བསྒྲུབ་པའི་ཉམས་ཀྱི་བྱེ་བྲག་ལས་བྱུང་བའི་ཚིགས་སུ་བཅད་པ་སྣ་ཚོགས་པ་རྣམ་པ་མང་པོ་ཡི་གེར་བཀོད་པ་དག
ཤོག་ལྷེབ་ ༡ ནས་ ༡༦ བར།
བསྒྲུབ་པའི་ཉམས་ཀྱི་བྱེ་བྲག་ལས་བྱུང་བའི་ཚིགས་སུ་བཅད་པ་སྣ་ཚོགས་པ་རྣམ་པ་མང་པོ་ཡི་གེར་བཀོད་པ་དག་བཞུགས་སོ།
རྒྱལ་བ་ཀུན་གྱི་ཐུགས་རྗེའི་རང་གཟུགས་ཉིད། །སྙིགས་དུས་འགྲོ་བའི་དོན་དུ་སྤྲུལ་པའི་སྐུ། །བསྟན་པའི་རྒྱལ་མཚན་འགྲོ་བའི་སྐྱབས་གཅིག་པོ། །སྐྱབས་གནས་སྤྲུལ་སྐུ་ཆེན་པོའི་ཞབས་དྲུང་དུ། །སྒོ་གསུམ་གུས་པས་ཐལ་སྦྱར་ཞུ་བ་ནི། །དེང་སང་སྐུ་ཡི་དཀྱིལ་འཁོར་རབ་རྒྱས་ཤིང་། །ཕྲིན་ལས་འོད་སྟོང་ཀུན་ཏུ་རབ་འཕྲོས་པས། །ཐུབ་བསྟན་མཛེས་པའི་དཔལ་དུ་བཞུགས་ཐོས་པས། །བདག་ཡིད་རབ་ཏུ་དགའ་བའི་དཔལ་འབྱོར་རྒྱས། །སླར་ཡང་སྙིགས་དུས་ཐུབ་བསྟན་ཉམས་དམའ་ཞིང་། །འགྲོ་བར་སྡུག་བསྔལ་བར་ཆད་རྐྱེན་མང་
ལ། །ལྷག་པར་ཐུགས་རྗེའི་དཔུང་ཆེན་ཆེར་བསྐྱེད་ནས། །ལོ་བརྒྱའི་བར་དུ་བཞུགས་པར་གསོལ་བ་འདེབས། །སྐབས་ཞུས་རྨོ་དང་གཙུག་ཕུའི་གཟིམས་ཁང་ལ། །ན་ཉིན་ལོ་ནས་ཁང་ལས་ལེགས་པར་ཚར། །རྟོགས་ལྡན་རྣམས་ཀྱང་ཐུགས་དམ་འཕེལ་བར་ཡོད། །བདག་ཀྱང་སྐྱབས་གནས་ཉིད་ཀྱི་ཆགས་ཕྱི་དང་། །བསྟན་ལ་གང་ཕན་སྒྲུབ་སྡེ་ཁ་གསོ་དང་། །ཆོས་ར་འབུལ་སྒང་ཟང་ཟིང་མཆོད་པ་སོགས། །དགོས་ཚུལ་ཤེས་ཤིང་སེམས་བསྐྱེད་མི་ཆུང་ཡང་། །རེ་ཞིག་དུས་ཀྱི་དབང་གིས་སྟབས་མ་བདེ། །མ་འོངས་པ་ན་བསྒྲུབ་པའི་སྨོན་ལམ་ཞུ། །དེ་
སླད་ཟང་ཟིང་འབུལ་བ་མི་འཇོག་ཀྱང་། །ད་ནི་རྩེ་གཅིག་བསྒྲུབ་པའི་མཆོད་པ་འབུལ། །དེང་ནས་བཟུང་སྟེ་ཇི་སྲིད་འཚོ་ཡི་བར། །ཚེ་འདིའི་བྱ་བ་སྒྲུབ་པ་བློས་བཏང་ནས། །བྱང་ཆུབ་དོན་དུ་གཉེར་བའི་དམ་བཅའ་འབུལ། །ཚེ་འདིའི་ལྟོ་གོས་གཏམ་ལ་གྱོང་བསྐུར་ནས། །སྒྲུབ་པ་སྙིང་པོར་བྱེད་པའི་དམ་བཅའ་འབུལ། །ལྟོ་ཕྱིར་གྲོང་ཆོག་འདྲེ་འདུལ་མི་བྱེད་ཅིང་། །གྲོང་ནག་ཐེམ་པ་སྤང་བའི་དམ་བཅའ་འབུལ། །དབེན་པར་སོ་གསོད་ལྐོག་ཉལ་མི་བྱེད་པར། །བསྒྲུབ་ལ་བརྩོན་འགྲུས་བསྐྱེད་པའི་དམ་བཅའ་འབུལ། །བློས་བྱས་ཡིད་དཔྱོད་ལྟ་བ་མི་བསྒོམ་པར། །བཅོས་མིན་རང་ཞལ་ལྟ་བའི་དམ་བཅའ་འབུལ། །རྩ་བ་བཞི་པོ་སྲོག་ལྟར་བསྲུང་བ་སོགས། །སྡོམ་གསུམ་ངོས་ལྐོག་སྤངས་བའི་དམ་བཅའ་འབུལ། །བྱིང་རྒོད་ལ་སོགས་གེགས་སྐྱོན་གང་བྱུང་ཡང་། །མོས་གུས་གནད་དུ་བསྣུན་པའི་དམ་བཅའ་འབུལ། །བློ་མང་རྩབ་རྩུབ་མང་པོ་མི་བྱེད་པར། །སྒྲུབ་པ་གཉུགས་སུ་བསྲིང་བའི་དམ་བཅའ་འབུལ། །རང་དོན་ཞི་བདེའི་བསམ་པ་བློས་བཏང་ནས། །ཅི་བྱེད་གཞན་དོན་བསྔོ་བའི་དམ་བཅའ་འབུལ། །བསྒྲུབས་པས་མཆོད་པའི་
འབུལ་བ་དགུ་ཚན་འདི། །བར་ཆད་མེད་ཅིང་མཐའ་རུ་ཕྱིན་པར་ནི། །སྤྲུལ་པའི་སྐུ་མཆོག་ཁྱེད་ཀྱིས་བྱིན་གྱིས་རློབས། །ཞུ་ཡིག་གཟིགས་རྟེན་བཀྲ་ཤིས་ཁ་བཏགས་དང་། །རྗེ་ཉིད་ཡུན་རིང་བཞུགས་པའི་རྟེན་འབྲེལ་དུ། །ས་གདན་ལེགས་པ་གཅིག་དང་བཅས་ནས་ཀྱང་། །ཚེས་གྲངས་དགེ་བར་རི་བོའི་ཁྲོད་ནས་ཕུལ། །ཞེས་པ་འདི་དྲུང་པ་སྒྲུབ་བརྒྱུད་བསྟན་པ་རྣམ་རྒྱལ་གྱི་དྲུང་ནས་དཔེ་ཆ་དུང་དཀར་ལ་སོགས་གནང་སྦྱིན་གཉེར་པ་ལ་བསྐུར་བྱུང་དུས་ཞུ་ཡིག་ཕུལ་བའོ།། ༈ །།ན་མོ་གུ་རུ་ཨ་མོ་གྷ་པ་ཤ་ཡ། རྗེ་འཇིག་རྟེན་དབང་ཕྱུག་སྤྲུལ་པའི་སྐུ། །ཕ་དྲིན་ཆེན་བླ་མའི་ཞབས་ལ་འདུད། །ངས་བྱུང་ཆུབ་མཆོག་ཏུ་སེམས་བསྐྱེད་ནས། །ལས་གཞན་ཕན་བསྒྲུབ་པར་དམ་བཅས་ཀྱང་། །ཚིག་འཇམ་པོར་སྨྲས་ཀྱང་ཉན་མཁན་མེད། །ངག་རྩུབ་པོར་སྨྲས་ན་ཁོང་ཁྲོ་ལྡང་། །ད་གཞན་ཕན་ཅི་ལྟར་སྨྲ་ན་ཨང་། །ནད་ཚད་པ་གདིང་ནས་རྒྱས་པ་ལ། །ཟས་ཤ་ཆང་སྙོད་པའི་བྱམས་བྱམས་དེ། །སྡང་དགྲ་བོ་གཅིག་གི་དོ་ཟླ་མིན། །འདིས་རིན་ཆེན་སྲོག་དང་འབྲལ་ལོ་ཞེས། །ངག་ཕན་པར་སྨྲས་ཚེ་མི་དགའ་ལྟ། །ལུས་སྲོག་དང་
བྲལ་དུས་འགྱོད་ཀྱང་འཕྱིས། །བློ་གསལ་ན་གཞོན་གྱི་བན་ཆུང་འགའ། །ཡིག་རིས་དང་ཡོན་ཏན་མ་ཤེས་ན། །གོས་བཟང་ཡང་བོང་བུ་རྒྱབ་སེར་ཡིན། །ཅེས་ཕན་པར་སྨྲས་ཚེ་ཀ་ལོང་བྱེད་། །རང་ཤི་རྒས་ལ་ཐུགས་དུས་འགྱོད་ཀྱང་འཕྱིས། །ནོར་འདོད་པས་ཚ་ཁེ་བུན་སྐྱེད་སོགས། །འཕྲལ་དཀའ་ཞིང་གོང་མ་རྣམས་ཀྱིས་ཁྲེལ། །འདི་སྨྲས་ཚེ་མི་དགའི་ངོ་ནག་སྦྱད། །རང་ཆོས་པ་དང་ཚོང་པ་གང་དགའ་སོམ། །རང་ཆོས་ཚུགས་དངསྡོམ་པ་མི་འགལ་བར། །གཉེན་ཉེ་འབྲེལ་དང་ཡོན་བདག་སྐྱོང་ཡང་བཟོད། །རང་ཆོས་ཚུགས་དང་སྡོམ་པ་འགལ་བཞིན་དུ། །ཉེ་འབྲེལ་དང་ཡོན་བདག་བསྐྱང་འདོད་པ། །དེ་ནག་པོ་བདུད་ཀྱི་ཆོ་འཕྲུལ་ཡིན། །འདི་སྨྲས་ཚེ་མི་དགའི་ཅང་སྐད་འབྱིན། །རང་ཀུན་གྱིས་འཕྱ་དུས་འགྱོད་ཀྱང་འཕྱིས། །རང་གཉོམ་ཆུང་གི་མོས་པར་ཁས་བླངས་ནས། །མི་གཞན་ལ་གྱོད་རྩའི་ཕུང་གཞི་བསླབ། །འདི་འགོང་པོ་སྙིང་ལ་ཞུགས་པ་ཡིན། །ཞེ་ཚིག་ངན་སྨྲས་ཚེ་འགྲོ་བསྡིགས་བྱེད། །དོན་རང་གཞན་ཀུན་ཕུང་དུས་འགྱོད་ཀྱང་འཕྱེས། །མི་གཞན་ལ་ཕན་ངེས་ཀྱི་དོན་རིག་ན། །ངག་ཚིག་རྩུབ་སྨྲ་བར་རྒྱལ་བས་གནང་། །
ད་འོན་ཀྱང་མི་མཇེད་འཇིག་རྟེན་ཁམས། །དོན་ཕན་གནོད་གཉིས་པོ་འབྱེད་པར་དཀའ། །ལས་ངན་པ་བསླབས་ན་ཕན་དུ་གོ །ཚིག་ངན་པར་སྨྲས་ན་སྡང་བར་མཐོང་། །ངག་ཡང་ཡང་སྨྲས་ན་ཁོང་ཁྲོ་སྐྱེ། །ད་དེ་བས་དམ་བཅའ་ཚིག་གསུམ་འབུལ། །ངས་སྔོན་ཆད་བློ་སེམས་མི་ངན་ཡང་། །ངག་ཚིག་རྩུབ་གང་སྨྲས་མཐོལ་ཞིང་བཤགས། །བདག་འདི་ཕྱིར་སྒྲིབ་པར་མ་གྱུར་ཅིག །ད་དིང་ནས་ཇི་སྲིད་འཚོ་ཡི་བར། །གྲྭ་སློབ་དང་མཆེད་གྲོགས་སུ་ལ་ཡང་། །ངག་འཇམ་པོས་ཁ་ད་ཞུ་བ་ལས། །ཚིག་རྩུབ་མོ་མི་སྨྲ་དམ་བཅའོ། །རྗེ་བླ་མ་ཡི་དམ་མཁའ་འགྲོ་དང་། །སྐྱབས་དཀོན་མཆོག་གསུམ་པོ་ཐམས་ཅད་ཀྱིས། །ད་དམ་བཅའ་མཐའ་རུ་ཕྱིན་པ་དང་། །བདག་ངག་སྒྲིབ་དག་པར་བྱིན་གྱིས་རློབས། །ཞེས་ཡོན་བདག་དང་གྲྭ་སློབ་འགའ་རེ་ལ་ཤ་ཚས་མ་བཟོད་ནས་ཚིག་རྩུབ་འགའ་རེ་སྨྲ་ཤོར་བ་ལ་མི་དགའ་བའི་རྣམ་འགྱུར་མང་དུ་སྟོན་འདུག་པར་ད་ནས་མི་སྨྲ་བའི་དམ་བཅའ་བྱས་པའོ། །བྷ་ཝནྟུ།། །ན་མོ་གུ་རུ། དཔལ་འཇིག་རྟེན་དབང་ཕྱུག་སྤྲུལ་པའི་སྐུ། །ཕ་འདྲེན་མཆོག་བླ་མའི་ཞབས་ལ་འདུད། །གཞི་ཕྱག་རྒྱ་ཆེན་པོ་ཨ་ལ་
ལ། །ཨེ་མ་ཧོ་སྟེ་ངོ་མཚར་ཆེ། །ཡ་ཀི་རྒྱལ་བའི་ཐུགས་རྒྱུད་དང་། །མ་ཀི་རིགས་དྲུག་གི་འཁྲུལ་སྣང་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་བྱང་སེམས་ཀྱི་འགྲོ་དོན་དང་། །མ་ཀི་བདུད་ཀྱི་སྡིག་སྟོབས་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་བདེ་ཆེན་གྱི་ཞིང་ཁམས་དང་། །མ་ཀི་དམྱལ་ཁམས་བཅོ་བརྒྱད་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་དཀོན་མཆོག་གི་ཐུགས་རྗེ་དང་། །མ་ཀི་ལྷ་འདྲེའི་བར་ཆད་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་ལྷ་དབང་གི་དཔལ་འབྱོར་དང་། །མ་ཀི་ཡི་དྭགས་ཀྱི་བཀྲེས་སྐོམ་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་འཇམ་དཔལ་གྱི་མཁྱེན་རབ་དང་། །མ་ཀི་དུད་འགྲོའི་གླེན་ལྐུགས་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་འཕགས་ཆེན་གྱི་ཞི་དུལ་དང་། །མ་ཀི་ལྷ་མིན་གྱི་རྩུབ་འཁྲུག་གཉིས། །དེ་ཆོས་ཉིད་སྟོང་པའི་ངང་དུ་གཅིག་ཟོག་ཡིད་བཞིན་ནོར་བུའི་རིན་ཐང་དང་། །རྡོ་ཤི་ཤ་ཅན་གྱི་འདོད་ལུགས་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་རྒྱལ་བའི་ཐུགས་རྒྱུད་དང་། །མ་
ཀི་རང་གི་སེམས་རྒྱུད་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་རྣལ་འབྱོར་རང་སེམས་དང་། །མ་ཀི་འགྲོ་དྲུག་གི་སེམས་རྒྱུད་གཉིས། །དེ་ཆོས་ཉིད་སྟོང་པའི་ངང་དུ་གཅིག །དེ་ཚོ་གཅིག་པའི་གཅིག་ལུགས་ཡིན། །ད་མཚར་བའི་མཚར་ལུགས་འདི་ལྟར་གདའ། །ཡར་རྫོགས་པའི་སངས་རྒྱས་ཐོབ་གྱུར་ཀྱང་། །ད་ངོ་བོ་བཟང་དུ་མ་སོང་མཚར། །མར་མནར་མེད་ཀྱི་གནས་སུ་བསྲེགས་གྱུར་ཀྱང་། །ད་ངོ་བོ་ངན་དུ་མ་སོང་མཚར། །ལས་དགེ་སྡིག་ཚབས་ཆེན་ཅི་བསགས་ཀྱང་། །དོན་ངོ་བོ་ལ་གོས་པ་མེད་པ་མཚར། །སྣང་ཞིང་སྲིད་པའི་ཆོས་རྣམས་ལ། །ཁོས་མ་ཁྱབ་ཅི་ཡང་མེད་པ་མཚར། །དེ་གདོད་ནས་ལྷུན་གྱིས་གྲུབ་པ་ལ། །དེ་སུས་ཀྱང་བྱས་པ་མེད་པ་མཚར། །གཟུགས་ངོ་བོ་ཁ་དོག་མ་གྲུབ་ཀྱང་། །ཆོས་ཀུན་གྱི་འབྱུང་གནས་ཡིན་པ་མཚར། །ད་དེ་ཡི་གནས་ལུགས་རྟོགས་པ་ལ། །ད་ལྟ་བ་མིང་དུ་བཏགས་པ་མཚར། །དེས་འཕགས་བཞི་མ་ལུས་བསྐྱེད་པས་ན། །ཡུམ་ཆེན་མོའི་མིང་དུ་བཏགས་པ་མཚར། །དེ་ངོ་བོ་སྟོང་པ་ཡིན་མོད་ཀྱི། །རྣམ་པ་ཅིར་ཡང་འཆར་བ་མཚར། །དེ་སྣང་བ་དང་
སྟོང་པ་དབྱེར་མེད་པས། །གཞི་དབུ་མའི་མིང་དུ་བཏགས་པ་མཚར། །གཅིག་པ་བཅུ་དང་མཚར་བ་བཅུ། །མཚམས་དམ་པོ་འདག་ཆར་བྱེད་པའི་དུས། །གདོན་དང་སྟོང་ཉམས་མི་འབྱེད་པའི། །ཉམས་མཚར་པོ་ཅིག་ཤར་ནས་སྨྲས་པ་ཡིན། །ཤུ་བྷཾ།། ༈ །།ན་མོ་གུ་རུ་ཌཱཀི་ཡེ། བླ་མ་ཡི་དམ་དབྱེར་མེད་པའི། །གསང་བ་ཡེ་ཤེས་ཞབས་ལ་འདུད། །ཚེ་འདིའི་འདུན་མ་བློས་བཏང་ནས། །རྩེ་གཅིག་སྒྲུབ་པ་བྱེད་པའི་ཚེ། །ནུབ་གཅིག་འཁྲུལ་པའི་རྨི་ལམ་ན། །གྲོང་ཁྱེར་བསམ་གྱིས་མི་ཁྱབ་པ། །གྲོང་མཐར་རྒྱ་མཚོ་ཆེན་པོ་འབབ། །སྲུང་འགག་ཤ་དང་དྲི་ཆེན་སོགས། །ནང་གི་བདུད་རྩི་རྣམ་ལྔ་ལ། །མཁའ་ལྡིང་ཀུ་ཀུའི་ཚོགས་ཀྱིས་རོལ། །དེ་དབུས་ཡེ་ཤེས་ཏྟཀི་མ། །འདི་ཡིན་ངོས་བཟུང་མེད་པ་རུ། །སྦས་པའི་ཚུལ་དུ་བཞུགས་སོ་སྐད། །བདག་གིས་དད་པས་ཀུན་ཏུ་བཙལ། །གྲོང་ཁྱེར་དེ་ཡི་དཀྱིལ་སྟོད་ན། །ཁང་བཟང་ཆུང་ངུགཅིག་གི་ནང་། །ཡེ་ཤེས་མཁའ་འགྲོ་བཞུགས་སོ་སྐད། །ནང་དུ་ཕྱིན་པས་མཇལ་བའི་ཚེ། །སྐུ་ཁ་དོག་དབྱིབས་སུ་མ་གྲུབ་པའི། །ལུས་མེད་ཡེ་ཤེས་མཁའ་འགྲོ་མ། །
གསུང་ལྷང་ལྷང་ཆོས་སྒྲ་སྒྲོག་པ་མཇལ། །བདག་ལ་ཆོས་འབྲེལ་གནང་དགོས་ཞུས། །དེ་ཚེ་ཡེ་ཤེས་མཁའ་འགྲོ་མས། །སེང་གདོང་ཌཱཀི་གཏོར་དབང་ནི། །མངོན་སུམ་ལྟ་བུར་གསལ་བར་གནང་། །ཞལ་ཕྱག་གསལ་བར་མ་མཐོང་ཡང་། །གཏོར་མ་མགོ་ལ་འབྱོན་པར་སྣང་། །སྐུ་གསུང་ཐུགས་ཡོན་ཕྲིན་ལས་ཀྱི། རྗེས་གནང་ལྔ་པོ་སོ་སོ་ལ། །གཏོར་མ་ལྷ་རུ་གསལ་བ་ཡི། །དཔྲལ་བ་མགྲིན་པ་ཐུགས་ཀ་དང་། །ལྟེ་བ་གསང་གནས་ལྔ་པོ་ནས། །སེང་གདོང་ལྷ་མོའི་སྐུ་ཆུང་ངུ་། །དཀར་དམར་མཐིང་སེར་ལྗང་གུའི་ཚོགས། །སྤྲོས་ནས་རང་གི་གནས་ལྔར་བསྟིམ། །དེ་འདྲའི་དམིགས་པ་སྤྱོད་པའི་ཚེ། །མངོན་སུམ་ལྟ་བུར་གྱུར་པ་རྨིས། །རྨི་ལམ་འཁྲུལ་པའི་སྣང་བ་ལ། །བློ་གཏད་མཆོག་འཛིན་མེད་ན་ཡང་། །ཉམས་མཚར་མཚར་འདྲ་ནས་བྲིས་པ་ཡིན། །ཤུ་བྷཾ།། ༈ །།ན་མོ་མ་ཧཱ་མུ་དྲ་ཡ། རྗེ་བླ་མ་རྣམས་ལ་གསོལ་བ་འདེབས། །བཀའ་དྲིན་ཅན་གྱིས་བྱིན་གྱིས་རློབས། །ཆོས་རྣམས་རྨི་ལམ་ལྟ་བུ་སྟེ། །རྨི་ལམ་ཉིད་ནའང་དམ་ཆོས་སྨྲ། །ཨེ་མ་ངོ་མཚར་མི་ཆེའམ། །ངོ་མཚར་བ་
བླ་མ་རྗེ་ཡི་དྲིན། །བལྟ་རྒྱུ་ཡོད་ན་ལྟ་བ་མིན། །ལྟ་བློ་ཡོད་ན་ལྟ་བ་མིན། །ལྟ་བ་བློ་ལས་འདས་པ་ཡིན། །བསྒོམ་རྒྱུ་ཡོད་ན་སྒོམ་པ་མིན། །བསྒོམ་བློ་ཡོད་ན་སྒོམ་པ་མིན། །བསྒོམ་པ་ཡིད་དཔྱོད་བྲལ་བ་ཡིན། །སྤྱོད་རྒྱུ་ཡོད་ན་སྤྱོད་པ་མིན། །སྤྱོད་བློ་ཡོད་ན་སྤྱོད་པ་མིན། །སྤྱོད་པ་བླང་དོར་བྲལ་བ་ཡིན། །ཐོབ་རྒྱུ་ཡོད་ན་འབྲས་བུ་མིན།་ཐོབ་བློ་ཡོད་ན་འབྲས་བུ་མིན། །འབྲས་བུ་སྐུ་གསུམ་རང་ཆས་ཡིན། །བལྟ་བྱ་ལྟ་བྱེད་རྣམ་རྟོག་ཡིན། །རྣམ་རྟོག་མ་རིག་ཆེན་པོ་ཡིན། །གྲུབ་མཐའི་དགག་བཞག་དགོས་རྒྱུ་ཆུང་། །དོན་སྤྲོས་བྲལ་རྟོགས་ན་ལྟ་བ་ཡིན། །བསྒོམ་བྱ་སྒོམ་བྱེད་རྣམ་རྟོག་ཡིན། །རྣམ་རྟོག་མ་རིག་ཆེན་པོ་ཡིན། །གེགས་སེལ་བོགས་འདོན་དགོས་རྒྱུ་ཆུང་། །ཡེངས་མེད་བསྐྱངས་ན་སྒོམ་པ་ཡིན། །དཔྱད་བྱ་དཔྱོད་བྱེད་རྣམ་རྟོག་ཡིན། །རྣམ་རྟོག་མ་རིག་ཆེན་པོ་ཡིན། །བླང་དོར་སྲུང་མཚམས་དགོས་རྒྱུ་ཆུང་། །ཚུལ་འཆོས་བྲལ་ན་སྤྱོད་པ་ཡིན། །ཐོབ་བྱ་ཐོབ་བྱེད་རྣམ་རྟོག་ཡིན། །རྣམ་རྟོག་མ་རིག་ཆེན་པོ་ཡིན། །ས་ལམ་རྩི་བགྲང་དགོས་རྒྱུ་ཆུང་། །མངོན་དུ་གྱུར་ན་འབྲས་བུ་ཡིན། །རྨི་ལམ་འཁྲུལ་པས་རྐྱེན་
བྱས་ནས། །ཁ་སྦད་ཁ་པོ་ཆོས་པ་མཐོལ་ལོ་བཤགས། །ཞེས་པ་རྨི་ལམ་དུ་ཆོས་གཏམ་འགའ་བྱས་པས་བསྒོམ་རྒྱུ་ཡོད་ན་སྒོམ་མིན། བསྒོམ་སྙམ་པའི་བློ་ཡོད་ན་སྒོམ་མིན།ཞེས་སོགས་སྨྲས་པ་རྨིས་ཤིང་ཕྱིར་ནངས་ནས་དེ་དང་མཐུན་པའི་ཉམས་ཤིག་སྐྱེས་པ་ལ་བརྟེན་ནས་སྨྲས་པའོ།། ༈ །།ན་མོ་གུ་རུ་བྷ། གནས་འོག་མིན་ཆོས་དབྱིངས་ཕོ་བྲང་ནས། །རྗེ་རྒྱལ་བའི་སྤྱི་གཟུགས་རྡོ་རྗེ་འཆང་། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །ཤར་ཟ་ཧོར་ནོར་བུའི་དགོན་པ་ན། །དཔལ་ཏེ་ལོ་སངས་རྒྱས་འགྲོ་བའི་མགོན། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །བྱང་པུལླ་ཧ་རིའི་དགོན་པ་ན། །རྗེ་ནཱ་རོ་པཎ་ཆེན་ཐུགས་རྗེ་ཅན། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །ལྷོ་གྲོ་བོ་ལུང་གི་དགོན་པ་ན། །ཕ་སྒྲ་བསྒྱུར་ལོ་ཙཱ་བཀའ་དྲིན་ཅན། །
ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །ནུབ་ལ་ཕྱི་གངས་ཀྱི་ར་བ་ན། །མ་མཁའ་འགྲོའི་དབང་ཕྱུག་མི་ལ་རྗེ། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །ཤར་དྭགས་ལྷ་དཔལ་གྱི་སྒམ་པོ་ན། །སྐྱབས་རྒྱལ་བས་ལུང་བསྟན་ལྷ་རྗེ་བ། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །མཚུར་མདོ་བོ་ལུང་གི་དགོན་པ་ན། །མཚན་སྙན་པར་གྲགས་པའི་དུས་གསུམ་མཁྱེན། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །གནས་སྤྱི་གཙུག་པད་ཟླའི་གདན་སྟེང་ན། །དྲིན་འཁོར་མེད་རྩ་བརྒྱུད་བླ་མའི་ཚོགས། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །ཁྱེད་དབང་བཅུའི་
མངའ་བདག་ཡིན་ལགས་པས། །ཚེ་སྔོན་གྱི་ལས་ངན་ཡོད་ན་ཡང་། །དུས་དེ་རིང་ཁྱེད་ཀྱིས་བཟློག་ཏུ་གསོལ། །རྐྱེན་གློ་བུར་གྱི་བར་ཆད་མཆིས་ན་ཡང་།དུས་དེ་རིང་ཞི་བར་མཛད་དུ་གསོལ། །ཞེས་པ་འདི་དག་གཞན་རྐྱེན་ལ་བརྟེན་པའི་འཇིགས་སྐྲག་འགའ་བྱུང་དུས། ཡི་དམ་ལ་གསོལ་བ་བཏབ་པས་རྨི་ལམ་ན། ཤེར་ཕྱིན་རྒྱས་པ་ཡིན་སྙམ་པའི་གླེགས་བམ་མང་པོ་འདུག་པ་གཅིག་ཞལ་ཕྱེས་པས་མཐིང་ཤོག་ལ་དངུལ་གྱིས་བྲིས་པའི་ནང་ན། རྡོ་རྗེ་འཆང་ཏེ་ལོ་ནཱ་རོ་མར་པ་མི་ལ་དྭགས་པོ་རྣམས་ལ་གསོལ་བ་བཏབ་ན། རྒྱལ་པོའི་འཇིགས་པ་སོགས་འཇིགས་པ་ཐམས་ཅད་སྐྱོབ་པར་འགྱུར་རོ། །ཟེར་བ་གཅིག་འདུག་པས་མར་མི་དྭགས་པོ་སོགས་གསལ་པོ་འདི་འདྲ་སྟོན་པས་གསུངས་ནས་གདའ་ཨང་། སྙམ་ནས་དད་པ་ཆེར་སྐྱེས་པ་རྨིས་པ་ལ་བརྟེན་ནས་རཱ་ག་ཨ་སྱས་གསོལ་བ་བཏབ་པའོ།། །། ན་མོ་གུ་རུ། ཕྱི་ལྟར་མར་པ་ལོ་ཙཱ་བ། །ནང་ལྟར་ཌོམྦི་ཧེ་རུ་ཀ །གསང་བ་དགྱེས་མཛད་ཧེ་རུ་ཀ །གསོལ་བ་འདེབས་སོ་བྱིན་གྱིས་རློབས། །ཕྱི་ལྟར་སི་ཏུ་སྤྲུལ་པའི་སྐུ། །ནང་ལྟར་འགྲོ་མགོན་རས་པ་ཆེ། །གསང་བ་རྡོ་རྗེ་བེར་ནག་ཅན། །གསོལ་བ་འདེབས་སོ་བྱིན་གྱིས་རློབས། །
ཕྱི་ལྟར་ཆོས་ཀྱི་རྒྱལ་མཚན་པ། །ནང་ལྟར་རྗེ་བཙུན་རི་མགོ་བ། །གསང་བ་དམ་ཅན་རྒྱ་མཚོའི་གཙོ། །གསོལ་བ་འདེབས་སོ་བྱིན་གྱིས་རློབས། །ཕྱི་ལྟར་རྒྱལ་སྲས་སྨྱུ་གུའི་ཚུལ། །ནང་ལྟར་ཆོས་ཀྱི་གོ་ཆ་སྟེ། །གསང་བ་དཔལ་ལྡན་མགོན་པོ་ཉིད། །གསོལ་བ་འདེབས་སོ་བྱིན་གྱིས་རློབས། །རྒྱལ་བ་རྒྱ་མཚོ་སྤྱན་རས་གཟིགས། །རྒྱ་མཚོ་ལྔ་ཡི་དཀྱིལ་འཁོར་གྱི། །འོག་ཕྱོགས་དམ་ཅན་རྒྱ་མཚོ་ཡི། །གཙོ་བོ་རྡོ་རྗེ་བེར་ཅན་ལ། །གསོལ་བ་འདེབས་སོ་བྱིན་གྱིས་རློབས། །བསྟན་དང་རྣལ་འབྱོར་བདག་ཅག་གི །བར་ཆད་ཐམས་ཅད་བསལ་དུ་གསོལ། །ཕྲིན་ལས་ཐམས་ཅད་བསྒྲུབ་ཏུ་གསོལ། །སྔོན་གྱི་ཐུགས་དམ་མ་གཡེལ་ཞིག །རྟགས་དང་མཚན་མ་དངོས་སུ་སྟོན། །ལེ་ལོ་བཏང་སྙོམས་མ་མཛད་ཅིག །དུས་ལ་བབ་བོ་ས་མ་ཡ། །ཞེས་པ་འདི་ནུབ་གཅིག་རྨི་ལམ་ན་སི་ཏུ་སྤྲུལ་པའི་སྐུ་དང་མཇལ་ནས་མགོན་པོའི་སྲུང་འཁོར་གྱི་སྔགས་ལུང་འདྲ་བ་གཅིག་གནང་ལས་ཚོགས་དཔེ་ཆ་གཅིག་གཏད་ནས། དེ་མ་ཐག་སྤྲུལ་སྐུ་ཉིད་མགོན་པོ་བེར་ནག་ཅན་ཕྱག་བཞི་ཡོད་པ་གཅིག་ཏུ་སྤྲུལ་ནས་བར་སྣང་ན་བཞུགས་པ་གཅིག་མཇལ་བ་ལ་བརྟེན་ནས་ཨ་རཱ་གས་སྨྲས་པའོ།།
ཤོག་ལྷེབ་ ༡༧ ནས་ ༡༠༤ བར།
༈ །།ན་མོ་ལོ་ཀེ་ཤྭ་ར་ཡེ། བདེ་བ་ཅན་གྱི་ཞིང་ཁམས་ན། །ཆོས་སྐུ་སྣང་བ་མཐའ་ཡས་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །པོ་ཊ་ལ་ཡི་གནས་མཆོག་ན། །ལོངས་སྐུ་ཐུགས་རྗེ་ཆེན་པོ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །ཟངས་མདོག་དཔལ་རིའི་རྩེ་མོ་ན། །སྤྲུལ་སྐུ་པདྨ་འབྱུང་གནས་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །ཨོ་རྒྱན་སྤྲུལ་པའི་གཙུག་ལག་ན། །མ་གཅིག་གྲུབ་པའི་རྒྱལ་མོ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལཾ། །ཤིང་སྤང་གསེར་གྱི་མཎྜལ་ན། །ཏེ་པུ་གསང་སྔགས་སྡོང་པོ་ལ། །མོས་གུས་དྲག་པོས་
གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །ལྕང་ལོ་ཅན་གྱི་གནས་མཆོག་ན། །རས་ཆུང་རྡོ་རྗེ་གྲགས་པ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །རྩ་རླུང་བདེ་དྲོད་གཞལ་ཡས་ན། །བླ་མ་ཟངས་རི་རས་པ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །འོག་མིན་ཀརྨའི་གནས་མཆོག་ན། །འགྲོ་མགོན་སངས་རྒྱས་རས་ཆེན་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །སྟེང་ཕྱོགས་དགའ་ལྡན་ལྷ་ཡུལ་ན། །རྒྱལ་སྲས་སྤོམ་བྲག་ཆེན་པོ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་
སྩོལ། །སྣང་སྲིད་ཟིལ་གནོན་ཕོ་བྲང་ན། །གྲུབ་ཆེན་ཀརྨ་པཀཱི་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །གཉེན་རས་སང་གྷ་ལཀྵ་དང་། །སེམས་དཔའ་རང་བྱུང་རྡོ་རྗེ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །མཁས་བཙུན་རིན་ཆེན་རྒྱལ་མཚན་དང་། །ཡ་མཁས་གྲུབ་མངྒ་ཀེ་ཏུ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །རྗེ་བཙུན་རིཏྣ་བྷ་དྲ་དང་། །སྤྲུལ་སྐུ་མཐོང་བ་དོན་ལྡན་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །བྱང་སེམས་དཔལ་འབྱོར་དོན་གྲུབ་དང་། །རྒྱལ་དབང་ཆོས་གྲགས་རྒྱ་མཚོ་ལ། །མོས་གུས་དྲག་པོས་གསོལ་བ་
འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །གྲུབ་ཆེན་མཉན་པ་རས་ཆེན་དང་། །ཀུན་མཁྱེན་མི་བསྐྱོད་རྡོ་རྗེ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །གར་དབང་དཀོན་མཆོག་ཡན་ལག་དང་། །རྗེ་བཙུན་དབང་ཕྱུག་རྡོ་རྗེ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །སྒར་ཆེན་ཆོས་ཀྱི་ཕོ་བྲང་ན། །དྲིན་ཆེན་ཆོས་ཀྱི་དབང་ཕྱུག་ལ། །མོས་གུས་དྲག་པོས་གསོལ་བ་འདེབས། ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །དཔལ་ལྡན་རྩ་བའི་བླ་མ་མཆོག །ལུང་རིགས་བསྟན་པའི་ཉི་མ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །རང་
ལུས་སྣང་སྟོང་གཟུགས་ཀྱི་སྐུ། །ཡི་དམ་རྒྱལ་བ་རྒྱ་མཚོ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །ན་ཚ་བདེ་སྟོང་ཆོས་ཀྱི་སྐུ། །མཁའ་འགྲོ་གསང་བ་ཡེ་ཤེས་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །རྐྱེན་ངན་རིག་སྟོང་ཆོས་ཀྱི་སྐུ། །མགོན་པོ་བར་ཆད་ཀུན་སེལ་ལ། །མོས་གུས་དྲག་པོས་གསོལ་བ་འདེབས། །ནད་གདོན་བར་ཆད་ཞི་བར་མཛོད། །དུས་མིན་འཆི་བ་བཟློག་ཏུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །ཚེ་རབས་བསྐལ་པ་གྲངས་མེད་ནས། །ཆང་དང་ཕབས་ཀྱི་རྫས་སྦྱོར་དང་། །ཐུགས་ཀྱི་དམ་ཚིག་ཉམས་པ་སོགས། །བརྒྱལ་ཞིང་འབོག་པའི་ལས་སྒྲིབ་རྣམས། །གང་བསགས་ཐམས་ཅད་མཐོལ་ཤིང་བཤགས། །ཕྱིན་ཆད་བགྱིད་པར་མ་གྱུར་ཅིག །དབང་བཅུའི་མངའ་བདག་སྤྱན་རས་གཟིགས། །མི་དགེའི་ལས་སྒྲིབ་བསལ་ནས་ཀྱང་། །དགེ་བའི་འབྲས་
བུས་གསོལ་བཏབ་ནས། །བརྒྱལ་ཞིང་འབོག་པའི་ནད་གདོན་རྣམས། །ཞི་ཞིང་མེད་པར་མཛད་དུ་གསོལ། །ལུས་སེམས་བདེ་བར་བྱིན་གྱིས་རློབས། །ཞེས་པ་འདི་རང་གི་ཉེ་གནས་དོན་གྲུབ་ལ་བརྒྱལ་ནད་དྲག་པོ་ཞིག་བྱུང་ནས་ཞག་རེ་རེ་ལ་ཡང་ལན་བཅུ་གཉིས་ཙམ་བརྒྱལ་ནས་འགྲོ་བ་གཅིག་བྱུང་ནས་ཐབས་གང་གིས་ཀྱང་མ་ཕན། འདི་སྔོན་ལས་ཀྱི་འབྲས་བུ་ཅི་ཡིན་ནམ་སྙམ་ནས་ནམ་སྲོད་ཙམ་ལ་གསོལ་འདེབས་འདི་བྱུང་རྒྱལ་དུ་སྨྲས་ནས། ཐུགས་རྗེ་ཆེན་པོའི་ནད་པ་བྱིན་རླབས་ཀྱི་དམིགས་པ་གནད་དུ་བསྣུན་པས། ཕྱིར་ནངས་ཅུང་ཟད་ཙམ་བདེ་བ་བྱུང་ངོ་། །ཞེས་པ་རཱ་ག་ཨ་སྱས་སོ།། ༈ །།ན་མོ་ཤྲཱི་ཙཀྲ་སཾ་ཝ་ར་ཡེ། ཟངས་མདོག་དཔལ་རིའི་རྩེ་མོ་ནས། །སྣང་སྲིད་ཟིལ་གནོན་སྤྲུལ་པའི་སྐུ། །ཨོ་རྒྱན་པདྨ་འབྱུང་གནས་ལ། །གསོལ་བ་འདེབས་སོ་བྱིན་གྱིས་རློབས། །སྣང་སྲིད་དབང་གི་དངོས་གྲུབ་སྩོལ། །བདེ་ཆེན་འབར་བའི་དཀྱིལ་འཁོར་ན། །དབང་མཆོག་པདྨ་ཧེ་རུ་ཀ །བཅོམ་ལྡན་བདེ་མཆོག་འཁོར་ལོ་ལ། །གསོལ་བ་འདེབས་སོ་བྱིན་གྱིས་རློབས། །སྣང་སྲིད་དབང་གི་དངོས་གྲུབ་སྩོལ། །ཨོ་རྒྱན་སྤྲུལ་པའི་གཞལ་ཡས་ན། །དབང་གི་རང་བཞིན་ཌཱཀི་མ། །
ཡུམ་མཆོག་རྡོ་རྗེ་ཕག་མོ་ལ། །གསོལ་བ་འདེབས་སོ་བྱིན་གྱིས་རློབས། །སྣང་སྲིད་དབང་གི་དངོས་གྲུབ་སྩོལ། །ཉི་ཤུ་རྩ་བཞིའི་གནས་མཆོག་ན། །ཐོགས་མེད་རྫུ་འཕྲུལ་སྟོབས་དང་ལྡན། །རིགས་བཞིའི་དཔའ་བོ་མཁའ་འགྲོ་ལ། །གསོལ་བ་འདེབས་སོ་བྱིན་གྱིས་རློབས། །སྣང་སྲིད་དབང་གི་དངོས་གྲུབ་སྩོལ། །ཁྱེད་ལ་གསོལ་བ་བཏབ་པའི་མཐུས། །ཁམས་གསུམ་དབང་དུ་སྡུད་པ་དང་། །སྲིད་གསུམ་ཟིལ་གྱིས་གནོན་པ་དང་། །བསམ་པ་ཡིད་བཞིན་འགྲུབ་པར་མཛོད། །སྣང་སྲིད་དབང་གི་དངོས་གྲུབ་སྩོལ། །ཞེས་པ་འདི་རྒྱལ་ཟླའི་ཚེས་བཅུའི་ནུབ་མོ་དགོས་པ་ཅུང་ཟད་ལ་བརྟེན་ནས་བདེ་མཆོག་དམར་པོ་ལ་གསོལ་བ་འདི་བཏབ་པས། དོན་དེ་འགྲུབ་པའི་ལྟས་གསལ་བར་མཐོང་ཞིང་ཐོག་ཏུ་བབ་པའོ། །ཀརྨ་ཨ་རཱ་གས་སོ།། །།ན་མོ་དྷི་པཾ་ཀ་ར་ཨུ་པ་སི་ཀ་ཡེ། བདེ་བ་ཅན་ན་རྒྱལ་བ་ཚེ་དཔག་མེད། །འཕགས་པའི་ཡུལ་ན་པཎ་ཆེན་ཨ་ཏི་ཤ །དགའ་ལྡན་གནས་ན་ནམ་མཁའ་དྲི་མེད་ཅེས། །གངས་རིའི་ཁྲོད་འདིར་ཞྭ་དམར་ཅོད་པན་ཅན། །ཆོས་ཀྱི་དབང་ཕྱུག་ཞབས་ལ་གསོལ་བ་འདེབས། །རི་བོ་ཏ་ལའི་རྩེ་
ན་སྤྱན་རས་གཟིགས། །དབུས་རུ་བྱང་ན་འབྲོམ་སྟོན་རྒྱལ་བའི་མཚན། །ཕུ་ཆུང་བ་དང་སྐྱེར་སྒང་བ་ལ་སོགས། །གང་འདུལ་སྤྲུལ་པ་ཕྱོགས་བཅུར་འགྱེད་མཛད་ཅིང་། །དེང་སང་ཞིང་འདིར་སྤྲུལ་པའི་སྐུ་སྟོན་པ། །ཆོས་དབྱིངས་རྡོ་རྗེའི་ཞབས་ལ་གསོལ་བ་འདེབས། །ཤེས་རབ་རྣམ་གཉིས་རྒྱལ་མཚན་རྣམ་གསུམ་སོགས། །བརྒྱུད་པའི་བླ་མ་ཐུགས་རྗེ་ཆེ་རྣམས་དང་། །བཀའ་གདམས་ལྷ་བཞི་ཡུམ་ཆེན་རྡོ་རྗེ་འཆང་། །བྱམས་པ་ཀླུ་སྒྲུབ་ལ་སོགས་བྱང་ཆུབ་ཀྱི། །ཐིག་ལེ་བཅུ་དྲུག་ལྷ་ལ་གསོལ་བ་འདེབས། །སྐྱབས་གནས་དམ་པ་དཀོན་མཆོག་རིན་ཆེན་གསུམ། །ཡི་དམ་གདམས་པ་བཀའ་གདམས་ལྷ་མཆོག་བཞི། །དམ་ཆོས་གདམས་པ་སྡེ་སྣོད་རིན་ཆེན་གསུམ། །རྒྱལ་བ་རྒྱ་མཚོའི་གདམས་ཁ་མ་ནོར་བའི། །ཆོས་བདུན་པོ་དེ་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་དང་བདག་གི་བརྒྱུད་པར་བཅས་པ་རྣམས། །ཁེ་ལས་ཉེན་ཆེའི་ཆོས་ཀྱིས་མི་བསླུ་བར། །ཉན་ཆུང་ཁེ་ཆེའི་དམ་ཆོས་སྡེ་སྣོད་གསུམ། །ཚུལ་བཞིན་ཉམས་སུ་ལོན་པར་བྱིན་གྱིས་རློབས། །སྙིང་རྗེ་མེད་ཅིང་ཁྲོ་གཏུམ་ཀོ་ལོང་ཅན། །
འཇིག་རྟེན་ལྷ་ལ་སྐྱབས་སུ་མི་འགྲོ་བར། །ཐུགས་རྗེ་གཡེལ་མེད་འགྲོ་ལ་རྟག་ཏུ་གཟིགས། །འཕྲལ་བདེ་ཕུགས་སུ་སྐྱོབ་པའི་ལྷ་ཚོགས་བཞི། །འབྲལ་མེད་སྐྱབས་སུ་འཛིན་པར་བྱིན་གྱིས་རློབས། །རབ་འབྱམས་མདོ་རྒྱུད་ཀུན་ཏུ་གསུངས་པའི་ལྷ། །ལྷ་རེ་སྔགས་རེ་སྤང་བླང་མི་བྱེད་པར། །ཐམས་ཅད་ཐིག་ལེའི་དཀྱིལ་འཁོར་གཅིག་བསྡུས་ནས། །རྗེས་དྲན་ལྔ་དང་ལྡན་པར་ཉམས་ལེན་པའི། །བཀའ་གདམས་བྱིན་རླབས་འཇུག་པར་བྱིན་གྱིས་རློབས། །བརྟན་མ་བཅུ་གཉིས་དཀར་པོ་བརྒྱད་ཅུ་སོགས། །སྲུང་མ་རྣམས་ཀྱིས་རྟག་ཏུ་གྲོགས་མཛད་ཅིང་། །རྣམ་ཐར་གཙང་མ་བསླབ་པ་གསུམ་ལྡན་པའི། །བདག་གི་བུ་སློབ་དཔག་མེད་རབ་འཕེལ་ནས། །རྒྱལ་བའི་བསྟན་པ་ཉིན་མོར་བྱེད་པ་ཡི། །དངོས་གྲུབ་མཆོག་དེ་བདག་ལ་བསྩལ་དུ་གསོལ། །ཞེས་ཐིག་ལེ་བཅུ་དྲུག་གི་སྒྲུབ་པ་ཚར་བའི་ཉིན་མོ་རྗེ་བླ་མའི་དུས་མཆོད་ལ་དམིགས་ནས་སྨྲས་སོ།། །།ན་མོ་གུ་རུ་བྷྱཿ ཐོག་མའི་མགོན་པོ་ཀུན་བཟང་རྡོ་རྗེ་འཆང་། །རང་བཞིན་ལྷུན་གྲུབ་ངོ་བོ་ཉིད་ཀྱི་སྐུ། །སྨྲ་བསམ་བརྗོད་བྲལ་ཤེས་རབ་ཕ་རོལ་ཕྱིན། །བླ་མ་
ཆོས་ཀྱི་སྐུ་ལ་གསོལ་བ་འདེབས། །ངེས་པ་ལྔ་ལྡན་འདྲེན་པ་འོད་དཔག་མེད། །རིགས་ལྔ་ཚེ་ཡི་བདག་པོ་བཅོམ་ལྡན་འདས། །རྒྱལ་བ་རྒྱ་མཚོ་གསང་འདུས་ཐུགས་རྗེའི་ལྷ། །བླ་མ་ལོངས་སྤྱོད་རྫོགས་ལ་གསོལ་བ་འདེབས། །མི་མཇེད་འཛམ་གླིང་བྱེ་བ་ཕྲག་བརྒྱ་ན། །མདོ་སྔགས་བསྟན་པ་ཟུང་དུ་འཇུག་པའི་ཕྱིར། །ཤཱཀ་ཐུབ་པད་འབྱུང་བྱེ་བ་ཕྲག་བརྒྱར་སྤྲུལ། །བླ་མ་སྤྲུལ་པའི་སྐུ་ལ་གསོལ་བ་འདེབས། །རྒྱལ་བའི་བསྐྱེད་ཡུམ་འཕགས་མ་སྒྲོལ་མ་ཉིད། །གང་འདུལ་སྐུར་སྟོན་མ་གཅིག་མཚོ་རྒྱལ་མ། །མནྡ་ར་བ་ཤཱཀྱ་དེ་བློམ་སོགས། །ཡེ་ཤེས་མཁའ་འགྲོའི་ཚོགས་ལ་གསོལ་བ་འདེབས། །མཁན་པོ་བྱང་ཆུབ་སེམས་དཔའ་ཞི་བ་འཚོ། །བི་མ་མི་ཏྲ་ནཱ་ག་རྫུ་ན་དང་། །ཧཱུཾ་ཆེན་ཀ་ར་བཱ་སུ་དྷ་ར་སོགས། །རྒྱ་བལ་རིག་འཛིན་རྣམས་ལ་གསོལ་བ་འདེབས། །མངའ་བདག་ཡབ་སྲས་ཉང་བན་ཏིང་འཛིན་བཟང་། །སྐ་ཅོག་ཞང་དང་རྗེ་འབངས་ཉི་ཤུ་ལྔ། །དམར་གཡོ་གཙང་གསུམ་དགོངས་པ་རབ་གསལ་སོགས། །བོད་ཀྱི་རིག་འཛིན་རྣམས་ལ་གསོལ་བ་འདེབས། །ཟབ་གཏེར་བདག་པོ་ཆོས་རྒྱལ་རཏྣ་གླིང་། །ཉང་དང་ཆོས་དབང་འཇའ་ཚོན་
སྙིང་པོ་དང་། །དྲི་མེད་སྡེ་ལྔ་གླིང་པ་བརྒྱད་ལ་སོགས། །གཏེར་སྟོན་སྤྲུལ་སྐུ་རྣམས་ལ་གསོལ་བ་འདེབས། །རྒྱལ་བ་རང་བྱུང་མཚོ་སྐྱེས་རྡོ་རྗེའི་ཞབས། །ཀུན་མཁྱེན་འབྲུག་ཆེན་ཀུན་དགའ་དཔལ་འབྱོར་དང་། །སྤྲུལ་པའི་ཆོས་རྒྱལ་ཀུན་དགའི་མཚན་ཅན་སོགས། །ཆོས་བདག་སྐྱེས་མཆོག་རྣམས་ལ་གསོལ་བ་འདེབས། །དབང་ཆེན་སྤྲུལ་པ་རྒྱལ་སྲས་ཚེ་དབང་གྲགས། །སྒྲུབ་བརྒྱུད་བསྟན་པའི་རྒྱལ་མཚན་ངག་དབང་གྲགས། །ཀུན་དགའ་གྲགས་པ་ཀུན་དགའ་བསྟན་འཛིན་སོགས། །གདུང་རྒྱུད་དྲི་མེད་་རྣམས་ལ་གསོལ་བ་འདེབས། །ལུང་ནས་བསྟན་པའི་སྐྱེས་བུ་ཤཱཀྱའི་མཚན། །ཨོ་རྒྱན་བསྟན་པའི་གསལ་བྱེད་མཁར་པའི་དྲུང་། །པདྨའི་མཚན་དང་མདྨ་དོན་ཡོད་མཚན། །ལས་ཆེན་སློབ་བརྒྱུད་རྣམས་ལ་གསོལ་བ་འདེབས། །རཏྣ་དབོན་སྲས་ཆོས་ཀྱི་མཛོད་འཛིན་པ། །གཏེར་སྟོན་ཆེན་པོ་ལས་འཕྲོ་གླིང་པ་དང་། །འཇིག་རྟེན་མགོན་པོ་སངས་རྒྱས་ཕུན་ཚོགས་སོགས། །ཉེ་བརྒྱུད་བླ་མ་རྣམས་ལ་གསོལ་བ་འདེབས། །སྐྱོན་ཡོན་གཉིས་ལྡན་སོ་སྐྱེའི་སློབ་དཔོན་ཡང་། །རྒྱལ་བ་ཀུན་བས་བཀའ་དྲིན་ཁྱད་པར་འཕགས། །ཡི་
དམ་དངོས་སུ་མོས་ན་དངོས་གྲུབ་མྱུར། །རྩ་བའི་བླ་མའི་ཞབས་ལ་གསོལ་བ་འདེབས། །སློབ་མས་མཆོད་དམ་དབང་བསྐུར་བྱེད་པའི་ཚེ། །དད་ལྡན་རྗེས་སུ་བཟུང་ཕྱིར་སངས་ལྟརྒྱས་རྣམས། །དེ་ཚེ་སློབ་དཔོན་ལུས་ལ་ཞུགས་པར་གསུངས། །ཤིན་ཏུ་ཉེ་བརྒྱུད་དེ་ལ་གསོལ་བ་འདེབས། །སྙིགས་དུས་གཏེར་ལ་མོས་པའི་སྐལ་ལྡན་རྣམས། །དེང་སང་གུ་རུའི་ཞལ་མཐོང་སྨོན་ལམ་བཏབ། །ཐམས་ཅད་ལས་ཅན་ཡིན་ཞེས་མཚོ་རྒྱལ་གསུངས། །མཆེད་གྲོགས་ཆོས་མཛད་རྣམས་ལ་གསོལ་བ་འདེབས། །གདོད་ནས་ལྷན་སྐྱེས་རང་སེམས་པདྨ་འབྱུང་། །རང་ཞལ་བལྟས་པས་སྒྲོ་འདོགས་ནང་ནས་ཆོད། །རྒྱུན་དུ་མཇལ་ན་ཚེ་གཅིག་སངས་རྒྱས་འགྲུབ། །རབ་ཏུ་ཉེ་བརྒྱུད་དེ་ལ་གསོལ་བ་འདེབས། །རང་ལུས་ཡང་གསང་དྲག་པོ་ཐོད་ཕྲེང་རྩལ། །སྙིང་དབུས་ཞི་བའི་ལྷ་ཚོགས་བཞི་བཅུ་གཉིས། །དུང་ཁང་ནང་ན་ཁྲག་འཐུང་ལྔ་བཅུ་བརྒྱད། །ཡི་དམ་ལྷ་ཚོགས་རྣམས་ལ་གསོལ་བ་འདེབས་། །མ་རིག་བདག་འཛིན་རུ་ཏྲ་དུར་ཁྲོད་བདག །རིག་པའི་ཡེ་ཤེས་ཆེ་མཆོག་ཧེ་རུ་ཀ །གཉིས་མེད་མ་ནིང་ཆོས་སྐྱོང་ཡོངས་ཀྱི་རྗེ། །བླ་མགོན་དབྱེར་མེད་དེ་ལ་
གསོལ་བ་འདེབས། །རྟོག་ཚོགས་འཁྲུལ་པའི་རང་གཟུགས་དྲེགས་པའི་ཚོགས། །རྒྱལ་བས་བཀའ་བསྒོས་རྣལ་འབྱོར་བུ་བཞིན་སྐྱོངས། །བསྟན་པའི་བཀའ་སྲུང་བཀའ་ཡི་བྱ་ར་བ། །དམ་ཅན་རྒྱ་མཚོའི་ཚོགས་ལ་གསོལ་བ་འདེབས། །དེ་ལྟར་པད་འབྱུང་བརྒྱུད་པར་བཅས་རྣམས་ལ། །ཁ་ཙམ་མིན་པར་སྙིང་ནས་གསོལ་བཏབ་པས། །སེམས་མེད་ནོར་བུས་དགོས་འདོད་སྩོལ་བ་ལྟར། །བྱིན་རླབས་ཤུགས་ཀྱིས་འབྱུང་བར་བྱིན་གྱིས་རློབས། །སྔོན་ཚེ་བསོད་ནམས་དཔག་མེད་བསགས་པའི་མཐུས། །ད་རེས་མི་ལུས་རིན་ཆེན་ཐོབ་དུས་འདིར། །རིན་ཆེན་གླིང་ནས་སྟོང་ལོག་མི་བྱེད་པར། །དལ་འབྱོར་སྙིང་པོ་ལོན་པར་བྱིན་གྱིས་རློབས། །སང་དང་ཕྱི་མ་གང་སྔ་མི་ཤེས་པས། །རྟག་ཏུ་འཆི་བ་དྲན་པའི་བརྩོན་འགྲུས་ཀྱིས། །འཆི་ཁ་བྲང་ལག་འཐབ་མོ་མི་འཆོར་བར། །བློ་བདེ་ཁོང་དུ་ཆུད་པར་བྱིན་གྱིས་རློབས། །ལས་འབྲས་བསླུ་བ་མེད་པའི་དོན་མཐོང་ནས། །ཤེས་བཞིན་ངན་སོང་གཡང་ལ་མི་འཆོར་བར། །སྡོམ་གསུམ་དྲི་མ་སྤང་བའི་སྙིང་རུས་ཀྱིས། །གཏན་བདེའི་བཙན་ས་ཟིན་པར་བྱིན་གྱིས་རློབས། །སྔོན་ཚེ་
གང་ནས་འོང་ཡང་མི་ཤེས་ཤིང་། །ཕྱི་མ་གར་སྐྱེ་ད་ལྟའི་ལས་ལ་རག །རིགས་དྲུག་གང་དུ་སྐྱེས་ཀྱང་སྡུག་བསྔལ་ཆེ། །སྐྱོ་བ་གཏིང་ནས་སྐྱེ་བར་བྱིན་གྱིས་རློབས། །བཙན་ཕྱུག་སྟོབས་འབྱོར་ཆེ་ཡང་རྟག་མི་ཐུབ། །ཚེ་འདིའི་བདེ་སྐྱིད་བསྒྲུབ་ཀྱང་འགྲུབ་པར་དཀའ། །འགྲུབ་ཀྱང་ཡུན་རིང་མི་གནས་མྱུར་དུ་འཇིག །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །ཕུང་པོ་ལྔ་པོ་དྲག་པོ་རིགས་ལྔ་དང་། །ཁམས་ལྔ་རྒྱལ་བའི་ཡུམ་ཆེན་མཁའ་འགྲོ་ལྔ། །འཁོར་ལོ་ལྔ་པོ་གོ་ཆའི་ལྷ་ཚོགས་ལྔ། །དབང་དྲག་པདྨ་འགྲུབ་པར་བྱིན་གྱིས་རློབས། །སྣོད་བཅུད་གདོད་ནས་ལྷ་དང་གཞལ་ཡས་ཁང་། །འབྱུང་འཇུག་རླུང་དང་སྒྲ་སྐད་སྔགས་ཀྱི་ཚིག །དྲན་རྟོགས་དུག་ལྔ་རང་གྲོལ་ཡེ་ཤེས་ལྔ། །ཡིན་ན་ཡིན་བཞིན་རྟོགས་པར་བྱིན་གྱིས་རློབས། །ཚེ་འདིར་ཚེ་རིང་ནད་མེད་དཔལ་འབྱོར་རྒྱས། །སྒྲུབ་ལ་བར་ཆད་ནམ་ཡང་མི་འབྱུང་ཞིང་། །ཆོས་བཞིན་སྤྱོད་པའི་གྲོགས་དང་ལྷན་ཅིག་ཏུ་།སྒྲུབ་པ་མཐའ་རུ་ཕྱིན་པར་བྱིན་གྱིས་རློབས། །ནམ་ཞིག་འདི་ནས་མི་གནས་འཕོ་བའི་ཚེ། །ཆགས་ཞེན་འཇིགས་སྐྲག་བསམ་པ་ཀུན་སྤངས་ནས། །མ་བཅོས་སོ་མའི་
ངང་དུ་བཞག་པ་ཡི། །འོད་གསལ་མ་བུ་འདྲེས་པར་བྱིན་གྱིས་རློབས། །འཆི་བ་ཆོས་ཀྱི་སྐུ་རུ་སངས་རྒྱས་ནས། །སླར་ཡང་བར་དོ་ལོངས་སྤྱོད་རྫོགས་པའི་སྐུ་། །མཚན་དཔེའི་རྒྱན་དང་ལྡན་པའི་ཡི་དམ་ལྷ། །དག་པའི་སྒྱུ་ལུས་འཆར་བར་བྱིན་གྱིས་རློབས། །ཡི་དམ་ལྷ་དང་དཔའ་བོ་མཁའ་འགྲོའི་ཚོགས། །སྣ་ཚོགས་མཆོད་པས་བདག་གི་མདུན་བསུ་ཞིང་། །ཨོ་རྒྱན་སྣང་བ་མཐའ་ཡས་ཞབས་དྲུང་དུ། །བརྫུས་སྐྱེས་སྤྲུལ་སྐུ་ཐོབ་པར་བྱིན་གྱིས་རློབས། །ཐུགས་རྗེའི་མངའ་བདག་པདྨ་འབྱུང་གནས་ལ། །ཡིད་གཉིས་ཐེ་ཚོམ་མེད་པར་གསོལ་བ་འདེབས། །ཆོས་དང་མཐུན་པའི་འདོད་དོན་མ་ལུས་པ། །འབད་མེད་ལྷུན་གྱིས་གྲུབ་པར་བྱིན་གྱིས་རློབས། །ཞེས་པ་འདི་ཀརྨ་ཡང་དག་གིས་བླ་མ་བརྒྱུད་པའི་གསོལ་འདེབས་ཚིག་མ་མང་ཞིག་དགོས་ཟེར་ནས། ཀརྨ་རཱ་གས་ཐུན་མཚམས་གཅིག་ལ་བྲིས་པའོ།།་ཨེ་མ་ཧོ། རྒྱལ་བའི་དབང་པོ་འོད་སྟོང་རབ་འབར་ཡང་། །བསྟན་པའི་སྙིགས་མ་མེ་ཤེལ་སྐྱོན་ལྡན་ཞིང་། །གདུལ་བྱའི་སྤྲོ་བ་ལོག་ལྟའི་རླན་གྱིས་བངས། །བྱིན་རླབས་བྱིན་ཟ་རྒྱས་པར་དཀའ་འམ་སྙམ། །རྒྱལ་དབང་ཐུགས་
རྗེའི་ཆུ་འཛིན་རབ་འཁྲིགས་ཀྱང་། །གསོལ་འདེབས་དབྱར་སྐྱེས་མགྲིན་རྔ་མི་སྒྲོག་ཅིང་། །ལོག་ལྟའི་རླུང་དམར་རབ་ཏུ་སྦྱད་ལུགས་ཀྱིས། །བྱིན་རླབས་བསིལ་རྒྱུན་ནམ་ཞིག་ལྟའབབ་ན་ཨང་། །རྒྱལ་བསྟན་མཚན་མོའི་མགོན་པོ་ཤར་ན་ཡང་། །ངེས་འབྱུང་བཟང་པོའི་སྤྲིན་དཀར་འཛུམ་མེད་པར། །ཚུལ་མིན་སྤྱོད་པའི་ཆར་མུན་འཁྲིགས་ལུགས་ཀྱིས། །ཐར་བའི་ལམ་བཟང་ནམ་ཞིག་རྙེད་ན་ཨང་། །སེམས་བསྐྱེད་པད་སྡོང་ལོ་འདབ་གཡུར་ཟ་ཡང་། །གཞན་ཕན་བསམ་པའི་ཉི་འོད་མི་མཐོང་ཞིང་། །གནོད་བསམ་མི་སྲུན་ཀིང་ཀང་འབེབས་ལུགས་ཀྱིས། །རབ་དགའི་འདབ་སྟོང་ནམ་ཞིག་བཞད་ན་ཨང་། །དབང་བཞི་དཔག་བསམ་ལོ་འདབ་ཁྱོན་ཡངས་ཀྱང་། །བསྐྱེད་རྫོགས་བུང་བའི་གཉེར་གྱུར་མ་མཐོང་ཞིང་། །མི་བརྩོན་འཆར་བའི་སྟ་ཐོགས་མང་ལུགས་ཀྱིས། །དངོས་གྲུབ་འབྲས་བུ་ནམ་ཞིག་སྨིན་ན་ཨང་། །ཟབ་ཆོས་སྒོམ་རྒྱུར་སྙིང་པོ་མང་ན་ཡང་། །བརྩོན་འགྲུས་ཀ་ཤིའི་རས་ཀྱིས་མི་ཕྱི་ཤིང་། །བསྒྲུབ་པའི་རྒྱལ་མཚན་སྲོག་ཤིང་ཆགས་ལུགས་ཀྱིས། །དགོས་འདོད་རེ་བ་ནམ་ཞིག་བསྐང་ན་ཨང་། །སྨྲ་མང་ཉམས་ལེན་བྲལ་བའི་ནེ་
ཚོ་བཞིན། །དམ་ཆོས་སྨྲས་ཀྱང་རང་རྒྱུད་གྱོང་པོ་རང་། །བྱ་བྲལ་ང་ནི་རང་ལ་རང་མ་མགུ། །ད་ནི་རང་གིས་རང་ལ་གྲོས་ཤིག་ཐོབ། །ཅེས་རང་གཞན་འགའ་ལ་བསམས་པས་ཅུང་མ་མགུ་ཞིང་། ཁྱད་པར་དྲུང་རམ་པ་སྟོབས་ཆེན་གྱིས་རྒྱལ་བའི་དབང་པོ་ལ་མ་དད་ནས་ངག་འཁྱལ་འགའ་སྨྲས་ཟེར་བ་དྲན་ནས་སྨྲས་པའོ། །མངྒ་ལཾ།། ༈ །།སྔགས་འཆང་རྣལ་འབྱོར་ཚེ་དབང་བཀྲ་ཤིས་ཀྱི། །སྒྱུ་ལུས་ཡུན་རིང་ནད་ཀྱིས་མནར་ན་ཡང་། ཚེ་ལ་བདུད་ཀྱི་བར་ཆད་མ་བྱུང་ཞིང་། །ཟུག་གཟེར་ཆུང་ཞིང་དགེ་སྦྱོར་འཕེལ་བ་ལེགས། །ཁྱེད་ཀྱང་བསྙུང་གཞི་ཤིན་ཏུ་ལྕི་བ་དང་། །ང་ཡང་མཚམས་ཀྱི་བཅད་རྒྱ་དམ་པའི་ཕྱིར། །ད་ནས་རང་གཉིས་ཅི་འཕྲད་མི་ཤེས་པས། །དངོས་སུ་འཕྲད་འདྲའི་སྙིང་གཏམ་ཚིག་གསུམ་བཤད། །མི་ལུས་རིན་ཆེན་ཐོབ་པ་ཤིན་ཏུ་དཀའ། །སངས་རྒྱས་བསྟན་དང་མཇལ་བ་དེ་བས་དཀའ། །བསྐྱེད་རྫོགས་ཉམས་ལེན་ཤེས་པ་ད་རེས་ཙམ། །སྡུག་སྐད་ཤི་སྨོན་སྨེ་སྔགས་རྒྱང་སྟེ་སྒྱུར། །ཞག་རེ་མ་ཤི་ན་ཡང་དགེ་སྦྱོར་འཕེལ། །སྡིག་སྡུག་དཀའ་ལས་མང་པོས་བསྒྲུབས་པའི་ཟས། །ཤ་ཆང་ཇ་སོགས་ཞིམ་དགུ་ཟོས་ན་ཡང་། །ཞག་གཅིག་
སོང་ནས་མི་གཙང་རྫས་སུ་འགྱུར། །ཞིམ་མངར་ཟས་ཀྱི་སྲེད་པ་རྒྱང་སྟེ་སྒྱུར། །གང་བྱུང་གྱི་ན་ཙམ་ལ་ཆོག་ཤེས་མཛོད། །ཁ་བསྡུས་ཚེ་ཕུད་གྲོང་ཆོག་འདྲེ་རྡུང་ཡང་། །མི་ཚེར་བསྒྲུབ་ཀྱང་ཇེ་ལྟོགས་བརྒྱགས་དུས་མེད། །རང་གི་ཐུགས་དམ་དགེ་སྦྱོར་སད་ལ་འཆོར། །རྙེད་ཚོལ་གྲོང་ཆོག་རློམ་སེམས་རྒྱང་སྟེ་སྒྱུར། །རྐྱེན་ངན་གྲོགས་ཤར་སོམས་ལ་དགེ་སྦྱོར་གྱིས། །སྤྱིར་དུ་འགྲོ་བའི་ཚེ་སྲོག་མི་རྟག་ཅིང་། །སྒོས་སུ་དེང་སང་བཞི་བཅུ་ཁ་རལ་ཡིན། །ད་ནི་ཚེ་མཇུག་དགུན་ཉི་ལས་ཀྱང་ཐུང་། །ཚེ་འདིར་མི་ཕྱིད་དགོས་པ་རྒྱང་སྟེ་སྐྱར། །ཚེ་མཇུག་ཅི་གདའ་དགེ་སྦྱོར་ཉིད་ལ་དྲིལ། །དུས་མིན་འཆི་བ་སུས་ཀྱང་བཟློག་མི་ཐུབ། །ཐབས་ནི་ཇི་ལྟར་བྱས་ཀྱང་བཤོལ་ཐབས་མེད། །ན་དོགས་འཆི་དོགས་ནད་ལ་ཨེ་ཕན་གྱིས། །སྲུང་ཟློག་ཐུགས་དམ་མང་པོ་རྒྱང་སྟེ་སྐྱུར། །ཐུགས་དམ་ཅི་བྱེད་ཕྱི་མའི་དོན་དུ་དྲིལ། །སྤུན་ཟླ་བཟའ་ཚང་ཡུལ་མི་ཁྱིམ་མཚེས་ཀུན། །ཚོང་དུས་ཆེན་པོའི་ཁྲོམ་པ་ཅི་བཞིན་དུ། །ཡུན་རིང་མི་གནས་མྱུར་དུ་སོ་སོར་འགྲོ། །ཆགས་སྡང་འགྲན་སེམས་བསམ་པ་རྒྱང་སྟེ་སྒྱུར། །ཀུན་ལ་ཕན་སེམས་བསམ་པ་བཟང་དུ་
སྒོམས། །ནད་ཀྱིས་ཟུག་གཟེར་ཉམ་ཐག་ཆེ་ན་ཡང་། །ཚེ་ཚད་མ་རྫོགས་འཕོ་བ་བྱས་གྱུར་ན། །ལུས་ལྷ་བསད་པའི་ཉེས་པས་དམྱལ་བར་ལྟུང་། །སྡུག་ནས་འཕོ་བ་བསྒོམ་པ་རྒྱང་སྟེ་སྒྱུར། །འདི་བས་དམྱལ་བའི་སྡུག་བསྔལ་ཆེ་ལུགས་སོམས། །ཆོས་རྒྱལ་ཆེན་པོ་ཁྲི་སྲོང་ལྡེའུ་བཙན་དང་། །འབྲོམ་དང་ཕག་གྲུ་འཇིག་རྟེན་གསུམ་མགོན་སོགས། །མཛེ་ནད་དྲག་པོས་ཡུན་རིང་མནར་ལུགས་སོམས། །ང་སྡུག་བསམ་པའི་སྡུག་ཡུས་རྒྱང་སྟེ་སྒྱུར། །སྔོན་གྱི་ལས་སྒྲིབ་འཛད་པའི་དགའ་བ་སྒོམས། །བདེ་སྔག་ལེགས་ཉེས་བྱ་བ་ཅི་བྱུང་ཡང་། །ནབ་མོའི་རྨི་ལམ་བཟང་ངན་རྨིས་པ་ལྟར། །རིང་པོར་མི་ཐོགས་མྱུར་དུ་ཡལ་ནས་འགྲོ། །རེ་དོགས་སེམས་ཁྲལ་མང་པོ་རྒྱུང་སྟེ་སྒྱུར། །ཅི་འོང་དཀོན་མཆོག་མཁྱེན་ལ་བློ་སྙིང་ཁོལ། །ལུས་ཀྱི་ན་ཚ་ཟུག་གཟེར་བྱུང་བའི་དུས། །ཨ་ན་བསམ་མཁན་སེམས་ལ་ཅེར་རེ་ལྟོས། །དངོས་པོ་མེད་པར་སྟོང་པར་ལྷང་ངེ་འཆར། །བསྒོམ་གོ་མི་ཆོད་དོགས་པ་རྒྱང་སྟེ་སྒྱུར། །མ་བཅོས་ཡེངས་མེད་ངང་ལ་ལྷན་ནེ་ཞོག །ན་བསམ་སེམས་དེ་དང་པོ་གང་ནས་བྱུང་། །ཐ་མ་གར་འགྲོ་ད་ལྟ་གར་གནས་
ལྟོས་། །སྐྱེ་འགག་གནས་གསུམ་བྲལ་བའི་ཆོས་སྐུ་ཡིན། །ནད་འདི་ཨེ་ཕན་བསམ་པ་རྒྱང་སྟེ་སྒྱུར། །ན་བ་དེ་ཉིད་བསྒོམ་གྱི་མཐིལ་པོར་བསྒྱུར། །འགྲོ་བ་རིགས་དྲུག་སྡུག་བསྔལ་ཐམས་ཅད་དང་། །ཁྱད་པར་འགྲོ་བའི་ནད་རིགས་ཐམས་ཅད་ཀུན། །རང་གི་ན་ས་དེ་ལ་ཧྲིལ་གྱིས་བསྟིམ། །ནད་འདི་ཕན་ན་དགའ་བསམ་རྒྱང་སྟེ་སྒྱུར། །འགྲོ་ཀུན་བདེ་དང་ལྡན་པའི་སྨོན་ལམ་ཐོབ། །འདི་དང་ཕྱི་མའི་སྡུག་བསྔལ་ཐམས་ཅད་ནི། །ཚེ་སྔོན་བསགས་པའི་སྡིག་པའི་འབྲས་བུ་ཡིན། །སྡིག་པ་ཆུང་ངུ་ལ་ཡང་དུག་བཞིན་འཛེམ། །ཁ་བཤད་ལག་ལེན་འཛོལ་བ་རྒྱང་སྟེ་སྒྱུར། །སྒྲིབ་སྦྱོང་རྡོར་སེམས་སྒོམ་བཟླས་རྒྱུན་དུ་གྱིས། །དེ་ལྟར་བདག་གིས་སྨྲས་པའི་ཚིག་འདི་རྣམས། །དེ་ཚེ་སྐྱིད་དུས་ཟླ་བོ་ཡིན་ནོ་ཞེས། །ཚིག་དོན་རང་གི་སེམས་ལ་མི་ཕབ་པར། །ཀོ་ལོང་སྡུག་ཡུས་བྱེད་པ་རྒྱུང་སྟེ་སྒྱུར། །འདི་དོན་ཉམས་སུ་ལེན་ལ་བརྩོན་འགྲུས་གྱིས། །ནམ་ཞིག་འཆི་བདག་དབང་ཆེན་ཁོ་བྱུང་ན། །ལུས་དང་ཉེ་འབྲེལ་ཞིང་ཁང་ནོར་རྫས་རྣམས། །བློ་ཡིས་བླངས་ནས་དཀོན་མཆོག་གསུམ་ལ་ཕུལ། །སེམས་ཐོགས་ཆགས་ཞེན་འཁྲི་བ་རྒྱང་སྟེ་སྒྱུར། །
ཆགས་ཞེན་མེད་པར་ཉམས་ལེན་ངང་དུ་སྡོད། །སྤྱི་བོར་ཨོ་རྒྱན་སྣང་བ་མཐའ་ཡས་ལ། །ཁ་ཙམ་མིན་པར་སྙིང་ནས་གསོལ་བ་ཐོབ། །འདི་དུས་འཕོ་བ་ཟླུ། བསྒོམ་ཡང་ཕན་ཡོན་ཆེ། །བརྩེ་སེམས་ཁ་ཆེམས་ཁ་དལ་རྒྱང་སྟེ་སྐུར། །ཉམས་ལེན་ངང་དུ་རིག་པ་རྩེ་གཅིག་བསྒྲིམས། །འབྱུང་བཞིའི་ཐིམ་རིམ་དཀར་ལམ་དམར་ལམ་ཆ་སོགས། །འཁྲུལ་སྣང་འཇིགས་སྐྲག་སྣང་བ་ཅི་བྱུང་ཡང་། །མ་ཡེངས་སྐྲག་མཁན་སེམས་ལ་རེ་རེ་ལྟོས། །དེ་ལས་གཞན་པའི་ཚབ་ཚུབ་རྒྱང་སྟེ་སྒྱུར། །གང་ཤར་བཟོ་མེད་ངང་དུ་འཆི་རུ་ཆུག །གཞི་ཡི་འོད་གསལ་ནམ་མཁའ་གཡའ་དག་བཞིན། །ཚུར་ལ་འཆར་དུས་དེ་ཉིད་ངོས་བཟུང་ལ། །དེ་ཡི་ངང་ལ་མ་བཅོས་ཀློད་ལ་ཞོག །སྟོང་པ་ཉིད་ལ་སྐྲག་སྣང་རྒྱང་སྟེ་སྒྱུར། །དེ་ནི་འཆི་བ་ཆོས་ཀྱི་སྐུ་ཞེས་བྱ། །དེ་ཉིད་ངོས་ཟིན་རྟགས་སུ་ཚེ་འདས་ཀྱི། །ཕུང་པོ་ཤ་བཀྲག་ཡུན་རིང་མི་ཡལ་ཞིང་། །ཕྱི་རྟགས་ནམ་མཁའ་དྭངས་ཤིང་།གསལ་བ་ཡིན། །འདི་དུས་ཉེ་དུའི་ངུ་སྐད་རྒྱང་སྟེ་སྒྱུར། །ཕུང་པོ་ཐུག་རེག་མེད་པའི་ཉ་ར་བཟོབ། །དེ་ནས་བར་དོའི་ཡིད་ལུས་ཤར་བྱུང་ན། །རང་ལུས་ཡི་དམ་གང་ཡིན་
བསྐྱེད་རིམ་ནི། །སྣང་ལ་རང་བཞིན་མེད་པའི་འཇའ་ལྟར་བསྒོམས། །ཞི་ཁྲོའི་ལྷ་ལ་འཇིགས་སྐྲག་རྒྱང་སྟེ་སྐྱུར། །དེ་ནས་བར་དོ་ལོངས་སྐུར་སྣང་བ་ཡིན། །དེ་རྟགས་ནམ་མཁར་འཇའ་འོད་འབྱུང་བ་དང་། །སྐུ་གཟུགས་རིང་བསྲེལ་ཡིག་འབྲུ་ལ་སོགས་པ། །མང་པོའམ་ནི་སྣ་གཅིག་ངེས་པར་འབྱུང་། །གཉེན་འདུན་རྣམས་ཀྱང་མྱ་ངན་རྒྱང་སྟེ་སྐྱར། །བར་དོར་གྲོལ་ལ་སྡུག་བསྔལ་ག་ལ་དགོས། །སྐྱེ་བར་སླ་ཞིང་ཡོན་ཏན་དཔག་མེད་པ། །ནུབ་ཕྱོགས་བདེ་བ་ཅན་གྱི་ཞིང་ཁམས་སུ། །ཐེ་ཚོམ་མེད་པར་འགྲོ་བའི་འདུན་པ་བསྒོམས། །སྐྱེའམ་མི་སྐྱེའི་ཐེ་ཚོམ་རྒྱང་སྟེ་སྒྱུར། །དེ་ནི་སྐྱེ་བ་སྤྲུལ་སྐུ་ཐོབ་པར་འགྱུར། །དེ་ཉིད་ད་ལྟ་ནས་ཀྱང་འདུན་པ་སྦྱོངས། །དེ་རུ་སྐྱེ་བའི་སྨོན་ལམ་རྒྱུན་པར་ཐོབ། །དགེ་བ་གང་བྱེད་དེ་ཡི་དོན་དུ་བསྔོས། །བདག་འདྲ་མི་སྐྱེ་བསམ་པ་རྒྱང་སྟེ་སྒྱུར། །སྨོན་ལམ་གང་བཏབ་མྱུར་དུ་འགྲུབ་པ་ཡིན། །རྒྱང་སྐྱུར་ཉེས་གསུམ་ལྡན་པའི་སྙིང་གཏམ་འདི། །སྙིང་ནས་ཕན་སེམས་བསམ་པ་བཟང་པོས་བྲིས། །ཁ་བཤད་ཁྲམ་པའི་གླུ་དང་འདྲ་སྙམ་པའི། །རྩིས་མེད་ལོག་ལྟའི་བསམ་ངན་རྒྱང་སྟེ་སྐྱར། །སྙིང་གཏམ་སྙིང་གི་
ཐིག་ལེར་ཉམས་སུ་ལོངས། །ཞེས་པ་འདི་སྔགས་འཆང་ཚེ་དབང་བཀྲ་ཤིས་ནད་དྲག་པོས་ཡུན་རིང་མནར་བ་ལས། ནད་གཞི་ཆེར་མ་ཕན་ཡང་ཟུག་གཟེར་ཆུང་ཞིང་བསྙེན་པ་མང་དུ་འགྲུབ། ད་ཐུགས་དམ་གང་དགའ་འཕོ་བའི་བསྐྱེད་ཆོག་གཅིག་ཀྱང་བྲིས་བསྐུར་ཟེར་བས། ཨ་རཱ་གས་ཐུན་མཚམས་གཅིག་ལ་བྲིས་ནས་ཕུལ་བའོ།། ༈ །།ན་མོ་དཀོན་མཆོག་གསུམ་ལ་ཕྱག་འཚལ་ལོ། །ཕྱོགས་དུས་རྒྱལ་བའི་ཐུགས་བསྐྱེད་སྨོན་ལམ་སོགས། །འཁོར་འདས་དུས་གསུམ་དགེ་ལ་ཡི་རང་ངོ་། །དེ་ལྟར་རྗེས་སུ་ཡི་རང་དགེ་བ་དང་། །ཆུ་བོ་དབྱིངས་ཁྱབ་འགྲོ་དོན་འདི་བྱས་མཐུས། །འདི་ནས་བཟུང་སྟེ་ཇི་སྲིད་བསྐལ་པའི་བར། །ཆུ་བོས་གར་ཁྱབ་ཡིག་དྲུག་ཁྱབ་པར་ཤོག །བསྐལ་པའི་བར་དུ་ཆུ་དེ་སུས་འཐུང་དང་། །མཐོང་དང་ཐོས་དང་ཆུ་སྒྲ་ཐོས་པ་དང་། །ཆུ་དེ་རྒྱ་མཚོར་སོང་ཞིང་གར་ཁྱབ་དང་། །དེ་ལས་རླངས་པ་སྤྲིན་དང་ན་བུན་དང་། །དེ་ལས་ཁ་ཆར་བབས་པས་གར་ཁྱབ་ཀྱི། །འབུ་སྲིན་ཡན་ཆད་སྲོག་ཆགས་ཐམས་ཅད་དང་། །ཆུ་ལ་གནས་པའི་ཀླུ་དང་ཆུ་གནས་སོགས། །ཐམས་ཅད་ངན་སོང་འཁོར་བ་དོང་སྤྲུགས་ཤོག །དེ་དག་ལས་ཉོན་
སྒྲིབ་པ་དག་པར་ཤོག །ངན་སོང་གསུམ་གྱི་སྐྱེ་སྒོ་ཆོད་པར་ཤོག །ཐུགས་རྗེ་ཆེན་པོས་བྱིན་གྱིས་བརླབས་པའི་ཞིང་། །མཐོ་རིས་གནས་སུ་ཆོས་ལྡན་ལུས་ཐོབ་སྟེ། །སྐྱེ་བ་ལྔ་ནས་བདེ་བ་ཅན་ཉིད་དུ། །པདྨའི་སྦུབས་ལས་རྫུས་ཏེ་སྐྱེ་བར་ཤོག །འོད་དཔག་མེད་མགོན་མཆོད་པས་མཉེས་བྱེད་ཅིང་། །བྱང་ཆུབ་སྤྱོད་པ་རྒྱ་ཆེན་སྤྱོད་བྱས་ནས། །བླ་མེད་རྫོགས་པའི་སངས་རྒྱས་ཐོབ་པར་ཤོག །རྣལ་འབྱོར་བདག་ཀྱང་ཚོགས་གཉིས་མྱུར་རྫོགས་ནས། །ཚེ་འདིར་ཐུགས་རྗེ་ཆེན་པོ་འགྲུབ་པར་ཤོག །བདག་ཅག་འཁོར་བཅས་ཚེ་དང་རིགས་རྒྱུད་དང་། །བདག་དང་ཐུགས་རྗེ་ཆེན་པོའི་ཕྲིན་ལས་ནི། །ཆུ་བོའི་རྒྱུན་ལྟར་རིང་ཞིང་རྒྱས་པར་ཤོག །ཆོས་ཉིད་གདོད་ནས་རྣམ་པར་དག་པ་དང་། །ཆོས་ཅན་ཀུན་རྫོབ་བསླུ་བ་མེད་པ་དང་། །རྒྱལ་བ་སྲས་དང་བཅས་པའི་ཐུགས་རྗེའི་མཐུས། །སྨོན་ལམ་དེ་དག་གེགས་མེད་འགྲུབ་པར་ཤོག །ཅེས་ཆུ་བོ་དབྱིངས་ཁྱབ་ཀྱི་སྒྲུབ་པ་ཞག་བཅོ་ལྔ་ཚར་བའི་ཉིན་པར་བགྱིས་པའོ།། ༈ ན་མོ་གུ་རུ། རྒྱལ་བ་ཀུན་གྱི་ངོ་བོ་པདྨ་འབྱུང་། །དེ་ཡི་རྣམ་འཕྲུལ་ཆོས་ཀྱི་དབང་ཕྱུག་ལ། །ཁ་ཙམ་མིན་པར་སྙིང་
ནས་གསོལ་བ་འདེབས། །རྗེས་འཇུག་བུ་ཡི་སྐྱིད་སྡུག་ཁྱེད་རང་ཤེས། །དམ་བཅའ་མཐའ་རུ་ཕྱིན་པར་བྱིན་གྱིས་རློབས། །དལ་འབྱོར་རྙེད་དཀའ་འཆི་བ་མི་རྟག་པ། །ལས་འབྲས་འཁོར་བའི་ཉེས་དམིགས་བསྒོམ་པ་བཞི། །བུ་ཁྱོད་ལེགས་པར་གོ་བ་ངོ་མཚར་ཆེ། །ཐོབ་དཀའི་དལ་འབྱོར་ཐོབ་པ་མང་ལགས་ཀྱང་། །གཏན་ཕུང་འདུན་མ་བསྒྲུབ་པ་ཤིན་ཏུ་མང་། །ཕལ་ཆེར་རིན་ཆེན་གླིང་ནས་སྟོང་ལོག་བྱེད། །བུ་ཁྱོད་གཏན་བདེ་བསྒྲུབ་པ་ངོ་མཚར་ཆེ། །ཚེ་ལ་ལོངས་མེད་ནམ་འཆི་ཆ་མེད་ཀྱང་། །གཏན་དུ་སྡོད་ཆོས་བྱེད་མཁན་ཤིན་ཏུ་མང་། །ཕལ་ཆེར་འཆི་བར་ཤེས་ཀྱང་ངན་སོང་བསྒྲུབ། །བུ་ཁྱོད་འཆི་བ་དྲན་པ་ངོ་མཚར་ཆེ། །དཀར་ནག་ལས་འབྲས་བསླུ་བ་མེད་ལགས་ཀྱང་། །རང་ཉིད་ངན་འགྲོར་འཕེན་མཁན་ཤིན་ཏུ་མང་། །ཕལ་ཆེར་རང་གཞན་ངན་འགྲོར་ཁུ་དེད་བྱེད། །བུ་ཁྱོད་སྡིག་སྤང་དགེ་སྒྲུབ་ངོ་མཚར་ཆེ། །འཁོར་བའི་གནས་ན་བདེ་བ་མེད་ལགས་ཀྱང་། །བདེ་བར་རེ་ནས་སྡིག་པ་བསྒྲུབ་མཁན་མང་། །ཕལ་ཆེར་འཇིག་རྟེན་ཆོས་བརྒྱད་དབང་དུ་འགྲོ། །བུ་ཁྱོད་ཚེ་འདི་བློས་བཏང་ངོ་མཚར་ཆེ། །ལུས་
ལ་སེར་གོས་གྱོན་པ་མང་ལགས་ཀྱང་། །ངེས་འབྱུང་བསམ་པ་སྐྱེས་པ་ཤིན་ཏུ་དཀོན། །ཕལ་ཆེར་བག་མེད་འཆལ་པའི་དབང་དུ་འགྲོ། །བུ་ཁྱོད་ངེས་འབྱུང་སྐྱེས་པ་ངོ་མཚར་ཆེ། །ཁྲིད་དང་གདམས་ངག་ཞུས་པ་མང་ལགས་ཀྱང་། །ཆོས་དྲེད་གོ་ཡུལ་ལུས་པ་ཤིན་ཏུ་མང་། །ཕལ་ཆེར་འཛིན་ཆགས་སེར་སྣ་སྔར་ལས་ཐུ། །བུ་ཁྱོད་ཚེ་འདི་བློས་བཏང་ངོ་མཚར་ཆེ། །བླ་མའི་དྲུང་དུ་སྡོད་པ་མང་ལགས་ཀྱང་། །ཡོན་ཏན་མི་མཐོང་སྐྱོན་ལ་རྟོག་པ་མང་། །ཕལ་ཆེར་བླ་མའི་ཞབས་འདྲེན་བྱེད་པ་མང་། །བུ་ཁྱོད་མོས་གུས་སྐྱེས་པ་ངོ་མཚར་ཆེ། །སེམས་ངོ་སྤྲུག་སྤྲུག་ཤེས་པ་མང་ལགས་ཀྱང་། །བསྒོམ་སྐྱེ་བདག་པོ་མེད་པ་ཤིན་ཏུ་མང་། །ཕལ་ཆེར་བསྒོམ་ཆེན་ཆགས་འཛིན་གཞན་བས་ཆེ། །བུ་ཁྱོད་ཞེན་པ་ལྡོག་པ་ངོ་མཚར་ཆེ། །རྟོགས་པ་མཐོན་པོར་རློམ་པ་མང་ལགས་ཀྱང་། །འཛིན་ཆགས་འཁྲུལ་པ་སྔར་ལས་ཆེ་བ་མང་། །ཕལ་ཆེར་ཚེ་འདི་ཁོ་ན་ཁོང་དུ་བཅུག །བུ་ཁྱོད་ཚེ་འདི་བློས་བཏང་ངོ་མཚར་ཆེ། །བྱ་བཏང་ཡིན་ནོ་ཟེར་བ་མང་ལགས་ཀྱང་། །སེམས་ལ་གང་དུས་མེད་པའི་བྱ་བཏང་མང་། །ཕལ་ཆེར་རྒྱལ་ཁམས་ཉུག་ཅིང་ལོག་འཚོ་བསྒྲུབ། །
བུ་ཁྱོད་དགོས་མེད་བསྒོམ་པ་ངོ་མཚར་ཆེ། །རང་གཞན་གཉིས་ཕུང་མཚོན་ཆས་བྱེད་ལགས་ཀྱང་། །སྲོག་འདས་གཅེས་པར་འཛིན་པའི་སྐྱེས་ཕྲན་མང་། །ཕལ་ཆེར་འཆི་ལ་ཐུག་ཀྱང་གཏོར་མི་ཕོད། །བུ་ཁྱོད་མདའ་གཞུ་བཅག་པ་ངོ་མཚར་ཆེ། །འགའ་ཞིག་ལྷམ་གོས་ཙམ་ཞིག་ཤེས་ལགས་ཀྱང་། །ཉུང་ངུ་མཁོ་ཟེར་སྟེར་མི་འགྱང་པ་མང་། །དགོས་འདོད་སོར་སོའི་རྩེ་ནས་འཁྲུངས་བཞིན་དུ། །བུ་ཁྱོད་མགར་ཆ་ཕུལ་བ་ངོ་མཚར་ཆེ། །ཚེ་མ་ཕྱིད་ཀྱི་བྱ་བཏང་མང་ལགས་ཀྱང་། །ཆོས་མེད་སྤྲང་འཁྱམས་བྱེད་པ་ཤིན་ཏུ་མང་། །ཕལ་ཆེར་བསྟན་པའི་བླ་བཙོང་རང་མཚང་སྟོན། །བུ་ཁྱོད་སྐྱིད་དུས་དམ་ཆོས་དྲན་པ་ངོ་མཚར་ཆེ། །འོད་གསལ་འཁོར་ཡུག་ཡོད་ཟེར་མང་ལགས་ཀྱང་། །སྤྱོད་པ་སྔར་ལས་ཐུ་བ་ཤིན་ཏུ་མང་། །ཕལ་ཆེར་དུག་ལྔ་ཆགས་འཛིན་སྔར་བས་ཆེ། །བུ་ཁྱོད་བྱ་བཏང་ནུས་པ་ངོ་མཚར་ཆེ། །མཉམ་མེད་དྭགས་པོས་ཆོས་བཞིའི་དངཔོ་དང་། །ཕྱག་རྒྱ་ཆེན་པོའི་བསྒོམ་གྱི་རྐང་པ་དང་། །བཀའ་གདམས་ལུགས་ཀྱི་ལམ་རིམ་གཉིས་པ་རྣམས། །བུ་ཁྱོད་རྒྱུད་ལ་སྐྱེས་པ་ངོ་མཚར་ཆེ། །གེགས་སེལ་བོགས་འདོན་
ལ་སོགས་གང་དགོས་པ། །རིམ་གྱིས་ཉམས་དང་བསྟུན་ཏེ་བདག་གིས་བྱ། །སྤྲང་པོ་བདག་ལ་ཡོན་ཏན་མི་བདོག་ཀྱང་། །བུ་ཁྱོད་འབྲལ་མི་ཕོད་པ་ངོ་མཚར་ཆེ། །ཁོ་བོ་བླ་མའི་མཚན་ཉིད་མི་ལྡན་ཀྱང་། །བདག་ལ་བརྒྱུད་པ་བཟང་པོའི་གདམས་ངག་མང་། །ཕལ་ཆེར་རང་གིས་ཅུང་ཟད་ཉམས་སུ་བླངས། །བུ་ཁྱོད་དོན་གཉིས་འགྲུབ་པ་ངོ་མཚར་ཆེ། །ངོ་མཚར་བཅོ་བརྒྱད་ལྡན་པའི་དབྱངས་ཆུང་འདི། །འཇིག་རྟེན་བྱ་བ་བཏང་བའི་བྱ་དགའ་ཡིན། །བཀའ་བརྒྱུད་གོང་མའི་རྣམ་ཐར་འབྱོང་བར་ཤོག །བུ་ཁྱོད་བསྟན་ལ་ཕན་པ་ངོ་མཚར་ཆེ། །ཞེས་པ་བལ་པོ་སྤྲུལ་སྐུ་པདྨ་རིག་འཛིན་གྱིས་ཚེ་འདིའི་བྱ་བ་བློས་བཏང་ནས་བསྒྲུབ་པ་རྩེ་གཅིག་གི་དམ་བཅའ་ཕུལ་དུས་སྨྲས་པའོ།། ༈ །།ན་མོ་གུ་རུ། བླ་མ་གཅིག་ཆོག་ཞྭ་དམར་གསེར་མདངས་ལ། །དམ་ཆོས་གཅིག་ཆོག་ཕྱག་རྒྱ་ཆེན་པོ་ཞུ། །ཉམས་ལེན་གཅིག་ཆོག་གསོལ་བ་བཏབ་པའི་མཐུས། །རྟོགས་པ་གཅིག་ཆོག་རང་སེམས་རང་ངོ་ཤེས། །གང་ཤར་ངང་དུ་བཟོ་བཅོས་མེད་པ་ཡི། །རྩ་ཡི་ནང་ནས་ཨ་ཝ་དྷུ་ཏི་ཡིན། །རླུང་གི་ནང་ནས་ཡེ་ཤེས་མཆོག་གི་རླུང་། །ཐིག་ལེའི་ནང་ནས་མི་ཤིགས་ཐིག་ལེར་
སྣང་། །ལས་ཉོན་སྒྲིབ་པ་སྲེག་པས་གཏུམ་མོ་ཡིན། །དངོས་པོའི་བདེན་ཞེན་བཟློག་པས་སྒྱུ་ལུས་ཡིན། །མ་རིག་མུན་པ་སེལ་བས་འོད་གསལ་ཡིན། །རྨི་ལམ་དུས་སུའང་བསྒོམས་པས་རྨི་ལམ་ཡིན། །འཆི་དུས་འོད་གསལ་ཟིན་པས་འཕོ་བ་ཡིན། །བར་དོར་ཉམས་ལེན་ཟིན་པས་བར་དོ་ཡིན། །གང་ཤར་དེ་ལ་བསྲེ་བས་བསྲེ་བ་ཡིན། །ཆོས་བརྒྱད་སེམས་སུ་སྙོམས་པས་རོ་སྙོམས་ཡིན། །རིགས་ལྔའི་ནང་ནས་ཟུང་འཇུག་རིམ་པ་ཡིན། །དུག་ལྔ་རང་སར་ཞི་བས་ཞི་བྱེད་ཡིན། །སྦྱོར་དྲུག་ནང་ནས་ཐོག་མར་དགེ་བ་ཡིན། །ཀླུ་སྒྲུབ་ལུགས་ཀྱི་དབུ་མ་ཆེན་པོ་ཡིན། །ཐོགས་མེད་ལུགས་ཀྱི་ཕ་རོལ་ཕྱིན་པ་ཡིན། །ས་ར་ཧ་ཡི་ལུགས་ཀྱི་ཕྱག་ཆེན་ཡིན། །དགའ་རབ་རྡོ་རྗེའི་ལུགས་ཀྱི་རྫོགས་ཆེན་ཡིན། །མ་གཅིག་ལུགས་ཀྱི་བདུད་ཀྱི་གཅོད་ཡུལ་ཡིན། །བཀའ་བརྒྱུད་ལུགས་ཀྱི་བླ་མའི་བྱིན་རླབས་ཡིན། །ས་སྐྱའི་ལུགས་ཀྱི་དབང་བཞིའི་ཡེ་ཤེས་ཡིན། །མཚན་ཉིད་ལུགས་ཀྱི་གང་ཟག་བདག་མེད་ཡིན། །ཨ་ལ་ལ་ཧོ་བླ་མའི་བྱིན་རླབས་ལ། །ཨ་ལ་ལ་ཧོ་ཡི་དམ་དངོས་གྲུབ་ལ། །སྟོན་པས་གསུངས་པའི་ཆོས་ཕུང་བརྒྱད་ཁྲི
རྣམས། །མཉམ་བཞག་ཐུན་གཅིག་ཁོང་དུ་ཚང་བར་རྟོགས། །དུག་གསུམ་འདུལ་བའི་གཉེན་པོ་སྡེ་སྣོད་གསུམ། །དུག་གསུམ་རང་ཞལ་ལྟ་བའི་ནང་དུ་ཚང་། །ཆོས་རྣམས་ཐམས་ཅད་སེམས་སུ་ཐག་ཆོད་པས། །ད་ནི་སྤྲང་པོ་ཤི་ཡང་འགྱོད་པ་མེད། །ཅེས་ཉམས་སྔར་དང་མི་འདྲ་བ་གཅིག་ཤར་ནས་སྨྲས་སོ།། ༈ །།ན་མོ་གུ་རུ། །བསྐྱེད་རིམ་ལྷ་ཡི་དཀྱིལ་འཁོར་དང་། །སྣང་བ་སྐུ་ཡི་འཁྱེར་སོ་གཉིས། །ལུས་གནད་རྩ་ཡི་སྟོང་ར་གསུམ། །གནད་ཀྱི་འབབ་ས་གཅིག་ཏུ་གོ །ཐ་མལ་ཞེན་པ་བཟློག་ནས་ཀྱང་། །སྤྲུལ་སྐུ་འགྲུབ་པའི་ཐབས་སུ་གདའ། །བསྙེན་སྒྲུབ་སྔགས་ཀྱི་བཟླས་པ་དང་། །གྲག་པ་གསུང་གི་འཁྱེར་སོ་གཉིས། །སྲོག་རྩོལ་རླུང་ལ་སྦྱངས་བ་གསུམ། །དོན་གྱི་འབབ་ས་གཅིག་ཏུ་གོ། །ངག་སྒྲིབ་ལས་རླུང་སྦྱངས་ནས་ཀྱང་། །ལོངས་སྐུ་འགྲུབ་པའི་ཐབས་སུ་གདའ། །ཕྱག་རྫོགས་དབུ་གསུམ་བསྒོམ་པ་དང་། །དྲན་རྟོགས་ཐུགས་ཀྱི་འཁྱེར་སོ་གཉིས། །གཏུམ་མོ་བདེ་སྟོང་བསྒོམ་པ་གསུམ། །དོན་གྱི་འབབ་ས་གཅིག་ཏུ་གོ། །རང་སེམས་རང་ངོ་ཤེས་ནས་ཀྱང་། །ཆོས་སྐུ་འགྲུབ་པའི་ཐབས་སུ་གདའ། །
