ཤོག་ལྷེབ་ ༡ ནས་ ༡༦ བར།
བསྒྲུབ་པའི་ཉམས་ཀྱི་བྱེ་བྲག་ལས་བྱུང་བའི་ཚིགས་སུ་བཅད་པ་སྣ་ཚོགས་པ་རྣམ་པ་མང་པོ་ཡི་གེར་བཀོད་པ་དག་བཞུགས་སོ།
རྒྱལ་བ་ཀུན་གྱི་ཐུགས་རྗེའི་རང་གཟུགས་ཉིད། །སྙིགས་དུས་འགྲོ་བའི་དོན་དུ་སྤྲུལ་པའི་སྐུ། །བསྟན་པའི་རྒྱལ་མཚན་འགྲོ་བའི་སྐྱབས་གཅིག་པོ། །སྐྱབས་གནས་སྤྲུལ་སྐུ་ཆེན་པོའི་ཞབས་དྲུང་དུ། །སྒོ་གསུམ་གུས་པས་ཐལ་སྦྱར་ཞུ་བ་ནི། །དེང་སང་སྐུ་ཡི་དཀྱིལ་འཁོར་རབ་རྒྱས་ཤིང་། །ཕྲིན་ལས་འོད་སྟོང་ཀུན་ཏུ་རབ་འཕྲོས་པས། །ཐུབ་བསྟན་མཛེས་པའི་དཔལ་དུ་བཞུགས་ཐོས་པས། །བདག་ཡིད་རབ་ཏུ་དགའ་བའི་དཔལ་འབྱོར་རྒྱས། །སླར་ཡང་སྙིགས་དུས་ཐུབ་བསྟན་ཉམས་དམའ་ཞིང་། །འགྲོ་བར་སྡུག་བསྔལ་བར་ཆད་རྐྱེན་མང་
ལ། །ལྷག་པར་ཐུགས་རྗེའི་དཔུང་ཆེན་ཆེར་བསྐྱེད་ནས། །ལོ་བརྒྱའི་བར་དུ་བཞུགས་པར་གསོལ་བ་འདེབས། །སྐབས་ཞུས་རྨོ་དང་གཙུག་ཕུའི་གཟིམས་ཁང་ལ། །ན་ཉིན་ལོ་ནས་ཁང་ལས་ལེགས་པར་ཚར། །རྟོགས་ལྡན་རྣམས་ཀྱང་ཐུགས་དམ་འཕེལ་བར་ཡོད། །བདག་ཀྱང་སྐྱབས་གནས་ཉིད་ཀྱི་ཆགས་ཕྱི་དང་། །བསྟན་ལ་གང་ཕན་སྒྲུབ་སྡེ་ཁ་གསོ་དང་། །ཆོས་ར་འབུལ་སྒང་ཟང་ཟིང་མཆོད་པ་སོགས། །དགོས་ཚུལ་ཤེས་ཤིང་སེམས་བསྐྱེད་མི་ཆུང་ཡང་། །རེ་ཞིག་དུས་ཀྱི་དབང་གིས་སྟབས་མ་བདེ། །མ་འོངས་པ་ན་བསྒྲུབ་པའི་སྨོན་ལམ་ཞུ། །དེ་
སླད་ཟང་ཟིང་འབུལ་བ་མི་འཇོག་ཀྱང་། །ད་ནི་རྩེ་གཅིག་བསྒྲུབ་པའི་མཆོད་པ་འབུལ། །དེང་ནས་བཟུང་སྟེ་ཇི་སྲིད་འཚོ་ཡི་བར། །ཚེ་འདིའི་བྱ་བ་སྒྲུབ་པ་བློས་བཏང་ནས། །བྱང་ཆུབ་དོན་དུ་གཉེར་བའི་དམ་བཅའ་འབུལ། །ཚེ་འདིའི་ལྟོ་གོས་གཏམ་ལ་གྱོང་བསྐུར་ནས། །སྒྲུབ་པ་སྙིང་པོར་བྱེད་པའི་དམ་བཅའ་འབུལ། །ལྟོ་ཕྱིར་གྲོང་ཆོག་འདྲེ་འདུལ་མི་བྱེད་ཅིང་། །གྲོང་ནག་ཐེམ་པ་སྤང་བའི་དམ་བཅའ་འབུལ། །དབེན་པར་སོ་གསོད་ལྐོག་ཉལ་མི་བྱེད་པར། །བསྒྲུབ་ལ་བརྩོན་འགྲུས་བསྐྱེད་པའི་དམ་བཅའ་འབུལ། །བློས་བྱས་ཡིད་དཔྱོད་ལྟ་བ་མི་བསྒོམ་པར། །བཅོས་མིན་རང་ཞལ་ལྟ་བའི་དམ་བཅའ་འབུལ། །རྩ་བ་བཞི་པོ་སྲོག་ལྟར་བསྲུང་བ་སོགས། །སྡོམ་གསུམ་ངོས་ལྐོག་སྤངས་བའི་དམ་བཅའ་འབུལ། །བྱིང་རྒོད་ལ་སོགས་གེགས་སྐྱོན་གང་བྱུང་ཡང་། །མོས་གུས་གནད་དུ་བསྣུན་པའི་དམ་བཅའ་འབུལ། །བློ་མང་རྩབ་རྩུབ་མང་པོ་མི་བྱེད་པར། །སྒྲུབ་པ་གཉུགས་སུ་བསྲིང་བའི་དམ་བཅའ་འབུལ། །རང་དོན་ཞི་བདེའི་བསམ་པ་བློས་བཏང་ནས། །ཅི་བྱེད་གཞན་དོན་བསྔོ་བའི་དམ་བཅའ་འབུལ། །བསྒྲུབས་པས་མཆོད་པའི་
འབུལ་བ་དགུ་ཚན་འདི། །བར་ཆད་མེད་ཅིང་མཐའ་རུ་ཕྱིན་པར་ནི། །སྤྲུལ་པའི་སྐུ་མཆོག་ཁྱེད་ཀྱིས་བྱིན་གྱིས་རློབས། །ཞུ་ཡིག་གཟིགས་རྟེན་བཀྲ་ཤིས་ཁ་བཏགས་དང་། །རྗེ་ཉིད་ཡུན་རིང་བཞུགས་པའི་རྟེན་འབྲེལ་དུ། །ས་གདན་ལེགས་པ་གཅིག་དང་བཅས་ནས་ཀྱང་། །ཚེས་གྲངས་དགེ་བར་རི་བོའི་ཁྲོད་ནས་ཕུལ། །ཞེས་པ་འདི་དྲུང་པ་སྒྲུབ་བརྒྱུད་བསྟན་པ་རྣམ་རྒྱལ་གྱི་དྲུང་ནས་དཔེ་ཆ་དུང་དཀར་ལ་སོགས་གནང་སྦྱིན་གཉེར་པ་ལ་བསྐུར་བྱུང་དུས་ཞུ་ཡིག་ཕུལ་བའོ།། ༈ །།ན་མོ་གུ་རུ་ཨ་མོ་གྷ་པ་ཤ་ཡ། རྗེ་འཇིག་རྟེན་དབང་ཕྱུག་སྤྲུལ་པའི་སྐུ། །ཕ་དྲིན་ཆེན་བླ་མའི་ཞབས་ལ་འདུད། །ངས་བྱུང་ཆུབ་མཆོག་ཏུ་སེམས་བསྐྱེད་ནས། །ལས་གཞན་ཕན་བསྒྲུབ་པར་དམ་བཅས་ཀྱང་། །ཚིག་འཇམ་པོར་སྨྲས་ཀྱང་ཉན་མཁན་མེད། །ངག་རྩུབ་པོར་སྨྲས་ན་ཁོང་ཁྲོ་ལྡང་། །ད་གཞན་ཕན་ཅི་ལྟར་སྨྲ་ན་ཨང་། །ནད་ཚད་པ་གདིང་ནས་རྒྱས་པ་ལ། །ཟས་ཤ་ཆང་སྙོད་པའི་བྱམས་བྱམས་དེ། །སྡང་དགྲ་བོ་གཅིག་གི་དོ་ཟླ་མིན། །འདིས་རིན་ཆེན་སྲོག་དང་འབྲལ་ལོ་ཞེས། །ངག་ཕན་པར་སྨྲས་ཚེ་མི་དགའ་ལྟ། །ལུས་སྲོག་དང་
