ཕར་ཕྱིན་དྲུག་སྙན་ངག་དང་སྦྱར་བའི་ཉམས་མགུར།
ཕར་ཕྱིན་དྲུག་སྙན་ངག་དང་སྦྱར་བའི་ཉམས་མགུར་བཞུགས་སོ།
བསོད་ནམས་དགེ་ཚོགས་ལས་བྱུང་བའི་དཔལ་འབྱོར་ལོངས་སྤྱོད། །ད་ལྟ་རང་དབང་ཡོད་དུས་ཡར་མཆོད་མར་སྦྱིན་ཞིག་གྱིས་དང་། །དགྲ་འདྲེ་མཐའ་དམག་གིས་ཁྱེར་དུས་འགྱོད་ཀྱང་ནི་འཕྱིས་པ་གདའ་བས། །གྲོགས་སུ་དགེ་སེམས་ཞིག་བསྐྱེད་མཛོད་འབྱོར་ལྡན་གྱི་ཡོན་བདག །ཡངས་པའི་པད་ཚལ་དུ་རྒྱུ་བའི་སྟག་ཆུང་གི་བུང་བ། །རྩི་བཅུད་ཀྱིས་ཚང་མང་ཁེངས་དུས་བུང་བ་ཀུན་ཚིམ་པར་ཟོ་དང་། །དབང་མེད་མི་ཡིས་ཁྱེར་དུས་དར་དིར་འབང་མདུང་གིས་མི་ཕན། །གྲོགས་སུ་གསོག་འཇོག་སྐྱུང་མཛོད་པད་ཚལ་གྱི་གླུ་མཁན། ཤཱཀ་ཐུབ་
བསྟན་པ་ལ་ཞུགས་པའི་རབ་བྱུང་གི་བཙུན་ཆུང་། །ད་ལྟ་གཙང་མར་ཡོད་དུས་ཚུལ་ཁྲིམས་ཤིག་བསྲུང་དང་། །བག་མེད་དུ་འཁྱལ་ནས་ངན་སོང་དུ་ལྟུང་ཚབས་ཆེ་ཉན་ཡོད་པས། །གྲོགས་སུ་བག་ཡོད་དྲན་ཤེས་བརྟེན་མཛོད་ཁྲིམས་ལྡན་གྱི་བནྡྷེ། །སྤང་ལྗོངས་མཐོན་མཐིང་ལས་འཁྲུངས་པའི་འདབ་རྒྱས་ཀྱི་པདྨ། །ད་ལྟ་བཀྲག་མདངས་ཟིལ་མངར་ལྡན་དུས་དཀོན་མཆོག་ཅིག་མཆོད་དང་། །དུས་ཀྱི་བ་མོས་བསིལ་ངད་ལྡང་དུས་རང་དབང་མི་འདུག་པས། །གྲོགས་སུ་མཆོད་པ་སྔུན་མཛོད་བུང་བ་ཡི་གཉེན་གཅིག །རྒྱལ་ཁྲིམས་ཆོས་ཁྲིམས་ལ་བསྟེན་
པའི་དབུ་ནག་གི་མི་ཚོ། །དོན་མེད་ཚིག་རྩོད་འདྲ་བྱུང་དུས་བཟོད་པ་རེ་སྒོམ་དང་། །འཐབ་འཁྲུག་ནི་སྨས་ལ་ཐུག་ན་གཉིས་ཕུང་དུ་འགྲོ་བས། །གྲོགས་སུ་གཤིས་འཇམ་བརྟེན་མཛོད་ཤེས་ལྡན་གྱི་མི་ཕོ། །སྲ་བརྟན་གོ་ཆའི་རྒྱལ་པོ་རྦ་ཕུབ་ནི་ལིང་ཆེན། །ཉག་ཕྲན་མདའ་མོ་བྱུང་དུས་རང་རྟགས་ཤིག་སྟོན་དང་། །སྐྱེས་བུ་ཤི་སྨས་ཤོར་ན་དགོས་པ་ནི་སྟོར་བས། །གྲོགས་སུ་བཟུར་ཤེས་བརྟེན་མཛོད་སྤྲིས་ཕུབ་ནི་སྒོར་མོ། །ནམ་འཆི་ཆ་མེད་དུ་ངེས་པའི་མི་ལུས་ནི་རིན་ཆེན། །ད་ལྟ་རང་དབང་ཡོད་དུས་དམ་ཆོས་ཤིག་གྱིས་དང་། །འཆི་བདག་གཤིན་རྗེས་ཟིན་ན་སྡོད་དབང་ནི་མེད་པས། །གྲོགས་སུ་བརྩོན་འགྲུས་བརྟེན་མཛོད་འཛམ་གླིང་གི་མི་སྡེ། །འདུར་འགྲོས་ལྔ་གསུམ་འཛོམ་པའི་ཅང་ཤེས་ཀྱི་རྟ་ཕོ། །སྲོག་གཅོད་དགྲ་ཡིས་དེད་དུས་དཀྱུས་ཐག་ཅིག་ཆོད་དང་། །སྔོ་མཉེན་ལྕགས་སུ་བཅུག་ན་རང་དབང་ནི་མེད་པས། །གྲོགས་སུ་རྩལ་ཆེན་བརྟེན་མཛོད་གྱི་ལིང་གི་རྟ་ཕོ། །ཉམས་དང་རྟོགས་པ་སྐྱེ་འདོད་ཁྲིད་ཕྲུག་ནི་གསར་པ། །རྣམ་གཡེང་སྤོངས་ལ་ལུས་གནད་སེམས་གནད་ལ་གཅུན་དང་། །ཞི་གནས་མེད་པར་ལྷག་མཐོང་སྐྱེས་ཀྱང་ཡོན་ཏན་ནི་ཆུང་
བས། །ཡེངས་མེད་བསམ་གཏན་སྒོམ་མཛོད་སྒོམ་ཆེན་གྱི་གསར་བུ། །རས་དཀའ་སྣུམ་གྱིས་སྦགས་པའི་སྣང་གསལ་གྱི་སྒྲོན་མེ། །ད་ལྟ་བཀྲག་མདངས་གསལ་དུས་རྟེན་གསུམ་ལ་མཆོད་དང་། །རླུང་ནག་འཚུབ་མ་འདྲ་ལྡང་ན་རང་དབང་ནི་མེད་པས། །གྲོགས་སུ་རླུང་ཡོལ་བརྟེན་མཛོད་ཞུན་མར་གྱི་དྷི་པཾ། །ཤེས་རབ་ཕར་ཕྱིན་རྟོགས་པའི་སྒོམ་ཆེན་ནི་རྙིང་པ། །ད་ལྟ་ལུས་སེམས་བདེ་དུས་རང་ཞལ་རེ་སྟོན་དང་། །ན་ཚ་ཟུག་གཟེར་གྱིས་མནར་དུས་རང་དབང་འདུ་བར་དཀའ་བས། །གྲོགས་སུ་ཡེངས་མེད་བརྟེན་མཛོད་རི་ཁྲོད་ཀྱི་སྒོམ་ཆེན། །སྤྲིན་དཀར་གསེབ་ནས་ཐོན་པའི་རྟ་བདུན་གྱི་རྒྱལ་པོ། །དགུང་སྔོན་དྭངས་པའི་ཚེ་ན་འོད་སྣང་རེ་འགྱེད་དང་། སྒྲ་གཅན་མུན་པས་ནུབ་ཚེ་རང་དབང་ནི་མེད་པས། །གྲོགས་སུ་རྟ་བདུན་བརྟེན་མཛོད་ནམ་མཁའི་ནོར་བུ། །ཞེས་ཕར་ཕྱིན་དྲུག་གི་གླུ་སྙན་ངག་དང་སྦྱར་བ་དགེ་སློང་ཨ་རཱ་གས་སོ།། ༈ །།ཡོན་བདག་དཔོན་རིགས་འགའ་ལ་གསུངས་པའི་བསྒྲུབ་པའི་དམ་བཅའི་མགུར་བཞུགས་སོ། །ན་མོ་ཨཱཿརྱ་པ་ལོ། དཔལ་ཐུགས་རྗེ་ཆེན་པོ་སྤྱན་རས་གཟིགས། །སྤྲང་མི་འབྲལ་སྙིང་ནས་གསོལ་བ་འདེབས། །
བདག་བསྒྲུབ་པའི་བར་ཆད་བསལ་དུ་གསོལ། །བདག་གྲོང་ཆོག་གི་འདྲེ་འདུལ་བྱས་ལགས་ཀྱང་། །འཕྲལ་ཁ་སྐྱིད་ཀྱི་ཞིམ་ལྟོ་མ་གཏོགས་པ། །བློ་གཞན་ཕན་གྱི་བྱང་སེམས་མ་འབྱོངས་པས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་འཕོ་འདེབས་དང་བདུན་ཚིགས་བྱས་ལགས་ཀྱང་། །འཕྲལ་འབུལ་ནོར་ཞིག་ཅི་རྙེད་མ་གཏོགས་པ། །བློ་མི་རྟག་དང་སྙིང་རྗེ་མི་སྐྱེ་བས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་དབང་བཀའ་རྗེས་གནང་བྱས་ལགས་ཀྱང་། །འཕྲལ་གྲིབ་ཀ་ཞིག་ཨེ་ཕན་མ་གཏོགས་པ། །རྗེས་དམ་ཚིག་སྲུང་མཁན་མི་གདའ་བས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་གང་བྱུང་གི་སློབ་མ་བསྟེན་ལགས་ཀྱང་། །འཕྲལ་ཟ་ཆོག་དང་ངན་སྔགས་འདོད་པ་བས། །བློ་ཆོས་དང་མཐུན་པ་མི་རྙེད་པས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་བླ་མའི་གདན་ས་བཟུང་ལགས་ཀྱང་། །འཕྲལ་ཆགས་སྡང་གི་འཁོར་ལོ་འཁོར་བ་བས། །ཕ་བཀའ་བརྒྱུད་ཀྱི་གདན་ས་མི་ཚུགས་པས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་དཀོར་ཇའི་འབུལ་
སྡུད་བྱས་ལགས་ཀྱང་། །འཕྲལ་དགྲ་རྐུན་གྱི་གཡབ་མོ་མ་གཏོགས་པ། །ཞིང་དག་པ་ལ་བརྒྱ་འབུལ་མི་ཁྱོག་པས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་ཆོས་ར་དང་ཁྲོམ་དབང་བྱས་ལགས་ཀྱང་། །འཕྲལ་སྒར་ཆུང་གི་ཁ་ཐོན་མ་གཏོགས་པ། །རྒྱུད་སྨིན་གྲོལ་གྱི་ནུས་པ་མི་ཐོབ་པས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་སུས་ཟེར་གྱི་སྐུ་ཕུད་བླངས་ལགས་ཀྱང་། །འཕྲལ་སྣང་ཤེས་ཀྱི་དཔོན་སློབ་མ་གཏོགས་པ། །ཕུགས་བསླབ་སྡོམ་བསྲུང་མཁན་དཀོན་པས་ན། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་སྡིག་སྤོང་གི་ཁས་ལེན་བྱས་ལགས་ཀྱང་། །འཕྲལ་ངོ་མ་ཆོག་པའི་ཚིག་སྐམ་པས། །ཕུགས་སྲོག་གཅོད་སྤོང་བ་དཀོན་དོ་བས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་དགེ་བའི་ཁས་ལེན་བྱས་ལགས་ཀྱང་། །འཕྲལ་ཁྲོམ་ནང་དུ་ཁ་འཕྱོར་མ་གཏོགས་པ། །དོན་ལག་ཏུ་ལེན་མཁན་དཀོན་པས་ན། །འཕྲུལ་བསྒྲུབ་པ་འདི་མཐའ་རུ་འདོན་ན་བསམ། །བདག་སེམས་བསྐྱེད་དང་བློ་སྦྱང་བཤད་ལགས་ཀྱང་། །འཕྲལ་བཤད་ལོ་དང་ཉན་ལོ་མ་