གོ་བ་གསུམ་དང་གདའ་བ་གསུམ། །ཉམས་ལ་ཤར་ནས་བྱུང་རྒྱལ་སྨྲས། །མངྒ་ལཾ།། ༈ །།ན་མོ་གུ་རུ། བླ་མ་སངས་རྒྱས་ཡིན་ཟེར་ཞིང་། །བརྒྱུད་པ་ཉེ་རིང་བསྒྲུང་བ་འདི། །མོས་གུས་ཅན་ལ་ངོ་རེ་ཚ། །འགྲོ་དྲུག་ཕ་མ་ཡིན་ཟེར་ཞིང་། །ཉེ་རིང་ཆགས་སྡང་བྱེད་པ་འདི། །བྱམས་སེམས་ཅན་ལ་ངོ་རེ་ཚ། །སྣང་སྲིད་ཡི་དམ་ཡིན་ཟེར་ཞིང། །འདྲེ་གདོན་བརྡུང་གཏག་བྱེད་པ་འདི། །དག་སྣང་ཅན་ལ་ངོ་རེ་ཚ། །རང་སེམས་ཆོས་སྐུ་ཡིན་ཟེར་ཞིང་། །དུག་ལྔ་ཡན་པར་ཤོར་བ་འདི། །ཉམས་ལེན་ཅན་ལ་ངོ་རེ་ཚ། །གང་ཤར་བཟོ་མེད་ཡིན་ཟེར་ཞིང་། །དམིགས་གཏད་སེམས་འཛིན་བསྒོམ་པ་འདི། །རྟོགས་པ་ཅན་ལ་ངོ་རེ་ཚ། །ཚེ་འདི་བློ་ཡིས་བཏང་ཟེར་ཞིང་། །གདུལ་བྱ་ཅི་འོང་བྱེད་པ་འདི། །ཆོག་ཤེས་ཅན་ལ་ངོ་རེ་ཚ། །རྩེ་གཅིག་སྒྲུབ་པ་བྱེད་ཟེར་ཞིང་། །གཉིད་རྨུགས་ལེ་ལོར་ཤོར་བ་འདི། །བརྩོན་འགྲུས་ཅན་ལ་ངོ་རེ་ཚ། །ཆོས་པ་བཟང་པོ་ཡིན་ཟེར་ཞིང་། །རྟོགས་པའི་གདེང་དང་མི་ལྡན་ན། །འཆི་དུས་སྐག་ན་ངོ་རེ་ཚ། །ངོ་ཚ་བའི་ཚ་ལུགས་བརྒྱད་པོ་འདི། །རང་གིས་རང་
ལ་སྨྲས་པ་ཡིན། །གཞན་ལ་ཕོག་ན་བཟོད་པར་གསོལ། །ཞེས་པ་འདི་སེམས་རླུང་བྱུང་བ་ཞིག་གིས་ངོ་ཚ་ཟེར་ནས་ཡིབས་ནས་སྡོད་འདུག་ཟེར་བ་ཐོས་ནས་བྱུང་རྒྱལ་དུ་སྨྲས་སོ།། ༈ ན་མོ་ལོ་ཀེ་ཤྭ་ར་ཡེ། ངེད་བན་བརྒྱ་ནང་གི་བོན་གཅིག་པོ། །ཁྱེད་བན་བོན་རྒྱལ་མཚན་ཚུར་གསོན་དང་། །རྩིས་བན་བོན་རྩིས་མགོ་མ་མཐུན་ཞེས། །གཏམ་ངག་འཁྱལ་གྱིས་ཁྱེད་སེམས་འཁྲུགས་ཞེས་ཐོས། །དོན་ཉམས་ལེན་གྱི་གནད་འགགས་མཐུན་པ་ན། །ཚིག་ཐ་སྙད་ལ་མ་མཐུན་འགལ་ཡང་བཟོད། །ལུས་དལ་འབྱོར་ཡིད་བཞིན་ནོར་བུ་འདི། །དཔེ་ལོ་བརྒྱ་ནང་གི་ཐོག་གཅིག་ཡིན། །འདི་རྙེད་པར་དཀའ་ཞེས་བན་བོན་མཐུན། །དགྲ་འཆི་བདག་གཤིན་རྗེ་དབང་ཆེན་འདི། །དུས་ནམ་འོང་ཆ་མེད་ངེས་་པར་འོང་། །འདི་བཟློག་ཐབས་མེད་ཅིང་བན་བོན་མཐུན། །རང་གར་སྐྱེ་ལས་འབྲས་དབང་ཆེ་སྟེ། །དཔེ་ས་བོན་གང་བཏབ་སྨིན་པ་བཞིན། །འདི་བསླུ་བ་མེད་ཅེས་བན་བོན་མཐུན། །གནས་ངན་སོང་གསུམ་གྱི་སྡུག་བསྔལ་འདི། །ཚིག་རྣ་བས་གོ་ཡང་མཆི་མ་འཆོར། །འདི་བཟོད་ཐབས་མེད་ཅིང་བན་བོན་མཐུན། །ལྷ་གཤེན་རབ་གཤེན་ལྷ་འོད་
དཀར་གཅིག །ཡུལ་བོད་ཡུལ་གྱི་གཤེན་སྒོམ་རེ་ཐུལ་གསུམ། །མགོན་སྤྱན་རས་གཟིགས་ཀྱི་སྤྲུལ་པར་གསུངས། །དོན་དེས་ན་བན་བོན་ལྷ་རུ་མཐུན། །ཆོས་བན་ལུགས་དང་བོན་ལུགས་ཁྱད་མེད་པར། །སེམས་རང་རྒྱུད་འདུལ་བའི་གདམས་ངག་དགོས། །གནས་རང་གི་སྤྱི་གཙུག་ནམ་མཁའ་ལ། །ལྷ་ཐུབ་གཤེན་གཅིག་དང་དབྱེར་མེད་པའི། །རང་གི་དད་པ་གང་ཡོད་བླ་མ་དེ། །དཔལ་ཐུགས་རྗེ་ཆེན་པོའི་རྣམ་པར་བསྒོམ། །ཞིང་ཕྱོགས་བཅུའི་རྒྱལ་བ་སྲས་བཅས་རྣམས། །སྐུ་འོད་ཟེར་ཚུལ་དུ་དེ་ལ་བསྟིམ། །ལུས་ལོངས་སྤྱོད་མཆོད་པ་སྤྲུལ་ཏེ་ཕུལ། །ད་ཅི་མཛད་ཁྱེད་ཤེས་ཀྱི་བློ་སྙིང་བཀལ། །ཁ་ཚིག་ཙམ་མིན་པར་གསོལ་བ་བཏབ། །སྐུ་འོད་དུ་ཞུ་ནས་རང་ལ་བསྟིམ། །ད་དེ་ནས་རང་གི་སེམས་ཉིད་ལ། །རང་མ་ཡེངས་ས་ལེ་ཧྲིག་གེ་ལྟ། །སེམས་དབྱིབས་དང་ཁ་དོག་མ་གྲུབ་པའི། །སེམས་ངོ་བོ་སྟོང་པར་འདུག་པ་དེ། །སེམས་བོན་སྐུ་ཀུན་ཏུ་བཟང་པོ་ཡིན། །སེམས་རང་བཞིན་གསལ་བར་སྣང་བ་དེ། །སེམས་ལོང་སྐུ་གཤེན་ལྷ་འོད་དཀར་ཡིན། །སེམས་འགག་མེད་ཅིར་ཡང་འཕྲོ་བ་དེ། །སེམས་
སྤྲུལ་སྐུ་གཤེན་རབ་མི་པོ་ཡིན། །བོན་སྐུ་གསུམ་གྱི་རང་ཞལ་ལྟ་འདོད་ན། །སེམས་མ་ཡེངས་དྲན་པའི་རྒྱང་སོ་ཚུགས། །དེ་ལན་གཅིག་མ་ཡིན་རྒྱུན་དུ་བསྐྱོངས། །དོན་དེ་ལ་ཐིག་ལེ་ཉག་ཅིག་ཟེར། །ངེད་བན་གྱི་ཕྱག་རྒྱ་ཆེན་པོ་ཟེར། །ཁོང་ལ་ལས་རྫོགས་པ་ཆེན་པོ་ཟེར། །ཁོང་ལ་ལས་དབུ་མ་ཆེན་པོ་ཟེར། །ཁོང་ལ་ལས་ཕ་རོལ་ཕྱིན་པ་ཟེར། །ཁོང་ལ་ལས་སྡུག་བསྔལ་སྙེམ་བྱེད་ཟེར། །དོན་མིང་བཏགས་མང་ཡང་རང་སེམས་ཡིན། །སེམས་རང་ངོ་ལྟ་བས་ལྟ་བ་ཡིན། །དེ་རྒྱུན་དུ་བསྒོམས་ན་བསྒོམ་པ་ཡིན། །དེ་རྒྱུན་ཆད་མེད་ན་སྤྱོད་པ་ཡིན། །དེ་མངོན་དུ་གྱུར་ན་འབྲས་བུ་ཡིན། །དོན་ཉམས་སུ་ལོངས་དང་ཟབ་ཆོས་ཡིན། །ཚིག་འདི་རྣམས་ཚང་བར་བློ་ལ་ཟུངས། །དོན་ཡང་ནས་ཡང་དུ་གཞིག་འགྲེལ་ཐོངས། །ཁྱེད་བོན་པོའི་ཐུགས་དེ་ལྟར་ཞོག །ཅེས་པ་འདི་བླ་མ་ཕྲིན་ལས་ཀྱིས་སྨྲ་མ་མཁས་པ་ཅིག་ལ་བརྟེན་ནས་བོན་པོ་རྒྱལ་མཚན་ཡུས་ཆེ་བར་སྣང་ཟེར་བས། །ཀརྨ་ཨ་རཱ་གས་མཚམས་ཁུང་ནས་མགྱོགས་པར་བྲིས་པའོ།། །།བྱང་ཆུབ་ལམ་གྱི་གེགས་སེལ་མདོར་བསྡུས་པར་བཞུགས་པའི་དབུའོ། །ན་མོ་ལོ་ཀེ་ཤྭ་ར་ཡེ། བླ་མ་ཡི་དམ་དབྱེར་མེད་པའི། །
སྤྱན་རས་གཟིགས་ལ་གསོལ་བ་འདེབས། །ཉམས་རྟོགས་སྐྱེ་བར་བྱིན་གྱིས་རློབས། །རེ་ས་གཞན་མེད་ཐུགས་རྗེས་གཟིགས། །གནས་པོ་ཚེ་དབང་འབུམ་ཞེས་པས། །གེགས་སེལ་བསྐུར་ཞེས་གསུངས་པའི་ལན། །གསར་རྙིང་མདོ་རྒྱུད་བསྟན་བཅོས་ཀུན། །གེགས་སེལ་ཁོ་ན་མ་ལགས་སམ། །དལ་འབྱོར་མི་ལུས་ཐོབ་ན་ཡང་། །དམ་པའི་ཆོས་ལ་བློ་མི་འགྲོ། །དུག་གསུམ་མི་དགེ་ཅི་ནུས་འབག །སྨྱོན་པ་ཆུ་ལ་མཆོངས་བ་འདྲ། །ངན་སོང་གཏན་ཡུལ་བྱེད་པའི་གེགས། །གེགས་འདིས་བསླུས་པ་ཤིན་ཏུ་མང་། །དེ་ལ་གེགས་སེལ་གདམས་ངག་ནི། །ཡིད་བཞིན་ནོར་བུ་རིན་ཆེན་ལས། །མི་ལུས་རྙེད་པར་དཀའ་ཚུལ་བསམ། །ད་རེས་ཆོས་ཤིག་མ་ནུས་ན། །རིན་ཆེན་གླིང་ནས་སྟོང་ལོག་དེས། །སྙིང་མེ་།་མདོ་མེད་ཡིན་པར་སོམས། །ཚེ་འདིའི་དགྲ་གཉེན་སྐྱིད་སྡུག་སོགས། །གལ་ཆེ་བསྲན་ཚུགས་མི་གདའ་ཡང་། །རྨི་ལམ་ཙམ་ཞིག་ཡིན་པར་སོམས། །དགེ་སྡིག་གཉིས་པོ་མ་གཏོགས་པ། །དགྲ་དང་གཉེན་དང་ལོངས་སྤྱོད་ནོར། །དར་རྒུད་གཏམ་གྱི་བཟང་ངན་སོགས། །གཅིག་ཀྱང་རྗེས་སུ་མི་འབྲང་
བར། །རང་ཉིད་གཅིག་པུར་འགྲོ་བ་སོམས། །སྔོན་ཚེ་བསྐལ་པ་དུ་མ་ནས། །སངས་རྒྱས་གྲངས་མེད་བྱོན་གྱུར་ཀྱང་། །བྱང་བསྟན་ཕུག་པར་ཉི་མ་བཞིན། །རང་ལ་ཕན་པར་མ་གྱུར་ན། །འཁོར་བར་འཁྱམས་ལ་སྐྱོ་བ་སྐྱེས། །ད་རེས་བསྟན་དང་བླ་མ་མཇལ། །དབང་ཁྲིད་གདམས་ངག་ཐོབ་དུས་འདིར། །ལམ་སྣ་ཟིན་ཙམ་མ་བྱས་ན། །འཁོར་བ་མཐའ་མེད་ཡིན་པར་སོམས། །དེ་ལྟར་ཡང་ཡང་བསམ་བྱས་པས། །བློ་སེམས་ཆོས་ལ་ཤུགས་ཀྱིས་ཚུད། །ལམ་སྣ་ཟིན་པའི་བོགས་སྐྱེད་འོང་། །དེ་ལྟར་ཆོས་ལ་བློ་སོང་ཡང་། །དམན་རྣམས་ཟས་གོས་འཚོལ་ཕྱིར་གཡེངས། །འབྲིང་རྣམས་སོ་ནམ་འཚོ་སྐྱོང་བྲེལ། །མི་ཆེན་དགྲ་འདུལ་གཉེན་སྐྱོང་གཡེངས། །ད་རེས་གལ་ཆེན་འདི་བསྒྲུབས་ནས། །རྗེས་སོར་ཁོམ་དུས་ཆོས་བྱེད་བསམ། །བྱ་བཞག་ཆུ་ཡི་གཉེར་མ་འདྲ། །གཅིག་རྒྱབ་གཅིག་འབྱུང་དལ་དུས་མེད། །བྱེད་བསམ་ངང་ལ་མི་ཚེ་ཟད། །ཆོས་འདོད་ཉམས་ལེན་ཤེས་ན་ཡང་། །འགྲུབ་དུས་མེད་པའི་གེགས་སེལ་ཡིན། །དེ་ལ་མི་རྟག་འཆི་བ་བསྒོམ། །ཤི་བའི་མི་ཚོ་རྩིས་གྲངས་ཐོངས། །རང་ལས་གཞོན་པ་དེ་ཙམ་
ཤི། །རྒས་གཞོན་ངེས་པ་མི་གདའ་ན། །རྒྱལ་པོ་བློན་པོ་མི་ཆེན་རྣམས། །སྨན་དང་རིམ་གྲོས་མ་ཕན་འདས། །འཆི་བ་བཟློག་ཐབས་མི་གདའ་ན། །སྙིགས་མ་ལྔ་ཡི་དུས་ཚོད་འདིར། །ཚེ་ཐུང་ནད་མང་བར་ཆད་རྒོད། །གློ་བུར་བར་ཆད་ཤི་བ་མང་། །སང་ཕོད་ཕྱི་མ་གང་སྔ་ཨང་། །ཟླ་བ་རྒྱབ་མ་ཚེས་ཕྱི་མ། །གང་སྔ་ཐག་ཆོད་ང་ལ་མེད། །དེ་ཕྱིར་བྱ་བ་གཞན་རྣམས་ལས། །དམ་ཆོས་ཉམས་ལེན་གལ་ཆེར་བྱ། །ཚེ་འདི་བློས་བཏང་མ་ནུས་ཀྱང་། །དམ་ཆོས་ཉམས་ལེན་གཙོ་བོ་ལ། །ཚེ་འདི་ཞོར་ལ་བསྒྲུབ་ཙམ་མཛོད། །དེ་བྱས་འཕྲལ་དུ་ཤི་ན་ཡང་། །འགྱོད་མེད་བློ་བདེའི་བོགས་སྐྱེད་འོང་། །རྒྱུ་འབྲས་དམ་ཆོས་མ་ཐོས་པས། །ཕན་ཡོན་ཉེས་དམིགས་ཤེས་གྱུར་ནས། །སྡིག་སྤོང་དགེ་སྒྲུབ་མི་བྱེད་པ། །བསམ་མེད་བྱིས་པ་མེར་མཆོངས་འདྲ། །ཕན་ཡོན་ཉེས་དམིགས་ཤེས་བཞིན་དུ། །སྡིག་ལ་མི་འཛེམ་འཆོལ་ཉོག་སྤྱོད། །ཤེས་བཞིན་བཙན་དུག་ཟ་བ་འདྲ། །དེ་འདྲ་བཤགས་ཀྱང་དག་པར་དཀའ། །མནར་མེད་དམྱལ་བར་སྲེག་པའི་གེགས། །དེ་ལ་མདོ་སྡེ་མཛངས་བླུན་སོགས། །རྒྱུ་འབྲས་ཆོས་ལ་
ཡིད་ཆེས་བསྐྱེད། །ཕ་མ་མཉམ་པའི་བུ་ལ་ཡང་། །ཚེ་ཡི་རིང་ཐུང་སྐྱིད་དང་སྡུག །མི་མཉམ་ལས་འབྲས་སོ་སོའི་རྟགས། །མི་ལུས་ཐོབ་པ་འདྲ་འདྲ་ལ། །དབང་སྟོབས་མངའ་ཐང་ཆེ་དང་ཆུང་། །མི་མཉམ་ལས་འབྲས་བལྟས་པས་གསལ། །སྐྱེ་བ་འདི་དང་ཚེ་རབས་ཀུན། །ཕན་ངེས་གཉེན་ནི་དགེ་བའི་ཆོས། །གནོད་ངེས་དགྲ་ནི་མི་དགེའི་སྡིག །དེ་ཕྱིར་སྡིག་སྤོངས་དགེ་ལ་འབད། །ངན་སོང་སྤོང་བའི་བོགས་སྐྱེད་འབྱུང་། །དེ་ལྟར་སྡིག་སྤོང་དགེ་སྒྲུབ་ཀྱང་། །ཕྱི་མ་ལྷ་དང་མི་རྣམས་ཀྱི། །བདེ་སྐྱིད་འདོད་ཕྱིར་ཡིན་ན་ནི། །སྐྱེ་བ་བརྒྱ་སྟོང་ཁྲི་འབུམ་དུ། །འདོད་བཞིན་བདེ་སྐྱིད་འབྱུང་ན་ཡང་། །དེ་ནས་དགེ་རྩ་དེ་ཟད་ནས། །སླར་ཡང་ངན་སོང་མཐའ་མེད་འཁྱམས། །ཐར་པ་མི་ཐོབ་གེགས་ཆེན་ཡིན། །སྔར་ཡང་གེགས་འདིས་བསླུས་པས་ལེན། །འཇིག་རྟེན་འདི་ཡི་བདེ་སྐྱིད་མཆོག །ཚངས་དང་བརྒྱ་བྱིན་འཁོར་ལོས་སྒྱུར། །དེ་ཡང་ནམ་ཞིག་ལྟུང་དགོས་ན། །འཁོར་བར་སྙིང་པོ་ག་ལ་ཡོད། །འཕྲལ་དུ་གནས་སྐབས་བདེ་སྐྱིད་ཀྱང་། །དུག་དང་འདྲེས་པའི་ཟས་ཞིམ་ལྟར། །ཕུགས་སུ་ཕན་ལས་གནོད་ཆེས་སོམས། །དེ་
ཕྱིར་སྡིག་སྤངས་དགེ་བསྒྲུབས་འབྲས། །འཁོར་བའི་བདེ་སྐྱིད་འདོད་པ་སྤོངས། །བཙོན་དོང་ནང་གི་བཙོན་བཞིན་དུ། །སྐྱེ་རྒ་ན་འཆི་བྱེ་བ་དུང་། །འདི་ལ་སྐྲག་ནས་འཁོར་བ་ན། །ནམ་ཐར་བསམ་པ་ཡིད་ལ་ཆོངས། །ཐར་པ་ཐོབ་པའི་བོགས་སྐྱེད་འབྱུང་། །དེ་ལྟར་ཐར་པ་སྒྲུབ་པ་ཡང་། །སྙིང་རྗེ་སེམས་བསྐྱེད་མི་ལྡན་པར། །རང་དོན་ཁོ་ན་ལ་དམིགས་ནས། །ཉན་རང་དགྲ་བཅོམ་ཐོབ་ནས་ཀྱང་། །འཁོར་བའི་སྡུག་བསྔལ་སྤངས་ལགས་ཀྱང་། །རྫོགས་པའི་སངས་རྒྱས་མི་ཐོབ་པས། །ཐེག་ཆེན་ལམ་གོལ་གེགས་ཆེན་ཡིན། །དེ་ལ་བྱམས་དང་སྙིང་རྗེ་བསྐྱེད། །རང་གི་ཕ་མ་མ་བྱས་པའི། །སེམས་ཅན་གཅིག་ཀྱང་ཡོད་མ་ཡིན། །དེ་དག་ཐམས་ཅད་འཁོར་བ་ཡི། །སྡུག་བསྔལ་རྒྱ་མཚོར་བྱིངས་བཞིན་དུ། །རང་ཉིད་ཐར་ཡང་དགོས་པ་ཆུང་། །དེ་ཡང་གནས་སྐབས་ལྷ་མི་ཡི། །བདེ་བར་བཀོད་ཀྱང་སླར་ལ་ལྟུང་། །དེ་བས་སེམས་ཅན་ཐམས་ཅད་ཀུན། །བླ་མེད་རྫོགས་པའི་སངས་རྒྱས་སར། །བདག་ཉིད་ཁོ་ནས་དགོད་པའི་ཕྱིར། །ཉམས་ལེན་དགེ་སྦྱོར་འབད་སྙམ་པའི། །བློ་སྟོབས་བསྐྱེད་ལ་སེམས་བསྐྱེད་
སྒོམས། །ཐུབ་པས་གཞན་དོན་མཛད་པ་དང་། །བྱིས་པས་རང་དོན་བྱས་པ་གཉིས། །གང་དེ་ཁེ་གདའ་གནད་དེ་སོམས། །དགེ་སྦྱོར་དགེ་རྩ་ཆེ་ཕྲ་ཀུན། །འགྲོ་ཀུན་སངས་རྒྱས་ཐོབ་ཕྱིར་བསྔོ། །ཅི་བྱས་བྱང་ཆུབ་ལམ་དུ་འགྲོ། །མཐར་འཚང་རྒྱ་བའི་བོགས་ཆེན་འབྱུང་། །དེ་ལྟར་སེམས་བསྐྱེད་ཆོས་བྱས་ཀྱང་། །བླ་མ་བཀའ་བརྒྱུད་རྣམ་ཐར་དང་། །ཕན་ཡོན་ཞིང་ཁམས་བཀོད་པ་དང་། །ངན་སོང་སྡུག་བསྔལ་ཡོད་ལུགས་དང་། །ཕན་ཡོན་ཉེས་དམིགས་ཅི་ཐོས་ཀྱང་། །བཤད་ཚོད་ཡིན་སྙམ་ངེས་ཤེས་མེད། །དཀོན་མཆོག་བྱིན་རླབས་རྒྱང་རིང་ཞིང་། །ཆོས་བྱས་ཕན་ཡོན་ཆུང་བའི་གེགས། །ཉི་ཟླ་ཐང་ལ་ལྟུང་ཡང་སྲིད། །རླུང་ནི་ཞགས་པས་ཟིན་ཡང་སྲིད། །སངས་རྒྱས་བཀའ་ལ་རྫུན་མི་སྲིད། །སྙམ་ནས་ངེས་ཤེས་དྲག་པོ་བསྐྱེད། །འདི་དང་ཕྱི་མ་བར་དོ་རུ། །ཅི་མཛད་དཀོན་མཆོག་ཁྱེད་ཤེས་སམ། །གཟུངས་སྔགས་ལ་སོགས་ཕན་ཡོན་རྣམས། །ད་ལྟ་གསུངས་ལྟར་མ་བྱུང་བ། །རང་གི་རྣམ་སྨིན་སྒྲིབ་པས་བསྒྲིབས། །ལས་ཀྱི་རྣམ་སྨིན་མ་གཏོགས་གསུངས། །དེ་དོན་གོ་བས་ལོག་ལྟ་སྤོངས། །དཀོན་མཆོག་གསུམ་གྱི་བྱིན་
རླབས་འཇུག །ཕན་ཡོན་འབྱུང་བའི་བོགས་འབྱུང་ངོ་། །དེ་ལྟར་སེམས་བསྐྱེད་ཆོས་སྤྱོད་ཀྱང་། །བསྐལ་པ་གྲངས་མེད་གསུམ་གྱི་བར། །རྫོགས་པའི་སངས་རྒྱས་མི་ཐོབ་གེགས། །རང་ལུས་ལྷ་རུ་མ་ཤེས་ནས། །ཐ་མལ་རང་རྒྱུད་བཟུང་བས་ལེན། །ཕུང་པོ་ཁམས་དང་སྐྱེ་མཆེད་རྣམས། །ཡེ་ནས་ལྷ་ཡི་དཀྱིལ་འཁོར་དུ། །གསར་རྙིང་བླ་མེད་རྒྱུད་ཀུན་མཐུན། །དེ་ཕྱིར་རང་ལུས་སྤྱན་རས་གཟིགས། །གར་འདུག་གནས་དེ་གཞལ་ཡས་ཁང་། །སུ་འགྲོགས་དཔའ་བོ་མཁའ་འགྲོའི་འཁོར། །གདན་ནི་པདྨ་ཟླ་བ་སྟེ། །གོས་རྣམས་ལྷ་ཡི་ན་བཟའ་བརྒྱན། །ཟས་རྣམས་ཚོགས་འཁོར་བདུད་རྩིར་བསྒོམ། །ཚེ་འདིའམ་ནི་བར་དོ་དང་། །སྐྱེ་བ་བདུན་ལས་མི་ཐོགས་པར། །སངས་རྒྱས་ཐོབ་པའི་བོགས་འབྱུང་ངོ་། །དེ་ལྟར་མོས་པ་ཙམ་བྱས་ཀྱང་། །དོན་ལ་ཡིན་རྒྱུ་མེད་བསམ་ནས། །ངེས་ཤེས་སྐྱེ་བར་མི་ནུས་པས། །བྱིན་རླབས་རྟགས་མཚན་མི་འབྱུང་གེགས། །རང་ཉིད་ཡི་དམ་ལྷ་ཡིན་པའི། །ངེས་ཤེས་ཨུ་ཚུགས་འདྲ་བ་བསྒོམ། །རྟགས་མཚན་གསལ་བའི་བོགས་འབྱུང་ངོ་། །ལྷ་རྟགས་དངོས་ཉམས་རྨི་ལམ་དུ། །
ཞལ་མཐོང་ལུང་བསྟན་དག་སྣང་ལ། །མཆོག་ཡིན་སྙམ་ནས་རློམ་སེམས་ཆེ། །རང་མཐོང་རང་རྩིས་ཆེར་སྐྱེས་ནས། །མཆོག་གི་དངོས་གྲུབ་འགག་པའི་གེགས། །མེ་བུས་རྟགས་ལ་དུ་བའི་དཔེ། །རྟགས་མཚན་དེ་ཙམ་ལོས་འོང་ཡིན། །སྙམ་དུ་རློམ་སེམས་མི་བསྐྱེད་པར། །ངེས་ཤེས་བསྐྱེད་ལ་བསྙེན་སྒྲུབ་བྱ། །ལམ་དུ་འགྲོ་བའི་བོགས་འབྱུང་ངོ། །སྔགས་བཟླས་བསྐྱེད་རིམ་གསལ་ན་ཡང་། །གདོས་བཅས་ལྡེར་སྐུ་འདྲར་བསྒོམས་པས། །ལྷ་དེ་འདྲ་བའི་འབྱུང་པོའི་རིགས། །ཡང་ན་གཟུགས་ཀྱི་ཁམས་ཀྱི་ལྷ། །སྐྱེ་ཞིང་སངས་རྒྱས་མི་ཐོབ་གེགས། །ལྷ་སྐུ་གསལ་ཡང་ངོ་བོ་སྟོང་། །སྣང་སྟོང་འཇའ་ཚོན་བཞིན་དུ་བསྒོམ། །ལུས་འདི་བོར་ནས་བར་དོ་རུ། །ལོངས་སྤྱོད་རྫོགས་སྐུའི་ཞིང་ཁམས་སུ། །སྐྱེས་ནས་བྱང་ཆུབ་མཆོག་ཐོབ་བོ། །དེ་ནི་བོགས་འདོན་ཆེན་པོའོ། ༈ །ཁྲིད་ཞུས་གནས་འགྱུ་སྐྱོང་ཤེས་ནས། །ཡུན་རིང་མ་སྒྱུར་བསྲུངས་ན་ཡང་། དང་པོ་འབྲོས་དེད་དེ་ག་ལས། །ཅི་ཡང་ཡར་སྐྱེད་མེད་པའི་གེགས། །མོས་གུས་དད་པ་ཆུང་བས་ལེན། །རང་གི་དྲིན་ཐོབ་བླ་མ་དེ། །སངས་རྒྱས་སེམས་ཅན་སུ་ཡིན་འདྲ། །
རང་སེམས་ངོ་བོ་སྤྲད་པ་དེ། །སངས་རྒྱས་ཀུན་བས་བཀའ་དྲིན་ཆེ། །རྡོ་རྗེ་འཆང་དང་ཀུན་ཏུ་བཟང་། །སངས་རྒྱས་ཀུན་གྱི་ཆོས་སྐུ་དང་། །བླ་མ་དབྱེར་མེད་མོས་གུས་བསྐྱེད། །བླ་མ་སངས་རྒྱས་ཆོས་སྐུ་དེ། །རྡོ་རྗེ་འཆང་ངམ་སྣང་མཐའ་ཡས། །ཆོས་སྐུའི་སངས་རྒྱས་གཅིག་ཏུ་བསྒོམ། །དཀོན་མཆོག་བླ་མ་ཡི་དམ་ལྷ། །ཀུན་འདུས་བསྒོམས་ལ་གསོལ་བ་བཏབ། །གདུང་ཤུགས་མཆི་མ་དབྱུང་བར་བྱ། །བླ་མ་འོད་ཞུ་རང་ལ་བསྟིམ། །དེ་འདྲ་ཐུན་གསུམ་ཐུན་བཞི་སོགས། །འབད་ན་དབྱར་ཁའི་སྤང་བཞིན་དུ། །ཉམས་རྟོགས་རང་རྡོལ་ཁོག་ནས་འཆར། །ཅི་ཡང་འཆར་བའི་བོགས་འབྱུང་ངོ། །དེ་ལྟར་ཉམས་ལེན་བསྐྱངས་ཙམ་ན། །རིག་པ་འཕྲོ་རྒོད་རྩུབ་ཅིང་རྒྱུག །སྐྱོངས་རྒྱུ་མི་རྙེད་ཡི་མུག་སྐྱེ། །ནན་གྱིས་བསྐྱངས་ན་བློ་མི་བདེ། །རྒན་མོས་ཕྱུགས་ལུག་འཚོས་པ་འདྲ། །དེ་ལ་རྒོད་པའི་གེགས་ཤེས་བྱ། །གནས་འགྱུ་གདམས་ག་བྱས་པས་ལེན། །འཁྱིལ་བའི་ཆུ་དང་རྦ་རླབས་ཆུ། །ཆུ་ཡིན་པ་ལ་བཟང་ངན་མེད། །གནས་པའི་སེམས་དང་འགྱུ་བའི་སེམས། །སེམས་ཉིད་ཡིན་ལ་ཁྱད་པར་མེད། །སེམས་ཉིད་ཡེ་
ནས་ཆོས་ཀྱི་སྐུ། །དེ་ལ་བཅོས་བསླད་བྱས་ན་ཞེན། །གནས་འདོད་མ་ཆེ་འགྱུ་དོགས་སྤོངས། །མ་ཡེངས་ཙམ་ལ་ལྷོད་ནས་སྐྱོངས། །གསལ་ཚེ་སྐྱུར་ལ་ཡང་ཡང་བསྒོམ། །བློ་བདེ་སྐྱོང་སླའི་བོགས་ཤིག་འབྱུང་། །དེ་ལྟར་བསྐྱངས་པས་རེས་འགའ་ཞིག །བལྟས་ཀྱང་གསལ་དང་ངེས་ཤེས་མེད། །གནམ་ངོ་རྨུགས་ལྟར་ཐིབ་བེ་བ། །ཧྲིག་ཧྲིག་བྱས་ནས་བལྟས་ན་ཡང་། །རྣམ་རྟོག་འདི་ཡིན་ངོས་བཟུང་རུ། །མེད་པའི་བན་བུན་ཕྲ་ཞིབ་སྣང་། །ཡི་མུག་སྐྱོང་ཡང་མི་འདོད་པ། །བྱིང་བའི་སྐྱོན་དེ་གེགས་ཤིག་ཡིན། །དེ་ལ་ལྟ་སྟངས་ནམ་མཁར་གཏད། །སེམས་དང་ནམ་མཁའ་སྔོ་བསངས་བསྲེ། །ལུས་སེམས་བསྒྲིམས་ལ་ལུས་གནད་བསྲང་། །གསལ་དང་རྗེན་པའི་བོགས་ཤིག་འབྱུང་། །ཏིང་འཛིན་གེགས་ལ་རྣམ་མང་ཡང་། །བྱིང་རྒོད་གཉིས་ལ་ཕལ་ཆེར་འདུས། །དེ་ལ་གེགས་སེལ་མང་ན་ཡང་། །དོན་ལ་བསྒྲིམ་ལྷོད་གཉིས་ཡིན་ཏེ། །རྒོད་ན་ལྷོད་ལ་བྱིང་ན་སྒྲིམས། །ལ་ཆེན་གང་ཤར་ངོ་བོ་ལ། །གང་བྱུང་དེས་ཆོག་སྐྱོང་བ་མཆོག །བཟང་བཟང་པོ་གཅིག་མ་འདོད་ལ། །ངན་ངན་འདྲ་ཡང་མི་སྐྱུར་བར། །ཡུགས་སས་དྭ་ཕྲུག་
སྐྱོང་བ་འདྲ། །རྒྱུན་བསྲིང་བ་ནི་གནད་ཡིན་ནོ། །ལམ་མུས་ཕོག་པའི་གེགས་སེལ་ཡིན། །དེ་ལྟར་རྒྱུན་གཅིག་བསྲིང་ནུས་ན། །བདེ་གསལ་མི་རྟོག་ཉམས་བཟང་འཆར། །ལུས་བདེ་སེམས་བདེ་སེམས་རྩ་སྐྱིད། །ང་ལས་སྐྱིད་པ་མེད་དོ་སྙམ། །འགྱུ་བ་ཉུང་ཞིང་མེ་རེ་གནས། །སྤྱོད་ལམ་ཕལ་ཆེར་འབྲལ་བ་མེད། །འོད་གསལ་འཁོར་ཡུག་ཡིན་ནམ་སྙམ། །ཉོན་མོངས་དུག་ལྔའི་མགོ་ཡང་ནོན། །འཇིག་རྟེན་བྱ་བས་དགོས་པ་མེད། །གཅིག་པུར་བྲག་ཕུག་འགྲིམ་ན་བསམ། །མཚན་མོ་རྨི་ལམ་ཕལ་ཆེར་ཟིན། །ཉམས་ལེན་འདི་དང་མ་བྲལ་ན། །འདི་ཕྱིའི་དོན་ཆེན་འགྲུབ་བོ་སྙམ། །དེ་ལ་ངེས་ཤེས་མཆོག་འཛིན་གྱིས། །ངང་ལ་ཚེ་ཡི་དུས་བྱས་ནས། །ཉམས་ལེན་ཆེ་ཆུང་རིམ་པ་ཡིས། །རྒྱལ་ཆེན་རིགས་བཞིའི་ལྷ་རྣམས་དང་། །སུམ་ཅུ་རྩ་གསུམ་འཐབ་བྲལ་དང་། །དགའ་ལྡན་འཕྲུལ་དགའ་གཞན་འཕྲུལ་གྱི། །ལྷ་ཡི་གནས་སུ་སྐྱེ་བ་ལེན། །བདེ་སྐྱིད་ལོངས་སྤྱོད་དཔག་མེད་ཀྱང་། །བྱང་ཆུབ་མི་ཐོབ་གེགས་ཡིན་ནོ། །དེ་ལ་བདེ་ཉམས་ཅི་སྐྱེས་ཀྱང་། །དེ་ལ་ཆགས་ཞེན་མཆོག་འཛིན་སྤང་། །བདེ་བ་དེ་
ཡི་ངོ་བོ་ལ། །ཧྲིག་གེ་བལྟས་པས་བདེ་བ་དང་། །སྟོང་པ་དབྱེར་མེད་ཟུང་དུ་འཇུག །བདེ་སྟོང་ཕྱག་རྒྱ་ཆེན་པོ་འཆར། །གོལ་ས་གཅོད་པའི་བོགས་འདོན་ཡིན། །དེ་ཉིད་བསྐྱངས་པས་དེ་མི་རྟག །རང་སེམས་གསལ་སྟོང་རྗེན་པར་འཆར། །སྤྲིན་ཐག་ཆད་པའི་ནམ་མཁའ་ལྟར། །ལྷང་ངེ་རྗེན་ནེ་ས་ལེ་བ། །དྲན་པས་ཟིན་ནམ་དེ་ཡི་ངང་། །ཐེ་ཚོམ་མེད་པའི་ངེས་ཤེས་སྐྱེ། །འདི་ལས་ལྷག་པའི་ཉམས་རྟོགས་ནི། །གྲུབ་ཐོབ་རྣམས་ལའང་མེད་དམ་སེམས། །གཉིད་དང་རྨི་ལམ་མཚམས་ཤེད་ནས། །ཉི་ཟེར་ཟླ་ཐིག་མེ་རུ་ནི། །འདྲ་བའི་འོད་ཅིག་རྐྱེན་བྱས་ནས། །ཉམས་ལེན་ཉིན་པར་བཞིན་དུ་ཟིན། །གཉིད་བཞིན་ཁང་པའི་ནང་དང་ནི། །ས་ཐག་རིང་དང་ལ་གྲིབ་ཀྱིས། །ཅི་གདའ་ཅི་བྱེད་རེས་འགའ་མཐོང་། །སུ་ཡིས་ཟེར་ཡང་ང་ཡི་འདི། །རྟོགས་པ་མཆོག་གྱུར་ཡིན་ནོ་སེམས། །དེ་ལ་ཆགས་ཞེན་ཆེན་པོ་དང་། །ངེས་ཤེས་བརྟན་པོས་ཚེ་འཕོས་ན། །ཚངས་རིས་ཚངས་པ་མདུན་ན་འདོན། །དགེ་ཆུང་ཚད་མེད་དགེ་ལ་སོགས། །ཉམས་ལེན་དེ་ཡི་ཆེ་ཆུང་གིས། །གཟུགས་ཁམས་གནས་རིགས་བཅུ་བདུན་གྱི། །ལྷ་ཡི་གནས་
སུ་སྐྱེས་གྱུར་ནས། །རིན་པོ་ཆེ་ཡི་གཞལ་ཡས་སུ། །མཚན་དཔེ་ལྡན་པའི་ལུས་ཐོབ་ནས། །རེ་ཞིག་ལོ་གྲངས་དཔག་མེད་དུ། །བདེ་སྐྱིད་སངས་རྒྱས་ཞིང་འདྲ་ཡང་། །སླར་ཡང་ངན་སོང་ལྟུང་བའི་གེགས། །དེ་ལྟར་གསལ་ཉམས་ཆེ་དྲགས་པས། །ཟག་བཅས་མངོན་ཤེས་ཤར་འདྲ་ཡང་། །དེ་ལ་མཆོག་འཛིན་ང་རྒྱལ་སྤོངས། །གསལ་བ་དེ་ཡི་ངོ་བོ་ལ། །བལྟས་པས་ངོ་བོ་སྟོང་པར་རྟོགས། །གསལ་སྟོང་དབྱེར་མེད་གཅིག་ཏུ་འདྲེས། །གསལ་སྟོང་ཕྱག་རྒྱ་ཆེན་པོར་འཆར། །བླ་མེད་མཆོག་ཐོབ་བོགས་འདོན་ཡིན། །དེ་ལ་བསྐྱངས་པས་ནམ་ཞིག་ན། །བདེ་ཉམས་གསལ་ཉམས་གཉིས་ཀ་མེད། །ཐམས་ཅད་སྟོང་པ་ཉིད་དུ་མཐོང་། །ལུས་ཀྱང་དངོས་སུ་མེད་དམ་སྙམ། །ཕྱི་ནང་སྣོད་བཅུད་འཁོར་འདས་ཀུན། །ཐམས་ཅད་སྟོང་པ་ནམ་མཁའ་འདྲ། །སྙམ་པའི་རྟོགས་པ་སྐྱེས་ཙམ་ན། །ཐམས་ཅད་སྟོང་པ་ཉིད་དུ་གདའ། །དགེ་སྡིག་ཕན་གནོད་ག་ལ་ཡོད། །སྙམ་ནས་སྡིག་ལ་མི་འཛེམ་ཞིང་། །དགེ་བ་སྒྲུབ་པར་མི་བྱེད་ན། །སྟོང་ལྟ་ཧད་པོ་བདུད་ཀྱི་ལས། །སྟོང་པ་ཉིད་ལ་བལྟ་ཉེས་པས། །ཤེས་རབ་དམན་རྣམས་ཕུང་
གསུངས་ལྟར། །མནར་མེད་གནས་སུ་ལྟུང་བའི་གེགས། །རྟོགས་པ་ཇི་ཙམ་མཐོ་ན་ཡང་། །རྒྱུ་འབྲས་ལག་ལེན་ཞིབ་པར་རྩི། །དཔེར་ན་ནམ་མཁའ་སྟོང་པ་ལ། །བརླན་དང་ཚ་གྲང་རྟེན་འབྲེལ་གྱིས། །འཇའ་དང་སྤྲིན་དང་ཆར་པ་དང་། །ཐོག་དང་སེར་བ་འོང་བ་ལྟར། །ཆོས་ཀུན་སྟོང་པ་ཉིད་ཡིན་ཀྱང་། །རྒྱུ་འབྲས་རྟེན་འབྲེལ་མི་བསླུ་བས། །རིགས་དྲུག་སྐྱིད་སྡུག་སྣ་ཚོགས་འབྱུང་། །ཤེས་རབ་སྟོང་ཉིད་བསྒོམས་པ་ཡིས། །འཁོར་བ་སྤངས་ནས་ཆོས་སྐུ་ཐོབ། །ཚོགས་བསགས་སྙིང་རྗེ་བསྒོམས་པ་ཡིས། །ལོངས་སྐུ་སྤྲུལ་སྐུ་ཐོབ་པ་སྟེ། །ཤེས་རབ་སྟོང་ཉིད་ཐབས་ནི་ཚོགས། །ཚོགས་གཉིས་ཟུང་འཇུག་ཉམས་སུ་བླངས། །སྐུ་གཉིས་ཐོབ་པའི་བོགས་འདོན་ཆེ། །དེ་ལྟར་ཚོགས་གཉིས་འབད་པའི་ཚེ། །ཐམས་ཅད་སེམས་རེད་བསམ་པ་དང་། །སེམས་ནི་ནམ་མཁའ་དང་འདྲ་བསམ། །སེམས་ནི་ཡོད་མེད་གཉིས་ཀ་མིན། །ཡོད་མིན་མེད་མིན་རེད་བསམ་དང་། །སེམས་ནི་ཅི་ཡང་མི་གདའ་བསམ། །དེ་འདྲ་རེས་འགའ་སྐྱེས་ཀྱང་བཟོད། །དེ་འདྲ་ཡིན་ལ་ཁད་ཡོད་ཀྱང་། །དེ་འདྲ་ཡིན་ནོ་བསམ་པ་ཡི། །ངེས་ཤེས་
འཛིན་པ་དམ་པོའི་ངང་། །གལ་ཏེ་ཚེ་འདི་འཕོས་ན་ནི། །གཟུགས་མེད་སྐྱེ་མཆེད་མུ་བཞིར་གོལ། །བསྐལ་པ་ཁྲི་ཕྲག་བརྒྱད་ཀྱི་བར། །བཟང་ངན་ལུས་ནི་ལེན་རྒྱུ་མེད། །དྲན་མེད་བརྒྱལ་བ་འདྲ་ཞིག་འབྱུང་། །སླར་ཡང་ལུས་ལེན་འཁོར་བར་འཁྱམས། །དེ་འདྲའི་ངེས་ཤེས་བརྟན་པོ་ནི། །སྐྱེས་པ་ཕྱི་རོལ་མུ་སྟེགས་ལུགས། །ཆོས་སྐུ་ཐོབ་པར་འདོད་པ་རེ། །དེ་འདྲའི་རྟོགས་པ་སྐྱེས་ནའང་། །ཐམས་ཅད་སེམས་རེད་བསམ་མཁན་སོགས། །འཛིན་པ་དེ་དག་རང་ལ་ལྟོས། །འཛིན་པ་དེ་དག་རང་སར་དག །སྟོང་ཉིད་ཕྱག་རྒྱ་ཆེན་པོར་འཆར། །དེ་ནི་བོགས་འདོན་ཡང་དག་གོ །དེ་ལྟར་བདེ་གསལ་མི་རྟོག་ཉམས། །བྱིང་རྒོད་ལ་སོགས་དེ་རྣམས་ལ། །གོ་རིམ་ངེས་པ་མེད་་པ་སྟེ། །སྔ་འཆར་ཕྱི་འཆར་ཅི་ཡང་འབྱུང་། །འཆར་ཝིག་སྐོར་རྫོགས་མང་དུ་འོང་། །ཡུན་ཡང་ལོ་མང་ཟླ་གྲངས་དང་། །ཞག་འགའ་དང་ནི་ཡུད་རེ་ཙམ། །ངེས་མེད་མི་ཡི་རིགས་ཡིན་ནོ། །མི་འཆར་བ་ནི་མི་འབྱུང་སྟེ། །སྐས་ཐེམ་བཞིན་དུ་བརྒྱུད་དགོས་སོ། །རེས་འགའ་འདོད་ཆགས་ཞེ་སྡང་དང་། །ཕྲག་དོག་སེར་སྣ་སྔར་ལས་ཆེ། །ཚིག་
རྩུབ་རྒྱུད་གྱོང་མི་རྣམས་ཀྱང་། །སྒོམ་ཆེན་ཟེར་ཞིང་མཚང་ནས་འབྲུ། །རྩུབ་ཉམས་སྡིག་སྒྲིབ་སློང་བའི་གེགས། །བླ་མ་རྗེ་ལ་གསོལ་བ་བཏབ། །ལུས་སེམས་ལྷོད་དེ་ཀློད་ལ་བསྐྱང་། །དེ་ཉིད་ཤིན་དུ་བོགས་ཆེའོ། །མཚང་འབྲུ་ཚིག་ངན་ལ་སོགས་པ། །ཆེད་དུ་དེ་ལ་དམིགས་གཏད་བྱས། །ངོ་བོ་བལྟས་པས་སྟོང་པར་རྟོགས། །དེ་ལྟར་ཆུང་ས་ནས་བརྩམས་ཏེ། །གནད་ཆེན་ལ་ཡང་རིམ་པས་བསླབ། །རྣམ་རྟོག་ངན་པ་གང་སྐྱེས་ལ། །དང་པོ་རྗེས་སླེབ་བྱ་བ་གཅེས། །དེ་ནས་སྐྱེས་ཐོག་འབུར་འཇོམས་དང་། །དེ་ནས་རང་གྲོལ་ཆུ་རླབས་ལྟར། །རང་སེམས་འདུལ་བ་འདུལ་བའི་མཆོག །ཉོན་མོངས་འཇོམས་པའི་བོགས་འདོན་ཡིན། །ཉོན་མོངས་རྣམ་རྟོག་དགྲ་ཡིན་པས། །ངོ་བོ་བསྐྱངས་པས་འཇོམས་སྙམ་ན། །གཉེན་པོར་ཤོར་བའི་གེགས་ཡིན་ཏེ། །གསང་སྔགས་དོན་དང་མི་མཐུན་གེགས། །ཉོན་མོངས་དང་ནི་རྣམ་རྟོག་ཀུན། །ཡེ་ནས་ཡེ་ཤེས་ཆེན་པོ་སྟེ། །མ་རྟོགས་འཁོར་བར་འཁྱམས་པ་ཡིན། །ཉོན་མོངས་སྤངས་བའི་ཕ་རོལ་ན། །ཡེ་ཤེས་རྩལ་དུ་མ་མཆིས་ཀྱང་། །དེ་རྗེས་འབྲང་ན་འཁོར་བར་འཁྱམས། །སྤངས་
ནས་བསམ་པ་བསྒྱུར་ཐུབ་ཀྱང་། །ཐེག་དམན་ཡིན་གྱི་ཕྱག་རྫོགས་མིན། །ཉོན་མོངས་རྣམ་རྟོག་དགེ་མི་དགེ །གང་ཤར་ཁྱད་མེད་རང་ངོ་བལྟ། །བཟོ་བཅོས་མེད་པར་དེ་གར་ཀློད། །ཆུ་རླབས་ཆུ་རུ་གྲོལ་བ་དང་། །ཉོན་མོངས་ཡེ་ཤེས་ཆེན་པོར་འཆར། །གང་ཤར་སྤང་བླང་མ་དགོས་པར། །བསྒོམ་དུ་འཆར་བའི་བོགས་འདོན་ཡིན། །མངོན་རྟོགས་ལ་སོགས་བསྒོམ་པའི་དུས། །སྭ་བྷཱ་ཝ་སོགས་སྔགས་བརྗོད་ནས། །སྟོང་པ་ཉིད་དུ་གྱུར་བརྗོད་དུས། །ཅི་ཡང་མེད་པའི་སྟོང་པ་ཉིད། །ནམ་མཁའ་ལྟ་བུར་གྱུར་བསྒོམ་པ། །སྟོང་ཉིད་དངོས་སུ་མི་རྟོགས་པར། །བློ་བཟོ་རྒྱས་འདེབས་ཤོར་བའི་གེགས། །བློ་ཡིས་སྟོང་པ་མི་བཟོ་བར། །རང་སེམས་སྟོང་པའི་ངོ་བོ་བལྟ། །མངོན་སུམ་རྟོགས་པའི་བོགས་འདོན་ཡིན། །མདོ་རྒྱུད་གྲུབ་ཐོབ་གསུང་མང་པོ། །མཐོང་བས་ཆོས་ཀུན་སྟོང་པ་ཉིད། །ནམ་མཁའ་ལྟ་བུ་ཡིན་རྒྱུ་རེད། །བསམ་པའི་གོ་བ་སྐམ་པོ་ལ། །ངེས་ཤེས་སྐྱེས་ནས་སྟོང་སྐད་འདོན། །དབུལ་པོས་ཕྱུག་པོའི་ལོ་རྒྱུས་རྣམས། །གོ་ཡང་ཕན་པ་མེད་དང་འདྲ། །དེ་ཕྱིར་གོ་བ་ཆེ་ན་ཡང་། །རྟོགས་པ་
མཐོ་བར་མི་རློམ་པར། །རང་སེམས་སྟེང་དུ་རྡོ་རུས་གཏུགས། །ཉམས་སུ་མྱོང་བའི་བོགས་འདོན་ཡིན། །དེ་ལྟར་བྱིང་རྒོད་སྐྱོན་གཉིས་བསལ། །བདེ་དང་གསལ་དང་མི་རྟོག་པའི་། །ཉམས་བཟང་རྣམས་ལ་མ་ཆགས་ཤིང་། །སེམས་སློང་རྩུབ་འཁྲུགས་མགོ་ནོན་ནས། །ཤོར་ས་གསུམ་དེར་མ་ཤོར་བ། །རྒྱུན་བསྲིངས་ཉམས་སུ་ལེན་ནུས་ན། །ནམ་ཞིག་བསོད་ནམས་དགེ་སྦྱོར་མཐུས། །བླ་མའི་བྱིན་རླབས་སེམས་ལ་ཞུགས། །ལྟ་རྒྱུ་ལྟ་མཁན་གཅིག་ཏུ་འདྲེས། །འདི་བསྒོམ་གཏད་སོ་གཅིག་ཀྱང་མེད། །འདི་ཡིན་འདི་མིན་འཛིན་པ་ཞིག །བདེ་གསལ་མི་རྟོག་ཉམས་བཟང་པོ། །ལེགས་ལེགས་འདྲ་ཚོ་ཤུན་པར་བུད། །ང་ཡི་བསྒོམ་དེ་བོར་རམ་ཅི། །འདི་བསྒོམ་གཏད་སོ་མི་འདུག་པས། །བསྒོམ་མེད་ཨམ་དེ་ཨེ་ཡིན་ཨང་། །འདི་ཆ་དེ་ཆ་མེད་པ་འདི། །གོལ་ས་གཅིག་ནི་ཨེ་ཡིན་ནམ། །སྙམ་ནས་རང་ལ་ཡིད་མི་ཆེས། །ཐ་མལ་ཤེས་པ་རྗེན་པར་བུད། །རང་སེམས་ངོ་བོ་མཐོང་བ་དེ། །ཕྱག་རྒྱ་ཆེན་པོའི་སྣེ་ཁེ་ཡིན། །ནམ་དྲན་དུས་སུ་དེ་ཉིད་ལ། །འཕེལ་འགྲིབ་ཆེན་པོ་མེད་ན་ཡང་། །བརྗེད་སྐབས་ཡེངས་སྐབས་
འཁྲུལ་པར་འཆོར། །དྲན་རྫིས་ཡང་ཡང་གསལ་འདེབས་གཅེས། །འདི་ནས་རྟོགས་ལྡན་མིང་བཏགས་རུང་། །རྣམ་གཡེང་གནས་དང་གཅིག་པུ་གཉིས། །ཨེ་མཉམ་བོགས་སུ་ཅི་ཐོན་ལྟ། །བོགས་འདོན་བླ་མའི་གསོལ་འདེབས་དང་། །སྤྲོས་བཅས་དགེ་སྦྱོར་ཉུང་བཅུག་ལ། །ངོ་བོ་ཉིད་ལ་ཨུ་ཚུགས་བསྐྱེད། །སྤྱོད་ལམ་རྣམས་དང་ཨེ་འདྲེས་ཚད། །འདི་ནས་འདྲེས་ན་འདྲེས་ངེས་ཡིན། །བསྒོམ་རྒྱུ་ཅི་ཡང་མི་གདའ་བས། །སྒྱུར་ནས་བཞག་པས་འཐུས་གདའ་བསམ། །སྤྲོས་བྲལ་མེད་པའི་སྟོང་རྗེས་ཁྱེར། །འཁྲུལ་པར་འབྱམས་པའི་གེགས་ཤིག་ཡིན། །དྲན་པས་ཡང་ཡང་གསལ་འདེབས་བྱ། །དྲན་ན་སྒོམ་ཡིན་དྲན་པས་ཆོག །མ་དྲན་ཐ་མལ་འཁྲུལ་པ་རང་། །ཡང་ཡང་དྲན་པས་བོགས་སུ་ཆེ། །རང་སེམས་སྟེང་དུ་བཞག་པའི་ཚེ། །གཟུགས་སྒྲ་དྲི་རོ་ལ་སོགས་པ། །མཐོང་ཐོས་ཚོར་བ་མ་འགགས་ཀྱང་། །ཡིན་མིན་བླང་དོར་འཛིན་པ་མེད། །ནང་དུ་འདི་བསྒོམ་གཏད་སོ་མེད། །མ་བཅོས་རྗེན་པ་ས་ལེ་བ། །གང་ཟག་བདག་མེད་ཅེས་བྱ་སྟེ། །ཉམས་ལེན་བཟང་པོ་ཡིན་མོད་ཀྱང་། །ཆོས་ཀྱི་བདག་མེད་མ་
གཏོགས་པ། །ད་རུང་སྟོང་ཉིད་ཕྱེད་པོ་ཡིན། །ཕྱི་རོལ་རི་དང་ཁང་ཁྱིམ་དང་། །སྐྱེས་པ་བུད་མེད་ལ་སོགས་པ། །རིག་པ་གཏད་ནས་བསྒོམས་ཙམ་ན། །འདི་ཡན་གཟུགས་དང་འདི་ཚུན་སེམས། །ཕྱེ་རྒྱུ་མེད་པར་དབྱེར་མེད་དུ། །ཉམས་ལེན་དེ་དང་ངོ་བོ་གཅིག །དེ་བཞིན་སྣང་སྲིད་འཁོར་འདས་ཀུན། །རང་གི་སེམས་དང་དབྱེར་མེད་ཅིང་། །རང་སེམས་ཡེ་ནས་སྟོང་པ་ཉིད། །སྟོང་དང་མི་སྟོང་འཛིན་པ་བྲལ། །ཕྱི་རོལ་ཡུལ་སྣང་སྣ་ཚོགས་པ། །ཆུ་ནང་ཟླ་བའི་གཟུགས་བརྙན་ལྟར། །གསལ་ཡང་ངོ་བོ་སྟོང་པར་མཐོང་། །དེ་ཡང་བསྲེ་སོགས་མི་དགོས་པར། །རང་ཤར་རྒྱུན་དུ་བྱུང་བ་ན། །ཉམས་ཀྱི་རོ་གཅིག་ཅེས་བྱ་སྟེ། །ཆོས་ཀྱི་བདག་མེད་རྟོགས་པ་ཡིན། །དེ་ནས་སྟོང་ཉིད་ཆ་ཚང་ངོ་། །སྣང་སྲིད་འཁོར་འདས་ཆོས་ཀུན་ལ། །ཐམས་ཅད་སྟོང་ཉིད་རྩི་ཡིས་ཟིན། །གང་བྱས་ཅི་བྱས་སྒྲིབ་མི་ནུས། །སྙམ་ཞིང་སྤྱོད་པ་རྩིང་ཤོར་ན། །མི་རྒྱུ་གྱོང་ཞིང་རྩབ་རྩུབ་མང་། །སྐབས་སུ་ཡེངས་སྐབས་བརྗེད་སྐབས་ཆེ། །འཇིག་རྟེན་བྱ་བ་རུ་ང་ཆེ། །རོ་གཅིག་འདྲེས་པའི་རྦ་ལ་གཡེངས། །ལན་གཅིག་ངན་སོང་ལྟུང་དོགས་གེགས། །
དེ་ལ་སྤྱོད་པ་ཞིབ་ཏུ་བྱ། །ད་རུང་གསོལ་བ་དྲག་ཏུ་གདབ། །འདི་སྐབས་གཉན་ས་འགའ་རེ་འགྲིམ། །ཆོ་འཕྲུལ་སེམས་དང་བསྲེ་ཞིང་བསྒོམ། །སྙིང་རྗེས་སེམས་བསྐྱེད་དྲག་ཏུ་བསྒོམ། །དུས་གསུམ་རྒྱལ་བའི་ཐུགས་རྒྱུད་དང་། །འགྲོ་དྲུག་སེམས་ཅན་སེམས་རྒྱུད་གཉིས། །དབྱེར་མེད་ངོ་བོ་གཅིག་ཏུ་རྟོགས། །སེམས་དང་ནམ་མཁའ་ཆོས་ཀྱི་དབྱིངས། །དབྱེར་མེད་ཆེ་ཆུང་མེད་པར་རྟོགས། །སྣོད་བཅུད་འཁོར་འདས་ཐམས་ཅད་ཀུན། །ལན་ཚྭ་ཆུ་རུ་ཐིམ་པ་ལྟར། །རང་སེམས་ངང་དུ་དབྱེར་མེད་འདྲེས། །ད་རུང་བརྗེད་སྐབས་ཡེངས་སྐབས་ཡོད། །ཡེངས་དང་མ་ཡེངས་བརྗེད་མ་བརྗེད། །དབྱེར་མེད་བཟང་ངན་མེད་པ་རུ། །ངོ་བོ་འགྱུར་མེད་ཀློང་དུ་རྟོགས། །དེ་ག་ཙམ་ཞིག་བྱུང་བ་ན། །མི་ལུས་ཐོབ་པ་དོན་དང་ལྡན། །ནམ་ཞིག་འཆི་བའི་དུས་ན་ཡང་། །བདེ་བ་ཅན་ནམ་རྔ་ཡབ་གླིང་། །སྨོན་ལམ་རྩེ་གཅིག་གར་བཏབ་དེར། །འགྲོ་ལ་ཐེ་ཚོམ་མི་དགོས་པས། །དེ་ཙམ་ཨེ་འོང་བརྩོན་འགྲུས་མཛོད། །གཞན་ཡང་བོགས་འདོན་གེགས་སེལ་ནི། །རྟོགས་པའི་གདེང་ཡང་ཐོབ་དཀའ་བས། །ནམ་འཆི་མི་ཤེས་ཤི་
བའི་ཚེ། །བར་དོ་མི་ཆོད་པ་ཡི་གེགས། །འཇིགས་རུང་གེགས་ཆེན་དེ་སེལ་ཐབས། །རྒྱུད་སྡེ་འབུམ་ཕྲག་དྲུག་ཅུའི་དོན། །དགའ་རབ་ཤྲཱི་སེང་པདྨ་འབྱུང་། །བི་མ་མི་ཏྲ་ལ་སོགས་པ། །རིག་འཛིན་རྗེ་འབངས་ཐུགས་ཀྱི་བཅུད། །བསྒོམ་ནི་མི་དགོས་བལྟས་པས་གྲོལ། །རྫོགས་ཆེན་ཐོད་རྒལ་ཉམས་སུ་ལོངས། །འཇའ་ཚོན་ཐིག་ལེ་ཐིག་ཕྲན་།དང་། །རང་སེམས་ངོ་བོ་བསྲེས་ལ་ལྟོས། །གསལ་སྟོང་དབྱེར་མེད་མངོན་སུམ་མཐོང་། །གལ་ཏེ་སེམས་ངོ་མི་ཤེས་ཀྱང་། །དེ་ལ་བལྟས་པས་བར་དོ་ཆོད། །འདི་ལས་ཟབ་དང་སླ་བ་མེད། །ཐེག་པ་དགུ་ཡི་ཡང་རྩེ་ཡིན། །འཇའ་ཚོན་ཐིག་ལེ་ཐིག་ཕྲན་རྣམས། །དངོས་སུ་གསལ་པོར་ཡིད་ཆེས་མཐོང་། །རྩེ་གཅིག་བསྒོམ་དང་ངོ་མཉམ་སྟེ། །ཆོས་ཉིད་མངོན་སུམ་མཐོང་བ་ཡིན། །འོད་ལྔ་ཡེ་ཤེས་ལྔ་ཡི་འོད། །འོད་སྐོར་དབྱིངས་ཀྱི་སྒྲོན་མ་སྟེ། །ཐིག་ཕྲན་རིག་པ་ལུ་གུ་རྒྱུད། །དེ་དག་ཇེ་ཆེ་ཇེ་ཆེར་འཕེལ། །ཉམས་ལེན་གོང་དུ་འཕེལ་བ་ཡིན། །སྤྲོས་བྲལ་བསྒོམ་དང་ངོ་མཉམ་པའི། །ཐིག་ལེའི་ནང་ནས་ལྷ་སྐུ་མཇལ། །བར་དོར་ཞི་ཁྲོའི་ལྷ་འཆར་ཚེ། །ངོས་ཟིན་དག་པའི་ཞིང་དུ་སྐྱེ། །
ད་ལྟ་ཞི་ཁྲོའི་ལྷ་ཡོངས་རྫོགས། །ཤར་ནས་བར་དོ་བགྲོད་མི་དགོས། །ཕྱི་དབུགས་ཆད་པའི་དེ་མ་ཐག །ནམ་མཁའི་དཀྱིལ་ནས་འོད་ཀྱི་ལམ། །མིག་གི་དཀྱིལ་དུ་ཟུག་ནས་འོང་། །དེ་ཡི་རྒྱུད་ནས་རྣམ་ཤེས་འཕོ། །རྡོ་རྗེ་སེམས་དཔའི་ཐུགས་ཀར་ཐིམ། །རྫོགས་ཆེན་ཉེ་ལམ་ངོ་མཚར་ཆེ། །དེ་ལས་ཟབ་དང་སླ་བའི་ཆོས། །འཇིག་རྟེན་གང་དུའང་མེད་པར་གསུངས། །ཨོ་རྒྱན་པད་མའི་ཟབ་ཁྱད་ཡིན། །རྒྱུན་དུ་དགེ་སྦྱོར་གང་བྱེད་ཀྱང་། །སེམས་ཅན་ཀུན་གྱི་དོན་གྱི་ཕྱིར། །འདི་ནས་ཚེ་འཕོས་གྱུར་མ་ཐག །བདེ་བ་ཅན་གྱི་ཞིང་ཁམས་སུ། །སྐྱེ་བའི་བསྔོ་བ་སྨོན་ལམ་མཛོད། །སྐྱེའམ་མི་སྐྱེའི་ཐེ་ཚོམ་སྤོངས། །སྐྱེ་བར་ཐེ་ཚོམ་མི་དགོས་དང་། །འོད་དཔག་མེད་པའི་སྨོན་ལམ་སྟོབས། །ཡིན་པས་བློ་གཏད་དེ་ལ་མཛོད། །དེ་ལྟར་གེགས་སེལ་བོགས་འདོན་རྣམས། །འཕྲལ་དུ་ཡིད་ལ་གང་ཤར་ཙམ། །ཆོ་འཕྲུལ་ཟླ་བའི་གནམ་སྟོང་གི །ཉི་ཤར་ནས་བཟུང་དགོང་ཆེན་བར། །རྫོགས་པར་བྲིས་པའི་དགེ་བ་འདིས། །གནས་པོའི་ཉམས་རྟོགས་འཕེལ་བ་དང་། །འདི་ཉིད་སུ་ཡིས་མཐོང་ཐོས་རྣམས། །བྱང་ཆུབ་
བསྒྲུབ་ལ་གེགས་མེད་ཅིང་། །ཉམས་རྟོགས་དབྱར་གྱི་ཆུ་བོ་བཞིན། །རབ་ཏུ་འཕེལ་ཞིང་རྒྱས་ནས་ཀྱང་། །ཚེ་གཅིག་ལུས་གཅིག་འདི་ཉིད་ལ། །ཕྱག་རྒྱ་ཆེན་པོ་འགྲུབ་པར་ཤོག །དེ་སྐད་རཱ་ག་ཨ་སྱས་སྨྲས། །མངྒ་ལཾ།། ༈ ན་མོ་མ་ཧཱ་ཀཱ་ལ་ཡེ། ཕྱོགས་བཅུའི་རྒྱལ་བ་སྲས་བཅས་ཀྱིས། །ཕྲིན་ལས་དྲག་པོའི་སྐུར་བཞེངས་ནས། །གདུལ་དཀའ་འགྲོ་བ་འདུལ་མཛད་པ། །ཡེ་ཤེས་མགོན་པོ་བེར་ནག་ཅན། །ལེགས་ལྡན་མ་ནིང་ཕྱག་བཞི་པ། །སེང་གེའི་གདོང་ཅན་ལ་སོགས་པའི། །ཕོ་རྒྱུད་མགོན་པོ་ཐམས་ཅད་དང་། །མོ་རྒྱུད་ལྷ་མོ་ཐམས་ཅད་ལ། །གསོལ་བ་འདེབས་སོ་ཐུགས་རྗེས་གཟིགས། །དིང་སང་སྙིགས་མ་ལྔ་བརྒྱའི་དུས། །སངས་རྒྱས་བསྟན་པ་དར་བ་དང་། །བསྟན་འཛིན་དབུ་འཕང་མཐོ་བ་དང་། །བདག་དང་སློབ་མ་བརྒྱུད་པར་བཅས། །བར་ཆད་བདུད་ཀྱི་གཡུལ་ལས་རྒྱལ། །བསླབ་གསུམ་རྒྱན་གྱིས་རབ་མཛེས་ཤིང་། །བསྐྱེད་རྫོགས་གཉིས་ལ་བརྟན་ཐོབ་ནས། །ཚེ་གཅིག་སངས་རྒྱས་འགྲུབ་པར་མཛོད། །ཁྱད་པར་ལུང་བསྟན་འདི་ཉིད་ཀྱིས། །བསྟན་པ་དང་ནི་འགྲོ་བའི་དོན། །
རླབས་ཆེན་འགྲུབ་པའི་ཕྲིན་ལས་མཛོད། །ཁྱེད་རྣམས་ཐུགས་དམ་ཞལ་བཞེས་དང་། །བདག་གི་འདོད་དོན་གཅིག་པའི་ཕྱིར། །རིགས་མི་མཐུན་ཀྱང་དམ་།ཚིག་གཅིག །དེ་ཕྱིར་མ་གཡེལ་ཕྲིན་ལས་མཛོད། །ཅེས་པ་མགོན་པོ་སྤྱི་བསྡུས་ཀྱི་མདོས་ཆེན། གཏེར་སྟོན་གཉིས་ལ་དགོངས་པ་ཞུས་ནས་བཅས་དུས་ཉམས་རྨི་ལམ་གྱི་མཚམས་སུ། སྔགས་བཙུན་ཐོར་ཅོག་ཅན་གཟི་བརྗིད་ཅན་ཅིག་བྱུང་བ་མདོས་ལ་ལྟ་ཞིང་འདུག །བར་ཆད་ཞི་ཞིང་ཅི་བསམ་འགྲུབ་པའི་མཆོག་ཏུ་འགྱུར། །ཟེར་བའི་སྒྲ་ཞིག་གྲག །ལྷ་གང་ཡིན་མི་འབྱེད་པ་ཕྱག་གཡོན་བཻཌཱུརྱ་ཧྲིལ་པོ་བསྣམས་པ་ཞིག་མཇལ། འདི་ཅི་ཡིན་བསམས་པས། ཕྱག་གཡོན་མཉམ་བཞག་གི་སྟེང་ན་བཻཌཱུརྱ་འཛིན་པས་ཅི་བསམ་འགྲུབ། ཕྱག་གཡས་དོན་ཡོད་གྲུབ་པའི་ཕྱག་རྒྱ་མཛད་པས་དོན་འགྲུབ་བོ། །ཞེས་པའི་སྒྲ་ཞིག་གྲག་པ་ཐོས་པ་ལ་བརྟེན་ནས་བྲིས་པའོ།། །༈ །།ན་མོ་ལོ་ཀེ་ཤྭ་ར་ཡེ། འགྲོ་བ་འདུལ་མཛད་ཐུགས་རྗེ་ཅན། །སྤྱན་རས་གཟིགས་ལ་གསོལ་བ་འདེབས། །བདག་གིས་ཐོབ་དཀའི་མི་ལུས་ཐོབ། །མཇལ་དཀའི་མཁས་གྲུབ་མང་དུ་བསྟེན། །ཐོབ་དཀའི་དབང་ལུང་རྒྱ་མཚོ་ཐོབ། །རྟོགས་དཀའི་རང་སེམས་ཆོས་སྐུར་རྟོགས། །ད་ནི་ལོ་ནི་འགའ་ཟུང་ཙམ། །དམ་པའི་ཆོས་སྦྱིན་
བྱེད་ན་བསམ། །མཆོག་དམན་བར་མའི་འགྲོ་བ་ལ། །བསྔོ་སྨོན་འབྲེལ་པ་འཇོག་ན་བསམ། །བདག་གི་ལྷག་བསམ་རྣམ་དག་ལ། །བར་ཆད་མེད་ཅིང་དོན་འགྲུབ་པར། །ཐུགས་རྗེ་ཆེན་པོས་བྱིན་གྱིས་རློབས། །ཨོ་རྒྱན་རྗེ་ཡིས་བར་ཆད་སོལ། །བཀའ་སྲུང་ཀུན་གྱིས་ཕྲིན་ལས་སྒྲུབས། །ལྷ་སྲིན་ཀུན་གྱིས་སྡོང་གྲོགས་མཛོད། །བདག་ལ་རང་འདོད་ཁོང་སྐྲུན་མེད། །དཀའ་ལས་ངལ་དུབ་ཁྱད་བསད་ནས། །བསྟན་དང་འགྲོ་བའི་དོན་ཁོ་ན། །ཡིན་མིན་ཡེ་ཤེས་སྤྱན་གྱིས་གཟིགས། །གལ་ཏེ་བསམ་སྦྱོར་རྣམ་དག་བློན་།ཁྱེད་བཞེད་འགྲོ་དོན་འདི་ལགས་པས། །བསམ་པ་འགྲུབ་པར་ཐུགས་རྗེས་ཟུངས། །ཐུགས་རྗེས་ཐུགས་དམ་དུས་ལ་བབ། །ཅེས་མགྲོན་པོ་ཞིག་ལ་འགྲོ་བའི་ཉམས་དུས། །ཉམས་རྨི་ལམ་མཚམས་སུ། སྤྱན་རས་གཟིགས་བཞུགས་པ་བསྒྲུབ་པ་བས། བཞེངས་པ་བསྒྲུབ་པ་དགའ། བཞེངས་པ་བསྒྲུབ་པ་བས། མཆོངས་པ་བསྒྲུབ་པ་དགའ། ཞེས་པའི་སྒྲ་ཞིག་གྲགས་པས། དེ་བསྒྲུབ་པ་བས་རེ་ཞིག་མགྲོན་པོ་དགའ་ཞེས། བདུད་འདུལ་རྡོ་རྗེས་གསུངས་པ་དེ་བདེན་པའི་བརྡར་གོ་ནས་སྨྲས་སོ།། །།ན་མོ་རྒྱ་གྷི་ཝ་ཡེ། དབང་ཆེན་ཁྲོ་བོ་རྟ་མགྲིན་ལ། །གསོལ་བ་
འདེབས་སོ་བར་ཆད་སོལ། །བླ་མ་ཀརྨ་དོན་གྲུབ་ལ། །བསྒོམ་སྐྱོན་ཡིད་ཡུལ་མ་བདེ་ན། །གེགས་སེལ་གདམས་པ་འདི་ལྟར་བསྒོམ། །རང་ཉིད་ཐ་མལ་ལུས་པོ་ཡི། །རྐང་པ་གཉིས་ཀྱི་བོལ་གོང་ནང་། །ཡི་གེ་རཾ་ཡིག་དམར་པོ་རེ། །དེ་ལས་མེ་འབར་རང་གི་ལུས། །ནད་གདོན་ཤ་ཁྲག་ལུས་པོ་བཅས། །ཐམས་ཅད་ཡེ་ཤེས་མེ་ཡིས་ཚིག །རང་ལུས་མེ་ཕུང་ཆེན་པོར་གྱུར། །མེ་ལྕེ་འབར་བའི་སྔགས་སྒྲ་ནི། །རྟ་མགྲིན་སྔགས་དེའི་སྒྲ་སྐད་ནི། །འུར་འུར་འབྲུག་བཞིན་གྲག་པར་བསྒོམ། །རྟ་མགྲིན་སྔགས་ལ་སྟོང་ཕྲག་ཙམ། །ལུས་སེམས་མ་བདེ་བར་དུ་བཟླས། །དེ་ནི་དགོང་ཀའམ་ནུབ་མོ་བྱ། །ནངས་སྔ་ལ་སོགས་སྔ་དྲོ་ལ། །རང་གི་སྙིང་ནི་སྟོང་པའི་དཀྱིལ། །གཟབ་ཀྱི་ཡི་གེ་ཐཾ་དཀར་པོ། །དངུལ་གྱིས་བྲིས་པ་ལྟ་བུ་བསྒོམ། །དེ་ལས་བདུད་རྩི་དཀར་པོའི་རྒྱུན། །འོ་མ་ལྟ་བུར་བབ་པ་ཡིས། །སྙིང་ནི་ལྡེམས་སེ་གང་བར་སྒོམས། །དེ་ཚེ་སྔགས་ནི་ཡིག་དྲུག་བཟླས། །སྐབས་སུ་ལུས་སེམས་བག་ཀློད་ལ། །སེམས་ནི་བདེ་བའི་ངོ་བོར་ལྟ། །གེགས་སེལ་རཱ་ག་ཨ་སྱས་བྲིས་པ་ཨི་ཐི་རྒྱ་རྒྱའོ།།
ན་མོ་མ་ཧཱ་མུ་དྲ་ཡེ། དྲག་ལུས་རྟོགས་འབུལ་བྱས་པའི་ལེན། །དངོས་སུ་སྨྲས་པ་མ་གསལ་ན། །ཡི་གེ་བྲིས་པ་འདི་ལ་ལྟོས། །རང་སེམས་ཡེ་ནས་ཆོས་ཀྱི་སྐུ། །ཕྱག་རྒྱ་ཆེན་པོ་ཡེ་ནས་གནས། །དེ་ལ་བཅོས་པས་ཡག་རྒྱུ་མེད། །ཡག་འདོད་བཅོས་ན་ཞན་པའི་རྒྱུ། །ངན་དོགས་གཟབ་ན་ངན་པའི་རྒྱུ། །མ་བཅོས་བཞག་པས་ཕྱག་རྒྱ་ཆེ། །རང་ངོ་ཤེས་པ་དེ་གས་ཆོག །མ་ཡེངས་དྲན་རྫི་ཉམས་ལེན་རང་། །ཡང་ཡང་གསལ་འདེབས་མན་ངག་ཟབ། །ལུས་སེམས་བདེ་ཞིང་ཀྱི་ལེ་གནས། །བཟང་པོ་ཡིན་སྙམ་ཞེ་བ་དགའ། །གསལ་དང་སེང་ངེ་རྗེན་ནེ་བ། །ལྟ་མི་ལྟ་རྒྱུ་ཡོད་པ་འདྲ། །ཐམས་ཅད་སྟོང་པ་ཕྱམ་མེ་བ། །སྣོད་བཅུད་འཁོར་འདས་སྟོང་པ་འདྲ། །ཡག་ཡག་འདྲ་བ་ཐམས་ཅད་ཀུན། །འཇའ་དང་འདྲ་སྟེ་ཡག་རྒྱུ་ཡིན། །ཚབ་བེ་ཚུབ་བེ་རླུང་འཚུབ་འདྲ། །རིག་པ་འཕྲོ་རྒོད་གར་ཡང་རྒྱུག །རྩུབ་ཉམས་ཡིན་ཏེ་ངན་རྒྱུ་མེད། །བལྟས་ཀྱང་མི་གསལ་མགོ་བོ་འཐིབ། །ཅི་འདྲ་དྲན་པའི་ངོས་བཟུང་མེད། །རླངས་པ་བཞིན་དུ་འགྱུ་བ་ནི། །ཕྲའུ་འོང་བ་རིག་པའི་སྙིགས། །དེ་དག་ལ་སོགས་ཅི་ཡང་ཤར། །གང་ཤར་ངོ་
བོ་བལྟས་པས་ཆོག །མ་ཡེངས་དྲན་རྫི་གཅིག་པོས་ཆོག །ཧ་ཅང་བསྒྲིམ་ཡང་མི་དགོས་ཏེ། །ཡང་ཡང་དྲན་རྫི་གསལ་འདེབས་བྱ། །གནས་དང་འཕྲོ་ལ་ཁྱད་པར་མེད། །མ་ཡེངས་ངོ་བོ་མཐོང་བས་ཆོག །རང་ཞི་རང་གྲོལ་ད་མི་དགོས། །བལྟས་པས་ཧྲིག་གེ་མཐོང་མི་དགོས། །མཐོང་དང་མ་མཐོང་ཁྱད་པར་མེད། །མ་ཡེངས་དྲན་རྫི་དེ་གས་ཆོག །མཐོང་དང་མ་མཐོང་གདམ་ག་དང་། །གནས་དང་མི་གནས་གདམ་ག་དང་། །གསལ་དང་མི་གསལ་གདམ་ག་སོགས། །བཟང་ངན་གདམ་ག་དགའ་སྡུག་དེ། །མ་བཅོས་མ་ཡིན་བཅོས་པ་ཡིན། །བཟང་ངན་གང་ཤར་ཁྱད་མེད་པར། །མ་ཡེངས་དྲན་རྫི་ཉམས་ལེན་ཡིན། །དོན་ལ་ཡེངས་དང་མ་ཡེངས་མེད། །འོན་ཀྱང་སྒོམ་མེད་མ་རྟོགས་པར། །མ་ཡེངས་དྲན་པའི་གསལ་འདེབས་འདི། །ཡང་ཡང་བྱེད་པ་ཉམས་ལེན་ཡིན། །རང་སེམས་ཕྱག་རྒྱ་ཆེན་པོ་ཉིད། །ཡིན་པས་བཟོ་བཅོས་མི་དགོས་པར། །རང་ག་གཞག་པས་བློ་ཚིམ་པ། །རྟོགས་པར་ལྡན་ཞེས་མིང་དུ་བཏགས། །དེ་ཡིས་བློ་ཁ་མ་ཚིམ་པར། །ཐེ་ཚོམ་སྐྱེ་འམ་བཟང་པོ་འདོད། །རྟོགས་པ་ཉམས་
སུ་ཤོར་བ་སྟེ། །གསེར་ལས་ར་གན་གདམ་པ་འདྲ། །དེ་ཕྱིར་ད་ལྟ་ལུས་སེམས་ཀློད། །གང་ཤར་སྤང་བླང་མ་བྱེད་པར། །མ་ཡེངས་དྲན་པས་གསལ་འདེབས་མཛོད། ལྟརང་གི་སེམས་ཉིད་འདི་ལས་གཞན། །ཉམས་སུ་ལེན་རྒྱུ་ཡོད་སྐད་ནི། །མདོ་རྒྱུད་མན་ངག་བླ་མའི་གསུངས། །གང་ནས་ཀྱང་ནི་མ་གསུངས་པས། །ད་ནི་ཐེ་ཚོམ་ཡིད་གཉིས་སྤོངས། །ད་རུང་ཡིད་ཆེས་མ་སྐྱེས་ན། །མི་ལ་མཁའ་སྤྱོད་པ་སོགས་ཀྱི། །གསུང་མགུར་རྣམས་ལ་ལྟ་རྟོགས་གྱིས། །རང་ཕོར་ངོས་ལེན་ཟེར་བ་ཡིས། །ཐམས་ཅད་གོ་བར་མི་འགྱུར་ཏེ། །རང་གི་ཉམས་དང་བསྟུན་པའི་གསུངས། །ཚིག་རེ་འབྱུང་བ་ཙིར་གྱིས་ཟུངས། །འོན་ཀྱང་སང་ཕོད་ཙམ་གྱི་བར། །ལུས་སེམས་ཀློད་ནས་ལྟ་བར་མཛོད། །མ་ཡེངས་དྲན་རྫི་གཅིག་པོས་ཆོག །ཧྲིག་ཧྲིག་གསལ་བའི་འདོད་པ་སྐྱུར། །གནས་པ་ཆེ་བར་དགའ་མ་བྱེད། །འགྱུ་བ་མང་བར་སྐྱོན་མ་ལྟ། །མི་གསལ་འདི་མཐོང་མེད་ཀྱང་བཟོད། །མ་ཡེངས་དྲན་རྫི་ཁོ་ན་ལ། །ཡང་ཡང་གསལ་འདེབས་བྱ་བ་གཅེས། །བར་སྐབས་བརྗེད་ཅིང་ཡེངས་ན་ཡང་། །སྐྱོན་མེད་དེ་ལ་འགྱོད་པ་སྤང་། །ནམ་ཡེངས་
ནམ་བརྗེད་རྗེས་མ་མཐུད། །ནམ་དྲན་ལྟོས་ལ་ཀློད་དེ་ཞོག །དེ་སྐད་དབྱི་འདམ་ཁ་རུ་སྨྲས། །བྷ་ཝནྟུ།། ༈ །།ན་མོ་ཨརྱ་པ་ལོ་ཡེ། སྤྱན་རས་གཟིགས་ལ་སྐྱབས་སུ་མཆི། །སྤྱན་རས་གཟིགས་ལ་གསོལ་བ་འདེབས། །སྤྱན་རས་གཟིགས་ཀྱིས་བྱིན་གྱིས་རློབས། །སྤྱན་རས་གཟིགས་ཀྱི་རྣལ་འབྱོར་བདག །བྱང་ཆུབ་མཆོག་ཏུ་སེམས་བསྐྱེད་ནས། །སྤྱན་རས་གཟིགས་ཀྱི་ཕྲིན་ལས་བསྒྲུབ། །འགྲོ་ལ་དམ་ཆོས་སྟོན་དང་གཅིག །དབང་ལུང་གདམས་པ་སྤེལ་དང་གཉིས། །སྤྱན་རས་སྨྲོགཟིགས་ཀྱི་སྤྲུལ་པ་རུ། །འཇིག་རྟེན་ཀུན་ལ་གྲགས་པ་ཡི། །འཕགས་པ་རྒྱལ་བ་རྒྱ་མཚོ་ཡི། །བཀའ་ལུང་ཆགས་ཕྱི་བསྒྲུབ་དང་གསུམ། །དཀོན་མཆོག་དབུ་འཕང་བསྟོད་དང་བཞི། །ཕྱི་ནང་འཁྲུག་རྩོད་ཞི་དང་ལྔ། །ཡུལ་ཕྱོགས་བདེ་བར་གནས་དང་དྲུག །སྦྱིན་བདག་བསོད་ནམས་ཚོགས་རྫོགས་ཤིང་། །བསྔོ་སྨོན་འབྲེལ་པ་འཇོག་དང་བདུན། །རོ་སྙོམས་ལྡོམ་བུ་བྱེད་དང་བརྒྱད། །རྡོ་རྗེ་སྤུན་འགའ་མཇལ་དང་དགུ། །ཚེ་མཇུག་མཚམས་སྒྲུབ་ཐོན་ཐབས་བཅུ། །གནམ་ཆོས་དབང་ལུང་སྤེལ་དང་བཅུ་
གཅིག །བདུད་འདུལ་ས་གཏེར་སྤེལ་དང་བཅུ་གཉིས། །བཀའ་བརྒྱུད་དབང་ལུང་སྤེལ་དང་བཅུ་གསུམ། །བྱ་བ་བཅུ་གསུམ་བསྒྲུབ་པའི་ཕྱིར། །ཁོ་བོ་སྨར་ཁམས་སྒང་དུ་འགྲོ། །འགྲོ་དྲུག་སེམས་ཅན་མ་ལུས་ལ། །རྫོགས་བྱང་ས་བོན་བཏབ་ནས་ཀྱང་། །བྱང་ཆུབ་མྱུ་གུ་བསྐྲུན་བྱས་ཏེ། །བདེ་ཆེན་དག་པའི་ཞིང་སྐྱེས་ན། །ས་བཅུ་པོ་ལ་རབ་གནས་པ། །སྤྱན་རས་གཟིགས་ཀྱི་ཐུགས་དམ་ལགས། །བདག་གི་སེམས་བསྐྱེད་དེ་ལགས་པས། །མཆོག་དམན་ཆེ་དང་ཐུགས་དམ་གཅིག །དེ་ཕྱིར་བདག་ལ་བྱིན་གྱིས་རློབས། །ཐུགས་རྗེས་འཇིག་རྟེན་དབང་དུ་སྡུས། །སྙིགས་དུས་ལྷ་སྲིན་འདུལ་བ་དང་། །ཨ་ཏིའི་བསྟན་པ་འཕེལ་བ་ནི། །ཨོ་རྒྱན་ཆེན་པོའི་ཐུགས་དམ་ལགས། །བདག་གི་སེམས་བསྐྱེད་དེ་ལགས་པས། །ནུས་མཐུའི་རྩལ་ཤུགས་བདག་ལ་སྩོལ། །ལྷ་འདྲེ་མི་གསུམ་ཟིལ་གྱིས་གནོན། །གསང་སྔགས་ཚུལ་བཞིན་སྤེལ་དང་བསྒྲུབ། །དེ་ལ་སྲུང་སྐྱོབ་ཕྲིན་ལས་སྒྲུབས། །དམ་ཅན་ཀུན་གྱི་དམ་ཚིག་ལགས། །བདག་གི་ཐུགས་དམ་དེ་ལགས་པས། །ཆོས་སྐྱོང་ཀུན་གྱིས་བདག་དོན་སྒྲུབས། །ཁྱད་པར་འཇམ་དཔལ་སྤྲུལ་
པ་ཡི། །ཀླུ་རྒྱལ་མི་མགོན་དཀར་པོ་ཁྱོད། །ཨོ་རྒྱན་སྤྱན་སྔར་ཁས་བླངས་པའི། །དམ་ཚིག་དེ་ལས་མ་འདའ་བར། །ཨོ་རྒྱན་རྗེས་འཇུག་རྣལ་འབྱོར་ལ། །ལོངས་སྤྱོད་དངོས་གྲུབ་ཆར་ལྟར་ཕོབ། །གཞན་ཡང་སྨར་ཁམས་གཞི་བདག་ཚོགས། །ཨོ་རྒྱན་དམ་ཚིག་དྲན་མཛོད་ལ། །སྔགས་འཆང་བདག་གི་ཕྲིན་ལས་སྒྲུབས། །ཞེས་སྒར་བཏེག་ཉིན་སྨྲས་སོ།། ༈ །།ཉམས་མགུར་གསོལ་འདེབས་སོགས་དུམ་གཅིག་བཞུགས་སོ། ༈ །ན་མོ་པྲ་ཝ་ཀ་ར་ཨ་ཡུཛྙཱ་ན་སིདྡྷི་ཧཱུྃ། མངོན་ཤེས་དྲུག་ལྡན་ཆོས་སྐུ་སྣང་མཐའ་ཡས། །ཡེ་ཤེས་སྤྱན་གྱིས་དུས་འདིར་གཟིགས་སུ་གསོལ། །ཁྱེད་སྔོན་འཇིག་རྟེན་དབང་ཕྱུག་རྒྱལ་པོ་དང་། །བདེ་གཤེགས་རིན་ཆེན་སྙིང་པོའི་སྤྱན་སྔ་རུ། །ཐུགས་བསྐྱེད་སྨོན་ལམ་དྲན་མཛད་དུས་འདིར་དགོངས། །ནམ་ཞིག་ཁྱེད་ཀྱིས་བྱང་ཆུབ་ཐོབ་པའི་ཚེ། །ཁྱེད་མཚན་འཛིན་པས་དུས་མིན་འཆི་བ་ཟློག །ཚེ་ལོ་སྟོང་ཕྲག་ཐུབ་པར་འགྱུར་བ་ཡི། །སྨོན་ལམ་ཐུགས་བསྐྱེད་དེང་འདིར་དུས་ལ་བབ། །བདག་དང་མི་འགྱུར་རྡོ་རྗེ་འཁོར་བཅས་ཀྱིས། །ཁྱེད་མཚན་འཛིན་ཞིང་ཁྱེད་ལ་གསོལ་འདེབས་
ན། །དུས་མིན་ཚེ་ཡི་བར་ཆད་ཞི་བ་དང་། །ཚེ་དང་བསོད་ནམས་ཡེ་ཤེས་འཕེལ་མཛད་གསོལ། །ལོངས་སྐུ་ཐུགས་རྗེ་ཆེན་པོ་སྤྱན་རས་གཟིགས། །ཁྱེད་མཚན་བརྗོད་ཅིང་ཁྱེད་ལ་བོས་པ་ན། །དགྲ་དང་རྒྱལ་པོ་ཆོམ་རྐུན་མེ་ཆུ་སོགས། །འཇིགས་པ་ཐམས་ཅད་སྐྱོབ་པར་འགྱུར་རོ་ཞེས། །པདྨ་དཀར་པོའི་མདོ་ལས་གསུངས་པས་ན། །བདག་དང་མི་འགྱུར་རྡོ་རྗེ་འཁོར་བཅས་རྣམས། །ཁྱེད་མཆོད་ཁྱེད་བསྟོད་ཁྱེད་ལ་གསོལ་འདེབས་ན། །འཇིགས་པ་ཀུན་ལས་སྐྱོབ་པར་མཛད་དུ་གསོལ། །སྤྲུལ་སྐུ་པདྨ་འབྱུང་གནས་དགོངས་སུ་གསོལ། །སྙིགས་མ་ལྔ་དུས་ཁྱེད་ལ་གསོལ་བཏབ་ན། །ཐུགས་རྗེ་བྱིན་རླབས་གློག་བས་མྱུར་བ་དང་། །འཇིགས་པ་ཀུན་སྐྱོབ་བསམ་པ་འགྲུབ་གསུངས་ན། །བདག་དང་མི་འགྱུར་རྡོ་རྗེ་འཁོར་དང་བཅས། །ཁྱེད་ལ་རྩེ་གཅིག་བློ་གཏད་ལིང་སྐྱུར་ན། །ཐུགས་རྗེས་ད་གཟིགས་བྱིན་རླབས་དངོས་གྲུབ་སྩོལ། །མ་ནིང་ལ་སོགས་དམ་ཅན་རྒྱ་མཚོའི་ཚོགས། །སྔོན་ཚེ་པདྨ་འབྱུང་གནས་སྤྱན་སྔ་རུ། །མ་འོངས་རྗེས་འཇུག་སྐྱོང་བར་ཁས་བླངས་ཤིང་། །དམ་བཅས་དམ་ཚིག་ཆེན་པོའི་དུས་ལ་བབ། །པད་འབྱུང་རྗེས་
འཇུག་མི་འགྱུར་རྡོ་རྗེ་དང་། །བདག་ཅག་འཁོར་བཅས་སྲུང་སྐྱོབ་མེལ་ཚེ་མཛོད། །དུས་ངན་དུས་འདིར་མི་གཟིགས་མི་སྐྱོབ་ན། །ཁྱེད་རྣམས་ཐུགས་དམ་དམ་བཅས་ཅི་ཞིག་བྱ། །ད་ནི་དུས་ལ་བབ་བོ་ས་མ་ཡ། །ཞེས་པ་ཆུ་ཡོས་ལོ་སྤྲེའུ་ཟླའི་ཡར་ཚེས་བཅུའི་སྔ་དྲོ་གནས་ཆེན་སྤོམ་ནེ་བྲག་གི་མདུན་དུ་ཚེས་བཅུ་བྱས་དུས་བྲིས་ཏེ། ཚེ་དཔག་མེད་ཀྱི་གནས་ཡིག་གསུངས་པ་ཐུགས་བདེན་པར་འདུག་སྟེ། དེ་ནུབ་གནས་ལ་མཎྜལ་དང་དམིགས་པ་གཏད་པས་བདག་རང་གི་ཚེ་ཚད་རིང་པོར་བསྲིང་བའི་རྨི་ལམ་ཅིག་ཀྱང་བྱུང་ངོ་།། ༈ །།ན་མོ་མ་ཧཱ་ཀ་རུ་ཎི་ཀ་ཡེ། འགྲོ་དྲུག་འདྲེན་མཛད་སྤྱན་རས་གཟིགས། །དཔལ་ལྡན་བླ་མར་ཐ་མི་དད། །གསོལ་བ་འདེབས་སོ་ཐུགས་རྗེས་གཟིགས། །མི་རྟག་འཆི་བའི་ཆོས་ཉིད་དེ། །རང་གིས་ཐོས་ཤིང་གཞན་ལ་བཤད། །འོན་ཀྱང་ངེས་པ་མ་རྙེད་ཟིན། །ད་ནི་དངོས་སུ་ངོ་འཕྲོད་བྱུང་། །ད་ལམ་ཞག་སྐོར་འདི་ལ་ཡང་། །མི་གཞོན་གསུམ་ཙམ་གློ་བུར་གུམ། །ཚེ་ལ་ངེས་པ་མེད་པ་དེ། །ངེས་པ་སྙིང་ནས་སྐྱེས་ཏེ་བྱུང་། །དགེ་ཚུལ་པདྨ་ཐུགས་རྗེ་དེ། །བྱིན་རླབས་དབང་བསྐུར་སྨན་དཔྱད་ཀྱིས། །མ་ཕན་ཞག་གཅིག་ནད་
ཀྱིས་གུམ། །འཆི་བདག་གཤིན་རྗེའི་ཕོ་ཉ་དེ། །བཟློག་ཐབས་མེད་པའི་ངེས་ཤེས་སྐྱེས། །དགེ་ཚུལ་ཁོ་ཡི་ཁ་ཆེམས་ལ། །སྡོམ་པའི་མཐའ་ཡང་ཐུབ་པར་དཀའ། །ང་ནི་ཤི་ཡང་མི་སྡུག་སྐད། །དམ་ཆོས་འདུལ་བའི་གཞུང་ལུགས་ལས། །ཚུལ་ཁྲིམས་དག་པའི་ཕན་ཡོན་བཅུ། །འཆི་ཁ་འགྱོད་པ་མེད་པ་དང་། །ཤི་ནས་བདེ་འགྲོ་མཐོ་རིས་སུ། །སྐྱེ་བར་གསུངས་པ་དངོས་སུ་གྱུར། །མངོན་པར་ཤེས་པ་མི་ལྡན་ཡང་། །དུ་བ་ལས་ནི་མེ་ཤེས་དང་། །ཆུ་སྐྱར་ལས་ནི་ཆུ་ཤེས་ལྟར། །རྗེས་དཔག་ཚད་མས་ཤེས་པ་ཡིན། །ང་ཡི་གྲྭ་པ་བཙུན་པ་རྣམས། །འདི་ལྟར་ད་ལྟ་ཤི་ན་ཡང་། །སྡོམ་པ་དམ་ཚིག་སྐྱོན་མེད་པར། །འགྱོད་པ་མེད་པ་གལ་ཆེའོ། །དམ་ཆོས་འདུལ་བའི་སྡེ་སྣོད་ལས། །ཚུལ་ཁྲིམས་འཆལ་བའི་ཉེས་དམིགས་བཅུ། །འཆི་ཁ་འགྱོད་པར་འགྱུར་བ་དང་། །ངན་སོང་ལྟུང་སྙམ་སྐྲག་པ་དང་། །ཤི་བའི་འོག་ཏུ་ངན་སོང་དང་། །ངན་འགྲོ་ལོག་པར་ལྟུང་གསུངས་པས། །འཆི་ཁ་འགྱོད་པ་མེད་གལ་ཆེ། །ནམ་འཆི་ངེས་མེད་ཐུགས་རྗེ་བཞིན། །བཟློག་ཐབས་མེད་པ་ཐུགས་རྗེ་བཞིན། །དེ་འདྲའི་དུས་ཤིག་བྱུང་བ་ན། །འགྱོད་
པ་མེད་པ་ཐུགས་རྗེ་བཞིན། །རྩ་བཞི་ཆང་ལྔ་གཙང་ཁྲིག་གེ །ཤི་ནས་བདེ་འགྲོ་མཐོ་རིས་སུ། །འགྲོ་བར་ངེས་པ་ཐུབ་པའི་བཀའ། །གཞོན་ནུར་ཤི་བ་སྙིང་རྗེ་ཡང་། །བརྒྱད་ཅུ་ལོན་དང་གཞོན་ནུ་གཉིས། །འཆི་བའི་སྡུག་བསྔལ་འདྲ་བར་གསུངས། །དེ་ཕྱིར་སེམས་ནད་དགོས་རྒྱུ་མེད། །འོན་ཀྱང་བླ་མ་དོན་གྲུབ་ཀྱིས། །ཐུགས་གནད་དགེ་རྩ་གང་འགྲུབ་ནི། །སྤུན་ཡ་ཤི་བ་ལྟར་བྱས་པ། །གཞུངས་བཟང་ཡ་རབ་སྤྱོད་པར་སྣང་། །ད་ནི་སེམས་ནད་མི་བྱེད་པར། །བསྔོ་བ་སྨོན་ལམ་ལམ་སྟོན་དང་། །ནམ་དྲན་རང་སེམས་ཚེ་འདས་གཉིས། །དབྱེར་མེད་བསྲེ་ཞིང་ངོ་བོ་ལྟ། །ཁོ་ཡི་སེམས་དང་ང་ཡི་སེམས། །ངོ་བོ་སྟོང་པ་ཁྱད་པར་མེད། །རང་བཞིན་གསལ་བའི་ངང་དུ་གཅིག་རྣམ་པ་འགག་མེད་ངང་དུ་འདྲ། །གསོན་པོ་དང་ནི་གཤིན་པོ་ཁོང་། །རྣམ་པ་སོ་སོར་སྣང་ན་ཡང་། །ངོ་བོ་དབྱེར་མེད་རོ་གཅིག་འདྲེས། །རྒྱུ་འབྲས་རྟེན་འབྲེལ་བསླུ་མེད་པས། །བསྔོ་བ་སྨོན་ལམ་རྟེན་འབྲེལ་གྱིས། །རྟ་ཁ་སྲབ་ཀྱིས་བསྒྱུར་བ་བཞིན། །བདེ་ཆེན་དག་པའི་ཞིང་ཁམས་སུ། །མེ་ཏོག་པདྨའི་ཟེའུ་འབྲུ་ལ། །མཚན་དང་
དཔེ་བྱད་ལྡན་པའི་ལུས། །ཐོབ་ནས་བཅོམ་ལྡན་འོད་དཔག་མེད། །ཞལ་ལྟ་ཆོས་ཉན་བདེ་སྐྱིད་ལྡན། །བཀྲེས་སྐོམ་ནད་དང་སྡུག་བསྔལ་མེད། །ཕྱིར་མི་ལྡོག་པའི་ས་ཐོབ་པ། །འོད་དཔག་མེད་ཀྱི་སྨོན་ལམ་ཡིན། །དགེ་ཚུལ་གཙང་མ་བློ་སེམས་ནི། །ཆོས་ལ་གཏོད་བཞིན་ཤི་བ་ན། །མྱ་ངན་བྱེད་དོན་མི་གདའོ། །བླ་མ་དོན་གྲུབ་ལ་སོགས་པ། ཉེ་དུ་དང་ནི་མཆེད་གྲོགས་ཀུན། །དེ་ལྟར་དགོངས་ལ་མྱ་ངན་སྐྱུར། །ཞེས་པ་ཚེ་འདས་དེ་དྲན་ཅིང་རང་གཞན་ཀུན་སྨྲེ་སྔགས་ཤོར་དུས་བྲིས།། ༈ །།མ་ཧཱ་ཀ་རུ་ཎི་ཀ་ཡེ། །སྐྱབས་གནས་བླ་མར་ཐ་མི་དད། །བདག་གིས་བློ་གཏད་ལིངས་སྐྱུར་བས། །ཐུགས་རྗེ་བྱིན་རླབས་ལོས་འོང་ཡིན། །སློབ་བུ་བརྩོན་འགྲུས་ཞེས་བྱ་བ། །ཐག་རིང་ཡུལ་དུ་འཁྱམ་པ་ལས། །བྱང་ཆུབ་སེམས་དཔའི་སྦྱིན་བདག་རྙེད། །དགེ་འདུན་གཉིས་བརྒྱ་ལྷག་ཙམ་ལ། །ཟླ་བ་ཧྲིལ་པོར་བུམ་སྒྲུབ་ཚུགས། །སྒྲུབ་ཆེན་ཕྱག་ལེན་མང་དུ་སྤེལ། །བར་ཆད་མེད་པར་རྟགས་མཚན་ཐོན། །རིལ་བུ་འཕེལ་ཞིང་འཇའ་ཚོན་འཁྲུགས། །དམ་ཚིག་གཙང་རྟགས་དངོས་སུ་བསྟན། །དགེ་བཤེས་མཁས་རྣམས་ཐུགས་དགྱེས་
ཤིང་། །གཏམ་སྙན་མཚམས་ཀྱི་ལྟས་དང་བཅས། །བྱུང་ནས་བློ་སེམས་སྤྲོ་བར་བྱུང་། །ཐུགས་རྗེ་ཆེན་པོ་སྤྱན་རས་གཟིགས། །སླར་ཡང་ཐུགས་རྗེའི་བྱིན་རླབས་བྱུང་། །ད་ཡང་ཐུགས་རྗེའི་སྤྱན་རྒྱང་བསྲིང་། །དམ་ལྡན་ཀརྨ་བརྩོན་འགྲུས་དང་། །དེ་ལ་འབྲེལ་ཐོགས་འགྲོ་བ་རྣམས། །ཚེ་འདིར་བར་ཆད་རྐྱེན་ཞི་ཞིང་། །བསོད་ནམས་ཆོས་བསོད་འཕེལ་བ་དང་། །ཕྱི་མ་བདེ་ཆེན་ཞིང་བགྲོད་ནས། །སྤྱན་རས་གཟིགས་ཀྱིས་རྗེས་འཛིན་ཤོག །ཕྱིར་ནངས་སྐེ་ཆུ་འགྲམ་དུ་བྲིས།། ༈ །།ན་མོ་མ་ཧཱ་མུ་དྲ་ཡེ། དྲོད་གཤེར་འཛོམ་པ་དབྱར་ཁའི་དུས་དང་གཅིག །བདེ་ཞིང་ཡངས་པའི་བྱང་ཐང་འདི་དང་གཉིས། །རྩྭ་སྔོ་རྩི་ཐོག་ཕུན་སུམ་ཚོགས་དང་གསུམ། །རྟ་ཕྱུགས་རྣམས་ལ་ཕན་པའི་རྒྱན་དུ་གདའ། །དལ་འབྱོར་མི་ལུས་ཐོབ་པའི་དུས་དང་གཅིག །སྡོམ་པ་རིམ་གྱིས་ནོད་པའི་ཐང་དང་གཉིས། །ཐོས་བསམ་བསྒོམ་པའི་རྩྭ་སྔོ་ལེགས་དང་གསུམ། །འདི་ཕྱི་གཉིས་ཀར་ཕན་པའི་རྒྱན་དུ་གདའ། །སློབ་དཔོན་མཁས་པ་གཞོན་དུས་བསྟེན་དང་གཅིག །དབང་ལུང་གདམས་པའི་བྱང་ཐང་ཡངས་དང་གཉིས། །ཉམས་
