ཉམས་མགུར་གྱི་བྱེ་བྲག་འགའ་ཟུང་ཞིག་གསར་དུ་བྲིས་པའི་སྐོར་མཆིས་སོ། །ས་མ་ཡ་བརྡ་ཐིམ།
དོ་ཧ་རྡོ་རྗེའི་གླུའི་རྣམ་པར་དབྱེ་བ་ཤོ་མང་གི་སུལ་འབྱེད་ཅེས་བྱ་བའི་གླུ། ན་མོ་མ་ཧཱ་མུ་དྲ་ཡེ། སྐྱབས་བླ་མ་རྣམས་ལ་གསོལ་བ་འདེབས། །ཁྱེད་བསྒྲུབ་ལ་བརྩོན་པའི་ཡང་དག་གིས། །མི་བདག་ལ་གླུ་ལོང་ཡང་ཡང་ཟེར། །གླུ་འདི་ལ་རྣམ་པ་མང་དུ་མཆིས། །གནས་འཁོར་འདས་མཉམ་ཉིད་ཞིང་ཁམས་ནས། །དཔལ་དང་པོའི་སངས་རྒྱས་ཀུན་བཟང་དེས། །ཆོས་རྫོགས་པ་ཆེན་པོ་གླུ་རུ་བླངས། །དེ་དམ་ཆོས་ཀུན་གྱི་གྲོལ་ཕུགས་ཡིན། །མཚན་སྲས་གཅིག་ས་བོན་རྒྱུད་ཅེས་གྲགས། །གནས་འོག་མིན་དཔལ་གྱི་ཞིང་ཁམས་ན། །དཔལ་ཆོས་སྐུ་རྡོ་རྗེ་འཆང་
ཆེན་དེས། །ཆོས་བསྐྱེད་རྫོགས་དགོངས་པ་གླུ་རུ་བླངས། །དེ་ཟབ་ཆོས་ཀུན་གྱི་གྲོལ་ཕུགས་ཡིན། །མཚན་བླ་མེད་རྒྱུད་སྡེ་ཞེས་སུ་གྲགས། །གནས་འོག་མིན་འཐུག་པོ་བཀོད་པ་ན། །དཔལ་ལོངས་སྐུ་རྣམ་པར་སྣང་མཛད་དེས། །ཆོས་གསང་སྔགས་དགོངས་པ་གླུ་རུ་བླངས། །དེ་ཕྱག་རྒྱ་བཞི་ཡི་གྲོལ་ཕུགས་ཡིན། །མཚན་ཡོ་གའི་རྒྱུད་སྡེ་ཞེས་སུ་གྲགས། །གནས་འཛམ་གླིང་བྱེ་བ་ཕྲག་བརྒྱ་ན། །དཔལ་སྤྲུལ་སྐུ་ཤཱཀྱ་ཐུབ་པ་དེས། །ཆོས་སྡེ་སྣོད་དགོངས་པ་གླུ་རུ་བླངས། །དེ་སངས་རྒྱས་བསྟན་པའི་གྲོལ་ཕུགས་ཡིན། །མཚན་དབྱངས་སུ་སྙན་
པའི་སྡེ་ཞེས་བྱ། །དཔལ་དཔལ་ལྡན་འབྲས་སྤུང་མཆོད་རྟེན་དེར། །དཔལ་ཤཱཀ་ཐུབ་མྱ་ངན་འདས་ཁའི་དུས། །ཆོས་དུས་འཁོར་དགོངས་པ་གླུ་རུ་བླངས། །དེ་སྦྱོར་དྲུག་ཆོས་ཀྱི་གྲོལ་ཕུགས་ཡིན། །མཚན་བསྟོད་པ་གླུ་བླངས་རྒྱུད་ཅེས་གྲགས། །གནས་ཨོ་རྒྱན་སྤྲུལ་པའི་ཞིང་ཁམས་ན། །དཔལ་ལོངས་སྐུ་རྡོ་རྗེ་འཆང་ཆེན་དེས། །ཆོས་བདེ་མཆོག་དགོངས་པ་གླུ་རུ་བླངས། །དེ་སྙན་བརྒྱུད་ཆོས་ཀྱི་གྲོལ་ཕུགས་ཡིན། །མཚན་རྡོ་རྗེ་ཚིགས་རྐང་ཞེས་སུ་གྲགས། །གནས་རྒྱ་གར་རྡོ་རྗེའི་གདན་སྟེང་ན། །དཔལ་བྲམ་ཟེ་ས་ར་ཧ་པ་དེས། །ཆོས་ཕྱག་ཆེན་རྟོགས་པ་གླུ་རུ་བླངས། །དེ་གྲུབ་ཆེན་བརྒྱད་ཅུའི་ཆོས་ཕུགས་ཡིན། །མཚན་དོ་ཧ་སྐོར་གསུམ་ཞེས་སུ་གྲགས། །གནས་དཔལ་གྱི་རི་སོགས་སོ་སོ་རུ། །དཔལ་ཤ་བ་རི་སོགས་གྲུབ་ཆེན་བརྒྱད། །ཆོས་ཕྱག་ཆེན་རྟོགས་པ་གླུ་རུ་བླངས། །དེ་ཟབ་ཆོས་མང་པོའི་གྲོལ་ཕུགས་ཡིན། །མཚན་དོ་ཧ་མཛོད་བརྒྱད་ཅེས་སུ་གྲགས། །གནས་རྒྱ་གར་སྒྲུབ་གནས་སོ་སོ་རུ། །དཔལ་བཀའ་བརྒྱུད་བླ་མ་ཐམས་ཅད་ཀྱིས། །རང་རང་གི་རྟོགས་པ་གླུ་རུ་བླངས། །དེ་སྒྲུབ་བརྒྱུད་བསྟན་པའི་སྲོག་ཤིང་ཡིན། །མཚན་
བཀའ་བརྒྱུད་མགུར་འབུམ་ཞེས་སུ་གྲགས། །གླུ་དེ་རྣམས་བརྗོད་མེད་རྡོ་རྗེའི་གླུ། །གླུ་དེ་འདྲ་རྣ་བས་ཐོས་ན་ཡང་། །ངན་སོང་གི་སྐྱེ་སྒོ་དུ་མ་ཆོད། །འཁོར་བའི་རྒྱ་མཚོ་མཐའི་ཅན་བྱེད། །གླུ་དེ་འདྲ་སྐྱབས་ཡུལ་ཕྱག་གི་གནས། །ཁོང་རྟོགས་ལྡན་རབ་ཀྱི་གླུ་དབྱངས་དེ། །སྒོམ་རོ་གཅིག་གི་རྟོགས་པ་མངོན་དུ་གྱུར། །ཕྱི་སྣང་བ་དེ་ཀུན་དཔེ་ཆར་ཤར། །ནང་བསྒོམས་བྱུང་གི་རིག་པའི་ཤེས་རབ་འཆར། །དེ་འདྲའི་གླུ་དབྱངས་བདག་ལ་མེད། །ཁོང་རྟོགས་ལྡན་འབྲིང་གི་གླུ་དབྱངས་དེ། །ལུས་རྩ་རླུང་ཐིག་ལེ་ལས་སུ་རུང་། །བདེ་དྲོད་ཀྱི་ཡེ་ཤེས་མེ་ལྟར་འབར། །ངག་མགྲིན་པ་ལོངས་སྤྱོད་རྩ་ཁ་བྱེ། །དེ་འདྲའི་གླུ་དབྱངས་བདག་ལ་མེད། །ཁོང་ཚད་ལྡན་གྱི་གླུ་དབྱངས་ཅི་མཛད་ཀྱང་། །མདོ་རྒྱུད་ཀྱི་དོན་དང་འགལ་མི་སྲིད། །གང་ཐོས་ཀྱི་སྣང་བ་བསྒྱུར་བར་ནུས། །དེ་འདྲའི་གླུ་ལ་སྨོན་ལགས་ཀྱང་། །དེ་འདྲའི་གླུ་དབྱངས་བདག་ལ་མེད། །ཁོང་ཨ་རྟོགས་ལྡན་ཐ་མའི་གླུ་དབྱངས་དེ། །ལུས་བདེ་གསལ་གྱི་ཉམས་མྱོང་ཅུང་ཟད་རེ། །བྱུང་རྒྱལ་དུ་སྨྲས་ཀྱང་བཀའ་དང་འགལ། །མཁས་པ་རྣམས་གཟིགས་ན་ཁྲེལ་རྒོད་བྱེད། །
དེ་འདྲའི་གླུ་དབྱངས་དགོས་པ་མེད། །སྔོན་བཀའ་བརྒྱུད་ཀྱི་གསུངས་ལ་དཔེ་བླངས་ནས། །རྡུལ་བྱང་ལ་བཀོད་ཅིང་བྲིས་སྣོག་བྱེད། །དེ་ཉམས་མགུར་ཡིན་ཚུལ་ཇོ་བརྫུ་སྨྲ། །ཚིག་ལེགས་ལེགས་འདྲ་ཡང་བྱིན་རླབས་མེད། །དེ་འདྲའི་གླུ་དབྱངས་དགོས་པ་མེད། །ཡུལ་མདོ་ཁམས་ཡུལ་གྱི་སྐྱེས་ཕྲན་འགའ། །ལྷ་མ་སངས་རིགས་ཀྱི་གཞི་བདག་བབས། །ཆོས་འཇིག་རྟེན་བརྫུན་དང་གསུམ་བསྲེས་ཀྱིས། །གླུ་དབྱངས་ལ་ཟད་མེད་ཆུ་བོ་འདྲ། །དེ་འདྲའི་གླུ་དབྱངས་དགོས་པ་མེད། །དུས་སྙིགས་མའི་ན་ཆུང་གཞོན་ནུ་འགའ་། །ལྷ་སྨན་རིགས་ཀྱི་གཞི་བདག་རྩ་ལ་ཞུགས། །རྫུན་མཐོང་སྣང་རྨི་ལམ་སུམ་བསྲེས་ཀྱིས། །གླུ་མགུར་དང་ལུང་བསྟན་ཟད་པ་མེད། །དེ་འདྲའི་གླུ་དབྱངས་དགོས་པ་མེད་། །དུས་སྙིགས་མའི་སྤྲང་པོ་བྱ་བྲལ་འགའ། །ལུས་རྐང་མཐིལ་དམྱལ་བའི་རྩ་སྒོ་བྱེ། །གཤིན་བར་དོའི་ཟ་འདྲེ་མང་དུ་མཐོང་། །ཆ་ཕྲིན་གྱི་གླུ་དབྱངས་བདེན་བདེན་འདྲ་།དེ་འདྲའི་གླུ་དབྱངས་དགོས་པ་མེད། །དོན་དེ་ཕྱིར་གླུ་དབྱངས་ངས་མ་བླངས། །གླུ་ལེན་དགོས་ཀྱི་དོན་གྱིས་བླངས་པ་རྣམས། །དེ་བྲིས་པ་འདིར་མེད་སོ་སོར་
ཁྱེར། །དེ་ཕྱོགས་གཅིག་ཡོད་ན་པོད་ལོང་ཙམ། །དེ་བསོགས་ཀྱང་དགོས་པ་ཆེར་མེད་བསམ། །བདག་རྩོམ་འདོད་ཀྱི་རྟོགས་པ་མ་སྐྱེས་དུས། །དོན་བསམ་གཞིག་བྱས་ཀྱང་ལེགས་པ་དཀའ། །རང་བརྩམ་འདོད་ཆེན་པོ་ནམ་བྱུང་དུས། །དེ་བསམ་གཞིག་མི་དགོས་ཤར་གྱིས་འབྱུང། །དེ་མི་རིགས་ཀྱི་གཤིས་ཀ་ཞིག་ཡིན་ནམ་སེམས། །བཀའ་བརྒྱུད་ཀྱི་གསུང་ལ་མ་འགྲན་ཅིང་། །ཉམས་རྟོགས་ཀྱི་གླུ་དབྱངས་མ་མཆིས་ཀྱང་། །ན་ཆུང་དང་སྐྱེས་ཕྲན་འབྱམས་ལོང་རྣམས། ཁ་བཤད་ཀྱི་གླུ་དབྱངས་མང་བ་བཞིན། །གང་དྲན་གྱི་ཚིག་འགའ་བྲིས་པ་ཡང་། །ཡང་དག་གིས་ཡང་ཡང་བསྐུལ་ཕྱིར་ཡིན། །ཞེས་སྨྲས་སོ།། ༈ །།ཀ་མད་སུམ་ཅུའི་གླུ་མཚར་བའི་རོལ་མོ། ཀ་ཡེ་གསོན་དང་ཀརྨ་ཡང་དག་དགོངས། །ཁ་ད་རང་གིས་རང་ལ་བྱས་ན་ལེགས། །ག་ནས་བསམས་ཀྱང་ཚེ་ལ་ལོང་མི་གདའ། །ང་ནི་ད་ནི་སྐྱོ་བ་སྙིང་ནས་སྐྱེས། །ཅ་ཅོའི་འཆལ་གཏམ་མ་མང་སྨྲ་བཅད་མཛོད། །ཆ་ལུགས་སྐྱ་ཆས་མ་བསྲེ་བཙུན་ཚུགས་ཟུངས། །ཇ་གསོལ་ཆང་ནི་བཙན་དུག་བཞིན་དུ་སྤོངས། །ཉ་མཚམས་བརྒྱད་ལ་བསྐང་བཤགས་མཆོད་
པ་གཟོབ། །ཏ་ཐཱ་ག་ཏའི་རྟེན་ལ་ཕྱག་བསྐོར་མཛོད། །ཐ་ན་ཡི་དྭགས་ཡན་ལ་ཆུ་སྦྱིན་ཐོངས། །ད་ནི་ཚེ་ཡང་སུམ་གཉིས་ཙམ་ཞིག་ཟད། །ན་རྒས་འཆི་བ་བྱུང་ཚེ་འགྱོད་མེད་མཛོད། །པ་དེ་པུ་དེའི་མནའ་དང་འཛིང་རྩོད་སྤོངས། །ཕ་རོལ་ཕྱིན་པའི་མདོ་སྒྲུབ་ཆག་མེད་མཛོད། །བ་སོགས་བཤས་པའི་ཉིན་ཤ་བསྔོས་ཤ་སྤོངས། །མ་རྒན་འགྲོ་དྲུག་དོན་དུ་སེམས་བསྐྱེད་མཛོད། །རྩ་དང་རླུང་གི་རྣལ་འབྱོར་ཐུན་རེ་སྒོམས། །ཚ་ཚ་ཡན་ཆད་ཚོགས་བསགས་གང་འགྲུབ་མཛོད། །ཛ་རེ་ཛོ་རེའི་ལངས་འདུག་སྤྱོད་ལམ་དུས། །ཝ་ལེ་ཡེ་རེ་རང་སེམས་ངོ་བོ་ལྟོས། །ཞྭ་ལྟར་བླ་མ་སྤྱི་བོའི་གཙུག་ཏུ་སྒོམས། །ཟ་འཐུང་ཅི་བྱེད་ནང་གི་སྦྱིན་སྲེག་མཛོད། །འ་རེ་འུ་རེའི་འགྲེལ་འགྲིམ་རྣམ་གཡེང་དུས། །ཡ་ང་མེད་པ་བསྐྱེད་རིམ་བརྟན་པོ་སྒོམས། །ར་ལ་ཆིབས་པའི་རྡོ་རྗེ་ལེགས་པ་སོགས། །ལ་ཆེན་ཆོས་སྐྱོང་ཀུན་ལ་མཆོད་བསྟོད་རེམ། །ཤ་ས་ན་སོགས་བཟླས་བརྗོད་བསྙེན་པར་འབུངས། །ས་བདག་ཡུལ་ལྷ་རྣམས་ལ་དཀར་གཏོར་བྱིན། །ཧ་ཡ་གྷི་ཝ་ལ་སོགས་ཡི་དམ་སྒྲུབས། །ཨ་ཅང་ང་ནི་ཀུ་རེ་ཙམ་ཡང་མིན། །ཞེས་སྨྲས་སོ།། ༈
དམ་པའི་ཆོས་བྱ་བར་བློ་བསྟུན་པའི་གླུ་ཚིག་སྙན་གསེར་གླིང་རྒྱལ་མོའི་རྔ་སྒྲ་ཞེས་བྱ་བ། ན་མོ་ཤཱཀྱ་མུ་ན་ཡེ། ཐུབ་དབང་ཐུགས་རྗེ་ཅན་ལ་འདུད་དོ། །བསམ་ཤེས་མི་རྣམས་ལེགས་པར་གསོན་དང་། །བསྐལ་པ་བྱེ་སྟོང་བསམ་གྱིས་མི་ཁྱབ། །ཕལ་ཆེར་མུན་པའི་བསྐལ་བ་ཡིན་པའི། །སངས་རྒྱས་ཆོས་ཀྱི་སྒྲ་ཡང་མི་གྲག །ད་རེས་བསྐལ་པ་བཟང་པོ་འདིར་སྐྱེས། །སྟོང་ཕྲག་འབྱོན་ཡང་བསྟན་པ་ཡུན་ཐུང་། །ད་རེས་ཐུགས་རྗེ་ཆེན་པོའི་ཞིང་ཁམས། །བོད་ཡུལ་དམ་ཆོས་དར་ས་འདིར་སྐྱེས། །དབང་པོ་མ་ཚང་གླེན་ལྐུག་འོན་ལོང་། །མི་ལུས་ཐོབ་ཀྱང་ཆོས་ངོ་མི་ཤེས། །ཚེ་སྔོན་ཚུལ་ཁྲིམས་བསྲུངས་བའི་འབྲས་བུས། །ད་རེས་དབང་པོ་རྣམ་ཤེས་བཀྲ་གདའ། །ཕྱི་རོལ་མུ་སྟེགས་བོན་རིགས་སྐྱེས་ན། །དབང་པོ་ཚང་ཡང་ཆོས་ལ་ལོག་ལྟ། །ད་རེས་དཀོན་མཆོག་གསུམ་ལ་དད་པའི། །ནང་པ་སངས་རྒྱས་རིགས་སུ་སྐྱེས་གདའ། །རྒྱ་བོད་བསྟན་པའི་བར་སྐབས་བྱུང་དུས། །ཆོས་དང་བླ་མ་ཤིན་ཏུ་རྙེད་དཀའ། །ད་ལྟ་ཆོས་ཀྱི་ཐང་མ་བརྡལ་ནས། །བླ་མ་མཚན་ལྡན་ས་སྟེང་གང་གདའ། །རྒྱལ་པོའི་བྲན་དང་ཤན་པའི་ཆུང་མ། །དམ་ཆོས་
