དགེ་སློང་རྣལ་འབྱོར་སྤྱོད་པ་རཱ་ག་ཨ་སྱའི་ཐོལ་བྱུང་ཚིགས་བཅད།
ཤོག་ལྷེབ་ ༣༥༡ ནས་ ༤༣༠ བར།
དགེ་སློང་རྣལ་འབྱོར་སྤྱོད་པ་རཱ་ག་ཨ་སྱའི་ཐོལ་བྱུང་ཚིགས་བཅད་འགའ་རེ་ཡོད་དོ།།
ན་མོ་ཤཱཀྱ་མུ་ནེ་ཡེ། བསྟན་པའི་བདག་པོ་གསེར་མདོག་ཅན། །ཤཱཀྱའི་ཏོག་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཤཱ་རིའི་བུ་སོགས་ཉན་ཐོས་ནི། །མཆོག་ཆེན་བརྒྱད་ལ་གསོལ་བ་འདེབས། །ཡན་ལག་འབྱུང་ལ་སོགས་པ་ཡི། །འཕགས་པ་གནས་བརྟན་བཅུ་དྲུག་ལ། །གསོལ་བ་འདེབས་སོ་ཐུགས་རྗེས་ཟུང་། །གཉིས་ཀའི་ཆ་ལས་རྣམ་གྲོལ་སོགས། །དགྲ་བཅོམ་ཁྲི་དང་དྲུག་སྟོང་ལ། །གསོལ་བ་འདེབས་སོ་ཐུགས་རྗེས་ཟུང་། །དྷརྨཱ་ཏ་དང་ཧྭ་ཤང་དང་། །རྒྱལ་ཆེན་བཞི་ལ་གསོལ་བ་འདེབས། །བསྟན་པ་
རྒྱས་པར་མཛད་དུ་གསོལ། །བདག་གི་ལུས་རྟེན་འདི་ཉིད་ཀྱིས། །ཚུལ་ཁྲིམས་ཕ་རོལ་ཕྱིན་པ་ལ། །འགྲོ་བ་ཐམས་ཅད་འགོད་པར་ཤོག །བདག་ལས་བརྒྱུད་པའི་སྡོམ་རྒྱུན་ཀུན། །ཉེས་ལྟུང་དྲི་མས་མ་གོས་པར། །ཉེ་བར་འཁོར་ལྟར་མཉམ་པར་ཤོག། སྦངས་བའི་ཡོན་ཏན་ཕུལ་བྱུང་བ། །འཕགས་པ་འོད་སྲུང་ལྟར་གྱུར་ཅིག །ཅེས་པ་འདི་ནི་ཡོར་སྟོད་དུ། །སྒར་པ་སླེབས་ནས་བསྡད་པའི་ནུབ། །དགེ་བསྙེན་མ་ཡི་ཆ་ལུགས་ཅན། །མང་པོ་མཇལ་དུ་བྱུང་རྨིས་དུས། །གཞི་བདག་སྨན་རིགས་ཡིན་ནམ་སེམས། །ཕྱིར་ནངས་གྲོ་རྫོང་བླ་མ་བྱོན། །དབོན་པོ་གསུམ་གྱིས་དགེ་ཚུལ་ཞུས། །དེ་ཚེ་གེ་མོ་སངས་
རྒྱས་ཀྱི། །མདངས་ནི་བདག་གི་རྨི་ལམ་དུ། །གནས་བརྟན་བཅུ་དྲུག་མཇལ་བ་རྨིས། །ཟེར་ཞིང་སྡོམ་པ་གནང་བསྡོ་བྱུང་། །དེ་ནི་རྟེན་འབྲེལ་ལེགས་སྙམ་ནས། །མགོ་ཟླའི་བཅོ་ལྔ་དེ་ཉིན་བྲིས།། ༈ །།ན་མོ་ཨཱརྱ་ཏཱ་རེ་ཡེ། འཇིགས་པ་བརྒྱད་ལས་སྐྱོབ་མཛད་པའི། །ཐུགས་རྗེ་ཆེན་པོ་སྤྱན་རས་གཟིགས། །གསོལ་བ་འདེབས་སོ་ཐུགས་རྗེས་གཟིགས། །པདྨ་དཀར་པོའི་མདོ་སྡེ་ལས། །འཛམ་གླིང་གཡོན་ཅན་དགྲས་གང་བར། །ཚོང་པ་ནོར་ཆེན་བགྲོད་པའི་ཚེ། །ཁྱེད་ཀྱི་མཚན་ནས་བརྗོད་བྱས་ན། །སྡང་བའི་སེམས་ཀྱིས་བལྟ་མི་ནུས། །གསུངས་ན་བདག་དང་བསྲུང་བྱར་བཅས། །རྩེ་གཅིག་ཁྱེད་ལ་གསོལ་བ་འདེབས། །འཇིགས་པ་ཀུན་ལས་བསྐྱབ་ཏུ་གསོལ། །དགྲ་སྡང་མཚོན་ཆ་ཕྱར་ན་ཡང་། །ཁྱེད་ཉིད་ཡིད་ལ་དྲན་ཙམ་གྱིས། །མཚོན་ཆ་དུམ་བུར་འཐོར་གསུངས་ན། །བདག་གིས་རྩེ་གཅིག་ཁྱེད་དྲན་ན། །བར་ཆད་ཐམས་ཅད་བསལ་དུ་གསོལ། །འཇིགས་པ་ཀུན་སྐྱོབ་ཏཱ་རེ་མ། །འཇིག་རྟེན་དབང་ཕྱུག་སྤྱན་ཆབ་ལས། །འགྲོ་བའི་དོན་དུ་འཁྲུངས་མ་ཐག །འཇིག་རྟེན་དག་ན་འཇིགས་པ་ཡིས། །གང་ཞིག་འཇིགས་ཤིང་སྐྲག་པ་ཀུན། །ང་ཡིས་སྐྱབས་
ཞེས་ཞལ་བཞེས་ན། །བདག་སོགས་འགྲོ་བ་སེམས་ཅན་རྣམས། །སྙིགས་དུས་འཇིགས་པས་རབ་ཏུ་སྐྲག །འདི་ལ་མི་འཇིགས་ཕྱག་རྐྱངས་འཚལ། །དུས་ཀྱི་འཁོར་ལོའི་ཡུམ་གཅིག་མ། །ཁྱེད་ནི་ཡིད་ལ་དྲན་ཙམ་གྱིས། །འཇིགས་པ་བཅུ་དྲུག་སྐྱོབ་པའི་ཚུལ། །རྒྱུད་དང་དྲི་མེད་འོད་ལས་གསུངས། །སྣ་ཚོགས་ཡུམ་ལ་སྐྱབས་ཞུས་པས། །བདག་དང་བསྲུང་བྱ་ཐམས་ཅད་ལ། །སྐྱོབ་པར་མཛོད་ཅིག་རྣལ་འབྱོར་མ། །དུ་རུ་ཀ་ཡི་དམག་དཔུང་གིས། །མཐའ་འཁོར་ཆོས་འཁོར་འཇིག་ཉེ་ན། །པད་འབྱུང་ཁྱེད་ལ་གསོལ་བཏབ་ན། །ལྷ་སྲིན་སྡེ་བརྒྱད་འཁོར་དང་བཅས། །གནོད་བྱེད་ཟློག་པར་གསུངས་ལགས་ན། །ཐེ་ཚོམ་མེད་པར་ཨོ་རྒྱན་མཁྱེན། །བར་ཆད་ཐམས་ཅད་བཟློག་ཏུ་གསོལ། །གཤེད་མའི་དམག་གིས་མཐའ་འཁོར་ནས། །མཚོན་ཆ་རྣོན་པོས་འདེབས་པ་ན། །པད་འབྱུང་ཁྱེད་ལ་གསོལ་བཏབ་ན། །གཤེད་མ་སྐྲག་ཅིང་མཚོན་་འཐོར་གསུངས། །ཐེ་ཚོམ་མེད་པར་ཨོ་རྒྱན་མཁྱེན། །བར་ཆད་རྐྱེན་ངན་བཟློག་ཏུ་གསོལ། །རིག་སྔགས་ལྷ་མོ་འོད་ཟེར་ཅན། །ཁྱེད་ཉིད་མཚན་ཙམ་ཤེས་པས་ཀྱང་། །
ཆད་པས་བཅད་དུ་མེད་པ་དང་། །བསྒག་མེད་སྒལ་དུ་མེད་གསུངས་ན། །བདག་གིས་ལྷ་མོ་ཁྱེད་བསྟེན་ན། །འཇིགས་པ་ཀུན་ལས་བསྐྱབ་ཏུ་གསོལ། །འཇམ་དཔལ་ཕ་རོལ་རྒོལ་འཇོམས་པ། །ཁྱེད་ལ་གསོལ་བ་བཏབ་པ་ན། །ཕ་རོལ་རྒོལ་བས་མི་བརྫི་བར། །གསུངས་ན་ཡི་དམ་ཁྱེད་བསྟེན་ན། །ཕ་རོལ་རྒོལ་བ་བཟློག་ཏུ་གསོལ། །དཔལ་ལྡན་མགོན་དཀར་དུར་ཁྲོད་བདག །ཁྱེད་ཀྱིས་ཐུགས་དམ་སྨོན་ལམ་ནི། །དགྲ་ཇག་གནོད་པ་བཟློག་གསུངས་ན། །བདག་གི་སྲུང་མར་ཁྱོད་བསྟེན་ན། །ཙོ་ར་མི་རྒོད་གནོད་པ་ཟློག །སྟོང་ཉིད་ཡུམ་ཆེན་ཕ་རོལ་ཕྱིན། །གང་གིས་སུ་ཞིག་སྒོམ་བྱེད་ན། །འཇིགས་དང་བར་ཆད་ཐམས་ཅད་ཀུན། །རང་ས་རང་སར་ཞིའོ་ཞེས། །ཤེར་ཕྱིན་རྒྱུས་འབྲིང་རྣམས་ནས་གསུངས། །བདག་ནི་ཡུམ་དོན་སྟོང་ཉིད་དོན། །བསྒོམས་པའི་བདེན་པས་འཇིག་པ་ཀུན། །རང་ས་རང་སར་ཞི་གྱུར་ཅིག །བྱམས་ཆེན་གཉུག་མའི་ཏིང་འཛིན་གྱི། །སུ་ཞིག་སྒོམ་པར་བྱེད་པ་ལ། །འཇིགས་པ་གང་གིས་མི་བརྫི་བར། །མདོ་སྡེ་ཀུན་ནས་གསུངས་ལགས་ན། །བདག་གིས་བྱམས་པའི་ཏིང་འཛིན་ནི། །
བསྒོམས་པའི་བདེན་པས་འཇིགས་བྲལ་ཤོག །དཀོན་མཆོག་གསུམ་གྱི་བདེན་པ་དང་། །བདེན་ལྡན་ཇི་སྙེད་བདེན་པའི་མཐུས། །རྒྱལ་པོ་ཆོས་བཞིན་སྤྱོད་པ་དང་། །བོད་ཁམས་བདེ་ཞིང་སྐྱིད་པར་ཤོག །བསྟན་དང་བསྟན་འཛིན་སྐྱེས་བུ་རྣམས། །དབུ་འཕང་དགུང་བས་མཐོ་བ་དང་། །བླ་མེད་རྡོ་རྗེ་ཐེག་པ་ཡིས། །བསྟན་ལ་བར་ཆད་མེད་གྱུར་ཅིག །ཅེས་པ་འདི་ནི་མཐའ་འཁོབ་རཱ་ཛ་གཅིག །ཐུགས་གཏུམ་ཐམས་ཅད་འཇིགས་ཤིང་ཡ་ངའི་ཚེ། །རེ་ས་དཀོན་མཆོག་གསུམ་ལས་མེད་མཐོང་ནས། །ཐེ་ཚོམ་མེད་པར་གསོལ་བ་བཏབ་པའོ།། ༈ །།ཀྱེ་མ་གསོན་དང་ཤེས་ལྡན་ཀུན། །འཁོར་བ་སྙིང་པོ་མེད་པའི་ཚུལ། །ངོ་སྤྲོད་དངོས་སུ་མི་འདུག་གམ། །སྡིག་ལྟུང་ངལ་བ་ཁྱད་བསད་ན། །གཞན་ཕྱོགས་ཐམས་ཅད་བཅོམ་ནས་ཀྱང་། །རྒྱལ་སྲིད་ཐོབ་པར་གྱུར་ན་ཡང་། །རང་གི་རྒྱལ་སྲིད་མི་དབང་བར། །དོན་མེད་མི་ཡིས་རྒྱལ་ས་བཟུང་། །དེ་ཡང་མི་རྟག་སྒྱུ་མའི་དཔེ། །ཝཱ་དམག་དང་བུ་རྟ་ཧྲག་པ་ཡིས། །དཔོན་པོའི་སྐུ་ཆུས་བསྒྲུབས་བསྒྲུབས་ནས། །སྐུ་ཆུས་འགྲུབ་ནས་རང་ཉིད་བརླག །འདི་ཡང་མི་རྟག་སྒྱུ་མའི་དཔེ། །བྱད་ཟློག་སྲུང་བ་བྱས་
བྱས་ནས། །སྲུང་བ་འགྲུབ་ནས་རང་ཉིད་ཕུང་། །འདི་ཡང་མི་རྟག་སྒྱུ་མའི་དཔེ། །ཕྱོགས་རིས་གཞན་ཕྱོགས་བཏུལ་བཏུལ་ནས། །གཞན་ཕྱོགས་ཐུལ་ཛ་ནང་དུ་འཁྲུག །འདི་ཡང་མི་རྟག་སྒྱུ་མའི་དཔེ། །དམ་པའི་ཆོས་ཤིག་མ་ནུས་ན། །འཁོར་བའི་བྱ་བ་སྙིང་པོ་མེད། །ཀྱེ་མ་འཁོར་བའི་སེམས་ཅན་རྣམས། །སྙིང་པོ་མེད་ལ་སྙིང་པོར་རློམ། །དོན་དམ་སྟོང་ཉིད་མ་རྟོགས་ན། །འདུས་བྱས་དགེ་བ་ལྟར་སྣང་ཡང་། །ཕལ་ཆེར་བྱང་ཆུབ་སྒྲུབ་པའི་གེགས། །འདི་ལྟར་སྣང་བའི་དངོས་པོ་ཀུན། །མ་བརྟགས་ཚེ་ན་བདེན་བདེན་འདྲ། །བརྟགས་ན་སྙིང་པོ་ཅི་ཡང་མེད། །ཐམས་ཅད་བྱིས་པའི་རྩེད་མོ་འདྲ། །དགྲ་ཡང་གཉེན་ལ་གཉེན་ཡང་དགྲ། །ལོ་གཅིག་ཙམ་ཡང་ངེས་པ་མེད། །ཚེ་རབས་འཕོས་ན་ལྟ་ཅི་སྨོས། །ཁམས་གསུམ་སེམས་ཅན་མ་ལུས་པ། །ཕ་མ་ཡིན་པར་ཐག་ཆོད་པས། །ཐམས་ཅད་བདེ་བ་མཆོག་ཐོབ་པར། །འདོད་པ་བདག་གིས་བསྒོམ་བྱ་ཡིན། །འདི་ལྟར་སྣང་བ་ཐམས་ཅད་ཀུན། །ངོ་བོ་སྟོང་ལ་རང་བཞིན་གསལ། །ཆུ་ཟླ་འཇའ་ཚོན་སྒྱུ་མ་ལྟར། །མཐོང་བ་བདག་གི་ལྟ་བ་ཡིན། །བདག་ཅེས་བྱ་བ་མིང་ཙམ་
མེད། །ལུས་སེམས་གང་ལའང་བདག་མ་གྲུབ། །བདག་མེད་རྟོགས་པའི་གདེང་ཚད་ཡིན། །དེ་ལྟར་མ་རྟོགས་སེམས་ཅན་ལ། །བཅོས་མིན་སྙིང་རྗེ་ཤུགས་ལ་སྐྱེས། །དེ་ནི་བདག་གི་ཉམས་མྱོང་ཡིན། །ཐམས་ཅད་སྟོང་པར་རྟོགས་ན་ཡང་། །སྤྱོད་པ་བླང་དོར་གཟབ་པ་དང་། །འཇིག་རྟེན་མི་ཆོས་དང་བསྟུན་པ། །ཐབས་ལ་མཁས་པའི་སྤྱོད་པ་ཡིན། །ནམ་ཞིག་མི་རྟག་འཆི་ངེས་ཤིང་། །དེ་ཚེ་ཞག་རྒྱགས་ཙམ་ཞིག་ཀྱང་། །ཁྱེར་དབང་མེད་དོ་གཅིག་པུར་འགྲོ། །དེ་ཕྱིར་འཁོར་དང་ལོངས་སྤྱོད་ལ། །དགོས་མེད་ཞེན་པ་ལོག་ལགས་ཀྱང་། །རང་བཞིན་ཆོས་ལ་འཛུད་པའི་ཕྱིར། །སྒར་གཞི་འབུལ་བ་སྡུད་པ་འདི། །བྱང་ཆུབ་སེམས་དཔའི་སྤྱོད་པ་ཡིན། །དཀོར་རྫས་ཆར་ལྟར་བབ་ན་ཡང་། །འཁོར་གསུམ་ཡོངས་སུ་དག་པ་ཡི། །དམིགས་མེད་བསྔོ་བས་རྒྱས་བཏབ་པས། །བྱིན་པ་ཆུད་ཟོས་མི་འོང་ཞིང་། །སྦྱིན་བདག་ཚོགས་གཉིས་རྫོགས་པ་ནི། །ཤཱཀ་ཐུབ་གསུངས་ལ་དཔང་པོ་ཡིན། །འཕྲལ་དུ་གང་དྲན་བྲིས་པ་འདི། །ཡོར་སྟོད་སླེབས་པའི་ཕྱི་དེ་ཉིན། །ཅུང་ཟད་དལ་བའི་སྐབས་ལ་བྲིས། །
ན་མོ་གུ་རུ་ཧ་སུ་བཛྲ་ཡེ། བྱ་བཏང་རྒྱལ་པོ་མི་ལ་རྗེ། །དབྱེར་མེད་ཀུན་དགའ་རྣམ་རྒྱལ་ལ། །གསོལ་བ་འདེབས་སོ་ཐུགས་རྗེས་ཟུངས། །བསྟན་དང་སྟོན་པ་གཉིས་ཀ་སྟེ། །དམ་ཆོས་འདུལ་བའི་གཞུང་ལས་ནི། །མཐའ་གཉིས་སྤང་བར་གསུངས་པ་སྟེ། །ཧ་ཅང་འདོད་པ་ཆེ་བའི་མཐའ། །ཆོག་མི་ཤེས་པ་སྤང་གསུངས་ལྟར། །ཟས་དང་འབུལ་བ་ལྷ་རྟེན་སོགས། །ཆེ་ཞིང་མནོག་པ་རྒྱུས་ཡོད་དེ། །སྙན་བརྒྱུད་རྣམས་ཀྱི་དམ་ཚིག་དང་། །བཀའ་བརྒྱུད་གོང་མའི་རྣམ་ཐར་ལྟར། །གྲོང་ནག་འགྲིམས་དང་གྲོང་ཆོག་འདི། །ད་ནི་བདག་གིས་སྤང་བར་བགྱི། །སྲུང་འཁོར་ཟ་ཡིག་ལ་སོགས་པ། །ཡོན་དང་ལྷ་རྟེན་འོང་ཤེས་ཀྱང་། །རྣམ་གཡེང་ཆེ་ཞིང་དགེ་སྦྱོར་ཆག །ད་ནི་མི་བྱ་་དམ་བཅའ་འོ། །འབྲུ་ལྡོམ་དཀར་ལྡོམ་ལ་སོགས་པ། །ཀུན་གྱི་སྤྱི་སྲོལ་ལབ་བརྗོད་མེད། །དུས་གཉིས་ཁྲལ་འདི་ཁེབས་ཆེ་ཡང་། །ཤུགས་འབྱུང་སྤྲང་ཟས་ཚུར་སྐྱེལ་བསྒུག །ལྟོ་ཕྱིར་ཡུལ་འབྲོག་མི་ཉུག་གོ །ཉོ་སླ་ཁེ་ཆེ་དངུལ་ཁུག་ཀྱང་། །ཁལ་མ་རྒྱབ་ཆོད་རྔན་ཆེན་ཆེ། །འདེབས་ཚྭ་ཆད་ཀྱང་ཚྭ་མི་ལེན། །ཁེ་ཆེ་ཇ་དར་མོད་ལགས་
ཀྱང་། །ཁལ་མ་ཐམས་ཅད་སྡུག་བསྔལ་ཆེ། །གྲྭ་པ་འཁོར་གྱིས་སྲོག་ཀྱང་སྐྱེལ། །བསྐོལ་ཇ་ཆད་ཀྱང་རྒྱ་འགྲོ་སྤང་། །ཟ་འདོད་སྲུག་འབྱུང་ནས་སྔ་མཁོ། །ཞིང་འདྲ་ཤུགས་ལ་འོང་ལགས་ཀྱང་། །རྣམ་གཡེང་འཇིག་རྟེན་བྱ་བ་མཐུན། །རྩམ་དྲི་ཆད་ཀྱང་ཞིང་མི་རྨོ། །གྲྭ་འཁོར་མང་ཕྱིར་རྩྭ་བཏུ་ན། །ཁེབས་ཆེ་རྟ་ཕྱུགས་སོས་ན་ཡང་། །འབུ་སྲིན་སྟོང་ཕྲག་སྲོག་དང་ཕྲལ། །ཡུལ་མི་རྣམས་དང་རྩོད་པ་འཕེལ། །རྩྭ་སྔོ་མི་ཐུ་དམ་བཅའ་འོ། །འཚོ་སྐྱོང་མི་དགོས་མར་མཁོ་ཡང་། །རྟོལ་པོ་སྣ་ཚོགས་ཐབས་ཀྱིས་གསོད། །སྲོག་བཅད་མང་པོ་སོགས་འགྲོ་བས། །མཛོ་མོ་ཡོད་ཀྱང་ཤེ་མི་བཏང་། །དང་པོ་བསམ་པ་བཟང་ལགས་ཀྱང་། །ཕྱིས་ནས་ཁ་མཆུ་གྱོད་ཀྱི་གཞི། །ནས་འབྲུ་ཡོད་ཀྱང་དོམ་མི་བཏང་། །མི་ཆེན་མགྲོན་པོ་མང་བ་དང་། །ཚོགས་འཁོར་སྒྲུབ་ཆེན་ཤ་མཁོ་ཡང་། །རང་གི་སྒོ་བཤས་ལྟ་ཅི་སྨོས། །གཞན་ལ་བཤའ་བཅུག་ཉོ་བ་སྤངས། །གྲྭ་པ་དགེ་འདུན་སྤྱི་པའི་དཀོར། །ཕྱག་བདེ་ཕྱུག་པར་འདུག་སྲིད་པས། །མཁོ་འོ་འོས་སོ་ཟེར་བ་ཡི། །སྤྱི་རྫས་དཀོར་ལས་ཕྲི་བ་སྤང་། །སྙིང་ནས་དབང་ལུང་
ཁྲིད་འདོད་ཀྱང་། །འབུལ་བ་མེད་ན་མི་གནང་བ། །དམ་ཆོས་ཉོ་ཚོང་བྱེད་པ་སྤང་། །ང་ནི་རྟོགས་པར་ལྡན་པ་དང་། །གསང་སྔགས་རྣལ་འབྱོར་ཡིན་ནོ་ཞེས། །དགོང་ལྟོ་ཤ་དང་ཆང་ལ་སོགས། །ཚོགས་འཁོར་ཡིན་ཀྱང་ཟ་བ་སྤང་། །འཁྲུལ་པ་ཞིག་པ་ཡིན་ནོ་ཞེས། །འདུལ་བའི་ཆོས་དང་མི་མཐུན་པའི། །སྐྱ་ཆས་སྔགས་ཆོས་བྱེད་པ་སྤང་། །དེ་ཙམ་བདག་གིས་བྱ་བཏང་ཡིན། །ཞེན་ལོག་བསྒོམ་གྱི་རྐང་པ་རུ། །གསུངས་པའི་ས་བཅད་མ་བཏང་ཙམ། །ཤུགས་ཀྱི་ཟས་གོས་ལོངས་སྤྱོད་རྣམས། །བྱུང་ཡང་མི་སྤྱོད་དཀའ་ཐུབ་ལ། །སྡུག་སྒུར་བྱེད་པ་མུ་སྟེགས་ལུགས། །ཡིན་ཞེས་རྒྱ་ཆེ་རོལ་པ་ཡི། །མདོ་ལས་ཐུབ་པས་བཀག་པའི་ཕྱིར། །ཤུགས་ཀྱིས་བྱུང་བ་ངས་མི་སྤང་། །ཤུགས་ཀྱིས་བྱུང་ན་ཟས་དང་གོས། །གསེར་སྲང་འབུམ་ཕྲག་རི་བ་ཡང་། །དགེ་སློང་རྣམས་ལ་གནང་ངོ་ཞེས། །དམ་ཆོས་འདུལ་བ་ལས་གསུངས་ཕྱིར། །ཉུང་ཇ་ཙམ་ཞིག་ཐུད་དཀར་ཟ། །ཐེར་ཕྲུག་སྤུ་བོ་ཆེ་ཡང་གྱོན། །བསྔོས་ཤ་མིན་པའི་ཚོགས་ཤ་ནི། །མ་ཟོས་རྩ་ལྟུང་ཡིན་ཕྱིར་དང་། །ཚོགས་ཆང་སོར་མོའི་རྩེ་ལ་རེག །རྟ་གླང་མན་ནས་ཁབ་སྐུད་
ཡན། །གང་བྱུང་ལེན་ཅིང་བྱང་ཆུབ་བསྔོས། །གསེར་དང་དངུལ་སོགས་བྱུང་ན་ཡང་། །དགེ་བའི་ཕྱོགས་སུ་དམིགས་ནས་འཚགས། །མང་ཇ་ཀློག་འདོན་སྒྲུབ་ཆེན་དང་། །བུམ་སྒྲུབ་དགེ་འདུན་འདུ་བའི་སྡེ། །དགེ་ཕྱོགས་གང་འགྲུབ་མ་གཏོགས་པ། །གེལ་སོགས་བདག་འཛིན་སེར་སྣ་སྤང་། །དེ་ཙམ་བདག་གིས་བྱ་བ་ཡི། །བཏང་ཚོད་མཐའ་རུ་ཕྱིན་ངེས་བྱ། །རྐང་བཞིའི་འབུལ་བ་མི་ལེན་དང་། །འབུལ་བ་གཏན་ནས་མི་ལེན་དང་། །བྱང་བུ་མི་བཞུ་ཟེར་བ་སོགས། །གསུངས་མཁན་མང་དུ་བྱུང་སོང་ཡང་། །མཐར་ཕྱིན་གཅིག་ཀྱང་དཀའ་འདུག་པས། །མཐར་ཕྱིན་མིན་པའི་ལོ་ཤས་ཙམ། །བྱ་བ་བཏང་ཡང་ཇོ་བརྫུ་འདྲ། །དེ་ཕྱིར་དེ་འདྲ་ངས་མི་བྱེད། །རང་གི་ཉམས་སུ་ལོན་ཚོད་དང་། །བསྟུན་པའི་བྱ་བཏང་བྱེད་ལུགས་འདི། །རྗེས་འཇུག་རྣམས་ཀྱང་དེ་ལྟར་མཛོད། །ཅེས་ཡོར་སྟོད་དུ་སྨྲས་སོ།། ༈ །།ན་མོ་ཨཱརྱ་པ་ལོ་བྱཱ་ཡེ། ཕྱོགས་བཅུའི་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཡོན་ཕྲིན་ལས་འདུས། །གསང་འདུས་ཐུགས་རྗེ་ཆེན་པོ་ལ། །གསོལ་བ་འདེབས་སོ་ཐུགས་རྗེས་ཟུངས། །
འདིར་འཚོགས་ཁྲོམ་ལ་བྱིན་གྱིས་རློབས། །ཕྱོགས་བཅུའི་སངས་རྒྱས་ཐམས་ཅད་ཀྱི། །ལོངས་སྐུ་འདུས་པའི་ཡེ་ཤེས་ལྔ། །བཅོམ་ལྡན་རིགས་ལྔ་ཡབ་ཡུམ་ལ། །གསོལ་བ་འདེབས་སོ་བྱིན་གྱིས་རློབས། །ཕྱོགས་བཅུའི་སངས་རྒྱས་ཐམས་ཅད་ཀྱི། །ཚོགས་བརྒྱད་ཡུལ་བརྒྱད་ངོ་བོ་འདུས། །སེམས་དཔའ་ལྕམ་དྲལ་བཅུ་དྲུག་ལ། །གསོལ་བ་འདེབས་སོ་བྱིན་གྱིས་རློབས། །ཕྱོགས་བཅུའི་སངས་རྒྱས་ཐམས་ཅད་ཀྱི། །ཕྲིན་ལས་འདུས་པས་རིགས་དྲུག་འདྲེན། །བཅོམ་ལྡན་ཐུབ་པ་དྲུག་པོ་ལ། །གསོལ་བ་འདེབས་སོ་བྱིན་གྱིས་རློབས། །བསྐལ་པ་བཟང་པོ་འདི་ཉིད་ལ། །མཛད་པ་མཐར་ཕྱིན་ཆོས་འཁོར་བསྐོར། །སངས་རྒྱས་སྟོང་དང་རྩ་གཉིས་ལ། །གསོལ་བ་འདེབས་སོ་བྱིན་གྱིས་རློབས། །འཇའ་ལུས་འཆི་མེད་རྡོ་རྗེའི་སྐུ། །རིག་འཛིན་ཆེན་པོ་པདྨ་འབྱུང་། །རྗེ་འབངས་ཉེར་ལྔ་འཁོར་བཅས་ལ། །གསོལ་བ་འདེབས་སོ་བྱིན་གྱིས་རློབས། །རིག་འཛིན་རཏྣ་གླིང་པ་སོགས། །གཏེར་སྟོན་བརྒྱ་དང་རྩ་བརྒྱད་དང་། །ཆོས་བདག་ལས་ཅན་ཐམས་ཅད་ལ། །གསོལ་བ་འདེབས་སོ་བྱིན་གྱིས་རློབས། །སྔགས་སྲུང་སྐྱེས་བུ་སྨྱོ་
ཁ་དང་། །ལུང་བཙན་ལྕམ་དྲལ་ཨ་པ་ར། །མཁའ་རི་ལྕམ་དྲལ་ལ་སོགས་པ། །བཀའ་སྲུང་དམ་ཅན་ཐུགས་དམ་བསྐུལ། །དམ་བཅའ་མ་གཡེལ་ཕྲིན་ལས་མཛོད། །དབང་ཁྲིད་སྒྲུབ་ཆེན་འཛུགས་པ་ལ། །དགྲ་དང་བགེགས་ཀྱི་བར་ཆད་ཟློག །མཐོང་ཐོས་དྲན་རེག་འགྲོ་བ་རྣམས། །ཚེ་འདིར་བཀྲ་ཤིས་བདེ་ལེགས་ཤིང་། །ཕྱི་མ་བདེ་ཆེན་ཞིང་སྐྱེ་བར། །བྱིན་གྱིས་རློབས་ཤིག་སྤྱན་རས་གཟིགས། །ཞེས་པ་ཡོར་སྟོད་དུ་དབང་ཁྲིད་ཚུགས་དུས་བྲིས་པའོ།། ༈ །།ན་མོ་ཨཱརྱ་པ་ལོ་ཡེ། །པོ་གསང་འདུས་ཐུགས་རྗེ་སྤྱན་རས་གཟིགས། །ཐུགས་རྗེ་ཆེན་པོས་སེམས་ཅན་ཀུན། །འཁོར་བའི་སྡུག་བསྔལ་ཐམས་ཅད་སྐྱོབས། །འདི་དང་ཕྱི་མའི་དོན་རྣམས་ཀུན། །ཡིད་བཞིན་ནོར་བུ་ལྟ་བུར་སྩོལ། །བྱམས་པའི་ཞགས་པས་ཁམས་གསུམ་འཆིངས། །སྐུ་མདོག་པདྨ་རཱ་གའི་མདོག །སེམས་ཅན་ཀུན་ལ་རྗེས་སུ་ཆགས། །ཚད་མེད་བཞི་ལྡན་ཕྱག་བཞི་སྟེ། །ཕྱག་གཡས་དང་པོས་སྐྱབས་སྦྱིན་གྱིས། །རྒྱལ་པོའི་འཇིགས་པ་སྐྱོབ་པར་མཛད། །གཡོན་གྱི་དང་པོ་པདྨ་འཛིན། །འཁོར་བའི་སྐྱོན་དང་བྲལ་བར་མཛད། ཕྱག་
གཡས་འོག་མས་ལྕགས་ཀྱུ་ཡིས། །འགྲོ་བ་ཐམས་ཅད་དབང་དུ་སྡུད། །ཕྱག་གཡོན་འོག་མས་ཞགས་པ་ཡིས། །གདུག་པ་ཅན་རྣམས་རབ་ཏུ་འཆིངས། །ཞི་འཛུམ་སྤྱན་གཉིས་འགྲོ་ལ་གཟིགས། །མཚན་དཔེས་དར་དང་རིན་ཆེན་བརྒྱན། །པདྨ་ཟླ་སྟེང་རོལ་སྟབས་བཞུགས། །ཁྱེད་ལ་ཕྱག་འཚལ་སྐྱབས་སུ་མཆི། །བདག་དང་བསྲུང་བྱ་ཐམས་ཅད་ལ། །རྒྱལ་པོའི་དབྱིངས་སྨྱོའི་འཇིགས་པ་ལས། །སྐྱོབ་པར་མཛོད་ཅིག་ཐུགས་རྗེ་ཅན། །ཞེས་ཡོར་སྟོད་ཆོས་རའི་མཇུག་ཏུ་གསོལ་བ་བཏབ་པའོ།། ༈ །།ཀ་ཡེ་ཁ་དོག་ཆར་སྤྲིན་ནག་པོ་འདྲ། །ཁ་གདངས་མཆེ་གཙིགས་ལྗགས་དམར་གློག་ལྟར་འཁྱུག །ག་ཤལ་རྒྱུ་རློན་སྤྲུལ་དང་མི་མགོའི་ཕྲེང་། །ང་རོ་བྷྱོ་བཟློག་ཙཱ་བྷ་ཡ་ཡི་སྒྲ། །ཅ་ཅོའི་སྒྲ་སྒྲོག་ལྷ་སྲིན་སྡེ་བརྒྱད་ཚོགས། །ཆ་ལུགས་དམག་ཆས་བདུད་དཔུང་ལྟ་བུ་རྣམས། །ཇ་ཆང་གསེར་སྐྱེམས་ཚོགས་དང་གཏོར་མས་མཆོད། །ཉ་རྒྱས་ཟླ་ལྟར་འགྲོ་བའི་མུན་སེལ་བའི། །ཏ་ཐཱ་ག་ཏའི་བསྟན་པའི་སྙིང་པོ་འདིར། །ཐ་དད་མེད་ཅིང་མོས་པ་ཡན་ཆད་ཀུན། །ད་ནི་སྲུང་སྐྱོབ་ར་མདའི་དུས་ལ་བབ། །ན་ཚ་དང་ནི་ཆོ་འཕྲུལ་ཅུང་ཟད་ཀྱིས། །
པ་དེ་པུ་དེའི་རྟགས་མཚན་ཕན་པ་མེད། །ཕ་རོལ་དགྲ་བགེགས་མྱུར་དུ་རྩད་ནས་ཆོད། །བ་མོར་ཉི་ཟེར་ཕོག་ལྟར་མྱུར་དུ་ཆོམས། །མ་གཡེལ་མ་གཡེལ་དམ་ཚིག་དུས་ལ་བབ། །རྩྭ་སྐམ་ཕུང་པོར་མེ་དཔུང་བརྒྱབ་པ་ལྟར། །ཚ་ངར་ནུས་པ་ཅི་ཡོད་ད་སྟོན་ཅིག །ཛ་ཡེའི་བསྟན་པ་མྱུར་དུ་རྒྱས་པར་མཛོད། །ཝ་ལེར་དུས་གསུམ་གཟིགས་པའི་པད་འབྱུང་གིས། །ཞྭ་ལྟར་བཀུར་གསུངས་ལུང་བསྟན་སྐྱེས་བུ་ལ། །ཟ་འདོད་ཁ་མཆུ་རྙེད་ཚོལ་བྱེད་པ་དང་། །འ་རེ་འུ་རེའི་གཤེ་སྐུར་འདེབས་པའི་དགྲ། །ཡ་མ་ར་ཙ་བཙན་བདུད་མ་མོ་དང་། །ར་ཞོན་སེང་ཞོན་འབྲུག་ཞོན་སྡེ་བརྒྱད་ཚོགས། །ལ་ཆེན་བཀའ་སྲུང་དམ་ཅན་ཐམས་ཅད་ཀྱིས། །ཤ་ཟོ་ཁྲག་འཐུང་ཐལ་བ་རྡུལ་དུ་རློགས། །ས་ཆ་ཡུལ་ཁམས་འགྲོ་བ་དབང་དུ་སྡུས། །ཧ་ཧའི་གད་མོ་དང་བཅས་གསང་སྔགས་བསྟན། །ཨ་ལ་ལ་ཞེས་དར་ཞིང་རྒྱས་པར་མཛོད། །ཅེས་པ་འདི་ནི་ནུབ་གཅིག་རྨི་ལམ་ནི། །དང་པོ་ཙཀ་ལི་ཆུ་ཚོན་བྱས་འདྲ་ལ། །ཀིང་ཀང་ནག་པོའི་ལྷ་ཚོགས་ཡོངས་རྫོགས་སྐུ། །དེ་ནས་ཚོན་རྫོགས་གསེར་རིས་ཤིན་ཏུ་ལེགས། །དེ་ནས་བྲིས་པ་རང་ཡང་མ་ཡིན་པར། །འཇའ་ཚོན་འདྲ་བ་ཤིན་ཏུ་ལེགས་པར་མཐོང་། །དེ་ཕྱིར་རྟེན་འབྲེལ་ཀ་བསྟོད་བྲིས་པའོ།། །།
ཤོག་ལྷེབ་ ༤༣༠ ནས་ ༥༠༠ བར།
༈ ན་མོ་བཛྲ་ཀྲོ་དྷ་བིར་བ་ཡེ། རིག་འཛིན་བླ་མ་ཐམས་ཅད། །གཅིག་ཏུ་འདུས་པའི་ངོ་བོ། །རྡོ་རྗེ་གྲོ་ལོད་མཁྱེན་ནོ། །དུས་ངན་ལྔ་བརྒྱའི་ཐ་མ། །མཐའ་དམག་བོད་ཡུལ་བཟུང་དུས། །མི་ནད་རླུང་ལྟར་འཚུབ་ཅིང་། །ནོར་ནད་མེ་ལྟར་འབར་དུས། །ཁྱེད་ལ་གསོལ་བ་བཏབ་ན། །ཁྱེད་ཀྱིས་བཟློག་པར་གསུངས་ན། །བདག་གིས་ཐེ་ཚོམ་མེད་པར། །ཁྱེད་ལ་གསོལ་བ་འདེབས་སོ། །ཕྱུགས་ནད་གོད་ཡམས་གློ་ཧོན། །ཐ་མའི་དགྲ་ཇག་ཆོམ་རྐུན། །བཟློག་པའི་དུས་ལ་བབ་ལགས། །དུས་གསུམ་རྒྱལ་བའི་ཡུམ་གཅིག །རི་ཁྲོད་ལོ་མ་ཅན་མ། །ཁྱེད་ཀྱི་མཚན་ཙམ་བརྗོད་ཀྱང་། །མི་ནད་ཕྱུགས་ནད་ཞི་བ། །ཁྱེད་ཀྱི་ཕྲིན་ལས་ཡིན་ན། །བདག་གིས་ཁྱོད་ཀྱི་ཡོན་ཏན། །བརྗོད་ཅིང་ཀུན་ལ་སྤེལ་ན། །བདག་ཉིད་གར་གནས་གར་འགྲོ། །མི་ནད་ཕྱུགས་ནད་ཞི་ཞིང་། །བཀྲ་ཤིས་བདེ་ལེགས་འབྱུང་བ། །ལྷ་མོ་ཁྱེད་རང་མཁྱེན་ནོ། །བསྟན་སྲུང་དུད་སོལ་ལྷ་མོ། །ཁྱོད་མཚན་ཙམ་གཅིག་ཤེས་ཀྱང་། །མི་ནད་ཕྱུགས་ནད་ཞི་བར། །རྡོ་རྗེ་འཆང་གིས་གསུངས་ན། །ཁྱེད་
བསྟེན་མཆོད་ཅིང་བསྟོད་ན། །མི་ནད་ཕྱུགས་ནད་དལ་ཡམས། །ཐམས་ཅད་ཞི་བར་ཁྱེད་མཁྱེན། །སྡེ་བརྒྱད་སྣང་སྲིད་ལྷ་འདྲེ། །མགུར་ལྷ་བརྟན་མ་དགེ་བསྙེན། །ཁྱད་པར་ཡུལ་འདིའི་གཞི་བདག །ཁྱེད་ཅག་སྔོན་ཚེ་སློབ་དཔོན། །པདྨ་འབྱུང་གནས་སྤྱན་སྔར། །ཁས་བླངས་དམ་བཅས་མ་གཡེལ། །སློབ་དཔོན་དེ་ཡི་བརྒྱུད་འཛིན། །རྣལ་འབྱོར་བདག་ཅག་མི་ནོར། །མི་ནད་ཕྱུགས་ནད་གོད་ཁ། །དགྲ་ཇག་ཆོམ་པོའི་གནོད་པ། །ཐམས་ཅད་བཟློག་པར་མཛོད་ཅིག །བཀའ་དང་དམ་ལ་མ་འདའ། །ཆོས་ཉིད་གདོད་ནས་རྣམ་དག །ཀུན་རྫོབ་སྒྱུ་འབྲས་བསླུ་མེད། །རྒྱལ་བ་སྲས་བཅས་ཐུགས་རྗེ། །བདེན་ལྡན་ཀུན་གྱི་བདེན་པས། །ཕྱུགས་ནད་གློ་ཧོན་གནོད་པ། །ཐམས་ཅད་ཞི་བར་གྱུར་ཅིག །དགྲ་ཇག་ཐ་མའི་ཆོམ་རྐུན། །ཐམས་ཅད་མྱུར་དུ་བཟློག་ཅིག །ཨེ་མ་ཀུན་རྫོབ་འཁྲུལ་སྣང་། །མི་ནད་ཕྱུགས་ནད་དགྲ་ཇག །ངོ་བོ་ཡེ་ནས་སྟོང་པ། །ཅི་ཡི་ངོ་བོར་མ་གྲུབ། །སྒྱུ་མ་སྨིག་སྒྱུ་བཞིན་དུ། །བདེན་པར་གྲུབ་པ་མེད་དོ། །དེ་ལྟར་མ་རྟོགས་སེམས་ཅན། །སྒྱུ་མས་བསླུས་པ་ལྟ་བུ། །དེ་ལ་
བཟོད་མེད་སྙིང་རྗེ། །རང་བཞིན་ཤུགས་ལ་འཁྲུངས་པས། །སྟོང་ཉིད་སྙིང་རྗེས་བདེན་པ། །འཁོར་བའི་སྡུག་བསྔལ་འདི་རྣམས། །ཆོས་ཀྱི་དབྱིངས་སུ་བཟློག་ཅིག །འགྲོ་དྲུག་སེམས་ཅན་ཐམས་ཅད། །ཕ་མ་དྲིན་ཅན་ཤ་སྟག །ཡིན་པར་ཤེས་པའི་གནད་ཀྱིས། །འགྲོ་ཀུན་བདེ་བར་འདོད་པ། །དགྲ་གཉེན་ཕྱོགས་རིས་མེད་པས། །བྱམས་པ་ཆེན་པོའི་བདེན་པས། །གོ་ཆ་བླ་ན་མེད་པས། །ནོར་ཕྱུགས་ཐམས་ཅད་སྲུངས་ཤིག །ཡ་ཀི་རྒྱལ་བའི་ཐུགས་རྒྱུད། །མ་ཀི་འགྲོ་བའི་སེམས་རྒྱུད། །རྣལ་འབྱོར་བདག་གི་སེམས་གསུམ། །དབྱེར་མེད་གཅིག་ཏུ་རྟོགས་པས། །ལྟ་བ་འཁོར་འདས་དབྱེར་མེད། །ངེས་པར་བདག་གིས་རྟོགས་ན། །ལྟ་བ་དེ་ཡི་བདེན་པས། །ཕྱུགས་ནད་གོད་ཡམས་ཐམས་ཅད། །ཞི་ཞིང་མེད་པར་གྱུར་ཅིག །ཅེས་པ་འདི་ནི་ཡོར་སྟོད་དུ། །ཐུགས་རྗེ་ཆེན་པོ་གསང་འདུས་ཀྱི། །དབང་ཁྲིད་སྦྲེལ་མ་བཙུགས་པའི་དུས། ཕྱུགས་ནད་ཆེན་པོས་ཀུན་ནས་བསྐོར། །རང་གཞན་ཐམས་ཅད་སྐྲག་པའི་དུས། །ཉམས་དང་རྨི་ལམ་འདྲེས་པའི་སྐབས། །མི་ནི་དཀར་པོ་ཆེ་ཞིང་བརྗིད། །དེ་འདྲ་ཞིག་གིས་འདི་སྐད་དུ། །ཨུ་དོགས་ཟེར་སྙམ་བྱེད་པ་བྱུང་། །དེ་ཕྱིར་རྟེན་འབྲེལ་བྲིས་པ་ཡིན།། ༈ །།
ཀ་ཡེ་གསོན་དང་སྤྱན་རས་གཟིགས་ཀྱི་ལྕམ། །ཁ་ནི་ཤར་དུ་རྒྱུ་བས་ཞི་བ་འགྲུབ། །ག་ལྗང་དྲུག་དཀར་གཡུ་བོ་ཆེན་པོས་བརྒྱན། །ང་ཡི་ཚེ་རབས་གཏན་གྱི་སྲུང་མ་ཁྱོད། །ཅ་ཅོའི་བསྟོད་དབྱངས་འདི་ལ་སྙན་གཏད་འཚལ། །ཆ་ལུགས་བརྒྱ་བྱིན་སྲས་མོ་འདྲ་བ་ལ། །ཇ་ཆང་ཕུད་དང་གཏོར་མའི་མཆོད་པ་འབུལ། །ཉ་རྒྱས་ཟླ་ལྟར་མཛེས་འཛུམ་ལྷ་མོ་ཁྱོད། །ཏ་ཐཱ་ག་ཏའི་བསྟན་པ་མན་ཆད་ནས། །ཐ་ན་བདག་གི་ནོར་ཕྱུགས་ཡན་ཆད་རྣམས། །ད་ནི་མ་གཡེལ་སྲུང་ཞིང་བསྐྱབ་ཏུ་གསོལ། །ན་ཚ་ཤི་ཆད་གོད་ཁ་མ་བཏང་ཞིག །པ་ར་ག་ཏའི་དོན་ལ་མཉམ་བཞག་ཅིང་། །ཕ་རོལ་ཕྱིན་དྲུག་ཉམས་སུ་ལེན་བསམ་པས། །བ་མོར་ཉི་ཟེར་ལྟར་དུ་བར་ཆད་སེལ། །མ་གཅིག་ཁྱེད་ཀྱིས་རྟག་ཏུ་གྲོགས་མཛོད་ལ། །རྩ་རླུང་བྱང་ཆུབ་སེམས་ཀྱི་ཡོན་ཏན་སྤེལ། །ཚ་གྲང་འདུ་བའི་ནད་ཀུན་ཞི་བ་དང་། །ཛ་ཡེའི་གོ་འཕང་འགྲུབ་པའི་སྡོང་གྲོགས་མཛོད། །ཝ་ལེར་དུས་གསུམ་ལེགས་ཉེས་གསལ་པོར་སྟོན། །ཞྭ་ལྟར་ཀུན་གྱིས་གཙུག་ཏུ་བཀུར་བར་མཛོད། །ཟ་འཐུང་ལོངས་སྤྱོད་ཤུགས་ལ་འབྱུང་བ་དང་། །འ་རེ་འུ་རེའི་སྙན་གྲགས་