དང་རྟོགས་པའི་རྩི་ཐོག་ཕྱུག་དང་གསུམ། །རང་གཞན་གཉིས་ཀར་ཕན་པའི་རྒྱན་དུ་གདའ། །ན་སོ་དར་བབ་ལུས་སེམས་བདེ་དུས་གཅིག །ཁྲིད་རིམ་མང་པོའི་བྱང་ཐང་ཡངས་དང་གཉིས། །སྒྲུབ་པ་སྙིང་རུས་རྩི་ཐོག་ཕུན་ཚོགས་གསུམ། །བློ་བདེ་ཁོང་དུ་ཆུད་པའི་རྒྱན་དུ་གདའ། །དབང་བཞི་ཡོངས་རྫོགས་ཐོབ་པའི་དུས་དང་གཅིག །བསྐྱེད་རྫོགས་ཟབ་མོའི་བྱང་ཐང་ཡང་དང་གཉིས། །བསྒྲུབས་པའི་རྟགས་མཚན་རྩྭ་ཁ་ལེགས་དང་གསུམ། །ཕྲིན་ལས་རྣམ་བཞི་འགྲུབ་པའི་རྒྱན་དུ་གདའ། །དབང་ལུང་གདམས་པས་ཕྱུག་དུས་འདི་དང་གཅིག །སེམས་བསྐྱེད་རྒྱ་ཆེན་བྱང་ཐང་ཡངས་དང་གཉིས། །སྐྱ་སེར་ཕལ་ཆེར་དད་འདུན་ཆེ་དང་གསུམ། །བསྟན་དང་འགྲོ་ལ་ཕན་པའི་རྒྱན་དུ་གདའ། །སྡོམ་པ་གསུམ་ལྡན་བླ་མིང་ཐོགས་དུས་གཅིག །བསྔོ་བྱང་འབྲེལ་པའི་བྱང་ཐང་ཡངས་དང་གཉིས། །འཁོར་གསུམ་དག་པའི་དགེ་རྩ་ལེགས་དང་གསུམ། །ཟང་ཟིང་ཆུད་མི་ཟ་བའི་རྒྱན་དུ་གདའ། །ཁྲིད་སྟོན་ཆོས་འཆད་མཁན་དུ་གྱུར་དུས་གཅིག །གནས་ལུགས་རང་ངོ་རྗེན་པར་མཐོང་དང་གཉིས། །སྣང་སེམས་དབྱེར་མེད་རྩྭ་ཁ་ལེགས་དང་གསུམ། །གོ་
རྟོགས་འོང་འདོད་རྣམས་ཀྱི་རྒྱན་དུ་གདའ། །ནམ་འཆི་ཆ་མེད་དུས་ཚོད་འདི་དང་གཅིག །ཤི་ཡང་འགྱོད་མེད་དམ་ཚིག་གཙང་དང་གཉིས། །གར་འགྲོའི་ཞིང་ཁམས་ཀྲིག་ཀྲིག་ཡོད་དང་གསུམ། །ཆོས་པའི་མིང་ཐོགས་རྣམས་ཀྱི་རྒྱན་དུ་གདའ། །རྒྱན་དགུ་ཚང་བའི་དབྱངས་ཆུང་འདི་ཉིད་ནི། །བྱང་ཐང་བདེ་ཞིང་རྩྭ་ཁ་ལེགས་པའི་སར། །སྒར་པ་སླེབ་དུས་ཉམས་ལ་ཤར་ནས་བྲིས། །ཉམས་མཚར་ཡིན་ཀྱང་དོན་ནི་འགའ་མཆིས་སོ།། ༈ །།ན་མོ་གུ་རུ་ཨར་མེ་ཏྲི་ཡེ། དེང་སང་སྙིགས་མ་ལྔ་ཡི་དུས། །མི་རྣམས་ཁ་ལ་གནོད་སྦྱིན་ཞུགས། །བསྟོད་འོས་རྒྱལ་བ་རྣམས་ལ་གཤེ། །སྨད་འོས་བདུད་རིགས་རྣམས་ལ་བསྟོད། །ཁ་ལྕེ་སྡེ་དབྱེན་འཁྲུག་རྩོད་བསླང་། །རྫུན་དང་ཕྲ་མ་རླུང་ལྟར་འཚུབ། །བདེན་པ་མི་འགྲིམ་བརྫུན་པ་འགྲིམ། །འདི་ལྟར་ངེས་པ་མེད་པའི་དུས། །ས་རྣམས་ཐམས་ཅད་བྲག་ཆ་ལྟར། །འཛིན་པ་མེད་ན་བདེ་བ་ཐོབ། །བདག་འདྲ་སྤྲང་པོ་ཉམ་ཆུང་ལ། །ཤར་ཕྱོགས་སྤུང་རི་ནང་སོ་སོགས། །མཁས་གྲུབ་ལྡན་པ་ལ་ལ་ཡིས། །སྤྱན་རས་གཟིགས་ཀྱི་སྤྲུལ་པ་ཞེས། །ཐལ་མོ་
སྦྱར་ཞིང་ཁྲོམ་ལ་གསུངས། །ལ་ལས་བདག་གི་དབང་དང་ལུང་། །ཕ་ལ་ཞུས་པས་ཁུངས་མི་བཙུན། །ཆོས་འབྱུང་ལ་སོགས་རྩོམ་མང་པོ། །རྒྱལ་བ་ཡབ་སྲས་མ་གཏོགས་པའི། །བྱེད་པ་མི་འཐད་ཟེར་ནས་གཤེ། །རང་གི་རྩ་བའི་སློབ་བུ་འགའ། །ཆོ་ག་ཕྱག་ལེན་གཞན་ལུགས་བསྲེ། །རང་དྲན་སྣ་ཚོགས་བྱེད་ཅེས་ཐོས། །ཐོས་ཚེ་སེམས་ལ་ཟུག་རྔུ་མེ། །བྲག་ཅ་ཐོས་པ་འདྲ་ན་ཡང་། །རྗེས་ཤེས་དེ་དོན་བརྟགས་བྱས་པས། །སེམས་ལ་འཆར་སྒོ་འདི་ལྟར་རོ། །ཀྱེ་མ་སྤྲང་རྒན་བདག་ལྟ་བུ། །ད་ནི་འཆི་བ་ཤིན་ཏུ་ཉེ་། །བསྟོད་འོས་བསྟོད་ན་ཆོས་ཡིན་ཀྱང་། །བདག་ལ་ཡོན་ཏན་ཅི་ཡང་མེད། །བདག་འདྲ་སྤྲུལ་པར་མཐོང་བ་ཡང་། །ཁོང་རང་དག་སྣང་འབྱངས་པའི་རྟགས། །ཡོན་ཏན་མེད་ལ་བསྟོད་བྱས་ཀྱང་། །ར་གན་གསེར་དུ་བསྟོད་དང་མཚུངས། །བདག་ཉིད་ཤི་བའི་འོག་རོལ་དུ། །བསྟོད་པ་གསོལ་འདེབས་ཅི་བྱས་ཀྱང་། །བདག་ལ་ཕན་རྒྱུ་རྡུལ་ཙམ་མེད། །དེ་ཕྱིར་བསྟོད་པས་དགའ་རྒྱུ་མེད། །ཡོན་ཏན་ལྡན་པ་སྨད་ན་ཡང་། །དེ་ཉིད་ངན་པར་མི་འགྱུར་བས། །གསེར་འདི་ར་གན་ཡིན་སྨྲས་ཀྱང་། །མཁས་པ་ཀུན་
གྱིས་གོང་ཆེན་སྦྱིན། །བདག་ནི་ཤི་བའི་འོག་རོལ་དང་། །སྨད་པ་བྱས་ཀྱང་གནོད་རྒྱུ་མེད། །དེ་ཕྱིར་བསྟོད་སྨད་རོ་སྙོམས་སོ། །ངེས་པའི་དོན་ལ་བསྟོད་སྨད་ཀྱི། །སྒྲ་ཡི་ངོ་བོ་ལ་བལྟས་པས། །གཉིས་ཀ་ཁྱད་མེད་ངོ་བོ་སྟོང་། །གྲགས་སྟོང་ཕྱག་རྒྱ་ཆེན་པོ་ཉིད། །དེ་ཕྱིར་རོ་སྙོམས་དགའ་སྡུག་བྲལ། །སྒོམ་ཆེན་མིང་བཏགས་ཁྲིད་སྟོན་མཁན། །བདག་གམ་བདག་འདྲ་གཞན་ཡང་རུང་། །བསྟོད་པས་ཧ་ཅང་དགའ་དྲགས་ནས། །གནང་སྦྱིན་བྱེད་དམ་བློ་སྙིང་གཏད། །གཤེ་སྐུར་ཐོས་པས་ཞེ་སྡང་སྐྱེས། །འཐབ་ཅིང་རྩོད་དམ་ངན་ཤག་འདེབས། །དམིགས་ངན་ལ་སོགས་མཐུ་བསྡིག་བྱེད། །རང་རྒྱུད་མ་གྲོལ་རང་རྟགས་ཉིད། །རྟོགས་པ་ཇི་བཞིན་མ་སྐྱེས་ཏེ། །ཁ་ཏ་རྩོད་པ་གདིང་བཅས་རྟགས། །དེས་ན་རྟོགས་པའི་ཚོད་འཛིན་དང་། །བོགས་འདོན་གདམས་པ་ཟབ་མོ་ནི། །རང་ལ་བསྟོད་ཅིང་སྙན་པའི་ཚིག །མི་སྙན་གཤེ་སྐུར་འདེབས་པ་རྣམས། །ཐོབ་པ་ལམ་ཁྱེར་གདམས་པ་དེ། །ཟབ་ཆོས་སྙིང་པོ་ཡིན་པར་སེམས། །ཁྱད་པར་གཤེ་ཞིང་སྐུར་འདེབས་མཁན། །གྲག་སྟོང་ཕྱག་རྒྱ་ཆེན་པོ་ཡི། །བོགས་
འདོན་འཆད་པའི་བཤེས་གཉེན་དུ། །ད་ནི་ཁོ་བོས་དག་སྣང་སྦྱངས། །རྐེ་ཆུ་འགྲམ་གྱི་ཅོག་སྒར་དུ། །རང་གིས་རང་ལ་སྨྲས་པ་ཡིན།། ༈ །།ན་མོ་མ་ཧཱ་མུ་ཏྲ་ཡེ། ཅི་ཡང་མ་གྲུབ་ནམ་མཁའ་སྟོང་པ་ལས། །གང་ནས་མ་བྱུང་སྤྲིན་ཚོགས་གློ་བུར་བྱུང་། །སྣ་ཚོགས་ཆར་དང་བུ་ཡུག་ངེས་མེད་འབེབས། །ཅི་ཡང་མ་གྲུབ་ནམ་མཁའ་སྟོང་པ་ལས། །གང་ནས་མ་བྱུང་འཁོར་འདས་སྣ་ཚོགས་བྱུང་། །སྣ་ཚོགས་སྣང་བ་བདེ་སྡུག་ངེས་མེད་འཆར། །ཅིར་ཡང་མ་གྲུབ་སེམས་ཉིད་སྟོང་པ་ལ། །གང་ནས་མ་བྱུང་རྣམ་རྟོག་སྣ་ཚོགས་བྱུང་། །སྣ་ཚོགས་དགེ་དང་མི་དགེའི་ལས་རྣམས་བསགས། །ཅིར་ཡང་མ་གྲུབ་རྟོག་པ་སྟོང་པ་ལས། །གང་ནས་མ་བྱུང་ཉམས་སྣང་སྣ་ཚོགས་བྱུང་། །སྣ་ཚོགས་ཉམས་དབྱངས་ཆལ་ཆོལ་ཅི་ཡང་སྨྲ། །ནམ་མཁའ་སྟོང་པར་ཅིར་ཡང་མ་གྲུབ་པ། །རང་སེམས་ངོ་བོ་སྟོང་པའི་དཔེ་རུ་གདའ། །ནམ་མཁའི་དབྱིངས་ལས་སྤྲིན་གྱི་འདུ་འཚོགས་འདིར། །རང་སེམས་རྣམ་རྟོག་སྣ་ཚོགས་དཔེ་རུ་གདའ། །སྤྲིན་ལས་ཆར་དང་སེར་བ་ཁུ་འཕངས་འདི། །རྣམ་རྟོག་རྗེས་འབྲང་དགེ་སྡིག་དཔེ་རུ་གདའ། །སྤྲིན་རྣམས་
ཡལ་ནས་མཁའ་ལ་ཐིམ་པ་འདི། །རྣམ་རྟོག་ཤར་གྲོལ་ཀློང་ཐིམ་དཔེ་རུ་གདའ། །སྤྲིན་དང་ན་བུན་ཁུ་རླངས་ཅི་ཤར་ཡང་། །ནམ་མཁའི་ངོ་བོ་འགྱུར་བ་མེད་པ་འདི། །སེམས་ཉིད་ངོ་བོ་འགྱུར་མེད་དཔེ་རུ་གདའ། །ནམ་མཁའ་བར་སྣང་འཇའ་ཚོན་བཀྲ་བ་འདི། །བསྐྱེད་རིམ་སྒྱུ་མ་ལྷ་སྐུའི་དཔེ་རུ་གདའ། །ནམ་མཁའ་འཇའ་ཚོན་དབྱེར་མེད་ཟུང་འཇུག་འདི། །བསྐྱེད་རྫོགས་ཟུང་དུ་འཇུག་པའི་དཔེ་རུ་གདའ། །ནམ་མཁའ་སྟོང་པ་ཅིར་ཡང་མ་གྲུབ་པ། །ཆོས་ཉིད་དོན་དམ་བདེན་པའི་དཔེ་རུ་གདའ། །སྤྲིན་དང་ཆར་རྒྱུན་འཇའ་ཚོན་སྣ་ཚོགས་འདི། །ཆོས་ཅན་ཀུན་རྫོབ་བདེན་པའི་དཔེ་རུ་གདའ། །ནམ་མཁའ་སྟོང་པའི་ནང་ནས་ཆར་དང་སྤྲིན། །ཀུན་རྫོབ་དོན་དམ་ཟུང་འཇུག་དཔེ་རུ་གདའ། །དེ་སྐད་རྐེ་སྟོད་ནགས་འདས་ཐང་དུ་སྨྲས།། ༈ །།ན་མོ་དྷ་ན་ཡེ། ཡིད་བཞིན་ནོར་བུ་རིན་ཆེན་ལྟར། །སེམས་ཅན་བསམ་པ་སྐོང་བྱེད་ཅིང་། །ལྷ་མི་རྒུད་པ་སེལ་མཛད་པའི། །མགོན་པོ་ཁྱེད་ལ་ཕྱག་འཚལ་བསྟོད། །འདས་པའི་སངས་རྒྱས་རིན་ཆེན་མང་། །ད་ལྟ་སངས་རྒྱས་རྣམ་པར་མཛད། །མ་འོངས་
སངས་རྒྱས་རིན་ཆེན་གདུགས། །དུས་གསུམ་སངས་རྒྱས་ཁྱོད་ཕྱག་འཚལ། །ལྷ་མིན་ཕམ་མཛད་ལུས་ངན་པོ། །ལྷ་གནས་སྲུང་མཛད་གནས་སྲུང་སྟེ། །ལྕང་ལོ་ཅན་གྱི་ཕོ་བྲང་བདག །གསང་བདག་བཀའ་སྡོད་ཁྱོད་ལ་བསྟོད། །སངས་རྒྱས་སྟོང་གི་སྦྱིན་བདག་སྟེ། །ཁྱད་པར་ཤཱཀྱའི་བསྟན་པ་བསྲུང་། །མདོ་རྒྱུད་ཀུན་ནས་རབ་བསྔགས་པ། །ས་བརྒྱད་ལ་གནས་ཁྱོད་ལ་བསྟོད། །སྲས་ནི་ཨརྱ་ཛམ་བྷ་ལ། །ཡབ་ནི་དབང་ཕྱུག་ཆེན་པོ་སྟེ། །ཡུམ་ནི་ལྷ་མོ་དཔལ་ཆེན་མོ། །ཡབ་ཡུམ་སྲས་དང་བཅས་ལ་བསྟོད། །ནང་བློན་ནོར་ལྷ་མཆེད་བརྒྱད་དེ། །ཕྱི་བློན་ཀླུ་ཆེན་བརྒྱད་པོ་དང་། །འཁོར་ནི་གནོད་སྦྱིན་བྱེ་བ་འབུམ། །སྡེ་བོ་ཆེ་ལ་བསྟོད་པར་བགྱི། །ཁྱེད་ཀྱི་ཐུགས་དམ་དམ་ཚིག་ནི། །ལྷ་མི་བདེ་སྐྱིད་རྒྱས་པ་དང་། །སངས་རྒྱས་བསྟན་པ་རྒྱས་པ་ལགས། །བསྟན་སྲུང་ཆེན་པོ་ཁྱོད་ལ་འདུད། །རྣལ་འབྱོར་བདག་གིས་སེམས་བསྐྱེད་ཀྱང་། །འགྲོ་ཀུན་བདེ་སྐྱིད་ལྡན་པ་དང་། །སངས་རྒྱས་བསྟན་པ་དར་འདོད་པའི། །འུ་ཅག་དམ་ཚིག་གཅིག་ལགས་སོ། །བདག་དང་བརྒྱུད་པར་བཅས་པ་ཡི། །མངའ་ཐང་བསོད་ནམས་རྒྱས་པ་ཡི། །
གཉེར་ཁ་མགོན་པོ་ཁྱོད་ལ་གཏད། །བསམ་པ་ཡིད་བཞིན་འགྲུབ་པར་མཛོད། །ཅེས་པ་ད་ལམ་གདུལ་བྱ་འདི་ཙམ་སོང་ཟེར་བའི་ལུང་བསྟན་དང་གདུལ་བྱ་འོང་རྒྱུ་རྣམས་རྨི་ལམ་དུ་མཐོང་བ་འདྲ་ཞིག་བྱུང་བས་བྲིས་སོ།། ༈ །།ན་མོ་དྷེ་ཝཱི་ཀཱ་ལཱི་ཡེ། ཕྱི་ལྟར་ལྷ་མོ་དབྱངས་ཅན་མ། །ནང་ལྟར་རྡོ་རྗེ་ཕག་མོ་སྟེ། །གསང་བར་དཔལ་ལྡན་དུད་སོལ་མ། །སྔགས་ཀྱི་སྲུང་མ་རེ་མ་ཏི། །སྐུ་ལུས་གཅིག་ལ་སྤྲུལ་པ་སྟོང་། །དོན་དམ་འཕགས་མ་སྒྲོལ་མ་ཉིད། །སྤྲུལ་པ་བརྒྱ་སྟོང་གྲངས་མེད་པ། །ཆུ་བོ་བཞི་ཡི་མཐར་ཐུག་པ། །འཛམ་གླིང་ཁྱབ་པར་ཀུན་ཏུ་རྒྱུ། །བྱང་ཆུབ་སེམས་ལྡན་རྣལ་འབྱོར་མ། །ལུས་དང་གྲིབ་བཞིན་རྗེས་སུ་འབྲང་། །མ་དང་སྲིང་མོ་མཛའ་བ་མོ། །བྲན་མོའི་ཚུལ་དུ་ཕྲིན་ལས་བསྒྲུབ། །ཡེ་ཤེས་ལས་དང་འཇིག་རྟེན་ཚུལ། །ལྷ་མོ་འཁོར་དང་བཅས་ལ་བསྟོད། །ཐུགས་དང་འགལ་བ་གང་གྱུར་བཤགས། །སྐྱེ་བ་མང་པོའི་གོང་རོལ་ན། །ལྷ་མོ་ཁྱེད་དང་དམ་ཚིག་ཅིག །བདག་དང་བརྒྱུད་པར་བཅས་པ་ལ། །མ་ལྟར་བྱམས་པའི་ཐུགས་ཀྱིས་སྐྱོབས། །སྲིང་ལྟར་གདུང་བའི་ཐུགས་ཀྱིས་དགོངས། །
གྲོགས་ལྟར་འབྲལ་བ་མེད་པ་དང་། །བྲན་ལྟར་ཅི་བསམ་ཡིད་བཞིན་སྒྲུབས། །བདག་ཅག་མི་ནོར་འཁོར་བཅས་ལ། །ཡམས་ནད་རིམས་ནད་མེད་པ་ཡི། །གཉེར་ཁ་མ་གཅིག་ཁྱོད་ཀྱིས་མཛོད། །ཅེས་པ་ལྷ་མོ་རྒྱན་བཟང་ཞིང་ལེགས་ཀྱང་། ནད་རིམས་གྱི་རྟགས་ཤིག་བྱུང་བས་བྲིས་སོ།། ༈ །ན་མོ་ལོ་ཀེ་ཤྭ་ར་ཡེ། དལ་འབྱོར་མི་ལུས་ཐོབ་པའི་ལས། །དུས་མིན་འཆི་བ་མི་འབྱུང་བར། །ཚེ་དཔག་མེད་པས་བྱིན་གྱིས་རློབས། །རང་གཞན་དོན་ཆེན་འགྲུབ་པར་ཤོག །དམ་པའི་ཆོས་སྒོར་ཞུགས་པའི་ཆུས། །སྡོམ་པ་ཆག་ཉམས་མེད་པ་རུ། །ཤཱཀྱ་ཐུབ་པས་བྱིན་གྱིས་རློབས། །བསྟན་པ་རྒྱ་ཆེན་འཕེལ་བར་ཤོག །དབང་གཅིག་རྫོགས་པར་ཐོབ་པའི་ཆུས། །དམ་ཚིག་ཆག་ཉམས་མེད་པ་རུ། །རྡོ་རྗེ་འཆང་གིས་བྱིན་གྱིས་རློབས། །རྒྱ་ཆེན་རྒྱུད་སྡེའི་དོན་རྟོགས་ཤོག །བདེ་སྐྱིད་འགྲོ་དོན་བྱེད་པའི་ཆུས། །འབྲེལ་ཚད་དོན་དང་ལྡན་པ་རུ། །ཐུགས་རྗེ་ཆེན་པོས་བྱིན་གྱིས་རློབས། །བདེ་ཆེན་ཞིང་དུ་ཁྲིད་པར་ཤོག །དུས་ངན་སྙིགས་མར་སྐྱེས་པའི་ཆུས། །འཇིགས་པ་ཀུན་ལས་ཐར་བ་རུ། །རྗེ་བཙུན་སྒྲོལ་མས་བྱིན་གྱིས་རློབས། །
འཇིགས་ཆེན་བཅུ་དྲུག་མེད་པར་ཤོག །ཆུས་ཆེན་སྟེང་གི་ཆོས་རའི་ཆུས། །བར་ཆད་མེད་ཅིང་དོན་འགྲུབ་པར། །རྩ་བ་གསུམ་གྱིས་བྱིན་གྱིས་རློབས། །འགྲོ་དོན་རྒྱ་ཆེན་འགྲུབ་པར་ཤོག །ཅེས་སྤྲེའུ་ཟླའི་བཅུ་གཉིས་ལ་སྐེ་སྟོད་ཆུས་ཆེན་སྟེང་དུ་སྒར་པ་བརྒྱབ་ཉིན་བྲིས་སོ།། ༈ །།ན་མོ་གུ་རུ་དྷེ་ཝ་ཌཱཀི་ནཱི་སིདྡྷི་ཧཱུྃ། གཏེར་ཆོས་ཀུན་གྱི་བསྟན་པའི་བདག །སངས་རྒྱས་སྣང་བ་མཐའ་ཡས་ཁྱེད། །ཀུན་མཁྱེན་སངས་རྒྱས་སྤྱན་མངའ་བ། །ཉིན་མཚན་དུས་དྲུག་སེམས་ཅན་ཁམས། །ཐམས་ཅད་སོ་སོར་གཟིགས་ལགས་ན། །ཁྱེད་ཀྱི་བསླུ་མེད་རྡོ་རྗེའི་གསུངས། །རྩ་རྒྱུད་པད་སྡོང་བརྩེགས་པ་ལས། །དེ་ནས་ཉི་མའི་ཟེར་ཐག་ལྟར། །སྣང་ཡུལ་བྱ་བྱེད་གནས་སྐབས་འགར། །འཕྲོས་པའི་ཕྲེང་བ་རེ་རེ་ཙམ། །མཐའ་ནས་མཐའ་རུ་བྱུང་བར་འགྱུར། །གསུངས་པའི་ཕྲེང་བ་ལུང་བསྟན་པར། །མི་འགྱུར་རྡོ་རྗེ་མ་ལགས་སམ། །ད་ནི་སངས་རྒྱས་སྤྱན་གྱིས་གཟིགས། །ས་གཏེར་ཐོན་པར་བྱིན་གྱིས་རློབས། །ཐུགས་རྗེ་ཆེན་པོ་སྤྱན་རས་གཟིགས། །དུས་ངན་སྙིགས་མའི་སེམས་ཅན་དང་། །ཁྱད་པར་བོད་ཀྱི་སེམས་ཅན་
ལ། །ཁྱེད་ཀྱི་ཐུགས་རྗེས་རྟག་གཟིགས་ཤིང་། །ཁྱེད་ཀྱིས་བསྟན་པ་དར་གསུངས་ནས། །དེང་སང་གསང་སྔགས་ཆོས་རྣམས་འཆལ། །དར་ལ་མ་སྨིན་རྟགས་ཐོན་ཉུང་། ཚེ་ཐུང་ནད་མང་འཁྲུག་རྩོད་དར། །བོད་ཁམས་སྐྱབས་མེད་ཉམ་ཐག་དུས། །ཟབ་གཏེར་ཆོས་ཀྱིས་སྐྱབས་བྱེད་ཅིང་། །འབྲས་བུ་འགྲུབ་པར་མྱུར་ཐོབ་ཕྱིར། །མི་འགྱུར་རྡོ་རྗེས་ས་ཡི་གཏེར། །མྱུར་དུ་ཐོན་པར་ཐུགས་རྗེས་ཟུངས། །ལྔ་བརྒྱ་ཐ་མ་ཡང་མཐའ་དུས། །ཐུབ་པའི་བསྟན་པ་རྟགས་ཙམ་དུ། །ཀུན་བཟང་ཐུགས་ཀྱི་བསྟན་པའི་དུས། །དམ་ཆོས་རྫོགས་པ་ཆེན་པོ་དང་། །པད་འབྱུང་བསྟན་པ་དར་གསུངས་ན། །ད་ནི་དུས་བབ་ཐུགས་རྗེས་གཟིགས། །ཁྱད་པར་ཨོ་རྒྱན་ཕྲིན་ལས་པ། །ལུང་ཟིན་མི་འགྱུར་རྡོ་རྗེ་ཡི། །ས་གཏེར་འདོན་པའི་དུས་རྟགས་དང་། །ས་རྟགས་གནམ་རྟགས་ཐམས་ཅད་རྫོགས། །སྔོན་གྱི་སྨོན་ལམ་ལུང་བསྟན་རྣམས། །ད་ནི་མ་བསླ་རྟགས་སྟོན་ཅིག །ཁྲག་དཀར་སེང་གེའི་གནམ་རྫོང་གི །ས་གཏེར་ད་ལྟ་འདི་ཉིད་དུ། །ཐོན་པར་མཛོད་ཅིག་ས་མ་ཡ། །མ་གཅིག་ཡེ་ཤེས་མཚོ་རྒྱལ་ཁྱེད། །ཕྱི་རན་གཏེར་ལ་སྤྱོད་པ་རྣམས། །
ཁྱེད་ཀྱིས་བར་ཆད་སེལ་བ་དང་། །ལུང་བསྟན་ཁ་བྱང་སྤྲོད་པ་དེ། །ཁྱེད་ཀྱི་དམ་ཚིག་མ་ལགས་སམ། །མི་འགྱུར་རྡོ་རྗེའི་བར་ཆད་སོལ། །ད་ནི་ཁ་བྱང་ཕྱག་ཏུ་སྤྲོད། །སྔོན་གྱི་ཐུགས་དམ་དུས་ལ་བབ། །ཁ་བྱང་དུས་ལས་ཡོལ་བ་དང་། །ས་གཏེར་དུས་ལས་ཡོལ་བ་ན། །གུ་རུའི་ལུང་བསྟན་རྫུན་དུ་འགྱུར། །མ་གཅིག་ཁྱོད་ཀྱི་ཐུགས་དམ་ཉམས། །གཏེར་སྟོན་སྤྲུལ་སྐུ་བར་ཆད་ཁྱེར། །གཏེར་སྦས་དོན་མེད་ས་ནང་རུལ། །རྒྱལ་ཁམས་ཀུན་གྱིས་འཕྱ་ཞིང་གཤེ། །གཤེ་སྐུར་བྱེད་མཁན་མནར་མེད་ལྟུང་། །ཆོས་བྱེད་གསང་སྔགས་ཆོས་ཀྱིས་ཕོངས། །ནད་མུག་མཚོན་གྱིས་མི་ཐོག་འབུད། །སངས་རྒྱས་བསྟན་པ་མུན་གླིང་ནུབ། །བོད་ཁམས་མཐའ་དམག་དཔུང་གིས་འཇོམས། །གཙུག་ལག་ཆོས་འཁོར་ས་ཕུང་འགྱུར། །ལས་ཅན་ཐམས་ཅད་དུས་མིན་འཆི། །དེ་ལ་མ་ཐུག་ཐུགས་རྗེས་གཟིགས། །སྣང་བ་མཐའ་ཡས་དུས་ལ་བབ། །ཐུགས་རྗེ་ཆེན་པོའི་དུས་ལ་བབ། །པདྨ་འབྱུང་གནས་དུས་ལ་བབ། །ཡེ་ཤེས་མཚོ་རྒྱལ་དུས་ལ་བབ། །ལུང་ཟིན་མི་འགྱུར་རྡོ་རྗེ་ཡིས། །ས་གཏེར་མྱུར་དུ་ད་ཐོན་མཛོད། །
དུས་ལ་བབ་བོ་ཐུགས་རྗེས་གཟིགས། །མ་ནིང་སྡེ་ལྔ་མ་མགོན་ཚོགས། །ཊཱཀི་སྡེ་ལྔ་ལ་སོགས་པ། །ཡེ་ཤེས་མཚོ་རྒྱལ་གཏེར་སྲུང་རྣམས། །ཨོ་རྒྱན་བྱེ་བ་ཕྲག་བརྒྱ་ཡི། བཀའ་ཡི་སྲུང་མ་ཐམས་ཅད་ཀུན། །ད་ནི་ཐུགས་དམ་དུས་ལ་བབ། །མི་འགྱུར་རྡོ་རྗེའི་བར་ཆད་སོལ། །ས་གཏེར་མྱུར་དུ་ཐོན་པར་མཛོད། །དྲེགས་པ་བཅོ་བརྒྱད་མཁའ་རི་དང་། །སྡེ་དཔོན་སུམ་ཅུ་བརྟན་སྐྱོང་སོགས། །བོད་ཁམས་གཏེར་སྲུང་ཐམས་ཅད་ཀུན། །བཅོལ་བ་མི་སྟེར་དམ་ཉམས་སམ། །ཕ་ནོར་བུ་ལ་ད་སྤྲོད་ཅིག །སེང་གེ་བྲག་སོགས་གཏེར་ཁ་རྣམས། །ད་ནི་མི་འགྱུར་རྡོ་རྗེ་ལ། །མྱུར་དུ་སྤྱོད་པར་མ་བྱས་ན། །ཨོ་རྒྱན་ཆེན་པོའི་དམ་ལས་འགལ། །དེས་ན་དམ་ལས་མ་འདའ་བར། །ད་ལྟ་ཉིད་དུ་ས་གཏེར་གཏོད། །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་ཆུ་ཡོས་ཀྱི་ལོ་སྤྲེའུ་ཟླའི་ཚེས་བཅུ་ལ་རྨི་ལམ་དུ་སྤྲུལ་སྐུ་དང་མཇལ། མར་མེ་ཡང་འཛིན་འདུག་པ་ཕྱིར་ནངས་བཅོ་ལྔའི་སྔ་དྲོ་ལ་རྟེན་འབྲེལ་བསྒྲིགས་ཏེ་བྲིས་སོ།། །།ན་མོ་དྷེ་ཝི་ཀཱ་ལི་ཡེ། སངས་རྒྱས་ཀུན་བས་བསྒྲེས་པའི་ཀུན་བཟང་ཡུམ། །སྲིད་པ་ཀུན་གྱི་སྐྱེད་བྱེད་སྲིད་རྒྱལ་མ། །
ཡེ་ནས་རྫོགས་སངས་རྒྱས་ཀྱང་འཇིག་རྟེན་ཚུལ། །ལྷ་ཀླུ་གནོད་སྦྱིན་ཀུན་གྱི་བུ་མོ་སྟེ། །ཡེ་ཤེས་ཁྲོ་བོ་ཀུན་དང་མཉམ་སྦྱོར་མ། །འཇིག་རྟེན་ལྷ་འདྲེ་ཀུན་གྱི་དགྱེས་སྡེ་མོ། །སྐྱེ་བ་རྣམ་བཞི་ཟ་བའི་ཁ་མོ་ཆེ། །མི་ཕྱུགས་ཁྲམ་ལ་འདེབས་པའི་བདུད་མོ་ཆེ། །སྲོག་གཅོད་དབུགས་ལ་དགའ་བའི་གཤིན་རྗེ་མོ། །མ་མོ་མཁའ་འགྲོ་ཀུན་གྱི་ཡང་རྗེ་བོ། །ཕྱི་ནང་དཀྱིལ་འཁོར་ཀུན་གྱི་མཐའ་སྐྱོང་མ། །ཕུད་རྣམས་སྡུད་ཅིང་ལྷག་མ་ལེན་པ་མོ། །དམ་ལྡན་རྣལ་འབྱོར་ཀུན་གྱི་ཚེ་འཛིན་མ། །དམ་ཉམས་མནའ་ཟན་ཀུན་གྱི་སྲོག་གཅོད་མ། །རླུང་ནག་འཚུབ་པ་སྲིད་པའི་རླུང་ཕྱུར་མ། །འགྲོ་དྲུག་འདྲེན་མཛད་ཡེ་ཤེས་མཁའ་འགྲོ་མ། །ལེགས་ཉེས་སྟངས་འཛིན་སྲིད་པའི་བྱ་རི་མ། །ཉིན་མཚན་དུས་དྲུག་རྒྱུག་པའི་རྐང་ཡང་མ། །སུམ་མདོ་རི་རྩེ་འགྲིམས་པའི་ལྷ་འདྲེ་མ། །དུར་ཁྲོད་ཀུན་དུ་རྒྱུག་པའི་ཤ་ཟ་མ། །དུས་གསུམ་སངས་རྒྱས་ཀུན་གྱི་བསྟན་སྲུང་མ། །ཡེ་ཤེས་མགོན་པོ་ཀུན་གྱི་ཡུམ་གཅིག་མ། །གཙུག་ལག་ཆོས་འཁོར་ཀུན་གྱི་དཀོར་བདག་མ། །ལྷ་སྲིན་དྲེགས་པ་ཀུན་གྱི་དམག་དཔོན་མ། །ནད་རིམས་དལ་ཡམས་འབེབས་
པའི་ནད་བདག་མ། །ལྟས་ངན་ཆོ་འཕྲུལ་གཏོང་བའི་ཐན་བདག་མ། །ཟས་ནོར་ལོངས་སྤྱོད་འཕེལ་བའི་གཡང་བདག་མ། །བཀྲ་ཤིས་བདེ་ལེགས་སྩོལ་བའི་དཔལ་འབར་མ། །ཁྲོས་ན་སྲིད་སྒྲ་བརླག་པའི་མཐུ་མོ་ཆེ། །དགའ་ན་བདེ་སྐྱིད་ཆར་འབེབས་དགའ་བ་མོ། །བཅོལ་ན་ཕྲིན་ལས་ཀུན་འགྲུབ་ནོར་བུ་མ། །མཆོད་ན་ཚོགས་གཉིས་རྫོགས་པའི་མཆོད་སྡོང་མ། །ས་བརྒྱད་སེམས་མ་རེ་མ་ཏི་ལ་བསྟོད། །ལྷ་མོ་ཁྱེད་ལ་བསྟོད་པའི་བསོད་ནམས་ཀྱིས། །བདག་དང་བདག་ལ་འབྲེལ་ཐོགས་འགྲོ་བ་ཀུན། །བྱང་ཆུབ་བསྒྲུབ་ལ་བར་ཆད་མེད་པ་དང་། །ཚེ་གཅིག་སངས་རྒྱས་འགྲུབ་པའི་དངོས་གྲུབ་སྩོལ། །བདག་ནི་གར་གནས་གར་སོང་ས་ཕྱོགས་དེར། །མི་ནད་ཕྱུགས་ནད་ཐམས་ཅད་རྒྱུན་ཆད་ཅིང་། །བདེ་ལེགས་བཀྲ་ཤིས་འཕེལ་བར་མཛད་དུ་གསོལ། །ཞེས་པ་རྐེ་སྟོད་ཆུས་ཆེན་ཁ་རུ་ཆོས་ར་བྱེད་ཤོམ་པའི་ཚེ། རྨི་ལམ་དུ་སྒར་གྱི་གཡོན་ཕྱོགས་དེར་ལྷ་མོ་རེ་མ་ཏི། ནད་ཀྱི་རྐྱལ་པ་ཕག་གི་ལོགས་གིས་མགོ་གསུམ་ཡོད་པ་གཅིག་དྲེའུ་ཀྱི་ཕྱི་ཤ་ལ་བཏགས་ཏེ་བྱུང་བ་ཅིག་མཐོང་སྙམ་བྱེད། ཕྱིར་ཉིན་ལྷ་འབུམ་གྱིས་སྡེ་ལ་ཕན་པའི་ཡམས་བཟློག་ཅིག་བཅའ་དགོས་ཟེར་བས། སྦྱིན་སྲེག་བརྒྱ་རྩ་བྱས་དུས་བྲིས་པ་ཡིན་ནོ།། །།
ཤོག་ལྷེབ་ ༡༠༥ ནས་ ༡༧༤ བར།
༈ ཀྱེ་དགོངས་ཤིག་ཐུགས་རྗེ་ཆེན་པོ་དགོངས། །གསོན་ཅིག་སྤྱན་རས་གཟིགས་དབང་གསོན། །ངན་སོང་གསུམ་གྱི་སྡུག་བསྔལ་འདི། །དྲན་པས་བཟོད་གླགས་མི་གདའ་ན། །སྐྱེ་རྒ་ན་འཆི་སྡུག་བསྔལ་གྱི། །སེམས་ཅན་ཐམས་ཅད་རྒྱུན་དུ་མནར། །ལྷ་བས་ལྷག་པའི་མི་ལུས་ཀུན། །དུས་ངན་དབང་གིས་བདེ་སྐབས་མེད། །ང་ཡི་ཕ་མ་དྲིན་ཆེན་ཚོ། །ཇི་ལྟར་བྱས་པས་བདེ་ཐུབ་ཨང་། །འགྲོ་བ་སེམས་ཅན་བདེ་ཐུབ་ན། །ང་ནི་མནར་མེད་དམྱལ་བ་རུ། །བསྐལ་པར་སྡོད་དགོས་བྱུང་ཡང་བཟོད། །བདག་གིས་དུས་གསུམ་དགེ་བསགས་པ། །སེམས་ཅན་ཀུན་གྱིས་ཐོབ་ནས་ཀྱང་། །རྟག་ཏུ་བདེ་སྐྱིད་ལྡན་གྱུར་ཅིག །འགྲོ་བ་སེམས་ཅན་ཐམས་ཅད་ཀྱི། །སྡིག་དང་སྡུག་བསྔལ་མ་ལུས་པ། །ཐམས་ཅད་ལྷག་མེད་བདག་གིས་ཁུར། །ང་ཡི་བསམ་པ་འདི་ལགས་སོ། །ཐུགས་རྗེ་ཆེན་པོའི་ཐུགས་དམ་ཡང་། །དེ་ལྟར་ལགས་པས་ལྷ་ཁྱེད་དང་། །མི་དང་དམ་ཚིག་མི་གཅིག་གམ། །གཅིག་ན་བདག་ལ་ཐུགས་རྗེས་གཟིགས། །ད་རེས་རྒད་པོ་འཆི་ཁ་འདི། །བསྟན་པ་དང་ནི་
སེམས་ཅན་ལ། །ཕན་པ་རྒྱ་ཆེན་འབྱུང་བ་གཅིག །ཐུགས་རྗེ་ཆེན་པོ་ཁྱེད་རང་མཁྱེན། །ཞེས་པ་གསང་འདུས་དབང་ཁྲིད་བཙུགས་དུས། ཉིན་གཅིག་དབང་གཤར་དུས། སྙིང་རྗེ་རང་དབང་མེད་པར་མཆི་མ་འཁྲུག་ཅིང་། ངེས་པར་བདག་གཞན་བརྗེ་ནུས་སམ་སྙམ་པའི་ཉམས་ཤིག་སྐྱེས་ནས་སྨྲས་སོ།། ༈ །།ཨ་མཚར་པོ་འཁྲུལ་པའི་རྨི་ལམ་ལ། །ས་ལུང་པ་གཡས་ཕྱོགས་སྤང་རིའི་རྩེར། །ས་དམའ་འུ་གཅིག་ཏུ་བདག་འདུག་པས། །རི་ཇེ་ཆེར་སྐྱེས་ཏེ་མཐོན་པོ་འདྲ། །ཁྲི་མཐོན་པོ་གཅིག་ནི་བརྩེགས་པའི་སྟེང་། །ཉི་མ་དང་ཟླ་བ་གདན་དུ་བཏིང་། །དེ་སྟེང་དུ་རཱ་ག་ཨ་སྱ་བདག །ལུས་ཧཱུཾ་ཡིག་སྔོན་པོ་གཅིག་ཏུ་གྱུར། །ས་མཐོན་པོ་འགའ་ནས་གཞུང་ཆུ་བབ། །བྱང་ནམ་མཁའ་དྭངས་པའི་དཀྱིལ་ཤེད་ནས་། །ཉི་མའི་དཀྱིལ་འཁོར་སྔོན་པོ་ཤར། །ལྷོ་ནམ་མཁའ་ཡངས་པའི་བར་སྣང་ལ། །ཚེས་བཅུ་བདུན་ཙམ་གྱི་ཟླ་བ་ཤར། །དོན་ཅི་ཡིན་བརྟག་པར་དཀའ་བའི་བརྡ། །མི་བདག་ལ་འཆི་ལྟས་མ་ཡིན་ནམ། །ས་རྐོ་སྟོད་ཆུ་ཆེན་གད་ཐོག་ཏུ། །ལྷ་ཐུགས་རྗེ་ཆེན་པོའི་དབང་ཁྲིད་དུས། །སེམས་འཁྲུལ་པའི་རྨི་ལམ་ཨ་ལ་ལ། །གུ་རུ་པདྨ་སིདྡྷི་
ཧཱུཾ། །གུ་རུ་པདྨ་འབྱུང་གནས། དུས་ངན་སྙིགས་མའི་དུས་འདིར། །ཁྱེད་ལ་གསོལ་བ་བཏབ་ན། །རྒྱལ་པོ་དགྲ་དང་ཆོམ་རྐུན། །ཡམས་ནད་རིམས་ནད་དུས་འཁྲུགས། །སྡེ་བརྒྱད་དྲེགས་པའི་ཆོ་འཕྲུལ། །ཐམས་ཅད་སྐྱོབ་པར་གསུངས་ན། །ལུང་ཟིན་ཁྱེད་ཀྱི་ཕོ་ཉ། །སྤྲུལ་སྐུ་མི་འགྱུར་རྡོ་རྗེ། །དུས་ངན་ལྔ་བརྒྱའི་མཐའ་འདིར། །བར་ཆད་འཚེ་བ་མང་ཞིང་། །བསམ་པ་འགྲུབ་པར་དཀའ་ན། །ད་ནི་ཐུགས་རྗེས་གཟིགས་ལ། །བར་ཆད་སོལ་ཅིག་གུ་རུ། །རེ་ས་གཞན་མེད་གུ་རུ། །ཐུགས་རྗེས་སྐྱོབས་ཤིག་གུ་རུ། །ཅེས་པའི་ཆེ་དུར་ཁ་ཡི། དཔུང་ཚོགས་ས་ཕྱོགས་དེར་སོང་། ཟེར་བའི་སྐད་ངན་ཐོས་པས། ཞག་བར་བློ་སེམས་མ་བདེ། གསོལ་བ་རྩེ་གཅིག་བཏབ་པས། ཉམས་དང་རྨི་ལམ་འདྲེས་སྐབས། སྐད་ངན་དེ་ཡང་རྫུན་ཡིན། འཇིགས་བྲལ་བཙན་པོའི་ས་རུ། །སྤྲུལ་སྐུ་ཆགས་ཕེབས་ཡོད་ཅེས། །ཟེར་བའི་ལུང་བསྟན་བརྡ་ཙམ། །བྱུང་བས་སྤྲོ་ནས་བྲིས་སོ།། ༈ །།ན་མོ་བཛྲ་ཁྲོ་ལོད་ཡེ། ཨོ་རྒྱན་ཆེན་པོ་པདྨ་འབྱུང་གནས་ལ། །གསོལ་བ་འདེབས་སོ་ཅི་མཛད་ཁྱེད་རང་ཤེས། །བོད་ཡུལ་སྟག་ཚང་སེང་གེའི་བསམ་འགྲུབ་
ཏུ། །སྡེ་བརྒྱད་ལྷ་སྲིན་ཐམས་ཅད་དབང་དུ་བསྡུས། །དམ་ལ་མི་གནས་ལྷ་སྲིན་སྡེ་བརྒྱུད་ཀུན། །བསད་བཅད་གཏུབ་པ་གཤིན་རྗེའི་ཁྲིམས་དང་འདྲ། །མ་འོངས་སློབ་དཔོན་པདྨའི་རྗེས་འཇུག་ཅིང་། །མཚན་ཙམ་འཛིན་པར་བྱེད་པའི་གང་ཟག་ཀུན། །ལྷ་སྲིན་སྡེ་བརྒྱད་གཞི་བདག་ཐམས་ཅད་ཀྱིས། །སེམས་ཀྱིས་བླངས་ཏེ་སྤྱི་བོའི་གཙུག་ཏུ་བཀུར་། །དེ་ཡི་བཀའ་བཞིན་ཕྲིན་ལས་གང་བཅོལ་བསྒྲུབ། །གལ་ཏེ་དེ་ལྟར་མ་བྱས་དེ་ཡི་ཚེ། །ལྷ་སྲིན་དེ་ཡི་མགོ་ལུས་སྙིང་གས་ཤིང་། །རྡོ་རྗེ་ཁྲོ་ལོད་ཡཀཱ་མེ་དབལ་ཚེགྱིས། །ལུས་སྲོག་དུམ་བུར་གཏུབ་ཅིང་སྡུག་བསྔལ་མྱོང་། །ཤི་ནས་དམྱལ་ཁམས་བཅོ་བརྒྱད་ཁ་བརྒྱུད་ནས། །མྱ་ངན་འོ་དོད་འབོད་པའི་དམོད་བོར་བས། །སྡེ་བརྒྱད་ལྷ་སྲིན་ཡུལ་ལྷ་ཐམས་ཅད་ཀྱང་། །སློབ་དཔོན་བཀའ་ལས་ནམ་ཡང་མི་འདའ་གསུངས། །སྙིགས་དུས་སྔགས་འཆང་རཱ་ག་ཨ་སྱས་བདག །རང་ལ་ནུས་མཐུ་བྱིན་རླབས་མ་མཆིས་ཀྱང་། །ལོ་བདུན་ལོན་ནས་དེང་སང་ང་ལྔའི་བར། །ཨོ་རྒྱན་རྗེ་ལ་བཟློག་མེད་མོས་གུས་སྐྱེས། །བསྙེན་སྒྲུབ་མང་བྱས་རྙིང་མར་སྦྱོང་བ་བྱས། །ཡིད་གཉིས་མེད་པར་ཨོ་རྒྱན་
བསྟན་པ་ལ། །རང་ལ་ཁ་ཐབས་ཅི་ཡོད་གང་ཕན་བྱས། །དེ་ཡི་བྱིན་རླབས་ལྷ་འདྲེ་གཞི་བདག་ལ། །ཕལ་ཆེར་བཀའ་བསྒོས་བཀའ་ཉན་སྙམ་པ་ཡོད། ཁྱད་པར་ཡོས་ལོ་བྱ་ཟླའི་ཚེས་བརྒྱད་ཀྱི། །ནམ་ལངས་ཞོགས་ཇ་བཏུང་རྗེས་ཡུད་ཙམ་འཐུམ། །ཉམས་དང་རྨི་ལམ་འདྲེས་པའི་འཁྲུལ་སྣང་ལ། །དཔལ་ལྡན་རི་བོ་ཆེ་ཡི་བཀའ་སྲུང་ཆེ། །ལྷོ་གཉན་དམག་དཔོན་དབྱི་རྒྱལ་རིན་ཆེན་དེ། །མི་བོ་ཆེ་ཡི་ཆ་ལུགས་གཟི་བརྗིད་ཅན། །ཕྲུག་སྔོན་གཙང་མཐིང་མདོག་ཅན་གསར་པ་གྱོན། །རལ་པ་སྣུམ་སིལ་སྐུ་སྟོད་ཁྱབ་པ་ལ། །ཁ་དོག་སྨུག་པོ་གདོང་བཟང་སྣ་བོ་ཆེ། །དེ་འདྲ་མངོན་སུམ་འདྲ་བ་མདུན་དུ་བྱུང་། །གནམ་ཆོས་ལ་སོགས་གསུང་གླེང་ཅུང་ཟད་བྱས། །ཡུད་ཙམ་བསམ་བློ་བཏང་བ་འདྲ་ཞིག་བྱས། །གུས་པའི་ཚུལ་གྱིས་མི་ངན་ཁོ་བོ་ལ། །གནས་ལྔ་ས་ལ་གཏུགས་པའི་ཕྱག་གསུམ་འཚལ། །དེ་ནས་མི་སྣང་འཇའ་ལྟར་ཡལ་མ་ཐག །ཕྱག་འབུལ་བྱེད་མི་མང་པོ་འོང་ངོ་ཞེས། །ཟེར་བའི་སྒྲ་ཞིག་བར་སྣང་ཁམས་ནས་གྲག །གཉེན་ཆེན་སྡེ་བཞིའི་ཡ་རྒྱལ་དབྱི་རྒྱལ་དེ། །ང་ལ་ཕྱག་འབུལ་བྱེད་པ་མི་འོས་ཀྱང་། །ཨོ་རྒྱན་
བཀའ་བཞིན་བདག་གིས་བསྒྲུབ་པ་དེས། །པད་འབྱུང་དམ་ཚིག་བརྩི་བ་ཡིན་ནམ་སེམས། །ས་རྐོ་སྟོད་ནགས་ཅོག་སྨན་ལུང་མཐར། །སྒར་པ་བསྡད་དུས་བྱུང་ནས་ཉམས་མཚར་བྲིས། །འདི་ལ་རྟེན་འབྲེལ་གནད་གཅིག་ཡོད་དམ་སེམས། །བྷ་ཝནྟུ།། །༈ །།ན་མོ་པྲ་ཝ་ཀ་ར་ཡེ། སྣང་སྲིད་འཁོར་འདས་དུས་གསུམ། །ཐམས་ཅད་མཁྱེན་ཅིང་གཟིགས་པ། །པད་འབྱུང་ཁྱེད་ཀྱི་ལུང་བསྟན། །ཆོས་དབྱིངས་རྡོ་རྗེའི་སྐུ་རིང་། །སེང་གེ་གནམ་རྫོང་གཏེར་ཁ། །སྤྱི་འབྱམས་གཏེར་ལ་སོགས་པ། །གཏེར་ཁ་བརྒྱ་དང་རྩ་བརྒྱད། །མི་འགྱུར་རྡོ་རྗེས་འདོན་པར། །ལུང་བསྟན་གསར་རྙིང་མཐུན་ཞིང་། །དུས་རྟགས་ཐམས་ཅད་རྫོགས་འདུག །ད་ནི་དུས་ལ་བབ་བོ། །བབ་པས་མི་ཚད་འཕྱིས་གདའ། །ཉི་ཟླ་ཐང་ལ་ལྷུང་སྲིད། །རི་རབ་ཆུ་ཡིས་ཁྱེར་སྲིད། །རླུང་ནི་ཞགས་པས་ཟིན་སྲིད། །མེ་དཔུང་ཆུ་རུ་འགྱུར་སྲིད། །རྒྱལ་བས་གསུངས་པའི་བཀའ་ནི། །ནམ་ཡང་འགྱུར་བ་མེད་ན། །འགྱུར་མེད་རྟགས་མཚན་ད་སྟོན། །གལ་ཏེ་དངོས་རྟགས་མེད་ན། །རྒྱལ་བའི་བཀའ་ཡིས་བསླུས་སོ། །ཀུན་བཟང་བསྟན་པ་ནུབ་
བོ། །ནད་མུག་མཚོན་གྱི་བསྐལ་པས། །བོད་ཁམས་མི་ཐོག་འབུད་དོ། །མཁའ་འགྲོ་གཏེར་སྲུང་རྣམས་ཀྱང་། །ཁས་བླངས་དམ་ཚིག་ཉམས་སོང་། །རྣལ་འབྱོར་བདག་ཀྱང་ཡི་ཆད། །ཕྱི་རབས་རྣལ་འབྱོར་སུན་ཕྱུང་། །དེ་བས་ཐུགས་དམ་དུས་བབ། །བར་ཆད་ཐམས་ཅད་བཟློག་ལ། །ཁ་བྱང་ཤོག་སེར་དམ་ཆོས། །ད་ལྟ་ཉིད་དུ་སྩོལ་ཅིག །ཅེས་པ་འདི་ནི་ནུབ་གཅིག །སྤྲུལ་སྐུ་ཅུང་ཟད་བསྙུང་ཡོད། །ཟེར་བའི་རྨི་ལམ་བྱུང་བས། །བརྟན་བཞུགས་གསོལ་འདེབས་སྲུང་འཁོར། །འབད་ཅིང་བྱ་ཟླའི་ཚེས་བཅུར། །རྨི་ལམ་བརྟག་པ་བྱས་པས། །ཐོ་རངས་ཉམས་དང་རྨི་ལམ། །འདྲེས་པའི་སྐབས་ལ་ལུང་བསྟན། །བསྙུང་མེད་སྐུ་ཚེ་བརྟན་ཅིང་། །ས་གཏེར་ཐོན་པར་འགྱུར་ཞེས། །ལུང་བསྟན་གསལ་པོ་མིང་ཙམ། །བྱུང་བས་བྲིས་པ་ལགས་སོ། །དོན་དང་ལྡན་པར་གྱུར་ཅིག། ༈ །།ན་མོ་སརྦ་ཛྙཱ་ན་དེ་བ་ཡེ། སངས་རྒྱས་སྤྱན་རྒྱས་ཨུཏྤལ་དྲི། །ཏོག་གི་རྒྱལ་པོ་ཞེས་བྱ་ལ། །གསོལ་བ་འདེབས་སོ་ཐུགས་རྗེས་གཟིགས། །བདག་དང་སེམས་ཅན་ཐམས་ཅད་ཀྱི། །མིག་ནད་ཐམས་ཅད་ཞི་གྱུར་ནས། །ཡེ་ཤེས་སྤྱན་དང་ལྡན་པར་ཤོག །སྤྱན་སྟོང་མངའ་བའི་
སྤྱན་རས་གཟིགས། །ལྷ་མོ་སྤྱན་སྟོང་གདུགས་དཀར་མོ། །གསོལ་བ་འདེབས་སོ་ཐུགས་རྗེས་གཟིགས། །བདག་དང་སེམས་ཅན་ཐམས་ཅད་ཀྱི། །མིག་ནད་ཐམས་ཅད་ཞི་གྱུར་ནས། །ཡེ་ཤེས་སྤྱན་དང་ལྡན་པར་ཤོག །དཀར་པོ་ཟླ་མདངས་སྒྲོལ་མ་དང་། །ཕག་མོ་དབུ་སྟོང་སྤྱན་སྟོང་མར། །གསོལ་བ་འདེབས་སོ་ཐུགས་རྗེས་གཟིགས། །བདག་དང་སེམས་ཅན་ཐམས་ཅད་ཀྱི། །མིག་ནད་ཐམས་ཅད་ཞི་གྱུར་ནས། །ཡེ་ཤེས་སྤྱན་དང་ལྡན་པར་ཤོག །སྨེ་བ་བརྩེགས་པ་མི་གཡོ་མགོན། །ཡིད་བཞིན་འཁོར་ལོ་བསྐུལ་བྱེད་མར། །གསོལ་བ་འདེབས་སོ་ཐུགས་རྗེས་གཟིགས། །བདག་དང་སེམས་ཅན་ཐམས་ཅད་ཀྱི། །མིག་ནད་ཐམས་ཅད་ཞི་གྱུར་ནས། །ཡེ་ཤེས་སྤྱན་དང་ལྡན་པར་ཤོག །མིག་གི་དབང་པོ་རྣམ་དག་པ། །སེམས་དཔའ་ས་ཡི་སྙིང་པོ་ལ། །གསོལ་བ་འདེབས་སོ་ཐུགས་རྗེས་གཟིགས། །བདག་དང་སེམས་ཅན་ཐམས་ཅད་ཀྱི། །མིག་ནད་ཐམས་ཅད་ཞི་གྱུར་ནས། །ཡེ་ཤེས་སྤྱན་དང་ལྡན་པར་ཤོག །མིག་ཡུལ་གཟུགས་རྣམས་རྣམ་དག་པ། །སེམས་མ་ལཱ་སྱ་དཀར་མོ་ལ། །གསོལ་བ་འདེབས་སོ་ཐུགས་རྗེས་
གཟིགས། །བདག་དང་སེམས་ཅན་ཐམས་ཅད་ཀྱི། །མིག་ནད་ཐམས་ཅད་ཞི་གྱུར་ནས། །ཡེ་ཤེས་སྤྱན་དང་ལྡན་པར་ཤོག །ཕྱི་ཡི་མིག་གཉིས་ངོ་བོ་སྟེ། །ཙཱ་རི་ཙ་འདྲའི་ལྷ་ཚོགས་ལ། །གསོལ་བ་འདེབས་སོ་ཐུགས་རྗེས་གཟིགས། །བདག་དང་སེམས་ཅན་ཐམས་ཅད་ཀྱི། །མིག་ནད་ཐམས་ཅད་ཞི་གྱུར་ནས། །ཡེ་ཤེས་སྤྱན་དང་ལྡན་པར་ཤོག །བདག་གི་མིག་གཉིས་རབ་གསལ་ནས། །གསར་རྙིང་དབང་ལུང་གདམས་པ་ཡིས། །སྐལ་ལྡན་སྨིན་ཅིང་གྲོལ་བ་དང་། །མདོ་སྔགས་བསྟན་པ་གསལ་ནུས་པར། །བྱིན་གྱིས་རློབས་ཤིག་རྩ་བ་གསུམ། །ན་ཚ་ལམ་དུ་བསླང་བ་ནས། །ཉམས་ལེན་བོགས་སུ་ཐོན་གྱུར་ཅིག །ཅེས་པ་མིག་ནི་རབ་ཏུ་ཚ། །ཡིད་ཀྱིས་གསོལ་བ་བཏབ་པའི་ནུབ། །ཉམས་དང་རྨི་ལམ་འདྲེས་པའི་སྐབས། །སྔོན་ཆད་མཐོང་བར་མ་མྱོང་བའི། །ངོ་མ་ཤེས་པའི་ཡུལ་ཁམས་འགའ། །གསལ་པོ་མཐོང་བའི་སྣང་བ་བྱུང་། །མིག་ཀྱང་ཅུང་ཟད་བདེ་བར་སྣང་། །དེ་ཕྱིར་གྱེར་ནས་ཡི་གེར་བཀོད།། །།ན་མོ་ལོ་ཀེ་ཤྭ་ར་ཡེ། ཆོས་སྐུ་ཀུན་བཟང་ཐུགས་ཀྱི་བསྟན། །དྲུག་ཅུ་ནས་བཟུང་བཅུ་པའི་བར། །ཨ་ཏིའི་
བསྟན་པ་དར་རོ་ཞེས། །རྫོགས་ཆེན་རྒྱུད་ནས་གསུངས་པ་དེ། །དུས་ལ་བབ་པ་མ་ཡིན་ནམ། །དུས་ངན་བསྐལ་པའི་སྙིགས་མ་ལ། །ཨོ་རྒྱན་བསྟན་པ་དར་བ་དང་། །ཀུན་ཀྱང་གཏེར་ཆོས་བློ་གཏད་པར། །ལུང་བསྟན་དུས་ལ་མ་བབས་སམ། །མཁར་དམར་སྟོད་ཀྱི་ནགས་ཚལ་ན། །ཐུགས་རྗེ་ཆེན་པོ་གསང་འདུས་ཀྱི། །དབང་ཁྲིད་ཞག་བདུན་བཙུགས་པའི་དུས། །རབ་རིབ་འཁྲུལ་པའི་རྨི་ལམ་ལ། །དྲིན་ཆེན་ཆོས་ཀྱི་དབང་ཕྱུག་གི །སྤྲུལ་སྐུ་ཡེ་ཤེས་སྙིང་པོ་དེས། །བདག་ལ་བསྐུར་བ་ཡིན་སྙམ་པའི། །གླེགས་བམ་བཟང་པོ་ལག་ཏུ་ཕྱིན། །དེ་ཉིད་ཞལ་ཕྱེས་བལྟས་ཙམ་ན། །དུང་མདོག་རིན་ཆེན་ཤོག་བུ་ལ། །རིན་ཆེན་མཚལ་གྱིས་པར་བཏབ་པའི། །རང་བྱུང་རྡོ་རྗེས་མཛད་པ་ཡི། །སངས་རྒྱས་སྐྱེས་རབས་ཡིན་འདུག་པ། །ལྡེབ་མ་འགའ་ཞིག་ཀློག་ཙམ་ནས། །ཡི་གེའི་རྣམ་པ་མི་སྣང་བར། །སྐུ་སྟོད་ཨོ་རྒྱན་ཁོ་ནའི་སྐུ། །པད་ཞྭ་ཆོས་གོས་དམར་པོ་ཅན། །གཅིག་གི་གྲིབ་ནས་གཅིག་མཐོང་བ། །ཐམས་ཅད་དྭངས་པ་འགྲོ་བའི་སྐུ། །སྐུ་སྨད་ཐམས་ཅད་གཅིག་ཏུ་འབྲེལ། །དཔེ་ཆ་ཐམས་ཅད་དེ་འདྲས་གང་། །ཤིན་ཏུ་
ངོ་མཚར་མཇལ་བ་དང་། །བར་སྣང་ཁམས་ནས་སྒྲ་གྲག་པ། །བོད་ཡུལ་དབང་བསྒྱུར་བླ་མ་ཆེ། །དེས་ཀྱང་རྙིང་མ་ཁོ་ན་ལ། །ཐུགས་དམ་བྱེད་ཅིང་ཡོད་དོ་སྐད། །དེ་དོན་ལེགས་པར་དཔྱད་བྱས་པས། །ད་ནས་གསང་སྔགས་རྙིང་མ་ལ། །ཆོས་ལུགས་ཐམས་ཅད་འགྱུར་ཞིང་དད། །ཨོ་རྒྱན་བསྟན་པ་དར་བ་དང་། །སྤྲང་པོ་བདག་གི་རྗེས་འཇུག་ཀྱང་། །བླ་བྲན་མང་དུ་བྱུང་བ་རྣམས། །ཐམས་ཅད་རྙིང་མ་ཁོ་ནར་བྱེད། །ཆོས་ལུགས་ཀུན་ཀྱང་རྙིང་མ་ལ། །དད་ཅིང་བསམ་བློ་གཅིག་པ་ཡི། །རྟེན་འབྲེལ་བརྡ་ཞིག་ཡིན་ནམ་སེམས། །ཨོ་རྒྱན་ཐུགས་རྗེ་མི་ཆེའམ། །སྤྲང་པོའི་བསམ་པ་འགྲུབ་པར་ཤོག། ༈ །།ན་མོ་གུ་རུ་ཀྲོ་དྷ་ཡེ། མཁར་དམར་སྟོད་ཀྱི་ཆོས་ར་ན། །གློ་བུར་ནད་པ་གཅིག་ཀྱང་བྱུང་། །རྒྱལ་རྟགས་ཆོ་འཕྲུལ་ཆེ་བ་བྱུང་། །ཡི་དམ་ཏིང་འཛིན་ང་རྒྱལ་བསྐྱེད། །དེ་ནས་དེ་ཡི་ཚར་ཚད་ལ། །མི་དཀར་ཁྱི་དཀར་ཞོན་པ་གཅིག །གུས་པས་བདག་གི་ཅོག་པུ་ལ། །བསྐོར་བ་ཀྱིལ་ཀྱིལ་བསྐོར་བ་ཞིག །ཉམས་ཀྱི་སྐབས་ལ་གསལ་བར་མཐོང་། །ལོ་བརྒྱད་ལོན་ནས་
བསྒྲུབས་པའི་ལྷ། །ཡི་དམ་པདྨ་ཐོད་ཕྲེང་རྩལ། །བདག་དང་བདག་གི་རྗེས་འཇུག་དང་། །འཁོར་འབངས་རྟ་ཕྱུགས་བཅས་པ་རྣམས། །སྲུང་སྐྱོབ་བྱིན་རླབས་ཁྱེད་རང་ཤེས་།དུས་ངན་བསྐལ་པའི་སྙིགས་མ་ལ། །དམ་སྲི་འགོང་པོ་ཁ་ལངས་ནས། །ཕལ་ཆེར་བར་ཆད་དབང་འགྲོ་བ། །འདི་ལ་ཐུགས་རྗེའི་སྤྱན་གྱིས་གཟིགས། །བསྒྲུབ་ལ་བར་ཆད་མེད་པ་དང་། །བསམ་པ་འགྲུབ་པར་བྱིན་གྱིས་རློབས།། ༈ །།ན་མོ་གུ་རུ་དྷེ་ཝ་དྷཀི་ནཱི་ཧཱུཾ། ཆུང་ངུའི་དུས་ནས་ད་ལྟའི་བར། །བླ་མ་ཡི་དམ་མཁའ་འགྲོ་ཡི། །ཐུགས་རྗེས་གཅེས་པར་བསྐྱངས་པའི་མཐུས། །སྡུག་མ་མྱོང་བའི་གཅེས་ཕྲུག་དང་། །དེ་རིང་སྨྲེ་སྔགས་ཚིག་གསུམ་འདོན། །ཡེ་ཤེས་ལས་དང་འཇིག་རྟེན་གྱི། །རྩ་བ་གསུམ་གྱི་ལྷ་ཚོགས་རྣམས། །རྡོ་རྗེའི་སྤྱན་དང་སྙན་མངའ་ཡི། །ཐམས་ཅད་གསོན་ལ་ཐུགས་རྗེས་གཟིགས། །འཇིག་རྟེན་བཀའ་སྲུང་དམ་ཅན་ཚོགས། །འཇིག་རྟེན་ལེགས་ཉེས་ཤན་འབྱེད་པའི། །མངོན་ཤེས་རྫུ་འཕྲུལ་ལྡན་རྣམས་ཉོན། །བདག་ཅག་སློབ་དཔོན་ཐམས་ཅད་ནི། །སྐྱབས་གསུམ་འཛིན་པའི་དགེ་བསྙེན་ལགས། །བསླབ་བྱ་
དགུ་ལས་མ་འདས་ན། །འཇིགས་དང་འཚེ་བ་ཐམས་ཅད་ཀུན། །དཀོན་མཆོག་ཐུགས་རྗེས་ཅིས་མི་སྐྱོབ། །དཀོན་མཆོག་གསུམ་པོ་གཟུ་དང་དཔང་། བདག་ཅག་དཔོན་སློབ་བཅས་པ་རྣམས། །དགེ་བསྙེན་ཚངས་པར་སྤྱོད་པ་དང་། །ཕལ་ཆེར་དགེ་ཚུལ་ཁྲིམས་ལྡན་དང་། །བདག་ནི་ཤཱཀྱའི་དགེ་སློང་སྟེ། །ངེས་པར་ཚུལ་ཁྲིམས་ལྡན་པ་ལགས། །སྦྲུལ་ཆེན་ཀླུ་དུག་ནག་པོས་ཀྱང་། །ཚུལ་ཁྲིམས་ལྡན་ཡང་མི་གནོད་ཀྱང་། །སྙིགས་དུས་དགྲ་བོས་གནོད་འཚེ་བྱས། །སེར་ཆགས་ཡོངས་ཀྱི་དགྲ་བླ་ཆེ། །མ་མགོན་ཐམས་ཅད་གང་དུ་སོང་། །ཡེ་ཤེས་སྤྱན་དང་མི་ལྡན་ནམ། །བདག་ཅག་ཐུབ་པའི་བསྟན་ལ་ཞུགས། །ངེས་པར་སྟོན་པའི་འཁོར་ཡིན་ན། །རྣམ་བཞིའི་འཁོར་རྣམས་སྲུང་བྱེད་པའི། །དཔལ་མགོན་བདུན་ཅུས་མ་གཟིགས་སམ། །མདོ་སྡེ་ཀུན་ལས་ཐུབ་དབང་གིས། །བྱམས་པའི་སེམས་ལྡན་གང་ཟག་ལ། །གནོད་དང་འཇིགས་པ་མི་འབྱུང་ཞིང་། །གོ་ཆའི་མཆོག་ཏུ་གསུངས་ལགས་ཀྱང་། །བདག་ཅག་བྱང་ཆུབ་སེམས་བསྐྱེད་ནས། །བསམ་པ་བྱང་ཆུབ་སེམས་ལྡན་ཀྱང་། །བདུད་མི་ལོག་
ལྟས་བར་ཆད་བརྩམས། །འདི་ལ་ཐུགས་རྗེའི་སྤྱན་གྱིས་གཟིགས། །དུས་གསུམ་སངས་རྒྱས་གཟུ་དང་དཔང་། །གང་ཞིག་བྱང་སེམས་ལྡན་པ་ལ། །ལྷ་མོ་སྒྲོལ་མ་རྗེས་འབྲངས་ནས། །འཇིགས་པ་ཀུན་ལས་སྐྱོབ་གསུངས་ན། །བདག་ཅག་བྱང་སེམས་ལྡན་པ་ལ། །སྙིགས་དུས་ཙོ་ར་ཆོམ་རྐུན་འཚེ། །སྒྲོལ་མ་མྱུར་མས་ཕྱག་སྐྱོངས་ཤིག །བྱང་ཆུབ་སེམས་དཔའ་ཐམས་ཅད་ཀྱི། །སྤྲུལ་པ་དུང་ཕྱུར་གྲངས་མེད་པའི། །གྲངས་མཉམ་གསང་བདག་སྤྲུལ་པ་ཡང་། །རྡོ་རྗེ་བསྣམས་ནས་ཕྱི་བཞིན་དུ། །འབྲངས་ནས་སྲུང་བར་གསུངས་ལགས་ན། །གནམ་ཆོས་ས་གཏེར་ལུང་དང་མཐུན། །བན་རྒན་བདག་ཀྱང་སེམས་དཔའ་ཡི། །སྤྲུལ་པ་ཡིན་གསུངས་དེ་བདེན་ན། །ཕྱག་ན་རྡོ་རྗེ་གང་དུ་བྱོན་། །སྙིགས་དུས་བདག་གི་འགྲོ་དོན་ལ། །དགྲ་བགེགས་བདུད་ཀྱི་འཚེ་བ་མང་། །གསང་བདག་མཐུ་སྟོབས་མ་ཆུང་ཞིག །ཁྱད་པར་ཨོ་རྒྱན་སྤྲུལ་པ་ཡིས། །དུས་ངན་སྙིགས་མ་ཡང་སྙིགས་དུས། །ཁྱེད་ལ་གསོལ་བ་བཏབ་པ་ན། །ཙོ་ར་མི་རྒོད་མཐའ་ཡི་དམག །ཐམས་ཅད་བཟློག་པར་གསུངས་ལགས་ན། །བདག་གིས་ཁྱེད་ཀྱི་བཀའ་
བཞིན་བགྱིད། །གློ་སྙིང་བྲང་གསུམ་ཁྱེད་ལ་གཏད། །ཐུགས་རྗེས་བདག་ཅག་ཅིས་མི་སྐྱོབ། །ཁྱད་པར་ཐུགས་ཆེན་གསང་འདུས་ཀྱི། །དབང་ཁྲིད་སྦྲེལ་མ་འཛུགས་པ་ཡང་། །ཨོ་རྒྱན་ཐུགས་དགོངས་རྫོགས་ཕྱིར་བསམ། །འདི་ལ་བར་ཆད་དགྲ་བགེགས་མང་། །སྔགས་སྲུང་རྡོར་ལེགས་སྨྱོ་ཁ་སོགས། །བཀའ་སྲུང་ནུས་པ་གང་དུ་སོང་། །ངས་ནི་ཨོ་རྒྱན་བཀའ་བཞིན་བསྒྲུབས། །བཀའ་སྲུང་དམ་ལ་མི་གནས་སམ། གནས་ན་རྟགས་མཚན་མྱུར་དུ་སྟོན། །པད་འབྱུང་སྲིན་ཡུལ་བཞུད་ཀ་རུ། །ལོ་ཧི་ཏ་ཡི་ཀླུང་འགྲམ་དུ། །བོད་ཡུལ་ལྷ་འདྲེ་ཐམས་ཅད་འཚོགས། །པད་འབྱུང་རྗེས་འཇུག་རྣལ་འབྱོར་ལ། །གནོད་བྱེད་བསྒྲལ་བར་ཁས་བླངས་པའི། །མགུར་ལྷ་བརྟན་མ་དགེ་བསྙེན་ཚོགས། །བོད་ཀྱི་ལྷ་འདྲེ་མངོན་ཤེས་ཅན། །ཐམས་ཅད་དམ་ཚིག་བསྲུང་དགོས་ན། །སྒྲུབ་ཆེན་དབང་ཁྲིད་ཟབ་མོ་ཡི། །འགྲོ་དོན་གདུལ་བྱ་སྐྱོང་བ་ལ། །གནོད་ཅིང་འཚེ་བའི་དགྲ་བོ་ལ། །བཀའ་ཡི་ཆད་པ་ད་ཕོབ་ཅིག །གལ་ཏེ་ཡལ་བར་དོར་སྲིད་ན། །ཁྱེད་ཅག་དམ་ཚིག་ཉམས་ནས་ནི། །གནམ་ལྕགས་སྡིག་པས་སྙིང་ཁྲག་
འཇིབས། །རྡོ་རྗེ་དམྱལ་བར་འོ་དོད་འབོད། །བྱང་ཆུབ་འབྲས་བུ་མི་མཆིས་སོ། །དེ་བས་ཐུགས་དམ་མ་གཡེལ་ཅིག །མ་རྒན་སེམས་ཅན་ཐམས་ཅད་ཀུན། །ཕ་མའི་འདུ་ཤེས་ཉེར་བཞག་ནས། །བྱམས་དང་སྙིང་རྗེ་བསྒོམས་བྱས་ཀྱང་། །བཟང་ལེན་ངན་གྱིས་མཇལ་བ་ཡི། །གདུག་པའི་སེམས་ཅན་མ་རུངས་པ། །ཞི་བས་འདུལ་བར་མི་འགྱུར་ན། །གདུལ་ཕྱིར་སངས་རྒྱས་ཐམས་ཅད་ཀྱང་། །ཁྲོ་བོའི་དཀྱིལ་འཁོར་མངོན་པར་སྤྲུལ། །ཚད་མེད་སྙིང་རྗེ་ཆེན་པོ་ཡིས། །བདུད་སྡེ་བཅོམ་པར་མཛད་པ་ལྟར། །ཞེ་སྡང་བསམ་པ་མ་སྐྱེས་ཀྱང་། །སེར་ཆགས་ཡོངས་ལ་གནོད་ཅིང་འཚེ། །འགྲན་མེད་རྒྱལ་བ་ཐམས་ཅད་ལ། །མི་རྩི་དོ་བསྡོ་ཕོད་འཛུགས་ཤིང་། །འཇིག་རྟེན་རྒྱལ་པོའི་ཁྲིམས་ཡང་བཤིག །མནའ་དང་ངོ་ཚ་ཁྲེལ་མེད་པས། །ཉིན་མོ་ཕུལ་ཞིང་མཚན་མོ་རྐུ། །རྐུ་འཕྲོག་གསོད་ཅིང་དམེ་དུག་ལ། །མི་ཚེ་ཕུད་པར་བྱེད་པ་ཡི། །ལས་ངན་དགྲ་བོ་སྡིག་ཅན་འདི། །མི་རུང་ཆོ་འཕྲུལ་སྣ་ཚོགས་ཀྱིས། །འགྱོད་ཚངས་སྐྱེད་པའི་ལས་མཛོད་ཅིག །ཐོག་མེད་དུས་ནས་མི་དགེའི་ལས། །གང་བསགས་ལུས་འདིར་ད་ལྟ་ཉིད། །སྨིན་
པའི་ཕྲིན་ལས་མྱུར་དུ་མཛོད། །ནམ་ཞིག་ཁོང་རྣམས་ཚེ་འཕོས་ཚེ། །བདེ་ཆེན་དག་པའི་ཞིང་ཁམས་སུ། །སྐྱེས་ནས་གཏན་བདེ་འགྲུབ་པར་ཤོག །ཅེས་པ་རྟ་གཉིས་རྐུན་མས་ཁྱེར་ནས་གྲྭ་པ་རྣམས་རྟ་རྣམས་ལ་དཀའ་ལས་ཆེན་པོ་བྱུང་བས། ཕྱིར་ཉིན་ཆོས་ཁྲི་མདོར་སླེབས་དུས་བྲིས་སོ།། ༈ །།ན་མོ་པྲ་ཝ་ཀཱ་ར་ཡེ། གུ་རུ་པདྨ་སམྦྷ་དེས། །དགའ་བ་ཚལ་གྱི་དུར་ཁྲོད་དུ། །དབང་ཕྱུག་ཆེན་པོ་དམ་ལ་བཏགས། །ཁམས་གསུམ་དབང་སྡུད་དངོས་གྲུབ་བརྙེས། །མཚན་ཡང་པདྨ་རྒྱལ་པོར་གྲགས། །གསོལ་བ་འདེབས་སོ་བྱིན་གྱིས་རློབས། །སྣང་སྲིད་དབང་གི་དངོས་གྲུབ་སྩོལ། །ཐུགས་རྗེ་ཆེན་པོ་སྤྱན་རས་གཟིགས། །རྒྱལ་བ་རྒྱ་མཚོའི་ཕྲིན་ལས་ཀྱིས། །རྒྱ་བོད་ཧོར་གསུམ་འདུལ་མཛད་པའི། །གྲུབ་ཆེན་ཀརྨ་པཀི་ལ། །གསོལ་བ་འདེབས་སོ་བྱིན་གྱིས་རློབས། །སྣང་སྲིད་དབང་གི་དངོས་གྲུབ་སྩོལ། །སྤྱན་རས་གཟིགས་དབང་ཁྲོས་པའི་སྐུ། །རྟ་མཆོག་རྒྱལ་པོ་ཧེ་རུ་ཀ །སྤྲུལ་པ་རྟ་ནག་དྲེགས་པ་ཆེ། །ཡང་སྤྲུལ་ཡུལ་ཕྱོགས་གཞི་བདག་ཚུལ། །ཆུ་དྲག་ཁྲོ་རྒྱལ་རྟ་མགྲིན་ལ། །བསྟོད་པར་བགྱིའོ་ཐུགས་དམ་
བསྐུལ། །སྣང་སྲིད་དབང་གི་དངོས་གྲུབ་སྩོལ། །དྲེགས་པ་རྟ་མགྲིན་སྤྲུལ་པའི་སྐུ། །སྐྱེས་བུ་རྡོ་རྗེ་ལེགས་པ་དང་། །དེ་ཡི་བཀའ་བློན་འཛིན་གིང་ཆེ། །དམ་ཅན་རྡོ་རྗེ་ཁྱུང་དྲག་ལ། །བསྟོད་པར་བགྱིའོ་ཐུགས་དམ་བསྐུལ། །སྣང་སྲིད་དབང་གི་དངོས་གྲུབ་སྩོལ། །སྤྱན་རས་གཟིགས་ཀྱི་ལྕམ་གཅིག་མ། །འཇིག་རྟེན་སྒྲོལ་མ་སྔོན་མོ་སྟེ། །བོད་སྐྱོང་ལྷན་ཅིག་སྐྱེས་མ་ཞེས། །ཕུར་སྲུང་རྡོ་རྗེ་ཕག་བྱིན་མ། །བརྟན་མ་དམག་གི་རྒྱལ་མོ་སྟེ། །འཇིག་རྟེན་ལས་ཀྱི་རེ་མ་ཏི། །ཤ་ཟ་ཌཀི་ཟ་བྱེད་གདོང་། རྡོ་རྗེ་གཡུ་ཡི་སྒྲོལ་ཚེམ་ལ། །བསྟོད་པར་བགྱིའོ་ཐུགས་དམ་བསྐུལ། །རྡོ་རྗེ་ཕུར་པའི་བཀའ་སྲུང་མ། ཊཀྐི་ནག་པོ་འཇིགས་པའི་གཟུགས། །དམག་དཔོན་དགྲ་འདུལ་དབང་ཕྱུག་ལ། །བསྟོད་པར་བགྱིའོ་ཐུགས་དམ་བསྐུལ། །བརྟན་མ་ཤ་མེད་གངས་དཀར་མ། །སྐྱོང་མ་གཡུ་སྒྲོན་འོད་ལྡན་མ། །དེ་ཡི་འཁོར་དུ་གཏོགས་པ་ཡི། །གཡུ་བུན་གཡུ་ཞག་གཡུ་སྐྱིད་མ། །གཡུ་ཕྲེང་མ་སོགས་རིགས་བཞི་དང་། །བློན་མོ་དཀར་མོ་མཆེད་བརྒྱད་དང་། །ཀ་ལི་དར་འཛིན་བཅུ་གཉིས་དང་། །གཟུངས་བརྗོད་མཚོ་མོ་ཞེ་བརྒྱད་སོགས། །སྨན་
ཕྲན་འབུམ་དང་བཅས་པ་ཡི། །ཡུལ་ཕྱོགས་འདི་ཡི་ལྷ་མ་སྲིན། །ཕལ་ཆེར་ཁྱེད་ཀྱི་འབངས་ལགས་པས། །སྔོན་གྱི་ཐུགས་དམ་དམ་བཅས་དགོངས། །ཁྱེད་ཅག་པད་འབྱུང་དམ་གནས་ཏེ། །བདག་གིས་ཨོ་རྒྱན་བཀའ་བཞིན་བསྒྲུབ། །ཨོ་རྒྱན་རྗེས་འཇུག་ཕྲིན་ལས་ཀུན། །བསྒྲུབས་པར་ཁས་བླངས་དུས་ལ་བབ། །འགྲོ་དོན་རྒྱ་ཆེན་འགྲུབ་པར་མཛོད། །ཚ་བའི་ས་རུ་སླེབས་པའི་ནུབ། །རབ་རིབ་འཁྲུལ་པའི་རྨི་ལམ་དུ། །རང་ཉིད་པདྨ་རྒྱལ་པོ་ཡི། །མངོན་རྟོགས་སྔགས་དང་བཅས་པ་ན། །སྔར་མི་ཤེས་པ་ཡིད་ལ་གསལ། །བཏོན་ཅིང་བསྒོམས་པས་དངོས་ལྟར་གྱུར། །བཙུན་པའི་གཟུགས་ཅན་གསུམ་ཙམ་གྱིས། །གུས་པས་བརྒྱ་ཕྱག་གསུམ་ཙམ་འཚལ། །ཉ་ཁྲབ་འདྲ་བའི་ཁྲབ་གྱོན་པའི། །ཁྲོམ་ནི་སྟོང་ཕྲག་ཙམ་གཅིག་ལ། །དབང་བརྒྱ་ཕྱེད་གཉིས་ཙམ་ཞིག་བྱས། །ཐོ་རངས་བར་སྣང་སྒྲ་གྲག་པ། །དཔོན་དང་བླ་མས་གང་གསུངས་དགོས། །ཟེར་བའི་ཚིག་ཀྱང་གསལ་བྱུང་བ། །ཨོ་རྒྱན་ཆེན་པོའི་ཐུགས་རྗེ་ཡིས། །ཡུལ་ཕྱོགས་འདི་ཡི་ལྷ་འདྲེ་རྣམས། །བདག་ལ་ཅུང་ཟད་གུས་པར་གོ །ཕྱིར་ནངས་ནམ་ནི་ལངས་པའི་དུས། །ལས་ཀྱི་ལྷ་མོ་རེ་མ་ཏི། །རྡོ་རྗེ་གཡུ་སྒྲོན་གནས་པའི་ཕྱོགས། །ནམ་མཁའ་
སྨུག་ནག་འཇའ་ཚོན་ནི། །སྔོན་ཆད་མཐོང་མ་མྱོང་བར་དངོས་སུ་སྣང་། །དགོང་མོ་སྒར་གྱི་གན་དྲུང་དུ། །འཇའ་ཚོན་འཐིབ་པ་ལ་ལས་མཐོང་། །ལྷ་མོའི་རྒྱུད་ལས་གསུངས་དང་མཐུན། །ལྷ་མོ་དགྱེས་པའི་རྟགས་སུ་གོ །དེ་ཕྱིར་ཡི་གེར་འཕྲལ་དུ་བྲིས།། ༈ །།ན་མོ་ལོ་ཀེ་ཤྭ་ར་ཡེ། དུས་གསུམ་སངས་རྒྱས་ཐམས་ཅད་ཀྱི། །ཐུགས་རྗེ་ཕྲིན་ལས་ཐམས་ཅད་ཀུན། །གཅིག་བསྡུས་རྒྱལ་བ་རྒྱ་མཚོ་ལ། །གསོལ་བ་འདེབས་སོ་ཐུགས་རྗེས་གཟིགས། །ང་ཡི་ཕ་མ་སེམས་ཅན་ཀུན། །བསམ་ཞིང་བཟོད་གླགས་མི་གདའ་སྟེ། །དམྱལ་བ་ཚ་གྲང་སྡུག་བསྔལ་དེ། །ཐོས་ཀྱང་གློ་སྙིང་འདར་ལགས་ན། །ཐོག་ཏུ་བབ་རྣམས་ཅི་ལྟར་བྱེད། །ཐུགས་རྗེས་ཟུངས་ཤིག་སྤྱན་རས་གཟིགས། །ཡི་དྭགས་བཀྲེས་སྐོམ་སྡུག་བསྔལ་དེ། །རྣ་བས་ཐོས་ཀྱང་ཡི་རེ་མུག །ཐོག་ཏུ་བབ་རྣམས་ཨ་ཙ་མ། །ཐུགས་རྗེས་ཟུངས་ཤིག་སྤྱན་རས་གཟིགས། །དུད་འགྲོ་གླེན་ལྐུག་སྡུག་བསྔལ་དེ། །བསམ་ཞིང་སྐྱོ་བ་སྙིང་ནས་སྐྱེ། །ཐོག་ཏུ་བབ་རྣམས་ཅི་འདྲ་ན། །ཐུགས་རྗེས་ཟུངས་ཤིག་སྤྱན་རས་གཟིགས། །ལྷ་མིན་འཐབ་རྩོད་ཡ་རེ་ང་། །ཐུགས་རྗེས་ཟུངས་ཤིག་སྤྱན་རས་གཟིགས། །
ཕམ་ལྟུང་ལྷ་ཡི་སྡུག་བསྔལ་དེ། །ཨ་ཙ་མ་ལ་སྙིང་རེ་རྗེ། །ཐུགས་རྗེས་ཟུངས་ཤིག་སྤྱན་རས་གཟིགས། །ཐོབ་དཀའི་མི་ལུས་རིན་ཆེན་ཡང་། །ཡད་ཡུད་ནུབ་གཅིག་རྨི་ལམ་ཙམ། །མི་རྟག་འཆི་བ་བྱུང་བའི་ཚེ། །གཏན་བདེ་བྱ་བ་ག་ལ་ཞིག །ཆོས་ལ་འབྲེལ་པ་ཅི་ཡང་མེད། །ཚེ་མ་ཕྱིད་པའི་ངང་གཅིག་ལ། །ཨེ་སྐྱིད་ངང་ལ་སྡུག་གི་ངང་། །དོན་མགོ་ཅི་ཡང་མེད་པ་ལ། །མི་ཚེ་ཟད་པ་སྙིང་རེ་རྗེ། །ཐུགས་རྗེས་ཟུངས་ཤིག་སྤྱན་རས་གཟིགས། །དེ་འདྲའི་ཡོན་བདག་མང་པོ་འགའ། །རེ་ལྟོས་འཆང་གསུམ་ང་ལ་བཅས། །རྣམ་ཤེས་ཡིད་ལུས་བར་དོར་འཁྱམས། །ཐུགས་རྗེས་ཟུངས་ཤིག་སྤྱན་རས་གཟིགས། །ར་མདའ་བྱོན་ཞིག་སྤྱན་རས་གཟིགས། །བདག་དང་འབྲེལ་ཐོགས་འགྲོ་བ་རྣམས། །བདེ་ཆེན་ཞིང་དུ་ལམ་སྣ་དྲོངས། །སྤྱན་རས་གཟིགས་ཀྱི་སྐུ་གསུང་ཐུགས། །རྣལ་འབྱོར་ང་ཡི་ལུས་ངག་ཡིད། །ཚེ་འདས་རྣམ་པར་ཤེས་པ་གསུམ་། །དབྱེར་མེད་ཆོས་དབྱིངས་སྟོང་པ་ཉིད། །ཀ་དག་སྤྲོས་བྲལ་གདོད་ནས་དག །ཀུན་བཟང་རྫོགས་པ་ཆེན་པོའི་ངང་། །འཁོར་གསུམ་དམིགས་མེད་བསྔོ་བ་ཡིས། །
ཚེ་ལས་འདས་པ་ཐམས་ཅད་ཀུན། །བདེ་བ་ཅན་གྱི་ཞིང་ཁམས་སུ། །བརྫུས་སྐྱེས་སྤྲུལ་སྐུ་ཐོབ་པར་ཤོག །ཅེས་པ་ཚ་བ་སྒང་སྟོད་དུ། །བྱང་བུ་འགའ་རེ་བྱས་པའི་ཚེ། །སྙིང་རྗེ་དྲག་པོ་གཅིག་སྐྱེས་པས། །འཕྲལ་དུ་ཡི་གེར་བཀོད་པའོ།། ༈ །།ན་མོ་མ་ཧཱ་མུ་དྲ་ཡེ། ཚ་བ་སྒང་གི་སྒང་སྟོད་ན། །སྐུ་ལྷ་གཉན་གྱི་ལྷ་ཞོལ་ན། །ལུང་ནས་བསྟན་པའི་གཏེར་གྱི་གནས། །ཅོག་ནེ་བྲག་གི་གཡོན་ཟུར་ན། །ཆབ་ཀྱིས་བསྐོར་བའི་དོ་དཀྱིལ་ན། །ཞག་གཉིས་སྒར་པ་བསྡད་པའི་དུས། །འབྲང་རྗེ་དཔོན་པོ་མཇལ་དུ་བྱུང་། །དེ་ཚེ་སྣང་སྲིད་ལྷ་འདྲེའི་གཡོས། །གཟི་བྱིན་ཆོ་འཕྲུལ་ཆེན་པོ་བྱུང་། །ཉམས་དང་རྨི་ལམ་རྩུབ་སློང་ཆེ། །ལྷ་བསྒོམས་སྔགས་བཟླས་ཞི་མ་ཐུབ། །ཉོན་དང་ལྷ་འདྲེ་གདུག་པའི་ཚོགས། །ཡ་ཀི་ཆོས་སྐུ་ཀུན་བཟང་དང་། །མ་ཀི་ཐེའུ་རང་རྐང་གཅིག་ཡན། །ངོ་བོ་སྟོང་ཉིད་ཆོས་སྐུ་རུ། །དབྱེར་མེད་ཆུ་ལ་ཆུ་བཞག་འདྲ། །ཡ་ཀི་རྡོ་རྗེ་ཕག་མོ་ནས། །མ་ཀི་གྲོང་རྒྱུན་འདྲེ་མོ་ཡན། །དབྱེར་མེད་ཆོས་སྐུ་ངོ་བོ་གཅིག །ཡ་ཀི་ཤཱཀྱ་ཐུབ་པ་ནས། །མ་ཀི་ནག་པོ་ལྷས་བྱིན་ཡན། །དབྱེར་མེད་ཆོས་ཀྱི་དབྱིངས་སུ་གཅིག །ལྷ་ཡང་
སེམས་ལ་འདྲེ་ཡང་སེམས། །སེམས་ཉིད་ཡེ་ནས་ཆོས་ཀྱི་སྐུ། །སངས་རྒྱས་ཀུན་དང་དབྱེར་མ་མཆིས། །བདག་གཞན་དབྱེར་མེད་རོ་གཅིག་འདྲེས། །ཚུར་ལ་བལྟས་པས་བདག་མ་མཐོང་། །ཕར་ལ་བལྟས་པས་གཞན་མ་མཐོང་། །རང་གི་སེམས་ལ་ཚུར་བལྟས་པས། །སྨྲ་བསམ་བརྗོད་པའི་ཡུལ་ལས་འདས། །ཕྱི་རོལ་ཡུལ་ལ་ཕར་བལྟས་པས། །ཆུ་ནང་ཤར་བའི་ཟླ་བ་བཞིན། །ངོ་བོ་སྟོང་ལ་རྣམ་པ་གསལ། །ངོ་བོ་སྟོང་པ་ཆོས་ཀྱི་སྐུ། །ཅི་ཡང་མ་གྲུབ་སྟོང་སང་ངེ་། །མེད་བཞིན་སྣང་བ་སྒྱུ་མའི་འཕྲུལ། །རྟེན་འབྲེལ་སྣ་ཚོགས་འགའ་རེ་འཆར། །སྟོང་པ་དོན་དམ་བདེན་པ་སྟེ། །སྣ་ཚོགས་འཆར་བ་ཀུན་རྫོབ་བདེན། །དེ་གཉིས་མི་འགལ་ཟུང་དུ་འཇུག །མཁའ་དང་འཇའ་ཚོན་ལྟར་རྟོགས་སོ། །དེ་རིང་ཁོ་བོའི་ཉམས་ལ་ཤར། །དེ་ལ་དབུ་མ་མི་ཟེར་རམ། །དེ་སྐད་འཕྲལ་དུ་སྨྲས་པ་དགེ།། །།ན་མོ་རཏྣ་ཏྲ་ཡཱ་ཡ། བསླུ་བ་མེད་པའི་དཀོན་མཆོག་གསུམ། །ཁྱབ་དང་རྟག་པའི་ཕྲིན་ལས་ཅན། །རྡོ་རྗེའི་སྙན་དང་ཡེ་ཤེས་སྤྱན། །ལྡན་རྣམས་འདིར་གསོན་བདག་ལ་གཟིགས། །བདག་
ཅག་ཤཱཀྱའི་དགེ་སློང་དང་། །དགེ་ཚུལ་དགེ་བསྙེན་མང་ཞིག་ནི། །བཞོན་པ་བྲན་དང་ཉེར་མཁོ་དང་། །ཡོ་བྱད་འཚོ་བའི་རྐྱེན་དང་བཅས། །བསམ་པ་བྱང་ཆུབ་སེམས་བསྐྱེད་ནས། །འགྲོ་བ་དགེ་ལ་བསྐུལ་བ་དང་། །རྒྱུ་འབྲས་དམ་ཆོས་འཆད་པ་དང་། །སྐྱབས་སྡོམ་བསྙེན་གནས་འབོགས་པའི་ཕྱིར། །ངེས་མེད་ཕྱོགས་ཀུན་འཕྱན་པ་ལ། །བར་ཆད་འཚེ་བ་ཤིན་ཏུ་མང་། །གསོལ་བ་འདེབས་སོ་དཀོན་མཆོག་གསུམ། །དགྲ་དང་ཆོམ་རྐུན་ཆུ་དང་ནད། །འཇིགས་པ་ཀུན་ལས་བསྐྱབ་ཏུ་གསོལ། །གལ་ཏེ་སྔོན་གྱི་ལས་ཡིན་ཡང་། །དབང་བཅུ་མངའ་བའི་མཐུ་སྟོབས་ཀྱིས། །ལས་ངན་རྣམ་སྨིན་བཟློག་ཏུ་གསོལ། །ཐུགས་རྗེ་ཆེན་པོ་སྤྱན་རས་གཟིགས། །རྗེ་བཙུན་སྒྲོལ་མ་ཉི་ཤུ་གཅིག །སྣ་ཚོགས་ཡུམ་དང་འོད་ཟེར་ཅན། །འཇིགས་པ་ཀུན་སྐྱོབ་ལྷ་ཚོགས་ལ། །གསོལ་བ་འདེབས་སོ་ཐུགས་རྗེས་གཟིགས། །ཆུ་དང་ནད་སོགས་འཇིགས་པ་སྐྱོབ། །འགྲོ་དོན་འགྲུབ་པར་བྱིན་གྱིས་རློབས། །ཁྱད་པར་སྙིགས་དུས་སྐྱབས་གཅིག་པོ། །པད་འབྱུང་ཞི་དྲག་ག་རུ་ཌ། །གསོལ་བ་འདེབས་སོ་ཐུགས་རྗེས་ཟུངས། །ཆུ་དང་ནད་སོགས་འཇིགས་པ་
སོལ། །སྲུང་ཞིང་སྐྱབས་པར་མཛད་དུ་གསོལ། །ཆུ་ནི་བདེ་བ་ཅན་གྱི་ཞིང་། །ཆུ་རླབས་ཐུགས་རྗེ་ཆེན་པོ་ཡི། །དཀྱིལ་འཁོར་ཉིད་དུ་བྱིན་རློབས་ལ། བདག་ཅག་མི་ཕྱུགས་ཀ་ཆར་བཅས། །ཉེ་ཞོ་མེད་པར་ཐུགས་རྗེས་ཟུངས། །ས་ནད་ས་སྐྱོན་འཇིགས་པ་ལས། །སྲུངས་ཤིག་ཁྲོ་ཆེན་རྟ་མགྲིན་རྒྱལ། །སྐྱོབས་ཤིག་གསང་བདག་རྡོ་རྗེ་འཛིན། །སྲུངས་ཤིག་མ་ཧཱ་ག་རུ་ཌ། །སྐྱོབས་ཤིག་རྡོ་རྗེ་ལག་མྱུར་བ། །ཀྱེ་ཀྱེ་ཡིད་ཀྱི་མངོན་ཤེས་ཅན། །ཐོགས་མེད་རྫུ་འཕྲུལ་སྟོབས་མངའ་བ། །མགུར་ལྷ་བརྟན་མ་དགེ་བསྙེན་ཚོགས། །བདག་ཅག་སྔགས་འཆང་སྒྲུབ་པ་པོ། །སྐྱེལ་བསུ་རོགས་དན་མི་བྱེད་དམ། །པད་འབྱུང་བཀའ་བསྒོས་བརྗེད་ལགས་སམ། །རང་དམ་རང་གིས་མི་སྲུང་ངམ། །དགྲ་རྐུན་ཆུ་དང་ལམ་བར་ལས། །སྐྱེལ་བསུ་རོགས་དན་དུས་ལ་བབ། །སྣང་སྲིད་ལྷ་སྲིན་སྡེ་བརྒྱད་ཀུན། །རྡོ་རྗེ་ཁྲོ་ལོད་སྤྱན་སྔ་རུ། །མ་འོངས་ཨོ་རྒྱན་ཆེན་པོ་ཡི། །མཚན་ཙམ་འཛིན་པའི་གང་ཟག་ཀྱང་། །སེམས་ཀྱིས་བླངས་ཏེ་སྤྱི་བོ་ཡི། །གཙུག་ཏུ་བཞག་ནས་བསྐུར་བར་བྱ། །དེ་ཡི་བྱ་བ་དགོས་པ་རྣམས། །ཐམས་
ཅད་བསྒྲུབ་པར་དམ་བཅས་ཤིང་། །གལ་ཏེ་དམ་ལས་འདས་པ་ན། །ལྷ་སྲིན་ཁྱོད་ཀྱི་མགོ་ལུས་སྙིང་། །བཀའ་གཏུན་ཚལ་པ་བརྒྱར་འགས་ཤིང་། །རུལ་མྱག་ཚེ་ཡི་དུས་བྱས་ནས། །ཕྱི་མ་རབ་ཏུ་ཚ་བ་སོགས། །དམྱལ་ཁམས་བཅོ་བརྒྱད་ཁ་བརྒྱུད་ནས། །མྱ་ངན་འོ་དོད་འབོད་གྱུར་པའི། །དམོད་པ་སློབ་དཔོན་པདྨ་དང་། །དམོད་པ་ལྷ་སྲིན་ཀུན་གྱིས་བོར། །དེ་ཡི་དམ་ཚིག་དྲན་པར་གྱིས། །དེང་སང་དུས་ངན་སྙིགས་མའི་མཐར། །བདག་ཅག་རྣལ་འབྱོར་སྒྲུབ་པ་པོ། །སྡོམ་པ་གསུམ་ལ་གཞི་བཅས་ནས། །སྨོན་ཚོའཇུག་སེམས་བསྐྱེད་གཞུང་བཟུང་སྟེ། །བསྐྱེད་རྫོགས་ཟུང་འཇུག་ཏིང་འཛིན་གསལ། །པད་འབྱུང་བསྟན་པའི་ཁུར་ཆེན་ཁུར། །འགྲོ་དྲུག་འདྲེན་ཞིང་གཡར་དམ་བཅས། །དབང་ཁྲིད་གདམས་པའི་ཆར་ཆེན་འབེབས། །འབྲེལ་ཚད་དོན་ལྡན་སྨོན་ལམ་བཏབ། །རིག་འཛིན་རྒྱལ་བས་ལུང་ཡང་བསྟན། །བདག་འདྲའི་ཕྲིན་ལས་མི་བསྒྲུབ་ན། །བར་ཆད་རྐྱེན་རྣམས་མི་སེལ་ན། །སྐྱེལ་བསུ་རོགས་ལྡན་མི་བྱེད་ན། །ལམ་ངན་ཆུ་འཇིགས་མི་སྒྲོལ་ན། །འགྲོ་དོན་གདུལ་བྱ་མི་བསྐུལ་ན། །སྣང་སྲིད་ལྷ་འདྲེ་ཁྱེད་རྣམས་
ཀྱིས། །ཁས་བླངས་དམ་ཚིག་མི་ཉམས་སམ། །རང་དམ་རང་གིས་བཀྲལ་ལགས་སམ། །བཀའ་ཡི་ཆད་པས་མི་སྡིགས་སམ། །རྡོ་རྗེ་དམྱལ་བར་མི་འཚེར་རམ། །མཐུ་རྩལ་ནུས་པ་མི་ལྡན་ནམ། །དེ་བས་དམ་ལ་མ་འདའ་བར། །དགྲ་རྐུན་ཆུ་དང་ས་སྐྱོན་སོགས། །བར་ཆད་ཐམས་ཅད་ད་སོལ་ཅིག །སྣོད་ལྡན་སློབ་མ་ད་བསྡུས་ཤིག །མི་རྣམས་དགེ་ལ་ད་སྐུལ་ཞིག །ཨོ་རྒྱན་ཐུགས་རྗེ་ད་མ་གཡེལ། །བཀའ་སྲུང་དམ་ཅན་ད་མ་གཡེལ། །སྣང་སྲིད་ལྷ་སྲིན་དྲེགས་པའི་ཚོགས། །ནུས་རྩལ་ཡསྤྲུག་པའི་དུས་ལ་བབ། །དེ་སྐད་ཚ་བ་སྒང་གི་སར། །ཆར་ཆེན་ཆུ་བོ་གནམ་དུ་འཕྱུར། །ཅི་བྱ་གཏོལ་མེད་བྱུང་བའི་དུས། །སྨྲེ་སྔགས་འོ་དོད་འབོད་པ་ཤོར། །ཨེ་མ་ལེགས་པར་བརྟགས་ཙམ་ན། །དགྲ་རྐུན་ཆུ་དང་ཆར་པ་དང་། །ས་སྐྱོན་ལ་སོགས་འཇིགས་སྐྲག་འདི། །ངོ་བོ་སྟོང་པ་ཆོས་ཀྱི་སྐུ། །གཡོ་མེད་རྗེན་པ་ནམ་མཁའ་འདྲ། །རྣམ་པ་མ་འགགས་སྣ་ཚོགས་པ། །ཅིར་ཡང་འཆར་བ་སྒྱུ་མའི་འཕྲུལ། །ཟུང་འཇུག་མཁའ་དང་འཇའ་ཚོན་བཞིན། །ད་ལྟ་ཁོ་བོའི་ཉམས་ལ་ཤར། །ཁྱེད་ཅག་དམ་ཅན་སྲུང་མ་རྣམས། །
རང་དམ་སྲུང་དགོས་ཡོད་ན་སྲུངས། །ང་ནི་གཞན་དོན་སེམས་བསྐྱེད་པས། །སྒྱུ་ལུས་འཇིགས་ཀྱང་འགྱོད་པ་མེད། །རང་སེམས་སྐྱེ་མེད་ཆོས་ཀྱི་སྐུ། །སྐྱེ་འཆི་མེད་པའི་གདེང་ཞིག་རྟོགས། །ཨེ་བདེན་མངོན་ཤེས་ཅན་ཀུན་ལྟོས། །སྡུར་མའི་དཔའ་གཏམ་ཧ་ཧ་ཧ། །ཀུ་རེའི་ནང་ན་དོན་དམ་ཡོད། །རྣལ་འབྱོར་ཉམས་ལ་ཅི་ཡང་འཆར། །ད་ལྟ་ཉམས་ལ་ཤར་ནས་བྲིས། །དོན་དང་ལྡན་ནོ་སྙམ་ནས་བྲིས། །དོན་དང་འགལ་ན་མཐོལ་ལོ་བཤགས། །བདག་ནི་འགྲོ་བ་ཀུན་དོན་དུ། །ལུས་དང་སྲོག་ལ་ལྟོས་མེད་པར། །བླ་མེད་བྱང་ཆུབ་དོན་གཉེར་ཕྱིར། །འགྲོ་དྲུག་སེམས་ཅན་ཐམས་ཅད་ལ། །གང་ལ་གང་འདུལ་ཆོས་སྟོན་པ། །སྤྱན་རས་གཟིགས་ཀྱི་གཡོག་པོར་ཤོག །ཕཊ། །ད་ནི་ཁོ་བོས་གཅོད་གཅིག་བྱེད། །སྣང་བ་ཐམས་ཅད་སེམས་སུ་གཅོད། །སེམས་ཉིད་སྐྱེ་བ་མེད་པར་གཅོད། །བདེ་སྡུག་སྣ་ཚོགས་སྣང་བ་འདི། །ལན་ཚྭ་ཆུ་ལ་ཐིམ་པ་ལྟར། །ཐམས་ཅད་རོ་གཅིག་ངང་དུ་གཅོད། །སྟོང་པའི་ངང་ལས་རིག་པའི་རྩལ། །ཡེ་ཤེས་བྱ་ཁྱུང་ག་རུ་ཌ། །མེ་འབར་གནམ་ལྕགས་མཆུ་སྡེར་ཅན། །ཉི་ཟླ་འབར་བའི་