འདོད་ཀྱང་རང་ལ་དབང་མེད། །ད་ལྟ་གཞན་གྱི་དབང་དུ་མ་སོང་། །རང་དབང་རང་ལ་ཡོད་པའི་དུས་འདིར། །ད་རེས་དམ་ཆོས་མི་སྒྲུབ་པ་ནི། །རིན་ཆེན་སྣ་བདུན་གླིང་དུ་ཕྱིན་ནས། །ལག་པ་སྟོང་པར་འོངས་པ་ལས་ཀྱང་། །ཆེས་ཆེར་བླུན་པ་མིན་ནམ་སོམས་དང་། །ད་རེས་ཕུམ་སུམ་ཚོགས་པའི་དུས་འདིར། །དམ་པའི་ཆོས་ཤིག་མི་བསྒྲུབས་ན་ནི། །དུས་ཚོད་ནམ་ཞིག་དམ་ཆོས་སྒྲུབ་ཅེས། །རང་གིས་རང་ལ་བསམ་གཞིག་ཐོང་ཞིག །ད་རེས་ཆོས་ཤིག་མ་འགྲུབ་ན་ནི། །ཚེ་སྔོན་དགེ་རྩ་ལུས་བཟང་འདི་ཟད། །རྒྱ་མཚོའི་དཀྱིལ་ན་གྲུ་ནི་ཞིག་ལྟར། །མཐའ་མེད་འཁོར་བའི་རྒྱ་མཚོར་ལྟུང་ངོ་། །སྐྱེ་རྒ་ན་འཆིའི་རྦ་རླབས་འཁྲུག་ཅིང་། །ཉོན་མོངས་ཆུ་སྲིན་མཆེ་བས་བཟུང་ནས། །བཟོད་མེད་ངན་སོང་སྡུག་བསྔལ་དྲག་པོས། །འོ་དོད་སྨྲེ་སྔགས་འདོན་པར་འགྱུར་རོ། །དེ་བས་དལ་འབྱོར་གཙང་མའི་གྲུ་འདིས། །མཚན་ལྡན་བླ་མ་མཉེས་པར་བརྟེན་ནས། །ཉམས་ཁྲིད་གདམས་པ་ཟབ་མོའི་སྐྱ་བས། །འཁོར་བའི་རྒྱ་མཚོ་སྒྲོལ་བར་མཛོད་ཅིག །ཅེས་སྨྲས་སོ།། ༈ །།དམ་པའི་ཆོས་ལ་འཇུག་ཚུལ་བློ་མང་གིས་སུན་པའི་སྐྱོ་གླུ་རིང་མོ་
ཞེས་བྱ་བ། ན་མོ་སརྦ་ཛྙཱ་ན་ཡེ། དཔལ་ཐམས་ཅད་མཁྱེན་པ་བཅོམ་ལྡན་འདས། །ཕ་མཚུངས་མེད་རྗེ་ལ་གསོལ་བ་འདེབས། །སྔོན་རྒྱ་བོད་པཎ་གྲུབ་སྐྱེས་མཆོག་རྣམས། །ཁོང་བསམ་བཞིན་འགྲོ་བའི་དོན་དུ་སྤྲུལ། །ཐུགས་ཀུན་མཁྱེན་ཡེ་ཤེས་ཉི་མ་ཤར། །སྤྱིར་རྒྱུ་རྩལ་དྲུག་ཅུ་རྩ་བཞི་དང་། །ཕྱི་རིག་གནས་བཞི་དང་བཅོ་བརྒྱད་དང་། །ནང་སྡེ་སྣོད་གསུམ་དང་རྒྱུད་སྡེ་བཞི། །དེ་ཐམས་ཅད་ཐུགས་སུ་ཆུད་པར་མཛད། །དོན་འཆད་རྩོད་རྩོམ་པའི་མཛད་པ་ཡིས། །རྗེ་ཐུབ་པའི་བསྟན་པ་ཉིན་མོར་མཛད་། །ཁོང་རྣམས་ལ་འགྲན་ཟླ་མ་མཆིས་ཀྱང་། །ས་མདོ་ཁམས་ཀྱི་བན་ཆུང་ཆགས་མེད་ང་། །ས་གར་སོང་དུ་ཤེས་རབ་ཆེ་ཞེས་སྨོན། །ཚོད་མ་ཟིན་གྱི་མི་ང་ཧམ་པ་ཆེ། །ཕྱི་ཐོས་པའི་སྒྲོ་འདོགས་གཅོད་དགོས་སྙམ། །འདི་མི་ཤེས་སྨྲ་བ་ངོ་རེ་ཚ། །རིག་པའི་གནས་ཀུན་བསླབ་དགོས་སྙམ། །བླུན་སྒོམ་གྱི་ཨུ་ཚུགས་གོལ་ས་ཆེ། །ཆོས་ཀུན་གྱི་རྩ་བ་གཅོད་དགོས་སྙམ། །ལོ་དྲུག་ནས་ཀློག་ཡིག་གཤར་གཟབ་བསླབ། །སྔགས་སྤུང་ཡིག་མང་པོ་ནན་གྱིས་སྦྱངས། །སྔགས་བཀླག་ཐབས་མང་པོ་ཡང་ཡང་
བལྟས། །མཁས་ཟེར་བ་ཀུན་ལ་རྩད་གཅོད་བྱས། །ཚིག་བརྗོད་པ་མི་གཙང་ཡུལ་སྐད་འདྲེས། །ཀློག་ཡི་གེ་ལ་སྦྱངས་པས་ང་རེ་སུན། །བྲིས་ཚག་འགྲིག་དང་ཧོར་སེར་གཟབ་མའི་བྲིས། །སྐར་ཡིག་དང་ལན་ཚ་གཏེར་ཡིག་བསླབས། །སྐྱབས་དྲུང་པས་མཛད་སོགས་ཀྱི་ཐོབ་ཆ་བཟུང་། །རྗེ་ཞ་ལུའི་དག་ཡིག་ཡང་ཡང་བལྟས། །དཔེ་ཆའི་གོ་བ་འབྱེད་ལགས་ཀྱང་། །བྲི་དུས་སུ་ཐོབ་ཆ་འཕྲོད་པ་དཀའ། །བྲིས་ཡི་གེ་ལ་སྦྱོང་བས་ང་རེ་སུན། །སྒྲོན་ཆུང་སོགས་རྩིས་ཡིག་རྣམ་མང་བཟུང་། །ཤི་གསོན་གྱི་རྩིས་ལ་མང་དུ་བསླབས། །མཐའ་ཟད་མེད་གྲམ་ཕུང་རྡོ་དང་འདྲ། །རྣམ་རྟོག་གི་དྲ་བས་སྣང་བ་སུན། །རྒྱ་ནག་རྩིས་ལ་བསླབས་པས་ང་རེ་སུན། །ལྔ་བསྡུས་ཀྱང་མི་འདྲ་གསུམ་ཙམ་བསླབས། །གཟའ་འཛིན་དང་ཆད་ལྷག་འབྱེད་ཙམ་དང་། །རྟེན་འབྲེལ་དང་རི་མོའི་ནག་རྩིས་སོགས། །གྲ་ཐུབ་ཙམ་ཤེས་ཏེ་ཐུགས་དམ་ཆག །ཕྱི་ནང་གི་དག་སྦྱོར་ཤེས་པར་དཀའ། །རྒྱ་དཀར་རྩིས་ལ་བསླབས་པས་ང་རེ་སུན། །ས་བྱེ་མ་ལག་ཁྲིད་ཕྱེད་གཉིས་བཟུང་། །རི་རྩིས་དང་སྟག་ཤམ་དོན་བདུན་སོགས། །ཕན་གནོད་ཀྱི་ས་དཔྱད་མང་དུ་
བལྟས། །དུར་གར་འདེབས་ཀྱི་བློ་ཕུག་སྣང་བ་སྤུན། །ཕྱི་ལུང་པའི་བཟང་ངན་དཔྱད་པར་དཀའ། །དུར་ས་དཔྱད་ལ་བསླབ་པས་ང་རེ་སུན། །ཡར་ལྷ་གསོལ་དང་གཡང་བླངས་ལྷ་ཐོ་བརྩེགས། །མར་འདྲེ་བཀར་གླུད་མདོས་སྲི་མནན་རིགས། །ཕྱོགས་འདི་རུ་དར་བ་ཕལ་ཆེར་བསླབས། །དུས་ད་རུང་མིང་དོན་མི་འཕྲོད་པའི། །ཡས་གླུད་མདོས་འགའ་མོ་རྩིས་གཞུང་ན་གདའ། །གླུད་ཡས་བོན་ལ་བསླབས་པས་ང་རེ་སུན། །ཡི་དམ་ཆོས་སྐྱོང་བསྐང་ཟློག་མདོས། །ཉི་ཤུ་ནི་རྩ་ལྷག་ཤེས་མོད་ཀྱི། །མདོས་ཆེན་དང་མདོས་ཕྲན་བརྒྱ་རྩ་སོགས། །ཐམས་ཅད་མཁྱེན་དམིགས་ཙམ་ག་ལ་ཤེས། །མདོས་ཟློག་ལ་ཟད་མེད་མཐའ་མི་ཆོད། །མདོས་ཟློག་པ་ལ་བསླབས་པས་ང་རེ་སུན། །ལོ་གསུམ་བཞི་ལ་བསྡུས་གྲ་རྫས་ལྡོག་སྦྱང་། །བསྡུས་པའི་སྡོམ་ཚིག་བྱང་བར་བཟུང་། །ཁྱབ་རྐང་ཡང་བརྒྱ་ཕྲག་གཅིག་གཉིས་བཟུང་། །དུས་རྒྱུན་དུ་བགྲོ་གླེང་བསྒྱུ་བརྩོན་པ་བྱས། །ཚོགས་ལ་ཡང་ལན་གྲངས་གཉིས་ཙམ་ལ། །ཕམ་ཁ་ཡང་མ་ཁུར་རྒྱལ་ཁ་ལོན། །དབུས་གཙང་གི་ཆོས་སྡེ་མང་པོ་ལ། །རི་ལུང་གི་འབྲེལ་པ་ཅུང་རེ་བཞག །
ལོ་ཉི་ཤུ་རྩ་ལྷག་བསླབ་པ་རྣམས། །ད་རུང་ཡང་བསྡུས་གྲྭ་བསླབས་ཤིང་གདའ། །ང་ལོ་ཤས་ཀྱི་མཐའ་ཆོད་ག་ལ་ཡོང་། །ཞེ་སྡང་ཡང་འཕེལ་ཞིང་གོས་ལག་ཟད། །བསྡུས་གྲ་ཡང་བསླབས་པས་ང་རེ་སུན། །རྣམ་འབྲེལ་གྱི་ཁྱབ་རྐང་འགའ་ཡང་བཟུང་། །རིག་པ་གཞུང་ལུགས་ཀྱི་རྒྱ་མཚོ་དང་། །དཔལ་འཇམ་དབྱངས་བཞེད་པའི་གླེགས་བམ་ལ། །ཟིན་ཐུན་དང་དཔེ་ལྟས་མང་དུ་བྱས། །ཚད་མའི་མཐའ་ཡང་ག་ལ་ཆོད། །ཚད་མ་ལ་བསླབ་འདོད་ང་རེ་སུན། །མཚམས་སྦྱོར་གྱི་གཞུང་ཚིག་བློ་ལ་བླངས། །རྐང་པ་ལྔ་བྲི་ཐུབ་ཙམ་ཞིག་བསླབས། །བོད་སྒྲ་ཡང་སུམ་རྟགས་བློ་ལ་བླངས། །དཔེར་བརྗོད་དང་སློབ་དཔོན་ངག་ཁྲིད་སྦྲགས། །འགྲེལ་པ་ཡང་རིགས་གཉིས་ཞིབ་ཏུ་བལྟས། །སྙན་ངག་གི་ཚིག་བརྒྱན་རྟོགས་དཔྱོད་བཞག །སྒྲ་སྙན་ངག་གི་མཐའ་ཡང་ངས་མ་ཆོད། །སྒྲ་སྙན་ངག་ལ་བསླབ་འདོད་ང་རེ་སུན། །མདོ་རྒྱན་དང་མངོན་རྟོགས་དབུ་འཇུག་བཟུང་། །དབུ་ཕར་ཕྱིན་གྱིས་ཁྱབ་པ་འགའ་ཡང་བསླབས། །ཊིཀ་ཆེ་ཆུང་ལྟ་རྟོགས་བྱས། །ཁོང་དགེ་བཤེས་མཁས་པ་འགའ་རེ་ལ། །དབུ་ཕར་ཕྱིན་གྱི་བགྲོ་གླེང་འབྲེལ་པ་བཞག །མཐའ་
ཅི་བཞིན་དཔོག་པ་ག་ལ་ཞིག །ཆོས་དབུ་ཕར་ལ་བསླབ་ལོ་བྱས་པས་སུན། །ཆོས་འདུལ་མཛོད་གཞུང་དང་འགྲེལ་པ་བལྟས། །དོན་གོ་བའི་རྣམ་སྤྱོད་བག་རེ་ཤར། །དོན་དེ་དག་ལ་བགྲོ་གླེང་བག་ཆགས་བཞག །དོན་ཅི་བཞིན་ཤེས་པ་ག་ལ་ཞིག །ཆོས་འདུལ་མཛོད་ལ་བསླབ་ལོ་བྱས་པས་སུན། །ཆོས་ནང་དོན་དང་དགོངས་གཅིག་བློ་ལ་བཟུང་། །གཞུང་དེ་ཡི་འགྲེལ་ཆེན་མང་དུ་བལྟས། །ཆོས་གསང་སྔགས་དང་སྡོམ་གསུམ་དོན་རྣམས་ལ། །ཁོང་དགེ་གཤེས་འགའ་ལ་བགྲོ་གླེང་ཕུལ། །ཚིག་གོ་བའི་སྐྱ་རིས་སྐམ་པོ་ལ། །དོན་ཇི་བཞིན་རྟོགས་པ་ག་ལ་ཞིག །སྔགས་བཤད་པའི་སློབ་གཉེར་བྱས་པས་སུན། །ཆུང་ལོ་བརྒྱད་ལོན་ནས་བསྐྱེད་རིམ་བསྒོམ། །ལྷ་གསར་རྙིང་། ཡི་དམ་ཆོས་སྐྱོང་ཚོགས། །དེར་སྒྲུབ་པ་ཆེ་ཕྲ་བརྒྱ་ཕྲག་བྱས། །དུས་དང་པོ་རྨིས་ལྟས་སྤྲོ་བ་སྐྱེ། །ཕར་ནན་ཆེན་བསྒྲུབས་ན་འཇའ་བཞིན་ཡལ། །ལྷ་གཅིག་ཀྱང་དངོས་སུ་ཞལ་མ་མཐོང་། །ལྷ་སྒྲུབ་ཐབས་སྣ་ཁ་མང་བས་སུན། །ཕྱི་ཐོས་པའི་སྒྲོ་འདོགས་གཅོད་བསམ་ཛ། །རང་མི་ཤེས་དགུ་ཤེས་གྲལ་དུ་སླེབས། །ཡུལ་མཐའ་འཁོབ་ཏུ་འགྲོ་དགོས་
དེས་བྱུང་རེད། །ད་རི་ཁྲོད་གཅིག་འགྲིམས་ཀྱང་སྲུང་འཁོར་སོགས། །འདི་མི་དགོས་བསམ་པ་གཅིག་མི་གདའ། །བདག་ཡོན་ཏན་ལ་སྣ་ཁ་མང་བས་སུན། །ས་ཐོབ་ཀྱི་སྐྱེས་ཆེན་མ་གཏོགས་པ། །སོ་སྐྱེ་ཤེས་རབ་ཅི་ཆེ་ཡང་། །ཕྱི་ཐོས་པའི་སྒྲོ་འདོགས་མི་ཆོད་དེ། །དཔེ་ནམ་མཁའ་འདོམ་པས་འཇལ་བ་བཞིན། །དུས་སྙིགས་མའི་མི་ཚེ་ཡུད་ཙམ་འདི། །ཚིག་ཐ་སྙད་སྦྱིན་པས་མགོ་འཁོར་ནས། །དོན་ཆོས་མེད་ཐ་མལ་དུ་འཆི་ཉན་འགའ། །ཕྱི་ཐོས་པའི་སྒྲོ་འདོགས་མ་ཆོད་པའི། །དཔེ་བན་རྒན་ང་ལ་ལོང་མཛོད་ལ། །ནང་རིག་པའི་སེམས་ཉིད་གཏན་ལ་ཕོབ། །བདག་བསླབ་པའི་ཚེ་ན་མཐའ་མ་ཆོད། །ཚིག་བློ་ལ་ཡོད་ཀྱང་དོན་མ་གོ །ད་ཉམས་ལེན་ཅུང་ཙམ་བྱས་པའི་མཐུས། །བཀའ་སྡེ་སྣོད་རྒྱུད་སྡེ་ཐམས་ཅད་ལ། །གར་བལྟས་ཀྱང་ཕྱོགས་ཙམ་གོ་བ་ཤར། །སྔར་བློ་ལ་ཡོད་པའི་དོན་རྣམས་ཀུན། །འདི་དེ་དུས་ཅི་ཕྱིར་མ་གོ་སྙམ། །དཔལ་ཇོ་བོ་རྗེ་ཡི་ཞལ་གདམས་ལས། །ཚིག་བསླབས་པས་མང་པོ་མི་གོ་སྟེ། །དོན་བསྒོམས་ན་མང་པོ་གོ་གསུངས་པའི། །དོན་དེ་ལ་བདག་གིས་ངེས་པ་ཐེབས། །མཚན་ལྡན་གྱི་བླ་མ་དམ་པ་
ལ། །བརྒྱུད་ལྡན་གྱི་གདམས་པ་ཐོབ་གྱུར་ན། །རྣམ་གཡེང་གི་འདུ་འཛི་རྒྱང་བསྲིངས་ནས། །གཅིག་ཏུ་ཕུར་ཚུགས་སྒྲུབ་ནུས་ན། །ཉམས་རྟོགས་དང་གོ་བ་གཉིས་ཀ་སྐྱེ། །གཅིག་ཤེས་ཀུན་གྲོལ་ཞིག་འོང་བར་མཆིས། །ཞེས་སྨྲས་སོ།། ༈ །།མི་རྟག་འཆི་བ་སྙིང་ལ་གཟིར་བའི་གླུ་དགེ་སྦྱོར་གྱི་ལྕགས་འདེབས་ཞེས་བྱ་བ། ན་མོ་གུ་རུ་སརྦ་ཡེ། རྗེ་བཀའ་དྲིན་ཅན་ལ་གསོལ་བ་འདེབས། །ཕྱི་འཇིག་རྟེན་རྒྱ་ཆེ་རྔམ་འཐུག་པ། །འདི་མི་རྟག་མེ་ཆུས་འཇིག་ཐོས་ནས། །ལུས་འདོམ་གང་ཙམ་འདི་ག་ལ་རྟག །ནང་བཅུད་ཀྱི་སེམས་ཅན་མ་ལུས་པ། །དེ་གཅིག་ཀྱང་མི་འཆི་མི་སྲིད་ན། །བདག་གཅིག་པུ་ཅི་ཕྱིར་ཚེ་ཐར་ལུས། །སྔར་སྲིད་པ་ཆགས་ནས་ད་ལྟའི་བར། །མི་མ་ཤི་ལུས་པ་གཅིག་མི་གདའ། །རང་འཆི་བ་མི་དྲན་ཅི་ཡིན་ཨང་། །སྔོན་རྫོགས་པའི་སངས་རྒྱས་རྡོ་རྗེའི་སྐུ། །འདི་མི་རྟག་འདས་ཚུལ་བསྟན་དགོས་ན། །ལུས་མི་གཙང་སྒྱུ་རྐྱལ་པ་ག་ལ་རྟག །སྔོན་ཉན་རང་དགྲ་བཅོམ་རྫུ་འཕྲུལ་ཅན། །དེ་ཐམས་ཅད་མྱ་ངན་འདས་ཐོས་ན། །རང་འཁོར་བའི་སེམས་ཅན་སྨོས་ཅི་དགོས། །སྔོན་དྲང་སྲོང་མངོན་
