མེ་ཕོ་རྟའི་ལོ་སྤྲེལ་ཟླ་བའི་ཚེས་བཅུ་ནས་བཟུང་སྟེ་འཕྲལ་དུ་གང་ཤར་བྲིས་པའི་གླུ་ཆུང་དམ་དུམ།
ཤོག་ལྷེབ་ ༡ ནས་ ༡༠༠ བར།
མེ་ཕོ་རྟའི་ལོ་སྤྲེལ་ཟླ་བའི་ཚེས་བཅུ་ནས་བཟུང་སྟེ་འཕྲལ་དུ་གང་ཤར་བྲིས་པའི་གླུ་ཆུང་དམ་དུམ་ཡོད།
ན་མོ་གུ་རུ་དྷེ་ཝ་ཌཱ་ཀི་ནཱི་ཧཱུྃ། ཀུན་བཟང་རིགས་ལྔ་རྡོ་རྗེ་སེམས། །རྒྱལ་བ་དགོངས་བརྒྱུད་བླ་མ་ལ། །གསོལ་བ་འདེབས་སོ་བྱིན་གྱིས་རློབས། །དགའ་རབ་ཤྲཱི་སེང་པདྨ་འབྱུང་། །རིག་འཛིན་བརྡ་བརྒྱུད་བླ་མ་ལ། །གསོལ་བ་འདེབས་སོ་བྱིན་གྱིས་རློབས། །མཚོ་རྒྱལ་ཀརྨ་གླིང་པ་དང་། །གཏེར་ཆོས་སྨོན་ལམ་བརྒྱུད་པ་ལ། །གསོལ་བ་འདེབས་སོ་བྱིན་གྱིས་རློབས། །སྲས་མཆོག་ཉི་ཟླ་ཆོས་རྒྱ་མཚོ། །བཀའ་བབས་དོན་གྱི་བརྒྱུད་པ་ལ། །གསོལ་བ་འདེབས་སོ་བྱིན་གྱིས་རློབས། །ཐུགས་རྗེ་བུདྡྷ་མང་ག་སྟེ། །ཐུགས་རྗེ་བྱིན་རླབས་བརྒྱུད་པ་
ལ། །གསོལ་བ་འདེབས་སོ་བྱིན་གྱིས་རློབས། །ཀུན་དགའ་གྲགས་པ་ཀུན་དགའི་མཚན། །གདུང་རྒྱུད་ཆོས་བདག་བརྒྱུད་པ་ལ། །གསོལ་བ་འདེབས་སོ་བྱིན་གྱིས་རློབས། །སྦས་པའི་རྣལ་འབྱོར་ཨ་མོ་གྷ། །དྲིན་ཐོབ་རྩ་བའི་བླ་མ་ལ། །གསོལ་བ་འདེབས་སོ་བྱིན་གྱིས་རློབས། །ཕུང་ཁམས་སྐྱེ་མཆེད་གནས་དག་པའི། །བདེ་གཤེགས་ཞི་བའི་ལྷ་ཚོགས་ལ། །གསོལ་བ་འདེབས་སོ་བྱིན་གྱིས་རློབས། །ཉོན་མོངས་རྟོག་པ་གནས་དག་པའི། །ཁྲག་འཐུང་ཁྲོ་བོའི་ལྷ་ཚོགས་ལ། །གསོལ་བ་འདེབས་སོ་བྱིན་གྱིས་རློབས། །ས་དང་ལམ་ལ་རབ་ཏུ་
གནས། །དག་པ་རིག་འཛིན་ལྷ་ཚོགས་ལ། །གསོལ་བ་འདེབས་སོ་བྱིན་གྱིས་རློབས། །དམ་ཚིག་ཅན་ལ་བུ་བཞིན་བརྩེ། །བཀའ་སྲུང་དམ་ཅན་རྒྱ་མཚོ་ཡིས། །གསོལ་བ་འདེབས་སོ་བར་ཆད་སོལ། །གསོལ་བ་བཏབ་པའི་བྱིན་རླབས་ཀྱིས། །མི་འགྱུར་རྡོ་རྗེའི་བར་ཆད་ཞི། །བསམ་པ་ཡིད་བཞིན་འགྲུབ་པར་ཤོག །བདག་དང་བདག་ལ་འབྲེལ་ཐོགས་རྣམས། །རྫོགས་ཆེན་སྣང་བཞི་མཐར་ཕྱིན་ནས། །འཇའ་ལུས་འོད་སྐུ་འགྲུབ་པར་ཤོག །ནམ་ཞིག་ཚེ་འཕོས་གྱུར་མ་ཐག །ཞི་ཁྲོའི་ལྷ་ཡིས་མདུན་བསུས་ནས། །བདེ་ཆེན་དག་ཞིང་སྐྱེ་བར་ཤོག །བྷ་ཝནྟུ།། ༈ །།ཨེ་མ་ཧོ། ཆོས་སྐུ་ཀུན་ཏུ་བཟང་པོ་ནི། །འཁྲུལ་མ་མྱོང་བར་ཡེ་སངས་རྒྱས། །དེ་ལས་སྔ་བའི་སངས་རྒྱས་མེད། །མ་རིག་འཁྲུལ་པའི་སེམས་ཅན་ལ། །སྙིང་རྗེ་སྐྱེས་ནས་ཆོས་གསུངས་པ། །བཏགས་གྲོལ་རྒྱུད་འདི་ཡིན་པ་སྟེ། །དེ་ལས་སྔ་བའི་ཆོས་ཤིག་མེད། །ཆོས་རྣམས་ཀུན་གྱི་ས་བོན་ཡིན། །དེ་ལ་བརྟེན་ནས་སྔར་བྱོན་གྱི། །སངས་རྒྱས་ཐམས་ཅད་དེ་ལས་བྱུང་། །དེ་ཕྱིར་སྲས་གཅིག་ས་བོན་རྒྱུད། །སངས་རྒྱས་ཐམས་ཅད་ཆོས་སྐུ་གཅིག །
ནམ་མཁའ་བཞིན་དུ་ཀུན་ལ་ཁྱབ། །འོན་ཀྱང་འཁྲུལ་པའི་སེམས་ཅན་ལ། །ཕན་མ་ཐོག་སྟེ་འཁོར་བར་འཁྱམས། །ཉི་མ་ཇི་ལྟར་དྲོ་གསལ་ཡང་། །བྱང་བལྟས་ཕུག་པར་མི་ཤར་བཞིན། །སེམས་ཅན་རང་རང་ལས་ཀྱིས་བསྒྲིབས། །ལས་སྒྲིབ་དག་པས་བལྟས་པ་ན། །ནམ་མཁའ་ས་གཞི་བར་སྣང་ཁམས། །རྡུལ་ཕྲན་རེ་རེའི་ས་ན་ཡང་། །སངས་རྒྱས་ཞིང་ཁམས་རེ་རེ་ཡོད། །བདེ་སྐྱིད་ལྡན་ཞིང་རྣམ་པར་དག །སངས་རྒྱས་དེ་དག་དམ་ཆོས་གསུངས། །སངས་རྒྱས་ལོངས་སྐུ་མང་ན་ཡང་། །གཙོ་བོ་དག་པའི་ཞིང་མཆོག་ལྔར། །རིགས་ལྔའི་སངས་རྒྱས་འཁོར་བཅས་པ། །རྟག་ཏུ་ཆོས་ཀྱི་འཁོར་ལོ་བསྐོར། །རང་རེ་བསྐལ་པ་ངན་པ་རྣམས། །ཐུབ་པ་མྱ་ངན་འདས་པའི་རྗེས། །བསྟན་པ་ནུབ་ལ་ཁད་དུ་སྣང་། །ཤིན་ཏུ་ལས་ངན་སེམས་ཅན་རྣམས། །ད་ལྟའི་ས་ཆའི་ཡུལ་འདི་ཡང་། །ལ་ལས་དམྱལ་བའི་འཇིག་རྟེན་ཁམས། །ལྕགས་སྲེག་ས་མྱུ་གཞིའི་སྣང་བ་འཆར། །ལ་ལས་ཡི་དྭགས་འཇིག་རྟེན་ཁམས། །ཆུ་མེད་བྱེ་ཚན་གླིང་དུ་མཐོང་། །ལ་ལས་བདེ་སྐྱིད་ཕུན་སུམ་ཚོགས། །དག་པའི་ཞིང་ཁམས་འདྲ་བ་
མཐོང་། །ལ་ལས་ད་ལྟ་བསྐལ་པ་འཇིག །མེས་ཚིག་རླུང་གིས་གཏོར་བ་མཐོང་། །ལ་ལས་བསྐལ་པ་ཞིག་ཚར་ནས། །ད་ལྟ་ཅི་ཡང་མེད་པར་མཐོང་། །ལ་ལས་བསྐལ་པ་སླར་ཆགས་མཐོང་། །ངེད་རང་ཚོ་ཡི་སྣང་བ་ལ། ད་ལྟ་བསྐལ་པ་གནས་པར་སྣང་། །དེ་ལྟར་སྣ་ཚོགས་སྣང་བ་དེ། །རང་རང་ལས་འཕྲོ་བཟང་ངན་གྱིས། །སོ་སོར་ཇི་ལྟར་མཐོང་བ་བདེན། །སོ་སོར་སྐྱིད་སྡུག་དངོས་སུ་མྱོང་། །འཇིག་རྟེན་སྟོང་གསུམ་རིགས་དྲུག་གིས། །ལུས་པོ་ཐོབ་པའི་སེམས་ཅན་བས། །ཤིང་རྟའི་འཕང་ལོ་ཙམ་ཞེས་པ། །ཕུབ་ཀྱི་རྒྱ་ཙམ་ནམ་མཁའ་དང་། །བར་སྣང་ས་གཞི་ཐམས་ཅད་ན། །ལུས་མ་ཐོབ་པའི་སེམས་ཅན་མང་། །སེམས་ཅན་ཟད་དང་འཕེལ་བ་མེད། །སེམས་ཅན་ཀུན་གྱི་སེམས་ཉིད་ནི། །བདེ་བར་གཤེགས་པའི་ཡེ་ཤེས་ཡིན། །འོན་ཀྱང་རང་ངོ་མ་ཤེས་འཁྲུལ། །ང་མེད་པ་ལ་ང་རུ་བཟུང་། །བདག་མེད་པ་ལ་བདག་ཏུ་བཟུང་། །ང་རུ་བཟུང་བས་གཞན་ཡང་མཐོང་། །གཞན་མེད་པ་ལ་གཞན་དུ་འཁྲུལ། །བདག་ལ་ཆགས་ཤིང་གཞན་ལ་སྡང་། །ཆགས་སྡང་གཉིས་ཀྱིས་འཁོར་བར་འཁྱམས། །དམྱལ་བ་ཡི་དྭགས་དུད་
འགྲོ་དང་། །ལྷ་དང་ལྷ་མིན་མི་རྣམས་སུ། །གཅིག་ནས་གཅིག་ཏུ་རྒྱུན་དུ་འཁོར། །སྡུག་བསྔལ་གྲངས་མང་ཚབས་ཆེན་མྱོང་། །འོན་ཀྱང་སེམས་ཉིད་མེད་མི་ཐུབ། །མེས་མི་ཚིག་ལ་ཆུས་མི་འཇིག །ལུས་ནི་སྡུག་བསྔལ་ཚབས་ཆེན་སྤྱོད། །དམ་པའི་ཆོས་ཤིག་མ་འགྲུབ་ན། །ནམ་ཡང་ཐར་པའི་དུས་ནི་མེད། །སྐྱེ་རྒ་ན་འཆིའི་འཁོར་ལོ་འཁོར། །སྟོང་གསུམ་རི་རབ་གླིང་བཞི་ན། །དེ་སྔ་སྐྱེ་མ་མྱོང་བ་དང་། །འཆི་མ་མྱོང་བའི་ས་ཆ་ནི། །ཁབ་ཀྱི་རྩེ་ཙམ་མེད་པར་གསུངས། །འགྲོ་བ་སེམས་ཅན་ཐམས་ཅད་ཀུན། །ཕ་མ་བྱས་པ་གྲངས་མེད་དེ། །ཉེ་དུ་བཟའ་ཚང་དུ་སྐྱེས་ནས། །ཤི་ནས་ངུས་པའི་མཆི་མ་ཡིས། །རོལ་པའི་མཚོ་བདུན་ཙམ་ཡོད་གསུངས། །ཆུང་མ་ཤི་བའི་སྐུ་བསོགས་པ། །བསགས་ན་ནམ་མཁའ་གང་བ་ཙམ། །སེམས་ཅན་གཞན་དག་ཕ་མར་སྐྱེས། །རང་ལ་བྱིན་པའི་ནོར་རྫས་ནི། །བསགས་ན་གླིང་བཞིར་མི་ཤོང་ཙམ། །རང་གི་སྐྱེ་བ་བླངས་ཚད་དེའི། །ཤ་དང་རུས་པ་བསགས་པ་ན། །སྟོང་གསུམ་འཇིག་རྟེན་གཏོས་དང་མཉམ། །ཁྲག་རྣམས་བསགས་ན་རྒྱ་མཚོ་ཙམ། །རང་ཉིད་
དཔའ་རྩལ་ལྡན་པར་སྐྱེས། །དགྲ་བསད་པ་ཡི་མགོ་བསགས་ན། །རི་རབ་ཙམ་དུ་འགྱུར་བར་གསུངས། །སྐབས་དེར་བསོད་ནམས་བསགས་པའི་འབྲས། །འཁོར་ལོས་སྒྱུར་བའི་རྒྱལ་པོར་སྐྱེས། །གླིང་བཞི་མངའ་འོག་བྱེད་པ་མང་། །རེས་འགའ་སྦྱིན་པའི་འབྲས་བུ་ཟད། །སྤྲང་ནས་མུ་གེས་ཤི་བ་དང་། །ཡི་དྭགས་སྡུག་བསྔལ་དཔག་ཏུ་མེད། །རེས་འགའ་དགྲ་ཡིས་བསད་པ་དང་། །དམྱལ་བའི་སྡུག་བསྔལ་བསྐལ་པར་མྱོང་། །རེས་འགའ་དགེ་བའི་འབྲས་བུ་ཡིས། །ལོ་མང་ལྷ་ཡི་བདེ་སྐྱིད་མྱོང་། །བསོད་ནམས་ཟད་ནས་ཁྱི་ཕག་སོགས། །དུད་འགྲོ་ངན་པར་གྲངས་མེད་སྐྱེས། །རེས་འགའ་དམག་དཔོན་སྟོབས་ཆེན་གྱུར། །དགྲ་སྡེ་ཐམས་ཅད་བརླགས་བྱས་ཤིང་། །ཤི་ནས་ལྷ་མིན་འཐབ་རྩོད་ཡུལ། །བསད་བཅད་བརྡུང་བཙོག་དཔག་མེད་མྱོང་། །དེ་སྔོན་བསྐལ་པ་གྲངས་མེད་ནས། །དེ་འདྲའི་ངང་ལ་འཁོར་བར་འཁྱམས། །ལྷ་མིར་སྐྱེས་པ་བརྒྱ་ལན་རེ། །ཕལ་ཆེར་ངན་སོང་གཏན་ཡུལ་བྱས། །དེ་ལྟར་ཡུན་རིང་དེ་ཙམ་ཡང་། །སྐྱིད་སྡུག་དེ་ཙམ་མྱོང་བའི་ཚེ། །རང་ཉིད་སྐྱིད་འདོད་ཕྱུག་འདོད་དང་། ཕ་རོལ་དམའ་འདོད་ཕམ་བབས་
འདོད་ཀྱང་། །རང་ལ་ཆགས་དང་གཞན་ལ་སྡང་། །དེ་གཉིས་ཁོ་ན་བྱས་པས་ལན། །དེ་ལྟར་ཚེ་རབས་ཐམས་ཅད་དུ། །དགེ་བ་བསྒྲུབས་དང་སྡིག་པ་སྤངས། །ཚོགས་ཀྱང་མང་དུ་བསགས་ན་ཡང་། །བར་སྐབས་དེ་ཡི་འབྲས་བུ་ཡིས། །ལྷ་མིའི་བདེ་སྐྱིད་མྱོང་བ་མང་། །བསོད་ནམས་ཟད་ནས་མར་ལྟུང་བ། །སེམས་བསྐྱེད་བསྔོ་བ་མ་ཤེས་ལན། །ད་རེས་ཆོས་སྒོར་ཞུགས་པ་དང་། །ཆོས་ཀྱི་གནད་འགགས་མ་ཤེས་ན། །ད་རུང་དེ་སྔའི་མུ་ལ་འཁྱམས། །ཀྱེ་མ་ཧོཿ དེ་ཙམ་འཁོར་བར་ཡུན་རིང་ན། །སྔར་བྱོན་སངས་རྒྱས་གྲངས་མེད་བྱོན། །དེ་ཚོའི་ཐུགས་རྗེ་རྡུགས་པ་ཨང་། །སངས་རྒྱས་བྱང་སེམས་ཐམས་ཅད་ཀྱི། །རྟག་ཏུ་ཐུགས་རྗེས་གཟིགས་ན་ཡང་། །ལྕགས་ཀྱི་ཐོ་ལུམ་གཡང་ལྷུང་ལ། །ལྕགས་ཀྱུས་ཐེབས་པ་མེད་པ་བཞིན། །བདག་དང་བདག་འདྲའི་སེམས་ཅན་ཚོ། །ད་ནི་སྐྱོ་བ་མི་སྐྱེ་འམ། །འཁོར་བའི་བྱ་བ་ལ་ཐམས་ཅད་འདི། །སྨྱོན་པས་བཙན་དུག་འགམས་པ་འདྲ། །རང་གིས་རང་ཕུང་ལས་རེ་ངན། །ད་ནི་ཞན་པ་མི་ལོགས་སམ། །འཁོར་བའི་གནས་ཚུལ་འདི་དག་ནི། །དམ་
ཆོས་དཀོན་མཆོག་བརྩེགས་པ་སོགས། །མདོ་རྒྱུད་རྒྱ་ཆེ་རྣམས་ནས་གསུངས། །རང་གི་ཡིད་ལ་ཤར་བ་དེ། །ཨོ་རྒྱན་རིག་འཛིན་ལ་སོགས་པའི། །བློ་ཆུང་གོ་བ་བསྐྱེད་པའི་ཕྱིར། །རཱ་ག་ཨ་སྱས་གླུ་རུ་བླངས། །མངྒ་ལཾ།། ༈ །ཨེ་མ་ཧོཿ ནུབ་ཕྱོགས་བདེ་ཆེན་ཞིང་ཁམས་ནས། །སྣང་བ་མཐའ་ཡས་སྤྱན་རས་གཟིགས། །མཐུ་ཆེན་ཐོབ་སོགས་པདྨའི་རིགས། །ཐམས་ཅད་ཀུན་ལ་གསོལ་བ་འདེབས། །སྟེང་ཕྱོགས་དུར་ཁྲོད་མེ་འབར་ན། །རྟ་མཆོག་དབང་གི་རྒྱལ་པོ་སོགས། །ཡི་དམ་ཁྲོ་བོ་ཐམས་ཅད་དང་། །རིག་འཛིན་རྣམས་ལ་གསོལ་བ་འདེབས། །ལྷོ་ནུབ་རྔ་ཡབ་གླིང་ཕྲན་ན། །ཨོ་རྒྱན་རྗེ་འབངས་ཉི་ཤུ་ལྔ། །རིགས་བཞི་ཌཱཀི་གིང་གི་ཚོགས། །ཐམས་ཅད་ཀུན་ལ་གསོལ་བ་འདེབས། །དེ་རིང་སྤྲེལ་ཟླའི་ཚེས་བཅུ་ལ། །ཨོ་རྒྱན་མཁའ་འགྲོ་སྡེ་བཞིས་བསྐོར། །བོད་ཁམས་ཁྱབ་པར་བྱོན་པའི་དུས། །མི་འགྱུར་རྡོ་རྗེའི་བར་ཆད་སོལ། །ས་གཏེར་ཁ་བྱང་ལུང་བསྟན་གསོལ། །སྔགས་འཆང་བདག་གི་བསམ་པ་འགྲུབ། །བདག་ཅག་རྗེས་འཇུག་བཅས་པ་ཡི། །བར་ཆད་ཀུན་སོལ་དངོས་གྲུབ་སྩོལ། །རེ་ས་
གཞན་མེད་ཨོ་རྒྱན་མཁྱེན། །དུས་མིན་འཆི་དང་བར་ཆད་ཟློག །ཚེ་དང་སྒྲུབ་པ་མཐར་ཕྱིན་ནས། །ཕྱིར་མི་ལྡོག་པའི་ས་ཐོབ་པར། །ད་ལྟ་ཉིད་དུ་བྱིན་གྱིས་རློབས། །དེ་སྐད་རཱ་ག་ཨ་སྱས་ཞུས། །བྷ་ཝནྟུ།། ༈ །།ཆོས་དབྱིངས་རབ་འབྱམས་རྒྱལ་བའི་དཀྱིལ་འཁོར་ནས། །དུས་གསུམ་འཕོ་འགྱུར་མེད་པར་རྟག་ཏུ་གཟིགས། །རྣམ་རྟོག་ཅི་ཡང་མི་མངའ་ས་ལེར་མཁྱེན། །སྲིད་ཞི་མགོན་པོ་ཡོན་ཏན་ཀུན་གྱི་གཞི། །པད་འབྱུང་ཆོས་ཀྱི་སྐུ་ལ་ཕྱག་འཚལ་བསྟོད། །འོག་མིན་འཐུག་པོ་བཀོད་པའི་ཞིང་ཁམས་ནས། །རིགས་ལྔ་གངས་ཆེན་མཚོ་ཡི་སྐུར་སྣང་བས། །སྐུ་ཡི་བ་སྤུ་འོད་ཟེར་རེ་རེ་ལ། །དག་པའི་ཞིང་ཁམས་དཔག་མེད་སྤྲུལ་མཛད་པ། །ས་བཅུའི་སེམས་དཔའ་རྣམས་ལ་བརྡ་ཆོས་སྟོན། །ཨོ་རྒྱན་ལོངས་སྤྱོད་རྫོགས་ལ་ཕྱག་འཚལ་བསྟོད། །མི་མཇེད་འཇིག་རྟེན་བྱེ་བ་ཕྲག་བརྒྱ་ན། །བརྫུས་སྐྱེས་པད་འབྱུང་བྱེ་བ་ཕྲག་བརྒྱ་ལུ་འགྱེད། །རེ་རེའང་མཚན་བརྒྱད་འཕྲུལ་མཚན་བཞི་བཅུ་རེ། །རིགས་དྲུག་འདུལ་ཕྱིར་གུ་རུ་དྲུག་རེར་སྤྲུལ། །ཨོ་རྒྱན་སྤྲུལ་པའི་སྐུ་ལ་ཕྱག་འཚལ་བསྟོད། །ཡར་དང་མར་གྱི་
ཚེས་བཅུ་ཐམས་ཅད་ལ། །སྤྲུལ་པ་དཔག་མེད་མཁའ་འགྲོའི་འཁོར་དང་བཅས། །བོད་ཁམས་བྱེ་བ་ཕྲག་བརྒྱ་རྟག་ཏུ་ཉུལ། །ཨོ་རྒྱན་ཐུགས་རྗེ་ཅན་ལ་ཕྱག་འཚལ་བསྟོད། །མངོན་ཤེས་དྲུག་ཅུ་མངའ་བའི་པདྨ་འབྱུང་། །སེམས་ཅན་ཀུན་གྱི་ཡིད་ལ་ཅི་བསམ་པའི། །འགྱུ་བའི་གྲངས་ཁ་ཐམས་ཅད་རྟག་ཏུ་མཁྱེན། །སེམས་ཅན་ཐམས་ཅད་ཚེ་རབས་གར་སྐྱེས་ཀྱང་། །དེ་ཚེའི་དགེ་སྡིག་ལས་འཕྲོ་གང་ཡོད་གཟིགས། །ཕྱིན་ཆད་གར་སྐྱེ་དེ་ལ་གང་ཕན་མཛད། །ཨོ་རྒྱན་མངོན་ཤེས་ལྡན་ལ་ཕྱག་འཚལ་བསྟོད། །སེམས་ཅན་ཀུན་གྱི་རང་རང་སོ་སོའི་སྐད། །ཅི་སྨྲས་ཐམས་ཅད་མ་འདྲེས་སོ་སོ་རུ། །རྒྱུན་དུ་གསན་ཅིང་གསོལ་བ་གང་བཏབ་མཁྱེན། །རྡོ་རྗེའི་སྙན་མངའ་ཨོ་རྒྱན་རྗེ་ལ་བསྟོད། །ཉིན་མཚན་དུས་དྲུག་འགྲོ་དྲུག་སེམས་ཅན་ལ། །བྱམས་དང་སྙིང་རྗེའི་ཐུགས་ཀྱིས་སོ་སོར་གཟིགས། །ཕན་ཕྱིར་སྐྱོབ་ཕྱིར་སྤྲུལ་པ་རེ་རེ་ན། །དྲུང་དུ་བཞུགས་ཀྱང་བསྒྲིབས་པས་སྒྲིབ་པ་ཡི། །མཇལ་བའི་སྐབས་མེད་དད་པ་མེད་པ་ལ། །ཐུགས་རྗེ་བྱིན་རླབས་འཇུག་པའི་སྐབས་མ་མཆིས། །ཨོ་རྒྱན་ཐུགས་རྗེ་ཅན་ལ་ཕྱག་འཚལ་ལོ། །བདུད་དང་ལྷ་
སྲིན་ཐམས་ཅད་ཟིལ་གྱིས་ནོན། །ལས་ལ་མངའ་བའི་མཐུ་ཆེན་མངའ་བ་ཡི། །མཐོང་ཆོས་མྱོང་འགྱུར་མ་གཏོགས་ལས་ངན་ཟློག །ཉི་ཟླ་ཐང་འབེབས་རྒྱ་མཚོ་གནམ་དུ་སྒྱུར། །རི་རབ་ཚོགས་པོར་འཕེན་དང་ཤར་ནུབ་སྒྱུར། །ས་རྡོ་གསེར་དངུལ་བསྒྱུར་བའི་རྫུ་འཕྲུལ་ལྡན། །ཨོ་རྒྱན་མཐུ་སྟོབས་ཅན་ལ་ཕྱག་འཚལ་བསྟོད། །ཁྱེད་ཀྱི་ཡོན་ཏན་ནམ་མཁའི་ཚད་དང་མཉམ། །སངས་རྒྱས་ཀུན་གྱིས་བརྗོད་ཀྱང་མི་ཟད་ན། །བདག་འདྲ་རྨོངས་པས་བརྗོད་པར་ག་ལ་ནུས། །འོན་ཀྱང་རྒྱ་མཚོ་ཆེ་ལས་ཆུ་ཐིགས་ཙམ། །དུས་ཆེན་སྤྲེལ་ཟླའི་ཚེས་བཅུར་བསྟོད་བྱས་པས། །ཁྱེད་ཀྱིས་ལུང་བསྟན་མི་འགྱུར་རྡོ་རྗེ་ཡི། །ཤོག་སེར་གཏེར་ཁ་མྱུར་དུ་ཐོབ་པ་དང་། །བདག་ཅག་འཁོར་བཅས་བར་ཆད་བདུད་ལས་རྒྱལ། །བྱང་ཆུབ་སྒྲུབ་ལ་བར་ཆད་མེད་པར་ཤོག །མངྒ་ལཾ།། ༈ །།ན་མོ་ཤཱཀྱ་མུ་ནེ་ཡེ། བཅོམ་ལྡན་ཤཱཀྱ་ཐུབ་པ་སངས་རྒྱས་ནས། །དམ་སུ་པའི་ཆོས་ནི་མ་གསུངས་བཞུགས་པའི་ཚེ། །སྟོང་གསུམ་བདག་པོ་ལྷ་ཆེན་ཚངས་པ་དེས། །གསེར་གྱི་འཁོར་ལོ་རྩིབས་སྟོང་ལྡན་པ་ཕུལ། །ཆོས་ཀྱི་འཁོར་ལོ་བསྐོར་བར་གསོལ་
བ་བཏབ། །དེ་ནསཝཱ་རཱ་ཎ་སཱིར་ཆོས་འཁོར་བསྐོར། །ལྔ་སྡེ་བཟང་པོ་ལ་སོགས་དགྲ་བཅོམ་ཐོབ། །རིམ་པར་དགེ་སློང་དང་ནི་དགེ་སློང་མ། །འཁོར་ཚོགས་བསམ་མི་ཁྱབ་པ་།ཐམས་ཅད་གྲོལ། །འདུལ་བ་ལུང་དང་དྲན་པ་ཉེར་གཞག་དང་། །མདོ་རྒྱུད་ལས་ནི་བརྒྱ་པ་ལ་སོགས་པ། །ཐེག་པ་ཐུན་མོང་མདོ་སྡེ་ཐམས་ཅད་གསུངས། །དེ་དག་དོན་དེ་གོ་བདེ་འདིར་བརྗོད་ན། །དགེ་སྡིག་ལས་ཀྱི་རྒྱུ་འབྲས་ཁོ་ན་ཡིན། །རྒྱུ་འབྲས་ཕྲ་ཞིབ་ཤིན་ཏུ་རྟོགས་དཀའ་སྟེ། །རྫོགས་པའི་སངས་རྒྱས་མ་གཏོགས་ཉན་རང་གིས། །དགྲ་བཅོམ་བྱང་སེམས་རྣམས་ཀྱིས་མི་ཤེས་གསུངས། །རོ་གཅིག་ཆེན་པོའི་རྟོགས་པ་སྐྱེས་པའི་ཚེ། །རྒྱུ་འབྲས་ཕྲ་ཞིབ་ལ་ཡང་ཕྲིག་ཚུད་པས། །རྟེན་འབྲེལ་སྣ་ཚོགས་ཟ་འོག་བཀྲ་ལྟར་མཐོང་། །དེ་ཚེ་སློབ་མའི་བར་ཆད་སེལ་བ་སོགས། །གང་ལ་གང་ཕན་རྟེན་འབྲེལ་བསྒྲིག་པར་ཤེས། །དཔེར་ན་ཕག་གྲུ་སྐྱོབ་པ་ལྟ་བུ་ལགས། །རང་རེའི་དེ་འདྲའི་རྟེན་འབྲེལ་མི་ཤེས་ཀྱང་། །ཐུབ་པའི་བཀའ་ལ་དཔང་པོ་བྱས་ནས་ཀྱང་། །ཕན་གནོད་རྒྱུ་འབྲས་ཕྱོགས་ཙམ་ཤེས་པ་ཡིན། །དེ་ལ་སྤྱི་དང་བྱེ་བྲག་གཉིས་ཡིན་ཏེ། །སྤྱིར་ནི་སྐྱེ་བ་
འདི་དང་གཞན་དུ་ཡང་། །བདེ་སྐྱིད་གང་བྱུང་དགེ་བའི་འབྲས་བུ་སྟེ། །བདེ་སྐྱིད་འདོད་ཕྱིར་དགེ་ལ་འབད་པར་བྱ། །སྐྱེ་བ་འདི་དང་ཚེ་རབས་ཐམས་ཅད་དུ། །སྡུག་བསྔལ་བྱུང་ཚད་སྡིག་པའི་འབྲས་བུ་སྟེ། །སྡུག་བསྔལ་མི་འདོད་ཕྱིར་ན་སྡིག་པ་སྤངས། །དཔེར་ན་དུག་དང་སྨན་གྱི་ཁྱད་པར་བཞིན། །དུག་དེ་འཕྲལ་དུ་མངར་ཡང་ཟ་མི་ཕོད། །དེ་བཞིན་སྡིག་པས་འཕྲལ་དུ་སྐྱིད་ན་ཡང་། །ཕུགས་སུ་གནོད་པ་དེ་བས་འབུམ་འགྱུར་ཆེ། །ནད་ལ་ཕན་ངེས་སྨན་དེ་ཁ་ན་ཡང་། །ནད་ཕན་ཚེ་སྲོག་སྐྱོབ་ཕྱིར་ཟ་བ་ལྟར། །དགེ་བ་བསྒྲུབ་པ་འཕྲལ་དུ་དཀའ་འཚེར་ཡང་། །སྙིང་རུས་བསྐྱེད་པས་གཏན་བདེའི་འདུན་མ་འགྲུབ། །ལ་ལས་མི་དགེ་སྡིག་ལ་བརྩོན་བྱས་པས། །ཚེ་འདིར་ཚེ་རིང་ནད་མེད་ཅི་བསམ་འགྲུབ། །དེ་ནི་དགེ་བ་མཐའ་རྫོགས་ཤིན་ཏུ་ངན། །ཚེ་སྔོན་དགེ་བའི་འབྲས་བུ་གང་ཡོད་པ། །སྡིག་པའི་སྟོབས་ཀྱིས་ཐམས་ཅད་ཚེ་འདིར་སྨིན། །ཤི་ནས་མནར་མེད་དམྱལ་བར་གཏན་ཡུལ་བྱེད། །ནམ་ཡང་ཐར་དུས་མེད་པའི་ལས་ངན་ཡིན། །ཚེ་འདིར་རྩེ་གཅིག་དམ་ཆོས་བསྒྲུབས་ན་ཡང་། །ནད་མང་ཚེ་ཐུང་
སྡུག་བསྔལ་དུ་མས་མནར། །དེ་ནི་སྡིག་པ་མཐའ་རྫོགས་བཟང་བར་གསུངས། །ཕྱི་མ་དམྱལ་བ་ཡི་དྭགས་དུད་འགྲོ་རུ། །བསྐལ་པ་མང་པོའི་སྡུག་བསྔལ་མྱོང་རྒྱུའི་སྡིག །དགེ་བའི་སྟོབས་ཀྱིས་ཚེ་འདིར་སྨིན་པ་སྟེ། །ཚ་དམྱལ་སྐྱེ་རྒྱུའི་ཚད་པའི་ནད་ཙམ་དང་། །གྲང་དམྱལ་སྐྱེ་རྒྱུའི་གྲང་བའི་ནད་ལྕི་མོད། །ཡི་དྭགས་སྐྱེ་རྒྱུ་ཤོར་གོད་གོད་ཁ་ཙམ། །མཐའ་མེད་འཁོར་བར་གཏན་ཡུལ་དགོས་པ་ཡང་། །ཆོས་མགོ་ཐོན་ངེས་ཚེ་ནི་ཐུང་བ་ཙམ། །ལས་དང་རྒྱུ་འབྲས་ཁྱད་པར་མཐའ་ཡས་ཀྱང་། །མདོར་བསྡུས་མི་དགེ་བཅུ་དང་དགེ་བཅུར་འདུས། །མི་དགེ་བ་ཡི་ལས་ནི་རེ་རེ་ལ། །རྣམ་སྨིན་འབྲས་བུ་དབང་གི་འབྲས་བུ་དང་། །རྒྱུ་མཐུན་འབྲས་བུ་དང་ནི་གསུམ་རེ་འབྱུང་། །སྲོག་བཅད་རྣམ་སྨིན་འབྲས་བུས་དམྱལ་བར་སྐྱེ། །རྒྱུ་མཐུན་འབྲས་བུས་དེ་ནས་མིར་སྐྱེས་ཀྱང་། །ནད་ནི་མང་ཞིང་ཚེ་ཡང་ཐུང་བར་འགྱུར། །དབང་གི་འབྲས་བུས་མི་དེ་སྐྱེ་བའི་ཡུལ། །བཀྲ་མི་ཤིས་ཤིང་ས་ངན་དག་ཏུ་སྐྱེ། །མ་བྱིན་བླངས་བའི་རྣམ་སྨིན་ཡི་དྭགས་སྐྱེ། །རྒྱུ་མཐུན་འབྲས་བུས་དེ་དག་མིར་སྐྱེས་ཀྱང་། །དབུལ་ཞིང་ཕོངས་ལ་མུ་གེས་མནར་བར་འགྱུར། །
དབང་གི་འབྲས་བུས་སད་སེར་མང་བར་སྐྱེ། །མི་ཚངས་སྤྱོད་པའི་རྣམ་སྨིན་ཡི་དྭགས་སྐྱེ། །རྒྱུ་མཐུན་འབྲས་བུས་རྒྱ་ལ་མིར་སྐྱེས་ཀྱང་། །དགྲ་ནོར་མང་པོ་ཡོད་པའི་ཆུང་མར་སྐྱེ། །དབང་གི་འབྲས་བུས་ཡུལ་ནི་ཚད་རོང་གི །སེམས་ཅན་སྤུ་མེད་སྦལ་སྦྲུལ་རྨིག་བུར་སྐྱེ། །སྲོག་བཅད་མ་བྱིན་ལེན་དང་མི་ཚངས་སྤྱོད། །དེ་ནི་ལུས་ཀྱི་མི་དགེ་གསུམ་པོ་ཡིན། །རྫུན་སྨྲས་རྣམ་སྨིན་དུད་འགྲོའི་ལུས་སུ་སྐྱེ། །རྒྱུ་མཐུན་འབྲས་བུས་གལ་ཏེ་མིར་སྐྱེས་ཀྱང་། །མི་ཁ་སྡང་ཞིང་གཤེ་སྐུར་མང་བར་འགྱུར། །དབང་གི་འབྲས་བུས་བསེ་དྲི་ཡོད་པ་དང་། །ཁ་ནས་དྲི་མ་ངན་པ་བྲོ་བར་འགྱུར། །ཕྲ་མ་ཞེས་པ་དབྱེན་ནི་བྱེད་པ་སྟེ། །རྣམ་སྨིན་འབྲས་བུས་དམྱལ་བར་སྐྱེ་བར་འགྱུར། །རྒྱུ་མཐུན་འབྲས་བུས་གལ་ཏེ་མིར་སྐྱེས་ཀྱང་། །ཉེ་དུ་ཀུན་དང་མི་འཁྱམས་བྱེ་བྲལ་མང་། །དབང་གི་འབྲས་བུས་ས་ཆ་རྩུབ་པ་ཡི། །རི་རོང་གྱེན་ཐུར་འགྲོ་སྟབས་དཀའ་བར་སྐྱེ། །ཚིག་རྩུབ་ཞེས་པ་ཁ་ངན་སྨྲ་བ་སྟེ། །རྣམ་སྨིན་འབྲས་བུས་དམྱལ་བར་སྐྱེ་བར་འགྱུར། །རྒྱུ་མཐུན་འབྲས་བུས་རྒྱ་ལ་མིར་སྐྱེས་ཀྱང་། །སེམས་ལ་གནོད་པའི་གཏམ་ངན་སྨྲ་བ་
མང་། །དབང་གི་འབྲས་བུས་ཆུ་དཀོན་ས་ཆ་དང་། །སྡིག་པ་དར་བའི་ཡུལ་དུ་སྐྱེ་བར་འགྱུར། །ངག་འཁྱལ་ཞེས་པ་དོན་དང་མི་ལྡན་པའི། །ཡིད་ལ་གང་དྲན་ཁ་མང་ལབ་པ་སྟེ། །རྣམ་སྨིན་འབྲས་བུས་དུད་འགྲོར་སྐྱེ་བ་ཡིན། །།རྒྱུ་མཐུན་འབྲས་བུས་རྒྱ་ལ་མིར་སྐྱེས་ཀྱང་། །ངག་ནི་མི་མཐན་ཁ་ནི་བཙོག་པར་འགྱུར། །དབང་གི་འབྲས་བུས་དབྱར་ཁ་འཁྱག་ཅིང་གྲང་། །དགུན་དུས་ཚད་པ་ཆེ་བའི་ཡུལ་དུ་སྐྱེ། །རྫུན་དང་ཕྲ་མ་ཚིག་རྩུབ་ངག་འཁྱལ་བཞི། །ངག་གི་མི་དགེ་རྣམ་པ་བཞི་ཞེས་བྱ། །བརྣབ་སེམས་ཞེས་པ་རང་རྩིས་ཆེ་བ་དང་། །གཞན་གྱི་ནོར་དང་ལོངས་སྤྱོད་མངའ་ཐང་ནི། །རང་ལ་ཡོད་ན་བསམ་པའི་ཡིད་སྨོན་བྱེད། །དེ་ཡི་རྣམ་སྨིན་ཡི་དྭགས་གནས་སུ་སྐྱེ། །རྒྱུ་མཐུན་འབྲས་བུས་གལ་ཏེ་མིར་སྐྱེས་ཀྱང་། །འདོད་པ་ཆེ་ཞིང་ཆོག་ཤེས་མེད་པར་འགྱུར། །དབང་གི་འབྲས་བུས་ལོ་ཐོག་མི་སྨིན་པའི། །ས་ཆ་ངན་པ་ཞིག་ཏུ་སྐྱེ་བ་ཡིན། །གཞན་ལ་གནོད་སེམས་འཆང་བའི་རྣམ་སྨིན་ནི། །དམྱལ་བའི་ཡུལ་དུ་སྐྱེ་བ་ངེས་པའོ། །རྒྱུ་མཐུན་འབྲསབུས་གལ་ཏེ་མིར་སྐྱེས་ཀྱང་། །རང་དབང་མེད་པའི་ཞེ་སྡང་ཅན་དུ་འགྱུར། །དབང་གི་
འབྲས་བུས་ཡུལ་དེའི་ཟས་རྣམས་ཀྱང་། །ཞིམ་མངར་མི་རག་ཁ་ཞིང་རྩུབ་པ་དང་། །ལོག་ལྟ་ཞེས་པ་དགེ་སྡིག་ཕན་གནོད་དང་། །དཀོན་མཆོག་ཐུགས་རྗེ་ཆོས་ཀྱི་ཕན་ཡོན་དང་། །ཐོས་ཀྱང་དེ་ཙམ་མི་བདེན་བཤད་ཚོད་ཡིན། །བསམ་ཞིང་སྨྲ་འདི་དེ་ནི་ལོག་ལྟ་སྟེ། །རྣམ་སྨིན་འབྲས་བུས་དུད་འགྲོར་སྐྱེ་བར་འགྱུར། །རྒྱུ་མཐུན་འབྲས་བུ་གལ་ཏེ་མིར་སྐྱེས་ཀྱང་། །བླུན་རྨོངས་ཅི་ཡང་མི་ཤེས་འགྱའ་ཕོར་འགྱུར། །དབང་གི་འབྲས་བུས་ས་ཆ་དེ་ཕྱོགས་སུ། །ལོངས་སྤྱོད་མེད་ཅིང་ཚོལ་ཁུང་མེད་སར་སྐྱེ། །དེ་ནི་ཡིད་ཀྱི་མི་དགེ་རྣམ་གསུམ་ཡིན། །དེ་ལྟར་མི་དགེ་པ་ཡི་ལས་བཅུ་དེ། །ཞེ་སྡང་དབང་གིས་བྱས་ན་དམྱལ་བར་སྐྱེ། །འདོད་ཆགས་བསམ་པས་བྱས་ན་ཡི་དྭགས་སྐྱེ། །མི་ཤེས་གཏི་མུག་དབང་གིས་མི་དགེ་བྱས། །དེ་ནི་དུད་འགྲོའི་གནས་སུ་སྐྱེ་བ་སྟེ། །དེ་ནི་ཀུན་སློང་བསམ་པའི་ཁྱད་པར་ཡིན། །གྲང་ཁ་མང་དུ་བྱས་ན་དམྱལ་བར་སྐྱེ། །འབྲིང་ཨ་ཙམ་བསགས་པས་ཡི་དྭགས་གནས་སུ་སྐྱེ། །འགའ་ཟུང་ཙམ་ལས་མ་བྱས་དུད་འགྲོར་སྐྱེ། །དེ་ནི་མང་ཉུང་ཁྱད་ཀྱིས་ཡང་ལྗི་ཡིན། །རྐུ་འཕྲོག་ཚིག་ངན་གནོད་སེམས་ལ་སོགས་
པ། །བླ་མ་དགེ་འདུན་ལ་སོགས་བཟང་པོ་ལ། །བྱས་ན་དམྱལ་བའི་གནས་སུ་སྐྱེ་བ་ཡིན། །འབྲིང་ཙམ་བྱས་ན་ཡི་དྭགས་གནས་སུ་སྐྱེ། །མི་ནི་ཐ་མལ་ངན་པ་ལས་བྱས་ན། །དེ་ནི་དུད་འགྲོའི་གནས་སུ་སྐྱེ་བ་ཡིན། །མི་དགེའི་བསགས་ཡུལ་མཐོ་དམན་ཁྱད་པར་རོ། །མི་དགེ་དེ་དག་དང་པོ་བྱེད་བསམ་གཞིག །བར་དུ་བྱས་ཤིང་རྗེས་ནས་འགྱོད་པ་མེད། །དེ་ནི་སྦྱོར་དངོས་རྗེས་གསུམ་ཚང་བ་སྟེ། །དམྱལ་བ་ཡི་དྭགས་གང་དུ་སྐྱེས་པ་ཡི། །ཚེ་ཚད་མ་རྫོགས་བར་དུ་མི་ཐར་ཏེ། །དུད་འགྲོ་ལ་སོགས་ལུས་ངན་དེ་རྣམས་ཀྱང་། །བརྒྱུད་མར་སྐྱེ་བ་ལྔ་བརྒྱ་ཚང་བར་ལེན། །རྗེས་ནས་འགྱོད་ཅིང་བཤགས་པ་བྱས་ན་ནི། །དམྱལ་བ་ཡི་དྭགས་ཚེ་ཕྱེད་རྫོགས་ནས་ཐར། །ལུས་ངན་ལེན་པ་ཕྱེད་དང་སུམ་བརྒྱས་ཆོག །དང་པོ་སྡིག་དེ་བྱེད་བསམ་མེད་པ་ལ། །བར་དུ་རེད་ཤོར་རྗེས་ནས་འགྱོད་ཅིང་བཤགས། །དམྱལ་བ་ཡི་དྭགས་རྣམས་སུ་སྐྱེས་པ་ན། །ཡུན་རིང་མི་ཐོག་མྱུར་དུ་ཐར་འགྱུར་ཞིང་། །ལུས་ངན་དུད་འགྲོའང་སྐྱེ་བ་འགའ་རེས་ཆོག །སྲོག་བཅད་པ་ཡི་སྲོག་གི་ལན་ཆགས་ནི། །བཤགས་ཀྱང་མི་དག་སྐྱེ་བ་དགུ་བརྒྱ་དང་། །དགུ་
བཅུ་གོ་དགུར་རང་ཉིད་འཆི་རྐྱེན་བྱེད། །དེ་ལྟར་མི་དགེ་བཅུ་ཡི་འབྲས་བུ་དེ། །སྡོམ་པ་ཞུས་དང་མ་ཞུས་ཁྱད་པར་མེད། །སྐྱེས་པ་བུད་མེད་བན་བོན་ཁྱད་པར་མེད། །སུ་ཡིས་བྱས་ཀྱང་འབྲས་བུ་དེ་རྣམས་འབྱུང་། །སྡོམ་པ་ཞུས་པས་བྱས་ན་དེ་ཡི་སྟེང་། །སངས་རྒྱས་བཀའ་བཅག་འབྲས་བུ་འབུམ་འགྱུར་ཐུ། །བྱ་དང་རི་དྭགས་གཅན་གཟན་དུད་འགྲོ་སོགས། །མཐའ་འཁོབ་མི་ཡིས་མ་ཤེས་བྱས་པ་ནི། །དེ་ཉིད་ལྷག་པར་ཉེས་སྒྲིབ་ཆེ་བ་ཡིན། །མི་ཤེས་པ་ཉིད་ཉེས་པ་ཆེ་བ་སྟེ། །དུད་འགྲོ་གཏི་མུག་ཆེ་བས་དམན་ཞེས་གསུངས། །དེང་སང་སྡོམ་པ་ཞུས་པས་མི་ཚངས་སྤྱོད། །བྱས་ན་སྡོམ་པ་ཤོར་ཞེས་ཉེས་ཆེར་རྩི། །སྡོམ་པ་མ་ཞུས་སྐྱེ་བོ་ཕོ་མོ་ཡི། །མི་ཚངས་སྤྱོད་ལ་ཉེས་པ་མེད་བསམ་སྟེ། །ཡང་ལྗི་མ་གཏོགས་ཉེས་པ་ཡོད་པ་མཉམ། །སྡོམ་པ་ཞུས་པས་མི་དགེ་གང་བྱས་དེ། །བཅས་པའི་ཁ་ན་མ་ཐོའི་ལྟུང་བ་སྟེ། །སྡོམ་པ་ཤོར་རལ་ཚུལ་ཁྲིམས་འཆལ་ཞེས་བྱ། །སྐྱེ་བོ་ཕོ་མོའི་མི་དགེ་དེ་དག་བྱས། །རང་བཞིན་ཁ་ན་མ་ཐོའི་སྡིག་པ་སྟེ། །མིང་ལ་སྡིག་པ་བྱས་ཞེས་མིང་གི་ཁྱད། །དོན་ལ་ངན་སོང་རྒྱུ་ཡིན་ཁྱད་པར་མེད། །དེ་
དོན་དམ་ཆོས་དགོངས་པ་གཅིག་པ་ལས། །ཁམས་གསུམ་བླ་མས་འགྲོ་བ་སྤྱི་ལ་བཅས། །བཅས་རང་ཁ་ནས་མ་ཐོ་གཅིག་ཅེས་གསུངས། །དེང་སང་སྡོམ་པ་ཤོར་བ་རྣམས་ཀྱིས་ཀྱང་། །ལན་གཅིག་མོ་སྡོམ་ལ་སོགས་ཤོར་ཕྱི་ནས། །ཁྱོད་མེད་བསམ་ནས་མི་ནག་བྱེད་ལུགས་ཏེ། །དཔེར་ན་སྲོག་བཅད་ཇི་ལྟར་མང་བ་བཞིན། །སྡིག་པ་ཆེ་ཞིང་མང་བ་དེ་བཞིན་དུ། །མི་ཚངས་སྤྱོད་དང་རྐུ་འཕྲོག་རྫུན་རྣམས་ཀྱང་། །ཇི་ལྟར་མང་བཞིན་སྡིག་ཆེ་དམྱལ་ཚབས་ཆེ། །ལན་གཅིག་སྡོམ་པ་ཤོར་ནས་སྡིག་ཆེ་ཡང་། །སྡོམ་པ་ཤོར་ཝིག་འོང་རྒྱུ་མེད་བསམ་ནས། །སྡོམ་རོ་དེ་ཉིད་ཕུལ་བར་མ་བྱས་པར། །མི་ཚངས་སྤྱོད་སོགས་ལན་གྲངས་དུ་བྱས་པར། །དེ་ཡི་གྲངས་མཉམ་སྡོམ་པ་ཤོར་བ་ཡི། །སྡིག་པ་སོ་སོར་ཡོད་པར་གསུངས་པ་ཡིན། །རང་གིས་སྡིག་པ་བྱེད་བསམ་མེད་ན་ཡང་། །མི་བྱེད་ཀ་མེད་རྐྱེན་ངན་བྱུང་བ་དང་། །རང་གི་མ་ལེན་གཞན་གྱིས་ལེན་པ་སོགས། །ཡིན་ཡང་སྡིག་པ་མེད་ཅིང་ཆུང་མི་འགྱུར། །རང་དོན་མིན་པར་སྡེ་དང་དཔོན་གྱི་དོན། །སྡིག་པ་བྱས་ཀྱང་ཁུར་རོགས་བྱེད་མི་འགྱུར། །གང་བྱས་རང་ཐོག་མིན་པར་སྨིན་ས་མེད། །དེ་དོན་
འདྲེན་མཆོག་ཆོས་ཀྱི་དབང་ཕྱུག་གིས། །སྤང་བླང་རང་ལ་དོ་གལ་ཆེ་བ་ལས། །ཡུལ་དང་རྐྱེན་ཁག་ལེ་ལེན་བརྡའ་རྒྱུ་མེད། །གསུངས་པ་དེ་ཡང་དེ་ཡི་དོན་ལ་དགོངས། །རང་ལ་ཉམས་ལེན་རྟོགས་པ་བཟང་པོ་ཡོད། །རྒྱུ་འབྲས་ཕྲ་ཞིབ་མི་གནོད་བསམ་མི་རུང་། །བལྟ་བ་རྣམ་དག་སྤྱོད་པ་རྩིང་བ་དེ། །དམྱལ་བ་ཡི་དྭགས་རྣམས་སུ་ཉྙམི་སྐྱེ་སྟེ། །ཕྱི་མ་ཀླུ་ཡི་ལུས་སུ་སྐྱེ་འགྱུར་ཞེས། །རྒྱ་མཚོས་ཞུས་པའི་མདོ་ལས་ཐུབ་པས་གསུངས། །སྡིག་པ་མི་དགེ་ཆེ་ཁོག་སྤངས་ཐུབ་ན། །ཆུང་ཆུང་རེ་ཡིས་མི་དོགས་ཝི་བསམ་མི་རུང་། །དགེ་སློང་རོགས་ལ་སྤྲེའུ་འདྲ་སྨྲས་པས། །སྤྲེའུ་སྐྱེ་བ་ལྔ་བརྒྱ་བླངས་པ་དང་། །ཕག་མོ་གྲུ་པ་སྒོམ་ཆེན་ལ་སྐྱེས་ཚེ། །སྤྲེའུའི་ཆགས་པ་སྤྱོད་མཐོང་འདོད་ཆགས་སྐྱེས། །ཐིག་ལེ་ཤོར་ལ་བཤགས་པ་མ་བྱས་པས། །སྤྲེའུ་སྐྱེ་བ་འགའ་ཟུང་ལེན་དགོས་བྱུང་། །སྡིག་པ་ཆུང་ཡང་བཤགས་པ་མ་ཐེང་ན། །དུག་ནི་ཆུང་ངུའི་གཟེར་ཆེན་ཨ་འབྱུང་དང་འདྲ། །དེས་ན་ཉེས་ལྟུང་ཕྲ་ཞིབ་བྱུང་ན་ཡང་། །དེ་མ་ཐག་ཏུ་བཤགས་ན་མཁས་པ་ཡིན། །དེ་རྣམས་ཐབས་ནི་ཟབ་མོའི་མ་ཟིན་པའི། །མི་དགེ་བ་ཡི་ལས་དང་རྒྱུ་
འབྲས་སོགས། །སེམས་བསྐྱེད་སྟོབས་ཆེ་གསང་སྔགས་ཐབས་ཟབ་མོས། །ཟིན་ན་མི་དགེའི་ལས་རྣམས་དགེ་བར་འགྱུར། །རང་གི་འདོད་པ་ཁོ་ན་མ་ཡིན་པར། །སངས་རྒྱས་བསྟན་དང་རྩ་བའི་བླ་མའི་དོན། །བསྒྲལ་བའི་ཞིང་བཅུ་ཚང་བའི་དགྲ་བོ་དེ། །ཞེ་སྡང་མིན་པར་སྡིག་འཕྲོ་གཅོད་པའི་ཕྱིར། །དྲག་སྔགས་སྟོབས་ཀྱིས་བསྒྲལ་ནས་རྣམ་ཤེས་དེ། །ངན་སོང་སྒོ་གཅོད་ཐར་པར་འདྲེན་ཐུབ་ན། །སྲོག་གཅོད་གྲངས་མེད་བྱས་ཀྱང་བསོད་ནམས་ཆེ། །དེ་ལ་དགོངས་ནས་མཐུ་གཏད་རྫས་ངན་གསུངས། །ཉོན་མོངས་འདོད་ཆགས་དབང་གི་མ་ཡིན་པར། །རྩ་རླུང་རང་དབང་ཐོབ་ནས་གསང་སྔགས་ཀྱི། །ཚེ་གཅིག་རྡོ་རྗེ་འཆང་ཆེན་འགྲུབ་འདོད་པས། །རང་གི་ཐེག་ལེ་དབང་ཐོབ་ཉམས་དོགས་མེད། །བུད་མེད་ཌཀིའི་ཐིག་ལེ་དམར་པོ་དེ། །ཡར་ལ་དྲངས་པས་བཀྲག་མདངས་ཉམས་རྟོགས་འཕེལ། །དགའ་བ་བཞི་ཡི་ཡེ་ཤེས་དངོས་སུ་རྟོགས། །རང་ཉིད་རྡོ་རྗེ་འཆང་དང་རྟོགས་པ་མཉམ། །བུད་མེད་དེ་ཡང་ཡེ་ཤེས་མཁའ་འགྲོ་འགྱུར། །དེ་འདྲའི་བུད་མེད་བརྒྱ་སྟོང་སྤྱོད་ན་ཡང་། །སྡོམ་པ་མི་འཆོར་ས་ལམ་མྱུར་དུ་བགྲོད། །དེ་ཕྱིར་
རྩ་རླུང་ཆགས་ལམ་གསུངས་པ་ཡིན། །རང་གིས་ཟ་ཕྱིར་སྒེས་མནོག་མ་བསམ་པ། །དཀོན་མཆོག་མཆོད་དང་དཀྱིལ་འཁོར་སྒྲུབ་པའི་རྫས། །བླ་མ་ལ་འབུལ་ལྷ་བྲི་ཆོས་བཞེངས་ཕྱིར། །ཕྱུག་པོ་སེར་སྣས་བཅིངས་བའི་ནོར་བླངས་ཏེ། །དགེ་ཕྱོགས་བཏང་བས་རང་གཞན་གཉིས་ཀ་འཚེང་། །དེ་ལ་དགོངས་ནས་དབང་སྡུད་ནོར་སྒྲུབ་གསུངས། །མུ་སྟེགས་རྒྱལ་པོ་རྒྱལ་ཕྲན་ལ་སོགས་པས། །མང་པོ་ཁ་མཐུན་བསྟན་པ་རྩད་ནས་བརླགས། །དེ་དག་བྱེད་ན་བསྟན་ལ་གནོད་མི་ཐུབ། །དེ་ལ་དགོངས་ནས་རླུང་། དམར་ལ་སོགས་པའི། །བྱེ་ཞིག་གཏོར་བའི་ཕུང་བཤིགས་མང་པོ་གསུངས། །སྡོམ་ལྡན་དགེ་སློང་དགེ་ཚུལ་ལ་སོགས་པས། །ཤ་ཆང་དགོང་ཟས་ལྟུང་བ་ཆེ་ན་ཡང་། །ཟ་ཕྱིར་མ་བསམ་ཤུགས་འབྱུང་བྱུང་བ་ཡིན། །ཚོགས་འཁོར་དམ་རྫས་ཤ་ཟན་བརྒྱག་ཀྱང་རུང་། །ཆང་ནི་བྷན་གང་བས་མི་མང་བ། །ཆོ་ག་ཚང་ཞིང་ཚོགས་འཁོར་བྱས་ནས་ནི།། སུ་རང་ལུས་ལྷར་གསལ་ལུས་དཀྱིལ་གསལ་བར་བསྒོམ། །དམ་རྫས་བདུད་རྩི་ངེས་ཤེས་ལྡན་པ་ཡིས། །ལུས་ལྷ་མཆོད་ཕྱིར་ཟ་འཐུངས་བྱས་པ་ན། །ཉེས་པ་མེད་དེ་བསོད་ནམས་
ཚོགས་ཆེན་རྫོགས། །དེ་ཕྱིར་ཤ་ཆང་ཚོགས་འཁོར་གསུངས་པ་ཡིན། །དེ་དག་མི་དགེའི་གཟུགས་ཅན་དགེ་བ་ཡིན། །སེམས་བསྐྱེད་མ་ཤེས་བསམ་པ་ངན་པ་ཡི། །དགེ་བ་བྱས་ཀྱང་སྡིག་པར་འགྱུར་སྐབས་ཡོད། །དེ་བྱས་གཏམ་དང་མི་ཁ་གྲགས་འདོད་དང་། །གཞན་མ་རྣམས་དང་འགྲན་པ་གླག་ཚད་ནས། །ཡར་མཆོད་མར་སྦྱིན་ལྷ་བཞེངས་ཆོས་བྲིས་པ། །མཚམས་དང་སྒྲུབ་པ་སྔགས་བསྙེན་དུང་ཕྱུར་སོགས། །ཕན་ཡོན་ཆེན་པོ་མི་འབྱུང་འཕྲོ་བརླག་འདྲ། །དབུལ་པོ་གཉོམ་ཆུང་ཁྲལ་དང་ཨར་པོས་མནར། །ཆེན་པོ་ཚོརྣམས་ཀྱིས་ས་གཞིའི་ལོངས་སྤྱོད་འཕྲོག །དེས་བྱས་འགྲན་ཟླས་ལྷ་ཁང་དགོན་སྡེ་བཙུགས། །དགོན་པ་དེ་ཡང་དམག་མིའི་འདུ་ཤེས་ཀྱིས། །འོབ་དང་ལྕགས་རི་གོ་མཚོན་ཁྲལ་འཇོག་པ། །དཀར་པོ་དགེ་བ་སྡིག་པའི་སྙིང་པོ་ཅན། །དེ་བས་དགེ་མེད་སྡིག་མེད་དགའ་བོ་ཞེས། །ཨོ་རྒྱན་ཆེན་པོའི་རཏྣའི་གཏེར་ཁར་གསུངས། །འོན་ཀྱང་སྔོན་ཚེ་ཤཱཀྱ་ཐུབ་པ་ཉིད། །བརྒྱ་བྱིན་ལྷ་ཡི་རྒྱལ་པོར་སྐྱེས་པའི་ཚེ། །འཛམ་གླིང་མི་རྣམས་མི་དགེའི་སྡིག་ལ་དགའ། །དམ་ཆོས་བཤད་ཀྱང་ཉན་མཁན་མེད་པའི་དུས། །བརྒྱ་བྱིན་དེ་ཡིས་
སྙིང་རྗེ་ཆེན་པོ་སྐྱེས། །སྲིན་པོ་འཇིགས་རུང་མི་རྣམས་ཟ་བར་སྤྲུལ། །མི་དགེ་སྡིག་པ་སུས་བྱས་ཟ་བར་ཤོམ། །དགེ་བ་སུས་བྱས་མི་ཟ་སྨྲས་པ་ཡིས། །འཛམ་གླིང་མི་ཀུན་དགེ་བ་བཅུ་ལ་སྤྱོད། །དེ་བཞིན་སེམས་དཔའ་ཆེན་པོའི་སྤྲུལ་པ་ཡིས། །མི་རྣམས་དབང་མེད་ཆོས་ལ་བཀོད་ན་ནི། །དེ་ནི་དཔག་ཏུ་མེད་པའི་དགེ་བ་སྟེ། །དེ་ཡང་མཐོན་པོ་རྣམས་ནི་དེ་དང་འདྲ། །ཡིན་པའི་རྩིས་ཡིན་དེ་འདྲ་ཡིན་ཤས་ཆེ། །དེ་ཕྱིར་གཤེ་སྐུར་མི་རུང་དག་སྣང་སྦྱངས། །གཞན་སྐྱོན་མི་བལྟ་རང་སྐྱོན་ཡང་ཡང་བརྟག །དེ་ཡིས་རང་རྒྱུད་གཙང་བའི་གདམས་ངག་ཟབ། །མི་དགེ་བཅུ་ཡི་ལས་འབྲས་བཤད་པ་ནི། །ལམ་གླུ་རིང་མོ་རཱ་ག་ཨ་སྱ་ཡིས། །ཆུ་སྟོད་ཟླ་བའི་བཅུ་གསུམ་ཉིན་པར་བྲིས། །མངྒ་ལཾ།། ༈ །།ན་མོ་སརྦ་ཛྙཱ་ན་ཤཱཀྱ་མུ་ནེ་ཡེ། མི་དགེ་བཅུ་སྤང་དགེ་བཅུ་བསྒྲུབས་པ་ཡིས། །སྲོག་གཅོད་སྤང་ཞིང་གཞན་གྱི་སྲོག་བསྐྱབས་བྱས། །དེ་ཡི་རྣམ་སྨིན་འབྲས་བུ་ལྷ་མིར་སྐྱེས། །རྒྱུ་མཐུན་འབྲས་བུས་ཚེ་རིང་ནད་མེད་ཅིང་། །དབང་གི་འབྲས་བུས་ཡུལ་དེ་བཀྲ་ཤིས་སྐྱིད། །མ་བྱིན་ལེན་སྤང་ལྷ་མི་ཕྱུག་
པོར་སྐྱེ། །རྒྱུ་མཐུན་འབྲས་བུས་ལོངས་སྤྱོད་རྟག་ཏུ་ལྡན། །དབང་གི་འབྲས་བུ་རྟག་ཏུ་ལོ་ལེགས་པར། །མི་ཚངས་སྤྱོད་སྤང་ཚུལ་ཁྲིམས་སྲུང་བའི་མི། །རྣམ་སྨིན་འབྲས་བུས་ལྷ་མིའི་ལུས་བཟང་ཐོབ། །རྒྱུ་མཐུན་འབྲས་བུས་བུད་མེད་ལུས་མི་ལེན། །དབང་གི་འབྲས་བུས་སྐྱེས་པའི་ཡུལ་དག་ལ། །བསིལ་དྲོད་སྙོམ་ཞིང་སྐྱིད་པའི་ས་རུ་སྐྱེ། །རྫུན་སྤང་བདེན་ཞིང་དྲང་བར་སྨྲས་པའི་མི། །རྣམ་སྨིན་འབྲས་བུས་མི་ཆེན་རིགས་སུ་སྐྱེ། །རྒྱུ་མཐུན་འབྲས་བུས་ཀུན་གྱིས་བསྟོད་ཅིང་བཀུར། །དབང་གི་འབྲས་བུས་ལུས་ནི་དྲི་ཞིམ་ཟློབྲོ། །དེ་ཡིས་གང་ཟེར་ཀུན་གྱིས་བདེན་པར་རྩི། །ཕྲ་མ་སྤང་ཞིང་གཞན་དག་འཁོན་པ་སྡུམ། །དེ་ཡི་རྣམ་སྨིན་འབྲས་བུས་ལྷ་མིར་སྐྱེ། །རྒྱུ་མཐུན་འབྲས་བུས་སུ་དང་བྱེ་བྲལ་མེད། །དབང་གི་འབྲས་བུ་ཡུལ་དེར་འཇིགས་སྐྲག་མེད། །ཚིག་རྩུབ་སྤང་ཞིང་ངག་ནི་འཇམ་པ་ཡི། །རྣམ་སྨིན་འབྲས་བུས་ལྷ་དང་མིར་སྐྱེས་ཏེ། །རྒྱུ་མཐུན་འབྲས་བུས་སྙན་གྲགས་ཆེན་པོ་ཐོབ། །དབང་གི་འབྲས་བུས་མཛའ་བཤེས་མང་བར་འགྱུར། །ངག་འཁྱལ་སྤང་ཞིང་དོན་དང་ལྡན་པར་སྨྲ། །དེ་ཡི་རྣམ་སྨིན་ལྷ་དང་མི་རུ་སྐྱེ། །རྒྱུ་མཐུན་འབྲས་
བུས་རིགས་བཟང་ཚིག་བཙུན་འགྱུར། །དབང་གི་འབྲས་བུས་ཡུལ་སྐྱིད་གནོད་འཚེ་མེད། །བརྣབ་སེམས་སྤང་ཞིང་འདོད་ཆུང་ཆོག་ཤེས་ཀྱི། །རྣམ་སྨིན་འབྲས་བུས་ལྷ་མིའི་ལུས་སུ་སྐྱེ། །རྒྱུ་མཐུན་འབྲས་བུས་སུས་ཀྱང་དེ་མི་ཐུབ། །དབང་གི་འབྲས་བུས་ཅི་བསམ་ཐམས་ཅད་འགྲུབ། །གནོད་སེམས་སྤང་ཞིང་བྱམས་པ་བསྒོམས་པ་ཡི། །རྣམ་སྨིན་འབྲས་བུས་ལྷ་མི་སྟོབས་ཆེན་སྐྱེ། །རྒྱུ་མཐུན་འབྲས་བུས་གཞན་གྱིས་གནོད་མི་ནུས། །དབང་གི་འབྲས་བུས་སེམས་ཅན་དགའ་ཞིང་འདུ། །ལོག་ལྟ་སྤངས་པས་ལྷ་རིགས་ལུས་སུ་སྐྱེ། །རྒྱུ་མཐུན་འབྲས་བུས་གོ་བ་ཤེས་རབ་ཆེ། །དབང་གི་འབྲས་བུས་ཡུལ་དུ་ལོངས་སྤྱོད་ཕྱུག །དེ་ལྟར་མི་དགེ་བཅུ་སྤང་དགེ་བཅུ་བསྒྲུབ། །དེ་ལ་བསམ་པ་བསྔོ་སྨོན་ཁྱད་པར་གྱིས། །དེ་རྣམས་འབྲས་བུ་ཆེ་ཆུང་འབྲིང་གསུམ་འབྱུང་། །ཕྱི་མ་ལྷ་མིའི་བདེ་སྐྱིད་ཐོབ་འདོད་ཀྱི། །བསམ་པས་ཀུན་བསླངས་སྨོན་ལམ་དེ་བཏབ་ལན། །དེ་ཡང་མི་རུ་སྐྱེ་བར་འདོད་པ་ནི། །དེ་ཡང་དགེ་བ་ཆེ་ཆུང་ཁྱད་པར་གྱིས། །རབ་ལ་འཁོར་ལོས་སྒྱུར་བའི་རྒྱལ་པོ་སྟེ། །དེ་ལ་གླིང་བཞི་དབང་དང་གླིང་གསུམ་དབང་། །
གླིང་གཉིས་དབང་དང་གླིང་གཅིག་དབང་བ་དང་། །འཛམ་གླིང་ཕྱེད་ལ་དབང་སྒྱུར་རྒྱལ་པོ་དང་། །ཁམས་ཀྱི་རྒྱལ་ཕྲན་ཞེས་བྱ་རྒྱལ་པོའོ། །དེ་འོག་བྲམ་ཟེ་ཆེ་ཞིང་བཟང་བ་དང་། །དེ་འོག་བློན་པོ་དེ་འོག་ཚོང་དཔོན་དང་། །དེ་འོག་ཕྱུག་པོ་དེ་མན་ཕལ་པ་དང་། །དེ་འདྲའི་རིགས་ཀྱི་དལ་འབྱོར་མི་ལུས་ཐོབ། །ལྷ་རུ་སྐྱེས་འདོད་དགེ་བ་བྱས་པ་ཡང་། །སྟོང་གསུམ་དབང་སྒྱུར་ཚངས་པ་ཆེན་པོ་དང་། །གླིང་བཞི་རི་རབ་དབང་བ་བརྒྱ་བྱིན་དང་། །གཞན་འཕྲུལ་དབང་བྱེད་དགའ་ལྡན་འཕྲུལ་དགའ་དང་། །འཐབ་བྲལ་སུམ་རྩེན་རྒྱལ་ཆེན་བཞི་ཡི་ལྷ། །ཕྲེང་ཐོགས་རྟག་མྱོས་གཞོང་ཐོགས་ལ་སོགས་པ། །བསོད་ནམས་དགེ་རྩ་ཆེ་ཆུང་ལ་དཔག་པའི། །འདོད་ལྷ་དྲུག་པོ་རྣམས་སུ་སྐྱེ་བ་ལེན། །དེ་དག་སྐྱེ་བ་རེ་རེ་མ་ཡིན་ཏེ། །སྦྱོར་དངོས་རྗེས་ཚང་དགེ་བ་རེ་རེས་ཀྱང་། །ལྷ་ལུས་མི་ལུས་ལྔ་བརྒྱ་བརྒྱུད་མར་ལེན། །དེ་དག་གནས་སྐབས་བདེ་སྐྱིད་ཆེ་ན་ཡང་། །བར་སྐབས་སྐྱེ་དང་འཆི་བའི་སྡུག་བསྔལ་ཡོད། །མཐར་ནི་བསོད་ནམས་དགེ་རྩ་དེ་ཟད་ནས། །སླར་ཡང་ངན་སོང་གནས་སུ་སྐྱེ་བར་འགྱུར། །དེ་ཕྱིར་ལྷ་མིའི་བདེ་སྐྱིད་ཐོབ་པའི་
ཕྱིར། །དགེ་བཅུ་བྱས་ཀྱང་ནམ་ཕུག་ངན་པ་ཡིན། །རང་ཉིད་འཁོར་བའི་གནས་ནས་ཐར་འདོད་ཕྱིར། །དགེ་བ་བྱས་ན་མཐར་ནི་དགྲ་བཅོམ་ཐོབ། །དེ་ནས་འཁོར་བ་འདི་ལ་ལུས་མི་ལེན། །དེ་ཉིད་མ་ཐོབ་བར་གྱི་སྐྱེ་བ་ལེན། །ལྷ་ལུས་མི་ལུས་ཆོས་དང་ལྡན་པར་སྐྱེ། །དེ་ནི་ཐེག་དམན་ལུགས་ཏེ་འབྲིང་པོ་ཙམ། །སེམས་ཅན་ཐམས་ཅད་སངས་རྒྱས་ཐོབ་པའི་ཕྱིར། །དགེ་བ་ཆུང་ངུ་བྱས་ཀྱང་ཆེན་པོར་འགྱུར། །བསྐལ་པ་ཆེན་པོ་གྲངས་མེད་གསུམ་གྱི་བར། །ལྷ་ལུས་མི་ལུས་ཆོས་ལྡན་ཁོ་ན་ལེན། །གལ་ཏེ་རེས་འགའ་དུད་འགྲོའི་ལུས་བླངས་ཀྱང་། །རིགས་མཐུན་དུད་འགྲོ་རྣམས་ལ་ཆོས་འཆད་ཤེས། །དེ་ཡི་ཤ་ཁྲག་རུས་པ་ལྤགས་པ་ཡང་། །སུ་ཡིས་སྤྱོད་པ་རིམ་གྱིས་འདྲེན་པར་བྱེད། །མཐར་ནི་བླ་མེད་རྫོགས་པའི་སངས་རྒྱས་ཐོབ། །དེ་བར་བདེ་སྐྱིད་དཔག་མེད་ཅི་མྱོང་ཡང་། །དགེ་བ་ཆུང་ངུ་རེ་ཡང་ཟད་པ་མེད། །དེ་ནི་སེམས་བསྐྱེད་བསྔོ་སྨོན་ལ་ནུས་པ་ཡིན། །བསྔོ་བ་མ་ཐོན་གོང་དུ་དགེ་བ་རྣམས། །འགྱོད་པ་སྐྱེས་ཀྱང་གཞན་ལ་ངོམས་པ་དང་། །ཁོང་ཁྲོ་དྲག་པོ་སྐྱེས་ཀྱང་དགེ་རྩ་ཟད། །བསྔོ་བ་ཚར་ནས་ཟད་རྒྱུ་མེད་
པའོ། །དགེ་བ་བཅུ་ཡི་རྣམ་དབྱེ་མདོར་བསྡུས་གླུ། །རྟ་ལོ་སྤྲེལ་ཟླའི་དམར་པོའི་ཚེས་ལྔ་ལ། །ནམ་མཁའ་དྭངས་བཞིན་སྤྲོ་བས་བྲིས་པའོ།། ན་མོ་ཤཱཀྱ་མུ་ནེ་ཡེ། སྲོག་བཅད་མ་བྱིན་ལེན་དང་མི་ཚངས་སྤྱོད། །རྩ་བ་བཞི་ལ་ཉེས་པ་བཅུ་རེ་གསུངས། །ཆང་ལ་ཉེས་པ་དྲུག་ཅུ་ཐམ་པ་གསུངས། །ཆང་གི་མི་དགེ་བཅུ་ཡི་སྣ་འདྲེན་བྱེད། །ཆང་འཐུང་རྣམ་སྨིན་དམྱལ་བ་ངུ་འབོད་དུ། །ཁྲོ་ཆུ་ཁོལ་མ་ཁོ་ན་འཐུང་བར་སྐྱེ། །རྒྱུ་མཐུན་འབྲས་བུས་གནོད་སྦྱིན་གདུག་པ་ཅན། །ཆང་ལ་དགའ་བའི་རྒྱལ་འགོང་རིགས་སུ་སྐྱེ། །དབང་གི་འབྲས་བུ་གལ་ཏེ་མིར་སྐྱེས་ན། །སྨྱོན་པ་ཁོ་ནའི་སྐྱེ་བ་ལྔ་བརྒྱ་ལེན། །ཆང་ནི་སྤངས་པའི་རྣམ་སྨིན་གྱིས། །འབྲས་བུ་དག་པའི་ཞིང་དུ་སྐྱེ། །རྒྱུ་མཐུན་འབྲས་བུས་སྐྱེ་བ་ཀུན། །ཆོས་ལྡན་མཉམ་བཞག་བསྒོམ་པར་སྐྱེ། །དབང་གི་འབྲས་བུས་སྐྱེ་བ་ཀུན། །བག་ཡོད་ཚུལ་ཁྲིམས་ལྡན་པར་སྐྱེ། །ཚོགས་ཆང་མ་གཏོགས་ཆང་ནི་གང་འཐུང་བ། །སྐྱེ་བོ་རྣམས་ལ་ཉེས་པ་དེ་རྣམས་འབྱུང་། །སྡོམ་པ་ཞུས་པས་ཆང་འཐུང་འབུམ་འགྱུར་ཐུ། །ཚོགས་ཆང་བྷནྡྷ་གང་ལས་མི་མང་བ། །ཐིགས་པ་ལྕེ་ལ་
བཞག་པ་དམ་ཚིག་སྟེ། །དེ་མ་བྱས་ན་སྔགས་ཀྱི་དམ་ཚིག་ཉམས། །དམྱལ་བ་ཆུ་བུར་ཅན་དུ་སྐྱེ་བར་གསུངས། །སྐྱེ་བོ་ཡིན་ན་ཆང་ནི་བཅད་ན་ནི། །བཙུན་པས་ཆང་འཐུང་བདུད་ཀྱི་བར་ཆད་ཡིན། །དེ་སྐད་དགེ་སློང་རཱ་ག་ཨ་སྱས་སྨྲས།། ༈ །།ན་མོ་མ་ཧཱ་ཀ་རུ་ཎི་ཀ་ཡེ། བསྔོས་ཤ་ཟོས་ན་དམྱལ་བ་ནི། །ངུ་འབོད་ཆེན་པོར་སྐྱེ་བར་གསུངས། །བསྔོས་ཤ་དེ་ཉིན་ཟོས་པ་དེས། །མནར་མེད་དམྱལ་བར་སྐྱེ་བ་སྟེ། །ནད་པར་ཕན་ཕྱིར་རྩི་ཤ་བྱས། །དེ་ནི་ལྷག་པར་སྡིག་པ་ལྗི། །ཞི་ཁྲོའི་ཆོ་ག་ཚོགས་བརྒྱ་དང་། །ཆོས་འདོན་བྱ་ཕྱིར་བསྔོས་ཤ་བྱས། །དུད་འགྲོ་དེ་ཉིད་བདེ་འགྲོར་སྐྱེ། །ཚེ་འདས་གསོན་པོ་སུ་ཡི་དོན། །བསྔོས་པ་དེ་ནི་དམྱལ་བར་སྐྱེ། །ཤི་བའི་ཤ་དང་ཚོང་འདུས་ནས། །སྙེམ་མེད་བྱུང་ན་ཉེས་པ་ཆུང་། །ཤ་ནི་ཟོས་པའི་རྒྱུ་མཐུན་འབྲས། །སྲིན་པོ་ཕྲ་མེན་མ་རུངས་པ། །གནོད་པ་བྱེད་པའི་འདྲེ་རུ་སྐྱེ། །ཤ་ཟོས་ལ། དབང་གི་འབྲས་བུ་ནི། །སེང་གེ་སྟག་གཟིག་སྤྱང་ཀི་དང་། །བྱི་ལ་ཝ་སོགས་གཅན་གཟན་དུ། །སྐྱེ་བ་དུ་མར་ལེན་པར་གསུངས། །བསྔོས་ཤ་མ་ཡིན་པ་ཡི་ཤ། །ཚོགས་ཤ་
བྱས་ལ་ཉེས་པ་མེད། །དུད་འགྲོ་དེ་ཡང་མཐོ་རིས་སྐྱེ། །ཤ་སྤངས་པ་ཡི་རྣམ་སྨིན་གྱིས། །ལྷ་དང་བྲམ་ཟེའི་རིགས་སུ་སྐྱེ། །རྒྱུ་མཐུན་འབྲས་བུས་ལྷ་དང་ལྷ་འདྲེས་བསྲུང་། དབང་གི་འབྲས་བུས་དེ་ལ་དཀར་ཕྱོགས་ཀྱི། །ལྷ་རྣམས་འདུ་ཞིང་རིག་སྔགས་རྣམས་ཀྱང་འགྲུབ། །འོན་ཀྱང་ཚོགས་ཀྱི་དམ་རྫ་ས་སྤང་བ་ནི། །དམ་ཚིག་ཉམས་པས་དམྱལ་བར་སྐྱེ་བ་དང་། །མཁའ་འགྲོ་རྣམས་ཀྱི་བཀའ་ཆད་འབྱུང་བའི་ཕྱིར། །ཅུང་ཟད་ཙམ་ཞིག་ལྕེ་ལ་བཞག་པར་བྱ། །ཆང་དང་མི་འདྲ་ཤ་དང་ཚོགས་ཀྱི་ཟན། །ཏིང་འཛིན་ལྡན་པས་བློའགྲང་བར་ཟ་བར་རུང་། །དེ་ཡང་བདུད་རྩི་ཡིན་པའི་ངེས་ཤེས་དང་། །ལུས་དཀྱིལ་མཆོད་པའི་ཏིང་འཛིན་གལ་ཆེ་ཞིང་། །དུད་འགྲོ་དེ་ནི་ཚེ་སྔོན་ཕ་མ་ཡིན། །དེ་ལ་སྙིང་རྗེའི་བསམ་པ་བསྐྱེད་བྱ་ཞིང་། །ཀཾ་ཀ་དང་ནི་པདྨོ་ཨུཏྟཱི་ཥའི། །སྔགས་ཀྱིས་ཟ་འཕྲོའི་ཤ་དང་རུས་པ་བསྔགས། །དུད་འགྲོ་བདེ་བ་ཐོབ་པའི་བསྔོ་སྨོན་བྱ། །ཤ་ཡི་གནང་བཀག་གོ་བདེའི་ཚིགས་བཅད་འདི། །དགེ་སློང་རཱ་ག་ཨ་སྱས་སྨྲས་པའོ།། ༈ །།ན་མོ་མ་ཧཱ་ཀ་རུ་ཎི་ཀ་ཡེ། འཕགས་པ་ཐུགས་རྗེ་ཆེན་པོ་མཁྱེན། །འཛམ་གླིང་མ་
དྲོས་མཚོ་ཡི་འོག །དཔག་ཚད་ཁྲི་ཕྲག་གཉིས་ཀྱི་འོག །མནར་མེད་དམྱལ་བའི་འཇིག་རྟེན་ཡོད། །དེ་འོག་རིམ་པར་ཚ་དམྱལ་བརྒྱད། །རེ་རེའང་དམྱལ་ཕྲན་བཅུ་དྲུག་བསྐོར། །དེ་དག་ཀུན་གྱི་ལྷོ་ངོས་ན། །ལྕགས་མཁར་ནག་པོ་བཅུ་དྲུག་གི །དབུས་ཀྱི་ལྕགས་མཁར་ཆེན་པོ་ན། །གཤིན་རྗེ་ཆོས་ཀྱི་རྒྱལ་པོ་བཞུགས། །དགེ་བ་བྱས་པའི་སེམས་ཅན་ཀུན། །ཞི་བ་སངས་རྒྱས་མཐིང་ཀ་ལ། །གཙུག་ཏོར་ཆོས་གོས་ཅན་དུ་མཐོང་། །སྡིག་པ་གོམས་པ་རྣམས་ཀྱིས་ནི། །མཐིང་ནག་ཞལ་བཞི་ཕྱག་བཞི་པ། །ཞབས་བཞི་ཁྲོ་བོའི་ཆ་ལུགས་མཐོང་། །ཞེ་སྡང་སྦྲུལ་གྱི་མགོ་ཅན་དང་། །གཏི་མུག་ཕག་གི་མགོ་ཅན་དང་། །འདོད་ཆགས་གླང་གི་མགོ་ཅན་སོགས། །ལས་མཁན་གཤིན་རྗེ་བྱེ་བ་འབུམ། །དག་པས་ལྷ་དང་ལྷ་མོར་མཐོང་། །མ་དག་འཇིགས་རུང་གཤིན་རྗེར་མཐོང་། །ཕྱི་རིམ་ལྕགས་མཁར་བཅུ་དྲུག་ན། །གཤིན་རྗེ་ཕོ་བརྒྱད་མོ་བརྒྱད་སྒྱུ་གནས། །ཡ་ཟད་ཤི་གསོན་སོ་མཚམས་ན། །ལས་མཁན་གཏུམ་པོ་རབ་གྲགས་ཡོད། །ཞག་མ་སུམ་བརྒྱ་དྲུག་ཅུ་ལ། །སྲོག་གཅོད་གཤིན་རྗེ་ཕོ་མོ་གཉིས། །ཡོད་པས་
བདུན་བརྒྱ་ཉི་ཤུ་ནས། །ཚེ་སྲོག་གཅོད་པའི་ལས་མཁན་ཡོད། །ཚེ་སྔོན་སྐྱེ་བ་ལེན་ཁ་ལ། །ཅི་ཙམ་འཛམ་གླིང་འདུག་ཆོག་པའི། །གྲངས་ཁ་གཤིན་རྗེའི་ཁྲམ་ཡིག་བྲིས། །དུས་དེ་ནམ་ཐེབ་ཕོ་ཉ་གཏོང་། །དེ་ལ་བསྲིང་ཐབས་མེད་པ་ཡིན། །ཤི་ནས་འོད་གསལ་ཟིན་པ་དང་། །འཕོ་བ་ངེས་པར་ཐེབས་པ་དང་། །གཟུགས་མེད་ཁམས་སུ་སྐྱེ་བ་དང་། །བར་དོ་ངེས་པར་ཆོད་པ་ན། །གཤིན་རྗེའི་ཁྲིམས་ར་འགྲིམ་མི་དགོས། །དེ་མིན་དགེ་སྡིག་འབྱེད་སླ་བ། །གཏུམ་མོ་རབ་གྲགས་གཤག་རལ་བྱེད། །དགེ་སྡིག་སྣ་མང་འབྱེད་དཀའ་ན། །ཆོས་ཀྱི་རྒྱལ་པོའི་དྲུང་དུ་བཏང་། །དེ་ཡང་མང་ཞིག་འབྱེད་དཀའ་ན། །རྒྱ་མ་ཡིག་ཆུང་མེ་ལོང་བལྟ། །དགེ་སྡིག་གང་མང་བལྟ་བ་ལས། །ཐུགས་ཀྱང་ཐུགས་སྡང་འོང་མི་སྲིད། །གཤིན་རྗེའི་རྒྱལ་བློན་དེ་རྣམས་ཀྱང་། །དོན་ལ་སངས་རྒྱས་བྱང་སེམས་ཀྱི། །སྤྲུལ་པ་དགེ་སྡིག་ལུང་སྟོན་མཁན། །སྙིང་རྗེ་ཆེན་པོ་ཡོད་ན་ཡང་། །རང་རེ་ལས་ངན་སྒྲིབ་པ་ཡི། །ཁྲོ་གཏུམ་སྲོག་དབུགས་འཕྲོག་པ་ཡིན། །མ་རུངས་གདུག་པའི་སྲིན་པོར་མཐོང་། །དེ་དག་གནས་དང་ཕོ་བྲང་ཡང་། །རྨི་ལམ་ལྟ་བུ་
མ་ཡིན་ཏེ། །དངོས་སུ་འོག་ཕྱོགས་འདི་ན་ཡོད། །ཚ་དམྱལ་བརྒྱད་ཀྱི་བྱང་གི་ཕྱོགས། །རི་བོ་གངས་ཅན་ཞེས་བྱའི་འོག །དཔག་ཚད་ཉི་ཁྲི་ཆིག་སྟོང་ན། །ཆུ་བུར་ཅན་གྱི་དམྱལ་བ་ཡོད། །དེ་ནས་རིམ་བཞིན་འོག་ཏུ་ནི། །དཔག་ཚད་ཉིས་སྟོང་རེ་རེའི་སར། །གྲང་དམྱལ་བདུན་པོ་རིམ་བཞིན་ཆགས། །དེ་ལྟར་དམྱལ་ཁམས་བཅུ་དྲུག་གི །འོག་གི་བྱང་ཤར་ཕྱོགས་ངོས་ན། །དམྱལ་བ་ཤམ་བྷ་ལ་ཞེས་པ། །མིང་དང་དབྱིབས་དང་སྡུག་བསྔལ་ནི། །ཚ་དམྱལ་བརྒྱད་དང་འདྲ་བ་ལས། །དེ་ལས་བདུན་འགྱུར་སྡུག་བསྔལ་ཆེ། །འདི་ཡང་ཐར་མདོ་སོགས་ནས་གསུངས། །དེ་དག་ཀུན་གྱི་འོག་གི་ཕྱོགས། །རླུང་གི་དཀྱིལ་འཁོར་ཆེན་པོའི་སྟེང་། །རྡོ་རྗེ་དམྱལ་བ་ཞེས་བྱ་བ། །གོང་གི་སྡུག་བསྔལ་དེ་རྣམས་ཀུན། །དུས་གཅིག་ལ་ནི་མྱོང་དགོས་ཤིང་། །ཚེ་ཚད་ནམ་མཁའ་ཇི་སྲིད་བར། །དམ་ཚིག་ཉམས་རྣམས་སྐྱེ་བའི་ས། །དེ་ནི་རྡོ་རྗེ་ལ་དམྱལ་བ་ཞེས། །རྒྱུད་སྡེ་རྣམས་ལས་རྒྱ་ཆེར་གསུངས། །མནར་མེད་རྡོ་རྗེ་དམྱལ་བ་གཉིས། །རྒྱལ་བ་འབྲི་གུང་པ་ཡིས་ནི། །དོན་ལ་གཅིག་པ་བཞེད་ན་ཡང་། །ཚེ་ཚད་
སྡུག་བསྔལ་མི་གཅིག་པས། །སོ་སོར་ཡོད་པར་རྒྱུད་ལས་གསལ། །ད་ལྟ་མི་ལུས་ཐོབ་པ་དང་། །གནས་སྐབས་བདེ་སྐྱིད་ལོངས་སྤྱོད་དང་། །སྐྱེ་རྒ་ན་འཆིའི་སྡུག་བསྔལ་ཡང་། །དོན་ལ་བདེན་པར་མ་གྲུབ་སྟེ། །རང་སྣང་འཁྲུལ་པ་ཁོ་ནར་གསུངས། །དེ་དོན་གོ་བ་ཙམ་ཡོད་ཀྱང་། །སྐྱེ་དང་རྒས་དང་ན་དང་འཆི། །འདྲེ་གདོན་དགྲ་ཡིས་འཚེ་བ་སོགས། །མངོན་སུམ་མྱོང་བར་འདུག་པ་ལྟར། །དམྱལ་བ་འཁྲུལ་སྣང་ཡིན་ན་ཡང་། །དེ་རུ་སྐྱེས་པའི་སེམས་ཅན་ལ། །སྡུག་བསྔལ་ཚོར་བ་དངོས་སུ་ཡོད། །ལུས་ཀྱང་གདོས་བཅས་དངོས་སུ་ཡོད། །རྨི་ལམ་ལྟ་བུ་མ་ཡིན་ནོ། །རྨི་ལམ་ནུབ་གཅིག་ཡུད་ཙམ་ཡིན། །དེ་ལ་ཚེ་ཚད་གསུངས་པ་མེད། །དམྱལ་བའི་ཚེ་ཚད་ཞིབ་པར་གསུངས། །དེ་ཕྱིར་དམྱལ་བའི་འཇིག་རྟེན་ལ། །རང་ཉིད་སྐྲག་པ་བསྐྱེད་པ་དང་། །དེར་སྐྱེས་རྣམས་ལ་སྙིང་རྗེའི་སེམས། །མཆི་མ་འཁྲུགས་པ་ཅི་སྐྱེ་བྱ། །དེ་རུ་ད་ལྟ་སྐྱེས་ཚད་ཀུན། །རང་གི་ཚེ་རབས་མང་པོ་ཡི། །ཕ་མ་ལན་གྲངས་མང་པོ་བྱས། །ཨ་ཙ་མ་ལ་སྙིང་རེ་རྗེ། །དེ་ཕྱིར་དེ་དག་ཐམས་ཅད་ལ། །ཕན་ཕྱིར་བཏང་ལེན་དམིགས་པ་དང་། །ཡི་དམ་
ལྷ་ཡི་འོད་ཟེར་བཀྱེ། །དམྱལ་བའི་ན་རཀ་དོང་སྤྲུགས་ནས། །ཐམས་ཅད་ཐར་པ་ཐོབ་པ་ཡི། །བསྔོ་བ་སྨོན་ལམ་རྒྱ་ཡིས་བཏབ། །དེ་སྐད་རཱ་ག་ཨ་སྱས་སྨྲས། །མངྒ་ལཾ།། ༈ །།ཀྱེ་མ་ཀྱི་ཧུད་ཨ་ཙ་མ། །ཆུ་བུར་མིག་གིས་མ་མཐོང་ཡང་། །རྒྱལ་བའི་གསུང་རབ་དོན་གོ་བས། །དམྱལ་བའི་སྡུག་བསྔལ་ཡིད་ལ་དྲན། །འཛིང་རྩོད་ཞེ་ས་གཅོད་རེས་དང་། །འཐབ་ཅིང་འཁྲུག་པ་བྱས་པ་རྣམས། །ལྕགས་སྲེག་ས་གཞི་མེ་འབར་སྟེང་། །ཐམས་ཅད་འཚོགས་ཤིང་འཐབ་ཅིང་རྩོད། །མཚོན་ཆ་རྣོན་པོ་རྒྱབ་ཅིང་གཅོད། །ཐམས་ཅད་འགྱེལ་ནས་བརྒྱལ་བ་དང་། །སོས་པར་གྱུར་ཅིག་ཟེར་བའི་སྒྲ། །གྲགས་པས་སོས་ནས་སྔར་ལྟར་གཅོད། །གཞན་ཡང་བརྡུང་ཞིང་བཅོམ་ནས་འཆི། །སླར་ཡང་སོས་ནས་བརྡུང་བ་དང་། །ལྕགས་རིས་བསྐོར་བའི་ནང་དུ་ནི། །མཚོན་ཆ་མེ་འབར་ཆར་པ་འབབ། །ལྕགས་ཟངས་མེ་འབར་ནང་དུ་བཙོ་། །ཤིང་སྡོང་མེ་འབར་བར་དུ་བཙིར། །མུན་ཁང་ནང་དུ་རང་ཉིད་ཀྱི། །སྤུ་ལ་མེ་འབར་རང་ལུས་ཚིག །བྱ་དང་འབུ་སྲིན་མང་པོས་ཟ། །གོས་ལ་མེ་འབར་ལུས་པོ་
སྲེག །དེར་སྐྱེས་སེམས་ཅན་རྣམས་ཀྱིས་ནི། །ཆུ་གྲི་ཤང་ལང་རལ་གྲི་དང་། །ཐོ་བ་མདུང་ཐུང་སེན་མོ་རྣོ། །མདའ་གཞུ་འཕང་མདུང་འཁོར་ལོ་དང་། །རྡོ་རྗེ་མཚོན་ཆ་རྩེ་གཅིག་གིས། །གཅིག་གིས་གཅིག་ལ་རྒྱབ་ཅིང་གསོད། །མི་ལོ་བྱེ་བ་འབུམ་ཕྲག་དང་། །དྲུག་ཁྲི་ཉིས་སྟོང་ཚེ་ཡི་ཚད། །དེ་རུ་སྐྱེས་ཚད་སེམས་ཅན་དང་། །ཁྱད་པར་བདག་ལ་འབྲེལ་ཐོགས་པའི། །ཚེ་འདས་དེ་རུ་སྐྱེས་སྲིད་ན། །རེ་ས་གཞན་མེད་སྤྱན་རས་གཟིགས། །ཐུགས་རྗེ་ཆེན་པོ་ཁྱེད་རང་མཁྱེན། །ཡང་སོས་དམྱལ་བའི་གནས་ནས་དྲོངས། །ཨོཾ་མ་ཎི་པདྨེ་ཧཱུྃ། སངས་རྒྱས་ཆོས་དང་དགེ་འདུན་ལ། །གཤེ་ཞིང་གནོད་འཚེ་བྱེད་པ་དང་། །ཕ་དང་མ་ལ་སྡང་བ་དང་། །དབྱེན་བྱེད་དགེ་འདུན་མི་རྣམས་དཀྲུགས། །ངན་བསླབ་ལོག་མིན་བྱེད་བཅུག་པས། །ལས་མཁན་འཇིགས་སུ་རུང་བ་འགས། །ལུས་ལ་ཐིག་ནི་ནག་པོ་བཏབ། །ལྕགས་སྲེག་སོག་ལེས་དྲ་བ་དང་། །ལྕགས་སྲེག་མེ་འབར་སྟ་རེས་གསེ། །ལྕགས་སྲེག་ཐག་པས་དམ་དུ་བཅིངས། །གྲོག་རོང་ནང་དུ་བསྒྱུར་ཏེ་བཏང་། །མིག་འབྲུ་ལྕེ་དང་རྐང་ལག་གཅོད། །ལས་མཁན་རྣམས་
ཀྱིས་རལ་གྲིས་གསེ། །མི་ལོ་བྱེ་བ་ཕྲག་ས་ཡ། །གཉིས་འབུམ་དྲུག་ཁྲི་དགུ་སྟོང་དང་། །བཅུ་གཉིས་དེ་ཡི་ཚེ་ཡི་ཚད། །ཐུགས་རྗེ་ཆེན་པོ་སྤྱན་རས་གཟིགས། །སེམས་ཅན་དེ་རུ་སྐྱེས་རྣམས་དང་། །བདག་ལ་འབྲེལ་ཐོགས་ཚེ་འདས་ཚོ། །ཐིག་ནག་དམྱལ་བའི་གནས་ནས་དྲོངས། །རེ་ས་གཞན་མེད་ཁྱེད་རང་མཁྱེན། །ཨོཾ་མ་ཎི་པདྨེ་ཧཱུྃ། བྱ་དང་རི་དྭགས་ལ་སོགས་པ། །སེམས་ཅན་མང་པོའི་སྲོག་བཅད་དང་། །འདོད་ལོག་མང་དུ་སྤྱད་པ་རྣམས། །ལས་མཁན་རྣམས་ཀྱིས་དེ་དག་གི །ར་ལུག་ཁྱུ་མར་ཕྱོགས་གཅིག་བསྡུས། །དེ་ཚེ་ལྕགས་སྲེག་ལས་གྲུབ་རི། །ར་ལུག་རི་དྭགས་གདོང་འདྲ་བ། །བརྡུང་ཁ་ཚད་འདྲའི་བར་དུ་བཅིར། །ཁྲག་རྒྱུན་ཆུ་བོ་ལྟ་བུར་འབབས། །དེ་བཞིན་ལྕགས་སྲེག་འདྲ་བའི་སྣོད། །ཟར་མར་དབྱིབས་ནི་བརྩག་ཏར་བཅིར། །ལྕགས་སྲེག་གཏུན་དུ་ཚོས་ལྟར་བརྡུང་། །ལྕགས་སྲེག་ས་གཞིར་དྲོས་ཙ་ན། །རྡོ་རྗེ་མེ་འབར་ཆར་གྱིས་བྲབ། །གསལ་ཤིང་མེ་འབར་ཁོང་སྨད་ཕུག །ལྕགས་ཀྱི་ཕུར་པ་ཁར་བཏབ་ནས། །ལྟག་པའི་བར་དུ་བརྫུར་བ་དང་། །ལྕགས་སྒོང་མེ་འབར་ཁ་རུ་
བརྫ་ངས། །གསང་གནས་ཟངས་ཁུ་མེ་འབར་བླུགས། །རྐང་པ་ཤིང་ལ་བཏགས་ནས་བསྲེགས། །ནང་ཁྲོལ་མེ་འབར་ཚིག་ཅིང་ཚ། །མེ་མདག་རི་ལ་ཟ་དགོས་དང་། །ལྕགས་ཀྱི་བུམ་པའི་ནང་བཅུག་ནས། །ཕྱི་ནས་གཏུན་གྱིས་བརྡུང་བ་དང་། །མིག་དང་རྣ་བ་ཁ་རྣམས་སུ། །ཞ་ཉེ་བཀོལ་ནས་བླུགས་པ་དང་། །ལྕགས་སྲེག་མཆིག་གི་བར་དུ་བཏགས། །སྟེང་ནས་མེ་མ་མུ་རུམ་དང་། །ལྕགས་སྲེག་ཆར་པ་རབ་ཏུ་འབབ། །དེ་འདྲའི་སྡུག་བསྔལ་མི་ཡི་ལོ། །བྱེ་བ་སུམ་འགྱུར་འབུམ་ཕྲག་ཁྲི། །བརྒྱ་སྟོང་རྩ་གཉིས་ཚེ་ཡི་ཚད། །དེ་རུ་སྐྱེས་ཚད་སེམས་ཅན་དང་། །ཁྱད་པར་བདག་ལ་འབྲེལ་ཐོགས་པའི། །ཚེ་འདས་དེ་རུ་སྐྱེས་སྲིད་ན། །དྲོངས་ཤིག་འཕགས་པ་སྤྱན་རས་གཟིགས། །རེ་ས་གཞན་མེད་ཁྱེད་རང་མཁྱེན། །ཨོཾ་མ་ཎི་པདྨེ་ཧཱུྃ། སངས་རྒྱས་བྱང་སེམས་ཉན་ཐོས་ལ། །གཤེ་ཞིང་ཕ་དང་མ་ལ་སྡང་། །ཆང་འཚོང་མ་དང་ཆང་ལ་དགའ། །སེམས་ཅན་མང་པོ་བསད་པ་དང་། །མི་ཚངས་སྤྱོད་དང་བུད་མེད་རྐུ། །དེ་དག་གཤིན་རྗེ་ལ་བྲོས་པས། །ལྕགས་ཀྱི་ཁང་པའི་ནང་དུ་ཚུད། །ཁང་པ་དེ་ལ་མེ་འབར་བས། །ཉམ་ཐག་དུ་
འབོད་ང་རོ་བྱེད། །གཞན་ཡང་ཞ་ཉེ་བཞུས་པ་ཡི། །ཁུ་བ་ཁ་ནས་བླུགས་པ་དང་། །ལྕགས་སྲེག་གཏུན་གྱི་ནང་དུ་བརྡུང་། །མེ་ཡི་ཆར་པ་འབེབས་པ་དང་། །ལྕགས་ཀྱི་འབུ་སྲིན་རྣམས་ཀྱིས་ཕུག །ལྕགས་ཀྱི་སྣོད་དུ་བཙོ་བ་དང་། །ལྕགས་སྲེག་རྐམ་པས་མཁལ་དཀར་འདོན། །ལྕགས་ཐག་མེ་ལྕེ་འབར་བས་བཅིངས། །ཤལ་མ་རི་ལ་འཛེགས་པ་དང། །རྡོ་ཚན་མེ་འབར་ཆར་པས་བྲབ། །མི་ལོ་བྱེ་བ་ས་ཡ་གཉིས། །བྱེ་བ་ཕྲག་དགུ་འབུམ་བཞི་ཁྲི། །བཞི་སྟོང་བྱེ་བ་ཕྲག་བརྒྱ་ཐུབ། །དེར་སྐྱེས་སེམས་ཅན་ཨ་ཙ་མ། །བདག་ལ་འབྲེལ་ཐོགས་སེམས་ཅན་རྣམས། གལ་ཏེ་དེ་རུ་སྐྱེས་སྲིད་ན། །དྲོངས་ཤིག་འཕགས་པ་སྤྱན་རས་གཟིགས། །ཨོཾ་མ་ཎི་པདྨེ་ཧཱུཾ། ལྷ་ཁང་མཆོས་རྫས་དཀར་མེ་འཕྲོག །དགེ་སློང་ལ་སོགས་ཆོས་བྱེད་གསོད། །སྐུར་འདེབས་རྫུན་དང་ཕྲ་མ་ཨཱཿང་། །ལྟ་བ་ལོག་པ་འཆང་བ་དང་། །འདོད་ཆགས་ཆེ་ཞིང་བག་མེད་སྤྱོད། །ཆོས་ལ་ཁ་བཏང་སྡིག་ལ་བསོགས། །ལྕགས་སྲེག་ཁང་པ་གཉིས་རིམ་ནང་། །ཚུད་ཅིང་མེ་འབར་ནང་དུ་འཚིག །ངུ་འབོད་ཆེན་པོ་ཚག་ཕྱུར་ཕྱུར། །ལྕེ་ནི་ཕྱིར་
དྲངས་ཟངས་ཁུ་འབེབས། །སྲོག་ཆགས་མེ་འབར་མང་པོས་ཟ། །ལྕེ་ལ་ལྕགས་སྲེག་ཕུར་པ་འདེབས། །སྲིན་བུ་ལྕགས་ཀྱི་མཆུ་རིང་གིས། །ནང་ཆ་ཐམས་ཅད་ཟ་བར་བྱེད། །མེ་ཐབ་ནང་དུ་སོལ་མེ་སྤུངས། །དེར་བཅུག་སྦྱད་པས་སྡུད་ནས་བཞུ། །དེ་ནས་ཐོ་བས་ལྕགས་ལྟར་འཐར། །ལྕེ་ནི་སྤྱི་གཙུག་ཨོག་མར་དྲངས། །སྟག་གཟིག་དོམ་དྲེད་སེངྒེས་ཟ། །རང་ཤ་བཅད་ཅིང་ཁ་རུ་བརྫངས། །ལྕགས་ལེབ་མེ་ལྕེ་འབར་བས་དཀྲི། །བྱ་དང་སྲོག་ཆགས་མང་པོས་ཟ། །སྟེང་ནས་མེ་ལྕེའི་ཆར་ཆེན་འབེབས། །མི་ལོ་བྱེ་བ་ས་ཡ་གསུམ། །ལྔ་འབུམ་ལྔ་ཁྲི་ཉིས་སྟོང་དང་། །དྲུག་ཅུ་རྩ་བཞི་ཚེ་ཡི་ཚད། །དེ་རུ་སྐྱེས་པའི་སེམས་ཅན་དང་། །བདག་ལ་འབྲེལ་ཐོགས་འགྲོ་བ་རྣམས། །གལ་ཏེ་དེ་རུ་སྐྱེས་སྲིད་ན། །དཔུང་དང་རི་མདའ་གཞན་མེད་དེ། །ཐུགས་རྗེ་ཆེན་པོ་སྤྱན་རས་གཟིགས། །ངུ་འབོད་ཆེན་པོའི་གནས་ནས་དྲོངས། །ཨོཾ་མ་ཎི་པདྨེ་ཧཱུཾ། ལྷ་ཁང་དགོན་པ་རི་ཁྲོད་བསྲེགས། །གྲོང་དང་ནགས་ལ་རི་མེ་བཀྱེས། །ལོག་ལྟ་ཆེ་བའི་སེམས་ཅན་རྣམས། །ཟངས་ལྕགས་དཔག་ཚད་མང་པོའི་སྣོད། །གྲོ་མཆན་བཞིན་དུ་བཙོ་བ་
དང་། །ལྕགས་སྲེག་གསལ་ཤིང་མེ་འབར་བས། །འཕོངས་ནས་སྤྱི་བོའི་བར་དུ་ཕུག །ཁ་མིག་རྣ་བ་བ་སྤུ་ནས། །མེ་ལྕེ་འབར་ཞིང་རང་ལུས་ཚིག་ལྕགས་སྲེག་ས་གཞི་མེ་འབར་ཏེ། །ལྕགས་སྲེག་ཐོ་བས་ཡུངས་ལྟར་རྡུང་། །མེ་ལྕེ་དཀར་པོ་འབར་ནས་བསྲེགས། །རྐང་ལག་རྣམས་ལ་མེ་འབར་ཚིག །ལྕགས་སྲེག་མཆིག་གི་བར་དུ་བཏགས། །ཉ་སྦྲུལ་མེ་ལྕེ་འབར་བས་ཟ། །ཐལ་ཚན་ཆུ་བོ་འབོགས་པའི་ཚེ། །དེ་ནས་སྲོག་ཆགས་མང་པོས་ཟ། །ལྕགས་ལྕགས་སྲེག་སྐམ་པས་གཏོག་པར་བྱེད། །མི་ལོ་བྱེ་བ་ས་ཡ་བརྒྱད། །བཞི་འབུམ་བྱེ་བ་ཁྲི་དྲུག་སྟོང་། །ལྔ་བརྒྱ་སུམ་ཅུ་ཚེ་ཡི་ཚད། །དམྱལ་བ་ཚ་བ་ཞེས་བྱ་བའི། །དེ་རུ་གང་སྐྱེས་སེམས་ཅན་རྣམས། །ཚེ་རབས་མང་པོའི་ཕ་མ་ཡིན། །སྙིང་རེ་རྗེ་སྟེ་བྱེད་ཐབས་མེད། །ཚེ་འདིར་བདག་ལ་འབྲེལ་ཐོགས་རྣམས། །འགའ་ཞིག་དེ་རུ་སྐྱེས་སྲིད་
ན། །དྲོངས་ཤིག་འཕགས་པ་སྤྱན་རས་གཟིགས། །ཨོཾ་མ་ཎི་པདྨེ་ཧཱུཾ། དགེ་བའི་ལས་ལ་མི་དགའ་ཞིང་། །ཆོས་དང་དགེ་བ་བྱེད་པ་ལ། །སྐུར་བ་འདེབས་ཤིང་གཤེ་བ་དང་། །དགེ་སྡིག་ཕན་གནོད་མེད་པར་སྨྲ། །ལྕགས་སྲེག་ཁཊཾ་རྩེ་གསུམ་པས། །འཕོངས་ནས་བཙུགས་ཏེ་སྤྱི་བོ་དང་། །ཕྲག་པ་གཉིས་ལ་ཕུད་པར་བྱེད། །དེ་ཚེ་ཁོག་པར་མེ་འབར་ནས། །བུ་ག་དགུ་ནས་མེ་ལྕེ་འབར། །ལྕགས་ལ་ཆེ་ངར་མེ་འབར་བས། །ལུས་པོ་ཐམས་ཅད་དཀྲིས་པ་དང་། །ཟངས་ལྕགས་མེ་འབར་ནང་དུ་བཙོ། །དེ་ཚོ་ཇ་བཀོལ་ཇ་ལོ་ལྟར། །སྟེང་འོག་ཕྱོགས་མཚམས་རྣམས་སུ་འགྲོ། །ཤ་རུས་ཞིག་ནས་ཀེང་རུས་ཏེ། །ད་རུང་མི་འཆི་ཚུར་བཏོན་ཏེ། །ལྕགས་སྲེག་ས་གཞི་བསྒྲེ་གློག་གིས། །སྔར་ལྟར་ཤ་རུས་སོས་པ་དེ། །སླར་ཡང་སྔར་བཞིན་བཙོ་བར་བྱེད། །མགོ་ནས་བཟུང་སྟེ་སྐྱེད་པའི་བར། །མེ་མགལ་བཞིན་དུ་བསྲེགས་པ་དང་། །ཟངས་ཁུ་མེ་འབར་འཐུང་དུ་བཅུག །གཅན་གཟན་ཁ་ནས་མེ་འབར་བ། །མང་པོ་རུབ་ནས་ཟ་བ་དང་། །ཐལ་བ་མ་རེད་བར་དུ་སྲེག །ཤ་རྣམས་ལྕགས་སྲེག་སྐམ་པས་བཏོག །མདུང་སོགས་མཚོན་
ཆ་མེ་འབར་བས། །གཤང་ལམ་ལས་ནི་སྤྱི་བོར་ཕུག །ལྕགས་ཁུ་སྤྱི་བོའི་གཙུག་ནས་བླུགས། །ཚེ་ཚད་བར་གྱི་བསྐལ་པའི་ཕྱེད། །རབ་ཏུ་ཚ་བའི་དམྱལ་བ་དེར། །སྐྱེས་པའི་སེམས་ཅན་སྙིང་རྗེའི་གནས། །ཡི་དམ་འཕགས་པ་སྤྱན་རས་གཟིགས། །དེ་དག་རྣམས་ལ་ཐུགས་རྗེས་གཟིགས། །ཁྱད་པར་བདག་ལ་འབྲེལ་ཐོགས་རྣམས། །ད་ལྟ་ཉིད་དུ་འདྲེན་དུ་གསོལ། །ཨོཾ་མ་ཎི་པདྨེ་ཧཱུྃ། ལྟ་ལོག་ཆོས་ལོག་མུ་སྟེགས་ཚོགས། །ཆོས་ལ་མི་བདེན་སྐུར་པ་འདེབས། །རྒྱུ་འབྲས་ཕན་གནོད་མི་བདེན་ཟེར་། །ཆོས་ཀྱི་ཕན་ཡོན་མི་བདེན་ཟེར། །སློབ་དཔོན་བྱང་ཆུབ་སེམས་དཔའ་སོགས། །སྐྱེས་བུ་དམ་པ་རྣམས་ལ་སྡང་། །ལྕགས་སྲེག་ས་གཞི་རྒྱ་ཆེ་བ། །མེ་དཔུང་བསམ་ལས་འདས་པ་འབར། །དེ་ཡི་ལྤགས་པ་ཤ་དང་ཁྲག །རྐང་གི་བར་དུ་ཚིག་པ་ཡི། །མར་མེའི་སྡོང་བུ་ལྟ་བུའོ། །ཕྱོགས་བཞི་མཚམས་བརྒྱད་གར་བྲོས་པར། །མེ་ལྕེས་བཏུམ་སྟེ་སྔར་བཞིན་འཚིག །ལུས་ཀུན་མེ་འབར་མེ་ལྟར་དམར། །ངུ་སྒྲ་འབྱིན་པ་ཐོས་ཙམ་ལས། །ལུས་པོ་གཞན་གྱིས་མི་མངོན་པ། །ལྕགས་ཀྱི་སླ་ང་བཙོ་མའི་ནང་། །
ས་མཆན་ལམ་ལམ་མེ་མུར་ནང་དུ་ཡོས་ལྟར་བཀྲབ། །ལྕགས་ཀྱི་ས་གཞི་ལ་འགྲོ་ཞིང་། ལྕགས་སྲེག་རི་ལ་འཛེག་ཅིང་འབབ། །ཟངས་ཞུན་ཁོལ་མ་ཁར་བླུགས་ནས། །གློ་སྙིང་ནང་ཆ་ཁོག་ནས་ཐོན། །ཁྲོ་ཆུ་ཁོལ་མའི་ནང་དུ་བཙོ། །མཚོན་ཆ་མེ་འབར་མང་པོ་ཡིས། །ལུས་ཀུན་ཡུངས་འབྲུ་ཙམ་དུ་གཏུབ། །ལྕགས་སྲེག་ལས་གྲུབ་འཇིགས་རུང་བའི། །སེང་གེའི་མགོ་ནས་མར་ལ་ཟ། །སྟག་གིས་རྒྱབ་ནས་ཚུར་ལ་ཟ། །དུག་སྦྲུལ་གཉིས་ཀྱིས་རྩིབ་ལོགས་ཟ། །རྐང་པ་ནས་བཟུང་མེ་ནང་སྲེག །གཤིན་རྗེའི་མདའ་ཡི་འབེན་ལ་འཛུགས་། །མེ་དོང་ནང་དུ་མགོ་ཐུར་སྲེག །བུ་ག་རྣམས་སུ་ལྕགས་ཕུར་བཏབ། །མཚོན་ཆ་རྣམས་ཀྱིས་ཡན་ལག་གཅོད། །ལུས་ནི་དཔག་ཚད་ལྔ་བརྒྱ་ལ། །མགོ་བོ་དང་ནི་ལྔ་བརྒྱ་སྟེ། །རེ་རེ་ལ་ཡང་ལྕེ་ལྔ་བརྒྱ། །ལྕེ་རེ་དཔག་ཚད་ལྔ་བརྒྱ་ལ། །ལྕགས་སྲེག་གླང་དོར་ལྔ་བརྒྱས་རྨོ། །ལུས་ལ་སྲོག་ཆགས་མང་པོས་ཟ། །རང་ཤ་རང་གིས་ཟ་དགོས་དང་། །ལྕགས་སྲེག་གཏུན་ནང་ཐོ་བས་བརྡུང་། །དུག་སྦྲུལ་མེ་འབར་ལུས་ལ་འཁྱུད། །ལྕགས་སྲེག་ཁོང་པའི་ནང་ཀུན་སྲེག །སྡུག་བསྔལ་བར་སྐབས་རྒྱུན་ཆད་
མེད། །དེ་ཕྱིར་མནར་མེད་ཅེས་བྱ་སྟེ། །དེ་ལྟར་ཚ་དམྱལ་བརྒྱད་པོ་སྟེ། །གོང་མ་རྣམས་ལས་འོག་མ་རྣམས། །དགུ་རེའི་འགྱུར་གྱི་སྡུག་བསྔལ་ཆེ། །འདི་ཡི་ཚེ་ཚད་བར་བསྐལ་གཅིག །སྡིག་ཚབས་ཆེ་བའི་སེམས་ཅན་རྣམས། །དེ་འདྲའི་སྡུག་བསྔལ་བར་མཚམས་མེད། །སེམས་ཅན་དེ་རྣམས་ཨ་ཙ་མ། །དེ་འདྲའི་ལས་ངན་སེམས་ཅན་རྣམས། །བདག་ལ་འབྲེལ་ཐོགས་སེམས་ཅན་རྣམས། །དྲོངས་ཤིག་འཕགས་པ་སྤྱན་རས་གཟིགས། །ཨོཾ་མ་ཎི་པདྨེ་ཧཱུྃ། ཚ་དམྱལ་བརྒྱད་པོ་དེ་དག་གི །ཕྱོགས་བཞིའི་ཕྱོགས་རེར་བཞི་རེ་སྟེ། །རེ་རེའང་བཅུ་དྲུག་རེ་རེས་བསྐོར། །དེ་ཕྱིར་ཉེ་འཁོར་དམྱལ་བ་ཟེར། །ལྕགས་ཁང་ནང་དུ་ཡུན་རིང་བས། །ཤར་གྱི་སྒོ་ཕྱེས་བྲོས་པ་ན། །མེ་མ་མུར་གྱི་ས་གཞི་ནི། །པུས་མོ་ནུབ་ཙམ་འབོག་ཅིང་འགྲོ། །རྐང་པ་བཙུགས་དུས་ཤ་ལྤགས་ཞིག །བསྲེགས་པས་སྔར་ལྟར་སོས་པར་འགྱུར། །མ་ཚུགས་འགྱེལ་ནས་འདྲེ་ལོག་གི །ཤ་དང་རུས་པ་ཐམས་ཅད་བསྲེགས། །སྡོམ་པ་ཞུས་ནས་མི་བསྲུང་བ། །མེ་མ་མུར་དུ་ཚིག་པ་རྣམས། །སྙིང་རེ་རྗེ་སྟེ་བཟོད་ཐབས་མེད། །བདག་ལ་འབྲེལ་བའི་
སྡོམ་ཤོར་རྣམས། །དྲོངས་ཤིག་འཕགས་པ་སྤྱན་རས་གཟིགས། །ཨོཾ་མ་ཎི་པདྨེ་ཧཱུཾ། མེ་མ་མུར་ནས་ཐར་ཙམ་ནས། །གཅིན་རྟོག་མི་གཙང་འདམ་རྫབ་ནི། །མི་རོ་རུལ་བའི་དྲི་མ་ཅན། །དེ་འདྲའི་རྒྱ་མཚོ་ཆེན་པོ་བྲུལ། །ཨེ་ཐར་བསྐྱལ་ཞིང་འབོག་པའི་ཚེ། །འབུ་ནི་དཀར་པོ་ལྕགས་མཆུ་ཅན། །མང་པོས་ཤ་རུས་ལྤགས་པ་ཕུག །སྦུར་ནམ་སྦྲང་བུ་ལ་སོགས་པ། །སྲིན་བུ་ཁྲི་ཕྲག་འབྱར་ནས་ཟ། །ལུས་ནི་འགྲེ་ལོག་ངུ་འབོད་འདོན། །སྡོམ་པ་དམ་ཚིག་མེད་པ་ཡི། །ཡོད་བརྫུ་བྱས་ནས་དཀོར་ཟོས་དང་། །རྫུན་གྱིས་མགོ་གཡོག་དཀོར་བསྡུས་པས། །རོ་མྱག་འདམ་དུ་སྐྱེས་པ་རྣམས། །ཐུགས་རྗེས་དྲོངས་ཤིག་སྤྱན་རས་གཟིགས། །ཨོཾ་མ་ཎི་པདྨེ་ཧཱུཾ། རོ་མྱག་འདམ་ནས་ཐར་ཙམ་ན། །སྤང་ཐང་ཡིད་དུ་འོང་བ་མཐོང་། །དེ་རུ་བརྒྱུགས་པས་ས་གཞི་དེ། །སྤུ་གྲི་རྣོན་པོའི་རྩ་ཡིས་གང་། །རྐང་པ་ཐམས་ཅད་བཤགས་ཤིང་གཏུབ། །དེ་འདྲར་ནགས་ཚལ་འཐུག་པོར་ཕྱིན། །ཤིང་ལོ་རལ་གྲི་མཚོན་ཆའི་ཚོགས། །རླུང་གིས་བསྐྱོད་པས་མཚོན་ཆའི་ཆར། །མགོ་བོ་ཡན་ལག་གཅོད་ཅིང་སྨྲས། །ཉམ་ཐག་ང་རོའི་འོ་དོད་འབོད། །སྣ་དང་
རྣ་བ་རྐང་ལག་རྣམས། །ཆད་པས་བྱ་རྒོད་བྱ་རོག་དང་། །འུག་པ་རྣམས་ཀྱིས་ཟ་བར་བྱེད། །ཆོས་ལོག་མུ་སྟེགས་སྟོན་པ་དང་། །ལམ་དགྲ་སྐྲག་སྔངས་འུར་ཟིང་བསླང་། །དེ་ཡི་འབྲས་བུས་དེ་ལྟར་ལགས། །རལ་གྲིས་ནགས་དེ་ཡོལ་ནས་ཐར། །ལྕགས་ཀྱི་ཤལ་མ་རི་ཞེས་པ། །ཤིང་སྡོང་ཆེན་པོ་རི་འདྲ་བ། །ལྕགས་ཀྱི་ཚེར་མ་སོར་བཅུ་དྲུག །བར་མཚམས་མེད་པར་སྐྱེས་པའི་རྩེར། །གསོན་དུས་ཆགས་པ་སྐྱེས་པ་ཡི། །བུད་མེད་དེ་ནི་ཤིང་རྩེར་མཐོང་། །དེ་ཡིས་རང་ལ་འབོད་པ་ཐོས། །ཤིང་ལ་འཛེག་པས་ཚེར་སོ་རྣམས། །ཐུར་ལ་བསྟན་པས་ལུས་ཀུན་ཕུག །ཤིང་རྩེར་ཕྱིན་པས་བུད་མེད་དེ། །སྲིན་མོ་འཇིགས་པར་གྱུར་པས་འཇུས། །བདུད་མོ་དེ་ཡིས་ཟ་བ་དང་། །ཁྱུང་དང་ཁྭ་ཏ་བྱ་རྒོད་ཀྱིས། །མིག་འབྲུ་ཀླད་པ་རྒྱུ་མ་ཟ། །ལན་གཅིག་ཞིག་ནས་སྔར་བཞིན་དུ། །བུད་མེད་དེ་ནི་ཤིང་སྡོང་གི །རྩ་བར་འདུག་ནས་འབོད་པ་སུ་མཐོང་། །ཐུར་ལ་བབས་པས་ཚེར་མ་རྣམས། །གྱེན་ལ་འབར་བས་ལུས་ཀུན་འཛེར། །ཁྲག་རྒྱུན་བབ་ཅིང་རྩ་བར་ཕྱིན། །བུད་མེད་ཁྱི་རྒོད་སྲེ་བོར་གྱུར། །འབལ་ཞིང་རྒྱུ་
ལྟོ་འདྲེན་ཅིང་ཟ། །དེ་འདྲ་ལོ་གྲངས་དཔག་མེད་མྱོང་། །བུད་མེད་མི་ཚངས་སྤྱོད་པའི་འབྲས། །རལ་གྲི་སྤུ་གྲི་ཤལ་མ་རི། །གསུམ་ཀ་གཅིག་ཏུ་བརྩི་བ་སྟེ། །དམྱལ་བ་མཚོན་ཆའི་འཁོར་ལོ་ཟེར། །དེ་ནས་བྲོས་ནས་ཐར་ཙམ་ན། །རལ་གྲིའི་འཁོར་ལོ་འཁོར་བས་གཏུབ། །མདའ་མདུང་ཁཊཾ་མང་པོ་རྒྱབ། །དེ་ལ་བྲོས་ནས་སྐྱབས་བཙལ་བས། །ཐལ་ཚན་ཆུ་བོ་རབ་མེད་པ། །དམྱལ་བའི་མཐའ་རྣམས་འོབ་ལྟར་བསྐོར། །དེ་རུ་བྲོས་ནས་ཤ་རུས་ཞིག །ཡང་ཐར་སོས་ནས་སྔར་བཞིན་བྲུལ། །དེ་ལྟར་ཉེ་འཁོར་ལ་གནས་པའི། །དམྱལ་ཕྲན་བཅུ་དྲུག་གཡས་སུ་བསྐོར། །དེ་འདྲའི་ལས་ངན་སེམས་ཅན་དང་། །ཁྱད་པར་བདག་ལ་འབྲེལ་ཐོགས་རྣམས། །ཉེ་འཁོར་དམྱལ་ཁམས་བཅུ་དྲུག་ནས། །དྲོངས་ཤིག་འཕགས་པ་སྤྱན་རས་གཟིགས། །ཨོཾ་མ་ཎི་པདྨེ་ཧཱུཾ། འདུ་ཁང་རི་ཁྲོད་ཁང་པ་བཤིག །དགེ་འདུན་རི་ཁྲོད་འབུད་ཤིང་བརྐུས། །སྐུ་གསུང་ཐུགས་རྟེན་ན་བཟའ་བཤུས། །མི་དང་སེམས་ཅན་འཁྱག་གྲིར་བསད། །ཆུ་ལ་འཕངས་ནས་བསད་པ་དང་། །གོས་འཕྲོག་ཆུ་འཁྱག་བླུགས་པ་དང་། །འཁྱག་ཤིག་བྱས་ནས་བསད་
པ་དང་། །མར་མེའི་རྒྱུ་ནི་བརྐུས་སམ་འཕྲོག །དེ་དག་གྲང་དམྱལ་དུ་སྐྱེས་ཏེ། །འཁྱགས་པས་ལུས་འཁུམ་ཆུ་བུར་འབུད། །ཆུ་བར་རྡོལ་བས་ཁྲག་རྣག་འབབས། །འཁྱགས་ཤིང་འདར་ནས་སོ་ཡང་འཐམས། །ཕ་མ་ཉེ་དུའི་མིང་ནས་འབོད། །ཨ་ཆུ་ཟེར་བའི་ང་རོ་འབོད། །འཁྱག་པས་ལུས་མདོག་ནག་པོ་ལ། །ཚལ་པ་ལྔའམ་དྲུག་ཏུ་གས། །ཤིན་ཏུ་འཁྱག་ནས་ལྤགས་པ་དམར། །ལུས་ནི་ཚལ་པ་བརྒྱད་དུ་གས། །ཚལ་པ་བརྒྱ་སྟོང་གས་པ་སྟེ། །མ་གྷ་ཏ་ཡི་བྲེ་ཚད་དེ། །བདུན་ཕུལ་བྲེ་ལ་འཇལ་བ་ཡི། །ཏིལ་འབྲུ་ཁལ་ནི་བརྒྱ་བཅུ་ནས། །ལོ་བརྒྱ་ལོན་དུས་ཏིལ་དེ་ཡི། །ཏིལ་འབྲུ་རེ་རེ་ཕྱིར་འཕང་ན། །ནམ་ཞིག་དེ་ཀུན་ཟད་པའི་ཚེ། །ཆུ་བུར་ཅན་གྱི་ཚེ་ཚད་རྫོགས་། །གཞན་བདུན་ཉི་ཤུའི་འགྱུར་རེ་མང་། །གྲང་དམྱལ་སྡུག་ལ་ཚེ་རིང་བ། །ཡ་རེ་ང་ཞིང་སྙིང་རེ་རྗེ། །དེ་རུ་སྐྱེས་པ་ཐམས་ཅད་དང་། །བདག་ལ་འབྲེལ་ཐོགས་དེར་ཟླ་སྐྱེས་ན། །མྱུར་དུ་དྲོངས་ཤིག་ཡི་དམ་ལྷ། །ཐུགས་རྗེ་ཆེན་པོ་སྤྱན་རས་གཟིགས། །ཨོཾ་མ་ཎི་པདྨེ་ཧཱུཾ། དེ་དག་ཀུན་གྱི་འོག་གི་ཕྱོགས། །བྱང་ཤར་ཕྱོགས་སུ་ཉེ་བ་ན། །
དམྱལ་བ་ཤམ་བྷ་ལ་ཞེས་པ། །ལྕགས་སྲེག་ཁང་པ་སུམ་རིམ་ན། །ཕྱི་ནས་མེ་དཔུང་རབ་ཏུ་འབར། །ནང་དུ་ཁྲོ་ཆུ་ཁོལ་མའི་མཚོ། །རྦ་ཀློང་འཁྲུགས་ཤིང་རབ་ཏུ་འཁྲུགས། །དེ་ཡི་ནང་དུ་བཙོ་བའི་ཚེ། །ཨེ་ཐར་སྒོ་ལ་འགྲོ་བསམས་པས། །སྒོ་སྲུང་ཁྱི་རྒོད་དེལ་མགོ་ཙམ། །མཆེ་བ་སྤུ་གྲིས་གཏམས་པ་ལ། །སྤུ་རྣམས་ཐམས་ཅད་མཚོན་ཆར་སྐྱེས། །མིག་གི་སྐར་ཆེན་ལྟ་བུའི་འོད། །ཟུག་སྐད་འབྲུག་སྒྲ་དྲག་པོ་ཙམ། །རྔ་མ་དུག་སྦྲུལ་གཡུག་ལྟར་འཁྱུགས། །ཁ་རླངས་དྲི་ངན་འཚུབ་པས་བསུབ། །ཚ་དམྱལ་བརྒྱད་ལས་སྡུག་བསྔལ་ནི། །དགུ་འགྱུར་ཆེ་བའི་སྡུག་བསྔལ་ཅན། །དམྱལ་བའི་མེ་ནི་མི་རྣམས་ཀྱིས། །མེ་ལས་དགུ་འགྱུར་ཚ་ངར་ཆེ། །མཚམས་མེད་བྱེད་པའི་སྡིག་ཅན་རྣམས། །བསྐལ་པའི་བར་དུ་མི་ཐར་བ། །དེ་རུ་སྐྱེས་པའི་སྡིག་ཅན་དང་། །བདག་ལ་འབྲེལ་ཐོགས་དེར་སྐྱེས་རྣམས། །མྱུར་དུ་དྲོངས་ཤིག་སྤྱན་རས་གཟིགས། །ཨོཾ་མ་ཎི་པདྨེ་ཧཱུྃ། དེ་དག་ཀུན་གྱི་འོག་གི་ཆ། །ལྕགས་སྲེག་ས་གཞི་ལྕགས་སྲེག་གི །ཁང་པའི་དབུས་སུ་ལྕགས་སྲེག་གི །ལྕགས་ཀྱི་ཟངས་ཆེན་ཁ་སྦྱོར་དང་། །ལྕགས་སྲེག་
རྫ་བུམ་ཆེན་པོའི་ནང་། །ཁྲོ་ཆུ་ཁོལ་མ་བླུགས་པའི་ནང་། །མགོ་མཇུག་ལྡོག་སྟེ་རྒྱུན་དུ་བཙོ། །དམ་ཚིག་ཆག་ནས་མ་བཤགས་པ། །ནམ་མཁའ་ཇི་སྲིད་མི་ཐར་བ། །ཕྱག་རྡོར་གོས་སྔོན་རྒྱུད་ནས་གསུངས། །ནམ་ཡང་ཞིག་རྒྱུ་མེད་པའི་ཕྱིར། །རྡོ་རྗེ་དམྱལ་བ་ཞེས་བྱ་བ། །དེ་རུ་སྐྱེས་པའི་དམ་ཉམས་རྣམས། །ཨ་ཙ་མ་ན་སྙིང་རེ་རྗེ། །དེ་འདྲའི་ལས་ངན་སེམས་ཅན་དང་། །བདག་ལ་འབྲེལ་ཐོགས་སེམས་ཅན་རྣམས། །གལ་ཏེ་དེ་འདྲར་སྐྱེས་སྲིད་ན། །མྱུར་དུ་དྲོངས་ཤིག་སྤྱན་རིས་གཟིགས། །ཨོཾ་མ་འཎི་པདྨེ་ཧཱུཾ། དེ་རྣམས་དམྱལ་ཁམས་བཅོ་བརྒྱད་དང་། །ཉེ་འཁོར་དམྱལ་བ་བཅུ་དྲུག་གོ །ཉེ་ཚེའི་དམྱལ་བ་ཞེས་བྱ་བ། །གནས་ལ་ངེས་པ་མ་མཆིས་ཏེ། །ཆུ་ཆེན་འགྲམ་དང་ཐང་སྟོང་པ། །རི་རྩེ་བར་སྣང་གར་ཡང་ཡོད། །ཆུ་འཁྱིལ་ནང་གི་འབུ་སྲིན་དང་། །ཕ་ཝང་ནང་དུ་འབུ་ཆེན་པོ། །འབུ་ཆུང་མང་པོས་ཟ་བ་དང་། །སྒྱེད་པུའི་ནང་དུ་འབུར་སྐྱེས་སོགས། །རང་རང་སྡུག་བསྔལ་སྣ་ཚོགས་ཏེ། །མང་པོ་མེད་དེ་རེ་རེ་ཟུང་། །ཚེ་ཚད་སྡུག་བསྔལ་ངེས་པ་མེད། །ཉི་ཚེའི་དམྱལ་བར་སྐྱེས་རྣམས་དང་། །བདག་
ལ་འབྲེལ་ཐོགས་དེར་སྐྱེས་ན། །མྱུར་དུ་དྲོངས་ཤིག་སྤྱན་རས་གཟིགས། །ཨོཾ་མ་ཎི་པདྨེ་ཧཱུྃ། དམྱལ་བའི་སྡུག་བསྔལ་དྲན་པ་ཡི། །མྱ་ངན་སྡུག་གླུ་རིང་མོ་འདི། །རྟ་ལོ་སྤྲེལ་ཟླའི་བཅུ་དགུ་དང་། །ཉི་ཤུ་ཉིན་ལ་ཐུན་མཚམས་སུ། །བྲིས་པས་འདི་མཐོང་འགྲོ་བ་རྣམས། །སྡིག་ལ་དུག་ལྟར་འཛེམ་པར་ཤོག །མངྒ་ལཾ།། །།ན་མོ་བཛྲ་དྷ་ར་ཡ། བདེན་པར་གྲུབ་ཅིང་བདེན་པར་གསུངས་པ་ཡི། །རྫོགས་པའི་སངས་རྒྱས་ཀུན་ལ་ཕྱག་འཚལ་བསྟོད། །ཆོས་རྣམས་བཀའ་དང་བསྟན་བཅོས་གཉིས་སུ་འདུས། །ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཐུབ་པའི་བསྟན་པ་ནི། །འཇིག་རྟེན་ཁམས་སུ་ཡུན་རིང་གནས་པར་གསུངས། །བཀའ་ནི་བོད་དུ་འགྱུར་བ་པོ་ཏི་བརྒྱ། །བསྟན་འགྱུར་གླེགས་བམ་ཉིས་བརྒྱ་དྲུག་ཅུར་གྲགས། །རྒྱ་གར་ཡུལ་ན་བསྟན་བཅོས་རྩོམ་པ་ན། །རབ་ནི་ཆོས་ཉིད་བདེན་པ་མཐོང་བ་དགོས། །འབྲིང་ནི་ཡི་དམ་ལྷ་ཡི་གནང་བ་ཐོབ། །ཐ་མ་རིག་པའི་གནས་ལྔར་མཁས་པ་དགོས། །དེ་མིན་བསྟན་བཅོས་འབྲི་བའི་དབང་མེད་དེ། །རྩོམ་ན་
རྒྱ་གར་རྒྱལ་པོའི་ཆད་པ་འོང་། །དེ་ཕྱིར་རྒྱ་གར་ཆོས་ཁུངས་བཙུན་པའི་ཕྱིར། །རྒྱ་འགྱུར་རྩོམ་ལ་ཀུན་གྱིས་རྩིས་ཆེན་བྱེད། །བོད་དུ་དེ་འདྲའི་ཁྲིམས་ནི་མེད་པའི་ཕྱིར། །རིག་པའི་གནས་ལྔ་མཁས་ནི་མི་དགོས་ཀྱང་། །རྩོམ་རྒྱུའི་ཆོས་དེ་ཉིད་ལ་མཁས་པའམ། །ཡང་ན་བསྒོམས་བྱུང་ཤེས་རབ་ནང་ནས་རྡོལ། །གཅིག་ཤེས་ཀུན་ལ་མཁས་པའི་ཉམས་རྟོགས་དགོས། །པོ་ཏི་ནང་ནས་ཡག་ཡག་ཚིག་ཐུས་ནས། །ཕྱོགས་གཅིག་འབྲི་བ་དེ་ཡང་རྩོམ་ཡིན་ཏེ། །བསྡུས་དོན་བསྟན་བཅོས་ཞེས་ནི་བྱ་བའོ། །མི་མཁས་བླུན་པོས་དེ་འདྲ་བྲི་བ་ནི། །ཆོས་བཤའ་ལག་དམར་ཁྲག་ཅན་ཞེས་བྱ་སྟེ། །སྡིག་དང་ཉེས་སྒྲིབ་ཤིན་ཏུ་ཆེ་བ་ཡིན། །ཁྱད་པར་སྔགས་ཀྱི་རྒྱུད་གཞུང་སྒྲུབ་ཐབས་ལ། །དེ་འདྲ་བྱས་པ་བཅོས་བསླད་ཉེས་པ་ཆེ། །ཆོས་བདག་མཁའ་འགྲོས་བཀའ་ཆད་འབྱུང་བར་གསུངས། །ཆོས་དེ་བྱིན་རླབས་ཡལ་ནས་འཆལ་བར་བཤད། །རྒྱལ་བའི་དབང་པོ་པ་ཆོས་གྲགས་རྒྱ་མཚོ་ལ། །དགེ་བཤེས་མཁས་པ་གཅིག་གིས་ཞུས་པ་ནི། །ཕག་མོའི་རྒྱ་གཞུང་བརྒྱ་ལྷག་པོ་ཏི་ནས། །ཡག་ཡག་བཏུས་ནས་ཁྲིད་རིམ་ཟབ་མོ་གཅིག །མཛད་
ན་བསྟན་ལ་ཕན་པར་གདའ་ཞུས་པས། །དེ་འདྲ་རྣམ་སྨིན་ཆེ་གསུངས་མ་མཛད་སྐད། །གནུབས་བན་ནམ་མཁའི་སྙིང་པོའི་གདུང་རྒྱུད་པ། །བྱ་རྒྱུད་སྔགས་རྒྱུད་མ་ཆད་ནུས་པ་ཅན། །ཨ་མྱེ་ཉི་མས་ཨ་རྩིག་དུང་ཕྱུར་ཐོན། །ཞྭ་ནག་སྟེང་དུ་ཐོག་བརྒྱབ་ཐོག་སྡུག་སྟེ། །པད་གླིང་རཏྣ་གླིང་པའི་གུ་དྲག་གཉིས། །བསྲེས་ནས་བཏོན་པས་སྐྱོན་ནི་མ་བྱུང་སྟེ། །བུ་ལ་ཕན་ཕྱིར་ཡི་གེར་བྲིས་མ་ཐག །ལྕེ་དག་བུ་དང་བུ་མོ་སྨྱོ་ནས་ཤི །འབྲི་གུང་ཞབས་དྲུང་ཆོས་ཀྱི་གྲགས་པ་ལ། །བླ་མ་ཐམས་ཅད་མཁྱེན་པའི་བཀའ་བྱུང་བས། །ཚེ་བདག་ཆོས་སྐོར་འགའ་ཞིག་ཟིན་བྲིས་བྲིས། །ཕྱག་མཛུབ་གཡས་པ་བསྙུང་ནས་འདས་རྐྱེན་བྱས། །རྗེ་ཡི་སློབ་མ་མཁས་པ་གུ་རུ་བས། །བསྟན་བཅོས་རྩོམ་ལ་མཁར་ནག་བཀའ་ཆད་འདས། །བསྟན་བཅོས་དཔེ་ལ་དགེ་ལུགས་རྣམ་རྟོག་དར། །རྙིང་མའི་རབ་འབྱམས་དཀར་པོ་ཞ་ཞེས་པས། །དགོངས་འདུས་མེ་ཏོག་ཕྲེང་མཛེས་འབྲེལ་པ་རྩོམ། །སྙུག་གྲི་ཟུག་ནས་དེ་མ་ཐག་ཏུ་འདས། །འབྲུག་པའི་བླ་མ་ནག་མགོ་རྟོགས་ལྡན་གྱིས། །གཏེར་གསལ་རྡོ་རྗེ་གྲོ་ལོད་རྒྱས་པར་བརྩམས། །མགྲིན་པར་ལྷོག་པ་རྒྱབ་ནས་ཞིང་
བརྗེས་སྐད། །ངེད་རང་ཚང་གི་བླ་མ་ཞིང་གཤེགས་དེས། །ཚེས་བཅུའི་འདོན་འགྲིགས་ཁོང་གིས་བསྒྲིག་བསམ་ནས། །ཤོག་བུ་འཛིན་ཐོན་བྲིས་པ་མགོ་ཐོར་བས། །མི་རུང་བསམ་ཡང་མ་བྱེད་སྨྲ་མ་བདེ། །ང་ཡིས་མང་པོ་བྲི་ཆོག་ཁྱེད་ཀྱིས་ནི། །བསྒྲིགས་མི་ཕོད་ཀྱིས་སྨྲས་ན་མི་དགའ་དོགས། །རཏྣ་གླིང་དང་དགོངས་འདུས་འཇའ་ཚོན་ལུགས། །བསྲེས་པའི་འདོན་ཆ་པོ་ཏི་བསྒྲིགས་ནས་གདའ། །ན་ཉིང་ཞི་ཁྲོའི་ཕྱིར་ལྡོག་བསྒྲིགས་སོང་བས། །དེ་ནས་ཕྱག་ནི་མ་བདེ་སྙུང་གཞི་བྱུང་། །དེ་དག་རྣམས་ནི་འཕྲིག་པོ་མ་བྱུང་བས། །དཔེ་ཆ་གདུང་རྟེན་ནང་གཞུག་བྱས་ནས་བཞག །ཐུབ་པས་གསུངས་པའི་མདོ་འབུམ་ཉེར་ལྔ་སོགས། །ཡག་ཡག་བཏུས་ནས་སེམས་ཁྲིད་གསལ་པོ་གདའ། །འོན་ཀྱང་དེ་འདྲ་སུ་ཡིས་མ་སློབ་ཟིན། །མ་ཎི་བཀའ་འབུམ་ཡང་ནི་དེ་དང་འདྲ། །འབྲི་གུང་ཞབས་དྲུང་ཆོས་ཀྱི་གྲགས་པ་ཡིས། །མ་ཎི་བཀའ་འབུམ་ནང་ནས་ལུ་བཏུས་པ་ཡི། །བསྡུས་པ་ལེགས་པོ་གཅིག་ནི་ཡོད་པ་ཐོས། །དེ་མིན་སུས་ཀྱང་ཐུགས་རེག་བྱས་པ་མེད། །ཐུགས་རྗེ་ཆེན་པོའི་དམར་ཁྲིད་གསལ་པོ་ཅིག །ཐུ་རྒྱུ་གདའ་བ་
བདག་གིས་ཐུ་བསམ་སྟེ། །ཨེ་ཡོད་མི་ཤེས་བསམ་ཞིང་མ་ཐོན་ལུས། །ཞི་ཁྲོའི་བཀའ་བབས་ཆོས་ཀྱི་རྒྱལ་མཚན་དེ། །ཀརྨ་གླིང་པའི་ཆོས་བདག་ལུང་བསྟན་གསལ། །དེ་ཕྱིར་ཞི་ཁྲོའི་ཆོས་སྐོར་པོད་གཉིས་ཀྱིས། །ཕྱེད་ཙམ་ཁོང་གིས་བརྩམས་པ་ཡིན་ན་ཡང་། །སྐུ་ཚེ་འགྲོ་དོན་མཐར་ཕྱིན་བཀྲ་ཤིས་དགེ །རྩོམ་པ་ཧ་ཅང་མཁས་པ་མ་རེད་དེ། །ཆོས་བདག་ཡིན་ཕྱིར་དབུས་གཙང་ཁམས་སུ་དར། །བདག་ཀྱང་བྲིས་ངན་ཐོབ་ཆ་མེད་པ་དང་། །མཁས་པ་མིན་ཞིང་ཉམས་རྟོགས་དམན་ན་ཡང་། །ཁྲིད་དང་སྒྲུབ་ཐབས་རིགས་ལ་གོ་བ་ཆེ། །མི་འགྱུར་རྡོ་རྗེའི་གནམ་ཆོས་ཐུགས་གཏེར་དང་། །བདུད་འདུལ་རྡོ་རྗེའི་ས་གཏེར་ཤོག་སེར་ལ། །ཁོ་བོ་ཆོས་བདག་ཡིན་པའི་ལུང་བསྟན་གསལ། །བསྡུས་དོན་རྒྱས་པར་བཀྲོལ་བའི་འགྲེལ་པ་དང་། །རྒྱས་པའི་ནང་ནས་དོན་བསྡུས་ཐུ་བ་དང་། །མགུར་དང་ཞལ་གདམས་ཉམས་ལ་ཤར་བ་རྣམས། །བྲིའོ་སྨོད་ནས་བྲི་ལ་ཐོགས་པ་མེད། །དེ་ཕྱིར་སྔར་ཡང་མང་ཞིག་བྲིས་པ་དང་། །གཞེ་ཉིན་བླ་ཆེན་འགའ་ཡིས་བཀའ་ཡིས་བསྐུལ། །སྒྲུབ་སྐོར་ཟིན་བྲིས་ཡང་ནི་མང་ཞིག་རྩོམ། །ན་ཉིན་ན་ཚ་རྐྱེན་
ངན་མང་བ་དང་། །རང་གི་ལག་པ་འདིའང་མི་བདེ་བས། །རྩོམ་དང་ཟིན་བྲིས་ཧ་ཅང་མང་སོང་བས། །གསང་སྔགས་དོན་རྣམས་སྦ་འོས་གསལ་བར་བཀོད། །ཆོས་བདག་མཁའ་འགྲོ་མ་དགྱེས་ཡིན་ནམ་སེམས། །ད་ནི་གཅིག་ཀྱང་མི་རྩོམ་མི་བྲི་བསམ། །དམ་བཅའ་བྱས་ནས་ཉལ་བའི་རྨི་ལམ་ལ། །རྩོམ་པར་རུང་བའི་ལུང་བསྟན་གསལ་བ་དང་། །གཞན་ལ་ཕན་ཐོགས་ཆེ་བའི་རྟགས་མཚན་བྱུང་། །དེ་ཕྱིར་ལག་པ་མི་བདེ་བྲི་དཀའ་ཡང་། །བརྩོན་འགྲུས་མཐར་ཕྱིན་སོགས་ལ་ངག་ནས་སྨོད། །བསྙེན་པ་ཅུང་ཞིག་ཆག་པ་འདུག་ན་ཡང་། །མ་འོངས་འགྲོ་ལ་ཕན་ཕྱིར་བཞག་པ་བསམ། །མགུར་དང་ཞལ་གདམས་ཉེས་པ་མེད་པའི་ཕྱིར། །འཕྲལ་དུ་གང་དྲན་བྲིས་པ་གྲངས་མེད་ཀྱང་། །སྔགས་ཕྱོགས་རྩོམ་པ་བསྒྲིགས་ཆོག་ལ་སོགས་པ། །བྱེད་ཁ་མཎྜལ་མཆོད་གཏོར་གསོལ་བ་བཏབ། །བརྟགས་པ་བྱས་ཤིང་རུང་བའི་ལེགས་པ་ཡིས། །རྟགས་མཚན་མཐོང་ན་བྲིས་པ་ལ་སོགས་པ། །གྱ་ཚོམ་ཉིད་དུ་བྲིས་པ་འགའ་ཡང་མེད། །ངེས་ཤེས་གདེང་ཐོབ་གནད་དུ་འགའ་མེད་པས། །མ་ཎི་བཀའ་འབུམ་ལ་