འབྲུག་ལྟར་སྒྲོག །ཡ་མཚན་ཆེ་བའི་རྟགས་མཚན་དུ་མ་སྟོན། །རྭ་ཅོ་གཉིས་ལྟར་ཟླ་གྲོགས་ཁྱོད་བསྟེན་གྱི། །ལ་ཆེན་ཕྲིན་ལས་ཐམས་ཅད་ཁྱོད་ཀྱིས་སྒྲུབས། །ཤ་ས་ན་འདི་དར་ཞིང་རྒྱས་པ་དང་། །ས་ཆ་གར་འདུག་གར་འགྲོ་འབྲལ་མེད་དུ། །ཧ་ཧའི་གད་མོ་དང་བཅས་ཕྱི་བཞིན་འབྲང་། །ཨ་ལ་ལ་ཧོ་དངོས་གྲུབ་ཐམས་ཅད་སྩོལ། །ཅེས་པ་ཡོར་སྟོད་ལས་བཞིའི་སྦྱིན་སྲེག་ནུབ། །མ་གཅིག་ལྷ་མོ་མཛེས་སྡུག་རྒྱན་གྱིས་བརྒྱན། །ཉམས་ཀྱི་སྐབས་ལ་ཡུད་ཙམ་མཐོང་བས་བྲིས།། ཨ༈ །།ན་མོ་རཏྣ་ཏྲ་ཡཱ་ཡ། དཀོན་མཆོག་རིན་ཆེན་གསུམ་ལ་ཕྱག་འཚལ་ལོ། །ན་མོ་བཛྲ་པཱ་ཎི་ཡེ། གསང་བདག་རྡོ་རྗེ་འཛིན་ལ་ཕྱག་འཚལ་ལོ། །སྨོན་ལམ་ཡོངས་སུ་འགྲུབ་པར་བྱིན་གྱིས་རློབས། །འཕགས་པ་སྤྱན་རས་གཟིགས་ནི་ཐུགས་རྗེའི་བདག །འཇམ་དབྱངས་མཁྱེན་རབ་མཚུངས་པ་མེད་པ་དང་། །ཕྱག་ན་རྡོ་རྗེ་མཐུ་སྟོབས་ཟླ་མེད་པས། །བདེན་པ་ཆེན་པོས་ཕྱུགས་ནད་ཞི་གྱུར་ཅིག །ཐུབ་དབང་གྲངས་མེད་གསུམ་དུ་ཚོགས་བསགས་དང་། །པདྨ་འབྱུང་གནས་རྫུ་འཕྲུལ་བསམ་ལས་འདས། །སྒྲོལ་མ་ཉེར་གཅིག་ཐུགས་རྗེ་མྱུར་བ་ཡི། །བདེན་པ་ཆེན་པོས་
ཕྱུགས་ནད་ཞི་གྱུར་ཅིག །ཆོས་རྣམས་ངོ་བོ་ཡེ་ནས་སྟོང་ཉིད་དང་། །རྣམ་པ་རྟེན་འབྲེལ་བསླུ་བ་མེད་པའི་མཐུས། །ཕྱུགས་ནད་གློ་ཧོན་གནོད་པ་ཞི་གྱུར་ཅིག །བསྐལ་བཟང་འདི་ལ་བཅོམ་ལྡན་རྒྱལ་བ་སྟོང་། །འབྱོན་པར་གསུངས་པའི་ལུང་བསྟན་དེ་བདེན་ན། །བདེན་པ་དེ་ཡིས་ཕྱུགས་ནད་ཞི་གྱུར་ཅིག །འཛམ་གླིང་བྱེ་བ་ཕྲག་བརྒྱའི་ཞིང་ཁམས་སུ། །ཐུབ་དབང་ཨོ་རྒྱན་བྱེ་བ་ཕྲག་བརྒྱ་ནི། །བྱོན་ཅིང་མདོ་སྔགས་ཆོས་འཁོར་བསྐོར་གསུངས་པ། །བདེན་པ་དེ་ཡི་བདེན་པས་ནོར་ནད་ཆོད། །རྒྱ་གར་ཡུལ་དུ་གྲུབ་ཆེན་བརྒྱད་ཅུ་དང་། །བོད་དུ་རྗེ་འབངས་ཉི་ཤུ་རྩ་ལྔ་དང་། །མར་མི་དྭགས་གསུམ་བཀའ་བརྒྱུད་གྲུབ་ཐོབ་སོགས། །མཆོག་ཐུན་དངོས་གྲུབ་ཐོབ་པ་དེ་བདེན་ན། །བདེན་པ་དེ་ཡིས་ཧོན་ནད་ཞི་གྱུར་ཅིག །དགེ་སྡིག་རྒྱུ་འབྲས་བསླུ་བ་མེད་པ་དང་། །རྒྱལ་བའི་བཀའ་ནི་ནམ་ཡང་མི་རྫུན་ཞིང་། །མ་མགོན་ཆོས་སྐྱོང་དམ་ལས་མི་འདའ་ན། །བདེན་པ་དེ་ཡིས་བསྲུང་བྱའི་ནོར་ཕྱུགས་ལ། །ཧོན་གྱི་གནོད་པ་ཐམས་ཅད་ཞི་གྱུར་ཅིག །པད་འབྱུང་གཏེར་ཁ་བྱེ་བ་སར་སྦས་ཤིང་། །གཏེར་སྟོན་བརྒྱ་དང་རྩ་
བརྒྱད་ལ་སོགས་པས། །འདོན་ཞིང་རིམ་པར་འགྲོ་དོན་འབྱུང་བདེན་ན། །ཕྱུགས་ནད་ཧོན་གྱི་གནོད་པ་ཞི་གྱུར་ཅིག །ཐུགས་རྗེ་ཆེན་པོའི་ཡང་སྤྲུལ་སད་ན་ལེགས། །སྤྲུལ་པའི་ཆ་ཤས་ཆགས་མེད་ཡིན་པ་རུ། །ལུང་བསྟན་བདེན་ན་དེ་ཡི་བདེན་སྟོབས་ཀྱིས། །བསྲུང་བྱའི་ནོར་ཕྱུགས་ཧོན་གྱིས་མི་ཚུགས་ཤོག །ལོཙྪཅོག་རོ་ཀླུ་ཡི་རྒྱལ་མཚན་གྱིས། །སྤྲུལ་པའི་ཆ་ཤས་ཆགས་མེད་ཡིན་ནོ་ཞེས། །བསམ་ཡས་གཏེར་ཁའི་ཤོག་སེར་ལས་བྱུང་བས། །བདེན་ན་དེ་ཡིས་བདེན་པས་བསྲུང་བྱ་ཡི། །ནོར་ཕྱུགས་ཧོན་གྱི་གནོད་པས་མི་ཚུགས་ཤོག །བོད་རྗེའི་གདུང་དང་མཁའ་སྤྱོད་པ་ཡི་གདུང་། །རིགས་རྒྱུད་ཆགས་མེད་ཡིན་པར་རློམ་པ་དེ། །བདེན་ན་དེ་ཡི་བདེན་པས་བསྲུང་བྱ་ཡི། །ནོར་ཕྱུགས་རྣམས་ལ་ཧོན་གྱིས་མི་ཚུགས་ཤོག །གང་གི་སྤྲོས་བྲལ་ཕྱག་རྒྱ་ཆེན་པོའི་དོན། །མ་ནོར་མངོན་སུམ་རྟོགས་པར་རློམ་པ་དང་། །སྡོམ་གསུམ་རྩ་བ་མ་ཉམས་སྐྱོན་མེད་པར། །སུམ་ལྡན་རྡོ་རྗེ་འཛིན་པ་ཡིན་ངེས་ན། །དེ་ཡི་བདེན་པས་ཧོན་གྱི་འཇིགས་བྲལ་ཤོག །སྡེ་དཔོན་སུམ་ཅུ་ལྷ་སྲིན་སྡེ་བརྒྱད་ཚོགས། །མགུར་ལྷ་བརྟན་མ་བོད་ཀྱི་དགེ་
བསྙེན་རྣམས། །སློབ་དཔོན་པདྨའི་དམ་ལ་མི་འདའ་ན། །དེ་ཡི་བདེན་པས་ཧོན་ནད་གནོད་པ་ཟློག །འཕགས་པ་བཞི་དང་འཇིག་རྟེན་སྐྱོང་བ་དང་། །བདེན་ལྡན་ཇི་སྙེད་བདེན་པའི་ནུས་མཐུ་ཡིས། །བསྲུང་བྱའི་ནོར་ཕྱུགས་ཧོན་གྱིས་མི་ཚུགས་ཤོག །ནོར་ཕྱུགས་གོད་ཁ་མེད་ཅིང་འཕེལ་གྱུར་ཅིག །ཏདྱཐཱ། པཉྩ་དྲི་ཡ་ཨ་བ་བྷོ་དྷ་ན་ཡེ་སྭཱ་ཧཱ། ཞེས་པ་འདི་ནི་ཉལ་ཁ་བདེན་སྟོབས་ཀྱི་སྨོན་ལམ་འགའ་རེ་བཏབ་ནུབ་རྨི་ལམ་དུ་ཕྱག་ན་རྡོ་རྗེས་སངས་རྒྱས་ཐམས་ཅད་ལ། ཅི་བསམ་འགྲུབ་པའི་གདམས་ངག་གནོང་ཞུས་པས། ཁྱེད་རང་སྨོན་ལམ་ཐོབ་དང་འགྲུབ་གསུངས་ཞེས། གཏམ་རྒྱུད་འདྲ་བའི་སྒྲ་ཞིག་གྲག་པ་ལ། བརྟེན་ནས་ཕྱི་ནུབ་རྟེན་འབྲེལ་བྱས་ནས་བྲིས།། ༈ ན་མོ་གུ་རུ་དེ་ཝ་ཌཱཀི་ནི་ཧཱུཾ། ཆོས་འབྲེལ་ཐོབ་པའི་བླ་མ་མང་ལགས་ཀྱང་། །ད་བསམ་ཞིང་བཀའ་དྲིན་ཆེ་བ་དེ། །ཕ་ཀུན་མཁྱེན་ཆོས་ཀྱི་དབང་ཕྱུག་ཡིན། །སྐུ་ཐ་དད་ཀྱང་ངོ་བོ་དབྱེར་མེད་པ། །རྗེ་པདྨ་འབྱུང་གནས་སྙིང་ནས་དྲན། །དབང་ཨུཎྜ་ལུང་ཐོབ་ཀྱི་ཡི་དམ་མང་ལགས་ཀྱང་། །ཚེ་འདི་ཕྱིའི་བློ་སྙིང་གཏད་ས་དེ། །དཔལ་རྒྱལ་བ་རྒྱ་མཚོ་སྤྱན་རས་གཟིགས། །དོན་དབྱེར་མེད་ཐུགས་རྗེ་ཁྲོས་པའི་སྐུ། །དཔལ་གུ་
བས་རུ་དྲག་པོ་སྙིང་ནས་དྲན། །མ་ཌཱཀི་བྱེ་བ་བསམ་ཡས་ཀྱང་། །དོན་དབང་བཞི་ཐོབ་ཅིང་དད་པའི་ཡུལ། །དཔལ་ལྷན་སྐྱེས་རྡོ་རྗེ་རྣལ་འབྱོར་མ། །དེ་ཐུགས་རྗེ་དྲག་པོར་བཞེངས་མཛད་པ། །མ་སེང་ཧ་མུ་ཁ་སྙིང་ནས་དྲན། །སྐྱབས་རྩ་བ་གསུམ་པོ་ཁྱེད་རྣམས་ལ། །མི་བདག་གི་སྐྱིད་སྡུག་བློ་གཏད་བཅལ། །ད་མཐོར་བཏང་དམར་བཏང་ཁྱེད་རྣམས་མཁྱེན། །དུས་དེང་སང་སྙིགས་མའི་ཡང་མཐའ་ལ། །བདག་འགྲོ་དོན་འགྲུབ་པར་ཐུགས་རྗེས་ཟུངས། །སྤྱིར་འབྲེལ་ཚད་དོན་དང་ལྡན་པ་དང་། །སྒོས་སྒྲུབ་རྒྱུད་བསྟན་ལ་ཕན་པ་དང་། །འཁོར་རྗེས་འཇུག་ཆོས་ཚུགས་ཟིན་པ་དང་། །དགྲ་ནད་གདོན་བར་ཆད་མེད་པ་ཞིག །ལྷ་རྩ་གསུམ་ཁྱེད་ཀྱི་བྱིན་གྱིས་རློབས། །ཅེས་པ་འདི་ནི་ཡོར་སྟོད་ཆོས་རའི་མཇུག །ནོར་ནད་ལ་སོགས་དོགས་པ་ཆེ་བ་ཡིས། །རང་ཡུལ་ངོས་སུ་ཁལ་མ་འོང་ཨེ་ཡོད། །བསམ་ཞིང་རྩ་བ་གསུམ་ལ་གསོལ་བཏབ་པས། །རང་མདུན་མར་ཁུ་ཁོལ་མ་སྐྱོགས་ཆེན་གང་། །གཡང་གི་ཁ་ཞག་ཡིན་ཟེར་འདུག་པ་དེ། །ཕར་ལ་ཁྱེར་ནི་ཨེ་ཕོད་བསམ་པ་ལ། །ཁྱེར་ནས་ཕོ་མོ་མ་ཤོར་ཕྱིན་པ་རྨིས། །དེ་ཉིད་ལེགས་སྙམ་གཞན་ཡང་རང་གི་ནོར། །རང་ཡུལ་ལུང་པ་བཙན་པོར་བཙུད་པ་ཡིས། །ད་ནི་དགྲ་དོགས་མེད་དོ་སེམས་ལ་
སོགས། །རྨི་ལམ་ལུང་བསྟན་བྱུང་ཕྱིར་གསོལ་བ་དེ་བཏབ་བོ།། །།ན་མོ་བཛྲ་དྷ་ར་ཡེ། འགྲོ་དྲུག་སྤྱི་དང་ཁྱད་པར་དུ། །གངས་ཅན་བོད་ཀྱི་གཉེན་གཅིག་པོ། །ཨོ་རྒྱན་རྗེ་ལ་གསོལ་བ་འདེབས། །ཁ་བ་ཅན་གྱི་རྒྱལ་ཁམས་སུ། །སྒྲུབ་བརྒྱུད་བསྟན་པ་དར་བ་དང། །སྐྱེས་ཆེན་དབུ་འཕང་མཐོ་བ་དང་། །བསྟན་ལ་གནོད་བྱེད་མེད་པ་དང་། །མི་ནད་ཕྱུགས་ནད་ཞི་བ་དང་། །ལོ་ཕྱུགས་ལེགས་པར་བྱིན་གྱིས་རློབས། །འགྲོ་དྲུག་སྤྱི་དང་ཁྱད་པར་དུ། །གངས་ཅན་བོད་ཀྱི་ལྷ་གཅིག་པོ། །སྤྱན་པ་རས་གཟིགས་ལ་གསོལ་བ་འདེབས། །ཁ་བ་ཅན་ལྗོངས་བོད་ཡུལ་འདིར། །སྒྲུབ་བརྒྱུད་བསྟན་པ་དར་བ་དང་། །བསྟན་འཛིན་དབུ་འཕང་མཐོ་བ་དང་། །བསྟན་ལ་གནོད་བྱེད་མེད་པ་དང་། །མི་ཕྱུགས་དལ་ཡམས་ཞི་བ་དང་། །ལོ་ལེགས་འབྲུ་འཕེལ་བྱིན་གྱིས་རློབས། །བོད་ཡུལ་གནས་ཆེན་བརྒྱ་རྩའི་བདག །མགོན་པོ་སེང་གདོང་ཡབ་ཡུམ་་ལ། །གསོལ་བ་འདེབས་སོ་མཐུ་རྩལ་བསྐྱེད། །ཁ་བ་ཅན་གྱི་ཞིང་ཁམས་སུ། །སྒྲུབ་བརྒྱུད་བསྟན་པ་དར་བ་དང་། །སྐྱེས་བུ་དམ་པ་དབུ་འཕང་མཐོ། །ཕྱུགས་ནད་མི་ནད་
དལ་ཡམས་ཞི། །བསྟན་ལ་གནོད་བྱེད་མཐར་བྱེད་ཅིང་། །ལོ་ལེགས་བཀྲ་ཤིས་བདེ་ལེགས་སྩོལ། །ཅེས་པ་ཡོར་སྟོད་ཆོས་ར་གྲོལ་ཁ་ནུབ། །གཉིད་པ་མ་ཡིན་ཉམས་ཀྱི་སྣང་བ་ལ། །བྲིས་པ་ཡང་མ་ཡིན་ཡི་གེ་འབྲུ་མང་པོ། །ཆེ་ཞིང་གསལ་བ་མིག་གི་ཐད་དུ་སྣང་། །དེ་དག་བཏོན་པས་དེ་ཡི་དོན་ནི་འདི། །ལོ་འདི་སར་ནས་སྒྲུབ་བརྒྱུད་བསྟན་པ་དར། །བསྟན་ལ་གནོད་བྱེད་རཱ་ཛ་ས་མཐར་འགྲོ། །ནོར་ནད་ཧོན་གྱི་གནོད་པ་ཆེར་མི་འབྱུང་། །ཞེས་པའི་དོན་ནི་འལ་འོལ་གསལ་སྙམ་བྱེད། །དེ་ཕྱིར་གསོལ་འདེབས་འདི་ཡང་བྲིས་པ་ཡིན། །ཡོར་སྟོད་དེ་རུ་ཞག་པོ་བཅུ་དགུ་ཙམ། །ཐུགས་རྗེ་ཆེན་པོའི་དབང་ཁྲིད་སྦྲེལ་མ་ལ། །བར་ཆད་མེད་ཅིང་ཁྲོམ་ལ་ན་ཚ་མེད། །གྲོ་རྫོང་བླ་མ་ལ་སོགས་སེར་མོ་བ། །གསར་རྙིང་དབང་ལུང་མང་ཞིག་འཕེལ་བ་དང་། །དགེ་ཚུལ་སྒྲུབ་མི་བཅུ་གཅིག་སྐྲ་ཕུད་གཉིས། །ཡིག་དྲུག་དུང་ཕྱུར་གཅིག་དང་བྱེ་བ་ནི། །བརྒྱད་ཅུའི་ཁས་ལེན་བྱུང་ཞིང་ཚུར་བཏེགས་ནས། །མཚམས་བསྡམ་རེ་ཞིག་ཐུགས་དམ་སྐུ་རིམ་བསྒྲུབས།། ༈ །།ན་མོ་གུ་རུ་བཛྲ་ཀྲོ་དྷ་བིར་བ་ཡེ། རྒྱལ་བ་ཀུན་གྱི་ངོ་བོ་པདྨ་འབྱུང་། །ལྷ་སྲིན་འདུལ་ཕྱིར་རྡོ་རྗེ་ཁྲོ་བོ་ལོད། །དེ་ཉིད་ཞི་ཚུལ་ཆོས་དབྱིངས་རྡོ་རྗེ་དང་། །ཁྲོ་ཚུལ་སྟོན་པ་བདུད་འདུལ་རྡོ་རྗེ་ལ། །གསོལ་བ་འདེབས་སོ་དེང་འདིར་ཐུགས་རྗེས་གཟིགས། །བསྟན་དང་བསྟན་
འཛིན་དང་བཅས་བོད་ཁམས་ཀྱི། །བར་ཆད་བདུད་དང་དམ་སྲི་བཟློག་ཏུ་གསོལ། །བླ་མེད་ཡང་གསང་ཨ་ཏིའི་བསྟན་པ་དང་། །བསྟན་འཛིན་རྣམས་ཀྱི་དབུ་འཕང་བསྟོད་དུ་གསོལ། །མི་ནད་ཕྱུགས་ནད་དལ་ཡམས་བཟློག་ཏུ་གསོལ། །རིག་འཛིན་སྟོབས་བཅུ་མངའ་བ་ཁྱེད་ཀྱི་མཐུས། །ཟབ་གཏེར་བསྟན་པ་ཕྱོགས་བཅུར་རྒྱས་པ་དང་། །བསྟན་འཛིན་མི་འགྱུར་རྡོ་རྗེ་ཞབས་བརྟན་ཅིང་། །བསམ་པ་ལྷུན་གྱིས་གྲུབ་པར་བྱིན་གྱིས་རློབས། །བདག་ཀྱང་ཁྱེད་ལྟར་ནུས་པའི་སྟོབས་རྒྱས་ནས། །བསྟན་དང་འགྲོ་བའི་དཔལ་དུ་འགྱུར་བར་ཤོག །ཅེས་པ་རྒྱལ་གྱི་ཟླ་བའི་ཚེས་བརྒྱད་ནུབ། །རབ་རིབ་འཁྲུལ་བའི་བག་ཆགས་རྨི་ལམ་ལ། །རང་ཉིད་རྡོ་རྗེ་གྲོ་ལོད་བསྒོམས་བྱས་པས། །ཕོད་ཁ་ལ་སོགས་མངོན་སུམ་ལྟ་བུར་གྱུར། །ཕུར་བུ་ཕྱོགས་བཅུར་འདྲིལ་ཞིང་འཆམས་པ་དང་། །རྒྱལ་དབང་ཆོས་དབྱིངས་རྡོ་རྗེ་དེ་ཉིད་ཀྱང་། །ཁྲོ་ལོད་ཆ་ལུགས་འདྲ་བའི་སྔགས་ཆས་མཛད། །ཟངས་ཀྱི་མཆོད་ཆ་འདྲ་བ་མང་པོ་དང་། །རྡོ་ཡི་པར་བུ་གཏེར་ནས་བཏོན་པ་དང་། །མྱོང་གྲོལ་དམ་རྫས་གཅིག་ཀྱང་གནང་གྲབ་དང་། །ཤོག་སེར་སཾ་སྐྲི་ཏ་ཡི་ཡི་གེ་གཅིག །ཕབ་རྒྱུ་ཡོད་གསུངས་ཕབ་གྲབ་མཛད་པ་དང་། །ཤར་ཕྱོགས་ས་མཐར་འགྲོ་ལ་ཕན་པའི་ཕྱིར། །དངུལ་གྱི་གཏེར་ཁ་ཆེན་པོ་ཕྱེས་ཡོད་གསུངས། །
གཞན་ཡང་དེ་སྐོར་ས་ཕྱོགས་འདི་ཉིད་དུ། །རྒྱལ་དབང་འོད་མཚན་དབང་པོ་དེ་ཉིད་ཀྱི། །ཕྲིན་ལས་འབྱུང་བའི་ལྟས་ཀྱང་འགའ་རྨིས་པས། །ཁྲོ་བོ་ལོད་ལ་གསོལ་བ་བཏབ་པའོ། །དེ་ཚེ་རྨི་ལམ་རྒྱལ་བའི་དབང་པོའི་གསུངས། །བདེ་བ་ཅན་ནས་འབྱོན་པའི་སྐྱེས་བུ་ནི། །བེ་རོ་ཙ་ན་ལ་སོགས་བཞི་དང་ནི། །ལབ་སྒྲོན་མ་གཅིག་ཞྭ་མ་ལ་སོགས་བཞི། །སྤྲུལ་པ་དང་པོ་དངོས་སུ་བཞུགས་པ་ཡི། །ཡེ་ཤེས་ཌཱཀིའི་རྣམ་འཕྲུལ་བུད་མེད་གཅིག །ངོས་འཛིན་ཁྲི་འདོན་མཛད་ཚུལ་ཟུར་ཙམ་གསུངས།། ༈ །།ན་མོ་གུ་རུ་བཛྲ་མ་ཧཱ་ཡེ། ཕྱོགས་བཅུ་དུས་བཞིའི་རྒྱལ་བ་སྲས་བཅས་པའི། །མཐུ་སྟོབས་ཐུགས་རྗེ་ནུས་པ་གཅིག་བསྡུས་ནས། །སྙིགས་དུས་འདུལ་དཀའི་སེམས་ཅན་འདུལ་བ་ལ། །དབང་བསྐུར་བཀའ་བསྒོ་བྱིན་གྱིས་བརླབས་པའི་མཐུས། །ཇི་ལྟར་སྙིགས་དུས་བཞིན་དུ་ཐུགས་རྗེ་དང་། །ནུས་པ་ཆེ་ཞེས་མྱུར་བར་ཞལ་བཞེས་པའི། །པདྨ་ཐོད་ཕྲེང་རྩལ་ལ་གསོལ་བ་འདེབས། །རེ་ས་གཞན་ན་མེད་དོ་ཐུགས་རྗེས་གཟིགས། །བོད་ཡུལ་བསྟན་དང་འགྲོ་ལ་ཕན་པའི་ཕྱིར། །མི་འགྱུར་རྡོ་རྗེ་བསྐལ་པར་ཞབས་བརྟན་ཅིང་། །བར་ཆད་མེད་པར་བྱིན་གྱིས་བརླབ་ཏུ་གསོལ། །བཀའ་དགོངས་ཕུར་གསུམ་ཞི་ཁྲོ་རབ་འབྱམས་རྣམས། །བླ་མེད་ཨ་
ཏིའི་བསྟན་པ་རྒྱས་པའི་ཕྱིར། །མི་འགྱུར་རྡོ་རྗེ་ལོ་བརྒྱར་ཞབས་བརྟན་ཅིང་། །བར་ཆད་མེད་པའི་དངོས་གྲུབ་བསྩལ་དུ་གསོལ། །སྔགས་བདག་མ་ནིང་དམ་ཅན་རྒྱ་མཚོའི་ཚོགས། །ཟབ་གཏེར་བསྟན་པ་དར་ཞིང་རྒྱས་པའི་ཕྱིར། །བསྟན་འཛིན་མི་འགྱུར་རྡོ་རྗེ་འདི་ཉིད་ལ། །གནོད་བྱེད་དགྲ་བགེགས་ཐམས་ཅད་བཟློག་པ་དང་། །བསམ་པ་ཡིད་བཞིན་འགྲུབ་པའི་ཕྲིན་ལས་མཛོད། །མདོར་ན་རིག་འཛིན་མི་འགྱུར་རྡོ་རྗེ་ཡི། །གྲངས་མེད་བསྐལ་པའི་གོང་ནས་ཐུགས་བསྐྱེད་དང་། །སྨོན་ལམ་རྣམ་དག་ཚོགས་གཉིས་རྒྱ་ཆེན་པོ། །བསགས་པའི་བདེན་པ་ཆེན་པོ་གང་དེ་ཡིས། །མི་འགྱུར་རྡོ་རྗེ་སྐུ་ཚེ་བརྟན་པ་དང་། །དགྲ་བགེགས་དམ་སྲིའི་གནོད་པ་མེད་པ་དང་། །རང་སྐལ་ཟབ་གཏེར་བརྒྱ་རྩ་གེགས་མེད་དུ། །ཐོན་ནས་པད་འབྱུང་དགོངས་པ་རྫོགས་བྱེད་ཤོག །ཅེས་པ་འདི་ནི་སྟོབས་ཆེན་གླང་གི་ལོ། །རྒྱལ་གྱི་ཟླ་བའི་ཡར་ཚེས་བཅུ་ཡི་ཉིན། ༧ རཱ་ག་ཨ་སྱས་གསོལ་བ་བཏབ་པའོ།། ན་མོ་ལོ་ཀེ་ཤྭ་ར་ཡེ། ཐུགས་རྗེ་ཆེན་པོ་ཕྱག་སྟོང་བཅུ་གཅིག་ཞལ། །སྤྱན་སྟོང་སྤྲུལ་པའི་འོད་ཟེར་འཛམ་གླིང་འདིར། །བསྐལ་
བཟང་རྒྱལ་བ་སྟོང་ཕྲག་འབྱོན་པ་ཡི། །ཐ་མ་མོས་པ་ཞེས་བྱར་འཚང་རྒྱ་ཞིང་། །འཁོར་དང་སྐུ་ཚེའི་འགྲོ་དོན་བསྟན་པའི་ཡུན། །སངས་རྒྱས་སྟོང་དང་མཉམ་པར་འགྱུར་རོ་ཞེས། །དམ་བཅའ་མི་འཇིགས་སེང་གེའི་སྒྲ་སྒྲོག་པ། །ཚེར་ལུང་པར་གྲགས་རྣམས་ལ་གསོལ་བ་འདེབས། །བདག་དང་འགྲོ་ལ་ཐུགས་རྗེས་ཉེར་དགོངས་ལ། །འགྱུར་མེད་རྡོ་རྗེ་ལྟ་བུར་ཞབས་བརྟན་གསོལ། །གྲུབ་ཆེན་བརྒྱད་ཅུའི་སྤྱི་སྐྱེས་ས་ར་ཧ། །དེ་ཡི་གསུང་སྤྲུལ་རྒྱལ་བ་རྒོད་ཚང་པ། །གངས་ཅན་ལྗོངས་འདིར་ཕྱག་ཆེན་བསྟན་པའི་བདག །དེ་ཡི་རྣམ་འཕྲུལ་སྐྱེ་བའི་ཕྲེང་བ་ཅན། །དཀོན་མཆོག་བསྟན་འཛིན་ཞབས་ལ་གུས་ཕྱག་འཚལ། །གྲུབ་ཆེན་རྨ་སེའི་བསྟན་དང་བསྟན་འཛིན་པ། །བརྩེ་བར་དགོངས་ཏེ་ཡུན་རིང་ཞབས་བརྟན་གསོལ། །གྲུབ་ཆེན་བརྒྱད་ཀྱི་ཡ་གྱལ་ཀུ་ཀུ་རི། །འཇའ་ལུས་མཁའ་སྤྱོད་གྲུབ་པའི་འོད་ཟེར་ལས། །སྤྱི་ཏི་ཛྙཱ་ན་འདན་མ་གྲུབ་ཐོབ་སོགས། །སྐྱེས་རྒྱུད་སྤྲུལ་པས་འགྲོ་བའི་དོན་མཛད་པ། །བདེ་ལེགས་སྙིང་པོའི་ཞབས་ལ་གུས་པས་འདུད། །འགྲོ་ལ་ཕན་ཕྱིར་ལོ་བརྒྱར་ཞབས་བརྟན་གསོལ། །སྤྲུལ་པའི་སྐུ་མཆོག་རྣམ་གསུམ་བསྐྱེད་
པའི་ཡུམ། །ངེས་པའི་དོན་ལ་ཡེ་ཤེས་ཌཱཀི་སྟེ། །ཀུན་རྫོབ་གདུལ་བྱ་སྣང་ངོར་ཐ་མལ་ཚུལ། །སྒྱུ་ལུས་གཡར་པོ་ཞིག་པའི་ཚུལ་སྟོན་ཚེ། །གནས་གསུམ་དཔའ་བོ་མཁའ་འགྲོའི་ཚོགས་རྣམས་ཀྱིས། །གདུགས་དང་རྒྱལ་མཚན་ལ་སོགས་མཆོད་པའི་སྤྲིན། །མེ་ཏོག་ཆར་འབེབས་རོལ་མོའི་སྒྲ་དང་བཅས། །འོག་མིན་བདེ་ཆེན་ཞིང་དུ་ཁྲིད་པར་ཤོག །ཞིང་དེར་པདྨའི་སྒྲུབ་ལ་བརྫུས་སྐྱེས་ནས། །ཀུན་ཏུ་བཟང་མོ་ཉིད་དང་དབྱེར་མེད་ནས། །གང་འདུལ་སྤྲུལ་པ་བྱེ་བ་ཕྲག་བརྒྱ་ཡིས། །ནམ་མཁའི་མཐའ་མཉམ་འགྲོ་བ་འདྲེན་པ་ལ། །རྡོ་རྗེ་རྣལ་འབྱོར་མ་དང་དབྱེར་མེད་ཤོག །ཅེས་པ་ཟུར་མང་ནས་སྤྲུལ་སྐུ་མཆེད་གསུམ་གྱི་མ་ཡུམ་ཞིང་བརྗེ་བར་ཉེའོ་ཞེས་རྟ་བཞི་བཅུའི་ནང་ནས་གདམས་པ་ཡིན་ཟེར་བའི་ཆིབས་པ་གཉིས་བསྐུར་ནས་མ་ཡུམ་ལ་བྱང་བུ་དང་བསྔོ་སྨོན་གྱིས་གསུངས་དུས་བྲིས་པའོ།། ༈ །།ན་མོ་རཏྣ་ཏྲ་ཡཱ་ཡ། བཅོམ་ལྡན་རྒྱལ་བ་ཤཱཀྱ་ཐུབ་དབང་གི །བྱང་ཕྱོགས་རྒྱུད་དུ་བསྟན་ཨུ་པ་རྒྱས་པ་དང་། །བསྟན་པ་ནུབ་ཁ་ཟབ་མོའི་ཆོས་དར་བར། །ལུང་བསྟན་དེ་ལ་བདེན་པ་ཡོད་ན་ནི། །ད་ནི་མྱུར་དུ་སྒྲུབ་བརྒྱུད་བསྟན་པ་ནི། །ཉི་མ་ཤར་བ་ལྟ་བུར་འབྱུང་
གྱུར་ཅིག །སྤྱན་རས་གཟིགས་ཀྱིས་བོད་ཡུལ་བདག་བཟུང་ནས། །ཆོས་རྒྱལ་མ་གཏོགས་སྡིག་རྒྱལ་མི་འབྱུང་ཞིང་། །གལ་ཏེ་བྱུང་ན་དེ་མ་ཐག་འདུལ་ཞེས། །གསུངས་པ་བདེན་ན་བསྟན་དགྲ་ད་ཐུལ་ཞིག །སྲོང་བཙན་སྒམ་པོས་ལྔ་བརྒྱ་ཐ་མའི་དུས། །བོད་དུ་བསྟན་པ་ཤིན་ཏུ་རྒྱས་གསུངས་པ། །བདེན་ན་ད་ནི་སྒྲུབ་བརྒྱུད་བསྟན་པ་ནི། །མྱུར་བ་ཉིད་དུ་ཤིན་ཏུ་རྒྱས་གྱུར་ཅིག །ནཱ་རོས་མར་པ་བོད་ཁམས་འདུལ་བར་བསྒོས། །ཆོས་བརྒྱུད་ཆུ་བོའི་གཞུང་ལྟར་ལུང་བསྟན་པ། །བདེན་ན་ད་ནི་མར་པའི་བསྟན་པའི་སྲོལ། །དབྱར་གྱི་ཆུ་བོ་བཞིན་དུ་འཕེལ་གྱུར་ཅིག །མར་པས་མི་ལའི་ཉམས་དང་རྟོགས་པའི་བརྒྱུད། །ཐུབ་བསྟན་ཇི་སྲིད་གནས་བར་མི་འཆད་པར། །ལུང་བསྟན་བདེན་ན་མི་ལའི་བསྟན་པའི་གཞུང་། །ད་ནི་མྱུར་དུ་འཕེལ་ཞིང་རྒྱས་གྱུར་ཅིག །མི་ལས་མཉམ་མེད་དྭགས་པོ་ལྷ་རྗེ་ཡི། །རྗེས་འཇུག་སེར་ཆགས་བསྟན་པ་ནི། །དར་ཞིང་རྒྱས་པར་ལུང་བསྟན་པ། །བདེན་ན་དྭགས་རྒྱུད་བསྟན་པའི་གཞུང་། །ད་ནི་མྱུར་དུ་རྒྱས་གྱུར་ཅིག །དུས་གསུམ་མཁྱེན་པས་རང་གི་བསྟན། །སྡོང་རུལ་ལ་ནི་མེ་ཟིན་ལྟར། །སངས་རྒྱས་
བསྟན་པ་གནས་ཀྱི་བར། །རྒྱུན་མི་འཆད་པར་ལུང་བསྟན་པ། །བསྟན་པ་དུ་བ་ཙམ་ལས་མེད། །ད་ནི་རླུང་ཆེན་མྱུར་སྦུད་ཤོག །མ་མགོན་དམ་ཅན་རྒྱ་མཚོ་ཡིས། །པཀིའི་སྐྱེས་རྒྱུད་ཐམས་ཅད་ཀྱི། །ཕྲིན་ལས་བསྒྲུབ་པར་ཡང་ཡང་དུ། །ཞལ་བཞེས་བརྫུན་དུ་མི་གཏོང་ན། །ད་ནི་ཕྲིན་ལས་དུས་ལ་བབ། །ཁྱད་པར་རང་བྱུང་རྒྱལ་མོ་ཡི། །དུས་མཁྱེན་བརྒྱུད་པ་འཛིན་རྣམས་ཀྱིས། །སྒྲུབ་ཐབས་རྒྱས་པ་མི་ཤེས་ཀྱང་། །སྡོང་གྲོགས་མཛད་པར་དམ་བཅས་ནི། །ད་ནི་དམ་བཅའ་དུས་ལ་བབ། །དྭགས་པོས་དུས་གསུམ་མཁྱེན་པ་ལ། །ཕྲིན་ལས་དབུས་གཙང་ཁམས་སུ་ཁྱབ། །པཀཱིའི་རྨ་ཟླ་སྒང་ཚུན་ཆད། །བུ་སློབ་བསྟན་པ་ཁྱབ་བོ་ཞེས། །གསུངས་པ་བདེན་ན་བུ་སློབ་དང་། །བསྟན་པ་མྱུར་དུ་ཁྱབ་གྱུར་ཅིག །ཁྱད་པར་སློབ་དཔོན་པདྨ་ཡིས། །ཀརྨའི་མིང་ཅན་བཅུ་གསུམ་གྱིས། །མཐའ་དམག་བཟློག་ཅིང་འདུལ་བ་དང་། །འབྲེལ་ཚད་ལྟ་བདེ་ཆེན་ཞིང་འདྲེན་པར། །ལུང་བསྟན་བདེན་ན་བསྟན་པ་ལ། །གནོད་པར་བྱེད་རྣམས་མྱུར་བཟློག་ཅིང་། །གངས་ཅན་གདུལ་བྱ་འདུལ་གྱུར་ཅིག །སངས་རྒྱས་གཞན་ཕན་
རྣམ་རོལ་དང་། །ས་ར་ཧ་སོགས་རྣམ་པར་འཕྲུལ། །ཁྲོ་རྒྱལ་རྟ་མགྲིན་ངོ་བོ་རུ། །ཆོས་དབྱིངས་རྡོ་རྗེས་ལུང་བསྟན་ཞིང་། །མ་འོངས་དྲུག་པ་སེང་གེ་རུ། །འགྱུར་བར་གསུངས་པ་བདེན་ན་ནི། །ད་ནི་བསྟན་པ་མྱུར་འཕེལ་ཤོག །སངས་རྒྱས་དཀོན་མཆོག་ཡན་ལག་དང་། །ཕྱོགས་གླང་ཁོལ་པོ་དགའ་ལ་སོགས། །གར་དབང་རྡོ་རྗེ་འཆང་ངོ་བོ། །ད་ལྟ་ཡེ་ཤེས་སྙིང་པོ་སྟེ། །མ་འོངས་རྒྱལ་བ་བྱམས་པ་རུ། །འབྱུང་བར་གསུངས་པ་དེ་བདེན་ན། །བདེན་པས་བསྟན་པ་མྱུར་འཕེལ་ཤོག །ཌོམྦི་ཧེ་རུ་ཀ་ཆེན་པོ། །བློརས་ཆེན་ལ་སོགས་ངོ་བོ་སྟེ། །རྡོ་རྗེ་བེར་ཅན་དབྱེར་མེད་པ། །ད་ལྟ་སི་ཏུ་སྤྲུལ་པའི་སྐུ། །གསུངས་པ་བདེན་ན་བདེན་སྟོབས་ཀྱིས། །ཉིད་ཀྱི་བསྟན་པ་མྱུར་འཕེལ་ཤོག །ཁྲི་སྲོང་ལྡེའུ་བཙན་སྤྲུལ་པའི་ཆ། །དར་མ་མདོ་སྡེ་རིན་ཆེན་གླིང་། །ད་ལྟ་དཔའ་བོ་སྤྲུལ་སྐུ་རུ། །གསུངས་པ་བདེན་ན་བདེན་པ་དེས། །ཉིད་ཀྱི་བསྟན་པ་ད་འཕེལ་ཤོག །གནད་ནས་བསྐུལ་བའི་གསོལ་འདེབས་འདི། །དད་མེད་ཅོ་འདྲི་མ་ཡིན་ཏེ། །ཡིན་པར་ངེས་པའི་བདེན་ཡུས་ཀྱིས། །བདེན་སྟོབས་སྨོན་ལམ་བཏབ་པ་ཡིན། །རླུང་ནི་ཞགས་
པས་ཟིན་པ་དང་། །ཉི་ཟླ་ཐང་ལ་ལྟུང་སྲིད་ཀྱང་། །རྒྱལ་བའི་བཀའ་ནི་བསླུ་མེད་ན། །བདེན་འབྲས་རྟགས་མཚན་མངོན་སུམ་ཞིག །བོད་ཁམས་འགྲོ་ལ་བསྟན་དུ་གསོལ། །ཞེས་པ་སྟོབས་ལྡན་གླང་གི་ལོ། །རྒྱལ་གྱི་ཟླ་བའི་ཡར་གྱི་ངོ་། །མཆོག་གི་སྤྲུལ་སྐུར་བྱིན་རླབས་པའི། །བཅུ་གཅིག་ཉིན་པར་བྲིས་པ་ཡིན།།་ཨ།་་་།།ན་མོ་བྷེ་ཥ་ཛེ་ཡ། །ཀ་ཡེ་འདིར་དགོངས་བཅོམ་ལྡན་སྨན་གྱི་ལྷ། །ཁ་དོག་མཐོན་མཐིང་ནམ་མཁའ་དྭངས་བ་འདྲ། །ག་ནས་བལྟས་ཀྱང་འོད་དང་གཟི་བརྗིད་འབར། །ང་ནི་རྩེ་གཅིག་དད་པས་ཁྱེད་དྲན་ཅིང་། །ཅ་ཅོའི་མཚན་ནས་བརྗོད་པའི་སྒྲ་གསན་ནམ། །ཆ་ལུགས་སྤྲུལ་སྐུ་ཆོས་གོས་རྣམ་གསུམ་འཆང་། །ཇ་དར་ཡུལ་དོས་ཤར་ཕྱོགས་ཞིང་ཁམས་ནས། །ཉ་རྒྱས་ཟླ་བ་ལྟ་བུར་ལྷང་ངེར་བཞུགས། །ཏ་ཐཱ་ག་ཏ་བེཌཱུརྱ་ཡི་འོད། །ཐ་མལ་འགྲོ་ལ་ལྷག་པར་བརྩེ་བ་ཁྱེད། །ད་ནི་མ་གཡེལ་ཐུགས་རྗེའི་སྤྱན་གྱིས་གཟིགས། །ན་ཚ་མི་ནད་ཕྱུགས་ལ་ནད་རྒྱུན་ཆད་མཛོད། །པ་ར་ག་ཏའི་ལྟ་བ་རྟོགས་པ་དང་། །ཕ་རོལ་ཕྱིན་བཅུའི་སྤྱོད་པ་མཐར་ཕྱིན་ནས། །བ་མོར་ཉི་ཟེར་ཕོག་ལྟར་སྒྲིབ་བཅོམ་ནས། །མ་གྱུར་འགྲོ་བའི་
མགོན་དུ་བདག་གྱུར་མཛོད། །ཙ་རླུང་གེགས་སྐྱོན་འབྱུང་བ་འཁྲུགས་པ་དང་། །ཚ་གྲང་འདུ་བའི་ནད་ཀུན་མེད་པར་མཛོད། །ཛ་ཡེ་ཁྱེད་ལྟར་ཚེ་འདིར་བདག་འགྲུབ་ནས། ཝ་ལེར་མངོན་ཤེས་དྲུག་དང་ལྡན་ནས་ཀྱང་། །ཞ་ལྟར་འགྲོ་བས་གཙུག་ཏུ་བཀུར་རུང་ཞིང་། །ཟ་འཐུང་ལོངས་སྤྱོད་འགྲོ་བའི་ཚོགས་རྫོགས་ཏེ། །འ་རེ་འུར་རེའི་རྣམ་གཡེང་སྤྱོད་ལམ་ཀུན། །ཡ་མཚན་འབྲེལ་ཚད་དོན་ལྡན་ཉིད་གྱུར་ནས། །ར་ཅན་ཁྲི་འབུམ་བྱེ་བ་གྲངས་མེད་ཀྱིས། །ལ་ཆེན་མཐོང་ཐོས་དྲན་རེག་འགྲོ་བ་ཀུན། །ཤ་ས་ན་ལ་རབ་ཏུ་བཙུད་ནས་ཀྱང་། །ས་བཅུ་ལམ་ལྔ་གེགས་མེད་ཁྲིད་ནུས་ནས། །ཧ་ཡ་གྲི་ཝ་ལྟ་བུར་མཐུ་སྟོབས་ཀྱིས། །ཨ་ལ་ལ་ཧོ་དངོས་གྲུབ་བདག་ལ་སྩོལ། །ཅེས་པ་སྨན་གྱི་ལྷའི་ཀ་བསྟོད་དོ།། ༈ །།ཀ་ཡེ་གསོན་དང་རྗེ་བཙུན་རི་ཁྲོད་མ། །ཁ་དོག་སེར་ལྗང་དམར་སོགས་ཅི་ཡང་སྟོན། །ག་ཤལ་རིན་ཆེན་རྒྱན་ཕྲེང་དར་དཔྱངས་འཕུར། །ང་ཡིས་རྩེ་གཅིག་དད་པས་ཁྱེད་བསྟེན་ཞིང་། །ཅ་ཅོའི་བསྟོད་དབྱངས་སྔགས་སྒྲ་གསན་ལགས་སམ། །ཆ་ལུགས་སྒེག་བཞེད་ཡིད་འོང་ལྷ་མོའི་གཟུགས། །ཇ་ཆང་སྣ་ཚོགས་མཆོད་དང་གཏོར་མ་
འབུལ། །ཉ་རྒྱས་ཟླ་ལྟར་ཐུགས་རྗེའི་འོད་དཀར་ཅན། །ཏ་ཐཱ་ག་ཏ་ཀུན་གྱི་ཡུམ་གཅིག་མ། །ཐ་མལ་ནད་ཀྱིས་ཉེན་ལ་ཁྱེད་བརྩེ་ན། །ད་ནི་དུས་འདིར་ཐུགས་རྗེ་དུས་ལ་བབ། །ན་ཚ་དལ་ཡམས་ཕྱུགས་ནད་རྒྱུན་ཆོད་ཅིག །པ་ར་ག་ཏའི་གཟུགས་ཀྱི་སྐུར་བསྟན་ཅིང་། །ཕ་རོལ་ཕྱིན་དྲུག་མཐར་ཕྱིན་ལྷ་མོ་ཡིས། །བ་ལང་འབྲི་གཡག་ནོར་ཕྱུགས་ལ་སོགས་པ། །མ་གྱུར་འགྲོ་བའི་ནད་གདོན་ཞི་བར་མཛོད། །ཙ་རླུང་གེགས་སྐྱོན་རྣལ་འབྱོར་ལུས་འདི་ལ། །ཚ་གྲང་འབྱུང་བའི་ནད་ཀུན་མེད་པར་མཛོད། །ཛ་ཡེའི་གོ་འཕང་བདག་གིས་བསྒྲུབ་པ་ལ། །ཝ་ལེར་མངོན་ཤེས་ལྡན་པའི་ལྷ་མོ་ཁྱེད། །ཞྭ་ལྟར་སྤྱི་བོའི་གཏད་ས་བྱས་ལགས་ན། །ཟ་འཐུང་འཚོ་བ་འབད་མེད་འབྱུང་བ་དང་། །འ་རེ་འུར་རེའི་སྙན་དང་གྲགས་པ་དང་། །ཡ་མཚན་ཆེ་བའི་དངོས་གྲུབ་ཐམས་ཅད་སྩོལ། །ར་ཅན་ཁྲི་འབུམ་གྲངས་ལས་འདས་པ་ཡི། །ལ་ཆེན་མཐོང་ཐོས་དྲན་རེག་སྒྱུ་འགྲོ་བ་རྣམས། །ཤ་ས་ན་ལ་སྐྱོན་མེད་བཀོད་ནས་ཀྱང་། །ས་དང་ལམ་རྣམས་རིམ་གྱིས་བརྗོད་པ་ཞིག །ཧ་ཧ་དགྱེས་པའི་གད་མོ་དང་བཅས་ནས། །ཨ་ལ་ལ་ཧོ་དངོས་གྲུབ་