གཏོགས་པ། །བྱམས་སྙིང་རྗེ་བསྒོམ་མཁན་མི་འོང་བས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་བླ་མའི་རྣལ་འབྱོར་བཤད་ལགས་ཀྱང་། །འཕྲལ་གསོལ་རས་ཀྱི་ངོ་བསྟོད་མ་གཏོགས་པ། །སེམས་མོས་གུས་སྐྱེ་མཁན་མི་འོང་བས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །ཕྱག་ཆེན་དང་སེམས་ཁྲིད་བཤད་ལགས་ཀྱང་། །འཕྲལ་གོ་བརྫུའི་ཟོམ་ཟོམ་མ་གཏོགས་པ། །སེམས་རང་ངོ་འཕྲོད་པ་མི་འོང་བས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་རྫོགས་ཆེན་དང་ཐོས་གྲོལ་བཤད་ལགས་ཀྱང་། །འཕྲལ་སྤྱོད་པ་རྩིང་འདྲེ་མ་གཏོགས་པ། །ལམ་ཁྲེགས་ཆོད་བགྲོད་མཁན་མི་འོང་བས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་གཅོད་ཁྲིད་དང་གསང་སྤྱོད་བཤད་ལགས་ཀྱང་། །འཕྲལ་ཟ་ཕྱིར་དུ་ཐོབ་རྫོས་མ་གཏོགས་པ། །རྐྱེན་ལམ་དུ་སློང་མཁན་མི་འོང་བས། །འཕྲལ་བསྒྲུབ་པ་འདི་མཐའ་རུ་འདོན་ན་བསམ། །བདག་གྲྭ་མང་གི་མགོ་ཕུ་བྱས་ལགས་ཀྱང་། །འཕྲལ་སྣང་ཤེས་ཀྱི་འདུ་ཚོགས་མ་གཏོགས་པ། །ཕུགས་ཆོས་དང་མཐུན་པ་མི་འོང་བས། །འཕྲལ་བསྒྲུབ་པ་
འདི་མཐའ་རུ་འདོན་ན་བསམ། །རྗེ་བླ་མ་ཡི་དམ་མཁའ་འགྲོའི་ཚོགས། །བདག་བསམ་པ་འགྲུབ་པར་བྱིན་གྱིས་རློབས། །ཞེས་པ་འདི་ཡོན་བདག་དཔོན་རིགས་འགའ་ཕུག་སྒོ་ན་མཇལ་དུ་བྱུང་ནས་ཁྱེད་འདི་ལྟར་བཞུགས་པ་བས་ཁྲིད་ཆུང་རེ་བཙུགས་ན་ཕན་ཆེ་ཟེར་བར་སྨྲས་པའོ། །ཨ་རཱ་གས་སོ།། ༈ །།རྗེ་བཙུན་བླ་མ་རིན་པོ་ཆེ་ཀརྨ་རཱ་ག་ཨ་སྱས་བལ་པོའི་སྒོམ་ཆེན་ལ་གདམས་པ་རྣམ་ཐར་གྱི་ཚུལ་གྱིས་གསུངས་པའི་མགུར་བཞུགས་སོ།། ན་མོ་གུ་རུ། བསམ་ཆུང་བདག་གི་བསམ་ཚུལ་འབྲས་མེད་འགའ། །ཉེ་རིང་བུ་ལ་ཁ་ནས་གླེང་བར་སྤྲོ། །འགྲོ་དྲུག་ནང་ནས་དལ་འབྱོར་མི་ལུས་ཐོབ། །བླ་མར་བཟུང་དུ་རུང་བའི་སྲས་སུ་གྱུར། །དྲུག་ལ་ཡི་གེ་དགུ་ནས་བསྐྱེད་རིམ་བསྒོམ། །དབུལ་པོར་སྐྱེས་ཀྱང་སྐལ་པ་བཟང་ངོ་བསམ། །བཅུ་དགུའི་བར་དུ་ཕ་ཇོའི་ཆོས་ལུགས་བསྐྱངས། །བར་སྐབས་མཚམས་སྒྲུབ་སྐབས་འགར་རིག་གནས་སྦྱངས། །གྲོང་ནག་འགྲིམ་ཡང་གྲོང་པའི་ཆོས་མ་གོས། །ཆུང་ནས་རབ་བྱུང་གཙང་བཙུན་ཡིན་ནོ་བསམ། །ལོ་ཤས་གནས་རི་བསྐོར་ཞིང་གྲྭ་ས་འགྲིམ། །གྲྭ་སྐོར་མཁས་པའི་མིང་སྙན་མ་ཐོབ་ཀྱང་། །སློབ་གཉེར་ཡེངས་མེད་སྒྲིག་དང་
འགལ་མེད་བྱས། །གྲྭ་རྐྱང་ཆོས་མཐུན་ཉམ་ཆུང་ཡིན་ནོ་བསམ། །རིག་གནས་ཤེས་བྱ་གང་ལ་ཡང་འབྲེལ་པ་བཞག །ཤེས་རབ་ཆེ་ཞེས་ཀུན་གྱིས་ཡིད་སྨོན་བྱེད། །གཅིག་ལ་མཁས་མཐར་ཕྱིན་པ་མ་བྱུང་ཡང་། །བློ་གསལ་མང་དུ་ཐོས་པ་ཡིན་ནོ་བསམ། །རབ་བྱུང་དགེ་ཚུལ་བསྙེན་པར་རྫོགས་པ་ཞུས། །རྩ་བ་བཞི་པོ་འཕྱུག་མེད་སྲོག་ལྟར་བསྲུང་། །ཕྲ་ཞིབ་འཆལ་ལ་གསོ་སྦྱོང་བྱིན་གྱིས་བརླབས། །སོ་ཐར་ཁྲིམས་ལྡན་དགེ་སློང་ཡིན་ནོ་སྙམ། །འགྲོ་དྲུག་ཕ་མར་གོ་ནས་སེམས་བསྐྱེད་བླངས། །དགེ་བ་གང་བྱེད་འགྲོ་བ་སྤྱི་ལ་བསྔོས། །བྱམས་དང་སྙིང་རྗེ་བཏང་ལེན་ཅི་ནུས་འབད། །བྱང་སྡོམ་བརྒྱུད་ལྡན་སེམས་དཔའ་ཡིན་ནོ་བསམ། །དབང་བཞི་ཞུས་ནས་སྣང་སྲིད་ལྷ་སྐུར་གོ །བསྐྱེད་རིམ་བཟླས་བརྗོད་རྒྱུན་གཏོར་དུས་གཏོར་དགའ། །ཉམས་རྨིས་རྟགས་དང་ལས་ཚོགས་ཕྲན་བུ་འགྲུབ། །མ་ཧཱ་ཡོ་གའི་རྣལ་འབྱོར་ཡིན་ནོ་སྙམ། །རྡོ་རྗེའི་ལུས་དང་སེམས་ཀྱི་གནས་ལུགས་གོ །རྩ་རླུང་ཐིག་ལེར་མོས་པ་ལམ་དུ་བྱས། །ཀུན་བྱང་ཆུབ་སེམས་ལ་གཅེས་སྤྲས་བཟུང་། །ཨ་ནུ་ཡོ་གའི་རྣལ་འབྱོར་ཡིན་ནོ་བསམ། །འཁོར་འདས་གདོད་ནས་རྣམ་