ཤེས་རྫུ་འཕྲུལ་ཅན། །འདི་རྣམས་ཀྱང་བྲོས་ས་མ་རྙེད་འདས། །ད་མི་འཆི་ས་རུ་བྲོས་ས་མེད། །དུས་ནམ་ཟླ་མི་སྡོད་འགྱུར་ཞིང་འགྲོ། །ལོ་ཟླ་བ་མི་སྡོད་ཡུད་ཡུད་ཟད། རང་འཆི་དང་ཉེ་བ་མ་ཚོར་རམ། །ཚེ་ཡུད་ཡུད་ཟད་པར་མ་ཤེས་པར། །དུས་ནམ་ཟླ་ཞིག་སོང་ན་དགའ་སྣང་བྱེད། །ཨ་བསམ་ཆུང་གི་སྙིང་མེད་སྙིང་རེ་རྗེ། །དཔེ་བཤའ་ལུག་ཤན་པས་བཟུང་བ་བཞིན། །ཁོང་འཆི་བདག་ལས་ཀྱི་ཤན་པ་དེས། །དུས་ནམ་ཞིག་བཟུང་ངེས་ཨ་ཙ་མ། །སྨན་རིམ་གྲོ་བྱས་ཀྱང་ཕྱི་ཕྱིར་ཐུ། །ཕན་རེ་བའི་སྨན་པས་ཝ་བྲོས་བྱེད། །ཐབས་སྡུག་པའི་དུས་ཤིག་ནམ་འོང་ན། །ནད་འདུ་བ་རྣམ་བཞི་ཁོང་ནས་འཁྲུགས། །གདོན་དྲི་ཟ་རྣམས་ཀྱིས་འཇབ་བུ་སྟོན། །སྡུག་ཐུག་པའི་དུས་ཤིག་ནམ་འོང་ན། །ཡར་མཆོད་པའི་ལྷ་ཡི་སྲུང་སྐྱོབ་ཡལ། །མར་བཀར་བའི་འདྲེ་གདོན་ཕྱིར་ལ་སྡང་། །སེམས་མྱོས་ཤིང་འཁྲུག་པ་ཞིག་ནམ་འོང་ན། །སྡུག་སྡིག་པས་སྒྲུབས་པའི་ཟས་ནོར་རྣམས། །སེམས་ཆགས་ཀྱང་ཡུད་ཙམ་ཁྱེར་དབང་མེད། །རང་ལག་སྟོང་དུ་འགྲོ་དུས་ཤིག་ནམ་འོང་ན། །གོས་གྲོ་འཇམ་བཀོན་ཀྱང་རི་བས་ལྗི། །ཟས་ཁ་ན་འགྲོ་བ་ཆུ་
ཐིགས་གཅིག །གཏམ་ཁ་ཆེམས་འཇོག་དུས་ཞིག་ནམ་འོང་ན། །ཕྱི་སྐྱ་ལུས་བཟོད་མེད་ན་ཚས་མནར། །ནང་རྣམ་ཤེས་འཁྲུལ་སྣང་འཇིགས་སྐག་ཆེ།།གནམ་སྡིབ་པ་འདྲ་ཞིག་ནམ་འོང་ན། །ལུས་གཅེས་ཤིང་འཕོངས་པ་ཐག་པས་བཅིངས། །གོས་དྲོ་འཇམ་བྲག་ཕུག་སྟོང་པར་དོར། །མལ་ཕྱགས་མས་འཕྱགས་དུས་ཤིག་ནམ་འོང་ན། །ལུས་མེར་བསྲེགས་ཐལ་བ་རླུང་གིས་ཁྱེར། །དེ་ཡང་ན་བྱ་ཁྱི་གཅན་གྱིས་ཟ། །རྟེན་ཡུད་མེད་རེ་དུས་ཤིག་ནམ་འོང་ན། །གཉེན་བྱམས་པའི་མིག་ནས་མཆི་མ་འབྱིན་། །སྡང་དགྲ་བོ་རྣམས་ཀྱིས་ཁོག་དགོད་བྱེད། །མིང་ཙམ་ཡང་མེད་དུས་ཤིག་ནམ་འོང་ན། །ལས་དེ་འདྲ་ཞིག་ངེས་པར་འོང་རྒྱུ་ལ། །འཆི་གྲབ་ཀྱི་ཤོམ་ཞིག་མི་བྱེད་པར། །སྡོད་ཆིས་རང་བྱེད་པ་ཨ་ཙ་མ། །དེ་ནམ་འོང་ཡང་ཁྲིག་ཁྲིག་མི་གདའ་ན། །གློ་བུར་དུ་ཐོག་ལྟར་རྒྱབ་པ་ལ། །ལོང་ཡོད་རང་བསམ་པ་ཨ་ཙ་མ། །དམ་པའི་ཆོས་ཤིག་མ་གཏོགས་པ། །དེ་དུས་སུ་ཕན་པ་མི་གདའ་བས། །སྙིང་ནས་དམ་ཆོས་རང་མཛོད་ཅིག་ཨང་། །སྒྱུ་ལུས་འདི་ངེས་པར་སྐྱུར་དགོས་པས། །ལུས་འདི་ལ་ད་རེས་སྙིང་པོ་
ལོངས། །གཏན་གྱི་སོ་ནམ་ཞིག་ད་རེས་རེམ། །ཞེས་སྨྲས་སོ།། ༈ །།ལུས་ལ་སྙིང་པོ་ལེན་ལུགས་ཚུལ་ཁྲིམས་བསྔགས་པའི་གླུ་འཕགས་པའི་གཎྜི་ཞེས་བྱ་བ། ན་མོ་ཤཱཀྱ་མུ་ནེ་ཡེ། བསྟན་པའི་གཙོ་ལ་གསོལ་བ་འདེབས། །བསྟན་དང་མཐུན་པར་བྱིན་གྱིས་རློབས། །མི་མཇེད་འཛམ་གླིང་བྱེ་བ་བརྒྱར། །སྤྲུལ་སྐུ་སངས་རྒྱས་སྟོང་རྩ་གཉིས། །རབ་ཏུ་བྱུང་ནས་རྫོགས་སངས་རྒྱས། །ཁྱིམ་པའི་ཚུལ་དུ་སངས་མ་རྒྱས། །སྔོན་བྱོན་སྟོན་པའི་རྣམ་ཐར་དེ། །རྗེས་འཇུག་སློབ་མའི་ཉམས་ལེན་ཡིན། །པད་འབྱུང་ནཱ་རོ་ལ་སོགས་པས། །སྔགས་སྤྱོད་ཕྱག་རྒྱ་བསྟེན་པ་ཡིས། །བཀྱིག་བརྡུང་གསོན་བསྲེགས་བྱས་ཞེས་ཐོས། །ཕལ་པ་གཞན་དག་སྨོས་ཅི་འཚལ། །ཚུལ་ཁྲིམས་ཉམས་པའི་ཉེས་པ་ཡིས། །བསྐལ་པ་བྱེ་བ་སྟོང་ཕྲག་བརྒྱར། །བདེ་འགྲོའི་སྒྲ་ཡང་མི་ཐོས་པར། །ངན་སོང་དུཉཁ་སྤྱོད་འགྱུར་ཞེས། །ཚུལ་ཁྲིམས་རབ་བསྔགས་མདོ་ལས་གསུངས། །དཔེར་ན་སྐྱེས་བུ་གླེན་པ་ཞིག །ཟས་བཟང་དུག་དང་འདྲེས་པ་དག །ཟས་ལ་སྲེད་ནས་ཟ་བ་ལྟར། །ཚེ་འདིའི་འདོད་པའི་ཡོན་ཏན་ལ། །སྲེད་ནས་བསླབ་པ་འདྲར་བྱེད་པ། །
དེ་བས་བླུན་པར་ཤེས་པར་བྱ། །བྱིས་པས་སྤུ་གྲི་ཡི་རྩེ་མོ་ལ། །སྦྲང་རྩི་འགོས་པར་ལྡགས་འདོད་ནས། །ལྕེ་ཉིད་སྡུག་བསྔལ་བྱེད་པ་ལྟར། །ཆགས་སོགས་སྡུག་བསྔལ་སྤྱོད་བྱས་ན། །ཉེས་པ་ཆེན་པོའི་རྩ་བར་འགྱུར། །འཁོར་བ་སྡུག་བསྔལ་རྒྱ་མཚོ་ལས། །གཟིངས་དང་གྲུ་ཡིས་མི་སྒྲོལ་ཏེ། །ཚུལ་ཁྲིམས་གྲུ་ཡིས་སྒྲོལ་བར་བྱེད། །ཚུལ་ཁྲིམས་གཟིངས་ནི་གྲུ་ཡི་མཆོག །འཁོར་བའི་ཚ་གདུང་ཉམ་ང་བ། །ཁང་བཟང་གང་གིས་ཀྱང་མི་ཕན་ཏེ། །ཚུལ་ཁྲིམས་བསིལ་བའི་ཁང་པས་སེལ། །ཚུལ་ཁྲིམས་ཁང་བཟང་གནས་ཀྱི་མཆོག །དབང་མེད་བར་དོའི་སེམས་ཅན་ལ། །ལུས་བཟང་གྲོགས་གཞན་གྱིས་མི་སྟེར། །ཚུལ་ཁྲིམས་གྲོགས་ཀྱིས་ལུས་བཟང་སྟེར། །ཚུལ་ཁྲིམས་གྲོགས་ནི་གྲོགས་ཀྱི་མཆོག །འཕགས་མཆོག་རྣམས་ཀྱི་སྤྱན་ལམ་དུ། །རིན་ཆེན་རྒྱན་གྱིས་མི་མཛེས་ཏེ། །ཚུལ་ཁྲིམས་རྒྱན་ལྡན་སྤྱན་ལ་མཛེས། །ཚུལ་ཁྲིམས་རྒྱན་ནི་པ་རྒྱན་གྱི་མཆོག །དགྲ་འདུལ་གཉེན་སྐྱོང་ཕལ་ཆེར་ཡང་། །ཀུན་གྱིས་བསྟོད་པར་མི་འགྱུར་ཏེ། །ཚུལ་ཁྲིམས་ལྡན་པ་ལྷ་ཡིས་བསྟོད། །ཚུལ་ཁྲིམས་བྱ་བ་ཀུན་གྱི་མཆོག །
དམ་ཆོས་ཐམས་ཅད་ཀུན་མཁས་ཀྱང་། །ཚུལ་ཁྲིམས་སྣོད་དང་མི་ལྡན་ན། །དེ་ཡིས་རང་གཞན་དོན་མི་འགྲུབ། །ཚུལ་ཁྲིམས་གཙང་ལྡན་ཚིག་གཅིག་ཤེས། །དེས་ཀྱང་རང་གཞན་ཕན་པར་ནུས། །ཆོས་ཀྱི་ཕུང་པོ་གཞན་དག་རྣམས། །བསྟན་པ་ཡིན་ཡང་སྟོན་པ་མིན། །ང་ནི་མྱ་ངན་འདས་གྱུར་ནས། །འདི་ནི་ཁྱོད་ཀྱི་སྟོན་པ་ཞེས། །འདུལ་བ་སྟོན་པ་དངོས་དང་མཚུངས། །དེས་ན་ལུས་ཀྱི་ཀུན་སྤྱོད་རྣམས། །འདུལ་བ་བཞིན་དུ་མཛད་ན་ལེགས། །བཀའ་ཕྱག་ཆུ་བོ་གཉིས་འདྲེས་ཀྱི། །དྭགས་བརྒྱུད་དགོངས་ཀྱང་དེ་ལྟར་ཡིན། །གསང་སྔགས་གཞུང་དང་པད་འབྱུང་གསུངས། །དེ་དག་ཀུན་དང་འགལ་བ་མེད། །ཅི་ཕྱིར་སོ་སོའི་སྐྱེ་བོ་ཡི། །རྣམ་པར་སྤྱོད་པ་མི་བྱ་གསུངས། །རྒྱལ་བ་ཐམས་ཅད་མཁྱེན་པ་དེའི། །གསུངས་ལ་ངེས་པ་ཅུང་ཟད་ཐོབ། །རང་གི་ཞེ་ཕུགས་འཆང་བའི་ནོར། །ད་ལྟ་འདི་རུ་དབྱངས་སུ་བླངས། །བདག་དང་འགའ་ལ་ཕན་པར་ཤོག །ཅེས་སྨྲས་སོ།། ༈ །།འཕགས་པའི་ནོར་བདུན་དང་རྒྱལ་སྲིད་བདུན་སྦྱར་བའི་གླུ་ཆོས་ཀྱི་རྒྱལ་སྲིད་ཀྱི་རྒྱལ་རྔ་ཞེས་བྱ་བ། ན་མོ་གུ་རུ་དྷརྨ་རཱ་ཛ་ཡེ། ཆོས་ཀྱི་རྒྱལ་
པོ་དྲིན་ཅན་ཆོས་རྗེ་ལ། །གསོལ་བ་འདེབས་སོ་བུ་ལ་བྱིན་གྱིས་རློབས། །བསོད་ནམས་དགེ་ཚོགས་རྒྱལ་སྲིད་འབྱུང་བའི་གཞི། །དད་པའི་ནོར་ནི་འཁོར་ལོ་རིན་པོ་ཆེ། །མོས་གུས་གསོལ་འདེབས་འཁོར་ལོ་བསྐོར་བྱས་ན། །བྱིན་རླབས་དངོས་གྲུབ་དཔལ་ལ་སྤྱོད་པར་ངེས། །ཚེ་རབས་ཀུན་ཏུ་དགོས་འདོད་ཀུན་འབྱུང་བའི། །གཏོང་བའི་ནོར་ནི་ནོར་བུ་རིན་པོ་ཆེ། །རྒྱུན་དུ་གཏོར་མ་ཆུ་སྦྱིན་བཏང་བྱས་ནས། །སྐྱེ་བ་གཏན་དུ་ལོངས་སྤྱོད་ཟད་པ་མེད། །ལྷ་དང་ལྷ་མིན་ཀུན་གྱི་སྤྱན་ལ་མཛེས། །ཚུལ་ཁྲིམས་ནོར་ནི་བཙུན་མོ་རིན་པོ་ཆེ། །མ་ཉམས་གཙང་མའི་རྒྱན་གྱིས་བརྒྱན་བྱས་ནས། །སྐྱེ་བ་གཏན་དུ་མཛེས་སོ་སྐལ་ལྡན་རྣམས། །འདི་ཕྱིའི་བྱ་བ་ཀུན་ལ་མི་རྨོངས་པའི། །ཐོས་པའི་ནོར་ནི་བློན་པོ་རིན་པོ་ཆེ། །རྒྱལ་བའི་གསུང་རབ་རྣམས་ལ་བློ་དྲིས་ནས། །འདི་ཕྱིའི་འདུན་མ་འཕྱུགས་མེད་ལེགས་པར་མཆིས། །བྱ་བ་གང་ཡང་མགོ་ཐོན་མཐར་་འཁྱོལ་བའི། །ཁྲེལ་ཡོད་ནོར་ནི་རྟ་མཆོག་རིན་པོ་ཆེ། །བག་ཡོད་ཤེས་བཞིན་སྒ་སྲབ་གཟབ་པ་ན། །ཆོས་མགོ་ཐོན་པའི་གནས་སུ་སླེབས་པར་ངེས། །ཚུལ་ཁྲིམས་འཆལ་
བའི་དབང་དུ་མི་འཆོར་བའི། །ངོ་ཚ་ཤེས་པའི་ནོར་ནི་གླང་ཆེན་མཆོག །ཚུལ་ཁྲིམས་སྐྱེས་བུ་ངོ་ཚའི་གླང་པོར་བསྐྱོན། །འཁོར་བའི་ཆུ་བོ་ངེས་པར་དེ་ཡིས་སྒྲོལ། །མ་རིག་བདག་འཛིན་དགྲ་དཔུང་འཇོམས་མཛད་པ། །ཤེས་རབ་ནོར་ནི་དམག་དཔོན་རིན་པོ་ཆེ། །སོ་སོ་རང་རིག་རང་གི་གོ་མཚོན་གྱིས། །འཁོར་བའི་གཡུལ་བཟློག་ཐར་པའི་ཆོས་སྲིད་རྒྱས། །འཁོར་བའི་རྒྱལ་སྲིད་འཕྲལ་མེད་ཕུགས་སུ་རྡུགས། །ཆོས་ཀྱི་རྒྱལ་སྲིད་འདི་བདེ་ཕྱི་མ་སྐྱིད། །འཕགས་པའི་ནོར་བདུན་ལྡན་ན་ཕྱུག་པོ་མཆོག །རྒྱལ་སྲིད་བདུན་དང་ལྡན་པ་རྒྱལ་པོ་ཡིན། །སྤྲང་པོས་རྒྱལ་སྲིད་སྐྱོང་ཚུལ་སྨྲས་པ་འདི། །ཉམས་ལ་ཤར་གྱི་ཉམས་མཚར་སྨྲས་པ་ཡིན། །ཞེས་སྨྲས་སོ།་་་་ཚེ་འདིའི་བྱ་བ་སྙིང་པོ་མེད་པའི་གླུ་བཀའ་བརྒྱུད་བླ་མའི་གསུང་གི་རྗེས་བརྗོད་ནེ་ཙོས་མི་སྐད་སྨྲ་བ་ལྟ་བུ་ཞེས་བྱ་བ།་ན་མོ་གུ་རུ་བཛྲ་ཧ་ཕྱེ་ཡེ། རྗེ་མི་ལ་རས་ཆེན་སྤྲུལ་པའི་སྐུ། །ཕ་བྱ་བཏང་ཆོས་རྗེའི་ཞབས་ལ་འདུད། །ཕོ་རབ་རྣམས་གཏམ་འདི་བློས་མ་ཐེངས། །ཁོང་རྒྱལ་ལོ་ཕམ་མོ་ཟེར་བའི་སྒྲ། །ཚིག་ལ་ཚོགས་ནས་རྔམ་ཆེན་ལས། །མི་བརྒྱ་སྟོང་གསོད་ལ་ཡ་ང་