སོགས་གཏེར་ཆོས་ལ། །ཉེར་མཁོ་ཡག་ཡག་ཕྱོགས་གཅིག་ཐུ་བ་སོགས། །ཆོས་བདག་མཁའ་འགྲོའི་བཀའ་ཆད་འོང་དོགས་མེད། །དེ་སྐད་བུམ་སྒྲུབ་གྲྭ་པ་འགའ་རེ་ཡིས། །མ་ཎི་བཀའ་འབུམ་ནང་ནས་ཐུ་ཐོས་པས། །དེ་ནི་གོ་བ་ཤེས་རབ་ཡོད་པའི་རྟགས། །ཤེས་རབ་ཅན་གྱིས་གྲྭ་པ་བླ་མའི་རྒྱན། །འོན་ཀྱང་རང་རང་སོ་སོར་གནོད་དོགས་པས། །མ་བྲི་སྨྲས་ན་ཆགས་སྡང་མཐོ་ནོན་དུ། །གོ་ནས་མི་དགེའི་རྣམ་རྟོག་སྐྱེ་དོགས་པས། །རང་བསྟོད་གཞན་སྨད་འདྲ་ཡི་གསང་རྒྱུའི་ཚིག །ད་རིས་མ་གསང་རྗེན་པར་ཕུད་ནས་སྨྲས། །ཕྱིན་ཆད་གྲྭ་རིགས་ཀུན་གྱི་སེམས་ལ་ཞོག །བཀྲ་ཤིས་བདེ་ལེགས་བསྟན་པ་དར་རྒྱས་ཤོག །མངྒ་ལཾ།། ༈ །།ན་མོ་མ་ཧཱ་ཀ་རུ་ཎི་ཀ་ཡེ། ཡ་ཕྱོགས་བཅུའི་རྒྱལ་བ་ཐམས་ཅད་ཀྱི། །སྐུ་གསུང་ཐུགས་ཀྱི་གསང་བ་འདུས། །ཚད་མེད་ཐུགས་རྗེ་ཆེན་པོ་ཡི། །འགྲོ་བ་མ་ལུས་འདྲེན་མཛད་པ། །གསང་འདུས་ཐུགས་རྗེ་ཆེན་པོ་ལ། །གསོལ་བ་འདེབས་སོ་བྱིན་གྱིས་རློབས། །བླ་མ་དགེ་སློང་གཉིས་པོ་ཡི། །གཙོ་བྱས་བུམ་སྒྲུབ་པ་ཀུན་གསོན། །ཡི་དམ་ཐུགས་རྗེ་ཆེན་པོ་ཡི། དབང་ཐོབ་ལུང་
ཐོབ་སྒྲུབ་རྫས་འཛོམ། །རྩེ་གཅིག་སྒྲུབ་པ་བྱེད་ཆོག་པ། །མི་ལུས་དོན་ལྡན་བསྐལ་པ་བཟང་། །ལས་འཕྲོ་བཟང་པོ་དགའ་བ་བསྒོམ། །རང་སེམས་རྟ་རྒོད་སྲབ་མེད་དེ། །མཐའ་འགའ་མི་གདའ་གར་ཡང་རྒྱུག །རེས་འགའ་ཟས་ཀྱི་སྣང་བ་འཆར། །ཞིམ་དགུ་མངར་བཅུ་ཅི་ཡང་དྲན། །ཤ་ཆང་བཟང་ཇ་ཟོས་འཐུང་ཡང་། །ཞག་གཅིག་ལོན་ནས་གཅིན་རྟུག་གྱུར། །དེ་ལ་སྙིང་པོ་མེད་པར་སོམ། །ལུས་འཚོ་ཙམ་ལ་ཆོག་ཤེས་མཛོད། །ཟས་ཀྱི་མཆོག་གྱུར་ཏིང་འཛིན་ཟས། །ཟག་མེད་བདུད་རྩི་གཏན་དུ་བདེ། །ཞི་གནས་ལྷག་མཐོང་ཏིང་འཛིན་སོགས། །ཞི་ནི་རྣམ་རྟོག་སྤན་སྤུན་ཞི། །ངོ་བོ་སྟོང་པར་ལྷག་གེ་མཐོང་། །ཞི་ལྷག་ཟུང་འཇུག་ཏིང་འཛིན་ཟས། །ཟོས་ན་ཟས་མང་ཟོས་ཀྱང་འཇུ། །མ་ཟོས་ན་ཡང་ལྟོགས་སྣང་མེད། །ལུས་བདེ་སེམས་བདེ་རིག་པ་གསལ། །ཤིན་ཏུ་ལྗིད་པའི་དཀོར་ཡང་འཇུ། །ས་དང་ལམ་གྱི་ཡོན་ཏན་སྐྱེ། །དེ་ཕྱིར་ཏིང་འཛིན་ཟས་ལ་སྤྱོད། །བཀའ་བརྒྱུད་བླ་མའི་ཕ་འབབས་ཡིན། །རེས་འགའ་གོས་ཀྱི་སྣང་བ་འཆར། །གོས་ཀྱི་སྣང་བ་ཤར་ཙམ་ན། །སྒྱུ་ལུས་ཕུང་པོ་མི་གཙང་རྫས། །
སེམས་ནི་དུག་ལྔའི་ཚེར་ཕུང་འདྲ། །ཕྱི་ནས་གོས་བཟང་གྱོན་ན་ཡང་། །འཕགས་པའི་སྤྱན་སྔར་དེ་མི་མཛེས། །ཁྱི་རྟུག་དར་གྱིས་བཏུམ་པ་འདྲ། །དྲོ་འཇམ་ཐེར་ཕྲུག་ཚར་ཐུལ་ཡང་། །ཤི་ཚེ་མི་གཙང་རོ་ཤུ་གྲིབ། །བྲག་ཕུག་ནང་དུ་སྲིས་ཀྱིས་ཟ། །དེ་ལ་སྙིང་པོ་ཅི་ཡོད་ཨང་། །ལྷག་སྐྱོབ་ཙམ་ལ་ཆོག་ཤེས་མཛོད། །གོས་སུ་གཏུམ་མོའི་མེ་དྲོད་གྱོན། །སྡོམ་གསུམ་གཙང་མའི་སྐེ་རགས་ཆིངས། །ཚེ་རབས་གཏན་དུ་དྲོ་བའི་གོས། །རྒྱལ་བ་སྲས་བཅས་སྤྱན་ལ་མཛེས། །མཐར་ཐུག་མཚན་དཔེའི་རྒྱན་དང་ལྡན། །མི་ལའི་དཀའ་སྤྱད་ན་བཟའ་ཡིན། །རེས་འགའ་གྲོགས་ཀྱི་སྣང་བ་འཆར། །གྲོགས་ཀྱི་སྣང་བ་ཤར་ཙམ་ན། །ཕྱི་ན་མདོག་དཀར་སྐྱེ་ཡག་ཀྱང་། །ནང་ནི་ཁྲག་དང་གཅིན་རྟུག་གང་། །ལོ་འགའ་སོང་ནས་གཉེར་མས་གང་། །མདོག་ནག་སྐྱ་སེ་ཡི་དྭགས་འདྲ། །ཤི་ནས་མི་འཕྲད་སོ་སོར་འགྲོ། །དེ་ལ་ཡག་རྒྱུ་ཅི་ཞིག་ཡོད། །རང་རིག་ཤེས་རབ་ཕར་ཕྱིན་ལ། །དུས་གསུམ་རྒྱལ་བ་ཀུན་དང་སྦྱོར། །རྒས་པ་མེད་ཅིང་འབྲལ་བ་མེད། །རང་སེམས་མ་ཡུམ་ཞལ་ངོ་ལ། །སྲུང་ན་བདེ་སྟོང་ཡེ་ཤེས་འཆར། །ན་དང་འཆི་དང་
བར་དོར་ཡང་། །གྲོགས་དེས་མི་སྐྱུར་ཕན་ཡོན་ཆེ། །འཇིགས་སྐྲག་སྡུག་བསྔལ་ཐམས་ཅད་སྐྱོབ། །འབྲལ་བ་མེད་པ་གཏན་གྱི་གྲོགས། །ཡུམ་ཆེན་ཡེ་ཤེས་ཌཀི་མ། །དེ་ལ་མ་ཡེངས་རང་ཞལ་ལྟོས། །དེ་ལ་རྟག་ཏུ་བསྲུང་བ་ན། །བདེ་དང་གནས་དང་མི་རྟོག་པ། །འཕྲོ་དང་རྒོད་དང་གནས་པ་དང་། །ངོ་འཛུམ་དཀར་ནག་ཅི་ཡང་སྟོན། །འཛུམ་ཞལ་བདེ་ལ་མ་ཆགས་ཤིང་། །གཞན་ཞལ་གསལ་ལ་མ་ཞེན་པ། །ཁྲོ་ཞལ་འཕྲོ་རྒོད་འཚུབ་ན་ཡང་། །ཁྲོ་ནས་མ་སྐྱུར་ལྷོད་ནས་ལྟོས། །དེ་ལྟར་ཆུང་མའི་ངོ་བསྲུངས་ན། །དེ་བས་སྙིང་གཏོད་ཕྱག་ཆེན་གྱི། །དངོས་གྲུབ་དེ་ཡི་ལག་ནས་འབྱུང་། །གྲུབ་ཐོབ་ཀུན་གྱི་མཛའ་མོ་ཡིན། །ཁྱེད་ཅག་ཀུན་གྱི་མ་ཇོ་མཛོད། །མ་ཇོ་དེ་དང་མ་བྱེ་ན། །སངས་རྒྱས་ས་ལ་ངེས་པར་སྐྱེལ། །རེས་འགའ་ཉེ་དུའི་སྣང་བ་འཆར། །ཉེ་དུའི་སྣང་བ་འཆར་ཙམ་ན། །ཁམས་གསུམ་སེམས་ཅན་མ་ལུས་པ། །ལན་གཅིག་མིན་ཟླ་པར་གྲངས་མེད་དུ། །ཕ་མ་བཟའ་ཚང་ཉེ་དུ་བྱས། །ཤི་དུས་ངུས་པའི་མཆི་མ་ཡང་། །བསགས་ན་རྒྱ་མཚོ་ཙམ་ཡོད་གསུངས། །རེས་འགའ་དགྲ་རུ་གྱུར་ནས་ཀྱང་། །ཕན་
ཚུན་བསད་པའི་མགོ་སྤུངས་ན། །རི་བོ་མཆོག་རབ་ཙམ་དུ་གསུངས། །དགྲ་དེ་གཉེན་ཡིན་གཉེན་ཡང་དགྲ། །སུ་ཡི་སེམས་ནད་སུ་ཡིས་བྱེད། །ཚོང་འདུས་མགྲོན་པོ་ལྟ་བུ་སྟེ་།གཏན་དུ་འགྲོགས་པ་སྲིད་པ་མིན། །དེ་ཕྱིར་བླ་མ་འདས་དུས་ཀྱང་། །ངས་ནི་མཆི་ཐིགས་བཏང་བ་མེད། །བླ་མ་ཡི་དམ་མཁའ་འགྲོ་དང་། །ཡེ་ཤེས་ཆོས་སྐྱོང་སྲུང་མ་རྣམས། །རྫོགས་པའི་སངས་རྒྱས་མ་ཐོབ་པར། །རྟག་ཏུ་ཕན་བདེ་གཉེན་འདུན་ཡིན། །གཉེན་འདུན་དེ་དག་སྐྱོང་འདོད་ན། །མོས་གུས་བླ་མའི་གསོལ་འདེབས་ཀྱིས། །གདབ་ལེན་ཕྱག་ཆེན་དངོས་གྲུབ་གནང་། །ཡི་དམ་བསྐྱེད་རིམ་བསྙེན་པ་མཛོད། །གདའ་ལེན་མཆོག་གི་དངོས་གྲུབ་སྦྱིན། །མཁའ་འགྲོ་ཆོས་སྐྱོང་གསོལ་མཆོད་མཛོད། །གདབ་ལེན་ཕྲིན་ལས་རྣམ་བཞི་སྩོལ། །ཕ་ཡི་མཆོག་ནི་བླ་མ་ཡིན། །མ་ཡི་མཆོག་ནི་མཁའ་འགྲོ་ཡིན། །སྤྱན་དང་དགྲ་བོ་ཡི་དམ་ལྷ། །ཚ་བོ་ཚ་མོ་བཀའ་སྲུང་ཡིན། །ཉེ་དུ་མཆོག་ཏུ་དེ་རྣམས་བརྟེན། །རེས་འགའ་ནོར་གྱི་སྣང་བ་འཆར། །ནོར་གྱི་སྣང་བ་ཤར་ཙམ་ན། །འདི་ཕྱིའི་དོན་དག་ནོར་བས་ནོར། །ཕན་གནོད་གཉིས་པོ་ནོར་བས་ནོར། །
ཕུང་འཚེང་གཉིས་པོ་ནོར་བས་ནོར། །ཡོད་ན་འཚོ་སྐྱོང་མི་ཐུབ་སྡུག །རྒན་མོས་ནོར་ཕྱུགས་འཚོ་བ་འདྲ། །མང་ན་དགྲ་འདུལ་གཡབ་མོ་སྡུད། །མེད་ན་བཙལ་བས་མི་རྙེད་སྡུག །ཡི་དྭགས་ཟས་སྐོམ་ཚོལ་བ་འདྲ། །ཇི་ལྟར་ཡོད་ཀྱང་ད་རུང་མཁོ། །ཆོག་ཤེས་མེད་པ་ལན་ཚྭའི་ཆུ། །ཤི་བའི་ནང་པར་ཁབ་སྐུད་ཙམ། །འཁྱེར་དབང་མེད་དེ་ལག་སྟོང་འགྲོ། །དེ་ལ་སྙིང་པོ་མེད་པར་སོམ། །ནོར་གྱི་མཆོག་གྱུར་དགེ་བའི་ཚོགས། །དེ་ཡི་སྙིང་པོ་ཡི་གེ་བདུན། །ཕྲེང་སྐོར་རེ་རེ་ཐོན་ན་ཡང་། །མི་རྟག་འཆི་བའི་ནང་པར་དེར། །གསེར་སྲང་སྟོང་བས་མི་དགའ་རེ། །ཚེ་རབས་ཀུན་ཏུ་དེ་མི་ཟད། །དགྲ་རྐུན་ཇག་པས་བཅོམ་རྒྱུ་མེད། །མཐར་ཐུག་སངས་རྒྱས་གོ་འཕང་སྟེར། །ནོར་གྱི་ནང་ནས་རིན་པོ་ཆེ། །ཡིད་བཞིན་ནོར་བུ་ཡིག་བདུན་ཡིན། །དེ་ལ་དུང་གཅིག་སྙིང་ལ་འཆོང་། །རེས་འགའ་ཕ་ཡུལ་སྣང་བ་འཆར། །ཕ་ཡུལ་སྣང་བ་ཤར་ཙམ་ན། །ལ༔ སྟོང་གསུམ་གླིང་བཞི་རི་རབ་བཅས། །སྐྱེ་དང་འཆི་བ་མ་མྱོང་བ། །ཁབ་ཀྱི་རྩེ་ཙམ་མེད་པར་གསུངས། །ཕ་ཡུལ་གང་ཡིན་ཁང་དེ་མིན། །ཁམས་གསུམ་རིགས་དྲུག་གར་སྐྱེས་
ཀྱང་། །སྐྱེ་རྒ་ན་འཆིའི་འཁོར་ལོ་འཁོར། །ངན་སོང་སྡུག་བསྔལ་བཟོད་བླག་མེད། །མཐོ་རིས་བདེ་སྐྱིད་མི་རྟག་འགྱུར། །གཏན་དུ་བདེ་སྐྱིད་སྡུག་བསྔལ་མེད། །སྐྱེ་རྒ་ན་འཆིའི་སྡུག་བསྔལ་མེད། །ཟས་གོས་ལོངས་སྤྱོད་ཐམས་ཅད་ནི། །ཡིད་ལ་ཅི་འདོད་ལྷུན་གྱིས་གྲུབ། །རྩོལ་སྒྲུབ་འཚོ་སྐྱོང་བྱེད་མི་དགོས། །མངོན་ཤེས་རྫུ་འཕྲུལ་ཐོགས་པ་མེད། །སངས་རྒྱས་ཞིང་ཀུན་ཐོགས་མེད་བགྲོད། །མཆོད་པ་འབུལ་ཞིང་དམ་ཆོས་ཉན། །མཐར་ནི་སངས་རྒྱས་ས་ལ་གནས། །དེ་འདྲའི་ཕ་ཡུལ་བདེ་བ་ཅན། །དེ་འདྲའི་ཕ་ཡུལ་བཟུང་འདོད་ན། །སྡོམ་པ་དམ་ཚིག་གཙང་མར་སྲུངས། །ལུས་ནི་ཐུགས་རྗེ་ཆེན་པོ་སྒོམས། །ཐུགས་ཀའི་ཧྲུལ་རིག་པ་གཏོད། །མི་འཕྲོ་དེ་ལ་སེམས་གནས་ན། །ཞི་གནས་ཏིང་འཛིན་ལོག་ན་མེད། །ཐུན་མོང་དངོས་གྲུབ་དེ་ལས་འབྱུང་། །སེམས་ཀྱི་སེམས་ལ་ཧྲིག་གེར་ལྟོས། །མ་མཐོང་བ་དེ་མཐོང་བའི་མཆོག །སྟོང་པ་ཉིད་ཀྱི་ཏིང་ངེ་འཛིན། །ས་ལེ་ཧྲིག་གེ་རྗེན་ནེ་ཞོག །ལྷག་མཐོང་ཏིང་འཛིན་ལོག་ན་མེད། །གང་ཤར་སྤང་བླང་མེད་པར་སྐྱོངས། །མ་བཅོས་ངང་ལ་ལྷོད་དེ་ཞོག །ཕྱག་རྒྱ་ཆེན་པོ་ལོག་ན་
མེད། །བཀའ་བརྒྱུད་གོང་མའི་ཉམས་ལེན་ཡིན། །གལ་ཏེ་མིག་གིས་མཐོང་འདོད་ན། །ནངས་ནུབ་རྫོགས་ཆེན་ཐོད་རྒལ་ལྟོས། །ཁ་དོག་ལྔ་ནི་ཡེ་ཤེས་ལྔ། །ཐིག་ལེ་ཐིག་ཕྲན་ལུ་གུ་རྒྱུད། །ཀུན་བཟང་དགོངས་པ་ལོག་ན་མེད། །རིག་འཛིན་གོང་མའི་ཉམས་ལེན་ཡིན། །རེས་འགའ་བླ་མ་བྱེད་འདོད་འཆར། །བླ་འདོད་སྣང་བ་འཆར་བའི་དུས། །ཡོན་ཏན་གྲྭ་ཐུབ་མི་ཤེས་ཤིང་། །བསྐྱེད་རྫོགས་ཧོས་འགོ་ཙམ་མེད་པར། །འཕོ་འདེབས་དབང་བསྐུར་ཕྱིར་ལྡོག་སོགས། །ལོང་བས་ལོང་བ་ཁྲིད་པ་བ་བཞིན། །ཕྱི་མ་ཁུར་པོ་ལྗི་བར་སོམས། །སེམས་ལ་རྟོགས་པ་སྐྱེས་པ་ན། །ཡོན་ཏན་མེད་ཀྱང་བླ་མ་འོང་། །ཡང་རི་བསོད་ནམས་བཟང་པོ་དང་། །རྒྱ་ར་ཤེས་རབ་ཕུན་ཚོགས་དང་། །འབྲུག་པ་བསོད་ནམས་དགེ་བ་ཡི། །ཡི་གེ་ཙམ་ཡང་མི་ཆོད་དེ། །ས་གྲོལ་རྡོ་གྲོལ་བྱུང་བ་སོམས། །བླ་མ་འདོད་ན་སེམས་ངོ་སྐྱོངས། །རང་རྒྱུད་གྲོལ་ན་འགྲོ་དོན་འབྱུང་། །བཀའ་བརྒྱུད་བླ་མའི་རྣམ་ཐར་ཡིན། །རེས་འགའ་ཡོན་ཏན་སྣ་མང་འདོད། །བཤེས་གཉེན་བསླབ་འདོད་ཤར་ཙམ་ན། །མི་རྟག་འཆི་བ་དྲན་པར་
མཛོད། །ཚེ་ཐུང་དགུན་སྒང་ཉི་མ་ཙམ། །བར་ཆད་རླུང་གསེབ་མར་མེ་འདྲ། །ནམ་འོང་ཆ་མེད་འཆི་བདག་བདུད། །འོང་ངོ་ཤེས་པ་འཆི་བདག་བདུད། །བཟློག་ཐབས་མེད་པ་འཆི་བདག་བདུད། །ཟླ་བ་རྒྱབ་རེས་ཚེ་ཕྱི་མ། །སུ་སྔ་ཏིག་ཏིག་ཨུ་གདའ་ན། །སང་ཕོད་ད་ཙམ་ས་སྟེང་དུ། །རང་རེ་ཡོད་མེད་ཅི་ཆ་ཡོད། །བྲིས་པའི་དཔེ་ཆ་གཞན་གྱིས་ཁྱེར། །བསླབས་པའི་ཡོན་ཏན་ཕ་མཐའ་ཡས། །ཕུང་པོ་མེས་བསྲེགས་རླུང་གིས་ཁྱེར། །ཡང་ན་བྱ་ཁྱི་འབུ་ཡིས་ཟ། །རྣམ་ཤེས་དགེ་སྡིག་ལས་དང་འགྲོགས། །དེ་དུས་རང་མགོ་ཐོན་པ་ཞིག །རང་གི་རང་ལ་སྙིང་རྗེ་ལྟོས། །དབོན་པོ་སྐྱེར་པ་སྒང་པ་དེས། །ཡོན་ཏན་བསླབ་རྒྱུ་ཕར་བསྒྱུར་ནས། །ལོ་གསུམ་ཐུགས་རྗེ་ཆེན་པོ་བསྒྲུབ། །ཞལ་མཇལ་མངོན་ཤེས་ཐོགས་མེད་བྱུང་། །དབུས་གཙང་ཁམས་སུ་བླ་མར་གྱུར། །རྒྱ་ནག་རྒྱལ་པོའི་འབུལ་ཆེན་བསྐུར། །ཡོན་ཏན་སྣ་མང་ཤེས་པ་བས། །ཐུགས་རྗེ་ཆེན་པོའི་སྒྲུབ་པ་ལ། །རྟགས་ཐོན་བྱས་ན་ལྷག་པར་སོམས། །ང་ལ་གནས་མདོ་བླ་མ་ཟེར། །བར་སྐབས་འདི་ན་གྲགས་ཆེ་བ། །ཐུགས་རྗེ་ཆེན་པོའི་སྒྲུབ་པ་ལ། །ལོ་འགའ་
འབད་པའི་བྱིན་རླབས་ཡིན། །ང་ལས་བརྒྱ་འགྱུར་ཡོན་ཏན་ཆེ། །སྐྱེ་ས་རིགས་རྒྱུད་གང་ལྟར་ལས། །ང་ལས་ལྷག་ངེས་མང་པོ་ཡི། །ང་ལ་ཕྱག་འཚལ་དབང་ལུང་ཞུས། །དེ་དོན་དེ་ཡིན་གོ་ལགས་སམ། །བླ་མ་འདོད་ན་བུམ་སྒྲུབ་དེས། །སྔགས་དང་དམིགས་པ་རྟགས་ཐོན་མཛོད། །རེས་འགའ་གཅིག་པུར་འདུག་འདོད་འཆར་། །གཅིག་པུར་འདུག་འདོད་ཤར་ཙམ་ན། །ཉམས་ལེན་སྐྱོང་རྒྱུ་ངེས་ཤེས་མེད། །རི་ཁྲོད་ཟིན་ངེས་མེད་པ་རུ། །རི་ཁྲོད་བཟུང་ནས་མཚམས་བསྡམས་ཏེ། །སོ་གསོད་ལྐོག་ཉལ་བྱེད་པ་དེ། །དགུན་གསུམ་ཕྱི་བ་ཉལ་དང་འདྲ། །དོན་མེད་སྡུག་སྐུར་ཡིན་པར་སོམས། །རང་སེམས་རང་གིས་མ་ཐུལ་ན། །གཅིག་པུར་བྲག་ཕུག་བསྒོམས་ན་ཡང་། །ཨེ་ལེའི་འདབ་ཀླུའི་ལོ་རྒྱུས་ལྟར། །བྱ་དང་རི་དྭགས་གཅན་གཟན་ལྟར། །ཤིང་སྤུན་ཡན་གྱིས་ཞེ་སྡང་བསླང་། །ནང་གི་ཞེ་སྡང་མ་ཞི་ན། །དུག་སྦྲུལ་རི་ལ་ཚང་ལ་བཅས་དང་། །གླ་བ་བྲག་ལ་གནས་པ་འདྲ། །དེ་ཕྱིར་ཁོང་ཁྲོ་ནམ་སྐྱེས་དུས། །དེ་ཡི་ངོ་ལ་ཧྲིག་གེར་ལྟོས། །དངོས་པོ་མེད་པར་སྟོང་པར་འཆར། །གསལ་སྟོང་ཕྱག་རྒྱ་ཆེན་
པོ་ཡིན། །དེ་སྐད་རཱ་ག་ཨ་སྱ་ཡིས། །རྟ་ལོ་སྤྲེལ་ཟླའི་ཉེར་གཅིག་ཉིན། །བུམ་སྒྲུབ་པ་ལ་གསལ་འདེབས་སུ། །ཉམས་ལ་ཤར་ནས་སྨྲས་པ་ཡིན། །མངྒ་ལཾ། །༈ །ཀྱེ་མ་ཀྱེ་ཧུད་ཨ་ཙ་མ། །རང་གི་ནོར་ལ་སེར་སྣས་བཅིངས། །ཡར་མཆོད་མར་སྦྱིན་བྱེད་མི་བྲ། །རང་ལ་སྟོབས་འབྱོར་ཆེ་ན་ཡང་། །མ་ནུས་པ་ལ་མགོན་སྐྱབས་མེད། །རང་ཉིད་ཡོན་ཏན་ཆེ་ན་ཡང་། །བློ་ངན་གཞན་ལ་ལོབ་དོགས་བྱེད། །སྡོམ་པ་དམ་ཚིག་མི་བསྲུང་བར། །ཤ་ཆང་དགོང་སོགས་བག་མེད་སྤྱོད། །སེམས་ལ་འདོད་ཆགས་སེར་སྣ་ཆེ། །མི་ཚངས་སྤྱོད་ལ་ཤིན་ཏུ་བརྩོན། །གཞན་གྱི་བསོད་ནམས་ལོངས་སྤྱོད་ལ། །རང་ཉིད་འཕྲོག་བཞིན་ཡིད་མི་དགའ། །དེ་འདྲའི་ལས་འབྲས་ཡི་དྭགས་སྨིན། །རྒྱ་གར་གྲོང་ཁྱེར་སེར་སྐྱའི་འོག །དཔག་ཚད་ལྔ་བརྒྱའི་སོ་མཚམས་ན། །བྱེ་མའི་ཐང་ཆེན་ཆུ་མེད་པར། །ཉི་མ་མེད་ཀྱང་ཚ་གདུག་ཆེ། །དེ་འདྲའི་དབུས་སུ་ཕོ་བྲང་ནང་། །ཡི་དྭགས་རྒྱལ་པོ་གཤིན་རྗེ་ཞེས། །དག་པ་རྣམས་ཀྱིས་སངས་རྒྱས་སྐུ། །དམར་པོ་གཙུག་ཏོར་ཅན་དུ་མཐོང་། །ལ་ལས་བུད་མེད་རིན་ཆེན་བརྒྱན། །ཐང་ཤིང་
ཙམ་གྱི་དབུ་རྒྱན་ཅན། །འཁོར་ཚོགས་མང་པོས་བསྐོར་བ་ལ། །ལོངས་སྤྱོད་དཔག་ཏུ་མེད་པ་མཐོང་། །ཕོ་བྲང་དེ་ཡི་མཐའ་བསྐོར་ན། །ལོངས་སྤྱོད་དཔག་ཏུ་མེད་པའི་ནང་། །པུས་མོ་ནུབ་ཅིང་འགྲོ་ན་ཡང་། །ཟ་དབང་མེད་དེ་ཁྲོ་བོ་དང་། །དམག་མི་གོ་མཚོན་ཅན་གྱིས་བསྲུང་། །དེ་རྒྱབ་ཆུ་མཚོ་ལྗོན་ཤིང་སོགས། །ཕུན་སུམ་ཚོགས་པ་ཡོད་ན་ཡང་། །རང་རང་ལས་ངན་རྣམ་སྨིན་གྱིས། །ཆུ་རྣམས་རྣག་ཁྲག་དུག་ཆུར་མཐོང་། །ལ་ལས་ཆུ་སྐམ་གྲམ་པར་མཐོང་། །ལྗོན་ཤིང་ལོ་འབྲས་བཟང་པོ་ཡང་། །ཟ་བསམ་བརྒྱུགས་པས་བྱེ་ཐང་དང་། །ཤིང་སྐམ་གྲམ་པ་སྐྱ་བོར་མཐོང་། །ཟས་ཚོལ་བརྒྱུགས་པས་ངལ་ཞིང་ཆད། །ལྟོགས་ནས་རང་ཤ་གཅོད་ཅིང་ཟ། །ཕན་ཚུན་ལྔ་བ་གཤག་པ་ནས། །རྣག་ཁྲག་དོན་ཏེ་ཟག་པར་བྱེད། །ཆུ་མཐོང་བརྒྱུགས་པས་ས་འོག་ཐིམ། །ས་བྲེད་མཛུབ་གུ་རུས་པར་ཐུག །ཆུ་ནི་མ་རག་ཆུ་སྐད་ཉན། །ལ་ལ་སྐྱ་ལུས་ནི་ཆེ་བ་ལ། །ལྟོ་བ་རི་ཡི་རྒྱ་མཚོ་ལ། །མགོ་ནི་རྫ་ཟོམ་ཙམ་པ་ལ། །ཁ་ནི་ཁབ་ཀྱི་མིག་ཙམ་ལ། །སྐྱིད་པ་རྟ་རྔ་ཙམ་དུ་ཕྲ། །ཟས་རྙེད་ཁ་དང་མྱིད་པ་ན། །མི་ཐར་
ལྟོ་བ་གང་དུས་མེད། །ལ་ལ་ཟ་ས་མེད་ན་ཡང་། །ཁོག་ཏུ་ཕྱིན་ནས་མེ་དཔུང་འབར། །ཁ་ནས་མེ་ལྕེ་འབར་བ་དང་། །རྐང་ལག་ཚིག་མཚམས་དུ་བ་འཐུལ། །ལུས་ནི་ཁོ་ཤོག་ལྟར་སྐམ་རླུང་གིས་ཁྱེར། །རུས་པ་སྐམ་པའི་ཚིག་མཚམས་རྣག་ཁྲག་འཐབ། །དེ་དག་ཀུན་གྱི་ཡི་དྭགས་ཨ་ཙ་མ། །ཁ་འཐོར་ཡི་དྭགས་མི་ཡི་ཡུལ་ན་ཡོད། །བྱང་སྟོང་ཆུ་འགྲམ་ནགས་གསེབ་གར་ཡང་གནས། །ལུས་ནི་སྡོང་རྒན་མེ་ཡིས་ཚིག་པ་འདྲ། །ཐང་ཤིང་ཙམ་ལ་ལུས་ནི་མི་ཡི་གཟུགས། །གཅེར་བུ་རྒྱ་བོ་སེན་མོ་རྣོ་ལ་རིང་། །ཟླ་བས་འཚིག་ཅིང་ཉི་མ་ཕོག་པས་འཁྱག །ཆར་འབྲུ་རེ་ཡང་མེ་འདག་དུ་མ་འཐུལ། །དེ་ཕྱིར་ཆར་པ་འབབ་དོགས་སྡུག་བསྔལ་ཆེ། །ཆུ་ཆེན་རྣམས་ཀྱང་བལྟས་པ་ཙམ་གྱིས་སྐམ། །བཙོག་པར་ཤེས་ཀྱང་ཧ་ཅང་ལྟོགས་དྲགས་པས། །སྣབ་དང་ཁ་ལུད་གཅིན་རྟུག་རྩོད་ཅིང་ཟ། །དེ་ཡང་བསྔོས་པ་མ་གཏོགས་ཐོབ་པ་དཀའ། །ཁ་ལུད་ཟ་མ་བྲ་བར་ལག་ཏུ་འཆང་། །སེན་མོ་ལག་པའི་རྒྱབ་ཏུ་སྔོ་རྒྱབ་བེ། །བུ་དང་ཆུང་མ་གསོ་ཕྱིར་བསོགས་པ་སྟེ། །ཕ་མ་བུ་ཚ་རྒན་གཞོན་མི་དང་འདྲ། །ཆུ་གཏོར་གཏོང་སར་ཐམས་ཅད་ཧྲུག་གེ་
འཚོགས། །རེ་ཞིག་བཀྲེས་སྐོམ་ཞི་ནས་གླུ་གར་བྱེད། །ཉི་མ་ནུབ་ནས་ཟླ་བ་མ་ཤར་བར། །གྲིབ་སོའི་ངོགས་ལ་ས་གཞི་ཁྱབ་པར་རྒྱུག །ཀུན་ཀྱང་ཟས་དང་ཆུ་ཚོལ་སྙིང་རེ་རྗེ། །བདག་དང་འབྲེལ་ཐོགས་འགྲོ་བ་ཐམས་ཅད་རྣམས། །བཀྲེས་སྐོམ་གནས་ནས་དྲོངས་ཤིག་སྤྱན་རས་གཟིགས། །ཡི་དྭགས་གནས་ལ་སུམ་ཅུ་སོ་དྲུག་སྟེ། །སྡུག་བསྔལ་ཆེ་ཆུང་མི་གཅིག་སྣ་ཚོགས་ཡོད། །ཚེ་ཚད་མི་ལོ་ལྔ་སྟོང་ལྔ་ཁྲི་ཐུབ། །ཨོཾ་མ་ཎི་པདྨེ་ཧཱུཾ། ཀྱེ་མ་ཨ་ལ་མཚར་པོ་ཆེ། །ཡི་དྭགས་མཐུ་ཆེན་ལོངས་སྤྱོད་ཅན། །།བཙན་དང་ཐེའུ་རང་རྒྱལ་འགོང་དང་། །བགེགས་དང་འབྱུང་པོ་ལོག་འདྲེན་རིགས། །ཕོ་བྲང་ལོངས་སྤྱོད་ཆེ་ན་ཡང་། །རྟག་ཏུ་བཀྲེས་སྐོམ་ཆེ་གྲགས་པས། །སྡིག་པ་ཡོད་པ་ཤེས་ན་ཡང་། །རྔོན་པས་རི་དྭགས་གསོད་པ་ལྟར། །ཚེ་དང་བསོད་ནམས་རྐུ་ཞིང་འཕྲོག །གླུད་དང་མཆོད་པ་ཨེ་འོང་གིས། །རེ་བ་ཡོད་ནས་གནོད་པ་བྱེད། །དབུགས་དེ་ལོན་ན་བརྒྱག་སྣང་ཡོད། །སྔགས་པ་གཅོད་པ་ལ་སོགས་ཀྱིས། །འདྲེ་བརྡུངས་བྱས་ནས་སྐྲག་སྔངས་དང་། །སྡུག་བསྔལ་བཀྱིག་བརྡུང་བསྲེས་དང་འདྲ། །མཐོ་ཐོག་ཨོ་
རྒྱན་ལ་སོགས་ཀྱིས། །དམ་ལ་བཏགས་ཕྱིར་བསྟན་པ་བསྲུང་། །དེ་མིན་འགྲོ་བའི་དབུགས་བླངས་པས། །ཚེ་ཚད་རྫོགས་ནས་མནར་མེད་འདྲ། །ལས་ངན་དབང་གིས་ལུས་ངན་བླངས། །ལུས་ངན་བླངས་ནས་ལས་ངན་བསགས། །ལས་ངན་བསགས་པས་ཐར་མེད་དུ། །འགྲོ་བའི་འདྲེ་སྲིན་སྙིང་རེ་རྗེ། །ཨོ་རྒྱན་པདྨ་འབྱུང་གནས་ཀྱིས། །ཚེས་བཅུར་སྤྲུལ་པ་འགྱེད་པའི་དུས། །དེ་དག་ཐམས་ཅད་དམ་ལ་ཐོག །ཐར་པའི་ལམ་ལ་འགོད་དུ་གསོལ། །གུ་རུ་པདྨ་སིདྡྷི་ཧཱུྃ། །ཡི་དྭགས་སྡུག་བསྔལ་དྲན་པའི་གླུ། །རྟ་ལོ་སྤྲེལ་ཟླའི་ཉེར་གཉིས་ལ། །དགེ་སློང་རཱ་ག་ཨ་སྱས་བྲིས། །མངྒ་ལཾ།། ༈ །།ཀྱེ་མ་ཀྱེ་ཧུད་ཨ་ཙ་མ། །མ་རིག་མ་ཤེས་གཏི་མུག་གིས། །དཀོན་མཆོག་གསུམ་ལ་དད་པ་མེད། །དམ་པའི་ཆོས་ལ་འདོད་པ་མེད། །ཚིག་ངན་དུད་འགྲོ་འདྲ་སོགས་སྨྲས། །དུད་འགྲོའི་རིགས་ལ་ཁྲོ་ཞིང་བརྡུང་། །མི་ཕན་གནོད་པའི་ཟས་སྐོམ་སྦྱིན། །སྐུར་པ་བཏབ་དང་ངག་འཆལ་མང་། །སྡོམ་པ་ཕྲ་ཞིབ་ཁྱད་དུ་བསད། །དེ་འདྲའི་ལས་ཀྱི་འབྲས་བུ་ནི། །གླིང་བར་མུན་ནག་འཁྲིགས་པའི་ནང་། །ཡིད་ལས་གྲུབ་པའི་དུད་
འགྲོའི་ལུས། །དེ་དབུས་རིན་ཆེན་གཞལ་ཡས་ཁང་། །དེ་ནང་དུད་འགྲོ་འདུལ་བའི་ལྷ། །བཅོམ་ལྡན་སེང་གེ་རབ་བརྟན་བཞུགས། །དག་པ་རྣམས་ཀྱི་སྣང་ངོར་ལ། །སངས་རྒྱས་མཐིང་ཁ་ཆོས་གོས་ཅན། །ཕྱག་ན་ཤེས་རབ་པོ་ཏི་འཛིན། །ཉན་ཐོས་དགེ་སློང་དཔག་མེད་བསྐོར། །ལོངས་སྤྱོད་བདེ་སྐྱིད་ཕུན་སུམ་ཚོགས། །དུད་འགྲོ་རང་རང་སྐད་དུ་ནི། །ཤེས་རབ་ཕར་ཕྱིན་ཆོས་གསུངས་ཀྱང་། །མ་དག་པ་ཡི་སྣང་ངོ་ལ། །སེང་གེ་འཇིགས་སུ་རུང་བ་གཅིག །ང་རོ་སྒྲོག་ཅིང་དུད་འགྲོ་རྣམས། །སྐྲག་ཆ་པར་བྱེད་ཅིང་ཟིལ་གྱིས་གནོན། །ཕོ་བྲང་དེ་ཡི་མཐའ་བསྐོར་དུ། །ལྕགས་ཀྱི་སྒམ་བུ་གྲངས་མེད་བརྩིགས། །སྒམ་བུ་དེ་འདྲ་རེ་རེའི་ནང་། །སྐྱེས་པ་བུད་མེད་མང་པོ་ནི། །དུད་འགྲོ་སྣ་ཚོགས་མགོ་ཅན་ལ། །རྣ་བ་ལྕགས་ཀྱི་འཛེར་གྱིས་བསྡམས། །ཉི་ཟླའི་ཟེར་ཡང་མི་མཐོང་བ། །མུན་ནག་གླིང་དགུར་རྒྱུན་དུ་འདུག །ས་འོག་རྒྱ་མཚོ་ཆེན་པོའི་ནང་། །རིན་ཆེན་སྣ་ཚོགས་ཕོ་བྲང་ན། །ལོངས་སྤྱོད་བསམ་ལས་འདས་པ་དེར། །ཀླུ་ཡི་རྒྱལ་པོ་ནག་པོ་སོགས། །རྒྱལ་པོ་བློན་པོ་བཙུན་མོ་དང་། །ཀླུ་ཡི་སྡེ་རིགས་བསམ་
ལས་འདས། །རྒྱལ་རིགས་རྗེའུ་རིགས་བྲམ་ཟེའི་རིགས། །དམངས་རིགས་གདོལ་པའི་རིགས་སུ་འདུས། །ཀླུ་ཡི་རྒྱལ་པོ་ཆེ་ཆེ་རྣམས། །ཚེ་ཚད་བསྐལ་པའི་བར་དུ་གནས། །སངས་རྒྱས་མང་པོའི་ཞལ་མཐོང་ཞིང་། །བསྟན་པ་སྲུང་ཞིང་ཆོས་ལ་དགའ། །བྱང་ཆུབ་སེམས་དཔའི་ས་ལམ་ཐོབ། །ལོངས་སྤྱོད་བདེ་སྐྱིད་བསམ་མི་ཁྱབ། །ཁྱུང་གི་སྙིང་ལས་གྲུབ་པ་ཡི། །ནོར་བུ་སྤྱི་བོར་ཡོད་པའི་ཕྱིར། །ཁྱུང་གི་འཇིགས་པ་དེ་ལ་མེད། །རིན་པོ་ཆེ་ཡི་བྲག་ཕུག་ན། །འདུག་ས་ཡོད་པས་བྱེ་ཚན་གྱིས། །ཆར་པ་བབ་ཀྱང་གནོད་པ་མེད། །དུས་སུ་ཆར་འབེབས་འབྲུག་སྒྲ་འབྱིན། །འཇིག་རྟེན་ལོ་ལེགས་སྐྱེ་རྒྱལ་དང་། །སངས་རྒྱས་བསྟན་པ་དར་བར་བྱེད། །འོན་ཀྱང་ནག་ཕྱོགས་གདུག་པའི་ཀླུ། །དེ་དང་གནས་སུ་འཁྲུག་པ་དགོས། །སྐབས་རེ་བསྙུང་ནས་འཆི་ལ་ཁད། །དེ་དུས་འཛམ་གླིང་ཆར་པ་མེད། །བྱང་ཆུབ་སེམས་ལྡན་ཀླུ་རྒྱལ་གྱིས། །སེར་སྣ་གྲོལ་ནས་སྦྱིན་པ་གཏོང་། །དེ་དུས་གསེར་ཁ་དངུལ་ཁ་དང་། །ཟངས་ཁ་ལྕགས་ཁ་རྡོལ་བ་ཡིན། །དེ་མིན་ཀླུ་རིགས་ཐམས་ཅད་ནི། །གཏི་མུག་ང་རྒྱལ་ཕྲག་དོག་ཆེ། །མཐོང་
བའི་དུག་ཅན་ཀླུ་རིགས་ཀྱིས། །བལྟས་པས་ལུས་ལ་ནད་ཀུན་འབྱུང་། །རེག་པའི་དུག་ཅན་ལག་པ་ཡིས། །གང་ལ་རེག་པ་ནད་ཀྱིས་འཆི། །མཆེ་བའི་དུག་དང་ཁ་རླངས་དུག །བསམ་པའི་དུག་གིས་གནོད་པ་བྱེད། །སྤྱི་བོར་དུག་ཅན་ནོར་བུ་བཅིངས། །དེ་ལས་སྤྲིན་བྱུང་ཆར་ཆེན་ཡང་། །ལོ་ཐོག་རྩྭ་སོགས་མི་སྐྱེ་རུལ། །རེས་འགའ་བྱ་ཁྱུང་དེར་འོང་ནས། །ཀླུ་རིགས་ཆེ་ཆེ་གཏུབ་ཅིང་ཟ། །ཆུང་ཆུང་ཇུར་མིད་བྱེད་ཅིང་ཟ། །གླག་ཅིང་བྱ་རིགས་བདའ་དང་འདྲ། །རེས་འགའ་བྱེ་ཚན་ཆར་པ་འབབས་། །ཀླུ་ཀུན་ཤ་དང་རུས་པ་ཞིག །ཆར་འབོད་ཆར་པ་གཏན་ནས་མེད། །ནག་ཕྱོགས་ཀླུ་རིགས་འདུལ་བའི་ཕྱིར། །རྟ་མགྲིན་ཕྱག་རྡོར་སྟོབས་པོ་ཆེ། །ཁྲོ་བོ་རྣམས་བྱུང་སྡུག་བསྔལ་ཆེ། །ཆོས་ལ་དགའ་བའི་དཀར་ཕྱོགས་ཀླུ། །སྡིག་ལ་དགའ་བའི་ནག་ཕྱོགས་ཀླུ། །མི་དུམ་འཁྲུག་པ་དུས་ལོག་རྣམས། །གསོད་དང་ཡུལ་ཕུད་བཅོམ་ཕྲོག་པ་རྣམས་། །མི་ལ་དུས་ལོག་བྱུང་དང་འདྲ། །རེས་འགའ་མཛེ་དང་ཤུ་བ་སོགས། །ནད་རིམས་ཡམས་ནད་ཆེན་པོ་ནི། །མི་ལ་ནད་ངན་བྱུང་དང་འདྲ། །རྒྱལ་པོའི་བཀའ་སྐྱོན་
ཕོག་པ་ན། །སྦྲུལ་མགོའི་གདེངས་ཀ་ཐམས་ཅད་བྲེག །ཡུལ་ནས་ཕུད་སོགས་ཁྲིམས་ལ་གཏུག །ལོངས་སྤྱོད་བསམ་གྱིས་མི་ཁྱབ་ཅིང་། །རིན་ཆེན་གཏེར་ཁ་ས་འོག་གང་། །རྒྱ་མཚོ་ཆེན་པོའི་གྲམ་པ་རྣམས། །ཐམས་ཅད་རིན་པོ་ཆེ་ཡིན་ཀྱང་། །གཞན་གྱིས་ཁྱེར་དོགས་བསྐུང་ཞིང་སྦ། །སྦལ་པའི་ཤ་ནི་མར་ཁུ་ལ། །བཙོས་པས་ཟས་ཀྱི་མཆོག་ཏུ་རྩི། །དེ་ཚེ་དངོས་མེད་ལྷ་འདྲེ་འདྲ། །དངོས་སུ་རྒྱ་མཚོའི་ནང་ན་ཡང་། །བུ་ཆུང་སྦྲུལ་མཇུག་རལ་པ་ཅན། །ཡིན་པ་དཔག་ཏུ་མེད་པ་རྣམས། །རྒྱ་མཚོའི་འགྲམ་དུ་བརྩེ་བའི་ཚེ། །མཚོ་འགྲམ་ཤིང་སྡོང་དཔག་མེད་རྩེར། །ནམ་མཁའ་ལྡིང་ཞེས་ཁྱུང་གི་རིགས། །མང་པོ་ཡོད་པས་གསོད་ཅིང་ཟ། །དེ་དག་འཁོར་དུ་རྒྱ་མཚོའི་ནང་། །ཉ་བོ་ཆེ་ནི་རི་ཙམ་པ། །དེ་ཉིད་ཇུར་མིད་བྱེད་པ་ཡི། །ཉ་མིད་ཅེས་བྱའི་དུད་འགྲོ་ཡོད། །དེ་ཉིད་ཇུར་མིད་བྱེད་པ་ཡི། །དེ་མིད་ཅེས་བྱའི་སེམས་ཅན་ཡོད། །པིར་དང་རུ་སྦལ་ཆུ་རྟ་དང་། །ཆུ་ལུག་ཆུ་གླང་ཆུ་འབྲི་དང་། །ཆུ་ཡི་མི་སོགས་དཔག་ཏུ་མེད། །དེ་དག་ཐམས་ཅད་ཟ་བྱེད་པ། །ཆུ་སྲིན་ཞེས་བྱ་རི་ཆེན་ཙམ། །ལོ་གསུམ་བར་དུ་ཁ་གདངས་
བས། །ཁ་ནང་སེམས་ཅན་དཔག་མེད་འཚོགས། །ཁ་བསྡབ་ཟོས་པའི་ཁྲག་གིས་ནི། །ཕྱོགས་དེའི་རྒྱ་མཚོ་དམར་པོར་བཏང་། །ལྟོ་འཕྱེ་ཞེས་བྱའི་སྦྲུལ་ཆེན་པོ། །དབུས་ཀྱི་རི་བོ་མཆོག་རབ་ལ། །ལུས་ཀྱིས་གཅུད་གསུམ་འཁོར་བ་ཙམ། །ལུས་པོ་ཤིན་ཏུ་ཆེ་དྲགས་པས། །སྐམ་ལ་ཐོན་པ་བྱ་ཡིས་ཟ། །ཆུ་ལ་ནུབ་པ་ཆུ་གནས་ཚོཟ། །འཆི་བར་མི་ནུས་སྡུག་བསྔལ་ཆེ། །ཉིང་ཤ་ཉིང་ཟའི་སེམས་ཅན་ཞེས། །རྒྱ་མཚོའི་གདེང་ཁྱུད་མུན་གླིང་ན། །དེ་འདྲའི་ལུས་པོ་ཆེན་པོ་སྟེ། །བཀྲེས་དྲགས་ཟ་རྒྱུ་མ་རྙེད་པས། །རང་གི་ལུས་ལ་རང་གིས་ཟ། །བླུན་ཞིང་ཤིན་ཏུ་གཏི་ཐུག་པས། །ན་ཚ་ཆེན་པོ་བྱུང་བ་དེ། །རང་གིས་འགྲད་པའི་དོན་མ་ཤེས། །ན་ཚ་ཆེ་ཞིང་རང་ལུས་ཟ། ཆུ་སྲིན་ལ་སོགས་ལུས་ཆེ་བ། །དུང་སོགས་ཆུང་བས་ལུས་པོ་ཕུག །ན་ཚ་ཆེ་དྲགས་གཡབ་པ་དེས། །རྒྱ་མཚོ་འཁྲུག་པས་ས་འགུལ་དང་། །ས་གཏིབ་ཆེན་པོ་འོང་བར་བྱེད། ཆུང་བ་རྣམས་ནི་ཆེ་ཆེ་ཡིས། །ཇུར་མིད་བྱེད་ནས་ཟ་བ་སོགས། །དུད་འགྲོའི་སྡུག་བསྔལ་དཔག་ཏུ་མེད། །དེ་དག་གནས་ཀྱི་དུད་འགྲོ་སྟེ། །རྒྱ་མཚོ་ཆེན་པོའི་ནང་ན་ནི། །
ཆང་ལ་ཆུ་རྒྱབ་སྦང་མ་ཙམ། །དེ་དག་གནས་ཀྱི་དུད་འགྲོ་ཡིན། །ཁ་འཐོར་མི་ཡུལ་ལྷ་ཡུལ་ན། །བྱ་དང་རི་དྭགས་འབུ་སྲིན་སོགས། །དུད་འགྲོ་སྐྱིད་ཤོས་གཡུང་དྭགས་ཏེ། །མི་ལ་འཁོར་བའི་དུད་འགྲོ་རྣམས། །རྨོ་འགེལ་བཤའ་སོགས་མཐོང་ལྟར་ལགས། །བྱང་ཆུབ་སེམས་དཔའ་ལ་ལ་ནི། །ལྟུང་བ་ཕྲ་མོའི་རྒྱུ་འབྲས་ཀྱིས། །རེས་འགའ་དུད་འགྲོར་སྐྱེས་ན་ཡང་། །རིགས་མཐུན་རྣམས་ལ་ཆོས་འཆད་ཤེས། །དེ་ཡི་ཤ་ཁྲག་རུས་པ་དང་། །ལྤགས་པ་སུས་ཟོས་སུས་གྱོན་རྣམས། །འབྲེལ་བ་ཐོག་པས་འདྲེན་པར་ནུས། །དེ་ལ་སྡུག་བསྔལ་མེད་པའང་ཡིན། །ལུས་ལ་སྡུག་བསྔལ་ཡོད་མཉམ་སྟེ། །དེ་ནི་བྱང་ཆུབ་སེམས་བསྐྱེད་ལྡན། །དུད་འགྲོ་རིགས་བཟང་ཞེས་བྱའོ། །དེ་ཡི་ལུས་ལ་གི་ཝང་དང་། །སྡིག་ཆེན་མི་དང་ཁྱི་དང་ཕག །སྐྱེ་བ་བདུན་བརྩེགས་བླངས་ན་ནི། །དེ་ལ་རིང་བསྲེལ་འབྱུང་བ་སྟེ། །སྡིག་པ་རིང་བསྲེལ་ཞེས་བྱ་སྟེ། །དེ་ཡི་ཤ་ཟོས་དམྱལ་བར་འགྲོ་།བདག་ལ་འབྲེལ་ཐོགས་འགྲོ་བ་རྣམས། །གླེན་ལྐུགས་དུད་འགྲོར་སྐྱེ་སྲིད་ན། །མྱུར་དུ་དྲོངས་ཤིག་སྤྱན་རས་གཟིགས། །ཨོཾ་མ་ཎི་པདྨེ་ཧཱུཾ། དུད་འགྲོའི་སྡུག་བསྔལ་
དྲན་པའི་གླུ། །རྟ་ལོ་བྱ་ཟླའི་ཚེས་གཅིག་ལ། །རཱ་ག་ཨ་སྱས་སྨྲས་པའོ། །བྷ་ཝནྟུ།། །།ཀྱེ་མ་སྡིག་ཆེར་མ་བྱས་ཤིང་། །གདན་གཅིག་ལ་སོགས་སྡོམ་པ་བསྲུང་། །སྦྱིན་པ་མང་པོ་བཏང་ན་ཡང་། །གཞན་ལ་མཐོ་དོག་ཕྲག་དོག་ཆེ། །གཡོ་སྒྱུ་མགོ་བསྐོར་མི་རྣམས་བསླུ། །འཐབ་རྩོད་མང་ཞིང་འཁྲུགས་པ་བསླང་། །རྒྱུན་དུ་འཛིང་རྩོད་ཞེ་གཅོད་པ། །དེ་འདྲ་ལས་ཀྱི་རྣམ་སྨིན་ནི། །རི་རབ་ཆུ་ཡི་མཚམས་ནས་མར། །དཔག་ཚད་ཁྲི་ཡི་སོ་མཚམས་ན། །རི་རབ་ཁོང་སེང་འོད་ལྡན་ཞེས། །ལྷ་མིན་གྲོང་ཁྱེར་ཆེན་པོ་ཡོད། །དེ་ཡི་རྒྱལ་པོ་སྒྲ་གཅན་འཛིན། །དེ་འོག་དཔག་ཚད་ཁྲི་ཡི་སོར། །ལྷ་མིན་གྲོང་ཁྱེར་སྐར་ཕྲེང་ན། །རྒྱལ་པོ་མགུལ་ཕྲེང་ཅན་ཞེས་ཡོད། །དེ་འོག་དཔག་ཚད་ཁྲི་ཆིག་སྟོང་། །གྲོང་ཁྱེར་བརྟན་པ་ཞེས་བྱ་བའི། །ལྷ་མིན་རྒྱལ་པོ་རབ་གནོན་ཡོད། །རྒྱལ་པོ་དེ་གསུམ་ཐ་མལ་པ། །བསོད་ནམས་སྦྱིན་སྐྱ་ཤུགས་སྟོབས་ལས་བྱུང་། །དེ་འོག་དཔག་ཚད་ཁྲི་ཆིག་སྟོང་། །ལྷ་མིན་གྲོང་ཁྱེར་ཟབ་པ་ན། །བཅོམ་ལྡན་ཐགས་བཟང་རི་ཞེས་པ། །དག་པ་རྣམས་ཀྱི་སྣང་ངོ་ལ། །སངས་
རྒྱས་ལྗང་གུ་གོ་མཚོན་ཅན། །འཐབ་རྩོད་སྡུག་བསྔལ་སྦྱང་བའི་ཕྱིར། །བཟོད་པ་ཆེན་པོའི་དམ་ཆོས་སྟོན། །བྱང་ཆུབ་སེམས་དཔའི་འཁོར་དང་བཅས། །མ་དག་པ་ཡི་སྣང་ངོ་ལ། །ལྷ་མིན་གྲོང་ཁྱེར་བཞི་པོ་ལ། །སྤྱི་དཔོན་རྒྱལ་པོ་གདུག་པ་ཅན། །གསོད་གཅོད་འཁྲུག་པའི་གཙོ་བོར་མཐོང་། །ལྷ་མ་ཡིན་གྱི་ཡུལ་དེ་ན། །བདེ་སྐྱིད་ལོངས་སྤྱོད་ཐམས་ཅད་ནི། །མི་ལས་བརྒྱ་སྟོང་འགྱུར་གྱིས་ལྷག །ལྷ་ཡི་བདེ་སྐྱིད་མ་དོ་ཙམ། །རིན་ཆེན་སྣ་ཚོགས་སྐུ་མཁར་ན། །ཀུན་དགའ་ར་བ་སྐྱེད་མོས་ཚལ། །དཔག་བསམ་ལྗོན་ཤིང་ལ་སོགས་ཡོད། །ལྷ་མ་ཡིན་གྱི་བུ་མོ་ནི། །ལྷ་མོ་མི་མོ་གང་བས་ཀྱང་། །མཛེས་ཤིང་ཡིད་འོང་ལྟ་ན་སྡུག །དེ་ཚོ་ལྷ་ལ་ཤོར་དོགས་སྐྱག །དཔེར་ན་རི་བོ་མཆོག་རབ་ནི། །མཁར་ཆེན་བརྩེགས་ལྔ་འདྲ་བ་ཡི། །རྩེ་ན་སུམ་རྩེན་ལྷ་ཡི་ཡུལ། །ལྷ་ཡི་དབང་པོ་བརྒྱ་བྱིན་ཡོད། །རི་རབ་བང་རིམ་རྣམ་བཞི་ནི། །བརྩེགས་བཞིའི་བད་སྒྲ་འདྲ་བའི་སྟེང་། །རྒྱལ་ཆེན་རིགས་བཞིའི་ལྷ་རྣམས་ཡོད། །མཁར་གྱི་སྲོག་རྫོང་འདྲ་བ་ཡི། །ནང་གི་བརྩེགས་བཞིའི་ཐོག་རྣམས་སུ། །ལྷ་མིན་གྲོང་ཁྱེར་བཞི་ཆགས་པས། །
མཁར་གྱི་དཀྱིལ་ཀ་འདྲ་བ་ཡི། །རི་རབ་སྲོག་ཤིང་དཔག་བསམ་ཤིང་། །རྩེ་མོ་ལྷ་ཡུལ་ཡོད་པ་ལ། །ལོ་མ་དར་ཟབ་ལྷ་ཡི་གོས། །འབྲས་བུ་བདུད་རྩི་ཤིང་མཆོག་ནི། །རོ་བརྒྱ་ལྡན་པ་ལྷ་ཡི་ཟས། །ཤིང་ཁུ་བདུད་རྩི་འཆི་མེད་ཟས། །རྩ་བ་ལྷ་མིན་ཡུལ་ཟུག་པས། །རྩེ་མོར་འཁྲུངས་པའི་ལོངས་སྤྱོད་དེ། །ལྷ་ཡི་བྱེད་ལ་མི་འདུམ་རྩོད། །ལྷ་ཡི་བདེ་སྐྱིད་བསོད་ནམས་སྟོབས། །ཡིན་པས་མེད་པའི་དུས་ནི་མེད། །དེ་ཉིད་མ་ཐུབ་སེམས་ནད་ཆེ། །འཛམ་བུའི་གླིང་ནས་སངས་རྒྱས་དང་། །རང་སངས་རྒྱུས་དང་འཁོར་ལོས་སྒྱུར། །བཞུགས་ཚེ་ལྷ་མིན་ཕྲག་དོག་ནི། །ལྷ་ལ་རྩོད་པ་མི་བྱེད་དེ། །མི་བཞུགས་དུས་ན་འཁྲུག་པ་བྱེད། །འཛམ་གླིང་ཆོས་བྱེད་མང་ན་ཡང་། །ལྷ་རྣམས་རྒྱལ་ཞིང་ལྷ་མིན་ཕམ། །དེ་ཕྱིར་ཆོས་བྱེད་ལྷ་ཡིས་བསུ། །སྡིག་བྱེད་མང་ན་ལྷ་མིན་བསྲུངས། །ལྷ་མིན་བདུད་ཀྱི་སྡེ་ཡིན་པས། །བདུད་རིགས་ཆོས་བྱེད་རྣམས་ལ་སྡང་། །ལྷ་མ་ཡིན་གྱི་རྒྱལ་པོ་བཞི། །རེ་རེ་དང་ནི་གཉིས་རེ་དང་། །གལ་ཆེ་བཞི་ཁའི་དམག་དཔུང་གཡོ། །གསེར་དང་དངུལ་དང་བཻཌཱུརྱའི། །ཤེལ་གྱི་གོ་ཆ་སྲ་བ་
གྱོན། །མདའ་གཞུ་རལ་གྲི་མདུང་རྣམས་དང་། །སྐྱོགས་དང་དཔག་ཆེན་མཚོན་ཆ་ཐོགས། །རི་རབ་ཁོང་སེང་ཕྱི་ན་ཐོན། །ལྷ་ཡི་སྒོ་སྲུང་དང་པོ་ནི། །རོལ་པའི་མཚོ་བདུན་ནང་གནས་པའི། །ཀླུ་ཆེན་བརྒྱད་པོ་འཁོར་བཅས་དང་། །འཐབ་ཅིང་ཀླུ་ཡིས་མ་ཐུབ་ན། །རི་རབ་བང་རིམ་དང་པོ་ན། །ལྷ་ཡི་སྒོ་སྲུང་གཉིས་པོ་སྟེ། །གཞོང་ཐོགས་ལྷ་ཡི་སྡེ་དང་བཅས། །དེས་མ་ཐུབ་ན་ཡར་འབོ་ནས། །བང་རིམ་གཉིས་པའི་སྒོ་སྲུང་གསུམ། །ཕྲེང་ཐོག་ལྷ་ཡི་སྡེ་དང་འཐབ། །མ་ཐུབ་དེ་གཉིས་ཡར་བྲོས་ནས། །སྒོ་སྲུང་གསུམ་པ་ལྷ་ཡི་སྡེ། །རྟག་མྱོས་ལྷ་ཡི་སྡེ་དང་འཐབ། །དེས་མ་ཐུབ་ན་ཡར་སོང་ནས། །བང་རིམ་བཞི་པའི་ཐོག་གནས་པའི། །རྒྱལ་པོ་ཆེན་པོ་སྡེ་བཞི་ཡི། །དམག་དཔུང་བྱེ་བ་དུང་ཕྱུར་དང་། །འཐབས་པས་ཕལ་ཆེར་ཐུབ་པར་འགྱུར། །དེས་ཀྱང་མ་ཐུབ་ལྷ་དམག་ཚོ། །རི་རབ་རྩེ་ནས་ཡར་བྲོས་ཏེ། །རི་རབ་དེ་ཡི་ཕྱོགས་བཞི་ན། །གནོད་སྦྱིན་ལག་ན་རྡོ་རྗེ་ཅན། །ཆ་ལུགས་ཕྱག་རྡོར་འདྲ་བ་ཡི། །ཁྲོ་བོ་ལྔ་བརྒྱ་ཚན་བཞི་ཡི། །ཅུང་ཟད་ལྷ་མིན་བཀག་ཐུབ་ཚེ། །རྒྱལ་ཆེན་སྡེ་བཞི་མར་བྱོན་ནས། །བརྒྱ་བྱིན་ལྷ་ཡི་
རྒྱལ་པོར་ཞུས། །བློན་པོ་སུམ་ཅུ་རྩ་གཉིས་ཀྱིས། །ལྷ་ཡི་དམག་རྣམས་བསྡུ་བའི་ཚེ། རིན་ཆེན་སྣ་ཚོགས་གོ་མཚོན་ཐོགས། །ལྷ་རྣམས་ཞེ་སྡང་མེད་པ་དེས། །འགྲོ་དང་འཁྲུག་པ་མི་ཤེས་པས། །བྱང་ཤར་རྩུབ་གྱུར་དུར་ཁྲོད་དུ། །མགོན་པོ་ནག་པོ་གནས་པའི་ས། །ཁྲོ་བོ་ལངྐ་ནག་པོ་ཡི། །ཁ་ཆུའི་མཚོ་བཞི་ཡོད་པ་འཐུང་། །དེ་ནས་ལྷ་རྣམས་ཞེ་སྡང་སྐྱེ། །གླང་ཆེན་རབ་ཏུ་བརྟན་པ་ཞེས། །མགོ་བོ་སུམ་ཅུ་རྩ་གཉིས་ལ། །ཉེ་དབང་བློན་པོ་སོ་གཉིས་ཞོན། །སྟེང་དུ་བརྒྱ་བྱིན་ཉིད་ཀྱིས་ཆིབས། །སྣ་ལ་མཚོན་ཆའི་འཁོར་ལོ་བསྐོར། །འཕང་ན་མི་ཕོགས་མི་སྲིད་ལ། །ཕོགས་ནས་མི་སྨྲས་མི་སྲིད་དང་། །སྨྲས་ན་མི་འཆི་མི་སྲིད་ལ། །ཤི་ནས་ངན་སོང་མི་འགྲོ་མེད། །དམ་བཅའ་བཞི་ལྡན་རྡོ་རྗེ་དེ། །བརྒྱ་བྱིན་ལྷ་ཡི་མཚོན་ཆ་ཡིན། །དམག་དཔོན་མགོན་པོ་ལེགས་ལྡན་དེས། །ཕྱག་ན་ཙན་དན་བེང་ཕྱེ་ནས། །དམག་ཚོགས་བྱེ་བ་དགུ་ཁྲི་སྒྱུ་འགྱེད། །སྲིང་མོ་དཔལ་ལྡན་ལྷ་མོ་དེས། །བསམ་གཅོད་རལ་གྲི་མེ་ཕྲེང་ཅན། །ཕྱར་ནས་ལྷ་མི་སྐེ་རྣམས་ལ། །ལྷ་རྣམས་སྨྲས་ན་མི་དང་འདྲ། །ལྷ་མིན་སྨྲས་ན་ཁྲག་
ཐིགས་རེ། །གང་བོ་ས་ནས་ལྷ་མིན་དམག །ཁྲི་ཚོ་རེ་རེ་འཕེལ་ནས་འོང་། །དེ་ཕྱིར་ལྷ་མིན་ཐུབ་པར་དཀའ། །ཁྲག་དེ་འཕེལ་རྒྱུ་མེད་པའི་ཕྱིར། །དཔལ་ལྡན་ལྷ་མོས་ཁྲག་རྣམས་འཐུང་། །ལྕགས་ཀྱི་འཁོར་ལོ་རྩིབས་བཞི་པ། །གོང་ལྟར་དམ་བཅའ་བཞི་ལྡན་ནི། །ལྷ་ཡི་རྒྱལ་པོའི་མཚོན་ཆ་ཡིན། །གླང་ཆེན་ཏི་སེ་གངས་བརྩེགས་དང་། །རྟ་ཡི་རྒྱལ་པོ་གྲགས་འཇིགས་ཞེས། །འཕུར་ཤེས་ལྷ་མིན་རྒྱལ་པོའི་རྟ། །ལྷ་མ་ཡིན་རྣམས་མགོ་དང་སྐེད། །ཆད་ན་མིན་པར་འཆི་རྒྱུ་མེད། །སྨྲས་པ་རྣམས་ནི་བསྐུང་བའི་ཕྱིར། །གསོན་པོར་མུན་པའི་གླིང་དུ་འཕེན། །ཡུན་རིང་མི་འཆི་སྡུག་བསྔལ་ཆེ། །གལ་ཏེ་ལྷ་རྣམས་ཕམ་ན་ནི། །བྲོས་ཏེ་རྣམ་པར་རྒྱལ་བ་ཡི། །ཕོ་བྲང་ནང་ཞུགས་སྒོ་རྣམས་བསྡམ། །ཕོ་བྲང་དེ་ལ་མི་ཐུབ་ཀྱང་། །ཐུབ་དོགས་ལྷ་རྣམས་སྐྲག་ཅིང་འདུག །གལ་ཏེ་ལྷ་མིན་ཕམ་པ་ན། །རྒྱ་མཚོའི་ཆུ་མཚམས་བར་དུ་དེད། །སོ་སོའི་ཕོ་བྲང་ནང་བྲོས་ནས། །ལྷ་ཡིས་ཐུབ་པ་མ་ཡིན་ཡང་། །ཐུབ་དོགས་ས་འོག་ཀླུ་རྣམས་དང་། །རྒྱབ་བརྟེན་ཞུས་ནས་སྐྱབས་ཚོལ་དགོས། །འཛམ་གླིང་ཆོས་བྱེད་ཉུང་ནས་ནི། །ལོ་རེ་ལན་
གཉིས་འཁྲུག་པ་འོང་། །འཁྲུག་པར་ལྟད་མོ་བལྟ་བའི་ཕྱིར། །གཟའ་བདུད་རྒྱལ་པོ་རཱ་ཧུ་ལ། །ལྷོ་ནུབ་རྒྱ་མཚོའི་འགྲམ་ནས་ལང་། །དེ་ཡི་གྲིབ་མ་ཕོག་པའི་ཕྱིར། །ཉི་ཟླ་གཟའ་ཡིས་འཛིན་པ་མཐོང་། །ཉི་ཟླ་གཟའ་ཡིས་ནམ་འཛིན་དུས། །ལྷ་དང་ལྷ་མིན་འཁྲུག་རྟགས་ཡིན། །ལྷ་དང་ལྷ་མིན་འཁྲུག་ཆེ་ན། །འོག་ཕྱོགས་ཀླུ་རྣམས་མི་བདེ་སྟེ། །དཀར་ཕྱོགས་ཀླུ་རིགས་ཐམས་ཅད་ནི། །ཀླུ་ཆེན་བརྒྱད་ཀྱི་འཁོར་ཡིན་པས། །ལྷ་ཡི་ཕྱོགས་ལ་དགའ་བ་ཡིན། །ནག་ཕྱོགས་གདོལ་བའི་ཀླུ་རིགས་རྣམས། །བདུད་རིགས་ཡིན་ཕྱིར་ལྷ་མིན་ཕྱོགས། །དཀར་ནག་ཀླུ་གཉིས་འཁྲུག་པ་ཆེ། །དཀར་ཕྱོགས་རྒྱལ་ན་མི་རྣམས་བདེ། །ནག་ཕྱོགས་རྒྱལ་ན་སད་སེར་དང་། །བཙའ་དང་མུ་གེ་ལ་སོགས་འབྱུང་། །དེ་ནས་ཀླུ་ཡི་སྒོ་སྲུང་བ། །ས་བདག་གཞི་བདག་དཀར་ཕྱོགས་དང་། །ནག་ཕྱོགས་འཁྲུག་པས་མི་རྣམས་འཁྲུག །གཙུག་ལག་དགོན་སྡེ་སྒྱུ་ཞིག་རལ་འབྱུང་། །མ་གཅིག་དཔལ་ལྡན་ལྷ་མོ་ཁྲོས། །བྱང་ཤར་རྒྱ་མཚོའི་འགྲམ་ནས་བཞེངས། །ནམ་མཁའི་དཀྱིལ་དུ་ངུ་འབོད་བྱས། །མཆིལ་མ་ཁྲག་གི་ཆར་པར་
འབབ། །དེ་ཡིས་མ་མོ་མཁའ་འགྲོ་འཁྲུག །ཁ་རླངས་ནད་ཀྱི་ན་བུན་འཁྲིགས། །ཐལ་མོ་བར་སྣང་ཁམས་སུ་བརྡབ། །མི་ནད་ནོར་ནད་ཆར་དུ་འབེབས། །འཛམ་གླིང་མི་ནོར་ཕྱགས་མས་འདེབས། །དེ་ལྟར་མི་དགེ་སྣ་ཚོགས་དེ། །ཕྲག་དོག་འཐབ་རྩོད་རྒྱུ་ལས་བྱུང་། །ཐུགས་རྗེ་ཆེན་པོ་སྤྱན་རས་གཟིགས། །ལྷ་དང་ལྷ་མིན་འཐབ་རྩོད་ཀྱི། །འཁྲུག་རྩོད་ཞི་བར་བྱིན་གྱིས་རློབས། །ཨོཾ་མ་ཎི་པདྨེ་ཧཱུྃ། ལྷ་མིན་འཐབ་རྩོད་ཞི་བའི་གླུ། །རྟ་ལོ་བྱ་ཟླའི་ཡར་ཚེས་གཅིག །རཱ་ག་ཨ་སྱས་སྨྲས་པ་དགེ །མངྒ་ལཾ།། ༈ །།ཨེ་མ་མཚར་ཞིང་དང་སྤྲོ་བ། །ཚུལ་ཁྲིམས་རྣམ་པར་དག་པ་བསྲུང་། །དགེ་བཅུ་སྤྱོད་ཅིང་ཆོས་ཉན་འདོད། །ཅི་ཡོད་སྦྱིན་པ་མང་པོ་བཏང་། །འཆི་ཁར་སངས་རྒྱས་སྐུ་གཟུགས་མཇལ། །དགེ་བ་འགྲུབ་པའི་ང་རྒྱལ་ཆེ། །དེ་ཡང་དགེ་བ་ཆེ་ཆུང་དང་། །དཔག་པའི་འདོད་ཁམས་ལྷ་ཡི་གནས། །དྲུག་པོ་རྣམས་སུ་སྐྱེ་བར་གསུངས། །རི་རབ་བང་རིམ་དང་པོ་ལ། །ལྷ་ཡི་སྡེ་ཚོགས་དཔག་ཏུ་མེད། །སྐྱིད་དགའ་ལོངས་སྤྱོད་ཆེ་ན་ཡང་། །ཕོ་བྲང་རྒྱ་མཚོ་བཤིགས་དོགས་ནས། །ལག་ན་རིན་ཆེན་