དག་ཆོས་སྐུར་གོ །བདེ་གསལ་མི་རྟོག་མྱོང་བ་རྒྱུད་ལ་སྐྱེས། །ཐ་མལ་མ་བཅོས་རྗེན་པའི་ཟབ་གནད་རིག །ཨ་ཏི་ཡོ་གའི་རྣལ་འབྱོར་ཡིན་ནོ་བསམ། ཀུན་རྫོབ་དོན་དམ་བདེན་གཉིས་ཟུང་འཇུག་གོ །ཐབས་ཤེས་གཅིག་གྲོགས་གཅིག་བྱེད་གནད་ཟབ་ཤེས། །འབྲས་བུ་སྐུ་གཉིས་འབྱུང་ཚུལ་ལེགས་པར་ཐོབ། །དབུ་མ་ཆེན་པོའི་རྣལ་འབྱོར་ཡིན་ནོ་བསམ། །གཞི་ཤེས་བདེ་གཤེགས་སྙིང་པོའི་གནད་གསང་གོ །ལམ་ཤེས་སྟོང་ཉིད་སྙིང་རྗེ་ཟུང་དུ་ཆུད། །རྣམ་མཁྱེན་འབྲས་བུའི་ཡོན་ཏན་རྒྱ་ཆེར་ཐོབ། །ཕ་རོལ་ཕྱིན་པའི་རྣལ་འབྱོར་ཡིན་ནོ་བསམ། །གཞི་ཡི་གནས་ལུགས་འཁོར་འདས་དབྱེར་མེད་གོ །ལམ་གྱི་བགྲོད་ཚུལ་རིག་སྟོང་དབྱེར་མེད་རྟོགས། །འབྲས་བུའི་ཐོབ་ཚུལ་ཐོབ་བྱ་བྲལ་བར་གོ །ཕྱག་རྒྱ་ཆེན་པོའི་རྣལ་འབྱོར་ཡིན་ནོ་བསམ། །ཡོན་ཏན་མེད་པ་ང་རྒྱལ་ལྷག་པར་ཆེ། །ངན་པ་རྣམས་ནི་རང་མཐོང་གནམ་བས་ཆེ། །ངན་པས་རང་བསྟོད་དེ་འདྲ་སྨྲས་ན་ཡང་། །སྐྱོན་གྱི་ཆ་ཡང་ཤིན་ཏུ་མང་ངོ་བསམ། །གནས་མདོ་ཁྱི་ནག་གྲེ་ཁུང་ས་ཆ་འདིར། །ཕ་ཡུལ་ཡིན་ཞེས་ཤོར་དོགས་ཤི་སྤར་འཐམ། །འདི་འདྲ་
ཆོས་པའི་སྤྱོད་པ་མ་ཡིན་ཞེས། །དེ་འདྲ་གཞན་གྱིས་གླེང་ཞིང་རང་ཡང་བསམ། །ཕ་ཡུལ་བདུད་ཀྱི་བཙོན་ར་ཆགས་སྡང་འཕེལ། །མི་རྩིས་ཆུང་ཞིང་དད་མེད་མཚང་དགུ་ཀློག །མི་ཚེ་འདི་ན་སྐྱེལ་བའི་བསམ་པ་མེད། །ཕྱོགས་མེད་ཡུལ་དུ་འགྲོ་དོན་བྱའོ་སྙམ། །འབྲི་སྟག་ས་འབྲུག་སྐྱེས་ཆེན་དཔག་མེད་རྣམས། །འཁྲུངས་ཡུལ་ཉིད་དུ་དོན་གཉིས་ལྷུན་གྱིས་གྲུབ། །ཕ་ཡུལ་ཡིན་ཡང་མི་དགེ་སྤོང་བྱེད་ཅིང་། །དམ་ཆོས་བསྒྲུབས་ན་ཉེས་པས་མི་དགོས་བསམ། །ཁམས་པས་ཏི་སེ་བཟུང་ནས་འབྲི་འབྲུག་རྩོད། །ཀོང་པོས་འབའ་བློབཟུང་ཤི་བསད་འཁྲུག་པ་བསླང་། །སྤྱོད་ལམ་དམ་པའི་ཆོས་དང་མ་མཐུན་ན། །ཕ་ཡུལ་སྤངས་ཀྱང་དམ་ཆོས་མ་ཡིན་བསམ། །ཉེ་དུ་རྣམས་ནི་འཁོར་བའི་བཤལ་ཐག་ཡིན། །དཀོར་གྱིས་ཉེ་དུ་གསོས་ན་གཉིས་ཀ་ཕུང་། །ཉེ་དུས་བསྐོར་བ་དམ་པའི་ཆོས་དང་འགལ། །འདི་འདྲ་གཞན་ཡང་གླེང་ཞིང་རང་ཡང་བསམ། །རྒྱུ་ཡི་ཟོས་ལན་དཀོར་གྱིས་གསོད་པ་དང་། །རྣ་མེད་གཞུང་མེད་ངོ་ཚ་སྤང་བའི་ཕྱིར། །ངོ་བྲིད་ཅུང་ཟད་ཙམ་རེ་མ་གཏོགས་པ། །ཉེ་དུར་དོན་མེད་དཀོར་ནག་མི་སྦྱིན་བསམ། །ཕ་དང་མ་ནི་དཀོན་མཆོག་བཞི་
པ་ཞེས། །ས་བཅུའི་སེམས་དཔའ་ཞིག་དང་མཉམ་གསུང་ཕྱིར། །དཀོར་སྒྲིབ་རང་གིས་སྦྱངས་བའི་ཟས་གོས་ཀྱིས། །ནམ་འཚོ་བར་དུ་བཀུར་སྟི་བྱའོ་སྙམ། །རྒས་པའི་ནད་དང་གཅོས་པའི་གདོན་གྱིས་ཟིན། །མི་རྩོད་ཁྱི་འཁོན་གྲྭ་ས་ཆགས་མི་འཇུག །ཁ་མང་སྤྱོད་ངན་སྔོ་ལོ་འཕྱར་ན་ཡང་། །བརྡེག་ཚོག་ཚིག་ངན་ཡི་ཆད་མི་རུང་བསམ། །འབྲི་འབྲུག་ས་སྟག་གཏེར་སྟོན་ཐམས་ཅད་ཀྱང་། །རུས་དབོན་སྣག་དབང་མུ་ཏིག་སྟར་བརྒྱུན་བཞིན། །ཅུང་ཟད་ཆོས་དང་འཇིག་རྟེན་འོང་སྙམ་པས། །ཉེ་དུས་བསྐོར་ཡང་ཆོས་དང་མི་འགལ་བསམ། །བདག་ནི་ཆོས་ཕག་གཟན་ཚོལ་དཀོར་སྒྲིབ་ཆེ། །དད་ཟས་གྲིབ་ཟས་མང་པོའི་རྒྱ་མཚོར་ལྟུང་། །ཤི་ཤོག་གསོན་ཤོག་མང་པོའི་གཏིང་རྡོ་བཏགས། །ཐར་བར་དཀའ་ཞེས་རང་གཞན་གཉིས་ཀས་བསམ། །ལོ་དགུ་ལོན་ནས་མི་ཟས་དཀོར་ལ་འབགས། །མི་ཚེའི་ཕྱེད་ལ་ཡོན་ཏན་བཙོང་ཟོས་ཀྱང་། །སྦྱོར་དངོས་རྗེས་ཚང་རྒྱལ་བའི་བཀའ་བཞིན་བསྒྲུབས། །རྫུན་དང་མགོ་བསྐོར་སྒྲིབ་པ་མེད་དོ་བསམ། །འཁོར་ལོས་སྒྱུར་རྒྱལ་ལྔ་བརྒྱའི་བསོད་ནམས་ཚོགས། །སྟོན་པས་ཉན་ཐོས་