མེད། །རང་ཤི་བའི་དུས་ལ་བབ་པའི་ཚེ། །རྒྱལ་ཟེར་བའི་གཏམ་དེ་རྗེས་མི་འབྲང་། །ལས་དཀར་ནག་གང་སྤྱད་གྲིབ་བཞིན་འཁོར། །ཁོ་སྟག་ཤར་རྣམས་དཔའ་སྡར་གྱི་སྒྲ་ལ་ཆགས། །ཁོ་བྲོས་སོ་འཐབ་མོ་ཟེར་བའི་སྒྲ། །ཚིག་དེ་ལ་ཆགས་ནས་རང་སྲོག་སྐྱེལ། །ཁོས་འཐབ་བོ་ཟེར་བའི་སྒྲ་སྙན་དེ། །སང་བར་དོར་ཕན་མེད་གནོད་པ་ཆེ། །བཙུན་ཆོས་པས་ཀྱང་གཏམ་དེ་བློས་མ་ཐེངས། །ཁོང་བཙུན་ནོ་བཟང་ངོ་ཟེར་བའི་སྒྲ། །ཚིག་དེ་ལ་ཆགས་ནས་ཇོ་བརྫུ་བྱེད། །སྟབས་ཉེས་ན་མི་ཆོས་བླ་མའི་རྫུན། །རང་ཚུལ་ཁྲིམས་དོན་མེད་ཞོར་ལ་ཉམས། །བཟང་ཟེར་བའི་གཏམ་དེ་ཤུལ་དུ་ལུས། །རང་བཟང་ངན་གང་ཡིན་བར་དོར་གསལ། །གཏམ་བཟང་ངན་འདི་ལ་སྙིང་པོ་མེད། །སྔོན་ཤཱཀ་ཐུབ་མཆོག་ཟུང་པད་འབྱུང་སོགས། །འགྲན་དོ་མེད་རྣམས་ལ་སྐུར་འདེབས་བྱུང་། །སྔོན་དགེ་སློང་ལྷ་སྦྱིན་དཀར་རྒྱལ་སོགས། །བདུད་ལོག་འདྲེན་རྣམས་་ལ་དད་འདུན་མང་། །གཏམ་འདི་ལ་སྙིང་པོ་མི་གདའ་བས། །གཏམ་ངོ་བསྟོད་ལ་ཆགས་སེམས་མི་སྐྱེད་ཅིང་། །ཚིག་གཤེ་སྐུར་ལ་ཀོ་ལོང་མི་དམ་པར། །སྒྲ་གྲག་སྟོང་
དབྱིངས་སུ་བསྒྱུར་ན་བསམ། །ཕོ་འབྲིང་གོས་འདི་བློས་མ་ཐེངས། །ཕྲུག་དར་རས་སྤུ་ཤུན་རིན་གྱིས་ཉོས། །དེ་ཁྱིམ་དུ་སྦས་ཤིང་མི་སྤུན་གྱོན། །ནང་རྒྱུ་ཡོད་ཚུལ་ནི་མིས་ཀྱང་ཤེས། །སང་བར་དོར་གོས་མེད་གཅེར་བུར་འགྲོ། །བཙུན་གསར་པ་རྣམས་ཀྱང་གོས་ལ་ཆགས། །ནང་འདུལ་ཁྲིམས་མི་གཟབ་ཕྱི་གོས་གཟབ། །ཚད་འདུལ་བ་ལས་བཀག་པའི་ཆ་རྩག་འདོད། །འདི་ལྷབ་ལྷུབ་གོས་ཀྱི་བླ་མ་ཟེར། །གོས་ཙམ་ལ་ངོ་ཕག་གཡར་དགོས་སྡུག །ཆོས་འདུལ་བ་ནས་གསུངས་པའི་ངུར་སྨྲིག་མདོག །ལྷགས་སྐྱོབས་ཀྱི་གོས་ནི་མ་གཏོགས་པ། །གོས་ལག་ལ་སྲེད་པ་རྒྱབ་ཏུ་སྐྱུར། །ཧྲུལ་པོའི་གོས་ལ་བརྟེན་ན་བསམ། །ཕོ་ཐ་མ་རྣམས་ཟས་འདི་བློས་མ་ཐེངས། །ཁ་འབུ་ཁུང་ཙམ་འདི་མ་སོས་ནས། །ལས་སྡིག་ལྟུང་མི་དགེ་སྣ་ཚོགས་བྱེད། །སང་འཆི་ཁ་བར་དུ་དེ་ཡི་ངང་། །དེ་འགྲོ་ས་ངན་སོང་གསུམ་ལས་མེད། །བཙུན་གྲྭ་ཐུབ་རྣམས་ཀྱང་ཟས་ལ་ཆགས། །བསྐྱེད་རྫོགས་སྒོམ་སྒྲུབ་ཡལ་བར་དོར། །ཟས་ཁ་སྣུམ་གྲོང་ཆོག་གི་མི་ཚེ་ཕུད། །ལས་བཟའ་བ་དུ་མས་བསྒྲུབ་པའི་ཟས། །དེ་ཙམ་ཞིག་ལེགས་པར་ཟོས་ན་ཡང་། །ཞག་
གཅིག་ནས་མི་གཙང་ཕུང་པོར་འགྱུར། །ད་ཟས་ལ་སྙིང་པོ་ཅི་གདའ་ལྟོས། །ཟས་རིན་ཐང་ཆེ་བ་ཅི་ཟོས་ཀྱང་། །ཞག་གཉིས་གསུམ་ཙམ་གྱིས་བཀྲེས་མི་སེལ། །ཟས་འགང་ཆེན་ལ་སྙིང་པོ་ཅི་ཡོད་སེམས། །ཚེ་འདི་ལ་ཟས་སྐོམ་ཕུན་ཚོགས་ཀྱང་། །སང་བར་དོ་ཕན་ཆད་བཀྲེས་ཤིང་སྐོམ། །ཟས་འབྱོར་ཡོད་ནམ་ཕུགས་ཅི་ཡོད་སྙམ། །ཟས་ཤུགས་འབྱུང་དུ་བྱུང་ན་ལུས་ལྷ་མཆོད། །དེ་བག་ཆགས་མི་དགོས་པ་གསང་སྔགས་ལུགས། །ཟས་མ་རྙེད་དབུལ་ཞིང་ཕོངས་ན་ཡང་། །ཟས་ཕྱིར་དུ་སྒྲུབ་པ་མི་གི་བཤོལ་བར། །ཟས་དཀའ་ཐུབ་དང་བཅུད་ལེན་བྱེད་ནས་ནི། །ཚེ་འདི་ལ་ལྟོ་གོས་གཏམ་དང་གསུམ། །དེ་ལེགས་ན་དཀོན་མཆོག་ཐུགས་རྗེ་ཡིན། །ཤུགས་འབྱུང་ལ་ཆགས་ཞེན་མེད་པར་སྤྱད། །དེ་ཞེན་ན་སྔོན་གྱི་ལས་སྒྲིབ་དག །གང་བྱུང་དེས་ཆོག་ཅིག་མ་གཏོགས་པ། །ཚེ་འདི་ཡི་དོན་དུ་སྡིག་སྒྲིབ་མི་བསགས་བསམ། །ཕ་གྲུབ་ཐོབ་ཆོས་རྗེའི་སྒྱུ་ཐུགས་རྗེ་ཡིས། །བདག་བསམ་པ་འགྲུབ་པར་བྱིན་གྱིས་རློབས། །ཞེས་སོ། །༈་་།མཆོད་པ་རྣམ་ལྔ་ལ་སྦྱར་བའི་གླུ་དཔའ་བོའི་དགའ་སྟོན། ཨ་ལ་ལ་ཧོ། སྤང་ལྗོན་
མཐོང་མཐིང་ལས་འཁྲུངས་པའི་འདབ་བརྒྱད་ཀྱི་པདྨ། །བཀྲག་མདངས་ཟིལ་དངར་ལྡན་དུས་དཀོན་མཆོག་ལ་མཆོད་དང་། །དུས་ཀྱི་བ་མོ་ཐེབས་དུས་རང་དབང་ནི་མེད་པས། །རྟེན་གསུམ་མཆོད་པའི་དྲུང་དུ་སྙོགས་མཛོད་དབྱར་སྐྱེས་ཀྱི་པུཎྜེ། །དལ་འབྱོར་བཅོ་བརྒྱད་དང་ལྡན་པའི་མི་ལུས་རིན་ཆེན། །རྩ་རླུང་དར་ལ་བབ་དུས་དམ་ཆོས་ལ་འབུངས་དང་། །རྒན་རྒོན་ནད་ཀྱིས་མནར་དུས་རང་དབང་ནི་མེད་པས། །མཚན་ལྡན་བླ་མའི་དྲུང་དུ་སྙོགས་མཛོད་རིགས་ལྡན་གྱི་དྷ་པེ། །རི་རྒྱལ་མ་ལ་ཡར་སྐྱེས་པའི་ཙནྡན་གྱི་མྱུ་གུ། །དྲི་བསུང་ངད་དང་ལྡན་དུས་དཀོན་མཆོག་ལ་མཆོད་དང་། །མི་གཙང་དྲི་མའི་གསེབ་ན་རང་དབང་ནི་མེད་པས། །མཆོད་པའི་དུད་སྤྲིན་སྤྲོ་མཛོད་དྲི་ལྡན་གྱི་དྷུ་པོ། །ཐུབ་བསྟན་པད་ཚལ་དུ་འཁྲུངས་པའི་བཙུན་ཆུང་གི་གསར་པ། །ཚུལ་ཁྲིམས་དྲི་བསུང་བརྟེན་དུས་བག་ཡོད་རེ་བརྟེན་དང་། །ཚུལ་འཆལ་དྲི་མས་གོས་ན་རང་དབང་ནི་མེད་པས། །བག་ཡོད་ཤེས་བཞིན་རེ་བརྟེན་མཛོད་ཁྲིམས་ལྡན་གྱི་བནྡེ། །རིན་ཆེན་ཀོང་བུར་གཏམ་པའི་སྣང་གསལ་གྱི་མར་མེ། །གསལ་དང་མུན་པ་སེལ་དུས་དཀོན་མཆོག་ལ་མཆོད་པ། །སྣུམ་ཟད་
ཚེག་སྒྲ་འབྱིན་དུས་རང་དབང་ནི་མེད་པས། །རྟེན་གསུམ་འོད་ཀྱིས་གསལ་བའི་སྣང་གསལ་གྱི་དྷི་པཾ། །ཉམས་ཁྲིད་ཟབ་མོ་ཐོབ་པའི་སྒོམ་ཕྲུག་ནི་གསར་པ། །བདེ་གསལ་ཉམས་རྟོགས་སྐྱེ་དུས་ཕུར་ཚུགས་སུ་བསྒོམ་མཛོད། །རྣམ་གཡེང་རླུང་གིས་ཁྱེར་ན་རང་དབང་ནི་མེད་པས། །རི་ཁྲོད་དབེན་པ་བརྟེན་མཛོད་བྱ་བྲལ་གྱི་སྒོམ་ཆེན། །ཏིང་བདུན་གཙང་མ་རུ་བཤམས་པའི་ཡོན་ཆབ་ཀྱི་གཙང་མ། །གཙང་ཞིང་ཡི་ག་རུ་འོང་དུས་དཀོན་མཆོག་ལ་མཆོད་དང་། །རླུང་འཚུབ་རྡུལ་གྱིས་ཁེངས་ན་རང་དབང་ནི་མེད་པས། །ལྷ་ཚོགས་དགྱེས་པ་བསྐྱེད་མཛོད་གཙང་མ་ཡི་གྷནྡྷེ། །སྒོ་གསུམ་ཆོས་ལ་འདུན་པའི་སྐལ་ལྡན་གྱི་སྐྱེས་བུ། །ལུས་སེམས་བདེ་དུས་ཚོགས་བསགས་སྒྲིབ་སྦྱང་ལ་འབད་དང་། །ནད་གདོན་འཆི་བས་གཏུག་ན་རང་དབང་ནི་མེད་པས། །རང་རྒྱུད་གཙང་མ་རུ་ཕྱུང་མཛོད་ཆོས་ལྡན་གྱི་སྐྱེས་བུ། །ལི་དཀར་གསེར་དངུལ་འདྲེས་པའི་སྒྲ་སྙན་གྱི་རོལ་ཊྛ་མོ། །སྐད་སྙན་གདངས་འཆད་བཟང་དུས་དཀོན་མཆོག་ལ་མཆོད་དང་། །ཆག་གྲུག་དྲི་མས་གོས་ན་རང་དབང་ནི་མེད་པས། །མཆོད་དབྱངས་རམ་བུ་རུ་ཐེགས་དང་སྒྲ་སྙན་གྱི་
རོལ་མོ། །དབང་ཁྲིད་གདམས་ངག་མཁས་པའི་ཚད་ལྡན་གྱི་བཤེས་གཉེན། །ཁམས་བཟང་དུས་ལ་བབ་དུས་འགྲོ་དོན་རེ་མཛོད་དང་། །བགྲེས་རྒུད་འདས་ལ་ཐུག་ཚེ་རང་དབང་ནི་མེད་པས། །ཐར་པའི་ལམ་བཟང་རེ་སྟོན་མཛོད་བསྟན་པའི་གསལ་བྱེད། །བློ་གསལ་ལག་བདེས་བཞེངས་པའི་ལྷ་བཤོས་ནི་གཙང་མ། །རྒྱན་ལྡན་བཀྲག་མདངས་བཟང་ཚེ་དཀྱིལ་འཁོར་ལ་མཆོད་དང་། །འབག་བཙོག་དྲི་མས་གོས་ཚེ་རང་དབང་ནི་མེད་པ། །བསོད་ནམས་ཚོགས་ཆེན་རྫོགས་མཛོད་བཅུད་ལྡན་གྱི་ཞལ་ཟས། །ལོངས་སྤྱོད་འབྱོར་པ་རྒྱས་པའི་དད་ལྡན་གྱི་ཡོན་བདག །འབྱོར་པ་མངའ་ཐང་ཡོད་དུས་ཆོས་ཕྱོགས་ལ་ཐོངས་དང་། །དགྲ་ཇག་དམག་གིས་ཁྱེར་དུས་རང་དབང་ནི་མེད་པས། །འཛད་མེད་གཏེར་དུ་སྦས་མཛོད་འབྱོར་ལྡན་གྱི་ཕྱུག་པོ། །ཞེས་སྨྲས་སོ། །༈ །།དགྲ་གཉེན་གྱི་དབྱེ་བ་མེད་པའི་གླུ་བཟོད་པའི་རྒྱུན་མང་ཞེས་བྱ་བ། ན་མོ་གུ་རུ་ཨཱརྱ་མེ་ཏྲི་ཡེ༈ རྒྱལ་བ་བྱམས་ཆེན་སྤྲུལ་པའི་སྐུ། །མཚུངས་མེད་ཆོས་ཀྱི་རྗེ་ལ་འདུད། །བསྐལ་པ་གངྒའི་བྱེ་མ་སྙེད། །གྲངས་མེད་ཚད་མེད་དཔག་ཏུ་མེད། །འཁོར་བའི་རྒྱ་མཚོར་
འཁྱམས་པའི་ཚེ། །ལུས་ནི་མ་བླངས་བྱ་བ་མེད། །ལུས་ཀྱི་ཤ་ཁྲག་བསགས་ན་ཡང་། །སྟོང་གསུམ་འཇིག་རྟེན་བས་ཀྱང་ཆེ། །ཁྲག་ནི་རྒྱ་མཚོ་བས་ཀྱང་མང་། །གཉེན་རྣམས་ཤི་བའི་མྱ་ངན་གྱིས། །མཆི་མ་བསགས་ན་རོལ་མཚོ་ཙམ། །དགྲ་བསད་མགོ་བོ་བཅད་པ་དག །བསགས་ན་རི་བོའི་གཏོས་དང་མཉམ། །དེ་རྣམས་དོན་མེད་སྟོང་ལས་རེད། །ཕན་པ་མེད་ཅིང་གནོད་པ་ཆེ། །སྡིག་སྒྲིབ་རང་གི་སྟེང་ན་ཡོད། །སྲོག་བཅད་དགྲ་བོ་གང་ཡིན་པ། །ཕལ་ཆེར་ལན་ཆགས་བུ་ཚར་སྐྱེས། །སྙིང་སྡུག་བུ་དང་ཆུང་མ་ཡང་། །ཕལ་ཆེར་སྲོག་གཅོད་ཤན་པར་སྐྱེས། །དྲིན་ཆེན་ཕ་མ་རྒན་རྒོན་རྣམས། །ཕལ་ཆེར་སྒོ་ནོར་སྐྱེས་ནས་བཤལ། །འཁོར་བའི་གནས་ཚུལ་དེ་འདྲ་ལ། །སུ་ཞིག་དགྲ་ཡིན་སུ་ཞིག་གཉེན། །སྐྱེ་བ་འདི་ཉིད་ཁོ་ན་ལ། །ཚེ་སྟོད་དགྲ་ལ་ཚེ་སྨད་གཉེན། །ཚེ་སྟོད་གཉེན་ལ་ཚེ་སྨད་དགྲ།། །སྔར་ལོ་གཉན་ལ་ཕྱིར་ལོ་དགྲ། །སྔར་ལོ་དགྲ་ལ་ཕྱིར་ལོ་གཉེན། །དགྲ་དང་གཉེན་གཉིས་གང་ལ་ཡང་། །བློ་གཏད་ཡོད་པར་ངས་མ་མཐོང་། །བློ་སྙིང་གཏད་སའི་གྲོགས་པོ་འགས། །བསླུས་ནས་སྲོག་
གཅོད་བྱེད་པ་མཐོང་། །མི་ཤ་ཐུག་པའི་དགྲ་བོ་ཡང་། །གཉེན་སྦྲེལ་བཟའ་ཚང་བསྡེབ་པ་མཐོང་། །འཁོར་བའི་ཆོས་ལ་སྙིང་པོ་མེད། །སྒྱུ་མ་རྨི་ལམ་ཡུལ་དང་མཚུངས། དགྲ་ལ་དགྲ་ཡིན་བསམ་པ་ཡིས། །མནར་སེམས་སྡང་སེམས་གདུག་རྩུབ་དང་། །གཉེན་ལ་གཉེན་ཡིན་བསམ་པ་ཡིས། །ཆགས་ཞེན་ཤི་སར་འཐམ་པ་འདི། །དོན་མ་གོ་བའི་རྟགས་སུ་གདའ། །སྡང་བའི་དགྲ་བོ་སུ་ལ་ཡང་། །ཉམ་ཐག་སྡུག་བསྔལ་བྱུང་ཐོས་ཀྱང་། །དེ་ལ་དགའ་བ་མི་བསྒོམ་ཞིང་། །རང་གི་ཐུབ་དུས་བྱུང་ན་ཡང་། །ཧ་ཅང་མནར་བ་མི་ཕབ་ལ། །རང་ལ་རེ་དགོས་བྱུང་ན་ཡང་། །ཕན་ཐོགས་གང་དགོས་བསྒྲུབ་པ་དང་། །ཚེ་འདིར་ཕན་པ་མ་བྱུང་ཡང་། །ཕྱི་མར་ཕན་པའི་སྨོན་ལམ་འདེབས། །ནམ་ཡང་བློ་ཡིས་མི་བཏང་སྟེ། །ནམ་ཞིག་རྣམ་མཁྱེན་རྫོགས་པ་ཡི། །བྱང་ཆུབ་ས་ལ་སྐྱེལ་བ་ཡི། །དམ་བཅའ་སེམས་བསྐྱེད་བདག་ལ་མཆིས། །གཞན་དག་ཀྱང་ནི་དེ་ལྟར་མཛོད། །གཉེན་ལ་གཉེན་ཡིན་བསམ་པ་ཡི། །ཧ་ཅང་ཆགས་ཞེན་མི་བྱ་སྟེ། །ཁྲེལ་ཡོད་བག་དང་ལྡན་པའི་ཕྱིར། །གཉེན་ལའང་དགྲ་རུ་མི་ལྟ་བར། །ཇི་ལྟར་འཚམས་