གཞོང་པ་ཐོགས། །རྒྱ་མཚོའི་ཆུ་ལ་བཅུས་ནས་ཀྱང་། །ལྕགས་རི་རྒྱབ་ཏུ་འདོར་ལ་བརྩོན། །དེ་ཡི་འཁོར་གྱི་གནོད་སྦྱིན་རྣམས། །ཆར་པས་རྒྱ་མཚོ་སྐྱེ་དོགས་ནས། །བར་སྣང་ཁམས་ནས་ཆར་པ་རྣམས། །གཞོང་པ་ཐོགས་ནས་ལྕགས་རི་ཡི། །རྒྱབ་ཏུ་འདོར་ཞིང་ཆར་པ་བཀག །གཞོང་ཐོགས་ལྷ་ཡི་གྲོང་ཁྱེར་ཡིན། །བང་རིམ་གཉིས་པ་ལྷ་ཡི་སྡེ། །གྲོང་ཁྱེར་སྐྱིད་དགའ་ལོངས་སྤྱོད་ཆེ། །མེ་ཏོག་སྣ་ཚོགས་ཕྲེང་བ་འཛིན། །རྟག་ཏུ་གླུ་གར་རྩེ་མོར་ཡེངས། །ཕྲེང་ཐོགས་ལྷ་ཡི་གྲོང་ཁྱེར་ཡིན། །བང་རིམ་གསུམ་པའི་ལྷ་རྣམས་ནི། །རྟག་ཏུ་སྦྲང་རྩིའི་ཆང་འཐུང་བས། །ཉིན་མཚན་མེད་པར་བཟི་ནས་འདུག །རྟག་ཏུ་མྱོས་པས་རྟག་མྱོས་ཟེར། །བང་རིམ་བཞི་པའི་ཕྱོགས་བཞི་ན། །རྒྱལ་ཆེན་བཞི་ཡི་ཕོ་བྲང་ཡོད། །ཤར་ཕྱོགས་ཕོ་བྲང་སྤོས་ངད་ལྡན། །དེ་ན་རྒྱལ་པོ་ཡུལ་འཁོར་སྲུང་། །དྲི་ཟ་བྱེ་བ་འབུམ་དང་བཅས། །རྟག་ཏུ་གླུ་དབྱངས་རོལ་ཀླུ་མོ་སྒྲ། །ལྷོ་ཕྱོགས་ཕོ་བྲང་བཻཌཱུརྨ། །རྒྱལ་པོ་ཆེན་པོ་འཕགས་སྐྱེས་པོ། །གྲུལ་བུམ་བྱེ་བ་འབུམ་དང་བཅས། །ནུབ་ཕྱོགས་ཕོ་བྲང་རྒྱ་མཚོའི་ངོགས། །རྒྱལ་པོ་ཆེན་པོ་སྤྱན་
མི་བཟང་། །ཀླུ་རིགས་བྱེ་བ་འབུམ་གྱིས་བསྐོར། །བྱང་ཕྱོགས་ཕོ་བྲང་ལྕང་ལོ་ཅན། །རྒྱལ་པོ་ཆེན་པོ་རྣམ་ཐོས་སྲས། །གནོད་སྦྱིན་བྱེ་བ་འབུམ་གྱིས་བསྐོར། །རིན་ཆེན་གཏེར་ཁ་ཀུན་གྱི་བདག །ཉི་མ་ཟླ་བ་སྐར་མ་དང་། །གསེར་གྱི་རི་བདུན་སྟེང་རྣམས་དང་། །གླིང་བཞིའི་རི་མཐོ་ས་གཙང་དང་། །ལྗོན་ཤིང་རྣམས་ལ་གནས་པ་དང་། །ཕྱི་ཡི་ལྕགས་རིའི་སྟེང་གནས་པའི། །གཟུགས་ཅན་གཟུགས་མེད་ལྷ་འདྲེའི་ཚོགས། །རྒྱལ་ཆེན་བཞི་ཡིས་མངའ་འོག་སྟེ། །ཐམས་ཅད་གཅིག་ཏུ་རྩིས་པ་ནི། རྒྱལ་ཆེན་བཞི་པའི་ལྷ་ཞེས་བྱ། །ཀུན་ཀྱང་ལོངས་སྤྱོད་རྒྱ་ཆེ་ཞིང་། །སྟོབས་དང་རྫུ་འཕྲུལ་རྒྱ་ཆེ་ཡོད། །མི་ལོ་ལྔ་བཅུ་ཞག་གཅིག་ལ། །བརྩི་བའི་རང་ལོ་ལྔ་བརྒྱ་ཐུབ། །ལུས་ཚད་རྒྱང་གྲགས་བཞི་ཆའོ། །རི་རབ་རྩེ་ཡི་སྟེང་ན་ནི། །སུམ་རྩེན་ལྷ་ཡི་ཡུལ་ཡོད་དེ། །ས་གཞི་འཇམ་ཞིང་ཁོད་སྙོམས་པ། །ཏ་ལའི་ཕོ་བྲང་མཛེས་པར་བརྒྱན། །རིན་ཆེན་གསེར་གྱི་བྱེ་མ་བརྡལ། །བདུད་རྩི་རྫིང་བུ་དུ་མ་དང་། །ལྷ་ཡི་བདུད་རྩི་དཀར་སེར་དམར། །སྔོན་པོ་འཁྱིལ་བའི་མཚོ་ཆུང་མང་། །བྱང་ཤར་དཔག་བསམ་ལྗོན་ཤིང་ལས། །ལོ་མ་ལྷ་ཡི་
དར་ཟབ་འབྱུང་། །འབྲས་བུ་བདུད་རྩི་རོ་བརྒྱ་ལྡན། །ཕྱོགས་བཞིར་སྐྱེད་མོས་ཚལ་ཆེན་བཞི། །དེ་དབུས་ལྷ་ཡི་གྲོང་ཁྱེར་ནི། །ལྟ་ན་སྡུག་ཅེས་ལྕགས་རིས་བསྐོར། །དེ་དབུས་བརྒྱ་བྱིན་ཕོ་བྲང་ནི། །རྣམ་པར་རྒྱལ་བའི་ཁང་བཟང་ཞེས། །རིན་ཆེན་སྣ་ཚོགས་ལས་གྲུབ་པའི། །གཞལ་ཡས་ཁང་པ་བདུན་བརྩེགས་དབུས། །རིན་ཆེན་སྣ་ཚོགས་ཁྲི་ཡི་སྟེང་། །ལྷ་ཡི་ཐུབ་པ་བརྒྱ་བྱིན་བཞུགས། །དག་པ་རྣམས་ཀྱི་སྣང་ངོ་ལ། །སངས་རྒྱས་དཀར་པོ་པི་ཝང་བསྣམས། །བརྩོན་འགྲུས་ཕར་ཕྱིན་ཆོས་རྣམས་སྟོན། །མ་དག་པ་ཡི་སྣང་བ་ལ། །ལྷ་ཡི་ཐུབ་པ་བརྒྱ་བྱིན་བཞུགས། །སྐུ་ལུས་སྤྱན་མིག་སྟོང་གིས་གང་། །ལྷ་རྣམས་ཟིལ་གྱིས་གནོན་པ་དང་། །ལྷ་མིན་གཡུལ་བཟློག་སྟོབས་པོ་ཆེ། །ཉེ་དབང་བློན་པོ་སོ་གཉིས་བསྐོར། །བདེ་སྐྱིད་ལོངས་སྤྱོད་བསམ་ལས་འདས། །ཕལ་ཆེར་གླུ་གར་རྩེད་མོར་ཡེངས། །བརྒྱ་བྱིན་བཙུན་མོ་བདེ་སོགས་མ། །ལ་ལྷ་ཡི་བུ་མོ་བསམ་མི་ཁྱབ། །ལྷ་དང་ལྷ་མོ་བརྩེ་ཞིང་རོལ། །འཛམ་གླིང་ཆོས་བྱེད་མང་ན་ནི། །ལྷ་རུ་སྐྱེ་བས་ལྷ་བུ་མང་། །ལྷ་མ་ཡིན་རྣམས་ཐུབ་ཕྱིར་དགའ། །སྡིག་བྱེད་
མང་བས་ལྷ་བུ་ཉུང་། །ལྷ་མིན་མི་ཐུབ་དོགས་པས་སྡུག །འཛམ་གླིང་དགེ་སྡིག་ཅི་བྱེད་དེ། །བལྟ་ཕྱིར་ཉ་མཚམས་བརྒྱད་གསུམ་ལ། །ཕོ་ཉ་བ་དང་རྒྱལ་ཆེན་བུ། །རྒྱལ་ཆེན་བཞི་དང་བརྒྱ་བྱིན་གྱིས། །འཛམ་གླིང་ཐམས་ཅད་ཉུལ་ཞིང་བལྟ། །དགེ་སྡིག་བྱས་ཚད་ཡི་གེར་བྲི། །ལྷོ་ཕྱོགས་རིམ་དགུ་ས་ཡི་འོག །གཤིན་རྗེའི་རྒྱལ་པོ་དེ་ལ་བསྐུར། །སུམ་ཅུ་རྩ་གསུམ་མན་ཆད་དེ། །ལྷ་མ་ཡིན་ལ་འཐབ་དགོས་སྡུག །རྟ་ཡི་རྒྱལ་པོ་སྤྲིན་ཤུགས་ཅན། །རྟ་གཡོག་བརྒྱ་སྟོང་དུ་མ་དང་། །ས་སྲུང་བུ་ཞེས་གླང་པོ་ཆེ། །གླང་གཡོག་དང་བཅས་བརྒྱ་བྱིན་རྟ། །རྔ་ཆེན་ཆོས་ཀྱི་མཐོ་བ་ཞེས། །གསེར་གྱི་རྔ་ལས་ཆོས་སྒྲ་དང་། །ལྷ་མིན་ཐུབ་དང་མི་ཐུབ་སོགས། །རྔ་དེས་རང་གྲགས་སྒྲོག་པ་འབྱུང་། །མི་ཡི་ལོ་བརྒྱ་ཞག་གཅིག་ལ། །བརྩི་བའི་རང་ལོ་སྟོང་ཕྲག་ཐུབ། །ནད་མེད་རྒས་པའང་ལྷ་ལ་མེད། །དེ་ནས་ས་ཡི་སྟེང་མིན་པར། །ཡར་ལ་ཁང་པའི་རྩག་བཞིན་དུ། །ལྷ་གནས་ཐམས་ཅད་བརྩེགས་མར་ཡོད། །འོག་མའི་འོག་མ་རྣམས་ལས་ནི། །གོང་མའི་གོང་མ་རྒྱ་ཆེ་ཞིང་། །ཚེ་དང་ལོངས་སྤྱོད་བདེ་སྐྱིད་ཀྱང་། །ཇེ་ཆེར་
གོང་མ་ཐམས་ཅད་ལྷག །དེ་དག་ནམ་མཁའ་སྟོང་པ་ན། །རླུང་གི་དཀྱིལ་འཁོར་སྲ་ཞིང་བརྟན། །ས་གཞི་བས་ཀྱང་བརྟན་པ་ལ། །མི་སྒྲིབ་ནམ་མཁའ་སྟོང་པ་འདྲ། །དེ་འདྲའི་སྟེང་དུ་གྲོང་ཁྱེར་ཆགས། །དང་པོ་འཐབ་བྲལ་ལྷ་རྣམས་ཀྱི། །ལྷ་མ་ཡིན་དང་འཐབ་མི་དགོས། །མི་ལོ་ཉིས་བརྒྱ་ཞག་གཅིག་ལ། །རྩི་བའི་རང་ལོ་ཉིས་སྟོང་ཐུབ། །དེ་སྟེང་དགའ་ལྡན་ལྷ་ཡི་གནས། །བྱམས་པ་བཞུགས་པས་ཆོས་འཁོར་བསྐོར། །མི་ལོ་བཞི་བརྒྱ་ཞག་གཅིག་ལ། །རྩི་བའི་རང་ལོ་བཞི་སྟོང་ཐུབ། །དེ་སྟེང་འཁྲུལ་དགའ་ཞེས་པའི་ལྷ། །ཅི་འདོད་ལོངས་སྤྱོད་ངང་གིས་སྤྲུལ། །མི་ལོ་བརྒྱད་བརྒྱ་ཞག་གཅིག་ལ། །བརྩི་བའི་རང་ལོ་བརྒྱད་སྟོང་ཐུབ། །དེ་སྟེང་གཞན་འཕྲུལ་དབང་བྱེད་ལྷ། །གཞན་གྱི་སྤྲུལ་པའི་ལོངས་སྤྱོད་ལ། །སྤྱོད་ཅིང་བདེ་སྐྱིད་བསམ་ལས་འདས། །དེ་ཡི་རྒྱལ་པོ་བདུད་སྡིག་ཅན། །དགའ་རབ་དབང་ཕྱུག་བྱ་བ་ཡོད། །མི་ལོ་སྟོང་དང་དྲུག་ཅུ་ལ། །ཞག་གཅིག་རྩི་བའི་རང་གི་ལོ། །ཁྲི་དང་དྲུག་སྟོང་ཐུབ་པ་ཡིན། །མནར་མེད་ཡན་ནས་དེ་ཡན་ཆད། །བདུད་དེའི་མངའ་འོག་སྡེ་ཡིན་གྱི། །འདོད་ཆགས་ལྡན་
པས་འདོད་ཁམས་ཟེར། །འདོད་ཡོན་ལྔ་ལ་སྲེད་པ་ཆེ། །གལ་ཏེ་ཆོས་བྱེད་མཐོང་ན་ནི། །འདོད་ཆགས་ལ་སོགས་སྤང་ན་ནི། །བདུད་ཀྱི་འཁོར་དུ་མི་གཏོགས་པས། །ཁོ་ཡི་མངའ་ཞབས་ཉུང་དོགས་པས། །བདུད་དེས་ཆོས་ལ་བར་ཆད་བྱེད། །བདུད་རྒྱལ་དེ་ལ་བུ་སྟོང་ཡོད། །ལྔ་བརྒྱ་ཆོས་ལ་དགའ་བ་སྟེ། །སངས་རྒྱས་བསྟན་པ་སྲུང་བྱེད་པའི། ཆོས་སྐྱོང་ཕལ་ཆེར་བདུད་ཀྱི་བུ། །ལྔ་བརྒྱ་ཆོས་ལ་མི་དགའ་བས། །ནག་ཕྱོགས་བདུད་རིགས་ཐམས་ཅད་ཡིན། །ལྷ་གནས་མི་ཡུལ་ཀླུ་ཡུལ་དུ། །ཆོས་ལ་དགའ་བ་ཐམས་ཅད་ནི། །དཀར་ཕྱོགས་བུ་ཚོའི་འཁོར་དུ་གཏོགས། །ཆོས་ལ་མི་དགའ་ཐམས་ཅད་ནི། །ནག་ཕྱོགས་བུ་ཚོའི་འཁོར་དུ་གཏོགས། །ཀུན་ཀྱང་འདོད་ཁམས་ཐམས་ཅད་དེ། །བདུད་ཀྱི་མངའ་ཞབས་སྡེ་ཡིན་པས། །དུག་ལྔ་ཤུགས་ཀྱིས་ཆེ་བ་ཡིན། །དེ་ཡན་འདོད་ཆགས་མེད་ན་ཡང་། །རང་རང་སྐུ་གཟུགས་མཛེས་པ་དང་། །རིན་ཆེན་གཞལ་ཡས་ཁང་ཡོད་པས། །གཟུགས་ཀྱི་ཁམས་ཀྱི་ལྷ་ཡིན་ཏེ། །དེ་ལ་གནས་རིགས་བཅུ་བདུན་ཡོད། །དེ་ཡི་མཐོ་ཤོས་འོག་མིན་ཏེ། །དེ་ཡི་གོང་ན་གཞན་མེད་དོ། །དེར་སྐྱེས་ཕལ་
ཆེར་འཕགས་པ་ཡིན། །གཟུགས་མེད་སྐྱེ་མཆེད་བུ་བཞིའི་ལྷ། །གཟུགས་ནི་མེད་དེ་རྣམ་ཤེས་ཙམ། །གནས་ནི་ངེས་པ་མེད་པ་ཡིན། །དེ་ལྟར་གཟུགས་དང་གཟུགས་མེད་ལྷ། །བསམ་གཏན་བསྒོམ་པའི་རྒྱུ་ལས་བྱུང་། །གོང་མའི་བསོད་ནམས་ཟད་པ་ན། །འོག་མ་འོག་མར་ལྟུང་བར་ཡོད། །འདོད་ཁམས་ལྷ་རིགས་ཐམས་ཅད་ལ། འཆི་ལྟས་རྣམ་པ་ལྔ་བྱུང་བས། །སྡུག་བསྔལ་མི་ལོ་དྲུག་ཅུར་མྱོང་། །ཚེ་ཟད་བསོད་ནམས་མ་ཟད་ན། །ལྷ་གནས་ཤི་འཕོས་ལྷ་རུ་སྐྱེས། །ཚེ་ཟད་བསོད་ནམས་ཕྱེད་ཟད་ན། །བརྒྱ་བྱིན་ལྷ་ཡི་ལུང་མནོས་ནས། །མི་ཡི་རྒྱལ་པོའི་བུ་རུ་སྐྱེས། །ཚེ་དང་བསོད་ནམས་གཉིས་ཀ་ཟད། །ངན་སོང་གནས་སུ་སྐྱེ་བར་འགྱུར། །ལྷ་ཡི་འཕོ་ལྟུང་དྲན་པའི་གླུ། །རྟ་ལོ་བྱ་ཟླའི་ཚེས་གཉིས་ལ། །སྨྲས་པ་ཀུན་གྱིས་གོ་བ་ལོངས། །སརྦ་མངྒ་ལཾ།། ༈ །།ཨེ་མ་རྒྱུ་འབྲས་བདེན་པ་མཚར། །མི་ལ་བདེ་སྐྱིད་འདོད་པ་ཡིས། །བསྙེན་གནས་གཙང་མ་སྲུང་བ་དང་། །སྦྱིན་པ་མང་དུ་བཏང་བ་ན། །སེར་སྣ་ཅུང་ཟད་འདྲེས་པ་དང་། །འཁོར་བའི་ཆོས་ལ་སེམས་ཆགས་ནས། །ཐར་པ་ཐོབ་
པའི་འདོད་པ་མེད། །ཡང་ན་སྡོམ་པ་མ་ཞུས་པར། །སྡིག་པ་སྤང་ཞིང་སྦྱིན་པ་བཏང་། །ཆོས་ནི་ཞུ་བར་མི་བྱེད་ཅིང་། །ཆོས་ཐོབ་འདོད་པའི་བསམ་པ་མེད། །དེ་དག་དགེ་བ་ཆེ་ཆུང་དང་། །སྦྱིན་ཤུགས་ཆེ་ཆུང་ཁྱད་པར་གྱིས། །སྒྲ་མི་སྙན་དང་བ་ལང་སྤྱོད། །ལུས་འཕགས་གླིང་དུ་སྐྱེ་བ་སྟེ། །དེ་བས་བསོད་ནམས་ཅུང་ཟད་ཆུང་། །སོ་སོའི་གླིང་གཡོག་རྣམས་སུ་སྐྱེ། །སྒྲ་མི་སྙན་ནས་ལོ་སྟོང་ཐུབ། །དེ་ལ་དུས་མིན་འཆི་བ་མེད། །ལོངས་སྤྱོད་བདེ་སྐྱིད་བསམ་མི་ཁྱབ། །དེ་ལ་རྩོལ་སྒྲུབ་མི་དགོས་ཤིང་། །ལོངས་སྤྱོད་བདག་ཏུ་བཟུང་བ་མེད། །ཟས་ནི་མ་རྨོས་ལོ་ཏོག་ཟ། །དོ་ནུབ་ཟད་ན་ནངས་པར་སྐྱེ། །གོས་ནི་དཔག་བསམ་ཤིང་ལོ་ལ། །དར་ཟབ་སྣ་ཚོགས་སྐྱེ་བ་གྱོན། །རྒྱན་ཆ་ཤིང་གི་འབྲས་བུ་ལ། །གསེར་དངུལ་རིན་ཆེན་རྒྱན་ཆ་འཁྲུངས། །སྐྱེ་རྒས་འཆི་གསུམ་ཡོད་ན་ཡང་། །ནད་དང་དགྲ་དང་གདོན་རྣམས་མེད། །དམ་པའི་ཆོས་ནི་མ་དར་ཏེ། །དགྲ་དང་གཉེན་དང་རྒྱལ་པོ་མེད། །ཤིང་ལས་འཆི་ལྟས་སྒྲ་གྲགས་ནས། །ཞག་བདུན་ནས་ནི་འཆི་བ་ཡིན། །སྲོག་བཅད་སྤང་ཞིང་སྦྱིན་པ་བཏང་། །བསྔོ་བ་སྨོན་ལམ་མ་ཤེས་
པའི། །འབྲས་བུས་སྒྲ་མི་སྙན་གྱི་མི། །སྦྱིན་ཤུགས་ཤིན་ཏུ་ཆེ་བ་ནི། །དེ་འདྲའི་སྐྱེ་བ་ལྔ་བརྒྱ་ལེན། །དེ་བས་སྦྱིན་པའི་བསོད་ནམས་ཟད། །ངན་སོང་གནས་སུ་ལྟུང་བར་འགྱུར། །བ་ལང་སྤྱོད་ཀྱི་མི་རྣམས་ནི། །བ་དང་ནོར་དང་འབྲུ་རིན་ཆེན། །ལོངས་སྤྱོད་ཆེན་པོ་ལྡན་པ་སྟེ། །རྩོལ་སྒྲུབ་ཅུང་ཟད་ཙམ་རེ་དགོས། །ཚེ་ཚད་ལྔ་བརྒྱ་ཡིན་ན་ཡང་། །དུས་མིན་འཆི་དང་ནད་གདོན་ཡོད། །ཆོས་ཀྱང་སྐབས་རེ་ཅུང་ཟད་དར། །ལུས་འཕགས་པོ་ཡི་མི་རྣམས་ནི། །གཟུགས་མཛེས་ལྟ་བས་ཆོག་མི་ཤེས། །ཚེ་ཚད་ཕྱེད་དང་སུམ་བརྒྱ་སྟེ། །ནད་གདོན་དུས་མིན་འཆི་བ་དང་། །དགྲ་དང་གཉེན་དང་རྒྱལ་པོ་ཡོད། །འབྲུ་དང་རིན་ཆེན་ནོར་ཕྱུགས་སྤྱོད། །དམ་པའི་ཆོས་ནི་མི་ཤེས་སོ། །བཤད་ཀྱང་མི་གོ་ལོག་ལྟ་བྱེད། །དཀོན་མཆོག་གསུམ་ལ་དད་པ་བྱས། །སྡོམ་པ་གཙང་མར་བསྲུང་བ་དང་། །སྦྱིན་པ་བཏང་ཞིང་སེར་སྣ་འདྲེས། །འཆི་ཁར་ཆོས་དང་དབང་སོགས་ཐོབ། །ཆོས་ནི་ཉན་འདོད་ཐོབ་ན་དགའ། །མི་རུ་སྐྱེ་བའི་སྨོན་ལམ་བཏབ། །དེ་ནི་འཛམ་གླིང་མི་རུ་སྐྱེ། །དེ་ཡང་ལོག་ལྟ་ཆེ་བ་དང་། །དགེ་བཤེས་
རྣམས་ལ་སྐུར་པ་འདེབས། །ཆོས་བཤད་མཁན་ལ་འཕྱས་པ་ཡིས། །མཐའ་འཁོབ་ཆོས་མི་དར་བར་སྐྱེ། །འཛམ་གླིང་སྐྱིད་སྡུག་ཚེ་རིང་ཐུང་། །མ་ངེས་དུས་ཀྱིས་བསྒྱུར་བ་སྟེ། །བསྐལ་པ་ཡར་དར་དུས་ལ་ནི། །མི་ཡི་ལོ་ནི་བརྒྱད་ཁྲི་ཐུབ། །བདེ་སྐྱིད་ཕུན་སུམ་ཚོགས་པ་ཡིན། །དེ་ནས་མར་འགྲིབ་ཇེ་ཇེ་ཞན། །ཚེ་ལོ་སུམ་ཅུ་ཉི་ཤུ་དང་། །ཚེ་ལོ་བཅུ་པའི་བར་དག་ཏུ། །མུ་གེ་ནད་དང་མཚོན་གྱིས་མནར། །དེ་ནས་ཡར་འཕེལ་བརྒྱད་ཁྲིར་འགྱུར། །དེ་འདྲ་ཁུག་པ་བཅོ་བརྒྱད་འབྱུང་། །བསྐལ་པ་ཡར་ལ་དར་བའི་ཚེ། །འཁོར་ལོས་སྒྱུར་བའི་རྒྱལ་པོ་འབྱུང་། །ཚུལ་ཁྲིམས་བསྲུང་ཞིང་བཟོད་པ་བསྒོམ། །སྦྱིན་པ་རྒྱུ་ཆེན་བཏང་ནས་ནི། །མི་ཡི་བདེ་སྐྱིད་ཐོབ་པའི་ཕྱིར། །དགེ་རྩ་དེ་ཡི་ཕྱིར་བསྔོས་པ། །རྒྱལ་ཕྲན་གཅིག་གི་བུར་སྐྱེ་སྟེ། །ལུས་ལ་མཚན་བཟང་སོ་གཉིས་ཚང་། །མི་དང་མི་འདྲ་ལྷ་ཕྲུག་འདྲ། །ནད་དང་དུས་མིན་འཆི་བ་མེད། །ལྷ་ཡི་དབང་པོ་བརྒྱ་བྱིན་གྱིས། །དེ་ལ་གསེར་གྱི་འཁོར་ལོ་གནང་། །འཁོར་ལོ་དེ་ནི་གར་འདོད་སར། །ནམ་མཁར་འཕུར་ནི་འགྲོ་བའི་རྗེས། །རྒྱལ་པོ་འཁོར་བཅས་འཕུར་ནས་འགྲོ། །
ཤོག་ལྷེབ་ ༡༠༡ ནས་ ༢༠༠ བར།
ནོར་བུ་རྒྱལ་མཚན་རྩེར་བཏགས་ནས། །རྒྱལ་པོའི་སྨོན་ལམ་བཏབ་ཙམ་ན། །གསེར་དངུལ་ཇ་དར་ནས་གྲོ་འབྲས། །གང་འདོད་ཆར་པས་ས་ཕྱོགས་ཁྱབ། །མི་རྣམས་ཐམས་ཅད་སྐྱིད་པར་བྱེད། །དམག་དཔོན་རིན་ཆེན་ཡ་བོ་མེད། །དེ་ཡོད་སུས་ཀྱང་དགྲ་མི་ཕོད། །བཙུན་མོ་རིན་ཆེན་ལྷ་མོ་འདྲ། །དེ་འཁོར་བཙུན་མོ་བརྒྱད་ཁྲིར་བཅས། །བུ་ཡང་སྟོང་དུ་ཚང་བ་རྣམས། །ཐམས་ཅད་དཔའ་རྩལ་སྟོབས་དང་ལྡན། །གླང་པོ་རིན་ཆེན་རྟ་རིན་ཆེན། །རྒྱལ་པོས་ཆིབས་ནས་ཐོ་རས་འབྱོན། །འཛམ་གླིང་ས་ཡི་མཐའ་བསྐོར་ནས། །དེ་དགོང་ཕོ་བྲང་ནང་ལ་འཁོར། །རྒྱལ་པོ་དམག་དཔུང་ཆེན་པོར་བཅས། །ནམ་མཁར་འཕུར་ནས་འོང་བའི་ཚེ། །འཛམ་གླིང་མི་རྣམས་ཐམས་ཅད་ཀྱིས། །ཕྱག་འཚལ་ངེད་རྣམས་ཁྱེད་ཀྱི་འབངས། །ཞུགས་ནས་འོང་བས་འཐབ་མི་དགོས། །དེ་ལ་རྒྱལ་པོའི་ཁྲིམས་བཅའ་བ། །སེམས་ཅན་གང་ཡང་སྲོག་ལཎྜ་གཅོད་སྤང་། །གཞན་གྱིས་ནོར་ནི་རྐུ་འཕྲོག་སྤང་། །གཞན་གྱི་བུད་མེད་མ་སྤྱོད་ཅིག །རྫུན་དང་དབྱེན་གྱིས་ཚིག་མ་སྨྲ། །ཞེས་པའི་ཁྲིམས་དེ་མ་གཏོགས་པ། །གཏེ་ཁྲལ་
འུ་ལག་ཟེར་བ་མེད། །དེ་བཞིན་གླིང་བཞིར་འཕུར་ནས་འགྲོ། །གླིང་བཞི་ཐམས་ཅད་མངའ་འོག་ཚུད། །དེ་ནས་ལྷ་ཡི་ཡུལ་དུ་འགྲོ། །ལྷ་ཡུལ་ཕྱེད་ཙམ་ཞབས་སུ་འདུ། །བློན་པོ་རིན་ཆེན་མངོན་ཤེས་ཅན། །རྒྱལ་པོའི་ཡིད་དང་ཅི་དགོངས་ཤེས། །དེ་དོན་བློན་པོས་བསྒྲུབས་ནས་འགྲོ། །གྲོས་དང་ཞལ་ཏ་མི་དགོས་སོ། །བློན་པོ་ལྷ་ཡི་སྤྱན་ལྡན་དེས། །ས་འོག་གཏེར་ཁ་ཐམས་ཅད་རློག །རྒྱལ་པོའི་མཛོད་ནི་ཐམས་ཅད་བཀང་། །སྡེ་ལ་བསྡུ་ནི་དགོས་དོན་མེད། །དང་པོ་འཁོར་ལོ་བབས་པ་དེ། །དངུལ་གྱི་འཁོར་ལོ་བབས་པ་ཡིན། །གླིང་གསུམ་ཞབས་སུ་ཚུད་པའོ། །ཟངས་བྱུང་གླིང་གཉིས་ཞབས་སུ་ཚུད། །ལྕགས་བྱུང་འཛམ་གླིང་རྐྱང་པ་དབང་། །དེ་ཀུན་རྒྱལ་སྲིད་སྣ་བདུན་ལྡན། །རྒྱལ་སྲིད་སྣ་བདུན་མེད་ན་ཡང་། །སྦྱིན་འབྲས་འཛམ་གླིང་ཕྱེད་དབང་བ། །སྟོབས་ཀྱིས་འཁོར་ལོས་སྒྱུར་བ་ཟེར། །དེ་མིན་རྒྱལ་པོ་ཐམས་ཅད་ནི། །རྒྱལ་ཕྲན་ཡིན་པར་ཤེས་པར་བྱ། །བྲམ་ཟེའི་རིགས་ནི་ཤ་ཆང་སྤང་། །ཡན་ལག་བརྒྱད་པའི་ཁྲིམས་དེ་ནི། །ལོ་ནི་བཞི་བཅུའི་བར་དུ་བསྲུངས། །སྒྲ་དང་སྙན་ངག་བསྟན་བཅོས་མཁས། །ཚངས་
པའི་ལྷ་ལ་མཆོད་པ་བརྩོན། །འཁོར་ཡང་བྲམ་ཟེ་བརྒྱ་སྟོང་བཅས། །དེ་ནི་མི་རིགས་བཟང་པོ་ཡིན། །རྗེའུ་རིགས་ཞེས་བྱ་བློན་པོའི་རིགས། །དམངས་རིགས་དུད་ནི་ཕལ་པ་སྟེ། །རྗེའུ་རིགས་དམངས་རིགས་བསོད་ནམས་ཅན། །ཁྱིམ་བདག་ཞེས་བྱ་གསེར་དངུལ་དང་། །འབྲུ་ཡི་བང་མཛོད་བརྒྱ་སྟོང་བདག །ཤིན་ཏུ་ཕྱུག་ཅིང་སྐྱིད་པ་ཡིན། །རྒྱ་སྐད་གདོལ་བའི་རིགས་ཡིན་ཏེ། །དབུས་སྐད་ཡ་ལོང་ཞེས་བྱ་ལ། །ཁམས་སྐད་འབྱམས་པ་སྡིག་པ་བ། །མི་དགེ་སྡིག་ལ་སྤྱོད་པའོ། །དེ་ལྟར་འཛམ་གླིང་མི་རིགས་ལྔ། །ཡུལ་ཆེན་ཉི་ཤུ་རྩ་བཞི་སྟེ། །ཡུལ་ཕྲན་སྟོང་དང་རྩ་གཉིས་ཡོད། །མི་རིགས་སུམ་བརྒྱ་དྲུག་ཅུ་སྟེ། །སྐད་རིགས་བདུན་བརྒྱ་ཉི་ཤུ་ཡོད། །མཐའ་འཁོབ་བརྒྱ་དང་རྩ་བརྒྱད་དང་། །ཡང་འཁོབ་སྟོང་དང་རྩ་གཉིས་ཡོད། །མཐའ་འཁོབ་ཡང་འཁོབ་ཕལ་ཆེར་དུ། །དམ་པའི་ཆོས་ནི་མི་དར་རོ། །སྐྱེ་དང་རྒ་དང་འཆི་བ་གསུམ། །མི་ཡི་ལ་རིགས་ནི་ཀུན་ལ་ཡོད། །ནད་གདོན་དགྲ་དང་དུས་མིན་འཆི། །གླིང་གསུམ་མི་ལ་མོད་པ་ཡིན། །མེད་པ་བཙལ་བའི་དཀའ་ཚེགས་དང་། །ཡོད་པ་འཚོ་སྐྱོང་སྡུག་བསྔལ་
ནི། །འཛམ་གླིང་མི་ལ་སྒེར་དུ་ཡོད། །དེ་སོགས་ཞིབ་ཏུ་རྩིས་པ་ན། །སྡུག་བསྔལ་བརྒྱད་ཅུ་ཡོད་པར་གསུངས། །ཐུགས་རྗེ་ཆེན་པོ་སྤྱན་རས་གཟིགས། །བདག་སོགས་མི་ལུས་ཐོབ་ཚད་ཀུན། །སྐྱེ་འཆི་འགྱུར་བའི་སྡུག་བསྔལ་ལས། །ཐུགས་རྗེ་ཆེན་པོས་བསྐྱབ་ཏུ་གསོལ། །ནམ་ཞིག་ཚེ་འཕོས་གྱུར་མ་ཐག །སྡུག་བསྔལ་གཅིག་ཀྱང་མ་མཆིས་ཤིང་། །དུས་རྣམས་རྟག་ཏུ་བདེ་བའི་ཡུལ། །བདེ་བ་ཅན་གྱི་ཞིང་ཁམས་དེར། །དྲོངས་ཤིག་འཕགས་པ་སྤྱན་རས་གཟིགས། །མི་ཡི་སྐྱིད་སྡུག་དྲན་པའི་གླུ། །རྟ་ལོ་བྱ་ཟླའི་ཚེས་བདུན་ལ། །བྲིས་པས་འགྲོ་ལ་ཕན་པར་ཤོག། ༈ །།ཨེ་མ་ཨེ་མ་མཚར་པོ་ཆེ། །ལྷ་མིའི་བདེ་བ་མི་རྟག་འགྱུར། །སྐྱེས་མཐའ་འཆི་དང་བརྩིགས་མཐའ་འཇིག །འདུས་མཐའ་འབྲལ་དང་དར་མཐའ་རྒུད། །ངན་སོང་སྡུག་བསྔལ་བཟོད་གླགས་མེད། །དར་གྲགས་ཡུན་རིང་མྱལ་ཐག་གཅོད། །ཚེ་རབས་གྲངས་མེད་དུ་མ་རུ། །དེ་འདྲའི་སྡུག་བསྔལ་མྱོང་ན་ཡང་། །ད་ལྟ་མི་དྲན་སྐྲག་མི་ཤེས། །མེ་མ་མུར་ན་ནུབ་པ་དང་། །ལྕགས་སྲེག་ས་གཞིར་འབྱར་བ་དང་། །ཁྲོ་ཆུ་ཁོལ་མ་འཐུང་བ་
ཡང་། །ལོ་གྲངས་བྱེ་བ་དུ་མར་བྱས། །ད་རུང་རྨུས་རྒྱུ་མེད་པ་ཨང་། །གཉེན་འདུན་ཤི་ཕྱིར་ངུས་པ་ཡི། །མཆི་མ་བསགས་ན་རྒྱ་མཚོ་ཙམ། །དགྲ་མགོ་བཅད་པ་སྤུངས་ན་ཡང་། །རི་བོའི་ལྟོས་དང་མཉམ་ན་ཡང་། །སྲོག་གཅོད་མཁན་རྣམས་བུར་གྱུར་ཅིང་། །མཐུན་གྲོགས་སྲོག་གཅོད་དགྲ་བོར་སྐྱེས། །འཁོར་ལོས་སྒྱུར་དང་ལྷ་ཡི་རྒྱལ། །སྟོབས་ཆེན་རྣམས་སུ་སྐྱེས་ནས་སླར། །འབུ་སྲིན་ཁྱི་ཕག་ལོང་སྤྲང་འགྱུར། །ལོ་གྲངས་སྟོང་ཕྲག་ཁྲི་ཕྲག་ཏུ། །ལྷ་མིའི་བདེ་བ་ཐོབ་ན་ཡང་། །ད་རུང་ཆོག་ཤེས་ཅུང་ཙམ་མེད། །ལན་གྲངས་བྱེ་བ་འབུམ་ཕྲག་བརྒྱར། །སྐྱེ་འཆིའི་སྡུག་བསྔལ་མྱོང་ན་ཡང་། །ད་རུང་འཚེར་བའི་བསམ་པ་མེད། །ད་རུང་བསྐལ་པ་དུང་ཕྱུར་དང་། །གྲངས་མེད་བརྗོད་མེད་བསམ་ཡས་སུ། །མཐའ་ནི་མེད་དེ་འཁོར་ལོ་འཁོར། །སྡུག་བསྔལ་རྒྱ་ཆེ་གྲངས་མང་བ། །ཆུ་ཡི་གཉེར་མ་ལྟ་བུ་སྟེ། །གཏིང་ཟབ་ཐར་བའི་དུས་མེད་པས། །འཁོར་བའི་རྒྱ་མཚོའི་འཇིགས་སུ་རུང་། །སྐྱེ་རྒ་ན་འཆིའི་རྦ་རླབས་འཁྲུགས། །ཉོན་མོངས་དུག་ལྔའི་ཆུ་སྲིན་མང་། །ལྷ་དང་མི་དང་ལྷ་མ་ཡིན། །མཐོ་རིས་གནས་
གསུམ་འཕྲལ་སྐྱིད་ཀྱང་། །ཡུན་རིང་མི་གནས་སྡུག་བསྔལ་འབྱུང་། །དམྱལ་བ་ཡི་དྭགས་དུད་འགྲོ་གསུམ། །ངན་སོང་སྡུག་བསྔལ་མངོན་གྱུར་པ། །འགྲོ་བ་དྲུག་ཏུ་མི་ཐེ་བའི་། །བར་དོའི་རྣམ་ཤེས་ཡིད་ཀྱི་ལུས། །ལོ་བརྒྱད་པ་ཡི་ན་ཚོད་ལ། །རིགས་དྲུག་གར་སྐྱེས་ཁ་དོག་ཅན། །བསོད་ནམས་ཅན་ནི་ལུས་ཆེ་ཞིང་། །འོད་ཀྱིས་ས་ཕྱོགས་ཁྱབ་པ་ལ། །འབྲིང་ནི་ལུས་དང་འོད་ཀྱང་འབྲིང་། །ཐ་མ་ལོ་བརྒྱད་ན་ཚོད་ལ། །འོད་ཀྱང་ལམ་ནི་ཐོད་ཙམ་སྟེ། །ཚེ་ཡི་ཚད་ནི་ཞག་བདུན་ཏེ། །དེ་ནས་འཆི་ཞིང་སླར་ཡང་སྐྱེ་།ཞག་བདུན་མཚམས་སུ་ཉི་མ་དེས། །སྔ་དྲོ་ཕྱི་དྲོ་ནམ་ཕྱེད་སོགས། །སྔོན་དུས་ནམ་འཆིའི་ཚོད་ལ་འཆི། །སྐྱེ་བ་ལེན་ས་མ་འགྲིགས་ན། །སླར་ཡང་བར་དོའི་ཡིད་ལུས་སྐྱེ། །བདུན་གསུམ་མམ་ནི་ཞེ་དགུ་དང་། །ལ་ལ་ཚེ་ཚད་མ་རྫོགས་པར། །བར་དོ་དེ་རུ་འདུག་པ་ཡོད། །ལ་ལ་ལས་ཀྱི་དབང་གིས་ནི། །ལོ་གྲངས་བརྒྱ་སྟོང་དུ་མ་རུ། །ལུས་ནི་གར་ཡང་མ་ལོན་ནི། །བར་དོར་གནས་པ་ཡང་ཡོད་པར་བཤད། །དེ་ལ་ཆོས་བསྒུག་ལམ་ཞེས་ཟེར། །རྒྱ་མཚོའི་གཏིང་ནས་འཆོལ་འདྲའི་སྒྲ། །འབྲུག་སྟོང་
དུས་གཅིག་ལྡིར་འདྲ་དང་། །མེ་ཆེན་མཆེད་པ་ལྟ་བུའི་སྒྲ། །རི་རབ་ཉིལ་བ་ལྟ་བུའི་སྒྲ། །འཇིགས་པའི་སྒྲ་བཞིས་སྐབས་སུ་བསྔངས། །ཁ་ཆར་བུ་ཡུག་སེར་བ་དང་། །མུན་ནག་དམག་མི་གཅན་གཟན་དང་། །ཁྲོ་བོ་གཤིན་རྗེས་སྐབས་སུ་འདེད། །དེ་ལ་ཡ་ངའི་འཕྲང་བརྒྱད་ཟེར། །གནས་ལ་ངེས་པ་མ་མཆིས་ཏེ། །རི་བོའི་རྩེ་དང་རྒྱ་མཚོའི་འགྲམ། །དབང་མེད་བལ་འདབ་རླུང་ཁྱེར་འདྲ། །འདུག་མི་ཚུགས་ཤིང་ཡིད་སེམས་སྐྱོ། །གསོན་པོ་རྣམས་ལ་རེ་འཁང་ཆེ། །ཤི་བའི་ཡུས་དང་སེམས་སྡུག་ཆེ། །ལུས་གཅིག་ཨེ་ཐོབ་རེ་བ་ཆེ། །དམ་ཆོས་མ་བྱས་འགྱོད་པ་ཆེ། །དམྱལ་བར་འགྲོ་དོགས་སྐྲག་པ་ཆེ། །རེས་འགའ་གསོན་པོ་རྣམས་དང་འགྲོགས། །ཁ་ལེན་མི་བྱེད་སེམས་སྡུག་ཆེ། །ཟས་སྐོམ་མེད་པས་ལྟོགས་སྣང་ཆེ། །རེས་འགའ་གཤིན་པོ་རྣམས་དང་འགྲོགས། །ཕ་མ་ཉེ་དུ་འགྲོགས་སྣང་འཆར། །ཕལ་ཆེར་རོགས་མེད་གཅིག་པུར་ཟླ་འཁྱམས། །གར་འགྲོ་ཆ་མེད་སྐྲག་ཅིང་སྡུག །བྱིས་པ་ཐང་སྟོང་འཁྱམས་པ་བཞིན། །རེས་འགའ་ཟག་བཅས་མངོན་ཤེས་འཆར། །ཚེ་རབས་སྔ་ཕྱི་བར་གསུམ་ཤེས། །
རང་ཉིད་ཤི་བ་ཐག་ཆོད་ཅིང་། །ཆོས་དང་སྡིག་པ་གང་བྱས་དྲན། །དེ་མ་ཐག་ཏུ་བརྗེད་ནས་འགྲོ། །ཁྱད་ཕྱེད་ཡད་ཡུད་གར་ཡང་འཁྱམས། །ད་ནི་དེ་འདྲའི་སྡུག་བསྔལ་བས། །ལུས་གཅིག་ལོན་ན་གང་འདོད་རིགས། །ཁྱི་ལུས་རེད་ཀྱང་ལེན་ནོ་བསམ། །ཞག་རེས་ལོ་རེའི་གཉུག་ཙམ་མཐོང་། །ལུས་གཅིག་ལེན་ཕྱིར་ཀུན་ཏུ་འཁྱམས། །བདག་དང་བདག་ལ་འབྲེལ་ཐོགས་རྣམས། །དེ་འདྲའི་དུས་ལ་བབ་པའི་ཚེ། །ལམ་སྣ་དྲོངས་ཤིག་སྤྱན་རས་གཟིགས། །དགེ་བ་གཅིག་ཀྱང་མ་བྱས་པས། །མཐོ་རིས་ལུས་ཀྱང་མ་ཐོབ་ཅིང་། །མི་དགེ་ཅི་ཡང་མ་བྱས་པས། །ངན་སོང་ལུས་ཀྱང་མ་བླངས་ནས། བདེ་སྡུག་ཚོར་བ་མེད་པ་ཡི། །རྣམ་ཤེས་འཁྱམས་པོ་བསམ་མི་ཁྱབ། །ཤིང་རྟའི་འཕང་ལོ་ཙམ་གྱིས་ནི། །ས་དང་ནམ་མཁའ་བར་སྣང་ནས། །སྟོང་གསུམ་རིགས་དྲུག་སེམས་ཅན་གྱི། །ལུས་ནི་བླངས་བ་ཐམས་ཅད་བས། །ལུས་མེད་སེམས་ཅན་མང་བར་གསུངས། །དེ་ཕྱིར་སེམས་ཅན་ཟད་པ་མེད། །དེ་ལྟར་ལུས་མེད་སེམས་ཅན་ཚོ། །དྲོངས་ཤིག་འཕགས་པ་སྤྱན་རས་གཟིགས། །ཨོཾ་མ་ཎི་པདྨེ་ཧཱུཾ། འཁོར་བའི་ཉེས་
དམིགས་དྲན་པའི་གླུ། །རྟ་ལོ་བྱ་ཟླའི་ཚེས་བདུན་ལ། །སྨྲས་པས་འཁོར་བ་དོང་སྤྲུགས་ཤོག །མངྒ་ལཾ།། ༈ །།ཨེ་མ་གསོན་དང་སྨྲ་ཤེས་དོན་གོ་བ། །སྤྱང་གྲུང་ཆེ་ཞིང་བསམ་བློ་ཡོད་པ་རྣམས། །ཐམས་ཅད་མཁྱེན་ཅིང་གཟིགས་པ་བཅོམ་ལྡན་འདས། །ཐུབ་པའི་དབང་པོའི་གསུང་ལ་ཉན་པར་མཛོད། །ཐུབ་པའི་བཀའ་ལ་འཁྲུལ་པ་ཡོད་མི་སྲིད། །ནམ་མཁའ་འདི་ལ་ཚད་དང་འཐའ་མེད་དེ། །ནམ་མཁས་གར་ཁྱབ་ས་འོག་ས་སྟེང་དང་། །ནམ་མཁའ་བར་སྣང་ས་གཞི་ཐམས་ཅད་ནི། །ལུས་མ་ཐོབ་པའི་རྣམ་ཤེས་འཁྱམས་པོ་ནི། །བར་མཚམས་མེད་པར་ཐེམ་འགགས་ནེམ་འགགས་གང་། །ལུས་པོ་ཐོབ་པའི་རིགས་དྲུག་སེམས་ཅན་ཡང་། །ངན་སོང་གསུམ་ནི་ས་ཆེན་རྡུལ་གྱི་གྲངས། །ལྷ་མིར་སྐྱེས་པ་སེན་མོའི་རྡུལ་ཙམ་ཡིན། །བསྐལ་པ་བྱེ་བ་སྟོང་ཕྲག་དུ་མར་ཡང་། །སངས་རྒྱས་མི་འབྱོན་མུན་པའི་བསྐལ་པ་ཡིན། །སངས་རྒྱས་སྒྱུ་འབྱོན་པའི་སྒྲོན་མེའི་བསྐལ་པ་ནི། །དེ་དག་སྐབས་སུ་བརྒྱ་ལ་རེས་འགའ་ཙམ། །ད་རེས་བསྐལ་པ་བཟང་པོ་འདི་ལ་ནི། །སངས་རྒྱས་སྟོང་འབྱོན་ཨེ་མ་ངོ་མཚར་ཆེ། །སངས་
རྒྱས་གཞན་གྱི་བསྟན་པ་རྣམས་ལ་ཡང་། །གསང་སྔགས་ཟབ་མོ་ཀུན་གྱིས་མི་ཐོས་ཏེ། །ད་རེས་ཐུབ་པའི་བསྟན་ལ་གསང་སྔགས་དར། །སངས་རྒྱས་སྟོང་གི་སྔ་མའི་བསྟན་པ་ནུབ། །ཕྱི་མ་མ་བྱོན་བར་སྐབས་རྣམས་སུ་ནི། །ལོ་གྲངས་སྟོང་ཕྲག་དུ་མར་ཆོས་མི་དར། །ད་རེས་ཤཱཀ་ཐུབ་བསྟན་པ་གནས་སྐབས་ལགས། །ལུས་འཕགས་སྒྲ་མི་སྙན་དང་བ་ལང་སྤྱོད། །དེ་དག་རྣམས་ཀྱི་གླིང་གཡོག་དྲུག་པོ་དང་། །འཛམ་གླིང་མཐའ་འཁོབ་མི་རུ་སྐྱེས་ན་ཡང་། །དམ་ཆོས་མི་དར་མི་ལུས་ཙམ་པོ་ཉིད། །ད་རེས་ཐུགས་རྗེ་ཆེན་པོས་བྱིན་བརླབས་པའི། །གངས་ཅན་བོད་ཡུལ་དམ་ཆོས་དར་སར་སྐྱེས། །དགེ་བའི་བཤེས་གཉེན་དམ་ཆོས་འཆད་པ་མང་། །སྔར་དུས་བོད་ལ་དམ་ཆོས་མེད་པའི་དུས། །སྲོག་ལ་བརྡོས་ནས་རྒྱ་གར་ཡུལ་དུ་འགྲོ། །དབང་སྣ་རེ་དང་སྒྲུབ་ཐབས་ལན་རེ་ལ། །ཡོན་དུ་གསེར་སྲང་ལྔ་བརྒྱ་ཙམ་རེ་དགོས། །བོད་དུ་འབྲོག་མི་ལོ་ཙཱ་ལ་སོགས་པ། །རྗེས་གནང་རེ་རེ་ཞུས་པའི་ཡོན་ལ་ཡང་། །འབྲི་ནི་སུམ་ཅུ་ཙམ་རེ་འབུལ་དགོས་སྐད། །དེང་སང་དབང་ལུང་ཁྲིད་ཀྱི་ཆར་པ་འབེབས། །འགྱ་ཕོ་ལྐུགས་པ་འོན་པ་སྨྱོན་པ་
སོགས། །ཡིན་ན་དམ་ཆོས་ཐོབ་པའི་སྐབས་མེད་ཀྱང་། །དེ་འདྲ་མ་རེད་དབང་པོ་སྒོ་ལྔ་ཚང་། །མདོར་ན་དལ་འབྱོར་ཆོས་ནི་བཅོ་བརྒྱད་ལྡན། །འདི་འདྲ་ཚེ་སྔོན་བསོད་ནམས་རྒྱ་ཆེན་བསགས། །སྨོན་ལམ་རྣམ་པར་དག་པའི་འབྲས་བུ་སྟེ། །འཕེན་བྱེད་དགེ་བས་འཕང་སྟེ་འདི་ན་ཕྱིན། །ད་ནི་དགེ་བའི་ལས་ལ་བརྩོན་ན་ནི། །རྫོགས་བྱེད་དགེ་བས་རྫོགས་ཏེ་གཏན་བདེ་འགྲུབ། །འོན་ཏེ་ད་རེས་དགེ་སྡིག་གང་བསགས་ན། །རྫོགས་བྱེད་སྡིག་པས་རྫོགས་ཏེ་ངན་འགྲོར་འགྲོ། །ཡར་འགྲོ་མར་འགྲོའི་ས་མཚམས་ད་རེས་ཏེ། །འཛམ་གླིང་ལས་ཀྱི་ས་པ་ཞེས་བྱའོ། །འདི་འདྲ་དམ་ཆོས་སྤྱོད་པའི་སྐལ་པ་ཅན། །བསྐལ་པ་བརྒྱ་དང་སྟོང་དུ་ལན་རེ་ཙམ། །ད་རེས་གཏན་བདེའི་འདུན་མ་མི་བསྒྲུབ་པར། །གཏན་ཕུང་མི་དགེའི་ལས་ལ་བརྩོན་པ་འདི། །སྐེ་ལ་བདུད་ཀྱི་ཞགས་པས་མ་ཐེབས་སམ། །སྙིང་ལ་འགོང་པོ་སྟོབས་ཆེན་སུ་ཞུགས་ནས། །ཡིད་ལྟ་བཞིན་ནོར་བུ་ཆུ་ལ་འཕེན་པ་བཞིན། །མི་ལུས་རིན་ཆེན་ཆུད་ཟོས་བློ་རེ་ནོར། །ཚངས་པ་བརྒྱ་བྱིན་འཁོར་ལོས་སྒྱུར་རྒྱལ་གྱིས། །མངའ་ཐང་སྟོབས་ཀྱང་སྙིང་པོ་མེད་པའི་
ཚུལ། །མདོ་རྒྱུད་རྣམས་ལས་གསུངས་པ་ཐོས་བཞིན་དུ། །ཚེ་ཐུང་དགུན་གང་ཉི་མ་ཙམ་འདི་ལ། །བཙན་ཕྱུག་སྟོབས་འབྱོར་ཅུང་ཟད་ཐོབ་པའི་དོན། །མི་དགེའི་སྡིག་ལ་སྤྱོད་པའི་སྙིང་ཁམས་ཅན། །བརྒྱ་བྱིན་བཙུན་མོ་ལྷ་མོ་བདེ་སོགས་མ། །འཁོར་ལོས་སྒྱུར་བའི་བཙུན་མོ་རིན་པོ་ཆེ། །བུད་མེད་ཡོན་ཏན་སུམ་ཅུ་རྩ་གཉིས་ལྡན། །འཁོར་ཚོགས་བཙུན་མོ་བརྒྱད་ཁྲི་ལ་སོགས་པར། །རྨི་ལམ་བཞིན་དུ་སྙིང་པོ་མེད་ཐོས་ན། །ད་རུང་ཐ་མལ་བུད་མེད་འདོད་པ་ཨང་། །ཡུད་ཙམ་འཁྲིག་པའི་ཚོར་བ་བདེ་བ་དེས། །སྐྱེ་བ་འབུམ་ཕྲག་བརྒྱ་རུ་བཟོད་དཀའ་བའི། །ངན་སོང་ཚོར་བ་དྲག་པོ་མྱོང་ཤེས་བཞིན། །ཚུལ་ཁྲིམས་འཆལ་བར་གཏོང་བའི་སྨྱོ་ཚབས་ཅན། །ཐོབ་དཀའི་དལ་འབྱོར་མི་ལུས་རིན་པོ་ཆེ། །རིན་ཆེན་གླིང་ནས་སྟོང་ལོག་མི་ཆོག་པར། །སྡིག་ལྟུང་ཁུར་པོ་ཁྱག་ཚད་ཁུར་འགྲོ་བ། །སྙིགས་དུས་སྐྱེས་པའི་མི་ལུས་རིན་པོ་ཆེ། །སྨྱོན་པའི་གར་བཞིན་མི་བྱེད་མེད་རྣམས་ལ། །ཐུགས་རྗེས་གཟིགས་ཤིག་འཕགས་པ་སྤྱན་རས་གཟིགས། །ཨོཾ་མ་ཎི་པདྨེ་ཧཱུཾ། དལ་འབྱོར་ཐོབ་དཀའ་དྲན་པའི་གླུ་ཆུང་འདི། །རྟ་ལོ་གྲོ་ཞུན་ཡར་ཚེས་བརྒྱད་
སྔོན་མར། །རཱ་ག་ཨ་སྱས་ཡིད་ལ་ཤར་ནས་སྨྲས།། ༈ །ཨེ་མ་སྣང་སྲིད་འཁོར་འདས་ཆོས། །འདུས་བྱས་དང་ནི་འདུས་མ་བྱས། །དེ་ལ་མ་འདུས་གཅིག་ཀྱང་མེད། །ཆོས་ཀྱི་དབྱིངས་དང་ཆོས་ཀྱི་སྐུ། །ནམ་མཁའ་རྣམས་ནི་འདུས་མ་བྱས། །དེ་ནི་རྟག་ཅིང་འཕོ་འགྱུར་མེད། །གཟུགས་ཀྱི་སྐུ་དང་འཇིག་རྟེན་ཁམས། །ལུས་ཅན་ཐམས་ཅད་འདུས་བྱས་ཏེ། །དེ་ནི་མི་རྟག་འཕོ་འགྱུར་བྱེད། །དངོས་པོར་གྲུབ་པ་ཐམས་ཅད་ནི། །རྟག་པར་གནས་པ་གཅིག་ཀྱང་མེད། །ཡུན་ནི་རིང་ཐུང་ཅི་ཡང་སྲིད། །སྟོང་གསུམ་རབ་འབྱམས་འཇིག་རྟེན་ཁམས། །རི་རབ་གླིང་བཞི་ཉི་ཟླ་རྣམས། །བྱེ་བ་ཕྲག་ནི་བརྒྱ་རེ་སྟེ། །ཡུན་རིང་བར་དུ་གནས་ན་ཡང་། །མཐར་ནི་མེ་ཆུ་རླུང་གིས་འཇིག །སྤྲུལ་སྐུ་བསྐལ་བཟང་སངས་རྒྱས་རྣམས། །མཚན་དཔེའི་རྒྱན་ལྡན་རྡོ་རྗེའི་སྐུ། །དེ་ཡང་མི་རྟག་འདས་ཚུལ་སྟོན། །རང་སངས་རྒྱས་དང་དགྲ་བཅོམ་པ། །མངོན་ཤེས་རྫུ་འཕྲུལ་དཔག་མེད་ཅིང་། །ཉོན་མོངས་རྩད་ནས་ཟད་རྣམས་ཀྱང་། །སྐུ་ལུས་མི་རྟག་མྱ་ངན་འདའ། །ཚངས་པ་བརྒྱ་བྱིན་འཁོར་ལོས་སྒྱུར། །བསོད་
ནམས་ཆེན་པོའི་སྟོབས་ཆེན་ཡང་། །ཚེ་ཚད་རྫོགས་ནས་དབང་མེད་འཆི། །བསྐལ་པ་ཡར་འཕེལ་མར་འགྲིབ་དང་། །ནམ་ཟླ་དུས་བཞི་མི་རྟག་འགྱུར། །ཕྱི་རོལ་དྲང་སྲོང་མངོན་ཤེས་ཅན། །རི་དང་བྲག་ལ་མི་ཐོགས་པར། །དཔག་ཚད་ལྔ་བརྒྱར་འཕུར་ནུས་ཀྱང་། །འཆི་བ་མིན་པར་འགྲོ་ས་མེད། །གེ་སར་དམག་དཔོན་རིན་ཆེན་སོགས། དཔའ་རྩལ་སྟོབས་དང་ལྡན་པས་ཀྱང་། །འཆི་བདག་གཤིན་རྗེ་བཟློག་མ་ཐུབ། །མུ་སྟེགས་སྐལ་ལྡན་རྒྱལ་པོ་སོགས། །རྡོ་ཡི་ཆར་པ་འབེབས་ནུས་ཤིང་། །སྡིགས་མཛུབ་བྱ་རོག་སར་ཕབ་ཀྱང་། །ནུས་མཐུས་འཆི་བདག་བཟློག་ཐབས་མེད། །བློན་པོ་རིན་ཆེན་བློན་པོ་མགར། །ཨ་པོ་ལྕང་རྒན་ལ་སོགས་ཀྱང་། །གཏམ་དང་བློ་ཐབས་མཁས་ན་ཡང་། །འཆི་བདག་གཏམ་ལ་བློས་མ་ཟློག །བསྐལ་པ་ཆགས་ནས་ད་ལྟའི་བར། །མི་ནི་དཔག་ཏུ་མེད་པ་རྣམས། །སྟོན་འཇུག་རྩི་ཐོག་བཞིན་དུ་ཡལ། །རིམ་པ་རིམ་པར་ཡལ་ནས་སོང་། །མ་ཤི་ལུས་པ་གཅིག་ཀྱང་མེད། །ལོ་ཟླ་ཞག་དུས་རིམ་བཞིན་འགྲོ། །མི་ཚེ་མ་ཚོར་ཡུད་ཙམ་ཟད། །མ་ལ་སྐྱེས་ནས་དུས་རྟག་ཏུ། །གོམ་གང་ཙམ་ཡང་མ་
འཆུགས་པར། །འཆི་བདག་ཕྱོགས་སུ་ཡུད་ཡུད་འགྲོ། །དེང་སང་དུས་ཀྱི་ཐ་མ་ལ། །ཚེ་ཚད་བཞི་བཅུ་ཁ་རལ་གསུངས། །དེ་ཡང་ངེས་པ་མེད་པ་སྟེ། །མངལ་དུ་འཆི་དང་བཙས་ཙམ་འཆི། །གོག་ཙམ་འཆི་དང་རྒྱུག་ཙམ་འཆི། །གཞོན་ནུ་དར་མ་རྒན་པོ་སོགས། །འཛམ་གླིང་ཚེ་ལ་ངེས་པ་མེད། །ལུས་ནི་མི་གཙང་ཤ་ཁྲག་རྫས། །རླུང་མཁྲིས་བད་ཀན་ནད་ཀྱི་ཚང་། །བཀྲེས་སྐོམ་ཚ་གྲང་རེག་མི་བཟོད། །ཇི་ལྟར་གཅེས་སྤྲས་ཆེར་བྱས་ཀྱང་། །རྫ་མ་བཞིན་དུ་ནམ་ཞིག་ཆག །བསྲུང་བ་བརྒྱ་ཡིས་བསྲུངས་ན་ཡང་། །ནམ་ཞིག་བྱུར་གྱི་འདྲེ་སྲིན་ན། །དར་ཕྲུག་རས་ཀྱིས་བཏུམ་ན་ཡང་། །ནམ་ཞིག་རོ་རུལ་དྲི་ངན་བྲོ། །མི་རྟག་སྙིང་པོ་མེད་པ་ཡི། །སྒྱུ་མ་ལུས་ཀྱི་ཕུང་པོ་ལ། །མི་རྟག་ནམ་འོང་ཅི་ཆ་ཡོད། །དེ་ཚོ་ཡིད་ལ་མི་དྲན་པར། །སྡིག་དང་མི་དགེ་སྣ་ཚོགས་ལ། །བློ་རྒྱ་གང་ཆེ་བྱེད་པ་འདི། །སྙིང་ལ་བདུད་པོ་སུ་ཞུགས་ན། །ཟླ་ཕུ་ཤི་མདའ་ཤི་བརྒྱ་ཐོས་ཀྱང་། །རང་ཉིད་འཆི་བ་མི་དྲན་པ། །དམུ་གབ་ནག་པོ་སུས་བཀོན་ན། །རང་ཉིད་འཆི་བ་ཤེས་བཞིན་དུ། །འཆི་གྲབ་ཅི་ཡང་མི་བྱེད་པར།
འདུག་གྲབ་ཁོ་ན་བྱེད་པ་འདི། །རྒྱལ་པོ་གང་འདྲས་མགོ་སྐོར་ཨང་། །ཟླ་གཅིག་ལམ་ལ་འགྲོ་བ་ཀུན། །བརྒྱག་ཕྱེ་འདི་ཙམ་བཏགས་དགོས་ན། །གཏན་ནས་ཕྱིར་ལ་མི་ཕྱིན་པའི། །ཐག་རིང་ཞིག་ཏུ་འགྲོ་དགོས་ན། །བརྒྱག་ཕྱེ་གྲབ་ཤོམ་གཅིག་མེད་པ། །བསམ་བློ་ཅི་འདྲ་ཡོད་པ་ཨང་། །རྟ་དང་ནོར་ལ་རྔམས་པ་ཡི། །ཇག་པ་ཚན་ཅིག་འོང་། ཐོས་ན། །འུར་ཐུང་འདི་ཙམ་ཚོལ་ལུགས་ལ། །སྲོག་གཅོད་དམྱལ་བར་ཁྲིད་པའི་དགྲ། །གཤིན་རྗེ་ནམ་འོང་ཆ་མེད་ན། །འབྲོས་ཁུང་མི་ཚོལ་ཅི་བསམ་ཨང་། །འཆི་བ་གཏན་ནས་མི་དྲན་པའི། །མི་དགེ་སྡིག་པར་ལོངས་སྤྱོད་པའི། །སྨྱོ་ཚབ་ཅན་གྱི་མི་རྣམས་ལ། །ཐུགས་རྗེས་གཟིགས་ཤིག་སྤྱན་རས་གཟིགས། །ཨོཾ་མ་ཎི་པདྨེ་ཧཱུྃ། མི་རྟག་འཆི་བ་དྲན་པའི་གླུ། །རྟ་ལོ་བྱ་ཟླའི་ཚེས་བརྒྱད་ལ། །རཱ་ག་ཨ་སྱས་སྨྲས་པའོ།། ༈ །།ཨེ་མ་འཁོར་བའི་སྡུག་བསྔལ་ནི། །འཇིགས་སུ་རུང་ཞིང་བཟོད་དཀའ་བ། །དེ་ལས་སྐྱོབ་པའི་སྐྱབས་ཤིག་དགོས། །ཕ་དང་མ་དང་ཉེ་དུ་རྣམས། །བསམ་པ་བཟང་ཡང་སྐྱབས་མི་ནུས། །ལྷ་ཀླུ་གཞི་བདག་མཐུ་ཆེ་ཡང་། །རང་རང་རྣམས་ཀྱང་
འཁོར་བ་ནས། །མ་ཐར་གཞན་དག་ཇི་ལྟར་སྐྱོབས། །སྐྱོན་རྣམས་ཐམས་ཅད་སངས་ཤིང་དག །ཡོན་ཏན་ཐམས་ཅད་ཡོངས་སུ་རྒྱས། །རྫོགས་སངས་རྒྱས་ལ་སྐྱབས་ན་སྐྱོབས། །དེ་ནི་གཏན་གྱི་སྐྱབས་གནས་ཡིན། །སངས་རྒྱས་ས་ལ་འགྲོ་བའི་ལམ། །ཆོས་ལ་ལམ་གྱི་ཚུལ་དུ་སྐྱབས། །ལམ་དེར་འགྲོ་བའི་རོགས་ལྟ་བུ། །དགེ་འདུན་གྲོགས་ཀྱི་ཚུལ་དུ་སྐྱབས། །སངས་རྒྱས་ལ་ནི་སྐྱབས་ཞུས་ནས། །དེས་གསུངས་ཆོས་དེ་ཉམས་བླངས་ན། །རང་ཉིད་དགེ་འདུན་གྲལ་དུ་ཚུད། །བསམ་པ་སངས་རྒྱས་ལ་སྐྱབས་ནས། །སྦྱོར་བ་ཆོས་ཀྱིས་སྐྱབས་ནས་འོང་། །སངས་རྒྱས་སྟོབས་བཅུ་དབང་བཅུ་དང་། །མི་འཇིགས་བཞི་ལ་སོགས་པ་དང་། །མ་འདྲེས་ཆོས་ནི་བཅོ་བརྒྱད་སོགས། །ཡོན་ཏན་བསམ་གྱིས་མི་ཁྱབ་པར། །དེ་ལ་སྐྱབས་སུ་འགྲོ་བར་འོས། །བསྐལ་པ་བྱེ་བ་གྲངས་མེད་ནས། །འགྲོ་བ་མ་ལུས་སྐྱོབ་པའི་ཕྱིར། །ཕར་ཕྱིན་བཅུ་ལ་དཀའ་བ་སྤྱད། །འགྲོ་ལ་ཕན་པའི་སྨོན་ལམ་བཏབ། །དེ་ལྟར་ཉིན་མཚན་དུས་དྲུག་ཏུ། །སངས་རྒྱས་སྤྱན་གྱིས་སོ་སོར་གཟིགས། །སུ་ལ་ཕན་པར་བྱ་ཞེས་དགོངས། །བུ་
གཅིག་མ་བཞིན་རྟག་ཏུ་བརྩེ། །དེ་ལ་སྐྱབས་ན་སྐྱོབས་པར་མཛད། །རྡོ་རྗེའི་སྙན་གྱིས་དུས་རྟག་ཏུ། །སེམས་ཅན་སོ་སོས་ཅི་སྨྲས་པ། །མ་འདྲེས་སྙན་དུ་སོ་སོར་གསན། །དེ་ཕྱིར་སྐྱབས་འགྲོ་བྱས་པ་གསན། །སེམས་ཅན་ཀུན་གྱིས་དུས་རྟག་ཏུ། །སེམས་ལ་རྣམ་རྟོག་བཟང་དང་ངན། །གང་འགྱུས་མ་འདྲེས་སོ་སོར་མཁྱེན། །དེ་ཕྱིར་དད་གུས་ཡོད་མེད་མཁྱེན། །སེམས་ཅན་སྐྱེ་དང་འཆི་བ་དང་། །ནད་དང་སྡུག་བསྔལ་མྱ་ངན་སོགས། །གང་བྱུང་རྟག་ཏུ་སོ་སོར་གཟིགས། །དེ་ལ་ཕན་པའི་སྐལ་ཡོད་ན། །སྐད་ཅིག་ཙམ་ཡང་ལེ་ལོ་མེད། །དེ་མ་ཐག་ཏུ་སྐྱོབ་པར་མཛད། །མཐོང་ཆོས་མྱོང་གྱུར་ལས་འབྲས་ནི། །སངས་རྒྱས་ཀྱིས་ཀྱང་བཅོས་སུ་མེད། །དེ་མིན་ལས་ངན་ཡོད་ན་ཡང་། །ལས་ལ་ཡང་བའི་སྟོབས་མངའ་བ། །ལས་ངན་ཕྱི་རུ་བཟློག་པའོ། །ཡང་ན་ལྗི་བ་ཡང་བར་ནུས། །སེམས་ཅན་ཁམས་ནི་ཚད་མེད་པས། །གང་ལ་གང་གིས་ཕན་པ་ཡི། །ཐབས་དང་གདམས་ངག་ཐམས་ཅད་མཁྱེན། །སེམས་ཅན་དེ་ཡི་སྔོན་ཚེ་ནི། །བསྐལ་པ་གྲངས་མེད་ཚད་མེད་དུ། །དགེའམ་སྡིག་པའི་འབྲས་བུ་ནི། །ཏིལ་འབྲུ་ཙམ་ཞིག་གང་ཡོད།
མཁྱེན། །གང་དུ་སྐྱེས་པ་ཐམས་ཅད་དང་། །ད་ནི་གང་སྐྱེ་མཐའ་ཅི་འགྱུར། །ཐམས་ཅད་མ་འདྲེས་མ་འཆུག་པར། །འཇའ་ཚོན་བཀྲ་བ་ལྟ་བུར་མཁྱེན། །སེམས་ཅན་རྒྱུད་ལ་ཡོད་པ་ཡི། །ཉོན་མོངས་བརྒྱད་ཁྲི་བཞི་སྟོང་ལ། །གང་ལ་གང་ཕན་ཆོས་རྣམས་གསུངས། །གསུངས་པའི་དམ་ཆོས་དེ་དག་ལ། །སོ་སོའི་གཞུང་ལྟར་ཉམས་བླངས་ན། །ཇི་ལྟར་བཤད་པའི་འབྲས་བུ་ནི། །བསླུ་བ་མེད་པར་ཐོབ་ངེས་ཏེ། །ཉི་ཟླ་ཐང་ལ་ལྷུང་བའམ། །མེ་ནི་གྲང་བར་འགྱུར་བའམ། །རླུང་ནི་ཞགས་པས་ཟིན་སྲིད་ཀྱང་། །སངས་རྒྱས་བཀའ་ཡིས་བསླུ་མི་སྲིད། །དེང་སང་ནད་གདོན་ཞི་བ་དང་། །ཚེ་ནི་བསྲིང་བ་ལ་སོགས་པ། །གཞུང་ནས་གསུངས་ལྟར་མ་བྱུང་བ། །མཐོང་ཆོས་མྱོང་འགྱུར་ལས་ངན་འབྲས། །བཅོས་སུ་མེད་པར་གསུངས་པའི་དོན། །ཡིན་གྱིས་ཕན་ཡོན་མི་བདེན་མིན། །མ་སྐྱོབ་པ་ཡང་མ་ཡིན་ཏེ། །ཕྱི་མའི་ངན་སོང་སྡུག་བསྔལ་སྐྱོབས། །དེང་སང་ཆོས་ལ་བརྩོན་པའི་མི། །ནད་གདོན་དུས་མིན་འཆི་བ་སོགས། །སྡུག་བསྔལ་དྲག་པོས་གཟིར་བ་ནི། །མ་འོངས་བསྐལ་པ་དུ་མ་རུ། །དམྱལ་བར་སྐྱེ་
བའི་སྡིག་སྒྲིབ་རྣམས། །ཆོས་ཀྱི་ནུས་པས་ཚེ་འདིར་སྨིན། །ནད་དང་སྡུག་བསྔལ་དེ་ཙམ་གྱིས། །བྱང་ཞིང་དག་ནས་ཕྱི་མ་ལ། །གཏན་བདེ་ཐོབ་པར་གསུངས་པ་ཡིན། །འགའ་ཞིག་མི་དགེ་སྡིག་སྤྱོད་པས། །ཚེ་འདིར་བཀྲ་ཤིས་བསམ་པ་འགྲུབ། །དེ་ནི་སྡིག་པའི་སྟོབས་ཤུགས་ཀྱིས། །ཚེ་སྔོན་བསོད་ནམས་དགེ་རྩ་ནི། །གང་ཡོད་ཚེ་འདི་ཉིད་ལ་སྨིན། །ཕྱི་མ་མནར་མེད་དམྱལ་བ་ནས། །ནམ་ཡང་ཐར་དུས་མེད་པའི་རྟགས། །དེ་ཕྱིར་དགེ་སྡིག་སྤྱོད་པ་ལ། །ཚེ་འདིར་བདེ་སྡུག་གོ་ལོག་ཀྱང་། །དཀོན་མཆོག་ཐུགས་རྗེ་མེད་པ་དང་། །ཆོས་ལ་བདེན་པ་མེད་དམ་ཞེས། །ལོག་ལྟ་སྐུར་འདེབས་མི་རུང་སྟེ། །དོན་དེ་ཡིད་ལ་ངེས་པར་བྱ། །ཕྱི་རོལ་བོན་དང་མུ་སྟེགས་ལྷ། །རྣོ་མྱུར་ཆེ་བ་གྲགས་པ་དང་། །འཇིག་རྟེན་ལྷ་འདྲེ་དྲག་རྩལ་ཅན། །རྣོ་མྱུར་ཤིན་ཏུ་ཆེ་ན་ཡང་། །འཁོར་བ་ངན་སོང་སྡུག་བསྔལ་ལས། །ཁོ་རང་རྣམས་ཀྱང་མ་ཐར་ཞིང་། །སྙིང་རྗེ་གཞན་ཕན་བསམ་པ་མེད། །འཇིག་རྟེན་མི་དཔོན་བཙན་པོ་ལྟར། །ཅུང་ཟད་མ་དགའ་གནོད་པ་བྱེད། །མཆོད་བསྟོད་ལ་སོགས་བརྩོན་པ་ནི། །ཚེ་འདིར་ཅུང་ཟད་ཕན་ན་