རྣམས་ཀྱི་འཚོ་བར་བསྔོས། །ཚུལ་ཁྲིམས་ལྡན་རྣམས་འཚོ་བས་མི་འཕངས་པ། །ཐུབ་པའི་དབང་པོའི་ཐུགས་རྗེ་ཡིན་ནོ་སྙམ། །རྫུན་དང་ཟོབ་ཀྱིས་མི་མགོ་བསྐོར་བ་དང་། །དགེ་འདུན་ནོར་ལ་ཐུག་ཐུབ་སྤྱོད་པ་རྣམས། །ལྕགས་ཀྱི་ཐུ་ལུམ་མེ་འབར་ཟ་བ་སྟེ། །དེ་འདྲའི་དཀོར་སྒྲིབ་བདག་ལ་མེད་དོ་སྙམ། །ཚུལ་ཁྲིམས་འཆལ་ཡང་ཚུལ་ཁྲིམས་ལྡན་བརྫུན་ནས། །དཀོར་ལ་སྤྱོད་ན་ལྷར་བཅས་འཇིག་རྟེན་ལ། །བརྫུན་ཤིང་ཟོས་པའི་སྒྲིབ་པ་འབྱུང་གསུངས་ཀྱང་། །དེ་འདྲའི་དཀོར་སྒྲིབ་བདག་ལ་མེད་དོ་བསམ། །སྤྲུལ་སྐུ་དང་ནི་གྲུབ་ཐོབ་ལ་སོགས་པ། །མན་ལ་ཡིན་པར་རང་གིས་ཁས་བླངས་ནས། །དེ་ཡིས་དཀོར་བསྡུས་བདུད་ལས་རང་གཞན་ཕུང་། །དེ་འདྲའི་དཀོར་སྒྲིབ་བདག་ལ་མེད་དོ་བསམ། །ཚུལ་ཁྲིམས་ལྡན་པས་བདག་པོའི་ཚུལ་དུ་ཟ། །བསྐྱེད་རིམ་འབྱོང་བས་དངོས་གྲུབ་ཚུལ་དུ་ཟ། །རང་རྒྱུད་དུལ་ལམ་ཡོན་ཏན་ཤེས་པ་ལ། །ཐུབ་པས་གནང་ཕྱིར་དཀོར་སྒྲིབ་མེད་དམ་བསམ། །སྐུ་སྐྱེ་མིན་ཞིང་བླ་རྒྱུད་དཔོན་རྒྱུད་མེད། །དགོན་པ་གདན་སའི་ཐོབ་མེད་བྱ་བྲལ་ལ། །འབུལ་བ་ཆེ་དང་བྱང་ཞུས་མི་འོས་ཞེས། །དེ་འདྲ་
གཞན་གྱིས་གླེངས་ཤིང་རང་ཡང་བསམ། །སྔོན་བྱོན་བླ་མ་ཆེན་པོ་དེ་དག་ཀྱང་། །དེང་ནས་སྐུ་སྐྱེ་བླ་རྒྱུད་དབོན་བརྒྱུད་ཡིན། །དེ་ཡི་རྒྱབ་ལ་གདན་ས་བླ་བརྒྱུད་བྱུང་། །རང་བྱུང་དེ་འདྲ་བྱུང་ན་མཆོག་ཡིན་བསམ། །ཆོ་ག་ཚང་ཞིང་བསྐྱེད་རིམ་གསལ་བའི་ངང་། །བྱམས་དང་སྙིང་རྗེས་སྒྲིབ་སྦྱོང་རྣམ་ཤེས་སྤར། །བསྔོ་བས་རྒྱས་བཏབ་བསྔོ་ཡིག་རྒྱུན་དུ་བཅང་། །མཚན་བྱང་མ་བཞུས་སྒྲིབ་པ་མེད་དམ་བསམ། །གསོན་ཤོག་རུང་དང་མི་རུང་བདེན་མི་བདེན། །ཟེར་མཁན་ཡོད་ཀྱང་བདེ་མཆོག་རྒྱུད་ནས་གསུངས། །གསུང་བཞིན་བྱས་ལ་བསྔོ་ཡིག་ནང་དུ་བྲིས། །གསོན་ཤོག་བཞུས་པས་སྒྲིབ་པ་མི་འབྱུང་བསམ། །བསྔོ་ཡིག་ཐེབ་ཚད་གཙོར་བྱས་སེམས་ཅན་ཀུན། །རྫོགས་བྱང་མཆོག་ལ་འགོད་པར་སེམས་བསྐྱེད་ནས། །སྨོན་ལམ་བསྔོ་བ་ཕྱིར་ལྡོག་གང་ཐུབ་འབད། །བསྔོ་ཡིག་ཡབ་སྲས་སྤྱན་སྔར་ཨེ་ཕྱིན་བསམ། །སྒྲུབ་པ་བྱེད་པར་འཚོ་བས་ཐབས་ཆགས་ན། །བསྒྲུབ་པ་མི་བཤོལ་དཀའ་ཐུབ་བཅུད་ལེན་བྱ། །དཀོར་སྒྲིབ་ཆུང་ཞིང་ཉམས་འཕེལ་མངོན་ཤེས་འཆར། །དེ་འདྲ་དགོས་དུས་བྱུང་ན་བྱེད་ན་བསམ། །
ལོངས་སྤྱོད་ཡོད་བཞིན་མི་ཟ་ལུས་གདུང་བ། །རྒྱ་ཆེ་རོལ་པར་མུ་སྟེགས་ལུགས་སུ་བཤད། །ཐུབ་པའི་དབང་པོས་མཐའ་གཉིས་སྤོང་བར་གསུངས། །འདུལ་བ་བཞིན་དུ་དུས་སུ་ཟ་ན་བསམ། །འདུལ་བའི་ལུགས་ལ་ཆང་དང་དགོང་གཉིས་སྤོང་། །བྱང་སེམས་ལུགས་བཞིན་ཤ་སྤོང་གདན་གཅིག་བྱ། །དེ་ཡང་སྔགས་ལྟར་ནང་གི་སྦྱིན་སྲེག་སྤྱད། །དེ་ལྟར་ཟོས་པས་སྒྲིབ་མེད་ཚོགས་རྫོགས་བསམ། །དཀོར་མང་བསྡུས་ཤིང་འཇིག་རྟེན་ཟས་སྤངས་ཀྱང་། །རྒྱུ་ཟས་ཆགས་འཛིན་ཡོད་ཕྱིར་སྒྲིབ་པའང་ཡོད། །གསང་སྔགས་ལུགས་ཀྱི་ལྷ་བསྙེན་ལྟུང་བའང་ཕོག །འཇིག་རྟེན་པ་རྣམས་དད་ཀྱང་འབྲས་ཆུང་བསམ། །རང་རྒྱུད་མ་ཐུལ་གཞན་རྒྱུད་ག་ལ་ཐུལ། །དེང་སང་རང་དོན་རྩེ་གཅིག་བསྒྲུབ་པའི་དུས། །རླབས་ཆེན་གཞན་དོན་འགྲུབ་པའི་དུས་ལ་བབ། །ཆོས་འཆད་འཁོར་སྐྱོང་ད་རུང་མ་རན་བསམ། །རང་དོན་གྲུབ་ནས་གཞན་དོན་མ་བྱས་ན། །བྱང་སྡོམ་འཆོར་ཞིང་རྒྱལ་བ་སྲས་བཅས་བསླུས། །ཚེ་མཇུག་དངོས་སུ་འགྲོ་དོན་གང་འགྲུབ་དང་། །མ་འོངས་འགྲོ་དོན་སྨོན་ལམ་འདེབས་སོ་བསམ། །ཕ་ཡུལ་མི་གཅིག་གྲྭ་པ་གཉེར་པ་འགས། །