མྱུར་དུ་སྩོལ། །ཅེས་པ་ལུང་པའི་ཕུ་ན་མི་ནད་དར། །ལུང་པའི་སྨད་ན་ནོར་ནད་མཆེད་པའི་ཚེ། །ཞི་བའི་སྦྱིན་སྲེག་བཅུ་ཕྲག་བླུགས་པའི་ནུབ། །ཀ་བསྟོད་གཉིས་པོ་རྟེན་འབྲེལ་བྱས་ནས་བྲིས།། ༈ ། ཡེ་གསོན་དང་འཕགས་པ་ངལ་བསོ་པོ། །ཁ་དོག་ཛམ་བུ་ཆུ་གསེར་བཙོ་མ་འདྲ། །ག་ནས་བསམས་ཀྱང་ཁྱོད་ནི་བསོད་ནམས་གཏེར། །ང་ཡིས་མགོན་དུ་ལྷ་མཆོག་ཁྱོད་བསྟེན་ཞིང་། །ཅ་ཅོའི་སྤྱན་འདྲེན་བསྟོད་དབྱངས་གསན་ལགས་སམ། །ཆ་ལུགས་གསེར་ཁྲབ་གསོལ་ཞིང་སེང་གེ་ཆིབས། །ཇ་དར་ཡུལ་གྱི་དགྲ་བླ་ཆེན་པོ་སྟེ། །ཉ་རྒྱས་ཟླ་ལྟར་གཟི་བརྗིད་འོད་དུ་འབར། །ཏ་ཐཱ་ག་ཏ་སྟོང་གི་བསྟན་པ་སྲུང་། །ཐ་མལ་ཕྱི་རོལ་པས་ཀྱང་ཁྱེད་ལ་མཆོད། །ད་ནི་རྩེ་གཅིག་བདག་གིས་ཁྱེད་བསྟེན་ཅིང་། །ན་མེད་དོ་གལ་གནད་ནས་བསྐུལ་ལགས་ན། །པ་དེ་པུ་དེའི་རྟགས་མཚན་དགོས་པ་མེད། །ཕ་རོལ་གནོད་བྱེད་ཐམས་ཅད་ཟིལ་ནོན་ཅིང་། །བ་གླང་ནོར་ཕྱུགས་ནད་མེད་འཕེལ་རྒྱས་ཤིང་། །མ་ལྟར་བརྩེ་བས་བདག་ཅག་བསྲུང་བྱར་གཟིགས། །ཙ་ཁ་ལོ་ཕྱུགས་རྟག་ཏུ་ལེགས་པ་དང་། །ཚ་གྲང་འདུ་བའི་ནད་ཀུན་ཞི་བར་མཛོད། །ཛ་ཡེའི་གོ་འཕང་བདག་གིས་སྒྲུབ་པ་
ལ། །ཝ་ལེར་ཡིད་ལ་འདོད་པ་ཀུན་འགྲུབ་ཅིང་། །ཞྭ་ལྟར་ཀུན་གྱིས་གཙུག་ཏུ་ཁུར་བར་མཛོད། །ཟ་འཐུང་ལོངས་སྤྱོད་ཆོས་མཐུན་ལྷུན་གྲུབ་ཅིང་། །འ་རེ་འུ་རེའི་སྙན་པ་འབྲུག་ལྟར་སྒྲོག །ཡ་མཚན་ཆེ་ཞིང་བསྟན་ལ་ཕན་པ་དང་། །ར་ཅན་ཁྲི་འབུམ་གྲངས་ལས་འདས་པ་ཡི། །ལ་ཆེན་འབྲེལ་ཚད་དོན་དང་ལྡན་པ་དང་། །ཤ་ས་ན་འདི་དར་ཞིང་རྒྱས་པར་མཛོད། །ས་དང་ལམ་གྱི་བར་ཆད་ཀུན་ཞི་ནས། །ཧ་ཧ་ཞེས་བཞད་དགྱེས་པའི་གད་མོར་བཅས། །ཨ་ལ་ལ་ཧོ་མཆོག་ཐུན་དངོས་གྲུབ་སྩོལ། །ཞེས་པ་བྱང་ཆུབ་སེམས་དཔའ་རིན་ཆེན་མང་། །དེ་ལ་དད་ཕྱིར་ཀ་བསྟོད་འདི་ཉིད་ནི། །རྒྱས་པའི་སྦྱིན་སྲེག་བླུགས་ནུབ་རྟེན་འབྲེལ་བྲིས།། ༈ །།ཀ་ཡེ་གསོན་དང་ལྷ་མོ་འོད་ཟེར་ཅན། །ཁ་དོག་གསེར་མདོག་འོད་ཟེར་རབ་ཏུ་འཕྲོ། །ག་ཤལ་རིན་ཆེན་ཕྲེང་བ་དར་དཔྱངས་འཕུར། །ང་ནི་ལྷ་མོ་ཁྱེད་ལ་སྐྱབས་ཞུ་ཞིང་། །ཅ་ཅོའི་སྔགས་སྒྲས་ཐུགས་དམ་རྒྱུད་བསྐུལ་ལོ། །ཆ་ལུལྟ་ལུགས་རབ་མཛེས་ཕག་གི་སྟེང་བཞུགས་མ། ཇ་ཕུད་འོ་ཕུད་དཀར་གསུམ་མཆོད་པ་འབུལ། །ཉ་རྒྱས་ཟླ་སྟེང་ཐུགས་སྲོག་མཾ་ཡིག་ལ། །ཏ་ཐཱ་ག་ཏས་གསུངས་པའི་རིག་སྔགས་
བསྐོར། །ཐ་མལ་ངན་རྐུན་ཡན་ཆད་དགྲ་དང་བགེགས། །ད་ནི་ཁ་མིག་ཁབ་དང་སྐུད་པས་ཚེམས། །ན་ཚ་མེད་པར་བདེ་བར་མྱོས་སུ་ཆུག །པ་ར་ག་ཏེའི་ཕྱག་རྒྱ་ཆེར་བསྒོམ་ཞིང་། །ཕ་རོལ་ཕྱིན་དྲུག་ཉམས་སུ་ལེན་པ་ལ། །བ་མོར་ཉི་ཟེར་ཕོག་ལྟར་འགལ་རྐྱེན་སོལ། །མ་གྱུར་འགྲོ་བའི་དོན་དུ་བྱང་ཆུབ་མཆོག །ཙ་རིགས་བཟང་ངན་མ་རྟོགས་མྱུར་འགྲུབ་མཛོད། །ཚ་གྲང་འཁོར་བའི་སྡུག་བསྔལ་མི་མྱོང་ཞིང་། །ཛ་ཡེའི་གོ་འཕང་མྱུར་དུ་འགྲུབ་ནས་ཀྱང་། །ཝ་ལེར་དུས་གསུམ་ཤེས་བྱ་ཀུན་གཟིགས་ནས། །ཞྭ་ལྟར་བློའགྲོ་བའི་གཙུག་རྒྱན་འབྱུང་བར་མཛོད། །ཟ་འཐུང་ལོངས་སྤྱོད་དཀོར་གྱི་ལོངས་སྤྱོད་དང་། །འ་རེ་འུར་རེའི་བསྟོད་པ་གཤེ་སྐུར་ཀུན། །ཡ་མཚན་འབྲེལ་ཚད་དོན་དང་ལྡན་ནས་ཀྱང་། །ར་ཅན་ཁྲི་འབུམ་ལས་ལྷག་གྲངས་འདས་རྣམས། །ལ་ཆེན་འབྲེལ་ཚད་བདེ་ཆེན་ཞིང་དུ་དྲོངས། །ཤ་ཁྲག་རུས་པ་སྐྲ་སེན་གོས་དུམ་ཡང་། །ས་ཆ་གང་དུ་གནས་དེར་བཀྲ་ཤིས་ཤིང་། །ཧ་ཅང་ཐུ་བའི་ནད་གདོན་ཞི་ནུས་ཤིང་། །ཨ་ལ་ལ་ཞེས་འགྲོ་ཀུན་མགུ་ནུས་མཛོད། །ཅེས་པ་ཞགས་ལྔར་འོད་ཟེར་ཅན་བསྙེན་ཚེ། །བུད་མེད་མཛེས་ཤིང་ཡིད་འོང་གཞོན་ནུ་
མ། །དབུ་སྐྲ་བཤད་ཅིང་སྤྱི་བོར་ཐོར་གཙུགས་བྱས། །ཕྲུག་གོས་སྟེང་དུ་སྐུ་གཟན་དམར་པོ་གསོལ། །སྐྱིལ་ཀྲུང་གིས་བཞུགས་དང་བ་འདྲེན་པ་ཅིག །རྨི་ལམ་དུ་མཇལ་གཞན་ཡང་འཇིགས་པ་ལས། །གྲོལ་སོགས་རྨིས་ལྟས་འགའ་རེ་བྱུང་ནས་བྲིས།། ༈ །།གུ་རུ་དྷེ་ཝ་ཌཱཀི་ནཱི་སིདྡྷི་ཧཱུྃ། འཇའ་ལུས་འཆི་མེད་ཐུགས་རྗེ་གློག་བས་མྱུར། །ཨོ་རྒྱན་རིན་པོ་ཆེ་ལ་གསོལ་བ་འདེབས། །སྤྲུལ་གཞིའི་སྤྲུལ་པས་བྱིན་གྱིས་བརླབ་ཏུ་གསོལ། །སྒྲུབ་པའི་བར་ཆད་སོལ་ལ་ཁ་བྱང་སྩོལ། །ཡེ་ཤེས་སྤྱན་ལྡན་རྐང་མགྱོགས་དངོས་གྲུབ་ཐོབ། །བེ་རོ་ཙ་ནའི་སྐུ་ལ་གསོལ་བ་འདེབས། །སྤྲུལ་གཞིའི་སྤྲུལ་པས་བྱིན་གྱིས་བརླབ་ཏུ་གསོལ། །སྒྲུབ་པའི་བར་ཆད་སོལ་ལ་ཁ་བྱང་སྩོལ། །ཆུ་བོ་གྱེན་བཟློག་ནམ་མཁར་སྐྱིལ་ཀྲུང་བཞུགས། །ཤུད་བུ་དཔལ་སེང་གསུང་ལ་གསོལ་བ་འདེབས། །སྤྲུལ་གཞིའི་སྤྲུལ་པས་བྱིན་གྱིས་བརླབ་ཏུ་གསོལ། །སྒྲུབ་པའི་བར་ཆད་སོལ་ལ་ཁ་བྱང་སྩོལ། །སྡིགས་མཛུབ་ཙམ་གྱིས་མཁའ་ལ་ཐོག་སེར་འབེབས། །ལང་གྲོ་ལོ་ཙཱའི་ཐུགས་ལ་གསོལ་བ་འདེབས། །སྤྲུལ་གཞིའི་སྤྲུལ་པས་བྱིན་གྱིས་བརླབ་ཏུ་གསོལ། །སྒྲུབ་པའི་བར་ཆད་སོལ་ལ་ཁ་བྱང་སྩོལ། །རྫུ་
འཕྲུལ་སྣ་ཚོགས་ཐོགས་མེད་ཕྱོགས་བཅུར་ཁྱབ། །སྣ་ནམ་ཡེ་ཤེས་ཀྱི་ནི་ཡོན་ཏན་ལ། །གསོལ་བ་འདེབས་སོ་སྤྲུལ་པར་བྱིན་གྱིས་རློབས། །སྒྲུབ་པའི་བར་ཆད་སོལ་ལ་ཁ་བྱང་སྩོལ། །རི་བྲག་ཀུན་ལ་ཐོགས་མེད་རླུང་ལྟར་འཕྱོ། །ཤྲཱི་བཛྲ་ཀྱི་ནི་ཕྲིན་ལས་ལ། །གསོལ་བ་འདེབས་སོ་སྤྲུལ་པར་བྱིན་གྱིས་རློབས། །སྒྲུབ་པའི་བར་ཆད་སོལ་ལ་ཁ་བྱང་སྩོལ། །གཏེར་སྟོན་ཐམས་ཅད་ལུང་སྟོན་བར་ཆད་སོལ། །ཡེ་ཤེས་སྤྱན་ལྡན་མ་གཅིག་མཚོ་རྒྱལ་ལ། །གསོལ་བ་འདེབས་སོ་མི་འགྱུར་རྡོ་རྗེ་ལ། །ཁ་བྱང་མྱུར་སྩོལ་བར་ཆད་ཐམས་ཅད་སོལ། །པད་འབྱུང་ཡབ་ཡུམ་རིག་འཛིན་རྣམ་ལྔ་ལ། །སྙིང་ནས་བློ་གཏད་གསོལ་བ་འདེབས་ལགས་ཀྱིས། །ཨ་ཏིའི་བསྟན་རྩ་མི་འགྱུར་རྡོ་རྗེ་ལ། །བར་ཆད་ཀུན་སོལ་ཁ་བྱང་མྱུར་དུ་སྩོལ། །ཐུགས་རྗེ་ཐུགས་དམ་དུས་ལ་མ་འདའ་ཅིག །ཅེས་པ་གནམ་ཆོས་དཔེ་རྣམས་བཞེངས་པའི་སྐབས། །སྤྲུལ་སྐུའི་སྐུ་རིམ་བཟློག་པ་བྱས་པའི་སྐབས། །མི་འགའི་མགུལ་དུ་བསྲུང་སྐུད་རེ་རེ་བཏགས། །ལག་ཏུ་མདའ་མོ་ལ་དཀྲིས་རེ་རེ་ཐོགས། །ཁོ་བོ་པདྨ་འབྱུང་གནས་ལ་གསོལ་བ་འདེབས། །ཞེས་པ་ཀུན་གྱི་དབྱངས་སུ་གྱེར་བྱེད་ཅིང་། །ད་ནི་མི་གཞོན་ཁྱེད་རྣམས་སྒོར་སོང་ལ། །ངེད་རྣམས་ན་བུན་རྫོང་པ་ཡིན་
སྨྱོས་ཤིང་། །མདའ་རྒྱག་གིས་ཞེས་དཔའ་གཏམ་སྨྲ་བ་རྨིས། །དེ་ཕྱིར་རྟེན་འབྲེལ་ཡོད་སྙམ་བྲིས་པའོ།། ༈ །།ན་མོ་བུདྡྷ་སཏཱ་ཡེ། འདས་པའི་སངས་རྒྱས་གཞན་ཕན་རྣམ་རོལ་དང་། །སྤོས་འོད་སེང་གེ་ལ་སོགས་བཅོམ་ལྡན་དང་། །མ་འོངས་སངས་རྒྱས་སེང་གེ་སྣང་མཛད་སོགས། །ད་ལྟ་འགྲོ་བའི་དོན་དུ་སྤྲུལ་པའི་སྐུ། །ཡིན་ལ་ཡིན་བཞིན་སྟོབས་བཅུའི་སྟོབས་དང་ནི། །དབང་བཅུའི་ནུས་པ་འགྲོ་ལ་བསྟན་ནས་ཀྱང་། །བསྟན་པ་དར་ཞིང་རྒྱས་པར་གསོལ་བ་འདེབས། །འདས་པའི་སངས་རྒྱས་དཀོན་མཆོག་ཡན་ལག་དང་། །གར་དབང་རྡོ་རྗེ་འཆང་དང་འོད་དཔག་མེད། །མ་འོངས་བྱམས་པ་ཀུན་གཟིགས་ལ་སོགས་པ། །ཡིན་ལ་ཡིན་བཞིན་སྟོབས་བཅུ་དབང་བཅུའི་རྩལ། །མྱུར་དུ་འགྲོ་བའི་སྣང་ངོར་བསྟན་ནས་ཀྱང་། །བསྟན་པ་དར་ཞིང་རྒྱས་པར་གསོལ་བ་འདེབས། །བཅོམ་ལྡན་རྡོ་རྗེ་འཛིན་པ་གསང་བའི་བདག །ཀུན་དགའ་བོ་དང་ཤུད་བུ་དཔལ་སེང་སུ་ཉིད། །བེ་རོ་ཙ་ན་ས་བརྒྱད་སེམས་དཔའ་ཆེ། །ཡིན་ལ་ཡིན་བཞིན་སྟོབས་ཀྱིས་ཕར་ཕྱིན་གྱིས། །མཐུ་སྟོབས་ནུས་པ་ད་ནི་རྩལ་སྤྲུགས་ལ། །བར་ཆད་བདུད་ཀྱི་འཚེ་བ་
བཟློག་ནས་ཀྱང་། །ས་གཏེར་རང་སྐལ་གཞན་ངོར་བསྟན་དུ་གསོལ། །སྙིགས་མའི་འགྲོ་ལ་ཐུགས་རྗེའི་གནས་གྱུར་ལ། །མངོན་སུམ་མྱུར་བར་མངོན་རྟགས་མ་བསྟན་ན། །བག་ལ་ཉལ་དུ་བྱ་བས་ཅི་ཞིག་བྱ། །ད་ནི་སེམས་དཔའ་ཆེན་པོ་མཆོག་གསུམ་པོས། །གཞན་དྲིང་མི་འཇོག་རང་རྩལ་བསྟན་དུ་གསོལ། །ཞེས་པ་ཡབ་སྲས་གཉིས་དང་སྤྲུལ་སྐུའི་དོན། །ལེགས་ཉེས་རྣམ་རྟོག་མང་པོ་ཕྲེང་བའི་ཚེ། །བདེ་བར་གཤེགས་པ་གཞན་ལ་མི་རེའོ། །ཞེས་པའི་སྒྲ་ཞིག་ཉམས་ཀྱི་སྣང་བར་གྲག །དེ་ཕྱིར་དེ་དོན་གསོལ་བ་བཏབ་པའོ།། ༈ །།ན་མོ་བུདྡྷ་བྷེ་ཥ་ཛཱི་ཡེ། །མཚན་ཙམ་ཐོས་པས་ནད་ཞི་ཐུགས་རྗེ་ཅན། །བདེ་གཤེགས་སྨན་གྱི་ལྷ་ལ་ཕྱག་འཚལ་ལོ། །རིག་སྔགས་བཟླས་པས་ནད་རིགས་སེལ་བའི་ལྷ། །པཎྜ་ཤ་ཝ་རི་ལ་སྐྱབས་སུ་མཆི། །མཚན་ཙམ་ཤེས་པས་ནད་རིགས་འཇིགས་པ་སྐྱོབ། །དུད་པའི་སོལ་བ་མ་ལ་ཕྱག་འཚལ་ལོ། །ས་བརྒྱད་སེམས་དཔའ་ནོར་ཕྱུགས་སྲུང་བའི་ལྷ། །བྷེ་ཤ་ཝ་ཎ་ཉིད་ལ་ཕྱག་འཚལ་བསྟོད། །གཞན་ཡང་བསྟན་སྲུང་བཀའ་ཡི་ལས་སྒྲུབ་པ། །བཛྲ་སཱ་དྷུ་བེ་རོ་ཏ་ལ་སོགས། །བཀའ་སྲུང་དམ་ཅན་ཀུན་ལ་ཕྱག་འཚལ་བསྟོད། །དངོས་སམ་ཡིད་
སྤྲུལ་མཆོད་པ་རྒྱ་མཚོ་འབུལ། །བསྲུང་བྱ་ཀུན་ལ་སྲུང་སྐྱོབ་མ་གཡེལ་ཅིག །མཐུ་རྩལ་ནུས་པ་མངོན་སུམ་བསྟན་དུ་གསོལ། །ཞེས་པ་འདི་ནི་མི་ཕྱུགས་བསྲུང་བ་ཡི། དམིགས་རིམ་བཀའ་བསྒོ་ལ་སོགས་བྱེད་སྐབས་སུ། །ཆོས་སྐྱོང་རྣམས་ཀྱི་གསུངས་པ་ཡིན་སྙམ་པའི། །ངེད་རྣམས་བསྲུང་བྱ་རྣམས་ལ་ཉིན་རེ་ལ། །ལན་གཉིས་བལྟ་ཞིང་ཡོད་དོ་ཟེར་བ་ཡི། །སྒྲ་ཞིག་ཉམས་ཀྱི་སྐབས་ལ་གྲག་ཕྱིར་བྲིས།། ༈ །།ན་མོ་ལོ་ཀེ་ཤྭ་ར་ཡེ། མ་རྒན་འགྲོ་བ་མ་ལུས་པ། །བདེ་ཆེན་ཞིང་དུ་བགྲོད་པའི་ཕྱིར། །གསང་འདུས་སྒྲུབ་ཆེན་བུམ་སྒྲུབ་བྱས། །དེ་ཚེ་ཐུན་པ་ལ་ལ་ཡི། །དཀྱིལ་འཁོར་བུམ་པའི་ཕྱོགས་དག་ནས། །མེ་རྟག་འདྲ་བའི་འོད་འཕྲོ་དང་། །སིལ་སྒྲ་དང་བཅས་རིལ་བུ་ཁོལ། །ཚེག་སྒྲ་ཆེན་པོ་གྲགས་པ་ཐོས། །རིལ་བུ་དྲིལ་བུ་ཕྱེད་གསུམ་འཕེལ། །ནམ་མཁར་འཇའ་ཚོན་ཤར་བ་སོགས། །རྟགས་མཚན་འགའ་རེ་བྱུང་ཞེས་ཟེར། །བདག་ནི་དཀོར་སྒྲིབ་ཆེ་བ་དེས། །དངོས་རྟག་གསལ་པོར་མ་མཐོང་ཡང་། །ཉམས་སྣང་དང་ནི་རྨི་ལམ་དུ། །ལྷ་མོ་སྐྱེས་བུ་སྨྱོ་ཁ་སོགས། །བཀའ་སྲུང་ཀུན་གྱི་རྟགས་མཚན་གསལ། །ཉམས་སྣང་ནམ་མཁར་ཉི་མ་ཡི། །དཀྱིལ་འཁོར་
ས་གསལ་པོ་ལན་གཉིས་ཤར། །དཀར་ཡོལ་ཡུ་ཐུང་མཛེས་པའི་ནང་། །ཞིམ་ཇ་གང་བྱུང་བཏུང་བ་དང་། །རྨི་ལམ་བདུད་འདུལ་རྡོ་རྗེ་ནི། །ཡབ་ཡུམ་གཉིས་པོ་གསལ་བར་མཇལ། །འགྲོ་མགོན་ས་སྐྱ་པཎ་ཆེན་དང་། །ཆོས་ཀྱི་ཞུ་གནང་འགའ་རེ་བྱས། །སྤྲུལ་སྐུ་མི་འགྱུར་རྡོ་རྗེ་ནི། །མ་རལ་དབུ་བརྒྱན་གསོལ་ནས་ཀྱང་། །དཀྱིལ་འཁོར་ནང་དུ་འབྱོན་པ་དང་། །རང་གི་དྲུང་དུ་བཞུགས་པ་ལ། །དར་གྱི་སྲུང་མདུད་ཕུལ་བ་དང་། །གུར་དཀར་བཟང་པོའི་ནང་ཉིད་དུ། །རང་ཉིད་འདུག་ཅིང་ཉི་མ་ཤར། །འགྲོ་མགོན་སངས་རྒྱས་དབོན་པོ་ཡི། །སྐུ་རྗེས་རྩིག་པ་ལ་བཞག་པ། །བདག་གིས་གཞན་ལ་བསྟན་པ་རྨིས། །བྱིན་འབེབས་བྱེད་ཚེ་དད་པ་ཡིས། །མཆི་མ་འཁྲུག་ཅིང་བྱིན་འཐིབ་དང་། །བསྐྱེད་རིམ་གསལ་ཞིང་སེམས་བསྐྱེད་ནི། །རྒྱ་ཆེན་རབ་ཏུ་བོགས་སྐྱེད་བྱུང་། །དེ་ལྟར་བསྒྲུབས་པའི་དགེ་བ་དེས། །འབྲེལ་ཚད་བདེ་ཆེན་ཞིང་སྐྱེ་ཤོག། །།ན་མོ་མ་ཧཱ་མུ་དྲ་ཡེ། ང་ད་ནངས་ནམ་མཁའ་གསེང་བའི་དུས། །རང་གཉིད་པ་མ་ཡིན་ཉམས་སྣང་ལ། །རང་མལ་སའི་ནང་དུ་གནས་བཞིན་དུ། །ལུས་ཆེ་རུ་
མ་སོང་འདི་ག་ལ། །ལ་ལུང་པ་མང་པོའི་ཕ་རོལ་ན། །ཐག་ཉེ་རུ་མ་སོང་ཡུལ་དེ་རུ། །མི་བདག་གིས་ལག་པ་བརྐྱངས་པས་སླེབས། །ལག་བུམ་པའི་ནང་གི་བདུད་རྩི་ཡིས། །མི་དད་ལྡན་ཡོན་བདག་ཕོ་མོ་ལ། །ཁྲུས་བྱས་པའི་སྣང་བ་མཚར་པོ་བྱུང་། །དུས་དེ་ཚེ་སེམས་ལ་འདི་ལྟར་དྲན། །མི་བདག་ལ་རྫུ་འཕྲུལ་མ་མཆིས་ཀྱང་། །དུས་ད་ལྟ་རྫུ་འཕྲུལ་འདྲ་བ་འདི། །ཁོང་རྣམས་ཀྱི་དད་པའི་བདེན་མཐུས་སྣང་། །དེ་དྲན་མ་ཐག་ཏུ་ཉམས་ལས་སད། །བུ་རྗེས་འཇུག་དད་པ་སྐྱེ་མཛོད་ཅིག །ཕ་རྗེ་བཙུན་མི་ལ་རས་ཆེན་ལ། །ཁྱེད་སུ་ཡིས་སྤྲུལ་པ་ཡིན་ཞུས་པས། །ང་སུ་ཡིན་ང་ལ་ཆ་མེད་དེ། །ཁྱེད་རྣམས་ཀྱིས་སངས་རྒྱས་སུ་མཐོང་བ། །དེར་སངས་རྒྱས་ཀྱི་བྱིན་རླབས་འཇུག་གོ་གསུངས། །བཅོམ་ལྡན་ཐུབ་པས་ཀུན་དགའ་བོ། །དད་པ་ལ་ནི་སྦྱོང་བར་མཛོད། །འདི་ནི་དེ་བཞིན་གཤེགས་པ་ཡི། །གསོལ་བ་འདེབས་པ་ཡིན་ནོ་གསུངས། །དད་པའི་ལྟ་ནུས་པ་ཚད་མེད་པ། །ཟུར་ཙམ་བདག་གིས་མངོན་སུམ་རྟོགས། །བུ་ཀུན་དད་པ་མ་རྙིང་མཛོད།། །།ན་མོ་ལོ་ཀི་ཤྭ་ར་ཡེ། དེ་རིང་ཟླ་བ་ཡར་གྱི་
ངོ་། །དུས་ཁྱད་པར་ཅན་གྱི་ཚེས་བརྒྱད་ཉིན། །ཆོས་རླུང་ཁྲིད་ཞག་བདུན་ཚར་བའི་ཉིན། །སེམས་བདེ་ཉམས་ཤར་བས་མགུར་གཅིག་བྱེད། །ལུས་རྒྱལ་བ་རྒྱ་མཚོ་སྤྱན་རས་གཟིགས། །སྐུ་མཚན་དང་དཔེ་བྱད་རྒྱན་ཆ་རྫོགས། །ཕྱི་དར་དམར་གུར་ཕུབ་ལྟ་བུ་ལ། །ནང་སྟོང་པ་འོད་ཀྱི་གུར་ཁང་ནས། །རྩ་དབུ་རྐྱང་རོ་གསུམ་ཀ་བ་བཞིན། །རྩ་འཁོར་ལོ་ལྔ་པོ་ཨེ་བི་དབྱིབས། །ལུས་རྩ་མདུད་དུག་ལྔའི་ས་བོན་ལྔ། །དེ་ཡེ་ཤེས་གཏུམ་མོའི་མེ་ཡིས་སྲེགས། །ལྷ་ཐུགས་རྗེ་ཆེན་པོ་རིགས་ལྔར་བསྒྱུར། །གནས་རྩ་བྲན་རིགས་ལྔའི་ཊཱཀི་གསལ། །གནས་སྤྱི་བོའི་ཧཾ་ལས་བདུད་རྩི་བབ། །ལུས་རྩ་གནས་ལྷ་ཚོགས་འོད་དུ་འབར། །སེམས་བདེ་སྟོང་དབྱེར་མེད་རྟོགས་པ་འཆར། །འོད་འཕྲོས་པས་རྒྱལ་བ་སྲས་བཅས་མཆོད། །དེ་ཐམས་ཅད་ཐུགས་རྗེ་ཆེན་པོར་གྱུར། །རླུང་རྩུབ་པས་འོད་ཞུ་རང་ལ་ཐིམ། །རླུང་སྟེང་འོག་ཁ་སྦྱོར་བུམ་ཆེན་དང་། །སེམས་མ་བཅོས་སྟོང་ཉིད་ངང་ལ་བཞག །དོན་དེ་ལ་རྒྱུན་དུ་ཉམས་བླངས་ན། །ཚེ་གཅིག་ལ་བདེ་སྟོང་དབྱེར་མེད་པ། །དཔལ་རྡོ་རྗེ་འཆང་ཆེན་འགྲུབ་པར་གསུངས། །ཁྱེད་སྙིང་རུས་ལྡན་
པའི་མི་ཡོད་ན། །ཆོས་འདི་ལ་སྙིང་རུས་བྱེད་པར་རིགས། །ལུས་རླུང་དང་འཁྲུལ་འཁོར་གཅུན་ནུས་ན། །ལུས་སྦྱང་གི་འཁྲུལ་འཁོར་ཚར་རེ་ཡིས། །དུས་བསྐལ་པ་གྲངས་མེད་སྒྲིབ་པ་དག །ལུས་རྩ་གནས་ལྷ་ཚོགས་བསྒོམ་ནུས་ན། །ཟས་ཟོས་ཚད་ཚོགས་ཀྱི་འཁོར་ལོ་ཡིན། །རླུང་སྲོག་རྩོལ་རྒྱུན་དུ་བསྒོམ་ནུས་ན། །དབུགས་དབྱུང་རྔུབས་སྔགས་དང་བསྙེན་པ་ཡིན། །སེམས་མ་ཡེངས་དྲན་རྫི་བསྐྱང་ནུས་ན། །སེམས་གང་ཤར་ཡེ་ཤེས་ཟང་ཐལ་ཡིན། །ཁྱེད་འདིར་འཚོགས་ཐུགས་ལ་དེ་ལྟར་ཞོག །ཅེས་སོ།། །།ཨེ་ཨེ། བསམ་བློ་ཐོངས་ཤིག་དང་སྤྲང་པོ་ཁྱོད། །ཁྱོད་འཆི་བདག་ནམ་ཡོང་ཆ་ཡོད་དམ། །ཁྱོད་སོ་གསོད་ལྐོག་ཉལ་བྱེད་ཕོད་དམ། །མི་ཕྱུག་པོ་ཀུན་འཆི་བ་ཐོས་ཙམ་ན། །ནོར་བསགས་པས་ཕན་པ་འདུག་ལགས་སམ། །མི་བཙན་པོ་ཀུན་འཆི་བ་ཐོས་ཙམ་ན། །སྟོབས་འབྱོར་པས་ཕན་པ་འདུག་ལགས་སམ། །མི་གཙོ་བོ་ཀུན་འཆི་བ་ཐོས་ཙམ་ན། །གཏམ་མཁས་པས་ཕན་པ་འདུག་ལགས་སམ། །རྗེ་རྒྱལ་པོ་ཀུན་འཆི་བ་ཐོས་ཙམ་ན། །འཁོར་མངའ་རིས་ཀྱི་ཕན་པ་
འདུག་ལགས་སམ། །མི་ཕ་ཚན་འཆི་བ་ཐོས་ཙམ་ན། །གཉེན་ཉེ་དུས་ཕན་པ་འདུག་ལགས་སམ། །ད་འཆི་མེད་བཙན་ས་མ་ཟིན་ན། །ཆོས་གཟུགས་བརྙན་གྱི་ཕན་པ་འདུག་ལགས་སམ། །སེམས་བདེ་གསལ་གྱི་ཉམས་དང་མི་ལྡན་ན། །རང་གཅིག་པུར་བསྡད་པས་ཕན་ལགས་སམ། །སེམས་ལྷག་མཐོང་གི་རང་ངོ་མ་འཕྲོད་ན། །སེམས་གནས་པ་ཙམ་གྱིས་ཕན་ལགས་སམ། །ཉམས་གང་བྱུང་དེས་ཆོག་གཅིག་མ་བྱུང་ན། །ཉམས་རེ་འགའ་མཐོ་བས་ཕན་ལགས་སམ། །དུས་རྒྱུན་དུ་ཉམས་ལེན་མ་བརྐྱངས་ན། །དུས་རེས་འགའ་བརྩོན་པས་ཕན་ལགས་སམ། །སེམས་ངེས་ཤེས་གཏིང་ནས་མ་སྐྱེས་ན། །སྤོམ་ཡོར་ཨང་འདིར་གྱིས་ཕན་ལགས་སམ། །འདི་གཞན་ལ་སྨྲས་པ་མ་ཡིན་ཏེ། །སེམས་སྐྱོ་བ་སྐྱེས་ནས་རང་ལ་སྨྲས། །ཞེས་པ་གློ་བུར་དུ་མི་གཅིག་ཤི་བ་ཐོས་ཏེ་སྨྲས་པའོ། །ན་མོ་མ་ཧཱ་མུ་དྲ་ཡེ། སྤྲིན་ཐག་ཆད་པའི་ནམ་མཁའ་འདི་དང་གཅིག་སྤྲོས་བྲལ་གདོད་མའི་གནས་ལུགས་འདི་དང་གཉིས། །རང་སེམས་སྐྱེ་མེད་འོད་གསལ་འདི་དང་གསུམ། །བརྗོད་མེད་བློ་འདས་ངང་དུ་འཛོམས་ནི་གདའོ་ཨང་། །
བར་སྣང་ལྡིང་བའི་སྤྲིན་དཀར་འདི་དང་གཅིག །རྒྱ་མཚོའི་ཀློང་གི་རྦ་རླབས་འདི་དང་གཉིས། །རང་སེམས་སྟོང་པའི་འཕྲོ་འདུ་འདི་དང་གསུམ། །རང་བྱུང་རང་གྲོལ་ཀློང་དུ་འཛོམས་ནི་གདའོ་ཨང་། །ཆུ་ནང་ཤར་བའི་ཟླ་གཟུགས་འདི་དང་གཅིག །བར་སྣང་ཤར་བའི་འཇའ་ཚོན་འདི་དང་གཉིས། །བསྐྱེད་རིམ་ལྷ་ཡི་རྣལ་འབྱོར་འདི་དང་གསུམ། །གསལ་སྟོང་འཛིན་མེད་ཀློང་དུ་འཛོམས་ནི་གདའོ་ཨང་། །ཚེ་འདི་བློས་བཏང་སྙིང་ཁམས་འདི་དང་གཅིག །གཅིག་པུར་འདག་ཆར་སྒྲུབ་ཚུགས་འདི་དང་གཉིས། །ཐང་ལྷོད་མེད་པ་བརྩོན་འགྲུས་འདི་དང་གསུམ། །བཀའ་བརྒྱུད་རྣམ་ཐར་ཀློང་དུ་འཛོམས་ནི་གདའོ་ཨང་། །ངོས་ལྐོག་མེད་པའི་ཚུལ་ཁྲིམས་འདི་དང་གཅིག །བདག་གཞན་བརྗེ་བའི་བྱང་སེམས་འདི་དང་གཉིས། །རྣམ་གཡེང་སྤང་བའི་ཏིང་འཛིན་འདི་དང་གསུམ། །ཤཱཀ་ཐུབ་བསྟན་པའི་ཀློང་དུ་འཛོམས་ནི་གདའོ་ཨང་། །ཐེ་ཚོམ་མེད་པའི་དད་པ་འདི་དང་གཅིག །ཆག་ཉམས་མེད་པའི་དམ་ཚིག་འདི་དང་གཉིས། །རྒྱུན་ཆད་མེད་པའི་བསྙེན་སྒྲུབ་འདི་དང་གསུམ། །རྒྱུད་སྡེ་ཟབ་མོའི་ཀློང་དུ་འཛོམས་ནི་གདའོ་
ཨང་། །རྩ་བཞི་སྲོག་ལྟར་བསྲུང་བ་འདི་དང་གཅིག །ཡན་ལག་ཅི་ནུས་བསྲུང་བ་འདི་དང་གཉིས། །ཕྲ་ཞིབ་གསོ་སྦྱོང་འབད་པ་འདི་དང་གསུམ། །བསྟན་རྩ་འདུལ་བའི་ཀློང་དུ་འཛོམས་ནི་གདའོ་ཨང་། །འགྲོ་ཀུན་སྒྲོལ་བའི་དམ་བཅའ་འདི་དང་གཅིག །འཁོར་སློབ་ཡར་ལྟོས་བསླབ་བྱ་འདི་དང་གཉིས། །འབྲེལ་ཚད་དོན་ལྡན་སྨོན་ལམ་འདི་དང་གསུམ། །བྱང་ཆུབ་སྤྱོད་པའི་ཀློང་དུ་འཛོམས་ནི་གདའོ་ཨང་། །ད་ལྟ་ཤི་ཡང་འགྱོད་མེད་འདི་དང་གཅིག །བདེ་ཆེན་ཞིང་དུ་འགྲོ་བའི་ངེས་ཤེས་འདི་དང་གཉིས། །རིགས་བདག་མཇལ་བའི་དགའ་སྤྲོ་འདི་དང་གསུམ། །ཆོས་མགོ་ཐོན་པའི་ཀློང་དུ་འཛོམས་ནི་གདའོ་ཨང་། །སྤྲོ་བ་བསྐྱེད་པའི་དབྱངས་ཆུང་འདི་དང་གཅིག །ཆར་མེད་ནམ་མཁའི་འབྲུག་སྒྲ་དེ་དང་གཉིས། །དབུས་གཙང་གཤང་མོའི་ཁ་ཐད་དེ་དང་གསུམ། །སྟོང་སྒྲོབ་ཁ་ཟད་ཀློང་དུ་འཛོམས་ནི་གདའོ་ཨང་། །ཞེས་ནམ་མཁའ་དྭངས་བ་གཅིག་ལ་བརྟེན་ནས་ཉམས་མཚར་སྨྲས་པ་ཨ་རཱ་གས་སོ།། །།ན་མོ་གུ་རུ་དྷམཱ་ཤྭ་ར་ཡེ། བླ་མ་ཡི་དམ་དབྱེར་མེད་པའི། །སྤྱན་རས་གཟིགས་ལ་གསོལ་བ་འདེབས། །བདག་གི་རྗེས་འཇུག་
འདོད་པ་ཡི། །བུ་གཅིག་བསོད་ནམས་ནོར་བུ་ལ། །རྒས་པོའི་སྙིང་གཏམ་ཚིག་གསུམ་ཞུ། །དལ་འབྱོར་མི་ལུས་རིན་ཆེན་འདི། །ལོ་བརྒྱ་ནང་གི་ཐོག་གཅིག་ཡིན། །དེ་ཉིད་དོན་དང་ལྡན་པའི་ཕྱིར། །རྩ་བ་བཞི་པོ་སྲོག་ལྟར་བསྲུང་། །དེ་སྲུང་དམ་ཆོས་ལམ་དུ་འགྲོ། །ཡོན་ཏན་ཆེའམ་ཆུང་ཡང་རུང་། །རང་གཞན་དོན་ཆེན་འགྲུབ་པར་ངེས། །དེང་སང་རྩ་བཞི་བསྲུང་བ་ལས། །ཁྲིམས་ལྡན་ཡིན་པར་རྒྱལ་བའི་དབང་། །མི་བསྐྱོད་ཞབས་ཀྱིས་གསུངས་པ་ཡིན། །ཟས་ཀྱི་ནང་ནས་སྡིག་ཆེ་བ། །ཆང་དང་བསྔོས་ཤ་ཡིན་པ་ནི། །ཐུབ་པས་ཡང་ཡང་བཀའ་སྩལ་ཕྱིར། །འདི་གཉིས་ཤིན་ཏུ་འཛེམ་གལ་ཆེ། །དེ་ནི་སྙིང་གཏམ་དང་པོ་ཡིན། །མི་རྟག་འཆི་བ་ཞེས་བྱ་བ། །ཀུན་ལ་འོང་ཞིང་བཟློག་ཐབས་མེད། །ནམ་འོང་ཆ་མེད་སྐྱོན་རེ་ཆེ། །དེ་རིང་ཤི་ཡང་འགྱོད་མེད་པའི། །དགེ་སྦྱོར་ཉམས་ལེན་བརྩོན་འགྲུས་བསྐྱེད། །བྱེད་བསམ་བཟང་ཡང་ལ་ཕན་པ་མེད། །རང་གི་བརྩོན་འགྲུས་མ་བྱས་ན། །བླ་མ་བཟང་དང་གདམས་ངག་ཟབ། །གནས་རི་བཟང་དང་ཉམས་རྟོགས་དཀའ། །མ་ཡེངས་དྲན་པའི་རྒྱང་སོ་དེ། །མ་
བརྗེད་དྲན་པའི་རྩི་ཡིས་ཟུངས། །དེ་ནི་སྙིང་གཏམ་གཉིས་པ་ཡིན། །རང་བྱས་ལས་ཀྱི་རྣམ་སྨིན་ནི། །རྫོགས་སངས་རྒྱས་དང་བདུད་སྡིག་ཅན། །སྟོབས་ཆེན་སུས་ཀྱང་བཅོས་རྒྱུ་མེད། །དེ་ཕྱིར་དགེ་སྒྲུབ་སྡིག་པ་སྤང་། །སྔགས་པ་ཡིན་དང་ལྟ་བ་མཐོ། །གང་བྱས་སྐྱོན་མེད་མ་བསམ་པར། །སྒྲིབ་སྦྱངས་བསོད་ནམས་ཚོགས་རྫོགས་ཐབས། །ཅི་ནུས་འབད་ཅིང་སྤྱོད་པ་ཞིབ། །རང་ཉིད་ཆོས་པའི་གྲལ་ཚུད་པ། །བྱེད་པ་སྙིང་གཏམ་གསུམ་པ་ཡིན། །ཐོག་མ་ཉིད་ནས་ད་ལྟའི་བར། །སྐྱེ་རྒས་ན་འཆིའི་འཁོར་ལོ་བསྐོར། །རིགས་དྲུག་གནས་སུ་འཁྱམས་ཡུན་རིང་། །ངན་སོང་གསུམ་དུ་གནས་ཡུལ་བྱས། །ད་རེས་འཁོར་བའི་རྒྱ་མཚོ་ནས། །ཐར་བའི་ཐབས་ཤིག་མ་བསྒྲུབས་ན། །རང་གིས་རང་ལ་བསླ་ཚབས་ཆེ། །རང་གིས་རང་ལ་སྙིང་རྗེ་ལྟོས། ཟས་ནོར་སྦྲང་མའི་སྦྲང་རྩི་འདྲ། །རང་གིས་གསོག་པ་གཞན་གྱིས་སྤྱོད། །གཉེན་འདུན་ཚོང་དུས་མགྲོན་པོ་འདྲ་། །ཡུན་རིང་མི་འདུག་སོ་སོར་འགྲོ། །ཅི་དང་གང་ལ་སྙིང་པོ་མེད། །ཚངས་དང་བརྒྱ་བྱིན་འཁོར་ལོས་སྒྱུར། །དེ་འདྲར་སྐྱེས་ཀྱང་ནམ་ཕུག་ལྟུང་། །གཏན་དུ་བདེ་ཞིང་
སྐྱིད་པའི་ས། །བདེ་བ་ཅན་གྱི་ཞིང་ཁམས་སུ། །འགྲོ་བའི་ཐབས་དང་བརྩོན་འགྲུས་མཛོད། །རྒན་པོའི་སྙིང་གཏམ་བཞི་པ་ཡིན། །རང་ཉིད་བདེ་བས་མི་ཆོག་སྟེ། །གྲོ་ཀུན་ཕ་མ་དྲིན་ཆེན་ཡིན། །དེ་རྣམས་སངས་རྒྱས་སར་འགོད་ཕྱིར། །རང་ཉིད་བྱང་ཆུབ་ཐོབ་བྱས་ནས། །འབད་མེད་ལྷུན་གྲུབ་ཕྲིན་ལས་ཀྱི། །འགྲོ་ཀུན་འདྲེན་པར་བྱ་བའི་ཕྱིར། །བསྐྱེད་རྫོགས་བཟླས་བསྒོམ་བྱ་བ་སོགས། །སེམས་བསྐྱེད་བཟང་པོས་ཟིན་པར་བྱ། །བྱམས་དང་སྙིང་རྗེ་བཏང་ལེན་གྱིས། །དམིགས་པའི་བསྒོམ་བྱ་གཙོ་བོ་ཡིན། །དེ་ནི་སྙིང་གཏམ་ལྔ་པ་ཡིན། །མདོ་ལས་ཟབ་པ་གསང་སྔགས་གནད། །རང་ལུས་ཡི་དམ་ལྷ་ཡི་སྐུ། །ང་རྒྱལ་བརྟན་པོ་བསྒོམ་པ་ནི། །འགྲོ་འདུག་སྤྱོད་ལམ་ཀུན་ཏུ་བྱ། །ངག་ནི་དལ་བར་མི་སྡོད་པར། །བསྙེན་པ་ཆུ་བོའི་གཞུང་བཞིན་ཏེ། །འདོན་ཆ་ཆོ་ག་མང་པོ་བས། །བསྙེན་པ་བཟླས་པས་ནུས་པ་འབྱུང་། །བླ་མ་ཡི་དམ་ལུ་ཆོས་སྐྱོང་སོགས། །བསྲེ་མ་དུང་ཕྱུར་ཞེ་ལ་འཆོང་། །དབང་ལུང་གདམས་ངག་ཐོབ་པ་རྣམས། །ཡི་དམ་དངོས་ཉིད་ཡིན་སྙམ་པའི། །དག་སྣང་བྱས་པས་འགྲུབ་ཐག་ཉེ། །
འོན་ཀྱང་དངོས་སུ་མ་མཇལ་ཡང་། །དེང་སང་ཀཾ་ཚང་ཐམས་ཅད་ཀྱི། །སྟོན་པ་ཡབ་སྲས་རྣམ་གཉིས་ཡིན། །དེ་ཉིད་རྩ་བའི་བླ་མར་ཟུངས། །ཐེ་ཚོམ་མེད་པར་གསོལ་བཏབ་ན། །ཉམས་རྟོགས་སྐྱེ་བར་ངེས་པ་ནི། །དུས་གསུམ་མཁྱེན་པས་ཞལ་གྱིས་བཞེས། །བླ་མ་རང་སེམས་གཅིག་ཏུ་བསྲེས། །གང་ཤར་རང་ངོར་གཅེར་གྱིས་ལྟོས། །བལྟས་པས་མ་མཐོང་ངང་ལ་ཞོག །ཉམས་ཀྱི་མཐོ་དམན་བཟང་དང་ངན། །གང་ཤར་སྟོང་པའི་ངང་ལ་ཞོག །གང་ཤར་སྤང་བླང་དགའ་སྡུག་མེད། །ལྷོད་དེ་བཞག་ན་རྟོགས་པ་འཆར། །དེ་ནི་སྙིང་གཏམ་དྲུག་པ་ཡིན། །ན་སོ་གཞོན་ཞིང་ནད་མེད་མིས། །ཐིག་ལེ་མ་ཉམས་སྲོག་ལྟར་བསྲུང་། །རྩ་རླུང་འཁྲུལ་འཁོར་ལ་འབད་ན། །ལམ་རྟགས་ཡོན་ཏན་དུ་མ་འཆར། །གཅོང་ནད་བྱང་ཞིང་ཉམས་རྟོགས་འབར། །རྟོགས་ལྡན་སྒོམ་ཆེན་ཚད་ལྡན་འགྱུར། །རྩ་རླུང་ནུས་པ་ལྡན་ན་ཡང་། །གཞན་ལུས་ཕྱག་རྒྱ་མི་བསྟེན་པར། །འདུལ་ཁྲིམས་གཙང་མར་བསྲུང་བ་འདི། །བཀའ་བརྒྱུད་གོང་མའི་རྣམ་ཐར་ལེགས། །བསྟན་ལ་ཕན་ཕྱིར་འགྲོ་དོན་འབྱུང་། །དེ་ནི་སྙིང་གཏམ་བདུན་པ་ཡིན། །
གྲོང་ཆོག་ལ་སོགས་བྱེད་པའི་ཚེ། །བསྙེན་བཀུར་འབུལ་ཞབས་བཟང་ངན་ལ། །དགའ་དང་མི་དགའི་རྣམ་འགྱུར་སྤང་། །བཟང་ན་རྐྱེན་འགྱུར་ཁོ་རང་ལེགས། །ངན་ན་རང་ལ་དཀོར་སྒྲིབ་ཆུང་། །གང་ལྟར་བྱུང་ཡང་དགའ་བ་བསྒོམ། །ལྷ་བསྙེན་ཐེམ་ཞིང་ནུས་པར་ལྡན། །དྲག་པོའི་ལས་སྦྱོར་མཁས་ན་ཡང་། །མཐུ་སྡིག་ངན་སྦྱོར་ཞེ་དམ་སྤང་། །དགྲ་གཉེན་ངེས་པ་ཅི་ཡང་མེད། །དགྲ་དེ་གཉེན་འགྱུར་གཉེན་དེ་དགྲ། །ལོ་རེ་ལ་ཡང་འགྱུར་ཞིང་འགྲོ། །དོན་ལ་འགྲོ་ཀུན་ཕ་དང་མ། །འཁོར་བའི་བྱ་བ་སྙིང་པོ་མེད། །རང་ཉིད་གཉོམ་ཆུང་ས་བཟུང་ན། །རང་ལ་སྡིག་གི་མི་གོས་ཤིང་། །གཞན་ལ་གནོད་པ་མི་འབྱུང་བས། །རང་ཉིད་འཆི་ཚེ་འགྱོད་མེད་འབྱུང་། །དེ་ནི་སྙིང་གཏམ་བརྒྱད་པ་ཡིན། །རྒྱུན་དུ་ཡི་དམ་གང་བྱེད་ཀྱི། །མངོན་རྟོགས་གཏོར་བསྔོས་ཆག་མེད་དང་། །ཚེས་བཅུ་དགུ་གཏོར་གཟབ་པར་བྱ། །ལོ་དུས་བསྐང་གསོལ་གཟབ་པ་དང་། །དུས་བཟང་ཚོགས་དང་བསྐང་གསོལ་བྱ། །རྒྱུན་དུ་འདོན་ཆ་མི་མང་བར། །སྔགས་དང་ཏིང་འཛིན་གཙོ་བོར་སྟོན། །དེ་ཡིས་ཉམས་ལེན་འཕེལ་བ་དང་། །
ཌཀྐི་ཆོས་སྐྱོང་ངང་གི་འདུ། །མཚམས་ལ་འདུག་རྒྱུ་བྱུང་བའི་ཚེ། །སོ་གསོད་ལྐོག་ཉལ་མི་བྱ་བར། །ངག་མཚམས་དམ་ཞིང་མལ་ས་གནོན། །ཆབ་ཆོབ་མང་པོ་མི་འདོན་པར། །གང་སྒྲུབ་ལྷ་དེ་རྟགས་ཐོན་བྱ། །ཤིན་ཏུ་དམ་པའི་མཚམས་བསྡམས་ན། །ཡུན་རིང་མི་ཐོག་རྟགས་ཐོན་ངེས། །དེ་ནི་སྙིང་གཏམ་དགུ་པ་ཡིན། །ཁྱད་པར་ཀུན་ཏུ་བཟང་པོའི་བཀའ། །ཐེག་དགུའི་ཡང་རྩེ་རྫོགས་པ་ཆེ། །འཇའ་འོད་ཐིག་ལེ་ཐིག་ཕྲན་ལ། །ངེས་ཤེས་བསྐྱེད་ལ་རྒྱུན་དུ་ལྟོས། །ཉམས་ལེན་སེམས་དང་བསྲེ་ཞིང་བལྟ། །དེ་ལ་ཐེ་ཚོམ་ཡིད་གཉིས་ན། །བསོད་ཆུང་སྐལ་པ་མེད་པར་ངེས། །དེ་ཕྱིར་ཟབ་ཆོས་མཆོག་ཏུ་ཟུང་། །བར་དོ་ཆོད་པར་ཐེ་ཚོམ་མེད། །དེ་ནི་སྙིང་གཏམ་བཅུ་པ་ཡིན། །ཤེས་རབ་རང་བཞིན་བུད་མེད་ལ། །གཤེ་སྐུར་མི་རུང་དམ་ཚིག་སྟེ། །འོན་ཀྱང་མི་ཉེ་རྒྱང་བསྲིངས་ནས། །འགོ་བའི་ནད་ལྟར་འཛེམ་བྱས་ན། །རང་ཉིད་ཆོས་མགོ་ཐོན་པ་ཡི། །བསྟན་པ་དང་ནི་བླ་མ་ཡི། །ཆགས་ཕྱིར་ཞབས་ཏོག་ཆེ་ཤོས་ཏེ། །དེ་ནི་སྙིང་གཏམ་བཅུ་གཅིག་པ། །བློ་སེམས་ཆོས་ལ་འགྱུར་བ་དང་། །ཆོས་དེ་ཆོས་མིན་མི་འགྲོ་
བར། །བྱང་ཆུབ་ལམ་དུ་འགྲོ་བའི་ཐབས། །མི་རྟག་ནམ་འཆི་ཆ་མེད་འདི། །ཉིན་རེ་ལན་གསུམ་དྲན་པ་གཅེས། །ད་ལྟ་འཆི་ནད་ཕོག་བྱུང་ན། །མི་འཇིག་གདེང་ཚོད་ཅི་འདུག་པ། །རང་གི་སེམས་ལ་སྐོར་རྫོགས་བྱ། །འདི་ནི་སྙིང་གཏམ་བཅུ་གཉིས་པ། །རྒྱུན་དུ་བདེ་ཆེན་ཞིང་ཁམས་སུ། །སྐྱེ་བའི་བསྔོ་བ་སྨོན་ལམ་དང་། །འགྲོ་བའི་འདུན་པ་དྲག་པོ་བྱ། །དེ་རུ་སྐྱེ་བའི་དགེ་ཚོགས་འབད། །དེ་ནི་སྙིང་གཏམ་བཅུ་གསུམ་ཡིན། །བན་རྒན་རཱ་ག་ཨ་སྱ་ཡིས། །ཚེམ་དཀར་མདོ་རུ་ཞུན་མར་ངོགས། །འཕྲལ་དུ་གང་དྲན་བྲིས་པའོ། །མངྒ་ལཾ།། ༈ །།རཱ་ག་ཨ་སྱས་ཀརྨ་ནཱ་ཐ་ལ་གདམས་པའི་མགུར་ཚན་གཅིག་བཞུགས། ན་མོ་མ་ཧཱ་མུ་དྲ་ཡེ། བླ་མ་ཡི་དམ་དབྱེར་མེད་པའི། །འཇིག་རྟེན་དབང་ཕྱུག་ཞབས་ལ་འདུད། །བཙུན་པ་ཀརྨ་མགོན་པོ་ཡི། །སེམས་ལ་ཕན་པ་དགོས་གསུངས་པ། །མདོ་རྒྱུད་བླ་མའི་གསུངས་རྣམས་ལྕསྒྱུ་ཀུན། །སེམས་ལ་ཕན་ཐབས་ཁོ་ན་སྟེ། །དོན་གཞན་གསུངས་པ་འདུག་གམ་ཅི། །སེམས་ལ་ཕན་ཐབས་གང་ཞེ་ན། །རང་སེམས་རང་གིས་འདུལ་བ་ཡིན། །དེ་ཕྱིར་བུ་
ཁྱེད་རང་སེམས་ཐུལ། །དལ་འབྱོར་མི་ལུས་རིན་ཆེན་འདི། །ཡང་ཡང་ཐོབ་དཀའ་ད་རེས་ཙམ། །ད་རེས་རྡོག་སྣ་འདྲེད་ཤོར་ན། །ནམ་ཡང་ཐར་བའི་དུས་མ་མཆིས། །ལུས་འདི་ཆུད་ཟོས་མི་འབྱུང་བར། །ལུས་འདི་དོན་དང་ལྡན་པའི་ཐབས། །སྡོམ་པ་དམ་ཚིག་བསྲུང་བ་གཅེས། །སྐྱབས་གསུམ་སྡོམ་པ་ཞུ་ཕྱི་ནས། །འདི་དང་ཕྱི་མ་བར་དོ་ཡི། །སྐྱིད་སྡུག་གང་བྱུང་དཀོན་མཆོག་ལ། །ཅི་མཛད་ཁྱེད་ཤེས་བློ་སྙིང་གཏོད། །སྐྱིད་ན་དཀོན་མཆོག་ཐུགས་རྗེར་བསྒོམ། །སྡུག་ནའང་དཀོན་མཆོག་ཐུགས་རྗེ་སྟེ། །ལས་སྒྲིབ་དག་པའི་དགའ་བ་བསྒོམ། །སེར་གོས་གྱོན་པ་ཐམས་ཅད་ལ། །དགེ་འདུན་དངོས་ཀྱི་འདུ་ཤེས་ཀྱིས། །སྐྱོན་ལ་མི་བརྟགས་དག་སྣང་སྦྱོངས། །དལ་འབྱོར་མི་ལུས་རིན་ཆེན་འདི། །ཡུན་རིང་མི་ཐོག་འཆི་བདག་འབྱུང་། །འཆི་བདག་ལས་ཀྱི་གཤིན་རྗེ་འདི། །ནམ་འོང་ཏིག་ཏིག་མ་མཆིས་ཤིང་། །བྱུང་ན་ཅེས་ཀྱང་བཟློག་ཐབས་མེད། །ཉི་མ་ནུབ་རིའི་རྩེར་ནུབ་ལྟར། །སུས་ཀྱང་མི་བཟློག་ཕ་རོལ་འགྲོ། །ལུས་དང་ལོངས་སྤྱོད་ནོར་རྫས་དང་། །ཡུལ་མཁར་མཐུན་གྲོགས་ཤུལ་དུ་ལུས། །རིག་པ་གཏན་མེད་
གཅིག་པུར་ལུས། །མགོ་དཔོན་ཕ་ཚོ་ཉེ་དུ་ཡི། །དོན་དུ་སྡིག་པ་བྱས་ན་ཡང་། །སྡིག་པ་ཁོང་ཚོས་ཁུར་རོགས་མེད། །དགེ་སྡིག་ལུས་དང་གྲིབ་མ་ལྟར།། རང་དང་འབྲལ་མེད་རྗེས་སུ་འབྲང་། །ལས་ཀྱི་གཤིན་རྗེའི་ཁྲིམས་ར་ན། །རྫུན་དང་གཏམ་མཁས་བྱེད་ས་མེད། །གང་བྱས་མེ་ལོང་ཡིག་ཆུང་གསལ། །དེ་དུས་འགྱོད་ཀྱང་ཕན་པ་མེད། །དགེ་བ་འདོད་ཀྱང་ཚོལ་ཁུང་མེད། །ད་ལྟ་རང་དབང་རང་ལ་ཡོད། །བསམ་ཤེས་ཡོད་པའི་མི་ཡིན་ན། །ད་ལྟ་སྡིག་པ་ཆུང་ལ་འཛེམ། །སྡིག་པ་ཆུང་ངུ་རེ་རེས་ཀྱང་། །བསྐལ་པ་དུ་མར་སྡུག་བསྔལ་བསྐྱེད། །དགེ་བ་ཆུང་ཡང་འབད་པས་སྒྲུབས། །དགེ་བ་ཆུང་ངུ་རེ་རེས་ཀྱང་། །སྐྱེ་བ་དུ་མར་བདེ་སྐྱིད་འབྱུང་། །ལྷ་དང་མི་ཡི་བདེ་སྐྱིད་ཀྱང་། །ཡུན་རིང་མི་རྟག་སྡུག་བསྔལ་འགྱུར། །རིགས་དྲུག་གང་དུ་སྐྱེས་ཀྱང་སྡུག །འཁོར་བ་སྡུག་བསྔལ་རྒྱ་མཚོ་སྟེ། །སྐྱེ་རྒས་ན་འཆིའི་རྦ་རླབས་འཁྲུགས། །སྐྱ་འདི་ལ་ཐར་ཐབས་དམ་པའི་ཆོས། །ད་ལྟ་བསྒྲུབས་ན་ངེས་པར་འགྲུབ། །ཆོས་ཀྱི་རྨིང་གཞི་ཚུལ་ཁྲིམས་ཡིན། །སྡོམ་པ་དམ་ཚིག་གཙང་བ་ན། །ངན་སོང་གནས་སུ་ལྟུང་
དོགས་མེད། །མི་ལུས་ཐོབ་པ་དཀའ་རྒྱུ་མེད། །ཐོས་བསམ་སྒོམ་གསུམ་གང་བྱེད་ཀྱང་། །ལམ་དུ་འགྲོ་ཞིང་དོན་ལྡན་འགྱུར། །གལ་ཏེ་སྡོམ་པ་ཚུལ་ཁྲིམས་རྣམས། །རྩ་བཞི་གང་རུང་ཉམས་ཤོར་ན། །རྩིགས་རྨིང་ངན་པའི་མཁར་དང་འདྲ། །ཐོས་བསམ་ཡོན་ཏན་ཆེ་ན་ཡང་། །རང་གཞན་དོན་ཆེན་འགྲུབ་པར་དཀའ། །དེ་ཕྱིར་རྩ་བ་བཞི་པོ་འདི། །རང་སེམས་དཔང་པོར་ཞོག་ལ་སྲུངས། །འཆི་བདག་ནམ་འོང་ཆ་མེད་ཅིང་། །བྱུང་ན་བཟློག་ཐབས་མི་གདའ་བས། །བྱུང་ཡང་འགྱོད་མེད་དགེ་སྦྱོར་རེམ། །གང་ཤེས་གསོལ་འདེབས་ཆོས་སྤྱོད་སོགས། །སྤྱི་པའི་ཁྲལ་དུ་མ་སེམས་པར། །ནངས་ནུབ་རྒྱུན་དུ་ཐུགས་དམ་མཛོད། །ཉམས་ལེན་བོགས་སྐྱེད་འབྱུང་བའི་ཐབས། །ཟུང་འཇུག་བརྒྱུད་པའི་བླ་མ་རྣམས། །སྤྱི་བོར་ཐོ་བརྩེགས་སྒོམ་མཛོད་ལ། །གསོལ་བ་སྙིང་གི་དཀྱིལ་ནས་ཐོབ། །ཅི་མཛད་ཁྱེད་ཤེས་བློ་སྙིང་གཏོད། །འོད་དུ་ཞུ་ནས་རང་ལ་བསྟིམ། །དེ་ནས་རང་སེམས་ངོ་བོར་ལྟོས། །བལྟས་པས་མི་མཐོང་རང་སར་ཞོག །བྱིང་ཞིང་རྨུག་ན་སྒྲིམ་ལ་ལྟོས། །ས་ལེ་ཡེ་རེ་རྗེན་ནེ་ཞོག །འཕྲོ་རྒོད་མང་ན་ལྷོད་ལ་
ལྟོས། །གར་འགྲོ་ཐོངས་ལ་རྒྱངས་སོ་ཚུགས། །སེམས་ཀྱི་ངོ་བོ་སྟོང་པ་ཉིད། །གཟུགས་དང་ཁ་དོག་དངོས་པོ་མེད། །སྟོང་ཉིད་ཆོས་སྐུའི་ངོ་བོ་ཡིན། །སེམས་ཀྱི་རང་བཞིན་གསལ་ལ་དྭངས། །རང་རིག་རང་གསལ་རྗེན་ནེ་བ། །ལོངས་སྤྱོད་རྫོགས་སྐུའི་ངོ་བོ་ཡིན། །སེམས་ཀྱི་རྣམ་པ་འགགས་མེད་པ། །གར་ཡང་འགྲོ་ཞིང་ཅིར་ཡང་འཆར། །སྤྲུལ་པའི་སྐུ་ཡི་ངོ་བོ་ཡིན། །དེ་གསུམ་དབྱེར་མེད་ངོ་བོ་གཅིག །ངོ་བོ་ཉིད་སྐུའི་ངོ་བོ་ཡིན། །རང་ངོ་རང་གིས་མ་རིག་ན། །ལྷན་ཅིག་སྐྱེས་པའི་མ་རིག་པ། །འཁོར་བར་འཁྱམས་པའི་རྩ་བ་ཡིན། །རང་ངོ་རང་གིས་རིག་པ་ན། །ལྷན་སྐྱེས་ཡེ་ཤེས་ཕྱག་རྒྱ་ཆེ། །ཆོས་སྐུ་སྐྱེ་མེད་ངོ་བོ་ཡིན། །སེམས་ལ་རྣམ་རྟོག་གང་ཤར་བ། རང་ངོ་རང་གིས་མ་རིག་ན། །རྣམ་རྟོག་མ་རིག་ཆེན་པོ་སྟེ། །རིགས་དྲུག་འཁོར་བའི་རྩ་བ་ཡིན། །རྣམ་རྟོག་རང་ངོ་རིག་པ་ན། །རང་ཞི་ཆུ་རླབས་ཆུར་ཐིམ་ལྟར། །མི་རྟོག་ཡེ་ཤེས་ཆེན་པོ་ཡིན། །ལས་ནི་དང་པོ་པ་ཡི་དུས། །གང་ཤར་རང་གི་ངོ་བོར་ལྟོས། །བལྟས་པས་རང་ཞི་རང་གྲོལ་ནས། །གསལ་སྟོང་རྗེན་པར་ཡུད་ཙམ་གནས། །
དེ་ལ་ཉམས་ལེན་བྱེད་པ་ཡིན། །དེ་བས་ཅུང་ཟད་མཐོ་ཙམ་ན། །དྲན་པ་ཙམ་གྱི་ཐོག་ཏུ་སླེབས། །མ་དྲན་ན་ནི་འཁྲུལ་པ་སྟེ། །དྲན་ནས་ཉམས་ལེན་དེས་ཆོག་པ། །ཉམས་ལེན་སྐྱོང་སྟབས་བདེ་བ་འབྱུང་། །རྣམ་རྟོག་ཉུང་དུ་མ་སོང་ཡང་། །རྣམ་རྟོག་བསྒོམ་ལ་མི་གནོད་དེ། །མཚོ་ལ་ཁ་བ་བབ་པ་ལྟར། །རྣམ་རྟོག་བསྒོམ་དུ་ཤར་བ་འབྱུང་། །དེ་ནས་ཅུང་ཟད་བོགས་བྱུང་ན། །ཕྱི་ནང་སྣོད་བཅུད་ཐམས་ཅད་ཀུན། །རང་གི་སེམས་དུ་ངེས་པར་རྟོགས། །སེམས་ཉིད་གཞི་མེད་རྩ་བྲལ་བ། །སྟོང་ཉིད་ཕྱག་རྒྱ་ཆེན་པོར་རྟོགས། །སེམས་ངོ་སྐྱོང་བ་མ་གཏོགས་པ། །ཅི་ཡང་དགོས་མེད་སྙམ་པ་འབྱུང་། །ལུས་བདེ་སེམས་བདེ་ཞེ་རྩ་སྐྱིད། །ང་ལས་སྐྱིད་མེད་སྙམ་པ་འབྱུང་། །དགྲ་གཉེན་ཁྱད་མེད་སྙམ་པ་དང་། །ཟས་གོས་སྲེད་པ་ཆུང་བ་དང་། །བྱ་བ་བཏང་སྙིང་འདོད་པ་འབྱུང་། །དེ་དུས་གནས་ཉམས་ཤིན་ཏུ་ཆེ། །མེ་རེ་འཁྱིལ་ལེ་གནས་པ་འབྱུང་། །རེས་འགའ་གསལ་སྟོང་རྗེན་པར་འཆར། །རེས་འགའ་སྟོང་ཉམས་སྟོང་ཧད་དེ། །ཐམས་ཅད་སྟོང་པ་ཡིན་སྙམ་བྱེད། །རེས་འགའ་འཕྲོ་རྒོད་སྔར་བས་མང་། །དུག་ལྔ་ཞེ་སྡང་ཕྲག་
དོག་ཆེ། །སྔར་བས་ཐུ་བ་འདྲ་ཡང་འབྱུང་། །དེ་ལྟར་བཟང་ངན་གང་ཤར་ཡང་། །མི་སྐྱུར་རང་ངོ་ལྟ་བ་གཅེས། །བཟང་ལ་བློ་སེམས་མི་སྐྱེད་ཅིང་། །ངན་ལ་ཞེ་རྩ་མི་ཞུམ་པར། །གང་ཤར་ངོ་བོ་སྐྱོང་ནུས་ན། །བལྟ་བྱ་ལྟ་བྱེད་གཅིག་ཏུ་འདྲེས། །འདི་སྒོམ་གཏད་སོ་སྤུ་ཙམ་མེད། །འཁོར་འདས་སྣང་སྲིད་ཐམས་ཅད་ཀུན། །རང་གི་སེམས་དང་དབྱེར་མེད་འདྲེས། །ཕྱི་རོལ་བྲག་རི་སྐྱེ་འགྲོ་སོགས། །སོ་སོར་སྣང་ཡང་ངོ་བོ་སྟོང་། །ཆུ་ནང་ཤར་བའི་ཟླ་གཟུགས་འདྲ། །ནམ་མཁས་གར་ཁྱབ་སེམས་ཀྱིས་ཁྱབ། །སེམས་ཉིད་ངོ་བོ་རྗེན་པར་བུད། །དེ་ཡི་གནས་ཚུལ་བརྗོད་མི་ཤེས། །འདི་ཡིན་འདི་མིན་ཅི་ཡང་མེད། །མདོ་རྒྱུད་མན་ངག་བླ་མའི་གསུང་། །ཐམས་ཅད་ས་ཕག་གྲོས་བྱས་ལྟར། །ཐམས་ཅད་རང་སེམས་སྟེང་དུ་འབབ། །བློ་འཛིན་བློ་བཤར་མ་བྱས་ཀྱང་། །བཤད་ན་ཟད་མེད་ཆུ་བོ་འདྲ། །དེ་ཉིད་མ་རྟོགས་སེམས་ཅན་ལ། །བཅོས་མིན་སྙིང་རྗེ་ཤུགས་ལ་སྐྱེ། །བསྐྱེད་རིམ་མངོན་རྟོགས་མི་དགོས་པར། །དྲན་རྫོགས་ནམ་མཁའི་འཇའ་ཚོན་ལྟར། །བསྐྱེད་རྫོགས་དབྱེར་མེད་ཟུང་འཇུག་གོ །དེ་ག་
ཙམ་ཞིག་སྐྱེས་པ་ལ། །ངོ་བོ་མཐོང་ཞེས་བརྗོད་རུང་ཙམ། །རྟོགས་ལྡན་མིང་ཙམ་བཏགས་ཀྱང་རུང་། །འོན་ཀྱང་སྤྱོད་པ་ཞིབ་པ་དང་། །དགེ་སྒྲུབ་སྡིག་སྤངས་གཟབ་པ་གཅེས། །བསྔོ་བ་སྨོན་ལམ་རྒྱ་ཆེར་གདབ། །ད་རུང་སྣང་སེམས་བསྲེ་བའི་གནད། །ཕྱི་རོལ་དངོས་པོ་ཐམས་ཅད་དང་། །རང་སེམས་བསྲེ་ཞིང་བསྒོམ་པ་ཟབ། །ད་རུང་ཡེངས་སྐབས་བརྗེད་སྐབས་ཡོད། །དྲན་རྗེ་རྒྱུན་དུ་བརྟན་པ་གཅེས། །ད་རུང་བརྒྱུད་པའི་བྱིན་རླབས་དགོས། །གསོལ་བ་སྙིང་ནས་གདབ་པ་གཅེས། །ཆོས་ཀུན་སྨོན་ལམ་མཐའ་བསྒྱུར་བས། །རྟ་ཁ་སྲབ་ཀྱིས་བསྒྱུར་དང་འདྲ། །སྐྱེ་སླ་ཕན་ཡོན་རྒྱ་ཆེ་བ། །བདེ་བ་ཅན་གྱི་ཞིང་ཁམས་སུ། །སྐྱེ་བའི་བསྔོ་བ་སྨོན་ལམ་དང་། །བཟང་སྤྱོད་བདེ་སྨོན་ཐུགས་དམ་བྱ། །གནས་སྐབས་བར་ཆད་སེལ་བ་དང་། །མདོ་འབུམ་ཉེར་ལྔ་ལ་སོགས་པ། །ཤེར་ཕྱིན་ཀུན་གྱི་དོན་ཚང་ཕྱིར། །ཟབ་མོ་བདུད་བཟློག་ཆག་མེད་མཛོད། །རྩ་བ་བཞི་པོ་ཉམས་ལེན་ཅིང་། །ཕྲ་ཞིབ་ཉེས་ལྟུང་བཤགས་སྡོམ་འབད། །གསོལ་འདེབས་ཆོས་སྤྱོད་གང་ཤེས་དང་། །བསྙེན་པ་བསྐྱེད་རིམ་སེམས་ངོ་ལ། །ཅི་ནུས་འབད་
འབུངས་འདོན་པ་ནི། །ཆོས་མགོ་ཐོན་པ་མཐའ་འཁྱོལ་ན། །དེང་སང་སྙིགས་མ་ལྔ་ཡི་དུས། །ཆོས་པའི་གྲ་རུ་འགྲོ་བ་ཡིན། །དེ་ཕྱིར་དེ་ལྟར་ཉམས་སུ་ལོངས། །དགེ་འདུན་གྲ་རུ་བག་མི་ཕེབས། །དམ་ཆོས་བཤའ་མ་བྱེད་སྙམ་པ། །ཕལ་ཆེར་བར་ཆད་དབང་དུ་འགྲོ། །དེ་ཕྱིར་དགེ་འདུན་སྡེ་ཉིད་དུ། །དག་སྣང་སྦྱངས་ཤིང་དད་འདུན་བསྐྱེད། །རང་ཉིད་ཀུན་ལས་དམན་པར་ལྟ། །ཕྱག་དངབསྐོར་བ་ཆོས་སྤྱོད་འབུངས། །འགྲོ་འདུག་སྤྱོད་ལམ་ཐམས་ཅད་དུ། །རང་སེམས་ངོ་བོ་སྐྱོངས་བར་མཛོད། །འཕྲལ་དུ་གང་དྲན་བསླབ་བྱ་འདི། །ཡོར་སྟོད་ཆོས་ར་བྱེད་པའི་དུས། །སྣང་གསལ་མར་མེའི་ངོགས་ལ་ནི། ༧ རཱ་ག་ཨ་སྱས་བྲིས་པ་ཡིན། མངྒ་ལཾ།། ༈ །།ན་མོ་གུ་རུ་སརྦ་ཡེ། རྟོགས་ལྡན་ཐར་པ་ཞེས་བྱ་བས། །བདག་གི་བཀའ་འབུམ་བྲི་འདོད་པས། །བདག་གིས་གང་དྲན་བྲིས་པ་ལ། །སྙིང་པོ་ཆེ་བར་མ་མཆིས་ཀླུ་ཤིང་། །མཚན་ཉིད་ལྡན་པའི་བླ་མ་ནི། །དཀོར་ཟན་བདག་འདྲ་ག་ལ་ཡིན། །དེ་ཕྱིར་དཀའ་གནད་བྲིས་ན་ཡང་། །ཤོག་བུ་ཁྲོག་བརླག་རྒྱུ་བ་གྱོང་། །བྲིས་ཡོན་ཆུད་ཟོས་
ཡིན་ནམ་སེམས། །འོན་ཀྱང་མི་ལ་རས་པ་ཡིས། །ཁོ་བོ་སུ་ཡི་སྤྲུལ་པ་ཡིན། །ཁོ་བོ་རང་ལའང་ཆ་མེད་དེ། །ངན་སོང་སྤྲུལ་པ་ཡིན་ཡང་རུང་། །ཁྱེད་རང་རྣམས་ཀྱིས་རྡོ་རྗེ་འཆང་། །ཡིན་པར་བསྒོམས་ལ་གསོལ་ཐོབ་དང་། །རྡོ་རྗེ་འཆང་གི་བྱིན་རླབས་འབྱུང་། །གསུངས་པའི་དཔེ་དང་འདྲ་བ་བཞིན། །བདག་ནི་མཚན་ལྡན་བླ་མ་རུ། །མཐོང་ནས་དད་འདུན་བྱས་པ་ན། །ཁྱི་སོ་ལ་ནི་རིང་བསྲེལ་དཔེ། །མཚན་ལྡན་བླ་མའི་བྱིན་རླབས་འབྱུང་། །དེ་ཡི་རྒྱུ་མཚན་ཅི་ཞེ་ན། །མི་བསྐྱོད་རྡོ་རྗེའི་གསུངས་ལས་ཀྱང་། །བླ་མ་མཚན་ལྡན་མིན་ན་ཡང་། །སློབ་མ་དད་གུས་ལྡན་པ་ཡིས། །སངས་རྒྱས་ཡིན་པའི་ངེས་ཤེས་ཀྱིས། །གསོལ་འདེབས་བཀུར་སྟི་བྱེད་པའི་ཚེ། །སློབ་མ་དད་ལྡན་རྗེས་བཟུང་ཕྱིར། །སངས་རྒྱས་བྱང་སེམས་ཐམས་ཅད་ཀུན། །བླ་མ་དེ་ལ་ཞུགས་ནས་ཀྱང་། །སློབ་མ་དད་ལྡན་བྱིན་རླབས་ཤིང་། །བཀུར་བསྟིའི་ཚོགས་གཉིས་རྫོགས་པ་རུ། །སངས་རྒྱས་ཀུན་གྱིས་མཛད་པར་གསུངས། །དེ་ཕྱིར་ང་ཡི་བཀའ་འབུམ་ཡང་། །དད་པས་བྲིས་ན་བསོད་ནམས་འཕེལ། །ཤཱཀྱ་ཐུབ་པས་གསུངས་པ་ཡི། །ཨཱ་ལི་ཀཱ་ལིས་
བརྒྱན་པ་ཡི། །རྒྱུད་ལས་ཕན་ཡོན་འདི་ལྟར་གསུངས། །གང་ཞིག་སྐལ་དང་ལྡན་པ་ཞིག །བླ་མའི་གསུངས་ལ་ངོ་མཚར་ནས། །གྲོ་ག་རས་སམ་ཤིང་ཤུན་ལ། །རིན་ཆེན་གསེར་གྱིས་བྲིས་ནས་ནི། །མགུལ་ལམ་སྤྱི་བོར་སུས་བཟུང་ན། །འདི་ནི་མདོ་སྡེ་བརྒྱ་ཕྲག་གམ། །རྒྱུད་གཞན་བྱེ་བ་བསམ་ཡས་རྣམས། །བྲིས་ཤིང་འཛིན་པའི་མི་བས་ཀྱང་། །འདི་ཉིད་བསོད་ནམས་བསམ་ཡས་ཏེ། །བསྐལ་པ་ཞིང་གི་རྡུལ་སྙེད་དུ། །བརྗོད་ཀྱིས་ལོང་བ་མ་ཡིན་ནོ། །གལ་ཏེ་བཀླགས་ཤིང་མཆོད་ན་ཡང་། །འདི་དེས་ཀྱང་ནི་དེ་སྙེད་འགྱུར། །དཔེར་ན་ཆུ་བོ་གངྒཱའི་རྒྱུན། །ཇི་སྲིད་འཆད་པ་མེད་པ་བཞིན། །འདི་བྲིས་དགེ་བ་བར་ཆད་མེད། །སྐུ་གསུམ་རྫོགས་པའི་སར་བསྐྱལ་ལོ། །འབྲས་བུ་གཞན་ཕན་འབྱུང་སྔོན་པར། །འདི་ལ་ཁྱད་པར་ལས་རྫོགས་སོ། །དེ་སྐད་རྒྱུད་ལས་གསུངས་པ་སྟེ། །དེ་ཡི་དོན་དེ་བཀྲོལ་བ་ན། །མདོ་སྡེ་བརྒྱ་ཕྲག་བྲིས་་པ་བས། །བླ་མའི་གསུང་ནི་བྲིས་པས་ལྷག །རྒྱུད་གཞན་བྱེ་བ་བྲིས་པ་བས། །བླ་མའི་གསུང་ནི་བྲིས་པས་ལྷག །འདོན་ན་ཡང་ནི་དེ་དང་འདྲ། །མདོ་སྡེ་བརྒྱ་ཕྲག་འདོན་པ་
བས། །བླ་མའི་གསུང་ནི་འདོན་པ་ལྷག །རྒྱུད་སྡེ་བྱེ་བ་འདོན་པ་བས། །བླ་མའི་གསུང་ནི་འདོན་པ་ལྷག །བླ་མའི་གསུང་འབུམ་བྲིས་པ་ཡི། །ཕན་ཡོན་བསོད་ནམས་མཐའ་ཡས་ཏེ། །སྟོང་གསུམ་འཇིག་རྟེན་ཞིང་ཁམས་ཀྱི། །ས་གཞིའི་རྡུལ་ཕྲན་གྲངས་མཉམ་པའི། །བསྐལ་པ་དེ་ཡིས་གྲངས་ལ་ནི། །ཕན་ཡོན་བརྗོད་པར་མི་ནུས་ཏེ། །དེ་ཡི་ཕན་ཡོན་བསོད་ནམས་ནི། །ཆུ་བོ་གངྒཱའི་རྒྱུན་བཞིན་དུ། །ནམ་ཡང་ཆད་མེད་ཟད་པ་མེད། །མཐར་ཐུག་འབྲས་བུ་རྫོགས་སངས་རྒྱས། །ཆོས་སྐུ་ནམ་མཁའ་ལྟ་བུ་ཐོབ་། །ལོངས་སྐུ་རྒྱལ་བའི་སྐུ་ལྔ་ཐོབ། །སྤྲུལ་སྐུ་མཛད་པ་བཅུ་གཉིས་ཀྱི། །འགྲོ་དོན་བྱེད་པའི་སངས་རྒྱས་འགྱུར། །གཞན་ཕན་སྐྱེ་བ་ཐམས་ཅད་དུ། །སྐྱེས་མ་ཐག་ནས་ཆོས་དང་འཕྲད། །དབང་ལུང་ཁྲིད་སོགས་ཞུ་བ་རྣམས། །འབད་རྩོལ་མི་དགོས་ཤུགས་ཀྱིས་ཐོབ། །བླ་མ་དགེ་བའི་བཤེས་གཉེན་ནི། །མ་འཆུགས་བཟང་པོ་རྣམས་དང་མཇལ། །ཞབས་ཏོག་མེད་ཀྱང་ཐུགས་བཏགས་འབྱུང་། །བརྩོན་འགྲུས་མི་དགོས་ཡོན་ཏན་ལོབས། །དམ་ཚིག་ཆག་ཉམས་མི་འབྱུང་ཞིང་། །བསྒྲུབ་ལ་བར་ཆད་མེད་པར་
འོང་། །རང་གི་གང་དང་གང་སྨྲས་པ། །མི་རྣམས་ཀུན་གྱིས་ཆོས་སུ་གོ །གང་བཤད་ཆོས་དེས་གཞན་ལ་ཕན། །ངག་ལ་ནུས་པ་ཆེན་པོ་འབྱུང་། །བྱིན་རླབས་བཀའ་བསྒོས་ནད་གདོན་ཞི། །གང་སྨྲས་ཚིག་ལ་ལྷ་འདྲེ་དང་། །མི་རྣམས་ཐམས་ཅད་གུས་པས་ཉན། །རྨོད་མོ་བྱས་ན་དགྲ་བགེགས་བསྒྲལ། །དེ་སོགས་ཕན་ཡོན་རྒྱ་ཆེ་བས། །བླ་མའི་གསུང་འབུམ་བྲིས་པ་ལ། །འབྱུང་བར་བཅོམ་ལྡན་འདས་ཀྱིས་གསུངས། །བསྐལ་པ་སྟོང་གི་སངས་རྒྱས་བས། །བླ་མ་གཉན་པར་གསུངས་ཕྱིར་རོ། །དེ་ཡང་བླ་མ་ཐམས་ཅད་མིན། །རང་གི་རྩ་བའི་བླ་མ་ཡིན། །རྩ་བའི་བླ་མ་གང་ཡིན་ན། །འདུལ་ཁྲིམས་སྡོམ་པ་ཕོག་དང་གཅིག །བྱང་སེམས་སྡོམ་པ་ཕོག་དང་གཉིས། །དཀྱིལ་འཁོར་དབང་བཞི་བསྐུར་དང་གསུམ། །དེ་གསུམ་གཅིག་གིས་མཛད་པ་ནི། །སུམ་ལྡན་རྡོ་རྗེ་འཛིན་པ་ཞེས། །མདོ་སྔགས་གཉིས་ཀ་ནས་གསུངས་པའི། །རྩ་བའི་བླ་ཨུ་མ་ཡིན་པར་བཤད། །དཀྱིལ་འཁོར་དབང་བཞི་བསྐུར་དང་གཅིག །དེ་ཡི་རྒྱུད་ཀྱི་ལུང་ཐོབ་གཉིས། །ཉམས་ཁྲིད་གདམས་པ་ཐོབ་དང་གསུམ། །སྔགས་ལུགས་རྩ་བའི་བླ་མ་
ཡིན། །རང་སེམས་ཆོས་སྐུ་མངོན་སུམ་དུ། །སུ་ལ་བསྟན་ནས་ངོ་འཕྲོད་པ། །དྭགས་པོ་བཀའ་བརྒྱུད་ཆོས་ལུགས་ཀྱི། །རྩ་བའི་བླ་མ་ཡིན་པའོ། །དང་པོར་ཆོས་སྒོར་བཙུད་པ་དང་། །སྐྱ་ཕུད་དང་པོ་ལེན་མི་དེ། །རྩ་བའི་བླ་མ་ཡིན་ནོ་ཞེས། །འཇིག་རྟེན་འདི་ན་གྲགས་ཆེ་ཏེ། །ཆོས་ནས་བཤད་པ་མི་སྣང་ངོ་། །རྩ་བའི་བླ་མ་དེ་ཉིད་ནི། །ལེགས་པོ་ཙམ་ཞིག་མིན་ན་ཡང་། །སློབ་མས་དད་པ་རྩེ་གཅིག་གིས། །གསུངས་པའི་ཆོས་དེ་ཉམས་བླངས་ན། །དེ་ཡི་ཕན་ཡོན་འབྱུང་བ་ནི། །བལ་པོའི་དགེ་སློང་ལྷ་ཆེན་པོའི། །ཕ་མ་བསད་པའི་སྡིག་ཆེན་ཞིག །བླ་བརྫུ་བྱས་ནས་ཆོས་བཤད་པས། །སློབ་མ་མང་པོ་དགྲ་བཅོམ་ཐོབ། །སློབ་མས་དགྲ་བཅོམ་ཐོབ་པ་དང་། །བླ་མ་བཟང་ངན་གཟིགས་པ་ཡིས། །རྫུན་མ་སྡིག་ཅན་ཡིན་པར་མཐོང་། །བླ་མ་སློབ་མས་འདྲེན་བསམ་ཡང་། །འདྲེན་མ་ཐུབ་པར་དམྱལ་བར་སོང་། །དེ་བཞིན་བདག་ནི་བླ་མ་ངན། །འོན་ཀྱང་བཀའ་འབུམ་བྲིས་པ་ན། །ཡོན་ཏན་འབྱུང་ངོ་རྟོགས་ལྡན་པ། །ཞེས་སྨྲས་སོ།། ༈ །།ན་མོ་མ་ཧཱ་མུ་ཏྲ་ཡེ། །སྒོམ་ཆེན་བསོད་ནམས་ཚུར་ཉོན་དང་། །
གནས་འགྱུ་མི་གདའ་ཟེར་བ་ལ། །ཀོ་ལོང་རྣམ་རྟོག་བྱེད་མི་དགོས། །ཆོས་རྣམས་མ་ལུས་ཐམས་ཅད་ནི། །མིང་ཙམ་མ་གཏོགས་གཅིག་ཀྱང་མེད། །ཡོད་དང་མེད་པའི་མཐའ་ལས་འདས། །གཟུགས་ནས་རྣམ་མཁྱེན་བར་གྱི་ཆོས། །གཅིག་ཀྱང་མེད་པར་འབུམ་ལས་གསུངས། །དེ་དག་ཀུན་གྱི་དོན་བསྡུས་པ། །ཤེས་རབ་སྙིང་པོ་ཟབ་མདོ་ལས། །གཟུགས་མེད་སྒྲ་མེད་དྲི་མེད་ལ་སོགས་དང་། །ཆོས་མེད་གསུངས་པའི་དོན་གོ་མཛོད། །ཆོས་རྣམས་ཐམས་ཅད་མེད་གསུངས་ན། །གནས་འགྱུ་ཡོད་པ་ག་ལ་སྲིད། །གནས་པ་མེད་པའི་རྒྱུ་མཚན་ནི། །ཡོད་པའི་རྣམ་པར་མི་གནས་ཏེ། །གཟུགས་དང་ཁ་དོག་དངོས་པོ་མེད། །མེད་པའི་རྣམ་པར་མི་གནས་ཏེ། །རི་བོང་རྭ་ལྟར་གནས་མཁན་མེད། །ལུས་ནི་ཕྱི་ནང་བར་གསུམ་སོགས། །གང་དུ་གནས་པའི་ངོས་བཟུང་མེད། །འདི་ལྟར་གནས་ཞེས་སྨྲ་རྒྱུ་མེད། །དེ་ཕྱིར་གནས་པ་མེད་པ་བདེན། །དེ་སྐྱ་བཞིན་འགྱུ་བ་མེད་པ་སྟེ། །འགྱུ་བའི་མཁན་པོ་སེམས་ཡིན་ལ། །དེ་ལ་དངོས་པོ་མེད་པའི་ཕྱིར། །འགྱུ་མཁན་མེད་པས་འགྱུ་བ་མེད། །ཕྱི་རོལ་སྣང་བ་ཐམས་ཅད་ནི། །རྨི་
ལམ་ཡུལ་གྱི་སྣང་བ་བཞིན། །སེམས་ཉིད་ཁོ་རང་མ་གཏོགས་པ། །གཞན་ན་མེད་པ་འགྱུ་བ་མེད། །འགྱུ་བ་མེད་པའི་ངོ་བོ་ནི། །ཡོད་མེད་གང་དུ་ངོས་བཟུང་མེད། །དེ་ཕྱིར་འགྱུ་བའི་ངོ་བོ་ནི། །མ་བཅོས་རང་སར་བཞག་པ་ལས། །བལྟ་བྱ་ལྟ་བྱེད་བལྟ་རྒྱུ་མེད། །དེ་ཕྱིར་ལྟ་བ་མེད་པ་ཡིན། །མ་ཡེངས་ཙམ་ཞིག་མ་གཏོགས་པ། །འདི་སྒོམ་གཏད་སོ་སྤུ་ཙམ་མེད། །དེ་ཕྱིར་བསྒོམ་རྒྱུ་མེད་པ་ཡིན། །མ་ཡེངས་མ་བཅོས་ཤུགས་འབྱུང་ལས། །སྤང་དང་བླང་བྱ་མེད་པའི་ཕྱིར། །དེ་ཕྱིར་སྤྱོད་པ་མེད་པ་ཡིན། །སེམས་ཉིད་མངོན་དུ་གྱུར་པ་ལས། །གཞན་པའི་སངས་རྒྱས་མེད་པའི་ཕྱིར། །འབྲས་བུ་ཐོབ་རྒྱུ་མེད་པ་ཡིན། །དེ་ཕྱིར་བཅོམ་ལྡན་ཐུབ་པ་ཡིས། །ཆོས་ཀུན་མིང་ཙམ་བརྡ་ཙམ་སྟེ། །ངེས་པའི་དོན་ལ་མེད་པའི་རབ། །རྒྱས་པར་འབུམ་ལས་གསུངས་པ་སྟེ། །གནས་འགྱུ་མེད་པའི་དོན་རྟོགས་ན། །ཕྱག་རྒྱ་ཆེན་པོ་རྟོགས་པ་ཡིན། །བསོད་ནམས་ཐུགས་ལ་དེ་ལྟར་ཞོག། ༈ །།ན་མོ་གུ་རུ་དྷརྨེ་ཤྭ་ར་ཡེ། ཤཱཀྱའི་དགེ་ཚུལ་བྱམས་པ་ཡིས། །ངེད་ཚོ་ལ་ནི་མ་གནང་ཞེས། །ཞལ་གདམས་འཁང་ར་བྱེད་མི་
དགོས། །རྒྱལ་བས་གསུངས་པའི་མདོ་རྒྱུད་ཀུན། །སེམས་ཅན་སྤྱི་ལ་ཞལ་གདམས་ཡིན། །ཞལ་གདམས་དེ་ཚོ་ལྟ་འདོད་ན། །སྡུག་རུས་གྱིས་ལ་ཡི་གེ་ཐོན། །འཕྲལ་དུ་ཞལ་གདམས་འདོད་པ་ན། །མི་ལུས་ཡང་ཡང་ཐོབ་དཀའ་བས། །མི་ལུས་ཐོབ་པ་དོན་ལྡན་ཕྱིར། །སྡོམ་པ་དམ་ཚིག་གཙང་མར་བསྲུང་། །འདི་ནི་ཞལ་གདམས་དང་པོ་ཡིན། །ནམ་འཆི་ངེས་པ་མི་གདའ་བས། །གང་ཤེས་ཆོ་ག་ཆོས་སྤྱོད་དང་། །ཡི་གེ་དྲུག་པ་རྒྱུན་དུ་ཟློས། །འདི་ནི་ཞལ་གདམས་གཉིས་པ་ཡིན། །ཁྱི་སོ་ལ་ཡང་རིང་བསྲེལ་དཔེ། །བླ་མར་དད་གུས་བསྐྱེད་མཛོད་ལ། །ཕྱག་རྒྱ་ཆེན་པོ་ཤུགས་ལ་འཆར། །འདི་ནི་ཞལ་གདམས་གསུམ་པ་ཡིན། །དམ་ཚིག་ཆག་ཉམས་མ་ཤོར་བ། །བླ་མ་གཅིག་པའི་རྡོ་རྗེ་སྤུན། །སངས་རྒྱས་ཞིང་དུ་མཉམ་པར་འཚོགས། །མཆེད་གྲོགས་རྣམས་ལ་དག་སྣང་སྦྱངས། །འདི་ནི་ཞལ་གདམས་བཞི་པ་ཡིན། །ཆུ་ལེན་མེ་འབུད་དཀའ་ལས་རྣམས། །བླ་མ་དང་ནི་དགེ་འདུན་སྤྱི། །ཆགས་ཕྱི་ཡིན་པས་སྡིག་པ་འདག །བསམས་ན་ལས་དཀའ་དཀའ་ལས་རྣམས། །ཕྱག་བསྐོར་བྱས་དང་ཕན་ཡོན་