ཡང་། །ཕྱི་མ་ཕན་པའི་ནུས་པ་མེད། །དེ་ཕྱིར་དཀོན་མཆོག་གསུམ་པོ་བས། །འཇིག་རྟེན་ལྷ་ནི་ལྷག་བསམ་པ། །དེ་ནི་ལོག་ལྟ་ཆེན་པོའོ། །དཀོན་མཆོག་གསུམ་ལས་གཉེན་པའི་ལྷ། །མེད་ཅེས་མི་ལ་རས་པས་གསུངས། །སངས་རྒྱས་ཐུགས་ལ་ཉེ་རིང་མེད། །ཀུན་ལ་མཉམ་པར་གཟིགས་ན་ཡང་། །སྙིང་ནས་དད་ཅིང་གུས་པ་ཡི། །བློ་གཏད་སྐྱབས་སུ་མ་སོང་ན། །སངས་རྒྱས་ཐུགས་རྗེ་འཇུག་པར་དཀའ། །དེ་ནི་རང་ཉིད་ཡིད་མ་ཆེས། །དེ་ཡི་སྐྱོན་ནི་ཡིན་པ་སྟེ། །སངས་རྒྱས་ཉེ་རིང་མཛད་པ་མིན། །རང་ཉིད་འཁོར་བའི་སྡུག་བསྔལ་ལས། །སྐྱོབ་ཕྱིར་སྐྱབས་སུ་འགྲོ་བ་ནི། །ཐེག་དམན་སྐྱབས་འགྲོ་ཐ་མ་ཡིན། །འགྲོ་བ་ཀུན་ལ་རང་ཉིད་ཀྱིས། །ནམ་ཞིག་ཕན་པར་ནུས་པའི་ཕྱིར། །སྐྱབས་སུ་འགྲོ་བ་འབྲིང་པོ་ཙམ། །འགྲོ་ཀུན་ཕ་མ་ཤ་སྟག་ཡིན། །བདག་དང་འགྲོ་ཀུན་སྐྱབས་འགྲོ་བ། །དེ་ནི་ཐེག་ཆེན་སྐྱབས་འགྲོ་ས་མཆོག །སྟོན་པ་བླ་མེད་སངས་རྒྱས་ཏེ། །སྐྱོབ་མཛད་དམ་ཆོས་རིན་པོ་ཆེ། །འདྲེན་པ་འཕགས་པའི་དགེ་འདུན་ཏེ། །ཕྱི་ཡི་དཀོན་མཆོག་གསུམ་པོ་ལ། །བདག་སོགས་
འགྲོ་ཀུན་སྐྱབས་སུ་མཆི། །བྱིན་རླབས་རྩ་བ་བླ་མ་རྗེ། །དངོས་གྲུབ་རྩ་བ་ཡི་དམ་ལྷ། ཕྲིན་ལས་རྩ་བ་མཁའ་འགྲོ་མ། །ནང་གི་དཀོན་མཆོག་རྣམ་གསུམ་ལ། །བདག་སོགས་འགྲོ་ཀུན་སྐྱབས་སུ་མཆི། །སྟོང་པ་ཀུན་ཁྱབ་ཆོས་ཀྱི་སྐུ། །གསལ་བ་ལོངས་སྤྱོད་རྫོགས་པའི་སྐུ། །སྣ་ཚོགས་མ་འགགས་སྤྲུལ་པའི་སྐུ། །གསང་བའི་དཀོན་མཆོག་རྣམ་པ་གསུམ། །བདག་སོགས་འགྲོ་ཀུན་སྐྱབས་སུ་མཆི། །སྐུ་ནི་དགེ་འདུན་དཀོན་མཆོག་སྟེ། །གསུང་ནི་དམ་ཆོས་འབྱུང་བའི་གནས། །ཐུགས་ནི་སངས་རྒྱས་ངོ་བོ་ཉིད། །ཡོན་ཏན་ཡི་དམ་ལྷ་ཡི་ཚོགས། །ཕྲིན་ལས་མཁའ་འགྲོ་ཆོས་སྐྱོང་སྟེ། །དཀོན་མཆོག་ཀུན་འདུས་བླ་མ་ལ། །བདག་སོགས་འགྲོ་ཀུན་སྐྱབས་སུ་མཆི། །རང་གི་སེམས་ཉིད་སངས་རྒྱས་སུ། །ངོ་ཤེས་ཐག་ཆོད་གདེང་ཐོབ་ན། །སངས་རྒྱས་ལ་ནི་སྐྱབས་སུ་སོང་། །དེ་ཡི་ངང་ལ་མཉམ་བཞག་པ། །དེ་ལས་ལྷག་པའི་སྐྱབས་མེད་ཕྱིར། །ཆོས་ལ་སྐྱབས་སུ་སོང་བ་ཡིན། །དེ་དོན་རྒྱུན་དུ་ཉམས་བླངས་ན། །རང་ཉིད་དགེ་འདུན་གྲལ་ཚུད་པས། །དགེ་འདུན་ལ་ནི་སྐྱབས་སུ་སོང་། །དེ་ནི་དོན་གྱི་སྐྱབས་འགྲོ་ཡིན། །
སྐྱབས་འགྲོའི་གནད་འགག་གླུ་ཆུང་འདི། །རྟ་ལོ་བྱ་ཟླའི་ཚེས་དགུ་ལ། །ཉམས་ལ་ཤར་ནས་བྱུང་རྒྱལ་སྨྲས། །མངྒ་ལཾ། །བྷ་ཝནྟུ། །ན་མོ་ཤཱཀྱ་མུ་ན་ཡེ། སྐྱབས་སྡོམ་བསྙེན་གནས་སྡོམ་པའི་ཕྱོགས། །ཚངས་སྤྱོད་དགེ་བསྙེན་དགེ་ཚུལ་དང་། །དགེ་སློང་རྣམས་ནི་ཁྱིམ་སྤངས་པ། །སྡོམ་པ་ཞུ་དང་བསྲུང་བའི་དུས། །ཕྱི་མ་ལྷ་མི་བདེ་སྐྱིད་འདོད། །ལེགས་སྨོན་སྡོམ་པ་ཐ་མ་ཡིན། །འཁོར་བ་གནས་སྤངས་ཐར་པ་འདོད། །ངེས་འབྱུང་སོ་ཐར་འབྲིང་པོའོ། །འགྲོ་ཀུན་སངས་རྒྱས་ཐོབ་འདོད་བློ། །རབ་སྟེ་ཐེག་ཆེན་ཚུལ་ཁྲིམས་ཡིན། །ཞུ་ལུགས་བསྲུང་ལུགས་ཁྱད་མེད་དེ། །བསམ་པའི་ཁྱད་ཀྱིས་གསུམ་དུ་འགྱུར། །ཕྱི་རོལ་བོན་དང་མུ་སྟེགས་ཀྱི། །ལྷ་དང་རྟེན་ལ་ཕྱག་མཆོད་སྤངས། །སེམས་ཅན་གནོད་པའི་བསམ་སྦྱོར་སྤངས། །མུ་སྟེགས་ཅན་དང་མཐུན་མི་བྱ། །སྐྱབས་འགྲོའི་ཁྱད་པར་བསླབ་བྱ་ཡིན། །སྐུ་གཟུགས་ལེགས་པོ་དོད་ཙམ་ཡན། །གླེགས་བམ་ཡི་གེ་འབྲུ་གཅིག་ཡན། །དགེ་འདུན་སེར་གོས་གྱོན་ཚད་ཡན། །དད་གུས་བྱ་བ་ཆ་མཐུན་གྱི། །སྐྱབས་འགྲོའི་བསླབ་པ་
རྣམ་གསུམ་ཡིན། །ནངས་ནུབ་རྒྱུན་དུ་སྐྱབས་འགྲོ་བྱ། །ཅི་ཟའི་ཕུད་ཀྱིས་དཀོན་མཆོག་མཆོད། །ན་ཚ་སྡུག་བསྔལ་ཅི་བྱུང་ཡང་། །དཀོན་མཆོག་ཕྱོགས་དང་མི་མཐུན་པའི། །རིམ་གྲོས་ཕན་ཡང་མི་བྱེད་སྤངས། །དེ་ལྟར་རྣམ་དགུ་མ་བསྲུངས་ན། །སྐྱབས་འགྲོའི་ཕན་ཡོན་མི་འབྱུང་གསུངས། །སྐྱབས་སྡོམ་རྒྱུད་ལ་མི་ལྡན་ན། །དབང་དང་སྡོམ་པ་སེམས་བསྐྱེད་སོགས། །ཞུས་ཀྱང་ཐོབ་པར་མི་འགྱུར་ཏེ། །ཞབས་མེད་སྣོད་དུ་ཆུ་བླུགས་འདྲ། །ཕྱི་པ་ནང་པ་བན་དང་བོན། །སྐྱབས་འགྲོ་འདི་ཡིས་སོ་སོར་ཕྱེས། །དཔེར་ན་སྡེ་རིགས་སོ་སོ་ཡང་། །མགོ་དཔོན་ཁྱད་པར་ཡིན་དང་མཚུངས། །བསྙེན་གནས་ཡན་ལག་བརྒྱད་པ་ནི། །ཐུབ་པས་ཁྱིམ་པ་རྣམས་ལ་གནང་། །དེ་ལ་བསྲུང་བྱ་བརྒྱད་ལས་མེད། །ཡུན་ནི་ཉིན་ཞག་ཕྲུག་གཅིག་བསྲུང་། །ཟས་གཅིག་པ་ཡི་སྡོམ་པ་ནི། །དེ་སྟེང་གདན་གཅིག་བྱེད་པ་སྟེ། །ས་ཡི་སྙིང་པོའི་མདོ་ལས་གསུངས། །བསྙེན་གནས་གདན་གཅིག་དུས་གཅིག་བསྲུང་། །དེ་ལ་ཆབ་ལེན་ལྷམ་ཕུད་པ། །ཇོ་བོ་རྗེ་ཡིས་མཛད་པ་ལེགས། །སྨྱུང་གནས་དོན་ཡོད་ཞགས་པ་དང་། །བཅུ་གཅིག་ཞལ་གྱི་
གཟུངས་ལས་གསུངས། །ཉིན་ཡ་གདན་གཅིག་བསྲུང་བ་ལ། །ཤ་དང་རུས་པ་ཚིལ་ཡང་སྤང་། །ཉིན་ཡ་ངག་ནི་བཅད་པའི་དུས། །བཟའ་བཏུང་ཆུ་ཐིགས་ཙམ་ཡང་སྤངས། །འདོན་པ་སྔགས་ནི་ཡིད་འདོན་བྱེད། །དེ་ལྟར་ཞག་གཉིས་སྨྱུང་གནས་གཅིག །ཚེས་གཅིག་ནས་བཟུང་བཅུ་དྲུག་བར། །བསྲུང་བ་དཀར་ཕྱོགས་ཞེས་བྱ་སྟེ། །དེ་ཚེ་ཆོ་ག་མ་ཆག་པ། །གཟུངས་རིང་བསྙེན་པ་བྱས་པ་ནི། །བཅུ་གཅིག་ཞལ་གྱི་བསྙེན་པ་རྫོགས། །སྨྱུང་གནས་དང་ནི་དཀར་ཕྱོགས་ནི། །དགེ་སློང་གིས་ཡང་བསྲུང་དུ་རུང་། །ཟས་གཅིག་པ་ཡང་བསྲུང་དུ་རུང་། །བསྙེན་གནས་ཡན་ལག་བརྒྱད་པ་ནི། །ཁྱིམ་པ་ཡིན་པས་བསྲུང་མི་རུང་། །བཅོ་ལྔ་དང་ནི་གནམ་སྟོང་ལ། །གདན་གཅིག་ལ་སོགས་དགེ་བསྙེན་གྱིས། །བསྲུང་བ་དགེ་བསྙེན་གསོ་སྦྱོང་ཡིན། །རྩ་བཞི་ཆང་ལྔ་ཕྱི་དྲོའི་ཟས། །མལ་སྟན་ཆེན་པོ་མཐོན་པོ་དང་། །གླུ་གར་རྒྱན་ཆ་གསར་པ་དང་། །བརྒྱད་པོ་ཡན་ལག་བརྒྱད་པ་སྟེ། །འདུལ་བའི་ལུང་ནས་གསུངས་པའོ། །དེ་ལྟར་བསྲུང་བྱ་བརྒྱད་པོ་སྟེ། །མངོན་པ་རྣམས་ལ་མཚན་མོ་དང་། །སྨད་ཚོང་མ་ལ་
ཉིན་བསྲུང་དང་། །ཞག་ཕྱེད་སྡོམ་པ་ཐུབ་པས་གནང་། །རྩ་བཞི་ཆང་ལྔ་བསྲུང་བ་ནི། །ཚངས་སྤྱོད་དགེ་བསྙེན་ཡོངས་སུ་གྲགས། །དེ་དག་ཚང་བར་མི་བསྲུང་བར། །ལོག་གཡེམ་སྤངས་བའི་ལྔ་པོ་ནི། །ཁྱིམ་པ་དགེ་བསྙེན་ཡིན་པའོ། །དེའང་སྣ་གཅིག་བསྲུང་བ་དང། །སྣ་འགའ་བསྲུང་སོགས་རིགས་བདུན་བཤད། །སྐྱབས་སྡོམ་ཁོ་ན་སྲུང་བ་ཡང་། །དགེ་བསྙེན་སྡོམ་པ་ཐོབ་པའི་ཕྱིར། །ལྷ་འདྲེ་དགེ་བསྙེན་ཐམས་ཅད་ཡིན། །བར་མ་རང་བྱུང་སྡོམ་པ་ཡང་། །དགེ་ཚུལ་དང་ནི་ཆ་འདྲ་ལ། །རབ་བྱུང་ཆ་ལུགས་འཆད་པ་ཡིན། །དགེ་ཚུལ་རྩ་བཞི་ཆང་ལྔའི་སྟེང་། །གླུ་གར་དང་ནི་རོལ་མོའི་སྒྲ། །ཕྲེང་བ་དང་ནི་སྤོས་བྱུག་པ། །རྒྱན་དང་ཁ་དོག་འཆང་བ་དང་། །ཁྲི་སྟན་ཆེན་པོ་མཐོན་པོ་དང་། །དུས་མ་ཡིན་པའི་ཁ་ཟས་དང་། །གསེར་དངུལ་ལེན་པ་སྤངས་དང་བཅུ། །དེ་དག་གཞན་ནི་གོ་སླ་སྟེ། །མགུར་དང་འདོན་པའི་གདངས་དབྱངས་སོགས། །མིན་པའི་སྒྲུང་སོགས་མི་རུང་ངོ་། །ལྷ་ལ་མཆོད་ཕྱིར་མ་ཡིན་པ། །པི་ཝང་ཏང་ཏང་ཏིང་ཏིང་སོགས། །ཉམས་མཚར་རྩེད་མོའི་རོལ་མོ་སྤངས། །སྤོས་ཤེལ་བྱུ་རུ་སོགས་པ། །
སྔགས་བགྲངས་ཕྲེང་བ་མ་ཡིན་པའི། །ལུས་རྒྱན་རིན་ཆེན་ཕྲེང་བ་སྤང་། །སྤོས་ཆུ་བྱུག་དང་རུམ་སྤོས་སོགས། །འཕྱོར་འདོད་སྤོས་རུམ་བྱ་བ་སྤངས། །དེ་བཞིན་གོས་དང་རྒྱན་རྣམས་ལ། །རབ་བྱུང་རྣམས་ལ་མི་འོས་པའི། །འཕྱོར་ཆས་བཟང་པོ་སྤང་བའོ། །ཆོས་ནི་འཆད་དུས་མ་ཡིན་པའི། །ཁྲུ་གང་ལས་མཐོའི་ཁྲི་དང་ནི། །གོས་འབོལ་ལ་སོགས་ཆེན་པོ་སྤངས། །དུས་མ་ཡིན་པའི་ཁ་ཟས་ནི། །ཉིན་ཕྱེད་ཕན་གྱི་བཅའ་བ་སྤངས། །དགེ་སློང་བསླབས་པ་ཕམ་པ་བཞི། །ལྷག་མའི་ཆོས་ནི་བཅུ་གསུམ་དང་། །སྤང་བའི་ལྟུང་བ་སུམ་ཅུ་དང་། །ལྟུང་བྱེད་འབའ་ཞིག་དགུ་བཅུ་སྟེ། །སོ་སོར་བཤགས་པར་བྱ་བ་བཞི། །ཉེས་བྱས་བརྒྱ་དང་བཅུ་གཉིས་པོ། །བསྡོམས་པས་ཉིས་བརྒྱ་ལྔ་བཅུ་གསུམ། །དེ་དག་ཀུན་གྱི་དོན་བསྡུས་ཀྱང་། གཞན་ལ་གནོད་པ་གཞི་དང་བཅས། །སྤང་བའི་ནང་དུ་འདུས་པ་ཡིན། །ལྟུང་བ་ཉེས་བྱས་མང་ན་ཡང་། །རྩ་བ་བཞི་པོ་སྐྱོན་མེད་ན། །སྡོམ་པ་ཡོད་པའི་གྲ་རུ་བགྲང་། །དགེ་ཚུལ་དགེ་སློང་གཉིས་པོ་ནི། །སྡོམ་པ་ཆེ་ཕྱིར་འཆོར་བ་དཀའ། །མི་འམ་མིར་ཆགས་མ་བསད་
ན། །སྲོག་ཆགས་གཞན་བསད་སྡོམ་མི་འཆོར། །གསེར་ནི་ཞོ་གང་བཞི་ཆ་གཅིག །རི་བའི་དངོས་པོ་མ་བརྐུས་ན། །ཕྲན་བུས་སྡོམ་པ་འཆོར་བ་མིན། །བདག་པོ་གཅིག་ལ་ཆུང་ཆུང་ནི། །ལུས་ཀྱིས་བརྐུས་ན་གསེར་ཞོ་ཡི། །བཞི་ཆའི་རིན་ཙམ་ནལ་སོགས་དུས། །མ་བྱིན་ལེན་པའི་སྡོམ་པ་འཆོར། །བུད་མེད་སྤྱོད་པ་མ་བྱས་ན། །ཐེག་ལེ་ཉམས་ཀྱང་སྡོམ་མི་འཆོར། །གཞན་ལ་གནོད་ཅིང་མགོ་སྐོར་དང་། །མངོན་ཤེས་གྲུབ་རྟགས་མེད་བཞིན་དུ། །ཡོད་ཅེས་མི་ཆོས་བླ་མའི་རྫུན། །ལྷ་དང་ལྷ་འདྲེ་ལ་སོགས་པ། །མ་མཐོང་བ་དང་མཐོང་སྨྲ་བ། །དེ་ནི་རྫུན་སྨྲའི་སྡོམ་པ་འཆོར། །ཀུ་རེ་ལ་སོགས་རྫུན་དང་ནི། །གཞན་ལ་ཕན་པ་ཆེན་པོ་ཡི། རྫུན་གྱིས་སྡོམ་པ་མི་འཆོར་རོ། །ཆང་ནི་ཉེས་པ་བསམ་འདས་ཀྱང་། །སྡོམ་པ་འཆོར་བ་མ་ཡིན་ནོ། །དེ་བཞིན་བྱང་སེམས་བཏང་བ་སོགས། །དགེ་འདུན་ལྷག་མའི་ལྟུང་བ་རྣམས། །ལྟུང་བ་ཤིན་ཏུ་རྫི་ན་ཡང་། །སྡོམ་པ་འཆོར་བ་མ་ཡིན་ནོ། །རྩ་བཞི་སྲོག་ལྟར་བསྲུང་བ་དང་། །ཉེས་ལྟུང་གཞན་རྣམས་གསོ་སྦྱོང་དང་། །བཤགས་སྡོམ་འབད་པར་བྱ་བ་ནི། །དེང་སང་བཙུན་
པ་ཀུན་གྱི་ལུགས། །དགེ་བ་གསོ་ཞིང་སྡིག་པ་སྦྱོང་། །དེ་ཕྱིར་གསོ་སྦྱོང་ཞེས་བྱ་སྟེ། །དེ་ལ་གསོ་སྦྱོང་ཇི་ལྟ་བ། །དགེ་འདུན་སྡེ་མེད་བྱེད་རྒྱུ་མེད། །དགེ་སློང་གཅིག་པུར་འདུག་པ་ཡི། །གསོ་སྦྱོང་བྱིན་གྱིས་རློབ་པའམ། །ཞི་གནས་གསོ་སྦྱང་བྱ་བར་གསུངས། །ཉེས་ལྟུང་དེ་དག་དག་པའི་ཕྱིར། །ཞི་གནས་ཏིང་འཛིན་བསྒོམ་པ་ནི། །དོན་ལ་ཞི་གནས་གསོ་སྦྱོང་ཡིན། །ཚུལ་ཁྲིམས་བསྲུངས་བར་མ་བྱས་ན། །སྦྱིན་པ་ལ་སོགས་རྒྱ་ཆེ་ཡང་། །ལུས་ནི་བཟང་པོ་མི་ཐོབ་སྟེ། །ཀླུ་སོགས་ཕྱུག་པོ་རྣམས་སུ་སྐྱེ། །སྡོམ་པ་གཙང་བར་མ་བསྲུངས་ན། །རྡོ་ལེབ་སྟེང་གི་ས་བོན་བཞིན། །དགེ་བའི་ལོ་ཐོག་སྐྱེ་མི་སྲིད། །གལ་ཏེ་སྡོམ་པ་ཤོར་བ་ན། །དམྱལ་བ་ཡི་དྭགས་དུད་འགྲོ་ཡི། །ལུས་ནི་འབུམ་ཕྲག་བརྒྱ་ལེན་གསུངས། །ཉེས་བྱས་བདུན་སོགས་ལྟུང་བ་གཅིག །ལྟུང་བ་གཅིག་ཙམ་བྱུང་བ་ན། །བཤགས་སྡོམ་ལེགས་པར་མ་བྱས་ན། །ངན་སོང་ལུས་སུ་ལན་གཅིག་ལྟུང་། །དེ་ཕྱིར་ལྟུང་བ་ཞེས་བྱའོ། །དེ་ཕྱིར་རྩ་བ་མ་ཉམས་པའི། །ཉེས་ལྟུང་བཤགས་ལ་འབད་པར་བྱ། །ཐུབ་དབང་གནས་བརྟན་བཅུ་དྲུག་དང་། །
དགྲ་བཅོམ་ཁྲི་དང་དྲུག་སྟོང་དང་། །བཞི་བརྒྱའི་ཚོགས་ལ་གསོལ་བ་འདེབས། །བདག་དང་སློབ་མ་བརྒྱུད་པར་བཅས། །འཆལ་བའི་སྐྱོན་གྱིས་མ་གོས་པར། །ཚུལ་ཁྲིམས་རྣམ་པར་དག་གྱུར་ནས། །ཐུབ་བསྟན་མཛེས་པའི་རྒྱན་གྱུར་པ། །བྱིན་གྱིས་རླབས་པར་མཛད་དུ་གསོལ། །རཱ་ག་ཨ་སྱས་སྨྲས་པའོ། །མངྒ་ལཾ། །བྷ་ཝནྟུ།། ༈ །ན་མོ་བོ་དྷི་སཏྭ་ཡེ། ཐེག་པ་ཆེ་ཆུང་ཟེར་བ་འདི། །སྙིང་རྗེ་ཆེ་ཆུང་ཁྱད་པར་ལགས། །འཁོར་བའི་སྡུག་བསྔལ་འདི་ལ་སྐྲག །རང་ཉིད་ཐར་པ་ཐོབ་འདོད་པ། །དེ་ནི་ཐེག་པ་དམན་པ་ཡིན། །སེམས་ཅན་གཅིག་ཀྱང་མ་ལུས་པར། །ཚེ་རབས་མང་པོའི་ཕ་མ་སྟེ། །དེ་རྣམས་འཁོར་བ་སྡུག་བསྔལ་བ། །སྙིང་རྗེ་ཆེན་པོའི་མ་བཟོད་ནས། །དེ་དག་ཐར་བར་བྱ་འདོད་པ། །དེ་ནི་ཐེག་པ་ཆེན་པོ་ལ། །སེམས་ཅན་ཟད་པའི་དུས་མི་སྲིད། །ནམ་མཁའ་ཇི་སྲིད་གནས་ཀྱི་བར། །སེམས་ཅན་དོན་ནི་བྱེད་འདོད་ནི། །མྱུར་དུ་སངས་རྒྱས་མི་འདོད་དེ། །སངས་རྒྱས་འབྲས་བུ་ཐོབ་ན་ཡང་། །ད་རུང་བྱང་ཆུབ་སེམས་དཔའ་ཡི། །ཚུལ་གྱིས་འགྲོ་བའི་དོན་བྱེད་པ། །སེམས་དཔའ་
ནང་ནས་སེམས་དཔའ་ཆེ། །རིགས་གསུམ་མགོན་པོ་ལྟ་བུ་སྟེ། །དེ་འདྲའི་བྱང་ཆུབ་སེམས་དཔའ་དཀོན། །དེ་ལ་ཕྱག་འཚལ་སྐྱབས་སུ་མཆི། །རྫི་བོ་ལྟ་བུའི་སེམས་བསྐྱེད་དེ། །དཔེར་ན་ནོར་ཕྱུགས་ཀུན་བསྡུས་ནས། །རང་ཉིད་རྒྱབ་ནས་འགྲོ་དང་མཚུངས། །བྱང་ཆུབ་སེམས་དཔའ་ཆེན་པོ་དེས། །སེམས་ཅན་ཐམས་ཅད་འཚང་རྒྱས་པར། །བཀོད་རྗེས་རང་ཉིད་སངས་རྒྱས་འདོད། །འཁོར་བ་ཇི་སྲིད་གནས་བར་དུ། །བདག་སངས་རྒྱས་པར་མ་གྱུར་གསུངས། །བྱང་ཆུབ་སེམས་དཔའ་གཞན་དག་གིས། །རང་ཉིད་སངས་རྒྱས་ཐོབ་བྱས་ནས། །འབད་མེད་ལྷུན་གྲུབ་ཕྲིན་ལས་ཀྱིས། །འགྲོ་བའི་དོན་ནི་འབྱུང་བར་སྨོན། །འདི་ནི་རྒྱལ་པོ་ལྟ་བུ་སྟེ། །འདི་ཙམ་མེད་པའི་ཐབས་མེད་དེ། །མེད་ན་སངས་རྒྱས་འབྲས་བུ་མེད། །དཔེར་ན་མི་ཡི་རྒྱལ་པོ་ལྟར། །རང་ཉིད་ཕུན་སུམ་ཚོགས་བྱས་ཏེ། །མངའ་ཞབས་སྡེ་ལ་ཕན་ཐོགས་འདོད། །སེམས་བསྐྱེད་དེ་ཡང་དེ་དང་འདྲ། །བྱང་ཆུབ་སེམས་དཔའི་བརྩོན་འགྲུས་ཅན། །རང་གི་བདེ་སྐྱིད་བློས་བཏང་ནས། །སྙིང་རྗེ་ཆེན་པོའི་སེམས་ཅན་དོན། །སེམས་ཅན་གཅིག་
ལ་ཕན་ཐོགས་ན། །དམྱལ་བར་རང་ཉིད་སྐྱེ་ངེས་ཀྱང་། །དེ་ལ་མི་སྐྲག་མི་འགྱོད་དེ། །བཀྲེས་པའི་སེམས་ཅན་མཐོང་རྩ་ན། །རང་ཤ་གཅོད་ཅིང་དེ་ལ་སྦྱིན། །ན་ཚ་མེད་པ་མ་ཡིན་ཡང་། །དེ་ཉིད་བཟོད་པར་བྱེད་པ་ཡིན། །ལུས་དང་སྲོག་ལ་ལྟོས་པ་མེད། །རང་གི་བདེ་སྐྱིད་མི་འདོད་པར། །སེམས་ཅན་གཞན་ལ་ཕན་པར་འདོད། །དཀའ་སྤྱད་དང་དུ་ལེན་ནས་ནི། །ནམ་ཞིག་སངས་རྒྱས་ཐོབ་དུས་ཀྱང་། །བདེ་སྐྱིད་ཕུན་སུམ་ཚོགས་པ་ཡིན། །དག་པའི་ཞིང་དུ་སངས་མི་རྒྱ། །མ་དག་མ་རུངས་གདུག་པ་ཡི། །འཇིག་རྟེན་ཁམས་སུ་སངས་རྒྱས་ནས། །ཚོགས་མ་བསགས་པའི་སེམས་ཅན་ལ། །ཕན་ཕྱིར་ཆོས་ཀྱི་འཁོར་ལོ་བསྐོར། །དེ་ཚོ་ཞིང་ཁམས་མ་དག་པས། །བདུད་དང་མུ་གེ་སྟེགས་ལོག་ལྟ་ཅན། །མང་པོས་གཤེ་ཞིང་རྩོད་ན་ཡང་། །དེ་དག་གསོད་ཅིང་བྱམས་པས་འདུལ། །དཔེར་ན་ཤཱཀ་ཐུབ་ལྟ་བུ་སྟེ། །དེ་འདྲའི་སངས་རྒྱས་དཀོན་པ་ཡིན། །དེ་ལ་ཕྱག་འཚལ་སྐྱབས་སུ་མཆི། །བྱང་ཆུབ་སེམས་དཔའ་ལེ་ལོ་ཅན། །དེ་ཙམ་དཀའ་བ་སྤྱད་མི་ནུས། །བདེ་སྐྱིད་ལྡན་པའི་ངང་ཉིད་ནས། །དག་པའི་ཞིང་དུ་སངས་རྒྱས་
ནས། །བསོད་ནམས་ལྡན་པའི་སེམས་ཅན་ལ། །ཆོས་ཀྱི་འཁོར་ལོ་བསྐོར་བ་དང་། །དེ་ཉིད་སངས་རྒྱས་སར་བཞུགས་ནས། །སྤྲུལ་པ་བྱེ་བ་ཕྲག་བརྒྱ་ཡིས། །འགྲོ་བའི་དོན་ནི་མཛད་པ་སྟེ། །འོད་དཔག་མེད་དང་བྱམས་པ་བཞིན། །སེམས་བསྐྱེད་འདི་ཙམ་མེད་ཐབས་མེད། །སེམས་བསྐྱེད་ལེན་པའི་ཆོ་ག་ཡང་། །རྒྱ་ཆེན་སྤྱོད་རྒྱུད་ལུགས་དེ་ནི། །ཆོ་ག་རྒྱས་པར་ཡོད་པ་སྟེ། །ཚུལ་ཁྲིམས་ལྡན་ཞིང་ཡོན་ཏན་ཅན། །མ་གཏོགས་གཞན་ལ་སྐྱེ་བ་ལེན། །ཟབ་མོ་ལྟ་རྒྱུད་སེམས་བསྐྱེད་ནི། །ཆོ་ག་བསྡུས་པ་སུ་ལ་སྐྱེ། །རྗེས་གནང་ཀུན་གྱི་སྔོན་ལའང་འབྱུང་། །དེ་ཕྱིར་སེམས་བསྐྱེད་ཐོབ་པ་མང་། །དེ་ལ་བསླབས་པ་བསྲུང་བྱ་ནི། །སེམས་ཅན་བློ་ཡིས་མི་བཏང་དང་། །སེམས་བསྐྱེད་ཕན་ཡོན་དྲན་པ་དང་། །ཚོགས་གཉིས་བསགས་པར་བྱ་བ་དང་། །ཡང་ཡང་བྱང་སེམས་སྦྱང་བ་ན། །དཀར་ནག་ཆོས་བཞི་བླང་དོར་གསུངས། །ལྟུང་བ་ལྔ་ལ་བརྒྱ་བརྒྱད་ལ་སོགས། །རྒྱས་པར་བསྲུང་བྱ་མཐའ་ཡས་ཏེ། །དབང་པོ་ཐ་མས་ཤེས་དཀའ་བས། །གཅིག་པུ་བསྲུང་བས་དོན་འཐུས་ལ། །རྒྱལ་པོ་ལ་གདམས་མདོ་ལས་
གསུངས། །གཞན་གྱི་དགེ་ལ་ཡི་རང་བསྒོམ། །སངས་རྒྱས་ཐོབ་འདོད་བསམ་པ་ནི། །ཀུན་ཏུ་མ་བརྗེད་ཡིད་ལ་བསྒོམ། །དགེ་བའི་རྩ་བ་ཐམས་ཅད་ཀུན། །འགྲོ་ཀུན་སངས་རྒྱས་ཐོབ་ཕྱིར་བསྔོ། །དེ་ཡིས་རྩ་བ་འཐུས་པ་ཡིན། །བསྒོམ་བྱ་བཏང་ལེན་དམིགས་པ་སྟེ། །རྒྱུན་དུ་མ་ཆག་ཐུན་རེ་འབད། །འདི་ནས་ཚེ་འཕོས་གྱུར་མ་ཐག །བདེ་བ་ཅན་གྱི་ཞིང་དུ་འགྲོ། །བསྐལ་པ་བཟང་པོ་འདི་ཡི་ཡུན། །བདེ་བ་ཅན་ལ་ཞག་གཅིག་སྟེ། །དེ་ལྟར་ལོ་ཟླར་རྩིས་པ་ཡི། །ལོ་གྲངས་བྱེ་བ་དུང་ཕྱུར་ནི། །དུང་ཕྱུར་གྲངས་ལས་འདས་པ་ལ། །དེ་རུ་སྐྱེས་ནས་འཆི་བ་མེད། །ངན་སོང་སྡུག་བསྔལ་སྒྲ་མི་གྲག །རྒས་དང་ན་བའི་སྡུག་བསྔལ་མེད། །ལོངས་སྤྱོད་རྩོལ་སྒྲུབ་མི་དགོས་ཏེ། །ཡིད་ལ་ཅི་འདོད་ལོངས་སྤྱོད་རྣམས། །ན་བུན་བཞིན་དུ་འཐིབས་ནས་འོང་། །འོད་དཔག་མེད་དང་སྤྱན་རས་གཟིགས། །མཆོད་ཅིང་དམ་ཆོས་རྒྱུན་དུ་ཉན། །དག་པའི་ཞིང་ཁམས་གཞན་རྣམས་སུ། །རྫུ་འཕྲུལ་སྟོབས་ཀྱིས་སྐད་ཅིག་བགྲོད། །སངས་རྒྱས་མཆོད་ཅིང་ཆོས་ཉན་ནས། །སླར་ཡང་མྱུར་དུ་རང་གི་གནས། །བདེ་བ་ཅན་དུ་བསླེབས་ནས་
འདུག །བསྐལ་པ་ཆེན་པོ་དུང་ཕྱུར་ནི། །གྲངས་མེད་དཔག་ཏུ་མེད་པའི་མཐར། །འོད་དཔག་མེད་དེ་མྱ་ངན་འདས། །བསྐལ་པ་གྲངས་མེད་གང་གཱའི་ཀླུང་། །བྱེ་མ་སྙེད་ནི་གཉིས་ཀྱི་བར། །འོད་དཔག་མེད་ཀྱི་བསྟན་པ་གནས། །སྤྱན་རས་གཟིགས་ཀྱིས་རྒྱལ་ཚབ་མཛད། །དེ་ནས་སྲོད་ལ་ཆོས་ནུབ་པའི། །ཐོ་རངས་སྤྱན་རས་གཟིགས་སངས་རྒྱས། །སངས་རྒྱས་འོད་ཟེར་ཀུན་འཕགས་པའི། །དཔལ་བརྩེགས་རྒྱལ་པོ་ཞེས་བྱར་འགྱུར། །སྐུ་ཚེ་བསྐལ་པ་བྱེ་བ་ཕྲག །ཁྲག་ཁྲིག་འབུམ་ཕྲག་དགུ་བཅུ་དྲུག །འདས་ནས་དེ་ཡི་བསྟན་པ་ནི། །བསྐལ་པ་དུང་ཕྱུར་ཕྲག་དྲུག་དང་། །བྱེ་བ་ཕྲག་གསུམ་གནས་པའི་ཚེ། །མཐུ་ཆེན་ཐོབ་ཀྱིས་རྒྱལ་ཚབ་མཛད། །དེ་ཡི་ཆོས་ནི་སྲོད་ནུབ་པའི། །ཐོ་རངས་མཐུ་ཆེན་ཐོབ་སངས་རྒྱས། །དེ་བཞིན་གཤེགས་པ་རབ་ཏུ་བརྟན། །ཡོན་ཏན་ནོར་བུ་བརྩེགས་པ་ཡི། །རྒྱལ་པོ་ཞེས་བྱར་འགྱུར་བ་ཡི། །སྐུ་ཚེ་དང་ནི་བསྟན་པ་ཡང་། །སྤྱན་རས་གཟིགས་དང་མཉམ་པར་གསུངས། །ཡུན་ནི་དེ་ཡི་བར་མཚམས་སུ། །སངས་རྒྱས་རྣམས་དང་མི་འབྲལ་ཞིང་། །སངས་རྒྱས་མཆོད་ཅིང་
དམ་ཆོས་ཉན། །ཏིང་ངེ་འཛིན་ནི་བྱེ་བ་ཕྲག །དུ་མ་ལ་ནི་མཉམ་བཞག་པས། །སྡིག་སྒྲིབ་ཐམས་ཅད་དེས་བྱང་ནས། །སངས་རྒྱས་མཆོད་ཅིང་ཆོས་ཉན་པས། །བསོད་ནམས་ཚོགས་ཀྱང་དེ་ནས་རྫོགས། །དེ་ནས་ཚེ་ནི་འཕོས་མ་ཐག །ཞིང་ཁམས་དེ་ཡི་གང་འདོད་དུ། །མངོན་པར་རྫོགས་པར་སངས་རྒྱའོ། །དེ་ནས་འབད་རྩོལ་མི་དགོས་པར་། །སངས་རྒྱས་ཚེ་དཔག་མེད་པ་ལྟར། །སྤྲུལ་པ་ཡང་སྤྲུལ་དུ་མ་ནི། །ནམ་མཁའ་ཇི་སྲིད་སེམས་ཅན་འདྲེན། །ད་རེས་མི་འཆི་ཐབས་མེད་ཅིང་། །གནད་གཅོད་སྲོག་ཆད་ཚོར་བ་ནི། །སྡུག་བསྔལ་ལན་གཅིག་མྱོང་རྗེས་ནས། །ནམ་ཡང་སྡུག་བསྔལ་མི་མྱོང་ཞིང་། །བདེ་སྐྱིད་ཕུན་སུམ་ཚོགས་པ་དང་། །རྫོགས་པའི་སངས་རྒྱས་ཐོབ་འདོད་ན། །བྱང་ཆུབ་སེམས་བསྐྱེད་དེ་ལྟར་བྱ། །སྨོན་ལམ་ཡང་ནི་དེ་ལྟར་འདེབས། །དེ་ལྟར་འགྲུབ་པའི་ཐབས་ཟབ་མོ། །རྒྱལ་བ་རྒྱ་མཚོར་ཡི་དམ་བྱ། །རང་གཞན་ཀུན་ལ་ཕན་པའི་ཕྱིར། །གསང་འདུས་བུམ་སྒྲུབ་བློ་རྩེ་གཏད། །གཞན་ཡང་མེ་ཏོག་ཆུ་སྐྱེས་སོགས། །འོད་དཔག་མེད་པའི་སྒྲུབ་ཐབས་རིགས། །ཀུན་ལ་འབྲེལ་པ་སྣ་རེ་བཞག །
ཆོས་སྤྱོད་རྩ་བའི་བདེ་སྨོན་དང་། །བཟང་སྤྱོད་ལ་སོགས་སྨོན་ལམ་འདོན། །ལུས་ངག་དགེ་སྦྱོར་ལ་སོགས་པ། །དགེ་བ་ཆེ་ཆུང་ཅི་འགྲུབ་ཚད། །བདེ་བ་ཅན་དུ་སྐྱེ་ཕྱིར་བསྔོ། །བདེ་བ་ཅན་དུ་སྐྱེ་བའི་སྔགས། །ཡི་གེ་དྲུག་པ་དུང་ཕྱུར་གཅིག །སྙིང་ལ་འཆང་བར་བྱ་དགོས་ཏེ། །དགེ་རྩ་ངན་ངོན་ཙམ་གྱིས་ནི། །བདེ་བ་ཅན་དུ་མི་སྐྱེ་གསུངས། །ཡིག་དྲུག་འདོན་ལས་སླ་བ་ཡི། །དགེ་རྩ་རྒྱ་ཆེན་འགྲུབ་པར་དཀའ། །གོ་བར་གྱིས་ཤིག་དགེ་སློང་བ། །ཨོ་རྒྱན་རིག་འཛིན་ཡིད་ལ་ཟུངས། །ཡིག་རྐང་ཞན་ཞིང་གོ་བ་ཆུང་། །དཔེ་ཆ་མང་པོར་བལྟས་ན་ཡང་། །ཡིག་དྲུག་ཆག་པས་དགོས་པ་ཆུང་། །ཡིག་དྲུག་དུང་གཅིག་མ་འགྲུབ་ན། །བྱ་བ་གཞན་ཚོ་སྟོང་ལས་ཡིན། །དེ་སྐད་རཱ་ག་ཨ་སྱ་ཡིས། །རྟ་ལོ་བྱ་ཟླའི་ཚེས་བཅུར་སྨྲས། །མངྒ་ལཾ། གུ་རུ་པདྨ་སིདྡྷི་ཧཱུྃ། ལོ་ཡི་རྒྱལ་པོ་ཅང་ཤེས་ལོ། །པདྨ་རཱ་གའི་ཁ་དོག་ཅན། །ཟླ་བ་བློན་པོ་ནམ་མཁར་ལྡིང་། །ཨིནྡྲ་ནཱི་ལེའི་ཁ་དོག་ཅན། །དུས་ཆེན་ཡར་གྱི་ཚེས་པ་བཅུ། །རྟ་བདུན་རྒྱལ་པོ་ཤར་ཞིང་དྲོས། །པད་འབྱུང་མཁའ་འགྲོའི་ཚོགས་
དང་བཅས། །བོད་ཁམས་ཁྱབ་པར་འབྱོན་པའི་དུས། །འདོད་དོན་ཞུ་བའི་དུས་ལ་བབ། །བདག་དང་སློབ་མ་བརྒྱུད་པར་བཅས། །ཁྱད་པར་མི་འགྱུར་རྡོ་རྗེ་ལ། །ཨོ་རྒྱན་ཆེན་པོས་གཟིགས་སུ་གསོལ། །བྱམས་པའི་ཞལ་བཟང་བསྟན་དུ་གསོལ། །ཐུགས་རྗེའི་ཕྱག་གིས་བཟུང་དུ་གསོལ། །ཡེ་ཤེས་སྤྱན་གྱིས་གཟིགས་སུ་གསོལ། །དགོངས་པས་བྱིན་གྱིས་བརླབ་ཏུ་གསོལ། །བར་ཆད་རྐྱེན་ངན་བཟློག་ཏུ་གསོལ། །དངོས་གྲུབ་རྣམ་གཉིས་བསྩལ་དུ་གསོལ། །ཚེ་བསྲིང་དཔལ་རྣམས་བསྐྱེད་དུ་གསོལ། །ཉམས་དང་རྟོགས་པ་སྦར་དུ་གསོལ། །ཁྱད་པར་མི་འགྱུར་རྡོ་རྗེ་ལ། །ཨོ་རྒྱན་ཆེན་པོས་གཟིགས་སུ་གསོལ། །ས་གཏེར་ཁ་བྱང་གནང་དུ་གསོལ། །དེང་སང་དུས་ངན་སྙིགས་མ་ལ། །ཐུགས་རྗེའི་མཐུ་དཔུང་བསྐྱེད་དུ་གསོལ། །ཨ་ཏིའི་བསྟན་པ་རྒྱས་མཛད་གསོལ། །བདུད་བགེགས་དམ་སྲིའི་མགོ་ནོན་གསོལ། །སངས་རྒྱས་བསྟན་པ་ཡུན་བསྲིང་གསོལ། །སྙིང་པོའི་དོན་བརྒྱུད་དར་མཛད་གསོལ། །ལོག་ལྟ་ཟིལ་གྱིས་གནོན་མཛད་གསོལ། །ཕྱག་རྫོགས་ཟུང་དུ་འཇུག་པ་ཡི། །བསྟན་པའི་སྙིང་པོ་རྒྱས་མཛད་གསོལ། །བདག་གི་
རྗེས་འབྲང་རེ་ལྟོས་རྣམས། །རིགས་རྒྱུད་ཆོས་བརྒྱུད་དར་མཛད་གསོལ། །བདག་དང་བརྒྱུད་པར་བཅས་པ་ཡི། །མཐོང་ཐོས་འབྲེལ་ཐོགས་སེམས་ཅན་རྣམས་། །རེ་ས་གཞན་ན་མ་མཆིས་སོ། །བདེ་ཆེན་ཞིང་དུ་འདྲེན་མཛད་གསོལ། །སྟོབས་བཅུ་དབང་བཅུའི་སྟོབས་དབང་བཅས། །ཐོགས་མེད་རྫུ་འཕྲུལ་སྟོབས་དང་ལྡན། །མངོན་ཤེས་དྲུག་ཅུས་སྣང་སྲིད་གཟིགས། །སངས་རྒྱས་གཞན་ལས་ཁྱད་འཕགས་པ། །བཅོམ་ལྡན་པདྨ་ཐོད་ཕྲེང་རྩལ། །ད་ནི་ཐུགས་རྗེ་མ་ཆུང་ཞིག །བསམ་པ་ལྷུན་གྱིས་འགྲུབ་མཛད་གསོལ། །དེ་སྐད་རཱ་ག་ཨ་སྱས་ཞུ། །བྷ་ཝནྟ།། ༈ །།ན་མོ་རཏྣ་ཏྲ་ཡཱ་ཡ། ཕྱོགས་བཅུ་དུས་གསུམ་བཞུགས་པའི་རྒྱལ་བ་སྲས་བཅས། །ཡེ་ཤེས་སྤྱན་དང་རྡོ་རྗེའི་སྙན་དང་མངོན་ཤེས་དྲུག་ལྡན། །དེ་དག་ཐམས་ཅད་ཐུགས་རྗེའི་བརྩེ་བས་བདག་ལ་གཟིགས་དང་། །ཐུགས་ཀྱིས་དགོངས་ལ་དགོངས་པས་བྱིན་གྱིས་རློབས་ཤིག །སྐྱབས་མཆོག་བསླུ་མེད་དཀོན་མཆོག་གསུམ་ལ་སྐྱབས་ན། །འཇིགས་དང་འཚེ་བ་ཀུན་ལས་སྐྱོབ་པར་གསུངས་ན། །བདག་དང་སློབ་མ་བསྲུང་བྱ་
ཐམས་ཅད་དེང་ནས། །དཀོན་མཆོག་གསུམ་ལས་སྐྱབས་གཞན་མེད་པའི་བློ་ཐག་བཅད་ནས། །བསླུ་བ་མེད་པར་མྱུར་དུ་སྐྱོབས་ཤིག་དཀོན་མཆོག་གསུམ་པོ། །བཅོམ་ལྡན་ཚེ་དཔག་མེད་པའི་མཚན་དང་རིག་སྔགས། །འཛིན་ན་ཚེ་ཟད་པ་ཡང་ཡུན་རིང་འཚོ་བར་གསུངས་ན། །བདག་ཅག་དཔོན་སློབ་བསྲུང་བྱ་རིགས་རྒྱུད་བཅས་པས། །ཚེ་དཔག་སྐུ་བཞེངས་སྔགས་བཟླས་མདོ་རྒྱུད་བྲིས་ན། །དུས་མིན་འཆི་བ་བཟློག་ལ་ལོ་བརྒྱ་ཐུབ་པར་མཛོད་ཅིག །དེ་བཞིན་གཤེགས་པ་སྨན་གྱི་བླ་བཻཌཱུརླའི་འོད་ཀྱིས། །མཚན་ཙམ་འཛིན་པས་ནད་ཀུན་ཞི་བར་མདོ་ལས་གསུངས་ན། །བདག་ཅག་དཔོན་སློབ་སྨན་བླའི་སྐུ་བཞེངས་སྔགས་བཟླས། །ཆོ་ག་ཡང་ནི་ཆག་མེད་བྱེད་མཁན་མང་དུ་མཆིས་ན། །སྨོན་ལམ་རྗེས་སུ་དགོངས་ལ་ནད་མང་རྒྱུན་འདི་ད་ནི་ཆད་མཛོད། །འཕགས་པ་འཇིག་རྟེན་གསུམ་གྱི་མགོན་པོ་སྤྱན་རས་གཟིགས་དབང་། །ཁྱེད་མཚན་བརྗོད་པས་ནད་གདོན་དགྲ་དང་དུག་མཚོན། །འཇིགས་པ་ཀུན་ལས་སྐྱོབ་ཅིང་མི་འཇིགས་དབུགས་འབྱིན་གསུངས་ན། །བདག་ཅག་སློབ་འབངས་འཁོར་བཅས་ཁྱེད་མཚན་ཐུགས་དམ་མཛད་འདིར། །
འཇིགས་པ་ཀུན་ལས་མི་འཇིགས་གནོང་ལ་དབུགས་འབྱིན་ད་མཛོད། །རིག་འཛིན་ཆེན་པོ་རྩལ་འཆང་པདྨ་ཐོད་ཕྲེང་རྩལ་ཆེན། །སྙིགས་མའི་མཐའ་ལ་ཐུགས་རྗེ་བྱིན་རླབས་མྱུར་བར་ཡང་ཡང་གསུངས་ན། །བདག་ཅག་སློབ་མ་ཡང་སློབ་རྗེས་འབྲང་རིགས་རྒྱུད། །ཁྱོད་ལ་གསོལ་འདེབས་དཔུང་དང་ར་མདའ་སྦྲན་ཞིང་གནས་ངན། །ཐུགས་རྗེའི་མྱུར་དུ་སྙིགས་མའི་ནད་མུག་མཚོན་འཁྲུག །འདྲེ་རྒོད་འབྱུང་པོའི་ཆོ་འཕྲུལ་འདི་ལ་ད་ནི་སྐྱོབས་ཤིག །འཕགས་མ་སྒྲོལ་མ་འཇིག་རྟེན་མགོན་པོའི་སྤྱན་ཆབ་ལས་འཁྲུངས། །འཇིག་རྟེན་དག་ན་འཇིགས་པས་སུ་སྐྲག་ངེད་ཀྱིས་སྐྱོབ་ཅེས། །དམ་བཅའ་མཛད་ན་ཁྱེད་ལ་རྩེ་གཅིག་ངེད་ཅག་སློབ་འབངས་རིགས་བཅས། །རྩེ་གཅིག་སྐྱབས་ཞུས་དགོངས་ལ་གདོན་དང་ནད་སོགས། །འཇིགས་པ་ཀུན་ལས་ད་ནི་ཐུགས་རྗེའི་ཕྱག་བརྐྱངས། །རྒྱལ་བ་མི་འཁྲུགས་རྒྱལ་པོའི་སྔོན་གྱི་དུས་ན། །བྱང་ཆུབ་སྤྱོད་པ་རྒྱ་ཆེན་སྤྱོད་ཚེ་བདེན་ཚིག་མང་པོ་འགྲུབ་ན། །དེ་ཡི་བདེན་པས་བདག་ཅག་འཇིགས་པ་དང་ནི་གནོད་པ་འདི་རྣམས། །ད་ལྟ་ཉིད་དུ་ནུབ་ཅིང་མེད་དང་ཞི་བའི་བྱིན་རླབས་སྩོལ་ཅིག །དཔལ་
དུས་ཀྱི་འཁོར་ལོ་དེ་དང་མཉམ་སྦྱོར་སྣ་ཚོགས་ཡུམ་ཆེན། །ཁྱེད་ཞབས་དྲན་ནས་འཇིགས་པ་ཆེན་པོ་བཅུ་དྲུག་ཐམས་ཅད་ཞི་བར་གསུངས་ན། །བདག་གིས་རྒྱུན་དུ་ཁྱེད་སྒོམ་རིག་སྔགས་དག་ཀྱང་བཟླས་བཞིན་གནས་ན། །ཅི་ཕྱིར་མི་སྐྱོབ་འཇིགས་དང་གནོད་པ་ཇེ་འཕེལ་འདི་ཅི། །འཕགས་མ་རི་ཁྲོད་ཤིང་ལོའི་ན་བཟའ་རྨ་བྱའི་མདངས་ལྡན་མཛེས་མ། །ཁྱེད་ཀྱི་རིག་སྔགས་སུས་འཆང་ནད་རིགས་ཞི་བའི་རྡོ་རྗེ་མཆོག་ཏུ་གསུངས་ན། །ཅི་ཕྱིར་བདག་གིས་ཁྱེད་དྲན་རིག་སྔགས་དག་ཀྱང་ཅི་ནུས་བརྗོད་བཞིན། །ནད་མང་ནད་ཀྱི་རིགས་ནི་དུ་མས་འཚེ་འདི་ཅི་ཀོ་ཀྱེ་མ། །རང་གི་ཙིཏྟ་ལྕགས་ཀྱུ་འདྲ་བའི་དྲག་པོ་དུས་མིན་ཕ་རོལ་པོ་ཡང་། །མཐོང་ཆོས་མྱོང་འགྱུར་ལས་ལ་བཅོས་མེད་གོ་ཕྱིར། །དཀོན་མཆོག་གསུམ་དང་མདོ་རྒྱུད་དོན་ལ་ལོག་ལྟ་སྤང་ན། །ཕྱིན་ཆད་ངེད་ཅག་དཔོན་སློབ་རིགས་རྒྱུད་དག་ནི་དུ་མ། །ཐམས་ཅད་ལས་འབྲེལ་གཅིག་དང་མཚུངས་པར་སྤྱོད་པ་འདི་འདྲའི་གནས་ནི། །སྲིད་པ་མིན་པར་གཅིག་དང་འདྲ་བར་ཁོ་ནར་བར་ཆད་དུས་མིན་འཆི་ན། །མདོ་རྒྱུད་གསུངས་དང་དཀོན་མཆོག་ཐུགས་རྗེ་རིག་སྔགས་ནུས་པ། ཀུན་ལ་འགྲོ་ཡང་ལོག་ལྟ་
སྐྱེ་བར་ངེས་པ། །ད་ནི་ཐུགས་རྗེ་མ་གཡེལ་ཐུགས་རྗེས་སྐྱོབས་ཤིག །ཅེས་པ་རྟ་ལོ་སྤྲེལ་ཟླའི་ཉི་ཤུའི་ཐོ་རངས་སྐོར་ཞིག །རང་ཚང་ལ་བརྟག་གཞིག་བྱས་པས་ངན་ལོག་ལ་འགྲོ། །འགྱ་ཐོ་ལོག་ཟེར་བ་གཅིག་རྨིས་བྱུང་། དེ་ལ་རྣམ་རྟོག་མ་བྱས་ཀྱང་། །དེ་རྗེས་སྤྲུལ་སྐུ་བསྙུང་བ་ཐོས། །སློབ་བུ་ཞི་གནས་དང་། མ་ཎི་བྷ་རི་སྐྱབས་ཀྱང་ནད་ཚབས་ཆེན་བྱུང་གདའ། དེ་ནས་དཀར་ལུ་ན་ནས་ཐུ་མོ་བྱས་པའི་སྐད་བྱུང་ནས། །བྱ་ཟླའི་ཡར་ཚེས་བཅུ་གསུམ་ལ་སྨྲས་པའོ།། ༈ །།ན་མོ་བོ་དྷི་སཏཱ་ཡེ། སྤྲིན་དཀར་ཕུང་པོ་སྤུངས་འདྲའི་ཞིང་། །ཉ་རྒྱས་ཟླ་བ་ལྟར་མཛེས་ཞལ་གཅིག་པ། །ཕྱག་གཡས་མྱུ་གུ་ཨིནྡྲ་ནཱི་ལེའི་མདོག །འཛམ་བུའི་ཆུ་གསེར་ལས་གྲུབ་དྲིལ་བུ་གཡོན། །སུམ་རྩེན་ལྷ་ཡི་རྒྱན་དང་ན་བཟའ་བཀླུབས། །རབ་མཛེས་པདྨའི་ལྟེ་བར་ཕྱེད་པའི་སྐྱིལ། །བྱང་ཆུབ་སེམས་དཔའི་ནང་ནས་སེམས་དཔའ་ཆེ། །ས་ཡི་སྙིང་པོའི་ཞབས་ལ་ཕྱག་འཚལ་ལོ། །འགྲོ་བ་ཀུན་ལ་ཐུགས་རྗེས་བརྩེར་དགོངས་ནས། །སད་དང་སེར་བའི་གནོད་པ་མི་འབྱུང་ཞིང་། །ལོ་ཐོག་ཕུན་སུམ་ཚོགས་པར་བྱིན་གྱིས་རློབས། །བཙོ་མའི་མདོག་ཅན་སྐབས་གསུམ་བུ་མོ་འདྲ། །སྐུ་སྟོད་ས་ལས་ཐོན་ནས་གཏེར་བུམ་འཛིན། །དུས་གསུམ་
རྒྱལ་བའི་ས་ལམ་བགྲོད་པ་ཡི། །དཔང་པོ་མཛད་པས་བདུད་སྡེ་ཕམ་མཛད་མ། །ས་འཛིན་ལྷ་མོ་དེ་ལ་བདག་གིས་བསྟོད། །རྒྱལ་བའི་སྤྱན་སྔར་ཐུགས་དམ་རྗེས་དགོངས་ལ། །སྟོང་ཕྲག་ཉི་ཤུའི་འོག་ནས་ས་ཡི་བརྒྱུད། །ས་ཕྱོགས་འདི་རུ་བསྡུས་ལ་ཡུལ་ཕྱོགས་འདིར། །རྟག་ཏུ་ལོ་ལེགས་འབྲུ་འཕེལ་བཀྲ་ཤིས་སྩོལ། །རྒྱ་མཚོའི་ཀློང་ནས་ཤེལ་དཀར་རི་བོ་བཞིན། །ལྟོ་འགྲོའི་གདེངས་ཁ་སྤྲིན་ཕུང་ནམ་མཁའ་ཁྱབ། །ཕྱག་གཉིས་ཐལ་སྦྱར་འཛད་མེད་གཏེར་བུམ་བསྣམས། །ལྟོ་འཕྱེ་མཇུག་མས་ས་འོག་རྒྱ་མཚོ་དཀྲུགས། །འཇམ་དབྱངས་སྤྲུལ་པ་ཀླུ་ཡི་རྒྱལ་པོ་ཆེ། །ཀླུ་ཡི་མགོན་པོ་དཀར་པོ་ཞེས་གྲགས་པ། །སྨར་ཁམས་ཕྱོགས་ནས་ཡུལ་ཕྱོགས་འདིར་གཟིགས་ལ། །གྲོ་ཞུན་ཁྲུམས་དང་ཐ་སྐར་ཡར་ངོའི་ཚེས། །ཐོ་རས་རྒྱུན་དུ་ནམ་མཁར་དབུགས་ཐོགས་ལ། །སྤྲིན་ཕུང་འཁྲིགས་ཤིང་སད་སེར་མེད་པར་མཛོད། །སེམས་དཔའ་ཁྱོད་ཀྱིས་སྙིགས་མའི་འགྲོ་བ་ལ། །སྙིང་རྗེའི་དབང་གིས་མི་འཇིགས་སྦྱིན་པ་བྱིན། །བྷེ་ནི་ཀོ་ཊའི་གནས་ཆེན་བླ་མཚོ་ནས། །ས་བརྒྱད་སེམས་དཔའ་རྒྱ་མཚོའི་ཀླུ་བརྒྱད་ཚུལ། །སྨྱོ་ཁ་ཀླུ་བདུད་ནག་པོ་
མགོ་དགུ་པ། །སྲིན་པོའི་གཟུགས་ཅན་སྦྲུལ་མཇུག་གདེངས་ཀ་ཅན། །གསེར་གྱི་འཁོར་ལོ་སྦྲུལ་ཞགས་ལག་ན་ཐོགས། །མིག་མང་སྤྲིན་འཁྲིགས་ན་བུན་གློག་འོད་འཁྱུགས། །བྲ་ནག་རྟིང་དཀར་རྫུ་འཕྲུལ་རླུང་བས་མགྱོགས། །གྲོ་ཞུན་ཁྲུམས་དང་ཐ་སྐར་ཟླ་བ་ལ། །ཐོ་རངས་རྒྱུན་དུ་ནམ་མཁར་ཁྱོད་རྒྱུག་ལ། །སྤྲིན་ནག་འཁྲིགས་ཤིང་སད་སེར་མེད་པར་མཛོད། །ཁྱོད་ནི་འཇིག་རྟེན་འདས་ཀྱང་འཁོར་བའི་ཚུལ། །འགྲོ་ལ་ཕན་ཕྱིར་འཇིག་རྟེན་འདིར་བཞུགས་ལ། །སྙིགས་དུས་འགྲོ་རྣམས་མུ་གེས་འཇིགས་པ་ལས། །སྐྱོབ་ཕྱིར་སེམས་དཔའ་ཁྱོད་ཀྱིས་ཐུགས་བསྐྱེད་མཛོད། །གཞན་ཡང་ཀླུ་རྒྱལ་སངས་རྒྱས་བཅོམ་ལྡན་འདས། །ཀླུ་ཆེན་བརྒྱད་དང་མ་དྲོའི་ཀླུ་དབང་དང་། །བློན་པོ་ཁམས་ཀྱི་བྱ་ཐུལ་ལ་སོགས་པ། །གཟི་བྱིན་ཆེ་བའི་ཀླུ་དང་ཡུལ་ལྷ་རྣམས། །སད་དང་སེར་བའི་གནོད་པ་མ་གཏོང་བར། །འཇིག་རྟེན་བདེ་ཞིང་ལོ་ལེགས་མཛད་དུ་གསོལ། །ཞེས་པ་མེ་ཕོ་རྟ་ཡི་ལོ་ལ་གླང་རྩིས་ནསལོ་ལྟས་ཤིན་ཏུ་ངན་ཞིང་དབྱར་སྟོད་ཆུ་སྐམ་ཟེར་བ་ཡོད་ཀྱང་། དགུན་ལ་ཆར་བསྒྲུབས་བྱས་པའི་རྟེན་འབྲེལ་ཡིན་ནམ་སྙམ། ཕྱོགས་གཞན་དུ་ཆར་དཀོན་ཡང་ཕྱོགས་འདིར་ཆར་
ལེགས་པར་བྱུང་། གྲོ་ཞུན་ཟླ་བའི་བཅུ་གཉིས་དང་བཅུ་གསུམ་ལ་ཤི་ལུགས་ངན་པས་སྐྱེས་པ་བུད་མེད་འགའ་རེ་ཤི་བས་སད་འོང་དོགས་སྤྲིན་སྡུད་འཁོར་ལོ་དང་གདམས་པ་འགའ་བྱས་དུས་སྨྲས་པའོ། །མངྒ་ལཾ། །ན་མོ་བཛྲ་སཏཱ་ཡེ། རང་རེ་སེམས་ཅན་ཐམས་ཅད་ཀུན། །སྐྱེ་བ་འདི་དང་ཚེ་རབས་ཀུན། །སྡུག་བསྔལ་འབྱུང་བའི་རྒྱུ་རྐྱེན་ནི། །མི་དགེ་སྡིག་ལྟུང་ཁོ་ན་ཡིན། །དེ་ལ་བཤགས་པ་མ་བྱས་ན། །བསྐལ་པ་བྱེ་བ་དུ་མར་ཡང་། །མེད་པར་མི་འགྱུར་ནམ་ཞིག་སྨིན། །སྡིག་པ་ཆུང་ངུ་གཅིག་བྱས་ན། །བཤགས་པ་མ་བྱས་ལུས་པ་ན། །ཞག་རེ་སོང་བཞིན་སྐྱེད་རེ་འཕེལ། །སྡིག་པ་ཆུང་ཡང་ཆེན་པོར་འགྱུར། །བཤགས་པས་རྩད་ནས་མ་དག་ཀྱང་། །དེ་ཕྱིར་སྐྱེད་ནི་འཕེལ་མི་འགྱུར། །སྡིག་ཆེན་དམྱལ་བར་སྐྱེས་ན་ཡང་། །སྡིག་པ་བཤགས་པ་བྱས་པ་དེས། །དམྱལ་བའི་ཚེ་ཚད་འདུག་མི་དགོས། །སྟོབས་བཞི་ཚང་བར་བཤགས་ཤེས་ན། །མཚམས་མེད་ལྔ་ཡི་སྡིག་བྱས་ཀྱང་། །དམྱལ་བར་ཡུད་ཙམ་འགྲོ་ན་ཡང་། །དེ་མ་ཐག་ཏུ་ཐར་བར་འགྱུར། །དེ་ལ་སྟོབས་བཞི་འདི་ལྟར་ཏེ། །སྔར་བྱས་སྡིག་ལ་འགྱོད་སེམས་ནི། །ཁོག་པར་བཙན་
དུག་སོང་བཞིན་བྱ། །དེ་ནི་རྣམ་པར་སུན་འབྱིན་སྟོབས། །རྟེན་གསུམ་བྱིན་རླབས་ལྡན་པ་ལ། །གནས་རི་བཟང་པོ་ངོ་མཚར་ཅན། །བླ་མའི་དྲུང་དང་དཀྱིལ་འཁོར་དྲུང་། །དེ་འདྲའི་དྲུང་དུ་བཤགས་པར་བྱ། །དེ་འདྲ་དངོས་སུ་མ་འཛོམས་ན། །ནུབ་ཏུ་ཁ་བལྟས་ཡིད་ཡུལ་དུ། །བདེ་བ་ཅན་གྱི་ཞིང་ཁམས་དང་། །འོད་དཔག་མེད་པ་གཙོ་འཁོར་གསུམ། །ཚུར་ལ་ཞལ་གཟིགས་མངོན་སུམ་དུ། །རི་རྒྱལ་ལྷུན་པོ་ལྟ་བུ་ནི། །ལྷང་ངེ་ལྷན་ནེ་ལྷམ་མེར་བསྒོམ། །དེ་ཡི་དྲུང་དུ་ཕྱག་འཚལ་ཞིང་། །བཤགས་པ་བྱས་ན་ཟབ་པ་སྟེ། །རྟེན་གྱི་སྟོབས་ཞེས་བྱ་བའོ། །གཉེན་པོ་ཀུན་ཏུ་སྤྱོད་པའི་སྟོབས། །དགེ་བའི་རྩ་བ་ཀུན་ཡིན་ཡང་། །ཁྱད་པར་མཆོག་ཏུ་ཟབ་པ་ནི། །ལུས་ཀྱི་སྒྲིབ་པ་སྦྱོང་བ་ལ། །ཕྱག་དང་བསྐོར་བ་མཚུངས་པ་མེད། །ཕྱག་ལ་ཕྱི་ནང་གསང་བ་གསུམ། །ཕྱི་ལྟར་རབ་བྱུང་སྐྱེ་བོ་སོགས། །སོ་སོ་ཆ་ལུགས་དགོས་བཅས་གཟབ། །དང་པོ་ལུས་པོ་བསྲངས་ཏེ་ལང་། །ལག་པ་འཕྲེད་དུ་ཤད་ཀྱིས་བརྐྱངས། །ཐལ་མོ་སྤྱི་བོའི་གཙུག་ཏུ་སྦྱར། །དཔྲལ་མགྲིན་སྙིང་ཁར་གཏུགས་བྱས་ཏེ། །ལག་མཐིལ་དཔྲལ་བ་པུས་
མོ་ལྔ། །ས་ལ་གཏུག་པར་བྱེད་པ་ནི། །དཀྱིལ་འཁོར་ལྔ་པའི་ཕྱག་ཡིན་ནོ། །བླ་མ་སློབ་དཔོན་མཇལ་བའི་ཚེ། །ལག་པ་གཉིས་ཀྱིས་ཞབས་ལ་འཁྱུད། །ཐོད་པ་པུས་མོར་གཏུག་པ་ནི། །བྱིན་པ་ནས་འཁྱུད་ཕྱག་ཡིན་ལ། །དེང་སང་བོད་དུ་མ་དར་རོ། །ཐོར་ཚུགས་བཀྲོལ་ལ་དབུ་རྒྱན་ཕུད། །ཕོད་ཁ་རུས་རྒྱན་ལུས་ལ་གྱོན། །ཕྱག་རབ་གྱེར་ཞིང་ཕྱག་འཚལ་ན། །དེ་ནི་ནང་གི་ཕྱག་ཏུ་བཤད། །ཐ་མལ་སྐྱེ་བོ་མེད་པའི་ས། །ལྷ་དང་བླ་མའི་དཀྱིལ་འཁོར་དུ། །གཅེར་བུར་ཕྱག་འཚལ་གསང་བའི་ཕྱག །དམ་ཚིག་ཉམས་ཆག་བསྐང་བ་ཡིན། །རས་ཀྱི་ཨང་ག་རག་གྱོན་ནས། །རླུང་བཟུང་ནམ་མཁར་ལུས་འཕག་སྟེ། །ལུས་ནི་ཁ་སྦུབ་ས་ལ་སྡེབ། །ལག་པ་གཡས་གཡོན་རིམ་པ་ལྟར། །ས་ལ་ལན་གྲངས་གསུམ་རེ་དང་། །རྐང་པ་གཡོན་གཡས་གསུམ་རེ་དང་། །ཐོད་པ་ས་ལ་ལན་གསུམ་སྡེབ། །དེ་ནི་བརྐྱང་ཕྱག་ཞེས་བྱ་སྟེ། །ཨ་ཙ་ར་དང་རྟོགས་ལྡན་ལུགས། །སྒྲིབ་པ་དག་པའི་མཆོག་ཡིན་ཏེ། །རླུང་ལ་བྱང་པོ་མེད་པ་ནི། །རྐང་ལག་ཆག་གྲུག་འོང་བའམ། །ཆུ་སེར་འཁྲུགས་ནས་ཞ་གྲུམ་འོང་། །རྒྱུན་དུ་ཡན་ལག་ལྔ་པ་
ཡི། །ཕྱག་དེ་འཚལ་བར་བྱེད་ན་ལེགས། །ནང་གི་ལྟུང་བཤགས་སྤྱི་བཤགས་དང་། །གསེར་འོད་ནས་བྱུང་བཤགས་པ་དང་། །ཀློང་བཤགས་ལ་སོགས་བཤགས་པའི་རིགས། །ཁྱད་པར་ཡིག་བརྒྱ་བཟླ་བ་ཟབ། །ཡིད་ཀྱིས་བཤགས་བྱ་བཤགས་བྱེད་རྣམས། །མི་དམིགས་སྟོང་ཉིད་ངང་ལ་བཤགས། །དེ་ལྟར་ལུས་ངག་ཡིད་གསུམ་གྱིས། །བཤགས་པའི་ཐབས་ལ་འབད་པ་ནི། །གཉེན་པོ་ཀུན་ཏུ་སྤྱོད་པའི་སྟོབས། །དེ་ལྟར་སྡིག་པ་བཤགས་ཆོག་པས། །ད་རུང་སྡིག་ལྟུང་བྱས་ན་ཡང་། །སྐྱོན་མེད་བཤགས་ཆོག་བསམ་པ་ནི། །བཤགས་ཀྱང་དག་པར་མི་འགྱུར་བས། །ཕྱིན་ཆད་སྲོག་ལ་བབ་ན་ཡང་། །སྡིག་ལྟུང་དེ་རྣམས་མི་བྱེད་པའི། །དམ་བཅའ་དྲག་པོ་ཐུབ་ངེས་བྱ། །དེ་ནི་ཆུར་ལོན་སྟོབས་ཞེས་བྱ། །དེ་ལྟར་སྟོབས་བཞི་ཚང་བ་ཡི། །བཤགས་ན་སྡིག་ཀུན་བྱང་བ་ནི། །སོར་ཕྲེང་ཅན་གྱིས་མི་ཡི་གྲངས། །དགུ་བརྒྱ་དགུ་བཅུ་གོ་དགུ་ཀླུ་བསད། །མ་སྐྱེས་སྒྲ་ཡི་ཕ་བསད་དང་། །མཐོང་ལྡན་མ་བསད་སྡིག་རྣམས་ཀྱང་། །བཤགས་པས་དག་པའི་ལོ་རྒྱུས་མང་། །རྒྱལ་བ་ཆོས་ཀྱི་དབང་ཕྱུག་གིས། །ཕྱག་ཆེན་
ཁྲིད་ཆེན་གནང་བའི་སྐབས། །ཐ་མལ་སེམས་ཅན་ཐམས་ཅད་ཀུན། །དང་པོ་སྡིག་ཡོད་དགེ་མེད་ཡིན། །བར་དུ་དགེ་ཡོད་སྡིག་ཡོད་ཡིན། །ཐ་མ་དགེ་ཡོད་སྡིག་མེད་ཡིན། །དེ་སྐད་ཞལ་ནས་གསུངས་པ་ཐོས། །སྡིག་ཡོད་དགེ་མེད་གང་ཞེ་ན། །ཆོས་སྒོར་མ་ཞུགས་པ་རྣམས་ཡིན། །འགྲོ་ས་ངན་སོང་གསུམ་ལས་མེད། །དགེ་ཡོད་སྡིག་མེད་གང་ཞེ་ན། །ཆོས་སྒོར་ཞུགས་པ་ཕལ་ཆེར་ཡིན། །འདུལ་ཁྲིམས་ཉིས་བརྒྱ་ལྔ་བཅུ་གསུམ། །རྩ་བ་བཞི་པོ་མ་ཤོར་ཡང་། །ལྟུང་བ་ཉེས་བྱས་ཆར་པ་འབེབས། །བྱང་ཆུབ་སེམས་དཔའི་བསླབ་པ་དང་། །སངས་རྒྱས་ཐོབ་འདོད་མི་སྤང་ཡང་། །ལྟུང་བ་མང་པོ་རྒྱུན་དུ་སོགས། །གསང་སྔགས་དབང་བཞི་ཐོབ་ནས་ཀྱང་། །ལྷ་སྔགས་བླ་མ་མི་སྤང་ཡང་། །དམ་ཚིག་ཉམས་ཆག་རྒྱུན་མི་ཆད། །རྩ་བའི་སྡོམ་པ་གཙང་བ་དེས། །སངས་རྒྱས་བསྟན་པའི་གྲལ་ཚུད་ཅིང་། །ཕན་ཡོན་དགེ་བ་རྒྱ་ཆེ་ཡང་། །ཕྲ་ཞིབ་ལྟུང་བ་ཉེས་བྱས་དེས། །ཀླུ་དང་དུད་འགྲོའི་ལུས་ངན་པ། །ལེན་པའི་རྒྱུ་ནི་མང་དུ་སོགས། །དེ་ཕྱིར་རྒྱུན་དུ་བཤགས་པ་གཅེས། །སྡིག་ལྟུང་ཆུང་ངུ་བྱུང་བ་ཡང་། །མི་གནོད་ཙམ་
དུ་བརྙས་མི་བྱ། །བཙན་དུག་ཆུང་ཡང་སྲོག་རྩ་གཅོད། །ཚེ་འདིར་སྡང་བའི་དགྲ་བོས་ཀྱང་། །ལན་གཅིག་གསོད་ལས་ཐུ་མི་བྱེད། །སྲོག་བཅད་གཅིག་གི་སྡིག་པས་ཀྱང་། །ལན་གྲངས་སྟོང་ལ་གཅིག་ཆད་པའི། །གྲངས་ཙམ་རང་གི་སྲོག་གཅོད་དེ། །ཞེ་སྡང་ཆེ་བའི་དགྲ་བོས་ཀྱང་། །བཙོ་བསྲེག་ལན་གཅིག་ཨི་བྱེད་དམ། །སྡིག་པས་བསྐལ་པར་བཙོ་དང་སྲེག །དེས་ན་སྡང་བའི་དགྲ་བོ་ནི། །སྡིག་པ་ཡིན་པས་འདུལ་བའི་ཐབས། །འདི་ལ་འབད་པར་བྱ་བ་གཅེས། །དེ་སྐད་རཱ་ག་ཨ་སྱས་སྨྲས།། ༈ །།ཨེ་མ་རང་ཅག་སེམས་ཅན་རྣམས། །བདེ་སྐྱིད་འདོད་པ་བློ་མཉམ་སྟེ། །དམ་ཆོས་མ་ཐོབ་ཕལ་པ་ཡི། །བདེ་སྐྱིད་སྒྲུབ་ཐབས་མི་ཤེས་ཏེ། །ཚེ་འདིའི་བདེ་སྐྱིད་ཐོབ་འདོད་ནས། །མི་དགེ་སྡིག་པའི་ལས་བྱས་པ། །དཔེར་ན་བྱིས་པ་བསམ་མེད་ཀྱིས། །རང་གི་ཁ་དོག་དཀར་འདོད་ནས། །རྫ་དྲེག་བྱུག་སྒྱུ་པར་བྱེད་དང་འདྲ། །དྲེག་སྣག་དཀར་པོར་མི་ཡོང་ལྟར། །སྡིག་པས་བདེ་སྐྱིད་འབྱུང་བ་མེད། །བདེ་སྐྱིད་བྱུང་ནི་དགེ་བ་སྟེ། །བསོད་ནམས་བསགས་ན་བདེ་སྐྱིད་འབྱུང་། །
ངན་སོང་གསུམ་དང་གླིང་གཞན་གསུམ། །མཐའ་འཁོབ་བསོད་ནམས་བསགས་མི་ཤེས། །རང་རེ་དམ་ཆོས་དར་སར་སྐྱེས། །ད་རེས་ཚེ་རབས་ཐམས་ཅད་དུ། །བདེ་སྐྱིད་བསྒྲུབ་པའི་དུས་ལ་བརྡ། །དཔེར་ན་ཁྱིམ་པ་ཐམས་ཅད་ཀྱིས། །ཚོང་དང་སོ་ནམ་ནོར་ཕྱུགས་སྒབ། །སྣ་ཚོགས་ཐབས་ཀྱིས་ཟས་ནོར་སྒྲུབ། །དེ་ཕྱིར་ཆོས་སྒོར་ཞུགས་ཕྱི་ནས། །སྣ་ཚོགས་ཐབས་ཀྱིས་ཚོགས་བསགས་བྱ། །བསོད་ནམས་དང་པོ་སྦྱིན་པ་སྟེ། །ཁྱིམ་པ་ཡིན་ན་ཟས་ནོར་གྱིས། །ཡར་མཆོད་མར་སྦྱིན་བྱ་བར་གསུངས། །དེ་ལ་ཞིང་ས་གདམས་ལུགས་གཉིས། །རྟོགས་པ་མཐོན་པོ་མེད་པ་ན། །ཞིང་ས་ཡར་ལ་གདམས་པ་ཟབ། །སྐྱེ་བོ་ཕལ་པ་འབུམ་ཕྲག་ལ། །ཟས་དངོས་སྦྱིན་པ་བྱིན་པ་བས། །བྲམ་ཟེ་གཙང་མ་གཅིག་ལས་ལྷག །བྲམ་ཟེ་འབུམ་ཕྲག་གཅིག་ལས་ནི། །སྡོམ་གཙང་བཙུན་པ་གཅིག་ལས་ལྷག །བན་དེ་འབུམ་ལས་དགེ་ཚུལ་གཅིག །དགེ་ཚུལ་འབུམ་ལས་དགེ་སློང་གཅིག །དགེ་སློང་འབུམ་ལས་ཕྱག་ཆེན་གྱི། །རྟོགས་པ་ལྡན་པ་གཅིག་ལྷག་གསུངས། །རྩ་བའི་བླ་མ་ཕ་དང་མ། །ས་བཅུའི་བྱང་ཆུབ་སེམས་དཔའ་དང་། །
དམ་ཆོས་རྒྱ་ཆེན་སྟོན་མཁན་ལ། །ཕུལ་ན་ཕན་ཡོན་དཔག་ཏུ་མེད། །རྟོགས་པ་མཐོན་པོའི་གང་ཟག་གིས། །ཞིང་ས་མར་ལ་གདམས་པ་སྟེ། །ནད་པ་དང་ནི་དབུལ་ཕོངས་ལ། །བྱིན་ན་སངས་རྒྱས་རྣམས་ཀྱང་ལེགས། །སངས་རྒྱས་མཆོད་ཀྱང་མཉེས་པ་མེད། །དེ་ཕྱིར་ཉམ་ཐག་སྐྱོང་བ་ལེགས། །དོན་དམ་ཞིང་ས་མཐོ་དམན་མེད། །སེམས་ཅན་ཐམས་ཅད་ཡི་དམ་གྱི། །ལྷ་སྐུར་རང་གིས་གསལ་བསྒོམ་ཕྱིར། །ཞིང་ས་ཁྱད་པར་མེད་པར་བཤད། །དེ་དག་ཁྱིམ་པ་སྔགས་འཆང་ལུགས། །སྦྱིན་པའི་གཙོ་བོ་ཆོས་སྦྱིན་ཡིན། །ཟང་ཟིང་སྦྱིན་པས་དོ་ཟླ་མིན། །སྙིང་ནས་དམ་ཆོས་འདོད་པ་ལ། །ཕྱག་རྟེན་མེད་ཀྱང་དབང་ལུང་སྦྱིན། །དེ་ཡིས་མཐུན་རྐྱེན་འཚོ་བ་སྦྱར། །ཡི་དྭགས་རྣམས་ལ་ཆུ་སྦྱིན་བྱ། །གུང་ཚིག་ཟ་འཕྲོ་ཆངས་བུ་སོགས། །བྱ་ཁྱི་སོགས་ལ་སྦྱིན་པར་གསུངས། །དེ་མིན་ཟས་གོས་ལ་སོགས་པ། །དཀོར་རྫས་མིན་པ་མེད་པའི་ཕྱིར། །སྐྱེ་བོ་དབུལ་ཕོངས་ཅན་ལ་ཡང་། །ཧ་ཅང་སྦྱིན་པར་མི་རུང་སྟེ། །དཀོར་དེས་ཁོ་ལ་གནོད་པ་ཆེ། །དེ་ཕྱིར་རྒྱ་གར་ནཱ་ལེནྡྲ། །དགེ་འདུན་འབྲས་ཚོད་ལྷག་མ་
རྣམས། །བྱ་ཁྱི་སྤྲང་པོར་མིན་སྦྱིན་པ། །དོང་བསྐོས་ནང་དུ་བླུགས་སྲོལ་དར། །དེ་ལ་གོ་རྒྱུ་ཆེན་པོ་ཡོད། །བཙུན་པའི་རིགས་ལ་སྦྱིན་དུ་རུང་། །གློ་བུར་ལྷགས་མའི་དགེ་འདུན་ཟེར། །བཙུན་པ་དབུལ་ཕོངས་ལྡན་པ་ལ། ཟས་གོས་ཅི་འབྱོར་སྦྱིན་རུང་གི །རང་གི་ཆོས་གོས་རྣམ་གསུམ་དང་། །ལྷུང་བཟེད་སྦྱིན་པར་མི་རུང་གསུངས། །ཁྱིམ་པ་། སྐྱེ་བོ་ཁྱད་པར་དུ། །ཁོ་ལ་མཁོ་ཞིང་ཕན་ཆེ་ཡང་། །དུག་དང་མཚོན་དང་ངན་སྔགས་རིགས། །སྦྱིན་དུ་རུང་བ་མ་ཡིན་ཏེ། །སྣག་སྨྱུག་ཤོག་གུ་དཔེ་ཆ་སོགས། །བྱིན་ན་ཤེས་རབ་ཆེ་བའི་རྒྱུ། །ནད་ལ་གནོད་པའི་ཟས་དང་སྐོམ། །ནད་པ་དགའ་ཡང་སྦྱིན་མི་རུང་། །སྙིང་རྗེ་དཔག་མེད་སྦྱིན་ན་ཡང་། །རང་ཉིད་ས་ཐོབ་མ་ཡིན་ན། །རང་གི་ཤ་ཁྲག་སྦྱིན་མི་རུང་། །མཆོད་པ་སྦྱིན་པ་དོན་གཅིག་པས། །ཕྱི་གཏོར་ཆབ་གཏོར་བཏང་བ་དང་། །ནང་གཏོར་གཏོར་བསྔོས་བྱ་བ་དང་། །གསང་གཏོར་ལུས་རྒྱན་དམིགས་པ་གསུམ་། །མ་ཆག་སྦྱིན་པའི་མཆོག་ཡིན་ནོ། །དངོས་སུ་ཤ་ཁྲག་མི་སྦྱིན་ཡང་། །ཡིད་ཀྱིས་ལུས་སྦྱིན་དམིགས་པ་དེས། །དངོས་སུ་བྱིན་དང་བསོད་ནམས་མཉམ། །དེ་ཡང་
གནད་ཟབ་ངོ་མཚར་ཆོས། །འབུ་སྲིན་ལ་སོགས་ཤི་ལ་ཁད། །མེ་ནང་འབུད་སོགས་སྲོག་སྐྱབས་དང་། །སད་དང་སེར་བ་ཐན་པ་སོགས། །སེམས་བསྐྱེད་ལྡན་པས་བསྲུང་བ་དང་། །སྤྲིན་སྡུད་ཆར་འབོད་བྱེད་པ་ནི། །མི་འཇིགས་སྐྱབས་ཀྱི་སྦྱིན་པ་ཡིན། །རང་ལ་དབང་སྟོབས་ཡོད་པ་ནི། །སྐེ་མིག་སོགས་ཀྱི་སྲོག་སྐྱབས་དང། །བཤས་ལུག་ཉོ་དང་རི་རྒྱ་བཀག །འདི་དག་སྦྱིན་པའི་མཆོག་ཡིན་ནོ། །དེ་འདྲའི་དབང་དང་སྟོབས་མེད་ན། །མ་བྱས་པ་ལ་ཉེས་པ་མེད། །སྡོམ་པའི་ཚུལ་ཁྲིམས་གང་ཞུས་པ། །དགེ་བ་ཆོས་སྡུད་ཚུལ་ཁྲིམས་ནི། །དབང་ལུང་ཆོས་སོགས་གང་ཐོབ་ཞུ། །བླ་མ་ཚད་ལྡན་མཇལ་ཚད་ལ། །ཆོས་འབྲེལ་སྣ་རེ་གང་ཐོབ་བྱ། །རྩ་བའི་བླ་མར་མི་འཛིན་ཀྱང་། །དམ་ཚིག་མི་བཅག་གཤེ་སྐུར་སྤང་། །སེམས་ཅན་དོན་བྱེད་ཚུལ་ཁྲིམས་ནི། །མཚམས་ཀྱི་དམ་བཅའ་མིན་པའི་དུས། །གང་ལ་གང་ཕན་དབང་ལུང་དང་། །འདི་ཕྱིར་ཕན་པའི་ཞལ་གདམས་བྱ། །ཐབས་ཀྱིས་བྱང་ཆུབ་ལམ་ལ་དཀྲི། །དཀའ་བ་དང་ལེན་བཟོད་པ་ནི། །ཕྱག་དང་བསྐོར་བ་འཁྲུལ་འཁོར་སོགས། །དཀའ་ཞིང་ཚེགས་མེད་
ནན་ཏན་བྱ། །ཚིག་ངན་ལ་སོགས་སྨྲ་བ་དང་། །ཕན་ལན་གནོད་པ་སྐྱེལ་བ་དང་། །རེ་བ་བཞིན་དུ་མ་བྱས་ན། །ཚིག་ངན་ཁ་ལེན་ལྐུགས་ཚུལ་བཟུང་། །ཡིད་ཀྱིས་ཞེ་བཞག་གནོད་སེམས་སྤང་། །བསྟོད་པ་ལེགས་པོ་སྨྲ་བ་དང་། །མཚང་འབྲུ་གནོད་ཚིག་བརྗོད་པ་གཉིས། །ངོ་བོར་བལྟས་པས་སྟོང་པ་ཉིད། །བྲག་ཆའི་སྒྲ་དང་མཚུངས་པར་བསམ། །རང་ལ་ཡོན་ཏན་མི་ལྡན་ན། །བསྟོད་པ་བྱས་ཀྱང་རྫུན་གྱི་ཚིག །རང་ཉིད་ཡོན་ཏན་ལྡན་པ་ལ། །གཤེ་སྐུར་བྱུང་ན་སྒྲིབ་པ་ཟད། །མི་འོས་བསྟོད་པ་ཆེ་བྱུང་ན། །རང་གི་བསོད་ནམས་ཟད་པའི་རྒྱུ། །བསྟོད་པ་དང་ནི་ཚིག་འཇམ་པས། །རང་ལ་ཕན་ཐོག་ཅུང་ཙམ་མེད། །གཤེ་སྐུར་བྱུང་དང་ཚིག་རྩུབ་པས། །རང་ལ་གནོད་པ་ཅི་ཡང་མེད། །དེ་ལྟར་ཤེས་ནས་བཟོད་པ་བསྒོམ། །ཅི་མི་སྙམ་པའི་བཟོད་པ་ཡིན། །རང་ལ་རེ་ལྟོས་བཅས་པའི་མི། །ཚུལ་ཁྲིམས་སྡོམ་པ་མི་བསྲུང་དང་། །ཆོས་ལ་བར་ཆད་འབྱུང་ངེས་པའི། །བྱ་བ་འགའ་རེ་བྱེད་འདུག་ན། །དེ་ལ་ངོ་བསྲུང་ཤ་ཚ་བས། །ངན་པ་མི་བརྗོད་ངག་འཇམ་པ། །དེ་བཞིན་ཆོས་ཕྱིར་དཀའ་སྤྱད་ལ། །ཤ་ཚ་བྱས་ནས་དེ་
བཤོལ་ན། །བཟོད་པ་ཤ་ཚ་གོ་ལོག་ཡིན། །ངན་སྤྱོད་བྱེད་པའི་རྡུང་ཚིག་དང་། །ཆོས་དེ་ལམ་དུ་མི་འགྲོ་བའི། །གནད་དེ་རིག་ན་བཤོལ་བྱའོ། །ཆོས་ལ་བརྩོན་འགྲུས་བྱ་བ་ཡང་། །བརྩོན་འགྲུས་མཐར་ལྟུང་སྤང་དགོས་ཏེ། །དཔེར་ན་ཐག་རིང་མགྲོན་པོ་ལྟར། །ཞག་འགའ་ཚུགས་ཐག་རིང་འདུག་ན། །མི་ཤུལ་རྟ་ཆད་མི་ཕྱིན་རྐྱེན། །དེ་བཞིན་ཟླ་ཞག་འགའ་རེ་ལ། །བརྩོན་འགྲུས་དྲག་ཐལ་ལུས་སུ་བཅིངས། །ནད་ལྡང་ཡུན་རིང་དགེ་སྦྱོར་ཆག །གཉུག་བསྲིང་ནན་མཐུད་དགེ་སྦྱོར་བྱ། །དོན་མེད་ཡང་ཡེངས་སྤང་བྱ་ཞིང་། །ཐག་རིང་འགྲོ་བའི་མགྲོན་པོ་བཞིན། །འཕྲལ་དུ་ལུས་སེམས་དལ་འདྲ་ཡང་། །ཕུག་གི་ཞེ་རྩ་ཆོས་ལ་བསྒྲིམ། །ཕྱག་རྫོགས་བླ་མེད་རྒྱུད་རྣམས་ནས། །ཚེ་གཅིག་སངས་རྒྱས་འགྲུབ་གསུངས་ཀྱང་། །ཚེ་སྟོད་ཡང་མ་ཡེངས་ལ་ཟད། །བར་དུ་ཆོས་སྒོར་ཞུགས་ན་ཡང་། །ཆོས་ཀྱི་གནད་དེ་གོ་མ་ཐུབ། །ད་ནི་བསྐྱེད་རྫོགས་ཕྱོགས་མགོ་ཤེས། །ཉམས་ལེན་བྱེད་པའི་དུས་ཡིན་ཀྱང་། །དུས་སྙིགས་བར་ཆད་རྐྱེན་མགོ་རྒོད། །མི་ཚེ་ལོ་ཤས་ཙམ་ཞིག་ཡིན། །ཚེ་གཅིག་སངས་རྒྱས་བསྒྲུབ་
ལོངས་མེད། །ཕྱག་རྫོགས་ཉམས་ལེན་གང་ཟག་རྣམས། །ཚེ་འདིར་སངས་རྒྱས་མ་ཐོབ་ཀྱང་། །འཆི་བ་འོད་གསལ་ཟིན་པ་ན། །ཆོས་སྐུར་སངས་རྒྱས་གསུངས་ན་ཡང་། །ད་ལྟར་འོད་གསལ་འཁོར་ཡུག་མེད། །སྟོང་ཉིད་མངོན་སུམ་རྟོགས་ན་ཡང་། །ཡེངས་ནས་དུག་ལྔའི་ནད་ཉོན་མོངས། །ཡེངས་དང་མ་ཡེངས་ཁྱད་མེད་པའི། །གཉུག་མའི་གནས་ལུགས་རྟོགས་པ་དང་། །འོད་གསལ་མང་དུ་ཟིན་ན་ཡང་། །རྨི་ལམ་ཕལ་ཆེར་འཁྲུལ་པར་འབྱམས། །དེ་ཕྱིར་རང་ཉིད་འཆི་བའི་ཚེ། །ཐུགས་དམ་བརྟན་པོ་ཟིན་ན་ཡང་། །ཉམས་རྟོགས་བོགས་ཙམ་ཆེ་ཙམ་ལས། །འཆི་བ་ཆོས་སྐུར་སངས་རྒྱས་དཀའ། །བསྐྱེད་རིམ་གསལ་དང་ཐོས་གྲོལ་སོགས། །བར་དོར་ལོངས་སྐུ་ཐོབ་གསུངས་ཀྱང་། །ཡི་དམ་བསྙེན་སྒྲུབ་མང་པོ་ཐོན། །ཉམས་རྨིས་དག་སྣང་མང་ན་ཡང་། །རྒྱུད་སྡེ་རྣམས་ནས་གསུངས་པ་བཞིན། །མཐོང་རེག་མཚན་མ་བརྙེས་ཞེས་པ། །ཡི་དམ་མི་བཞིན་དངོས་སུ་མཇལ། །ཐུགས་དམ་ཟིན་པའི་གང་ཟག་ལ། །ཞི་ཁྲོའི་ལྷ་མང་འཆར་བ་ཡིན། །ཐ་མལ་སྐྱེ་བོ་རྣམས་ལ་ནི། །ཡུད་ཙམ་འཆར་ཡང་ངོས་མི་ཟིན། །བར་
དོར་བསྐྱེད་རིམ་ཟིན་ན་ཡང་། །དེང་སང་བརྟན་པ་མ་ཐོབ་པས། །ལོངས་སྐུར་སངས་རྒྱས་དཀའ་འམ་བསམ། །འཆི་ཁར་འཕོ་བ་ཐེབས་པ་ན། །སྐར་ཁུང་ནང་ནས་མདའ་འཕང་ལྟར། །རབ་ལ་དག་པའི་ཞིང་ཁམས་བགྲོད། །ཐ་མ་ལྷ་མིའི་ལུས་བཟང་དུ། །སྐྱེ་བར་རྒྱུད་ནས་གསུངས་ནའང་། །འཆི་བ་བརྟག་པ་མཁས་བྱས་ལ། །ཚང་ན་འཆི་བསླུ་ལན་གསུམ་བྱ། །མ་བསླུས་འཆི་ནད་མ་ཕོག་གོང་། །རང་ཉིད་འཕོ་བར་བྱ་གསུངས་པས། །རང་གིས་རང་ཉིད་འཕོ་བ་ལ། །རླུང་ལ་བྱུང་པོ་མེད་ན་ནི། །དམིགས་པ་ཁོ་ནས་འཕོ་མི་ཐུབ། །འཆི་ནད་ཕོག་ནས་རང་ཉིད་ཀྱིས། །རང་ཉིད་འཕོ་བར་མི་ནུས་ཞེས། །རྡོ་རྗེ་གདན་བཞིའི་རྒྱུད་ལས་གསུངས། །དེ་ཕྱིར་དེང་སང་རྟོགས་ལྡན་འགའ། །ཐུགས་དམ་མི་འདུག་རོ་རུལ་ལ། །མི་ཆག་འཕོ་བ་བྱེད་ཟེར་ཡང་། །གདན་བཞིའི་རྒྱུད་ལ་འགལ་དོགས་གདའ། །འཕོ་ཡང་མི་ནུས་ཐུགས་དམ་ཡུམེད། །གཉིས་མེད་སེང་གེ་ཧར་སངས་ཆེ། །ཕྱག་རྫོགས་པ་ཡི་ཆོས་སྐད་ལ། །དབང་པོ་རབ་འབྲིང་ཉེར་གཅིག་གིས། །ཐ་མའི་ཡང་ཐ་དེ་ཡི་ལུགས། །འཕོ་བ་ཐེབས་རུང་
མ་ཐེབས་རུང་། །ཐུགས་དམ་ཟིན་རུང་མ་ཟིན་རུང་། །བར་དོ་ཟིན་རུང་མ་ཟིན་རུང་། །བསྐྱེད་རིམ་ཟིན་རུང་མི་ཟིན་རུང་། །ཞི་ཁྲོ་ཟིན་རུང་མ་ཟིན་རུང་། །དུད་འགྲོ་མ་གཏོགས་མི་ཀུན་ལ། །མཚམས་མེད་སྡིག་ཅན་མ་གཏོགས་པ། །ཤི་ནས་བདུན་ཕྲག་ཕྱེད་བཞི་ཙམ། །དེ་ནས་ཞག་གྲངས་གཉིས་གསུམ་ལ། །བར་དོའི་འཇིགས་སྐྲག་རྣམས་ཀྱང་ཡོལ། །ཟག་བཅས་མངོན་ཤེས་རྫུ་འཕྲུལ་ལྡན། །གཤིན་རྗེའི་ལས་མཁན་མ་ཕྱིན་པས། །དགེ་སྡིག་རྩིས་བགྲང་མ་བསླེབས་པས། །ལས་ལ་བཟང་ངན་དེར་མ་ཟློསླེབས། །གར་འགྲོ་ཅི་བྱེད་རང་དབང་ཆེ། །རང་ཉིད་ཤི་བའི་སྡུག་བསྔལ་ཆེ། །དམ་ཆོས་མ་བྱས་འགྱོད་པ་ཆེ། །སྡིག་བྱས་དྲན་པས་སྐྲག་པ་ཆེ། །གཤིན་རྗེ་འོང་དོགས་དོགས་པ་ཆེ། །རང་གི་ས་ཕྱོགས་ཆགས་ཞེན་ཆེ། །མྱུར་བར་མི་ལུས་གཅིག་ལོན་ན། །དམ་ཆོས་བཤའ་མ་གཅིག་བྱེད་བསམ། །ཉེ་སྐོར་དེ་ལ་ལུས་ཚོལ་ཚེ། །འཁོར་བ་སྡུག་བསྔལ་རྒྱ་མཚོ་དང་། །མི་ལུས་སྐྱེ་རྒ་ན་འཆི་སོགས། །སྙིང་པོ་མེད་པའི་དོན་དྲན་ནས། །ཉེས་ཆེན་བཙོན་ནས་ཐར་བ་བཞིན། །གཏན་དུ་བདེ་ཞིང་སྐྱིད་པའི་ཡུལ། །
བདེ་བ་ཅན་གྱི་ཞིང་ཁམས་སུ། །འགྲོ་བའི་བློ་ཐག་གཅོད་པར་གྱིས། །བར་དོར་ཉི་ཟླ་མེད་པའི་ཕྱིར། །ནུབ་ཕྱོགས་གང་ཡིན་མ་ཤེས་པས། །བདེ་བ་ཅན་དང་འདི་ཡི་བར། །འཇིག་རྟེན་ཁམས་ནི་དཔག་མེད་པས། །ཞིང་ཁམས་ནོར་སོགས་དོགས་པ་ན། །བདེ་བ་ཅན་གྱི་ཞིང་ཁམས་ན། །སངས་རྒྱས་འོད་དཔག་མེད་པ་དེ། །མ་བརྗེད་ཡིད་ལ་དུང་དུང་ངང་། །སོང་བས་ངེས་པར་ཕྱིན་པ་ཡིན། །ད་ལྟ་བདེ་སྨོན་བཟང་སྤྱོད་དང་། །མེ་ཏོག་ཆུ་སྐྱེས་མ་ལ་སོགས། །འོད་དཔག་མེད་དང་ཚེ་དཔག་མེད། །རྒྱུན་དུ་ཐུགས་དམ་བྱས་ན་ནི། །འོད་དཔག་མེད་ཀྱི་སྤྲུལ་པ་ནི། །དགེ་སློང་དགེ་འདུན་དང་བཅས་པའི། །འོད་དཔག་མེད་དེ་བར་དོ་རུ། །བསུ་བའི་ཚུལ་དུ་འབྱོན་པར་བཤད། །དེ་ཡི་རྐྱེན་བྱས་དེ་མ་ཐག །ཞིང་ཁམས་དེ་རུ་པདྨ་ཡི། །སྦུབས་སུ་སྐྱེ་བ་ལེན་ན་ཡང་། །ད་ལྟ་མི་སྐྱེ་དོགས་པ་ཡིས། །ཐེ་ཚོམ་བྱས་ན་ལོ་ལྔ་བརྒྱར། །པདྨའི་ཁ་ནི་མི་བྱེ་བར། །ནང་དུ་བདེ་སྐྱིད་ཕུན་ཚོགས་ཤིང་། །སངས་རྒྱས་གསུང་ནི་ཐོས་ན་ཡང་། །ཞལ་མཇལ་ཕྱི་བའི་སྐྱོན་དུ་འགྱུར། །དེ་ཕྱིར་ཐེ་ཚོམ་མི་བྱེད་པར། །
ཞིང་དེར་འགྲོ་བའི་བློ་ཐག་ནི། །ད་ལྟ་ཉིད་དུ་རྦད་ཆོད་བྱ། །སྡུག་བསྔལ་མེད་ཅིང་བདེ་བའི་ངང་། །རྫོགས་པའི་སངས་རྒྱས་ངེས་པར་མཐོང་། །དོན་དེ་ངེས་པར་འགྲུབ་པའི་ཐབས། །ཐུགས་རྗེ་ཆེན་པོ་ཡི་དམ་བྱ། །དགེ་བ་ཐམས་ཅད་དེ་ཕྱིར་བསྔོ། །བསོད་ནམས་ཚོགས་གཉིས་བསགས་པའི་ཐབས། །མཎྜལ་ལ་སོགས་ཐུགས་དམ་བྱ། །དེ་སྐད་རཱ་ག་ཨ་སྱས་ཡིས། །གྲོ་ཞུན་བཅུ་དྲུག་ཉིན་ལའོ།། ༈ །།ན་མོ་ཧ་སུ་བཛྲ་ཡེ། །ཚེ་འདིའི་བདེ་སྐྱིད་ལོངས་སྤྱོད་སྙན་གྲགས་རྣམས། །གསོད་པར་མགོ་གཡོག་བྱེད་པའི་སྟོན་མོ་ལྟར། །སྙིང་ནས་སྐྱུགས་ལོག་མི་འདོད་མི་བསྒྲུབ་པའི། །བྱ་བཏང་སྐྱེས་བུ་རྣམས་ལ་ཕྱག་འཚལ་ལོ། །སྙིང་ལ་ཚེ་འདིའི་དཔལ་འབྱོར་མི་འདོད་ཀྱང་། །དགེ་ཚོགས་བསྒྲུབ་དང་བསོད་ནམས་ཚོགས་བསགས་ཕྱིར། །སྡིག་དང་མ་འདྲེས་ཆོས་མཐུན་འབྱོར་བ་རྒྱས། །རང་གཞན་ཚོགས་གཉིས་རྫོགས་པའི་བྱ་བ་ཅན། །བྱ་གང་སྐྱེས་བུ་དེ་ཡང་ཕྱག་གི་གནས། །དེ་མིན་འཛམ་གླིང་སྐྱེས་པའི་མཆོག་དམན་རྣམས། །ཐམས་ཅད་ཁྱད་མེད་བསམ་པ་གཅིག་པ་སྟེ། །ཚེ་འདིར་ཟས་ནོར་ལོངས་སྤྱོད་སྙན་
གྲགས་འདོད། །སྟོབས་ཆེན་རྣམས་ཀྱིས་དམག་ཇག་ཁྲིམས་གཅོད་བྱེད། །འབྲིང་རྣམས་རྒྱ་འགྲོ་དབུས་བསྐོར་ཚོང་འདུས་འགྲིམ། །ཡུལ་པས་སོ་ནམ་རྨོ་རྐོ་ཆུ་མ་བཟོ། །འབྲོག་པས་ནོར་ཕྱུགས་འཚོ་སྐྱོང་བཤས་ཚོང་བྱེད། །ཕྱུག་པོས་ཁེ་དོམ་རྒྱ་ཕུལ་གཡོ་སྒྱུ་བྱེད། །དབུལ་པོས་གླ་གཡོག་འཚོ་སྐྱོང་སྤྲང་སོགས་བྱེད། །རྒོད་པོས་རྐུ་དང་རི་དྭགས་གཤོར་ལ་བརྩོན། །ངན་པས་སྡིག་བྱེད་བྱ་རི་ཕྲན་བུ་རྔོན། །ཀུན་ཀྱང་དལ་དུས་མེད་དེ་བྱ་རྒྱུ་མང་། །ལུས་ངག་ཆད་དུབ་སེམས་ལ་དལ་དུས་མེད། །དེ་ལྟར་དཀའ་བས་བརྩོན་འགྲུས་ཅི་བྱས་ཀྱང་། །ཚེ་སྔོན་སྦྱིན་པའི་འབྲས་བུ་མེད་པ་རྣམས། །ཚེ་འདིར་ལོངས་སྤྱོད་ཕུན་སུམ་ཚོགས་དུས་མེད། །སྦྱིན་འབྲས་སྨིན་ནས་ལོངས་སྤྱོད་ཐོབ་ན་ཡང་། །ཡུན་རིང་སྤྱོད་ལོངས་མེད་དེ་ངན་སོང་ལྟུང་། །སེར་གོས་གྱོན་པའི་བཙུན་པ་ཕལ་ཆེར་ཡང་། །གྲྭ་ས་འགྲོ་དང་སློབ་གཉེར་བྱེད་པ་དང་། །རིག་གནས་ཡོན་ཏན་མང་པོ་ཟླ་བསླབ་པ་དང་། །དབང་ལུང་ཐོབ་རྒྱ་མང་པོ་བྱེད་པ་དང་། །བླ་མིང་བཏགས་ནས་དཀོར་མང་བསྡུ་བསམས་པས། །སེམས་བསྐྱེད་ངན་པའི་ཆོས་དེ་ཆོས་མིན་ནོ། །ཚེ་སྔོན་
སྦྱིན་འབྲས་བསོད་ནམས་མི་ལྡན་ཞིང་། །ཡི་དམ་ཆོས་སྐྱོང་བྱིན་རླབས་མ་ཞུགས་ན། །ཡོན་ཏན་ཆེ་ཡང་གདུལ་བྱ་འདུ་ངེས་མེད། །དབུས་གཙང་ཀུན་ལ་གྲགས་པའི་རབ་འབྱམས་དང་། །ཀུན་དྷ་ར་དང་འབྱེད་པ་འབུམ་རམ་པ། །དབུས་གཙང་ཀུན་ཏུ་སྤྲང་འཁྱམས་བྱེད་པ་མཐོང་། །ཀ་ཡེ་གསོན་དང་སྐྱ་སེར་འདོད་པ་ཅན། །རང་གིས་བསོད་ནམས་ཆེ་ཆུང་གང་བསགས་པའི། །ཚེ་འདིར་ལོངས་སྤྱོད་འབྱོར་པ་འཕེལ་བ་དང་། །ཕྱི་མ་བདེ་བ་ཅན་གྱི་ཞིང་ཁམས་སུ། །ཟད་པ་མེད་པ་ལོངས་སྤྱོད་ལྷུན་གྲུབ་ཅིང་། །ཕྱོགས་བཅུའི་སངས་རྒྱས་ཐམས་ཅད་མཆོད་བྱེད་ཅིང་། །རིམ་གྱིས་སྐྱེ་རྒ་ན་འཆི་མི་མྱོང་བར། །བདེ་སྐྱིད་ངང་ལས་རྫོགས་སངས་རྒྱས་འདོད་ན། །ཐུགས་རྗེ་ཆེན་པོ་ནོར་ལྷའི་སྐུ་སྤྲུལ་པ། །འཕགས་པ་འབྲུག་ཞོན་གཙོ་འཁོར་ལྔ་པོ་ལ། །རྒྱུན་དུ་ཐུགས་དམ་བསྙེན་པ་ཅི་མང་མཛོད། །སྡིག་ལྟུང་དཀའ་ལས་ཆེན་པོ་མི་དགོས་པ། །དགོས་འདོད་ལོངས་སྤྱོད་ཤུགས་ཀྱིས་འབྱུང་བ་ཡིན། །དཀའ་གདམས་བླ་མ་རྣམས་ཀྱིས་ལག་བླངས་ལགས། །གཞན་ཡང་ཛ་དམར་ཛཾ་ནག་ཛ་སེར་སོགས། །ངོ་བོ་ཡང་དག་རྫོགས་པའི་སངས་རྒྱས་
ཉིད། །འགྲོ་ལ་ཕན་ཕྱིར་ནོར་ལྷའི་སྐུར་སྤྲུལ་པ། །འདི་ནི་ཚེ་རབས་གཏན་གྱི་སྐྱབས་གནས་སུ། །སྔགས་སྒྲ་བྱ་དང་རི་དྭགས་ཀྱིས་ཐོས་ཀྱང་། །ངན་སོང་སྐྱེ་སྒོ་ཆོད་པ་རྒྱལ་བས་གསུངས། །ཁྱད་པར་ཡི་གེ་བཅུ་པོ་འདི་ཉིད་ལ། །ཕན་ཡོན་བསམ་ལས་འདས་ཤིང་བརྗོད་མི་ལང་། །ཆུ་སྦྱིན་མཆོད་བསྟོད་གཏོར་བསྔོས་བྱས་ན་ཡང་། །སངས་རྒྱས་ཐམས་ཅད་མཆོད་དང་བསོད་ནམས་མཉམ། །ཚེ་འདིར་ལོངས་སྤྱོད་ཤུགས་ཀྱིས་འབྱུང་བ་ནི། །ཡིད་བཞིན་ནོར་བུ་བས་ཀྱང་ངེས་པར་ལྷག །ཡིད་བཞིན་ནོར་བུ་བསྐལ་པ་མར་འགྲིབ་དུས། །གསོལ་བ་བཏབ་ཀྱང་དགོས་འདོད་མི་འབྱུང་གསུངས། །ཛཾ་ལྷ་མར་འགྲིབ་དུས་ཀྱང་དངོས་གྲུབ་འབྱུང་། །ཡར་འཕེལ་དུས་སུ་ཇི་ལྷའི་སྒྲུབ་ཐབས་ནི། །མི་མཁོའི་ཕྱིར་ན་གསུངས་པ་མ་ཡིན་ནོ། །བྱ་བཏང་མིན་པའི་གྲྭ་སློབ་ཐམས་ཅད་ལ། །ལོངས་སྤྱོད་སྒྲུབ་ཐབས་ཟབ་མོའི་དབྱངས་ཆུང་འདི། །རྟ་ལོ་གྲོ་ཞུན་མར་ངོའི་ཚེས་གཅིག་ལ། །ཉམས་ལ་ཤར་ནས་རཱ་ག་ཨ་སྱས་སྨྲས།། ༈ །།ཀ་ཡེ་གསོན་དང་ལས་གཤིན་དུག་གདོང་ཅན། །ཁ་གདངས་མཆེ་གཙིགས་དབུ་གསུམ་ཕྱག་དྲུག་
པ། །ག་ཤལ་མགོ་རློན་སྙིང་ཕྲེང་སེ་རལ་ཁར། །ང་རོ་འབྲུག་སྒྲ་ཧཱུྃ་ཕཊ་ཐུག་ཆོམ་ཅན། །ཅ་ཅོ་སྒྲོག་པའི་གཤིན་རྗེ་འབུམ་དང་བཅས། །ཆ་ལུགས་མ་རུངས་བདུད་དང་སྲིན་པོའི་གཟུགས། །ཇ་ཆང་སྨན་རཀ་གཏོར་མ་འདི་བཞེས་ལ། །ཉ་རྒྱས་ཟླ་ལྟར་དགེ་ལེགས་རྒྱས་པར་མཛོད། །ཏ་ཐཱ་ག་ཏའི་བསྟན་སྲུང་ཆེན་པོ་ཁྱོད། །ཐ་མལ་བྱད་མ་ལྷ་སྲིན་གནོད་པ་ཀུན། །ད་ནི་བཟློག་བསྒྱུར་ཐལ་བ་རྡུལ་དུ་རློགས། །ན་ཚ་ཤི་ཆད་གོད་ཁའི་རྒྱུན་ཆོད་ཅིག །པ་ར་ག་ཏའི་དོན་འདི་བསྒོམ་པ་ལ། །ཕ་རོལ་བར་ཆད་བྱེད་པའི་གདུག་སེམས་ཀུན། །བ་མོར་ཉི་ཟེར་ཕོག་ལྟར་མེད་པར་མཛོད། །མ་ར་ཡ་ཡི་ལས་ཀྱི་དགྲ་བགེགས་སོགས། །ཙ་ར་མ་ཡི་དམག་ཚོགས་མཐུ་མ་ཆུང་། །ཚ་གྲང་རླུང་མཁྲིས་བད་ཀན་ནད་ཀུན་ཟློག །ཛ་ཡེ་སྤྱན་སྔར་ཁས་བླངས་དུས་ལ་བབ། །ཝ་ལེར་གང་ལ་དམིགས་པ་ཁྱོད་ཀྱིས་ཤེས། །ཞྭ་ལྟར་དུས་གསུམ་སངས་རྒྱས་དབུ་ལ་བརྒྱན། །ཟ་བྱེད་ཞལ་གདངས་སྲིད་གསུམ་ཟ་བ་ཁྱོད། །འ་འུར་མཱ་ར་ཡ་དང་ཧཱུྃ་ཕཊ་བཅས། །ཡ་མ་བདུན་བརྒྱ་ཉི་ཤུའི་འཁོར་རྣམས་ལ། །ར་ཅན་ཁྲི་ཡི་ལྷ་སྲིན་འཁོར་དང་བཅས། །ལ་ཆེན་གནོད་
བྱེད་གདོན་དང་བྱད་མའི་ཚོགས། །ཤ་ཟོ་ཁྲག་འཐུང་རུས་མུར་ལྤགས་པ་གྱོན། །ས་དང་ལམ་གྱི་བར་ཆད་ཐམས་ཅད་ཟློག །ཧ་ཧ་ཧི་ཧི་བཞད་པའི་གད་རྒྱང་ཅན། །ཨ་ལ་ལ་ཞེས་ངོ་མཚར་དངོས་གྲུབ་སྩོལ། །ཅེས་པ་རྟ་ལོ་གྲོ་ཞུན་ཟླ་བའི་ཉི་ཤུའི་ཐོ་རངས་སྐོར་འཇམ་དཔལ་དུག་གདོང་གིས་གཏོར་ཟློག་བྱས་དུས་བསྟོད་པའོ། །མངྒ་ལཾ། ན་མོ་རཏྣ་ཏྲ་ཡཱ་ཡ། བདག་ནི་བསྟན་པ་སྤྱི་དང་ལམ་ཚོལ་བ། །ཀུན་ལ་མི་གཤེ་དག་སྣང་སྦྱང་བ་སྟེ། །མུ་སྟེགས་ཅན་ལ་མི་སྨོད་དམ་ཚིག་ལགས། །འོན་ཀྱང་སྔོན་གྱི་ལས་དང་འཕྲལ་རྐྱེན་གྱིས། །བདག་གི་དབོན་པོ་བསྲུང་བྱར་གྱུར་པ་ཡི། །རང་འདོད་འཁྲི་བ་ཞེ་སྡང་མེད་ན་ཡང་། །རྒྱ་གར་གྲུབ་ཆེན་ནག་པོ་པ་ཡིས་ནི། །བླ་མས་གསུངས་ན་སྡིག་ཀྱང་བྱ་དགོས་དང་། །སློབ་དཔོན་ཆེན་པོ་ཕྱོགས་ཀྱི་གླང་པོ་ཡིས། །མུ་སྟེགས་བོན་སོགས་བསྟན་པའི་དགྲ་ཡིན་པས། །ཐུབ་བསྟན་འཛིན་པས་བསྒྲལ་བར་བྱ་གསུངས་ལྟར། །བོན་དགོན་བདུན་ཕྲག་གཉིས་ཙམ་རྩད་བཅད་ནས། །བན་དགོན་ཆེན་པོ་གཉིས་ལ་བསྒྱུར་འདུག་པ། །ཤཱཀྱའི་བསྟན་དང་དགེ་འདུན་འབུམ་ཕྲག་གིས། །ཆོས་དང་བསྟན་པ་བླ་
མའི་གསུང་སྒྲུབ་ལས། །རང་དོན་འཁྲི་བ་ཅུང་ཟད་མ་མཆིས་ལ། །གལ་ཏེ་མཆིས་ན་བན་བོན་སྲུང་མར་བཤགས། །དབང་མེད་རྗེ་བོའི་དབང་དུ་གྱུར་པ་ལ། །ལག་ནི་ཉེས་ཀྱང་ཡིད་སེམས་ཉེས་པ་མེད། །དེ་ཕྱིར་བན་བོན་སྲུང་མས་བཟོད་པར་བཞེས། །ཕྱི་ནང་རྩོད་པ་བསྟན་པ་སྤྱི་ཡི་ལུགས། །ཡིན་ཕྱིར་ཆོས་སྲུང་རྣམས་ཀྱིས་སྲུང་སྐྱོབ་མཛོད། །ནང་པར་གྱུར་ཀྱང་ཚུལ་ཁྲིམས་མ་དག་པའི། །དགོན་ཆུང་བདུན་ཕྲག་གཙང་དགོན་བསྒྱུར་འདུག་པའི། །ཆོས་སྐྱོང་རྣམས་ནི་དགྱེས་བཞིན་སྲུང་བ་ལས། །ཀོ་ལོང་མ་མཛད་སྐྱེས་ཆེན་དམ་པ་ཀུན། །སེར་ཁྱིམ་གཙང་དགོན་བསྒྱུར་བ་བསྟན་པའི་དོན། །བསྟན་པ་དངོས་ནི་འདུལ་བ་ཡིན་ཕྱིར་རོ། །སྡེ་ཆེན་སེང་གེ་ཁ་འཐབ་བྱུང་བ་ལ། །རྣམ་སྨིན་མི་རྩི་བརྔན་པ་དོན་གཉེར་བའི། །བོན་ནག་མང་པོས་མནན་པས་ས་འོག་གང་། །བླ་མཚོ་གཉན་པོ་སྐམ་པར་བྱས་འདུག་པས། །ལྷ་སྲིན་ཐམས་ཅད་འཇིག་རྟེན་དྲང་ཤན་མཁན། །ཡིན་ཕྱིར་མིང་ཡིག་བྲིས་ལ་མ་གནོད་པའི། །ཟ་འདོད་སྔགས་ནག་ཁོ་རང་ཕུང་བར་འོས། །ཡང་ན་དེ་དག་བྱེད་དུ་བཅུག་པ་ཡི། །གྱོད་གཞི་མཁན་པོ་ཉིད་ལ་ལེ་ལན་འདོད། །
དེ་དོན་ཡེ་ཤེས་པ་དང་འཇིག་རྟེན་པའི། །ལེགས་ཉེས་སྟངས་འཛིན་རྣམས་ཀྱིས་དགོངས་པར་མཛོད། །ཅེས་བཟློག་པ་དུས་སྨྲས་སོ། །ཡེ་རྟ་མཆོག་རྒྱལ་པོ་ཧེ་རུ་ཀ །ཁ་དོག་ཆར་སྤྲིན་གཏིབས་པ་ལྟ་བུའི་མདོག །ག་ཤལ་ཁྲག་འཛག་མི་མགོའི་ཕྲེང་བས་བརྒྱན། །ང་རོ་ཧཱུྃ་ཕཊ་རྟ་སྐད་དྲག་པོའི་སྒྲ། །ཅ་ཅོའི་ངུར་སྒྲ་དང་བཅས་བདུད་དགྲ་མནན། །ཆ་ལུགས་བེར་ནག་དཔའ་ཆས་ཡོངས་སུ་རྫོགས། །ཇ་ཆང་སྨན་རག་གཏོར་མའི་མཆོད་པ་བཞེས། །ཉ་རྒྱས་ཟླ་ལྟར་ཐུགས་རྗེ་འོད་ཟེར་གྱིས། །ཏ་ཐཱ་ག་ཏའི་སྤྲུལ་པའི་ཁྲོ་བོ་ཁྱོད། །ཐ་མལ་ཟ་འདྲེ་ཤི་སྲི་བྱད་མ་སོགས། །ད་ནི་ཁྱོད་ཀྱིས་ཚར་གཅོད་དྲག་པོས་སྒྲོལ། །ན་ཚ་ཤི་ཆད་རྒྱུན་འདི་ད་ཆོད་ཅིག །པ་དེ་པུ་དེ་བསམ་ངན་མཐུ་གཏད་སོགས། །ཕ་རོལ་གནོད་བྱེད་གདུག་རྩུབ་ནུས་པ་ཀུན། །བ་མོར་ཉི་ཟེར་ཕོག་ལྟར་མེད་པར་མཛོད། །མ་ར་ཡ་ཡི་ཕྲིན་ལས་དུས་ལ་བབ། །རྩ་རླུང་ཐིག་ལེ་བསྒོམ་པའི་གེགས་སྐྱོན་དང་། །ཚ་གྲང་འདུས་པའི་ནད་ཀུན་ཞི་བར་མཛོད། །ཛ་ཡེ་སྣང་མཐའི་སྤྱན་ལམ་དམ་བཅས་ལྟར། །ཝ་ལེར་དུས་གསུམ་མཁྱེན་པའི་ལྷ་
ཁྱེད་ནི། །ཞྭ་ལྟར་སྤྱི་བོར་བཀུར་ཞིང་བསྙེན་སྒྲུབ་ན། །ཟ་བྱེད་ལྷ་སྲིན་སྡེ་བརྒྱད་དྲེགས་པའི་ཚོགས། །འ་འུར་འབྲུག་སྒྲ་ཆོ་འཕྲུལ་ཆེན་པོ་བཅས། །ཡ་མ་རཱ་ཙ་ལ་སོགས་སྡེ་བརྒྱད་འཁོར། །རྭ་ཅན་འབུམ་གྱི་འཁོར་དང་ཡང་འཁོར་བཅས། །ལ་ཆེན་བདག་ཅག་སློབ་འབངས་བརྒྱུད་པར་བཅས། །ཤ་ནས་བརྩེ་བའི་མ་ལྟར་སྲུང་སྐྱོབ་དང་། །ས་དང་ལམ་གྱི་བར་ཆད་ཐམས་ཅད་ཟློག །ཧ་ཡ་གྷི་ཝའི་ཐུགས་དམ་མ་གཡེལ་ཅིག །ཨ་ལ་ལ་ཞེས་ངོ་མཚར་དངོས་གྲུབ་སྩོལ། །ཅེས་ཁྲོ་ཆུའི་ཟོར་ལྟས་ལོག་ནས། སླར་ཡང་རྟ་མགྲིན་གྱི་བཟློག་པ་བཅས་ཉིན་བྲིས་པའོ།། ༈ ས།།ན་མོ་གུ་རུ། བླ་མ་རྣམས་ལ་ཕྱག་འཚལ་ལོ། །ས་བརྒྱད་ཡན་ཆད་ཐོབ་པའི་སེམས་དཔའ་ཡི། །རྣམ་སྣང་ལ་སོགས་ལོངས་སྤྱོད་རྫོགས་པའི་སྐུ། །བླ་མར་བསྟེན་ནས་དབང་དང་གདམས་ངག་ཞུས། །ས་ནི་དང་པོ་ཡན་ཆད་ཐོབ་པ་ཡི། །རྫོགས་པའི་སངས་རྒྱས་མི་འཁྲུགས་པ་ལ་སོགས། །བླ་མར་བསྟེན་ནས་དབང་དང་གདམས་ངག་ཞུ། །ཚོགས་ལམ་ཆེན་པོ་སྦྱོར་ལམ་ལ་གནས་པས། །ཤཱཀ་ཐུབ་ལ་སོགས་མཆོག་གི་སྤྲུལ་པའི་སྐུ། །སངས་རྒྱས་བླ་མར་བསྟེན་ནས་དམ་
ཆོས་ཉན། །ཐ་མལ་རང་རེ་སོ་སོའི་སྐྱེ་བོ་ཡི། །བླ་མ་དེ་འདྲ་བསྟེན་པའི་སྐལ་པ་མེད། །ནམ་མཁའ་བར་སྣང་སངས་རྒྱས་སྤྲུལ་པའི་སྐུ། །རྟག་ཏུ་གང་བར་བཞུགས་ཀྱང་མ་མཇལ་ཏེ། །མ་རིག་འཐིབ་པོས་སྒྲིབ་པས་བསྒྲིབས་པ་ཡིན། །ད་ལྟར་ཕྱོགས་བཅུའི་འཇིག་རྟེན་ཁམས་རྣམས་སུ། །སངས་རྒྱས་གྲངས་མེད་ཆོས་འཁོར་བསྐོར་ན་ཡང་། །རང་རེ་རྣམས་ཀྱིས་མི་མཐོང་སྒྲིབ་པས་བསྒྲིབས། །སངས་རྒྱས་དེ་རྣམས་གསུང་གི་སྒྲ་དབྱངས་ཀྱང་། །ནམ་མཁའ་ཁྱབ་པར་རྟག་ཏུ་གྲགས་ན་ཡང་། །རང་རེ་རྣམས་ཀྱིས་མི་ཐོས་སྒྲིབ་པས་བསྒྲིབས། །དཔེར་ན་ཡིག་དྲུག་ལ་སོགས་སྔགས་འདོན་ཚེ། །ཡི་དམ་འབྲལ་མེད་མདུན་དུ་བཞུགས་ན་ཡང་། །སྒྲིབ་པ་མ་དག་བར་དུ་དེ་མི་མཐོང་། །མཐོང་ན་ཡེ་ཤེས་ལུས་ཅན་སངས་རྒྱས་རྣམས། །ཐ་མལ་ཆུ་བུར་མིག་གིས་མཐོང་བ་མེད། །དེ་བཞིན་གསུང་ཡང་ཚིག་གཅིག་ཐོས་སྐབས་མེད། །སྔོན་འདས་སངས་རྒྱས་བྱང་ཆུབ་སེམས་དཔའ་དང་། །དགྲ་བཅོམ་གྲུབ་ཐོབ་དཔག་མེད་བྱོན་ན་ཡང་། །རང་རེ་རྣམས་ལ་ཕན་ཐོགས་མ་ནུས་ན། །ད་རུང་འཁོར་བར་འཁྱམས་པ་ཨ་ཙ་
མ། །དེ་ཕྱིར་རང་རེ་ཆོས་སྒོར་བཅུག་པ་དང་། །དབང་ལུང་ཁྲིད་གསུམ་ཐོབ་པའི་བླ་མ་དེ། །སངས་རྒྱས་ཡིན་རུང་སེམས་ཅན་ཡིན་ཀྱང་རུང་། །སངས་རྒྱས་ཀུན་བས་རང་ལ་བཀའ་དྲིན་ཆེ། །དེ་ཕྱིར་དྲིན་ཅན་རྩ་བའི་བླ་མ་ཟེར། །བླ་མ་དེ་ཡིས་བསྟན་པའི་དམ་ཆོས་རྣམས། །རང་གིས་རྩེ་གཅིག་ཉམས་སུ་བླངས་ནུས་ན། །སྒྲིབ་པ་ཇེ་སྲབ་གྱུར་ནས་མ་འོངས་དུས། །སངས་རྒྱས་བྱང་སེམས་མཇལ་ནས་ཆོས་ཐོབ་འགྱུར། །དེ་ཡི་རྩ་བའང་བླ་མ་དེ་ཡི་དྲིན། །ཐ་མལ་སོ་སོའི་སྐྱེ་བོའི་བླ་མ་ཡིས། །གཞན་ལ་ཆོས་བཤད་དབང་བསྐུར་བྱེད་པའི་ཚེ། །སངས་རྒྱས་ཐམས་ཅད་དེ་ལ་ཐུགས་དགྱེས་ནས། །མདུན་གྱི་ནམ་མཁར་བྱོན་ནས་ཕྱག་མཛད་དེ། །ངེད་ཀྱིས་བཤད་ཀྱང་གོ་བའི་སྐལ་པ་མེད། །ཁྱོད་ཀྱིས་བཤད་པ་ལེགས་སོ་བརྗོད་ནས་གཤེགས། །ཐ་མལ་བླ་མས་དབང་ནི་བསྐུར་བའི་ཚེ། །བླ་མ་དེ་ལ་བྱིན་རླབས་མེད་ན་ཡང་། །དབང་ཞུའི་སློབ་མ་དེ་ལ་ཕན་པའི་ཕྱིར། །སངས་རྒྱས་ཡི་དམ་གང་ཡིན་དེ་ཉིད་ནི། །དབང་ནི་བསྐུར་ཚེ་བླ་མ་དེ་ལ་ཞུགས། །སློབ་མ་དེ་ལ་བྱིན་རླབས་འཇུག་བྱས་ནས། །དབང་བསྐུར་ཚར་ནས་ལྷ་དེ་གཤེགས་པའི་
ཕྱིར། །ཐ་མར་བླ་མར་འབུལ་བ་བྱེད་པ་ཡང་། །དབང་བསྐུར་དུས་དེར་ཕུལ་བར་བྱས་ན་ནི། །ཡི་དམ་དེ་དང་དངོས་སུ་ཕུལ་དང་འདྲ། །བརྒྱ་སྟོང་འགྱུར་གྱིས་ཕན་ཡོན་ཆེ་བར་གསུངས། །རང་ཉིད་གོ་བ་ཤེས་རབ་རྒྱ་ཆེ་བས། །དབང་ཆོག་ཐམས་ཅད་བློ་ལ་བྱང་ནས་ཀྱང་། །སྔོན་དུ་བླ་མ་ཞིག་ལས་མ་ཐོབ་ན། །བདག་འཇུག་བླངས་ཀྱང་དབང་ནི་མི་ཐོབ་ལ། །གཞན་ལ་བསྐུར་ན་མཚམས་མེད་སྡིག་དང་འདྲ། །རྡོ་རྗེ་འཆང་ལས་དམ་ཆོས་བརྐུས་པ་ཡིན། །སྔོན་ལ་ཐོབ་ན་རང་གིས་རང་ཉིད་ལ། །དབང་བསྐུར་བླངས་བས་གསར་དུ་ཐོབ་པ་དང་། །འདྲ་བའི་བྱིན་རླབས་འབྱུང་ཞིང་ཉམས་ཆག་བསྐང་། །དེ་ཡང་བླ་མ་དེ་ཡི་དྲིན་ཡིན་ནོ། །རང་ཉིད་ཤེས་རབ་ཕུན་སུམ་ཚོགས་པ་དེས། །ཁྲིད་རིམ་ཐམས་ཅད་གོ་ཞིང་འཆད་ཤེས་ཀྱང་། །སྔོན་དུ་བླ་མ་གཅིག་ལས་མ་ཐོབ་ན། །རང་གིས་བསྒོམས་ཀྱང་ཉམས་རྟོགས་མི་སྐྱེ་ལ། །གཞན་ལ་བཤད་ན་ཉེས་སྒྲིབ་དཔག་ཏུ་མེད། །སྔོན་དུ་ཐོབ་ནས་ཡིད་ལ་མ་འཇག་ཀྱང་། །ཁྲིད་དཔེ་བལྟ་ཞིང་རང་གིས་བསྒོམས་པ་ན། །གཞུང་ནས་བཤད་བཞིན་ཉམས་རྟོགས་རིམ་པར་སྐྱེ། །
གཞན་ལ་བཤད་ན་ཕན་ཡོན་ཆེ་བ་ཡིན། །ཕ་རོལ་སྐལ་པ་ལྡན་རྣམས་ཉམས་རྟོགས་སྐྱེ། །མ་སྐྱེས་ན་ཡང་ལུང་ཐོབ་ཕན་ཡོན་འབྱུང་། །དེ་ཡང་དང་པོའི་བླ་མ་དེ་ཡི་དྲིན། །སྔོན་དུ་བླ་མས་སྡོམ་ལུང་མ་ཐོབ་ན། །སྡོམ་པ་བསྲུང་ཡང་སྡོམ་པའི་ཕན་ཡོན་མེད། །བསོད་ནམས་ཡོད་ཀྱང་བར་མའི་དགེ་བ་སྟེ། །སངས་རྒྱས་ཐོབ་པའི་རྒྱུ་རུ་དེ་མི་འགྱུར། །སྡོམ་པ་ཐོབ་ནས་བསྲུངས་ན་ཕན་ཡོན་འབྱུང་། །གཞན་ལ་སྡོམ་ལུང་བྱས་ཀྱང་སྡོམ་པ་ཐོབ། །དེ་ཡང་དང་པོ་བླ་མ་དེ་ཡི་དྲིན། །སྒྲུབ་ཐབས་དཔེ་ཆ་རྙེད་ཅིང་བསྒྲུབ་ཤེས་ཀྱང་། །དང་པོ་བླ་མ་གཅིག་ལས་མ་ཐོབ་ན། །བསྒྲུབ་ཀྱང་མི་འགྲུབ་ཡུན་རིང་སྔགས་བཟླས་ན། །ནད་ཞི་གདོན་ཞི་ཅུང་ཟད་བྱུང་ན་ཡང་། །ཕྱི་མ་ངན་སོང་གསུམ་དུ་སྐྱེ་བར་གསུངས། །བླ་མ་ལས་ཐོབ་བསྒྲུབས་ན་མྱུར་དུ་འགྲུབ། །ཚེ་འདིའི་སྲུང་སྐྱོབ་ཕྱི་མ་ལམ་སྣ་འདྲེན། །དེ་ཡང་བླ་མ་དེ་ཡི་དྲིན་ཡིན་ནོ། །སྤྱི་བོར་རྫོགས་པའི་སངས་རྒྱས་བསྒོམས་བྱས་ནས། །རྩེ་གཅིག་དད་པས་གསོལ་བ་བཏབ་ན་ཡང་། །སངས་རྒྱས་དེ་དང་འབྲེལ་པ་མེད་པའི་ཕྱིར། །བྱིན་རླབས་འཇུག་དཀའ་རྒྱང་ཐག་རིང་བ་ཡིན། །བླ་མ་
སངས་རྒྱས་དེ་དང་དབྱེར་མེད་དུ། །བསྒོམ་ནས་རྩེ་གཅིག་གསོལ་བ་བཏབ་བྱས་ན། །སངས་རྒྱས་ཐུགས་རྗེ་བྱིན་རླབས་ཆེ་བ་དང་། བླ་མ་དེ་དང་འབྲེལ་བ་ཡོད་པའི་ཕྱིར། །སངས་རྒྱས་དེ་ཡི་བྱིན་རླབས་མྱུར་དུ་འཇུག །བླ་མ་ཡིན་ན་སངས་རྒྱས་ཡིན་ངེས་པའི། །ཡབ་སྲས་ལྟ་བུ་སྐུ་དངོས་བསྒོམ་པ་ན། །དམིགས་པ་ཟིན་སླ་བྱིན་རླབས་མྱུར་བ་དང་། །དད་པ་དག་སྣང་འཕེལ་བས་ལེགས་པ་ཡིན། །ཐ་མལ་བླ་མ་དངོས་སུ་བསྒོམ་པ་ན། །བརྐོས་ཕོར་རི་མོ་ཚ་ཚར་དོད་པ་ལྟར། །བླ་མ་དེ་ལ་བྱིན་རླབས་གང་ཡོད་དང་། །ཉོན་མོངས་དུག་ལྔ་ནད་གདོན་གང་ཡོད་དེ། །མཉམ་དུ་འཇུག་པས་སྐུ་དངོས་བསྒོམ་མི་རུང་། །ངོ་བོ་བླ་མ་དེ་དང་དབྱེར་མེད་ལ། །རྣམ་པ་སངས་རྒྱས་སྐུ་རུ་བསྒོམ་པ་ཟབ། །དེ་ཡང་ཚེ་རིང་འདོད་ན་ཚེ་དཔག་མེད། །བདེ་ཆེན་ཞིང་དུ་སྐྱེ་འདོད་འོད་དཔག་མེད། །འགྲོ་དོན་སྙིང་རྗེ་སྐྱེ་འདོད་སྤྱན་རས་གཟིགས། །འཇིགས་པ་ཐམས་ལྟ་ཅད་སྐྱོབ་འདོད་སྒྲོལ་མའི་སྐུ། །ནད་ཀུན་ཞི་བར་འདོད་ན་སྨན་གྱི་བླར། །བྱིན་རླབས་ནུས་པ་ཆེ་འདོད་ཨོ་རྒྱན་སྐུ། །མཐུ་སྟོབས་ཆེ་འདོད་ཕྱག་ན་རྡོ་རྗེ་དང་། །ཤེས་རབ་ཆེ་
བར་འདོད་ན་འཇམ་པའི་དབྱངས། །ལོངས་སྤྱོད་ཆེ་བར་འདོད་ན་ཛཾ་བྷ་ལ། །ཉམས་རྟོགས་སྐྱེ་བར་འདོད་ན་རྡོ་རྗེ་འཆང་། །ཡང་ན་མི་ལ་རས་པ་དྭགས་པོ་སོགས། །གང་འདོད་བསྒོམ་པས་དངོས་གྲུབ་གང་འདོད་འབྱུང་། །དཔེར་ན་ཡིད་བཞིན་ནོར་བུ་རིན་ཆེན་འདྲ། །དེ་ཕྱིར་བླ་མ་སངས་རྒྱས་རིན་པོ་ཆེ། །རང་གི་བླ་མ་དེ་ཉིད་སངས་རྒྱས་དང་། །སེམས་ཅན་སུ་ཡིན་ཁྱད་ནི་མེད་པ་སྟེ། །རང་གིས་སངས་རྒྱས་དངོས་སུ་ཐག་བཅད་ན། །དབང་ལུང་གདམ་ངག་ཐོབ་པ་ཐམས་ཅད་ནི། །སངས་རྒྱས་དངོས་ལས་ཐོབ་དང་ཁྱད་པར་མེད། །དེ་བྱས་བརྒྱུད་པ་ཤིན་ཏུ་ཆེ་བ་སྟེ། །བྱིན་རླབས་མི་འབྱུང་མི་སྲིད་གདམས་ངག་སྟེ། །བླ་མ་སངས་རྒྱས་སུ་འདུག་པ་མི་རུ་བཟུང་། །བརྒྱུད་པ་ཉེ་རིང་དུ་བགྲང་བ་མཐོལ་ལོ་བཤགས། །གླིང་རྗེ་རས་པས་གསུངས་པ་དེ་ཡི་དོན། །ཐུགས་ནི་ཆོས་ཉིད་སངས་རྒྱས་ཀུན་དང་གཅིག །གསུང་ནི་དམ་ཆོས་ཐམས་ཅད་འབྱུང་བའི་གནས། །སྐུ་ནི་དགེ་འདུན་ངོ་བོར་རྫོགས་པའི་ཕྱིར། །དཀོན་མཆོག་གསུམ་ཡང་བླ་མ་ཉིད་ལ་འདུས། །དེ་ཕྱིར་དཀོན་མཆོག་གསུམ་གྱི་རྩ་བ་ཟེར། །རིག་འཛིན་གྲུབ་ཐོབ་
ཐམས་ཅད་བླ་མའི་སྐུ། །ཡི་དམ་དཀྱིལ་འཁོར་ལྷ་ཀུན་བླ་མའི་གསུང་། །མཁའ་འགྲོ་ཆོས་སྐྱོང་ཐམས་ཅད་བླ་མའི་ཐུགས། །ནོར་ལྷ་གཏེར་བདག་བླ་མའི་ཡོན་ཏན་ཏེ། །མཁའ་འགྲོ་སྲུང་མ་བླ་མའི་ཕྲིན་ལས་ཏེ། །དེ་ཕྱིར་སངས་རྒྱས་ཐམས་ཅད་འདུས་པའི་སྐུ། །དེ་དོན་ལམ་འབྲས་སོགས་ནས་རྒྱ་ཆེར་གསུངས། །གསང་སྔགས་རིག་སྔགས་གཟུངས་སྔགས་ཐམས་ཅད་ནི། །བླ་མ་མེད་ན་ཉམས་སུ་བླངས་མི་རུང་། །དེ་ཕྱིར་རྡོ་རྗེ་འཛིན་པའི་ངོ་བོ་ཉིད། །དེ་ཕྱིར་བསྐལ་པ་འབུམ་གྱི་སངས་རྒྱས་བས། །རང་གི་རྩ་བའི་བླ་མ་གཉན་པར་གསུངས། །དེ་ཕྱིར་ཁམས་གསུམ་སེམས་ཅན་བསད་པ་བས། །ཆོས་དང་མཐུན་པའི་བླ་མའི་བཀའ་སྩལ་དེ། །མ་བསྒྲུབ་བཀའ་བཅག་ཉེས་པ་ཆེ་བར་བཤད། །བཀའ་བཞིན་བསྒྲུབས་ན་ཕན་ཡོན་ཆེ་བའི་ཕྱིར། །ནཱ་རོའི་སློབ་གཉེར་པཎྜི་ཏ་བྱས་ཤིང་། །བདེ་དགྱེས་ཡི་དམ་བསྙེན་སྒྲུབ་བྱས་ན་ཡང་། །རྟོགས་པ་མ་སྐྱེས་ལྔ་གྲུབ་པ་མ་ཐོབ་ནས། །ཏེ་ལོའི་ཆགས་ཕྱི་བཀའ་བཞིན་ལོ་བཅུ་གཉིས། །བྱས་པས་བསྒྲུབ་པ་མ་དགོས་གྲུབ་པ་ཐོབ། །ནཱ་རོའི་བརྒྱུད་པ་མོས་གུས་བཀའ་བབས་པས། །མོས་
གུས་ཁོ་ནས་ཕྱག་ཆེན་རྟོགས་པ་སྐྱེས། །འོན་ཀྱང་གསོལ་བ་འདེབས་ཡུལ་བླ་མ་དེ། །སངས་རྒྱས་ཡིན་ངེས་སྙིགས་དུས་རྙེད་དཀའ་བས། །བླ་མའི་མཚན་ཉིད་ཐམས་ཅད་ཚང་བ་ཡི། །སོ་སོའི་སྐྱེ་བོའི་རང་གི་བླ་མ་ལ། །སངས་རྒྱས་དངོས་ཀྱི་མོས་གུས་བྱ་བར་གསུངས། །བླ་མ་མཚན་ཉིད་ཚང་བ་མ་རྙེད་ན། །ཡོན་ཏན་ཤས་ཆེ་སྐྱོན་ནི་ཆ་ཆུང་བ། དེ་ལ་དབང་ལུང་འབྲེལ་བ་ཞུ་རུང་བ། །དུས་ཀྱི་འཁོར་ལོའི་རྒྱུད་ལས་གསུངས་པ་ཡིན། །དེ་ལ་དད་པ་དག་སྣང་བྱེད་དགོས་ཀྱི། །གལ་ཏེ་རྩེ་གཅིག་གསོལ་བ་བཏབ་ན་ཡང་། །ཉམས་དང་རྟོགས་པ་སྐྱེ་བར་མི་འགྱུར་ཏེ། །བརྐོས་ཕོར་མེད་ན་ཚ་ཚ་མི་དོད་དཔེ། །དེ་ཕྱིར་རྒྱལ་དབང་མི་བསྐྱོད་རྡོ་རྗེ་ཡིས། །གསོལ་བ་ཁྱི་བཏབ་ཕག་བཏབ་སངས་མི་རྒྱ། །གསུངས་པའི་དོན་ཡང་དེ་ལ་དགོངས་པ་ཡིན། །ཕྱག་ཆེན་ཁྲིད་ཀྱི་ལུང་དེ་ཐོབ་ཕྱི་ནས། །དྭགས་པོ་དུས་མཁྱེན་རྒོད་ཚང་པ་ལ་སོགས། །བཀའ་བརྒྱུད་གོང་མའི་གྲུབ་ཐོབ་རྩོད་མེད་ཅིག །རང་གི་རྩ་བའི་བླ་མར་བཟུང་བྱས་ཏེ། །གསོལ་བ་བཏབ་ན་བྱིན་རླབས་འཇུག་པ་དང་། །རྟོགས་པ་སྐྱེ་བར་བཀའ་བརྒྱུད་དེ་རྣམས་ཀྱིས། །
འདས་ཁ་ཞལ་ཆེམས་བཞག་པ་ཡིན་པར་གསུངས། །དེ་ཕྱིར་ཀུན་གྱིས་དེ་ལྟར་གསོལ་བ་ཐོབ། །རྟོགས་པ་སྐྱེ་དང་བོགས་འདོན་གེགས་སེལ་ཐབས། །མོས་གུས་གསོལ་འདེབས་འདི་ལས་ཟབ་པ་ནི། །གཅིག་ཀྱང་མེད་དོ་ཉམས་རྟོགས་སྐྱེ་འདོད་ན། །བླ་མའི་རྣལ་འབྱོར་ཐུན་བཞིར་ཉམས་སུ་ལོངས། །དེ་ལ་ཀརྨ་པ་ཡི་ཐུན་བཞི་དང་། །ཞྭ་དམར་པ་ཡི་བླ་སྒྲུབ་འདི་ཉིད་དང་། །སྔོན་འགྲོ་བཞི་སྦྱོར་བླ་མའི་རྣལ་འབྱོར་དང་། །རྒྱལ་བ་རྒྱ་མཚོ་ལྷ་ལྔའི་གསོལ་འདེབས་སམ། །རྡོ་རྗེ་འཆང་ཆུང་མ་སོགས་ཆག་མེད་དུ། །ཐུན་བཞི་སོ་སོར་བསྒོམས་ནས་འདོན་པའི་སྐབས། །ཁ་ཙམ་མ་ཡིན་སྙིང་ཁུང་རུས་པའི་གཏིང་། །མཆི་མ་འཁྲུག་ཅིང་བ་སྤུ་ལྡང་བ་དང་། །སྣང་བ་འགྱུར་ངེས་མོས་གུས་གསོལ་བ་ཐོབ། །དེ་ལྟར་དལ་དྲགས་ཡུན་རིང་གསོལ་བཏབ་ནས། །བྱིན་རླབས་སྟོབས་ཀྱིས་ཉམས་སྣང་གང་ཤར་ལ། །གེགས་སྐྱོན་མི་སྲིད་ལྷོད་དེ་བསྐྱངས་བས་འཐུས། །ལ་མོས་གུས་གསོལ་འདེབས་གནད་དུ་མ་སོང་ན། །ཕྱག་རྒྱ་ཆེན་པོ་སྐྱེ་བའི་རེ་བ་མེད། །དེ་སྐད་རཱ་ག་ཨ་སྱས་གང་དྲན་སྨྲས།། ༈ །།ན་མོ་བཛྲ་དྷ་ར་ཡེ། ཀུན་