བྲལ་དུས་འགྱོད་ཀྱང་འཕྱིས། །བློ་གསལ་ན་གཞོན་གྱི་བན་ཆུང་འགའ། །ཡིག་རིས་དང་ཡོན་ཏན་མ་ཤེས་ན། །གོས་བཟང་ཡང་བོང་བུ་རྒྱབ་སེར་ཡིན། །ཅེས་ཕན་པར་སྨྲས་ཚེ་ཀ་ལོང་བྱེད་། །རང་ཤི་རྒས་ལ་ཐུགས་དུས་འགྱོད་ཀྱང་འཕྱིས། །ནོར་འདོད་པས་ཚ་ཁེ་བུན་སྐྱེད་སོགས། །འཕྲལ་དཀའ་ཞིང་གོང་མ་རྣམས་ཀྱིས་ཁྲེལ། །འདི་སྨྲས་ཚེ་མི་དགའི་ངོ་ནག་སྦྱད། །རང་ཆོས་པ་དང་ཚོང་པ་གང་དགའ་སོམ། །རང་ཆོས་ཚུགས་དངསྡོམ་པ་མི་འགལ་བར། །གཉེན་ཉེ་འབྲེལ་དང་ཡོན་བདག་སྐྱོང་ཡང་བཟོད། །རང་ཆོས་ཚུགས་དང་སྡོམ་པ་འགལ་བཞིན་དུ། །ཉེ་འབྲེལ་དང་ཡོན་བདག་བསྐྱང་འདོད་པ། །དེ་ནག་པོ་བདུད་ཀྱི་ཆོ་འཕྲུལ་ཡིན། །འདི་སྨྲས་ཚེ་མི་དགའི་ཅང་སྐད་འབྱིན། །རང་ཀུན་གྱིས་འཕྱ་དུས་འགྱོད་ཀྱང་འཕྱིས། །རང་གཉོམ་ཆུང་གི་མོས་པར་ཁས་བླངས་ནས། །མི་གཞན་ལ་གྱོད་རྩའི་ཕུང་གཞི་བསླབ། །འདི་འགོང་པོ་སྙིང་ལ་ཞུགས་པ་ཡིན། །ཞེ་ཚིག་ངན་སྨྲས་ཚེ་འགྲོ་བསྡིགས་བྱེད། །དོན་རང་གཞན་ཀུན་ཕུང་དུས་འགྱོད་ཀྱང་འཕྱེས། །མི་གཞན་ལ་ཕན་ངེས་ཀྱི་དོན་རིག་ན། །ངག་ཚིག་རྩུབ་སྨྲ་བར་རྒྱལ་བས་གནང་། །
ད་འོན་ཀྱང་མི་མཇེད་འཇིག་རྟེན་ཁམས། །དོན་ཕན་གནོད་གཉིས་པོ་འབྱེད་པར་དཀའ། །ལས་ངན་པ་བསླབས་ན་ཕན་དུ་གོ །ཚིག་ངན་པར་སྨྲས་ན་སྡང་བར་མཐོང་། །ངག་ཡང་ཡང་སྨྲས་ན་ཁོང་ཁྲོ་སྐྱེ། །ད་དེ་བས་དམ་བཅའ་ཚིག་གསུམ་འབུལ། །ངས་སྔོན་ཆད་བློ་སེམས་མི་ངན་ཡང་། །ངག་ཚིག་རྩུབ་གང་སྨྲས་མཐོལ་ཞིང་བཤགས། །བདག་འདི་ཕྱིར་སྒྲིབ་པར་མ་གྱུར་ཅིག །ད་དིང་ནས་ཇི་སྲིད་འཚོ་ཡི་བར། །གྲྭ་སློབ་དང་མཆེད་གྲོགས་སུ་ལ་ཡང་། །ངག་འཇམ་པོས་ཁ་ད་ཞུ་བ་ལས། །ཚིག་རྩུབ་མོ་མི་སྨྲ་དམ་བཅའོ། །རྗེ་བླ་མ་ཡི་དམ་མཁའ་འགྲོ་དང་། །སྐྱབས་དཀོན་མཆོག་གསུམ་པོ་ཐམས་ཅད་ཀྱིས། །ད་དམ་བཅའ་མཐའ་རུ་ཕྱིན་པ་དང་། །བདག་ངག་སྒྲིབ་དག་པར་བྱིན་གྱིས་རློབས། །ཞེས་ཡོན་བདག་དང་གྲྭ་སློབ་འགའ་རེ་ལ་ཤ་ཚས་མ་བཟོད་ནས་ཚིག་རྩུབ་འགའ་རེ་སྨྲ་ཤོར་བ་ལ་མི་དགའ་བའི་རྣམ་འགྱུར་མང་དུ་སྟོན་འདུག་པར་ད་ནས་མི་སྨྲ་བའི་དམ་བཅའ་བྱས་པའོ། །བྷ་ཝནྟུ།། །ན་མོ་གུ་རུ། དཔལ་འཇིག་རྟེན་དབང་ཕྱུག་སྤྲུལ་པའི་སྐུ། །ཕ་འདྲེན་མཆོག་བླ་མའི་ཞབས་ལ་འདུད། །གཞི་ཕྱག་རྒྱ་ཆེན་པོ་ཨ་ལ་