བླ་མའི་དབང་བསྐུར་འཁྲུག་རྩོད་སྡིག་ཚབས་ཆེ། །ངན་དབང་ཆེ་ན་ཉེ་དུ་ཡིན་ན་ཡང་། །མི་དགེ་སྤྱོད་ནས་བཟང་རྒྱུ་མེད་དོ་བསམ། །སྙིང་རིང་བཀའ་བསྒོ་མི་བདེ་ཚིག་གཤིས་གྱོང་། །ཆོས་དང་ཡོན་ཏན་མི་སློབ་དཀོར་ལ་རྔམ། །བླ་མའི་ཡོན་ཏན་མི་གཙང་སྐྱོན་རྣམས་བགྲངས། །དེ་འདྲའི་གྲྭ་པ་མེད་ན་ལེགས་སོ་བསམ། །ཡོན་ཏན་བསླབ་འདོད་བློ་ཕུགས་ཆོས་ལ་གཏད། །བླ་མར་དད་ཅིང་སྙིང་ཉེ་མཆེད་ལ་བྱམས། །ལྐོག་ཐུབ་བློ་ཁེལ་ཚུལ་ཁྲིམས་ངོས་ལྐོག་མེད། །དེ་འདྲའི་གྲྭ་པ་བརྒྱ་སྟོང་ལོང་མོད་བསམ། །སྤྱི་སེམས་མེད་ཅིང་རང་འདོད་ཁོང་དུ་བཅུག །དཀོར་གྱིས་ཉེ་དུ་སྐྱོང་དང་སྒེར་ཟོག་བྱེད། ། །ཆང་དང་བྷ་གའི་རིན་ལ་ནང་ཏི་བཤང་། །དེ་འདྲའི་གཉེར་པ་མེད་ན་ལེགས་སོ་སྙམ། །བླ་མའི་བསྟན་པ་བསམ་ཞིང་སྤྱི་སེམས་ཆེ། །དགྲ་གྱོད་ཁ་མཆུ་ཐབས་ཀྱིས་སྤང་བར་མཁས། །དཀོར་རྣམས་ཆུད་ཟོས་མི་བྱེད་ཆོས་ལ་བཏང་། །དེ་འདྲའི་གཉེར་པ་ཆོས་སྐྱོང་དངོས་ཡིན་བསམ། །བླ་མ་མི་འདོད་ཡོན་ཏན་ཐབས་ཀྱིས་ལེན། །དབང་ལུང་ཐོབ་ནས་ཕྱི་ཐག་དམ་ཚིག་མེད། །བརྒྱུད་པ་གང་མཐོ་འདྲེན་ཞིང་བླ་མ་
གསང་། །དེ་འདྲའི་སློབ་མ་མེད་ན་ལེགས་སོ་བསམ། །དད་པ་དམ་ཚིག་ལྡན་ཞིང་བསྒྲུབ་ལ་བརྩོན། །རྒྱུད་དུལ་ཤེས་རབ་སྙིང་རྗེ་རྟོགས་པ་ལྡན། །ཆོས་མང་ཐོས་ཀྱང་རང་གི་ཆོས་བརྒྱུད་འཛིན། །དེ་འདྲའི་སློབ་མ་སྙིང་བས་དམར་རོ་བསམ། །སྦྱོར་བ་བྱང་ཆུབ་སེམས་ཀྱིས་ཀུན་སློང་བཟང་། །སྤྱོད་པ་འདུལ་བ་ཁོ་ནར་གཙོ་བོར་འཛིན། །ཉམས་ལེན་བསྐྱེད་རྫོགས་ཟུང་འཇུག་སྒོམ་བྱེད་པ། །འདི་འདྲའི་སྲོལ་འཇགས་བསྟན་པ་དར་རོ་བསམ། །སྙིགས་མའི་དུས་འདིར་གཞན་སྣང་བསྒྱུར་ནུས་པའི། །རྫུ་འཕྲུལ་སྤྲུལ་བསྒྱུར་དངོས་སུ་མི་ནུས་པར། །མྱུར་ལམ་ཕོ་ཉའི་ལམ་སོགས་ཉམས་བླངས་ན། །བསྟན་པ་མེ་མགལ་ཆུར་བཅུག་འདྲའོ་བསམ། །རྒྱ་གར་རྒྱ་ནག་གངས་ཅན་བོད་ཡུལ་དུ། །ངོ་མཚར་གནས་ཆེན་དཔག་མེད་ཡོད་ན་ཡང་། །ཚེགས་ཆེ་འདུལ་བ་འཛིན་པ་འགྲོ་སྟབས་དཀའ། །རྩ་རླུང་བསྒོམ་ན་རང་ལུས་གནས་ཡིན་བསམ། །ཡབ་སྲས་གཏེར་སྟོན་ལ་སོགས་མཇལ་འདོད་ཀྱང་། །འགྲོ་སྟབས་དཀའ་ཞིང་མཇལ་ཡང་ཆོས་ཐོབ་དཀའ། །ཞལ་མཇལ་ཙམ་གྱིས་ཆོས་འདོད་བློ་མི་ཚིམ། །དེ་བས་རྒྱང་ནས་གསོལ་བ་འདེབས་ན་
བསམ། །དེང་སང་ཕྱོགས་རིས་གཏམ་ལ་ངེས་མེད་ཀྱང་། །གཏེར་ལུང་ཐམས་ཅད་ས་ཕག་གྲོས་བྱས་འདྲ། །རྒྱལ་བ་ཡབ་སྲས་རྫོགས་པའི་སངས་རྒྱས་དངོས། །དེ་ཕྱིར་སྙིང་གི་ཐིག་ལེར་འཆང་ན་བསམ། །ཟབ་ཆོས་ནམ་མཁའི་སྐར་ཚོགས་འདྲ་ན་ཡང་། །ལམ་འདི་ཁོ་ནས་གྲུབ་ཐོབ་གྲངས་མེད་བྱོན། །སྟབས་བདེ་ཉམས་སུ་ལོན་སླ་བཀའ་བབ་ལྡན། །ལྷན་ཅིག་སྐྱེས་སྦྱོར་སྙིང་ལ་འཆང་ན་བསམ། །དབང་ལུང་ཡོན་ཏན་སུ་ལ་འདུག་ན་ཡང་། །ཐབས་ཀྱིས་བླངས་ནས་དམ་ཚིག་མ་ཆག་བྱ། །དགེ་བའི་ཆོས་རྣམས་སྡུད་པའི་ཚུལ་ཁྲིམས་དང་། །བུང་བ་ལྟ་བུའི་སྤྱོད་པ་ཡིན་ནོ་བསམ། །སྣ་ཚོགས་ཐབས་ཀྱིས་བསྒྲུབ་པའི་ཟས་དང་ནོར། །མེད་ན་ཐབས་ཆག་མང་ན་ཕུང་གཞི་འབྱུང་། །ཇི་ལྟ་ཡོད་ཀྱང་ཆོག་ཤེས་སྐྱེ་དཀའ་བས། །ཉེར་མཁོ་ཙམ་ལས་བསོགས་ཆོད་བྱས་ན་བསམ། །དཀོར་རྫས་བསགས་ནས་འབུལ་སྐྱེལ་རི་ཤུ་དང་། །བརྒྱ་འབུལ་ལ་སོགས་དགེ་ཆེན་བྱ་བསམ་ཡང་། །ཐོག་ཏུ་མི་འགྲོ་དགྲ་བོའི་གཡབ་མོ་བྱེད། །དེ་བས་འཕྲལ་འཕྲལ་ཆོས་ལ་བཏང་ན་བསམ། །སློབ་བུས་རྒྱ་མཚོ་ལྟ་བུའི་དཀོར་ནག་བསྡུས། །