ཏུ་བཟང་དང་རྡོ་རྗེ་འཆང་། །རྡོ་རྗེ་སེམས་དཔའ་གསང་བའི་བདག །ཧེ་རུ་ཀ་དཔལ་པདྨ་འབྱུང་། །གསང་སྔགས་སྟོན་པ་རྣམས་ལ་འདུད། །གསར་རྙིང་རྒྱུད་སྡེ་རྒྱ་མཚོའི་དོན། །གསང་སྔགས་བླ་ན་མེད་པ་དེ། །ཉམས་སུ་ལེན་པར་བྱེད་པ་ལ། །བསྡུ་ན་གཞི་ལམ་འབྲས་བུ་གསུམ། །གཞི་ནི་ཤེས་པ་གང་ཆེ་ཞིང་། །ལམ་ནི་ཉམས་སུ་བླངས་གལ་ཆེ། །འབྲས་བུ་གནས་སྐབས་མཐར་ཐུག་གཉིས། །གནས་སྐབས་ཐུན་མོང་དངོས་གྲུབ་སྤྱོད། །མཐར་ཐུག་མཆོག་གི་དངོས་གྲུབ་ནི། །བརྩོན་འགྲུས་ཆེ་ན་ཚེ་འདི་རྒྱུདང་། །འབྲིང་ན་བར་དོ་ཐ་མ་ཡང་། །སྐྱེ་བ་གཞན་དུ་ཐོབ་པར་བཤད། །གཞི་ཡི་གནས་ལུགས་མ་ཤེས་ན། །བསྒོམ་པ་བླུན་བསྒོམ་ཐོམ་འགྲོས་ཡིན། །དེ་ལ་གཞི་ནི་ལུས་ངག་ཡིད། །ལམ་ནི་བསྐྱེད་རིམ་རླུང་དང་སྔགས། །མི་རྟོག་ཕྱག་རྒྱ་ཆེན་པོ་ཡིན། །གནས་སྐབས་ལས་བཞི་གྲུབ་པ་དང་། །མཐར་ཐུག་སྐུ་ལྔ་ཡེ་ཤེས་ལྔ། །སེམས་ལ་སེམས་དང་སེམས་ཉིད་གཉིས། །དེ་ཡང་དྭངས་སྙིགས་ཚུལ་དུ་གནས། །སེམས་ནི་འཁྲུལ་པའི་རྣམ་རྟོག་སྟེ། །སེམས་ཉིད་སངས་རྒྱས་ངོ་བོ་ཉིད། །བདེ་གཤེགས་སྙིང་པོ་
ཆོས་ཀྱི་དབྱིངས། །ཆོས་ཉིད་ཆོས་སྐུ་ཀུན་ཏུ་བཟང་། །སངས་རྒྱས་ཀུན་གྱི་ཐུགས་རྒྱུད་དང་། །སེམས་ཅན་ཀུན་གྱི་སེམས་ཉིད་དང་། །རང་གི་སེམས་ཉིད་དབྱེར་མེད་དེ། །རྒྱ་གར་ཆུ་དང་བོད་ཀྱི་ཆུ། །ལུང་པའི་དབང་གིས་སོ་སོ་ཡང་། །ཆུ་ཡི་ངོ་བོ་གཅིག་དང་འདྲ། །ངོ་བོ་སྟོང་ལ་ཁྱད་པར་མེད། །རང་བཞིན་གསལ་ལ་རྗེན་པར་གཅིག །སྣ་ཚོགས་འགག་མེད་འཆར་བ་གཅིག །ཕྱི་རོལ་སྣོད་ཀྱི་འཇིག་རྟེན་ཡང་། །སེམས་ཀྱི་སྣང་ཆ་ཙམ་གཅིག་སྟེ། །རྨི་ལམ་ཡུལ་གྱི་སྣང་བ་འདྲ། །ས་རྡོ་རི་བྲག་སྲ་མཁྲེགས་དང་། །མེ་ཡི་ཚ་དང་ཆུ་ཡི་གཤེར། །དགྲ་གཉེན་སྐྱིད་སྡུག་སྣང་བ་ཀུན། །མ་འདྲེས་སོ་སོར་སྣང་བ་ཡང་། །ངོ་བོ་སྟོང་པར་རོ་གཅིག་སྟེ། །ཆོས་སྐུ་རྗེན་པར་གཅིག་གི་ངང་། །འཁྲུལ་དང་མ་འཁྲུལ་ཡེངས་མ་ཡེངས། །དྲན་དང་མ་དྲན་གཉིད་མ་གཉིད། །ཁྱད་མེད་གཉུག་མའི་གནས་ལུགས་དང་། །སྲིད་པའི་རྩེ་ནས་མནར་མེད་ཡན། །ངན་སོང་གསུམ་དང་དག་པའི་ཞིང་། །ངོ་བོ་སྟོང་ཉིད་ཕྱག་རྒྱ་ཆེ། །ཡེ་ནས་མ་བཅོས་ལྷུན་གྱིས་གྲུབ། །སྣང་སྲིད་ཕྱག་རྒྱ་ཆེན་པོ་ལགས། །ལུས་ཀྱི་ཕུང་པོ་ལྔ་པོ་
ཡང་། །ཡེ་ནས་རྒྱལ་བ་རིགས་མཆོག་ལྔ། །ཁམས་ལྔ་ཡུམ་ཆེན་ལྔ་ཡིན་ཏེ། །ཚོགས་བརྒྱད་ཡུལ་བརྒྱད་སེམས་དཔའ་དང་། །སེམས་མ་ཡབ་ཡུམ་བཅུ་དྲུག་ཉིད། །རྐང་ལག་ལྷུ་སོགས་ཁྲོ་བོ་བཅུ། །དེ་བཞིན་སྣོད་ཀྱི་འཇིག་རྟེན་ཡང་། །ས་ཆུ་མེ་རླུང་ནམ་མཁའ་ལྔ། །ཡུམ་ཆེན་ལྔ་ཡི་ངོ་བོ་ཉིད། །ཡེ་ནས་དག་པ་ལྷུན་གྲུབ་ཡིན། །སྐྱེ་བ་བསྐྱེད་པའི་རིམ་པ་སྟེ། །འཆི་བ་རྫོགས་རིམ་ངོ་བོར་གནས། །གཉིད་ནི་ཆོས་སྐུའི་ངོ་བོ་སྟེ། །རྨི་ལམ་ལོངས་སྤྱོད་རྫོགས་པའི་སྐུ། །སད་པ་སྤྲུལ་སྐུའི་རང་བཞིན་ཏེ། །སྙོམས་འཇུག་བདེ་བ་ཆེན་པོའི་སྐུ། །རྩ་ནི་སྐུ་ཡི་རྡོ་རྗེ་སྟེ། །ངག་དང་རླུང་ནི་གསུང་རྡོ་རྗེ། །ཐིག་ལེ་ཐུགས་ཀྱི་རྡོ་རྗེ་སྟེ། །དེ་ལྟར་ཡེ་ནས་རང་བྱུང་སྟེ། །སུས་ཀྱང་མ་བྱས་ལྷུན་གྱིས་གྲུབ། །དེ་དོན་མ་རྟོགས་འཁོར་བར་འཁྱམས། །དབུལ་པོའི་གསེར་ངོ་མ་ཤེས་པས། །གསེར་གྱི་སྒྱེད་པུ་བཙུགས་ནས་ཀྱང་། །མུ་གེས་ཤི་ལ་ཁད་དང་འདྲ། །དེ་ཉིད་ངོ་སྤྱོད་བླ་མ་དེ། །དྲིན་ཅན་རྩ་བའི་བླ་མ་ཡིན། །སྦྱང་བ་སྔོན་དུ་སོང་བ་ཡིན། །སྐལ་ལྡན་སྐྱེས་བུ་ལ་ལ་ནི། །ངོ་སྤྲོད་བྱས་མ་ཐག་ཏུ་གྲོལ། །ལུས་མ་སྤང་བར་མཁའ་སྤྱོད་
གཤེགས། །དེ་འདྲ་སྔར་དུས་མང་བར་གསུངས། །སྒྲིབ་པ་འཐུག་པའི་གང་ཟག་རྣམས། །ངོ་སྤྲོད་ཆོས་ཀྱིས་མི་གྲོལ་ཏེ། །འོ་མ་མར་གྱི་རྒྱུ་ཡིན་ཡང་། །མ་བཤིག་བར་དུ་མར་མི་འབྱུང་། །དེ་ཕྱིར་ཉམས་ལེན་གལ་ཆེའོ། །རང་ལུས་ཡེ་ནས་ལྷ་ཡི་སྐུ། །ཡིན་ལ་ཡིན་བཞིན་བསྐྱེད་རིམ་བསྒོམ། །སྦྱང་གཞི་ལུས་སེམས་ངག་དང་གསུམ། །སྦྱོང་བྱེད་ལྷ་སྔགས་ཏིང་འཛིན་ནོ། །དུག་གསུམ་ལུས་ངག་ཡིད་གསུམ་དང་། །རྩ་གསུམ་སྦྱང་ཕྱིར་ལྷ་གསུམ་སྟེ། །དཔེར་ན་རྩ་བ་གསུམ་པོ་བཞིན། །དུག་ལྔ་ཕུང་པོ་ལྔ་དང་ནི། །ཁམས་ལྔ་སྦྱང་ཕྱིར་ལྷ་ལྔ་སྟེ། །རྒྱལ་བ་རྒྱ་མཚོ་ལྷ་ལྔ་བཞིན། །ཐ་མལ་ལུས་ཀྱི་བག་ཆགས་འདི། །སྦྱོང་བའི་ཐབས་སུ་བསྐྱེད་རིམ་གསུམ། །ཐ་མལ་ངག་གི་བརྗོད་པ་འདི། །སྦྱང་ཕྱིར་རླུང་དང་སྙིང་པོ་གསུམ། །ཐ་མལ་ཡིད་ཀྱི་རྟོག་པ་འདི། །སྦྱང་ཕྱིར་ཞི་ལྷག་ཏིང་འཛིན་གསུངས། །སྦྱང་གཞི་སྦྱོང་བྱེད་མ་ཤེས་ན། །ལྷ་སྐུའི་དམིགས་པ་གསལ་ན་ཡང་། །གྱ་ནོམ་ལྷར་ཞེན་ཞེས་བྱ་སྟེ། །བསྐྱེད་རིམ་གོ་ཆོད་མིན་པར་བཞེད། །ལྟ་བའི་གནས་ལུགས་མ་གོ་ན། །གནས་འགྱུ་འབྲོས་འདེད་བསྲུང་ན་
ཡང་། །སྟོང་ཉིད་ལྟ་བ་མིན་པར་བཞེད། །ལུས་ཀྱི་གནས་ལུགས་མ་ཤེས་ན། །དབུགས་ཀྱི་རྒྱུ་རྡུབ་བཀག་ན་ཡང་། །རྩ་རླུང་བསྒོམ་པ་མིན་པར་བཞེད། །དེ་ཚོ་མཁས་པ་རྣམས་ཀྱིས་བཞེད། །དེ་ཚོ་ལེགས་པར་གོ་ན་ཡང་། །དེ་དོན་ཉམས་སུ་མ་བླངས་ན། །རང་རྒྱུད་གྲོལ་བར་མི་ནུས་ཏེ། །ནད་པས་སྨན་རྐྱལ་ཁུར་བ་འདྲ། །དེ་འདྲ་སྒོམ་ཆེན་རྣམས་ཀྱིས་བཞེད། །དེ་དག་རྒྱུད་གཞུང་མང་པོ་ལ། །སློབ་གཉེར་བྱས་ནས་མཁས་པར་སྦྱང་། །དེ་ནས་ཉམས་སུ་བླངས་པ་ན། །ལམ་ལ་ནོར་འཁྲུལ་མེད་པ་དེ། །མཁས་ཟློཔ་རྣམས་ཀྱིས་བཞེད་པ་ལགས། །ལྟ་བ་བསྒོམས་པས་གཏན་ལ་འབེབས། །རྒྱུད་གཞུང་རྣམས་ཀྱི་ལུགས་ལགས་སོ། །དེ་དོན་ལེགས་པར་མ་རྟོགས་ན། །སྒྲུང་མཁན་རྣམས་ཀྱི་སྒྲུང་དང་འདྲ། །གེ་སར་རྒྱལ་པོའི་དཔའ་རྩལ་དེ། །སྒྲུང་མཁན་རྣམས་ཀྱིས་བཤད་ན་ཡང་། །ཁོ་ལ་རྫུ་འཕྲུལ་དཔལ་རྩལ་མེད། །དེ་བཞིན་བཤད་པ་མཁས་ན་ཡང་། །ཉམས་ལེན་ཕྱོགས་མགོ་ཙམ་མེད་པ། །འདི་འདྲ་དོན་ལ་དགོས་པ་ཆུང་། །དེ་བས་མན་ངག་མཁན་གྱི་ལུགས། །བླ་མའི་གསུངས་བཞིན་ཉམས་བླངས་ན། །བཤད་པ་ཚིག་
གཅིག་མི་ཤེས་ཀྱང་། །བསྐྱེད་རྫོགས་གང་བསྒོམ་རྟགས་ཐོན་པ། །ཟན་གྱིས་ལྟོ་བ་འགྲངས་པ་ན། །རྩོམ་པའི་བྱུང་ཁུངས་ཤེས་མི་དགོས། །སྦྱང་གཞི་ལུས་ངག་ཡིད་གསུམ་ལ། །སྦྱོང་བྱེད་ལྷ་སྔགས་ཏིང་འཛིན་གསུམ། །ཡིན་པར་ཤེས་པ་ཙམ་གྱིས་ཆོག །ལྟ་བའི་གནས་ལུགས་མི་ཤེས་ཀྱང་། །སྒོམ་པའི་སྟོབས་ཀྱིས་ལྟ་བ་རྟོགས། །སྣང་བ་བདེན་མེད་སྒྱུ་མར་འཆར། །འདི་དོན་བཀའ་བརྒྱུད་པ་རྣམས་བཞེད། །གནས་ལུགས་གཞིའི་དབྱངས་ཆུང་འདི། །རྟ་ལོ་ཁྲུམས་ཟླའི་ཚེས་གཅིག་ལ་སྨྲས་པ་མངྒ་ལཾ། །བྷ་ཝན།། །།ཨེ་མ་ཧོ། དེང་སང་གསང་སྔགས་དར་དྲགས་པས། །བསྐྱེད་རིམ་བསྒོམ་པ་མང་ལགས་པས། །གོལ་ས་ཆོད་པ་ཉུང་བར་གདའ། །དམ་པ་རིགས་བརྒྱའི་བསྐྱེད་རིམ་ལ། །གོལ་ས་བརྒྱ་ནི་ཡོད་པར་གསུངས། །དེ་ཡི་དོན་བསྡུས་འདིར་བཤད་ན། །དེ་ཀུན་ཐེར་ཟུག་གོལ་སར་འདུས། །ཨ་འཐས་ཐེར་ཟུག་ཅེས་བྱ་བ། །དཔེར་ན་མིའམ་འདག་སྐུ་ལྟར། །གདོས་བཅས་དངོས་སུ་བསྒོམ་པ་ནི། །ཨ་འཐས་ཐེར་ཟུག་གོལ་ས་ཆེ། །དེ་འདྲ་ངེས་ཤེས་ཆེ་དྲགས་ན། །
ཞི་བ་བསྒོམ་ན་གཟུགས་ཁམས་ལྷ། །ཁྲོ་བོ་བསྒོམ་ན་གཤིན་རྗེ་དང་། །སྲིན་པོ་རྣམས་སུ་གོལ་བ་ཡིན། །རྟ་ཞལ་ཕག་ཞལ་མ་ཧེའི་ཞལ། །ཨ་འཐས་བསྒོམ་པ་ཕྲ་མེན་མ། དེ་འདྲའི་མགོ་ཅན་རྣམས་སུ་གོལ། །ཁྱད་པར་ཡི་དམ་ཁྲོ་བོའི་རིགས། །བསྒོམ་ཞིང་ཨ་འཐས་དངོས་པོར་ཞེན། །ལྷ་དེའི་སྐུ་གཟུགས་འདྲ་བ་ཡི། །རིག་འཛིན་ཞེས་བྱ་རླུང་ལྷའི་འཁོར། །ཡི་དྭགས་འབྱུང་པོའི་རིགས་སུ་གོལ། །གོལ་ཞེས་བྱ་བ་གང་ཞེ་ན། །དེ་འདྲའི་གནས་སུ་སྐྱེ་བ་ཡིན། །རྣམ་པ་གསལ་བར་མ་ཟིན་ནས། །འ་ལེ་འོ་ལེར་མོས་པ་ཙམ། །སྒོམ་ལ་སྐྱོན་ནི་སོ་སོར་ཡོད། །སྐྱིལ་ཀྲུང་པད་ཉི་མ་གསལ་ན། །ཚེ་ནི་ཐུང་བར་འགྱུར་བ་ཡིན། །སྤྱན་མ་གསལ་ན་མིག་མི་གསལ། །ཞལ་མ་གསལ་ན་མི་རྣམས་ཀྱིས། །སྨྲས་པ་མི་བརྟན་སྐྱོན་དུ་འགྱུར། །རྒྱན་ཆ་མ་གསལ་ནོར་དབུལ་ཞིང་། །མེ་རི་འོད་སྐོར་མ་གསལ་ན། །བར་ཆད་མང་བར་འགྱུར་བ་ཡིན། །ཞབས་ནི་བསྒྲད་དང་ཞབས་གཉིས་པོ། །མ་གསལ་འདུག་མི་ཚུགས་པར་གསུངས། །དེ་སོགས་རྒྱན་དང་ཆ་ལུགས་རྣམས། །གང་མ་གསལ་ལ་སྐྱོན་རེ་ཡོད། །གང་གསལ་དེ་ཡི་ཡོན་
ཏན་འབྱུང་། །མཚན་དང་དཔེ་བྱད་ཐམས་ཅད་ལ། །རེ་རེ་ནས་ནི་གསལ་བཏབ་པས། །ཕན་ཡོན་སོ་སོར་མདོ་ལས་གསུངས། །དེ་ཕྱིར་སྐུ་མདོག་རྒྱན་ཆ་ལ། །དབུ་གཙུག་ནས་ནི་པད་གདན་བར། །སོ་སོར་གསལ་བཏབ་རིག་པ་གཏད། །སོ་སོར་གཏད་པའི་འགོག་པ་སྟེ། །ཞི་གནས་མཆོག་ཏུ་གྱུར་པ་ཡིན། །རེས་འགའ་སྐུ་ལུས་ཡོངས་རྫོགས་པ། །ལམ་མེར་གསལ་ལ་རིག་པ་གཏད། །སོ་སོར་བརྟག་མིན་འགོག་པ་ཡིན། །དེ་ལྟར་རྣམ་པ་གསལ་ན་ཡང་། །རྣམ་དག་དྲན་པ་གལ་ཆེ་སྟེ། །ལྷ་ཡི་སྐུ་མདོག་རྒྱུན་ཆ་ལུགས། །བརྡ་ཡི་ཆོས་ནི་སྟོན་པ་སྟེ། །ལོངས་སྤྱོད་རྫོགས་པའི་ཞིང་ཁམས་སུ། །ཞལ་ནས་ཆོས་གསུངས་མི་དགོས་ཏེ། །སྐུ་མདོག་ཆ་ལུགས་མཐོང་ཙམ་ན། །འཁོར་གྱིས་ཆོས་ཀྱི་དོན་རྣམས་གོ །ཞལ་གཅིག་ཆོས་སྐུ་རོ་གཅིག་བརྡ། །ཞལ་གཉིས་ཆོས་སྐུ་གཟུགས་སྐུ་གཉིས། །ཞལ་གསུམ་སྐུ་གསུམ་མཚོན་པ་སྟེ། །ཞལ་བཞི་གླུ་སྐུ་བཞི་མཚོན་པ་ཡིན། །ཕྱག་གཉིས་ཐབས་དང་ཤེས་རབ་སྟེ། །ཕྱག་བཞི་ཚད་མེད་རྣམ་པ་བཞི། །ཕྱག་དྲུག་ཕ་རོལ་ཕྱིན་པ་དྲུག །ཞབས་གཉིས་མཐའ་གཉིས་སྤང་བ་
སྟེ། །ཞབས་བཞི་བསྡུ་བའི་དངོས་པོ་བཞི། །དར་དང་རིན་ཆེན་རྒྱན་ལྡན་པ། །ཡོན་ཏན་ཐམས་ཅད་རང་ལ་རྫོགས། །ཁྲོ་བོའི་ཆས་ནི་ཐམས་ཅད་པ། །དྲེགས་པ་ཐམས་ཅད་ཟིལ་གནོན་བརྡ། །དེ་སོགས་བརྡ་དོན་ཤེས་པར་བྱ། །རྒྱས་པར་སོ་སོའི་སྒྲུབ་གཞུང་དང་། །བསྟོད་པའི་ནང་ལ་དོན་རྣམས་གསལ། །དེ་ལྟར་ལྷ་སྐུ་གང་བསྒོམ་ཡང་། །ངོ་བོ་སྟོང་ལ་རང་བཞིན་གསལ། །ནམ་མཁའི་འཇའ་ཚོན་ལྟ་བུར་བསྒོམ། །དེས་ནི་གོལ་ས་ཐམས་ཅད་གཅོད། །ང་རྒྱལ་བརྟན་ལ་བྱིན་རླབས་འབྱུང་། །རང་ལུས་ཡེ་ནས་ཡི་དམ་ལྷ། །ཡིན་པར་རྒྱུད་སྡེ་ཀུན་ནས་གསུངས། །དེ་ཕྱིར་རང་ཉིད་ལྷ་དངོས་ཀྱི། །ངེས་ཤེས་ང་རྒྱལ་བརྟན་པོར་བཟུང་། །རྣམ་པ་གསལ་དང་རྣམ་དག་དྲན། །ང་རྒྱལ་བརྟན་དང་གསུམ་འཛོམས་ན། །བསྐྱེད་རིམ་མཆོག་ཏུ་གྱུར་པ་ཡིན། །མདོ་ལུགས་བསྐལ་པ་གྲངས་མེད་གསུམ། །ཚོགས་བསགས་སྒྲིབ་སྦྱངས་མ་བྱས་པས། །སངས་རྒྱས་མི་ཐོབ་པ་ཡི་སྐྱོན། །རང་ལུས་ལྷ་རུ་མ་ཤེས་སྐྱོན། །བླ་མེད་ཚེ་གཅིག་སངས་རྒྱས་པར། །རང་ལུས་ལྷ་རུ་བསྒོམས་པས་ཟབ། །དེ་ཕྱིར་མདོ་སྔགས་ཟབ་མི་ཟབ། །ཡོད་པ་
བསྐྱེད་རིམ་གནད་ཡིན་གསུངས། །བསྐྱེད་རིམ་གནད་འགག་དབྱངས་ཆུང་འདི། །རཱ་ག་ཨ་སྱས་འཕྲལ་དུ་སྨྲས། །མངྒ་ལཾ།། མོ་མ་ཧཱ་མུ་ཏྲ་ཡེ། དེང་སང་ཁྲིད་ཞུས་ཁྲིད་ཕྲུག་མང་། །སྒོམ་ཆེན་ཡིན་ཟེར་མང་ལགས་ཏེ། །ཞི་གནས་སྐྱོན་མེད་ཆགས་པ་ཉུང་། །ལུས་གནད་ལ་སོགས་ལེགས་བཅས་ནས། །རྣམ་རྟོག་མ་རིག་ཆེན་པོ་དེ། །འཁོར་བའི་རྒྱ་མཚོར་ལྟུང་བྱེད་ཡིན། །མི་རྟོག་ཡེ་ཤེས་ལ་གནས་ན། །ནམ་མཁའ་བཞིན་དུ་རྟོག་མེད་གནས། །རྣམ་སྣང་མངོན་བྱང་ལས་གསུངས་པ། །དེ་ཡི་གོ་བ་ལོག་ཤོར་ནས། །འགྱུ་བ་བཀག་ནས་མི་འགྱུ་ན། །སྒོམ་དུ་འཛིན་པར་བྱེད་མཁན་མང་། །མིག་གིས་གཟུགས་རྣམས་མི་མཐོང་ཞིང་། །རྣ་བས་སྒྲ་ཡང་མི་ཐོས་པར། །དྲན་མེད་རྣམ་རྟོག་ཐམས་ཅད་འགག །ཅི་ཡང་ཡིད་ལ་དྲན་མེད་པར། །ཡུན་རིང་ཐོམ་མེར་ལུས་པ་ནི། །སྒོམ་ནི་སྐྱེ་བའི་སྔ་ལྟས་ཙམ། །ཡིན་གྱིས་དེ་ནི་སྒོམ་མིན་ཏེ། །སྒོམ་ཡིན་བསམས་ནས་དེ་བསྒོམ་པ། །དུད་འགྲོར་སྐྱེ་བའི་རྒྱུ་ཡིན་ནོ། །དེ་འདྲ་སྐྱེ་མཁན་མང་བར་གདའ། །དྲེད་དང་ཕྱི་བས་དེ་བསྒོམས་པས། །
བྱིན་རླབས་ཟླ་གསུམ་ལུས་དེ་ལ། །ལྟོགས་འཁྱག་མེད་དེ་ཚོན་པོར་གནས། །དེ་ལའང་ཡོན་ཏན་དེ་ཙམ་མཚར། །ལུས་གནད་བཅས་ནས་ཡིད་ལ་ནི། །ཅི་ཡང་བསྒོམ་པར་མི་བྱེད་པར། །སྙིང་དཀྱིལ་རིག་པ་གཏད་ནས་འདུག །རྣམ་རྟོག་འཕྲོ་བ་ཚུར་ལ་བཀུག །གར་ཡང་འགྲོ་ན་ཚད་མི་འཇུག །ཅི་ཡང་ཡིད་ལ་མི་དྲན་པར། །འདུག་པ་དེ་ཉིད་བཟང་བར་རྩི། །དགེ་བ་ཡིད་ལ་དྲན་མི་རུང་། །དྲན་ནས་མཐོ་རིས་གནས་སུ་སྐྱེ། །དེར་ཡང་སྐྱེ་འཆིའི་སྡུག་བསྔལ་ཡོད། །མི་དགེ་ཡིད་ལ་དྲན་མི་རུང་། །དྲན་ན་ངན་སོང་གནས་སུ་སྐྱེ། །དེ་ན་སྡུག་བསྔལ་དཔག་ཏུ་མེད། །དགེ་བ་མི་བསྒྲུབ་སྡིག་མི་སྤངས། །ཅི་ཡང་ཡིད་ལ་མི་འགྱུ་ན། །དེ་ནི་ཐར་པ་ཐོབ་པ་ཡིན། །ཟེར་བ་རྒྱ་ནག་ཧྭ་ཤང་ལུགས། །ལྟ་བ་ལོག་པ་ཡིན་པར་བཤད། །དེ་གཉིས་ཞི་གནས་འཐོམ་པོ་སྟེ། །ཞི་གནས་སྐྱོན་ཅན་ཡིན་པའོ། །མདུན་གྱི་ནམ་མཁར་ཐུབ་པའམ། །འོད་དཔག་མེད་སོགས་སངས་རྒྱས་བསྒོམ། །དེ་ལ་རིག་པ་རྩེ་གཅིག་གཏད། །རིག་པ་འཕྲོ་རྒོད་ཆེ་བ་ན། །པད་ཟླ་སྐྱིལ་ཀྲུང་རིག་པ་གཏད། །རིག་པ་བྱིང་རྨུག་མི་གསལ་ན། །མཛོད་སྤུ་
གཙུག་ཏོར་རིག་པ་གཏད། །འཕྲོ་བ་ཚུར་བཀུག་དེ་སྟེང་བཞག །དེ་ལྟར་ཡུན་དུ་བསྒོམས་པ་ཡིས། །རིག་པ་གར་གཏད་དེ་ཉིད་ལ། །མི་འཕྲོ་ཡུན་རིང་གནས་པ་ནི། །མཚན་བཅས་ཞི་གནས་ཞེས་བྱ་བ། །མདོ་ལུགས་ཞི་གནས་སྐྱེས་པ་ཡིན། །དེ་བཞིན་རང་ཉིད་ཡི་དམ་ལྷའི། །ཐུགས་སྲོག་ཧཱུྃ་ངམ་ཧཱི༔ཡིག་ལ། །རིག་པ་གཏད་པ་ཡུན་རིང་དུ། །མི་འཕྲོ་གནས་པ་ཞི་གནས་སོ། །ཡིད་ལ་ཅི་ཡང་མི་དྲན་པ། །ལྷོད་དེ་བཞག་པས་རང་གི་སེམས། །གར་ཡང་མི་འཕྲོ་ཀྱི་ལེ་གནས། །ཀྱི་ལེ་གནས་པའང་སེམས་ཀྱི་རིག །འདི་ནི་མཚན་མེད་ཞི་གནས་མཆོག །འདི་ལྟར་ཞི་གནས་བསྒོམ་པ་ལ། །ཕན་ཡོན་དཔག་ཏུ་མེད་པ་དང་། །ཐུན་མོང་གྲུབ་ཆེན་བརྒྱད་ཐོབ་སྟེ། །མཁའ་ལ་འཕུར་དང་ཆུས་མི་བྱིང་། །ཟག་བཅས་མངོན་ཤེས་ཐོབ་པར་གསུངས། །དེ་ཕྱིར་མུ་སྟེགས་པ་རྣམས་ལ། །གྲུབ་ཐོབ་རྫུ་འཕྲུལ་མངོན་ཤེས་ཅན། །འབྱུང་བ་ཞི་ལ་གནས་ཕན་ཡོན་ཡིན། །ཞི་ནི་རྣམ་རྟོག་སྤྱན་སྤུན་ཞི། །གནས་ནི་རིག་པ་གར་གཏད་དུ། །ཡུན་རིང་གནས་པ་ཞི་གནས་སོ། །ཞི་གནས་ཇི་ལྟར་ཚབས་ཆེ་བཞིན། །ལྷག་
མཐོང་ཡོན་ཏན་རྩལ་ཆེ་གསུངས། །ཞི་གནས་འཐུག་པོ་མ་ཆགས་ན། །སྤྲིན་ཐག་ཆད་པའི་ནམ་མཁའ་བཞིན། །ལྷག་མཐོང་སྐྱེས་ཀྱང་ཕོ་མི་བྱེད། །དེ་ཕྱིར་བདག་གི་འདྲེན་པ་མཆོག་རྗེ་བཙུན་ཀུན་དགའ་རྣམ་རྒྱལ་བས། །ཁྲིད་དུས་ཞི་གནས་གཙོ་བོ་མཛད། །གྲུབ་ཆེན་དྲུང་ཡིག་པ་དེས་ཀྱང་། །དང་པོ་ཞི་གནས་ཅི་སྐྱེས་མཛད། །དང་པོ་ཧབ་རྒྱུག་མི་བྱེད་པར། །ཞི་གནས་རྟགས་ཐོན་གལ་ཆེ་གདའ། །དེ་སྐར་རཱ་ག་ཨ་སྱས་སྨྲས།། ༈ །།ན་མོ་མ་ཧཱ་མུ་དྲ་ཡེ། ལྷག་མཐོང་འདི་ལ་རྣམ་པ་གཉིས། །ཐེག་པ་སྤྱི་ཡི་ལྷག་མཐོང་དང་། །ཕྱག་རྫོགས་ལུགས་ཀྱི་ལྷག་མཐོང་གཉིས། །ཐེག་པ་སྤྱི་ཡི་ལྷག་མཐོང་ནི། །གོ་བའི་ཤེས་རབ་ཡིན་པར་བཤད། །ངོ་བོ་རྣམ་རྟོག་ཁོ་ན་ཡིན། །ཆོས་ཀུན་ཀུན་རྫོབ་དོན་དམ་གཉིས། །ཀུན་རྫོབ་རྒྱུ་འབྲས་རྟེན་འབྲེལ་ཏེ། །རྒྱུ་ལ་རྟེན་ནས་འབྲས་བུ་འབྱུང་། །དགེ་བའི་རྒྱུ་ལས་བདེ་སྐྱིད་དང་། །སྡིག་པའི་རྒྱུ་ལས་སྡུག་བསྔལ་འབྱུང་། །དོན་དམ་སྐྱེ་འགག་གནས་གསུམ་བྲལ། །ཆོས་ཀུན་གང་ལ་སྐྱེ་བ་མེད། །གང་ལ་གནས་པའི་ཡུལ་མེད་དེ། །གང་དུ་ཡང་ནི་འགགས་པ་
མེད། །མེད་ཅིང་ཆད་ལྟ་མ་ཡིན་ཏེ། །སྟོང་པའི་ངང་ལས་ཅི་ཡང་འཆར། །དཔེར་ན་སྤྲིན་དང་འཇའ་ཚོན་བཞིན། །ཆོས་ཀུན་མི་རྟག་འགྱུར་བ་སྟེ། །སྒྱུ་མ་རྨི་ལམ་སྤྲུལ་པ་བཞིན། །དང་པོ་གང་ནས་འོང་བ་མེད། །མཐར་ནི་གང་དུ་འགྲོ་བ་མེད། །ཆོས་ཀུན་ཐ་དད་མ་ཡིན་ཏེ། །ཐམས་ཅད་ངོ་བོ་སྟོང་པར་གཅིག །ཆོས་ཀུན་གཅིག་པ་མ་ཡིན་ཏེ། །རྣམ་པ་སྣ་ཚོགས་དཔག་ཏུ་མེད། །སྤྲོས་པའི་མཚན་མ་ཐམས་ཅད་ནི། །མི་དམིགས་ཉེ་བར་ཞི་བ་ཉིད། །རྫོགས་སངས་རྒྱས་ཀྱིས་གསུངས་པ་ཡིན། །ལྟ་བའི་གནས་ལུགས་དེ་ལྟར་ཏེ། །དེ་དོན་འཕགས་པ་ཀླུ་སྒྲུབ་ཀྱིས། །གང་གིས་རྟེན་ཅིང་འབྲེལ་བར་འབྱུང་། །ཞེས་སོགས་ཚིགས་བཅད་གསུངས་པ་ཡིན། །དེ་བཞིན་བྱམས་ཆོས་སྡེ་ལྔ་དང་། །དབུ་མ་རིག་པའི་ཚོགས་དྲུག་སོགས། །གཞུང་ཚིག་རྣམས་ལ་གོ་བ་ལེན། །ཆོས་ཀུན་སྟོང་ཉིད་སྟོང་པ་ཉིད། །སྨྲ་བསམ་བརྗོད་པའི་ཡུལ་མིན་སྒྲ་པར། །ནམ་མཁའ་དྭངས་པའི་དཀྱིལ་ལྟ་བུ། །ཡིན་པར་འདུག་སྙམ་གོ་བ་འཆར། །དེ་ལ་ངེས་ཤེས་སྐྱེ་བ་དེ། །ལྟ་བ་སྟོང་ཉིད་ཡིན་པར་བཤད། །དེ་ནི་སྟོང་ཉིད་དོན་སྤྱི་
ཡི། །ཚུལ་དུ་བསྒོམ་པ་ཞེས་བྱ་སྟེ། །པཎྜི་ཏ་ཡི་དཔྱད་བསྒོམ་ཡིན། །དགེ་བཤེས་ཕལ་ཆེར་ཉམས་ལེན་ཡིན། །ཕྱག་ཆེན་ལུགས་ལ་དེ་ལྟ་བུ། །སྟོང་ཉིད་ཤེས་བྱའི་གཤིས་ལ་ཤོར། །ལྟ་བའི་གོ་བ་སྐམ་པོ་སྟེ། །དེ་ཉིད་རྣམ་རྟོག་ཡིན་པའི་ཕྱིར། །སྒོམ་གྱི་གོ་ནི་ཆོད་པ་མིན། །སུ་བྷ་ཝ་ཡི་སྔགས་བརྗོད་པས། །ས་རྡོ་རི་བྲག་གྲོང་ཁྱེར་སོགས། །ཐམས་ཅད་མེད་པར་སྟོང་པ་ཉིད། །ནམ་མཁའ་ལྟ་བུ་ཡིད་ཀྱིས་བསྒོམ། །སྔགས་པ་ཕལ་གྱིས་བསྒོམ་ལུགས་ཡིན། །དང་པོ་དཀྱིལ་འཁོར་ལྷ་ཚོགས་བསྒོམ། །དེ་ནས་ཕྱི་སྣོད་ཚེའཇིག་རྟེན་ཁམས། །གཞལ་ཡས་ཁང་ལ་ཐིམ་པར་བསྒོམ། །ནང་བཅུད་སེམས་ཅན་ཐམས་ཅད་ཀྱང་། །དཀྱིལ་འཁོར་ལྷ་ཡི་འཁོར་ལ་ཐིམ། །འཁོར་རྣམས་གཙོ་བོ་ཉིད་ལ་ཐིམ། །གཙོ་བོ་ཐུགས་ཀའི་ཧཱུྃ་ལ་ཐིམ། །ཧཱུྃ་ཡང་གྱེན་རྫོགས་ཡར་ཐིམ་ནས། །ནཱ་ད་སྤུ་རྩེ་ཙམ་ལ་ཐིམ། །དེ་ཡང་མེད་དེ་སྟོང་པ་ཉིད། །ནམ་མཁའ་ལྟ་བུར་བསྒོམ་པ་ནི། །ཆོ་ག་མཁན་གྱི་སྟོང་ཉིད་དེ། །ཕྱག་ཆེན་པ་ཡི་ལུགས་དེ་ལ། །སྟོང་ཉིད་རྒྱས་འདེབས་སུ་ཤོར་ན། །དེ་ཡང་རྣམ་རྟོག་ཕྲེང་བ་སྟེ། །བསྒོམ་གོ་ཆོད་པ་མ་ཡིན་ནོ། །
འཁོར་བར་སྐྱེ་བའི་རྩ་བ་ནི། །བདག་ཏུ་འཛིན་པ་ཡིན་པའི་ཕྱིར། །བདག་འཛིན་དེ་ཉིད་འདུལ་བའི་ཐབས། །བདག་མེད་རྟོགས་པའི་ཤེས་རབ་དགོས། བདག་ཅེས་བྱ་བ་གང་དེ་ཡིན། །ལུས་པོ་འདི་ནི་མ་ཡིན་ཏེ། །བྷནྡ་རྐང་དུང་སོ་དང་མིག །ལུས་ནི་དུམ་བུ་སོ་སོ་ལ། །རེ་རེའང་བདག་ནི་མ་ཡིན་པས། །ལུས་ལ་བདག་ནི་མ་མཆིས་སོ། །སེམས་ཡང་བདག་ནི་མ་ཡིན་ཏེ། །གཟུགས་དང་ཁ་དོག་དངོས་པོ་མེད། །གཅིག་ཏུ་མི་གནས་དུ་མ་འཕྲོ། །དེ་ཕྱིར་སེམས་ཀྱང་བདག་མིན་ན། །ལུས་སེམས་གཉིས་པོ་མ་ཡིན་པའི། །བདག་ནི་ཅི་ཕྱིར་མི་དུ་ཡོད། །བདག་ཅེས་བྱ་བ་བརྟེན་པ་ཙམ། །བརྟག་པ་མ་ཡིན་དོན་མ་གྲུབ། །དེ་ལྟར་བསྒོམ་པས་བདག་འཛིན་ཞིག །བདག་མེད་རྟོགས་ན་གྲོལ་བ་ཡིན། །དེ་སྐད་མཁས་པ་རྣམས་ཀྱིས་བསྒོམ། །ཕྱག་ཆེན་པ་ཡི་ལུགས་ལ་ནི། །དེ་ཡིས་བསྒོམ་གོ་མི་ཆོད་དོ། །སྟོང་ཉིད་གཉེན་པོར་ཤོར་བ་ཡིན། །སྤང་བྱ་གཉེན་པོ་སོ་སོར་མེད། །གང་ཤར་ངོ་བོ་བལྟས་པས་གྲོལ། །དེ་ལྟར་སྟོང་ཉིད་ཤོར་བ་གསུམ། །ཕྱག་རྒྱ་ཆེན་པོ་མ་ཡིན་ཡང་། ཕྱག་ཆེན་མ་རྟོགས་གང་
ཟག་གིས། །དེ་ལ་ཉམས་ལེན་བྱས་པ་ཡིས། །སྒྲིབ་པ་ཅུང་ཟད་སྲབ་པར་གསུངས། །ཐེག་པ་ཐུན་མོང་ལྷག་མཐོང་གི །གླུ་ཆུང་རཱ་ག་ཨ་སྱ་ཡི། །རྟ་ལོ་ཁྲུམས་ཟླའི་བཅུ་དྲུག་སྨྲས། །མངྒ་ལཾ།། ༈ །།ན་མོ་མ་ཧཱ་མུ་དྲ་ཡེ། མདོ་རྒྱུད་སློབ་གཉེར་མི་དགོས་པར། །སྟོང་ཉིད་མངོན་སུམ་རྟོགས་པའི་ཐབས། །ཕྱག་རྒྱ་ཆེན་པོའི་ངོ་སྤྱོད་ནི། །ཅར་ཕོག་ཉིད་དུ་ངོ་སྤྲོད་ཐབས། །ཆོས་རྣམས་ཀུན་གྱི་རྩ་བ་ནི། །རང་སེམས་ཁོ་ན་ཡིན་པ་ནི། །མདོ་རྒྱུད་མན་ངག་ཀུན་ནས་གསུངས། །བླུན་པོས་རིགས་པས་དཔྱད་ན་ཡང་། །དཔྱད་མཁན་སྡུག་མཁན་རང་གི་སེམས། །དུག་ལྔ་ཉོན་མོངས་སེམས་ལས་བྱུང་། །དད་པ་མོས་གུས་སེམས་ལས་བྱུང་། །ངན་སོང་འཁོར་བར་འཁྱམས་རྒྱུ་སེམས། །མཐོ་རིས་ཐར་པ་ཐོབ་རྒྱུ་སེམས། །ལུས་ནི་ཁོང་པ་གོས་རུལ་འདྲ། །འཁོར་བ་དང་ནི་མྱ་ངན་འདས། །ཀུན་གྱི་རྩ་བ་སེམས་ཡིན་པས། །སེམས་ཀྱི་རྩ་བ་ཆོད་པ་ན། །ཆོས་ཀུན་རྩ་བ་ཆོད་པ་ཡིན། །ཐང་ཤིང་སྡོང་པོ་གཅིག་སྐམ་ན། །ལོ་འདབ་ཁྲི་འབུམ་སྐམ་དང་འདྲ། །དེ་ཕྱིར་རང་གི་སེམས་ཉིད་དེ། །ལུས་ཀྱི་ཕྱི་ནང་གང་དུ་
གདལ། །གཟུགས་དང་ཁ་དོག་ཅི་ལྟ་བུ། །སྙམ་དུ་ལུས་ལ་ཚོལ་བར་བྱ། །ལུས་ལ་མེད་ན་ཕྱི་རོལ་གྱི། །ཕྱོགས་བཞི་མཚམས་བརྒྱད་སྟེང་འོག་བཅུ། །ནམ་མཁའི་ཕ་མཐའ་ཚུལ་ལ་ཚོལ། །གལ་ཏེ་སེམས་དེ་མ་རྙེད་ན། །མ་རྙེད་བསམ་མཁན་སེམས་མིན་ནམ། །བལྟས་པས་སེམས་དེ་མེད་ན་ནི། །དགའ་སྡུག་སྣང་བ་ཅི་ལ་སྐྱེ། །ཞེ་སྡང་འདོད་ཆགས་གང་ནས་བྱུང་། །སེམས་མེད་ས་རྡོ་ཁྱད་པར་ཅི། །དེ་ལྟར་ལེགས་པར་རྩད་བཅད་པས། །སེམས་ཉིད་ཡོད་པ་མ་ཡིན་ཏེ། །གཟུགས་དང་ཁ་དོག་དངོས་པོ་མེད། །སེམས་ནི་མེད་པ་མ་ཡིན་ཏེ། །སྣ་ཚོགས་འཆར་ཞིང་གར་ཡང་རྒྱུག །སེམས་ནི་གཅིག་པུ་མ་ཡིན་ཏེ། །རྣམ་ཤེས་ཚོགས་བརྒྱད་སྣ་ཚོགས་འཕྲོ། །སེམས་ནི་ཐ་དད་མ་ཡིན་ཏེ། །ངོ་བོ་སེམས་ཉིད་གཅིག་པུ་ཉིད། །སེམས་ནི་རྟག་པ་མ་ཡིན་ཏེ། །མི་རྟག་སྣ་ཚོགས་འགྱུར་ཞིང་འཆར། །སེམས་ནི་ཆད་པ་མ་ཡིན་ཏེ། །རྒྱུན་ཆད་མེད་པར་ཏུར་ཏུར་འཕྲོ། །སེམས་ལ་འགྱུ་བ་སྣ་ཚོགས་ཏེ། །དང་པོ་གང་ནས་མ་སྐྱེས་ཤིང་། །བར་དུ་གར་ཡང་མི་གནས་ལ། །ཐ་མ་གར་སོང་འདིར་འགགས་མེད། །
མཐའ་བརྒྱད་བྲལ་བ་དབུ་མའི་ལམ། །སེམས་ལ་ཡེ་ནས་ཚང་བར་གནས། །དེ་དོན་ཡིད་ལ་གསལ་ན་ཡང་། །ངག་ནས་བརྗོད་ནི་མི་ཤེས་ཏེ། །ལྐུགས་པས་བུ་རམ་ཟོས་པ་བཞིན། །སྨྲ་བསམ་བརྗོད་མེད་དངོས་སུ་འཆར། །ལྷག་མཐོང་ངོ་བོ་སྤྱོད་པའི་ཐབས། །མཁའ་འགྲོའི་གསང་ཚིག་གླུ་ཆུང་འདི། །རྟ་ལོ་ཁྲུམས་ཟླའི་བཅུ་བདུན་ཉིན། །རཱ་ག་ཨ་སྱས་སྨྲས་པ་མཚར། །མངྒ་ལཾ།། ༈ །།ཨེ་མ་ཧོ། མཁས་པ་ནཱ་རོ་པཎྜི་ཏས། །རྒྱུད་སྡེ་བཞི་ཡི་ལྟོ་ཚིལ་བླངས། །སྐྱེས་མཆོག་མར་པ་ལོ་ཙཱར་གནང་། །རྟེན་འབྲེལ་ལུས་ལ་བསྒྲིགས་ཤེས་ན། །རྟོགས་པ་སེམས་ལ་འཆར་བའི་ཐབས། །རྣམ་པར་སྣང་མཛད་ཆོས་བདུན་འདི། །བོད་དུ་དར་བའི་ཆོས་ཀུན་ལས། །ང་ཡི་ལུས་གནད་བདུན་པོ་འདི། །ཟབ་ཅེས་མར་པས་ཞལ་ཕོད་གསུངས། །རྐང་པ་རྡོ་རྗེ་སྐྱིལ་ཀྲུང་བཅའ། །ན་སོ་རྒས་སམ་རྐང་ནད་ཅན། །སེམས་དཔའི་སྐྱིལ་ཀྲུང་བཅས་པས་འཐུས། །རྡོར་སྐྱིལ་རྐང་གཡས་སྟེང་ཡིན་ལ། །སེམས་སྐྱིལ་རྐང་གཡས་ཕྱི་ལ་བཞག །སྒལ་ཚིགས་མདའ་ལྟར་བསྲང་བ་ཡང་། །རྐེད་པ་ཉག་བྱས་ཕོ་བ་ཐེར། །བྲང་ནི་
ཐད་ཀར་བཞག་པ་ལ། །མགྲིན་པ་ལྕགས་ཀྱུ་བཞིན་དུ་བཀུག །ལག་པ་མཉམ་གཞག་ལྟེ་འོག་མནན། །ལག་གཡས་སྟེང་བཞག་མཐེ་བོང་གཉིས། །ལྟོ་བ་སྦྱར་བར་བྱ་བ་ཡིན། །གྲུ་མོ་མི་བཀུག་ཤད་དེ་བྱ། །དཔུང་པ་གྱེན་དུ་རྒོད་གཤོག་ལྟར། །མིག་གཉིས་ཟིམ་བུས་སྣ་རྩེར་ཐད། །བར་སྣང་དུ་ནི་ཧད་དེ་བལྟ། །ཡིད་ལ་ཅི་ཡང་མི་བསྒོམ་པར། །ལྷོད་དེ་ཤིག་གེ་བཞག་ཤེས་ན། །དེ་མ་ཐག་ཏུ་ཡེ་ཤེས་འཆར། །དེ་ལྟར་ལུས་གནད་བསྲང་བ་དེས། །རྩ་ནི་དབུ་རྐྱང་རོ་གསུམ་དྲང་། །རྐང་པ་སྐྱིལ་ཀྲུང་བཅས་པ་ཡིས། །ཐུར་སེལ་རླུང་ཟིན་འདུག་པར་ཚུགས། །ཕོ་བ་ཐེར་ཐེར་བྱས་པ་དེས། །མེ་ཉམས་རླུང་ཟིན་དྲོད་སྐྱེ་ཞིང་། །དྲོད་ཀྱིས་སྤྱི་བོའི་ཐིག་ལེ་ཞུ། །མར་ལ་བབས་པས་བདེ་བ་སྐྱེ། །དཔུང་པ་རྒོད་གཤོག་ལྟར་བརྒྱང་བས། །རླུང་ནི་དབུ་མར་ཚུད་པ་ཡིན། །མི་རྟོག་ཡེ་ཤེས་ཤུགས་ལ་འཆར། །མགྲིན་པ་ཨེན་ཙམ་འགུགས་པ་དེས། །གྱེན་རྒྱུ་རླུང་ཟིན་རྩ་མདུད་གྲོལ། །མིག་ནི་སྣ་རྩེའི་ཐད་ཙམ་དུ། །མི་ཕྱེ་མི་བཙུམ་བལྟས་པ་ཡིས། །ཡེ་ཤེས་ཕྱག་རྒྱ་ཆེན་པོ་མཐོང་། །ནད་མེད་ན་སོ་གཞོན་པ་
རྣམས། །ལུས་གནད་འདི་ལ་བརྩོན་བྱས་ན། །ཡེ་ཤེས་ཕྱག་རྒྱ་ཆེན་པོ་དེ། །འབད་མེད་ལྷུག་པར་འཆར་བ་ཡིན། །ན་སོ་རྒས་སམ་ནད་ཅན་གྱིས། །ཆོས་བདུན་ཚང་བར་མ་ལྕོགས་ཀྱང་། །སྒོམ་དུས་ལུས་ནི་ཙོག་པུ་ལ། །སྒལ་ཚིགས་བསྲང་བ་གལ་ཆེ་སྟེ། །རྩ་མཆོག་ཨ་ཝ་དྷུ་ཏི་དེ། །དྲང་བར་བསྲང་བ་གལ་ཆེན་ཡིན། །རྣམ་སྣང་ཆོས་བདུན་བཅའ་བའི་ཚེ། །གཡས་སུ་ཡོ་ན་གསལ་ཉམས་སྐྱེ། །དེ་ནས་ཞེ་སྡང་སྐྱེ་འགྱུར་ཏེ། །ཕོ་གདོན་ལ་སོགས་གནོད་པ་འབྱུང་། །གཡོན་དུ་ཡོ་ན་བདེ་ཉམས་སྐྱེ། །དེ་ནས་འདོད་ཆགས་ཆེར་འགྱུར་ཏེ། །མོ་གདོན་གནོད་པ་འབྱུང་བའོ། །རྒྱབ་ཏུ་ཡོ་ན་ང་རྒྱལ་སྐྱེ། །བློ་སེམས་མི་བདེ་འཚུབས་པར་སྐྱེ། །མདུན་དུ་འགུག་ན་མི་རྟོག་སྐྱེ། །དེ་ནས་གཏི་མུག་འཕེལ་བ་དང་། །ཀླུ་དང་ས་བདག་གནོད་པ་འབྱུང་། །དེ་ཕྱིར་མ་ཡོ་མ་འཁྱུག་ཅེས། །ལུས་གནད་སྦྱང་བའི་རྟགས་ལ་ནི། །ཡུན་རིང་བཅས་ཀྱང་མི་བདེ་མེད། །ལུས་གནད་བཅས་པ་ཙམ་ཉིད་ནས། །སེམས་ནི་ཏིང་ངེ་འཛིན་ལ་འབྱམས། །ལུས་གནད་ཆོས་བདུན་ཁོ་ན་ལ། །ཕྱག་ཆེན་གྲུབ་པ་ཐོབ་པ་ནི། །བདག་གི་འབྲེལ་ཐོགས་བླ་མ་
ཤོག་ལྷེབ་ ༢༠༡ ནས་ ༢༤༠ བར།
རྗེ། །ཀརྨ་བསྟན་འཕེལ་ཡིན་པར་གདའ། །ཉིན་མཚན་དུས་རྣམས་ཐམས་ཅད་དུ། །རྣམ་སྣང་ཆོས་བདུན་མ་ཡིན་པར། །ཡུད་ཙམ་གཅིག་ཀྱང་མི་བཞུགས་སྐད། །དེ་ནི་གྲུབ་རྟགས་ཆེན་པོ་སྟེ། །ལུས་ནི་ཤིན་ཏུ་སྦྱངས་བ་ནི། །ཡོངས་སུ་སྦྱངས་བ་ཐོབ་རྟགས་ལགས། །ནུབ་མོ་ཉལ་བའི་ཚེ་ན་ཡང་། །དེ་ཡི་ངང་ནས་དགེ་བའི་ཆོས། །ཤ་ཟུང་རྒྱབ་ནས་ལྕམ་ལ་བཏགས། །གཉིད་ཀྱིས་ལུས་གནད་མི་ཞིག་པ། །དེ་འདྲ་ཐུབ་ན་རབ་ཡིན་ཏེ། །དེ་མིན་སྒལ་ཚིགས་བསྲང་བ་ཡི། །ཙོག་པུར་གཉིད་པ་ཙམ་ལ་ནི། །གཉིད་ནི་སྲབ་པར་འགྱུར་བ་དང་། །གཞན་དག་དང་བ་འདྲེན་པའི་ཕྱིར། །རྒོད་ཚང་པ་ཡི་ཕྱག་སྲོལ་ལགས། །མདོ་རྒྱུད་རྣམས་ནས་མ་གསུངས་སོ། །མ་བསླབས་ཆོས་ཀུན་ཁོང་ནས་བརྡོལ། །གཅིག་ཤེས་ཀུན་ལ་མཁས་པར་འགྱུར། །སྔས་ནི་ཅུང་ཟད་མཐོ་བྱས་ལ། །ལྷན་ཅིག་སྐྱེས་པའི་བདུད་གནས་པའི། །གཞོགས་གཡས་འོག་ཏུ་ཕབ་བྱས་ཏེ། །སྣ་གཡས་ཉི་མ་དུག་གི་རླུང་། །འགགས་ནས་གཡོན་དུ་རྒྱུ་བའི་ཕྱིར། །ལག་གཡས་འགྲམ་པ་བརྟེན་བྱས་ཏེ། །སྲིན་ལག་སྣ་བུག་གཡས་པ་བཀག །
ལྷན་ཅིག་སྐྱེས་པའི་ལྷ་གནས་པས། །གཞོགས་གཡོན་སྟེང་དུ་སྟོན་པ་སྟེ། །བུད་མེད་ཡིན་ན་གོ་ལྡོག་བྱ། །ལག་གཡོན་མེ་ཡི་དཀྱིལ་འཁོར་གྱིས། །མཁལ་གཡོན་ཆུ་ཡི་དཀྱིལ་འཁོར་བཀབ། །དེ་ཡིས་ལུས་དྲོད་སྐྱེ་བ་ཡིན། །རྐང་གཡས་ཅུང་ཟད་བསྐུམ་བྱས་ལ། །གཡོན་པ་ཅུང་ཟད་བརྐྱངས་པ་ཡིས། །ཐིག་ལེ་མི་འཆོར་འདོད་ཆགས་ཞི། །དེ་དོན་སྤྱོད་འཇུག་ལ་སོགས་ནས། །རྒྱལ་བ་མྱ་ངན་འདས་གཟིམ་ལྟར།།འདོད་པའི་ཕྱོགས་སུ་ཉལ་བར་བྱ། །ཞེས་གསུངས་སེང་གེ་ཉལ་སྟབས་ཡིན། །ཆོས་དྲུག་རྨི་ལམ་འོད་གསལ་སོགས། །མདོ་རྒྱུད་གསར་རྙིང་ཐམས་ཅད་ནས། །ཉལ་བའི་ལུས་གནད་འདི་ཉིད་གསུངས། །རྨི་ལམ་ངན་པ་མི་འབྱུང་ཞིང་། །དག་པའི་སྣང་བ་འཆར་བ་དང་། །རྨི་ལམ་ཟིན་དང་འོད་གསལ་ཟིན། །དེ་སོགས་ཕན་ཡོན་དུ་མ་འབྱུང་། །མ་གཉིད་བར་དང་གཉིད་པའི་དུས། །ལུས་གནད་བཅའ་ཚུལ་གླུ་ཆུང་འདི། །རཱ་ག་ཨ་སྱས་སྨྲས་པ་སྟེ་། །རྨོངས་པ་རྣམས་ལ་ཕན་ཕྱིར་ཡིན། །མཁས་པ་རྣམས་ཀྱིས་མི་ཁྲེལ་ཞུ། །བྷ་ཝནྟུ།། ༈ །།ན་མོ་མ་ཧཱ་མུ་ཏྲ་ཡེ། །ལུས་གནད་ཆོས་བདུན་
ལེགས་བཅས་ནས། །སེམས་ཀྱིས་སེམས་ལ་བལྟས་ཙ་ན། །མཐོང་རྒྱུ་ཅི་ཡང་མེད་པ་ལ། །མེད་པ་དེ་ཉིད་སེམས་ཀྱིས་མཐོང་། །ཅི་ཡང་སེམས་ལ་མི་དྲན་པར། །ཀྱི་ལེ་མེ་རེ་ལྷོད་དེ་གནས། །གནས་པ་དེ་ཡང་སེམས་ཀྱིས་རིག །གནས་ནི་ཡོད་དོ་བསམ་པ་ཡི། །སེམས་ཀྱི་འཛིན་པ་དམ་པོ་ཅན། །དེ་ལ་གནས་པ་མིང་དུ་བཏགས། །དེ་ནས་སེམས་དེ་ག་ཤེད་དུ། །འཕྲོས་ནས་སོང་ཡང་འགྲོ་ལུགས་ནི། །ཇི་ལྟར་སོང་བ་མ་ཤེས་པར། །ཐག་རིང་ཞིག་ཏུ་ཕྱིན་ནི་གདའ། །མ་གནས་འགྱུར་ནི་སོང་བསམ་པའི། །འཛིན་པ་ཞིག་ནི་སེམས་ལ་ཡོད། །དེ་ལ་འགྱུ་བ་མིང་དུ་བཏགས། །གནས་དུས་སེམས་ཀྱིས་གནས་པ་རིག །འགྱུ་བས་འགྱུ་བ་རིག་པ་དེ། །གནས་འགྱུ་གང་བྱས་རིག་སྙམ་པའི། །སེམས་ལ་འཛིན་པ་དམ་པོ་ཅན། །དེ་ལ་རིག་པ་མིང་དུ་བཏགས། །དེ་གསུམ་ནམ་ཡང་ལྟ་ཤེས་པ། །གནས་འགྱུ་ཕྲུག་ནི་ཚུད་པ་ལགས། གནས་དང་འགྱུ་བ་རིག་པ་གསུམ། །རྟག་ཏུ་རྒྱུན་ཆད་མེད་ན་ཡང་། །སྔར་ནས་མ་མཐོང་མཚར་པོ་ཆེ། །ད་རེས་མཐོང་བ་བླ་མའི་དྲིན། །དེ་གསུམ་རྒྱུན་དུ་བསྲུང་བ་ན། །
གནས་འགྱུ་ངོ་ཤེས་ཞི་གནས་ཡིན། །ངོ་ཤེས་ཙམ་དེས་མི་ཆོག་པར། །གནས་དུས་གནས་ནི་ཡོད་བསམ་པའི། །འཛིན་པ་དེ་ཡིས་མི་ཆོག་པར། །གནས་མཁན་ངོ་བོ་ཅི་ལྟར་སྣང་། །ཧྲིག་གེ་རྗེན་ནེ་བལྟས་པ་ན། །གནས་པ་ཅི་ཡང་མི་དྲན་པའི། །ངོ་བོ་སྟོང་པ་ལྷག་གེར་མཐོང་། །གནས་པའི་སྟེང་ནས་ལྷག་མཐོང་ཤར། །གནས་པ་ཀྱི་ལེ་གནས་པ་དང་། །ངོ་བོ་སྟོང་པར་འདུག་པ་གཉིས། །སོ་སོ་མ་ཡིན་དབྱེར་མེད་ཅིག །དེ་ནི་ཞི་ལྷག་ཟུང་འཇུག་ཡིན། །འགྱུ་བ་ཤོར་དུས་འགྱུ་ཤོར་ཙམ། །འཛིན་པ་དེ་ཡིས་མ་བཅིངས་པར། །འགྱུ་མཁན་ངོ་བོ་ཧྲིག་གེར་ལྟ། །བལྟས་པས་འགྱུ་བ་རང་སར་ཡལ། །ཚུར་ལ་ཇི་ལྟར་བྱུང་བ་དང་། །ཇི་ལྟར་ཡལ་ཚུལ་མི་ཤེས་པར། །གནས་པའི་སྟེང་དུ་ཧྲིག་གེར་གནས། །འགྱུ་བའི་ངོ་བོ་སྟོང་པར་རྟོགས། །འགྱུ་བའི་སྟེང་ནས་ལྷག་མཐོང་ཤར། །ངོ་བོ་སྟོང་པ་ཉིད་ཀྱི་ངང་། །སྟོང་པའི་ངང་ནས་སྟོང་པར་འགྱུ། །ཆུ་དང་ཆུ་རླབས་སོ་སོ་ཡིན། །དེ་ལྟར་ཨེ་གནས་ཨེ་འགྲུ་གཉིས། །རིག་མཁན་སེམས་དེ་དང་པོ་དུས། །སོ་སོར་ཡོད་ཡོད་འདྲ་ན་ཡང་། །སོ་སོར་མ་གྲུབ་ངོ་བོ་གཅིག །གནས་མི་
འགྱུ་མི་རིག་མི་གསུམ། །སེམས་ཉིད་གཅིག་པུ་ཁོ་རང་ལ། །བྱེད་ལས་གསུམ་དུ་མཚར་བ་ལ། གནས་པ་འགྱུ་བ་གཉིས་པོ་ནི། །རེས་མོས་ཡིན་གྱིས་མཉམ་དུ་མེད། །གནས་འགྱུ་ངོ་མཐོང་གླུ་ཆུང་འདི། །ཁྲིད་མ་ཐོབ་ལ་ཕན་ཕྱིར་སྨྲས། །ཁྲིད་ཐོབ་རྣམས་ཀྱིས་མི་ཁྲེལ་ཞུ། །མངྒ་ལཾ།། ༈ །།ན་མོ་མཉྫ་ཤྲཱི་ཡེ། ཤེས་རབ་ཆེན་པོ་འཇམ་དཔལ་དབྱངས། །ཆོས་སྐུ་མཁྱེན་ལ་ཕྱག་འཚལ་ལོ། །གནས་འགྱུ་རིག་གསུམ་ཆོས་སྐད་ལ། །བཤད་ལུགས་མི་མཐུན་རྣམ་གྲངས་མང་། །བོད་ཡུལ་མཁས་པ་ལ་ལ་ཡིས། །བདེ་གཤེགས་སྙིང་པོ་ཞེས་བྱ་བ། །སེམས་ཅན་རྣམས་ལ་ཁྱབ་ན་ཡང་། །དངུལ་རྡོ་ལ་ནི་དངུལ་ཡོད་ཀྱང་། །བཞུ་བརྟུལ་མ་བྱས་དེ་མི་འབྱུང་། །སེམས་ཅན་ཀུན་ལ་སངས་རྒྱས་ཀྱི། །སྙིང་པོ་ཡེ་ནས་གནས་ན་ཡང་། །བསྐལ་པ་གྲངས་མེད་གཅིག་གི་བར། །ཚོགས་བསགས་སྒྲིབ་སྦྱངས་མ་བྱས་པར། །ཝ་སངས་རྒྱས་སྙིང་པོའི་སེམས་མི་མཐོང་། །ད་ལྟ་མི་དྲན་དགུ་དྲན་གྱི། །སེམས་འདི་འཁྲུལ་པའི་རྣམ་རྟོག་ཡིན། །རྣམ་རྟོག་མ་རིག་འཁོར་བའི་རྒྱུ། །འདི་ལ་བལྟས་པས་ཕན་
ཡོན་མེད། །དེ་བས་ཚོགས་བསགས་སྒྲིབ་སྦྱང་འབད། །ཆོས་ཀུན་སྟོང་ཉིད་ཡིན་སྙམ་པའི། །མོས་པ་བྱེད་ཅིང་ཚོགས་བསགས་པའི། །བསྐལ་པ་གྲངས་མེད་གཅིག་གི་དུས། །དེ་བས་སྟོང་ཉིད་རྟོགས་པར་འགྱུར། །དེ་སྐད་གསུངས་པ་མདོ་ཡི་ལུགས། །མདོ་ཡི་ལུགས་ལ་དེ་ལྟར་བདེན། །བླ་མེད་སྔགས་ཀྱི་ལུགས་འདི་ལ། །ཚེ་གཅིག་སངས་རྒྱས་ཐོབ་གསུངས་པ། །སྟོང་ཉིད་རྟོགས་པས་སྨོས་ཅི་དགོས། །གྲངས་མེད་གཅིག་གི་བར་དག་ཏུ། །ཚོགས་བསགས་སྒྲིབ་སྦྱང་ཐམས་ཅད་ནི། །སྔོན་འགྲོ་བཞི་སྦྱོར་ཁོ་ནར་ཚང་། །སྟོང་ཉིད་ད་ལྟ་སྒོམ་རྒྱུ་ཡོད། །དེ་ལ་ཕྱག་རྫོགས་རྒྱུད་དང་གཞུང་། །པཎ་གྲུབ་ཐམས་ཅད་ཞལ་མཐུན་ཏེ། །འོན་ཀྱང་གནས་འགྱུ་ཞལ་མི་འཆམ། །བོད་ཀྱི་མཁས་པ་ལ་ལ་ཞིག །གནས་པ་ཀུན་གཞི་རྣམ་ཤེས་ཡིན། །དེ་ནི་མ་རིག་བག་ལ་ཉལ། །འགྱུ་བ་རྣམ་པར་རྟོག་པ་སྟེ། །རྣམ་རྟོག་མ་རིག་ཆེན་པོ་ཡིན། །དེ་ལ་བལྟ་ཞིང་སྐྱོང་བ་ཡང་། །ཆོས་སྐུའི་དགོངས་པ་མ་ཡིན་ཏེ། །ཕྱག་ཆེན་དོན་ལ་མི་གནས་ཀྱང་། །ཐ་མལ་རྨོངས་པའི་གང་ཟག་ལ། །དེ་ཙམ་བསྟན་ན་གོ་སླ་བས། །དང་པོ་དེ་ཙམ་
སྐྱོང་དུ་བཅུག །དེ་ནས་ཞི་གནས་ཆགས་ཐུབ་ན། །ལྷག་མཐོང་ངོ་བོ་སྤྱད་པར་བྱ། །ཞི་ལྷག་ཟུང་དུ་འཇུག་པ་ནི། །བདེ་གསལ་མི་རྟོག་འཆར་བའི་མཐར། །ཆུ་ཟླ་ལྟ་བུར་སྣང་སྲིད་ཀུན། །ཆོས་ཀྱི་བདག་མེད་མངོན་སུམ་དུ། །རྟོགས་ན་ཉམས་ལེན་གོ་ཆོད་གསུངས། །གྲུབ་མཐའ་འདི་ཉིད་འཆང་བ་ཡི། །དགེ་བཤེས་དེང་སང་ས་སྟེང་ཁྱབ། །མདོ་ལུགས་ཕྱག་ཆེན་ཡིན་པར་གསུངས། །རྗེ་བཙུན་མི་ལ་རས་ཆེན་དང་། །སེམས་དཔའ་རང་བྱུང་རྡོ་རྗེ་སོགས། །ཕྱག་རྫོགས་གཉིས་ཀྱི་དགོངས་པ་ནི། །གཞི་འབྲས་ངོ་བོ་དབྱེར་མེད་དེ། །སེམས་ཉིད་ཡེ་ནས་སངས་རྒྱས་ཉིད། །གནས་པ་ཆོས་སྐུ་རྗེན་པ་ཡིན། །རིག་པ་གསལ་སྟོང་ལོངས་སྤྱོད་རྫོགས། །འགྱུ་བ་ཐུགས་རྗེ་སྤྲུལ་པའི་སྐུ། །དབྱེར་མེད་ངོ་བོ་ཉིད་ཀྱི་སྐུ། །འགྱུ་བ་མ་རིག་རྣམ་རྟོག་སྟེ། །རིག་ནས་མི་རྟོག་ཡེ་ཤེས་ཡིན། །དང་པོ་སེམས་ངོ་གསལ་བ་ནས། །སྒོམ་མེད་ཆེན་ལ་པོའི་བར་དག་ཏུ། །གནས་འགྱུ་མིན་པ་སྟོན་རྒྱུ་མེད། །དང་པོ་ཀ་ཚར་བསླབ་པ་ནས། །བཀའ་འགྱུར་བསྟན་འགྱུར་པོ་ཏི་མང་། །ཀ་ཚར་མིན་པ་མེད་དང་མཚུངས། །དེ་
ཕྱིར་གནས་འགྱུ་སྐྱོང་ལུགས་དེ། །ལེགས་པར་ཤེས་ནས་མ་སྐྱུར་ན། །དེ་ལས་ལྷག་པ་མེད་པ་སྟེ། །གེགས་དང་གོལ་ས་ཤོར་བ་ཡང་། །རྣམ་རྟོག་འཛིན་པ་ཕྲ་མོ་རེ། །མ་བཅོས་རང་བབ་སྐྱོང་ཤེས་ན། །གེགས་དང་གོལ་ས་ཅི་ཡང་མེད། །རྒྱ་བོད་གྲུབ་ཐོབ་ཐམས་ཅད་ཀྱང་། །ཉམས་ལེན་འདི་ཡིས་གྲོལ་བ་ཡིན། །རྡོ་རྗེ་འཆང་ནས་ད་ལྟའི་བར། །སྙན་ནས་སྙན་དུ་བརྒྱུད་པ་ཡིན། །ཐུགས་ནས་ཐུགས་སུ་བརྒྱུད་པ་ཡིན། །གྲུབ་ཐོབ་ཟམ་མ་ཆད་པ་ཡིན། །མདོ་རྒྱུད་དཔེ་ཆ་རག་མ་ལུས། །མཚན་ཉིད་མཁས་པའི་རྟོག་གེ་བས། །རིགས་པས་དཔྱད་པས་དོན་མི་རྟོགས། །དེ་ཕྱིར་རང་སེམས་ཆོས་ཀྱི་སྐུ། །བཅོས་སླད་མེད་པར་རང་བབ་སྐྱོང་། །ཡོན་ཏན་མཁས་པས་འདི་མི་རྟོགས། །རིག་པ་རྣོ་བས་འདི་མི་རྟོགས། །འདོད་པ་ཆེ་བས་འདི་མི་རྟོགས། །མི་ཆེ་ཡུལ་ནི་གཉན་ན་ཡང་། །འདི་ཉིད་རྟོགས་པ་མ་ཡིན་ནོ། །སྔོན་སྦྱང་ལས་འཕྲོ་སད་པ་དང་། །མོས་གུས་བྱིན་རླབས་སྟོབས་ཀྱིས་སྐྱེ། །དེ་ཕྱིར་མོས་གུས་གསོལ་འདེབས་རེམ། །གནས་འགྱུ་བཞེད་པ་སོ་སོའི་གླུ། །རྟ་ལོ་ཁྲུམས་ཟླའི་དམར་པོའི་ཕྱོགས། །ཚེས་
གཉིས་ཉིན་པར་སྨྲས་པའོ། །སྒོམ་ཆེན་རྣམས་ཀྱིས་མི་ཁྲེལ་ཞུ།། ༈ །།ན་མོ་མ་ཧཱ་མུ་ཏྲ་ཡེ། །དང་པོ་གནས་འགྱུ་ངོ་བསྐྱངས་ནས། །ལུས་གནད་བཅས་ནས་སྐྱོང་བསམ་ཛ། །འགྱུ་བ་རྟ་རྒོད་སྲབ་མེད་འདྲ། །ལ་ནས་རྒྱུག་ཅིང་ལུང་ནས་མཆོང་། །འགྱུ་བ་བྱིས་པ་བསམ་མེད་འདྲ། །མི་བྱེད་དགུ་བྱེད་ཅ་ཅོ་བྱེད། །འགྱུ་བ་ཨ་ནེ་སྤྲེའུ་འདྲ། །འདུག་ཚུགས་མེད་དོ་བྱ་གླག་མང་། །འགྱུ་བ་ལ་ཁའི་བྱ་སྤུ་འདྲ། །རླུང་གིས་བསྐྱོད་ནས་གར་ཡང་འཁྱམས། །འགྱུ་བ་རི་ངོས་ཆུ་དང་འདྲ། །ཡུད་ཙམ་མི་སྡོད་ཁྱུག་ཁྱུག་ཁྱུག །འགྱུ་བ་བར་སྣང་རླུང་དང་འདྲ། །ཐོགས་པ་མེད་པར་གར་ཡང་ཁྱབ། །འགྱུ་བ་རྟ་རྒོད་སྒྲ་བྲོས་འདྲ། །བཟུང་ན་བྲོས་ལ་བཞག་ན་འདུག །འགྱུ་བ་བར་དོའི་རྣམ་ཤེས་འདྲ། །ས་རྡོ་རི་བྲག་ཐོགས་པ་མེད། །འགྱུ་བ་ལྷ་འདྲེ་དྲག་པོ་འདྲ། །བསམ་པ་ཙམ་གྱིས་སྟོང་གསུམ་འཁོར། །སྒོམ་ཆེན་རྒན་མོས་ལུག་འཚོ་འདྲ། །འདུག་ཁས་མི་ཉེན་སེམས་མི་བདེ། །ཅུང་ཙམ་གནས་ན་བློ་སེམས་དགའ། །ནན་ཏན་སྙིང་རུས་ཆེན་པོ་ཡི། །འགྱུ་བ་དགྲ་རུ་བལྟས་ནས་བཀག །བརྩོན་འགྲུས་ཆེ་