ལ། །ཨེ་མ་ཧོ་སྟེ་ངོ་མཚར་ཆེ། །ཡ་ཀི་རྒྱལ་བའི་ཐུགས་རྒྱུད་དང་། །མ་ཀི་རིགས་དྲུག་གི་འཁྲུལ་སྣང་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་བྱང་སེམས་ཀྱི་འགྲོ་དོན་དང་། །མ་ཀི་བདུད་ཀྱི་སྡིག་སྟོབས་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་བདེ་ཆེན་གྱི་ཞིང་ཁམས་དང་། །མ་ཀི་དམྱལ་ཁམས་བཅོ་བརྒྱད་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་དཀོན་མཆོག་གི་ཐུགས་རྗེ་དང་། །མ་ཀི་ལྷ་འདྲེའི་བར་ཆད་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་ལྷ་དབང་གི་དཔལ་འབྱོར་དང་། །མ་ཀི་ཡི་དྭགས་ཀྱི་བཀྲེས་སྐོམ་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་འཇམ་དཔལ་གྱི་མཁྱེན་རབ་དང་། །མ་ཀི་དུད་འགྲོའི་གླེན་ལྐུགས་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་འཕགས་ཆེན་གྱི་ཞི་དུལ་དང་། །མ་ཀི་ལྷ་མིན་གྱི་རྩུབ་འཁྲུག་གཉིས། །དེ་ཆོས་ཉིད་སྟོང་པའི་ངང་དུ་གཅིག་ཟོག་ཡིད་བཞིན་ནོར་བུའི་རིན་ཐང་དང་། །རྡོ་ཤི་ཤ་ཅན་གྱི་འདོད་ལུགས་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་རྒྱལ་བའི་ཐུགས་རྒྱུད་དང་། །མ་
ཀི་རང་གི་སེམས་རྒྱུད་གཉིས། །དེ་ཆོས་ཉིད་སྟོང་པའི་ངང་དུ་གཅིག །ཡ་ཀི་རྣལ་འབྱོར་རང་སེམས་དང་། །མ་ཀི་འགྲོ་དྲུག་གི་སེམས་རྒྱུད་གཉིས། །དེ་ཆོས་ཉིད་སྟོང་པའི་ངང་དུ་གཅིག །དེ་ཚོ་གཅིག་པའི་གཅིག་ལུགས་ཡིན། །ད་མཚར་བའི་མཚར་ལུགས་འདི་ལྟར་གདའ། །ཡར་རྫོགས་པའི་སངས་རྒྱས་ཐོབ་གྱུར་ཀྱང་། །ད་ངོ་བོ་བཟང་དུ་མ་སོང་མཚར། །མར་མནར་མེད་ཀྱི་གནས་སུ་བསྲེགས་གྱུར་ཀྱང་། །ད་ངོ་བོ་ངན་དུ་མ་སོང་མཚར། །ལས་དགེ་སྡིག་ཚབས་ཆེན་ཅི་བསགས་ཀྱང་། །དོན་ངོ་བོ་ལ་གོས་པ་མེད་པ་མཚར། །སྣང་ཞིང་སྲིད་པའི་ཆོས་རྣམས་ལ། །ཁོས་མ་ཁྱབ་ཅི་ཡང་མེད་པ་མཚར། །དེ་གདོད་ནས་ལྷུན་གྱིས་གྲུབ་པ་ལ། །དེ་སུས་ཀྱང་བྱས་པ་མེད་པ་མཚར། །གཟུགས་ངོ་བོ་ཁ་དོག་མ་གྲུབ་ཀྱང་། །ཆོས་ཀུན་གྱི་འབྱུང་གནས་ཡིན་པ་མཚར། །ད་དེ་ཡི་གནས་ལུགས་རྟོགས་པ་ལ། །ད་ལྟ་བ་མིང་དུ་བཏགས་པ་མཚར། །དེས་འཕགས་བཞི་མ་ལུས་བསྐྱེད་པས་ན། །ཡུམ་ཆེན་མོའི་མིང་དུ་བཏགས་པ་མཚར། །དེ་ངོ་བོ་སྟོང་པ་ཡིན་མོད་ཀྱི། །རྣམ་པ་ཅིར་ཡང་འཆར་བ་མཚར། །དེ་སྣང་བ་དང་
སྟོང་པ་དབྱེར་མེད་པས། །གཞི་དབུ་མའི་མིང་དུ་བཏགས་པ་མཚར། །གཅིག་པ་བཅུ་དང་མཚར་བ་བཅུ། །མཚམས་དམ་པོ་འདག་ཆར་བྱེད་པའི་དུས། །གདོན་དང་སྟོང་ཉམས་མི་འབྱེད་པའི། །ཉམས་མཚར་པོ་ཅིག་ཤར་ནས་སྨྲས་པ་ཡིན། །ཤུ་བྷཾ།། ༈ །།ན་མོ་གུ་རུ་ཌཱཀི་ཡེ། བླ་མ་ཡི་དམ་དབྱེར་མེད་པའི། །གསང་བ་ཡེ་ཤེས་ཞབས་ལ་འདུད། །ཚེ་འདིའི་འདུན་མ་བློས་བཏང་ནས། །རྩེ་གཅིག་སྒྲུབ་པ་བྱེད་པའི་ཚེ། །ནུབ་གཅིག་འཁྲུལ་པའི་རྨི་ལམ་ན། །གྲོང་ཁྱེར་བསམ་གྱིས་མི་ཁྱབ་པ། །གྲོང་མཐར་རྒྱ་མཚོ་ཆེན་པོ་འབབ། །སྲུང་འགག་ཤ་དང་དྲི་ཆེན་སོགས། །ནང་གི་བདུད་རྩི་རྣམ་ལྔ་ལ། །མཁའ་ལྡིང་ཀུ་ཀུའི་ཚོགས་ཀྱིས་རོལ། །དེ་དབུས་ཡེ་ཤེས་ཏྟཀི་མ། །འདི་ཡིན་ངོས་བཟུང་མེད་པ་རུ། །སྦས་པའི་ཚུལ་དུ་བཞུགས་སོ་སྐད། །བདག་གིས་དད་པས་ཀུན་ཏུ་བཙལ། །གྲོང་ཁྱེར་དེ་ཡི་དཀྱིལ་སྟོད་ན། །ཁང་བཟང་ཆུང་ངུགཅིག་གི་ནང་། །ཡེ་ཤེས་མཁའ་འགྲོ་བཞུགས་སོ་སྐད། །ནང་དུ་ཕྱིན་པས་མཇལ་བའི་ཚེ། །སྐུ་ཁ་དོག་དབྱིབས་སུ་མ་གྲུབ་པའི། །ལུས་མེད་ཡེ་ཤེས་མཁའ་འགྲོ་མ། །
གསུང་ལྷང་ལྷང་ཆོས་སྒྲ་སྒྲོག་པ་མཇལ། །བདག་ལ་ཆོས་འབྲེལ་གནང་དགོས་ཞུས། །དེ་ཚེ་ཡེ་ཤེས་མཁའ་འགྲོ་མས། །སེང་གདོང་ཌཱཀི་གཏོར་དབང་ནི། །མངོན་སུམ་ལྟ་བུར་གསལ་བར་གནང་། །ཞལ་ཕྱག་གསལ་བར་མ་མཐོང་ཡང་། །གཏོར་མ་མགོ་ལ་འབྱོན་པར་སྣང་། །སྐུ་གསུང་ཐུགས་ཡོན་ཕྲིན་ལས་ཀྱི། རྗེས་གནང་ལྔ་པོ་སོ་སོ་ལ། །གཏོར་མ་ལྷ་རུ་གསལ་བ་ཡི། །དཔྲལ་བ་མགྲིན་པ་ཐུགས་ཀ་དང་། །ལྟེ་བ་གསང་གནས་ལྔ་པོ་ནས། །སེང་གདོང་ལྷ་མོའི་སྐུ་ཆུང་ངུ་། །དཀར་དམར་མཐིང་སེར་ལྗང་གུའི་ཚོགས། །སྤྲོས་ནས་རང་གི་གནས་ལྔར་བསྟིམ། །དེ་འདྲའི་དམིགས་པ་སྤྱོད་པའི་ཚེ། །མངོན་སུམ་ལྟ་བུར་གྱུར་པ་རྨིས། །རྨི་ལམ་འཁྲུལ་པའི་སྣང་བ་ལ། །བློ་གཏད་མཆོག་འཛིན་མེད་ན་ཡང་། །ཉམས་མཚར་མཚར་འདྲ་ནས་བྲིས་པ་ཡིན། །ཤུ་བྷཾ།། ༈ །།ན་མོ་མ་ཧཱ་མུ་དྲ་ཡ། རྗེ་བླ་མ་རྣམས་ལ་གསོལ་བ་འདེབས། །བཀའ་དྲིན་ཅན་གྱིས་བྱིན་གྱིས་རློབས། །ཆོས་རྣམས་རྨི་ལམ་ལྟ་བུ་སྟེ། །རྨི་ལམ་ཉིད་ནའང་དམ་ཆོས་སྨྲ། །ཨེ་མ་ངོ་མཚར་མི་ཆེའམ། །ངོ་མཚར་བ་
བླ་མ་རྗེ་ཡི་དྲིན། །བལྟ་རྒྱུ་ཡོད་ན་ལྟ་བ་མིན། །ལྟ་བློ་ཡོད་ན་ལྟ་བ་མིན། །ལྟ་བ་བློ་ལས་འདས་པ་ཡིན། །བསྒོམ་རྒྱུ་ཡོད་ན་སྒོམ་པ་མིན། །བསྒོམ་བློ་ཡོད་ན་སྒོམ་པ་མིན། །བསྒོམ་པ་ཡིད་དཔྱོད་བྲལ་བ་ཡིན། །སྤྱོད་རྒྱུ་ཡོད་ན་སྤྱོད་པ་མིན། །སྤྱོད་བློ་ཡོད་ན་སྤྱོད་པ་མིན། །སྤྱོད་པ་བླང་དོར་བྲལ་བ་ཡིན། །ཐོབ་རྒྱུ་ཡོད་ན་འབྲས་བུ་མིན།་ཐོབ་བློ་ཡོད་ན་འབྲས་བུ་མིན། །འབྲས་བུ་སྐུ་གསུམ་རང་ཆས་ཡིན། །བལྟ་བྱ་ལྟ་བྱེད་རྣམ་རྟོག་ཡིན། །རྣམ་རྟོག་མ་རིག་ཆེན་པོ་ཡིན། །གྲུབ་མཐའི་དགག་བཞག་དགོས་རྒྱུ་ཆུང་། །དོན་སྤྲོས་བྲལ་རྟོགས་ན་ལྟ་བ་ཡིན། །བསྒོམ་བྱ་སྒོམ་བྱེད་རྣམ་རྟོག་ཡིན། །རྣམ་རྟོག་མ་རིག་ཆེན་པོ་ཡིན། །གེགས་སེལ་བོགས་འདོན་དགོས་རྒྱུ་ཆུང་། །ཡེངས་མེད་བསྐྱངས་ན་སྒོམ་པ་ཡིན། །དཔྱད་བྱ་དཔྱོད་བྱེད་རྣམ་རྟོག་ཡིན། །རྣམ་རྟོག་མ་རིག་ཆེན་པོ་ཡིན། །བླང་དོར་སྲུང་མཚམས་དགོས་རྒྱུ་ཆུང་། །ཚུལ་འཆོས་བྲལ་ན་སྤྱོད་པ་ཡིན། །ཐོབ་བྱ་ཐོབ་བྱེད་རྣམ་རྟོག་ཡིན། །རྣམ་རྟོག་མ་རིག་ཆེན་པོ་ཡིན། །ས་ལམ་རྩི་བགྲང་དགོས་རྒྱུ་ཆུང་། །མངོན་དུ་གྱུར་ན་འབྲས་བུ་ཡིན། །རྨི་ལམ་འཁྲུལ་པས་རྐྱེན་