སྤྱན་བསྒྲད་ཅིང་། །ཀྲང་ཀྲང་ཀྲིང་ཀྲིང་སྒྲ་སྒྲོགས་པོས། །ཆར་བདག་ཀླུ་གཉན་ས་བདག་ཀུན། །སྐྲག་ཅིང་དངངས་ནས་འོག་གི་ཕྱོགས། །རིམ་དགུ་ས་ཡི་འོག་ཏུ་སོང་། །ས་གཞི་ལྕགས་སྲེག་ས་གཞི་ལ། །རི་རབ་ལྕགས་སྲེག་སྡོང་པོ་སྟེ། །སྣང་སྲིད་ལྷ་འདྲེ་ཐམས་ཅད་ཀྱི། །དབང་པོའི་སྒོ་ལྔ་ཐམས་ཅད་ནས། །བསྐལ་པའི་མེ་དཔུང་འུ་རུ་རུ། །མེ་སྟག་ཁྱུང་དམར་སྐར་ལྟར་འཁྲུགས། །རྣལ་འབྱོར་པ་ཡིས་བསྒོམས་པས་འགྲུབ། །སྣང་སྲིད་ཀུན་གྱི་བྱེད་པོ་ནི། །རང་སེམས་སྐྱེ་མེད་ཀུན་ཏུ་བཟང་། །དེ་ལས་དབང་བཙན་སུ་ཞིག་ཡོད། །ལྷ་ཡང་སེམས་ལ་འདྲེ་ཡང་སེམས། །སྣང་བ་ཐམས་ཅད་སེམས་ཀྱི་འོད། །དེ་ཕྱིར་རང་སེམས་ཧེ་རུ་ཀ །ང་རྒྱལ་གདེང་ཞིག་དེ་རིང་སྐྱེས། །ཕྲཊ། ཕྲཊ། ཕཊ། ༈ །ན་མོ་དྷཱ་ཀི་ནཱི། སྔགས་འཆང་རཱ་ག་ཨ་སྱ་བདག །བྱང་ཆུབ་མཆོག་ཏུ་སེམས་བསྐྱེད་ནས། །དབང་ལུང་ཁྲིད་སོགས་སྤེལ་བའི་ཕྱིར། །ཚ་བའི་ཡུལ་དུ་འགྲོ་བའི་ཚེ། །ཆོས་ཁྲི་མདོ་རུ་སླེབས་པའི་ནུབ། །བུད་མེད་མཛེས་སྡུག་རྒྱན་ཅན་འགའ། །ཉམས་རྨི་ལམ་མཚམས་སུ་མདུན་དུ་བྱུང་། །
བརྟན་མའི་བསུ་བ་ཡིན་ནམ་སེམས། །ཚ་བའི་ཡུལ་དུ་སླེབས་པའི་དུས། །རབ་རིབ་འཁྲུལ་པའི་རྨི་ལམ་ན། །བུད་མེད་མཛེས་ཤིང་ཡིད་འོང་བ། །རིན་ཆེན་དུ་མས་བརྒྱན་པ་ཤུལ། །སྐུ་སྟོད་གཅེར་བུ་ཡོད་པ་ཅིག །ཆགས་པའི་སྣང་བ་མ་ཡིན་པར། །རང་དང་མཉམ་དུ་འདུག་པ་ལ། །ལུས་ལ་མཐུན་ཚུལ་ལག་གིས་ཕུར། །དེ་བཞིན་བུད་མེད་ཤ་རྒྱས་པ། །གཡུ་བོ་ཆེ་ཡི་རྒྱན་ཅན་ལ། །རང་དང་མཉམ་དུ་འདུག་པ་སྙམ། །དེ་ནས་མཆོག་ལ་གོང་དུ་ཕྱིན། །འབྲུག་སྒྲ་ཆར་དང་ན་བུན་འཇའ། །རྟེན་འབྲེལ་ལེགས་སམ་སྙམ་པ་བྱུང་། །ཞག་གཉིས་ནུབ་པར་ཉམས་དང་ནི། །རྨི་ལམ་འདྲེས་པའི་སྐབས་ཉིད་དུ། །བརྟན་མའི་ཤེལ་གུར་ཐད་དེ་ནས། །ཁྲི་ནི་མཐོན་པོ་གཅིག་འདུག་པ། མང་པོ་འགའ་ཡིས་བར་སྣང་ལ། །བཏེག་ནས་བདག་གི་མདུན་དེ་ཡི། །བར་སྣང་ཁམས་སུ་ཁྱེར་ཏེ་བྱུང་། །ཁྲི་དེའི་སྟེང་ན་བུད་མེད་ནི། །བཅུ་དྲུག་ལོན་པའི་ན་ཚོད་ཙམ། །མཛེས་ཤིང་ལྟ་བས་མི་ངོམས་པ། །དགེ་སློང་མ་ཡི་ཆ་ལུགས་ཅན། །སྟོད་འགགས་ཤམ་ཐབས་བེར་ལ་སོགས། །བླ་ཆེན་སྐུ་སྐྱེ་འདྲ་བར་སྣང་། །བརྟན་མ་དངོས་དེ་ཡིན་པར་གོ་
དེ་མ་ཐག་ཏུ་འཇའ་ལྟར་ཡལ། །དེ་ནས་བདག་གི་བསམ་པ་ལ། །གཙོ་མོ་དེ་ནི་ཡེ་ཤེས་པ། །ཕལ་པས་མཇལ་རྒྱུ་མེད་པར་གོ །ཆོ་འཕྲུལ་སྣ་ཚོགས་སྟོན་པ་ནི། །འཁོར་གྱི་སྨན་མོ་འབུམ་ཕྲག་རྣམས། །མགུར་དང་མཐོང་བ་འདོན་མཁན་ནི། །ཕོ་ཞིག་བསྒྱུར་ཞེས་འཁོར་གཅིག་སྟེ། །སྐྱེ་བོ་ཕལ་པའི་རྨི་ལམ་ན། །ཆགས་པ་སྤྱོད་པར་རྨི་བ་སོགས། །ཀུན་དགའ་མ་ཞེས་བྱ་བ་གཅིག །རྟོགས་ལྡན་ལ་སོགས་ཆོས་པ་ལ། །ཆགས་པ་སྤྱོད་རྨིས་མགོན་པ་ནི། །རྣལ་འབྱོར་གྲོགས་ཞེས་འཁོར་གཅིག་སྟེ། །ལྕགས་ཁའི་བདག་མོ་ལྕགས་བདག་མ། །གནོད་འཚེ་བྱེད་པ་གྲོ་ཁེ་མ། །ནག་མོ་མ་དང་སྤྱང་གདོང་མ། །དེ་སོགས་འཁོར་ཚོགས་ཆོ་འཕྲུལ་མ། །གཙོ་མོ་ཉིད་ནི་ཡེ་ཤེས་པ། །སྤྱན་རས་གཟིགས་ཀྱི་ལྕམ་གཅིག་ཅེས། །གྲུབ་ཆེན་རྣམས་ཀྱིས་བསྟོད་ལྟར་ལགས། །དེ་ཕྱིར་གསས་མཁར་ལྷ་ཐོ་བརྩིགས། །བོད་ཁམས་བདེ་བའི་སྨོན་ལམ་བཏབ། །གཉིད་པ་མ་ཡིན་ཉམས་སྣང་ལ། ཕྱིར་ནངས་འོང་རྒྱུའི་འབུལ་བ་རྣམས། །མིག་གི་མཐོང་སྟེ་མཚར་བ་བྱུང་། །ཕྱོགས་རིས་ཆེ་བར་གྲགས་པས་ཀྱང་། །གུས་
འདུད་འབུལ་བ་ལ་སོགས་བྱས། །དེ་ནས་གངས་ཆེན་འབུལ་ཕྱུག་ཞོལ། །དབང་ཁྲིད་བདུན་གསུམ་ཙམ་དུ་བཙུགས། །འབྲང་རྗེ་རྒྱལ་པོ་བཙུན་མོ་དང་། །སྲས་དང་བློན་འབངས་བཅས་པ་དང་། །རི་སྒྲིས་ཁག་གསུམ་བླ་མ་རྣམས། །སེར་མོ་བ་ཡང་མང་པོ་ལ། །དབང་ལུང་ཁྲིད་སོགས་ཤིན་ཏུ་འཕེལ། །རབ་བྱུང་བསྙེན་རྫོགས་གསུམ་དང་བཅས། །དགེ་ཚུལ་དགེ་སློང་བསྒྲུབ་མཁན་ཡང་། །སུམ་ཅུ་སོ་དགུ་ཙམ་ཞིག་བྱུང་། །སེམས་ངོ་གསར་དུ་མཐོང་བ་དང་། །བོགས་འདོན་པ་ཡང་མང་ཞིག་བྱུང་། །གྲུབ་མཐའི་ཕྱོགས་རིས་ཆེ་ན་དང་། །སྟོབས་ལྡན་མི་སྣ་བཙུན་པ་དང་། །སོག་པོ་ཨ་ཙ་ར་ལ་སོགས། །མི་རིགས་མང་པོས་གུས་འདུད་དང་། །བདུད་འདུལ་རྡོ་རྗེའི་སྐུ་ཚབ་པ། །རྡོ་རྗེ་གྲོ་ལོད་གནས་སྒོ་ནི། །ཕྱེ་རུ་བཏང་བའི་བླ་མ་དེས། །གུས་འདུད་དབང་འབྲེལ་ལ་སོགས་ཞུས། །ཟླ་བ་གཅིག་གི་འགྲོ་དོན་ལ། །ད་ལམ་ཆེའམ་བསམ་པ་བྱུང་། །རྨི་ལམ་སྒྲུབ་ཆེན་དཀྱིལ་འཁོར་དྲུང་། །དུང་དཀར་གཅིག་ནི་འབུད་འདུག་པ། །སྐད་ནི་ཕྲ་ཞིང་སྙན་ལ་རིང་། །མཁའ་ལ་ཉི་མའི་དཀྱིལ་འཁོར་ཤར། །བཙུན་པ་གཅིག་དང་སྐྱ་
སེར་འགའ། །གུས་འདུད་ཕྱག་ཀྱང་འཚལ་བ་རྨིས། །དེ་ནས་ཡར་འོང་སྐ་ལྷའི་དྲུང་། །བཙུན་གཟུགས་ལུས་ཚད་རྩག་གསུམ་ཙམ། །ལུས་པོ་ཧ་ཅང་མི་གསལ་ལ། །སྐེད་པར་ཨོ་རྒྱན་གཏེར་ཕུར་ནི། །རིང་ཐུང་འདོམ་པ་གསུམ་གསུམ་ཙམ། །ཤིན་ཏུ་གསལ་ཞིང་ལེགས་པ་བཅུག །དེ་འདྲ་ཞིག་ནི་མཐོང་སྙམ་པ། །ཨོ་རྒྱན་ཆེན་པོའི་བཀའ་སྡོད་པ། །སྐུ་ལྷ་ངང་ཡག་ཡིན་ནམ་སྙམ། །དེ་ནས་གད་གཉིས་བར་དུ་ཕྱིན། །སྒར་པ་ཕོག་ཚེ་ཅུང་ཟད་འཐུམ། །བུད་མེད་ལ་སོགས་མང་པོ་འགའ། །གུས་ཤིང་འདུད་པས་མདུན་དུ་འཁོད། །ཤེལ་དཀར་གཅིག་གིས་དབང་བསྐུར་བྱས། །སེམས་ཀྱི་ངོ་སྤྲོད་བྱས་པ་རྨིས། །ཕྱོགས་དེའི་གཞི་བདག་ཡིན་ནམ་སྙམ། །བདག་ལ་ནུས་པ་མ་མཆིས་ཀྱང་། །ཨོ་རྒྱན་ཆེན་པོའི་བཀའ་དྲིན་ཡིན། །དེ་སྐད་དེ་མ་ཐག་ཏུ་བྲིས།། ༈ །།ན་མོ་གུ་རུ་སིདྡྷི་ཧཱུྃ། རང་སེམས་བླ་མ་པདྨ་འབྱུང་། །བཅོས་བསླད་མེད་པ་ཆོས་ཀྱི་སྐུ། །བལྟ་བྱ་ལྟ་བྱེད་བྲལ་བ་ལ། །རང་གར་བཞག་པས་ཆོག་པ་འདི། །དབུལ་པོའི་ཁྱིམ་ནས་གཏེར་རྙེད་ལྟར། །བླ་མའི་བཀའ་དྲིན་ངོ་མཚར་
ཆེ། །ཞན་པའི་སྡུག་ཡུས་མ་ཡིན་པར། །ཤུགས་འབྱུང་དད་པ་འཕེལ་བར་བྱུང་། །ཧོམ་གཉིས་བར་དུ་བསྡད་པའི་ནུབ། །རྨི་ལམ་འོད་གསལ་འདྲེས་པའི་སྐབས། །ངོ་མཚར་ལྟད་མོ་ཅི་ཡང་མཐོང་། །བརྟན་མའི་ཕོ་བྲང་ཤེལ་གུར་དེ། །དྲུང་ན་ཡོད་ལྟར་མཐོང་སྙམ་བྱེད། །སྐུ་གཟུགས་གསལ་པོ་མ་མཐོང་ཡང་། །བརྟན་མ་དྲུང་དེར་ཡོད་སྙམ་བྱེད། །དེ་ཚེ་བདག་གིས་འདི་སྐད་སྨྲས། །ཨོ་རྒྱན་པདྨ་འབྱུང་གནས་དེ། །ཚེས་བཅུར་རྒྱུན་དུ་འབྱོན་པ་དེ། །ངེད་ཅག་མི་ཡིས་མི་མཇལ་ཡང་། །ཁྱེད་ཅག་ལྷ་འདྲེས་ཨེ་མཇལ་སྨྲས། །དེ་ཚེ་བརྟན་མས་ཚིག་འདི་ཟེར། །དོ་གལ་ཆེ་བའི་དུས་རྣམས་སུ། །རྩེ་གཅིག་གསོལ་བ་བཏབ་པ་ན། །ནམ་མཁའ་ལ་ནི་འཇའ་ཤར་ལྟར། །པད་འབྱུང་ནམ་འདོད་མཇལ་རྒྱུ་ཡོད། །གསོལ་བ་ལ་སོགས་མ་བཏབ་ཅིང་། །མཇལ་དགོས་གལ་ཆེན་མེད་དུས་ནི། །ཚེས་བཅུ་ལ་ཡང་མི་མཇལ་ཟེར། །དེ་ཚེ་ནམ་མཁའི་དབྱིངས་སུ་ནི། །འཇའ་ཚོན་ཤར་བ་ལྟ་བུ་ཡི། །ཨོ་རྒྱན་སྤྲུལ་སྐུའི་ཆ་ལུགས་ཅན། །བདག་གིས་ཡུད་ཙམ་མཇལ་སྙམ་བྱེད། །དེ་ནས་མོས་གུས་ཕྱག་ཆེན་གྱི། །དཔེ་ཆ་བདག་གི་ལག་
ཏུ་ཕྱིན། །རང་གིས་རང་ལ་ཁྲིད་བཙུགས་སྙམ། །དམིགས་པ་འགའ་རེ་བསྒོམས་པ་རྨིས། །དེ་ནས་བདག་གིས་པཎ་ཞྭ་གྱོན། །ལུས་ལ་ཐུལ་པ་གཅིག་གྱོན་ནས། །འོག་ཏུ་རྟ་བཟང་གཅིག་ཞོན་ནས། །ལག་ཏུ་དུང་དཀར་ཆེན་པོ་གཅིག །འབུད་ཅིང་འབུད་ཅིང་སོང་བ་སོགས། །རེས་འགའ་རྨི་ལམ་རེས་འགའ་ནི། །འོད་གསལ་ཟིན་པ་བསྲེ་མར་བྱུང་། །ཉམས་མཚར་ཕྱིར་ནངས་ཡི་གེར་བྲིས།། །།ན་མོ་གུ་རུ་བྷེ་ཥ་ཛུ་ཡེ། བླ་མ་བཅོམ་ལྡན་སྨན་གྱི་བླ། །མཆེད་བརྒྱད་རྣམས་ལ་གསོལ་བ་འདེབས། །བདེ་བར་གཤེགས་པ་སྨན་བླ་ཡི། །སྔོན་ཚེ་བྱང་ཆུབ་སེམས་དཔའི་ཚེ། །གང་གིས་མཚན་ཐོས་བརྗོད་པ་ཡི། །ནད་ཀུན་ཞི་བར་གྱུར་ཅིག་ཅེས། །སྨོན་ལམ་བཏབ་ཅིང་མཐར་སོན་པའི། །བདེན་པས་བདག་ཅག་འཁོར་བཅས་ཀྱི། །ནད་ཀུན་མྱུར་དུ་ཞི་གྱུར་ཅིག །བཅོམ་ལྡན་འཕགས་མ་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་གཟིགས། །ནད་སོགས་འཇིགས་པ་ཐམས་ཅད་ལ། །སྐྱོབ་པར་ཁྱེད་ཀྱིས་དམ་བཅས་པའི། །བདེན་པས་བདག་ཅག་འཁོར་བཅས་ཀྱི། །ནད་ཀུན་ད་ལྟ་ཉིད་
དུ་སོལ། །འཕགས་མ་ལོ་མ་གྱོན་མ་ལ། །གསོལ་བ་འདེབས་སོ་ཐུགས་རྗེས་གཟིགས། །ཁྱེད་ཀྱི་མཚན་ཙམ་བརྗོད་པས་ཀྱང་། །མི་ནད་ཐམས་ཅད་ཞི་བ་ཡི། །བདེན་པ་དེ་ཡིས་བདག་ཅག་རྣམས། །ནད་ཡམས་གནོད་པ་ཞི་གྱུར་ཅིག །མ་གཅིག་དུད་སོལ་ལྷ་མོ་ལ། །གསོལ་བ་འདེབས་སོ་ཐུགས་རྗེས་གཟིགས། །ཁྱེད་ཀྱི་མཚན་ཙམ་ཤེས་པས་ཀྱང་། །མི་ནད་ཐམས་ཅད་ཞི་གསུངས་པའི། །བདེན་པས་བདག་ཅག་འཁོར་བཅས་ཀྱི། །མི་ནད་ཐམས་ཅད་རྒྱུན་ཆོད་ཅིག །རང་སེམས་སྐྱེ་མེད་རྒྱལ་བའི་ཡུམ། །འདི་ལ་མཉམ་པར་བཞག་པ་ན། །འཇིགས་དང་གནོད་པ་ཐམས་ཅད་ཀུན། །རང་སར་ཞི་བར་ཐུབ་དབང་གསུངས། །དེ་ཡི་བདེན་པས་ནད་དང་གདོན། །ཐམས་ཅད་དབྱིངས་སུ་ཞི་གྱུར་ཅིག །དེ་སྐད་རང་གི་གྲྭ་འཁོར་རྣམས། །གློ་བུར་རིམས་ནད་མཆེད་པའི་དུས། །རཱ་ག་ཨ་སྱས་བདེན་ཚིག་བརྗོད། །བརྡ་ཐིམ།། །།ན་མོ་རཏྣ་ཏྲ་ཡཱ་ཡ། ད་ལོ་ཚ་བའི་སྒང་ངོས་ཕྱིན། །རླུང་འཚུབ་ཆེ་ཞིང་ཆོན་ཐག་རྒྱུག །ཆུ་རྔུར་རི་བྱ་ཁྱིམ་དུ་འཛུལ། །སྐབས་སུ་རྨི་ལམ་རྩུབ་ཆ་ཆེ། །ཨེ་མ་ཐམས་ཅད་སེམས་ཀྱི་
འཕྲུལ། །བགེགས་དང་འདྲེ་ཀུན་རང་གི་སེམས། །བདུད་དང་བར་ཆད་རང་གི་སེམས། །ཆོ་འཕྲུལ་རྣམ་རྟོག་རང་གི་སེམས། །རང་སེམས་ཡེ་ནས་ཆོས་ཀྱི་སྐུ། །སྟོང་པ་ཉིད་ལ་ཅི་ཡང་འཆར། །རང་ངོ་རང་གིས་མ་ཤེས་ན། །འདྲེ་དང་གདོན་ལ་ཟད་པ་མེད། །ལྟས་ངན་བརྒྱད་ཅུ་རྩ་གཅིག་དེ། །དུས་གཅིག་སྤྲིན་ལྟར་གཏིབས་ན་ཡང་། །རང་སེམས་འཁྲུལ་པའི་རང་གཟུགས་ལས། །གཞན་ནས་བཏང་དང་འོང་བ་མེད། །སེམས་ལས་ཤར་ཞིང་སེམས་སུ་གྲོལ། །དཔེར་ན་ཆུ་དང་ཆུ་རླབས་འདྲ། །ལྟ་བ་ལྷ་མེད་འདྲེ་མེད་ཡིན། །སྒོམ་པ་སེམས་འཛིན་བྲལ་བ་ཡིན། །སྤྱོད་པ་བླང་དོར་བྲལ་བ་ཡིན། །འབྲས་བུ་རེ་དོགས་བྲལ་བ་ཡིན། །གཞན་དོན་སེམས་བསྐྱེད་རང་དོན་ཡིན། །གང་བྱུང་འདོད་པ་གཅོད་ཡུལ་ཡིན། །སྐྱིད་ན་དཀོན་མཆོག་ཐུགས་རྗེ་ཡིན། །བསྟན་འགྲོར་གང་ཕན་བྱེད་པ་ཡིན། །སྡུག་ན་སྒྲིབ་པ་ཟད་པ་ཡིན། །འགྲོ་བའི་སྡུག་བསྔལ་ཁུར་བ་ཡིན། །ཕྱུག་ན་ཚོགས་སོགས་གང་འགྲུབ་བྱེད། །སྦྱིན་བདག་ཚོགས་གཉིས་རྫོགས་པ་ཡིན། །དབུལ་ན་སྒྲུབ་པ་རྩེ་གཅིག་བྱེད། །དཀོར་སྒྲིབ་ཆུང་བས་དགའ་
བ་ཡིན། །དེ་སྐད་རཱ་ག་ཨ་སྱས་སྨྲས། །རྣལ་འབྱོར་རཱ་ག་ཨ་སྱ་ང་། །དེ་རིང་ཉམས་ཀྱི་སྣང་བ་ལ། །གང་བྱས་སྐྱིད་པའི་ཉམས་ཤིག་ཤར། །ནད་མེད་སྐུ་ཚེ་རིང་ན་སྐྱིད། །རང་གཞན་དོན་གཉིས་འཕེལ་བས་སྐྱིད། །མྱུར་དུ་ཤི་ན་དེ་བས་སྐྱིད། །འདུ་བྱེད་སྡུག་བསྔལ་བྲལ་བས་སྐྱིད། །བདེ་ཆེན་ཞིང་དུ་འགྲོ་བས་སྐྱིད། །འོད་དཔག་མེད་དང་མཇལ་བས་སྐྱིད། །གདུལ་བྱ་ལོངས་སྤྱོད་ཆེ་ན་སྐྱིད། །དཀོན་མཆོག་མཆོད་པ་བྱེད་པས་སྐྱིད། །རང་གཞན་ཚོགས་གཉིས་རྫོགས་པས་སྐྱིད། །དབུལ་ཕོངས་གདུལ་བྱ་མེད་ན་སྐྱིད། །དཀའ་ཐུབ་སྒྲུབ་པ་བྱེད་པས་སྐྱིད། །དཀོར་སྒྲིབ་ཁུར་རུ་ཆུང་བས་སྐྱིད། །བསྐྱེད་རྫོགས་ཡེངས་མེད་བསྒོམས་ན་སྐྱིད། །ཉམས་ལེན་གོང་དུ་འཕེལ་བས་སྐྱིད། །ཡེངས་ཤིང་འཁྲུལ་པར་འབྱམས་ན་སྐྱིད། །ངོ་བོ་འགྱུར་མེད་རྟོགས་པས་སྐྱིད། །ཡེངས་དང་མ་ཡེངས་མེད་པས་སྐྱིད། །འཁྲུལ་དང་མ་འཁྲུལ་མེད་པས་སྐྱིད། །ནད་མེད་ལུས་ཉམས་བཟང་ན་སྐྱིད། །དབང་ལུང་ཁྲིད་སོགས་འཕེལ་བས་སྐྱིད། །ན་ཞིང་ཡུན་རིང་མནར་ན་སྐྱིད། །སྒྲིབ་པ་བྱང་བར་འགྱུར་བས་སྐྱིད། །བཏང་ལེན་བློ་སྦྱོང་བསྒོམས་པས་
སྐྱིད། །ཉམས་རྒོད་ཤར་བའི་གླུ་རྒོད་འདི། །རཱ་ག་ཨ་སྱས་འཕྲལ་དུ་སྨྲས། །སྨྱོ་གཏམ་འདྲ་ཡང་གནད་གཅིག་ཡོད། །ཧེ་ཧེ་ཧེ།། ༈ །།ན་མོ་མ་ཧཱ་ཀ་རུ་ཎི་ཀ་ཡེ། ཀྱེ་མ་འགྲོ་དྲུག་སེམས་ཅན་རྣམས། །ཐར་མེད་འཁོར་བའི་རྒྱ་མཚོར་བྱིངས། །ཚ་དམྱལ་བརྒྱད་དང་གྲང་དམྱལ་བརྒྱད། །དེ་དག་སྡུག་བསྔལ་དཔག་མེད་དེ། །ད་ལྟ་ཉིད་དུ་བདག་ཉིད་ལ། །ཐིམ་ནས་དེ་ཀུན་བདེ་གྱུར་ཅིག །ཡི་དྭགས་རིགས་ལ་སུམ་ཅུ་གཉིས། །བཀྲེས་སྐོམ་སྡུག་བསྔལ་དཔག་མེད་རྣམས། །དེ་ཀུན་བདག་ལ་སྨིན་གྱུར་ནས། །དེ་རྣམས་བདེ་སྐྱིད་ལྡན་གྱུར་ཅིག །དུད་འགྲོ་གླེན་ལྐུག་བཀོལ་སྤྱད་སོགས། །སོ་སོའི་སྡུག་བསྔལ་གྲངས་མེད་པ། །དེ་ཀུན་བདག་ལ་སྨིན་གྱུར་ནས། །དེ་རྣམས་བདེ་སྐྱིད་ལྡན་གྱུར་ཅིག །ལྷ་མིན་འཐབ་རྩོད་སྨས་འགྲམ་གྱི། །ན་ཚ་སྡུག་བསྔལ་དཔག་མེད་དེ། །བདག་གི་ན་ས་འདིར་ཐིམ་ནས། །དེ་རྣམས་བདེ་དང་ལྡན་གྱུར་ཅིག །མི་ཡི་སྐྱེ་རྒ་ན་འཆི་དང་། །ལྷ་ཡི་ཕམ་ལྟུང་སྡུག་བསྔལ་རྣམས། །བདག་གི་ནད་འདིས་གོ་ཆོད་ཤོག །སྣང་ཞིང་སྲིད་པའི་ལྷ་འདྲེ་དང་། །
བགེགས་རིགས་ལན་ཆགས་ཐམས་ཅད་ཀུན། །བདག་ལུས་འབྱུང་བཞིའི་ཕུང་པོ་འདི། །ནམ་ཡང་མི་བཞག་འདོར་བ་ལ། །སུས་དགོས་ཁྱེར་ལ་ཅི་དགའ་རོལ། །བདག་སེམས་ཆོས་སྐུ་རྒྱལ་བའི་ཡུམ། །ནམ་མཁའི་ཁམས་དང་ཆོས་ཀྱི་དབྱིངས། །དབྱེར་མེད་སྤྲོས་བྲལ་འདུས་མ་བྱས། །ལྷས་ཀྱང་བཟང་དུ་བཏང་རྒྱུ་མེད། །འདྲེས་ཀྱང་ངན་དུ་བཏང་རྒྱུ་མེད། །གཞོམ་གཞིག་བྲལ་བ་གཉུག་མའི་གཤིས། །འདི་ལ་ནད་གདོན་བགེགས་ཀྱང་མེད། །ལྷ་མེད་འདྲེ་མེད་སྟོང་རྗེན་ནེ། །བདག་མེད་བདག་འདྲ་དེ་ལ་གནས། །ཞེས་པ་འཛི་ཆུའི་དོལ་ཁུག་ན། །སྐེ་འཛི་འདུས་པའི་གཉན་ས་ན། །གླ་བ་ཤིང་གི་ནགས་ཁྲོད་ན། །རོ་སྙོམས་དགོང་འདྲིལ་གདམས་ངག་བྲིས། །རྟོགས་ལྡན་ཞིག་ལ་ལུང་བྱས་པས། །སློང་དང་ཆོ་འཕྲུལ་ཡ་མའི་ནད། །སྙིལ་སྐྲང་ཟུག་ཟེར་ཆེ་བའི་དུས། །ཡིད་ལ་ཅི་ལྟར་བསྒོམ་ཚུལ་ཡིན། །དེ་ལྟར་བསྒོམ་ཞིང་གཉིད་པ་དང་། །སྐབས་སུ་ཕཊ་སྒྲ་སྒྲོག་པའི་སྐབས། །མི་འགས་ཇ་དར་འབུལ་དུ་བྱུང་། །དེ་དགོང་དངོས་སུ་འབུལ་བ་རྣམས། །རྨི་ལམ་བྱུང་ལྟར་མི་ཡིས་ཕུལ། །བཙན་དང་རྒྱལ་པོའི་ཆོ་
འཕྲུལ་དང་། །དེ་དག་རྣམ་ལ་དབང་བསྐུར་སོགས། །ཞག་གཅིག་རྨི་ལམ་དངོས་ཉམས་ཀྱི། །ཚར་སློང་འགྲིགས་པའི་ཡ་མཚན་བྱུང་། །ཕྱིར་ཉིན་ཡི་གེར་བྲིས་པའོ།། ༈ །།ན་མོ་པྲ་ཝ་ཀ་ར་ཡེ། ནུབ་ཕྱོགས་བདེ་ཆེན་ཞིང་ཁམས་སུ། །ཆོས་སྐུ་སྣང་བ་མཐའ་ཡས་ལ། །གསོལ་འདེབས་གསོལ་བ་ཡང་ཡང་འདེབས། །སྔར་ཡང་ཐུགས་རྗེ་ངོ་མཚར་ཆེ། །ད་ཡང་ཐུགས་རྗེས་བྱིན་གྱིས་རློབས། །མི་འགྱུར་རྡོ་རྗེ་ཞབས་བརྟན་ཅིང་། །ཟབ་གཏེར་གཏེར་སྒོ་ཕྱེད་པ་དང་། །འགྲོ་དོན་འཕེལ་བར་མཛད་དུ་གསོལ། །པོ་ཊ་ལ་ཡི་གནས་མཆོག་ན། །ལོངས་སྐུ་ཐུགས་རྗེ་ཆེན་པོ་ལ། །གསོལ་འདེབས་གསོལ་བ་ཡང་ཡང་འདེབས། །སྔར་ཡང་ཐུགས་རྗེ་ངོ་མཚར་ཆེ། །ད་ཡང་ཐུགས་རྗེས་བྱིན་གྱིས་རློབས། །མི་འགྱུར་རྡོ་རྗེ་ཞབས་བརྟན་ཅིང་། །ཟབ་གཏེར་གཏེར་སྒོ་ཕྱེད་པ་དང་། །འགྲོ་དོན་འཕེལ་བར་མཛད་དུ་གསོལ། །པདྨ་འོད་ཀྱི་གཞལ་ཡས་ན། །སྤྲུལ་སྐུ་པདྨ་འབྱུང་གནས་ལ། །གསོལ་འདེབས་གསོལ་བ་ཡང་ཡང་འདེབས། །སྔར་ཡང་ཐུགས་རྗེ་ངོ་མཚར་ཆེ། །ད་ཡང་ཐུགས་རྗེས་བྱིན་གྱིས་
རློབས། །མི་འགྱུར་རྡོ་རྗེ་ཞབས་བརྟན་ཅིང་། །ཟབ་གཏེར་གཏེར་སྒོ་ཕྱེད་པ་དང་། །འགྲོ་དོན་འཕེལ་བར་མཛད་དུ་གསོལ། །གངས་ཅན་བོད་ཀྱི་ཞིང་ཁམས་ན། །གྲུབ་ཆེན་རྗེ་འབངས་ཉེར་ལྔ་ལ། །གསོལ་འདེབས་གསོལ་བ་ཡང་ཡང་འདེབས། །སྔར་ཡང་ཐུགས་རྗེ་ངོ་མཚར་ཆེ། །ད་ཡང་ཐུགས་རྗེས་བྱིན་གྱིས་རློབས། །མི་འགྱུར་རྡོ་རྗེ་ཞབས་བརྟན་ཅིང་། །ཟབ་གཏེར་གཏེར་སྒོ་ཕྱེད་པ་དང་། །འགྲོ་དོན་འཕེལ་བར་མཛད་དུ་གསོལ། །ཆོས་དབྱིངས་བདེ་བ་ཆེན་པོ་ན། །ཡི་དམ་ཞི་ཁྲོ་རབ་འབྱམས་ལ། །གསོལ་འདེབས་གསོལ་བ་ཡང་ཡང་འདེབས། །སྔར་ཡང་ཐུགས་རྗེ་ངོ་མཚར་ཆེ། །ད་ཡང་ཐུགས་རྗེས་བྱིན་གྱིས་རློབས། །མི་འགྱུར་རྡོ་རྗེ་ཞབས་བརྟན་ཅིང་། །ཟབ་གཏེར་གཏེར་སྒོ་ཕྱེད་པ་དང་། །འགྲོ་དོན་འཕེལ་བར་མཛད་དུ་གསོལ། །ཡུལ་ཆེན་ཉི་ཤུ་རྩ་བཞི་ན། །མ་སྲིང་མཁའ་འགྲོ་རྒྱ་མཚོ་ལ། །གསོལ་འདེབས་གསོལ་བ་ཡང་ཡང་འདེབས། །སྔར་ཡང་ཐུགས་རྗེ་ངོ་མཚར་ཆེ། །ད་ཡང་ཐུགས་རྗེས་བྱིན་གྱིས་རློབས། །མི་འགྱུར་རྡོ་རྗེ་ཞབས་བརྟན་ཅིང་། །ཟབ་གཏེར་གཏེར་སྒོ་ཕྱེད་པ་དང་། །འགྲོ་དོན་
འཕེལ་བར་མཛད་དུ་གསོལ། །དུར་ཁྲོད་ཆེན་པོའི་ཚལ་བརྒྱད་ན། །བཀའ་སྲུང་དམ་ཅན་རྒྱ་མཚོ་ལ། །གསོལ་འདེབས་གསོལ་བ་ཡང་ཡང་འདེབས། ༈ སྔར་ཡང་ཐུགས་རྗེ་ངོ་མཚར་ཆེ། །ད་ཡང་ཐུགས་རྗེས་བྱིན་གྱིས་རློབས། །མི་འགྱུར་རྡོ་རྗེ་ཞབས་བརྟན་ཅིང་། །ཟབ་གཏེར་གཏེར་སྒོ་ཕྱེད་པ་དང་། །འགྲོ་དོན་འཕེལ་བར་མཛད་དུ་གསོལ། །རྩ་བ་གསུམ་གྱི་ཐུགས་རྗེ་དང་། །བདེན་གཉིས་ཟུང་འཇུག་བདེན་པ་དང་། །བདེན་ལྡན་ཇི་སྙེད་བདེན་པའི་མཐུས། །པད་འབྱུང་རྒྱལ་ཚབ་སྤྲུལ་པའི་སྐུ། །མི་འགྱུར་རྡོ་རྗེའི་སྐུ་ཚེ་དང་། །འགྲོ་དོན་ཕྲིན་ལས་རྒྱས་གྱུར་ཅིག །ཅེས་པ་ཀཐོག་ཨ་སྐྱོ་བས། །སྤྲུལ་སྐུ་སྐུ་ཁམས་བཟང་བ་དང་། །ཕྲིན་ལས་རྒྱས་པའི་གཏམ་སྙན་བཤད། །ས་ཐོབ་ལྟ་བུར་ཡིད་དགའ་ནས། །ཐ་སྐར་ཟླ་བའི་ཡར་ཚེས་དྲུག །ནགས་ཚལ་འཐུག་པོའི་ཁྲོད་དུ་སྨྲས།། ༈ །།རྣལ་འབྱོར་རཱ་ག་ཨ་སྱས་འཕྲལ་དུ་རྟགས་ཡིག་ཉམས་མགུར་དུམ་གཅིག་ཡོད། ན་མོ་ལོ་ཀེ་ཤྭ་ར་ཡེ། རྣལ་འབྱོར་རཱ་ག་ཨ་སྱའི་བདག །རང་ལོ་ང་དྲུག་འབྲུག་གི་ལོ། །འབྲུག་གི་ཟླ་བ་ནས་བཟུང་སྟེ། །བསམ་གཏན་ཁང་བུ་བསྒྲུབས་པ་དང་། །
གྲྭ་སློབ་མཚམས་པ་འགའ་ཟུང་ལ། །ཕན་ཕྱིར་ཆུ་སྐོར་འཛུགས་པ་སོགས། །ས་རྡོ་རི་བྲག་རྐོ་རློག་མང་། །དེ་ལ་ཕོག་ཐུག་མི་འབྱུང་ཕྱིར། །སྔགས་བདག་རྒྱུད་དང་ཞིང་སྐྱོང་གི །ལས་ཚོགས་ཀླུ་ཁང་བཅས་པའི་ཚེ། །འབྲུག་སྒྲ་ཁ་བ་འབེབས་པ་དང་། །རྨི་ལམ་ཁྱེའུ་མཛེས་པ་ནི། །བཞི་བཅུ་ཙམ་ཞིག་གུས་འདུད་བཅས། །བདག་ལ་བསྐོར་ནས་འདུག་པ་རྨིས། །ཡེ་ཤེས་དང་ནི་འཇིག་རྟེན་གྱི། །ཀླུ་དང་ས་བདག་མ་ལུས་པ། །ཟག་བཅས་མངོན་པར་ཤེས་པ་ཡིས། །རྣལ་འབྱོར་བདག་གི་ཚིག་འདི་གསོན། །བསླུ་བ་མེད་པའི་དཀོན་མཆོག་གསུམ། །བླ་མ་ཡི་དམ་ཌཀིའི་ཚོགས། །ཁྱད་པར་སྤྲིན་ཆེན་མདོ་སྡེ་ལས། །གསུངས་པའི་བདེ་གཤེགས་ཐམས་ཅད་དང་། །ཀླུ་དབང་རྒྱལ་པོ་བཅོམ་ལྡན་འདས། །ཀླུ་རྒྱལ་སངས་རྒྱས་བཅོམ་ལྡན་འདས། །ཀླུ་ཡི་རྒྱལ་པོ་གཡོག་མཐའ་ཡས། །ལ་སོགས་ཀླུ་ཡི་སེམས་དཔའ་རྣམས། །ཐམས་ཅད་བདེན་ལྡན་བདེན་འགྲུབ་པའི། །བདེན་པ་ཆེན་པོ་དེ་ཡིས་མཐུས། །སྔགས་བདག་མི་མགོན་དཀར་པོ་དང་། །སྨྱོ་ཁ་མཁར་ནག་ལ་སོགས་པའི། །ཀླུ་ཡི་དགེ་བསྙེན་དཀར་ཕྱོགས་རྣམས། །ཀླུ་ཁང་
འདི་ལ་གནས་གྱུར་ཅིག །གནས་ནས་ས་ཕྱོགས་ཡུལ་ཕྱོགས་འདིར། །ཆར་ཆུ་དུས་འབེབས་ལོ་ཕྱུགས་ལེགས། །འཁྲུག་རྩོད་ཡམས་ནད་རྒྱུན་ཆད་ཅིང་། །ཡུལ་ཕྱོགས་བདེ་ལེགས་བསྒྲུབ་པར་མཛོད། །ཀླུ་ཡི་རྒྱལ་པོ་དེ་རྣམས་ལ། །མཐུ་དབང་གཟི་བརྗིད་དཔག་མེད་པའི། །བདེན་པ་དེ་ཡིས་ས་ཕྱོགས་འདིར། །མྱུར་དུ་ཆར་གྱི་རྒྱུན་ཆེན་ཕོབ། །རྩྭ་ཁ་ལོ་ཐོག་ལེགས་པ་དང་། །སད་སེར་མུ་གེ་མེད་པ་ཡི། །བཀྲ་ཤིས་བདེ་ལེགས་མཛད་དུ་གསོལ། །མི་འཁྲུགས་རྒྱལ་བ་རྡོ་རྗེ་སེམས། །བཅོམ་ལྡན་སྨན་བླའི་བདེན་པ་ཡིས། །ཀླུ་དང་ས་བདག་ཐམས་ཅད་ཀྱི། །ནད་དང་གནོད་པ་རྒྱུན་ཆད་ནས། །གཟི་བརྗིད་སྟོབས་ནུས་འཕེལ་གྱུར་ཅིག །འཕེལ་ནས་གནས་འདིར་གནས་པ་ཡི། །སྔགས་འཆང་རྡོ་རྗེ་འཛིན་རྣམས་ཀྱི། །གཡོག་དང་ཁོལ་པོ་ཡང་གཡོག་མཛོད། །གསང་བདག་དང་ནི་ཤཱཀ་ཐུབ་ཀྱི། །སྤྱན་སྔར་དྲིལ་བུའི་སྒྲ་ཙམ་པ། །ལེགས་པར་ཉན་ཅིང་བཀའ་བསྒྲུབ་སྟེ། །གལ་ཏེ་དམ་ལས་འདས་གྱུར་ན། །ལུས་སྙིང་རུལ་མྱལ་མནར་མེད་དུ། །སྐྱེ་བའི་དམོད་བོར་དམ་བཅས་པའི། །དམ་ལས་མ་འདའ་ས་མ་ཡཱ། །
བདག་ཅག་འཁོར་དང་བཅས་པ་ལ། །དུག་རླངས་ཀླུ་ནད་མ་བཏང་ལ། །ཀླུ་གཡང་དངོས་གྲུབ་ཆར་ལྟར་ཕོབས། །བཅོལ་བའི་ཕྲིན་ལས་འགྲུབ་པར་མཛོད། །ལྟོ་བ་ཕུ་རུ་དེ་རྗེས་ཕྱིན། །གླང་སྒའི་ཆུ་མིག་ཀླུ་དེ་ནི། །ཁྱེའུ་མཛེས་པ་གཅིག་ཏུ་སྤྲུལ། །རང་གི་མདུན་དུ་གུས་པས་འདུག །ཁ་ནི་བཙུམས་ཏེ་བསྡམས་ན་ཡང་། །ཚིག་ནི་གསལ་པོར་སྨྲ་ཤེས་པས། །ང་ལ་ཁ་རླངས་དུག་ཡོད་པས། །ཁྱེད་ལ་ཁ་རླངས་ཕོག་དོགས་ཟེར། །ང་ལ་སྲོག་སྙིང་ཕུལ་གཅིག་སྨྲས། །སྲོག་སྙིང་ཕུལ་བའི་རྨི་ལམ་བྱུང་། །ཕྱིར་ནངས་བསང་ཡིག་བྲིས་ཏེ་སྤེལ། །ཞག་ལྔ་དབང་ཁྲིད་འགྲོ་དོན་འཕེལ། །ཟང་ཟིང་ལོངས་སྤྱོད་ཆར་ལྟར་བབ། །བདག་ལ་ནུས་པ་མ་མཆིས་ཀྱང་། །ཨོ་རྒྱན་རྗེ་ཡི་བཀའ་དྲིན་ཡིན། ༈ །ན་མོ་གུ་རུ་དེ་ཝ་ཌཱཀི་ནཱི་ཧཱུྃ། བླ་མ་ཡི་དམ་དབྱེར་མེད་པའི། །ཐུགས་རྗེ་ཆེན་པོ་སྤྱན་རས་གཟིགས། །རྒྱལ་བ་རྒྱལ་སྲས་རྒྱ་མཚོའི་ཚོགས། །པད་འབྱུང་གྲུབ་ཐོབ་རྒྱ་མཚོའི་ཚོགས། །ཡེ་ཤེས་སྤྱན་དང་རྡོ་རྗེའི་སྙན། །མངོན་ཤེས་དྲུག་ལྡན་ཐམས་ཅད་ཀུན། །བདག་ལ་བརྩེ་བས་དགོངས་སུ་གསོལ། །བདག་གིས་དུས་
གསུམ་དགེ་བསགས་དང་། །ཁྱེད་རྣམས་ཐུགས་རྗེ་ཚད་མེད་མཐུས། །ཟླ་བ་ཕྱེད་དང་བདུན་འདི་ལ། །འགྲོ་དོན་དཔག་མེད་འགྲུབ་གྱུར་ཅིག །བསམ་བཞིན་འགྲུབ་པར་བྱིན་གྱིས་རློབས། །བར་ཆད་མེད་པར་ཐུགས་རྗེས་ཟུངས། །མཐོང་ཐོས་འབྲེལ་ཐོགས་འགྲོ་བ་ཀུན། །བདེ་ཆེན་ཞིང་དུ་ལམ་སྣ་དྲོངས། །འབྲེལ་ཚད་དོན་དང་ལྡན་པ་ཅིག །རེ་ས་གཞན་མེད་ཁྱེད་རང་ཤེས། །དེ་སྐད་སྒྲ་ཆེན་འབྲུག་གི་ལོ། །ཤུགས་འཆང་རྟ་ཡི་ཟླ་བ་ཡི། །རྣམ་གསུམ་འཛོམ་པའི་དུས་ཆེན་ཉིན། །ཟུར་མང་མཇལ་དུ་འགྲོ་བ་ཡི། །དོས་བཅས་བྱས་པའི་སྐབས་སུ་བྲིས། །བྲིས་པ་དོན་དང་ལྡན་པར་ཤོག། ༈ །།ན་མོ་ཨརྱ་པ་ལོ་ཡེ། སྤྱན་རས་གཟིགས་ལ་ཕྱག་༔ འཚལ་ལོ། །བདག་ནི་མཐོང་དང་ཐོས་པ་དང་། །མོས་དང་གུས་འདུད་འབྲེལ་ཐོགས་དང་། །དྲན་དང་དབང་ལུང་ཆོས་ཐོབ་པའི། །སེམས་ཅན་གཅིག་ཀྱང་མ་ལུས་པ། །ཚེ་འདིར་བར་ཆད་རྐྱེན་ངན་ཞི། །ནད་མེད་བདེ་བའི་ལངས་ཚོ་རྒྱས། །ཡུན་རིང་བསགས་པའི་སྒྲིབ་ཀུན་བྱང་། །ནམ་ཞིག་ཚེ་ཡི་དུས་བྱེད་ཚེ། །རྩལ་ཆེན་སྐྱེས་བུས་མདའ་
འཕང་ལྟར། །ནུབ་ཕྱོགས་བདེ་ཆེན་ཞིང་དུ་འཕོས། །རིན་ཆེན་པདྨའི་སྙིང་པོ་ལ། །མཚན་དཔེའི་རྒྱན་ལྡན་ལུས་སུ་སྐྱེས། །ས་བཅུ་མངོན་དུ་བྱེད་པར་ཤོག །བདག་ལས་དབང་ལུང་འཕེལ་བ་རྣམས། །དུས་ཀྱི་འཁོར་ལོ་ལས་གསུངས་པའི། །སྔགས་བསྟན་གནས་ཚད་མ་རྫོགས་བར། །ནམ་ཡང་ནུབ་པར་མ་གྱུར་ཅིག །དེ་སྲིད་ངེས་ཙམ་ཆོས་རྣམས་དར། །འགྲོ་ཕན་དཔག་མེད་འབྱུང་གྱུར་ཅིག །བདག་གིས་བཤད་པའི་ཁྲིད་རིམ་རྒྱུན། །ཉམས་དང་རྟོགས་པའི་བརྒྱུད་པ་ཡང་། །ཀུན་ཏུ་བཟང་པོའི་ཐུགས་ཀྱི་བསྟན། །མ་རྫོགས་བར་དུ་མི་ནུབ་པ། །མཐའ་ཡས་འགྲོ་བ་གྲོལ་གྱུར་ཅིག །བདག་ལས་བརྒྱུད་པའི་སྡོམ་པའི་རྒྱུན། །འདུལ་བསྟན་ཅི་གནས་བར་དུ་དར། །ཀུན་ཀྱང་ཚུལ་ཁྲིམས་རྣམ་དག་ཤོག །བདག་གི་བརྒྱུད་པ་འཛིན་པ་ཀུན། །བདག་གིས་བསྟེན་པའི་ཆོས་སྐྱོང་ཀུན། །ལུས་དང་གྲིབ་བཞིན་རྗེས་འབྲངས་ནས། །ཆོས་མཐུན་བསམ་པ་ཀུན་འགྲུབ་ཤོག །བདག་ཀྱང་ལུས་རྟེན་འདི་ཉིད་ལ། །དོན་གཉིས་མཐའ་རུ་མ་ཕྱིན་བར། །བར་ཆད་དབང་དུ་མི་འགྲོ་བར། །བསམ་པ་ལྷུན་གྱིས་གྲུབ་པར་ཤོག །ར་ག་
མདོ་ཞེས་བྱ་བ་རུ། །ཞག་གསུམ་རྫོགས་ཆེན་མགྱོགས་ཁྲིད་དང་། །དབང་ལུང་ཕྲན་བུ་འཕེལ་བའི་ཚེ། །ཉམས་དང་རྨི་ལམ་འདྲེས་པའི་མཚམས། །སྐྱེས་ཕྲན་བཞི་ཡིས་ཕྱག་འཚལ་ཞིང་། །བུ་ཆུང་ལྟག་ཕུད་ཡོད་པ་གསུམ། །བདག་ལ་དགའ་ཞིང་མཇལ་དུ་བྱུང་། །བུད་མེད་ཤས་ཆེའི་ཁྲོམ་ཚོགས་ནི། །སྟོང་ཕྲག་ཙམ་རེ་ཡང་ཡང་དུ། གུས་པས་མདུན་དུ་ཐལ་མོ་སྦྱར། །ད་ལོ་བདག་ལ་འོང་རྒྱུ་ཡི། །འབུལ་ནོར་རྣམས་ཀྱང་ཡད་ཡུད་མཐོང་། །དེ་ཕྱིར་ཉམས་མཚར་བྲིས་པའོ།། ༈ །ན་མོ་གུ་རུ་ཀྲོ་དྷ་ཡེ། སྔོན་ཚེ་པདྨ་ཐོད་ཕྲེང་རྩལ། །བསམ་ཡས་ཡར་ལུང་ཤེལ་བྲག་དང་། །མཆིམས་ཕུའི་སྒྲུབ་གནས་ཀེའུ་ཚང་དང་། །དམར་ནག་མེ་ཕྲེང་སྐུར་བཞེངས་ནས། །དམ་ལ་བཏགས་པའི་ལྷ་འདྲེ་ཀུན། །ཡིད་ཀྱི་མངོན་ཤེས་ལྡན་པ་ཡིས། །རྣལ་འབྱོར་བདག་གི་ཚིག་འདི་ཉོན། །སློབ་དཔོན་ཆེན་པོའི་སྤྱན་སྔ་རུ། །རང་རྟགས་སྲོག་གི་སྙིང་པོ་ཕུལ། །དབང་བསྐུར་གསང་བའི་དམ་ལ་བཞག །ངག་ཏུ་དམ་ཚིག་བདུད་རྩི་བྱིན། །དེ་ཚེ་ཁྱེད་ཅག་ཐམས་ཅད་ཀྱིས། །མ་འོངས་སློབ་དཔོན་པདྨ་ཡི། །མཚན་
ཙམ་འཛིན་པར་བྱེད་པ་ཡང་། །སེམས་ཀྱིས་བླངས་ཏེ་སྤྱི་བོ་ཡི། །གཙུག་ཏུ་བཞག་སྟེ་བསྐུར་བར་བྱ། །དེ་ཡི་དགོས་པ་གང་དང་གང་། །ཐམས་ཅད་ཡིད་བཞིན་བསྒྲུབ་པ་དང་། །དེ་ལ་གནོད་བྱེད་དགྲ་ཡི་ཚོགས། །ཐམས་ཅད་རྡུལ་དུ་བརླག་པར་བྱ། །གལ་ཏེ་བཀའ་བཞིན་མ་བྱས་ན། །ལྷ་འདྲེ་དེ་དག་ལུས་སྲོག་སྙིང་། །རུལ་དམྱག་ཚིག་ནས་དམྱལ་ཁམས་ནི། །བཅོ་བརྒྱད་བརྒྱུད་པར་གྱུར་ཅིག་ཅེས། །དམ་ཚིག་རྡོ་རྗེའི་མནའ་བོར་བའི། །དམ་ཚིག་རྗེས་སུ་དྲན་པར་གྱིས། །བདག་ནི་སོ་དཀར་ཙམ་ནས་བཟུང་། །ད་ལྟ་སྐུ་དཀར་སྐྱེས་ཀྱི་བར། །པདྨ་འབྱུང་གནས་བསྒོམས་ཤིང་བསྒྲུབས། །དེང་སང་ཁྲེགས་ཆོད་ལྟ་བ་རྟོགས། །བསྐྱེད་རྫོགས་ཟུང་འཇུག་བསྒོམ་པ་གསལ། །དམ་ཚིག་གསུམ་ལྡན་རྡོ་རྗེ་འཛིན། །དེང་སང་པད་འབྱུང་བསྟན་པ་སྤེལ། །འདི་ལ་མ་འཁུ་མ་ལྡོག་ལ། །མ་འདའ་ཀུ་རེ་རེ་འདོད་སྤོངས། །སྡོང་གྲོགས་བསྟན་པ་སྤེལ་རོགས་རེམ། །ང་ཡི་འཁོར་དུ་གཏོགས་པ་ཡི། །གྲྭ་སློབ་རྟ་དྲེལ་ནོར་ཕྱུགས་ལ། །དགྲ་ཇག་ཆོམ་རྐུན་ཧོར་སོགས་དང་། །གོད་ཁ་གཅན་གཟན་གནོད་པ་ཟློག །ང་ཡི་དབང་ཁྲིད་གདམས་
པའི་ཚོགས། །ཕྱོགས་བཅུར་ཁྱབ་ཅིང་འཕེལ་བ་དང་། །དེ་ལ་བར་ཆད་རྐྱེན་མེད་ཅིང་། །བསམ་པ་ལྷུན་གྱིས་འགྲུབ་པར་མཛོད། །གལ་ཏེ་དེ་ལྟར་མ་བྱས་ན། །ཁྱེད་ཅག་དམ་ཚིག་ཉམས་མི་ཉམས། །ཡིད་ཀྱི་མངོན་ཤེས་ལྡན་པས་ལྟོས། །སློབ་དཔོན་པདྨ་འབྱུང་གནས་ཀྱི། །ཡེ་ཤེས་སྤྱན་གྱིས་གཟིགས་སུ་གསོལ། །དེ་སྐད་ཀ་མདར་ཞག་པའི་ནུབ། །རྒྱལ་འགོང་གཅིག་གི་རེ་འདོད་ཀྱིས། །ཆོ་འཕྲུལ་བག་ཙམ་བྱུང་བས་བྲིས།། ༈ །།ན་མོ་གུ་རུ་དྷེ་ཝ་དྷཱ་ཀི་ནཱི་ཧཱུྃ། ཕྱོགས་བཅུ་དུས་གསུམ་བདེ་གཤེགས་སྲས་དང་བཅས། །ཉན་རང་དགྲ་བཅོམ་རྒྱུད་སྡེའི་དཀྱིལ་འཁོར་ལྷ། །དྷཱ་ཀི་ཆོས་སྐྱོང་དམ་ཅན་སྲུང་མའི་ཚོགས། །ཡེ་ཤེས་སྤྱན་དང་མངོན་པར་ཤེས་པ་དྲུག །ཟག་བཅས་ཟག་མེད་མངོན་ཤེས་ལྡན་རྣམས་གསོན། །རྡོ་རྗེའི་སྤྱན་དང་སྙན་ལྡན་ཡེ་ཤེས་ལྷ། །གཟུགས་སྒྲ་ཀུན་གྱི་རྗེས་འགྲོ་མཁྱེན་ལྡན་གསོན། །དམ་ཅན་བཀའ་སྲུང་ལྷ་སྲིན་དམ་ཚིག་ཅན། །འཇིག་རྟེན་ལེགས་ཉེས་ཤན་འབྱེད་བྱ་ར་བ། །ཟག་བཅས་མངོན་ཤེས་ཅེ་རེ་ལྟ་བ་དང་། །ཀྲོག་གེ་ཉན་པ་ཀུན་ཀྱང་འདིར་དགོངས་ཤིག །
བདག་ཅག་སློབ་དཔོན་གཞི་བྱེས་ཐམས་ཅད་ཀྱི། །མི་རྟ་ནོར་ཕྱུགས་གཡོག་དང་བཅས་པ་ཀུན། །བསླུ་མེད་སྐྱབས་མཆོག་དཀོན་མཆོག་གསུམ་རྣམས་ལ། །ཁ་ཙམ་མིན་པར་སྙིང་ནས་སྐྱབས་ཞུ་བ། །གང་ཞིག་དཀོན་མཆོག་གསུམ་ལ་སྐྱབས་སོང་ན། །འཚེ་བ་ཀུན་ལས་སྐྱོབ་པའི་གླེང་གཞི་བཅས། །མདོ་དང་མདོ་སྡེ་རྒྱན་ལས་གསུངས་པ་ནི། །བདེན་ན་བདེན་པ་དེ་ཡིས་བདག་ཅག་དང་། །བསྲུང་བྱ་ནད་རིམས་ཐ་མི་ཆོམ་རྐུན་གྱི། །འཇིགས་པ་སྐྱོབ་པར་མཛོད་ཅིག་དཀོན་མཆོག་གསུམ། །རྒྱལ་བ་མི་འཁྲུགས་པ་ཡི་མཚན་བརྗོད་ན། །འཇིགས་སྐྲག་ཡམས་ནད་ལ་སོགས་འཚེ་བ་ཀུན། །ཞི་བར་དཀོན་མཆོག་བརྩེགས་པ་ལས་གསུངས་ན། །བདག་གིས་ཁྱེད་མཚན་བརྗོད་ཅིང་ཁྱེད་སྔགས་བཟླས། །བདག་དང་བསྲུང་བྱ་འཚེ་བ་ཀུན་ལས་སྐྱོབས། །བདེ་གཤེགས་སྨན་བླའི་མཚན་ནས་རྗོད་བྱེད་ན། །ནད་ཀུན་ཞི་བར་མདོ་སྡེ་གཉིས་ནས་ནི། །གསུངས་པ་བདེན་ན་བདག་གིས་ཁྱེད་མཚན་བརྗོད། །བདག་དང་བསྲུང་བྱའི་ནད་ཀུན་མེད་པར་མཛོད། །བྱང་ཆུབ་སེམས་དཔའ་སྤྱན་རས་གཟིགས་དབང་གི །མཚན་ནས་བོས་ན་དགྲ་རྐུན་
གཡོན་ཅན་ལས། །ཐར་གསུངས་བདེན་ན་བདག་གིས་དུས་རྟག་ཏུ། །ཁྱེད་ལ་འབོད་དོ་འཇིགས་ཀུན་ཞི་བར་མཛོད། །སློབ་དཔོན་པདྨ་སྙིགས་དུས་ཐུགས་རྗེ་མྱུར། །ཐེ་ཚོམ་ཡིད་གཉིས་མེད་པར་གསོལ་བཏབ་ན། །བར་ཆད་ཀུན་སེལ་བསམ་པ་ལྷུན་གྲུབ་པར། །ཞལ་བཞེས་བདེན་ན་བདག་ལ་ཡིད་གཉིས་མེད། །རྟག་ཏུ་ཁྱེད་ལ་གསོལ་འདེབས་བློ་གཏད་ན། །བར་ཆད་ཀུན་སོལ་བསམ་པ་ལྷུན་གྲུབ་མཛོད། །རྗེ་བཙུན་སྒྲོལ་མ་དཀར་ལྗང་སྣ་ཚོགས་ཡུམ། །རྣལ་འབྱོར་མ་རྣམས་ཡིད་ལ་དྲན་པས་ཀྱང་། །འཇིགས་ཆེན་བརྒྱད་དང་བཅུ་དྲུག་ཞི་གསུངས་པ། །བདེན་ན་བདག་གིས་ཁྱེད་སྒོམ་རིག་སྔགས་བརྗོད། །རྒྱལ་པོ་ཆོམ་རྐུན་ཐ་མི་རིམས་དང་ཡམས། །ཆུ་དང་གཅན་གཟན་འཇིགས་དང་གནོད་པ་སོལ། །མྱུར་མགྱོགས་གློག་ལྟར་བསྲུང་བྱ་ཕྱག་གིས་ཟུངས། །གུ་ཎའི་སྔགས་དང་རུ་ཏྲའི་སྔགས་ལ་སོགས། །མ་མགོན་ལྕམ་དྲལ་གང་ཞིག་བསྙེན་སྒྲུབ་པ། །རྒྱལ་པོ་ཆོམ་རྐུན་ཆུ་དང་གཅན་སྤྱང་སོགས། །གནོད་དང་འཇིགས་ལས་ཐར་འགྱུར་གསེར་འོད་དང་། །མདོ་རྒྱུད་མང་པོ་ལས་གསུངས་དེ་བདེན་ན། །བདེན་པ་དེ་ཡིས་
བདག་དང་བསྲུང་བྱ་ཡི། །མ་མགོན་བསྟན་གྱི་འཇིགས་དང་གནོད་ཀུན་སོལ། །མགོན་ཆེན་ཞེ་ལྔ་སྤྲུལ་པའི་ལྷ་མོ་སྟོང་། །ཆོས་སྐྱོང་རྟ་མགྲིན་ཡ་མཱནྟ་ཀ་དང་། །གསང་བདག་སྤྱན་སྔར་དམ་ལྡན་སྔགས་འཆང་རྣམས། །སྲུང་ཞིང་སྐྱོང་བའི་གཡར་དམ་དེ་བདེན་ན། །བདག་ཅག་འཁོར་བཅས་སྔགས་འཆང་དམ་ལྡན་ཏེ། །གཡར་དམ་དྲན་མཛོད་སྲུང་སྐྱོབ་སྡོང་གྲོགས་རེམ། །དྲེགས་པ་སྡེ་བརྒྱད་བརྟན་མ་མགུར་ལྷ་སོགས། །བོད་ཁམས་དྲེགས་པ་ལྷ་སྲིན་ཐམས་ཅད་ཀྱིས། །མ་འོངས་སློབ་དཔོན་པདྨའི་རྒྱུད་འཛིན་རྣམས། །སྤྱི་བོར་བསྐུར་ཞིང་དགོངས་པ་བསྒྲུབ་བོ་ཞེས། །ཁས་བླངས་དམ་བཅས་ཐ་ཚིག་མི་འདོར་ན། །བདག་ཅག་འཁོར་བཅས་སློབ་དཔོན་བརྒྱུད་འཛིན་ངེས། །སྐྱེལ་བསུ་རོགས་ལྡན་སྡོང་གྲོགས་མེལ་ཚེ་རིམ། །བྱམས་སེམས་ལྡན་པ་དུག་མཚོན་དགྲས་མི་ཚུགས། །གོ་ཆ་བསྲུང་བ་ཀུན་ལས་མཆོག་གསུངས་པ། །བདེན་ན་བདག་གིས་བྱམས་པའི་ཏིང་འཛིན་བསྒོམ་། །བདག་ཅག་འཁོར་བཅས་འཇིགས་པ་ཀུན་ཞི་ཤོག །གང་གི་ཤེས་རབ་ཕ་རོལ་ཕྱིན་བསྒོམ་དོན། །དེ་ལ་འཇིགས་དང་གནོད་པའི་དགྲ་དང་བདུད། །ཐམས་ཅད་གང་
ནས་བྱུང་བ་དེར་ནུབ་པར། །འབུམ་དང་ཉི་ཤུ་ལྔ་པ་ལས་གསུངས་པ། །བདེན་ན་བདག་གིས་ཡུམ་དོན་རྟོགས་ཤིང་བསྒོམ། །བདག་ཅག་འཁོར་བཅས་ལ་གནོད་བདུད་དང་དགྲ། །འཇིགས་དང་གནོད་པ་རང་ཞི་རྗེས་མེད་ཤོག །ཁྱད་པར་རི་ཁྲོད་མ་དང་དུད་སོལ་མའི། །མཚན་ཤེས་མཚན་ནས་བརྗོད་པ་གང་ཡིན་པའི། །ཡམས་དང་རིམས་ཀུན་ཞི་བར་གསུངས་བདེན་ན། །བདག་ཅག་འཁོར་བཅས་ཁྱོད་མཆོད་ཁྱོད་སྔགས་བཟླས། །མི་ཕྱུགས་ཡམས་དང་རིམས་ནད་འཚེ་བ་ཀུན། །སྲུང་དང་ཟློག་དང་ཞི་བའི་ལས་མཛོད་ཅིག །སྲུང་སྐྱོབ་བརྒྱ་བས་བདག་འཛིན་གཅོད་པ་ཡིས། །ཟོ་ཁྱེར་གཅིག་དགའ་ཡེ་ཤེས་མཁའ་འགྲོ་ཡི། །གསུངས་པ་བདེན་ན་བདག་གིས་ཀུ་ས་ལིའི། །་ཚོགས་སོགས་རྒྱུན་ཁྱེར་བགྱིད་ཀྱི་བར་ཆད་ཆོད། །གལ་ཏེ་ལས་དབང་གཅོད་ཅེས་སྙད་འདོགས་ན། །ཡེ་ཤེས་ལྷ་ཁྱོད་སྟོབས་བཅུ་དབང་བཅུ་ལྡན། །ལས་དབང་ངན་པ་ཕྱི་རུ་བཟློག་མཛོད་ལ། །དགེ་བསོད་ལས་འབྲས་གང་མཆིས་འདིར་སྩོལ་ཅིག །དེ་ལྟའི་ནུས་པ་ཁྱེད་ལ་མེད་ན་ནི། །ལས་ལ་དབང་བའི་སྟོབས་དེས་ཅི་ལ་ཕན། །སྔོན་གྱི་སྨོན་ལམ་
ཐུགས་རྗེས་སུ་ལ་ཕན། །མཚན་དང་རིག་སྔགས་ནུས་པས་ཅི་ཞིག་བྱ། །མདོ་རྒྱུད་གསུང་རབ་རྫུན་དུ་ཅིས་མི་འགྱུར། །རང་རང་ཐུགས་དམ་དམ་བཅས་མི་ཉམས་སམ། །དེ་བས་ཡལ་ཡོལ་ལེ་ལོ་བཏང་སྙོམས་སྤོངས། །སྤྱན་གྱིས་ད་གཟིགས་ཕྱག་གིས་ད་ལྟ་སྐྱོབས། །ཞེས་པ་ཟངས་རི་འབར་བ་རྩེ་དགུའི་དྲུང་། །ཞག་ནུབ་རྨི་ལམ་འཁྲུལ་པའི་སྣང་བ་ལ། །ཁྲོམ་འཚོགས་འགའ་རེ་འདུ་ཞིང་གུས་ན་ཡང་། །གྲྭ་པ་འགའ་རེར་རྐྱེན་ཆགས་ཡོད་པ་ཡི། །རྨི་ལྟས་བྱུང་ཞིང་ཕྱི་ནང་ཟུར་མང་དུ། །ད་དུང་ནད་མུ་མ་ཆད་གཏམ་ཐོས་པས། །ཐུགས་དམ་བདེན་ཚིག་གནད་ནས་བསྐུལ་བའོ།། ༈ །།ན་མོ་གུ་རུ་མ་ཧཱ་མུ་དྲ་ཡེ། གནས་འོག་མིན་བདེ་བ་ཆེན་པོ་ན། །ཆོས་སྐུ་རྡོ་རྗེ་འཆང་ཆེན་ལ། །བདག་གསོལ་འདེབས་གསོལ་བ་ཡང་ཡང་འདེབས། །ཏེ་ལོ་ནཱ་རོ་མར་མི་དྭགས་པོ་རྗེ། །དུས་མཁྱེན་རས་ཆེན་སྤོམ་བྲག་ཀརྨ་པ། །བདག་གསོལ་འདེབས་གསོལ་བ་ཡང་ཡང་འདེབས། །ཨོ་རྒྱན་རང་བྱུང་གཡུང་སྟོན་རོལ་པའི་མཚན། །མཁའ་སྤྱོད་དེ་བཞིན་གཤེགས་པ་རྨ་སེའི་ཞབས། །བདག་གསོལ་འདེབས་གསོལ་བ་ཡང་ཡང་
འདེབས། །གསང་ཡེ་ཆོས་སྐུ་འོད་མཚན་བློ་གྲོས་གྲགས། །བློ་གྲོས་རྒྱ་མཚོ་དོན་གྲུབ་ལེགས་བཤད་པ། །བདག་གསོལ་འདེབས་གསོལ་བ་ཡང་ཡང་འདེབས། །ཀུན་དགའ་རྣམ་རྒྱལ་འགྱུར་མེད་སྙིང་པོའི་ཞབས། །དྲིན་ཆེན་སྒྲུབ་བརྒྱུད་བསྟན་པ་རྣམ་རྒྱལ་ལ། །བདག་གསོལ་འདེབས་གསོལ་བ་ཡང་ཡང་འདེབས། །འཁོར་ལོ་སྡོམ་པ་རྡོ་རྗེ་རྣལ་འབྱོར་མ། །རྣལ་འབྱོར་མ་བཞི་སྒོ་མཚམས་ལྷ་མོ་བརྒྱད། །བདག་གསོལ་འདེབས་གསོལ་བ་ཡང་ཡང་འདེབས། །བྱ་རོག་མཚན་ཅན་དུད་སོལ་སྔགས་སྲུང་མ། །ཤ་ཟ་ཌཱཀི་བདུན་དང་སྲོག་སྒྲུབ་མ། །བདག་གསོལ་འདེབས་གསོལ་བ་ཡང་ཡང་འདེབས། །མི་བདག་ལ་དབང་བསྐུར་བྱིན་གྱིས་རློབས། །ཕ་བཀའ་བརྒྱུད་ཐུགས་དང་རང་གི་སེམས། །དོན་ཆོས་ཉིད་ངང་དུ་དབྱེར་མེད་ནས། །སེམས་ཆོས་སྐུ་རྟོགས་པར་བྱིན་གྱིས་རློབས། །ལྷ་བདེ་མཆོག་ཡབ་ཡུམ་སྐུ་རྡོ་རྗེ། །མི་བདག་ལུས་རྩ་ཐིག་རླུང་དང་གསུམ། །དོན་ཆོས་ཉིད་ངང་དུ་དབྱེར་མེད་ནས། །ལུས་འཇའ་ལུས་འགྲུབ་པར་བྱིན་གྱིས་རློབས། །ལྷ་མ་མགོན་ལྕམ་དྲལ་སྔགས་སྲུང་གསུམ། །མི་བདག་གིས་སྨྲ་བརྗོད་
བཟླས་པའི་ཚིག །དོན་ཆོས་ཉིད་ངང་དུ་དབྱེར་མེད་ནས། །ངག་ནུས་པ་འབར་བར་བྱིན་གྱིས་རློབས། །ཚིག་ཉུང་ལ་དོན་ཟབ་སྙན་བརྒྱུད་འདིས། །བདག་སྨིན་ཅིང་གྲོལ་བར་བྱིན་གྱིས་རློབས། །དཔལ་འཁོར་ལོ་སྡོམ་པ་གསུང་གི་གནས། །ཡུམ་ཕག་མོའི་དཀྱིལ་འཁོར་རང་བྱུང་བས། །དཔལ་ཟུར་མང་མཇལ་འགྲོའི་ཐང་བཅད་དུས། །ཉམས་རྨི་ལམ་འདྲེས་པའི་སྣང་བ་ལ། །དཔལ་ཡེ་ཤེས་མགོན་པོ་ཕྱག་བཞི་པའི། །ཚེ་སྔར་ནས་སྔགས་རྒྱུན་མ་ཆད་ཟེར། །ལྷ་བདེ་མཆོག་རྣལ་འབྱོར་གྲངས་མེད་ཕྱིར། །དཔལ་ཡེ་ཤེས་མགོན་པོ་དངོས་བཞུགས་རྟགས། །རྟ་ནག་པོ་གཟི་བརྗིད་འོད་དུ་འབར། །ལུས་ཆེ་ཆུང་འབྲོང་ལས་ཆེ་བ་གཅིག །དར་གོས་ཆེན་སྟན་དང་སྒ་སྲབ་བརྒྱན། །མི་ཁོ་བོ་བསུ་ཕྱིར་བྱང་ཕྱོགས་ནས། །གནས་བར་སྣང་ལམ་དུ་འདུར་ཞིང་བྱུང་། །མི་ཁོ་བོའི་ཐད་ཀྱི་བར་སྣང་ལ། །དེར་འདུར་སྣ་བསྐྱིལ་སྟེང་ང་ལ་བལྟ། །མགོ་མཐོ་དང་ཡད་ཡད་མཚེར་བ་མཐོང་། །ལམ་ཉེ་ཞོ་མེད་པར་ཟུར་མང་ཕྱིན། །རྗེ་སྤྲུལ་སྐུ་རྣམ་བཞི་ཞལ་འཛོམས་དང་། །མི་ཁོ་བོ་དུས་བྱས་བཞིན་དུ་འཛོམས། །དེ་རྟེན་འབྲེལ་ལེགས་སྙམ་སྤྲོ་བ་སྐྱེས། །
རང་དམ་ཚིག་གཙང་རྟགས་ཡིན་ནམ་སེམས། །ཐུགས་དགྱེས་ཚུལ་ལུགས་གཉིས་བདག་རྐྱེན་གནང་། །ཉམས་རྨི་ལམ་འཁྲུལ་པའི་སྣང་བ་ལ། །གྲོགས་དགེ་བཤེས་འགས་གུས་ཚུལ་དབང་ཞུ་རྨིས། །དེའི་ཕྱིར་ནངས་ནས་རི་གླིང་ཕལ་ཆེར་གྱིས། །དབང་ཆོས་ཀྱི་འབྲེལ་པ་ཞུ་བྱུང་བས། །ལྷ་ཡི་དམ་རབ་འབྱམས་དབང་ལུང་སོགས། །ཞག་དགུ་རུ་དབང་ལུང་རྒྱ་ཆེར་འཕེལ། །དེ་ནས་དགའ་ལྡན་དུ་བཀྱག་ཁ་ནུབ། །དཔལ་གསང་འདུས་ཀྱི་དབང་བསྐུར་བྱས་པ་རྨིས། །དེར་དགའ་ལྡན་དུ་ཕྱིན་པས་ནང་སོ་ཁག་སོགས། །དཔོན་སློབ་ཀུན་ཞལ་བཞི་དབང་ལུང་འཕེལ། །ཚེས་བཅུ་གཉིས་ཡར་ལ་བཀྱག་པའི་ཉིན། །ཁ་བ་ཡང་མེ་ཏོག་གི་དབྱིབས་ཅན་བབ། །དེ་ནས་ས་གཉན་ཆུ་མིག་དྲུང་། །ཞག་ནུབ་ལ་ཉམས་ཀྱི་སྣང་བ་ལ། །བུད་མེད་སྦྲུལ་མགོ་མང་པོ་ཡི། །གདེངས་ཀ་ཅན་བདག་ལ་སྐྲག་ཅིང་བལྟ། །དེ་ནས་ཨོ་རྒྱན་མཁའ་འགྲོའི་གླིང་། །གཉིས་པ་རུ་གྲགས་པའི་བདུད་རྩི་དེའུ། །མཇལ་ཕྱིར་འོང་བས་ས་ཐག་རིང་། །རྩྭ་ཤིང་དང་ཆུ་སོགས་དཀོན་པ་ཡིས། །ངལ་དུབ་ཀྱི་སྣང་བ་ཆེན་པོ་བྱུང་། །རྗེ་ནཱ་རོས་ཏེ་ལོ་བཙལ་བའི་
ཚེ། །ངལ་དུབ་ཀྱི་འོ་རྒྱལ་ཐོས་པ་དྲན། །ཐག་དེ་ཙམ་རིང་བ་མི་འདུག་སྟེ། །མི་བདག་གིས་སྙན་བརྒྱུད་ཐོབ་འདོད་པའི། །རྟེན་འབྲེལ་གྱི་ཆེ་བ་ཡིན་པར་གོ། །གཉེན་པོ་ཨ་བོ་གེར་མཛོ་དང་། །ཐག་ཧ་ཅང་མི་རིང་ས་རུ་ཞག །དེར་དམིགས་པ་གཏད་པས་དཀར་གཏོར་ཕུལ། །མི་བཙུན་གཟུགས་ཤིན་ཏུ་ཆས་བཟང་ཞིག །མི་བདག་ལ་ཕྲུག་དམར་གདིང་བ་དང་། །དར་དམར་པོ་ཁ་གང་མཇལ་དར་ཕུལ། །ཉམས་རྨི་ལམ་བདེན་པ་མ་མཆིས་ཀྱང་། །སྔར་བོན་ལུགས་ཀྱི་བསང་ཡིག་མཐོང་བ་ལ། །འདི་བོན་སྐྱོང་བན་གྱི་གཤེད་ཡིན་པའི། །བསྟོད་བསྐུལ་གསལ་པོ་འདུག་ན་ཡང་། །འདི་བན་ལ་ཡང་དད་པ་གཅིག་ཡིན་ནམ་སྙམ། །དེ་ནས་འབྲུག་ལོ་སྨོན་གྱི་ཟླ། །སྔ་རྩིས་ཡར་ཚེས་བཅུ་གསུམ་ལ། །བདུད་རྩི་དེའུ་གདན་ས་མཇལ། །སྐྱབས་གནས་དམ་པས་དབང་ལུང་མཛད། །ས་ཚིག་འོང་སྐབས་ཡིན་ན་ཡང་། །གདན་ས་དེ་རུ་བསླེབས་མ་ཐག །འབྲུག་གྲག་ཆར་པ་ཅུང་ཟད་བབ། །རྟེན་འབྲེལ་ཤིན་ཏུ་ལེགས་པར་བསམ། །དཔོན་སློབ་རྣམས་ལ་མགོན་པོ་ཡི། །གདམས་ངག་འགའ་རེ་སྤེལ་བར་བྱས། །ཉམས་དགའ་རིག་པ་
དྭངས་བ་དང་། །འཇའ་སྤྲིན་འཇའ་འོད་ཟུག་པའང་བྱུང་། །འདོད་ཆོས་དབང་ལུང་དཔེ་ཆ་ཆོད། །རེ་ཞིག་བསམ་པ་འགྲུབ་པར་བྱུང་། །དབོན་པོ་གཉིས་ལའང་བསྐོ་ཇ་གནང་། །རྒྱལ་བ་རྒྱ་མཚོའི་སྒྲུབ་སྐོར་གྱི། །གླེགས་བམ་བཞེངས་པར་བྱས་པའི་ཚེ། །རྨི་ལམ་དྲུང་སྐྱིད་རིན་པོ་ཆེས། །རྒྱལ་བ་རྒྱ་མཚོའི་གླེགས་བམ་འདི། །གཉན་པས་གཞན་ལ་སྟོན་པ་དང་། །སྤེལ་མི་རུང་ཞེས་བཀའ་རྒྱ་དང་། །ཞལ་གདམས་མང་པོ་གསུངས་ན་ཡང་། །ཐམས་ཅད་ཡིད་ལ་མ་ཟིན་ནོ། །དངོས་སུ་པོ་ཏིའི་དབང་གནང་ངོ་།། ༈ །།ན་མོ་གུ་རུ་ལོ་ཀེ་ཤྭ་ར་ཡེ། དེ་ནས་དཔལ་ལྡན་ས་སྐྱ་པའི། །གདན་ས་བར་ཚང་ཡིན་ཞེས་པའི། །གླེ་མདའ་དགོན་པའི་དྲུང་ཉིད་དུ། །སྒར་ཕབ་ཞག་པོ་གསུམ་ཙམ་བསྡད། །དགེ་འདུན་རྣམས་ལ་ལྷ་མོ་དང་། །ཞལ་གྱི་དབང་ལུང་འབྲེལ་པ་ཕུལ། །ཐན་པ་ཆེན་པོས་ས་ཚིག་ནས། །མུ་གེ་འོང་དོགས་འབྲོག་ཡུལ་གྱི། །མི་ཀུན་མྱ་ངན་ཟུག་རྔུ་ལྡང་། །ཉམས་དང་རྨི་ལམ་འདྲེས་པའི་མཚམས། །རང་གིས་དྲན་ནམ་གཞན་གྱི་སྨྲས། །གང་ཡིན་མི་འབྱེད་ལུང་བསྟན་ཚིག །ད་
མ་ཡལོ་ལོ་ཉེས་འབྲུ་བཟང་འབྱུང་། །ཁྱེད་རང་ཚང་ལ་མུ་གེ་མེད། །ད་ལམ་མགོ་ཐོན་ལེགས་པོ་འོང་། །ཞེས་པའི་ཚིག་འགའ་ཐོས་སྙམ་བྱེད། །དཔོན་གྱིས་ཆར་ཞུས་བྱས་བྱུང་བས་། །གློ་བུར་ཆར་འབེབས་གདམས་པ་དང་། །མཚོ་དང་ཆུ་མིག་འགའ་ལ་ཕྱིན། །ཉམས་དང་རྨི་ལམ་གནས་སྐབས་སུ། །ཆུ་བོ་འབྲུག་དང་མཚོ་ཆེན་དང་། །ཀླུ་བདུད་དགེ་བསྙེན་ཆེན་པོ་དེ། །བླ་རྟ་སྔོན་པོ་ཞོན་པ་ལ། །མགོ་ལ་གསེར་ཞྭའི་ཅོད་པན་ཅན། །དཔོན་གཡོག་གཉིས་བཅས་བྱུང་བ་དང་། །མཚོ་འགྲམ་དགེ་བསྙེན་ཆེན་པོ་ནི། །ཚོགོས་ཆེན་སེར་པོའི་བེར་གྱོན་པ། །ལངས་ཏེ་མཚོ་འགྲམས་གདའ་བ་མཐོང་། །ཞག་པོ་གཅིག་ལ་ཆར་ཆེན་བབ། །དེ་ནས་དབའ་སྡ་མཚོ་ནག་ཅེས། །རྒྱམ་གྱི་མཚོ་ནག་རྔ་མ་ནི། །ཡིན་ཟེར་མཚོ་ཁར་སྒར་པ་བརྒྱབ། །མཚོ་དེར་ཆུ་མིག་ཆར་འབོད་བྱས། །འབྲུག་སྒྲོག་སེར་ཕྲན་ཆར་ཆེན་བབ། །ཉམས་དང་རྨི་ལམ་འདྲེས་པའི་མཚམས། །དང་པོ་རྣ་བས་ཐོས་པ་ལ། །དེ་ནས་མིག་གིས་མཐོང་སྙམ་པའི། །ལོ་རྒྱུས་མཐོང་སྣང་འདི་ལྟར་རོ། །ཟུར་མང་སྐུ་སྐྱེ་འདི་རྣམས་ནི། །སངས་རྒྱས་འོད་དཔག་མེད་པའི་དྲུང་། །
འགྲོ་བ་སེམས་ཅན་དོན་གྱི་ཕྱིར། །སྐྱེ་བ་བདུན་རེ་ལེན་པ་ཡི། །ཁས་ལེན་མཛད་ནས་བྱོན་པ་ཡིན། །ཟེར་བའི་སྒྲ་ཞིག་རྣ་བས་ཐོས། །ཡང་ནི་ལོ་རྒྱུས་འདི་འདྲ་ཐོས། །ཤིན་ཏུ་སྡིག་ཆེན་མི་གཉིས་ནི། །མནར་མེད་དམྱལ་བར་སྐྱེས་པ་དེ། །འདྲེན་ཕྱིར་བྱང་ཆུབ་སེམས་དཔའ་གཅིག །དམྱལ་བའི་ཡུལ་དུ་བྱོན་པ་ལ། །དམྱལ་བ་གཉའ་མ་ཐམས་ཅད་ལ། །མི་དེ་གར་ཡོད་དྲིས་ཤིང་བྱོན། །ད་རུང་འོག་ཏུ་ཡོད་དོ་ཟེར། །མ་ཟད་དམྱལ་བ་མནར་མེད་དེར། །འབྱོན་པར་དགོངས་ཡང་ལམ་མ་རྙེད། །སྡིག་ཆེན་མི་དེ་འདྲེན་པའི་ཕྱིར། །ཇི་ལྟར་བྱས་ན་ལམ་ཐོད་སྨྲས། །དེ་ཚེ་དམྱལ་སྲུང་ལས་མཁན་གྱིས། །དམྱལ་བའི་ཡུལ་གྱི་ས་འདི་ན། །སུ་དང་གང་གིས་ལུང་མི་འགྲོ། །རྫོགས་པའི་སངས་རྒྱས་བཅོམ་ལྡན་འདས། །དེ་ཡི་ལུང་དང་ལག་རྟགས་ཤིག །ཡོད་ན་ལམ་ཐོད་ལུང་འགྲོ་ཟེར། །དེ་ནས་བྱང་ཆུབ་སེམས་དཔའ་དེ། །ཡར་འོང་སངས་རྒྱས་ལ་ཞུས་ནས། །ལུང་དང་ལག་རྟགས་ཞུ་བསམ་སྐད། །དེ་ནས་རཱ་ག་ཨ་སྱ་བདག །ལུང་པའི་ཕུ་ལ་ཡར་བལྟས་པས། །བཅོམ་ལྡན་ཤཱཀྱ་ཐུབ་པ་དེ། །སྐུ་མདོག་འཛམ་བུ་ཆུ་
གསེར་མདོག །སྐུ་ཚད་འདོམ་པ་བརྒྱད་ཅུ་ཙམ། །མཚུར་ཕུའི་ལྷ་ཆེན་ལས་ཆེ་བ། །སྐུ་གཟུགས་མ་ཡིན་ཐུབ་པ་དངོས། །དངོས་སུ་བཞུགས་ནས་གདའ་བ་ལ། །འཁོར་དུ་ཉན་ཐོས་དགེ་སློང་ནི། །ཐོ་རེ་ལོ་ངེ་བ་ཞིག་འདུག །དེ་འདྲ་མཐོང་བའི་སྣང་བ་བྱུང་། །ཉམས་དང་རྨི་ལམ་འདྲེས་མཚམས་ཏེ། །ཉིན་མོ་གཉིད་ཡུར་སྐབས་ཡིན་པས། །ཉེ་གནས་ཀྱིས་ནི་གཉིད་སྐྱོག་པས། །དེ་དག་རྣམས་ཀྱི་ཚིག་དོན་མཇུག །མི་གསལ་རྡུམ་རྡུམ་བྱུང་བ་དེ་ཡི་ལེན། །མཚོ་ཁའི་བྲག་ལ་རང་བྱོན་གྱི། །དགའ་འཁྱིལ་ལ་སོགས་།རྟགས་འདུག་པས། །ཨོ་རྒྱན་ཆེན་པོས་སྦས་པ་ཡི། །གཏེར་ཕྲན་གཅིག་ཀྱང་ཡོད་དོ་སེམས། །རྨི་ལམ་ཉམས་སོགས་འཕྲུལ་སྣང་ལ། །མཆོག་འཛིན་རློམ་སེམས་མ་མཆིས་ཀྱང་། །ཉམས་མཚར་ཡི་གེར་བྲིས་པའོ།། ༈ །།ན་མོ་ཨཱརྱ་ཏཱ་ར་ཡེ། ཐུབ་ཆེན་དེ་བཞིན་གཤེགས་པ་ཡི། །ཕྱག་བྲིས་ཡི་གེ་དྲུག་པ་དང་། །རང་བྱོན་སྒྲོལ་མ་བཞུགས་པའི་གནས། །རུ་པ་དབང་ཕྱུག་རྡོ་རྗེ་སོགས། །བཀའ་བརྒྱུད་སྐྱེས་ཆེན་མང་པོ་ཡིས། །བྱིན་རླབས་ཞབས་ཀྱིས་བཅགས་པའི་ས། །སིབ་ཅེས་བྱ་བའི་ལུང་པ་
ན། །འབྲོང་པའི་དཔོན་གྱིས་སྤྱན་དྲངས་སླེབས། །ཉམས་དང་རྨི་ལམ་མཚམས་ཤེད་ན། །རྟ་ནི་དཀར་པོ་སྒ་བཅས་ཅན། །གཉིས་ནི་གུར་གྱི་དྲུང་དུ་བྱུང་། །དེ་མ་ཐག་ཏུ་བཙུན་པ་ནི། །རྒྱ་བོ་ཆས་བཟང་འཇིགས་པ་གཅིག །བདག་ལ་མཇལ་ཕྱིར་གུར་སྒོར་བྱུང་། །འབྲོང་པ་བན་ཐུང་ཞེས་བྱ་བའི། །འབྲོང་པའི་ལྷ་དེ་ཡིན་ནམ་སྙམ། །དེ་ཡི་གསོལ་ཁ་ཉུང་བསྡུས་བྲིས། །སྔོན་དུ་དབའ་ནག་མཚོ་ཞེས་པ། །རྒྱམ་གྱི་མཚོ་ནག་རྔ་མ་དང་། །མཚོ་དང་ཆུ་དེ་འགའ་རེ་ལ། ཆར་པ་དྲག་འབོད་རྫས་བཞག་པས། །ཡོན་བདག་རྣམས་ལ་ལོང་སྨྲས་ཀྱང་། །མ་བླངས་ཆུ་ལ་ཤོར་ཟིན་པས། །འབྲུག་སྒྲ་གློག་འོད་དྲག་ཆར་དང་། །ཐོག་འོང་འདྲ་བའི་དངོས་རྟགས་མང་། །དེ་ཕྱིར་རྡོ་ཏི་གངས་དཀར་ལ། །དམ་བརྡར་གསོལ་ཁ་ཉུང་ངུ་བྲིས། །དེ་ནས་མི་གཞོན་རལ་པ་ཅན། །ཆས་བཟང་དཔོན་རིགས་ཆེན་པོའི་གཟུགས། །བདག་ལ་ཕྱག་འཚལ་མདུན་དུ་བྱུང་། །དབང་རྫ་ས་སྣ་གཅིག་མགོར་བཞག་པས། །དབང་ནི་ཡོངས་རྫོགས་ཐོབ་གྱུར་པས། ཁོ་དགའ་གར་འཆམས་བྱེད་ཅིང་ནི། །རླུང་ལྟར་སྐད་ཅིག་ཡུད་ཀྱིས་
སོང་། །ཆས་བཟང་བུད་མེད་རྒྱན་ཅན་གཉིས། །བདག་ལ་སྐོར་བ་བྱེད་པ་ཡང་། །ཉམས་དང་རྨི་ལམ་མཚམས་སུ་མཐོང་། །དཔལ་ལྡན་ས་སྐྱའི་གདན་ས་བར། །གླེ་མདའ་དགོན་པའི་དགེ་འདུན་སོགས། །སྐྱ་སེར་ཁྲོམ་ཚོགས་ཇེ་ཆེར་རྒྱས། །ཞག་དགུར་དབང་ལུང་ཁྲིད་སོགས་འཕེལ། །བན་བོན་སྐྱ་སེར་ཐམས་ཅད་ཀྱིས། །གུས་འདུད་ཆེ་ཞིང་འགྲོ་དོན་འགྲུབ། །དགེ་བ་བསྔོ་སྨོན་རྒྱས་འདེབས་བྱས། །དེ་ནས་སྔོན་ཙམ་ཉམས་སྣང་ལ། །ད་ལོ་བདག་ལ་འོང་རྒྱུ་ཡི། །འབུལ་ནོར་རྣམས་ཀྱང་མཐོང་སྙམ་བྱེད། །ཉམས་མཚར་བརྗེད་ཐོ་བྲིས་པའོ།། །།དེ་རིང་སྒྲ་སྐད་འབྲུག་གི་ལོ། །དུས་ཆེན་སྤྲེའུ་ཟླའི་ཚེས་བཅུ་ལ། །ཐོས་པས་གྲོལ་བའི་ཆོས་ར་ན། །དགོང་མོ་དབང་གི་དུས་ཚོད་ལ། །སྔགས་འཆང་རཱ་ག་ཨ་སྱ་ངས། །འོ་དོད་ཆེན་པོས་ཕྱོགས་བཅུར་འབོད། །གསོན་ཅིག་དགོངས་ཤིག་དཀོན་མཆོག་གསུམ། །གསོན་ཅིག་དགོངས་ཤིག་རྩ་བ་གསུམ། །གསོན་ཅིག་དགོངས་ཤིག་སྲུང་མའི་ཚོགས། །གསོན་ཅིག་དགོངས་ཤིག་དམ་ཚིག་ཅན། །གསོན་ཅིག་དགོངས་ཤིག་
བཀའ་སྲུང་ཚོགས། །གསོན་ཅིག་དགོངས་ཤིག་གཏེར་སྲུང་ཚོགས། །ད་དུས་སྙིགས་མའི་ཡང་མཐའ་འདིར། །སངས་རྒྱས་བསྟན་པ་ནུབ་ལ་ཁད། །གསང་སྔགས་བསྟན་པ་གཟུགས་བརྙན་ཙམ། །གཏེར་རྙིང་ཐམས་ཅད་ཉམས་པའི་དུས། །དམ་ཆོས་ཀུན་གྱི་ངད་པ་ཡལ། །ནད་མུག་མཚོན་གསུམ་མེ་ལྟར་འབར། །བདུད་དང་བར་ཆད་རླུང་ལྟར་འཚུབ། །གློ་བུར་བར་ཆད་ཐོག་ལྟར་འབེབས། །འདི་ལ་ཐུགས་རྗེའི་ཕྱག་བརྐྱང་འཚལ། །ཉིན་མཚན་དུས་དྲུག་ཡེ་ཤེས་སྤྱན། །འགྲོ་ཀུན་གཟིགས་རྣམས་སྤྱན་ལམ་ཡེངས། །རྡོ་རྗེའི་སྙན་གྱིས་སྒྲ་སྐད་ཀུན། །མ་འདྲེས་གསན་རྣམས་བདག་ལ་གསོན། །འདི་འདྲའི་དུས་ལ་བབ་པའི་ཚེ། །སངས་རྒྱས་བསྟན་མཇུག་ཟབ་གཏེར་གྱིས། །བསྐྱང་བར་ཞལ་བཞེས་དུས་ལ་བབ། །ཟབ་གཏེར་སྟོན་པ་སྣང་མཐའ་ཡས། །བདེ་བ་ཅན་ནས་ཕྱག་བརྐྱངས་ལ། །ཕྱག་མཚན་འཆི་མེད་བུམ་པ་བཟང་། །མི་འགྱུར་རྡོ་རྗེའི་གཙུག་ཏུ་ཞོག །རིག་འཛིན་ཆེན་པོ་པདྨ་འབྱུང་། །དུས་ཆེན་སྤྲེའུ་ཟླའི་ཚེས་བཅུ་ལ། །མཁའ་འགྲོ་སྡེ་བཞིའི་འཁོར་དང་བཅས། །བོད་ཁམས་ཁྱབ་པར་འབྱོན་ལགས་ན། །
རིག་འཛིན་མི་འགྱུར་རྡོ་རྗེ་ལ། །ལུང་བསྟན་ཁ་བྱང་ད་ལྟ་གནོང་། །དཔལ་མགོན་ནག་པོ་ཆོས་སྐྱོང་རྗེ། །ཨོ་རྒྱན་བྱེ་བ་ཕྲག་བརྒྱ་ཡི། །གཏེར་སྲུང་གཙོ་བོ་ཁྱོད་ལགས་ན། །ས་གཏེར་མི་འགྱུར་རྡོ་རྗེ་ལ། །ད་ལྟ་ཉིད་དུ་སྤྲད་པར་ཞུ། །སྡེ་དཔོན་སུམ་ཅུ་དྲེགས་བཅོ་བརྒྱད། །བརྟན་མ་དགེ་བསྙེན་དམ་ཚིག་ཅན། །ཨོ་རྒྱན་བཀའ་ལས་མི་འདའ་ན། །གཉེར་དུ་གཏད་པའི་གཏེར་ཁ་རྣམས། །མི་འགྱུར་རྡོ་རྗེའི་ཕྱག་ཏུ་སྤྱོད། །ཕ་ནོར་བུ་ལ་མ་གཏད་ན། །དེ་ལས་དམ་འགལ་ཅི་ཞིག་ཡོད། །རྗེ་འབངས་ཉེར་ལྔ་མཚོ་རྒྱལ་མ། །སྨོན་ལམ་དམ་བཅས་དུས་ལ་བབ། །རྡོ་རྗེ་སྤུན་གྱུར་ཤུད་བུ་ཡི། །སྐྱེ་མཐའ་མི་འགྱུར་རྡོ་རྗེ་ལ། །དྲན་ནས་བྱིན་གྱིས་མི་བརླབས་ན། །རྡོ་རྗེ་སྤུན་གྱི་དམ་ཚིག་སྟེ། །མི་བསྲུང་དམ་ལས་མི་འགལ་ལམ། །ཆོས་ཉིད་ཆོས་ཅན་འགོག་དང་ལམ། །རྒྱུ་འབྲས་རྟེན་འབྲེལ་བསླུ་མེད་དང་། །རྩ་གསུམ་ལྷ་ཡི་ཐུགས་རྗེ་དང་། །དམ་ཅན་རྒྱ་མཚོའི་ནུས་མཐུ་ཡིས། །མི་འགྱུར་རྡོ་རྗེའི་སྐུ་ཚེ་བརྟན། །ཕྱི་ནང་གསང་བའི་བར་ཆད་ཞི། །ས་གཏེར་མྱུར་དུ་ཐོན་ནས་ཀྱང་། །ཨོ་རྒྱན་བསྟན་པ་གསལ་གྱུར་ཅིག །ཨ་ཏིའི་བསྟན་པ་
དར་རྒྱས་ནས། །འགྲོ་ཀུན་ཚེ་གཅིག་ལུས་གཅིག་ལ། །ཆོས་ཉིད་ཟད་སར་འཁྱོལ་ནས་ཀྱང་། །སངས་རྒྱས་གཞོན་ནུ་བུམ་སྐུ་ཡི། །ཀློང་དུ་མངོན་པར་བྱང་ཆུབ་ཤོག། །།ན་མོ་རཏྣ་ཏྲ་ཡཱ་ཡ། དུས་ཆེན་སྤྲེའུ་ཟླའི་ཚེས་བཅུ་ལ། །བདག་གི་གཞན་ཕན་སྨོན་ལམ་འདི། །གེགས་མེད་འགྲུབ་པར་སྤྱན་རས་གཟིགས། །རྒྱལ་བ་རྒྱ་མཚོས་བྱིན་གྱིས་རློབས། །ད་ནི་ཟླ་བ་ཕྱེད་དང་དྲུག །འདི་ལ་ལུས་འདིས་གཞན་ཕན་ནས། །བསམ་མི་ཁྱབ་པ་འགྲུབ་པར་ཤོག །མཐོང་ཐོས་འབྲེལ་ཐོགས་སྐྱེ་འགྲོ་ཀུན། །བདེ་ཆེན་ཞིང་དུ་སྐྱེ་བར་ཤོག །སྡོམ་རྒྱུན་འཕེལ་བ་ཐམས་ཅད་ནི། །འདི་ནས་བྱང་ཆུབ་སྙིང་པོའི་བར། །ཚུལ་ཁྲིམས་ཉམས་པ་མེད་པར་ཤོག །དབང་ལུང་གདམས་པ་འཕེལ་ཚད་ཀུན། །བསྐྱེད་རྫོགས་བརྟན་པ་ཐོབ་པར་ཤོག །ཨ་ཏིའི་དོན་ཁྲིད་ཐོབ་པ་ཀུན། །སྣང་བཞི་མཐའ་རུ་ཕྱིན་པར་ཤོག །ཁྲེགས་ཆོད་འབྲེལ་པ་ཐོབ་པ་ཀུན། །རང་སེམས་ཆོས་སྐུ་མངོན་གྱུར་ཤོག །བསྔོ་སྨོན་བྱང་བུ་ཐོབ་པ་ཀུན། །རིགས་དྲུག་སྐྱེ་སྒོ་ཆོད་ནས་ཀྱང་། །བདེ་ཆེན་ཞིང་ཁམས་བསྒྲོད་པར་
ཤོག །རྐྱེན་ཟློག་འབྲེལ་པ་ཐོབ་པ་ཀུན། །དུས་དང་དུས་མིན་འཆི་བ་ཟློག །བྱང་ཆུབ་ཐོབ་པའི་རྒྱུ་རུ་ཤོག །མཐོང་ཐོས་མི་མིན་འབྱུང་པོ་ཀུན། །བྱང་ཆུབ་སེམས་དང་ལྡན་པར་ཤོག །འབུ་སྲིན་དུད་འགྲོ་མཐོང་ཐོས་ཀུན། །མ་འོངས་བདག་གི་གདུལ་བྱར་གྱུར། །སྤྲུལ་པས་བྱང་ཆུབ་ལམ་འགོད་ཤོག །ཤ་ཁྲག་འོ་ཞོ་མར་ལ་སོགས། །ཁ་རུ་མྱངས་བའི་དུད་འགྲོ་ཀུན། །བདེ་ཆེན་ཞིང་དུ་ཁྲིད་པར་ཤོག །འོག་རྟ་གྲ་ཁལ་སྒོ་ནོར་ཀུན། །དུད་འགྲོར་སྐྱེ་བའི་སྒོ་ཆོད་ནས། །དག་པའི་ཞིང་དུ་སྐྱེ་བར་ཤོག །ཟླ་བ་དྲུག་གི་དུས་ཚང་ནས། །སྒྲུབ་ལ་བར་ཆད་མེད་པར་ཤོག །རྗེས་སུ་འཇུག་པའི་སློབ་མ་ཀུན། །ཚེ་རིང་ནད་མེད་ཉམས་རྟོགས་འཕེལ། །རང་གཞན་དོན་གཉིས་མཐར་ཕྱིན་ཤོག །དེང་ནས་བརྩམས་ཏེ་དུས་མཐའི་བར། །བདག་དང་བདག་གི་རྗེས་འཇུག་རྣམས། །འཇིགས་པ་བཅུ་དྲུག་མེད་པར་ཤོག །བདུད་ཀྱི་བར་ཆད་མི་འབྱུང་ཞིང་། །མ་ནོར་བྱང་ཆུབ་ལམ་བསྒྲོད་ཤོག །དེ་ལྟར་འཕྲལ་དྲན་སྨོན་ལམ་དེ། །རྩ་གསུམ་ཐུགས་རྗེས་འགྲུབ་པར་ཤོག །བདེན་གཉིས་བདེན་པས་འགྲུབ་པར་ཤོག། །།
ཤོག་ལྷེབ་ ༡༧༥ ནས་ ༢༠༠ བར།
༈ ན་མོ་ལོ་ཀེ་ཤྭ་ར་ཡེ། དེ་ནས་རྫག་གི་ལུང་པ་ན། །རིན་འོད་དཔོན་གྱིས་གདན་དྲངས་སླེབས། །སྒར་ཕབ་ཡུད་ཙམ་འཐུམ་པའི་ཚེ། །བུ་ཆུང་གཞོན་ནུ་མཛེས་པ་ནི། །མགོ་ཡི་སྐྲ་བཞར་བཙུན་པའི་མགོ །ལུས་ལ་གོས་དཀར་གྱོན་པ་ནི། །བཞི་བཅུ་ཙམ་ཞིག་བདག་གི་མདུན། །གུས་འདུད་ཐལ་མོ་སྦྱར་ཏེ་འདུག །ལྷ་ཐོག་ཡེ་བརྫུ་ཡིན་ནམ་སེམས། །དེ་ཡི་གསོལ་ཁ་རྒྱས་བསྡུས་གཉིས། །བྲིས་ནས་དཔོན་རིས་འགའ་ལ་བྱིན། །ཡང་ནི་ཉམས་དང་རྨི་ལམ་མཚམས། །གཟུགས་ནི་གསལ་པོ་མི་སྟོན་པའི། །ཟང་ཟིང་ཤིན་ཏུ་མང་ན་ཡང་། །སྐྱབས་གསུམ་འཛིན་པའི་སྡོམ་པ་ཕོག །ལུང་པ་ཤར་རྒྱུ་རྫག་ནང་དེའི། །གཞི་བདག་དཀར་ཕྱོགས་མང་བར་གོ །ནད་མུག་འཇིགས་པ་ཆེར་སྣང་ཡང་། །ཁྲོམ་འཚོགས་རང་འཁོར་བདེ་བར་བྱུང་། །དཔོན་གྱི་སྐུ་རིམ་འགའ་བྱས་པས། །དམ་ཅན་སྐྱེས་བུའི་གསུང་ཡིན་སྙམ། །སྔོན་ཆད་ང་ཡིས་།གནོད་བྱས་ཀྱང་། །ད་ཕྱིས་མི་བྱེད་ཟེར་བ་བྱུང་། །དེ་ཕྱིར་དྲག་ལས་མ་བྱས་སོ། །བོད་སོག་སྐྱ་སེར་ཁྲོམ་ཆེན་འདུས། །ཟང་ཟིང་གདུལ་བྱ་འུར་བ་དང་། །བཅུ་གསུམ་ཞག་
ལ་དབང་ལུང་དང་། །ཁྲིད་སོགས་འགྲོ་དོན་ཆེ་བར་བྱུང་། །རྡོ་རྗེ་སྤུན་གྱུར་བཛྲ་མཚན། །གཉིས་དང་མཇལ་ཞིང་དག་སྣང་འཕེལ། །དབང་ལུང་འདོད་པ་མ་རྫོགས་ཀྱང་། །ད་ནི་འགྲོ་ཤོམ་གྱིས་ཟེར་བའི། །ལུང་བསྟན་བྱུང་ཕྱིར་མྱུར་བར་བཀྱག །དེ་ནས་གྲགས་སེང་དཔོན་ཚང་གིས། །སྤྱན་དྲངས་དེ་ཡི་སྡེ་དཀྱིལ་གཅིག་ཏུ་ཕྱིན། །ན་ཐང་ཆུ་མིག་མང་པོ་ཅན། །སྒར་མཐའ་ཆབ་ཀྱིས་བསྐོར་བར་གདའ། །དེ་མ་ཐག་ཏུ་ཉམས་སྣང་ལ། །མི་གཞོན་ཆེ་བཟང་མཛེས་པ་སོགས། །ཉི་ཤུ་ཙམ་ཞིག་རང་མདུན་བྱུང་། །ཐལ་མོ་སྦྱར་སྟེ་འདུག་པ་ལ། །བུམ་པའི་དབང་བསྐུར་ལན་འགའ་བྱས། །དེ་ཡང་ཡེ་བརྫུའི་རྟགས་སུ་སེམས། །བུ་ཆུང་གཞོན་ནུ་གོས་སྔོན་ཅན། །འཁོར་གསུམ་བཏགས་པ་གཅིག་གིས་ནི། །བདག་གི་རྟ་ཁ་ཁྲིད་སྙམ་བྱེད། །སྐྱེས་བུས་ཕྲིན་ལས་བསྒྲུབ་བམ་སེམས། །ས་དེ་གཉན་ཆ་ཆེ་འདུག་པས། །ས་འབྲུག་འདིར་དང་ཆུ་བསྡུར་དང་། །གློག་འོད་འབྲུག་སྒྲ་ཆེ་སོགས་བྱུང་། །དཔོན་ཚང་བོན་པོའི་སྐུ་རིམ་ནི། །བཅའ་བ་དེ་ཡི་རྟགས་མཚན་དང་། །ནད་པ་ལུས་ཉམས་ཞན་པ་ཡང་། །རྣ་བའི་ཡུལ་དུ་ཐོས་པ་བྱུང་། །