པས་བསྐྱང་བྱ་ཞིང་། །བསྐལ་པ་གང་འཚམས་ཆོས་ལ་བཀོད། །གནས་སྐབས་འབྲེལ་པ་ཡད་ཡུད་ཙམ། །མི་རྟག་འབྲལ་འགྱུར་ཡིད་ལ་བཞག །འབྲལ་མི་ཕོད་པའི་གདུང་སེམས་སྐྱུར། །སྙིང་དང་འདྲ་བ་ཤི་ན་ཡང་། །ཧ་ཅང་ངུ་འཇོ་མྱ་ངན་སྤོངས། །འཁོར་བའི་ཆོས་ཉིད་ཡིན་ཞེས་བྱ། །བདག་ཀྱང་སྤྱོད་ཚུལ་འདི་ལྟར་ཡིན། །གཞན་དག་དེ་ལྟར་མཛད་ན་ལེགས། །དགྲ་གཉེན་ཐམས་ཅད་ཁྱད་པར་མེད། །ཚེ་རབས་མང་པོའི་ཕ་མ་ཡིན། །བདག་ལ་གནོད་པར་བྱེད་པ་ཡང་། །སྨྱོན་པས་རང་རྒྱུད་གསོད་པ་བཞིན། །འཁོར་བའི་ཆུ་བོས་སེམས་མྱོས་ནས། །ཉོན་མོངས་གདོན་གྱིས་བརླམས་པས་ལན། །ཁོ་ལ་རང་དབང་ག་ལ་ཡོད། །བདག་གིས་བཟོད་པར་མ་བྱས་ན། །སྨྱོན་པས་སྨྱོ་ནས་བརྡེག་པའི་ལན། །ནད་གཡོག་རྣམས་ཀྱིས་བརྡེག་དང་མཚུངས། །དེས་ན་དགྲ་གཉེན་བར་མ་ཡི། །འགྲོ་བ་གཅིག་ཀྱང་མ་ལུས་པའི། །སྡིག་དང་ལྟ་སྡུག་བསྔལ་བདག་ལ་བསྟིམ། །བདེ་སྐྱིད་དགེ་རྩ་གཞན་ལ་བསྔོ། །འདི་འདྲའི་སེམས་བསྐྱེད་བཏང་ལེན་ལ། །ཐུན་རེ་རྒྱུན་དུ་ཆག་མེད་མཛོད། །བདག་ཀྱང་ཡི་དམ་དེ་ལྟར་
ལགས། །ཁྱེད་ཀྱང་དེ་ལྟར་ཉམས་སུ་ལོངས། །ཞེས་སྨྲས་སོ།། ༈ །།གནས་འགྱུ་ངོ་སྤྲོད་ཀྱི་གླུ་ཁྲིད་ཕྲུག་གསར་པ་དགའ་བའི་པི་ཝཾ། ན་མོ་གུ་རུ་རཏྣ་ཡེ། སྐྱབས་གནས་ཕྱོགས་བཅུའི་རྒྱལ་བ་སྲས་བཅས་ནི་མང་ཡང་། །རྩ་བའི་བླ་མ་དཀོན་མཆོག་ཀུན་འདུས་རང་ཡིན་པར་འདུག་གོ །དམ་ཆོས་ཆོས་ཕུང་བརྒྱད་ཁྲི་བཞི་སྟོང་ནི་མང་ཡང་། །དམ་ཆོས་ཀུན་འདུས་ཡི་གེ་དྲུག་པ་འདི་ཡིན་པར་འདུག་གོ །ཚོགས་བསགས་སྒྲིབ་སྦྱང་བྱ་ཐབས་བརྒྱ་སྟོང་ཁྲི་འབུམ་ནི་ཡོད་ཀྱང་། །སྟབས་བདེ་ཕན་ཡོན་ཆེ་བ་ཕྱག་དང་བསྐོར་བ་འདི་ཡིན་པར་འདུག་གོ །གདམས་ངག་ཟབ་ཟབ་ཁུངས་བཙུན་སྐར་ཚོགས་དང་འདྲ་ཡང་། །མོས་གུས་གསོལ་བ་འདེབས་པ་འདི་ཟབ་ཆོས་སྙིང་པོ་རུ་འདུག་གོ ། ཕྱག་རྒྱ་ཆེན་པོ་ལ་བཤད་ཆོས་རྒྱ་མཚོའི་ཆུ་བས་མང་ཡང་། །དོན་རྩ་རང་གི་སེམས་ཉིད་རིག་རིག་ཏུར་ཏུར་འདི་ཡིན་པར་འདུག་གོ །ཉམས་ལེན་སྐྱོང་ཚུལ་གྱི་ཁྲིད་རིམ་ལོ་ཡག་གི་སྙེ་མ་དང་འདྲ་བར་གདའ་སྟེ། །མ་ཡེངས་རང་ངོ་རྒྱུན་དུ་སྐྱོང་བ་འདི་ཉམས་ལེན་གྱི་དངོས་གཞི་རང་ཡིན་པར་འདུག་གོ །གནས་པ་གནས་པ་ཟེར་ཡང་མི་དྲན་ཀྱི་ལེར་གནས་པ་
འདི་ཡིན་པར་འདུག་གོ །སྟོང་ཉིད་སྟོང་ཉིད་ཟེར་ཡང་གཟུགས་དང་ཁ་དོག་མེད་པ་འདི་ཡིན་པར་འདུག་གོ །འགྱུ་བ་འགྱུ་བ་ཟེར་ཡང་མི་དྲན་དགུ་དྲན་མི་འཕྲོ་དགུ་འཕྲོ་འདི་ཡིན་པར་འདུག་གོ །མ་རིག་མ་རིག་པ་ཟེར་ཡང་རང་ངོ་རང་གིས་མ་རིག་པ་འདི་ཡིན་པར་འདུག་གོ །རིག་པ་རིག་པ་ཟེར་ཡང་རང་སེམས་རང་གིས་རིག་པ་འདི་ཡིན་པར་འདུག་གོ །སེམས་ངོ་མཐོང་སེམས་ངོ་མཐོང་ཟེར་བ་སེམས་ཀྱི་ངོ་བོ་ཅིར་ཡང་མ་གྲུབ་པར་མཐོང་བ་འདི་ཡིན་པར་འདུག་གོ །སྒོམ་ཆེན་སྒོམ་ཆེན་ཟེར་བ་ཡང་འདི་སྒོམ་གྱི་དམིགས་གཏད་མེད་པར་བསྒོམ་པ་འདི་ཡིན་པར་འདུག་གོ །ལྟ་བ་ལྟ་བ་ཟེར་ཡང་རང་སེམས་རང་གི་ལྟ་བ་འདི་ཡིན་པར་འདུག་གོ །སྒོམ་པ་སྒོམ་པ་ཟེར་ཡང་དེ་ལ་རྒྱུན་དུ་གོམས་འདྲིས་བྱེད་པ་འདི་ཡིན་པར་འདུག་གོ །སྤྱོད་པ་སྤྱོད་པ་ཟེར་ཡང་དགེ་བསྒྲུབ་སྡིག་སྤང་ལ་བརྩོན་པ་འདི་ཡིན་པར་འདུག་གོ །འབྲས་བུ་འབྲས་བུ་ཟེར་ཡང་རང་སེམས་ལ། །བརྟན་པ་ཐོབ་པ་ཞིག་ཡིན་སྐད་ཐོས་སོ། །ཞེས་སྨྲས་སོ། །དག་སྣང་སྦྱང་བའི་གླུ་སྣང་བ་རྒྱ་ཡན་གྱི་རོལ་མོ་ཞེས་བྱ་བ། ན་མོ་སརྦ་ཏ་ཐཱ་ག་ཏ་ཡེ།
རབ་འབྱམས་རྒྱལ་བ་ཐམས་ཅད་ལ། །གསོལ་བ་འདེབས་སོ་ཐུགས་རྗེས་གཟིགས། །སངས་རྒྱས་སེམས་ཅན་ཟེར་བ་དེ། །རང་སེམས་དག་དང་མ་དག་ལས། །དོན་གཞན་ལ་ཡོད་སྐད་ངས་མ་ཐོས། །སྣང་སྲིད་འཁོར་འདས་ཆོས་རྣམས་ཀུན། །ཐམས་ཅད་རྒྱལ་བའི་ཐུགས་ཀྱིས་ཁྱབ། །ཐམས་ཅད་འོག་མིན་ཆོས་ཀྱི་དབྱིངས། །སེམས་ཅན་སངས་རྒྱས་མཉམ་པ་ཡིན། །ཐམས་ཅད་བདེ་གཤེགས་སྙིང་པོའི་འཕྲུལ། །བདུད་དང་ལྷ་ཡང་ཆོས་ཉིད་གཅིག །ཐམས་ཅད་ཀུན་བཟང་ཆོས་ཀྱི་དབྱིངས། །འདི་འདྲ་དངོས་སུ་རྟོགས་དཀའ་ཡང་། །གསང་སྔགས་ཟབ་མོའི་བྱིན་རླབས་ཀྱིས། །གོ་བའི་ངེས་ཤེས་གནད་གསང་རིག །ཨ་ལ་ལ་ཧོ་ངོ་མཚར་ཆེ། །ཨ་ལ་ལ་ཧོ་ངེས་པའི་དོན། །ཨ་ལ་ལ་ཧོ་གསང་སྔགས་ཆོས། །ཨ་ལ་ལ་ཧོ་ང་རེ་སྐྱིད། །ཀུན་རྫོབ་སྒྱུ་མའི་སྣང་བ་ཡང་། །སྟོང་གསུམ་རབ་འབྱམས་འཇིག་རྟེན་ཁམས། །རྣམ་སྣང་ཆེན་པོའི་ཕྱག་གིས་འཛིན། །ཞིང་འདི་ཐུགས་ཀའི་ཐད་དུ་ཡོད། །འཇིག་རྟེན་འདི་ཡང་བྱིན་རླབས་ཆེ། །ཁྱད་པར་ལྷོ་རྒྱལ་འཛམ་བུའི་གླིང་། །གླིང་བརྒྱད་ནང་ནས་མཆོག་ཏུ་བསྔགས། །སངས་རྒྱས་སྟོང་
རྩིས་བྱིན་གྱིས་བརླབས། །བྱིན་རླབས་ཆེའོ་གླིང་རེ་བཟང་། །ཡང་སྒོས་བོད་ཡུལ་ཁ་བ་ཅན། །ཐུགས་རྗེ་ཆེན་པོའི་བྱིན་གྱིས་བརླབས། །གནས་ཆེན་གཙུག་ལག་དུ་མས་བརྒྱན། །སངས་རྒྱས་བསྟན་པའི་ཉི་མ་ཤར། །ཡུལ་གླིང་བཟང་པོ་བྱིན་རླབས་ཆེ། །སྔོན་ཚེ་རྒྱལ་བས་ལུང་བསྟན་པའི། །སངས་རྒྱས་སྤྲུལ་པ་མང་དུ་བཞུགས། །དུས་ཚོད་བཟང་ངོ་བསྐལ་བ་བཟང་། །རབ་ཏུ་བྱུང་བ་ཐམས་ཅད་ཀྱང་། །ཚུལ་ཁྲིམས་ལྡན་ནམ་འཆལ་ཡང་རུང་། །མོས་པའི་རྟེན་ལས་མི་འདའ་བར། །འབྲས་བུ་ཐོབ་པར་ཐུབ་པས་གསུངས། །ཐམས་ཅད་སྐྱབས་གནས་དགེ་འདུན་མཆོག །ངུར་སྨྲིག་ཚོས་ཀྱིས་བསྒྱུར་ཙམ་ཡང་། །ལྷ་དང་བཅས་པའི་འཇིག་རྟེན་གྱིས། །མཆོད་པའི་རྟེན་དང་ཚོགས་ཀྱི་ཞིང་། །སེར་གོས་མནབ་པ་ཐམས་ཅད་ལ། །བདག་ནི་གུས་པས་སྐྱབས་སུ་མཆི། །དང་པོའི་ས་ཐོབ་ཡན་ཆད་ལ། །བདུད་དམག་བྱེ་བ་ཁྲག་ཁྲིག་སྒྱུ་གིས། །བ་སྤུའི་རྩེ་མོ་བསྒུལ་མི་ནུས། །བསྟན་དང་བསྟན་འཛིན་སྐྱེས་ཆེན་ལ། །ཚབས་ཆེན་གནོད་པ་བྱེ་བ་ཡང་། །རྨུ་རྒོད་སྐལ་མེད་སེམས་ཅན་རྣམས། །རྒྱལ་དང་རྒྱལ་
བའི་བསྟན་པ་ལ། །བཟང་ངན་འབྲེལ་པ་ཐོགས་ཕྱིར་ཡིན། །སངས་རྒྱས་ཉིད་ཀྱི་སྤྲུལ་པ་ལས། །གཞན་གྱིས་གནོད་པར་ག་ལ་ནུས། །གཤེ་དང་དད་དང་གླེང་མོ་སོགས། །ཅུང་ཟད་འབྲེལ་པ་གང་ཐོབ་པ། །ཐམས་ཅད་འཁོར་བ་མཐའ་ཅན་ཏེ། །རྒྱལ་བའི་མཛད་པ་ཨེ་མ་ཧོ། །དེང་སང་སྐྱ་སེར་ཕལ་ཆེར་ཞིག །ཤཱཀ་ཐུབ་བསྟན་པའི་བཀའ་དྲིན་གྱིས། །སེམས་བསྐྱེད་དབང་བསྐུར་མ་ཐོབ་མེད། །ཐམས་ཅད་འཁོར་བ་མཐའ་ཅན་ཏེ། །མ་འོངས་སངས་རྒྱས་ཨེ་མ་ཧོ། །འགྲོ་དྲུག་སེམས་ཅན་མ་ལུས་པ། །ཐམས་ཅད་བདེ་བཤེགས་སྙིང་པོས་ཁྱབ། །ཏིལ་མར་ཇི་བཞིན་སངས་རྒྱས་རིགས། །གཞི་དུས་སངས་རྒྱས་ཨེ་མ་ཧོ། །སྐྱོན་རྣམས་ཐམས་ཅད་རང་སྐྱོན་ཡིན། །གཞན་གྱི་དྲི་མ་ནག་བག་རྣམས། །མེ་ལོང་ནང་དུ་འཆར་དང་མཚུངས། །སེམས་ཅན་སུ་ལའང་སྐྱོན་མ་མཆིས། །མ་རུངས་མི་སྲུན་སེམས་ཅན་ཡང་། །བཟོད་པ་བསྒོམ་པའི་བཤེས་གཉེན་མཆོག །སེམས་ཅན་འདི་དག་ལ་བརྟེན་ནས། །སངས་རྒྱས་ཐམས་ཅད་རྫོགས་སངས་རྒྱས། །གཞན་གྱི་སྐྱོན་གྱིས་འཁོར་བ་རུ། །ལྟུང་བའི་སེམས་ཅན་གཅིག་ཀྱང་མེད། །བདག་ནི་
རང་གི་ཉེས་པ་ཡིས། །ད་བར་འཁོར་བའི་རྒྱ་མཚོར་འཁོར། །དབུལ་ཕོངས་སེམས་ཅན་མེད་ན་ནི། །སྦྱིན་པའི་ཕར་ཕྱིན་ཇི་ལྟར་རྫོགས། །གཤེ་སྐུར་གནོད་སྐྱེལ་མཁན་མེད་ན། །བཟོད་པའི་ཕར་ཕྱིན་ཇི་ལྟར་རྫོགས། །བསླུ་བྲིད་སྨད་འཚོང་མེད་ན་ནི། །ཚུལ་ཁྲིམས་ཕར་ཕྱིན་ཅི་ལྟར་རྫོགས། །དཔེར་ན་འདི་དག་ཐམས་ཅད་ནི། །རང་རྒྱུད་དག་ནི་ཆོས་ཀྱི་གྲོགས། །དགེ་བའི་བཤེས་གཉེན་དམ་པ་ཡིན། །བདག་ནི་དེང་ནས་བྱང་ཆུབ་བར། །གཞན་སྐྱོན་བྱ་ར་མི་བྱ་བར། །རང་སྐྱོན་མཚང་ནས་འདོན་པར་ཤོག །གསུངས་སོ། །ཞེས་པ་གློ་བུར་དུ་དག་སྣང་གི་ཉམས་བཟང་པོ་བཅོས་མིན་ཞིག་སྐྱེས་ནས་སྨྲས་ཏེ་ཉམས་འདི་རྟག་ཐུབ་པར་དཀའོ་སེམས།།་་་།རང་ལ་ཉམས་མྱོང་ཅུང་ཟད་སྐྱེས་ཚུལ་གྱི་གླུ་ཤུལ་རིང་མགྲོན་པོའི་སྐྱོ་གླུ་རིང་མོ་ཞེས་བྱ་བ། ན་མོ་མ་ཧཱ་མུ་ཏྲ་ཡེ། སྐྱབས་བསླུ་མེད་དགོས་འདོད་འབྱུང་བའི་ནོར། །དོན་རང་སེམས་ཆོས་ཀྱི་སྐུ་ལ་འདུད། །དུས་དེང་སང་ཆོས་པར་ཙ་མིང་བཏགས་པའི། །མཚམས་འདག་ཆར་བྱེད་པའི་སྤྲང་པོ་བདག །ཚེ་སྔོན་གྱི་སྨོན་ལམ་འབྲེལ་བ་ཡིས། །ཆུང་བྱིས་པ་ལོ་ལྔའི་དུས་ཙམ་ན། །མཚན་ཡོངས་གྲགས་འབྲུག་