ན་སྲོག་རླུང་འབྱུང་། །དེ་དུས་བླ་མའི་གདམས་ངག་དགོས། །འགྱུ་བ་སྐྱོན་དུ་མ་བལྟ་ཞིག །གང་འགྱུ་རིག་པ་ཁོ་ནས་ཆོག །འགྱུ་བ་གཅིག་ནི་ངོས་ཟིན་ན། །ཡེ་ཤེས་གཅིག་ནི་སྐྱེ་བ་ཡིན། །འགྱུ་བ་བརྒྱ་ལ་ཡེ་ཤེས་བརྒྱ། །འགྱུ་བ་སྟོང་ལ་ཡེ་ཤེས་སྟོང་། །འགྱུ་བ་མང་ན་ལེགས་པ་ཡིན། །ལར་ནི་འགྱུ་བ་གནས་པ་གཉིས། །ཆུ་དང་ཆུ་རླབས་འདྲ་བ་སྟེ། །བཟང་ངན་ཁྱད་པར་མེད་པ་ཡིན། །འགྱུ་བ་གནས་པ་གཉིས་པོ་ནི། །རང་སེམས་ཡིན་ལ་ཁྱད་པར་མེད། །སེམས་ཉིད་ཡེ་ནས་ཆོས་ཀྱི་སྐུ། །མ་རིག་ན་ནི་འཁྲུལ་པ་སྟེ། །ལྷན་ཅིག་སྐྱེས་པའི་མ་རིག་པ། །འགྱུ་བ་མ་རིག་རྣམ་རྟོག་སྟེ། །འཁོར་བའི་རྒྱ་མཚོར་ལྟུང་བར་བྱེད། །རིག་ན་རང་རིག་ཡེ་ཤེས་ཏེ། །ཐར་པ་བགྲོད་པའི་ལམ་སྣེ་ཡིན། །གནས་འགྱུ་གདམ་ག་མི་བྱེད་པར། །གང་ཤར་སྐྱོང་བ་ཉམས་ལེན་ཡིན། །ཧ་ཅང་འགྱུ་བ་རྒོད་དྲགས་ན། །ལུས་སེམས་ཀློད་པ་མན་ངག་ཡིན། །ལྟ་སྟངས་བྱས་ནས་གདན་མཚམས་བསྲུང་། །ཉམས་དང་པོ་སྐྱེས་དུས་གླུ་ཆུང་འདི། །གསར་བུ་རྣམས་ལ་ཕན་ཕྱིར་སྨྲས། །རྒན་པ་རྣམས་ཀྱིས་མི་ཁྲེལ་ཞུ། །མངྒ་ལཾ། །
ན་མོ་མ་ཧཱ་མུ་ཏྲ་ཡེ། གནས་འགྱུ་ཡུན་དུ་བསྲུངས་བ་ན། །ཉམས་ནི་གཉིས་པ་འཆར་བའི་ཚེ། །སེམས་ནི་ཟླ་སྐར་འཕྲོག་འཛོམ་འདྲ། །རེས་འགའ་དལ་ལ་རེས་འགའ་བྲེལ། །སེམས་ནི་ལུང་རོང་ཆུ་དང་འདྲ། །རེས་འགའ་གནས་ལ་རེས་འགའ་འཚུབ། །སེམས་ནི་བུ་ཆུང་ཁེར་འགྲོས་འདྲ། །རེས་འགའ་འདུག་ཅིང་རེས་འགའ་རྒྱུག །གནས་དུས་སེམས་དགའ་སྤྲོ་བ་སྐྱེད། །འཚུབ་དུས་མི་དགའ་སེམས་མི་ཚིམ། །མ་ཡེངས་རྒྱུན་དུ་སྐྱོང་བ་དང་། །གནས་དུས་ངོ་བོ་ཧྲིག་གེ་བལྟ། །འཚུབ་དུས་ལུས་སེམས་ལྷོད་ལ་བལྟ། །འདི་དུས་དབེན་པར་བསྒོམ་པ་གཅེས། །ལྟ་ཡུན་རིང་ན་རྗེས་ནས་སྙོགས། །རྣ་སུན་བསྒོམ་ཁ་འཚེར་བར་འོང་། །ཡུན་ཐུང་གྲངས་མང་ཡང་ཡང་བལྟ། །བལྟ་རྒྱུ་ལྟ་མི་གཅིག་ཡིན་ཡང་། །སོ་སོར་ཡོད་པ་འདྲ་ཞིག་འོང་། །ཕར་ལ་ལྟ་དང་ཚུར་ལ་ལྟ། །དོན་ལ་ཁྱད་པར་མེད་ན་ཡང་། །དེ་སྐབས་ཚུར་ལ་སྙིང་ཁའི་ཐད། །རིག་པ་གཏད་ལ་བལྟས་ན་གསལ། །ཐུན་གྱི་གྲངས་མེད་ནམ་དྲན་ཀྱང་། །འོན་ཀྱང་ཐུན་དུ་བཅད་ན་གསལ། །འབོར་རྒྱུ་ཡར་རྒྱུ་མེད་ན་ཡང་། །གཞན་མ་གསལ་
གཞིང་བསྒོམས་ན་གསལ། །རེས་འགའ་ངེས་ཤེས་བློ་སེམས་དྲོ། །རེས་འགའ་ཐེ་ཚོམ་ཡིད་མི་ཆེས། །ངེས་ཤེས་སྐྱེས་ན་ང་རྒྱལ་སྤངས། །ཐེ་ཚོམ་བྱུང་ཡང་མི་སྐྱུར་སྐྱོང་། །འདི་ཙམ་ཁྲིད་ཕོག་རེ་རེ་ནས། །སྐྱེས་པ་ཤིན་ཏུ་མང་བ་ཡིན། །དཔལ་མགོན་འཕགས་པ་ཀླུ་སྒྲུབ་ཀྱིས། །ཐེ་ཚོམ་ཙམ་ཞིག་སྐྱེས་ན་ཡང་། །འཁོར་བ་ཧྲུལ་པོར་བྱེད་པར་འགྱུར། །གསུངས་པའི་ས་མཚམས་དེ་ལགས་པས། །འདི་ཙམ་ལ་ཡང་ཕན་ཡོན་ཆེ། །ཉམས་ནི་གཉིས་པའི་གླུ་ཆུང་འདི། །རཱ་ག་ཨ་སྱས་སྨྲས་པ་སྟེ། །ཉམས་གསར་རྣམས་ལ་ཕན་ཕྱིར་ཡིན། །སྒོམ་ཆེན་རྣམས་ཀྱིས་མི་ཁྲེལ་ཞུ། །བྱང་ལེབ་སྟེང་གི་ཀ་ཚར་ཏེ། །བྱིས་པ་རྣམས་ལ་ཕན་ཕྱིར་ཡིན། །ཨ་མཆོད་རྣམས་ཀྱིས་མི་ཁྲེལ་ཞུ། །མངྒ་ལཾ།། ༈ །།ན་མོ་མ་ཧཱ་མུ་ཏྲ་ཡེ། །ཉམས་ནི་གསུམ་པ་ཤར་ཙམ་ན། །ཆུ་བོ་ཆེན་པོ་དལ་འབབ་འདྲ། །ལུས་ངག་ཡིད་གསུམ་ལྷོད་བག་ཆེ། །རེས་འགའ་ཆུ་རླབས་གཡོ་བ་འདྲ། །འགྱུ་བ་འགའ་རེ་བྱུང་ན་ཡང་། །དེ་ངོ་ཤེས་ཤིང་རང་སར་ཞི། །ཆུ་རླབས་ཆུ་ལ་ཐིམ་པ་འདྲ། །དེ་ནས་སྒོམ་ལ་དྲོད་པ་རྙེད། །བསྒོམ་ཞིག་སྐྱེས་སོ་
བློ་སེམས་བདེ། །ཡེངས་སྐབས་ཐ་མལ་འཁྲུལ་པ་འབྱམས། །མ་ཡེངས་ཉམས་ལེན་གསལ་པོ་འཆར། །ཉིན་བར་བརྩོན་འགྲུས་ཆེ་བ་དང་། །སྒྲིབ་པ་ཆུང་བའི་རིགས་འགའ་ལ། །འདི་ནས་རྨི་ལམ་བན་བུན་ཟིན། །དད་པ་དག་སྣང་ཆེ་རུ་འགྲོ། །རི་ཁྲོད་གཅིག་ཏུ་འདུག་འདོད་ཆེ། །འདི་སྐབས་གནས་འགྱུ་གང་ཤར་ལ། །དེ་ཡི་ངོ་བོ་ཧྲིག་གེར་བལྟ། །སྟོང་པ་ཉིད་དུ་ལྷག་གེ་འཆར། །ངོ་མ་ཟིན་ན་འཁྲུལ་པ་ཆེ། །ངོ་ཤེས་ཙམ་གྱིས་མི་ཆོག་པར། །གང་ཤར་ངོ་བོར་བལྟས་པ་ཡིས། །སྟོང་པ་ཉིད་དུ་སང་ངེ་བ། །དེ་ནི་འདི་སྐབས་ཉམས་ལེན་ཡིན། །ཁབ་མིག་སྐུད་པ་འཛུད་པ་ལྟར། །མ་ཡེངས་ཧྲིག་གེ་དགོས་པ་སྟེ། །ཅུང་ཞིག་དཀའ་སྣང་འཚེར་སྣང་ཆེ། །ཡུན་རིང་བསྒོམས་ན་ཐང་ཡང་ཆད། །ལས་རྒྱུ་མེད་པའི་དཀའ་ལས་མཚར། །ཉམས་སྣང་གསུམ་པ་སྐྱེ་ཚུལ་འདི། །རཱ་ག་ཨ་སྱས་བྲིས་པའོ། །མངྒ་ལཾ།། ༈ །།ན་མོ་མ་ཧཱ་མུ་ཏྲ་ཡེ། །ཉམས་ནི་བཞི་པ་ཤར་ཙམ་ན། །གནས་ཉམས་རྒྱ་མཚོ་ཆེན་པོ་ལ། །རླུང་གིས་མ་བསྐྱོད་ལྟ་བུར་འཆར། །མེ་རེ་འཁྱིལ་ལེ་ཡུན་རིང་
གནས། །ས་ཁམས་པ་ཡི་རིགས་རྣམས་ལ། །འགྱུ་བ་གཏན་ནས་མེད་མེད་འདྲ། །དེ་མིན་ལན་རེ་འགྱུ་བ་འདི། །དྭངས་བའི་མཚོ་ལ་ཉ་འཁྱུག་འདྲ། །འགྱུ་བས་གནས་པ་བཤིགས་མི་ནུས། །འདི་ལ་དགོངས་ནས་ཇོ་བོ་རྗེས། །ཞི་གནས་མཚོ་ཆུང་འདྲ་བ་ལ། །ལྷག་མཐོང་ཉ་མོ་འཁྱུག་འདྲ་གསུངས། །འདི་དུས་ངོ་བོ་མ་བལྟས་པར། །མེ་རེ་གནས་པའི་ངང་དེ་ནི། །དོན་ལ་མཚན་མེད་ཞི་གནས་ཏེ། །ཞི་གནས་ཁ་རྐྱང་ཡིན་པ་སྟེ། །གནས་པའི་ངོ་བོ་དེ་ཉིད་ལ། །ཧྲིག་གེ་རྗེན་ནེ་བལྟས་པ་ཡིས། །གནས་པའི་ངོ་བོ་སྟོང་པ་ཉིད། །ས་ལེ་ཧྲིག་གེ་ཕྱམ་མེ་འཆར། །གནས་དང་ངོ་བོ་སྟོང་པ་གཉིས། །དབྱེར་མེད་གཅིག་ཏུ་འདྲེས་པ་སྟེ། །ཞི་ལྷག་ཟུང་འཇུག་ཉམས་ལེན་ཡིན། །འདི་སྐབས་ཟས་གོས་སྲེད་པ་ཆུང་། །ཞེ་སྡང་ལ་སོགས་ཉོན་མོངས་ཀྱི། །མགོ་བོ་ནོན་ནོན་འདྲ་བ་འབྱུང་། །ཅི་ཡང་དགོས་པ་མི་གདའ་སྙམ། །བྱ་བ་ཐོངས་ཐོངས་འདྲ་བ་འབྱུང་། །མི་མེད་ལུང་སྟོང་འགྲོ་འདོད་སོགས། །བློ་རྒོད་ཐོལ་ཐོལ་སྐྱེ་ན་ཡང་། །གཉུག་མའི་གཡོས་ཡིན་རྟག་མི་ཐུབ། །བློ་ཡང་རྩབ་རྩུབ་མི་བྱེད་པར། །གདན་གནོན་སྐྱོང་བ་གནད་དུ་
ཆེ། །འགྲོ་འདུག་བྱ་བྱེད་མང་དྲགས་ན། །ཉམས་དེ་ལྷ་དྭངས་བཞིན་དུ་ཡལ། །ཐ་མལ་ལོག་པར་འགྲོ་དོགས་ཡོད། །ཉམས་ནི་བཞི་པའི་ས་མཚམས་སུ། །རཱ་ག་ཨ་སྱས་སྨྲས་པ་འདིས། །གསར་བུ་རྣམས་ལ་ཕན་ཐོགས་ཤོག། ༈་།།ན་མོ་མ་ཧཱ་མུ་ཏྲ་ཡེ། །གོལ་ས་གསུམ་སོགས་མང་པོ་ཡང་། །ཉམས་ཀྱི་འཆར་སྒོ་རེ་རེ་ལ། །ཆགས་ཞེན་འཛིན་པ་དམ་པོ་ཡི། །མཆོག་ཏུ་བཟུང་བ་གོལ་ས་ཡང་། །ལན་རེ་དེ་འདྲའི་ཉམས་སྐྱེས་ཀྱང་། །སྐྱོན་དུ་འགྱུར་བ་མ་ཡིན་ནོ། །གང་ཤར་བཟང་ངན་གདམ་པ་མེད། །མ་ཡེངས་རྒྱུན་དུ་མ་སྐྱུར་བར། །ཡུགས་སས་ད་ཕྲུག་གསོ་བ་བཞིན། །གཉུག་ཏུ་བསྲིངས་ན་རྟོགས་པ་འཆར། །འདོད་ཐག་ཉེ་བའི་ཁ་ན་མེད། །མ་ཡེངས་དྲན་རྫི་བྱ་ར་བ། །ཧབ་འཆོང་བྱེད་ནས་རྒྱུག་པ་མེད། །རེས་འགའ་གནས་ལ་གདམ་ག་སྐྱེ། །གནས་ལ་གདམ་གའི་བློ་སྐྱེས་ཚེ། །གངས་དཀར་ཏི་སེའི་རྩེར་བསྒོམ་ཀྱང་། །རང་སེམས་ངོ་བོ་མ་བསྲུངས་ན། །ལྷག་རླུང་ཆེ་བ་མ་གཏོགས་པ། །རྟོགས་པ་ལོག་ནས་རྙེད་པ་མེད། །བསིལ་བའི་ཚལ་དུ་བསྒོམས་ན་ཡང་། །རང་
སེམས་ངོ་བོ་མ་སྐྱོང་ན། །སྐྲག་འཇིགས་ཆེ་ཙམ་མ་གཏོགས་པ། །ཉམས་རྟོགས་ལོག་ནས་འོང་རྒྱུ་མེད། །མི་མེད་ལུང་སྟོང་འགྲིམ་ན་ཡང་། །རང་སེམས་ངོ་བོ་མ་སྐྱོང་ན། །སེམས་རྩ་སྐྱོ་ཙམ་མ་གཏོགས་པ། །རྟོགས་པ་ལོག་ནས་འཆར་རྒྱུ་མེད། །རེས་འགའ་བླ་མ་ཚོལ་ན་བསམ། །མཁས་བཙུན་བླ་མ་བརྒྱ་བསྟེན་ཀྱང་། །ལུང་རྒྱ་ཆེ་ཙམ་མ་གཏོགས་པར། །རང་སེམས་ངོ་བོ་མ་སྐྱོང་ན། །ཉམས་རྟོགས་གསོལ་རས་གནང་ཐབས་མེད། །ད་རུང་ཁྲིད་འགའ་ཞུ་ན་བསམ། །ཁྲིད་རིམ་བརྒྱ་དང་སྟོང་ཞུས་ཀྱང་། །བཤད་རྒྱ་ཆེ་ཙམ་མ་གཏོགས་པ། །རང་སེམས་ངོ་བོ་སྐྱོང་བ་ལས། །ཟབ་པའི་གདམས་ངག་སྟོན་རྒྱུ་མེད། །རེས་འགའ་སློབ་གཉེར་བྱེད་ན་བསམ། །ཤེས་བྱ་ཡོན་ཏན་སྣ་རེ་ཡི། །མཐའ་ནི་ནམ་མཁའ་འདོམ་མཇལ་འདྲ། །ཚེ་ཐུང་ནམ་འཆི་ཅི་ཆ་ཡོད། རྟོགས་པ་ནང་ནས་ཤར་ཙམ་ན། །མ་བསླབ་ཆོས་ཀུན་ཁོང་ནས་རྡོལ། །གཅིག་ཤེས་ཀུན་ལ་མཁས་པར་གྱུར། །རེས་འགའ་ཟས་ནོར་བསོག་འདོད་སྐྱེ། །མི་ནི་ཆེ་ཆུང་མེད་པ་ཀུན། །བསམ་བློས་འཕྲོད་ནས་ནོར་བསོག་ཀྱང་། །སྦྱིན་འབྲས་མེད་ན་དབུལ་ཞིང་
ཕོངས། །བསོགས་པས་སོགས་པ་འགའ་ཡང་མེད། །རྟོགས་པ་ནང་ནས་ཤར་ཙམ་ན། །སེམས་ལ་ཞེ་འདོད་མེད་ན་ཡང་། །ཟས་ནོར་ལོངས་སྤྱོད་ཆར་ལྟར་འབེབས། །རེས་འགའ་གྲོགས་ཀྱི་སྣང་བ་འཆར། །མཐུན་གྲོགས་བརྩེ་གདུང་ཅི་ཆེ་ཡང་། །ཚིག་ངན་གཅིག་གི་གནད་མི་ཁྱག །མཐུན་གྲོགས་དགྲ་རུ་ལང་བ་མང་། །གྲྭ་འཁོར་ཕུན་སུམ་ཚོགས་ན་ཡང་། །འཆི་ཚེ་གྲོགས་མེད་གཅིག་པུར་འཁྱམས། །དེ་དུས་འབྲལ་མེད་སྐྱོབ་པའི་གྲོགས། །རང་སེམས་རིག་པའི་ཆེ་ཆུང་ཚོལ། །རེས་འགའ་ཟས་ཀྱི་སྣང་བ་འཆར། །ཤ་ཆང་ཞིམ་ལྟོ་ཅི་ཟོས་ཀྱང་། །ཞག་གཅིག་ལོན་ནས་མི་གཙང་རྫས། །ཞིམ་དང་མི་ཞིམ་བསམ་པ་ཡི། །ངོ་བོ་བལྟས་ནས་སྟོང་པ་ཉིད། །ཟས་ཀྱི་དམ་པ་ཏིང་འཛིན་ཟས། །ཞི་གནས་ལེགས་པར་ཆགས་པ་ན། །བཟའ་བཏུང་མེད་ཀྱང་ལྟོགས་སྣང་མེད། །འཚོ་བ་སྲབ་ཀྱང་ལུས་མདངས་བཟང་། །འཚོ་བ་སྣང་སྲིད་ལྷ་འདྲེས་སྒྱུ་འདྲེན། །ཆོས་པ་ལྟོགས་ནས་འཆི་མི་སྲིད། །རེས་འགའ་དཀའ་ཐུབ་བྱེད་སྙིང་འདོད། །རང་སེམས་ངོ་བོ་མ་སྐྱོང་ན། །ལྟོགས་པས་སྡིག་པ་དག་འདོད་པ། །དེ་ནི་ཕྱི་རོལ་མུ་
སྟེགས་ལུགས། །ཤུགས་ཀྱིས་བྱུང་ན་བགག་མི་དགོས། །མ་ཡེངས་ངང་ནས་ཟས་ཟ་བ། །ཟག་མེད་ཚོགས་ཀྱི་འཁོར་ལོ་ཡིན། །ཁོ་བོ་མི་ལ་རས་པ་ངས། །ཟ་ཞིང་ཟ་ཞིང་བསྒོམ་ཙ་ན། །ཟ་འཐུང་ཚོགས་འཁོར་གདམས་ངག་ཡོད། །གསུངས་པའི་དོན་ཡང་དེ་ལ་དགོངས། །རང་སེམས་རྒྱུན་དུ་བསྲུང་ནུས་ན། །དུག་ལྔ་མི་དགེ་རང་འགགས་ཡིན། །ཐབ་ཀྱི་མེ་ལ་ཆུ་བླུག་ན། །སྐར་ཁུང་རྩིག་ཁུང་དུ་བ་ཆད། །རང་སེམས་འདུལ་བ་འདུལ་བའི་མཆོག །ཆོས་རྣམས་ཀུན་གྱི་མདོ་འགགས་ནི། །རང་སེམས་བསྲུང་བ་འདི་ལ་འདུས། །མདོ་ཡི་ཉམས་ལེན་བླ་ན་མེད། །རང་སེམས་ངོ་བོ་སྐྱོང་ནུས་ན། །མངོན་སུམ་ཆོས་སྐུ་རྗེན་པ་འཆར། །མངོན་པའི་ཉམས་ལེན་གཙོ་བོ་ཡིན། །འདི་ནི་གསང་སྔགས་ཀུན་གྱི་གསང་། །ཡེ་ཤེས་མཁའ་འགྲོའི་གསང་ཚིག་སྟེ། །གསང་སྔགས་ཉམས་ལེན་འདི་རང་ཟབ། །རང་རིག་རྒྱ་སྟ་ངར་མ་དེས། །ཕན་དུ་རེ་བའི་ལྷར་འཛིན་གཅོད། །གནོད་དུ་དོགས་པའི་འདྲེ་འཛིན་གཅོད། །དུག་ལྔ་དུག་གསུམ་རྣམ་རྟོག་གཅོད། །མ་གཅིག་གཅོད་ཡུལ་རྩ་བ་ཡིན། །སྐྱིད་སྡུག་ན་ཚ་བདེ་སྡུག་སོགས། །གང་
ཤར་ངོ་བོ་སྟོང་པ་རྣམས། །རོ་སྙོམས་སྐོར་དྲུག་དེ་ལ་འདུས། །སྣང་སྲིད་འཁོར་འདས་ཐམས་ཅད་ཀྱང་། །རང་སེམས་ལས་ཀུན་རྡུལ་ཙམ་མེད། །དེ་ལས་སྣང་སྲིད་མི་འདའ་ན། །འཁོར་ལོས་སྒྱུར་རྒྱལ་ཕྱག་རྟགས་འདྲ། །ཕྱག་རྒྱ་ཆེན་པོའི་རང་སེམས་ཉིད། །དེ་ལ་མ་རྫོགས་གཅིག་ཀྱང་མེད། །རྫོགས་ཆེན་ཁྲེགས་ཆོད་རང་གི་སེམས་། །དེ་ཤེས་ཤེས་བྱ་ཀུན་གྱི་རབ། །ཤེས་རབ་ཕ་རོལ་ཕྱིན་པ་ཟེར། །ཡོད་མེད་རྟག་ཆད་སྐྱེ་འགགས་བྲལ། །དབུ་མ་ཆེན་པོ་རང་གི་སེམས། །དེ་ལྟར་རང་སེམས་བསྲུང་བ་དེས། །ཆུ་བརྒྱ་ཟམ་པ་གཅིག་འོག་འདུས། །བྱ་བརྒྱ་འུར་རྡོ་གཅིག་གིས་འདེད། །གཅིག་ཤེས་ཀུན་ལ་མཁས་པ་སྟེ། །དཔེར་ན་ཡིད་བཞིན་ནོར་བུ་འདྲ། །འདི་ལྟར་རང་སེམས་ངོ་འཕྲོད་ན། །དེ་ཉིད་རྒྱུན་དུ་སྐྱོང་བས་ན། །དེ་ལས་ཟབ་པའི་ཆོས་འདོད་པ། །གླང་པོ་རྙེད་ནས་གླང་རྗེས་ཚོལ། །ནོར་བུ་རྙེད་ནས་འཆིང་བུ་ཚོལ། །མ་རིག་མགོ་གཏུམ་ཧར་ལོང་མིག །ཀླད་པ་མེད་པའི་མི་ཡིན་ནོ། །དེ་སྐད་རཱ་ག་ཨ་སྱ་ཡིས། །གང་དྲན་སྨྲས་པ་མཐོལ་ལོ་བཤགས།། །།ན་མོ་མ་ཧཱ་མུ་ཏྲ་
ཡེ། །ཉམས་ལེན་ངོ་བོ་སྐྱོང་བའི་ངང་། །རང་སེམས་ལྷན་ནེ་གནས་པ་དང་། །ངོ་བོ་སྟོང་པར་གནས་པ་གཉིས། །དབྱེར་མེད་ཞིག་ལྷག་ཟུང་དུ་འཇུག །དེ་ལ་མ་ཡེངས་རྩེ་གཅིག་ཏུ། །མར་མེ་རླུང་གིས་མ་བསྐྱོད་ལྟར། །ས་ལེ་སེང་ངེ་ཡེ་རེ་བ། །རེས་འགའ་རྣམ་རྟོག་འགྱུ་ན་ཡང་། །ཆུ་དང་རླབས་བཞིན་རང་སར་ཞི། །སྐབས་འགའ་ཡེངས་ཚེ་ཐ་མལ་པ། །མ་ཡེངས་བསྒོམ་ཚེ་རྗེན་ནེ་བ། །རེས་འགའ་བསྒོམས་ཀྱང་མི་གསལ་འཚུབ། །རེས་འགའ་ཆེད་དུ་མ་བསྒོམས་ཀྱང་། །ཚུར་ལ་གསལ་སྟོང་རྗེན་ནེ་འཆར། །རེས་འགའ་རྨི་ལམ་ཡུལ་དུ་ཟིན། །རེས་འགའ་ངོ་མཚར་དག་སྣང་རྨིས། །བཟང་ངན་གང་རྨིས་མངོན་ཤེས་འདྲ། །དད་པ་དག་སྣང་ངེས་འབྱུང་འཕེལ། །བརྩོན་འགྲུས་དང་ནི་ལས་འཕྲོ་སད། །སྐབས་འགའ་དེ་ལྟར་ཤར་ན་ཡང་། །ཕལ་ཆེར་ཐ་མལ་འཁྲུལ་པ་ཡིན། །རྩེ་གཅིག་ངོ་མཐོང་ཆུང་ངུ་ཙམ། །འཁྲུལ་པ་ཉུང་ཞིང་ཕལ་ཆེར་བ། །ཏིང་འཛིན་དེ་བརྟན་འབྲིང་པོ་ཙམ། །ཡེངས་སྐབས་ཅུང་ཙམ་མ་གཏོགས་པར། །ཉིན་མོ་ཕལ་ཆེར་ཏིང་འཛིན་ངང་། །དེ་ནི་རྩེ་གཅིག་ཆེན་པོ་སྟེ། །ཞི་ལྷག་ཟུང་འཇུག་ཏིང་འཛིན་ལ། །
རྩེ་གཅིག་གནས་པས་རྩེ་གཅིག་ཟེར། །དེ་ཡང་ལྟ་ས་ལྟ་རྒྱུ་གཉིས། །སོ་སོར་ཡོད་པ་འདྲ་བ་ལ། །ཧྲིག་གེ་རྗེན་ནེ་ས་ལེ་བ། །ངེས་ཤེས་འཛིན་པ་ཆེན་པོ་ཅན། །དཔེར་ན་གཅན་གཟན་སེང་གེ་དེ། །གོམ་པ་འདོར་ཞིང་མི་འགྲོ་སྟེ། །མཆོང་རྒྱང་ཆེན་པོ་བྱེད་ནས་འགྲོ། །དེ་ནས་ཕྱི་མིག་ལྟ་བྱས་ནས། །ཅི་ཙམ་མཆོང་ཐུབ་ཚུར་ལ་ལྟ། །དེ་བཞིན་རྩེ་གཅིག་རྣལ་འབྱོར་པས། །རྣམ་རྟོག་ཕར་ལ་འཕྲོ་སོང་ཡང་། །དེ་ཡི་རྗེས་ལ་མི་སྙོག་པ། །ཚུར་ལ་རང་སེམས་ངོ་བོ་ལྟ། །དེ་ཕྱིར་རྩེ་གཅིག་བསྒོམ་འདི་ལ། །སེང་གེ་རྣམ་པར་འགྱིང་བ་ཡི། །ཏིང་ངེ་འཛིན་དུ་རྒྱལ་བས་གསུངས། །རྩེ་གཅིག་སྐབས་ཀྱི་གླུ་ཆུང་འདི། །རྟ་ལོ་ཁྲུམས་ཟླའི་ཚེས་བཞི་ལ། །འཕྲལ་དུ་གང་དྲན་བྲིས་པ་འདི། །དགེ་སློང་རཱ་ག་ཨ་སྱས་སོ།། ༈ །།ན་མོ་མ་ཧཱ་མུ་དྲ་ཡེ། གང་ཟག་དབང་པོའི་བྱེ་བྲག་གི །ཉམས་རྟོགས་འཆར་ལུགས་མ་ངེས་ཏེ། །རིམ་སྐྱེས་པ་ཡི་གང་ཟག་དེ། །སྔོན་སྦྱང་ཆུང་བས་སྐྱེ་བར་དཀའ། །སྔོན་འགྲོའི་ཆོས་ལ་རྟགས་ཐོན་དུ། །བསྒོམས་པས་རིམ་བཞིན་དལ་བུས་སྐྱེས། །གང་སྐྱེས་འགྱུར་མེད་བརྟན་
པར་གནས། །གཞུང་ནས་བཤད་དང་མཚུངས་པར་འགྱུར། །ཐོད་རྒལ་བ་ཡི་གང་ཟག་དེ། །ལས་འཕྲོ་བཟང་སྟེ་བར་ཆད་རྒོད། །མ་རན་དུས་ནས་རྟོགས་པ་སྐྱེ། །སྐྱེ་རན་ཙམ་ནས་ཕྱིར་ལ་ཞེན། །རེས་མཐོ་རེས་དམའ་རྟགས་མི་ཐུབ། །རེས་འགའ་བྱ་བཏང་གྲུབ་ཐོབ་འདྲ། །རེས་འགའ་མི་ནག་སྡིག་ཅན་འདྲ། །ཕོག་ཏུ་བབ་དང་མི་ཕོག་ནི། །བློ་རྒོད་སྐྱེ་ཞིང་སྙིང་ཁམས་ཆེ། །རེས་འགའ་དབང་མེད་དད་གུས་སྐྱེ། །རེས་འགའ་ཅི་སྨྲས་ངག་མི་ཉན། །བར་ཆད་རྐྱེན་གྱིས་མ་ཁྱེར་ན། །གྲུབ་ཐོབ་འོང་བ་ཚེགས་མེད་དེ། །བར་ཆད་དབང་དུ་ཤོར་བ་ན། །ཆོས་མགོ་མི་ཐོན་མི་ནག་འགྱུར། །འདི་འདྲ་ཁེར་སྐྱ་མི་ཐུབ་པས། །བླ་མ་ཡུན་རིང་བསྟེན་གལ་ཆེ། །གཅིག་ཆར་བ་ནི་ཤིན་ཏུ་དཀོན། །སྔོན་སྦྱང་ལས་ཀྱི་འཕྲོ་སད་ན། །ངོ་སྤྲོད་ཐོབ་པ་ཙམ་ཉིད་ནས། །རྟོགས་པ་མཆོག་ཏུ་གྱུར་པ་སྐྱེ། །དེ་ལ་འཕོ་འགྱུར་མེད་པ་སྟེ། །འདི་དག་ཅི་བཞིན་དཀའ་ན་ཡང་། །རིམ་སྐྱེས་པ་ཡི་རིམ་སྐྱེས་ནི། །རིམ་སྐྱེས་པ་ཡི་ཐོད་རྒལ་བ། །རིམ་སྐྱེས་པ་ཡི་གཅིག་ཆར་བ། །དེ་ནི་ཐོད་རྒལ་གཅིག་ཆར་བ། །རེ་རེ་ལ་ཡང་གསུམ་གསུམ་
སྟེ། །དེ་ལྟར་རབ་འབྲིང་དགུ་པོ་ཡི། །ནང་དུ་གང་ཟག་ཕལ་ཆེར་འདུ། །བླ་མ་ཉམས་ཆེན་གྱིས་བརྟགས་ནས། །རིགས་ནི་གང་ཡིན་ངོས་བཟུང་ནས། །གང་ལ་གང་ཕན་གེགས་སེལ་དང་། །བོགས་འདོན་སོ་སོར་གལ་ཆེ་བའི། །གཅིག་ལ་ཕན་པའི་ངོ་སྤྲོད་དེས། །ཀུན་ལ་ཕན་པའི་ངེས་པ་མེད། །གཅིག་ལ་གནོད་པའི་སྤྱོད་ལམ་དེ། །ཀུན་ལ་གནོད་པའི་ངེས་པ་མེད། །སྨན་པ་མཁས་པས་རྩ་ཆུ་ལ། །ཡུན་རིང་བརྟགས་ནས་བཅོས་པ་ལྟར། །བླ་མ་ཉམས་ཅན་ཡུན་རིང་བསྟེན། །སོ་སོར་གེགས་བསལ་བོགས་འདོན་ན། །རང་རང་སྐལ་པ་འཚམས་པ་ཡི། །ཉམས་རྟོགས་མི་སྐྱེ་ཐབས་མ་མཆིས། །སྤྱི་ཆོས་སྤྱི་བཤད་འབྱམས་ཡུག་གིས། །ལུས་ཆོས་ཐོབ་པ་འདྲ་ཞིག་ལ། །གནད་དུ་འགྲོ་བ་དཀའ་འམ་སྙམ། །གང་ཟག་དབང་པོ་ཁྱད་པར་གླུ། །རཱ་ག་ཨ་སྱས་འཕྲལ་དུ་སྨྲས། །བྷ་ཝན་ཏུ།། ༈ །།ན་མོ་མ་ཧཱ་མུ་ཏྲ་ཡེ། ཁྲིད་ལྟ་དཔེ་མིག་གིས་མ་བལྟས་ཤིང་། །བཀའ་བརྒྱུད་གོང་མའི་གསུངས་རྣམས་ལ། །དཔེ་ལྟས་བྲིས་བཤུ་མ་ཡིན་པའི། །རང་གི་མྱོང་བ་དང་བསྟུན་ནས། །ཉམས་ཀྱི་སྐྱེ་ཚུལ་ཅུང་
ཟད་བརྗོད། །དོན་དུ་གནས་རུང་མ་གནས་རུང་། །རྣལ་འབྱོར་ཉམས་ལ་ཅི་ཡང་འཆར། །གསུང་རབ་དོན་ལ་འགལ་ལོ་ཞེས། །མཁས་པ་རྣམས་ཀྱིས་མི་ཁྲེལ་ཞུ། །བདག་ནི་རིམ་སྐྱེས་པ་ཡི་རིགས། །ཉམས་རྟོགས་སྐྱེ་བ་དཀའ་མོ་བྱུང་། །བདག་ནི་བློ་རྨོངས་ཅོལ་ཆུང་བས། །བསྐྱེད་རིམ་བསྙེན་སྒྲུབ་རྣམས་གྲངས་མང་། །ཉམས་ལེན་ངོ་བོ་ཁོ་ན་ལ། །ཐེར་དྲིལ་ནེར་དྲིལ་མ་བྱུང་བས། །རྟོགས་པ་མཐོན་པོ་བདག་ལ་མེད། །འོན་ཀྱང་བྱིས་པ་ལོ་ལྔ་ནས། །གནས་འགྱུ་བསྲུང་ཕྱོགས་འཕྲིག་ཚུད་ཅིང་། །དེང་སང་སྒྲ་དཀར་སྐྱེས་ཀྱི་བར། །མ་བསྒྱུར་རྒྱུན་དུ་སྐྱོང་ལོ་བྱས། །དེ་ཕྱིར་ཉམས་ཀྱི་སྐྱེ་ཚུལ་དེ། །དེ་ཚེ་ཉམས་དང་བསྟུན་པ་ཡིན། །ཉམས་ཀྱི་སྐྱེ་ཚུལ་སྤྱི་ཁའི་ཉིན། །སྟོན་ཀའི་གནམ་བཞིན་འགྱུར་ལྡོག་མང་། །དབྱར་ཁའི་སྤང་བཞིན་སྣ་ཚོགས་སྐྱེས། །རེ་རེ་བརྗོད་པའི་མུ་མཐའ་མེད། །དང་པོ་རྣམ་རྟོག་འཕྲོ་རྒོད་འདི། །སྐྱོན་མེད་གསུངས་ཀྱང་གནོད་སྣང་ཆེ། །སེམས་ལ་རྣམ་རྟོག་ཤར་བ་དེ། །དང་པོ་གང་ནས་བྱུང་ན་སྙམ། །བལྟས་པས་བྱུང་བའི་ཡུལ་མ་རྙེད། །སང་གནང་འོང་རྒྱུའི་རྣམ་རྟོག་ཚོ། །དེ་རིང་གང་ནས་འོང་ཞིང་
ཡོད། །དེ་སྔ་བྱུང་ཚད་རྣམ་རྟོག་ཚོ། །དེ་ཙམ་གང་དུ་སོང་ནས་ཡོད། །ད་ལྟ་སེམས་ཀྱི་རྣམ་རྟོག་འདི། །གང་གི་ས་རུ་གནས་ནས་ཡོད། །དེ་ཚེ་རྩད་རྗེས་བཅད་ཙམ་ན། །སྐྱེས་པ་གནས་པ་འགགས་པ་མེད། །སེམས་ལས་བྱུང་ཞིང་སེམས་ལ་ཐིམ། །རང་ཞི་ཆུ་ཡི་པ་ཏྲ་འདྲ། །གནས་དང་འགྱུ་གཉིས་ཁྱད་མེད་པར། །སེམས་རང་ཡིན་པའི་ངེས་ཤེས་སྐྱེས། །དེ་གཉིས་སེམས་ཡིན་ཁྱད་མེད་ན། །ཁྱད་ཕྱེ་གདམ་ཁ་ཅི་ལ་ཡོད། །གང་ཤར་སྐྱོང་བས་ཆོག་པར་གོ །འོན་ཀྱང་རིག་དང་མ་རིག་ཁྱད། །རང་ངོ་མ་བལྟས་ཐ་མལ་པ། །བལྟས་ན་ཉམས་ལེན་ཡིན་པར་རྟོགས། །གནས་འགྱུ་གདམ་ཁ་སྤང་བའི་གླུ། །གསར་བུ་རྣམས་ལ་ཕན་ཕྱིར་སྨྲས། །སྒོམ་ཆེན་རྣམས་ལ་མཐོལ་ལོ་བཤགས།། ༈ །།ན་མོ་མ་ཧཱ་མུ་ཏྲ་ཡེ། ལས་དང་པོ་པ་ཡི་སྒོམ་ཕྲུག་རྣམས། །རིག་པ་རྐྱང་དེད་ཟབ་ཅེས་ཐོབ། །ཁབ་མིག་སྐུད་པ་འཛུད་པ་བཞིན། །མ་ཡེངས་རིག་པ་རྩེ་གཅིག་གཏད། །སེམས་ཀྱི་སེམས་ལ་བལྟས་རྩ་ན། །ཅི་ཡང་མི་དྲན་ཀྱི་ལེ་གནས། །འདི་ནི་གནས་པ་ཡིན་ནོ་སྙམ། །ངོ་བོ་ལྟ་དགོས་བསམ་ནས་
བལྟས། །གནས་པའི་ངོ་བོ་སྟོང་པར་རྟོགས། །ཞི་ལྷག་ཟུང་འཇུག་ཡིན་ནོ་སྙམ། །ཡང་གཅིག་རྣམ་རྟོག་གཅིག་སྐྱེས་པས། །འགྱུ་བ་སོང་ངོ་ཡིད་ལ་བསམ། །དེ་ངོ་ལྟ་དགོས་བསམ་ནས་བལྟས། །འགྱུ་བ་ཡལ་ནས་སྟོང་པར་མཐོང་། །རང་ཞི་རང་གྲོལ་འདི་ཡིན་བསམ། །དེ་ལྟར་རིག་པ་བསྒྲིམ་དྲགས་པས། །དཀའ་ལས་ཆེ་བར་བྱུང་ན་ཡང་། །མ་སྐྱུར་ལོ་གྲངས་འགའ་ལ་བསྐྱངས། །དེ་ནས་དེ་ལ་ཐེ་ཚོམ་སྐྱེས། །གནས་དུས་གནས་ཡོད་སྙམ་པ་དང་། །དེ་ངོ་བལྟ་དགོས་བསམ་པ་གཉིས། །འགྱུ་བ་གཉིས་དེ་ཁ་ཡན་རེད། །བལྟས་པས་ངོ་བོ་སྟོང་པར་རྟོགས། །འདི་རང་ཉམས་ལེན་སྙམ་པ་ཡི། །འགྱུ་བ་ཕྱེད་པར་ཕྲའུ་དང་། །ཕྱེད་གསུམ་ཁ་ཡན་འཁྲུལ་པ་རང་། །རྣམ་རྟོག་འགྱུས་ནི་སོང་ཙམ་ན། །འགྱུས་སོང་སྙམ་པའི་རྣམ་རྟོག་གཅིག །དེ་ངོ་བལྟ་དགོས་བསམ་པ་གཉིས། །བལྟས་པས་འགྱུ་བ་སྟོང་པར་ཡལ། །རང་ཞི་རང་གྲོལ་ཡིན་བསམ་པའི། །འགྱུ་བ་ཕྲའུ་དེ་དང་གསུམ། །དེ་གསུམ་རྣམ་རྟོག་ཁ་ཡན་རང་། །དང་པོ་སྐྱོང་ལུགས་དེ་ཡིན་ཀྱང་། །དེ་ཡི་གྲོས་ཐུབ་ཡིན་པར་གོ །མ་བཅོས་པར་ཡང་མིན་པར་
སྣང་། །གང་ཡིན་འདྲེས་པའི་བླ་མ་དེ། །དྲིན་ཆེན་ཆོས་ཀྱི་དབང་ཕྱུག་དེ། །སྤྱི་བོར་བསྒོམས་ནས་གསོལ་བ་བཏབ། །བླ་སྒྲུབ་ཐུན་གསུམ་ཟླ་མཚམས་བྱས། །དེ་ཡི་བྱིན་རླབས་དངོས་སུ་བྱུང་། །མ་བཅོས་བཞག་པའི་གནད་དེ་རྟོགས། །གནས་དང་འགྱུ་བ་ཁྱད་པར་མེད། །ཧ་ཀྱང་སྒྲིམ་པ་དེ་མིན་པར། །མ་ཡེངས་ཙམ་དེ་ལྷོད་དེ་བཞག །གནས་ཉམས་རྒྱ་མཚོ་འཁྱིལ་འདྲ་ལ། །འགྱུ་བ་ཆུ་རླབས་ཆུར་ཐིམ་འདྲ། །འགྱུ་བས་བསྒོམ་ལ་མི་གནོད་པར། །རྣམ་རྟོག་བརྒྱ་སྟོང་འཕྲོ་ན་ཡང་། །མཚོ་ལ་ཆར་པ་འབབ་པ་བཞིན། །ཉམས་ལེན་དེ་ཡི་ངང་ལ་ཐིམ། །ཧྲིག་ཧྲིག་ཅེར་ཅེར་མི་དགོས་པར། །རང་བབ་བཞག་པས་དོན་ཆེན་འགྲུབ། །འགྱུ་བ་ཁོ་རང་བསྒོམ་དུ་ཤར། །གནས་འགྱུ་གདམ་ཁ་ཅི་ལ་བྱེད། །སྔོན་དང་མི་འདྲ་དཀའ་ལས་ཆུང་། །རྩོལ་བ་ཅི་ཡང་མི་དགོས་པར། །ཁ་རོག་བསྡད་པས་ཆོག་འདུག་པ། །ད་ནི་རྣམ་གཡེངས་མི་གནོད་པར། །གྲོང་དང་རི་ཁྲོད་ཁྱད་མེད་སྙམ། །དེ་འདྲའི་ཉམས་དེ་ཟླ་གསུམ་ཙམ། །དེ་ནས་གྲོང་ཆོག་ལ་སོགས་པ། །རྣམ་གཡེང་འབྱམས་པས་ཉམས་དེ་ཡལ། །གནས་འགྱུ་
གདམས་ག་མེད་ན་ཡང་། །བར་སྐབས་བརྗེད་ངས་ཆེ་བ་དང་། །ངེས་ཤེས་གསལ་ཆ་འགྲིབ་པར་འདུག །གནས་འགྱུ་སྐྱོང་ལུགས་ཉམས་མྱོང་འདི། །གཞོན་དུས་ཉམས་དེ་རྒས་དུས་དྲན། །གཞོན་ནུ་རྣམ་ལ་ཕན་ཕྱིར་སྨྲས། །མངྒ་ལཾ།། ༈ །།ན་མོ་མ་ཧཱ་མུ་ཏྲ་ཡེ། འདོད་ལྷ་རིགས་དྲུག་གོལ་ས་དང་། །བདེ་སྟོང་ཕྱག་རྒྱ་ཆེན་པོ་གཉིས། །འདྲ་འདྲ་འདྲ་ལ་ནོར་དོགས་ཡོད། །བར་དེར་སྤུ་ཡི་ཁྱད་ལས་མེད། །ལུས་བདེ་ཟས་གོས་སྲེད་པ་ཆུང་སེམས་བདེ་ཉོན་མོངས་མགོ་བོ་ནོན། །ཅི་སྐྱིད་མེད་པར་སེམས་རྩ་སྐྱིད། །མེ་རེ་འཁྱིལ་ལེ་གནས་ཉམས་ཆེ། །འགྱུ་བ་བྱུང་ཡང་དེ་མི་གནོད། །ཆོས་བཤད་དབང་བསྐུར་དྲི་བཤད་སོགས། །ཇི་ལྟར་བྱས་ཀྱང་ཉམས་ལེན་ངང་། །སྤྱོད་ལམ་ཀུན་ཏུ་འབྲལ་བ་མེད། །ད་ནི་ང་ཡི་འདོད་པ་འགྲུབ། །ང་ལས་སྐྱིད་པ་སུ་ཡོད་སྙམ། །ཆོས་ཀྱི་རྩ་བ་འདི་རྙེད་པས། །ཅི་ཡང་གང་གིས་དགོས་པ་མེད། །བླ་མའི་གསོལ་འདེབས་གཅིག་པུས་ཆོག །སློབ་སྦྱང་ཡོན་ཏན་དགོས་པ་མེད། །སྙམ་པའི་ཞེན་ལོག་གཏིང་ནས་སྐྱེས། །ཏིང་ངེ་འཛིན་ལ་བཞག་པའི་ཚེ། །སྟེང་གི་
ལྗིད་ཀྱི་འོག་མི་གནོད། །ཡུན་རིང་ལུས་གནས་ངང་ལ་གནས། །ལུས་ནི་ཞུ་འམ་མེད་དམ་སྙམ། །ལུས་སེམས་གཉིས་ཀ་བདེ་བས་ཁྱབ། །འདི་ལ་མཆོག་ཏུ་འཛིན་པ་ཡི། །ཆགས་ཞེན་ང་རྒྱལ་ཁེངས་པར་བསྒོམ། །འདོད་ཁམས་ལྷ་རུ་སྐྱེ་བའི་རྒྱུ། །ཐར་པ་ཐོབ་པའི་གེགས་སུ་ཆེ། །མ་ཆགས་དེ་ལ་མཆོག་འཛིན་མེད། །བདེ་བའི་ངོ་བོར་ཧྲིག་གེར་ལྟ། །བདེ་དང་སྟོང་པ་དབྱེར་མེད་འདྲེས། །མ་ཆགས་མ་ཞེན་ངོ་བོ་སྐྱོངས། །བདེ་སྟོང་ཕྱག་རྒྱ་ཆེན་པོ་ལགས། །ཉི་ཤུའི་སྐོར་ལ་སྐྱེས་པའི་ཉམས། །ལྔ་བཅུའི་མཇུག་ལ་བབ་པའི་དུས། །གཞོན་པ་འགའ་ལ་ཕན་སྙམ་ནས། །རཱ་ག་ཨ་སྱས་ངག་ཏུ་བརྗོད། །བྷ་ཝན་ཏུ། ༈ །།ན་མོ་མ་ཧཱ་མུ་ཏྲ་ཡེ། གསལ་སྟོང་ཕྱག་རྒྱ་ཆེན་པོ་དང་། །གཟུགས་ཁམས་ལྷ་ཡི་གོལ་ས་གཉིས། །འདྲ་འདྲ་འདྲ་སྟེ་གོལ་ས་ཆེ། །སྤུ་རྩེ་ཙམ་གྱིས་བྱེད་པ་ཡིན། །རྔམ་ཆེན་སྐྱོན་ཡོན་གཉིས་སུ་ལ་འགྱུར་། །རང་སེམས་གསལ་སྟོང་རྗེན་ཅེ་རེ། །སྤྲིན་མེད་ནམ་མཁའ་དྭངས་པ་འདྲ། །རྟོག་པ་མེད་པའི་ང་རྒྱལ་ཅན། །རང་མིན་གཞན་ལ་སེམས་མི་འགུ། །ངེས་ཤེས་
བརྟན་པ་ཆེན་པོ་རྙེད། །སུ་ཡིས་ཟེར་ཡང་བློ་མི་འགྱུར། །འདི་བས་ལྷག་པ་མི་སྲིད་སྙམ། །ལུས་གནད་ལྟ་སྟངས་བྱེད་སྙིང་འདོད། །ཡེངས་སྐབས་རྣམས་སུ་ཐ་མལ་པ། །ཡེངས་བ་དེ་ཡིས་བརྗེད་འདུག་སྙམ། །ནུབ་མོ་གཉིད་མ་ཐག་ཏུ་ཡང་། །རྨི་ལམ་མེད་པར་ཉམས་རྟོགས་འཆར། །དེ་ནས་ཡིད་ལ་མི་དྲན་པས། །གཉིད་འཐུག་ཡིན་ནམ་འོད་གསལ་ཡིན། །དེ་ནི་རང་གིས་ཚོད་མ་ཟིན། །རེས་འགའ་རྨི་ལམ་ངོས་ཟིན་ནས། །ཉིན་པར་བཞིན་དུ་ཉམས་ལེན་གསལ། །རེས་འགའ་འོད་གསལ་མི་ཟིན་པ། །འཁྲུལ་པའི་རྨི་ལམ་རྨིས་ན་ཡང་། །རྒྱ་བོད་གྲུབ་ཆེན་ཡི་དམ་ལྷ། །མ་ངེས་དུ་མ་མཇལ་བ་དང་། །ཆོས་གསུངས་བརྡ་ཡང་སྟོན་པ་འབྱུང་། །རེས་འགའ་གཉིད་དང་མ་གཉིད་མཚམས། །ཟླ་བ་ཤར་འདྲ་ཉི་ཞོར་རམ། །མེ་རུ་བཀྱག་འདྲ་འོད་བྱུང་ནས། །དེ་ཡི་རྐྱེན་བྱས་འོད་གསལ་ཟིན། །རེས་འགའ་ཉམས་དང་རྨི་ལམ་མཚམས། །ཐག་རིང་ཡུལ་དུ་ཅི་བྱེད་དང་། །ཅི་སྨྲས་མངོན་སུམ་བཞིན་དུ་མཐོང་། །རེས་འགའ་ཐག་རིང་མི་འགའ་རེས། །རང་ལ་བཟང་ངན་གང་སྨྲས་ནི། །དྲུང་ནས་སྨྲས་པ་བཞིན་དུ་ཐོས། །རེས་
འགའ་རང་ཉིད་གཉིད་སོང་བས། །ཁྱིམ་དུ་སེ་ར་སྤྱད་ལ་སོགས། །ཉིན་པར་བཞིན་དུ་སོ་སོར་མཐོང་། །རེས་འགའ་མི་ནི་ལ་ལ་ཡི། །ཁོ་རང་ཡིད་ལ་གང་བསམ་དེ། །ཁོ་རང་ངག་ནས་སྨྲ་འདྲ་བར། །ཡིད་ལ་ཅི་བསམ་ཤེས་སྙམ་བྱེད། །ཉིན་པར་ཉམས་ལེན་གསལ་སྟོང་ངང་། །འདི་ལ་དགའ་ཞིང་རློམ་སེམས་སྐྱེས། །རྟོགས་པའི་མཆོག་ཡིན་ཉམས་ནི་ཆགས། །འོད་གསལ་ཆེ་ཆུང་རིམ་པ་ལྟར། །ཚངས་རིས་ཚངས་པ་མདུན་ན་འདོན། །ཚངས་ཆེན་ལྷ་སོགས་གཟུགས་ཁམས་ཀྱི། །གནས་སུ་སྐྱེ་བའི་གོལ་ས་ལགས། །དེ་ལ་ཆགས་འཛིན་རློམ་སེམས་མེད། །གསལ་ལོ་སྟོང་ངོ་སྙམ་པ་ཡི། །འཛིན་པ་མ་ཞུགས་རང་ངོ་སྐྱོང་། །གསལ་སྟོང་ཕྱག་རྒྱ་ཆེན་པོ་ཡིན། །རང་ལོ་ཉི་ཤུ་སྐབས་འགའ་ལ། སྐྱེས་པའི་ཉམས་དེ་རྒས་དུས་སྨྲས། །གསར་བུ་འགའ་ལ་ཕན་པར་ཤོག། ༈ །།ན་མོ་མ་ཧཱ་མུ་དྲ་ཡ། མི་ཁོམ་གནས་བརྒྱད་ནང་ཚན་ནས། །ཚེ་རིང་ལྷ་རུ་གོལ་བའི་ས། །མུ་སྟེགས་ལུགས་ཀྱི་བསྒོམ་དེ་དང་། །མི་རྟོག་ཕྱག་རྒྱ་ཆེན་པོ་གཉིས། །འདྲ་བ་འདྲ་སྟེ་ནོར་དོགས་གདའ། །སྣང་སྲིད་འཁོར་འདས་
ཆོས་རྣམས་ཀུན། །རང་གི་སེམས་ཉིད་མ་གཏོགས་པ། །ལོགས་སུ་གྲུབ་པ་རྡུལ་ཙམ་གཅིག །མེད་པའི་ངེས་ཤེས་གདིང་ནས་སྐྱེས། །སེམས་ནི་སྟོང་པ་ནམ་མཁའ་འདྲ། །བསམ་པའི་ངེས་ཤེས་འཛིན་པ་ཅན། །རྣམ་ཤེས་མཐའ་ཡས་ཞེས་བྱ་བའི། གཟུགས་མེད་ཁམས་སུ་སྐྱེ་བའི་རྒྱུ། །སེམས་ནི་ཡོད་པ་མ་ཡིན་ཏེ། །གཟུགས་དང་ཁ་དོག་དངོས་པོ་མེད། །སེམས་ནི་མེད་པ་མ་ཡིན་ཏེ། །སྣ་ཚོགས་ཅི་ཡང་འཆར་བར་འདུག །ཡོད་མེད་གཉིས་ཀ་མིན་སྙམ་པའི། །འཛིན་པ་དེ་ལ་ཨ་འཐས་པའི། །ཡོད་མིན་མེད་མིན་ཞེས་བྱ་བའི། །གཟུགས་མེད་ཁམས་སུ་སྐྱེ་བའི་རྒྱུ། །སེམས་དང་ཆོས་རྣམས་ཐམས་ཅད་ནི། །ནམ་མཁའ་བཞིན་དུ་སྟོང་པ་ཉིད། །མཐའ་ལས་འདས་སྙམ་འཛིན་པ་ཅན། །སེམས་དང་ནམ་མཁའ་དབྱེར་མེད་དེ། །ནམ་མཁས་གར་ཁྱབ་སེམས་ཀྱིས་ཁྱབ། །སྙམ་པའི་ཉམས་རྟོགས་གདེང་ནས་འཆར། །དེ་ལ་དེར་འཛིན་ཞུགས་པ་ན། །ནམ་མཁའ་མཐའ་ཡས་ཞེས་བྱ་བའི། །གཟུགས་མེད་ཁམས་སུ་སྐྱེ་བའི་རྒྱུ། །རེས་འགའ་སེམས་དང་ཆོས་རྣམས་ཀུན། །ཅི་ཡང་མ་གྲུབ་སྟོང་པ་ཉིད། །ལུས་འདིའང་དངོས་སུ་མེད་དོ་
སྙམ། །ས་རྡོ་རི་བྲག་ཁང་ཁྱིམ་སོགས། །ཐམས་ཅད་སྟོང་པ་ཡིན་པར་མཐོང་། །དེ་ལ་འཛིན་པ་དམ་དྲགས་པས། །ཅི་ཡང་མེད་པའི་སྐྱེ་མཆེད་ཀྱི། །གཟུགས་མེད་ལྷ་ཡི་ཁམས་སུ་སྐྱེ། །ཉམས་རྟོགས་དེ་ལྟར་ཤར་བའི་ཚེ། །ཐམས་ཅད་སེམས་ཡིན་བསམ་པ་དང་། །སེམས་ནི་ཡོད་མིན་གཉིས་མིན་དང་། །ནམ་མཁའ་སེམས་ཉིད་དབྱེར་མེད་དང་། །ཐམས་ཅད་སྟོང་པར་མཐོང་བ་ལ། །ངེས་ཤེས་དམ་པོས་མ་བཅིང་པར། །བསམ་མཁན་དེ་ཡི་ངོ་བོར་བལྟ། །འཛིན་པ་བཤིགས་ནས་ལྷོད་དེར་བཞག །མི་རྟོག་ཕྱག་རྒྱ་ཆེན་པོ་ཡིན། །མཚམས་བསྡམས་ལོ་ངོ་གསུམ་ཙམ་སྐབས། །ཉམས་ལ་ཤར་བའི་གླུ་ཆུང་འདི། །དཔེ་རྒྱུད་རྣམས་དང་ཅུང་མི་མཐུན། །རང་གི་ཉམས་དང་བསྟུན་པ་ཡིན། །མཁས་པ་རྣམས་ཀྱིས་མི་ཁྲེལ་ཞུ།། །།ཨེ་མ་འདི་ཡི་སྐབས་འགའ་ལ། །སྟོང་ཉམས་ཧད་པོར་འཆར་བར་བཤད། །ཐམས་ཅད་སྟོང་པ་ཉིད་དུ་གོ །སྡིག་པ་དགེ་བ་གཉིས་པོ་སྟོང་། །སྟོང་པས་སྟོང་པར་ཕན་གནོད་མེད། །སྙམ་ནས་དགེ་བ་མི་སྒྲུབ་ཉལ། །སྡིག་པ་མི་སྤང་མ་གྲུབ་ཟེར། །
ཐམས་ཅད་སྟོང་པ་ཡིན་ནོ་སྐད། །སེམས་ཉིད་སངས་རྒྱས་ཡིན་ནོ་སྐད། །རྣམ་རྟོག་ཆོས་སྐུ་ཡིན་ནོ་སྐད། །འཁོར་བ་མྱང་འདས་ཡིན་ནོ་སྐད། །ནམ་ཤི་སངས་རྒྱས་ཡིན་ནོ་སྐད། །ཐོད་པ་བོར་ཆོག་ཡིན་ནོ་སྐད། །ཞེ་སྡང་གསལ་སྟོང་ཡིན་ནོ་སྐད། །འདོད་ཆགས་བདེ་སྟོང་ཡིན་ནོ་སྐད། །གཏི་མུག་འོད་གསལ་ཡིན་ནོ་སྐད། །དུག་ལྔ་ཡེ་ཤེས་ཡིན་ནོ་སྐད། །སྤྱོད་པ་རྩིང་ཞིང་ཚུལ་ཁྲིམས་འཆལ། །ནག་པོ་ཁ་འབྱམས་ཞེས་བྱ་བ། །བདུད་ཀྱི་ལྟ་བ་མནར་མེད་རྒྱུ། །འདི་འདྲ་འབྱུང་བར་གསུངས་མོད་ཀྱིས། །རང་ལ་དེ་འདྲ་འཆར་མ་མྱོང་། །བཀའ་འདི་མདོ་རྒྱུད་ནས་གསུངས་པས། །གེགས་སེལ་རྒྱུ་འབྲས་བླང་དོར་ཟབ། །རང་ཉིད་རང་གིས་མི་ཕུང་ཞུ། །རཱ་ག་ཨ་སྱས་ལྷ་ཕྱག་འཚལ།། ༈ །།ན་མོ་མ་ཧཱ་མུ་ཏྲ་ཡེ། བསྒོམ་ཡུན་རིང་ཞིག་སོང་བ་ན། །བླ་མའི་བྱིན་རླབས་ཞུགས་པའམ། །ཡི་དམ་ལྷ་ཡི་དངོས་གྲུབ་བམ། །སྔོན་བསགས་ལས་འཕྲོ་སད་ཙམ་ན། །རྐྱེན་ནི་གང་ཡིན་ངེས་ངེས་མེད། །སྐྱིད་སྡུག་ཅིས་ཀྱང་རྐྱེན་བྱེད་དེ། །ཕལ་ཆེར་མོས་གུས་དྲག་པོ་བྱེད། །སྔར་གྱི་སྒོམ་དང་ཉམས་རྟོགས་
ཀུན། །གར་སོང་ཆ་མེད་འཇའ་ལྟར་ཡལ། །བསྒོམ་བྱ་སྒོམ་བྱེད་འཛིན་པ་ཞིག །ལྟ་མི་ལྟ་རྒྱུ་གཅིག་ཏུ་འདྲེས། །ཕྱི་ནང་གཅིག་འདྲེས་འདི་ལྟ་མེད། །འདི་བྱ་འདི་བྱེད་ཅི་ཡང་མེད། །ཁ་རོག་བསྡད་པས་ཆོག་པ་འདྲ། །སྔར་དང་གཏན་ནས་མ་མཆིས་པས། །ཐེ་ཚོམ་ཁུ་འཕྲིག་ཡིད་གཉིས་ཟ། །གོལ་ས་ཨམ་དེ་ཨུ་ཡིན་ཨང་། །བསྒོམ་མེད་ཨམ་དེ་འདྲ་ལ་ཁད། །སྔར་གྱི་གསལ་སྟོང་རྗེན་པར་ཡལ། །བསྒོམ་དེ་བོར་བ་ཡིན་ཡང་དོགས། །དེ་དུས་བླ་མ་མེད་པ་ན། །ཐེ་ཚོམ་སྐྱེས་ནས་སྐྱུར་ཉེན་གདའ། །ཧམ་པ་ཆེན་པོའི་མ་རིག་གིས། །བསྒོམ་མེད་ཡིན་སྙམ་ང་རྒྱལ་སྐྱེས། །སྟོང་སྐད་མཐོན་པོ་བྱེད་སྙམ་གདའ། །དོན་ནི་སྤྲོས་བྲལ་ངོ་མཐོང་ཙམ། །ཚེས་གསུམ་ཟླ་བ་མཐོང་བ་ཙམ། །ཕྱག་རྒྱ་ཆེན་པོའི་ཞལ་མཐོང་ལགས། །དེ་ནས་དེ་ཡི་ངང་ལ་བཞག །ད་དུང་ཡེངས་སྐབས་འཁྲུལ་པར་འབྱམ། །མ་ཡེངས་དྲན་རྫི་ཡང་ཡང་བརྟེན། །སྐུ་འདི་ནི་མི་བརྟེན་རེས་འགའ་དང་། །ཕལ་ཆེར་བརྟེན་དང་རྒྱུན་དུ་བརྟེན། །ཆེ་འབྲིང་ཆུང་གསུམ་ཐ་སྙད་བྱེད། །རྣམ་གཡེང་སྤང་ཞིང་སྤྲོས་བཅས་རྣམས། །ཉུང་ངུར་བཏང་ལ་
ཏིང་འཛིན་བསྒོམ། །གང་ལའང་ཡ་ངའི་འཛིན་པ་མེད། །དཔའ་བར་འགྲོ་བའི་ཏིང་འཛིན་ཟེར། །འདི་ལ་འདྲ་མིན་བཤད་པ་མང་། །སྤྲོས་བྲལ་ངོ་མཐོང་གླུ་ཆུང་འདི། །རང་ལོ་ཞེ་གཅིག་ཙམ་དུས་ཀྱི། །ཉམས་མྱོང་གཞན་ལ་ཕན་པའི་ཕྱིར། །ང་བརྒྱད་ལོ་ལ་སྨྲས་པའོ།། ༈ །།ཨེ་མ་ཉམས་ཀྱི་འཆར་སྒོ་མཚར། ནམ་མཁས་གར་ཁྱབ་སེམས་ཀྱིས་ཁྱབ། །སེམས་ཀྱིས་གར་ཁྱབ་ཆོས་སྐུས་ཁྱབ། །རྫོགས་པའི་སངས་རྒྱས་ཀུན་གྱི་ཐུགས། །འགྲོ་དྲུག་སེམས་ཅན་ཀུན་གྱི་སེམས། །སྣང་སྲིད་ལྷ་འདྲེ་ཀུན་གྱི་སྲོག །རྣལ་འབྱོར་རང་གི་སེམས་ཉིད་གསུམ། །དབྱེར་མེད་ངོ་བོ་གཅིག་ཏུ་རྟོགས། །ངོ་བོ་སྟོང་པ་ཉིད་དུ་གཅིག །རང་བཞིན་གསལ་རིག་རྗེན་པ་གཅིག །སྣ་ཚོགས་འགགས་མེད་ཤར་བ་གཅིག །ཕྱི་ནང་དབྱེར་མེད་གཅིག་འདྲེས་པས། །ཕྱི་ལྟ་ནང་ལྟའི་ཁྱད་པར་མེད། །ཉམས་དང་སྐབས་སུ་རང་བབ་སྐྱོང་། །ལྟ་བ་འཁོར་འདས་དབྱེར་མེད་ལགས། །འོན་ཀྱང་ཡེངས་སྐབས་བརྗེད་སྐབས་མང་། །བརྗོད་པ་དྲན་ཚེ་ཡིད་མི་དགའ། །དང་པོ་བརྗེད་ནས་མ་དྲན་བར། །སེམས་ཀྱི་ངོ་བོ་ཅི་ལྟ་བུ། །ཕྱི་
བལྟས་བྱེད་འདྲ་བྱས་ནས་ལྟ། །དེ་ཡང་ངོ་བོ་སྟོང་པར་མཐོང་། །དེ་ཡིས་ཅུང་ཞིག་བློ་ཁ་ཚིམ། །བཞི་བཅུའི་སྟོད་ལ་སྐྱེས་པའི་ཉམས། །དེང་སང་གཞན་ལ་ཕན་ཕྱིར་བྲིས། །གང་དྲན་བྲིས་པས་ཐུགས་མ་ཁྲེལ། །རཱ་ག་ཨ་སྱས་བཅོས་གཏམ་ལགས།། །།ཨེ་མ་ཉམས་ལ་མི་འཆར་མེད། །ཕྱི་ཡི་ས་རྡོ་རི་བྲག་དང་། །གྲོང་ཁྱེར་ཁྲོམ་ཚོགས་འདུ་ལོང་རྣམས། །སོ་སོར་གསལ་ཡང་ངོ་བོ་སྟོང་། །རྒྱ་མཚོར་ཤར་བའི་གཟའ་སྐར་བཞིན། །བཅོས་ནས་བསྒོམ་པ་མ་ཡིན་ཞིང་། །དཔེ་རྒྱུད་གོ་བ་སྐམ་པོ་མིན། །བླ་མའི་རྗེས་ཟློས་མ་ལགས་ཤིང་། །སྒོམ་ཆེན་གཞན་གྱི་ཁ་སྟོང་མིན། །ཕྱི་ནང་སྣོད་བཅུད་ཐམས་ཅད་ཀུན། །ཆུ་ཟླ་མེ་ལོང་གཟུགས་བརྙན་དང་། །སྒྱུ་མ་སྤྲུལ་པ་བཞིན་དུ་རྟོགས། །ཀྱེ་མ་དེ་ལྟར་རྟོགས་ངེས་ཀྱང་། །ཡེངས་སྐབས་བརྗེད་སྐབས་འཁྲུལ་པ་ཤོར། །ཡེངས་སྐབས་མེད་པར་ཅི་དྲག་སྙམ། །བླ་མ་ལྕསྒོམ་ཆེན་མང་པོ་ལ། །རྟོགས་འབུལ་བྱས་ཤིང་དྲིས་ལགས་ཀྱང་། །གདམ་ངག་སྟོན་མཁན་གསེར་བས་དཀོན། །ས་མཚམས་ཕྱེ་བའི་གསུང་ངག་དམ། །ལྔ་བཅུའི་སྟོད་ཀྱི་
ཉམས་རྟོགས་འདི། །རཱ་ག་ཨ་སྱས་རྨོངས་གླུ་བླངས། །གཞན་ལ་ཕན་པའི་བསམ་པས་བྲིས། །མངྒ་ལཾ།། །།ན་མོ་མ་ཧཱ་མུ་ཏྲ་ཡེ། རཱ་ག་ཨ་སྱའི་ཉམས་རྟོགས་ཀྱང་། །ཆེ་ནས་མེད་པའི་བུ་ངན་བཞིན། །ལྔ་བཅུའི་སྟེང་ལ་སླེབ་ཙམ་ན། །རྨི་ལམ་འོད་གསལ་ཉུང་དུ་སོང་། །དཀོར་སྒྲིབ་ཆེ་བ་ཡིན་ནམ་སྙམ། །བདེ་ཉམས་གསལ་སྣང་མི་རྟོག་ཉམས། །ཉམས་སྣང་མང་པོ་འཇའ་ལྟར་ཡལ། །ཡེངས་སྐབས་བརྗེད་སྐབས་མང་ན་ཡང་། །ཡེངས་དང་མ་ཡེངས་ཁྱད་པར་མེད། །བརྗེད་དང་མ་བརྗེད་ཁྱད་པར་མེད། །གཉིད་དང་མ་གཉིད་ཅི་ལ་ཡང་། །ཐམས་ཅད་ངོ་བོ་འགྱུར་བ་མེད། །ནམ་མཁའ་དྭངས་བའི་དཀྱིལ་ལྟ་བུ། །ནམ་མཁའ་སྤྲིན་དང་ཉི་ཟླ་དང་། །འཇའ་ཚོན་ཆར་དང་སེར་བ་ཡང་། །ནམ་མཁའ་ཉིད་ལ་འགྱུར་བ་མེད། །སེམས་ཉིད་འཁྲུལ་ལམ་མ་འཁྲུལ་རུང་། །དྲན་རྗེས་ཟིན་རུང་མ་ཟིན་རུང་། །ངོ་བོ་འགྱུར་མེད་ཆོས་ཀྱི་སྐུ། །དོན་ལ་རྡུལ་ཙམ་ཁྱད་མེད་པའི། །རྟོགས་པ་གཤའ་མ་གདེང་ནས་སྐྱེས། །དེ་ཉིད་དོན་དང་ལྡན་མི་ལྡན། །བླ་མ་སྒོམ་ཆེན་མང་པོ་ལ། དྲིས་ཀྱང་དེ་དོན་སུས་མ་
གསུངས། །དྭགས་པོ་ཕག་གྲུའི་ཞུས་ལེན་ལ། །བལྟས་པས་དོན་ལྡན་ཡིད་ཆེས་སྐྱེས། །སླར་ཡང་དཔལ་ལྡན་སྟག་ལུང་པ། །བཀྲ་ཤིས་དཔལ་གྲུབ་མཇལ་བའི་ཚེ། །ང་ཡི་རྟོགས་པ་འདི་ལྟ་བུ། །རྟོགས་པ་ལགས་སམ་ཧམ་པ་ལགས། །ཞིབ་པར་ཞུས་པས་བཀའ་སྩལ་པ། །གཞན་གྱིས་དེ་འདྲ་ཟེར་བྱུང་ཡང་། །ངེད་ཀྱིས་བདེན་པར་མི་འཛིན་ཏེ། །ཁྱེད་ནི་བསྒྲུབ་པ་ཡུན་རིང་བའི། །ཟེར་བ་དེ་ལ་བདེན་པར་འཛིན། །དེ་ནི་དོན་དང་ལྡན་པ་སྟེ། །དེང་སང་ངེད་ཀྱང་དེ་ལྟར་ཡིན། །འོན་ཀྱང་ཉལ་ནི་མ་འདུག་པར། །ཐུགས་དམ་དགེ་སྦྱོར་འབད་དགོས་གསུངས། །དེ་ཕྱིར་བོགས་སྐྱེད་མ་བྱུང་སྟེ། །གསལ་འགྲིབ་བག་རེ་འོང་བར་གདའ། །ཉམས་ཀྱི་རོ་གཅིག་ངོ་མཐོང་ཙམ། །མཉམ་རྗེས་འདྲེས་ལ་ཁད་པའི་གླུ། །རང་ལོ་ང་བརྒྱད་རྟ་ཡི་ལོ། །ཁྲུམས་ཟླའི་ཡར་ཚེས་བཞི་ལ་བྲིས། །སྣང་སྲིད་སྒྱུ་མར་རྟོགས་པའི་ཕྱིར། །སྒྱུ་མ་ལྟ་བུའི་ཏིང་པ་འཛིན་ཟེར། །ཆུ་རླུང་རོལ་པའི་རྒྱུད་ནས་གསུངས། །དེ་ཡན་ཉམས་རྟོགས་མགུར་མ་ལགས། །རྟོགས་པ་མཉམ་རྗེས་འདྲེས་པ་ནི། །སྒོམ་མེད་ཡིན་ཞིང་དེ་ལ་ཡང་། །ཆེ་
ཆུང་འབྲིང་དུ་དབྱེ་བ་ནི། །རྡོ་རྗེ་ལྟ་བུའི་ཏིང་འཛིན་ནི། །ཡིན་པར་ཁྲིད་གཞུང་རྣམས་ནས་བྱུང་། །རང་ལ་མྱོང་བ་ཞུ་རྒྱུ་མེད། །དགེ་སློང་ཨོ་རྒྱན་རིག་འཛིན་གྱིས། །བུམ་སྒྲུབ་གཙོ་བོ་དོ་དམ་སྐབས། །ཤོག་བུ་གཏད་ནས་བྲི་དགོས་ཟེར། །ངོ་ཆེན་ངོ་དེ་མ་ལྡོག་ཕྱིར། །ལག་པ་ནད་ཀྱིས་མི་བདེ་ཡང་། །ཨུ་ནུས་བསྐྱེད་ནས་བྲིས་པ་འདི། །བུམ་སྒྲུབ་རྣམས་ལ་ཕན་པའི་ཕྱིར། །ལུང་འདྲེན་གཅིག་ཀྱང་མ་བྱས་པར། །གོ་སླ་ཉམས་མྱོང་མགུར་མ་འདི། །རཱ་ག་ཨ་སྱས་སྨྲས་པའོ། །བྷ་ཝནྟུ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །