ལོ་འོར་ལ་གདམས་པ་མགུར་ཚན་གསུམ།
ན་མོ་གུ་རུ་ལོ་ཀེ་ཤྭ་ར་ཡེ། བླ་མ་ཡི་དམ་དབྱེར་མེད་པའི། །ཐུགས་རྗེའི་གཏེར་ལ་ཕྱག་འཚལ་ལོ། །དད་པ་དང་ལྡན་པའི་ལོ་འོར་གྱིས། །སེམས་ལ་ཕན་པ་གཅིག་དགོས་ཟེར་བ། །སེམས་ལ་གང་ཤར་གཅིག་འཕྲལ་དུ་བརྗོད། །བསྐལ་པ་ནི་བྱེ་བ་བརྒྱ་སྟོང་ལ། །སངས་རྒྱས་ནི་འབྱོན་པ་ད་རེས་ཙམ། །ད་རེས་ནི་བསྐལ་པ་བཟང་པོར་སྐྱེས། །ངན་སོང་ནི་ས་ཆེན་རྡུལ་གྲངས་ཙམ། །མི་ལུས་ནི་སེན་མོའི་རྡུལ་ཙམ་ཡིན། །ད་རེས་ནི་མི་ལུས་རིན་ཆེན་ཐོབ། །ལུས་འཕགས་དང་བ་ལང་སྒྲ་མི་སྙན། །གླིང་གསུམ་དུ་སྐྱེས་ཀྱང་ཆོས་མི་དར། །ད་རེས་ནི་འཛམ་བུའི་གླིང་འདིར་སྐྱེས། །མཐའ་འཁོབ་ནི་བརྒྱ་དང་ཡང་འཁོབ་སྟོང་། །དེ་དག་ཏུ་ཆོས་ཀྱི་བསྐལ་པ་མེད། །ད་རེས་ནི་ཁ་བ་ཅན་འདིར་སྐྱེས། །སངས་རྒྱས་ཀྱི་བསྟན་པ་གནས་ཡུན་ཐུང་། །བསྟན་པ་ནི་ནུབ་ན་དམ་ཆོས་མེད། །ད་རེས་ནི་ཐུབ་བསྟན་དར་དུས་སྐྱེས། །འོན་པ་དང་ལྐུགས་པ་སྨྱོན་པ་ལ། །དམ་ཆོས་དར་ཀྱང་ཆོས་སྐལ་མེད། །ད་རེས་ནི་དབང་པོ་སྒོ་ལྔ་ཚང་། །འདི་འདྲ་ནི་ཡང་ཡང་འཛོམ་དཀའ་བས། །ད་རེས་དམ་ཆོས་ཤིག་བསྒྲུབས་ན་ལེགས། །ད་
རེས་དམ་ཆོས་ཤིག་མ་བསྒྲུབས་ན། །རང་གི་རང་ཉིད་བསླུ་ཚབས་ཆེ། །ཆོས་བྱེད་བསམ་ཅིག་ཡོད་པས་མི་ཕན་ཏེ། །ལོ་ཟླ་འདི་སོང་བཞིན་འཆི་ལ་ཉེ། །མི་ཚེ་ནི་ཟད་པ་མི་ཚོར་རོ། །ཟས་གོས་ནི་ཟད་སྙམ་སེར་སྣ་སྐྱེ། །ཚེ་ཟད་ནས་འཆི་བ་ཡང་རེ་རེ་ཅེས། །ནད་རིགས་དང་གདོན་རིགས་འདི་རླུང་ལྟར་འཚུབ། །ཚེ་སྲོག་འདི་རླུང་གསེབ་མར་མེ་འདྲ། །ངེས་པར་འཆི་བདག་ཁོ་སླེབ་ཙ་ན། །མགོ་དཔོན་དང་ཕ་སྡེས་ཀྱང་ཁེབ་ས་མེད། །གཏམ་ལས་དང་ཟས་ནོར་གྱིས་བསླུ་ཐབས་མེད། །རིམ་གྲོ་སྨན་དཔྱད་བྱས་བཞིན་ཐུ། །ཉེ་དུ་དང་མཐུན་གྲོགས་ཀྱིས་མཐའ་བསྐོར་ཡང་། །སྲོག་ཆད་པའི་སྡུག་བསྔལ་བགོ་ཐབས་མེད། །ལུས་ནི་སྡུག་བསྔལ་བཟོད་མེད་ཀྱི་ཟུག་གཟེར་ལྡང་། །སེམས་ནི་འཁྲུལ་སྣང་གི་འཇིགས་སྐྲག་ཆེ། །བེམ་རྒོག་ཀྱང་སྐྱུར་ནས་འགྲོ་དགོས་ན། །ཉེ་དུ་དང་ཟས་ནོར་སྨོས་ཅི་དགོས། །རྣམ་ཤེས་ནི་བྱ་སྒྲོ་རླུང་ཁྱེར་བཞིན། །ཆ་མེད་ཀྱི་ཡུལ་དུ་རྒྱུས་མེད་འཁྱམས། །དགེ་སྡིག་ནི་ལུས་དང་གྲིབ་བཞིན་འཁོར། །གཤིན་རྗེའི་ཁྲིམས་ར་ཡ་རེ་ང་། །ལས་ཀྱི་མེ་ལོང་མདོག་རེ་གསལ། །གསང་སྒྲིབ་དང་རྫུན་ཞུས་དེར་མི་
ཚུད། །དགེ་བ་ནི་འདོད་ཀྱང་ཚོལ་ཁོངས་མེད། །སྡིག་པ་ལ་འགྱོད་ཀྱང་དེ་ནས་འཕྱིས། །དམྱལ་བའི་མེ་ལྕེ་ཚ་ངར་ཆེ། །གཤིན་རྗེའི་ལས་མཁན་སྙིང་རྗེ་མེད། །དེ་འདྲ་སོམ་ལ་དམ་ཆོས་མཛོད། །ཅེས་པ་བློ་སེམས་ཆོས་ལ་འཇུག་པའི་ཀླུའོ།། ༈ །།ན་མོ་གུ་རུ། ཁྱེད་ལོ་འོར་དམ་ཆོས་མཛད་དགོངས་ན། །ལྷ་དཀོན་མཆོག་གསུམ་ལ་སྐྱབས་སུ་སོང་། །ཁྱེད་ལུས་ལ་སྙིང་པོ་ལེན་འདོད་ན། །དུས་ཉ་མཚམས་བསྙེན་གནས་གཙང་མ་སྲུངས། །ཁྱེད་ལུས་ཀྱི་སྒྲིབ་པ་དག་འདོད་ན། །དུས་རྒྱུན་དུ་བརྒྱ་ཕྱག་ཆག་མེད་མཛོད། །ཁྱེད་ངག་གི་སྒྲིབ་པ་དག་འདོད་ན། །དུས་རྒྱུན་དུ་ཡི་གེ་དྲུག་པ་ཐོན། །ཁྱེད་སེམས་ལ་འཁྲུལ་པ་མེད་འདོད་ན། །སེམས་སྨྱོ་བའི་སྨྱོ་ཆུ་ཆང་འདི་སྤོངས། །ཁྱེད་བླ་མའི་བྱིན་རླབས་འཇུག་འདོད་ན། །སེམས་དད་པ་བརྟན་པོས་གསོལ་བ་ཐོབ། །ཁྱེད་དག་སྣང་ཕྱོགས་མེད་སྦྱོང་འདོད་ན། །གོས་སེར་མོ་ཀུན་ལ་དད་པ་བསྐྱེད། །ཁྱེད་དམྱལ་བའི་སྡུག་བསྔལ་སྤང་འདོད་ན། །ལས་སྲོག་གཅོད་སྤོངས་ལ་གནོད་སེམས་སྐྱུར། །ཁྱེད་ཡི་དྭགས་སྡུག་བསྔལ་སྤང་འདོད་ན། །ལས་རྐུ་འཕྲོག་སྤོངས་
ལ་རློམ་སེམས་སྐྱར། །ཁྱེད་དུད་འགྲོའི་སྡུག་བསྔལ་སྤང་འདོད་ན། །ངག་ཚིག་ངན་སྤོངས་ལ་སྐུར་འདེབས་སྒྱུར། །ཁྱེད་ལྷ་མའི་སྡུག་བསྔལ་སྤང་འདོད་ན། །ལས་འཛིང་རྩོད་སྤོངས་ལ་དབྱེན་ཚིག་སྒྱུར། །ཁྱེད་ལྷ་ལུས་མི་ལུས་ཐོབ་འདོད་ན། །ལས་དགེ་བ་བཅུ་པོ་ཅི་འགྲུབ་གྱིས། །ཁྱེད་མཐར་ཐུག་སངས་རྒྱས་ཐོབ་འདོད་ན། །ཆོས་ཅི་བྱེད་འགྲོ་དྲུག་སྤྱི་ལ་བསྔོས། །ཁྱེད་རང་སེམས་ཆོས་སྐུར་རྟོགས་འདོད་ན། །སེམས་མ་བཅོས་རང་སེམས་ངོ་བོ་ལྟོས། །ཁྱེད་འཇའ་ལུས་ལོངས་སྐུ་ཐོབ་འདོད་ན། །ལུས་སྣང་སྟོང་ཐུགས་རྗེ་ཆེན་པོར་བསྒོམ། །ཁྱེད་སྤྲུལ་སྐུས་འགྲོ་དོན་བསྒྲུབ་འདོད་ན། །མ་འགྲོ་དྲུག་དོན་དུ་སྨོན་ལམ་ཐོབ། །དེ་སྤྲང་པོ་ང་ཡི་སྙིང་གཏམ་ཡིན། །ཁྱེད་ལོ་འོར་ཐུགས་ལ་དེ་ལྟར་ཞོག །ཅེས་ཉམས་སུ་ལེན་ཚུལ་གོ་བདེ་བའི་གླུའོ།། ༈ །།ན་མོ་མ་ཧཱ་མུ་དྲ་ཡེ། ལོ་འོར་རྣམས་ཉམས་ལེན་སྐྱོང་འདོད་ན། །མ་ཡེངས་རང་གི་སེམས་ལ་ལྟོས། །བལྟས་པས་མི་མཐོང་ངང་ལ་ཞོག །འཕྲོ་ན་འཕྲོ་མཁན་ངོ་བོར་ལྟོས། །རང་སར་ཞི་ཚེ་ངང་ལ་ཞོག །གསལ་ན་གསལ་བའི་ངོ་བོར་ལྟོས། །མ་ཡེངས་ས་ལེ་སེང་ངེ་ཞོག །གནས་ན་གནས་
པའི་ངོ་བོར་ལྟོས། །ཧྲིག་གེ་རྗེན་ནེ་ཡེ་རེ་ཞོག །དུག་ལྔ་ཤར་དུས་ངོ་བོར་ལྟོས། །རང་གྲོལ་ཡེ་ཤེས་ངང་ལ་ཞོག །འཚུབ་ན་རང་སེམས་ཀློད་ལ་ལྟོས། །གར་འགྲོ་ཐོངས་ལ་རྒྱང་སོ་ཚུགས། །བྱིང་རྨུག་འཐིབ་ན་བསྒྲིམ་ལ་ལྟོས། །བྱིང་རྨུག་རང་གསལ་ངང་ལ་ཞོག །ལྟ་བ་བཤད་ལུགས་མང་ན་ཡང་། །རང་ངོ་བལྟ་བ་ལྟ་བའི་མཆོག །སྒོམ་པ་བཤད་ལུགས་མང་ན་ཡང་། །ཡེངས་མེད་དྲན་པ་སྒོམ་པའི་མཆོག །སྤྱོད་པ་བཤད་ལུགས་མང་ན་ཡང་། །དགེ་སྒྲུབ་སྡིག་སྤང་སྤྱོད་པའི་མཆོག །འབྲས་བུ་བཤད་ལུགས་མང་ན་ཡང་། །ཆོས་སྐུ་མངོན་གྱུར་འབྲས་བུའི་མཆོག །བོགས་འདོན་རྣམ་གྲངས་མང་ན་ཡང་། །མོས་གུས་གསོལ་འདེབས་བོགས་འདོན་མཆོག །གེགས་སེལ་རྣམ་གྲངས་མང་ན་ཡང་། །སྡིག་པ་འཛེམ་པ་གེགས་སེལ་མཆོག །མན་ངག་གདམས་པ་མང་ན་ཡང་། །བརྩོན་འགྲུས་སྒོམ་སྲན་མན་ངག་མཆོག །སྒྲུབ་གནས་རྣམ་གྲངས་མང་ན་ཡང་། །གར་འདུག་དགེ་སྒྲུབ་སྒྲུབ་གནས་མཆོག །འོ་ན་དད་ལྡན་ལོ་འོར་ཁྱོད། །འཆི་དུས་འགྱོད་མེད་ད་རེས་རན། །ཉམས་ལེན་འབྲལ་མེད་ཨེ་ཡོང་ལྟོས། །
ཞེས་པ་སེམས་ལ་ཕན་ཕྱིར་འཕྲལ་དུ་དགེ་སློང་ཨ་རཱ་གས་སྣོན་ཟླ་བའི་ཡར་ཚེས་དགུ་ལ་སྨྲས་པའོ།།