མཉམ་། །དགེ་འདུན་པ་ཡིས་ཆུ་འགེལ་ས། །བོང་བུའི་ཞབས་རྗེས་བཞག་པ་སོམ། །རང་སེམས་རང་གིས་མ་བསྲུངས་ན། །བླ་མ་བཟང་དང་གནས་བཟང་དང་། །གྲོགས་མཆེད་བཟང་པོ་ཅི་ཡོད་ཀྱང་། །སྒོམ་རོགས་བྱེད་ནི་སྟེར་ཐབས་མེད། །དེ་ཕྱིར་མ་བརྗེད་རང་སེམས་བསྲུང་། །འདི་ནི་ཞལ་གདམས་ལྔ་པ་ཡིན། །རང་སེམས་རང་གིས་བསྲུང་ཟེར་བ། །མཐོང་རྒྱུ་རིག་རྒྱུ་ཡོད་པ་མིན། །མ་མཐོང་པ་ཡི་ངང་ལ་ཞོག །སྐྱུར་ནི་བཞག་པ་མ་ཡིན་ཏེ། །ཡང་ཡང་དྲན་པའི་རྒྱང་སོ་ཚུགས། །འདི་ནི་ཞལ་གདམས་དྲུག་པ་ཡིན། །ལུས་ཀྱི་ཚུལ་ཁྲིམས་བསྲུང་དང་གཅིག །ངག་གི་བསྙེན་པ་འདོན་བརྗོད་གཉིས། །སེམས་ཀྱི་རང་ངོ་ལྟ་བ་གསུམ། །དེ་བས་ཟབ་པའི་དམ་ཆོས་ནི། །སྟོང་གསུམ་གང་དུ་བཙལ་ཡང་མེད། །མདོ་རྒྱུད་ཀུན་ནས་གསུངས་པ་མེད། །དེ་ཕྱིར་དེ་ཀུན་སྙིང་ལ་ཆོངས། །དེ་ནི་ཞལ་གདམས་བདུན་པ་ཡིན། །རྩ་བ་བཞི་པོ་སྲོག་ལྟར་བསྲུང་། །ཚོགས་ཆང་མ་གཏོགས་ཆང་སྤང་ཞིང་། །ཅི་ནུས་ཁ་ཐོན་བཟླས་བརྗོད་འབད། །རྒྱུན་དུ་གསོལ་འདེབས་སེམས་ངོ་བསྲུང་། །དེ་ཙམ་མ་ཤི་བར་འཁྱོངས་ན། །
དེང་སང་སྙིགས་མ་ལྔ་ཡི་དུས། །ཆོས་པར་ཐེ་ཞིང་ཆོས་མགོ་ཐོན། །སྔོན་ཚེ་བསྐལ་པ་བཟང་པོའི་དུས། །མཁས་གྲུབ་གྲུབ་རྟགས་ཡོད་པ་བས། །དེང་སང་དེ་ཙམ་ཕན་ཡོན་དང་། །ངོ་མཚར་ཆེ་བར་ཐུབ་པས་གསུངས། །དེ་ཕྱིར་དེ་ཙམ་རྡོག་གཏད་མཛོད། །དེ་ནི་ཞལ་གདམས་བརྒྱད་པ་ཡིན། །རྟ་ཁ་སྲབ་ཀྱིས་བསྒྱུར་བ་ལྟར། །ཆོས་ཀུན་སྨོན་ལམ་མཐའ་བཙན་པ། །བདེ་བ་ཅན་དུ་སྨོན་ལམ་ཐོབ། །གཏན་དུ་བདེ་བའི་ཞིང་ཁམས་ཡིན། །དེ་ནི་ཞལ་གདམས་དགུ་པ་ཡིན། །བར་སྐབས་དྲེད་ཞད་བྱུང་བ་ན། །ནམ་འཆི་ནམ་འཆི་བསམ་པ་གྱིས། །ཤི་དུས་གར་འགྲོ་བསམ་པ་གྱིས། །ད་རེས་ལམ་སྣ་མ་ཟིན་ན། །མི་ལུས་མི་ཐོབ་བསམ་པ་གྱིས། །དེ་ནི་གེགས་སེལ་གདམས་པ་ཡིན། །ཞལ་གདམས་བཅུ་པ་ཡིན་པ་སྟེ། །དེ་བཅུ་ཡིད་ལ་མ་བརྗེད་མཛོད།། །།ན་མོ་མ་ཧཱ་མུ་ཏྲ་ཡེ། དགེ་ཚུལ་ཐུགས་རྗེ་ཚུར་ཉོན་དང་། །སྟོང་ཉིད་ཕྱག་རྒྱ་ཆེན་པོ་དེ། །དཔེ་ཆ་བཏོན་པས་རྟོགས་པ་མིན། །སྔོན་གྱི་བཀའ་བརྒྱུད་གྲུབ་ཐོབ་ཀུན། །བླ་མ་བསྟེན་པས་རྟོགས་པ་ཡིན། །མོས་གུས་བྱས་པས་རྟོགས་པ་
ཡིན། །གསོལ་བ་བཏབ་པས་རྟོགས་པ་ཡིན། །བུ་ཁྱོད་ཉམས་རྟོགས་སྐྱེ་འདོད་ན། །བླ་མ་རྡོ་རྗེ་འཆང་དུ་བསྒོམ། །གསོལ་བ་སྙིང་གི་དཀྱིལ་ནས་ཐོབ། །ཆགས་ཕྱི་དཀའ་ལས་སྡུག་བསྔལ་ཀུན། །སྒྲིབ་པ་དག་པའི་དགའ་བ་སྒོམ། །ནངས་ནུབ་སངས་རྒྱས་སྟོང་སྐུ་ལ། །བརྒྱ་ཕྱག་རེ་ཙམ་དམ་བཅའ་གྱིས། །ནངས་ནུབ་ཅུང་ཟད་དལ་བའི་སྐབས། །ལུས་གནད་རྣམ་སྣང་ཆོས་བདུན་ཆོས། །སེམས་ཀྱིས་སེམས་ལ་ཅེ་རེ་ལྟོས། །ཆུ་ལེན་མེ་འབུད་ལས་འགུལ་དུས། །མ་ཡེངས་དྲན་པའི་རྒྱང་སོ་ཚུགས། །རེས་ཚོའགའ་ཟ་ཞིང་རང་སེམས་ལྟོས། །ཟ་འཐུང་ཟག་མེད་ཚོགས་འཁོར་ཡིན། །རེས་འགའ་འགྲོ་ཞིང་སེམས་ངོ་ལྟོས། །སྤྲོས་མེད་དོན་དམ་བསྐོར་བ་ཡིན། །རེས་འགའ་ཉལ་ཞིང་སེམས་ངོ་ལྟོས། །འོད་གསལ་བསྒོམ་པའི་གདམས་ངག་ཡིན། །རེས་འགའ་ཧྲིག་གེ་རྗེན་ནེ་ལྟོས། །རིག་པ་གཅེར་མཐོང་གདམས་པ་ཡིན། །རེས་འགའ་མ་བཅོས་སོ་མར་ཞོག །ཐ་མལ་རྗེན་པའི་གདམས་པ་ཡིན། །རེས་འགའ་འགྱུ་ཡང་ཕྱལ་བར་ཞོག །སྣང་སྲིད་ཕྱག་རྒྱ་ཆེན་པོ་ཡིན། །རེས་འགའ་གང་ཤར་ངོ་བོ་ལྟོས། །འགྱུ་བ་རྐྱང་དེད་
གདམས་པ་ཡིན། །དེང་སང་ལས་ནི་དང་པོ་པས། །གདམས་ངག་བརྒྱུད་པའི་བླ་མ་བསྟེན། །བཀའ་དང་མདོ་རྒྱུད་མགུར་འབུམ་བས། །བླ་མའི་གསུང་རབ་དགའ་དུས་ཡིན། །སྤྲོས་བྲལ་ངོ་བོ་མཐོང་དུས་སུ། །མདོ་རྒྱུད་མགུར་འབུམ་ཟབ་ཆོས་རྣམས། །གང་ལ་བལྟས་ཀྱང་དོན་གོ་ན། །བདེ་གཤེགས་བཀའ་ཡི་བླ་མ་བསྟེན། །ཀྱི་དཔེ་ཆ་ཀུན་ལ་བལྟ་དུས་ཡིན། །རོ་གཅིག་རྟོགས་པ་ཤར་ཙམ་ན། །སྣང་བ་ཐམས་ཅད་དཔེ་ཆར་ཤར། །བློ་འཛིན་ལ་སོགས་མ་བྱས་ཀྱང་། །ཆོས་བཤད་ཟད་རྒྱུ་མེད་པ་ཡིན། །སྒོམ་མེད་ཨང་དེ་རྟོགས་པའི་དུས། །རང་སེམས་བླ་མར་འཆར་བ་སྟེ། །མདོ་རྒྱུད་དོན་ཀུན་རང་སེམས་ལ། །འཆར་བ་ཡིན་ནོ་གསུངས་པར་སྣང་། །ད་ལྟ་དཔེ་ཆའི་དོན་མི་གོ །དེ་བས་སྔོན་འགྲོ་བཞི་སྦྱོར་ལ། །ཉིན་རེ་དུས་གསུམ་རྩེ་གཅིག་ཏུ། །བསྒོམ་ཞིང་ཆག་མེད་བྱེད་པ་དང་། །ཐུན་བཞི་ལ་སོགས་གསོལ་འདེབས་ལ། །དད་སུ་གུས་གདུང་ཤུགས་དྲག་པོ་ཡིས། །གསོལ་བ་སྙིང་ནས་ཐོབ་ཅིག་དང་། །ཉམས་རྟོགས་རང་དབང་མེད་པར་འཆར། །ཐུགས་རྗེའི་སེམས་ལ་དེ་ལྟར་ཞོག །ཅེས་སྨྲས་སོ།།
ན་མོ་གུ་རུ་མཉྫགྷོ་ཥ་ཡེ། དགེ་ཚུལ་སྦྱིན་པ་ཞེས་བྱ་བས། །མི་ཁོམ་སྐབས་ཤིག་ཞལ་གདམས་ཟེར། །ཁྱེད་རྣམས་ཡིད་བཞག་བྱས་ན་ནི། །ཞལ་གདམས་ཆུ་བོའི་རྒྱུན་དང་འདྲ། །དམ་ཆོས་ཀུན་གྱི་གཞི་མ་སྟེ། །མཁར་གྱི་བརྩིགས་རྨིང་འདྲ་བའི་སྡོམ་པ་བསྲུང་། །ཆོས་ཀྱི་རྩ་བ་ཐོས་བསམ་སྒོམ་གསུམ་ཡིན། །ཐོས་པ་ཞེས་བྱ་དབང་ལུང་ཁྲིད་ཞུ་དང་། །ཟིན་ཐུན་སློབ་གཉེར་གང་འོས་བྱེད་པ་ཡིན། །དེ་ལས་བསམ་པའི་ཁྱེར་ཕྱོགས་ལེགས་པ་གཅེས། །ཟིན་ཐུན་ཁ་ཁྲལ་ཡིན་ནོ་བསམ་པ་དང་། །ཡོན་ཏན་ཚིལོབས་ན་གྲོང་ཆོག་རག་བསམ་དང་། །གྲོང་མཆེད་རྣམས་ལ་ཕྲག་དོག་འགྲན་སེམས་དང་། །མི་སྡུན་ཐད་སོ་ཨེ་ལོབས་བསམ་པ་དང་། །ཙནྡན་སོལ་བ་བྱས་ནས་བཙོང་བ་ལྟར་། །སློབ་གཉེར་བྱས་ཡང་ཆོས་སུ་མི་འགྲོ་བས། །སློབ་གཉེར་ཟིན་ཐུན་ཆགས་ཕྱི་དཀའ་ལས་རྣམས། །རང་གི་སྒྲིབ་གཉིས་དག་པར་བྱ་བ་དང་། །བླ་མེད་བྱང་ཆུབ་ཐོབ་ཕྱིར་སློབ་གཉེར་དང་། །ཆགས་ཕྱི་དཀའ་ལས་འདི་དག་བྱ་བསམས་ན། །དམ་ཆོས་དེ་བས་ལྷག་མེད་ཡིད་ལ་ཞོག །བླ་མ་ལ་ནི་སངས་རྒྱས་དངོས་སུ་ལྟ། །མཆེད་གྲོགས་
རྣམས་ནི་དཀྱིལ་འཁོར་ལྷ་རུ་ལྟ། །དབང་ལུང་དམ་ཆོས་རྣམས་ནི་བདུད་རྩི་མོས། །ནམ་འཆི་ཆ་མེད་བརྩོན་འགྲུས་ལྕགས་ཀྱིས་བྲོབས། །དེ་ལྟར་བྱས་ན་འདི་སྐྱིད་ཕྱི་མ་སྐྱིད། །ད་རེས་མི་ལུས་ཐོབ་པ་དོན་དང་ལྡན། །ཕ་མ་བུ་སྐྱེས་རྐན་མར་ཁྲོག་མ་རླགས། །བླ་མ་བསྟེན་པའི་ཞབས་ཏོག་དེ་ཡིས་འོང་། །དེ་ཕྱིར་སྡོམ་པ་གཙང་མར་བསྲུང་བ་དང། །ཟིན་ཐུན་སློབ་གཉེར་སྡུག་རུས་མ་གཡེལ་མཛོད། །སྐབས་སུ་རང་སེམས་ངོ་བོ་ལྟ་བ་དང་། །སྐབས་སུ་ཡི་དམ་བསྐྱེད་རིམ་གང་ཟིན་དང་། །བསྙེན་པ་ཡང་ནི་གྲངས་ཞོག་བསོགས་པར་མཛོད། །ཅེས་པ་སྦྱིན་པ་ལ་གདམས་པའོ།། ༈ །།ན་མོ་ལོ་ཀེ་ཤྭ་ར་ཡེ། ཐུགས་རྗེ་ཆེན་པོ་གསང་བ་འདུས། །འགྲོ་བ་འདྲེན་ལ་ཕྱག་འཚལ་ལོ། །སྔོན་ཚེ་ལས་འཕྲོ་བཟང་པོའི་མཐུས། །ད་རེས་དལ་འབྱོར་མི་ལུས་ཐོབ། །ཐོབ་ཀྱང་ནམ་འཆི་ཆ་མ་མཆིས། །ཤི་ཚེ་ཆོས་ཤིག་མ་གཏོགས་པ། །ཅིས་ཀྱང་ཕན་པ་མི་གདའ་བས། །བུ་ཁྱོད་བློ་ཕུགས་ཆོས་ལ་གཏོད། །ཕྱི་མ་གར་སྐྱེ་ཚེ་སྔོན་ལས་འབྲས་གཙོ། །དགེ་སྒྲུབ་སྡིག་སྤང་ལག་ཏུ་ལོངས། །རིགས་དྲུག་གང་དུ་སྐྱེས་ཀྱང་སྡུག །བདེ་
ཆེན་ཞིང་དུ་སྨོན་ལམ་ཐོབ། །འབྲེལ་ཚད་ཞིང་དེར་ཁྲིད་པའི་ཐབས། །མ་ཎི་བུམ་སྒྲུབ་འདི་ཉིད་ཡིན། །འདི་ལ་དད་གུས་ངེས་ཤེས་བསྐྱེད། །འདི་ཡི་ཆགས་ཕྱི་འགྲུབ་པ་ན། །ཚོགས་བསགས་སྒྲིབ་སྦྱངས་དེ་གས་འཐུས། །གཡོ་སྒྱུ་མེད་པའི་ཁ་ལག་དུས་ཚོད་སྤྲོད། །དཀའ་ལས་རྐང་ཚག་སྡུག་ཡུས་མ་བྱེད་ལ། །སྒྲུབ་པ་འདི་ཡི་ཆགས་ཕྱིར་བརྩོན་འགྲུས་མཛོད། །སྒྲིབ་པ་དག་པའི་དགའ་བ་བསྒོམ། །སྤྱི་བོར་བླ་མ་ཨོ་རྒྱན་བསྒོམ། །བཛྲ་གུ་རུའི་གསོལ་བ་ཐོབ། །འོད་དུ་ཞུ་ནས་རང་ལ་ཐིམ། །རང་ལུས་ཐུགས་རྗེ་ཆེན་པོར་བསྒོམ། །ཡི་གེ་དྲུག་པ་རྒྱུན་དུ་ཐོན། །རང་གི་སེམས་ཀྱིས་སེམས་ལ་ལྟོས། །གཟུགས་དང་དངོས་པོ་ཅི་འདུག་ལྟོས། །མ་མཐོང་དེ་ཡི་ངང་ལ་ཞོག །དངོས་པོ་མཐོང་རྒྱུ་མེད་ན་ཡང་། །ཡིད་ལ་མྱོང་རྒྱུ་ཡོད་པ་ཡིན། །ཅི་ཡང་མི་དྲན་ཀྱི་ལེ་གནས། །དེ་ལ་གནས་པ་མིང་དུ་བཏགས། །གང་ཡང་འཕྲོ་ཞིང་ཅི་ཡང་དྲན། །དེ་ལ་འགྱུ་བ་མིང་དུ་བཏགས། །གནས་འགྱུ་ཅི་བྱེད་རིག་པ་ཡང་། །རིག་པ་མིང་དུ་བཏགས་པ་ཡིན། །དེ་ལྟར་གནས་འགྱུ་རིག་གསུམ་ལ། །རྒྱུན་དུ་རང་གི་ལྟ་བ་ལ། །ཉམས་ལེན་སྐྱོང་
བ་མིང་དུ་བཏགས། །དངོས་པོ་མཐོང་རྒྱུ་མེད་པ་ལ། །སྟོང་ཉིད་མིང་དུ་བཏགས་པ་ལགས། །དེ་ཉིད་ལེགས་པར་ཤེས་པ་ལ། །ཤེས་རབ་ཕ་རོལ་ཕྱིན་པ་ཟེར་། །ཡུན་ཐུང་གྲངས་མང་ཡང་ཡང་ལྟོས། །དེ་ལ་ཉམས་ལེན་སྐྱོང་བ་ཟེར། །ལྟ་རྒྱུ་མི་རྙེད་མ་གསལ་ན། །བརྒྱ་ཕྱག་རེ་ཙམ་ཕུལ་ལ་ལྟོས། །ནངས་ནུབ་ལུས་གནད་བསྲང་ལ་ལྟོས། །གསལ་དང་མི་གསལ་ཅི་བྱུང་ཡང་། །མི་སྐྱུར་རྒྱུན་དུ་ལྟ་བ་གཅེས། །འགྱུ་བ་སྐྱོན་དུ་མི་ལྟ་བར། །ལྷོད་ཅིང་ལྟ་བ་མན་ངག་ཡིན། །རང་སེམས་རང་གིས་བལྟ་བ་ལ། །ལྟ་བ་མིང་དུ་བཏགས་པ་ཡིན། །དེ་ལ་རྒྱུན་དུ་སྐྱོང་བ་ལ། །སྒོམ་པ་མིང་དུ་བཏགས་པ་ཡིན། །དགེ་སྒྲུབ་སྡིག་སྤངས་བྱེད་པ་ལ། །སྤྱོད་པ་མིང་དུ་བཏགས་པ་ཡིན། །ཕྱི་མ་བདེ་ཆེན་ཞིང་ཁམས་སུ། །སྐྱེ་བའི་སྨོན་ལམ་བཏབ་པ་ལ། །འབྲས་བུ་དེ་ལས་ལྷག་པ་མེད། །རེ་ཞིག་སེམས་ངོ་མི་སྐྱུར་བར། །ནངས་ནུབ་བསྙེན་པ་ཁྱུ་བསོགས་པ་དང་། །ཟིན་ཐུན་རྣམས་ཀྱང་ཅི་ཟིན་མཛོད། །ཕ་མ་ཉེ་དུ་ཀུན་གྱིས་ཚབ། །ཁོ་བོ་ཡིན་པར་ཤེས་གྱིས་ལ། །བློ་སེམས་གཏན་ལ་ཕེབས་པར་སྡོད། །ཇ་དང་ཐུག་
པ་དུས་ཚོད་ལ། །བསྐོལ་དུ་གྱིས་ལ་དྲང་བར་མཛོད། །ཟ་མའི་ཞིམ་རྩོག་ལག་ལས་རག །ཅེས་བཟོད་པས་བསྐུལ་ཕྱིར་དེ་སྐད་རཱ་ག་ཨ་སྱས་འཕྲལ་དུ་སྨྲས་སོ། །མངྒ་ལཾ། བྷ་ཝནྟུ། ༈ །རྗེ་བཙུན་མི་ལའི་སྐུ་མདོག་ལ། །ནཱ་ག་པ་ཎིའི་སྤྱན་འབྲས་ཅན། །པོ་ཏྲེ་དགེ་བཤེས་ལ་གདམས་པའོ།། ན་མོ་གུ་རུ། སྤང་ལྗོངས་མཛེས་པ་ན་ལྡིང་བའི་སྟག་ཆུང་གི་བུང་བ། །དར་དིར་བྱང་ཆུབ་ལ་མ་ཡེངས་རྩི་བཅུད་རེ་འཇིབས་དང་། །སྟོན་སེར་ལྷགས་ཁས་ཁྱེར་ན་རང་དབང་ནི་མེད་པས། །དགུན་བརྒྱག་སྦྲང་རྩི་ནི་གསོག་གམ་སྟག་ཆུང་གི་བུང་བ། །སྐྱེད་ཚལ་སྔོ་མཐིང་ན་འཁྲུངས་པའི་འདབ་རྒྱས་ཀྱི་པདྨ། །བཀྲག་མདངས་ཟིལ་འོད་ལྡན་དུས་དཀོན་མཆོག་ལ་མཆོད་དང་། །དུས་ཀྱི་བ་མོས་བཅོམ་དུས་རང་དབང་ནི་མེད་པས། །ལྷ་ཁང་མཆོད་རྫས་སུ་ཐེང་ངམ་མེ་ཏོག་གི་གསར་པ། །གསུང་སྙན་ལྷང་ལྷང་དུ་སྒྲོག་པའི་བྱ་རྒྱལ་གྱི་ཁུ་བྱུག །ལྷ་རྣམས་ཆར་རྒྱུན་འབེབས་དུས་ངོམ་པ་རེ་འཐུང་དང་། །ཆར་མེད་ཐན་ཆེན་འབབ་དུས་རང་དབང་ནི་མེད་པས། །སྐོམ་གྱི་གདུང་བ་རེ་ཆོད་དང་བྱ་རྒྱལ་གྱི་ཁུ་བྱུག །ཆུང་ནས་རབ་ཏུ་བྱུང་བའི་བན་ཆུང་ནི་གསར་པ། །ན་ཆུང་
ཤེས་རིག་བཀྲ་དུས་སློབ་གཉེར་རེ་གྱིས་དང་། །རྒན་རྒོན་དབང་པོ་འགྲིབ་དུས་རང་དབང་ནི་མེད་པས། །ཟིན་ཐུང་གྲ་ཐུབ་རེ་སློབ་དང་བན་ཆུང་ནི་གསར་པ། །བླ་མའི་དྲུང་ན་འདུག་པའི་བཙུན་ཆུང་ནི་གསར་པ། །བླ་མ་མཆེད་གྲོགས་འཛོམ་ཚེ་ཡོན་ཏན་རེ་སློབ་དང་། །མི་རྟག་སོ་སོར་བྱེ་ནས་རང་དབང་ནི་མེད་པས། །རང་མགོ་ཐོན་པ་རེ་གྱིས་དང་བན་ཆུང་ནི་གཞོན་ནུ། །སྐྲ་ཕུད་སྡོམ་པ་ཞུས་པའི་བན་ཆུང་ནི་གསར་པ། །ན་སོ་དར་ལ་བབ་དུས་སྡོམ་ཁྲིམས་དེ་བསྲུང་དང་། །སྤྱོད་ངན་སྡོམ་པ་ཤོར་བ་རང་དབང་ནི་མེད་པས། །སྡོམ་གཙང་གྲ་རུ་རེ་ཚུད་མཛོད་བན་ཆུང་ནི་གཞོན་ནུ། །ཉམས་མཚར་དཔེ་དོན་བསྡེབས་པའི་གླུ་དབྱངས་ནི་མཚར་པོ། །དཔེ་དོན་གོ་བ་ཁ་ད་ནི་ཡིན་ནོ། །དོན་མ་གོ་ན་ཁ་བཤད་རང་ཡིན་ནོ། །ཤོག་བུ་གཏད་ཕྱིར་གང་དྲན་ནི་བྲིས་སོ། །ཅེས་རཱ་ག་ཨ་སྱས་སྨྲས་སོ།། ༈ །།ཀ་ཡེ་གསོན་དང་བན་ཆུང་ཚོ། །ཁ་རོག་མ་འདུག་ཟིན་ཐུན་ཟུང་། །ག་ལེ་ལུང་མེད་བཏག་རྒྱུ་མེད། །ང་ཁྱོད་རྩོད་པའི་འཛིང་མོ་སྤོངས། །ཅ་ལེ་ཅོ་ལེའི་རྩེ་ཀྱུ་སྐྱུར། །ཆ་བེ་ཆོབ་བེའི་འཕྱོངས་རྒྱུགས་སྐྱུར། །ཇ་
དེ་ནམ་འཐུང་ཇ་མཆོད་ཐོན། །ཉ་སྟོང་བརྒྱད་དང་ཚེས་བཅུ་ལ། །ཏ་ཐཱ་ག་ཏའི་སྐུ་གཟུགས་ལ། །ད་ནི་བརྒྱ་ཕྱག་ཆག་མེད་འཚོལ། །ན་རྒས་འཆི་དུས་རིན་ཐང་ཆེ། །པ་དེ་པུ་དེའི་མནའ་དེ་སྤོངས། །ཕ་བརླ་མ་གཙོང་ཙམ་ཞིག་གྱིས། །བ་མོར་ཉི་ཟེར་ཕོག་པ་ལྟར། །མ་རྒན་འགྲོ་བའི་སྒྲིབ་སྦྱང་ཕྱིར། །རྩ་རླུང་འཁྲུལ་འཁོར་སློབ་ལ་བསྒོམ། །ཚ་གྲང་དམྱལ་བའི་སྐྱེ་སྒོ་གཅོད། །ཛ་ལེའི་གོ་འཕང་ཐོབ་པའི་ཕྱིར། །ཝ་ལེར་རང་སེམས་ངོ་བོ་ལྟོས། །ཞྭ་ལྟར་བླ་མ་སྤྱི་བོར་བསྒོམ། །ཟ་འཐུང་ལུས་ལྷ་ཞི་ཁྲོ་མཆོད། །འ་རེ་ཟླུའུ་རེའི་རྣམ་གཡེང་དུས། །ཡ་ང་མེད་པར་ཡི་དམ་བསྒོམ། །ར་ལ་ཆིབས་པའི་རྡོར་ལེགས་སོགས། །ལ་ཆེན་གཏོར་བསྔོས་ཐུགས་དམ་གྱིས། །ཤ་ས་ན་སོགས་སྔགས་བསྙེན་སོགས། །ས་ཆ་གང་འདུག་མི་དང་བསྟུན། །ཧ་ཁོག་གོ་ན་སྤྱང་པོ་ཡིན། །ཨ་ཉོག་པོ་ཏྲེ་བུ་ལ་སྨྲས། །ཨོ་བླ་མ་ཡི་དམ་མཁའ་འགྲོའི་ཚོགས། །ཨཱཔོ་ཏྲེ་བུ་ལ་ཐུགས་རྗེས་གཟིགས་། །ཧཱུཾ་ཐུགས་ཀྱིས་དགོངས་ལ་བྱིན་གྱིས་རློབས། །དྷཱིདོན་གཉིས་འགྲུབ་པར་མཛད་དུ་གསོལ། །ས་བན་རྒན་རཱ་ག་ཨ་སྱས་གདམས། །ཧཱ་ཅི་དྲན་བྲིས་པ་ཧ་ཧ། །མངྒ་ལཾ།། །།
ཤོག་ལྷེབ་ ༥༠༡ ནས་ ༥༦༦ བར།
༈ ན་མོ་ཤཱཀྱ་མུ་ནེ་ཡེ། གསོན་དང་གཉེར་ཆུང་ཆོས་སྐྱོང་འཕེལ། །ཐོབ་པར་དཀའ་བའི་མི་ལུས་འདི། །ད་རེས་དགོངས་གཅིག་མ་ཐེབ་ན། །ཡང་ཡང་མི་ཐོབ་ཆོས་སྐྱོང་འཕེལ། །ལུས་འདི་དོན་དང་ལྡན་པའི་ཕྱིར། །སྡོམ་པ་དམ་ཚིག་བསྲུང་བར་མཛོད། །རྩ་བ་བཞི་དང་ཆང་འདི་ནི། །སྲོག་ལྟར་བསྲུང་ཞིག་ཆོས་སྐྱོང་འཕེལ། །བཅོམ་ལྡན་ཤཱཀྱ་ཐུབ་པ་ཡིས། །ཆང་ལ་ཉེས་པ་དྲུག་ཅུ་ཐམ་པ་གསུངས། །ཟས་ཀྱི་ནང་ནས་ཆང་ལས་སྡིག་ཆེ་མེད། །དེ་ནི་ཉེས་པ་དྲུག་ཅུ་སྐྱ་སེར་འདྲ། །ཆང་ལ་དགའ་བ་སྐྱེ་བ་ལྔ་བརྒྱ་རུ། །སྨྱོན་པ་ཁོ་ནའི་སྐྱེ་བ་ལེན་པར་གསུངས། །ཁྱད་པར་བཙུན་པ་རྣམས་ཀྱིས་ཆང་འཐུང་བ། །དམྱལ་བ་ངུ་འབོད་ཆེན་པོའི་ནང་དུ་སྐྱེ། །ཁམ་བུ་དུ་འཐུང་གྲངས་ཀྱི་ཁྲོ་ཆུ་ནི། །ཁོལ་མ་གཤིན་རྗེའི་ཁ་རུ་བླུག་པར་བྱེད། །དེ་སོགས་ཕྱི་མའི་རྣམ་སྨིན་བཟོད་དཀའ་ཞིང་། །ཚེ་འདིར་ལུས་ཀྱི་ལྷ་རྣམས་རྒྱང་རིང་འབྲོས། །དཀར་ཕྱོགས་ལྷ་རྣམས་མི་དགའ་ཁྲོ་བར་བྱེད། །ནག་ཕྱོགས་བདུད་རིགས་རྒྱལ་འགོང་སྙིང་ལ་ཞུགས། །བྱིན་རླབས་ཉམས་རྟོགས་བསོད་ནམས་འགྲིབ་པར་
བྱེད། །གསང་སྔགས་ཉམས་ལེན་ཡོད་པ་ཚང་བཟི་ན། །མཁའ་འགྲོ་མ་རྣམས་མི་དགའ་བཀའ་ཆད་གཏོང་། །དེ་སོགས་འདི་ཕྱི་ཀུན་ལ་གནོད་པ་ཡིས། །མྱོས་བྱེད་དུག་ཆུ་འདྲ་བའི་ཆང་འདི་སྤོངས། །ནམ་འཆི་ཆ་མེད་མི་འཆིའི་གདིང་ཚོད་མེད། །ཤི་ནས་གར་འགྲོ་ཆ་མེད་ཡང་ཡང་བསྒོམ། །རང་སེམས་རང་གིས་གར་འགྲོ་གར་འདུག་ལྟོས། །བལྟས་པས་མ་མཐོང་ངང་ལ་ཀློད་ལ་ཞོག །ངག་གི་བསྙེན་པ་ཡིག་དྲུག་ཅི་ཐོན་དང་། །བླ་མར་དད་པ་མཆེད་གྲོགས་དག་སྣང་བསྒོམ། །ཆོས་སྒོར་ཞུགས་པའི་དོན་ཙ་གང་ཡིན་པ། །བསམ་བློ་ཐོངས་ལ་རང་སེམས་འཁྲེབ་མ་ཤོར། །ལས་དཀའ་འཚག་ཚེ་རྣམ་གཡེང་དཀའ་ལས་རྣམས། །བླ་མ་དགེ་འདུན་སྤྱི་ཡི་ཆགས་ཕྱི་སྟེ། །རང་གི་སྒྲིབ་པ་དག་པའི་དགའ་བ་བསྒོམ། །སེར་གོས་གྱོན་ཙམ་བཙུན་པ་མ་ཡིན་པར། །ཤི་ཁ་མི་འགྱོད་སེར་གོས་དོན་ལྡན་པ། །ཆོས་སྒོར་ཞུགས་པའི་དོན་དང་ལྡན་པ་གཅིག །ཆོས་སྐྱོང་འཕེལ་གྱིས་སེམས་ལ་འཆང་རྒྱུ་མཛོད།། ༈ །།ན་མོ་ལོ་ཀེ་ཤྭ་ར་ཡེ། ཐུགས་རྗེ་ཆེ་ལ་གསོལ་བ་འདེབས། །ཐུགས་རྗེ་ཆེན་པོས་བྱིན་གྱིས་རློབས། །ཐུགས་རྗེ་
ཆེན་པོས་དངོས་གྲུབ་སྩོལ། །ཐུགས་རྗེ་ཆེན་པོས་ལམ་སྣ་དྲོངས། །ཐུགས་རྗེ་ཆེན་པོས་བར་ཆད་སོལ། །ཐུགས་རྗེ་ཆེན་པོ་འགྲུབ་པར་ཤོག །ཐུགས་རྗེ་ཆེན་པོ་འགྲུབ་ནས་ཀྱང་། །མཐོང་ཐོས་དྲན་རེག་འགྲོ་བ་རྣམས། །བདེ་བ་ཅན་དུ་ཁྲིད་པར་ཤོག །འཇིག་རྟེན་སྲིད་པའི་ཁ་དཔེ་ལ། །མ་རྒས་བར་དུ་མི་གོམ་ཟེར། །དེ་ལ་བདེན་པ་ཆེན་པོ་གདའ། །ད་ནི་ཁོ་བོ་རབ་ཏུ་རྒས། །བསམ་ལོ་ཆེན་པོ་སྐྱེས་ནི་བྱུང་། །སྔོན་ཆད་ཧ་རེ་ལོང་དུ་སོང་། །ད་ནི་དོན་གྱི་སྙིང་པོ་མཐོང་། །ཆུ་བུར་མིག་གིས་མ་མཐོང་ཡང་། །ཡེ་ཤེས་དག་པའི་སྤུན་ཟླར་བྱེད། །སེམས་ཉིད་སྟོང་པའི་དཀྱིལ་འཁོར་ན། །ཆོས་སྐུ་རྡོ་རྗེ་འཆང་ཆེན་དེ། །འདུ་འབྲལ་མེད་པར་བཞུགས་ནི་གདའ། །སེམས་ཉིད་གསལ་བའི་དཀྱིལ་འཁོར་ན། །ལོངས་སྐུ་ཐུགས་རྗེ་ཆེན་པོ་དེ། །གསལ་འགྲིབ་མེད་པར་བཞུགས་ནི་གདའ། །སེམས་ཉིད་འགག་མེད་དཀྱིལ་འཁོར་ན། །སྤྲུལ་ལ་སྐུ་པདྨ་འབྱུང་གནས་དེ། །རྒྱུན་ཆད་མེད་པར་བཞུགས་ནི་གདའ། །ཕུང་པོ་ལྔ་ཡི་དཀྱིལ་འཁོར་ན། །སངས་རྒྱས་རྒྱལ་བ་རིགས་ལྔ་དེ། །ལྷུན་གྱིས་གྲུབ་པར་བཞུགས་ནི་
གདའ། །ཁམས་ལྔ་དག་པའི་དཀྱིལ་འཁོར་ན། །ཡུམ་ཆེན་ལྷ་མོ་དབྱིངས་ཕྱུག་ལྔ། །གདོད་ནས་དག་པར་བཞུགས་ནི་གདའ། །ཚོགས་བརྒྱུད་དག་པའི་དཀྱིལ་འཁོར་ན། །ཉེ་བའི་སྲས་ཆེན་བརྒྱད་པོ་དེ། །སྤྲུལ་སྒྱུར་བྱེད་ཅིང་བཞུགས་ནི་གདའ། །ཚོགས་བརྒྱད་རྒྱུ་བའི་ཡུལ་བརྒྱད་ན། །སྒེག་སོགས་མཆོད་པའི་ལྷ་མོ་བརྒྱད། །རོལ་གར་འཆམ་སྟབས་ངང་ནས་གདའ། །སྣང་ཞིང་སྲིད་པའི་ཆོས་རྣམས་ཀུན། །ཐམས་ཅད་སེམས་སུ་རོ་གཅིག་ཐིམ། །ཕྱི་ནང་དབྱེར་མེད་འདྲེས་ནི་གདའ། །སྣང་བ་སེམས་སུ་མ་ལུས་ཞི། །རིག་པ་ནང་དུ་མ་ལུས་པ། །དབྱེར་མེད་ཁྱབ་གདལ་ཆེན་པོར་གདའ། །བདག་དང་གཞན་དུ་མ་གྲུབ་ཅིང་། །ཐམས་ཅད་སེམས་ཉིད་གཅིག་ཏུ་གདའ། །སེམས་ཡང་ཡེ་ནས་ཡོད་མེད་དང་། །རྟག་ཆད་སྐྱེ་འགགས་བྲལ་བར་གདའ། །མ་བསྒོམས་པ་ཡང་འཁྲུལ་པ་སྟེ། །སྒོམ་པ་རང་ཡང་འཁྲུལ་པ་ཉིད། །བསྒོམ་དང་མ་བསྒོམས་ཁྱད་མེད་པར་། །ཡེ་ནས་ཆོས་སྐུ་རྗེན་པར་གདའ། །ཡེངས་བ་ཉིད་ནི་འཁྲུལ་པ་ཉིད། །མ་ཡེངས་པ་ཡང་འཁྲུལ་པ་ཉིད། །ཡེངས་དང་མ་ཡེངས་དབྱེར་མེད་པར། །ཡེ་ནས་སྤྲོས་
བྲལ་ཆེན་པོར་གདའ། །བདག་མེད་ཕྱིར་ན་གཞན་མེད་ཕྱིར། །བདག་གཞན་གཉིས་མེད་སྟོང་པ་ཉིད། །དབྱེར་མེད་རོ་གཅིག་ཆེན་པོར་གདའ། །རང་སེམས་གདོད་ནས་ཀུན་ཏུ་བཟང་། །དང་པོའི་སངས་རྒྱས་བཅོམ་ལྡན་འདས། །རང་ལ་ཡེ་ནས་བཞུགས་པའི་ཕྱིར། །འབྲས་བུ་ཐོབ་འདོད་ད་ནི་ཆུང་། །རིགས་དྲུག་སེམས་ཀྱི་སྣང་བ་ལ། །གཞན་དུ་གྲུབ་པ་མ་དམིགས་པས། །འཁོར་བར་འཁྱམས་དོགས་ད་ནི་ཆུང་། །སེམས་ཅན་ཡེ་ནས་མ་དམིགས་པས། །སྙིང་རྗེ་སྐྱེ་བའི་ཡུལ་མ་མཆིས། །དངོས་འཛིན་སྙིང་རྗེ་ད་ནི་ཆུང་། །རང་སེམས་རྫོགས་པའི་སངས་རྒྱས་མཐོང་། །ལྷ་ཞལ་མཐོང་འདོད་ད་ནི་ཆུང་། །མུན་པ་ལ་ནི་སྒྲོན་མེ་ལྟར། །རང་སེམས་ཆོས་སྐུར་རྟོགས་མ་ཐག །སྡིག་སྒྲིབ་མ་ལུས་ཐམས་ཅད་དག །དཀོར་སྒྲིབ་ཆེ་ཡང་ང་མི་སྐྲག །རྗེས་སུ་འཇུག་པའི་སློབ་མ་ཚོ། །ཚ་ཚ་བརྐོས་ཕོར་ཅི་བཞིན་དུ། །བོགས་སྐྱེད་འོང་ན་ད་ཟླ་འོང་རན། །ཚོང་པ་ཁྱིམ་དུ་སླེབ་པ་བཞིན། །བློ་བདེའི་བསམ་དོན་ད་རེས་འགྲུབ། །གངས་དཀར་སེང་ལྕམ་དཀར་མོ་ལ། །ཡ་ང་བག་ཚ་མི་འདུག་སྟེ། །གངས་དཀར་
འགྲིམས་པ་སེང་གེའི་ལུགས། །འཁོར་བ་ལྟུང་དོགས་མི་གདའ་སྟེ། །རྒྱུ་འབྲས་འཛེམ་པ་ཆོས་པའི་ལུགས། །གཙང་ཆབ་ཉ་མོ་གསེར་མིག་དེ། །འཚུབས་ནས་འཆི་དོགས་མི་གདའ་སྟེ། །མཚོ་འཁྱིལ་བསྡམ་པ་གསེར་མིག་ལུགས། །ལྟུང་བའི་དོགས་པ་མི་གདའ་སྟེ། །ཚུལ་ཁྲིམས་བསྲུང་བ་བཙུན་པའི་ལུགས། །འཕགས་པ་འཇིག་རྟེན་དབང་ཕྱུག་གིས། །སེམས་ཅན་དམིགས་སུ་མ་མཆིས་ཏེ། །འགྲོ་དོན་བྱེད་པ་རྒྱལ་སྲས་ལུགས། །བདག་གཞན་གཉིས་མེད་རྟོགས་ལགས་ཀྱང་། །གཞན་ཕན་བྱེད་པ་བློ་སྦྱོང་ལུགས། །ཡུམ་ཆེན་འཕགས་མ་སྒྲོལ་མ་དེ། །སངས་རྒྱས་ཀུན་དང་དབྱེར་མེད་ཀྱང་། །དཀྱིལ་འཁོར་ཀུན་གྱིས་མཆོད་ལྷ་མ། །རང་ལུས་རྒྱལ་བའི་དཀྱིལ་འཁོར་དུ། །ད་ནི་ངེས་ཤེས་སྐྱེ་ལགས་ཀྱང་། །མཆོད་གཏོར་མཎྜལ་མི་གཅོད་པར། །འདི་ཡང་རྟེན་འབྲེལ་དོན་རྟོགས་རྟགས། །ཆོས་སྐྱོང་བཀའ་སྲུང་ཐམས་ཅད་ཀྱང་། །རང་རིག་རྩལ་དུ་རྟོགས་མོད་ཀྱང་། །གཏོར་བསྔོས་དུས་གཏོར་མི་གཅོད་པ། །འདི་ཡང་རྟེན་འབྲེལ་གནད་གཅིག་རྟོགས། །སྣང་སྲིད་ལྷ་འདྲེ་སྡེ་བརྒྱད་ཀུན། །རང་སེམས་ཡིན་པར་ཐག་ཆོད་ཀྱང་། །
བསང་མཆོད་བསྐང་གཏོར་བསྔོ་བ་སོགས། །རྟེན་འབྲེལ་ཆད་དུ་མི་གསོད་པ། །འདི་ཡང་རྒྱུད་ཀྱི་དགོངས་པ་ཡིན། །ད་ལྟ་ཤི་ཡང་འགྱོད་མེད་ཅིང་། །བློ་བདེ་ཁོང་དུ་ཆུད་ལགས་ཀྱང་། །སྲུང་ཟློག་ཚེ་སྒྲུབ་སྨན་བླ་སོགས། །རྟེན་འབྲེལ་ཐབས་ལ་འབུང་བ་འདི། །ད་དུང་ལུས་འདིའི་འགྲོ་དོན་གཅིག །འགྲུབ་ན་སྙམ་པའི་སེམས་བསྐྱེད་ཡིན། །རྒས་པོ་བཅོས་པའི་དཔའ་གཏམ་འདི། །བོང་བུའི་སེང་སྐད་ཡིན་ནམ་མིན། །ཡེ་ཤེས་སྤྱན་ལྡན་རྣམས་ཀྱིས་མཁྱེན། །ཆུང་ནས་འགྲོགས་པའི་དོན་འགྲུབ་ལ། །དེ་རིང་སྙིང་གཏམ་རྗེན་པར་ཕུད། །ཤོག་བུ་ལྷག་པས་ཉམས་མཚར་དུ། །ཁང་ཁྱིམ་དབེན་ཕྱིར་ཉམས་ལ་ཤར། །འཕྲལ་དུ་བྲིས་པ་མངྒ་ལཾ།། ༈ །།ན་མོ་ཀེ་ཤྭ་ར་ཡེ། བདག་གི་སྤྱི་གཙུག་ཁྲུ་གང་སོ། །པདྨ་འདབ་བརྒྱད་ཟླ་བའི་སྟེང་། །འབྲེལ་པ་ཐོབ་ཚད་བླ་མ་དང་། །དབྱེར་མེད་མགོན་པོ་སྤྱན་རས་གཟིགས། །སྐུ་མདོག་སྟོན་ཁའི་ཟླ་བའི་མདོག །ཕྱག་བཞི་ཞལ་གཅིག་སྐྱིལ་ཀྲུང་བཞུགས། །རྩ་ཕྱག་ཐུགས་ཀར་ཐལ་མོ་སྦྱར། །གཡས་འོག་ཤེལ་དཀར་ཕྲེང་བ་འདྲེན། །གཡོན་འོག་པད་
དཀར་འདབ་བརྒྱད་བསྣམས། །འཛུམ་ཞལ་སྤྱན་གཉིས་འགྲོ་ལ་གཟིགས། །མཚན་དཔེ་དར་དང་རིན་ཆེན་བརྒྱན། །ཐུགས་ཀར་ཟླ་སྟེང་ཧྲིཡིག་ལ། །གསུང་མཆོག་ཡི་གེ་དྲུག་གིས་བསྐོར། །ཕྱོགས་བཅུའི་སངས་རྒྱས་བྱང་སེམས་རྣམས། །ཐམས་ཅད་བུ་ཡུག་འཚུབ་བཞིན་བྱོན། །ཐུགས་རྗེ་ཆེན་པོའི་སྐུ་ལ་ཐིམ། །སངས་རྒྱས་ཐམས་ཅད་འདུས་པའི་ཐུགས། །ཐུགས་རྗེ་ཅན་ལ་གསོལ་བ་འདེབས། །སེམས་ལ་ཐུགས་ཀྱིས་བྱིན་གྱིས་རློབས། །ཆོས་སྐུ་འགྲུབ་པར་ཐུགས་རྗེས་ཟུངས། །དམ་ཆོས་ཐམས་ཅད་འདུས་པའི་གསུང་། །ཡིག་འབྲུ་དྲུག་ལ་གསོལ་བ་འདེབས། །ངག་ལ་གསུང་གིས་བྱིན་གྱིས་རློབས། །ལོངས་སྐུ་འགྲུབ་པར་ཐུགས་རྗེས་ཟུངས། །དགེ་འདུན་ཐམས་ཅད་འདུས་པའི་སྐུ། །སྤྱན་རས་གཟིགས་ལ་གསོལ་བ་འདེབས། །ལུས་ལ་སྐུ་ཡིས་བྱིན་གྱིས་རློབས། །སྤྲུལ་སྐུ་འགྲུབ་པར་ཐུགས་རྗེས་ཟུང་། །དུས་ད་རེས་མི་ལུས་ལན་གཅིག་འདི། །དོན་མེད་སྟོང་ལོག་མི་བྱེད་པར། །སྡིག་སྤངས་བསྙེན་གནས་ཡིག་དྲུག་སོགས། །སྙིང་པོ་ལོན་པར་བྱིན་གྱིས་རློབས། །ཚེ་ལ་ལོང་མེད་བར་ཆད་མང་། །ལོ་ཟླ་ཉིན་ཞག་ཚེ་ལ་
རྐུ། །ནམ་འཆི་ཆ་མེད་ཨ་ཙ་མ། །ཐུགས་རྗེས་ཟུངས་ཤིག་སྤྱན་རས་གཟིགས། །ཉེ་དུ་ནོར་རྫས་དགྲ་དང་གཉེན། །ཐམས་ཅད་སྐྱུར་ནས་གཅིག་པུར་འགྲོ། །དགེ་སྡིག་ལུས་དང་གྲིབ་བཞིན་འབྲང་། །ཐུགས་རྗེས་ཟུངས་ཤིག་སྤྱན་རས་གཟིགས། །ཆོས་ཀྱི་རྒྱལ་པོ་ཁྲིམས་ཁ་ཚ། །གཤིན་རྗེའི་ལས་མཁན་གདུག་རྩུབ་ཆེ། །མེ་ལོང་ཡིག་ཆུང་ནོར་འཁྲུལ་མེད། །ཐུགས་རྗེས་ཟུངས་ཤིག་སྤྱན་རས་གཟིགས། །དམྱལ་ཁམས་བཅོ་བརྒྱད་སྡུག་བསྔལ་དེ། །རྣ་བས་ཐོས་ཀྱང་གློ་སྙིང་འདར། །ཐོག་ཏུ་བྱུང་ན་ཇི་ལྟར་བྱེད། །ཐུགས་རྗེས་ཟུངས་ཤིག་སྤྱན་རས་གཟིགས། །ཡི་དྭགས་གྲོང་ཁྱེར་བཀྲེས་སྐོམ་དེ། །རྣ་བས་ཐོས་ཀྱང་མཆིན་པ་ན། །ཐོག་ཏུ་བྱུང་ན་ཅི་ལྟར་བསྲན། །ཐུགས་རྗེས་ཟུངས་ཤིག་སྤྱན་རས་གཟིགས། །འགྲོ་དྲུག་གང་དུ་སྐྱེས་ཀྱང་སྡུག །ཐར་མེད་འཁོར་བའི་བཙོན་ར་ནས། །བདག་དང་འགྲོ་དྲུག་སེམས་ཅན་རྣམས། །མྱུར་དུ་དྲོངས་ཤིག་སྤྱན་རས་གཟིགས། །དཀོན་མཆོག་ཀུན་འདུས་སྤྱན་རས་གཟིགས། །ཁྱེད་ལ་བདག་ནི་སྐྱབས་སུ་མཆི། །འགྲོ་བ་སེམས་ཅན་ཀུན་དོན་དུ། །ཁྱེད་ལྟར་བདག་ཀྱང་སེམས་
མཆོག་བསྐྱེད། །ཐོག་མེད་དུས་ནས་ད་ལྟའི་བར། །སྡིག་སྒྲིབ་ཉེས་ལྟུང་ཅི་བསགས་པ། །ཁོག་ཏུ་བཙན་དུག་ཤོར་བ་བཞིན། །རབ་ཏུ་འགྱོད་པས་སོ་སོར་བཤགས། །འདི་ནས་བཟུང་སྟེ་ཚེ་རབས་ཀུན། །བདག་གི་ལུས་དང་ལོངས་སྤྱོད་རྣམས། །ཐམས་ཅད་སྤྱན་རས་གཟིགས་ལ་འབུལ། །ཚོགས་གཉིས་རྫོགས་པར་ཐུགས་རྗེས་ཟུངས། །ཁྱེད་མིན་རེ་ས་གཞན་ན་མེད། །སྙིང་ནས་གསོལ་བ་འདེབས་ལགས་པས། །བདག་ལ་དབང་བསྐུར་བྱིན་གྱིས་རློབས། །ཕྱག་རྒྱ་ཆེན་པོའི་དངོས་གྲུབ་སྩོལ། །དེ་ལྟར་རྩེ་གཅིག་གསོལ་བཏབ་པས། །ཐུགས་རྗེ་ཆེན་པོ་འོད་དུ་ཞུ། །བདག་ལ་ཐིམ་པས་དབྱེར་མེད་ཅིང་། །དབང་བཞི་ཐོབ་ཅིང་བྱིན་རླབས་ཞུགས། །ཚུལ་ལྟོས་རང་གི་སེམས་ལ་ལྟོས། །སེམས་ལ་གཟུགས་དང་ཁ་དོག་མེད། །བལྟས་པས་མཐོང་རྒྱུ་མེད་པ་དེ། །སྟོང་ཉིད་ཤེས་རབ་ཕར་ཕྱིན་ཡིན། །མེད་པ་མ་ཡིན་ཅི་ཡང་དྲན། །གར་ཡང་ཐོགས་མེད་རྒྱུག་པ་དེ། །འགྱུ་བ་ཡེ་ཤེས་ཟངས་ཐལ་ཟེར། །དེ་ཉིད་རིག་ན་ཡེ་ཤེས་ཡིན། །བཟུང་ན་མི་ཟིན་ཕྱོགས་བཅུར་རྒྱུག །རྟ་རྒོད་སྒྲ་བྲོས་ལོབ་པ་འདྲ། །གར་འགྲོག་ཐོངས་ལ་ལུས་
སེམས་ཀློད། །བཏང་ན་མི་འགྲོ་ཚུར་ལ་འཁོར། །རྟེའུ་ཆུང་བཟུང་བའི་རྒོད་མ་འདྲ། །ངོ་བོ་སྟོང་ལ་ས་ལེར་ཞོག །འདི་བསྒོམ་གཏད་སོ་འདི་ལ་མེད། །ལུག་ཁྱུ་འཚོ་བའི་རྫི་བོ་ལྟར། །གར་འགྲོ་ཐོངས་ལ་རྒྱང་སོ་ཚུགས། །ཐང་ཤིང་ལོ་འདབ་བརྒྱད་ཁྲི་དེ། །སོ་སོར་བཅད་ཀྱིས་ག་ལ་ལོང་། །སྡོང་པོ་བཅད་ན་ཐམས་ཅད་སྐམ། །ཆོས་ཀྱི་ཕུང་པོ་བརྒྱད་ཁྲི་དེ། །སོ་སོར་བསླབ་ཀྱང་མཐའ་མི་ཆོད། །རང་སེམས་རྩ་བ་བཅད་པ་ན། །ཆོས་ཕུང་བརྒྱད་ཁྲི་དེ་ལ་འདུས། །འཛམ་གླིང་ཁྱབ་པའི་མུན་ནག་ཡང་། །ཉི་མ་གཅིག་ཤར་ཐམས་ཅད་སངས། །ཐོག་མེད་དུས་བསགས་སྡིག་སྒྲིབ་རྣམས། །རང་སེམས་ཆོས་སྐུར་རྟོགས་ན་དག །བདག་གི་དུས་གསུམ་དགེ་བ་རྣམས། །རྫོགས་པའི་སངས་རྒྱས་ཐོབ་ཕྱིར་བསྔོ། །ནམ་ཞིག་འདི་ནས་ཚེ་འཕོས་ཚེ། །ནུབ་ཕྱོགས་བདེ་ཆེན་ཞིང་ཁམས་སུ། །དག་པའི་སྐྱེ་བ་ལེན་པར་ཤོག །འདི་དང་ཕྱི་སྒྱུ་མ་བར་དོ་རུ། །སྤྱན་རས་གཟིགས་ཀྱིས་བྱིན་བརླབས་ནས། །བཀྲ་ཤིས་བདེ་ལེགས་འབྱུང་བར་ཤོག །ཅེས་ཨ་ནུ་ཚེ་མགོན་རྒྱལ་གྱི་ཐུགས་དམ་རྒྱུན་ཁྱེར་དུ་དམིགས་ནས་དགེ་སློང་ཨ་རཱ་གས་བྲིས་
པའོ། མངྒ་ལཾ།། །།ན་མོ་ཤཱནྟི་ཀྲོ་ཏ་ཡེ། གནས་དག་པ་མཁའ་སྤྱོད་ཀྱི་ཞིང་ཁམས་ནས། །རིག་འཛིན་བླ་མ་གྲུབ་ཐོབ་རྒྱ་མཚོ་དེས། །འདིར་ཚོགས་ཁྲོམ་པ་རྣམས་ལ་བྱིན་གྱིས་རློབས། །འཕོ་བས་མཁའ་སྤྱོད་བསྒྲོད་པ་ཞིག་ཐུགས་རྗེས་ཟུངས། །གནས་འོག་མིན་ཆོས་དབྱིངས་ཀྱི་ཞིང་ཁམས་ནས། །ཆོས་སྐུ་སངས་རྒྱས་ཀུན་ཏུ་བཟང་པོ་དེས། །འདིར་ཚོགས་ཁྲོམ་པ་རྣམས་ལ་བྱིན་གྱིས་རློབས། །འཆི་དུས་འོད་གསལ་ཟིན་པ་ཞིག་ཐུགས་རྗེས་ཟུངས། །གནས་དག་པའི་ཞིང་ཁམས་ལྔ་པོ་ནས། །ཞི་བ་བཞི་བཅུ་རྩ་གཉིས་ལྷ་ཚོགས་དེས། །འདིར་ཚོགས་ཁྲོམ་པ་རྣམས་ལ་བྱིན་གྱིས་རློབས། །བར་དོ་ལོངས་སྐུ་འགྲུབ་པ་ཞིག་ཐུགས་རྗེས་ཟུངས། །གནས་རང་བྱུང་དུར་ཁྲོད་ཆེན་པོ་ནས། །འབར་བ་ཁྲག་འཐུང་ལྔ་བཅུ་རྩ་བརྒྱད་དེས། །འདིར་ཚོགས་ཁྲོམ་པ་རྣམས་ལ་བྱིན་གྱིས་རློབས། །བར་དོ་རང་ངོ་ཤེས་པ་ཞིག་ཐུགས་རྗེས་ཟུངས། །གནས་ཨུ་ཙ་ལ་ཡི་དུར་ཁྲོད་ཆེན་པོ་ནས། །བཀའ་སྲུང་ཆོས་སྐྱོང་དམ་ཅན་སྡེ་བདུན་དེས། །འདིར་ཚོགས་ཁྲོམ་པ་རྣམས་ལ་བྱིན་གྱིས་རློབས། །རྐྱེན་ངན་བར་ཆད་མེད་པ་ཞིག་ཐུགས་རྗེས་
ཟུངས། །གནས་ཙིཏྟ་མཆོང་གུར་སྨུག་པོ་ནས། །རང་སེམས་སངས་རྒྱས་ཀུན་ཏུ་བཟང་པོ་དེས། །འདིར་ཚོགས་ཁྲོམ་པ་རྣམས་ལ་བྱིན་གྱིས་རློབས། །གདོད་མའི་གནས་ལུགས་རྟོགས་པ་ཅིག་ཐུགས་རྗེས་ཟུངས། །ཞེས་ཐམ་ཁར་ཞི་ཁྲོའི་དབང་ཁྲིད་དུས་ཅུང་ཟད་བྱིན་མི་ཆགས་པ་གཅིག་བྱུང་ནས་གསོལ་བ་བཏབ་པ་ཨ་རཱ་གས་སོ། མངྒ་ལཾ།། ༈ གསང་འདུས་ཁྲིད་ཀྱི་གསོལ་འདེབས་བཞུགས་སོ།། ཨོཾ་མ་ཎི་པདྨེ་ཧཱུྃ་ཧཱུྃ༔ བདག་གི་སྤྱི་གཙུག་པད་སྡོང་ནི། །འདབ་མ་སྟོང་ལྡན་ཟེའུ་འབྲུ་ལ། །གསང་བ་འདུས་པའི་ལྷ་ཚོགས་བཞུགས། །འདབ་མ་སྟོང་ལ་སངས་རྒྱས་སྟོང་། །མཚན་དང་དཔེ་བྱད་གཟི་བརྗིད་འབར། །ཕྱོགས་བཅུའི་རྒྱལ་བ་སྲས་བཅས་ཀུན། །ཁ་བ་བུ་ཡུག་འཚུབ་ལྟར་བྱོན། །སྤྱི་བོའི་ལྷ་ཚོགས་རྣམས་ལ་ཐིམ། །ཨོཾ་མ་ཎི་པདྨེ་ཧཱུྃ་ཧཱུྃ༔ ཐུགས་རྗེ་ཆེན་པོ་སྤྱན་རས་གཟིགས། །བསྐལ་བཟང་སངས་རྒྱས་སྟོང་དང་བཅས། །སྐྱབས་ཀྱི་དམ་པ་ཐམས་ཅད་ལ། །བདག་སོགས་འགྲོ་ཀུན་སྐྱབས་སུ་མཆི། །སྣོད་ཀྱི་འཇིག་རྟེན་མེ་ཆུས་འཇིག །ནམ་ཟླ་དུས་བཞི་འགྱུར་ཞིང་འགྲོ། །ཉི་མ་རྒས་པའི་གྲིབ་སོ་བཞིན། །འཆི་བདག་མི་སྡོད་ཚུར་
ཚུར་འོང་། །མི་ཚེ་ཟད་པ་མ་རིག་ནས། །ཟས་གོས་ཟད་ལ་སེམས་ནད་བྱེད། །ཨ་ཚ་མ་ན་ང་རེ་འཁྲུལ། །ཚེ་ལ་བར་ཆད་རྐྱེན་ངན་མང་། །ང་བས་གཞོན་པ་དུ་མ་ཤི །ང་ལ་མི་འཆིའི་གདེང་ཚོད་མེད། །གཟའ་སོགས་དུས་མིན་འཆི་བ་མང་། །དེ་རིང་མི་ལ་སང་ཉིན་རོ། །དེ་འདྲ་བྱུང་བ་མང་དུ་ཐོས། །འཆི་བདག་ལས་ཀྱི་གཤིན་རྗེ་ལ། གཏམ་ས་གཏུན་ས་མི་གདའ་ན། །གཏུག་གིས་ཐུག་པའི་དུས་ཚོད་ཅིག །བདག་ལ་ནམ་འོང་ཏིག་ཏིག་མེད། །ཐུགས་རྗེས་གཟིགས་ཤིག་སྤྱན་རས་གཟིགས། །བྱིན་གྱིས་རློབས་ཤིག་འོད་དཔག་མེད། །བར་ཆད་སོལ་ཅིག་ཨོ་རྒྱན་རྗེ། །ཨོཾ་མ་ཎི་པདྨེ་ཧཱུྃ་ཧྲཱིཿ ཉེ་དུ་ཡོད་ཀྱང་འགྲོགས་དབང་མེད། །མང་པོའི་གསེབ་ནས་གཅིག་པུར་འགྲོ། །བསགས་པའི་ནོར་རྫས་ཤུལ་དུ་ལུས། །དགེ་སྡིག་ལུས་དང་གྲིབ་བཞིན་འགྲོགས། །དགྲ་ཡིས་གནོད་པ་མི་སྐྱེལ་ཏེ། །ཐར་མེད་བཙོན་རར་བཙུད་མི་དེ། །མི་དགེ་སྡིག་པའི་ལས་འདི་རེད། །ཐོག་མེད་དུས་ནས་ད་ལྟའི་བར། །མི་དགེ་ཉེས་ལྟུང་ཅི་བསགས་པ། །ཐུགས་རྗེ་ཆེན་པོའི་ལྷ་ཚོགས་དྲུང་དུ་བཤགས། །འཛམ་གླིང་གང་བའི་ནོར་ཡོད་
ཀྱང་། །ཁབ་སྐུད་ཙམ་ཡང་འཁྱེར་དབང་མེད། །འཁྱེར་རྒྱུའི་ནོར་དེ་དགེ་བ་རེད། །ལུས་དང་ལོངས་སྤྱོད་དགེ་རྩར་བཅས། །ཐུགས་རྗེ་ཆེན་པོའི་ལྷ་ལ་འབུལ། །ཨོཾ་མ་ཎི་པདྨེ་ཧཱུྃ་ཧཱུྃ༔ འདི་དང་ཕྱི་མ་བར་དོ་གསུམ། །རེ་ས་གཞན་ན་མ་མཆིས་པས། །གསོལ་བ་འདེབས་སོ་སྤྱན་རས་གཟིགས། །གསོལ་བ་འདེབས་སོ་འོད་དཔག་མེད། །གསོལ་བ་འདེབས་སོ་སངས་རྒྱས་སྟོང་། །གསོལ་བ་འདེབས་སོ་པདྨ་འབྱུང་། །དེ་ལྟར་གསོལ་བ་བཏབ་པའི་མཐུས། །ཐུགས་རྗེ་ཆེན་པོ་སངས་རྒྱས་སྟོང་། །འོད་དུ་ཞུ་ནས་བདག་ལ་ཐིམ། །ཨོཾ་མ་ཎི་པདྨེ་ཧཱུྃ་ཧཱུྃ༔ བདག་ལུས་ཤ་ཁྲག་གདོས་བཅས་འདི། །འཇའ་ལུས་ཐུགས་རྗེ་ཆེན་པོའི་སྐུ། །སྐུ་མདོག་དམར་པོ་བྱི་རུའི་མདོག །ཞལ་གཅིག་ཕྱག་གཉིས་མཚན་དཔེ་རྫོགས། །ཕྱག་གཡས་ཕྲེང་བ་ཐུགས་ཀར་འཛིན། །ཕྱག་གཡོན་ཚེ་ཡི་བུམ་པ་བསྣམས། །ཞབས་གཉིས་སྐྱིལ་ཀྲུང་པད་ཟླའི་གདན། །ཡུམ་མཆོག་གསང་ཡེ་སྐུ་ལ་འཁྲིལ། །དར་དང་རིན་ཆེན་རྒྱན་གྱི་སྤྲས། །ཨོཾ་མ་ཎི་པདྨེ་ཧཱུཾ་ཧཱི༔ ཐུགས་ཀར་ཟླ་སྟེང་ཧཱུྃ་ཡིག་མཐར། །ཡི་གེ་བདུན་པ་གཡས་སུ་འཁོར། །དེ་
ལས་འོད་ཟེར་ཕྱོགས་བཅུར་འཕྲོས། །སངས་རྒྱས་ཞིང་ཁམས་ཐམས་ཅད་ནས། །ཐུགས་རྗེ་ཆེན་པོ་སངས་རྒྱས་སྟོང་། །ཆར་བཞིན་བབས་ནས་བདག་ལ་ཐིམ། །ཨོཾ་མ་ཎི་པདྨེ་ཧཱུྃ་ཧྲཱིཿ འགྲོ་དྲུག་སེམས་ཅན་ཐམས་ཅད་ཀུན། །ཚེ་རབས་མང་པོའི་ཕ་མ་རེད། །འགའ་རེ་དམྱལ་བར་བཙོ་ཞིང་བསྲེགས། །འགའ་རེ་གྲང་དམྱལ་ཁྱགས་ཤིང་གས། །འགའ་རེ་ཡི་དྭགས་ལུས་པོ་སྐམ། །འགའ་རེ་དུད་འགྲོ་བླུན་ཤིང་ལྐུག །འགའ་རེ་ལྷ་མིན་རྒྱུན་དུ་རྩོད། །ལྷ་དང་མི་ཡི་བདེ་སྐྱིད་ཀྱང་། །ཡུན་རིང་མི་རྟག་སྡུག་བསྔལ་འབྱུང་། །ཨ་ཙ་མ་ན་སྙིང་རེ་རྗེ། །ཨོཾ་མ་ཎི་པདྨེ་ཧཱུྃ་ཧཱུྃ༔ བདག་གི་ཡི་གེ་བདུན་པའི་སྒྲ། །འབྲུག་སྟོང་བཞིན་དུ་བསྒྲགས་པ་ཡིས། །འགྲོ་དྲུག་སེམས་ཅན་ཐམས་ཅད་ཀུན། །ཐུགས་རྗེ་ཆེན་པོའི་སྐུ་རུ་གྱུར། །ཀུན་གྱིས་བདག་གི་རམ་བུ་བཀྱག །སྒྲ་སྐད་ཐམས་ཅད་ཡིག་བདུན་སྒྲ། །ཐམས་ཅད་འཁོར་བ་དོང་ནས་སྤྲུགས། །ཐམས་ཅད་སངས་རྒྱས་ཐོབ་པར་ཤོག །ཨོཾ་མ་ཎི་པདྨེ་ཧཱུྃ་ཧཱུྃ༔ དེ་ལྟར་སྒོམ་མཁན་རང་གི་སེམས། །སྐྱིད་སྡུག་བཟང་ངན་རང་གི་སེམས། །ཕྱག་རྫོགས་དབུ་མ་རང་གི་སེམས། །སེམས་ནི་གཟུགས་
དང་ཁ་དོག་མེད། །མེད་པ་མ་ཡིན་ཅི་ཡང་འཕྲོ། །སེམས་ནི་ཡེ་ནས་ཆོས་ཀྱི་སྐུ། །དེ་ལ་བཅོས་བསླད་བྱེད་དོན་མེད། །རང་སར་ཞོག་ལ་རང་ངོ་ལྟོས། །བལྟས་པས་མི་མཐོང་ངང་ལ་ཞོག །གནས་ན་གནས་པའི་ངོ་བོར་ལྟོས། །ཀྱི་ལེ་གནས་པ་ཞི་གནས་ཏེ། །སྟོང་པར་མཐོང་བ་ལྷག་མཐོང་ཡིན། །མི་འཕྲོ་མཐོང་བའང་ཞི་གནས་ཏེ། །སྟོང་པར་མཐོང་བ་ལྷག་མཐོང་ཡིན། །སེམས་ནི་གནས་སམ་འཕྲོ་ཡང་རུང་། །ངོ་བོ་སྟོང་པར་མཐོང་བ་ནི། །ཆུ་དང་རླབས་བཞིན་རང་ལ་ཐིམ། །ཉམས་ལེན་གསར་པའི་ཆོས་སྐལ་གྱིས། །འགྱུ་བ་གནས་པས་མི་སྒྲིབ་པར། །མཚོ་ལ་ཁ་བ་བབས་པ་ལྟར། །སྤྱོད་ལམ་ཕལ་ཆེར་རྣམས་དང་འདྲེས། །དྲན་པ་ཙམ་གྱིས་སྟེང་དུ་སླེབས། །ཉམས་ལེན་འབྲིང་གི་ཆོས་སྐལ་གྱིས། །བལྟ་བྱ་ལྟ་བྱེད་གཅིག་ཏུ་འདྲེས། །འདི་བསྒོམ་གཏད་སོ་གཅིག་ཀྱང་མེད། །ཕྱི་ནང་སྣོད་བཅུད་ཐམས་ཅད་ཀུན། །རང་གི་སེམས་དང་དབྱེར་མེད་འདྲེས། །ཉམས་ལེན་རབ་ཀྱི་ཆོས་སྐལ་གྱིས། །གཉིད་དང་རྨི་ལམ་མཚམས་ཤེད་ན། །ཉམས་ལེན་ཟིན་པ་འོད་གསལ་ཡིན། །རྨི་ལམ་ཡུལ་དུ་ཉམས་ལེན་
ཟིན། །བརྩོན་འགྲུས་ཅན་གྱི་ཆོས་སྐལ་གྱིས། །དགེ་བ་འདི་ཡིས་སེམས་ཅན་ཀུན། །ཐུགས་རྗེ་ཆེན་པོ་འགྲུབ་གྱུར་ཅིག །ཨོཾ་མ་ཎི་པདྨེ་ཧཱུྃ་ཧཱུྃ༔ ཞེས་པ་འདི་གནས་མདོ་ནང་དུ་ཐུགས་རྗེ་ཆེན་པོའིདབང་ཁྲིད་དུས་གྱང་སྒང་བའི་བཙུན་མ་འགས་བསྐུལ་ནས་ཨ་རཱ་གས་ནུབ་ཏུ་མར་མེའི་ངོགས་ལ་བྲིས་སོ།། ༈ །།ན་མོ་ལོ་ཀེ་ཤྭ་ར་ཡེ། བདག་སོགས་དབུ་ནག་འགྲོ་བ་ཀུན། །དལ་འབྱོར་མི་ལུས་ཐོབ་ལགས་ཀྱང་། །ནམ་འཆི་ཆ་མེད་ཨ་ཙ་མ། །སྣོད་ཀྱི་འཇིག་རྟེན་མེ་ཆུས་འཇིག །ལོ་ཟླ་སོང་ཞིང་འཆི་དང་ཉེ། །འཆི་བདག་གཤིན་རྗེའི་ཕོ་ཉ་ལ། །བཟློག་པའི་ཐབས་མེད་ཏུག་གིས་ཐུག །འཁོར་དང་ཉེ་དུ་ཁྲིད་དབང་མེད། །བསགས་པའི་ནོར་རྫས་ཤུལ་དུ་ལུས། །གཅེས་པའི་ལུས་འདི་བྱ་ཁྱིས་ཟ། །དེ་དུས་སྐྱབས་གཞན་མ་མཆིས་པས། །སྐྱབས་གནས་བསླུ་མེད་ད་ལྟ་ཚོལ། །སྤྱི་གཙུག་པད་སྡོང་ཉི་ཟླའི་སྟེང་། །འཇའ་དང་འོད་ཀྱི་གུར་ཁང་ནང་། །དཀོན་མཆོག་ཀུན་འདུས་འོད་དཔག་མེད། །དམར་པོ་མཉམ་བཞག་སྐྱིལ་ཀྲུང་བཞུགས། །ཆོས་གོས་རྣམ་གསུམ་སྐུ་ལ་གསོལ། །མཚན་དང་དཔེ་བྱད་གཟི་བརྗིད་འབར། །དམ་ཡེ་དབྱེར་མེད་ངོ་བོ་
བཞུགས། །བླ་མ་ཨོ་རྒྱན་སྣང་མཐའ་ཡས། །གསོལ་བ་འདེབས་སོ་ཐུགས་རྗེས་ཟུངས། །འགྲོ་དྲུག་རྣམས་ལ་ཐུགས་རྗེས་གཟིགས། །དམྱལ་བའི་སྡུག་བསྔལ་བཟོད་གླགས་མེད། །ཡི་དྭགས་བཀྲེས་སྐོམ་མེ་ལྟར་འབར། །དུད་འགྲོ་གླེན་ལྐུག་ཡི་རེ་མུག །ལྷ་མིན་འཐབ་རྩོད་སྐྱོ་བ་སྐྱེ། །ལྷ་དང་མི་ཡི་བདེ་སྐྱིད་ཀྱང་། །ཡུན་རིང་མི་གནས་རྨི་ལམ་ཙམ། །འདི་རྣམས་བདག་གིས་འདྲེན་པའི་ཕྱིར། །འཕགས་མཆོག་ཐུགས་རྗེ་ཆེན་པོ་དེ། །འགྲུབ་པར་བྱིན་གྱིས་བརླབ་ཏུ་གསོལ། །འགྲོ་བའི་དོན་དུ་གསོལ་བཏབ་པས། །འོད་དཔག་མེད་ཀྱི་སྐུ་ལུས་ལས། །བདུད་རྩི་འོ་མ་ལྟ་བུ་བབས། །ནད་གདོན་སྡིག་སྒྲིབ་ཐམས་ཅད་དག །རང་ལུས་ཐུགས་རྗེ་ཆེན་པོ་ནི། །བཀྲག་གསལ་གངས་ལ་ཉི་ཤར་འདྲ། །ཕྱག་བཞི་དང་པོས་ཐལ་མོ་སྦྱར། །གཡས་གཡོན་ཕྲེང་བ་པདྨ་འཛིན། །ཞལ་གཅིག་ཞི་འཛུམ་འགྲོ་ལ་གཟིགས། །དར་དང་རིན་ཆེན་རྒྱན་གྱིས་བཀླུབས། །པདྨ་ཟླ་བའི་གདན་ལ་བཞུགས། །སྐུ་ནི་རི་རྒྱལ་ལྷུན་པོ་ཙམ། །དབུ་ནི་ཚངས་པའི་གནས་སུ་སླེབས། །ཞལ་ནས་ཡི་གེ་དྲུག་པའི་སྒྲ། །འབྲུག་སྟོང་བཞིན་
དུ་འུ་རུ་རུ། །འགྲོ་དྲུག་ཐུགས་རྗེ་ཆེན་པོའི་ཞིང་། །སེམས་ཅན་གཅིག་ཀྱང་མ་ལུས་པ། །ཐུགས་རྗེ་ཆེན་པོའི་སྐུར་གྱུར་ནས། །ཀུན་ཀྱང་སྔགས་སྒྲ་འུ་རུ་རུ། །འཁོར་བ་དོང་། །ནས་སྤྲུགས་པར་འགྱུར། །ཡི་གེ་དྲུག་པ་རྡོ་རྗེའི་སྒྲ། །བདག་སོགས་སེམས་ཅན་ཐམས་ཅད་ཀྱིས། །རིགས་དྲུག་སྐྱེ་སྒོ་ཆོད་ནས་ཀྱང་། །བདེ་བ་ཅན་དུ་སྐྱེ་བར་ཤོག །ཨོཾ་མ་ཎི་པདྨེ་ཧཱུྃ་ཧི༔ རང་ཉིད་ཐུགས་རྗེ་ཆེན་པོ་ཡིས། །ཐུགས་ཀར་མེ་ལོང་གཡའ་དག་སྟེང་། །འོད་ཀྱི་ཐིག་ལེ་མཐེ་བོང་ཙམ། །ཤེལ་སྒོང་དྲི་མེད་ལྟ་བུ་ལ། །སེམས་ནི་མི་འཕྲོ་རྩེ་གཅིག་ཏུ། །གཏད་པ་མཚན་བཅས་ཞི་གནས་ཡིན། དེ་ལྟར་སྒོམ་མཁན་རང་སེམས་ལ། །གཅེར་གྱི་བལྟས་པས་དངོས་པོ་མེད། །མེད་པ་མ་ཡིན་ཅི་ཡང་འཆར། །འཆར་ཡང་སེམས་ཀྱི་ཀློང་དུ་ཐིམ། །རང་ཞི་ཆུ་ཡི་པ་ཏྲ་འདྲ། །གང་ཤར་དེ་ཡི་ངོ་བོ་ལ། །མ་བཅོས་རང་བབ་ཀློད་ལ་ཞོག །མ་ཡེངས་དྲན་པའི་རྒྱང་སོ་ཚུགས། །ས་ལེ་སེང་ངེ་ཧྲིག་གེ་བ། །རྗེན་ནེ་ཡེ་རེ་འབོལ་ལེ་བཞག །ཡིད་ལ་གསལ་ཡང་བརྗོད་མི་ཤེས། །སྨྲ་བསམ་བརྗོད་མེད་ངང་ལ་ཞོག །གཉིད་ཁ་སྙིང་གར་པདྨ་ནི། །དཀར་པོ་གྱེན་དུ་
ཁ་བྱེ་བ། །དེ་ནང་ཐིག་ལེ་སྲན་མ་ཙམ། །ཤེལ་སྒོང་ལྟ་བུ་འོད་འབར་བ། །དེ་ལ་སེམས་གཏད་གཉིད་མ་ཐག །ཉམས་ལེན་ཟིན་པ་འོད་གསལ་ཡིན། །གལ་ཏེ་འོད་གསལ་མ་ཟིན་ན། །གཉིད་ཁ་མགྲིན་པར་པདྨ་ནི། །དམར་པོའི་དཀྱིལ་དུ་ཐིག་ལེ་ནི། །དཀར་ལ་དམར་བའི་མདངས་ཆགས་པ། །སྲན་མ་ཙམ་ལ་སེམས་གཏད་པས། །རྨི་ལམ་ཡུལ་དུ་ཉམས་ལེན་ཟིན། །གཉིད་དང་རྨི་ལམ་མངོན་སུམ་དུ། །ལུས་ནི་ཐུགས་རྗེ་ཆེན་པོའི་སྐུ། །སྟོང་གསལ་ནམ་མཁའི་འཇའ་ཚོན་བཞིན། །ངག་ནི་ཡི་གེ་དྲུག་པའི་སྒྲ། །རྒྱུན་ཆད་མེད་པ་ཆུ་བོའི་རྒྱུན། །སེམས་ཀྱི་དྲན་རྟོག་ཐམས་ཅད་ནི། །རང་གྲོལ་སྟོང་ཉིད་ཕྱག་རྒྱ་ཆེ། །བདག་གི་ལུས་ངག་ཡིད་གསུམ་དང་། །ཐུགས་རྗེ་ཆེན་པོའི་སྐུ་གསུང་ཐུགས། །དབྱེར་མེད་ཚེ་འདིར་འགྲུབ་གྱུར་ནས། །མ་རྒན་སེམས་ཅན་མ་ལུས་པ། །རྣམ་མཁྱེན་རྫོགས་པའི་བྱང་ཆུབ་ལ། །བདག་ཉིད་ཁོ་ནས་འགོད་པར་ཤོག །ཅེས་པ་གནས་མདོ་ནང་དུ་ཐུགས་རྗེ་ཆེན་པོ་གསང་བ་འདུས་པའི་དབང་ཁྲིད་སྦྲེལ་དུས་འབྲང་པ་ཆོས་མཛད་མས་བསྐུལ་ནས་ཨ་རཱ་གས་སོ།། ༈ །།ན་མོ་པདྨ་ཀ་ར་ཡེ། པདྨ་ལས་
འཁྲུངས་ཐུགས་རྗེ་ཅན། །པདྨའི་ཞབས་ལ་གསོལ་བ་འདེབས། །པདྨ་རིག་འཛིན་བྱིན་གྱིས་རློབས། །པདྨའི་གོ་འཕང་བསྒྲུབ་པ་ལ། །བར་ཆད་མེད་པར་ཐུགས་རྗེས་ཟུངས། །དམ་ཆོས་ཚུལ་བཞིན་བསྒྲུབ་པ་འདི། །བྱང་ཆུབ་ལམ་དུ་འགྲོ་བ་ལ། །སྤྱོད་པ་དུས་ཚོད་འབྲེལ་བ་དགོས། །གྱ་བཞི་བ་ཡི་གནས་བསྐོར་དང་། །རྩེ་གཅིག་སྒྲུབ་པ་བྱེད་པའི་ཚེ། །ཧར་ལང་བྱས་པའི་གནས་བསྐོར་དེ། །དུས་ལ་མ་བབ་ཆོས་དང་འགལ། །ལམ་དུ་མི་འགྲོ་བཞད་གད་འཕེལ། །དེ་ཕྱིར་ད་རེས་བདག་གིས་བཤོལ། །གནས་རི་ཕྱི་རོལ་མ་བསྐོར་བར། །ནང་དུ་གནས་རི་བསྐོར་ན་ལེགས། །རྡོ་རྗེ་ལུས་ཀྱི་གནས་ལུགས་ལྟོས། །སྤྱི་བོ་བདེ་ཆེན་འཁོར་ལོ་འདི། །འཇམ་དཔལ་སྐུ་ཡི་གནས་མཆོག་ཡིན། །འཇམ་དཔལ་ལྷ་ཚོགས་དངོས་སུ་བཞུགས། །ཡང་རྫོང་ཤེལ་ཕུག་གཅིག་དེ་ན་བཟང་། །མགྲིན་པ་ལོངས་སྤྱོད་འཁོར་ལོ་འདི། །པདྨ་གསུང་གི་གནས་མཆོག་ཡིན། །རྟ་མགྲིན་ལྷ་ཚོགས་དངོས་སུ་བཞུགས། །མཆིམས་ཕུ་བྲེ་གུ་གཅིག་དེ་ན་གདའ། །སྙིང་ཁ་ཆོས་ཀྱི་འཁོར་ལོ་དེ། །ཡང་དག་ཐུགས་ཀྱི་གནས་མཆོག་ཡིན། །གསང་བདག་གི་ལྷ་
ཚོགས་དངོས་སུ་བཞུགས། །ལྷོ་བྲག་ཕུག་རིང་གཅིག་དེ་ན་གདའ། །ལྟེ་བ་སྤྲུལ་པའི་འཁོར་ལོ་དེ། །བདུད་རྩི་ཡོན་ཏན་གནས་མཆོག་ཡིན། །ཆེ་མཆོག་ལྷ་ཚོགས་དངོས་སུ་བཞུགས། །ཡར་ལུང་ཤེལ་བྲག་གཅིག་དེ་ན་གདའ། །གསང་གནས་བདེ་སྤྱོད་ཀྱི་འཁོར་ལོ་དེ། །ཕྲིན་ལས་ཕུར་པའི་གནས་མཆོག་ཡིན། །རྡོ་རྗེ་གཞོན་ནུ་དངོས་སུ་བཞུགས། །སེང་གེ་རྫོང་གསུམ་གཅིག་དེ་ན་གདའ། །ཙིཏྟ་དུང་ཁང་གི་གཞལ་ཡས་གཉིས། །རྒྱལ་བ་ཞི་ཁྲོའི་གནས་མཆོག་ཡིན། །དམ་པ་རིགས་བརྒྱ་དངོས་སུ་བཞུགས། །ཟམ་བུ་དང་འབྲས་མོ་གཅིག་དེ་ན་གདའ། །མི་ཤིགས་སྙིང་གི་ཐིག་ལེ་འདི། །དུས་གསུམ་རྒྱལ་བས་བྱིན་བརླབས་གནས། །རང་སེམས་མ་ཧཱ་བྷོ་དྷི་བཞུགས། །རྡོ་རྗེའི་གདན་གཅིག་དེ་ན་གདའ། །དབུ་མ་ཨ་ཝ་དྷུ་ཏི་འདི། །དུས་གསུམ་རྒྱལ་བ་ཐམས་ཅད་ཀུན། །འདི་ལ་བསྟེན་ནས་བྱང་ཆུབ་ཐོབ། །བྱང་ཆུབ་ཀྱི་ཤིང་གཅིག་དེ་ན་གདའ། །མིག་འབྲས་ཙཱ་རི་རྩྭ་གང་གཉིས། །ཉེ་བའི་འཐུང་གཅོད་ཀྱི་གནས་ཆེན་ཡིན། །སྣང་སྟོང་གི་ལྷ་ཚོགས་དཔག་མེད་བཞུགས། །ཙཱ་རི་གཅིག་བསྐོར་ན་དེ་རུ་བསྐོར། །
གསང་བའི་ནོར་བུ་ཏི་སེའི་གངས། །ལྷ་དབང་ཕྱུག་ཆེན་པོའི་གནས་ཆེན་ཡིན། །བདེ་སྟོང་གི་ལྷ་ཚོགས་ཅིར་ཡང་བཞུགས། །དབབ་ཟློག་གིས་གངས་བསྐོར་གཅིག་དེ་རུ་མཛོད། །ལུས་རྩ་གནས་ཉི་ཤུ་རྩ་བཞི་དེ། །ཡུལ་ཉི་ཤུ་རྩ་བཞིའི་གནས་ཆེན་ཡིན། །དཔའ་བོ་ཌཱཀི་དཔག་མེད་བཞུགས། །སྤྱོད་པ་གཅིག་མཛད་ན་དེ་རུ་མཛོད། །ལྟེ་འོག་སོར་བཞི་གཏུམ་མོའི་གནས། །ཨ་ཐུང་ཕག་མོ་དངོས་སུ་བཞུགས། །ཨོ་རྒྱན་གྱི་ཡུལ་གཅིག་དེ་ན་གདའ། །བདེ་དྲོད་ཀྱི་དངོས་གྲུབ་གཅིག་དེ་རུ་ཞུས། །སྨིན་མཚམས་གྱི་རྩ་གནས་ཐིག་ལེའི་མཛོད། །ཀུན་དྷ་ཡི་ཐིག་ལེ་ཧེ་རུ་ཀ །ཤམ་བྷ་ལ་གཅིག་དེ་རུ་གདའ། །སྨིན་གྲོལ་གྱི་དངོས་གྲུབ་གཅིག་དེ་རུ་ཞུས། །རང་རྒྱུད་སྲ་མཁྲེགས་ཀྱི་རྒྱུ་བྲག་ལ། །དུས་གསུམ་རྒྱལ་བའི་ཐུགས་གཏེར་ཐོན། །གཅིག་ཤེས་ཀུན་གྲོལ་གྱི་ཤོག་སེར་རྙེད། །གཏེར་སྟོན་ཡང་གཞན་ནས་ཚོལ་དོན་མེད། །རང་སེམས་ཀུན་བྱེད་ཀྱི་སློབ་དཔོན་ལ། །རང་ཤར་རིག་པའི་རྩལ་དབང་ཐོབ། །ཆོས་ཕུང་བརྒྱད་ཁྲི་ཀུན་སེམས་ལ་སྨིན། །དབང་བསྐུར་ཡང་གཞན་ལ་ཞུ་དོན་མེད། །རང་སེམས་དང་པོའི་སངས་རྒྱས་
ལ། །འཁོར་འདས་ཀྱི་རྩ་རྒྱུད་རང་དབང་ཐོབ། །རྒྱུད་དེ་ལ་མ་འདུས་རྒྱུད་གཞན་མེད། །རྒྱུད་གཞུང་ཡང་གཞན་ལ་ཞན་དོན་མེད། །འཁོར་འདས་ཀྱི་རྩ་བ་རང་སེམས་ལ། །མ་བསྒྲུབས་སངས་རྒྱས་ཀྱི་གནད་མཚང་གོ །ཐ་མལ་རང་གི་གདམས་ངག་ཤེས། །གདམས་ངག་ཀྱང་གཞན་ནས་ཚོལ་དོན་མེད། །ཁྲིད་བརྒྱ་སྟོང་གིས་སྐྱེས་སོ་རང་སེམས་རྟོགས། །བདེ་གསལ་མི་རྟོག་གི་ཉམས་མྱོང་སྐྱེས། །གླང་རྙེད་ནས་གླང་རྗེས་ཚོལ་བ་ལྟར། །ཉམས་ཁྲིད་ཀྱང་གཞན་ནས་ཞུ་དོན་མེད། །དོན་དེ་ཕྱིར་ད་རེས་མི་འབྱོན་པར། །ཆོས་སྒྲུབ་པ་མཐའ་རུ་འདོན་པར་ཞུ། །ཁྱེད་བཤོལ་རྟགས་སད་འཐུང་གི་སྐུ་ཚབ་དང་། །དོན་ཐབས་ཤེས་མཚོན་པའི་དཔེ་ཤོག་བཅས། །ཚེས་དགེ་བའི་སྔ་དྲོ་བུ་ལ་འབུལ། །ཞེས་ཨ་རཱ་གས་སོ། །མངྒ་ལཾ།། ༈ །།ཉམས་མཚར་མགུར་གྱི་སྐོར་འགའ་ཞིག་འཕྲལ་དུ་བྲིས་པ་ཨ་མཆོད་གསེར་ལུ་ལ་སྤྲིང་བའོ། །ན་མོ་གུ་རུ་བསྒྱུར་གནས་འཁོར་འདས་མཉམ་ཉིད་ཞིང་ཁམས་ནས། །དཔལ་དང་པོའི་སངས་རྒྱས་ཀུན་ཏུ་བཟང་། །ཡུམ་ཤེས་རབ་ཕ་རོལ་ཕྱིན་མ་ལ། །བདག་གསོལ་བ་འདེབས་སོ་ཐུགས་རྗེས་
ཟུངས། །གཞི་གདོད་མའི་གནས་ལུགས་རྟོགས་ནས་ཀྱང་། །མགོན་ཁྱེད་དང་མཉམ་པར་བྱིན་གྱིས་རློབས། །གནས་འོག་མིན་དག་པའི་ཞིང་ཁམས་ལྟར། །དཔལ་རིགས་ལྔ་བཅོམ་ལྡན་རྡོ་རྗེ་འཆང་། །བཀའ་རྒྱུད་སྡེ་བཞི་ཡི་ལྷ་ཚོགས་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །ལམ་བསྐྱེད་རྫོགས་བརྟན་པ་ཐོབ་ནས་ཀྱང་། །ལྷ་ཁྱེད་དང་མཉམ་པར་བྱིན་གྱིས་རློབས། །གནས་འཛམ་གླིང་བྱེ་བ་ཕྲག་བརྒྱ་ན། །དཔལ་སྐལ་བཟང་སངས་རྒྱས་བྱེ་བ་བརྒྱ། །འཁོར་དེ་སྙེད་བྱང་སེམས་ཉན་ཐོས་ཚོགས། །བདག་གསོལ་བ་འདེབས་སོ་ཐུགས་རྗེས་ཟུང་ས། །རྒྱུ་ཚོགས་གཉིས་བྲེ་ཁ་གང་ནས་ཀྱང་། །སྐྱབས་ཁྱེད་དང་མཉམ་པར་བྱིན་གྱིས་རློབས། །གནས་རི་བོ་ཏ་ལ་བྱེ་བ་བརྒྱར། །དཔལ་སྤྱན་རས་གཟིགས་དབང་བྱེ་བ་བརྒྱ། །གྲངས་དེ་སྙེད་སྒྲོལ་མ་དཀར་སྔོན་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །བྱམས་སྙིང་རྗེའི་ཆུ་བོ་ཆེར་རྒྱས་ནས། །ལྷ་ཁྱེད་དང་མཉམ་པར་བྱིན་གྱིས་རློབས། །གནས་རི་བོ་རྩེ་ལྔ་བྱེ་བ་བརྒྱ། །དཔལ་འཇམ་དབྱངས་བྱེ་བ་ཕྲག་བརྒྱ་དང་། །གྲངས་དེ་སྙེད་རྡོ་རྗེ་འཇིགས་བྱེད་ལ། །
བདག་གསོལ་བ་འདེབས་སོ་ཐུགས་རྗེས་ཟུངས། །བཀའ་མདོ་རྒྱུད་དགོངས་པ་རྟོགས་ནས་ཀྱང་། །ལྷ་ཁྱེད་དང་མཉམ་པར་བྱིན་གྱིས་རློབས། །གནས་ལྕང་ལོ་ཅན་གནས་བྱེ་བ་བརྒྱར། །དཔལ་གསང་བདག་བྱེ་བ་ཕྲག་བརྒྱ་དང་། །གྲངས་དེ་སྙེད་མ་མགོན་ལྕམ་དྲལ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སྟོབས་ནུས་པའི་བྱིན་རླབས་ཆེར་འབར་ནས། །ལྷ་ཁྱེད་དང་མཉམ་པར་བྱིན་གྱིས་རློབས། །གནས་ཨོ་རྒྱན་བྱེ་བ་ཕྲག་བརྒྱ་ན། །ཡུམ་ཕག་མོ་བྱེ་བ་ཕྲག་བརྒྱ་དང་། །གྲངས་དེ་སྙེད་རིགས་བཞི་ཌཱཀི་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །མཆོག་ཐུན་མོང་དངོས་གྲུབ་ཐོབ་ནས་ཀྱང་། །མ་ཁྱེད་དང་མཉམ་པར་བྱིན་གྱིས་རློབས། །གནས་སྲིན་ཡུལ་བྱེ་བ་ཕྲག་བརྒྱ་ན། །དཔལ་ཨོ་རྒྱན་ཆེན་པོའི་བྱེ་བ་བརྒྱ། །གྲངས་དེ་སྙེད་རྗེ་འབངས་ཉེར་ལྔ་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །ལམ་བསྐྱེད་རྫོགས་བརྟན་པ་ཐོབ་ནས་ཀྱང་། །རྗེ་ཁྱེད་དང་མཉམ་པར་བྱིན་གྱིས་རློབས། །གནས་གླིང་བཞི་ལྷ་གནས་བྱེ་བ་བརྒྱ། །དཔལ་གནས་བརྟན་བཅུ་དྲུག་དགྲ་བཅོམ་ཚོགས། །
རྗེ་གྲུབ་ཆེན་བརྒྱད་ཅུ་རྩ་བཞི་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །ཆོས་མདོ་སྔགས་དགོངས་པ་མངོན་གྱུར་ནས། །རྗེ་ཁྱེད་དང་མཉམ་པར་བྱིན་གྱིས་རློབས། །གནས་གངས་ཅན་བོད་ཀྱི་ཞིང་ཁམས་ནས། །དཔལ་མྱེས་དབོན་རྣམ་གསུམ་ལོ་པཎ་ཚོགས། །རྗེ་བཀའ་བརྒྱུད་བླ་མ་ཐམས་ཅད་ལ། །བདག་གསོལ་བ་འདེབས་སོ་ཐུགས་རྗེས་ཟུངས། །སེམས་རང་རིག་ཆོས་སྐུའི་དོན་རྟོགས་ནས། །ཕ་ཁྱེད་དང་མཉམ་པར་བྱིན་གྱིས་རློབས། །རྗེ་སྐྱབས་གནས་དམ་པ་ཁྱེད་རྣམས་ལ། །བདག་སྒོ་གསུམ་གུས་པས་སྐྱབས་སུ་མཆི། །མ་འགྲོ་དྲུག་བདེ་ལ་འགོད་པའི་ཕྱིར། །བདག་བྱང་ཆུབ་མཆོག་ཏུ་སེམས་བསྐྱེད་དོ། །ལས་མི་དགེའི་སྡིག་སྒྲིབ་ཅི་བསགས་པ། །མགོན་ཁྱེད་ཀྱི་སྤྱན་སྔར་སོ་སོར་བཤགས། །ལུས་ལོངས་སྤྱོད་དགེ་རྩ་ཅི་བསགས་པ། །སྐྱབས་ཁྱེད་རྣམས་ཀུན་ལ་མཆོད་པ་འབུལ། །སྙིང་རུས་པའི་གཏིང་ནས་གསོལ་བ་འདེབས། །མི་བདག་ལ་དབང་བསྐུར་བྱིན་གྱིས་རློབས། །ཚེ་འདི་དང་ཕྱི་མ་བར་དོ་གསུམ། །བདག་མཐོར་བཏང་དམའ་བཏང་ཁྱེད་རྣམས་མཁྱེན། །ད་མ་གཡེལ་ཐུགས་རྗེའི་མཐུ་དཔུང་
བསྐྱེད། །དོན་དབྱེར་མེད་ཆུ་ལ་ཆུ་བཞག་བཞིན། །མི་བདག་ལ་དབྱེར་མེད་གཅིག་པར་མཛོད། །ཅེས་པ་གསོལ་བ་འདེབས་པའི་གླུ་བྱིན་རླབས་ཀྱི་ཆར་འབེབས་ཞེས་བྱ་བ་སྤྱི།། ༈ །།ན་མོ་ཤཱཀྱ་མུ་ནེ་ཡེ། ཤཱཀྱའི་ཏོག་ལ་ཕྱག་འཚལ་ལོ། །བསམ་བློ་ཅིག་ཐོངས་དང་སྐལ་ལྡན་ཀུན། །ངན་སོང་གསུམ་དུ་སྐྱེ་བའི་གྲངས། །ས་ཆེན་འདི་ཡི་རྡུལ་གྲངས་ཙམ། །མཐོ་རིས་ལྷ་མིར་སྐྱེས་པ་ནི། །སེན་མོའི་སྟེང་གི་རྡུལ་གྲངས་ཙམ། །ལུས་འཕགས་ལ་སོགས་གླིང་གསུམ་ན། །སྐྱེས་ཀྱང་ཆོས་ཀྱི་སྐལ་བ་།མེད། །འཛམ་གླིང་འདི་ན་སྐྱེས་ན་ཡང་། །མཐའ་འཁོབ་དང་ནི་ཡང་འཁོབས་སུ། །སྐྱེས་ཀྱང་ཆོས་ཀྱི་བསྐལ་པ་མེད། །ད་རེས་དལ་འབྱོར་མི་ལུས་ཐོབ། །བསྟན་དང་མཇལ་ཞིང་བླ་མ་རྙེད། །འདི་འདྲའི་བསྐལ་པ་བཟང་པོ་ནི། །བསྐལ་པ་བརྒྱར་ཡང་རྙེད་པར་དཀའ། །ད་རེས་དམ་ཆོས་བསྒྲུབ་དུས་ཡིན། །དམ་ཆོས་བྱེད་བསམ་ཡོད་ན་ཡང་། །ཚེ་ལ་ངེས་པ་མི་གདའ་བས། །དམ་ཆོས་འཕྲལ་དུ་མ་བསྒྲུབས་ན། །ལོ་ཟླ་སོང་ཞིང་འཆི་དང་ཉེ། །ཟས་གོས་གཉིས་པོ་ཟད་པར་ཚོར། །མི་ཚེ་ཟད་པ་ཚོར་མཁན་
དཀོན། །མི་བྱེད་ཁ་མེད་བྱ་བ་མང་། །དགོས་ངོ་ཤེས་པ་དམ་ཆོས་དེ། །བྱེད་བསམ་ངང་ལ་འགྲུབ་དུས་མེད། །ནད་རིགས་གདོན་རིགས་རླུང་ལྟར་འཚུབ། །ཚེ་ཚད་ཐུབ་པ་རེ་རེ་ཙམ། །ད་རུང་མི་འོང་བསམ་དུས་གཅིག །གཤིན་རྗེའི་ཕོ་ཉ་གཏུག་གིས་སླེབས། །རིམ་གྲོ་སྨན་གྱི་ནུས་པ་རྡུགས། །ཤི་བར་ཤེས་ཀྱང་བྱ་ཐབས་མེད། །ལུས་ནི་ཟུག་གཟེར་དྲག་པོས་མནར། །སེམས་ནི་འཁྲུལ་སྣང་བསྔངས་སྐྲག་ཆེ། །དམ་ཆོས་མ་འགྲུབ་འགྱོད་པ་ཆེ། །ཚེ་འདིས་བྱ་བཞག་སྐྱིད་སྡུག་ཀུན། །མདང་གསུམ་རྨི་ལམ་བཞིན་དུ་བརྗེད། །བཟུར་མེད་བར་དོའི་འཕྲང་ལ་འགྲིམ། །དགེ་སྡིག་ལུས་དང་གྲིབ་བཞིན་འཁོར། །ཉེ་དུ་ཟས་ནོར་ཤུལ་དུ་ལུས། །རེ་བ་ཆེ་ཡང་ཕན་ཐོགས་དཀའ། །དགེ་སྡིག་ལས་ཀྱི་མེ་ལོང་གསལ། །རྫུན་དང་ཞུ་མཁན་བྱེད་ས་མེད། །ཚ་གྲང་སྡུག་བསྔལ་བཟོད་གླགས་མེད། །ལན་སྟོང་ཤི་ཡང་སླར་ལ་སོས། །ལས་ངན་སྒྲིབ་པ་མ་ཟད་པར། །ཇི་ལྟར་བྱས་ཀྱང་ཐར་བར་དཀའ། །ཡི་དྭགས་བཀྲེས་སྐོམ་རང་དབང་མེད། །ཆུ་བོ་རྣམས་ཀྱང་མེ་རུ་མཐོང་། །ཆར་པ་ལྕགས་མདའ་དུག་མདར་མཐོང་། །དུད་འགྲོ་གླེན་
ལྐུགས་རང་ཤ་ཟ། །ཉེས་མེད་རིན་ཆེན་སྲོག་དང་འབྲལ། །ལྷ་དང་མི་དང་ལྷ་མ་ཡིན། །གནས་སྐབས་ཅུང་ཟད་སྐྱིད་ན་ཡང་། །དུག་དང་འདྲེས་པའི་ཁ་ཟས་བཞིན། །ཡུད་ཙམ་སྐྱིད་ཀྱང་ཕུགས་སུ་རྡུགས། །དེ་ལྟར་འགྲོ་བ་རིགས་དྲུག་ཏུ། །གཅིག་ནས་གཅིག་ཏུ་སྐོར་ར་རེ། །འཁོར་བས་འཁོར་བ་ཞེས་སུ་གྲགས། །སྐྱེ་དང་རྒ་དང་ན་དང་འཆི། །སྡུག་བསྔལ་རྒྱ་ཆེན་གྲངས་མང་ཕྱིར། །འཁོར་བ་སྡུག་བསྔལ་རྒྱ་མཚོ་ཟེར། །དེ་ལ་མཐའ་ནི་མེད་པའི་ཕྱིར། །འཁོར་བ་མཐའ་མེད་ཅེས་བྱ་ཡིན། །དེ་ལ་སྐྱོབ་པར་ནུས་པ་ནི། །དཀོན་མཆོག་གསུམ་ལས་གཞན་མེད་ཕྱིར། །ནངས་ནུབ་སྐྱབས་འགྲོ་ནན་ཏན་བྱ། །འགྲོ་དྲུག་སེམས་ཅན་ཐམས་ཅད་ཀུན། །སྐྱེ་བ་མང་པོའི་ཕ་དང་མ། །དྲིན་དང་ལྡན་པ་ཁོ་ན་ཡིན། །དེ་དག་བདེ་ལ་འགོད་པའི་ཕྱིར། །བསམ་པ་བྱང་ཆུབ་སེམས་བསྐྱེད་གཅེས། །འཁོར་བའི་སྡུག་བསྔལ་ཐམས་ཅད་ཀུན། །སྡིག་པའི་ལས་ལ་བྱུང་བ་ཡིས། །སྔར་བྱས་སྡིག་ལ་བཤགས་པ་བྱ། །འཁོར་འདས་བདེ་བ་ཐམས་ཅད་ཀུན། །དགེ་བའི་ལས་ལ་བྱུང་བའི་ཕྱིར། །ཅི་ནུས་དགེ་ལ་འབད་པར་བྱ། །
ཉམས་དང་རྟོགས་པ་ཐམས་ཅད་ཀུན། །བླ་མའི་བྱིན་རླབས་ཞུགས་ན་སྐྱེ། །དེ་ཕྱིར་གསོལ་འདེབས་རྒྱུན་དུ་བྱ། །སེམས་ཅན་སངས་རྒྱས་ཁྱད་པར་ཡང་། །རང་སེམས་དག་དང་མ་དག་ཡིན། །ཀུན་ལ་དག་སྣང་ཕྱོགས་མེད་སྦྱོངས། །ཉམས་ལེན་ཡོད་དང་མེད་པ་ཡང་། །ཡེངས་དང་མ་ཡེངས་ཁྱད་པར་ཡིན། །མ་ཡེངས་རང་སེམས་ངོ་བོ་ལྟོས། །དེ་ཚོ་གསེར་ལུའི་ཐུགས་ལ་ཞོག །ཅེས་སྨྲས་སོ། །འདི་ནི་ཁྲིད་ཀྱི་སྔོན་འགྲོའི་གླུ་ཡིད་ཀྱི་ལྕགས་འབེབས་ཞེས་བྱ་བའོ།། ༈ །།ན་མོ་མ་ཧཱ་མུ་དྲ་ཡེ། བྲམ་ཟེ་ཆེན་པོ་ས་ར་ཧ། །མི་ལས་འདས་ཀྱང་མི་གཟུགས་ཀྱིས། །འགྲོ་བ་འདྲེན་མཛད་ཐུགས་རྗེ་ཅན། །དྲིན་ཅན་བླ་མ་རྗེ་ལ་འདུད། །ཨ་མཆོད་རྒན་པོ་གསེར་ལུ་ཁྱོད། །ཕྱག་ཆེན་ཉམས་ལེན་སྐྱོང་འདོད་ན། །འདི་བསྒོམ་སྙམ་པའི་གཏད་སོ་སྤོངས། །མ་ཉན་དོགས་པའི་བསམ་ཆུང་སྐྱུར། །བསྒོམ་བཟང་སྐྱེ་འདོད་རེ་བ་ཆོད། །སྔ་རབས་གང་བྱས་རྗེས་མ་ཐུ། །ཕྱི་ནས་འདི་བྱེད་བསམ་གཞིག་སྐྱར། །ད་ལྟའི་རང་སེམས་སོ་མ་ལ། །བཅོས་བསླད་མེད་པར་གཅེར་གྱི་ལྟོས། །མཐོང་བ་མེད་ཀྱང་ས་ལེ་བ། །ཡོད་པ་མ་ཡིན་དངོས་པོ་མེད། །
མེད་པ་མ་ཡིན་རང་སེམས་གསལ། །ཧྲིག་གེ་ཡེ་རེ་རྗེན་ནེ་བ། །དེ་ཉིད་ཕྱག་རྒྱ་ཆེན་པོ་ཡིན། །ལོག་ནས་མ་ཚོལ་གསེར་ལུ་བ། །མི་གནས་ཕྱོགས་བཅུར་རྒྱུག་ན་ཡང་། །ཆུ་རླབས་ཆུ་ཡིན་ངོ་བོ་གཅིག །འཕྲོས་པས་སྐྱོན་མེད་གསེར་ལུ་བ། །རེས་འགའ་མི་གསལ་འཚུབ་ན་ཡང་། །ནམ་མཁའི་གསལ་འགྲིབ་ཅི་བཞིན་དུ། །གསལ་དང་མི་གསལ་ཁྱད་པར་མེད། །རང་ངོ་མཐོང་བ་གཅིག་པུས་ཆོག །གསལ་གསལ་ལེགས་ལེགས་མ་འདོད་པར། །གང་ཤར་སྐྱོང་མཛོད་གསེར་ལུ་བ། །རེས་འགའ་བདེ་བདེ་ལེགས་ལེགས་པོ། །རེས་འགའ་གསལ་སྟོང་རྗེན་ནེ་བ། །རེས་འགའ་སྟོང་ཉམས་ནམ་མཁའ་བཞིན། །རྟོགས་པ་མཐོ་མཐོ་འདྲ་ན་ཡང་། །ང་རྒྱལ་མ་སྐྱེ་གསེར་ལུ་བ། །རེས་འགའ་ཐེ་ཚོམ་ཡིད་གཉིས་སྐྱེ། །གེགས་དང་གོལ་སར་ལྟུང་གིས་དོགས། །དེ་དུས་བླ་མ་སྤྱི་བོར་བསྒོམ། །གསོལ་བ་རྒྱང་འབོད་ཚུལ་དུ་ཐོབ། །གེགས་སེལ་བོགས་འདོན་དེ་གས་ཆོག །ལོགས་ནས་མི་དགོས་གསེར་ལུ་བ། །རེ་ཞིག་བརྩོན་འགྲུས་ཆེ་ན་ཡང་། །རྒྱུན་དུ་སྐྱོང་བར་མ་བྱས་ན། །བསྒོམ་ལ་ལམ་ལུས་ཕོག་ཉན་ཡོད། །
བསྒོམ་ཡུན་ཤི་དང་མཉམ་པ་དགོས། །ངང་ཐུང་མ་བྱེད་གསེར་ལུ་བ། །ཡུན་དུ་སྐྱོང་བར་བྱས་གྱུར་ཀྱང་། །བོགས་དང་ཡར་སྐྱེད་མེད་འདྲ་ཡང་། །བྱིས་སྦ་བསམ་མནོས་ཟིན་པ་བཞིན། །སྙེམས་མེད་བོགས་སྐྱེད་ཤུགས་ལ་འབྱུང་། །འདོད་ཐག་མ་ཉེ་གསེར་ལུ་བ། །སྔོན་གྱི་གྲུབ་ཆེན་ཕལ་ཆེར་ཡང་། །ལོ་གྲངས་བཅུ་གཉིས་བསྒོམས་པས་གྲོལ། །དེ་ལ་སོམས་མཛོད་གསེར་ལུ་བ། །འཕྲལ་དུ་གང་དྲན་དབྱངས་ཆུང་འདི། །དེ་རིང་ཉམས་ལ་ཤར་བས་སྨྲས། །གསེར་ལུའི་ཐུགས་ལ་དེ་ལྟར་ཞོག །ཅེས་པ་ཉམས་ལེན་སྐྱོང་ཚུལ་གྱི་གླུ་ཁྲིད་ཕྲུག་དགའ་བའི་པི་ཝང་ཞེས་བྱ་བ་མངྒ་ལཾ།། ༈ །།ཀ་ཡེ་གསོན་དང་གསེར་ལུ་བ། །ཁ་ཐོན་བཟླས་བརྗོད་གསུང་རབ་ཐོན། །ག་ལེ་ལོང་མེད་འཆི་བདག་འོང་། །ང་ཁྱོད་རྩོད་པའི་ཞེ་སྡང་དང་། །ཅ་ལེ་ཅོ་ལེའི་འཆལ་གཏམ་དང་། །ཆ་བོ་ཆོབ་བེའི་སྤྱོད་པ་སྤོངས། །ཇ་ཆང་ཕུད་ཀྱིས་དཀོན་མཆོག་མཆོད། །ཉ་སྟོང་བརྒྱད་སོགས་བསྙེན་གནས་བསྲུང་། །ཏ་ཐཱ་ག་ཏའི་གསུང་རབ་ཐོན། །ཐ་མལ་ཁྱི་སྤྲང་ཡན་ཆད་ལ། །ད་ནས་ཚོགས་གསོག་གང་འགྲུབ་མཛོད། །ན་རྒས་འཆི་དུས་འགྱོད་མེད་གྱིས། །པ་ར་ག་
ཏེའི་ཤེར་སྙིང་དང་། །ཕ་རོལ་ཕྱིན་པའི་གླེགས་བམ་ཀློག །བ་སོགས་སྒོ་ནོར་བཤས་མ་བྱེད། །མ་གྱུར་འགྲོ་ལ་སྙིང་རྗེ་བསྒོམ། །ཙ་ཐོར་ཡན་གྱི་ཡིག་དྲུག་བསྐུལ། །ཚ་སོགས་ཚོང་ལ་གཡོ་སྒྱུ་སྤོངས། །ཛ་རེ་ཛོ་རེའི་འགྲོ་འདུག་དུས། །ཝ་ལེ་ཡེ་རེ་སེམས་ལ་ལྟོས། །ཞྭ་ལྟར་བླ་མ་སྤྱི་བོར་བསྒོམ། །ཟ་འཐུང་ཚོགས་ཀྱི་འཁོར་ལོར་བསྒོམ། །འ་རེ་འུ་རེའི་རྣམ་གཡེང་དུས། །ཡ་ང་མེད་པར་ཡི་དམ་བསྒོམ། །ར་ལུག་ཚེ་ཐར་གང་མང་ཐོངས། །ལ་ཆེན་བློ་ཕུགས་ཆོས་ལ་གཏོད། །ཤ་ཡང་ཉིན་ཤ་བསྔོས་ཤ་སྤོངས། །ས་ཆ་གང་འདུག་དགེ་སྦྱོར་འབུངས། །ཧ་ཁོག་གོ་ན་ཆོས་ལ་སླ། །ཨ་ཀྱང་ང་ནི་ཀུ་རེ་མིན། ཀ་ཚར་གྱི་མཚར་གླུ་ཞེས་བྱ་བ་མངྒ་ལཾ།། ༈ །།ན་མོ་ལོ་ཀེ་ཤྭ་ར་ཡེ། གསོན་དང་མཆོད་རྒན་གསེར་ལུ་བ། །རྒྱུད་སྡེའི་ལྷ་ཚོགས་གྲངས་མང་ཡང་། །ཐུགས་རྗེ་ཆེན་པོ་སྤྱན་རས་གཟིགས། །ཁ་བ་ཅན་གྱི་ལྷ་སྐལ་ཡིན། །ལྟ་ཁོང་ལས་ཐུགས་རྗེ་ཆེ་བ་མེད། །ཁྱད་པར་དུས་ངན་སྙིགས་མ་ལ། །སྤྱན་རས་གཟིགས་དབང་བྱིན་རླབས་མྱུར། །གཟུངས་སྔགས་རིག་སྔགས་གྲངས་མང་ཡང་། །རིག་
སྔགས་རྒྱལ་པོ་ཡི་གེ་དྲུག །གངས་ཅན་ཁྲོད་པའི་ཆོས་སྐལ་ཡིན། །ཁྱད་པར་མདོ་ཁམས་ཕོ་མོ་ལ། །ཡི་གེ་དྲུག་པའི་བཀའ་བབས་ཡོད། །བྱང་ཆུབ་སེམས་དཔའ་ས་དྲུག་པའི། །བསོད་ནམས་དགེ་རྩ་གང་ཡོད་པས། །ཡིག་དྲུག་ལན་གཅིག་བསོད་ནམས་ཆེ། །བསྐྱེད་རིམ་སྒོམ་ལུགས་མང་ན་ཡང་། །སྐད་ཅིག་དྲན་རྫོགས་སྒོམ་པ་འདི། །དབང་པོ་རབ་ཀྱི་བསྐྱེད་རིམ་ཡིན། །མཁའ་ལ་འཇའ་ཚོན་ཤར་བ་བཞིན། །རང་ཉིད་ཐུགས་རྗེ་ཆེན་པོར་བསྒོམ། །ཐུགས་ཀར་པད་དཀར་འདབ་མ་དྲུག །དབུས་སུ་ཧཱུྃཡིག་དཀར་པོ་སྟེ། །འདབ་དྲུག་ཡི་གེ་དྲུག་པོ་བཀོད། །དེ་ལས་འོད་ཟེར་ཕྱོགས་བཅུར་འཕྲོས། །ཕྱོགས་བཅུའི་རྒྱལ་བ་སྲས་བཅས་མཆོད། །ཐམས་ཅད་ཐུགས་རྗེ་ཆེན་པོར་གྱུར། །ཁ་བ་བུ་ཡུག་འཚུབ་བཞིན་བྱོན། །རང་ལ་སིབ་སིབ་ཐིམ་པར་བསྒོམ། །སྤྱན་འདྲེན་དབང་བསྐུར་གཉིས་ཀ་ཡིན། །ཡང་གཅིག་འོད་ཟེར་ཕྱོགས་བཅུར་འཕྲོས། །འགྲོ་དྲུག་སེམས་ཅན་ཀུན་ལ་ཕོག །སྡིག་སྒྲིབ་ཉེས་ལྟུང་ཐམས་ཅད་དག །ཐམས་ཅད་ཐུགས་རྗེ་ཆེན་པོར་གྱུར། །ཀུན་ཀྱང་ཡི་གེ་དྲུག་པ་འདོན། །སྐད་ཅིག་དུང་ཕྱུར་མང་པོ་འགྲོ། །
དེ་ལྟར་སྒོམ་མཁན་རང་གི་སེམས། །སེམས་ནི་སྐྱེ་མེད་ཆོས་ཀྱི་སྐུ། །བསྒོམ་དུས་ཉིད་ནས་སྟོང་པའི་ངང་། །སྟོང་པའི་ངང་ནས་གསལ་བར་སྣང་། །དེ་ལ་བསྐྱེད་རྫོགས་ཟུང་འཇུག་ཟེར། །བདེ་བ་ཅན་དུ་སྐྱེ་བའི་ཐབས། །ཡིག་དྲུག་སྒོམ་བཟླས་མཆོག་ཏུ་ཟབ། །བདེ་ཆེན་ཞིང་དུ་སྨོན་ལམ་ཐོབ། །སྤྲང་པོ་ང་ཡི་སྙིང་གཏམ་ཡིན། །ངས་ཀྱང་དེ་ལྟར་ཉམས་སུ་བླངས། །ཁྱེད་ཀྱང་དེ་ལྟར་ཉམས་སུ་ལོངས། །འདི་ལས་ཟབ་པ་ཡོད་རེ་ཤི །ཞེས་པ་ཐུགས་རྗེ་ཆེན་པོའི་སྒོམ་བཟླས་ཀྱི་གླུ་གངས་ཅན་བོད་ཀྱི་སྤྱི་ནོར་ཞེས་བྱ་བ་མངྒ་ལོ།། ༈ །།ན་མོ་གུ་རུ། དྲིན་ཆེན་རྗེ་ལ། །གསོལ་བ་འདེབས་སོ། །ཨ་མཆོད་གསེར་ལུ། །ང་ལ་གསོན་དང་། །སྙིང་གཏམ་བཤད་དོ། །ཚེ་འདི་མི་རྟག །དགུན་ཉི་ཙམ་ཡིན། །ངན་སོང་སྡུག་བསྔལ། །བཟོད་གླགས་མེད་དོ། །ལས་འབྲས་བསླུ་མེད། །རང་ལ་སྨིན་ནོ། །སྡིག་པ་ཆུང་ཡང་། །བཙན་དུག་ཟོས་ལྟར། །གནོད་པ་ཆེའོ། །དགེ་བ་ཆུང་ཡང་། །རྩི་དང་སྨན་བཞིན། །ཕན་སྟོབས་ཆེའོ། །ཉ་མཚམས་བརྒྱད་གསུམ། །བསྙེན་གནས་བསྲུང་དང་། །མི་ལུས་ཐོབ་
བོ། །ཡི་གེ་དྲུག་པ། །རྒྱུན་དུ་ཐོན་དང་། །སྡིག་སྒྲིབ་འདག་གོ །བླ་མ་རྗེ་ལ། །གསོལ་བ་ཐོབ་དང་། །ཉམས་རྟོགས་སྐྱེའོ། །རང་སེམས་ངོ་བོ། །རྒྱུན་དུ་སྐྱོང་དང་། །ཕྱག་རྒྱ་ཆེན་པོ། །དེ་རང་ཡིན་ནོ། །བསམ་པ་བཟང་པོས། །སྨོན་ལམ་ཐོབ་དང་། །གང་འདོད་འགྲུབ་བོ། །བདེ་ཆེན་ཞིང་དུ། །སྨོན་ལམ་ཐོབ་དང་། །སྐྱེ་བར་སླའོ། །ད་ནི་ཚེ་ཡང་། །སུམ་གཉིས་སོང་བས། །ཚེ་གཞུག་འདི་ལ། །དགེ་སྦྱོར་འབུངས་ཤིག །ཚེ་འདིའི་བྱ་བ། །གལ་ཆེན་ཐམས་ཅད། །གཞོན་པ་རྣམས་ལ། །དབང་རིས་གཏད་ནས། །མལ་ས་ཟུངས་ཤིག །ཡི་གེ་དགོས་ཞེས། །ཁ་སེང་ཟེར་ཡང་། །ང་ཡང་མ་ཁོམ། །ད་རེས་སྦོ་ཟླའི། །ཡར་ཚེས་བཞི་ལྔའི། །ཐུན་མཚམས་རྣམས་ལ། །རཱ་གའི་མིང་ཅན། །དགེ་སློང་དེ་ཡིས། །མཚམས་ཀྱི་ཁུང་ནས། །སྤྲིང་བའི་ཡི་གེ །མཆོད་རྒན་ཐུགས་ལ། །བཞག་པར་ཞུ་དང་། །མངྒ་ལཾ།། ན་མོ་གུ་རུ་པྲ་ཝ་ཀ་ར་ཡེ། གླེ་མདའ་དགོན་པའི་བན་རྒན་གྱིས། །ཉིན་ལམ་གཅིག་ཏུ་ཁོ་བོ་བསྐྱལ། །སྐྱེལ་དང་ངོ་སྤྲོད་ཚིག་གསུམ་
བཞག །བླ་མ་ཨོ་རྒྱན་དབྱེར་མེད་དེ། །མི་འབྲལ་སྤྱི་བོའི་གཙུག་ཏུ་བསྒོམ། །ཅི་མཛད་ཁྱེད་ཤེས་བློ་སྙིང་གཏོད། །གསོལ་བ་མཆི་མ་འཁྲུག་པར་ཐོབ། །དེ་ནས་རང་ལ་དབྱེར་མེད་བསྟིམ། །མ་བཅོས་རང་སེམས་ངོ་བོ་ལྟོས། །བལྟས་པས་མི་མཐོང་ངང་ལ་ཞོག །རང་སེམས་གདོད་ནས་ཆོས་ཀྱི་སྐུ། །མ་བཅོས་བཞག་པས་ཕྱག་རྒྱ་ཆེ། །བཅོས་ཤིང་བསྒོམས་པས་འཁྲུལ་པའི་བློ། །བཅོས་དང་མ་བཅོས་འབྱེད་མཁན་དཀོན། །ཡག་ཏུ་འདོད་ནས་བཅོས་པ་ཡིན། །ཉེས་སུ་འདོད་ནས་བཅོས་པ་ཡིན། །ཀྲིམ་མེ་བསྒྲིམས་ན་བཅོས་པ་ཡིན། །དྲན་རྫི་བསྲུང་རྒྱུ་མེད་པ་དེ། །ཐ་མལ་འཁྲུལ་པ་ཁ་འབྱམས་ཡིན། །གནས་དགའ་འགྱུ་སྡུག་བཅོས་པ་ཡིན། །བདེ་གསལ་མི་རྟོག་ཉམས་བཟང་ལ། །ཆགས་ཞེན་མཆོག་འཛིན་བཅོས་པ་ཡིན། །མ་བཅོས་པ་དེ་གང་ཞེ་ན། །དྲན་རྫི་མ་བརྗེད་མ་ཡེངས་ཙམ། །དེ་མིན་སྒོམ་རྒྱུ་སྤུ་ཙམ་མེད། །ལྷོད་དེ་ཀློད་སྐུ་ལ་ཕྱམ་མེར་ཞོག །བཟང་ངན་སྤང་བླང་མེད་པར་ཞོག །དེ་ལྟར་མ་བཅོས་བཞག་ཤེས་ན། །རྟོགས་པ་སྐད་ཅིག་ཉིད་ལ་འཆར། །ཕྱི་ནང་བདག་གཞན་གཅིག་ཏུ་འདྲེས། །
སྨྲ་བསམ་བརྗོད་དུ་མེད་པ་ལ། །འདི་ཡིན་འདི་མིན་ཅི་ཡང་མེད། །འཁོར་འདས་སྣོད་བཅུད་ཐམས་ཅད་ཀུན། །རང་གི་སེམས་དང་དབྱེར་མེད་འདྲེས། །ཡེངས་དང་མ་ཡེངས་འཁྲུལ་མ་འཁྲུལ། །ཁྱད་མེད་ངོ་བོའི་ཀློང་དུ་འདྲེས། །ཕྱི་རོལ་སྣང་བ་སྣ་ཚོགས་འདི། །ཆུ་ཟླ་འཇའ་ཚོན་ལྟ་བུ་མཐོང་། །མ་རྟོགས་འགྲོ་ལ་སྙིང་རྗེ་སྐྱེད། །དེ་ལ་བསྒོམ་ཆེན་མིང་བཏགས་ཙམ། །ཙཀྱུས་སུརྱའི་ཟེར་ལ་ལྟ། །འཇའ་འོད་ཐིག་ལེ་ཐིག་ཕྲན་དང་། །ལུ་གུ་རྒྱུད་སོགས་ཅི་ཡང་འཆར། །ལས་དག་ཡུན་རིང་མ་བལྟས་ཀྱང་། །སངས་རྒྱས་བྱང་སེམས་ལྷ་ཀླུ་མཐོང་། །བར་དོ་ཆོད་པར་ཐེ་ཚོམ་མེད། །དེ་སྐད་རཱ་ག་ཨ་སྱས་སྨྲས། །ཤུ་བྷཾ།། ༈ །།ན་མོ་གུ་རུ། བུ་ཆུང་ནས་བསྐྱངས་བའི་ཀརྨ་སྐྱབས། །ཁྱོས་ཁར་ཉིན་གསོལ་འདེབས་དགོས་ཟེར་བ། །དུས་དེ་རིང་ཉམས་ལ་ཤར་ནས་སྨྲས། །ཕ་དྲིན་ཆེན་སྤྲུལ་པའི་སྐུ་མཆོག་ལ། །མི་ངས་ཀྱང་གསོལ་བ་སྙིང་ནས་བཏབ། །བུ་ཁྱོད་ཀྱང་གསོལ་བ་སྙིང་ནས་ཐོབ། །ཉམས་རྟོགས་པ་འཆར་བར་ཐེ་ཚོམ་མེད། །སྔོན་སློབ་དཔོན་འཕགས་པ་ཀླུ་སྒྲུབ་དེས། །ཕྱུགས་མ་ཧེ་འཚོ་བའི་རྫི་བོ་
ལ། །སྒོམ་ཇི་ལྟར་བཏབ་ཀྱང་སྐྱེ་མ་ཐུབ། །ད་ཁྱོད་རང་མ་ཧེ་གཅིག་བསྒོམ་གསུངས། །དེ་བསྒོམས་པས་མགོ་ལ་རྭ་ཅོ་སྐྱེས། །ད་མ་ཧེ་ཐུགས་རྗེ་ཆེན་པོར་བསྒོམ། །དེ་གསུངས་ནས་བསྒོམས་པས་དངོས་སུ་འགྲུབ། །ལྷ་ཐུགས་རྗེ་ཆེན་པོ་དངོས་སུ་མཇལ། །གསུང་ཡི་གེ་དྲུག་མ་རང་བྱོན་གནང་། །མཆོག་ཐུན་མོང་གཉིས་ཀྱི་དངོས་གྲུབ་ཐོབ། །དཔལ་གྲུབ་ཆེན་ཀླུ་ཡི་དབང་ཕྱུག་ཡིན། །དཔེ་དེ་བཞིན་བན་ཆུང་ཀརྨ་སྐྱབས། །ཁྱོད་ཆུང་ངུའི་དུས་ནས་རྟ་མཚོ་གོམས། །དཔེ་དེ་ལ་ལེན་པའི་ཆོས་ཤིག་བཤད། །ས་མི་མེད་ལུང་པའི་ནགས་གསེབ་ན། །མི་ངན་པ་ཟས་འདོད་རྐུན་འཁྱམས་དེས། །ཆིབས་པའི་རྟ་ཕོ་འཁྱེར་ཉན་གདའ། །བུ་མ་ཡེངས་རྐུན་དོགས་བྱ་ར་ལྟོས། །ལུས་ལང་ཚོ་རྒྱས་པའི་ནགས་ཁྲོད་ན། །བར་ཆད་བདུད་མོ་རྐུན་འཁྱམས་དེས། །ཆོས་ཚུལ་ཁྲིམས་རྟ་ཕོ་འཁྱེར་ཉན་གདའ། །བུ་ངོ་ཚ་ཁྲེལ་ཡོད་ཀྱི་བྱ་ར་ལྟོས། །ལྕེ་རོ་ལ་ཆགས་པའི་ནགས་ཁྲོད་ན། །ཆང་ཀུན་དགའ་སྨྱོ་འགོའི་རྐུན་འཁྱམས་དེས། །དྲན་ཤེས་བཞིན་གྱི་རྟ་ཕོ་འཁྱེར་ཉན་གདའ། །བུ་དམ་བཅའ་ཞེ་བཅད་ཀྱི་བྱ་ར་ལྟོས། །ཁྱོད་མ་
ཡེངས་རྩད་མོའི་རྐུན་འཁྱམས་དེས། །འཛིན་ཟིན་ཐུན་གྱི་རྟ་ཕོ་འཁྱེར་ཉན་གདའ། །བུ་མ་ཡེངས་བརྩོན་འགྲུས་ཀྱི་བྱ་ར་ལྟོས། །གྲོགས་རྡོ་རྗེ་སྤུན་གྱི་ནགས་ཁྲོད་ན། །ཚིག་ངན་པ་གཤིས་གྱོང་གིས་རྐུན་འཁྱམས་དེས། །ཆོས་དག་སྣང་གི་རྟ་ཕོ་འཁྱེར་ཉན་གདའ། །བུ་བཟོད་པ་དག་སྣང་གི་བྱ་ར་ལྟོས། །ལུས་ཐོབ་དཀའ་འཇིག་སླའི་ནགས་ཁྲོད་ན། །དུས་ངེས་མེད་འཆི་བདག་གི་རྐུན་འཁྱམས་དེས། །ལུས་ཚེ་སྲོག་གི་རྟ་ཕོ་འཁྱེར་ཉན་གདའ། །བུ་ནམ་འཆི་ངེས་མེད་ཀྱི་བྱ་ར་ལྟོས། །སེམས་གནས་འགྱུ་རིག་གསུམ་གྱི་ནགས་ཁྲོད་ན། །སེམས་དྲན་རྫི་བྲལ་བའི་རྐུན་འཁྱམས་དེས། །བསྒོམ་ཉམས་ལེན་གྱི་རྟ་ཕོ་འཁྱེར་ཉན་གདའ། །བུ་མ་ཡེངས་སེམས་ལ་བྱ་ར་ལྟོས། །སེམས་ཞི་གནས་འཐོམ་པོའི་ནགས་ཁྲོད་ན། །སེམས་བྱིང་རྨུག་འཐིབ་གསུམ་གྱི་རྐུན་འཁྱམས་དེས། །བསྒོམ་ལྷག་མཐོང་གི་རྟ་ཕོ་འཁྱེར་ཉན་གདའ། །བུ་མ་ཡེངས་སེམས་ལ་ཧྲིག་གེ་ལྟོས། །སེམས་འཕྲོ་རྒོད་འཚུབ་པའི་ནགས་ཁྲོད་ན། །སེམས་དུག་ལྔ་འཁྲུག་པའི་རྐུན་འཁྱམས་དེས། །བསྒོམ་ཞི་གནས་ཀྱི་རྟ་ཕོ་འཁྱེར་ཉན་གདའ། །བུ་མ་ཡེངས་ལྷོད་དེ་ཤིགས་སེ་ཞོག །
ཁ་ཆོས་བཤད་མང་པོའི་ནགས་ཁྲོད་ན། །ཆོས་ཁ་ཞེ་འཛོལ་བའི་རྐུན་འཁྱམས་དེས། །དོན་ཉམས་ལེན་གྱི་རྟ་ཕོ་འཁྱེར་ཉན་གདའ། །བུ་ཁ་ཞེ་མེད་པར་གསོལ་བ་ཐོབ། །ཅེས་ཀརྨ་སྐྱབས་གྱིས་བསྐུལ་བ་དོན་ཡོད་པར་བྱ་བའི་ཕྱིར་ཡུད་ཙམ་ཞིག་ལ། ༧ ཨ་རཱ་གས་བྲིས་པའོ། །མངྒ་ལཾ། བྷ་ཝནྟུ།། ༈ །།སྤྲང་ཕྲུག་བདག་མེད་གཅིག་གི་ལོ་རྒྱུས་ཡོད་ཧེ་ཧེ། ན་མོ་ལོ་ཀེ་ཤྭ་ར་ཡེ། བཙུན་པ་རཱ་ག་ཨ་སྱ་བདག །ཐུགས་རྗེ་ཆེན་པོར་གསོལ་བཏབ་ནས། །རྩེ་གཅིག་བསྒྲུབ་པའི་དམ་བཅའ་ཡིས། །ལོ་ཡང་བཅུ་གཅིག་སོང་བའི་དུས། །སྤྲང་མོ་གཅིག་གིས་བུ་ཁྱེར་ནས། །བུ་འདི་ཆུང་ངུའི་དུས་ཤིག་ལ། །ང་ནི་གསང་ཕུ་བླ་མ་ཡིན། །གསུང་པས་སྐུ་སྐྱེ་ཡིན་ནམ་བསམ། །གནས་མདོ་བླ་མར་བརྟག་པ་ཞིག །ཞུ་ཕྱིར་འོང་བ་ཡིན་ནོ་སྐད། །ཅི་ཡིན་བརྟགས་པ་བྱས་པའི་ནུབ། །རྨི་ལམ་འཁྲུལ་པའི་སྣང་བ་ལ། །ས་སྐྱའི་བླ་མ་ས་ཞུ་ཅན། །གཅིག་ནི་ང་ལ་མཇལ་ཙམ་བྱས། །དེ་ནས་ག་ཤེད་བྱོན་སོང་རྨིས། །ས་སྐྱ་པ་གཅིག་ཡིན་ནམས་སེམས། །ཇ་འདེབས་མར་སེན་ལ་དུམ་བྱིན། །བཟང་ངན་ཅི་ཡང་མ་སྨྲས་ཀྱང་། །གནས་མདོ་བླ་མས་
གསང་ཕུ་པའི། །སྐུ་སྐྱེ་ཡིན་ཞེས་ཟེར་རོ་ཞེས། །མ་དེས་ཀུན་ལ་བསྒྲགས་བྱས་ཤིང་། །ཡུལ་འབྲོག་ཀུན་དུ་སྤྲང་འཁྱམས་བྱས། །ཁྱད་པར་ང་ཡི་ཉེ་སྐོར་དེར། །འཁོར་ཞིང་ཤུཕུད་ཀྱང་འགྲོ་མ་ཉན། །བདག་རྐྱེན་ཅུང་ཟད་བྱ་འདོད་ཀྱང་། །གྲྭ་པ་རྣམས་ཀྱིས་བྱེད་མ་བཅུག །ང་ཡིས་ཐོས་པར་བུ་དེ་ནི། །མ་དེས་བརྡུང་ཞིང་ངུ་འབོད་ཆེ། །ཞག་མང་བར་དུ་དེ་ལྟར་བྱས། །སྙིང་རྗེ་སྐྱེས་ཀྱང་ཐབས་མ་བྱུང་། །དེ་ཚེ་འཁྲུལ་པའི་རྨི་ལམ་ན། །ས་སྐྱའི་བླ་མ་ས་ཞུ་ཅན། །གཅིག་ནི་རང་གི་གྲྭ་པ་ཡི། །གྲལ་མཇུག་དེ་རུ་བྱོན་བྱུང་།ཛ། །གྲྭ་པ་རྣམས་ཀྱིས་བཞུགས་མ་བཅུག །བླ་མ་དེ་ཡི་མཆེད་ཡ་ནི། །མི་གཞོན་དར་མ་གཅིག་ཁྲོས་ནས། །ང་ཡི་སྤུན་ཡ་བླ་མ་འདི། །བདག་པོ་ཨེ་བྱེད་རེ་ནས་འོང་། །གྲུ་པ་འདི་ཚོས་བྱེད་མ་བཅུག །གྲྭ་པ་ཚོ་ལ་ལྟོས་ཉོན་ཞེས། །སྡིག་གཏམ་མང་དུ་བྱེད་པ་རྨིས། །བླ་མ་དེ་ཡི་ཆོས་སྐྱོང་དེ། །མ་དགའ་བ་ཡི་རྟགས་སུ་གོ །གྲྭ་པ་ཐམས་ཅད་རིམས་སྙོག་ན། །གཅིག་ནི་ཡུན་རིང་ན་ནས་ཤི། །འདི་ལ་བདག་པོ་མ་བྱས་ན། །ཆོས་སྐྱོང་མི་དགའ་གྲྭ་པ་ཚོ། །ཞེན་པར་འདུག་ཅེས་རྙེད་པར་སྨྲས། །བ་དང་ར་དང་ནས་
འབྲུ་སོགས། །བྱིན་ཅིང་བདག་པོ་ཅུང་ཟད་བྱས། །དེ་ནས་བུ་འདི་བཟང་ངན་དང་། །བླ་མ་སུ་ཡིན་བརྟག་པ་ནི། །ཐུགས་རྗེ་ཆེན་པོའི་སྒོ་ནས་བྱས། །ཡི་དམ་ཐུགས་རྗེ་ཆེན་པོ་ལ། །རྩེ་གཅིག་གསོལ་བ་བཏབ་པའི་ནུབ། །ཉམས་དང་རྨི་ལམ་འདྲེས་པའི་སྐབས། །ལུང་བསྟན་ཚིགས་བཅད་འདི་གསུངས་ཏེ། །སྐུ་ནི་གསལ་པོར་མ་མཐོང་ཡང་། །གསུང་མཁན་ཐུགས་རྗེ་ཆེན་པོར་རློམ། །བླ་མ་ཤིན་ཏུ་བཟང་པོ་གཅིག་ཡིན་ཀྱང་། །ཐུགས་ཀྱི་དགོངས་པ་རྫོགས་པར་མ་གྱུར་ནས། །འགྲོ་བའི་དོན་དུ་སྤྲུལ་སྐུ་བྱོན་པ་ཡིན། །སྐྱེས་མ་ཐག་ཏུ་ད་རེས་སྐྱེ་བ་འདིར། །ཇོ་བོ་མཇལ་ཏུ་ཡོད་སྙམ་ཤིན་ཏུ་དགའ། །ཅེས་གསུངས་སོ། །དེ་ལྟར་ལུང་བསྟན་གསལ་བར་བྱུང་ན་ཡང་། །བླ་མ་སུ་ཡིན་གསལ་ཁ་མ་བྱུང་བའི། །དེ་དུས་སྤྲུལ་སྐུ་མི་འགྱུར་རྡོ་རྗེ་ལ། །གནམ་ཆོས་ཐུགས་གཏེར་འོང་བའི་སྐབས་ཡིན་པས། །གང་ཡིན་ཨོ་རྒྱན་ཉིད་ལ་ཞུ་ཆོག་པས། །ལ་སྤྲུལ་སྐུ་ཨོ་རྒྱན་ལ་ནི་ཞུ་བཅུག་པས། ། ན་མོ་ཤཱཀྱ་མུ་ན་ཡེ། གསང་ཕུ་ཆོས་རྗེ་ཡིན་ན་ཡང་། །བར་དུ་བར་ཆད་ཅུང་ཟད་བྱུང་། །དེ་ནས་འགྲོ་དོན་ཅུང་
མ་བྱུང་། །ཇོ་བོ་མཇལ་དང་འགྲོ་དོན་ལ། །སེམས་ཐོག་དེ་ཕྱིར་སྐྱེ་བ་བླངས། །སེམས་ལ་འགྲོ་དོན་བྱེད་སྙམ་ཡོད། །བདག་རྐྱེན་བྱས་ཀྱང་འགལ་བ་མེད། །མ་བྱས་ན་ནི་ནག་ལ་ཐུག །ཐུགས་ནས་ལོ་བདུན་ལོན་ཙ་ན། །འདི་འདྲ་ལ་སྙམ་འགྱོད་པ་ཅན། །དེ་འདྲ་གཅིག་ལས་འབྱུང་སྒོ་མེད། ས་མ་ཡ༔ རྒྱ་རྒྱ་རྒྱ༔ ཁ་ཐཾ་གུ་ཧྱ༔ ཤམཉ༔ ཅེས་པ་འདི་ཨོ་རྒྱན་རིན་པོ་ཆེ་ཐུབ་པའི་སྐུར་སྤྲུལ་ནས་དངོས་སུ་གསུངས་སོ།། ༈ །།ན་མོ་གུ་རུ་ལོ་ཀེ་ཤྭ་ར་ཡེ། བདག་སོ་སྐྱེ་མངོན་ཤེས་མི་ལྡན་ཅིང་། །རང་སུ་ཡིན་གར་སྐྱེ་མི་ཤེས་ཀྱང་། །སྤྲང་རབ་རིབ་འཁྲུལ་པའི་རྨི་ལམ་ན། །ཚེ་སྔ་ཕྱི་ཅུང་ཟད་དྲན་སྙམ་བྱེད། །བུ་ཉེ་གནས་ཀུན་དགའ་ལ་གདམས་པ་ཡོད། ༈ ན་མོ་གུ་རུ་མཉྫགྷོ་ཥ་ཡེ། གསུང་གི་རྡོ་རྗེ་འོད་དཔག་མེད། །འཇམ་དཔལ་དམར་པོའི་སྤྲུལ་པའི་སྐུ། །བྱང་ཕྱོགས་རྒྱུད་ཀྱི་པཎྜི་ཏ། །འཇམ་དབྱངས་བླ་མ་ཆོས་ཀྱི་ཞིང་། །སྣང་བ་ཅན་ཞེས་བྱ་བ་རུ། །ཡི་དམ་ལྷ་ཡི་མཚན་གསོལ་ཞིང་། །འཇམ་དབྱངས་གསར་དུ་བཞད་པ་ཞེས། །ཉིད་ཀྱི་ཉིད་ལ་མཚན་བཏགས་པ། །ཆོས་ཀྱི་དབང་