བློ་གཏད་བཅས་ནས་བདག་མདུན་སྤུངས་ན་ཡང་། །ཡི་དམ་མཆོད་ཅིང་བསྔོ་བའི་རྒྱ་ཡིས་བཏབ། །དཀོར་གྱི་སྒྲིབ་པས་ལྟུང་བར་མི་འགྱུར་བསམ། །དབུལ་ཕོངས་བཀྲེས་སྐོམ་ལྡན་པའི་དུས་བྱུང་ཡང་། །ཚེ་གཅིག་སྒྲུབ་པ་བྱེད་པའི་སློབ་བུ་ལ། །སྒྲུབ་པ་སྐྱུར་ནས་དཀོར་སྡུས་ང་གསོས་ཞེས། །བསྒྲུབ་ལ་བར་ཆད་འོང་བ་མི་སྨྲ་བསམ། །ཉེ་དུ་ཡིན་རུང་མིན་རུང་སློབ་བུ་ཡི། །དཀོར་བསྡུ་ལུགས་གཉིས་ཚོ་འཛིན་གོ་ཆོད་ན། །བདག་ལ་དབང་མེད་ཁོ་དབང་ཆེའོ་ཞེས། །མི་ངན་ཕལ་པའི་གཏམ་འདི་མི་སྨྲ་བསམ། །འཇིག་རྟེན་མཐུན་འཇུག་བསམ་བློ་ཆེ་མི་དགོས། །ཆོས་མིན་བྱ་རྒྱུ་མེད་པར་ཟོལ་བདེ་རུ། །འདུག་དུས་འདི་ལ་ཐུགས་དམ་མ་འཕེལ་ན། །ཐུགས་དམ་འཕེལ་དུས་ནམ་ཡང་མི་འབྱུང་བསམ། །མངོན་ཤེས་མེད་ཀྱང་མདོ་རྒྱུད་དཔང་བཞག་ན། །ལུས་འདི་བོར་ནས་བདེ་ཆེན་ཞིང་དུ་སྐྱེ། །དེ་ནི་སྲིད་པ་ཐ་མའི་བྱང་སེམས་ཡིན། །དེ་བས་འཚངས་ཆེ་ལམ་མྱུར་མེད་དོ་བསམ། །བདག་དང་བློ་མཐུན་བདག་གཞན་སུས་སྤྱོད་པ། །ཚེ་འདིར་འགྲོ་བས་བཀུར་ཞིང་བསྟན་ལའང་ཕན། །ཕྱི་མ་བདེ་ཆེན་ཞིང་དུ་མཉམ་དུ་སྐྱེ། །དེ་དག་བདག་
གི་སློབ་མ་ཡིན་ནོ་བསམ། །བདག་དང་མི་མཐུན་འགལ་བར་སུས་སྤྱོད་པ། ཡང་ན་རབ་བྱུང་ཡང་ན་ཐ་མར་ལྟུང་། །འབྲིང་པོ་དོར་བས་བཟང་ངན་ལུང་སྟོན་དཀའ། །དེ་ཡང་དུས་ཀྱི་ཐ་མར་ཉེ་འོ་བསམ། །བདག་གི་བསམ་པ་དྲུག་ཅུ་རེ་གསུམ་པོ། །དགེ་སློང་སྒོམ་ཆེན་ཞིག་གི་རྣམ་ཐར་ཚང་། །ཉམས་སུ་སུ་ཡིས་བླངས་ཀྱང་ལོན་ངེས་པས། །ཉམས་དང་བསྟུན་པའི་དྲང་གཏམ་ཡིན་ནོ་བསམ། །དེ་སྐད་ས་གའི་ཚེས་ལྔ་སྔ་དྲོར་བྲིས། །རཱ་གའི་མིང་ཅན་དགེ་སློང་རྒན་པོ་ཡི། །ལུས་པོ་ཟུང་ཟད་བདེ་བའི་ཁམས་དྭངས་ནས། །བལ་པོ་སྒོམ་ཆེན་དེ་ལ་སྤྲིང་བའོ།། ༈ །།ཨོ་རྒྱན་རིག་འཛིན་ལ་གདམས་པ་བཞུགས་སོ། །ན་མོ་གུ་རུ་དྷརྨེ་ཤྭ་ར་ཡེ། ཡིད་གཞུངས་བློ་གསལ་དད་ལྡན་བུ་ཁྱོད་ལ། །བསླབ་བྱ་མི་དགོས་ཇི་བཞིན་ཤུགས་ལ་རྟོགས། །འོན་ཀྱང་ཅུང་ཟད་འཕྲལ་དུ་གང་དྲན་བརྗོད། །རང་ཉིད་མཐའ་མེད་འཁོར་བའི་རྒྱ་མཚོ་ནས། །ཐར་ཐབས་ད་རེས་ཁོ་ནར་བསྒྲུབ་པ་ལ། །གཞན་ལ་ཡུས་དང་ཁོང་ལོང་སྤང་བ་གཅེས། །འགལ་རྐྱེན་མང་ཞིང་ཉོན་མོངས་དབང་བཙན་ན། །ཚུལ་ཁྲིམས་མིག་འབྲས་བཞིན་དུ་
བསྲུང་བ་འདི། །ངན་འགྲོའི་མཚོ་ལས་སྒྲོལ་བའི་གྲུ་དང་གཟིང་། །ཚུལ་ཁྲིམས་བསྲུང་བའི་ཡུས་དང་ང་རྒྱལ་སྤོངས། །མི་སྙན་ཚིག་དང་མི་འོས་བྱ་བ་ལ། །བཟོད་པ་བསྒོམ་པ་ཆོས་ཀྱི་སྙིང་པོ་ཡིན། །ལན་དགུའི་བར་དུ་བཟོད་པ་ཅི་ནུས་བསྒོམ། །ཅུང་ཟད་ཙམ་ལ་ངན་སྔགས་སྦྱོར་བ་སྤོངས། །དཀོར་སྒྲིབ་མེད་པའི་རང་ཟས་བདུད་རྩི་མཆོག །ཉམས་རྟོགས་འཕེལ་ཞིང་རྟགས་མཚན་མི་སྒྲིབ་གསལ། །ས་ཐོབ་རྣམས་ཀྱང་རྟགས་མཚན་དཀོར་གྱིས་འགག །དཀོར་ལ་ཟ་འདོད་རློམ་སེམས་སྤང་བ་གཅེས། །རང་འཚོ་ཙམ་གྱི་ལོངས་སྤྱོད་མི་འཕོངས་ཀྱང་། །སེར་སྣས་བཅིང་ནས་བཟའ་བཏུང་མི་བྲ་ན། །སྦྲང་མའི་རྩི་བཞིན་སུས་སྤྱོད་ཅི་ཆ་ཡོད། །སེར་སྣ་དཀའ་ཐུབ་ཡིན་པ་མི་དགོངས་འཚལ། །དེང་སང་ཚེ་ཚད་བཞི་བཅུ་ཁ་རལ་གསུངས། །དེ་ལ་ཉི་ཤུ་རྩ་ཐོག་གཉིད་ཀྱིས་བཅད། །ལོ་གསུམ་བསྒྲུབ་ཀྱང་ཟླ་བ་བཅུ་དགུ་གཉིད། །ལོ་གསུམ་བསྒྲུབ་གཉུག་རིང་བའི་སྐྱོ་དུབ་སྤོངས། །ལེགས་ལེགས་མཁོ་མཁོ་འདྲ་བའི་དཔེ་ཆ་ཡང་། །མི་ཚེར་བྲིས་ཀྱང་འཛད་མེད་ཇོ་ཇོ་མང་། །དཔེ་བྲལ་དོན་གཅིག་སེམས་ལ་མ་འགྲོགས་ན། །འཆི་དུས་དཔེ་ཆ་
ཤུལ་དུ་ལུས་པར་སོམས། །ད་ལྟ་ལུས་སེམས་བདེ་ཞིང་མཐུན་རྐྱེན་འཛོམ། །རྩ་རླུང་དར་བབ་དབང་པོ་གསལ་དུས་འདིར། །ཉམས་ལེན་རྡོ་རུས་མི་གཏུག་སོ་གསོད་ཙམ། །མ་འོངས་ཉམས་ལེན་བྱེད་སྙམ་འཁྲུལ་པར་སོམས། །ཉམས་ལེན་ཧ་ཅང་མི་བཤོལ་ངང་ཉིད་ནས། །བྲི་འདོན་ཕྱག་དང་ཚ་ཚ་ཆུ་སྦྱིན་སོགས། །རྩལ་སྦྱོང་ཚོགས་གཉིས་ཟུང་འཇུག་ཡིན་པའི་ཕྱིར། །འདུས་བྱས་དགེ་བ་ཁྱད་དུ་མི་གསོད་འཚལ། །གལ་ཏེ་བསྐྱེད་རྫོགས་ཉམས་ལེན་བཤོལ་ན་ནི། །འདུས་བྱས་དགེ་བ་མ་ལྕོགས་ན་ཡང་རུང་། །བསྐྱེད་དང་རྫོགས་དང་བསྐྱེད་རྫོགས་ཟུང་འཇུག་གསུམ། །གང་རུང་ཞིག་དང་མ་བྲལ་སེམས་ལ་འཆོང་། །གཞན་སྣང་འགྱུར་བའི་རྟེན་འབྲེལ་ལ་བསྟེན་ནས། །ཤུགས་ཀྱིས་འཚོ་བ་བྱུང་བ་དགག་མེད་དགོས། །ཞེན་ཆགས་མེད་པར་ནང་གི་སྦྱིན་སྲེག་འབུལ། །དཀོར་ལ་འཛེམ་སྐད་ཇོ་བརྫུའི་སྨྲ་བ་སྤང་། །རྩ་རླུང་དར་བབ་བཟའ་བཏུང་བཅུད་ལྡན་པས། །ཁམས་རྒྱས་ཆགས་པའི་བསམ་སྦྱོར་རྒྱས་སྲིད་ན། །རང་གཞན་ལུས་འདི་མི་གཙང་ཕུང་པོ་སྟེ། །ཆུ་གཅིན་རྣག་ཁྲག་ཕུང་པོ་ཡིན་ཚུལ་དཔྱད། །རོ་རུལ་ཀེང་
རུས་ཉིད་དང་ཁྱད་མེད་བསྒོམ། །ཡང་ན་རང་ཉིད་ཡི་དམ་ཡབ་ཡུམ་བསྒོམ། །དམིགས་པ་འཁྲུལ་འཁོར་རླུང་གིས་བྱང་སེམས་དབབ། །རྩ་གནས་བཞི་པོར་དགའ་བཞིའི་ངོས་བཟུང་ནས། །ཐེག་ལེ་མི་གཏོང་གྱེན་ལྡོག་སྤྱི་བོར་བསྟིམ། །རྒྱུན་གྱི་ཉམས་ལེན་མ་ཡེངས་དྲན་རྫི་སྟེ། །ཡེངས་ན་འཁྲུལ་པ་མ་ཡེངས་ཡེ་ཤེས་ཉིད། །མ་ཡེངས་ངང་ནས་ཅི་བྱེད་ཟག་མེད་ལམ། །རྒྱུན་དུ་དལ་བུས་སྤྱོད་ལམ་ཀུན་དང་བསྲེ། །གཟུགས་སྒྲ་དྲི་རོ་གང་ཤར་དེ་དང་བསྲེ། །ཁྱི་སྒྲ་ཀུ་ཅོ་མི་སྙན་ཟེ་རེ་སོགས། །སེམས་ལ་གནོད་ཚབས་གང་ཆེ་དེ་ཉིད་ལས། །ཆེད་དུ་བསྲེ་ཞིང་ངོར་ལྟ་བོགས་འདོན་མཆོག །འོད་གསལ་མི་རྟོག་ཉམས་བཟང་ཅི་ཤར་ཡང་། །ཆགས་ཞེན་སྤོངས་ལ་དེ་ཡི་ངོ་བོར་ལྟ། །བྱིང་རྒོད་མི་བདེའི་ཉམས་ངན་ཅི་ཤར་ཡང་། །དེ་ཡི་ངོ་བོ་ལྟ་བ་གེགས་སེལ་མཆོག །སྐབས་སུ་ཐུན་བཞི་ལ་སོགས་གསོལ་འདེབས་ལ། །རྒྱང་འབོད་གང་ཤེས་རྣལ་འབྱོར་རང་གདངས་བྱ། །རྒྱུན་དུ་དཀོན་མཆོག་ཀུན་འདུས་པད་འབྱུང་ལ། །ཅི་མཛད་ཁྱེད་ཤེས་བློ་བཀལ་གདུང་ཤུགས་བསྐྱེད། །སྐབས་སུ་མ་གཏོགས་འགྲོ་ལ་སྙིང་རྗེ་བསྐྱེད། །རང་ཉིད་དམ་
ཆོས་སྒྲུབ་པའི་དགའ་བ་བསྒོམ། །ཐུན་མཇུག་བསྔོ་བ་སྨོན་ལམ་རྒྱ་ཡིས་བཏབ། །དེ་ལྟར་ཉམས་སུ་བླངས་ན་གཏན་བདེ་འགྲུབ། །དེ་ལྟར་རཱ་གའི་མིང་གིས་འཕྲལ་ཉིད་བྲིས། །ཨོ་རྒྱན་རིག་འཛིན་ཉམས་ཀྱི་གསལ་འདེབས་མཛོད། ། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།