ཡུལ་དེའི་གཞི་བདག་གདུག་རྩུབ་ཆེ། །སྨར་ཁམས་སྟོད་སྨད་ཐམས་ཅད་དུ། །གང་དུ་སེར་བ་བརྒྱབ་ན་ཡང་། །རྫ་གསེང་སྙི་ཚལ་ལོ་མ་ཕྱིན། །ས་ཕྱོགས་དེ་རུ་བླ་མ་རྣམས། །ཕེབས་ཚེ་ཐོག་འབྲུག་སེར་བ་རྒྱོབ། །ས་སྐྱོན་སྡང་སོགས་ཆོ་འཕྲུལ་ཆེ། །ཟེར་བའི་གྲགས་ཆེན་འདུག་ནའང་། །དཀར་གཏོར་ཕུལ་ཞིང་ཨོ་རྒྱན་གྱི། །སྔོན་གྱི་དམ་ཚིག་དམ་བརྡར་བྱས། །རྩུབ་ཆགས་མེད་ཅིང་བདེ་བར་བྱུང་། །གཞི་བདག་དེ་རྣམས་ཨོ་རྒྱན་གྱི། །དམ་གནས་སྐྱེས་བུ་ཆེན་པོ་ཡི། །བཀའ་ཡི་འཁོར་ཚོགས་ཡིན་ནམ་སེམས། །འོད་ཀྱི་མགར་བ་མཆེད་བརྒྱད་སོགས། །ཤིན་ཏུ་འཇིགས་པ་ཡིན་ནོ་སྐད། །ཞག་བཅུར་དབང་ལུང་ཁྲིད་སོགས་འཕེལ། །ཟང་ཟིང་ལོངས་སྤྱོད་ཆར་ལྟར་བབ། །དེ་ནས་འཛི་རྒྱལ་སྒ་བྲོ་ཞེས། །བེ་རི་རྒྱལ་པོའི་བླ་རི་ནི། །མཐོང་བའི་ས་རུ་ཕྱིན་པ་དང་། །གནམ་རྩུབ་གློ་བུར་སེར་ཕྲན་བྱུང་། །བན་བོན་ལྷ་རུ་ཡིན་པར་ག། །དེ་ནས་བྲག་དཀར་མདོ་རུ་སླེབས། །ཡོན་བདག་འགའ་ལ་དབང་བསྐུར་བྱས། །བུམ་ཆུ་ལེགས་པོར་འཕེལ་བ་དང་། །རྨི་ལྟས་བཟང་བ་འགའ་རེ་བྱུང་། །ནམ་ཕྱེད་འབྲུག་སྒྲ་
གློག་འོད་དང་། །ཁ་བ་ཆར་པ་ཆེན་པོ་བབ། །ཚེས་གཅིག་ནམ་ལངས་ཉམས་སྣང་ལ། །མི་དམར་ཁ་ཤོ་རྟ་དམར་ཅན། །མི་སྔོན་གོས་སྔོན་རྟ་སྔོན་ཅན། །མི་ནག་རྟ་ནག་མི་གསལ་ཞིང་། །སྒར་གྱི་ནང་དུ་བྱུང་ཙམ་གྱིས། །སྤུ་གྲི་མཆེད་གསུམ་ཡིན་པར་ཤེས། །འདི་གསུམ་ཅི་ལ་ཡིན་སྙམ་པས། །འདི་གསུམ་སྔར་ནས་ཡོད་པ་ཡིན། །ཟེར་བའི་སྒྲ་ཞིག་གྲག་བྱུང་བས། །དེ་དུས་གཏེར་སྟོན་སྤྲུལ་སྐུ་ཡི། །དགོངས་པ་གཏད་པ་ཡིན་འདུག་པས། །ཚེས་གསུམ་ཉིན་པར་བཀའ་ཤོག་དང་། །གནོད་སྦྱིན་གྱ་ནོམ་བཅས་པ་སླེབས། །ལམ་དུ་ཚུགསགཉིས་བྱས་སོ་སྐད། །རྣམ་ཐར་ཐོས་པས་ཡིད་རབ་ཚིམས། །གནས་སྒོ་ཕྱེས་ཚེ་མེ་ཏོག་ཆར། །སྣ་ཚོགས་འཇའ་ཡིས་ནམ་མཁའ་གང་། །རྡོ་ལ་ཕྱག་མཛུབ་གསུམ་རྗེས་དང་། །གནས་སྒོ་མང་དུ་ཕྱེས་པ་ལ། །ཐམས་ཅད་ཡིད་ཆེས་དད་པ་ཐོབ། །དགུན་སྒང་གཏུམ་མོའི་ཁྲིད་མཛད་པས། །དཔོན་སློབ་ཐམས་ཅད་རས་རྐྱང་དང་། །འཕོ་ལུང་ཞག་རེ་སྦྱངས་པ་ཡི། །སྤྱི་བོ་སྐྱང་ཞིང་ཁྲག་འབབ་དང་། །རྡོ་རྗེའི་བཅུད་ལེན་གནང་བ་ཡིས། །ལྟོ་ཡི་ཞེན་ཁྲིས་ཆོད་པ་སོགས། །གྲུབ་པའི་མཚན་མ་
དང་མཚར་བ། །བུམ་སྒྲུབ་བུམ་པར་འབྲུག་སྒྲ་འདྲའི། །སྒྲ་གྲག་ནམ་མཁརཞག་གཉིས་བར། །ཁ་དོག་སྣ་ལྔའི་འཇའ་སྤྲིན་གོང་། །བུམ་ཁང་འཇའ་ཡི་ཀ་བ་ཟུག །གསང་སྔགས་རྙིང་མའི་དགེ་འདུན་ལ། །བརྒྱ་སྟོང་ཙམ་དང་ཁྱད་པར་དུ། །ཀཿཐོག་དྲུང་པ་ལ་སོགས་པའི། །མཁས་གྲུབ་ཀུན་གྱིས་སྤྱི་བོར་བཀུར། །སྡེ་ཆེན་ཀུན་གྱིས་གུས་པས་བཏུད། །དེ་འདྲའི་གཏམ་སྙན་ཐོས་པ་ཡིས། །མི་རྒན་བློ་སེམས་ཚིམ་པར་གྱུར། །ཨོ་རྒྱན་ཆེན་པོའི་བཀའ་དྲིན་ཡིན། །སླར་ཡང་ཨོ་རྒྱན་ཆེན་པོ་མཁྱེན། །ང་དང་བུ་ན་གཏེར་སྟོན་པ། །སྐྱིད་སྡུག་ཅི་མཛད་ཁྱེད་རང་ཤེས། །དེ་སྐད་གོ་ཡི་ལུང་པར་བྲིས། །དེ་ནས་གོ་ཡི་ལུང་པ་དེར། །སྐྱབས་བདུད་ལྷ་འབྲང་འདྲེས་པ་ལ། །དབང་ཁྲིད་གདམས་ངག་རྒྱ་ཆེར་འཕེལ། །དེ་ནས་ཁོ་ཆེན་ཞེས་བྱ་རུ། །སྐྱབས་ཅེ་བླ་མས་གདན་དྲངས་ཏེ། །སྐུ་རིམ་དྲག་པོའི་སྦྱིན་སྲེག་དང་། །ལྷ་མོ་བརྒྱ་རྩ་བྱས་པའི་ནུབ། །བླ་མ་ཚང་ལ་གནོད་བྱེད་པའི། །དམ་སྲི་ངུར་འཛིན་བྱ་བ་དེས། །ཉམས་རྨི་མཚམས་སུ་རང་གཟུགས་བསྟན། །ཕྱི་སློང་ཁྲོམ་རྣམས་འཁྲུག་པ་ཤོམ། །ནང་སློང་རང་
ཡང་ལུས་མ་བདེ། །གསང་སློང་སེམས་རྒྱུད་རབ་ཏུ་འཁྲུགས། །དེ་ནས་ཏིང་འཛིན་དགོངས་པ་བསྐྱེད། །རྩུབ་འཁྲུག་ཐམས་ཅད་རབ་ཏུ་ཞི། །སྐྱབས་བདུད་ས་དཀར་བ་ལ་སོགས། །བླ་མ་བཅུ་གསུམ་ཙམ་དང་ནི། །དགེ་འདུན་དྲུག་ཅུ་ཙམ་དང་ནི། །ཁྲོམ་འཚོགས་ཤིན་ཏུ་མང་པོ་ལ། །དབང་ལུང་ཁྲིད་སོགས་འགྲོ་དོན་འགྲུབ། །དང་པོ་དེ་རུ་སླེབ་མ་ཐག །ཡུད་ཙམ་འཐུམ་པའི་ཉམས་སྣང་ལ། །ལྷ་འདྲེ་ཡིན་ནམ་ཁྲོམ་ཚོགས་ལ། །སྐད་ཅིག་དབང་བསྐུར་བྱས་པ་སྙམ། །དེ་ནས་སྨར་ཁམས་སྒང་སྟོད་དེར། །ཤིན་ཏུ་གཉན་ཆགས་ཆེ་བའི་རི། །ཟླ་བདག་གཡུ་དྲུང་ལྷ་རྩེ་ཞེས། །བྲག་རི་དཀར་པོ་མཆོད་རྟེན་དབྱིབས། །སྔོན་དུས་དེ་ལ་རི་དྭགས་པས། །རི་དྭགས་བཤོར་བས་གངས་རུད་བརྒྱབ། །མི་ནི་གསུམ་ཙམ་བསད་པ་དང་། །སོག་པོས་གོ་བཏང་རི་དྭགས་བཤོར། །དེ་ཚེ་མ་སོད་སེར་བས་བྲབ། །དེ་ནས་སོག་པོའི་རྒྱལ་པོ་ཡིས། །མེ་མདའི་ཁྲལ་བརྒྱབ་རི་ལ་བརྒྱབ། །དེ་མ་ཐག་ཏུ་ཐོག་བརྒྱབ་ནས། །མི་རྟ་ལྔ་ཙམ་བསད་ཟེར་བའི། །རི་ཡི་རྩ་རུ་ཞག་པའི་ནུབ། །བྲག་རི་དེ་ཡི་རྩེ་མོ་ནས། །སྐྱེས་ཕྲན་དར་མ་ཆས་བཟང་
བ། །རལ་པས་སོག་འདབ་ཁེབས་པ་ལ། །ཁོག་སྨད་བྲག་རིའི་ནང་དུ་ནུབ། །ཁོག་སྟོད་བདག་ལ་དགའ་ཞིང་གུས། །ང་ནི་བོན་པོ་ཡིན་ལགས་ཟེར། །ཐོ་རས་ནས་ནི་སྔོ་ལྷུག་ལྷུག །སྒོ་བ་གང་ནི་ཕུལ་བྱུང་བ། །ཉམས་རྨི་འདྲེས་པའི་འཁྲུལ་སྣང་ལ། །བྱུང་ཕྱིར་ཕྱིར་ནངསཀ་བསྟོད་གཅིག །དེ་ངོས་མི་ལ་ཕན་ཕྱིར་བྲིས། །སྐུ་མཐུ་ཆེ་བ་མ་ལགས་ཏེ། །ཨོ་རྒྱན་རྗེ་ཡི་བཀའ་དྲིན་ཡིན། །དེ་ནས་སིབ་ཀྱི་ལུང་པར་ཕྱིན། །ཅུང་ཟད་འཐུམ་པའི་རྨི་ལམ་མཚམས། །སྐྱ་མི་ཆས་བཟང་འཁོར་གསུམ་ཅན། །ཆེ་ཆུང་དེའུ་མགོ་ཆེ་ཤོས་ཙམ། །ལུང་པ་དེ་ཡི་ཕུ་སོ་ནས། །བདག་གི་དྲུང་དུ་བྱུང་སྙམ་བྱེད། །ཕུ་ཡི་གཞི་བདག་ཡིན་པ་འདྲ། །དེ་མ་ཐག་ཏུ་འབྲོང་པ་དཔོན། །བཀྲ་ཤིས་དབང་དྲག་དེར་བྱུང་ནས། །སང་ཉིན་འབྱོན་ཞོར་ཕུ་འདི་ན། །ང་རང་རེ་གཅིག་ཡོད་པ་ལ། །བསང་མཆོད་བྱེད་རོགས་ཐུགས་ཐོགས་ཟེར། །དེ་ཡི་དོན་དེ་ཡིན་པར་སེམས། །ལྷ་འདྲེ་ཡིད་ཀྱི་མངོན་ཤེས་ཅན། །མི་དང་ལྷ་འདྲེ་ཟུང་འཇུག་སྟེ། །ཕྱི་ནང་དབྱེར་མེད་རྟེན་འབྲེལ་མཚར།། །།།ན་མོ་མ་ཧཱ་མུ་དྲ་ཡེ། ཕྱི་ནང་
གརྟེན་འབྲེལ་གཅིག་པའི་གནད། །ད་ནི་ཁོ་བོ་ངེས་ཤེས་སྐྱེས། །ད་ལོ་མངོན་སུམ་གཏན་ལ་ཕེབས། །ནང་དུ་འདོད་པ་ཡོད་པའི་ཚེ། །གདུལ་བྱ་འོང་བར་དཀའ་འོ་ཞེས། །བཀའ་བརྒྱུད་བླ་མས་གསུངས་པ་དེ། །ད་ལོ་མངོན་སུམ་ཉམས་སུ་མྱོང་། །ནང་དུ་འདོད་པ་མེད་པའི་ཚེ། །གདུལ་བྱ་ཆར་ལྟར་བབ་པ་དེ། །ད་ལོ་མངོན་སུམ་ཉམས་སུ་མྱོང་། ངོ་སྲུང་གང་འོས་བྱས་པ་ཡི། །མི་ངོ་སྲུང་བར་དཀའ་བ་མཐོང་། །རང་བབ་ཅི་བྱུང་ཤོག་སྙམ་པའི། །ཞེ་འདོད་འཛིན་པ་མེད་པའི་ཚེ། །ཀུན་གྱིས་ཐུགས་ལ་འདོགས་པ་མཐོང་། །རང་རྒྱུད་རྩུབ་འཁྲུག་ཆེ་བའི་ཚེ། །ཁྲོམ་ཚོགས་འཛིང་རྩོད་བྱེད་པ་མཐོང་། །བྱམས་སེམས་སྙིང་རྗེ་བསྐྱེད་པའི་ཚེ། །ཐམས་ཅད་འཇམ་ཞིང་དུལ་བ་མཐོང་། །སྟོང་ཉིད་ཏིང་འཛིན་བརྟན་པ་ན། །ལྷ་འདྲེས་སྡོང་གྲོགས་བྱེད་པ་མཐོང་། །བསྟན་དང་སེམས་ཅན་དོན་བསམ་ན། །བཀའ་སྲུང་གཉན་པོ་ཐམས་ཅད་ཀྱིས། །བཀའ་གཏད་དབང་ལུང་ཅི་བྱས་ཀྱང་། །རྒྱུད་འཇམ་འཁུ་ལྡོག་མེད་པ་མཐོང་། །མདོར་ན་ལྷ་འདྲེ་སྣོད་བཅུད་རྣམས། །རང་སེམས་ཁོ་ནའི་ཆོ་འཕྲུལ་དུ། །ད་ནི་ངེས་ཤེས་གཏིང་ནས་
སྐྱེས། །བཀའ་བརྒྱུད་བླ་མའི་གསུངས་རྣམས་ལ། །རིམ་གྱིས་ངེས་ཤེས་དད་པ་འཕེལ། །དེ་སྐད་རཱ་ག་ཨ་སྱ་ཡིས། །སིབ་ཀྱི་ལུང་པ་ཞེས་བྱ་བ། །གྲུབ་ཆེན་པཀིས་བྱིན་བརླབས་པའི། །དགོན་གཉིས་འགྲམ་དུ་བྲིས་པའོ།། །།ན་མོ་གུ་རུ་དྷེ་ཝ་དྷཀི་ནཱི། ཡིད་ལས་སྤྲུལ་པའི་མཆོད་པའི་སྤྲིན། །བཟང་པོ་སྤྱོད་པའི་སྨོན་ལམ་བཞིན། །སྐུ་གསུམ་ཞིང་ཁམས་ཀུན་བཀང་སྟེ། །སྐྱབས་གནས་དཀོན་མཆོག་གསུམ་ལ་འབུལ། །མཆོད་པའི་ལྷ་མོ་བཅུ་དྲུག་སོགས། །ཟག་མེད་མཆོད་སྤྲིན་རྒྱ་མཚོའི་ཚོགས། །མངོན་དགའི་ཞིང་གི་རྒྱན་ལྟ་བུ། །སྐྱབས་གནས་རྩ་བ་གསུམ་ལ་འབུལ། །ལྷ་ཀླུ་མི་ཡི་མཆོད་པའི་སྤྲིན། །འཁོར་ལོས་སྒྱུར་བའི་ལོངས་སྤྱོད་བཞིན། །བཀའ་སྲུང་ཆོས་སྐྱོང་རྣམས་ལ་འབུལ། །བདག་ལུས་ལོངས་སྤྱོད་དགེ་རྩར་བཅས། །སྐྱབས་གནས་རྣམས་ལ་གུས་པས་འབུལ། །ལྷག་བསམ་དག་པས་ཕུལ་བ་འདི། །ཐུགས་བརྩེར་དགོངས་ཏེ་བཞེས་སུ་གསོལ། །དེ་སྔོན་བསམ་པ་ཕལ་ཆེར་འགྲུབ། །བགེགས་དང་བར་ཆད་རང་སར་ཞི། །དེ་ཡང་དཀོན་མཆོག་ཐུགས་རྗེར་གོ །གྲུབ་ཆེན་
པཀྴིའི་གདུང་རྒྱུད་དང་། །སྐྱབས་བདུད་ལ་སོགས་དཔོན་གྱི་རིགས། །བླ་མགོ་བཅུ་གསུམ་གཙོར་བྱས་པའི། །དགེ་འདུན་དྲུག་ཅུ་ཙམ་ཞིག་ལ། །དབང་ལུང་ཁྲིད་སོགས་རྒྱ་ཆེར་འཕེལ། །ཟང་ཟིང་ལོངས་སྤྱོད་ཆར་ལྟར་བབ། །སྔར་ཡངདཀོན་མཆོག་ཐུགས་རྗེས་བསྲུངས། །དེ་ཡང་རེ་ས་གཞན་ན་མེད། །དགྲ་བགེགས་ནད་གདོན་བར་ཆད་ནི། །མང་དུ་འདུག་ཀྱང་ཞི་བར་གྱུར། །མཆེད་གྲོགས་རྡོ་རྗེ་སྤུན་རྣམས་ཀྱང་། །ཤི་གསོན་འཕྲད་པ་བཞིན་དུ་མཇལ། །ཕན་ཚུན་དག་སྣང་བརྩེ་གདུང་འཕེལ། །དབང་ལུང་ཁྲིད་ཀྱིས་མཉེས་པར་བྱས། །དམ་ཚིག་ལྡན་པའི་རྣལ་འབྱོར་ལ། །རྟེན་འབྲེལ་རང་འགྲིགས་འོང་ངོ་ཞེས། །གྲི་གུག་བརྩེགས་རྒྱུད་ལས་གསུངས་པ། །མངོན་དུ་གྱུར་པ་ཡིན་ནམ་སེམས་། །ཞེས་པ་བར་ཆད་མ་བྱུང་ཞིང་། །ཟུར་མང་མཇལ་སོགས་དོན་འགྲུབ་པས། །ཏིལ་ཐོག་གཞུང་དུ་སླེབ་དུས་བྲིས།། ༈ །།ན་མོ་ལོ་ཀེ་ཤྭ་ར་ཡེ། ཐུབ་པས་གཞན་དོན་མཛད་པ་ཡིས། །མངོན་པར་རྫོགས་པར་སངས་རྒྱས་སོ། །བྱིས་པ་སོ་སོའི་སྐྱེ་བོ་རྣམས། །རང་དོན་བྱས་པས་འཁོར་བར་འཁྱམས། །བདེ་བའི་
བདེ་སྐྱིད་བསྒྲུབ་འདོད་པས། །སྡིག་སྡུག་མི་དགེ་སྣ་ཚོགས་བྱེད། །དེ་ཡིས་འདི་ཕྱི་གཉིས་ཀ་སྡུག །ཕྱི་མ་ཐར་པ་བྱང་ཆུབ་འདོད། །དེ་ཕྱིར་ཚེ་འདིར་དཀའ་སྤྱད་པས། །འདི་དང་ཕྱི་མ་གཉིས་ཀ་སྐྱིད། །ཟང་ཟིང་ལོངས་སྤྱོད་འདོད་པའི་ཕྱིར། །དཀའ་བ་སྣ་ཚོགས་སྤྱད་བྱས་ཀྱང་། །ཟང་ཟིང་ལོངས་སྤྱོད་མི་འབྱུང་ཞིང་། །གལ་ཏེ་བྱུང་ཡང་ངན་སོང་རྒྱུ། །ཟང་ཟིང་འདོད་པ་མེད་བཞིན་དུ། །འགྲོ་བ་སྨིན་ཅིང་གྲོལ་བའི་ཕྱིར། །དབང་ལུང་ཁྲིད་ཀྱི་ཆར་ཕབ་པས། །རྟ་བརྒྱ་ནོར་སྟོང་དཔག་མེད་བྱུང་། །དེ་ཡང་ཆོས་ཀྱི་བྱིན་རླབས་ཉིད། །དབང་བསྐུར་རེ་རེའི་ཡོན་དུ་ནི། །རྟ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་འབུལ། །རིན་ཆེན་གསེར་ནི་རང་ལུས་ཙམ། །གུས་པས་བླ་མ་ལ་ཕུལ་གསུངས། །སྤང་དག་ལན་གསུམ་བྱས་པའི་རྗེས། །སྒྱུ་ལུས་བླ་མའི་བྲན་དུ་འབུལ། །ཟས་ནོར་ལོངས་སྤྱོད་ཅི་ཡོད་པ། །དྲུག་ཆ་བླ་མ་ལ་ཕུལ་ནས། །གཅིག་ཆ་རང་ལ་བཞག་པར་གསུངས། །ཕུལ་བ་བླ་མས་བླངས་པ་ལ། །དཀོར་སྒྲིབ་ཡོད་པར་མ་གསུངས་སོ། །མཁས་གྲུབ་ཁྱུང་པོས་མེ་ཏྲི་པར། །ཕྱག་དྲུག་
པ་ཡི་དབང་ཡོན་དུ། །གསེར་སྲང་ལྔ་བརྒྱ་ཕུལ་བར་གསུངས། །འབྲོག་མི་ལོ་ཙཱས་བདག་མེད་མའི། །རྗེས་གནང་རེ་རེའི་ཡོན་དུ་ནི། །འབྲི་ནི་སུམ་ཅུ་རེ་བླངས་སྐད། །མར་པ་ལོ་ཙཱས་རྔོག་པ་ལ། །སྙན་བརྒྱུད་དབང་གི་ཡོན་དུ་ནི། །འབྲི་ནི་ལྔ་བརྒྱས་གཙོར་བྱས་པའི། །སྤོང་དག་ལན་གསུམ་མ་ཆོག་པར། །འབྲི་རྒན་ཆག་ཅིང་ཉིན་ལམ་ནས། །གསུམ་བཞིའི་སོ་ནས་ཁུར་དགོས་བྱུང་། །ཆོས་ལ་ཆེ་བ་མེད་ན་ནི། །ཆོས་ནི་ཤི་བའི་རོ་དང་འདྲ། །ང་ལ་འབྲི་རྒན་དགོས་མེད་ཀྱང་། །ཆོས་ཀྱི་ཆེ་བ་ཡིན་ནོ་གསུངས། །རྫ་ཆུ་ལ་ནི་ཐེག་དཀའ་བའི། །རྟ་ཁྱུ་ནོར་ཁྱུ་མང་པོ་འདི། །ཆེད་དུ་ཞེ་འདོད་མ་བྱས་ཀྱང་། །རང་བཞིན་ཤུགས་ལས་བྱུང་བ་འདིས། །དབང་ལུང་ཁྲིད་ཀྱི་ཆེ་བ་ཐོན། །ང་ལ་སྒྲིབ་པ་ཡོད་སྙམ་མེད། །དེ་ཡང་ཆོས་ཀྱི་ཕྱོགས་སུ་འགྲོ། །སླར་ཡང་མང་དུ་བྱུང་བ་ཚོ། །ཆེ་ཁོག་དཀོན་མཆོག་ཕྱོགས་སུ་སོང་། །མི་དགེའི་རྩ་བར་སོང་བ་མེད། །འགྲོ་དོན་མིན་ལ་འགྲོ་དོན་ཞེས། །སྨྲས་ན་མི་ཆོས་བླ་མའི་རྫུན། །ཚུལ་ཁྲིམས་རྩད་ནས་འཇིག་པ་ཡིན། །འགྲོ་དོན་ཡིན་ལ་འགྲོ་དོན་དུ། །མིང་བཏགས་ཉེས་པར་
གསུངས་པ་མེད། །རང་དོན་གཞན་དོན་གཉིས་པོ་དེ། །བསམ་པའི་སྒྱུར་ལུགས་མ་ཤེས་ན། །གཞན་དོན་རང་དོན་གཉིས་ཀ་མེད། །སེམས་བསྐྱེད་བཟང་པོའི་རྩིས་ཟིན་ན། །གཞན་དོན་བྱས་པས་རང་དོན་འགྲུབ། །ངེས་པའི་དོན་ལ་རང་དང་གཞན། །དབྱེར་མེད་ཆོས་ཀྱི་དབྱིངས་སུ་གཅིག །སེམས་ཉིད་གཅིག་པོའི་ཆོ་འཕྲུལ་ལས། བདག་གཞན་སོ་སོར་གྲུབ་པ་མེད། །མེད་བཞིན་སྣང་བའི་འགྲོ་བ་ལ། །རྩོལ་མེད་སྙིང་རྗེ་ཤུགས་ལ་འཆར། །འདོད་སྲེད་མེད་བཞིན་བྱུང་བའི་ནོར། །ཞེན་མེད་དགེ་བའི་ཕྱོགས་སུ་གཏོང་། །བསྔོ་མི་བསྔོ་རྒྱུ་བསྔོ་བ་གསུམ། །དངོས་འཛིན་དམིགས་པ་མེད་བཞིན་དུ། །བླ་མེད་བྱང་ཆུབ་ཆེན་པོར་བསྔོ། །བདག་གིས་ལོ་བདུན་འགྲོ་དོན་ཚེ། །མགོ་བོ་སྦ་ཕུང་ལྟར་དཀར་ཞིང་། །ལུས་ནི་རྔ་ལྕག་ལྟར་གྱུར་པའི། །ཡུལ་ཕྱོགས་སོ་སོའི་མི་རྒན་རྣམས། །དབང་ཁྲིད་ཟབ་མོ་འདི་འདྲ་བ། །སྔོན་ཆད་མཐོང་ཐོས་ལྕེམེད་དམ་ཟེར། །རྒྱ་དབུས་ལྷོ་བྱང་ཀུན་བསྐོར་ཞིང་། །གྲྭ་ས་བཟང་དགུ་འགྲིམས་པ་ཡི། །དགེ་བཤེས་དབུ་ལོ་དཀར་བ་འགས། །དཀྱིལ་འཁོར་རྣམས་དང་ཆོས་སྐྱོང་གི །
སྒྲུབ་ཐབས་དབང་དང་མན་ངག་རྣམས། །དེ་སྔོན་འདི་འདྲ་མ་ཐོབ་ཟེར། །ལྕང་ལོ་དཀར་བའི་སྔགས་རྒན་རྣམས། །ཟབ་ཅིང་གཉན་པའི་དབང་དང་ལུང་། །མན་ངག་ཞལ་ཁྲིད་དང་བཅས་པ། །སྔོན་ཆད་འདི་བཞིན་མ་ཐོབ་སྐད། །ཁྲིད་མང་ཞུས་ཤིང་མི་ཚེ་ལ། ཉམས་ལེན་བསྐྱངས་པའི་སྒོམ་ཆེན་འགའ། །གནད་ཀྱི་ངོ་སྤྲོད་བོགས་འདོན་རྣམས། །འདི་འདྲ་གནང་མཁན་མ་བྱུང་ཟེར། །མགོན་པོ་རྟགས་ཐོན་རྣལ་འབྱོར་པས། །མགོན་པོའི་དབང་ལུང་མན་ངག་རྣམས། །སྟོན་པའི་བླ་མ་མཚན་ལྡན་དང་། །མཇལ་བར་དཔལ་ལྡན་མགོན་པོ་ལ། །གསོལ་བཏབ་དངོས་རྟགས་འབྲས་བུ་དེ། །ད་རེས་འགྲུབ་ཟེར་སྤྲོ་དགའ་བྱས། །ཕྱག་ཆེན་རྟོགས་པའི་བོགས་ཐོན་ཅིང་། །རྫོགས་ཆེན་ལྷ་ཞལ་མཐོང་མཁན་མང་། །གཏུམ་མོར་རས་ཐུབ་འགའ་ཟུང་སྟེ། །འཕོ་བར་རྟགས་ཐོན་མང་ཞིག་བྱུང་། །ཚངས་སྤྱོད་དགེ་བསྙེན་དགེ་ཚུལ་སློང་། །ཞུ་མཁན་བརྒྱ་ཙམ་ལས་མང་སོགས། །རྒན་གོག་ཚངས་སྤྱོད་དགེ་བསྙེན་དང་། །དགེ་བསྙེན་མ་ནི་དཔག་ཏུ་མེད། །སྐྱབས་སྡོམ་བསྙེན་གནས་སྨྱུང་གནས་དང་། །སེམས་བསྐྱེད་སྡོམ་པ་བྱེད་པ་ནི། །
གྲངས་ལས་འདས་པ་ཡོད་དམ་སེམས། །མྱོང་གྲོལ་རིལ་བུ་ཕྱོགས་མཐར་ཁྱབ། །དགེ་བ་ཁས་ལེན་བསམ་ལས་འདས། །འདི་དག་འགྲོ་དོན་ཡིན་ནམ་མིན། །བདག་གི་སེམས་རྒྱུད་མཁྱེན་པ་ཡི། །ཨོ་རྒྱན་རྗེ་སོགས་རྒྱལ་བས་མཁྱེན། །གཞན་གྱི་སྤྱོད་ཡུལ་མ་ཡིན་ནོ། །དེ་སྐད་ལྷ་ཐོག་བླ་མ་ཡིས། །སྐུ་རྩེད་ཉམས་དགའི་གསུངས་འགའ་ཞིག །མགྲོན་གཉེར་ལ་ནི་གསུངས་འདུག་ཕྱིར། །རཱ་ག་ཨ་སྱས་སྨྲས་པའོ།། ༈ །།ན་མོ་གུ་རུ་དྷེ་ཝ་དྷཱཀྐི་ནཱི་ཧཱུཾ། མངོན་པར་དགའ་བའི་ཞིང་ཁམས་ན། །བཅོམ་ལྡན་རྒྱལ་བ་མི་འཁྲུགས་པར། །གསོལ་བ་འདེབས་སོ་ཐུགས་རྗེས་གཟིགས། །སྔོན་ཚེ་ཁྱེད་ཀྱིས་ས་དང་ལམ། །བགྲོད་ཚེ་དཀའ་སྤྱད་སྨོན་ལམ་གྱི། །བདེན་པ་ཆེན་པོ་གང་མཆིས་མཐུས། །བདག་དང་མི་འགྱུར་རྡོ་རྗེ་ཡི། །གཞི་བྱེས་དཔོན་སློབ་མི་ཕྱུགས་ཀུན། །འཇིགས་པ་ཀུན་ལས་ཐར་མཛད་གསོལ། །འཇིགས་པ་ཀུན་ལ་མི་འཇིག་པ། །སྦྱིན་མཛད་འཕགས་པ་འཇིག་རྟེན་དབང་། །སྤྱན་རས་གཟིགས་ལ་གསོལ་བ་འདེབས། །བདག་དང་མི་འགྱུར་རྡོ་རྗེ་ཡི། །དཔོན་སློབ་མི་ཕྱུགས་
ཐམས་ཅད་ཀུན། །གཡོན་ཅན་ཆོམ་རྐུན་དགྲ་དང་ཆུ། །འཇིགས་པ་ཀུན་ལས་བསྐྱབ་ཏུ་གསོལ། །འཇིག་རྟེན་དབང་ཕྱུག་སྤྱན་ཆབ་ལས། །བྱུང་བའི་མེ་ཏོག་པདྨ་ལས། །འཁྲུངས་མ་ཐག་ཏུ་འཇིགས་པ་ཀུན། །སྐྱོབ་པར་ཞལ་བཞེས་རྗེ་བཙུན་མ། །སྒྲོལ་མ་དཀར་དང་སྔོན་མོ་ལ། །གསོལ་བ་འདེབས་སོ་ཐུགས་རྗེས་ཟུངས། །བདག་དང་མི་འགྱུར་རྡོ་རྗེ་ནི། །མི་ཕྱུགས་ཀ་ཆ་བཅས་པ་ལ། །རྒྱལ་པོ་དགྲ་དང་ཆོམ་རྐུན་ཆུ། །འཇིགས་པ་ཀུན་ལས་བསྐྱབ་ཏུ་གསོལ། །སྙིགས་དུས་ཐུགས་རྗེའི་རྩལ་ཆེ་བ། །པདྨ་འབྱུང་གནས་སྤྱི་བོས་མཆོད། །བདག་དང་མི་འགྱུར་རྡོ་རྗེ་ཡི། །རེ་ས་གཞན་ན་མ་མཆིས་པས། །བདག་དང་མི་འགྱུར་རྡོ་རྗེ་ཡི། །མི་ཕྱུགས་འཁོར་དང་བཅས་པ་རྣམས། །རྒྱལ་པོ་དགྲ་དང་ཆོམ་རྐུན་ཆུ། །ནད་དང་བགེགས་སོགས་བར་ཆད་ལས། །ད་ནི་སྐྱོབ་པའི་དུས་ལ་བབ། །མ་མགོན་ལྕམ་དྲལ་རིགས་རྣམས་ཀུན། །མེ་དང་རྒྱལ་པོ་ཆུ་དང་དུག །འཇིགས་པ་སྐྱབས་པར་རྒྱུད་རྣམས་ནས། །གསུངས་ནས་རྒྱུད་གཞུང་མི་བསླུ་བར། །བདག་དང་མི་འགྱུར་རྡོ་རྗེ་ཡི། །འཁོར་དང་སློབ་མ་ལོངས་སྤྱོད་བཅས། །ད་ནི་
བསྲུང་ཞིང་སྐྱབས་པར་མཛོད། །བརྟན་མ་དགེ་བསྙེན་གཏེར་སྲུང་ཚོགས། །སློབ་དཔོན་པདྨའི་རྗེས་འཇུག་རྣམས། །གཞི་བྱེས་ལམ་གསུམ་གང་དུ་ཡང་། །སྐྱེལ་བསུ་རོགས་ལྡན་བསྲུང་དང་སྐྱོབས། །ཁ་འཛིན་སྡོང་གྲོགས་བྱེད་པ་ཡི། །ཁས་བླངས་དམ་བཅས་དུས་ལ་བབས། །བདག་དང་མི་འགྱུར་རྡོ་རྗེ་ཡི། །དཔོན་སློབ་རྟ་ཕྱུགས་ཀ་ཆ་བཅས། །བར་ཆད་མེད་ཅིང་མགོ་ཐོན་པར། །སྣང་སྲིད་ལྷ་འདྲེས་གྲོགས་མཛོད་དང་། །དམ་བཅས་དམ་ལས་མ་འདའ་ཞིག །སྣང་བ་སེམས་སུ་ཆོད་པའི་མི། །བར་ཆད་བདུད་བགེགས་འབྱུང་བཞི་ཡི། །གནོད་པ་སྟོང་ཉིད་རྒྱལ་ཡུམ་གྱིས། །ཟིལ་གྱིས་གནོན་པར་འགྱུར་གསུངས་ན། །བདག་གིས་དེ་དོན་རྟོགས་ངེས་ན། །བདེན་པས་་མི་འགྱུར་རྡོ་རྗེ་དང་། །བདག་ཅག་འཁོར་དང་ལོངས་སྤྱོད་བཅས། །ཆུ་དང་རྒྱལ་པོ་དགྲ་ཆོམ་རྐུན། །འཇིགས་པ་རང་སར་ཞི་གྱུར་ན། །དེ་སྐད་འར་འུར་ཡན་ཡུན་སྐད། །ཐོས་ཤིང་ཆུ་ཆེན་གནོད་པ་ཡི། །བླ་ཆེན་གཅིག་གིས་ཀ་ཆ་རྣམས། །ཁྱེར་བས་ཐུགས་ཁྲོས་ཆུ་བོ་ལ། །གཏོར་མ་མདོ་སྒྲུབ་བརྒྱབ་པ་ཐོས། །རང་ཡང་ཆུ་ཆེན་དེ་ཉིད་ལ། །
དབྱར་སྒང་བསྒྲོད་པར་ཉེ་ཚེ་བྲིས། །དེ་ནས་ཆུ་དེར་ཉེས་མེད་དུ། །ཐར་ཁ་དེ་ནུབ་རྨི་ལམ་དུ། །ཁྱིམ་དེ་ཆེན་པོ་གཅིག་གི་ནང་། །མཆེད་གྲོགས་བཙུན་པ་མང་པོ་འཚོགས། དགའ་བའི་རྣམ་འགྱུར་མང་པོ་བསྟན། །ཁྱིམ་དེའི་ཕྱེད་ཙམ་མཚོ་རུ་སྣང་། །མཁར་ནག་འཁོར་དུ་གཏོགས་པར་གོ །ཕྱིར་ནངས་ཉེས་མེད་བདེ་བར་ཐར། །དེ་ནས་གནས་མདོའི་ལྷ་ཁང་དུ། །ཞག་དྲུག་མགོན་པོའི་བསྐང་མདོས་བྱས། །ཉི་མའི་དཀྱིལ་འཁོར་གསལ་པོ་ནི། །ལན་གསུམ་ཤར་གྱི་ཕྱོགས་ནས་ཤར། །ཟླ་བའི་དཀྱིལ་འཁོར་ལྷོ་ནས་ཤར་། །ཉམས་རྨི་ལམ་མཚམས་སུ་དེ་ལྟར་བྱུང་། །དེ་ནས་རི་བོ་ཆེ་ཕྱོགས་སུ། །བཀྱག་པ་རང་གི་ཉམས་རྨི་རུ། །བྱ་རོག་མང་པོས་མདུན་ཁེངས་རྨིས། །མགོན་པོ་དགྱེས་པའི་རྟགས་སུ་གོ །ལམ་དུ་ཞག་ནུབ་རྨི་ལམ་དུ། །རྒྱལ་བའི་དབང་པོ་མཇལ་བའི་ཕྱིར། །སོང་བ་རྨིས་ཕྱིར་སོ་སོ་ཡང་། །ཆོས་སྐུ་གཅིག་པ་ཡིན་པར་སེམས། །ཞབས་དྲུང་ཉིད་ལ་བརྒྱ་འབུལ་སོགས། །ཁུ་དབོན་མཇལ་ཞིང་འབུལ་བ་བྱས། །གང་ཞུས་དབང་ལུང་གདམས་པ་གནང་། །དེ་ནས་རྟོགས་པ་ཕུལ་བ་ནི། །ན་ཉིན་ཕན་ཆད་ཁོ་བོ་ལ། །
ཡེངས་སྐབས་བརྗེད་སྐབས་འགའ་རེ་བྱུང་། །དེ་ལ་འགྱོད་པའི་སེམས་ཤིག་བྱུང་། །ད་ནི་བརྗེད་སྐབས་ཡོད་མོད་ཀྱང་། །དེ་ལ་འགྱོད་པའི་སེམས་ཤིག་བྱུང་། །གཞི་ཡི་ཕྱག་རྒྱ་ཆེན་པོ་ཡི། །གོ་བ་སྐམ་པོ་སྔར་ནས་ཡོད། །དེ་ཡིས་ཕན་པ་མེད་མོད་ཀྱང་། །གོ་བ་མིན་པར་གདེང་ཕབ་ནས། །ཡེངས་དང་མ་ཡེངས་ཁྱད་མེད་ཅིང་། །འཁྲུལ་དང་མ་འཁྲུལ་ངོ་བོ་གཅིག །གཉིད་དང་མ་གཉིད་ངོ་བོ་གཅིག །གཉུག་མ་རྒྱུན་ཆད་མེད་པའི་དོན། །ཡེ་ནས་ལྷུན་གྲུབ་རང་བཞིན་ལ། །ངེས་ཤེས་གཏིང་ནས་སྐྱེ་བ་བྱུང་། །འདི་ཉིད་རྟོགས་པ་ཡིན་ལགས་སམ། །ཡང་ན་ཧམ་པ་ཆེས་པ་ལགས། །ཉམས་ལེན་སྟེང་དུ་བཞག་ཙམ་ན། །གཟུགས་སྒྲ་ལ་སོགས་སྣང་བ་ལ། །ཡིན་མིན་བཟང་ངན་འཛིན་པ་མེད། །གཟུགས་རྣམས་སྣང་སྟོང་སྒྲ་གྲག་སྟོང་། །ཚོགས་བརྒྱད་རྟོག་པ་མ་འགགས་པར། །ཉམས་ལེན་སྟེང་དུ་མ་ཡེངས་པ། །གང་ཟག་བདག་མེད་ཡིན་ནམ་སེམས། །ཕྱི་རོལ་སྣང་བ་སྣ་ཚོགས་འདི། །རྒྱ་མཚོའི་ནང་དུ་གཟའ་སྐར་བཞིན། །རྣམ་པ་སོ་སོར་གསལ་བ་ལ། །ངོ་བོ་སྟོང་པ་ཉིད་དུ་མཐོང་། །ཆོས་ཀྱི་བདག་
མེད་ཡིན་ནམ་སེམས། །དེ་དག་དོན་དང་ལྡན་ལགས་སམ། །རྒྱལ་བའི་ཐུགས་དང་རང་གི་སེམས། །འགྲོ་བ་ཀུན་གྱི་སེམས་རྒྱུད་གསུམ། །རྣམ་པ་སོ་སོར་ཡོད་མོད་ཀྱང་། །ངོ་བོ་དབྱེར་མེད་གཅིག་པར་སེམས། །དེ་ཡང་དོན་དང་ལྡན་ལགས་སམ། །བླ་མ་གཞན་ལ་ཞུས་ལགས་ཀྱང། །མཛེས་ཆོས་ལེགས་པོ་གསུངས་པ་ལས། །གེགས་སེལ་བོགས་འདོན་གནང་མཁན་དཀོན། །དིང་སང་དག་བརྒྱུད་བསྟན་པའི་བདག །རྗེ་ཉིད་ལགས་པས་བཀའ་སྩལ་ཞུས། །སྐྱོན་ལ་ཕྱག་མཛུབ་མ་བཙུགས་ན། །ཡོན་ཏན་སྐྱེ་ཐབས་མི་གདའ་ན། །ང་ཡི་དེ་རྣམས་རྟོགས་པ་དང་། །ཧམ་པ་གང་རེད་དབྱེ་བར་ཞུ། །དེ་དག་ལེགས་པར་ཞིབ་རྒྱས་ཞུས། །དེ་ཚེ་ཞལ་ནས་བཀའ་སྩལ་པ། །རྒྱུ་ལས་མ་བྱུང་འབྲས་བུ་དཀའ། །གཞན་གྱིས་དེ་འདྲ་ཟེར་བྱུང་ཡང་། །ངེད་ཀྱིས་བདེན་པར་འཛིན་མི་བྱེད། །འོན་ཀྱང་ཁྱེད་རང་ཡུན་རིང་པོར། །བསྒྲུབ་པ་ཐེམ་ཕྱིར་བདེན་པར་འཛིན། །དེ་དག་དོན་དང་ངེས་པར་ལྡན། །དྭགས་པོ་རྣལ་འབྱོར་ཆོས་དབྱུང་གཉིས། །ཞུས་ལེན་མཛད་པའི་སྐབས་དེར་གསལ། །ངེད་ཀྱང་དེ་ལྟར་ཆགས་འཇོག་ཡིན། །
ཆོས་དང་གང་ཟག་བདག་མེད་གཉིས། །མཚན་ཉིད་པ་ཡི་ལུགས་ལྟར་ན། །དིང་སང་རྟོགས་པའི་རེ་བ་ཅི། །གང་ཟག་བདག་མེད་རྐྱང་པ་ཙམ། །རྟོགས་ནའང་དགྲ་བཅོམ་ཡིན་ཕྱིར་རོ། །འོན་ཀྱང་ངེད་རང་སྒོམ་ཆེན་པས། །གང་ལ་ཆེད་དུ་འཛིན་པ་མེད། །གཡས་ཆུང་འདྲ་བར་གྲོལ་བ་ན། །དེ་ནི་གང་ཟག་བདག་མེད་དོ། །ཐམས་ཅད་སྒྱུ་མ་རྨི་ལམ་ལྟར། །རྟོགས་པ་ཆོས་ཀྱི་བདག་མེད་དོ། །ཞེས་གསུངས་སླར་ཡང་ཞུས་པ་ནི། །ཡེངས་དང་མ་ཡེངས་མེད་པ་འདི། །ཧམ་པ་ཡིན་ནམ་དོན་དང་ལྡན། །ཞུས་པས་བཀའ་སྩལ་གནང་བ་ནི། །དེ་ཉིད་དོན་དང་ངེས་པར་ལྡན། །ངེད་ཀྱང་དེ་ལ་ཆགས་བཞག་ཡིན། །འོན་ཀྱང་ཁྱད་པར་མེད་སྙམ་ནས། །ཉལ་ནས་བསྡད་པས་ག་ལ་འོངས། །ཐུགས་དམ་དགེ་སྦྱོར་འབད་དགོས་གསུངས། །འོ་ན་དེ་ཉིད་དོན་ལྡན་ན། །ཁོ་བོ་འཚིང་ནས་འདུག་ལགས་ཞུས། །དེ་དག་དོན་གྱི་རྩ་བ་སྟེ། །རྒྱས་པར་གསུང་འཕྲོས་གསུང་གླེང་ནི། །ཇ་ཐུག་གཅིག་ཙམ་རྒྱུག་ཡུན་ཐོགས། །བློ་ཁ་ཚིམ་ཞིང་ལུགས་གཉིས་ཀྱི། །བྱ་བ་གྲུབ་ཅིང་ལེགས་པར་བྱུང་། །དེ་ནས་འོང་ལམ་རྡུལ་ཐང་
དུ། །རྒྱབ་ནས་ལྷས་བྱིན་འོང་གིན་ཡོད། །ཟེར་བའི་སྒྲ་ཞིག་གྲག་པ་དང་། །དེ་ནུབ་བུད་མེད་སྨྱོན་མ་གཅིག །འདུག་པ་བདག་གིས་རྟ་མགྲིན་གྱི། །བསྐྱེད་རིམ་དྲག་སྔགས་ཀྱིས་གཟིར་རྨིས། །ཕར་ལམ་གནས་སྤྲུའི་ཐང་མཇུག་ཏུ། །འདྲེ་མོ་གནས་པའི་བྲག་ཕུག་ཏུ། །ཞག་པའི་རྗེས་བསྙག་ཡིན་ནམ་སེམས། །རྟ་གཅིག་ན་བ་བྱིན་རླབས་ཕན་། །དེ་ནས་དགོས་པ་ཅང་མེད་པར། །རྟ་གཅིག་མཆོད་ཆ་དཔེ་ཆར་བཅས། །གཡང་ལ་འགྲིལ་ནས་ཆུ་ཆེན་ཁྱེར། །འཕོངས་སེམས་འགྱོད་སེམས་མ་བྱུང་བར། །རང་སེམས་ངོ་བོའི་སྟེང་དུ་བཞག །འོན་ཀྱང་རྗེས་སུ་བརྒྱུགས་པ་ཚོ། །ཆུ་ཡིས་ཁྱེར་དོགས་པད་འབྱུང་དང་། །སྤྱན་གཟིགས་སྒྲོལ་མའི་སྔགས་དམིགས་བྱས། །མཆོད་ཆ་དཔེ་ཆར་བཅས་པ་ལོན། །དཔེ་ཆ་ཐང་ཀ་མ་སྐྱོན་པས། །ཆུ་སྡུགས་བྱས་ཀྱང་རུང་ངམ་ཟེར། །ཡི་དམ་ཐུགས་རྗེ་མྱུར་བར་གོ །དབང་ཆས་ཆུ་ལ་ནུབ་པ་དེ། །འགྲོ་དོན་ཚོད་གྱིས་ཟེར་བར་གོ །འཕྲལ་དུ་བརྗེད་ཐོར་མདོར་བསྡུས་སོ། །དེ་ནས་གྲྭ་མང་རྣམས་ལ་ཡང་། །རྡོ་རྗེ་ཕྲེང་བ་རྔོག་དཀྱིལ་བདུན། །དབང་བསྐུར་མངོན་རྟོགས་ལུང་བྱས་སྐབས། །བླ་
མ་མཚན་ཉིད་ལྡན་པ་ཡིས། །བཀའ་འགྱུར་ཡོངས་སུ་རྫོགས་པ་ཡི། །པོ་ཏིའི་ལུང་དབང་གནང་བ་རྨིས། །རྡོ་རྗེ་གདན་བཞི་བཀའ་གཉན་པས། །སོ་ན་རྐན་སྐྲངས་ཟུག་གཟེར་ཆེ། །ཡ་མའི་ནད་འདི་ཕོག་ནས་ནི། །ལོ་གྲངས་བཅུ་གསུམ་སོང་ན་ཡང་། །གཞི་མེད་ཕན་རྒྱུ་མ་བྱུང་ཞིང་། །རེས་འགའ་བདེ་ཡང་རེས་འགའ་ཐུ།ཁྱད་པར་དུས་དེར་སློང་དུ་གོ །ལུས་སྦྱིན་བྱས་ནས་ཉམས་ལེན་སྐྱོང་། །སྔོན་ཚེ་བསྐལ་པ་འདིའི་སྔོན་ལ། །ཁོ་བོ་བུ་ཆུང་གཅིག་གྱུར་ཚེ། །རི་བོང་གཅིག་གི་འགྲམ་པ་ལ། །རྡོ་བརྒྱབ་རི་བོང་ཡུན་རིང་ན། །དེ་ཡིས་རྐྱེན་བྱས་རི་བོང་གུམ། །དེ་ཡི་ལས་འབྲས་ཡིན་པ་ནི། །རྨི་ལམ་རྨི་ཞིང་གསལ་བ་ནི། །རྡོ་ཡི་བརྒྱབ་ལུགས་ལ་སོགས་པ། །རྨི་ལམ་ཡུལ་དུ་གསལ་བར་དྲན། །དེ་ཕྱིར་ལྷག་པར་ལས་འབྲས་ལ། །ཡིད་ཆེས་ཆེན་པོ་སྐྱེས་པ་བྱུང་། །བསང་བཏང་ལྷ་མོའི་དགའ་སྤྲོ་སོགས། །རྨིས་དང་མཚུངས་པར་རི་ཁྲོད་དུ། །ལྷོ་པ་ཕེབས་ཤིང་མཇལ་སྤྱད་དང་། །ཕུན་ཚོགས་འདོད་ཆོས་ཕུལ་ཞིང་ཞུས། །མཚར་འདོད་བརྗེད་ཐོ་ཙམ་དུ་བྲིས། །འདི་སྐབས་རྡོར་ཕྲེང་དབང་གི་དུས། །མར་མེ་
ལན་མང་འཛིན་ན་ཡང་། །རྟེན་གྱི་དོན་ནམ་དབང་གི་དོན། །གང་ཡིན་དབྱེ་གསལ་མེད་པའོ། །དྷ་ཐིམ།། ༈ ན་མོ་གུ་རུ་དྷེ་ཝ་དྷཱཀྐི་ནི་ཧཱུཾ། སྐྱབས་གནས་བསླུ་མེད། །དཀོན་མཆོག་ཀུན་འདུས། །རྩ་གསུམ་ཀུན་འདུས། །སྙིགས་དུས་སྐྱབས་གཅིག །པདྨ་འབྱུང་གནས། །རེ་ས་གཞན་མེད། །སྙིང་ཁུང་རུས་པའི། །གཏིང་ནས་གསོལ་བ། །འདེབས་སོ་འདེབས་སོ། །དེ་རིང་ཚེས་བཅུའི། །ཉི་ཤར་འདི་ལ། །ཁྱེད་ཉིད་དངོས་སུ། །འབྱོན་དུས་ཡིན་པས། །ཐུགས་རྗེས་གཟིགས་ཤིག །ང་ཡི་བུ་གཅིག །མི་འགྱུར་རྡོ་རྗེའི། །བར་ཆད་སོལ་ཅིག །ས་གཏེར་དངོས་གྲུབ། །ད་ནི་སྩོལ་ཅིག །དགྲ་བགེགས་དམ་སྲིའི། །བར་ཆད་བཟློག་ཅིག །སྐུ་བསོད་ཕྲིན་ལས། །རྒྱ་ཆེར་སྤེལ་ཅིག །སློབ་དཔོན་པད་མའི། །བཀའ་དང་དམ་ལ། །གནས་ཀྱི་གཏེར་སྲུང་། །ཐམས་ཅད་ཐམས་ཅད། །ཐུགས་དམ་དུས་ལ། །ད་ནི་ད་ནི། །ས་གཏེར་སྤྱོད་ཅིག །བླ་མ་ཡི་དམ། །མཁའ་འགྲོ་ཆོས་སྐྱོང་། །ཁྱད་པར་མ་གཅིག །ཡེ་ཤེས་མཚོ་རྒྱལ། །ཐུགས་རྗེས་ད་གཟིགས། །སྐུ་གསུང་ཐུགས་
དང་། །ཡོན་ཏན་ཕྲིན་ལས། །ད་ནི་མ་གཡེལ། །མཁྱེན་ནོ་མཁྱེན་ནོ། །འབྲུག་ལོ་སྨིན་དྲུག །ཟླ་བའི་ཚེས་བཅུར། །སྔགས་འཆང་རཱ་ག །ཨ་སྱས་སྨྲས་སོ།། ༈ །ན་མོ་རཏྣ་ཏྲ་ཡཱ་ཡ། ན་མོ་བཛྲ་པཱ་ཎི་ཡེ། བདེན་ལྡན་བདེན་འགྲུབ་དཀོན་མཆོག་རིན་ཆེན་གསུམ། །རྩ་བ་གསུམ་དང་བདེན་ལྡན་ཇི་སྙེད་མཐུས། །བདག་གིས་སྨོན་ལམ་འདི་བཏབ་འགྲུབ་གྱུར་ཅིག །བདག་གིས་དུས་གསུམ་དགེ་བ་ཅི་བསགས་མཐུས། །རྒྱལ་ཟླའི་བར་དུ་འགྲོ་དོན་རྒྱ་ཆེན་འགྲུབ། །དེ་ལ་བར་ཆད་གང་ཡང་མི་འབྱུང་ཞིང་། །མཐུན་རྐྱེན་ཐམས་ཅད་འབད་མེད་འགྲུབ་གྱུར་ཅིག །བདག་གིས་མཐོང་ཐོས་དྲན་པའི་འགྲོ་བ་རྣམས། །བླ་མེད་བྱང་ཆུབ་ས་བོན་ཐེབ་པ་དང་། །འཁོར་བ་ངན་སོང་སྐྱེ་བའི་སྒོ་ཆོད་ནས། །འཕོས་མ་ཐག་ཏུ་བདེ་ཆེན་ཞིང་ཁམས་སུ། །པདྨ་མཆོག་ལ་རྫུས་ཏེ་སྐྱེ་གྱུར་ཅིག །བདག་ལས་འཕེལ་བའི་དབང་ལུང་མན་ངག་རྣམས། །རྒྱ་ཆེར་ནུབ་མེད་ཡུན་དུ་འཕེལ་རྒྱས་ཤིང་། །རྒྱལ་བའི་བསྟན་ལ་ཕན་པ་རྒྱ་ཆེར་ཤོག །རྒྱལ་ཟླ་ནས་བཟུང་ཇི་སྲིད་འཚོ་ཡི་བར། །གཞན་དོན་སྨོན་ལམ་སེམས་
བསྐྱེད་མི་འདོར་ཡང་། །དངོས་སུ་རང་དོན་རྩེ་གཅིག་ཉམས་ལེན་ལ། །བར་ཆད་མེད་ཅིང་ཚེ་དང་སྒྲུབ་པ་མཉམ། །སྒྲུབ་བརྒྱུད་བསྟན་པའི་སྤྱན་སྲོལ་ལ་ཕན་ཤོག །གལ་ཏེ་ཁོ་བོ་ལུང་ཟིན་ཆོས་ཀྱི་བདག །ཡིན་ཞེས་ས་གཏེར་གནམ་ཆོས་ནས་གསུངས་པ། །བདེན་ན་བདེན་པ་དེ་ཡི་བདེན་སྟོབས་ཀྱིས། །བདག་གིས་སྨོན་ལམ་དེ་བཏབ་འགྲུབ་གྱུར་ཅིག །ཅེས་ར་ག་མདོར་བྲིས་སོ། །ཡང་ནི་མ་ནི་ཤར་གྱི་ནི། །རི་བོའི་ཁྲོད་དུ་ཞག་གསུམ་ཚེ། །སྐུ་གསུམ་ངོ་སྤྲོད་ཁྲིད་ཆེན་ལ། །དཔེ་ལྟས་སྤྲོ་བ་འཕེལ་བའི་ཚེ། །ཉམས་དང་རྨི་ལམ་འདྲེས་པའི་མཚམས། །མཉམ་མེད་ཐུབ་པའི་དབང་པོ་དེ། །མི་གསལ་ཡད་ཡུད་ཙམ་ཞིག་མཇལ། །ཁྲིད་དཔེ་བྱིན་རླབས་ཆེ་བར་གོ །དེ་ནས་གིག་ཐུང་ཐང་དུ་ཕྱིན། །ཐོས་གྲོལ་དབང་ཁྲིད་འཛུགས་པའི་ཚེ། །བར་ཆད་རྟགས་མཚན་འགའ་རེ་མཐོང་། །ལུས་ཚོགས་དམིགས་པ་བརྒྱ་རྩ་བྱས། །ཐོ་རངས་རྒྱལ་འགོང་ཞྭ་ཐེབ་ཅན། །དཔོན་གཡོག་རྐྱ་པ་བརྒྱ་ཙམ་ཞིག །བུད་ནི་སོང་བ་གསལ་བ་ནི། །ཉམས་ཀྱི་སྐབས་ལ་མཐོང་བ་ཡིས། །སྒྱུ་ལུས་ན་བ་འཕྲལ་དུ་བདེ། །མ་མགོན་དབང་གཏོར་འཛིན་པའང་བྱུང་།། །།
ཤོག་ལྷེབ་ ༢༠༡ ནས་ ༣༠༤ བར།
༈ ན་མོ་གུ་རུ་ཨཱ་ཡུཛྙཱ་ན་ཡེ། བདེ་བ་ཆེན་པོའི་ཞིང་ཁམས་ན། །བཞུགས་པའི་སྟོན་པ་སྣང་མཐའ་ཡས། །གཏེར་ཆོས་སྟོན་པ་ཁྱེད་ལགས་ན། །བསྟན་འཛིན་མི་འགྱུར་རྡོ་རྗེ་ལ། །ཐུགས་རྗེས་གཟིགས་ལ་ཚེ་དབང་སྩོལ། །པོ་ཏཱ་ལ་ཡི་གནས་མཆོག་ན། །བཞུགས་པའི་འཕགས་པ་ཐུགས་རྗེའི་བདག །མི་འགྱུར་རྡོ་རྗེ་ཐུགས་རྗེས་གཟིགས། །འགྲོ་འདུལ་ཕྲིན་ལས་དངོས་གྲུབ་སྩོལ། །སྲིན་ཡུལ་ཟངས་མདོག་དཔལ་རི་དུ། །བཞུགས་པའི་ཐོད་པ་རྩལ་ཆེན་གྱི། །མི་འགྱུར་རྡོ་རྗེ་བྱིན་གྱིས་རློབས། །བར་ཆད་མེད་པའི་སྲུང་སྐྱབས་ཞུ། །མཁའ་སྤྱོད་དག་པའི་ཕོ་བྲང་ན། །བཞུགས་པའི་བདེ་ཆེན་རྒྱལ་མོ་ཡིས། །མི་འགྱུར་རྡོ་རྗེ་བདེ་བར་སྐྱོངས། །མྱུར་དུ་ས་གཏེར་ཁ་བྱང་སྤྱོད། །མི་མཇེད་སྟོང་གསུམ་འཇིག་རྟེན་ན། །བཞུགས་པའི་གཏེར་སྲུང་དམ་ཅན་ཚོགས། །སྔོན་གྱི་དམ་ཚིག་མ་གཡེལ་བར། །མི་འགྱུར་རྡོ་རྗེར་དབང་བ་ཡིས། །གཏེར་རྣམས་ད་ནི་ཕྱག་ཏུ་སྤྲོད། །སྨོན་ལམ་ཨོ་རྒྱན་བཀའ་མ་བསླུ། །བསྟན་དང་སེམས་ཅན་བློས་མ་དོར། །རྩ་གསུམ་ཐུགས་རྗེའི་དུས་ལ་
བབ། །ཅེས་པའི་གདུངས་དབྱངས་འབྲུག་གི་ལོ། །སྨིན་དྲུག་ཟླ་བའི་ཚེས་བཅུར་བླངས།། ༈ །།ན་མོ་གུ་རུ་དྷེ་ཝ་ཌཱཀྐི་ནཱི་ཡེ། སངས་རྒྱས་ཆོས་དང་དགེ་འདུན་གསུམ། །དཀོན་མཆོག་གསུམ་ལ་གསོལ་བ་འདེབས། །བླ་མ་ཡི་དམ་མཁའ་འགྲོ་གསུམ། །རྩ་བ་གསུམ་ལ་གསོལ་བ་འདེབས། །ཆོས་ཉིད་ཆོས་ཅན་འགོགས་ལམ་གསུམ། །བདེན་དོན་གསུམ་ལ་གསོལ་བ་འདེབས། །གཞི་དང་ལམ་དང་འབྲས་བུ་གསུམ། །ཆོས་ལམ་གསུམ་ལ་གསོལ་བ་འདེབས། །ལྟ་བ་སྒོམ་པ་སྤྱོད་པ་གསུམ། །རྣམ་དག་གསུམ་ལ་གསོལ་བ་འདེབས། །འདུལ་བ་མདོ་སྡེ་མངོན་པ་གསུམ། །སྡེ་སྣོད་གསུམ་ལ་གསོལ་བ་འདེབས། །རྒྱུད་དང་ལུང་དང་མན་ངག་གསུམ། །གསང་སྔགས་གསུམ་ལ་གསོལ་བ་འདེབས། །ཕྱི་ནང་གསང་བ་ཡང་གསང་གསུམ། །དཀྱིལ་འཁོར་གསུམ་ལ་གསོལ་བ་འདེབས། །རྩ་དང་རླུང་དང་ཐིག་ལེ་གསུམ། །གནས་འགགས་གསུམ་ལ་གསོལ་བ་འདེབས། །ངོ་བོ་རང་བཞིན་ཐུགས་རྗེ་གསུམ། །དོན་དམ་གསུམ་ལ་གསོལ་བ་འདེབས། །བདེ་དང་གསལ་དང་མི་རྟོག་གསུམ། །ཉམས་རྟོགས་གསུམ་
ལ་གསོལ་བ་འདེབས། །སྐྱེ་མེད་འགག་མེད་གནས་མེད་གསུམ། །རྣམ་ཐར་གསུམ་ལ་གསོལ་བ་འདེབས། །ཆོས་སྐུ་ལོངས་སྐུ་སྤྲུལ་སྐུ་གསུམ། །འབྲས་བུ་གསུམ་ལ་གསོལ་བ་འདེབས། །དབྱིངས་དང་ཐིག་ལེ་ལུག་རྒྱུད་གསུམ། །རྫོགས་ཆེན་གསུམ་ལ་གསོལ་བ་འདེབས། །གཤིན་རྗེ་རྟ་མགྲིན་ཕྱག་རྡོར་གསུམ། །ཁྲོ་བོ་གསུམ་ལ་གསོལ་བ་འདེབས། །འཇམ་དབྱངས་སྤྱན་གཟིགས་ཕྱག་རྡོར་གསུམ། །རིགས་གསུམ་མགོན་ལ་གསོལ་བ་འདེབས། །སྣང་མཐའི་སྤྱན་གཟིགས་པད་འབྱུང་གསུམ། །སྐུ་གསུམ་ལྷ་ལ་གསོལ་བ་འདེབས། །ཆོས་ལོངས་སྤྲུལ་པའི་ཌཱཀི་གསུམ། །མཁའ་འགྲོ་གསུམ་ལ་གསོལ་བ་འདེབས། །ཡེ་ཤེས་ལས་དང་འཇིག་རྟེན་གསུམ། །མགོན་པོ་གསུམ་ལ་གསོལ་བ་འདེབས། །མ་མོ་གཟའ་དང་དམ་ཅན་གསུམ། །བསྟན་སྲུང་གསུམ་ལ་གསོལ་བ་འདེབས། །བདུད་རྗེ་བཙན་རྒོད་ཀླུ་གསུམ་ལ། །སྤུ་གྲི་གསུམ་ལ་གསོལ་བ་འདེབས། །ཕོ་རྒྱུད་མོ་རྒྱུད་མ་ནིང་གསུམ། །བཀའ་སྲུང་གསུམ་ལ་གསོལ་བ་འདེབས། །དེ་ལྟར་སྐྱབས་གསུམ་རྩ་གསུམ་ལ། །ལན་གསུམ་སྙིང་ནས་འོ་དོད་
འབོད། །ད་ནི་ཟླ་ཕྱེད་གསུམ་ཙམ་ལ། །འགྲོ་དོན་བསྡུ་བ་རྣམ་བཞི་སྩོལ། །དེ་ནས་ལོ་གྲངས་བཅུ་ཕྲག་གསུམ། །སྒོ་གསུམ་མཚམས་ལ་བར་ཆད་མེད། །སྡོམ་གསུམ་མཐའ་རུ་ཕྱིན་པ་དང་། །སྐུ་གསུམ་འབྲས་བུ་ཐོབ་པ་ཞིག །རེ་ས་གཞན་མེད་རྩ་གསུམ་མཁྱེན། །གིག་ཐང་ཆོས་རིའི་ཚེས་གསུམ་ལ། །གསོལ་བཏབ་དོན་དང་ལྡན་གྱུར་ཅིག །རཱ་ག་ཨ་སྱས་གསུངས་སོ། །དགེ་ལེགས་འཕེལ།། །།ན་མོ་རཏྣ་ཏྲ་ཡཱ་ཡ། ན་མོ་བཛྲ་པཱ་ཎི་ཡེ། བསླུ་མེད་སྐྱབས་གནས་དཀོན་མཆོག་གསུམ། །གསོལ་བ་འདེབས་སོ་བྱིན་གྱིས་རློབས། །པད་འབྱུང་རྩ་བ་གསུམ་གྱི་ཚོགས། །གསོལ་བ་འདེབས་སོ་བྱིན་གྱིས་རློབས། །བདག་གིས་བྱང་ཆུབ་སེམས་བསྐྱེད་ནས། །ལོ་བདུན་འགྲོ་དོན་བྱས་པའི་མཇུག །ད་ནི་བཅུ་ཕྲག་གསུམ་མམ་བཞི། །གྲངས་ལས་མི་མང་ཞག་གྲངས་འདིར། །འགྲོ་དོན་དཔག་མེད་འགྲུབ་པ་རུ། །བྱིན་གྱིས་རློབས་ཤིག་དཀོན་མཆོག་གསུམ། །དེ་ལ་བར་ཆད་མེད་པ་རུ། །བྱིན་གྱིས་རློབས་ཤིག་ཏཱ་རེ་མ། །བསམ་པ་ལྷུན་གྱིས་གྲུབ་པ་རུ། །བྱིན་གྱིས་རློབས་ཤིག་པདྨ་འབྱུང་། །
ཆོས་ར་འདི་རུ་འོང་ཚད་ལ། །ཡམས་ནད་ཆུ་དང་གདོན་སོགས་ཀྱིས། །བར་ཆད་སྲུངས་ཤིག་ཆོས་སྐྱོང་ཚོགས། །མཐོང་གྲོལ་དྲན་གྲོལ་རེག་གྲོལ་དང་། ཐོས་པ་ཙམ་གྱིས་རྒྱུད་གྲོལ་བར། །བྱིན་གྱིས་རློབས་ཤིག་སྤྱན་རས་གཟིགས། །བར་ཆད་སོལ་ཅིག་གསང་བའི་བདག །དངོས་གྲུབ་སྩོལ་ཅིག་ཕག་མོ་ཡུམ། །བྱིན་ཆེན་ཕོབ་ཅིག་རིག་འཛིན་རྣམས། །མཐུན་རྐྱེན་སྒྲུབས་ཤིག་ཛམ་བྷ་ལ། །དགྲ་བགེགས་སྒྲོལ་ཅིག་གཤིན་རྗེའི་གཤེད། །ཆོམ་རྐུན་ཆིངས་ཤིག་འོད་ཟེར་ཅན། །རྟོགས་པ་སྐྱེད་ཅིག་གྲུབ་ཐོབ་རྣམས། །ཞག་གྲངས་དེ་ཙམ་རྫོགས་ནས་ནི། །རྣམ་གཡེང་བར་ཆད་མི་ལྡང་བར། །བསྒྲུབ་པའི་རྒྱལ་མཚན་ཚུགས་པ་ཞིག །བདེན་ལྡན་ཀུན་གྱིས་བདེན་པ་དང་། །ཆོས་སྐྱོང་སྲུང་མའི་སྟོབས་ཀྱིས་ཤོག །གནས་མདོ་ནང་དུ་དབང་དང་ཆོས། །རྗེས་མ་བཙུགས་དུས་སྨྲས་པའོ།། ༈ །།ན་མོ་ཨཱ་ཡུཛྙཱ་ན་ཡེ། །པདྨ་འབྱུང་གནས་རྩ་བ་གསུམ། །མི་འབྲལ་སྙིང་ནས་གསོལ་བ་འདེབས། །མི་འགྱུར་རྡོ་རྗེའི་བར་ཆད་སོལ། །སྐུ་ཚེ་བརྟན་ཅིང་ཕྲིན་ལས་རྒྱས། །ས་གཏེར་རྟེན་འབྲེལ་མྱུར་
འགྲིགས་ནས། །འགྲོ་དོན་རྒྱ་ཆེན་འགྲུབ་པར་ཤོག །ཅེས་པ་སྒྲ་རྒྱལ་འབྲུག་གི་ལོ། །མགོ་ཡི་ཟླ་བའི་ཚེས་བཅུ་ལ། །བཀའ་བརྒྱད་བཙུགས་སྐབས་རྟེན་འབྲེལ་བྲིས། །ཀརྨ་ཨ་རཱ་གས་སོ།། ༈ །།ན་མོ་རཏྣ་ཏྲ་ཡཱ་ཡ། དཀོན་མཆོག་གསུམ་དང་རྩ་བ་གསུམ། །བཀའ་སྲུང་དམ་ཅན་རྒྱ་མཚོ་ཡི། །བདེན་པ་ཆེན་པོའི་མཐུ་སྟོབས་ཀྱིས། །དབང་ཆོས་འདི་ལ་བར་ཆད་མེད། །བདེ་སྐྱིད་ཕུན་སུམ་ཚོགས་པར་ཤོག །དེ་ཡང་ཚེས་བཅུར་དགོང་བྱུང་བྲིས།། ༈ །།ན་མོ་རཏྣ་ཏྲ་ཡཱ་ཡ། བདག་ཅག་སྐྱབས་གཅིག་བསླུ་བ་མེད་པ་ཡི། །དཀོན་མཆོག་གསུམ་དང་རྩ་བ་གསུམ་པོ་ལ། །ཉེ་གནས་མ་ཕམ་སྙིང་ནས་སྐྱབས་ཞུ་ཡི། །དུས་མིན་འཆི་དང་ནད་ཀྱི་གནོད་པ་ཟློག །གང་ལ་ཕྱག་འཚལ་མཚན་ནས་བརྗོད་པ་ལ། །ནད་རིགས་ཐམས་ཅད་ཞི་བའི་སྨོན་ལམ་ཅན། །བཅོམ་ལྡན་སྨན་བླ་མཆེད་བདུན་ལ་ཕྱག་འཚལ། །སངས་རྒྱས་བདེན་པས་མ་ཕམ་ནད་ཞི་ཤོག །མཚན་ནས་བརྗོད་དང་རིག་སྔགས་འཛིན་པ་རྣམས། །ཚེ་ཟད་པ་ཡང་ཚེ་བསྲིང་སྨོན་ལམ་ཅན། །བཅོམ་ལྡན་ཚེ་དཔག་མེད་ལ་གསོལ་བ་འདེབས། །སངས་རྒྱས་
བདེན་པས་མ་ཕམ་ཚེ་འཕེལ་ཤོག །འཇིག་རྟེན་ཁམས་ན་འཇིགས་པས་སུ་སྐུག་པ། །སྐྱོབ་པར་ཐོག་མར་ཞལ་བཞེས་ཕྱག་མྱུར་བ། །འཕགས་མ་སྒྲོལ་མར་མ་ཕམ་སྐྱབས་སུ་མཆི། །ནད་དང་དུས་མིན་འཆི་བའི་འཇིགས་ལས་སྐྱོབ། །གང་ཞིག་ཤིན་ཏུ་སྙིགས་མར་གྱུར་ཚེ་ཡང་། །ཐུགས་རྗེ་བྱིན་རླབས་ལྷག་པར་མྱུར་བ་ཅན། །པདྨ་འབྱུང་གནས་ཁྱེད་ལ་འོ་དོད་འབོད། །རྗེས་འཇུག་མ་ཕམ་དུས་མིན་འཆི་བ་ཟློག །ཨོ་རྒྱན་བཀའ་སྲུང་དམ་ཅན་ཐམས་ཅད་ཀྱིས། །ཨོ་རྒྱན་རྗེས་འཇུག་དད་ལྡན་མ་ཕམ་འདིའི། །རྐྱེན་ངན་བར་ཆད་ཐམས་ཅད་ད་བཟློག་ལ། །བསྐྱེད་རྫོགས་ཉམས་ལེན་མཐར་ཕྱིན་སྡོང་གྲོགས་མཛོད། །དཀོན་མཆོག་གསུམ་དང་རྩ་གསུམ་ཐུགས་རྗེ་དང་། །ཆོས་ཉིད་ཆོས་ཅན་འགོག་དང་ལམ་གྱི་བདེན། །བདེན་ལྡན་ཇི་སྙེད་བདེན་པའི་བདེན་སྟོབས་ཀྱིས། །ཉེར་གནས་མ་ཕམ་དུས་མིན་འཆི་བ་ཟློག །ནད་མེད་བདེ་བའི་ལང་ཚོ་རྒྱས་གྱུར་ཅིག །ཅེས་པ་རང་གི་ཉེ་གནས་མ་ཕམ་ལ་ན་ཉིན་དབྱར་ནས་རྨི་ལྟས་ངན་ཅིང་ལོ་གསར་རྙིང་མཚམས་ནས་ནད་དྲག་པོས་འཆི་ལ་ཉེ་དུས་བྲིས་སོ།། ༈ །།ན་མོ་མ་ཧཱ་མུ་དྲ་ཡེ། པོ་ཊ་ལ་བཞུགས་སྤྱན་
མྱུར་མ། །སྒྲོལ་མ་ཉི་ཤུ་རྩ་གཅིག་ལ། །གསོལ་བ་འདེབས་སོ་ཕྱག་མྱུར་སྐྱོངས། །བདག་དང་བདག་ལ་ལྟོས་པ་རྣམས། །རིམས་ནད་དྲག་པོའི་འཚེ་བ་ཟློག །ལྷོ་ཕྱོགས་སངས་རྒྱས་ཞིང་ཁམས་ནས། །ཡིད་བཞིན་འཁོར་ལོ་སྤྱན་རས་གཟིགས། །སེམས་དཔའ་བྱེ་བ་ཕྲག་དང་བཅས། །གློག་བཞིན་མྱུར་བར་འདིར་གཤེགས་ལ། །བདག་དང་བདག་ལ་ལྟོས་པ་རྣམས། །རིམས་ནད་འཚེ་བ་མྱུར་དུ་ཟློག །རྔ་ཡབ་སྤྲུལ་པའི་གནས་མཆོག་ན། །མཐུ་སྟོབས་རྨད་བྱུང་ཨོ་རྒྱན་རྗེ། །རྗེས་འབྲང་རིག་འཛིན་རྒྱ་མཚོ་ལ། །ལྕེགསོལ་བ་འདེབས་སོ་ཐུགས་རྗེས་ཟུངས། །བདག་དང་བདག་ལ་ལྟོས་པའི་མི། །ནད་རིམས་དུས་མིན་འཆི་བའི་རྐྱེན། །ད་ལྟ་ཉིད་དུ་བཟློག་ཏུ་གསོལ། །མུ་ལེ་མཐིང་གི་མཚོ་འགྲམ་ནས། །དཔལ་ལྡན་ལྷ་མོ་དཔོན་གཡོག་ལ། གསོལ་བ་འདེབས་སོ་ཐུགས་དམ་བསྐུལ། །ཁྱོད་མཆོད་རིག་སྔགས་བཟླས་ལགས་ན། །དམ་ཚིག་སོམས་ལ་རིམས་ནད་དང་། དལ་ཡམས་རྐྱེན་ཁ་བཟློག་ཏུ་གསོལ། །ཁྱད་པར་རིག་པ་ཤིང་ལོ་ཅན། །དུར་ཁྲོད་གནས་པའི་ཤ་ཟ་མ། །ཁྱེད་ཀྱི་རིག་སྔགས་བདག་འཆང་གིས། །དལ་ཡམས་
རྐྱེན་ཁ་ད་ལྟ་ཟློག །བདག་གིས་བྲིས་པའི་ཡི་གེའི་དོན། །མངོན་ཤེས་དྲུག་དང་རྡོ་རྗེ་ཡི། །སྤྱན་དང་སྙན་མངའ་ཁྱེད་ལགས་པས། །དོན་གྱི་འབྲས་བུ་མཆིས་པར་མཛོད། །ཅེས་པ་རང་གི་སློབ་བུ་བརྩོན་འགྲུས་རྒྱ་མཚོ་སོགས་རིམས་ནད་ཀྱི་འཚེ་བ་ཆེན་པོས་བྲོ་འཚལ་དུས་བྲིས།། ༈ །།ན་མོ་ལོ་ཀེ་ཤྭ་ར་ཡ། ཐུགས་རྗེ་ཆེན་པོ་སྤྱན་རས་གཟིགས། །དེ་རིང་བདག་ལ་ཐུགས་རྗེས་གཟིགས། །ཀྱེ་མ་ཀྱེ་ཧུད་ཨ་ཙ་མ། །ནམ་འཆི་ཆ་མེད་མི་རྟག་པ། །མི་ལ་ཡང་ཡང་བཤད་ལགས་ཀྱང་། །རང་གིས་མ་གོ་ཨ་ཙ་མ། །དེ་རིང་མངོན་སུམ་ཐོག་ཏུ་བབ། །གཞེ་ཉིན་ལོ་ཡི་ཆོས་ར་ན། །མིག་གི་འོད་དཀར་མེད་པ་སོགས། །མ་ཕམ་འཆི་རྟགས་ཚང་བྱུང་ཡང་། །འཕོ་བ་བསྒོམ་པའི་དོན་ཡིན་སྙམ། །ད་ནི་འཕོ་བ་མ་བསྒོམས་སྨྲས། །ན་ཉིན་དབྱར་ཁ་ཐོ་རངས་ཙམ། །མ་ཕམ་ད་ལོ་ནས་འགྲོ་ཞེས། །ལུང་བསྟན་སྒྲ་ཞིག་ཐོས་སྙམ་བྱེད། །རི་ཁྲོད་གཞན་དུ་འགྲོ་འམ་སྙམ། །རྨི་ལམ་དུ་ཡང་མ་ཕམ་ཉིད། །མི་དགའ་བཞིན་དུ་འགྲོ་ཤོམ་བྱེད། །ཚེ་སྒྲུབ་བསྙེན་པ་གྱིས་དང་སྨྲས། །ད་རུང་ཨུ་དོགས་ཨུ་དོགས་བསམ། །ཅེ་
རེ་ལང་ཚོད་ཨ་ཙ་མ། །རང་གཞན་ཐམས་ཅད་འདི་དང་འདྲ། །ཨུ་དོགས་བསམ་ཞིང་རང་མགོ་འཁོར། །འཆི་བདག་ཐོག་ཏུ་ཕྱིན་ཙམ་ན། །སྨན་དང་སྔགས་དང་དམིགས་པ་དང་། །སྲུང་ཟློག་ཀུན་གྱི་ནུས་པ་རྡུགས། །དཔེར་ན་ད་རེས་མ་ཕམ་བཞིན། །ཐམས་ཅད་ཆོས་ཉིད་འདི་དང་མཚུངས། །ཉམས་ལེན་དམ་ཆོས་བསྒྲུབ་བསམ་ཡང་། །ལོང་མེད་མ་ཕམ་ཤི་དང་འདྲ། །ངོ་སྤྱོད་མངོན་སུམ་འདི་ལ་ལྟོས། །ལོ་འགའ་ཉེ་གནས་འདྲིས་ཆེ་བས། །སྙིང་རྗེ་བཟོད་གླགས་མི་གདའ་སྟེ། །གཉེན་འདུན་རྣམས་ཀྱིས་མཐའ་བསྐོར་ཡང་། །སྲོག་ཆད་པ་ཡི་ཚོར་བ་ནི། །རང་ཉིད་གཅིག་པུས་མྱོང་བར་འགྱུར། །གསུངས་པ་དེ་ཉིད་མངོན་སུམ་མཐོང་། །ཟུག་གཟེར་ཁུར་རོགས་བྱེད་ཐབས་རྡུགས། །ཁོ་ཉིད་གྲོགས་མེད་གཅིག་པུར་འགྲོ། །ཕྱིན་ཆད་འཕྲད་པ་མི་འོང་བ། །འདི་ལ་བསམ་ན་སྐྱོ་བ་ལ། །ཀུན་ཀྱང་འདི་འདྲ་ཤ་སྟག་ཡིན། །བདག་གི་ཉེ་གནས་མ་ཕམ་དེ། །ཆུང་ནས་རབ་ཏུ་བྱུང་བ་དང་། །སྡོམ་པ་དམ་ཚིག་བསྲུང་བ་དང་། །སྟག་ལུང་ཞབས་དྲུང་དབུ་བྱས་པའི། །བླ་མ་བཟང་དགུ་བསྟེན་པ་དང་། །བསྐྱེད་རྫོགས་ཉམས་ལེན་བྱས་
པ་དང་། །གཏོར་མ་རྒྱལ་བ་རྒྱ་མཚོ་སོགས། །ཐམས་ཅད་ཆག་མེད་རེམ་པ་དང་། །དབང་བསྐུར་བརྒྱ་ཕྲག་མང་པོ་དག །ཐོབ་པ་ལ་སོགས་དུས་གསུམ་དུ། །དགེ་བའི་རྩ་བ་ཅི་བསགས་ཀུན། །ཕྱོགས་བཅུའི་སངས་རྒྱས་ཀུན་ལ་འབུལ། །མཆོད་སྤྲིན་ནམ་མཁའ་མཉམ་གྱུར་ཅིག །དེ་ཡི་དགེ་བ་གཅིག་བསྡུས་ཏེ། །མར་གྱུར་སེམས་ཅན་ཀུན་ལ་བསྔོ། །ཀུན་ཀྱང་སངས་རྒྱས་མྱུར་ཐོབ་ཤོག །དགེ་བ་དེ་དག་གཅིག་བསྡུས་ཏེ། །མ་ཕམ་རྒྱུད་ལ་ད་ལྟ་ཉིད། །མངོན་སུམ་ཉིད་དུ་སྨིན་གྱུར་ཅིག །དེ་ཡི་ནུས་པ་ད་ལྟ་ཉིད། །འཆི་བ་འོད་གསལ་ཆོས་ཀྱི་སྐུ། །ངོས་ཟིན་བརྟན་པ་ཐོབ་གྱུར་ཅིག །དེ་ནས་འཕོས་ཚེ་སྤྱི་གཙུག་ན། །བསམ་ཞིང་ཆགས་མེད་ཞེན་མེད་དུ། །བདེ་ཆེན་ཞིང་དུ་འཕོ་གྱུར་ཅིག །གཟུགས་སྐུ་སྐྱེ་གནས་བར་མ་ཆོད། །བདེ་བ་ཅན་དུ་པདྨ་ལ། །བརྫུས་སྐྱེས་སྤྲུལ་སྐུ་ཐོབ་གྱུར་ཅིག །རྒྱལ་བ་སྲས་བཅས་ཐུགས་རྗེ་དང་། །ཆོས་ཉིད་རྣམ་པར་དག་པ་དང་། །བདེན་ལྡན་ཀུན་གྱི་བདེན་སྟོབས་དང་། །རྩ་བ་གསུམ་གྱི་མཐུ་སྟོབས་ཀྱིས། །བསྔོ་བ་སྨོན་ལམ་འགྲུབ་གྱུར་ཅིག །ཉེ་གནས་ཚེ་ལས་འདས་པའི་ཉིན། །
ངག་བཅད་སྨྲེ་སྔགས་ཡི་གེར་བྲིས། ༈ །ན་མོ་མ་ཧཱ་ཀ་རུ་ཎི་ཀཱ་ཡེ། ཐུགས་རྗེ་ཆེན་པོ་སྤྱན་རས་གཟིགས། །རྡོ་རྗེའི་སྙན་དང་ཡེ་ཤེས་སྤྱན། །དུས་དྲུག་སེམས་ཅན་ཐམས་ཅད་ལ། །བུ་གཅིག་བཞིན་དུ་བརྩེར་དགོངས་པ། །དེང་འདིར་བདག་ལ་དགོངས་སུ་གསོལ། །ང་ཡི་ཉེ་གནས་མ་ཕམ་དེ། །གཤིན་རྗེའི་སྐྱེས་བུས་ཁྲིད་ནི་ཐལ། །ར་མདའ་མཛོད་ཅིག་སྤྱན་རས་གཟིགས། །འཆི་ཁ་ནད་གཅོད་ཟུག་གཟེར་ཆེ། །ཚེ་འདིར་སྒྲིབ་པ་མི་ཆེ་ཡང་། །ཚེ་རབས་མང་པོའི་སྡིག་སྒྲིབ་ཀུན། །ཟུག་གཟེར་དེ་ཡིས་བྱང་བ་རུ། །བྱིན་གྱིས་རློབས་ཤིག་སྤྱན་རས་གཟིགས། །ཚེ་འདིར་སྲོག་བཅད་སྤངས་ན་ཡང་། །ཚེ་རབས་དུ་མར་སྲོག་བཅད་པའི། །ལས་ཀྱི་རྣམ་སྨིན་ལན་ཆགས་ཀུན། །ད་རེས་ཚེ་ནི་ཐུང་བ་དེས། །ལྷག་མ་མེད་པར་བྱང་བ་རུ། །བྱིན་གྱིས་རློབས་ཤིག་སྤྱན་རས་གཟིགས། །ཚེ་འདིར་བླ་མ་མང་པོ་མཇལ། །དབང་ལུང་ཁྲིད་རིམ་རྒྱ་མཚོ་ཐོབ། །སྡོམ་གསུམ་ཉེས་སྐྱོན་མེད་པ་དང་། །ཐོས་བསམ་བསྒོམ་ལ་འབད་པ་དང་། །བདག་དང་མི་འགྱུར་རྡོ་རྗེ་ཡི། །ཆགས་ཕྱི་དཀའ་ལས་གང་བྱས་དེས། །ད་རེས་
བར་དོ་འདི་ཉིད་ནས། །རྩལ་པོ་ཆེ་ཡིས་མདའ་འཕང་བཞིན། །བདེ་ཆེན་ཞིང་དུ་སྐྱེ་བ་ཅིག །ཐུགས་རྗེས་ཟུངས་ཤིག་སྤྱན་རས་གཟིགས། །སྤྱིར་ནི་འབྲེལ་ཐོགས་ཚེ་འདས་ཀུན། །ཁྱད་པར་ཉེ་གནས་མ་ཕམ་གྱི། །སྐྱིད་སྡུག་རེ་ས་ང་བས་མེད། །ང་ཡི་རེ་ས་སྤྱན་རས་གཟིགས། །འབྲེལ་ཐོགས་ཚེ་འདས་ཐམས་ཅད་དང་། །མ་ཕམ་ཐུགས་རྗེས་མ་བཏང་ཞིག །རང་དང་ལས་འབྲས་དབང་བཙན་ཏེ། །གཤིན་རྗེ་ཆོས་ཀྱི་རྒྱལ་པོས་ཀྱང་། །ལས་འབྲས་གང་གདའ་མ་གཏོགས་པ། །ལས་འབྲས་བཅོས་སུ་མེད་ན་ཡང་། །ལམ་རྒྱུད་ལྔ་ཡི་བདག་པོ་ནི། །ཚངས་པ་ཀུན་འཇིགས་ཞེས་བྱ་བ། །འཕགས་པ་སྤྱན་རས་གཟིགས་དབང་ཁྱེད། །ལས་ལ་དབང་བའི་སྟོབས་མངའ་བས། །སྐྱེ་གནས་མཐོ་དམན་ཁྱེད་དབང་ཆེ། །དེ་སྐད་མོའུ་འགལ་མདོ་ལས་གསུངས། །དེ་ཕྱིར་མ་ཕམ་ལ་སོགས་པ། །བདག་ལ་འབྲེལ་ཐོགས་ཚེ་འདས་ཀུན། །ལས་སྒྲིབ་ཤིན་ཏུ་ཆེ་ན་ཡང་། །ཁྱེད་ཀྱི་ཐུགས་རྗེའི་མཐུ་སྟོབས་ཀྱིས། །ལས་ངན་སྒྲིབ་པ་ཟིལ་མནན་ནས། །ད་རེས་སྐྱེ་བ་གཞན་དག་གིས། །བར་མ་ཆོད་པར་ནུབ་ཀྱི་ཕྱོགས། །
བདེ་བ་ཅན་གྱི་ཞིང་ཁམས་སུ། །སྐད་ཅིག་ལག་པ་བརྐྱང་བསྐུམ་ལ། །འདྲེན་པར་མཛོད་ཅིག་སྤྱན་རས་གཟིགས། །སྣང་བ་མཐའ་ཡས་སྤྱན་སྔ་རུ། །ཐུགས་དམ་ཞལ་བཞེས་མ་སྙེལ་ཞིག །ཞིང་དེར་མེ་ཏོག་པདྨ་ཡི། །སྦུབས་ལ་སྐྱེ་བ་ལེན་པ་རུ། །བྱིན་གྱིས་རློབས་ཤིག་སྤྱན་རས་གཟིགས། །ཁྱད་པར་ཨོ་རྒྱན་རིན་པོ་ཆེ། །ཁྱེད་ལ་འབོད་ཅིང་ཤི་བའི་མི། །མ་ཕམ་བདེ་ཆེན་ཞིང་དུ་དྲོངས། །གཞན་ཡང་བདག་ལ་རེ་ལྟོས་པའི། །ཚེ་འདས་བར་དོའི་འཕྲང་ནས་སུས། །བདེ་བ་ཅན་གྱི་ཞིང་ཁམས་སུ། །མྱུར་བ་ཉིད་དུ་འདྲེན་དུ་གསོལ། །མ་མགོན་ཡེ་ཤེས་ཆོས་སྐྱོང་རྣམས། །བར་མ་དོ་རུ་འཇུག་ཚེ་ཡང་། །ཞིང་ཁམས་དག་པར་ཁྲིད་གསུངས་ན། །མ་ཕམ་ལ་སོགས་ཚེ་འདས་ཚོ། །བདེ་བ་ཅན་གྱི་ཞིང་དུ་སྐྱོལ། །དེ་སྐད་མ་ཕམ་ཕུང་པོ་ཡང་། །རི་ལ་བསྐྱལ་འདྲོག་རྒོད་ཀྱིས་ཟོས། །སྐྱོ་བ་སྐྱེས་ནས་སྨྲེ་སྔགས་འདི། །རེ་ས་ཡི་དམ་ལྷ་ལ་བོས། །བོས་པ་སྙན་ལ་གསན་པ་དང་། །རེ་བ་དོན་དང་ལྡན་པར་ཤོག། ༈ །ན་མོ་ལོ་ཀེ་ཤྭ་ར་ཡེ། སྐྱབས་དཀོན་མཆོག་གསུམ་དང་རྩ་བ་གསུམ། །ལྷ་ཐུགས་རྗེ་ཆེན་པོའི་
བདེན་པ་ཡིས། །བུ་ཉེ་གནས་མ་ཕམ་རྣམ་ཤེས་དེ། །མི་བདག་གི་མདུན་འདིར་མཆིས་གྱུར་ན། །ཚིག་འདི་དག་མངོན་སུམ་ཐོས་གྱུར་ཅིག །བུ་མ་ཕམ་ཆུང་ནས་ཆོས་སྒོར་ཞུགས། །དབང་བཀའ་ལུང་རྒྱ་མཚོ་ལྟ་བུར་ཐོབ། །ད་སྡོམ་པ་དམ་ཚིག་མ་ཉམས་པར། །ཁྱོད་ཤི་བ་མ་ཡིན་གྲུབ་པ་ཡིན། །དུས་སྙིགས་དུས་ཆོས་མགོ་ཐོན་པ་དཀའ། །ཁྱོད་ཤི་བས་སྡུག་རྒྱུ་མེད་དོ་བུ། །རྗེ་རྫོགས་པའི་སངས་རྒྱས་མན་ཆད་ནས། །མར་འཇག་མའི་སྲིན་བུ་ཡན་ཆད་ཀུན། །དེ་མི་འཆི་བྱ་བ་གཅིག་ཀྱང་མེད། །ཁྱོད་གཅིག་པུ་མིན་ཏེ་ཀུན་ལ་འོང་། །ཁྱོད་མ་ཕམ་ཤི་བའི་སྡུག་བསྔལ་སྤོང་། །སྔོན་བར་དོའི་དབང་ཁྲིད་མང་པོ་ཐོབ། །ད་དེ་ཚོ་མ་བརྗེད་ཡིད་ལ་ཁོད། །ཁྱོད་མ་ཕམ་ཤི་ནས་ཞག་པོ་གསུམ། །དུས་ད་རེས་ཚེས་བཅུའི་ཉི་དྲོས་བཞི། །ཁྱོད་ཤི་བ་ཡིན་མིན་ཐེ་ཚོམ་སྐྱེ། །བུ་མ་ཕམ་ཤི་བ་ཐག་ཆོད་ཡིན། །ཁྱོད་མ་སྐྲག་མ་སྔངས་རིགས་ཀྱི་བུ། །བུ་ཁྱོད་ཀྱི་ཡི་དམ་སྤྱན་རས་གཟིགས། །ལྷ་རྒྱལ་བ་རྒྱ་མཚོའི་བསྐྱེད་རིམ་བསྒོམ། །ཁྱོད་ཤ་ཁྲག་གདོས་བཅས་ལུས་མེད་པར། །ཁྱོད་ཡིད་ལུས་ཐུགས་རྗེ་ཆེན་པོའི་སྐུ། །ལྷ་རྒྱལ་བ་རྒྱ་
མཚོ་དངོས་སུ་གྱུར། །དེ་ལྷ་སྐུ་ཕྱག་རྒྱ་ཆེན་པོ་ཡིན། །དེ་སྒོམ་མཁན་སེམས་ལ་ཧྲིག་གེ་ལྟོས། །སེམས་སྟོང་པ་གཟུགས་དང་དངོས་པོ་མེད། །དེ་ཆོས་སྐུ་ཀུན་བཟང་ཡབ་ཡུམ་ཡིན། །དེ་སྟོང་པའི་ངང་ནས་གཟུགས་ཀྱི་སྐུ། །དཔེ་ནམ་མཁར་ཤར་བའི་འཇའ་ཚོན་བཞིན། །ལུས་ཡི་དམ་རྒྱལ་བ་རྒྱ་མཚོ་བསྒོམ། །བུ་མ་ཡེངས་མ་འཁྲུལ་མ་ཕམ་པ། །ལུས་ཤ་ཁྲག་ཕུང་པོ་བྱ་ཡིས་ཟོས། །སེམས་རིག་པ་བར་དོར་འཁྱམས་ནི་གདའ། །ད་བླ་མ་དང་མཆེད་གྲོགས་སྲིང་མོ་སོགས། །སུ་གང་ལའང་མ་ཆགས་རིགས་ཀྱི་བུ། །རྒྱུ་དངོས་པོ་གང་གདའ་བསྔོ་འབྲེལ་ཞུ། །དེ་ཀུན་ལ་མ་འཕྲེང་རིགས་ཀྱི་བུ། །ཁྱོད་སྡུག་རྒྱུ་མེད་དོ་སྐྱིད་པ་ཡིན། །ལྷ་ཞི་ཁྲོ་རབ་འབྱམས་སུན་མ་ཡོད། །ལྷ་ཐུགས་རྗེ་ཆེན་པོའི་རྒྱབ་རྟེན་ཡོད། །ཆོ་ག་དང་བསྔོ་སྨོན་གྱི་སྐྱེལ་མ་ཡོད། །དུས་དེ་རིང་རྒྱུ་འབྲས་མ་སླེབས་པ། །མི་སྡིག་ཆེན་ཡང་གྲོལ་བའི་གསེབ་ལམ་ཡིན། །ཁྱོད་འགྲོ་ས་འདི་ནས་ནུབ་ཀྱི་ཕྱོགས། །གནས་བདེ་བ་ཅན་གྱི་ཞིང་ཁམས་ཡོད། །ཁྱོད་ཉི་ཟླ་མིག་གིས་མི་མཐོང་བས། །ནུབ་གང་ཡིན་ཐག་ཆོད་མ་བྱུང་ན། །རྗེ་སངས་རྒྱས་འོད་དཔག་མེད་པ་དེ། །
གར་བཞུགས་པའི་ཞིང་ཁམས་ཡིད་ལ་ཟུང་། །ནུབ་བདེ་བ་ཅན་གྱི་ཞིང་ཁམས་ན། །དཔལ་བཅོམ་ལྡན་སངས་རྒྱས་འོད་དཔག་མེད། །དེ་དངོས་སུ་དམ་ཆོས་གསུང་ཞིང་ཡོད། །ལྷ་ཡི་དམ་ཐུགས་རྗེ་ཆེན་པོ་དང་། །དཔལ་ཕྱག་ན་རྡོ་རྗེ་མཐུ་ཆེན་ཐོབ། །དེ་ཐམས་ཅད་དེ་ན་དངོས་སུ་བཞུགས། །དེ་མཇལ་ལ་ཡུད་ཙམ་སྔ་འཕྱི་ཡོད། །གནས་འཁོར་བ་སྡུག་བསྔལ་རྒྱ་མཚོ་འདིར། །སྔོན་གྲངས་མེད་དུས་ནས་ད་ལྟའི་བར། །སྡུག་མཐའ་མེད་སྐྱེ་རྒས་ན་འཆི་མྱོང་། །མར་ངན་སོང་གཡང་ས་ཡ་རེ་ང་། །ཡར་ལྷ་་མའི་བདེ་བ་རྨི་ལམ་ཙམ། །ད་འཁོར་བའི་གནས་འདི་བཙོན་དོང་ཡིན། །བུ་མ་ཕམ་བཙོན་དོང་འདི་ནས་བྲོས། །ནུབ་བདེ་བ་ཅན་གྱི་ཞིང་ཁམས་སུ། །སེམས་ཐེ་ཚོམ་ཡིད་གཉིས་མེད་པར་སོང་། །དེར་འགྲོ་བའི་ལམ་སོ་ཐམས་ཅད་ན། །མི་ཁྱོད་ཀྱི་ཕ་མ་ང་ཡིན་ཟེར། །མི་ཁྱོད་ཀྱི་ཉེ་དུ་ང་ཡིན་ཟེར། །མི་ཁྱོད་ཀྱི་ཟླ་གྲོགས་ང་ཡིན་ཟེར། །ཤ་ཚ་ཚ་བྱེད་ནས་འབོད་པ་ཀུན། །ཁྱོད་ཐར་ལམ་དགག་པའི་བར་ཆད་ཡིན། །དེར་མ་ཉན་མ་ལྟ་ཆགས་ཞེན་སྤོངས། །རང་ཡི་དམ་རྒྱལ་བ་རྒྱ་མཚོ་བསྒོམ། །ལྷ་སྣང་བ་མཐའ་ཡས་
མཇལ་ནས་ཀྱང་། །གསུང་དམ་ཆོས་ཞུ་བ་སྙིང་ལ་ཆོངས། །ཞིང་དེ་ན་སྡུག་བསྔལ་མིང་ཡང་མེད། །དུས་རྟག་ཏུ་བདེ་སྐྱིད་ཕུན་སུམ་ཚོགས། །དུས་རྟག་ཏུ་སངས་རྒྱས་མཇལ་བ་དང་། །དུས་རྟག་ཏུ་དམ་ཆོས་ཉན་པ་དང་། །དུས་རྟག་ཏུ་ཆོས་ལ་སྤྱོད་ཆོག་པས། །གདན་མེ་ཏོག་པདྨའི་ཟེའུ་འབྲུ་ལ། །བུ་མ་ཕམ་སྐྱེ་བ་ལེན་པ་ཡི། །སེམས་ཐེ་ཚོམ་མེད་པར་འདུན་པ་གཏོད། །བུ་མ་ཕམ་ཚེ་ཡི་དུས་བྱས་ནས། །དུས་ཞག་གསུམ་ཉི་མའི་དྲོས་བཞི་ཡིན། །བུ་ཉེ་གནས་མ་ཕམ་འདིར་མ་བཞུགས། །ནུབ་བདེ་བ་ཅན་དུ་ཏ་ལེ་ཚུབྱོན། །ཆོ་ག་དང་བསྔོ་སྨོན་གྱིས་སྐྱེལ་མ་བྱེད། །ཚིག་དེ་སྐད་རྒྱལ་ཟླའི་ཚེས་བཅུར་སྨྲས། །དེ་སྨྲས་པ་དོན་དང་ལྡན་པར་ཤོག། ༈ །།ན་མོ་གུ་རུ་པྲ་ཝ་ཀ་ར་ཡེ། ཐུགས་རྗེ་ཅན་གྱི་པདྨ་འབྱུང་། །མངོན་ཤེས་དབང་བཅུ་ཁྱེད་ལ་མངའ། །དེ་ཕྱིར་བདག་གི་ཡི་གེ་འདི། །པད་འབྱུང་ཐུགས་ཀྱིས་མཁྱེན་པར་གསོལ། །བདག་དང་བདག་ལ་ལྟོས་བཅས་རྣམས། །བར་ཆད་དབང་དུ་མི་འགྲོ་བར། །ཚེ་དང་སྒྲུབ་པ་མཐར་ཕྱིན་ནས། །ཚེ་གཅིག་སངས་རྒྱས་འགྲུབ་པ་ཞིག །པདྨ་འབྱུང་གནས་ཁྱེད་རང་
མཁྱེན། །དུས་ངན་སྙིགས་མའི་ཡང་མཐའ་འདིར། །ནད་མུག་མཚོན་གསུམ་རླུང་ལྟར་འཁྲུག །དགྲ་ཇག་ཆོམ་རྐུན་མེ་ལྟར་འབར། །བདུད་དང་ལྷ་སྲིན་ཁ་རླངས་འཕྱོ། །འདི་འདྲ་ཁྱེད་ཀྱི་འདུལ་ཞིང་ལགས། །བར་ཆད་རྐྱེན་ངན་ཐམས་ཅད་སོལ། །བསམ་པ་ལྷུན་གྱིས་གྲུབ་པ་ཞིག །ཨོ་རྒྱན་ཆེན་པོ་ཁྱེད་རང་མཁྱེན། །ཐེ་ཚོམམེད་པར་གསོལ་བ་འདེབས། །བློ་སྙིང་བྲང་གསུམ་ཁྱེད་ལ་གཏད། །ཅི་མཛད་སྐྱིད་སྡུག་ཁྱེད་ལ་རེ། །ཐུགས་རྗེའི་ཐུགས་དམ་མ་གཡེལ་ཅིག །ཁྱེད་ལ་འགྲོ་བའི་དོན་ལས་མེད། །ཐུགས་རྗེ་བྱིན་རླབས་གློག་བས་མྱུར། །མཐུ་སྟོབས་རྫུ་འཕྲུལ་ཐོགས་པ་མེད། །ང་ཡི་རེ་ས་ཁྱེད་གཅིག་པུ། །རྔ་ཡབ་གླིང་ནས་སྤྱན་གྱིས་གཟིགས། །བདག་ཅག་འཁོར་བཅས་བྱིན་གྱིས་རློབས། །རྒྱལ་ཟླའི་ཡར་ཚེས་བཅུ་ཡི་ཉིན། །སྐྱོ་རུང་དེ་ཡི་ངང་ནས་འོ་དོད་འདི། །ཕ་ཨོ་རྒྱན་སྙན་ལ་གསན་པར་ཤོག། ༈ ན་མོ་གུ་རུ་དྷེ་ཝ་དྷཱཀི་ནཱི་ཧཱུྃ། བདེ་བ་ཆེན་པོའི་ཞིང་ཁམས་ན། །གཏེར་ཆོས་སྟོན་པ་སྣང་མཐའ་ཡས། །གཏེར་ཆོས་བསྟན་པ་ཐུགས་རྗེས་གཟིགས། །བསྟན་འཛིན་མི་འགྱུར་
རྡོ་རྗེ་ལ། །འཆི་མེད་ཚེ་ཡི་དངོས་གྲུབ་སྩོལ། །ས་གཏེར་མྱུར་དུ་ཐོན་ནས་ཀྱང་། །གཏེར་སར་བསྟན་པ་དར་བ་གཅིག །སྟོན་པ་སྣང་བ་མཐའ་ཡས་མཁྱེན། །པོ་ཊ་ལ་ཡི་གནས་མཆོག་ནས། །གཏེར་ཆོས་ཡི་དམ་སྤྱན་རས་གཟིགས། །ཐུགས་རྗེ་ཆེན་པོ་ཞི་དང་ཁྲོ། །མི་འགྱུར་རྡོ་རྗེ་སྲུང་སྐྱོབ་མཛོད། །བར་ཆད་བདུད་ཀྱིས་མི་ཚུགས་ཤིང་། །ས་གཏེར་གསར་དུ་ཐོན་པ་ཡི། །དངོས་གྲུབ་སྩོལ་ཅིག་ཡི་དམ་ལྷ། །རྔ་ཡབ་ཟངས་མདོག་དཔལ་རི་ནས། །གཏེར་གྱི་མངའ་བདག་ཨོ་རྒྱན་རྗེ། །ལུང་ཟིན་མི་འགྱུར་རྡོ་རྗེ་ལ། །བྱིན་རླབས་ས་གཏེར་དངོས་གྲུབ་ནི། །དུས་ལ་མ་གཡེལ་ད་ལྟ་སྩོལ། །དུས་རྟགས་ཐམས་ཅད་སྔར་ནས་ཚང་། །གཏེར་ལུང་ཐམས་ཅད་རྫུན་ལ་ཉེ། །ད་ནི་ཐུགས་རྗེ་དུས་ལ་བབ། །མཁའ་སྤྱོད་མཁའ་འགྲོའི་ཚོགས་ཁང་ན། །བདེ་ཆེན་རྒྱལ་མོ་དུང་སྨན་མ། །ཁྱོད་རང་སྔོན་གྱི་དམ་བཅའ་དགོངས། །ཐུགས་སྲས་མི་འགྱུར་རྡོ་རྗེ་ལ། །ཁ་བྱང་ཤོག་སེར་གནང་རེ་རན། །བྱིན་རླབས་དངོས་གྲུབ་དུས་ལ་བབ། །མ་ནིང་དྷ་ཀི་སྡེ་ལྔ་དང་། །དམ་ཅན་རྒྱ་མཚོ་ཐུགས་དམ་ཅན། །སྔོན་གྱི་དམ་བཅས་བརྗེད་དམ་ཅི། །ལུང་
ཟིན་མི་འགྱུར་རྡོ་རྗེ་ལ། །དབང་སྐལ་ཆོས་རྣམས་ད་མྱུར་སྤྱོད། །ཕ་ནོར་བུ་ལ་མི་གཏད་དམ། །པད་འབྱུང་དམ་ལ་མི་གནས་སམ། །རང་གི་དམ་ཚིག་རང་འདྲ་ལ། །དེ་བས་དམ་ལ་མ་འདའ་བར། །མི་འགྱུར་རྡོ་རྗེའི་སྡོང་གྲོགས་མཛོད། །དགྲ་དང་བགེགས་ཀྱི་བར་ཆད་ཟློག །དབང་སྐལ་ཆོས་རྣམས་ཕྱག་ཏུ་སྤྱོད། །པད་འབྱུང་བསྟན་པ་རྒྱས་པར་མཛོད། །རྒྱལ་གྱི་ཟླ་བའི་ཡར་ཚེས་བཅུར། །ཚེས་བཅུ་བྱེད་པའི་འདོན་མཚམས་སུ། །སྤྲུལ་སྐུ་ཡིད་ལ་འཕྲེང་ནས་བྲིས། །བྲིས་པ་དོན་དང་ལྡན་པར་ཤོག །ཨ་ཨ་ཀརྨ་ཆགས་མེད་ཁྱོད། །མི་ལ་ཆོས་བཤད་ཁྲིད་འགའ་བཙུགས། །ཚེ་ལ་ངེས་པ་མེད་རབས་དང་། །འཆི་བདག་བཟློག་པའི་ཐབས་མེད་ཚུལ། །འདུས་པའི་མཐའ་ནས་བྲལ་བ་དང་། །སྐྱེ་བའི་མཐའ་མ་ཤི་བ་སྟེ། །འཁོར་བར་སྙིང་པོ་མེད་ཚུལ་དང་། །མང་པོ་གཞན་ལ་བཤད་པ་ཚོ། །རང་གི་ཡིད་ལ་མེད་ལགས་སམ། །བཅོམ་ལྡན་ཐུབ་པ་ཆེན་པོ་དང་། །སྐུ་ཚེ་འདུ་བྱེད་བཏང་བའི་ཚེ། །ཤཱ་རིའི་བུ་སོགས་དགྲ་བཅོམ་རྣམས། །མྱ་ངན་སྐུ་ལུས་སྤངས་བ་དང་། །ཚེ་དཔག་མེད་ཀྱིས་སྤྱན་རས་
གཟིགས། །མྱ་ངན་མི་འདའ་བཞུགས་དགོས་ཞེས། །ཞུ་བ་ཕུལ་ཕྱིར་བཏང་ན་ཡང་། །བཞུགས་པའི་ཐབས་མེད་མྱ་ངན་འདས། །ང་ལས་ནུས་ཀྱི་རྒྱལ་པོ་ཡང་། །གླིང་བཞི་ལྷ་གནས་ཕྱེད་དབང་བ། །ལྟུང་ནས་སྨྲེ་སྔགས་དང་བཅས་པས། །དེ་ཚོ་ཐོས་པའི་ཡུལ་ཡིན་ཀྱང་། །མངོན་སུམ་རྒྱལ་བ་ཡབ་སྲས་དང་། །བོད་སོག་རྒྱལ་པོ་དབང་ཆེན་འགའ། །སྐུ་རིམ་སྨན་དཔྱད་ནུས་པ་རྡུགས། །འདས་ནས་སོང་བ་མ་མཐོང་ངམ། །ལོ་ལྔ་མིག་སྔར་འཁོད་པ་ཡི། །ངོ་འདྲེས་ཙམ་ལས་ལྷག་པ་ཡི། །ལྷན་ཅིག་སྐྱེས་པའི་ཤ་རུས་ཀྱང་། །སོ་སོར་འབྲལ་བ་མི་ཤེས་སམ། །ཕ་མ་བུ་ཚ་སྤུན་ཟླ་དང་། །གྲྭ་སློབ་གྲོགས་མཆེད་ཡོན་བདག་སོགས། །ཐམས་ཅད་ཚོང་འདུས་མགྲོན་པོ་འདྲ། །ཡུན་རིང་མི་རྟག་སོ་སོར་འགྲོ། །ཕྱིན་ཆད་མི་འཕྲད་གར་སོང་མེད། །འཁོར་བའི་མཚན་ཉིད་མ་ལགས་སམ། །དེ་ལྟར་འཁོར་བར་འཁོར་བའི་ཚེ། །ཉེ་དུ་ཤི་བའི་མྱ་ངན་གྱི། །མཆི་མ་བསགས་ཀྱང་རོལ་མཚོ་ཙམ། །དེ་ལ་སྙིང་པོ་ཅང་མེད་པར། །རྒྱལ་བས་གསུངས་པ་མ་མཐོང་ངམ། །གཉེན་དང་བྲལ་ལམ་བྲལ་དགོས་པ། །མི་ཡི་སྡུག་བསྔལ་ཆ་ཤས་
ཙམ། །དེ་ནས་འཇིགས་པ་ནད་དང་འཆི། །ད་གཟོད་འོང་བ་མི་ཤེས་སམ། །དེ་དག་ཐམས་ཅད་ཤེས་བཞིན་དུ། །སེམས་སྡུག་བྱེད་པ་བྱིས་པའི་བློ། །མ་ཕམ་ཆུང་ནས་རབ་ཏུ་བྱུང་། །ཚུལ་ཁྲིམས་གཙང་མར་ཤི་བ་དེ། །ཤི་བ་མ་ཡིན་གྲུབ་པ་ཡིན། །མཆེད་གྲོགས་རྣམས་ལ་ཞེ་འཁོན་མེད། །དབང་ལུང་རྒྱ་མཚོ་ལྟ་བུར་ཐོབ། །དམ་ཚིག་མ་ཉམས་གཙང་མ་ལ། །ཤི་བ་མ་ཡིན་གྲུབ་པ་ཡིན། །བར་དོ་ཐོས་གྲོལ་ངོ་སྤྲོད་ལས། །རྩ་བའི་བླ་མ་འཛོམས་ན་རབ། །གསུངས་ཕྱིར་རྩ་བའི་བླ་མ་ཡིས། །ངོ་སྤྱོད་ལམ་སྟོན་དགོགས་ཞག་སོགས། །བྱེད་པ་བསོད་ནམས་རབ་ཏུ་གདའ། །འཆི་ཁ་ནད་གཅོད་སྡུག་བསྔལ་ལ། །རྒས་གཞོན་ཁྱད་པར་མེད་པར་གསུངས། །འཆི་ལ་མི་འཚེར་མེད་ན་ཡང་། །མ་ཕམ་ཟུག་གཟེར་ཆེ་སྐབས་སུ། །མ་ཕམ་ཉིད་ཀྱི་བསམ་པ་ལ། །ཤི་ཡང་སྡུག་རྒྱུ་མེད་བསམ་པ། །བདག་གི་མཐོང་བའི་སྣང་བ་བྱུང་། །ཕྱིར་ནངས་རྡུལ་བྱང་ལ་བྲིས་ནས། །ཁྱོད་ཀྱིས་འདི་འདྲ་བསམ་དོ་སྟེ། །རྡར་སྐད་མི་དགོས་ཨུ་དོགས་ཞེས། །སེམས་བསོའི་ཡི་གེ་བྲིས་གཏད་པས། །གཡག་གུ་ཡོད་པ་ཕྱག་ཏུ་ཕུལ། །
གསོན་ཤོག་གནང་བར་ཞུའོ་ཟེར། །ཐུགས་དམ་གསལ་པོ་ཟིན་འདུག་སྟེ། །ཕྱིར་ནངས་ཐོ་རངས་ཉམས་སྣང་ལ། །མ་ཕམ་ཕ་ཀིར་ཡོད་འདུག་པས། །ཡ་ད་ཟེར་ནས་འགྱོད་པ་ཡི། །ཚིག་གཅིག་སྨྲ་བ་ཐོས་སྙམ་པས། །ཐུགས་དམ་བྱི་བས་ཟོས་པ་ཡི། །རྣམ་ཤེས་འཕོས་པའི་རྟགས་སུ་སྣང་། །དེ་ནུབ་ཉམས་དང་རྨི་ལམ་མཚམས། །ད་ནས་དེ་ཅི་ཟིན་གྱིས་ཞེས་ཟེར། །རྒྱལ་པོ་རྒྱལ་སྲིད་ཆགས་པ་དང་། །སྤྲང་པོ་དབྱུག་པ་ཆགས་པ་གཉིས། །འདྲའོ་ཟེར་བ་ཡིད་ལ་ཤར། །ནས་དེ་མེད་པར་གྱིས་ཤིག་སྨྲས། །དེ་ནས་བདུན་ཕྲག་གཅིག་གི་སོ། །རྨི་ལམ་ཡད་ཡུད་མ་ཕམ་འཕྲད། །མ་ཕམ་ཁྱོད་ནི་ཤི་བ་ཡིན། །མ་འདུག་བདེ་བ་ཅན་དུ་སོང་། །དེ་སྐད་ལན་གསུམ་བསྐྱར་ནས་སྨྲས། །དེ་ནས་མེད་དེ་སོང་བ་ཡིས། །འོན་ཀྱང་ལོ་ལྔ་དུས་རྒྱུན་དུ། །འབྲལ་མེད་དྲུང་དུ་བསྡད་པ་སྟེ། །ཡང་ཡང་དྲན་ཅིང་སེམས་སྐྱོ་ནས། །སེམས་སྡུག་མྱ་ངན་བྱུང་བ་ཡིས། །རང་གིས་རང་ལ་སེམས་བསོ་འདི། །རྒྱལ་ཟླའི་བཅུ་གསུམ་ཉིན་པར་བྲིས།།་་།།ན་མོ་ལོ་ཀེ་ཤྭ་ར་ཡེ། རང་དོན་གཞན་དོན་གང་ཡིན་པ། །མཁས་པ་རྣམས་ཀྱིས་
མཁྱེན་པ་ཡིན། །རྨོངས་པ་རྣམས་ཀྱིས་ཤེས་པར་དཀའ། །སེམས་ཅན་ཀུན་གྱིས་རང་དོན་བསྒྲུབ། །མ་བསྒྲུབས་འཁོར་བའི་རྒྱ་མཚོར་ལྟུང་། །སེམས་དཔའ་རྣམས་ཀྱིས་གཞན་དོན་མཛད། །རང་ཉིད་མངོན་པར་རྫོགས་སངས་རྒྱས། །གཞན་དོན་སྙིང་ནས་བསྒྲུབ་ནུས་ན། །རང་དོན་དེ་བས་ལྷག་གཞན་མེད། །རང་དོན་ཆེ་འདིར་བདེ་སྐྱིད་ནི། །བསྒྲུབ་ཀྱང་འགྲུབ་མཁན་རེ་རེ་ཙམ། །གལ་ཏེ་འགྲུབ་ཀྱང་ཡུན་མི་རིང་། །གཞན་དོན་བསྒྲུབས་པས་རང་གི་དོན། །འགྲུབ་པ་ཆོས་ནས་གསུངས་པ་སྟེ། །འཇིག་རྟེན་ལ་ཡང་དེ་དང་མཚུངས། །ཀུན་ལ་བྱམས་དང་སྙིང་རྗེ་ཆེ། །དེ་ནི་རང་ཉིད་བླ་མར་གྱུར། །རང་གི་གང་ཤེས་ཡོན་ཏན་ཀུན། །ཕན་སེམས་གཞན་ལ་སྙིང་ནས་སློབ། །དེ་ནི་ཀུན་གྱིས་སློབ་དཔོན་བསྐུར། །སྡེ་ལ་ཕན་སེམས་སྤྱི་ཆོས་སུ། །རང་ཉིད་ལུས་སྲོག་ལོངས་སྤྱོད་བཏང་། །དེ་ནི་ཀུན་གྱི་དཔོན་དུ་གྱུར། །འགྲོ་བ་སེམས་ཅན་བདེ་བའི་ཕྱིར། །རང་གི་སྒོ་གསུམ་དགེ་སྦྱོར་བརྩོན། །དེ་ནི་མངོན་པར་སངས་རྒྱས་ཐོབ། །བདག་ཀྱང་ལོ་བདུན་དབང་ལུང་གི །མན་ངག་སྒོ་སྐྱེལ་བྱེད་དུ་ཕྱིན། །
བསམ་པ་གཞན་དོན་བསམ་ན་ཡང་། །རང་དོན་ཟང་ཟིང་ཤུགས་ཀྱིས་བྱུང་། །ཆབ་མདོའི་འབུལ་སྡུད་བྱས་པ་ཡི། །གདུལ་བྱའི་ཞེ་འདོད་ཆེ་བ་དེས། །ཅུང་ཟད་གདུལ་བྱ་ཆུང་བ་འདྲ། །སེམས་བསྐྱེད་གཙོ་བོའི་གནད་གཅིག་རྟོགས། །བླ་མ་བསོད་ནམས་མགོན་པོ་ཡང་། །སྡེ་ཡི་སྤྱི་ཚོས་དགོངས་པའི་ཕྱིར། །ལྷ་ཐོག་སྤྱི་དཔོན་བྱུང་བ་ཡིན། །རང་དོན་རི་ཁྲོད་བཟུང་བ་ན། །སྤྱི་དཔོན་མི་འོང་བྱ་བྲལ་འོང་། །དེ་སྐད་ལྷ་ཐོག་བླ་མ་ཡི། །མགྲོན་གཉེར་ལ་ནི་ཀུ་རེའི་གསུང་། །འགའ་རེ་གསུངས་པ་ཐོས་པ་ན། །དྲན་ནས་ཡི་གེར་བྲིས་པ་ཡིན།། ༈ །།ན་མོ་བཛྲ་པཱ་ཎི་ཡེ། བདག་མཆིས་བཙུན་པ་ཆགས་མེད་ངས། །བུང་བ་ལྟ་བུའི་སྤྱོད་པ་ཡི། །བླ་མ་སློབ་དཔོན་མང་པོ་ལ། །དབང་ལུང་གདམས་པ་མང་དུ་ཞུས། །རང་གིས་དབང་ལུང་མ་ཐོབ་པར། །གཞན་ལ་དབང་ལུང་ངས་མི་སྤོབས། །བླུན་སྒོམ་ཨུ་ཚུགས་མ་བྱས་པས། །གྲྭ་ས་འགྲིམ་ཞིང་སློབ་གཉེར་བྱས། །གསར་རྙིང་རྒྱུད་སྡེའི་རྣམ་བཞག་ཤེས། །འོལ་ཚོལ་བློ་བཟོ་ངས་མི་ཕོད། །ས་དགེ་བཀའ་བརྒྱུད་རྙིང་མ་ཡི། །དགོངས་བཞེད་སོ་སོར་དབང་ལུང་
ཤེས། །ཕ་ཞྭ་མ་ལྷམ་སྤྲད་དོན་མེད། །ཆོ་ག་རྒྱས་བསྡུས་འབྲིང་པོ་ཤེས། །གཏི་ཐུག་རིགས་འགྲེས་ངས་མི་དགོས། །སྣང་བ་དཔེ་ཆར་མ་ཤར་ཏེ། །ཤེས་རབ་རིག་པ་ནང་ནས་རྡོལ། །བཤད་པ་བཟུང་བཤར་ངས་མི་དགོས། །ཀུན་མཁྱེན་ཡེ་ཤེས་མ་ཐོབ་སྟེ། །གསར་རྙིང་དབང་ལུང་བསྒྲུབ་པའི་སྐོར། །བལྟས་པ་ཙམ་གྱིས་དེ་དོན་ཤེས། །དབང་བསྐུར་རྒྱས་བསྡུས་ཐམས་ཅད་ལ། །འབྱོར་པ་རབ་དང་དབང་པོ་ནི། །ཐ་མར་རྡུལ་ཚོན་དཀྱིལ་འཁོར་དགོས། །འབྱོར་པ་འབྲིང་དང་དབང་པོ་འབྲིང་། །རས་བྲིས་དཀྱིལ་འཁོར་བྱ་བར་གསུངས། །འབྱོར་པ་ཐ་མ་དབང་པོ་རབ། །ཚོམ་བུའི་དཀྱིལ་འཁོར་ཆོག་པར་བཤད། །འོན་ཀྱང་དབང་པོ་ཐ་མ་ཡིས། །ཚོམ་བུའི་དཀྱིལ་འཁོར་ལ་བརྟེན་ནས། །དཀྱིལ་འཁོར་དབང་བསྐུར་མི་བསྣུབ་གསུངས། །གྲུབ་པ་ཐོབ་པའི་རྣལ་འབྱོར་པས། །ཡེ་ཤེས་སྤྲུལ་པའི་དཀྱིལ་འཁོར་དུ། །དབང་བསྐུར་དབང་རྫས་མི་ལྟོས་གསུངས། །དབང་པོ་འབྲིང་དང་ཐ་མ་ཡིས། །དལ་ཞིང་ལོང་སྐབས་བྱུང་བ་ན། །བདག་མདུན་བུམ་གསུམ་བདག་འཇུག་ལེན། །ཅུང་ཟད་བྲེལ་ན་བདག་བསྐྱེད་
བྱ། །མདུན་བུམ་དུས་གཅིག་སྒྲུབ་ཆོག་པ། །ས་ཀར་ཐམས་ཅད་མཚུངས་པ་ཡིན། །བདག་འཇུག་ཏིང་ངེ་འཛིན་གྱིས་བླང་། །གསང་སྔགས་རྙིང་མའི་ཁྱད་ཆོས་ལ། །ཆོ་ག་གཅིག་གིས་བདག་མདུན་བུམ། །གཏོར་བསྐྱེད་བཞི་ཁ་དུས་གཅིག་བསྒྲུབ། །ཏིང་ངེ་འཛིན་གྱིས་བདག་འཇུག་བླང་། །རྙིང་མའི་དབང་བསྐུར་ཐམས་ཅད་ལ། །བདག་གིས་དེ་ལྟར་བགྱིས་པ་ལགས། །དགེ་ལུགས་པ་དང་ཀར་ལུགས་སོགས། །འགའ་ཞིག་རང་གི་ཡི་དམ་ལྷ། །གནས་འགྱུར་བདག་མདུན་བུམ་པ་དུས་གཅིག་བསྒྲུབ། །དབང་བསྐུར་མཁས་པ་འགའ་ཡི་ལུགས། །རྫོགས་ཆེན་ལུགས་ལ་བདག་མདུན་བུམ། །དྲན་རྫོགས་ཅུང་ཟད་སྔགས་བརྗོད་ནས། །དབང་བསྐུར་གནམ་ཆོས་ལ་སོགས་པ། །ཚད་ལྡན་གཞུང་ལུགས་མང་པོ་དང་། །པཎ་ཆེན་རྡོ་རྗེ་གདན་པས་བཤད། །གསར་མའི་རྒྱུད་སྡེ་རྣམས་ནས་ཀྱང་། །དེ་དང་མཚུངས་པར་གསུངས་པ་སྟེ། །སྡོམ་པ་འབྱུང་བའི་རྒྱུད་ཆེན་ལས། །རྣོན་པོས་སྐད་ཅིག་རྣམ་པ་ཡིས། །བསམ་གཏན་ཉིད་ཀྱི་དཀྱིལ་འཁོར་ཏེ། །སྐད་ཅིག་རྣམ་པའི་རྣལ་འབྱོར་ནི། །རྫོགས་པའི་རིམ་པ་བསྒོམ་པར་བྱ། །ཞེས་
གསུངས་གྲུབ་ཆེན་དྲིལ་བུ་པས། །རྫུས་ཏེ་སྐྱེས་པའི་སེམས་ཅན་བཞིན། །ས་བོན་མེད་པ་རྣམ་པར་བསྒོམ། །ཞེས་གསུངས་དེ་ལ་ས་པཎ་གྱིས། །རྔོ་བཏགས་ལེགས་པར་མ་བྱས་པའི། །རྗེན་ནི་སྐད་མི་མྱང་བ་ལྟར། །སྔོན་དུ་བསྐྱེད་རིམ་མ་གོམས་པས། །དྲན་རྫོགས་བསྒོམ་པར་མི་ནུས་གསུངས། །འོན་ཀྱང་ཁོ་བོ་ལོ་བརྒྱད་ནས། །དེང་སང་བར་དུ་བསྐྱེད་རིམ་སྦྱངས། །དྲན་རྫོགས་མི་ནུས་ཅིའམ་ཕྱིར། །མངོན་བརྗོད་ལེའུ་དྲུག་པ་ནས། །ལས་དང་པོ་པ་ཡི་སྒོམ་རིམ་ནི། སྐད་ཅིག་གཅིག་གིས་སྐུ་རྫོགས་པ། །ཞེས་གསུངས་གྲུབ་ཆེན་ཀརྨ་པས། །སྐྱེ་བོ་ཕོ་མོ་མི་ནག་པ། །ཡི་གེ་མི་ཤེས་པ་ཀུན་ལ། །དྲན་རྫོགས་བསྒོམ་པ་ཕན་ཆེ་གསུངས། །སློབ་དཔོན་པདྨ་འབྱུང་གནས་ཀྱིས། །དྲན་པ་ཙམ་གྱིས་རྫོགས་པ་ཉིད། །ལྟ་བ་གྱད་ཀྱི་ལྷ་ཞེས་བྱ། །རྡོ་རྗེ་ལྟ་བུའི་ཏིང་འཛིན་ཏེ། །བསྲུང་བ་ཀུན་གྱི་མཆོག་ཡིན་གསུངས། །དེ་བཞིན་རྒྱ་སྟོན་སན་དྷ་པས། །དྲན་རྫོགས་ཕག་མོ་ལ་སོགས་པ། །བསྒོམ་པ་ནམ་མཁའི་འཇའ་ཤར་ལྟར། །དེ་ནི་ཟབ་ཅིང་ཁྱད་པར་འཕགས། །བསྐྱེད་རིམ་གསལ་པོ་མེད་ན་ནི། །ཆོ་ག་
བཏོན་ཡང་མི་ཚང་བཞེད། །གཏེར་བཞེད་སྙིང་པོའི་ཕྱག་ལེན་དང་། །དགེ་ལུགས་བླ་མ་མང་པོ་ཡིས། །རྗེས་གནང་དབང་བསྒྲུབ་མི་མཛད་པར། །གཏོར་མ་ལྷར་བསྐྱེད་སློབ་མ་ལ། །གསལ་འདེབས་བཅུག་དེས་ཆོག་པར་མཛད། །དེ་ཕྱིར་རྒྱུད་དང་རྒྱ་གཞུང་དང་། །བླ་མ་རྣམས་ཀྱི་ཕྱག་ལེན་ལྟར། །ཁོ་བོ་དྲན་རྫོགས་བསྐྱེད་རིམ་གྱི། །དབང་བསྐུར་བྱས་ཀྱང་འགལ་བ་ཅི། །འོན་ཀྱང་སེར་མོ་ཡོན་ཏན་མཁན། །གཞན་ལ་འཕེལ་རེ་ཡོད་པ་དང་། །རང་གིས་སྒྲུབ་པ་བྱེད་མཁན་ལ། །ཤིན་ཏུ་མི་ཁོམ་བྲེལ་ན་ཡང་། །རྒྱས་བསྡུས་མ་གཏོགས་བདག་མདུན་གྱི། །དབང་ཆོག་མ་བྱས་པ་ཡི་དབང་། །བསྐུར་རེ་ཁོ་བོས་མནའ་ཡིས་ཐེག །འོན་ཀྱང་སྐྱེ་བོ་མི་ནག་པ། །དབང་ལུང་སྤེལ་བའི་རེ་བ་ཟད་། །རང་གིས་བསྙེན་སྒྲུབ་མི་ཤེས་པའི། །ནད་པ་ལ་སོགས་མང་པོ་ནི། །དུས་གཅིག་གཏི་ཐུག་རྗེས་གནང་འདྲ། །བཏུད་ནས་བྱ་དགོས་ལོང་ཁོམ་མེད། །མི་ཁོམ་ད་ལྟ་འགྲོ་དགོས་ཟེར། །དེ་འདྲ་སྐད་ཅིག་དྲན་རྫོགས་སུ། །བསྐྱེད་ནས་རྗེས་གནང་བྱེད་དགོས་བྱུང་། །དེ་དོན་རུང་ངམ་ཞབས་དྲུང་ལ། །ཞུས་པས་མི་རུང་མ་གསུངས་སོ། །
བདེ་གཤེགས་གཅིག་བསྒྲུབ་ཀུན་གྱི་ངང་། །ལྷ་གཅིག་བསྙེན་པ་ལེགས་ཐེམས་ནས། །ལྷ་ཀུན་དབང་བསྐུར་རུང་ངོ་ཞེས། །རྡོ་རྗེ་ཕྲེང་བར་གསུངས་མོད་ཀྱིས། །ཡི་དམ་ཆོས་སྐྱོང་མི་གཅིག་པ། །བསྙེན་སྒྲུབ་བརྒྱ་ཕྲག་སྔར་ནས་ཐོན། །ལྷ་གཅིག་ལོ་གྲངས་བཅུ་གསུམ་བསྒྲུབས། །དབང་ལུང་ཐོབ་ཚད་ལྷ་ཀུན་སྔགས། །གཟའ་འཛིན་དུས་འགའ་བགྲངས་ནས་ཀྱང་། །འགྱུར་རྩིས་ཀུན་གྱི་བསྙེན་པ་ཐེམས། །བསྐྱེད་རིམ་འབྱང་པའི་རློམ་སེམས་ཡོད། །བདག་ལ་དབང་ལུང་ཐོབ་པ་ཀུན། །དབང་ཆོག་ཕྱག་ལེན་དག་མ་དག །ཐེ་ཚོམ་ཡིད་གཉིས་མ་བྱེད་པར། །བསྒྲུབས་ན་དག་དང་མ་དག་གི །རྟགས་མཚན་བསྒྲུབས་པའི་མཚན་མ་ཤེས། །དེ་སྐད་རང་ལ་འབྲེལ་ཆེ་བའི། །དགེ་སློང་ཞིག་གིས་འབྲུག་ཆེན་པ། །བླ་མ་བསོད་ནམས་རྒྱ་མཚོའི་དྲུང་། །གནས་མདོ་བླ་མས་དབང་བྱེད་དུས། །དབང་ཆོག་མི་འདོན་བསྐུར་འདུག་པ། །རུང་ངམ་ཞུས་པས་མི་རུང་ཞེས། །ཐུགས་ཁྲེལ་མཛད་འདུག་ཟེར་བའི་གཏམ། །རང་གི་བུ་ཆེན་གཅིག་གིས་ནི། །ཐོས་ནས་དགེ་སློང་དེ་ལ་ཡང་། །གཤེ་སྐུར་བྱེད་པ་ཐོས་པའི་
ཕྱིར། །མ་དགའི་རྟོག་པ་མ་བྱུང་སྟེ། །གནས་ཚུལ་དྲང་པོའི་གཏམ་གྱིས་ནི། །འདི་རུ་རང་གར་བྲིས་པ་སྟེ། །རྗེས་འཇུག་རྣམས་ལ་དགོས་སོ་སྙམ།། ༈ ན་མོ་མ་ཧཱ་ཡེ། ལྷག་བསམ་བསྐུལ་བའི་མདོ་ལས་ཐུབ་དབང་གིས། །རྙེད་དང་བཀུར་སྟི་དག་ལ་འདོད་མེད་པར། །ཆོས་ཀྱི་སྦྱིན་པ་བྱིན་ན་ཕན་ཡོན་ནི། །དྲན་པ་དང་ལྡན་བློ་ལྡན་བློ་གྲོས་ལྡན། །མོས་པ་དང་ལྡན་ཤེས་རབ་ལྡན་པ་དང་། །འཇིག་རྟེན་འདས་པའི་ཤེས་རབ་རྗེས་སུ་རྟོགས། །འདོད་ཆགས་ཞེ་སྡང་གཏི་མུག་ཆུང་བར་འགྱུར། །བདུད་ཀུན་གྱིས་ནི་དེ་ལ་གླགས་མི་རྙེད། །སངས་རྒྱས་ཀུན་གྱིས་དེ་ལ་དགོངས་པར་འགྱུར། །མི་མ་ཡིན་རྣམས་དེ་ལ་སྲུང་བར་བྱེད། །ལྷ་རྣམས་དེ་ཡི་ལུས་ལ་མངོན་འཇུག་ཅིང་། །མི་མཛའ་བ་རྣམས་དེ་ལ་གླགས་མི་རྙེད། །མཛའ་བོ་རྣམས་ཀྱང་མི་འབྱེད་ཚིག་བཟང་འོས། །ཡིད་བདེ་མི་འཇིགས་ཐོབ་ཅིང་མཁས་པས་བསྔགས། །ཆོས་ཀྱི་སྦྱིན་པ་རྗེས་སུ་དྲན་འགྱུར་ཏེ། །དེ་ལས་ཕན་ཡོན་ཉི་ཤུ་ཐོབ་པར་གསུངས། །དེ་བཞིན་མདོ་ལས་ཐུབ་དབང་གིས། །གང་ལ་ཕན་ཕྱིར་ང་ཡི་ཆོས། །ཚུལ་བཞིན་བསྟན་པས་མཆོད་འགྱུར་
གྱིས། །མེ་ཏོག་བདུག་པ་མར་མེ་ཡིས། །རྒྱས་པ་ཡང་དག་མཆོད་མ་ཡིན། །ཞེས་གསུངས་མཆོད་པའི་མཆོག་ཀྱང་ཡིན། །བྱམས་པ་སེང་གེའི་མདོ་ལས་ཀྱང་། །གངྒཱའི་བྱེ་སྙེད་རིན་ཆེན་གསེར་དག་གིས། །བཀང་སྟེ་གང་ལ་སྦྱིན་པ་བྱིན་པ་བས། །དུས་ངན་ཚེ་ན་ཚིགས་བཅད་གཅིག་བརྗོད་ན། །དེ་ཡི་ཕན་འདོགས་ཅི་འདྲ་དེ་འོང་མེད། །གང་གིས་གང་གཱའི་བྱེད་སྙེད་སངས་རྒྱས་ཞིང་། །རིན་ཆེན་བདུན་གྱིས་ཡོངས་སུ་བཀང་བྱས་ནས། །དགའ་རབ་སེམས་ཀྱིས་རྒྱལ་ལ་ཕུལ་བ་དང་། །གང་གིས་སེམས་ཅན་གཅིག་ལ་ཚིགས་བཅད་སྦྱིན། །རིན་ཆེན་སྦྱིན་པ་ཤིན་ཏུ་རྒྱ་ཆེན་དེས། །ཚིགས་བཅད་སྦྱིན་པ་སྙིང་རྗེས་བསྒྲུབས་དེ་ལ། །ཆར་ཡང་མི་ཕོད་གྲངས་སུ་མ་ཡིན་ན། །གཉིས་དང་གསུམ་ལ་བསམ་དུ་ག་ལ་ཡོད། །ཅེས་གསུངས་དེ་བཞིན་གསེར་འོད་དམ་པ་ནས། །སྦྱིན་པའི་ནང་ནས་ཆོས་སྦྱིན་མཆོག་ཅེས་གསུངས། །དེ་བཞིན་འཕགས་པ་དཀོན་མཆོག་བརྩེགས་པ་ལས། །མི་རྣམས་གང་ཞིག་གང་གཱའི་བྱེ་སྙེད་ཀྱིས། །འཇིག་རྟེན་ཁམས་མཆོག་རིན་ཆེན་བཀང་བྱས་ཏེ། །དགེ་མཆོག་སེམས་ཀྱིས་རྒྱལ་ལ་ཕུལ་བ་
བས། །གང་གིས་སེམས་ཅན་གཅིག་ལ་ཚིགས་བཅད་བྱིན། །རིན་ཆེན་སྦྱིན་པ་རྒྱ་ཆེན་བྱིན་པ་དེས། །ཚིགས་བཅད་སྦྱིན་པ་སྙིང་རྗེས་བསྒྲུབས་དེ་ལ། །ཆར་ཡང་མི་ཕོད་གྲངས་སུ་མ་ཡིན་ནོ། །ཞེས་གསུངས་སེང་གེས་ཞུས་པའི་མདོ་ལས་ཀྱང་། །ཆོས་ཀྱི་སྦྱིན་པས་སྐྱེ་བ་དྲན་པར་གསུངས། །ཀླུ་ཡི་རྒྱལ་པོ་རྒྱ་མཚོའི་ཞུས་པ་ལས། །ཆོས་ཀྱི་སྦྱིན་པས་ཟག་པ་ཟད་པ་ཡི། །མངོན་པར་ཤེས་པ་རྣམ་པར་དག་འགྱུར་ཏེ། །ཞེས་གསུངས་ཏིང་འཛིན་རྒྱལ་པོའི་མདོ་སྡེ་ལས། །གང་དག་སྲོག་ཆགས་ཕན་ཕྱིར་ཆོས་སྟོན་པ། །དེ་འདྲའི་མི་དེ་ཤིན་ཏུ་བརྟན་པ་ཡིན། །དེ་ཡང་གཅིག་ལ་གཅིག་ཀྱང་མི་འབྱེད་མཛའ། །བྱེ་བ་སྙེད་ཀྱི་བདུད་ཀྱིས་དབྱེ་མི་ནུས། །འཇིག་རྟེན་ཟང་ཟིང་དག་གིས་བརྟེན་པའི་མི། །དེ་དག་ཚེ་འདིའི་དོན་དུ་ཀུན་འགྱུར་གྱི། །ཟང་ཟིང་མེད་པའི་ཆོས་ལ་བརྟེན་པ་ཡི། །མི་དག་གིས་ཀྱང་རབ་ཏུ་དོན་ཆེན་འགྱུར། །ཟང་ཟིང་མེད་པའི་སེམས་ནི་ཉེར་བཞག་སྟེ། ཟང་ཟིང་མེད་པའི་ཆོས་རྣམས་རབ་བཤད་ལ། །གང་དག་ཟང་ཟིང་མེད་པའི་དགའ་ལྡན་པ། །དེ་འདྲ་དེ་དག་མྱུར་དུ་སངས་རྒྱས་འགྱུར། །ཞེས་གསུངས་དེ་བཞིན་དབང་བསྐུར་
ཕན་ཡོན་ཡང་། །གསང་བ་པ་ཡི་མཛོད་ལས་ཀྱང་། །དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ནི་སྐྱེ་བ་བརྒྱད་ལས་ནི། །མ་བསྒོམས་པར་ཡང་དངོས་གྲུབ་ཐོབ། །མཁའ་འགྲོ་སྡོམ་པ་རྒྱ་མཚོ་ལས། །སངས་རྒྱས་ཀུན་གྱི་ཡེ་ཤེས་ནི། །དབང་ལས་ཡང་དག་ཤེས་པར་འགྱུར། །དབང་མཆོག་རིག་པའི་ཡེ་ཤེས་ནི། །འབྲས་བུ་ལམ་དུ་འགྱུར་བ་ཡིན། །ལྟུང་བ་རྣམ་པར་གཞག་རྒྱུད་ལས། །དཀྱིལ་འཁོར་ཐར་པའི་གྲོང་མཆོག་འདིར། །ཞུགས་པ་དང་ནི་དབང་བསྐུར་བས། །ཕྱིར་ལྡོག་པ་ནི་ཡོད་མ་ཡིན། །འདིར་ཞུགས་བུ་རྣམས་སྐད་ཅིག་ཀྱང་། །འབྲལ་མེད་འོག་མིན་གནས་སུ་འགྲོ། །ཞེས་གསུངས་ཆོས་བཤད་དབང་བསྐུར་གྱི། །ཕན་ཡོན་འདི་རྣམས་སྙིང་ལ་འཆང་། །ཟང་ཟིང་སྙིང་ལ་མ་འཆང་བར། །ཁྱི་ཡི་ལོ་པ་ནས་བཟུང་སྟེ། །ཤིང་འབྲུག་ལོ་དེ་མ་རྫོགས་བར། །ལོ་བདུན་འགྲོ་དོན་དམིགས་རྩེ་གཏད། །སྲོག་དགྲ་ཅན་གྱི་ཆུ་ཆེན་དང་། །དཀའ་ཚེགས་ཅན་གྱི་ལ་ཆེན་དང་། །ཡ་ང་ཟ་བའི་ལམ་འཕྲང་དང་། །འཇིགས་སྐྲག་ཅན་གྱི་དགྲ་དོགས་དང་། །
དབྱར་གྱི་ཆར་ཆུ་དགུན་གྱི་ལྷགས། །ལུས་ཀྱི་ངལ་དུབ་ཁྱེད་ཀྱིས་བསད། །འོབ་ཇོ་བུདྡྷ་དམར་པོ་མན། །སྨར་ཁམས་བསམ་འགྲུབ་ལུང་པ་ཚུན། །ཚ་བའི་རྡོ་རྗེ་གཡུ་སྒྲོན་ཡན། །ས་ཁོལ་འདི་ཡི་གར་ཡང་ཕྱིན། །གསང་འདུས་དང་ནི་ཞི་ཁྲོ་ཡི། །དབང་ཁྲིད་སྦྲེལ་མ་སྒྲུབ་ཆེན་ལུགས། །ཁྲིད་ཆེན་ཉི་ཤུ་རྩ་བརྒྱད་བཙུགས། །དབང་ལ་གཞི་བླང་ཁྲིད་ཆུང་བཅུ། །རྟ་རྣ་དགོན་དང་ལ་གོང་དགོན། །ཙོག་མདའ་དགོན་དང་སོག་གསའ་གཉིས། །ཀརྨ་དགོན་དང་ལྷ་སྟེང་དགོན། །ཟུར་མང་རི་གླིང་དགའ་ལྡན་དགོན། །བདུད་རྩི་དེའུ་དང་གླུ་མདའ་དགོན། །སྐྱབས་བདུད་རི་སྒེས་ཁག་སོགས་ཀྱི། །དགེ་འདུན་མང་པོར་དབང་ཆོས་ཕུལ། །ལྷོ་པ་སྤྲུལ་སྐུ་ཤོར་ཕུ་བ། །འཁྲུལ་ཞིག་དབོན་པོ་ཁུ་དབོན་གསུམ། །ཚ་བཤི་བླ་མ་ཆོས་ཕོག་པ། །སྟག་གཉིས་ལ་སོགས་འབྲུག་པ་འགལ། །འཇང་གྲྭ་བླ་མ་ཁུ་དབོན་གསུམ། །སྒོས་སྣ་བླ་མ་ཆེ་ཆུང་ལྔ། །བླ་ཚང་བླ་མ་བསྒྲེས་གཞོན་བཞི། །སྤར་ངེ་དབོན་པོ་རྣམ་པ་གཉིས། །རི་པ་སྟོད་སྨད་བླ་མ་ལྔ། །སྐྱབས་ཆེ་བླ་མ་བདུན་དང་ནི། །བདུད་མོ་བླ་མ་ཆུང་བ་གཉིས། །ས་དཀར་བླ་མ་ཆེ་བ་
གཉིས། །བོན་པོའི་བླ་མ་གཉིས་གསུམ་ཙམ། །འོག་ལ་བླ་མ་ཁུ་དབོན་གཉིས། །རྒྱ་རའི་བུ་ཆེན་བླ་མ་གཅིག །གྲོ་རྫོང་བླ་མ་ཁུ་དབོན་གཉིས། །ཝ་པ་སྐུ་སྐྱེ་ཡབ་སྲས་གསུམ། །གོ་འཇོའི་བླ་མ་བཞི་ལྔ་ཙམ། །རྙི་བ་རབ་འབྱམས་སྐུ་མཆེད་གཉིས། །སྟོང་ནག་བླ་མ་སྐུ་སྐྱེ་གཉིས། །འཇའ་མོ་སྐུ་སྐྱེ་ལ་སོགས་པ། །སྐུ་སྐྱེའི་མིང་ཐོབ་བཅུ་ལྷག་ཙམ། །དེ་དག་རྣམས་ལ་དབང་ལུང་ཕུལ། །ཁྲིད་དང་གེགས་སེལ་བོགས་འདོན་སོགས། །སོ་སོའི་ཐུགས་བཞེད་བསྐང་བར་བྱས། །རྒྱལ་པོ་བློན་པོ་ཤོག་དཔོན་རིགས། །སྔགས་པའི་རིགས་དང་སྨན་པའི་རིགས། །ཨ་མཆོད་རིགས་དང་བྱ་བྲལ་རིགས། །རྟོགས་ལྡན་གཅོད་པ་རི་ཁྲོད་པ། །སྒྲུབ་པ་མ་དང་རང་གྲོལ་རིགས། །སོ་སོར་གང་འདོད་དབང་དང་ལུང་། །ཁྲིད་དང་ངོ་སྤྲོད་མགུ་བར་བྱས། །རྒན་རྒོན་ལ་སོགས་ཆོས་ཉན་པ། །ཁྲོམ་ཚོགས་སྟོང་ཕྲག་དུ་མ་ལ། །སྐྱབས་སྡོམ་སེམས་བསྐྱེད་སྡོམ་པ་དང་། །བསྙེན་གནས་དཀར་ཕྱོགས་སྡོམ་པ་ཕོག །ཐུགས་རྗེ་ཆེན་པོའི་བསྒོམ་ལུང་དང་། །ཐོས་པས་གྲོལ་བའི་ཐོས་གྲོལ་བཤད། །བསྒོམས་པས་གྲོལ་བའི་ཕྱག་ཆེན་
བཤད། །བལྟས་པས་གྲོལ་བའི་ཐོད་རྒལ་བསྟན། །ཟོས་པས་གྲོལ་བའི་སྐྱེ་བདུན་བྱིན། །གཟུངས་སྔགས་བྱིན་རླབས་ཅན་རྣམས་བསླབ། །མཚན་ཐོས་ངན་སོང་སྒོ་གཅོད་པའི། །སྨན་བླ་བདུན་གྱི་དབང་ལུང་བྱིན། །ཡིག་དྲུག་ལ་སོགས་དགེ་བསྐུལ་གྱི། །ཁས་ལེན་དཔག་ཏུ་མེད་པ་བྱུང་། །སྲོག་བཅད་སྤང་དང་མནའ་སྤང་དང་། །ཤ་ཁྱི་རྒྱ་རྣམས་མང་དུ་ཕུལ། །གཞན་ཡང་དགེ་བསྙེན་དགེ་བསྙེན་མ། །སྐྲ་ཕུད་བླངས་པ་དཔག་མེད་དེ། །དགེ་ཚུལ་དང་ནི་བསྙེན་རྫོགས་ཀྱི། །སྡོམ་པ་ཞུ་མཁན་མང་དུ་བྱུང་། །ཤི་ཤོག་གསོན་ཤོག་བསྔོ་འབྲེལ་གྱི། །འབྲེལ་པ་ཞུ་མཁན་གྲངས་མེད་པར། །དམིགས་མེད་བསྔོ་བས་རྒྱས་བཏབ་ཅིང་། །དཀྱིལ་འཁོར་དབུས་སུ་བྱང་བུ་བཞུས། །དེ་ལྟར་ལོ་བདུན་འགྲོ་བའི་དོན། །བྱས་པའི་བསོད་ནམས་གང་མཆིས་དང་། །རྒྱལ་བ་ཀུན་ལ་མཆོད་པ་འབུལ། །ཀུན་བཟང་མཆོད་པའི་སྤྲིན་ལྟ་བུ། །དུས་གསུམ་རྒྱུན་ཆད་མེད་གྱུར་ཅིག །འགྲོ་ཀུན་བདེ་དང་ལྡན་ཕྱིར་བསྔོ། །མྱུར་དུ་སངས་རྒྱས་འགྲུབ་གྱུར་ཅིག །དེ་ཡི་དགེ་བས་འབྲེལ་ཐོགས་རྣམས། །ཚེ་འདས་ཐམས་ཅད་རིགས་དྲུག་གི །སྐྱེ་སྒོ་ཆོད་
ཅིང་མྱུར་དུ་ནི། །བདེ་ཆེན་ཞིང་དུ་སྐྱེ་གྱུར་ཅིག །ཚེ་དང་ལྡན་པའི་ཡོན་བདག་ཀུན། །ནད་མེད་བདེ་བར་ཡུན་རིང་འཚོ། །འཕོས་ཚེ་བདེ་ཆེན་ཞིང་སྐྱེ་ཤོག །བདག་དང་འབྲེལ་ཐོགས་བླ་མ་དང་། །དགེ་འདུན་ཐམས་ཅད་སྐུ་ཚེ་བརྟན། །ཐོས་བསམ་སྒོམ་གསུམ་མཐར་ཕྱིན་ནས། །ཐུབ་བསྟན་གསལ་བར་བྱེད་གྱུར་ཅིག །དེ་ཡི་དགེ་བས་བདག་དང་ནི། །གྲྭ་སློབ་ཆགས་ཕྱི་བྱེད་རྣམས་ཀྱང་། །ཚེ་འདིར་ཚེ་རིང་ནད་མེད་ཅིང་། །སྡོམ་གསུམ་བར་ཆད་མེད་གྱུར་ནས། །ཚེ་འདི་ཉིད་ལ་སྤྱན་རས་གཟིགས། །རྒྱལ་བ་རྒྱ་མཚོ་འགྲུབ་གྱུར་ནས། །འཕོ་ཚེ་བདེ་བ་ཅན་གྱི་ཞིང་། །པདྨའི་སྦུབས་སུ་རྫུས་སྐྱེས་ནས། །སྟོན་པ་སྣང་བ་མཐའ་ཡས་དང་། །ནམ་ཡང་འབྲལ་བ་མེད་གྱུར་ཅིག །དཀོན་མཆོག་གསུམ་དང་རྩ་བ་གསུམ། །བདེན་ལྡན་ཇི་སྙེད་བདེན་པ་དང་། །ཆོས་ཉིད་རྣམ་པར་དག་སྟོབས་དང་། །རྒྱུ་འབྲས་རྟེན་འབྲེལ་མི་བསླུ་བས། །དེ་དག་གེགས་མེད་འགྲུབ་གྱུར་ཅིག །རྒྱལ་ཟླའི་དམར་པོའི་ཚེས་གཉིས་ལ། །བྲིས་པ་དོན་དང་ལྡན་གྱུར་ཅིག། །།ན་མོ་གུ་རུ་ཡེ། ང་ཡི་ཉེ་གནས་མ་
ཕམ་དེ། །སོ་བཞི་གཞོན་ནུ་ནད་མེད་དེ། །གློ་བུར་གཤིན་རྗེས་ཁྲིད་ནི་ཐལ། །ནམ་འཆི་ངེས་པ་མི་གདའ་བས། །ད་ནི་འཆི་བ་སྙིང་ནས་དྲན། །རྩེ་གཅིག་སྒྲུབ་པ་བྱེད་སེམས་ཡང་། །ལོང་ཁོམ་ཡོད་མེད་ཆ་མ་མཆིས། །དཔེར་ན་མ་ཕམ་ཉིད་དང་འདྲ། །འཆི་གྲབ་བྱེད་རྒྱུ་གཞན་མ་མཆིས། །དགེ་བ་ངོམས་པ་མ་ལགས་ཏེ། །དགེ་རྩ་ཅུང་ཟད་གང་འགྲུབ་རྣམས། །བསྔོ་བས་རྒྱས་འདེབས་བྱེད་པ་གཅེས། །བདེ་གཤེགས་ཕག་གྲུའི་གསུངས་ལས་ཀྱང་། །སྔོན་བསོད་ནམས་མ་བསགས་པ་ཅིག་མ་ལགས་ཏེ། །ཡུན་རིང་པོ་ཞིག་ནས་འཁོར་བར་འཁྱམས། །གནད་བསྔོ་བ་མ་ཤེས་གཅིག་པུས་ལེན། །ཞེས་གསུངས་ཨཱརྱ་དེ་བས་ཀྱང་། །བསྔོ་བ་མི་ཟད་མང་བ་སྟེ། །འཕེལ་བར་འགྱུར་དང་བཅས་པར་གསུངས། །བ་ཚ་ཅན་གྱི་ཆུ་ཀླུང་མདོར། །དཔེར་ན་རྒྱ་མཚོར་ཆུ་ཐིགས་ཅིག་ལྷུང་བ། །རྒྱ་མཚོ་མ་ཟད་བར་དུ་དེ་མི་སྐམ། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་ཟད། །གསུངས་པའི་ཕྱིར་ན་དགེ་རྩ་ཕན་ཡོན་བཅས། །འདི་རུ་གསལ་བཏབ་བསྔོ་བས་རྒྱས་འདེབས་བྱ། །དམ་ཚིག་མཆོག་གི་
རྒྱུད་ཆེན་ལས། །ལུས་དང་ངག་དང་ཡིད་སྟོབས་ཀྱིས། །ཅི་ནུས་པ་ཡིས་བླ་མ་ལ། །བསྙེན་བཀུར་སྲི་ཞུ་སུས་བྱས་པ། །འདི་ལ་མཐུ་དང་ནུས་པའི་ཚོགས། །བྱིན་རླབས་ཐོགས་པ་མེད་པར་འབྱུང་། །ཞེས་གསུངས་ཡེ་ཤེས་རྒྱ་མཚོའི་རྒྱུད། །གང་གི་བླ་མའི་བྱ་བ་ལ། །མཁས་པ་སྐལ་ལྡན་གང་ཡིན་དེས། །དུས་གསུམ་སངས་རྒྱས་ཐམས་ཅད་ལ། །བསྐལ་པ་བྱེ་བ་དྲུག་འབུམ་དུ། །ཕྱག་བྱས་པས་ནི་འདི་འདོན་ཆེ། །བླ་མས་བསྒོས་པ་བཞིན་བསྒྲུབས་ན། །འདོད་པ་ཐམས་ཅད་འགྲུབ་པ་དང་། །བསོད་ནམས་དཔག་ཏུ་མེད་པ་ཐོབ། །ཅེས་གསུངས་མདོ་ནི་དགོངས་འདུས་ལས། །བཀའ་ཟུར་མ་བཅག་ཆོས་བསྲུངས་ན། །ཆོས་སྐྱོང་སྲུང་མ་མཐུ་ཆེན་རྣམས། །བུ་བཞིན་རྟག་ཏུ་སྲུང་བྱེད་གསུངས། །དེ་ལྟར་བདག་གི་སློབ་དཔོན་བྱས། །དེ་སྔ་ཕན་ཆད་གྲྭ་པ་དང་། །རྟ་པ་ནོར་རྫི་ཡན་ཆད་ཀྱིས། །ཆགས་ཕྱི་དཀའ་ལས་བྱས་པ་ལ། །བསོད་ནམས་དགེ་རྩ་གང་ཐོབ་པ། །དེ་བཞིན་མདོ་ནི་དགོངས་འདུས་ལས། །ཆོས་ཀུན་མི་ཤེས་མ་གཏོགས་ཀྱང་། །མཚན་ཉིད་བཟང་ལྡན་བླ་མ་ལ། །བཀུར་སྟི་རིམ་གྲོ་ཆེར་
བྱས་པས། །འཁོར་བའི་རྒྱ་མཚོ་བརྒལ་བར་འགྱུར། །དཔེར་ན་ཞིང་རབ་གཤིན་པོ་ལ། །ས་བོན་བཏབ་ན་འཕེལ་རྒྱས་བཞིན། །ཞེས་གསུངས་དབང་ཆོས་འབྲེལ་མེད་ཀྱང་། །བདག་ལ་འབུལ་ཞབས་བྱས་ཚད་དང་། །བཀོད་པ་ཆེན་པོའི་རྒྱུད་ལས་ཀྱང་། །རྟ་དང་གླང་པོ་ནོར་གྱི་དབྱིག །རྒྱལ་སྲིད་བུ་དང་ཆུང་མ་དང་། །གསེར་དངུལ་ཟངས་ལྕགས་རིན་པོ་ཆེ། །བཟའ་བཅའ་དགའ་སྟོན་ན་བཟའ་དང་། །སྙིང་པོ་སྨན་འབུ་མེ་ཏོག་དང་། །ཆོས་དང་ཟང་ཟིང་ལོངས་སྤྱོད་རྣམས། །བླ་མ་མཉེས་ཕྱིར་ཡོན་དུ་འབུལ། །དེ་ཡི་དངོས་གྲུབ་མ་ལུས་པ། །ད་ལྟ་ཉིད་དུ་ཐོགས་མེད་འགྲུབ། །ཅེས་གསུངས་དབང་བསྐུར་ཆོས་བཤད་ཡོན། །རྟ་ནི་བརྒྱ་ཕྲག་མང་པོ་དང་། །གནག་ཕྱུགས་སྟོང་ཕྲག་མང་པོ་དང་། །ཇ་དང་གསེར་དངུལ་འབྲུ་ལ་སོགས། །གྲངས་ལས་འདས་པ་ཕུལ་བྱུང་བའི། །སྦྱིན་པའི་བསོད་ནམས་ཐམས་ཅད་དང་། །རྡོ་རྗེ་མེ་ལྕེའི་རྒྱུད་ལས་ཀྱང་། །བླ་མ་ཉིད་དང་བླ་མའི་འཁོར། །ཉེ་འཁོར་གཡོག་དང་བཅས་པ་ལ། །གསེར་ལ་སོགས་པའི་ཡོན་ཕུལ་ན། །སངས་རྒྱས་ཞིང་ཁམས་གྲངས་མེད་པའི། །གཙོ་བོ་
སྟོང་ཕྲག་གྲངས་མེད་ལ། །བསྙེན་བཀུར་མཆོད་པ་གྲངས་མེད་པས། །བསོད་ནམས་འདི་ཡི་ཆར་མི་ཕོད། །ཅེས་གསུངས་བདག་གིས་དབང་ཁྲིད་ཚེ། །བདག་དང་གྲྭ་འཁོར་ཐམས་ཅད་ལ། །གཞི་ལེན་མང་ཇ་འོ་ཞོ་མར། །ཚོགས་འཁོར་ཞི་ཁྲོ་ལ་སོགས་ཀྱི། །ཚོགས་སོགས་བསྙེན་བཀུར་བྱུང་ཚད་ལས། །སྦྱིན་འབྲས་བསོད་ནམས་གང་ཡོད་དང་། །དེ་བཞིན་དད་གུས་ཕྱག་བསྐོར་བ། །དགེ་བ་ཁས་ལེན་གང་བྱས་སོགས། །བདག་ལ་བརྟེན་ནས་གཞན་དག་གིས། །དགེ་བའི་དངོས་པོ་གང་འགྲུབ་དང་། །ཀུན་ཏུ་ཁ་སྦྱོར་རྒྱུད་ཆེན་ལས། །ཡེ་ཤེས་ཀུན་སེམས་ཞེས་བྱ་བའི། །སངས་རྒྱས་ཀུན་གྱི་སློབ་དཔོན་མཆོག །དངོས་གྲུབ་སྣ་ཚོགས་གཏེར་གཅིག་པ། །བློ་དང་ལྡན་པས་རྟག་མཆོད་བྱ། །གང་ཕྱིར་ཕྱོགས་བཅུའི་སངས་རྒྱས་དང་། །བྱང་ཆུབ་སེམས་མཆོད་བསོད་ནམས་ལས། །སློབ་དཔོན་བ་སྤུ་ཁུང་གཅིག་མཆོག །དེ་ཕྱིར་སློབ་དཔོན་མཆོད་བྱེད་པ། །སངས་རྒྱས་བྱང་ཆུབ་སེམས་དཔས་གཟིགས། །བདུད་རྩི་རྒྱ་མཚོ་འབྱུང་རྒྱུད་ལས། །ནམ་མཁའ་གང་བའི་སངས་རྒྱས་ལ། །རིན་ཆེན་སྣ་ཚོགས་སྤྲས་པ་
ཡིས། །སྟོང་གསུམ་གང་བར་ཕུལ་གྱུར་པས། །བླ་མའི་བ་སྤུ་ཉག་རེ་ལ། །མར་གྱིས་ཐིགས་པ་གཅིག་བྱུགས་པ། །བསོད་ནམས་བརྒྱ་ཕྲག་ཆར་མི་ཕོད། །མེ་ལྕེ་ཕྲེང་བའི་རྒྱུད་ལས་ཀྱང་། །གལ་ཏེ་རྣལ་འབྱོར་བློ་ལྡན་གྱིས། །རང་ཟས་གོས་ལ་གྱོང་ཁུར་ནས། །བླ་མ་རྡོ་རྗེ་མཆོད་པ་ན། །ཞིང་གི་འཁོར་ཡུག་རྒྱལ་ཁམས་ནས། །དགེ་སློང་དཔག་ཏུ་མེད་པ་ལ། །སྟོན་མོ་ལན་སྟོང་བྱས་པ་བས། །ཟས་སམ་ཡང་ན་གོས་ཀྱང་རུང་། །བླ་མ་ལན་གཅིག་མཆོད་པ་ཡི། །བསོད་ནམས་བརྒྱ་ཕྲག་བརྗོད་མི་རྫོགས། །ཞེས་གསུངས་ཕྱིར་ན་བདག་ཅག་གིས། །སྟག་ལུང་ཞབས་དྲུང་ཚེར་ལུང་པར། །སོ་སོར་བརྒྱ་འབུལ་རེ་རེ་དང་། །ཞལ་སྔ་མཁན་སློབ་རྣམ་གཉིས་ལ། །སྔ་ཕྱི་བརྒྱ་འབུལ་ཕྱེད་ལྔ་ཙམ། །མི་འགྱུར་རྡོ་རྗེར་སྔ་ཕྱི་རུ། །བརྒྱ་འབུལ་གཅིག་གིས་ཁ་བཀང་བའི། །བསོད་ནམས་དངོས་པོ་གང་མཆིས་དང་། །ཡེ་ཤེས་རྒྱ་མཚོའི་རྒྱུད་སྡེ་ལས། །ཇི་ལྟར་དགེ་སློང་ཁྲིམས་ལྡན་པ། །འབུམ་ཕྲག་དྲུག་ཅུ་རྩ་གསུམ་ལ། །ཆོས་སྟོན་ལྔ་བཅུ་རྩ་གཅིག་པས། །བླ་མའི་ཞལ་དུ་འབྲས་ཆེན་འབྲུ། །རྡོག་མ་བདུན་དྲངས་བསོད་ནམས་ལ། །
ལྔ་སྟོང་ཁྲི་ཕྲག་ཆར་མི་ཕོད། །ཅེས་གསུངས་ཕྱིར་ན་བདག་ཅག་གིས། །ལྷོ་པ་ཟུར་མང་རི་བོ་ཆེ། །བདུད་འདུལ་རྡོ་རྗེ་ལ་སོགས་པའི། །བླ་མ་ཆེ་ཕྲ་དཔག་མེད་ལ། །འབུལ་བ་ཆེ་ཕྲ་སྣ་ཚོགས་དང་། །བསྙེན་བཀུར་གསོལ་ཞབས་བྱས་པའི་དགེ །སྦྱིན་པའི་ཕར་ཕྱིན་མདོ་སྡེ་པས། །སྒོམ་བྱིན་པས་ནི་མཁས་པ་དེ། །ཀུན་ཏུ་འབར་ཞིང་རབ་འབར་བའི། །ཡི་དྭགས་ཉམ་ངར་མི་སྐྱེ་ཞིང་། །སྐོམ་པའི་གནོད་པ་འབྱུང་མི་འགྱུར། །ཁ་ཟས་བྱིན་པས་དགའ་བ་དང་། །ཚེ་རིང་སྟོབས་ལྡན་བདེ་སྐྱིད་འགྱུར། །སྐྱིད་ཅིང་བརྟན་པ་དེ་དག་ནི། །ཐོགས་མེད་སྤོབས་དང་ལྡན་པར་འགྱུར། །ཕྱུག་ཅིང་ནོར་མང་དཔལ་དང་ལྡན། །མི་ནི་དེས་ཤིང་བློ་ལྡན་ལ། །བསོད་ནམས་ལྡན་ཞིང་མཁས་ལ་ཞི། །ཁ་ཟས་བྱིན་པས་དེ་ལྟར་འགྱུར། །བཞོན་པ་བྱིན་པས་དྲང་སྲོང་ཆེ། །སངས་རྒྱས་ཞིང་ནས་ཞིང་དག་ཏུ། །བློ་ལྡན་བྱ་ཡི་ཤུགས་འདྲ་བར། །རྫུ་འཕྲུལ་གྱིས་ནི་མཁའ་ལ་འགྲོ། །གསུངས་ཕྱིར་དགོན་སྡེ་མང་པོ་ལ། །མང་ཇ་མང་དུ་བསྐོལ་བ་དང་། །གང་འོས་ཆེ་ཕྲ་མང་པོ་ལ། །རྟ་སོགས་རྐང་འགྲོས་ཕུལ་དང་བྱིན། །
ཆོས་ཞུ་འགྲིམ་འགྲུལ་སྤྲང་པོ་སོགས། །ཅི་འབྱོར་ཟས་སྐོམ་བྱིན་པ་དང་། །མར་མེ་འབུལ་བའི་མདོ་སྡེ་ལས། །མར་མེ་ཕུལ་བའི་རྣམ་སྨིན་འདི་ཡིན་ཏེ། །འཆི་དུས་བྱེད་ཚེ་དྲན་པ་ཉམས་མི་འགྱུར། །དེ་ལ་ཕྱོགས་ཙམ་སྣང་བར་བྱེད་པར་འགྱུར། །སྔོན་ཆད་མ་མཐོང་གཟུགས་བཟང་རྣམས་ཀྱང་མཐོང་། །དེ་ནི་ཤི་ནས་མཐོ་རིས་ངན་འགྲོ་ཞིང་། །ལྷ་ཡི་རྟེན་ལ་དེ་ལུས་འདུག་པར་ཤེས། །ཞེས་གསུངས་བཞིན་དུ་ཚེ་འབར་བཙུགས་པ་དང་། །ཞི་ཁྲོ་སྒྲུབ་ཆེན་དུས་དང་རྒྱུན་དུ་ཡང་། །མཆོད་ཁང་རྣམས་སུ་མར་མེ་བགྱིད་པ་དང་། །འཕགས་པ་སྤྱན་རས་གཟིགས་ཀྱི་མདོ་སྡེ་ལས། །གང་ཞིག་སྟོན་པ་མི་མཆོག་གཟུགས་བྱེད་པ། །རས་བྲིས་རྩིག་ངོས་འབྲིའམ་གསེར་ལས་བྱས། །དེ་ཡི་ཆོས་ཀྱི་ཁྱད་པར་གང་ཡིན་པ། །དེ་དག་མ་ལུས་རབ་ཏུ་བསྟན་གྱིས་ཉོན། །མི་རྟ་མ་ཡིན་ལོང་བར་བཞག་མི་འགྱུར། །སྒུར་པོར་མི་འགྱུར་ཡན་ལག་མི་སྡུག་མིན། །དེ་ནི་གཟུགས་དང་ལྡན་ཞིང་ཁ་དོག་ལྡན། །སུམ་ཅུ་རྩ་གཉིས་མཚན་གྱི་གོ་ཆར་འགྱུར། །ལུས་ནི་རྣམ་པར་དག་ཅིང་ཁྱད་པར་ཐོབ། །སྤོབས་པ་ཐོབ་ཅིང་སྒྲ་སྙན་ཡིད་དུ་འོང་། །ཤེས་བཞིན་ལྡན་
ཞིང་འཇིག་རྟེན་ཀུན་གྱིས་མཆོད། །དེ་མཐོང་སེམས་ཅན་བདེ་ཞིང་དགའ་བར་འགྱུར། །སྡིག་བྱེད་མི་འགྱུར་ཞེ་སྡང་མེད་སེམས་ལྡན། །གཡོ་སྒྱུ་མེད་ཅིང་རྒྱལ་པོ་འཁྲུག་མི་བྱེད། །མཐུ་དང་ལྡན་ཞིང་དབང་ཆེ་གྲགས་པར་འགྱུར། །ཞེས་སོགས་ཕན་ཡོན་མཐའ་ཡས་གསུངས་མཐོང་ཕྱིར། །དམ་པ་རིགས་བརྒྱ་ཐུགས་རྗེ་ཆེན་པོ་ཡི། །ཕོ་བྲང་གཉིས་དང་སྨན་བླའི་ཕོ་བྲང་གཅིག །ཚེ་དཔག་ཨོ་རྒྱན་བསྐལ་བཟང་སངས་རྒྱས་སྟོང་། །ཐུབ་དབང་འབར་སྐུ་སྟོང་སོགས་སྟོང་སྐུ་འགའ། །ཞིང་བཀོད་རྩ་བ་གསུམ་སོགས་ཐང་སྐུ་འགའ། །དངུལ་བྲིས་གླེགས་བམ་གཉིས་དང་དཔེ་ཕྲན་གྱི། །གླེགས་བམ་མང་པོ་གནམ་ཆོས་ཆ་གསུམ་སོགས། །དེ་བཞིན་སྤྱན་རས་གཟིགས་ཀྱི་མདོ་ལས་ནི། །དེ་བཞིན་གཤེགས་པ་སུས་མཆོད་པ། །དེ་ནི་ནོར་གྱི་ཕུང་པོ་ལ། །རྒྱལ་པོ་དང་ནི་ཆོམ་རྐུན་དང་། །མེ་དང་ཆུས་ཀྱང་རེག་མི་འགྱུར། །འཇིག་རྟེན་སྒྲོན་མ་མཆོད་བྱེད་པ། །ཚེ་རབས་དག་ནི་ཐམས་ཅད་དུ། །མྱ་ངན་མེད་ཅིང་གནོད་མེད་དང་། །འཁོར་ལོས་སྒྱུར་བ་འབྱོར་ཆེན་འགྱུར། །ཞེས་གསུངས་བླ་མ་དགོངས་འདུས་ལས། །ཞག་བདུན་སྔགས་
རྒྱུན་མ་ཆད་ན། །སྒྲུབ་པའི་གྲལ་ཡོད་ཐམས་ཅད་ཀྱིས། །སོ་སོས་ལོ་བདུན་བསྒྲུབས་པ་དང་། །ཕན་ཡོན་འདྲ་བར་གསུངས་པ་དང་། །རང་བཞིན་ཡིག་དྲུག་བཟླས་པ་བས། །སྒྲུབ་ཆེན་བརྒྱ་འགྱུར་ལྷག་གསུངས་པས། །ཐུབ་པ་ལྔ་བཅུ་ཟུང་ཙམ་ལ། །དགོངས་འདུས་སྒྲུབ་ཆེན་གསུམ་དང་ནི། །གསང་འདུས་བུམ་སྒྲུབ་སྒྲུབ་ཆེན་བཞི། །ཐུགས་སྒྲུབ་སྒྲུབ་ཆེན་གཅིག་དང་བརྒྱད། །དེ་བས་ཐུན་པ་ཉུང་བ་ལ། །རྒྱལ་བ་རྒྱ་མཚོ་ལ་སོགས་པའི། །སྒྲུབ་ཕྲན་འུར་འདོན་མང་འགྲུབ་དང་། །སྤྱན་རས་གཟིགས་ཀྱི་མདོ་ལས་ནི། །གང་ཞིག་སངས་རྒྱས་སྟོང་རྣམས་དང་། །བརྒྱ་དང་བྱེ་བ་འགེངས་དག་ལ། །བསྐལ་པ་གང་གཱའི་བྱེ་མ་སྙེད། །དེ་སྙེད་བསྐལ་པར་བཀུར་བ་བས། །འཇིག་རྟེན་མགོན་གྱིས་གསུངས་པ་ཡི། །དམ་ཆོས་འཇིག་ཚེ་གང་དག་གིས། །ཉིན་དང་མཚན་དུ་འཛིན་པ་ནི། །དེ་ཡི་བསོད་ནམས་ཁྱད་པར་འཕགས། །ཆོས་འཇིག་ཚེ་ན་ཆོས་འཛིན་པ། །སྔོན་གྱི་སངས་རྒྱས་ཐམས་ཅད་དང་། །སངས་རྒྱས་ཡེ་ཤེས་རབ་གནས་པ། །དེ་ནི་ང་ལ་མཆོད་པ་བྱས། །ཞེས་གསུངས་ཕྱིར་ན་དུས་འདི་ལ། །ཕྱོགས་འདིར་བསྟན་
པ་ནུབ་པའི་སྐབས། །བདག་ཅག་དཔོན་སློབ་ཐམས་ཅད་ཀྱིས། །ཐོས་བསམ་སྒོམ་གསུམ་འབད་པ་དང་། །སུ་དག་རབ་ཏུ་བྱུང་དང་འཚམས་པ་ཡི། །ཁ་ཟས་བཟང་པོ་དགེ་འདུན་སྦྱིན་བྱེད་པ། །དེ་དག་འཁོར་བའི་དགོན་པར་གནས་པ་ན། །ཁ་ཟས་ཁ་དོག་རོ་མཆོག་སོགས་ལྡན་ཐོབ། །སུ་དག་རབ་ཏུ་བྱུང་དང་འཚམས་པ་ཡི། །བཏུང་བ་རྒྱ་ཆེན་དགེ་འདུན་སྦྱིན་བྱེད་པ། །དེ་དག་འཁོར་བའི་དགོན་པར་གནས་པ་ན། །བཏུང་བ་ཁ་དོག་རོ་མཆོག་སྣ་ཚོགས་ཐོབ། །དེ་སྐད་ཐུབ་པའི་དབང་པོས་གསུངས་པའི་ཕྱིར་། །རང་འཁོར་སྡོམ་ལྡན་སེར་མོ་བཞི་བཅུ་ཙམ། །བཟའ་དང་བཏུང་བ་རྟག་ཏུ་ཕོངས་མེད་བྱས། །བདེ་མཆོག་ངེས་བརྗོད་བླ་མའི་རྒྱུད་ལས་ནི། །སྐྱེ་བོ་ཉན་ཐོས་དཔག་མེད་ལ། །རྒྱན་དང་བསོད་ནམས་སྤེལ་བ་བས། །ཚོགས་ཆུང་གཅིག་བྱས་བསོད་ནམས་ཡང་། །འབུམ་གྱི་ཆར་ཡང་མི་ཕོད་དོ། །ཞེས་གསུངས་ཕྱིར་ན་རྒྱུན་དུ་ཚོགས་འཁོར་འབད། །ཚོགས་ཆང་བག་མེད་བསྔོས་ཤ་དུག་ལྟར་འཛེམ། །དེ་བཞིན་ཐུབ་པའི་དབང་པོའི་བཀའ་ལས་ནི། །མི་རྣམས་གང་དག་དགེ་བའི་སེམས་ལྡན་པས། །རྒྱལ་པོའི་
མཆོད་པ་གཞན་གྱིས་བྱས་པ་ལ། །རྗེས་སུ་ཡི་རང་དོན་དེ་མ་བྱས་ཀྱང་། །མདོར་ན་དེ་དག་གིས་ཀྱང་བྱས་པར་འགྱུར། །གསུངས་ཕྱིར་དེང་སང་མཐོང་དང་ཐོས་པ་ཡི། །དགོན་སྡེ་བཀའ་དང་བསྟན་འགྱུར་ལ་སོགས་པ། །གཞན་གྱི་བྱེད་ལ་རྗེས་སུ་ཡི་རང་བསྒོམ། །དེ་ལྟར་བདག་ཅག་འཁོར་དང་བཅས་པ་ཡི། །བྱ་བ་ཆོས་མཐུན་དགེ་བ་ཁོ་ན་སེམས། །འོན་ཀྱང་མ་ལེགས་ཉེས་པ་གང་མཆིས་པ། རྒྱལ་བ་སྲས་དང་བཅས་པའི་དྲུང་དུ་བཤགས། །འདི་དང་ཕྱི་མར་སྒྲིབ་པར་མ་གྱུར་ཅིག །དེ་ལྟར་གཞན་གྱིས་བདག་ལ་འབུལ་བ་དང་། །དེ་ལ་བརྟེན་ནས་དགེ་ཕྱོགས་གང་བྱས་དང་། །ཆོས་དབང་དངོས་གྲུབ་རྒྱལ་མཚན་ཆོས་འཕེལ་གྱིས། །གཙོ་བྱས་གྲྭ་པ་རྫི་བོ་ཡན་ཆད་ཀྱིས། །ཚག་དང་བརྩོན་འགྲུས་སྒྱུ་བ་རོགས་ལྡན་པ། །ལྷ་བཟོ་བྲིས་པ་བཟོ་བོ་ཤིང་བཟོ་སོགས། །ཆུ་ལེན་མེ་འབུད་ཤིང་ཐུ་རྔོ་བཏགས་དང་། །ཁ་ཐེ་ལག་འབག་འབྲེལ་པ་ཐོབ་ཚད་ཀྱི། །བསོད་ནམས་དགེ་རྩ་གང་ཐོབ་ཐམས་ཅད་དང་། །མཆོད་ཁང་སྒྲུབ་ཁང་བཟོ་བའི་དཀའ་ལས་སོགས། །དེ་དག་ཀུན་གྱི་དགེ་བ་གཅིག་བསྡུས་ཏེ། །བླ་མ་སྐུ་གསུམ་ལ་སོགས་
ཕྱོགས་བཅུ་ཡི། །སངས་རྒྱས་བྱང་སེམས་ཀུན་གྱི་སྤྱན་སྔར་འབུལ། །སེམས་དཔའ་ཀུན་ཏུ་བཟང་པོའི་རྣམ་ཐར་བཞིན། །མཆོད་སྤྲིན་རྒྱ་མཚོ་ཟད་པ་མེད་གྱུར་ཅིག །དེ་ལ་བརྟེན་ནས་ཨ་ནུ་པད་དབང་སོགས། །ཞིང་གཤེགས་རྣམས་ཀྱི་ཐུགས་ཀྱི་དགོངས་པ་རྫོགས། །ས་ལམ་ཡོན་ཏན་གོང་དུ་འཕགས་གྱུར་ཅིག །མདོ་སྔགས་བསྟན་པ་དར་དྲག་ཡུན་རིང་དུ། །ནུབ་པ་མེད་པ་རྟག་ཏུ་རྒྱས་གྱུར་ཅིག །རྒྱལ་བ་ཡབ་སྲས་མི་འགྱུར་རྡོ་རྗེ་དང་། །དྲུང་སྐྱིད་ལ་སོགས་བདག་གི་བླ་མ་རྣམས། །སྐུ་ཚེ་བརྟན་ཅིང་ཕྲིན་ལས་རྒྱས་གྱུར་ཅིག །དེ་ཡི་དགེ་བ་སེམས་ཅན་ཐམས་ཅད་ལ། །བསྔོས་པས་འགྲོ་ཀུན་མྱུར་དུ་བྱང་ཆུབ་ཤོག །དེ་ཡི་དགེ་བས་ཇོ་རུ་ཚེ་དབང་སྒྲོན། །རིན་རྒྱལ་ཀརྨ་མགོན་པོ་ཐུགས་རྗེ་དང་། །གོ་ཁྲ་བར་བསྒོམ་ལྷུན་གྲུབ་མ་ཕམ་དང་། །བདག་ལ་བསྔོ་བ་བྱང་བུ་འབྲེལ་ཚད་ཀྱི། །ཚེ་འདས་ཐམས་ཅད་རིགས་དྲུག་སྐྱེ་སྒོ་ཆོད། །མྱུར་དུ་བདེ་བ་ཅན་གྱི་ཞིང་ཁམས་སུ། །པདྨའི་སྦུབས་ལས་རྫུས་ཏེ་སྐྱེ་གྱུར་ཅིག །གསོན་བསྔོ་གསོན་ཤོག་ཟས་ནོར་འབྲེལ་ཐོགས་པའི། །ཡོན་བདག་ཐམས་ཅད་ཚེ་རིང་ནད་མེད་ཅིང་། །དུས་བབ་
འཆི་ཚེ་བདེ་ཆེན་ཞིང་ཁམས་སུ། །སྐྱེ་གཞན་བར་མ་ཆོད་པར་སྐྱེ་གྱུར་ཅིག །དབང་ལུང་ཁྲིད་སོགས་ཆོས་འབྲེལ་ཐོབ་ཚད་ཀུན། །བསྐྱེད་རྫོགས་བརྟན་ཐོབ་ཉམས་རྟོགས་འཕེལ་ཞིང་རྒྱས། །རབ་ཏུ་ཚེ་འདི་འབྲིང་དུ་འཆི་ཁ་དང་། །ཐ་མ་ཡང་ནི་བར་དོར་གྲོལ་གྱུར་ཅིག །བདག་ཀྱང་རིང་དུ་འཚོ་ཞིང་བར་ཆད་མེད། །ཚེ་གཅིག་ལུས་རྟེན་འདི་ལ་མངོན་སངས་རྒྱས། །འཆི་བ་འོད་གསལ་བར་དོ་ལོངས་སྤྱོད་རྫོགས། །སྐྱེ་བ་སྤྲུལ་སྐུ་བདེ་བ་ཅན་གྱི་ཞིང་། །རྫུས་སྐྱེས་སྤྲུལ་སྐུ་འོད་དཔག་མེད་མགོན་གྱི། །རྟག་ཏུ་ཞབས་འབྲིང་བྱེད་ཅིང་ཆོས་ཉན་ཏེ། །ལུས་རྟེན་དེ་ལ་རྫོགས་སངས་རྒྱས་གྱུར་ཅིག །ཆོས་དབང་དོན་གྲུབ་རྒྱལ་མཚན་ཆོས་འཕེལ་སོགས། །བདག་ལ་རེ་ཞིང་ལྟོས་པའི་གྲྭ་རིས་རྣམས། །ཚེ་རབས་འདི་ལ་ཐུགས་རྗེ་ཆེན་པོ་འགྲུབ། །འབྲེལ་ཚད་དོན་ལྡན་སངས་རྒྱས་བསྟན་ལ་ཕན། །དེ་ལ་ནད་གདོན་དགྲ་ཡི་བར་ཆད་ཞི། །འཕོ་ཚེ་བདེ་ཆེན་ཞིང་དུ་མཉམ་དུ་འཚོ། །ཕན་ཚུན་ངོ་ཤེས་བཀའ་མཆིད་བྱེད་པར་ཤོག །བདག་གིས་བརྩམས་དང་བདག་ལ་འཕེལ་བ་ཡི། །སྡོམ་རྒྱུན་དབང་ལུང་རྒྱུན་དང་ཁྲིད་རིམ་སོགས། །དུས་ཀྱི་འཁོར་
ལོའི་རྒྱུད་ལས་གསུངས་པ་ཡི། །བསྟན་པའི་གནས་ཚད་དེ་ཉིད་མ་རྫོགས་བར། །ནམ་ཡང་ནུབ་མེད་དར་ཞིང་རྒྱས་པར་ཤོག །བདག་ལ་མོས་ཤིང་བདག་གི་རྗེས་འཇུག་རྣམས། །ཆོས་སྐྱོང་རྣམས་ཀྱིས་བུ་བཞིན་སྐྱོང་བ་དང་། །ནོར་ལྷ་རྣམས་ཀྱིས་དགོས་འདོད་ཆར་འབེབས་ནས། །ཆོས་དང་འབྱོར་པ་འབད་མེད་ལྷུན་གྲུབ་ཤོག །ཨོ་རྒྱན་ཆེན་པོའི་ཕྲིན་ལས་མ་རྫོགས་པར། །གནས་འདིར་གསང་སྔགས་བཤད་སྒྲུབ་སྡེ་རྒྱས་ཤིང་། །ཟབ་ཆོས་ཀུན་གྱི་འབྱུང་གནས་འོང་བར་ཤོག །དེ་ལ་ཆོས་སྐྱོང་ཀུན་གྱིས་དུས་རྟག་ཏུ། །སྲུང་སྐྱོབ་སྡོང་གྲོགས་གཡེལ་བ་མེད་པ་ཡི། །མངོན་རྟགས་མི་རྣམས་ཀུན་ལ་གསལ་བར་ཤོག །ལུང་བསྟན་བཞིན་དུ་བདག་གི་རྣམ་ཤེས་ཀྱིས། །དུམ་བུ་སྨན་བླ་དང་ནི་ཨོ་རྒྱན་གྱི། །ཞབས་འབྲིང་བྱེད་ཅིང་རང་གི་རྒྱུད་འཛིན་ལ། །རྟག་ཏུ་སྲུང་སྐྱོབ་ལམ་སྣ་འདྲེན་པར་ཤོག །རྣམ་ཤེས་དུམ་བུ་མི་རུ་གྱུར་གཉིས་པོ། །ཚེ་རིང་ནད་མེད་མངའ་ཐང་དགུང་ལས་མཐོ། །གསར་རྙིང་བསྟན་ལ་ཕན་ཐོགས་རྒྱ་ཆེར་ཤོག །རྒྱལ་བ་སྲས་བཅས་རྩ་གསུམ་ཐུགས་རྗེ་དང་། །ཆོས་སྐྱོང་སྲུང་མ་རྣམས་ཀྱི་མཐུ་སྟོབས་དང་། །
བདེན་ལྡན་བདེན་འགྲུབ་ཀུན་གྱི་བདེན་སྟོབས་དང་། །ཆོས་ཉིད་རྣམ་དག་རྒྱུ་འབྲས་བསླུ་མེད་མཐུས། །བདག་གི་བསྔོ་བ་སྨོན་ལམ་དེ་དག་ཀུན། །གེགས་མེད་བསླུ་བ་མེད་པར་འགྲུབ་གྱུར་ཅིག །དཀོན་མཆོག་གསུམ་ལ་ཕྱག་འཚལ་ལོ། །ཏདྱ་ཐཱ་པཉྩ་དྲི་ཡ་ཨ་ཝ་བྷོ་ཏ་ན་ཡེ་སྭཱ་ཧཱ། ༈ །།ན་མོ་གུ་རུ་པདྨ་སིདྡྷི་ཧཱུྃ། བསླུ་མེད་སྐྱབས་གནས་པདྨ་འབྱུང་། །སྙིང་ནས་ཁྱེད་རྗེས་བདག་ཞུགས་པས། །ཐུགས་རྗེ་བྱིན་རླབས་འགྲོ་དོན་འགྲུབ། །རང་ལ་མཁོས་ཁ་མ་མཆིས་ཀྱང་། །ཨོ་རྒྱན་ཆེན་པོའི་ཐུགས་རྗེ་ཡིས། །སྡེ་ཆེན་བླ་ཆེན་མང་པོ་ཡིས། །དབང་ཞུས་ཆོས་ཞུས་སྐྱབས་གནས་ཞུས། །འཁོར་ལྡན་ཡོན་བདག་མང་པོ་ཡིས། །བཀུར་སྟི་ཕུ་དུད་རྒྱ་ཆེན་བྱས། །གདུལ་བྱ་ཟང་ཟིང་མང་པོ་ཡང་། །ཕལ་ཆེར་དགེ་བའི་ཕྱོགས་སུ་ཐེངས། །རྟ་ཕྱུགས་འགའ་ཟུང་ཆོམ་རྐུན་གྱིས། །ཁྱེར་ཡང་ཆོ་འཕྲུལ་དྲག་པོ་ཡིས། །ཚུར་ལ་ལོན་དང་མ་ལོན་པར། །བཀའ་ཆད་ལོ་མ་འགོར་བར་བབ། །དྲག་ལས་གཏད་སེལ་བཞེས་འབོད་སོགས། །སྙིང་ནས་དམིགས་ངན་མ་བྱས་ཀྱང་། །སྙིང་ནས་ཨོ་རྒྱན་རྗེས་ཞུགས་པས། །བཀའ་སྲུང་
རྣམས་ཀྱིས་རང་རང་གི །དམ་ཚིག་སྲུང་བ་ཡིན་པར་གོ །དཔྱིད་སོ་ས་ཚིགས་འོང་དོགས་ནས། །ཐམས་ཅད་སྐྲག་ཅིང་བསྔངས་བའི་ཚེ། །དེ་ཙམ་མི་དགོས་ལོ་ཉེས་ཀྱང་། །འབྲུ་བཟང་སྐྱོན་མེད་འོང་བ་དང་། །སྟོན་དུས་ཕྱོགས་ཀུན་ལ་ཉེས་པས། །རང་ལ་མུ་གེ་འོང་དོགས་ཚེ། །ནས་ནི་ཅི་འོང་གྲངས་ཀ་དང་། །ངོམ་སྨད་ཆུ་དང་ལྟེ་རྒྱུད་སོགས། །ཁྲོམ་ཚོགས་འདུ་བར་དཀའ་བའི་ཚེ། །ཨོ་རྒྱན་རྗེ་ལ་གསོལ་བཏབ་ཅིང་། །ཁོ་བོ་ཨོ་རྒྱན་ལུང་བསྟན་པའི། །གལ་ཏེ་ཆོས་བདག་ཡིན་ན་ནི། །ཁྱེད་ཅག་ཡཾ། སྣང་སྲིད་ལྷ་འདྲེ་ཡིས། །ཨོ་རྒྱན་ཆེན་པོའི་བཀའ་བཞིན་དུ། །ལོ་གཞུག་འདི་ལ་འགྲོ་བའི་དོན། །རྒྱ་ཆེན་འགྲུབ་པར་མཛོད་ཅིག་ཅེས། །དཀར་གཏོར་ཕུལ་ཞིང་དམ་བརྡར་ནས། །འོག་ནས་མཚོ་ནི་བསྡུར་བ་དང་། །གཞན་ནས་རི་ནི་རབ་ཏུ་བསྡུར། །རང་དང་ཉེ་གནས་ལ་སོགས་ཀྱིས། །ཐོས་པའི་ཆོ་འཕྲུལ་འོང་བའི་སྐབས། །ཉམས་དང་རྨི་ལམ་འདྲེས་མཚམས་སུ། །གཟུགས་ནི་གསལ་བར་མ་མཐོང་ཡང་། །གཞི་བདག་རྣམས་ཀྱི་འདི་སྐད་དུ། །ངོམ་གྱི་སྟོད་སྨད་ཐམས་ཅད་དུ། །ཁྲོམ་ཚོགས་འདུས་ཞེས་ངེད་
རྣམས་ཀྱིས། །ཆ་ངག་བྱེད་ཅིང་ཡོད་དོ་ཟེར། །ངོམ་དང་ནང་ཆེན་གྲ་ནང་ནས། །གདུལ་བྱ་དགའ་རབ་འོང་བར་རྟོགས། །དེ་དང་མཚུངས་པས་ཁྲོམ་ཆེ་ཞིང་། །བླ་མ་རྣམས་ཕེབས་འགྲོ་དོན་འགྲུབ། །ཁྲག་འཐུང་བདུད་འདུལ་རྡོ་རྗེ་ལ། །བཀའ་བརྒྱད་བཙུགས་པའི་ཁས་ལེན་ཞུས། །དེ་ཕྱིར་བཀའ་བརྒྱད་དབང་མོ་ཆེ། །སྒྲུབ་ཆེན་སྦྲག་པ་བཙུགས་པ་ཡིས། །བུད་མེད་གཅིག་ཤི་གཅིག་ལ་སོགས། །སློང་དང་རྩུབ་ཉམས་ཆེ་ན་ཡང་། །ནུབ་གསུམ་ཟླ་བས་འཇའ་གུར་ཕུབ། །མར་མེ་འཛིན་སོགས་བརྡའ་ཙམ་བྱུང་། །མགོན་པོ་བཀའ་རྒྱས་དཀྱིལ་ཐང་དང་། །དབང་རྒྱུན་སྒོ་སྐྱེལ་ལ་སོགས་པ། །ལེགས་ཚོགས་རྟེན་འབྲེལ་འགའ་རེ་འགྲིག །གྲྭ་སློབ་དྲག་རིམ་ཕལ་ཆེར་ལ། །གཏེར་སར་མ་གཏོགས་གསར་རྙིང་གིས། །དབང་རྒྱུན་ཕལ་ཆེར་རྫོགས་པར་འགྲུབ། །སྣ་ཁ་འགའ་ཟུང་རྟེན་འབྲེལ་གྱིས། །མ་རྫོགས་ཚེ་ཡི་རྟེན་འབྲེལ་དང་། །གནམ་ཆོས་སྤྲུལ་སྐུ་ཉིད་ཀྱིས་ནི། །གནང་བའི་རྟེན་འབྲེལ་བྱས་ནས་བཞག །སློབ་མ་འགའ་ལ་བརྒྱུད་པ་གཏད། །གདམས་གཏད་བྱས་རྗེས་དྲེགས་པ་ཡི། །སྲོག་དབང་བྱས་ན་རུང་ངམ་
བརྟགས། །སློབ་བརྒྱུད་རྣམས་ལ་ལེགས་པ་ཡིམ། །ལྟས་བྱུང་སྲོག་དབང་རིགས་གསུམ་བྱས། །ཞག་གཉིས་སོང་ནས་མ་ཕམ་ལ། །ནད་ཕོག་ཤི་བར་གྱུར་པ་སྟེ། །བུམ་སྒྲུབ་བཙུགས་པའི་སློང་དང་ནི། །དྲེགས་པའི་སྲོག་དབང་སུམ་བརྩེགས་དེ། །བྱས་པའི་རྩུབ་སློང་འདྲ་ན་ཡང་། །དོན་ལ་ཁོང་ལ་ཚེ་མེད་ཅིང་། །ད་ལོ་ནས་ནི་འཆི་བ་ཡི། །ལུང་བསྟན་དབྱར་ནས་བྱུང་བའི་ཕྱིར། །དེ་ཚོ་མ་ཉེས་བསམ་པ་ཡི། །བློ་འགྱོད་ཙམ་ཡང་མེད་པ་ཡིན། །རང་གིས་དྲན་ནས་གཅིག་ལབ་བྱས། །བྷ་ཝནྟུ།། ༈ །ན་མོ་ཤཱཀྱ་མུ་ནེ་ཡེ། ཐམས་ཅད་མཁྱེན་པ་བཅོམ་ལྡན་འདས། །ཤཱཀྱའི་གཙོ་ལ་ཕྱག་འཚལ་ལོ། །འདྲེན་མཆོག་འོད་མཚན་དབང་པོ་ཡིས། །དབང་རྟུལ་དད་པའི་རྗེས་འབྲང་ལས། །དབང་རྣོན་ཆོས་ཀྱི་རྗེས་འབྲང་བ། །བྱུང་བ་དེ་ཉིད་མཆོག་ཡིན་ཞེས། །དངོས་སུ་བཀའ་སྩལ་ཡིད་ལ་འཆང་། །ལོངས་སྤྱོད་རྒྱ་ཆེན་ལྡན་ན་ཡང་། །མི་ཟད་དཀའ་ཐུབ་སྡུག་སྐུར་དང་། །ཟས་གོས་རྐྱེན་ནི་ཆོག་ཙམ་གྱིས། །མི་ཚིམ་སྡིག་ལྟུང་སྤྱོད་ཅིང་ཚོལ། །དར་ཟབ་ཕྲུག་ཐུལ་དོས་ལ་བརྩིགས། །སྤྲང་
ཆས་རྒེབ་བེ་གྱོན་པ་དང་། །བཙུན་ཆས་གྲྭ་ཐུལ་གྱོན་ཙམ་གྱིས། །མ་ཆོག་བཟང་དགུ་ཚོལ་བ་ཡིས། །སྡིག་ལྟུང་སྣ་ཚོགས་སྤྱོད་པ་དང་། །བཟང་པོའི་སྙན་གྲགས་འདོད་པ་ལྟཡིས་། །སྔས་སྤང་ཆབ་ལེན་ལྷམ་ཕུད་སོགས། །ལན་རེ་བརྗེད་ཀྱང་སྐྱོན་ཆེར་རྩི། །སྟོང་ཉིད་ཕྱོགས་ཙམ་རྟོགས་པ་ཡིས། །འདུལ་ཁྲིམས་བྱིས་པའི་ཆོས་ཡིན་ཟེར། །ཆང་འབྱམས་ཉིན་བཟི་མཚན་མི་དང་། །འདི་དག་ཀུན་ཀྱང་ཐུབ་པས་བཀག །རང་ཉིད་མི་དགེ་སྡིག་ལྟུང་སྤྱོད། །གཞན་ལ་རྒྱུ་འབྲས་བླང་དོར་བཤད། །རང་ཉིད་ཚིག་ངན་གཅིག་མི་ཐེག །གཞན་ལ་དགྲ་གཉེན་མཉམ་དགོས་སྐད། །རང་ཉིད་གནས་དགའ་འགྱུ་ན་སྡུག །གཞན་ལ་མ་བཅོས་བཞག་ཚུལ་འཆད། །རང་ཉིད་ཚེ་འདི་ཁོང་དུ་འཆང་། །གཞན་ལ་བྱ་བ་བཏང་ཚུལ་བཤད། །ཕན་བྱ་སོ་སྔགས་ཙམ་ཤེས་ན། །ལོབ་དོགས་ངན་སྔགས་བཞིན་དུ་གསང་། །གཞན་ཕན་བློ་སྦྱོང་སེམས་བསྐྱེད་འཆད། །མདོ་རྒྱུད་དང་ནི་མི་འགལ་བའི། །ཤུགས་འབྱུང་རིག་པ་མ་རྟོགས་པའི། །བླུན་གཏམ་གང་དྲན་ཆོས་འཆད་བྱེད། །འདོད་པ་ཁོང་མེད་འབུལ་སྡུད་ཀྱང་། །ཟས་ནོར་མི་འདོད་དགོས་མེད་
སྨྲ། །རང་ཉིད་ནམ་འཆི་ཆ་མེད་པར། །གཞན་ལ་ལེགས་ཉེས་མངོན་ཤེས་སྨྲ། །ལྐོག་ཏུ་ནག་ཆང་མི་དགེ་སྤྱོད། །ངོས་སུ་ཆོས་གོས་ཟླུམ་ཁྱེར་གཟབ། །རང་ངོ་རྗེན་པར་མ་མཐོང་བར། །བདེ་གསལ་ཉམས་ལ་མཆོག་ཏུ་རློམ། །ཡི་དམ་གཅིག་ཙམ་བསྙེན་སྒྲུབ་ལ། །རྟགས་ཐོན་ཙམ་ཞིག་མ་བྱས་པར། །རོ་བསྲེགས་དབང་བསྐུར་བྱང་བུ་བཞུ། །ཆོས་གོས་བཟང་དང་བཏང་བྱུང་བཟང་། །དེ་ལ་བླ་མ་མཆོག་ཏུ་རློམ། །གཞན་ལ་གདུལ་བྱ་བྱུང་ཐོས་ན། །རང་གི་ཤོར་བ་ཙམ་དུ་སྡུག །ཐོས་བསམ་སྒོམ་གསུམ་མི་དྲན་པར། །གདུལ་བྱ་སྙན་གྲགས་འགྲན་སེམས་ལྡང་། །རང་ལ་ལྟོས་བཅས་གྲྭ་རིས་རྣམས། །ཐོས་བསམ་སྒོམ་ལ་མི་དཀྲི་བར། །ཚོང་དང་དགྲ་འདུལ་ལས་ལ་སྦྱོར། །བསྙེན་སྒྲུབ་གཏོར་བསྔོས་དགུ་གཏོར་སོགས། །ངག་ནུས་འདོད་དང་རིམ་གྲོ་ལས། །བྱང་ཆུབ་བསྒྲུབ་པའི་སེམས་བསྐྱེད་མེད། །དྲིན་ཆེན་སློབ་དཔོན་རྣམས་ལ་ཡང་། །ད་ནི་མི་མཁོ་སྤང་སེམས་ལས། །གདུང་སེམས་བཀའ་དྲིན་དྲན་པ་མེད། །བརྒྱུད་པ་གསང་ནས་མཐོ་སར་བསྙག །བསྐྱེད་རིམ་ཨ་འཐས་ཐེར་ཟུག་གོལ། །གདོན་
ལ་ཞེ་སྡང་ཐུབ་ཐུབ་བྱེད། །ཕན་ཐོགས་བྱུང་ན་རང་ཉིད་ཀྱི། །བྱིན་རླབས་ཡིན་སྙམ་རློམ་སེམས་ལས། །ལྷ་དང་བླ་མའི་ཐུགས་རྗེ་བརྗེད། །བྱང་བུ་བསྔོ་ཞུས་བརྒྱ་བྱུང་ཡང་། །ཚེ་འདས་དེ་ལ་སྙིང་རྗེ་མེད། །རང་ཉིད་ཕོ་སྒོ་བཟང་བར་སེམས། །བསྔོ་བ་བྱང་ཞུས་ཚར་ཚུགས་ནས། །བུ་ལོན་སོད་བཞིན་དེ་ཕྱིས་བརྗེད། །ཟས་ནོར་རྒྱ་མཚོ་ལྟར་བྱུང་ཡང་། །ད་རུང་མུས་ཀྱིས་འདོད་པ་ལས། །དཀོར་གྱི་སྒྲིབ་པ་ཡིད་ལ་མེད། །དཀོན་མཆོག་ཕྱོགས་སུ་མི་གཏོང་བར། །དགྲ་འདུལ་གཉེན་སྐྱོང་ཕྱོགས་སུ་གཏོང་། །བུན་བཏང་ཚྭ་ཁེ་ཚོང་སྤྱོད་རེམ། །ཅུང་ཟད་མ་དགའི་རྩོད་བྱུང་ན། །མཐུ་མི་ཤེས་ཀྱང་མཐུ་སྡིག་བྱེད། །ཤེས་ན་ཀླུ་གཏད་སེལ་ནག་དང་། །སེར་བ་འབེབས་ལའང་ཡ་ང་མེད། །དགྲ་ཤི་ཐོས་ན་དགའ་སྤྲོ་ཆེ། །འདྲེན་དགོས་དཀའ་བསམ་ཡིད་ལ་མེད། །མི་ཚེ་གྲོང་ཆོག་འབྱམས་ན་ཡང་། །ཟས་ནོར་ཇི་རྙེད་མ་གཏོགས་པ། །རང་གཞན་གཉིས་དོན་སེམས་བསྐྱེད་མེད། །འབུལ་བ་མ་བྱུང་བརྡ་བསྙག་སྐྱེན། །ཁོ་ལ་དགོས་དུས་འགྲོ་རེ་སེམས། །ཅི་ལྟར་ཕུལ་ཡང་མགུ་བ་དཀའ། །འཁང་ཤིང་དྲིན་རྣམས་རྩི་ཞིང་
ཁྱེར། །ནད་པ་མང་པོའི་སྔས་ཕྱིན་ཡང་། །འཆི་ཁ་སྙིང་རྗེ་བསམ་པ་ཡི། །དཀྱིལ་འཁོར་དབང་བསྐུར་གཅིག་ཙམ་མེད། །རང་གི་འཕོ་བ་མ་བྱང་ཡང་། །རོ་དང་ཤ་བ་གང་སྔའི་དཔེ། །འབུལ་བ་བསམས་ནས་སྔོན་ལ་རྒྱུག །ང་སྔ་འབུལ་བ་ཆེ་དགོས་བསམ། །འཕོ་བ་ཨེ་ཐེབ་རྟགས་མ་རིག །ཆོ་ག་མང་དུ་བཏོན་ན་ཡང་། །བར་དོའི་རྣམ་ཤེས་མངོན་ཤེས་ལྡན། །དྲུང་འདིར་ཡོད་པ་སྙིང་རེ་རྗེ། །བསམ་ནས་དམིགས་པ་མི་གཏད་པར། །སྔགས་དང་ཕྱག་རྒྱ་ཏིང་འཛིན་གསུམ། །ཁྲིག་ཁྲིག་མི་འཕྲོད་ལྷག་ཆད་མང་། །བྱམས་དང་སྙིང་རྗེའི་བསམ་པ་མེད། །ཇ་དང་རྒྱ་རི་བཟང་ན་བསམ། །བསྔོས་ཤ་རྟགས་ཀྱང་ཡ་ང་མེད། །ཀུན་རིག་མི་འཁྲུགས་པ་ལ་སོགས། །འདོན་སྐབས་གསོལ་ཆང་བྱུང་ན་མཉེས། །གཤེད་དམར་རྗེས་གནང་ཙམ་ལ་ཡང་། །བཀའ་གཉན་ཟེར་ནས་ལྷ་རྟེན་རྩོད། །བྱང་གདན་ཁྲུས་གདན་ལ་སོགས་པ། །མ་འབྱོར་བྱང་བུ་བཤོལ་ལ་སྐད། །འདོད་ཡོན་ནང་གི་ཤ་ཐུད་ཀྱང་། །ལེགས་ན་རྩམ་ཁུག་ནང་དུ་བཅུག །རྟ་དང་ནོར་གྱི་སོ་གྲུས་རྩི། །བྱང་ཐལ་ཚ་ཚ་ཙམ་མི་འགྲུབ། །རོ་བསྲེག་ཐབ་ཐིག་
ཙམ་མི་ཤེས། །རྡུལ་ཚོན་མི་འབྱོར་ཆུར་ཙམ་འདེབས། །རི་མོ་རྒོ་རུས་ཟླུམ་པོར་འཐེན། །གནས་ཡིག་སྤུར་གདན་སྤུར་འགེབས་མེད། །བསྲེགས་རྫས་མི་འཛོམ་ནས་ཀྱང་འདེབས། །སྔགས་ལ་གྲངས་རྐུན་མཛེས་ཆོས་ཙམ། །མེ་དར་མར་སྣོད་མཆོད་གཞི་སོགས། །ཁ་མཆུ་ཆུང་ཆུང་གཏམ་དགོས་ཐུག །རུས་པར་ཚ་ཚ་འགའ་ཟུང་མེད། །རྒྱ་གར་གདུང་སྲེག་ཧ་ལས་རྩི། །རི་ཁྲོད་བཟུང་ཞིང་མཚམས་བསྡམས་ཀྱང་། །ཚེ་གཅིག་བྱང་ཆུབ་བསྒྲུབ་བསམ་མེད། །གཞན་གྱི་བཟང་པོར་ཨེ་མཐོང་བསམ། །ངག་ནུས་ཟློབསམ་ནས་བསྙེན་པར་རེམ། །འོན་ཀྱང་སྒྲུབ་པའི་ཐབས་མི་ཤེས། །ཆུ་ཤིང་ཡོན་བདག་ངོ་སྲུང་ལས། །རང་གི་དགེ་སྦྱོར་སད་ལ་བསྐུར། །རྙེད་པས་རྙེད་པ་ཚོལ་བའི་ཕྱིར། །རྒས་གོག་རྣམས་ལ་ཇ་ཐེབ་སྐུར། །བཙུན་མ་གཞོན་ནུ་དད་ལྡན་ལ། །རྩེ་རླུང་ཡོད་སྐད་སྡོམ་པ་བཏང་། །ལུས་ནི་དབེན་པར་གཅིག་པུ་འདུག །སེམས་ནི་རྒྱ་ཡན་རྒྱལ་ཁམས་བསྐོར། །གདུལ་བྱ་མ་བྱུང་བར་དུ་ནི། །མི་འདི་དཀའ་ཐུབ་རྡེའུ་འཆའ་ཟེར། །རྐང་བཞི་མི་ལེན་དམ་བཅའ་སྐད། །བྱུང་ན་ཅིས་ཀྱང་ཆོག་མི་ཤེས། །སྤུ་རྟགས་སོ་སོར་ཁྱུ་
བྱེད་སྐད། །དབང་རྩལ་མེད་དུས་ཉམ་ཆུང་ཞིང་། །དགྲ་དང་གཉེན་ལ་ཁྱད་མེད་སྐད། །ཉམས་པོ་བྱུང་ན་དམག་མགོ་རྒོད། །མི་ནི་བརྒྱ་སྟོང་བསད་ན་ཡང་། །མི་བསྒྲིབས་དྲངས་ནི་ཡོད་དོ་སྐད། །དབང་རྩལ་ཆུང་ན་སངས་རྒྱས་བསྟན། །ཁྱད་མེད་དག་སྣང་ཕྱོགས་མེད་ཟེར། །དབང་བྱུང་ན་ནི་རང་གི་ལུགས། །མིན་པའི་སེར་མོ་རེ་རེ་ཡང་། །མཐོང་ཐོས་ཡུལ་ནའང་འདུག་མི་འཇུག །གུང་ཚིགས་སྦྱིན་ལེན་བཟའ་ལགས་ཀྱང་། །འཕྲོག་བཅོམ་ཐུབ་ན་ཅི་ཡོད་ལེན། །དགེ་འདུན་སྡེ་ནི་མཆོག་ཡིན་ཀྱང་། །ཐོས་བསམ་སློབ་གཉེར་ཆགས་སྡང་དབང་། །འདོན་པ་ཆོས་སྤྱོད་སྤྱི་ཡི་ཁྲལ། །སྡོམ་པ་ངོ་ཚ་ཁྲིམས་ལ་སྐྲག །བྱང་ཆུབ་བསྒྲུབ་པ་ཕར་ལ་སྐྱུར། །རང་དོན་ཡིན་བསམ་ཙམ་ཡང་མེད། །ཚོང་ལ་བྲེ་སྲང་གཡོ་སྒྱུ་ཆེ། །སྙིང་ལ་འཆང་རྒྱུ་ཁེ་དང་རྒྱུ། །འདི་འདྲ་བདག་དང་བདག་འདྲ་ཡི། །རྣལ་འབྱོར་རྣམས་ལ་ལེགས་དཔྱད་ན། །ཐུབ་དབང་བཀའ་དང་རྒྱབ་འགལ་བས། །དད་པ་འགྲོ་དཀའ་བདེན་ན་ཡང་། །དེ་ལྟར་གཞན་སྐྱོན་ལྟ་མི་རུང་། །གཞན་སྐྱོན་མཐོང་བ་རང་སྐྱོན་ཡིན། །སངས་རྒྱས་སེམས་
