཉེ་ལམ་ངོ་མཚར་ཆེ། །དེ་ལས་ཟབ་དང་སླ་བའི་ཆོས། །འཇིག་རྟེན་གང་དུའང་མེད་པར་གསུངས། །ཨོ་རྒྱན་པདྨའི་ཟབ་ཁྱད་ཡིན། །རྒྱུན་དུ་དགེ་སྦྱོར་གང་བྱེད་ཀྱང་། །སེམས་ཅན་ཀུན་གྱི་དོན་གྱི་ཕྱིར། །འདི་ནས་ཚེ་འཕོས་གྱུར་མ་ཐག །བདེ་བ་ཅན་གྱི་ཞིང་ཁམས་སུ། །སྐྱེ་བའི་བསྔོ་བ་སྨོན་ལམ་མཛོད། །སྐྱེའམ་མི་སྐྱེ་ཐེ་ཚོམ་སྤོངས། །སྐྱེ་བར་ཐེ་ཚོམ་མི་དགོས་དང་། །འོད་དཔག་མེད་ཀྱི་སྨོན་ལམ་སྟོབས། །ཡིན་པས་བློ་གཏད་དེ་ལ་མཛོད། །དེ་ལྟར་གེགས་སེལ་བོགས་འདོན་རྣམས། །འཕྲལ་དུ་ཡིད་ལ་གང་ཤར་ཙམ། །ཆོ་འཕྲུལ་ཟླ་བའི་གནམ་གང་གི །ཉི་ཤར་ནས་བཟུང་དགོང་ཆེན་བར། །རྫོགས་པར་བྲིས་པའི་དགེ་བ་དེས། །གནས་པའི་ཉམས་རྟོགས་འཕེལ་བ་དང་། །འདི་ཉིད་སུ་ཡིས་མཐོང་ཐོས་རྣམས། །བྱང་ཆུབ་སྒྲུབ་ལ་གེགས་མེད་ཅིང་། །ཉམས་རྟོགས་དབྱར་གྱི་ཆུ་བོ་བཞིན། །རབ་ཏུ་འཕེལ་ཞིང་རྒྱས་ནས་ཀྱང་། །ཚེ་གཅིག་ལུས་
གཅིག་འདི་ཉིད་ལ། །ཕྱག་རྒྱ་ཆེན་པོ་འགྲུབ་པར་ཤོག །དེ་སྐད་རཱ་ག་ཨ་སྱས་སྨྲས། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།