ཕྱུག་ཞབས་ལ་འདུད། །སྔོན་ཚེ་བསྐལ་པ་ཡར་དར་དང་། །མི་རྣམས་ཚེ་ལོ་བརྒྱད་ཁྲི་ཐུབ། །སུམ་བརྒྱ་ལོན་དུས་བསམ་བློས་འཕྲོད། །ལྔ་བརྒྱ་ལོན་དུས་བག་མ་ལེན། །དེ་ནས་ཚེ་ལོ་མར་འགྲིབ་སྟེ། །དེང་སངས་ཚེ་ལོ་བཞི་བཅུའི་དུས། །དེ་ཡང་སུམ་ཅུར་ཉེ་བ་སྟེ། །ལོ་ནི་བཅུ་གཉིས་བཅུ་གསུམ་ནས། །བསམ་ལུས་འཕྲོད་ཅིང་བག་མ་འགྲོ། །འབྲས་མོ་ལྗོངས་ཀྱི་གནས་སྒོ་བྱེ། །མ་འོངས་ཚེ་ལོ་བཅུ་པའི་དུས། །ལོ་གསུམ་ལོན་ནས་བསམ་ལུས་འཕྲོད། །བཞིའམ་ལྔ་ནས་བག་མ་ལེན། །དེ་འདྲ་འའོང་བར་གསུངས་གདའ་བས། །ཁྱོད་ཀྱང་ལོ་གྲངས་བཅུ་གསུམ་ཉེ། །དེ་ནས་བསམ་ལུས་འཕྲོད་རེ་རན། །བྱིས་སྦ་ཡིན་བསམ་མ་བྱེད་པར། །མི་གཞོན་ཡིན་བསམ་ཡིད་ལ་ཟུངས། །སྐྱོ་མདའི་གསང་ཕུ་བླ་མ་ཡི། །སྐུ་སྐྱེ་ཁྱོད་ཡིན་ངས་མ་སྨྲས། །འོན་ཀྱང་གསང་ཕུ་སྐུ་སྐྱེ་ཞེས། །མ་ཡིས་སྨྲས་ནས་ཀུན་ལ་གྲགས། །དབུས་ན་བོད་ཀྱི་རྡོ་རྗེ་ཨུ་གདན། །གསང་ཕུ་ནེའུ་ཐོག་ཅེས་བྱ་བར། །སྔོན་ཚེ་ཇོ་བོ་ཨ་ཏི་ཤས། །ཕ་ཀི་ལུང་པ་འདི་ཡི་ཕུར། །འཇམ་དབྱངས་དང་ནི་བྱམས་པ་གཉིས། །བཀའ་བགྲོས་མཛད་ཅིང་
བཞུགས་འདུག་པས། །མ་འོངས་དུས་ན་ས་ཆ་འདིར། །དགོན་པ་ཆེན་པོ་ཆགས་འགྱུར་ཞིང་། །དགེ་བཤེས་མང་པོ་འབྱོན་པར་འདུག །འོན་ཀྱང་ས་དེ་གཉེན་འདུག་པས། །རེ་ཞིག་གསང་ཞེས་བྱ་བའི་ཕྱིར། །གསང་ཕུ་ཞེས་ནི་གྲགས་པ་ཡིན། །དེ་ནས་འཇམ་དབྱངས་སྤྲུལ་པ་ཡི། །ལོ་ཙཱ་བློ་ལྡན་ཤེས་རབ་ཀྱིས། །དེ་རུ་དགོན་པ་བཏབ་པ་ཡི། །དགེ་འདུན་ཁྲི་ཚོ་བཅོ་བརྒྱད་འདུས། །མཚན་ཉིད་ཆོས་ཀྱི་འབྱུང་ཁུངས་ཡིན། །ཕྱ་པ་ཆོས་ཀྱི་སེང་གེ་དང་། །གཙང་ནག་མི་ཡི་སེང་གེ་དང་། །རྨ་བྱ་སྨྲ་བའི་སེང་གེ་དང་། །སེང་ཆེན་བརྒྱད་ཀྱིས་གཙོར་བྱས་པའི། །བླ་མ་ཆེ་ཕྲ་གྲངས་མེད་བྱུང་། །ད་རུང་བནྡེ་སྟོང་ཕྲག་འཚོགས། །ཆོས་ལུགས་ས་སྐྱ་ཤས་ཆེ་ཡིན། །བཀའ་བཅུའི་གྲྭ་སྐོར་བཏང་བ་ཡིན། །དེ་ནས་གྲྭ་པ་གཅིག་འཁྱར་བ། །སྐྱོ་མདའ་རི་ཁྲོད་བྱས་པ་ཡི། །གསང་ཕུ་བླ་མར་མིང་ཐོགས་པ། །སྔ་ཕྱི་བླ་མ་གཉིས་བྱུང་སྐད། །དེ་ཡི་སྐྱེ་བ་ཡིན་དང་མིན། །ངས་ནི་ཐག་ཆོད་མེད་ན་ཡང་། །བུ་ཁྱོད་སྐྱེ་བ་སྔ་མ་ལ། །ས་སྐྱ་པ་ཡི་བླ་བྲན་ནི། །མགོན་པོ་གུར་དང་ཞལ་བཞི་པ། །བསྙེན་སྒྲུབ་ཆེན་པོ་ཐོན་པ་དང་། །འབར་བ་པ་ཡི་
འབིར་སྲུང་དང་། །དགྱེས་རྡོར་ཡི་དམ་བྱེད་པ་གཅིག །འགྲོ་དོན་བསམ་ཡང་མ་འགྲུབ་ཅིང་། །ལྷ་སའི་ཇོ་བོ་འདི་ཉིད་ལ། །སྐར་མེ་བསྐོར་བ་གསོག་པ་སོགས། །མ་འགྲུབ་པ་ལ་སེམས་ཞོག་ནས། །དག་པའི་ཞིང་དུ་མ་སོང་བར། །མི་ལུས་བླང་བ་ཡིན་པའི་རྟགས། །བདག་ལ་རྨི་ལམ་ལུང་བསྟན་གསལ། །དེ་ལ་བདེན་པ་ཡོད་ན་ནི། །ད་ནི་བག་ཆགས་སད་རེ་རན། །བག་ཆགས་སད་རྒྱུ་ཡེ་མེད་ན། །ཐ་མལ་པ་དང་ཁྱད་ཅི་ཡོད། །བག་ཆགས་བཟང་པོ་ད་མྱུར་དུ། །སད་ཅིང་སློབ་གཉེར་འོང་།བ་གཅིག །འབིར་བ་པ་ཡིས་བྱིན་གྱིས་རློབས། །དགྱེས་པ་རྡོ་རྗེས་དངོས་གྲུབ་སྩོལ། །གུར་གྱི་མགོན་པོས་བར་ཆད་སོལ། །གདོང་བཞི་མགོན་པོས་སྡོང་གྲོགས་མཛོད། །ཁྱེད་རྣམས་ཡེ་ཤེས་སྤྱན་ལྡན་པས། །བསྙེན་སྒྲུབ་མཆོད་གཏོར་མང་པོ་ཞིག །སྔོན་ཚེ་བྱས་པ་ཆུད་མ་གསན། །ད་ནི་མྱུར་དུ་ཐུགས་རྗེས་གཟིགས། །བུ་གཅིག་པདྨ་ཀུན་དགའ་ཁྱེད། །རྩོད་མེད་འཛིང་ཚོད་ཡང་མི་སྐྱུར། །རྣམ་འཇོམས་ཟབ་མདོ་ལ་སོགས་པ། །ཆོས་སྤྱོད་རྣམས་ཀྱིས་རིམ་པ་ཟུང་། །དེ་ལ་བར་ཆད་མེད་པའི་ཕྱིར། །འབར་བ་པ་ཡི་
བསྙེན་པ་བསོགས། །ཀུན་རིག་རྒྱལ་བ་རྒྱ་མཚོ་སོགས། །ཆོ་ག་རྣམས་ཀྱང་མུ་མུ་ཟུངས། །སྐབས་སུ་ལྷ་ཁང་ནང་དུ་ནི། །ཕྱག་ནི་མང་དུ་འཚལ་བ་ན། །མངལ་གྱི་སྒྲིབ་པ་དག་ནས་ཀྱང་། །བག་ཆགས་སད་པའི་གནད་ཅིག་ཡོད། །ལུས་པོ་ཚད་ལ་མ་རྫོགས་བར། །མི་རྒན་ང་ཡི་མཚམས་གཡོགས་དང་། །ཞོར་ལ་སློབ་གཉེར་སྙིང་རུས་བསྐྱེད། །བླ་མ་ངོ་ཆེན་ཕེབས་ཞོར་ལ། །དབང་ལུང་འགའ་རེ་མོས་ཀྱི་ཐོབ། །ང་ཡི་བུ་ཆེན་བླ་མ་ནི། །རང་མགོ་ངེས་པར་ཐོན་པ་དང་། །འགྲོ་དོན་དགའ་རབ་འགྲུབ་པ་དང་། །སྔོན་ཚེ་སེམས་ཐོག་དེ་བཅད་ཕྱིར། །དུས་མཐར་ལྷ་སའི་བསྐོར་བ་དང་། །ཇོ་བོར་སྙན་དར་དཀར་མེ་དང་། །གདུལ་བྱ་སྙེད་ན་གསེར་གསོལ་དང་། །གསང་ཕུ་མང་ཇ་ཐེབ་ཙམ་ཅིག །ཨེ་འོང་རེ་བ་ཁྱོད་ལ་ཡོད། །བུ་ཁྱོད་ང་ཡི་སྙིང་ལ་གཅེས། །གཅེས་ཆད་མ་བྱེད་བསམ་ལོ་ཁུག །ཧ་ཅང་ཚེ་ཡང་རིང་ཤས་ཆུང་། །ཡང་ཡེང་ལུགས་འགའ་ད་ནས་མེད། །ཚེ་རབས་སྔོན་ནས་བྱ་བའི་འཕྲོ། །ད་རེས་སྒྲུབ་པའི་དུས་ལ་བབ། །ཆུང་ཚེ་ཕས་ཕུད་མ་ཡིས་བརྡུང་། །ཟ་རྒྱུ་མི་རྙེད་སྤྲང་ཟས་ཟ། །དེ་འདྲ་སངས་རྒྱས་གླིང་པ་
སོགས། །སྐྱེས་བུ་དམ་པ་འགའ་ལ་བྱུང་། །དེ་ལ་ངེས་པ་མེད་ན་ཡང་། །ད་ནས་བསམ་ལུས་འཕྲོད་རེ་རན། །ཆོས་ཀྱི་བག་ཆགས་མ་སད་ནས། །བན་ཐོ་གཅིག་ལས་མ་བྱུང་ན། །སྐུ་སྐྱེ་ཀུན་གྱི་ཞབས་འདྲེན་ཏེ། །སངས་རྒྱས་བསྟན་པར་སྨ་འབེབས་ཆེ། །དེ་ཕྱིར་ཟིན་ཐུན་སྙིང་རུས་གྱིས། །ཁྱོད་འདྲའི་དུས་ཕྱིས་སྐུ་སྐྱེའི་རིགས་། །འགྲོ་དོན་བསམ་ནས་ལུས་བླངས་ཀྱང་། །གཞན་ཕན་འགྲོ་དོན་ཕར་ལ་སྐྱུར། །རང་མགོ་མི་ཐོན་སྡུག་བསྔལ་ཆེ། །འདི་འདྲ་མཐོང་ནས་བན་རྒན་བདག །འཁོར་བར་སྐྱེ་བ་མི་ལེན་པར། །བདེ་བ་ཅན་དུ་སྐྱེ་བའི་ཐབས། །ཐུགས་དམ་གཙོ་བོར་བྱེད་དགོས་བྱུང་། །ཁྱོད་ཀྱང་ད་རེས་སྐྱེ་བ་འདིར། །ཚེ་སྔོན་བསམ་པ་སྒྲུབ་གྱིས་ལ། །འཁོར་བའི་གནས་འདིར་མ་ཆགས་པར། །བདེ་བ་ཅན་གྱི་ཞིང་ཁམས་སུ། །ངེད་རང་ཕ་སྤུན་འཚོགས་པ་གཅིག །བུ་ཁྱོད་མ་གཡེལ་ད་རེས་རེམ། །དེ་སྐད་སྐུ་སྐྱེ་ལྟ་ཀུན་དགའ་ཡིས། །ཤོག་བུ་གཏད་ནི་བྱུང་བའི་ཕྱིར། །རཱ་ག་ཨ་སྱས་འཕྲལ་དུ་སྨྲས། །བྷ་ཝནྟུ།། ༈ །།གེགས་སེལ་བོགས་འདོན་གྱི་གསལ་འདེབས་འོད་གསལ་ལ་
གདམས་པའི་ཚན་གཅིག་བཞུགས་སོ། །ན་མོ་མ་ཧཱ་མུ་དྲ་ཡེ། ཚུར་གསོན་དང་རྟོགས་ལྡན་འོད་གསལ་བ། །གནས་ཉིན་མཁར་དཔལ་གྱི་ནགས་ཁྲོད་དེ། །རྒྱུད་ལུང་དང་མཐུན་པའི་སྒྲུབ་གནས་ཡིན། །གནས་ནགས་ཁྲོད་འཐུག་པོར་བསྒོམས་པ་ན། །སེམས་མི་རྟོག་ཏིང་འཛིན་སྐྱེ་བར་བཤད། །ཤིང་ཤུག་པའི་ནགས་ཚལ་བེཌུར་མདོག །ཤིང་ཙན་དན་ནགས་ཚལ་དྲི་བསུང་འཐུལ། །བྱ་རི་དྭགས་གསུང་སྙན་སྐྱོ་ཤས་འཕེལ། །དབྱར་མེ་ཏོག་ཚལ་ཆེན་སྣང་བ་སྤྲོ། །མི་རྒྱུ་འགྲུལ་དཀོན་པས་སྐུ་མཚམས་དམ། །རང་གཅིག་པུར་འདུག་པས་དགེ་སྦྱོར་འཕེལ། །སེམས་ཆགས་སྡང་རྟོག་པ་རང་སར་འགགས། །གདན་བྲག་རི་ཕག་མོའི་དཀྱིལ་འཁོར་འདྲ། །ལམ་རྩ་རླུང་བསྒོམ་པའི་གནས་སུ་བཟང་། །རྗེ་ཆོས་ཀྱི་རྒྱལ་མཚན་སྒམ་པོ་ལ། །ཕ་དྲུང་ཆེན་ཀུན་དགའ་རྣམ་རྒྱལ་སོགས། །སྔོན་སྐྱེས་ཆེན་མང་པོའི་ཞབས་ཀྱིས་བཅགས། །ལམ་མོས་གུས་བསྒོམ་པའི་གནས་སུ་བཟང་། །གནས་རྒྱབ་རི་ཞྭ་ནག་གསེར་མདོངས་འདྲ། །ཕ་བཀའ་བརྒྱུད་ལ་གསོལ་འདེབས་གནས་སུ་བཟང་། །གཡས་རི་བོ་ཛམ་ལྷ་སེར་པོ་འདྲ། །མཆོག་ཐུན་
མོང་དངོས་གྲུབ་གནས་སུ་བཟང་། །མདུན་ས་ཤལ་སྣང་གསལ་མར་མེ་འདྲ། །ལམ་གཏུམ་མོ་བསྒོམ་པའི་གནས་སུ་བཟང་། །གནས་མི་འཇམ་ལྷ་འདྲེའི་ཆོ་འཕྲུལ་ཆེ། །རང་དགེ་སྦྱོར་བོགས་འདོན་གྱི་གནས་སུ་བཟང་། །བྱ་གསུང་སྙན་ཏང་ཏང་དུས་སུ་སྒྲོག །སེམས་སྐྱོ་བ་སང་བའི་གནས་སུ་བཟང་། །བྱ་རི་དྭགས་རྔོན་པ་ཅིན་གྱིས་གསོད། །བྱམས་སྙིང་རྗེ་བསྒོམ་པའི་གནས་སུ་བཟང་། །ཆུ་མེ་ཤིང་མི་དཀོན་ཕུན་སུམ་ཚོགས། །རང་དགེ་སྦྱོར་ངང་གིས་འཕེལ་བས་སྐྱིད། །གནས་དེ་རུ་བྱོན་ལ་ཉམས་ལེན་མཛོད། །གནས་དེ་རུ་གཅིག་པུར་འདུག་པའི་དུས། །དུས་རེས་འགའ་མཆེད་གྲོགས་ཀྱི་སྣང་བ་འཆར། །མཆེད་གྲོགས་ཀྱི་རྟོག་པ་འཕྲེང་ཙམ་ན། །གྲོགས་གཉིས་འཚོགས་དོན་མེད་འཆལ་གཏམ་འཕེལ། །གྲོགས་མང་དུ་འཚོགས་ན་ཆགས་སྡང་འཕེལ། །གྲོགས་གཤིས་གྱོང་ཡོད་ན་རྩོད་པ་འཕེལ། །གྲོགས་འགྲོགས་ཡུན་རིང་ན་འགྲས་རུ་སྒྱུ་འཕེལ། །གྲོགས་འཁོས་ཆུང་ཡོད་ན་བརྙས་ཆོས་འཕེལ། །གྲོགས་མཐོན་པོ་ཡོད་ན་ངོ་སྲུང་དཀའ། །གྲོགས་མཉམ་པོ་མང་ན་འགྲན་སེམས་འཕེལ། །གྲོགས་རྡོ་རྗེ་སྤུན་གྱི་
དམ་ཚིག་དཀའ། །དོན་དེ་ཕྱིར་རྒྱང་ནས་དག་སྣང་བསྐྱེད། །དུས་རེས་འགའ་ཟས་ཀྱི་སྣང་བ་འཆར། །ཟས་ཀྱི་རྟོག་པ་འཕྲེང་ཙམ་ན། །ལས་སྡིག་སྡུག་དཀའ་ལས་མང་པོ་ཡིས། །ཟས་ཞིམ་དགུ་བསྒྲུབས་ནས་ཟ་བ་དེ། །དཔེ་བུ་རམ་དུག་བཏབ་ཟོས་པ་བཞིན། །འཕྲལ་ཞིམ་སྟེ་ཕུགས་སུ་གནོད་པ་ཆེ། །རང་བསླབ་གསུམ་ཡོན་ཏན་མི་ལྡན་པའི། །དཀོར་བག་མེད་བརྒྱག་ཚད་ཟ་བ་འདི། །དེ་བྱིས་སྦ་མེ་མུར་འགམ་པ་བཞིན། །ནོར་འཕྲོག་བཅོམ་བྱེད་ནས་ཟ་བ་འདི། །དཔེ་རྒྱལ་པོའི་དཀོར་མཛོད་བརྐུས་པ་བཞིན། །དུས་ནམ་ཞིག་བསྐལ་པ་དུ་མ་རུ། །ལུས་མི་བཟོད་སྡུག་བསྔལ་དཔག་མེད་མྱོང་། །ཟས་དེ་འདྲ་ལ་ཡིད་སྨོན་ཅི་ལ་བྱེད། །ཟས་བཟང་ཟོས་དང་ངན་ཟོས་ཁྱད་པར་མེད། །ཞག་གཅིག་ནས་མི་གཙང་ཕུང་པོ་འདྲ། །ལུས་ཟས་འཚོ་སྡིག་དང་མ་འདྲེས་ལ། །འདི་བདེ་བ་ལྷ་ཡི་ཕ་འབབ་ཡིན། །དུས་རེས་འགའ་གྲོགས་ཀྱི་སྣང་བ་འཆར། །སེམས་གཞན་ལ་ཆགས་པ་འཁྲུལ་པ་ཆེ། །ཕྱི་ལྤགས་པའི་མདོག་དཀར་མཛེས་འདྲ་ཡང་། །ནང་གཅིན་སྙུག་ཁྲག་དང་འབུ་སྲིན་གང་། །དཔེ་མི་གཙང་དར་དུ་བཏུམ་པ་འདྲ། །ལུས་ཐིག་ལེ་
རྒྱས་ནས་བདེ་དྲོད་འཕེལ། །དེ་གཞན་གྱི་ལུས་ལ་འབྱུང་སེམས་པ། །ཁྱིས་རུས་པ་འཆས་ནས་རྐན་གཤག་ནས། །ཁྲག་རུས་པའི་བཅུད་དུ་སེམས་པ་འདྲ། །ལུས་བདེ་བ་རྒྱས་འདོད་གཏུམ་མོ་བསྒོམ། །ལུས་རྩ་གནས་བཞི་རུ་དགའ་བ་བཞི། །དེ་ཡེ་ཤེས་སྟོང་པ་རྒྱ་ཡིས་ཐོབ། །ཕྱི་སྣང་བའི་དངོས་པོ་བཀྲག་ཆེ་བ། །སེམས་སྟོང་པའི་ཡུམ་དང་གཉིས་མེད་སྦྱོར། །ཡུམ་ཕྱག་རྒྱ་ཆེན་པོར་སྙོམས་ཞུགས་མཛོད། །བཀའ་གསལ་བའི་ཁྲིམས་དང་མ་འགལ་བར། །རང་སྡོམ་པའི་ཚུལ་ཁྲིམས་མིག་ལྟར་བསྲུང་། །དེ་བསྟན་པའི་དོན་དང་བླ་མའི་དོན། །རང་འདི་ཕྱིའི་དོན་ཆེན་ཡིན་པར་སོམས། །གཞི་ཚུལ་ཁྲིམས་རྣམ་དག་རྨིང་གཞི་བཏིང་། །ལམ་སེམས་བསྐྱེད་བཟང་པོའི་ཕོ་བྲང་བརྩེགས། །རང་དགེ་སྦྱོར་གང་བྱེད་ཐམས་ཅད་ཀུན། །མ་འགྲོ་དྲུག་སྤྱི་ཡི་དོན་ཆེད་དུ། །རང་རྣམ་མཁྱེན་སྒྲུབ་པའི་འདུན་མ་བཏང་། །དེས་གང་བྱས་བྱང་ཆུབ་ལམ་དུ་འགྲོ། །སུཏྟ་བཀའ་མདོ་རྒྱུད་རྒྱ་ཆེ་གྲངས་མང་བ། །མཐའ་བཅད་ཀྱང་ནམ་མཁའ་འདོམ་མཇལ་ལྟར། །སྔོན་པཎ་གྲུབ་དུ་མས་མཐའ་མ་ཆོད། །དེ་ཚེ་ཐུང་ནད་མང་བར་ཆད་རྒོད། །བློ་
རིག་པའི་རྩལ་ཤུགས་ཆུང་བའི་སྟེང་། །ད་ཚེ་ཡང་ཕྱེད་ཙམ་སོང་བའི་སྟེང་། །ཆོས་མཐའ་རྒྱ་གཅོད་པའི་བསམ་པ་སྐྱུར། །དོན་སྙིང་པོའི་ཉམས་ལེན་རྡོ་རུས་གཏུག །ཚེ་ལྷག་མ་ཅི་གདའ་བསྒྲུབ་ལ་འབུངས། །ནམ་འཆི་ཡང་འགྱོད་མེད་ཀྱི་བརྩོན་འགྲུས་མཛོད། །ཁྲིད་ཟབ་རྒྱས་བརྒྱ་སྟོང་གྲངས་མང་ཡང་། །དོན་རང་སེམས་ངོ་བོ་སྐྱོང་བར་འཐུས། དེ་རང་ངོ་རང་གིས་མ་བསྐྱངས་ན། །ཐབས་གཞན་གྱིས་རྟོགས་པ་འཕེལ་ཐབས་མེད། །སེམས་མ་བཅོས་སོ་མར་མ་བཞག་ན། །བསྒོམ་བསམ་པའི་རྟོག་པས་བསྒོམ་རང་བཅིངས། །སེམས་འདི་བསྒོམ་གྱི་གཏད་སོ་མ་ཞིག་ན། །སེམས་བདེ་གསལ་མི་རྟོག་ལ་འཛིན་པ་ཡོད། །སེམས་འགྱུ་ཡང་ཕྱལ་བར་མ་བཏང་ན། །སེམས་སྡུག་བཙིར་བསྒོམས་པས་བོགས་སྐྱེད་མེད། །སེམས་སྣོད་བཅུད་སྟོང་པར་མ་རྟོགས་ན། །སེམས་གོ་བའི་སྟོང་པ་ཁ་ཏ་ཡིན། །སེམས་དུག་ལྔ་ཤུགས་ཀྱིས་མ་ཞི་ན། །ཁོང་སྟོང་སྐད་ཆེ་ཡང་འུར་སྒོག་ཡིན། །ལས་རྒྱུ་འབྲས་ཕྲ་ཞིབ་མི་བརྩི་ན། །ཁ་སྟོང་སྐད་ཆེ་ཡང་ངན་སོང་རྒྱུ། །སེམས་སྟོང་ཉིད་རང་ཞལ་མ་མཐོང་ན། །ལས་དགེ་བཅུ་བསྒྲུབ་ཀྱང་འཁོར་བར་
འཆིང་། །ལུས་ངག་གི་དགེ་སྦྱོར་ཐབས་ཀྱི་ཆ། །སེམས་ངོ་བོ་སྟོང་ཉིད་ཤེས་རབ་ཆ། །ཐབས་ཤེས་རབ་ཟུང་འཇུག་འདི་བྱང་ཆུབ་ལམ། །ལམ་དེ་ལ་བུ་ཁྱོད་ནན་ཏན་བསྐྱེད། །ཕྱི་ཡུལ་སྣང་བདེ་ཆེན་ཞིང་དུ་བསྒོམ། །གནས་སྒྲུབ་ཁང་འདི་ལྷ་ཡི་གཞལ་ཡས་ཁང་། །རང་མལ་གདན་འདི་པད་ཉི་ཟླ་བའི་གདན། །རང་རྒྱུ་ལུས་འདི་ཡི་དམ་ལྷ་ཡི་སྐུ། །ངག་འབྱུང་འཇུག་འདི་སྐྱེ་མེད་རྡོ་རྗེའི་སྔགས། །སེམས་དྲན་རྟོག་འདི་མ་བཅོས་ཆོས་ཀྱི་སྐུ། །མཇུག་བསྔོ་བ་དང་སྨོན་ལམ་རྒྱས་འདེབས་པ། །དོན་དེ་ལ་བུ་ཁྱོད་འབྲལ་མེད་མཛོད། །དུས་རེས་འགའ་དགེ་སྦྱོར་གྱི་སུན་བྱུང་ན། །ཚེ་འཁོར་བ་ཐོག་མ་མེད་པ་ནས། །ལས་བྱས་པ་ཐམས་ཅད་ཆུད་ཟོས་རེད། །ཆུད་ཟོས་ཀྱི་མི་ཕན་རང་ཕུང་མང་། །ཆོས་སྙིང་ནས་བྱེད་པ་ད་རེས་ཙམ། །ལམ་བསྐྱེད་རྫོགས་ཤེས་པ་ད་རེས་ཙམ། །དོན་བསྒྲུབ་ལ་དྲིལ་བ་ད་རེས་ཙམ། །དུས་ཡུན་རིང་མི་ཐོག་འཆི་བ་འོང་། །ད་ཡང་ཡེང་བསྡད་ཀྱང་བྱེད་དུས་མིན། །དེ་སོམ་ལ་རང་ལ་བསྐུལ་མ་ཐོབ། །དེ་བྱས་ཀྱང་བོགས་སྐྱེད་མ་བྱུང་ན། །རང་དད་པ་མོས་གུས་ཆུང་བས་ལེན། །ཕ་བླ་མ་ཨོ་རྒྱན་
དབྱེར་མེད་ལ། །དུས་དང་པོ་བཅོས་མའི་མོས་གུས་ཀྱིས། །དེ་གོམས་ནས་བཅོས་མིན་གྱི་མོས་གུས་སྐྱེ། །དུས་ཐ་མར་རང་སེམས་བླ་མར་འཆར། །བོགས་འདོན་དང་གེགས་སེལ་དེ་ལས་མེད། །དུས་ད་རེས་ལ་གསལ་འདེབས་དེ་ཙམ་ཞུ། །ཞེས་དགེ་སློང་རཱ་ག་ཨ་སྱས་འཕྲལ་དུ་འགྲོ་ཆོས་སུ་གདམས་པའོ། །མངྒ་ལཾ། །བཀྲ་ཤིས་ཤོག། ༈ །།སྨོན་ལམ་དོན་དམ་ངོ་སྤྲོད་མ་ཞེས་བྱ་བ་བཞུགས་སོ། །ན་མོ་གུ་རུ་ཡེ། གང་ལ་སྐྱབས་ན་མི་བསླུ་ངེས་པ་ཡི། །དཀོན་མཆོག་རིན་ཆེན་གསུམ་དང་ཡི་དམ་ལྷ། །བུ་བཞིན་སྐྱོང་བའི་བསྟན་སྲུང་རྒྱ་མཚོའི་མཐུས། །སྨོན་ལམ་ཡོངས་སུ་འགྲུབ་པར་བྱིན་གྱིས་རློབས། །མཁའ་སྤྱོད་རིག་འཛིན་ཆེན་པོའི་དབོན་གྱི་རིགས། །སྦས་པའི་རྣལ་འབྱོར་འོད་གསལ་མངའ་མཉེས་པ། །ཨ་ནུ་ཚེ་རིང་འབུམ་གྱི་བསམ་དོན་རྣམས། །དད་ལྡན་དགེ་བས་བརྩོན་པའི་བློ་གྲོས་ཅན། །བཟོ་རིགས་ཕུལ་ཕྱིན་བློ་གསལ་མི་གཞུངས་པ། །བཟོ་བོ་བླ་མ་སྐྱབས་ཀྱི་བསམ་དོན་རྣམས། །ཆོས་དང་མཐུན་པར་ཡིད་བཞིན་འགྲུབ་གྱུར་ཅིག །རྙེད་པར་དཀའ་བའི་དལ་འབྱོར་རིན་ཆེན་འདི། །དུས་མིན་འཆི་བའི་དབང་དུ་མི་འགྲོ་བར། །
མགོན་པོ་ཚེ་དཔག་མེད་ཀྱིས་རྗེས་བཟུང་ནས། །འཆི་མེད་ཚེ་ཡི་རིག་འཛིན་ཐོབ་གྱུར་ཅིག །ཡར་མཆོད་མར་སྦྱིན་བསོད་ནམས་བསགས་པའི་རྫས། །དཔལ་དང་འབྱོར་པ་མངའ་ཐང་ཐམས་ཅད་ནི། །འཕགས་པ་ཛམ་བྷ་ལ་ཡིས་གྲོགས་མཛད་ནས། །དབྱར་གྱི་ཆུ་བོ་བཞིན་དུ་རྒྱས་གྱུར་ཅིག །ཆོས་དང་མཐུན་པར་བཀུར་སྟི་སྒྲུབ་པའི་གྲོགས། །སྲས་སོགས་རིགས་རྒྱུད་རྣམས་ཀྱི་ཚེ་དང་དཔལ། །འཕགས་མ་ནོར་རྒྱུན་མ་ཡིས་བྱིན་བརླབས་ནས། །ཡར་ངོའི་ཟླ་བ་བཞིན་དུ་འཕེལ་གྱུར་ཅིག །འཁོར་དང་ལོངས་སྤྱོད་ཕུན་སུམ་ཚོགས་ན་ཡང་། །དེ་དག་རང་བཞིན་མེད་པའི་དོན་རིག་ནས། །སྒྱུ་མའི་སྐྱེས་བུ་སྒྱུ་མས་མི་འཆིང་ལྟར། །འཁོར་བ་མ་སྤངས་གནས་སུ་དག་གྱུར་ཅིག །ཇ་ཆང་ཤ་སོགས་ཟས་ལ་ལོངས་སྤྱོད་ཚེ། །རང་ལུས་གདོད་ནས་ལྷ་སྐུའི་དོན་རྟོགས་ནས། །གང་ཟོས་རོ་རྣམས་མྱོང་སྟོང་ཕྱག་རྒྱ་ཆེ། །ཟག་མེད་ཚོགས་ཀྱི་མཆོད་པར་བསྒྱུར་ལཎྜ་གྱུར་ཅིག །སྨྲ་བརྗོད་གཏམ་གྱི་བྱ་བ་གང་བྱེད་ཀྱང་། །སྒྲ་སྐད་ཐམས་ཅད་སྔགས་ཀྱི་དོན་རིག་ནས། །གང་སྨྲས་ཐམས་ཅད་ཡིག་དྲུག་རྡོ་རྗེའི་སྒྲ། །དྲན་རྟོག་ཕྱག་རྒྱ་ཆེན་པོའི་
དོན་རྟོགས་ཤོག །གཉིད་ནི་གདོད་ནས་ཆོས་སྐུའི་དོན་རིག་ནས། །གཉིད་དང་རྨི་ལམ་གཉིས་ཀྱི་བར་མཚམས་ནས། །རང་རིག་གསལ་སྟོང་འོད་གསལ་ཆོས་ཀྱི་སྐུ། །གཏི་མུག་མ་སྤང་འོད་གསལ་འཆར་བར་ཤོག །རྨི་ལམ་ལོངས་སྤྱོད་རྫོགས་སྐུའི་གནས་རིག་ནས། །རྨི་ལམ་བཟུང་ནས་སྤྲུལ་པས་ཞིང་ཁམས་བསྒྲོད། །སངས་རྒྱས་བྱང་སེམས་རྣམས་ལ་དམ་ཆོས་ཞུ། །རྨི་ལམ་དག་སྣང་འོད་གསལ་འབྱོང་བར་ཤོག །སད་པ་སྤྲུལ་པའི་སྐུ་ཡི་དོན་རིག་ནས། །དགྲ་གཉེན་འདུ་འཛི་སྤྱོད་ལམ་ཐམས་ཅད་དུ། །བདེན་འཛིན་འཁྲུལ་པའི་དབང་དུ་མི་འགྲོ་བར། །བདེན་མེད་སྒྱུ་མའི་ཉམས་དང་མི་འབྲལ་ཤོག །ལྟེ་བའི་གནས་ནས་གཏུམ་མོའི་མེ་སྦར་ནས། །སྤྱི་བོའི་ཧཾ་ལས་བདུད་རྩིའི་རྒྱུན་ཕབ་སྟེ། །རྩ་གནས་བཞི་ལ་དགའ་བཞི་ཉམས་མྱོང་ནས། །བདེ་སྟོང་ཟུང་འཇུག་ཉམས་མྱོང་བརྟན་པར་ཤོག །སེམས་གྱི་གླང་པོ་དྲན་པའི་ཐག་པས་བཏགས། །གཞན་གནོད་གཞིར་བཅས་རང་བཞིན་ཤུགས་ལ་འགགས། །རང་སེམས་འདུལ་བ་འདུལ་བ་ཀུན་གྱི་མཆོག །དོན་གྱི་དགེ་སློང་ཉིད་དུ་འགྱུར་བར་ཤོག །དོན་ལ་མེད་ཀྱང་རྨི་ལམ་ཁྲོམ་
འཚོགས་ལྟར། །ཡང་དག་དོན་གྱི་གནས་ལུགས་མ་རྟོགས་པས། །མཐའ་མེད་འཁོར་བར་འཁྱམ་པའི་འགྲོ་རྣམས་ལ། །ཟོལ་མེད་གཏིང་ནས་སྙིང་རྗེ་སྐྱེ་བར་ཤོག །རང་གི་བསོད་ནམས་དགེ་ཚོགས་ཅི་ཡོད་ཀུན། །འགྲོ་དྲུག་སེམས་ཅན་ཀུན་ལ་བསྔོ་བ་དང་། །འགྲོ་བ་ཀུན་གྱི་སྡིག་དང་སྡུག་བསྔལ་ཀུན། །རང་གིས་ལེན་པའི་སེམས་བསྐྱེད་འབྱུང་བར་ཤོག །རང་གི་བཀའ་དྲིན་ཐོབ་པའི་བླ་མ་རྣམས། །གདོད་ནས་རྒྱལ་བ་ཀུན་དང་དབྱེར་མེད་ཅེས། །མོས་གུས་གདུང་ཤུགས་དྲག་པོའི་ངེས་ཤེས་ཀྱིས། །ཀླུ་མོས་གུས་ཕྱག་རྒྱ་ཆེན་པོ་འཆར་བར་ཤོག །འཁོར་བ་དང་ནི་མྱ་ངན་འདས་པའི་ཆོས། །ཐམས་ཅད་ཡེ་ནས་བསལ་བཞག་སྤང་བླང་བྲལ། །ཡོད་མེད་རྟག་ཆད་ལ་སོགས་མཐའ་ལས་འདས། །གནས་ལུགས་ཕྱག་རྒྱ་ཆེན་པོ་རྟོགས་པར་ཤོག །ཉོན་མོངས་ཡེ་ཤེས་རྣམ་རྟོག་ཆོས་ཀྱི་སྐུ། །འཁོར་བ་མྱང་འདས་སེམས་ཅན་རྫོགས་སངས་རྒྱས། །གདོད་ནས་སྒྱུ་ཡིན་ལ་ཡིན་བཞིན་དོན་རིག་ནས། །ཡིན་ལུགས་ཕྱག་རྒྱ་ཆེན་པོ་རྟོགས་པར་ཤོག །བདེ་ལ་མི་ཆགས་བདེ་སྟོང་ཕྱག་རྒྱ་ཆེ། །གསལ་ལ་མི་ཞེན་གསལ་སྟོང་ཕྱག་རྒྱ་ཆེ། །རྟོག་
མེད་འཛིན་བྲལ་སྟོང་ཉིད་ཕྱག་རྒྱ་ཆེ། །བདེ་གསལ་ཉམས་ལ་ཆགས་ཞེན་མེད་པར་ཤོག །སེམས་ལ་བསྒོམ་རྒྱུ་རྡུལ་ཙམ་མེད་པ་ལ། །ཡེངས་སུ་སྐད་ཅིག་མེད་པའི་ཉམས་ལེན་གྱིས། །ཡེངས་དང་མ་ཡེངས་ཁྱད་པར་མེད་པ་ཡིས། །ཉམས་ལེན་གོམས་འདྲེས་བརྟན་པ་ཐོབ་པར་ཤོག །དོན་ལ་དགེ་སྡིག་བདེན་པར་མ་གྲུབ་ཀྱང་། །འགྲོ་བའི་དོན་དུ་གཟུགས་སྐུ་འབྱུང་བའི་ཕྱིར། །སྡིག་པ་སྲོག་ལ་བབ་ཀྱང་མི་བྱ་ཞིང་། །དགེ་བ་སྒྲུབ་ལ་ཆོག་ཤེས་མེད་པར་ཤོག །འགྲང་དང་ལྟོགས་དང་སྐྱིད་དང་སྡུག་པ་སོགས། །ཚེ་འདིའི་འཁྲུལ་སྣང་སྣ་ཚོགས་ཅི་ཤར་ཡང་། །དོན་ལ་ཁྱད་མེད་ཉམས་ལེན་དེ་ཡི་ངང་། །མཉམ་ཉིད་ཕྱག་རྒྱ་ཆེན་པོ་འཆར་བར་ཤོག །སེམས་ལ་མྱོང་རྒྱུ་བལྟ་རྒྱུ་ནམ་ཡོད་ཚེ། །ཅི་ལྟར་བཟང་ཞིང་ཡིན་ཡིན་འདྲ་ན་ཡང་། །རྩེ་གཅིག་ཉམས་ཀྱི་དྲི་མ་ཡིན་གོ་ནས། །བལྟ་རྒྱུ་ལྟ་མཁན་གཅིག་ཏུ་འདྲེས་པར་ཤོག །སེམས་ལ་གཏད་སོ་སྤུ་ཙམ་བྱུང་ན་ཡང་། །ཕྱག་རྒྱ་ཆེན་པོའི་དོན་དང་འགལ་མཐོང་ནས། །བསྒོམ་རྒྱུ་སྤུ་ཙམ་མེད་པའི་སེམས་ཉིད་འདི། །བཅོས་བསླད་མེད་པར་རང་གར་འཇོག་པར་ཤོག །རང་སེམས་ངོས་བཟུང་མེད་
པ་དེ་བཞིན་དུ། །རང་གི་ལུས་དང་ངག་ཀྱང་དེ་ཡི་ངང་། །སངས་རྒྱས་སེམས་ཅན་ཀུན་ཀྱང་དེ་ཡི་ངང་། །བདག་གཞན་དབྱེར་མེད་གཅིག་ཏུ་འདྲེས་པར་ཤོཕྱི་རོལ་ནམ་མཁའ་དེ་བཞིན་རང་གི་སེམས། །ས་རྡོ་རི་བྲག་རྩི་ཤིང་ནགས་ཚལ་སོགས། །ཐམས་ཅད་རང་གི་སེམས་དང་དབྱེར་མེད་པར། །སྣང་སེམས་དབྱེར་མེད་གཅིག་ཏུ་འདྲེས་པར་ཤོག །དགྲ་ཡིས་གཅོད་ཅིང་ཚིག་ངན་སྨྲ་བ་དང་། །གཉེན་གྱིས་ཕན་བཏགས་བཀུར་སྟི་བྱེད་པ་གཉིས། །ཉམས་ལེན་སེམས་ཉིད་ངང་དུ་ཁྱད་མེད་པར། །རོ་གཅིག་ཆེན་པོའི་རྟོགས་པ་སྐྱེ་བར་ཤོག །མཚང་ནས་འདྲི་དང་བསྟོད་ར་བྱེད་པ་དང་། །ཕྱུག་དང་དབུལ་དང་བརྒྱག་དང་ལྟོགས་པ་དང་། །བཙན་དང་ཁས་ཉན་དབང་ཆུང་དབྱེར་མེད་པར། །རོ་གཅིག་དོན་ལ་བརྟན་པ་ཐོབ་པར་ཤོག །ཆགས་སྡང་སྐུར་འདེབས་བརྙས་བཅོས་ངན་འདོད་དང་། །བཏགས་རྐུ་བརྡུང་རྩོག་བཅོམ་འཕྲོག་ནད་གདོན་སོགས། །ལྟ་འགལ་རྐྱེན་ཐམས་ཅད་ནགས་ལ་མེ་མཆེད་བཞིན། །ཐམས་ཅད་བསྒོམ་གྱི་གྲོགས་སུ་འཆར་བར་ཤོག །དམྱལ་བ་ཡི་དྭགས་ལ་སོགས་སེམས་ཅན་ཀུན། །རང་གི་སེམས་དང་
དབྱེར་མེད་གཅིག་ཏུ་འདྲེས། །སེམས་ལས་གཞན་པའི་རིགས་དྲུག་མེད་རྟོགས་ནས། །འཁོར་བར་འཁྱམས་པའི་དོགས་པ་མེད་པར་ཤོག །སངས་རྒྱས་ཐུགས་དང་རང་སེམས་དབྱེར་མེད་འདྲེས། །རང་སེམས་མངོན་དུ་གྱུར་པ་མ་གཏོགས་པ། །སངས་རྒྱས་གཞན་ན་མེད་པའི་དོན་རྟོགས་ནས། །སངས་རྒྱས་གཞན་ནས་ཐོབ་འདོད་མེད་པར་ཤོག །དོན་ལ་འཆི་བ་ཅེས་བྱ་མ་གྲུབ་ཀྱང་། །ནམ་ཞིག་འཆི་བདག་ནད་ཀྱིས་ཟིན་པའི་ཚེ། །མི་རྟག་སྒྱུ་མ་ཡིན་པའི་དོན་རྟོགས་ནས། །ཅི་དང་གང་ལའང་ཆགས་སེམས་མེད་པར་ཤོག །འབྱུང་བཞི་ལུས་ལ་ན་ཚ་ཟུག་གཟེར་དང་། །གཉེན་འདུན་རྣམས་ཀྱིས་ངུ་སྐད་སྨྲེ་སྔགས་དང་། །བླ་མཆོད་ལ་སོགས་སྦྱར་རྩུབ་ཆེ་ན་ཡང་། །ཉམས་ལེན་ངང་ལ་ཡེངས་བ་མེད་པར་ཤོག །ཐིམ་རིམ་དཀར་ལམ་དམར་ལམ་ཅི་ཤར་ཡང་། །དེ་དག་སེམས་ཀྱི་རྣམ་རྟོག་ཁོ་ན་ཡིན། །གཞན་ནས་འཆར་རྒྱུ་སྤུ་ཙམ་མེད་ཤེས་ནས། །གང་ཤར་དེ་ཡི་ངོ་བོ་སྐྱོངས་བར་ཤོག །གཞི་ཡི་འོད་གསལ་སྤྲིན་མེད་ནམ་མཁའ་བཞིན། །འོད་གསལ་མཐའ་དབུས་མེད་པ་འཆར་བའི་ཚེ། །སྔར་འདྲིས་མི་དང་ཕྲད་པ་ཅི་བཞིན་དུ། །དེ་ཡི་
ངང་ལ་ཡུན་རིང་གནས་པར་ཤོག །དེ་ལ་མི་གནས་རྣམ་ཤེས་འཕོ་བའི་ཚེ། །རིག་འཛིན་དཔའ་བོ་མཁའ་འགྲོའི་ཚོགས་རྣམས་ཀྱང་། །མེ་ཏོག་ཆར་འབེབས་རོལ་མོའི་སྒྲ་དང་བཅས། །བདེ་བ་ཅན་གྱི་ཞིང་དུ་ཁྲིད་པར་ཤོག །ཞིང་དེར་པདྨའི་སྦུབས་ལ་བརྫུས་སྐྱེས་ནས། །མཚན་དང་དཔེ་བྱད་ལྡན་པའི་ལུས་ཐོབ་ནས། །སྐྱེས་མ་ཐག་ཏུ་པདྨའི་ཁ་བྱེ་ནས། །འོད་དཔག་མེད་པའི་ཞལ་མཆོག་མཐོང་བར་ཤོག །རྒྱལ་བ་དེ་ཡི་བྱང་ཆུབ་ལུང་བསྟན་ནས། །སྐད་ཅིག་དེ་ལ་ས་བཅུ་རབ་བསྒྲོད་དེ། །གྲངས་མེད་སྤྲུལ་པས་འགྲོ་བ་འདྲེན་པར་ཤོག །མངོན་དགའ་ལས་རབ་རྫོགས་དང་འཐུག་པོ་བཀོད། །གྲངས་མེད་ཞིང་དུ་སྤྲུལ་པ་དཔག་མེད་ཀྱིས། །ཀུན་ཏུ་བཟང་པོའི་མཆོད་སྤྲིན་ལྟ་བུ་ཡིས། །རྒྱལ་བ་མཆོད་ཅིང་དམ་ཆོས་ཉན་པར་ཤོག །མདོར་ན་འཕགས་པ་སྤྱན་རས་གཟིགས་དབང་དང་། །སྐུ་གསུང་ཐུགས་རྣམས་དབྱེར་མེད་གཅིག་གྱུར་ནས། །ཇི་སྲིད་སྒྱུ་ནམ་མཁའ་གནས་པ་དེ་སྲིད་དུ། །འགྲོ་བ་སེམས་ཅན་འདྲེན་པའི་དཔལ་དུ་ཤོག །ཆོས་དབྱིངས་གདོད་ནས་རྣམ་པར་དག་པ་དང་། །རྒྱུ་འབྲས་རྟེན་འབྲེལ་བསླུ་བ་མེད་པ་
དང་། །རྒྱལ་བ་སྲས་བཅས་ཀུན་གྱི་བདེན་པའི་མཐུས། །སྨོན་ལམ་འདི་དག་གེགས་མེད་འགྲུབ་གྱུར་ཅིག །ཅེས་པ་འདི་ཨ་ནུ་ཚེ་རིང་འབུམ་གྱི་བཞེད་པ་ལྟར། ༧ ཀརྨ་ཨ་རཱ་གས་མགྱོགས་པར་བྲིས་པའོ། །མངྒ་ལཾ། ཤུ་བྷཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།