ཅན་ཁྱད་པར་ཡང་། །སྣང་བ་དག་དང་མ་དག་ཁྱད། །རྒྱལ་བ་ཡབ་སྲས་རྣམས་ཀྱིས་ཀྱང་། །དགེ་འདུན་སྡེ་ལ་ཚོགས་ཕྱག་འཚལ། །དཔེར་ན་ཐུབ་པའི་འདག་སྐུ་ཡང་། །ཤཱཀྱ་ཐུབ་པ་ག་ལ་ཡིན། །འོན་ཀྱང་དེ་ལ་བཀུར་སྟི་དང་། །དད་གུས་བྱས་ན་ཕན་ཡོན་ཐོབ། །དེ་བཞིན་བླ་གཟུགས་སེར་ཆགས་ཀུན། །ཚད་ལྡན་ཡིན་མིན་མང་ན་ཡང་། །དད་གུས་བྱས་ན་ཕན་ཡོན་ཐོབ། །ལོགས་ལྟ་བསྒོམས་ན་ཉེས་སྒྲིབ་སོགས། །དེ་ཕྱིར་དག་སྣང་བསྒོམ་པ་མཆོག །རང་ཉིད་ཆོས་དང་མི་མཐུན་ཞིང་། །ཉམས་རྟོགས་ཕོ་བྱེད་མེད་ན་ཡང་། །གཞན་ལ་ཆོས་བཤད་བྱས་པ་ཡི། །ཕན་ཐོགས་ཉམས་རྟོགས་སྐྱེས་པ་དང་། །དགེ་བ་ཁས་ལེན་སྡིག་སྤང་སོགས། །ཕན་ཐོགས་མང་པོ་འོང་བར་མཐོང་། །འོན་པས་དུང་བུས་ལྟ་བུ་ཡི། །ཆོས་བཤད་གཞན་ཕན་འབྱུང་ལུགས་ལ། །བལྟས་ན་དོན་ལྡན་ཆོས་གསུངས་རྣམས། །ཕན་ཡོན་རྒྱ་ཆེན་སྨོས་ཅི་དགོས། །བསམས་ཤིང་ཆོས་ལ་དད་གུས་བསྐྱེད། །དབང་སྒྲུབ་མ་ཚར་གློ་བུར་དུ། །གཏོར་མའི་བྱིན་རླབས་རེ་རེས་ཀྱང་། །ནད་པ་གཉིད་ཁུག་བདེ་མཐོང་ན། །ཅི་བཞིན་དབང་བསྐུར་ཞིབ་རྒྱས་པའི། །
ཕན་ཡོན་རྒྱ་ཆེན་སྨོས་ཅི་དགོས། །བསམ་ཞིང་རང་ཡང་བདག་འཇུག་ལེན། །བྱང་བུ་དབང་བསྐུར་རོ་ལ་བྱ། །སེང་གེའི་རྒྱལ་པོ་ཡི་དམ་བསྟན། །རྔོན་པས་ངུར་སྨྲིག་གོས་གྱོན་ནས། །དུག་མདའ་བརྒྱབ་ནས་བགྲངས་པའི་དུས། །དད་པ་མ་ལོག་ལན་མ་བྱས། །དེ་ཡི་བསོད་ནམས་ཚོགས་རྫོགས་པའང། །བསམ་ཞིང་སེར་མོ་གྱོན་ཚད་ལ། །གུས་འདུད་དག་སྣང་བཀུར་སྟི་བྱ། །རང་སངས་རྒྱས་པ་མཐོང་མྱོང་བའི། །སྤྲེའུ་ལུས་གནད་བསྟེན་པ་བཞིན། །བྱས་པས་མང་པོས་དགྲ་བཅོམ་ཐོབ། །ལོ་རྒྱུས་འདི་ལ་བསམས་བྱས་ནས། །ཉམས་རྟོགས་མེད་པའི་ཁྲིད་སྟོན་ལའང་། །གཤེ་དང་འཕྱ་བར་མི་བྱའོ། །མདོར་ན་རང་གི་སེམས་རྒྱུད་ལ། །བརྟགས་ན་སྐྱོན་རྣམས་གང་འདུག་པ། །སྤང་བའི་ཐབས་ལ་འབད་བྱ་ཞིང་། །གཞན་སྐྱོན་མི་ལྟ་མི་གླེང་བར། །ཀུན་ལས་རང་ཉིད་དམན་པར་ལྟ། །རང་རྒྱུད་གཙང་བར་འགྱུར་བ་དང་། །སྒྲུབ་པ་མི་གསོག་ཚོགས་རྫོགས་པའི། །གདམས་ངག་ཟབ་མོ་ཡིན་པར་ངེས། །དོན་ལ་འཁོར་འདས་མཉམ་པ་ཉིད། །དག་དང་མ་དག་གཙང་མི་གཙང་། །ལེགས་དང་མ་ལེགས་བཟང་དང་
ངན། །ཐམས་ཅད་ཡེ་ནས་སྤྲོས་དང་བྲལ། །རྣམ་དག་ཆོས་སྐུ་ཀུན་ཏུ་བཟང་། །དེ་ལས་ནམ་ཡང་མ་གཡོས་པས། །ལྟ་བའི་ཞེ་ཕུག་འདི་འཆང་ནས། །གྲུབ་མཐའ་བཟང་རྒྱུན་ལྟ་གྲུབ་དང་། །བརྒྱུད་པ་གཙང་དང་དམ་སེལ་དང་། །སྐྱེ་རྒྱུད་བཟང་ངན་ལུས་རྟེན་སོགས། །གཉིས་འཛིན་རྣམ་རྟོག་སྣ་ཚོགས་པ། །ད་ནི་ཁོ་བོའི་རྣམ་རྟོག་ནི། །ཤུགས་ཀྱིས་བྱུང་བས་ཕྱམ་གདལ་བ། །ཕྱི་ནང་བཟང་ངན་འདྲེས་འདྲ་བ། །གུ་ཡངས་པ་གཅིག་བྱུང་བ་འདི། །ལྷ་དང་བླ་མའི་ཐུགས་རྗེར་སེམས། །དེ་སྐད་ནུབ་གཅིག་རྨི་ལམ་དུ། །ཚེ་ལས་འདས་པ་གཅིག་བྱུང་ནས། །ཁོ་བོའི་བླ་མ་འགའ་ཞིག་གིས། །སྤྱོད་པ་མཐོང་བས་དད་པ་ཡང་། །མ་སོང་ཟེར་ཞིང་ལོ་རྒྱུས་འགའ། །སྨྲ་བ་རྨིས་ཕྱིར་བྲིས་པ་སྟེ། །གཞན་ལ་ཟུར་ཟ་ཡིན་རེ་ཀན། །རང་སྐྱོན་ངོས་ལེན་མཛད་དོན་མེད། །རང་ལ་བརྟགས་ནས་རང་སྐྱོན་སྨྲས། །བྷ་ཝནྟུ།། ༈ །།ན་མོ་གུ་རུ་ཨཱ་ཡུམྦྷ་ན་ཡེ། བླ་མ་ཡི་དམ་དབྱེར་མེད་པའི། །སྟོན་པ་སྣང་བ་མཐའ་ཡས་ལ། །གསོལ་བ་འདེབས་སོ་ཐུགས་རྗེས་གཟིགས། །ཚེ་དང་སྒྲུབ་པ་མཐར་ཕྱིན་ནས། །འབྲེལ་
ཚད་བདེ་ཆེན་ཞིང་ཁམས་སུ། །ཁྲིད་པའི་ནུས་པ་ཐོགས་མེད་གཅིག །བདག་ལ་སྩོལ་བར་མཛད་དུ་གསོལ། །གསོན་དང་དད་ལྡན་བསམ་བཟང་མཁན། །བདག་ནི་བྱང་ཆུབ་སེམས་བསྐྱེད་ཅིང་། །གཞན་ཕན་སེམས་བསྐྱེད་མི་ཆུང་ཡང་། །དེང་སང་སྙིགས་མའི་མཐའ་ལ་ཐུག །འགྲོ་དོན་འགྲུབ་པའི་སྐབས་མ་མཆིས། །དཔལ་ལྡན་ཇོ་བོ་ཨ་ཏི་ཤས། །འགྲོ་དོན་བྱེད་པའི་གང་ཟག་ལ། །མངོན་ཤེས་མེད་ན་མི་འོང་གསུངས། །དེ་ཡང་མངོན་ཤེས་ཡོད་ངེས་ཀྱི། །སྐྱེས་བུ་དམ་པ་ཕལ་ཆེར་ཡང་། །བསྟན་པའི་དོན་དང་འགྲོ་བའི་དོན། །བློས་བཏང་སྦས་ཡུལ་དབེན་ས་བསྙག །འདི་ཡང་འགྲོ་དོན་དཀའ་བའི་རྟགས། །འོན་ཀྱང་མུན་པ་ནག་པའི་ཚེ། །མར་མེས་ཁྱིམ་ཆུང་གསལ་བ་ལྟར། །བསམ་བཟང་ལོ་བདུན་དབང་དང་ཁྲིད། །སྒོ་སྐྱེལ་བྱས་ནས་ཆར་ཕབ་ཀྱང་། །ན་བཞོན་རྣམས་ནི་ལྟད་མོའི་ཕྱིར། །ཚིག་དོན་ཉན་པ་འགའ་ཙམ་མེད། །རྒན་གོག་འཆི་རན་ཆོས་འདོད་འགའ། །རྣ་བ་འོན་པས་ཚིག་མི་གོ །འགའ་ཞིག་གོ་ཡང་དུད་འགྲོ་ལ། །བཤད་པ་བཞིན་དུ་དོན་མི་རྟོགས། །གྲོང་ཆོག་འབྱམས་པའི་སེར་མོ་
བ། །ཆོས་དང་དབང་ནི་ཞུ་འདོད་ཀྱང་། །མི་ཁོམ་གྲོང་ཆོག་བརྡ་དགོས་སྐད། །ལོངས་སྤྱོད་ཆེ་བའི་ཕྱུག་པོ་འགའ། །མི་ཁོམས་རྟ་ལུག་འཚོ་དགོས་ཟེར། །ཡུལ་དཔོན་གཙོ་བོ་རྒན་གསུམ་འགའ། །མི་ཁོམ་ཁ་མཆུ་གཏམ་དགོས་ཟེར། །དཔའ་རྩལ་ལྡན་པའི་མི་དཔོན་འགའ། །མི་ཞུ་དམག་ཇག་བྱེད་དགོས་ཟེར། །རིགས་རུས་ཆེ་བའི་བླ་མ་འགའ། །དབང་རྒྱུན་ལུང་རྒྱུན་འདོད་ན་ཡང་། །རིགས་རུས་ཆེ་བ་ཉམས་དོགས་འཛེམ། །བཟང་པོར་གྲགས་པའི་སྒོམ་ཆེན་འགའ། །གནད་ཟབ་ངོ་སྤྲོད་འདོད་ན་ཡང་། །ཆོས་ལུགས་ཆེ་བ་ཉམས་དོགས་འཛེམ། །དགེ་སློང་དགེ་ཚུལ་གནས་པོ་སོགས། །ཉམས་ལེན་འདོད་པ་ཆེ་ན་ཡང་། །དགོན་པས་ཁ་ཟེར་དོགས་པས་འཛེམ། །ཉམ་ཆུང་ཆོས་འདོད་ཕལ་ཆེར་ཡང་། །ལྷགས་པས་མི་ཚུགས་ཆོས་བརྒྱགས་མེད། །རྒན་གོག་ཆོས་ཞུ་འདོད་ན་ཡང་། །བུ་དང་མནའ་མས་ཕྱག་རྟེན་དང་། །ཆོས་བརྒྱགས་མི་བསྐུར་འགྲོ་དབང་མེད། །ལ་ལ་སོ་ནམ་ཚོང་དང་མགྲོན། །ལ་ལ་དམག་ཁྲལ་འུ་ལག་ཁྲལ། །ལ་ལ་སྡེ་ཡི་བང་ཆེན་སོགས། །ཆོས་ཞུ་འདོད་ཀྱང་ཁོམ་སྐབས་མེད། །ཆོས་གཞི་སྣ་ལེན་
དེ་བས་དཀའ། །ལ་ལ་རྒྱུ་མེད་ཞུ་མི་སྤོབས། །ལ་ལ་དཔོན་གྱིས་བཀའ་བཀྱོན་དོགས། །ལ་ལ་དགོན་པས་ཕྲག་དོག་སྐྲག །ལ་ལ་སྡེ་བླ་མི་མཉེས་དོགས། །ལ་ལ་རྩྭ་ཤིང་མི་འབྱོར་དོགས། །ས་ཆ་འདི་རུ་ཆོས་ཚུགས་ཞེས། །ཞུ་ཕྱོགས་ནུས་པར་དཀའ་མོར་གདའ། །དེ་བས་ཀྱང་ནི་ཆོས་བཤད་མཁན། །སྒར་འགྲོས་འགྲོ་འདུག་དཀའ་བར་སྣང་། །སྲོག་ལ་བསྡོ་བའི་ཆུ་ཆེན་དང་། །རྐང་ལག་ཕྱིད་པའི་ཁ་ཆེན་དང་། །གཡང་ལ་ལྟུང་བའི་འཕྲང་ངན་དང་། །འོག་རྟ་འཕྲོག་པའི་ཧོར་སོག་འགྲིམ། །ནམ་འོང་ཆ་མེད་ཁྱི་སྨྱོན་རྒྱུག །གར་ཡོད་ཆ་མེད་ས་སྐྱོན་ལྡང་། །འགྲོ་སྟན་དཀའ་བའི་ནོར་མུའི་ཁྲིམས། །ཆོས་ཚུགས་ཁྲོམ་ཚོགས་རྒྱས་ན་ཡང་། །སྣོད་ལྡན་ཆོས་དང་མཐུན་པ་དཀོན། །མི་ཤ་མོ་གྱོད་ཐུག་པ་མང་། །སྡེ་ཧྲག་ཤོག་ཁའི་གླད་རུ་འཐེན། །ངན་རྐུན་ཆོས་ཕྲུག་ཆོས་བརྒྱགས་བཅོམ། །ཇག་རྐུན་འགྲིམས་པའི་རྟ་ཁལ་འཇབ། །རིམས་ངན་ཁྲོམ་ལ་མཆེད་གྲབ་བྱེད། །སྐུ་ཁག་ཆེ་བའི་གཅེས་ཕྲུག་མང་། །གདོན་བགེགས་དམ་སྲིས་བར་ཆད་རྩོམ། །འབུལ་བ་ཞབས་ཏོག་བྱེད་རྣམས་ཀྱང་། །
རྟ་རྒན་ཕུལ་ལ་རྟ་གཞོན་འདོད། །མཛོ་རྒན་ཕུལ་ནས་མཛོ་གཞོན་འདོད། །དཔོན་རིགས་གསོལ་ལོས་ཆེ་བ་མང་། །སྡེ་ཡི་འབུལ་བ་བྱས་པ་ཡི། །གསོལ་རས་དཔོན་ཁ་བ་རྣམས་འདོད། །ཚེ་འདས་དྲན་པ་འགའ་ཙམ་སྟེ། །ཕལ་ཆེར་འདྲེན་པའི་འབུལ་བ་མང་། །དབང་ལ་དཔུང་ཤེད་བཙན་དབང་ཞུ། །ཆོས་རར་གྲལ་རྩོད་འཁྲུག་པ་སློང་། །ཚེ་འདས་དྲན་པའི་ཞི་ཁྲོ་དང་། །ཆོ་ག་བྱང་བཞུས་བསྔོ་རྟེན་ཡང་། །མི་ཁ་ཨེ་ཆོད་སེམས་ལ་འཆང་། །ཞི་ཁྲོ་བྱེད་ཟེར་བསྔོས་ཤ་མང་། །ཆོས་ཉན་ཁྲིད་སྦུག་པ་རྣམས་ཀྱང་། །ལ་ལ་ཁ་སྦུབ་ལྟ་བུའི་སྣོད། །ཇི་ཙམ་བཤད་ཀྱང་དོན་མི་གོ །སྤྱོད་པའི་དམིགས་པ་མི་བསྒོམ་པར། །ངག་འཁྱལ་ཁ་དལ་ཚོང་གཏམ་མང་། །ལ་ལ་ཞབས་རྡོལ་ལྟ་བུའི་སྣོད། །ལུས་གནད་བསླབས་ཀྱང་འདུག་མགོ་མེད། །རྒྱུ་འབྲས་ད་ལྟ་བཤད་པ་ཡི། །ཕྱིར་ནངས་ཉིད་ནས་མི་དགེ་སྤྱོད། །ལ་ལ་དུག་ཅན་ལྟ་བུའི་སྣོད། །གསང་སྔགས་དབང་ལུང་ཞུས་ནས་ནི། །མཐུ་གཏད་ངན་སྔགས་རྣོན་པོ་འདོད། །ལ་ལས་ངག་ནུས་ལྡན་བྱས་ཏེ། །འདྲེ་འདུལ་ཟས་ནོར་སྡུད་པ་འདོད། །ལ་ལས་དབང་ལུང་ལག་ཆར་
ཁྱེར། །འབུལ་སྡུད་ཟང་ཟིང་བསྡུ་བར་འདོད། །ལ་ལས་ཁྲིད་ཙམ་ཐོབ་ཕྱི་ནས། །རང་གིས་ཉམས་ལེན་མི་བྱེད་པར། །ཕོ་སྒོས་གཞན་ལ་ཁྲིད་སྟོན་འདོད། །ལ་ལས་འཕོ་ལུང་ཙམ་ཞུ་ནས། །རང་གིས་རྟགས་ཐོན་མི་སྦྱོང་བར། །གཞན་ལ་འདེབས་ནས་རྟ་ཁྲིད་འདོད། །ལ་ལས་ཡི་དམ་གཅིག་ཙམ་གྱི། །ལས་རུང་བསྙེན་པ་མི་བྱེད་པར། །དབང་བསྐུར་རོ་བསྲེགས་བྱང་བུ་བཞུ། །དཀོར་གྱི་ལོངས་སྤྱོད་གང་ཆེ་འདོད། །གལ་ཏེ་དབང་ལུང་ཐོབ་པ་ནས། །ཟླ་མཚམས་ཡ་ཟུང་བྱེད་པ་ཡང་། །རྐྱེན་ཟློག་དབང་སྡུད་དྲག་སྔགས་སོགས། །ཚེ་འདིའི་དོན་དུ་མ་གཏོགས་པ། །བྱང་ཆུབ་སྒྲུབ་པ་བྱེད་མཁན་དཀོན། །འགའ་ཞིག་ཆོ་ག་ཕྱག་ལེན་སོགས། །རིག་པས་ལེགས་པར་མི་སློབ་པར། །མགོ་མེད་མཇུག་སྡུམ་གང་བྱུང་བྱེད། །བླ་མས་འདི་འདྲ་གྱིས་གསུངས་སྨྲ། །ལ་ལས་དབང་ལུང་ཚན་ཆེན་ཞུས། །བརྒྱུད་པ་སངས་རྒྱས་ཕྲེང་བ་ལས། །མ་བྱུང་རྩིས་མེད་སྐད་པ་ཟེར། །ལ་ལས་ཞག་པོ་བཅུ་ཙམ་རེ། །སྡོད་ནས་ཐམས་ཅད་ཐོབ་འདོད་སྐྱེད། །དབང་ལུང་ཅི་འགྲོ་བྱས་པ་ན། །དབང་སྒྲུབ་ཉུང་བས་མི་
མགུ་སྐད། །ཡུན་རིང་འདུག་ལོང་མེད་དོ་སྐད། །ཐམས་ཅད་ཐོབ་ནི་དགོས་དོ་སྐད། །ཐ་མལ་རྨོངས་པའི་སྤྲང་པོ་འགའ། །དབང་ཆོས་དོ་དམ་མེད་པའི་རྟགས། །ཉམས་ལེན་དམིགས་པ་མི་སྐྱོང་བར། །ངག་འཁྱལ་རྩེ་ཀྱུའི་ངང་ལ་སྡོད། །འཕྲལ་དུ་ད་ལམ་ཟླ་ཤས་འདིར། །དཀོར་ལྷག་ཁ་ཐོན་སེམས་ལ་འཆང་། །ཡོན་བདག་དྲག་རིམ་ངོ་ཆེན་འགའ། །ད་ལྟ་ཉིད་དུ་འགྲོ་དགོས་པར། །ཟབ་ལ་བཀའ་གཉན་དབང་དགོས་ཟེར། །ཡུད་ཙམ་དབང་སྒྲུབ་དགོས་སྨྲས་ན། །མི་ཁོམ་མི་འགྲོ་ཁ་མེད་ཟེར། །སྲོག་རླུང་སྨྱོ་འབོག་བརྒྱལ་ནད་དང་། །མཛེ་ནད་སྨིན་མ་བྱི་བ་དང་། །བད་ཀན་བག་ལྷུང་མིད་གཅུས་དང་། །སྐྲན་ནད་འདྲིལ་སོགས་གཅོང་ནད་རིགས། །སྨན་དཔྱད་རིམ་གྲོའི་རྡུགས་པ་རྣམས། །ཕྱག་རྟེན་བརྡ་ཚོན་ཙམ་རེ་ཁྱེར། །ཐག་རིང་ཡུལ་ནས་ཁུར་འགེལ་བྱས། །ཁྱེད་ལ་དད་ནས་འོང་བ་ཡིན། །འདི་ཉིད་ཕན་ཐབས་ཁྱེད་ཤེས་ཟེར། །འགོས་ནད་བྱུང་བའི་ནད་ལངས་རྣམས། །བཀའ་བསྒོ་བྱིན་རླབས་དགོས་སོ་སྐད། །གློ་བུར་སྙེམ་མེད་མདུན་དུ་འདུག །ཁྲིམས་ཕོག་ནད་བྱུང་སྔོན་ལས་སྨིན། །མིག་བྲུས་རྐང་ལག་ཞ་བ་
རྣམས། །བླ་མས་བྱས་ལྟར་ཡུས་ཆེ་ཞིང་། །བཞོན་རྒྱུ་འགེལ་རྒྱུ་གྱོན་རྒྱུ་དང་། །བཟའ་རྒྱུ་གྱི་ནོམ་དགོས་ཞེས་རྩོད། །བྱིན་པས་མི་མགུ་འབོད་ངན་བྱེད། །ལ་ལས་སྲོག་བཅད་རིགས་དྭགས་ཀྱང་། །བརྔན་པ་རྟ་མཛོ་དགོས་ཟེར་རྩོད། །ལ་ལས་ཤ་ཁྱི་རྒད་པོ་དང་། །རྒྱ་རུལ་ཕུལ་ནས་གནང་སྦྱིན་འདོད། །རྒྱ་སར་བསྒྲུབ་ཅིང་ཤ་ཁྱི་ཉོ། །ཆོས་འཁྲེབ་སོང་བའི་སེར་གཟུགས་འགའ། །ཆོས་དང་དབང་ནི་གར་ཡང་ཐོབ། །འདི་རུ་ཞུ་བའི་བརྔན་པ་ལ། །གོས་དང་དགུན་བརྒྱགས་འདོད་དོ་ཟེར། །ལ་ལས་གཅོད་དང་སྔགས་ཆོས་ཀྱི། །དཔེ་རུལ་མགོ་མེད་མཇུག་སྡུམ་ཁྱེར། །དེ་ཡི་དབང་ལུང་ཞུ་ནས་ནི། །གྲོང་ཆོག་འགྲིམ་མོ་ཟ་འདོད་ཟེར། །མགོ་མཇུག་ཚང་བའི་དབང་དང་ལུང་། །བྱས་ཀྱང་ཡི་གེ་བྲི་མི་མེད། །ཤེས་ཀྱང་ཤོག་སྣག་སྨྱུ་གུ་མེད། །དཔེ་ཆ་བྲིས་ལ་གནང་དགོས་ཟེར། །ལ་ལས་མཚམས་སྒྲུབ་མི་དགོས་པའི། །ཕན་གནོད་ལས་ཚོགས་རྣོན་པོའི་རིགས། །ཁག་ཁུར་ཕེར་བ་འདོད་དོ་སྐད། །ལ་ལས་ཐེ་ཚོམ་ཁུ་འཕྲིག་གིས། །གནམ་ཆོས་ལ་སོགས་ལས་ཚོགས་རྣམས། །བསྙེན་སྒྲུབ་ནུས་རྟགས་མ་ཐོན་
པར་། །བྱས་པས་ཕན་པ་མ་བྱུང་ཞེས། །བླ་མ་ཆོས་ལ་ལོག་ལྟ་སྒོམ། །ལ་ལས་རྫོགས་ཆེན་ཐོད་རྒལ་སོགས། །ཤིན་ཏུ་གསང་བའི་གདམས་པ་ཚོ། །ཀུན་ལ་འཆལ་གཏམ་གཡེལ་ཆུང་སྨྲ། །འཕོ་ལུང་གསང་སྔགས་ཧིག་ཀ་སོགས། །རི་ལུང་ཁུར་བའི་ཧུར་སྒྲ་འབྱིན། །ལ་ལས་ཡེ་ཤེས་ལྷ་མི་བསྙེན། །རྣོ་མྱུར་དམ་ཅན་ལ་སོགས་པ། །འཕྲལ་དུ་བསྒྲུབས་ནས་རྟགས་སྟོན་འདོད། །ལ་ལས་དབྱར་ལྡོམ་སྟོན་ལྡོམ་དང་། །གྲོང་ཆོག་གཅིག་ཀྱང་མེད་པའི་དུས། །དབང་ལུང་རྒྱ་ཆེན་ཞུ་འདོད་སྐད། །ཁྲིད་ཚུགས་ཁྲོམ་ཚོགས་རྒྱས་པ་ཡིས། །དབྱར་དགུན་ལྡོམ་བུ་པ་རྣམས་ཀྱིས། །སྒོ་རྡུགས་ཕོག་ཟེར་གཤེ་སྐུར་འདེབས། །ལ་ལས་དད་པ་མི་འོང་བའི། །འདི་ཚང་གདུལ་བྱ་ཆེ་བ་འདི། །རྫས་དང་གདམས་ངག་ཡོད་པས་ཟེར། །ལ་ལས་གཏོ་ཆོག་ཡན་ཆོད་ཀྱི། །མི་ཤེས་དགུ་ཤེས་དོན་ཡིན་སྐད། །ལ་ལས་འཆམས་དང་འབག་ལ་སོགས། །ཅལ་སྒྲོགས་རྗེས་རྒྱུག་ཕན་པན་ཟེར། །སེར་མོ་ཕལ་གཅིག་ཟུག་རྔུ་ལྡང་། །ཡོན་བདག་བསམ་བཟང་ལ་ལ་ཡིས། །ད་ཙམ་སྐུ་མཚམས་མི་བསྡམས་པར། །དཀོར་ནོར་འདི་ཙམ་བསྡུ་བ་ནི། །བཙན་
ངོ་རྣམས་ལ་འབུལ་བ་ནི། །ཁྲོག་བརླག་ཡིན་ཞེས་སེར་སྣ་བྱེད། །ལ་ལས་དཀོར་ནོར་འདི་ཙམ་བསྡུ། །བཀའ་འགྱུར་མི་བཞེངས་ཅི་ཡིན་ཟེར། །ལ་ལས་ནང་ཟོག་གསེར་དང་དངུལ། །མང་པོ་ཡོད་སྙམ་ཚོད་གྱིས་སྨྲ། །གྲམ་གསེང་ཆུ་བླུག་ཅི་ལྟ་བར། །འབུལ་བ་ཅུང་ཟད་གང་བྱུང་བ། །ཇ་དང་ཙམ་རྒྱུག་ཕྱག་མདུད་དགོས། །འབུལ་བ་ཆེ་ན་གནང་སྦྱིན་དང་། །གྲྭ་མང་འགྲིམ་པ་བརྒྱ་སྟོང་ལ། །ཕོག་དང་ཇ་ཐུག་རྒྱུན་ལྡན་དང་། །སྡེ་དགོན་བླ་མ་མི་དཔོན་སོགས། །ཅི་རིགས་བཏང་སྒོ་དགོས་པ་སོགས། །ཕར་ལ་ཅི་འགྲོ་གནད་མ་རིགས། །དབང་བསྐུར་དཔག་མེད་ཞུས་པས་ཀྱང་། །དམ་ཚིག་སྲུང་མཁན་ཤིན་ཏུ་དཀོན། །བཀའ་སྲུང་ལ་སོགས་ཐ་མལ་པས། །ཞུ་མི་རུང་བའི་དབང་བསྐུར་དུས། །ངོ་ཆེན་བྱེད་དང་དཔུང་ཤེད་བརྫང་། །མི་རུང་སྨྲས་ན་ཤིན་ཏུ་ཁྲོ། །དེ་ཕྱིན་དབང་ཞུ་མི་འདོད་སྐད། །སྒོམ་ཆེན་རྟོགས་འབུལ་བྱེད་པ་ཕལ། །ལ་ལས་མེད་ཀྱང་ཡོད་མདོག་སྨྲ། །རྩད་གཅོད་དྲིས་ན་ཁྲོ་བསྡུར་བྱེད། །ལ་ལས་སྤོམ་ཡོར་གཡོ་གཏམ་སྨྲ། །ངོ་སྤྲོད་གེགས་སེལ་ཁྱད་པར་ཅན། །གཞན་ལ་མེད་
པའི་ཟབ་གནད་རྣམས། །དང་པོ་ཐོས་ཀྱང་མ་མྱོང་བ། །ལེགས་པར་བསླབ་ནི་ཚར་མ་ཐག །དེ་དག་སྔར་ནས་ཤེས་སྐད་སྨྲ། །ལ་ལས་གསང་སྔགས་ཟབ་གནད་རྣམས། །རང་གིས་ཤེས་རྒྱུའི་ངང་གཅིག་ལ། །རྐུ་ཐབས་གཡོ་སྒྱུས་ཨེ་ལོན་ལྟ། །ལ་ལས་ངན་སྔགས་མི་འདོད་ཅེས། །གཞན་ལ་བྱེད་རེའི་མནའ་བྱེད་ཅིང་། །དྲག་སྔགས་ཕྱག་ལེན་འདོད་པ་ཆེ། །ལ་ལས་སངས་རྒྱས་བསྟན་པའི་དོན། །ཡིན་པས་དྲག་སྔགས་བསླབ་དགོས་སྐད། །མ་བསླབས་ཁ་གཏམ་མེད་པ་སྐད། །ལ་ལས་རྫས་དང་བསྙེན་སྒྲུབ་སོགས། །དཀའ་གནད་ཅི་ཡང་མི་དགོས་པར། །བསམ་པ་ཙམ་ནས་བྱད་མ་གསོད། །ནོར་ཤོར་ཆོ་འཕྲུལ་སྣ་ཚོགས་པ། །འོང་བའི་ཐབས་ཤིག་འདོད་དོ་སྐད། །ལ་ལས་རང་གི་ཉམས་ལེན་དང་། །སྒྲུབ་པ་བྱེད་བསམ་མེད་ན་ཡང་། །བླ་མའི་ཐུགས་དམ་གང་ཡིན་གྱི། །ཡི་དམ་ཆོས་སྐྱོང་ཐམས་ཅད་ཀྱི། །དབང་ལུང་ཚང་བར་ཞུ་འདོད་སྐད། །ཤུགས་ཀྱིས་བྱུང་བའི་རྟ་ནོར་རྣམས། །བླ་མ་རྣམས་ཀྱི་དཀོར་ཕུད་འདོད། །མི་ཆོག་ད་རུང་འབུལ་སྡུད་འདོད། །དགོན་པས་འགྱེད་དང་མང་ཇ་འདོད། །མི་ཆོག་ད་རུང་དགོན་
གསོས་འདོད། །དཔོན་པོ་རྣམས་ཀྱི་དཔོན་ཆེན་འདོད། །མི་ཆོག་ད་རུང་ཁྲལ་ཡང་འདོད། །ཡོན་བདག་སྲུང་མདུད་བཟའ་བཏུང་འདོད། །མི་ཆོག་ད་རུང་གནང་སྦྱིན་འདོད། །སེར་མོ་བ་རྣམས་ཆོས་བརྒྱགས་འདོད། །མི་ཆོག་ད་རུང་ཁུར་རྒྱུ་འདོད། །ལོང་སྤྲང་རྣམས་ཀྱིས་ཟས་གོས་འདོད། །མི་ཆོག་ད་རུང་བཞོན་རྒྱུ་འདོད། །ཉེ་བ་རྣམས་ཀྱིས་མཉམ་ཟ་འདོད། །མི་ཆོག་ད་རུང་བསོགས་རྒྱུ་འདོད། །གྲྭ་པ་རྣམས་ཀྱིས་ཟས་གོས་འདོད། །མི་ཆོག་ད་རུང་འཚགས་རྒྱུ་འདོད། །རྫི་བོ་བཞོན་མས་གླ་ཟས་འདོད། །མི་ཆོག་ད་རུང་འབག་སྒོ་འདོད། །ཇག་པ་རྐུན་མས་འཕྲོག་བཅོམ་འདོད། །མི་ཆོག་ཞོར་ལ་གསོད་རྒྱུ་འདོད། །བཟོ་རིག་པ་ཀུན་ཡོན་ཟ་འདོད། །མི་ཆོག་ལག་གཟར་སྣ་སྣེ་འདོད། །བླ་བྲན་རྣམས་ཀྱིས་དབང་ལུང་འདོད། །མི་ཆོག་དཔེ་ཆ་མཆོད་ཆ་འདོད། །སློབ་མ་རྣམས་ཀྱིས་བསྐོ་ཇ་འདོད། །མི་ཆོག་བཀའ་སྲུང་གྲྭ་པ་འདོད། །ཡོན་བདག་ངོ་ཆེན་དབང་བརྒྱ་འདོད། །མི་ཆོག་སྲུང་འཁོར་རྫས་སྲུང་འདོད། །དཔོན་ཕྲན་དགྲ་བླའི་གསོལ་མཆོད་འདོད། །མི་ཆོག་མཚོན་སྲུང་ཟབ་མོ་འདོད། །སྔགས་པས་
མདོས་ཟློག་ཕྱག་ལེན་འདོད། །མི་ཆོག་རྫས་དང་ངན་སྔགས་འདོད། །རི་ཁྲོད་པ་ཡིས་ཆར་འབོད་འདོད། །མི་ཆོག་ཆར་རྫས་རྣོན་པོ་འདོད། །སོ་སོའི་འདོད་དོན་གང་ཡིན་པ། རང་གིས་འབད་དེ་བསྐངས་བྱས་ནས། །ངེད་རང་དཔོན་སློབ་འཁོར་བཅས་ཀུན། །ལོ་རེ་ཙམ་ལ་མ་སྤུངས་ཀྱང་། །ཁ་ཐོན་འོང་ཙམ་མ་བཞག་ཀྱང་། །མགུ་བ་མང་ལ་ཁང་པ་མང་། །ལ་ལས་བླ་མ་འཁོས་ཆུང་ཟེར། །ལ་ལས་དབོན་པོ་ཁྲམ་མོ་ཟེར། །ལ་ལས་གཉེར་པ་མི་ངན་ཟེར། །ལ་ལས་དེ་ཚང་གྲྭ་པ་ཟེར། །མི་ཁ་ཆོད་ཙམ་ཐོན་པར་དཀའ་། །འདི་དག་དུས་ཀྱི་དབང་གིས་ཏེ། །བདུད་ཀྱི་ལས་སུ་ཐུབ་པས་གསུངས། །དེ་ཕྱིར་དབང་ཁྲིད་འགྲོ་བའི་དོན། །བྱས་ཀྱང་ཆོས་དང་མཐུན་དཀའ་བས། །ད་ནི་བསམ་པ་གཞན་དོན་དུ། །སེམས་བསྐྱེད་སྨོན་ལམ་མ་གཏོགས་པ། །སྦྱོར་བ་གཞན་དོན་རྫོགས་སོ་ཡིན། །དེ་སྐད་ཤིང་འབྲུག་ལོ་མཇུག་ལ། །ཡུལ་མི་རྒན་པོས་གྲོས་བྱས་ནས། །བླ་མས་འགྲོ་དོན་རྫོགས་གསུངས་པ། །ཅི་ཡིན་གོ་རྒྱུ་མི་གདའ་བས། །བརྟན་བཞུགས་ཞུ་འབུལ་དགོས་སོ་ཞེས། །སློབ་མ་ཀུན་དང་ཡོན་བདག་བཅས། །ཁ་ཐག་
ལ་སོགས་འབུལ་བ་དང་། །བརྟན་བཞུགས་བརྩམས་ཤིང་སུན་ཟློག་བྱས། །འགྲོ་དོན་རྒྱ་ཆེན་མི་མཛད་ཀྱང་། །ལོ་དུས་ཉེ་སྐོར་ངེད་རྣམས་ལ། །ཆོས་ལུང་དགོས་ཟེར་ཞུ་འབུལ་བྱས། །ཚེ་ནི་རྟེན་འབྲེལ་ཡིན་ཟེར་བའི། །དེ་དུས་མི་བྱེད་མ་སྨྲས་སོ། །དེ་རྗེས་དད་ལྡན་ཡོན་བདག་ཅིག །འབུལ་བ་གྱ་ནོམ་དང་བཅས་ནས། །ཚུགས་མ་ཉི་ཤུའི་སོ་ནས་ནི། །རྐང་གཏད་མཇལ་ཕྱིར་འོང་ཟེར་བྱུང་། །གསུང་ངག་ཐོས་ཀྱང་བློ་མ་ཚིམ། །སང་ཕོད་མ་ཤི་ངེད་ཕ་བུ། །འོང་བས་ཞལ་མཐོང་དགོས་སོ་ཞེས་། །སླར་ཡང་ཕྱི་ཆ་བྱུང་བ་དང་། །དངོས་སུ་ཁྱེད་ཀྱིས་འགྲོ་བའི་དོན། །ཁྱད་པར་ཁྲིད་རིམ་མ་གནང་ན། །ཤར་གྱི་རྐང་ལ་མན་ཆོད་ལ། །ཆོས་འདོད་ཉམས་ཁྲིད་སུས་སྐྱོང་ཞིང་། །རྟེན་འབྲེལ་ཞུ་བ་བྱུང་ཕྱིར་བྲིས། །བྷ་ཝནྟུ།། ༈ །།ན་མོ་རཏྣ་ཏྲ་ཡཱ་ཡ། གང་ལ་ཐོག་མར་ཕྱག་འཚལ་ན། །བྱ་བ་མཐའ་རུ་ཕྱིན་མཛད་པའི། །དཀོན་མཆོག་གསུམ་ལ་ཕྱག་འཚལ་ལོ། །ཕྱི་བ་ཟླ་གསུམ་ཉལ་ཁ་ཡང་། །ཁུང་སྒོར་སྣ་ཡིས་ཐེའུ་རྒྱབ་ནས། །སྨོན་ལམ་འདེབས་པ་ཡིན་སྐད་ན། །ཁོ་བོ་བླ་
མའི་མིང་ཐོབ་གཅིག །ཚེ་མཚམས་དམ་བཅའ་བྱེད་སྐབས་སུ། །སྨོན་ལམ་འདེབས་པར་ཅིས་མི་རིགས། །ད་ནི་ན་སོ་རྒན་པོར་སོང་། །མི་འཆིའི་ཐབས་ནི་མི་སྲིད་ན། ནམ་འཆི་ཆ་ཡང་མ་ངེས་པས། །ཤི་ཡང་འགྱོད་མེད་སྒྲུབ་པ་བྱེད། །ཤིང་མོ་སྦྲུལ་ལོ་འདི་ཚེས་ནས། །བདག་ནི་ཚེ་མཚམས་བསྡམ་མོ་ཞེས། །སྤྱན་རས་གཟིགས་དབང་འཕགས་པ་ལྷ། །འཇམ་དཔལ་དབྱངས་དངོས་སྟག་ལུང་པ། །ཨུ་རྒྱན་དངོས་ཉིད་ལྷོ་སྤྲུལ་སྐུ། །ས་བཟང་སངས་རྒྱས་ཚེར་ལུང་པ། །བླ་ཆེན་བཞི་ལ་ཁས་ལེན་ཕུལ། །ལྷ་འབྲང་སེར་གསུམ་སྒོམ་སྟག་སོགས། །དཔོན་ཆེན་རྣམས་ལ་ཆ་ཡོད་བྱས། །ཚེ་དང་སྒྲུབ་པ་མཐར་ཕྱིན་པར། །བླ་མ་རྣམས་ལ་གསོལ་བ་བཏབ། །ཡི་དམ་རྣམས་ལ་དངོས་གྲུབ་ཞུ། །ཆོས་སྐྱོང་རྣམས་ལ་ཕྲིན་ལས་བཅོལ། །བཀའ་སྲུང་རྣམས་ལ་བཀའ་བསྒོ་བྱས། །དྲིན་ཆེན་ཡོན་བདག་འགའ་རེ་ཡིས། །ད་རུང་འགྲོ་དོན་དགོས་ཟེར་དུས། །དམག་དཔོན་ཆུ་ནི་ཡག་པ་ན། །དམག་ནི་ཐམས་ཅད་མགོ་ཐོན་ལྟར། །ང་ཡི་སྒྲུབ་པ་མཐར་ཕྱིན་ན། །ཁྱེད་ཅག་འབྲེལ་ཐོགས་ཤི་གསོན་ནི། །ཀུན་ལ་ཕན་པ་ཡིན་ནོ་སྨྲས། །
དེ་ཕྱིར་ད་ནི་ཁྲོམ་སྡུད་ཀྱིས། །དབང་ལུང་ཁྲིད་སོགས་མི་བྱའོ། །སྔོན་ནས་ཞུས་ཤིང་ཡིད་ཡུལ་དུ། །མཚམས་བསྡམ་བཞག་པ་འགའ་ཟུང་ལས། །མི་ལ་ངོ་ཡང་མི་གཏུག་གོ །ཧ་ཅང་ས་ཐག་རིང་བ་ཡི། །རང་ལ་རྐང་གཏད་འོང་བ་དང་། །མཚམས་སྒྲུབ་ཁས་ལེན་གནད་ཆེ་སོགས། །མི་ལ་མཚམས་ཁུང་ཆོས་བཤད་མེད། །དམ་ཆོས་སྦྱིན་ལེན་ཆོག་པ་དང་། །ས་གནས་སེམས་དཔའ་འཁྲུལ་མེད་པ། །མཚམས་ཁུང་ཞབས་ཀྱིས་བཅགས་ཕྱིར་ལས། །ཕྱི་རྒྱབ་ངོ་ཆེན་སུ་ལ་ཡང་། །མཚམས་ཁུང་ནང་དུ་གདན་འདྲེན་མེད། །རང་ཉིད་ནད་ཀྱིས་མནར་བའམ། །སྦྱིན་སྲེག་བཅའ་ཚོགས་མཆོད་གཡོག་སོགས། །མི་མཁོ་ཀ་མེད་མ་གཏོགས་པ། །གྲྭ་པ་ནང་དུ་འོང་ས་མེད། །རྒྱལ་བ་ཡབ་སྲས་མཇལ་བ་ནི། །མ་གཏོགས་ནམ་ཡང་མཚམས་མི་གྲོལ། །གྲྭ་རིས་ནང་མ་ཨ་མ་སོགས། །ཤི་བ་མ་གཏོགས་མཚན་འགྲོས་ཀྱིས། །འཕོ་འདེབས་མི་བྱེད་དམ་བཅའ་འོ། །རང་དབང་མ་ཐོབ་རཱ་ཛ་ཡིས། །ཁྱེར་ན་མ་གཏོགས་སྲུང་རིམ་དང་། །གྲོང་ཆོག་ཕྱིར་དུ་གོམ་མི་སྤྲོ། །ཟན་སྒོང་ཡར་འདྲིལ་མ་བྱུང་ན། །གྲྭ་སློབ་དབོན་པོ་བཏང་
བ་ལས། །ལྡོམ་བུར་རང་ཉིད་བརྒྱགས་ཆད་ཀྱང་། །མི་བྱ་སྡུག་བསྒྱུར་དམ་བཅའོ། །སྲུང་ཟློག་དམིགས་རིམ་ཅུང་ཟད་ལས། །ངན་སྔགས་དྲག་སྔགས་བསད་ལས་རིགས། །སྒྲུབ་པར་མི་བྱ་དམ་བཅའོ། །བློ་སྦྱོང་ཕྱག་རྫོགས་གསུམ་པོ་ལ། །ཉམས་ལེན་འཐིལ་པོ་དམ་བཅའོ། །ཕྱི་རབས་གཞན་ལ་ཕན་སེམས་ཀྱིས། །རང་གི་གང་ཤེས་ཡོན་ཏན་སྐོར། །བལྟས་ཆོག་ཟིན་བྲིས་བྲི་བྱའོ། །ཐུགས་རྗེ་ཆེན་པོས་གཙོར་བྱས་པའི། །ཡི་དམ་བསྙེན་སྒྲུབ་ཆུ་བོ་བཞིན། །རྒྱུན་མི་གཅོད་པ་དམ་བཅའ་འོ། །འབྲེལ་ཐོགས་ཚེ་འདས་ཐམས་ཅད་ལ། །བསྔོ་སྦྱོང་བྱམས་དང་སྙིང་རྗེ་དང་། །གཟུངས་སྔགས་རྒྱུན་བཟླས་མ་བརྗེད་པས། །དཀོར་སྒྲིབ་བྱང་ངེས་ཐུགས་དམ་ནི། །བྱ་བ་འདི་ཡང་དམ་བཅའ་འོ། །མི་འགྱུར་རྡོ་རྗེས་དབུ་བྱས་པའི། །རང་རྒྱུད་འཛིན་ངེས་སློབ་མ་དང་། །བློ་སེམས་གཏད་པའི་གྲ་རིས་ལ། །སྲུང་འཁོར་བསྲེ་བ་ལ་སོགས་པ། །དམིགས་རིམ་མི་བརྗེད་དམ་བཅའ་འོ། །དེ་ལྟར་དམ་བཅས་བཅུ་དྲུག་ཙམ། །གེགས་མེད་མཐའ་རུ་ཕྱིན་པ་རུ། །རྩ་བར་བརྒྱུད་པའི་བླ་མའི་ཚོགས། །ཐམས་ཅད་ཀུན་གྱིས་བྱིན་གྱིས་
རློབས། །དེ་ལྟར་ཚེ་དང་སྒྲུབ་པ་གཉིས། །མཐར་ཕྱིན་པ་ཡི་དངོས་གྲུབ་དེ། །ཡི་དམ་ལྷ་ཚོགས་ཀུན་གྱིས་སྩོལ། །དེ་ལྟར་བླ་མེད་བྱང་ཆུབ་ནི། །ཚེ་འདི་ཉིད་ལ་སྒྲུབ་འདོད་པའི། །བར་ཆད་ཆོས་སྐྱོང་ཀུན་གྱིས་སོལ། །དེ་ལ་ཆོས་མཐུན་ལོངས་སྤྱོད་ཀྱི། །འཚོ་བ་ནོར་ལྷ་ཀུན་གྱིས་སྦྱོར། །དེ་ལྟར་ངེས་པ་དམ་པའི་ཆོས། །སྒྲུབ་པའི་མཐུན་རྐྱེན་སྡོང་གྲོགས་ནི། །ཡུལ་ལྷ་བརྟན་མ་དགེ་བསྙེན་ཚོགས། །བཀའ་སྲུང་དམ་ཅན་རྒྱ་མཚོས་སྩོལ། །སངས་རྒྱས་ཆོས་དང་དགེ་འདུན་གསུམ། །བསླུ་བ་མེད་པའི་དཀོན་མཆོག་གསུམ། །དཀོན་མཆོག་གསུམ་གྱི་བདེན་པ་ཡིས། །དམ་བཅའ་མཐའ་རུ་ཕྱིན་པར་ཤོག །བླ་མ་ཡི་དམ་མཁའ་འགྲོ་གསུམ། །རྩ་བ་གསུམ་གྱི་ཐུགས་རྗེ་ཡིས། །དམ་བཅའ་མཐའ་རུ་ཕྱིན་པར་ཤོག །མ་མགོན་ལ་སོགས་ཆོས་སྐྱོང་ཚོགས། །ཆོས་སྐྱོང་ཀུན་གྱི་མཐུ་སྟོབས་ཀྱིས། །དམ་བཅའ་མཐའ་རུ་ཕྱིན་པར་ཤོག །ཛཾ་ལྷ་ཡབ་ཡུམ་སྲས་དང་འཁོར། །གཏེར་བདག་རྣམས་ཀྱི་གཟི་བྱིན་གྱིས། །དམ་བཅའ་མཐའ་རུ་ཕྱིན་པར་ཤོག །སློབ་དཔོན་པདྨ་འབྱུང་གནས་ཀྱིས། །བཀའ་དང་དམ་ལ་
བཏགས་པ་ཡི། །ལྷ་སྲིན་བརྟན་མ་དགེ་བསྙེན་ཚོགས། །བདག་གི་བསམ་པ་མི་བསྒྲུབས་ན། །རང་རང་དམ་ཚིག་མི་འགལ་ལམ། །བདག་ནི་སློབ་དཔོན་པདྨ་ཡི། །རྗེས་འཇུག་བཀའ་བཞིན་བསྒྲུབ་ལགས་སམ། །ཚེ་རིང་མཆེད་ལྔས་བདག་གི་ནི། །བསམ་པ་སྒྲུབ་པར་མི་བྱེད་ན། །རྗེ་བཙུན་ཆེན་པོའི་བཀའ་བཅག་གམ། །བདག་ནི་ལྷན་ཅིག་སྐྱེས་སྦྱོར་ཉིད། །སྙིང་ལ་འཆང་ནས་བཀའ་བརྒྱུད་འཛིན། །ངོམ་རྒྱལ་གཏམ་རྒྱལ་དབྱི་དོ་སོགས། །ཡུལ་ཕྱོགས་འདི་ཡི་ས་བདག་ཚོ། །ངས་ནི་ཁྱེད་ཅག་གནས་པོ་བྱས། །བླ་མེད་བྱང་ཆུབ་བསྒྲུབས་ནས་ཀྱང་། །ཁྱེད་ཅག་བླ་མེད་བྱང་ཆུབ་ཀྱི། །ལམ་ལ་འགོད་པར་འདོད་པས་ན། །འདི་ཡི་སྡོང་གྲོགས་མ་བྱས་ན། །ཨུ་རྒྱན་ཆེན་པོའི་བཀའ་ལས་འདས། །དེ་ཕྱིར་དམ་ཚིག་ས་མ་ཡ། །ཤིང་འབྲུག་རྫོགས་པའི་གནམ་གང་ལ་དགེའོ། །མངྒ་ལཾ།། ༈ །།ན་མོ་ལོ་ཀེ་ཤྭ་ར་ཡེ། དེ་རིང་ཟླ་བ་ཡར་གྱི་ངོ་། །དུས་ཁྱད་པར་ཅན་གྱི་ཚེས་བརྒྱད་ཉིན། །ཆོས་རླུང་ཁྲིད་ཞག་བདུན་ཚར་བའི་ཉིན། །སེམས་བདེ་ཉམས་ཤར་བས་མགུར་གཅིག་བྱེད། །ལུས་རྒྱལ་བ་རྒྱ་མཚོ་སྤྱན་
རས་གཟིགས། །སྐུ་མཚན་དང་དཔེ་བྱད་རྒྱན་ཆ་རྫོགས། །ཕྱི་དར་དམར་གུར་ཕུབ་ལྟ་བུ་ལ། །ནང་སྟོང་པ་འོད་ཀྱི་གུར་ཁང་ནང་། །རྩ་དབུ་རྐྱང་རོ་གསུམ་ཀ་བ་བཞིན། །རྩ་འཁོར་ལོ་ལྔ་པོ་ཨེ་བི་དབྱིབས། །ལུས་རྩ་མདུད་དུག་ལྔའི་ས་བོན་ལྔ། །དེ་ཡེ་ཤེས་གཏུམ་མོའི་མེ་ཡིས་བསྲེགས། །ལྷ་ཐུགས་རྗེ་ཆེན་པོ་རིགས་ལྔར་བསྒྱུར། །གནས་རྩ་ཕྲན་རིགས་ལྔའི་ཌཱཀི་གསལ། །གནས་སྤྱི་བོའི་ཧཾ་ལས་བདུད་རྩི་བབ། །ལུས་རྩ་གནས་ལྷ་ཚོགས་འོད་དུ་འབར། །སེམས་བདེ་སྟོང་དབྱེར་མེད་རྟོགས་པ་འཆར། །འོད་འཕྲོས་པས་རྒྱལ་བ་སྲས་བཅས་མཆོད། །དེ་ཐམས་ཅད་ཐུགས་རྗེ་ཆེན་པོར་གྱུར། །རླུང་རྡུབས་པས་འོད་ཞུ་རང་ལ་ཐིམ། །རླུང་སྟེང་འོག་ཁ་སྦྱོར་བུམ་ཆེན་དང་། །སེམས་མ་བཅོས་སྟོང་ཉིད་ངང་ལ་བཞག །དོན་དེ་ལ་རྒྱུན་དུ་ཉམས་བླངས་ན། །ཚེ་གཅིག་ལ་བདེ་སྟོང་དབྱེར་མེད་པ། །དཔལ་རྡོ་རྗེ་འཆང་ཆེན་འགྲུབ་པར་གསུངས། །ཁྱེད་སྙིང་རུས་ལྡན་པའི་མི་ཡོད་ན། །ཆོས་འདི་ལ་སྙིང་རུས་བྱེད་པར་རིགས། །ལུས་རླུང་དང་འཁྲུལ་འཁོར་གཅུན་ནུས་ན། །ལུས་སྦྱོང་གི་འཁྲུལ་འཁོར་ཚར་རེ་
ཡིས། །དུས་བསྐལ་པ་གྲངས་མེད་སྒྲིབ་པ་དག །ལུས་རྩ་གནས་ལྷ་ཚོགས་བསྒོམ་ནུས་ན། །ཟས་ཟོས་ཚད་ཚོགས་ཀྱི་འཁོར་ལོ་ཡིན། །རླུང་སྲོག་རྩོལ་རྒྱུན་དུ་བསྒོམ་ནུས་ན། །དབུགས་དབྱུང་རྔུབས་སྔགས་དང་བསྙེན་པ་ཡིན། །སེམས་མ་ཡེངས་དྲན་རྫི་བསྐྱང་ནུས་ན། །སེམས་གང་ཤར་ཡེ་ཤེས་ཟང་ཐལ་ཡིན། །ཁྱེད་འདིར་ཚོགས་ཐུགས་ལ་དེ་ལྟར་ཞོག །ཅེས་སོ།། ༈ །།མཆོག་གི་སྤྲུལ་པའི་སྐུ་ལྷོ་པ་རིན་པོ་ཆེ་ཡི་དྲུང་ནས་དབང་རྡོ་རྗེ་ཕྲེང་བ་ཞུས་པའི་རྟགས་ཡིག་ཡོད། ན་མོ་གུ་རུ་བཛྲ་དྷ་ར་ཡེ། རབ་འབྱམས་དཀྱིལ་འཁོར་ཀུན་གྱི་བདག །བླ་མ་རྡོ་རྗེ་འཆང་ལ་འདུད། །དགེ་སློང་རཱ་ག་ཨ་སྱ་བདག །རྒྱུད་འབུམ་གླེགས་བམ་ལན་འགའ་བལྟས། །གོ་བའི་སྐྱ་རིས་ཐེབ་ལགས་ཀྱང་། །དབང་བསྐུར་ལེགས་པར་མ་ཐོབ་ན། །རྒྱུད་དོན་ལེགས་པར་ཤེས་ན་ཡང་། །གཞན་ལ་བཤད་པ་ལྟ་ཅི་སྨོས། །རང་གིས་ཉམས་སུ་བླང་མི་རུང་། །གལ་ཏེ་དད་དང་འདོད་པ་ཡི། །ཉམས་སུ་རྩེ་གཅིག་བླངས་གྱུར་པས། །ཐུན་མོང་དངོས་གྲུབ་ཅུང་ཞིག་དེར། །ཐོབ་ཀྱང་ངན་སོང་ལྟུང་བར་གསུངས། །དེ་ཕྱིར་རྒྱུད་སྡེ་རབ་འབྱམས་
དབང་། །རྡོ་རྗེ་ཕྲེང་བ་ཞེས་བྱའི་དབང་། །ཞུ་འདོད་སྐོམ་པ་ཆུ་ལྟར་གདུངས། །མཁས་པར་གྲགས་པ་འགའ་ཞིག་ལ། །ཞུ་བར་བརྩམས་ཀྱང་བསྐུར་མ་སྤོབས། །དབང་ལུང་ཐོབ་པའི་མཆེད་གྲོགས་འགར། །ཞུ་བར་སེམས་ཀྱང་སྤོབས་པ་ཟད། །ཀྱེ་མ་བདག་འདྲ་སྐལ་བ་དམན། །སྙམ་ནས་ཡི་མུག་ག་ཆད་གྱུར། །འོན་ཀྱང་གསང་སྔགས་སྣོད་གྱུར་པའི། །གང་ཟག་གང་དུ་ཡོད་པ་དེར། །རྡོ་རྗེ་འཆང་ཆེན་སློབ་དཔོན་གྱི། །ཚུལ་བཟུང་སྐལ་བར་འཚམས་པ་ཡི། །སྐུ་རུ་སྤྲུལ་ནས་དེ་ནང་དུ། །སངས་རྒྱས་ཐུགས་རྗེ་དུས་མི་གཡེལ། །གསུངས་པའི་ལུང་དང་རྗེས་མཐུན་པར། །མཁས་གྲུབ་ཡོངས་གྲགས་སྤྲུལ་པའི་སྐུ། །བཀའ་གཏེར་གསང་སྔགས་མཛོད་འཆང་བ། །ཀུན་མཁྱེན་ལྷོ་པ་རིན་པོ་ཆེ། །དབུས་ནས་ཕེབས་པ་ཞལ་མཇལ་ཚེ། །གསུང་གླེང་འཕྲོ་འགའ་བྱུང་བའི་ཞོར། །ཞབས་དྲུང་ཆོས་ཀྱི་གྲགས་པའི་བཀའ། །དམ་པ་མགར་གྱི་སྤྲུལ་སྐུ་ལ། །རྡོ་རྗེ་ཕྲེང་བ་གནང་དགོས་པས། །དེ་ཞོར་མཚམས་ཁུང་རེད་ན་ཡང་། །ཁྱོད་ལ་གནང་གསུངས་ཞལ་བཞེས་བྱུང་། །དེ་ནས་ལོ་གསུམ་གླང་གི་ལོ། །སྦོ་ཡི་ཟླ་
བའི་ནང་ཙམ་དུ། །དུས་ཆད་ཡོད་ཀྱང་ངག་མ་བྱུང་། །ད་ནི་ཆ་ངག་མི་འོང་ངམ། །བར་ཆད་དབང་དུ་ལུས་དོགས་ཚེ། །ཉམས་དང་རྨི་ལམ་འདྲེས་པའི་སྐབས། །ལྷ་དེ་གཡར་ཕྱིར་བཏང་འོང་ཞེས། །ཟེར་བའི་སྒྲ་ཞིག་ལྷང་གིས་གྲག །རྙིང་མའི་དབང་ལུང་འགའ་ཞིག་སོགས། །གསན་བཞེད་གནད་ཀྱིས་འོང་བར་གོ །རིང་པོར་མ་ཐོགས་བཀའ་ཤོག་ཕེབས། །དགའ་ཞིང་གུས་པས་མཇལ་དུ་སོང་། །ཁ་བ་ལྷགས་པ་ངལ་དུབ་སོགས། །དཀའ་ཚེགས་བག་ཙམ་བྱུང་བའི་དུས། །སྒྲིབ་པ་དག་པའི་དགའ་བ་སྐྱེས། །སྦོ་ཟླ་དམར་པོའི་ཚེས་བཅུ་ལ། །མཚམས་ཁུང་ཉིད་དུ་ཞལ་མཇལ་ཞིང་། །མཎྜལ་ཕྱག་རྟེན་ཕུལ་ནས་ཀྱང་། །ལུགས་གཉིས་གསུང་གླེང་མང་པོ་དང་། །ཐུགས་སྒྲུབ་ཡང་སྙིང་འདུས་པ་ཡི། །པོད་ལུང་ཡོངས་རྫོགས་ཕུལ་བའི་སྐབས། །རྨི་ལམ་ཨོ་རྒྱན་རིན་པོ་ཆེ། །སྐུ་ནི་གསལ་པོར་མ་མཐོང་ཡང་། །གསུང་གླེང་མང་དུ་བྱུང་བ་ལ། །ལྷོ་པ་སྤྲུལ་པའི་སྐུ་ཉིད་ནི། །རྗེ་འབངས་སོག་པོ་ལྷ་དཔལ་གྱི། །སྐྱེ་མཐའ་ཡིན་པར་ལུང་བསྟན་དང་། །འབྲི་ཁུང་ཞབས་དྲུང་གསུམ་མཐུན་ཅིང་། །ཨོ་རྒྱན་རྗེ་དང་སོག་པོ་དཔལ། །
སྟོན་འཁོར་ཐ་མི་དད་པའི་ཕྱིར། །དོན་ལ་བླ་མ་དམ་པ་འདི། །ཨོ་རྒྱན་དངོས་སུ་འདུག་སྙམ་པའི། །གོ་བ་མོས་གུས་ངེས་ཤེས་ཐོབ། །ཆོས་ཀྱི་བགྲོ་གླེང་འདྲ་བ་འགའ། །བྱུང་ནུབ་ཉམས་ཀྱི་སྣང་བ་ལ། །གསང་སྔགས་ལུགས་ལ་བླ་མ་ཡི། །ཅི་གསུངས་ཚད་མར་འཛིན་དགོས་པ། །བགྲོ་གླེང་བྱས་ན་བླ་མ་ཡི། །ཅི་གསུངས་དེ་འཆ་ལ་ཐལ་རྒྱག་དགོས། །དཀྱིལ་འཁོར་དུ་མའི་དབང་ཞུ་དུས། །སློབ་དཔོན་གསུང་ལ་ཐལ་རྒྱག་པ། །རྟེན་འབྲེལ་ལེགས་པོ་མིན་པར་གོ །བདག་ནི་དབང་ལུང་ཞུ་ཕྱིར་འོང་། །བགྲོ་གླེང་བྱེད་དུ་འོང་བ་མིན། །ད་ནི་ཅི་ལྟར་གསུངས་པ་ལ། །ཉམས་མཚར་བགྲོ་གླེང་མི་བྱེད་ཞུས། །ཅི་ཡིན་གསུངས་པས་རྟགས་བྱུང་ཞུས། །ཁྱེད་ལ་འཕྲལ་དུ་རྟགས་གསལ་བ། །བསྙེན་པ་མང་བའི་དོན་ཡིན་གསུངས། །ད་ནི་རྡོར་ཕྲེང་བཙུགས་པ་ནས། །ང་ཡི་ཐུགས་དམ་འགའ་ཆག་ཆེ། །དཔོན་སློབ་བསྲུང་བྱ་འགའ་སྣང་བར། །སྲུང་འཁོར་དམིགས་འདུན་མཛོད་ཅིག་གསུངས། །ཚེས་གཅིག་ནས་བཟུང་དབུ་བཙུགས་ཏེ། །རྡོ་རྗེ་ཕྲེང་བའི་ལུང་རྣམས་དང་། །སྟ་གོན་ནས་བཟུང་རིམ་པར་གནང་། །དེ་
ནས་མཎྜལ་དང་བཅས་ཏེ། །ཞུས་པས་རྔོག་དཀྱིལ་བདུན་པོ་གནང་། །གཤེད་དམར་དང་བཅས་དཀྱིལ་འཁོར་གྱི། །དབང་བསྐུར་ལྔ་བཅུ་ང་གསུམ་ཙམ། །ཐོབ་པས་སེམས་དགའ་བག་དྲོ་ཞིང་། །སྟན་ཐོག་གཅིག་ཏུ་དཀྱིལ་འཁོར་དབང་། །འདི་ལས་མང་བ་ཞུ་མ་མྱོང་། །ཆོས་ཀྱི་སྙིང་པོ་གསང་སྔགས་ཏེ། །གསང་སྔགས་རྩ་བ་དབང་ཡིན་ཅིང་། །དབང་པོ་རབ་ཀྱི་གང་ཟག་ནི། །དབང་བསྐུར་ཁོ་ནས་གྲོལ་བར་གསུངས། །གྲོལ་བའི་སྐལ་པ་མི་ལྡན་ཡང་། །སྒྲིབ་པ་དཔག་མེད་དག་པ་དང་། །སྐུ་གསུང་ཐུགས་ཀྱི་རྡོ་རྗེ་ཡི། །ས་བོན་རྒྱུད་ལ་ངེས་པར་ཐེབས། །ཨེ་མ་ང་རེ་སྐལ་པ་བཟང་། །ཁྱད་པར་ད་རེས་ཉ་མཚམས་ལ། །ཉི་ཟླ་གཟས་འཛིན་གཉིས་དང་འགྲིག །ཐོབ་པའི་ཡི་དམ་དེ་་རྣམས་ཀྱི། །བསྐྱེད་རིམ་སྐད་ཅིག་དྲན་རྫོགས་བསྒོམས། །བཟླས་པ་ཕྲེང་སྐོར་རེ་རེ་བྱས། །ཟླ་བ་བྱེ་བ་བརྒྱ་འགྱུར་ཏེ། །ཉི་མ་བྱེ་བ་འབུམ་འགྱུར་དུ། །བཅོམ་ལྡན་འདས་ཀྱིས་གསུངས་པའི་ཕྱིར། །ཡི་དམ་དཀྱིལ་འཁོར་དེ་རྣམས་ཀྱི། །བསྙེན་པ་དུང་ཕྱུར་སྟོང་རེ་ལྷག །འཕྲལ་དུ་ཐེམས་པས་བསོད་ནམས་ཆེ། །དཀྱིལ་འཁོར་རེ་རེ་ཐོབ་མ་ཐག །
ཏིང་འཛིན་གསལ་བའི་ངང་དེ་ལ། །བསྙེན་པ་ཕྲེང་སྐོར་དུ་ཐོན་བགྱིས། །ཁྱེད་ཀྱིས་བསྙེན་སྒྲུབ་བྱེད་ལུགས་འདི། །ལྟོགས་པ་ཟས་དང་འཕྲད་པ་འདྲ། །གསུངས་ཤིང་མཉེས་པའི་རྣམ་འགྱུར་མཛད། །དེ་ལྟར་དཀྱིལ་འཁོར་དབང་རྫོགས་ནུབ། །རྟགས་ཤིག་འོང་ངམ་སེམས་ཤིང་ཉལ། །དང་པོ་ལུང་བསྟན་དཔེ་ཆ་གཅིག །ལག་ཏུ་བྱུང་བར་དེ་གདའ་སྙམ། །དེ་ནས་དཔེ་ཆ་མ་ཡིན་པར། །རང་གིས་དྲན་ཅིང་ཤེས་སྙམ་བྱེད། །བཅོམ་ལྡན་ཤཱཀྱ་ཐུབ་པའི་ཡབ། །རྒྱལ་པོ་ཟས་གཙང་སྤྲུལ་པ་ནི། །བོད་རྗེ་ལྷ་སྲས་སད་ན་ལེགས། །དེ་ཉིད་དངོས་ཀྱི་སྐྱེ་མཐའ་ནི། །འབྲི་ཁུང་སྐྱུ་རའི་རིགས་འཁྲུངས་པ། །གཏེར་སྟོན་རིན་ཆེན་ཕུན་ཚོགས་ཏེ། །དེ་ཡི་སྤྲུལ་པའི་ཆ་ཤས་གཅིག །ཁོ་བོ་ཡིན་པ་དྲན་སྙམ་བྱེད། །དཀྱིལ་འཁོར་མང་པོའི་དབང་རྫོགས་པའི། །བྱིན་རླབས་ཡིན་པར་ངེས་ཤེས་སྐྱེས། །གཞན་ཡང་གསང་བ་སྙིང་བྱང་གི །དབང་ལུང་གནང་ནུབ་བསྙེན་པ་བྱས། །ཤར་ལྷོ་མཚམས་ཀྱི་ནམ་མཁའ་ལ། །ཉི་མའི་དཀྱིལ་འཁོར་གསལ་པོ་གཅིག །ཤར་ནས་བྱུང་བའི་རྨི་ལྟས་བྱུང་། །ཡང་ཟབ་ཆོས་དེ་ཟབ་པར་གོ །ཀརྨ་
འཇམ་དབྱངས་སྐུ་སྐྱེ་དང་། །ཁྲ་ལེབ་དབོན་པོ་སྐུ་སྐྱེ་དང་། །ཤོར་ཕུ་བ་ཡི་དབོན་པོ་དང་། །འཇང་གྲ་བ་ཡི་གྲ་རིས་དང་། །ཚ་བཤིའི་དབོན་པོ་སྐུ་སྐྱེ་སོགས། །དགེ་ཚུལ་བཅུ་བདུན་ཙམ་ཞིག་དང་། །དགེ་སློང་བཅུ་གཉིས་ཙམ་བསྒྲུབ་པའི། །མཁན་པོ་ལྷོ་པ་རིན་པོ་ཆེ། །སློབ་དཔོན་བདག་གིས་བྱས་ཏེ་བསྒྲུབ། །དེ་ཞོར་ཁྲ་ལེབ་སྐུ་སྐྱེ་གཉིས། །ཤོར་ཕུ་དང་ནི་ཚ་བཤི་ཡི། །བླ་མ་དབོན་པོ་སྐུ་སྐྱེ་དང་། །བསོད་ནམས་རྒྱ་མཚོའི་རྟོགས་ལྡན་གཉིས། །ཅོག་གྲྭའི་དགེ་སློང་ལ་སོགས་པ། །ཕག་མོ་བེར་དང་ཚེ་རིང་མ། །ལྷ་མོ་སྔགས་བདག་སྲིན་མགོན་དང་། །ཞིང་སྐྱོང་ལ་སོགས་ཀར་ལུགས་དང་། །གནམ་ཆོས་ཚེ་དཔག་དྲག་པོ་དང་། །གཏེར་སར་གྲོ་ལོད་ལ་སོགས་པ། །དབང་ལུང་འགྲོ་དོན་བག་ཙམ་འགྲུབ། །ཞི་དྲག་མཁའ་འགྲོའི་སྙིང་ཐིག་དང་། །བེར་ཆེན་འཁོར་ལྔ་ཚེ་དཔག་སོགས། །པོ་ཏི་བཞི་ལྔ་ཙམ་ཞིག་གིས། །དབང་ལུང་མཎྜལ་ཚུལ་དུ་ཕུལ། །བསམ་ཡས་ཆོས་སྐྱོང་གིས་བསྐུར་བའི། །རལ་གྲི་མདུང་དང་མདུང་དམར་དང་། །སྐུ་རྟེན་ཞབས་དྲུང་ཕྱག་བྲིས་སོགས། །གཟིམས་ཁང་ནང་དེར་འདུག་པའི་དྲུང་། །དྲག་པོ་
གཏེར་ཀ་གོང་འོག་གི །པོད་ལུང་ཕུལ་ཚེ་རྒྱལ་པོ་ལ། །གཟིར་བའི་དྲག་སྔགས་བཏོན་པའི་ནུབ། །དྲག་པོ་སྔགས་རྒོད་དེ་ཚོ་ཡིས། །ཆོས་སྐྱོང་ཆེན་པོའི་ཐུགས་ལ་ནི། །ཕོག་ཐུག་ཅུང་ཟད་བྱུང་ཟེར་བའི། །སྒྲ་ཞིག་གྲགས་ནས་དྲེའུ་གཅིག་ཤི། །རང་ཡང་སོ་ན་ལུས་མ་བདེ། །གཞན་གྱི་ཞོར་ལ་ཐོབ་པ་ནི། །ཚེ་སྒྲུབ་གནམ་ལྕགས་རྡོ་རྗེ་དང་། །བཀའ་བརྒྱད་དྲིལ་དབང་གཉིས་པོ་དང་། །ཐུགས་རྗེ་ཆེན་པོའི་དབང་རྒྱས་པ། །ཡང་ཟབ་གཏོར་དབང་ལུང་འགའ་ཞིག །པདྨ་འོད་འབར་གུ་དྲག་དང་། །ཚེ་དབང་དང་བཅས་པོད་དབང་དང་། །ཕག་མོ་ཞལ་གཉིས་ཕྱག་བཞི་པ། །རིགས་ལྔ་དགོངས་འདུས་འཁྲུལ་འཁོར་དང་། །གསང་ཁྲིད་འཁོར་ལོ་ལྔ་པའི་ཁྲིད། །ངོམས་མེད་ཆོས་ཀྱི་རྒྱ་མཚོ་ཐོབ། །བྱིན་རླབས་རྟེན་དང་ཟང་ཟིང་སོགས། །གནང་སྦྱིན་གདན་མཐོ་བཀུར་སྟི་གནང་། །མཆེད་གྲོགས་རྡོ་རྗེ་སྤུན་གྱུར་པ། །དམ་པ་མགར་དང་ཚ་བཤི་བ། །འབྲུག་ཆེན་བསོད་ནམས་དགེ་བ་སོགས། །གནང་སྦྱིན་གདན་མཐོ་བཀུར་སྟི་མཛད། །ཕྱིར་ལ་དབང་ལུང་རྫོགས་ཚར་ནས། །ཡར་ལ་འབུལ་ཞིང་ཡོད་པའི་
མགོ་ཀཾ་ཚང་ཕྱག་ཆེན་ལམ་རིམ་དང་། །ཞིབ་རྒྱས་གང་ཡོད་འབུལ་བསམ་ཚེ། །ཡུལ་ལྷ་ངོམ་རྒྱལ་མཚོ་བཀྲ་ནི། །བན་སྐྱ་འདྲ་བའི་སྐྱ་མི་ལྔ། །རྨི་ལམ་ཡུལ་དུ་ཡད་ཡུད་མཐོང་། །མྱུར་དུ་ཕ་ཡུལ་འགྲོ་དགོས་པའི། །རྟགས་ཤིག་བྱུང་སྨྲས་ཅི་མགྱོགས་བྱས། །འོན་ཀྱང་མ་ནིང་ལ་སོགས་དང་། །ཀཾ་ཚང་ལུང་རྣམས་རྫོགས་མ་ཐུབ། །ད་རུང་མཇལ་བའི་རྟེན་འབྲེལ་ཞུས། །དེ་སྐོར་གལ་ཆེན་བརྟག་པ་ནི། །ཞུ་མཁན་གསུམ་ཙམ་བྱུང་བ་ལ། །རྨི་ལྟས་གསལ་ཕྱིར་ཕྱོགས་ཙམ་སྨྲས། །དེ་ལ་གང་ཕན་རིམ་གྲོ་བཀྲལ། །ཁྱིམ་བདག་མགོན་མེད་ཟས་སྦྱིན་གྱི། །ཀུན་དགའ་ར་བ་དང་མཚུངས་པའི། །སྡོང་གི་གནས་པོས་གཙུག་ལག་ཏུ། །སྤྱན་དྲངས་ཡར་ལམ་མར་ལམ་ལ། །བཀུར་སྟི་གུས་ཞབས་ཚད་མེད་བྱས། །རྒྱལ་བ་ཐམས་ཅད་མཁྱེན་པ་ཡིས། །གནས་དེར་སྦྱིན་སྲེག་མཛད་པ་ཡི། །སྤྱན་ལྟོས་ལྟར་དུ་སྦྱིན་སྲེག་དང་། །དབང་གི་འབྲེལ་པ་འགའ་རེ་བྱས། །དེ་ནས་རང་གནས་སླེབས་པ་ཡི། །བན་ཁྲལ་སོགས་ཀྱི་གཏམ་ཉོག་དང་། །མི་བདེ་འགའ་རེ་བྱུང་གདའ་བས། །ངོམ་རྒྱལ་འོང་བ་དེ་རུ་གོ །གྲྭ་པ་གཞི་བ་ཐམས་
ཅད་ལ། །ཌཀི་དང་ནི་བཀའ་སྲུང་མའི། །དབང་བསྐུར་དགོངས་འདུས་འཁྲུལ་འཁོར་གྱི། །ལུང་བྱས་འཁྲུལ་འཁོར་སྦྱོང་བཅུག་གོ །མངྒ་ལཾ། །ན་མོ་ལོ་ཀེ་ཤྭ་ར་ཡེ། ཡོས་ལོ་སྨིན་དྲུག་བཅོ་ལྔ་ལ། །བདུད་འདུལ་རྡོ་རྗེའི་བཀའ་ལུང་དང་། །གོང་ནས་དཔོན་པོའི་བཀའ་ཡིས་བསྐུལ། །དབང་ལུང་ཟབ་ཁྲིད་སྤེལ་བའི་ཕྱིར། །སྨར་ཁམས་ཀེ་རུའི་སྒང་དུ་ཆས། །མཚོ་དཀར་གནས་ལག་ལྷ་སྟེང་ཁོག །དམ་ཅན་འགགས་སུ་གསོལ་ཁ་བཏང་། །མགར་བ་དམར་ནག་གཉིས་ཀའི་སྐུ། །ཁྲག་ལ་གསལ་བར་འདུག་པ་མཇལ། །གྱིང་ཐང་ཞེས་བྱར་ཞག་པའི་ནུབ། །རྨི་ལམ་ཁྲོམ་ཚོགས་འགའ་བྱུང་བར། །ཆོས་འབྲེལ་དབང་འབྲེལ་བྱེད་སྙམ་ཛ། །ངེད་ཆ་རྣམས་བླ་མ་མང་པོ་ལ། །དབང་འབྲེལ་མང་པོ་ཐོབ་ཟེར་ནས། །བདག་ལ་མ་ཞུས་བྱེར་སོང་བ། །དཔོན་དེ་མཛེ་ཡིས་ཟིན་ནས་སྣང་། །བདག་ལ་ཧ་ཅང་མི་གུས་ཤིང་། །ཡུལ་དེའི་ཀླུ་ལ་ནད་བྱུང་བས། །ཆར་དཀོན་ཡུལ་རྒུད་དེས་ལེན་སྙམ། །དེ་ནས་མི་འགྱུར་རྡོ་རྗེ་ཡིས། །གནས་སྒོ་གསར་དུ་ཕྱེས་པ་ཡི། །དཀར་ཡུ་སེ་ཡུའི་དྲུང་ནས་གཤར། །
གནས་ཡིག་ལ་སོགས་མ་མཐོང་ཡང་། །མ་གཅིག་ལབ་སྒྲོན་གྱིས་གསུངས་པའི། །གཅོད་ཀྱི་ས་དཔྱད་གཞུང་ལྟར་ན། །སྒྲོལ་མ་དཀར་སྔོན་གནས་སུ་སེམས། །ཕྱག་བརྒྱ་མཎྜལ་བརྒྱ་རྩ་ཕུལ། །ཕ་བོང་གཅིག་ལ་ཞབས་རྗེས་མང་། །སྲིན་པོའི་ཀླད་པས་བྲིས་པ་ཡི། །ཡིག་དྲུག་མཇལ་བས་ཡིད་ཆེས་སྐྱེས། །དེ་ཚེ་ནམ་མཁའ་དྭངས་སྐབས་ལ། །གློ་བུར་སྤྲིན་དཀར་འཇའ་དཀར་གྱིས། །ཨུཏྤལ་ཤིང་ལོ་སྣ་ཚོགས་གཟུགས། །ནམ་མཁའ་གང་བར་བྲིས་པ་འདྲ། །ལྷགས་སྣ་ས་ཆུ་བསྡམ་སྐབས་དེར། །ཆུ་སྣ་སྒྲ་བཅས་དཔྱིད་དུས་བཞིན། །མདུན་ནས་བསུ་ལྟར་ལན་གཉིས་བྱུང་། །གནས་པར་བྱིན་རླབས་མ་ཉམས་ཤིང་། །དམ་ཚིག་གཙང་བའི་རྟགས་སུ་གོ །འཇམ་དཔལ་རྩ་བའི་རྒྱུད་ཆེན་ལས། །འཕགས་མ་སྒྲོལ་མའི་སྤྲུལ་པ་ནི། །འཛམ་གླིང་ཆུ་བཞིའི་རྒྱུད་ཁྱབ་པར། །འགྱེད་པར་གསུངས་པ་དེ་དང་ནི། །བཅོམ་ལྡན་ཤཱཀ་ཐུབ་ཉིད་ཀྱི་གསུངས་ལས་ཀྱང་།་གླིང་དང་ནགས་ཚལ་སྟུག་པོའི་རི་ཁྲོད་དང་། །ཕུག་དང་ཆུ་ཀླུང་རི་བོའི་རྩེ་རྣམས་སུ། །དུས་རྣམས་རྟག་ཏུ་བཞུགས་པར་གྱུར་པ་ཡི། །བཅོམ་ལྡན་སྒྲོལ་མ་ཁྱེད་ལ་ཕྱག་འཚལ་
བསྟོད། །ཅེས་གསུངས་ལྟར་དུ་སེ་ཡུ་དཀར་ཡུ་ཡི། །གནས་དེའི་རི་རྩེ་བྲག་ཕུག་ནགས་ཚལ་དང་། །སྒྲོལ་མ་དཀར་སྔོན་སྤྲུལ་པ་ངེས་བཞུགས་ཀྱང་། །ཡི་དྭགས་རྣམས་ཀྱིས་ཟས་ལ་དགྲ་མཐོང་ལྟར། །གནས་བཟང་མཇལ་ཞིང་བསྐོར་མཁན་ཉུང་འདུག་པ། །བསོད་ནམས་ཆུང་ཞིང་ཐོས་རྒྱ་ཆུང་བས་ལེན། །འོན་ཀྱང་རིམ་གྱིས་འགྲོ་དོན་འབྱུང་ངམ་སེམས། །པོ་ཊ་ལ་དང་དབྱེར་མེད་དོན་གཅིག་པ། །དཀར་ཡུ་སེ་ཡུ་ཞེས་བྱའི་གནས་མཆོག་ན། །སྒྲོལ་མ་དཀར་ལྗང་གཉིས་ལ་གསོལ་བ་འདེབས། །མི་འགྱུར་རྡོ་རྗེའི་སྐུ་ཚེ་འཕེལ་བ་དང་། །བདག་ཅག་འཇིགས་པ་བརྒྱད་ལས་སྒྲོལ་མཛད་གསོལ། །དེ་ནས་དམ་ཚིག་གཅིག་པའི་རྡོ་རྗེ་སྤྱན། །སྡེ་སྣོད་འཛིན་པ་ཡོངས་རྫོགས་དགེ་བའི་བཤེས། །རྙི་བ་རབ་འབྱམས་སྐུ་མཆེད་གཉིས་དང་མཇལ། །གནམ་ཆོས་དབང་ལུང་གསན་ཞིང་དག་སྣང་འཕེལ། །རྨི་ལམ་བུད་མེད་མཛེས་མས་དགའ་ཚུལ་དང་། །ཁྲོམ་འདུས་དབང་ཆོས་ཞུ་ཞིང་ཀུན་འདུད་སྣང་། །ལུང་པ་དེ་ཡི་གཞི་བདག་ཡིན་ནམ་སེམས། །དེ་ནས་མཛོ་རྫི་མདའ་རུ་ཞག་པའི་ནུབ། །རྒྱལ་འགོང་ཆོ་འཕྲུལ་གནོད་འཚེ་བྱེད་
པའི་རྟགས། །བླ་ཆེན་པཎ་ཞྭ་གྱོན་པ་གཅིག་གིས་ནི། །ང་ཡི་ཞྭ་ལ་ངན་སྐྱུགས་བྱུགས་པ་རྨིས། །ཕྱིར་ནང་ས་ཁུད་དྲོ་སར་སྒར་བརྒྱབ་ཀྱང་། །རླུང་འཚུབ་ཆེན་པོས་གནོད་པ་ཆེར་བྱུང་ཞིང་། །རང་གི་སློབ་བུ་གཅིག་གི་རྐང་པ་ཆག །ཧཱུྃ་ཧཱུྃ་ཧཱུྃ། རྣལ་འབྱོར་བདག་ལ་དམ་སྲིའི་དགྲ་བྱུང་ན། སྐྱབས་ཀྱི་དམ་པ་རྡོ་རྗེ་གྲོ་ལོད་འབོད། །ཡེ་ཤེས་སྤྱན་དང་མངོན་ཤེས་དྲུག་ཅུ་ཡིས། །སྣང་སྲིད་འཁོར་འདས་ཐམས་ཅད་ས་ལེར་གཟིགས། །རྡོ་རྗེའི་སྙན་མངའ་ནམ་མཁའི་མཐར་ཐུག་གི །སྒྲ་རྣམས་ཀུན་གྱི་རྗེས་འགྲོ་སོ་སོར་གསོན། །མཐུ་སྟོབས་ཐོགས་མེད་དྲེགས་པ་ཀུན་འདུལ་བ། །གནོད་བྱེད་དམ་སྲི་འདི་ལ་བཀའ་ཆད་ཕོབ། །མ་འོངས་པདྨ་འབྱུང་གནས་མཚན་འཛིན་པ། །སྤྱི་བོས་བླངས་ནས་ཕྲིན་ལས་བསྒྲུབ་བོ་ཞེས། །སྔོན་གྱི་དམ་ཚིག་དེ་ལས་འདས་གྱུར་ནས། །རྣལ་འབྱོར་ང་ལ་ཐོ་འཚམ་བྱེད་པ་ཡི། །བགེགས་དང་འབྱུང་པོ་དམ་སྲི་གང་ཡིན་པ། །ཡཀཱ་ཁྲོ་བོས་མགོ་དང་ཡན་ལག་ཆོད། །གནམ་ལྕགས་སྡིག་པས་དེ་ཡི་སྙིང་ཁྲག་འཇིབས། །སྔོན་གྱི་དམོད་པ་རང་རང་ཉིད་ལ་སྡིགས། །རྡོ་རྗེ་ཁྲོ་ལོད་བཀའ་ལ་བདེན་ཡོད་ན། །ང་ལ་ཐོ་འཚམ་བྱེད་
པའི་དམ་སྲི་རྣམས། །མཐུ་སྟོབས་ནུས་པས་རྡུལ་དུ་བརླག་གྱུར་ཅིག །ནམ་ཞིག་བདག་གིས་བླ་མེད་འབྲས་ཐོབ་ཚེ། །དམ་སྲི་ཁྱོད་ཀྱང་བདག་གིས་རྗེས་བཟུང་ནས། །བླ་མེད་བྱང་ཆུབ་མཆོག་ལ་འགོད་པར་ཤོག །ཅེས་སོ། །དེ་ནས་སྒ་ཉག་ཅེས་བྱར་ཚེར་ལུང་པས། །བྱིན་གྱིས་སརླབས་པའི་གནས་སུ་ཞི་ཁྲོ་ཡི། །དབང་ཁྲིད་སྦྲེལ་མ་རྫོགས་ཆེན་ཉུང་ཁྲིད་བཙུགས། །ལྷ་ཐོག་དགྲ་བླ་ཡེ་བརྫུ་ཞེས་བྱ་དེ། །ནམ་མཁར་གནས་ཚེ་ཡེ་བརྫུ་ཞེས་བྱ་སྟེ། །རི་ལ་གནས་ཚེ་རྡོ་རྗེ་གུར་མགོན་ཡིན། །ས་འོག་གནས་ཚེ་མི་མགོན་དཀར་པོ་ཡིན། །ཟེར་བའི་སྒྲ་ཞིག་ཉམས་རྨི་མཚམས་སུ་ཐོས། །དཔོན་གྱིས་བསྐུལ་ནས་དེ་ཡི་གསོལ་ཁ་བརྩམས། །གཡག་ནག་མང་པོ་རང་གི་དྲུང་འདུག་དང་། །མི་དཀར་དིལ་མགོ་ཙམ་པ་ཆས་བཟང་ལ། །ཕྲུག་དཀར་དར་གོས་སྔོན་པོའི་གོང་ལག་ཅན། །མགོ་ལ་ཞྭ་ཐེབ་དཀར་པོ་གུར་ཙམ་གྱོན། །རྟ་བཟང་སྨུག་པོ་ཞོན་པའི་བརྗིད་བག་ཅན། །ཉམས་དང་རྨི་ལམ་འདྲེས་པའི་མཚམས་སུ་མཐོང་། །ཡེ་བརྫུའི་ཀ་བསྟོད་ལ་སོགས་འགའ་རེ་བྲིས། །གནམ་ཆོས་འདོན་འགྲིགས་མི་མགོན་དཀར་པོ་ཡི། །
འདོན་ཆོག་ཀ་བསྟོད་བྲིས་ནས་གཏོར་མ་ཕུལ། །ཉམས་དང་རྨི་ལམ་འདྲེས་པའི་སྐབས་འགའ་ལ། །ས་གཞི་ཐམས་ཅད་རྒྱ་མཚོར་གྱུར་པ་མཐོང་། །སྡེ་ཡང་རྒྱུས་མེད་ཁྲོམ་ཡང་ཉུང་བའི་སྐབས། །ཁྲོམ་ཚོགས་ཨ་ཐོ་བ་ཅིག་འདུས་པ་ཡི། །བདག་གི་གདན་གྱི་ཐོག་དེར་རྡོ་དྲིལ་དང་། །དབང་ཆས་བཞག་པ་ཁྲོམ་པའི་སྤྱི་བོའི་ཐད། །བྱ་ལྟར་ལྡིང་ནས་མགོ་ཐོག་འདྲིལ་བ་རྨིས། །ཡུལ་དེའི་ལྷ་འདྲེ་ཅུང་ཞིག་དད་འདུག་པས། །མི་རྣམས་དད་ཅིང་འགྲོ་དོན་འབྱུང་ངམ་སྙམ། །དེ་ནས་བཟུང་སྟེ་ཁྲོམ་ཡང་ཡོད་ཚད་ཚོགས། །ཉམས་དང་རྨི་ལམ་འདྲེས་པའི་སྐབས་ཤེད་ན། །གུ་རུའི་མཚན་ཅན་སྡེ་དཔོན་དེ་ཉིད་ནི། །སྤྲུལ་པའི་ཆོས་རྒྱལ་ཡིན་ཞེས་ལུང་བསྟན་བྱུང་། །དེ་ཕྱིར་བརྟན་བཞུགས་ཚེ་དབང་ལ་སོགས་ཕུལ། །མཆེད་གྲོགས་ཡིན་ལྟར་ཕན་ཚུན་དག་སྣང་འཕེལ། །སྐུ་རིམ་དགོས་ཚུལ་ཞིབ་པར་དཔོན་ལ་ཞུས། །འདི་སྐབས་དཀོན་མཆོག་ཡན་ལག་གིས་མཛད་པའི། །གླེགས་བམ་གཅིག་ནི་མཇལ་རྒྱུ་བྱུང་བ་དེས། །དངོས་སུ་མཇལ་ལྟར་སྒྲོ་འདོགས་མང་དུ་ཆོད། །དེ་སར་གོ་ནས་དོན་ཆེན་འགྲུབ་སྙམ་དགའ། །དར་གྱི་ན་བཟའ་མཎྜལ་བརྒྱ་རྩ་
ཕུལ། །ཁྲིད་ཕྲུག་ལྷ་ཞལ་མཐོང་བ་གསུམ་བཞི་དང་། །བར་ཆད་མེད་ཅིང་བདུན་གསུམ་ཆོས་མཐར་ཕྱིན།། ༈ །།ན་མོ་གུ་རུ། རྡོ་རྗེའི་སྙན་དང་ཡེ་ཤེས་སྤྱན། །སེམས་ཅན་ཁམས་ལ་ལན་དྲུག་ཏུ། །གཟིགས་མཛད་སངས་རྒྱས་ཚེ་དཔག་མེད། །ཁྱེད་ལ་བདག་གིས་འདོད་དོན་ཞུ། །ཚེ་རབས་འཁོར་བ་ཐོག་མེད་ནས། །མི་ལུས་ལ་ནི་ཚེ་བསོད་ནམས། །བསགས་པའི་ལས་འབྲས་གང་མཆིས་པ། །ད་རེས་ལུས་ཐོག་འདིར་སྨིན་ནས། །ཕྱིན་ཆད་འཁོར་བར་མི་སྐྱེ་ཞིང་། །འདི་ནས་ཚེ་འཕོས་གྱུར་མ་ཐག །མགོན་པོ་ཁྱེད་ཀྱི་ཞབས་དྲུང་དུ། །རྫུས་སྐྱེས་སྤྲུལ་སྐུ་ཐོབ་པ་ཅིག །འོད་དཔག་མེད་མགོན་ཁྱེད་རང་མཁྱེན། །པདྨ་གར་དབང་ཁྱེད་རང་མཁྱེན། །ཆོས་ཀྱི་དབང་ཕྱུག་ཁྱེད་རང་མཁྱེན། །སྟོབས་བཅུ་མངའ་བ་ཁྱེད་རང་མཁྱེན། །རྒྱལ་བ་རྒྱ་མཚོ་སྤྱན་རས་གཟིགས། །བདག་ལ་གསན་ཅིང་དགོངས་སུ་གསོལ། །ཐོག་མེད་དུས་ནས་ད་ལྟའི་བར། །མི་ཡི་ལུས་ལ་བརྟེན་ནས་ནི། །བསྟན་དང་འགྲོ་ལ་ཕན་པ་ཡི། །བསོད་ནམས་དགེ་ཚོགས་སྨོན་ལམ་ཤུགས། །གང་ཡོད་ལུས་རྟེན་འདིར་
སྨིན་ནས། །བསྟན་ལ་ཕན་ཐོགས་ཆེ་བ་དང་། །འགྲོ་བ་སྨིན་ཅིང་གྲོལ་བ་དང་། །འབྲེལ་ཚད་དོན་དང་ལྡན་པ་དང་། །རེ་ཞིག་ལྟོས་པའི་ཤི་གསོན་ཀུན། །བདེ་ཆེན་ཞིང་དུ་ཁྲིད་ནུས་པར། །སྤྱན་རས་གཟིགས་དབང་ཁྱེད་རང་མཁྱེན། །རྒྱལ་བ་རྒྱ་མཚོ་ཁྱེད་རང་མཁྱེན། །བཛྲ་དྷརྨཱ་དྷ་ཏུ་མཁྱེན། །བླ་མ་ཡི་དམ་དབྱེར་མེད་མཁྱེན། །འདོད་པའི་དོན་འདི་འགྲུབ་གྱུར་ཅིག །རྒྱལ་བ་ཀུན་གྱི་མཐུ་སྟོབས་བདག །ཧེ་རུ་ཀ་དཔལ་པདྨ་འབྱུང་། །ལྷག་པར་དེང་སང་ཐུགས་རྗེ་དང་། །ནུབ་པ་མྱུར་བའི་ངོ་མཚར་ཅན། །ཐོག་མེད་མངོན་པར་ཤེས་པ་ཡིས། །དགོངས་ལ་བདག་གིས་ཞུས་འདི་གསོན། །ཐོག་མེད་དུས་ནས་ད་ལྟའི་བར། །མི་ཡི་ལུས་རྟེན་ལ་རྟེན་ནས། །མཐུ་སྟོབས་ནུས་པ་རྫུ་འཕྲུལ་སོགས། །ངོ་མཚར་འབྱུང་བའི་ལས་ཅི་བསགས། །ལུས་རྟེན་འདི་ལ་མངོན་གསལ་ནས། །གསང་སྔགས་བསྟན་པ་རྒྱས་པ་དང་། །དབང་དང་ཁྲིད་སོགས་འབྲེལ་ཐོབ་རྣམས། །བསྐྱེད་རིམ་བརྟན་ཐོབ་བསྙེན་སྒྲུབ་ཐེམ། །ཐ་མལ་ཤེས་པ་རྗེན་པར་རྟོགས། །རིག་པ་ཚད་ཕེབས་དངོས་སུ་མཐོང་། །བདུད་བགེགས་དམ་སྲིའི་བར་ཆད་ཞི། །
ཆོས་བརྒྱུད་ཆུ་བོའི་གཞུང་ཆེན་ལྟར། །ཉམས་ལེན་བསྟན་སྲོག་འཛིན་པ་ཞིག །ཨོ་རྒྱན་ཆེན་པོ་ཁྱེད་རང་མཁྱེན། །རྗེ་འབངས་ཉི་ཤུ་རྩ་ལྔ་མཁྱེན། །གཏེར་སྟོན་བརྒྱ་དང་རྩ་བརྒྱུད་མཁྱེན། །དབང་བསྐུར་ཆོས་བཤད་འགྲོ་དོན་ཡང་། །དམ་བཅའ་ད་ནི་རྫོགས་ལ་ཁད། །ཟླ་བ་བཅུ་ཕྲག་ལྷག་ཙམ་འདིར། །འགྲོ་དོན་རླབས་ཆེན་འགྲུབ་པ་དང་། །དེ་ལ་བར་ཆད་མེད་པ་ཞིག །བྱ་རོག་མིང་ཅན་ནག་པོ་མཁྱེན། །འདོད་པ་ཁམས་ཀྱི་གཙོ་མོ་མཁྱེན། །མ་ནིང་ཡབ་ཡུམ་སྲས་བཅས་མཁྱེན། །བཀའ་སྲུང་དམ་ཅན་མ་གཡེལ་ཅིག །ཅེས་སྨྲས་སོ།། ༈ །།ན་མོ་མ་ཧཱ་མུ་དྲ་ཡེ། ས་ཅོར་ན་འདུག་པའི་ནུབ་མོ་ལ། །ཉམས་རྨི་ལམ་འདྲེས་པའི་མཚམས་ཤེད་ན། །མི་དཀར་པོ་རྟ་དཀར་ཞོན་པ་གཅིག །ལུས་ཕྱིང་དཀར་མགོ་ལ་ཞྭ་དཀར་གྱོན། །མི་བདག་ཉིད་བསུ་རུ་བྱུང་བ་སྙམ། །རྗེ་པདྨ་འབྱུང་གནས་བཀའ་དྲིན་གྱིས། །མི་ང་ལ་ནུས་པ་མ་མཆིས་ཀྱང་། །ཀླུ་མི་མགོན་དཀར་པོའི་འཁོར་ཅིག་ནི། །མི་བདག་ལ་བསུ་བ་བྱེད་དམ་སྙམ། །དུས་ཕྱིར་ནང་ལ་དེར་འོང་ཙམ་ན། །མི་བདག་ལ་རྟོགས་པའི་ཡེ་ཤེས་
ནི། །ལོ་སྔ་མའི་ནང་ནས་སྐྱེས་པ་དེ། །འཕྲལ་དེ་རུ་གསལ་ཞིང་ཡིད་ལ་བཀྲ། །ཕྱི་བཟུང་བའི་ཡུལ་སྣང་སྣ་ཚོགས་འདི། །དཔེ་རྒྱ་མཚོར་ཤར་བའི་ཟླ་སྐར་བཞིན། །དེ་སོ་སོར་གསལ་ཡང་ངོ་བོ་གཅིག །དཔེ་ལན་ཚྭ་ཆུ་ལ་ཐིམ་པ་ལྟར། །དེ་ཐམས་ཅད་རོ་གཅིག་སྟོང་པའི་ངང་། །ནང་འཛིན་པའི་དྲན་རིག་གྱ་གྱུ་འདི། །སེམས་སྣ་ཚོགས་འཕྲོ་ཡང་ངོ་བོ་གཅིག །དོན་ལྷན་སྐྱེས་ཡེ་ཤེས་འགྱུར་བ་མེད། །ཡར་སངས་རྒྱས་ཀུན་གྱི་ཐུགས་རྡོ་རྗེ། །མར་སེམས་ཅན་ཀུན་གྱི་སེམས་ཉིད་དང་། །བར་རྣལ་འབྱོར་ང་ཡི་སེམས་ཉིད་གསུམ། །དེ་དབྱེར་མེད་ལྷན་སྐྱེས་བདེ་བ་ཆེ། །དེ་ངོ་བོ་སྟོང་པ་བླ་མ་རྗེ། །དེ་རང་བཞིན་གསལ་བ་ཡི་དམ་ལྷ། །དེ་ཐུགས་རྗེ་འགག་མེད་ཌཱཀིའི་ཚོགས། །དོན་ཀུན་བྱེད་རྒྱལ་པོ་རང་གི་སེམས། །ད་རིན་ཆེན་སེམས་ཀྱི་གཏེར་ཁ་བྱེ། །བློ་བདེ་བ་བླ་མའི་བཀའ་དྲིན་ཡིན། །དོན་དེ་ལྟར་བསམ་ཞིང་འོང་ཙམ་ན། །དེ་སྙེམ་ཐ་མི་ཡི་འགྲིམ་ཕྲད་ཀྱང་། །སྐྱོན་ཉེ་ཞོ་མེད་པར་བདེ་བར་ཐར། །ས་རེ་གཞུང་སྤྱན་ལུང་འདུག་པའི་ནུབ། །ཉམས་རྨི་ལམ་འདྲེས་པའི་སོ་མཚམས་ན། །ཤར་ནམ་མཁའི་དབྱིངས་ནས་ཉི་མ་ཤར། །དོན་ཉམས་མཚར་དལ་ཕྱིར་བྲིས་པའོ།།
ཤོག་ལྷེབ་ ༣༠༥ ནས་ ༣༥༠ བར།
༈ ན་མོ་གུ་རུ། ཆོས་མངོན་པའི་སྡེ་སྣོད་ལས་གསུངས་པའི། །ཕྱི་སྣོད་ཀྱི་འཇིག་རྟེན་མི་རྟག་སྟེ། །དུས་ད་རེས་བསྐལ་པ་མེ་ཡིས་འཇིག །དེ་བསམ་གཏན་དང་པོ་མན་ཆད་དེ། །དེ་ཚིག་པའི་ཐལ་བ་ཙམ་མི་ལུས། །དཔེ་མར་ཁུ་མེ་ཡིས་ཚིག་པ་བཞིན། །ལན་བདུན་དུ་བསྐལ་ཆེན་མེ་ཡིས་འཇིག །དུས་དེ་རྗེས་ཆུ་ཡིས་འཇིག་པ་ནི། །ཡར་ལྷ་གནས་གཉིས་པ་མན་ཆད་འཇིག །དཔེ་ལན་ཚྭ་ཆུ་ལ་ཐིམ་པ་ལྟར། །དེ་ཞིག་པའི་སྙིགས་མ་ཙམ་མི་ལུས། །དེ་ལྟར་དུ་ཆུ་ཡིས་ལན་བདུན་ཏེ། །དེ་རྗེས་ནས་རླུང་གིས་འཇིག་པ་ཡང་། །མཐོ་ལྷ་གནས་བསམ་གཏན་གསུམ་པ་མན། །དཔེ་ཐལ་བ་རླུང་གིས་ཁྱེར་བ་བཞིན། །དེ་ཞིག་པའི་ལྷག་མ་ཙམ་མི་ལུས། །དེ་ཕྱི་ཡི་བསྐལ་ཆེན་མི་རྟག་ཚུལ། །ཆོས་མདོ་རྒྱུད་ཀུན་ནས་གསུངས་པ་ཡིན། །དོན་ཁྱད་པར་རྫོགས་ཆེན་རྒྱུད་སྡེ་ལས། །མེ་དང་ཆུ་དང་རླུང་གསུམ་གྱིས། །བསྐལ་པ་འཇིག་ཅིང་ཁྱད་པར་དུ། །ཤཱཀ་ཐུབ་བསྟན་པ་རྫོགས་ནས་ནི། །བྱམས་པའི་བསྟན་པ་མ་བྱོན་བར། །མེ་ཆུ་རླུང་
གིས་འཇིག་གྱུར་ནས། །ལོ་བརྒྱའི་བར་དུ་སྟོང་པར་གནས། །ལྔ་བརྒྱའི་བར་དུ་ཆགས་གསུངས་པ། །དེ་ནི་བསྐལ་ཕྲན་འཇིག་ཚུལ་ཏེ། །ཚེ་ལོ་བཅུ་པའི་མཐར་ཐུག་ནས། །མེ་ཡིས་རྩི་ཤིང་ལོ་ཐོག་བསྲེགས། །རླུང་གིས་གཏོར་ཞིང་ཆུ་ཡིས་ཇམ། །ལོ་བརྒྱའི་བར་དུ་སྲོག་ཆགས་དང་། །སྣོད་བཅུད་བདེ་ལེགས་ཀུན་གྱིས་སྟོངས། །དེ་ནས་སྣོད་ཀྱི་བདེ་ལེགས་དང་། །བཅུད་ཀྱི་སེམས་ཅན་ཡར་འཕེལ་ཏེ། །ས་གཞིའི་རྩི་བཅུད་ལོ་ཐོག་སོགས། །དག་པའི་ཞིང་ཁམས་ལྟ་བུ་ཡི། །ལོ་གྲངས་དཔག་མེད་ཐུབ་པ་ནས། །མར་འགྲིབ་ཚེ་ལོ་བརྒྱད་ཁྲིའི་དུས། །བྱམས་པ་འབྱོན་པར་གསུངས་པའོ། །མདོ་རྒྱུད་དགོངས་པ་མི་འགལ་ཚུལ། །བསམ་འགྲུབ་རྒྱལ་མོ་ཁྲི་སྐོར་གྱི། །སྡེ་ཆེན་ཞིག་པའི་ཡུལ་མཐོང་བས། །སྣོད་བཅུད་མི་རྟག་འགྱུར་བའི་ཚུལ། །ངེས་ཤེས་གོ་བ་བརྟན་པོ་སྐྱེས། །སྙིང་པོ་མེད་པའི་གནད་མཚང་རིག །མི་རྟག་འཆི་བ་ཏུང་ཏུང་དྲན། །སྐྱོ་ཤས་ངེས་འབྱུང་ལྷང་ལྷང་སྐྱེས། །མི་རྟག་འཆི་བ་བསྒོམ་པའི་ས། །འདི་འདྲར་བསྒོམས་ན་སྐྱེ་མྱུར་ཞེས། །གསུངས་པའི་དོན་ལ་ངེས་པ་རྙེད། །དེ་སྐད་འཕྲལ་དུ་བཀོད་
པའོ།། ༈ །།ན་མོ་གུ་རུ་སིདྡྷི་ཧཱུྃ། ཀུན་བཟང་རིགས་ལྔ་རྡོ་རྗེ་འཆང་ཆེན་སོགས། །རྒྱལ་བ་དགོངས་བརྒྱུད་རྣམས་ལ་གསོལ་བ་འདེབས། །དགའ་རབ་ཤྲཱི་སེང་རྒྱ་གར་རིག་འཛིན་བརྒྱད། །རིག་འཛིན་བརྡ་བརྒྱུད་རྣམས་ལ་གསོལ་བ་འདེབས། །པད་འབྱུང་རྗེ་འབངས་ཉི་ཤུ་རྩ་ལྔ་སོགས། །གང་ཟག་སྙན་བརྒྱུད་རྣམས་ལ་གསོལ་བ་འདེབས། །བཀའ་དགོངས་ཕུར་གསུམ་ཞི་ཁྲོ་རབ་འབྱམས་སོགས། །ཡི་དམ་ལྷ་ཚོགས་རྣམས་ལ་གསོལ་བ་འདེབས། །མ་ནིང་སྡེ་ལྔ་ལྷ་མོ་དཔོན་གཡོག་སོགས། །བཀའ་སྲུང་དམ་ཅན་རྣམས་ལ་གསོལ་བ་འདེབས། །ཁྱེད་རྣམས་ཡེ་ཤེས་སྤྱན་གྱིས་དུས་འདིར་གཟིགས། །མི་འགྱུར་རྡོ་རྗེའི་སྐུ་ཚེ་བརྟན་པ་དང་། །གོ་བར་ཆད་མེད་ཅིང་ས་གཏེར་ཐོན་པ་ཡི། །བྱིན་རླབས་དངོས་གྲུབ་ད་ལྟ་ཉིད་དུ་སྩོལ། །དེ་སྐད་སྒྲ་སྐད་རྒྱལ་པོ་འབྲུག་གི་ལོ། །རྒྱལ་ཟླའི་ཟླ་མགོ་འགྲུབ་སྦྱོར་སྔ་དྲོ་ལ། །བྲིས་པས་རྟེན་འབྲེལ་ལེགས་ཚོགས་འགྲིག་གྱུར་ཅིག། ༈ །།ན་མོ་གུ་རུ་བཛྲ་ཁྲོ་ལོད་ཡེ། འཇིག་རྟེན་འདི་ནི་སྟོབས་ཤུགས་རྫུ་འཕྲུལ་ཅན། །སྡེ་དཔོན་སུམ་
ཅུ་དྲེགས་པ་བཅོ་བརྒྱད་དང་། །མགུར་ལྷ་བརྟན་མ་དགེ་བསྙེན་ཐམས་ཅད་ཀུན། །ཡིད་ཀྱི་མངོན་ཤེས་ལྡན་པ་བདག་ལ་གསོན། །ཁྱེད་ཅག་སྔོན་ཚེ་རྡོ་རྗེ་གྲོ་ལོད་དྲུང་། །མ་འོངས་པད་འབྱུང་མཚན་ཙམ་འཛིན་པ་ཡང་། །ཁ་ཞེ་མེད་པར་སྤྱི་བོས་བཀུར་བ་དང་། །དེ་ཡི་དགོས་པ་བསྒྲུབ་པའི་དམ་བཅའ་བྱ། །དེ་ལས་འགལ་ན་ཁྱེད་ཅག་མགོ་ལུས་སྙིང་། རུལ་མྱག་རྡོ་རྗེ་དམྱལ་བར་ལྟུང་བ་ཡི། །དམ་བཅའ་ཐ་ཚིག་དེང་འདིར་དུས་ལ་བབ། །བདག་ནི་པདྨ་འབྱུང་གནས་རྗེས་འཇུག་ཅིང་། །གསང་སྔགས་བསྟན་པ་སྤེལ་བར་དམ་བཅས་ཏེ། །ཟླ་གྲངས་བཅུ་ལ་འགྲོ་དོན་བྱེད་སྐབས་འདིར། །བསྟན་འགྲོའི་དོན་ཆེན་འགྲུབ་པའི་ཕྲིན་ལས་མཛོད། །མྱུར་མགྱོགས་སྟོབས་ཤུགས་ཕྱུང་བའི་དུས་ལ་བབ། །དེ་སྐད་བསམ་འགྲུབ་གཞུང་དུ་ཚེས་གཅིག་ནུབ། །རྨི་ལམ་ཡེ་བརྫུ་བཙུན་ཆུང་མཛེས་པར་སྤྲུལ། །དྲུང་དུ་བྱུང་ནས་དགའ་ཚུལ་འཛུམ་མདངས་བསྟན། །དེ་བཞིན་ཕ་ཀིར་བུ་ཆུང་ཕྲུག་དཀར་ཅན། །དགའ་ཞིང་རྒྱང་ནས་བདག་ལ་བལྟ་བ་ནི། །ཀླུ་རྒྱལ་མི་མགོན་དཀར་པོ་ཡིན་ནམ་སེམས། །དེ་ཕྱིར་ཕྱིར་ནངས་འགྲུབ་སྦྱོར་སྔ་དྲོ་བྲིས།།
༈ ན་མོ་རཏྣ་ཏྲ་ཡཱ་ཡ། བདག་འདྲ་རཱ་ག་ཨ་སྱ་བདག །པད་འབྱུང་ལུང་གིས་ཟིན་པ་ན། །སྐལ་ལྡན་ལས་ཅན་ཡིན་པ་ན། །ས་ཆོས་གནམ་ཆོས་མང་པོ་ཡི། །བཀའ་བབས་ཆོས་བདག་ཡིན་པ་ལ། །སྟོང་ཉིད་ལྟ་བ་རྟོགས་པ་ན། །རོ་གཅིག་སེམས་སུ་རྟོགས་པ་ན། །སྨོན་ལམ་ལས་འཕྲོ་ལྡན་པ་ན། །གཞན་ཕན་སེམས་བསྐྱེད་རྒྱ་ཆེ་ན། །ཁྲིམས་ལྡན་དགེ་སློང་ཡིན་པ་ན། །དམ་ལྡན་སྔགས་འཆང་ཡིན་པ་ན། །རྟོགས་ལྡན་རྣལ་འབྱོར་ཡིན་པ་ན། །དེ་དག་ཀུན་གྱི་བདེན་པའི་སྟོབས། །ད་ལྟ་ཉིད་དུ་འདིར་གསལ་ནས། །འགྲོ་དོན་དཔག་མེད་མྱུར་འགྲུབ་ཤོག །སྐྱེ་འགྲོ་སྨིན་ཅིང་གྲོལ་བར་ཤོག །འབྲེལ་ཚད་དོན་དང་ལྡན་པར་ཤོག །བསྟན་པ་མེ་ལྟར་འབར་བར་ཤོག །སྐལ་ལྡན་སྤྲིན་ལྟར་འདུ་བར་ཤོག །བདེ་སྐྱིད་ཆར་ལྟར་འབབ་པར་ཤོག །དད་པའི་སྣང་བ་འགྱུར་བར་ཤོག །ཉམས་རྟོགས་འཕེལ་ཞིང་རྒྱས་པར་ཤོག །ཆོས་རྒྱུད་ཆུ་བས་རིང་བར་ཤོག །བར་ཆད་རྐྱེན་ངན་མེད་པར་ཤོག །སེང་གེ་ཁྱུང་གི་ཕྲུ་གུ་བཞིན། །ཕ་བས་བུ་བཟང་ཚར་བར་ཤོག །འབྲེལ་ཚད་བདེ་ཆེན་ཞིང་
བགྲོད་ཤོག །འགྲུབ་སྦྱོར་ཉིན་པར་སྨྲས་པས་དགེ། །།ན་མོ་གུ་རུ་པདྨ་སིདྡྷི་ཧཱུྃ། གཏེར་མའི་སྟོན་པ་བཅོམ་ལྡན་འདས། །སྣང་བ་མཐའ་ཡས་ལ་གསོལ་བ་འདེབས། །གཏེར་སྟོན་མི་འགྱུར་རྡོ་རྗེ་ལ། །ལུགས་གཉིས་བྱ་བ་ལུང་སྟོན་ལ། །བར་ཆད་མེད་པར་བྱིན་གྱིས་རློབས། །གཏེར་མ་ཡི་དམ་ཐུགས་རྗེ་ཅན། །སྤྱན་རས་གཟིགས་ལ་གསོལ་བ་འདེབས། །གཏེར་སྟོན་མི་འགྱུར་རྡོ་རྗེ་ལ། །ལུགས་གཉིས་བྱ་བ་ལུང་སྟོན་ལ། །བར་ཆད་མེད་པར་བྱིན་གྱིས་རློབས། །གཏེར་རྣམས་སྦས་མཛད་རིག་འཛིན་མཆོག །ཨོ་རྒྱན་རྗེ་ལ་གསོལ་བ་འདེབས། །གཏེར་སྟོན་མི་འགྱུར་རྡོ་རྗེ་ལ། །ལུགས་གཉིས་བྱ་བ་ལུང་སྟོན་ལ། །བར་ཆད་མེད་པར་བྱིན་གྱིས་རློབས། །གཏེར་མའི་ཡི་དམ་བཀའ་དགོངས་ཕུར། །ཞི་ཁྲོའི་ལྷ་ལ་གསོལ་བ་འདེབས། །གཏེར་སྟོན་མི་འགྱུར་རྡོ་རྗེ་ལ། །ལུགས་གཉིས་བྱ་བ་ལུང་སྟོན་ལ། །བར་ཆད་མེད་པར་བྱིན་གྱིས་རློབས་། །མ་ནིང་ཤན་པ་རྡོར་ལེགས་སོགས། །གཏེར་སྲུང་རྣམས་ལ་གསོལ་བ་འདེབས། །གཏེར་སྟོན་མི་འགྱུར་རྡོ་རྗེ་ལ། །ལུགས་གཉིས་བྱ་བ་ལུང་སྟོན་ལ། །བར་ཆད་
མེད་པར་བྱིན་གྱིས་རློབས། །པད་འབྱུང་རྩ་གསུམ་བདེན་པ་དང་། །དམ་ཅན་རྒྱ་མཚོའི་མཐུ་སྟོབས་དང་། །སྨོན་ལམ་ལས་འཕྲོ་བདེན་པའི་མཐུས། །སྤྲུལ་སྐུ་མི་འགྱུར་རྡོ་རྗེ་འདི། །བར་ཆད་དབང་དུ་མི་འགྲོ་བར། །གེགས་མེད་ས་ཡི་གཏེར་ཐོན་ནས། །སྐུ་ཚེ་ཕྲིན་ལས་འཕེལ་གྱུར་ཅིག །དེ་སྐད་སྒྲ་རྒྱལ་འབྲུག་གི་ལོ། །རྒྱལ་གྱི་ཟླ་བའི་ཚེས་བཅུ་ལ། །རཱ་ག་ཨ་སྱས་བྲིས་པ་དགེ།་་་༈་།ན་མོ་རཏྣ་ཏྲ་ཡཱ་ཡ། བསླུ་བ་མེད་པའི་དཀོན་མཆོག་གསུམ། །བླ་མ་ཡི་དམ་མཁའ་འགྲོ་གསུམ། །ཆོས་སྐྱོང་སྲུང་མའི་ཐུགས་རྗེ་དང་། །བདག་གིས་དུས་གསུམ་དགེ་བསགས་མཐུས། །བར་ཆད་རྐྱེན་ངན་ཞི་བ་དང་། །བསྟན་འགྲོའི་དོན་ཆེན་འགྲུབ་པ་དང་། །འབྲེལ་ཚད་དོན་དང་ལྡན་པ་དང་། །ཚེ་མཇུག་སྒྲུབ་པ་མཐར་ཕྱིན་ནས། །འཕོས་མ་ཐག་ཏུ་བདེ་ཆེན་ཞིང་། །རྫུས་སྐྱེས་སྤྲུལ་པའི་སྐུ་ཐོབ་ནས། །ལུས་རྟེན་དེ་ལ་སངས་རྒྱས་ཤིང་། །སྤྲུལ་པས་འགྲོ་བ་འདྲེན་པ་ལ། །སྤྱན་རས་གཟིགས་དང་དབྱེར་མེད་པར། །འགྲོ་བའི་ཉེར་འཚོའི་གཞིར་གྱུར་ཅིག །བདག་གི་འདོད་དོན་སྨོན་ལམ་འདི། །
འགྲུབ་པར་པད་འབྱུང་ཁྱེད་རང་མཁྱེན། །དེ་རིང་སྙན་གྲགས་འབྲུག་གི་ལོ། །རྒྱལ་གྱི་ཟླ་བའི་ཚེས་པ་བཅུ། །སྔ་དྲོ་ཨོ་རྒྱན་ཉིད་བྱོན་སྐབས། །བདག་གིས་ཁྱེད་ལ་གསོལ་འདེབས་འདི། །རྡོ་རྗེའི་སྙན་གྱིས་གསན་ནས་ཀྱང་། །ཡེ་ཤེས་སྤྱན་གྱིས་བདག་ལ་གཟིགས། །དབང་བཅུའི་དབང་དང་སྟོབས་བཅུའི་སྟོབས། །རྫུ་འཕྲུལ་རྐང་པ་ཁྱད་འཕགས་པས། །ད་ལྟ་ཉིད་དུ་བདག་བྱིན་རློབས། །མ་ནིང་གྲི་གུག་ཕྱག་བཞི་དྲུག །ལྷ་མོ་དཔོན་གཡོག་ལ་སོགས་པ། །ཡེ་ཤེས་ཆོས་སྐྱོང་ཐམས་ཅད་ལ། །གསོལ་བ་འདེབས་སོ་བར་ཆད་སོལ། །འདོད་དོན་དེ་འགྲུབ་ཕྲིན་ལས་མཛོད། །རྣམ་སྲས་ཛམ་ལྷ་རེ་མན་ཏ། །ཨ་པར་ཚོགས་བདག་ལ་སོགས་པའི། །ཡེ་ཤེས་སྤྲུལ་པའི་གཏེར་བདག་ག་ལ། །གསོལ་བ་འདེབས་སོ་དངོས་གྲུབ་སྩོལ། །བསམ་པ་དེ་འགྲུབ་མཐུན་རྐྱེན་སྒྲུབས། །སྡེ་དཔོན་སུམ་ཅུ་དྲེགས་བཅོ་བརྒྱད། །བརྟན་མ་མགུར་ལྷ་དགེ་བསྙེན་ཚོགས། །སྔོན་གྱི་དམ་བཅས་མ་བསྙེལ་བར། །པད་འབྱུང་བསྟན་པ་འཛིན་སྐྱོང་སྤེལ། །བསྲུང་བའི་སྡོང་གྲོགས་དུས་ལ་བབ། །དམ་ལས་མ་འདའ་ས་མ་ཡ། །སྔགས་འཆང་བདག་གི་
བདེན་ཚིག་འདི། །འབྲས་བུ་དངོས་སུ་གསལ་བར་ཤོག། ༈ །།ན་མོ་གུ་རུ་ནཱ་ག་རྫུ་ན་ཡེ། མདངས་གསུམ་གཉིད་པའི་རྨི་ལམ་ལ། །ཀླུ་སྒྲུབ་སྙིང་པོས་བྱིན་བརླབས་ཤིང་། །རྒྱལ་བའི་རིང་བསྲེལ་ཕུང་པོའི་གཏེར། །བལ་ཡུལ་འཕགས་པ་ཤིང་ཀུན་མཇལ། །ཕྱི་ནི་མཆོད་རྟེན་ཆེན་པོ་ལ། །ནང་ནི་གཙུག་ལག་ཁང་ཆེན་པོ། །ཐུབ་དབང་སྐུ་མཆོག་ངོ་མཚར་བ། །མཚུར་ཕུའི་ལྷ་ཆེན་ཚད་ཙམ་ལ། །གསེར་མདོག་འོད་དུ་འབར་བ་མཇལ། །དེ་དྲུང་བཙུན་པའི་གཟུགས་ཅན་འགའ། །བདག་ལ་སྡོམ་པ་ཞུ་འདོད་ཟེར། །རྨི་ལམ་འཁྲུལ་པ་ངེས་མེད་དེ། །ཆོས་ཀུན་རྨི་ལམ་ཉིད་དང་མཚུངས། །ཀུན་རྫོབ་རྟེན་འབྲེལ་བསླུ་མེད་ཕྱིར། །བསྟན་ལ་ཅུང་ཟད་ཕན་ནམ་སྙམ། །སྟོན་པ་ཤཱཀྱའི་རྒྱལ་པོ་དང་། །དཔལ་མགོན་འཕགས་པ་ཀླུ་སྒྲུབ་ལ། །གསོལ་བ་འདེབས་སོ་བྱིན་གྱིས་རློབས། །ལུང་བསྟན་འདི་ཡིས་ཐུབ་དབང་གི །བསྟན་ལ་།ཕན་ཐོགས་ནུས་པར་ཤོག །ཀླུ་གནས་འཕགས་པ་ཤིང་ཀུན་ལ། །གསོལ་བ་འདེབས་སོ་བྱིན་གྱིས་རློབས། །མི་མགོན་དཀར་པོ་ལ་སོགས་པ། །ཡེ་ཤེས་ཀླུ་རིགས་ཐམས་
ཅད་ལ། །གསོལ་བ་འདེབས་སོ་དངོས་གྲུབ་བྱིན། །ཡང་ནི་རྨི་ལམ་མཆོད་རྟེན་དེ། །བྱ་རུང་ཁ་ཤོར་ཡིན་སྙམ་བགྱི། །བྱ་རྫི་མ་ཡི་བུ་གསུམ་གྱི། །སྐྱེ་བ་མཁན་སློབ་ཁྲི་སྲོང་ལ། །གསོལ་བ་འདེབས་སོ་ཐུགས་རྗེས་ཟུངས། །ལྷ་མོ་ཆེན་པོ་གྷསྨ་རཱི། །གསོལ་བ་འདེབས་སོ་བར་ཆད་སོལ། །རང་གཞན་དོན་གཉིས་འགྲུབ་པར་མཛོད། །དེ་སྐད་ཚེས་བཅུའི་སྔ་དྲོར་བྲིས།། །༈ །།ན་མོ་གུ་རུ་ཨཱརྱ་ཏཱ་ར་ཡེ། པདྨ་དཀར་པོའི་མདོ་སྡེ་ལས། །ཚོང་པ་ནོར་མང་ལྡན་པ་དག །གཡོན་ཅན་ཆོམ་རྐུན་དགྲ་ཡི་གསེབ། །གལ་ཏེ་སྐྱབས་མེད་འགྲོ་བའི་ཚེ། །སྤྱན་རས་གཟིགས་ལ་བོས་ན་ནི། །དེ་དག་གིས་ཀྱང་ལྟར་མི་ནུས། །གསུངས་ན་རྒྱུན་དུ་ཁྱེད་འབོད་ན། །བདག་ཅག་སྒར་་གཞིས་རྟ་ཕྱུགས་ལ། །དགྲ་རྐུན་ཇག་པ་མཐའ་མི་ཡི། །འཚེ་བ་ཀུན་ལས་བསྐྱབ་ཏུ་གསོལ། །རྗེ་བཙུན་འཕགས་མ་སྒྲོལ་མ་ཁྱེད། །འཇིག་རྟེན་དབང་པོའི་སྤྱན་ཆབ་ལས། །འཁྲུངས་མ་ཐག་ཏུ་འཇིག་རྟེན་ན། །གང་དག་འཇིགས་པས་སུ་སྐྲག་པ། །དེ་དག་སྐྱོབ་ཅེས་ཞལ་བཞེས་ན། །བདག་གིས་ཁྱེད་ལ་སྐྱབས་གསོལ་ན། །དགྲ་ཇག་རྐུན་པོ་མཐའ་
མི་ཡི། །འཇིགས་ལས་སྐྱོབས་ཤིག་རྗེ་བཙུན་མ། །དཔལ་ལྡན་དུར་ཁྲོད་བདག་པོ་ནི། །ཡབ་ཡུམ་སྔོན་ཚེ་བདེ་མཆོག་དྲུང་། །མ་འོངས་རང་ནོར་མི་དབང་དུས། །སྐྱོབ་ཅིང་བསྲུང་བར་དམ་བཅས་ན། །བདག་གིས་ཁྱོད་མཆོད་ཁྱོད་བསྟེན་ན། །མཐའ་མི་ཆོམ་རྐུན་དགྲ་ཇག་གི །འཚེ་བ་འདི་ལས་བསྲུང་དུ་གསོལ། །དེ་ཝི་འོད་ཟེར་ཅན་མ་ཡི། །མཚན་ཙམ་སུ་ཡིས་འཛིན་པ་ཡང་། །དགྲ་ཡི་དབང་དུ་མི་འགྲོ་བར། །གསུངས་ན་ཁྱེད་སྔགས་བདག་གིས་འཆང་། །མཐའ་མི་མི་རྒོད་དགྲ་ཇག་གི །འཇིགས་པ་འདི་ལས་བསྐྱབ་ཏུ་གསོལ། །བསྟན་སྲུང་རྡོ་རྗེ་ངེ་ནེ་མ། །དཀོར་ནོར་སྲུང་བར་ཁྱོད་བསྔགས་ན། །རྟ་ཕྱུགས་དགྲ་ལ་མ་ཤོར་ཅིག །འདོད་པའི་དབང་ཕྱུག་ལྷ་ཆེན་པོ། །ཁྱོད་སྔགས་འཆང་བ་སྲུང་ཞེས་པ། །ཐུབ་པའི་དྲུང་དུ་དམ་བཅས་ན། །སྔགས་འཆང་བདག་གི་རྟ་ཕྱུགས་ལ། །མཐའ་མིའི་འཚེ་བ་སྐྱོབ་པར་གྱིས། །སྟོབས་ནུས་ཅི་གདའ་ད་ལྟའོ། །དེ་སྐད་རྨི་ལྟས་དགྲ་ངོ་ཆེ། །ཕྱིར་ནངས་མཐའ་མིའི་འགྲིམ་འཇིགས་བྱུང་། །དེ་ཕྱིར་འཕྲལ་དུ་རྟེན་འབྲེལ་བྲིས།། ༈ །།ན་མོ་མ་ཧཱ་
མུ་ཏྲ་ཡེ། གནས་འོག་མིན་ཆོས་དབྱིངས་ཀྱི་ཞིང་ཁམས་བྱ་བ་ཡང་དེ་ན། །ཆོས་སྐུ་ཀུན་ཏུ་བཟང་པོ་བྱ་བ་དེ་བཞུགས་སོ། །རང་ལུས་ཙིཏྟ་སྙིང་གི་ཡང་དཀྱིལ་ན། །རང་སེམས་ངོ་བོ་ཆོས་སྐུ་རྗེན་པ་དེ་བཞུགས་གདའ། །དེ་གཉིས་དབྱེར་མེད་དུ་རྟོགས་པ་འདི་དགའ་ཡང་ནི་དགའོ། །ཆོས་སྐུ་སེམས་ལ་རྙེད་པ་འདི་སྐྱིད་ཀྱང་ནི་སྐྱིད་དོ། །དབང་མེད་འཁྲབ་སྙིང་འདོད་པ་འདི་མཚར་ཡང་ནི་མཚར་རོ། །གནས་འོག་མིན་འཐུག་པོ་བཀོད་པ་བྱ་བ་ཡང་དེ་ན། །ལོངས་སྐུ་རྣམ་པར་སྣང་མཛད་བྱ་བ་དེ་བཞུགས་སོ། །རང་སེམས་རང་བཞིན་རྣམ་དག་གསལ་དྭངས་ནི་འདི་ལ། །ལོངས་སྐུ་རིགས་ལྔ་ཡབ་ཡུམ་དེ་བཞུགས་གདའ། །དེ་གཉིས་དབྱེར་མེད་དུ་རྟོགས་པ་འདི་དགའ་ཡང་ནི་དགའོ། །ལོངས་སྐུ་སེམས་ལ་རྙེད་པ་འདི་སྐྱིད་ཀྱང་ནི་སྐྱིད་དོ། །དབང་མེད་འཁྲབ་སྙིང་འདོད་པ་འདི་མཚར་ཡང་ནི་མཚར་རོ། །མི་མཇེད་སྟོང་གསུམ་འཇིག་རྟེན་གྱི་ཞིང་ན། །སྤྲུལ་སྐུ་སངས་རྒྱས་སྟོང་རྩ་ནི་བཞུགས་སོ། །རང་སེམས་རིག་རྩལ་སྣ་ཚོགས་ཀྱི་ཀློང་ན། །སྣ་ཚོགས་སྤྲུལ་སྐུ་གྲངས་མེད་ནི་བཞུགས་གདའ། །དེ་གཉིས་དབྱེར་མེད་དུ་རྟོགས་པ་འདི་དགའ་ཡང་ནི་
དགའོ། །སྤྲུལ་སྐུ་སེམས་ལ་རྙེད་པ་འདི་སྐྱིད་ཀྱང་ནི་སྐྱིད་དོ། །དབང་མེད་འཁྲབ་སྙིང་འདོད་པ་འདི་མཚར་ཡང་ནི་མཚར་རོ། །ཚུར་ལ་རང་སེམས་ངོ་བོ་ལ་བལྟས་པས། །བལྟ་བྱ་ལྟ་བྱེད་ནི་མི་སྣང་སྟོང་གསལ་དུ་རྗེན་ནེ། །གང་ཟག་བདག་མེད་དེ་འདི་ག་རང་མིན་ནམ། །ཕར་ལ་ཕྱི་རོལ་ཡུལ་སྣང་ལ་བལྟས་པས། །སྟོང་གསལ་རྒྱ་མཚོའི་ཟླ་སྐར་ལྟར་ལམ་མེ། །ཆོས་ཀྱི་བདག་མེད་འདི་ག་རང་མིན་ནམ། །དེ་གཉིས་ཟུང་འཇུག་ཏུ་རྟོགས་པ་འདི་དགའ་ནི་དགའོ། །བདག་མེད་རྣམ་གཉིས་སེམས་ལ་རྙེད་པ་འདི་སྐྱིད་ཀྱང་ནི་སྐྱིད་དོ། །དབང་མེད་འཁྲབ་སྙིང་འདོད་པ་འདི་མཚར་ཡང་ནི་མཚར་རོ། །འགྲོ་དྲུག་སེམས་ཅན་རང་བཞིན་མེད་པར་ནི་མཐོང་ཡང་། །མ་གཏོགས་འགྲོ་ལ་ཤུགས་འབྱུང་གི་སྙིང་རྗེ། །སྟོང་ཉིད་སྙིང་རྗེ་ཟུང་འཇུག་འདི་དགའ་ཡང་དགའོ། །མ་བསྒོམ་རང་ཤར་འདི་སྐྱིད་ཀྱང་ནི་སྐྱིད་དོ། །དབང་མེད་འཁྲབ་སྙིང་འདོད་པ་འདི་མཚར་ཡང་ནི་མཚར་རོ། །འགྲོ་དྲུག་སེམས་ཅན་རང་བཞིན་མེད་པ་ནི་མཐོང་ཡང་། །མ་རྟོགས་འགྲོ་ལ་ཤུགས་འབྱུང་གིས་སྙིང་རྗེ། །སྟོང་ཉིད་སྙིང་རྗེ་ཟུང་འཇུག་འདི་དགའ་ཡང་ནི་
དགའ་འོ། །མ་བསྒོམས་རང་ཤར་འདི་སྐྱིད་ཀྱང་ནི་སྐྱིད་དོ། །དབང་མེད་འཁྲབ་སྙིང་འདོད་པ་འདི་མཚར་ཡང་ནི་མཚར་རོ། །བསམ་འགྲུབ་གཞུང་དུ་གསང་བ་ནི་འདུས་པའི། །དབང་སྒྲུབ་བཙུགས་ཉིན་ཐུན་བར་ནི་ཞིག་ཏུ། །རོགས་མེད་གུར་ནང་གཅིག་པུར་ནི་ཡོད་ཛ། །ཉམས་འབར་དབང་མེད་གདན་ཁ་རུ་བྲོ་འཁྲབ། །མི་རྒན་གཅོད་པ་རང་མིན་ནམ་དགོད་བྲོ། །དེ་ནས་འཕྲལ་དེར་ཡི་གེ་རུ་བྲིས་སོ།། ༈ །།ན་མོ་གུ་རུ་དྷརྨེ་ཤྭ་ར་ཡེ། ནུབ་བདེ་བ་ཅན་གྱི་ཞིང་ཁམས་ན། །མི་བདག་གི་བླ་མ་བཞུགས་པ་དེ། །མཚན་ཚེ་དཔག་མེད་པ་མི་ཟེར་རམ། །བདག་གསོལ་བ་འདེབས་སོ་ཐུགས་རྗེས་ཟུངས། །གནས་འོག་མིན་མཁའ་སྤྱོད་ཞིང་ཁམས་ན། །མི་བདག་གི་བླ་མ་བཞུགས་པ་དེ། །མཚན་གར་དབང་རྡོ་རྗེ་འཆང་ཆེན་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །གནས་རྒྱ་གར་ཡུལ་ན་བཞུགས་ཙམ་ན། །མཚན་གྲུབ་ཆེན་ཉི་མ་སྦས་པ་ཟེར། །བདག་གསོལ་བ་འདེབས་སོ་ཐུགས་རྗེས་ཟུངས། །བོད་མཁན་པོའི་ཡུལ་ན་བཞུགས་ཙམ་ན། །མཚན་གླང་རི་ཐང་པ་ཞེས་སུ་གྲགས། །བདག་གསོལ་བ་འདེབས་སོ་ཐུགས་རྗེས་ཟུངས། །མི་ཁོ་བོའི་སྤྱི་
བོའི་རྒྱན་བཞུགས་པ། །མཚན་ཆོས་ཀྱི་དབང་ཕྱུག་བསྟན་པའི་བདག །བདག་གསོལ་བ་འདེབས་སོ་ཐུགས་རྗེས་ཟུངས། །གནས་རི་བོ་བྱ་རྐང་ཉེ་བའི་སར། །མི་བདག་གི་བླ་མ་བཞུགས་པ་དེ། །མཚན་ཡེ་ཤེས་སྙིང་པོ་གྲགས་སོ་སྐད། །ཁྱེད་བསྐལ་བརྒྱར་ཞབས་པད་བརྟན་པར་གསོལ། །ལོ་སྒྲ་སྐད་རྒྱལ་པོ་གཡུ་འབྲུག་ལོ། །དུས་ལོ་མགོ་རྒྱལ་ཟླའི་ཡར་ཚེས་ལ། །ས་བསམ་འགྲུབ་གཞུང་ཞེས་བྱ་བ་ན། །ཆོས་དབང་ཁྲིད་སྦྲེལ་མ་བཙུགས་པའི་དུས། །ཉམས་རྨི་ལམ་འཁྲུལ་པའི་སྣང་བ་ལ། །རྗེ་དྲིན་ཆེན་ཆོས་ཀྱི་དབང་ཕྱུག་དེ། །སྐུ་མངོན་སུམ་གསལ་བར་བཞུགས་པའི་དྲུང་། །མི་བདག་གི་བྱང་བུ་བཞུ་རྒྱུ་འགའ། །ཡིད་ཏིང་འཛིན་བྱང་བུ་རྣམ་ཤེས་སྤར། །གཉིད་སད་ཀྱང་ཉམས་དགའ་དད་གུས་འཕེལ། །དུས་དེ་ནས་ཞག་པོ་འགའ་ཙམ་ནས། །གྲོགས་རྡོ་རྗེ་སྤུན་གྱུར་གཅིག་དང་མཇལ། །རྗེ་བླ་མའི་བཀའ་ཤོག་བྲིས་མ་དང་།ལྷ་མ་མགོན་ཞལ་ཐང་ཕྱག་ནས་མ། །དེ་བདག་ལ་ཕུལ་ཞིང་དད་གུས་བྱས། །རང་ཡིད་ཚིམ་དད་པའི་གསལ་འདེབས་གྱུར། །དོན་དེ་ཕྱིར་གསོལ་བ་བཏབ་པའོ།།
༈ ན་མོ་ཤཱཀྱ་མུ་ནེ་ཡེ། །ཐམས་ཅད་མཁྱེན་ཅིང་ཐམས་ཅད་གཟིགས། །བདེན་གསུང་བདེན་པ་གྲུབ་པ་སོགས། །ཤཱཀྱའི་ཏོག་ལ་ཕྱག་འཚལ་ལོ། །ཙི་རོང་ཡུལ་གྱི་དཔོན་རྒན་ཞིག །བསམ་འགྲུབ་གཞུང་གི་ས་ཆ་ན། །རས་ཆུང་ཀརྨ་པར་གྲགས་ཕེབས། །གདུལ་བྱ་འགྲོ་དོན་མ་བྱུང་དུས། །གྲུབ་རྟགས་བཞག་པས་གདུལ་བྱ་རྒྱས་། །དེ་བཞིན་གནས་མདོ་བླ་མས་ཀྱང་། །ལྟ་རྒྱུ་སྟོན་རྒྱུ་ཡོད་པ་ཡི། །གྲུབ་རྟགས་བཞག་དགོས་ཟེར་སྐད་དོ། །རྒྱ་གར་གྲུབ་ཆེན་བརྒྱད་ཅུ་དང་། །བོད་ཀྱི་རྗེ་འབངས་ཉི་ཤུ་ལྔ། །བཀའ་བརྒྱུད་གོང་མའི་རྣམ་ཐར་ལྟར། །དེང་སང་འོང་བར་དཀའ་བ་སྟེ། །དུས་ངན་སྙིགས་མར་སོང་དང་གཅིག །གདུལ་བྱའི་མི་རྣམས་ཐམས་ཅད་ཀྱང་། །ཧ་ཅང་སྒྲིབ་པ་ཆེ་དང་གཉིས། །ཐུབ་བསྟན་མར་འགྲིབ་བབ་དང་གསུམ། །བསྟན་པ་རྟགས་ཙམ་འཛིན་དུས་བཞི། །དེ་བཞིའི་དབང་གིས་མི་འོང་སྟེ། །བླ་མ་ཞན་དུ་སོང་བ་མིན། །ཀརྨ་པཀི་བཅུ་པ་བ། །ན་རིམ་འབྲུག་པ་ཐམས་ཅད་མཁྱེན། །ཐམས་ཅད་མཁྱེན་པ་རྒྱལ་བ་འབྲོམ། །གྲགས་པ་རྒྱལ་མཚན་ཨ་མི་ལགས། །ཨོ་རྒྱན་མགོན་པོའི་
ཞབས་དྲུང་གཉིས། །དེ་རྣམས་གཅིག་པར་ངེས་ན་ཡང་། །གྲུབ་རྟགས་སྔར་དུས་ལྟ་བུ་མེད། །དེ་ཕྱིར་རྣལ་འབྱོར་ང་ལ་ཡང་། །མཆོག་གི་གྲུབ་རྟགས་མངོན་ཤེས་མེད། །ཟག་བཅས་མངོན་ཤེས་གྲུབ་པའི་རྟགས། །བདུད་སྤྲུལ་ནག་ཕྱོགས་ལྷ་འདྲེ་ཆེ། །འཕྲལ་དུ་ལེགས་ཉེས་གང་བྱུང་བའི། །མངོན་ཤེས་ཁ་ཏ་ཕོ་རོག་ནོ། །ལྷ་འདྲེ་ཚེ་འདས་རྣམ་ཤེས་སོགས། །འདྲེ་ཟུག་བྱེད་པའི་ཁྱི་ཡིས་མཐོང་། །རྡོ་བཅངས་ལྕགས་མདུད་རྐང་ལག་རྗེས། །ཐེའུ་རང་བབ་པ་རྣམས་ཀྱིས་བྱེད། །ཆུ་ཆེན་རྣམས་ལ་མི་ཐོགས་པ། །ཀླུ་བདུད་བབས་པས་བྱེད་པ་ཐོས། །གང་ཟེར་ཐིག་པའི་མངོན་ཤེས་ནི། །ལྷ་འདྲེ་གཞི་བདག་བབ་ན་འབྱུང་། །ཟང་ཟིང་ལོངས་སྤྱོད་འདུ་བ་ནི། །ལྷ་བུའི་ཆ་བདུད་རིགས་ཞུགས་ན་འབྱུང་། །འཁོར་སློབ་གྲྭ་རིས་དར་རྒྱས་ནི། །དམ་སྲི་འགོང་པོས་མགོན་ན་འབྱུང་། །ཆོས་ལ་ཁ་བཏགས་སྡིག་སྟོབས་ནི། །དགའ་རབ་དབང་ཕྱུག་ཞུགས་ན་འོང་། །དཀའ་ཐུབ་ལུས་པོ་སྐམ་བཅུག་པ། །མུ་སྟེགས་དྲང་སྲོང་རྣམས་ལ་ཡོད། །དེ་ལྟ་བུ་ཡི་གྲུབ་རྟགས་ནི། །བདག་དང་བརྒྱུད་པར་བཅས་པ་ལ། །མི་འོང་བ་
ཡི་སྨོན་ལམ་འདེབས། །དལ་འབྱོར་ཆོས་སྒོར་ཞུགས་པ་འདི། །བསོད་ནམས་བསགས་པའི་གྲུབ་རྟགས་ཡིན། །གྲུབ་མཐའ་ངན་པར་མ་ཞུགས་པ། །སྨོན་ལམ་དག་པའི་གྲུབ་རྟགས་ཡིན། །ཕྱག་རྫོགས་གདམས་པ་ཐོབ་པ་ནི། །ལས་འཕྲོ་བཟང་བའི་གྲུབ་རྟགས་ཡིན། །བན་རྒན་སྡོམ་པ་གཙང་བ་འདི། །དེང་སང་གྲུབ་རྟགས་ཆེ་ཤོས་ཡིན། །གཞན་ལ་ཕན་སེམས་ཆེ་བ་འདི། །བློ་སྦྱོང་བསྒོམས་པའི་གྲུབ་རྟགས་ཡིན། །བླ་མ་རིགས་བདག་དབྱེར་མེད་རྟོགས། །མོས་གུས་བསྒོམས་པའི་གྲུབ་རྟགས་ཡིན། །རང་ལུས་ལྷ་ཡི་དཀྱིལ་འཁོར་གསལ། །བསྐྱེད་རིམ་བསྒོམས་པའི་གྲུབ་རྟགས་ཡིན། །རང་སེམས་ངོ་བོ་རྗེན་པར་མཐོང་། །ཕྱག་ཆེན་བསྒོམས་པའི་གྲུབ་རྟགས་ཡིན། །ལྟ་བ་འཁོར་འདས་དབྱེར་མེད་རྟོགས། །ཉམས་ལེན་བྱས་པའི་གྲུབ་རྟགས་ཡིན། །སྒོམ་པ་བསྐྱེད་རྫོགས་ཟུང་དུ་འཇུག །གསང་སྔགས་བསྒྲུབས་པའི་གྲུབ་རྟགས་ཡིན། །ཕུག་བསྲིས་སྙིང་ནོར་འཆང་བ་མེད། །ཞེན་ལོག་བསྒོམས་པའི་གྲུབ་རྟགས་ཡིན། །འཁོར་གསུམ་ཡོངས་དག་བསྔོ་བ་ཤེས། །ཡོན་བདག་མི་བསླུའི་གྲུབ་རྟགས་ཡིན། །དགེ་རྩ་འགྲོ་བ་སྤྱི་ལ་
བསྔོ། །ཐེག་ཆེན་བསྒོམས་པའི་གྲུབ་རྟགས་ཡིན། །དབང་ལུང་ཁྲིད་ཀྱི་ཆར་པ་ཕབ། །འགྲོ་དོན་འགྲུབ་པའི་གྲུབ་རྟགས་ཡིན། །སློབ་མ་སྐྱེས་ཆེན་འགའ་རེ་བཞུགས། །བསྟན་ལ་ཕན་པའི་གྲུབ་རྟགས་ཡིན། །གཞན་ཡང་སློབ་བུ་བླ་མ་མང་། །ཕན་ཐོགས་བྱུང་བའི་གྲུབ་རྟགས་ཡིན། །ཤི་ནས་གར་འགྲོ་བསམ་མི་དགོས། །དམ་ཆོས་འགྲུབ་པའི་གྲུབ་རྟགས་ཡིན། །ཁ་ཚོ་མ་ཡིན་ངེས་པ་ལགས། །དེ་སྐད་རྭ་ཨ་སྱས་སྨྲས།། ༈ །།ན་མོ་མ་ཏི་ཏིཥྛཡེ། ཡོ་ག་རྣམ་གསུམ་ཆོས་ཚུ་རྣམས་ལ། །སྦྱངས་པ་མཐར་ཕྱིན་ཐམས་ཅད་མཁྱེན། །མཁས་པ་བློ་ལྡན་མཆོག་སྲེད་ལ། །གསོལ་བ་འདེབས་སོ་ཐུགས་རྗེས་གཟིགས། །གསང་སྔགས་རྒྱུད་སྡེ་ཐམས་ཅད་ནས། །བླ་མ་སངས་རྒྱས་ཀུན་དང་མཉམ། །གསུངས་པ་བདེན་ན་བདེན་པ་དེས། །བདག་གི་སྨོན་ལམ་འགྲུབ་པར་ཤོག །བུ་གཅིག་མི་འགྱུར་རྡོ་རྗེ་བ། །སྐུ་ཚེ་བརྟན་ཞིང་ཕྲིན་ལས་རྒྱས། །ཀཐོག་རྡོ་རྗེའི་གདན་སྟེང་དུ། །ཡོ་ག་རྣམ་གསུམ་ཆོས་རྣམས་ལ། །གསན་བསམ་མཁས་མཐར་ཕྱིན་གྱུར་ཅིག །ཁ་བྱང་ས་གཏེར་མྱུར་ཐོན་ནས། །
བོད་ཁམས་བདེ་ལ་འགོད་གྱུར་ཅིག །བདུད་རིགས་དམ་སྲི་མི་ངན་གྱིས། །ཉེར་འཚེ་བར་ཆད་མེད་གྱུར་ཅིག །རྔམ་ཆེན་ཞེས་བྱར་ཕྱིན་པའི་ནུབ། །སྤྲུལ་སྐུ་མི་འགྱུར་རྡོ་རྗེ་ཡིས། །གནས་སྒོ་གསར་དུ་ཕྱེས་འདུག་པར། །རང་བྱོན་ངོ་མཚར་གཅིག་འདུག་པར། །གྲུབ་མཐའ་གཅིག་པའི་བླ་དགེ་རྣམས། །གུས་འདུད་ཚོགས་ཚུལ་རང་བྱོན་སྣང་། །སོ་ལྔའི་བར་དུ་གནས་འདི་ཡི། །ཕྲིན་ལས་འགྲོ་དོན་ཆེན་པོ་འབྱུང་། །དེ་ནས་གནས་འདིའི་འགྲོ་དོན་རྫོགས། །དེ་སྐད་སྤྲུལ་སྐུས་གསུངས་པ་རྨིས། །དེ་ལ་གོ་བ་འགའ་རེ་ཤར། །དེ་ཕྱིར་ཡི་གེར་བྲིས་པ་དགེ། ༈ །།ན་མོ་གུ་རུ། རྒྱལ་བའི་གསུང་རབ་རྒྱ་མཚོ་ནས། །འཁོར་བ་སྙིང་པོ་མེད་པའི་ཚུལ། །རྒྱ་ཆེར་གསུངས་ཀྱང་གོ་མཁན་དཀོན། །ད་རུང་ཚེ་འདི་དོན་དུ་གཉེར། །དམ་ཆོས་བྱ་བ་མང་ལགས་ཀྱང་། །ལྷ་མིའི་བདེ་འབྱོར་ཐོབ་པར་འདོད། །འཁོར་བའི་བདེ་འབྱོར་ཐོབ་པ་ལ། །སྙིང་པོ་འདུག་གམ་འདི་ལ་ལྟོས། །ཚེ་འདིའི་སྟོབས་འབྱོར་སྒྲུབ་པ་ལ། །སྙིང་པོ་ཨེ་འདུག་འདི་ལ་ལྟོས། །གཏམ་དང་སྙན་གྲགས་ཁེ་གྲགས་ལ། །སྙིང་པོ་ཨེ་འདུག་འདི་ལ་
ལྟོས། །བུ་རྒྱལ་བེ་རི་དོན་ཡོད་དེས། །ཆུ་དྲུག་སྒང་ལྔ་དབང་དུ་བསྡུས། །ག་དང་བརྒྱ་ནས་གསར་དུ་བཙུགས། །ཇ་པ་ལ་པར་ཇ་ཁྲལ་བསྡུས། །དེ་ཀུན་། དགྲ་ཡིས་ཁྱེར་ཏེ་ཟོས། །ཟས་ནོར་བསགས་པའི་མཐའ་ལ་ལྟོས། །དམག་སྡེ་ཁྲི་ཕྲག་ཁྲབ་ཆེན་ཡོད། །དགྲ་སྡེ་མང་པོ་ཆམ་ལ་ཕབ། །སྟོང་ཕྲག་མང་པོའི་མི་སྲོག་བཅད། །བརྒྱ་ཕྲག་ལོང་བའི་ཁུ་ཕང་བྱས། །ས་བཙན་རྣམས་སུ་རྫོང་ཆེན་བརྩིགས། །ཐ་མ་བཙོན་དོང་ནང་དུ་ཤི། །ཆུས་དང་ཁེ་གྲགས་མཐའ་ལ་ལྟོས། །དྲིན་ཆེན་བླ་མར་དམ་ཚིག་འགལ། །མཚན་ལྡན་བླ་མ་མང་པོ་བཀྲོངས། །དགེ་འདུན་སྡེ་བཤིགས་གཙུག་ལག་བཅོམ། །བན་ལ་ནུས་མཐུ་མེད་ཅེས་ཟེར། །ཆོས་སྐྱོང་བཀའ་སྲུང་ཁྱད་དུ་བསད། །རྗེས་འཇུག་ཐལ་བ་རླུང་ཁྱེར་འདྲ། །ཆོས་སྐྱོང་ཨེ་གདའ་དེ་ལ་ལྟོས། །ལས་ངན་མི་དགེ་སྤྱད་སྤྱད་པས། །རྣམ་ཤེས་དམྱལ་ཁམས་བཅོ་བརྒྱད་འགྲིམ། །བླ་ཡིད་རི་སྟོང་བྲག་ལ་འཁོར། །སྙིང་རེ་རྗེ་ལ་ཨ་ཙ་མ། །འོན་ཀྱང་དུང་ཡོན་མང་པོ་དང་། །ཚེ་སྟོད་བཤེས་གཉེན་དུ་མ་ལ། །འབུལ་བ་བསྙེན་བཀུར་བྱས་པ་དེས། །ཇོ་བོ་ཐུགས་རྗེ་ཆེན་པོ་
ཡིས། །སྡིག་ཅན་འདི་ལ་ཐུགས་རྗེས་གཟིགས། །བདེ་ཆེན་ཞིང་དུ་སྐྱེ་བར་ཤོག །ཨོཾ་མ་ཎི་པདྨེ་ཧཱུཾ། རྔམ་གྱི་བྲག་དཀར་མཚལ་རྩེའི་དྲུང་། །རྔམ་ཆེན་གཞུང་དུ་ཞག་པའི་ནུབ། །རྨི་ལམ་འཁྲུལ་པའི་སྣང་བ་ལ། །བེ་རི་རྒྱལ་པོ་དོན་ཡོད་རྒྱལ། །ཁོ་བོའི་དྲུང་དུ་བྱུང་ནས་ཀྱང་། །བྲག་འདི་གསས་མཁར་བསྟོད་རོགས་གྱིས། །ཟེར་བས་ཁོ་བོའི་བླ་དེ་ནི། །བྲག་དཀར་དེ་ལ་འཁོར་རམ་སྙམ། །གསས་མཁར་བསྟོད་པ་མ་གྲུབ་པས། །ཕྱིར་ཉིན་ཁལ་མ་གཉིས་ཙམ་གོད། །བདུད་སྤྲུལ་གདུག་པའི་རྒྱལ་པོ་ཁྱོད། །ད་ནི་གདུག་སེམས་རབ་ཞི་ནས། །བྱང་ཆུབ་སེམས་དང་ལྡན་པར་ཤོག། ༈ །།ན་མོ་སཏཱ་རཏྣ་ཕ་ལ་ཧཱུྃ། བེ་འདི་ནས་བྱང་གི་ཕྱོགས་རོལ་ན། །རི་རབ་རི་ཡི་ཕ་རོལ་ན། །སྒྲ་མི་སྙན་གྱི་ཚུ་རོལ་ན། །རོལ་པའི་མཚོ་བདུན་ཀྱི་ལི་ལི། །གསེར་གྱི་རི་བདུན་ལྡེམས་སེ་ལྡེམ། །གཉའ་ཤིང་འཛིན་གྱི་རྩེ་མོ་ན། །ཉི་མ་དང་ཟླ་བ་སྐར་མའི་ཚོགས། །ཀུན་ཀྱང་བསྐོར་བ་ཀྱི་ལི་ལི། །རིན་ཆེན་རི་བདུན་སྤུངས་སེ་སྤུང་། །དཔག་བསམ་ལྗོན་ཤིང་ལྡེམས་སེ་ལྡེམ། །ཏ་ལའི་ཕྲེང་བ་ཐིབས་སེ་ཐིབ། །གསེར་ཕྱེའི་
ཐང་མ་ལྡེམས་སེ་ལྡེམ། །རིན་ཆེན་གྲམ་པ་ཉི་ལི་ལི། །བདུད་རྩིའི་ཆུ་མིག་ཤ་ར་ར། །ལྕགས་རི་རིམ་བདུན་ཟོམས་སེ་ཟོམ། །ཕོ་བྲང་ཆེན་པོ་ལྕང་ལོ་ཅན། །རིན་ཆེན་ཁང་པ་བདུན་བརྩེགས་ལ། །འཁོར་ས་རིམ་པ་གསུམ་ལྡན་དབུས། །སེང་ཁྲི་པདྨ་ཉི་ཟླའི་གདན། །ལོངས་སྤྱོད་སྣ་ཚོགས་བསམ་མི་ཁྱབ། །དེ་འདྲའི་གནས་མཆོག་ཕོ་བྲང་ནས། །རྣམ་པར་སྣང་མཛད་ཐུགས་སྤྲུལ་པ། །འདས་པའི་སངས་རྒྱས་རིན་ཆེན་མང་། །མ་འོངས་བདེ་གཤེགས་རིན་ཆེན་གདུགས། །ད་ལྟར་སེམས་དཔའ་རིན་ཆེན་མང་། །བསྐལ་མང་གོང་ནས་སངས་རྒྱས་ཀྱང་། །ལྷ་མིའི་དབུལ་ཕོངས་སེལ་བའི་ཕྱིར། །གནོད་སྦྱིན་ནོར་ལྷའི་རྒྱལ་པོ་མཛད། །སྣང་སྲིད་དབང་གི་ལས་མཛད་ཕྱིར། །མཚལ་མདོག་གོ་ཁྲབ་རྨོག་ཞུ་གསོལ། །ཕྱག་གཡས་མདུང་དར་རྒྱལ་མཚན་ཕྱར། །གཡོན་པས་ནེའུ་ལེ་ལྕགས་ཀྱུ་བསྣམས། །སེང་གེའི་སྟེང་དུ་བརྗིད་བག་མཛད། །ཡུམ་ནི་ཀླུ་མོ་ནོར་སྐྱོང་མ། །མ་ཏྲག་བཞི་དང་གནོད་སྦྱིན་བརྒྱད། །ཀླུ་བརྒྱད་ལ་སོགས་མང་པོས་བསྐོར། །དད་པས་བདག་གིས་སྤྱན་འདྲེན་གྱིས། །ཐུགས་རྗེས་
མྱུར་དུ་འདིར་བྱོན་ལ། །མི་འབྲལ་ལུས་དང་གྲིབ་མ་བཞིན། །རྟག་ཏུ་བརྟན་པར་བཞུགས་སུ་གསོལ། །ཧཱུྃ། རྣམ་སྲས་དམར་པོ་མདུང་དམར་ཅན། །ཁྱེད་ལ་མཐུན་རྫས་འབུལ་བ་ནི། །འཇིག་རྟེན་ཁམས་ན་དཀོན་པའི་ནོར། །བརྗིད་ལྡན་ལྷ་གཡག་ཞོལ་ཆེན་འདི། །པདྨ་རཱ་གའི་རི་བོ་འདྲ། །དབང་གི་ལས་རྣམས་གྲུབ་པའི་རྟགས། །རུ་ཅོ་།ཐབས་དང་ཤེས་རབ་འདྲ། །ཐབས་ཤེས་ཟུང་དུ་འཇུག་པའི་བརྡ། །མིག་གཉིས་སྤུ་མཚན་མཐིང་ནག་མཚན། །བདག་མེད་གཉིས་པོ་རྟོགས་པའི་བརྡ། །རྔ་མ་བདུད་རྩིའི་སྤྲིན་ཕུང་འདྲ། །དགོས་འདོད་ཆར་པ་འབེབས་པའི་བརྡ། །ལུས་ལ་སྤུ་རིས་ནག་པོ་བཞི། །གངྒཱ་ལ་སོགས་ཆུ་བཞི་འདྲ། །ཆུས་སྲིད་ཆུ་རྒྱུན་ཆད་མེད་བརྡ། །སུག་བཞི་རྫུ་འཕྲུལ་རྐང་པ་འདྲ། །དག་པའི་ཞིང་ཁམས་བགྲོད་པའི་བརྡ། །ཉལ་ན་བྱི་རུའི་གླང་ཆེན་འདྲ། །སྟོབས་བཅུའི་སྟོབས་དང་ལྡན་པའི་བརྡ། །འགྲོ་ན་མཚལ་གྱི་རྟ་མཆོག་འདྲ། །མྱུར་མགྱོགས་ཕྲིན་ལས་འགྲུབ་པའི་བརྡ། །འཇིག་རྟེན་ཁམས་ན་དཀོན་པའི་ནོར། །ལྷ་གཡག་དམར་པོ་བརྗིད་ལྡན་འདི། །རྣམ་སྲས་མདུང་དམར་ཅན་ལ་འབུལ། །ཁྱེད་ཀྱི་
ཐུགས་དམ་བསྐངས་གྱུར་ནས། །ལྷ་གཡག་འདི་ལ་རྟེན་ཆོས་ལ། །བདག་ཅག་དཔོན་སློབ་འཁོར་བཅས་ཀྱི། །དཔལ་འབྱོར་མངའ་ཐང་སྤེལ་བར་མཛོད། །ཀླུ་མོ་ནོར་སྐྱོང་མ་ལ་འབུལ། །ཀླུ་ནོར་འདི་ལ་རྟེན་ཆོས་ལ། །ཀླུ་གཡང་དངོས་གྲུབ་ཆར་ལྟར་ཕོབ། །གནོད་སྦྱིན་དམར་པོ་བརྒྱད་ལ་འབུལ། །ལྷ་གཡག་དམར་པོར་རྟེན་ཆོས་ལ། །དཔལ་འབྱོར་ཕུན་སུམ་ཚོགས་པར་མཛོད། །དམར་སེར་ཀླུ་ཆེན་བརྒྱད་ལ་འབུལ། །ཀླུ་ནོར་གཡག་དམར་རྟེན་ཆོས་ལ། །ཡུལ་ཁམས་གྲོང་རྡལ་དབང་འདུས་མཛོད། །ལྷ་གཡག་དམར་པོ་ཞོལ་ཆེན་འདིས། །རྣམ་སྲས་མདུང་དམར་ཐུགས་དམ་བསྐང་། །མ་ཏྲག་བཞི་ཡི་ཐུགས་དམ་བསྐང་། །ཀླུ་མོ་ནོར་སྐྱོང་ཐུགས་དམ་བསྐང་། །ནོར་ལྷ་མཆེད་བརྒྱད་ཐུགས་དམ་བསྐང་། །བཀའ་བློན་ཀླུ་བརྒྱད་ཐུགས་དམ་བསྐང་། །གནོད་སྦྱིན་བྱེ་བའི་ཐུགས་དམ་བསྐང་། །ཁྱེད་ཀྱི་ཐུགས་དམ་བསྐངས་གྱུར་ནས། །བདག་གི་ཡིད་ལ་གང་འདོད་པ། །འབད་མེད་ལྷུན་གྱིས་གྲུབ་པར་མཛོད། །ཅེས་ལྷ་གཡག་ལི་ཁྲིའི་མདོག་ཅན་གཅིག་འབུལ་མི་བྱུང་བ་རྩེན་དུས་བྲིས་སོ།།
ན་མོ་ཨཱརྱ་རེ་མནྟ་ཡེ། ཤར་ཕྱོགས་སྐྱོང་མཛད་མགོན་པོ་དཔལ་རབ་འཆང་། །ཉི་མའི་སྲས་པོ་ལམ་ལྷའི་རྒྱལ་པོ་མཆོག །འཇིག་རྟེན་ལས་འདས་འཕགས་པའི་སར་གནས་ཀྱང་། །འགྲོ་བ་བཞོན་པས་ཕོངས་པ་སྐྱོབ་པའི་ཕྱིར། །འཇིག་རྟེན་སྐྱོང་ཞེས་རྟ་ལྷའི་ཚུལ་བཟུང་བ། །རྔོག་ཆགས་བདག་པོ་འཕགས་པ་རེ་མནྟ། །དད་ཅིང་གདུང་བས་བདག་གིས་འབོད་ལགས་ན། །ཐུགས་རྗེ་ཐུགས་དམ་དབང་གིས་གནས་འདིར་བྱོན། །བདག་གི་ཆིབས་སོགས་རྔོག་ཆགས་བསྲུང་བའི་ཕྱིར། །མི་འབྲལ་ལུས་དང་གྲིབ་བཞིན་བརྟན་པར་བཞུགས། །ཁྱེད་ལ་མཐུན་པའི་རྟེན་རྫས་འབུལ་བ་ནི། །གླིང་བཞི་སྟོང་གསུམ་ཀུན་ལ་དཀོན་པའི་ནོར། །ལྷ་གཡག་རྔོག་བརྗིད་རྟ་ཡི་རྔོག་མ་ཅན་། །སྤུ་ཞོལ་རྔམ་བརྗིད་སྤྲིན་ནག་འཁྲུགས་པ་འདྲ། །སྤུ་ཞོལ་ལང་ལིང་གཡང་མོ་ལུག་དང་འདྲ། །གནམ་ལྕགས་རྭ་ལ་ཁྲོ་ཆུའི་རྨིག་པ་ཅན། །ཉི་ཟླའི་སྤྱན་དང་རྒྱུ་སྐར་ཕྲེང་འདྲའི་ཚེམས། །གློག་དམར་ལྗགས་འཁྱུག་ངར་སྐད་གཡུ་འབྲུག་འདྲ། །འདི་འདྲ་གཡང་རྫས་ལྷ་གཡག་རྔོག་མ་ཅན། །རྔོག་ཆགས་བདག་པོ་རེ་མན་ལ་འབུལ། །འཁོར་དང་
བཅས་པའི་ཐུགས་དམ་བསྐངས་གྱུར་ནས། །ལྷ་གཡག་རྔོག་མ་ཅན་ལ་རྟེན་ཆོས་ལ། །བདག་གི་རྟ་དྲེལ་རྔོག་ཆགས་ཐམས་ཅད་ལ། །བསྲུང་ཞིང་སྐྱབས་དང་སྤེལ་བའི་ཕྲིན་ལས་མཛོད། །ལོ་དགྲ་ཇག་རྐུན་རྟ་ནད་རྟ་གདོན་ཟློག །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཐུགས་དམ་དུས་ལ་བབ་པོ་ས་མ་ཡ། །ཞེས་གྲུ་གུའི་གཞུང་དུ་འབུམ་འགྱུར་ཟླ་བའི་ཚེས་བཞི་གཟའ་སྐར་བཟང་པོ་ལ་བྲིས་སོ།། ༈ །།ན་མོ་གུ་རུ་མ་ཧཱ་ཀཱ་ལ་ཡེ། འཆི་མེད་འོད་ལུས་གུ་རུ་པདྨ་འབྱུང་། །རྒྱ་གར་གྲུབ་ཆེན་གཙོ་བོ་ས་ར་ཧ། །གངས་ཆེན་འདྲེན་མཆོག་ཞྭ་ནག་ཅོད་པན་ཅན། །གང་འདུལ་དེར་སྟོན་དཔལ་ལྡན་ནག་པོ་ཆེ། །བླ་མ་མགོན་པོ་དབྱེར་མེད་གཤེགས་སུ་གསོལ། །ཧ་ཡ་གྲི་ཝ་ཁྲོ་རྒྱལ་ནག་པོ་ཆེ། །དཀྱིལ་འཁོར་གཙོ་མཆོག་པདྨ་ཧེ་རུ་ཀ །ཡི་དམ་མགོན་པོ་འཕགས་པ་སྤྱན་རས་གཟིགས། །ཚད་མེད་ཐུགས་རྗེས་གནས་འདིར་གཤེགས་སུ་གསོལ། །བསིལ་ཚལ་པོ་ཊ་ལ་དང་རྡོ་རྗེ་གདན། །ཙནྡན་རྐང་གཅིག་ཤིང་ཆེན་ནགས་ཚལ་ནས། །བྱིན་རླབས་མྱུར་མཛད་མགོན་པོ་གཤེགས་སུ་གསོལ། །མུ་ལེ་མཐིང་དང་
ཡོངས་འདུའི་ཤིང་ཆེན་ནས། །མ་གཅིག་དཔལ་ལྡན་ལྷ་མོ་གཤེགས་སུ་གསོལ། །ཙཱ་རི་ཏྲ་དང་ཡུལ་ཆེན་ཉེར་བཞི་ནས། །གནོད་སྦྱིན་ཀྵེ་ཏྲ་པཱ་ལ་གཤེགས་སུ་གསོལ། །དུར་ཁྲོད་ཆེན་པོ་མུན་པ་མི་བཟད་ནས། །ཛི་ན་མི་ཏྲ་ཊཀྐི་རཱ་ཛ་སྟེ། །དབང་ཕྱུག་གཤིན་རྗེའི་སྲས་པོ་གཤེགས་སུ་གསོལ། །ཨུ་ཙ་ལ་ཡི་དུར་ཁྲོད་ཐོད་མཁར་ནས། །བདུད་མགོན་ཏྲག་ཤད་ནག་པོ་གཤེགས་སུ་གསོལ། །པད་ཉི་ཚོགས་བདག་དགྲ་བགེགས་གདན་ལ་བཞུགས། །ཧཱུྃ། མྱུར་མཛད་ཡེ་ཤེས་མགོན་པོ་འཁོར་བཅས་ལ། །མཆོད་ཅིང་བསྐང་བའི་དམ་རྫས་འབུལ་བ་ནི། །གནམ་ལྕགས་ལས་གྲུབ་པདྨ་རཱ་གའི་མདངས། །རྡོ་རྗེའི་ཁྲབ་ཀྱིས་ཐུགས་དམ་བསྐང་གྱུར་ཅིག །སྣ་ཚོགས་མདོག་ཅན་རྔོག་མའི་སྤྲིན་དཔུང་གཏིབས། །གངྒའི་རྒྱུན་བཞིན་རྔ་མའི་ཆུ་རིས་འཁྱུགས། །མཛེས་སྡུག་སྤུ་རིས་ཡིད་ཀྱིས་བྲིས་པ་བཞིན། །སྲིད་པའི་རླུང་བཞིན་ཐོགས་མེད་རྩལ་ལྡན་པའི། །ཅང་ཤེས་རྟ་མཆོག་ཁྱུ་ཡིས་ཐུགས་དམ་བསྐང་། །ས་ལ་རབ་གནས་ལྟ་བུའི་སྟོབས་ཤུགས་ཅན། །རྫུ་འཕྲུལ་རྐང་པས་མཁོ་བའི་ཡོ་བྱད་རྣམས། །གར་འདོད་གནས་སུ་སྐྱེལ་བའི་ཡིད་བཞིན་
ནོར། །ཁྱུང་དཀར་མཛོ་ཡི་ཁྱུ་འདིས་ཐུགས་དམ་བསྐང་། །སེར་སྤྲིན་འཁྲིགས་འདྲའི་སྤུ་ཞོལ་བརྗིད་ཅིང་རྔམ། །གནམ་ལྕགས་རྭ་དང་ཁྲོ་ཆུའི་རྨིག་བཞི་འཁྲབ། །འབྲུག་གི་སྒྲ་འབྱིན་རྔུ་མའི་སྤྲིན་དཔུང་གཡོབ། །གཡག་གི་ཁྱུ་འདིས་མགོན་པོའི་ཐུགས་དམ་བསྐང་། །འདོད་འཇོའི་བ་ཡིས་འགྲན་པར་མི་བཟོད་ཅིང་། །འོ་མའི་རྒྱུན་འབེབས་འགྲོ་བའི་ཉེར་འཚེ་ཞི། །མཛོ་མོའི་ཁྱུ་འདིས་ལྷ་མོའི་ཐུགས་དམ་བསྐང་། །རྐང་བཞི་ཕྱུགས་རྣམས་མི་ཟད་འབྱུང་བའི་གཏེར། །སྤུ་ཞོལ་ཤམ་ཤམ་རྔ་ཡབ་མཛེས་པས་སྤྲས། །ཟ་ལེ་འབྲི་ཡི་ཁྱུ་ཆེན་ལྡན་པ་འདི། །མ་གཅིག་ལྷ་མོ་དཔོན་གཡོག་ཐུགས་དམ་བསྐང་། །གཞན་ཡང་མ་ཧཱ་ཙི་ནིའི་རྐང་ཐུང་འདབ། །རིན་ཆེན་སྣོད་སྤྱད་འཇམ་རྩུབ་གོས་ཀྱི་ཚོགས། །དཀར་གསུམ་རོ་མཆོག་རིན་ཆེན་བྱེ་བྲག་སོགས། །དངོས་འབྱོར་མཆོད་པ་བརྒྱ་ཕྲག་ཕྱེད་དང་གསུམ། །ཡིད་སྤྲུལ་ཟད་མེད་ཀུན་བཟང་མཆོད་སྤྲིན་སྤྲུལ། །མྱུར་མཛད་ཡེ་ཤེས་མགོན་པོ་འཁོར་བཅས་ལ། །འབུལ་ལོ་ཐུགས་དམ་གཉན་པོ་བསྐངས་གྱུར་ནས། །དཀའ་བ་དང་བླངས་ལྕི་བའི་ཁུར་ཁྱེར་ནས། །འབད་པས་
བསྒྲུབས་པའི་མཆོད་རྫས་བསྐང་རྫས་འདིས། །བླ་མ་མགོན་པོ་དབྱེར་མེད་ཐུགས་དམ་བསྐང་། །མགོན་དཀར་ཡིད་བཞིན་ནོར་བུའི་ཐུགས་དམ་བསྐང་། །ཇོ་བོ་གཟི་ལྡན་མགོན་པོའི་ཐུགས་དམ་བསྐང་། །མ་གཅིག་ལྷ་མོ་དཔོན་གཡོག་ཐུགས་དམ་བསྐང་། །ལྷ་མོ་ཕྱག་བཞི་མ་ཡི་ཐུགས་དམ་བསྐང་། །ལྷ་མོ་ཕྱག་གཉིས་མ་ཡི་ཐུགས་དམ་བསྐང་། གནོད་སྦྱིན་ཀྵེ་ཏྲ་པཱ་ལའི་ཐུགས་དམ་བསྐང་། །དབང་ཕྱུག་ཛི་ན་མི་ཏྲའི་ཐུགས་དམ་བསྐང་། །གཤིན་རྗེ་ཊཀཱི་རཱ་ཛའི་ཐུགས་དམ་བསྐང་། །བདུད་མགོན་ཏྲག་ཤད་ནག་པོའི་ཐུགས་དམ་བསྐང་། །གཙང་རིས་དཔལ་མགོན་བདུན་ཅུའི་ཐུགས་དམ་བསྐང་། །དྲེགས་པ་ཕོ་མོ་ལྔ་སྟོང་ཐུགས་དམ་བསྐང་། །དམ་ཅན་རྒྱ་མཚོའི་ཚོགས་ཀྱི་ཐུགས་དམ་བསྐང་། །ཁྱེད་ཀྱི་ཐུགས་དམ་གཉན་པོ་བསྐང་གྱུར་ཅིག །བདག་ཅག་དཔོན་སློབ་འཁོར་དང་བཅས་པ་དང་། །མཐུན་རྐྱེན་སྦྱོར་བའི་ཡོན་བདག་ཐམས་ཅད་ཀྱི། །ཉེས་ལྟུང་འགལ་འཁྲུལ་ཉམས་ཆགས་དག་གྱུར་ཅིག །བསྐང་རྫས་གྱུར་པའི་རྟ་ཕྱུགས་འདི་དག་ཀྱང་། །གནས་སྐབས་ཡམས་ནད་འཚེ་བ་ཞི་བ་དང་། །དུད་འགྲོའི་སྐྱེ་སྒོ་ཆོད་ནས་འཕོས་
མ་ཐག །བདེ་ཆེན་དག་པའི་ཞིང་དུ་ལམ་སྣ་དྲོངས། །བདག་ཅག་དཔོན་སློབ་འཁོར་དང་བཅས་པ་ལ། །གདོན་རིགས་སྟོང་ཕྲག་བརྒྱད་ཅུའི་འཚེ་བ་ཟློག །ནད་རིགས་བཞི་བརྒྱ་རྩ་བཞི་ཞི་བར་མཛོད། །རྐྱེན་ངན་ཉི་ཁྲི་ཆིག་སྟོང་གནོད་པ་ཟློག །འཇིགས་པ་བརྒྱད་དང་བཅུ་དྲུག་ཞི་བར་མཛོད། །ཡམས་ནད་རིམས་ནད་མི་ནད་ཕྱུགས་ནད་ཟློག །འཁྲུག་རྩོད་ཇག་རྐུན་གནོད་པ་ཞི་བར་མཛོད། །མི་ནོར་ཟས་གསུམ་གདུལ་བྱ་མངའ་ཐང་སྤེལ། །ལྷ་འདྲེ་མི་གསུམ་སྐྱེ་འགྲོ་དབང་དུ་སྡུས། །བྱད་མ་གནོད་བྱེད་དགྲ་བགེགས་རྡུལ་དུ་རློགས། །བདག་ཅག་དཔོན་སློབ་འཁོར་དང་བཅས་པ་དང་། །དེ་ལ་འབྲེལ་ཐོགས་འགྲོ་བ་ཐམས་ཅད་ཀུན། །ནམ་ཞིག་འཕོས་ཚེ་མྱུར་མཛད་མགོན་པོ་ཡིས། །བར་དོའི་འཇིགས་སྐྱོབས་རིགས་དྲུག་སྐྱེ་སྒོ་ཁོག །བདེ་ཆེན་དག་པའི་ཞིང་དུ་སྐྱེལ་བར་ཤོག །ཅེས་འབྲུག་ལོ་ཆོ་འཕྲུལ་ཆེན་པོའི་ཚེས་ལྔ་གཟའ་སྐར་བཟང་པོ་ལ་རཱ་ག་ཨ་སྱས། །ན་མོ་དྷི་པཾ་ཀ་ར་ཤྲཱི་ཛྙཱ་ན་ཡེ། དཔལ་ལྡན་ཇོ་བོ་ཡབ་སྲས་ལ། །གསོལ་བ་འདེབས་སོ་ཐུགས་རྗེས་ཟུངས། །བདག་དང་སློབ་མ་བརྒྱུད་པར་
བཅས། །ཚུལ་ཁྲིམས་ལྡན་ཞིང་བྱང་སེམས་འབྱོང་། །བསྟན་པ་དར་ཞིང་དོན་གཉིས་འགྲུབ། །ཐུབ་བསྟན་མཛེས་པའི་རྒྱན་དུ་ཤོག །འབྲུག་ལོ་ཆོ་འཕྲུལ་ཆེན་པོ་ཡི། ཚེས་དགུ་ཆོས་གྲྭ་ཆེན་པོར་སླེབས། །སྤྱན་རས་གཟིགས་སྤྲུལ་ཕག་གྲུ་ཡི། །སྐྱེ་བརྒྱུད་གྲགས་པའི་སྤྲུལ་སྐུ་ལ། །བརྒྱ་ཕྲག་གསུམ་གྱི་མཆོད་སྤྲིན་སྤྲོས། །ལུགས་གཉིས་ཐུགས་འདོགས་དཔེ་མེད་གནང་། གཏེར་ཤོག་ཇོ་བོའི་ཐུགས་སོགས་མཇལ། །ཉམས་ཀྱི་སྣང་བར་དགོན་དེ་ནས། །ཀརྨ་ཆགས་མེད་ཀྱིས་ཐུགས་རྗེས་ཟུངས། །ཟེར་མཁན་གྲག་པ་རྣ་བས་ཐོས། །དེ་མཐུན་དེ་ཡི་དཔོན་རིས་འགས། །གུས་འདུད་འབུལ་ཞབས་དབང་ཞུ་བ། །ཉམས་དང་རྨི་ལམ་འདྲེས་མཚམས་སུ། །རང་གི་སྒྲུབ་གནས་རི་ཁྲོད་ལ། །ཉི་མ་ཤར་དེར་འདུག་པ་མཐོང་། །གནས་སྐབས་བདེ་ལེགས་འབྱུང་ངམ་སེམས། །དེ་ནས་ཀླུ་བདུད་ཕོ་བྲང་ཆེ། །དགེ་བསྙེན་དགོག་རའི་མཚོ་ཁར་ཞག །བཙུན་ཆུང་ཆས་བཟང་མཛེས་པ་གཅིག །གུས་ཚུལ་དགའ་ཞིང་དྲུང་འོང་དང་། །རྒྱན་ལྡན་བུད་མེད་མང་པོ་ཡིས། །ཕྱག་འཚལ་རྩྭ་སྔོ་འབུལ་བ་རྨིས། །ཕྱིར་ནངས་མཚོ་འབུལ་མཚོན་ཙམ་བྱས། །
དེ་ནས་ཆོ་འཕྲུལ་ཆེན་པོ་ཡི། །ཉ་དང་གཟས་འཛིན་འཛོམ་པའི་ནུབ། །གོ་བོ་ཁྱུང་ཕུག་གནས་འདབས་སུ། །ཕྱག་དང་མཎྜལ་བསྐང་བ་རྣམས། །བརྒྱ་རྩ་རེ་དང་ཚོགས་ཆེན་བཤམས། །འཕྲལ་ཕུགས་རྟེན་འབྲེལ་འགྲིགས་པ་དང་། །བསྙེན་པ་རྣམས་ཀྱིས་ཁ་གསོ་བྱས། །བུད་མེད་སྣུམ་བག་ལྡན་པ་ལ། །རལ་པ་ཐོར་ཅོག་བྱས་པ་ཡི། །ཉི་ཤུ་ཙམ་གྱིས་ཕྱག་འཚལ་ཞིང་། །གུས་འདུད་ཕྱག་དབང་ཞུ་བ་རྨིས། །ཕྱིར་ནངས་ལ་འཇམ་སྤྲིན་འཇའ་འཁྲིགས། །འདྲབ་རྒྱལ་གནས་མདུན་གཤིན་རྗེ་ཡི། །ཕོ་དོང་ཐང་དུ་སྒར་པ་ཞག །ཅུང་ཟད་འཐུམ་ཙམ་ཉམས་སྣང་ལ། །བཙུན་པ་གཞོན་ནུ་ཆས་བཟང་ནི། །མགོ་ལ་སྤུ་ཤུན་ཞྭ་དཀར་གྱོན། །མདའ་གཞུ་འཁོར་གསུམ་སྐྱེད་ལ་བསྐོར་། །རྟ་ནི་རྐྱང་སྨུག་ཞོན་པ་ཞིག །དྲུང་དུ་བྱུང་ནས་གུས་ཚུལ་བསྟན། །གཤེ་བནེ་མ་དེ་ཡིན་ནམ་སེམས། །དེ་ནས་རྨོ་སྨད་ཞག་པའི་ནུབ། །རི་བོ་ཆེ་རུ་འགྲོ་བ་ཡི། །སྟབ་ཀ་འགྲིག་གམ་མི་འགྲིགས་སོགས། །རྣམ་རྟོག་ཕྲེང་རྗེས་གཉིད་པ་ཡི། །རྨི་ལམ་སྟག་ལུང་ཞབས་དྲུང་དེ། །རང་གིས་རྒྱབ་གཞུང་དུ་ཁུར་ནས། །གྱོན་རིང་འགའ་ལ་སོང་
བ་རྨིས། །དེ་ལ་གོ་བ་འགའ་རེ་བྱུང་། །དེ་ནས་ཉེ་ཞོ་མེད་པ་རུ། །རང་ཁྱིམ་བདེ་བར་སླེབས་པ་དང་། །རང་གཞན་དོན་འགའ་འགྲུབ་པ་ཡི། །འགྲོ་བའི་རྨི་ལམ་བརྟག་པ་ལ། །ཉི་ཟླ་ཟུང་འབྲེལ་ཟེར་བ་དེ། །ཕྱོགས་འགྲོ་ཐོག་ཏུ་བབ་ཅེས་གླེང་། །དེ་སྐད་རཱ་ག་ཨ་སྱ་ཡིས། །འཕྲལ་དུ་ལག་རྩེད་ཡི་གེར་བཀོད།། ༈ ན་མོ་གུ་རུ་དྷེ་ཝ་ཌཱཀི་ནི་ཨཱ་ཡུ་སིདྡྷི་ཧཱུྃ། བདེ་བ་ཆེན་པོའི་ཞིང་ཁམས་ནས། །གཏེར་ཆོས་སྟོན་པ་ཚེ་དཔག་མེད། །གསོལ་བ་འདེབས་སོ་ཐུགས་རྗེས་གཟིགས། །སྙིགས་དུས་ཁྱེད་ཀྱི་བསྟན་འཛིན་པ། །མི་འགྱུར་རྡོ་རྗེའི་སྐུ་ཚེ་སྲིངས། །རྡོ་རྗེའི་སྐུ་རུ་བྱིན་གྱིས་རློབས། །པོ་ཊ་ལ་ཡི་གནས་མཆོག་ན། །རྒྱལ་བ་རྒྱ་མཚོ་སྤྱན་རས་གཟིགས། །གསོལ་བ་འདེབས་སོ་ཐུགས་རྗེས་གཟིགས། །སྙིགས་དུས་ཁྱེད་ཀྱི་ཕྲིན་ལས་པ། །མི་འགྱུར་རྡོ་རྗེའི་སྐུ་ཚེ་སྲིངས། །འགྱུར་མེད་རྡོ་རྗེར་བྱིན་གྱིས་རློབས། །རྔ་ཡབ་དཔལ་རིའི་རྩེ་མོ་ན། །འཆི་མེད་འཇའ་ལུས་ཨོ་རྒྱན་རྗེ། །གསོལ་བ་འདེབས་སོ་ཐུགས་རྗེས་གཟིགས། །སྙིགས་དུས་ཁྱེད་ཀྱི་བསྟན་པའི་བདག །མི་འགྱུར་རྡོ་རྗེའི་སྐུ་ཚེ་སྲིངས། །བར་ཆད་
མེད་པའི་སྲུང་སྐྱོབ་ཞུ། །མཁའ་སྤྱོད་དག་པའི་ཞིང་ཁམས་ན། །མ་གཅིག་ཡེ་ཤེས་མཚོ་རྒྱལ་ལ། གསོལ་བ་འདེབས་སོ་ཐུགས་རྗེས་གཟིགས། །ལུང་ཟིན་མི་འགྱུར་རྡོ་རྗེ་ལ། །བར་ཆད་མེད་པར་ས་གཏེར་གྱི། །དངོས་གྲུབ་སྩོལ་བའི་དུས་ལ་བབས། །ཨོ་རྒྱན་སྤྲུལ་པའི་ཞིང་ཁམས་ན། །ཡི་དམ་དབང་ཆེན་ཡབ་ཡུམ་ལ། །གསོལ་བ་འདེབས་སོ་ཐུགས་རྗེས་གཟིགས། །སྐལ་ལྡན་མི་འགྱུར་རྡོ་རྗེ་ཡི། །སྒོ་གསུམ་རྡོ་རྗེ་རྣམ་གསུམ་དུ། །བྱིན་བརླབས་དབང་བསྐུར་དངོས་གྲུབ་གནོང་། །དུར་ཁྲོད་ཆེན་པོའི་གནས་བརྒྱད་ནས། །མ་ནིང་དམ་ཅན་རྒྱ་མཚོ་ལ། །གསོལ་བ་འདེབས་སོ་ཐུགས་དམ་བསྐུལ། །སྔོན་གྱི་དམ་བཅས་ད་མ་གཡེལ། །སྔགས་བདག་མི་འགྱུར་རྡོ་རྗེ་ཡིས། །གང་བཅོལ་ཕྲིན་ལས་མྱུར་འགྲུབ་མཛོད། །རྩ་བ་གསུམ་གྱི་ལྷ་ཚོགས་རྣམས། །ཡེ་ཤེས་སྤྱན་དང་རྡོ་རྗེའི་སྙན། །མངོན་ཤེས་དྲུག་ལྡན་ཐུགས་མངའ་བས། །དུས་འདིར་བདག་ལ་གསན་ཅིང་དགོངས། །གྲངས་མེད་བསྐལ་པའི་སྔོན་རོལ་ན། །སེམས་ཅན་ཀུན་གྱི་དོན་གྱི་ཕྱིར། །ཐུགས་བསྐྱེད་སྨོན་ལམ་མ་མཛད་དམ། །འགྲོ་བ་སེམས་
ཅན་ཐམས་ཅད་ལ། །བུ་གཅིག་མ་ལྟར་མི་བརྩེ་འམ། །གསང་སྔགས་བསྟན་པ་འདི་འཛིན་མི། །སྙིང་དང་སྲོག་ལྟར་མི་གཅེས་སམ། །འོ་ན་གསང་སྔགས་བསྟན་འཛིན་མཆོག །གཏེར་སྟོན་མི་འགྱུར་རྡོ་རྗེ་ཞེས། །ལུང་བསྟན་དུ་མར་མ་གསུངས་སམ། །འདི་ལ་བར་ཆད་རྐྱེན་མང་ཞིང་། །ལུང་བསྟན་ཐོག་ཏུ་མ་ཁེལ་ན། །འགྱུར་མེད་ཨོ་རྒྱན་རྡོ་རྗེའི་གསུངས། །དེ་ཡང་རྫུན་པར་མི་འགྱུར་རམ། །ཨ་ཏིའི་བསྟན་པ་མི་ནུབ་བམ། །འགྲོ་ཀུན་མུན་པར་མི་འཁྱམས་སམ། །ཆོས་སྐྱོང་བཀའ་སྲུང་ཐམས་ཅད་ཀྱང་། །དམ་བཅའ་དམ་ལས་མི་ཉམས་སམ། །མཚོ་རྒྱལ་དྷཱ་ཀིའི་ཚོགས་རྣམས་ཀྱང་། །ཐུགས་དམ་ཉམས་པར་མི་འགྱུར་རམ། །དེང་སང་གསང་སྔགས་སྣོད་གྱུར་ཀུན། །ཡི་མུག་ག་ཡང་མི་ཆད་དམ། །ཕྱིས་འབྱུང་གསང་སྔགས་གཏེར་ཆོས་ཀུན། །སུན་ཡང་ཕྱུང་བར་མི་འགྱུར་རམ། །དེ་བས་རྩ་གསུམ་ཐུགས་མ་གཡེལ། །མི་འགྱུར་རྡོ་རྗེའི་བར་ཆད་སོལ། །ས་གཏེར་གེགས་མེད་ཐོན་པ་དང་། །སྐུ་ཚེ་འགྲོ་དོན་རྒྱས་པར་མཛོད། །གུ་རུ་དྷེ་ཝ་དྷཀི་ནཱི་དྷརྨ་པཱ་ལ་ས་མ་ཡཱ་ས་མ་ཡཱ་ཧ་ན་ཧ་ན་ཧཱུྃ་ཕཊ༔ ཅེས་སྤྲུལ་སྐུས་གྱ་ཚོམ་དུ་གཏེར་
ཅིག་བཏོན་པ་ཐོས་སྣང་དང་དེའི་ཕྱིར་ནུབ་བསྙུང་ནས་དྲན་མེད་དུ་གཟིམས་པ་འདྲ་གཅིག་འདུག་པས་རབ་ཏུ་སྐྱག་པ་གཅིག་རྨིས་པས་བློ་མ་བདེ་ནས་རྩ་བ་གསུམ་ལ་བོས་པའོ།། མོ་རཏྣ་ཏྲ་ཡཱ་ཡ། ན་མོ་བཛྲ་པཱ་ཎི་ཡེ། དཀོན་མཆོག་གསུམ་དང་རྩ་བ་གསུམ། །ཆོས་སྐྱོང་དམ་ཅན་སྲུང་མའི་ཚོགས། །ཐམས་ཅད་བདག་ལ་དགོངས་སུ་གསོལ། །ཁྱེད་ཅག་རྣམས་ལ་ཐུགས་རྗེ་དང་། །བྱིན་རླབས་མཐུ་སྟོབས་དཔག་མེད་པས། །བདག་གི་བསམ་པ་འགྲུབ་པ་དང་། །བར་ཆད་མེད་པར་བྱིན་གྱིས་རློབས། །བདག་གིས་དུས་གསུམ་དགེ་བསགས་མཐུས། །བདག་གི་བསམ་པ་འགྲུབ་པ་དང་། །དེ་ལ་བར་ཆད་མེད་གྱུར་ཅིག །མི་འཁྲུགས་པ་དང་སྨན་གྱི་བླ། །ཆོས་གྲགས་རྒྱ་མཚོའི་དབྱངས་དང་ནི། །མྱ་ངན་མེད་མཆོག་མཚན་བརྗོད་པས། །བར་ཆད་མེད་གསུངས་དེ་བདེན་ན། །བདེན་པ་དེ་ཡིས་བདག་གི་ནི། །བསམ་པའི་དོན་འདི་འགྲུབ་པ་དང་། །དེ་ལ་བར་ཆད་མེད་གྱུར་ཅིག །ཕྱོགས་བཅུའི་མུན་སེལ་སངས་རྒྱས་བཅུ། །སྒྲོལ་མ་འོད་ཟེར་ཅན་མ་དང་། །ལོ་མ་ཅན་མའི་སྔགས་དང་མཚན། །བརྗོད་པས་བར་ཆད་ཞི་གསུངས་
པ། །བདེན་ན་བདེན་པས་བར་ཆད་ཞི། །བདག་གི་བསམ་པ་འགྲུབ་གྱུར་ཅིག །གཤིན་རྗེ་གཤེད་སོགས་ཁྲོ་བོའི་ཚོགས། །མགོན་པོ་ཕྱག་གཉིས་ཕྱག་བཞི་པ། །ལྷ་མོ་དཔོན་གཡོག་སྔགས་ཀྱི་མཐུས། །བར་ཆད་མེད་གསུངས་དེ་བདེན་ན། །བདེན་པས་བར་ཆད་ཞི་བ་དང་། །བདག་གི་བསམ་པ་འགྲུབ་གྱུར་ཅིག །མ་གཟའ་དམ་གསུམ་སྡེ་བརྒྱད་དང་། །བཀའ་སྲུང་གཏེར་སྲུང་ཐམས་ཅད་ཀྱིས། །སྙིགས་དུས་རྣལ་འབྱོར་སྐྱོང་ངོ་ཞེས། །ཁས་བླངས་དམ་བཅས་དེ་བདེན་ན། །བདེན་པས་བདག་གི་བར་ཆད་སོལ། །བསམ་པ་ཡིད་བཞིན་འགྲུབ་པར་མཛོད། །འཇིང་ཡོན་སད་ན་ལེགས་ཞེས་པ། །ཆོས་རྒྱལ་བྱང་ཆུབ་སེམས་དཔའ་ཡི། །སྤྲུལ་པའི་ཆ་ཤས་བདག་ཡིན་ཞེས། །གནམ་ཆོས་ལུང་བསྟན་དེ་བདེན་ན། །བདེན་པས་བར་ཆད་ཐམས་ཅད་ཞི། །བདག་གི་བསམ་པ་འགྲུབ་གྱུར་ཅིག །ལྕོག་རོ་ཀླུ་ཡི་རྒྱལ་མཚན་གྱི། །སྤྲུལ་པའི་ཆ་ཤས་བདག་ཡིན་པར། །ས་གཏེར་རྣམས་ནས་གསུངས་བདེན་ན། །བདེན་པས་བར་ཆད་ཐམས་ཅད་ཞི། །བདག་གི་བསམ་པ་འགྲུབ་གྱུར་ཅིག །དེང་སང་སྙིགས་མ་ལྔ་ཡི་དུས། །སུམ་
ལྡན་དགེ་སློང་རྡོ་རྗེ་འཛིན། །ཁོ་བོ་ཡིན་སྙམ་དེ་བདེན་ན། །བདེན་པས་བར་ཆད་ཞི་བ་དང་། །བདག་གི་བསམ་པ་འགྲུབ་གྱུར་ཅིག །མཉམ་མེད་དྭགས་བརྒྱུད་བཞེད་པའི་དོན། །ཕྱག་རྒྱ་ཆེན་པོའི་ཡེ་ཤེས་དེ། །བདག་གིས་རྟོགས་པ་འདི་ཡིན་ན། །བདེན་པ་དེ་ཡིས་བར་ཆད་ཞི། །བདག་གི་བསམ་པ་འགྲུབ་གྱུར་ཅིག །རྡོ་རྗེ་འཆང་གི་གསུང་པའི་དོན། །རིམ་གཉིས་མཉམ་བཞག་ཟུང་འཇུག་པ། །བདག་གིས་བསྒོམས་པ་འདི་ཡིན་ན། །བདེན་པས་བར་ཆད་ཐམས་ཅད་ཞི། །བདག་གི་བསམ་པ་འགྲུབ་གྱུར་ཅིག །རྒྱུད་སྡེ་འབུམ་ཕྲག་དྲུག་ཅུའི་དོན། །ཆོས་ཉིད་མངོན་སུམ་སྣང་བ་དེ། །བདག་གིས་མཐོང་བ་འདི་ཡིན་ན། །བདེན་པ་དེ་ཡི་བར་ཆད་ཞི། །བདག་གི་བསམ་པ་འགྲུབ་གྱུར་ཅིག །གྲངས་མེད་བསྐལ་པའི་སྔོན་རོལ་ན། །བདག་གིས་བྱང་ཆུབ་སེམས་བསྐྱེད་ཞུས། །ཚོགས་གཉིས་བསགས་པ་འདི་བདེན་ན། །བདེན་པས་དེང་འདིར་བར་ཆད་ཞི། །བདག་གི་བསམ་པ་འགྲུབ་གྱུར་ཅིག །ཁྱད་པར་སྐྱེ་བ་འདི་ལ་ཡང་། །ཅི་ནུས་ཚོགས་གཉིས་བསགས་པ་དང་། །བསྙེན་སྒྲུབ་མཆོད་གཏོར་གང་བྱས་
པའི། །བདེན་པའི་མཐུ་དང་བྱིན་རླབས་ཀྱིས། །བར་ཆད་ཐམས་ཅད་ཞི་བ་དང་། །བསམ་པའི་དོན་འདི་འགྲུབ་གྱུར་ཅིག །འགོ་ཞིང་སྡོང་གྲོགས་བྱེད་པ་ཡི། །ལྷ་དང་སྲུང་ཤུམ་ཐམས་ཅད་ཀྱིས། །བར་ཆད་ཐམས་ཅད་སེལ་བ་དང་། །བསམ་པ་འགྲུབ་པའི་སྡོང་གྲོགས་མཛོད། །དེ་ལྟའི་བསམ་པ་གང་ཡིན་ན། །འབྲུག་ལོ་འདི་ལ་བླ་མ་མཇལ། །དབང་ལུང་འབྲེལ་ཞུ་གདན་ས་མཇལ། །དབང་ལུང་ཁྲིད་སོགས་རྒྱ་ཆེར་སྤེལ། །སྦྲུལ་ལོ་ཚེས་ནས་མ་ཤིའི་བར། །རྩེ་གཅིག་སྒྲུབ་པ་བྱེད་བསམས་ཀྱང་། །འདི་ལ་བར་ཆད་བློའགག་པ་མང་། །དེ་ཕྱིར་བདེན་ཚིག་གནད་འབེབས་ཀྱི། །གསོལ་འདེབས་སྨོན་ལམ་བཅས་པ་འདི། །འབྲུག་ལོ་ནག་ཟླའི་བཅུ་དྲུག་བྲིས།། ༈ །།ན་མོ་གུ་རུ་མ་ཧཱ་ཀཱ་ལ་ཡེ། སྨར་ཁམས་སྒང་དུ་འགྲོ་བའི་ཚེ། །ཏྲག་ཤད་སྤུ་གྲི་གཅིག་ཤུར་ལ། །ཕྲེང་སྐོར་གཉིས་གསུམ་ཆག་མེད་དང་། །གཏོར་བསྔོས་མ་ཆས་གཏོར་འབུལ་སོགས། །དགུན་ཟླ་ཐ་ཆུང་ཉེར་ལྔ་ནས། །ཟླ་གཅིག་ཙམ་ལ་རྒྱུན་བསྙེན་བྱས། །དགེ་བཤེས་རབ་འབྱམས་མཁས་པའི་མཆོག །མདོག་སྔོ་གཟུགས་ཐུང་ཁྲོ་བོའི་
དབྱིབས། །སྐྱེ་བོའི་ཆས་བྱས་མདའ་གཞུ་བཏགས། །བདག་གི་མདུན་དུ་བྱུང་བ་ལ། །འདི་ལས་ཁྲོ་གཏུམ་ཆེ་བ་ནི། །སུ་ཡང་མེད་སྙམ་བྱེད་པ་དང་། །རྡོ་རྗེ་སློབ་དཔོན་བཙུན་ཆེན་སོགས། །རྨི་ལྟས་ཕྱོགས་ཙམ་ཐོན་པར་བྱས། །དེ་ནས་འབྲུག་ལོ་ཆོ་འཕྲུལ་ཟླའི། །ཉེར་བཞི་ནས་བཟུང་མི་མདའ་བཅུས། །མ་མགོན་སྤྱི་ཡི་མདོས་ཆེན་དང་། །བསྐང་གསོ་ལ་སོགས་རྒྱས་པར་བྱས། །ཉམས་དང་རྨི་ལམ་འདྲེས་མཚམས་སུ། །ཤར་ལྷོའི་ནམ་མཁར་ཉི་མ་ཤར། །བུད་མེད་དཀར་མཛེས་རྒྱན་གྱིས་བཀླུབས། །འཛུམ་ཞིང་དགའ་ཚུལ་སྟོན་པ་ནི། །ལན་གཉིས་བར་དུ་མངོན་སུམ་བཞིན། །གཞན་ཡང་རྒྱན་ཅན་བུད་མེད་ནི། །མང་པོ་ཁྲོམ་ལྟར་ཚོགས་པ་དང་། །བདག་གི་རྟ་སྒའི་སྔ་རུ་དང་། །ཕྱི་རུ་གཉིས་སུ་བྱ་རོག་ནི། །གཟི་བརྗིད་ལྡན་གཉིས་ཡོད་སྙམ་དང་། །རང་ཉིད་རལ་པ་ལུས་དང་མཉམ། །བཤད་ཅིང་རིང་སྣང་མཛེས་སྣང་བྱེད། །དེ་ལྟར་རྨི་ལྟས་ཕྱོགས་མཐུན་དང་། །དངོས་སུ་མ་མགོན་གསང་སྔགས་ཀྱིས། །གནད་གསང་རྒྱུད་དང་གྲུབ་ཆེན་གསུངས། །ཤིན་ཏུ་ཟབ་ལ་རྒྱ་ཆེའི་དོན། །སྔོན་ཆད་མི་ཤེས་
སུ་ཡིན་ཡང་། །མ་རྟོགས་པ་ཡི་དོན་གཅིག་རྟོགས། །ངེས་ཤེས་དད་པ་རབ་ཏུ་འཕེལ། །རྒྱུན་ཁྱེར་ཐུགས་དམ་ཆག་མེད་པའི། །དམ་བཅའ་དག་ཀྱང་དབང་མེད་ཤོར།། ༈་།།ན་མོ་གུ་རུ་བྷེ་ཥ་ཛུ་ཡེ། བཻཌཱུརྱ་སྣང་ཞིང་ཁམས་ནས། །བཅོམ་ལྡན་བདེ་གཤེགས་སྨན་བླ་ལ། །གསོལ་བ་འདེབས་སོ་བྱིན་གྱིས་རློབས། །མི་ནད་ཕྱུགས་ནད་ཞི་མཛད་གསོལ། །པོ་ཊ་ལ་ཡི་གནས་མཆོག་ན། །སྒྲོལ་མ་བརྒྱ་དང་རྩ་བརྒྱད་ལ། །གསོལ་བ་འདེབས་སོ་སྤྱན་གྱིས་གཟིགས། །གློག་ལྟར་མྱུར་བའི་ཕྱག་བརྐྱང་ལ། །མི་ནད་ཕྱུགས་ནད་འཇིགས་ལས་སྐྱོབས། །རྒྱ་གར་རི་ཁྲོད་མདངས་དགའ་ན། །འཕགས་མ་ལོ་མ་ཅན་མ་ལ། །གསོལ་བ་འདེབས་སོ་ཐུགས་རྗེས་གཟིགས། །མི་ནད་ཕྱུགས་ནད་རྒྱུན་ཆད་མཛོད། །དགའ་བ་ཚལ་གྱི་དུར་ཁྲོད་ནས། །བདུད་རྩི་སྨན་གྱི་རྒྱལ་མོ་ལ། །གསོལ་བ་འདེབས་སོ་ཐུགས་དམ་བསྐུལ། །ཞལ་ནས་བདུད་རྩི་ཆར་ལྟར་ཕོབ། །མི་ནད་ཕྱུགས་ནད་དག་མཛད་གསོལ། །མུ་ལེ་མཐིང་གི་རྒྱ་མཚོ་ནས། །ཐུགས་རྗེ་བྱམས་ལྡན་ལྷ་མོ་ལ། །གསོལ་བ་འདེབས་སོ་ཐུགས་དམ་བསྐུལ། །མི་ནད་ཕྱུགས་ནད་ཞི་
བར་མཛོད། །སྨན་གྱི་ལྷ་དང་ཏཱ་རེ་མ། །པི་ཤ་ཙི་དང་དུང་སྐྱོང་མ། །ཁྱེད་རྣམས་སྔོན་གྱི་སྨོན་ལམ་དང་། །དམ་བཅས་བདེན་པའི་བདེན་སྟོབས་དང་། །འགྲོ་བ་སྤྱི་དང་ཁྱད་པར་དུ། །བདག་ཅག་དཔོན་སློབ་བསྲུང་བྱར་བཅས། །མི་ནད་ཕྱུགས་ནད་འཇིགས་པ་འདི། །ཞི་ཞིང་བདེ་དང་ལྡན་གྱུར་ཅིག །ཅེས་པ་མི་ནད་ཕྱུགས་ནད་ཀྱིས་འགྲོ་བ་སྡུག་བསྔལ་གཟས་འཛིན་འབྲས་བུ་ཡང་ངན་ཞེས་ས་རིས་པ་རྣམས་ཀྱིས་སྒོ་ཡིག་སྦྱར་ཞེས་ཐོས་དུས་བྲིས་སོ།། ༈ །།ན་མོ་ཨཱརྱ་ཏཱ་རེ་ཡེ། འཇིགས་པ་ཀུན་སྐྱོབ་རྒྱལ་བའི་ཡུམ། །སྒྲོལ་མ་དཀར་སྔོན་སྣ་ཚོགས་ཡུམ། །ལྷ་མོ་རྡོ་རྗེ་ལྕགས་སྒྲོག་མར། །གསོལ་བ་འདེབས་སོ་ཐུགས་རྗེས་སྐྱོབས། །གཅན་གཟན་འཇིགས་པ་ཞི་མཛད་གསོལ། །དུར་ཁྲོད་བདག་པོ་ཡབ་ཡུམ་གྱི། །ཐུགས་དམ་རྒྱུད་བསྐུལ་དམ་བཅས་དགོངས། །གཅན་གཟན་གནོད་པ་སྐྱོད་པར་མཛོད། །ནག་ཕྱོགས་བདུད་རིགས་ཐམས་ཅད་ཀྱང་། །རང་གི་ལུས་ལ་དཔེ་ལོང་ལ། །འགྲོ་བ་སེམས་ཅན་ཕ་མ་སྟེ། །གསོན་པོར་ཟ་བའི་ལས་བྱས་ན། །དམྱལ་ཁམས་བཅོ་བརྒྱད་ཁ་བརྒྱུད་ནས། །ཐར་དུས་མེད་ལ་ཡ་ང་སོམས། །
ཕྱིན་ཆད་བྱམས་པའི་སེམས་སུ་གྱིས། །གཅན་གཟན་གནོད་པ་མ་བཏང་ཞིག །དཀོན་མཆོག་གསུམ་གྱི་བདེན་པ་དང་། །བདེན་ལྡན་ཇི་སྙེད་བདེན་སྟོབས་ཀྱིས། །བསྲུང་བྱའི་དུད་འགྲོ་འདི་རྣམས་ལ། །གཅན་གཟན་འཚེ་བ་མེད་པར་ཤོག །ཅེས་པ་སྤྱང་ཀིས་རྟ་ཕྱུགས་བརྒྱད་དགུ་བསད་འདུག་པས་བྲིས་སོ།། ༈ །།ན་མོ་ལོ་ཀེ་ཤྭ་ར་ཡེ། །ཐུགས་རྗེ་ཆེན་པོ་སྤྱན་རས་གཟིགས། །རྒྱལ་བ་རྒྱ་མཚོ་ལྷ་ལྔའི་ཚོགས། །རྡོ་རྗེའི་སྤྱན་དང་སྙན་མངའ་བས། །བདག་ལ་གསན་ཅིང་དགོངས་སུ་གསོལ། །བདག་གིས་བྱང་ཆུབ་སེམས་བསྐྱེད་ནས། །འགྲོ་བ་སེམས་ཅན་མ་ལུས་པ། །ལུས་ངག་ཡིད་གསུམ་དབང་བསྡུས་ནས། །བྱང་ཆུབ་ལམ་དུ་མྱུར་བཀོད་ནས། །རྣམ་མཁྱེན་སངས་རྒྱས་སར་འགོད་ཕྱིར། །བདག་གིས་སྦ་ལྕག་སྒྲུབ་ཆེན་བྱ། །ཁྱེད་ཀྱི་བཞེད་དང་ང་ཡི་འདོད། །མཐུན་ཕྱིར་དམ་ཚིག་གཅིག་ལགས་པས། །མྱུར་དུ་བྱིན་བརླབས་དངོས་གྲུབ་གནོང་། །རྟགས་དང་མཚན་མ་བསྟན་དུ་གསོལ། །ཞེས་སྒྲུབ་པ་ཞག་བཞི་སོང་ཡང་རྟགས་ཅི་ཡང་མ་མཐོང་ནས། ཐུགས་དམ་གནད་ནས་བསྐུལ་ཕྱིར་བྲིས་སོ། །མི་མདའ་ཉི་ཤུ་རྩ་བརྒྱད་ཀྱིས། །ཞག་བདུན་རྒྱལ་
བ་རྒྱ་མཚོ་ཡི། །སྒྲུབ་པ་བྱས་ཚེ་རྨི་ལམ་དང་། །ཉམས་ཀྱི་སྐབས་ལ་དཀྱིལ་འཁོར་དྲུང་། །བུད་མེད་དཀར་མཛེས་རིན་ཆེན་གྱི། །རྒྱན་ཆས་བཀླུབས་པ་ལན་མང་དང་། །ལྷོ་ཕྱོགས་ཉི་མའི་དཀྱིལ་འཁོར་ཤར། །བུད་མེད་དཀར་མཛེས་དབང་ཞུ་དང་། །ཙནྡན་དམར་པོའི་ཕྲེང་བ་ནི། །མང་པོ་བདག་ལ་ཕུལ་བྱུང་བས། །ཁུར་པོ་ཆེ་ཞིང་ཐེག་དཀའ་བྱུང་། །མཁའ་འགྲོ་ཡེ་ཤེས་མཚོ་རྒྱལ་ནི། །སྐུ་ཡི་རྣམ་པ་ཧ་ལམ་གསལ། །ཞལ་གདམས་ཡི་གེ་མིག་གིས་མཐོང་། །ནང་བཟང་བར་གྱིས། །བྱད་ཁ་འདི་ལ་བཟློག་པ་གྱིས། །དེ་བཞིན་དགྲ་ལ་དགྲ་ཟློག་མཛོད། །ལ་ཆེན་བསམ་པ་འགྲུབ་པ་ཀྱེ། །ཞེས་པ་གདའ་ཞིང་དེ་རྗེས་ལ། །དཔེ་གཅིག་ལག་ཏུ་གཏད་བྱུང་བས། །མཁའ་འགྲོ་སྙིང་ཐིག་དབང་ཆོས་འདིས། །འགྲོ་དོན་དཔག་ཏུ་མེད་པ་འབྱུང་། །འགྲོ་དོན་ཁམས་ཕྱོགས་ཁྱབ་ཅིང་རྒྱས། །ཟེར་བ་གདའ་སྣང་ཉམས་ལ་ཤར། །འདི་ལྟར་བསྒྲུབས་པའི་དགེ་བ་དེས། །མཐོང་ཐོས་དྲན་རེག་འགྲོ་བ་ཀུན། །སྣང་བ་དམ་པའི་ཆོས་ལ་འགྱུར། །ཐར་པའི་ལམ་དུ་འགོད་པར་ཤོག །བདག་དང་བདག་གི་བརྒྱུད་འཛིན་
རྣམས། །སྣང་སྲིད་ཐམས་ཅད་དབང་འདུས་ནས། །ཀུན་ཀྱང་བྱང་ཆུབ་ལམ་ལ་འགོད། །བདེ་ཆེན་ཞིང་དུ་ཁྲིད་པར་ཤོག །བདག་ནི་མཐོང་ཐོས་དྲན་རེག་ལ། །བརྒྱུད་འཛིན་ཆོས་ལུགས་འཆང་བ་ཀུན། །མཐོང་ཐོས་སྣང་བ་ཆོས་ལ་འགྱུར། །མོས་པ་བཞི་ཡིས་དབང་དུ་འདུ། །བསྡུ་བ་བཞི་ཡིས་དཔལ་འབྱོར་རྒྱས། །དོན་གཉིས་ལྷུན་གྱིས་གྲུབ་པར་མཛོད། །མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཉམས་མགུར་གྱི་བྱེ་བྲག་འགའ་ཟུང་ཞིག་གསར་དུ་བྲིས་པའི་སྐོར།