ཆེན་བསྟན་འཕེལ་བས། །ཆོས་ཕྱག་ཆེན་འཆད་པའི་ཆོས་རར་རྒྱུག །བསྒོམ་གནས་འགྱུའི་དོན་ལ་འཕྲིག་ཚུད་ཀྱང་། །ངོ་སྤྲོད་མཁན་མེད་པས་ཕྱི་ནར་ལུས། །ཆུང་ལོ་ངོ་དྲུག་ཙམ་ལོན་པའི་དུས། །རྗེ་མི་ལའི་མགུར་འབུམ་བཏོན་ཙམ་གྱིས། །བསྒོམ་རྟོག་མེད་ཞི་གནས་ཡུན་རིང་འབྱམས། །འདི་ཅི་ཡིན་དྲིས་ཀྱང་བཤད་མཁན་མེད། །ཆུང་ལོ་ངོ་བརྒྱད་དགུ་ཙམ་གྱི་དུས། །ཡབ་སློབ་དཔོན་སྦས་པའི་རྣལ་འབྱོར་པས། །བསྒོམ་གནས་འགྱུ་སྐྱོང་ཚུལ་ཁ་བསླབས་བྱས། །དུས་དེ་ནས་རྒྱུན་དུ་སྐྱོང་ལོ་བྱས། །སེམས་གནས་དགའ་འགྱུ་སྡུག་ཡར་སྐྱེད་མེད། བདག་ལོ་ངོ་བཅུ་བདུན་ལོན་པའི་དུས། །རྗེ་ཚེར་ལུང་དྲུང་པའི་ཉམས་ཁྲིད་ཐོབ། །རང་གོ་རྟོག་སྐྱེས་ཚུལ་མདུན་དུ་ཞུས། །བསྒོམ་གནས་འགྱུའི་ངོ་སྤྲོད་མཛུབ་ཚུགས་མཛད། །དེ་མ་སྐྱུར་གོམས་འདྲིས་བྱས་ན་ཡང་། །དུས་དང་པོ་འགྱུ་བ་ངོས་བཟུང་ནས། །དེ་རང་ངོ་ལྟ་ནས་རང་ཞིར་བཏང་། །དེ་ཞི་བའི་ངང་ལ་མ་ཡེངས་ལྟ། །དེ་རྣམ་རྟོག་ཕྲེང་བ་བསྒྲང་བ་འདྲ། །ཡུན་རིང་ན་སུན་སྣང་ཆེ་བར་བྱུང་། །བདག་ཕོ་ལོ་ཉི་ཤུ་ལོན་ཙ་ན། །རྗེ་མཆོག་གི་སྤྲུལ་སྐུས་ཁྲིད་ཆེན་ཐོབ། །ཚིག་
ཐོས་བསམ་ལ་བློ་རྩེ་གཏད་པ་དེས། །ཉམས་རྟོགས་པ་ལ་ཡར་སྐྱེད་མ་བྱུང་ཡང་། །བློ་བཟློག་མེད་ཀྱི་དད་པ་བསྟན་པོ་སྐྱེས། །ད་ཅི་མཛད་ཁྱེད་ཤེས་ཀྱི་བློ་སྙིང་གཏད། །བདག་རང་ལོ་ཉེར་གསུམ་ལོན་པའི་དུས། །རྗེ་བྱ་བཏང་དྲུང་ཡིག་ཆེན་པོ་དང་། །དཔལ་རྒྱལ་དབང་བཅུ་པས་ངོ་སྤྲོད་ཐོབ། །སེམས་གནས་ཉམས་རྒྱ་མཚོ་དྭངས་པ་བཞིན། །དེ་ཟླ་བ་དྲུག་ཙམ་འཕོ་འགྱུར་མེད། །ལུས་ནད་ཚ་འཁྱགས་ལྟོགས་ཀྱིས་ཟིལ་མི་ནོན། །བློ་ཆོས་བརྒྱད་ཀྱི་མགོ་བོ་སྙོམས་སྙམ་བྱེད། །དེ་སྐབས་སུ་དྭགས་པོའི་ཐར་རྒྱན་བཟུང་། །ལས་རྒྱུ་འབྲས་ལ་འཕྲིགས་ཤིག་དེ་ནས་ཚུད། །ལས་མི་དགེ་སྤྱོད་རེ་ཞེ་མནའ་ཤོར། །ལྷ་ཇོ་བོ་ཤཱཀྱ་མུ་ནེའི་དྲུང་། །ལུས་སོར་མཛུབ་མཆོད་པའི་སྒྲོན་མེར་སྦར། །རྒྱུ་བྱང་ཆུབ་མཆོག་གི་སེམས་བསྐྱེད་ཞུས། །བློ་གཞན་ཕན་གྱི་བསམ་པ་དེ་ནས་སྐྱེས། །བདག་རང་ལོ་ཉེར་བཞིའི་ལོ་མཇུག་ལ། །རྗེ་དྲུང་པའི་འདྲ་སྐུ་མཇལ་བའི་དྲུང་། །ཚོགས་མཆོད་པ་ཕུལ་ཞིང་གསོལ་བ་བཏབ། །ལུས་བདེ་ཉམས་ལུས་སེམས་ཞུ་བ་འདྲ། །ཉིན་སྤྱོད་ལམ་རྣམ་བཞིར་ཁོར་མོ་ཡུག །དེ་ཉིན་ཞག་གཅིག་ལས་རྟག་
མ་ཐུབ། །བདག་རང་ལོ་ཉེར་ལྔ་ལོན་པའི་དུས། །མཚམས་རྡོག་མཚམས་ཆོས་དྲུག་དམིགས་རིམ་བསྒོམ། །རྗེ་རིགས་བདག་མཆོག་གི་སྤྲུལ་པའི་སྐུ། །སྐུའི་ལུས་དཀྱིལ་ནང་དུ་དབང་བསྐུར་ནས། །དོན་བདེ་སྟོང་ཡེ་ཤེས་ངོ་སྤྲོད་པར། །དེ་རྨི་ལམ་སྣང་བ་ཡིན་ན་ཡང་། །སེམས་བདེ་སྟོང་དབྱེར་མེད་ཉམས་བཟང་པོར། །ཞག་དྲུག་བདུན་བར་དུ་བརྟན་པར་བྱུང་། །བདག་རང་ལོ་ཉེར་བདུན་ལོན་ཙམ་ན། །དཔལ་ཞབས་དྲུང་བཀྲ་ཤིས་དཔལ་གྲུབ་མཇལ། །ཆོས་འཆི་མེད་རྣམ་གཉིས་དམིགས་ཐུན་གནང་། །ཆོས་བསྐྱེད་རྫོགས་ལ་གསལ་ཆ་དེ་ནས་ཐོན། །དེ་ཡན་ཆད་སྐབས་སུ་ཉམས་བཟང་ཡང་། །དུས་ཕལ་ཆེར་གནས་འགྱུ་སྐྱོང་དེད་རང་། །སྲུང་མི་བདེ་ཞེ་བ་སུན་པར་བྱུང་། །བདག་རང་ལོ་སོ་གཅིག་མཚམས་ཀྱི་དུས། །རྗེ་མཆོག་གི་སྤྲུལ་སྐུའི་བླ་སྒྲུབ་ལ། །ངག་གསོལ་འདེབས་རྒྱང་འབོད་ཐུན་བཞིར་བྱས། །ལུས་མཚམས་བསྡམས་སྒྲོལ་དཀར་བསྙེན་པ་བྱས། །སེམས་རྟོགས་པའི་བོགས་ཤིག་དེ་ནས་བྱུང་། །སེམས་འགྱུ་བ་རྣམ་རྟོག་ཅི་ཤར་ཡང་། །དཔེ་མཚོ་ལ་ཁ་བ་བབ་པ་བཞིན། །སེམས་རྣམ་རྟོག་བསྒོམ་དུ་དེ་ནས་ཤར། །
ཅི་བསྒོམས་ཀྱང་མི་དཀའ་འཚེར་བག་མེད། །ཉམས་དེ་འདྲ་ཟླ་བ་བཞི་ལྔ་ཙམ། །ད་རྣམ་གཡེང་ཅིས་ཀྱང་མི་གནོད་སྙམ། །ལུས་རྣམ་གཡེང་ཆེ་བས་ཁད་ཀྱིས་འགྲིབ། །སེམས་དྲན་རྫི་ནམ་ཟིན་ཁྱད་མེད་ཀྱང་། །དུས་ཕལ་ཆེར་དྲན་རྗེས་མ་ཟིན་འཁྲུལ། །བདག་རང་ལོ་སོ་དྲུག་ལོན་པའི་དུས། །རྗེ་དྲུང་སྐྱིད་སྤྲུལ་པའི་སྐུ་དང་མཇལ། །སེམས་དག་སྣང་དགའ་བྲོད་དཔག་མེད་ཤར། །ལུས་བདེ་ཉམས་ལུས་སེམས་བདེ་བས་ཁྱབ། །སེམས་མི་གཡོ་རྒྱ་མཚོ་དྭངས་མ་བཞིན། །སེམས་རྣམ་རྟོག་འཕྲོ་འདུ་མང་ཉུང་ཡང་། །དཔེ་མཚོ་དང་རླབས་བཞིན་རང་སར་ཞི། །ཉིན་སྤྱོད་ལམ་ཕལ་ཆེར་འདུ་འབྲལ་མེད། །ཕྱི་རྣམ་གཡེང་ཅིས་ཀྱང་གནོད་མི་ནུས། །ལུས་ངལ་དུབ་མེད་ཅིང་སེམས་རྒྱུད་དུལ། །དེ་མ་འགྲིབས་ཟླ་བ་བརྒྱད་དགུར་གནས། །བདག་རང་ལོ་སོ་བདུན་ལོ་མཇུག་ལ། །སྲུ་གྲོང་ཆོག་སྤང་བར་དམ་བཅས་ནས། །ལོ་བཅུ་གསུམ་སྒྲུབ་ཨུཎྜ་པའི་དམ་བཅའ་བྱས། །མཚམས་འདག་ཆར་གཅིག་ཀྱང་ངོ་མ་གཏུག །ངག་སྨྲ་བཅད་ཐུན་མཚམས་ངག་མ་བཏང་། །དོན་བསྐྱེད་རྫོགས་བསྙེན་སྒྲུབ་བརྩོན་འགྲུས་བསྐྱེད། །
ནུབ་རྨི་ལམ་གསལ་བའི་འོད་གསལ་ནི། །ཉམས་མཚར་མཚར་འདྲ་བ་ལན་གྲངས་མང་། །ལོ་གཉིས་ཙམ་སོང་བའི་དུས་ཙམ་ན། །ཕྱི་ནམ་མཁས་གར་ཁྱབ་འཁོར་འདས་ཀུན། །རང་སེམས་ཀྱིས་ཁྱབ་ནི་འདུག་སྙམ་བྱེད། །དེ་ནམ་མཁའ་མཐའ་ཡས་སྐྱེ་མཆེད་དུ། །རང་གོལ་བའི་ས་ཡང་ཡིན་གྱིས་དོགས། །དུས་རེས་འགའ་སྣང་སྲིད་འཁོར་འདས་ཀུན། །སེམས་རང་ལས་གཞན་དུ་མ་གྲུབ་པར། །དེ་མངོན་སུམ་རྟོགས་པའི་སྣང་བར་སྐྱེས། །དེ་གོ་བའི་སྐྱ་རིས་ཡིན་ཡང་དོགས། །ཡར་རྒྱལ་བའི་ཐུགས་དང་རང་གི་སེམས། །མར་འགྲོ་དྲུག་སེམས་ཅན་སེམས་རྒྱུད་རྣམས། །དོན་དབྱེར་མེད་གཅིག་ཏུ་འདྲེས་སྙམ་བྱེད། །དེ་ལྟ་བ་འཁོར་འདས་དབྱེར་མེད་པ། །ད་འདི་ཉིད་རེད་སྙམ་ངེས་ཤེས་སྐྱེད། །དེ་གོ་ཡུལ་ཙམ་ཡང་ཡིན་གྱིས་དོགས། །དུས་དེ་རྗེས་ལོ་གསུམ་ཙམ་གྱི་དུས། །རྗེ་མཁའ་སྤྱོད་ནམ་མཁའ་རྒྱལ་མཚན་པས། །ཆོས་ཕྱག་ཆེན་ངོ་སྤྲོད་གནང་བ་རྨིས། །དུས་དེ་ནས་སྔར་དང་མི་འདྲ་བའི། །ཉམས་རྟོགས་པ་ཤིན་ཏུ་མཚར་བ་སྐྱེས། །སྔར་བསྒོམ་པའི་ཉམས་རྟོགས་ལེགས་ལེགས་ཚོ། །བསྒོམ་བསམ་པའི་འཛིན་པས་བསླུས་ནས་གདའ། །ད་
འདི་སྒོམ་གྱི་གཏད་སོ་ཅང་མེད་པས། །དོན་སྤྲོས་མེད་ཐ་མལ་རྗེན་ནེ་བ། །བློ་འཛིན་པའི་ཐུག་རེག་སྤུ་ཙམ་མེད། །དོན་དེ་འདྲའི་རྟོགས་པ་སྐྱེས་ཙམ་ན། སྐབས་སྐབས་སུ་ཐེ་ཚོམ་གྱི་རྣམ་རྟོག་ལྡང་། །སྔར་བསྒོམ་དང་ད་ལྟ་ཡེ་མ་ཅིག །སྔར་ངེས་ཤེས་དང་རྗེན་ནེ་ལྷང་ངེ་ཡོད། །ད་ངེས་ཤེས་ཀྱི་འཛིན་པ་ནང་ནས་ཞིག །སྔར་བལྟ་རྒྱུ་དང་ལྟ་མཁན་གཉིས་སུ་ཡོད། །ད་བལྟ་རྒྱུ་དང་ལྟ་མཁན་གཅིག་ཏུ་འདྲེས། །བདག་ཅི་ཡང་མེད་པའི་སྐྱེ་མཆེད་དུ། །རང་གོལ་གྱིས་དོགས་ཏེ་བློ་མ་བདེ། །ཕ་བཀའ་བརྒྱུད་བླ་མའི་གསུང་མགུར་བལྟས། །བསྒོམ་ངོ་བོ་མཐོང་བར་ད་གཟོད་རྟོགས། །དོན་ངོ་བོ་དེ་ཕྱིར་འགྱུར་མེད་ཀྱང་། །ཉམས་མཐོ་དམན་འཕར་སྡང་ད་རུང་མང་། །ལོ་ཆུ་སྦྲུལ་ཤིང་རྟའི་ལོ་མཚམས་ལ། །ཉམས་རྨི་ལམ་རྩུབ་འཁྲུགས་ཆོ་འཕྲུལ་ཆེ། །ལུས་མི་བདེ་ན་ཚ་དྲག་པོ་ལྡང་། །སླར་ཆོ་འཕྲུལ་ཅུང་ཙམ་འཇམ་པའི་མཚམས། །ཕ་མཉམ་མེད་དྭགས་པོ་ལྷ་རྗེ་དང་། །རྗེ་ཕག་གྲུ་དང་སྐྱོབ་པ་ཐང་པ་བཞི། །དེ་རྨི་ལམ་དུ་མཇལ་བས་འོད་གསལ་ཟིན། །གཉིད་སད་དུས་གཉིད་མཐའ་བསྒོམ་གྱིས་བསུས། །ཉམས་རྟོགས་
པ་སྔར་དང་མི་འདྲ་སྐྱེས། །དུས་ཐ་མལ་གྱི་སེམས་ཉིད་རྗེན་པ་འདི། །བསྒོམ་ཕྱག་རྒྱ་ཆེན་པོར་ཧྲིག་གེ་རྟོགས། །སེམས་དྲན་རྫིས་ཟིན་དང་མ་ཟིན་མེད། །སེམས་ཡེངས་དང་མ་ཡེངས་ཁྱད་པར་མེད། །དོན་ཕྱག་རྒྱ་ཆེན་པོར་ཡེར་གྱིས་རྟོགས། །ཨ་མཚར་པོ་ཐ་མལ་གྱི་རྣམ་རྟོག་འདི། །བཟོ་བཅོས་དང་དགག་སྒྲུབ་མ་དགོས་པར་། །གཞི་གདོད་ནས་ཆོས་སྐུར་འདུག་པ་ལ། །ད་བར་དུ་ཧ་རེ་ལོང་བར་ལོང་། །ད་བར་དུ་མ་རྟོགས་ཅིས་ལེན་ཨང་། །དེ་བསམ་ཞིང་རང་ལ་ཁྲེལ་བགད་ཤོར། །ཉམས་དེ་འདྲ་ཞག་འགའི་བར་དུ་བྱུང་། །དེར་ངོ་བོར་འགྱུར་བ་མ་མཆིས་ཀྱང་། །ཉམས་མཐོ་དམན་གསལ་འགྲིབ་ད་རུང་གདལ། །གཞི་ནམ་མཁའ་འགྱུར་བ་མ་མཆིས་ཀྱང་། །རྐྱེན་ཉི་ཟླ་ལྷོ་སྤྲིན་གསལ་འགྲིབ་བཞིན། །དུས་རེས་འགའ་ཆོས་ཀུན་སྟོང་པར་རྟོགས། །ཕྱི་ས་རྡོ་རི་བྲག་ཡུལ་སྣང་ཀུན། །དེས་མཚོ་ལ་ཟླ་གཟུགས་བཀྲ་བ་བཞིན། །དབྱིབས་ཁ་དོག་བཀྲ་ཡང་ངོ་བོ་སྟོང་། །དེ་བཅོས་མིན་དངོས་སུ་རྟོགས་སྙམ་ཡང་། །དོན་དངོས་འཛིན་འཁྲུལ་པ་ཞིག་མ་ཐུབ། །ཕར་ལག་པས་རེག་ན་སྲ་མཁྲེགས་སྣང་། །དུས་རེས་འགའ་བསྐྱེད་རྫོགས་
ཟུང་དུ་འཇུག །དབྱིབས་ལྷ་སྐུར་གསལ་ཡང་ངོ་བོ་སྟོང་། །དཔེ་ནམ་མཁར་ཤར་བའི་འཇའ་ཚོན་བཞིན། །དེ་འོན་ཀྱང་སྒྲིབ་པ་དག་མ་ཐུབ། །ལྷ་ཡི་དམ་དངོས་སུ་མཇལ་མ་མྱོང་། །དུས་རེས་འགའ་སྟོང་ཉིད་སྙིང་རྗེ་འབྲེལ། །དོན་སྟོང་པའི་རང་མདངས་སྙིང་རྗེར་ཤར། །ད་འོན་ཀྱང་བདག་གཞན་བརྗེ་མ་ཐུབ། །སྡང་དགྲ་བོས་བཅོམ་དོགས་བརྡུང་དོགས་གདའ། །དུས་རེས་འགའ་རྣམ་གཡེང་འཁྲུལ་པས་ཁྱེར། །ཉམས་སྟོར་ནས་སྐབས་འགར་འཁྲུལ་པར་ཤོར། །དོན་མཉམ་རྗེས་འདྲེས་པ་ད་རུང་མེད། །ཆོས་གསང་སྔགས་གསང་བར་བསྔགས་པའི་ཕྱིར། །ཉམས་རྟོགས་པ་གསང་ན་གསལ་མོད་ཀྱང་། །མི་གཞན་ལ་ཨེ་ཕན་བསམས་ནས་བརྗོད། །ངས་བྱས་ཀྱི་ངོ་སོ་མ་ལགས་ཀྱང་། །ངོམས་ཆོག་པའི་ཉམས་རྟོགས་བདག་ལ་མེད། །ཆུང་ལོ་བརྒྱད་ལོན་ནས་ད་ལྟའི་བར། །བསྒོམ་གནས་འགྱུ་མ་བསྒྱུར་བསྐྱངས་ལགས་ཀྱང་། །ཉམས་རྟོགས་པ་ཞན་བྱཱ་བོའི་འགྲོས་དང་འདྲ། །སེམས་ཕམ་པར་མཆིས་ཏེ་བྱ་ཐབས་བྲལ། །ལོ་བཅུ་བདུན་ལོན་ནས་ཉམས་ཁྲིད་ཐོབ། །ངས་བློ་མང་གི་སད་སུད་མ་མང་བར། །ཉམས་རྟོགས་པ་ལ་
རྩེ་གཅིག་འབད་ལགས་ན། །དུས་ད་ཙམ་དོན་ཆེན་འགྲུབ་ཚོད་གདའ། །ཕྱི་ཐོས་པའི་སྒྲོ་འདོགས་གཅོད་སྙམ་ནས། །སྣ་མང་གི་ཡོན་ཏན་བསླབ་པས་ཕུང་། །དེ་བསམ་ཤིང་འགྱོད་པ་ཡང་ཡང་སྐྱེས། །ཕྱི་རབས་ཀྱི་སྒོམ་ཕྲུག་གསར་པ་རྣམས། །ང་བཞིན་དུ་བློ་སྣ་མ་མང་བར། །ཕུར་ཚུགས་སུ་ཉམས་ལེན་སྐྱོངས་ཤིག་ཨང་། །ཞེས་སྨྲས་སོ།། ༈ །།རང་སྐྱོན་ཐམས་ཅད་འཚངས་ནས་འདོན་པའི་གླུ་སྙིང་གྲོགས་ཀྱིས་ནང་བཙང་པ་ལྟ་བུ་ཞེས་བྱ་བ། ན་མོ་སརྦ་བིདྱ་ཡེ། ཕྱོགས་བཅུ་དུས་གསུམ་བདེ་གཤེགས་ཚོགས། །ཡེ་ཤེས་སྤྱན་གྱིས་ཉིན་མཚན་དུ། །འགྲོ་དྲུག་ལ་སོ་སོར་གཟིགས་མཛད་ཕྱིར། །རང་སྐྱོན་འདི་སྦས་པས་དག་མ་ཐུབ། །དེ་དག་ཀུན་ཐུགས་ཀྱིས་ཁྲེལ་ཏེ་མཆིས། །མཁའ་འགྲོ་དང་ཆོས་སྐྱོང་ཡུལ་གྱི་ལྷ། །ཟག་བཅས་དང་ཟག་མེད་མངོན་ཤེས་ཅན། །དེ་དག་ཀུན་མངོན་སུམ་དཔང་པོར་མཆིས། །ཆོས་པ་རུ་བརྫུ་བའི་གཡོ་ཟོལ་ཅན། །དཀོར་ཟན་གྱི་སྤྲང་པོ་ང་ཨ་ཙ་མ། །དཀོན་མཆོག་གི་སྐྱབས་འོག་ཏུ་ཚུད་སྙམ་ཡང་། །སྤར་སྐུ་སོགས་རླུང་རྙིང་ཐལ་བར་ནུབ། །དཔེ་རུལ་གྱི་ཆད་དུམ་རྡོག་པས་བརྫི། །བནྡེ་ཞིག་རྨིས་ན་
རྒྱལ་འགོང་ཟེར། །སྐྱབས་འགྲོའི་བསླབ་པ་ཨ་ཙ་མ། །ཀུ་རེ་ལ་དགའ་བས་རྫུན་ཚིག་སྨྲ། །གསེར་དངུལ་ཞིག་རྙེད་ན་ཕུགས་སུ་སྦ། །དགེ་བསྙེན་དང་དགེ་ཚུལ་ཨ་ཙ་མ། །དགེ་སློང་ཚད་ལྡན་ཞིག་ཡིན་རློམ་ཡང་། །ཕྲ་ཞིབ་ཀྱི་ཉེས་ལྟུང་རྣམ་གྲངས་མང་། །ཉིས་བརྒྱ་དང་ལྔ་བཅུ་རྩ་བཞིའི་ཁྲིམས། །ཐམས་ཅད་ཀྱང་རྣམ་གྲངས་ཡིད་གཟུང་དཀའ། །ལྟུང་བ་སྡེ་ལྔ་ཡང་ཨ་ཙ་མ། །སྤོས་མེ་སོགས་མེ་ཞིག་ལན་གྲངས་མང་། །མེ་རེག་གི་ལྟུང་བ་ཨ་ཙ་མ། །སྣམ་སྦྱར་ནི་སྔ་ནས་འཚགས་རྒྱུ་མེད། །བྲལ་ལྟུང་གི་ཉེས་པ་ཨ་ཙ་མ། །ལྷུང་བཟེད་ལ་རྒྱུན་དུ་ཟ་བ་འདི། །དགེ་སྦྱོང་གི་རྣམ་ཐར་ཡིན་སྙམ་ཡང་། །བཀྲུ་བཤལ་ནི་མ་འཕྲོད་ཟས་དྲི་འགོས། །ཡི་དྭགས་སུ་སྐྱེས་ན་ཨ་ཙ་མ། །ཆུ་ཚགས་དང་རུང་ཆུ་ལ་སོགས་པ། །ལོ་འགའ་རུ་བྱས་ཀྱང་ཕྱི་ནས་ལུས། །ཉེས་བྱས་ཀྱི་ཉེས་སྒྲིབ་ཨ་ཙ་མ། །བྱང་ཆུབ་ཀྱི་སེམས་བསྐྱེད་བླངས་ན་ཡང་། །འཁོར་བའི་སྡུག་z་བསྔལ་འདི་ལ་སྐྲག །བདེ་ཆེན་གྱི་ཞིང་དུ་སྐྱེ་འདོད་ཆེ། །ཐེག་དམན་དུ་ལྟུང་དོགས་ཨ་ཙ་མ། །སྙིང་རྗེ་དང་བཏང་ལེན་བསྒོམས་ལགས་ཀྱང་། །རང་ཉིད་སྡུག་དོགས་ཀྱི་རིམ་
གྲོ་འབད། །གཏོར་ཆོས་ཀྱི་བཏང་ལེན་ཨ་ཙ་མ། །སློབ་མ་འདྲ་འགའ་རེ་བསྐྱངས་ལགས་ཀྱང་། །བརྒྱུད་པ་རེ་བཟང་ན་དགའ་སྣང་བྱེད། །ཕྱོགས་རིས་ཀྱི་འགྲོ་དོན་ཨ་ཙ་མ། །ཚེ་མཇུག་ལ་འགྲོ་དོན་བྱ་སྙམ་ཡང་། །ཆོས་བརྒྱུད་གཅིག་དར་འདོད་སྙིང་ལ་གདལ། །རང་འདོད་ཀྱི་འགྲོ་དོན་ཨ་ཙ་མ། །ཟས་ནོར་ལ་ཆགས་འཛིན་ཆུང་སྙམ་ཡང་། །ནོར་ལྷ་ཡི་གསོལ་མཆོད་བཅག་མི་ཕོད། །གཡོ་ཟོལ་གྱི་བྱ་བཏང་ཨ་ཙ་མ། །བྱམས་པ་དང་བཟོད་པ་བསྒོམས་ལགས་ཤིང་། །ལོག་དགུ་རུ་བཟོད་པར་བྱ་སྙམ་ཡང་། །སྡུག་ཐུག་ན་མཐུ་མགོ་ཁུར་ཡང་སྲིད། །རྐྱེན་མི་འཁྱགས་ཀྱི་བཟོད་པ་ཨ་ཙ་མ། །ཡུལ་འབྲོག་གི་ཐེམ་པ་སྤངས་ནས་ཀྱང་། །བཀའ་བརྒྱུད་ཀྱི་རྣམ་ཐར་སྐྱོང་སྙམ་ཡང་། །ལྟོགས་དྲགས་ན་ལྡོམ་བུ་དྲན་ཡང་སྲིད། །མཐའ་མི་ཐུབ་ཀྱི་དམ་བཅའ་ཨ་ཙ་མ། །གྲོང་ཆོག་གི་དཀོར་སྒྲིབ་སྤངས་ནས་ཀྱང་། །སྤྱང་ཟས་སྒོ་སྐྱེལ་ཞིག་སྒུག་སྙམ་ཡང་། །ཤི་བྱང་དང་གསོན་བྱང་རྣམ་གྲངས་མང་། །དཀོར་སྒྲིབ་ནི་ཇེ་ཆེ་ཇེ་ཆེར་སོང་། །དཀོར་ནག་གི་རྐྱལ་པ་ཨ་ཙ་མ། །རྩ་རླུང་དང་ཐིག་ལེ་བསྒོམས་ལགས་ཀྱང་། །རས་རྐྱང་ཞིག་ཕེར་ཙམ་གྱི་
དྲོད་ཚད་མེད། །ཉོན་མོངས་ཀྱི་སྣོན་མ་ཨ་ཙ་མ། །བསྐྱེད་རིམ་ལ་བརྟན་པ་ཐོབ་སྙམ་ཡང་། །ཐ་མལ་གྱི་སྣང་ཞེན་བཟློག་མ་ནུས། །ཀུན་རྟོག་གི་རི་མོ་ཨ་ཙ་མ། །བདེ་གསལ་གྱི་ཉམས་བཟང་སྐྱེས་སྙམ་ཡང་། །མངོན་ཤེས་གྲུབ་རྟགས་ཟུར་ཙམ་མེད། །རྟགས་མེད་ཀྱི་ཞི་གནས་ཨ་ཙ་མ། །སྤྲོས་བྲལ་གྱི་ངོ་བོ་མཐོང་སྙམ་ཡང་། །མཐོང་ལམ་གྱི་ཡོན་ཏན་ཟུར་ཙམ་མེད། །སྟོང་ལྟའི་རྦད་སྒོག་ཨ་ཙ་མ། །ཉམས་ལེན་ལ་རྒྱུན་དུ་བརྩོན་སྙམ་ཡང་། །མཉམ་རྗེས་ཙམ་འདྲེས་པའི་ངེས་ཤེས་མེད། །བརྩོན་འགྲུས་ཀྱི་ཁ་ཐབས་ཨ་ཙ་མ། །ཡིག་དྲུག་ལ་རྒྱུན་དུ་འབད་བྱས་ཀྱང་། །ད་རུང་ཡང་དུང་ཕྱུར་ཁ་མ་ཁེངས། །གཉིད་རྨུག་འདི་འམ་ཨ་ཙ་མ། །གཞན་ལ་ཆོས་བཤད་ཐོགས་མེད་ཀྱང་། །རང་རྒྱུད་དང་ཆོས་གཉིས་ཧར་བག་ཆེ། །ནེ་ཙོའི་ཆོས་བཤད་ཨ་ཙ་མ། །སོལ་བ་ལ་ས་དཀར་བྱུག་པ་བཞིན། །ཕྱི་རོལ་ནས་བལྟས་ན་ཆོས་པར་མཐོང་། རང་ཉིད་ཀྱང་ཆོས་པ་ཡིན་ཚུལ་མཐོང་། །རང་རྒྱུད་དང་ཆོས་གཉིས་སོ་སོར་བྱེ། །སྙིགས་མའི་ཆོས་པ་ང་ཨ་ཙ་མ། །ཨ་ཙ་མ་ཡི་སྡུག་གླུ་འདི། །རང་ཉིད་ཀྱིས་རང་ལ་ཞེ་ཁྲེལ་
བཞག །གཞན་དག་གི་ཐུགས་ལ་ཕོག་དོན་མེད། །ཅེས་སྨྲས་སོ།། ༈ །།ངེས་ཤེས་ཅུང་ཟད་སྐྱེ་བའི་གླུ་དབུལ་པོའི་ནོར་བུ་རྙེད་པ་ལྟ་བུ་ཞེས་བྱ། ན་མོ་རཏྣ་གུ་རུ་ཡེ་། རྗེ་མཚུངས་མེད་རྗེ་ལ་གསོལ་བ་འདེབས། །ང་ཡོན་ཏན་གྱི་མཁྱེན་པ་རྒྱས་འདོད་པས། །བོད་དབུས་གཙང་མཚན་ཉིད་ཀྱི་གྲྭ་སར་ཕྱིན། །ལོ་བཞི་ལྔར་བགྲོ་གླེང་གི་རྒྱུག་འཕྱོངས་བྱས། །ཕྱི་ཐོས་པའི་སྒྲོ་འདོགས་མ་ཆོད་པར། །ནང་རྣམ་རྟོག་ཐེ་ཚོམ་གྱི་གཏེར་ཁ་ཕྱེས། །མདོ་མིན་གྱི་མདོ་འདྲ་མང་པོ་དང་། །རྒྱུད་མིན་གྱི་རྒྱུད་འདྲ་མང་པོ་དང་། །རྒྱ་གཞུང་གི་བརྫུ་མ་མང་པོ་དང་། །ཟབ་ཆོས་དང་ཆོས་ལོག་མང་པོ་དང་། །གཏེར་ཆོས་དང་གཏེར་རྫུན་མང་པོ་དང་། །ཆོས་རྒྱུད་རྣམས་གཙང་དང་མི་གཙང་དང་། །བཀའ་འཆལ་དང་བཀའ་བསླད་བཀའ་དཀྲུག་དང་། །བློ་བཟོའི་འདྲ་ཆོས་མང་པོ་དང་། །བཤད་པའི་བརྒྱུད་པ་མང་པོ་དང་། །བཤད་པའི་བརྒྱུད་པ་དར་ཆེ་ཡང་། །བྱིན་རླབས་ཀྱི་བརྒྱུད་པ་མེད་པ་དང་། །ཆོ་གའི་ཕྱག་ལེན་མཁས་ན་ཡང་། །དབང་ལུང་གི་བརྒྱུད་པ་མེད་པ་དང་། །དབང་ལུང་ཙམ་ཐོབ་པའི་བརྒྱུད་ཡོད་ཀྱང་། །ཆོ་གའི་ཕྱག་
ལེན་མེད་པ་དང་། །དབང་ལུང་དང་ཆོ་གའི་རྒྱུན་ཡོད་ཀྱང་། །སྒྲུབ་ཐབས་དང་མན་ངག་མེད་པ་དང་། །སྒྲུབ་ཐབས་དང་མན་ངག་ལུང་ཐོབ་ཀྱང་། །དེ་ཉིད་ཀྱི་ཕྱག་ལེན་མི་ཤེས་དང་། །དབང་ལུང་དང་སྒྲུབ་ཐབས་འབྲེལ་ན་ཡང་། །དེ་ཉིད་ཀྱི་རྒྱ་གཞུང་མེད་པ་དང་། །རྒྱ་གཞུང་དང་སྒྲུབ་ཐབས་འབྲེལ་ན་ཡང་། །དེ་ཉིད་ཀྱི་རྒྱུད་དེ་མེད་པ་དང་། །རྒྱུད་རྒྱ་གཞུང་སྒྲུབ་ཐབས་ཀུན་ཚང་ཡང་། །མཁས་པ་འགས་ཆོས་ལོག་ཡིན་གསུངས་དང་། །དོན་དེ་ཚོ་བདག་ལ་ཐེ་ཚོམ་སྐྱེས། །དཔེ་བསྲེག་བཅད་བརྡར་བའི་གསེར་བཞིན་དུ། །ངས་ལེགས་པར་བརྟགས་ལ་རྒྱལ་བའི་གསུངས། །སྐྱོན་ཀུན་བྲལ་ཡོན་ཏན་ཀུན་ཚང་བ། །ཆོས་ཟབ་ལ་ཕན་ཡོན་ཆེ་བ་ཞིག །དེ་གང་ཡིན་བརྟག་ལ་ཉམས་ལེན་སྙམ། །བཀའ་མདོ་རྒྱུད་མན་ངག་རྒྱ་ཆེར་བལྟས། །ཆོས་གྲུབ་མཐའ་ཕྱོགས་རིས་མེད་པར་བལྟས། །འབྲོམ་སྟོན་པས་ལྷ་བཞི་གདམས་པ་བཞིན། །རྗེ་པད་འབྱུང་གིས་ཡང་ཡང་ལུང་བསྟན་པའི། །རྗེ་འོད་དཔག་མེད་པ་མི་གཟུགས་ཅན། །དེ་བླ་མའི་མཆོག་ཏུ་ཁོ་ཐག་ཆོད། །དོན་རིགས་བདག་ཉིད་དང་དབྱེར་མེད་པར། །གནས་སྤྱི་བོའི་
གཙུག་ཏུ་བཞུགས་མལ་བྱས། །ལྷ་རྒྱལ་བ་རྒྱ་མཚོ་སྤྱན་རས་གཟིགས། །དེ་ཡི་དམ་མཆོག་ཏུ་ཁོ་ཐག་ཆོད། དུས་རྟག་ཏུ་བདག་ལུས་ལྷང་ངེར་བསྒོམ། །ཆོས་བརྒྱད་ཁྲི་བཞི་སྟོང་གཅིག་བསྡུས་པ། །གསུང་ཡི་གེ་དྲུག་མར་ཁོ་ཐག་ཆོད། །རྟགས་ཕྲེང་བ་ཁྲ་ཆོབ་མ་རེད་ཀྱང་། །ཕྲེང་ལུང་གིས་མི་འཆོལ་འཆད་ཅིང་གདའ། །ཆོས་ཟབ་ཆོས་ཀུན་གྱི་སྙིང་པོའི་བཅུད། །ཆོས་ཕྱག་རྒྱ་ཆེན་པོ་ཁོ་ཐག་ཆོད། །གནས་ཙིཏྟའི་དཀྱིལ་དུ་ཕོ་བྲང་བཅས། །དུས་རྒྱུན་དུ་ཉམས་ལེན་ཞེ་ལ་མནག །ཕྱི་སོ་སོར་ཐར་པ་འདུལ་བའི་ཁྲིམས། །དེ་ཐུབ་བསྟན་དངོས་གཞིར་ཁོ་ཐག་ཆོད། །ལུས་སྤྱོད་ལམ་དེ་དང་ཅི་མཐུན་བྱས། །དེ་ཕྲ་ཞིབ་གསོ་སྦྱོང་བཤགས་སྡོམ་འབད། །ལམ་སེམས་བསྐྱེད་བློ་བཟང་ཐེག་ཆེན་རྫོགས། །དོན་དེ་ལ་རང་རྒྱུད་ཅི་འདྲེས་སྦྱངས། །དུས་བཟང་པོར་སེམས་བསྐྱེད་རྒྱས་པར་བླངས། །རང་ལུས་ངག་ཡིད་དང་རྣམ་པ་གསུམ། །དེ་དལ་བར་སྐད་ཅིག་མ་བསྡད་པར། ལམ་བསྐྱེད་རྫོགས་སྒོམ་བཟླས་རྣམ་གསུམ་ལ། །དུས་འབྲལ་མེད་ཆུ་བོའི་གཞུང་བཞིན་བགྱིས། །སྐྱེ་སླ་ལ་ཕན་ཡོན་མཐའ་ཡས་པས། །གནས་བདེ་བ་ཅན་གྱི་ཞིང་ཁམས་