བྱས་ནས། །ཁ་སྦད་ཁ་པོ་ཆོས་པ་མཐོལ་ལོ་བཤགས། །ཞེས་པ་རྨི་ལམ་དུ་ཆོས་གཏམ་འགའ་བྱས་པས་བསྒོམ་རྒྱུ་ཡོད་ན་སྒོམ་མིན། བསྒོམ་སྙམ་པའི་བློ་ཡོད་ན་སྒོམ་མིན།ཞེས་སོགས་སྨྲས་པ་རྨིས་ཤིང་ཕྱིར་ནངས་ནས་དེ་དང་མཐུན་པའི་ཉམས་ཤིག་སྐྱེས་པ་ལ་བརྟེན་ནས་སྨྲས་པའོ།། ༈ །།ན་མོ་གུ་རུ་བྷ། གནས་འོག་མིན་ཆོས་དབྱིངས་ཕོ་བྲང་ནས། །རྗེ་རྒྱལ་བའི་སྤྱི་གཟུགས་རྡོ་རྗེ་འཆང་། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །ཤར་ཟ་ཧོར་ནོར་བུའི་དགོན་པ་ན། །དཔལ་ཏེ་ལོ་སངས་རྒྱས་འགྲོ་བའི་མགོན། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །བྱང་པུལླ་ཧ་རིའི་དགོན་པ་ན། །རྗེ་ནཱ་རོ་པཎ་ཆེན་ཐུགས་རྗེ་ཅན། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །ལྷོ་གྲོ་བོ་ལུང་གི་དགོན་པ་ན། །ཕ་སྒྲ་བསྒྱུར་ལོ་ཙཱ་བཀའ་དྲིན་ཅན། །
ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །ནུབ་ལ་ཕྱི་གངས་ཀྱི་ར་བ་ན། །མ་མཁའ་འགྲོའི་དབང་ཕྱུག་མི་ལ་རྗེ། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །ཤར་དྭགས་ལྷ་དཔལ་གྱི་སྒམ་པོ་ན། །སྐྱབས་རྒྱལ་བས་ལུང་བསྟན་ལྷ་རྗེ་བ། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །མཚུར་མདོ་བོ་ལུང་གི་དགོན་པ་ན། །མཚན་སྙན་པར་གྲགས་པའི་དུས་གསུམ་མཁྱེན། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །གནས་སྤྱི་གཙུག་པད་ཟླའི་གདན་སྟེང་ན། །དྲིན་འཁོར་མེད་རྩ་བརྒྱུད་བླ་མའི་ཚོགས། །ཕ་གསོལ་བ་འདེབས་སོ་ཐུགས་རྗེས་གཟིགས། །བུ་འཇིགས་པ་ཀུན་ལས་བསྐྱབ་ཏུ་གསོལ། །རྐྱེན་བར་ཆད་ཞི་བར་བྱིན་གྱིས་རློབས། །ཁྱེད་དབང་བཅུའི་
མངའ་བདག་ཡིན་ལགས་པས། །ཚེ་སྔོན་གྱི་ལས་ངན་ཡོད་ན་ཡང་། །དུས་དེ་རིང་ཁྱེད་ཀྱིས་བཟློག་ཏུ་གསོལ། །རྐྱེན་གློ་བུར་གྱི་བར་ཆད་མཆིས་ན་ཡང་།དུས་དེ་རིང་ཞི་བར་མཛད་དུ་གསོལ། །ཞེས་པ་འདི་དག་གཞན་རྐྱེན་ལ་བརྟེན་པའི་འཇིགས་སྐྲག་འགའ་བྱུང་དུས། ཡི་དམ་ལ་གསོལ་བ་བཏབ་པས་རྨི་ལམ་ན། ཤེར་ཕྱིན་རྒྱས་པ་ཡིན་སྙམ་པའི་གླེགས་བམ་མང་པོ་འདུག་པ་གཅིག་ཞལ་ཕྱེས་པས་མཐིང་ཤོག་ལ་དངུལ་གྱིས་བྲིས་པའི་ནང་ན། རྡོ་རྗེ་འཆང་ཏེ་ལོ་ནཱ་རོ་མར་པ་མི་ལ་དྭགས་པོ་རྣམས་ལ་གསོལ་བ་བཏབ་ན། རྒྱལ་པོའི་འཇིགས་པ་སོགས་འཇིགས་པ་ཐམས་ཅད་སྐྱོབ་པར་འགྱུར་རོ། །ཟེར་བ་གཅིག་འདུག་པས་མར་མི་དྭགས་པོ་སོགས་གསལ་པོ་འདི་འདྲ་སྟོན་པས་གསུངས་ནས་གདའ་ཨང་། སྙམ་ནས་དད་པ་ཆེར་སྐྱེས་པ་རྨིས་པ་ལ་བརྟེན་ནས་རཱ་ག་ཨ་སྱས་གསོལ་བ་བཏབ་པའོ།། །། ན་མོ་གུ་རུ། ཕྱི་ལྟར་མར་པ་ལོ་ཙཱ་བ། །ནང་ལྟར་ཌོམྦི་ཧེ་རུ་ཀ །གསང་བ་དགྱེས་མཛད་ཧེ་རུ་ཀ །གསོལ་བ་འདེབས་སོ་བྱིན་གྱིས་རློབས། །ཕྱི་ལྟར་སི་ཏུ་སྤྲུལ་པའི་སྐུ། །ནང་ལྟར་འགྲོ་མགོན་རས་པ་ཆེ། །གསང་བ་རྡོ་རྗེ་བེར་ནག་ཅན། །གསོལ་བ་འདེབས་སོ་བྱིན་གྱིས་རློབས། །
ཕྱི་ལྟར་ཆོས་ཀྱི་རྒྱལ་མཚན་པ། །ནང་ལྟར་རྗེ་བཙུན་རི་མགོ་བ། །གསང་བ་དམ་ཅན་རྒྱ་མཚོའི་གཙོ། །གསོལ་བ་འདེབས་སོ་བྱིན་གྱིས་རློབས། །ཕྱི་ལྟར་རྒྱལ་སྲས་སྨྱུ་གུའི་ཚུལ། །ནང་ལྟར་ཆོས་ཀྱི་གོ་ཆ་སྟེ། །གསང་བ་དཔལ་ལྡན་མགོན་པོ་ཉིད། །གསོལ་བ་འདེབས་སོ་བྱིན་གྱིས་རློབས། །རྒྱལ་བ་རྒྱ་མཚོ་སྤྱན་རས་གཟིགས། །རྒྱ་མཚོ་ལྔ་ཡི་དཀྱིལ་འཁོར་གྱི། །འོག་ཕྱོགས་དམ་ཅན་རྒྱ་མཚོ་ཡི། །གཙོ་བོ་རྡོ་རྗེ་བེར་ཅན་ལ། །གསོལ་བ་འདེབས་སོ་བྱིན་གྱིས་རློབས། །བསྟན་དང་རྣལ་འབྱོར་བདག་ཅག་གི །བར་ཆད་ཐམས་ཅད་བསལ་དུ་གསོལ། །ཕྲིན་ལས་ཐམས་ཅད་བསྒྲུབ་ཏུ་གསོལ། །སྔོན་གྱི་ཐུགས་དམ་མ་གཡེལ་ཞིག །རྟགས་དང་མཚན་མ་དངོས་སུ་སྟོན། །ལེ་ལོ་བཏང་སྙོམས་མ་མཛད་ཅིག །དུས་ལ་བབ་བོ་ས་མ་ཡ། །ཞེས་པ་འདི་ནུབ་གཅིག་རྨི་ལམ་ན་སི་ཏུ་སྤྲུལ་པའི་སྐུ་དང་མཇལ་ནས་མགོན་པོའི་སྲུང་འཁོར་གྱི་སྔགས་ལུང་འདྲ་བ་གཅིག་གནང་ལས་ཚོགས་དཔེ་ཆ་གཅིག་གཏད་ནས། དེ་མ་ཐག་སྤྲུལ་སྐུ་ཉིད་མགོན་པོ་བེར་ནག་ཅན་ཕྱག་བཞི་ཡོད་པ་གཅིག་ཏུ་སྤྲུལ་ནས་བར་སྣང་ན་བཞུགས་པ་གཅིག་མཇལ་བ་ལ་བརྟེན་ནས་ཨ་རཱ་གས་སྨྲས་པའོ།།