སུ། །རང་འབྲེལ་ཐོགས་བཅས་པར་སྨོན་ལམ་བཏབ། །བདག་རང་སྟོབས་ཀྱིས་སྐྱེ་བ་དཀའ་ན་ཡང་། །དཔལ་འོད་དཔག་མེད་པའི་སྨོན་ལམ་གྱིས། །སྐྱ་བ་དང་གྲུ་ཡིས་ཆུ་སྒྲོལ་ལྟར། །སྐྱེ་ངེས་པའི་གཏན་ཚིག་མདོ་ནས་རྙེད། །བདག་དཀོར་སྒྲིབ་དང་སྡིག་ཆེན་འབྲེལ་མང་ཡང་། །གནད་བསྔོ་བའི་གནད་གསང་ཟབ་མོ་ཡིས། །ཀྱི་རྒྱུ་དགེ་རྩ་ཆུད་ཟོས་མི་འོང་བ། །དེ་ཤཱཀ་ཐུབ་གསུངས་ལས་ངེས་པ་རྙེད། །དུས་དེང་སང་འདྲེན་པའི་སྟོབས་མེད་ཀྱང་། །དུས་ནམ་ཞིག་ས་བཅུ་ཐོབ་པའི་ཚེ། །ཐབས་ཐུགས་རྗེས་འདྲེན་པའི་སྨོན་ལམ་བཏབ། །དོན་དེ་ཙམ་ཞིག་སེམས་བསྐྱེད་ངལ་བསོ་སྟེ། །མི་བདག་གི་ཞེ་ཕུག་གི་གདེང་ཚད་ཡིན། །བདག་འདྲ་བའི་བན་སྤྲང་ཉམ་ཆུང་རྣམས། །དོན་དེ་ཙམ་རེ་ལ་བརྟན་པོར་མཛོད། །ཅེས་སྨྲས་སོ།། །།རང་གིས་རང་ལ་ཤ་ཚ་བའི་ཁ་ད་ཁེར་གཏམ་གཅིག་ལན་གྱི་གླུ། ཨེ་མ། སྤྲང་པོ་ཁྱོད་ཉོན་ཝཱ་དང་། །མི་ལུས་ནི་ད་རེས་ཙམ། །ཡང་ཡང་ནི་མི་ཐོབ། །མི་ཚེ་ནི་ཡུན་ཐུང་། །འཆི་རྐྱེན་ནི་གྲངས་མང་། །བར་ཆད་ནི་མགོ་རྒོད། །ཤེས་བྱ་ནི་གྲངས་མང་། །མཐའ་
རྒྱུ་ནི་མི་ཆོད། །ནམ་འཆི་ནི་ཆ་མེད། །དེ་དུས་ལ་ཕན་པ། །དམ་ཆོས་ལས་གཞན་མེད། །ཚུལ་ཁྲིམས་ནི་མེད་ན། །སེར་གོས་ཀྱིས་མི་ཕན། །བསླབ་པ་ནི་མེད་ན། །སེམས་བསྐྱེད་ཀྱིས་མི་ཕན། །དམ་ཚིག་ནི་མེད་ན། །དབང་བསྐུར་གྱིས་མི་ཕན། །ཉམས་རྟོགས་ཤིག་མེད་ན། །བསྒོམ་ལོ་ཡིས་མི་ཕན། །སྙན་གྲགས་ལ་མ་དགའ། །ལྷ་བུ་ཡི་བདུད་འཇུག །ངོ་བསྟོད་ལ་མ་དགའ། །བླ་མ་ཡི་བརྫུན་འཇུག །རྟགས་ཚོད་ལ་མ་དགའ། །བར་ཆད་ཀྱི་བདུད་འཇུག །གཅེས་འཛིན་ནི་མ་ཆེ། །རོ་སྒོག་འདི་སྒྱུར་དགོས། །ཞིམ་ལྟོ་ལ་མ་དགའ། །མི་གཙང་པའི་སྣོན་མ། །བཟང་འདོད་ནི་མ་ཆེ། །ཇོ་བརྫུ་ཡི་བདུད་འཇུག །གཉེན་འདུན་ལ་མ་ཆགས། །ནམ་ཞིག་ནི་འཆི་ངེས། ཟས་ནོར་ལ་མ་དགའ། །དགྲ་འདྲེ་ཡི་གཡབ་མོ། །ཞི་གནས་ལ་མ་ཆགས། །འཁོར་བའི་ནས་མི་འཕགས། །དགེ་བ་ལ་མ་ཆགས། །འཕགས་ལམ་ནི་མི་ཐོབ། །ཞེ་འདོད་ནི་མ་ཆེ། །གཞན་དོན་ནི་མི་འོང་། །ཨ་ཡེ་ད་ནི་ད་ནི། །ཚེ་འདིའི་བྱ་བ་ཐམས་ཅད་ཅི་བྱེད། །བློས་བཏང་ནས་སྒྲུབ་པ་རྩེ་གཅིག་བྱེད་ནུས་ན་ཨང་། །
དགྲ་གཉེན་ཕྱོགས་རིས་ཐམས་ཅད་སྤངས་ནས་བྱམས་པ་ཚད་མེད་པ་བསྒོམ་ནུས་ན་ཨང་། །རང་དོན་བདེ་སྐྱིད་ཐམས་ཅད་བློས་སྤངས་ནས་སྙིང་རྗེ་ཆེན་པོས་གཞན་དོན་ཞིག་བྱེད་ནུས་ན་ཨང་། །ཐ་མལ་གྱི་སྣང་བ་ཐམས་ཅད་སྤངས་ནས་སྤོང་གཉེན་སྦྱང་གཞི་ཤེས་པའི་བསྐྱེད་རིམ་ལ་བརྟན་པ་ཞིག་ཐོབ་ན་ཨང་། །ཉམས་མཐོ་དམན་ལ་སྤང་བླང་མེད་པར་ཐ་མལ་གྱི་ངོ་བོ་འདི་རྒྱུན་ཆད་མེད་པར་སྐྱོང་ནུས་ན་ཨང་། །སྲོག་རྩོལ་རླུང་གི་སྦྱོར་བ་ལས་སུ་རུང་བས་བདེ་དྲོད་ཀྱི་མེ་དཔུང་ཆེན་པོ་ཞིག་སྦར་ནུས་ན་ཨང་།། མི་མེད་ཀྱི་ལུང་སྟོང་གནས་རི་བཟང་པོ་ཞིག་ཏུ་ཆུ་རྡོ་མེ་ཏོག་བཟའ་ཞིང་རོ་བདག་བྱ་གཅན་གྱིས་བྱེད་པ་ཞིག་ནུས་ན་ཨང་། །ཚེ་གཅིག་ལུས་གཅིག་འདི་ལ་འཁོར་བ་སྡུག་བསྔལ་གྱི་རྒྱ་མཚོ་དང་གཏན་གྱེས་ཤིག་ནུས་ན་ཨང་། །རང་དོན་དུ་ཆོས་སྐུའི་རྒྱལ་ས་བཟུང་ནས་འབད་མེད་ལྷུན་གྲུབ་ཀྱི་འགྲོ་དོན་ཞིག་འབྱུང་ན་ཨང་། །བླ་མ་དཀོན་མཆོག་བླ་མ་དཀོན་མཆོག་བདག་ཆོས་གཟུགས་བརྙན་ཙམ་དུ་མ་སོང་བ་ཞིག་ཐུགས་རྗེས་ཟུངས་ཤིག །ཅེས་སྨྲས་སོ།། གནད་འགག་གསུམ་གྱི་གླུ་རྒྱལ་པོའི་བཀའ་ལུང་ལྟ་བུ་ཞེས་བྱ་བ། ན་མོ་བཛྲ་དྷ་ར་
ཡེ། དཔལ་ལྡན་རྡོ་རྗེ་འཆང་ཆེན་བླ་མའི་ཞབས། །བདག་མི་འབྲལ་སྤྱི་བོའི་རྒྱན་དུ་བཞུགས། །ཆོས་སྡེ་སྣོད་རྒྱུད་སྡེ་རྒྱ་མཚོའི་བཅུད། །དོན་མདོ་འགག་གནད་གསང་གསུམ་དུ་གདའ། །ཆོས་གཞི་དང་ལམ་དང་འབྲས་བུའི་གནད། །གཞི་འདི་ཤེས་པས་མི་ཆོག་པར། །ལམ་འདི་བསྒོམས་པས་བགྲོད་པར་གདའ། །གཞི་ལམ་གཉིས་པོ་མ་འཆུགས་ན། །འབྲས་བུ་འཆུག་པ་མེད་པར་གསུངས། །སྤྱིར་སྣང་སྲིད་འཁོར་འདས་ཆོས་རྣམས་ཀྱི། །ཆོས་ཉིད་སྟོང་པ་ཆོས་ཀྱི་དབྱིངས། །ཆེ་ཆུང་བཟང་ངན་མེད་པ་ཡིན། །དེ་ལ་ཆོས་ཉིད་ཆོས་དབྱིངས་དང་། །ལྟ་བ་འཁོར་འདས་དབྱེར་མེད་ཟེར། །ཁྱད་པར་འགྲོ་བ་ཀུན་གྱི་སེམས། །སྨྲ་བསམ་བརྗོད་དུ་མེད་པའི་དོན། །རྒྱུ་ཡིས་མ་སྐྱེས་རྐྱེན་མི་འཇིག །རང་སེམས་ལྷན་སྐྱེས་ཆོས་ཀྱི་སྐུ། །ཧེ་རུ་ཀ་དང་ཀྱེ་རྡོ་རྗེ། །དང་པོའི་སངས་རྒྱས་ཀུན་ཏུ་བཟང་། །བདེ་གཤེགས་སྙིང་པོ་ལ་སོགས་པ། །རྣམ་གྲངས་དུ་མར་གསུངས་པ་རྣམས་། །མར་དང་འོ་མ་ཅི་བཞིན་དུ། །སེམས་ཅན་ཀུན་ལ་ཁྱབ་པར་བཞུགས། །བཞུགས་ཀྱང་མ་ཕན་འཁོར་བ་འཁྱམས། །དབུལ་པོས་ནོར་བུ་མ་ཤེས་བཞིན། །དེ་ནི་
མདོ་སྔགས་དགོངས་པ་མཐུན། །ཐུན་མོང་མིན་པའི་བླ་མེད་བདག །བདག་སེམས་ཡེ་ཤེས་སེམས་དཔའ་སྟེ། །སེམས་ལས་གཞན་པའི་ཡེ་ཤེས་ལྷ། །ཕྱི་རོལ་གཞན་ན་ཡོད་མིན་ཏེ། །སེམས་ནི་རྫོགས་པའི་སངས་རྒྱས་ཉིད། །ལུས་ནི་དམ་ཚིག་སེམས་དཔའ་སྟེ། །ཕུང་པོ་ཁམས་དང་སྐྱེ་མཆེད་རྣམས། །རིགས་ལྔ་ཡབ་དང་སེམས་དཔའི་ཚོགས། །གདོད་ནས་ལྷ་ཡི་དཀྱིལ་འཁོར་ཡིན། །རྩ་དང་རླུང་དང་ཐིག་ལེ་རྣམས། །དཔའ་བོ་ཌཱཀྐིའི་རང་བཞིན་ཡིན། །དེ་ལྟར་ཡིན་ལ་ཡིན་ཤེས་བྱ། །གཞི་ཡི་གནད་མཆོག་ཨེ་མ་ཧོ། །བགྲོད་པར་བྱ་བ་ལམ་གྱི་གནད། །བྱང་ཆུབ་མཆོག་ཏུ་སེམས་བསྐྱེད་ནས། །ཕ་རོལ་ཕྱིན་པ་དྲུག་ལ་སྤྱོད། །ལམ་ལྔ་ས་བཅུ་རིམ་བགྲོད་པ། །མདོ་ཡི་ལུགས་ཏེ་རྒྱུ་ཡི་ལམ། །གྲངས་མེད་གསུམ་འགོར་ལམ་ཐག་རིང་། །དབང་བཞིས་རྒྱུད་བཞི་སྨིན་བྱས་ནས། །བསྐྱེད་རྫོགས་དོན་ལ་རབ་སྦྱངས་ཏེ། །ལམ་ལྔ་ས་བཅུ་ཚེ་འདིར་བགྲོད། །བཅུ་གསུམ་རྡོ་རྗེ་འཛིན་པའི་ས། །ཚེ་གཅིག་ཐོབ་པ་བླ་མེད་ལམ། །འབྲས་བུ་ལམ་དུ་བྱེད་ཅེས་བྱ། །སྐལ་ལྡན་དབང་པོ་ཡ་རབ་ལ། །བླ་མའི་བྱིན་
རླབས་སེམས་ལ་ཞུགས། །ཕྱག་རྒྱ་ཆེན་པོའི་ཡེ་ཤེས་ཤར། །མོས་གུས་སྟོབས་ཀྱིས་ས་དང་ལམ། །ལོ་ཟླ་ཙམ་གྱིས་བགྲོད་བྱེད་པ། །སྙིང་པོ་དོན་གྱི་བསྟན་པ་ཞེས། །ཕྱག་རྒྱ་ཆེན་པོའི་ལམ་ཡིན་ནོ། །ཤིན་ཏུ་ཡ་རབ་སྐལ་ལྡན་ལ། །བླ་མས་ངོ་སྤྲོད་གནང་བ་དང་། །རང་སེམས་ཆོས་སྐུར་རྟོགས་པ་དང་། །ས་ལམ་ཡོན་ཏན་རྫོགས་པ་རྣམས། །སྐད་ཅིག་ཉིད་ལ་ཐམས་ཅད་ཚང་། །དཔེར་ན་ཉི་མའི་དཀྱིལ་འཁོར་ཉིད། །འཛམ་གླིང་མཁའ་ལ་ཤར་བ་དང་། །མུན་པ་གསལ་དང་ཉི་འོད་ཕོག །མེ་ཏོག་པདྨ་ཁ་བྱེ་བ། །ཐམས་ཅད་དུས་གཅིག་འབྱུང་བ་བཞིན། །རྫོགས་པ་ཆེན་པོའི་ལམ་ཡིན་ཏེ། །ཐོས་གྲོལ་ཞེས་པ་དེ་ཡི་དོན། །ས་ལམ་མ་བགྲོད་མ་ཡིན་ཏེ། །སྐད་ཅིག་གཅིག་ལ་ཐམས་ཅད་བགྲོད། །དཔེར་ན་ཤོ་མང་སྡེབ་མང་པོ། །མདའ་ཡིས་སྐད་ཅིག་ཕུག་པ་བཞིན། །རིམ་པར་ཕུག་པ་ཡིན་མོད་ཀྱང་། །མགྱོགས་པས་དུས་གཅིག་ཕུག་འདྲ་མཐོང་། །དེ་བཞིན་གཅིག་ཅར་གང་ཟག་དེས། །ས་འདི་རིམ་པར་བགྲོད་མོད་ཀྱི། །ཡུན་ཐུང་དུས་གཅིག་བགྲོད་འདྲར་མཚུངས། །དེ་དག་ལམ་གྱི་གནད་འགག་ཡིན། །འགའ་ཞིག་མདོ་
སྔགས་ཀྱི་སངས་རྒྱས་ལ། །མཆོག་དམན་ཁྱད་པར་ཡོད་དོ་ཟེར། །འགའ་ཞིག་སྔགས་ལ་མ་བརྟེན་པའི། །མདོ་རྐྱང་གི་སངས་རྒྱས་མི་སྲིད་པའི། །ས་བརྒྱད་ནས་སྔགས་ལ་འཇུག་དགོས་ཟེར། །ཁ་ཅིག་མདོ་སྔགས་སོ་སོར་ཡང་། །སངས་རྒྱས་ནས་ཁྱད་པར་མེད་དོ་ཟེར། །ཁ་ཅིག་རྟོག་མེད་ཆོས་སྐུ་ལ། །ཡེ་ཤེས་ལྔ་ཡང་མེད་ཅེས་ཟེར། །ལ་ལ་སྐུ་གཉིས་སྐུ་གསུམ་དང་། །སྐུ་ལྔ་ལ་སོགས་བཞེད་པ་མང་། །ཁ་ཅིག་ཆོས་སྐུ་སངས་རྒྱས་ཡིན། །ལོངས་སྤྲུལ་གཉིས་གདུལ་བྱའི་སྣང་བ་ཡིན། །སྒྱུ་མས་སྤྲུལ་པའི་གཟུགས་བརྙན་བཞིན། །གཟུགས་སྐུ་ནི་སངས་རྒྱས་མིན་ཅེས་ཟེར། །སོ་སོ་ལ་ལུང་རྒྱབ་འདྲེན་རྒྱུ་མང་། །དཔལ་ལྡན་ཇོ་བོ་ཨ་ཏི་ཤ། །འབྲས་བུའི་དབྱེ་བ་ཞུས་ཙམ་ན། །ཁོ་བོ་སངས་རྒྱས་མ་མྱོང་གསུངས། །བདག་གི་འདྲེན་མཆོག་སྤྲུལ་པའི་སྐུ། །གཞི་ལམ་གཉིས་འཕྱུགས་མེད་ཉམས་ལོངས་དང་། །འབྲས་བུ་ལ་བརྩི་བགྲང་མི་པ་དགོངས་གསུངས། །དེ་ཕྱིར་འབྲས་བུ་ལ་སྤྱད་མི་དགོས། །གཞི་གནས་ལུགས་ཐོས་པས་གཏན་ལ་ཕོབ། །ལམ་བསྐྱེད་རྫོགས་ཉམས་ལེན་གནད་དུ་བསྣུན། །ཚེ་འདི་འམ་
བར་དོ་ཕྱི་མ་རུ། །རྫོགས་སངས་རྒྱས་ཀྱི་འབྲས་བུ་ཐག་མི་རིང་། །ཆོས་གསང་སྔགས་ཟབ་མོའི་ཁྱད་ཆོས་ཡིན། །དུས་དེ་རིང་ཡར་གྱི་ཚེས་བཅུ་ལ། །རྗེ་པད་འབྱུང་དགྱེས་པའི་རོལ་མོར་འབུལ། །ཞེས་མགུར་སྣ་བཅུ་བདུན་ཙམ་འདི་ཀརྨ་ཡང་དག་གིས་ཡང་ཡང་བསྐུལ་ཞིང་། ཆོས་དགེ་དེ་ཕྱོགས་སུ་འབྱོན་པའི་རྟགས་སུ་གྲོ་ཞུན་ཟླ་བའི་ཚེས་བརྒྱད་ནས་བཅུའི་བར་ཉི་མ་གསུམ་དུ་བརྒྱད་མཆོད་ཚེས་བཅུ་སོགས་རྒྱུན་ལྡན་རྣམས་ཀྱང་མ་ཆག་པར། གརླ་ན་བྲིས་པ་དང་། སྔོན་ནས་བསམ་མནོ་བཏང་བས། རྡུལ་བྱང་ལ་བཀོད་པ་དང་། མགུར་དཔེ་ལ་བལྟས་ནས་རིགས་འདྲ་འཚམས་པ་སོགས་ནི་གཏན་ནི་མིན་པར་ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།